Moshe bar Kepha. “On the Soul - ܡܐܡܪܐ ܕܥܠ ܢܦܫܐ.” Based upon Vat. sir. 147. Digital Syriac Corpus. Last modified March 10, 2019. https://syriaccorpus.org/474.
    
        
            
                ܬܘܒ ܥܠ ܣܒܪܐ ܕܐܠܗܐ ܟܬܒܝܢܢ ܡܐܡܪܐ ܕܥܠ ܢܦܫܐ ܕܥܒܝܕ ܐܝܟ ܕܡܨܝܐ ܠܚܣܝܐ ܡܪܝ ܡܘܫܐ ܐܦܝܣܩܘܦܐ ܗܿܘ ܕܐܬܟܢܝ ܒܪ ܟܐܦܐ
            
            
                ܩܦܠܐܘܢ ܩܕܡܝܐ. ܥܠ ܕܒܟܡܐ ܙܢܝ̈ܐ ܡܬܐܡܪܐ ܢܦܫܐ ܘܕܥܠ ܐܝܕܐ ܢܦܫܐ ܐܝܬܘܗܝ ܢܝܫܢ ܒܟܬܒܐ
                    ܗܢܐ
                ܢܦܫܐ ܗܟܝܐ ܒܫܘܝܘܬ ܫܡܐ ܐܝܬܝܗܿ. ܘܒܙܢܝ̈ܐ ܣܓܝ̈ܐܐ ܡܬܐܡܪܐ ܒܟܬܒܐ ܘܠܘܬ ܟܝܢܐ
                    ܘܥܝܕܐ. ܡܬܐܡܪ ܠܢ ܡܢ ܟܝܢܗ ܕܐܠܗܐ ܢܦܫܐ܆ ܐܝܟ ܗܿܝ ܕܐܡܪ ܡܪܝܐ ܒܐܫܥܝܐ ܢܒܝܐ: ܕܥܕܥܐܕܝ̈ܟܘܢ
                    ܘܪܝܫ ܝܪ̈ܚܝܟܘܢ ܣܢܬ ܢܦܫܝ1
                            ܐܫܥܝܐ ܢܒܝܐ: 14:1 ܘܐܝܟ ܗܿܝ: ܕܝܡܐ ܡܪܐ ܡܪ̈ܘܬܐ ܒܢܦܫܗ2 ܥܡܘܣ
                        ܢܒܝܐ:8:6. ܠܘ ܕܢܦܫܐ ܕܒܪܢܫܐ ܐܝܬ ܠܗ ܠܐܠܗܐ. ܚܣ: ܐܠܐ ܢܦܫܐ ܗܪܟܐ ܠܟܝܢܗ
                    ܕܐܠܗܐ ܘܠܝܬܗ ܡܫܡܗ ܟܬܒܐ ܐܠܗܝܐ. ܡܬܩܪܐ ܕܝܢ ܐܦ ܟܠܗ ܒܪܢܫܐ ܗܿܘ ܕܡܪܟܒ ܡܢ ܢܦܫܐ ܘܡܢ ܦܓܪܐ.
                    ܡܬܩܪܐ ܢܦܫܐ. ܐܝܟ ܗܿܝ ܕܟܬܝܒܐ ܒܚܙܩܝܐܠ ܢܒܝܐ: ܕܢܦܫܐ ܕܚܛܝܐ ܗܝ ܬܡܘܬ3 ܚܙܩܝܐܠ ܢܒܝܐ:4:18 . ܗܪܟܐ
                    ܓܝܪ ܠܟܠܗ ܡܪܟܒܐ ܩܪܐ ܟܬܒܐ ܢܦܫܐ. ܘܝܕܝܥܐ ܡܢ ܗܿܝ ܕܡܘܬܐ ܫܪܝܗ ܕܡܪܟܒܐ ܐܝܬܘܗܝ. ܡܫܬܡܗ ܐܦ
                    ܦܓܪܐ ܒܠܚܘܕܘܗܝ ܢܦܫܐ. ܟܕ ܡܬܬܥܒܪܝܢ ܫܡܗܐ ܘܚ̈ܫܐ. ܡܢ ܡܘܬܐ ܥܠ ܡܝܬܐ܆ܡܛܠ ܚܕܝܘܬܐ ܕܝܠܗܝܢ
                    ܕܡܢܘܬܐ ܥܡ ܚܕܕܐ. ܐܝܟ ܗܿܝ ܕܟܬܝܒܐ ܒܕܘܝܕ ܡܛܠ ܝܘܣܦ: ܕܒܦܪܙܠܐ ܥܠܬ ܢܦܫܗ4
                        ܡܙܡܘܪ̈ܐ:18:105. ܡܬܐܡܪܐ ܬܘܒ ܐܦ ܕܡܐ ܢܦܫܐ. ܐܝܟ ܗܿܝ ܕܐܡܪ ܡܘܫܐ: ܕܢܦܫܐ
                    ܕܟܠ ܒܣܪ ܕܡܐ ܗܝ5 ܣܦܪܐ
                            ܕܟܗܢ̈ܐ:11:17. ܗܪܟܐ ܕܝܢ ܠܕܡܐ ܒܠܚܘܕܘܗܝ ܫܡܗ ܢܦܫܐ. ܡܬܩܪܐ ܬܘܒ
                    ܢܦܫܐ ܐܦ ܚܝܠܐ ܗܿܘ ܡܬܪܣܝܢܐ ܘܡܪܒܝܢܐ ܕܐܝܬ ܠܐܝܠܢ̈ܐ ܘܠܥܣܒܐ ܘܠܙܪ̈ܥܐ ܘܠܟܠ ܡܕܡ ܕܡܬܬܪܣܐ
                    ܘܪܒܐ. ܢܦܫܢܝܐ ܘܡܢܦܫܐ ܡܫܡܗܝܢ ܠܗ ܦܝܠܠܘܣܘܦܐ. ܘܗܢܐ ܚܝܠܐ ܡܬܩܪܐ ܢܦܫܐ ܢـܨܒܬܢܝܬܐ. ܡܫܬܡܗ
                    ܕܝܢ ܬܘܒ ܢܦܫܐ. ܐܦ ܚܝܠܐ ܗܿܘ ܡܪܓܫܢܐ ܘܡܬܬܙܝܥܢܐ ܗܿܘ ܕܐܝܬ ܠܟܠܗܝܢ ܚܝ̈ܘܬܐ. ܘܗܢܐ ܚܝܠܐ
                    ܡܬܩܪܐ ܢܦܫܐ ܚܝܘܬܢܝܬܐ ܘܐܣܛܘܟܣܝܬܐ. ܘܚܝܘܬܢܝܬܐ ܡܬܩܪܝܐ ܡܛܠ ܕܟܠ ܡܕܡ ܕܡܪܓܫ ܘܡܬܬܙܝܥ ܡܢ
                    ܕܘܟܐ ܠܕܘܟܐ ܘܚܝ. ܚܝܘܬܐ ܡܫܡܗܝܢ ܠܗ ܚܟܝ̈ܡܐ ܕܥܕܬܐ. ܐܦ ܓܝܪ ܦܝܠܘܣܘܦܐ ܕܠܒܪ. ܐܣܛܘܟܣܝܬܐ
                    ܕܝܢ ܡܬܩܪܝܐ ܡܛܠ ܕܡܢ ܪܘܟܒܐ ܕܐܣܛܘܟܣܐ ܐܝܬܘܗܝ ܪܘܟܒܗܿ. ܘܗܕܐ ܢܦܫܐ ܚܝܘܬܢܝܬܐ ܘܐܣܛܘܟܣܢܝܬܐ
                    ܐܝܬܝܗܿ ܠܟܠܗܝܢ ܚܝܘܬܐ ܠܐ ܡܠܝܠܬܐ ܐܦ ܠܦܓܪ̈ܐ ܐܢܫܝ̈ܐ ܬܘܒ. ܡܬܐܡܪܐ ܬܘܒ ܢܦܫܐ ܐܦ ܢܦܫܐ
                    ܡܠܝܠܬܐ ܕܐܝܬ ܒܢ ܗܕܐ ܕܒܗܿ ܡܩܒܠܝܢܢ ܢܡܘܣܐ ܘܗܝ ܦܪܫܐ ܠܛܒܬܐ ܡܢ ܒܝܫܬܐ ܠܫܪܪܐ ܡܢ ܕܓܠܘܬܐ.
                    ܘܗܝ ܡܕܒܪܐ ܠܗ ܠܦܓܪܐ ܘܝܗܒܐ ܠܗ ܕܢܬܬܙܝܥ ܡܠܝܠܐܝܬ. ܡܕܝܢ ܒܫܒܥܐ ܙܢܝ̈ܐ ܡܬܐܡܪܐ ܢܦܫܐ ܒܟܬܒܐ
                    ܐܠܗܝܐ ܘܠܘܬ ܟܬܒܐ ܘܥܝܕܐ. ܡܬܝܕܥܝܢ ܬܘܒ ܗܠܝܢ ܫܒܥܐ ܝܬܝܪ ܢܗܝܪܐܝܬ ܡܢ ܦܘܠܓܐ ܕܡܢ ܠܬܚܬ
                    ܪܫܝܡ: 
                ܐ: ܝܬܗ ܘܟܝܢܗ ܕܐܠܗܐ ܐܝܟ ܗܿܝ: ܕܥܕܥܐܕܝ̈ܟܘܢ ܘܪܝܫ ܝܪ̈ܚܝܟܘܢ ܣܢܬ
                        ܢܦܫܝ1 ܐܫܥܝܐ ܢܒܝܐ:
                            14:1
                ܒ: ܟܠܗ ܒܪܢܫܐ ܐܝܟ ܗܿܝ: ܕܢܦܫܐ ܕܚܛܝܐ ܗܝ ܬܡܘܬ2 ܚܙܩܝܐܠ ܢܒܝܐ:4:18 
                ܓ: ܦܓܪܐ ܒܠܚܘܕܘܗܝ: ܢܦܫܐ ܕܣܒܥܐ ܕܝܫܐ ܟܟܪ̈ܝܬܐ3 ܟܬܒܐ ܕܡ̈ܬܠܐ ܕܫܠܝܡܘܢ:7:27 
                ܕ: ܕܡܐ ܒܠܚܘܕܘܗܝ: ܢܦܫܐ ܕܟܠ ܒܣܪ ܕܡܐ ܗܝ4 ܣܦܪܐ ܕܟܗܢ̈ܐ:11:17 
                ܗ: ܢܨܒܬܢܝܬܐ: (ܚܝܠܐ ܡܬܪܣܝܢܐ ܘܡܪܒܝܢܐ ܕܐܝܬ ܠܐܝܠܢ̈ܐ ܘܠܥܣܒܐ)
                ܘ: ܚܝܘܬܢܝܬܐ: ܚܝܠܐ ܡܪܓܫܢܐ ܘܡܬܬܙܝܥܢܐ ܕ…. ܠܚܝܘܬܐ ܘܠܦܓܪ̈ܐ. 
                ܙ: ܡܠܝ̈ܠܬܐ ܗ… ܦܪܫܝܢܢ ܛܒܬܐ ܡܢ ܒܝܫܬܐ ܘܡܬܬܙܝܥܝܢܢ ܡܠܝܠܐܝܬ. 
                ܚܢܢ ܕܝܢ ܥܠ ܢܦܫܐ ܗܝ ܡܠܝܠܬܐ ܐܝܬ ܠܢ ܢܝܫܐ ܒܟܬܒܐ ܗܢܐ ܘܠܘ ܥܠ ܗܠܝܢ
                    ܐܚܪ̈ܢܝܬܐ. 
            
            
                ܩܦܠܐܘܢ ܕܬܪܝܢ. 
                ܕܡܚܘܐ ܕܐܝܬ ܢܦܫܐ
                ܡܫܐܠ ܗܪܟܐ ܐܢܫ ܟܕ ܐܡܪ ܕܡܢ ܐܝܟܐ ܝܕܥܝܢܢ ܕܐܝܬ ܢܦܫܐ. ܟܕ ܠܐ ܡܬܕܪܟܐ ܒܚܕ
                    ܡܢ ܪ̈ܓܫܐ. ܠܐ ܓܝܪ ܡܬܚܙܝܐ ܒܥܝ̈ܢܐ ܘܠܐ ܡܫܬܡܥܐ ܒܐܕܢ̈ܐ. ܘܐܦܠܐ ܡܬܛܥܡܐ ܒܚܟܐ ܘܒܐܝܕܐ ܠܐ
                    ܡܬܬܓܝܫܐ. ܘܒܢܚܝܪ̈ܐ ܠܐ ܡܬܬܣܝܩܐ. ܡܕܝܢ ܠܡ ܡܢ ܐܝܟܐ ܡܬܝܕܥܐ ܕܐܝܬܝܗܿ ܢܦܫܐ. 
                ܩܕܡܝܬ ܝܕܝܥܐ ܕܐܝܬ ܢܦܫܐ ܡܢ ܫܡܗܿ. ܗܿܢܘ ܕܝܢ ܢܦܫܐ ܘܫܡܐ ܠܡܕܡ ܡܫܘܕܥ.
                    ܘܢܦܫܐ ܫܡܐ ܐܝܬܘܗܝ. ܡܕܝܢ ܫܡܐ ܕܢܦܫܐ ܠܡܕܡ ܡܫܘܕܥ. ܐܢܕܝܢ ܡܗܦܟ ܐܢܫ ܘܐܡܪ ܕܐܦ ܠܝܬܘܗܝ ܫܡܐ
                    ܐܝܬܘܗܝ. ܡܫܘܕܥ ܡܕܝܢ ܠܝܬܘܗܝ ܠܡܕܡ. ܐܡܪܝܢܢ ܕܠܝܬܘܗܝ ܠܘ ܫܡܐ ܐܝܬܘܗܝ ܐܠܐ ܫܡܐ ܕܐܝܟ ܐܝܟܢ
                    ܐܝܬܘܗܝ ܫܡܐ ܐܝܬܘܗܝ. ܘܗܿܝ ܐܬܬܘܣܦܬ ܠܗ ܗܿܝ ܠܐ ܗܘܐ ܠܐ ܫܡܐ ܗ ܠܝܬܘܗܝ. ܐܢܕܝܢ ܡܗܦܟ ܗܘ
                    ܘܐܡܪ ܕܐܝܬ ܫܡܐ … ܠܡܕܡ. ܐܟܙܢܐ ܕܥܢܙܐܝܠܐ ܕܫܡܐ ܐܝܬܘܗܝ … ܕܡܫܘܕܥ ܠܡܕܡ ܒܗܿܝ ܕ… ܡܕܡ ܕܡܪܟܒ
                    ܡܢ ܥܙܐ ܘܡܢ ܐܝܠܐ. ܐܡܪܝܢܢ ܬܘܒ ܠܘ … ܕܥܢܙܐܝܠܐ … … ܡܫܘܕܥ ܠܟܝܢܐ ܗܿܘ ܕܡܪܟܒ ܡܢ ܥܙܐ ܘܡܢ
                    ܐܝܠܐ. ܒܗܿܝ ܕܠܝܬ ܡܕܡ ܕܐܝܟ ܗܢܐ. ܐܠܐ ܡܫܘܕܥ ܠܚܘܫ̈ܒܐ ܫܚܝ̈ܡܐ ܡܪ̈ܟܒܐ. ܕܡܪܟܒܝܢ ܡܢ ܥܙܐ
                    ܘܡܢ ܐܝܠܐ ܐܝܟ ܕܐܡܪ ܐܪܝܣܛܘܛܠܝܣ ܕܫܡܗܐ ܡܫܘܕܥܝܢܢ ܠܚܘܫ̈ܒܐ. ܐܬܚܙܝܬ ܐܪܐ ܕܫܡܐ ܠܡܕܡ ܡܫܘܕܥ
                    ܘܢܦܫܐ ܐܝܬܘܗܝ. ܡܕܝܢ ܫܡܐ ܕܢܦܫܐ ܠܡܕܡ ܡܫܘܕܥ. ܐܬܓܠܝܬ ܡܕܝܢ ܕܐܝܬ ܢܦܫܐ. 
                ܝܕܝܥܐ ܕܝܢ ܕܐܝܬ ܢܦܫܐ ܡܢ ܗܿܝ ܕܚܙܝܢܢ ܠܗ ܠܦܓܪܐ ܒܙܒܢ ܡܢ ܡܬܬܙܝܥ. ܒܙܒܢ ܡܢ
                    ܫܠܐ ܡܢ ܙܘܥܗ. ܟܕ ܚܝ ܡܢ ܡܬܬܙܝܥ. ܟܕ ܡܝܬ ܕܝܢ ܫܠܐ ܡܢ ܙܘܥܗ. ܘܗܝ ܗܟܝܠ ܡܬܬܙܝܥܢܘܬܗ ܡܢܗ
                    ܐܝܬܝܗܿ. ܐܘ ܡܢ ܟܝܢܐ ܐܚܪܢܐ. ܘܐܠܘ ܡܢܗ ܐܝܬܝܗܿ ܗܘܬ. ܠܐ ܫܠܐ ܗܘܐ ܡܢ ܡܬܬܙܝܥܢܘܬܗ ܒܙܒܢ.
                    ܝܕܝܥܐ ܗܝ ܕܐܚܪܢܐ ܡܙܝܥ ܠܗ. ܗܿܘ ܕܐܝܬܘܗܝ ܢܦܫܐ. ܐܢܕܝܢ ܡܗܦܟ ܐܢܫ … ܕܡܬܬܙܝܥܢܘܬܗ ܕܦܓܪܐ ܡܢ
                    ܐܣܛܘܟܣܘܗܝ (ܐܝܬܝܗܿ). ܐܡܪܝܢܢ ܕܙܕܩ ܗܘܐ ܡܕܝܢ ܕܠܐ ܢܫܠܐ ܡܢ ܡܙܝܥܢܘܬܗ ܥܕܡܐ ܕܡܫܬܪܝܢ
                    ܐܣܛܘܟܣܘܗܝ (ܡܢ) ܚܕܕܐ ܘܡܦܪܫܝܢ ܡܢܘܬܗ ܘܡܬܦܠܗܕܝܢ (ܐܢ ܗܠܝܢ ܐܝܬܝܗܘܢ) ܥܠܬܐ ܕܡܬܬܙܝܥܢܘܬܗ
                    ܐܝܟ ܡܠܬܟ. ܘܐܢܕܝܢ ܚܙܝܢܢ ܠܗ ܕܫܠܐ ܡܢ ܡܬܬܙܝܥܢܘܬܗ ܟܕ ܥܕܟܝܠ ܐܣܛܘܟܣܘܗܝ ܠܐ ܫܪܝܢ
                    ܘܡܦܠܗܕܝܢ. ܝܕܝܥܐ ܗܝ ܕܡܢ ܐܚܪܢܐ ܐܝܬܝܗܿ ܡܬܬܙܝܥܢܘܬܗ ܗܘ ܕܐܝܬܘܗܝ ܢܦܫܐ. ܟܕ ܡܗܦܟ ܬܘܒ ܕܗܐ
                    ܐܦ ܚܝ̈ܘܬܐ ܠܐ ܡܠܝ̈ܠܬܐ ܚܙܝܢܢ ܠܗܝܢ ܕܒܙܒܢ ܡܬܬܙܝ̈ܥܢ ܒܙܒܢ ܕܝܢ ܠܐ. ܗ ܟܕ ܚܐܢ ܡܢ
                    ܡܬܬܙܝ̈ܥܢ. ܟܕ ܡܝܝ̈ܬܢ ܫܠܝ̈ܢ ܡܢ ܙܘܥܐ. ܬܗܘܐ ܐܦ ܠܗܝܢ ܢܦܫܐ ܡܠܝܠܬܐ ܕܡܙܝܥܐ ܓܘܫܡܝ̈ܗܝܢ.
                    ܐܡܪܝܢܢ ܠܘܬܗ ܕܗܠܝܢ ܠܘ ܡܢ ܢܦܫܐ ܡܠܝܠܬܐ ܡܬܬܙܝ̈ܥܢ ܐܟܙܢܐ ܕܦܓܪ̈ܐ ܐܢܫ̈ܝܐ. ܐܠܐ ܡܢ ܥܠܬܐ
                    ܡܕܡ ܐܚܪܬܐ. ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܘܐܝܟ ܕܚܘܝܢܢ ܒܩܦܠܐܘܢ ܩܕܡܝܐ ܕܢܦܫܐ ܕܚܝܘܬܐ
                    ܠܐ ܡܠܝ̈ܠܬܐ ܐܝܬܝܗܿ ܚܝܠܐ ܡܪܓܫܢܐ ܘܡܬܬܙܝܥܢܐ. ܗܿܘ ܕܗܘ ܐܝܬܘܗܝ ܥܠܬܐ ܕܡܬܬܙܝܥܢܘܬܐ
                    ܕܓܘܫܡܝ̈ܗܝܢ ܘܡܬܩܪܝܐ ܢܦܫܐ ܚܝܘܬܢܝܬܐ. ܐܢܕܝܢ ܡܗܦܟ ܬܘܒ ܘܐܡܪ ܕܐܦ ܠܦܓܪ̈ܐ ܐܢܫܝ̈ܐ ܗܕܐ ܢܦܫܐ
                    ܚܝܘܬܢܝܬܐ ܡܙܝܥܐ. ܐܡܪܝܢܢ ܕܠܦܓܪ̈ܐ ܡܢ ܕܒܢܝ̈ܢܫܐ ܢܦܫܐ ܡܠܝܠܬܐ ܡܙܝܥܐ ܠܗܘܢ. ܠܓܘܫ̈ܡܐ ܕܝܢ
                    ܕܚܝ̈ܘܬܐ ܠܐ ܡܠܝ̈ܠܬܐ ܢܦܫܐ ܚܝܘܬܢܝܬܐ ܡܙܝܥܐ ܠܗܘܢ. ܘܝܕܝܥܐ ܗܕܐ ܡܢ ܗܿܝ ܕܢܦܫܐ ܡܢ ܡܠܝܠܬܐ
                    ܝܗܒܐ ܠܗܘܢ ܠܒܢܝ̈ܢܫܐ ܕܢܬܬܙܝܥܘܢ ܡܠܝܠܐܝܬ. ܢܦܫܐ ܚܝܘܬܢܝܬܐ ܕܝܢ ܝܗܒܐ ܠܚܝ̈ܘܬܐ ܟܝܬ
                    ܕܢܬܬܙܝܥܘܢ ܠܐ ܡܠܝܠܐܝܬ. ܘܡܬܬܙܝܥܢܘܬܐ ܡܠܝܠܬܐ ܦܪܝܫܐ ܡܢ ܡܬܬܙܝܥܢܘܬܐ ܠܐ ܡܠܝܠܬܐ ܒܣܓܝ̈ܐܬܐ.
                    ܦܪܝܫ ܓܝܪ ܒܪܢܫܐ ܕܐܟܠ ܘܫܬܐ ܘܡܙܕܘܓ ܡܠܝܠܐܝܬ. ܟܠ ܕܡܬܬܙܝܥ ܐܘ ܡܢ ܠܓܘ ܡܬܬܙܝܥ ܐܘ ܡܢ ܠܒܪ.
                    ܗܿܘ ܡܢ ܕܡܢ ܠܒܪ ܡܬܬܙܝܥ ܐܝܟ ܙܢܐ ܕܟܐܦܐ ܕܪܚܝܐ ܕܡܬܬܙܝܥܐ ܡܢ ܟܘܕܢܝܐ. ܐܘ ܡܝ̈ܐ. ܗܘ ܕܝܢ
                    ܕܡܬܬܙܝܥ ܡܢ ܠܓܘ. ܐܟܙܢܐ ܕܢܘܪܐ ܕܡܢ ܟܝܢܗܿ ܘܝܬܗܿ ܡܬܬܙܝܥܐ. ܗܿܘ ܕܝܢ ܕܡܢ ܠܒܪ ܡܬܬܙܝܥ ܫܠܐ
                    ܒܙܒܢ ܙܒܢ ܡܢ ܙܘܥܗ. ܗܿܘ ܕܝܢ ܕܡܢ ܠܓܘ ܠܐ ܫܠܐ. ܦܓܪܐ ܗܟܝܠ ܠܘ ܡܢ ܠܒܪ ܡܬܬܙܝܥ. ܘܝܕܝܥܐ ܗܕܐ
                    ܡܢ ܗܿܝ ܕܠܘ ܡܣܬܚܦܘ ܡܣܬܚܦ ܘܐܦܠܐ ܡܬܢܓܕܘ ܡܬܢܓܕ ܐܝܟ ܨܒܘܬܐ ܕܠܐ ܢܦܫ. ܕܡܣܬܚ̈ܦܢ ܘܡܬܢܓ̈ܕܢ
                    ܟܕ ܡܢ ܠܒܪ ܡܙܝܥ ܠܗܝܢ. ܫܪܝܟܐ ܡܕܝܢ ܕܡܢ ܠܓܘ ܡܬܬܙܝܥ. ܘܟܕ ܡܢ ܠܓܘ ܡܬܬܙܝܥ ܠܘ ܡܢ ܟܝܢܗ
                    ܡܬܬܙܝܥ ܐܝܟ ܕܡܬܬܙܝܥܐ ܢܘܪܐ ܡܢ ܟܝܢܗܿ ܐܠܐ ܡܢ ܐܚܪܢܐ. ܝܕܝܥܐ ܗܟܝܠ ܕܢܘܪܐ ܟܝܢܐܝܬ ܡܬܬܙܝܥܐ
                    ܡܢ ܗܿܝ ܕܠܐ ܫܠܝܐ ܡܢ ܙܘܥܗܿ ܟܡܐ ܕܐܝܬܝܗܿ ܢܘܪܐ. ܦܓܪܐ ܕܝܢ ܠܐ ܗܘܐ ܟܝܢܐܝܬ ܡܬܬܙܝܥ. ܘܝܕܝܥܐ
                    ܡܢ ܗܿܝ ܕܫܠܐ ܡܢ ܙܘܥܗ ܟܕ ܐܝܬܘܗܝ ܦܓܪܐ. ܡܕܝܢ ܐܢܗܘ ܕܦܓܪܐ ܠܘ ܡܢ ܠܒܪ ܡܬܬܙܝܥ ܐܝܟ ܨܒܘܬܐ
                    ܕܠܐ ܢܦܫܐ. ܘܠܘ ܟܝܢܐܝܬ ܡܬܬܙܝܥ ܐܝܟ ܢܘܪܐ. ܫܪܝܟܐ ܗܝ ܕܡܢ ܢܦܫܐ ܡܬܬܙܝܥ. ܗܿܝ ܕܐܦ ܗܝ
                    ܐܝܬܝܗܿ ܥܠܬܐ ܕܚܝܘܬܗ. ܫܘܝܢܢ ܠܟܐܦ̈ܐ ܘܠܦܪܙܠܐ ܒܗܿܝ ܕܓܘܫܡܐ. ܘܦܪܝܫܝܢܢ ܡܢܗܘܢ ܒܡܪܓܫܢܘܬܐ.
                    ܫܘܝܢܢ ܕܝܢ ܠܚܝ̈ܘܬܐ ܘܒܡܬܬܙܝܥܢܘܬܐ ܕܡܢ ܕܘܟܐ ܠܕܘܟܐ. ܒܚܝܘܬܐ ܘܒܚܙܬܐ ܘܒܫܡܥܐ ܘܒܫܪܟܐ
                    ܕܪ̈ܓܫܐ ܘ… ܕܐܟܘܬܗܝܢ ܡܬܚܡܬܝܢܢ ܘܪܓܝܢܢ ܒܡܢܐ ܗܟܝܠ ܦܪܝܫܝܢܢ ܡܢܗܝܢ. ܝܕܝܥܐ ܕܒܢܦܫܐ ܡܠܝܠܬܐ.
                    ܡܕܝܢ ܐܝܬܝܗܿ ܢܦܫܐ. ܐܘ ܟܠܗ ܒܪܢܫܐ ܐܝܬܘܗܝ ܡܝܘܬܐ ܘܡܚܒܠܢܐ. ܐܘ ܟܠܗ ܠܐ ܡܝܘܬܐ ܘܠܐ
                    ܡܬܚܒܠܢܐ. ܐܘ ܡܢܗ ܡܢ ܡܝܘܬܐ ܘܡܬܚܒܠܢܐ. ܡܢܗ ܕܝܢ ܠܐ ܡܝܘܬܐ ܘܠܐ ܡܬܚܒܠܢܐ. ܐܘ ܕܠܢܦܫܐ
                    ܢܐܡܪܝܗܿ ܒܪܢܫܐ ܐܝܟ ܕ… ܦܠܛܘܢ. ܕܟܠܗ ܒܪܢܫܐ ܐܝܬܘܗܝ ܡܝܘܬܐ ܘܡܬܚܒܠܢܐ. ܐܘ ܗܘ ܦܓܪܐ
                    ܒܠܚܘܕܘܗܝ ܢܐܡܪܝܘܗܝ ܒܪܢܫܐ ܐܝܟ ܕܐܡܪܝܢ ܐܣܛܘܐܝܩܘ. ܡܢܗ ܕܝܢ ܕܒܪܢܫܐ ܐܝܬܘܗܝ ܡܝܘܬܐ
                    ܘܡܬܚܒܠܢܐ ܐܝܟ ܕܐܡܪ ܦܝܠܛܘܣ. ܗܿܝ ܕܗܝ ܐܝܬܝܗܿ ܫܪܝܪܬܐ. ܝܕܝܥܐ ܡܕܝܢ ܕܐܝܬ ܢܦܫܐ ܡܢ ܗܿܝ …
                    ܕܒܪܢܫܐ ܐܝܬܘܗܝ ܡܝܘܬܐ ܘܡܬܚܒܠܢܐ. ܦܓܪܐ ܡܢܗ ܕܝܢ ܠܐ ܡܝܘܬܐ ܘܠܐ ܡܬܚܒܠܢܐ ܢܦܫܐ. ܡܬܬܘܕܝܐ ܡܢ
                    ܚܟܝ̈ܡܐ ܕܐܝܬ ܐܘܣܝ̈ܣ ܘܐܝܬ ܓܕܫܐ. ܘܗܠܝܢ ܡܢܗܘܢ ܡܢ ܡܬܪ̈ܓܫܢܐ ܡܢܗܘܢ ܕܝܢ ܡܬܝܕܥܢ̈ܐ. ܐܢ
                    ܐܘܣܝ̈ܣ ܘܐܢ ܓܕܫܐ. ܐܠܝـܨܐ ܓܝܪ ܕܓܕܫܐ ܒܐܘܣܝ̈ܣ ܢܬܩܝܡܘܢ. ܡܛܠ ܕܠܐ ܩܢܝܢ ܩܘܝܡܐ ܕܐܝܬܝܗܝܢ
                    ܒܠܥܕ ܐܘܣܝ̈ܣ. ܡܬܬܘܕܝܐ ܬܘܒ ܕܐܝܬ ܐܘܟܡܘܬܐ ܘܚܘܪܘܬܐ ܘܫܪܟܐ. ܘܛܒܬܐ ܘܒܝܫܬܐ ܘܙܕܝܩܘܬܐ
                    ܘܥܘܠܘܬܐ. ܚܘܪܘܬܐ ܡܢ ܘܐܘܟܡܘܬܐ. ܘܓܫܝܡܐ (ܒܓܘܫܡܐ) ܦܫܝܛܐܝܬ ܡܬܩܝܡܝܢ. ܚܘܠܡܢܐ ܕܝܢ ܘܟܘܪܗܢܐ
                    ܒܦܓܪܐ ܡܢܦܫܐ. ܛܒܬܐ ܕܝܢ ܘܒܝܫܬܐ. ܘܙܕܝܩܘܬܐ ܘܥܘܠܘܬܐ ܒܡܢܐ ܡܬܩܝܡܝܢ. ܝܕܝܥܐ ܕܒܢܦܫܐ. ܐܢܗܘ
                    ܡܢ ܕܚܘܪܘܬܐ ܘܐܘܟܡܘܬܐ ܕܐܝܬܝܗܝܢ ܓܕܫܐ ܡܪ̈ܓܫܢܐ ܒܓܘܫܡܐ ܕܐܝܬܘܗܝ ܐܘܣܝܐ ܡܬܪܓܫܢܝܬܐ ܡܩܝܡܝܢ.
                    ܐܦ ܙܕܝܩܘܬܐ ܘܥܘܠܘܬܐ ܕܐܝܬܝܗܝܢ ܓܕܫܐ ܡܬܝܕܥܢ̈ܐ ܐܘܣܝܐ ܡܬܝܕܥܢܝܬܐ ܐܝܬ ܕܢܬܩܝܡܘܢ ܒܗܿ. ܡܕܝܢ
                    ܐܝܬܝܗܿ ܢܦܫܐ. ܝܕܝܥܐ ܬܘܒ ܕܐܝܬ ܢܦܫܐ. ܡܢ ܡܥܒܕܢܘܬܗܿ. ܕܐܝܟ ܐܝܟܢ ܙܒܢ̈ܝܢ ܕܝܢ ܣܓܝ̈ܐܢ ܡܥܡܨ
                    ܐܢܫ ܥܝ̈ܢܐ ܕܦܓܪܗ ܘܚܙܐ ܒܥܝ̈ܢܐ ܐܚܪ̈ܢܝܬܐ ܡܢ ܠܓܘ. ܘܫܬܝܩ ܦܘܡܗ ܘܡܡܠܠ ܒܠܒܗ. ܘܟܕ ܡܒܪܟ ܠܡܢ
                    ܕܨܒܐ ܘܠܐܛ ܠܡܢ ܕܨܒܐ. ܬܘܒ ܟܕ ܒܐܪܥܐ ܐܝܬܘܗܝ ܗܠܝܢ ܕܒܫܡܝܐ ܚܙܐ ܗ ܟܕ ܡܬܗܓܓ. ܘܟܕ ܒܩܪܝܒܘܬܐ
                    ܫܟܝܚ ܠܐܬܪ̈ܘܬܐ ܪ̈ܚܝܩܐ ܚܙܩ ܘܚܙܐ ܡܢܐ ܐܝܬ ܬܡܢ. ܟܕ ܦܓܪܗ ܠܐ ܡܫܢܐ. ܘܬܘܒ ܐܝܬ ܐܡܬܝ ܕܫܬܝܩ
                    ܠܫܢܗ. ܘܡܦܩ ܠܓܠܝܐ ܚܘܫܒܢܐ ܕܠܒܗ ܘܡܫܘܕܥ ܠܗܘܢ ܒܝܕ ܟܬܝ̈ܒܬܐ. ܘܬܘܒ ܚܙܝܢܢ ܠܐܣܝܐ ܟܕ ܒܐܝܕܗ
                    ܠܦܓܪܐ ܓܠܝܐ ܕܟܪܝܗܐ ܓܐܫ. ܥܠ ܚܫܐ ܘܟܐܒܐ ܟܣܝ̈ܐ ܢܦܠ. ܘܗܠܝܢ ܟܠܗܝܢ ܡܥܒܕܢܘܬܐ. ܘܐܝܠܝܢ
                    ܕܕܡܝ̈ܢ ܠܗܝܢ. ܠܘ ܕܦܓܪܐ ܐܝܬܝܗܝܢ ܐܠܐ ܕܢܦܫܐ. ܝܕܝܥܐ ܬܘܒ ܕܐܝܬ ܢܦܫܐ ܡܢ ܫܟܚ̈ܬܐ ܕܐܘܡܢܘܬܐ.
                    ܘܡܢ ܐܝܟܐ ܗܟܝܠ ܩܝܢܝܘܬܐ ܘܐܪܕܝܟܠܘܬܐ ܘܢܓܪܘܬܐ ܘܙܩܘܪܘܬܐ. ܘܓܐܘܡܛܪܝܐ ܘܐܣܛܪܘܡܝܐ
                    ܘܐܪܝܬܡܐܛܝܩܝ. ܡܘܣܝܩܝ ܘܫܪܟܐ ܕܐܘܡܢܘܬܐ ܐܚܪ̈ܢܝܬܐ. ܐܠܐ ܐܢ ܡܢ ܢܦܫܐ ܡܠܝܠܬܐ. ܘܐܢ ܕܝܢ ܡܗܦܟ
                    ܐܢܫ ܘܐܡܪ ܕܐܦ ܠܚܝ̈ܘܬܐ ܠܐ ܡܠܝ̈ܠܬܐ ܐܝܬ ܐܘܡܢܘܬܐ. ܐܟܙܢܐ ܕܠܕܒܘܪܝܬܐ ܡܢ ܦܘܠܚܢܐ ܕܟܟܪܝܬܐ.
                    ܠܓܘܓܝ ܙܩܘܪܐ ܬܡܝܗܐ. ܠܫܘܫܡܢܐ ܬܘܒ ܟܢܘܫܝܐ ܕܥܒܘܪܐ. ܐܡܪܝܢܢ ܠܘܬܗ ܬܪܬܝܢ. ܚܕܐ ܡܢ ܕܚܝ̈ܘܬܐ
                    ܠܐ ܡܠܝ̈ܠܬܐ ܟܝܢܐܝܬ ܣܥܪ̈ܢ ܗܠܝܢ. ܟܕ ܡܬܐܠـܨܝܢ ܡܢ ܩܛܝܪܗ ܕܟܝܢܐ. ܘܠܘ ܨܒܝܢܐܝܬ ܡܢ ܢܦܫܐ
                    ܡܠܝܠܬܐ. ܒܢܝܢܫܐ ܕܝܢ ܨܒܝܢܐܝܬ ܡܢ ܢܦܫܐ ܕܝܢ ܡܠܝܠܬܐ ܝܠܦܝܢ ܐܘܡܢܘܬܐ ܘܠܘ ܟܕ ܡܬܥܨܝܢ ܡܢ
                    ܩܛܝܪܐ ܕܟܝܢܐ. ܕܬܪܬܝܢ ܕܝܢ ܚܝ̈ܘܬܐ ܠܐ ܡܠܝ̈ܠܬܐ ܠܐ ܣܢܝ̈ܩܢ ܥܠ ܡܠܦܢ̈ܐ ܘܝܠܘܦܐ ܠܘܬ ܣܥܘܪܘܬܐ
                    ܕܐܘܡܢܘܬܐ. ܒܢܝ̈ܢܫܐ ܕܝܢ ܣܢܝܩܝܢ ܥܠ ܪ̈ܒܢܐ ܘܬܠܡܝ̈ܕܐ. ܗܠܝܢ ܟܠܗܝܢ ܫܟܚܬܐ ܕܢܦܫܐ ܡܠܝܠܬܐ
                    ܐܝܬܝܗܝܢ. ܝܕܝܥܐ ܬܘܒ ܕܐܝܬ ܢܦܫܐ ܡܢ ܩܕܝܡܘܬ ܡܚܫܒܬܐ ܗܿܝ ܕܐܝܬ ܠܗܿ. ܘܡܢ ܗܿܝ ܕܡܦܩܐ ܠܗ
                    ܠܡܥܒܕܢܘܬܐ ܒܝܕ ܦܓܪܐ ܕܐܝܬܘܗܝ ܐܘܪܓܢܘܢ ܕܝܠܗܿ ܘܛܒܥܐ ܠܗ ܒܗܘܠܐ. ܕܐܝܟ ܐܝܟܢ. ܙܒܢ̈ܝܢ
                    ܣܓܝ̈ܐܢ ܩُܕܡ ܢܓܪܐ ܘܚܐܪ ܒܚܘܫܒܗ ܠܟܘܪܣܝܐ ܗܿܘ ܕܨܒܐ ܕܢܓܪ ܘܡܛܦܣ ܐܣܟܝܡܗ ܘܪܘܡܗ ܘܥܘܡܩܗ
                    ܘܦܬܝܗ ܘܫܘܦܪܗ ܘܚܫܚܬܗ ܘܗܠܝܢ ܕܫܪܟܐ. ܒܬܪܟܢ ܕܝܢ ܡܦܩ ܠܥܒܕܐ ܗܿܘ ܕܩܕܡ ܚܫܠ ܠـܨܒܝܢܗ ܒܝܕ
                    ܐܝܕܝ̈ܐ ܕܝܠܗ ܘܒܝܕ ܥܫܦܐ ܘܩܝܣܐܘܡܬܬܙܝܥܢܘܬܐ. ܗܟܢܐ ܘܐܦ ܐܪܕܝܟܠܐ ܟܕ ܨܒܐ ܕܢܒܢܐ ܒܝܬܐ.
                    ܘܩܝܢܝܐ ܟܕ ܒܥܐ ܙܢܩܝܢܢ ܣܟܬܐ ܕܦܪܙܠܐ. ܗܕܐ ܗܟܝܠ ܩܕܝܡܘܬ ܡܚܫܒܬܐ ܕܢܦܫܐ ܡܠܝܠܬܐ ܐܝܬܝܗܿ
                    ܡܕܝܢ ܐܝܬ ܢܦܫܐ. ܝܕܝܥܐ ܬܘܒ ܕܐܝܬ ܢܦܫܐ ܬܪܬܝܢ ܡܥܒܕܢ̈ܘܬܐ ܣܩܘܒܠܝ̈ܬܐ ܕܐܝܬ ܠܒܪܢܫܐ. ܕܐܝܟ
                    ܐܝܟܢ ܙܒܢ̈ܝܢ ܣܓܝ̈ܐܢ ܟܦܢ ܐܢܫ ܠܐ ܐܟܠ. ܘܨܗܐ ܘܠܐ ܫܬܐ. ܘܨܒܐ ܕܡܙܕܘܓ ܘܠܐ ܡܙܕܘܓ. ܗܠܝܢ
                    ܟܠܗܝܢ ܡܥܒܕܘܢ̈ܘܬܐ ܕܦܓܪܐ ܐܝܬܝܗܝܢ. ܐܝܕܐ ܗܝ ܪܓܬܐ ܕܪܐܓ ܦܓܪܐ ܕܢܐܟܘܠ ܘܢܫܬܐ ܘܠܐ ܐܟܠ ܘܠܐ
                    ܫܬܐ. ܐܠܘܠܐ ܕܟܝܢܐ ܐܚܪܢܐ ܐܝܬ ܕܟܠܐ ܠܗ ܡܢ ܗܕܐ ܘܐܝܕܐ ܗܝ ܥܠܬܐ ܕܪܐܓ ܦܓܪܐ ܕܢܕܡܟ ܐܘ
                    ܕܢܙܕܘܓ. ܘܠܐ ܕܡܟ ܘܠܐ ܡܙܕܘܓ. ܐܠܘܠܐ ܕܟܝܢܐ ܐܚܪܢܐ ܐܝܬ ܕܡܦܓܕ ܠܗ ܡܢ ܗܕܐ. ܠܚܝ̈ܘܬܐ ܕܝܢ ܠܐ
                    ܡܠܝ̈ܠܬܐ ܠܐ ܫܟܝܚܐ ܗܕܐ. ܚܡܪܐ ܕܝܢ ܐܡܬܝ ܕܟܦܢ ܘܡܫܟܚ ܬܒܢܐ ܐܘ ܣܥܪ̈ܐ ܠܐ ܡܫܟܚ ܕܠܐ ܢܐܟܘܠ.
                    ܘܐܡܬܝ ܕܪܐܓ ܕܢܙܕܘܓ ܘܡܫܟܚ ܥܗܢܘܬܐ ܠܘܬ ܗܕܐ ܠܐ ܡܫܟܚ ܕܠܐ ܢܙܕܘܓ. ܡܛܠ ܕܠܝܬ ܠܗ ܢܦܫܐ
                    ܡܠܝܠܬܐ ܕܡܦܓܕܐ ܠܗ ܡܢ ܚܐܦܘܗܝ ܠܐ ܡܠܝ̈ܠܐ. ܕܟܦܢ ܘܡܫܟܚ ܣܝܒܪܬܐ ܘܠܐ ܡܣܬܝܒܪ ܘܨܗܐ ܘܡܫܟܚ
                    ܘܠܐ ܫܬܐ. ܦܓܪܐ ܡܢ ܪܐܓ. ܗܿܘ ܕܡܦܓܕ ܠܗ ܡܢ ܪܓܬܗ ܠܘ ܦܓܪܐ ܗܘ. ܦܓܪܐ ܡܢ ܨܒܐ ܕܢܐܟܘܠ ܗܿܘ
                    ܓܝܪ ܕܡܨܝܡ ܠܗ ܡܢ ܪܓܬܗ ܠܘ ܦܓܪܐ ܗܘ. ܦܓܪܐ ܕܝܢ ܨܒܐ ܕܢܙܕܘܓ. ܗܿܘ ܕܡܢܟܦ ܠܗ ܠܘ ܦܓܪܐ ܗܘ.
                    ܦܓܪܐ ܓܝܪ ܥܪܩ ܡܢ ܡܚܘܬܐ ܘܡܢ ܩܛܠܐ. ܗܿܘ ܕܝܢ ܕܡܫܠܡ ܠܗ ܠܩܛܠܐ ܘܠܡܚܘܬܐ ܥܠ ܣܒܪܐ ܕܡܕܡ. ܠܘ
                    ܦܓܪܐ ܗܘ. ܗܕܐ ܡܕܡ ܟܫܠܐ ܗܘ ܕܗܿܘ ܕܐܝܬܘܗܝ ܢܦܫܐ. ܘܬܘܒ ܗܟܢܐ ܒܪܢܫܐ ܡܢ ܡܛܠ ܕܐܝܬ ܠܗ ܢܦܫܐ
                    ܡܠܝܠܬܐ ܡܨܐ ܕܢܥܒܕ ܘܕܠܐ ܢܥܒܕ. ܙܒܢ̈ܝܢ ܓܝܪ ܣܓܝ̈ܐܢ ܟܕ ܚܝܪ̈ܢ ܥܝܢ̈ܘܗܝ ܡܥܡܨ ܠܗܝܢ ܕܠܐ
                    ܚܙًܝܢ. ܘܟܕ ܫܡܥܢ ܐܕܢܘܗܝ ܡܣܟܪ ܠܗܝܢ ܕܠܐ ܫܡ̈ܥܢ. ܚܝ̈ܘܬܐ ܕܝܢ ܠܐ ܡܠܝ̈ܠܬܐ ܠܐ ܡܫܟܚܢ ܕܠܐ
                    ܢܚܙًܝܢ ܘܕܢܚܙًܝܢ. ܘܕܕܫܡܥܢ ܘܕܠܐ ܫܡܥܢ. ܡܕܝܢ ܐܬܓܠܝܬ ܕܐܝܬ ܢܦܫܐ. ܐܢܗܘ ܡܢ ܗܟܝܠ ܕܬܪܬܝܢ
                    ܡܥܒܕܢ̈ܘܬܐ ܣܩܘܒܠܝ̈ܬܐ ܐܝܬ ܠܒܪܢܫܐ. ܚܕܐ ܡܢ ܕܡܩܝܡܐ ܠܦܓܪܐ. ܐܚܪܬܐ ܕܝܢ ܕܣܬܪܐ ܠܗ. ܝܕܝܥܐ
                    ܕܝܢ ܕܗܕܐ  f.8b  ܡܥܒܕܢܘܬܐ ܕܣܬܪܐ ܠܗܿܝ ܕܦܓܪܐ ܕܢܦܫܐ ܐܝܬܝܗܿ. ܐܢܕܝܢ ܡܗܦܟ ܐܢܫ
                    ܘܐܡܪ ܕܗܠܝܢ ܬܪܬܝܢ ܡܥܒܕܢܘܬܐ ܣܩܘܒܠܝ̈ܬܐ. ܡܢ ܐܣܛܘܟܣܐ ܐܝܬܝܗܝܢ. ܐܡܪܝܢܢ ܠܘܬܗ. ܕܐܣܛܘܟܣܐ
                    ܗܠܝܢ ܕܡܢܗܝܢ ܡܪܟܒ ܒܪܢܫܐ ܠܐ ܣܩܘܒܠܝ̈ܢ ܠܚܕܕܐ. ܒܚܐܦܐ ܕܪܓܬܐ. ܐܝܟܢܐ ܕܣܩܘܒܠܝܐ ܡܥܒܕܢܘܬܐ
                    ܕܢܦܫܐ ܠܡܥܒܕܢܘܬܐ ܕܦܓܪܐ. ܐܝܬ ܐܡܬܝ ܐܝܟ ܗܿܝ ܕܨܒܐ ܦܓܪܐ ܕܢܐܟܘܠ ܘܠܐ ܫܒܩܐ ܠܗ ܢܦܫܐ ܕܢܐܟܘܠ
                    ܡܛܠ ܥܠܬܐ ܐܝܕܐ ܕܨܒܝܐ. ܚܙܝܢܢ ܠܚܝ̈ܘܬܐ ܠܐ ܡܠܝ̈ܠܬܐ ܕܙܝ̈ܥܢ ܡܢ ܒܪܢܫܐ. ܘܦܠܚ̈ܢ ܘܡܫܬܥܒܕܢ.
                    ܘܟܕ ܛܒ ܫܘܝܢ ܠܒܪܢܫܐ ܒܟܠ ܡܕܡ ܕܡܢ ܐܣܛܘܟܣܐ ܐܝܬܘܗܝ. ܠܐ ܕܝܢ ܐܝܬ ܡܢ ܐܕܫ̈ܐ ܕܚܝ̈ܘܬܐ
                    ܕܡܫܬܥܒܕ ܘܦܠܚ ܠܚܒܪܗ ܘܡܡܠܐ ܣܘܢܩܢ̈ܘܗܝ. ܐܝܟܢܐ ܕܡܫܬܥܒܕ ܠܒܪܢܫܐ ܘܡܡܠܐ ܚܫܚܬܗ. ܝܕܝܥܐ ܗܝ
                    ܕܡܛܠ ܕܐܝܬ ܒܗ ܟܝܢܐ ܐܚܪܢܐ ܕܚܝܠܬܢ ܡܢ ܐܣܛܘܟܣܘܗܝ. ܗܿܘ ܕܐܝܬܘܗܝ ܢܦܫܐ. ܘܥܠ ܗܿܝ ܕܡܫܬܥܒܕܢ
                    ܠܗ ܚܝ̈ܘܬܐ ܘܦܠܚ̈ܢ ܠܗ ܥܒܕܘܬܐ. ܘܝܕܝܥܐ ܕܐܝܬ ܢܦܫܐ ܒܒܪܢܫܐ ܡܢ ܗܝ ܕܡܪܟܒ ܣܘܠܘܓܝܣܡܘܣ ܘܡܦܪܫ
                    ܫܪܪܐ ܡܢ ܕܓܠܘܬܐ ܘܛܒܬܐ ܡܢ ܒܝܫܬܐ. ܝܕܝܥܐ ܕܐܝܬ ܢܦܫܐ ܡܢ  f.9a  ܬܚܘܡܗ ܕܒܪܢܫܐ.
                    ܕܐܝܬܘܗܝ ܚܝܐ ܡܠܝܠܐ ܡܝܘܬܐ. ܘܚܝܐ ܡܢ ܘܡܠܝܠܐ ܡܛܠ ܢܦܫܐ ܡܬܐܡܪ. ܡܝܘܬܐ ܕܝܢ ܦܓܪܐ. ܟܠ ܚܕ ܚܕ
                    ܡܢ ܗܕܡ̈ܐ ܗܠܝܢ ܕܡܥܒܕܝܢ ܒܗܘܢ ܪ̈ܓܫܐ ܕܦܓܪܐ ܚܕܐ ܡܥܒܕܢܘܬܐ ܐܝܬ ܠܗ. ܠܥܝ̈ܢܐ ܡܢ ܕܢܚ̈ܙܝܢ.
                    ܠܐܕܢ̈ܐ ܕܝܢ ܕܢܫܡ̈ܥܢ. ܠܦܘܡܐ ܕܝܢ ܠܡܛܥܡ. ܠܢܚܝܪ̈ܐ ܕܝܢ ܠܡܪܚܘ. ܠܐܝܕܝܐ ܠܡܓܫ. ܕܕܐܝܕܐ ܕܝܢ
                    ܦܩܚܐ ܡܢ ܗܠܝܢ ܕܚܙًܝܢ ܥܝ̈ܢܐ ܘܫܡ̈ܥܢ ܐܕܢ̈ܐ ܘܐܝܕܐ ܠܐ ܦܩܚܐ. ܘܐܝܕܐ ܛܒܐ ܘܡܘܬܪܐ ܡܢ ܗܠܝܢ
                    ܕܓܝ̈ܫܢ ܐܝܕܝܐ ܘܐܝܕܐ ܡܚܣܪܐ. ܐܠܐ ܗܕܐ (ܣܥܘܪܘܬܐ) ܠܘ ܪܓܫܐ ܐܝܬܝܗܿ ܕܢܒܚܪܘܢ ܘܢܦܪܫܘܢ.
                    ܘܐܦܠܐ ܕܦܓܪܐ ܐܠܐ ܕܢܦܫܐ ܡܠܝܠܬܐ ܕܗܝ ܕܦܪܫܐ ܕܝܠܢ ܡܢ ܕܠܐ ܕܝܠܢ. ܘܐܝܕܐ ܕܦܩܚܐ ܡܢ ܐܝܕܐ ܕܠܐ
                    ܦܩܚܐ ………
                ܐܝܬ ܗܪܟܐ ܫܬܐ ܚܘܩܝ̈ܢ ܕܐܬܠܚܝܘ ܘܠܐ ܡܬܩܪܝܢ. 
                … ܦܓܪܢܝܬܐ ܚܡܝܡ̈ܬܐ … ܘܩܪܝܪ̈ܬܐ ܡܢ ܪ̈ܟܝܟܬܐ (؟). ܘܡܠܚܝ̈ܬܐ ܡܢ ܦܟܝ̈ܗܬܐ
                    ܘܕܫܪܟܐ. ܪ̈ܘܚܢܝܬܐ ܕܝܢ ܗܝܕܝܢ ܕܪ̈ܡܢ ܡܢܗܿ. ܐܡܪ ܐܢܐ ܕܝܢ ܐܝܠܝܢ ܕܥܕܪ̈ܢ ܘܦܩܚ̈ܢ ܘܐܝܠܝܢ
                    ܕܠܐ ܗܠܝܢ ܕܛܒܢ ܘܡܘܬܪ̈ܢ. ܘܗܠܝܢ  f.9b  ܕܠܐ. ܢܦܫܐ ܡܠܝܠܬܐ ܦܪܫܐ ܠܗܝܢ. ܘܠܘ
                    ܦܓܪܐ. ܐܢܕܝܢ ܡܗܦܟ ܬܘܒ ܘىܘܐܡܪ ܕܗܢܐ ܦܘܦܫܢܐ ܡܘܙܓܗ ܕܦܓܪܐ ܐܝܬܘܗܝ ܐܡܪܝܢܢ ܠܘܬܗ. ܙܕܩ ܗܘܐ
                    ܡܕܝܢ ܕܠܘܬ ܦܝ̈ܠܐ ܘܓܡ̈ܠܐ ܝܬܝܪ ܢܫܬܟܚ ܦܘܪܫܢܐ ܗܢܐ. ܡܢ ܚܝ̈ܘܬܐ ܙܥܘܪ̈ܝܬܐ. ܘܗܐ ܚܙܝܢܢ
                    ܠܗܠܝܢ ܕܩܕܩًܬܐ ܕܝܬܝܪ ܨܢܝ̈ܥܢ ܐܟܙܢܐ ܕܝܢ ܕܬܥܠܐ. ܝܕܝܥܐ ܕܐܝܬ ܢܦܫܐ ܠܒܪܢܫܐ ܡܢ ܗܿܝ
                    ܕܡܬܬܣܝ̈ܡܢ ܠܗ ܢܡܘܣܐ ܕܐܝܠܝܢ ܢܣܥܘܪ. ܘܐܝܠܝܢ ܠܐ ܢܣܥܘܪ. ܗܿܝ ܕܠܚܝ̈ܘܬܐ ܠܐ ܡܠܝ̈ܠܬܐ ܠܐ
                    ܡܫܟܚܐ ܕܬܗܘܐ. ܠܐ ܐܢܫ ܣܐܡ ܢܡܘܣܐ ܠܩܪ̈ܣܐ (ܠܩܪ̈ܩܣܐ) ܕܠܐ ܢܓܢܒܘܢ ܐܘ ܠܝܘܢܐ ܕܠܐ ܢܙܢ̈ܝܢ.
                    ܐܘ ܠܫܘܦܢܝ̈ܢܐ ܕܢܛܪܘܢ ܢܟܦܘܬܐ ܐܘ ܠܐܡܪ̈ܐ ܕܢܗܘܘܢ ܫܦܝ̈ܐ ܘܡܟܝ̈ܟܐ ܐܘ ܠܚܡܪ̈ܐ ܕܢܨܘܡܘܢ
                    ܘܢܨܠܘܢ. ܒܪܢܫܐ ܕܝܢ ܡܛܠ ܕܐܝܬ ܠܗ ܢܦܫܐ ܡܠܝܠܬܐ …………. ܝܕܝܥܐ ܕܐܝܬ ܢܦܫܐ ܠܒܪܢܫܐ ܡܢ ܗܿܝ
                    ܕܕܚܠ ܡܢ ܓܝܗܢܐ……… ܡܠܟܘܬܐ. ܘܦܠܚ ܛܒܬܐ ……ܣܡܒܪܝܫܐ ܟܕ ܡܣܟܠ ܠܦܘܪ…… ܫܦܝܪ ܗܠܝܢ ܕܢܦܫܐ
                    ܡܠܝܠܬܐ. ܘܦܪܫܐ ܘܣܥܪܐ ܠܗܘܢ. ܘܗܠܝܢ ܠܒܘܚ̈ܢܐ ܟܝܢ̈ܝܐ ܘܡܠܝ̈ܠܐ. ܡܚܘܝܢܢ ܕܐܝܬ ܢܦܫܐ ܐܦ ܡܢ
                    ܟܬܒܐ ܩܕܝ̈ܫܐ. ܡܘܫܐ ܡܢ ܐܡܪ: ܕܓܒܠ  f.10a  ܡܪܝܐ ܐܠܗܐ ܠܐܕܡ ܡܢ ܐܕܡܬܐ. ܘܢܦܚ
                    ܒܐܦܘܗܝ ܢܫܡܬܐ ܕܚ̈ܝܐ. ܘܗܘܐ ܐܕܡ ܠܢܦܫ ܚܝܐ1 ܣܦܪܐ ܕܒܪܝܬܐ:7:2. ܕܘܝܕ ܕܝܢ ܙܡܪ: ܒܪܟܝ ܢܦܫܝ
                    ܠܡܪܝܐ. ܘܢܦܩܐ ܪܘܚܗ ܘܗܿܦܟ ܠܐܘܪܥܗ. ܘܢܦܫܝ ܕܝܢ ܬܪܘܙܝ ܒܐܠܗܐ. ܘܫܒܚܝ ܢܦܫܝ ܠܡܪܝܐ2 ܡܙܡܘܪ̈ܐ:2:145 – 2:34
                            – 4:145 – 1:103. ܘܫܠܝܡܘܢ ܐܡܪ: ܕܗܦܟ ܦܓܪܐ ܠܐܪܥܐ ܐܝܟ ܕܗܘܐ.
                    ܘܪܘܚܐ ܠܘܬ ܡܪܝܐ ܕܝܗܒܗܿ3 ܩܘܗܠܬ:8:12. ܘܬܘܒ ܢܦܫܗܘܢ ܕܙܕܝ̈ܩܐ ܒܐܝܕܘܗܝ ܐܢܝܢ ܕܐܠܗܐ4 ܚܟܡܬܐ
                        ܪܒܬܐ:1:3. ܙܟܪܝܐ ܕܝܢ ܐܡܪ: ܕܒܪܐ ܪܘܚܗ ܕܒܪܢܫܐ ܒܓܘܗ5 ܙܟܪܝܐ:1:12. ܘܐܠܝܐ ܐܡܪ:
                    ܡܪܝܐ ܐܠܗܐ ܬܗܦܘܟ ܢܦܫܗ ܕܛܠܝܐ ܠܓܘܗ6 ܣܦܪܐ ܩܕܡܝܐ ܕܡܠܟًܐ:21:17. ܘܕܒܝܬ ܚܢܢܝܐ ܐܡܪܘ:
                    ܒܪ̈ܟܝܢ ܢܦܫ̈ܬܐ ܘܪ̈ܘܚܬܐ ܕܙܕܝ̈ܩܐ ܠܡܪܝܐ7 ܕܢܝܐܠ ܢܒܝܐ:؟. ܚܙܩܝܐܠ ܐܡܪ: ܬܝ ܪܘܚܐ ܡܢ ܐܪܒܥܬ
                    ܪ̈ܘܚܐ ܘܦܘܚ ܒܩܛܝ̈ܠܐ ܘܢܐܚܘܢ8 ܚܙܩܝܐܠ ܢܒܝܐ:9:37. ܘܡܪܝܐ ܐܡܪ: ܡܢܐ ܢܬܗܢܐ
                    ܒܪܢܫܐ ܐܢ ܟܠܗ ܥܠܡܐ ܢܩܢܐ ܘܢܦܫܗ ܢܚܣܪ. ܘܢܦܫܐ ܠܐ ܡܫܟܚܝܢ ܠܡܩܛܠ9 ܡܬܝ:26:16. ܘܐܣܛܦܢܘܣ
                    ܐܡܪ: ܘܗܘܝܢ ܒܡܢܝܢܐ ܫܒܥܝܢ ܘܚܡܫ ܢܦܫ̈ܢ10 ܦܪܟܣܝܣ:14:7. ܘܦܛܪܘܣ ܐܡܪ: ܘܐܬܦܢܝܬܘܢ ܗܫܐ
                    ܠܘܬ ܪܥܝܐ ܕܢܦܫ̈ܬܟܘܢ11
                            ܐܓܪܬܐ ܕܦܛܪܘܣ ܩܕܡܝܬܐ:25:2. ܝܘܚܢܢ ܬܘܒ ܐܡܪ: ܕܐܢ ܢܐܡܪ ܕܠܝܬ ܠܢ
                    ܚܛܝܬܐ ܢܦܫܢ ܡܛܥܝܢܢ1
                            ܐܓܪܬܐ ܕܝܘܚܢܢ ܩܕܡܝܬܐ:8:1. ܘܦܘܠܘܣ ܐܡܪ. ܢܦܫܐ ܓܝܪ ܚܕܐ ܡܢܟܘܢ ܠܐ
                    ܐܒܕܐ. ܘܬܘܒ ܢܕܟܐ ܢܦܫܢ ܡܢ ܨܐܘܬܐ ܒܩܕܝܫܘܬܐ ܕܪܘܚܐ2 ܕܩܘܪ̈ܝܢܬܝܐ ܕܬܪܬܝܢ:1:7. 
            
