Isaac of Nineveh. “Discourse 80.” Based upon Digital Syriac Corpus. Last modified March 5, 2019. https://syriaccorpus.org/471.
    
        
            
                 546 
                ܥܲܠ ܫܲܗܪܵܐ ܕܠܲܝ̈ܠܵܘܵܬܼܵܐ: ܘܥܲܠ ܦܘܼܪ̈ܫܵܢܹܐ ܤܲܝܼ̈ܐܹܐ ܕܲܙܢܲܝ̈ ܥܲܡ̈ܠܹܐ
                ܕܒܹܗ. ܘܲܕܼܠܵܐ ܙܵܕܹܩ ܢܝܼܫܵܐ ܕܥܲܡ̈ܠܲܝܢ ܠܡܘܼܠܵܝܵܐ ܕܲܟܼܡܵܝܘܼܬܼܵܐ
                ܢܸܗܘܸܐ: ܐܸܠܵܐ ܚܹܐܪܵܐܝܼܬܼ ܘܲܒܼܦܘܼܪܫܵܢܵܐ: ܐܲܝܟܼ ܒܢܲܝ̈ܵܐ ܕܐܲܠܵܗܵܐ ܕܦܵܠ̇ܚܝܼܢ
                ܥܲܡ ܐܲܒܼܘܼܗܘܿܢ ܒܪܘܼܘܵܚܵܐ ܕܚܘܼܒܵܐ. ܘܕܲܟܼܡܵܐ ܝܲܩܝܼܪ ܥܲܡܠܵܐ
                ܕܫܲܗܪܵܐ: ܝܲܬܝܼܪ ܡ̣ܢ ܟܠܗܘܿܢ ܕܘܼܒܵܪܹ̈ܐ. ܘܕܲܐܝܠܹܝܢ ܬܵܒܲܥ ܠܗܵܢܘܿܢ
                ܕܓܼܵܒܹ̇ܝܢ ܥܲܡܠܵܐ ܗܵܢܵܐ: ܘܕܲܝܟܲܢ ܢܸܪܕܘܿܢ ܒܹܗ. ܘܥܲܠ ܫܘܼ̈ܟܵܢܹܐ
                ܕܡܸܫܬܿܘܹܝܢ ܡ̣ܢ ܐܲܠܵܗܵܐ: ܘܥܲܠ ܐܵܓܼܘܿܢܹ̈ܐ ܕܗܵܘܹ̇ܝܢ ܠܘܼܩܒܲܠܗܘܿܢ ܡ̣ܢ
                ܐܲܪܟܘܿܢܹܐ ܕܥܵܠܡܵܐ. ܦ.
            
            
                ܡܵܐ ܕܹܝܢ ܕܨܵܒܹ̇ܐ ܐܲܢ̄ܬܿ ܕܲܬܼܩܘܼܡ ܠܬܸܫܡܸܫܬܼܵܐ ܒܫܲܗܪܵܟܼ:
ܒܥܘܼܕܼܪܵܢܹܗ ܕܡܵܪܲܢ ܥܒܸܕܼ ܐܲܝܟܼ ܕܐܵܡܲ݁ܪ ܐ̄ܢܵܐ ܠܵܟܼ. ܤܝܼܡ ܒܘܼܪܚܵܐ
ܐܲܝܟܼ ܥܝܵܕܼܵܐ: ܘܩܘܼܡ. ܘܒܼܵܬܲܪ ܗܵܝܕܹܝܟ: ܠܵܘ ܡܸܚܕܼܵܐ ܬܫܲܪܸܐ
ܒܬܸܫܡܸܫܬܵܟܼ. ܐܸܠܵܐ ܡܵܐ ܕܨܲܠܝܼܬܿ ܘܫܲܠܸܡ̣ܬܿ: ܘܲܪܫܲܡ̣ܬܿ ܠܸܒܵܟܼ
ܘܗܲܕܵܡܲܝ̈ܟ ܒܢܝܼܫܵܐ ܚܲܝܵܐ: ܩܘܼܡ ܐܲܝܟܼ ܥܸܕܵܢܵܐ ܙܥܘܿܪܵܐ: ܟܲܕܼ ܫܠܸܐ
ܐܲܢ̄ܬܿ. ܥܕܲܡܵܐ ܕܡܸܬܿܬܿܢܝܼܚܝܼܢ ܪܸ̈ܓܼܫܲܝܟ: ܘܙܵܘܥܲܝ̈ܟ ܡܸܫܬܲܝܢܝܼܢ. ܘܟܸܢ
ܐܲܪܝܼܡ ܚܝܵܪܵܟܼ ܓܵܘܵܝܵܐ ܠܘܵܬܼ ܡܵܪܲܢ: ܘܐܲܦܝܼܤܲܝܗܝ ܒܚܲܫܵܐ: ܕܢܸܤܡܘܿܟܼ
ܡܚܝܼܠܘܼܬܼܵܟܼ. ܘܐܲܝܟܼ ܕܠܲܢܝܵܚܵܐ ܕܨܸܒܼܝܵܢܹܗ ܢܸܗܘܘܿܢ ܦܸܬܼܓܼܵܡܹ̈ܐ ܕܠܸܫܵܢܵܟܼ:
ܘܙܵܘ̈ܥܹܐ ܕܠܸܒܵܟܼ. ܘܐܸܡ݂ܲܪ ܫܲܠܝܵܐܝܼܬܼ ܒܲܨܠܘܿܬܼܵܐ ܕܠܸܒܵܟܼ ܗܵܟܲܢܵܐ:
ܡܵܪܝ ܘܐܲܠܵܗܝ: ܤܵܥܘܿܪܵܗ̇ ܕܲܒܼܪܝܼܬܹܗ: ܕܲܓܼܠܹܝܢ ܠܹܗ ܚܲܫܲܝ̈ܢ
ܘܲܡܚܝܼܠܘܿܬܹܗ ܕܲܟܼܝܵܢܲܢ ܘܬܼܘܼܩܦܹܗ ܕܲܒܼܥܸܠܕܲܪܲܢ: ܐܲܢ̄ܬܿ ܤܲܬܼܪܲܝܢܝ ܡ̣ܢ
ܒܝܼܫܘܼܬܹܗ. ܕܚܲܝܠܹܗ ܕܝܼܠܹܗ ܚܲܤܝܼܢ: ܘܲܟܼܝܵܢܲܢ ܕܵܘܹ̇ܐ: ܘܚܲܝܠܲܢ ܬܵܚܘܿܒܼ.
ܐܲܢ̄ܬܿ ܗܵܟܹܝܠ ܒܲܤܝܼܡܵܐ ܕܲܡܦܵܣ ܒܲܡܚܝܼܠܘܼܬܲܢ: ܘܲܛܥܝܼܢ ܥܘܼܤܵܩܹ̈ܝܗ̇

 547 

ܕܲܟܼܪܝܼܗܘܼܬܲܢ: ܢܲܛܲܪܲܝܢܝ ܡ̣ܢ ܫܓܼܘܼܫܝܵܐ ܕܚܘܼ̈ܫܵܒܹܐ ܘܚܹܐܦܵܐ ܕܚܲܫܹ̈ܐ:
ܘܐܲܫܵܘܢܝ ܠܬܸܫܡܸܫܬܼܵܐ ܗܵܕܹܐ ܩܲܕܝܼܫܬܼܵܐ. ܕܠܵܐ ܒܝܲܕܼ ܚܲܫܲܝ̈ ܐܹܚܲܒܸܠ
ܛܲܥܡܵܗ̇: ܘܐܸܫܬܲܟܲܚ ܩܕܼܵܡܲܝܟ ܡܲܪܵܚܐ. ܐܸܠܵܐ ܒܚܘܼ̈ܫܵܒܹܐ ܙܗܲܝ̈ܵܐ
ܘܲܒܼܫܲܦܝܘܼܬܼܵܐ ܕܡܲܚܫܲܒܼܬܼܵܐ ܐܹܩܘܼܡ ܩܕܼܵܡܲܝܟ: ܐܲܝܟܼ ܕܲܦܐܸܐ ܠܩܲܕܝܼܫܘܼܬܼܵܟܼ:
ܗܵܝ̇ ܕܲܠܙܝܼܘܵܗ̇ ܠܵܐ ܤܵܦ̇ܩܵܐ ܗܵܝ̇ ܡܲܪܟܲܒܼܬܼܵܐ ܕܲܤܪ̈ܵܦܹܐ: ܕܒܲܪܦܵܦ
ܙܵܘܥܲܝ̈ܗܘܿܢ ܚܲܡܝܼ̈ܡܹܐ ܡܩܲܕܿܫܝܼܢ ܘܲܡܗܲܠܠܝܼܢ ܠܩܘܼ̈ܕܵܫܹܐ ܕܐܝܼܬܼܘܼܬܵܟܼ
ܠܒܼܘܼܤܵܗܘܿܢ. ܘܲܒܼܗܵܠܹܝܢ ܚܘܼ̈ܫܵܒܹܐ ܡܸܚܕܼܵܐ ܡܸܬܼܦܬܲܚ ܠܸܒܵܟܼ ܡ̣ܢ
ܛܲܝܒܿܘܼܬܼܵܐ: ܘܐܵܫܹ̇ܿܕܼ ܐܲܢ̄ܬܿ ܕܸܡ̈ܥܹܐ ܒܪܹܫ ܨܠܘܿܬܼܵܟܼ. ܘܚܘܼܫܵܒܲܝ̈ܟܼ:
ܡܸܙܕܲܗܹܝܢ ܒܥܘܼܗܕܵܢ ܡܵܪܝܵܐ. ܘܲܒܼܗܝܼܠܘܼܬܼܵܐ: ܘܢܲܟܼܦܘܼܬܼܵܐ ܙܗܝܼܬܼܵܐ
ܡܩܲܒܿܠܵܐ ܢܲܦܫܵܟܼ. ܘܟܲܕܼ ܟܢܝܼܫ ܪܸܥܵܝܵܟܼ ܘܲܙܗܸܐ: ܡܫܲܪܸܐ ܐܲܢ̄ܬܿ
ܕܠܵܐ ܕܘܼܘܵܕܼܵܐ ܒܬܸܫܡܸܫܬܵܟܼ: ܘܪܵܕܹܐ ܐܲܢ̄ܬܿ ܒܵܗ̇ ܥܕܲܡܵܐ ܠܫܘܼܡܠܵܝܵܐ
ܒܲܤܝܼܡܵܐܝܼܬܼ.
ܙܵܕܹܩ ܠܲܢ ܕܹܝܢ ܕܲܒܼܟܼܠܵܗ̇ ܚܹܐܪܘܼܬܼܵܐ ܗ̤ܘܲܝܢܲܢ ܪܵܕܹܝܢܲܢ ܒܵܗ̇
ܒܬܸܫܡܸܫܬܲܢ: ܠܒܲܪ ܡ̣ܢ ܟ̱ܠܹܗ ܪܸܥܝܵܢܵܐ ܡܕܼܵܘܕܼܵܐ ܕܛܲܠܝܘܼܬܼܵܐ.
ܐܸܢܕܹܝܢ ܢܸܚܙܸܐ ܕܥܸܕܵܢܵܐ ܠܵܐ ܤܲܓܝܼ: ܘܢܵܗܲܪ ܟܲܕܼ ܠܵܐ ܡܫܲܡܠܸܐ:
ܢܸܫܒܿܘܿܩ ܨܸܒܼܝܵܢܵܐܝܼܬܼ ܒܝܼܕܲܥܬܼܵܐ ܚܲܕܼ ܘܲܬܼܪܹܝܢ ܗܘܼ̈ܠܵܠܝܼܢ ܡ̣ܢ ܕܲܥܝܵܕܼܵܐ:
ܘܠܵܐ ܢܸܗܘܸܐ ܐܲܬܼܪܵܐ ܠܕܼܘܼܘܵܕܼܵܐ ܕܲܢܚܲܒܸܠ ܠܛܲܥܡܵܐ ܕܬܸܫܡܸܫܬܲܢ:
ܘܢܸܕܼܠܘܿܚ ܐܵܦ ܠܡܲܙܡܘܿܪܹ̈ܐ ܕܨܲܦܪܵܐ. ܐܸܢ ܟܲܕܼ ܡܫܲܡܸܫ ܐܲܢ̄ܬܿ:
ܠܵܚܹ̇ܫ ܠܵܟܼ ܚܘܼܫܵܒܼܵܐ ܘܐܵܡܲ݁ܪ: ܤܲܪܗܸܒܼ ܠܲܡ ܩܲܠܝܼܠ: ܟܹܐܡܲܬܼ
ܢܲܤܓܸܐ ܥ̇ܒܼܵܕܼܵܐ: ܘܬܸܦܠܲܛ ܠܵܟܼ ܒܲܥܓܲܠ: ܠܵܐ ܬܚܘܼܪ ܒܹܗ. ܐܸܢ
ܕܹܝܢ ܐܵܠܹ̇ܨ ܠܵܟܼ ܒܗܵܕܹܐ: ܥܛܘܿܦ ܡܸܚܕܼܵܐ ܒܲܪ ܒܸܤܬܿܪܵܐܝܼܬܼ ܡܲܪ̈ܡܝܵܬܼܵܐ
ܚܲܕܼ ܟܡܵܐ. ܘܟܼܠ ܦܸܬܼܓܼܵܡܵܐ: ܕܢܝܼܫܵܐ ܕܲܨܠܘܿܬܼܵܐ ܛܥܝܼܢ ܒܤܘܼܟܵܠܹܗ:

