Isaac of Nineveh. “Discourse 76.” Based upon Digital Syriac Corpus. Last modified March 5, 2019. https://syriaccorpus.org/467.
    
        
            
                 521 
                ܪܹ̈ܫܹܐ ܕܦܵܪܝܼ̈ܩܵܬܼܵܐ. ܥܘ.
            
            
                ܛܘܼܒܼܵܢܵܐ ܦܵܘܠܘܿܣ ܡܲܠܸܦ ܠܲܢ ܟܲܕܼ ܐܵܡܲ̈ܪ: ܫܘܼܠܚܘܼܗܝ
                ܠܒܲܪܢܵܫܵܐ ܥܲܬܝܼܩܵܐ: ܘܲܠܒܲܫܘ ܠܒܲܪܢܵܫܵܐ ܚܲܕܼܬܼܵܐ: ܗܵܘ̇ ܕܒܲܐܠܵܗܵܐ
                ܐܸܬܼܒܿܪܝܼ ܒܩܲܕܝܼܫܘܼܬܼܵܐ ܘܲܒܼܚܲܤܝܼܘܼܬܼܵܐ ܕܩܘܼܫܬܼܵܐ. ܟܲܕܼ ܠܵܐ ܐܸܡ݂ܲܪ:
                ܕܲܠܥܸܠ ܡ̣ܢ ܗܵܢܵܐ ܥܲܬܝܼܩܵܐ: ܠܘܼܒܼܫܘܼܗܝ ܠܚܕܼܬܼܵܐ. ܝܑܼܕܲܥ̣ ܓܹܝܪ:
                ܕܠܵܐ ܡܲܨܝܵܐ. ܚܙܝܼ ܐܲܝܟܲܢ ܚܲܟܼܝܼܡܵܐܝܼܬܼ ܦܵܩܹ̇ܕ. ܠܵܐ ܐܸܡ݂ܲܪ ܕܲܠܒܲܫܘ
                ܒܲܪܢܵܫܵܐ ܚܲܕܼܬܼܵܐ: ܗܵܘ̇ ܕܡܸܬܼܚܲܕܲܬܼ ܒܝܼܕܲܥܬܼܵܐ ܕܐܲܠܵܗܵܐ. ܐܸܠܵܐ ܠܘܼܩܕܲܡ
                ܫܘܼܠܚܘܼܗܝ ܠܗܵܢܵܐ ܐܵܡܲ݁ܪ: ܘܗܵܝܕܹܝܢ ܗܵܘ̇ ܚܲܕܼܬܼܵܐ ܐܵܡܲ̈ܪ
                ܠܘܼܒܼܫܘܼܗܝ. ܐܲܝܟܼ ܕܐܵܦ ܒܕܼܘܼܟܿܬܼܵܐ ܐ̄ܚܪܹܬܼܵܐ ܐܸܡ݂ܲܪ ܓܪܝܼܡܵܐܝܼܬܼ:
                ܕܒܸܤܪܵܐ ܘܲܕܼܡܵܐ ܡܲܠܟܿܘܼܬܼܵܐ ܕܐܲܠܵܗܵܐ ܠܵܐ ܝܵܪܬܝܼܢ: ܘܐܦܠܵܐ ܚܒܼܵܠܵܐ
                ܝܵܪܹܬܼ ܠܵܐ ܡܸܬܼܚܲܒܿܠܵܢܘܼܬܼܵܐ. ܠܵܐ ܡܸܬܼܚܲܒܿܠܵܢܘܼܬܼܵܐ: ܠܝܼܕܲܥܬܼܵܐ ܕܗܵܘ̇
                ܥܵܠܡܵܐ ܐܵܡܲ݁ܪ. ܚܒܼܵܠܵܐ ܘܒܸܤܪܵܐ ܘܲܕܼܡܵܐ: ܠܗܘܿܢ ܠܚܲܫܹ̈ܐ ܡܚܲܒܿܠܵܢܹ̈ܐ
                ܕܢܲܦܫܵܐ ܘܲܕܼܦܲܓܼܪܵܐ ܡܟܲܢܸܐ: ܕܲܒܼܬܲܪܥܝܼܬܼܵܐ ܕܒܸܤܪܵܐ ܐܝܼܬܼܵܘܗܝ ܐܲܬܼܪܵܐ
                ܕܙܵܘܥܗܘܿܢ. ܒܲܪܬܵܫܵܐ ܚܲܕܼܬܼܵܐ: ܠܵܗ̇ ܠܕܲܟܼܝܘܬܼܵܐ ܩܵܪܹܐ. ܡܲܠܟܿܘܼܬܼܵܐ
                ܕܐܲܠܵܗܵܐ: ܠܬܹܐܪܘܿܝܼܵܐ ܪܵܡܬܼܵܐ ܘܡܸܬܼܝܲܕܼܥܵܢܝܼܬܼܵܐ ܕܙܵܘ̈ܥܹܐ ܛܘܼܒܼ̈ܬܼܵܢܹܐ
                ܕܨܸܡ̈ܚܹܐ ܐܝܼܬܼܝܚܹ̈ܐ: ܕܲܠܢܲܦܫܵܐ ܚܤܝܼܬܼܵܐ ܒܲܠܚܘܿܕܼ ܫܲܠܝܼܛ ܠܡܸܥܲܠ:
                ܒܝܲܕܼ ܙܵܘ̈ܥܹܝܗ̇ ܠܵܐ ܡܸܬܼܚܲܒ̈ܠܵܢܹܐ ܕܐܸܬܿܬܿܪܝܼܡܘ: ܠܥܸܠ ܡ̣ܢ ܚܒܼܵܠܵܐ
                ܘܒܸܤܪܵܐ ܘܲܕܼܡܵܐ. ܐܸܢ ܠܵܐ ܡܕܲܟܲܝ ܒܵܒܼܘܿܢܵܐ ܙܥܘܿܪܵܐ ܕܢܲܦܫܵܟܼ: ܠܵܐ
                ܬܲܡܪܲܚ ܠܡܲܨܵܕܼܘܼ ܒܫܸܡܫܵܐ: ܕܠܵܐ ܬܸܬܼܓܠܸܙ ܡ̣ܢ ܚܙܵܬܼܵܐ ܕܲܥܝܵܕܼܵܐ:
                ܘܬܸܫܬܿܕܸܐ ܠܚܲܕܼ ܡ̣ܢ ܐܲܬܼܪ̈ܵܘܵܬܼܵܐ ܗܵܢ̇ܘܿܢ ܡܸܬܼܝܲܕܼ̈ܥܵܢܹܐ: ܕܗ̤ܘܝܘܼ
                
