Isaac of Nineveh. “Discourse 63.” Based upon Digital Syriac Corpus. Last modified March 5, 2019. https://syriaccorpus.org/454.
    
        
            
                ܕܡܸܛܠ ܡܵܢܵܐ ܒܢܲܝ̈ܢܵܫܵܐ ܕܢܲܦܫܵܢܝܼܢ ܒܝܼܕܲܥܬܼܵܐ: ܡܸܬܼܒܲܩܹܝܢ ܒܨܸܒܼ̈ܘܵܬܼܵܐ
                ܪ̈ܘܼܚܵܢܵܝܵܬܼܵܐ ܐܲܝܟܼ ܥܲܒܼܝܼܘܼܬܼܵܐ ܕܓܘܼܫܡܵܐ. ܘܕܲܐܝܟܲܢ ܡܲܨܝܵܐ: ܕܢܸܬܼܥܲܠܸܐ
                ܪܸܥܝܵܢܵܐ ܡ̣ܢ ܗܵܕܹܐ. ܘܲܕܼܡܵܢܲܐ ܗ̣̄ܝ ܥܸܠܬܼܵܐ: ܕܠܵܐ ܡܸܬܼܚܲܪܲܪܝܼܢܲܢ ܡܸܢܵܗ̇.
                ܘܕܐܹܡܲܬܼܝ ܘܲܒܼܡܵܢܵܐ ܡܸܫܟܿܚܵܐ: ܕܲܢܟܲܬܲܪ ܪܸܥܝܵܢܵܐ ܕܠܵܐ ܕܸܡ̈ܘܵܬܼܵܐ
                ܒܥܸܕܵܢܵܐ ܕܒܼܵܥܘܼܬܼܵܐ. ܤܓ.
                
            
            
                ܒܪܝܼܟܼ ܐܝܼܩܵܪܹܗ: ܗ̤ܘ ܢܸܦܬܲܚ ܬܲܪܥܵܐ ܩܕܼܵܡܲܝܢ. ܕܠܵܐ ܬܸܗܘܸܐ
                ܠܲܢ ܒܥܵܬܼܵܐ ܕܡܸܕܸܡ: ܐܸܠܵܐ ܐܸܢ ܪܸܓܿܬܼܵܐ ܕܒܹܗ. ܕܗܵܟܲܢܵܐ ܟܲܕܼ ܢܲܪܦܸܐ
                
