Isaac of Nineveh. “Discourse 73.” Based upon Digital Syriac Corpus. Last modified March 5, 2019. https://syriaccorpus.org/464.
    
        
            
                 502 
                ܪܸܥܝܵܢܵܐ ܟܢܝܼܫܵܐ ܕܝܼܠܹܗ ܕܦܵܤܘܿܩܵܐ: ܥܲܡ ܤܘܼ̈ܟܵܠܹܐ ܕܐܲܝܠܹܝܢ
                ܕܐܸܬܼܐܡܲܪ. ܥܓ.
            
            
                ܪܸܥܝܵܢܵܐ ܕܹܝܢ ܟܢܝܼܫܵܐ ܕܦܵܤܘܿܩܵܐ ܗܵܢܵܐ ܐܝܼܬܼܵܘܗܝ: ܕܢܵܘܕܥܲܢ
                ܕܲܒܼܟܼܠܥܸܕܵܢ ܒܗܵܠܹܝܢ ܥܸܤܪܝܼܢ ܘܐܲܪܒܲܥ ܫܵܥ̈ܝܼܢ ܕܠܸܠܝܵܐ ܘܕܼܐܝܼܡܵܡܵܐ:
                ܥܲܠ ܬܝܵܒܼܘܼܬܼܵܐ ܤܢܝܼܩܝܼܢܲܢ. ܤܘܼܟܵܠܵܐ ܕܫܘܼܡܵܗܵܐ ܕܲܬܼܝܵܒܼܘܼܬܼܵܐ: ܐܲܝܟܼ
                ܕܡ̣ܢ ܫܪܵܪܵܐ ܕܲܙܢܵܐ ܤܘܼܥܪܵܢܵܝܵܐ ܗܵܢܵܘ: ܦܝܵܤܵܐ ܚܢܝܼܓܼܵܐ ܕܲܒܼܟܼܠܥܸܕܵܢ
                ܕܒܲܨܠܘܿܬܼܵܐ ܡܲܠܝܲܬܼ ܬܘܵܬܼܵܐ: ܕܡܸܬܼܩܲܪܲܒܼ ܠܐܲܠܵܗܵܐ ܥܲܠ ܫܘܼܒܼܩܵܢܵܐ
                ܕܗܵܢܹܝܢ ܕܲܥܒܲܪ: ܘܒܼܵܥܘܼܬܼܵܐ ܕܥܲܠ ܢܛܝܼܪܘܼܬܼܵܐ ܕܡ̣ܢ ܗܵܠܹܝܢ
                ܕܲܥܬܼܝܼ̈ܕܼܵܢ. ܡܸܛܠܗܵܢܵܐ ܐܵܦ ܡܵܪܲܢ: ܥܲܠ ܨܠܘܿܬܼܵܐ ܤܲܡܟܵܗ̇
                ܠܲܡܚܝܼܠܘܼܬܲܢ. ܐܸܬܿܬܿܥܝܼܪܘ ܠܲܡ ܘܨܲܠܵܘ: ܕܠܵܐ ܬܸܥܠܘܼܢ
                ܠܢܸܤܝܘܿܢܵܐ. ܘܨܲܠܵܘ: ܘܠܵܐ ܬܸܡܐܲܢ ܠܟܼܘܿܢ. ܘܲܗ̤ܘܲܝܬܘܿܢ ܫܵܗܪܝܼܢ
                ܒܟܼܠܙܒܲܢ ܘܲܡܨܲܠܹܝܢ. ܘܲܒܼܥܵܘ ܠܲܡ: ܘܬܸܤܒܼܘܼܢ. ܘܲܫܐܲܠܘ: ܘܢܸܬܼܝܼܗܸܒܼ
                ܠܟܼܘܿܢ. ܘܩܘܿܫܘ: ܘܢܸܬܼܦܬܲܚ ܠܟܼܘܿܢ. ܘܟܼܠ ܡ̇ܢ ܕܫܵܐܹ̇ܠ: ܢܵܤܹ̇ܒܼ.