 548 

ܬܢܝܼܘܗܝ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ. ܘܐܸܢ ܬܘܼܒܼ ܫܵܓܹ̇ܫ ܐܵܘ ܐܵܠܹ̇ܨ ܠܵܟܼ:
ܐܲܪܦܵܐ ܠܙܘܼܡܵܪܵܐ: ܘܤܝܼܡ ܒܘܼܪܟܵܐ ܒܲܨܠܘܿܬܼܵܐ: ܘܐܸܡ݂ܲܪ: ܐܸܢܵܐ ܠܵܘ
ܡܝܼ̈ܠܹܐ ܕܐܸܡܢܸܐ ܨܵܒܹ̇ܐ ܐ̄ܢܵܐ: ܐܸܠܵܐ ܕܠܵܐܘܵܢܵܐ ܐܸܡܛܸܐ ܒܵܥܹ̇ܐ ܐ̄ܢܵܐ. ܒܟܼܠ
ܫܒܼܝܼܠܵܐ ܕܲܡܫܲܒܸܠ ܠܝܼ ܥܓܲܠ: ܒܹܗ ܐܵܙܹ̇ܠ ܐ̄ܢܵܐ. ܗܵܘ̇ ܥܲܡܵܐ
ܕܲܚܫܲܠ̣ܘ ܥܸܓܼܠܵܐ ܡܒܲܕܼܒܿܪܵܐ: ܐܲܪܒܿܥܝܼܢ ܫܢ̈ܝܼܢ ܗܲܠܸܟܼܘ ܟܲܕܼ ܦܵܗܹ̇ܝܢ
ܒܡܲܕܼܒܿܪܵܐ: ܤܵܠ̇ܩܝܼܡ ܘܢܵܚ̇ܬܝܼܢ ܛܘܼܪܹ̈ܐ ܘܪ̈ܵܡܵܬܼܵܐ. ܘܠܲܐܪܥܵܐ ܕܡܘܼܠܟܵܢܵܐ:
ܐܵܦܠܵܐ ܡ̣ܢ ܪܘܼܚܩܵܐ ܚܙܵܐܘܼܗ̇. ܘܐܸܢ ܢܸܙܟܹܝܟܼ ܩܵܘܡܵܐ ܟܲܕܼ ܫܵܗܲܪ
ܐܲܢ̄ܬܿ ܡܸܛܠ ܢܲܓܝܼܪܘܼܬܹܗ: ܘܬܸܬܼܚܲܒܼ ܡ̣ܢ ܠܹܐܘܬܼܵܐ. ܐܵܡܲ݁ܪ ܠܵܟܼ
ܓܹܝܪ ܚܘܼܫܵܒܼܵܐ: ܡܵܠܘܿܢ ܕܹܝܢ ܐܘܼܡܵܢܵܐ ܕܠܵܥܹ̇ܙ ܒܚܘܼܫܵܒܼܵܐ ܐܲܝܟܼ
ܕܲܒܼܚܸܘܝܵܐ: ܕܤܲܩܸܡ̣ ܡܸܟܹܝܠ: ܟܲܕܼ ܠܲܝܬܿ ܚܲܝܠܵܐ ܠܩܵܘܡܵܐ. ܐܸܡܲܪ:
ܠܵܘ ܗܵܟܲܢܵܐ. ܐܸܠܵܐ ܢܸܬܸܒܼ ܡܸܬܲܒܼ: ܘܛܵܒܼܵܐ ܝܲܬܝܼܪ ܡ̣ܢ ܫܸܢܬܼܵܐ. ܕܐܵܦܸܢ
ܟܲܕܼ ܠܵܐ ܗ̄ܘ̣ܵܐ ܡܲܙܡܘܿܪܵܐ ܐܹܡܲܪ: ܢܸܫܠܸܐ ܕܹܝܢ ܠܸܫܵܢܝ: ܟܲܕܼ ܥܢܸܐ
ܪܸܥܝܵܢܝ ܒܲܨܠܘܿܬܼܵܐ ܘܥܸܢܝܵܢܵܐ ܕܐܲܠܵܗܵܐ: ܦܵܩ̇ܚܵܐ ܗ̣̄ܝ ܥܝܼܪܘܼܬܼܵܐ
ܡܸܢܟܠܦܪܘܿܣ ܡܸܢܵܗ̇ ܕܫܸܢܬܼܵܐ. ܠܵܐ ܗ̄ܘ̣ܵܐ ܩܵܘܡܵܐ ܐܝܼܬܼܵܘܗܝ ܫܲܗܪܵܐ
ܟ̱ܠܹܗ: ܘܠܵܘ ܬܘܼܒܼ ܬܸܢܝܵܐ ܕܡܲܙܡܘܿܪܹ̈ܐ ܒܲܠܚܘܿܕܼ: ܐܸܠܵܐ ܐܝܼܬܼ:
ܕܲܒܼܙܲܡܘܿܪܹ̈ܐ ܡܦܸܩ ܠܸܠܝܵܐ ܟ̱ܠܹܗ. ܐܝܼܬܼ ܕܒܲܤܝܵܡ ܒܘܼܪ̈ܟܹܐ
ܘܲܨ̈ܠܵܘܵܬܼܵܐ ܚܲܫܝܲܫܵܬܼܵܐ: ܘܓܼܘܼܪ̈ܓܵܚܹܐ ܕܥܲܠ ܐܲܪܥܵܐ. ܘܐܝܼܬܼ ܕܒܲܒܼܟܼܵܬܐ
ܘܲܒܼܕܸܡ̈ܥܹܐ: ܘܐ̈ܘܿܠܝܵܬܼܵܐ ܕܥܲܠ ܚܛܵܗܵܘ̈ܗܝ.
ܐܲܡܝܼܪ ܥܲܠ ܚܲܕܼ ܡ̣ܢ ܐܲܒܼܵܗܲܝ̈ܢ: ܕܙܲܒܼܢܵܐ ܕܐܲܪܒܿܥܝܼܢ ܫܢܝܼ̈ܢ ܚܕܼܵܐ
ܡܸܠܬܼܵܐ ܗܘ̤ܵܬܼ ܨܠܘܿܬܹܗ: ܐܸܢܵܐ ܚܛܹ̇ܝܬܼ: ܐܲܝܟܼ ܒܲܪܢܵܫܵܐ. ܐܲܢ̄ܬܿ ܕܹܝܢ
ܫܒܼܘܿܩ ܠܝܼ: ܐܲܝܟܼ ܐܲܠܵܗܵܐ. ܘܫܵܡ̇ܥܝܼܢ ܗ̄ܘ̣ܵܘ ܠܹܗ ܐܲܒܼ̈ܗܵܬܼܵܐ ܘܐܲܚܹ̈ܐ

 549 

ܕܬܼܵܢܹܐ ܗ̄ܘ̣ܵܐ ܠܦܸܬܼܓܼܵܡܵܐ ܗܵܢܵܐ ܒܚܲܫܵܐ ܟܲܕܼ ܒܵܟܹ̇ܐ: ܘܠܵܐ ܫܵܠܹ̇ܐ
ܗ̄ܘ̣ܵܐ. ܘܲܚܠܵܦ ܬܸܫܡܸܫܬܼܵܐ ܐܝܼܬܹܝܗ̇ ܗ̄ܘ̣ܵܬܼ ܠܹܗ ܗܵܕܹܐ ܨܠܘܿܬܼܵܐ
ܒܲܠܚܘܿܕܼ: ܒܠܸܠܝܵܐ ܘܒܼܐܝܼܡܵܡܵܐ. ܐܝܼܬܼ ܬܘܼܒܼ: ܕܟܲܕܼ ܩܲܠܝܼܠ ܡ̣ܢ
ܪܲܡܫܵܐ ܡܙܲܡܲܪ: ܫܲܪܟܹܗ ܕܠܸܠܝܵܐ ܒܥܘܿܢ̈ܝܵܬܼܵܐ ܘܲܒܼܬܸܫ̈ܒܿܚܵܬܼܵܐ ܘܲܒܼܡܲܕܼܪ̈ܵܫܹܐ:
ܘܲܒܼܫܲܪܟܵܐ ܕܩܵܠܹ̈ܐ ܚܢܝܼ̈ܓܹܐ ܡܲܥܒܲܪ. ܘܐܝܼܬܼ: ܕܲܡܦܲܠܸܓܼ ܠܗܹܝܢ ܠܫܵܥܹ̈ܐ
ܕܠܸܠܝܵܐ ܠܡܵܘ̈ܬܿܒܹܐ. ܘܒܹܝܬܼ ܡܵܘܬܿܒܼܵܐ ܠܡܵܘܬܿܒܼܵܐ ܥܵܒܹ̇ܕܼ ܢܲܗܝܼܪܵܐ:
ܘܲܡܦܲܪܓܸܐ ܒܲܟܼܬܼܵܒܼܵܐ ܥܲܕܼ ܡܸܬܿܬܿܢܝܼܚ. ܐܝܼܬܼ ܬܘܼܒܼ ܕܤܵܐܹ̇ܡ ܬܚܘܼܡܵܐ
ܠܢܲܦܫܹܗ: ܕܠܵܐ ܢܸܟܘܿܦ ܒܘܼܪ̈ܟܵܘܗܝ ܠܲܓܼܡܵܪ. ܐܵܦܠܵܐ ܒܲܨܠܘܿܬܼܵܐ
ܕܫܘܼܠܵܡ ܡܲܪܡܝܼܬܼܵܐ: ܐܲܝܟܼ ܕܐܝܼܬܼ ܥܝܵܕܼܵܐ ܠܫܵܗܪܹ̈ܐ. ܐܸܠܵܐ ܒܚܲܕܼ
ܡܸܬܼܚܵܐ ܡܲܥܒܲܪ: ܠܠܸܠܝܵܐ ܟ̱ܠܹܗ. ܐܵܦ ܥܲܠ ܚܲܕܼ ܡ̣ܢ ܩܲܕܝܼ̈ܫܹܐ
ܐܲܡܝܼܪ: ܕܡܸܛܠ ܕܡܲܩܪܸܒܼ ܗ̄ܘ̣ܵܐ ܥܲܡܹܗ ܫܹܐܕܼܵܐ ܕܙܵܢܝܘܼܬܼܵܐ: ܘܲܒܼܚܲܕܼ
ܡ̣ܢ ܙܢ̈ܝܼܢ ܠܵܐ ܫܵܠܹ̇ܐ ܗ̄ܘ̣ܵܐ ܡܸܢܹܗ: ܝܲܗ̣̄ܒܼ ܢܲܦܫܹܗ ܠܥܲܡܠܵܐ ܕܫܲܗܪܵܐ.
ܘܤܵܡ̣ ܬܚܘܼܡܵܐ ܠܢܲܦܫܹܗ: ܕܠܵܐ ܢܸܟܘܿܦ ܒܘܼܪ̈ܟܵܘܗܝ ܠܲܓܼܡܵܪ. ܐܸܠܵܐ
ܩܵܐܹ̇ܡ ܗ̄ܘ̣ܵܐ ܟ̱ܠܹܗ ܠܸܠܝܵܐ: ܟܲܕܼ ܦܬܼܝܼ̈ܚܵܢ ܥܲܝܢܵܘ̈ܗܝ. ܘܠܵܐ ܤܵܐܹ̇ܡ
ܗ̄ܘ̣ܵܐ ܒܘܼܪܟܵܐ: ܥܕܲܡܵܐ ܠܨܲܦܪܵܐ. ܗܵܠܹܝܢ ܟܠܗܘܿܢ ܦܘܼܪ̈ܫܵܢܹܐ ܐܝܼܬܼ
ܒܥܲܡܠܵܐ ܕܫܲܗܪܵܐ: ܘܲܒܼܗܵܠܹܝܢ ܫܵܠ̇ܚܝܼܢ ܟܲܫܝܼܪܹ̈ܐ ܠܒܲܪܢܵܫܵܐ ܗܵܘ̇ ܥܲܬܝܼܩܵܐ
ܕܐܸܬܼܚܲܒܲܠ ܒܲܪ̈ܓܼܝܼܓܼܵܬܼܵܐ ܕܛܘܼܥܝܲܝ: ܘܠܵܒܼܫ̇ܝܼܢ ܠܲܡܫܝܼܚܵܐ ܘܡܸܬܼܦܲܪܩܝܼܢ.
ܒܗܵܠܹܝܢ ܙܢܲܝ̈ ܥܲܡ̈ܠܹܐ ܥܡܝܼ̈ܠܹܐ ܕܚܸܟܼܡܬܼܵܐ ܡܸܫܬܘܹܝܢ ܩܲܕܝܼ̈ܫܹܐ ܠܗܵܘ̇
ܬܸܡܗܵܐ ܕܓܸܠܝܵܢܵܐ ܐܲܠܵܗܵܝܵܐ: ܕܪܵܡ ܡ̣ܢ ܬܲܪܥܝܼܬܼܵܐ ܕܒܸܤܪܵܐ.
ܟܲܕܼ ܕܹܝܢ ܒܗܵܠܹܝܢ ܘܕܲܐܝܟܼ ܗܵܠܹܝܢ ܐܵܕܼܫ݂ܹ̈ܐ ܡܦܲܪ̈ܫܹܐ ܡܸܬܼܒܲܤܡܝܼܢ
ܒܫܲܗܪ̈ܲܝܗܘܿܢ ܟܲܫܝܼܪܹ̈ܐ: ܡܲܥܒܿܪܝܼܢ ܠܹܗ ܕܠܵܐ ܩܘܼܛܵܥ ܠܟܼܠܹܗ

 550 

ܡܸܬܼܚܵܐ ܕܫܵܥܹ̈ܐ ܐܲܪ̈ܝܼܟܼܵܬܼܵܐ ܕܠܸܠܝܵܐ. ܟܲܕܼ ܪܵܘܙܵܐ ܢܲܦܫܗܘܿܢ ܘܚܵܕܼܝܵܐ:
ܘܛܵܥ̇ܝܵܐ ܠܟܼܘܿܬܝܼܢ ܒܸܤܪܵܐ ܙܩܝܼܪܲܬܼ ܚܲܫܹ̈ܐ ܕܲܡܥܲܛܦܵܐ. ܘܡ̣ܢ ܒܘܼܤܵܡܵܐ
ܘܲܕܼܝܵܨܵܐ ܕܠܸܒܿܗܘܿܢ: ܠܫܸܢܬܼܵܐ ܠܵܐ ܡܸܬܿܕܲܟܼܪܝܼܢ. ܐܲܝܟܼ ܡܲܢ ܕܤܵܒܲܪܝܼܢ
ܕܫܲܠܚܘܼܗܝ ܠܦܲܓܼܪܵܐ: ܘܲܒܼܗܵܘ̇ ܕܘܼܒܵܪܵܐ ܕܒܼܵܬܲܪ ܢܘܼܚܵܡܵܐ ܐܝܼܬܲܝܗܘܿܢ
ܡ̣ܢ ܟܲܕܼܘ. ܘܡ̣ܢ ܚܲܕܼܘܲܬܼܗܘܿܢ ܤܲܓܝܼܐܬܼܵܐ ܒܲܙܒܲܢ ܙܒܲܢ ܫܵܒܼܩ̇ܝܼܢ
ܠܡܲܙܡܘܿܪܹ̈ܐ: ܘܢܵܦ̇ܠܝܼܢ ܥܲܠ ܐܲܦܲܝ̈ܗܘܿܢ: ܡ̣ܢ ܚܹܐܦܵܐ ܕܚܲܕܼܘܼܬܼܵܐ:
ܕܲܒܼܢܲܦܫܗܘܿܢ ܢܵܒܼ̇ܗܵܐ. ܘܟܼܠܵܗ̇ ܐܲܪܝܼܟܼܘܼܬܼܵܐ ܕܠܸܠܝܵܐ ܐܝܼܬܹܝܗ̇ ܠܗܘܿܢ
ܐܲܝܟܼ ܐܝܼܡܵܡܵܐ: ܘܚܸܫܘܿܟܼܵܐ ܐܲܝܟܼ ܕܸܢܚܹܗ ܕܫܸܡܫܵܐ. ܡܸܛܠ ܤܲܒܼܪܵܐ
ܗܵܘ̇ ܕܲܡܪܝܼܡ ܠܸܒܿܗܘܿܢ ܘܡܲܪܘܸܐ ܠܗܘܿܢ ܒܪܸܢܝܹܗ: ܘܡ̣ܢ ܫܘܼܠܗܵܒܼܵܐ
ܕܪܸܥܝܵܢܗܘܿܢ ܕܝܵܩܹ̇ܕܼ ܒܥܘܼܗܕܵܢܵܐ ܕܛܵܒܼ̈ܬܼܵܐ ܕܲܥܬܼܝܼ̈ܕܼܵܢ. ܘܟܲܕܼ ܠܸܫܵܢܵܐ
ܬܟܼܝܼܒܼܵܐܝܼܬܼ ܢܵܩܹ̇ܫ ܒܟܸܢܵܪܵܐ ܕܪܘܼܚ: ܗܵܘܢܵܐ ܡܸܟܹܝܠ ܤܵܥܲܪ ܗܵܠܹܝܢ
ܕܝܼܠܹܗ. ܟܲܕܼ ܒܲܙܒܲܢ ܠܘܵܬܼ ܤܘܼܟܵܠܵܐ ܕܦܸܬܼܓܼܵܡܹ̈ܐ ܪܵܕܹܐ: ܘܒܲܙܒܲܢ
ܠܚܘܼܫܵܒܼܵܐ ܓܝܼܘܿܪܵܐ ܕܲܡܕܼܝܼܩ ܕܵܚܹ̇ܩ ܠܒܲܪ. ܘܒܲܙܒܲܢ ܡܵܐ ܕܐܸܬܼܩܲܛܥܲܬ̤
ܠܹܗ ܬܢܵܢ: ܗܵܦܹ̇ܝܟܼ ܥܲܠ ܡܠܘܿܐܹ̈ܐ ܕܩܸܪܝܵܢܵܐ ܕܐܝܼܡܵܡܵܐ. ܘܥܘܼ̈ܗܕܵܢܹܐ
ܕܐܲܤܸܢ ܡ̣ܢ ܬܲܡܵܢ ܒܹܝܬܼ ܓܲܙܹܗ: ܡܲܝܬܸܐ ܒܗܵܠܹܝܢ ܥܸܕܼܵܢܹ̈ܐ ܙܵܘ̈ܥܹܐ:
ܘܡܸܬܼܦܲܪܓܸܐ ܒܗܘܿܢ: ܐܲܝܟܼ ܕܟܼܠ ܟ̱ܠܹܗ ܐܲܬܼܪܵܐ ܠܚܘܼ̈ܫܵܒܹܐ ܢܘܼܟܼܪ̈ܵܝܹܐ
ܠܵܐ ܢܸܗܘܸܐ. ܘܬܼܘܼܒܼ ܪܗܝܼܒܼܵܐܝܼܬܼ ܢܵܛܹ̇ܕܼ ܡܲܝܬܸܐ ܠܹܗ ܠܗܵܘܢܵܐ ܠܘܵܬܼ
ܤܘܼܟܵܠܵܗ̇ ܕܲܨܠܘܿܬܼܵܐ ܘܲܕܼܙܘܼܡܵܪܵܐ. ܕܠܵܐ ܡܵܐ ܕܐܲܓܲܪ ܬܲܡܵܢ: ܐܵܦܸܢ
ܡܵܘܬܪܵܢܝܵܐ ܡܲܪܢܝܼܬܼܵܐ ܕܲܒܼܗܘܿܢ: ܢܸܬܼܓܠܸܙ ܠܹܗ ܡ̣ܢ ܡܲܡܠܠܵܐ
ܕܥܲܡ ܐܲܠܵܗܵܐ ܘܢܘܼܗܪܵܐ ܕܬܹܐܘܿܪܝܼܵܐ: ܕܲܡܥܵܕܼ ܡܩܲܒܸܠ ܗܵܘܵܢܵܐ
ܡ̣ܢ ܨܠܘܿܬܼܵܐ ܗܵܝ̇ ܕܲܕܼܠܵܐ ܦܸܗܝܵܐ: ܕܝܼܚܝܼܕܼܵܐܝܼܬܼ ܒܝܲܕܼ ܟܲܤܝܘܼܬܹܗ

