Isaac of Nineveh. “Discourse 68.” Based upon Digital Syriac Corpus. Last modified March 5, 2019. https://syriaccorpus.org/459.
    
        
            
                ܪܹ̈ܫܹܐ ܡܤܲܝ̈ܟܹܐ. ܤܚ.
            
            
                ܝܵܕܼܥܝܼܬܿܘܿܢ ܐܲܚܲܝ̈: ܕܥܲܝܢܵܐ ܡܸܬܼܪܲܓܼܫܵܢܝܼܬܼܵܐ ܝܑܼܚܝܼܕܼܵܐܝܼܬܼ ܒܝܲܕܼ ܚܲܝܠܵܗ̇
                ܗܵܘ̇ ܚܵܙܘܿܝܵܐ: ܗܵܘ̇ ܕܐܲܝܟܼ ܕܲܒܼܤܝܼܠܘܿܢܵܐ ܡܸܕܸܡ ܡ̣ܢ ܡܘܼܚܵܐ
                ܡܸܫܬܲܡܲܪ ܠܘܵܬܼܵܗ̇: ܒܸܠܥܵܕܼ ܡ̣ܢ ܕܢܸܫܬܵܘܬܲܦ ܥܲܡ ܢܘܼܗܪܵܐ
                ܐ̄ܚܪܹܢܵܐ: ܠܵܐ ܡܸܫܟܿܚܵܐ ܕܲܬܼܩܲܒܸܠ ܦܘܼܪ̈ܫܵܢܹܐ ܕܨܸܒܼ̈ܘܵܬܼܵܐ. ܟܠܗܹܝܢ
                ܡܸܬܼܪ̈ܲܓܼܫܵܢܝܵܬܹܗ ܕܲܟܼܝܵܢܵܐ: ܫܲܘܝܵܐܝܼܬܼ ܡܛܲܪ̈ܤܵܢ ܥܲܡ ܡܸܬܼܚܲܕܼܸܥܵܢ̈ܝܵܬܹܗ
                ܕܕܘܼܒܵܪܵܐ ܕܪܘܼܚ ܒܗܵܢܵܐ ܦܸܚܡܵܐ. ܘܚܲܝܠܵܐ ܗܵܘ̇ ܟܝܵܢܵܝܵܐ ܕܡܲܕܥܵܐ:
                ܕܐܵܦ ܡܸܫܬܲܡܲܗ ܝܑܼܕܲܥܬܼܵܐ ܢܲܦܫܵܢܵܝܬܼܵܐ: ܒܸܠܥܵܕܼ ܕܲܢܩܲܒܸܠ ܢܘܼܗܪܵܐ
                ܐܲܠܵܗܵܝܵܐ: ܕܬܸܫܬܵܘܬܲܦ ܢܲܦܫܵܐ ܒܬܹܐܘܿܪܝܼܵܗ̇ ܠܲܫܪܵܪܵܐ: ܠܵܐ ܡܸܫܟܚܚܵܐ.
