Isaac of Nineveh. “Discourse 70.” Based upon Digital Syriac Corpus. Last modified March 5, 2019. https://syriaccorpus.org/461.
    
        
            
                ܥܲܠ ܗܵܝ̇ ܕܲܡܫܘܼܚܬܼܵܐ ܕܕܼܘܼܒܵܪܲܢ: ܡ̣ܢ ܫܘܼܚ̈ܠܵܦܹܐ ܕܪܸܥܝܵܢܲܢ ܢܸܤܬܲܟܲܠ.
                ܘܥܲܠ ܤܲܓܝܼܐܘܼܬܼ ܦܘܼܪ̈ܫܵܢܹܐ ܒܲܠܚܘܿܕܼ ܕܥܲܡ̈ܠܲܝܢ ܠܵܐ ܢܸܤܬܿܡܸܟܼ
                ܫܲܒܼܪܵܐܝܼܬܼ: ܐܸܠܵܐ ܡܫܘܼܚܬܼܵܐ ܕܢܲܦܫܲܢ ܢܸܕܲܥ ܐܲܝܟܼ ܚܲܟܿܝܼ̈ܡܹܐ: ܡ̣ܢ
                ܚܲܕܼܘܼܬܼܵܐ ܕܲܒܼܟܸܤܝܵܐ ܡܸܬܼܪܓܸܫ ܒܵܗ̇ ܝܘܿܡ ܡ̣ܢ ܝܘܿܡ. ܘܥܲܠ
                ܛܲܟܼܤܵܐ ܩܲܛܝܼܢܵܐ ܕܝܲܕܼܘܼܥܬܼܵܢܘܼܬܼܵܐ. ܥ.
            
            
                ܐܸܬܼܒܲܩܵܐ ܒܲܩܢܘܿܡܵܟܼ ܚܲܒܿܝܼܒܼܝ ܒܐܲܡܝܼܢܘܼ: ܘܲܚܙܝܼ ܒܟܼܠܵܗ̇
                ܬܟܝܼܒܼܘܼܬܼܵܐ ܕܥܲܡ̈ܠܲܝܟ: ܘܐܘܼ̈ܠܨܵܢܹܐ ܥܵܪ̈ܨܵܝܹܐ: ܘܐܲܬܼܪܵܐ ܚܘܼܪܒܵܐ
                ܕܕܘܼܝܵܪܵܟܼ: ܘܩܲܛܝܼܢܘܼܬܼܵܐ ܕܗܵܘܢܵܟܼ ܥܲܡ ܚܲܪܝܼܦܘܼܬܼܵܐ ܕܝܼܕܲܥܬܼܵܟܼ:
                ܘܡܸܬܼܚܵܐ ܤܲܓܝܼܐܵܐ ܕܫܸܠܝܵܟܼ: ܥܲܡ ܤܲܡ̈ܡܵܢܹܐ ܤܲܓܝܼ̈ܐܹܐ ܕܢܸܤܝ̈ܘܿܢܹܐ
                ܕܡ̣ܢ ܐܵܤܝܵܐ ܫܲܪܝܼܪܵܐ ܬܵܟܼ̇ܒܿܝܼܢ: ܐܲܝܟܼ ܕܲܠܚܘܼܠܡܵܢܵܐ ܕܒܲܪܢܵܫܵܐ ܗܵܘ̇
                ܕܲܠܓܼܵܘ. ܒܲܙܒܲܢ ܡܲܢ ܡ̣ܢ ܫܹܐܕܹ̈ܐ: ܒܲܙܒܢ ܕܹܝܢ ܒܝܲܕܼ ܟܘܼܪ̈ܵܗܵܢܹܐ ܘܚܲܫܹ̈ܐ
                ܕܦܲܓܼܪܵܟܼ: ܒܲܙܒܲܢ ܒܝܲܕܼ ܤܘܼܪ̈ܵܕܹܐ ܕܙܵܘ̈ܥܲܝ ܢܵܦܫܵܟܼ ܒܥܘܼܗ̈ܕܵܢܹܐ
                ܕܲܓܢܝܼ̈ܚܵܬܼܵܐ ܕܲܥܬܼܝܼ̈ܕܼܵܢ ܠܚܲܪܬܼܵܐ. ܒܲܙܒܲܢ ܬܘܼܒܼ ܒܝܲܕܼ ܪ̈ܘܼܟܵܟܹܐ
                
                 484 
                
