Isaac of Nineveh. “Discourse 69.” Based upon Digital Syriac Corpus. Last modified March 5, 2019. https://syriaccorpus.org/460.
    
        
            
                 479 
                ܕܐܲܝܟܲܢ ܙܵܕܹܩ ܠܦܵܪ̈ܘܿܫܹܐ ܠܡܸܬܲܒܼ ܒܫܸܠܝܵܐ. ܤܛ.
            
            
                ܫܡܲܥ ܚܲܒܿܝܼܒܼܝ: ܠܡܸܕܸܡ ܕܐܵܡܲ݁ܪ ܠܵܟܼ ܚܘܼܒܲܢ. ܐܸܢ ܒܵܥܹ̇ܐ ܐܲܢ̄ܬܿ
                ܕܠܵܐ ܢܸܗܘܘܿܢ ܥܲܡ̈ܠܲܝܟ ܤܪ̈ܝܼܩܹܐ ܘܝܵܘܡܲܝ̈ܟ ܒܲܛܝܼ̈ܠܹܐ: ܘܲܓܼܠܝܼܙ
                ܡ̣ܢ ܝܘܼܬܼܪܵܢܵܐ ܕܡܸܤܬܲܟܸܐ ܠܦܵܪ̈ܘܿܫܹܐ ܒܕܼܘܼܒܵܪܵܐ ܕܫܲܠܝܘܼܬܼܵܐ:
                ܡܲܥܲܠܬܵܟܼ ܕܲܠܫܸܠܝܵܐ ܒܦܘܼܪܫܵܢܵܐ: ܘܠܵܐ ܗ̄ܘ̣ܵܐ ܒܝܘܼܒܵܠܵܐ ܕܲܙܢܵܐ
                ܬܸܗܘܸܐ ܐܲܝܟܼ ܤܲܓܝܼ̈ܐܹܐ. ܐܸܠܵܐ ܢܸܗܘܸܐ ܢܝܼܫܵܐ ܤܝܼܡ ܠܪܸܥܝܵܢܵܟܼ:
                ܕܲܠܘܲܥܕܹܗ ܢܸܗܘܸܐ ܬܵܪܹܨ ܠܥܲܡ̈ܠܹܐ ܕܕܼܘܼܒܵܪ̈ܵܘܗܝ. ܘܫܲܐܸܠ: ܠܐܲܝܠܹܝܢ
                ܕܫܲܦܝܼܪ ܡܦܵܤܝܼܢ. ܡ̣ܢ ܢܸܤܝܵܢܵܐ: ܘܠܵܐ ܗ̄ܘ̣ܵܐ ܡ̣ܢ ܩܸܪܝܵܢܵܐ ܒܲܠܚܘܿܕܼ.
                ܘܐܸܬܿܕܲܪܲܫ: ܒܟܼܠܗܘܿܢ ܦܘܼܪ̈ܫܵܢܹܐ ܬܡܝܼ̈ܗܹܐ ܘܚܹܐܪ̈ܵܝܹܐ ܕܫܸܠܝܵܐ. ܘܠܵܐ
                ܬܢܘܼܚ: ܥܕܲܡܵܐ ܕܬܸܬܼܢܲܦܲܩ ܒܟܼܠܗܘܿܢ ܫܒܼܝܼ̈ܠܹܐ ܕܦܘܼܠܚܵܢܵܘ̈ܗܝ.
