Isaac of Nineveh. “Discourse 72.” Based upon Digital Syriac Corpus. Last modified March 5, 2019. https://syriaccorpus.org/463.
    
        
            
                ܥܲܠ ܝܑܼܕܲܥܬܼܵܐ ܕܲܫܪܵܪܵܐ: ܘܥܲܠ ܢܸܤܝܼ̈ܘܿܢܹܐ. ܘܥܲܠ ܗܵܝ̇ ܕܙܵܕܹܩ
                ܠܡܸܕܲܥ ܚܲܬܝܼܬܼܵܐܝܼܬܼ: ܕܠܵܘ ܒܲܠܚܘܿܕܼ ܐ̄ܢܵܫܵܐ ܡܚܝܼ̈ܠܹܐ ܘܲܒܼܨܝܼܪܹ̈ܐ
                ܘܠܵܐ ܡܕܲܪ̈ܫܹܐ: ܐܸܠܵܐ ܐܵܦ ܐܲܝܠܹܝܢ ܕܐܸܫܬܘܝܼܘ ܠܠܵܐ ܚܵܫܘܿܫܘܼܬܼܵܐ
                ܙܲܒܼܢܵܢܵܝܵܬܐ: ܘܲܡܛ̣ܵܘ ܠܲܓܼܡܝܼܪܘܼܬܼܵܐ ܕܬܲܪܥܝܼܬܼܵܐ: ܘܲܩܪܸܒܼܘ ܠܘܲܥܕܵܐ
                ܕܕܲܟܼܝܘܼܬܼܵܐ ܡܢܵܬܼܵܢܵܝܬܐ ܗܵܝ̇ ܕܥܲܡ ܡܵܝܘܿܬܼܘܼܬܼܵܐ ܟܕܼܝܼܢܵܐ: ܘܡܲܛܝܼܘ
                ܠܥܘܼܠܵܝܵܐ ܕܡ̣ܢ ܚܲܫܹ̈ܐ: ܟܡܵܐ ܕܲܒܼܗܵܢܵܐ ܥܵܠܡܵܐ ܡܲܦܲܣ ܡ̣ܢ ܐܲܠܵܗܵܐ
                ܒܲܟܼܕܼܝܼܢܘܼܬܼ ܚܲܝܹ̈ܐ ܕܥܲܡ ܒܸܤܪܵܐ ܚܵܫܘܿܫܵܐ: ܐܝܼܬܼ ܠܗܘܿܢ ܬܲܟܼܬܘܼܫܵܐ.
                ܘܡܸܫܬܲܚܩܝܼܢ ܡ̣ܢ ܚܲܫܹ̈ܐ: ܡܸܛܠ ܦܲܓܼܪܵܐ. ܘܗܵܘ̇ܝܵܐ ܠܘܵܬܼܗܘܿܢ
                ܒܐܲܡܝܼܢܘܼ ܐܵܦ ܡܸܫܬܲܒܼܩܵܢܘܼܬܼܵܐ ܕܲܒܼܪ̈ܲܚܡܹܐ: ܡܸܛܠ ܩܸܢܛܵܐ ܕܪܵܡܘܼܬܼܵܐ
                ܒܚܲܕܼܚ̈ܕܼܵܢܵܝܵܬܐ. ܘܲܟܼܡܵܐ ܙܲܒܼܢ̈ܝܼܢ ܡܸܬܼܥܲܒܼܪܝܼܢ: ܘܒܲܬܼܝܵܒܼܘܼܬܼܵܐ ܡܲܐܪܤܹܝܢ
                ܢܲܦܫܗܘܿܢ: ܘܛܲܝܒܿܘܼܬܼܵܐ ܡܩܲܒܿܠܵܐ ܠܗܘܿܢ. ܥܒ.
            
            
                ܕܲܒܼܟܼܠܹܗ ܓܹܝܪ ܟܝܵܢܵܐ ܡܲܠܵܠܵܐ ܥܵܒܼ̇ܪܵܐ ܡܸܨܛܲܠܝܵܢܘܼܬܼܵܐ ܕܠܵܐ
                ܦܘܼܪܵܫ: ܘܫܘܼܚ̈ܠܵܦܹܐ ܥܵܒܼ̇ܪܝܼܢ ܥܲܠ ܟܠܒܲܪܢܵܫ ܒܟܼܠܗܘܿܢ ܥܸܕܵܢܵܘ̈ܗܝ:
                ܥܲܡ ܗܵܝ̇ ܕܡ̣ܢ ܤܲܓܝܼ̈ܐܵܬܼܵܐ ܡܸܫܟܲܚ ܦܵܪܘܿܫܵܐ ܠܡܸܤܬܲܟܵܠܘܼ: ܐܸܠܵܐ
                ܢܸܤ̈ܝܵܢܹܐ ܕܗܘܹ̇ܝܢ ܠܘܵܬܹܗ ܒܟܼܠܝܘܿܡ: ܝܲܬܝܼܪܵܐܝܼܬܼ ܡܸܫܟܚܝܼܢ
                ܕܲܢܚܲܪܡܘܼܢܵܝܗܝ ܐܸܢ ܐܝܼܬܼܵܘܗܝ ܙܗܝܼܪܵܐ: ܘܲܢܛܝܼܪ ܒܕܼܝܼܠܹܗ. ܘܕܲܟܼܡܵܐ
                ܫܘܼܚ̈ܠܵܦܹܐ ܕܢܵܘܚܵܐ ܘܕܲܒܼܗܝܼܠܘܼܬܼܵܐ ܡܩܲܒܸܠ ܪܸܥܝܵܢܵܐ ܒܟܼܠܝܘܿܡ:
                