                ܘܲܕܼܒܼܵܥܹ̇ܐ: ܡܸܫܟܲܚ. ܘܐܲܝܢܵܐ ܕܢܵܩܹ̇ܫ: ܡܸܬܼܦܬܲܚ ܠܹܗ. ܘܫܲܪܪܵܗ̇
                ܝܲܬܝܼܪܵܐܝܼܬܼ ܠܡܸܠܬܹܗ ܘܝܲܬܝܼܪ ܚܲܦܛܲܢ: ܒܗܵܝ̇ ܕܐܲܡܬܸܠ ܒܪܵܚܡܵܐ
                ܕܐܸܙܲܠ̣ ܨܹܝܕܼ ܪܵܚܡܹܗ ܒܦܸܠܓܹܗ ܕܠܸܠܝܵܐ: ܘܲܫܐܸܠ̣ ܡܸܢܹܗ ܠܲܚܡܵܐ.
                ܐܵܡܹܝܢ ܠܲܡ ܐܵܡܲ݁ܪ ܐ̄ܢܵܐ ܠܟܼܘܿܢ: ܕܐܵܦܸܢ ܡܸܛܠ ܪܵܚܡܘܼܬܹܗ ܠܵܐ
                ܢܸܬܸܠ ܠܹܗ: ܡܸܛܠ ܚܲܨܝܼܦܘܼܬܹܗ ܢܩܘܼܡ ܘܢܸܬܸܠ ܠܹܗ: ܟܡܵܐ
                ܕܡܸܬܒܿܥܸܐ ܠܹܗ. ܐܵܦ ܐܲܢ̄ܬܿܘܿܢ ܨܲܠܵܘ: ܘܠܵܐ ܬܸܡܐܲܢ ܠܟܼܘܿܢ. ܐܹܝܘ
                ܠܠܘܼܒܵܒܼܵܐ ܕܠܵܐ ܡܸܬܼܡܲܠܲܠ ܕܝܵܗܘܿܒܼܵܐ: ܕܲܡܓܲܪܸܓܼ ܠܲܢ ܕܲܫܐܲܠܘ ܡܹܢܝ
                ܘܐܸܬܸܠ ܠܟܼܘܿܢ ܡܵܘܗܲܒܼܬܼܵܐ! ܘܐܵܦ ܗ̤ܘ: ܟܠ ܐܲܝܕܵܐ ܕܥܵܕܼܪܵܐ ܡܦܲܪܢܸܣ
                
                 503 
                
                ܐܲܝܟܼ ܕܗ̤ܘ ܝܵܕܲܥ. ܒܪܲܡ ܠܘܼܒܵܒܼܵܐ: ܘܬܼܘܼܟܼܠܵܢܵܐ ܪܲܒܵܐ ܡܲܠ̈ܝܵܢ
                ܒܢܵܬܼ̈ ܩܵܠܹ̈ܐ ܗܵܠܹܝܢ.
                ܘܲܒܼܗܵܝ̇ ܕܝܼܕܲܥ̣ ܡܵܪܲܢ ܕܠܵܐ ܐܲܪܝܼܡܵܗ̇ ܠܡܸܨܛܲܠܝܵܢܘܼܬܼܵܐ ܩܕܼܵܡ
                ܟܵܤܹܗ ܕܡܵܘܬܵܐ: ܘܲܟܼܡܵܐ ܕܗ̤ܝ ܐܝܼܬܹܝܗ̇: ܩܲܪܝܼܒܼ ܗ̄ܘ̣ ܠܒܲܪܢܵܫܵܐ
                ܫܘܼܚܠܵܦܵܐ ܕܡ̣ܢ ܡܝܲܬܿܪܘܼܬܼܵܐ ܠܲܒܼܨܝܼܪܘܼܬܼܵܐ: ܘܲܡܩܲܒܿܠܵܢܵܐ ܗ̄ܘ̣
                ܕܓܸܕܼܫܹ̈ܐ ܗ̤ܘ ܟܝܵܢܵܐ: ܥܲܠ ܬܲܟܼܫܲܦܬܼܵܐ ܐܲܡܝܼܢܬܼܵܐ ܚܲܦܛܲܢ. ܕܐܸܠܘܼ
                ܐܝܼܬܼ ܗ̄ܘ̣ܵܐ ܐܲܬܼܪܵܐ ܕܬܼܘܼܟܼܠܵܢܵܐ ܒܥܵܠܡܵܐ ܗܵܢܵܐ: ܕܟܲܕܼ ܠܘܵܬܹܗ