                ܘܟܼܠ ܦܤܵܥܬܼܵܐ ܕܤܵܐܹ̇ܡ ܐܲܢ̄ܬܿ: ܗ̤ܘܲܝܬܿ ܡܥܲܩܸܒܼ ܐܲܢ̄ܬܿ ܐܸܢܗ̤ܘ
                ܕܒܼܐܘܼܪܚܵܐ ܪܵܕܹܐ ܐܲܢ̄ܬܿ: ܐܵܘ ܠܒܲܪ ܡܸܢܵܗ̇ ܤ̣ܛܲܝܬܿ ܒܚܲܕܼ ܡ̣ܢ
                ܫܒܼܝܼ̈ܠܹܐ ܕܲܠܬܼܵܘܫܵܐ ܡܝܲܒܸܿܠ. ܘܠܵܐ ܬܗܲܝܡܸܢ: ܕܡ̣ܢ ܥܲܡ̈ܠܹܐ
                ܒܲܠܚܘܿܕܼ ܓܠܲܝ̈ܵܐ ܡܸܬܼܓܡܲܪ ܕܘܼܒܵܪܵܐ ܚܲܬܝܼܬܼܵܐ ܕܫܸܠܝܵܐ. ܐܸܢܗ̤ܘ
                ܕܲܠܡܸܕܸܡ ܕܐܸܫܟܲܚܘ ܐܲܒܼܵܗܲܝ̈ܢ ܨܵܒܹ̇ܐ ܐܲܢ̄ܬܿ ܠܡܲܕܼܪܵܟܼܘܼ ܒܢܸܤܝܵܢܵܐ
                ܒܲܩܢܘܿܡܵܟܼ: ܢܸܗܘܘܿܢ ܠܵܟܼ ܝܲܕܼܥܹ̈ܐ ܘܐܵܬܼ̈ܘܵܬܼܵܐ ܟܲܤܝܵܐܝܼܬܼ ܒܢܲܦܫܵܟܼ
                ܒܟܼܠ ܦܤܵܥܬܼܵܐ ܕܤܵܐܹ̇ܡ ܐܲܢ̄ܬܿ: ܕܡܸܢܗܘܿܢ ܡܸܫܬܵܘܕܲܥ ܐܲܢ̄ܬܿ ܫܪܵܪܵܐ
                ܕܐܲܒܼܵܗܲܝ̈ܢ ܐܵܘ ܛܵܥܝܘܼܬܹܗ ܕܤܵܛܵܢܵܐ. ܙܥܘܿܪ̈ܝܵܬܼܵܐ ܕܹܝܢ ܡܸܢܗܘܿܢ
                ܐܲܝܟܼ ܕܬܸܬܼܚܲܟܲܡ ܒܐܘܼܪܚܵܟܼ: ܐܝܼܬܲܝܗܹܝܢ ܗܵܠܹܝܢ.
                
                 480 
                
                ܐܸܡܲܬܼܝ ܕܒܲܗܘܵܝܵܟܼ ܕܲܒܼܫܸܠܝܵܐ: ܬܸܚܙܸܐ ܪܸܥܝܵܢܵܟܼ ܕܡܸܫܟܲܚ
                ܚܹܐܪܵܐܝܼܬܼ ܠܡܸܬܼܚܲܫܵܚܘܼ ܒܙܵܘܥܵܘ̈ܗܝ ܒܲܕܼܝܲܡܝܼܢܵܐ: ܘܠܲܝܬܿ ܥܸܨܝܵܢܵܐ
                ܒܲܡܫܲܠܛܘܼܬܹܗ ܥܲܠ ܚܲܕܼ ܡܸܢܗܘܿܢ: ܕܲܥ ܕܫܸܠܝܵܟܼ ܬܪܝܼܨܵܐ ܗ̄ܘ̣.