                ܘܲܥܨܵܒܹ̈ܐ ܕܛܲܝܒܿܘܼܬܼܵܐ: ܪܸܬܼܚܵܐ ܘܕܸܡ̈ܥܹܐ ܚܲܠ̈ܝܵܬܼܵܐ ܘܚܲܕܼܘܼܬܼܵܐ ܕܪܘܼܚ
                ܥܲܡ ܫܲܪܟܵܐ: ܕܠܵܐ ܐܲܤܓܸܐ ܡܲܡܠܠܵܐ. ܐܵܪܵܐ ܒܟܼܠܗܹܝܢ ܗܵܠܹܝܢ:
                ܠܲܓܼܡܵܪ ܚܵܙܹ̇ܐ ܐܲܢ̄ܬܿ ܟܲܝ ܠܫܘܼܚܢܵܟܼ ܕܫܲܪܝܼ ܚܵܬܹ̇ܡ؟ ܗܵܢܵܘ ܕܹܝܢ:
                ܕܫܲܪܝܼܘ ܚܲܫܹ̈ܐ ܡܸܬܼܡܲܚܝܼܢ؟ ܤܝܼܡ ܝܲܕܼܥܵܐ. ܘܥܘܿܠ ܠܓܼܵܘ ܡܸܢܵܟܼ
                ܐܲܡܝܼܢܵܐܝܼܬܼ: ܐܲܝܠܹܝܢ ܡ̣ܢ ܚܲܫܹ̈ܐ ܚܵܙܹ̇ܐ ܐܲܢ̄ܬܿ ܕܐܸܡܼܚܸܠܘ ܩܕܼܵܡܲܝܟ:
                ܐܲܝܠܹܝܢ ܡܸܢܗܘܿܢ ܤܵܦ̣ܘ ܘܐܸܬܿܛܲܠܲܩܘ ܠܲܓܼܡܵܪ. ܘܐܲܝܠܹܝܢ ܡܸܢܗܘܿܢ
                ܫܲܪܝܼܘ ܠܡܸܫܪܲܟܼ ܠܫܸܬܼܩܵܐ: ܡ̣ܢ ܚܘܼܠܡܵܢܵܐ ܕܢܲܦܫܵܟܼ: ܘܠܵܘ ܡ̣ܢ
                ܫܘܼܢܵܝܵܐ ܕܲܡܝܼܥܵܢܹܐ. ܘܡ̣ܢ ܪܸܥܝܵܢܵܐ ܕܐܸܬܼܥܲܠܲܡ: ܘܠܵܐ ܗ̄ܘ̣ܵܐ ܡ̣ܢ
                ܚܲܤܝܼܪܘܼܬܼ ܥܸ̈ܠܠܵܬܼܵܐ. ܐܸܬܼܒܲܩܵܐ: ܐܵܪܵܐ ܚܵܙܹ̇ܐ ܐܲܢ̄ܬܿ ܟܲܝ ܟܠ ܟ̱ܠܹܗ
                ܒܓܼܵܘ ܡܲܤܝܘܼܬܹܗ ܕܫܘܼܚܢܵܟܼ: ܕܫܲܪܝܼ ܤܵܠܹ̇ܩ ܒܸܤܪܵܐ ܚܲܝܵܐ ܕܗ̤ܘܝܘܼ
                ܫܲܝܢܵܐ ܕܢܲܦܫܵܐ: ܐܲܝܠܹܝܢ ܡ̣ܢ ܚܲܫܹ̈ܐ ܬܟܼܝܼܒܼܵܐܝܼܬܼ ܐܵܠܨ̇ܝܼܢ: ܘܐܲܝܠܹܝܢ
                ܒܲܙܒܲܢ ܙܒܲܢ. ܘܲܕܼܦܲܓܼܪܵܐ ܐܸܢܘܿܢ ܗܵܠܹܝܢ: ܐܵܘ ܢܲܦܫܵܢܵܝܹ̈ܐ: ܐܵܘ ܚܸܠܛܵܐ؟
                ܘܐܸܢ ܐܲܝܟܼ ܡܟܲܪ̈ܗܹܐ ܒܥܘܼܗܕܵܢܵܐ ܡܸܬܿܬܿܙܝܼܥܝܼܢ ܥܲܡܘܼܛܵܐܝܼܬܼ: ܐܵܘ
                ܚܲܝܠܬܼܵܢܵܐܝܼܬܼ ܩܵܝ̇ܡܝܢ ܥܲܠ ܢܲܦܫܵܐ؟ ܘܐܵܪܵܐ ܐܲܝܟܼ ܡܫܲܠܛܹ̈ܐ: ܐܵܘ
                ܡܓܲܢܒܼܵܐܝܼܬܼ؟ ܘܐܲܝܟܲܢ ܚܵܐܲܪ ܒܗܘܿܢ ܡܲܠܟܵܐ ܗܵܘܢܵܐ ܫܲܠܝܼܛܵܐ ܕܪܸ̈ܓܼܫܹܐ
                ܐܸܡܲܬܼܝ ܕܢܵܩ̇ܫܝܼܢ؟ ܡܲܩܪܵܒܼܘܼ ܡܲܩܪܸܒܼ ܥܲܡܗܘܿܢ ܘܲܡܫܲܦܸܠ ܠܗܘܿܢ
                ܒܚܲܝܠܹܗ: ܐܵܘ ܐܵܦܠܵܐ ܬܘܼܒܼ ܡܚܵܪ ܚܵܐܲܪ ܒܗܘܿܢ ܘܚܵܫܹ̇ܒܼ؟ ܘܐܲܝܠܹܝܢ