                 495 
                
                ܘܕܲܐܝܟܲܢ ܡ̣ܢ ܡܫܲܝܢܘܼܬܹܗ ܗܵܦܹ̇ܟܼ ܡܸܢܫܹܠܝ ܠܲܕܼܠܝܼܚܘܼܬܼܵܐ: ܟܲܕܼ
                ܥܸܠܬܼܵܐ ܡ̣ܢ ܕܘܼܟ ܠܲܝܬܿ ܠܹܗ: ܘܗܵܘܹ̇ܐ ܒܩܹܘܲܢܕܹܝܢܘܿܣ ܪܲܒܵܐ ܕܠܵܐ
                ܡܸܬܼܡܲܠܲܠ. ܘܠܵܗ̇ ܠܗܵܕܹܐ ܢܲܗܝܼܪܵܐܝܼܬܼ ܡܲܟܼܬܿܒܼܵܐ ܠܛܘܼܒܼܵܢܵܐ ܡܵܩܵܪܝܼܣ:
                ܒܲܒܼܛܝܼܠܘܼܬܼܵܐ ܤܲܓܝܼܐܬܼܵܐ ܘܲܒܼܝܲܨܝܼܦܘܼܬܼܵܐ: ܠܥܘܼܗܕܵܢܵܐ ܘܲܠܝܘܼܠܦܵܢܵܐ
                ܕܐܲܚܹ̈ܐ. ܕܠܵܐ ܢܸܤܛܘܿܢ ܠܲܦܤܵܩ ܤܲܒܼܪܵܐ ܒܙܲܒܼ̈ܢܹܐ ܕܫܘܼܚ̈ܠܵܦܹܐ
                ܕܲܠܩܘܼ̈ܒܼܠܵܝܹܐ: ܐܲܝܠܹܝܢ ܕܼܒܼܛܲܟܼܤܵܐ ܕܕܲܟܼܝܘܼܬܼܵܐ ܩܵܝ̇ܡܝܼܢ: ܐܸܡܲܬܼܝ
                ܕܗܵܘܹ̇ܐ ܠܘܵܬܼܗܘܿܢ ܓܸܕܼܫܵܐ ܒܲܕܡܘܼܬܼ ܐܵܐܲܪ. ܐܸܢܗ̤ܘ ܕܠܵܘ ܡ̣ܢ
                ܡܲܗܡܝܵܢܘܼܬܼܵܐ ܘܫܲܪܝܘܼܬܼܵܐ: ܐܸܠܵܐ ܒܛܲܟܼܤܗܘܿܢ ܪܵܕܹܝܢ ܗܵܘܹ̇ܝܢ ܠܘܵܬܼܗܘܿܢ
                ܓܸܕܼܫܹ̈ܐ ܕܤܘܼܒܵܠܵܐ ܠܢܝܼܫܵܐ ܕܬܲܪܥܝܼܬܼܗܘܿܢ.
                ܘܟܲܕܼ ܘܐܵܦ ܛܘܼܒܼܵܢܵܐ ܐܹܘܲܓܼܪܝܼܣ ܡܲܤܗܸܕܼ ܥܲܠ ܗܵܕܹܐ: ܐܲܝܟܼ
                ܕܡ̣ܢ ܢܸܤܝܵܢܵܐ ܚܲܬܝܼܬܼܵܐ. ܤܵܐܹ̇ܡ ܠܵܗ̇ ܒܲܟܼܬܼܵܒܹܗ: ܐܲܝܟܼ ܕܲܠܫܘܼܪܵܪܵܐ
                ܝܲܬܝܼܪܵܐ. ܕܠܵܐ ܢܸܤܒܲܪ ܐ̄ܢܵܫ ܕܐܲܝܟܼ ܕܐܵܬܼ̇ܝܵܐ: ܘܠܵܘ ܒܒܼܘܼܩܝܵܐ ܫܲܪܝܼܪܵܐ
                ܤܵܡܵܗ̇ ܛܘܼܒܼܵܢܵܐ ܡܵܩܵܪܝܼܣ ܒܐܸܓܲܪܬܹܗ. ܕܡ̣ܢ ܟܠ ܦܪܘܿܣ. ܐܲܝܟܼ
                ܕܡ̣ܢ ܬܪܹܝܢ ܤܵܗ̈ܕܹܐ ܫܲܪܝܼܪܹ̈ܐ ܕܐܲܝܟܼ ܗܵܠܹܝܢ: ܢܸܗܘܸܐ ܪܸܥܝܵܢܵܐ ܡܩܲܒܸܠ
                ܕܠܵܐ ܦܘܼܠܵܓܼ: ܠܒܼܘܼܝܵܐܹܗ ܒܙܲܒܼܢܵܐ ܕܤܘܼܢܩܵܢܵܐ. ܡܵܢܵܐ ܗܵܟܿܝܠ؟
                ܫܘܼܚ̈ܠܵܦܹܐ ܠܲܡ ܕܹܝܢ ܗܵܘܹ̇ܝܢ ܠܘܵܬܼ ܟܠܢܵܫ: ܒܲܕܼܡܘܼܬܼ ܐܵܐܲܪ.
                ܐܸܤܬܲܟܲܠ ܗܵܝ̇ ܕܲܠܘܵܬܼ ܟܠܢܵܫ. ܚܲܕܼ ܗ̄ܘ̣ ܓܹܝܪ ܟܝܵܢܵܐ. ܕܠܵܐ
                ܬܸܤܒܲܪ ܕܲܠܘܵܬܼ ܒܨܝܼܪܹ̈ܐ ܒܲܠܚܘܿܕܼ ܐܵܡܲ݁ܪ: ܓܡܝܼܪܹ̈ܐ ܕܹܝܢ ܡܚܲܪܪܝܼܢ
                ܡ̣ܢ ܫܘܼܚ̈ܠܵܦܹܐ: ܘܲܒܼܚܲܕܼ ܛܲܟܼܤܵܐ ܕܠܵܐ ܡܸܨܛܲܠܝܵܢܘܼܬܼܵܐ ܩܵܝ̇ܡܝܼܢ
                ܕܠܵܐ ܙܵܘܥܵܐ ܕܚܲܫܹ̈ܐ: ܐܲܝܟܼ ܕܐܵܡ̇ܪܝܼܢ ܡܨܲܠܝܵܢܹ̈ܐ. ܡܸܛܠ ܗܵܕܹܐ
                ܤܵܡܵܗ̇: ܗܵܝ̇ ܕܲܠܘܵܬܼ ܟܠܢܵܫ. ܕܐܲܝܟܼ ܐܲܝܟܲܢܵܐ: ܐܘܿ ܛܘܼܒܼܵܢܵܐ؟
                ܒܲܕܼܓܼܘܿܢ: ܐܵܡܲ݁ܪ: ܐܝܼܬܼ: ܕܩܘܼܪܫܵܐ. ܘܒܼܵܬܲܪ ܩܲܠܝܼܠ: ܫܲܚܝܼܢܘܼܬܼܵܐ.
                
