Isaac of Nineveh. “Discourse 64.” Based upon Digital Syriac Corpus. Last modified March 5, 2019. https://syriaccorpus.org/455.
    
        
            
                ܥܲܠ ܫܘܼ̈ܚܠܵܦܹܐ ܤܲܓܝܼ̈ܐܹܐ ܕܢܲܩܝܼܦܝܼܢ ܠܪܸܥܝܵܢܵܐ: ܘܒܲܨܠܘܿܬܼܵܐ
                ܡܸܬܼܒܲܚܪܝܼܢ. ܤܕ.
            
            
                ܠܡܸܓܼܒܵܐ ܡ̇ܢ ܛܵܒܼܬܼܵܐ: ܕܨܸܒܼܝܵܢܵܐ ܗ̣̄ܝ ܫܲܦܝܼܪܵܐ ܕܐܲܝܢܵܐ ܕܲܠܗܵܕܹܐ
                ܪܵܐܹ̇ܓܼ. ܠܲܡܫܲܠܵܡܘܼ ܕܹܝܢ ܠܲܓܼܒܼܝܼܬܼܵܐ ܕܗܵܘ̇ ܨܸܒܼܝܵܢܵܐ ܡܝܲܬܿܪܵܐ: ܕܐܲܠܵܗܵܐ
                ܗ̣̄ܝ ܗܵܕܹܐ: ܘܥܲܠ ܡܥܲܕܪܵܢܘܼܬܼܵܐ ܤܲܓܝܼܐܬܼܵܐ ܕܡ̣ܢ ܨܹܐܕܵܘܗܝ
                ܤܢܝܼܩܵܐ. ܡܸܛܠܗܵܢܵܐ ܠܪܸܓܿܬܼܵܬ ܫܲܦܝܼܪܬܵܐ ܕܢܵܒܼ̇ܗܵܐ ܒܲܢ ܡܲܩܦܝܼܢܲܢ:
                ܨܠܵܘ̈ܬܼܵܐ ܐܲܡܝܼ̈ܢܵܬܼܵܐ. ܠܵܘ ܒܲܠܚܘܿܕܼ ܠܡܸܒܼܥܵܐ ܡܸܢܹܗ ܥܘܼܕܼܪܵܢܵܐ: ܐܸܠܵܐ
                ܘܐܵܦ ܕܢܸܥܒܸܕܼ ܒܵܗ̇ ܦܘܼܪܫܵܢܵܐ: ܐܸܢ ܫܵܠܡܵܐ ܠܨܸܒܼܝܵܢܹܗ. ܠܵܘ ܟܠ
                ܪܸܓܿܬܼܵܐ ܕܫܲܦܝܼܪܬܵܐ: ܡ̣ܢ ܐܲܠܵܗܵܐ ܢܵܦ̇ܠܵܐ ܒܠܸܒܵܐ: ܐܸܠܵܐ ܐܲܝܕܵܐ ܕܐܵܦ
                ܡܵܘܬܪܵܢܝܵܐ. ܘܐܝܼܬܼ ܗ̄ܘ̣ ܫܲܦܝܼܪܬܵܐ ܕܪܵܐܹܓܼ ܠܵܗ̇ ܐ̄ܢܵܫ: ܟܲܕܼ ܠܵܐ
                ܡܥܲܕܪܵܐ ܠܹܗ. ܢܵܦ̇ܠܵܐ ܘܐܵܦ ܡ̣ܢ ܤܵܛܵܢܵܐ ܕܲܐܝܟܼ ܗܵܕܹܐ ܪܸܓܿܬܼܵܐ: ܟܲܕܼ
                ܡܸܤܬܲܒܼܪܵܐ ܕܲܕܼܥܘܼܪܵܢܵܐ ܗ̣̄ܝ. ܟܡܵܐ ܙܲܒܼܢ̈ܝܼܢ ܕܹܝܢ: ܠܲܝܬܹܝܗ̇
                ܕܲܡܫܘܼܚܬܹܗ: ܗ̤ܘ ܕܹܝܢ ܠܤܘܼܓܦܵܢܹܗ ܡܸܬܼܦܲܪܲܣ. ܟܲܕܼ ܥܵܨܹ̇ܐ ܠܹܗ
                
