Isaac of Nineveh. “Discourse 82.” Based upon Digital Syriac Corpus. Last modified March 5, 2019. https://syriaccorpus.org/473.
    
        
            
                ܥܲܠ ܕܲܟܼܡܵܐ ܐܝܼܩܵܪܵܐ ܩܲܢܝܵܐ ܡܲܟܿܝܼܟܼܘܼܬܼܵܐ: ܘܲܟܼܡܵܐ ܪܲܒܿ ܕܲܪܓܼܵܗ̇. ܦܒ.
            
            
                ܨܵܒܹ̇ܐ ܐ̄ܢܵܐ ܕܐܸܦܬܲܚ ܦܘܼܡܝ ܐܲܚܲܝ̈: ܠܲܡܡܲܠܵܠܘܼ ܥܲܠ ܫܲܪܒܵܗ̇
                ܡܥܲܠܝܵܐ ܕܡܲܟܿܝܼܟܼܘܼܬܼܵܐ: ܩܸܢܛܵܐ ܡܸܬܼܡܠܸܐ ܐ̄ܢܵܐ. ܐܲܝܟܼ ܐ̄ܢܵܫ ܕܲܡܦܵܣ:
                ܕܥܲܠ ܐܲܠܵܗܵܐ ܥܬܼܝܼܕܼ ܕܢܸܫܬܲܥܸܐ ܒܬܲܫܥܝܼܬܼܵܐ ܕܡܲܡܠܠܹܗ. ܐܸܤܛܠܵܐ
                ܗ̣̄ܝ ܓܹܝܪ ܕܐܲܠܵܗܘܼܬܼܵܐ: ܡܸܛܠ ܕܡܸܠܬܼܵܐ ܕܐܸܬܼܒܲܪܢܲܫ: ܠܲܒܼܫܵܗ̇
                ܘܡܲܠܸܠ̣ ܒܵܗ̇ ܥܲܡܲܢ ܒܝܲܕܼ ܦܲܓܼܪܲܢ. ܘܟܼܠ ܕܲܠܗܵܕܹܐ ܐܸܬܼܥܲܛܲܦ
                ܫܲܪܝܼܪܵܐܝܼܬܼ: ܠܗܵܘ̇ ܕܲܢܚܸܬܼ ܡ̣ܢ ܪܵܘܡܹܗ: ܘܟܲܤܝܼ ܙܝܼܘܵܐ ܕܪܲܒܘܼܬܹܗ:
                ܘܚܲܦܝܼ ܬܸܫܒܿܘܿܚܬܹܗ ܒܡܘܼܟܵܟܼܵܐ ܡܸܬܿܕܲܡܸܐ: ܕܠܵܐ ܬܤܘܼܦ ܗ̄ܘ̣ܵܬܼ
                ܒܪܝܼܬܼܵܐ ܒܲܚܙܵܬܹܗ. ܒܕܼܵܐܦܠܵܐ ܡܲܨܝܵܐ ܗܘ̣ܵܬܼ ܒܪܝܼܬܼܵܐ ܕܬܸܚܙܹܝܘܗܝ
                ܕܠܵܐ ܡܢܵܬܐ ܕܡܸܢܵܗ̇: ܕܢܸܤܒܼܝܼܗ̇ ܘܒܼܵܗ̇ ܢܡܲܠܸܠ ܥܲܡܵܗ̇: ܘܟܸܢ ܡܲܨܝܵܐ
                ܗ̄ܘ̣ܵܬܼ ܕܬܸܫܡܲܥ ܡܸܠܲܬܼ ܦܘܼܡܹܗ ܐܲܦܝܼ̈ܢ ܒܐܲܦܝܼ̈ܢ. ܠܵܐ ܡܵܘܦܹܝܢ ܗ̄ܘ̣ܵܘ
                ܒܢܲܝ̈ ܝܑܼܤܪܵܝܹܠ ܠܲܡܨܵܬܼ ܩܵܠܹܗ: ܟܲܕܼ ܡ̣ܢ ܓܵܘ ܥܢܵܢܵܐ ܡܡܲܠܸܠ ܗ̄ܘ̣ܵܐ
                ܥܲܡܗܘܿܢ: ܓܲܠܝܵܐܝܼܬܼ ܡܸܫܟܿܚܵܐ ܗ̄ܘ̣ܵܬܼ ܒܪܝܼܬܼܵܐ ܕܲܬܼܩܒܸܠ ܠܲܚܙܵܬܹܗ.
                ܕܗܵܟܲܢ ܐܸܬܼܐܠܸܨܘ: ܥܕܲܡܵܐ ܕܢܹܐܡܪܘܼܢ ܠܹܗ ܠܡܘܼܫܹܐ: ܢܡܲܠܸܠ
                ܥܲܡܵܟܼ: ܘܐܲܢ̄ܬܿ ܐܲܫܡܲܥ ܠܲܢ ܦܸܬܼܓܼܵܡܵܘ̈ܗܝ. ܘܠܵܐ ܢܡܲܠܸܠ ܥܲܡܲܢ
                