                 496 
                
                ܘܲܟܼܒܲܪ: ܒܲܪܕܵܐ. ܘܒܼܵܬܲܪ ܩܲܠܝܼܠ: ܨܲܚܘܵܐ. ܘܲܠܘܵܬܼ ܕܘܼܪܵܫܲܢ:
                ܗܵܟܲܢܵܐ. ܩܪܵܒܼܵܐ: ܘܥܘܼܕܼܪܵܢܵܐ ܕܛܲܝܒܿܘܼܬܼܵܐ. ܘܒܲܙܒܲܢ ܗܵܘ̇ܝܵܐ ܢܲܦܫܵܐ
                ܒܟܼܝܼܡܘܿܢܵܐ: ܘܤܵܥܹ̇ܝܢ ܥܠܹܝܗ̇ ܓܲܠܠܹ̈ܐ ܕܲܩܫܹܝܢ. ܘܬܼܘܼܒܼ ܗܵܘܹ̇ܐ
                ܫܘܼܚܠܵܦܵܐ: ܘܡܸܤܬܲܥܪܵܐ ܡ̣ܢ ܛܲܝܒܿܘܼܬܼܵܐ. ܘܡܵܠ̇ܝܵܐ ܚܲܕܼܘܼܬܼܵܐ ܠܠܸܒܵܐ
                ܘܲܫܠܵܡܵܐ ܕܡ̣ܢ ܐܲܠܵܗܵܐ: ܘܚܘܼ̈ܫܵܒܹܐ ܢܲܟܼܦܹ̈ܐ ܕܲܡܫܲܝܢܝܼܢ. ܗܵܝ̇ ܕܲܩܪܝܼܚܵܐܝܼܬܼ
                ܡܲܕܼܢܲܚ ܗܵܪܟܵܐ ܚܘܼ̈ܫܵܒܹܐ ܢܲܟܼ̈ܦܹܐ: ܥܲܠ ܒܲܥܪܝܼܪܵܝܘܼܬܼܵܐ ܘܛܲܡܐܘܼܬܼܵܐ
                ܕܐܲܝܠܹܝܢ ܕܡ̣ܢ ܩܕܵܪܡܹܝܗ̇ ܪܵܡܙܵܐ. ܘܲܡܙܲܗܲܪ ܡܵܕܹܝܢ: ܟܲܕܼ ܐܵܡܲ݁ܪ:
                ܕܒܼܵܬܲܪ ܗܵܠܹܝܢ ܚܘܼ̈ܫܵܒܹܐ ܢܲܟܼ̈ܦܹܐ ܘܲܡܫܲܝ̈ܢܹܐ: ܠܪܸܥܝܵܢܵܐ ܢܸܬܼܟܿܒܼܘܼܢ ܓܸܕܼܫܹ̈ܐ:
                ܠܵܐ ܢܲܟܼܪܸܐ ܘܢܸܦܤܘܿܩ ܤܲܒܼܪܵܐ. ܘܲܒܼܥܸܕܵܢ ܢܵܘܚܵܐ ܕܡ̣ܢ ܛܲܝܒܿܘܼܬܼܵܐ:
                ܠܵܐ ܢܸܫܬܲܒܼܗܲܪ. ܐܸܠܵܐ ܒܥܸܕܵܢ ܚܲܕܼܘܼܬܼܵܐ: ܢܚܘܼܪ ܠܐܘܼܠܨܵܢܵܐ. ܗܵܝ̇
                ܕܠܵܐ ܢܲܟܼܪܸܐ ܐܸܢܗ̤ܘ ܕܢܸܬܼܟܿܒܼܘܼܢ ܓܸܕܼܫܹ̈ܐ: ܠܵܘ ܕܠܵܐ ܢܩܘܼܡ
                ܠܘܼܩܒܲܠܗܘܿܢ: ܘܚܵܕܼܝܵܐܝܼܬܼ ܢܩܲܒܸܠ ܐܸܢܘܿܢ ܪܸܥܝܵܢܵܐ ܐܵܡܲ݁ܪ: ܐܲܝܟܼ ܡ̇ܢ
                ܕܲܟܼܝܵܢܵܝܬܼܵܐ ܗ̣̄ܝ ܡܸܟܹܝܠ ܗܵܕܹܐ ܘܕܼܝܼܠܲܢ ܐܸܢܘܿܢ. ܐܸܠܵܐ ܕܠܵܐ ܬܩܘܼܡ
                ܒܲܦܤܵܩ ܤܲܒܼܪܵܐ: ܐܲܝܟܼ ܐ̄ܢܵܫ ܕܲܡܤܲܟܸܐ ܗ̄ܘ̣ܵܐ ܠܡܸܕܸܡ ܕܲܡܥܲܠܲܝ
                ܡ̣ܢ ܬܲܟܼܬܘܼܫܵܐ ܘܲܢܝܵܚܵܐ ܓܡܝܼܪܵܐ ܕܠܵܐ ܫܘܼܚܠܵܦ: ܕܬܼܘܼܒܼ ܠܵܐ
                ܡܩܲܒܸܠ ܠܵܐ ܐܵܓܼܘܿܢܹ̈ܐ ܘܠܵܐ ܫܚܵܩܹ̈ܐ. ܘܠܵܐ ܗܵܘܹ̇ܐ ܒܹܗ ܙܵܘܥܵܐ ܕܲܚܕܼܵܐ
                ܡ̣ܢ ܤܲܩܘܼ̈ܒܼܠܵܝܵܬܼܵܐ: ܗܵܝ̇ ܕܠܵܐ ܫܸܦܪܲܬ̤ ܠܹܗ ܠܡܵܪܲܢ ܐܲܠܵܗܵܐ: ܕܢܸܬܸܠ
                ܠܹܗ ܠܲܟܼܝܵܢܲܢ ܗܵܕܹܐ ܒܥܵܠܡܵܐ ܗܵܢܵܐ: ܕܢܸܗܘܸܐ ܡܸܬܼܒܲܛܠܝܼܢܲܢ ܡ̣ܢ
                ܥܲܡܠܵܐ ܓܡܝܼܪܵܐܝܼܬܼ. ܘܲܒܼܗܵܢܵܐ ܪܸܥܝܵܢܵܐ ܬܸܬܼܪܫܸܠ ܒܲܦܤܵܩ ܤܲܒܼܪܵܐ:
                ܘܲܬܼܦܘܼܫ ܡ̣ܢ ܪܲܗܛܵܟ.
                ܐܸܠܵܐ ܠܲܡ ܕܲܥ: ܕܟܼܠܗܘܿܢ ܩܲܕܝܼ̈ܫܹܐ ܒܗܵܢܵܐ ܥܲܡܠܵܐ ܥܲܡܠܵܐ ܪܡܹܝܢ:
                ܟܡܵܐ ܕܐܝܼܬܲܝܢ ܒܥܵܠܡܵܐ ܗܵܢܵܐ: ܐܵܦܸܢ ܒܘܼܝܵܐܵܐ ܝܲܬܝܼܪܵܐ ܥܲܡ ܗܵܕܹܐ
                