            
                ܩܦܠܐܘܢ ܕܬܠܬܐ
                ܕܡܚܘܐ ܬܪ̈ܥܝܬܐ ܘܚܘܫ̈ܒܐ  f.11a  ܕܡܠܦܢ̈ܐ ܒܪ̈ܝܐ ܥܠ ܢܦܫܐ
                ܦܝܠܠܘܣܘܦܐ ܗܟܝܠ ܕܠܒܪ. ܡܢܗܘܢ ܡܢ ܐܬܪܥܝܘ ܘܐܡܪܘ ܕܢܦܫܐ ܓܘܫܡܐ ܐܝܬܝܗܿ.
                    ܡܢܗܘܢ ܕܠܐ ܓܫܘܡ ܗܝ. ܘܗܢܘܢ ܡܢ ܕܐܡܪܘܗܿ ܓܘܫܡܐ. ܡܢܗܘܢ ܡܢ ܐܡܪܘ ܕܚܕ ܐܣܛܘܟܣܐ ܐܝܬܝܗܿ.
                    ܡܢܗܘܢ ܕܡܢ ܐܣܛܘܟܣܐ ܣܓܝ̈ܐܐ ܡܪܟܒܐ. ܘܗܿܢܘܢ ܡܢ ܕܐܡܪ ܡܢ ܚܕ ܐܣܛܘܟܣܐ. ܡܢܗܘܢ ܡܢ ܡܝ̈ܐ
                    ܐܡܪܘܗܿ ܕܐܝܬܝܗܿ. ܗܢܐ ܕܝܢ ܐܝܬܘܗܝ ܗܘܐ ܬܐܠܝܣ. ܡܢܗܘܢ ܕܝܢ ܐܐܪ. ܗܢܐ ܕܝܢ ܐܝܬܘܗܝ ܗܘܐ
                    ܐܢܐܟܣܝܡܟܘܣ. ܡܢܗܘܢ ܕܝܢ ܢܘܪܐ ܐܡܪܘܗܿ. ܗܢܐ ܕܝܢ ܐܝܬܘܗܝ ܗܘܐ ܐܪܩܠܝܛܘܣ. ܡܢ ܐܪܥܐ ܕܝܢ ܠܐ
                    ܗܘܐ ܒܗܘܢ ܕܐܡܪܚ ܕܢܐܡܪ ܕܐܝܬܝܗܿ ܢܦܫܐ. ܡܛܠ ܕܣܓܝܐܐ ܣܩܘܒܠܝܘܬܐ ܕܐܝܬ ܒܝܬ ܩܛܝܢܘܬܐ ܕܢܦܫܐ
                    ܠܟܝܢܐ ܕܐܪܥܐ. ܗܿܢܘܢ ܕܝܢ ܕܐܡܪ ܕܡܢ ܐܣܛܘܟܣܐ ܣܓܝ̈ܐܐ ܡܪܟܒܐ. ܡܢܗܘܢ ܡܢ ܐܡܪ ܕܐܝܬܝܗܿ ܕܡܐ
                    ܕܚܕܪܝ ܠܒܐ. ܗܢܐ ܕܝܢ ܐܝܬܘܗܝ ܗܘܐ ܐܡܦܝܩܠܝܛܘܣ. ܡܢܗܘܢ ܕܝܢ ܪܘܚܐ ܐܡܪܘܗܿ. ܗܢܐ ܕܝܢ ܐܝܬܘܗܝ
                    ܗܘܐ ܐܩܪܐܛܝܣ. ܡܢܗܘܢ ܕܝܢ ܪܘܟܒܐ ܕܡܢ ܓܘܫ̈ܡܐ ܙܥܘܪ̈ܐ ܕܦܪܚܝܢ ܒܐܐܪ. ܗܢܐ ܕܝܢ ܐܝܬܘܗܝ ܗܘܐ
                    ܕܘܡܩܪܛܝܣ. ܗܠܝܢ ܗܟܝܠ ܟܠܗܘܢ ܕܐܡܪܝܢ ܗܘܘ ܕܓܘܫܡܐ ܐܝܬܝܗܿ ܢܦܫܐ ܐܝܬܝܗܘܢ ܗܘܘ ܐܣܛܘܐܝ̈ܩܘ.
                    ܗܿܢܘܢ ܕܟܠ ܡܕܡ ܓܘܫܡܐ ܐܡܪܝܢ ܗܘܘ ܕܐܝܬܘܗܝ. ܘܐܦ ܠܗ ܠܐܠܗܐ ܓܘܫܡܐ ܩܛܝܢܐ ܐܡܪܝܢ ܗܘܘ ܠܗ  f.11b  ܗܿܢܘܢ ܕܝܢ ܕܠܐ ܓܫܘܡ ܐܡܪ ܕܐܝܬܝܗܿ ܢܦܫܐ. ܐܦ ܗܢܘܢ ܡܬܦܠܓܝܢ ܟܕ ܡܢܗܘܢ ܡܢ
                    ܐܡܪܘ ܕܩܢܘܡܐ ܐܝܬܝܗܿ ܘܡܢܗܿ ܘܠܗܿ ܡܩܝܡܐ ܘܠܐ ܣܢܝܩܐ ܕܒܐܚܪܢܐ ܬܬܩܝܡ. ܡܢܗܘܢ ܕܝܢ ܐܡܪܘ ܕܠܐ
                    ܐܝܬܝܗܿ ܩܢܘܡܐ ܕܠܘ ܡܢܗܿ ܘܠܗܿ ܡܩܝܡܐ ܐܠܐ ܒܐܚܪܢܐ. ܘܗܢܘܢ ܡܢ ܕܐܡܪܘܗܿ ܩܢܘܡܐ ܕܡܩܝܡ ܡܢܗܿ
                    ܘܠܗܿ. ܘܠܗ ܟܝܢܐ ܕܝܠܢܝܐ ܐܡܪܘ ܕܐܝܬܝܗܿ ܕܡܬܬܙܝܥ ܘܚܝ ܘܐܝܬ ܠܗܿ ܡܥܒܕܢܘܬܐ ܡܢܗܿ ܘܠܗܿ. ܗܠܝܢ
                    ܕܝܢ ܕܐܡܪܘܗܿ ܕܠܐ ܐܝܬܝܗܿ ܩܢܘܡܐ ܐܠܐ ܒܐܚܪܢܐ ܡܩܝܡܐ. ܡܢܗܘܢ ܡܢ ܐܡܪܘ ܕܐܝܬܝܗܿ ܐܝܟ ܚܙܬܐ
                    ܒܥܝܢܐ ܘܐܝܟ ܚܘܪܘܬܐ ܒܬܠܓܐ. ܘܐܝܟ ܚܠܝܘܬܐ ܒܕܒ… (ܡܢܗܘܢ) ܡܢ ܐܡܪܘ ܕܐܝܬܝܗܿ ܚܝܠܐ ܕܡܘܙܓܐ
                    ܕܐܣܛܘܟܣܐ …ܪܝܢ ܠܡܥܒܕܢܘܬܐ ܕܡܬܝܠܕܐ ܡܢ ܚܒܝܟܘܬܗܘܢ ܐܝܕܐ ܕܠܐ ܫܟܝܚܐ ܗܘܬ ܒܟܠ ܚܕ ܚܕ ܡܢܗܘܢ
                    ܡܢܗ ܘܠܗ. ܐܟܙܢܐ ܕܟܕ ܡܬܚܒܟܝܢ ܒܚܕܕܐ. ܕܒܫܐ ܘܚܡܪܐ ܘܦܠܦ̈ܠܐ ܡܬܝܠܕܐ ܡܢܗܘܢ ܡܥܒܕܢܘܬܐ ܐܝܕܐ
                    ܕܠܐ ܐܝܬܝܗܿ ܗܘܬ ܠܚܕ ܚܕ ܡܢܗܘܢ ܡܢ ܩܕܝܡ. ܘܐܟܙܢܐ ܕܥܩܪ̈ܐ ܣܓܝ̈ܐܐ ܟܕ ܡܬܚܒܟܝܢ ܘܡܬܓܒܠܝܢ
                    ܡܬܝܠܕܐ ܡܢܗܘܢ ܣܥܘܪܘܬܐ ܕܠܐ ܐܝܬܝܗܿ ܗܘܬ ܒܚܕ ܚܕ ܡܢܗܘܢ ܡܢ ܩܕܝܡ ܕܢܬܓܒܠܘܢ. ܗܟܢܐ ܐܦ
                    ܐܣܛܘܟܣܐ ܟܕ ܡܬܡܙܓܝܢ ܒܡܫܘܚܬܐ ܫܘܝܬܐ ܡܬܩܝܡ ܡܢܗܘܢ ܦܓܪܐ. ܘܡܬܝܠܕ ܡܢ ܡܘܙܓܗܘܢ. ܚܝܠܐ ܗܿܘ
                    ܕܠܐ ܗܘܐ ܒܚܕ ܚܕ ܡܢܗܘܢ  f.12a  ܡܢ ܩܕܝܡ. ܗܢܐ ܕܝܢ ܚܝܠܐ ܐܝܬܘܗܝ ܟܝܢܗܿ ܕܢܦܫܐ.
                    ܘܐܟܙܢܐ ܠܡ ܕܡܥܒܕܢܘܬܐ ܘܣܥܘܪܘܬܐ ܐܘ ܚܝܠܐ ܟܕ ܡܬܦܪܫܝܢ ܡܢ ܗܿܢܘܢ ܕܒܗܘܢ ܡܡܬܩܝܡܝܢ ܘܡܬܚܒܠܝܢ
                    ܗܟܢܐ ܘܐܦ ܢܦܫܐ. ܟܕ ܡܬܦܪܫܐ ܡܢ ܦܓܪܐ ܡܬܚܒܠܐ. ܗܕܐ ܗܟܝܠ ܬܪܥܝܬܐ ܐܝܬܝܗܿ ܗܘܬ ܕܐܠܟܣܢܕܪܘܣ
                    ܕܐܡܦܪܝܕܝܣܝܐ. ܡܢܗܘܢ ܕܝܢ ܐܡܪ ܕܐܝܬܝܗܿ ܢܦܫܐ ܐܘܪܡܢܝܐ ܕܚܘܒܟܗܘܢ ܕܐܣܛܘܟܣܐ. ܟܕ ܡܢ ܕܘܡܝܐ
                    ܗܕܐ ܕܒܐܘܪܡܢܝܐ ܡܬܩܝܡܐ ܒܢܩܫܐ ܡܛܟܣܐ ܕܡܢ̈ܝ ܩܝܬܪܐ ܢܣܒܘܗܿ ܠܗܕܐ. ܘܐܝܟܢܐ ܠܡ (ܕܩܝܬܪܐ) …
                    ܟܕ ܡܬܦܪܫܝܢ ܡܢܗ ܡܢ̈ܐ ܕܩܝܬܪܐ ……ܡ. ܗܟܢܐ ܐܦܠܐ ܢܦܫܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. ܘܗܕܐ
                    ܬܪܥܝܬܐ ܐܝܬܝܗܿ ܗܘܬ ܕܐܩܪܐܛܝܣ. ܡܢܗܘܢ ܡܢ ܐܡܪܘ ܐܝܬܝܗܿ ܐܢܛܘܠܝܟܝܐ ܕܦܓܪܐ. ܗܘܝܘ ܫܘܡܠܝ ܗܕܐ
                    ܐܕܫܗ ܕܦܓܪܐ. ܗܢܐ ܐܝܬܘܗܝ ܗܘܐ ܐܪܝܣܛܘܛܐܠܝܣ. ܙܕܩ ܗܟܝܠ ܕܝܢܗ. ܪܢܗܿ ܠܗܕܐ ܐܪܝܣܛܛܠܝܣ ܕܝܢ
                    ܬܠܬ ܐܘܣܝ̈ܣ ܐܡܪ ܕܐܝܬ. ܚܕ ܡܢܗܘܢ ܗܘܠܐ ܗܝ ܕܣܝܡܐ. ܐܚܪܬܐ ܕܝܢ ܕܡܘܬܐ ܘܐܕܫܐ ܗܿܘ ܕܒܗ
                    ܡܬܬܙܝܥܐ ܗܘܠܐ ܐܚܪܬܐ ܕܝܢ ܗܿܝ ܕܡܪܟܒܐ ܡܢ ܬܪ̈ܬܝܗܝܢ ܗܠܝܢ. ܡܢ ܗܘܠܐ ܐܡܪ ܐܢܐ ܘܡܢ ܐܕܫܐ.
                    ܘܠܗܿܝ ܡܢ ܐܘܣܝܐ ܕܐܝܬܝܗܿ ܗܘܠܐ. ܚܝܠܐ ܡܫܡܗ ܠܗܿ. ܒܗܿܝ ܕܡܟܢܐ  f.12b  ܕܬܩܒܠ
                    ܠܕܡܘܬܐ. ܠܗܿܝ ܕܝܢ ܐܘܣܝܐ ܕܐܝܬܝܗܿ ܕܡܘܬܐ ܘܐܕܫܐ ܐܢܛܘܠܝܟܝܐ ܡܫܡܗ ܠܗܿ ܡܛܠ ܕܐܝܬܝܗܿ ܫܘܡܠܝܗ
                    ܕܓܘܫܡܐ. ܘܐܝܟ ܕܠܬܚܘܝܬܐ ܡܢܗܪܢܝܬܐ ܕܗܠܝܢ ܕܐܡܪ ܐܪܝܣܛܛܠܝܣ ܒܗܘܢܟ ܠܗܘܠܐ ܒܕܡܘܬ ܢܚܫܐ ܫܪܝܪܐ
                    ܘܦܫܝܛܐ ܕܠܐ ܥܕܟܝܠ ܩܒܠ ܐܣܟܝܡܐ ܐܝܢܐ ܕܗܘ. ܠܐܕܫܐ ܘܕܡܘܬܐ ܐܝܟ ܐܣܟܝܡܐ ܕܐܢܕܝܪܝܢܛܐ ܗܿܘ
                    ܕܡܪܟܒ ܡܢ ܢܚܫܐ ܘܡܢ ܐܣܟܝܡܐ ܠܐܘܣܝܐ. ܡܕܝܢ ܬܠܝܬܐܝܬ ܝܕܥ ܠܗ ܐܪܝܣܛܘܛܐܠܝܣ: 
                (ܐ: ) ܚܕ ܡܢ ܗܘܠܐ ܚܝܠܐ ܩܪܐ ܠܗ ܐܝܟ ܢܚܫܐ ܕܠܐ ܡܣܟܡ ܘܠܐ ܡܪܝܡ
                (ܒ: ) ܐܚܪܬܐ ܕܝܢ ܐܕܫܐ ܘܕܡܘܬܐ ܐܢܛܘܠܝܟܝܐ ܡܫܡܗ ܠܗ ܐܝܟ ܕܡܘܬܐ 
                 ܘܐܣܟܝܡܐ ܘܐܕܫܐ
                (ܓ: ) ܐܚܪܬܐ ܕܝܢ ܗܿܝ ܗܝ ܕܡܢ ܗܘܠܐ ܐܕܫܐ ܡܪܟܒܐ. ܐܝܟ ܐܢܕܪܝܢܛܐ ܡܪܟܒ 
                 ܡܢ ܢܚܫܐ ܘܡܢ ܐܣܟܝܡܐ ܕܒܪܢܫܐ. 
                ܐܡܪܗܿ ܗܟܝܠ ܐܪܝܣܛܛܠܝܣ ܕܐܝܬܝܗܿ ܢܦܫܐ ܐܢܛܘܠܝܟܝܐ ܒܗܢܐ ܙܢܐ. ܒܗܿܝ ܕܐܝܬܝܗܿ
                    ܫܘܡܠܝܗ ܘܐܕܫܗ ܕܦܓܪܐ. ܐܟܙܢܐ ܠܡ ܕܐܣܟܝܡܗ ܘܐܕܫܗ ܕܐܢܕܪܝܢܛܐ ܘܣܟܡܗ ܘܫܘܡܠܝܗ ܠܐܢܕܪܝܢܛܐ  f.13a  ܟܕ ܐܬܐ ܢܚܫܐ ܡܢ ܗܿܘ ܕܒܚܝܠܐ ܐܝܬܘܗܝ ܗܘܐ ܠܘܬ ܡܥܒܕܢܘܬܐ. ܒܕܓܘܢ ܐܝܬܘܗܝ
                    ܐܘܣܝܐ ܕܝܠܗ ܕܐܢܕܪܝܢܛܐ. ܗܟܢܐ ܘܐܦ ܢܦܫܐ ܐܝܬܝܗܿ ܫܘܡܠܝܗܿ ܘܐܕܫܗܿ ܕܦܓܪܐ. ܘܒܕܓܘܢ ܠܡ
                    ܐܢܛܘܠܝܟܝܐ ܕܦܓܪܐ ܐܝܬܝܗܿ. ܘܐܟܙܢܐ ܬܘܒ ܕܟܕ ܗܘܬ ܚܙܬܐ ܫܡܠܝܬ ܠܥܝܢܐ. ܗܟܢܐ ܘܟܕ ܗܝ ܢܦܫܐ
                    ܫܡܠܝܬ ܠܚܝܘܬܐ. ܘܗܠܝܢ ܡܢ ܡܢ ܬܪ̈ܥܝܬܐ ܘܚܘܫ̈ܒܐ ܕܐܬܪܥܝܘ ܘܚܫܒܘ ܥܠܝܗܿ ܦܝܠܠܘܣܘܦܐ ܕܠܒܪ ܡܛܠ
                    ܢܦܫܐ. ܡܬܝܕܥܢ ܗܠܝܢ ܝܬܝܪ ܢܗܝܪܐܝܬ ܡܢ ܦܘܠܓܐ ܗܢܐ ܕܡܢ ܠܬܚܬ ܪܫܝܡ: 
                ܡܢܗܘܢ ܡܢ ܓܘܫܡܐ ܐܡܪܘܗܿ ܕܐܝܬܝܗܿ ܢܦܫܐ: 
                
                    ܡܢܗܘܢ ܡܢ ܐܡܪ ܕܚܕܐ ܐܣܛܘܟܣܐ ܐܝܬܝܗܿ
                    ܡܢܗܘܢ ܕܝܢ ܐܣܛܘܟܣܐ ܣܓܝ̈ܐܐ
                    ܡܢܗܘܢ ܐܡܪܘܗܿ ܢܘܪܐ ܐܝܬܝܗܿ: ܗܪܐܩܠܝܛܝܘܣ
                    ܡܢܗܘܢ ܕܝܢ ܐܐܪ ܐܡܪ: ܐܢܐܟܣܝܡܝܢܘܣ
                    ܡܢܗܘܢ ܕܝܢ ܡܢ ܡܝ̈ܐ ܐܡܪܘܗܿ: ܐܡܦܪܩܠܝܛܘܣ
                    ܡܢܗܘܢ ܕܝܢ ܪܘܚܐ ܕܢܫܒܐ ܐܡܪܘܗܿ: ܐܩܪܐܛܝܣ
                    ܡܢܗܘܢ ܕܝܢ ܪܘܟܒܐ ܕܡܢ ܓܘܫ̈ܡܐ ܙܥܘܪ̈ܐ ܕܦܪܚܝܢ ܒܐܐܪ: ܡܩܪܝܛܝܣ
                    ܡܢܗܘܢ ܕܕܠܐ ܓܘܫܡܐ
                    ܡܢܗܘܢ ܡܢ ܐܡܪܘ ܕܡܢܗܿ ܘܠܗܿ ܡܩܝܡܐ ܒܩܘܝܡܗܿ
                    ܡܢܗܘܢ ܕܝܢ ܐܪܡܘܢܝܐ ܕܚܘܒܟܗܘܢ ܕܐܣܛܘܟܣܐ: ܐܢܐܩܪܐܛܝܣ
                    ܡܢܗܘܢ ܐܢܛܘܠܘܟܝܐ ܕܦܓܪܐ ܐܡܪܘܗܿ: ܐܪܝܣܛܛܠܝܣ
                    ܡܢܗܘܢ ܕܝܢ ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ: ܐܠܟܣܢܕܪܘܣ ܐܡܦܪܝܕܝܣܝܐ
                    ܡܢܗܘܢ ܠܐ ܡܢܗܿ ܘܠܗܿ (ܡܢܗܘܢ ܐܝܟ ܚܙܬܐ ܒܥܝܢܐ ܐܡܪܘ) ܐܠܐ ܒܐܚܪܢܐ ܡܩܝܡܐ
                
                
                     f.14a  ܐܝܬ ܕܝܢ ܐܚܪ̈ܢܐ ܕܐܣܒܪܘ ܥܠ ܡܣܒܪ̈ܢܘܬܐ ܐܚܪ̈ܢܝܬܐ ܕܠܐ ܥܐܠܢ ܒܦܘܠܓܐ ܗܢܐ.
                    ܘܠܐ ܡܬܚܒܫܢ ܬܚܘܬܘܗܝ. ܐܣܩܠܦܝܕܨ ܕܝܢ ܐܡܪ ܕܢܦܫܐ ܐܝܬܝܗܿ ܕܘܪܫܐ ܕܪܓܫܐ. ܦܝܬܓܘܪܘܣ ܕܝܢ ܐܡܪ
                    ܕܢܦܫܐ ܐܝܬܝܗܿ ܡܢܝܢܐ ܕܡܙܝܥ ܝܬܗܿ. ܐܚܪ̈ܢܐ ܕܝܢ ܐܡܪܘ ܕܢܦܫܐ ܐܝܬܝܗܿ ܟܘܢܫܐ ܕܣܘܟܠܐ
                    ܘܥܘܗܕܢܐ. ܐܟܙܢܐ ܠܡ ܕܟܪܛܝܣܐ ܐܘ ܡܓܠܬܐ ܕܠܐ ܟܬܝܒܐ ܡܩܒܠܢܝܬܐ ܐܝܬܝܗܿ ܕܟܬܝ̈ܒܬܐ ܘܕܣܘܟܠܐ
                    ܡܛܠ (ܕܡܬܟܬܒܝܢ) ܘܡܬܛܒܥܝܢ ܒܗܿ. ܗܟܢܐ ܐܦ ܦܓܪܐ ܐܢܫܝܐ ܡܐ ܕܡܬܓܒܠ ܠܝܬ ܒܗ ܚܘܫܒܐ ܘܠܐ ܣܘܟܠܐ
                    ܘܠܐ ܥܗܢܘܬܐ (؟). ܠܚܪܬܐ ܕܝܢ ܕܢܣܝ̈ܢܐ ܕܦܓܥܝܢ ܒܗ ܚܕ ܒܐܝܕܐ ܒܐܝܕܐ ܥܒܕܝܢ ܒܗ ܟܘܢܫܐ
                    ܕܚܘܫ̈ܒܐ ܘܕܣܘܟܠܐ. ܥܘܗܕܢܐ ܗܢܐ ܐܝܬܝܗܿ ܢܦܫܐ ܐܡܪܝܢ. ܦܠܛܘܢ ܬܘܒ ܐܡܪ. ܐܦ ܒܚܝ̈ܘܬܐ ܠܐ
                    ܡܠܝ̈ܠܬܐ ܢܦܫܐ ܡܠܝܠܬܐ ܐܝܬ. ܡَܢٍܝ̈ܢܐ (ܡܢܝ̈ܢܝܐ) ܬܘܒ ܐܡܪܘ ܡܛܠ ܢܦܫܐ ܗܠܝܢ ܬܠܬܐ ܫܘܒܚ̈ܐ
                    (ܚܘܫ̈ܒܐ): ܚܕ ܡܢ ܕܢܦܫܐ ܠܐ ܓܫܘܡ ܐܝܬܝܗܿ. ܕܬܪܝܢ ܕܝܢ ܕܠܐ ܡܝܘܬܬܐ ܐܝܬܝܗܿ. ܕܬܠܬܐ ܕܝܢ ܕܚܕ
                    ܐܝܬܝܗܿ ܢܦܫܐ ܠܡ ܕܡܬܦܠܓܐ. ܘܗܘܝܐ ܒܟܠ ܚܕ ܚܕ ܡܢ ܓܘܫ̈ܡܐ. ܡܢܦ̈ܫܐ ܡܫܘܬܦܝܢ ܒܣܘܓܐܐ ܡܢܗܿ.
                    ܗܠܝܢ ܕܝܢ ܠܐ ܡܢܦ̈ܫܐ ܩܠܝܠ. ܗܠܝܢ ܕܝܢ ܓܘܫ̈ܡܐ ܫܡܝ̈ܢܐ ܒܣܘܓܐܐ ܘܒܣܓܝ ܡܫܘܬܦܝܢ. 
            