                 442 
                
                ܕܹܝܢ: ܕܗܕܹܐ ܢܸܒܼܥܸܐ. ܟܲܕܼ ܠܵܐ ܡܛ̣ܵܐ ܥܕܲܟܹܝܠ ܠܕܼܘܼܒܵܪܵܐ ܗܵܘ̇: ܐܵܘ
                ܕܢܘܼܟܼܪܵܝܵܐ ܠܛܲܟܼܤܵܐ ܕܐܸܤܟܹܡܹܗ. ܐܵܘ ܬܘܼܒܼ ܠܵܐ ܐܝܼܬܼܵܘܗܝ ܙܲܒܼܢܵܐ:
                ܗܵܘ̇ ܕܒܹܗ ܗܵܠܹܝܢ ܕܢܸܓܼܡܘܿܪ ܡܕܝܼܠ ܒܹܗ. ܐܵܘ ܕܗ̤ܘ ܠܵܐ ܤܵܦܹ̇ܩ
                ܠܤܘܼܥܪܵܢܵܐ: ܐܵܘ ܒܝܼܕܲܥܬܼܵܐ: ܐܵܘ ܒܓܼܘܼܫܡܵܐ: ܐܵܘ ܒܙܲܒܼܢܵܐ ܕܠܵܐ
                ܝܵܗܹ̇ܒܼ ܐܝܼܕܼܵܐ. ܘܲܒܼܟܼܠ ܦܪܘܿܣ: ܐܲܝܟܼ ܕܲܒܼܦܲܪܨܘܿܦ ܫܲܦܝܼܪܬܵܐ ܗ̣̄ܝ:
                ܐܵܘ ܢܕܼܵܘܸܕܼ ܠܹܗ: ܐܵܘ ܢܤܲܓܸܦ ܠܹܗ ܒܦܲܓܼܪܹܗ: ܐܵܘ ܕܛܵܡܲܪ ܠܹܗ
                ܦܲܚܵܐ ܒܗܵܘܢܹܗ. ܒܲܕܼܓܼܘܿܢ ܐܲܝܟܼ ܕܐܸܡ̇ܪܹܬܼ: ܨܠܵܘ̈ܵܬܼܵܐ ܐܲܡܝܼ̈ܢܵܬܼܵܐ
                ܘܲܚܦܝܼ̈ܛܵܬܼܵܐ: ܡܲܩܦܝܼܢܲܢ ܠܪܸܓܿܬܼܵܐ ܕܡܸܬܼܚܲܙܝܵܐ ܫܲܦܝܼܪܬܵܐ ܕܢܵܒܼ̇ܗܵܐ ܒܲܢ.
                ܟܲܕܼ ܐܵܡ̇ܪܝܼܢܲܢ ܐ̄ܢܵܫ ܐ̄ܢܵܫ ܡܸܢܲܢ: ܢܸܗܘܸܐ ܒܝܼ ܨܸܒܼܝܵܢܵܟܼ ܠܲܡܫܲܠܵܡܘܼ
                ܒܲܥ̇ܒܼܵܕܼܵܐ: ܛܵܒܼܬܼܵܐ ܗܵܕܹܐ ܕܲܓܼܒܹܝ̇ܬܼ ܠܝܼ ܘܪܸܓܹܿܬܼ ܦܘܼܠܚܵܢܵܗ̇: ܐܸܢ
                ܫܵܠ̇ܡܵܐ ܠܨܸܒܼܝܵܢܵܟܼ. ܠܡܸܨܒܵܐ ܕܹܝܢ ܒܵܗ̇: ܦܫܝܼܩ ܠܝܼ. ܕܐܸܤܥܪܝܼܗ̇
                ܕܹܝܢ: ܠܵܐ ܡܸܫܟܲܚ ܐ̄ܢܵܐ ܕܠܵܐ ܡܵܘܗܲܒܼܬܼܵܐ ܕܡ̣ܢ ܨܹܐܕܲܝܟ. ܟܲܕܼ ܛܵܒܼ
                ܬܲܪ̈ܬܲܝܗܹܝܢ ܕܝܼܠܵܟܼ ܐܸܢܹܝܢ: ܐܵܦ ܠܡܸܨܒܵܐ: ܐܵܦ ܠܡܸܤܥܲܪ. ܕܠܵܘ
                ܒܸܠܥܵܕܼ ܛܲܝܒܿܘܼܬܼܵܟܼ ܠܗܵܝ̇ ܕܐܸܬܿܬܿܙܝܼܲܬ̤ ܐܸܬܿܛܦܝܼ̇ܤܹܬܼ ܐܵܘ ܕܙܵܥܹ̇ܬܼ
                ܡܸܢܵܗ̇. ܗܵܢܵܘ ܥܝܵܕܼܵܐ ܕܐܲܝܢܵܐ ܕܲܠܫܲܦܝܼܪܬܵܐ ܪܵܐܹܓܼ ܒܦܘܼܪܫܵܢܵܐ ܕܗܵܘܢܵܐ:
                ܕܥܲܠ ܐܲܦܹܝ̈ܗ̇ ܒܲܨܠܘܿܬܼܵܐ ܢܸܥܡܲܠ ܐܲܡܝܼܢܵܐܝܼܬܼ. ܘܚܲܝܠܵܐ ܕܡ̣ܢ ܬܲܡܵܢ:
                ܢܸܫܩܘܿܠ ܤܘܼܝܵܥܵܐ ܠܦܘܼܠܚܵܢܹܗ. ܘܚܸܟܼܡܬܼܵܐ ܕܒܼܵܚ̇ܪܵܐ ܫܪܵܪܵܐ ܡ̣ܢ
                ܙܹܐܦܵܐ: ܒܲܨ̈ܠܵܘܵܬܼܵܐ ܤܲܓܝܼ̈ܐܵܬܼܵܐ ܘܲܒܼܥܲܡܠܵܐ: ܘܲܙܗܝܼܪܘܼܬܼܵܐ ܘܝܲܐܝܼܒܼܘܼܬܼܵܐ
                ܕܠܵܐ ܫܲܠܘܵܐ ܛܵܒܼܬܼܵܐ ܡܸܬܼܦܲܪܫܵܐ: ܒܝܲܕܼ ܕܸܡ̈ܥܹܐ ܐܲܡܝܼ̈ܢܵܬܼܵܐ: ܘܡܘܼܟܵܟܼܵܐ:
                ܘܥܘܼܕܼܪܵܢܵܐ ܫܡܲܝܵܢܵܐ. ܝܲܬܝܼܪܵܐܝܼܬܼ ܕܤܲܩܘܼܒܼܠܵܐ ܐܝܼܬܼ ܠܵܗ̇: ܚܘܼ̈ܫܵܒܹܐ
                ܕܪܵܡܘܼܬܼܵܐ: ܗܵܢܘܿܢ ܕܲܡܥܲܕܪܵܢܘܼܬܼܵܐ ܕܐܲܠܵܗܵܐ ܡܸܢܲܢ ܟܵܠܹ̇ܝܢ. ܕܐܵܦ
                ܠܗܵܕܹܐ: ܒܲܨܠܘܼܬܼܵܐ ܡܒܲܛܠܝܼܢܲܢ.