                 438 
                
                ܟܠܡܸܕܸܡ: ܘܒܲܒܼܥܵܬܹܗ ܒܲܠܚܘܿܕܼ ܢܸܦܘܿܩ ܪܸܥܝܵܢܲܢ: ܠܵܐ ܢܸܗܘܸܐ ܒܹܗ
                ܪܸܢܝܵܐ ܕܡܸܕܸܡ ܕܤܵܐܹ̇ܡ ܕܤܵܐܹ̇ܓܼ ܒܐܲܦܵܘ̈ܗܝ: ܩܕܼܵܡ ܗܵܘ̇ ܚܸܙܘܵܐ ܕܡܵܪܹܟܠ.
                ܟܠ ܟܡܵܐ ܕܫܵܒܹ̇ܩ ܪܸܥܝܵܢܵܐ: ܚܲܒܼܝܼ̈ܒܲܝ: ܪܸܢܝܵܐ ܕܗܵܠܹܝܢ ܕܡܸܬܼܚܲܙ̈ܝܵܢ:
                ܘܪܵܢܹܐ ܒܗܵܘ̇ ܤܲܒܼܪܵܐ ܕܲܥܬܼܝܼܕܼ: ܠܦܘܼܬܼ ܡܫܘܼܚܬܼܵܐ ܕܲܡܥܲܠܝܘܼܬܹܗ
                ܕܡ̣ܢ ܪܸܢܝܵܐ ܕܓܼܘܼܫܡܵܐ ܘܥܸܢܝܵܢܹܗ ܕܲܒܼܗܵܘ̇: ܗܵܟܲܢܵܐ ܡܸܬܼܲܩܲܛܲܢ
                ܘܗܵܘܹ̇ܐ ܫܦܸܐ ܒܲܨܠܘܿܬܼܵܐ. ܟܡܵܐ ܕܡܸܬܼܚܲܪܲܪ ܦܲܓܼܪܵܐ ܡ̣ܢ ܐܲܤܘܼܪܹ̈ܐ
                ܕܨܸܒܼ̈ܘܵܬܼܵܐ: ܗܵܟܼܘܵܬܼ ܡܸܬܼܚܲܪܲܪ ܪܸܥܝܵܢܵܐ. ܘܲܟܼܡܵܐ ܕܡܸܬܼܚܲܪܲܪ ܡ̣ܢ
                ܦܟܵܪܹ̈ܐ ܕܡܲܪ̈ܢܝܬܼܵܐ: ܗܵܟܲܢܵܐ ܡܸܫܬܲܦܸܐ. ܘܲܟܼܡܵܐ ܕܡܸܫܬܲܦܸܐ: ܡܸܬܼܩܲܛܲܢ.
                ܘܲܟܼܡܵܐ ܕܡܸܬܼܩܲܛܲܢ: ܡܸܬܼܥܲܠܸܐ ܡ̣ܢ ܙܵܘ̈ܥܹܐ ܕܥܵܠܡܵܐ ܗܵܢܵܐ ܕܲܛܥܝܼܢ
                ܢܝܼܫܵܐ ܕܥܲܒܼܝܘܼܬܼܵܐ. ܘܝܵܕܲܥ̇ ܪܲܢܚܘܼܪ ܒܐܲܠܵܗܵܐ: ܐܲܟܼܘܵܬܹܗ: ܘܠܵܐ
                ܐܲܟܼܘܵܬܲܢ. ܐܸܠܵܐ ܐ̄ܢܵܫ ܐܸܫܬܘܼܝ ܠܘܼܩܕܲܡ ܠܓܸܠܝܵܢܵܐ: ܠܵܐ ܡܲܨܝܵܐ
