Isaac of Nineveh. “Discourse 74.” Based upon Digital Syriac Corpus. Last modified March 5, 2019. https://syriaccorpus.org/465.
    
        
            
                 507 
                ܫܘܼܐܵܠܵܐ ܕܹܝܢ ܕܥܲܠ ܦܘܼܪܵܫ ܡܝܲܬܿܪ̈ܵܬܼܵܐ: ܘܥܲܠ ܤܵܟܼܵܐ ܕܟܼܠܹܗ
                ܪܲܗܛܵܐ. ܘܥܲܠ ܪܲܒܿܘܼܬܹܗ ܕܚܘܼܒܵܐ ܕܲܒܼܢܲܝ̈ܢܵܫܵܐ: ܘܥܲܠ ܢܝܼܫܵܐ ܪܘܼܚܵܢܵܐ:
                ܕܗ̤ܝܘܼ ܓܵܡܲܪ ܠܟܼܠܗܘܿܢ ܩܲܕܝܼ̈ܫܹܐ: ܘܩܵܒܲܥ ܒܗܘܿܢ ܕܘܼܡܝܵܐ
                ܐܲܠܵܗܵܝܵܐ ܒܚܘܼܒܹܗ ܗܵܘ̇ ܥܲܬܝܼܪܵܐ ܕܐܲܫܦܲܥ̣ ܥܲܠ ܓܸܢܤܵܐ ܕܲܒܼܢܲܝ̈ܢܵܫܵܐ. ܥܕ.
            
            
                ܤܵܟܼܵܐ ܕܟܼܠܹܗ ܪܲܗܛܵܐ: ܒܗܵܠܹܝܢ ܬܠܵܬܼ ܐܝܼܬܼܵܘܗܝ: ܬܝܵܒܘܼܬܼܵܐ:
                ܘܕܲܟܼܝܘܼܬܼܵܐ: ܘܲܓܼܡܝܼܪܘܼܬܼܵܐ. ܘܡܵܢܲܐ ܗ̣̄ܝ ܬܝܵܒܼܘܼܬܼܵܐ؟ ܦܵܘܫܵܐ ܕܡ̣ܢ
                ܩܲܕܼ̈ܡܵܝܵܬܼܵܐ: ܘܚܲܫܵܐ ܕܲܥܠܲܝܗܹܝܢ. ܘܡܵܢܲܐ ܗ̣̄ܝ ܕܲܟܼܝܘܼܬܼܵܐ ܒܤܵܟܼܵܐ؟ ܠܸܒܵܐ
                ܡܪܲܚܡܵܢܵܐ ܕܥܲܠ ܟܠ ܟܝܵܢ ܕܲܒܼܪܝܼܬܼܵܐ. ܘܡܵܢܲܐ ܗ̣̄ܝ ܓܡܝܼܪܘܼܬܼܵܐ؟
                ܥܘܼܡܩܵܐ ܕܡܲܟܿܝܼܟܼܘܼܬܼܵܐ: ܕܐܝܼܬܼܵܘܗܝ: ܫܒܼܝܼܩܘܼܬܼܵܐ ܕܟܼܠܡܸܕܸܡ
                ܕܡܸܬܼܚܙܸܐ ܘܲܕܼܠܵܐ ܡܸܬܼܚܙܸܐ. ܕܡܸܬܼܚܙܸܐ: ܟܠ ܕܲܒܼܪܸ̈ܓܼܫܹܐ. ܕܠܵܐ
                ܡܸܬܼܚܙܸܐ: ܟܠ ܪܸܢܝܵܐ ܕܲܥܠܲܝܗܹܝܢ܀ ܗ̤ܘ ܟܲܕܼ ܗ̤ܘ ܤܵܒܼܵܐ: ܐܸܫܬܲܐܲܠ
                ܒܲܙܒܲܢ ܐ̄ܚܪܹܝܢ: ܕܡܵܢܲܐ ܗ̣̄ܝ ܬܝܵܒܼܘܼܬܼܵܐ؟ ܘܐܸܡ݂ܲܪ: ܠܸܒܵܐ ܬܒܼܝܼܪܵܐ.
                ܘܡܵܢܲܐ ܗ̣̄ܝ ܡܲܟܿܝܼܟܼܘܼܬܼܵܐ؟ ܘܐܸܡ݂ܲܪ: ܥܦܝܼܦܘܼܬܼ ܡܝܼܬܼܘܼܬܼܵܐ ܨܸܒܼܝܵܢܵܝܵܬܼܵܐ
                ܕܡ̣ܢ ܟܠ. ܘܡܵܢܵܐ ܐܝܼܬܼܵܘܗܝ ܠܸܒܵܐ ܡܪܲܚܡܵܢܵܐ؟ ܘܐܸܡ݂ܲܪ: ܝܼܩܕܵܢܵܐ
                ܕܠܸܒܵܐ ܕܥܲܠ ܟ̱ܠܵܗ̇ ܒܪܝܼܬܼܵܐ: ܕܥܲܠ ܒܲܪܢܵܫܵܐ: ܘܦܵܪܲܚܬܼܵܐ ܘܚܲܝ̈ܘܵܬܼܵܐ:
                ܘܥܲܠ ܫܹܐܕܹ̈ܐ: ܘܟܼܠ ܕܐܝܼܬܼ. ܕܡ̣ܢ ܥܘܼܗܕܵܢܗܹܝܢ ܘܡ̣ܢ ܚܙܵܬܼܗܹܝܢ:
                ܫܵܚ̈ܠܵܢ ܥܲܝܢܵܘ̈ܗܝ ܕܸܡ̈ܥܹܐ ܒܥܘܼܙܵܐ ܕܪ̈ܲܚܡܹܐ ܕܐܵܠܹ̇ܨ ܠܠܸܒܵܐ ܕܡ̣ܢ
                ܚܵܘܤܵܢܵܐ ܤܲܓܝܼܐܵܐ. ܠܸܒܵܐ ܙܵܥܲܪ ܠܹܗ: ܘܠܵܐ ܡܨܸܐ ܛܵܥܹ̇ܢ ܠܡܸܫܡܲܥ
                ܐܵܘ ܠܡܸܬܼܒܲܩܵܝܘܼ: ܒܢܸܡܼܝܵܢܵܐ ܐܵܘ ܚܲܫܵܐ ܙܥܘܿܪܵܐ ܕܡܸܕܸܡ ܕܒܲܒܼܪܝܼܬܼܵܐ.
                ܘܡܸܛܠܗܵܕܹܐ ܘܐܵܦ ܥܲܠ ܠܵܐ ܡܠܝܼ̈ܠܹܐ ܘܥܲܠ ܒܥܸܠܕܒܼܵܒܼܵܘ̈ܗܝ
                ܕܲܫܪܵܪܵܐ: ܘܐܵܦ ܥܲܠ ܢܵܟܼܘܿܝܵܘ̈ܗܝ: ܒܟܼܠܥܸܕܵܢ ܨܠܘܿܬܼܵܐ ܕܲܒܼܕܸܡ̈ܥܹܐ
                