                ܗܵܘ̇ ܕܡ̣ܢ ܡܝܲܬܿܪܘܼܬܼܵܐ ܕܕܼܘܼܒܵܪܹ̈ܐ: ܒܵܬܲܪ ܕܡܸܬܼܒܲܢܝܵܐ ܒܚܘܼܠܡܵܢܵܐ
                ܟܝܵܢܵܝܵܐ ܡܢܵܬܼܵܐ ܚܵܫܘܿܫܬܼܵܐ ܕܢܲܦܫܵܐ: ܡܸܬܼܩܢܸܐ: ܤܲܓܝܼ̈ܐܹܐ ܟܹܐܡܲܬܼ
                ܐܲܡܪܲܚܘ ܕܥܲܡ ܚܲܫܹ̈ܐ ܢܲܦܫܵܢܵܝܹ̈ܐ ܘܦܲܓܼܪ̈ܵܢܵܝܹܐ: ܒܪܲܗܛܵܐ ܦܝܼܠܵܤܘܿܦܵܝܵܐ
                ܟܲܕܼ ܥܲܠ ܗܵܕܹܐ ܝܑܼܚܝܼܕܼܵܐܝܼܬܼ ܐܸܤܬܡܸܟܼܘ: ܐܵܦ ܡ̣ܢ ܫܪܵܪܵܐ ܕܐܲܚܝܼܕܝܼܢ:
                ܫܓܼܵܘ. ܘܚܵܙܘܿܝܘܼܬܼܵܐ ܕܲܥܝܵܕܼܵܐ: ܐܵܘܒܸܿܕܼܘ. ܘܐܲܝܟܼ ܥܲܝ̈ܢܹܐ ܕܒܼܵܐܐܲܪ
                ܫܪܲܓܼܪ̈ܵܓܼܝܵܬܼܵܐ ܚܵܙ̈ܝܵܢ: ܡܸܛܠ ܢܲܤܝܼܤܘܼܬܼܵܐ ܕܲܚܙܵܝܗܹܝܢ: ܕܡܸܬܼܟܿܠܸܐ
                ܡ̣ܢ ܡܠܘܿܐܹ̈ܐ ܪ̈ܲܛܝܼܒܹܐ ܕܲܒܼܗܹܝܢ: ܟܠܚܲܕܼ ܚܲܕܼ ܡܸܢܗܘܿܢ: ܠܲܚܕܼܵܐ
                
                 475 
                
                ܕܡܘܼܬܼܵܐ ܕܡܸܬܼܗܲܓܓܼܵܐ ܗ̄ܘ̣ܵܬܼ ܩܕܼܵܡܵܘܗܝ: ܐܸܤܬܿܒܲܪ ܠܹܗ ܫܪܵܪܵܐ.
                ܘܟܲܕܼ ܐܸܬܼܟܲܢܲܫܹ̈ܝܢ ܕܸܡ̈ܘܵܬܼܵܐ ܟܠܗܹܝܢ ܕܟܼܠܗܘܿܢ ܠܲܚܕܵܐ: ܐܸܬܼܚܙܝܼ
                ܬܲܡܵܢ ܚܠܵܦ ܚܲܕܼ: ܕܸܡ̈ܘܵܬܼܵܐ ܤܲܓܼܝܼ̈ܐܵܬܼܵܐ ܕܘܼܟܲܬܼ ܫܪܵܪܵܐ. ܘܗܵܕܹܐ
                ܓܸܕܼܫܲܬ̤ ܠܗܘܿܢ: ܒܗܵܝ̇ ܕܥܲܠ ܙܸܠܓܹ̈ܐ ܕܛܲܝܒܿܘܼܬܼܵܐ: ܗܵܝ̇ ܕܲܒܼܕܼܘܼܟܵܝܵܐ
                ܕܢܲܦܫܵܐ ܡܲܙܠܓܼܵܐ: ܠܵܐ ܫܲܐܸܠ̣ܘ. ܫܪܵܪܵܐ ܐܝܼܬܼܵܘܗܝ: ܡܲܪܓܫܵܢܘܼܬܼܵܐ
                ܕܥܲܠ ܐܲܠܵܗܵܐ: ܕܒܲܪܓܸܫܬܼܵܐ ܕܪܸ̈ܓܼܫܵܘܗܝ ܪ̈ܘܼܚܵܢܹܐ ܕܗܵܘܢܵܐ: ܗ̤ܘ
                ܐ̄ܢܵܫ ܒܲܩܢܘܿܡܹܗ ܛܵܥܹ̇ܡ ܠܵܗ̇.