                ܕܢܸܕܲܥ ܗܵܕܹܐ. ܘܐܸܠܵܐ ܐܵܬܹ̇ܐ ܠܕܲܟܼܝܘܼܬܼܵܐ: ܠܵܐ ܡܸܫܬܲܦܹܝܢ ܙܵܘܥܵܘ̈ܗܝ
                ܠܲܡܚܵܪ ܒܟܲܤ̈ܝܵܬܼܵܐ. ܘܲܥܕܲܡܵܐ ܕܡܸܬܼܚܲܪܲܪ ܡ̣ܢ ܟܠ ܕܡܸܬܼܚܙܸܐ
                ܒܩܸܢܝܵܢܹܗ: ܠܵܐ ܡܸܬܼܚܲܪܲܪ ܐܵܦ ܡ̣ܢ ܙܵܘ̈ܥܹܐ ܕܲܥܠܲܝܗܹܝܢ: ܘܠܵܐ ܗܵܘܹ̇ܐ
                ܤܦܝܼܩ ܡ̣ܢ ܚܘܼ̈ܫܵܒܹܐ ܕܲܡܥܲܡܛܝܼܢ. ܘܲܟܼܡܵܐ ܕܥܲܡܛܵܢܵܐ ܘܥܘܼܪ̈ܙܵܠܲܝ
                ܚܘܼ̈ܫܒܹܐ: ܘܐܵܦ ܚܲܫܹ̈ܐ ܬܲܡܵܢ. ܐܸܠܵܐ ܓܹܝܪ ܡܸܬܼܚܲܪܲܪ ܐ̄ܢܵܫ ܡ̣ܢ ܗܵܠܹܝܢ
                ܟܠܗܹܝܢ ܕܐܸܡ̇ܪܹܬܼ ܘܡ̣ܢ ܥܸܠܠܵܬܼ̈ܗܹܝܢ: ܠܵܐ ܡܸܬܼܒܲܩܸܐ ܒܟܲܤ̈ܝܵܬܼܵܐ
                ܕܪܸܥܝܵܢܵܐ. ܡܸܛܠ ܗܵܢܵܐ ܡ̣ܢ ܩܕܼܵܡ ܟܠܡܸܕܸܡ: ܡܤܲܪܩܘܼܬܼܵܐ
                ܦܲܩܕܲܢ ܡܵܪܲܢ ܕܢܹܐܚܘܿܕܼ: ܘܡܸܬܼܪܲܚܩܵܢܘܼܬܼܵܐ ܕܡ̣ܢ ܫܓܼܘܼ̈ܫܝܹܐ
                ܕܥܵܠܡܵܐ: ܘܲܫܪܵܝܵܐ ܕܡ̣ܢ ܡܲܪܢܝܼܬܼܵܐ ܕܟܼܠ ܐ̄ܢܵܫ. ܡ̇ܢ ܕܠܵܐ ܠܲܡ
                ܫܵܒܹ̇ܩ ܠܟܼܠܵܗ̇ ܐ̄ܢܵܫܘܼܬܹܗ ܘܟܼܠܡܸܕܸܡ ܕܐܝܼܬܼ ܠܹܗ: ܘܟܼܵܦܲܪ ܐܵܦ
                ܒܢܲܦܫܹܗ: ܠܵܐ ܡܸܫܟܲܚ ܕܢܸܗܘܸܐ ܠܝܼ ܬܲܠܡܝܼܕܼܵܐ. ܕܲܒܼܡܸܕܸܡ
                