            
                ܩܦܠܐܘܢ ܕܐܪܒܥܐ
                ܡܠܬܐ ܐܪܘܥܬܐ  f.14b  ܠܘܩܒܠ ܬܪ̈ܥܝܬܐ ܗܠܝܢ ܕܦܝܠܠܣܘܦܐ ܕܐܬܐܡܪܘ.
                    ܘܣܬܪܐ ܕܫܘܒܚ̈ܐ ܗܠܝܢ ܕܫܪܝܪܝܢ ܕܫܒܚܘ ܡܛܠ ܢܦܫܐ
                ܩܕܡܝܬ ܡܢ ܐܡܪܝܢܢ ܠܘܬ ܟܠܗܘܢ ܐܣܛܘܝ̈ܩܘ ܗܠܝܢ ܕܡܪܝܢ ܕܓܘܫܡܐ ܐܝܬܝܗܿ ܢܦܫܐ.
                    ܐܣܛܘܝ̈ܩܘ ܗܟܝܠ ܥܒܕܝܢ ܬܠܬܐ ܣܥܝ̈ܐ ܕܡܢܗܘܢ ܡܚܘܝܢ ܕܢܦܫܐ ܓܘܫܡܐ ܐܝܬܝܗܿ. ܣܥܝܐ ܕܝܠܗܘܢ
                    ܩܕܡܝܐ. ܐܡܪܝܢ ܗܟܝܠ ܕܕܡܝܢܢ ܠܒܗܐ. ܠܘ ܒܠܚܘܕ ܕܒܦܓܪܐ. ܐܠܐ ܐܦ ܒܢܦܫܐ ܗ ܒܚܫܐ ܘܒܥܝܕܐ
                    ܘܒܕܝܬܣܝܣ. ܕܡܢܘܬܐ ܕܝܢ ܕܓܘܫ̈ܡܐ ܐܝܬܝܗܿ ܘܠܘ ܕܠܐ ܓܫܘܡ. ܡܕܝܢ ܠܡ ܢܦܫܐ ܓܘܫܡܐ ܐܝܬܝܗܿ. ܚܢܢ
                    ܕܝܢ ܫܪܝܢܢ ܠܣܥܝܗܘܢ ܩܕܡܝܐ ܗܟܢܐ: ܕܡܝܘܬܐ ܘܠܐ ܕܡܝܘܬܐ ܕܝܠܝܬܐ ܐܝܬܝܗܿ ܕܐܝܢܝܘܬܐ. ܘܐܝܢܝܘܬܐ
                    ܕܠܐ ܓܫܘܡ ܐܝܬܝܗܿ ܡܛܠ ܕܠܐ ܓܫܘܡ ܠܠܐ ܓܫܘܡ. ܕܕܡܐ ܘܠܐ ܕܡܐ ܐܝܬܘܗܝ. ܣܥܝܐ ܬܪܝܢܐ. ܠܝܬ ܠܡ
                    ܘܠܐ ܚܕ ܠܐ ܓܫܘܡ ܕܚܐܫ ܐܟܚܕܐ ܥܡ ܓܘܫܡܐ. ܟܕ ܡܬܟܪܗ ܐܘ ܡܬܦܣܩ. ܓܘܫܡܐ ܕܝܢ ܚܐܫ ܥܡ ܢܦܫܐ ܟܕ
                    ܚܐܫܐ ܕܐܝܟ ܐܝܟܢ. ܟܕ ܓܝܪ ܡܬܚܡܨܐ ܢܦܫܐ ܡܣܡܩ ܦܓܪܐ. ܘܟܕ ܕܚܠܐ ܡܪܥܬ. ܡܕܝܢ ܠܡ ܢܦܫܐ ܓܘܫܡܐ
                    ܐܝܬܝܗܿ ܡܛܠ ܕܚܐܫܐ ܥܡ ܓܘܫܡܐ. ܫܪܝܐ: ܩܕܡܐܝܬ ܐܡܪܝܢܢ ܠܘܬ ܗܿܝ ܩܕܡܝܬܐ ܕܝܠܗܘܢ ܕܐܝܬ ܡܕܡ
                    ܡܕܡ ܠܐ ܓܫܘܡ ܕܚܐܫ ܥܡ ܓܘܫܡܐ. ܕܐܝܟ ܐܝܟܢ ܐܝܢܝ̈ܘܬܐ  f.15a  ܗܟܝܠ ܕܐܝܬܝܗܝܢ ܕܠܐ
                    ܓܫܘܡ ܟܕ ܚܐܫܝܢ ܥܡ ܓܘܫ̈ܡܐ. ܐܦ ܗܢܝܢ ܐܟܚܕܐ ܥܡܗܘܢ ܗܘܝܢ ܐܝܢܝ̈ܘܬܐ. ܘܟܕ ܡܬܚܡܝܢ ܥܡܗܘܢ
                    ܡܬܚ̈ܡܢ. ܒܬܪܟܢ ܕܝܢ ܐܡܪܝܢܢ ܠܘܬ ܗܿܝ ܬܪܝܢܝܬܐ ܕܝܠܗܘܢ ܗܟܢܐ: ܕܓܘܫܡܐ ܟܕ ܚܐܫ ܡܢ ܢܦܫܐ ܫܩܠ
                    ܠܗ ܪܓܫܬܐ ܕܢܐܚܫ ܟܕ ܗܝ ܠܐ ܚܫܘܫܬܐ ܡܩܘܝܐ. ܘܠܐ ܚܐܫܐ ܡܘܬܪܐ. ܡܥܝܐ ܬܠܝܬܝܐ. ܡܘܬܐ ܠܡ
                    ܐܝܬܘܗܝ ܦܘܪܫܢܐ ܕܢܦܫܐ ܡܢ ܦܓܪܐ. ܘܠܐ ܚܕ ܠܐ ܓܫܘܡ ܡܬܦܪܫ ܡܢ ܓܘܫܡܐ. ܘܐܦܠܐ ܡܬܢܩܦܐ ܠܓܘܫܡܐ.
                    ܢܦܫܐ ܕܝܢ ܡܬܢܩܦܐ ܠܓܘܫܡܐ ܐܦ ܡܬܦܪܫܐ ܡܢܗ. ܡܕܝܢ ܠܡ ܢܦܫܐ ܓܘܫܡܐ ܐܝܬܝܗܿ. ܫܪܝܐ: ܗܿܝ ܡܢ
                    ܕܐܡܪܬܘܢ ܕܡܘܬܐ ܦܘܪܫܢܐ ܕܢܦܫܐ ܡܢ ܦܓܪܐ ܐܝܬܘܗܝ ܫܪܝܪܐ. ܗܝܕܝܢ ܕܝܢ ܕܐܡܪܬܘܢ ܕܠܐ ܓܫܘܡ ܠܐ
                    ܡܬܢܩܦ ܠܓܘܫܡܐ ܘܠܐ ܡܬܦܪܫ ܡܢܗ. ܕܓܠܬܐ ܐܝܬܝܗܿ. ܒܗܿܝ ܕܗܐ ܣܘܪܛܐ ܘܚܘܪܘܬܐ ܕܐܝܬܝܗܘܢ ܠܐ
                    ܓܫܘܡ ܡܬܢܩܦܝܢ ܠܓܘܫܡܐ ܘܡܬܦܪܫܝܢ ܡܢܗ. ܬܘܒ ܐܡܪܝܢܢ ܕܢܦܫܐ ܠܘ ܡܬܢܩܦܘ ܡܬܢܩܦܐ ܠܓܘܫܡܐ. ܐܠܘ
                    ܓܝܪ ܡܢܩܦ ܢܩܝܦܐ ܗܘܬ ܠܗ ܡܣܡ ܗܘ ܣܝܡܐ ܗܘܬ ܠܘܬܗ. ܐܘ ܥܠ ܓܢܒܗ. ܬܘܒ ܐܠܘ ܡܢܩܦ ܢܩܝܦܐ ܗܘܬ
                    ܠܗ ܠܘ ܟܠܗ ܡܢܦܫܐ ܐܝܬܘܗܝ ܗܘܐ. ܐܦܠܐ ܟܠܗ ܚܝܐ. ܐܠܐ  f.15b  ܡܢܬܐ ܡܢܗ ܒܠܚܘܕ.
                    ܡܢܦܫܬܐ ܘܚܝܐ ܗܘܬ ܗܿܝ ܕܢܩܝܦܐ ܗܘܬ ܠܢܦܫܐ. ܐܢ ܕܝܢ ܟܠܗ ܡܢܦܫ ܘܚܝ. ܠܟܠܗ ܡܚܝܕܐ ܘܥܡ ܟܠܗ
                    ܐܣܝܪܐ. ܘܠܘ ܡܢܩܦ ܢܩܝܦܐ ܠܗ. ܘܗܠܝܢ ܡܢ ܐܝܬܝܗܘܢ ܬܠܬܐ ܣܥܝ̈ܐ ܕܠܗܘܢ ܕܐܣܛܘܝ̈ܩܘ. ܘܫܪܝܐ
                    ܕܝܠܢ. 
                ܡܚܘܝܢ̈ܘܬܐ ܕܝܢ ܕܡܢܢ ܕܡܚܘܝܢ ܕܠܐ ܐܝܬܝܗܿ ܢܦܫܐ ܓܘܫܡܐ ܐܝܬܝܗܝܢ ܗܠܝܢ: 
                ܐ: ܟܠ ܓܘܫܡܐ ܐܝܢܐ ܕܗܘ ܬܚܝܬ ܚܕ ܡܢ ܪ̈ܓܫܐ ܢܦܠ. ܐܘ ܬܚܝܬ ܟܠܗܘܢ. ܘܒܕܓܘܢ
                    ܡܬܪܓܫܢܐ ܗܘ. ܢܦܫܐ ܓܝܪ ܠܐ ܡܬܪܓܫܢܝܬܐ ܗܝ. ܠܐ ܕܝܢ ܡܬܚܙܝܐ ܘܠܐ ܡܬܬܓܝܫܐ. ܘܕܫܪܟܐ. ܡܕܝܢ ܠܘ
                    ܓܘܫܡܐ ܐܝܬܝܗܿ. ܒ: ܓܘܫܡܐ ܟܕ ܡܬܬܘܣܦ ܥܠ ܓܘܫܡܐ ܐܚܪܢܐ ܝܘܩܪܐ ܥܒܕ ܒܗ. ܢܦܫܐ ܓܝܪ ܗܿܘܝܐ
                    ܒܦܓܪܐ. ܘܠܘ ܒܠܚܘܕ ܝܘܩܪܐ ܠܐ ܥܒܕܐ ܒܗ ܐܠܐ ܡܐܚܝܘ ܡܐܚܝܐ ܠܗ ܘܩܠܝܠܐ ܥܒܕܐ ܠܗ. ܡܕܝܢ ܠܘ
                    ܓܘܫܡܐ ܐܝܬܝܗܿ. ܓ: ܓܘܫܡܐ ܒܓܘܫܡܐ ܠܐ ܥܒܪ. ܡܛܠ ܕܚܕ ܠܚܒܪܗ ܟܠܐ. ܘܡܢܘܬܐ ܕܚܕ ܡܢ ܚܕ
                    ܡܬܥܘܟܝܢ. ܢܦܫܐ ܕܝܢ ܒܟܠܗ ܥܒܪܐ ܘܫܪܝܐ. ܡܕܝܢ ܠܘ ܓܘܫܡܐ ܐܝܬܝܗܿ. ܕ: ܟܠ ܓܘܫܡܐ ܕܡܬܬܙܝܥ ܐܘ
                    ܡܢ ܠܒܪ ܡܬܬܙܝܥ ܐܟܙܢܐ ܕܟܐܦܐ ܕܪܚܝܐ ܕܡܬܬܕܚܝܐ ܡܢ ܠܒܪ. ܐܘ ܡܢ ܠܓܘ ܡܬܬܙܝܥ ܐܟܙܢܐ ܕܓܘܫܡܐ
                    ܡܢܦܫܐ. ܢܦܫܐ ܗܟܝܠ ܠܘ ܡܢ ܠܒܪ ܡܬܬܙܝܥܐ  f.16a  ܐܟܙܢܐ ܕܓܘܫܡܐ ܠܐ ܡܢܦܫܐ. ܡܕܝܢ
                    ܠܘ ܓܘܫܡܐ ܐܝܬܝܗܿ. ܐܢܕܝܢ ܐܡܪ ܐܢܫ ܕܢܦܫܐ ܡܢ ܠܓܘ ܡܬܬܙܝܥܐ ܐܝܟ ܓܘܫܡܐ ܡܢܦܫܐ ܕܕܓܠܬܐ
                    ܘܫܟܝܪܬܐ. ܗ: ܓܕܫܐ ܕܓܘܫܡܐ ܓܘܫܡܢܝܐ ܗܘ. ܐܟܙܢܐ ܕܚܘܪܘܬܐ ܘܐܘܟܡܘܬܐ. ܕܡܬܩܝ̈ܡܢ ܒܓܘܫܡܐ.
                    ܓܕܫܐ ܕܝܢ ܕܢܦܫܐ ܕܠܐ ܓܫܘܡ ܐܝܬܝܗܘܢ. ܐܟܙܢܐ ܕܪܚܡܬܐ ܣܢܐܬܐ ܘܥܩܬܐ ܘܚܕܘܬܐ. ܡܕܝܢ ܠܘ ܓܘܫܡܐ
                    ܐܝܬܝܗܿ ܐܢ ܓܘܫ̈ܡܐ ܒܠܐ ܓܫܘܡ ܡܬܩܝܡܝܢ. ܘ: ܓܘܫܡܐ ܡܢܦܫܐ ܒܣܝܒܪ̈ܬܐ ܓܘܫܡܢ̈ܝܬܐ ܡܬܬܪܣܐ.
                    ܢܦܫܐ ܕܝܢ ܠܐ ܡܬܬܪܣܝܐ ܒܣܝܒܪ̈ܬܐ ܓܘܫܡܢ̈ܝܬܐ. ܡܕܝܢ ܠܘ ܓܘܫܡܐ ܐܝܬܝܗܿ. ܙ: ܓܘܫܡܐ
                    ܢܦܫܢܝܐܡܬܬܘܣܦ ܘܡܬܬܒܨܪ ܒܐܘܪܟܐ ܘܒܥܘܡܩܐ ܘܒܦܬܝܐ. ܘܠܐ ܡܬܬܘܣܦܐ ܒܗܠܝܢ ܡܕܝܢ ܠܘ ܓܘܫܡܐ
                    ܐܝܬܝܗܿ. ܚ: ܟܠ ܓܘܫܡܐ ܐܝܢܐ ܕܗܘ ܒܐܬܪܐ. ܗܿܘ ܕܐܚܝܕ ܠܗ ܐܝܬܘܗܝ. ܘܬܪܝܢ ܓܘܫ̈ܡܐ ܠܐ ܡܨܝܐ
                    ܕܢܗܘܘܢ ܒܚܕ ܐܬܪܐ. ܦܓܪܐ ܕܝܢ ܘܢܦܫܐ ܒܚܕ ܐܬܪܐ. ܡܕܝܢ ܠܝܬܝܗܿ ܢܦܫܐ ܓܘܫܡܐ. ܛ: ܠܝܬ ܓܘܫܡܐ
                    ܕܐܝܬܘܗܝ ܡܠܝܠܐ ܘܝܕܘܥܐ ܒܟܝܢܗ. ܢܦܫܐ ܕܝܢ ܟܝܢܐܝܬ ܡܠܝܠܘܬܐ ܘܝܕܘܥܬܢܘܬܐ. ܡܕܝܢ ܠܘ ܓܘܫܡܐ
                    ܐܝܬܝܗܿ. ܝ: ܟܠ  f.16b  ܓܘܫܡܐ ܐܝܢܐ ܕܗܘ ܒܝܕ ܢܩܝܦܘܬܐ ܕܣܟܘܗܝ ܡܚܝܕ ܠܓܘܫܡܐ
                    ܐܚܪܢܐ. ܢܦܫܐ ܕܝܢ ܟܠܗܿ ܥܡ ܟܠܗܿ ܡܚܝܕܐ ܒܢܩܝܦܘܬܐ ܕܠܘܬܗ. ܡܕܝܢ ܠܘ ܓܘܫܡܐ ܗܝ. ܘܗܠܝܢ ܡܢ
                    ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܓܘܫܡܐ ܐܝܬܝܗܿ. 
                ܠܘܩܒܠ ܗܠܝܢ ܕܐܡܪܝܢ ܕܢܦܫܐ ܡܝ̈ܐ ܐܝܬܝܗܿ ܐܘ ܐܐܪ. 
                ܐܡܪܝܢ ܓܝܪ ܗܠܝܢ. ܕܝܕܝܥܐ ܕܢܦܫܐ ܡܝ̈ܐ ܐܝܬܝܗܿ ܐܘ ܐܐܪ ܡܢ ܗܿܝ ܕܠܐ ܡܨܝܐ
                    ܠܡܐܚܐ ܣܛܪ ܡܢ ܡܝ̈ܐ ܘܐܐܪ. ܚܢܢ ܕܝܢ ܐܡܪܝܢܢ ܠܘܬܗܘܢ ܬܪܬܝܢ. ܚܕܐ ܡܢ ܕܐܦܠܐ ܣܛܪ ܡܢ ܣܝܒܪܬܐ
                    ܘܬܪܣܝܬܐ ܡܨܝܐ. ܠܡܐܚܐ. ܢܗܘܝܢ ܐܦ ܗܠܝܢ ܢܦܫܐ ܐܝܟ ܡܠܬܟܘܢ. ܕܬܪܬܝܢ ܕܝܢ ܕܐܝܬ ܣܓܝ̈ܐܬܐ ܡܢ
                    ܚܝ̈ܘܬܐ ܕܚܐܝܢ ܟܕ ܠܐ ܫܬܝܢ ܡܝ̈ܐ ܐܝܟ ܕܐܡܪܝܢ ܡܛܠ ܢܫܪ̈ܐ ܘܚܓ̈ܠܐ. ܘܐܝܬ ܐܚܪ̈ܢܝܬܐ ܣܓܝ̈ܐܬܐ
                    ܕܠܐ ܚܐܝܢ ܕܠܐ ܣܘܩܐ ܕܐܐܪ ܐܝܟ ܗܠܝܢ ܦܣܝ̈ܩܬܐ. ܐܟܙܢܐ ܕܕܒܘܪ̈ܐ ܘܕܒܘܪ̈ܝܬܐ ܘܗܠܝܢ ܕܠܐ ܐܝܬ
                    ܠܗܘܢ ܪܐܬܐ. ܢܘܢܐ ܐܡܪ ܘܐܢܟܠܝܘܣ ܘܕܫܪܟܐ. ܡܕܝܢ ܠܝܬܝܗܿ ܢܦܫܐ ܠܐ ܐܐܪ ܘܠܐ ܡܝ̈ܐ. 
                ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܢܘܪܐ ܐܝܬܝܗܿ. 
                ܩܕܡܢܢ ܚܘܝܢܢ ܣܓܝ̈ܐܬܐ. ܕܢܦܫܐ ܠܐ ܓܫܘܡ ܐܝܬܝܗܿ. ܘܒܕܓܘܢ ܡܚܘܝܢܢ ܕܠܝܬܝܗܿ
                    ܢܦܫܐ ܢܘܪܐ ܒܝܕ ܗܠܝܢ. ܐ: ܢܘܪܐ ܡܢ ܓܘܫܡܐ ܐܝܬܝܗܿ. ܢܦܫܐ ܕܝܢ ܠܝܬܝܗܿ ܓܘܫܡܐ. ܡܕܝܢ ܠܝܬܝܗܿ
                         f.17a  ܢܦܫܐ ܢܘܪܐ. ܒ: ܢܘܪܐ ܡܬܪܓܫܢܝܬܐ ܐܝܬܝܗܿ ܢܦܫܐ ܕܝܢ ܠܝܬܝܗܿ
                    ܡܬܪܓܫܢܝܬܐ. ܡܕܝܢ ܠܝܬܝܗܿ ܢܦܫܐ ܢܘܪܐ. ܓ: ܢܘܪܐ ܡܢ ܐܡܬܝ ܕܗܿܘܝܐ ܒܡܥܒܕܢܘܬܐ ܒܓܘܫܡܐ ܗܿܘ
                    ܡܟܢ ܝܩܕ ܡܘܩܕ ܠܗܿ. ܡܕܝܢ ܠܝܬܝܗܿ ܢܦܫܐ ܢܘܪܐ. 
                ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܕܡܐ ܐܝܬܝܗܿ ܘܪܘܚܐ. 
                ܐܡܪܝܢ ܓܝܪ ܝܕܝܥܐ ܕܢܦܫܐ ܕܡܐ ܐܝܬܝܗܿ ܘܪܘܚܐ. ܡܢ ܗܿܝ ܕܟܕ ܡܬܦܪܫ ܕܡܐ ܡܢ
                    ܚܝܘܬܐ ܘܪܘܚܐ ܡܝܬܐ ܚܝܘܬܐ. ܘܐܡܪܝܢܢ ܠܘܬܗܘܢ. ܕܐܢ ܡܛܠ ܕܟܕ ܡܬܦܪܫܝܢ ܗܠܝܢ ܡܢ ܚܝܘܬܐ. ܡܛܠ
                    ܗܕܐ ܐܡܪܬܘܢ ܕܐܝܬܝܗܘܢ ܢܦܫܐ. ܡܕܝܢ ܐܦ ܪܝܫܐ ܘܡܘܚܐ ܘܠܒܐ ܘܟܒܕܐ ܢܦܫܐ ܐܝܬܝܗܘܢ. ܡܛܠ ܕܟܕ
                    ܡܬܦܪܫ ܚܕ ܡܢܗܘܢ ܡܢ ܚܝܘܬܐ ܐܘ ܟܠܗܘܢ ܡܝܬܐ ܚܝܘܬܐ. ܘܬܘܒ ܐܝܟ ܡܠܬܟܘܢ ܗܟܢܐ ܐܝܬܝܗܿ. ܡܕܝܢ
                    ܕܡܢܬܐ ܡܢ ܕܡܐ ܕܝܒܐ. ܡܢܬܐ ܡܢ ܢܦܫܐ ܕܝܒܐ ܘܗܕܐ ܫܟܝܪܬܐ ܗܝ ܐܦ ܕܓܠܬܐ. 
                ܠܘܩܒܠ ܐܝܠܢ ܕܐܡܪܝܢ ܕܢܦܫܐ ܐܝܬܝܗܿ ܪܘܟܒܐ ܕܡܢ ܐܣܛܘܟܣܐ ܐܘ ܡܢ ܓܘܫ̈ܡܐ
                    ܙܥܘܪ̈ܐ ܕܦܪܚܝܢ ܒܐܐܪ. 
                ܐ: ܪܘܟܒܐ ܡܢ ܕܡܢ ܓܘܫ̈ܡܐ ܙܥܘܪ̈ܐ. ܓܘܫ̈ܡܐ ܐܝܬܘܗܝ. ܢܦܫܐ ܕܝܢ ܠܐ ܓܫܘܡ
                    ܐܝܬܝܗܿ. ܡܕܝܢ ܠܝܬܝܗܿ ܢܦܫܐ. ܪܘܟܒܐ ܕܡܢ ܓܘܫܡ̈ܐ ܙܥܘܪ̈ܐ. ܒ: ܪܘܟܒܐ ܡܢ ܕܡܢ ܓܘܫ̈ܡܐ ܙܥܘܪ̈ܐ
                    ܡܬܪܓܫܢܐ ܗܘ. ܢܦܫܐ ܕܝܢ ܠܐ ܡܬܪܓܫܢܝܬܐ ܗܝ. ܡܕܝܢ ܠܝܬܝܗܿ  f.17b  ܢܦܫܐ ܪܘܟܒܐ ܕܡܢ
                    ܓܘܫ̈ܡܐ ܙܥܘܪ̈ܐ. ܪܘܟܒܐ ܡܢ ܕܡܢ ܓܘܫ̈ܡܐ ܙܥܘܪ̈ܐ ܡܪܟܒܐ ܗܘ. ܢܦܫܐ ܕܝܢ ܦܫܝܛܬܐ ܐܝܬܝܗܿ. ܡܕܝܢ
                    ܠܝܬܝܗܿ ܢܦܫܐ ܪܘܟܒܐ ܕܡܢ ܓܘܫ̈ܡܐ ܙܥܘܪ̈ܐ ܕܦܪܚܝܢ. 
                ܠܘܩܒܠ ܐܝܠܝܢ ܕܐܡܪܝܢ ܢܦܫܐ ܠܐ ܓܫܘܡ ܐܝܬܝܗܿ ܡܩܝܡܐ ܡܢܗܿ ܘܠܗܿ ܐܠܐ ܒܐܚܪܢܐ
                    ܡܩܝܡܐ. 
                ܐܡܪܝܢܢ ܠܘܩܒܠ ܗܿܢܘܢ ܓܘܢܐܝܬ ܒܝܕ ܐܠܗܐ ܒܗܠܝܢ ܕܒܬܪܟܢ ܐܝܟܐ ܕܡܚܘܝܢܢ ܕܢܦܫܐ
                    ܩܢܘܡܐ ܐܝܬܝܗܿ. … … ܡܢ ܒܬܪ ܕܡܬܦܪܫܐ ܡܢ ܦܓܪܐ. ܡܩܝܡܐ ܡܢܗܿ ܘܠܗܿ. ܕܝܠܢܐܝܬ ܒܩܘܝܡܐ. ܗܪܟܐ
                    ܕܝܢ ܐܡܪܝܢܢ ܕܝܠܢܐܝܬ ܠܘܬ ܟܠ ܚܕ ܚܕ ܡܢܗܘܢ: ܩܕܡܐܝܬ ܠܘܩܒܠ ܕܐܡܪܝܢ ܕܢܦܫܐ ܐܝܬܝܗܿ ܐܝܟ ܚܙܬܐ
                    ܒܥܝ̈ܢܐ ܘܚܘܪܘܬܐ ܒܬܠܓܐ. ܐ: ܚܙܐ ܘܚܘܪܘܬܐ ܒܬܠܓܐ ܓܕܫܐ ܐܝܬܝܗܘܢ. ܢܦܫܐ ܕܝܢ ܐܘܣܝܐ ܐܝܬܝܗܿ.
                    ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܡܕܝܢ ܠܝܬܝܗܿ ܢܦܫܐ ܐܝܟ ܚܙܬܐ ܒܥܝ̈ܢܐ ܘܚܘܪܘܬܐ ܒܬܠܓܐ. ܒ:
                    ܚܙܬܐ ܡܢ ܒܥܝ̈ܢܐ ܘܚܘܪܘܬܐ ܕܒܬܠܓܐ ܕܡܢ ܗܠܝܢ ܕܒܗܿܘ ܣܝܡ ܕܣܝܡ ܐܝܬܝܗܝܢ ܗܘ ܕܣܝܡ. ܢܦܫܐ ܕܝܢ
                    ܗܿܘ ܕܣܝܡ ܐܝܬܝܗܿ. ܘܠܐ ܡܢ ܗܿܠܝܢ ܕܒܗܿܘ. ܣܝܡܐ ܓܝܪ ܠܙܕܝܩܘܬܐ ܘܠܥܘܠܘܬܐ ܘܠܝܕܥܬܐ ܘܠܠܐ
                    ܝܕܥܬܐ. ܡܕܝܢ ܠܝܬܝܗܿ ܢܦܫܐ ܐܝܟ ܚܙܬܐ ܒܥܝ̈ܢܐ  f.18a  ܘܐܝܟ ܚܘܪܘܬܐ ܒܬܠܓܐ. 
                ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܐܝܬܝܗܿ ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ. 
                ܐ: ܚܝܠܐ ܕܝܢ ܡܢ ܕܡܘܙܓܐ ܫܘܝܐ ܕܐܣܛܘܟܣܐ ܐܝܢܝܘܬܐ ܐܝܬܝܗܿ. ܢܦܫܐ ܕܝܢ ܐܘܣܝܐ
                    ܐܝܬܝܗܿ ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܡܕܝܢ ܠܝܬܝܗܿ ܢܦܫܐ ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ.
                    ܒ: ܚܝܠܐ ܕܡܘܙܓܐ ܡܬܪܓܫܢܐ ܗܘ. ܢܦܫܐ ܕܝܢ ܡܬܝܕܥܢܝܬܐ ܗܝ. ܡܕܝܢ ܠܝܬܝܗܿ ܢܦܫܐ ܚܝܠܐ ܕܡܘܙܐ.
                    ܓ: ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ ܚܘܠܡܢܐ ܡܫܟܢ ܠܦܓܪܐ. ܐܢ ܗܟܝܠ ܢܦܫܐ ܚܝܠܐ ܕܡܘܙܓܐ ܫܘܝܐ
                    ܕܐܣܛܘܟܣܐ ܐܝܬܝܗܿ. ܡܕܝܢ ܠܐ ܙܕܩ ܕܢܬܟܪܗ ܒܪܢܫܐ ܐܘ ܢܬܡܚܠ. ܟܠ ܟܡܐ ܕܚܝ ܘܐܝܬ ܒܗ ܢܦܫܐ. ܘܗܐ
                    ܚܙܝܢܢ ܕܡܬܟܪܗ ܘܡܬܡܚܠ ܟܕ ܚܝ ܘܐܝܬ ܒܗ ܢܦܫܐ. ܕ: ܚܝ̈ܝܠܐ ܫܘܝ̈ܐ ܕܡܘܙܓܐ ܕܐܣܛܘܟܣܐ ܐܙܠ ܡܢ
                    ܦܓܪܐ. ܘܢܦܫܐ ܦܝܫܐ ܒܗܿ. ܡܕܝܢ ܠܝܬܝܗܿ ܢܦܫܐ ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ. ܐܢ ܢܦܫܐ ܚܝܠܐ
                    ܕܡܘܙܓܐ ܫܘܝܐ ܕܐܣܛܘܟܣܐ ܐܝܬܝܗܿ. ܗ: ܚܝܠܐ ܕܝܢ ܕܡܘܙܓܐ ܕܐܣܛܘܟܣܐ. ܠܦܘܬ ܩܘܡ̈ܬܐ ܘܕܘܒܪ̈ܐ
                    ܘܙܒܢܐ ܡܫܬܚܠܦ. ܡܕܝܢ ܐܦ ܢܦܫܐ ܬܘܒ ܡܫܬܚܠܦܐ  f.18b  ܡܫܬܒܚܐ ܠܘ ܗܝ ܟܕ ܗܝ ܐܝܬܝܗܿ
                    ܠܢ ܐܠܐ ܐܚܪܬܐ ܘܐܚܪܬܐ ܠܦܘܬ ܚܝܠܐ ܕܡܘܙܓܐ ܕܐܣܛܘܟܣܐ ܕܡܫܬܚܠܦ ܒܙܒܢ ܡܢ ܕܐܪܝܐ ܒܙܒܢ ܡܢ
                    ܕܐܡܪܐ ܒܙܒܢ ܡܢ ܕܕܐܒܐ ܒܙܒܢ ܕܓܕܝܐ. ܐܢܕܝܢ ܗܕܐ ܕܓܠܬܐ ܘܫܟܝܪܬܐ ܠܝܬܝܗܿ ܢܦܫܐ ܚܝܠܐ ܕܡܘܙܓܐ
                    ܫܘܝܐ ܕܐܣܛܘܟܣܐ. ܘ: ܐܢ ܢܦܫܐ ܚܝܠܐ ܕܡܘܙܓܐ ܫܘܝܐ ܕܐܣܛܘܟܣܐ ܐܝܬܝܗܿ. ܟܠ ܓܘܫܡܐ ܕܡܢ ܐܣܛܘܟܣܐ
                    ܐܝܬ ܠܗ ܚܝܠܐ ܕܡܘܙܓܐ ܢܦܫܐ ܐܝܬ ܠܗܿ. ܡܕܝܢ ܟܠ ܓܘܫܡܐ ܢܦܫܐ ܐܝܬ ܠܗ. ܘܐܢ ܟܠ ܓܘܫܡܐ ܢܦܫܐ
                    ܐܝܬ ܠܗ. ܡܕܝܢ ܐܝܬ ܠܟܐܦ̈ܐ ܘܠܦܪܙܠܐ ܢܦܫܐ. ܘܡܫܬܟܚܝܢ ܠܐ ܡܢܦ̈ܫܐ ܡܢܦ̈ܫܐ. ܗܿܝ ܕܕܓܠܬܐ ܗܝ
                    ܘܫܟܝܪܬܐ. ܠܐ ܡܕܝܢ ܐܝܬܝܗܿ ܢܦܫܐ ܚܝܠܐ ܫܘܝܐ ܕܐܣܛܘܟܣܐ. 
                ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܐܝܬܝܗܿ ܐܘܪܡܢܝܐ ܕܒܝܟܘܬܗܘܢ ܕܐܣܛܘܟܣܐ. ܟܕ
                    ܐܘܪܡܢܝܐ ܐܡܪܝܢ ܠܡܠܚܡܘܬܐ. 
                ܐ: ܢܦܫܐ ܡܕܝܢ ܡܕܠܩܒܐ ܠܦܓܪܐ ܙܒܢ̈ܝܢ ܣܓܝ̈ܐܢ. ܒܗܿܝ ܕܟܠܝܐ ܠܗ ܡܢ ܪܓܬܗ. ܐܘ
                    ܡܫܠܡܐ ܠܗ ܠܘܬ ܐܝܠܝܢ ܕܡܣܓܦܝܢ ܠܗ. ܐܘܪܡܢܝܐ ܐܘܟܝܬ ܡܠܚܡܘܬܗܘܢ ܕܐܣܛܘܟܣܐ. ܠܐ ܡܕܠܩܒܐ ܠܦܓܪܐ
                    ܘܐܢ ܡܕܠܩܒܐ ܠܗ. ܠܘ ܡܠܚܡܘܬܐ ܗܝ. ܡܕܝܢ ܠܝܬܝܗܿ ܢܦܫܐ  f.19a  ܐܪܡܢܝܐ ܕܚܒܝܟܘܬܗܘܢ
                    ܕܐܣܛܘܟܣܐ. ܒ: ܢܦܫܐ ܡܢ ܐܝܬ ܠܗܿ ܩܕܝܡܘܬܐ ܘܪܝܫܢܘܬܐ ܥܠ ܦܓܪܐ. ܘܡܠܚܡܘܬܐ ܕܝܢ ܕܐܣܛܘܟܣܐ ܠܝܬ
                    ܠܗܿ ܩܕܝܡܘܬܐ ܘܪܝܫܢܘܬܐ ܥܠ ܦܓܪܐ. ܡܕܝܢ ܢܦܫܐ ܠܘ ܡܠܚܡܘܬܐ ܗܝ. ܓ: ܢܦܫܐ ܡܢ ܡܩܒܠܐ ܙܕܝܩܘܬܐ
                    ܘܥܘܠܘܬܐ ܘܢܟܦܘܬܐ ܘܡܝܬܪܘܬܐ. ܡܠܚܡܘܬܐ ܕܝܢ ܕܐܣܛܘܟܣܐ ܠܐ ܡܩܒܠܐ ܚܕܐ ܡܢ ܗܠܝܢ. ܡܕܝܢ ܢܦܫܐ
                    ܠܘ ܡܠܚܡܘܬܐ ܗܝ. ܕ: ܢܦܫܐ ܡܢ ܐܘܣܝܐ ܐܝܬܝܗܿ ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܡܠܚܡܘܬܐ ܕܝܢ
                    ܕܐܝܢܝܘܬܐ ܐܝܬܝܗܿ. ܡܕܝܢ ܠܝܬܝܗܿ ܢܦܫܐ ܡܠܚܡܘܬܐ ܕܐܣܛܘܟܣܐ. ܗ: ܐܢܕܝܢ ܢܦܫܐ ܐܪܡܘܢܝܐ ܐܘܟܝܬ
                    ܡܠܚܡܘܬܐ ܕܐܣܛܘܟܣܐ ܐܝܬܝܗܿ. ܡܠܚܡܘܬܐ ܕܝܢ ܚܘܠܡܢܐ ܐܝܬܝܗܿ ܕܦܓܪܐ. ܡܕܝܢ ܠܐ ܙܕܩ ܕܢܬܟܪܗ
                    ܒܪܢܫܐ ܐܘ ܢܬܡܚܠ ܟܡܐ ܕܚܝ ܘܐܝܬ ܒܗ ܢܦܫܐ. ܒܗܿܝ ܕܡܠܚܡܘܬܐ ܡܢ ܕܐܣܛܘܟܣܐ ܐܙܠܐ ܡܢ ܦܓܪܐ.
                    ܢܦܫܐ ܕܝܢ ܢܛܝܪܐ ܒܗ ܐܦܢ ܐܝܬܘܗܝ ܟܪܝܗܐ. ܡܕܝܢ ܠܝܬܝܗܿ ܢܦܫܐ ܐܪܡܢܝܐ ܐܘܟܝܬ ܡܠܚܡܘܬܐ
                    ܕܚܒܝܟܘܬܗܘܢ ܕܐܣܛܘܟܣܐ. 
                ܠܘܩܒܠ ܐܝܠܝܢ ܕܐܡܪܝܢ ܕܐܪܝܣܛܐܛܠܝܣ ܐܡܪ ܢܦܫܐ ܐܝܬܝܗܿ ܐܢܛܘܠܝܟܝܐ ܕܦܓܪܐ. 
                ܩܕܡܐܝܬ ܡܢ ܐܡܪܝܢܢ ܕܐܢܛܘܠܝܟܝܐ ܫܘܡܠܝܐ ܐܝܬܝܗܿ. ܘܐܢܛܘܠܝܟܝܐ ܕܡܕܡ ܒܬܪܝܢ
                    ܙܢܝ̈ܐ ܡܬܐܡܪܐ. ܚܕܐ ܡܢ ܡܢ ܗܿܝ ܕܠܐ ܐܝܬܝܗܿ ܡܕܒܪܢܝܬܗ  f.19b  ܕܡܕܡ. ܘܟܕ ܡܬܦܪܫܐ
                    ܡܢܗ. ܠܐ ܢܛܝܪܐ ܐܟܙܢܐ ܕܐܣܟܝܡܗܿ ܕܐܠܦܐ ܕܐܝܬܘܗܝ ܐܢܛܘܠܝܟܝܐ ܐܘܟܝܬ ܫܘܡܠܝܐ ܕܝܠܗܿ ܕܐܠܦܐ
                    ܘܐܝܟ ܙܢܐ ܕܐܣܟܝܡܗ ܕܒܪܢܫܐ. ܕܐܝܬܘܗܝ ܐܢܛܘܠܝܟܝܐ ܕܐܢܕܝܪܝܢܛܐ. ܗܕܐ ܐܢܛܘܠܝܟܝܐ ܟܕ ܡܬܦܪܫܐ
                    ܡܢ ܗܿܘ ܕܕܝܠܗ ܐܝܬܝܗܿ ܠܐ ܢܛܝܪܐ. ܙܢܐ ܕܝܢ ܐܚܪܢܐ ܕܐܢܛܘܠܝܟܝܐ ܐܝܬܘܗܝ ܗܿܘ ܡܕܡ ܕܐܝܬܘܗܝ
                    ܡܕܒܪܢܗ ܕܡܕܡ. ܘܟܕ ܡܬܦܪܫ ܡܢܗ ܐܟܙܢܐ ܕܡܠܚܐ ܕܐܝܬܘܗܝ ܐܢܛܘܠܝܟܝܐ ܐܘܟܝܬ ܫܘܡܠܝܗܿ ܕܐܠܦܐ ܘܐܦ
                    ܡܕܒܪܢܗܿ. ܗܕܐ ܗܟܝܠ ܐܢܛܘܠܝܟܝܐ ܟܕ ܡܬܦܪܫܐ ܡܢ ܗܿܘ ܕܕܝܠܗ ܐܝܬܝܗܿ. ܢܛܝܪ ܘܡܩܝܡ ܡܢܗ ܘܠܗ.
                    ܡܕܝܢ ܬܪܝܢܐܝܬ: 
                ܐ: ܚܕ ܡܢ ܗܿܘ ܕܐܝܬܘܗܝ ܡܕܒܪܢܝ ܕܡܕܡ ܟܕ ܡܬܦܪܫ ܡܢܗ ܢܛܝܪ
                ܒ: ܐܚܪܢܐ ܕܝܢ ܠܘ ܡܕܒܪܢܗ ܕܡܕܡ ܘܟܕ ܡܬܦܪܫ ܡܢܗ ܠܐ ܢܛܝܪ. 
                ܐܢ ܗܟܝܠ ܐܟܡܐ ܕܐܝܬܘܗܝ ܡܠܚܐ ܐܢܛܘܠܝܟܝܐ ܕܐܠܦܐ ܐܘܟܝܬ ܫܘܡܠܝܗܿ ܕܐܠܦܐ ܗܟܢܐ
                    ܐܡܪ ܐܪܝܣܛܐܛܠܝܣ ܕܐܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ ܒܗܿܝ ܕܐܝܬܝܗܿ ܡܠܚܡܘܬܗ ܐܘܟܝܬ ܡܠܚܡܢܝܬܗ
                    ܘܡܕܒܪܢܝܬܗ ܕܦܓܪܐ ܛܒܐܝܬܐܡܪ. ܡܬܐܡܪܐ ܓܝܪ ܕܐܝܬ ܠܗ  f.20a  ܟܬܒܐ ܕܒܗ ܩܪܐ ܠܗܿ
                    ܢܦܫܐ ܡܠܝܠܬܐ ܗܘܝܐ. ܐܢܕܝܢ ܐܝܟ ܕܐܝܬܘܗܝ ܐܣܟܝܡܗܿ ܕܐܠܦܐ. ܐܢܛܘܠܝܟܝܐ ܕܝܠܗ ܘܐܣܟܝܡܗ
                    ܕܐܢܕܝܪܝܢܛܐ ܐܢܛܘܠܝܟܝܐ ܕܐܢܕܪܝܢܛܐ. ܐܡܪ ܕܐܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ ܒܝܫܐܝܬ ܐܡܪ.
                    ܘܝܬܝܪ ܣܟܠܐܝܬ. ܐܢܕܝܢ ܗܟܢܐ ܐܡܪ ܠܗܿ ܠܢܦܫܐ ܐܡܪܝܢܢ ܠܩܘܒܠܗ ܗܠܝܢ ܡܟܣܢ̈ܘܬܐ. ܐ: ܐܢܕܝܢ
                    ܐܢܛܘܠܝܟܝܐ ܐܝܬܝܗܿ ܢܦܫܐ ܕܦܓܪܐ. ܐܟܡܐ ܕܐܝܬܘܗܝ ܐܣܟܝܡܐ ܕܐܢܕܝܪܝܢܛܐ ܒܟܝܢܐ. ܐܢܢܩܐ ܕܟܕ
                    ܡܬܦܣܩܐ ܐܝܕܗ ܕܒܪܢܫܐ ܚܝܐ. ܬܬܦܣܩ ܥܡܗ ܡܢܬܐ ܡܢ ܢܚܫܐ ܘܡܢܬܐ ܡܢ ܐܣܟܝܡܐ. ܐܠܐ ܓܠܝܐ ܗܝ
                    ܕܢܦܫܐ ܠܐ ܡܬܦܣܩܢܝܬܐ ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܡܕܝܢ ܠܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ
                    ܐܝܟ ܕܐܝܬܘܗܝ ܐܣܟܝܡܐ ܐܢܛܘܠܝܟܝܐ ܕܐܢܕܝܪܝܢܛܐ. ܒ: ܐܢ ܐܢܛܘܠܝܟܝܐ ܕܦܓܪܐ ܐܝܬܝܗܿ ܢܦܫܐ ܐܝܟ
                    ܐܣܟܝܡܐ ܒܐܠܦܐ ܠܐ ܡܨܝܐ ܗܘܬ ܕܬܬܟܫܠ ܠܘܬ ܦܓܪܐ. ܘܗܐ ܟܕ ܚܙܝܢܢ ܕܩܝܡܐ ܠܘܩܒܠ ܚܫܘܗܝ
                    ܒܣܓܝ̈ܐܬܐ. ܙܒܢ̈ܝܢ ܣܓܝ̈ܐܢ. ܪܐܓ ܓܝܪ ܕܢܐܟܘܠ ܘܐܘ ܕܢܫܬܐ ܐܘ ܕܢܙܕܘܓ ܘܟܠܝܐ ܠܗ ܡܢ ܗܕܐ ܐܝܬ
                    ܐܡܬܝ. ܡܕܝܢ ܠܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ. ܓ: ܐܢ ܐܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ ܐܝܟ
                    ܐܣܟܝܡܐ ܕܦܓܪܐ ܕܐܠܦܐ ܠܐ ܡܨܝܐ ܗܘܬ ܕܐܝܬ ܒܗܿ ܛܘܦܣܐ ܘܝܘܩܢ̈ܐ ܘܕܡܘܬܐ  f.20b 
                    ܕܓܘܫ̈ܡܐ ܟܕ ܡܪܚܩܝܢ ܡܢܗܿ ܡܢ ܒܬܪ ܕܚܙܐ ܠܗܘܢ. ܘܗܐ ܚܙܝܢܢ ܕܡܩܒܠܐ ܠܗܘܢ ܘܢܛܝܪܝܢ ܒܗܿ. ܕ:
                    ܐܢ ܐܢܛܘܠܝܟܝܐ ܕܦܓܪܐ ܐܝܬܝܗܿ ܢܦܫܐ. ܡܢ ܦܓܪܐ ܡܕܝܢ ܢܣܒܐ ܠܗܿ ܐܝܬܘܬܐ ܕܬܗܘܐ ܐܝܬܝܗܿ ܘܗܘ
                    ܡܝܬܪ ܡܢܗܿ. ܒܗܿܝ ܕܗܘ ܐܝܬܘܗܝ ܥܠܬܐ ܕܗܘܝܗܿ. ܘܡܢ ܗܪܟܐ ܒܨܝܪܐ ܡܢ ܗܿܘ ܕܡܢܗ ܗܿܘܐ. ܘܝܕܝܥܐ
                    ܘܓܠܝܐ ܕܢܦܫܐ ܡܝܬܪܐ ܡܢ ܦܓܪܐ ܒܣܓܝ̈ܐܬܐ ܘܡܠܝܐ ܠܥܠܡܐ ܝܕܥܬܐ ܘܚܟܡ̈ܬܐ ܘܐܘܡܢܘܬܐ ܘܫܪܟܐ.
                    ܡܕܝܢ ܠܝܬܝܗܿ ܢܦܫܐ ܐܢܛܘܠܝܟܝܐ ܕܦܓܪܐ ܐܝܟ ܕܐܝܬܘܗܝ ܐܣܟܝܡܐ ܐܢܛܘܠܝܟܝܐ ܕܐܠܦܐ ܘܕܒܝܬܐ. 
                ܠܘܩܒܠ ܐܝܠܝܢ ܕܡܪܝܢ ܕܢܦܫܐ ܐܝܬܝܗܿ ܕܘܪܫܐ ܕܪ̈ܓܫܐ ܘܡܢܝܢܐ ܕܡܙܝܥ ܝܬܗܿ ܐܘ
                    ܟܘܢܫܐ ܕܣܘܟܠܐ ܘܥܘܗܕܢܐ. 
                (ܐ: ) ܕܘܪܫܐ ܕܪ̈ܓܫܐ ܣܘܟܠܐ ܘܥܘܗܕܢܐ ܓܕܫ̈ܐ. ܢܦܫܐ ܕܝܢ ܐܘܣܝܐ ܐܝܬܝܗܿ ܡܕܝܢ
                    ܠܝܬܝܗܿ ܢܦܫܐ ܕܘܪܫܐ ܕܪ̈ܓܫܐ ܘܡܢܝܢܐ ܘܣܘܟܠܐ ܘܥܘܗܕܢܐ. (ܒ: )ܡܛܠ ܕܡܢ ܗܠܝܢ ܕܒܗܿܘ ܣܝܡ
                    ܐܝܬܝܗܿ. ܢܦܫܐ ܕܝܢ ܗܝ ܐܝܬܝܗܿ ܗܿܘ ܕܣܝܡ. ܡܕܝܢ ܠܝܬܝܗܿ ܢܦܫܐ ܕܘܪܫܐ ܘܡܢܝܢܐ ܘܣܘܟܠܐ
                    ܘܥܘܗܕܢܐ. (ܓ: ) ܘܕܘܪܫܐ ܡܢ ܕܪ̈ܓܫܐ ܘܣܘܟܠܐ ܘܥܘܗܕܢܐ ܘܡܢܝܢܐ ܠܐ ܡܙܝܥܝܢ ܠܦܓܪܐ ܡܠܝܐܝܬ
                    (ܡܠܝܠܐܝܬ). ܡܕܝܢ ܠܝܬܝܗܿ ܢܦܫܐ  f.21a  ܕܘܪܫܐ ܕܪ̈ܓܫܐ ܘܡܢܝܢܐ ܘܣܘܟܠܐ ܘܥܘܗܕܢܐ. 
                ܠܘܩܒܠ ܦܠܛܘܢ ܕܐܡܪ ܕܐܦ ܒܚܝ̈ܘܬܐ ܠܐ ܡܠܝ̈ܠܬܐ ܐܝܬ ܢܦܫܐ. 
                ܐܡܪܝܢܢ ܕܐܝܬ ܒܚܝ̈ܘܬܐ ܠܐ ܡܠܝ̈ܠܬܐ ܢܦܫܐ ܘܝܕܝܥܐ ܡܢ ܡܚܘܝܢ̈ܘܬܐ ܗܠܝܢ:
                    ܩܕܡܐܝܬ: ܠܝܬ ܒܚܝ̈ܘܬܐ ܠܐ ܡܠܝ̈ܠܬܐ ܘܠܐ ܚܕܐ ܡܬܬܙܝܥܢܘܬܐ ܡܠܝܠܬܐ. ܘܠܐ ܣܘܟܠܐ ܘܠܐ ܪܥܝܢܐ
                    ܘܟܬܝ̈ܒܬܐ ܘܐܦܠܐ ܐܘܡܢܘܬܐ ܗܠܝܢ ܕܫܟܚ̈ܬܐ ܐܢܝܢ ܕܢܦܫܐ ܡܠܝܠܬܐ. ܒ: ܝܕܝܥܐ ܕܠܝܬ ܒܗܝܢ ܢܦܫܐ
                    ܡܠܝܠܬܐ ܡܢ ܗܿܝ ܕܠܐ ܡܟܢ̈ܢ ܕܢܩܒܠܢ ܢܡܘܣܐ ܗܿܝ ܕܐܝܬܝܗܿ ܢܦܫܐ ܡܠܝܠܬܐ. ܠܐ ܡܬܘܡ ܐܢܫ ܣܡ
                    ܢܡܘܣܐ ܠܝܘܢ̈ܐ ܐܘ ܠܚܡܪܐ ܐܘ ܠܢܘܢܐ ܕܢܨܘܡܘܢ ܐܘ ܕܢܨܠܘܢ. ܓ: ܝܕܝܥܐ ܕܠܝܬ ܒܗܝܢ ܢܦܫ̈ܬܐ
                    ܡܠܝ̈ܠܬܐ ܡܢ ܗܿܝ ܕܠܐ ܩܢܝܛܝܢ ܡܢ ܫܘܢܩܐ ܕܥܠܡܐ ܕܥܬܝܕ. ܐܦܠܐ ܡܣܟܝܢ ܠܦܘܪܥܢܐ ܗܿܘ ܕܥܬܝܕ ܐܘ
                    ܬܘܒ ܕܡܠܝܟ. ܕ: ܝܕܝܥܐ ܕܝܢ ܕܠܝܬ ܠܗܝܢ ܢܦܫܐ ܡܠܝܠܬܐ. ܡܢ ܗܿܝ ܕܠܐ ܡܬܚܙܝܢ ܒܗܝܢ ܡܥܒܕܢܘܬܐ
                    ܣܩܘܒܠܝ̈ܬܐ. ܐܡܪ ܐܢْܐ ܕܝܢ ܕܠܐ ܡܟܢ̈ܢ ܕܟܕ ܟܦܢ̈ܢ ܘܐܝܬ ܠܗܝܢ ܬܘܪܣܝܐ ܕܠܐ ܢܐܟܠܢ. ܘܠܐ
                    ܡܨܝ̈ܢ ܕܟܕ ܪܐܓܝܢ ܠܙܘܘܓܐ ܘܡܫܟܚܝܢ ܥܗܢܘܬܐ ܘܡܚܕܐ ܘܒܪܫܥܬܗ ܡܙܕܘܓܝܢ  f.21b  ܗܟܢܐ
                    ܘܫܪܟܐ. ܕܐܚܪ̈ܢܝܬܐ. ܗ: ܝܕܝܥܐ ܬܘܒ ܕܠܝܬ ܒܚܝ̈ܘܬܐ ܠܐ ܡܠܝ̈ܠܬܐ ܢܦܫܐ ܡܠܝܠܬܐ ܡܢ ܗܿܝ ܕܟܠ
                    ܚܕܐ ܚܕܐ ܡܢܗܝܢ ܗܝ ܟܕ ܗܝ ܡܥܒܕܢܘܬܐ ܗܝ ܕܐܕܫܐ ܡܥܒܕܐ. ܐܦܢ ܒܝܬܝܪܘܬܐ ܡܥܒܕܐ ܘܠܐ ܡܫܟܚܐ
                    ܕܬܫܚܠܦܝܗܿ ܠܗܿܝ ܡܥܒܕܢܘܬܐ ܐܘ ܕܠܐ ܬܥܒܕܝܗܿ ܕܐܝܟ ܐܝܟܢ. ܓܡ̈ܠܐ ܡܢ ܟܠܗܝܢ ܐܟܬܢܝܢ. ܕܐܒܐ
                    ܕܝܢ ܟܪܘܡܬܢܝܢ. ܐܪ̈ܝܘܬܐ ܡܢ ܠܒܝ̈ܒܢ. ܐܪܢܒܐ ܕܝܢ ܕܚܘܠܬܢܝܢ. ܘܬܥܠܐ ܨܢܝܥܝܢ. ܘܛܘܣܐ ܚܬܝܪܝܢ.
                    ܘܡܢ ܗܕܐ ܝܕܝܥܐ ܕܠܘ ܡܠܝܠܐܝܬ ܡܬܬܙܝܥܝܢ ܐܠܐ ܠܐ ܡܠܝܠܐܝܬ. ܘ: ܐܢܕܝܢ ܡܗܦܟ ܐܢܫ ܡܢ ܕܒܝܬ
                    ܦܠܛܘܢ ܘܐܡܪ ܕܐܦ ܫܒܪ̈ܐ ܠܘ ܡܠܝܠܐܝܬ ܡܬܬܙܝܥܝܢ. ܐܡܪܝܢܢ ܠܘܬܗ. ܕܐܦܢ ܒܩܘܡܬܐ ܫܒܪܝܬܐ ܠܘ
                    ܡܥܒܕܢܘܬܐ ܡܠܝܠܬܐ ܡܚܘܝܢ ܐܠܐ ܒܩܘܡܬܐ ܕܒܬܪܟܢ ܡܠܝܠܐܝܬ ܡܥܒܕܝܢ. ܚܝ̈ܘܬܐ ܕܝܢ ܠܐ ܡܠܝ̈ܠܬܐ
                    ܘܠܐ ܒܚܕܐ ܡܢ ܩܘܡܬܗܝܢ ܡܥܒܕܢܘܬܐ ܡܠܝ̈ܠܬܐ ܡܚܘܝܢ ܐܠܐ ܠܐ ܡܠܝ̈ܠܬܐ. ܐܢܕܝܢ ܡܗܦܟܝܢ ܬܘܒ
                    ܘܐܡܪܝܢ ܕܡܥܒܕܢܘܬܐ ܡܠܝ̈ܠܬܐ ܐܝܬܝܗܝܢ. ܘܡܬܬܙܝܥܢܘܬܐ ܡܠܝܠܬܐ ܫܟܝܚܐ ܠܗܝܢ. ܐܠܐ ܓܒܝܠܘܬܐ
                    ܕܗܕܡ̈ܐ ܕܝܠܗܝܢ ܠܐ ܡܟܢ ܕܢܩܒܠ ܡܥܒܕܢܘܬܐ ܡܠܝܠܬܐ  f.22a  ܐܟܙܢܐ ܕܒܢܝ̈ܢܫܐ
                    ܕܐܒܝ̈ܕܢ ܨܒܥܬܗܘܢ ܘܒܛܠܝܢ ܡܢ ܐܘܡܢܘܬܐ. ܐܡܪܝܢܢ ܠܘܬܗܘܢ: ܡܕܝܢ ܐܝܟ ܡܠܬܗܘܢ ܠܘ ܢܦܫܐ ܕܠܚܡܐ
                    ܠܦܓܪ̈ܐ ܕܝܠܗܝܢ ܥܒܕ ܠܗܝܢ ܒܪܘܝܐ. ܐܠܐ ܕܠܐ ܠܚܡܐ. ܐܢ ܗܟܢܐ ܐܝܬܝܗܿ ܗܕܐ. ܕܣܪܝܩܐܝܬ ܒܪܐ
                    ܐܠܗܐ ܠܢܦܫ̈ܬܐ ܕܚܝ̈ܘܬܐ ܠܐ ܡܠܝ̈ܠܬܐ. ܐܠܐ ܕܓܠܬܐ ܐܝܬܝܗܿ ܗܕܐ ܕܐܠܗܐ ܒܪܐ ܡܕܡ ܣܪܝܩܐܝܬ.
                    ܐܝܟܢܐ ܕܐܡܪ ܐܢܫ ܡܢ ܚܟܝ̈ܡܐ. ܡܛܠ ܒܪ̈ܝܬܐ ܘܗܘܝܐ ܗܟܢܐ. ܕܠܐ ܠܡ ܒܪܐ ܚܕ ܡܢܗܘܢ ܒܛܝܠܐܝܬ. ܟܕ
                    ܛܒ ܐܦܠܐ ܚܕ ܡܢ ܒܢܝ̈ܢܫܐ ܚܟܝ̈ܡܐ. ܥܒܕ ܡܕܡ ܣܪܝܩܐܝܬ. ܚܕ ܟܡܐ ܐܠܗܐ. 
                ܠܘܩܒܠ ܡܢܝ̈ܢܝܐ ܕܐܡܪܝܢ ܕܢܦܫܐ ܐܝܬܝܗܿ ܕܠܐ ܓܫܘܡ ܕܡܬܦܠܓܐ ܠܚܕ ܚܕ ܡܢ
                    ܓܘܫ̈ܡܐ ܘܐܝܬܝܗܿ ܠܐ ܡܝܘܬܬܐ. 
                ܐܢ ܡܬܦܠܓܘ ܡܬܦܠܓܐ ܠܘ ܕܠܐ ܓܫܘܡ ܐܝܬܝܗܿ ܐܠܐ ܓܘܫܡܐ. ܠܐ ܓܫܘܡ ܕܝܢ ܠܐ ܣܟ
                    ܡܩܒܠ ܦܘܠܓܐ ܕܡܢܘܬܐ. ܓܘܫܡܐ ܕܝܢ ܒܪܡ ܡܬܦܠܓ. ܘܒܝܕ ܗܕܐ ܕܓܠܬܘܢ ܠܡܠܬܟܘܢ ܗܿܝ ܕܐܡܪܬܘܢ ܠܐ
                    ܓܫܘܡ ܐܝܬܝܗܿ ܢܦܫܐ. ܐܢ ܡܬܦܠܓܘ ܡܬܦܠܓܐ ܢܦܫܐ ܓܘܫܡܐ ܗܝ. ܘܐܢ ܓܘܫܡܐ ܗܝ ܡܝܘܬܬܐ ܗܝ. ܘܡܛܠ
                    ܕܟܠ ܕܚܝ ܘܐܝܬܘܗܝ ܓܘܫܡܐ ܡܝܘܬܐ ܗܘ.  f.22b  ܘܒܕܓܘܢ ܫܪܝܬܘܢ ܐܦ ܠܗܿܝ ܡܠܬܐ
                    ܕܝܠܟܘܢ ܐܚܪܝܬܐ ܕܐܡܪܐ ܕܠܐ ܡܝܘܬܬܐ ܗܝ ܢܦܫܐ. ܘܐܢ ܢܦܫܐ ܚܕܐ ܐܝܬܝܗܿ ܐܝܟ ܕܐܡܪܬܘܢ ܘܡܬܦܠܓܘ
                    ܡܬܦܠܓܐ ܠܟܠ ܚܕ ܚܕ ܡܢ ܓܘܫ̈ܡܐ ܢܦܫܐ ܟܝܬ ܘܠܐ ܡܢܦܫܐ ܡܫܟܚ̈ܢ ܟܐܦ̈ܐ ܘܦܪ̈ܙܠܐ ܕܐܝܬܝܗܘܢ
                    ܓܘܫ̈ܡܐ ܠܐ ܡܢ̈ܦܫܐ. ܗܿܝ ܕܕܓܠܬܐ ܐܝܬܝܗܿ. ܡܕܝܢ ܠܝܬܝܗܿ ܢܦܫܐ ܐܟܡܐ ܕܣܒܪܝܢ ܥܠܝܗܿ ܡܢܝ̈ܢܐ. 

            
            
                ܩܦܠܐܘܢ ܕܚܡܫܐ
                 ܕܡܚܘܐ ܕܐܘܣܝܐ ܐܝܬܝܗܿ ܢܦܫܐ
                ܝܕܝܥܐ ܕܝܢ ܕܐܘܣܝܐ ܐܝܬܝܗܿ ܢܦܫܐ. ܡܢ ܗܠܝܢ ܡܚܘܝܢ̈ܘܬܐ. ܐ: ܗܕܐ ܗܟܝܠ
                    ܕܐܝܬܝܗܿ ܕܝܠܝܬܐ ܕܐܘܣܝܐ ܐܝܟ ܕܡܬܪܥܝܢ ܚܟܝ̈ܡܐ. ܗܿܝ ܕܚܕܐ ܘܗܝ ܟܕ ܗܝ ܡܩܒܠܢܝܬܐ ܕܣܩܘܒܠܝ̈ܬܐ
                    ܬܗܘܐ ܐܝܬܝܗܿ ܒܫܘܚܠܦܐ ܗܿܘ ܕܝܠܗܿ ܕܐܝܟ ܐܝܟܢ. ܓܘܫܡܐ ܕܝܢ ܐܘܣܝܐ ܐܝܬܘܗܝ. ܒܙܒܢ ܡܢ ܚܘܪܐ
                    ܗܿܘܐ. ܒܙܒܢ ܕܝܢ ܡܢ ܐܘܟܡܐ. ܘܦܓܪܐ ܟܕ ܐܘܣܝܐ ܐܬܘܗܝ. ܒܙܒܢ ܕܝܢ ܚܠܝܡܐ ܐܝܬܘܗܝ. ܒܙܒܢ ܕܝܢ
                    ܟܪܝܗܐ. ܘܗܟܢܐ ܓܘܫܡܐ ܘܦܓܪܐ ܕܐܝܬܝܗܘܢ ܐܘܣܝ̈ܐܣ. ܡܩܒܠܝܢ ܠܚܘܪܘܬܐ ܘܠܐܘܟܡܘܬܐ ܘܠܚܘܠܡܢܐ
                    ܘܠܟܘܪܗܢܐ. ܕܐܝܬܝܗܘܢ ܓܕܫܐ ܣܩܘܒܠܝ̈ܐ. ܒܗ ܕܝܢ ܒܙܢܐ ܐܦ ܢܦܫܐ. ܟܕ ܚܕܐ ܘܗܝ ܟܕ ܗܝ ܐܝܬܝܗܿ.
                    ܒܙܒܢ ܡܢ ܡܩܒܠܐ ܙܕܝܩܘܬܐ ܘܗܿܘܝܐ  f.23a  ܙܕܝܩܬܐ. ܒܙܒܢ ܕܝܢ ܡܩܒܠܐ ܥܘܠܘܬܐ
                    ܘܗܿܘܝܐ ܥܘܠܬܐ. ܗܟܢܐ ܡܩܒܠܐ ܐܦ ܠܢܟܦܘܬܐ ܘܠܙܠܝܠܘܬܐ ܒܙܒܢ ܙܒܢ. ܕܐܝܬܝܗܝܢ ܣܩܘܒܠܝ̈ܬܐ
                    ܕܚܕܕܐ. ܐܢ ܗܘ ܗܟܝܠ ܕܕܝܠܝܬܐ ܕܐܘܣܝܐ ܗܕܐ ܐܝܬܝܗܿ. ܕܟܕ ܡܫܬܚܠܦܐ ܡܢ ܟܝܢܗܿ ܡܩܒܠܐ
                    ܣܩܘܒܠܝ̈ܬܐ ܡܫܚܠܦܐܝܬ. ܡܕܝܢ ܢܦܫܐ ܐܘܣܝܐ ܐܝܬܝܗܿ. ܒ: ܝܕܝܥܐ ܕܢܦܫܐ ܐܘܣܝܐ ܐܝܬܝܗܿ. ܡܢ ܦܓܪܐ
                    ܕܐܝܬܘܗܝ ܐܘܣܝܐ. ܠܐ ܓܝܪ ܡܨܝܐ ܕܗܿܘ ܕܡܬܬܙܝܥ ܘܡܬܥܒܕ ܘܡܬܕܒܪ ܢܗܘܐ ܐܘܣܝܐ. ܡܕܝܢ ܦܓܪܐ
                    ܕܡܬܬܙܝܥ ܐܘܣܝܐ ܐܝܬܘܗܝ. ܐܦ ܢܦܫܐ ܕܡܙܝܥܐ ܠܗ ܕܐܘܣܝܐ ܐܝܬܝܗܿ ܡܢ ܐܢܢܩܐ. ܓ: ܝܕܝܥܐ ܕܐܝܬܝܗܿ
                    ܐܘܣܝܐ. ܡܢ ܝܘܠܦܢ̈ܐ ܕܝܠܦܝܢܢ. ܠܘ ܒܓܘܫܡܢ ܡܬܩܝܡܝܢ. ܘܝܕܝܥܐ ܡܢ ܗܿܝ ܕܕܠܘ ܟܠܗܘܢ ܕܐܝܬܝܗܘܢ
                    ܓܘܫ̈ܡܐ ܡܩܒܠܝ̈ܢ ܝܘܠܦܢ̈ܐ. ܗܐ ܓܝܪ ܚܝ̈ܘܬܐ ܠܐ ܡܠܝ̈ܠܬܐ. ܓܘܫܡܢ̈ܝܬܐ ܐܝܬܝܗܝܢ. ܘܠܐ ܡܩܒܠܝܢ
                    ܝܘܠܦܢ̈ܐ ܘܝܕܥܬܐ. ܢܦܫܐ ܕܝܢ ܡܩܒܠܐ ܝܘܠܦܢ̈ܐ. ܘܐܢ ܒܗܿ ܡܬܩܝܡܝܢ ܝܘܠܦܢ̈ܐ. ܐܝܟ ܓܕܫܐ
                    ܒܐܘܣܝܐ. ܕ: ܝܕܝܥܐ ܕܐܘܣܝܐ ܐܝܬܝܗܿ. ܡܢ ܗܿܝ ܕܢܛܝܪܐ ܘܡܩܝܡܐ ܡܢ ܒܬܪ ܫܪܝܗܿ ܕܡܢ ܦܓܪܐ ܐܝܟ
                    ܕܥܬܝܕܝܢܢ ܕܢܚܘܐ ܒܝܕ ܐܠܗܐ. 
            
            
                 f.23b 
                 ܩܦܠܐܘܢ ܕܫܬܐ
                ܕܡܚܘܐ ܕܢܦܫܐ ܕܠܐ ܓܫܘܡ ܐܝܬܝܗܿ
                ܝܕܝܥܐ ܗܟܝܠ ܕܢܦܫܐ ܕܠܐ ܓܫܘܡ ܐܝܬܝܗܿ. ܡܢ ܣܘܠܝܓܝܣܡܘܣ ܗܠܝܢ ܕܡܣܬܠܓܣܝܢ
                    ܒܐܣܟܝ̈ܡܐ ܩܕܡܝ̈ܐ. ܐ: ܓܘܫܡܐ ܡܢ ܐܝܬ ܠܗ ܬܠܬܐ ܩܝ̈ܡܐ ܐܘܪܟܐ ܘܥܘܡܩܐ ܘܦܬܝܐ. ܬܠܬܐ ܕܝܢ
                    ܩܝ̈ܡܐ ܠܝܬ ܠܗܿ ܠܢܦܫܐ. ܡܕܝܢ ܕܠܐ ܓܫܘܡ ܐܝܬܝܗܿ. ܒ: ܟܠ ܓܘܫܡܐ ܡܬܪܓܫܢܐ ܗܘ ܒܪ̈ܓܫܐ. ܚܡܫܐ
                    ܕܝܢ ܪ̈ܓܫܐ ܠܐ ܢܦܠܝܢ ܥܠ ܢܦܫܐ. ܡܕܝܢ ܕܠܐ ܓܫܘܡ ܐܝܬܝܗܿ. ܓ: ܓܘܫܡܐ ܡܢ ܟܕ ܡܬܬܘܣܦ ܥܠ ܓܘܫܡܐ
                    ܐܚܪܢܐ ܘܢܩܦ ܠܗ ܥܒܕ ܒܗ ܝܘܩܪܐ. ܠܐ ܕܝܢ ܥܒܕܐ ܝܘܩܪܐ ܢܦܫܐ ܒܦܓܪܐ ܟܕ ܡܬܚܝܕܐ ܠܗ. ܡܕܝܢ
                    ܐܝܬܝܗܿ. ܕ: ܥܕܝܢ ܥܠ ܢܦܫܐ ܓܕܫܐ ܕܠܐ ܓܫܘܡ. ܐܟܙܢܐ ܕܙܕܝܩܘܬܐ ܘܥܘܠܘܬܐ. ܘܡܝܬܪܘܬܐ ܘܒܝܫܘܬܐ.
                    ܓܕܫܐ ܕܝܢ ܕܠܐ ܓܫܘܡ ܠܐ ܥܕܝܢ ܥܠ ܓܘܫܡܐ. ܡܕܝܢ ܢܦܫܐ ܠܘ ܓܘܫܡܐ ܐܝܬܝܗܿ. ܗ: ܢܦܫܐ ܡܢ
                    ܒܣܝܒܪ̈ܬܐ ܕܠܐ ܓܫܘܡ ܡܬܬܪܣܝܐ ܒܝܘܠܦܢ̈ܐ ܐܡܪ ܐܢْܐ ܘܒܝܕܥܬܐ. ܓܘܫܡܐ ܕܝܢ ܠܐ ܡܬܬܪܣܐ
                    ܒܣܝܒܪ̈ܬܐ ܕܠܐ ܓܫܘܡ. ܡܕܝܢ ܢܦܫܐ ܠܘ ܓܘܫܡܐ  f.24a  ܐܝܬܝܗܿ. ܘܓܘܫܡܐ ܥܠ ܓܘܫܡܐ
                    ܐܚܪܢܐ ܠܐ ܡܨܝܐ ܕܢܗܘܘܢ ܒܚܕ ܐܬܪܐ ܘܒܚܕܐ ܕܘܟܬܐ ܟܕ ܡܚܝܕܝܢ. ܡܕܝܢ ܕܠܐ ܓܘܫܡܐ ܐܝܬܝܗܿ ܢܦܫܐ.
                    ܘ: ܢܦܫܐ ܡܢ ܩܢܝܐ ܝܕܘܥܬܢܘܬܐ ܡܢ ܟܝܢܗܿ. ܓܘܫܡܐ ܕܝܢ ܠܐ ܩܢِܐ ܝܕܘܥܬܢܘܬܐ ܘܪܓܘܫܬܢܘܬܐ ܡܢ
                    ܟܝܢܗ. ܡܕܝܢ ܕܠܐ ܓܫܘܡ ܐܝܬܝܗܿ ܢܦܫܐ. ܗܠܝܢ ܕܝܢ ܡܚܘܝܢ̈ܘܬܐ ܐܚܪ̈ܢܝܬܐ ܕܡܚܘܝܢ ܢܦܫܐ ܠܐ ܓܫܘܡ
                    ܐܝܬܝܗܿ ܒܩܦܠܐܘܢ ܪܒܝܥܝܐ. ܗܠܝܢ ܡܢ ܣܘܠܝܓܝܣܡ̈ܘ ܕܡܚܘܝܢ ܕܢܦܫܐ ܠܐ ܓܫܘܡ ܐܝܬܝܗܿ. ܣܗܕܘܬܐ
                    ܕܝܢ ܕܡܢ ܟܬܒܐ ܩܕܝ̈ܫܐ ܕܡܫܪܪ̈ܢ ܕܢܦܫܐ ܕܠܐ ܓܫܘܡ ܐܝܬܝܗܿ. ܕܐܝܬܝܗܝܢ ܗܠܝܢ. ܐܡܪ ܗܟܝܠ ܡܪܝܐ
                    ܕܝܠܢ ܒܐܘܢܓܠܝܘܢ ܕܝܠܗ: ܕܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ. ܢܦܫܐ ܕܝܢ ܠܐ ܡܫܟܚܝܢ
                        ܩܛܠܝܢ1 ܡܬܝ:
                            28:10. ܚܕܐ ܡܢ ܕܢܦܫܐ ܕܠܐ ܓܫܘܡ ܐܝܬܝܗܿ. ܐܚܪܬܐ ܕܠܐ ܡܝܘܬܬܐ ܗܝ
                    ܕܕܠܐ ܓܫܘܡ ܐܝܬܝܗܿ. ܒܗܿܝ ܕܠܐ ܡܟܢܐ ܕܬܩܒܠ ܣܝܦܐ. ܐܘ ܚܫ̈ܐ ܐܝܠܝܢ ܕܥܕܝܢ ܥܠ ܦܓܪܐ ܕܐܝܬܘܗܝ
                    ܓܘܫܡܐ. ܠܐ ܡܝܘܬܬܐ ܕܝܢ ܒܗܿܝ ܕܠܐ ܡܬܩܛܠܐ ܐܟܡܐ ܕܡܬܩܛܠ ܦܓܪܐ. ܘܬܘܒ ܐܡܪ: ܠܐ ܗܘܐ ܒܠܚܡܐ
                         f.24b  ܒܠܚܘܕ ܢܐܚܐ ܒܪܢܫܐ. ܐܠܐ ܒܟܠ ܡܠܐ ܕܢܦܩܐ ܡܢ ܦܘܡܗ ܕܐܠܗܐ2 ܡܬܝ: 4:4.
                    ܒܗܿܝ ܗܟܝܠ ܕܐܡܪ ܐܠܐ ܒܟܠ ܡܠܐ. ܚܘܝ ܕܢܦܫܐ ܐܝܬܝܗܿ ܕܡܬܬܪܣܝܐ ܒܡ̈ܠܐ. ܘܒܝܕ ܗܕܐ ܕܡܬܬܪܣܝܐ
                    ܒܡ̈ܠܐ ܘܒܝܘܠܦܢ̈ܐ ܚܘܝ ܕܠܐ ܓܫܘܡ ܐܝܬܝܗܿ. ܘܫܠܝܚܐ ܬܘܒ ܦܘܠܘܣ ܐܡܪ ܗܘ ܡܛܠܬܗ ܗܟܢܐ: ܝܕܥ
                    ܐܢْܐ ܓܒܪܐ ܒܡܫܝܚܐ. ܐܢ ܒܦܓܪܐ ܕܝܢ ܘܐܢ ܕܠܐ ܦܓܪܐ ܠܐ ܝܕܥ ܐܢْܐ. ܐܠܗܐ ܗܘ ܝܕܥ ܕܐܬܚܛܦ ܗܘ
                    ܗܢܐ ܥܕܡܐ ܠܫܡܝܐ ܕܬܠܬܐ3
                            ܕܩܘܪ̈ܝܢܬܝܐ ܕܬܪܬܝܢ:2:12. ܗܫܐ ܕܝܢ ܒܗܿܝ ܕܐܡܪ ܕܐܢ ܕܠܐ ܦܓܪܐ. ܚܘܝ
                    ܕܟܝܢܐ ܕܢܦܫܐ ܠܐ ܦܓܪܢܐ ܐܝܬܘܗܝ ܘܠܐ ܓܘܫܡܢܐ. ܐܠܐ ܐܝܬܘܗܝ ܟܝܢܐ ܐܚܪܢܐ ܕܠܐ ܓܫܘܡ ܣܛܪ ܡܢ
                    ܟܝܢܐ ܕܦܓܪܐ. ܬܘܒ ܟܬܒ ܠܘܬ ܥܒܪ̈ܝܐ: ܕܐܬܕܟܪܘ ܠܐܝܠܝܢ ܕܐܠܝـܨܝܢ ܐܝܟ ܐܢܫ̈ܐ ܕܒܣܪܐ ܠܒܝܫܝܢ
                        ܐܢܬܘܢ1
                            ܥܒܪ̈ܝܐ:3:13. ܚܘܝ ܕܐܚܪܢܐ ܗܘ ܠܒܘܫܐ ܡܢ ܗܿܘ ܕܡܬܠܒܫ ܓܘܫܡܐ ܗܘ.
                    ܝܕܝܥܐ ܕܢܦܫܐ ܕܠܒܫܐ ܠܗ ܠܒܣܪܐ ܕܠܐ ܓܫܘܡ ܐܝܬܝܗܿ. ܘܬܘܒ ܢܒܝܐ ܕܘܝܕ ܐܡܪ: ܢܫܡܥ ܡܢܐ ܢܡܠܠ
                    ܡܪܝܐ ܐܠܗܢ2
                            ܡܙܡܘܪ̈ܐ:9:84. ܘܙܒܢ̈ܬܐ ܣܓܝ̈ܐܬܐ ܢܒܝܐ ܠܐܠܗܐ ܟܕ ܡܡܠܠ. ܘܐܟܙܢܐ  f.25a  ܒܦܘܡܐ ܓܘܫܡܢܝܐ ܢܦܩ ܗܘܐ ܡܡܠܠܗ. ܗܟܢܐ ܘܐܦܠܐ ܒܐܕܢ̈ܐ ܓܘܫܡܢ̈ܝܬܐ ܫܡܥܝܢ
                    ܗܘܘ ܠܗ ܢܒܝ̈ܐ. ܐܠܐ ܒܢܦܫ̈ܬܐ ܓܘܫܡܢܝ̈ܬܐ. ܡܕܝܢ ܐܬܚܘܝܬ ܒܝܕ ܗܠܝܢ ܕܐܬܐܡܪ ܕܢܦܫܐ ܕܠܐ ܓܫܘܡ
                    ܐܝܬܝܗܿ. 
            
            
                ܩܦܠܐܘܢ ܕܫܒܥܐ
                ܕܡܚܘܐ ܕܢܦܫܐ ܦܫܝܛܬܐ ܐܝܬܝܗܿ
                ܢܦܫܐ ܕܝܢ ܦܫܝܛܬܐ ܐܝܬܝܗܿ. ܘܝܕܝܥܐ ܡܢ ܗܠܝܢ. ܢܦܫܐ ܡܢ ܕܠܐ ܓܫܘܡ ܐܝܬܝܗܿ.
                    ܘܟܠ ܕܠܐ ܓܫܘܡ ܦܫܝܛܐ ܐܝܬܘܗܝ. ܡܕܝܢ ܢܦܫܐ ܦܫܝܛܬܐ ܐܝܬܝܗܿ. ܢܦܫܐ ܠܐ ܡܬܦܠܓܐ ܘܠܐ ܡܬܦܣܩܐ
                    ܠܡܢ̈ܘܬܐ. ܘܟܠ ܕܠܐ ܡܬܦܠܓ ܠܡܢ̈ܘܬܐ ܦܫܝܛܐ ܗܘ. ܢܦܫܐ ܡܕܝܢ ܦܫܝܛܬܐ ܐܝܬܝܗܿ. ܢܦܫܐ ܡܢ ܠܐ
                    ܡܪܟܒܐ ܡܢ ܐܣܛܘܟܣܐ. ܘܟܠ ܕܠܐ ܡܪܟܒ ܡܢ ܐܣܛܘܟܣܐ ܦܫܝܛܐ ܐܝܬܘܗܝ. ܡܕܝܢ ܢܦܫܐ ܦܫܝܛܬܐ ܐܝܬܝܗܿ.
                    ܘܗܠܝܢ ܡܢ ܬܠܬܐ ܣܘܠܝܓܝܣܡ̈ܘ ܕܒܐܣܟܝܡܐ ܩܕܡܝܐ ܥܠ ܗܿܝ ܕܢܦܫܐ ܦܫܝܛܬܐ ܐܝܬܝܗܿ. 
            