                ܗܲܒܵܒܼܵܐ ܕܹܝܢ ܕܝܼܕܲܥܬܼܵܐ ܕܪܘܼܚ: ܚܘܼܒܵܐ ܐܲܠܵܗܵܝܵܐ. ܗܵܘ̇ ܕܲܒܼܝܲܕܼ
                ܤܘܼ̈ܟܵܠܹܐ ܡܫܲܠܗ̈ܒܼܵܢܹܐ: ܕܲܒܼܝܲܕܼܸ ܪܘܼܚܵܐ ܡ̣ܢ ܨܠܘܿܬܼܵܐ ܡܸܫܬܲܟܼܚܝܼܢ:
                ܗܵܘܹ̇ܐ. ܚܘܼܒܵܐ ܐܝܼܬܼܵܘܗܝ: ܦܹܐܪܵܐ ܕܲܨܠܘܿܬܼܵܐ. ܕܲܒܼܝܲܕܼ ܬܹܐܘܿܪܝܼܵܐ ܕܡܵܢܵܗ̇
                ܢܵܓܼܕܵܐ ܠܹܗ ܠܗܵܘܢܵܐ ܠܵܐ ܡܸܤܬܲܒܼܥܵܢܵܐܝܼܬܼ ܠܪܸܚܡܬܼܵܗ̇: ܟܲܕܼ
                ܢܚܲܡܤܸܢ ܒܵܗ̇ ܕܠܵܐ ܩܘܼܛܵܥ: ܐܸܢ ܒܗܵܝ̇ ܕܡܸܬܼܪܲܓܼܫܵܢܵܐܝܼܬܼ ܘܲܒܼܝܲܕܼ
                ܦܲܓܼܪܵܐ: ܘܐܸܢ ܗܵܝ̇ ܕܲܒܼܝܲܕܼ ܙܵܘܥܵܐ ܫܲܠܝܵܐ ܕܬܲܪܥܝܼܬܼܵܐ ܬܨܲܠܸܐ
                ܚܲܡܝܼܡܵܐܝܼܬܼ ܘܚܲܪܝܼܦܵܐܝܼܬܼ. ܨܠܘܿܬܼܵܐ ܐܝܼܬܹܝܗ̇: ܡܝܼܬܼܘܼܬܼܵܐ ܕܙܵܘ̈ܥܹܐ
                ܕܨܸܒܼܝܵܢܵܐ ܡ̣ܢ ܚܲܝܹ̈ܐ ܕܒܸܤܪܵܐ. ܫܲܘܝܵܐ  ܗ̣̄ܝ ܓܹܝܪ ܘܗܵܝ̇ ܕܲܢܨܲܠܸܐ
                ܚܲܬܿܝܼܬܵܐܝܼܿܬܼ: ܘܗܵܝ̇ ܕܲܢܡܘܼܬܼ ܡ̣ܢ ܥܵܠܡܵܐ: ܘܗܵܕܲܐ ܗ̣̄ܝ ܗܵܝ̇
                ܕܢܸܟܼܦܘܿܪ ܐ̄ܢܵܫ ܒܢܲܦܫܹܗ. ܗܵܢܵܘ ܕܹܝܢ: ܕܬܸܗܘܸܐ ܐܲܡܝܼܢ ܒܲܨܠܘܿܬܼܵܐ.
                ܝܑܼܕܲܝܼܥ ܗ̄ܘ̣ ܠܝܵܕܼ̈ܥܲܝ ܟܬܼܵܒܹ̈ܐ: ܕܲܨܠܘܿܬܼܵܐ ܚܲܬܿܝܼܬܬܵܐ: ܡܵܢܲܐ ܗ̣̄ܝ
                ܒܥܵܬܼܵܗ̇. ܘܝܼܕܼܝܼܥܵܐ ܗ̣̄ܝ: ܕܐܲܝܠܹܝܢ ܕܲܠܗܵܢܵܐ ܪܸܥܝܵܢܵܐ ܝܑܼܚܝܼܕܼܵܝܵܐ ܩܲܒܸܠ̣ܘ
                ܥܠܲܝܗܘܿܢ: ܕܲܨܠܘܿܬܼܵܐ ܝܑܼܚܝܼܕܼܵܝܬܼܵܐ ܢܸܩܢܘܿܢ ܒܫܸ̈ܐܠܵܬܼܗܘܿܢ: ܕܲܠܩܘܼܒܼܠܵܐ
                ܕܪܸܓܲܬܼܗܘܿܢ: ܠܵܐ ܗܵܘܹ̇ܝܢ ܒܝܵܬܼܗܘܿܢ: ܕܲܢܥܝܼܪܘܼܢ ܫܓܼܘܼ̈ܫܝܹܐ ܥܲܠ
                ܢܲܦܫܗܘܿܢ ܡܸܛܠ ܚܲܫܹ̈ܐ ܤܲܩܘܼ̈ܒܼܠܵܝܹܐ ܕܒܼܵܬܲܪ ܨܠܘܿܬܼܵܐ ܒܢܲܦܫܗܘܿܢ
                
                 476 
                
                ܡܙܝܼܥܝܼܢ. ܡܵܕܹܝܢ ܚܘܼܒܵܐ ܕܐܲܠܵܗܵܐ: ܒܲܟܼܦܘܼܪܝܵܐ ܕܢܲܦܫܵܐ ܡܸܫܬܿܟܲܚ.