 551 

ܕܠܸܒܵܐ ܡܡܲܠܸܠ ܥܲܡ ܡܵܪܹܗ ܒܲܟܼܢܝܼܟܼܘܼܬܼܵܐ ܕܚܘܼܫܵܒܼܵܘ̈ܗܝ. ܘܗܵܟܲܢ
ܘܲܒܼܗܵܠܹܝܢ ܡܲܦܩܝܼܢ: ܟ̱ܠܹܗ ܙܲܒܼܢܵܐ ܕܚܲܝܲܝ̈ܗܘܿܢ. ܟܲܕܼ ܟܠܚܲܕܼ ܚܲܕܼ
ܡܸܢܗܘܿܢ ܫ̣ܦܲܪ ܠܡܵܪܹܗ ܒܥܲܡܠܵܘ̈ܗܝ: ܠܦܘܼܬܼ ܡܫܘܼܚܬܹܗ ܘܐܲܝܟܼ
ܚܲܝܠܹܗ: ܒܟܼܠܹܗ ܛܘܼܝܵܒܼܵܐ ܕܨܸܒܼܝܵܡܢܵܐ.
ܐܸܢ ܐܝܼܬܼ ܕܹܝܢ ܕܨܵܒܹ̇ܐ ܕܲܢܢܝܼܚ ܐܦܲܓܼܪܹܗ ܩܲܠܝܼܠ: ܡܫܲܠܸܡ:
ܘܝܵܬܹ̇ܒܼ ܠܘܼܩܒܲܠ ܡܲܕܼܢܚܵܐ. ܘܲܟܼܡܵܐ ܬܘܼܒܼ ܕܝܲܬܝܼܒܼ: ܠܵܐ ܡܲܪܦܸܐ
ܠܪܸܝܵܢܹܗ ܕܲܗܘ̤ܵܐ ܒܲܛܝܼܠ. ܐܸܠܵܐ ܗܵܪܹܓܼ ܘܪܵܢܹܐ ܘܡܸܬܼܚܲܫܲܒܼ: ܥܲܠ
ܪܲܒܿܘܼܬܹܗ ܕܗܵܢܵܐ ܕܘܼܒܵܪܵܐ. ܘܲܕܼܡܵܢܵܘ: ܘܲܟܼܡܵܐ ܥܡܝܼܠ ܦܘܼܠܚܵܢܹܗ.
ܘܕܲܟܼܡܵܐ ܪܲܒܿ ܟܠܝܼܠܹܗ: ܘܲܟܼܡܵܐ ܫܒܼܝܼܚ ܦܹܐܪܵܐ ܕܥܲܡܠܵܘ̈ܗܝ.
ܘܕܲܟܼܡܵܐ ܙܗܝܼܪܘܼܬܼܵܐ ܬܵܒܲ̇ܥ: ܘܕܲܐܝܟܲܢ ܐܸܬܼܗܲܦܲܟܼܘ ܒܹܗ ܩܲܕܼܡܵܝܹ̈ܐ.
ܘܠܲܐܝܠܹܝܢ ܐܸܫܬܿܘܝܼܘ ܒܫܘܼܠܵܡ ܐܵܓܼܘܿܢܲܝ̈ܗܘܿܢ. ܘܕܲܐܝܟܲܢ ܐܲܥܕܝܹܗ ܚܢܵܢܹܗ
ܕܝܼܫܘܿܥ ܡ̣ܢ ܥܵܠܡܵܐ: ܗܵܘ̇ ܕܬܼܵܥܹ̇ܫ ܗ̄ܘ̣ܵܐ ܒܹܗ ܥܲܡ̈ܠܹܐ ܤܪ̈ܝܼܩܹܐ:
ܕܚܲܪܬܼܗܘܿܢ ܐܲܒܼܕܵܢܵܐ ܕܡ̣ܢ ܐܲܠܵܗܵܐ ܘܟܼܘܼܐܵܪܵܐ ܕܡ̣ܢ ܚܛܵܗܹ̈ܐ:
ܘܐܲܝܬܝܹܗ ܠܦܘܼܠܚܵܢܵܐ ܗܵܢܵܐ ܕܡܲܠܲܟܹ̈ܐ: ܕܤܲܒܼܪܹܗ ܤܲܒܼܪܵܐ ܗ̄ܘ̣
ܫܲܪܝܼܪܵܐ: ܘܚܲܕܼܘܼܬܹܗ ܚܲܕܼܘܼܬܼܵܐ ܗ̣̄ܝ ܕܠܵܐ ܡܸܫܬܲܠܛܵܐ ܒܵܗ̇ ܥܵܩ̇ܬܼܵܐ:
ܘܬܘܼܟܼܠܵܢܹܗ ܬܘܼܟܼܠܵܢܵܐ ܗ̄ܘ̣ ܕܠܵܐ ܡܸܬܿܕܲܓܲܠ. ܡܸܛܠ ܕܲܟܼܡܵܐ ܐܸܢ
ܢܸܥܡܲܠ ܒܲܪܢܵܫܵܐ: ܙܥܘܿܪܝܼܢ ܐܸܢܘܿܢ ܥܲܡܠܵܘ̈ܗܝ: ܒܦܸܚܡܵܐ ܕܐܲܝܠܹܝܢ
ܕܲܒܼܫܘܼܠܵܡܹܗ ܥܬܼܝܼܕܼ ܠܡܸܤܲܒܼ ܒܪܲܗܒܼܘܿܢ ܛܘܼ̈ܒܹܐ ܠܒܼܘܼܤܵܡܵܐ
ܕܢܲܦܫܹܗ.
ܘܟܲܕܼ ܒܗܵܠܹܝܢ ܚܘܼ̈ܫܵܒܹܐ ܘܕܲܐܝܟܼ ܗܵܠܹܝܢ ܪܵܢܹܐ ܒܠܸܒܹܗ ܘܡܸܬܿܕܲܡܲܪ:
ܗܵܝܕܹܝܢ ܡܫܲܡܲܪ ܠܹܗ ܠܗܵܘܢܵܐ ܒܡܲܪܟܲܒܼܬܼܵܐ ܕܪܘܼܚ ܘܡܲܦܪܲܚ: ܟܲܕܼ
ܡܲܦܗܸܐ ܠܹܗ ܥܲܡ ܟܠܗܘܿܢ ܐܲܒܼ̈ܗܵܬܼܵܐ ܩܲܕܝܼ̈ܫܹܐ ܕܲܒܼܟܼܠܕܵܪ: ܐܲܝܠܹܝܢ

 552 

ܕܐܲܚܝܼܕܼ ܝܵܪܬܘܼܬܼܵܐ ܕܕܼܘܼܒܵܪ̈ܲܝܗܘܿܢ ܕܐܲܝܟܲܢ ܫܲܡܠܝܼ ܟܠܚܲܕܼ ܚܲܕܼ
ܡܸܢܗܘܿܢ ܒܦܘܼܪ̈ܫܵܢܹܐ ܡܫܲܚ̈ܠܦܹܐ: ܠܦܵܠܚܘܼܬܼܵܐ ܗܵܕܹܐ ܪܘܼܚܵܢܵܝܬܼܵܐ.
ܘܕܲܐܝܟܲܢ ܐܲܪܦܝܼܘ ܫܲܝܢܵܐ ܘܐ̄ܢܵܫܘܼܬܼܵܐ: ܘܐܲܥܕܝܼܘ ܢܲܦܫܗܘܿܢ ܡ̣ܢ
ܢܘܼܬܵܦܵܘ̈ܗܝ ܕܥܵܠܡܵܐ ܘܡ̣ܢ ܚܲܝܹ̈ܐ ܡܕܼܵܘ̈ܕܹܐ: ܘܐܸܙܲܠ̣ܘ ܘܐܸܤܬܲܬܲܪܘ
ܒܛܘܼܪܹ̈ܐ ܘܒܲܡܥܲܪܹ̈ܐ ܘܒܲܐܬܼܪ̈ܵܘܵܬܼܵܐ ܡܲܒܼ̈ܥܕܹܐ ܘܲܡܫܵܘ̈ܚܕܹܐ: ܒܕܲܚ̣ܙܵܘ
ܕܠܵܐ ܡܸܬܼܓܡܲܪ ܕܘܼܒܵܪܵܐ ܗܵܢܵܐ ܒܹܝܬܼ ܒܢܲܝ̈ܢܵܫܵܐ ܡܸܛܠ ܥܘܼܘܵܟܹ̈ܐ
ܤܲܓܝܼ̈ܐܹܐܘ ܘܲܗܘ̤ܵܘ ܡܝܼ̈ܬܹܐ ܒܚܲܝܲܝ̈ܗܘܿܢ ܡܸܛܠ ܚܲܝܹ̈ܐ ܕܒܲܐܠܵܗܵܐ: ܟܲܕܼ
ܦܵܗܹ̇ܝܢ ܗ̄ܘ̣ܵܘ ܒܕܼܘܼ̈ܟܿܝܵܬܼܵܐ ܕܚܘܼܪܒܵܐ ܘܒܲܝܢܵܬܼ ܫܩܝܼ̈ܦܹܐ ܐܲܝܟܼ ܛܵܥܲܝ̈ܐ:
ܐ̄ܢܵܫܵܐ ܕܠܵܐ ܦܵܚܹ̇ܡ ܗ̄ܘ̣ܵܐ ܥܵܠܡܵܐ ܟ̱ܠܹܗ: ܠܫܘܼܒܼܚܵܐ ܕܚܲܕܼ ܡܸܢܗܘܿܢ.
ܟܲܕܼ ܐܝܼܬܼ ܡܸܢܗܘܿܢ: ܕܒܲܫܩܝܼ̈ܦܹܐ ܥܲܪ̈ܡܹܐ ܘܲܡܙܲܩ̈ܦܹܐ ܥܡܲܪܘ. ܘܐܝܼܬܼ
ܕܒܲܫܦܘܿܠܲܝ̈ ܛܘܿܪܹ̈ܐ: ܘܲܒܼܢܲܚ̈ܠܹܐ ܥܲܡܝܼ̈ܩܹܐ. ܘܐܝܼܬܼ ܕܲܒܼܚܘܼܠܵܢܹ̈ܐ
ܕܐܲܪܥܵܐܘܲܒܼܢܸܩ̈ܥܹܐ: ܐܲܝܟܼ ܗܵܠܹܝܢ ܕܚܵܦ̇ܪܝܼܢ ܬܲܥ̈ܠܹܐ ܠܡ̣ܟܼܡܲܢ ܒܗܘܿܢ.
ܘܐܝܼܬܼ ܕܲܒܼܩܲܒܼܪܹ̈ܐ: ܘܒܲܫ̈ܢܵܢܵܬܐ ܕܛܘܼܪܹ̈ܐ. ܘܐܝܼܬܼ ܕܲܡܛܲܠܬܼܵܐ ܙܥܘܿܪܬܵܐ
ܢܩܲܫ̣ ܠܹܗ ܒܡܲܕܼܒܪܵܐ: ܘܒܼܵܗ̇ ܫܲܠܸܡ̣ ܫܲܪܟܵܢܵܐ ܕܚܲܝܵܘ̈ܗܝ. ܘܐܝܼܬܼ
ܕܲܒܼܢ̣ܵܐ ܠܹܗ ܤܝܵܓܼܬܼܵܐ ܙܥܘܿܪܬܵܐ ܒܪܹܫ ܛܘܼܪܵܐ: ܐܵܘ ܟܹܝܬܼ ܟܘܼܪܚܵܐ
ܙܥܘܿܪܵܐ: ܘܒܹܗ ܥ̣ܡܲܪ ܗܲܢܝܼܵܐܝܼܬܼ ܐܲܝܟܼ ܕܒܼܵܬܦܲܕܼܢܹ̈ܐ ܕܡܲܠܟܹ̈ܐ. ܘܲܕܼܠܵܐ
ܗ̄ܘ̣ܵܐ ܕܐܲܝܟܲܢ ܢܸܚܘܿܢ ܡܸܬܼܚܲܦܛܝܼܢ ܗ̄ܘ̣ܵܘ: ܐܸܠܵܐ ܕܐܲܝܟܲܢ ܢܸܫܦܲܪ
ܟܠܚܲܕܼ ܚܲܕܼ ܡܸܢܗܘܿܢ ܠܐܲܠܵܗܵܐ: ܘܲܢܫܲܠܸܡ ܠܐܵܓܼܘܿܢ݂ܗ ܫܲܦܝܼܪ.
ܘܕܲܐܝܠܹܝܢ ܟܲܝ ܚܲܝܹ̈ܐ ܚܵܐܹ̇ܝܢ ܗ̄ܘ̣ܵܘ ܗܵܠܹܝܢ ܩܲܕܝܼ̈ܫܹܐ ܒܐܲܬܼܪ̈ܵܘܵܬܼܵܐ
ܗܵܠܹܝܢ؟ ܒܲܦܓܲܪ ܟܲܝ ܚܵܐܹ̇ܝܢ ܗ̄ܘ̣ܵܘ: ܐܵܘ ܕܲܠܡܵܐ ܒܚܲܝܹ̈ܐ ܕܲܠܥܸܠ ܡ̣ܢ