            
                ܩܦܠܐܘܢ ܕܬܡܢܝܐ
                ܕܡܚܘܐ ܕܥܠ ܡܢܐ ܙܕܩ ܢܥܩܒ ܩܕܡܐܝܬ. ܥܠ ܟܝܢܐ ܕܢܦܫܐ 
                ܐܘ ܥܠ ܚܝܠܗܿ ܐܘ ܥܠ ܡܥܒܕܢܘܬܗܿ
                ܐܡܪܝܢܢ ܕܬܠܬܐ ܐܝܬܝܗܘܢ ܗܠܝܢ ܟܝܢ̈ܐ ܘܚܝ̈ܠܐ ܘܡܥܒܕܢܘܬܐ. ܟܝܢܐ ܡܢ ܐܝܬܘܗܝ
                    ܡܕܡ ܕܡܟܢ. ܚܝ̈ܠܐ ܕܝܢ ܒܟܝܢܐ ܡܩܝܡܝܢ. ܡܥܒܕܢܘܬܐ ܕܝܢ ܡܢ ܚܝ̈ܠܐ ܐܝܬܝܗܘܢ. ܗܿܘ ܗܟܝܠ ܕܡܥܩܒ
                    ܥܠ ܚܝ̈ܠܐ ܐܘ ܥܠ ܡܥܒܕܢܘܬܐ ܟܕ ܫܒܩ ܩܕܡܐܝܬ ܕܢܥܩܒ ܥܠ ܟܝܢܐ. ܕܡܐ ܠܐܢܫ ܣܡܝܐ ܕܡܢ ܫܡܥܐ
                    ܒܠܚܘܕ ܒܥܐ ܕܚܒܟ ܣܡ̈ܢܐ. ܘܨܐܪ ܨܠܡ̈ܐ ܫܦܝܪ̈ܐ ܘܕܡܘܬܐ ܦܐܝ̈ܬܐ ܡܕܡ. ܙܕܩ ܩܕܡܐܝܬ ܕܥܠ ܟܝܢܐ
                    ܕܢܦܫܐ ܢܥܩܒ ܕܡܢܐ ܐܝܬܘܗܝ. ܡܛܠ ܕܗܘ ܐܝܬܘܗܝ ܩܕܡܝܐ ܕܫܟܢܐ ܥܠܘܗܝ ܡܚܫܒܬܐ ܡܒܚܢܢܝܬܐ. ܡܛܠ
                    ܕܡܩܝܡܐ ܐܝܬܘܗܝ ܘܡܢܗ ܘܠܗ. ܘܠܐ ܣܟ ܕܒܐܚܪܢܐ ܢܬܩܝܡ. ܒܗܿܝ ܕܐܝܬܘܗܝ ܘܡܬܐܡܪ ܐܘܣܝܐ. ܘܒܬܪܟܢ
                    ܘܡܛܠ ܗܿܝ ܕܐܦ ܚܝ̈ܠܐ ܒܗ ܒܟܝܢܐ ܐܝܬܘܗܝ ܩܘܝܡܗܘܢ. ܘܒܬܪܟܢ ܥܠ ܚܝܠܗܿ ܕܢܦܫܐ ܢܥܩܒ. ܡܛܠ
                    ܕܗܢܘܢ ܩܕܝܡܝܢ ܠܡܥܒܕܢܘܬܐ. ܐܝܛܐ ܕܝܢ ܡܥܩܒܝܢܢ ܥܠ ܡܥܒܕܢܘܬܐ ܕܢܦܫܐ. ܡܛܠ ܕܡܢ ܚܝ̈ܠܐ
                    ܐܝܬܝܗܘܢ. ܡܕܝܢ ܙܕܩ ܕܢܥܩܒ ܩܕܡܐܝܬ ܥܠ ܟܝܢܗܿ ܕܢܦܫܐ. 
            
            
                 f.26a 

                ܩܦܠܐܘܢ ܕܬܫܥܐ
                ܕܡܚܘܐ ܕܡܢܐ ܐܝܬܘܗܝ ܟܝܢܗܿ ܕܢܦܫܐ 
                ܡܫܐܠ ܐܢܫ ܟܐܢܐܝܬ ܘܐܡܪ: ܕܡܢܐ ܐܝܬܘܗܝ ܟܝܢܗܿ ܕܢܦܫܐ. ܘܐܡܪܝܢܢ ܕܟܝܢܗܿ
                    ܕܢܦܫܐ ܚܝ̈ܐ ܐܝܬܘܗܝ. ܐܢܕܝܢ ܡܗܦܟ ܘܐܡܪ: ܕܡܢ ܐܝܟܐ ܝܕܝܥܐ ܕܚܝ̈ܐ ܐܝܬܘܗܝ ܟܝܢܗܿ. ܐܡܪܝܢܢ
                    ܕܝܕܝܥܐ ܡܢ ܗܠܝܢ ܡܚܘܝܢ̈ܘܬܐ. ܐ: ܟܠ ܕܚܝ ܒܟܝܢܗ ܚܝ. ܘܠܘ ܒܐܚܪܢܐ. ܚܝܐ ܐܝܬܘܗܝ ܒܟܝܢܗ. ܢܦܫܐ
                    ܕܝܢ ܒܟܝܢܗܿ ܚܝܐ ܘܠܘ ܒܐܚܪܢܐ. ܡܕܝܢ ܚܝ̈ܐ ܐܝܬܘܗܝ ܟܝܢܗܿ. ܒ: ܦܓܪܐ ܠܘ ܚܝܐ ܐܝܬܘܗܝ ܒܟܝܢܗ.
                    ܐܠܐ ܒܐܚܪܢܐ ܚܝ. ܘܝܕܝܥܐ ܡܢ ܗܿܝ ܕܟܕ ܦܪܫܝܢ ܗܿܢܘܢ ܚܝ̈ܐ ܕܒܗ ܦܐܫ ܠܐ ܚܝܐ. ܢܦܫܐ ܕܝܢ ܚܝ̈ܐ
                    ܐܝܬܘܗܝ ܟܝܢܗܿ. ܘܝܕܝܥܐ ܡܢ ܗܿܝ ܕܠܐ ܣܟ ܦܐܫ ܟܝܢܗܿ ܟܕ ܐܝܬܘܗܝ ܠܐ ܚܝܐ. ܓ: ܗܿܘ ܕܐܝܬܘܗܝ
                    ܟܝܢܗ ܘܚܝܐ ܠܐ ܫܩܠ ܫܘܠܡܐ. ܘܢܦܫܐ ܠܐ ܫܩܠܐ ܫܘܠܡܐ. ܡܕܝܢ ܚܝ̈ܐ ܐܝܬܘܗܝ ܟܝܢܗܿ. ܘܗܿܘ
                    ܕܐܝܬܘܗܝ ܟܝܢܗ ܚܝ̈ܐ. ܠܐ ܡܐܬ. ܘܢܦܫܐ ܠܐ ܡܝܬܐ. ܡܕܝܢ ܚܝ̈ܐ ܐܝܬܘܗܝ ܟܝܢܗܿ. ܐܬܚܘܝܬ ܒܝܕ
                    ܗܠܝܢ ܢܗܝܪܐܝܬ ܕܟܝܢܐ ܕܢܦܫܐ ܚܝ̈ܐ ܐܝܬܘܗܝ. ܐܢܕܝܢ ܡܗܦܟ ܐܢܫ ܘܐܡܪ: ܕܐܢ ܗܟܢܐ ܐܝܬܘܗܝ. ܐܦ
                    ܟܝܢܐ ܕܡܠܐܟܐ ܚܝ̈ܐ ܐܝܬܘܗܝ. ܘܒܕܓܘܢ ܠܐ ܡܫܟܚ ܟܝܢܐ ܕܢܦܫܐ  f.26b  ܕܗܘ ܐܝܬܘܗܝ
                    ܟܝܢܐ ܕܡܠܐܟܐ. ܘܟܝܢܐ ܕܡܠܐܟܐ ܗܘ ܐܝܬܘܗܝ ܕܢܦܫܐ. ܐܡܪܝܢܢ ܠܘܬܗ: ܕܠܘ ܡܛܠ ܕܫܘܐ ܟܝܢܐ ܕܢܦܫܐ
                    ܠܟܝܢܐ ܕܡܠܐܟܐ ܒܗܿܝ ܕܚܝ̈ܐ. ܡܢ ܐܢܢܩܝ ܕܢܗܘܐ ܟܝܢܐ ܕܡܠܐܟܐ ܘܕܢܦܫܐ ܚܕ. ܡܛܠ ܕܐܦܢ ܚܝ̈ܐ
                    ܐܝܬܘܗܝ ܟܝܢܗܿ ܕܢܦܫܐ. ܐܠܐ ܦܪܝܫܝܢ ܚܝ̈ܐ ܡܢ ܚܝ̈ܐ. ܒܗܿܝ ܕܪܡܝܢ ܘܡܥܠܝܢ ܚܝ̈ܐ ܕܡܠܐܟܐ ܡܢ
                    ܢܦܫܐ. ܘܐܝܟܢܐ ܕܪܡܝܢ ܚܝ̈ܐ ܡܢ ܚܝ̈ܐ. ܗܟܢܐ ܐܦ ܟܝܢܐ ܡܢ ܟܝܢܐ ܪܡ ܘܡܥܠܝ. ܘܬܘܒ ܡܠܐܟܐ ܐܦܢ
                    ܟܝܢܗܘܢ ܐܝܬܘܗܝ ܚܝ̈ܐ ܐܠܐ ܠܐ ܡܚܝܕܝܢ ܥܡ ܓܘܫ̈ܡܐ. ܘܒܝܕ ܗܕܐ ܡܝܬܪܝܢ ܚܝ̈ܐ ܕܡܠܐܟܐ ܡܢ
                    ܕܢܦܫܐ. ܘܒܕܓܘܢ ܗܟܢܐ ܘܐܦ ܟܝܢܐ. ܘܬܘܒ ܐܝܬ ܠܗܿ ܠܢܦܫܐ ܕܝܠܝ̈ܬܐ ܕܒܗܝܢ ܦܪܝܫ ܟܝܢܗܿ ܡܢ
                    ܕܡܠܐܟܐ. ܡܕܝܢ ܐܬܚܘܝܬ ܒܝܕ ܗܠܝܢ ܕܚܝ̈ܐ ܐܝܬܘܗܝ ܟܝܢܐ ܕܢܦܫܐ. ܘܬܘܒ ܐܡܪܝܢܢ ܕܐܝܬܘܗܝ ܟܝܢܗܿ
                    ܕܢܦܫܐ. ܠܐ ܡܝܘܬܐ. ܘܥܠ ܗܿܝ ܐܡܪܝܢܢ ܠܐ ܡܝܘܬܘܬܐ ܥܠ ܢܦܫܐ. ܠܘ ܓܠܝܙܘܬܐ ܡܫܘܕܥܝܢܢ. ܐܠܐ
                    ܩܢܝܘܬܐ. ܐܝܟ ܕܥܬܝܕܝܢܢ ܕܢܚܘܐ ܒܝܕ ܐܠܗܐ. ܘܐܝܕܐ ܩܢܝܘܬܐ ܡܫܘܕܥܝܢܢ ܟܕ ܐܡܪܝܢܢ ܠܐ ܡܝܘܬܘܬܐ
                    ܥܠ  f.27a  ܢܦܫܐ ܘܐܡܪܝܢܢ ܕܚܝ̈ܐ. ܘܒܕܓܘܢ ܫܘܝܐ ܗܝ ܕܢܐܡܪ ܥܠ ܢܦܫܐ ܚܝ̈ܐ ܠܟܝܢܗܿ
                    ܫܘܕܥܢܢ ܟܝܢܗ ܓܝܪ ܚܝ̈ܐ ܐܝܬܘܗܝ. ܘܟܕ ܐܡܪܝܢܢ ܕܐܝܬܘܗܝ ܟܝܢܗܿ ܕܢܦܫܐ ܠܐ ܡܝܘܬܘܬܐ. ܚܝ̈ܐ
                    ܡܫܘܕܥܝܢܢ ܕܐܝܬܘܗܝ. ܗܟܢܐ ܘܐܦ ܟܕ ܥܠ ܡܠܐܟܐ ܡܬܐܡܪܐ ܠܐ ܡܝܘܬܘܬܐ. ܚܝ̈ܐ ܡܫܘܕܥܐ ܘܠܘ
                    ܓܠܝܙܘܬܐ. ܡܕܝܢ ܟܝܢܗܿ ܕܢܦܫܐ ܚܝ̈ܐ ܐܝܬܘܗܝ. ܘܣܗܕ ܠܗܕܐ ܓܪܝܓܪܝܘܣ ܕܐܡܪ ܒܡܐܡܪܐ ܗܿܘ ܕܥܠ
                    ܝܠܕܐ ܗܟܢܐ. ܡܢ ܗܘܠܐ ܡܢ ܦܓܪܐ ܢܣܒ. ܡܢܗ ܕܝܢ ܚܝ̈ܐ ܣܡ ܗܢܘܢ ܕܢܦܫܐ ܝܕܘܥܬܢܝܬܐ. ܘܝܘܩܢܐ
                    ܕܐܠܗܐ ܝܕܥܐ ܡܠܬܐ. 
            
            
                ܩܦܠܐܘܢ ܕܥܣܪܐ
                ܕܡܚܘܐ ܥܠ ܚܝ̈ܠܗܿ ܘܡܥܒܕܢܘܬܗܿ ܕܢܦܫܐ
                ܚܝ̈ܠܐ ܗܟܝܠ ܕܢܦܫܐ ܡܢܗܘܢ ܡܢ ܐܝܬܝܗܘܢ ܟܝܢ̈ܝܐ. ܡܢܗܘܢ ܕܝܢ ܓܕܫܢ̈ܝܐ.
                    ܘܟܝܢ̈ܝܐ ܡܢ ܐܝܬܝܗܘܢ : ܡܕܥܐ . ܬܪܥܝܬܐ . ܝܕܘܥܬܢܘܬܐ . ܡܠܝܠܘܬܐ. ܙܘܥܐ. ܥܘܗܕܢܐ. ܘܐܝܠܝܢ
                    ܕܠܗܠܝܢ ܕܡܝܢ ܓܕܫܢ̈ܝܐ ܕܝܢ ܐܝܬܝܗܘܢ: ܚܡܬܐ. ܪܓܬܐ. ܪܓܫܬܐ ܗܿܝ ܕܒܚܡܫܐ ܪ̈ܓܫܐ ܦܐܢܛܣܝܐ
                    ܘܐܝܠܝܢ ܕܕܡܝܢ ܠܗܠܝܢ.  f.27b 
                
                ܐ: ܚܝ̈ܠܐ ܡܢ ܕܢܦܫܐ ܡܢܗܘܢ ܡܢ ܟܝܢ̈ܝܐ
                ܡܕܥܐ. ܬܪܥܝܬܐ. ܝܕܘܥܬܢܘܬܐ. ܡܠܝܠܘܬܐ. ܙܘܥܐ ܝܬܢܝܐ. ܥܘܗܕܢܐ
                ܒ: ܚܝ̈ܠܐ ܕܝܢ ܕܢܦܫܐ ܡܢܗܘܢ ܕܝܢ ܓܕܫܢ̈ܝܐ: 
                ܚܡܬܐ. ܪܓܬܐ. ܪܓܫܬܐ ܕܒܚܡܫܐ ܪ̈ܓܫܐ. ܦܐܢܛܐܣܝܐ
                ܗܠܝܢ ܐܝܬܝܗܘܢ ܚܝ̈ܠܐ ܕܢܦܫܐ ܘܐܝܠܝܢ ܕܕܡܝܢ ܠܗܘܢ. ܐܠܐ ܚܝ̈ܐ ܠܐ ܡܬܝܕܥܝܢ.
                    ܐܠܐ ܒܝܕ ܡܥܒܕܢܘܬܗܘܢ. ܡܛܠ ܕܐܝܬܝܗܘܢ ܟܣܝܐ. ܘܡܕܡ ܕܐܝܬܘܗܝ ܟܣܝܐ. ܒܝܕ ܡܥܒܕܢܘܬܗ ܡܬܝܕܥ.
                    ܡܕܝܢ ܙܕܩ ܕܢܦܫܩ ܘܢܘܕܥ ܐܢܘܢ ܠܚܝ̈ܠܐ ܗܠܝܢ ܡܢ ܡܥܒܕܢܘܬܗܘܢ. ܡܫܘܕܥܝܢܢ ܠܗܘܢ ܕܝܢ ܗܟܢܐ.
                    ܡܕܥܐ ܡܢ ܐܝܬܘܗܝ ܚܝܠܐ ܗܿܘ ܕܝܕܥ ܠܗܝܢ ܠـܨܒܘܬܐ ܠܘ ܒܝܕ ܡ̈ܠܐ. ܘܠܐ ܒܝܕ ܬܚܘܝ̈ܬܐ. ܘܐܦܠܐ
                    ܒܝܕ ܝܘܠܦܢܐ. ܐܠܐ ܒܝܕ ܚܙܬܐ  f.28a  ܗܿܝ ܟܣܝܬܐ ܘܦܫܝܛܬܐ ܕܐܝܬܝܗܿ ܠܩܕܝ̈ܫܐ ܒܚܝ̈ܝ
                    ܢܦܫ̈ܬܐ. ܬܪܥܝܬܐ ܕܝܢ ܐܝܬܝܗܿ ܗܿܝ ܕܝܕܥܐ ܠܗܝܢ ܠـܨܒܘܬܐ ܒܝܕ ܡ̈ܠܐ ܘܬܚܘܝ̈ܬܐ ܘܝܘܠܦܢ̈ܐ
                    ܘܣܘܠܝܓܝܣܡ̈ܘ. ܝܕܘܥܬܢܘܬܐ ܕܝܢ ܐܝܬܝܗܿ ܚܝܠܐ…… . ܡܥܒܕܢܘܬܐ ܕܝܢ ܐܝܬܝܗܿ ܗܿܝ ܕܡܦܪܫܐ ܠܚܘܫܒܐ
                    ܫܪܝܪ̈ܐ ܡܢ ܕܓ̈ܠܐ. ܗܟܢܐ ܗܟܝܠ ܡܬܚܡܝܢ ܠܗܿ ܠܦܝܠܠܘܣܘܦܐ ܠܡܠܝܠܘܬܐ ܕܐܝܬܝܗܿ ܚܝܠܐ ܡܦܪܫܢܐ
                    ܕܚܘܫ̈ܒܐ. ܙܘܥܐ ܕܝܢ ܝܬܢܝܐ ܚܝܠܐ ܗܘ ܕܡܬܬܙܝܥܐ ܡܢ ܝܬܗܿ. ܘܠܘ ܡܢ ܡܕܡ ܐܚܪܢܐ. ܥܘܗܕܢܐ ܕܝܢ
                    ܐܝܬܘܗܝ ܚܝܠܐ ܗܘ ܡܟܢܫܢܐ ܘܡܢܛܪܢܐ ܕܝܕܥܬܐ ܕܝܘܠܦܢ̈ܐ. ܒܗܿܝ ܕܡܟܢܫ ܠܗܝܢ ܘܡܢܛܪ ܠܗܝܢ ܕܠܐ
                    ܢܐܒܕܢ. ܘܗܠܝܢ ܡܢ ܐܝܬܝܗܝܢ ܡܥܒܕܢܘܬܐ ܕܡܢ ܚܝ̈ܠܐ ܟܝܢ̈ܝܐ ܕܢܦܫܐ. ܘܡܫܘܕܥܝܢ ܠܗܘܢ. ܡܥܒܕܢܘܬܐ
                    ܕܝܢ ܕܡܢ ܚܝ̈ܠܐ ܓܕܫܢ̈ܝܐ ܕܢܦܫܐ ܐܝܬܝܗܿ ܠܢ ܗܠܢ: ܚܡܬܐ ܡܢ ܐܝܬܝܗܿ ܗܿܝ ܕܢܬܬܙܝܥ ܐܢܫ ܠܬܒܥܬܐ
                    ܕܗܿܘ ܕܐܥܝܩܗ ܘܫܚܩܗ. ܘܪܓܬܐ ܕܝܢ ܗܿܝ ܕܢܪܓ ܐܢܫ ܠܡܐܟܘܠܬܐ ܘܠܫܩܝܐ ܘܠܙܘܘܓܐ  f.28b  ܘܠܩܢܝܢܐ ܘܠܫܪܟܐ ܕܐܝܟ ܗܠܝܢ. ܪܓܫܬܐ ܕܝܢ ܗܿܝ ܕܒܚܡܫܐ ܪ̈ܓܫܐ ܐܝܬܝܗܿ ܦܪܘܫܘܬܐ ܕܨܒܘܬܐ
                    ܓܘܫܡܢ̈ܝܬܐ ܘܡܬܪ̈ܓܫܢܝܬܐ܆ ܠܓܘܢ̈ܐ ܘܠܐܣܟܝ̈ܡܐ ܡܢ ܒܝܕ ܚܙܬܐ. ܠܩًܠܐ ܘܠܩܝ̈ܢܬܐ ܒܝܕ ܫܡܥܐ.
                    ܠـܪ̈ܝܚܢܐ ܕܝܢ ܒܣܝ̈ܡܐ ܘܣܪ̈ܝܐ ܒܝܕ ܣܘܩܐ. ܡܐܟܠܬܐ ܕܝܢ ܘܫܩًܝܐ ܚܠܝ̈ܐ ܘܡܪܝܪ̈ܐ ܘܕܫܪܟܐ ܒܝܕ
                    ܛܥܡܬܐ. ܫܥܝܥܐ ܕܝܢ ܘܚܪܘܣܐ. ܘܚܡܝܡܐ ܘܩܪܝܪܐ ܘܫܪܟܐ ܕܐܝܟ ܗܠܝܢ ܒܝܕ ܪܓܫܬܐ. ܦܢܛܐܣܝܐ ܕܝܢ
                    ܐܝܬܝܗܿ ܗܿܝ ܕܐܝܟ ܕܒܣܘܓܐܐ ܓܒܠܐ ܗܓ̈ܓܐ ܕܓ̈ܠܐ ܐܟܙܢܐ ܕܙܒܢ̈ܝܢ ܣܓܝ̈ܐܢ ܡܬܦܢܛܣܐ ܠܐܢܫ ܕܦܪܚ
                    ܘܠܢܘܢܐ ܢܡܗܠܟ ܥܠ ܐܪܥܐ.  f.29a 
                
                ܐ: ܚܝ̈ܠܐ ܟܝܢ̈ܝܐ ܕܢܦܫܐ: 
                
                    ܡܕܥܐ: ܗܿܝ ܕܝܕܥ ܠـܨܒܘܬܐ ܠܘ ܒܝܕ ܡ̈ܠܐ. ܘܠܐ ܒܝܕ ܬܚܘܝ̈ܬܐ. ܘܐܦܠܐ ܒܝܕ ܝܘܠܦܢ̈ܐ.
                        ܐܠܐ ܒܝܕ ܚܙܬܐ ܗܿܝ ܟܣܝܬܐ ܘܦܫܝܛܬܐ
                    ܬܪܥܝܬܐ: ܗܿܝ ܕܝܕܥܐ ܠܗܝܢ ܠـܨܒܘܬܐ ܒܝܕ ܡ̈ܠܐ ܘܬܚܘܝ̈ܬܐ ܘܝܘܠܦܢ̈ܐ
                        ܘܣܘܠܝܓܝܣܡ̈ܘ
                    ܝܕܘܥܬܢܘܬܐ: 
                    ܡܠܝܠܘܬܐ: ܗܿܝ ܕܡܦܪܫܐ ܠܚܘܫܒܐ ܫܪܝܪ̈ܐ ܡܢ ܕܓ̈ܠܐ
                    ܙܘܥܐ ܝܬܢܝܐ: ܡܢ ܝܬܗܿ ܠܘ ܡܢ ܐܚܪܢܐ
                    ܥܘܗܕܢܐ: ܗܿܘ ܕܐܝܬܘܗܝ ܡܟܢܫܐ ܕܝܕܥܬܐ ܘܕܝܘܠܦܢ̈ܐ
                
                ܒ: ܚܝ̈ܠܐ ܓܕܫܢ̈ܝܐ ܕܢܦܫܐ: 
                
                    ܚܡܬܐ: ܗܿܝ ܕܢܬܬܙܝܥ ܐܢܫ ܠܬܒܥܬܐ ܕܗܿܘ ܕܐܥܝܩܗ
                    ܪܓܬܐ: ܗܿܝ ܕܢܪܓ ܐܢܫ ܠܡܐܟܘܠܬܐ ܘܠܫܩܝܐ ܘܠܙܘܘܓܐ ܘܠܩܢܝܢܐ
                    ܪܓܫܬܐ: ܗܿܝ ܕܒܚܡܫܐ ܪ̈ܓܫܐ ܐܝܬܝܗܿ ܦܪܘܫܘܬܐ ܕܨܒܘܬܐ ܓܘܫܡܢ̈ܝܬܐ ܘܡܬܪ̈ܓܫܢܝܬܐ. ܒܝܕ
                        ܚܙܬܐ ܘܫܡܥܐ ܘܣܘܩܐ ܘܛܥܡܬܐ
                    ܦܢܛܣܝܐ: ܗܿܝ ܐܝܟ ܕܒܣܘܓܐܐ ܓܒܠܐ ܗܓ̈ܓܐ ܕܓ̈ܠܐ
                
                ܡܬܒܥܝܐ ܗܟܝܠ ܕܢܥܩܒ. ܕܡܛܠ ܡܢܐ ܡܬܩܪܝܢ ܗܿܢܘܢ ܚܝ̈ܠܐ. ܡܕܥܐ ܐܡܪ ܐܢْܐ
                    ܘܬܪܥܝܬܐ ܘܝܕܘܥܬܢܘܬܐ ܘܡܠܝܠܘܬܐ ܙܘܥܐ ܝܬܢܝܐ ܘܥܘܗܕܢܐ. ܚܝ̈ܠܐ ܟܝܢ̈ܝܐ ܕܢܦܫܐ. ܚܡܬܐ  f.29b  ܘܪܓܬܐ ܘܪܓܫܬܐ ܕܒܚܡܫܐ ܪ̈ܓܫܐ ܘܦܢܛܣܝܐ. ܡܬܩܪܝܢ ܚܝ̈ܠܐ ܓܕܫܢ̈ܝܐ ܕܢܦܫܐ.
                    ܘܐܡܪܝܢܢ ܕܗܿܢܘܢ ܕܡܬܩܪܝܢ ܟܝܢ̈ܝܐ. ܡܛܠ ܗܠܝܢ ܥܠܬܐ. (ܐ) ܚܝܐ ܡܢ ܡܛܠ ܕܡܢ ܟܝܢܗܿ ܕܢܦܫܐ
                    ܐܝܬܝܗܘܢ. ܘܠܘ ܡܢ ܕܘܟܬܐ ܐܚܪܬܐ. (ܒ) ܕܝܢ ܡܛܠ ܕܒܟܝܢܗܿ ܕܢܦܫܐ ܩܒܝܥܝܢ ܟܝܢܐܝܬ. (ܓ) ܡܛܠ
                    ܕܡܩܝܡܝܢ ܠܟܝܢܗܿ ܕܢܦܫܐ. (ܕ) ܡܛܠ ܕܡܬܢܣܒܝܢ ܒܬܚܘܝ̈ܬܐ ܕܢܦܫܐ ܘܒܗܘܢ ܦܪܝܫܐ ܡܢ ܟܝܢ̈ܐ
                    ܐܚܪ̈ܢܐ. (ܗ) ܡܛܠ ܕܟܕ ܩܪܝܒܝܢ ܠܢܦܫܐ ܡܗܢܝܢ ܠܩܘܝܡܗܿ. ܘܐܢ ܓܕܫ ܘܡܪܚܩܝܢ ܡܢܗܿ ܐܘ ܚܕ ܡܢܗܘܢ
                    ܡܚܣܪܝܢ ܠܗܿ. (ܘ) ܡܛܠ ܕܕܝܠܗܿ ܐܝܬܝܗܘܢ ܝܚܝܕܐܝܬ ܘܕܝܠܢܐܝܬ ܟܕ ܠܐ ܡܫܘܬܦ ܒܗܘܢ ܦܓܪܐ. ܗܠܝܢ
                    ܕܝܢ ܐܪܒܥܐ ܐܚܪ̈ܢܐ. ܚܡܬܐ ܘܪܓܬܐ ܘܦܪܘܫܘܬܐ ܕܒܚܫܡܐ ܪ̈ܓܫܐ ܘܦܢܛܣܝܐ. ܡܬܩܪܝܢ ܚܝ̈ܠܐ ܓܕܫܢ̈ܝܐ
                    ܕܢܦܫܐ. ܡܛܠ ܕܠܘ ܕܢܦܫܐ ܐܝܬܝܗܘܢ. ܘܐܦܠܐ ܒܟܝܢܗܿ ܩܒܝܥܝܢ ܘܢܨܝܒܝܢ ܐܠܐ ܐܝܬܝܗܘܢ ܕܦܓܪܐ
                    ܘܕܡܘܙܓܘܗܝ. ܡܛܠ ܕܡܪܡܐ ܥܡ ܦܓܪܐ ܓܕܫܝܢ ܠܗܿ ܘܡܩܒܠܐ ܠܗܘܢ. ܡܛܠ ܐܣܝܪܘܬܗܿ ܕܥܡܗ. ܡܬܝܕܥܐ
                    ܗܟܝܠ ܕܗܠܝܢ ܚܝ̈ܠܐ ܠܘ ܕܢܦܫܐ ܐܝܬܝܗܘܢ ܡܢ ܗܠܝܢ ܡܚܘܝܢ̈ܘܬܐ: ܚܕܐ ܡܢ ܕܠܐ ܡܬܢܣܒܝܢ
                    ܒܬܚܘܡ̈ܝܗܿ ܕܢܦܫܐ  f.30a  ܟܕ ܡܬܬܚܡܐ ܠܝܬ ܓܝܪ ܒܬܚܘܡܗܿ ܠܐ ܚܡܬܐ ܘܠܐ ܪܓܬܐ ܘܐܦܠܐ
                    ܦܪܘܫܘܬܐ ܕܒܪ̈ܓܫܐ. ܘܒܦܢܛܣܝܐ. (ܒ) ܕܝܢ ܡܢ ܗܿܝ ܕܒܨܠܡܐ ܕܐܠܗܐ ܒܪܝܐ ܢܦܫܐ. ܘܒܐܠܗܐ ܠܝܬܝܗܿ
                    ܗܠܝܢ. (ܓ) ܡܢ ܗܿܝ ܕܚܣܢܘ ܘܙܟܘ ܠܪܓܬܐ ܐܢܫ̈ܐ ܩܕܝܫ̈ܐ ܘܠܚܡܬܐ. ܡܕܝܢ ܠܘ ܕܢܦܫܐ ܐܝܬܝܗܘܢ
                    ܚܡܫܐ ܪ̈ܓܫܐ ܘܐܪܒܥܐ ܚܝ̈ܠܐ. ܐܠܐ ܕܦܓܪܐ ܘܡܘܙܓܘܗܝ. (ܕ) ܘܝܕܝܥܐ ܗܕܐ ܕܗܟܢܐ ܐܝܬܝܗܿ ܡܢ
                    ܕܚܡܬܐ ܘܪܓܬܐ ܫܟܝܚܝܢ ܐܦ ܒܚܝ̈ܘܬܐ ܠܐ ܡܠܝ̈ܠܬܐ. ܗܟܘܬ ܡܫܟܚܝܢ ܒܗܝܢ ܐܦ ܦܪܘܫܘܬܐ ܕܒܚܡܫܐ
                    ܪ̈ܓܫܐ. ܘܐܦܢ ܠܘ ܦܪܘܫܘܬܐ ܡܠܝܠܬܐ. ܦܪܘܫܘܬܐ ܓܝܪ ܕܒܚܡܫܐ ܪ̈ܓܫܐ ܕܓܘܫܡܐ ܐܝܬ ܠܗܝܢ ܐܠܐ ܠܘ
                    ܡܠܝܠܬܐ. ܐܝܟ ܕܐܝܬ ܠܒܢܝ̈ܢܫܐ. ܙܕܩ ܬܘܒ ܕܢܥܩܒ ܕܐܝܟܢܐ ܡܢ ܝܕ ܦܓܪܐ ܓܕܫܢ ܗܠܝܢ ܚܝ̈ܠܐ
                    ܠܢܦܫܐ. ܡܛܠ ܗܿܝ ܕܐܣܝܪܐ ܥܡܗ ܘܫܘܬܦܘܬܗܿ ܕܝܠܗܿ. ܘܐܡܪܝܢܢ ܕܗܟܢܐ: ܢܦܫܐ ܡܢ ܐܝܬܝܗܿ ܕܠܐ
                    ܓܫܘܡ. ܘܟܝ̈ܢܐ ܡܬܪ̈ܓܫܢܐ ܘܡܬܚܙܝ̈ܢܐ ܐܝܬ ܒܥܠܡܐ ܗܢܐ. ܕܐܝܬܝܗܘܢ ܓܘܫ̈ܡܐ ܟܕ ܡܬܥܢܝܐ ܥܡܗܘܢ
                    ܒܝܕ ܡܨܥܝܘܬܐ ܕܦܓܪܐ ܕܐܝܬܘܗܝ ܓܘܫܡܐ. ܓܕܫܝܢ ܠܗܿ ܗܠܝܢ ܚܝ̈ܠܐ. ܕܐܝܟ ܐܝܟܢ. ܐܡܪܝܢܢ ܕܓܘܫ̈ܡܐ
                    ܡܢܗܘܢ ܡܢ ܐܝܬܝܗܘܢ ܡܥܝܩܢ̈ܐ ܘܡܢܗܘܢ ܡܗܢܝ̈ܢܐ. ܘܟܕ ܡܫܬܘܬܦܐ ܒܝܕ ܦܓܪܐ ܥܡ ܓܘܫ̈ܡܐ ܗܢܘܢ  f.30b  ܡܥܝܩܢ̈ܐ ܟܘܙܐ ܡܢܗܘܢ ܘܡܬܡܪܡܐ(ܡܬܡܪܡܪܐ) ܘܡܬܚܡܬܐ. ܘܒܕܓܘܢ ܓܕܫ ܠܗܿ ܚܝܠܐ
                    ܗܘ ܚܡܬܢܐ. ܘܟܕ ܡܬܩܪܒܐ ܒܝܕ ܦܓܪܐ ܠܓܘܫܡ̈ܐ ܗܢܘܢ ܗܢܝ̈ܐܐ ܡܬܬܢܝܚܐ ܘܡܐܚܒܐ (ܡܚܒܐ) ܠܗܘܢ
                    ܘܪܓܐ ܠܗܘܢ. ܘܒܕܓܘܢ ܓܕܫ ܠܗܿ ܚܝܠܐ ܪܝܘܓܬܢܐ. ܘܡܛܠ ܕܡܬܥܢܝܐ ܥܡ ܟܠܗܘܢ ܓܘܫ̈ܡܐ ܒܡܨܥܝܘܬܐ
                    ܕܚܡܫܐ ܪ̈ܓܫܐ ܕܦܓܪܐ. ܓܕܫ ܠܗܿ ܚܝܠܐ ܗܿܘ ܕܐܝܬܘܗܝ ܪܓܫܬܐ ܕܒܚܡܫܐ ܪ̈ܓܫܐ. ܘܡܛܠ ܕܦܢܛܣܝܐ ܡܢ
                    ܪܓܫܬܐ ܕܒܚܡܫܐ ܪ̈ܓܫܐ ܡܬܝܠܕܐ ܓܕܫܐ ܠܗܿ ܠܢܦܫܐ ܐܦ ܦܢܛܣܝܐ. ܡܢ ܐܝܠܝܢ ܕܡܦܪܫܐ ܚܙܬܐ ܘܫܡܥܐ
                    ܘܣܘܩܐ ܘܓܫܬܐ. ܣܠܩ ܐܢܫ ܘܡܬܦܢܛܣ ܘܓܒܠ ܗܓ̈ܓܐ ܕܓ̈ܠܐ ܐܝܟ ܕܒܣܘܓܐܐ. ܕܐܝܟ ܐܝܟܢ. ܡܢ ܗܿܝ
                    ܕܢܚܙܐ ܠܢܫܪܐ ܕܦܪܚ. ܐܬܦܢܛܣ ܥܠ ܚܡܪܐ ܕܪܫܦ ܘܐܬܦܢܛܣ ܥܠ ܐܢܫ ܕܦܪܚ. ܘܡܢ ܗܠܝܢ ܕܩܪܝܒܝܢ
                    ܠـܪ̈ܓܫܐ ܡܬܦܢܛܣ ܥܠ ܐܝܠܝܢ ܕܪܚܝܩܝܢ. ܡܕܝܢ ܦܢܛܣܝܐ ܡܢ ܪܓܫܬܐ ܕܒܚܡܫܐ ܪ̈ܓܫܐ ܡܬܝܠܕܐ. 
                ܚܝ̈ܠܐ ܡܢܗܘܢ ܡܢ ܕܢܦܫܐ ܐܝܬܝܗܘܢ ܟܝܢܐܝܬ: 
                
                    ܡܕܥܐ 
                    ܬܪܥܝܬܐ
                    ܝܕܘܥܬܢܘܬܐ
                    ܡܠܝܠܘܬܐ
                    ܙܘܥܐ ܝܬܢܝܐ
                    ܥܘܗܕܢܐ
                
                ܚܝ̈ܠܐ ܡܢܗܘܢ ܕܝܢ ܕܦܓܪܐ (ܘܡܛܠ ܕܡܪܟܒ ܥܡ ܢܦܫܐ ܓܕܫ̈ܢ ܐܦ ܠܢܦܫܐ): 
                
                    ܚܡܬܐ 
                    ܪܓܬܐ
                    ܪܓܫܬܐ
                    ܦܢܛܣܝܐ
                
                
                     f.31a  ܟܒܪ ܗܟܝܠ ܡܗܦܟ ܐܢܫ ܘܐܡܪ ܕܗܐ ܒܕܘܟܝ̈ܬܐ ܣܓܝ̈ܐܬܐ. ܕܐܡܪܘ ܐܢܫ̈ܝܢ ܡܢ
                    ܦܝܠܣܘܦܐ ܕܚܝ̈ܠܐ ܕܢܦܫܐ ܬܠܬܐ ܐܝܬܝܗܘܢ. ܡܠܝܠܘܬܐ ܘܚܡܬܐ ܘܪܓܬܐ. ܘܠܘܬ ܗܢܐ ܐܡܪܝܢܢ ܕܗܠܝܢ
                    ܒܗܿܝ ܡܢ ܕܐܡܪܘ ܡܛܠ ܡܠܝܠܘܬܐ ܕܐܝܬܝܗܿ ܚܝܠܐ ܕܢܦܫܐ ܐܫܪܘ. ܡܠܝܠܘܬܐ ܕܝܢ ܚܝܠܐ ܗܝ ܕܢܦܫܐ ܐܝܟ
                    ܕܚܘܝܢܢ ܡܢ ܠܥܠ. ܒܗܿܝ ܕܝܢ ܕܐܡܪ ܡܛܠ ܚܡܬܐ ܘܪܓܬܐ ܕܐܝܬܝܗܘܢ ܚܝ̈ܠܐ ܕܢܦܫܐ ܚܕܐ ܡܢ ܬܪܬܝܢ
                    ܢܦܢܐ ܠܗܘܢ. ܐܘ ܦܕܘ ܡܢ ܫܪܪܐ ܒܗܕܐ ܘܕܓܠܘ. ܐܘ ܠܐ ܦܕܘ ܡܢ ܫܪܪܐ ܐܠܐ ܐܬܛܥܝܬ. ܐܘ ܣܝܘܡܐ.
                    ܒܫܘܝܘܬ ܫܡܐ ܡܛܠ ܢܦܫܐ ܦܫܝܛܐܝܬ ܢܣܒܘܗܿ. ܘܠܐ ܦܠܓܘܗܿ ܠܫܘܘܕܥܐ ܡܫܚ̈ܠܦܐ ܘܦܕܘ. ܐܘ ܫܡܗܘ
                    ܠܗܝܢ ܚܝ̈ܠܐ ܕܢܦܫܐ ܟܕ ܠܘ ܕܢܦܫܐ ܐܢܘܢ. ܐܠܐ ܕܦܓܪܐ. ܓܕܫܝܢ ܐܦ ܠܢܦܫܐ ܘܒܕܓܘܢ ܡܬܩܪܝܢ ܚܝ̈ܠܐ
                    ܓܕܫܢ̈ܝܐ ܕܢܦܫܐ ܐܟܡܐ ܕܚܘܝܢܢ ܒܬܐܘܪ̈ܝܣ ܥܠܝ̈ܬܐ. 
            
            
                ܩܦܠܐܘܢ ܕܚܕܥܣܪ
                ܕܡܚܘܐ ܕܢܦܫܐ ܡܠܝܠܬܐ ܐܝܬܝܗܿ ܘܝܬܢܝ̈ܬ ܙܘܥܐ. ܗܢܘ ܕܝܢ ܕܡܢ ܝܬܗܿ ܡܬܬܙܝܥܐ
                    ܘܠܐ ܡܢ ܐܚܪܢܐ.  f.31b  ܘܕܐܡܝܢܐܝܬ ܙܘܥܐ ܐܝܬܝܗܿ. ܗܿܢܘ ܕܝܢ ܕܐܡܝܢܐܝܬ ܡܬܬܙܝܥܐ 
                ܟܕ ܠܐ ܫܠܝܐ ܡܢ ܡܬܬܙܝܥܢܘܬܗܿ
                ܝܕܝܥܐ ܡܢ ܗܟܝܠ ܕܢܦܫܐ ܡܠܝܠܬܐ ܐܝܬܝܗܿ. ܡܢ ܗܿܝ ܕܡܦܪܫܐ ܠܚܘܫ̈ܒܐ ܫܪܝܪ̈ܐ ܡܢ
                    ܚܘܫ̈ܒܐ ܕܓ̈ܠܐ. ܗܟܢܐ ܓܝܪ ܡܬܚܡܝܢ ܦܝܠܠܘܣܘܦܐ ܠܡܠܝܠܘܬܐ ܕܐܝܬܝܗܿ ܚܝܠܐ ܡܦܪܫܢܐ ܕܚܘܫ̈ܒܐ. ܐܢ
                    ܡܠܝܠܘܬܐ ܚܝܠܐ ܡܦܪܫܢܐ ܕܚܘܫ̈ܒܐ ܐܝܬܝܗܿ. ܘܚܝܠܐ ܡܦܪܫܢܐ ܕܚܘܫ̈ܒܐ ܐܝܬ ܠܢܦܫܐ. ܡܕܝܢ ܡܠܝܠܘܬܐ
                    ܐܝܬ ܠܢܦܫܐ. ܘܐܢ ܡܠܝܠܘܬܐ ܐܝܬ ܠܗܿ. ܝܕܝܥܐ ܕܡܠܝܠܬܐ ܐܝܬܝܗܿ. ܝܕܝܥܐ ܬܘܒ ܕܝܬܢܝܬ ܙܘܥܐ
                    ܐܝܬܝܗܿ. ܗܢܘ ܕܝܢ ܕܡܢ ܝܬܗܿ ܡܬܬܙܝܥܐ. ܡܢ ܗܠܝܢ. ܚܕ ܡܢ. ܒܪܢܫܐ ܡܢ ܬܪܝܢ ܟܝܢ̈ܐ ܡܪܟܒ
                    ܥܡܗܘܢ. ܘܢܦܫܐ ܗܝ ܡܙܝܥܐ ܠܦܓܪܐ ܡܠܝܠܐܝܬ. ܐܢ ܢܦܫܐ ܗܟܝܠ ܗܝ ܡܙܝܥܐ ܠܦܓܪܐ ܟܕ ܠܝܬ ܡܕܡ
                    ܬܠܝܬܝܐ ܕܡܙܝܥ. ܡܕܝܢ ܡܢ ܝܬܗܿ ܡܬܬܙܝܥܐ ܡܛܠ ܕܗܿܘ ܕܡܬܬܙܝܥ ܘܡܙܝܥ ܐܦ ܠܐܚܪܢܐ. ܟܕ ܠܝܬ
                    ܐܚܪܢܐ ܕܡܙܝܥ ܠܗ ܐܦ ܠܗ ܗܢܐ ܝܬܗ ܡܬܬܙܝܥ. (ܒ) ܝܕܝܥܐ ܡܢ ܗܕܐ ܗܿܘ ܕܚܝ ܡܢ ܝܬܗ ܘܠܘ ܡܢ
                    ܐܚܪܢܐ. ܗܢܐ ܡܢ ܝܬܗ ܡܬܬܙܝܥ ܘܠܘ ܡܢ ܐܚܪܢܐ. ܢܦܫܐ ܕܝܢ ܚܝ̈ܐ ܐܝܬܝܗܿ ܒܟܝܢܗܿ ܘܡܢ ܝܬܗܿ
                    ܚܝ̈ܐ. ܘܠܘ ܡܢ ܐܚܪܢܐ. ܡܕܝܢ ܡܢ ܝܬܗܿ ܡܬܬܙܝܥܐ ܘܠܘ ܡܢ ܐܚܪܢܐ. (ܓ) ܝܕܝܥܐ  f.32a 
                    ܡܢ ܗܕܐ ܐܢ ܦܓܪܐ ܠܘ ܡܢ ܝܬܗ ܡܬܬܙܝܥ ܡܠܝܠܐܝܬ. ܐܠܐ ܐܢ ܡܢ ܢܦܫܐ. ܝܕܝܥܐ ܕܢܦܫܐ ܡܢ ܝܬܗܿ
                    ܡܬܬܙܝܥܐ ܘܠܘ ܡܢ ܐܚܪܢܐ ܡܛܠ ܕܚܝ̈ܠܐ ܕܢܦܫܐ ܕܠܩܘܒܠܝܝܢ ܠܕܦܓܪܐ ܐܝܟ ܕܐܡܪ ܪܒܐ ܒܫܠܝ̈ܚܐ
                    ܦܘܠܘܣ: ܕܪܘܚܐ ܪܓܐ ܡܕܡ ܕܢܟܐ ܠܦܓܪܐ1 ܓܠܛܝ̈ܐ:17:5. ܘܐܝܟ ܕܒܗܦܟܐ. ܐܢ ܡܕܝܢ ܦܓܪܐ ܠܘ
                    ܡܢ ܝܬܗ ܡܬܬܙܝܥ ܡܠܝܠܐܝܬ. ܢܦܫܐ ܕܝܢ ܡܢ ܝܬܗܿ ܡܬܬܙܝܥܐ. ܡܬܝܕܥܐ ܬܘܒ ܢܦܫܐ ܐܡܝܢܬ ܙܘܥܐ ܗ
                    ܕܐܡܝܢܐܝܬ ܡܬܬܙܝܥܐ ܟܕ ܠܐ ܣܟ ܫܠܝܐ ܡܢ ܙܘܥܗܿ. ܡܢ ܗܠܝܢ ܡܚܘܝܢ̈ܘܬܐ. ܐ: ܡܢ ܗܿܝ ܕܡܢ ܝܬܗܿ
                    ܡܬܬܙܝܥܐ. ܘܗܿܘ ܕܡܬܬܙܝܥ ܡܢ ܝܬܗ. ܠܐ ܫܠܐ ܡܢ ܙܘܥܗ. ܢܦܫܐ ܕܝܢ ܡܢ ܝܬܗܿ ܡܬܬܙܝܥܐ. ܡܕܝܢ ܠܐ
                    ܫܠܝܐ ܡܢ ܙܘܥܗܿ. ܐܠܐ ܐܡܝܢܐܝܬ ܡܬܬܙܝܥܐ. (ܒ: ) ܡܢ ܗܿܝ ܕܦܓܪܐ ܒܙܒܢ ܡܢ ܡܬܬܙܝܥ ܒܙܒܢ ܕܝܢ
                    ܫܠܐ ܡܢ ܙܘܥܗ. ܘܚܝ̈ܠܐ ܕܢܦܫܐ ܕܠܩܘܒܠܝܢ ܠܦܓܪܐ. ܡܕܝܢ ܢܦܫܐ ܐܡܝܢܐܝܬ ܡܬܬܙܝܥܐ. ܟܕ ܠܐ ܫܠܝܐ
                    ܡܢ ܙܘܥܗܿ. (ܓ: ) ܡܢ ܗܿܝ ܕܬܪܬܝܢ ܡ̈ܠܐ ܐܝܬ ܠܒܪܢܫܐ. ܚܕܐ ܗܿܝ ܕܢܦܘܩܬܐ ܩܒܝܥܬܐ. ܘܐܚܪܬܐ
                    ܢܦܩܘܩܬܐ. ܗܿܝ ܡܢ ܩܒܝܥܬܐ ܡܢ ܢܦܫܐ ܡܬܝܠܕܐ. ܗܕܐ ܕܝܢ ܢܦܘܩܬܐ ܒܦܓܪܐ ܡܫܬܡܠܝܐ. ܘܗܿܝ  f.32b  ܡܢ ܕܡܢ ܢܦܫܐ ܡܬܝܠܕܐ. ܠܘ ܡܚܫܒܬܐ ܐܝܬܝܗܿ ܐܟܡܐ ܕܐܢܫ̈ܝܢ ܐܣܒܪܘ ܘܐܡܪܘ.
                    ܐܠܐ ܐܝܬܝܗܿ ܚܝ̈ܠܐ ܡܦܪܫܢܐ ܕܚܘܫ̈ܒܐ. ܗܕܐ ܓܝܪ ܡܠܝܠܘܬܐ ܩܪܝܢܢ ܡܠܬܐ ܕܡܬܝܠܕܐ ܡܢ ܢܦܫܐ.
                    ܐܘܟܝܬ ܠܗܢܐ ܚܝܠܐ. ܐܘܟܝܬ ܗܕܐ ܡܠܬܐ ܠܘ ܡܚܫܒܬܐ ܘܠܘ ܚܘܫܒܐ ܐܝܬܝܗܿ. ܡܢ ܬܪܬܝܢ. ܚܕܐ ܡܢ ܡܢ
                    ܗܿܝ ܕܗܕܐ ܡܠܬܐ ܡܦܪܫܐ ܠܚܘܫ̈ܒܐ ܫܪܝܪ̈ܐ ܡܢ ܕܓ̈ܠܐ. ܘܚܘܫ̈ܒܐ ܒܗܿ ܡܬܦܪܫܝܢ. ܘܦܪܝܫ ܗܿܘ
                    ܕܡܦܪܫ ܡܢ ܗܿܢܘܢ ܕܒܗ ܡܬܦܪܫܢ ܐܝܟ ܕܦܪܝܫ ܡܣܪܐ ܡܢ ܕܦ̈ܐ. ܕܗܿܘ ܡܢ ܦܪܫ. ܗܠܝܢ ܕܝܢ ܡܦܪܫܝܢ.
                    ܘܝܕܝܥܐ ܡܢ ܗܿܝ ܕܚܘܫ̈ܒܐ ܦܣܩܝܢ ܠܚܕܕܐ. ܘܡܬܦܣܩܝܢ ܡܢ ܚܕܕܐ. ܡܠܬܐ ܕܝܢ ܗܕܐ ܠܐ ܦܣܩܐ ܗܝ ܠܗܿ
                    ܘܠܐ ܡܬܦܣܩܐ ܗܝ ܡܢܗܿ. ܡܕܝܢ ܡܠܬܐ ܗܿܝ ܕܡܬܝܠܕܐ ܡܢ ܢܦܫܐ ܠܘ ܡܚܫܒܬܐ ܐܝܬܝܗܿ. ܐܠܐ ܡܠܝܠܘܬܐ.
                    ܐܘܟܝܬ ܚܝܠܐ ܡܦܪܫܢܐ ܕܚܘܫ̈ܒܐ. ܡܠܬܐ ܕܝܢ ܢܦܘܩܬܐ ܐܝܬܝܗܿ ܗܕܐ ܕܡܫܬܡܥܐ ܘܡܫܬܡܠܝܐ ܒܦܓܪܐ.
                    ىܘܟܝܬ ܒܦܘܡܐ ܘܠܫܢܐ ܘܫܡ̈ܝ ܚܟܐ ܘܫܢ̈ܐ ܘܣܦܘܬܐ. ܟܕ ܐܐܪ ܥܐܠ ܠܓܘܪܬܐ ܘܢܦܩ. ܡܕܝܢ ܬܪܝܢ ܡ̈ܠܐ
                    ܐܝܬ ܠܒܢܝ̈ܢܫܐ ܗܢܘ ܕܝܢ ܚܕܐ  f.33a  ܕܡܬܝܠܕܐ ܡܢ ܢܦܫܐ ܕܐܝܬܝܗܿ ܩܒܝܥܬܐ. ܘܐܚܪܬܐ
                    ܕܡܫܬܡܠܝܐ ܒܦܓܪܐ ܕܐܝܬܝܗܿ ܢܦܘܩܬܐ ܒܙܒܢ ܡܢ ܡܬܬܙܝܥܐ. ܒܙܒܢ ܕܝܢ ܫܠܝܐ. ܗܿܘ ܕܝܢ ܩܒܝܥܬܐ.
                    ܐܡܝܢܐܝܬ ܡܬܬܙܝܥܐ ܟܕ ܠܐ ܫܠܝܐ ܡܢ ܙܘܥܗܿ. ܐܦܠܐ ܓܝܪ ܐܢ ܐܢܫ ܨܒܐ ܕܢܟܠܝܗܿ ܡܢ ܙܘܥܗܿ ܚܕ ܪܦܦ
                    ܬܡܪܐ ܕܥܝܢܐ ܡܫܟܚ. ܡܕܝܢ ܐܝܟܢܐ ܕܡܠܬܐ ܗܕܐ ܩܒܝܥܬܐ. ܐܡܝܢܬ ܙܘܥܐ ܐܝܬܝܗܿ ܐܝܬܝܗܿ. ܘܐܝܟܢܐ
                    ܕܡܠܬܐ ܗܿܝ ܢܦܘܩܬܐ ܒܙܒܢ ܡܢ (ܫܠܝܐ) ܒܙܒܢ ܕܝܢ ܠܐ. ܗܟܢܐ ܘܐܦ ܦܓܪܐ ܗܿܘ ܕܒܗ ܡܫܬܡܠܝܐ. ܒܙܒܢ
                    ܕܝܢ ܡܬܬܙܝܥ. ܒܙܒܢ ܕܝܢ ܠܐ. ܡܕܝܢ ܐܬܚܘܝܬ ܒܝܕ ܗܠܝܢ ܕܢܦܫܐ ܐܡܝܢܬ ܙܘܥܐ ܐܝܬܝܗܿ ܘܐܡܝܢܐܝܬ
                    ܡܬܬܙܝܥܐ. 
            