                 575 
                
                ܗ̤ܘ: ܕܠܵܐ ܢܡܘܼܬܼ. ܗܵܟܲܢܵܐ ܠܲܡ ܕܚܝܼܠ ܗ̄ܘ̣ܵܐ ܚܸܙܘܵܐ: ܕܐܵܦ ܗ̤ܘ
                ܡܸܨܥܵܝܵܐ ܐܸܡ݂ܲܪ ܗ̄ܘ̣ܵܐ: ܕܕܲܚܝܼܠ ܐ̄ܢܵܐ ܘܪܲܬܿܝܼܬ ܐ̄ܢܵܐ܀ ܐܸܬܼܓܠܝܼ ܓܹܝܪ
                ܥܲܠ ܛܘܼܪܵܐ ܕܤܝܼܢܲܝ ܗ̤ܘ ܙܝܿܘܵܐ ܕܬܸܫܒܿܘܿܚܬܹܗ: ܘܛܘܼܪܵܐ ܟ̱ܠܹܗ
                ܬܵܐܹ̇ܢ ܗ̄ܘ̣ܵܐ ܘܙܵܐܥ ܒܕܸܚܠܵܐ ܕܓܸܠܝܵܢܹܗ ܕܲܥܠܵܘܗܝ. ܐܲܝܟܲܢܵܐ ܕܐܵܦ
                ܚܲܝ̈ܘܵܬܼܵܐ ܕܩܵܪܒܵܢ ܗ̣̄ܘܲܝ̈ ܠܲܫܦܘܿܠܵܘ̈ܗܝ ܕܛܘܼܪܵܐ: ܡܵܝ̈ܬܵܢ ܗ̣̄ܘܲܝ̈.
                ܘܐܸܬܼܥܲܬܲܕܼܘ ܘܐܸܬܿܛܲܝܲܒܼܘ ܟܠܗܘܿܢ ܒܢܲܝ̈ ܝܑܼܤܪܵܝܹܠ: ܒܦܘܼܩܕܵܢܵܐ
                ܕܡܘܼܫܹܐ. ܕܲܢܕܲܟܸܐ ܟܠܢܵܫ ܢܲܦܫܹܗ ܬܠܵܬܼܵܐ ܝܵܘܡ̈ܝܼܢ: ܐܲܝܟܼ ܕܢܸܫܬܿܘܸܐ
                ܠܫܸܡܥܵܐ ܕܩܵܠ ܡܲܡܠܠܹܗ ܕܐܲܠܵܗܵܐ: ܘܲܠܚܙܘܵܐ ܕܓܸܠܝܵܢܵܘ̈ܗܝ.
                ܘܟܲܕܼ ܡܲܛܝܼ ܙܲܒܼܢܵܐ: ܠܵܐ ܐܸܬܼܡܨܝܼܘ ܠܲܡܩܲܒܵܠܘܼ ܚܙܵܬܼܵܐ ܕܢܘܼܗܪܹܗ:
                ܘܥܲܙܝܼܙܘܼܬܼܵܐ ܕܩܵܠܵܐ ܕܪܲܥܡܹܗ.
                ܐܸܠܵܐ ܗܵܫܵܐ ܕܛܲܝܒܼܘܼܬܹܗ ܐܸܫܲܕܼ ܥܲܠ ܥܵܠܡܵܐ ܒܡܹܐܬܼܝܼܬܹܗ: ܕܠܵܐ
                ܗ̄ܘ̣ܵܐ ܒܙܵܘܥܵܐ ܘܠܵܐ ܗ̄ܘ̣ܵܐ ܒܢܘܼܪܵܐ: ܘܠܵܐ ܒܩܵܠܵܐ ܕܚܝܼܠܵܐ ܘܥܲܙܝܼܙܵܐ:
                ܐܸܠܵܐ ܢܚܸܬܼ ܐܲܝܟܼ ܡܸܛܪܵܐ ܥܲܠ ܓܸܙܬܼܵܐ ܕܐܸܡܪܵܐ: ܘܐܲܝܟܼ ܪ̈ܤܝܼܤܹܐ
                ܢܝܼܚܹ̈ܐ ܕܢܵܚ̇ܬܝܼܢ ܪܲܟܿܝܼܟܼܵܐܝܼܬܼ ܥܲܠ ܐܲܪܥܵܐ. ܒܢܝܼܫܵܐ ܐ̄ܚܪܹܢܵܐ ܐܸܬܼܚܲܙܝܲܬ̤
                ܠܹܗ ܕܲܢܡܲܠܸܠ ܥܲܡܲܢ: ܗܵܢܵܘ ܕܹܝܢ: ܕܟܲܕܼ ܢܸܚܡܘܿܠ ܪܲܒܿܘܼܬܹܗ
                ܒܬܲܚܦܝܼܬܼܵܐ ܕܒܸܤܪܵܐ: ܒܲܢ ܢܡܲܠܸܠ ܥܲܡܲܢ: ܒܐܸܤܛܠܵܐ ܗܵܝ̇ ܕܲܙܩܲܪ
                ܠܹܗ ܠܵܗ̇ ܪܸܡܙܵܐ ܡ̣ܢ ܥܘܼܒܵܗ̇ ܕܲܒܼܬܼܘܼܠܬܼܵܐ. ܕܟܲܕ ܢܸܚܙܹܝܘܗܝ ܠܗܵܘ̇
                ܕܲܡܡܲܠܸܠ ܥܲܡܲܢ ܕܒܲܪ ܓܸܢܤܲܢ ܗ̄ܘ̣: ܠܵܐ ܢܸܬܼܪܗܸܒܼ ܡ̣ܢ ܚܙܵܬܹܗ.
                ܡܸܛܠܗܵܢܵܐ ܟܠ ܕܲܠܗܵܕܹܐ ܥܛܵܦܬܼܵܐ ܕܒܼܵܗ̇ ܐܸܬܼܚܙܝܼ ܥܵܒܼܘܿܕܲܢ:
                ܒܝܲܕܼ ܗܵܘ̇ ܦܲܓܼܪܵܐ ܡܠܸܐ ܡ̣ܢ ܩܘܼ̈ܕܹܫܐ ܢܸܠܒܲܫ: ܠܹܗ ܠܲܡܫܝܼܚܵܐ
                ܠܒܼܫܹܗ. ܡܸܛܠ ܕܲܠܗܵܘ̇ ܕܘܼܡܝܵܐ ܕܒܹܗ ܐܸܬܼܚܙܝܼ ܠܲܒܼܪܝܼܬܹܗ
                ܘܐܸܬܼܗܲܦܲܟ ܒܹܗ ܥܲܡܗܘܿܢ: ܐܸܬܼܪܲܓܼܪܲܓܼ ܕܢܸܠܒܲܫ ܥܲܠ ܒܲܪܢܵܫܹܗ
                