                ܐܸܢܘܿܢ ܬܵܘܬܵܪܹ̈ܐ ܕܡ̣ܢ ܥܲܬܝܼ̈ܩܹܐ: ܘܐܲܝܠܹܝܢ ܚܲܕܼܬܼܵܐܝܼܬܼ ܐܸܬܼܓܒܸܠܘ؟
                ܘܚܲܫܹ̈ܐ ܡ̇ܢ ܒܝܲܕܼ ܕܸܡ̈ܘܵܬܼܵܐ ܡܸܬܿܬܿܙܝܼܥܝܼܢ: ܐܵܘ ܒܡܲܪܓܫܵܢܘܼܬܼܵܐ ܕܠܵܐ
                ܕܡܘܼܬܼܵܐ: ܘܥܘܼܗܕܵܢܵܐ ܕܠܵܐ ܚܲܫܹ̈ܐ: ܘܙܵܘܥܵܐ ܕܠܵܐ ܚܘܼ̈ܬܼܚܵܬܹܐ؟
                ܕܡ̣ܢ ܗܵܠܹܝܢ ܬܘܼܒܼ: ܡܲܨܝܵܐ ܠܡܸܕܲܥ ܡܫܘܼܚܬܼܵܗ̇ ܕܢܲܦܫܵܐ
                ܕܐܲܝܟܵܐ ܩܵܝ̇ܡܵܐ. ܗܵܝ̇ ܡܲܢ ܩܲܕܼܡܵܝܬܼܵܐ ܘܐܵܦܸܢ ܠܵܐ ܡܲܨܠܚܝܼܢ:
                
                 485 
                
                ܕܲܥܕܲܟܹܝܠ ܐܝܼܬܼ ܗ̄ܘ̣ ܬܲܟܼܬܘܼܫܵܐ ܠܢܲܦܫܵܐ: ܐܵܦܸܢ ܚܲܝܠܬܼܵܢܝܵܐ ܥܲܠܝܗܘܿܢ
                ܡܚܵܘܝܵܐ. ܗܵܕܹܐ ܕܹܝܢ ܐܲܝܟܼ ܕܲܒܼܬܲܚܘܝܼܬܼܵܐ ܡܤܲܟܿܠܵܐ: ܐܲܝܟܼ ܗܵܝ̇ ܕܐܸܡ݂ܲܪ
                ܟܬܼܵܒܼܵܐ: ܕܝܼܬܸܒܼ ܕܵܘܝܼܕܼ ܒܒܲܝܬܹܗ: ܘܐܲܢܝܼܚܹܗ ܡܵܪܝܵܐ ܡ̣ܢ ܟܠܗܘܿܢ
                ܚܕܼܵܪܵܘܗܝ. ܗܵܠܹܝܢ: ܠܵܘ ܡܸܛܠ ܚܲܕܼ ܚܲܫܹ̈ܐ ܬܸܤܬܲܟܲܠ: ܐܸܠܵܐ ܘܥܲܡ
                ܕܚܲܫܹ̈ܐ ܟܝܵܢܵܝܹ̈ܐ ܕܪܸܓܿܬܼܵܐ ܘܲܕܼܚܡܬܼܵܐ: ܘܐܵܦ ܚܲܫܵܐ ܕܪܸܚܡܲܬܼ ܬܸܫܒܿܘܿܚܬܼܵܐ
                ܕܨܵܐܲܪ ܦܲܪ̈ܨܘܿܦܹܐ ܘܲܡܗܲܓܸܓܼ ܘܲܡܓܲܪܸܓܼ. ܘܚܲܫܵܐ ܕܪܸܚܡܲܬܼ ܡܸܤܦܵܐ
                ܬܘܼܒܼ ܐܸܡܲܬܼܝ ܕܢܦܫܵܐ ܡܸܫܬܵܘܬܦܵܐ ܠܹܗ ܒܟܸܤܝܵܐ: ܐܵܦܸܢ ܠܲܥ̇ܒܼܵܕܼܵܐ
                ܠܵܐ ܡܸܬܿܛܦܝܼܤܵܐ ܕܬܹܐܬܸܐ. ܨܲܠܡܹ̈ܐ ܕܨܸܒܼ̈ܘܵܬܼܵܐ ܕܪܸܚܡܲܬܼ ܟܸܤܦܵܐ
                ܒܲܡܠܘܿܐܹ̈ܐ ܕܟܼܘܢܵܫ ܥܘܼܬܼܪܵܐ ܨܲܐܲܪ ܒܗܵܘܢܵܐ: ܘܲܠܢܲܦܫܵܐ ܡܦܝܼܣ
                ܕܬܸܗܪܘܿܓܼ ܒܗܹܝܢ: ܘܲܡܚܲܬܼܚܸܬܼ ܠܩܸܢܝܵܢܗܹܝܢ: ܥܲܡ ܗܵܠܹܝܢ ܕܫܲܪܟܵܐ.