                ܢܸܡܛܸܐ ܒܲܪܢܵܫܵܐ: ܡ̣ܢ ܕܗܵܝܕܹܝܟ ܡܸܟܹܝܠ ܐܸܬܼܥܲܠܝܼ ܠܹܗ ܟܝܵܢܹܗ
                ܡ̣ܢ ܤܢܝܼܩܘܼܬܼܵܐ ܘܦܘܼܠܚܵܢܹܗ ܡ̣ܢ ܩܵܢܛܵܐ: ܥܲܠ ܨܠܘܿܬܼܵܐ ܠܵܐ
                ܡܙܲܗܲܪ ܗ̄ܘ̣ܵܐ ܠܲܢ ܘܲܡܚܲܦܸܛ ܒܲܒܼܛܝܼܠܘܼܬܼܵܐ. ܐܲܝܟܼ ܕܐܵܦܠܵܐ ܒܥܵܠܡܵܐ
                ܕܲܥܬܼܝܼܕܼ ܨܠܵܘ̈ܵܬܼܵܐ ܡܩܲܪܒܼܝܼܢ ܒܢܲܝ̈ܢܵܫܵܐ ܠܐܲܠܵܗܵܐ: ܒܲܦܝܵܤܹ̈ܐ ܕܥܲܠ
                ܡܸܕܸܡ ܡܸܕܸܡ. ܒܗܵܝ̇ ܕܲܒܼܗܵܘ̇ ܐܲܬܼܪܵܐ ܕܚܹܐܪܘܼܬܼܵܐ: ܠܵܐ ܡܩܲܒܿܠܵܢܵܐ
                ܗܵܘܹ̇ܐ ܕܫܘܼܚܠܵܦܵܐ ܟܝܵܢܲܢ: ܘܠܵܐ ܚܒܼܝܼܫܵܐ ܬܚܹܝܬܼ ܩܸܢܛܵܐ
                ܕܤܲܩܘܼܒܼܠܵܝܘܼܬܼܵܐ. ܘܲܡܫܲܡܠܝܵܐ: ܒܟܼܠܡܸܕܸܡ. ܡܸܛܠܗܵܢܵܐ ܠܵܘ
                ܥܲܠ ܨܠܘܿܬܼܵܐ ܒܲܠܚܘܿܕܼ ܘܥܲܠ ܙܗܝܼܪܘܼܬܼܵܐ: ܐܸܠܵܐ ܘܡܸܛܠ
                ܩܲܛܝܼܢܘܼܬܼܵܐ ܘܠܵܐ ܡܸܬܿܕܲܪܟܵܬܘܼܬܼܵܐ ܕܐܲܝܠܹܝܢ ܕܨܵܦ̈ܚܵܢ ܥܲܠܝܢ ܒܐܲܡܝܼܢܘܼ:
                ܕܡܵܪ̈ܕܵܢ ܠܚܲܝܠܵܐ ܕܝܼܕܲܥܬܼܵܐ ܕܝܼܠܲܢ. ܗܵܠܹܝܢ ܕܐܵܦ ܙܲܒܼܢ̈ܝܼܢ ܤܲܓܝܼ̈ܐܵܢ:
                ܘܟܲܕܼ ܠܵܐ ܨܵܒܹ̇ܝܢܲܢ: ܒܓܼܵܘܗܹܝܢ ܡܸܫܬܲܟܼܚܝܼܢܲܢ ܒܟܼܠܙܒܲܢ. ܘܐܵܦܸܢ ܪܲܒܲܬܼ
                ܡܫܲܪܪܵܐ ܬܲܪܥܝܼܬܲܢ ܘܬܸܨܒܸܐ ܒܛܵܒܼܬܼܵܐ: ܟܡܵܐ ܙܲܒܼܢ̈ܝܼܢ: ܘܐܵܦ ܥܲܠ
                ܐܸܤܩܹܛܹܐ ܕܢܸܤܝ̈ܘܿܢܹܐ ܫܕܼܵܬܲܢ ܒܛܝܼܠܘܼܬܹܗ. ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ
                ܦܵܘܠܘܿܣ: ܕܥܲܠ ܕܠܵܐ ܐܸܬܿܬܿܪܝܼܡ ܒܝܲܬܝܼܪܘܼܬܼܵܐ ܕܓܸܠܝܵܢܹ̈ܐ: ܐܸܫܬܠܸܡ
                ܠܝܼ ܫܦܵܝܵܐ ܠܒܸܤܪܝ ܡܲܠܲܐܟܹܗ ܕܤܵܛܵܢܵܐ: ܕܢܸܗܘܸܐ ܡܩܲܦܲܚ ܠܝܼ.