                ܘܐܸܢܗ̤ܘ ܬܘܼܒܼ ܕܟܲܕܼ ܡܫܲܡܸܫ ܐܲܢ̄ܬܿ ܒܦܘܼܪܫܵܢܵܐ ܬܸܫܡܸܫܬܵܟܼ ܠܒܲܪ
                ܡ̣ܢ ܦܸܗܝܵܐ ܟܡܵܐ ܕܡܲܨܝܵܐ: ܡܸܢܫܹܠܝ ܡܸܬܼܦܤܸܩ ܦܸܬܼܓܼܵܡܵܐ ܡ̣ܢ
                ܠܸܫܵܢܵܟܼ: ܘܪܵܡܹ̇ܐ ܥܲܠ ܢܲܜܫܵܟܼ ܤܘܼ̈ܛܡܹܐ ܕܫܸܬܼܩܵܐ ܕܲܠܒܲܪ ܡ̣ܢ
                ܚܹܐܪܘܼܬܼܵܐ: ܘܗ̤ܝ ܗܵܕܹܐ ܢܵܩ̇ܦܵܐ ܠܐܲܡܝܼܢܘܼܬܼܵܐ: ܕܲܥ: ܕܠܲܩܕܼܵܡܲܝܟ
                ܐܵܬܹ̇ܐ ܐܲܢ̄ܬܿ ܒܫܸܠܝܵܟܼ: ܘܫܲܪܝܲܬ̤ ܡܸܬܼܥܲܦܦܵܐ ܦܫܝܼܛܘܼܬܹܗ. ܫܸܠܝܵܐ ܓܹܝܪ
                ܦܫܝܼܛܵܐ ܒܹܝܬܼ ܟܹܐܢܘܼܬܼܵܐ: ܡܲܤܠܝܵܐ ܐܝܼܬܼܵܘܗܝ. ܘܟܼܠ ܕܘܼܒܵܪܵܐ
                ܦܫܝܼܛܵܐ: ܐܲܝܟܼ ܗܲܕܵܡܵܐ ܝܑܼܚܝܼܕܼܵܝܵܐ ܡܫܵܘܚܲܕܼ ܡ̣ܢ ܐܝܼܠܵܐ ܚܫܝܼܒܼ ܒܹܝܬܼ
                ܚܲܟܿܝܼ̈ܡܹܐ ܕܦܘܼܪܫܵܢܵܐ. ܘܐܸܢܗ̤ܘ ܬܘܼܒܼ ܕܬܸܚܙܸܐ ܢܲܦܫܵܟܼ: ܕܲܒܼܟܼܠ
                ܚܲܘܼܫܵܒܼ ܕܡܸܬܿܬܿܙܝܼܥ ܒܵܗ̇: ܒܟܼܠ ܥܘܼܗܕܵܢ ܘܚܸܙ̈ܘܝܼܢ ܕܲܒܼܫܸܠܝܵܐ:
                ܡܸܬܼܡܲܠ̈ܝܵܢ ܚܵܕܼܪ̈ܵܬܼܵܐ ܕܥܲܝܢܲܝ̈ܟ ܕܸܡ̈ܥܹܐ: ܘܡܲܡܛܲܪ ܐܲܢ̄ܬܿ ܠܦܟܲܝ̈ܟ
                ܡܸܢܗܹܝܢ ܕܠܵܐ ܥܸܨܝܵܢ: ܕܲܥ: ܕܫܲܪܝܲܬ̤ ܠܡܸܗܘܵܐ ܩܕܼܵܡܲܝܟ ܬܘܼܪܥܬܼܵܐ
                ܒܡܲܫܪܝܼܬܼܵܐ ܕܕܲܠܩܘܼܒܼܠܵܐ. ܘܐܸܢܗ̤ܘ ܕܡܸܫܟܲܚ ܐܲܢ̄ܬܿ ܠܵܟܼ: ܕܒܲܙܒܲܢ
                ܙܒܲܢ ܥܵܡܹ̇ܕܼ ܪܸܥܝܵܢܵܟܼ ܠܓܼܵܘ ܡܸܢܵܟܼ ܕܠܵܐ ܒܛܝܼܠܘܼܬܼܵܐ ܕܲܥܠܵܘܗܝ
                ܠܒܲܪ ܡ̣ܢ ܛܲܟܼܤܵܐ ܕܲܥܝܵܕܼܵܐ: ܘܲܡܩܵܘܸܐ ܡܢܵܬܼܵܐ ܡ̣ܢ ܫܵܥܬܼܵܐ ܘܲܟܼܡܵܐ