                ܠܵܘ ܟܠܗܘܿܢ ܚܲܫܹ̈ܐ ܒܓܼܘܼܪ̈ܵܓܹܐ ܡܲܩܪܒܼܝܼܢ. ܐܝܼܬܼ ܓܹܝܪ ܚܲܫܹ̈ܐ:
                ܕܐܘܼܠܨܵܢܹܐ ܒܲܠܚܘܿܕܼ ܡܲܤܒܿܠܝܼܢ ܠܵܗ̇ ܠܢܲܦܫܵܐ. ܡܲܐܝܼܢܘܼܬܼܵܐ ܕܹܝܢ
                ܘܩܘܼܛܵܥܵܐ ܘܥܵܩܬܼܵܐ: ܠܵܘ ܒܓܼܘܼܪ̈ܵܓܹܐ: ܘܐܵܦܠܵܐ ܒܲܢܝܵܚܹ̈ܐ: ܐܸܠܵܐ
                ܝܘܼܩܪܵܐ ܤܵܝ̇ܡܝܼܢ ܒܲܠܚܘܿܕܼ ܥܲܠ ܢܲܦܫܵܐ. ܚܠܝܼܨܘܼܬܼܵܐ ܕܢܲܦܫܵܐ:
                ܒܙܵܟܼܘܼܬܼܵܐ ܕܥܲܠ ܐܲܝܠܹܝܢ ܕܲܒܼܫܘܼ̈ܕܵܠܹܐ ܡܲܩܪܒܼܝܼܢ ܡܸܬܼܒܲܚܪܵܐ. ܕܗܵܠܹܝܢ
                ܟܠܗܹܝܢ: ܝܑܼܕܲܥܬܼܵܐ ܩܲܛܝܼܢܬܼܵܐ ܘܝܲܕܼܥܹ̈ܐ ܙܵܕܹܩ ܕܢܸܗܘܘܿܢ ܠܐ̄ܢܵܫ:
                ܕܢܲܪܓܸܫ ܒܟܼܠ ܦܤܵܥܬܼܵܐ ܕܤܵܐܹ̇ܡ. ܕܠܲܐܝܟܵܐ ܡܲܛܝܼ: ܘܒܲܐܝܼܢܵܐ
                ܐܲܬܼܪܵܐ ܫܲܪܝܲܬ̤ ܠܵܗ̇ ܢܲܦܫܵܐ ܠܡܸܕܼܪܲܟ. ܒܐܲܪܥܵܐ ܓܹܝܪ ܕܲܟܼܢܲܢ: ܐܵܘ
                ܠܓܼܵܘ ܡ̣ܢ ܝܘܿܪܕܢܵܢ.