                ܐܲܝܟܲܢܵܐ ܗܵܟܹܝܠ ܕܡ̣ܢ ܙܲܪ̈ܥܲܝ ܕܘܼܥܬܹܗ ܕܨܵܘܡܵܐ ܫܸܒܲܠ ܢܲܟܼܦܘܼܬܼܵܐ
                ܫܵܘܚܵܐ: ܗܵܟܲܢܵܐ ܡ̣ܢ ܤܲܒܼܥܘܼܬܼܵܐ ܦܲܚܙܘܼܬܼܵܐ: ܘܡ̣ܢ ܡܲܠܝܘܼܬܼܵܐ
                ܨܲܚܢܘܼܬܼܵܐ. ܥܲܠ ܟܲܪܤܵܐ ܕܹܝܢ ܕܟܲܦܢܵܐ: ܠܵܐ ܡܸܡܬܼܘܿܡ ܡܕܝܼܩܝܼܢ
                ܚܘܼ̈ܫܵܒܹܐ ܙܲܠܝܼ̈ܠܹܐ. ܟܠ ܡܹܐܟܼܘܼܠܬܼܵܐ ܕܹܝܢ ܕܡܸܬܼܩܲܒܿܠܵܐ ܠܓܼܵܘ ܡܸܢܲܢ:
                ܬܵܘܤܲܦܬܼܵܐ ܗܵܘ̇ܝܵܐ ܒܟܼܘܼ̈ܡܘܿ ܕܙܲܪܥܵܐ ܟܝܵܢܵܝܵܐ ܕܡܸܬܼܟܲܢܲܫ ܒܦܲܓܼܪܲܢ.
                ܘܡܵܐ ܕܐܸܬܼܡܠܝܼܘ ܗܲܕܵܡܹ̈ܐ ܐܘܿܪ̈ܓܵܢܵܝܹܐ ܒܫܸܚܠܵܐ ܕܡ̣ܢ ܟ̱ܠܹܗ ܦܲܓܼܪܵܐ
                ܕܲܠܬܲܡܵܢ ܗܵܘܹ̇ܐ: ܐܸܢ ܓܕܲܫ̣ ܘܲܚ̣ܙܵܐ ܦܲܓܼܪܵܐ: ܐܵܘ ܪܚܸܫ̣ ܒܠܸܒܵܐ
                ܥܘܼܗܕܵܢܵܐ ܡܸܕܸܡ ܕܠܵܐ ܡ̣ܢ ܨܸܒܼܝܵܢܵܐ: ܥܲܡܹܗ ܕܚܘܼܫܵܒܼܵܐ ܒܲܪ ܫܵܥܬܹܗ:
                ܡܠܘܿܐܵܐ ܗܲܢܝܼܐܵܐ ܡܸܬܿܬܿܙܝܼܥ ܡ̣ܢ ܬܲܡܵܢ: ܘܡܸܫܬܲܡܲܪ ܒܟܼܠܹܗ
                ܓܘܼܫܡܵܐ. ܐܲܝܟܲܢܵܐ ܕܐܵܦܸܢ ܤܲܓܝܼ ܢܸܗܘܸܐ ܚܲܝܠܬܼܵܢ ܪܸܥܝܵܢܵܐ ܘܲܢܟܸܦ
                ܘܲܙܗܸܐ ܒܙܵܘܥܵܘ̈ܗܝ: ܒܝܲܕܼ ܡܲܪܓܫܵܢܘܼܬܼܵܐ ܗܵܝ̇ ܕܗܲܕܵܡܹ̈ܐ: ܒܲܪ