                 576 
                
                ܓܵܘܵܝܵܐ: ܘܒܹܗ ܢܸܬܼܚܙܸܐ ܠܲܟܼ̈ܢܵܘܵܬܹܗ. ܘܲܚܠܵܦ ܠܒܼܘܼܫܵܐ ܕܐܝܼܩܵܪܵܐ
                ܘܫܘܼܒܼܚܵܐ ܕܲܠܒܲܪ: ܒܹܗ ܢܸܨܛܲܒܲܬܼ. ܘܡܸܛܠܗܵܢܵܐ ܟܠ ܕܲܠܗܵܕܹܐ
                ܕܡܘܼܬܼܵܐ ܚܵܙ̈ܝܵܢ ܒܹܗ ܒܸܪ̈ܝܵܬܼܵܐ ܕܲܠܒܼܝܼܫ: ܫܲܬܼܝܼ̈ܩܵܬܼܵܐ ܘܡܲܠܵܠܵܬܼ̈ܐ: ܐܲܝܟܼ
                ܕܲܠܡܵܪܵܐ ܤܵܓܼ̈ܕܵܢ ܠܹܗ: ܡܸܛܠ ܐܝܼܩܵܪܵܐ ܕܡܵܪܗܹܝܢ ܕܲܚܙܲܝܵܝ̈ܗܝ ܟܲܕܼ
                ܠܲܒܼܪܵܗ̇ ܗܘ̤ܵܐ ܘܐܸܬܼܗܲܦܲܟܼ ܒܵܗ̇. ܐܲܝܕܵܐ ܡ̣ܢ ܒܸܪ̈ܝܵܬܼܵܐ ܕܠܵܐ ܡܸܬܼܟܲܚܕܼܵܐ
                ܡ̣ܢ ܚܙܵܬܹܗ ܕܡܲܟܿܝܼܟܼܵܐ؟ ܒܪܲܡ ܕܹܝܢ ܥܕܲܡܵܐ ܕܐܸܬܓܠܝܼ ܫܘܼܒܼܚܵܗ̇
                ܕܡܲܟܿܝܼܟܼܘܼܬܼܵܐ ܠܟܼܠ: ܒܲܤܝܵܐ ܗ̄ܘܼܵܬܼ ܥܠܲܝܗܘܿܢ: ܗܵܝ̇ ܚܙܵܬܼܵܐ ܡܲܠܝܲܬܼ
                ܩܘܼ̈ܕܼܫܹܐ. ܗܵܫܵܐ ܕܹܝܢ ܕܐܲܕܼܢܲܚ ܪܲܒܘܼܬܼܵܗ̇ ܠܥܹܝܢ ܥܵܠܡܹ̈ܐ: ܟܠܢܵܫ
                ܡܝܲܩܲܪ ܠܹܗ ܠܗܵܢܵܐ ܕܘܼܡܝܵܐ: ܟܠ ܟܲܪ ܕܡܸܬܼܚܙܸܐ. ܕܲܒܼܗܵܢܵܐ
                ܡܸܨܥܵܝܵܐ: ܒܪܝܼܬܼܵܐ ܫܘ̤ܵܬܼ ܕܲܬܼܩܲܒܸܠ ܚܙܵܬܹܗ ܕܒܼܵܪܘܿܝܵܗ̇. ܘܡܸܛܠܗܵܢܵܐ:
                ܐܵܦܠܵܐ ܥܲܠ ܒܥܸܠܕܒܼܵܒܼܵܘ̈ܗܝ ܕܲܫܪܵܪܵܐ ܒܲܤܝܵܐ: ܘܐܵܦܸܢ ܨܪܝܼܟܼܵܐ ܢܸܗܘܸܐ
                ܡ̣ܢ ܟ̱ܠܵܗ̇ ܒܪܝܼܬܼܵܐ ܡܲܢ ܕܲܩܢ̣ܵܗ̇: ܐܲܝܟܼ ܕܲܒܼܬܼܵܓܼܵܐ ܘܐܲܪ̈ܓܘܵܢܹܐ ܡܸܬܼܝܲܩܲܪ
                ܒܵܗ̇ ܡܲܢ ܕܝܲܠܦ̣ܵܗ̇.
                ܠܡܲܟܿܝܼܟܼܵܐ ܡܸܡܬܼܘܿܡ ܐ̄ܢܵܫ ܠܵܐ ܤܵܢܹ̇ܐ: ܠܵܐ ܛܵܪܹܐ ܠܹܗ ܒܡܸܠܬܼܵܐ:
                ܠܵܐ ܫܵܐܹ̇ܛ. ܘܡܸܛܠ ܕܡܵܪܹܗ ܪܵܚܹ̇ܡ ܠܹܗ: ܥܲܠ ܟܠܢܵܫ ܪܚܝܼܡ.
                ܟܠܢܵܫ: ܡܲܚܸܒܼ ܠܹܗ. ܟܠܢܵܫ: ܡܚܲܒܸܒܼ ܠܹܗ. ܘܟܼܠ ܐܲܝܟܵܐ
                ܕܩܵܪܹܒܼ: ܐܲܝܟܼ ܕܲܒܼܡܲܠܲܐܟܼ ܢܘܼܗܪܵܐ ܚܵܝ̇ܪܝܼܢ ܒܹܗ: ܘܐܝܼܩܵܪܵܐ ܦܵܪܫܝܼܢ
                ܠܹܗ. ܡܡܲܠܸܠ ܚܲܟܝܼܡܵܐ ܘܲܤܦܝܼܪܵܐ ܘܲܡܫܲܠܹܝܢ ܠܹܗ: ܕܲܠܡܲܟܿܝܼܟܼܵܐ
                ܢܸܬܿܠܘܼܢ ܐܲܬܼܪܵܐ ܠܲܡܡܲܠܵܠܘܼ. ܥܲܝܢܵܘ̈ܗܝ ܕܟܼܠܢܵܫ ܠܦܘܼܡܹܗ ܚܵܝܪ̈ܵܢ:
                ܕܡܵܢܵܐ ܦܵܬܼܓܼܵܡܵܐ ܢܵܦܹ̇ܩ ܡܸܢܹܗ. ܘܟܼܠܢܵܫ ܠܦܸܬܼܓܼܵܡܵܘ̈ܗܝ ܡܤܲܟܸܐ:
                