                 508 
                
                ܡܩܲܪܸܒܼ ܠܡܸܬܼܢܛܵܪܘܼ ܘܲܠܡܸܬܼܚܲܤܵܢܘܼ. ܥܕܲܡܵܐ ܬܘܼܒܼ ܕܥܲܠ
                ܟܝܵܢܹ̈ܐ ܪ̈ܵܚܘܿܫܹܐ: ܡ̣ܢ ܡܪܚܡܵܢܘܼܬܹܗ ܤܲܓܝܼܐܬܼܵܐ ܕܐܲܫܝܼܕܼܵܐ ܒܠܸܒܹܗ
                ܕܠܵܐ ܟܲܝܠܵܐ ܒܗܵܝ̇ ܕܡܘܼܬܼܵܐ ܕܐܲܠܵܗܵܐ܀ ܘܡܵܢܲܐ ܗ̣̄ܝ ܨܠܘܿܬܼܵܐ؟
                ܘܐܸܡ݂ܲܪ: ܤܦܝܼܩܘܼܬܼܵܐ ܕܬܲܪܥܝܼܬܼܵܐ ܕܡ̣ܢ ܟܠ ܕܲܬܼܢܵܢ: ܘܠܸܒܵܐ
                ܕܐܲܗܦܸܟܼ ܚܝܵܪܹܗ ܓܡܝܼܪܵܐܝܼܬܼ ܠܘܵܬܼ ܤܘܼܘܵܚܵܐ ܕܗܵܘ̇ ܤܲܒܼܪܵܐ ܕܲܥܬܼܝܼܕܼ.
                ܕܲܦܪܝܼܫ ܕܹܝܢ ܡ̣ܢ ܗܵܢܵܐ: ܚܸܠܛܵܐ ܗ̄ܘ̣ ܙܵܪܲܥ̇ ܒܲܟܼܪܵܒܹܗ ܐܲܝܢܵܐ
                ܕܙܵܪܲܥ̇ ܘܐܲܝܟܼ ܗܵܝ̇ ܕܢܸܕܼܒܲܪ ܦܲܕܵܢܵܐ ܒܬܼܵܘܪܵܐ ܘܒܲܚܡܵܪܵܐ ܐܲܟܼܚ̄ܕܼܵܐ܀
                ܐܲܝܟܲܢ ܡܸܬܼܩܲܢܝܵܐ ܡܲܟܿܝܼܟܼܘܼܬܼܵܐ؟ ܘܐܸܡ݂ܲܪ: ܒܥܘܼܗܕܵܢܵܐ ܐܲܡܝܼܪܵܐ
                ܕܫܵܪ̈ܥܵܬܼܵܐ: ܘܤܘܼܟܵܝܵܐ ܩܲܪܝܼܒܼܵܐ ܕܡܵܘܬܵܐ: ܘܢܲܚ̈ܬܹܐ ܫܝܼ̈ܛܹܐ: ܘܗܵܝ̇
                ܕܲܒܼܟܼܠܙܒܲܢ ܢܸܓܼܒܸܐ ܕܘܼܟܿܬܼܵܐ ܐ̄ܚܪܵܝܬܼܵܐ: ܘܲܒܼܟܼܠܡܸܕܸܡ ܠܲܥ̇ܒܼܵܕܼܵܐ ܨܥܝܼܪܵܐ
                ܘܡܵܟܵܐ ܢܸܪܗܲܛ: ܘܠܵܐ ܥܸܨܝܵܢܘܼܬܼܵܐ: ܘܫܸܬܼܩܵܐ ܐܲܡܝܼܪܵܐ: ܘܲܕܼܠܵܐ
                ܢܸܪܚܲܡ ܠܡܸܦܓܲܥ ܒܲܟܼܢܘܼ̈ܫܝܹܐ: ܘܲܕܼܢܸܗܘܸܐ ܠܵܐ ܝܑܼܕܼܝܼܥܵܐ ܘܠܵܐ ܚܫܝܼܒܼܵܐ:
                ܘܐܵܚܘܿܕܼܵܐ ܠܚܲܕܼ ܡ̣ܢ ܤܘܼܥܪ̈ܵܢܝܼܢ ܦܪܝܼܫܵܐܝܼܬܼ ܠܲܓܼܡܵܪ: ܘܲܕܼܢܸܤܢܸܐ
                ܥܸܢܝܵܢܵܐ ܕܦܲܪ̈ܨܘܿܦܹܐ: ܘܗܵܝ̇ ܕܠܵܐ ܢܸܪܚܲܡ ܝܘܼܬܼܪ̈ܵܢܹܐ. ܟܠܗܹܝܢ: ܒܵܬܲܪ
                ܗܵܕܹܐ. ܘܲܗܘ̤ܵܐ ܡܥܲܠܲܝ ܪܸܥܝܵܢܹܗ ܡ̣ܢ ܥܸܕܼܠܵܝܵܐ ܘܪܸܫܝܵܢܵܐ ܕܲܠܐ̄ܢܵܫ:
                ܘܡ̣ܢ ܛܲܢܵܢܘܼܬܼܵܐ. ܘܲܕܼܠܵܐ ܬܸܗܘܸܐ ܐܝܼܕܹܗ ܥܲܠ ܟܠ: ܘܐܝܼܕܼܵܐ ܕܟܼܠ
                ܒܹܗ. ܐܸܠܵܐ ܝܑܼܚܝܼܕܼܵܝ ܒܕܼܝܼܠܹܗ: ܘܲܡܫܵܘܚܲܕܼ. ܘܠܵܐ ܢܸܫܩܘܿܠ ܨܸܦܬܼܵܐ
                ܕܐ̄ܢܵܫ ܒܬܹܒܹܝܠ: ܤܛܲܪ ܡ̣ܢ ܕܲܩܢܘܿܡܹܗ. ܚܵܒܼܘܿܫܵܐܝܼܬܼ ܕܹܝܢ:
                ܐܲܟܼܤܢܵܝܘܼܬܼܵܐ ܘܡܸܤܟܹܢܘܼܬܼܵܐ ܘܲܡܫܵܘܚܕܼܘܼܬܼܵܐ ܗܵܝ̇ ܕܲܒܼܕܼܘܼܝܵܪܵܐ. ܗܵܠܹܝܢ
                ܝܵܠ̈ܕܵܢ ܡܲܟܿܝܼܟܼܘܼܬܼܵܐ: ܘܲܡܕܲܟ̈ܝܵܢ ܠܠܸܒܵܐ. ܐܲܝܠܹܝܢ ܕܲܡܛ̣ܵܘ ܠܲܓܼܡܝܼܪܘܼܬܼܵܐ:
                ܗܵܢܵܘ ܫܘܼܘܕܵܥܗܘܿܢ: ܕܐܸܢ ܟܠܝܘܿܡ ܥܤܲܪ ܙܲܒܼ̈ܢܝܼܢ ܠܝܲܩܕܵܢܵܐ
                ܡܸܫܬܲܠܡܝܼܢ ܚܠܵܦ ܪܸܚܡܬܼܵܐ ܕܲܒܼܢܲܝ̈ܢܵܫܵܐ: ܠܵܐ ܡܸܤܬܲܒܼܥܝܼܢ ܡ̣ܢ ܗܵܕܹܐ.
                
                 509 
                
                ܐܲܝܟܼ ܕܐܵܦ ܡܘܼܫܹܐ ܐܸܡ݂ܲܪ ܠܐܲܠܵܗܵܐ: ܕܐܸܢ ܠܵܐ ܡܚܲܤܸܐ ܐܲܢ̄ܬܿ ܠܲܒܼ̈ܢܲܝ
                ܝܑܼܤܪܵܝܹܠ: ܥܛܝܼܢܝ ܡ̣ܢ ܤܸܦܪܵܟܼ ܕܲܟܼܬܲܒܼܬܿ. ܘܐܲܝܟܼ ܕܐܵܦ ܛܘܼܒܼܵܢܵܐ
                ܦܵܘܠܘܿܣ ܐܸܡ݂ܲܪ: ܕܨܵܒܹ̇ܐ ܐ̄ܢܵܐ ܕܲܬܼܪ̈ܲܝܗܘܿܢ ܥܵܠܡܹ̈ܐ ܥܲܡ ܫܒܼܝܼ̈ܚܵܬܼܵܐ
                ܘܲܚܢܝܼ̈ܓܼܵܬܼܵܐ ܕܲܒܼܗܘܿܢ: ܠܵܐ ܡܸܫܟܲܚܝܼܢ ܕܢܸܦܪܫܘܼܢܵܢܝ ܡ̣ܢ ܚܘܼܒܹܗ
                ܕܲܡܫܝܼܚܵܐ. ܨܵܒܹ̇ܐ ܐ̄ܢܵܐ ܕܐܸܗܘܸܐ ܐܸܬܼܪܲܚܲܩ ܡ̣ܢ ܡܫܝܼܚܵܐ: ܘܲܒܼ̈ܢܲܝ ܝܑܼܤܪܵܝܹܠ
                ܢܸܬܼܩܲܪܒܼܘܼܢ ܠܗܲܝܡܵܢܘܼܬܼܵܐ ܕܚܲܝܹ̈ܐ. ܐܸܢ ܟܲܕܼ ܗܵܟܲܢ ܬܸܗܘܸܐ: ܡܲܨܝܵܐ
                ܕܗܸܢܘܿܢ ܒܗܵܕܹܐ ܢܗܲܝܡܢܘܼܢ ܒܲܡܫܝܼܚܵܐ ܘܢܹܐܙܠܘܼܢ ܠܚܲܝܹ̈ܐ ܕܲܠܥܵܠܲܡ:
                ܘܠܵܐ ܢܸܬܼܢܲܟܼܪܘܿܢ ܡ̣ܢ ܐܲܠܵܗܵܐ ܚܲܝܵܐ: ܘܐܲܝܟܼ ܗܵܝ̇ ܕܚܵܕܹܐ ܐ̄ܢܵܐ
                ܒܐܘܼܪ̈ܠܨܵܢܹܐ ܕܥܲܠ ܐܲܦܲܝ̈ܟܿܘܿܢ ܥܲܡܡܹ̈ܐ. ܘܐܲܝܟܼ ܫܲܪܟܵܐ ܕܲܫܠܝܼܚܹ̈ܐ:
                ܕܲܚܠܵܦ ܪܸܚܡܬܼܵܐ ܕܚܲܝܹ̈ܐ ܕܲܒܼܢܲܝ̈ܢܵܫܵܐ: ܡܵܘܬܵܐ ܕܟܼܠ ܓܢܸܣ ܩܲܒܸܠ̣ܘ.
                ܘܤܵܟܼܵܐ ܕܟܼܠܗܹܝܢ: ܐܲܠܵܗܵܐ ܡܵܪܹܐ ܟܠ: ܕܡܸܛܠ ܪܸܚܡܬܼܵܐ
                ܕܲܒܼܪܝܼܬܹܗ: ܠܲܒܼܪܹܗ ܐܲܫܠܸܡ̣ ܠܡܵܘܬܵܐ ܕܲܨܠܝܼܒܼܵܐ. ܗܵܟܲܢܵܐ ܠܲܡ ܓܹܝܪ
                ܐܲܚܸܒܼ ܐܲܠܵܗܵܐ ܠܥܵܠܡܵܐ: ܐܲܝܟܲܢܵܐ ܕܠܲܒܼܪܹܗ ܝܑܼܚܝܼܕܼܵܝܵܐ ܢܸܬܸܠ ܚܠܵܦܵܘܗܝ.
                ܠܵܘ ܕܠܵܐ ܡܨܸܐ ܗ̄ܘ̣ܵܐ ܕܲܒܼܡܸܕܸܡ ܐ̄ܚܪܹܢܵܐ ܢܸܦܪܘܿܩ ܠܲܢ: ܐܸܠܵܐ
                ܕܚܘܼܒܹܗ ܝܲܬܝܼܪܵܐ ܒܗܵܕܹܐ ܝܲܬܝܼܪܵܐܝܼܬܼ ܡܸܫܟܚܵܐ ܗ̄ܘ̣ܵܬܼ ܕܲܢܫܵܘܕܥܲܢ:
                ܕܲܒܼܡܵܘܬܵܐ ܕܲܒܼܪܹܗ ܝܑܼܚܝܼܕܼܵܝܵܐ ܢܩܲܪܒܲܢ ܠܘܵܬܹܗ. ܘܐܸܠܘܼ ܐܝܼܬܼ ܗ̄ܘ̣ܵܐ
                ܠܹܗ ܡܸܕܸܡ ܕܝܲܩܝܼܪ ܗ̄ܘ̣ܵܐ ܡܸܢܹܗ: ܝܵܗܹ̇ܒܼ ܠܲܢ: ܡܸܛܠ ܗܵܝ̇
                ܕܒܹܗ ܢܸܫܬܿܟܲܚ ܠܹܗ ܓܸܢܤܲܢ. ܘܲܕܼܡܸܛܠ ܚܘܼܒܵܐ ܤܲܓܝܼܐܵܐ: ܐܵܦܠܵܐ
                ܕܢܹܐܠܘܿܨ ܠܚܹܐܪܘܼܬܲܢ ܒܲܩܛܝܼܪܵܐ ܐܸܨܛܒܼܝܼ: ܟܲܕܼ ܛܵܒܼ ܡܸܫܟܲܚ
                ܗ̄ܘ̣ܵܐ. ܐܸܠܵܐ ܕܲܒܼܚܘܼܒܵܐ ܕܬܲܪܥܝܼܬܲܢ ܢܸܬܼܩܲܪܲܒܼ ܠܘܵܬܹܗ. ܘܗ̤ܘ ܡܵܪܲܢ:
                ܐܸܫܬܡܲܥ ܠܐܲܒܼܘܼܗܝ ܡܸܛܠ ܚܘܼܒܹܗ ܕܲܠܘܵܬܲܢ: ܠܲܡܩܲܒܵܠܘܼ ܥܠܵܘܗܝ
                ܨܥܪܵܐ ܘܚܲܫܵܐ ܒܚܲܕܼܘܼܬܼܵܐ: ܐܲܝܟܲܢܵܐ ܕܐܸܡ݂ܲܪ ܟܬܼܵܒܼܵܐ: ܕܲܚܠܵܦ ܚܲܕܼܘܼܬܼܵܐ
                