                
                 504 
                
                ܘܥܲܠܗܵܕܹܐ ܠܲܡ: ܬܠܵܬܼ ܙܲܒܼܢ̈ܝܼܢ ܒܥܹ̇ܝܬܼ ܡ̣ܢ ܡܵܪܝ ܕܢܲܦܪܸܩ ܡܹܢܝ
                ܢܸܤܝܘܿܢܵܐ: ܟܹܐܡܲܬܼ ܚܹܐܪܵܐܝܼܬܼ ܐܸܦܠܘܿܚ ܒܲܥ̇ܒܼܵܕܼܵܐ ܕܲܦܩܲܕܼ ܠܝܼ.
                ܘܐܸܡ݂ܲܪ ܠܝܼ: ܤܵܦ̇ܩܵܐ ܠܵܟܼ ܛܲܝܒܿܘܼܬܼܝ. ܚܲܝܠܝ ܓܹܝܪ: ܒܲܟܼܪܝܼܗܘܼܬܼܵܐ
                ܡܸܬܼܓܡܲܪ܀
                ܡܵܕܹܝܢ ܡܵܪܝ: ܐܸܢ ܗܵܢܵܘ ܨܸܒܼܝܵܢܵܟܼ: ܘܗܵܢܵܐ ܟ̱ܠܹܗ ܤܢܝܼܩܵܐ
                ܫܲܒܼܪܘܼܬܲܢ ܥܲܠ ܦܹܕܵܓܼܘܿܓܼܵܐ ܕܪܵܕܹܐ ܘܲܡܥܝܼܪ: ܕܐܵܦܠܵܐ ܟܲܕܼ ܢܸܗܘܸܐ
                ܐ̄ܢܵܫ ܕܗܵܟܲܢ ܒܠܝܼܥ ܒܚܘܼܒܵܟܼ ܐܲܟܼܘܵܬܼܝ: ܘܲܢܬܼܝܼܦ ܒܵܬܲܪ
                ܛܵܒܼܬܼܵܐ: ܕܵܠܐ ܡܸܢܼܚܙܸܐ ܠܹܗ ܥܵܠܡܵܐ ܟܠ ܟ̱ܠܹܗ ܡܸܛܠ ܪܲܘܝܘܬܼܵܐ
                ܕܒܼܵܟܼ: ܕܡܸܛܠܵܬܼܵܗ̇ ܘܐܵܦ ܥܕܲܡܵܐ ܠܗܵܕܹܐ ܡܲܛܝܼܬܵܢܝ ܕܲܠܓܸܠܝܵܢܹ̈ܐ
                ܘܚܸܙ̈ܘܵܢܹܐ ܕܠܵܐ ܫܲܠܝܼܛ ܠܹܗ ܠܠܸܫܵܢܵܐ ܕܒܸܤܪܵܐ ܕܲܢܬܲܪܓܸܡ: ܕܐܸܚܙܸܐ
                ܘܐܸܫܡܲܥ ܩܵܠ ܬܸܫܡܸܫܬܼܵܐ ܕܛܲܟܼܤܵܐ ܕܪ̈ܘܼܚܵܢܹܐ ܘܠܲܚܙܵܬܼܵܟܼ ܡܲܠܝܲܬܼ
                ܩܘܼ̈ܕܼܫܹܐ ܕܲܒܼܪܘܼܚ ܐܸܫܬܿܘܸܐ: ܘܲܥܕܲܟܹܝܠ ܥܲܡ ܗܵܠܹܝܢ ܟܠܗܹܝܢ
                ܠܵܐ ܤܵܦܹ̇ܿܩ ܐ̄ܢܵܐ ܠܲܙܗܝܼܪܘܼܬܼܵܐ ܕܲܩܢܘܿܡܝ: ܐܸܢܵܐ ܕܐܝܼܬܲܝ ܓܲܒܼܪܵܐ
                ܓܡܝܼܪܵܐ ܒܲܡܫܝܼܚܵܐ. ܒܕܼܐܝܼܬܼ ܗ̄ܘ̣ ܥܕܲܟܹܝܠ ܡܸܕܸܡ ܕܡܸܛܠ
                ܩܲܛܝܼܢܘܼܬܹܗ ܡܵܪܹܕܼ ܠܚܲܝܠܵܐ ܕܝܼܕܲܥܬܼܝ ܕܝܼܠܝ: ܠܝܼ ܕܡܲܕܥܵܐ