            
                ܩܦܠܐܘܢ ܕܬܪܥܣܪ
                ܕܡܚܘܐ ܕܒܟܡܐ ܙܢܝ̈ܐ ܡܬܐܡܪܐ ܡܬܬܙܝܥܢܘܬܐ. ܘܕܐܝܕܐ ܡܬܬܙܝܥܢܘܬܐ ܐܡܪܝܢܢ ܕܐܝܬ
                    ܠܢܦܫܐ. ܘܡܢܐ ܗܝ ܡܬܬܙܝܥܢܘܬܐ ܕܢܦܫܐ. ܘܡܢܘ ܬܚܘܡܗܿ ܕܡܬܬܙܝܥܢܘܬܐ ܗܕܐ
                ܐܪܝܣܛܐܛܠܝܣ ܗܟܝܠ ܦܝܠܘܣܘܦܐ ܐܡܪ ܒܟܬܒܐ ܕܝܠܗ ܗܿܘ ܕܥܠ ܩَܐܛٍܐܓܘܪ̈ܝَܐܣ
                    ܕܡܬܬܙܝܥܢܘܬܐ ܒܫܬܐ ܙܢܝ̈ܐ ܡܬܐܡܪܐ: (ܬܪܝܢ ܡܢ ܒܐܘܣܝܐ). ܬܪܝܢ ܕܝܢ ܒܟܡܝܘܬܐ. ܘܚܕ ܒܐܝܢܝܘܬܐ.
                    ܘܐܚܪܢܐܒܗܿܝ ܕܐܝܟܐ. ܒܐܘܣܝܐ ܡܢ  f.33b  ܐܝܟ ܕܒܗܘܝܐ ܘܚܘܒܠܐ. ܒܗܘܝܐ ܡܢ ܐܟܙܢܐ
                    ܕܙܪܥܐ ܕܒܪܢܫܐ ܕܡܙܕܪܥ ܘܗܿܘܐ ܡܢܗ ܦܓܪܐ ܡܫܡܠܝܐ ܕܒܪܢܫܐ. ܒܚܘܒܠܐ ܕܝܢ ܕܦܓܪܐ ܕܒܪܢܫܐ
                    ܕܡܬܬܙܝܥ ܘܡܬܚܒܠ ܒܝܕ ܡܘܬܐ. ܒܟܡܝܘܬܐ ܕܝܢ ܐܝܟ ܕܒܬܪܒܝܬܐ ܘܒܘܨܪܐ. ܒܬܪܒܝܬܐ ܡܢ ܐܟܙܢܐ ܕܥܣܒܐ
                    ܕܡܬܬܙܝܥ ܘܪܒܐ ܒܡܘܫܚ̈ܬܐ. ܒܒܘܨܪ̈ܐ ܕܝܢ ܐܟܙܢܐ ܕܥܣܒܐ ܕܡܙܕܪܥ ܘܒܨܪ ܒܡܫܘܚܬܐ. ܒܐܝܢܝܘܬܐ ܕܝܢ
                    ܗܿܘ ܕܗܿܘܐ ܒܫܘܓܢܝܐ ܕܓܘܫܡܐ ܐܘ ܦܓܪܐ ܕܡܬܬܙܝܥ ܘܡܫܬܓܢܐ ܡܢ ܚܘܪܘܬܐ ܠܐܘܟܡܘܬܐ. ܘܡܢ ܐܘܟܡܘܬܐ
                    ܠܚܘܪܘܬܐ. ܡܬܬܙܝܥܢܘܬܐ ܕܝܢ ܗܿܝ ܕܒܐܝܟܐ ܗܟܢܐ ܐܝܬܝܗܿ. ܫܘܚܐ ܕܡܢ ܕܘܟܐ ܠܕܘܟܐ. ܘܗܕܐ ܡܬܦܠܓܐ
                    ܫܒܝܥܐܝܬ. ܠܥܠ ܘܠܬܚܬ. ܘܠܝܡܝܢܐ ܘܠܣܡܠܐ. ܘܠܩܕܡܐ ܘܠܒܣܬܪܐ. ܐܟܙܢܐ ܕܐܢܫ ܕܫܕܐ ܓܐܪܐ ܐܘ ܟܐܦܐ
                    ܠܚܕ ܡܢ ܗܠܝܢ ܫܬܐ ܣܘܦܐ…. ܘܠܚܘܕܪܢܝܬܐ ܬܘܒ ܐܟܙܢܐ ܕܟܐܦܐ ܕܪܚܝܐ ܡܬܬܙܝܥܐ ܘܡܬܟܪܟܐ
                    ܚܘܕܪܢܝܐܝܬ.  f.34a 
                
                ܡܬܬܙܝܥܢܘܬܐ ܒܫܬܐ ܙܢܝ̈ܐ ܡܬܐܡܪܐ: 
                
                    ܐܝܟ ܕܒܗܘܝܐ: ܐܝܟ ܙܪܥܐ ܕܗܿܘܐ ܦܓܪܐ
                    ܐܝܟ ܕܒܚܘܒܠܐ: ܐܝܟ ܦܓܪܐ ܕܡܬܚܒܠ
                    ܐܝܟ ܕܒܬܪܒܝܬܐ: ܐܝܟ ܥܣܒܐ ܕܪܒܐ 
                    ܐܝܟ ܕܒܒܘܨܪܐ: ܐܝܟ ܐܝܠܢܐ ܕܒــܨܪ
                    ܐܝܟ ܕܒܫܘܓܢܝܐ: ܐܝܟ ܓܘܫܡܐ ܕܐܟܡ ܐܘ ܚܘܪ 
                    ܐܝܟ ܕܒܫܘܢܝܐ ܕܡܢ ܕܘܟܐ ܠܕܘܟܐ: 
                
                 ܠܥܠ: ܐܝܟ ܢܘܪܐ ܕܥܪܝܐ ܠܥܠ 
                 ܠܬܚܬ: ܐܝܟ ܐܝܟ ܡܝ̈ܐ ܕܢܚܬܝܢ ܠܬܚܬ
                 ܠܝܡܝܢܐ: ܐܝܟ ܓܐܪܐ ܕܡܫܬܕܐ
                 ܠܣܡܠܐ. ܠܩܘܕܡܐ. ܠܒܣܬܪܐ: ܐܝܟ ܠܚܕ ܡܢ ܗܠܝܢ ܣܘܦܐ 
                 ܚܘܕܪܢܐܝܬ: ܐܝܟ ܪܚܝܐ ܕܡܬܬܙܝܥܐ
                ܒܐܝܢܐ ܡܢ ܗܠܝܢ ܙܢܝ̈ܐ ܕܡܬܬܙܝܥܢܘܬܐ ܡܬܬܙܝܥܐ ܢܦܫܐ. ܘܐܡܪܝܢܢ ܕܠܘ ܒܗܿܘ ܕܡܢ
                    ܫܘܢܝܐ ܕܡܢ ܕܘܟܐ ܠܕܘܟܐ ܘܐܦܠܐ ܒܗܿܘ ܕܒܬܪܒܝܬܐ ܘܕܒܘܨܪܐ. ܐܘ ܕܒܚܘܒܠܐ. ܡܛܠ ܕܗܠܝܢ ܙܢܝ̈ܐ
                    ܕܡܬܬܙܝܥܢܘܬܐ ܥܠ ܓܘܫ̈ܡܐ ܒܠܚܘܕ ܡܬܬܙܝܥܝܢ ܒܗܘܢ. ܓܘܫ̈ܡܐ  f.34b  ܓܝܪ ܪܒܝܢ
                    ܒܡܘܫܚ̈ܬܐ ܘܡܬܒܨܪܝܢ. ܘܓܘܫ̈ܡܐ ܡܫܢܝܢ ܡܢ ܕܘܟܐ ܠܕܘܟܐ. ܘܓܘܫ̈ܡܐ ܡܬܚܒܠܝܢ. ܢܦܫܐ ܕܝܢ ܕܠܐ
                    ܓܘܫܘܡ ܐܝܬܝܗܿ. ܡܕܝܢ ܠܐ ܡܬܬܙܝܥܐ ܒܗܠܝܢ ܙܢܝ̈ܐ ܕܡܬܬܙܝܥܢܘܬܐ. ܠܐ ܕܝܢ ܘܐܦܠܐ ܒܙܢܐ
                    ܕܡܬܬܙܝܥܢܘܬܐ ܗܿܝ ܐܝܟ ܗܘܝܐ ܡܬܬܙܝܥܐ ܡܛܠ ܕܡܢ ܟܕܘ ܗܘܬ ܠܗܿ ܘܠܘ ܐܝܟ ܙܪܥܐ ܐܢܫܝܐ ܐܝܬܝܗܿ
                    ܕܡܬܬܙܝܥ ܒܩܠܝܠ ܩܠܝܠ. ܘܗܿܘܐ ܦܓܪܐ ܡܫܡܠܝܐ ܕܒܪܢܫܐ. ܡܕܝܢ ܠܘ ܒܗܠܝܢ ܚܡܫܐ ܙܢܝ̈ܐ
                    ܕܡܬܬܙܝܥܢܘܬܐ ܡܬܬܙܝܥܐ ܢܦܫܐ. ܘܐܦܠܐ ܒܚܕ ܡܢܗܘܢ. ܫܪܝܟܐ ܡܕܝܢ ܕܒܙܢܐ ܕܡܬܬܙܝܥܢܘܬܐ ܗܿܝ ܕܐܝܟ
                    ܕܒܣܘܓܐܐ ܡܬܬܙܝܥܐ ܢܦܫܐ ܘܝܕܝܥܐ ܗܕܐ ܕܗܟܢܐ ܐܝܬܝܗܿ ܡܢ ܗܿܝ ܕܗܕܐ ܡܬܬܙܝܥܢܘܬܐ ܐܝܟ ܕܒܫܘܓܢܝܐ
                    ܡܬܐܡܪܐ. ܡܬܐܡܪܐ ܥܠ ܓܘܫܡܐ ܘܥܠ ܠܐ ܓܫܘܡ. ܘܒܕܓܘܢ ܐܝܟܢܐ ܕܦܓܪܐ ܡܬܬܙܝܥ ܘܡܫܬܓܢܐ ܡܢ ܚܘܪܘܬܐ
                    ܠܘܬ ܐܘܟܡܘܬܐ. ܘܡܢ (ܐܘܟܡܘܬܐ) ܠܘܬ ܚܘܪܘܬܐ. ܗܟܢܐ ܐܦ ܢܦܫܐ ܡܬܬܙܝܥܐ ܘܡܫܬܓܢܝܐ ܡܢ ܒܝܫܬܐ
                    ܠܘܬ ܛܒܬܐ. ܘܡܢ ܛܒܬܐ ܠܘܬ ܒܝܫܬܐ. ܘܡܢ ܕܚܠܬܐ ܘܡܢ ܚܕܘܬܐ. ܘܡܢ ܠܐ ܝܕܥܬܐ ܠܘܬ ܝܕܥܬܐ. ܘܡܢ
                    ܝܘܠܦܢܐ ܠܘܬ ܡܬܢܫܝܢܘܬܐ. ܘܡܢ ܡܬܢܫܝܢܘܬܐ  f.35a  ܠܘܬ ܡܬܥܗܕܢܘܬܐ. ܙܕܩ ܗܟܝܠ
                    ܕܢܥܩܒ ܕܡܢܐ ܐܝܬܝܗܿ ܡܬܬܙܝܥܢܘܬܐ ܗܿܝ ܕܢܦܫܐ. ܘܐܡܪܝܢܢ ܕܡܬܬܙܝܥܢܘܬܗܿ ܕܢܦܫܐ ܚܝܠܐ ܐܝܬܝܗܿ.
                    ܚܝܠܐ ܪܘܚܢܝܐ ܕܒܗܿ ܐܡܝܢܐܝܬ ܘܕܠܐ ܫܠܘܐ ܡܬܬܙܝܥܐ ܠܘܬ ܝܕܥܬܐ ܘܝܘܠܦܢ̈ܐ ܘܠܘܬ ܡܚܫ̈ܒܬܐ
                    ܘܦܘܪ̈ܫܢܝܗܝܢ. ܘܠܘܬ ܡܝܬܪܘܬܐ ܘܒܝܫܘܬܐ ܘܠܒܝܒܘܬܐ ܘܕܚܠܬܐ ܘܚܕܘܬܐ. ܘܠܘܬ ܗܠܝܢ ܕܫܪܟܐ. ܕܕܐܝܟ
                    ܗܟܢ ܘܠܐ ܬܘܒ ܕܢܐܡܪ ܕܡܢܐ ܐܝܬܘܗܝ ܬܚܘܡܗܿ ܕܡܬܬܙܝܥܢܘܬܐ. ܘܐܡܪܝܢܢ ܬܚܘܡܗܿ ܕܡܬܬܙܝܥܢܘܬܐ
                    ܐܝܬܘܗܝ ܐܘܪܚܐ ܕܡܢ ܚܝܠܐ ܠܘܬ ܡܥܒܕܢܘܬܐ. ܘܣܒ ܬܚܘܝܬܐ ܥܠܗܕܐ. ܡܕܥܐ ܡܢ ܐܝܬܘܗܝ ܚܝܠܐ ܕܢܦܫܐ.
                    ܡܥܒܕܢܘܬܐ ܕܝܢ ܕܗܢܐ ܚܝܠܐ ܐܝܬܝܗܿ ܗܿܝ ܕܢܕܥ ܠـܨܒܘܬܐ ܘܠܘ ܬܚܘܝ̈ܬܐ ܘܡ̈ܠܐ. ܐܠܐ ܒܝܕ ܝܕܥܬܐ
                    ܦܫܝܛܬܐ ܘܟܣܝܬܐ. ܡܬܬܙܝܥܢܘܬܐ ܗܟܝܠ ܐܝܬܝܗܿ ܐܘܪܚܐ ܘܡܥܒܪܬܐ ܕܡܢ ܗܢܐ ܚܝܠܐ ܠܘܬ ܗܕܐ
                    ܡܥܒܕܢܘܬܐ. ܗܟܢܐ ܣܒ ܘܐܦ ܥܠ ܫܪܟܐ ܕܚܝ̈ܠܐ ܘܡܥܒܕܢܘܬܐ ܕܢܦܫܐ. ܡܬܓܠܝܐ ܗܕܐ ܝܬܝܪ ܢܗܝܪܐܝܬ ܡܢ
                    ܦܘܠܓܐ ܕܡܢ ܠܬܚܬ ܪܫܝܡ: 
                ܢܦܫܐ: 
                
                    ܡܕܥܐ: ܗܿܝ ܕܢܕܥ ܠـܨܒܘܬܐ ܕܠܐ ܡܠܬܐ
                    ܬܪܥܝܬܐ: ܗܿܝ ܕܢܕܥ ܠـܨܒܘܬܐ ܒܝܕ ܡ̈ܠܐ
                    ܡܠܝܠܘܬܐ: ܗܿܝ ܕܬܦܪܘܫ ܠܚܘܫ̈ܒܐ
                
            
            
                 f.35a 
                 ܩܦܠܐܘܢ ܕܬܠܬܥܣܪ
                ܕܡܚܘܐ ܕܡܬܚܫܒܢܝܬܐ ܐܝܬܝܗܿ ܢܦܫܐ
                ܡܬܚܫܒܢܝܬܐ ܐܝܬܝܗܿ ܢܦܫܐ. ܘܡܬܝܕܥܐ ܡܢ ܗܠܝܢ. ܐ: ܡܢ ܝܕܥܬܐ ܘܐܘܡܢܘܬܐ
                    ܕܐܫܟܚܘ ܒܢܝ̈ܢܫܐ. ܒܗܿܝ ܕܒܝܕ ܡܚܫ̈ܒܬܐ ܕܢܦܫܐ ܐܫܟܚܘ ܐܢܝܢ. ܘܠܘ ܒܫܓܡܐ ܘܐܝܟ ܕܐܬܝܐ. ܒ: ܡܢ
                    ܗܿܝ ܕܩܕܡܝܢܢ ܨܝܪܝܢܢ ܒܡܚܫ̈ܒܬܐ ܠـܨܒܘܬܐ ܡܢ ܩܕܡ ܕܡܬܩܢܝܢܢ ܠܗܝܢ. ܗܿܘ ܡܐ ܕܪ̈ܓܫܐ ܕܦܓܪܢ ܠܐ
                    ܡܚܘܝܢ ܠܢ. ܩܕܡ ܓܝܪ ܢܓܪܐ ܘܨܐܪ ܒܡܚܫܒܬܗ ܠܟܘܪܣܝܐ ܘܠܐܣܟܝܡܗ ܡܢ ܩܕܡ ܕܡܢܓܪ ܠܗ. ܗܟܢܐ ܕܝܢ
                    ܐܪܕܝܟܠܐ ܠܒܝܬܐ ܩܕܡ ܘܨܐܪ ܠܗ ܒܚܘܫܒܗ ܡܢ ܩܕܡ ܕܒܢܐ ܠܗ. ܓ: ܝܕܝܥܐ ܕܡܚܫܒܢܝܬܐ ܐܝܬܝܗܿ ܗܝ
                    ܢܦܫܐ ܡܢ ܗܿܝ ܕܠܟܝܢܗܘܢ ܕܣܘܥܪ̈ܢܐ ܒܪ̈ܓܫܝܢ ܠܐ ܡܨܝܢܢ ܚܙܝܢܢ ܠܗ. ܘܒܕܓܘܢ ܡܣܬܟܠܝܢܢ ܠܗ
                    ܘܝܕܥܝܢܢ ܠܗ ܒܡܚܫ̈ܒܬܐ ܕܢܦܫܐ. ܡܕܝܢ ܡܬܚܫܒܢܝܬܐ ܐܝܬܝܗܿ ܢܦܫܐ. 
            
            
                ܩܦܠܐܘܢ ܕܐܪܒܥܣܪ
                ܕܡܚܘܐ ܕܟܡܐ ܘܐܝܠܝܢ ܕܝܠܝ̈ܬܐ ܐܝܬ ܠܗܿ ܠܢܦܫܐ
                ܚܕܐ ܡܢ ܗܟܝܠ ܕܝܠܝܬܐ ܕܢܦܫܐ ܐܝܬܝܗܿ ܗܕܐ. ܗܿܝ ܕܡܢ ܟܠܗܘܢ ܗܘܝܐ ܒܪ̈ܝܐ
                    ܘܡܠܝ̈ܠܐ ܗܝ ܒܠܚܘܕܝܗܿ  f.36a  ܣܢܝܩܐ ܕܬܬܚܫܚܝ ܒܡܚܫܒܬܐ ܡܒܚܢܢܝܬܐ. ܘܒܝܕ ܗܘܦܟ
                    ܚܘܫ̈ܒܐ. ܐܢ ܙܕܩ ܕܬܣܥܘܪ ܡܕܡ ܐܘ ܠܐ. (ܒ) ܐܝܬܝܗܿ ܗܝ ܕܟܕ ܐܣܝܪܐ ܒܦܓܪܐ ܟܢܬܗܿ ܘܒܝܬ ܡܥܡܪܗܿ
                    ܡܬܗܓܓܐ ܘܚܙܝܐ ܒܦܢܛܣܝܐ ܠܗܢܝܢ ܕܪܚܝܩܝܢ ܐܝܟ ܩܪ̈ܝܒܬܐ. ܟܕ ܠܐ ܡܫܢܝܐ ܐܘ ܡܪܚܩܐ ܡܢ ܥܘܡܪܗܿ.
                    (ܓ) ܘܗܿܝ ܕܟܕ ܕܡܟ ܦܓܪܐ ܕܥܡܗ ܐܣܝܪܐ ܘܡܬܬܢܝܚܐ ܐܦ ܗܝ ܥܡܗ. ܡܛܠ ܐܣܪܐ ܕܐܟܚܕܐ ܡܬܚܦܛܐ
                    ܕܬܣܥܘܪ ܗܠܝܢ ܕܒܥܝܪܘܬܐ ܥܢܝܐ ܗܘܬ ܒܗܝܢ. (ܕ) ܗܿܝ ܕܟܕ ܐܣܝܪܐ ܒܦܓܪܐ ܚܐܫܐ ܥܡܗ ܒܚܫܘܗܝ
                    ܘܡܬܬܥܝܩܐ ܒܟܐܒܘܗܝ. ܟܕ ܠܐ ܚܫܘܫܬܐ ܐܝܬܝܗܿ ܒܟܝܢܐ. (ܗ) ܗܿܢܘ ܕܝܢ ܗܿܝ ܕܬܣܢܐ ܠܥܘܠܘܬܐ
                    ܘܬܪܚܡ ܠܙܕܝܩܘܬܐ. ܘܐܦܢ ܡܫܬܪܥܐ ܘܡܨܛܠܝܐ ܘܡܚܛܝܐ ܕܝܠܝ̈ܬܐ ܕܝܠܗܿ. (ܘ) ܗܿܝ ܕܡܫܟܚܐ ܐܘܡܢܘܬܐ
                    ܡܫܚ̈ܠܦܬܐ ܘܝܕܥܬܐ ܡܦܬܟܐ. 
                ܐܝܬ ܗܪܟܐ ܪܘܫܡܐ ܕܚܝ̈ܠܐܘܕܝܠܝ̈ܬܐ ܕܢܦܫܐ. ܐܠܐ ܒܦܣܘܩܐ ܕܩܕܡ ܝܬܝܪ ܥܗܢ
            
            
                 f.36b 
                 ܩܦܠܐܘܢ ܕܚܡܫܬܥܣܪ
                ܕܡܚܘܐ ܕܡܢܘ ܬܚܘܡܗܿ ܕܢܦܫܐ. ܘܕܐܝܟ ܐܝܟܢܐ ܐܝܬܝܗܿ
                ܘܐܡܪܝܢܢ ܗܟܝܠ ܕܐܝܬܘܗܝ ܬܚܘܡܗܿ ܕܢܦܫܐ. ܗܢܘ ܐܘܣܝܐ ܚܝܬܐ. ܠܐ ܡܝܘܬܬܐ.
                    ܡܡܕܥܬܐ. ܡܬܪܥܝܢܝܬܐ. ܝܕܘܥܬܢܝܬܐ. ܥܗܘܕܬܐ. ܡܬܬܙܝܥܬ ܡܢ ܝܬܗܿ. ܢܗܝܪܬܐ. ܩܛܝܢܬܐ. ܫܦܝܬܐ.
                    ܡܠܝܠܬܐ. ܠܐ ܡܬܚܙܝܢܝܬܐ. ܕܡܚܝܕܐ ܠܦܓܪܐ. ܘܡܬܦܪܫܐ ܡܢܗ ܒܙܒܢ ܘ…… ܡܬܚܝܕܐ ܠܗ ܠܐ ܡܬܦܪܫܢܐܝܬ.
                    ܒܗܿܝ ܡܢ ܕܐܡܪܝܗܿ ܐܘܣܝܐ ܚܝܬܐ……. ܒܢ̈ܬ ܩًܠܐ ܕܝܢ ܕܫܪܟܐ ܫܘܕܥܢܢ ܚܝ̈ܠܐ ܟܝܢ̈ܝܐ ܘܫܘܚ̈ܠܦܐ
                    ܐܘܣܝ̈ܝܐ ܕܝܠܗܿ ܟܕ ܡܦܫܩܝܢ ܠܢ ܒܬܐܘܪ̈ܝܣ ܥܠܝ̈ܬܐ. ܐܠܐ ܐܡܪܝܢܢ ܗܪܟܐ ܥܡ ܫܪܟܐ ܕܒܢ̈ܬ ܩًܠܐ
                         f.37a  ܒܗܿܝ ܗܟܝܠ ܕܐܡܪܝܗܿ ܢܗܝܪܬܐ ܠܘ ܕܐܝܬ ܠܗܿ ܢܘܗܪܐ ܕܫܡܫܐ ܐܘ ܕܠܡܦܐܕܐ
                    ܕܫܪܓܐ. ܐܠܐ ܕܐܝܬܝܗܿ ܢܗܝܪܬܐ ܒܝܕܥܬܐ ܕܣܘܥܪ̈ܢܐ ܘܕܨܒܘܬܐ. ܒܗܿܝ ܕܝܢ ܐܡܪܝܗܿ ܩܛܝܢܬܐ. ܠܘ
                    ܒܕܡܘܬܐ ܕܓܘܫ̈ܡܐ ܩܛܝ̈ܢܐ ܕܚܐܫܝܢ ܗܿܝ ܕܣܩܘܒܠܝ̈ܐ ܒܝܕ …… ܠܘܬ ܡܢܘܬܐ ܕܠܩܘܒܠܐ ܕܓܘܫ̈ܡܐ
                    ܥܒܝ̈ܐ. ܐܠܐ ܗܿܝ ܕܥܪܩܐ ܡܢ ܐܝܠܝܢ ܕܒܗܝܢ ܡܬܪܓܫ ܦܓܪܐ. ܫܦܝܬܐ ܕܝܢ ܒܗܿܝ ܕܠܐ ܣܟ ܡܩܒܠ ܟܝܢܗܿ
                    ܐܛܪܢܝܘܬܐ ܕܦܓܪܐ ܗܿܝ ܓܘܫܡܢܝܬܐ. ܡܠܝܠܬܐ ܕܝܢ ܒܗܿܝ ܕܠܐ ܣܟ ܩܢܝܐ ܢܙܠܐ ܕܢܬܥ ܠܬܚܬ. ܠܐ
                    ܡܬܚܙܝܢܝܬܐ ܕܝܢ ܒܗܿܝ ܕܠܐ ܓܫܘܡ ܐܝܬܝܗܿ ܘܐܦܠܐ ܩܢܝܐ ܬܠܬܐ ܩܝ̈ܡܐ. ܒܗܿܝ ܕܝܢ ܕܡܚܝܕܐ ܠܓܘܫܡܐ
                    ܐܘܟܝܬ ܠܦܓܪܐ ܦܪܝܫܐ ܡܢ ܡܠܐܟܐ ܕܠܐ ܡܚܝܕܝܢ ܠܓܘܫ̈ܡܐܡܬܝܕܥ ܕܝܢ ܕܢܦܫܐ ܝܬܝܪ ܢܗܝܪܐܝܬ ܡܢ
                    ܦܘܠܓܐ ܗܢܐ ܬܚܝܘܡܗܿ ܕܢܦܫܐ ܐܝܬܘܗܝ ܐܘܣܝܐ: 
                ܐܘܣܝܐ ܓܢܣܗ ܕܬܚܘܡܐ
                ܚܝܬܐ ܟܝܢܗܿ ܕܢܦܫܐ
                ܠܐ ܡܝܘܬܬܐ ܟܝܢܗܿ ܕܢܦܫܐ
                ܡܡܕܥܬܐ ܚܝܠܗܿ ܕܢܦܫܐ
                ܥܗܘܕܬܐ ܚܝܠܗܿ ܕܢܦܫܐ
                ܝܕܘܥܬܢܝܬܐ ܚܝܠܗܿ ܕܢܦܫܐ
                ܡܬܬܙܝܥܬ ܡܢ ܝܬܗܿ ܚܝܠܗܿ ܕܢܦܫܐ  f.37b 
                
                ܢܗܝܪܬܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
                ܩܛܝܢܬܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
                ܫܦܝܬܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
                ܩܠܝܠܬܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
                ܠܐ ܡܬܚܙܝܢܝܬܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
                ܕܡܚܝܕܐ ܠܦܓܪܐ ܫܘܚܠܦܐ ܕܢܦܫܐ ܕܡܢ ܓܘܫ̈ܡܐ
            
            
                ܩܦܠܐܘܢ ܕܫܬܬܥܣܪ
                ܕܡܚܘܐ ܕܢܦܫܐ ܠܐ ܡܝܘܬܬܐ ܐܝܬܝܗܿ
                ܡܬܝܕܥܐ ܕܝܢ ܫܪܝܪܐܝܬ ܕܢܦܫܐ ܠܐ ܡܝܘܬܬܐ ܐܝܬܝܗܿ ܡܢ ܡܚܘܝܢ̈ܘܬܐ ܗܠܝܢ. ܐ: ܟܠ
                    ܣܘܥܪܢܐ ܕܐܝܬ ܐܘ ܦܫܝܛܐ ܐܝܬܘܗܝ ܐܘ ܡܪܟܒܐ. ܘܐܝܟܐ ܡܢ ܗܟܝܠ ܕܐܝܬ ܪܘܟܒܐ ܬܡܢ ܐܝܬ ܐܦ
                    ܣܩܘܒܠܝܘܬܐ. ܬܡܢ ܐܝܬ ܐܦ ܩܪܒܐ ܘܬܟܬܘܫܐ. ܘܐܝܟܐ ܕܐܝܬ ܬܟܬܘܫܐ. ܬܡܢ ܐܝܬ ܫܪܝܐ ܘܦܘܠܗܕܐ.
                    ܘܐܝܟܐ ܕܐܝܬ ܫܪܝܐ ܘܦܘܠܗܕܐ ܬܡܢ ܐܝܬ ܐܦ ܡܘܬܐ. ܐܝܟܐ ܕܝܢ ܕܐܝܬ ܦܫܝܛܘܬܐ ܠܝܬ ܪܘܟܒܐ. ܘܐܝܟܐ
                    ܕܪܘܟܒܐ ܠܝܬ. ܐܦܠܐ ܣܩܘܒܠܝܘܬܐ ܐܝܬ. ܘܐܝܟܐ ܕܠܝܬ ܣܩܘܒܠܝܘܬܐ ܠܝܬ ܬܟܬܘܫܐ ܘܡܨܘܬܐ.  f.38a  ܘܐܝܟܐ ܕܠܝܬ ܬܟܬܘܫܐ. ܠܝܬ ܫܪܝܐ ܘܦܘܠܗܕܐ. ܘܐܝܟܐ ܕܠܝܬ ܫܪܝܐ ܐܦܠܐ ܡܘܬܐ
                    ܐܝܬ. ܡܕܝܢ ܐܝܟܐ ܕܐܝܬ ܦܫܝܛܘܬܐ ܠܝܬ ܡܘܬܐ. ܝܕܝܥܐ ܗܟܝܠ ܕܢܦܫܐ ܠܐ ܡܝܘܬܬܐ ܐܝܬܝܗܿ. ܡܢ ܗܿܝ
                    ܕܐܝܬܝܗܿ ܦܫܝܛܬܐ ܕܐܝܟ ܐܝܟܢ. ܢܦܫܐ ܦܫܝܛܬܐ ܐܝܬܝܗܿ ܘܦܫܝܛܬܐ ܠܐ ܡܝܬܐ. ܒܗܿܝ ܕܐܝܟܐ ܕܐܝܬ
                    ܦܫܝܛܘܬܐ ܠܝܬ ܡܘܬܐ. ܒ: ܕܝܢ ܡܢ ܗܿܝ ܕܚܝܬܐ ܘܐܡܝܢܬ ܙܘܥܐ ܐܝܬܝܗܿ. ܢܦܫܐ ܗܟܝܠ ܐܡܝܢܬ ܙܘܥܐ
                    ܐܝܬܝܗܿ ܘܚܝܐ ܡܢ ܙܘܥܐ. ܠܐ ܫܩܠ ܫܘܠܡܐ. ܠܐ ܡܐܬ. ܡܕܝܢ ܢܦܫܐ ܠܐ ܡܝܬܐ. ܓ: ܕܝܢ ܡܢ ܗܿܝ
                    ܕܢܦܫܐ ܠܐ ܕܡܟܐ ܐܦ ܓܝܪ ܟܕ ܦܓܪܐ ܗܝ ܡܥܒܕܐ ܐܝܠܝܢ ܕܡܥܒܕܐ. ܢܦܫܐ ܓܝܪ ܠܐ ܕܡܟܐ. ܘܗܿܘ ܕܠܐ
                    ܕܡܟ ܠܐ ܡܐܬ. ܡܕܝܢ ܢܦܫܐ ܠܐ ܡܝܬܐ. ܐܦ ܓܝܪ ܐܢܫ ܡܢ ܡܠܦܢ̈ܐ ܐܡܪ ܕܠܐ ܡܝܬܐ ܢܦܫܐ ܡܛܠ ܕܠܐ
                    ܕܡܟܐ ܢܦܫܐ. ܕ: ܕܝܢ ܡܢ ܗܿܝ ܕܚܝ̈ܐ ܐܝܬܝܗܿ ܒܟܝܢܗܿ. ܢܦܫܐ ܗܟܝܠ ܚܝ̈ܐ ܐܝܬܝܗܿ ܒܟܝܢܗܿ ܗ
                    ܚܝ̈ܐ ܐܝܬܘܗܝ ܟܝܢܗܿ ܘܠܐ ܡܐܬ. ܡܕܝܢ ܢܦܫܐ ܠܐ ܡܝܘܬܬܐ. ܗ: ܕܝܢ ܝܕܝܥܐ ܕܠܐ ܡܝܬܐ ܢܦܫܐ ܡܢ
                    ܗܿܝ ܕܡܐܬ ܦܓܪܐ. ܕܠܩܘܒܠܝܬܐ ܓܝܪ ܐܝܬܝܗܿ ܕܝܠܗ. ܘܐܢܗܘ ܡܐܬ ܗܝ ܠܐ ܡܝܬܐ ܡܢ ܐܢܢܩܝ. ܟܕ
                    ܕܠܩܘܒܠܝܬܐ ܕܝܠܗ ܐܝܬܝܗܿ. ܦܓܪܐ ܡܢ ܡܐܬ. ܢܦܫܐ ܕܝܢ ܕܠܩܘܒܠܝܬܐ ܗܝ ܕܦܓܪܐ. ܡܕܝܢ  f.38b  ܢܦܫܐ ܠܐ ܡܝܬܐ. ܘ: ܕܝܢ ܝܕܝܥܐ ܕܠܐ ܡܝܬܐ ܡܢ ܗܿܝ ܕܦܓܪܐ ܡܢ ܛܒܬܐ ܡܬܩܝܡ
                    ܘܡܢ ܒܝܫ̈ܬܗ ܡܬܚܒܠ. ܛܒܬܗ ܗܟܝܠ ܕܦܓܪܐ ܐܝܬܝܗܘܢ ܫܦܝܪܘܬ ܚܘܠܡܢܐ ܡܘܙܓܐ ܚܠܝܡܘܬ ܗܕܡ̈ܐ.
                    ܫܘܦܪ̈ܐ ܗܠܝܢ ܓܝܪ ܡܩܝ̈ܡܢ ܠܗ ܠܦܓܪܐ. ܡܕܝܢ ܛܒܬܗ ܕܦܓܪܐ ܡܩܝ̈ܡܢ ܠܗ. ܢܦܫܐ ܕܝܢ ܠܐ ܛܒܬܗܿ
                    ܡܩܝ̈ܡܢ ܠܗܿ. ܐܦܠܐ ܒܝܫ̈ܬܗܿ ܡܢ ܡܚܒܠܢ ܠܗܿ. ܛܒܬܗܿ ܐܝܬܝܗܝܢ ܙܕܝܩܘܬܐ ܡܝܬܪܘܬܐ ܫܦܝܘܬܐ.
                    ܚܕܘܬܐ ܘܫܪܟܐ ܕܐܝܟ ܗܠܝܢ. ܒܝܫ̈ܬܗܿ ܕܝܢ ܐܝܬܝܗܝܢ ܥܘܠܘܬܐ ܚܣܡܐ ܙܠܝܠܘܬܐ ܣܢܐܬܐ ܥܩܬܐ. ܘܕܐܝܟ
                    ܗܠܝܢ. ܘܐܢ ܡܢ ܛܒܬܗܿ ܕܢܦܫܐ ܠܐ ܡܩܝ̈ܡܢ ܠܗܿ. ܘܒܝܫ̈ܬܗܿ ܠܐ ܡܚܒܠܢ ܠܗܿ. ܡܕܝܢ ܠܐ ܡܝܬܐ. ܙ:
                    ܬܠܬܐ ܙܢܝ̈ܐ ܕܚܘܠܐ ܐܝܬ. ܚܕ ܡܢ ܗܿܘ ܕܐܝܬܘܗܝ ܫܪܝܐ ܕܪ̈ܘܟܒܐ. ܐܟܙܢܐ ܕܫܪܝܐ ܕܪܘܟܒܗ ܕܒܝܬܐ
                    ܐܘ ܕܐܠܦܐ. ܫܪܝܐ ܗܟܝܠ ܡܚܒܠ ܠܗ ܠܒܝܬܐ ܐܦ ܠܐܠܦܐ. ܐܚܪܢܐ ܕܝܢ ܗܿܘ ܕܐܝܬܘܗܝ ܦܘܠܓܐ ܘܦܘܣܩܐ
                    ܕܠܡܢ̈ܘܬܐ. ܐܟܙܢܐ ܕܩܝܣܐ ܕܥܣܪܐ ܐܡܝ̈ܢ ܕܡܬܦܠܓ ܘܡܬܦܣܩ ܠܡܢ̈ܘܬܐ ܘܕܩܕܩًܬܐ ܗܟܢܐ ܦܘܠܓܐ
                    ܘܦܣܩܐ ܡܚܒܠ ܠܗ ܟܕ ܡܬܦܣܩ. ܐܚܪܢܐ ܕܝܢ ܗܿܘ ܕܗܿܘܐ ܒܫܘܚܠܦܐ ܕܡܕܡ  f.39a  ܟܕ
                    ܡܬܚܒܠ ܡܢ ܗܿܘ ܡܐ ܕܐܝܬܘܗܝ ܘܗܿܘܐ ܡܕܡ ܐܚܪܢܐ ܐܝܟ ܙܢܐ ܕܙܪܥܐ ܐܢܫܝܐ ܕܡܬܚܒܠ ܡܢ ܗܿܝ
                    ܕܐܝܬܘܗܝ ܙܪܥܐ. ܘܗܿܘܐ ܦܓܪܐ. ܡܕܝܢ ܚܘܒܠܐ ܒܬܠܬܐ ܙܢܝ̈ܐ ܗܿܘܐ: 
                ܐ: ܫܪܝܐ ܕܪܘܟܒܐ ܐܟܙܢܐ ܫܪܝܗ ܕܒܝܬܐ 
                ܒ: ܦܣܩܗ ܕܡܕܡ ܐܟܙܢܐ ܕܦܘܠܓܗ ܕܩܝܣܐ 
                ܓ: ܫܘܚܠܦܗ ܕܡܕܡ ܐܟܙܢܐ (ܕܙܪܥܐ) ܕܡܬܚܒܠ ܘܗܿܘܐ ܦܓܪܐ 
                ܥܠ ܢܦܫܐ ܗܟܝܠ ܘܠܐ ܚܕ ܡܢ ܗܠܝܢ ܬܠܬܐ ܙܢܝ̈ܐ ܕܚܘܒܠܐ ܥܐܠ. ܠܐ ܡܝܬܐ ܢܦܫܐ.
                    ܚ: ܡܢ ܗܿܝ ܕܡܙܝܥܐ ܠܦܓܪܐ. ܐܢ ܓܝܪ ܦܓܪܐ ܕܡܬܬܙܝܥ ܡܝܘܬܐ ܗܘ. ܢܦܫܐ ܕܗܝ ܡܙܝܥܐ ܠܗ ܠܐ ܡܝܬܐ.
                    ܝܕܝܥܐ ܕܠܐ ܡܝܬܐ ܡܢ ܗܕܐ. ܬܪܝܢ ܚܫ̈ܝܢ ܥܕܝܢ ܥܠ ܒܪܢܫܐ ܚܕ ܥܠ ܦܓܪܐ ܐܡܪ ܐܢْܐ ܘܐܚܪܢܐ ܥܠ
                    ܢܦܫܐ. ܘܗܿܘ ܡܢ ܕܦܓܪܐ ܐܝܬܘܗܝ ܡܚܘܬܐ ܘܦܣܩܐ ܘܢܓ̈ܕܐ ܐܘ ܨܝܪܐ ܘܟܐܒܐ ܘܕܐܝܟ ܗܠܝܢ. ܗܢܐ ܕܝܢ
                    ܕܢܦܫܐ ܐܝܬܘܗܝ ܚܛܗܐ ܚܘܒܐ ܣܟܠܘܬܐ ܘܒܘܨܪ̈ܐ  f.39b  ܦܘܕܐ ܐܘ ܕܐܝܟ ܗܠܝܢ. ܘܚܫ̈ܐ
                    ܡܢ ܕܦܓܪܐ ܕܐܝܬܝܗܘܢ ܡܚܘܬܐ ܘܦܘܣܩܐ ܘܕܫܪܟܐ. ܠܐ ܡܬܢܛܪܝܢ ܠܦܘܪܥܢܘܬܐ. ܒܕܓܘܢ ܐܦ ܦܓܪܐ ܕܒܗ
                    ܡܬܩܝܡܝܢ ܡܫܬܪܐ. ܚܫ̈ܐ ܕܝܢ ܕܢܦܫܐ ܕܐܝܬܝܗܘܢ ܚܛܗܐ ܘܚܘܒܐ ܘܕܫܪܟܐ ܡܬܢܛܪܝܢ ܠܦܘܪܥܢܐ. ܘܒܕܓܘܢ
                    ܢܦܫܐ ܕܒܗܿ ܡܬܩܝܡܝܢ ܠܐ ܡܫܬܪܝܐ ܘܠܐ ܡܝܬܐ. ܛ: ܝܕܝܥܐ ܕܠܐ ܡܝܬܐ ܐܢܦܫܐ ܡܢ ܥܘܬܕܐ ܗܢܐ: ܐܝܬ
                    ܒܛܝܠܘܬܐ ܘܐܢ ܒܛܝܠܘܬܐ ܐܝܬ. ܐܝܬ ܐܦ ܕܝܢܐ ܡܢ ܐܢܢܩܝ. ܘܐܢ ܕܝܢܐ ܐܝܬ. ܐܦ ܡܬܬܕܝܢܢܐ ܐܝܬ.
                    ܘܐܢ ܐܝܬ ܡܬܬܕܝܢܢܐ. ܐܝܬ ܐܦ ܢܦܫܐ ܠܐ ܡܝܘܬܬܐ ܡܢ ܐܢܢܩܝ. ܘܗܠܝܢ ܡܚܘܝܢ̈ܘܬܐ ܡܢ ܒܘܚܢ̈ܐ
                    ܟܝܢ̈ܝܐ ܘܡܠܝ̈ܠܐ ܐܝܬܝܗܝܢ. ܕܡܚܘܝܢ ܕܢܦܫܐ ܠܐ ܡܝܘܬܬܐ ܐܝܬܝܗܿ. ܘܣܗܕܘܬܐ ܕܝܢ ܕܡܢ ܟܬܒܐ
                    ܩܕܝ̈ܫܐ ܕܡܫܪܪ̈ܢ ܕܠܐ ܡܝܬܐ ܢܦܫܐ ܐܝܬܝܗܝܢ ܗܠܝܢ. ܐܡܪ ܐܠܗܐ ܠܘܬ ܡܘܫܐ: ܕܐܢܐ ܐܢْܐ ܐܠܗܗ
                    ܕܐܒܪܗܡ ܘܕܐܝܣܚܩ ܘܕܝܥܩܘܒ. ܘܐܠܗܐ ܠܐ ܗܘܐ ܕܡܝ̈ܬܐ ܐܠܐ ܕܚܝ̈ܐ1 ܣܦܪܐ ܕܡܦܩܢܐ:6:3 ܡܬܝ:
                        32:22. ܒܝܕ ܗܿܝ ܕܐܡܪ ܕܠܘ ܕܡܝ̈ܬܐ ܐܝܬܘܗܝ ܐܠܗܐ ܐܠܐ ܕܚܝ̈ܐ. ܚܘܝ
                    ܕܢܦܫ̈ܬܗܘܢ ܠܘ ܡܝ̈ܬܬܐ ܐܢܝܢ ܐܠܐ ܚܝ̈ܬܐ. ܘܫܠܝܡܘܢ ܐܡܪ: ܕܗܿܦܟ ܦܓܪܐ ܠܐܪܥܐ ܐܝܟ ܕܗܘܐ ܘܪܘܚܐ
                    ܠܘܬ ܡܪܝܐ  f.40a  ܕܝܗܒܗܿ2 ܩܘܗܠܬ:8:12. ܒܗܿܝ ܡܢ ܕܐܡܪ ܕܗܦܟܐ ܪܘܚܐ ܠܐܪܥܐ
                    ܐܟܡܐ ܕܗܿܦܟ ܦܓܪܐ. ܚܘܝ ܕܠܐ ܡܬܚܒܠܢܝܬܐ ܐܝܬܝܗܿ. ܒܗܿܝ ܕܝܢ ܕܐܡܪ ܕܠܘܬ ܡܪܝܐ ܗܿܦܟܐ ܘܦܢܝܐ.
                    ܫܘܕܥ ܕܠܐ ܡܝܬܐ ܐܠܐ ܚܝܐ. ܘܬܘܒ ܐܡܪ ܡܪܢ ܒܐܘܢܓܠܝܘܢ: ܕܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ
                    ܢܦܫܐ ܕܝܢ ܠܐ ܡܫܟܚܝܢ ܠܡܩܛܠ3 ܡܬܝ:28:10. ܒܗܿܝ ܗܟܝܠ ܕܐܡܪ ܕܠܐ ܡܫܟܚܝܢ ܠܡܩܛܠ
                    ܬܪܬܝܢ ܚܘܝ. ܚܕܐ ܡܢ ܕܠܐ ܓܘܫܡܢܝܬܐ ܐܝܬܝܗܿ ܢܦܫܐ. ܐܚܪܬܐ ܕܝܢ ܕܠܐ ܡܝܘܬܬܐ ܗܝ. ܠܐ ܓܘܫܡܢܝܬܐ
                    ܡܢ ܒܗܿܝ ܕܠܐ ܡܟܢܐ ܕܬܩܒܠ ܚܫ̈ܐ ܐܝܠܝܢ ܕܥܕܝܢ ܥܠ ܦܓܪܐ ܕܐܝܬܘܗܝ ܓܘܫܡܐ. ܠܐ ܡܝܘܬܬܐ ܗܝ ܒܗܿܝ
                    ܕܠܐ ܡܬܒܛܠܐ(ܡܬܩܛܠܐ) ܐܝܟ ܦܓܪܐ. ܘܬܘܒ ܐܡܪ ܒܬܫܥܝܬܐ ܕܥܠ ܥܬܝܪܐ ܘܠܥܙܪ: ܕܡܢ ܒܬܪ ܕܡܝܬ
                    ܥܬܝܪܐ ܘܐܬܩܒܪ. ܐܘܒܠܘܗܝ ܡܠܐܟܐ ܠܠܥܙܪ ܠܥܘܒܗ ܕܐܒܪܗܡ. ܘܕܫܐܠ ܥܬܝܪܐ ܡܝ̈ܐ ܡܢ ܐܒܪܗܡ
                        ܘܕܫܪܟܐ4
                            ܠܘܩܐ:19:16. ܒܗܿܝ ܗܟܝܠ ܕܐܡܪ ܕܐܘܒܠܘܗܝ ܡܠܐܟܐ ܠܠܥܙܪ ܠܥܘܒܗ
                    ܕܐܒܪܗܡ. ܘܒܗܿܝ ܕܦܢܝ ܐܒܪܗܡ ܠܥܬܝܪܐ ܐܝܠܝܢ ܕܦܢܝ. ܒܝܕ ܗܠܝܢ ܟܠܗܝܢ ܚܘܝ ܕܢܦܫ̈ܬܐ ܚܝ̈ܬܐ
                    ܐܝܬܝ̈ܗܝܢ ܕܠܐ ܣܟ  f.40b  ܡܝ̈ܬܢ. ܘܬܘܒ ܫܠܝܚܐ ܐܠܗܝܐ ܦܘܠܘܣ ܐܡܪ ܡܛܠ ܦܓܪܐ ܗܟܢܐ:
                    ܥܬܝܕ ܗܘ ܗܢܐ ܕܡܬܚܒܠ ܕܢܠܒܫ ܠܐ ܡܬܚܒܠܢܘܬܐ ܡܝܘܬܘܬܐ5 ܩܘܪܝܢܬܝ̈ܐ ܩܕܡܝܬܐ:53:15. ܐܝܟ ܗܿܘ
                    ܕܒܐܝܕܗ ܠܒܝܟ ܗܘܐ ܠܗ ܠܦܓܪܐ. ܘܒܨܒܥܗ ܡܚܘܐ ܗܘܐ ܠܗ ܟܕ ܐܡܪ ܕܗܢܐ ܕܡܬܚܒܠ ܘܡܐܬ. ܘܒܝܕ ܗܿܝ
                    ܕܐܡܪ ܥܠ ܦܓܪܐ ܕܗܢܐ ܕܡܬܚܒܠ ܘܡܐܬ. ܚܘܝ ܕܢܦܫܐ ܠܐ ܡܬܚܒܠܢܝܬܐ ܐܝܬܝܗܿ ܘܠܐ ܡܝܬܐ. ܡܕܝܢ ܢܦܫܐ
                    ܠܐ ܡܝܘܬܬܐ ܐܝܬܝܗܿ. 
            
            
                ܩܦܠܐܘܢ ܕܫܒܥܣܪ
                ܕܡܚܘܐ ܕܟܕ ܐܡܪܝܢܢ ܥܠ ܢܦܫܐ ܗܠܝܢ ܫܡܗܐ: ܠܐ ܡܝܘܬܘܬܐ ܠܐ ܓܘܫܡܢܝܬܐ. ܒܐܝܢܐ
                    ܙܢܐ ܐܡܪܝܢܢ ܠܗܘܢ ܥܠܝܗܿ. ܐܝܟ ܓܠܝܙܘܬܐ ܐܘ ܐܝܟ ܩܢܝܐ
                ܐܝܬ ܫܡܗܐ ܕܟܕ ܡܬܐܡܪܢ ܡܣܬܒܪܝܢ ܕܓܠܝܙܘܬܐ ܡܫܘܕܥܝܢ. ܟܕ ܠܘ ܓܠܝܙܘܬܐ
                    ܡܫܘܕܥܝܢ ܐܠܐ ܩܢܝܘܬܐ. ܘܐܝܬ ܬܘܒ ܫܡܗܐ ܕܟܕ ܡܬܐܡܪܝܢ ܡܣܬܒܪܝܢ ܕܩܢܝܘܬܐ ܡܫܘܕܥܝܢ. ܟܕ ܠܘ
                    ܩܢܝܘܬܐ ܡܫܘܕܥܝܢ ܐܠܐ ܓܠܝܙܘܬܐ. ܕܐܝܟ ܐܝܟܢ. ܗܿܢܘܢ ܡܢ ܕܡܣܬܒܪܝܢ ܕܓܠܝܙܘܬܐ ܡܫܘܕܥܝܢ. ܟܕ ܠܘ
                    ܓܠܝܙܘܬܐ ܡܫܘܕܥܝܢ ܐܠܐ ܩܢܝܘܬܐ. ܐܝܬܝܗܘܢ ܗܠܝܢ ܕܠܐ ܓܫܘܡ. ܠܐ ܡܠܝ̈ܠܐ. ܠܐ ܡܝܘܬܐ. ܠܐ ܢܦܫ
                         f.41a  ܘܫܪܟܐ ܕܐܝܟ ܗܠܝܢ. ܗܠܝܢ ܕܝܢ ܡܣܬܒܪܝܢ ܕܩܢܝܘܬܐ ܡܫܘܕܥܝܢ. ܟܕ ܠܘ
                    ܩܢܝܘܬܐ ܡܫܘܕܥܝܢ ܐܠܐ ܓܠܝܙܘܬܐ. ܕܐܝܬܝܗܘܢ ܗܠܝܢ. ܟܪܝܗܘܬܐ ܫܠܝܚܘܬܐ. ܡܣܟܢܘܬܐ ܣܡܝܘܬܐ.
                    ܒܝܫܘܬܐ ܘܚܫܘܟܐ ܘܫܪܟܐ ܕܐܝܟ ܗܠܝܢ. ܟܪܝܗܘܬܐ ܡܢ ܓܠܝܙܘܬܐ ܗܝ ܕܡܢ ܚܘܠܡܢܐ. ܘܫܠܝܚܘܬܐ
                    ܓܠܝܙܘܬܐ ܗܝ ܕܡܢ ܠܒܘܫܐ. ܘܡܣܟܢܘܬܐ ܓܠܝܙܘܬܐ ܗܝ ܕܡܢ ܥܘܬܪܐ. ܘܣܡܝܘܬܐ ܓܠܝܙܘܬܐ ܗܝ ܕܡܢ
                    ܚܙܬܐ. ܘܚܫܘܟܐ ܓܠܝܙܘܬܐ ܗܘ ܕܡܢ ܢܘܗܪܐ. ܘܒܝܫܘܬܐ ܓܠܝܙܘܬܐ ܗܝ ܕܡܢ ܛܒܬܐ. ܫܡܗܐ ܕܝܢ ܗܢܘܢ
                    ܓܠܘܙܐ ܠܐ ܓܫܘܡ ܐܡܪ ܐܢܐ ܘܠܐ ܡܝܘܬܐ ܘܠܐ ܡܠܝ̈ܠܐ ܘܠܐ ܢܦܫ ܘܫܪܟܐ. ܕܐܟܘܬܗܘܢ ܬܪܬܝܢ ܡܫܘܕܥܝܢ
                    ܘܠܗܿܘ ܕܒܨܝܪ ܡܢ ܗܿܘ ܕܕܝܠܗ ܐܝܬܝܗܿ ܓܠܝܙܘܬܐ. ܘܠܗܿܘ ܕܡܝܬܪ ܡܢܗ. ܕܐܝܟ ܐܝܟܢ. ܟܕ ܐܡܪܝܢ ܠܐ
                    ܓܫܘܡ ܠܘ ܡܓܠܙ ܓܠܙܢܝܗܝ. ܐܠܐ ܚܕܐ ܡܢ ܬܪܬܝܢ ܫܘܕܥܢܢ. ܐܘ ܠܡܕܡ ܒܨܝܪ ܡܢ ܓܘܫܡܐ ܐܟܙܢܐ ܕܗܘܠܐ
                    ܒܠܚܘܕ. ܐܘ ܐܕܫܐ ܒܠܚܘܕ. ܐܘ ܐܟܙܢܐ ܕܐܝܢܝ̈ܘܬܐ ܘܙܢܝ̈ܐ ܗܠܝܢ ܓܝܪ  f.41b  ܟܠܗܝܢ
                    ܠܐ ܓܫܘܡ ܐܝܬܝܗܝܢ ܕܒܨܝܪ̈ܢ ܡܢ ܓܘܫ̈ܡܐ ܐܘ ܠܡܕܡ ܕܡܝܬܪ ܡܢ ܓܘܫ̈ܡܐ ܡܫܘܕܥܝܢܢ ܟܕ ܐܡܪܝܢܢ ܠܐ
                    ܓܫܘܡ ܐܟܙܢܐ ܕܡܠܐܟܐ ܘܢܦܫ̈ܬܐ ܠܐ ܓܫܘܡ ܐܝܬܝܗܘܢ ܕܡܝܬܪܝܢ ܡܢ ܓܘܫ̈ܡܐ. ܡܕܝܢ ܠܐ ܓܫܘܡ ܠܘ
                    ܓܠܝܙܘܬܐ ܡܫܘܕܥ ܐܠܐ ܩܢܝܘܬܐ ܕܐܘ ܒܨܝܪܐ ܡܢ ܗܿܘ ܕܕܝܠܗ ܗܘܬ ܓܠܝܙܘܬܐ ܐܘ ܡܝܬܪܐ ܡܢܗ ܗܟܢܐ.
                    ܗܟܢܐ ܘܠܐ ܡܝܘܬܐ. ܟܕ ܐܡܪܝܢܢ ܠܐ ܡܝܘܬܐ. ܠܘ ܓܠܝܙܘܬܐ ܡܫܘܕܥܝܢܢ ܐܠܐ ܠܬܪܬܝܢ ܩܢܝ̈ܘܬܐ. ܚܕܐ
                    ܡܢ ܠܟܐܦ̈ܐ ܘܠܩܝ̈ܣܐ ܕܒܨܝܪ ܡܢ ܒܪܢܫܐ. ܕܐܝܬܘܗܝ ܠܐ ܡܝܘܬܐ. ܐܚܪܬܐ ܕܝܢ ܠܡܠܐܟܐ ܘܠܢܦܫܐ
                    ܡܝܬܪܐ ܡܢ ܒܪܢܫܐ ܕܐܝܬܘܗܝ ܡܝܘܬܐ. ܗܿܘ ܕܡܢܗ ܗܘܬ ܓܠܝܙܘܬܐ. ܒܗ ܒܗܢܐ ܙܢܐ ܗܟܝܠ ܘܟܕ ܐܡܪܝܢܢ
                    ܠܐ ܡܠܝܠܐ. ܘܠܐ ܢܦܫܐ. ܡܕܝܢ ܐܬܚܘܝܬ ܕܟܕ ܐܡܪܝܢܢ ܠܗܿ ܠܢܦܫܐ ܠܐ ܡܝܘܬܬܐ ܘܠܐ ܓܘܫܡܢܝܬܐ ܠܘ
                    ܡܓܠܙ ܓܠܙܢܗܿ ܒܗܠܝܢ ܫܡܗܐ. ܐܠܐ ܩܢܝܘܬܐ ܫܘܕܥܢܢ ܒܗܿܝ ܓܝܪ ܕܐܡܪܝܢܢ ܠܗܿ ܠܐ ܡܝܘܬܬܐ ܚܝ̈ܐ
                    ܡܫܘܕܥܝܢܢ ܕܐܝܬܝܗܿ. ܟܝܢܗܿ ܓܝܪ ܚܝ̈ܐ ܐܝܬܘܗܝ ܐܝܟ ܕܚܘܝܢܢ ܡܢ ܠܥܠ. ܒܗܿܝ ܕܝܢ ܕܐܡܪܝܢܢ ܠܗܿ
                    ܠܐ ܓܘܫܡܢܝܬܐ. ܕܡܝܬܪܐ ܡܢ ܓܘܫܡܐ ܫܘܕܥܢܗܿ. ܒܕܓܘܢ ܗܠܝܢ ܫܡܗܐ ܕܠܐ ܡܝܘܬܬܐ ܘܠܐ ܓܘܫܡܢܝܬܐ
                         f.42a  ܟܕ ܐܡܪܝܢܢ ܥܠ ܢܦܫܐ. ܩܢܝܘܬܐ ܟܝܬ ܡܫܘܕܥܝܢܢ ܘܠܘ ܓܠܝܙܘܬܐ. 
            