 553 

ܒܸܤܪܵܐ ܘܲܕܼܡܵܐ؟ ܠܵܐ ܟܲܝ ܙܸܥܪܲܬ̤ ܢܲܦܫܵܐ ܒܟܼܠܹܗ ܗܵܘ̇ ܨܸܕܼܝܵܐ؟ ܠܵܐ
ܟܲܝ ܬܚܸܒܼ ܚܲܝܠܵܐ ܕܲܡܤܲܝܒܿܪܵܢܘܼܬܼܵܐ ܒܟܼܠܹܗ ܙܲܒܼܢܵܐ ܗܵܘ̇ ܐܲܪܝܼܟܼܵܐ:
ܠܵܐ ܬܸܫܬܲܗܝܼ ܦܲܓܼܪܵܐ ܒܟܼܠܹܗ ܗܵܘ̇ ܛܵܘܪܵܐ ܕܡܸܬܼܚܵܐ: ܒܚܘܼܤܟܵܢܵܐ
ܕܡ̣ܢ ܟ̱ܠܵܗ̇ ܚܫܲܚܬܼܵܐ ܕܤܘܼܢܩܵܢ ܟܝܵܢܵܐ؟ ܒܡܵܢܵܐ ܟܲܝ ܐܸܬܼܢܛܲܪܘ
ܒܗܘܿܢ ܚܲܝܹ̈ܐ ܐ̄ܢܵܫܵܝܹ̈ܐ؟ ܘܲܕܼܥܲܡ ܗܵܠܹܝܢ ܟܠܗܹܝܢ ܐܲܝܠܹܝܢ ܐܵܓܿܘܿܢܹ̈ܐ ܤܲܝܒܲܪܘ:
ܘܐܲܝܠܹܝܢ ܐܘܼ̈ܠܨܵܢܹܐ؟ ܐܲܝܟܲܢ ܚܝܼܨܵܐܝܼܬܼ: ܐܲܝܟܲܢ ܕܠܵܐ ܕܘܼܘܵܕܼ ܡܚܲܡܤܢܝܼܢ
ܗ̄ܘ̣ܵܘ ܠܥܲܤܩܘܼܬܼ ܩܪ̈ܵܒܹܐ ܡܫܲܚ̈ܠ̱ܦܹܐ: ܕܲܠܗܘܿܢ ܐܵܪܥܝܼܢ ܗ̄ܘ̣ܵܘ ܡ̣ܢ
ܪ̈ܘܼܚܹܐ ܒܝܼ̈ܫܵܬܼܵܐ؟ ܘܐܲܝܟܲܢ ܠܵܐ ܢܸܬܼܪܲܦܝܼܘ ܒܟܼܠܹܗ ܡܸܬܼܚܵܐ ܕܚܲܝܲܝ̈ܗܘܿܢ
ܥܕܲܡܵܐ ܠܫܘܼܠܵܡܵܐ: ܡ̣ܢ ܥܲܡܠܲܝ̈ܗܘܿܢ ܥܲܤ̈ܩܹܐ ܘܲܡܩܲܛܥܹ̈ܐ. ܐܲܝܟܲܢ
ܠܵܐ ܟܸܪܝܲܬ̤ ܠܗܘܿܢ ܪܘܼܚܵܐ ܒܗܵܝ̇ ܟ̱ܠܹܗ̇ ܡܫܵܘܚܕܼܘܼܬܼܵܐ: ܚܤܝܼܟܲܬܼ
ܡ̣ܢ ܒܘܼ̈ܝܵܐܹܐ ܡܸܬܼܚܲܙܝܵܢܹ̈ܐ؟ ܘܕܼܐܝܼܬܼ ܟܲܝ ܒܲܟܼܝܵܢܵܐ ܐ̄ܢܵܫܵܝܵܐ ܗܵܢܵܐ ܟ̱ܠܹܗ
ܚܲܝܠܵܐ: ܘܕܲܐܝܟܲܢ ܬܘܼܒܼ ܡܢܲܛܲܪ ܗ̄ܘ̣ܵܐ ܠܗܘܿܢ ܚܲܝܠܵܐ ܐܲܠܗܵܝܵܐ ܕܠܵܐ
ܢܸܟܼܝܵܢ: ܒܟܼܠܗܘܿܢ ܗܵܢ̣ܘܿܢ ܢܸܤ̈ܝܘܿܢܹܐ ܡܫܲܚ̈ܠ̱ܦܹܐ. ܘܕܲܐܝܟܲܢ ܡܛܲܝܸܒܼ
ܗ̄ܘ̣ܵܐ ܠܟܼܠܚܲܕܼ ܚܲܕܼܸ ܡܸܢܗܘܿܢ: ܠܦܘܼܬܼ ܐܲܬܼܪܵܐ ܕܥܵܡܲܪ ܒܹܗ
ܒܦܘܼܪ̈ܢܵܤܹܐ ܡܫܲܚ̈ܠ̱ܦܹܐ: ܡܘܼܠܵܝ ܤܘܼܢܩܵܢܵܐ ܕܲܚܫܲܚܬܼܵܐ ܕܡܸܬܼܒܲܥܝܵܐ
ܗ̄ܘ̣ܵܬܼ ܠܹܗ؟ ܟܲܕܼ ܐܝܼܬܼ ܡܸܢܗܘܿܢ: ܕܲܒܼܝܲܕܼ ܦܵܪܲܚܬܼܵܐ ܡܬܲܪܤܸܐ ܗ̄ܘ̣ܵܐ
ܠܹܗ. ܗܵܐ ܠܲܡ: ܫܬܝܼܢ ܫܢ̈ܝܼܢ ܐܝܼܬܼ ܠܝܼ ܕܫܵܩܹ̇ܠ ܐ̄ܢܵܐ: ܦܸܠܓܵܗ̇
ܕܠܲܚܡܵܐ ܡ̣ܢ ܦܵܪܲܚܬܼܵܐ ܗܵܕܹܐ. ܐܝܼܬܼ ܬܘܼܒܼ ܕܡ̣ܢ ܐܝܼܠܵܢܵܐ ܡܸܕܸܡ ܐܵܘ
ܕܸܩܠܵܐ ܒܛܲܟܼܤܵܐ ܕܲܠܥܸܠ ܡ̣ܢ ܟܝܵܢܵܐ: ܐܲܝܟܼ ܕܐܸܡ݂ܲܪ ܚܲܕܼ ܡܸܢܗܘܿܢ.
ܗܵܢܵܘ ܕܹܝܢ: ܗܵܘ̇ ܐܲܦܸܤܩܘܿܦܵܐ ܕܬܼܵܐܹ̇ܒܼ ܗ̄ܘ̣ܵܐ ܒܡܲܕܼܒܪܵܐ. ܐܝܼܬܼ ܠܝܼ
ܠܲܡ ܗܵܫܵܐ ܕܐܝܼܬܲܝ ܒܗܵܢܵܐ ܡܲܕܼܒܪܵܐ: ܗܵܐ ܐܲܪܒܿܥܝܼܢ ܘܲܬܼܫܲܥ ܫܢ̈ܝܼܢ.
ܚܲܝܲܝ̈ ܕܹܝܢ ܝܲܗ̣̄ܒܼ ܠܝܼ ܐܲܠܵܗܵܐ: ܡ̣ܢ ܗܵܢܵܐ ܕܸܩܠܵܐ. ܐܲܟܼܘܵܬܹܗ ܬܘܼܒܼ:

 554 

ܘܗܵܘ̇ ܩܲܕܝܼܫܵܐ ܕܲܗܘ̤ܵܐ ܒܡܲܦܘܼܠܬܼܵܐ ܫܬܼܵܐ ܝܲܪ̈ܚܝܼܢ ܒܕܲܝܪܹܗ. ܘܲܥܪܲܩ̣
ܘܐܸܙܲܠ̣ ܠܡܲܕܼܒܿܪܵܐ ܓܵܘܵܝܵܐ: ܐܲܝܟܼ ܕܲܢܬܼܘܼܒܼ ܡ̣ܢ ܚܛܝܼܬܹܗ. ܗܵܢܵܘ
ܕܹܝܢ: ܗܵܘ̇ ܕܟܼܵܐܹܒܼ ܗ̄ܘ̣ܵܐ ܠܹܗ ܛܲܪܦܵܐ ܕܟܲܒܼܕܹܗ: ܘܐܸܬ̣ܼܵܐ ܡܲܠܲܐܟ̣ܵܐ
ܘܐܲܚܠܡܹܗ. ܘܐܝܼܬܼ: ܕܲܒܼܚܲܝ̈ܗܘܵܬܼܵܐ. ܐܲܝܟܼ ܗܵܘ̇ ܛܘܼܒܼܵܢܵܐ ܕܥܵܡܲ݁ܪ ܗ̄ܘ̣ܵܐ
ܒܚܘܼܠܵܢܵܐ ܒܡܲܕܼܒܿܪܵܐ ܕܲܤܕܼܘܿܡ. ܘܐܝܼܬܼ ܕܹܝܢ ܐܲܝܟܵܐ ܕܡܲܕܼܒܿܪܵܐ ܩܲܪܝܼܒܼ
ܗ̄ܘ̣ܵܐ ܠܝܲܬܼܒܵܐ: ܒܝܲܕܼ ܒܢܲܝ̈ܢܵܫܵܐ ܡܦܲܪܢܸܣ ܗ̄ܘ̣ܵܐ ܠܗܘܿܢ. ܐܲܝܟܼ ܗܵܘ̇
ܓܲܒܼܪܵܐ ܚܠܝܼܨܵܐ ܕܲܚܙܵܝܗܝ ܤܪܵܦܝܼܘܿܢ. ܘܐܲܝܟܼ ܗܵܘ̇ ܛܘܼܒܼܵܢܵܐ ܡܲܪܛܸܢܝܵܢܹܐ
ܕܥܵܡܲܪ ܗ̄ܘ̣ܵܐ ܒܗܵܝ̇ ܓܵܙܲܪܬܵܐ ܕܫܲܠܝܵܐ: ܘܤܵܥܲܪ ܗ̄ܘ̣ܵܐ ܠܹܗ ܓܲܒܼܪܵܐ
ܬܲܓܵܪܵܐ ܬܲܪܬܹܝܢ ܙܲܒܼ̈ܢܝܼܢ ܒܫܲܢ̄ܬܐ. ܐܲܝܟܵܐ ܓܹܝܪ ܕܠܵܐ ܩܲܪܝܼܒܼ ܗ̄ܘ̣ܵܐ
ܝܲܬܼܒܵܐ ܘܠܵܐ ܐܘܼܪ̈ܚܵܬܼܵܐ ܡܸܕܸܡ: ܒܝܲܕܼ ܡܲܠܲܐܟܼܵܐ ܤܵܥܲܪ ܗ̄ܘ̣ܵܐ ܠܗܘܿܢ.
ܐܲܝܟܼ ܗܵܝ̇ ܕܐܲܡܝܼܪܵܐ ܡܸܛܠ ܛܘܼܒܵܢܵܐ ܐܵܦܲܠܘܿ: ܕܥܵܡܲܪ ܗ̄ܘ̣ܵܐ ܠܲܡ
ܒܲܛܦܵܝܹܗ ܕܛܘܼܪܵܐ ܒܲܡܥܲܪܬܼܵܐ ܙܥܘܿܪܬܼܵܐ. ܥ̇ܒܼܵܕܹܗ ܠܲܡ ܗܵܢܵܐ ܗ̄ܘ̣ܵܐ:
ܕܲܨܠܘܿܬܼܵܐ ܡܩܲܪܸܒܼ ܗ̄ܘ̣ܵܐ ܠܐܲܠܵܗܵܐ ܝܵܘܡܵܐ ܟ̱ܠܹܗ: ܘܲܡܵܐܐ ܙܲܒܼ̈ܢܝܼܢ
ܒܠܸܠܝܵܐ. ܡܹܐܟܼܘܼܠܬܹܗ ܠܲܡ: ܟܲܕܼ ܠܵܐ ܝܵܨܹ̇ܦ: ܐܵܬܼ̇ܝܵܐ ܗ̄ܘ̣ܵܬܼ
ܒܡܲܕܼܒܿܪܵܐ ܒܝܲܕܼ ܡܲܠܲܐܟ̣ܵܐ. ܠܒܼܝܼܫ ܗ̄ܘ̣ܵܐ ܕܹܝܢ ܩܠܘܿܒܼܝܼܢ: ܘܲܪܡܸܐ
ܗ̄ܘ̣ܵܐ ܥܲܠ ܪܹܫܹܗ ܡܲܥܦܪܵܐ ܙܥܘܿܪܵܐ. ܘܗܵܠܹܝܢ ܦܵܫ̣ܘ ܥܠܵܘܗܝ
ܒܡܲܕܼܒܪܵܐ: ܟܲܕܼ ܠܵܐ ܒܵܠܹ̇ܝܢ. ܚ̣ܙܲܝܬܿ ܐܲܝܟܲܢ ܝܵܨܹ̇ܦ ܐܲܠܵܗܵܐ ܕܦܵܠܚܵܘ̈ܗܝ
ܒܟܼܠܡܸܕܸܡ؟ ܘܲܐ̄ܚܪ̈ܵܢܹܐ: ܥܸܩܵܪܹ̈ܐ ܡܸܤܬܲܝܒܿܪܝܼܢ ܗ̄ܘ̣ܵܘ. ܘܲܐ̄ܚܪ̈ܵܢܹܐ: ܡ̣ܢ
ܝܘܼܪ̈ܵܩܹܐ ܡܸܬܼܐܲܟܼ̈ܠܵܢܹܐ: ܕܡ̣ܢ ܢܲܦܫܗܘܿܢ ܝܵܥܹ̇ܝܢ. ܐ̄ܚܪ̈ܵܢܹܐ: ܙܲܪ̈ܥܘܿܢܹܐ
ܡܲܬܼܪ̈ܲܝܵܐ ܘܝܲܪܩܵܐ ܟܒܼܝܼܫܵܐ: ܗܵܠܹܝܢ ܕܲܒܼܛܝܼܠܵܐܝܼܬܼ ܡܸܙܕܲܪܥܝܼܢ ܗ̄ܘ̣ܵܘ.
ܐ̄ܚܪ̈ܵܢܹܐ: ܡ̣ܢ ܦܹܐܪܹ̈ܐ ܕܐܝܼܠܵܢܹ̈ܐ. ܐܝܼܬܼ ܬܘܼܒܼ ܕܲܡܫܲܪܬܵܐ ܕܲܟܼܪܲܦܤܵܐ
ܘܲܪܨܝܼܢܵܐ ܕܫܵܚܹ̇ܠ: ܤܵܦܹ̇ܩ ܗ̄ܘ̣ܵܐ ܠܗܘܿܢ ܠܤܘܼܢܩܵܢ ܚܲܝܹ̈ܐ ܗܵܠܹܝܢ

 555 

ܦܵܪ̈ܘܿܚܹܐ: ܟܡܵܐ ܕܲܟܼܝܵܢܵܐ ܒܲܠܚܘܿܕܼ ܕܦܲܓܼܪܵܐ ܒܹܗ ܡܸܬܼܢܛܲܪ ܗ̄ܘ̣ܵܐ
ܒܚܲܝܘܼܬܼܵܐ. ܥܲܠ ܫܲܪܟܵܐ ܬܘܼܒܼ ܕܥܘܼ̈ܗܕܵܢܹܐ ܡܵܘܬܿܪ̈ܵܢܹܐ: ܕܲܒܼܙܲܒܼ̈ܢܹܐ
ܗܵܠܹܝܢ ܡܸܬܿܬܿܙܝܼܥܝܼܢ ܡ̣ܢ ܛܲܝܒܿܘܼܬܼܵܐ: ܠܒܼܘܼܝܵܐܵܐ ܕܒܲܪܢܵܫܵܐ.
ܟܲܕܼ ܕܹܝܢ ܒܗܵܠܹܝܢ ܘܕܲܐܝܟܼ ܗܵܠܹܝܢ ܥܸܢܝܵܢܹ̈ܐ ܐܝܼܬܼܵܘܗܝ ܒܲܪܢܵܫܵܐ
ܒܗܵܘܢܹܗ: ܗܵܝܕܹܝܢ ܪܵܘܹ̇ܐ ܐܲܝܟܼ ܕܲܒܼܚܲܡܪܵܐ ܚܲܝܵܐ: ܘܛܵܥܹ̇ܐ ܝܵܬܹܗ.
ܘܚܵܙܹ̇ܐ ܬܘܼܒܼ ܠܢܲܦܫܹܗ ܘܡܸܬܿܕܲܡܲܪ: ܕܲܒܼܟܼܠܹܗ ܗܵܘ̇ ܟܪܘܼܟܼܝܵܐ
ܕܲܒܼܡܲܕܼܒܿܪܵܐ ܘܦܸܓܼܥܵܐ ܕܩܲܕܝܼ̈ܫܹܐ: ܠܲܓܼܡܵܪ ܢܸܟܼܝܵܢܵܐ ܠܵܐ ܦܵܓܲܥ ܒܹܗ
ܒܗܵܘܢܵܐ. ܐܸܠܵܐ ܐܲܝܟܼ ܗܵܘ̇ ܕܥܲܡܗܘܿܢ ܕܩܲܕܝܼ̈ܫܹܐ ܗܵܢ̇ܘܿܢ ܐܝܼܬܼܵܘܗܝ
ܡܸܟܹܝܠ: ܘܓܲܠܝܵܐܝܼܬܼ ܚܵܙܹ̇ܐ ܠܗܘܿܢ: ܗܵܟܲܢܵܐ ܡܸܤܬܿܒܲܪ ܠܹܗ ܒܥܸܕܵܢܵܐ
ܗܵܘ̇. ܘܡܸܟܵܐ ܡ̣ܢ ܗܵܢܵܐ ܕܘܼܟܼܪܵܢܵܐ ܕܕܼܘܼܒܵܪ̈ܲܝܗܘܿܢ ܕܩܲܕܝܼ̈ܫܹܐ: ܕܲܡܗܲܓܸܠܼ
ܗܵܘܢܵܐ ܡ̣ܢ ܥܘܼܗܕܵܢܵܐ ܕܬܲܫܥ̈ܝܵܬܼܗܘܿܢ: ܘܡ̣ܢ ܗܵܢܵܐ ܗܸܪܓܵܐ ܕܲܒܼܗܘܿܢ:
ܩܘܼܛܵܥܵܐ: ܒܵܛܹ̇ܠ. ܘܡܲܐܝܼܢܘܼܬܼܵܐ: ܡܸܬܼܪܲܕܼܦܵܐ. ܗܲܕܵܡܹ̈ܐ: ܡܸܬܼܚܲܨܝܼܢ.
ܘܫܸܢܬܼܵܐ: ܡܸܬܿܛܲܪܕܵܐ ܡ̣ܢ ܬܸܡܪܹ̈ܐ. ܘܬܲܪܥܝܼܬܼܵܐ: ܡܸܬܼܓܲܒܿܪܵܐ.
ܘܕܸܚܠܬܼܵܐ: ܫܵܕܼܝܵܐ ܡܸܢܵܗ̇. ܘܦܸܗܝܵܐ: ܓܲܢ̄ܒܵܪܵܐܝܼܬܼ ܡܸܤܬܿܚܸܦ. ܘܪܸܥܝܵܢܵܐ:
ܡܸܬܼܟܲܢܲܫ. ܘܪܸܬܼܚܵܐ ܚܲܡܝܼܡܵܐ ܒܠܸܒܵܐ: ܡܸܬܼܓܵܘܙܲܠ. ܘܚܲܕܼܘܼܬܼܵܐ ܠܵܐ
ܡܸܬܼܡܲܠܠܵܬܝܼܬܼܵܐ ܒܢܲܦܫܵܐ: ܢܵܒܼ̇ܗܵܐ. ܘܡ̣ܢ ܗܵܪܟܵܐ: ܕܸܡ̈ܥܹܐ ܚܲܝ̈ܠܝܵܬܼܵܐ
ܕܲܡܨܲܒ̈ܥܵܢ ܦܠܲܟܹ̈ܐ. ܪܘܵܙܵܐ ܪܘܼܚܵܢܵܐ: ܕܡܲܪܘܸܐ ܠܗܵܘܢܵܐ. ܒܘܼ̈ܝܵܐܹܐ
ܕܠܵܐ ܡܸܬܼܦܲܫܩܝܼܢ: ܕܲܡܩܲܒܿܠܵܐ ܢܲܜܫܵܐ. ܤܲܒܼܪܵܐ ܕܤܵܡܹ̇ܟܼ ܠܠܸܒܵܐ:
ܘܲܡܓܲܒܲܪ. ܘܗܵܝܕܹܝܢ ܐܲܝܟܼ ܗܵܘ̇ ܕܒܲܫܡܲܝܵܐ ܡܕܲܝܪ: ܗܵܟܲܢܵܐ ܡܸܬܿܕܲܡܸܐ
ܠܹܗ ܠܒܲܪܢܵܫܵܐ: ܒܫܲܗܪܹܗ ܗܵܘ̇ ܤܒܼܝܼܣ ܡ̣ܢ ܛܵܒܼ̈ܬܼܵܐ. ܒܗܵܠܹܝܢ
ܘܕܲܐܝܟܼ ܗܵܠܹܝܢ ܐܵܬܹ̇ܝܢ ܠܲܩܕܼܵܡܲܝܗܘܿܢ: ܗܵܢܘܿܢ ܕܲܒܼܦܘܼܪܫܵܢܵܐ ܥܵܡ̇ܠܝܼܢ
ܒܫܲܗܪܵܐ. ܠܲܝܬܿ ܓܹܝܪ ܡܸܕܸܡ ܕܗܵܟܲܢ ܡܙܲܗܸܐ ܪܸܥܝܵܢܵܐ ܘܲܡܚܲܕܸܐ:

 556 

ܘܲܡܢܲܗܲܪ ܗܵܢܵܐ ܘܲܡܛܲܠܸܩ ܚܘܼ̈ܫܵܒܹܐ ܒܝܼ̈ܫܹܐ: ܘܪܵܘܙܵܐ ܒܹܗ ܢܲܦܫܵܐ:
ܐܲܝܟܼ ܕܲܒܼܫܲܗܪܵܐ ܐܲܡܝܼܢܵܐ.
ܡܸܛܠܗܵܢܵܐ ܐܲܡܝܼܢܝܼܢ ܗ̄ܘ̣ܵܘ ܒܥܲܡܠܵܐ ܗܵܢܵܐ ܕܫܲܗܪܵܐ ܟܗܘܿܢ
ܐܲܒܼ̈ܗܵܬܼܵܐ ܩܲܕܝܼ̈ܫܹܐ: ܘܐܲܚܝܼܕܝܼܢ ܗ̄ܘ̣ܵܘ ܠܩܵܢܘܿܢܵܐ ܗܵܢܵܐ ܕܥܝܼܪܘܼܬܼܵܐ
ܕܲܒܼܠܲܝ̈ܠܵܘܵܬܼܵܐ ܒܟܼܠܹܗ ܪܲܗܛܵܐ ܕܕܼܘܼܒܵܪ̈ܲܝܗܘܿܢ. ܝܲܬܝܼܪܵܐܝܼܬܼ: ܕܫܵܡܥܝܼܢ
ܗ̄ܘ̣ܵܘ ܠܦܵܪܘܿܩܲܢ ܒܕܼܘܼ̈ܟܿܝܬܼܵܐ ܤܲܓܝܼ̈ܐܵܬܼܵܐ ܕܲܡܙܲܗܲܪ ܠܲܢ ܥܲܠ ܗܵܕܹܐ
ܒܛܝܼܠܵܐܝܼܬܼ ܒܡܸܠܬܹܗ ܚܲܝܬܼܵܐ: ܕܲܗ̤ܘܲܝܬܘܿܢ ܠܲܡ ܫܵܗܪܝܼܢ ܒܟܼܠܙܒܲܢ
ܘܲܡܨܲܠܹܝܢ. ܘܐܸܬܿܬܿܥܝܼܪܘ ܠܲܡ ܘܨܲܠܵܘ: ܕܠܵܐ ܬܸܥܠܘܼܢ ܠܢܸܤܝܘܿܢܵܐ.
ܘܬܼܘܼܒܼ: ܨܲܠܵܘ: ܘܠܵܐ ܬܸܡܐܲܢ ܠܟܼܘܿܢ. ܥܲܡ ܫܲܪܟܵܐ. ܟܲܕܼ ܠܵܐ
ܤܵܦܹ̇ܩ ܗ̄ܘ̣ܵܐ ܕܲܒܼܡܸܠܹ̈ܐ ܢܤܝܼܡ ܠܲܢ ܒܲܠܚܘܿܕܼ ܙܘܼܗܪܹ̈ܐ: ܐܸܠܵܐ
ܐܵܦ ܛܘܼܦܤܵܐ ܝܲܗ̣̄ܒܼ ܗ̄ܘ̣ܵܐ ܠܲܢ ܒܲܩܢܘܿܡܹܗ: ܕܠܲܥ̇ܒܼܵܕܼܵܐ
ܕܨܲܠܘܿܬܼܵܐ ܡܝܲܩܲܪ ܗ̄ܘ̣ܵܐ ܒܟܼܠܙܒܲܢ: ܝܲܬܝܼܪ ܡ̣ܢ ܟܠܡܸܕܸܡ.
ܘܲܠܗܵܕܹܐ ܦܵܪܹܫ ܗ̄ܘ̣ܵܐ ܢܲܦܫܹܗ: ܐܲܡܝܼܢܵܐܝܼܬܼ. ܘܠܲܨܠܘܿܬܼܵܐ: ܠܵܘ
ܫܝܼܥܵܐܝܼܬܼ. ܐܸܠܵܐ ܓܵܒܹ̇ܐ ܗ̄ܘ̣ܵܐ ܠܹܗ ܠܥܸܕܵܢܵܐ ܕܠܸܠܝܵܐ: ܘܠܲܐܬܼܪܵܐ
ܚܘܼܪܒܵܐ. ܕܲܒܼܗܵܝ̇ ܠܲܡ ܕܟܲܕܼ ܦܲܪܝܼܩܝܼܢܲܢ ܡ̣ܢ ܟ̱ܠܹܗ ܪܵܘܒܵܐ ܘܲܫܓܼܘܼܫܝܵܐ:
ܢܸܟܫܲܚ ܒܫܸܠܝܵܐ ܠܲܡܨܲܠܵܝܘܼ ܐܲܝܟܼ ܡܵܐ ܕܲܦܐܸܐ. ܐܵܦ ܟܠܗܘܿܢ ܓܸܠܝܵܢܹ̈ܐ
ܕܲܗܘ̤ܵܘ ܠܘܵܬܼ ܩܲܕܝܼ̈ܫܹܐ ܥܲܠ ܡܸܕܸܡ ܡܸܕܸܡ: ܐܸܢ ܐܲܝܟܼ ܕܲܠܚܘܼܟܵܡܗܘܿܢ
ܕܝܼܠܗܘܿܢ ܘܲܠܝܘܼܠܦܵܢܵܐ ܕܓܼܵܘܵܐ: ܒܥܸܕܵܢܵܐ ܕܠܸܠܝܵܐ ܐܲܝܟܼ ܕܲܒܼܤܘܿܓܼܵܐܐ:
ܘܲܒܼܙܲܒܼܢܵܐ ܕܲܨܠܘܿܬܼܵܐ ܗܵܘܹ̇ܝܢ ܗ̄ܘ̣ܵܘ ܠܘܵܬܼܗܘܿܢ. ܡܸܛܠܗܵܢܵܐ ܐܵܦ
ܐܲܒܼܵܗܲܝ̈ܢ ܐܲܝܟܼ ܡܲܢ ܕܡܸܢܹܗ ܕܦܵܪܘܿܩܲܢ ܩܲܒܸܠ̣ܘ ܝܘܼܠܦܵܢܵܐ ܗܵܢܵܐ
ܡܥܲܠܝܵܐ ܕܥܲܠ ܨܠܘܿܬܼܵܐ: ܘܥܝܼܪܘܼܬܼܵܐ ܕܒܼܵܗ̇ ܐܲܝܟܼ ܦܘܼܩܕܵܢܹܐ
ܬܘܼܒܼ ܕܲܫܠܝܼܚܵܐ: ܠܫܸܠܝܵܐ ܘܠܲܤܦܝܼܩܘܼܬܼܵܐ ܕܡ̣ܢ ܟܠ ܓܵܒܹ̇ܝܢ ܗ̄ܘ̣ܵܘ

 557 

ܩܲܕܼܡܵܝܑܬܼ: ܐܲܝܟܼ ܕܢܸܗܘܘܿܢ ܕܠܵܐ ܦܤܵܩ ܒܩܲܪܝܼܒܼܘܼܬܹܗ ܕܐܲܠܵܗܵܐ
ܒܐܲܡܝܼܢܘܼܬܼܵܐ ܕܲܨܠܘܿܬܼܵܐ. ܠܵܘ ܒܲܠܚܘܿܕܼ ܡܸܛܠ ܕܠܵܐ ܢܸܬܼܥܲܟܿܪܘܼܢ
ܒܡܸܕܸܡ ܡ̣ܢ ܐܲܡܝܼܢܘܬܗܘܿܢ ܕܲܠܦܘܼܠܚܵܢܵܗ̇ ܥܵܪܩܝܼܢ ܗ̄ܘ̣ܵܘ ܠܫܸܠܝܵܐ:
ܐܸܠܵܐ ܕܕܲܠܡܵܐ ܟܹܝܬܼ ܡܸܕܸܡ ܢܘܼܟܼܪܵܝܵܐ ܢܸܦܓܲܥ ܒܗܘܿܢ ܡ̣ܢ ܠܒܲܪ
ܘܢܸܕܼܠܘܿܚ ܠܪܸܥܝܵܢܵܐ ܙܲܗܝܵܐ: ܘܢܸܫܬܓܸܫ ܥܠܲܝܗܘܿܢ ܫܲܗܪܵܐ
ܡܚܲܕܼܝܵܢܵܐ ܕܐܝܼܬܼܵܘܗܝ ܢܘܼܗܪܵܐ ܕܢܲܦܫܵܐ. ܐܸܠܵܐ ܘܐܵܦ ܒܡܲܬܼܩܵܠܵܐ
ܐܵܟܼ̇ܠܝܼܢ ܗ̄ܘ̣ܵܘ: ܕܠܵܐ ܬܸܢܵܢܵܐ ܕܤܵܠܹ̇ܩ ܡ̣ܢ ܡܲܠܝܘܼܬܼܵܐ ܕܟܲܪܤܵܐ
ܠܗܵܘܢܵܐ ܢܲܥܡܸܛ: ܘܢܸܬܿܕܵܘܲܕܼ ܡ̣ܢ ܒܗܝܼܠܘܼܬܼܵܐ ܕܦܘܼܪܫܵܢܵܐ:
ܘܢܸܬܼܓܠܸܙ ܡ̣ܢ ܒܘܼܤܵܡܵܐ ܪܘܼܚܵܢܵܐ ܕܡ̣ܢ ܨܠܘܿܬܼܵܐ ܡܸܫܬܲܟܲܢ.
ܘܼܲܒܼܦܵܤܝܼ̈ܩܵܬܼܵܐ ܒܟܼܠ ܡܸܬܼܚܲܦܛܝܼܢ ܗ̄ܘ̣ܵܘ: ܕܢܸܫܟܿܚܘܼܢ ܕܲܕܼܠܵܐ
ܬܲܚܦܝܼܬܼܵܐ ܠܲܡܡܲܠܵܠܘܼ ܥܲܡ ܐܲܠܵܗܵܐ ܒܲܟܼܡܵܐ ܕܡܲܨܝܵܐ: ܟܲܕܼ ܒܡܸܕܸܡ
ܪܸܥܝܵܢܵܐ ܠܵܐ ܡܥܲܟܲܪ ܟܠ ܟ̱ܠܹܗ.
ܕܒܲܕܼܓܼܘܿܢ ܡܸܛܠ ܕܲܡܦܵܝ ܘܐܵܦ ܗ̤ܘ ܤܵܛܵܢܵܐ: ܕܗܵܠܹܝܢ
ܟܠܗܹܝܢ ܛܵܒܼ̈ܬܼܵܐ ܐܲܤܝܼ̈ܢܵܢ ܒܓܼܵܘ ܦܘܼܠܚܵܢܵܐ ܗܵܢܵܐ ܬܡܝܼܗܵܐ: ܕܕܼܘܼܟܲܬܼ
ܢܲܦܫܵܐ ܡ̇ܢ ܐܝܼܬܹܝܗ̇ ܠܟܼܠܗܹܝܢ ܡܢܵܘ̈ܬܼܵܐ ܕܗܲܕܵܡܲܝ̈ ܓܘܼܫܡܵܗ̇
ܕܲܡܝܲܬܿܪܘܼܬܼܵܐ: ܚܵܤܹ̇ܩ ܒܹܗ ܒܗܵܢܵܐ: ܝܲܬܼܝܼܪ ܡ̣ܢ ܕܲܒܼܟܼܠܗܘܿܢ
ܕܘܼܒܵܪܹ̈ܐ. ܗܵܕܹܐ ܕܐܵܦ ܡ̣ܢ ܢܸܤܝܵܢܵܐ: ܝܵܕܲܥ̇ܝܼܢ ܠܵܗ̇ ܟܠܢܵܫ. ܕܐܵܦ
ܠܵܐ ܒܡܸܕܸܡ ܐ̄ܚܪܹܝܢ ܗܵܟܲܢܵܐ ܡܸܙܕܩܸܬܼ ܘܛܵܐܹ̇ܢ ܒܲܒܪܢܵܫܵܐ: ܘܲܡܥܲܬܸܕܼ
ܢܲܦܫܹܗ ܠܐܵܓܼܘܿܢܵܐ ܕܥܲܡܹܗ: ܐܲܝܟܼ ܕܲܒܼܫܲܗܪܵܐ ܕܠܸܠܝܵܐ. ܐܸܢ ܝܑܼܚܝܼܕܼܵܝܵܐ
ܢܸܗܘܸܐ: ܘܐܸܢ ܕܲܝܪܵܝܵܐ: ܘܐܸܢ ܥܵܠܡܵܝܵܐ. ܗܵܪܟܵܐ: ܠܵܐ ܡܸܟܹܝܠ
ܡܚܲܡܤܸܢ ܕܠܵܐ ܗ̤ܘ ܩܢܘܿܡܹܗ ܢܚܵܘܸܐ ܓܲܠܝܵܐܝܼܬܼ ܒܲܩܪܵܒܼܵܐ ܓܲܠܝܵܐ
ܕܲܠܩܘܼܒܼܠܹܗ ܕܠܵܐ ܡܸܨܥܵܝܵܐ. ܘܟܲܕܼ ܟܠ ܟ̱ܠܹܗ ܗ̤ܘ ܠܵܐ ܡܲܪܓܸܫ