                ܕܲܡܫܝܼܚܵܐ ܩܢܸܐ ܐ̄ܢܵܐ. ܡܵܕܹܝܢ ܡܵܪܝ: ܡܸܛܠ ܗܵܢܵܐ ܚܵܕܹܐ ܐ̄ܢܵܐ
                ܒܟܼܘܼܪ̈ܗܵܢܲܝ: ܒܐܘܼ̈ܠܨܵܢܹܐ: ܒܲܚܒܼܘܼ̈ܫܝܹܐ: ܒܐܲܤܘܼܪܹ̈ܐ: ܒܐܵܢܲܢܩ̈ܘܿܣ:
                ܐܸܢ ܡ̣ܢ ܟܝܵܢܵܐ: ܘܐܸܢ ܡ̣ܢ ܒܢܲܝ̈ ܟܝܵܢܵܐ: ܘܐܸܢ ܡ̣ܢ ܒܥܸܠܕܲܪܹܗ
                ܕܲܟܼܝܵܢܵܐ. ܚܵܕܼܝܵܐܝܼܬܼ ܗܵܟܹܝܠ ܐܹܤܲܝܒܲܪ ܒܟܼܘܼܪ̈ܗܵܢܲܝ: ܗܵܢܵܘ ܕܹܝܢ ܒܢܸܤܝ̈ܘܿܢܲܝ:
                ܕܢܲܓܸܢ ܥܠܲܝ ܚܲܝܠܹܗ ܕܲܡܫܝܼܚܵܐ. ܐܸܢ ܥܲܡ ܗܵܠܹܝܢ ܟܠܗܹܝܢ: ܥܲܠ
                ܫܲܒܼܛܵܐ ܕܢܸܤܝ̈ܘܿܢܹܐ ܤܢܝܼܩ ܐ̄ܢܵܐ ܥܕܲܟܹܝܠ: ܕܒܹܗ ܬܸܬܼܪܲܒܸܐ ܡܲܓܢܵܢܘܼܬܼܵܟܼ
                
                 505 
                
                ܕܲܥܠܲܝ: ܘܐܸܬܼܢܛܲܪ ܒܩܲܪܝܼܒܼܘܼܬܼܵܟܼ: ܝ̇ܕܲܥ ܐ̄ܢܵܐ ܕܠܲܝܬܿ ܠܵܟܼ ܕܚܲܒܿܝܼܒܼ
                ܠܵܟܼ ܝܲܬܝܼܪ ܡܹܢܝ ܕܝܼܠܝ. ܘܡ̣ܢ ܗܵܕܹܐ ܕܝܲܬܝܼܪ ܡ̣ܢ ܤܲܓܝܼ̈ܐܹܐ ܐܵܘܪܸܒܼܬܵܢܝ:
                ܘܡܸܕܸܡ ܕܝܲܗ̣̄ܒܼܬܿ ܠܝܼ: ܗܵܢܵܘ ܕܹܝܢ ܚܲܝ̈ܠܹܐ ܕܬܸܫܒ̈ܚܵܬܼܵܟܼ ܠܡܸܕܲܥ:
                ܠܚܲܕܼ ܡ̣ܢ ܫܠܝܼ̈ܚܹܐ ܚܲܒܼܪ̈ܲܝ ܠܵܐ ܝܼܲܗ̣̄ܒܼܬܿ. ܘܲܪܲܝܬܵܢܝ ܡܵܐܢܵܐ ܓܲܒܼܝܵܐ:
                ܕܲܡܗܲܝܡܲܢ ܠܡܸܛܲܪ ܛܲܟܼܤܵܐ ܕܚܘܼܒܵܟܼ. ܘܡܸܛܠ ܗܵܠܹܝܢ ܟܠܗܹܝܢ:
                ܘܲܕܲܝܲܬܿܝܼܪܵܐܝܼܬܼ ܪܵܕܹܐ ܗ̄ܘ̣ܵ ܠܲܩܕܼܵܡܵܘܗܝ ܥ̇ܒܼܵܕܼܵܐ ܕܟܼܵܪܘܿܙܘܼܬܼܵܟܼ:
                ܟܲܕܼ ܫܪܸܐ ܐ̄ܢܵܐ ܡ̣ܢ ܦܟܼܵܪܹ̈ܐ ܕܢܸܤܝ̈ܘܿܢܹܐ ܝܵܕܲܥ ܐ̄ܢܵܐ: ܕܝܵܗܹ̇ܒܼ ܗ̣̄ܘܲܝܬܿ
                ܠܝܼ ܚܹܐܪܘܼܬܼܵܐ ܡܸܛܠ ܗܵܠܹܝܢ ܟܠܗܹܝܢ: ܐܸܠܘܼ ܥܵܕܼܪܵܐ ܗ̄ܘ̣ܵܬܼ ܠܝܼ.