                 577 
                
                ܐܲܝܟܼ ܕܲܠܦܸܓܼܓܼܵܡܹ̈ܐ ܕܡ̣ܢ ܐܲܠܵܗܵܐ. ܒܨܝܼܘܼܬܼܵܐ ܕܦܸܬܼܓܼܵܡܵܘ̈ܗܝ:
                ܐܲܝܟܼ ܡܸܠܬܼܵܐ ܕܤܘܿܦܸܤܛܵܐ ܡܲܥܩܒܼܝܼܢ ܥܲܠ ܤܘܼܟܵܠܵܗ̇. ܚܲܠ̈ܝܵܢ
                ܡܸܠܵܘ̈ܗܝ ܠܡܲܫܡܲܥܬܼܵܐ ܕܚܲܟܿܝܼ̈ܡܹܐ: ܝܲܬܿܝܼܪ ܡ̣ܢ ܟܲܟܵܪܝܼܬܼܵܐ ܠܚܸܟܵܐ
                ܕܐܵܟܼܘܿܠܹܝ̈ܗ̇. ܘܥܲܠ ܐܲܝܟܼ ܐܲܠܵܗܵܐ ܚܫܝܼܒܼ: ܐܵܦܸܢ ܗܸܕܼܝܼܘܿܛܵܐ
                ܐܝܼܬܼܵܘܗܝ ܒܡܸܠܬܹܗ ܘܫܝܼܛܵܐ ܒܲܚܙܵܬܹܗ. ܐܲܝܢܵܐ ܕܥܲܠ ܡܲܟܿܝܼܟܼܵܐ
                ܡܡܲܠܸܠ ܒܲܤܝܵܐܝܼܬܼ: ܠܵܐ ܬܘܼܒܼ ܚܵܫ̇ܒܿܝܼܢ ܠܹܗ ܕܚܲܝ̈ܐ ܗ̄ܘ̣: ܐܸܠܵܐ
                ܐܲܝܟܼ ܐ̄ܢܵܫ ܕܦܵܬܲܚ ܦܘܼܡܹܗ ܥܲܠ ܐܲܠܵܗܵܐ. ܘܲܟܼܡܵܐ ܕܡܸܬܿܬܿܫܝܼܛ
                ܗ̤ܘ ܝܲܬܿܝܼܪ ܒܥܲܝ̈ܢܲܝ ܢܲܦܫܹܗ: ܡ̣ܢ ܟܠܗܹܝܢ ܒܸܪ̈ܝܵܬܼܵܐ ܐܝܼܩܵܪ̈ܵܘܗܝ
                ܬܵܟܼ̇ܒܿܝܼܢ.
                ܩܵܪܹܒܼ ܡܲܟܿܝܼܟܼܵܐ ܠܘܵܬܼ ܚܲܝ̈ܘܵܬܼܵܐ ܚܲܒ̈ܵܠܵܬܼܵܐ: ܘܡܸܚܕܼܵܐ ܕܫܸܟܼܢܲܬ̤
                ܚܙܵܬܼܗܹܝܢ ܥܠܵܘܗܝ: ܡܸܫܬܲܝܢܵܐ ܒܲܥܪܝܼܪܵܝܘܼܬܼܗܹܝܢ: ܘܩܵܪ̈ܒܵܢ
                ܘܡܸܬܿܛܲܦ̈ܝܵܢ ܒܹܗ ܐܲܝܼܟܼ ܕܲܒܼܡܵܪܹܝܢ. ܘܲܡܚܲܪ̈ܟܿܫܵܢ ܒܕܼܘܼܢܒ̈ܝܵܬܼܗܹܝܢ:
                ܘܲܡܠܲܚ̈ܟܼܵܢ ܐܝܼܕܼܵܘ̈ܗܝ ܘܪܸ̈ܓܼܠܵܘܗܝ. ܡܸܛܠ ܕܗܵܘ̇ ܪܹܝܚܵܐ ܕܦܵܐܲܚ
                ܗ̄ܘ̣ܵܐ ܡ̣ܢ ܐܵܕܼܵܡ ܩܕܼܵܡ ܥܒܼܵܪ ܦܘܼܩܕܵܢܵܐ: ܟܲܕܼ ܐܸܬܼܟܲܢܲܫܹ̈ܝܢ ܨܹܐܕܼܵܘܗܝ
                ܘܤܵܡ̣ ܠܗܹܝܢ ܫܡܵܗܹ̈ܐ ܒܦܲܪܕܲܝܤܵܐ: ܡܪ̈ܝܼܚܵܢ ܡܸܢܹܗ. ܗܵܘ̇ ܕܲܫܩܝܼܠ
                ܗ̄ܘ̣ܵܐ ܡܸܢܲܢ: ܘܬܼܘܼܒܼ ܚܲܕܬܹܗ ܝܲܗ̣ܒܹܗ ܠܲܢ ܡܫܝܼܚܵܐ ܒܡܹܐܬܼܝܼܬܹܗ:
                ܗ̤ܘܝܘܼ ܕܐܲܒܼܤܸܡ̣ ܪܹܚܵܐ ܕܓܸܢܤܵܐ ܕܼܲܢܲܝ̈ܢܵܫܵܐ. ܘܐܸܢ ܩܵܪܹܒܼ ܠܘܵܬܼ ܪ̈ܲܚܡܵܠ
                ܩܵܛ̈ܘܿܠܹܐ: ܡܸܚܕܼܵܐ ܕܓܸܫܬܼܵܐ ܕܐܝܼܕܹܗ ܩܸܪܒܲܬ̤ ܠܓܼܘܼܫܡܲܝ̈ܗܘܿܢ: ܩܸܪܲܬ̤
                ܠܵܗ̇ ܥܲܤܩܘܼܬܼ ܥܘܼܙܵܗ̇ ܕܡܸܪܲܬܼܗܘܿܢ ܩܵܛܘܿܠܬܼܵܐ: ܘܒܼܐܝܼܕܼܵܘ̈ܗܝ
                ܦܵܪܹܬܼ ܠܗܘܿܢ ܐܲܝܟܼ ܕܲܠܩܲܡ̈ܨܹܐ. ܘܐܸܢ ܩܵܪܹܒܼ ܨܹܝܕܼ ܒܢܲܝ̈ܢܵܫܵܐ: ܘܐܲܝܟܼ
                ܕܲܒܼܡܵܪܵܐ ܚܵܝ̇ܪܝܼܢ ܒܹܗ. ܘܡܵܢܵܐ ܐܵܡܲ݁ܪ ܐ̄ܢܵܐ ܒܢܲܝ̈ܢܵܫܵܐ؟ ܕܥܲܡ ܟ̱ܠܵܗ̇
                