 558 

ܒܫܘܼ̈ܟܵܢܹܐ ܕܲܡܩܲܒܿܠܝܼܢ ܒܟܸܤܝܵܐ ܗܵܢܘܿܢ ܕܫܵܗ̇ܪܝܼܢ: ܐܸܠܵܐ ܚܵܤܹ̇ܡ
ܒܗܘܿܢ: ܡ̣ܢ ܐܸܤܟܹܡܵܐ ܢܲܟܼܦܵܐ ܕܩܵܘܡܗܘܿܢ: ܘܡ̣ܢ ܡܥܲܙܝܵܢܘܼܬܼܵܐ
ܕܠܘܼܩܒܲܠ ܫܸܢܬܼܵܐ ܒܥܝܼܪܘܼܬܼܵܐ ܕܲܒܼܬܸܫ̈ܒܿܚܵܬܼܵܐ ܘܙܘܼܡܵܪܵܐ: ܘܲܨ̈ܠܵܘܵܬܼܵܐ
ܕܒܲܟܼ̈ܦܵܦܹܐ ܘܲܦܫܵܛܹ̈ܐ: ܘܒܲܓܼ̈ܗܵܢܵܝܬܼܵܐ ܘܓܼܘܼܪ̈ܓܵܚܹܐ ܕܥܲܠ ܐܲܪܥܵܐ:
ܘܬܲܚܢܲܢܬܼܵܐ ܠܸܒܵܢܵܝܬܼܵܐ ܕܟܼܠܹܗ ܠܸܠܝܵܐ. ܚܵܤܹ̇ܡ ܘܐܵܦ ܝܲܬܝܼܪܵܐܝܼܬܼ:
ܒܗܵܝ̇ ܕܟܲܕܼ ܐ̄ܚܪ̈ܵܢܹܐ ܪܡܹܝܢ ܥܲܠ ܬܸܫܘ̈ܝܵܬܼܗܘܿܢ ܐܲܝܟܼ ܡܝܼ̈ܬܹܐ:
ܘܡܸܨܛܲܕܸܐ ܒܗܘܿܢ ܐܲܝܟܼ ܨܸܒܼܝܵܢܹܗ ܒܚܸܙ̈ܘܵܢܹܐ ܢܕܝܼ̈ܕܹܐ ܘܲܡܫܲܟܿܪܹ̈ܐ
ܕܗܲܓܵܓܼܵܘ̈ܗܝ: ܘܲܡܥܲܪܓܸܠ ܠܵܗܘܿܢ ܐܲܝܟܼ ܕܒܲܤܝܵܢܵܐ ܒܦܲܢܛܵܤ̈ܝܼܵܣ
ܡܫܲܚ̈ܠܦܵܬܼܵܐ ܒܫܸܢܬܼܵܐ ܥܒܼܝܼܬܼܵܐ ܕܡ̣ܢ ܝܘܼܩܪܵܐ ܕܐܸܤܛܘܼܡܗܘܿܢ ܟ̱ܠܹܗ
ܠܸܠܝܵܐ: ܗܵܠܹܝܢ ܕܹܝܢ ܨܵܝܪܝܼܢ ܒܢܲܦܫܗܘܿܢ ܡܸܟܵܐ: ܠܗܵܝ̇ ܥܝܼܪܘܼܬܼܵܐ
ܕܲܩܝܵܡܬܼܵܐ. ܘܚܵܙܹ̇ܐ ܠܗܘܿܢ ܕܟܲܕܼ ܥܕܲܟܹܝܠ ܬܚܹܝܬܼ ܐܲܦܲܝ̈ ܬܲܪܥܵܐ ܕܒܸܤܪܵܐ
ܚܒܼܝܼܫܝܼܢ: ܘܲܒܼܟܼܠܫܵܥ ܓܲܠ̈ܠܹܐ ܕܡܵܝܘܿܬܼܘܼܬܼܵܐ ܡܸܬܿܓܲܪܹܝܢ ܒܗܘܿܢ:
ܘܲܒܼܚܲܝܹ̈ܐ ܡܤܲܝ̈ܟܹܐ ܬܚܹܝܬܼ ܫܘܼܠܛܵܢܵܐ ܕܐܵܐܲܪ ܕܥܵܠܡܵܐ ܗܵܢܵܐ ܡܬܲܚܡܝܿܢ:
ܛܘܼܦܤܵܐ ܕܗܵܘ̇ ܕܘܼܒܵܪܵܐ ܕܲܥܬܼܝܼܕܼ ܡܚܵܘܹܝܢ ܒܲܟܼܝܵܢܗܘܿܢ ܡܵܘܝܿܬܼܵܐ.
ܚܲܝܠܵܐ ܪܲܒܵܐ ܩܲܝܢܵܐ ܨܠܘܿܬܼܵܐ ܕܲܒܼܥܸܕܵܢܹ̈ܐ ܕܠܸܠܝܵܐ ܡܸܬܼܩܲܪܒܼܵܐ:
ܬܝܲܝܲܪ ܡ̣ܢ ܕܒܼܐܝܼܡܵܡܵܐ. ܘܡܸܛܠܗܵܢܵܐ ܟܠܗܘܿܢ ܙܲܕܝܼ̈ܩܹܐ: ܒܠܲܝ̈ܠܵܘܵܬܼܵܐ
ܡܨܲܠܹܝܢ ܗ̄ܘ̣ܵܘ: ܟܲܕܼ ܡܲܩܪܒܼܝܼܢ ܗ̄ܘ̣ܵܘ ܠܘܼܩܒܲܠ ܝܘܼܩܪܹܗ ܕܦܲܓܼܪܵܐ:
ܘܠܘܼܩܒܲܠ ܚܲܠܝܘܼܬܼܵܗ̇ ܕܫܸܢܬܼܵܐ. ܘܠܲܟܼܝܵܢܵܐ ܡ̣ܢ ܕܝܼܠܹܗ: ܕܵܚܩ̇ܝܼܢ
ܗ̄ܘ̣ܵܘ. ܐܲܝܟܼ ܕܐܵܦ ܢܒܼܝܼܵܐ ܐܸܡ݂ܲܪ: ܕܲܠܐܝܲܬܼ ܒܬܸܢ̈ܚܵܬܼܝ: ܘܨܲܒܿܥܹ̇ܬܼ
ܒܟܼܠ ܠܲܝܠܹܗ ܥܲܪܤܝ. ܟܲܕܼ ܡܸܬܿܬܿܢܲܚ ܗ̄ܘ̣ܵܐ ܒܚܲܫܵܐ ܕܲܨܠܘܿܬܼܵܐ:
ܡ̣ܢ ܥܘܼܡܩܵܐ ܕܠܸܒܹܗ. ܘܬܼܘܼܒܼ: ܒܦܸܠܓܹܗ ܕܠܸܠܝܵܐ ܩܵܡܹ̇ܝܬܼ ܕܐܵܘܕܹܐ
ܠܵܟܼ ܥܲܠ ܕܝܼܢܲܝ̈ܟ: ܙܲܕܝܼܩܵܐ. ܥܲܠ ܟܠ ܫܸܐܠܬܼܵܐ ܕܹܝܢ ܕܐܵܠܨܵܐܝܼܬܼ

 559 

ܫܵܐܠܝܼܢ ܗ̄ܘ̣ܵܘ ܡ̣ܢ ܠܘܵܬܼ ܐܲܠܵܗܵܐ: ܒܲܨܠܿܬܼܵܐ ܕܲܒܼܱܫܗܪܵܐ ܕܠܲܝܼ̈ܠܵܘܵܬܼܵܐ
ܡܸܙܕܲܝܢܝܼܢ ܗ̄ܘ̣ܵܘ: ܘܡܸܚܕܼܵܐ ܡܩܲܒܿܠܝܼܢ ܗ̄ܘ̣ܵܘ ܫܸܐ̈ܠܵܬܼܗܘܿܢ. ܠܲܝܬܿ
ܡܸܕܸܡ ܕܲܕܼܚܝܼܠ ܘܐܵܦ ܥܲܠ ܤܵܛܵܢܵܐ: ܐܲܝܟܼ ܨܠܘܿܬܼܵܐ ܕܲܒܼܥܝܼܪܘܼܬܼܵܐ
ܕܠܸܠܝܵܐ ܡܸܬܼܩܲܪܒܼܵܐ. ܘܐܵܦܸܢ ܒܦܸܗܝܵܐ ܗܵܘܝܵܐ: ܠܵܐ ܗܵܦ̇ܟܵܐ
ܤܪܝܼܩܵܐܝܼܬܼ: ܐܸܠܵܐ ܐܸܢ ܛܵܟܼ ܠܒܲܪ ܡ̣ܢ ܟ̱ܠܵܗ̇ ܘܵܠܝܼܬܼܵܐ ܢܸܗܘܸܐ ܗܵܘ̇
ܡܵܐ ܕܡܸܫܬܿܐܸܠ. ܡܸܛܠ ܗܵܢܵܐ: ܕܲܪܵܐ ܚܲܤܝܼܢܵܐ ܡܵܚܹ̇ܐ ܥܲܡܗܘܿܢ:
ܕܲܬܥܵܘܸܟܼ ܐܸܢܘܿܢ ܡ̣ܢ ܦܘܼܠܚܵܢܵܐ ܗܵܢܵܐ ܐܸܢ ܡܲܨܝܵܐ: ܠܗܵܢܘܿܢ ܕܒܹܗ
ܐܲܡܝܼܢܝܼܢ. ܐܲܝܠܹܝܢ ܕܹܝܢ ܕܩܲܠܝܼܠ ܡܥܲܙܹܝܢ ܠܘܼܩܒܲܠ ܒܝܼܫܘܼܬܼ ܨܸܢ̈ܥܵܬܹܗ:
ܘܛܵܥܡ̇ܝܼܢ ܠܡܵܘܗ̈ܒܼܵܬܹܗ ܕܐܲܠܵܗܵܐ ܕܲܒܼܫܲܗܪܵܐ ܡܸܬܼܝܲܗ̈ܒܵܢ: ܘܲܡܢܲܤܹܝܢ
ܒܲܩܢܘܿܡܗܘܿܢ ܠܪܲܒܿܘܼܬܼ ܥܘܼܕܼܪ̈ܵܢܵܘܗܝ ܕܐܲܠܵܗܵܐ ܕܡܸܬܼܩܲܪܒܼܝܼܢ
ܠܗܘܿܢ: ܗܵܝܕܹܝܢ ܒܵܤܹ̇ܝܢ ܒܹܗ ܡܲܠܝܵܐܝܼܬܼ: ܒܹܗ ܘܲܒܼܟܼܠܗܘܿܢ
ܦܘܼܪ̈ܤܵܘܗܝ. ܘܒܲܕܓܼܘܿܢ ܝܲܬܝܼܪ ܡ̣ܢ ܟ̱ܠܹܗ ܓܵܘܵܐ ܕܥܹܕܬܵܐ: ܬܸܓܼܡܵܐ
ܗܵܢܵܐ ܕܝܼܚܝܼ̈ܕܼܵܝܹܐ ܐܲܚܝܼܕܼ ܕܲܪܵܐ ܕܲܠܩܘܼܒܼܠܹܗ: ܒܐܵܓܼܘܿܢܵܐ ܕܲܨܠܘܿܬܼܵܐ
ܘܲܕܼܫܲܗܪܵܐ. ܚܵܕܼܵܐ: ܡܸܛܠ ܤܦܝܼܩܘܼܬܼܗܘܿܢ ܕܡ̣ܢ ܡܸܬܼܚܲܙ̈ܝܵܢܝܵܬܼܵܐ.
ܘܲܐ̄ܚܪܹܬܼܵܐ: ܡܸܛܠ ܐܲܡܝܼܢܘܼܬܼܗܘܿܢ ܕܲܒܼܫܸܠܝܵܐ. ܕܲܒܼܗܵܝ̇ ܕܲܓܼܠܝܼܙܝܼܢ
ܐܸܢܘܿܢ ܡ̣ܢ ܥܸܠ̈ܠܵܬܼܵܐ: ܠܵܐ ܡܸܫܟܲܚ ܡܸܟܹܝܠ ܡܦܲܠܗܸܕܼ ܠܚܘܼ̈ܫܵܒܲܝܗܘܿܢ
ܡ̣ܢ ܪܸܢܝܵܐ ܕܐܲܠܵܗܵܐ: ܘܲܢܥܲܟܲܪ ܐܸܢܘܿܢ ܡ̣ܢ ܬܲܟܼܫܲܦܬܗܘܿܢ ܐܲܡܝܼܢܬܼܵܐ
ܒܬܲܟܼܬܘܼܫܵܐ ܕܲܠܩܘܼܒܼܠܹܗ. ܐܲܝܟܲܢܵܐ ܕܡ̣ܢ ܫܘܼܪܵܝ ܬܘܼܠܡܵܕܼܗܘܿܢ
ܘܲܥܕܲܡܵܐ ܠܤܲܝܒܿܘܼܬܼܗܘܿܢ: ܠܵܐ ܡܲܗܡܹܝܢ ܟܠ ܟ̱ܠܹܗ ܡ̣ܢ ܥܲܡܠܹܗ
ܕܫܲܗܪܵܐ: ܐܸܠܵܐ ܦܘܼܠܚܵܢܵܐ ܝܑܼܕܼܥܵܐ ܗܵܢܵܘ ܠܗܘܿܢ: ܩܵܘܡܵܐ ܡܬܼܝܼܚܵܐ
ܕܟܼܠܹܗ ܠܸܠܝܵܐ: ܐܲܝܟܼ ܕܐܵܦ ܡ̣ܢ ܪ̈ܘܼܫܡܹܗ ܕܬܲܫ̈ܥܝܵܬܼܵܐ ܕܚܲܕܼ ܚܲܕܼ
ܡܸܢܗܘܿܢ ܝܵܠܦܝܼܢܲܢ.

 560 

ܐܵܡܲ݁ܪ ܓܹܝܪ ܡܵܪܝ ܐܵܬܵܢܵܤܝܼܣ ܒܬܲܫܥܝܼܬܹܗ ܥܲܠ ܗܵܘ̇ ܡܲܚܙܝܼܬܼܵܐ
ܕܝܼܚܝܼ̈ܕܼܵܝܹܵܐ: ܕܫܵܗܲܪ ܗ̄ܘ̣ܵܐ ܠܲܡ ܡܲܠܝܵܐܝܼܬܼ: ܐܲܝܟܲܢܵܐ ܕܤܘܿܓܼܵܐܐ
ܕܠܲܝ̈ܠܵܘܵܬܼܵܐ: ܕܠܵܐ ܫܸܢܬܼܵܐ ܡܲܓܲܗ ܗ̄ܘ̣ܵܐ. ܘܐܵܦ ܕܲܪܵܐ ܩܲܕܼܡܵܝܵܐ
ܕܤܵܛܵܢܵܐ ܕܥܲܡܹܗ: ܡ̣ܢ ܗܵܪܟܵܐ ܐܸܫܟܲܚ ܥܸܠܬܼܵܐ ܠܲܡܙܵܥܘܼ ܠܘܼܩܒܲܠ
ܢܲܨܝܼܚܵܐ. ܘܗܵܢܵܐ: ܟܲܕܼ ܥܕܼܟܹܝܠ ܛܲܠܝܵܐ ܗ̄ܘ̣. ܡܸܫܟܿܚܝܼܢܲܢ ܕܹܝܢ
ܤܒܼܝܼܤܵܐܝܼܬܼ ܒܫܲܪܹ̈ܐ ܤܲܓܝܼ̈ܐܹܐ: ܕܠܵܐ ܡܸܡܬܼܘܿܡ ܐܲܗܡ̣ܝܼ ܡ̣ܢ
ܫܲܗܪܵܐ ܟ̱ܠܹܗ ܙܲܒܼܢܵܐ ܕܚܲܝܵܘ̈ܗܝ. ܐܲܝܟܼ ܕܐܵܦܠܵܐ ܟܲܕܼ ܠܘܵܬܼ ܐ̄ܚܪ̈ܵܢܹܐ
ܡܸܬܿܘܲܥܲܕܼ ܗ̄ܘ̣ܵܐ: ܐܲܝܟܼ ܗܵܝ̇ ܕܟܲܕܼ ܐܸܙܲܠ̣ ܠܘܵܬܼ ܛܘܼܒܼܵܢܵܐ ܦܵܘܠܘܿܣ
ܤܵܒܼܵܐ: ܟܲܕܼ ܐܸܟܲܠ̣ܘ ܠܫܵܪܘܼܬܼܵܐ ܗܵܝ̇ ܕܲܒܼܝܲܕܼ ܦܵܪܲܚܬܼܵܐ: ܘܩܵܡ̣ܘ ܠܲܡ
ܒܲܨܠܘܿܬܼܵܐ: ܟ̱ܠܹܗ ܠܸܠܝܵܐ. ܡܲܢ̣ܘܼ ܡ̣ܢ ܝܑܼܚܝܼ̈ܕܼܵܝܹܐ ܕܲܒܼܗܵܢܵܐ ܡܲܗܡܸܐ:
ܘܟܲܕܼ ܟܠܗܹܝܢ ܡܝܲܬܿܪ̈ܵܬܼܵܐ ܒܲܟܼܢܝܼܫܘܼ ܩܢܸܐ: ܠܵܐ ܗ̄ܘ̣ܵܐ ܒܲܛܝܼܠܵܐ
ܡܸܬܼܚܫܸܒܼ ܒܸܠܥܵܕܼ ܡ̣ܢ ܗܵܢܵܐ؟ ܡܸܛܠ ܕܗ̤ܘܝܘܼ ܢܘܼܗܪܵܐ ܕܬܲܪܥܝܼܬܼܵܐ.
ܒܹܗ ܗ̤ܘ ܓܹܝܪ ܡܸܙܕܩܸܦ ܡܲܕܥܵܐ ܘܡܸܬܼܟܲܢܲܫ ܪܸܥܝܵܢܵܐ: ܘܛܵܐܹ̇ܣ
ܗܵܘܢܵܐ ܘܕܼܵܐܹ̇ܩ ܒܪ̈ܘܼܚܵܢܵܝܵܬܼܵܐ: ܘܡܸܬܼܥܲܠܲܡ ܒܲܨܠܘܿܬܼܵܐ ܘܬܵܗܲܪ: ܒܹܗ
ܡܸܬܼܝܲܗܒܝܼܢ ܪܲܗܒܼܘܿܢ ܛܘܼ̈ܒܹܐ ܕܚܲܝܹ̈ܐ ܥܬܼܝܼ̈ܕܹܐ: ܘܫܘܼ̈ܟܵܢܹܐ ܕܡܵܘ̈ܗܒܼܵܬܼܵܐ
ܕܒܼܟܼܬܼܵܒܹ̈ܐ ܩܲܕܝܼ̈ܫܹܐ ܪܫܝܼܡܝܼܢ ܐ̄ܪ̈ܵܙܲܝܗܘܿܢ. ܘܡܸܛܠܗܵܢܵܐ: ܠܵܐ ܡܲܗܡܹܝܢ
ܗ̄ܘ̣ܵܘ ܐܵܒܼܵܗܲܝ̈ܢ ܡ̣ܢ ܥܲܡܠܵܐ ܗܵܢܵܐ ܡ̣ܢ ܙܲܒܼܢܵܐ ܕܫܘܼܪܵܝ ܬܘܼܠܡܵܕܼܗܘܿܢ:
ܘܲܥܕܲܡܵܐ ܠܲܡܫܘܼܚܬܼܵܐ ܕܲܓܼܡܝܼܪܘܼܬܼܵܐ. ܐܲܝܟܲܢܵܐ ܕܐܵܦܠܵܐ ܒܲܙܒܲܢ ܤܲܝܒܿܘܼܬܼܵܐ
ܥܲܡܝܼܩܬܼܵܐ: ܗܵܝ̇ ܕܲܠܡܲܚܤܸܢ ܡܸܫܟܿܚܵܐ ܕܲܬܼܩܘܼܡ ܥܲܠ ܪܸ̈ܓܼܠܹܝܗ̇:
ܝܵܗ̇ܒܿܝܼܢ ܗ̄ܘ̣ܵܘ ܐܲܬܼܪܵܐ ܠܡܲܐܝܼܢܘܼܬܼܵܐ ܠܡܸܫܬܲܠܵܛܘܼ ܥܲܠܝܗܘܿܢ:
ܕܲܬܼܥܵܘܸܟܼ ܐܸܢܘܿܢ ܡ̣ܢ ܐܲܡܝܼܘܼܬܼ ܥܝܼܪܘܼܬܼܵܐ ܕܠܲܝ̈ܠܵܘܵܬܼܵܐ: ܠܡܸܬܲܠ
ܢܝܵܚܵܐ ܠܦܓܼܪ̈ܲܝܗܘܿܢ ܒܝܲܕܼ ܫܸܢܬܼܵܐ ܙܥܘܿܪܬܵܐ. ܐܲܝܟܼ ܕܝܵܠܦܝܼܢܲܢ ܐܵܦ ܡ̣ܢ