                 522 
                
                ܛܲܪܛܵܪܘܿܣ ܕܐܝܼܬܼܵܘܗܝ ܛܘܼܦܤܵܐ ܕܲܫܝܼܘܿܠ. ܗܵܢܵܘ ܕܹܝܢ: ܚܸܫܟܵܐ
                ܕܲܠܒܲܪ ܡ̣ܢ ܐܲܠܵܗܵܐ. ܕܐܲܝܠܹܝܢ ܕܲܠܒܲܪ ܡ̣ܢ ܟܝܵܢܵܐ ܢܵܦ̇ܩܝܼܢ ܒܙܵܘ̈ܥܹܐ
                ܕܗܵܢܘܗܘܿܢ: ܠܬܲܡܵܢ ܡܸܬܬܵܘܫܝܼܢ ܒܲܟܼܝܵܢܵܐ ܗܵܘ̇ ܝܵܕܼܘܿܥܵܐ ܕܲܩܢܹܝܢ.
                ܡܸܛܠܗܵܢܵܐ ܐܵܦ ܗܵܘ̇ ܕܐܲܡܪܲܚ ܠܡܸܥܲܠ ܒܢܲܚ̈ܬܹܐ ܨܵܐܹ̈ܐ ܠܡܸܫܬܘܼܬܼܵܐ:
                ܠܗܵܢܵܐ ܚܸܫܟܵܐ ܕܠܒܲܪ ܐܸܬܼܦܩܸܕܼ ܕܢܸܫܬܿܕܹܐ. ܡܸܫܬܘܼܬܼܵܐ ܡܸܬܼܐܲܡܪܵܐ:
                ܚܙܵܬܼܵܐ ܕܝܼܕܲܥܬܼܵܐ ܪܘܼܚܵܢܵܝܬܼܵܐ. ܬܘܼ̈ܩܵܢܹܐ ܕܒܼܵܗ̇: ܤܒܼܝܼܤܘܼܬܼ ܐ̄ܪ̈ܵܙܹܐ
                ܐܲܠܵܗܵܝܹ̈ܐ: ܡܲܠܝܼܚ̈ ܚܲܕܼܘܼܬܼܵܐ ܘܲܪܘܵܙܵܐ ܘܒܼܘܼܤܵܡܵܐ ܕܢܲܦܫܵܐ. ܠܒܼܘܼܫܵܐ
                ܕܡܸܫܬܘܼܬܼܵܐ: ܠܐܸܤܛܠܵܐ ܕܕܲܟܼܝܘܼܬܼܵܐ ܡܫܲܡܲܗ. ܢܲܚ̈ܝܬܹܐ ܕܹܝܢ ܨܵܐܹ̈ܐ:
                ܠܙܵܘ̈ܥܹܐ ܚܲܫܵܢܵܝܹ̈ܐ ܕܲܡܟܲܬܡܝܼܢ ܒܢܲܦܫܵܐ. ܚܸܫܘܿܟܼܵܐ ܒܲܪܵܝܵܐ: ܠܒܲܪ ܡ̣ܢ
                ܟ̱ܠܹܗ ܒܘܼܤܵܡܵܐ ܕܝܼܕܲܥܬܼܵܐ ܕܲܫܪܵܪܵܐ ܘܒܲܝܬܵܝܘܼܬܼܵܐ ܐܲܠܵܗܵܝܬܼܵܐ. ܕܐܲܝܢܵܐ