                ܕܗܘ: ܘܒܼܵܬܲܪ ܗܵܝܕܹܝܟ ܚܵܙܹ̇ܐ ܐܲܢ̄ܬܿ ܠܗܲܕܵܡܲܝ̈ܟ ܐܲܝܟܼ ܡ̇ܢ
                ܕܐܝܼܬܲܝܗܘܿܢ ܒܲܡܚܝܼܠܘܼܬܼܵܐ ܤܲܓܝܼܐܬܼܵܐ: ܘܡܲܡܠܸܟܼ ܫܲܝܢܵܐ ܥܲܠ
                ܟܠܗܘܿܢ ܚܘܼܫܵܒܲܝ̈ܟ: ܘܗ̤ܝ ܟܲܕܼ ܗ̤ܝ ܐܲܡܝܼܢܵܐܝܼܬܼ: ܕܲܥ: ܕܫܲܪܝܲܬ̤
                ܥܢܵܢܵܐ ܡܲܓܿܢܵܐ ܥܲܠ ܡܲܫܟܿܢܵܐ. ܐܸܢ ܕܹܝܢ ܙܲܒܼܢܵܐ ܬܸܥܒܸܿܕܼ ܒܫܸܠܝܵܐ:
                ܬܸܫܟܲܚ ܢܲܦܫܵܟܼ ܕܚܘܼ̈ܫܵܒܹܐ ܤܵܕܼܘܿܩܹ̈ܐ ܡܫܲܠܛܝܼܢ ܥܠܹܝܗ̇: ܘܐܲܝܟܼ
                
                 481 
                
                ܕܒܲܩܛܝܼܪܵܐ ܡܸܬܿܕܲܒܼܪܵܐ ܡܸܢܗܘܿܢ ܒܟܼܠܫܵܥ: ܘܲܢܓܼܝܼܕܼ ܪܸܥܝܵܢܵܗ̇
                ܒܟܼܠܙܒܲܢ ܒܐܲܝܠܹܝܢ ܕܐܸܫܬܲܡܲܫ ܡ̣ܢ ܟܲܕܘܼ: ܐܵܘܟܹܝܬܼ ܪܓܼܝܼܓܼܵܐ
                ܠܥܘܼܩܵܒܹ̈ܐ ܤܪ̈ܝܼܩܹܐ: ܕܲܥ: ܕܲܤܪܝܼܩܵܐܝܼܬܼ ܬܵܥܹ̇ܫ ܐܲܢ̄ܬܿ ܒܫܸܠܝܵܐ:
                ܘܲܒܼܦܸܗܝܵܐ ܡܫܲܚܛܵܐ ܢܲܦܫܵܟܼ. ܘܐܝܼܬܲܝܗܹܝܢ ܠܵܗ̇ ܥܸܠ̈ܠܠܵܬܼܵܐ ܡ̣ܢ ܠܒܲܪ:
                ܐܵܘ ܡܲܗܡܝܵܢܘܼܬܼܵܐ ܕܘܵܠ̈ܝܵܬܼܵܐ ܕܲܠܓܼܵܘ. ܡܵܠܘܿܢ ܕܹܝܢ: ܕܫܲܗܪܵܐ
                ܘܲܕܼܩܸܪܝܵܢܵܐ. ܘܬܲܪܸܨ ܘܐܲܬܼܩܸܢ ܨܒܼܘܼܬܼܵܟܼ. ܐܸܢ ܕܹܝܢ ܡܸܚܕܼܵܐ ܕܥܵܐܹ̇ܠ
                ܐܲܢ̄ܬܿ ܒܗܘܿܢ ܒܝܵܘ̈ܡܵܬܼܵܐ: ܠܵܐ ܡܸܫܟܲܚ ܐܲܢ̄ܬܿ ܫܲܝܢܵܐ ܕܡ̣ܢ ܠܸܙܬܼܵܐ
                ܕܚܲܫܹ̈ܐ: ܠܵܐ ܬܸܬܿܕܲܡܲܪ.
                ܐܸܢ ܕܹܝܢ ܥܘܼܒܹܗ ܕܥܵܠܡܵܐ ܕܲܥܢܲܕܼܘ ܡܸܢܹܗ ܙܲܠܝܼܩܵܘ̈ܗܝ
                ܕܫܸܡܫܵܐ: ܒܵܬܲܪ ܛܵܘܪܵܐ ܤܲܓܝܼܐܵܐ ܡܩܵܘܝܵܐ ܒܹܗ ܫܲܚܝܼܢܘܼܬܼܗܘܿܢ.