                 497 
                
                ܐܝܼܬܼ ܠܲܢ ܒܟܸܤܝܵܐ. ܒܗܵܝ̇ ܕܟܼܠܝܘܿܡ ܘܲܒܼܟܼܠܥܸܕܵܢ ܡܸܬܿܬܲܒܼܥܝܼܢܲܢ ܕܢܸܬܸܠ
                ܒܘܼܩܝܵܐ ܕܚܘܼܒܲܢ ܠܐܲܠܵܗܵܐ: ܒܬܲܟܼܬܘܼܫܵܐ ܕܠܘܼܩܒܲܠ ܢܸܤܝܼ̈ܘܿܢܹܐ.
                ܘܗܵܕܹܐ ܗ̣̄ܝ ܗܵܝ̇ ܕܠܵܐ ܢܲܟܼܪܸܐ: ܗܵܢܵܘ ܕܹܝܢ: ܕܠܵܐ ܢܸܬܼܩܲܛܲܥ
                ܒܐܵܓܼܘܿܢܲܢ: ܘܗܵܟܲܢܵܐ ܡܛܲܝܒܼܵܐ ܐܘܼܪܚܲܢ. ܗܵܘ̇ ܓܹܝܪ ܕܡ̣ܢ ܗܵܢܵܐ
                ܡܫܲܓܼܢܲܢ: ܡܢܵܬܼܵܐ ܗ̄ܘ̣ ܕܕܹܐܒܹ̈ܐ. ܠܡܸܬܿܕܲܡܵܪܘܼ ܒܗܵܢܵܐ ܩܲܕܝܼܫܵܐ:
                ܕܲܒܼܡܸܠܬܼܵܐ ܙܥܘܿܪܬܵܐ: ܐܲܝܟܲܢ ܫܲܪܪܹܗ ܠܦܵܤܘܿܩܵܐ ܗܵܢܵܐ ܤܒܼܝܼܣ
                ܒܤܘܼ̈ܟܵܠܹܐ: ܘܫܲܩܠܹܗ ܠܦܘܼܠܵܓܼܵܐ ܓܡܝܼܪܵܐܝܼܬܼ ܡ̣ܢ ܪܸܥܝܵܢܹܗ ܕܩܵܪܘܿܝܵܐ.
                ܗܵܘ̇ ܠܲܡ ܕܡ̣ܢ ܗܵܢܵܐ ܡܫܲܓܼܢܲܢ: ܡܢܵܬܼܵܐ ܗ̄ܘ̣ ܕܕܹܐܒܹ̈ܐ. ܟܹܐܡܲܬܼ
                ܕܲܕܼܠܵܐ ܐܘܼܪܚܵܐ ܡܸܬܼܪܲܥܸܐ ܠܡܸܪܕܵܐ: ܗܵܘ̇ ܡ̇ܢ ܕܗܵܢܵܐ ܡܤܵܡ
                ܒܪܸܥܝܵܢܵܐ ܩܢܸܐ: ܘܒܲܠܚܘܿܕܼܵܝܘܼܬܼ ܫܒܼܝܼܠܵܐ ܕܠܵܐ ܕܪܝܼܫ ܠܐܲܒܼ̈ܗܵܬܼܵܐ
                ܨܵܒܹ̇ܐ ܠܡܸܪܕܵܐ. ܕܡܸܛܠܗܵܕܹܐ ܩܲܢܝܼܛ: ܕܲܡܢܵܬܼܵܐ ܗܵܘܹ̇ܐ ܕܕܹܐܒܹ̈ܐ
                ܥܲܬܝܼ̈ܩܹܐ ܥܛܝܼ̈ܦܝ ܠܒܼܘܼ̈ܫܹܐ ܕܐܸܡܪܹ̈ܐ: ܠܡܸܓܼܢܲܒܼ ܢܲܦ̈ܫܵܬܼܵܐ ܤܲܟܼ̈ܠܵܬܼܵܐ
                ܒܐܸܤܟܹܡ ܫܪܵܪܵܐ ܠܒܼܝܼܫܘܼܬܼܗܘܿܢ. ܗܵܝ̇ ܕܲܒܼܥܸܕܵܢ ܚܲܕܼܘܼܬܼܵܐ ܢܚܘܼܪ
                ܠܐܘܼܠܨܵܢܵܐ: ܗܵܕܹܐ ܡܵܘܕܲܥ: ܕܐܸܡܲܬܼܝ ܕܡ̣ܢ ܡܲܥܒܿܕܼܵܢܘܼܬܼܵܐ ܕܛܲܝܒܿܘܼܬܼܵܐ
                ܡܸܢܫܹܠܝ ܢܵܦ̇ܠܝܼܡ ܒܢܲܦܫܵܟܼ ܙܵܘ̈ܥܹܐ ܪܵܘܪ̈ܒܹܐ: ܘܬܸܡܗܵܐ ܕܲܚܙܵܬܼܵܐ
                ܕܡܲܕܥܵܐ ܕܥܲܠ ܐܲܝܠܹܝܢ ܕܲܡܥܲܠܹܝܢ ܡ̣ܢ ܟܝܵܢܵܐ: ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ
                ܐܹܘܲܓܼܪܝܼܣ: ܕܐܸܡܲܬܼܝ ܕܡܲܠܲܐܟܹ̈ܐ ܩܲܕܝܼ̈ܫܹܐ ܩܵܪܒܿܝܼܢ ܨܹܐܕܲܝܢ: ܡܵܠܹ̇ܝܢ
                ܠܲܢ ܚܙܵܬܼܵܐ ܪܘܼܚܵܢܵܝܬܼܵܐ. ܘܟܼܠܗܘܿܢ ܗܵܢܘܿܢ ܕܕܲܠܩܘܼܒܼܠܵܐ ܡܫܲܢܹܝܢ:
                ܘܗܵܘܹ̇ܐ ܫܲܝܢܵܐ ܘܒܼܘܼܠܗܵܝܵܐ ܕܠܵܐ ܡܸܬܼܡܲܠܲܠ.
                ܒܙܲܒܼܢܵܐ ܕܗܵܘܹ̇ܐ ܐܲܢ̄ܬܿ ܠܲܡ ܒܕܲܐܝܟܼ ܗܵܠܹܝܢ: ܕܐܲܓܿܢܲܬ̤ ܛܲܝܒܿܘܼܬܼܵܐ:
                ܘܩܲܪܝܼܒܼܝܼܢ ܘܲܚܕܼܝܼܪܝܼܢ ܡܲܠܲܐܟܹ̈ܐ ܩܲܕܝܼ̈ܫܹܐ: ܘܡܸܛܠܗܵܕܹܐ ܐܸܬܿܕܚܸܩܘ
                ܠܗܘܿܢ ܡ̣ܢ ܘܲܥܕܵܟܼܸ ܟܠܗܘܿܢ ܕܲܡܢܲܤܹܝܢ ܠܵܟܼ: ܠܵܐ ܬܸܬܿܪܝܼܡ
                