                 578 
                
                ܒܝܼܫܘܼܬܼܗܘܿܢ ܘܡܲܪܝܼܪܘܼܬܼܗܘܿܢ ܕܫܹ̈ܐܕܹܐ: ܘܟܼܠܹܗ ܚܘܼܬܼܪܵܐ
                ܕܬܲܪܥܝܼܬܼܗܘܿܢ: ܡܵܐ ܕܲܡܛ̣ܵܘ ܠܲܡܲܟܿܝܼܟܼܵܐ: ܗܘ̤ܵܘ ܠܗܘܿܢ ܐܲܝܟܼ
                ܥܲܦܪܵܐ. ܦܸܟܼܗܲܬ̤ ܠܵܗ̇ ܩܲܫܝܘܼܬܼܗܘܿܢ ܟ̱ܠܵܗ̇: ܐܸܫܬܪܝܼܘ ܦܘܪ̈ܤܲܝܗܘܿܢ:
                ܒܛܸܠ̣ ܠܗܹܝܢ ܨܸܢ̈ܥܵܬܼܗܘܿܢ.
                ܗܵܫܵܐ ܕܹܝܢ ܕܚܵܘܝܼܢܵܗ̇ ܠܪܲܒܿܘܼܬܼ ܐܝܼܩܵܪܵܗ̇ ܕܡ̣ܢ ܐܲܠܵܗܵܐ: ܘܚܲܝܠܵܐ
                ܕܒܼܵܗ̇ ܟܤܸܐ: ܢܚܵܘܸܐ ܡܸܟܹܝܠ ܢܲܗܝܼܪܵܐܝܼܬܼ ܕܡܵܢܵܐ ܐܝܼܬܹܝܗ̇ ܗ̤ܝ
                ܡܲܟܿܝܼܟܼܘܼܬܼܵܐ: ܘܐܸܡܲܬܼܝ ܢܸܫܬܿܘܸܐ ܐ̄ܢܵܫ ܕܲܢܩܲܒܿܠܝܼܗ̇ ܡܲܠܝܵܐܝܼܬܼ ܐܲܝܟܼ
                ܕܐܝܼܬܹܝܗ̇. ܘܢܸܥܒܸܕܼ ܦܘܼܪܫܵܢܵܐ ܒܹܝܬܼ ܡܲܟܿܝܼܟܼܵܐ ܕܒܲܦܝܼ̈ܢ: ܠܐܲܝܢܵܐ ܕܠܵܗ̇
                ܠܡܲܟܝܼܟܼܘܼܬܼܵܐ ܕܲܫܪܵܪܵܐ ܐܸܫܬܘܼܝܼ. ܡܲܟܿܝܼܟܼܘܼܬܼܵܐ ܐܝܼܬܹܝܗ̇: ܚܲܝܠܵܐ ܐ̄ܪܵܙܵܢܵܝܵܐ:
                ܕܒܼܵܬܲܪ ܟ̱ܠܹܗ ܫܘܼܡܠܵܝܵܐ ܕܕܘܼܒܵܪܹ̈ܐ ܡܩܲܒܿܠܝܼܢ ܠܵܗ̇ ܩܲܕܝܼ̈ܫܹܐ ܓܡܝܼܪܹ̈ܐ.
                ܘܠܵܐ ܡܸܬܼܝܼܗܸܒܼ ܗܵܢܵܐ ܚܲܝܠܵܐ: ܐܸܠܵܐ ܐܸܢ ܠܐܲܝܠܹܝܢ ܕܟܼܠܹܗ ܫܘܼܡܠܵܝܵܐ
                ܕܲܡܝܲܬܿܪܘܼܬܼܵܐ ܒܚܹܝܠ ܛܲܝܒܿܘܼܬܼܵܐ ܒܲܩܢܘܿܡܗܘܿܢ ܓܡܲܪܘ: ܟܡܵܐ
                ܕܤܵܦܹ̇ܩ ܟܝܵܢܵܐ ܒܲܬܼܚܘܼܡܵܐ. ܒܗܵܝ̇ ܕܲܡܝܲܬܿܪܘܼܬܼܵܐ ܗ̣̄ܝ ܚܵܒܼܫܲܬܼ ܠܟܼܠ.
                ܘܡܸܛܠ ܗܵܢܵܐ: ܠܵܐ ܡܸܫܟܿܚܝܼܢܲܢ ܕܲܠܟܼܠܢܵܫ ܐܲܝܟܼ ܕܐܵܬܼܝܵܐ ܢܸܚܫܒܝܼܘܗܝ
                ܡܲܟܿܝܼܟܼܵܐ: ܐܸܠܵܐ ܐܸܢ ܠܐܲܝܠܹܝܢ ܕܐܸܫܬܿܘܝܼܘ ܠܛܲܟܼܤܵܐ ܗܵܢܵܐ ܕܐܸܡܲܪܢܲܢ.
                ܠܵܘ ܟܠ ܕܒܲܟܼܝܵܢܹܗ ܡܫܲܝܲܢ ܐܵܘ ܫܠܸܐ: ܐܵܘ ܪܡܝܼܣ: ܐܵܘ ܬܲܡܝܲܡ:
                ܗܵܢܵܐ ܡܲܛܝܼ ܠܕܲܪܓܼܵܐ ܕܡܲܟܿܝܼܟܼܘܼܬܼܵܐ. ܐܸܠܵܐ ܡܲܟܿܝܼܟܼܵܐ ܐܝܼܬܼܵܘܗܝ
                ܒܲܫܪܵܪܵܐ: ܐܲܝܢܵܐ ܕܟܲܕܼ ܝܐܝܼܬܼ ܠܹܗ ܒܟܸܤܝܵܐ ܡܸܕܸܡ ܕܫܵܘܹ̇ܐ ܠܪܵܡܘܼܬܼܵܐ:
                ܠܵܐ ܡܸܬܿܬܿܪܝܼܡ. ܐܸܠܵܐ ܐܝܼܬܼܵܘܗܝ ܐܲܝܟܼ ܥܲܦܪܵܐ ܒܚܘܼܫܵܒܼܵܘ̈ܗܝ. ܐܵܦܠܵܐ
                ܠܐܲܝܢܵܐ ܕܲܒܼܥܘܼܗܕܵܢܵܐ ܕܡܵܟܵܬܹ̈ܗ ܐܵܘ ܕܫܵܪ̈ܥܵܬܹܗ ܡܸܬܼܡܲܟܲܟ:
                ܕܢܸܬܼܥܗܸܕܼ ܐܸܢܹܝܢ ܐܲܝܟܼ ܕܢܸܬܿܬܿܒܲܪ ܠܸܒܹܗ ܘܢܸܬܿܬܲܚܬܸܐ ܪܸܥܝܵܢܹܗ ܡ̣ܢ
                ܙܵܘ̈ܥܹܐ ܕܪܵܡܘܼܬܼܵܐ ܒܥܘܼܗܕܵܢܗܹܝܢ: ܩܵܪܹܝܢܲܢ ܡܲܟܝܼܟܼܵܐ ܐܵܦܸܢ ܡܩܲܠܤܵܐ
                