                 510 
                
                ܕܐܝܼܬܼ ܗ̄ܘ̣ܵܐ ܠܹܗ: ܤܲܝܒܲܪ ܨܠܝܼܒܼܵܐ: ܘܥܲܠ ܒܸܤܬܿܬܼܵܐ ܐܲܡܤܲܪ.
                ܡܸܛܠܗܵܢܵܐ: ܐܸܡ݂ܲܪ ܡܵܪܲܢ ܒܗܵܘ̇ ܠܸܠܝܵܐ ܕܡܸܫܬܠܸܡ ܗ̄ܘ̣ܵܐ: ܗܵܢܵܘ
                ܦܲܓܼܪܝ ܕܥܲܠ ܐܲܦܲܝ̈ ܦܘܼܪܩܵܢܹܗ ܕܥܵܠܡܵܐ ܡܸܬܼܝܼܗܸܒܼ ܠܚܲܝܹ̈ܐ. ܘܗܵܢܵܘ
                ܕܹܡܝ ܕܲܚܠܵܦ ܟܠ ܡܸܬܼܐܫܸܕܼ ܠܫܘܼܒܼܩܵܢܵܐ ܕܲܚܛܵܗܹ̈ܐ. ܘܥܲܠ
                ܐܲܦܲܝ̈ܗܘܿܢ ܠܲܡ ܐܸܢܵܐ ܡܩܲܕܸܫ ܐ̄ܢܵܐ ܢܲܦܫܝ. ܘܗܵܟܲܢܵܐ ܐܵܦ ܟܠܗܘܿܢ
                ܩܲܕܝܼ̈ܫܹܐ: ܠܗܵܢܵܐ ܫܘܼܡܠܵܝܵܐ ܡܵܛܹ̇ܝܢ ܡܵܐ ܕܐܸܬܼܓܡܲܪܘ: ܕܒܲܐܠܵܗܵܐ
                ܢܸܬܿܕܲܡܘܿܢ ܒܲܫܦܝܼܥܘܼܬܼ ܚܘܼܒܵܐ ܘܪ̈ܲܚܡܹܐ ܕܲܠܘܵܬܼ ܒܢܲܝ̈ܢܵܫܵܐ. ܘܗܵܕܹܐ
                ܐܵܬ̤ܵܐ ܒܵܥܹ̇ܝܢ ܠܢܲܦܫܗܘܿܢ ܠܕܼܘܼܡܝܵܐ ܕܒܲܐܠܵܗܵܐ: ܕܲܒܼܚܘܼܒܵܐ ܕܩܲܪ̈ܝܼܒܲܝܗܘܿܢ
                ܢܸܬܼܓܲܡܪܘܼܢ. ܗܵܟܲܢܵܐ ܐܵܦ ܐܲܒܼ̈ܗܵܬܼܵܐ ܝܑܼܚܝܼ̈ܕܵܝܹܐ ܥܵܒܼ̇ܕܝܼܢ ܗ̄ܘ̣ܵܘ: ܕܲܠܗܵܝ̇
                ܕܡܘܼܬܼܵܐ ܡܲܠܝܲܬܼ ܚܲܝܹ̈ܐ ܕܲܡܫܝܼܚܵܐ ܡܵܪܵܐ ܕܟܼܠ: ܒܲܩܢܘܿܡܗܘܿܢ
                ܢܸܫܩܠܘܼܢ ܐܲܡܝܼܢܵܐܝܼܬܼ.
                ܛܘܼܒܼܵܢܵܐ ܠܲܡ ܐܲܢܛܘܿܢܝܼܣ: ܠܵܐ ܡܸܡܬܼܘܿܡ ܕܵܢ ܒܢܲܦܫܹܗ
                ܠܡܸܥܒܲܕܼ ܥ̇ܒܵܕܼܵܐ ܕܠܹܗ ܦܲܩܲܚ: ܐܲܝܟܼ ܗܵܘ̇ ܕܲܠܩܲܪܝܼܒܹܗ ܡܵܘܬܲܪ.
                ܟܲܕܼ ܐܝܼܬܼ ܗ̄ܘ̣ܵܐ ܠܹܗ ܗܵܢܵܐ ܤܲܒܼܪܵܐ: ܕܝܘܼܬܼܪܵܢܵܐ ܕܩܲܪܝܼܒܹܗ:
                ܦܘܼܠܚܵܢܵܐ ܗܵܘܹ̇ܐ ܠܹܗ ܡܝܲܬܿܪܵܐ. ܘܐܲܝܟܼ ܕܐܲܡܝܼܪ ܡܸܛܠ ܛܘܼܒܼܵܢܵܐ
                ܐܵܓܼܵܬܘܿܢ: ܕܨܵܒܹ̇ܐ ܗ̄ܘܹ̇ܝܬܼ ܕܐܸܫܟܲܚ ܐܲܪܝܵܢܵܐ: ܘܐܸܬܸܠ ܠܹܗ ܦܲܓܼܪܝ:
                ܘܐܸܫܩܘܿܠ ܕܝܼܠܹܗ. ܚ̣ܙܲܝܬܿ ܚܘܼܒܵܐ ܡܫܲܡܠܝܵܐ؟ ܘܲܥܕܲܡܵܐ ܬܘܼܒܼ
                ܕܲܒܼܗܵܠܹܝܢ ܕܲܠܒܲܪ ܡܸܢܹܗ: ܠܵܐ ܡܤܲܝܒܲܪ ܗ̄ܘ̣ܵܐ ܕܠܵܐ ܡܢܝܼܚ
                ܠܩܲܪܝܼܒܹܗ: ܝܲܬܿܝܼܪ ܡ̣ܢ ܕܝܼܠܹܗ. ܐܲܝܟܼ ܗܵܝ̇ ܕܐܝܼܬܼ ܗ̄ܘ̣ܵܐ ܠܹܗ
                ܙܡܹܠܝܵܐ: ܘܲܚܙܵܗ̇ ܠܲܨܒܼܘܼܬܼܵܐ ܐܲܚܵܐ: ܘܪܲܚܡ̣ܵܗ̇. ܘܠܵܐ ܠܲܡ
                ܐܲܪܦܹܝܗ ܕܢܸܦܘܿܩ ܡ̣ܢ ܩܸܠܵܝܬܹܗ: ܥܕܲܡܵܐ ܕܫܲܩ̣ܠܵܗ̇. ܘܐܲܝܟܼ ܗܵܝ̇ ܬܘܼܒܼ
                