                ܘܐܸܬܼܒܲܩܵܐ: ܐܵܦ ܒܗܵܕܹܐ. ܕܐܸܢ ܡܸܛܠ ܢܲܗܝܼܪܘܼܬܼܵܗ̇ ܕܢܲܦܫܵܐ
                ܤܵܦ̇ܩܵܐ ܝܑܼܕܲܥܬܼܵܐ ܠܦܘܼܪ̈ܫܵܢܹܐ ܗܵܠܹܝܢ: ܐܵܘ ܥܲܡܘܼܛܵܐܝܼܬܼ ܦܵܪܫܵܐ
                ܠܗܘܿܢ: ܐܵܘ ܠܲܓܼܡܵܪ ܓܠܝܼܙܵܐ ܡ̣ܢ ܕܐܲܝܟܼ ܗܵܠܹܝܢ. ܡܸܫܟܲܚ ܐܲܢ̄ܬܿ ܟܲܝ
                
                 486 
                
                ܟܠ ܟܠܹܗ: ܕܫܲܪܝܼܘ ܚܘܼ̈ܫܵܒܹܐ ܡܸܫܬܲܦܹܝܢ: ܝܵܗܹ̇ܒܼ ܦܸܗܝܵܐ ܐܲܬܼܪܵܐ
                ܠܡܲܕܿܥܵܐ ܒܥܸܕܵܢܵܐ ܕܲܨܠܘܿܬܼܵܐ؟ ܘܐܲܝܢܵܐ ܚܲܫܹ̈ܐ ܐܵܪܵܐ ܫܵܓܹ̇ܫ ܡܵܐ
                ܕܢܸܩܪܘܿܒܼ ܪܸܥܝܵܢܵܐ ܠܲܨܠܘܿܬܼܵܐ؟ ܡܲܪܓܸܫ ܐܲܢ̄ܬܿ ܒܵܟܼ: ܕܚܲܝܠܹܗ
                ܕܫܸܠܝܵܐ ܐܲܓܸܢ ܥܲܠ ܢܲܦܫܵܐ ܒܲܒܼܗܝܼܠܘܼܬܼܵܐ ܘܫܲܝܢܵܐ ܕܠܵܐ ܒܲܥܝܵܕܼܵܐ
                ܕܡܵܘܠܸܕܼ ܒܸܪܥܝܵܢܵܐ: ܡܸܬܼܚܛܸܦ ܗܵܘܢܵܐ ܒܐܲܡܝܼܢܘܼ ܠܒܲܪ ܡ̣ܢ
                ܨܸܒܼܝܵܢܵܐ: ܒܙܵܘ̈ܥܹܐ ܠܵܐ ܡܓܲܫܡܹ̈ܐ ܠܘܵܬܼ ܐܲܝܠܹܝܢ ܕܠܵܐ ܡܲܦܲܣ
                ܠܪܸ̈ܓܼܫܹܐ ܠܲܡܬܲܪܓܵܡܘܼ: ܡܸܬܼܢܲܒܒܼܪܫܵܐ ܒܵܟܼ ܡ̣ܢ ܫܸܠܝܵܐ ܚܲܕܼܘܼܬܼܵܐ
                ܕܲܡܫܲܬܿܩܵܐ ܠܠܸܫܵܢܵܐ ܒܒܼܘܼܤܵܡܵܗ̇ ܕܠܵܐ ܡܸܬܼܦܲܚܲܡ: ܢܵܒܼ̇ܥܵܐ ܡ̇ܢ
                ܒܐܲܡܝܼܢܘܼ ܡ̣ܢ ܠܸܒܵܐ ܗܲܢܝܼܐܘܼܬܼܵܐ ܡܸܕܸܡ ܕܢܵܓܼܕܵܐ ܠܹܗ ܠܟܼܠܹܗ
                ܒܲܪܢܵܫܵܐ ܡ̣ܢ ܤܵܟܼܵܐ: ܟܲܕܼ ܠܵܐ ܪܓܼܝܼܫ ܐܲܢ̄ܬܿ ܒܲܙܒܲܢ ܢܵܦܹ̇ܠ ܒܟܼܠܹܞ
                ܦܲܓܼܪܵܐ ܒܘܼܤܵܡܵܐ ܡܸܕܸܡ ܘܲܪܘܵܙܵܐ: ܕܠܸܫܵܢܵܐ ܕܝܼܠܝܼܕܼ ܒܸܤܪܵܐ ܠܵܐ
                ܡܸܫܟܲܚ ܠܡܹܐܡܪܹܗ: ܐܲܝܟܲܢܵܐ ܕܲܠܟܼܠܗܹܝܢ ܐܲܪ̈ܥܵܢܵܝܵܬܼܵܐ ܐܲܝܟܼ ܩܸܛܡܵܐ
                ܘܙܸܒܼܠܵܐ ܬܸܚܫܘܿܒܼ: ܐܵܦܸܢ ܒܥܘܼܗܕܵܢܵܐ ܕܝܼܠܹܗ. ܗܵܝ̇ ܡ̇ܢ ܩܲܕܼܡܵܝܬܼܵܐ:
                ܒܲܙܒܲܢ ܒܥܸܕܵܢ ܨܠܘܿܬܼܵܐ: ܘܒܲܙܒܲܢ ܒܩܸܪܝܵܢܵܐ. ܒܲܙܒܲܢ ܬܘܼܒܼ: ܡ̣ܢ
                ܗܸܪܓܵܐ ܕܲܬܼܟܼܝܼܒܼܵܐܝܼܬܼ ܘܲܒܼܡܸܬܼܚܵܐ ܗܵܪܹܓܼ ܪܸܥܝܵܢܵܐ ܘܪܵܬܲܚ ܗܵܘܢܵܐ.