                ܫܵܥܬܹܗ ܡܸܬܿܕܵܘܕܼܵܐ ܦܵܪܘܿܫܘܼܬܹܗ: ܘܐܲܝܟܼ ܕܡ̣ܢ ܪܵܘܡܵܐ ܡܸܕܸܡ
                ܡܸܬܿܬܲܚܬܸܐ ܡ̣ܢ ܐܲܝܟܵܐ ܕܩܵܐܹ̇ܡ. ܘܚܲܪܤܝܘܼܬܼܵܐ ܕܚܘܼܫܵܒܼܵܘ̈ܗܝ:
                ܡܸܬܼܥܲܪܓܠܵܐ. ܘܢܲܟܼܦܘܼܬܹܗ ܙܗܝܼܬܼܵܐ: ܡܸܨܛܲܐܝܵܐ ܒܕܼܘܼܘܵܕܹܗ ܕܲܒܼܚܲܫܵܐ
                ܗܵܘ̇ ܕܢܵܨܹ̇ܦ ܒܠܸܒܵܐ: ܒܝܵܩܘܿܕܼܘܼܬܼܵܐ ܕܗܲܕܵܡܹ̈ܐ. ܘܡܸܚܕܼܵܐ ܦܸܠܓܵܐ
                ܕܚܲܝܠܹܗ ܡܸܫܬܲܦܲܠ: ܐܲܝܟܼ ܐ̄ܢܵܫ ܢܹܐܡܲܪ: ܘܲܠܢܝܼܫܹܗ ܩܲܕܼܡܵܝܵܐ
                ܕܤܲܒܼܪܹܗ ܡܸܬܼܢܫܸܐ. ܘܟܲܕܼ ܠܵܐ ܥܲܠ̣ ܠܐܵܓܼܘܿܢܵܐ: ܡܸܫܬܟܲܚ ܠܹܗ
                ܚܲܝܵܒܼܵܐ ܕܠܵܐ ܬܲܟܼܬܘܼܫܵܐ ܘܲܕܼܠܵܐ ܥܲܡܠܵܐ ܕܲܒܼܥܸܠܕܲܪܹܗ: ܘܕܲܡܚܲܝܲܒܼ
                ܬܚܹܝܬܼ ܨܸܒܼܝܵܢܵܐ ܡܫܲܦܠܵܐ ܕܦܲܓܼܪܵܐ. ܗܵܢܵܐ ܟ̱ܠܹܗ ܥܵܨܹ̇ܐ ܬܘܼܪܤܵܝܵܐ
                
                 477 
                
                ܪܲܒܵܐ ܘܤܲܒܼܥܵܐ ܐܲܡܝܼܢܵܐ: ܠܨܸܒܼܝܵܢܵܐ ܫܲܦܝܼܪܵܐ ܕܒܲܪܢܵܫܵܐ: ܕܟܲܕܼ ܡܸܬܿܕܲܒܲܪ
                ܬܲܩܢܵܐܝܼܬܼ ܒܲܠܡܹܐܢܵܐ ܕܢܲܟܼܦܘܼܬܼܵܐ: ܡܸܬܼܪܟܸܢ ܠܡܸܫܠܲܡ ܠܗܵܘ̇
                ܡܸܕܸܡ ܕܠܵܐ ܡܸܡܬܼܘܿܡ ܐܸܬܼܪܟܸܢ ܐܸܨܛܒܼܝܼ ܕܢܸܤܲܩ ܥܲܠ ܒܵܠܹܗ.