 561 

ܫܲܪ̈ܒܹܐ ܕܐܲܡܝܼܪܝܼܢ ܥܲܠ ܗܵܘ̇ ܨܲܠܡܵܐ ܓܡܝܼܪܵܐ ܕܲܡܝܲܬܿܪܘܼܬܼܵܐ
ܘܲܕܼܟܼܠܗܘܿܢ ܫܘܼܦܪܹ̈ܐ ܪ̈ܘܼܚܵܢܹܐ: ܐܵܡܲ݁ܪ ܐ̄ܢܵܐ ܕܹܝܢ ܛܘܼܒܼܵܢܵܐ ܐܲܪܤܵܢܝܼܣ.
ܗܵܢܵܐ ܕܟܲܕܼ ܢܓܲܕܼ ܢܲܦܫܹܗ ܓܡܝܼܪܵܐܝܼܬܼ ܡ̣ܢ ܟ̱ܠܹܗ ܚܘܼܠܛܵܢܵܐ ܕܥܲܡ
ܒܢܲܝ̈ܢܵܫܵܐ: ܘܐܲܒܼܥܸܕܼ ܥܘܼܡܪܹܗ ܒܛܵܘܪܵܐ ܤܲܓܝܼܐܵܐ ܐܵܦ ܡܸܢܘܗܘܿܢ
ܕܐܲܚܹ̈ܐ ܒܡܲܕܼܒܿܪܵܐ ܗܵܘ̇ ܛܒܼܝܼܒܼܵܐ ܕܐܸܤܩܹܛܝܼܣ: ܝܲܗ̣̄ܒܼ ܢܲܦܫܹܗ
ܡܲܠܝܵܐܝܼܬܼ ܠܦܘܼܠܚܵܢܵܐ ܗܵܢܵܐ ܬܡܝܼܗܵܐ ܕܫܲܗܪܵܐ. ܦܪܝܼܫ ܗ̄ܘ̣ܵܐ ܕܹܝܢ
ܘܐܵܦ ܗ̤ܘ ܩܵܘܡܹܗ ܕܲܒܼܫܲܗܪܵܐ: ܡ̣ܢ ܟܠܗܘܿܢ ܐܲܒܼ̈ܗܵܬܼܵܐ ܕܲܒܼܙܲܒܼܢܹܗ.
ܐܲܝܟܼ ܕܐܵܦ ܬܲܫܥܝܼܬܹܗ ܤܵܗ̇ܕܵܐ. ܕܲܒܼܪܲܡܫܵܐ ܠܲܡ ܕܡܲܥܵܠܲܝ ܚܲܕܼܒܫܲܒܵܐ
ܫܵܒܹ̇ܩ ܗ̄ܘ̣ܵܐ ܠܫܸܡܫܵܐ ܠܒܸܤܬܿܪܹܗ: ܘܡܵܬܲܚ ܗ̄ܘ̣ܵܐ ܐܝܼܕܼܵܘ̈ܗܝ
ܠܘܼܩܒܲܠ ܫܡܲܝܵܐ: ܥܕܲܡܵܐ ܕܕܼܵܢܲܚ ܗ̄ܘ̣ܵܐ ܫܸܡܫܵܐ ܒܐܲܦܵܘ̈ܗܝ.
ܘܬܼܘܼܒܼ: ܒܕܸܘܼܟܿܬܼܵܐ ܐ̄ܚܪܹܢܵܐ. ܟ̱ܠܹܗ ܠܲܡ ܠܸܠܝܵܐ: ܒܫܲܗܪܵܐ ܡܲܦܸܩ
ܗ̄ܘ̣ܵܐ ܠܹܗ. ܘܐܸܡܲܬܼܝ ܕܨܵܒܹ̇ܐ ܗ̄ܘ̣ܵܐ ܠܘܲܥܕܵܐ ܕܨܲܦܪܵܐ ܡܸܛܠ ܟܝܵܢܵܐ
ܕܢܸܬܿܬܿܢܝܼܚ: ܟܲܕܼ ܡܸܬܼܟܲܬܲܫ ܥܲܡ ܫܢܬܼܵܐ: ܐܵܡܲ݁ܪ ܗ̄ܘ̣ܵܐ: ܙܸܠܝ ܠܹܟܼܝ
ܡܹܢܝ: ܐܲܡܬܼܵܐ ܒܝܼܫܬܼܵܐ. ܘܗܵܟܲܢܵܐ ܩܲܠܝܼܠ ܚܵܛܹ̇ܦ ܗ̄ܘ̣ܵܐ ܫܸܢܬܼܵܐ:
ܘܡܸܬܿܬܿܥܝܼܪ. ܘܗܵܢܵܐ ܥܲܡ ܟ̱ܠܵܗ̇ ܗܵܝ̇ ܤܲܝܒܿܘܼܬܼܵܐ: ܕܐܲܡܝܼܪ ܕܟܲܦ̣
ܗ̄ܘ̣ܵܐ ܠܹܗ ܡ̣ܢ ܥܸܠܲܬܼ ܤܲܝܒܿܘܼܬܼܵܐ.
ܘܐܲܝܟܼ ܕܝܲܬܝܼܪ ܬܸܬܼܝܼܕܲܥ ܚܠܝܼܨܘܼܬܹܗ ܕܲܒܼܫܲܗܪܵܐ: ܢܸܫܡܲܥ ܡ̣ܢ
ܬܲܫܥܝܼܬܼܵܐ ܐ̄ܚܪܹܬܼܵܐ ܕܲܥܠܵܘܗܝ: ܐܲܝܟܲܢܵܐ ܡܥܲܙܸܐ ܗ̄ܘ̣ܵܐ ܒܟܼܠܵܗ̇ ܗܵܝ̇
ܤܲܝܒܿܘܼܬܼܵܐ ܘܲܡܚܝܼܠܘܼܬܼܵܐ: ܓܲܒܼܪܵܐ ܒܲܪ ܬܸܫܥܝܼܢ ܫܢ̈ܝܼܢ. ܗܵܢܵܐ ܕܹܝܢ
ܒܲܙܒܲܢ ܩ̣ܪܵܐ ܠܲܬܼܪܹܝܢ ܡ̣ܢ ܬܲܠܡܝܼܕܼܵܘ̈ܗܝ: ܗܵܢܘܿܢ ܕܐܝܼܬܲܝܗܘܿܢ

 562 

ܗ̄ܘ̣ܵܘ ܐܲܒܼ̈ܗܵܬܼܵܐ ܪܵܘܪ̈ܒܹܐ: ܘܐܸܡ݂ܲܪ ܠܗܘܿܢ: ܡܸܛܠ ܠܲܡ ܕܫܹ̈ܐܕܹܐ
ܡܸܬܼܟܲܬܿܫܝܼܢ ܥܲܡܝ: ܘܠܵܐ ܝܵܕܲܥ ܐ̄ܢܵܐ ܕܲܠܡܵܐ ܓܵܢܒܿܝܼܢ ܠܝܼ ܒܫܸܢܬܼܵܐ.
ܗܵܢܵܐ ܠܸܠܝܵܐ ܥܲܡܠܘ ܥܲܡܝ ܟܲܕܼ ܫܵܗܪܝܼܬܗܘܿܢ: ܘܛܘܿܪܘܼܢܵܢܝ:
ܘܲܚܙܵܐܝܼܢܵܢܝ ܐܸܢ ܢܵܐܹ̇ܡ ܐ̄ܢܵܐ ܒܫܲܗܪܵܐ. ܘܝܼܬܸܒܼܘ ܚܲܕܼ ܡ̣ܢ ܝܲܡܝܼܢܹܗ
ܘܚܲܕܼ ܡ̣ܢ ܡܸܤܵܠܹܗ: ܡ̣ܢ ܪܲܡܫܵܐ ܘܲܥܕܲܡܵܐ ܠܨܲܦܪܵܐ. ܘܐܵܡ̇ܪܝܼܢ
ܗ̄ܘ̣ܵܘ: ܕܲܚܢܲܢ ܢܵܡ̣ܢ: ܘܐܸܬܿܬܿܥܝܼܪܢ. ܘܠܹܗ ܠܵܐ ܚܙܲܝܢܵܝܗܝ: ܟܠ
ܟܠܹܗ ܕܢܵܡ̣. ܘܟܲܕܼ ܫܲܪܝܼ ܕܢܸܢܗܲܪ: ܟܒܲܪ ܡ̣ܢ ܢܲܦܫܹܗ ܥ̣ܒܲܕܼ ܗܵܕܹܐ
ܐܲܝܟܼ ܕܢܲܤܒܲܪ ܠܲܢ ܕܢܵܡ̣: ܐܵܘ ܬܘܼܒܼ ܒܲܫܪܵܪܵܐ ܫܸܢܬܐ ܛܪܵܬ̤ ܥܠܵܘܗܝ:
ܠܵܐ ܝܵܕܼܥܝܼܢ ܚ̄ܢܲܢ. ܬܠܵܬܼ ܙܲܒܼ̈ܢܝܼܡ ܐܸܬ݂ܼܵܐ ܩܵܠ ܢܫܲܡܬܼܵܐ ܕܲܢܚܝܼܪ̈ܵܘܗܝ:
ܘܩܵܡ̣. ܘܐܸܡ݂ܲܪ ܠܲܢ: ܡܢܵܡ ܢܵܡܹ̇ܬܼ: ܠܵܐ؟ ܘܲܥ̣ܢܲܝܢ: ܘܐܸܡܲܪܢ ܠܹܗ:
ܠܵܐ ܝܵܕܼܥܝܼܢܲܢ ܐܲܒܵܐ: ܕܲܚܢܲܢ ܢܵܡܢ ܗ̣̄ܘܲܝܢ. ܒܗܵܠܹܝܢ ܥܲܡ̈ܠܹܐ ܗܲܢܝܼ̈ܐܹܐ
ܕܫܲܗܪܵܐ ܡܸܬܼܒܲܤܡܝܼܢ ܗ̄ܘ̣ܵܘ: ܗܵܢܘܿܢ ܗܲܕܲܝܵܝܹ̈ܐ ܕܕܘܼܒܵܪܲܢ. ܘܡܢܵܐ
ܠܲܡ ܗܸܢܝܵܢܵܐ ܗܘ̤ܵܐ ܠܐܲܪܤܵܢܝܼܣ ܢܲܨܝܼܚܵܐ ܡ̣ܢ ܛܘܼܪܵܦܵܐ ܗܵܢܵܐ:
ܕܲܡܫܲܢܸܩ ܗ̄ܘ̣ܵܐ ܦܲܓܼܪܹܗ ܗܵܢܵܐ ܟ̱ܠܹܗ؟ ܓܲܠܝܵܐ: ܕܠܵܘ ܗܲܦܠܘܿܣ
ܡܤܲܝܒܲܪ ܗ̄ܘ̣ܵܐ ܗܵܠܹܝܢ ܟܠܗܹܝܢ. ܚܵܙܹ̇ܝܢܲܢ ܓܹܝܪ ܕܠܵܐ ܗ̄ܘ̣ܵܐ ܒܲܠܚܘܿܕܼ
ܒܲܪܢܵܫܹܗ ܓܵܘܵܝܵܐ ܐܸܬܼܢܲܗܲܪ ܠܒܼܘܼܤܵܡܹܗ: ܒܗܵܘ̇ ܨܸܡܚܵܐ ܥܸܠܝܵܐ: ܐܸܠܵܐ
ܘܲܠܒܲܪܢܵܫܹܗ ܒܲܪܝܵܐ ܕܐܝܼܬܼܵܘܗܝ ܟܝܵܢܵܐ ܐܛܝܼܡܵܐ ܘܡܸܬܼܚܲܒܿܠܵܢܵܐ:
ܐܲܠܒܿܫܹܗ ܬܸܫܒܿܘܿܚܬܼܵܐ: ܗܵܝ̇ ܕܲܥܬܼܝܼܕܼܝܼܢ ܟܠܗܘܿܢ ܩܲܕܝܼ̈ܫܹܐ
ܠܡܸܬܼܥܲܛܵܦܘܼ ܠܚܲܪܬܼܵܐ: ܒܫܘܼܚܠܵܦܵܐ ܕܲܡܩܲܒܸܿܠ ܟܝܵܢܵܐ ܕܟܼܠܹܗ
ܓܵܘܵܐ ܕܲܒܼܢܲܝ̈ܢܵܫܵܐ.