                ܗܵܕܹܐ ܕܲܐ̄ܚܪܵܝܑܬܼ ܐܲܝܟܼ ܕܲܒܼܤܘܿܓܼܵܐܐ: ܠܒܲܪ ܡ̣ܢ ܗܵܠܹܝܢ. ܘܲܟܼܡܵܐ
                ܙܲܒܼ̈ܢܝܼܢ: ܒܲܥ̇ܒܼܵܕܹ̈ܐ ܕܲܡܫܵܟܼܵܐ: ܘܤܘܿܓܼܐܗܘܿܢ ܕܠܲܝ̈ܠܵܘܵܬܼܵܐ ܒܹܗ ܒܢܝܼܫܵܐ:
                ܒܹܝܬܼ ܫܸܢܬܼܵܐ ܠܥܝܼܪܘܼܬܼܵܐ. ܕܲܡܝܲܟܼ: ܟܲܕܼ ܠܵܐ ܕܲܡܝܼܟܼ. ܘܥܝܼܪ: ܟܲܕܼ
                ܠܵܐ ܥܝܼܪ. ܘܒܼܘܼܤܵܡܵܐ ܕܪܵܦܹ̇ܬܼ ܒܓܼܘܼܫܡܵܐ ܟ̱ܠܹܗ: ܗܵܟܲܢ ܡܸܤܬܿܒܲܪ
                ܠܹܗ ܠܒܲܪܢܵܫܵܐ ܒܥܸܕܵܢܵܐ ܗܵܘ̇: ܐܲܝܟܼ ܡܲܢ ܕܡܲܠܟܘܼܬܼܵܐ ܕܲܫܡܲܝܵܐ ܠܲܝܬܿ
                ܡܸܕܸܡ ܐ̄ܚܪܹܝܢ: ܐܸܠܵܐ ܗܵܕܹܐ. ܘܲܚܙܝܼ ܬܘܼܒܼ ܐܸܢܗ̤ܘ ܕܲܩܢܵܬ̤ ܢܲܦܫܵܐ
                
                 487 
                
                ܚܲܝܠܵܐ ܠܡܲܤܠܵܝܘܼ ܥܘܼܗ̈ܕܵܢܹܐ ܕܡܸܬܼܪ̈ܲܓܼܫܵܢܝܵܬܼܵܐ: ܒܝܲܕܼ ܚܲܝܠܹܗ
                ܕܤܲܒܼܪܵܐ ܗܵܘ̇ ܕܐܲܡܝܸܟܼ ܥܲܠ ܠܸܒܵܐ: ܘܲܡܓܲܒܲܪ ܠܪܸ̈ܓܼܫܹܐ ܓܵܘܵܝܹ̈ܐ
                ܒܲܦܝܵܤܵܐ ܠܵܐ ܡܸܬܼܦܲܫܩܵܢܵܐ. ܘܐܸܢܗ̤ܘ ܕܐܸܬܼܥܲܝܲܕܼ ܠܸܒܵܐ ܕܠܵܐ
                ܒܛܝܼܠܘܼܬܼܵܐ ܕܲܥܠܵܘܗܝ: ܠܡܸܫܬܿܒܼܵܝܘܼ ܡ̣ܢ ܐܲܪ̈ܥܵܢܵܝܵܬܼܵܐ ܒܝܲܕܼ ܥܸܢܝܵܢܵܐ
                ܕܠܵܐ ܦܤܵܩ ܕܥܲܡ ܦܵܪܘܿܩܲܢ: ܗ̤ܘܲܬܿ ܕܹܝܢ ܩܢܸܐ ܝܑܼܕܲܥܬܼܵܐ
                ܠܦܘܼܪ̈ܫܢܹܐ ܕܲܩܪܵܝܬܼܵܐ ܕܝܼܠܹܗ ܕܥܸܢܝܵܢܵܐ ܐܸܡܲܬܼܝ ܕܬܸܫܡܲܥ: ܦܫܝܼܩܵܐܝܼܬܼ
                ܕܹܝܢ ܡܲܛܥܸܡ ܫܸܠܝܵܐ ܕܠܵܐ ܦܤܵܩ ܥܲܡ ܦܘܼܠܚܵܝܹܗ ܐܲܡܝܼܢܵܐ ܗܵܠܹܝܢ
                ܠܢܲܦܫܵܐ. ܘܐܵܒܼ̈ܕܵܢ ܬܘܼܒܼ ܡ̣ܢ ܒܵܬܲܪ ܫܟܼܵܚܬܗܹܝܢ ܡ̣ܢ ܡܲܗܡܝܵܢܘܼܬܼܵܐ
                ܕܡܩܲܒ̈ܠܵܢܹܐ: ܘܲܠܢܘܼܓܼܪܵܐ ܬܘܼܒܼ ܠܵܐ ܡܸܫܬܼܟܼ̈ܚܵܢ. ܒܝܲܕܼ ܗܵܠܹܝܢ
                ܡܲܡܪܲܚ ܐ̄ܢܵܫ ܠܡܹܐܡܲܪ ܒܤܵܗܕܘܼܬܼܵܐ ܕܪܸܥܝܵܢܵܐ ܬܟܼܝܼܠܵܐܝܼܬܼ: ܗܵܝ̇