                 498 
                
                ܘܬܸܤܒܲܪ ܒܢܲܦܫܵܟܼ: ܐܲܝܟܼ ܗܵܘ̇ ܕܡܲܛ̣ܝܼܬܿ ܠܵܟܼ ܡܸܟܹܝܠ ܠܲܠܡܹܐܢܵܐ
                ܠܵܐ ܡܸܬܿܬܿܙܝܼܥܵܢܵܐ ܘܠܵܐܐܲܪ ܠܵܐ ܡܸܫܬܲܚܠܦܵܢܵܐ: ܘܲܓܼܡܝܼܪܵܐܝܼܬܼ ܐܸܬܼܥܲܠ̣ܝܼܬܿ
                ܠܵܟܼ ܡ̣ܢ ܗܵܢܵܐ ܥܘܼܒܵܐ ܘܤܲܩܘܼܒܼܠܵܝܘܼܬܼܵܐ ܕܡܲܫܒܹ̈ܐ ܕܒܼܵܗ̇: ܘܠܲܝܬܿ
                ܬܘܼܒܼ ܒܥܸܠܕܒܼܵܒܼܵܐ ܐܵܦܠܵܐ ܦܸܓܼܥܹ̈ܐ ܒܝܼ̈ܫܹܐ. ܕܤܲܓܝܼ̈ܐܹܐ ܗܘ̤ܵܘ ܕܗܵܠܹܝܢ
                ܐܸܬܼܪܲܥܝܼܘ: ܘܲܢܦܲܠܘ ܒܩܹܘܲܢܕܹܝܢܘܿܣ: ܐܲܝܟܼ ܕܐܸܡ݂ܲܪ ܐܹܘܲܓܼܪܝܼܣ: ܐܵܘ
                ܟܹܝܬܼ ܬܘܼܒܼ ܐܲܝܟܼ ܗܵܘ̇ ܕܡ̣ܢ ܤܲܓܝܼ̈ܐܹܐ ܪܲܒܿ ܐܲܢ̄ܬܿ. ܘܙܵܕܼܩܵܐܝܼܬܼ ܟܹܐܡܲܬܼ
                ܐܝܼܬܲܝܟ ܒܗܵܠܹܝܢ: ܘܲܐ̄ܚܪ̈ܵܢܹܐ ܠܲܡ ܡܸܛܠ ܒܨܝܼܪܘܼܬܼܵܐ ܕܕܼܘܼܒܵܪ̈ܲܝܗܘܿܢ:
                ܐܵܘ ܒܲܕܼܠܵܐ ܠܲܡ ܤܵܦ̇ܩܵܐ ܝܑܼܕܲܥܬܼܗܘܿܢ ܓܠܝܼܙܝܼܢ ܡ̣ܢ ܕܐܲܝܟܼ ܗܵܠܹܝܢ.
                ܐܸܢܵܐ ܠܲܡ ܒܘܵܠܝܼܬܼܵܐ: ܘܡܸܟܹܝܠ ܡܲܛ̇ܝܼܬܼ ܠܢܲܟܼܦܘܼܬܼܵܐ ܓܡܝܼܪܬܵܐ:
                ܘܲܠܕܲܪܲܓܼܵܐ ܕܪܘܼܚܵܢܘܼܬܼܵܐ: ܘܲܠܚܘܼܕܵܬܼܵܐ ܕܠܵܐ ܫܘܼܚܠܵܦ. ܐܸܠܵܐ ܐܲܝܵܬܼܵܐ
                ܥܲܠ ܒܵܠܵܟܼ: ܠܚܘܼ̈ܫܵܒܹܐ ܛܲܡ̈ܐܹܐ ܘܲܠܨܲܠܡܹ̈ܐ ܡܫܲܟܿܪܹ̈ܐ ܕܐܸܬܼܩܒܲܥܘ
                ܒܪܸܢܝܵܢܵܟܼ ܒܲܙܒܲܢ ܟܝܼܡܘܿܢܵܐ: ܘܠܲܫܓܼܘܼ̈ܫܝܹܐ ܘܠܵܐ ܡܛܲܟܿܤܘܼܬܼܵܐ ܕܚܘܼ̈ܫܵܒܹܐ
                ܕܲܤܥ̣ܵܘ ܥܠܲܝܟܼ ܡ̣ܢ ܩܕܼܵܡ ܩܲܠܝܼܠ: ܒܥܲܡܛܵܢܵܐ ܗܵܘ̇ ܚܲܫܝܼܟܼܵܐ.
                ܘܕܲܐܝܟܲܢ ܕܠܝܼܠܵܐܝܼܬܼ ܐܸܬܼܪܟܸܢܬܿ ܠܘܵܬܼ ܚܲܫܹ̈ܐ ܘܐܸܬܼܥܢܝܼܬܿ ܥܲܡܗܘܿܢ
                ܒܲܙܒܲܢ ܕܠܘܼܚܝܵܐ ܕܪܸܥܝܵܢܵܐ: ܘܠܵܐ ܒܗܸܬܬܿ ܡ̣ܢ ܚܵܘܪܵܐ ܐܲܠܵܗܵܝܵܐ:
                ܘܡ̣ܢ ܡܵܘܗ̈ܒܼܵܬܼܵܐ ܘܫܘܼ̈ܟܵܢܹܐ ܕܩܲܒܸܠܬܿ. ܘܕܲܥ ܕܗܵܠܹܝܢ ܟܠܗܹܝܢ:
                ܕܬܸܬܼܡܲܟܲܟܼ ܠܲܝܬܿܝܲܬ̤ ܥܠܲܝܟ ܒܛܝܼܠܘܼܬܹܗ ܕܐܲܠܵܗܵܐ: ܗܵܝ̇ ܕܲܡܦܲܪܢܤܵܐ
                ܠܟܼܠܚܲܕܼ ܚܲܕܼ ܡܸܢܲܢ ܐܲܝܟܼ ܕܥܵܕܼܪܵܐ ܠܹܗ. ܘܐܸܢ ܡܸܬܿܬܿܪܝܼܡ ܐܲܢ̄ܬܿ
                ܒܡܵܘܗ̈ܒܼܵܬܼܵܗ̇: ܫܵܒܼ̇ܩܵܐ ܠܵܟܼ: ܘܲܓܼܡܝܼܪܵܐܝܼܬܼ ܢܵܦܹ̇ܠ ܐܲܢ̄ܬܿ ܒܤܘܼܥܪ̈ܵܢܹܐ:
                ܒܗܵܠܹܝܢ ܕܲܒܼܗܹܝܢ ܒܚܘܼ̈ܫܵܒܹܐ ܡܸܬܼܢܲܤܸܐ ܐܲܢ̄ܬܿ.
                ܡܵܕܹܝܢ: ܕܲܥ: ܕܗܵܕܹܐ ܬܘܼܒܼ ܕܩܝܼܡ ܐܲܢ̄ܬܿ: ܠܵܐ ܕܝܼܠܵܟܼ ܐܝܼܬܹܝܗ̇:
                ܘܠܵܐ ܕܲܡܝܲܬܿܪܘܼܬܼܵܟܼ. ܐܸܠܵܐ ܛܲܝܒܿܘܼܬܼܵܐ ܗ̣̄ܝ ܕܲܛܥܝܼܢܵܐ ܠܵܟܼ ܥܲܠ
                