                 579 
                
                ܗܵܕܹܐ. ܕܗܵܐ ܥܕܲܟܹܝܠ: ܐܝܼܬܼ ܠܹܗ ܚ̈ܘܼܫܵܒܹܐ ܕܪܵܡܘܼܬܼܵܐ.
                ܘܡܲܟܿܝܼܟܼܘܼܬܼܵܐ: ܠܵܐ ܩܲܢܝܵܐ ܠܹܗ. ܐܸܠܵܐ ܒܝܲܕܼ ܦܘܼܪ̈ܤܹܐ: ܡܩܲܪܸܒܼ
                ܠܵܗ̇ ܠܘܵܬܹܗ. ܘܐܵܦܸܢ ܡܩܲܠܤܵܐ ܗ̣̄ܝ ܗܵܕܹܐ ܐܲܝܟܼ ܕܐܸܡ̇ܪܹܬܼ: ܘܗܵܕܹܐ
                ܥܕܲܟܹܝܠ ܠܲܝܬܿ ܠܹܗ. ܐܸܠܵܐ ܡܸܒܼܥܵܐ ܗ̄ܘ̣ ܒܵܥܹ̇ܐ ܠܵܗ̇: ܘܠܵܘ ܕܝܼܠܹܗ
                ܗ̤ܝ. ܐܸܠܵܐ ܡܲܟܿܝܼܟܼܵܐ ܓܡܝܼܪܵܐ ܐܝܼܬܼܵܘܗܝ: ܐܲܝܢܵܐ ܕܠܵܐ ܤܢܝܼܩ ܕܗ̤ܘ
                ܢܸܬܼܦܲܪܲܣ ܥܸܠܬܼܵܐ ܠܬܲܪܥܝܼܬܹܗ ܕܬܸܬܼܡܲܟܲܟ. ܘܲܠܟܼܠܗܹܝܢ ܗܵܠܹܝܢ
                ܫܲܡܠܝܼ: ܘܐܲܝܟܼ ܟܝܵܢܵܝܬܼܵܐ ܩܲܢܝܵܐ ܠܹܗ ܕܠܵܐ ܥܲܡܠܵܐ. ܐܲܝܟܲܢܵܐ ܕܐܵܦ
                ܟܲܕܼ ܡܲܘܗܲܒܼܬܼܵܐ ܪܲܒܿܬܼܵܐ ܕܠܵܐ ܤܵܦ̇ܩܵܐ ܠܵܗ̇ ܒܪܝܼܬܼܵܐ ܟ̱ܠܵܗ̇: ܗܵܢܵܘ
                ܕܹܝܢ ܗ̤ܘ ܟܝܵܢܵܐ ܡܩܲܒܸܠ ܠܵܗ̇ ܠܓܼܵܘ ܡܸܢܹܗ: ܗ̤ܘ ܐܲܝܟܼ ܚܲܛܵܝܵܐ
                ܘܲܫܚܝܼܡܵܐ ܚܫܝܼܒܼ ܒܥܲܝ̈ܢܲܝ ܢܲܦܫܹܗ. ܘܟܲܕܼ ܥܲܠܝܼܠ ܒܐ̄ܪ̈ܵܙܹܐ ܕܟܼܠܗܘܿܢ
                ܟܝܵܢܹ̈ܐ ܪ̈ܘܼܚܵܢܹܐ: ܘܓܲܢܒܵܪ ܒܚܸܟܼܡܬܼܵܐ ܕܟܼܠܗܹܝܢ ܒܸܪ̈ܝܵܬܼܵܐ: ܒܟܼܠܵܗ̇
                ܚܲܬܿܝܼܬܼܘܼܬܼܵܐ ܝܵܕܲܥ̇ ܕܡܸܕܸܡ ܠܵܐ ܝܵܕܲܥ̇. ܘܗܵܢܵܐ: ܠܵܘ ܒܦܘܼܪ̈ܤܹܐ.
                ܐܸܠܵܐ ܕܠܵܐ ܥܸܨܝܵܢ: ܗܵܟܲܢ ܐܝܼܬܼܵܘܗܝ ܒܠܸܒܹܗ܀
                ܘܡܲܨܝܵܐ ܟܲܝ ܕܗܵܟܲܢ ܢܸܗܘܸܐ ܒܲܪܢܵܫܵܐ: ܐܝܼܬܼ ܠܹܗ ܠܲܟܼܝܵܢܵܐ
                ܕܲܢܫܲܚܠܸܦ ܗ̤ܘ ܠܹܗ ܗܵܟܲܢ؟ ܠܵܐ. ܡܵܕܹܝܢ: ܠܵܐ ܬܸܬܼܦܲܠܲܓܼ. ܕܚܲܝܠܵܐ
                ܗ̄ܘ̣ ܐ̄ܪܵܙܵܢܵܝܵܐ ܕܩܲܒܸܠ̣: ܘܗ̤ܘܝܘܼ ܕܓܼܵܡܲܪ ܠܹܗ ܒܟܼܠܵܗ̇ ܡܝܲܬܿܪܘܼܬܼܵܐ
                ܕܠܵܐ ܥܲܡܠܵܐ. ܗܵܢܵܘ ܚܲܝܠܵܐ ܗܵܘ̇ ܕܩܲܒܸܠ̣ܘ ܫܠܝܼܚܹ̈ܐ ܛܘܼ̈ܒܼܵܢܹܐ ܒܲܚܙܵܬܼܵܐ
                ܕܢܘܼܪܵܐ. ܘܡܸܛܠܵܬܹܗ ܗ̤ܘ ܕܦܲܩܸܕܼ ܐܸܢܘܿܢ ܦܵܪܘܿܩܲܢ: ܕܡ̣ܢ ܐܘܿ ܪܸܫܠܸܡ
                ܠܵܐ ܢܸܦܪܩܘܼܢ: ܥܕܲܡܵܐ ܕܲܢܩܲܒܿܠܘܼܢ ܚܲܝܠܵܐ ܡ̣ܢ ܪܵܘܡܵܐ: ܕܗ̤ܘܝܘܼ
                ܦܵܪܲܩܠܹܝܛܵܐ ܕܡܸܬܼܦܲܫܲܩ ܪܘܼܚܵܐ ܡܒܲܝܵܐܢܵܐ܀ ܘܗ̤ܘܝܘܼ ܪܘܼܚܵܐ
                ܕܚܸܙ̈ܘܵܢܹܐ. . ܘܗܵܕܲܐ ܗ̣̄ܝ ܕܐܲܡܝܼܪܵܐ ܒܲܟܼܬܼܵܒܼܵܐ ܥܠܲܝܗܘܿܢ: ܕܲܠܡܲܟܿܝܼ̈ܟܹܐ
                ܐ̄ܪ̈ܵܙܹܐ ܡܸܬܼܓܠܹܝܢ. ܗܵܢܵܘ ܕܹܝܢ: ܕܲܠܗܵܢܵܐ ܪܘܼܚܵܐ ܕܓܸܠܝܵܢܹ̈ܐ ܘܲܡܚܵܘܝܵܢܵܐ
                