                 511 
                
                ܕܐܸܢ ܐܝܼܬܼ ܗ̄ܘ̣ܵܐ ܠܹܗ ܨܒܼܘܼܬܼܵܐ: ܘܚܵܙܹ̇ܐ ܗ̄ܘ̣ܵܐ ܠܐ̄ܢܵܫ ܕܲܤܢܝܼܩ
                ܗ̄ܘ̣ܵܐ ܥܠܹܝܗ̇: ܬܘܼܒܼ ܠܵܐ ܡܸܫܬܲܠܲܛ ܗ̄ܘ̣ܵܐ ܥܠܹܝܗ̇. ܘܡܵܢ ܐܵܡܲ݁ܪ
                ܐ̄ܢܵܐ ܗܵܠܹܝܢ؟ ܕܤܲܓܝܼ̈ܐܹܐ ܡܸܢܗܘܿܢ: ܐܵܦ ܠܚܲܝ̈ܘܵܬܼܵܐ ܘܲܠܤܲܝܦܵܐ ܘܢܘܼܪܵܐ
                ܝܲܗ̣̄ܒܼܘ ܦܲܓܼܪ̈ܲܝܗܘܿܢ ܡܸܛܠ ܩܲܪ̈ܝܼܒܲܝܗܘܿܢ. ܠܵܐ ܡܲܨܝܵܐ ܕܢܹܐܬܸܐ ܐ̄ܢܵܫ
                ܠܛܲܟܼܤܵܐ ܗܵܢܵܐ ܕܚܘܼܒܵܐ: ܐܸܠܵܐ ܐܸܢ ܐܲܝܢܵܐ ܕܡܸܕܸܡ ܐܲܪܓܸܫ̣ ܟܲܤܝܵܐܝܼܬܼ
                ܒܤܲܒܼܪܹܗ. ܘܠܵܐ ܡܲܨܝܵܐ ܕܢܸܩܢܘܿܢ ܠܚܘܼܒܵܐ ܕܲܒܼܢܲܝ̈ܢܵܫܵܐ: ܐܲܝܠܹܝܢ
                ܕܡܲܚܒܼܝܼܢ ܠܹܗ ܠܥܵܠܡܵܐ ܗܵܢܵܐ. ܡܵܐ ܕܲܩܢ̣ܵܐ ܐ̄ܢܵܫ ܠܚܘܼܒܵܐ: ܠܹܗ
                ܠܐܲܠܵܗܵܐ ܠܲܒܼܫܹܗ ܥܲܡܹܗ. ܐܵܢܲܢܩܹܐ ܕܐܲܝܢܵܐ ܕܠܲܐܠܵܗܵܐ ܠܲܒܼܫܹܗ: ܠܵܐ
                ܡܸܬܿܛܦܝܼܣ ܕܢܸܩܢܸܐ ܥܲܡܹܗ ܡܸܕܸܡ: ܐܸܠܵܐ ܐܵܦ ܠܦܲܓܼܪܹܗ ܫܵܠܲܚ.
                ܘܐܸܢ ܠܥܵܠܡܵܐ ܠܒܼܝܼܫ: ܐܵܘ ܠܚܲܝܵܘ̈ܗܝ ܗܵܠܹܝܢ ܒܪܸܚܡܲܬܼܗܘܿܢ: ܕܢܸܠܒܲܫ
                ܠܐܲܠܵܗܵܐ ܠܵܐ ܫܵܒܼܩ̇ܝܼܢ ܠܹܗ ܗܵܠܹܝܢ. ܗ̤ܘ ܓܹܝܪ ܐܲܤܗܸܕܼ: ܕܐܲܝܢܵܐ ܠܲܡ
                ܕܠܵܐ ܫܵܒܹ̇ܩ ܘܤܵܢܹ̇ܐ ܟܠܡܸܕܸܡ ܘܐܵܦ ܠܢܲܦܫܹܗ: ܕܢܸܗܘܸܐ ܠܝܼ ܬܲܠܡܝܼܕܼܵܐ
                ܠܵܐ ܡܸܫܟܲܚ. ܘܠܵܘ ܒܲܠܚܘܿܕܼ ܕܢܸܢܒܿܘܿܩ: ܐܸܠܵܐ ܘܢܸܤܢܸܐ ܐܸܢܘܿܢ.
                ܘܐܸܢ ܬܲܠܡܝܼܕܼܵܐ ܠܵܐ ܡܸܫܟܲܚ ܕܢܸܗܘܸܐ: ܐܲܝܟܲܢ ܗܵܝ̇ ܕܢܸܥܡܲܪ ܒܹܗ؟
                ܡܫܲܐܠܵܢܵܐ. ܡܸܛܠܡܵܢܵܐ ܤܲܒܼܪܵܐ ܗܵܟܲܢ ܗܲܢܝܼ ܦܘܼܠܚܵܢܹܗ:
                ܘܩܲܠܝܼܠܝܼܢ ܥܲܡܠܵܘ̈ܗܝ: ܘܲܕܼܠܝܼܠ ܥ̇ܒܼܵܕܹܗ ܠܢܲܦܫܵܐ؟ ܤܵܒܼܵܐ.
                ܡܸܛܠ ܗܵܝ̇ ܕܡܸܬܼܝܲܐܒܼܵܢܘܼܬܼܵܐ ܟܝܵܢܵܝܬܼܵܐ ܡܸܬܿܬܿܥܝܼܪܵܐ ܒܵܗ̇ ܒܢܲܦܫܵܐ:
                ܘܡܲܫܩܸܐ ܠܗܘܿܢ ܟܵܤܵܐ ܗܵܢܵܐ ܘܡܲܪܘܸܐ ܠܗܘܿܢ. ܘܡ̣ܢ ܗܵܝ̇ ܫܵܥܬܼܵܐ:
                ܬܘܼܒܼ ܠܵܐ ܡܲܪܓܫܝܼܢ ܒܠܹܐܘܬܼܵܐ: ܘܗܵܘܹ̇ܝܢ ܠܵܐ ܪ̈ܵܓܼܘܿܫܹܐ ܒܐܘܼ̈ܠܨܵܢܹܐ.
                ܘܲܒܼܟܼܠܹܗ ܪܲܗܛܵܐ ܕܡܲܪܕܝܼܬܼܗܘܿܢ ܗܵܟܲܢ ܡܸܤܬܲܒܼܪܵܐ ܠܗܘܿܢ: ܐܲܝܟܼ
                ܡܲܢ ܕܒܼܵܐܐܲܪ ܪܵܕܹܝܢ: ܕܠܵܐ ܕܘܼܪ̈ܟܵܬܼܵܐ ܐ̄ܢܵܫܵܝ̈ܬܼܵܐ. ܟܲܕܼ ܠܵܐ ܡܸܬܼܚܲܙܝܵܐ
                
                 512 
                
                ܠܗܘܿܢ ܠܲܓܼܡܵܪ ܥܲܤܩܘܼܬܼܵܐ ܕܐܘܼܪܚܵܐ: ܘܐܵܦܠܵܐ ܕܐܝܼܬܼ ܩܕܼܵܡܲܝܗܘܿܢ
                ܢܲܚ̈ܠܹܐ ܘܪ̈ܵܡܵܬܼܵܐ. ܐܸܠܵܐ ܐܝܼܬܼܵܘܗܝ ܠܗܘܿܢ ܥܲܪܡܵܐ ܠܫܲܦܝܵܐ: ܘܐܲܬܼܪܵܐ
                ܥܲܤܩܵܐ ܠܲܦܩܲܥܬܼܵܐ. ܒܗܵܝ̇ ܕܟܼܠܫܵܥ: ܠܟܸܢܦܵܐ ܕܐܲܒܼܘܼܗܘܿܢ ܚܵܝ̇ܪܝܼܢ.
                ܠܟܼܠܗܹܝܢ ܗܵܠܹܝܢ ܕܪ̈ܲܚܝܼܩܵܢ ܘܠܵܐ ܡܸܬܲܚܲܙ̈ܝܵܢ: ܘܐܲܝܟܼ ܕܒܲܩܢܘܿܡܗܹܝܢ
                ܚܲܬܿܝܼܬܼܵܐ ܥܵܒܼ̇ܕܵܐ ܠܗܘܿܢ: ܕܢܸܬܼܒܲܩܘܿܢ ܒܗܹܝܢ ܦܸܠܐܬܼܵܢܵܐܝܼܬܼ: ܒܥܲܝܢܵܐ
                ܟܤܝܼܬܼܵܐ ܕܗܲܝܡܵܢܘܼܬܼܵܐ. ܡܸܛܠ ܗܵܝ̇ ܕܟܼܠܗܹܝܢ ܡܢ̈ܵܘܵܬܼܵܐ ܕܢܲܦܫܵܐ
                ܚܲܡ̣ ܠܗܹܝܢ ܐܲܝܟܼ ܕܲܒܼܢܘܼܪܵܐ: ܒܤܘܼܘܵܚܵܐ ܕܐܲܝܠܹܝܢ ܕܪ̈ܲܚܝܼܩܵܢ ܐܲܝܟܼ ܡܲܢ
                ܕܩܲܪ̈ܝܼܒܼܵܢ ܠܗܘܿܢ: ܠܬܲܡܵܢ ܡܸܟܹܝܠ ܡܬܼܝܼܚ ܟ̱ܠܹܗ ܛܵܘܚܵܐ
                ܕܚܘܼܫܵܒܲܝ̈ܗܘܿܢ: ܘܕܸܐܡܲܬܼܝ ܢܸܡܛܘܿܢ ܡܤܲܪܗܒܼܝܼܢ: ܘܐܸܡܲܬܼܝ
                ܕܩܵܪܒܼܝܼܢ ܠܟܼܠ ܚܕܼܵܐ ܚܕܼܵܐ ܡ̣ܢ ܡܝܲܬܿܪ̈ܵܬܼܵܐ. ܠܡܸܦܠܲܚ ܐܸܢܹܝܢ: ܠܵܐ
                ܗ̄ܘ̣ܵܐ ܡܢܵܬܼܵܢܵܐܝܼܬܼ ܦܵܠ̇ܚܝܼܢ ܠܗܹܝܢ: ܐܸܠܵܐ ܚܵܒܼܘܼܫܵܐܝܼܬܼ ܟ̱ܠܵܗ̇ ܒܟܼܠܵܗ̇
                ܒܲܚܕܼܵܐ ܙܒܲܢ. ܒܗܵܝ̇ ܕܡܲܪܕܝܼܬܼܗܘܿܢ: ܠܵܘ ܒܐܘܼܪܲܚ ܡܲܠܟܵܐ ܥܵܒܼ̇ܕܝܼܢ
                ܐܲܝܟܼ ܟܠܢܵܫ: ܐܸܠܵܐ ܫܒܼܝܼ̈ܠܹܐ ܦܵܤܘܿܩܹ̈ܐ ܓܵܒܹ̇ܝܢ ܠܗܘܿܢ: ܗܵܢܘܿܢ
                ܕܓܲܢ̄ܒܵܪܹ̈ܐ ܘܕܲܠܝܼ̈ܠܹܐ ܪܵܕܹܝܢ ܒܗܘܿܢ: ܐܲܝܠܹܝܢ ܕܲܕܼܠܝܼܠܵܐܝܼܬܼ ܡܡܲܢܥܝܼܢ
                ܠܗܘܿܢ ܠܐܵܘܵܢܵܐ. ܒܗܵܝ̇ ܕܗ̤ܘ ܤܲܒܼܪܵܐ ܗܵܐ ܫܵܓܲܪ ܠܗܘܿܢ ܐܲܝܟܼ
                ܕܲܒܼܢܘܼܪܵܐ: ܘܠܵܐ ܡܨܸܝܢ ܫܵܠܹ̇ܝܢ ܡ̣ܢ ܬܟܼܝܼܒܼܘܼܬܼ ܪܲܗܛܵܐ ܐܲܡܝܼܢܵܐ
                ܒܚܲܕܼܘܲܬܼܗܘܿܢ. ܘܓܼܵܕܼܫܵܐ ܠܘܵܬܼܗܘܿܢ ܐܲܝܟܼ ܗܵܝ̇ ܕܐܸܡ݂ܲܪ ܛܘܼܒܼܵܢܵܐ
                ܐܹܪܲܡܝܵܐ: ܕܐܸܡ̇ܪܹܬܼ ܠܲܡ ܕܬܼܘܼܒܼ ܠܵܐ ܐܸܢܿܕܲܟܼܪܝܼܘܗܝ: ܘܠܵܐ ܐܸܡܲܠܸܠ
                ܒܲܫܡܹܗ. ܘܲܗܘ̤ܵܐ ܒܠܹܒܿܝ ܐܲܝܟܼ ܢܘܼܪܵܐ ܕܝܵܩܕܵܐ: ܘܚܵܒܵܐ ܒܓܲܪ̈ܡܹܐ.
                ܗܵܟܲܢܵܐ ܗܵܘܹ̇ܐ ܒܠܸܒܿܗܘܿܢ ܥܘܼܗܕܵܢܵܐ ܕܲܐܵܠܵܗܵܐ ܠܐܲܝܠܹܝܢ ܕܲܒܼܤܲܒܼܪܵܐ
                ܕܡܘܼܠܕܵܢܵܐ ܪܵܕܹܝܢ. ܫܒܼܝܼ̈݁ܠܹܐ ܦܵܤܘܿܩܹ̈ܐ: ܠܲܡܝܲܬܿܪ̈ܵܬܼܵܐ ܚܵܒܼ̈ܘܿܫܵܬܼܵܐ ܩ̇ܪܹܝܬܼ
                
