Paulus Bedjan ed., Mar Isaacus Ninivita. De perfectione religiosa. (Paris/Leipzig: Otto Harrassowitz, 1909)
    
        
            
                ܥܲܠ ܝܘܼܬܼܪܵܢܵܐ ܕܡ̣ܢ ܥܪܘܼܩܝܵܐ ܕܡ̣ܢ ܥܵܠܡܵܐ: ܕܲܒܼܒܼܘܼܚܵܢܵܐ ܕܟܸܟܼܡܬܼܵܐ
                ܐܸܬܼܦܲܪܲܣ ܡ̣ܢ ܐܲܒܼ̈ܗܵܬܼܵܐ ܦܘܼܪܤܵܐ ܗܵܢܵܐ. ܥܚ.
            
            
                ܚܲܤܝܼܢ ܗ̄ܘ̣ ܓܹܝܪ ܫܲܪܝܼܪܵܐܝܼܬܼ ܘܲܥܤܸܩ ܘܛܵܒܼ ܩܫܸܐ: ܐܵܓܼܘܿܢܵܐ
                ܕܗܵܘܹ̇ܐ ܒܝܲܕܼ ܩܘܼܪܒܵܐ ܕܨܸܒܼ̈ܘܵܬܼܵܐ. ܘܲܟܼܡܵܐ ܐܸܢ ܛܘܼܠܝܵܩ ܘܚܲܝܠܬܼܵܢ ܢܸܗܘܸܐ
                ܐ̄ܢܵܫ: ܐܸܡܲܬܼܝ ܕܩܲܪ̈ܝܼܒܼܵܢ ܠܹܗ ܥܸܠ̈ܠܵܬܼܵܐ ܕܲܡܓܲܪ̈ܓܼܵܢ ܩܪ̈ܵܒܹܐ ܘܬܲܟܼܬܘܼ̈ܫܹܐ:
                ܩܸܢܛܵܐ ܢܲܩܝܼܦ ܠܹܗ. ܘܲܕܼܠܝܼܠ ܠܡܲܦܘܼܠܬܼܵܐ: ܝܲܬܝܼܪ ܡ̣ܢ ܗܵܝ̇
                ܕܗ̤ܘ ܩܢܘܼܡܹܗ ܕܤܵܛܵܢܵܐ ܒܲܩܪܵܒܼܵܐ ܓܲܠܝܵܐܝܼܬܼ ܢܸܦܓܲܥ ܒܹܗ. ܒܗܵܝ̇
                ܕܲܟܼܡܵܐ ܕܒܲܪܢܵܫܵܐ ܠܵܐ ܡܲܒܼܥܲܕܼ ܡ̣ܢ ܐܲܝܠܹܝܢ ܕܠܸܒܵܐ ܕܵܚܹ̇ܠ ܡܸܢܗܹܝܢ:
                