                 580 
                
                ܕܐ̄ܪ̈ܵܙܹܐ: ܡܸܫܬܿܘܹܝܢ ܡܲܟܿܝܼ̈ܟܹܐ ܕܲܢܩܲܒܿܠܘܼܢܵܝܗܝ ܠܓܼܵܘ ܡܸܢܗܘܿܢ.
                ܘܡܸܛܠܗܵܕܹܐ ܗ̄ܘ̣ ܕܐܲܡܝܼܪܵܐ ܡ̣ܢ ܐ̄ܢܵܫܵܐ ܩܲܕܝܼ̈ܫܹܐ: ܕܡܲܪܝܼܟܼܘܼܬܼܵܐ
                ܒܚܸܙ̈ܘܵܢܹܐ ܐܲܠܵܗܵܝܹ̈ܐ ܓܵܡܪܵܐ ܠܢܲܦܫܵܐ. ܡܵܕܹܝܢ ܠܵܐ ܢܲܡܪܲܚ ܐ̄ܢܵܫ ܠܡܸܪܢܵܐ
                ܥܲܠ ܢܲܦܫܹܗ: ܕܐܲܕܼܪܸܟܼ ܠܲܡܫܘܼܚܬܼܵܐ ܕܡܲܟܿܝܼܟܼܘܼܬܼܵܐ ܒܲܩܢܘܿܡܹܗ:
                ܡܸܛܠ ܚܲܕܼ ܚܘܼܫܵܒܼܵܐ ܕܲܬܼܘܵܬܼܵܐ ܕܲܤܠܸܩ̣ ܠܹܗ ܒܲܙܒܲܢ: ܐܵܘ ܒܩܲܠܝܼܠ
                ܕܸܡ̈ܥܹܐ ܕܲܢܦܲܩ̣ ܠܹܗ: ܐܵܘ ܡܸܛܠ ܚܕܼܵܐ ܫܲܦܝܼܪܬܵܐ ܕܐܝܼܬܼ ܠܹܗ
                ܒܲܟܼܝܵܢܹܗ: ܐܵܘ ܐܲܚܝܼܕܼ ܠܘܵܬܹܗ ܒܥܸܨܝܵܢܵܐ: ܕܲܠܗܵܘ̇ ܕܤܵܟܼܵܐ ܗ̄ܘ̣
                ܕܟܼܠܗܘܿܢ ܐ̄ܪ̈ܵܙܹܐ ܘܚܵܒܼܘܿܫܵܐ ܕܟܼܠܵܗ̇ ܡܝܲܬܿܪܘܼܬܼܵܐ: ܒܲܬܼܚܘܼܡܵܐ
                ܕܲܒܼܥܲܡ̈ܠܹܐ ܙܥܘܿܪܹ̈ܐ ܩܢ̣ܵܐ: ܚܵܫܹ̇ܒܼ ܠܗܘܿܢ ܒܕܼܘܼܟܲܬܼ ܗܵܕܹܐ ܡܵܘܗܲܒܼܬܼܵܐ.
                ܐܸܠܵܐ ܐܸܢܗ̤ܘ ܕܒܲܪܢܵܫܵܐ ܙܟܼܵܐ ܠܟܼܠܗܹܝܢ ܪ̈ܘܼܚܹܐ ܕܲܠܩܘܼ̈ܒܼܠܵܝܵܬܼܵܐ: ܘܠܵܐ
                ܦܲܕܼ ܡܸܢܹܗ ܚܲܕܼ ܡ̣ܢ ܥ̇ܒܼܵܪܹ̈ܐ ܕܲܡܝܲܬܿܪ̈ܵܬܼܵܐ ܟܠܗܹܝܢ: ܕܥܲܠ ܐܲܦܵܘ̈ܗܝ
                ܠܵܐ ܥܡܲܠ̣ ܘܲܩܢ̣ܵܐ: ܘܲܙܟܼܵܐ ܘܡܲܟܸܟܼ ܠܟܼܠܗܘܿܢ ܚܸܤ̈ܢܹܐ ܡܪ̈ܝܼܕܹܐ.
                ܘܒܼܵܬܲܪ ܗܵܝܕܹܝܟ ܒܪܘܼܚܵܐ ܐܲܪܓܸܫ̣ ܒܢܲܦܫܹܗ ܕܩܲܒܿܠܵܗ̇ ܠܡܵܘܗܲܒܼܬܼܵܐ:
                ܟܲܕܼ ܗ̤ܝ ܪܘܼܚܵܐ ܤܵܗ̇ܕܵܐ ܠܪܘܼܚܹܗ: ܐܲܝܟܼ ܡܸܠܬܹܗ ܕܲܫܠܝܼܚܵܐ: ܗܵܢܵܘ
                ܤܵܟܼܵܗ̇ ܕܡܲܟܿܝܼܟܼܘܼܬܼܵܐ. ܛܘܼܒܼܵܘܗܝ ܠܡܲܢ ܕܲܩܢ̣ܵܗ̇: ܕܟܼܠܥܸܕܵܢ
                ܠܥܘܼܒܹܗ ܕܝܼܫܘܿܥ ܡܥܲܦܸܩ ܗܵܢܵܐ܀
                ܐܸܠܵܐ ܡܫܲܐܸܠ ܐ̄ܢܵܫ: ܕܡܵܢܵܐ ܐܸܥܒܸܿܕܼ؟ ܐܲܝܟܲܢ ܐܸܩܢܹܝܗ̇؟ ܒܐܲܝܢܵܐ
                ܦܘܼܪܤܵܐ ܐܸܫܬܿܘܸܐ ܠܡܸܗܘܵܐ ܠܵܗ̇ ܡܩܲܒܿܠܵܢܵܐ؟ ܕܗܵܐ: ܥܵܨܹ̇ܐ ܐ̄ܢܵܐ
                ܢܲܦܫܝ. ܘܟܲܕܼܸ ܡܲܤܒܲܪ ܐ̄ܢܵܐ ܕܲܩܢܹ̇ܝܬܼܵܗ̇: ܚܵܙܹ̇ܐ ܐ̄ܢܵܐ ܕܟܲܕܼ ܠܵܐ ܪܓܼܝܼܫ
                ܐ̄ܢܵܐ: ܗܵܐ ܙܵܘ̈ܥܹܐ ܕܕܲܠܩܘܼܒܼܠܵܗ̇ ܦܵܤܹ̇ܝܢ ܒܓܼܵܘ ܪܸܥܝܵܢܝ. ܘܡܸܟܹܝܠ
                ܢܵܦܹ̇ܠ ܐ̄ܢܵܐ ܡܸܟܵܐ: ܠܲܦܤܵܩ ܤܲܒܼܪܵܐ. ܠܗܵܢܵܐ ܕܗܵܕܹܐ ܡܫܲܐܸܠ:
                