                 499 
                
                ܦܲܤܹ̈ܐ ܕܐܝܼ̈ܕܹܝܗ̇: ܕܠܵܐ ܬܸܬܿܙܝܼܥ. ܗܵܠܹܝܢ ܠܲܡ ܐܲܝܵܬܐ ܥܲܠ ܒܵܠܵܟܼ
                ܒܲܙܒܲܢ ܚܲܕܼܘܼܬܼܵܐ: ܟܲܕܼ ܡܸܬܿܬܿܪܝܼܡ ܚܘܼܫܵܒܼܵܟܼ: ܐܵܡܲ݁ܪ ܐܲܒܼܘܼܢ ܩܲܕܝܼܫܵܐ:
                ܘܲܒܼܟܼܝܼ ܘܕܲܡܲܥ. ܘܐܸܬܼܓܲܪܓܲܚ ܥܲܠ ܥܘܼ̈ܗܕܵܢܹܐ ܕܫܵܪ̈ܥܵܬܼܵܟܼ ܕܒܲܙܒܲܢ
                ܡܸܫܬܲܒܼܩܵܢܘܼܬܼܵܟܼ: ܕܲܟܼܒܲܪ ܡܸܫܬܵܘܙܲܒܼ ܐܲܢ̄ܬܿ ܒܗܵܕܹܐ ܕܬܸܩܢܸܐ ܡܸܢܗܹܝܢ
                ܡܲܟܿܝܼܟܼܘܼܬܼܵܐ. ܒܪܲܡ ܕܹܝܢ: ܠܵܐ ܢܸܦܤܘܿܩ ܤܲܒܼܪܵܐ ܕܢܲܦܫܵܟܼ: ܐܸܠܵܐ
                ܒܚܘܼ̈ܫܵܒܹܐ ܕܡܲܟܿܝܼܟܼܘܼܬܼܵܐ ܚܲܤܵܐ ܚܛܵܗܲܝ̈ܟ. ܡܲܟܿܝܼܟܼܘܼܬܼܵܐ: ܘܐܵܦ
                ܒܸܠܥܵܕܼ ܡ̣ܢ ܥܲܡ̈ܠܹܐ: ܚܛܵܗܹ̈ܐ ܤܲܓܝܼ̈ܐܹܐ ܡܚܲܤܝܵܐ. ܥܲܡܠܹ̈ܐ ܕܹܝܢ ܕܠܵܐ
                ܡܲܟܿܝܼܟܼܘܼܬܼܵܐ: ܕܲܠܩܘܼܒܼܠܵܐ: ܐܲܝܟܼ ܕܐܵܦ ܕܠܵܐ ܝܘܼܬܼܪܵܢ ܐܸܢܘܿܢ: ܐܸܠܵܐ
                ܘܲܠܒܼܝܼ̈ܫܵܬܼܵܐ ܤܲܓܝܼ̈ܐܵܬܼܵܐ ܡܥܲܬܕܹܝܢ ܠܲܢ. ܡܵܕܹܝܢ ܚܲܤܵܐ ܚܛܵܗܲܝ̈ܟ
                ܒܡܲܟܿܝܼܟܼܘܼܬܼܵܐ: ܐܲܝܟܼ ܕܐܸܡ̇ܪܹܬܼ. ܐܲܝܟܼ ܡܸܠܚܵܐ ܠܲܡ ܠܟܼܠ ܡܹܐܟܼ̈ܠܵܢ:
                ܗܵܟܲܢܵܐ ܡܲܟܿܝܼܟܼܘܼܬܼܵܐ ܠܟܼܠ ܡܝܲܬܿܪ̈ܵܢ. ܥܘܼܫܢܵܐ ܕܲܚܛܵܗܹ̈ܐ ܤܲܓܝܼ̈ܐܹܐ:
                ܡܸܫܟܿܚܵܐ ܬܵܒܼܒܵܐ ܗܵܕܹܐ. ܥܲܠ ܗܵܕܹܐ ܐܵܠ̇ܨܵܐ ܡܵܕܹܝܢ: ܕܪܸܥܝܵܢܵܐ ܢܸܚܲܫ
                ܐܲܡܝܼܢܵܐܝܼܬܼ: ܒܡܘܼܟܵܟܼܵܐ ܘܲܒܼܚܲܫܵܐ ܕܦܘܼܪܫܵܢܵܐ. ܘܗ̤ܝ ܗܵܕܹܐ ܐܸܢ ܢܸܩܘܸܐ:
                ܥܵܒܼ̇ܕܵܐ ܠܲܢ ܒܪܵܐ ܕܐܲܠܵܗܵܐ. ܘܲܕܼܸܠܵܐ ܦܘܼܠܚܵܢܵܐ: ܡܝܲܬܪܹ̈ܐ ܡܩܝܼܡܵܐ
                ܠܲܢ ܩܕܼܵܡ ܐܲܠܵܗܵܐ. ܐܲܝܟܼ ܕܐܵܦ ܒܸܠܥܵܕܹܝܗ̇: ܤܪܝܼܩ ܗ̄ܘ̣ ܟܠ
                ܦܘܼܠܚܵܢ ܘܟܼܠ ܡܝܲܬܪܘܼ ܘܥܲܡ̈ܠܝܼܢ. ܡܵܕܹܝܢ: ܫܘܼܠܵܦܵܐ ܗ̄ܘ̣
                ܕܪܸܥܝܵܢܵܐ ܒܵܥܹ̇ܐ ܐܲܠܵܗܵܐ. ܒܪܸܥܝܵܢܵܐ ܗ̄ܘ̣ ܡܸܬܼܝܲܬܿܪܝܼܢܲܢ: ܘܲܒܪܸܥܝܵܢܵܐ
                ܗ̄ܘ̣ ܡܸܬܿܬܿܫܝܼܛܝܼܢܲܢ. ܒܲܠܚܘܿܕܼܵܝܘܼܬܼܵܗ̇ ܗܵܟܹܝܠ ܤܵܦ̇ܩܵܐ ܗܵܕܹܐ ܕܠܵܐ
                ܬܲܥܕܝܼܪܵܐ: ܕܲܬܼܩܘܼܡ ܩܕܼܵܡ ܐܲܠܵܗܵܐ ܘܲܬܼܡܲܠܸܠ ܚܠܵܦܲܝܢ.
                ܘܐܵܘܕܵܐ ܠܐܲܠܵܗܵܐ ܕܠܵܐ ܫܲܠܘܵܐ: ܕܟܲܕܼ ܐܲܝܢܵܐ ܟܝܵܢܵܐ ܬܵܚܘܿܒܼܵܐ
                ܘܲܕܼܠܝܼܠ ܠܡܸܨܛܲܠܝܵܢܘܼܬܼܵܐ ܩܢܸܐ ܐܲܢ̄ܬܿ: ܒܥܘܼܕܼܪܵܢܵܐ ܕܛܲܝܒܿܘܼܬܼܵܐ
                ܠܐܲܝܟܵܐ ܡܸܬܼܥܲܠܸܐ ܐܲܢ̄ܬܿ ܒܲܙܒܲܢ ܙܒܲܢ: ܘܠܲܐܝܠܹܝܢ ܡܵܘܗ̈ܒܼܵܬܼܵܐ: ܘܲܒܼܡܵܢܵܐ
                