 563 

ܘܡ̣ܢ ܐܲܝܟܵܐ ܝܵܠܦܝܼܢܲܢ ܠܵܗ̇ ܠܗܵܕܹܐ؟ ܐܸܙܲܠ̣ ܠܲܡ ܒܲܙܒܲܢ ܚܲܕܼ
ܡ̣ܢ ܐܲܚܹ̈ܐ: ܠܩܸܠܵܝܬܹܗ ܕܐܲܒܼܵܐ ܐܲܪܤܵܢܝܼܣ. ܘܐܲܕܼܝܼܩ ܡ̣ܢ ܟܵܘܬܼܵܐ
ܘܲܚܙܵܝܗܝ ܠܤܵܒܼܵܐ ܕܩܵܐܹ̇ܡ: ܘܟܼܠܹܗ: ܐܲܝܟܼ ܢܘܼܪܵܐ ܕܝܵܩܕܵܐ. ܫܵܘܹ̇ܐ
ܗ̄ܘ̣ܵܐ ܠܲܡ ܓܹܝܪ ܐܲܚܵܐ ܗܵܘ̇ ܠܲܚܙܵܬܼܵܐ ܗܵܕܹܐ. ܟܹܐܡܲܬܼ: ܠܵܘ ܡ̣ܢ
ܒܨܸܝܼܪܹ̈ܐ ܗ̄ܘ̣ܵܐ. ܐܸܠܵܐ ܡ̣ܢ ܗܵܠܹܝܢ ܪܵܘܪ̈ܒܹܐ: ܕܐܸܙܲܠ̣ ܠܲܚܙܵܬܹܗ ܕܤܵܒܼܵܐ.
ܐܝܼܬܼ ܗ̄ܘ̣ܵܐ ܠܹܗ ܫܡܵܐ ܠܛܘܼܒܼܵܢܵܐ: ܡܸܛܠ ܡܥܲܠܝܘܼܬܼܵܐ ܕܕܼܘܼܒܵܪܹܗ.
ܘܟܼܠܗܘܿܢ ܐܲܒܼ̈ܗܵܬܼܵܐ ܕܓܼܝܼܓܼܝܼܢ ܗ̄ܘ̣ܵܘ ܠܲܚܙܵܬܹܗ. ܘܡܸܛܠ ܕܲܠܢܘܼܓܼܪܵܐ
ܚܵܙܹ̇ܝܢ ܗ̄ܘ̣ܵܘ ܠܹܗ ܝܲܬܿܝܼܪܵܐܝܼܬܼ: ܐܲܝܟܼ ܕܐܸܡ݂ܲܪ ܠܹܗ ܐܲܒܵܐ ܡܵܩܵܪܝܼܣ:
ܕܡܸܛܠ ܡܵܢܵܐ ܥܵܪܹܩ ܐܲܢ̄ܬܿ ܡܸܢܲܢ؟ ܡܸܛܠ ܗܵܢܵܐ ܘܐܵܦ ܐܲܟܼܤܢܵܝܹ̈ܐ
ܕܐܵܬܹ̇ܝܢ ܗ̄ܘ̣ܵܘ ܠܐܸܤܩܹܛܝܼܣ: ܠܹܗ ܩܲܕܼܡܵܝܑܬܼ ܪܓܼܝܼܓܼܝܼܢ ܗ̄ܘ̣ܵܘ
ܕܢܸܚܙܘܿܢ ܘܢܸܬܼܒܲܪܟܼܘܼܢ ܡܸܢܹܗ: ܘܒܲܕܼܓܼܘܿܢ ܟܲܕܼ ܢܩܲܫ̣ ܗܵܘ̇ ܐܲܚܵܐ:
ܢܦܲܩ̣ ܤܵܒܼܵܐ. ܘܲܚܙܵܝܗܝ: ܕܬܲܡܝܼܗ ܥܲܠ ܡܸܕܸܡ ܕܲܚ̣ܙܵܐ: ܘܐܸܡ݂ܲܪ
ܠܹܗ: ܙܲܒܼܢܵܐ ܗ̄ܘ̣ ܠܵܟܼ ܕܲܢܩܲܫ̣ܬܿ؟ ܕܲܠܡܵܐ ܚ̣ܙܲܝܬܿ ܡܸܕܸܡ. ܘܐܸܡ݂ܲܪ
ܠܹܗ: ܠܵܐ ܗܵܟܲܢܵܐ ܫܪܵܝܗܝ.
ܘܡܵܢܵܐ ܐܹܡܲܪ ܥܲܠ ܗܵܘ̇ ܛܘܼܒܼܵܢܵܐ ܦܵܟܼܘܿܡ؟ ܗܵܘ̇ ܒܲܪ ܦܸܚܡܹܗ
ܕܗܵܢܵܐ: ܘܲܒܼܫܲܪܟܵܐ ܪܹܫܵܝ: ܘܛܘܼܠܝܵܩ ܒܐܵܓܼܘܿܢܵܐ: ܘܲܠܗܝܼܩ
ܘܓܲܢ̄ܒܵܪ ܒܥܝܼܪܘܼܬܼ ܫܲܗܪܹܗ. ܗܵܢܵܐ ܕܙܲܒܼܢܵܐ ܤܲܓܝܼܐܵܐ ܥܒܲܕܼ ܟܲܕܼ
ܡܸܬܼܟܲܬܲܫ ܥܲܡ ܫܹ̈ܐܕܹܐ ܐܲܝܟܼ ܐܲܬܼܠܹܝܛܵܐ ܢܲܨܝܼܚܵܐ: ܒܲܕܼܡܘܼܬܹܗ
ܕܲܐܢܛܘܿܢܝܼܣ ܩܲܕܝܼܫܵܐ. ܗܵܢܵܐ ܕܡܸܛܠ ܕܲܒܼܠܲܝ̈ܠܵܘܵܬܼܵܐ ܤܲܓܝܼ̈ܐܹܐ
ܐܵܬܹ̇ܝܢ ܗ̄ܘ̣ܵܘ ܥܠܵܘܗܝ: ܗܵܢܵܘ ܕܹܝܢ ܟܲܕܼ ܫܵܗܲܪ: ܫܐܸܠ̣ ܡ̣ܢ ܐܲܠܵܗܵܐ:
ܕܢܲܦܪܸܩ ܡܸܢܹܗ ܫܸܢܬܼܵܐ. ܕܠܸܠܝܵܐ ܘܐܝܼܡܵܡܵܐ: ܢܸܗܘܸܐ ܕܠܵܐ ܫܸܢܬܼܵܐ:
ܕܢܸܫܟܲܚ ܢܫܲܦܸܠ ܠܚܲܝܠܹܗ ܕܲܒܼܥܸܠܕܲܪܵܐ. ܐܲܝܟܼ ܗܵܝ̇ ܕܐܲܡܝܼܪܵܐ: ܕܠܵܐ

 564 

ܐܸܗܦܘܿܟܼ ܥܕܲܡܵܐ ܕܐܹܓܲܡܲܪ ܐܸܢܘܿܢ. ܕܠܵܐ ܚܲܝܠܵܐ ܠܲܡ ܓܹܝܪ
ܐܝܼܬܲܝܗܘܿܢ ܠܘܵܬܼ ܗܲܝܡܵܢܘܼܬܹܗ ܕܡܵܪܝܵܐ. ܘܐܸܬܼܝܲܗܒܲܬ̤ ܠܹܗ ܗ̤ܝ
ܗܵܕܹܐ ܡܵܘܗܲܒܬܼܵܐ ܐܲܝܟܼ ܕܲܫܐܸܠ̣: ܙܲܒܼܢܵܐ ܝܑܼܕܲܝܼܥܵܐ. ܘܡܸܛܠ ܕܲܪܼܟܸܐ
ܗ̄ܘ̣ܵܐ ܠܸܒܹܗ: ܗܵܢܵܘ ܕܹܝܢ ܕܐܸܬܼܡܪܸܩ ܚܙܵܝܵܐ ܕܢܲܦܫܹܗ ܡ̣ܢ
ܫܲܗܪܵܐ ܕܠܲܝ̈ܠܵܘܵܬܼܵܐ ܘܫܸܠܝܵܐ ܘܲܨܠܘܿܬܼܵܐ: ܐܲܝܟܼ ܕܲܒܼܡܲܚܙܝܼܐܬܼܵܐ ܚܵܙܹ̇ܐ ܗ̄ܘ̣ܵܐ
ܠܐܠܵܗܵܐ ܕܠܵܐ ܡܸܬܼܚܙܸܐ. ܗܵܠܹܝܢ ܐܝܼܬܲܝܗܘܿܢ ܦܹܐܪܹ̈ܐ ܕܫܲܗܪܵܐ:
ܘܗܵܠܹܝܢ ܐܸܢܘܿܢ ܛܘܼ̈ܒܹܐ ܕܦܵܠܚܵܘ̈ܗܝ: ܘܗܵܠܹܝܢ ܐܸܢܘܿܢ ܟܠܝܼ̈ܠܹܐ
ܕܐܵܓܼܘܿܢܵܘ̈ܗܝ.
ܐܵܦ ܐܲܢ̄ܬܿ ܐܲܚܵܐ ܐܸܢ ܪܓܼܝܼܓܼ ܐܲܢ̄ܬܿ ܕܬܸܗܘܸܐ ܫܵܘܬܵܦܵܐ ܠܗܵܠܹܝܢ
ܩܲܕܝܼ̈ܫܹܐ ܘܝܵܪܢܬܵܐ ܕܕܼܘܼܒܵܪ̈ܲܝܗܘܿܢ: ܚܲܡܤܸܢ ܕܠܵܐ ܩܘܼܛܵܥ ܒܫܸܠܝܵܐ:
ܕܬܸܫܟܲܚ ܐܵܦ ܠܲܥ̇ܒܼܵܕܼܵܐ ܕܲܨܠܘܿܬܼܵܐ ܬܸܬܼܐܡܸܢ ܕܠܵܐ ܦܤܵܩ. ܤܲܝܒܲܪ
ܐܘܼܠܨܵܢܵܘ̈ܗܝ: ܕܲܢܼܩܲܕܸܐ ܛܵܒܼ̈ܬܹܗ. ܘܐܸܢ ܡ̣ܢ ܥܸܠ̈ܠܵܬܼܵܐ ܢܸܫܬܲܦܲܠ
ܦܲܓܼܪܵܟܼ ܘܲܢܦܘܪܫ ܡ̣ܢ ܥܲܡܠܵܐ: ܘܕܲܬܼܫܲܡܠܸܐ ܗܵܠܹܝܢ ܕܫܸܠܝܵܐ ܐܲܝܟܼ
ܥܝܵܕܼܵܐ ܠܵܐ ܡܸܫܟܲܚ ܐܲܢ̄ܬܿ: ܘܫܲܪܝܼܬܿ ܠܵܟܼ ܡܸܟܹܝܠ ܕܬܸܬܼܒܲܤܲܪ ܡ̣ܢ
ܬܹܐܪܬܵܟܼ ܘܬܸܬܼܩܲܛܲܥ ܘܬܸܬܼܡܥܸܣ: ܒܗܵܝ̇ ܕܗܵܢܵܘ ܥ̇ܒܼܵܕܼܵܐ
ܕܬܹܐܪܬܵܐ ܕܠܵܐ ܬܦܘܼܫ ܡ̣ܢ ܕܬܲܟܸܿܣ ܘܬܸܕܼܩܘܿܪ: ܝܲܬܝܼܪܵܐܝܼܬܼ
ܠܐܲܝܠܹܝܢ ܕܲܬܼܪܝܼܨ ܢܝܼܫܗܘܿܢ: ܠܵܐ ܬܹܐܡܲܪ ܕܘܵܝ ܕܒܲܛܝܼܠ ܐ̄ܢܵܐ:
ܘܲܕܼܦܲܩܵܚ ܗ̄ܘ̣ܵܐ ܠܝܼ ܡܵܕܹܝܢ ܕܐܸܗܘܸܐ ܠܒܲܪ ܘܕܹܐܦܠܘܿܚ ܐܲܝܢܵܐ ܕܗ̤ܘ
ܤܘܼܥܪܵܢܵܐ: ܘܠܵܐ ܟܲܕܼ ܐܝܼܬܼ ܠܝܼ ܫܡܵܐ ܤܦܝܼܩܵܐ ܕܫܸܠܝܵܐ ܘܕܲܚܒܼܘܼܫܝܵܐ:
ܡ̣ܢ ܦܘܼܠܚܵܢܵܐ ܕܹܝܢ ܒܲܛܝܼܠ ܐ̄ܢܵܐ. ܐܵܘ ܟܹܝܬܼ ܕܐܝܼܬܲܝ ܝܑܼܚܝܼܕܼܵܝܵܐ
ܘܲܡܫܵܘܚܕܼܵܐ: ܡ̣ܢ ܙܸܕܼܩܹ̈ܐ ܕܹܝܢ ܕܘܵܠܝܼܬܼܵܬ ܪܲܚܝܼܩ ܐ̄ܢܵܐ ܠܵܐ ܬܹܐܡܲܪ

 565 

ܗܵܕܹܐ. ܐܲܠܵܗܵܐ ܕܹܝܢ ܒܲܤܝܼܡܵܐ ܛܥܝܼܢ ܫܩܘܼܠܬܼܵܐ ܕܲܡܚܝܼܠܘܼܬܲܢ: ܡ̣ܢ
ܗܵܘ̇ ܡܵܐ ܕܐܝܼܬܼ ܠܹܗ ܒܵܥܹ̇ܐ ܡ̣ܢ ܐ̄ܢܵܫ. ܘܝܲܬܿܝܼܪ ܡܸܢܲܢ ܝܵܕܲܥ ܠܲܢ:
ܕܐܲܝܟܲܢ ܗ̄ܘ̣ ܚܲܝܠܲܢ. ܡܵܐ ܕܤܵܦܹ̇ܩ ܚܲܝܠܵܟܼ: ܦܠܘܿܚ. ܘܐܸܢ ܐܵܦܠܵܐ
ܩܲܠܝܼܠ ܡܸܫܟܲܚ ܐܲܢ̄ܬܿ: ܒܚܲܕܼܘܼܬܼܵܐ ܗ̤ܘܲܝܬ ܡܩܲܒܸܠ ܠܒܸܛܠܵܢܵܟܼ
ܕܲܒܼܫܸܠܝܵܐ: ܘܚܲܡܤܸܢ. ܘܲܗ̤ܘܲܝܬܿ ܝܵܕܲܥ̇: ܕܐܸܢ ܠܒܲܪ ܡ̣ܢ ܫܸܠܝܵܐ
ܬܸܗܘܸܐ: ܐܵܦܠܵܐ ܗܵܢܵܐ ܚܘܼܫܵܒܼܵܐ ܡܩܵܘܸܐ ܠܵܘܬܼܵܟܼ: ܐܲܝܟܼ ܕܬܸܬܼܩܲܦܲܚ
ܡ̣ܢ ܬܹܐܪܬܵܟܼ ܥܲܠ ܒܸܛܠܵܢܵܟܼ. ܐܸܠܵܐ ܕܲܠܩܘܼܒܼܠܵܐ: ܓܸܕܼ̈ܫܹܐ ܤܲܓܝܼ̈ܐܹܐ
ܥܵܪܨܝܼܢ ܥܠܲܝܟܼ ܒܝܲܕܼ ܦܸܗܝܵܐ ܘܫܲܪܝܼܘܼܬܼܵܐ ܕܪܸ̈ܓܼܫܹܐ: ܕܲܡܚܲܒܿܠܝܼܢ
ܘܐܵܦ ܠܐܲܝܠܹܝܢ ܕܡ̣ܢ ܟܲܕܼܘܼ ܐܸܬܼܦܠܲܚܘ ܡܸܢܵܟܼ. ܒܗܵܝ̇ ܕܛܲܝܒܿܘܼܬܼܵܐ
ܕܫܸܠܝܵܐ: ܡܸܫܬܲܩܠܵܐ ܡܸܢܵܟܼ. ܘܢܵܦܹ̇ܠ ܐܲܢ̄ܬܿ ܒܢܸܤ̈ܝܘܿܢܹܐ: ܘܦܵܓܼܥ̇ܝܼܢ
ܒܵܟܼ ܓܸܕܼܫܹ̈ܐ ܤܲܓܝܼ̈ܐܹܐ ܕܠܵܐ ܪܥܸܐ ܐܲܢ̄ܬܿ. ܐܸܢ ܢܵܦܹ̇ܠ ܐܲܢ̄ܬܿ
ܒܢܸܤ̈ܝܘܿܢܹܐ: ܠܵܐ ܬܸܦܤܘܿܩ ܤܲܒܼܪܵܟܼ. ܠܲܝܬܿ ܓܹܝܪ ܬܲܓܵܪܵܐ ܕܪܵܕܹܐ
ܒܝܲܡܡܹ̈ܐ ܘܒܼܐܘܼܪ̈ܚܵܬܼܵܐ: ܕܠܵܐ ܦܵܓܼܥ̇ܝܼܢ ܒܹܗ ܚܘܼܤܪ̈ܵܢܹܐ. ܘܠܵܐ ܐܲܟܵܪܵܐ:
ܕܟܼܠܹܗ ܡܟܲܢܵܫܘܼ ܒܲܠܚܘܿܕܼ ܡܟܲܢܸܫ. ܘܠܵܐ ܐܲܬܼܠܹܝܛܵܐ: ܕܠܵܐ ܡܸܬܼܡܚܸܐ
ܘܒܼܵܠܲܥ: ܐܵܦܸܢ ܢܵܤܹ̇ܒܼ ܙܵܟܼܘܼܬܹܗ ܠܚܲܪܬܼܵܐ. ܗܵܟܲܢܵܐ: ܘܲܒܼܗܵܠܹܝܢ ܕܒܹܝܬܼ
ܐܲܠܵܗܵܐ: ܒܗܵܠܹܝܢ ܕܬܲܓܼܵܪ̈ܲܝ ܐܘܼܚܵܐ ܗܵܕܹܐ ܕܠܵܐ ܡܸܬܼܚܲܙܝܵܐ: ܐܝܼܬܼ
ܒܵܗ̇ ܝܘܼܬܼܪ̈ܵܢܹܐ: ܘܚܘܼܤܪ̈ܵܢܹܐ. ܡܚܘܿܬܼܵܐ: ܘܙܵܟܼܘܼܬܼܵܐ. ܟܲܕܼ ܒܵܠܲܥ
ܐܲܢ̄ܬܿ: ܠܵܐ ܬܲܗܦܸܟܼ ܚܲܨܵܟܼ. ܫܒܼܘܿܩ ܠܝܼ.