                 537 
                
                ܐܲܡܝܼܢܵܐܝܼܬܼ ܐܝܼܬܼ ܠܹܗ ܠܲܒܼܥܸܠܕܲܪܵܐ ܐܲܬܼܪܵܐ ܥܠܵܘܗܝ. ܘܐܸܢ ܓܕܲܫ̣
                ܘܩܲܠܝܼܠ ܢܵܡ̣: ܦܫܝܼܩܵܐܝܼܬܼ ܡܵܘܒܸܕܼ ܠܹܗ. ܬܲܡܵܢ ܓܹܝܪ: ܦܲܓܼܪܵܐ
                ܩܲܢܝܼܛ ܕܢܸܤܬܲܓܲܦ. ܡ̣ܢ ܟܠ ܦܪܘܿܣ ܡ̣ܢ ܚܛܵܗܹ̈ܐ: ܡܲܒܼܥܲܕܼ ܗ̄ܘ̣.
                ܗܵܪܟܵܐ ܕܹܝܢ: ܢܲܦܫܵܐ ܗ̄ܘ̣ ܕܲܡܩܲܒܿܠܵܐ ܡܚܘܿܬܼܵܐ ܕܠܵܐ ܡܸܬܼܚܲܙܝܵܐ:
                ܘܠܵܐ ܡܲܠܐܝܵܐ ܠܹܗ ܠܲܒܼܥܸܠܓܕܲܪܵܗ̇ ܕܢܸܬܼܟܲܬܲܫ ܥܲܡܵܗ̇. ܒܗܵܝ̇ ܕܗܸܢܹܝܢ
                ܨܸܒܼ̈ܘܵܬܼܵܐ ܡ̣ܢ ܢܲܦܫܗܹܝܢ: ܤܵܦ̈ܩܵܢ ܕܲܢܙܝܼ̈ܥܵܢ ܥܠܹܝܗ̇ ܫܓܼܘܼܫܝܵܐ ܕܲܩܪ̈ܵܒܹܐ
                ܒܟܼܠܥܸܕܵܢ. ܘܨܸܒܒܼܝܵܢܵܐܝܼܬܼ ܡܸܬܿܕܲܒܼܪܵܐ ܒܲܫܒܼܝܼܬܼܗܹܝܢ: ܟܲܕܼ ܠܲܝܬܿ ܕܤܵܕܲܪ
                ܥܲܡܵܗ̇ ܩܪܵܒܼܵܐ ܡ̣ܢ ܠܒܲܪ. ܐܸܠܵܐ ܗ̤ܝ ܐܝܼܬܹܝܗ̇ ܐܵܓܼܘܿܢܵܐ ܠܝܵܬܼܵܗ̇:
                ܒܓܼܘܼܪ̈ܵܓܹܐ ܕܐܲܝܠܹܝܢ ܕܲܩܕܼܵܡ ܪܸ̈ܓܼܫܹܐ ܕܦܲܓܼܪܵܐ ܤܕܝܼܪ̈ܵܢ: ܐܲܝܟܼ ܕܐܡܝܼܪ
                ܒܕܼܘܼܟ: ܕܡܵܐ ܠܲܡ ܕܐܚܝܼܕܼܵܐ ܢܲܦܫܵܐ ܒܦܸܓܼܥܵܘ̈ܗܝ ܡܲܟܿܝܵܢܹ̈ܐ ܕܥܵܠܡܵܐ:
                ܗܸܢܘܿܢ ܦܸܓܼܥܹ̈ܐ ܗܵܘܹ̇ܝܢ ܠܵܗ̇ ܫܦܵܝܹ̈ܐ. ܘܐܲܝܟܼ ܗܵܘ̇: ܕܲܟܼܝܵܢܵܐܝܼܬܼ ܡܸܙܕܲܟܼܝܵܐ
                ܐܸܡܲܬܼܝ ܕܲܒܼܗܘܿܢ ܦܵܓ̇ܥܵܐ. ܘܒܲܕܼܓܼܘܿܢ ܕܲܡܦܵܤܝܼܢ ܗ̄ܘ̣ܵܘ ܩܲܕܝܼ̈ܫܹܐ
                ܩܲܕܼ̈ܡܵܝܹܐ ܐܲܝܠܹܝܢ ܕܒܲܫܒܼܝܼ̈ܠܹܐ ܗܵܠܹܝܢ ܪܕܼܵܘ: ܕܠܵܘ ܒܟܼܠܙܒܲܢ ܚܠܝܼܡ
                ܗܵܘܢܵܐ ܕܡܸܫܟܲܚ ܕܲܢܩܘܼܡ ܒܚܲܕܼ ܛܲܟܼܤܵܐ ܠܵܐ ܡܸܨܛܲܠܝܵܢܵܐܝܼܬܼ
                ܘܢܸܛܲܪ ܡܲܛܲܪܬܵܐ. ܒܗܵܝ̇ ܕܐܝܼܬܼ ܥܸܕܵܢܵܐ ܕܲܒܼܥܲܡܛܵܢܵܐ ܗܵܘ̇ܝܵܐ ܢܲܦܫܵܐ:
                ܘܠܵܐ ܡܲܨܝܵܐ ܕܬܲܨܸܕܸ ܒܐܲܝܠܹܝܢ ܕܡܲܤܲܓ̈ܦܵܢ: ܒܚܸܟܼܡܬܼܵܐ ܒܲܚܸܢܘ.
                ܘܐܸܬܼܥܲܛܲܦܘ ܡܤܲܪܩܝܘܼܬܼܵܐ: ܐܲܝܟܼ ܙܲܝܢܵܐ. ܕܡ̣ܢ ܐܵܓܼܘܿܢܹ̈ܐ ܤܲܓܝܼ̈ܐܹܐ:
                ܡܚܲܪܪܵܐ. ܐܲܝܟܼ ܕܲܟܼܬܼܝܼܒܼ. ܕܐܝܼܬܼ ܕܡܸܬܼܦܲܠܲܛ ܡ̣ܢ ܚܵܛܵܗܹ̈ܐ: ܡܸܛܠ
                ܨܪܝܼܸܟܼܘܼܬܹܗ. ܘܲܠܚܘܼܪܒܵܐ ܫܲܬܝܼܘ: ܐܲܝܟܵܐ ܕܠܲܝܬܿ ܨܸܒܼ̈ܘܵܬܼܵܐ: ܕܗܸܢܹܝܢ
                ܥܸܠ̈ܠܬܼܵܐ ܕܚܲܫܹ̈ܐ. ܕܐܵܦ ܟܲܕܼ ܢܸܗܘܸܐ ܥܸܕܵܢܵܐ ܕܢܸܬܼܡܲܚܠܘܼܢ: ܠܵܐ
                ܢܸܫܬܲܟܼ̈ܚܵܢ ܠܗܘܿܢ ܥܸܠ̈ܠܵܬܼܵܬ ܠܡܲܦ̈ܠܵܬܼܵܐ. ܐܵܡܲ݁ܪ ܐ̄ܢܵܐ ܕܹܝܢ: ܚܸܡܬܐ
                