                ܐܸܠܵܐ ܠܵܐ ܐܸܨܛ̣ܒܼܝܲܬܿ: ܕܲܕܼܠܵܐ ܐܘܼܠܨܵܢܵܐ ܘܲܕܼܠܵܐ ܡܲܪܢܝܼܬܼܵܐ ܐܸܗܘܸܐ
                ܒܥܵܠܡܵܐ ܗܵܢܵܐ. ܟܲܕܼ ܠܵܐ ܐܸܬܼܒܛܸܠ ܠܵܟܼ ܥܲܠ ܗܵܝ̇ ܕܝܲܬܿܝܼܪܵܐܝܼܬܼ
                ܢܸܤܓܸܐ ܥ̇ܒܼܵܕܼܵܐ ܕܟܼܵܪܘܿܙܘܼܬܼܵܐ ܕܲܤܒܲܪܬܼܵܟܼ ܒܥܵܠܡܵܐ: ܐܲܝܟܼ ܗܵܝ̇ ܕܐܸܢܵܐ
                ܐܹܬܲܪ ܒܢܸܤܝ̈ܘܿܢܲܝ: ܘܟܲܕܼ ܚܠܝܼܡܵܐ ܬܸܬܼܢܛܲܪ ܠܘܵܬܼܵܟܼ ܢܲܦܫܝܼ܀
                ܡܵܕܹܝܢ ܐܘܿ ܦܵܪܘܿܫܵܐ: ܐܸܢ ܗܵܢܵܐ ܟ̱ܠܹܗ ܪܲܠܵܐ ܡܵܘܗܲܒܬܼܵܐ:
                ܕܲܟܼܡܵܐ ܕܝܲܬܝܼܪ ܡܸܬܼܥܲܠܸܐ ܐ̄ܢܵܫ ܘܢܸܬܼܓܵܘܸܐ ܒܪܘܼܚܵܢܘܼܬܼܵܐ ܐܲܝܟܼ
                ܛܲܟܼܤܵܐ ܕܦܵܘܠܘܿܣ: ܥܕܲܟܹܝܠ ܥܲܠ ܕܸܚܠܬܼܵܐ ܘܲܙܗܝܼܪܘܼܬܼܵܐ ܤܢܝܼܩ:
                ܘܝܘܼܬܼܪܵܢܵܐ ܩܵܛܹ̇ܦ ܡ̣ܢ ܦܸܓܼܥܗܘܿܢ ܕܢܸܤ̈ܝܘܿܢܹܐ: ܡܲܢ̣ܘܼ ܗܵܢܵܐ ܕܲܡܛ̣ܵܐ
                ܠܐܲܬܼܪܵܐ ܕܬܘܼܟܼܠܵܢܵܐ ܒܥܵܠܡܵܐ ܕܡܵܝܘܿܬܼܘܼܬܼܵܐ ܟܲܗܝܼܢ ܡ̣ܢ ܒܵܙܘܼܙܹ̈ܐ:
                ܘܩܲܒܿܠܵܗ̇ ܠܠܵܐ ܡܸܨܛܲܠܝܵܢܘܼܬܼܵܐ: ܗܵܝ̇ ܕܲܠܡܲܠܲܐܟܹ̈ܐ ܩܲܕܝܼ̈ܫܹܐ ܠܵܐ
                ܐܸܬܼܝܲܗܒܲܬ̤: ܕܠܵܐ ܒܸܠܥܵܕܲܝܢ ܢܸܬܼܸܓܲܡܪܘܼܢ: ܘܗܵܢܵܐ ܩܲܒܸܠ ܩܕܼܵܡ
                ܟ̱ܠܹܗ ܓܵܘܵܐ ܕܪ̈ܘܼܚܵܢܹܐ ܘܲܕܼܦܲܓܼܸܪ̈ܵܢܹܐ: ܕܲܕܼܠܵܐ ܫܘܼܚܠܵܦܵܐ ܨܵܒܹ̇ܐ ܕܢܸܗܘܸܐ