                ܕܐܸܡ݂ܲܪ ܛܘܼܒܼܵܢܵܐ ܦܵܘܠܘܿܣ: ܕܲܡܦܵܣ ܐ̄ܢܵܐ ܕܠܵܐ ܡܵܘܬܵܐ: ܘܠܵܐ
                ܚܲܝܹ̈ܐ: ܘܠܵܐ ܕܩܵܝ̈ܡܵܢ: ܘܠܵܐ ܕܥܬܼܝܼ̈ܕܼܵܢ ܥܲܡ ܫܲܪܟܵܐ: ܡܸܫ̈ܟܿܚܵܢ
                ܠܡܸܦܪܫܲܢܝ ܡ̣ܢ ܚܘܼܒܹܗ ܕܲܡܫܝܼܚܵܐ. ܐܵܘ ܕܲܠܡܵܐ ܐܘܼܠܨܵܢܵܐ ܕܦܲܓܼܪܵܐ
                ܐܲܟܲܚ̄ܕܼ ܘܲܕܼܢܲܦܫܵܐ: ܐܵܘ ܪܕܼܘܼܦܝܵܐ: ܐܵܘ ܟܲܦܢܵܐ: ܐܵܘ ܥܪܲܛܸܠܵܝܘܼܬܼܵܐ:
                ܐܵܘ ܡܫܵܘܚܕܼܘܼܬܼܵܐ: ܐܵܘ ܚܒܼܘܼܫܝܵܐ: ܐܵܘ ܩܹܘܲܢܕܹܝܢܘܿܣ: ܐܵܘ ܤܲܝܦܵܐ؟
                ܐܸܠܵܐ ܐܵܦܠܵܐ ܡܲܠܲܐܟܼܵܘ̈ܗܝ ܕܤܵܛܵܢܵܐ: ܘܠܵܐ ܚܲܝܠܵܘ̈ܗܝ ܒܒܼܝܼܫܘܼܬܼ
                ܨܸܢ̈ܥܵܬܼܗܘܿܢ. ܘܠܵܐ ܬܸܫܒܿܘܿܚܬܼܵܐ ܕܡܸܬܼܒܲܛܠܵܐ ܒܝܲܕܼ ܫܘܼ̈ܕܵܠܹܝܗ̇
                ܡܚܲܬܼܚ̈ܬܼܵܢܹܐ: ܘܠܵܐ ܥܫܘܼܩܝܹ̈ܐ ܘܓܼܘܼܢܵܝܹ̈ܐ ܒܝܲܕܼ ܩܘܼܦܵܚܹ̈ܐ ܕܡܲܓܵܢ.
                ܐܸܢܗ̤ܘ ܕܗܵܠܹܝܢ ܐܵܚܝ: ܒܝܲܬܝܼܪ ܘܚܲܤܝܼܪ ܠܵܐ ܫܲܪܝܼܘ ܒܢܲܦܫܵܟܼ
                ܠܡܸܬܼܚܙܵܝܘܼ: ܥܲܡ̈ܠܲܝܟ ܘܐܘܼܠܨܵܢܲܝ̈ܟ ܘܫܸܠܝܵܟܼ ܟ̱ܠܹܗ: ܬܥܵܫܵܐ
                ܐܸܢܘܿܢ ܕܡܲܓܵܢ. ܘܐܵܦܠܵܐ ܐܸܢܗ̤ܘ ܕܬܸܕܼܡܪ̈ܵܬܼܵܐ ܢܸܤܬܲܥܪ̈ܵܢ ܒܐܝܼܕܲܝ̈ܟ
                
                 488 
                
                ܘܡܝܼ̈ܬܹܐ ܬܩܝܼܡ: ܐܝܼܬܲܝܗܹܝܢ ܒܦܸܚܡܵܐ ܕܗܵܠܹܝܢ ܡܸܕܸܡ. ܘܙܵܕܹܩ
                ܡܸܟܹܝܠ ܕܲܬܼܙܝܼܥ ܝܵܬܼܵܟܼ: ܘܲܒܼܕܼܡ̈ܥܹܐ ܬܦܝܼܣ ܠܡܲܚܝܵܢܵܐ ܕܟܼܠ:
                ܕܲܬܪܝܼܡ ܐܲܦܲܝ̈ ܬܲܪܥܵܐ ܡ̣ܢ ܠܸܒܵܐ: ܘܚܘܼܫܟܵܐ ܕܥܲܪ̈ܦܸܠܲܝ ܚܲܫܹ̈ܐ
                ܢܸܩܦܘܿܠ ܡ̣ܢ ܪܩܝܼܥܵܐ ܕܲܠܓܼܵܘ: ܘܬܸܫܬܿܘܸܐ ܠܡܸܚܙܵܐ ܠܨܸܡܚܹܗ
                ܕܐܝܼܡܵܡܵܐ: ܘܠܵܐ ܬܸܗܘܸܐ ܝܵܬܹ̇ܒܼ ܒܚܸܫܘܿܟܼܵܐ ܐܲܝܟܼ ܡܝܼܬܼܵܐ ܠܥܵܠܲܡ.