                 538 
                
                ܘܪܸܓܿܬܼܵܐ ܘܐܲܟܿܬܼܵܐ ܘܫܘܼܒܼܚܵܐ: ܗܵܠܹܝܢ ܕܒܲܕܼܫܲܪܟܵܐ ܩܲܠܝܼ̈ܠܢ: ܡܸܛܠ
                ܕܚܘܼܪܒܵܐ ܗ̄ܘ̣: ܘܒܹܗ ܐܸܤܬܲܬܲܪܘ ܐܲܝܟܼ ܕܲܒܼܡܲܓܼܕܠܵܐ ܕܠܵܐ ܡܸܬܼܟܒܸܫ.
                ܘܗܵܝܕܹܝܢ ܐܸܫܟܲܚ ܓܲܡܲܪ ܐܵܓܼܘܿܢܹܗ ܟܠܚܲܕܼ ܚܲܕܼ ܡܸܢܗܘܿܢ ܒܫܸܠܝܵܐ:
                ܐܲܝܟܵܐ ܕܪܸ̈ܓܼܫܹܐ ܠܵܐ ܐܸܫܟܲܚܘ ܬܲܥܕܝܼܪܵܐ: ܕܢܸܗܘܘܿܢ ܠܒܲܥ̈ܠܲܝ ܬܲܟܼܬܘܼܫܵܐ
                ܒܝܲܕܼ ܦܸܓܼܥܹ̈ܐ ܡܤܲܓܦܵܢܹ̈ܐ. ܦܲܩܵܚ ܠܲܢ ܡܵܘܬܵܐ ܕܒܼܵܐܓܼܘܿܢܲܢ: ܘܠܵܐ
                ܚܲܝܹ̈ܐ ܕܡܲܦܘܼܠܬܼܵܐ.