            
                ܩܦܠܐܘܢ ܕܬܡܢܥܣܪ
                ܕܡܚܘܐ ܕܠܐ ܡܬܦܣܩܐ ܢܦܫܐ ܘܠܐ ܡܬܦܠܓܐ ܠܡܢ̈ܘܬܐ
                ܠܐ ܡܬܦܣܩܐ ܢܦܫܐ ܘܐܦܠܐ ܡܬܦܠܓܐ ܠܡܢ̈ܘܬܐ. ܘܝܕܝܥܐ ܡܢ ܗܠܝܢ. ܐ: ܢܦܫܐ ܠܐ
                    ܓܫܘܡ ܐܝܬܝܗܿ. ܘܠܐ ܓܫܘܡ ܠܐ ܡܬܦܣܩ ܘܐܦܠܐ ܡܬܦܠܓ ܠܡܢ̈ܘܬܐ. ܓܘܫܡܐ ܐܝܬܘܗܝ ܕܡܬܦܣܩ ܘܡܬܦܠܓ
                    ܠܡܢ̈ܘܬܐ. ܡܕܝܢ ܢܦܫܐ ܠܐ ܡܬܦܣܩܐ ܘܐܦܠܐ ܡܬܦܠܓܐ ܠܡܢ̈ܘܬܐ. ܒ: ܐܟܙܢܐ ܓܝܪ ܕܠܐ ܗܿܘܝܐ ܢܦܫܐ
                    ܡܫܪܝܬܐ ܥܡ ܦܓܪ̈ܐ ܕܡܫܪ̈ܝܐ ܐܝܕܝ̈ܗܘܢ ܘܪ̈ܓܠܝܗܘܢ. ܘܐܦܠܐ ܗܿܘܝܐ ܣܡܝܬܐ ܥܡ ܦܓܪ̈ܐ ܣܡ̈ܝܐ.
                    ܚܪܫܬܐ ܘܠܐ ܟܘܣܢܝܬܐ ܥܡ ܦܓܪ̈ܐ ܚܪ̈ܫܐ ܘܟܘܣܬܢ̈ܐ. ܗܟܢܐ ܠܐ ܡܬܦܣܩܐ ܥܡ ܐܝܕܝ̈ܐ ܘܪ̈ܓܠܐ
                    ܕܡܬܦܣܩܝܢ ܐܘ ܥܡ ܗܕܡ̈ܐ ܐܚܪ̈ܢܐ ܕܦܓܪܐ ܕܡܬܦܣܩܝܢ. ܡܕܝܢ ܢܦܫܐ ܠܐ ܡܬܦܣܩܐ ܘܐܦܠܐ ܡܬܦܠܓܐ
                    ܠܡܢ̈ܘܬܐ. ܐܢܕܝܢ ܡܗܦܟ ܐܢܫ ܘܐܡܪ ܕܝܢ ܢܦܫܐ ܠܐ ܡܬܦܣܩܐ ܥܡ ܗܕܡ̈ܐ ܐܡܬܝ ܕܡܬܦܣܩ. ܡܛܠ ܡܢܐ
                    ܪܕܦ ܘܪܚܫ ܘܡܬܬܙܝܥ ܡܢ ܒܬܪ ܕܡܬܦܣܩ. ܐܡܪܝܢܢ ܕܗܕܐ ܚܐܫ ܗܕܡܐ ܗܿܘ ܕܐܬܦܣܩ ܠܘ ܡܛܠ ܕܐܬܦܣܩܬ
                    ܥܡܗ ܢܦܫܐ ܡܠܝܠܬܐ. ܐܠܐ ܡܛܠ ܕܐܬܦܣܩ ܥܡܗܿ ܚܝܠܐ ܡܪܓܫܢܐ ܘܡܬܬܙܝܥܢܐ ܗܿܘ ܕܐܝܬ ܠܚܝ̈ܘܬܐ ܠܐ
                    ܡܠܝ̈ܠܬܐ ܘܠܦܓܪ̈ܐ.  f.42b 
                
            
            
                ܩܦܠܐܘܢ ܕܬܫܥܣܪ
                ܕܡܚܘܐ ܕܢܦܫܐ ܡܕܒܪܐ ܠܦܓܪܐ
                ܡܫܐܠ ܐܢܫ ܟܕ ܐܡܪ ܐܝܢܐ ܡܕܒܪ ܠܚܒܪܗ. ܘܐܝܢܐ ܡܬܕܒܪ ܡܢ ܚܒܪܗ. ܢܦܫܐ ܡܕܒܪܐ
                    ܠܦܓܪܐ. ܐܘ ܦܓܪܐ ܡܕܒܪ ܠܢܦܫܐ. ܘܐܡܪܝܢܢ ܕܢܦܫܐ ܗܝ ܡܕܒܪܐ ܠܦܓܪܐ. ܘܝܕܝܥܐ ܡܢ ܗܠܝܢ
                    ܡܚܘܝܢ̈ܘܬܐ. ܐ: ܡܢ ܗܿܝ ܕܐܝܬܘܗܝ ܐܘܪܓܢܘܢ ܕܝܠܗܿ ܘܒܗ ܦܠܚܐ ܛܒܬܐ ܘܒܝ̈ܫܬܐ. ܘܒܗ ܡܙܕܕܩܐ
                    ܘܚܛܝܐ. ܘܗܿܘ ܕܦܠܚ ܒܐܘܪܓܢܘܢ ܗܘ ܡܕܒܪ ܠܐܘܪܓܢܘܢ. ܡܕܝܢ ܢܦܫܐ ܡܕܒܪܐ ܠܦܓܪܐ. ܒ: ܝܕܝܥܐ ܕܗܝ
                    ܡܕܒܪܐ ܠܗ. ܡܢ ܗܿܝ ܕܙܒܢ̈ܝܢ ܣܓܝ̈ܐܢ ܟܠܝܐ ܠܗ ܡܢ ܪܓܬܗ. ܐܝܬ ܓܝܪ ܐܡܬܝ ܕܦܓܪܐ ܪܐܓ ܕܢܐܟܘܠ
                    ܘܢܫܬܐ ܘܢܕܡܟ ܘܕܢܙܕܘܓ. ܘܡܦܓܕܐ ܠܗ ܡܢ ܪܓܬܗ. ܘܐܝܬ ܐܡܬܝ ܕܐܚܝܕܝܢ ܦܓܪ̈ܝܗܘܢ ܕܐܢܫ̈ܝܢ
                    ܒܐܫ̈ܬܐ ܚܡܝ̈ܡܬܐ ܘܪܓܝܢ ܠܫܩܝܐ ܩܪܝܪܐ. ܘܡܛܠ ܕܡܚܣܪ ܠܗܘܢ ܟܠܝܐ ܠܗܘܢ ܢܦܫܐ ܡܠܝܠܬܐ ܡܢ ܗܿܝ
                    ܕܢܫܬܘܢ. ܡܕܝܢ ܗܝ ܡܕܒܪܐ ܠܦܓܪܐ. ܓ: ܙܒܢܝ̈ܢ ܣܓܝ̈ܐܢ ܟܕ ܣܝܡ ܠܗ ܠܐܘܡܢܐ ܢܝܫܐ ܦܐܕ ܡܢܗ
                    ܘܗܿܦܟ ܡܬܪܨ ܠܗ ܕܐܝܟ ܐܝܟܢ. ܐܝܬ ܐܡܬܝ ܕܟܕ ܣܝܡ ܠܗ ܠܐܪܕܝܟܠܐ ܢܝܫܐ ܕܡܪܝܡ ܠܗ ܠܒܝܬܐ ܥܣܪܐ
                    ܐܡܝ̈ܢ ܡܪܝܡ ܠܗ ܬܪܥܣܪ. ܘܗܕܐ ܗܘܬ ܡܛܠ ܕܠܐ ܪܗܛ ܚܘܫܒܐ ܕܢܦܫܐ ܥܡ ܙܘܥܗ ܕܦܓܪܐ. ܘܐܦܠܐ ܦܓܕܬ
                    ܡܠܝܠܘܬܗܿ ܕܢܦܫܐ  f.43a  ܠܡܬܬܙܝܥܢܘܬܗ ܕܦܓܪܐ ܕܠܘܬ ܗܿܝ ܕܢܒܢܐ ܬܪܬܥܣܪ̈ܐ ܐܡܝ̈ܢ.
                    ܘܒܕܓܘܢ ܦܕ ܡܢ ܢܝܫܗ ܘܠܐ ܟܕ ܠܐܫܝܘܬܐ. ܘܗܿܝܕܝܢ ܗܿܦܟ ܡܬܩܢ ܠܗܿܘ ܡܕܡ ܕܚܒܠ ܒܗ ܟܕ ܒܗ ܒܦܓܪܐ
                    ܒܗܝܢ ܟܕ ܒܗܝܢ ܒܐܝ̈ܕܝܐ. ܘܡܛܠ ܗܠܝܢ ܝܕܝܥܐ ܕܢܦܫܐ ܡܕܒܪܐ ܠܦܓܪܐ. ܕ: ܒܙܘܥܗ ܕܬܐܘܪܝܐ ܫܠܐ
                    ܦܓܪܐ ܘܡܐ ܕܫܠܡܬ ܬܐܘܪܝܐ. ܗܝܕܝܢ ܡܦܩ ܦܓܪܐ ܒܝܕ ܣܥܘܪܘܬܐ ܠܦܘܬ ܙܘܥܐ ܕܬܐܘܪܝܐ. ܘܡܛܠ
                    ܕܬܐܘܪܝܐ ܕܢܦܫܐ ܐܝܬܝܗܿ ܣܥܘܪܘܬܐ ܕܢܦܫܐ ܣܥܘܪܘܬܐ ܒܝܕ ܬܐܘܪܝܐ ܗܿܘܝܐ. ܡܕܝܢ ܢܦܫܐ ܐܪܐ ܡܕܒܪܐ
                    ܠܦܓܪܐ. ܗ: ܐܡܪ ܪܒܐ ܒܫܠܝ̈ܚܐ ܦܘܠܘܣ: ܕܦܓܪܝ ܗܘ ܟܒܫ ܐܢْܐ ܘܡܫܥܒܕ ܐܢْܐ1 ܕܩܘܪ̈ܝܢܬܝܐ ܩܕܡܝܬܐ:
                    27:9. ܘܬܠܬ ܚܘܝ ܒܗܢܐ ܦܬܓܡܐ ܚܕ ܡܢ ܕܗܘ ܦܘܠܘܣ ܩܢܘܡܗ ܢܦܫܐ ܐܝܬܘܗܝ. ܕܬܪܬܝܢ
                    ܕܝܢ ܕܦܓܪܗ ܐܘܪܓܢܘܢ ܕܢܦܫܗ ܐܝܬܘܗܝ ܒܗܿܝ ܕܩܪܝܗܝ ܦܓܪܝ. ܕܬܠܬ ܕܝܢ ܕܢܦܫܗ ܡܕܒܪܐ ܗܘܬ ܠܦܓܪܐ.
                    ܠܐ ܓܝܪ ܐܡܪ ܕܦܓܪܝ ܟܒܫ ܝܬܗ ܐܘ ܡܕܒܪ ܗܘ ܠܗ. ܐܠܐ ܕܐܢܐ ܟܐܡܬ ܕܐܝܬܝ ܢܦܫܐ ܟܒܫ ܐܢܐ ܘܡܫܥܒܕ
                    ܐܢْܐ ܦܓܪܝ. ܘܐܢ ܢܦܫܐ ܡܢ ܟܒܫܐ ܘܡܫܥܒܕܐ. ܦܓܪܐ ܕܝܢ ܡܬܟܒܫ ܘܡܫܬܥܒܕ. ܡܕܝܢ ܢܦܫܐ ܡܕܒܪܐ
                    ܠܦܓܪܐ. ܐܝܟ ܕܐܡܪ ܫܪܝܪܐ ܘܫܠܝܚܐ ܐܠܗܝܐ  f.43b  ܦܘܠܘܣ ܒܫܪܪܐ ܗܟܝܠ ܕܢܦܫܐ ܝܗܒܐ
                    ܠܗ ܠܦܓܪܐ ܕܢܬܬܙܝܥ ܘܕܢܥܒܕ ܡܠܝܠܐܝܬ ܘܕܢܐܚܐ ܡܠܝܠܐܝܬ. 
            
            
                ܩܦܠܐܘܢ ܕܥܣܪܝܢ
                ܕܡܚܘܐ ܕܟܠ ܡܕܡ ܕܡܫܬܚܠܦ ܡܢ ܚܒܪܗ. ܒܟܡܐ ܙܢܝ̈ܐ ܡܬܐܡܪ ܕܡܫܚܠܦܐ. ܘܢܦܫ̈ܬܐ
                    ܡܫܚ̈ܠܦܢ ܡܢ ܚܕܕܐ ܐܘ ܠܐ ܡܫܚ̈ܠܦܢ. ܘܒܐܝܢܐ ܫܘܚܠܦܐ ܡܫܚ̈ܠܦܢ ܢܦܫ̈ܬܐ ܡܢ ܚܕܕܐ
                ܟܠ ܡܕܡ ܕܡܫܚܠܦ ܡܢ ܚܒܪܗ. ܐܘ ܒܝܬܗ ܡܫܚܠܦ ܡܢܗ. ܐܘ ܒܫܘܚܠܦܐ ܐܚܪܢܐ ܚܫܚܠܦ
                    ܡܢܗ. ܘܗܿܘ ܡܢ ܕܒܝܬܗ ܡܫܚܠܦ ܡܢܗ. ܡܢ ܚܒܪܗ ܐܝܬܘܗܝ ܐܟܙܢܐ ܕܚܘܪܘܬܐ ܘܐܘܟܡܘܬܐ. ܚܘܪܘܬܐ ܡܢ
                    ܒܝܬܗܿ ܡܫܚܠܦܐ ܡܢ ܐܘܟܡܘܬܐ. ܐܘܟܝܬ ܒܗܿܘ ܡܐ ܕܐܝܬܘܗܝ ܡܫܚܠܦ ܡܢ ܚܘܪܐ. ܗܿܘ ܕܝܢ ܕܡܫܚܠܦ ܡܢ
                    ܚܒܪܗ. ܒܫܘܚܠܦܐ ܕܐܝܬܘܗܝ ܐܚܪܢܐ ܡܢ ܗܿܢܘܢ ܕܒܗ ܡܫܚܠܦܝܢ ܒܙܢܝ̈ܐ ܣܓܝ̈ܐܐ ܡܬܐܡܪ. ܗܢܐ ܗܟܝܠ
                    ܫܘܚܠܦܐ ܐܘ ܐܝܬܘܗܝ ܐܘܣܝܝܐ ܐܘ ܓܕܫܢܝܐ. ܐܘ ܩܢܘܡܝܐ. ܘܐܘܣܝܝܐ ܡܢ ܐܝܬܘܗܝ ܐܟܙܢܐ ܕܡܠܝܠܘܬܐ
                    ܘܠܐ ܡܠܝܠܘܬܐ. ܡܫܚܠܦ ܓܝܪ ܒܪܢܫܐ ܡܢ ܚܡܪܐ ܒܡܠܝܠܘܬܐ. ܗܟܘܬ ܘܚܡܪܐ ܡܫܚܠܦ ܡܢ ܒܪܢܫܐ ܒܠܐ
                    ܡܠܝܠܘܬܐ. ܗܿܘ ܕܝܢ ܫܘܚܠܦܐ ܓܕܫܢܝܐ ܬܪܝܢܐܝܬ ܡܬܐܡܪ ܐܘ ܓܕܫܢܝܐ. ܡܫܢܝܢܐ ܐܘ ܠܐ ܡܫܢܝܢܐ.
                    ܡܫܢܝܢܐ ܕܝܢ  f.44a  ܐܟܙܢܐ ܕܩܘܡܐ ܘܡܘܬܒܐ ܘܡܬܬܙܝܥܢܘܬܐ ܘܫܠܝܐ. ܡܫܚܠܦ ܓܝܪ
                    ܣܘܩܪܛܝܣ ܡܢ ܦܠܛܘܢ ܡܛܠ ܕܗܿܘ ܡܢ ܩܐܡ. ܗܢܐ ܝܬܒ. ܣܘܩܪܛܝܣ ܡܬܬܙܝܥ ܦܠܛܘܢ ܫܠܐ. ܠܐ ܡܫܢܝܢܐ
                    ܕܝܢ ܐܟܙܢܐ ܕܙܪܩܘܬܐ ܘܦܛܫܘܬܐ. ܡܫܚܠܦ ܐܢܛܘܣ ܕܐܝܬܘܗܝ ܙܪܩܐ ܡܢ ܡܠܝܛܘܣ ܕܐܝܬܘܗܝ (ܕܠܝܬܘܗܝ)
                    ܙܪܩܐ. ܘܡܫܚܠܦ ܡܝܠܛܘܣ ܕܐܝܬܘܗܝ ܦܛܫܐ ܡܢ ܐܢܛܘܣ ܕܠܝܬܘܗܝ ܦܛܫܐ. ܫܘܚܠܦܐ ܕܝܢ ܗܘ ܩܢܘܡܝܐ
                    ܐܝܬܘܗܝ ܕܝܠܝ̈ܬܐ ܡܝܩܢܢ̈ܝܬܐ ܕܩܢܘܡܐ. ܗܠܝܢ ܕܝܢ ܕܝܠܝ̈ܬܐ ܐܝܬܝܗܝܢ ܚܝ̈ܐ ܘܡܝܩܢܢ̈ܐ ܘܕܝܬܐ
                    ܐܟܙܢܐ ܕܠܐ ܝܠܝܕܘܬܐ ܕܐܝܬܝܗܿ ܕܝܠܝܬܐ ܕܐܕܡ. ܘܢܦܘܩܘܬܐ ܕܐܝܬܝܗܿ ܕܝܠܝܬܐ ܕܚܘܐ. ܡܫܚܠܦ ܓܝܪ
                    ܐܕܡ ܡܢ ܚܘܐ ܒܝܠܘܕܘܬܐ. ܘܡܫܚܠܦܐ ܚܘܐ ܡܢ ܐܕܡ ܘܡܢ ܫܝܬ ܒܢܦܘܩܘܬܐ. ܐܕܡ ܓܝܪ ܠܐ ܝܠܝܕܐܝܬ
                    ܒܪܝܗܝ ܐܠܗܐ ܘܐܩܝܡܗ. ܘܠܚܘܐ ܢܦܘܩܐܝܬ ܒܪܗܿ ܘܐܩܝܡܗܿ ܡܢ ܐܠܥܗ ܕܐܕܡ ܕܐܦܩܗܿ ܡܢ ܕܦܢܗ. ܘܠܫܝܬ
                    ܝܠܝܕܐܝܬ ܒܪܝܗܝ ܐܠܗܐ ܘܐܩܝܡܗ ܡܢ ܐܕܡ ܘܡܢ ܚܘܐ. ܡܬܝܕܥܝܢ ܗܠܝܢ ܙܢܝ̈ܐ ܕܫܘܚ̈ܠܦܐ ܡܢ ܦܘܠܓܐ
                    ܗܢܐ ܕܡܢ ܠܬܚܬ ܪܫܝܡ. 
                ܐܟܙܢܐ ܕܡܫܚܠܦܐ ܫܥܝܥܘܬܐ ܡܢ ܚܪܘܣܘܬܐ ܒܝܬܗܿ ܘܐܟܙܢܐ ܕܡܚܫܠܦܐ ܡܚܫܒܬܐ ܒܝܬܗܿ
                    ܐܘܟܝܬ ܒܗܿܘ ܡܐ ܕܐܝܬܝܗܿ.  f.44b  ܟܠ ܡܕܡ ܕܡܫܚܠܦ ܡܢ ܚܒܪܗ: 
                ܐܘ ܒܝܬܗ ܡܫܚܠܦ ܡܢܗ: 
                ܐܘܣܝܝܐ ܐܝܬܘܗܝ: ܐܟܙܢܐ ܕܡܝܘܬܘܬܐ ܘܠܐ ܡܝܘܬܘܬܐ: ܡܫܚܠܦ ܓܝܪ ܒܪܢܫܐ ܡܢ
                    ܡܠܐܟܐ
                 ܒܡܝܘܬܘܬܐ܆ ܗܟܢܐ ܡܠܐܟܐ ܡܫܚܠܦ 
                 ܡܢ ܒܪܢܫܐ ܒܠܐ ܡܝܘܬܘܬܐ. 
                ܐܘ ܓܕܫܢܝܐ: ܐܘ ܡܫܢܝܢܐ: ܐܟܙܢܐ ܕܫܬܩܐ ܘܡܠܬܐ: ܡܫܚܠܦ ܓܝܪ ܣܘܩܪܛܝܣ ܕܡܠܠ 
                 ܡܢ ܦܠܛܘܢ ܕܫܠܐ܆ ܘܡܫܚܠܦ 
                 ܦܠܛܘܢ ܕܫܠܐ ܡܢ ܣܘܩܪܛܝܣ 
                 ܕܡܠܠ. 
                 ܐܘ ܠܐ ܡܫܢܝܢܐ: ܐܟܙܢܐ ܕܩܪܝܚܘܬܐ ܐܘ ܫܘܡܬܐ ܕܡܢ ܫܘܚܢܐ ܓܕܫܬ: 
                 ܡܫܚܠܦ ܐܢܛܘܣ ܕܐܝܬܘܗܝ 
                 ܩܪܝܚܐ ܡܢ ܡܝܠܛܘܣ 
                 ܕܠܝܬܗܘܝ ܩܪܝܚܐ܆ܘܡܫܚܠܦ 
                 ܡܝܠܛܘܣ ܕܐܝܬ ܒܗ ܫܘܡܬܐ
                 ܡܢ ܐܢܛܘܣ ܕܠܝܬ ܒܗ ܫܘܡܬܐ
                ܐܘ ܩܢܘܡܝܐ: ܐܟܙܢܐ ܕܕܝܠܝ̈ܬܐ ܡܝܩܢܢܝ̈ܬܐ ܘܕܝ̈ܬܐ: ܡܫܚܠܦ ܐܕܡ ܡܢ ܫܝܬ
                    ܒܠܐ
                 ܝܠܝܕܘܬܐ܆ ܘܡܫܚܠܦ ܫܝܬ 
                 ܡܢ ܐܕܡ ܘܚܘܐ ܒܝܠܝܕܘܬܐ܆
                 ܗܟܘܬ ܘܚܘܐ ܡܢ ܬܪ̈ܝܗܘܢ 
                 ܒܢܦܘܩܘܬܐ. 
                
                     f.45a  ܢܥܩܒ ܗܟܝܠ ܗܫܐ ܡܛܠ ܢܦܫ̈ܬܐ ܕܡܫܚ̈ܠܦܢ ܡܢ ܚܕܕܐ ܐܘ ܠܐ ܡܫܚ̈ܠܦܢ ܡܢ ܚܕܕܐ.
                    ܐ: ܢܦܫ̈ܬܐ ܣܓܝ̈ܐܬܐ ܐܝܬܝܗܝܢ. ܘܣܓܝ̈ܐܐ ܡܫܚ̈ܠܦܢ ܡܢ ܚܕܕܐ. ܐܢ ܠܐ ܡܫܚ̈ܠܦܢ ܢܦܫ̈ܬܐ ܡܢ
                    ܚܕܕܐ. ܚܕ ܡܬܟܢ̈ܝܢ ܕܐܝܬܝܗܝܢ. ܘܠܘ ܣܓܝ̈ܐܬܐ ܘܗܿܝ ܕܚܕܐ ܐܝܬܝܗܝܢ ܕܓܠܬܐ ܐܝܬܝܗܿ. ܘܫܪܝܪܐ
                    ܗܿܝ ܕܣܓܝ̈ܐܬܐ ܐܝܬܝܗܝܢ. ܡܕܝܢ ܐܢ ܣܓܝ̈ܐܬܐ ܐܝܬܝܗܝܢ܆ ܟܠܗܝܢ ܡܫܚ̈ܠܦܬܐ ܐܝܬܝܗܝܢ. ܒ: ܐܢ ܠܐ
                    ܡܫܚ̈ܠܦܢ ܡܢ ܚܕܕܐ ܠܐ ܦܪܝܫܬ ܢܦܫܐ ܕܦܛܪܘܣ ܡܢ ܕܦܘܠܘܣ܆ ܘܐܦܠܐ ܕܣܘܩܪܛܝܣ ܡܢ ܕܦܠܛܘܢ. ܘܐܢ ܠܐ
                    ܡܫܚ̈ܠܦܢ ܘܠܐ ܦܪܝܫܝܢ ܡܢ ܚܕܕܐ ܗܐ ܒܘܠܒܠܐ ܪܒܐ. ܡܕܝܢ ܡܫܚ̈ܠܦܢ ܢܦܫ̈ܬܐ ܡܢ ܚܕܕܐ. ܒܐܝܢܐ
                    ܫܘܚܠܦܐ ܡܫܚ̈ܠܦܢ ܡܢ ܚܕܕܐ܆ ܘܐܡܪܝܢܢ ܕܒܗܿܘ ܫܘܚܠܦܐ ܐܘܣܝܝܐ ܠܐ ܡܫܚ̈ܠܦܢ ܡܢ ܚܕܕܐ. ܒܗܿܝ
                    ܕܟܠܗܝܢ ܡܠܝ̈ܠܬܐ ܐܝܬܝܗܝܢ ܘܠܐ ܡܝܘܬܬܐ. ܘܐܦ ܚܝ̈ܠܐ ܐܘܣܝ̈ܝܐ ܕܝܠܗܝܢ ܫܘܝܢ ܠܚܕܕܐ. ܘܠܐ
                    ܡܫܚܠܦܝܢ ܒܗܘܢ ܟܠܗܘܢ ܓܝܪ ܐܝܬܝܗܝܢ ܡܡܪ̈ܥܬܐ ܝܕܘܥܬܢܝ̈ܬܐ ܦܪ̈ܘܫܬܐ ܥܗܘܕܬܐ ܡܬܬܙܝܥܬ ܡܢ
                    ܝܬܗܝܢ. ܗܟܢܐ ܘܐܦ ܒܫܪܟܐ ܕܚܝ̈ܠܝܗܝܢ ܟܝܢ̈ܝܐ ܫܘܝܢ ܠܚܕܕܐ ܘܠܐ ܡܫܚ̈ܠܦܢ. ܡܕܝܢ ܠܘ ܒܫܘܚܠܦܐ
                    ܗܿܘܐ ܐܘܣܝܝܐ ܡܫܚ̈ܠܦܢ ܢܦܫ̈ܬܐ ܡܢ ܚܕܕܐ. ܘܠܘ ܒܫܘܚܠܦܐ ܐܚܪܢܐ ܕܐܝܬܝܗܝܢ ܣܛܪ ܡܢ ܝܬܝ̈ܗܝܢ
                         f.45b  ܗܟܢܐ ܘܐܦ ܢܦܫ̈ܬܐ ܒܝܬܗܝܢ ܡܫܚ̈ܠܦܢ ܡܢ ܚܕܕܐ. ܘܠܘ ܒܫܘܚ̈ܠܦܐ ܐܚܪ̈ܢܐ
                    ܕܐܝܬܗܘܢ ܣܛܪ ܡܢܗܝܢ. ܡܕܝܢ ܒܝܬܗܝܢ ܡܫܚ̈ܠܦܢ ܢܦܫ̈ܬܐ ܡܢ ܚܕܕܐ ܐܘܟܝܬ ܒܗܿܘ ܡܐ ܕܐܝܬܝܗܝܢ.
                    ܐܟܙܢܐ ܕܡܫܚܠܦܝܢ ܡܠܐܟܐ ܡܢ ܚܕܕܐ ܒܝܬܗܘܢ. ܘܬܘܒ ܐܡܪܝܢܢ ܕܡܫܚ̈ܠܦܢ ܡܢ ܚܕܕܐ ܐܦ ܒܡܢܝܢܐ ܒܗܿܝ
                    ܡܢ ܐܝܬܝܗܿ ܚܕܐ܆ ܗܕܐ ܬܪܝܢܝܬܐ܆ ܐܚܪܬܐ ܕܝܢ ܬܠܝܬܝܬܐ ܘܐܚܪܬܐ ܪܒܝܥܝܬܐ ܘܫܪܟܐ. 
            
            
                ܩܦܠܐܘܢ ܕܥܣܪܝܢ ܘܚܕ
                ܕܡܚܘܐ ܕܢܦܫ̈ܬܐ ܐܡܬܝ ܕܡܫܢܝ̈ܢ ܡܢ ܦܓܪܐ ܩܢ̈ܝܢ ܫܘܚܠܦܐ ܐܚܪܢܐ ܣܛܪ ܡܢ ܗܢܐ
                    ܕܐܡܪܝܢܢ ܕܡܫܚ̈ܠܦܢ ܡܢ ܚܕܕܐ ܒܝܬܗܘܢ ܐܦ ܒܡܢܝܢܐ ܐܘ ܠܐ
                ܚܘܝܢܢ ܕܝܢ ܕܡܫܚ̈ܠܦܢ ܢܦܫ̈ܬܐ ܒܝܬܗܝܢ. ܘܐܦ ܒܡܢܝܢܐ ܐܝܟ ܕܡܫܚܠܦܝܢ ܡܠܐܟܐ ܡܢ
                    ܚܕܕܐ ܘܐܝܟ ܕܡܫܚܠܦܝܢ ܚܘܫ̈ܒܐ ܘܣܘܟܠܐ ܘܪ̈ܥܝܢܐ ܘܚܙܝ̈ܐ ܡܢ ܚܕܕܐ. ܗܿܘܐ ܡܫܐܠ ܐܢܫ ܘܐܡܪ:
                    ܕܐܡܬܝ ܕܡܫܢ̈ܝܢ ܢܦܫ̈ܬܐ ܡܢ ܦܓܪ̈ܐ ܩܢ̈ܝܢ ܫܘܚܠܦܐ ܐܚܪܢܐ ܣܛܪ ܡܢ ܗܢܐ ܐܘ ܠܐ. ܘܐܡܪܝܢܢ ܕܐܢ
                    ܕܐܝܟ ܐܡܬܝ ܕܡܫܢ̈ܝܢ ܡܢ ܦܓܪ̈ܝܗܝܢ ܗܿܘܝܐ ܟܠ ܚܕܐ ܚܕܐ ܡܢܗܝܢ ܒܕܘܟܝ̈ܬܐ ܪ̈ܘܚܢܝܬܐ ܕܠܚܡܐ
                    ܠܟܝܢܗܝܢ. ܘܒܕܓܘܢ ܡܫܚ̈ܠܦܢ ܬܘܒ ܡܢ ܚܕܕܐ ܒܫܘܚܠܦܐ  f.46a  ܐܚܪܢܐ ܒܓܕܫ̈ܐ ܐܡܪ ܐܢܐ
                    ܠܐ ܓܘܫܡܢ̈ܝܐ ܕܐܝܬܝܗܘܢ ܙܕܝܩܘܬܐ ܘܥܘܠܘܬܐ ܕܦܠܚ ܠܗܝܢ ܗܪܟܐ ܡܛܠ ܕܐܝܟܢܐ ܕܓܕܫ̈ܐ ܠܐ
                    ܓܘܫܡܢ̈ܝܐ ܕܐܝܬܝܗܘܢ ܚܘܪܘܬܐ ܘܐܘܟܡܘܬܐ ܘܦܛܫܘܬܐ ܘܙܪܩܘܬܐ ܘܫܪܟܐ ܕܕܐܝܟ ܗܠܝܢ ܡܬܩܝܡܝܢ
                    ܒܦܓܪ̈ܐ ܕܐܝܬܝܗܘܢ ܓܘܫ̈ܡܐ ܗܟܢܐ ܘܙܕܝܩܘܬܐ ܘܥܘܠܘܬܐ ܕܐܝܬܝܗܘܢ ܓܕܫ̈ܐ ܠܐ ܓܘܫܡܢ̈ܝܐ. ܡܬܩܝܡܝܢ
                    ܒܢܦܫ̈ܬܐ ܕܐܝܬܝܗܝܢ ܠܐ ܓܘܫܡܢ̈ܝܬܐ. ܡܕܝܢ ܢܦܫ̈ܬܐ ܐܡܬܝ ܕܡܫܢ̈ܝܢ ܡܢ ܦܓܪ̈ܐ ܗܘܝܢ ܕܡܫܚ̈ܠܦܢ
                    ܡܢ ܚܕܕܐ ܒܬܪ̈ܝܢ ܫܘܚ̈ܠܦܐ ܐܚܪ̈ܢܐ ܒܕܘܟܬܐ ܪܘܚܢܝܬܐ ܐܡܪ ܐܢܐ ܘܐܦ ܒܓܕܫ̈ܐ ܠܐ ܓܘܫܡܢ̈ܝܐ
                    ܕܐܝܬܝܗܘܢ ܙܕܝܩܘܬܐ ܘܥܘܠܘܬܐ. ܘܒܕܓܘܢ ܐܡܪܝܢܢ ܕܟܕ ܐܝܬܝܗܝܢ ܢܦܫ̈ܬܐ ܒܦܓܪ̈ܐ ܕܡܫܚ̈ܠܦܢ
                    ܒܝܬܗܝܢ ܐܦ ܒܡܢܝܢܐ. ܘܟܕ ܡܫܢܝ̈ܢ ܡܢ ܦܓܪ̈ܐ ܗܘܝܢ ܡܫܚ̈ܠܦܢ ܐܘ ܒܕܘܟܝ̈ܬܐ ܘܒܙܕܝܩܘܬܐ
                    ܘܒܥܘܠܘܬܐ. ܡܕܝܢ ܟܕ ܡܫܢ̈ܝܢ ܡܢ ܦܓܪ̈ܐ ܒܐܪܒܥܐ ܫܘܚ̈ܠܦܐ ܡܫܚ̈ܠܦܢ ܡܢ ܚܕܕܐ ܒܝܬܗܘܢ ܒܡܢܝܢܐ
                    ܒܕܘܟܬܐ ܒܙܕܝܩܘܬܐ ܘܥܘܠܘܬܐ. ܐܟܙܢܐ ܕܢܦܫܗ ܕܦܛܪܘܣ ܫܠܝܚܐ ܘܕܣܝܡܘܢ ܚܪܫܐ ܕܡܫܚ̈ܠܦܢ ܒܝܬܗܝܢ.
                    ܒܗܿܝ ܕܝܬܐ ܕܗܿܝ ܐܚܪܬܐ ܐܝܬܝܗܿ ܡܢ  f.46b  ܝܬܐ ܕܗܕܐ. ܘܡܫܚ̈ܠܦܢ ܐܦ ܒܡܢܝܢܐ ܕܗܿܝ
                    ܡܢ ܐܝܬܝܗܿ ܚܕܐ. ܗܕܐ ܕܝܢ ܕܬܪܬܝܢ ܡܫܚ̈ܠܦܢ ܕܐܦ ܒܕܘܟܬܐ. ܕܢܦܫܐ ܡܢ ܕܦܛܪܘܣ ܡܕܝܪܐ ܥܡ
                    ܡܠܐܟܐ. ܕܣܝܡܘܢ ܕܝܢ ܥܡ ܕܫܐܕܐ ܥܕܡܐ ܠܝܘܡܐ ܕܩܝܡܬܐ. ܡܫܚ̈ܠܦܢ ܕܝܢ ܐܦ ܒܓܕܫ̈ܐ ܠܐ ܓܘܫܡܢ̈ܝܐ
                    ܡܛܠ ܕܗܿܝ ܡܢ ܐܝܬܝܗܿ ܙܕܝܩܬܐ ܘܩܕܝܫܬܐ. ܗܕܐ ܕܝܢ ܥܘܠܬܐ ܘܪܫܝܥܬ. 

            
            
                ܩܦܠܐܘܢ ܕܥܣܪܝܢ ܘܬܪܝܢ
                ܕܡܥܩܒ ܡܛܠ ܢܦܫ̈ܬܐ ܕܐܚܝ̈ܕܢ ܠܒܣܪܐ ܐܝܠܝܢ ܕܐܝܬܚܝܛܘ ܟܕ ܠܐ ܐܨܛܠܡܘ ܒܕܡܘܬܐ܆
                    ܘܠܐ ܐܫܬܡܠܝܘ ܒܗܕܡ̈ܐ
                ܐܡܪ ܐܢܫ ܡܛܠ ܢܦܫ̈ܬܐ ܕܐܬܚܝ̈ܕܝܢ ܠܒܣܪܐ ܐܝܠܝܢ ܕܐܬܚܝܛܘ ܘܢܦܩܘ ܡܢ ܡܪܒܥܐ ܟܕ
                    ܠܐ ܐܨܛܠܡܘ ܒܕܡܘܬܐ ܘܐܦܠܐ ܐܫܬܡܠܝܘ ܒܗܕܡ̈ܐ ܘܐܫܬܪ̈ܝܢ ܢܦܫ̈ܬܐ ܡܢܗܘܢ ܘܐܬܦܪ̈ܫܝܢ. ܗܠܝܢ
                    ܕܢܦܫ̈ܬܐ ܐܝܟ ܢܦܫ̈ܬܐ ܗܠܝܢ ܕܗܘܝ ܥܡ ܦܓܪ̈ܐ ܥܕܡܐ ܠܛܠܝܘܬܐ ܘܥܕܡܐ ܠܥܠܝܡܘܬܐ. ܐܘ ܥܕܡܐ
                    ܠܣܝܒܘܬܐ ܐܝܬܝܗܝܢ. ܐܘ ܡܫܚ̈ܠܦܢ ܘܦܪ̈ܝܫܢ ܡܢܗܝܢ. ܘܐܡܪܝܢܢ ܕܐܟܘܬܗܝܢ ܐܝܬܝܗܝܢ ܒܟܠ ܡܕܡ. ܐܢ
                    ܒܟܝܢܐ ܘܐܢ ܒܗܿܝ ܕܠܐ ܓܫܘܡ. ܘܠܐ ܡܝܘܬܬܐ. ܘܐܢ ܒܫܪܟܐ ܕܚܝ̈ܠܐ ܟܝܢ̈ܝܐ ܘܐܢ ܒܫܘܚ̈ܠܦܐ ܕܩܢ̈ܝܢ
                    ܐܟܘܬܗܝܢ ܐܝܬܝܗܝܢ ܣܛܪ ܡܢ ܗܕܐ ܒܠܚܘܕ ܕܡܫܚ̈ܠܦܢ  f.47a  ܡܢܗܝܢ ܒܗܿܝ ܕܠܐ ܣܥܘܪܘܬܐ
                    ܕܛܒܬܐ ܩܢ̈ܝܢ ܐܦܠܐ ܒܝ̈ܫܬܐ. ܘܠܐ ܥܗܕܢ ܕܣܥܪܝܢ ܗܪܟܐ ܡܕܡ. ܗܟܢܐ ܐܣܬܟܠ ܐܦ ܥܠ ܢܦܫ̈ܬܐ
                    ܕܫܒܪ̈ܐ ܕܡܬܦܪܫܝܢ ܡܢ ܚܕܕܐ ܡܢ ܦܓܪ̈ܝܗܝܢ ܒܫܒܪܘܬܐ. 
            
            
                ܩܦܠܐܘܢ ܕܥܣܪܝܢ ܘܬܠܬܐ
                ܡܛܠ ܢܦܫܐ ܕܡܢ ܐܝܟܐ ܐܝܬܝܗܿ
                ܡܫܐܠ ܐܢܫ ܗܪܟܐ ܒܘܠܝܬܐ ܟܕ ܐܡܪ: ܕܡܢ ܐܝܟܐ ܐܝܬܝܗܿ ܢܦܫܐ. ܘܐܡܪܝܢܢ ܠܘܬܗ
                    ܕܡَܢٍܝ ܡܢ ܘܡَܪܩܝܘܢ ܘܒܪܕܝܨܢ ܘܐܚܪ̈ܢܐ ܥܡܗܘܢ ܐܡܪܝܢ ܕܡܢ ܟܝܢܐ ܕܐܠܗܐ ܐܝܬܝܗܿ ܢܦܫܐ ܐܘܟܝܬ
                    ܒܨܪܐ ܡܢ ܐܝܬܘܬܗ. ܐܚܪ̈ܢܐ ܕܝܢ ܐܡܪܝܢ ܕܢܦܫܐ ܡܢ ܢܦܫܐ ܡܬܝܠܕܐ ܘܡܬܝܒܠܐ ܘܪܕܝܐ. ܐܚܪ̈ܢܐ
                    ܐܡܪܝܢ ܕܢܦܫܐ ܡܢ ܙܪܥܐ ܕܓܒܪܐ ܡܬܝܠܕܐ ܘܡܬܝܒܠܐ. 
                ܡܢ ܐܝܟܐ ܐܝܬܝܗܿ ܢܦܫܐ: 
                
                    ܡܢܝ ܘܡܪܩܝܘܢ ܘܒܪܕܝܨܢ ܐܡܪܝܢ ܕܡܢ ܟܝܢܐ ܕܐܠܗܐ ܐܝܬܝܗܿ 
                    ܐܚܪ̈ܢܐ ܐܡܪܝܢ ܕܢܦܫܐ ܡܢ ܢܦܫܐ ܡܬܝܠܕܐ ܘܡܬܝܒܠܐ ܘܪܕܝܐ 
                    ܐܚܪ̈ܢܐ ܐܡܪܝܢ ܕܡܢ ܙܪܥܐ ܕܓܒܪܐ ܡܬܝܒܠܐ ܘܡܬܝܠܕܐ 
                
                ܘܩܕܡܐܝܬ ܐܡܪܝܢܢ ܠܘܩܒܠ ܗܿܢܘܢ ܕܐܡܪܝܢ ܕܡܢ  f.47b  ܟܝܢܐ ܕܐܠܗܐ
                    ܐܝܬܝܗܿ ܢܦܫܐ. ܠܐ ܕܝܢ ܫܪܝܪܐ ܗܕܐ ܕܡܢ ܟܝܢܐ ܕܐܠܗܐ ܐܝܬܝܗܿ ܢܦܫܐ. ܘܝܕܝܥܐ ܡܢ ܗܠܝܢ
                    ܡܚܘܝܢ̈ܘܬܐ. ܐ: ܟܝܢܗ ܕܐܠܗܐ ܠܐ ܡܫܬܚܠܦܢܐ ܗܘ. ܢܦܫܐ ܕܝܢ ܡܫܬܚܠܦܐ. ܒܙܕܝܩܘܬܐ ܘܥܘܠܘܬܐ.
                    ܘܚܕܘܬܐ ܘܥܩܬܐ. ܡܕܝܢ ܠܝܬܝܗܿ ܢܦܫܐ ܡܢ ܟܝܢܐ ܕܐܠܗܐ. ܒ: ܢܦܫܐ ܒܨܒܝܢܗ ܕܐܠܗܐ ܐܝܬܝܗܿ ܒܟܝܢܗ
                    ܕܝܢ ܕܐܠܗܐ ܠܐ ܡܬܐܡܪ ܕܒܨܒܝܢܗ ܕܐܠܗܐ ܐܝܬܘܗܝ. ܘܐܦܠܐ ܕܠܐ ܒܨܒܝܢܗ ܕܐܠܗܐ ܐܝܬܘܗܝ. ܐܠܐ ܡܛܠ
                    ܕܐܝܬܘܗܝ ܟܝܢܗ ܡܬܐܡܪ ܕܐܝܬܘܗܝ. ܡܕܝܢ ܢܦܫܐ ܠܝܬܝܗܿ ܡܢ ܟܝܢܗ ܕܐܠܗܐ. ܓ: ܢܦܫܐ ܡܢ ܡܩܒܠܐ
                    ܝܘܠܦܢܐ ܘܝܠܦܐ. ܟܝܢܗ ܕܐܠܗܐ ܠܐ ܡܩܒܠ ܝܘܠܦܢ̈ܐ ܡܛܠ ܕܡܫܡܠܝܐ ܗܘ ܒܟܠ ܘܠܐ ܚܣܝܪܐ. ܕ: ܢܦܫܐ
                    ܡܢ ܠܝܬ ܠܗܿ ܩܕܝܡܘܬ ܝܕܥܬܐ. ܡܕܝܢ ܠܝܬܝܗܿ ܢܦܫܐ ܡܢ ܟܝܢܗ ܕܐܠܗܐ. ܗ: ܐܡܪ ܡܘܫܐ: ܕܓܒܠ ܐܠܗܐ
                    ܠܐܕܡ ܘܢܦܚ ܒܐܦܘܗܝ ܢܫܡܬܐ ܕܚܝ̈ܐ1 ܣܦܪܐ ܕܒܪܝܬܐ:7:2. ܗܿܘ ܗܟܝܠ ܕܢܦܚ ܠܘ ܡܢ ܟܝܢܗ
                    ܢܦܚ. ܐܠܐ ܐܐܪ ܐܝܬܘܗܝ ܕܣܐܩ ܘܡܬܬܠܐ ܒܗ ܘܡܥܠ ܠܗ ܠܓܘ ܪܐܬܐ. ܘܗܟܢܐ ܢܦܚ ܠܗ ܒܡܬܢܦܚܐ. ܟܡܐ
                    ܝܬܝܪܐܝܬ ܐܠܗܐ ܥܒܘܕܐ ܠܘ ܡܢ ܟܝܢܗ ܢܦܚ. ܟܕ ܢܦܚ ܒܐܕܡ. ܠܐ ܕܝܢ ܐܦܠܐ ܐܐܪ ܣܐܩ ܘܢܦܚ ܐܟܘܬܢ.
                    ܠܐ ܓܘܫܡܢܐ ܗܘ ܓܝܪ ܘܡܥܠܝ ܡܢ ܡܐܢ̈ܐ ܐܘܪ̈ܓܢܝܐ  f.48a  ܘܢܦܘܚܐ. ܡܕܝܢ ܠܘ ܡܢ ܟܝܢܗ
                    ܕܐܠܗܐ ܐܝܬܝܗܿ ܢܦܫܐ. ܘ: ܝܕܝܥܐ ܬܘܒ ܕܠܘ ܡܢ ܟܝܢܗ ܕܐܠܗܐ ܐܝܬܝܗܿ ܢܦܫܐ ܡܢ ܡܘܒܠܢܘܬܐ ܕܠܘܬ
                    ܫܟܝܪܘܬܐ. ܗܟܢܐ ܐܢ ܡܢ ܟܝܢܗ ܕܐܠܗܐ ܐܝܬܝܗܿ ܢܦܫܐ. ܘܢܦܫܐ ܦܣܝܩܐ ܡܢܗ ܘܫܪܝܐ ܒܦܓܪܐ. ܡܕܝܢ
                    ܟܝܢܗ ܕܐܠܗܐ ܡܬܦܣܩܢܐ ܐܝܬܘܗܝ. ܙܙ: ܐܢ ܡܢ ܟܝܢܗ ܕܐܠܗܐ ܐܝܬܝܗܿ ܢܦܫܐ ܘܢܦܫ̈ܬܐ ܣܓܝ̈ܐܬܐ. ܐܝܬ
                    ܡܕܝܢ ܣܓܝ ܡܢܘܬܐ ܐܝܬܘܗܝ ܟܝܢܗ ܕܐܠܗܐ. ܚ: ܐܢ ܡܢ ܟܝܢܗ ܕܐܠܗܐ ܐܝܬܝܗܿ ܢܦܫܐ. ܘܢܦܫܐ ܡܕܝܢ
                    ܡܫܚܠܦܐ. ܡܕܝܢ ܡܫܚܠܦ ܟܝܢܗ ܕܐܠܗܐ ܗܘ ܡܢܗܿ. ܘܐܢ ܗܟܢܐ ܗܿܘ ܡܪܟܒܐ ܗܘ. ܘܐܢ ܡܪܟܒܐ ܗܘ ܒܪܝܐ
                    ܗܘ. ܛ: ܐܢ ܡܢ ܟܝܢܗ ܕܐܠܗܐ ܐܝܬܝܗܿ ܢܦܫܐ. ܘܢܦܫܐ ܚܛܝܐ ܒܚܘܫܒܐ ܘܡܬܬܕܝܢܐ. ܡܕܝܢ ܗܘ ܟܕ ܗܘ
                    ܐܠܗܐ ܚܛܐ. ܘܗܘ ܟܕ ܗܘ ܕܐܢ. ܘܡܫܬܟܚ ܕܗܘ ܠܗ ܚܛܐ. ܘܗܘ ܠܗ ܕܐܢ. ܘܡܚܝܒ ܘܡܫܢܩ. ܗܠܝܢ
                    ܕܫܟܝܪ̈ܘܬܐ ܐܢܝܢ ܕܢܬܪܥܐ ܐܢܝܢ ܥܠ ܐܠܗܐ. ܡܕܝܢ ܐܬܚܘܝܬ ܒܝܕ ܗܠܝܢ ܕܠܐ ܐܝܬܝܗܿ ܢܦܫܐ ܡܢ ܟܝܢܗ
                    ܕܐܠܗܐ. ܘܗܠܝܢ ܡܢ ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܡܢ ܟܝܢܗ ܕܐܠܗܐ ܐܝܬܝܗܿ. 
                ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ ܡܢ ܢܦܫܐ ܐܝܬܝܗܿ ܘܡܢܗܿ ܡܬܝܠܕܐ ܘܪܕܝܐ
                    ܘܡܬܝܒܠܐ. ܘܝܕܝܥܐ ܕܠܐ ܫܪܝܪܐ ܡܢ ܗܠܝܢ. ܐ: ܐܢ ܗܟܝܠ ܓܘܫܡܐ ܡܢ ܓܘܫܡܐ ܪܕܐ ܘܡܬܝܠܕ ܘܡܬܝܒܠ.
                         f.48b  ܢܦܫܐ ܕܐܝܬܝܗܿ ܕܠܐ ܓܫܘܡ܆ ܐܡܪܝܢܢ ܕܢܦܫܐ ܡܢ ܢܦܫܐ ܠܐ ܣܟ ܡܬܝܠܕܐ
                    ܘܐܦܠܐ ܡܬܝܒܠܐ ܘܪܕܝܐ. ܘܝܕܝܥܐ ܡܢ ܗܠܝܢ. ܐܢ ܗܟܝܠ ܓܘܫܡܐ ܡܢ ܓܘܫܡܐ ܪܕܐ ܘܡܬܝܠܕ ܘܡܬܝܒܠ.
                    ܢܦܫܐ ܕܐܝܬܝܗܿ ܕܠܐ ܓܫܘܡ ܠܐ ܡܨܝܐ ܕܬܪܕܐ ܘܬܬܝܠܕ ܘܬܬܝܒܠ ܡܢ ܢܦܫܐ ܐܚܪܬܐ ܕܠܐ ܓܫܘܡ ܡܛܠ
                    ܕܢܦܫܐ ܕܠܩܘܒܠܝܐ ܗܝ ܕܦܓܪܐ. ܐܝܟܢܐ ܕܦܓܪܐ ܕܠܩܘܒܠܝܐ ܗܘ ܕܠܐ ܓܫܘܡ. ܘܒܕܓܘܢ ܓܘܫܡܐ ܡܢ ܓܘܫܡܐ
                    ܡܬܝܠܕ. ܢܦܫܐ ܡܢ ܢܦܫܐ ܠܐ ܣܟ ܡܬܝܠܕܐ. ܒ: ܝܕܝܥܐ ܗܟܝܠ ܕܠܐ ܡܬܝܒܠ ܠܐ ܓܫܘܡ ܡܢ ܠܐ ܓܫܘܡ ܡܢ
                    ܡܠܐܟܐ ܘܫܐܕܐ ܕܠܐ ܡܦܪܝܢ ܒܢ̈ܝܐ܆ ܗܟܢܐ ܘܐܦܠܐ ܢܦܫܐ ܡܢ ܢܦܫܐ ܡܬܝܠܕܐ. ܓ: ܢܦܫܐ ܦܫܝܛܬܐ
                    ܐܝܬܝܗܿ ܘܠܐ ܡܬܦܠܓܐ ܠܡܢܘܬܐ. ܘܗܿܘ ܕܦܫܝܛ ܘܠܐ ܡܬܦܠܓ ܠܡܢܘܬܐ ܠܐ ܝܠܝܕ. ܘܐܦܠܐ ܡܬܝܠܕ. ܡܕܝܢ
                    ܢܦܫܐ ܡܢ ܢܦܫܐ ܠܐ ܡܬܝܠܕܐ. ܘܐܦܠܐ ܡܬܝܒܠܐ. ܐܢܕܝܢ ܡܗܦܟ ܐܢܫ ܘܐܡܪ ܕܗܐ ܐܠܗܐ ܐܒܐ ܐܝܬܘܗܝ
                    ܦܫܝܛܐ ܘܠܐ ܡܩܒܠ ܦܘܠܓܐ ܕܠܡܢܘܬܐ ܐܘܠܕ ܠܒܪܐ ܘܐܦܩ ܠܪܘܚܐ. ܐܡܪܝܢܢ ܠܘܬܗ ܕܐܠܗܐ ܐܒܐ ܡܬܘܡܐܝܬ
                    ܘܟܝܢܐܝܬ ܐܘܠܕ ܠܒܪܐ ܘܐܦܩ ܠܪܘܚܐ. ܘܠܘ ܒܪܕܝܐ ܘܒܝܘܒܠܐ ܚܕ ܒܬܪ ܚܕ. ܗܿܝ ܕܠܐ ܡܨܝܐ ܕܬܗܘܐ ܥܠ
                    ܟܝܢܐ ܕܠܐ ܓܫܘܡ ܐܠܐ ܐܢ ܥܠ ܓܘܫ̈ܡܐ ܒܠܚܘܕ. ܕ: ܐܢ ܢܦܫܐ ܡܢ ܡܬܝܠܕܐ ܘܡܬܝܒܠܐ܆ ܡܕܝܢ ܡܝܘܬܬܐ
                         f.49a  ܐܝܬܝܗܿ. ܘܚܒܠܐ ܢܩܦ ܠܗܿ ܐܝܟܢܐ ܕܢܩܦ ܠܓܘܫ̈ܡܐ ܕܡܬܝܠܕܝܢ ܡܢ ܓܘܫ̈ܡܐ
                    ܘܡܘܠܕܝܢ ܡܢܗܘܢ. ܡܕܝܢ ܢܦܫܐ ܡܢ ܢܦܫܐ ܠܐ ܡܬܝܠܕܐ. ܘܗܠܝܢ ܬܘܒ ܠܘܩܒܠ ܐܝܠܝܢ ܕܐܡܪܝܢ ܕܢܦܫܐ
                    ܡܢ ܢܦܫܐ ܡܬܝܠܕܐ ܘܡܬܝܒܠܐ. 
                ܠܘܩܒܠ ܕܝܢ ܗܿܢܘܢ ܕܐܡܪܝܢ ܕܢܦܫܐ ܡܢ ܙܪܥܐ ܕܓܒܪܐ ܡܬܝܠܕܐ ܘܡܬܝܒܠܐ. ܐܡܪܝܢܢ
                    ܕܠܐ ܫܪܝܪܐ. ܘܝܕܝܥܐ ܡܢ ܗܠܝܢ. ܐ: ܐܢ ܢܦܫܐ ܐܝܬܝܗܿ ܠܐ ܓܫܘܡ ܠܐ ܡܨܝܐ ܕܬܬܝܠܕ ܡܢ ܙܪܥܐ
                    ܕܓܒܪܐ ܕܐܝܬܘܗܝ ܓܘܫܡܐ. ܐܢ ܠܐ ܓܫܘܡ ܡܢ ܠܐ ܓܫܘܡ ܠܐ ܡܬܝܠܕ ܐܦܠܐ ܡܢ ܓܘܫܡܐ ܡܬܝܠܕ. ܒ: ܐܢ
                    ܙܪܥܐ ܕܓܒܪܐ ܗܘ ܐܝܬܘܗܝ ܥܠܬܐ ܘܡܘܠܕܢܐ ܕܢܦܫܐ. ܘܢܦܫܐ ܠܐ ܓܫܘܡ ܐܝܬܝܗܿ. ܡܕܝܢ ܙܪܥܐ ܕܓܒܪܐ
                    ܠܐ ܓܫܘܡ ܐܝܬܘܗܝ. ܗܿܝ ܕܕܓܠܬܐ ܗܝ. ܡܕܝܢ ܠܘ ܡܢ ܙܪܥܐ ܕܓܒܪܐ ܐܝܬܝܗܿ ܢܦܫܐ. ܘܐܦܠܐ ܡܢܗ
                    ܡܬܝܠܕܐ ܘܡܬܝܒܠܐ. 
                ܐܬܚܘܝܬ ܡܕܝܢ ܢܗܝܪܐܝܬ ܒܕܗܠܝܢ ܟܠܗܝܢ ܕܠܐ ܐܝܬܝܗܿ ܢܦܫܐ ܡܢ ܟܝܢܗ ܕܐܠܗܐ.
                    ܐܦܠܐ ܡܢ ܢܦܫܐ ܐܚܪܬܐ ܡܬܝܠܕܐ ܘܡܬܝܒܠܐ ܐܦܠܐ ܡܢ ܙܪܥܐ ܕܓܒܪܐ ܡܬܝܠܕܐ. ܘܐܠܐ ܡܢ ܐܝܟܐ ܐܝܬܝܗܿ
                    ܢܦܫܐ. ܘܐܡܪܝܢܢ ܡܢ ܠܐ ܡܕܡ ܒܪܐ ܠܗܿ ܐܠܗܐ ܘܝܕܝܥܐ ܕܠܐ ܡܢ ܡܕܡ ܒܪܐ ܠܗܿ ܡܢ ܗܠܝܢ. ܐ: ܓܘܫܡܐ
                    ܘܠܐ ܓܫܘܡ ܕܠܩܘܒܠܐܝܢ ܠܚܕܕܐ. ܘܐܢ ܦܓܪܐ ܕܐܝܬܘܗܝ ܓܘܫܡܐ ܡܢ ܡܕܡ ܒܪܐ ܠܗ ܐܠܗܐ. ܡܛܠ  f.49b  ܕܠܩܘܒܠܝܐ ܗܝ ܕܓܘܫܡܐ ܡܢ ܠܐ ܡܕܡ ܒܪܐ ܠܗܿ ܐܠܗܐ ܒܝܕ ܕܠܐ ܓܫܘܡ ܐܝܬܝܗܿ.
                    ܒ: ܐܝܟܢܐ ܕܠܡܠܐܟܐ ܡܢ ܠܐ ܡܕܡ ܒܪܐ ܗܟܢܐ. ܘܠܢܦܫ̈ܬܐ ܡܢ ܠܐ ܡܕܡ ܒܪܐ ܘܒܪܐ ܠܗܝܢ. ܓ: ܐܟܙܢܐ
                    ܓܝܪ ܕܦܓܪܗ ܕܐܕܡ ܕܡܢ ܡܕܡ ܒܪܝܗܝ. ܐܡܪ ܐܢܐ ܕܝܢ ܕܡܢ ܙܪܥܐ ܐܢܫܝܐ. ܘܐܝܟܢܐ ܕܠܢܦܫܗ ܕܐܕܡ ܡܢ
                    ܠܐ ܡܕܡ ܒܪܗܿ. ܗܟܢܐ ܘܐܦ ܠܟܠܗܝܢ ܢܦܫ̈ܬܐ ܕܡܢ ܒܬܪ ܢܦܫܗ ܕܐܕܡ ܘܥܕܡܐ ܠܫܘܠܡܗ ܕܥܠܡܐ ܡܢ ܠܐ
                    ܡܕܡ ܒܪܐ ܠܗܝܢ. ܐܦ ܓܝܪ ܫܘܝܬ ܒܟܝܢܐ ܐܝܬܝܗܿ ܢܦܫܗ ܕܐܕܡ ܠܗܠܝܢ ܢܦܫ̈ܬܐ ܕܡܢ ܒܬܪܟܢ. ܕ:
                    ܝܕܝܥܐ ܕܡܢ ܠܐ ܡܕܡ ܒܪܐ ܐܠܗܐ ܠܢܦܫ̈ܬܐ ܡܢ ܡܠܬܗ ܕܙܟܪܝܐ ܕܐܡܪ ܡܛܠ ܐܠܗܐ ܗܟܢܐ: ܒܪܐ ܪܘܚܗ
                    ܕܒܪܢܫܐ ܒܓܘܗ1 ܙܟܪܝܐ
                            ܢܒܝܐ: 1:12. ܡܬܒܪܝܐ ܐܝܟ ܕܐܡܪ ܢܒܝܐ܆ܝܕܝܥܐ ܕܡܢ ܠܐ ܡܕܡ ܒܪܐ ܠܗܿ.
                    ܡܛܠ ܕܗܿܘ ܡܬܒܪܐ ܡܢ ܠܐ ܡܕܡ ܡܬܒܪܐ. ܘܐܦ ܡܪܢ ܒܐܘܢܓܠܝܘܢ ܐܡܪ: (ܐܒܝ) ܥܕܡܐ ܠܗܫܐ ܥܒܕ܆ ܘܐܦ
                    ܐܢܐ ܥܒܕ ܐܢܐ2 ܝܘܚܢܢ:
                            17:5. ܒܗܿܝ ܗܟܝܠ ܕܐܡܪ ܘܐܦ ܐܢܐ ܥܒܕ ܐܢܐ ܬܠܬ ܫܘܕܥ. ܚܕܐ ܡܢ. ܗܿܝ
                    ܕܒܪܐ ܟܠ ܡܕܡ ܒܟܠ ܫܥ ܘܒܟܠ ܝܘܡ ܘܟܕ ܒܪܐ ……… ܫܘܝܬ ܒܟܝܢܐ ܠܗܠܝܢ ܕܐܬܒܪܝܢ. ܘܒܕܓܘܢ ܒܪܐ
                    ܢܦܫ̈ܬܐ ܝܘܡܢ ܐܡܝܢܐܝܬ ܡܢ ܠܐ ܡܕܡ ܗܢܐ ܐܝܬܘܗܝ ܚܕ ܙܢܐ ܕܗܿܝ ܕܐܡܪ  f.50a  ܘܐܦ
                    ܐܢܐ ܥܒܕ ܐܢܐ. ܐܚܪܬܐ ܕܝܢ ܗܿܝ ܕܒܛܝܠ ܠܗ ܥܠ ܒܪܝܬܗ ܒܣܬܘܐ ܘܒܩܝܛܐ. ܘܙܪܥܐ ܘܚܨًܕܐ ܘܡܐܚܐ
                    ܘܡܡܝܬ ܘܕܫܪܟܐ. ܙܢܐ ܕܝܢ ܕܬܠܬܐ ܗܿܝ ܕܢܛܝܪ ܠܒܪ̈ܝܬܗ. 
            