                 500 
                
                ܗܵܘܹ̇ܐ ܐܲܢ̄ܬܿ ܠܥܸܠ ܡ̣ܢ ܟܝܵܢܵܟܼ؟ ܘܐܸܡܬܼܝ ܕܡܸܫܬܿܒܸܩ ܐܲܢ̄ܬܿ: ܥܕܲܡܵܐ
                ܠܐܲܝܟܵܐ ܡܸܬܿܬܲܚܬܸܐ ܐܲܢ̄ܬܿ: ܘܩܵܢܹ̇ܐ ܐܲܢ̄ܬܿ ܗܵܘܢܵܐ ܕܲܒܼܥܝܼܪܵܐ؟ ܘܐܸܬܿܕܲܟܼܸܪ
                ܠܕܼܵܘܝܘܼܬܼ ܟܝܵܢܵܟܼ: ܘܠܲܕܼܠܝܼܠܘܼܬܼܫ ܫܘܼ̈ܚܠܵܦܹܐ ܕܢܲܩܝܼܦܵܐ ܠܵܟܼ: ܕܐܵܦ
                ܚܲܕܼ ܡ̣ܢ ܤܵܒܹ̈ܐ ܩܲܕܝܼ̈ܫܹܐ ܐܵܡܲ݁ܪ: ܡܵܐ ܠܲܡ ܕܐܵܬܹ̇ܐ ܠܵܟܼ ܚܘܼܫܵܒܼܵܐ
                ܕܪܵܡܘܼܬܼܵܐ: ܕܢܹܐܡܲܪ ܒܥܘܼܗܕܵܢܵܐ ܕܲܡܝܲܬܪ̈ܵܬܼܵܟܼ: ܐܸܡܲܪ: ܤܵܒܼܵܐ: ܚܙܝܼ
                ܙܵܢܝܘܼܬܼܵܟܼ! ܠܗܵܕܹܐ ܙܵܢܝܘܼܬܼܵܐ ܕܲܒܼܙܲܒܼܢܵܐ ܕܡܸܫܬܲܒܼܩܵܢܘܼܬܼܵܐ: ܐܵܡܲ݁ܪ:
                ܕܲܒܼܚܘܼܫܵܒܼܵܐ ܡܸܬܼܢܲܤܸܐ. ܗܵܝ̇ ܕܲܠܘܵܬܼ ܟܠܢܵܫ ܡܦܲܪܢܤܵܐ ܛܲܝܒܿܘܼܬܼܵܐ:
                ܐܸܢ ܩܪܵܒܼܵܐ ܘܐܸܢ ܥܘܼܕܼܪܵܢܵܐ: ܠܦܘܼܬܼ ܕܥܵܕܼܪܵܐ ܠܲܢ. ܚ̣ܙܲܝܬܿ ܠܗܵܢܵܐ
                ܤܵܒܼܵܐ ܬܡܝܼܗܵܐ: ܐܲܝܟܲܢ ܦܫܝܼܩܵܐܝܼܬܼ ܐܲܡ̣ܪܵܗ̇ ܠܲܨܒܼܘܼܬܼܵܐ؟ ܡܵܐ ܠܲܡ
                ܕܐܵܬܹ̇ܐ ܠܵܟܼ ܚܘܼܫܵܒܼܵܐ ܕܪܵܡܘܼܬܼܵܐ: ܡܸܛܠ ܡܥܲܠܝܘܼܬܼܵܐ ܕܕܼܘܼܒܵܪ̈ܲܝܟ:
                ܐܸܡܲܪ: ܤܵܒܼܵܐ: ܚܙܝܼ ܙܵܢܝܘܼܬܼܵܟܼ! ܓܲܠܝܵܐ ܗ̣̄ܝ ܓܹܝܪ: ܕܗܵܕܹܐ ܠܘܵܬܼ
                ܐ̄ܢܵܫ ܪܲܒܵܐ ܐܵܡܲ݁ܪ ܗ̄ܘ̣ܵܐ ܠܵܗ̇ ܤܵܒܼܵܐ ܗܵܢܵܐ: ܒܲܕܼܸܠܵܐ ܡܲܨܝܵܐ ܕܢܸܬܼܠܲܙܙܘܼܢ
                ܡ̣ܢ ܚܘܼ̈ܫܵܒܹܐ ܕܪܵܡܘܼܬܼܵܐ: ܐܸܠܵܐ ܐܲܝܠܹܝܢ ܕܲܒܼܛܲܟܼܤܵܐ ܡܥܲܠܝܵܐ ܘܲܒܼܕܼܘܼܒܵܪܵܐ
                ܕܫܵܘܹ̇ܐ ܠܩܘܼܠܵܤܵܐ ܩܵܝ̇ܡܝܼܢ. ܒܗܵܝ̇ ܕܗܵܢܵܐ ܚܲܫܵܐ: ܡ̣ܢ ܒܵܬܼܪ ܡܝܲܬܪܘܼܬܼܵܐ
                ܕܐܸܬܼܦܲܠܚܲܬ̤: ܤܵܥܹ̇ܐ ܥܲܠ ܢܲܦܫܵܐ: ܕܲܢܤܲܪܩܝܼܗ̇ ܡ̣ܢ ܦܘܼܠܚܵܢܵܗ̇.
                ܐܵܦ ܡ̣ܢ ܚܕܼܵܐ ܡ̣ܢ ܐܸܓܿܪ̈ܵܬܹܗ ܕܝܼܠܹܗ ܕܛܘܼܒܼܵܢܵܐ ܡܵܩܵܪܝܼܣ:
                ܡܸܫܟܲܚ ܐܲܢ̄ܬܿ ܕܬܹܐܠܲܦ ܐܸܢ ܬܸܨܒܸܐ. ܕܟܲܕܼ ܒܐܲܝܠܹܝܢ ܕܲܪ̈ܓܹܐ ܩܵܝ̇ܡܝܼܢ:
                ܐܲܝܠܹܝܢ ܡܸܫܬܲܒܼܩܝܼܢ ܥܠܲܝܗܘܿܢ ܠܡܸܬܼܢܲܤܵܝܘܼ ܒܗܹܝܢ ܩܲܕܝܼ̈ܫܹܐ. ܐܝܼܬܹܝܗ̇
                ܕܹܝܢ ܐܸܓܲܪܬܵܐ ܗܵܝ̇: ܐܲܒܼܵܐ ܡܵܩܵܪܝܼܣ ܟܬܲܒܼ ܠܟܼܠܗܘܿܢ ܒܢܵܘ̈ܗܝ
                ܚܲܒܿܝܼ̈ܒܹܐ: ܟܲܕܼ ܡܵܘܕܲܥ ܬܲܡܵܢ ܢܲܗܝܼܪܵܐܝܼܬܼ: ܕܐܲܝܟܲܢ ܡܸܬܼܦܲܪܢܤܝܼܢ
                ܡ̣ܢ ܐܲܠܵܗܵܐ: ܩܪ̈ܵܒܹܐ ܘܥܘܼܕܼܪ̈ܵܢܹܐ ܕܛܲܝܒܿܘܼܬܼܵܐ. ܕܲܒܼܗܘܿܢ ܒܗܵܠܹܝܢ
                ܫܸܦܪܲܬ̤ ܠܚܸܟܼܡܬܹܗ ܕܐܲܠܵܗܵܐ ܕܢܸܬܿܕܲܪܫܘܼܢ: ܟܡܵܐ ܕܲܒܼܚܲܝܹ̈ܐ ܗܵܠܹܝܢ
                