                ܘܪܹܚܵܐ ܬܘܼܒܼ ܕܤܲܡ̈ܡܵܢܹܐ ܘܥܸܛܪܵܐ ܕܒܸܤܡܹ̈ܐ ܕܡܸܬܼܐܫܸܕܼ ܒܐܵܐܲܪ:
                ܥܸܕܵܢܵܐ ܤܲܓܝܼܐܵܐ ܡܩܵܘܸܐ ܥܲܕܼ ܢܸܬܼܦܲܠܗܲܕܼ ܘܢܸܦܟܲܗ: ܟܡܵܐ ܝܲܬܝܼܪܵܐܝܼܬܼ
                ܚܲܫܹ̈ܐ ܕܒܲܕܼܡܘܼܬܼ ܟܲܠܒܹ̈ܐ ܠܘܵܬܼ ܛܲܒܵܚܵܐ ܐܸܬܼܥܲܝܲܕܼܘ ܠܡܸܠܲܥ ܕܡܵܐ:
                ܟܲܕܼ ܢܸܬܼܚܲܤܟܿܘܼܢ ܡܸܢܗܘܿܢ ܡܠܘܿܐܹ̈ܐ ܕܲܥܝܵܕܼܗܘܿܢ: ܢܩܘܼܡܘܼܢ ܥܲܠ
                ܬܲܪܥܵܐ ܟܲܕܼ ܢܵܒܼܚ̇ܝܼܢ: ܥܲܕܼ ܢܸܬܼܦܲܠܗܲܕܼ ܚܲܝܠܵܐ ܕܲܥܝܵܕܼܗܘܿܢ ܩܲܕܼܡܵܝܵܐ.
                ܐܸܡܲܬܼܝ ܕܫܲܪܝܲܬ̤ ܠܵܗ̇ ܡܲܗܡܝܵܢܘܼܬܼܵܐ ܚܵܠܕܵܐ ܒܢܲܦܫܵܟܼ ܡܓܲܢܒܼܵܐܝܼܬܼ:
                ܘܲܠܒܸܤܬܿܪܵܐ ܠܡܸܥܛܲܦ ܒܥܲܡܛܵܢܵܐ: ܘܩܲܪܝܼܒܼ ܒܲܝܬܼܵܐ ܚܸܫܟܵܐ
                ܕܢܸܬܼܡܠܸܐ: ܗܵܠܹܝܢ ܝܲܕܼܥܹ̈ܐ ܩܲܪ̈ܝܼܒܹܐ ܒܲܩܢܘܿܡܵܟܼ ܡܲܪܓܸܫ ܐܲܢ̄ܬܿ
                ܟܲܤܝܵܐܝܼܬܼ. ܒܗܲܝܡܵܢܘܼܬܼܵܟܼ: ܬܸܬܼܡܚܸܠ. ܘܲܒܼܡܸܬܼܚܲܙܝܵܢ̈ܝܬܼܵܐ: ܬܸܬܼܝܲܥܲܢ.
                ܘܬܼܘܼܟܼܠܵܢܵܟܼ: ܢܸܬܼܒܲܨܲܪ. ܘܲܒܼܩܲܪܝܼܒܼܵܟܼ: ܬܸܚܤܲܪ. ܘܡܼܠܵܗ̇ ܢܲܦܫܵܟܼ:
                ܗܘ̤ܵܬܼ ܡܲܠܝܵܐ ܥܸܕܼܠܵܝܵܐ ܒܦܘܼܡܵܐ ܘܲܒܼܠܸܒܵܐ: ܥܲܠ ܟܠܒܲܪܢܵܫ ܘܲܨܒܼܘܼ
                
                 482 
                
                ܘܫܲܪ̈ܒܿܝܼܢ ܕܲܒܼܗܘܿܢ ܬܸܦܓܲܥ ܒܚܘܼ̈ܫܵܒܹܐ ܘܲܒܼܪܸ̈ܓܼܫܹܐ: ܘܐܵܦ ܥܠܵܘܗܝ
                ܕܝܼܠܹܗ ܕܲܡܪܲܝܡܵܐ. ܘܬܸܕܚܲܠ ܡ̣ܢ ܤܓܼܝܼܦܘܼܬܹܗ ܕܦܲܓܼܪܵܐ: ܗܵܝ̇
                ܕܡܸܛܠܵܬܼܵܗ̇ ܙܥܘܿܪܘܼܬܼ ܢܲܦܫܵܐ ܗܘ̤ܵܬܼ ܡܫܲܠܛܵܐ ܒܵܟܼ ܠܟܼܠܥܸܕܵܢ.