                 513 
                
                ܐܸܢܹܝܢ: ܗܵܝ̇ ܕܲܠܝܬܿ ܒܗܹܝܢ ܟܪܘܼܟܼܝܵܐ ܘܛܵܘܪܵܐ ܕܲܫܒܼܝܼ̈ܠܹܐ ܤܲܓܝܼ̈ܐܹܐ
                ܕܕܼܘܼܒܵܪܵܐ ܕܡ̣ܢ ܗܵܘ̇ ܠܗܵܢܵܐ: ܘܐܲܬܼܪܵܐ ܘܙܲܒܼܢܵܐ ܘܦܘܼܠܗܵܕܼܵܐ. ܐܸܠܵܐ
                ܩܵܝ̇ܡܝܼܢ ܥܠܹܝܗ̇: ܘܡܸܚܕܼܵܐ ܡܫܲܡܠܹܝܢ ܠܵܗ̇.
                ܡܫܲܐܠܵܢܵܐ. ܡܵܢܵܐ ܐܝܼܬܹܝܗ̇ ܠܵܐ ܚܵܫܘܿܫܘܼܬܼܵܐ؟ ܘܦܲܢܝܼ ܤܵܒܼܵܐ: ܠܵܐ
                ܚܵܫܘܿܫܘܼܬܼܵܐ: ܠܵܘ ܠܵܐ ܡܲܪܓܫܲܬܼ ܒܝܼܫܹ̈ܐ ܐܝܼܬܹܝܗ̇: ܐܸܠܵܐ ܠܵܐ ܡܩܲܒܿܠܲܬ
                ܚܲܫܹ̈ܐ. ܕܡ̣ܢ ܡܝܲܬܿܪ̈ܵܬܼܵܐ ܤܒܼܝܼ̈ܤܵܬܼܵܐ ܕܲܩܢܹܝܢ ܕܓܲܠ̈ܝܵܢ ܘܲܕܼܟܲܤ̈ܝܵܢ:
                ܐܸܬܼܡܚܸܠܘ ܠܗܘܿܢ ܚܲܫܹ̈ܐ: ܘܠܵܐ ܕܠܝܼܠ ܠܗܘܿܢ ܠܡܸܤܥܵܐ ܥܲܠ
                ܢܲܦܫܵܐ. ܘܐܵܦ ܪܸܥܝܵܢܵܐ: ܠܵܐ ܤܢܝܼܩ ܟܠܫܵܥ ܠܲܡܚܵܪ ܒܗܘܿܢ. ܒܗܵܝ̇
                ܕܲܒܼܟܼܠܙܒܲܢ: ܡܸܛܠ ܒܙܵܘܥܹܗ ܡ̣ܢ ܗܸܪܓܵܐ ܘܥܸܢܝܵܢܵܐ ܕܪܸ̈ܢܝܹܐ ܡܝܲܬܿܪܹ̈ܐ:
                ܕܲܒܼܤܘܼܟܵܠܵܐ ܡܸܬܿܬܿܙܝܼܥܝܼܢ ܒܗܵܘܢܵܐ. ܘܡܵܐ ܕܫܲܪܝܼ ܚܲܫܵܐ ܡܸܬܿܬܿܙܝܼܥ:
                ܡܸܢܫܹܠܝ ܐܸܬܼܚܛܸܦ ܪܸܥܝܵܢܵܐ ܡ̣ܢ ܨܹܐܕܵܘܗܝ ܒܝܲܕܼ ܤܘܼܟܵܠܵܐ ܡܸܕܸܡ
                ܕܐܲܕܝܼܩ ܒܗܵܘܢܵܐ: ܘܦܵܫ̣ ܠܹܗ ܗ̤ܘ ܚܲܫܵܐ ܟܲܕܼ ܒܲܛܝܼܠ. ܐܲܝܟܼ ܕܐܸܡ݂ܲܪ
                ܐܵܦ ܛܘܼܒܼܵܢܵܐ ܐܹܘܲܓܼܪܝܼܣ: ܕܗܵܘܢܵܐ ܕܲܒܼܛܲܝܒܿܘܼܬܹܗ ܕܐܲܠܵܗܵܐ ܥ̇ܒܼܵܕܼ̈ܐ
                ܕܲܡܝܲܬܿܪܘܼܬܼܵܐ ܓܵܡܲܪ. ܘܐܸܬܲܩܲܪܲܒܼ ܠܘܵܬܼ ܝܑܼܕܲܥܬܼܵܐ: ܩܠܝܼܠ ܡܲܪܓܸܫ
                ܡ̣ܢ ܡܢܵܬܼܵܐ ܤܟܲܠܬܼܵܐ ܕܢܲܦܫܵܐ. ܝܑܼܕܲܥܬܹܗ ܓܹܝܪ ܚܵܛ̇ܦܵܐ ܠܹܗ ܠܪܵܘܡܵܐ:
                ܘܲܡܢܲܟܼܪܝܵܐ ܠܹܗ ܠܟܼܠܗܹܝܢ ܕܲܒܼܥܵܠܡܵܐ. ܘܲܒܼܗܵܝ̇ ܕܗܸܢܘܿܢ ܡܸܛܠ
                ܕܼܟܼܝܘܼܬܼܗܘܿܢ ܐܸܬܼܩܲܛܲܢ ܠܹܗ ܗܵܘܢܗܘܿܢ: ܘܲܗܘ̤ܵܐ ܩܲܠܝܼܠ ܘܚܲܪܝܼܦ.
                ܡܸܛܠ ܥܲܢܘܵܝܘܼܬܼܵܐ ܬܘܼܒܼ ܐܸܬܼܡܪܸܩ ܠܹܗ ܗܵܘܢܵܐ: ܒܕܼܝܼܒܸܫ ܠܹܗ
                ܓܘܼܫܡܵܐ ܘܐܵܦ ܡ̣ܢ ܤܦܝܼܩܘܼܬܹܗ ܕܫܸܠܝܵܐ ܘܲܡܬܼܝܼܚܘܼܬܹܗ ܕܙܲܒܼܢܵܐ
                ܕܒܹܗ. ܘܡܸܛܠ ܗܵܢܵܐ ܩܲܝܼܠܵܐܝܼܬܼ ܫܵܟܹ̇ܢ ܥܲܠ ܡܸܕܸܡ ܡܸܕܸܡ:
                ܕܢܵܓܼܕܵܐ ܠܹܗ ܬܹܐܘܿܝܼܵܐ ܕܲܒܼܗܘܿܢ ܠܬܲܗܪܵܐ ܕܲܠܘܵܬܹܗ. ܘܥܲܠ ܗܵܕܹܐ
                