                 581 
                
                ܡܸܬܼܦܲܢܸܐ ܠܹܗ: ܕܦܲܩܵܚ ܠܹܗ ܠܬܲܠܡܝܼܕܼܵܐ ܕܢܸܗܘܸܐ ܐܲܝܟܼ ܪܲܒܹܗ:
                ܘܲܠܥܲܒܼܕܵܐ ܐܲܝܟܼ ܡܵܪܹܗ. ܚܙܝܼ ܗܵܘ̇ ܦܵܩܘܿܕܼܵܗ̇ ܕܗܵܕܹܐ ܘܝܵܗܘܿܒܼܵܗ̇
                ܕܡܵܘܗܲܒܼܬܼܵܐ: ܒܡܵܢܵܐ ܩܲܢܝܵܐ ܗ̄ܘ̣ܵܬܼ ܠܹܗ: ܘܐܸܬܿܕܲܡܵܐ ܒܹܗ ܘܐܵܦ ܐܲܢ̄ܬܿ:
                ܘܡܸܫܟܲܚ ܐܲܢ̄ܬܿ. ܗ̤ܘ ܓܹܝܪ ܐܸܡ݂ܲܪ: ܕܐܵܬܹ̇ܐ ܐܲܪܟܿܘܿܢܹܗ ܕܥܵܠܡܵܐ ܗܵܢܵܐ:
                ܘܒܼܝܼ ܠܲܝܬܿ ܠܹܗ ܡܸܕܸܡ. ܚܵܙܹ̇ܐ ܐܲܢ̄ܬܿ ܐܲܝܟܲܢ ܒܫܘܼܡܠܵܝܵܐ ܕܟܼܠ ܡܝܲܬܪܘܼ
                ܡܸܬܼܩܲܢܝܵܐ ܡܲܟܿܝܼܟܼܘܼܬܼܵܐ؟ ܐܲܝܟܲܢܵܐ ܕܗܵܘ̇ ܕܦܲܩܸܕܼ: ܒܹܗ ܢܡܲܪܸܐ. ܠܬܲܥ̈ܠܹܐ
                ܠܲܡ ܢܸܩ̈ܥܹܐ ܐܝܼܬܼ ܠܗܘܿܢ: ܘܲܠܥܵܘܦܵܐ ܕܲܫܡܲܝܵܐ ܡܲܛܠܠܵܐ: ܘܠܲܒܼܪܹܗ
                ܕܐ̄ܢܵܫܵܐ ܠܲܝܬܿ ܠܹܗ ܐܲܝܟܵܐ ܕܢܸܤܡܘܿܟܼ ܪܹܫܹܗ. ܕܠܹܗ ܬܸܫܒܿܘܿܚܬܼܵܐ ܡ̣ܢ
                ܟܠ ܕܐܸܬܼܓܡܲܪܘ ܘܐܸܬܼܩܲܕܲܫܘ ܘܐܸܫܬܲܡܠܝܼܘ ܒܟܼܠܗܘܿܢ ܕܵܪܹ̈ܐ:
                ܥܲܡ ܐܲܒܼܵܐ ܡܫܲܕܪܵܢܹܗ ܘܪܘܼܚܵܐ ܕܩܘܼܕܼܫܵܐ: ܗܵܫܵܐ ܘܲܒܼܟܼܠܙܒܲܢ
                ܘܲܠܥܵܠܲܡ ܥܵܠܡܝܼܢ. ܐܵܡܹܝܢ.
            
            
                ܫܸܠܡܲܬ̤ ܒܥܘܼܕܼܪܵܢܹܗ ܕܡܵܪܲܢ ܦܵܠܓܘܼܬܼܵܐ ܩܲܕܼܡܵܝܬܼܵܐ ܕܡܵܪܝ ܐܝܼܤܚܵܩ
                ܐܲܦܸܤܩܘܿܦܵܐ ܕܢܝܼܢܘܹܐ.
                
            
            
                . . . ܐܬܟܬܒܬ̤ ܦܠܓܘܬܐ ܗܕܐ ܠܪܒܢ ܕܘܝܕ . . . ܒܩܪܝܬܐ
                ܐܠܛܘܢ ܐܘܟܝܬ . . . ܘܠܵܛܘܼ: ܒܩܠܝܬܐ ܗܝ̇ ܕܒܫܩܝܦܐ . . . .
                ܘܐܬ̣ܘ ܓܢܒ̈ܐ . . . ܘܢܤܒܘ ܟܬܒܘ̈ܗܝ . . . .ܘܐܫܬܟܚܬ̤ ܗܕܐ.
                ܡ̣ܢ ܐܚ̈ܐ. ܕܝܬܒܝܢ ܗܘܘ ܒܩܠܝܬܐ ܗܝ̇ ܕܛܝܵܪܹܗ ܩܪܝܬܐ. ܘܡ̣ܢ
                ܒܬܪ . . . ܫܬܬܥܤܪ̈ܐ ܫܢ̈ܝܢ . . . ܐܫܬܡܠܝܬ̤ ܡ̣ܢ ܐ̄ܢܫ. ܕܫܡܗ
                ܦ. ܘ. ܠ. ܘ. ܣ. ܒܫܢܬ ܐܠܦ ܘܚܡܫܡܐܐ ܘܐܪܒܥܝܢ ܘܫܬ
                ܠܡܠܟܘܬܐ ܕܝܘ̈ܢܝܐ: ܘܒܕܛܚ̈ܐ ܫܬܡܐܐ ܘܬܠܬܝܢ ܘܬܠܬ.