                 439 
                
                ܪܸܥܝܵܢܵܐ: ܠܵܐ ܢܸܬܼܢܟܸܐ ܒܲܚܙܵܬܼܵܐ ܘܲܒܼܫܸܡܥܵܐ ܘܲܒܼܨܸܦܬܼܵܐ ܕܨܸܒܼ̈ܘܵܬܼܵܐ
                ܘܚܘܼܒܵܠܗܹܝܢ ܘܬܲܪܒܿܝܼܬܼܗܹܝܢ: ܘܲܒܼܐ̄ܢܵܫ. ܘܲܒܼܗܵܝ̇ ܕܐܲܤ̣ܪܹܗ ܠܪܸܥܝܵܢܲܢ
                ܒܤܲܒܼܪܵܐ ܒܲܠܚܘܿܕܼ ܕܝܼܠܹܗ: ܠܘܵܬܹܗ ܐܲܚܝܼܪܹܗ ܠܟܼܠܹܗ ܪܸܢܝܵܐ
                ܕܚܘܼ̈ܫܵܒܲܝܢ. ܘܒܹܗ ܐܲܤܪܵܗ̇: ܠܟܼܠܵܗ̇ ܡܲܪܢܝܼܬܼܵܐ ܕܬܲܪܥܝܼܬܲܢ ܒܲܫܪܵܝܵܐ
                ܕܟܼܠ. ܕܡ̣ܢ ܗܵܪܟܵܐ ܢܸܫܬܲܪܲܓܼܪܲܓܼ ܠܥܸܢܝܵܢܹܗ: ܒܐܲܡܝܼܢܘܼܬܼܵܐ
                ܕܨܸܦܬܲܢ ܕܲܥܠܵܘܗܝ. ܐܵܦ ܕܘܼܪܵܫܵܐ ܬܘܼܒܼ: ܒܵܥ̇ܝܵܐ ܨܠܘܿܬܼܵܐ. ܕܡ̣ܢ
                ܙܲܒܼܢܵܐ ܢܲܓܝܼܪܵܐ ܕܒܼܵܗ̇: ܢܸܬܼܚܲܟܲܡ ܪܸܥܝܵܢܵܐ. ܒܵܬܲܪ ܡܤܲܪܩܘܼܐ ܓܹܝܪ
                ܕܫܵܪܝܵܐ ܙܵܘ̈ܥܲܝܢ ܡ̣ܢ ܦܟܼܵܪܹ̈ܐ: ܐܲܡܝܼܢܘܼܬܼܵܐ ܒܵܥ̇ܝܵܐ ܨܠܘܿܬܼܵܐ. ܕܡ̣ܢ
                ܐܲܡܝܼܢܘܼܬܼܵܐ ܘܙܲܒܼܢܵܐ: ܢܸܤܲܒܼ ܪܸܥܝܵܢܵܐ ܐܵܦ ܕܘܼܪܵܫܵܐ: ܠܡܸܕܲܥ
                ܚܘܼܫܵܒܼܵܘ̈ܗܝ ܠܲܡܬܲܟܵܤܘܼ: ܘܲܠܡܹܐܠܲܦ ܡ̣ܢ ܢܸܤ̈ܝܵܢܹܐ ܤܲܓܝܼ̈ܐܵܬܼܵܐ:
                ܐܲܝܠܹܝܢ ܕܠܲܡܩܲܒܵܠܘܼ ܡ̣ܢ ܐ̄ܚܪ̈ܵܢܹܐ ܠܵܐ ܡܸܫܟܲܚ. ܠܟܼܠ ܕܘܼܒܵܪܵܐ
                ܕܐܝܼܬܼ: ܬܲܪܒܿܝܼܬܼܵܐ ܐܝܼܬܼ ܠܹܗ ܒܕܼܘܼܒܵܪܵܐ ܕܲܩܕܼܵܡܵܘܗܝ. ܘܗܵܘ̇
                ܕܲܩܕܼܵܡܵܘܗܝ ܡܸܬܼܒܿܥܸܐ. ܠܲܫܟܼܵܚܬܼܵܐ ܕܗܵܘ̇ ܕܒܼܵܬܼܪܹܗ. ܠܲܨܠܘܿܬܼܵܐ
                ܩܲܕܝܼܡܵܐ ܠܵܗ̇: ܡܫܵܘܚܕܼܘܼܬܼܵܐ. ܘܐܵܦ ܗ̤ܝ ܡܫܵܘܚܕܼܘܼܬܼܵܐ: ܡܸܛܠ
                ܨܠܘܿܬܼܵܐ. ܘܲܨܠܘܿܬܼܵܐ ܐܲܝܟܼ ܕܢܸܩܢܸܐ ܡܸܢܵܗ̇: ܚܘܼܒܵܐ ܕܐܲܠܵܗܵܐ. ܡܸܛܠ
                ܕܡܸܢܵܗ̇ ܡܸܫܬܲܟܼ̈ܚܵܢ ܥܸܠ̈ܠܵܬܼܵܐ ܠܡܲܚܵܒܼܘܼ ܠܐܲܠܵܗܵܐ.
                ܐܵܦ ܗܵܕܹܐ ܙܵܕܹܩ ܕܢܸܕܲܥ: ܚܲܒܿܝܼ̈ܒܲܝ: ܕܟܼܠ ܥܸܢܝܵܢܵܐ ܕܲܒܼܟܸܤܝܵܐ
                ܕܐܝܼܬܼ: ܘܟܼܠ ܪܸܢܝܵܐ ܫܲܦܝܼܪܵܐ ܕܡܲܕܥܵܐ ܕܒܲܐܠܵܗܵܐ: ܘܟܼܠ ܗܸܪܓܵܐ
                ܕܪ̈ܘܼܚܵܢܵܝܬܼܵܐ: ܒܲܨܠܘܿܬܼܵܐ ܡܸܬܿܬܲܚܲܡ: ܘܲܒܼܫܸܡ ܨܠܘܿܬܼܵܐ ܡܸܬܼܚܒܸܫ:
                ܘܲܠܓܼܵܘ ܡ̣ܢ ܫܘܼܡܵܗܵܐ ܗܵܢܵܐ ܡܸܤܬܲܝܲܟ. ܘܐܸܢ ܩܸܪܝܵܢܵܐ ܕܦܘܼܪܫܵܢܵܐ
                