                 514 
                
                ܘܐܵܦ ܤܒܼܝܼܤܝܼܢ ܒܬܹܐܘܿܪ̈ܝܼܣ: ܘܠܵܐ ܡܬܼܘܿܡ ܚܵܤܲܪ ܠܗܘܿܢ
                ܡܠܘܿܐܵܐ ܕܤܘܼ̈ܟܵܠܹܐ ܡ̣ܢ ܪܸܥܝܵܢܗܘܿܢ. ܤܛܲܪ ܡ̣ܢ ܗܵܝ̇: ܕܗ̤ܘ
                ܪܘܼܚܵܐ ܦܹܐܪ̈ܵܘܗܝ ܡܚܲܦܸܛ ܒܗܘܿܢ. ܘܐܵܦ ܗ̤ܘ ܥܝܵܕܼܵܐ ܒܢܲܓܝܼܪܘܼܬܹܗ
                ܕܙܲܒܼܢܵܐ: ܥܛ̣ܵܐ ܐܸܢܘܿܢ ܠܥܘܼܗ̈ܕܵܢܹܐ ܡ̣ܢ ܠܸܒܵܐ: ܗܵܢܘܿܢ ܕܗܸܢܘܿܢ
                ܐܸܢܘܿܢ ܡܙܝܼ̈ܥܵܢܹܐ ܕܚܲܫܹ̈ܐ ܒܢܲܦܫܵܐ: ܘܚܲܝܠܵܐ ܪܹܫܵܝܵܐ ܕܤܵܛܵܢܵܐ. ܐܸܡܲܬܼܝ
                ܕܹܝܢ ܕܢܲܦܫܵܐ ܠܵܐ ܐܸܬܼܚܲܒܲܪ ܥܲܡ ܚܲܫܹ̈ܐ ܒܝܲܕܼ ܗܸܪܓܵܗ̇ ܕܲܒܼܗܘܿܢ:
                ܒܲܕܼܡ̣ܢ ܪܸܢܝܵܐ ܐ̄ܚܪܹܢܵܐ ܕܒܼܝܼܪܵܐ ܬܟܼܝܼܒܼܵܐܝܼܬܼ: ܠܵܐ ܡܨܼܐ ܩܵܐܹ̇ܬܼ ܚܹܝܠ
                ܛܸܦܪ̈ܲܝܗܘܿܢ ܒܪܸ̈ܓܼܫܹܝܗ̇ ܪ̈ܘܼܚܵܢܵܝܹܐ.
                ܡܫܲܐܠܵܢܵܐ. ܡܵܢܵܐ ܐܸܢܹܝܢ ܕܝܼ̈ܠܵܝܵܬܼܵܗ̇ ܕܡܲܟܿܝܼܟܼܘܼܬܵܐ؟ ܤܵܒܼܵܐ ܐܵܡܲ݁ܪ:
                ܐܲܝܟܲܢܵܐ ܕܡܲܤܒܿܪܵܢܘܼܬܼܵܐ ܡܒܲܕܪܵܢܝܼܬܼܵܐ ܗ̣̄ܝ ܕܢܲܦܫܵܐ ܒܦܲܢܛܵܤܝܼܵܐ
                ܕܦܸܗܝܵܗ̇: ܡ̣ܢ ܚܹܐܦܵܐ ܕܲܡܕܲܥܲܪ ܠܵܗ̇ ܠܡܸܦܪܲܚ ܒܲܥܢܵܢܵܐ
                ܕܚܘܼܫܵܒܹ̈ܝܗ̇ ܠܡܸܚܕܲܪ ܒܟܼܠܵܗ̇ ܒܪܝܼܬܼܵܐ: ܗܵܟܲܢܵܐ ܡܲܟܝܼܟܼܘܼܬܼܵܐ
                ܡܟܲܢܫܵܢܝܼܬܼܵܐ ܗ̣̄ܝ ܕܝܵܬܼܵܗ̇ ܒܫܲܠܝܘܼܬܼܵܐ ܕܚܘܼ̈ܫܵܒܹܐ: ܘܲܦܩܝܼܤܘܼܬܼܵܐ
                ܕܢܲܦܫܵܐ ܠܓܼܵܘ ܡܸܢܵܗ̇ܘ ܘܐܲܟܼܙܢܵܐ ܕܢܲܦܫܵܐ ܠܵܐ ܝܑܼܕܼܝܼܥܵܐ: ܘܠܵܐ ܠܥܲܝܢܵܐ
                ܕܒܸܤܪܵܐ ܡܸܬܼܚܲܙܝܵܐ: ܗܵܟܲܢܵܐ ܡܲܟܿܝܼܟܼܵܐ ܠܵܐ ܝܑܼܕܼܝܼܥ ܒܹܝܬܼ ܒܢܲܝ̈ܢܵܫܵܐ.
                ܘܐܲܝܟܼ ܢܲܦܫܵܐ ܒܓܼܵܘ ܦܲܓܼܪܵܐ: ܡܤܲܬܲܪ ܡ̣ܢ ܚܙܵܬܼܵܐ ܘܲܚܠܝܼܛܘܼܬܼܵܐ
                ܕܥܲܡ ܟܠ ܒܲܪܢܵܫ. ܡܲܟܼܝܼܟܼܵܐ ܕܲܫܪܵܪܵܐ: ܠܵܘ ܒܲܠܚܘܿܕܼ ܠܵܐ ܒܵܥܹ̇ܐ
                ܕܢܸܼܬܼܚܙܸܐ ܘܢܸܬܼܝܕܲܥ ܒܹܝܬܼ ܒܢܲܝ̈ܢܵܫܵܐ: ܡܸܛܠ ܓܢܝܼܙܘܼܬܹܗ
                ܘܲܩܦܝܼܤܘܼܬܹܗ ܕܡ̣ܢ ܟܠ: ܐܸܠܵܐ ܗܵܢܵܘ ܨܸܒܼܝܵܢܹܗ ܐܸܢ ܡܲܨܝܵܐ: ܕܐܵܦ
                ܗ̤ܘ ܡ̣ܢ ܢܲܦܫܹܗ ܢܸܗܘܸܐ ܥܲܡܝܼܕܼ ܘܲܚܡܝܼܠ: ܘܲܡܓܼܵܘܲܝ ܠܓܼܵܘ
                ܡܸܢܹܗ: ܒܫܲܠܝܘܼܬܼܵܐ ܘܦܵܘܫܵܐ ܕܙܵܘܥܵܘ̈ܗܝ ܥܲܡ ܪܸ̈ܓܼܫܵܘܗܝ ܟ̱ܠܹܗ
                ܒܟܼܠܹܗ: ܘܐܲܝܟܼ ܡܸܕܸܡ ܕܠܲܝܬܵܘܗܝ ܒܲܒܼܪܝܼܬܼܵܐ ܘܠܵܐ ܐܸܬ݂ܼܵܐ ܠܲܗܘܵܝܵܐ:
                
                 515 
                
                ܘܠܲܝܬܵܘܗܝ ܠܲܓܼܡܵܪ ܟܠ ܟ̱ܠܹܗ: ܕܐܵܦܠܵܐ ܗ̤ܘ ܠܢܲܦܫܹܗ ܨܵܒܹ̇ܐ
                ܕܢܸܬܼܝܼܕܲܥ ܘܢܸܬܼܪܓܸܫ. ܘܲܟܼܡܵܐ ܕܲܓܼܢܝܼܙ ܘܲܛܫܸܐ ܘܲܚܡܝܼܠ ܡ̣ܢ
                ܥܵܠܡܵܐ: ܟ̱ܠܹܗ ܠܘܵܬܼ ܡܵܪܹܗ ܐܝܼܬܼܵܘܗܝ. ܡܲܟܿܝܼܟܼܵܐ ܡܸܡܬܼܘܿܡ ܠܵܐ
                ܡܢܵܚ ܕܢܸܚܙܸܐ ܟܢܘܼ̈ܫܝܹܐ: ܘܪܵܘܒܵܐ ܕܐܵܟܼܠܘܿܣ: ܘܙܵܘܥܵܐ ܘܩܵܠܵܐ:
                ܘܠܵܐ ܫܘܼܪܬܵܚܵܐ ܘܨܸܒܼܬܼܵܐ ܘܦܘܼܪ̈ܦܵܥܹܐ ܕܡܸܢܗܘܿܢ ܐܲܫܝܼܕܼܘܼܬܼܵܐ: ܘܠܵܐ
                ܡܲܡܠܠܵܐ ܘܥܸܢܝܵܢܵܐ ܘܩܵܠܵܐ ܘܲܙܪܝܼܩܘܼܬܼܵܐ ܕܪܸ̈ܓܼܫܹܐ. ܐܸܠܵܐ ܝܲܬܝܼܪ
                ܡ̣ܢ ܟܠܡܸܕܸܡ ܓܒܸܐ ܥܠܵܘܗܝ: ܟܬܝܼܫܘܼܬܼܵܐ ܘܲܩܦܝܼܤܘܼܬܼܵܐ ܕܗ̤ܘ
                ܥܲܡ ܕܝܼܠܹܗ: ܟܲܕܼ ܫܠܸܐ ܘܲܚܡܝܼܠ ܘܲܡܫܵܘܚܲܕܼ: ܘܲܪܡܸܐ ܥܲܡ
                ܢܲܦܫܹܗ ܒܐܼܲܪܵܐ ܫܲܠܝܵܐ ܕܲܤܝܼܦܩ ܡ̣ܢ ܟܠ: ܘܲܫܠܸܐ ܡ̣ܢ ܟ̱ܠܵܗ̇
                ܒܪܝܼܬܼܵܐ. ܘܲܒܼܟܼܠܡܸܕܸܡ: ܙܥܘܿܪܘܼܬܼܵܐ ܘܲܡܤܲܩܡܘܼܬܼܵܐ ܘܲܤܝܼܩܘܼܬܼܵܐ
                ܘܡܸܤܟܹܢܘܼܬܼܵܐ ܡܚܲܒܿܒܼܵܐ ܥܠܵܘܗܝ. ܘܠܵܐ ܠܤܘܼܥܪ̈ܵܢܹܐ ܤܲܓܝܼ̈ܐܹܐ
                ܘܲܥ̇ܒܼܵܕܼ̈ܐ ܤܒܼܝܼ̈ܤܹܐ: ܐܸܠܵܐ ܒܟܼܠܙܒܲܢ ܒܲܤܦܝܼܩܘܼܬܼܵܐ ܘܲܕܼܠܵܐ ܪܸܢܝܵܐ
                ܩܝܼܡ: ܒܠܵܐ ܒܘܼܠܒܵܠܵܐ ܕܒܲܐܝܠܹܝܢ ܕܲܬܼܢܵܢ: ܕܠܵܐ ܢܸܦܩܘܼܢ
                ܚܘܼܫܵܒܼܵܘ̈ܗܝ ܠܒܲܪ ܡܸܢܹܗ. ܒܕܲܡܦܵܣ: ܕܐܸܢܗ̤ܘ ܕܲܒܼܤܲܓܝܼ̈ܐܵܬܼܵܐ
                ܢܸܦܸܠ: ܕܢܸܗܘܸܐ ܕܠܵܐ ܒܘܼܠܒܵܠܵܐ ܕܙܵܘܥܵܘ̈ܗܝ: ܠܵܐ ܡܸܫܟܚܵܐ.
                ܕܤܘܼܥܪ̈ܵܢܹܐ ܤܲܓܝܼ̈ܐܹܐ: ܪܸ̈ܢܝܹܐ ܐܸܢܘܿܢ ܤܲܓܝܼ̈ܐܹܐ. ܘܪܸܢܝܹܐ ܤܲܓܝܼ̈ܐܹܐ:
                ܟܢܘܼܫܝܵܐ ܐܸܢܘܿܢ ܕܡܲܚܫ̈ܒܼܵܬܼܵܐ: ܘܚܘܼ̈ܫܵܒܹܐ ܡܦܲܬܼܟܹ̈ܐ. ܘܲܢܦܲܩ̣ ܠܹܗ
                ܡܸܟܹܝܠ ܡ̣ܢ ܗܵܝ̇ ܕܢܸܗܘܸܐ ܡܥܲܠܲܚ ܡ̣ܢ ܨܸܦܬܼܵܐ ܕܐܲܪ̈ܥܵܢܵܝܵܬܼܵܐ ܒܫܲܝܢܵܐ
                ܕܚܘܼܫܵܒܼܵܘ̈ܗܝ: ܠܒܲܪ ܡ̣ܢ ܐܵܠ̈ܨܵܬܼܵܐ ܙܥܘܿܪ̈ܝܵܬܼܵܐ ܕܗ̤ܝ ܗ̣̄ܝ ܐܵܢܲܢܩܹܐ:
                ܘܪܸܥܝܵܢܵܐ ܕܲܫܩܝܼܠ ܪܸܢܝܵܐ ܝܑܼܚܝܼܕܼܵܝܵܐ ܒܙܵܘܥܵܘ̈ܗܝ ܡܫܲܝܹ̈ܐ. ܘܡܸܟܹܝܠ
                ܘܐܵܦ ܕܢܸܗܘܸܐ ܚܤܝܼܟܼ ܦܘܼܡܹܗ ܡ̣ܢ ܡܲܡܠܠܵܐ: ܠܵܐ ܫܵܒܼ̈ܩܵܢ ܠܹܗ
                