                ܘܒܲܙܒܲܢ ܙܒܲܢ: ܬܸܬܿܙܝܼܥ ܢܲܦܫܵܟܼ ܒܕܼܚܠܬܼܵܐ: ܐܲܝܟܼ ܕܡ̣ܢ ܛܸܠܵܢܝܼܬܵܟܼ
                ܬܸܤܬܲܪܲܕܼ ܘܬܸܬܼܪܗܸܒܼ. ܗܲܝܡܵܢܘܼܬܼܵܐ ܓܹܝܪ: ܠܵܘ ܠܗܵܝ̇ ܕܐܝܼܬܹܝܗ̇
                ܫܲܬܼܐܸܤܬܼܵܐ ܕܬܼܵܘܕܼܝܼܬܼܵܐ ܕܓܼܵܘܵܐ ܐܵܡܲ݁ܪ ܐ̄ܢܵܐ: ܐܸܠܵܐ ܠܚܲܝܠܵܐ ܗܵܘ̇
                ܡܸܬܼܝܲܕܼܥܵܢܵܐ ܕܲܒܼܢܘܼܗܪܵܐ ܕܪܸܥܝܵܢܵܐ ܤܵܡܹ̇ܟܼ ܠܠܸܒܵܐ: ܘܲܒܼܤܵܗܕܘܼܬܼܵܐ
                ܕܬܹܐܪܬܵܐ ܡܙܝܼܥ ܒܢܲܦܫܵܐ ܬܘܼܟܼܠܵܢܵܐ ܤܲܓܝܼܐܵܐ ܕܥܲܠ ܐܲܠܵܗܵܐ.
                ܕܠܵܐ ܗ̄ܘ̣ܵܐ ܗ̤ܝ ܬܹܐܨܲܦ ܕܲܩܢܘܿܡܵܗ̇: ܐܸܠܵܐ ܥܲܠ ܐܲܠܵܗܵܐ ܗܘ̤ܵܬܼ
                ܫܵܕܼܝܵܐ ܨܸܦܬܼܵܗ̇ ܕܠܵܐ ܡܲܪܢܝܼܬܼܵܐ ܒܟܼܠ.
                ܟܲܕܼ ܬܘܼܒܼ ܠܲܩܕܵܡܲܝܟ ܬܹܐܬܸܐ ܡܸܬܼܝܲܕܼܥܵܢܵܐܝܼܬܼ: ܐܵܦ ܗܵܪܟܵܐ
                ܗܵܠܹܝܢ ܐܵܬܼ̈ܘܵܬܼܵܐ ܒܲܗܘܼܪ̈ܵܬܼܵܐ: ܩܲܪܒܼܒܼܵܐܝܼܬܼ ܒܢܲܦܫܵܟܼ ܬܲܪܓܸܫ. ܒܤܲܒܼܪܵܐ
                ܬܸܬܼܓܲܒܲܪ: ܒܟܼܠܡܸܕܸܡ. ܘܒܲܨܠܘܿܬܼܵܐ: ܬܸܥܬܲܪ. ܘܠܵܐ ܢܸܚܤܲܪ
                ܡܠܘܿܐܵܐ ܕܝܘܼܬܼܪܵܢܵܐ ܡ̣ܢ ܪܸܥܝܵܢܵܟܼ ܒܐܲܡܝܼܢܘܼ ܒܟܼܠܡܸܕܸܡ ܕܬܸܦܓܲܥ:
                ܘܬܲܪܓܸܫ ܒܲܡܚܝܼܠܘܼܬܼܵܐ ܕܲܟܼܝܵܢܵܐ ܐ̄ܢܵܫܵܝܵܐ. ܕܡ̣ܢ ܚܲܕܼ ܓܲܒܵܐ ܡܸܢܵܗ̇
                ܕܗܵܕܹܐ: ܡ̣ܢ ܪܵܡܘܼܬܼܵܐ ܬܸܬܼܢܛܲܪ. ܒܓܲܒܵܐ ܕܹܝܢ ܐ̄ܚܪܹܢܵܐ: ܒܘܼܨܵܪܹ̈ܐ