                ܫܲܗܪܵܐ ܐܲܡܝܼܢܵܐ ܥܲܡ ܩܸܪܝܵܢܵܐ: ܘܲܤܝܵܡ ܒܘܼܪ̈ܟܹܐ ܤܒܼܝܼ̈ܤܹܐ ܕܒܲܝܢܵܬܼܗܘܿܢ
                ܡܸܬܼܝܲܒܿܠܝܼܢ: ܠܵܐ ܡܸܬܿܬܲܗܹܝܢ ܙܲܒܼܢܵܐ ܡ̣ܢ ܕܢܸܬܿܠܘܼܢ ܛܵܒܼ̈ܬܼܵܐ
                ܗܵܠܹܝܢ ܠܗܵܘ̇ ܕܡܸܬܼܚܲܦܲܛ. ܕܐܲܝܠܹܝܢ ܕܐܸܟܲܚܘ ܐܸܢܹܝܢ: ܒܗܵܠܹܝܢ
                ܐܸܫܟܲܚܘ. ܘܐܲܝܠܹܝܢ ܬܘܼܒܼ ܕܡܸܫܟܿܚܝܼܢ: ܒܗܵܠܹܝܢ ܡܨܹܝܢ ܠܡܸܫܟܵܚܘܼ.
                ܘܟܲܕܲ ܢܸܬܼܐܡܸܢ ܒܫܸܠܝܵܐ ܥܲܡ ܦܘܼܠܚܵܢܵܐ ܕܗܵܠܹܝܢ: ܟܲܕܼ ܠܵܐ ܐܲܤܝܼܪ
                ܪܸܥܝܵܢܵܐ ܒܡܸܕܸܡ ܘܲܒܼܐ̄ܢܵܫ ܠܒܲܪ ܡ̣ܢ ܢܲܦܫܹܗ: ܒܲܥ̇ܒܼܵܕܹ̈ܐ ܕܲܡܝܲܬܿܪܘܼܬܼܵܐ
                ܕܲܠܓܼܵܘ ܡܸܬܼܦܲܠܚܵܐ: ܒܗܵܘܿܢ ܒܲܥ̇ܒܼܵܕܹ̈ܐ ܒܲܩܢܘܿܡܲܢ ܩܲܪܝܼܒܼܵܐܝܼܬܼ
                ܡܸܫܟܿܚܝܼܢܲܢ ܒܡܲܪܓܫܵܢܘܼܬܼܵܐ ܚܲܬܼܝܼܬܿܬܵܐ ܡܸܢܗܹܝܢ ܕܗܵܠܹܝܢ ܡܢܵܬܼܵܢܵܐܝܼܬܼ:
                ܘܡܸܫܬܲܪܪܝܼܢܲܢ ܘܐܵܦ ܥܲܠ ܫܲܪܟܵܐ. ܐܲܝܠܹܝܢ ܕܒܲܗܘܵܝܵܐ ܕܲܒܼܫܸܠܝܵܐ
                ܢܤܲܒܼܘ ܢܸܤܝܵܢܵܐ ܕܒܲܤܝܼܡܘܼܬܹܗ ܕܐܲܠܵܗܵܐ: ܠܵܐ ܤܢܝܼܩܝܼܢ ܥܲܠ
                ܦܝܵܤܵܐ ܤܲܓܝܼܐܵܐ. ܐܵܦܠܵܐ ܒܚܲܫܵܐ ܕܠܵܐ ܗܲܝܡܵܢܘܼܬܼܵܐ ܡܸܬܼܟܲܪܗܵܐ
                ܢܲܦܫܗܘܿܢ ܐܲܝܟܼ ܦܠܝܼ̈ܓܲܝܼ ܥܲܠ ܫܪܵܪܵܐ. ܤܵܗܕܘܼܬܼܵܐ ܕܪܸܥܝܵܢܗܘܿܢ
                ܤܵܦ̇ܩܵܐ ܠܲܦܝܵܤܗܘܿܢ: ܝܲܬܝܼܪ ܡ̣ܢ ܪܸܒܿܘܿ ܡܸܠܝܼ̈ܢ ܕܲܕܼܠܵܐ ܢܸܤܝܵܢܵܐ.