                 516 
                
                ܐܵܠ̈ܨܵܬܼܵܐ. ܘܐܵܬܹ̇ܐ: ܘܐܵܦ ܠܗܵܝ̇ ܕܢܸܤܬܲܓܲܦ ܘܲܢܤܲܓܸܦ. ܘܡܸܟܹܝܠ:
                ܐܸܬܼܦܬܲܚ ܠܹܗ ܬܲܪܥܵܐ ܠܚܲܫܹ̈ܐ: ܘܐܸܙܲܠܬ̤ ܠܵܗ̇ ܒܗܝܼܠܘܼܬܼܵܐ ܕܦܘܼܪܫܵܢܵܐ:
                ܥܸܪܩܲܬ̤ ܡܲܟܿܝܼܟܼܘܼܬܼܵܐ: ܐܸܤܬܿܟܲܪ ܬܲܪܥܵܐ ܕܲܫܠܵܡܵܐ. ܘܡܸܛܠ ܗܠܹܝܢ
                ܟܠܗܹܝܢ: ܐܲܡܝܼܢܵܐܝܼܬܼ ܡܵܕܹܝܢ ܡܢܲܛܲܪ ܢܲܦܫܹܗ ܡ̣ܢ ܤܲܓܝܼ̈ܐܵܬܼܵܐ:
                ܘܲܒܼܟܼܠܙܒܲܢ ܡܸܫܟܲܚ ܐܲܢ̄ܬܿ ܠܹܗ ܕܲܒܼܗܝܼܠ ܘܢܝܼܚ ܘܲܟܼܢܝܼܟܼ ܘܲܢܫܲܝܲܢ.
                ܒܡܲܟܿܝܼܟܼܵܐ ܡܸܡܬܼܘܿܡ: ܠܲܝܬܿ ܚܹܐܦܵܐ ܘܲܪܗܝܼܒܼܘܼܬܼܵܐ
                ܘܕܼܘܼܘܵܕܼܵܐ: ܘܠܵܐ ܙܵܘ̈ܥܹܐ ܚܲܡܝܼ̈ܡܹܐ ܘܩܲܠܝܼ̈ܠܹܐ. ܐܸܠܵܐ ܒܟܼܠܙܒܲܢ:
                ܒܢܵܘܚܵܐ ܫܪܸܐ. ܐܸܢ ܡܸܬܿܕܲܒܲܩ ܫܡܲܝܵܐ ܠܐܲܪܥܵܐ: ܡܲܟܝܼܟܼܵܐ ܠܵܐ
                ܡܸܬܿܬܿܙܝܼܥ. ܠܵܘ ܟܠ ܕܲܒܼܗܝܼܠ: ܡܲܟܿܝܼܟܼ. ܟܠ ܕܹܝܢ ܕܡܲܟܿܝܼܟܼ: ܐܵܦ
                ܒܗܝܼܠ. ܡܲܟܿܝܼܟܼܵܐ ܕܠܵܐ ܟܢܝܼܟܼ: ܠܲܝܬܿ. ܟܢܝܼܟܼܵܐ ܕܹܝܢ ܕܠܵܐ ܡܲܟܿܝܼܟܼ:
                ܤܲܓܝܼ̈ܐܹܐ ܡܸܫܟܲܚ ܐܲܢ̄ܬܿ. ܗܵܢܵܘ ܢܝܼܚܵܐ ܘܡܲܟܿܝܼܟܼܵܐ ܕܐܸܡ݂ܲܪ ܡܵܪܲܢ:
                ܕܝܼܠܲܦܘ ܡܹܢܝ ܕܢܝܼܚ ܐ̄ܢܵܐ ܘܡܲܟܝܼܟܼ ܐ̄ܢܵܐ ܒܠܹܒܿܝ: ܘܡܸܫܟܿܚܝܼܢ
                ܐܢ̄ܬܿܘܿܢ ܢܝܵܚܵܐ ܠܢܦܫܵܬܼ̈ܟܼܘܿܢ. ܡܲܟܿܝܼܟܼܵܐ: ܒܟܼܠܙܒܲܢ ܡܢܵܚ: ܒܲܕܼ
                ܠܲܝܬܿ ܡܸܕܸܡ ܕܲܡܙܝܼܥ ܠܪܸܥܝܵܢܹܗ. ܐܲܝܟܼ ܕܠܵܐ ܡܸܫܟܿܚܵܐ ܕܲܢܙܝܼܥ
                ܐ̄ܢܵܫ ܛܘܼܪܵܐ: ܗܵܟܲܢܵܐ ܠܵܐ ܡܸܬܿܬܿܙܝܼܥ ܪܸܥܝܵܢܹܗ ܕܡܲܟܼܝܼܟܼܵܐ: ܐܸܢ
                ܡܲܨܝܵܐ ܠܡܹܐܡܲܪ. ܘܲܟܼܒܲܪ ܐܵܦܠܵܐ ܫܟܼܝܼܪܵܐ ܕܗ̤ܝ ܗܵܕܹܐ ܐ̄ܢܵܫ ܢܹܐܡܲܪ:
                ܕܡܲܟܿܝܼܟܼܵܐ: ܐܵܦܠܵܐ ܡ̣ܢ ܗܵܢܵܐ ܥܵܠܡܵܐ ܐܝܼܬܼܵܘܗܝ. ܒܗܵܝ̇ ܕܠܵܐ
                ܒܥܵܩ̈ܵܬܼܵܐ ܡܵܘܦܸܐ ܘܡܸܬܿܬܿܙܝܼܥ: ܐܵܦܠܵܐ ܒܐܲܝܠܹܝܢ ܕܲܕܼܚܲܕܼܘܼܬܼܵܐ ܐܸܢܹܝܢ
                ܬܵܗܲܪ ܘܡܸܬܼܐܫܸܕܼ. ܐܸܠܵ ܟ̱ܠܵܗ̇ ܚܲܕܼܘܼܬܹܗ ܘܲܪܘܵܙܹܗ ܫܲܪܝܼܪܵܐ: ܒܗܵܠܹܝܢ
                ܕܡܵܪܹܗ ܐܝܼܬܼܵܘܝ. ܢܲܩܝܼ̈ܦܵܢ ܠܵܗ̇ ܕܹܝܢ ܠܡܲܟܿܝܼܟܼܘܼܬܼܵܐ: ܡܲܬܝܼܢܘܼܬܼܵܐ:
                ܟܢܝܼܫܘܼܬܼ ܝܵܬܼܵܐ: ܕܗ̤ܝ ܗ̣̄ܝ ܟܢܝܼܟܼܘܼܬܼܵܐ. ܩܵܠܵܐ ܟܒܼܝܼܫܵܐ: ܙܥܘܿܪܘܼܬܼ
                