                ܕܟܲܕܼ ܕܐܲܝܟܼ ܗܵܠܹܝܢ ܠܒܼܘܼ̈ܫܹܐ ܠܒܼܝܼܫ: ܡܲܡܪܲܚ ܠܲܡܗܲܓܵܓܼܘ
                ܒܡܲܕܥܹܗ ܪ̈ܵܡܵܬܹܗ ܕܐܲܠܵܗܵܐ: ܘܲܠܡܲܥܵܠܘܼ ܘܲܠܡܵܘܬܵܒܼܘܼ ܢܲܦܫܹܗ
                ܠܓܼܵܘ ܡ̣ܢ ܬܹܐܘܿܪ̈ܝܼܵܣ ܪ̈ܘܼܚܵܢܵܝܵܬܼܵܐ ܕܗܵܝ̇ ܡܸܫܬܘܼܬܼܵܐ ܩܲܕܝܼܫܬܼܵܐ
                ܕܒܲܕܼܟܼܝ̈ܵܐ ܒܲܠܚܘܿܕܼ ܡܸܬܿܕܲܢܚܵܐ: ܘܲܠܒܼܘܼܤܵܡܵܗ̇ ܟܲܕܼ ܥܦܸܐ ܒܒܼܘܼܤܵܡܵܐ
                ܕܚܲܫܹ̈ܐ ܨܵܒܹ̇ܐ ܕܢܼܸܫܬܵܘܬܲܦ: ܐܲܝܟܼ ܕܒܲܪ̈ܲܓܼܪ̈ܵܓܼܝܬܼܵܐ ܡܸܕܸܡ ܡܸܬܼܒܠܲܥ
                ܡܸܢܫܹܠܝ: ܘܡܸܬܿܕܚܸܐ ܡ̣ܢ ܬܲܡܵܢ ܠܐܲܬܼܪܵܐ ܕܠܵܐ ܨܸܼܡܚܵܐ: ܗܵܘ̇
                ܕܡܸܫܬܲܡܲܗ ܫܝܘܿܠ ܘܐܲܒܼܕܵܢܵܐ. ܕܐܝܼܬܹܝܗ̇ ܠܵܐ ܝܼܕܲܥܬܼܵܐ: ܘܛܘܼܥܝܲܝ
                ܕܡ̣ܢ ܐܲܠܵܗܵܐ.
                ܐܲܡܝܼܪ ܓܹܝܪ: ܕܗܵܠܹܝܢ ܕܲܠܵܗܵܐ: ܡ̣ܢ ܢܲܦܫܗܹܝܢ ܐܵܬܼ̈ܝܵܢ: ܐܸܢ
                ܢܸܗܘܸܐ ܬܲܢܼܪܵܐ ܕܲܟܼܝܵܐ ܘܠܵܐ ܡܛܵܘܫܵܐ. ܗܵܝ̇ ܕܡ̣ܢ ܢܲܦܫܗܹܝܢ ܐܵܬܼ̈ܝܵܢ:
                ܕܢܹܐܡܲܪ: ܟܝܵܢܵܐܝܼܬܼ ܐܝܼܬܹܝܗ̇ ܠܕܲܟܼܝܘܼܬܼܵܐ ܕܢܲܙܠܸܓܼ ܒܵܗ̇ ܢܘܼܗܪܵܐ
                ܫܡܲܝܢܵܐ: ܕܠܵܐ ܥܘܼܩܵܒܼܵܐ ܘܥܲܡܠܵܐ ܕܝܼܠܲܢ. ܒܠܸܒܵܐ ܠܲܡ ܕܲܟܼܝܵܐ:
                