                ܘܟܲܕܼ ܕܲܡܝܲܟܼ ܒܲܠܚܘܿܕܼܵܘܗܝ: ܟܸܢܫܵܐ ܕܚܘܼ̈ܫܵܒܹܐ ܕܲܥܛܝܼܦܝܼܢ ܕܸܡ̈ܘܵܬܼܵܐ
                ܙܲܠܝܼ̈ܠܵܬܼܵܐ ܟܪܝܼܟܼܝܼܢ ܠܹܗ. ܘܲܥܒܼܝܼܕܼܵܐ ܠܗܘܿܢ ܬܸܫܘܝܼܬܹܗ ܗܵܝ̇ ܕܟܼܝܼܬܼܵܐ:
                ܒܹܝܬܼ ܚܸܙܘܹ̈ܐ ܘܦܘܼܬܿܩܵܐ ܕܙܵܢ̈ܝܵܬܼܵܐ: ܟܲܕܼ ܤܵܥܲܪ ܘܲܡܡܲܠܸܠ ܥܲܡܗܘܿܢ
                ܒܪܵܘܵܝܘܼܬܼܵܐ ܕܚܘܼ̈ܫܵܒܹܐ: ܘܲܡܛܲܢܸܦ ܠܗܲܕܵܡܵܘ̈ܗܝ ܚܤܲܝ̈ܵܐ: ܟܲܕܼ ܠܵܐ
                ܩܲܪܝܼܒܼܵܐ ܠܹܗ ܐܲܢ̄ܬܿܬܼܵܐ.
                ܐܲܝܢܵܘ ܝܲܡܵܐ ܕܗܵܟܲܢܵܐ ܡܸܫܬܓܸܫ ܘܡܸܬܿܛܲܪܛܲܥ ܡ̣ܢ ܟܝܼ̈ܡܘܿܢܹܐ:
                ܐܲܝܟܼ ܡܵܐ ܕܡܸܫܬܿܓܸܫ ܗܵܘܢܵܐ ܬܲܩܢܵܐ ܒܥܘܼܫܢܵܐ ܕܓܲܠܠܹ̈ܐ
                ܕܡܸܬܿܬܥܝܼܪܝܼܢ ܥܠܵܘܗܝ ܒܝܲܡܵܐ ܕܓܘܼܫܡܹܗ: ܡ̣ܢ ܡܲܠܝܘܼܬܼܵܗ̇
                ܕܟܲܪܤܵܐ؟ ܐܘܿ ܢܲܟܼܦܘܼܬܼܵܐ: ܟܡܵܐ ܡܸܙܕܲܗܸܐ ܫܘܼܦܪܹܟܼܝ ܒܡܲܕܼܡܟܼܵܐ
                ܕܥܲܠ ܐܲܪܥܵܐ ܘܚܲܫܵܐ ܕܟܲܦܢܵܐ: ܕܦܵܪܕܵܐ ܡܸܢܵܗ̇ ܫܸܢܬܼܵܐ ܡ̣ܢ ܢܵܚܘܿܒܼܘܼܬܼܵܐ
                ܕܦܲܓܼܪܵܐ ܘܤܲܦܝܼܩܘܼܬܼܵܐ ܕܟܲܪܤܵܐ: ܕܲܥܒܼܝܼܕܼܵܐ ܓܘܼܒܵܐ ܥܲܡܝܼܩܵܐ ܒܹܝܬܼ
                ܐܸܠܥܹ̈ܐ ܠܲܡ̈ܥܲܝܵܐ: ܡܸܛܠ ܚܤܝܼܟܼܘܼܬܼܵܗ̇ ܕܤܲܝܒܵܪܬܵܐ! ܥܲܠ ܡܹܐܟܼܘܼܠܬܼܵܐ
                ܕܹܝܢ ܘܲܢܝܵܚܵܐ ܕܡܸܬܼܢܲܤܒܝܼܢ ܠܓܼܵܘ ܡܸܢܲܢ: ܕܸܡ݁̈ܘܵܬܼܵܐ ܤܲܢ̈ܝܵܬܼܵܐ ܘܨܲܠܡܹ̈ܐ