                 440 
                
                ܬܹܐܡܲܪ: ܘܐܸܢ ܩܵܠܹ̈ܐ ܕܦܘܼܡܵܐ ܕܲܒܼܬܸܫ̈ܒܿܚܵܬܹܗ ܕܐܲܠܵܗܵܐ: ܘܪܸܢܝܵܐ
                ܫܚܝܼܩܵܐ ܕܲܒܼܡܵܪܲܢ: ܘܤܸܓܼܕܬܼܵܐ ܕܦܲܓܼܪܵܐ: ܘܗܘܼ̈ܠܵܠܹܐ ܕܙܘܼܡܵܪܵܐ:
                ܘܫܲܪܟܵܐ. ܡܸܛܠ ܕܡܸܢܗܹܝܢ ܡܸܬܼܩܲܒܲܠ ܝܘܼܠܦܵܢܵܐ ܕܥܲܠ ܨܠܘܿܬܼܵܐ
                ܚܲܬܿܝܼܬܿܬܵܐ: ܘܡܸܢܵܗ̇ ܚܘܼܒܵܐ ܕܐܲܠܵܗܵܐ ܡܸܬܼܝܼܠܸܕܼ. ܘܗ̤ܘ ܚܘܼܒܵܐ: ܒܝܲܕܼ
                ܨܠܘܿܬܼܵܐ. ܘܲܨܠܘܿܬܼܵܐ: ܒܕܼܘܼܝܵܪܵܐ ܡܫܵܘܚܕܼܵܐ. ܘܗ̤ܝ ܡܫܵܘܚܕܼܘܼܬܼܵܐ
                ܠܗܵܕܹܐ: ܡܸܛܠ ܕܢܸܗܘܸܐ ܠܲܢ ܐܲܬܼܪܵܐ ܕܒܲܠܚܘܿܕܲܝܢ ܥܲܡ ܐܲܠܵܗܵܐ
                ܢܸܬܼܥܢܸܐ: ܠܲܡܫܵܚܕܼܘܼܬܼܵܐ ܬܘܼܒܼ ܩܲܕܝܼܡܵܐ ܠܵܗ̇: ܫܒܼܝܼܩܘܼܬܼܵܐ
                ܕܥܵܠܡܵܐ. ܕܐܸܠܵܐ ܐ̄ܢܵܫ ܫܵܒܹ̇ܩ ܥܵܠܡܵܐ ܠܘܼܩܕܲܡ: ܘܡܸܤܬܲܦܲܩ
                ܡ̣ܢ ܟܠ ܕܐܝܼܬܼ ܠܹܗ: ܠܵܐ ܡܸܫܟܲܚ ܕܢܸܫܬܵܘܚܲܕܼ. ܗܵܟܲܢܵܐ
                ܘܠܲܫܒܼܝܼܩܘܼܬܼܵܐ ܬܘܼܒܼ ܕܥܵܠܡܵܐ: ܩܲܕܝܼܡܵܐ ܡܤܲܝܒܿܪܵܢܘܼܬܼܵܐ.
                ܘܠܲܡܤܲܝܒܿܪܵܢܘܼܬܼܵܐ: ܤܸܢܐܲܬܼ ܥܵܠܡܵܐ. ܠܤܸܢܐܲܬܼ ܥܵܠܡܵܐ: ܕܸܚܠܬܼܵܐ
                ܘܪܸܚܡܬܼܵܐ. ܕܐܸܠܵܐ ܡܤܲܪܕܼܵܐ ܠܪܸܥܝܵܢܵܐ ܕܸܚܠܬܼܵܐ ܕܓܹܗܲܢܵܐ: ܘܲܡܓܲܪܓܼܵܐ
                ܪܸܚܡܬܼܵܐ ܕܛܘܼ̈ܒܹܐ: ܠܵܐ ܕܵܝ̇ܠܵܐ ܒܹܗ ܤܸܢܐܬܼܵܐ ܕܥܵܠܡܵܐ ܗܵܢܵܐ. ܘܐܸܠܵܐ
                ܢܸܤܢܸܐ ܠܥܵܠܡܵܐ: ܠܵܐ ܡܤܲܝܒܲܪ ܡ̣ܢ ܥܸܢܝܵܢܹܗ ܘܲܢܝܵܚܹܗ. ܘܐܸܠܵܐ
                ܩܵܕܼܡܵܐ ܡܤܲܝܒܿܪܵܢܘܼܬܼܵܐ ܠܪܸܥܝܵܢܵܐ: ܠܵܐ ܡܸܫܟܲܚ ܓܵܒܹ̇ܐ ܥܘܼܡܪܵܐ
                ܕܲܡܠܸܐ ܨܸܕܼܝܵܐ: ܘܲܤܦܝܼܩ ܡ̣ܢ ܥܵܡܘܿܪܹ̈ܐ. ܘܐܸܠܵܐ ܢܸܓܼܒܸܿܐ ܠܹܗ ܚܲܝܹ̈ܐ
                ܡܫܵܘܚ̈ܕܹܐ: ܠܵܐ ܡܸܫܟܲܚ ܡܸܬܼܐܡܸܢ ܒܲܨܠܘܿܬܼܵܐ. ܘܐܸܠܵܐ ܢܸܗܘܸܐ
                ܐܲܡܝܼܢ ܡܸܬܼܥܢܸܐ ܥܲܡ ܐܲܠܵܗܵܐ: ܘܲܢܩܵܘܸܐ ܒܗܵܢ̇ܘܿܢ ܙܵܘ̈ܥܹܐ ܚܠܝܼ̈ܛܲܝ
                ܒܲܨܠܘܿܬܼܵܐ: ܘܐܵܕܼܫܲܝ̈ ܝܘܼܠܦܵܢܵܐ ܕܒܼܵܗ̇ ܕܐܸܬܼܐܡܲܪܘ: ܠܵܐ ܡܲܪܓܸܫ
                ܒܚܘܼܒܵܐ. ܡܵܕܹܝܢ ܚܘܼܒܵܐ ܕܐܲܠܵܗܵܐ: ܡ̣ܢ ܥܸܢܝܵܢܵܐ ܕܥܲܡܹܗ. ܘܥܸܢܝܵܢ
                ܨܠܘܿܬܼܵܐ: ܒܝܲܕܼ ܫܸܠܝܵܐ. ܘܫܸܠܝܵܐ: ܒܲܡܤܲܪܩܘܼܬܼܵܐ. ܘܲܡܤܲܪܩܘܼܬܼܵܐ
                ܬܘܼܒܼ: ܒܝܲܕܼ ܡܤܲܝܒܿܪܵܢܘܼܬܼܵܐ. ܘܲܡܤܲܝܒܿܪܵܢܘܼܬܼܵܐ: ܒܝܲܕܼ ܤܸܢܐܬܼܵܐ
                