                 517 
                
                ܡܲܡܠܠܵܐ: ܫܝܼܛܘܼܬܼ ܝܵܬܼܵܐ: ܒܲܤܝܘܼܬܼ ܢܲܚ̈ܬܹܐ: ܡܡܲܫܚܘܼܬܼ ܗܠܲܟܼܬܼܵܐ:
                ܪܟܼܝܘܼܬܼ ܚܝܵܪܵܐ: ܫܦܝܼܥܘܼܬܼ ܪ̈ܲܚܡܹܐ: ܕܠܝܼܠܘܼܬܼ ܕܼܡ̈ܥܹܐ: ܢܲܦܫܵܐ
                ܡܫܵܘܚܲܕܬܵܐ: ܠܸܒܵܐ ܬܒܼܝܼܪܵܐ: ܠܵܐ ܡܸܬܿܬܿܙܝܼܥܵܢܘܼܬܼܵܐ ܕܚܸܡܬܼܵܐ: ܠܵܐ
                ܙܪܝܼܩܘܼܬܼܵܐ ܕܪܸ̈ܓܼܫܹܐ: ܙܥܘܿܪܘܼܬܼ ܨܸܒܼ̈ܘܵܬܼܵܐ: ܙܥܪܘܼܬܼ ܚܫܲܚܬܼܵܐ
                ܒܟܼܠ: ܛܵܥܘܿܢܘܼܬܼܵܐ: ܡܤܲܝܒܿܪܵܢܘܼܬܼܵܐ: ܠܵܐ ܕܲܚܘܼܠܬܼܵܢܘܼܬܼܵܐ:
                ܓܲܢ̄ܒܵܪܘܼܬܼܵܐ ܕܠܸܒܵܐ ܕܡܸܬܼܝܼܠܕܵܐ ܡ̣ܢ ܤܸܢܐܲܬܼ ܚܲܝܹ̈ܐ ܙܲܒܼ̈ܢܵܢܵܝܹܐ:
                ܚܘܼܡܤܵܢܵܐ ܕܲܒܼܢܸܤܝ̈ܘܿܢܹܐ: ܙܵܘ̈ܥܹܐ ܝܲܩܝܼܪܹ̈ܐ ܘܠܵܐ ܩܲܠܝܼ̈ܠܹܐ: ܕܥܝܼܟܼܘܼܬܼܵܐ
                ܕܚܘܼ̈ܫܵܒܹܐ: ܢܛܝܼܪܘܼܬܼ ܐ̄ܪܵܙܵܐ: ܢܲܟܼܦܘܼܬܼܵܐ: ܢܲܟܿܝܼܚܘܼܬܼܵܐ: ܟܘܼܚܵܕܼܵܐ.
                ܘܝܲܬܼܝܼܪ ܡ̣ܢ ܟܠܗܹܝܢ: ܗܵܝ̇ ܕܢܸܫܬܘܿܩ ܐܲܡܝܼܢܵܐܝܼܬܼ: ܓܵܘܤܵܐ ܐܲܡܝܼܢܵܐ
                ܕܲܒܼܠܵܐ ܝܑܼܕܲܥܬܼܵܐ. ܠܡܲܟܿܝܼܟܼܵܐ ܡܸܡܬܼܘܿܡ: ܠܵܐ ܡܸܤܬܲܩܒܿܠܵܐ ܠܹܗ
                ܐܵܢܲܢܩܹܐ: ܕܥܵܒܼܕܵܐ ܠܹܗ ܕܢܸܬܿܕܵܘܲܕܼ. ܡܲܟܿܝܼܟܼܵܐ ܕܹܝܢ: ܘܟܲܕܼ ܒܲܠܚܘܿܕܼܵܘܗ
                ܐܝܼܬܼܵܘܗܝ: ܘܐܵܦ ܡ̣ܢ ܢܲܦܫܹܗ ܡܸܬܼܟܲܚܲܕܼ.
                ܡܸܬܿܕܲܡܲܪ ܐ̄ܢܵܐ ܐܝܼܬܼܵܘܗܝ ܐ̄ܢܵܫ ܡܲܟܿܝܼܟܼܵܐ ܒܲܫܪܵܪܵܐ: ܘܡܲܡܪܲܚ
                ܕܐܵܦܸܢ ܠܲܡܨܲܠܵܝܘܼ ܠܐܲܠܵܗܵܐ ܟܲܕܼ ܢܸܩܪܘܿܒܼ ܠܲܨܠܘܿܬܼܵܐ: ܐܵܘ ܕܫܵܘܹ̇ܐ
                ܠܗܵܕܹܐ: ܐܵܘ ܠܡܸܫܐܲܠ ܡܸܢܹܗ ܡܸܕܸܡ: ܐܵܘ ܕܝܵܕܲܥ ܡܵܢܵܐ ܢܨܲܠܸܐ.
                ܐܸܠܵܐ ܒܲܠܚܘܿܕܼ ܟܲܕܼ ܫܠܸܐ ܒܟܼܠܗܘܿܢ ܙܵܘܥܵܘ̈ܗܝ: ܘܲܡܤܲܟܵܝܘܼ
                ܡܤܲܟܸܐ ܒܲܠܚܘܿܕܼ ܠܪ̈ܲܚܡܹܐ: ܕܡܵܢܵܐ ܟܲܝ ܨܸܒܼܝܵܢܵܐ ܢܸܦܘܿܩ ܡܸܛܠܵܬܹܗ
                ܡ̣ܢ ܩܕܼܵܡ ܗܵܝ̇ ܪܲܒܿܘܼܬܼܵܐ ܤܓܼܝܼܕܬܵܐ. ܟܲܕܼ ܡܲܟ̈ܦܵܢ ܐܲܦܵܘ̈ܗܝ ܠܐܲܪܥܵܐ:
                ܘܚܵܘܪܵܐ ܓܵܘܝܵܐ ܕܠܸܒܹܗ ܬܠܸܐ ܥܲܠ ܬܲܪܥܵܐ ܕܲܩܕܼܘܿܫ ܩܘܼ̈ܕܼܫܹܐ
                ܕܲܡܪܲܝܡܵܐ. ܗܵܘ̇ ܕܥܲܪܦܸܠܵܐ ܕܲܫܟܼܝܼܢܬܹܗ ܡܲܓܼܗܲܤ ܥܲܝ̈ܢܹܐ ܕܲܤܪ̈ܵܦܹܐ:
                ܘܙܝܼܘܹܗ ܡܲܪܗܸܒܼ ܠܠܸܓܼܝ̈ܘܿܢܹܐ ܕܤܸܕܼܪ̈ܲܝܗܘܿܢ. ܘܫܸܬܼܩܵܐ ܪܡܸܐ
                ܥܲܠ ܟܠܗܘܿܢ ܬܸܓܼܡܲܝ̈ܗܘܿܢ: ܘܲܠܕܼܢܚܵܐ ܕܐ̄ܪ̈ܵܙܹܐ ܕܡ̣ܢ ܓܵܘ ܠܵܐ
                
                 518 
                
                ܡܸܬܼܚܲܙܝܵܢܘܼܬܼܵܐ ܡܤܲܟܹܝܢ: ܒܥܘܼܒܵܐ ܕܠܵܐ ܐܵܐܲܪ: ܒܙܵܘܥܵܐ ܕܠܵܐ ܩܵܠܵܐ:
                ܒܪܸ̈ܓܼܫܹܐ ܕܠܵܐ ܓܘܼܫܡܵܐ: ܒܡܲܪܓܫܵܢܘܼܬܼܵܐ ܕܠܵܐ ܕܡܘܼ: ܕܐܘܼܤܝܼܵܐ
                ܕܠܵܐ ܚܸܙܘܵܐ ܕܓܸܠܝܵܢܵܐ ܕܲܥܠܲܝܗܘܿܢ: ܟܲܕܼ ܡܚܝܼܠܵܐ ܚܲܝܠܬܼܵܢܘܼܬܼܵܐ
                ܕܙܵܘܥܲܝ̈ܗܘܿܢ ܠܲܡܤܲܝܒܵܪܘܼ ܩܕܼܵܡ ܓܲܠܠܹ̈ܐ ܕܐ̄ܪ̈ܵܙܵܘܗܝ. ܘܲܥܕܲܡܵܐ
                ܠܗܵܕܹܐ ܒܲܠܚܘܿܕܼ ܡܲܡܪܲܚ: ܕܐܲܝܟܼ ܨܸܒܼܝܵܢܵܟܼ ܡܵܪܝ܀
                ܗܵܠܹܝܢ ܕܹܝܢ ܥܕܲܡܵܐ ܠܗܵܪܟܵܐ ܕܢܸܪܫܘܿܡ ܠܵܟܼ ܒܦܸܬܼܓܼܵܡܹ̈ܐ
                ܦܫܝܼ̈ܛܹܐ: ܕܲܕܼܠܵܐ ܥܘܼܩܵܒܼܵܐ ܕܲܒܼܗܹܝܢ ܢܲܕܼܪܸܟܼ ܪܸܥܝܵܢܵܐ ܡܸܛܠ
                ܓܲܠܝܘܼܬܼܵܐ ܕܲܒܼ̈ܢܵܬܼ ܩܵܠܹ̈ܐ ܒܛܝܼܠܘܼܬܼܵܐ ܗܘ̤ܵܬܼ ܠܝܼ: ܐܲܝܠܹܝܢ ܕܡ̣ܢ
                ܩܸܪܝܵܢܵܐ ܕܲܒܼܗܹܝܢ ܒܲܠܚܘܿܕܼ: ܛܵܥܹ̇ܐ ܗܵܘܢܵܐ ܠܕܼܘܼܒܵܪ̈ܵܘܗܝ
                ܘܲܠܗܘܼܦܵܟܼܵܘ̈ܗܝ ܕܥܵܠܡܵܐ ܗܵܢܵܐ ܘܲܠܚܲܝܵܘ̈ܗܝ ܒܸܤܪ̈ܵܢܵܝܹܐ: ܘܲܡܫܲܢܸܐ
                ܒܪܸܥܝܵܢܹܗ ܡ̣ܢ ܟܲܕܘܼ ܠܗܵܘ̇ ܥܵܠܡܹܗ ܫܲܪܝܼܪܵܐ ܘܲܡܝܲܬܿܪܵܐ. ܟܲܕܼ
                ܡܦܝܼܣ ܐ̄ܢܵܐ ܠܚܘܼܒܵܟܼ: ܕܡܵܐ ܕܦܵܓܲܥ ܐܲܢ̄ܬܿ ܒܗܵܠܹܝܢ ܐ̄ܪ̈ܵܙܹܐ: ܠܵܐ
                ܬܸܦܘܿܩ ܡܸܢܗܘܿܢ ܕܠܵܐ ܝܘܼܬܼܪܵܢ ܘܢܸܫܬܲܟܚܘܼܢ ܠܘܵܬܼܵܟܼ ܦܸܬܼܓܼܵܡܹ̈ܐ
                ܡܝܼ̈ܬܹܐ. ܕܠܵܐ ܢܸܗܘܘܿܢ ܠܵܟܼ ܐܲܝܟܼ ܗܵܢ̇ܘܿܢ ܕܐܸܙܕܲܡܲܢܘ ܠܫܵܪܘܼܬܼܵܐ
                ܗܵܝ̇ ܪܘܼܚܵܢܵܝܬܼܵܐ: ܘܐܸܫܬܐܸܠܘ ܡ̣ܢ ܕܲܠܡܸܥܲܠ ܠܵܗ̇. ܗܵܐ ܦܵܬܼܘܿܪܵܐ
                ܡܛܲܝܲܒܼ: ܘܐܵܕܼܫܹ̈ܐ ܪ̈ܘܼܚܵܢܹܐ ܤܕܼܝܼܪܝܼܢ ܥܠܵܘܗܝ: ܘܟܼܠ ܓܹܐ̈ܘܵܬܼܵܐ
                ܗܵܐ ܡܲܬܼܩ̈ܢܵܢ. ܘܲܡܤܲܟܸܐ ܠܲܢ ܚܲܬܼܢܵܐ: ܕܢܸܥܘܿܠ ܢܸܬܼܒܲܤܲܡ ܥܲܡܹܗ.
                ܠܵܐ ܢܸܫܬܿܐܸܠ ܡܸܟܹܝܠ: ܕܲܠܡܵܐ ܬܸܬܼܐܡܲܪ ܐܵܦ ܠܘܵܬܲܢ: ܒܲܪܬܼ ܩܵܠܵܐ
                ܗܵܝ̇ ܕܲܗܘ̤ܵܬܼ ܡܸܛܠܵܬܼܗܘܿܢ. ܡܵܢܵܐ ܗܵܟܹܝܠ؟ ܐܵܡܹܝܢ ܐܵܡܲ݁ܪ ܐ̄ܢܵܐ ܠܟܘܿܢ:
                ܕܚܲܕܼ ܡܸܢܗܘܿܢ ܕܲܙܡܝܼ̈ܢܹܐ ܗܵܢܘܿܢ: ܠܵܐ ܢܸܛܥܡܘܼܢ ܡ̣ܢ  ܚܫܵܡܝܼܬܲܝ.