                ܡܫܲܟܿܪܹ̈ܐ ܡܸܬܼܓܲܒܼܠܝܼܢ ܘܗܵܘܹ̇ܝܢ ܡܸܢܗܘܿܢ. ܘܢܵܦ̇ܩܝܼܢ ܡܸܬܼܚܵܘܹܝܢ ܠܲܢ
                ܒܐܲܬܼܪܵܐ ܟܲܤܝܵܐ ܕܪܸܥܝܵܢܲܢ: ܘܲܡܓܲܪܓܼܝܼܢ ܠܲܢ ܠܫܵܘܬܵܦܘܼܬܼܵܐ
                ܕܥܲܡܗܘܿܢ ܟܲܤܝܵܐܝܼܬܼ ܒܤܘܼܥܪܵܢܹܐ ܨܲܚܢܹ̈ܐ: ܤܘܼܦܵܩܵܗ̇ ܕܹܝܢ
                ܕܟܲܪܤܵܐ: ܐܲܬܼܪܵܐ ܨܲܕܼܝܵܐ ܥܵܒܹ̇ܕܼ ܠܵܗ̇ ܠܬܲܪܥܝܼܬܼܵܐ: ܕܲܨܕܹܐ ܡ̣ܢ ܚܘܼ̈ܫܵܒܹܐ:
                ܘܲܫܠܸܐ ܡ̣ܢ ܟ̱ܠܹܗ ܪܵܘܒܵܐ ܕܡܲܚܫ̈ܒܼܵܬܼܵܐ. ܗܵܝ̇ ܕܹܝܢ ܕܡܲܠܝܵܐ ܘܤܲܒܿܝܼܥܵܐ:
                ܐܲܬܼܪܵܐ ܕܚܸܙ̈ܘܵܢܹܐ ܘܬܹܐܛܪܘܿܢ ܥܵܒܹܕܼ ܠܵܗ̇: ܘܐܵܦܸܢ ܒܚܘܼܪܒܵܐ
                
                 478 
                
                ܘܒܲܠܚܘܿܕܲܝܢ ܐܲܝܼܬܲܝܢ. ܤܲܒܼܥܵܐ ܠܲܡ: ܤܲܓܝܼ̈ܐܵܬܼܵܐ ܪܵܐܹܓܼ. ܕܲܫ̣ܘܲܝܬܿ
                ܒܛܝܼܒܿܘܼܬܼܵܐ ܐܲܠܵܗܵܝܵܬܐ ܠܠܵܐ ܚܵܫܘܿܫܘܼܬܼܵܐ ܕܢܲܦܫܵܐ ܬܸܤܬܲܟܲܠ: ܠܵܘ
                ܡ̣ܢ ܗܵܝ̇ ܕܠܵܐ ܢܸܥܒܿܪܘܼܢ ܒܵܟܼ ܚܘܼ̈ܫܵܒܹܐ ܤܢܲܝ̈ܵܐ: ܐܵܘ ܟܹܝܬܼ ܪܦܵܬܼܵܐ
                ܕܙܵܘ̈ܥܹܐ ܕܲܒܼܓܼܘܼܫܡܵܐ: ܕܠܵܐ ܡܲܨܝܵܐ. ܐܵܦܠܵܐ ܡ̣ܢ ܗܵܝ̇ ܕܙܵܟܹ̇ܐ ܐܲܢ̄ܬܿ
                ܠܗܘܿܢ ܦܫܝܼܩܵܐܝܼܬܼ: ܟܲܕܼ ܟܠ ܟ̱ܠܹܗ ܠܵܐ ܡܸܬܿܛܲܡܲܐ ܪܸܥܝܵܢܵܐ ܐܵܘ
                ܡܸܫܬܿܓܸܫ: ܐܵܦܸܢ ܪܲܒܲܬܼ ܡܥܲܠܝܵܐ ܗܵܕܹܐ. ܐܸܠܵܐ ܡ̣ܢ ܗܵܝ̇ ܕܡ̣ܢ