                 523 
                
                ܫܡܲܝܵܐ ܚܕܲܬܵܐ ܡܸܬܿܛܲܒܼܥܵܐ. ܕܚܸܙܘܹܗ ܢܘܼܗܪܵܐ: ܕܐܲܬܼܪܹܗ ܪܘܼܚܵܢܵܐ.
                ܐܲܝܟܼ ܕܐܵܦ ܒܕܼܘܼܟܿܬܼܵܐ ܐ̄ܚܪܹܬܼܵܐ: ܐܲܝܟܲܢܵܐ ܕܟܹܐܦܵܐ ܡܲܓܼܢܵܛܝܼܣ
                ܒܚܲܝܠܵܗ̇ ܟܝܵܢܵܝܵܐ ܩܲܢܝܵܐ ܗܵܝ̇ ܕܬܸܬܿܘܿܦ ܨܹܐܕܹܝܗ̇ ܦܸܪ̈ܕܲܝ ܦܲܪܙܠܵܐ:
                ܗܵܟܲܢܵܐ ܝܑܼܕܲܥܬܼܵܐ ܪܘܼܚܵܢܵܝܬܼܵܐ ܠܠܸܒܵܐ ܕܲܟܼܝܵܐ. ܐܵܦܸܢ ܡܸܫܬܲܠܡܵܐ ܡ̣ܢ
                ܫܲܪܝܼܪܹ̈ܐ ܒܚܲܬܿܝܼܬܼܘܼܬܼܵܐ: ܕܠܲܝܬܿ ܪܸܥܝܵܢܵܐ ܠܵܐ ܡܸܬܼܚܲܠܨܵܢܵܐ ܕܠܲܓܼܡܵܪ
                ܡ̣ܢ ܬܲܚܠܘܼܨܵܐ ܕܓܼܘܼܪ̈ܵܓܹܐ ܚܲܫܵܢܵܝܹ̈ܐ ܒܚܲܝܹ̈ܐ ܕܲܬܢܵܢ. ܐܸܠܵܐ ܐܸܢܵܐ
                ܒܲܬܼܟܼܝܼܠܘܼܬܼܵܐ ܐܵܡܲ̈ܪ ܐ̄ܢܵܐ ܗܵܕܹܐ: ܘܠܵܐ ܩܵܢܹ̇ܛ ܐ̄ܢܵܐ ܡ̣ܢ ܫܪܵܪܹܗ
                ܕܢܸܤܝܵܢܵܐ. ܕܐܲܝܢܵܐ ܕܲܡܥܲܛܲܦ ܠܒܼܘܼܫܵܐ ܕܐܸܒܼܠܵܐ ܒܬܲܪܥܝܼܬܹܗ: ܠܵܘ
                ܒܲܠܚܘܿܕܼ ܠܵܐ ܡܸܬܼܚܲܤܢܵܢܵܐ ܐܝܼܬܼܵܘܗܝ ܠܓܼܘܼܪ̈ܵܓܲܝ ܚܲܫܹ̈ܐ: ܐܵܘ ܓܲܢ̄ܒܵܪ
                ܒܲܩܪܵܒܼܵܐ ܕܥܲܡܗܘܿܢ ܘܙܲܟܵܝ: ܐܵܘ ܟܹܝܬܼ ܠܲܓܼܡܵܪ ܠܵܐ ܡܲܡܪܚܝܼܢ
                ܢܲܦܫܗܘܿܢ ܠܲܡܚܵܘܵܝܘܼ ܒܢܝܫܵܐ ܕܬܲܟܼܬܘܼܫܵܐ: ܐܸܠܵܐ ܕܐܵܦܠܵܐ ܡ̣ܢ
                ܪܘܼܚܩܵܐ ܠܡܸܚܠܲܦ ܩܕܼܵܡܹܝܗ̇ ܡܲܡܪܚܝܼܢ: ܕܐܲܝܟܵܐ ܕܐܝܼܬܹܝܗ̇ ܢܲܦܫܵܐ
                ܐܲܒܼܝܼܠܬܼܵܐ: ܕܲܥܒܼܝܼܕܼܵܐ ܗ̤ܝ ܠܵܗ̇ ܒܹܝܬܼ ܡܲܪܩܘܼܕܬܵܐ ܒܐܘܿܠ̈ܝܵܬܼܵܐ
                ܡܦܲܬܼ̈ܟܼܵܬܐ ܕܥܲܠ ܚܛܵܗܹ̈ܝܗ̇. ܘܐܲܝܟܼ ܗܵܝ̇ ܕܐܲܡܝܼܪܵܐ ܡ̣ܢ ܛܘܼܒܼܵܢܵܐ
                ܝܲܥܩܘܿܒܼ: ܒܩܲܒܼܪܵܐ ܥܵܒܼܕܵܐ ܥܘܼܡܪܵܗ̇: ܥܕܲܡܵܐ ܕܢܸܦܓܲܥ ܬܘܼܒܼ
                ܒܚܲܒܿܝܼܒܼܵܬ ܝܵܘܤܸܦ. ܐܲܝܟܵܐ ܕܐܝܼܬܹܝܗ̇ ܡܲܪܝܼܪܘܼܬܼܵܐ ܕܐܲܒܼܝܼܠܘܼܬܼܵܐ:
                ܕܬܸܥܘܿܠ ܗܲܢܝܼܐܘܼܬܼܵܐ ܕܚܲܫܹ̈ܐ ܕܐܹܡܲܪ: ܠܵܐ ܡܸܬܿܛܦܝܼܣ ܐ̄ܢܵܐ. ܐܸܢܵܐ
                ܕܹܝܢ ܐܵܡܲ݁ܪ ܐ̄ܢܵܐ: ܕܒܲܙܗܝܼܪܘܼܬܼܵܐ ܐܝܼܬܼܵܘܗܝ ܦܘܼܠܚܵܢܹܗ ܕܗܵܢܵܐ
                ܘܬܼܘܼܟܼܠܵܢܵܐ: ܘܲܠܥܸܠ ܡ̣ܢ ܩܸܢܛܵܐ. ܗܵܢܵܐ ܕܐܲܡܝܼܢ ܒܐܸܒܼܠܵܐ ܡܸܛܠ
                ܩܸܢܛܵܐ ܟܹܐܡܲܬܼ ܕܠܵܐ ܝܵܕܲܥ ܠܐܲܝܟܵܐ ܫܵܪܟܵܐ ܚܲܪܬܼܵܐ ܕܪܲܗܛܹܗ:
                ܝܲܬܼܝܼܪ ܡ̣ܢ ܗܵܘ̇ ܐܲܝܢܵܐ ܕܐܲܡܝܼܢ ܒܕܼܘܼܒܵܪܵܐ ܕܚܲܕܼܘܼܬܼܵܐ: ܡܸܛܠ ܗܵܝ̇
                