                 441 
                
                ܕܲܠܘܵܬܼ ܪ̈ܓܼܝܼܓܼܵܬܐ. ܘܤܸܢܐܲܬܼܸ ܪ̈ܓܼܝܼܓܼܵܬܐ: ܒܝܲܕܼ ܕܸܚܠܬܼܵܐ ܕܓܹܗܲܢܵܐ:
                ܘܤܘܼܟܵܝܵܐ ܕܛܘܼ̈ܒܹܐ. ܤܵܢܹ̇ܐ ܠܗܹܝܢ ܠܲܪ̈ܓܼܝܼܓܼܵܬܐ: ܐܲܝܢܵܐ ܕܝܵܕܲܥ̇ ܦܹܐܪܹ̈ܐ
                ܕܡܸܢܗܹܝܢ: ܕܡܵܢܵܐ ܡܛܲܝ̈ܒܼܵܢ ܠܹܗ: ܘܡ̣ܢ ܐܲܝܢܵܐ ܛܘܼܒܼܵܐ ܡܸܬܼܓܠܸܙ
                ܡܸܛܠܵܬܼܗܹܝܢ. ܘܗܵܟܲܢܵܐ ܟܠܚܲܕܼ ܡ̣ܢ ܕܘܼܒܵܪܹ̈ܐ: ܒܗܵܘ̇ ܕܲܩܕܼܵܡܵܘܗܝ
                ܐܲܤܝܼܪ: ܘܡܸܢܹܗ ܫܵܩܹ̇ܠ ܬܲܪܒܿܝܼܬܼܵܐ ܘܡܸܫܬܵܘܫܲܛ ܠܲܐ̄ܚܪ̈ܵܢܹܐ ܕܡܸܢܹܗ
                ܘܲܠܥܸܠ. ܘܐܸܢ ܚܲܕܼ ܡܸܢܗܘܿܢ ܡ̣ܢ ܡܨܲܥܬܼܵܐ ܚܲܤܝܼܪ: ܠܵܐ ܡܸܬܼܩܲܝܲܡ
                ܗܵܘ̇ ܕܒܼܵܬܼܪܹܗ. ܘܡܸܬܼܚܙܸܐ ܕܟܼܠܗܘܿܢ ܡܸܫܬܪܹܝܢ: ܘܐܵܒܼܕܝܼܢ ܠܗܘܿܢ.