            
                ܩܦܠܐܘܢ ܕܥܣܪܝܢ ܘܐܪܒܥܐ
                ܕܡܥܩܒ ܕܐܟܢܐ ܡܬܒܪܝܐ ܢܦܫܐ܆ ܒܓܘܗ ܕܦܓܪܐ ܐܘ ܠܒܪ ܡܢܗ ܕܦܓܪܐ
                ܡܟܝܠ ܡܢ ܓܝܪ ܕܚܘܝܢܢ ܒܩܦܠܐܘܢ ܗܿܘ ܕܥܒܪ ܕܢܦܫܐ ܡܢ ܠܐ ܡܕܡ ܡܬܒܪܝܐ܆ ܢܥܩܒ
                    ܕܝܢ ܗܫܐ ܕܐܝܟܐ ܒܪܐ ܠܗܿ ܡܪܝܐ ܠܢܦܫܐ ܒܓܘܗ ܕܦܓܪܐ. ܐܘ ܠܒܪ ܡܢܗ. ܘܐܡܪܝܢܢ ܕܐܢܫ̈ܝܢ ܡܢ
                    ܐܡܪܝܢ ܕܒܓܘܗ ܕܦܓܪܐ ܒܪܐ ܠܗܿ. ܘܝܕܝܥܐ ܗܕܐ ܡܢ ܬܠܬ. ܚܕܐ ܡܢ  f.50b  ܗܿܝ ܕܐܠܘ
                    ܠܒܪ ܡܢ ܦܓܪܐ ܒܪܐ ܗܘܐ ܠܗܿ ܘܟܢ ܡܥܠ ܗܘ ܠܗܿ ܠܓܘ ܡܢܗ ܘܡܚܝܕ ܗܘܐ ܠܗܿ ܥܡܗ. ܙܕܩ ܗܘܐ ܕܬܬܥܗܕ
                    ܕܟܝܢܗܿ ܟܕ ܐܝܬܝܗܿ ܗܘܬ ܕܠܐ ܦܓܪܐ ܘܗܠܝܢ ܕܐܝܬܝܗܿ ܗܘܬ ܒܗܝܢ ܡܢ ܩܕܡ ܕܬܥܘܠ ܠܗ. ܘܗܐ ܚܙܝܢܢ
                    ܕܠܐ ܥܗܕܐ ܡܕܡ ܕܐܝܟ ܐܝܟܢ. ܕܬܪܬܝܢ ܕܝܢ ܐܠܘ ܠܒܪ ܡܢ ܦܓܪܐ ܒܪܐ ܗܘܐ ܠܗܿ ܡܥܠ ܗܘܐ ܠܗܿ ܠܓܘܗ.
                    ܠܐ ܗܿܘܐ ܠܗܿ …… ܥܡܗܿ ܚܘܒܐ ܘܐܘܝܘܬܐ ܡܛܠ ܕܚܙܝܐ ܗܘܬ ܪܡܘܬܐ ܘܡܥܠܘܬܐ ܕܝܠܗܿ ܘܫܦܠܘܬܗ
                    ܘܬܚܬܝܘܬܗ ܕܦܓܪܐ. ܘܒܕܓܘܢ ܚܕܐ ܡܢ ܬܪܬܝܢ ܓܕܫܐ ܗܘܬ ܠܗܿ ܐܘ ܠܐ ܣܟ ܥܠܐ ܗܘܬ ܠܗ ܐܘ ܒܠܚܘܕ
                    ܚܘܒܐ ܠܐ ܩܢܝܐ ܗܘܬ ܥܡܗ. ܐܠܐ ܘܣܢܐܬܐ ܠܩܘܒܠܗ ܗܿܘܝܐ ܗܘܬ ܠܗܿ. ܘܗܐ ܟܕ ܚܙܝܢܢ ܕܩܢܝܐ ܥܡܗ
                    ܚܘܒܐ ܘܐܘܝܘܬܐ. ܕܬܠܬܐ ܕܝܢ ܝܕܝܥܐ ܕܡܢ ܡܠܬܗ ܕܙܟܪܝܐ ܢܒܝܐ ܕܐܡܪ ܡܛܠ ܐܠܗܐ ܗܟܢܐ: ܕܒܪܐ ܪܘܚܗ
                    ܕܒܪܢܫܐ ܒܓܘܗ1 ܙܟܪܝܐ
                            ܢܒܝܐ: 1:12. ܐܡܪ ܢܒܝܐ ܕܒܪܐ ܠܗܿ. ܡܕܝܢ ܠܡ ܫܪܝܪܐ ܗܿܝ ܕܐܡܪܝܢܢ
                    ܕܢܦܫܐ ܒܓܘܗ ܕܒܪܢܫܐ ܒܪܐ ܠܗܿ ܐܠܗܐ. ܐܢܫ̈ܝܢ ܡܢ ܗܟܢܐ ܐܬܪܥܝܘ ܘܐܡܪܘ ܡܛܠ ܢܦܫܐ ܕܐܝܟܐ
                    ܡܬܒܪܝܐ. ܡܠܦܢ̈ܐ ܕܝܢ ܝܘܢܝ̈ܐ ܐܡܪܝܢ ܕܠܒܪ ܡܢ ܦܓܪܐ ܒܪܐ ܠܗܿ ܐܠܗܐ ܠܢܦܫܐ ܘܡܥܠ ܠܗܿ ܠܓܘ
                    ܦܓܪܐ. ܘܡܚܝܕ ܠܗܿ ܥܡܗ. 
                ܣܗܕܘܬܐ ܕܡܠܦܢ̈ܐ ܥܠ ܗܢܐ ܩܦܠܐܘܢ ܘܥܠ ܗܿܘ ܕܩܕܡܘܗܝ ܕܡܚܘܝܢ ܕܢܦܫܐ ܡܢ ܠܐ
                    ܡܕܡ ܡܬܒܪܝܐ ܘܕܠܒܪ ܡܢ ܦܓܪܐ ܒܪܐ ܠܗܿ ܐܠܗܐ ܘܡܥܠ ܠܗܿ ܠܓܘ ܦܓܪܐ: 
                ܩܕܝܫܐ ܗܟܝܠ ܣܐܘܝܪܐ ܒܐܓܪܬܐ ܕܠܘܬ ܦܛܪܐ ܕܝܪܝܐ ܗܿܘ ܕܐܡܪ ܗܘܐ ܕܡܬܚܒܠܢܝܬܐ
                    ܢܦܫܐ ܘܕܡܢ ܙܪܥܐ ܐܝܬ ܠܗܿ ܩܘܝܡܐ ܐܡܪ ܗܟܢܐ. ܣܐܘܝܪܐ: ܡܛܠ ܕܝܢ ܕܐܡܪܬ ܟܕ ܝܨܦ ܕܬܚܘܐ
                    ܕܡܬܚܒܠܢܝܬܐ ܗܝ ܢܦܫܐ ܘܡܢ ܙܪܥܐ ܐܝܬ ܠܗܿ ܩܘܝܡܐ. ܐܟܚܕܐ ܥܡ ܦܓܪܐ ܡܙܕܪܥܐ܆ ܐܝܬܝܬ ܬܚܘܝܬܐ
                    ܕܝܘܠܝܢܘܣ ܕܐܡܪ ܕܡܢ ܨܒܝܢܐ. ܕܓܒܪܐ ܩܪܐ ܘܡܢ ܨܒܝܢܐ ܕܓܒܪܐ ܒܪܢܫܐ ܓܘܝܐ ܡܬܢܦܚ ܘܚܝܐ ܟܕ
                    ܡܪܡܝܢܘܬܐ ܗܘܠܢܝܬܐ ܕܙܪܥܐ ܚܝܠܐ ܡܚܝܠܐ ܠܡܪܟܒܐ ܗܿܘ ܕܡܩܒܠ. ܕܥ ܕܠܘ ܢܦܫܐ ܐܡܪ ܕܡܢ ܗܘܠܐ
                    ܙܪܥܐ ܐܝܬ ܠܗܿ ܩܘܝܡܐ. ܐܠܐ ܕܥܡܗ ܕܪܡܝܐ ܕܙܪܥܐ. ܘܢܦܫܐ ܐܟܚܕܐ ܡܬܒܪܝܐ ܐܝܟ ܕܐܦ ܓܪܝܓܘܪܝܘܣ
                    ܕܢܘܣܐ ܒܩܦܠܐܘܢ ܕܬܠܬܐ ܕܥܠ ܬܘܩܢܗ ܕܒܪܢܫܐ ܐܡܪ ܕܠܐ ܩܕܝܡܝܢ ܠܚܕܕܐ ܐܠܐ ܒܗ ܒܙܢܐ ܕܡܪܡܝܢܘܬܐ
                    ܕܙܪܥܐ ܕܙܪܥܐ ܐܝܬ ܠܗܿ. ܘܩܘܪܝܠܘܣ ܒܐܝܠܝܢ ܕܠܘܩܒܠ ܕܝܘܕܘܪܘܣ ܐܟܬܒ ܐܡܪ ܕܢܦܫܐ ܠܡ ܘܦܓܪܐ ܠܘܬ
                    ܗܘܢܗ ܕܒܪܢܫܐ ܫܘܝ̈ܝ ܒܪܗܛܐ ܠܚܕܕܐ ܐܝܬܝܗܘܢ ܕܡܫܡܠܝܬܐ ܕܝܢ  f.51b  ܐܝܬܝܗܿ ܢܦܫܐ.
                    ܘܕܡܢ ܠܒܪ ܡܬܬܪܡܐ ܘܒܩܠܝܠ ܡܩܪܒܐ ܠܗܿܘ ܕܡܬܒܛܢ ܠܡܥܒܕܢܘܬܐ ܕܝܠܗܿ. ܡܚܘܐ ܓܪܝܓܘܪܝܘܣ
                    ܬܐܘܠܘܓܘܣ ܒܡܐܡܪܐ ܕܡܘܫܚ̈ܬܐ: ܗܿܘ ܡܢ ܦܓܪܐ ܡܢ ܦܓܪܐ. ܢܦܫܐ ܕܝܢ ܡܬܚܠܛܐ ܠܐ ܡܬܚܙܝܢܐܝܬ ܟܕ
                    ܡܢ ܠܒܪ ܥܐܠܐ ܠܓܒܝܠܬܐ ܗܿܝ ܕܡܢ ܐܪܥܐ (ܙܪܥܐ). ܡܕܝܢ ܣܦܩًܢ ܗܠܝܢ ܕܢܚܘܝܢ ܕܐܒܗܬܐ ܥܠܬܐ
                    ܕܦܓܪܐ ܐܝܬܝܗܘܢ ܒܠܚܘܕ. ܘܠܘ ܕܢܦܫܐ. ܘܕܢܦܫܐ ܠܐ ܡܝܘܬܬܐ ܗܝ. ܗܿܝ ܕܡܢ ܠܒܪ ܥܐܠܐ ܥܡܗ ܐܘܟܝܬ
                    ܥܠܘܗܝ ܕܪܡܝܐ ܕܙܪܥܐ ܐܝܟܢܐ ܕܝܕܥ ܐܠܗܐ ܗܿܘ ܕܥܒܕ ܕܢܦܫܐ ܕܝܠܢ ܡܢ ܡܦܘܚܝܬܐ ܐܠܗܝܬܐ ܐܬܥܒܕܬ
                    ܘܐܬܚܠܛܬ ܒܦܓܪܐ ܘܐܝܬܝܗܿ ܠܐ ܡܝܘܬܬܐ ܘܠܐ ܡܫܬܪܝܢܝܬܐ. ܗܿܝ ܓܝܪ ܕܬܫܬܪܐ ܕܝܠܝܬܐ ܐܝܬܝܗܿ
                    ܕܢܦܫܐ ܕܒܥܝܪܐ. ܐܬܚܙܝܬ ܗܟܝܠ ܕܐܒܗܬܐ ܥܠܬܐ ܐܝܬܝܗܘܢ ܕܦܓܪܐ ܒܠܚܘܕ. ܩܘܝܡܐ ܕܝܢ ܕܢܦܫܐ
                    ܡܦܘܚܝܬܐ ܐܠܗܝܬܐ ܗܿܘܐ. ܡܛܠ ܕܝܢ ܕܗܘ ܦܛܪܐ ܕܝܪܝܐ ܐܡܪ ܗܘܐ ܕܣܩܘܒܠܝ ܩܘܪܝܠܘܣ ܠܬܐܘܠܘܓܘܣ
                    ܒܗܿܝ ܕܩܘܪܝܠܘܣ ܡܢ ܐܡܪ. ܕܡܦܘܚܝܬܐ ܕܐܡܪ ܡܘܫܐ ܕܢܦܚ ܐܠܗܐ ܒܐܕܡ ܪܘܚܐ ܕܩܘܕܫܐ ܐܝܬܝܗܿ.
                    ܬܐܘܠܘܓܘܣ ܕܝܢ ܐܡܪ ܕܗܕܐ ܡܦܘܚܝܬܐ ܢܦܫܐ ܐܝܬܝܗܿ. ܐܡܪ ܠܘܬܗ ܗܘ ܩܕܝܫܐ ܣܐܘܝܪܐ ܒܗܿ ܟܕ ܒܗܿ
                    ܒܐܓܪܬܐ  f.52a  ܠܥܠ ܡܢ ܐܝܠܝܢ ܕܟܬܒܢܢ ܗܟܢܐ. ܐܡܪ ܠܡ ܕܩܘܪܝܠܘܣ ܐܡܪ ܕܥܒܕ ܐܠܗܐ
                    ܦܓܪܐ ܡܢ ܐܪܥܐ. ܘܢܦܫܗ ܒܢܦܫܐ ܡܠܝܠܬܐ ܘܝܕܘܥܬܢܝܬܐ ܒܙܢܐ ܗܿܘ ܕܗܘ ܝܕܥ. ܘܡܛܠ ܕܙܕܩ ܗܘܐ
                    ܕܡܫܘܬܦܐ ܠܪܘܚܐ ܩܕܝܫܐ ܢܗܘܐ. ܢܦܚ ܒܗ ܪܘܚܐ ܕܚܝ̈ܐ. ܗܢܐ ܕܝܢ ܐܝܬܘܗܝ ܪܘܚܐ ܗܿܘ ܕܠܒܪ̈ܝܬܐ
                    ܡܬܝܗܒ ܘܡܨܠܡ ܕܡܘܬܐ ܠܕܡܘܬܐ ܐܠܗܝܬܐ. ܘܒܡܐܡܪܐ ܬܘܒ ܕܬܠܬܐ ܘܕܐܪܒܥܐ ܐܡܪ: ܡܦܘܚܝܬܐ ܐܠܗܝܬܐ
                    ܐܠܐ ܗܘܐ ܕܗܝ ܐܝܬܝܗܿ ܢܦܫܐ ܐܡܪܝܢܢ ܡܩܘܝܐ ܗܘܬ ܓܝܪ ܠܐ ܡܫܬܚܠܦܢܐܝܬ. ܐܝܟ ܕܡܢ ܐܠܗܐ ܢܦܩܬ
                    ܐܠܐ ܫܘܬܦܬܐ ܐܝܬܝܗܿ ܒܪܘܚܐ ܩܕܝܫܐ ܕܐܬܬܣܝܡܬ ܡܢ ܫܘܪܝܐ ܒܢܦܫܐ ܐܠܗܝܬܐ ܥܠ ܗܕܐ ܒܨܠܡ ܐܠܗܐ
                    ܗܘܬ ܚܝܘܬܐ ܡܠܝܠܬܐ. ܠܗܕܐ ܓܝܪ ܡܫܝܚܐ ܟܕ ܡܚܕܬ. ܢܦܚ ܒܬܠܡܝܕܘܗܝ. ܓܪܝܓܘܪܝܘܣ ܕܝܢ ܬܐܘܠܘܓܘܣ
                    ܐܡܪ ܕܗܝ ܢܦܫܐ ܡܢ ܗܿܝ ܕܠܐ ܐܝܬܝܗܿ ܗܘܬ. ܠܘܬ ܗܿܝ ܕܬܗܘܐ ܐܝܬܝܗܿ ܒܝܕ ܡܦܘܚܝܬܐ ܐܬܬ.
                    ܕܛܝܒܘܬܐ ܪܘܚܢܝܬܐ ܐܟܚܕܐ ܐܬܪܡܝܬ ܒܗܿ ܒܚܝܘܬܐ. ܒܗܿ ܠܡ ܚܐܝܢܢ ܘܡܬܬܙܝܥܝܢܢ ܐܝܬܝܢ ܐܝܟ ܚܝܠܐ
                    ܥܦܝܦܐ ܕܡܦܘܚܝܬܐ ܘܢܫܡܬܐ  f.52b  ܕܡܬܢܦܚܝܢ. ܘܠܪܘܚܐ ܩܕܝܫܐ ܗܿܢܘܢ ܕܥܕܝܢ. ܘܒܗ
                    ܒܡܐܡܪܐ ܕܥܠ ܝܠܕܐ ܐܡܪ ܬܘܒ: ܗܘܠܐ ܡܢ ܦܓܪܐ ܢܣܒ. ܡܢܗ ܕܝܢ ܚܝ̈ܐ ܣܡ. ܗܿܢܘܢ ܕܢܦܫܐ
                    ܝܕܘܥܬܢܝܬܐ ܘܝܘܩܢܐ ܕܐܠܗܐ ܝܕܝܥܐ ܡܠܬܐ. ܗ ܕܡܢ ܡܦܘܚܝܬܐ ܕܐܠܗܐ ܢܦܫܐ ܕܒܪܢܫܐ ܐܬܩܝܡܬ. ܐܬܒܝܢ
                    ܕܐܡܪ ܗܘ ܩܘܪܝܠܘܣ ܕܠܩܘܒܠܐ ܕܪܘܚܐ ܩܕܝܫܐ ܢܦܚ ܒܢܦܫܐ܆ ܓܪܝܓܘܪܝܘܣ ܕܝܢ ܕܗܝ ܡܦܘܚܝܬܐ ܗܘܬ
                    ܢܦܫܐ. ܐܡܪ ܗܟܢܐ ܦܛܪܐ ܕܝܪܝܐ ܕܠܘܬܗ ܐܡܪ ܩܕܝܫܐ ܣܐܘܝܪܐ ܗܟܢܐ: ܕܐܣܬܟܠ ܗܢܘܢ ܕܫܐܠ ܠܩܘܪܝܠܘܣ
                    ܡܣܒܪܝܢ ܗܘܘ ܕܗܝ ܡܦܘܚܝܬܐ ܟܕ ܐܫܬܚܠܦܬ ܗܘܬ ܠܒܪܢܫܐ ܘܠܘ ܕܡܢ ܡܦܘܚܝܬܐ ܐܬܒܪܝܬ ܐܝܟܢܐ
                    ܕܒܐܝܕܝܐ. ܘܠܘܩܒܠ ܠܐ ܝܕܥܬܗܘܢ ܕܗܢܘܢ ܐܡܪ ܕܠܘ ܡܦܘܚܝܬܐ ܗܘܬ ܢܦܫܐ ܕܠܐ ܫܘܚܠܦܐ. ܐܘ ܫܐܝܕܘܬܐ
                    ܐܘ ܚܫܐ ܠܟܠ ܐܘܣܝܐ ܐܠܗܝܬܐ ܢܣܒܪܘܢ. ܐܠܐ ܡܢ ܡܦܘܚܝܬܐ ܗܘܬ ܢܦܫܐ ܗ ܕܪܘܚܐ ܥܒܕ ܠܢܦܫܐ ܐܝܟ
                    ܕܥܒܕ ܠܚܝ̈ܠܘܬܐ ܫܡܝ̈ܢܐ. ܡܕܝܢ ܓܪܝܓܘܪܝܘܣ ܥܦܝܦܐܝܬ ܐܡܪ ܐܝܬܘܗܝ ܚܝܠܗܿ ܕܡܦܘܚܝܬܐ ܕܝܗܒܬ
                    ܢܫܡܬܐ ܘܪܘܚܐ ܩܕܝܫܐ. ܩܘܪܝܠܘܣ ܕܝܢ ܐܡܪ ܕܡܨܠܡܘ ܨܠܡܬܗ  f.53a  ܟܕ ܠܘܩܒܠ ܦܛܥܘܬܐ
                    ܕܗܿܢܘܢ ܡܬܟܬܫ ܠܐ ܡܕܝܢ ܣܩܘܒܠܝܢ. ܘܗܠܝܢ ܡܢ ܐܝܟ ܕܡܢ ܩܕܝܫܐ ܣܐܘܝܪܐ ܐܝܬܝܢܢ. ܩܕܝܫܐ ܕܝܢ
                    ܩܘܪܝܠܘܣ ܐܡܪ ܗܟܢܐ ܐܡܐ ܒܣܪܐ ܒܠܚܘܕ ܝܠܕܐ. ܢܦܫܐ ܕܝܢ ܡܠܝܠܬܐ ܐܠܗܐ ܒܪܐ ܠܗܿ ܐܝܟ ܕܐܡܪ
                    ܢܒܝܐ: ܕܒܪܐ ܪܘܚܗ ܕܒܪܢܫܐ ܒܓܘܗ1 ܙܟܪܝܐ ܢܒܝܐ:1:12. ܐܠܐ ܡܛܠ ܚܕܝܘܬܐ ܟܝܢܝܬܐ
                    ܘܩܢܘܡܝܬܐ ܕܐܝܬ ܠܢܦܫܐ ܥܡ ܦܓܪܐ ܡܬܐܡܪܐ ܐܡܐ ܕܝܠܕܐ ܟܠܗ ܒܪܢܫܐ. ܐܦ ܩܕܝܫܐ ܦܝܠܘܟܣܝܢܘܣ
                    ܕܐܝܬܘܗܝ ܡܠܦܢܐ ܣܘܪܝܝܐ ܐܡܪ ܒܪܥܝܢܐ ܕܚܡܫܐ ܗܟܢܐ: ܕܟܠ ܐܢܬܬܐ ܒܣܪܗ ܕܗܿܘ ܕܡܬܝܠܕ ܐܝܬܘܗܝ ܡܢ
                    ܒܣܪܗܿ. ܘܠܘ ܡܢ ܢܦܫܗܿ. ܐܝܟ ܕܦܓܪܗ ܕܗܿܘ ܕܡܬܝܠܕ ܡܢ ܒܬܘܠܬܐ ܘܠܘ ܐܠܗܘܬܗ. ܐܦ ܬܐܘܕܘܪܝܛܐ
                    ܕܩܘܪܘܣ ܐܡܪ ܒܟܬܒܐ ܕܠܘܩܒܠ ܚܢ̈ܦܐ ܗܟܢܐ: ܡܢ ܓܘܫ̈ܡܐ ܕܐܝܠܝܢ ܕܐܝܬܝܗܘܢ ܓܒܠ ܓܘܫ̈ܡܐ
                    ܕܚܝ̈ܘܬܐ. ܘܡܢ ܠܐ ܡܕܡ ܢܦܫ̈ܬܐ ܕܟܠܗܝܢ ܚܝ̈ܘܬܐ ܐܠܐ ܕܒܪܢܫܐ ܠܚܘܕ. ܘܗܠܝܢ ܐܝܬܝܗܝܢ ܣܗܕܘܬܐ
                    ܕܡܠܦܢ̈ܐ ܕܡܚܘܝܢ ܬܠܬ. ܚܕܐ ܡܢ ܕܢܦܫܐ ܡܢ ܠܐ ܡܕܡ ܡܬܒܪܝܐ ܒܪܡܙܗ ܕܒܪܘܝܐ. ܕܬܪܬܝܢ ܕܝܢ ܕܠܒܪ
                    ܡܢ ܦܓܪܐ ܡܬܒܪܝܐ ܘܟܢ ܥܐܠܐ ܠܦܓܪ̈ܐ. ܕܬܠܬ ܕܝܢ ܕܐܒܗܐ ܦܓܪܐ ܠܚܘܕ ܡܘܠܕܝܢ. 
            
            
                ܩܦܠܐܘܢ ܕܥܣܪܝܢ ܘܚܡܫܐ
                ܕܡܚܘܐ  f.53b  ܕܡܬܒܪܝܐ ܢܦܫܐ ܡܢ ܩܕܡ ܦܓܪܐ. ܐܘ ܥܡ ܦܓܪܐ. ܐܘ ܒܬܪ
                    ܦܓܪܐ
                ܘܐܦ ܗܪܟܐ ܡܫܐܠ ܗܿܘ ܕܡܫܐܠ ܟܕ ܡܥܩܒ ܥܠ ܢܦܫܐ ܕܐܡܬܝ ܡܬܒܪܝܐ. ܡܢ ܩܕܡ ܦܓܪܐ.
                    ܐܘ ܥܡܗ ܕܦܓܪܐ. ܐܘ ܡܢ ܒܬܪ ܦܓܪܐ. ܘܐܡܪܝܢܢ ܕܚܢ̈ܦܐ ܩܕܡ̈ܝܐ ܐܘܪܝܓܢܝܣ ܗܪ̈ܛܝܩܝܐ ܘܐܚܪ̈ܢܐ
                    ܥܡܗܘܢ ܐܡܪܝܢ ܕܩܕܝ̈ܡܢ ܒܪ̈ܝܢ ܢܦܫ̈ܬܐ ܡܢ ܩܕܡ ܦܓܪ̈ܐ ܘܡܛܠ ܕܐܪܚܩ ܡܢ ܦܘܠܚܢܐ ܐܠܗܝܐ
                    ܐܫܬܕܝ̈ܝܢ ܠܒܣܪܐ ܐܝܟ ܕܠܒܝܬ ܚܒܘܫܝܐ. ܡܠܦܢ̈ܐ ܕܝܢ ܣܘܪ̈ܝܝܐ ܡܪܝ ܐܦܪܝܡ ܐܡܪ ܐܢْܐ ܘܡܪܝ
                    ܝܥܩܘܒ ܕܒܛܢܢ ܘܦܝܠܘܟܣܝܢܘܣ ܕܡܒܘܓ ܘܬܐܘܕܘܪܝܛܐ ܕܩܘܪܘܣ. ܘܕܒܝܬ ܢܣܛܘܪܝܘܣ1 ܡܚܪܡ ܗܠܝܢ
                    ܟܠܗܘܢ ܐܡܪܝܢ ܕܩܕܡܐܝܬ ܦܓܪ̈ܐ ܡܬܓܒܠܝܢ ܘܒܬܪܟܢ ܡܬܒܪ̈ܝܢ ܢܦܫ̈ܬܐ ܒܗܘܢ ܡܢ ܠܐ ܡܕܡ. ܡܠܦܢ̈ܐ
                    ܕܝܢ ܝܘܢ̈ܝܐ ܠܗܠܝܢ ܬܪܬܝܢ ܬܪ̈ܥܝܬܐ ܡܣܠܝܢ ܘܐܡܪܝܢ ܕܠܐ ܩܕܝܡܐ ܢܦܫܐ ܠܦܓܪܐ. ܘܐܦܠܐ ܦܓܪܐ
                    ܠܢܦܫܐ. ܐܠܐ ܒܫܘܝܘܬܐ ܕܐܟܚܕܐ ܘܒܪܗܛܐ ܠܐ ܡܬܦܣܩܢܐ ܕܙܒܢܐ ܫܘܝܐܝܬ ܡܬܟܢܫܝܢ. ܟܕ ܦܓܪܐ ܡܢ
                    ܡܬܩܝܡ ܡܢ ܙܪܥܐ ܕܓܒܪܐ. ܢܦܫܐ ܕܝܢ ܡܬܒܪܝܐ ܡܢܫܝܠ ܡܢ ܠܐ ܡܕܡ ܒܪܡܙܗ ܕܒܪܘܝܐ. 
                ܐܡܬܝ ܡܬܒܪܝܐ ܢܦܫܐ: 
                
                    ܡܢ ܩܕܡ ܦܓܪܐ ܐܡܪܝܢ ܚܢ̈ܦܐ
                    ܡܢ ܒܬܪ ܦܓܪܐ ܐܡܪܝܢ ܡܠܦܢ̈ܐ ܣܘܪ̈ܝܝܐ
                    ܥܡܗ ܕܦܓܪܐ ܐܡܪܝܢ ܡܠܦܢ̈ܐ ܝܘܢ̈ܝܐ ܐܟܚܕܐ ܘܫܘܝܐܝܬ
                