                 524 
                
                ܕܐܲܪܓܸܫ ܡܸܟܵܐ ܒܤܲܒܼܪܵܐ ܕܦܘܼܠܚܵܢܹܗ. ܐܘܿ ܕܲܟܼܒܼܝܼܫܵܐ ܡܕܼܝܼܢ̄ܬܹܗ
                ܡ̣ܢ ܚܲܫܹ̈ܐ ܕܲܠܓܼܵܘ: ܐܸܙܕܲܝܲܢ ܒܙܲܝܢܵܐ ܕܐܸܒܼܠܵܐ ܘܲܪܕܼܘܿܦ ܒܵܬܲܪܗܘܿܢ:
                ܘܐܲܥܕܝܼ ܐܸܢܘܿܢ ܠܲܒܼܢܲܝ̈ܟ ܡ̣ܢ ܐܝܼܕܲܝ̈ܗܘܿܢ. ܠܵܐ ܡܸܬܼܚܲܤܢܵܢܵܐ ܗ̄ܘ̣
                ܓܹܝܪ ܙܲܝܢܵܐ ܗܵܢܵܐ ܘܲܕܿܬܼܘܼܟܼܠܵܢܵܐ ܒܟܼܠܙܒܲܢ: ܘܲܡܢܲܤܲܝ ܠܫܲܪܝܼܪܹ̈ܐܘ