                ܕܩܲܪܝܼܒܼܵܟܼ ܢܸܬܼܒܿܤܘܿܢ ܒܥܲܝܢܲܝ̈ܟ. ܘܲܗܘ̤ܵܬܼ ܕܹܝܢ ܪܓܼܝܼܓܼܵܐ ܠܵܟܼ
                ܡܲܦܲܩܬܼܵܐ ܕܡ̣ܢ ܦܲܓܼܪܵܐ: ܒܪܸܓܬܼܵܐ ܕܩܲܪܝܼܒܼܘܼܬܼܵܐ ܕܐܲܝܠܹܝܢ ܕܲܒܼܗܹܝܢ
                ܥܬܼܝܼܕܼܝܼܢܲܢ ܕܢܸܗܘܸܐ. ܘܲܠܟܼܠ ܓܸܕܼܫ̈ܝܼܢ ܕܲܡܥܝܼܩܵܢܝܵܬܼܵܐ ܕܥܵܪ̈ܨܵܢ
                ܨܹܐܕܲܝܟ ܒܓܸܠܝܵܐ ܘܲܒܼܟܸܤܝܵܐ: ܒܟܹܐܢܘܼܬܼܵܐ ܬܸܫܟܲܚ ܕܐܝܼܬܲܝܗܹܝܢ ܠܘܵܬܼܵܟܼ
                ܟܠܗܹܝܢ: ܒܟܼܠܵܗ̇ ܚܲܬܝܼܬܼܘܼܬܼܵܐ ܕܪܲܚܝܼܩܵܐ ܡ̣ܢ ܡܲܤܒܿܪܵܢܘܼܬܼܵܐ. ܘܥܲܠ
                
                 483 
                
                ܟܠ ܡܸܕܸܡ: ܬܵܘܕܝܼܬܼܵܐ ܬܲܤܪܲܚ. ܗܵܠܹܝܢ ܐܵܬܼ̈ܘܵܬܼܵܐ ܠܲܙܗܝܼܪܹ̈ܐ:
                ܘܠܲܐܝܠܹܝܢ ܕܲܒܼܫܸܠܝܵܐ ܐܲܡܝܼܢܝܼܢ: ܘܠܲܚܲܬܝܼܬܼܘܼܬܼܵܐ ܕܕܼܘܼܒܵܪܹ̈ܐ ܨܵܒܹ̇ܝܢ
                ܕܢܸܡܛܘܿܢ. ܪ̈ܦܲܝܵܐ ܕܹܝܢ: ܠܵܐ ܤܢܝܼܩܝܼܢ ܥܲܠ ܝܲܕܼܥܹ̈ܐ ܩܲܛܝܼ̈ܢܹܐ
                ܘܲܟܼܡܹܐܢܹ̈ܐ ܕܡܲܦ̈ܠܵܬܼܵܐ. ܕܐܵܦ ܡ̣ܢ ܡܝܲܬܿܪ̈ܵܬܼܵܐ ܕܟܲܤ̈ܝܵܢ: ܪܲܚܝܼܩܝܼܢ.
                ܐܸܡܼܲܬܼܝ ܕܲܚܕܵܐ ܡ̣ܢ ܗܵܠܹܝܢ ܫܲܪܝܲܬ̤ ܠܲܡܕܼܵܩܘܼ ܒܢܲܦܫܵܟܼ: ܐܸܢܒܲܝܲܢ
                ܒܲܪ ܫܵܥܬܹܗ: ܠܐܲܝܢܵܐ ܓܲܒܵܐ ܫܲܪܝܲܬ̤ ܠܡܸܨܠܵܐ: ܡܸܚܕܼܵܐ ܓܹܝܪ
                ܡܸܫܬܵܘܕܲܥ ܐܲܢ̄ܬܿ ܡ̣ܢ ܐܲܝܕܵܐ ܤܝܼܥܬܼܵܐ ܗ̣̄ܝ.