                 501 
                
                ܪܡܹܝܢ ܚܠܵܦ ܡܝܲܬܿܪܘܼܬܼܵܐ: ܒܐܵܓܼܘܿܢܵܐ ܕܠܘܼܩܒܲܠ ܚܛܝܼܬܼܵܐ. ܐܲܝܟܼ
                ܕܲܒܼܟܼܠܙܒܲܢ: ܠܘܵܬܹܗ ܢܸܗܘܸܐ ܬܠܸܐ ܚܝܵܪܗܘܿܢ. ܒܚܵܘܪܵܐ ܐܲܡܝܼܢܵܐ
                ܕܲܠܘܵܬܹܗ: ܢܸܬܼܪܲܒܸܐ ܒܗܘܿܢ ܚܘܼܒܹܗ ܩܲܕܝܼܫܵܐ. ܕܟܲܕܼ ܐܲܡܝܼܢܵܐܝܼܬܼ ܡ̣ܢ
                ܚܹܐܦܵܐ ܕܚܲܫܹ̈ܐ ܘܩܸܢܛܵܐ ܕܡܸܨܛܲܠܝܵܢܘܼܬܼܵܐ ܠܘܵܬܹܗ ܢܸܪܗܛܘܼܢ:
                ܢܸܫܬܲܪܪܘܼܢ ܒܗܲܝܡܵܢܘܼܬܼܵܐ ܘܤܲܒܼܪܵܐ ܘܚܘܼܒܵܐ. ܗܵܠܹܝܢ ܗܵܠܹܝܢ ܗܵܟܹܝܠ: ܠܵܘ
                ܠܐܲܝܠܹܝܢ ܕܐܲܡܝܼܢܝܼܢ ܨܹܝܕܼ ܒܢܲܝ̈ܢܵܫܵܐ ܘܦܵܗܹ̇ܝܢ ܒܟܼܠܕܘܼܟ: ܘܒܲܐܡܝܼܢܘܼ
                ܒܤܘܼܥܪ̈ܵܢܹܐ ܘܲܒܼܚܲܫܹ̈ܐ ܛܲܡ̈ܐܹܐ ܫܲܪܝܵܐܝܼܬܼ ܐܲܡܝܼܪ̈ܲܢ. ܘܐܵܦܠܵܐ ܠܐܲܝܠܹܝܢ
                ܕܙܲܕܝܼܩܘܼܬܼܵܐ ܒܲܥ̇ܒܼܵܕܹ̈ܐ ܕܲܠܒܲܪ ܡ̣ܢ ܫܸܠܝܵܐ ܦܵܠ̇ܚܝܼܢ: ܘܲܒܼܪܸ̈ܓܼܫܹܐ
                ܡܸܬܿܬܿܨܝܼܕܝܼܢ ܒܟܼܠܫܵܥ: ܘܲܒܼܟܼܠܙܒܲܢ ܒܩܹܘܲܢܕܹܝܢܘܿܣ ܕܡܲܦܘܼܠܬܼܵܐ
                ܡܩܝܼܡܵܐ ܠܗܘܿܢ ܐܵܢܲܢܩܹܐ ܕܐܲܝܠܹܝܢ ܕܲܒܼܗܘܿܢ ܦܵܓܼ̈ܥܵܢ ܠܒܲܪ ܡ̣ܢ
                ܨܒܼܝܵܢܗܘܿܢ: ܒܓܸܕܼܫܹ̈ܐ ܕܠܵܐ ܪܥܹܝܢ. ܗܵܝ̇ ܕܠܵܘ ܒܲܠܚܘܿܕܼ ܚܘܼܫܵܒܲܝ̈ܗܘܿܢ:
                ܐܸܠܵܐ ܐܵܦܠܵܐ ܠܪܸ̈ܓܼܫܲܝܗܘܿܢ ܡܨܹܝܢ ܠܡܸܛܲܪ ܓܡܝܼܪܵܐܝܼܬܼ. ܐܸܠܵܐ ܠܐܲܝܠܹܝܢ
                ܕܒܲܙܗܝܼܪܘܼܬܼܵܐ ܪܲܒܿܬܼܵܐ ܢܵܛܪܝܼܢ ܦܲܓܼܪ̈ܲܝܗܘܿܢ ܘܚܘܼܫܵܒܲܝ̈ܗܘܿܢ:
                ܘܡܲܪܚܩܝܼܢ ܠܲܓܼܡܵܐ ܡ̣ܢ ܫܓܼܘܼ̈ܫܝܹܐ ܘܥܸܢܝܵܢܹ̈ܐ ܕܲܒܼܢܲܝ̈ܢܵܫܵܐ: ܘܲܫܒܼܝܼܩܘܼܬܼܵܐ
                ܕܟܼܠܡܸܕܸܡ ܘܐܵܦ ܢܲܦܫܗܘܿܢ: ܐܸܤܬܲܦܸܩܘ ܠܡܸܛܲܪ ܗܵܘܢܗܘܿܢ
                ܒܲܨܠܘܿܬܼܵܐ: ܘܲܡܫܲܚܠܦܘܼܬܼ ܦܘܼܪ̈ܢܵܤܹܐ ܕܡ̣ܢ ܛܲܝܒܿܘܼܬܼܵܐ ܡܩܲܒܿܠܝܼܢ
                ܒܓܼܵܘ ܫܸܠܝܵܐ ܓܡܝܼܪܵܐ. ܘܲܬܼܚܹܝܬܼ ܕܪܵܥܵܐ ܕܝܼܕܲܥܬܹܗ ܕܡܵܪܝܵܐ
                ܡܸܬܼܪܲܒܹܝܢ: ܘܡܸܬܼܚܲܟܿܡܝܼܢ ܡ̣ܢ ܪܘܼܚܵܐ ܟܲܤܝܵܐܝܼܬܼ: ܒܫܸܠܝܵܐ ܕܡ̣ܢ
                ܤܘܼܥܪ̈ܵܢܹܐ ܘܲܚܙܵܬܼܵܐ ܕܨܸܒܼ̈ܘܵܬܼܵܐ: ܘܲܩܢܹܝܢ ܡܝܼܬܼܘܼܬܼ ܪܸܥܝܵܢܵܐ ܕܡ̣ܢ
                ܥܵܠܡܵܐ. ܚܲܫܹ̈ܐ: ܠܵܐ ܡܵܝ̇ܬܝܼܢ. ܥܸܢܝܵܢܵܐ ܕܹܝܢ: ܡܵܐܹ̇ܬܼ ܡܸܢܗܘܿܢ:
                ܒܪܲܚܝܼܩܘܼܬܼܵܐ ܕܡ̣ܢ ܨܸܒܼ̈ܘܵܬܼܵܐ ܘܥܘܼܕܼܪܵܢܵܐ ܕܛܲܝܒܿܘܼܬܼܵܐ.