                ܠܲܓܼܡܵܪ: ܘܠܵܐ ܢܸܬܼܩܲܪܲܒܼ ܠܹܗ ܐܵܦܠܵܐ ܢܸܤܝܘܿܢܵܐ ܕܲܒܼܚܘܼܫܵܒܼܵܐ؟ ܛܲܟܼܤܵܐ
                ܕܹܝܢ ܕܥܵܠܡܵܐ ܗܵܢܵܐ: ܗܵܢܵܘ ܐܲܝܟܼ ܕܡ̣ܢ ܪܸܥܝܵܢܵܐ ܕܟܼܠܗܘܿܢ ܤܸܦܪܹ̈ܐ
                
                 506 
                
                ܩܲܕܼܝܼ̈ܫܹܐ: ܕܐܸܢ ܟܠܝܘܿܡ ܐܵܠܹܦ ܙܲܒܼܢ̈ܝܼܢ ܢܩܲܒܸܠ ܡܚܘܿܬܼܵܐ: ܠܵܐ
                ܬܸܙܥܲܪ ܬܲܪܥܝܼܬܲܢ: ܘܲܢܦܘܼܫ ܡ̣ܢ ܪܵܗܛܵܐ ܕܒܸܐܤܛܵܕܼܝܼܘܿܢ. ܡܲܨܝܵܐ
                ܐܸܢ ܒܲܚܕܼܵܐ ܥܸܠܬܼܵܐ ܙܥܘܿܪܬܵܐ: ܚܵܛܦܝܼܢܲܢ ܠܵܗ̇ ܠܙܵܟܼܘܼܬܼܵܐ ܘܲܢܩܲܒܸܠ
                ܟܠܝܼܠܲܢ. ܗܵܢܵܐ ܥܵܠܡܵܐ: ܪܲܗܛܵܐ ܗ̄ܘ̣ ܕܐܵܓܼܘܿܢܵܐ: ܘܐܸܤܛܵܕܼܝܼܘܿܢ
                ܕܪ̈ܲܗܵܛܹܐ. ܘܙܲܒܼܢܵܐ ܗܵܢܵܐ: ܙܲܒܼܢܵܐ ܗ̄ܘ̣ ܕܬܲܟܼܬܘܼܫܵܐ. ܘܐܲܬܼܪܵܐ
                ܕܬܲܟܼܬܘܼܫܵܐ ܘܙܲܒܼܢܵܐ ܕܐܵܓܼܘܿܢܵܐ: ܢܵܡܘܿܤܵܐ ܠܵܐ ܡܸܬܿܬܿܤܝܼܡ. ܗܵܢܵܘ
                ܕܹܝܢ: ܬܚܘܼܡܵܐ ܠܵܐ ܤܵܐܹ̇ܡ ܡܲܠܟܵܐ ܥܲܠ ܦܵܠܚܵܘ̈ܗܝ: ܥܕܲܡܵܐ
                ܕܫܵܠܹ̇ܡ ܐܵܓܼܘܿܢܵܐ. ܘܡܸܬܼܟܲܢܫܝܼܢ ܟܠܢܵܫ ܠܬܲܪܥܵܐ ܕܲܡܠܸܟܼ ܡܲܠܟܹ̈ܐ:
                ܘܡܸܬܼܒܿܚܲܪ ܬܲܡܵܢ ܕܚܲܡܤܸܢ ܒܲܩܪܵܒܼܵܐ ܘܠܵܐ ܩܲܒܸܠ̣ ܡܸܙܕܲܟܼܝܵܢܘܼܬܼܵܐ:
                ܘܡܲܢ̣ܘܼ ܗܵܘ̇ ܕܲܐܗܦܸܟܼ ܚܲܨܵܐ. ܟܡܵܐ ܓܹܝܪ ܙܲܒܼ̈ܢܝܼܢ ܓܵܕܹܫ ܐ̄ܢܵܫ
                ܕܲܠܡܸܕܸܡ ܠܵܐ ܚܲܫܲܚ: ܘܐܲܡܝܼܢܵܐܝܼܬܼ ܡ̣ܢ ܠܵܐ ܡܕܲܪܫܘܼܬܹܗ ܕܓܼܝܼܫ
                ܗ̄ܘ̣ܵܐ ܘܲܪܡܸܐ: ܘܲܒܼܟܼܠܙܒܲܢ ܒܬܼܵܚܘܿܒܼܘܼܬܼܵܐ  ܐܝܼܬܼܵܘܗܝ ܗ̄ܘ̣ܵܐ: ܚܵܛܹ̇ܦ
                ܠܹܗ ܠܢܝܼܫܵܐ ܕܡܲܫܪܝܼܬܼܵܐ ܡ̣ܢ ܐܝܼܕܼܵܐ ܕܲܒܼܢܲܝ̈ ܓܲܢ̄ܒܵܪܹ̈ܐ: ܘܗܵܘܹ̇ܐ ܢܵܨܲܚ
                ܫܡܹܗ ܝܲܬܿܝܼܪ ܡ̣ܢ ܟܲܫܝܼܪܹ̈ܐ: ܛܘܼܠܝܵܩܹ̈ܐ ܡܗܝܼܪܹ̈ܐ ܘܝܵܕܼܘܿܥܹ̈ܐ: ܘܲܡܩܲܒܸܠ
                ܟܠܝܼܠܵܐ ܘܕܲܫ̈ܢܹܐ ܕܡ̣ܢ ܟܠܗܘܿܢ ܚܲܒܼܪ̈ܵܘܗܝ ܡܝܲܩܪܝܼܢ. ܡܸܛܠܗܵܢܵܐ:
                ܠܵܐ ܐ̄ܢܵܫ ܢܩܝܼܡ ܒܲܦܤܵܩ ܤܲܒܼܪܵܐ. ܒܲܠܚܘܿܕܼ ܒܲܨܠܘܿܬܼܵܐ: ܠܵܐ
                ܢܸܒܼܤܸܐ. ܘܡ̣ܢ ܕܢܸܒܼܥܸܐ ܥܘܼܕܼܪܵܢܵܐ ܡ̣ܢ ܡܵܪܲܢ: ܠܵܐ ܢܲܗܡܸܐ. ܘܗܵܕܹܐ
                ܢܤܝܼܡ ܒܬܲܪܥܝܼܬܲܢ: ܕܲܟܼܡܵܐ ܕܲܒܼܥܵܠܡܵܐ ܗܵܢܵܐ ܐܝܼܬܲܝܢ ܘܲܒܼܦܲܓܼܪܵܐ
                ܗܵܢܵܐ ܫܪܹܝܢܲܢ: ܐܸܢ ܥܕܲܡܵܐ ܠܟܲܦܬܼܵܐ ܕܲܫܡܲܝܵܐ ܢܸܬܼܥܲܠܸܐ: ܕܠܵܐ ܥܲܡܠܵܐ
                ܘܲܫܚܵܩܵܐ ܠܡܸܗܘܵܐ ܘܲܕܼܠܵܐ ܨܸܦܬܼܵܐ: ܠܵܐ ܡܸܫܟܿܚܵܐ. ܤܵܟܼܵܐ: ܗܵܢܵܘ.
                ܫܒܼܘܿܩ ܠܝܼ. ܝܲܬܿܝܼܪ ܡ̣ܢ ܗܵܢܵܐ: ܬܸܢܝܵܐ ܗ̄ܘ̣.