                ܦܘܼܠܚܵܢܵܐ ܡܝܲܬܪܵܐ ܕܡܲܕܥܵܐ: ܐܵܦܠܵܐ ܡܸܫܬܒܸܩ ܗܵܘܢܵܐ ܕܢܲܩܪܸܒܼ
                ܥܲܡܗܘܿܢ ܘܲܢܤܝܼܦ ܐܸܢܘܿܢ. ܐܸܠܵܐ ܡܵܐ ܕܐܲܕܼܝܼܩ̣ܘ ܚܘܼ̈ܫܵܒܹܐ: ܡܸܬܚܛܵܦܘܼ
                ܡܸܬܼܚܛܸܦ ܡ̣ܢ ܨܹܐܕܲܝܗܘܿܢ: ܒܲܩܛܝܼܪܵܐ ܕܡܸܕܸܡ ܕܲܠܒܲܪ ܡ̣ܢ
                ܨܸܒܼܝܵܢܵܐ: ܕܡ̣ܢ ܥܝܵܕܼܵܐ ܘܡ̣ܢ ܛܲܝܒܿܘܼܬܼܵܐ ܠܒܼܝܼܟܼ ܚܡܝܼܪܵܐ ܒܓܼܵܘ
                ܠܸܒܵܐ: ܕܐܝܼܬܼܵܘܗܝ ܒܲܝܬܹܗ ܕܡܲܕܿܥܵܐ. ܐ̄ܚܪܹܢܵܐ ܗ̄ܘ̣ ܗܵܘܢܵܐ
                ܐܵܓܼܘܿܢܸܤܛܵܐ: ܘܲܐ̄ܚܪܹܢܵܐ ܗ̄ܘ̣ ܛܲܟܼܤܵܐ ܕܟܼܵܗܢܘܼܬܼܵܐ. ܪܸܥܝܵܢܵܐ
                ܕܲܒܼܪ̈ܲܚܡܹܐ ܫܡܲܝܵܢܹ̈ܐ ܡܝܼܬܼ ܠܥܵܠܡܵܐ: ܚܘܼ̈ܫܵܒܹܐ ܒܲܠܚܘܿܕܼ ܫܚܝܼ̈ܡܹܐ
                ܗܵܘܹ̇ܝܢ ܠܘܵܬܹܗ ܥܲܠ ܨܸܒܼ̈ܘܵܬܼܵܐ: ܕܠܵܐ ܬܲܟܼܬܘܼܫܵܐ ܕܐܵܓܼܘܿܢܵܐ. ܘܐܸܢ
                ܡ̣ܢ ܙܵܘܥܵܐ ܕܗܲܕܵܡܹ̈ܐ: ܡܲܪܓܫܵܢܘܼܬܼܵܐ ܕܠܵܐ ܕܡܘܼܬܼܵܐ. ܓܡܝܼܪܘܼܬܼܵܐ
                ܕܥܲܡ ܒܸܤܪܵܐ ܘܲܕܼܡܵܐ ܟܕܼܝܼܢܵܐ: ܡܲܡܠܵܟܼܘܼ ܡܲܡܠܟܼܵܐ ܥܲܠ ܐܲܝܠܹܝܢ
                ܕܡ̣ܢ ܒܸܤܪܵܐ ܘܲܕܼܡܵܐ ܢܵܒܼ̇ܥܝܼܢ: ܘܠܵܘ ܡܒܲܛܵܠܘܼ ܡܒܲܛܠܵܐ ܠܗܹܝܢ
                ܠܕܼܝܼ̈ܠܵܝܵܬܹܗ ܕܲܟܼܝܵܢܵܐ: ܟܲܕܼ ܥܕܲܟܹܝܠ ܒܚܲܝܹ̈ܐ ܕܡ̣ܢ ܐܸܤܛܘܼ̈ܟܼܤܹܐ ܪܵܦܹ̇ܬܼ
                ܙܵܘܥܵܐ ܕܚܲܝܘܼܬܹܗ: ܘܡ̣ܢ ܐܲܪܒܿܥܵܐ ܟܘܼ̈ܡܘܿ ܫܲܬܼܐܸܤܬܼܵܐ ܕܲܗܘܵܝܹܗ
                ܢܵܤܹ̇ܒܼ ܫܘܼ̈ܚܠܵܦܹܗ ܒܟܼܠ ܪ̈ܦܵܦܝܼܢ.