                
                     f.54a  ܡܝܬܝܢܢ ܗܟܝܠ ܠܡ̈ܠܐ ܕܦܝܠܘܟܣܝܢܘܣ ܕܐܝܬܘܗܝ ܡܠܦܢܐ ܣܘܪܝܝܐ ܕܐܡܪ ܒܟܬܒܐ
                    ܕܝܠܗ ܕܦܘܫܩܐ ܕܐܘܢܓܠܝܘܢ ܗܟܢܐ: ܕܩܕܡܐܝܬ ܡܬܒܪܐ ܦܓܪܐ ܘܡܨܛܠܡ ܒܟܠ ܗܕܡ̈ܝܢ ܘܟܢ ܡܬܒܪܝܐ ܒܗ
                    ܢܦܫܐ ܡܢ ܠܐ ܡܕܡ. ܒܕܟܪܐ ܡܢ ܠܐܪܒܥܝܢ ܝܘܡܝ̈ܢ. ܒܢܩًܒܬܐ ܕܝܢ ܠܬܡܢܝܢ ܝܘܡܝ̈ܢ. ܘܒܕܓܘܢ ܘܐܦ
                        ܒܟܬܒܐ1 ܣܦܪܐ
                            ܕܟܗܢ̈ܐ:12:5 - 2 ܠܗܢܐ ܟܕ ܢܕܥ ܠܗ ܠܗܕܐ ܒܕܘܟ ܡܢ ܠܒܪ ܐܡܪ: ܠܗܿܝ
                    ܕܠܕܟܪܐ ܝܠܕܐ ܗܘܬ ܠܐܪܒܥܝܢ ܝܘܡܝ̈ܢ ܬܬܒ ܥܠ ܕܡܐ ܕܟܝܐ ܦܩܕ ܗܘܐ. ܐܝܟ ܐܝܕܐ ܕܒܝܘܡܬܐ ܗܢܘܢ
                    ܟܠܗܘܢ. ܠܦܓܪܐ ܡܝܬܐ ܣܛܪ ܡܢ ܢܦܫܐ ܛܥܝܢܐ ܗܘܬ. ܒܕܘܟ ܕܝܢ ܬܘܒ: ܐܢ ܢܡܚܘܢ ܬܪܝܢ ܓܒܪ̈ܝܢ
                    ܐܢܬܬܐ ܕܒܛܢܐ ܘܢܦܩܘܢ ܥܘܠܗܿ. ܐܢܗܘ ܡܢ ܕܗܿܘܐ ܩܐܪܣܐ. ܡܫܠܡܘ ܢܫܠܡ. ܐܢܕܝܢ ܠܐ ܗܿܘܐ ܩܐܪܣܐ
                    ܡܬܚܣܪܘ ܢܬܚܣܪ ܐܘ ܟܡܐ ܕܪܡܐ ܥܠܘܗܝ ܒܥܠܗܿ ܕܐܢܬܬܐ2 ܣܦܪܐ ܕܡܦܩܢܐ: 22:21. ܘܗܿܝ ܡܢ ܕܗܿܘܐ
                    ܩܐܪܣܐ ܡܫܡܗ ܠܡܬܬܙܝܥܢܘܬܐ ܕܗܿܘܝܐ ܠܦܓܪܐ ܒܒܪܝܬܗܿ ܕܢܦܫܐ. ܗܿܝ ܕܝܢ ܕܠܐ ܗܿܘܐ ܩܐܪܣܐ. ܠܗܿܝ
                    ܕܣܟ ܠܐ ܢܬܬܙܝܥ ܥܘܠܐ ܒܝܕ ܢܦܫܐ ܡܢ ܟܕܘ ܩܛܠܐ ܩܛܠ. ܘܒܪܢܫܐ ܐܘܒܕ ܡܬܩܛܠܘ ܢܬܩܛܠ. ܐܦ ܗܘ
                    ܐܢܕܝܢ ܠܐ ܗܘܬ ܡܬܬܙܝܥܢܘܬܐ ܥܕܟܝܠ ܒܝܕ ܢܦܫܐ. ܠܘ ܩܛܠܐ ܡܢ ܩܛܠ ܗ ܠܒܪܢܫܐ ܚܝܐ ܘܡܠܝܠܐ ܐܠܐ
                    ܠܦܓܪܐ ܡܝܬܐ ܒܠܚܘܕ ܐܘ ܠܠܐ ܡܢܦܫܐ ܐܟܝ. ܘܐܠܘ ܩܕܡܝܐ ܗܘܬ ܢܦܫܐ ܟܐ ܒܝܬܗܿ ܠܦܓܪܐ  f.54b  ܠܐ ܐܡܪ ܗܘܐ ܡܘܫܐ ܕܓܒܠ ܐܠܗܐ ܥܦܪܐ ܘܟܢ ܡܝܬܐ ܗܿܝ ܕܢܦܚ ܒܐܦܘܗܝ. ܘܬܘܒ
                    ܕܙܟܪܝܐ ܠܐ ܐܡܪ ܗܘܐ: ܕܒܪܐ ܪܘܚܗ ܕܒܪܢܫܐ ܒܓܘܗ1 ܙܟܪܝܐ ܢܒܝܐ: 1:12. ܘܗܠܝܢ ܡ̈ܠܐ ܐܝܬܝܗܝܢ
                    ܕܦܝܠܘܟܣܝܢܘܣ ܕܡܚܘܐ ܕܦܓܪܐ ܡܬܓܒܠ ܩܕܡܐܝܬ. ܘܡܢ ܒܬܪܟܢ ܡܬܒܪܝܐ ܒܗ ܢܦܫܐ ܡܢ ܪܡܙܗ ܕܒܪܘܝܐ.
                    ܗܟܢܐ ܘܐܦ ܐܟܘܬܗ ܐܡܪܝܢ ܡܪܝܐ ܐܦܪܝܡ ܘܡܪܝ ܝܥܩܘܒ ܕܣܪܘܓ ܒܕܘܟܝ̈ܬܐ ܣܓܝ̈ܐܬܐ. ܗܘ ܗܟܘܬ ܐܦ
                    ܬܐܘܕܪܝܛܐ ܕܩܘܪܘܣ ܘܢܣܛܘܪܝܘܣ ܗܪܛܝܩܐ. ܡܠܦܢ̈ܐ ܕܝܢ ܝܘܢ̈ܝܐ ܐܡܪܝܢ ܕܠܐ ܩܕܝܡܐ ܢܦܫܐ ܠܦܓܪܐ.
                    ܐܘ ܐܦܠܐ ܦܓܪܐ ܠܢܦܫܐ. ܐܠܐ ܐܟܚܕܐ ܫܘܝܐܝܬ ܡܬܟܢܫܝܢ ܠܚܕܝܘܬܐ ܟܕ ܦܓܪܐ ܡܬܓܒܠ ܡܢ ܡܕܡ.
                    ܓܪܝܓܘܪܝܘܣ ܬܐܘܠܘܓܘܣ ܐܡܪ ܒܡܐܡܪܐ ܕܥܠ ܡܠܬܐ ܕܐܘܢܓܠܝܘܢ ܗܟܢܐ: ܕܚܠ ܐܢܐ ܕܠܡܐ ܚܘܫܒܐ ܡܕܡ
                    ܕܠܐ ܘܠܝܬܐ ܢܥܘܠ ܐܝܟ ܗܿܘ ܕܢܦܫܐ ܒܕܘܟܬܐ ܐܚܪܬܐ ܢܚܬܬ. ܘܟܢ ܒܦܓܪܐ ܐܬܐܣܪܬ. ܘܡܢ ܕܘܒܪܐ ܕܬܡܢ
                    ܐܢܫ̈ܝܢ ܡܢ ܣܡܘ ܢܒܝܘܬܐ. ܐܚܪ̈ܢܐ ܕܝܢ ܐܬܚܝܒܘ. ܐܝܟ ܡܢ ܕܒܝܫܐܝܬ ܐܬܕܒܪܘ. ܐܠܐ ܡܛܠ ܕܗܕܐ
                    ܢܬܚܫܚ ܣܓܝ ܫܟܝܪܐ ܘܠܐ ܥܕܬܢܝܐ. ܐܚܪ̈ܢܐ ܡܢ ܓܝܪ ܒܝܘܠܦܢܐ ܢܨܛܕܘܢ. ܠܢ ܕܝܢ ܕܟܕ ܐܝܟ ܗܠܝܢ
                    ܢܨܛܕܐ ܠܘ ܙܗܝܪܘܬܐ ܗܝ܆ ܓܪܝܓܘܪܝܘܣ ܕܝܢ ܕܢܘܣܐ ܐܡܪ ܒܡܐܡܪܐ ܕܥܠ ܬܘܩܢܗ ܕܒܪܢܫܐ ܗܟܢܐ: ܫܦܪܐ
                    ܠܐܢܫ̈ܝܢ ܠܗܘܢ ܕܡܠܬܐ ܕܡܛܠ ܐܪܟܘܣ ܐܬܬܓܪܬ ܐܝܟ ܟܝܢܐ ܡܕܡ ܡܩܝܡܝܢ ܢܦܫ̈ܬܐ  f.55a 
                    ܒܕܘܝܪܐ ܕܝܠܢܝܐ ܘܣܡ ܐܦ ܬܡܢ ܩܕܡܝܗܝܢ ܬܚܘܝ̈ܬܐ ܕܒܝܫܘܬܐ ܘܕܡܝܬܪܘܬܐ. ܘܟܕ ܡܟܬܪܐ ܢܦܫܐ
                    ܒܛܒܬܐ܆ ܠܐ ܡܢܣܝܬܐ ܗܿܘܝܐ ܕܥܘܪܙܠܐ ܕܥܡ ܦܓܪܐ. ܐܢ ܕܝܢ ܬܘܒ ܡܢ ܫܘܬܦܘܬܐ ܕܛܒܬܐ ܐܫܬܪܓܠܬ ܠܘܬ
                    ܚܝ̈ܐ ܕܬܢܢ ܘܠܦܓܪܐ ܐܫܬܪܓܠ. ܘܒܕܓܘܢ ܕܩܕܝܡܐ ܠܦܓܪܐ ܐܡܪܝܢ ܗܕܐ ܐܝܟ ܕܠܒܝܬ ܚܒܘܫܝܐ ܕܒܝܬ
                    ܐܣܝܪ̈ܐ ܐܬܬ ܠܗܿ. ܐܚܪ̈ܢܐ ܕܝܢ ܟܕ ܡܨܛܪܝܢ ܒܡܠܬܗ ܕܡܘܫܐ ܕܡܛܠ ܬܘܩܢܗ ܕܒܪܢܫܐ ܬܪܝܢܝܬܐ ܕܦܓܪܢ
                    ܐܡܪܝܢ ܕܐܝܬܝܗܿ ܢܦܫܐ ܒܙܒܢܐ ܕܐܬܓܒܠ ܥܡ ܦܓܪܐ. ܘܒܬܪܟܢ ܢܦܫܐ ܒܝܕ ܡܦܘܚܝܬܐ. ܘܡܛܠ ܦܓܪܐ ܠܡ
                    ܗܘܬ ܢܦܫܐ ܕܢܬܬܙܝܥ. ܟܠ ܡܕܡ ܕܝܢ ܕܡܛܠ ܡܕܡ ܗܿܘܐ. ܐܝܟ ܕܐܡܪ ܐܘܢܓܠܝܘܢ ܕܡܝܬܪܐ ܢܦܫܐ ܡܢ
                    ܣܝܒܪܬܐ ܘܦܓܪܐ ܡܢ ܠܒܘܫܐ1 ܡܬܝ: 25:6. ܡܛܠ ܗܘܠܐ ܕܒܬܪ̈ܬܝܗܝܢ ܗܠܝܢ ܡܣܒܪ̈ܢܘܬܐ ܬܚܝܬ ܥܕܠܝܐ
                    ܗܝ ܡܠܬܐ. ىܡܪܝܢܢ ܕܠܐ ܢܦܫܐ ܩܕܡ ܠܦܓܪܐ. ܘܠܐ ܦܓܪܐ ܩܕܡ ܢܦܫܐ. ܐܠܐ ܐܝܟܢܐ ܕܒܚܛܬܐ ܟܠܗ ܐܕܫܐ
                    ܕܫܒܠܐ ܐܡܪܝܢܢ ܕܚܒܫ ܒܚܝܠܐ ܥܡܝܪܐ ܩܢܝܐ ܦܐܪܐ ܚܣܥܣܐ. ܘܠܐ ܐܡܪܝܢܢ ܕܩܕܝܡ ܡܕܡ ܡܢ ܗܠܝܢ ܠܡܕܡ
                    ܒܡܠܬܐ ܓܘܢܝܬܐ ܕܟܝܢܗܿ. ܘܒܬܪܟܢ ܐܬܬܘܣܦ ܠܟܝܢܗ ܕܙܪܥܐ. ܐܠܐ ܒܛܟܣܐ ܡܢ ܡܕܡ ܟܝܢܐ ܡܬܚܘܐ ܚܝܠܐ
                    ܗܿܘ ܕܣܝܡ ܒܗ ܒܙܪܥܐ. ܠܘ ܕܝܢ ܟܝܢܐ ܐܚܪܢܐ ܡܬܬܘܣܦ ܠܡܥܠ. ܗܟܢܐ  f.55b  ܘܙܪܥܐ
                    ܐܢܫܝܐ ܡܙܕܪܥ ܡܢ ܥܠܬܐ ܩܕܡܝܬܐ ܗܿܝ ܕܩܘܝܡܗܿ ܚܝܠܐ ܕܟܝܢܐ ܡܬܦܪܣ ܘܡܬܚܘܐ ܟܕ ܡܫܬܘܫܛ ܒܝܕ
                    ܢܩܝܦܘܬܐ ܟܝܢܝܬܐ ܗܿܝ ܕܡܫܡܠܝܐ. ܕܝܠܗ ܟܕىܕܝܠܗ ܡܢܗ ܟܕ ܡܢܗ ܡܬܐܡܪܐ. ܗܠܝܢ ܟܕ ܩܡܘ ܚܠܦ ܗܿܝ
                    ܡܠܬܐ ܩܕܡܝܬܐ. ܘܕܩܫܝܫ ܡܢ ܚܝ̈ܠܐ ܕܒܦܓܪܐ ܘܕܘܒܪܐ ܕܢܦܫܐ ܡܠܦܝܢ. ܠܐ ܡܣܬܒܪܐ ܠܝ ܕܕܟܝܢ ܡܢ
                    ܝܘܠܦܢܐ ܕܚܢ̈ܦܐ. ܡܛܠ ܗܕܐ ܡܡܬܠܝܢ ܠܗܘܢ. ܐܢ ܓܝܪ ܐܢܫ ܠܗܠܝܢ ܚܬܝܬܐܝܬ ܢܥܩܒ ܠܘܬ ܗܕܐ ܡܫܟܚ
                    ܠܗܿ ܕܡܢ ܟܠܦܪܘܣ ܠܡܠܬܗܘܢ ܕܡܫܬܪܓܠܐ ܠܗܿܝ ܕܐܡܪܝܢ ܕܐܢܫ ܡܢ ܚܟܝ̈ܡܐ ܕܠܘܬܗܘܢ ܐܡܪ ܕܗܘ ܟܕ ܗܘ
                    ܓܒܪܐ ܘܓܘܫܡܐ ܕܐܢܬܬܐ ܐܬܥܛܦ ܘܥܡ ܦܪ̈ܚܬܐ ܦܪܚ. ܘܐܝܠܢ̈ܐ ܐܘܥܝ. ܘܚܝ̈ܐ ܕܒܡ̈ܝܐ ܗܘܘ ܠܗ.
                    ܩܕܝܫܐ ܕܝܢ ܩܘܪܝܠܘܣ ܒܟܬܒܐ ܕܦܘܫܩܐ ܕܐܘܢܓܠܝܘܢ ܕܝܘܚܢܢ ܐܝܟܐ ܕܣܝܡ ܠܗ ܠܒܘܚܢܐ ܦܬܓܡܐ ܗܿܘ
                    ܕܐܡܪ: ܗܿܘ ܕܡܢܗܪ ܠܟܠ ܒܪܢܫܐ ܕܐܬܐ ܠܥܠܡܐ1 ܝܘܚܢܢ:9:1. ܒܗܘܦܟ ܚܘܫ̈ܒܐ ܚܝ̈ܠܬܢܐ ܣܓܝ ܙܓܪ
                    ܠܗܕܐ ܬܘܕܝܬܐ. ܕܠܐ ܢܦܫ̈ܬܐ ܩܕܝ̈ܡܢ ܘܐܦܠܐ ܦܓܪ̈ܐ ܠܢܦܫ̈ܬܐ. ܐܢܕܪܘܢܝܩܘܣ ܕܝܢ ܐܦܣܝܩܘܦܐ
                    ܕܓܘܓܪܢ ܒܟܬܒܐ ܗܿܘ ܕܟܬܝܒ ܥܠܘܗܝ ܡܣܟܝܢܘܬܐ ܕܝܕܥܬܐ ܕܓܠܬ ܫܡܐ ܐܡܪ ܗܟܢܐ: ܣܦܩܐܝܬ ܕܝܢ ܗܘ
                         f.56a  ܡܪܝܐ ܐܠܦ ܕܠܘ ܒܠܚܘܕ ܕܠܐ ܥܒܘܪܝܐ ܡܟܬܪ̈ܢ ܢܦܫ̈ܬܐ ܐܠܐ ܘܕܗܝ ܨܘܪܬܗ
                    ܕܦܓܪܐ ܗܝ ܕܒܗܿ ܡܬܬܚܡܝܢ ܗܝ ܟܕ ܗܝ ܡܬܢܛܪܐ. ܘܕܥܗܕܢ ܠܣܘܥܪ̈ܢܐ ܕܣܥܪ̈ܝ ܬܢܢ. ܒܗܿܘ ܡܐ ܕܫܒܩ
                    ܒܬܫܥܝܬܐ ܕܡܛܠ ܥܬܝܪܐ ܘܠܥܙܪ ܗܿܘ ܕܒܥܘܒܗ ܕܐܒܪܗܡ ܐܬܬܢܝܚ. ܩܕܝܫܐ ܕܝܢ ܣܐܘܝܪܐ ܐܡܪ ܒܐܓܪܬܐ
                    ܕܠܘܬ ܣܝܡܘܣ ܐܣܩܝ ܢܝܪܐ ܗܟܢܐ: ܒܥܘܬܕܐ ܕܒܪܢܫܐ. ܠܐ ܢܦܫܐ ܡܠܝܠܬܐ ܩܕܡ ܓܘܫܡܐ ܩܕܡܐܝܬ ܡܬܒܪܐ.
                    ܘܠܐ ܩܕܡ ܢܦܫܐ ܠܦܓܪܐ ܡܬܓܒܠ. ܐܠܐ ܐܡܪܝܢ ܐܢܫ̈ܝܢ ܕܒܗܿܝ ܕܐܡܪ ܟܬܒܐ: ܕܓܒܠ ܐܠܗܐ ܠܐܕܡ.
                    ܘܒܬܪܟܢ ܢܦܚ ܐܝܟ ܕܒܓܒܝܠܬܐ ܡܢ ܩܕܝܡ ܡܢܦܫܘܬܐ ܕܝܢ ܢܦܩܐ ܒܛܟܣܐ ܕܬܪܝܢ. ܕܥ ܕܝܢ ܕܟܬܒܐ ܒܡ̈ܠܐ
                    ܐܢܫ̈ܝܬܐ ܡܬܢܐ ܠܗܠܝܢ ܐܠܗܝ̈ܬܐ. ܘܠܐ ܡܫܟܚ ܕܡܢܫܝܠ ܟܠ ܢܫܬܥܐ ܘܒܚܣܝܪܘܬܐ ܕܡ̈ܠܐ ܠܐ ܡܫܟܚ
                    ܕܢܚܘܐ ܐܘ ܡܕܪܟ ܚܣܝܪܘܬܐ ܕܣܥܘܪ̈ܘܬܐ ܕܠܥܠ ܡܢ ܟܠ ܗܘܠܐ ܘܡܠܬܐ. ܐܠܐ ܕܥ ܕܗܿܘ ܪܡܙܐ ܩܕܡܝܐ.
                    ܘܚܐܦܐ ܕܨܒܝܢܐ ܫܘܠܡܐ ܕܗܿܘ ܕܡܬܒܪܐ ܐܝܬܘܗܝ. ܘܠܗ ܠܟܬܒܐ ܡܫܟܚܝܢܢ ܕܐܟܚܕܐ ܠܟܠ ܡܕܡ ܡܫܟܢܐܝܬ
                    ܐܡܪ ܠܘܬ ܐܝܘܒ: ܐܘ ܐܦ ܛܝܢܐ ܕܐܪܥܐ ܢܣܒܬ ܘܓܒܠܬ ܚܝܘܬܐ ܡܠܝܠܬܐ ܘܣܡܬܗܿ ܥܠ ܐܪܥܐ. ܘܚܘܝ
                    ܒܗܠܝܢ ܕܥܡ ܓܒܝܠܬܐ. ܪܗܛܐ ܐܟܚܕܐ ܡܢܦܫܘܬܐ. ܡܕܝܢ ܡܦܘܚܝܬܐ ىܐܠܗܝܬܐ ܥܒܘܕܬܐ ܕܢܦܫܐ ܕܒܪܢܫܐ
                    ܗܘܬ.  f.56b  ܚܣܝܐ ܕܝܢ ܬܘܒ ܝܥܩܘܒ ܕܐܘܪܗܝ ܒܐܓܪܬܐ ܕܠܘܬ ܝܘܚܢܢ ܕܐܠܝܬܐܪܒ ܐܡܪ
                    ܗܟܢܐ: ܠܝܘܡܐ ܐܘܟܝܬ ܡܣܒܪܢܘܬܐ ܕܝܠܝ ܐܝܬܝܗܿ ܒܦܣܝ̈ܩܬܐ ܕܠܐ ܢܦܫܐ ܩܕܝܡܐ ܠܦܓܪܐ ܒܒܪܝܬܗܿ.
                    ܘܐܦܠܐ ܬܘܒ ܦܓܪܐ ܠܢܦܫܐ ܩܕܝܡ. ܗܿܝ ܓܝܪ ܕܡܕܡ ܕܐܝܟ ܗܟܢ ܢܬܪܥܐ ܐܢܫ ܣܟ ܡܣܠܝܬܐ ܕܐܢ ܐܢܐ
                    ܕܐܝܬܝܗܿ. ܘܕܠܒܪ ܡܢ ܕܪܬܐ ܕܝܠܢ. ܘܬܪ̈ܬܝܗܝܢ ܗܠܝܢ ܗܪ̈ܣܝܣ ܡܣܠܝ̈ܬܐ ܐܢܝܢ. ܘܗܿܝ ܟܝܬ ܕܐܡܪܐ
                    ܕܩܕܝ̈ܡܢ ܢܦܫ̈ܬܐ ܠܦܓܪ̈ܐ ܐܝܟ ܚܢ̈ܦܐ. ܘܗܿܝ ܕܦܓܪ̈ܐ ܩܕܝ̈ܡܢ ܠܢܦܫ̈ܬܐ. ܘܡܛܠܬܗܘܢ ܐܬܒܪ̈ܝܝܢ
                    ܢܦܫ̈ܬܐ. ܐܠܐ ܒܪܡܙܐ ܩܠܝܠܐ ܐܬܒܪܝܘ ܘܡܬܒܪܝܢ ܦܓܪ̈ܐ ܐܟܚܕܐ ܘܢܦܫ̈ܬܐ. ܒܪܡ ܙܕܩ ܠܡܕܥ ܕܬܠܬܐ
                    ܚܝ̈ܠܐ ܐܝܬ ܠܢܦܫܐ ܡܐܠܠܘܢ ܕܝܢ ܐܝܟ ܗܿܘ ܕܬܠܬܐ ܙܢܝ̈ܐ ܕܢܦܫܐ܆ ܐܝܬܝܗܘܢ ܚܕ ܡܢ ܡܬܪܣܝܢܐ
                    ܘܡܪܒܝܢܐ ܗܿܘ ܕܐܦ ܢܨܒܬܢܝܐ ܡܫܬܡܗ. ܐܚܪܢܐ ܕܝܢ ܡܪܓܫܢܐ ܘܡܬܬܙܝܥܢܐ ܗܿܘ ܟܝܬ ܕܐܦ ܐܣܛܘܟܣܝܐ
                    ܐܘܟܝܬ ܚܝܘܬܢܝܐ ܡܬܩܪܐ. ܗܿܘ ܕܝܢ ܐܚܪܢܐ ܡܠܝܠܐ ܘܚܫܘܒܬܢܐ ܗܿܘ ܕܢܦܫܐ ܐܢܫܝܬܐ ܡܨܠܡܬ ܒܐܠܗܐ
                    ܡܫܡܗܝܢܢ ܠܗܿ. ܟܕ ܗܟܝܠ ܐܡܪܝܢܢ ܟܕ ܬܠܬܝ̈ܗܘܢ ܗܠܝܢ ܚܝ̈ܠܐ ܐܘܟܝܬ ܙܢܝ̈ܐ ܐܝܬ ܒܢܦܫܐ ܐܢܫܝܬܐ.
                    ܡܠܠܘܢ ܕܝܢ ܕܟܠܗܘܢ ܗܠܝܢ ܐܝܬܝܗܿ ܗ ܚܝܠܐ ܡܪܒܝܢܐ ܘܡܬܪܣܝܢܐ ܘܚܝܠܐ ܡܪܓܫܢܐ ܘܡܬܬܙܝܥܢܐ ܘܚܝܐ
                    ܡܠܝܠܐ ܘܚܫܘܒܬܢܐ. ܐܢܗܘ ܕܐܝܬ ܐܢܫ̈ܝܢ ܡܢ ܡܠܦܢ̈ܐ  f.57a  ܐܘ ܝܘܢܝ̈ܐ ܐܘ ܣܘܪ̈ܝܝܐ
                    ܕܟܕ ܚܝܪܝܢ ܒܫܘܚ̈ܠܦܐ ܕܗܠܝܢ ܬܠܬܐ ܚܝ̈ܠܐ ܐܘܟܝܬ ܙܢܝ̈ܐ ܕܢܦܫ̈ܬܐ ܐܡܪܘ ܕܒܕܘܪܓܐ ܕܒܩܠܝܠ ܩܠܝܠ
                    ܐܝܟ ܕܒܛܟܣܐ ܡܕܡ ܗܘܝ ܡܬܓܠܝܢ̈ܘܬܐ ܕܡܥܒܕܢܘܬܐ ܕܚܝ̈ܠܐ ܗܠܝܢ. ܗܿܘ ܢܨܒܬܢܝܐ ܘܡܪܒܝܢܐ ܒܪܡܝܗ
                    ܕܙܪܥܐ. ܘܒܬܪܗ ܕܗܿܘ ܩܠܝܠ ܡܪܓܫܢܐ ܘܡܬܬܙܝܥܢܐ. ܘܡܚܕܐ ܒܬܪ ܗܢܐ ܗܿܘ ܡܠܝܠܐ ܘܚܫܘܒܬܢܐ. ܩܠܝܠ
                    ܩܕܡ ܝܠܕܐ ܘܒܐܝܕܐ ܒܐܝܕܐ ܒܬܪ ܝܠܕܐ ܠܕܘܪܓܐ ܗܢܐ ܘܩܕܝܡܘܬܐ ܘܐܚܪܝܘܬܐ ܘܡܬܓܠܝܢܘܬܐ ܕܚܝ̈ܠܐ
                    ܗܠܝܢ ܩܪܘ ܢܦܫܐ. ܐܝܕܐ ܕܐܦ ܟܬܒܐ ܕܐܢ ܡܛܠ ܗܢܘܢ ܕܒܡܨܘܬܐ ܡܚܝܢ ܠܢ̈ܫܐ ܘܚܝܛܝܢ. ܕܐܢ ܡܨܠܡ
                    ܢܬܠ ܛܝܡ̈ܝ ܢܦܫܐ. ܘܐܢ ܕܝܢ ܠܐ ܢܚܣܪ ܡܢܬܐܝܬ. ܗܿܝ ܕܐܝܟ ܕܐܢ ܠـܨܠܡ ܐܘ ܠܐ. ܠܓܘ ܡܢ ܡܢܝܢܐ
                    ܕܐܪܒܥܝܢ ܐܡܪܝܢ ܚܟܝ̈ܡܐ ܕܐܬܝܗܿ. ܗܠܝܢ ܗܟܝܠ ܐܝܬܝܗܝܢ ܡ̈ܠܐ ܕܡܠܦܢ̈ܐ ܣܘܪ̈ܝܝܐ ܘܝܘܢܝ̈ܐ ܐܡܪ
                    ܐܢܐ. ܟܕ ܗܢܘܢ ܡܢ ܐܡܪܝܢ ܕܦܓܪܐ ܡܬܓܒܠ ܩܕܡܐܝܬ ܒܬܪܟܢ ܡܬܒܪܝܐ ܒܗ ܢܦܫܐ ܡܢ ܠܐ ܡܕܡ. ܗܿܠܝܢ
                    ܕܐܡܪܝܢ ܕܐܟܚܕܐ ܒܫܘܝܘܬܐ ܡܬܓܒܠ ܦܓܪܐ ܘܡܬܒܪܝܐ ܒܗ ܢܦܫܐ ܡܢ ܠܐ ܡܕܡ. ܟܕ ܠܝܬ ܒܗܘܢ ܕܩܕܝܡ ܡܢ
                    ܚܒܪܗ. ܘܐܦܠܐ ܕܒܬܪ ܡܢ ܚܒܪܗ. ܐܠܐ ܒܫܘܝܘܬܐ ܕܐܟܚܕܐ ܬܪ̈ܝܗܘܢ ܪܗܛܝܢ ܠܘܬ ܚܕܝܘܬܐ. ܟܕ ܦܓܪܐ
                    ܡܢ ܡܬܓܒܠ ܡܢ ܙܪܥܐ. ܢܦܫܐ ܕܝܢ ܡܢ ܠܐ ܡܕܡ. ܚܢܢ ܕܝܢ ܠܗܠܝܢ ܡܠܦܢ̈ܐ ܝܘܢܝ̈ܐ ܕܐܡܪܝܢ ܕܐܟܚܕܐ
                    ܒܫܘܝܘܬܐ ܡܬܓܒܠ ܦܓܪܐ ܘܡܬܒܪܝܐ ܒܗ ܢܦܫܐ ܫܠܡܝܢܢ ܘܢܩܦܝܢܢ. ܘܥܠ ܙܘܕܩܗܘܢ ܡܬܬܘܣܦܝܢܢ. ܘܐܦ
                    ܐܡܪܝܢܢ ܡܚܘܝܢ̈ܘܬܐ ܥܠ ܗܕܐ ܬܪܥܝܬܐ ܕܫܪܝܪܬܐ ܐܝܬܝܗܿ. ܩܕܡܐܝܬ ܡܢ ܐܡܪܝܢܢ ܠܘܩܒܠ ܐܝܠܝܢ
                    ܕܐܡܪܘ ܕܢܦܫܐ ܩܕܝܡܐ ܒܒܪܝܬܗܿ ܠܦܓܪܐ ܡܛܠ ܕܠܘ ܒܠܚܘܕ ܚܢ̈ܦܐ ܩܕܡܝ̈ܐ ܐܡܪܘܗܿ ܠܗܕܐ ܐܠܐ ܘܐܦ
                    ܐܢܫ̈ܝܢ ܒܙܒܢܐ ܕܝܠܢ ܕܡܫܬܡܗܝܢ ܟܪ̈ܝܣܛܝܢܐ ܟܕ ܐܝܬܝܗܘܢ ܗܪܛܝܩܘ. ܡܚܘܝܢ ܠܡ ܗܟܝܠ ܗܠܝܢ
                    ܕܩܕܝܡܐ ܢܦܫܐ ܠܦܓܪܐ ܒܒܪܝܬܗܿ ܡܢ ܬܠܬܐ ܣܥܝ̈ܐ. ܣܥܝܗܘܢ ܕܝܢ ܩܕܡܐܝܬ ܐܝܬܘܗܝ ܗܢܐ: ܐܡܪ ܠܡ
                    ܡܘܫܐ ܕܒܪܐ ܐܠܗܐ ܠܗܕܐ ܒܪܝܬܐ ܒܫܬܐ ܝܘܡ̈ܬܐ ܘܫܠܡܗܿ ܒܝܘܡܐ ܫܬܝܬܝܐ1 ܒܪܝܬܐ:2:2 ܘܡܢ ܗܿܘ ܝܘܡܐ
                    ܘܠܟܐ ܠܐ ܒܪܐ ܡܕܡ. ܐܢ ܐܪܐ ܫܪܝܪܐ ܗܿܝ ܕܐܡܪܘ ܕܫܠܡ ܐܠܗܐ ܒܝܘܡܐ ܫܬܝܬܝܐ ܥܒܕܘܗܝ ܟܠܗܝܢ
                    ܕܥܒܕ. ܘܒܬܪ ܫܘܠܡܐ ܠܝܬ ܡܕܡ ܐܚܪܢܐ. ܝܕܝܥ ܕܠܐ ܒܪܐ ܒܬܪ ܝܘܡܐ ܗܿܘ ܫܬܝܬܝܐ ܢܦܫ̈ܬܐ. ܡܕܝܢ
                    ܩܕܝ̈ܡܢ ܒܪ̈ܝܢ ܢܦܫ̈ܬܐ ܡܢ ܩܕܡ ܦܓܪ̈ܐ. ܚܢܢ ܕܝܢ ܫܪܝܢܢ ܠܣܥܝܗܘܢ ܗܢܐ ܗܟܢܐ: ܕܗܿܝ ܕܐܡܪ
                    ܡܘܫܐ: ܕܫܠܡ ܐܠܗܐ ܒܝܘܡܐ ܫܬܝܬܝܐ ܥܒܕܘܗܝ ܟܠܗܘܢ ܕܥܒܕ. ܗܢܐ ܐܝܬܘܗܝ ܣܩܘܒܠܗܿ ܕܫܠܡ ܟܠܗܝܢ
                    ܒܪ̈ܝܬܐ ܕܒܪܐ ܒܝܘܡܐ ܗܿܘ  f.58a  ܫܬܝܬܝܐ ܘܡܢܗ ܘܠܟܐ ܠܐ ܒܪܐ ܒܪܝܬܐ ܐܚܪܬܐ ܕܠܐ
                    ܐܬܒܪܝܬ ܡܢܗ ܒܐܫܬܐ ܝܘܡܐ. ܐܠܘ ܓܝܪ ܢܦܫ̈ܬܐ ܕܒܪܐ ܝܘܡܢ ܒܪ̈ܝܬܐ ܚܕܬܬܐ ܐܝܬܝ̈ܗܝܢ ܗܘܝ ܕܠܐ
                    ܐܬܒܪ̈ܝܢ ܒܐܫܬܐ ܝܘܡܐ. ܡܬܕܓܠܐ ܗܘܬ ܗܿܝ ܕܐܡܪ ܡܘܫܐ ܕܒܝܘܡܐ ܫܬܝܬܝܐ ܫܠܡ ܐܠܗܐ ܥܒܕܘܗܝ ܕܥܒܕ.
                    ܡܛܠ ܕܝܢ ܕܠܘ ܒܪ̈ܝܬܐ ܚܕܬܬܐ ܐܝܬܝܗܝܢ ܢܦܫ̈ܬܐ ܕܒܪܐ ܝܘܡܢ ܒܗܿܝ ܕܒܗ ܒܝܘܡܐ ܫܬܝܬܝܐ ܒܪܐ
                    ܠܢܦܫܐ ܕܐܕܡ ܘܠܢܦܫܐ ܕܚܘܐ ܕܫܘܝܢ ܒܟܝܢܐ ܠܢܦܫ̈ܬܐ ܕܒܪܐ ܝܘܡܢ. ܒܗܿܝ ܕܒܗ ܒܝܘܡܐ ܫܬܝܬܝܐ ܒܪܐ
                    ܐܢܝܢ. ܐܫܬܪܪܬ ܘܫܪܬ ܗܿܝ ܕܐܡܪ ܡܘܫܐ ܕܫܠܡ ܐܠܗܐ ܒܝܘܡܐ ܫܬܝܬܝܐ ܥܒܕܘܗܝ ܕܥܒܕ. ܒܗܿܝ ܕܠܐ ܒܪܐ
                    ܡܢ ܒܬܪ ܗܿܘ ܝܘܡܐ ܫܬܝܬܝܐ ܒܪܝܬܐ ܚܕܬܐ ܕܠܐ ܐܬܒܪܝܬ. ܘܫܪܬ ܬܘܒ ܗܿܝ ܕܐܡܪܝܢܢ ܕܒܪܐ ܢܦܫ̈ܬܐ
                    ܐܡܝܢܐܝܬ ܝܘܡܢ ܡܛܠ ܕܠܘ ܒܪܝܬܐ ܕܠܐ ܐܬܒܪܝܬ ܒܫ̈ܬܐ ܝܘܡ̈ܝܢ ܐܝܬܝܗܝܢ. ܡܕܝܢ ܠܐ ܩܕܝ̈ܡܢ
                    ܢܦܫ̈ܬܐ ܠܦܓܪ̈ܐ ܒܒܪ̈ܝܬܗܝܢ. ܘܬܘܒ ܫܪܝܪܐ ܕܒܪܐ ܐܠܗܐ ܢܦܫ̈ܬܐ ܝܘܡܢܐ ܡܢ ܡܠܬܗ ܕܙܟܪܝܐ ܢܒܝܐ
                    ܕܐܡܪ: ܕܒܪܐ ܪܘܚܗ ܕܒܪܢܫܐ ܒܓܘܗ1 ܙܟܪܝܐ:1:12. ܟܕ ܒܗܿܝ ܕܐܡܪ ܕܒܪܐ ܕܐܡܝܢܐܝܬ ܒܪܐ
                    ܪ̈ܘܚܬܐ ܕܒܢ̈ܝ ܐܢܫ̈ܐ ܫܘܕܥ. ܘܬܘܒ ܝܕܝܥܐ ܕܒܪܐ ܝܘܡܢ ܝܦܫ̈ܬܐ ܡܢ ܡܠܬܗ ܕܡܪܝܐ ܕܐܡܪ: ܕܐܒܝ
                    ܥܕܡܐ ܠܗܫܐ  f.58b  ܥܒܕ ܐܦ ܐܢܐ2 ܝܘܚܢܢ:17:5. ܟܕ ܒܗܿܝ ܕܐܡܪ ܕܥܒܕ ܐܢܐ ܬܠܬܐ
                    ܣܘܟܠܐ ܫܘܕܥ܆ܚܕܐ ܡܢ ܕܒܪܐ ܢܦܫ̈ܬܐ ܐܡܝܢܐܝܬ. ܕܬܪܬܝܢ ܕܝܢ ܕܗܿܝ ܕܒܛܝܠ ܠܗ ܥܠ ܒܪ̈ܝܬܗ ܘܡܕܒܪ
                    ܠܗܝܢ ܒܣܬܘܐ ܐܘ ܒܩܝܛܐ. ܘܒܙܪܥܐ ܘܒܚܨܕܐ ܘܒܡܛܪ̈ܐ ܕܡܚܬ ܘܢܗܪ̈ܘܬܐ ܕܡܕܪܐ. ܘܡܚܐ ܘܡܡܝܬ
                    ܘܕܫܪܟܐ. ܕܬܠܬ ܕܝܢ ܗܿܝ ܕܢܛܪ ܠܗܝܢ ܕܠܐ ܢܐܒܕܢ. ܣܥܝܐ ܕܝܢ ܕܬܪܝܢܐ ܐܝܬܘܗܝ ܗܢܐ ܒܫܘܪܝܐ ܠܡ
                    ܒܪܐ ܐܠܗܐ ܒܪܝܬܐ ܡܢ ܠܐ ܡܕܡ ܝܘܡܢ ܒܪܐ ܒܪ̈ܝܬܐ ܡܢ ܡܕܡ ܡܢ ܒܪܢܫܐ ܒܪܢܫܐ. ܘܡܢ ܣܘܣܝܐ ܣܘܣܝܐ.
                    ܘܡܢ ܬܘܥܣܘܬܐ ܒܩًܐ ܘܕܫܪܟܐ. ܘܐܢ ܡܢ ܫܘܪܝܐ ܡܢ ܠܐ ܡܕܡ ܒܪܐ ܠܒܪ̈ܝܬܐ ܘܝܘܡܢܐ ܡܢ ܡܕܡ ܒܪܐ
                    ܠܗܝܢ. ܘܢܦܫ̈ܬܐ ܡܢ ܒܪ̈ܝܬܐ ܕܒܪ̈ܝܢ ܡܢ ܠܐ ܡܕܡ ܐܝܬܝܗܝܢ ܡܕܝܢ ܒܫܘܪܝܐ ܒܪ̈ܝܢ ܘܩܕܝ̈ܡܢ
                    ܒܒܪܝܬܗܝܢ ܠܦܓܪ̈ܐ. ܕܠܘ ܟܠܗܝܢ ܒܪ̈ܝܬܐ ܕܒܪܐ ܐܠܗܐ ܒܫܘܪܝܐ ܡܢ ܠܐ ܡܕܡ ܒܪܐ ܐܢܝܢ. ܡܢܗܝܢ ܡܢ
                    ܠܐ ܡܕܡ ܒܪܐ ܐܢܝܢ. ܡܢܗܝܢ ܡܢ ܡܕܡ. ܐܝܠܝܢ ܓܝܪ ܕܒܪܐ ܡܢ ܠܐ ܡܕܡ ܐܝܬܝܗܝܢ ܐܪܥܐ ܡܝ̈ܐ ܘܐܐܪ
                    ܘܢܘܪܐ. ܘܢܦܫ̈ܬܐ ܗܠܝܢ ܕܒܪܐ ܐܢܝܢ ܡܢ ܡܕܡ ܐܝܬܝܗܝܢ ܗܠܝܢ ܪܩܝܥܐ ܘܦܪ̈ܚܬܐ ܘܪ̈ܚܫܐ ܘܒܥܝܪܐ
                    ܘܐܝܠܢ̈ܐ ܘܥܣܒܐ ܘܕܫܪܟܐ. ܗܠܝܢ ܕܝܢ ܝܠܦܢܢ ܐܢܝܢ ܡܢ ܟܬܒܐ ܩܕܝܫܐ ܕܛܘܒܢܐ ܡܘܫܐ. ܡܕܝܢ ܒܫܘܪܝܐ
                    ܕܡܢܗܝܢ ܕܒܪ̈ܝܬܐ ܡܢ ܠܐ ܡܕܡ ܒܪܐ ܐܢܝܢ. ܘܡܢܗܝܢ  f.59a  ܡܢ ܡܕܡ. ܘܗܿܢܘ ܣܘܩܡܐ
                    ܬܪܝܨܐ܆ ܕܐܟܙܢܐ ܕܒܫܘܪܝܐ ܕܒܪ̈ܝܬܐ ܡܢ ܠܐ ܡܕܡ ܒܪܐ ܐܢܝܢ. ܘܡܢܗܝܢ ܡܢ ܡܕܡ. ܗܟܢܐ ܐܦ ܝܘܡܢ.
                    ܡܢܗܝܢ ܕܒܪ̈ܝܬܐ ܕܒܪܐ ܠܗܝܢ ܡܢ ܠܐ ܡܕܡ. ܐܡܪ ܐܢܐ ܕܝܢ ܕܢܦܫ̈ܬܐ. ܘܡܢܗܝܢ ܡܢ ܡܕܡ ܐܡܪ ܐܢܐ
                    ܦܓܪܐ ܕܒܢܝ̈ܢܫܐ ܘܕܚܝ̈ܘܬܐ ܠܐ ܡܠܝ̈ܠܬܐ ܘܕܫܪܟܐ. ܣܥܝܗܘܢ ܕܝܢ ܬܠܝܬܝܐ ܐܝܬܘܗܝ ܗܢܐ ܒܪܢܫܐ
                    ܡܪܟܒ ܡܢ ܐܪܒܥܐ ܐܣܛܘܟܣܐ ܘܡܢ ܢܦܫܐ ܡܠܝܠܬܐ. ܐܟܙܢܐ ܕܐܣܛܘܟܣܐ ܡܩܕܡܝܢ ܡܩܝܡܝܢ ܡܢ ܩܕܡ ܪܘܟܒܗ
                    ܕܒܪܐܢܫܐ ܗܟܢܐ ܐܦ ܢܦܫܐ ܩܕܝܡܐ ܢܦܫܐ ܠܦܓܪܐ ܠܡ. ܫܪܝܐ: ܠܐ ܕܡܝܐ ܬܚܘܝܬܟܘܢ. ܕܐܝܟܢܐ
                    ܕܐܣܛܘܟܣܐ ܩܕܝܡܝܢ ܠܪܘܟܒܗ ܕܒܪܢܫܐ ܗܟܢܐ ܘܐܦ ܢܦܫܐ ܡܠܝܠܬܐ. ܐܠܐ ܒܪܢܫܐ ܡܪܟܒ ܡܢ ܦܓܪܐ ܕܡܢ
                    ܐܪܒܥܐ ܐܣܛܘܟܣܐ ܘܡܢ ܢܦܫܐ ܡܠܝܠܬܐ. ܢܩܦܐ ܡܕܝܢ ܕܢܟܢܫ ܚܢܢ ܗܟܢܐ: ܕܐܝܟܢܐ ܕܦܓܪܐ ܠܐ ܩܕܝܡ
                    ܠܪܘܟܒܗ ܕܒܪܢܫܐ. ܗܟܢܐ ܘܐܦ ܢܦܫܐ ܡܠܝܠܬܐ. ܐܠܐ ܒܪܢܫܐ ܡܪܟܒ ܡܢ ܦܓܪܐ ܕܡܢ ܐܪܒܥܐ ܐܣܛܘܟܣܐ
                    ܘܡܢ ܢܦܫܐ ܡܠܝܠܬܐ. ܢܩܦܐ ܡܕܝܢ ܕܢܟܢܫ ܚܢܢ ܗܟܢܐ: ܕܐܝܟܢܐ ܕܦܓܪܐ ܠܐ ܩܕܝܡ ܠܪܘܟܒܗ ܕܒܪܢܫܐ
                    ܗܟܢܐ ܘܐܦܠܐ ܢܦܫܐ ܡܠܝܠܬܐ ܩܕܝܡܐ ܠܪܘܟܒܗ. ܒܕܓܘܢ ܗܕܐ ܬܚܘܝܬܐ ܠܡܠܬܢ ܢܩܦܐ ܘܠܘ ܠܕܝܠܟܘܢ.
                    ܡܕܝܢ ܠܐ ܩܕܝܡܐ ܢܦܫܐ ܠܦܓܪܐ ܒܒܪܝܬܐ ܕܝܠܗܿ. ܬܘܒ ܐܡܪܝܢܢ ܠܘܬܗܘܢ: ܕܐܠܘ ܩܕܝܡܐ ܗܘܬ ܢܦܫܐ
                    ܘܒܪܝܐ ܗܘܬ ܡܢ ܩܕܡ ܦܓܪܐ ܙܕܩ ܗܘܐ ܕܬܬܥܗܕ ܗܝ ܠܗܿ ܡܢ ܩܕܡ  f.59b  ܕܬܬܝܬܐ ܠܦܓܪܐ
                    ܘܕܐܝܟܢܐ ܐܝܬܝܗܿ ܗܘܬ. ܘܕܒܐܝܕܐ ܩܐܛܣܛܐܣܝܣ ܣܝܡܐ ܗܘܬ. ܥܗܘܕܬܐ ܓܝܪ ܐܝܬܝܗܿ. ܘܥܘܗܕܢܐ ܚܕ ܡܢ
                    ܚܝܠܝ̈ܗܿ ܟܝܢ̈ܝܐ ܕܝܠܗܿ ܐܝܬܘܗܝ. ܘܗܐ ܚܙܝܢܢ ܘܡܣܬܟܠܝܢܢ ܕܠܐ ܥܗܕܐ ܡܕܡ ܕܐܝܟ ܗܠܝܢ. ܡܕܝܢ ܠܐ
                    ܩܕܝܡܐ ܢܦܫܐ ܒܒܪܝܬܐ ܠܦܓܪܐ. ܘܬܘܒ ܐܡܪܝܢܢ ܕܐܠܘ ܩܕܝܡܐ ܗܘܬ ܒܬܪܟܢ ܡܬܬܝܬܝܐ ܗܘܬ ܠܘܬ ܦܓܪܐ
                    ܕܐܬܚܝܕܬ ܥܡܗ. ܚܕܐ ܡܢ ܬܪܬܝܢ ܓܕܫܐ ܗܘܬ ܠܗܿ. ܕܐܘ ܕܠܐ ܣܟ ܥܐܠܐ ܗܘܬ ܠܗ. ܟܕ ܡܣܬܟܠܐ ܗܘܬ
                    ܠܡܠܝܠܘܬܐ ܕܝܠܗܿ ܘܫܒܝܚܘܬܐ ܕܟܝܢܐ ܘܠܡܐܟܘܬܐ ܘܫܝܛܘܬܐ ܕܟܝܢܐ ܕܦܓܪܐ. ܐܘ ܒܩܛܝܪܐ ܥܐܠܐ ܗܘܬ
                    ܠܗ. ܘܩܢܝܐ ܗܘܬ ܥܡܗ ܠܘ ܪܚܡܘܬܐ ܘܫܘܝܘܬܐ. ܐܠܐ ܣܢܐܬܐ ܘܦܠܝܓܘܬܐ. ܘܗܐ ܚܙܝܢܢ ܕܪܚܡܐ ܘܐܝܬ
                    ܠܗܿ ܥܡܗ ܫܘܝܘܬܐ ܘܡܬܢܓܕܐ ܠـܪ̈ܓܝܓܬܗ ܐܝܟ ܕܒܣܘܓܐܐ. ܡܕܝܢ ܐܬܝܕܥܬ ܒܝܕ ܗܠܝܢ ܕܠܐ ܩܕܝܡܐ
                    ܢܦܫܐ ܠܦܓܪܐ ܒܒܪܝܬܗܿ. ܗܢܘܢ ܬܘܒ ܐܡܪܝܢ ܕܦܓܪܐ ܡܬܓܒܠ ܩܕܡܐܝܬ. ܘܡܢ ܒܬܪܟܢ ܡܬܒܪܝܐ ܒܗ ܢܦܫܐ
                    ܐܦ ܗܢܘܢ ܒܝܕ ܬܚܘܝ̈ܬܐ ܡܩܝ̈ܡܢ ܠܬܪܥܝܬܢ ܗܕܐ. ܝܕܝܥܐ ܠܡ ܕܫܪܝܪܐ ܗܕܐ ܡܢ ܗܿܝ ܕܠܐ ܦܩܕ ܢܡܘܣܐ
                    ܓܙܪ ܕܝܢܐ ܕܡܘܬܐ ܥܠ ܐܝܢܐ ܕܡܚܐ ܐܢܬܬܐ ܘܡܚܝܛܐ ܡܢ ܩܕܡ ܕܢܨܛܠܡ ܥܘܠܐ ܒܕܡܘܬܐ ܘܒܗܕܡܐ. ܡܛܠ
                    ܕܠܐ ܡܚܝܕܐ ܥܡܗ ܢܦܫܐ ܟܕ ܠܐ ܥܕܟܝܠ ܡܨܠܡ ܗܘܐ ܒܕܡܘܬܐ  f.60a  ܘܒܗܕܡܐ. ܟܕ ܠܐ ܦܩܕ
                    ܥܠܘܗܝ ܢܡܘܣܐ ܓܙܪ ܕܝܢܐ ܕܡܘܬܐ. ܘܠܘ ܗܕܐ ܐܝܬܝܗܿ ܗܘܬ ܥܠܬܐ. ܢܦܫܐ ܓܝܪ ܥܡܗ ܕܪܡܝܐ ܕܙܪܥܐ
                    ܡܚܝܕܐ ܗܘܬ ܥܡܗ. ܐܠܐ ܡܛܠ ܦܓܪܐ ܗܿܘ ܕܐܬܚܝܛ ܠܐ ܥܕܟܝܠ ܡܨܠܡ ܒܕܡܘܬܐ ܘܒܗܕܡܐ. ܠܐ ܦܪܝܫ ܡܢ
                    ܕܚܝ̈ܘܬܐ ܠܐ ܡܠܝ̈ܠܬܐ ܠܝܬ ܥܠܘܗܝ ܓܙܪ ܕܝܢܐ ܕܡܘܬܐ. ܐܡܬܝ ܕܡܨܠܡ ܒܕܡܘܬܐ ܘܒܗܕܡܐ. ܘܒܗܕܐ
                    ܦܪܝܫ ܡܢ ܕܚܝ̈ܘܬܐ ܠܐ ܡܠܝ̈ܠܬܐ ܦܩܕ ܗܘܐ ܢܡܘܣܐ ܓܙܪ ܕܝܢܐ ܕܡܘܬܐ ܥܠ ܐܝܢܐ ܕܡܚܒܠ ܗܘܐ ܠܗ.
                    ܘܝܕܝܥܐ ܗܕܐ ܡܢ ܕܗܟܢܐ ܐܝܬܝܗܿ ܡܢ ܗܿܝ ܕܩܛܠܐ ܠܘܬ ܦܓܪܐ ܪܗܿܛ ܘܠܘ ܠܘܬ ܢܦܫܐ. ܐܝܟ ܡܠܬܗ
                    ܕܡܪܝܐ ܕܐܡܪ ܕܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ܆ܢܦܫܐ ܕܝܢ ܠܐ ܡܫܟܚܝܢ ܠܡܩܛܠ1 ܡܬܝ: 28:10
                        . ܡܕܝܢ ܠܐ ܩܕܝܡ ܦܓܪܐ ܒܓܒܝܠܘܬܗ ܠܢܦܫܐ. ܬܚܘܝܬܗܘܢ ܬܪܝܢܝܬܐ ܐܝܬܝ ܗܕܐ:
                    ܝܕܝܥܐ ܠܡ ܕܩܕܝܡ ܦܓܪܐ ܠܢܦܫܐ ܒܓܒܝܠܘܬܐ ܡܢ ܗܿܝ ܕܐܡܪ ܛܘܒܢܐ ܡܘܫܐ ܥܠ ܐܠܗܐ: ܕܓܒܠ ܥܦܪܐ.
                    ܩܕܡܐܝܬ ܘܒܬܪܟܢ: ܢܦܚ ܒܗ ܢܫܡܬܐ ܕܚܝ̈ܐ2 ܒܪܝܬܐ: 7:2. ܘܐܡܪܝܢܢ ܠܘܬܗܘܢ ܕܢܒܝܐ ܡܘܫܐ ܒܡ̈ܠܐ
                    ܐܢܫܝ̈ܬܐ ܡܬܢܐ ܗܘܐ ܠܣܥܘܪ̈ܘܬܐ ܐܠܗܝ̈ܬܐ. ܚܪܝܦܐܝܬ ܬܡܢ ܐܟܚܕܐ ܓܒܠܬ ܠܥܦܪܐ ܘܒܪܝܬ ܠܢܦܫܐ
                    ܘܢܦܚܬ ܒܗ. ܠܥܠ ܡܢ ܡܕܪ̈ܟܢܘܬܐ ܘܗܘܢܐ ܘܡܠܬܐ ܕܝܠܢ. ܘܟܕ ܨܒܐ ܕܢܝܬܐ ܡܘܫܐ ܠܗܕܐ ܣܥܘܪܘܬܐ  f.60b  ܐܠܗܝܬܐ ܘܩܠܝܠܬܐ ܒܡ̈ܠܐ ܐܢܫܝ̈ܬܐ ܠܐ ܐܫܟܚ ܐܟܚܕܐ ܘܡܢܫܝܠ ܟܠܡܕܡ ܢܦܩ ܒܚܕܐ
                    ܡܠܬܐ. ܠܦܘܬ ܣܥܘܪܘܬܐ ܗܿܝ ܚܪܝܦܬܐ. ܘܒܕܓܘܢ ܐܠـܨܐ ܕܢܐܡܪ ܕܓܒܠ ܥܦܪܐ. ܘܗܝܕܝܢ ܢܦܚ ܒܗ ܢܦܫܐ.
                    ܐܢܕܝܢ ܡܗܦܟ ܐܢܫ ܘܐܡܪ: ܕܐܢ ܗܟܢܐ ܐܝܬܝܗܿ ܙܕܩ ܗܘܐ ܠܗ ܠܡܘܫܐ ܕܢܐܡܪ ܕܐܟܚܕܐ ܒܚܕܐ ܫܘܝܘܬܐ.
                    ܓܒܠ ܐܠܗܐ ܠܥܦܪܐ ܘܢܦܚ ܒܗ ܢܦܫܐ. ܐܡܪܝܢܢ ܠܘܬܗ: ܕܐܠܘ ܗܟܢܐ ܐܡܪ ܥܒܝܕ ܗܘܐ ܡܦܫܩܢܐ. ܘܠܘ
                    ܡܟܬܒܢܐ. ܡܘܫܐ ܓܝܪ ܡܟܬܒܢܗ ܕܟܬܒܐ ܐܝܬܘܗܝ ܘܠܘ ܡܦܫܩܢܗ. ܗܕܐ ܐܝܬܝܗܿ ܕܡܟܬܒܢܐ ܒܠܚܘܕ ܗܿܝ
                    ܕܢܟܬܘܒ ܕܓܒܠ ܐܠܗܐ ܥܦܪܐ ܡܢ ܐܪܥܐ. ܘܢܦܚ ܒܗ ܢܦܫܐ. ܕܐܝܢܐ ܕܝܢ ܡܢܗܘܢ ܩܕܝܡ ܐܘ ܒܬܪܝ. ܘܐܢ
                    ܒܚܕܐ ܫܘܝܘܬܐ ܐܬܒܪܝܘ ܬܪ̈ܝܗܘܢ. ܗܠܝܢ ܥܘܩًܒܐ ܘܐܝܠܝܢ ܕܕܡܝ̈ܢ ܠܗܘܢ ܕܡܦܫܩًܢܐ ܐܝܬܝܗܘܢ
                    ܕܢܐܡܪܘܢ ܐܢܘܢ ܘܠܘ ܕܢܟܬܒܢܐ. ܘܗܠܝܢ ܐܡܪܝܢܢ ܠܘܬ ܗܢܘܢ ܕܡܪܝܢ ܕܩܕܝܡ ܦܓܪܐ ܒܓܒܝܠܬܗ ܠܢܦܫܐ. 
                ܚܢܢ ܕܝܢ ܐܡܪܝܢܢ ܗܟܢܐ: ܕܠܐ ܢܦܫܐ ܩܕܝܡܐ ܠܦܓܪܐ܆ܘܐܦܠܐ ܦܓܪܐ ܠܢܦܫܐ. ܐܠܐ
                    ܐܟܚܕܐ ܥܡ ܪܡܝܗ ܕܙܪܥܐ ܐܦ ܢܦܫܐ ܒܪܫܥܬܗ ܡܬܒܪܝܐ ܡܢ ܠܐ ܡܕܡ ܘܡܬܚܝܕܐ ܠܗ. ܘܝܕܝܥܐ ܗܕܐ ܕܗܟܢܐ
                    ܐܝܬܝܗܿ ܡܕܝܢ ܗܠܝܢ ܡܚܘܝ̈ܢܘܬܐ: ܟܠ ܫܘܪܝܐ ܕܫܘܠܡܐ  f.61a  ܐܝܬܘܗܝ ܫܘܪܝܐ. ܘܟܠ
                    ܕܫܘܪܝܐ ܐܝܬܘܗܝ ܫܘܠܡܐ. ܘܐܘܣܝܐ ܕܒܪܢܫܐ ܚܕܐ ܐܝܬܝܗܿ ܕܡܪܟܒܐ ܡܢ ܢܦܫܐ ܘܡܢ ܦܓܪܐ. ܘܐܘܣܝܐ
                    ܕܒܪܢܫܐ ܝܗܝܒܐ ܠܗܿ ܠܫܘܪܝܗ ܕܒܪܢܫܐ ܘܠܫܘܠܡܗ. ܡܕܝܢ ܐܝܟ ܫܘܠܡܗ ܕܒܪܢܫܐ ܐܝܬܘܗܝ ܢܦܫܐ ܘܦܓܪܐ.
                    ܐܦ ܫܘܪܝܗ ܐܝܬܘܗܝ ܢܦܫܐ ܠܦܓܪܐ ܡܢ ܐܢܢܩܐ. ܠܐ ܡܕܝܢ ܩܕܝܡܐ ܢܦܫܐ ܠܦܓܪܐ ܘܐܦܠܐ ܦܓܪܐ ܠܢܦܫܐ.
                    ܐܢ ܫܘܪܝܗ ܕܒܪܢܫܐ ܙܪܥܐ ܗܘ ܒܠܚܘܕ. ܠܐ ܕܝܢ ܐܝܬ ܥܡܗ ܐܦ ܢܦܫܐ ܡܠܝܠܬܐ. ܘܒܫܘܠܡܐ ܕܒܪܐܢܫܐ
                    ܦܓܪܐ ܘܢܦܫܐ ܡܫܬܪܝܢ ܡܢ ܚܕܕܐ. ܡܕܝܢ ܐܘܣܝܐ ܕܒܪܢܫܐ ܠܘ ܒܚܕܐ ܫܘܝܘܬܐ ܝܗܝܒܐ ܗܝ ܠܗܿ ܠܫܘܪܝܗ
                    ܕܒܪܢܫܐ ܘܫܘܠܡܗ ܐܠܐ ܒܬܘܣܦܬܐ ܘܒܘܨܪܐ. ܘܒܘܨܪܐ ܡܢ ܠܫܘܪܝܗ. ܒܬܘܣܦܬܐ ܕܝܢ ܠܫܘܠܡܗ. ܐܢܗܘ ܠܘ
                    ܥܡ ܪܡܝܗ ܕܙܪܥܐ ܐܦ ܢܦܫܐ ܡܠܝܠܬܐ ܘܕܠܐ ܓܫܘܡ. ܘܒܪܐܢܫܐ ܡܪܟܒ ܡܢ ܢܦܫܐ ܘܡܢ ܦܓܪܐ ܐܘܟܝܬ ܡܢ
                    ܓܘܫܡܐ ܘܡܢ ܠܐ ܓܫܘܡ. ܐܪܐ ܗܢܐ ܫܘܪܝܐ ܠܘ ܕܒܪܢܫܐ ܐܝܬܘܗܝ ܐܠܐ ܕܠܐ ܒܪܢܫܐ. ܡܕܝܢ ܐܝܬ ܐܡܬܝ
                    ܕܐܝܬܘܗܝ ܒܪܢܫܐ ܠܐ ܒܪܢܫܐ. ܘܡܐ ܕܥܠܬ ܒܗ ܢܦܫܐ ܗܘܐ ܒܪܢܫܐ ܘܡܫܬܟܚ ܣܘܩܪܛܝܣ ܐܘ ܐܢܫ ܐܚܪܢܐ
                    ܐܝܢܐ ܕܗܘ ܒܙܒܢ ܡܢ ܐܝܬܘܗܝ  f.61b  ܒܪܢܫܐ. ܒܙܒܢ ܠܐ ܒܪܢܫܐ ܗܿܝ ܕܕܓܠܬܐ ܗܝ
                    ܘܫܟܝܪܬܐ. ܘܣܗܕ ܟܬܒܐ ܕܢܨܝܚܐ ܒܙܕܝ̈ܩܐ ܐܝܘܒ. ܕܐܟܚܕܐ ܡܬܓܒܠ ܦܓܪܐ ܘܡܬܒܪܝܐ ܒܗ ܢܦܫܐ. ܐܡܪ
                    ܓܝܪ ܗܟܢܐ: ܐܦ ܛܝܢܐ ܕܐܪܥܐ ܢܣܒܬ ܘܓܒܠܬ ܚܝܘܬܐ ܡܠܝܠܬܐ ܘܣܡܬ ܥܠ ܐܪܥܐ. ܟܕ ܒܗܿܝ ܕܐܡܪ ܕܓܒܠܬ
                    ܚܝܘܬܐ ܡܠܝܠܬܐ ܕܡܬܓܒܠܐ ܢܦܫܐ ܘܦܓܪܐ ܐܝܬܝܗܿ ܕܠܐ ܦܣܩܐ. ܡܕܝܢ ܐܬܚܘܝܬ ܒܝܕ ܗܠܝܢ ܕܠܐ ܢܦܫܐ
                    ܩܕܝܡܐ ܠܦܓܪܐ ܘܐܦܠܐ ܦܓܪܐ ܠܢܦܫܐ. ܐܠܐ ܐܟܚܕܐ ܒܚܕܐ ܫܘܝܘܬܐ. ܡܬܓܒܠ ܦܓܪܐ ܡܢ ܙܪܥܐ ܘܢܦܫܐ ܡܢ
                    ܠܐ ܡܕܡ ܡܬܒܪܝܐ ܡܢ ܗܿܘ ܒܪܘܝܐ ܕܟܠ ܕܒܐܠܗܐ ܘܕܡܨܐ ܚܝܠ ܟܠ ܕܨܒܐ. 
            
            
                ܩܦܠܐܘܢ ܕܥܣܪܝܢ ܘܫܬܐ
                ܕܡܥܩܒ ܕܟܠ ܐܡܬܝ ܕܡܬܪܡܐ ܙܪܥܐ ܐܢܫܝܐ ܡܬܚܝܕܐ ܥܡܗ ܢܦܫܐ ܐܘ ܠܐ
                ܡܛܠ ܕܝܢ ܕܩܕܡܢܢ ܐܡܪܢܢ ܕܠܐ ܢܦܫܐ ܩܕܝܡܐ ܠܦܓܪܐ ܐܘ ܐܦܠܐ ܦܓܪܐ ܠܢܦܫܐ. ܐܠܐ
                    ܐܟܚܕܐ ܬܪ̈ܝܗܘܢ ܫܘܝܐܝܬ. ܟܕ ܥܡܗ ܕܗܿܝ ܕܢܬܓܒܠ ܡܢ ܙܪܥܐ. ܡܬܒܪܝܐ ܡܢ ܠܐ ܡܕܡ. ܒܕܓܘܢ ܡܫܐܠ
                    ܗܿܘ ܕܡܫܐܠ ܟܕ ܐܡܪ ܗܟܢܐ: ܕܟܠ ܐܡܬܝ ܕܓܒܪܐ ܒܠܚܘܕ ܢܪܡܐ ܙܪܥܐ ܢܫܝܐ ܡܬܒܪܝܐ ܢܦܫܐ ܡܢ ܠܐ
                    ܡܕܡ. ܘܡܬܚܝܕܐ ܥܡܗ. ܘܐܡܪܝܢܢ ܕܠܐ. ܒܗܿܝ ܕܟܠ ܐܡܬܝ ܕܓܒܪܐ ܒܠܚܘܕ ܢܪܡܐ ܙܪܥܐ. ܐܘ ܐܢْܬܬܐ
                    ܒܠܚܘܕ ܐܘ ܓܕܫܐ ܠܬܪ̈ܝܗܘܢ ܙܪ̈ܥܐ ܥܠܬܐ ܡܕܡ ܕܠܐ ܗܿܘܐ ܡܢܗܘܢ  f.62a  ܒܛܢܐ ܠܐ ܣܟ
                    ܡܬܒܪܝܐ ܢܦܫܐ ܘܐܦܠܐ ܡܬܚܝܕܐ ܠܗ. ܐܠܐ ܡܬܒܪܝܐ ܢܦܫܐ ܘܡܬܚܝܕܐ ܐܡܬܝ ܕܗܠܝܢ ܬܠܬ ܡܫܬܡ̈ܠܝܢ:
                    ܚܕܐ ܡܢ ܡܐ ܕܒܓܘ ܡܪܒܥܐ ܬܪ̈ܝܗܘܢ ܡܬܪܡܝܢ. ܕܬܪܬܝܢ ܕܝܢ ܡܐ ܕܡܬܚܝܕܝܢ ܥܡ ܚܕܕܐ. ܕܬܠܬ ܡܐ
                    ܕܡܬܩܛܪܝܢ ܒܚܕܕܐ ܠܘܬ ܗܿܝ ܕܢܬܓܒܠ ܘܢܬܪܟܒ ܡܢܗܘܢ ܦܓܪܐ. ܗܿܝܕܝܢ ܡܬܒܪܝܐ ܢܦܫܐ. ܘܡܬܒܪܝܐ
                    ܢܦܫܐ ܘܡܬܚܝܕܐ ܠܦܓܪܐ. ܐܢܕܝܢ ܗܿܠܝܢ ܬܠܬ ܠܐ ܡܫܬܡ̈ܠܝܢ ܠܘܬ ܙܪܥܐ ܠܐ ܡܬܒܪܝܐ ܢܦܫܐ ܘܐܦܠܐ
                    ܡܬܚܝܕܐ ܥܡܗܘܢ ܡܛܠ ܗܿܝ ܕܠܐ ܥܗܢܝܢ ܠܩܘܒܠܐ ܕܝܠܗܿ. ܫܘܡܠܝܐ ܓܝܪ ܕܦܓܪܐ ܐܢܫܝܐ ܡܢ ܬܪ̈ܝܗܘܢ
                    ܙܪ̈ܥܐ ܗܿܘܐ. ܘܝܕܝܥܐ ܗܕܐ ܡܢ ܗܿܝ ܕܒܙܒܢ ܡܢ ܡܬܒܛܢ ܕܟܪܐ. ܒܙܒܢ ܕܝܢ ܢܩܒܬܐ ܠܦܘܬ ܕܙܟܐ ܚܕ
                    ܡܢܗܘܢ ܠܚܒܪܗ. ܐܝܟ ܕܐܡܪܝܢ ܐܢܫ̈ܝܢ ܡܢ ܒܢ̈ܝ ܐܣܘܬܐ: ܕܟܕ ܙܟܐ ܙܪܥܐ ܕܓܒܪܐ ܕܟܪܐ ܡܬܒܛܢ. ܘܟܕ
                    ܗܿܘ ܕܐܢْܬܬܐ ܢܩܒܬܐ ܡܬܒܛܢܐ. ܡܕܝܢ ܐܡܬܝ ܕܡܬܓܡܪ̈ܢ ܗܠܝܢ ܬܠܬ ܠܘܬ ܙܪܥܐ ܕܬܪ̈ܝܗܘܢ. ܡܬܒܪܝܐ
                    ܢܦܫܐ ܘܡܬܚܝܕܐ ܠܗܘܢ ܒܪܡܙܗ ܕܒܪܘܝܐ. 
            
            
                ܩܦܠܐܘܢ ܕܥܣܪܝܢ ܘܫܒܥܐ
                ܕܡܚܘܐ ܕܡܛܠ ܐܝܕܐ ܥܠܬܐ ܠܐ ܦܪ̈ܝܫܢ ܢܦܫ̈ܬܐ ܕܫܒܪ̈ܐ ܛܒܬܐ ܡܢ ܒܝ̈ܫܬܐ 
                ܘܫܪܪܐ ܡܢ ܕܓܠܘܬܐ
                ܡܛܠ ܐܝܕܐ ܥܠܬܐ ܠܐ ܦܪ̈ܝܫܢ ܢܦܫ̈ܬܐ ܕܫܒܪ̈ܐ ܘܕܛܠܝ̈ܐ ܕܩܕܩًܐ ܛܒܬܐ ܡܢ
                    ܒܝܫܬܐ.  f.62b  ܘܫܪܪܐ ܡܢ ܕܓܠܘܬܐ. ܟܝ ܡܛܠ ܕܒܨܝܪ̈ܢ ܒܟܝܢܗܝܢ ܐܘ ܒܚܝ̈ܠܝܗܝܢ
                    ܟܝܢ̈ܝܐ ܡܢ ܢܦܫ̈ܬܐ ܕܥܠܝ̈ܡܐ ܘܕܓܒܪ̈ܐ. ܘܐܡܪܝܢܢ ܕܠܐ. ܐܠܐ (ܕܠܐ) ܗܠܝܢ ܒܨܝܪ̈ܢ ܒܟܝܢ̈ܝܗܝܢ
                    ܡܢ ܢܦܫ̈ܬܐ ܘܐܦܠܐ ܚܣܝܪܝܢ ܡܢ ܚܝ̈ܠܐ ܟܝܢ̈ܝܐ ܡܕܡ. ܒܗܿܝ ܕܐܟܘܬܗܝܢ ܐܝܬܝܗܝܢ ܡܗܘܢ̈ܝܐܐ
                    ܡܘܥܕܥܬܐ ܡܬܪ̈ܥܝܢܝܬܐ ܝܕܘܥܬܢܝܬܐ ܘܫܪܟܐ. ܐܠܐ ܡܛܠ ܕܚܣܪܝܢ ܗܕܡ̈ܐ ܕܦܓܪ̈ܐ ܕܫܒܪ̈ܐ ܘܒܨܝܪܝܢ
                    ܘܠܐ ܡܫܡܠܝܢ ܘܠܐ ܥܗܢܝܢ ܠܘܬ ܗܿܝ ܕܢܕܥܘܢ ܚܝܠܗܿ ܕܢܦܫܐ ܕܬܥܒܕ ܒܗܘܢ. ܦܝܫܝܢ ܡܢ ܗܿܝ ܕܢܚܘܘܢ
                    ܠܚܝܠܐ ܕܝܠܗܿ ܗܿܘ ܕܒܗ ܦܪܫܐ ܫܪܪܐ ܡܢ ܕܓܠܘܬܐ ܐܘ ܛܒܬܐ ܡܢ ܒܝܫܬܐ. ܗܝ ܓܝܪ ܒܟܝܢܗܿ ܦܪܘܫܬܐ
                    ܐܝܬܝܗܿ ܕܗܠܝܢ. ܐܠܐ ܗܕܡܐ ܕܦܓܪܐ ܗܢܘܢ ܕܐܘܪ̈ܓܢܐ ܕܝܠܗܿ ܐܝܬܝܗܘܢ ܚܣܪܝܢ ܘܠܐ ܡܫܡܠܝܢ ܘܠܐ
                    ܥܗܢܝܢ ܕܢܕܥܘܢ ܚܝܠܗܿ. ܠܐ ܡܬܚܘܝܐ ܦܪܘܫܘܬܗܿ ܗܿܝ ܕܦܪܫܐ ܛܒܬܐ ܡܢ ܒܝܫܬܐ ܐܘ ܫܪܪܐ ܡܢ
                    ܕܓܠܘܬܐ. ܐܟܙܢܐ ܗܟܝܠ ܕܒܩܢܝܐ ܕܠܐ ܓܠܝܦ ܘܠܐ ܡܫܡܠܝ ܘܠܐ ܟܬܒ ܟܬܘܒܐ ܟܕ ܠܐ ܡܬܐܡܪܐ ܕܠܐ ܝܕܥ
                    ܕܟܬܒ. ܘܐܟܙܢܐ ܕܒܩܝܬܪܐ ܕܠܐ ܡܬܩܢ ܘܠܐ ܡܫܡܠܝ ܠܐ ܢܩܫ ܩܝܬܪܘܕܐ. ܟܕ ܗܘ ܚܟܝܡ ܢܩܫ. ܘܟܙܢܐ
                    ܕܒ… ܕܒܥܫܦܐ ܕܠܐ  f.63a  ܡܬܩܢܐ ܘܠܐ ܡܫܡܠܝܐ ܘܠܐ ܥܗܢܐ ܠܐ ܡܢܓܪ ܢܓܪܐ. ܟܕ ܗܘ ܝܕܥ
                    ܕܢܢܓܪ ܘܠܐ ܡܬܐܡܪ ܕܠܐ ܝܕܥ ܕܡܢܓܪ. ܗܟܢܐ ܘܢܦܫܐ ܕܫܒܪ̈ܐ ܠܐ ܦܪܫܐ ܫܪܪܐ ܡܢ ܕܓܠܘܬܐ. ܘܠܐ
                    ܛܒܬܐ ܡܢ ܒܝܫܬܐ ܒܗܕܡ̈ܐ ܠܐ ܡܫܡ̈ܠܝܐ ܕܦܓܪ̈ܝܗܝܢ ܡܛܠ ܕܠܐ ܥܗܢܝܢ. ܟܕ ܗܝ ܟܝܢܐܝܬ ܐܝܬ ܠܗܿ
                    ܕܬܦܪܘܫ ܛܒܬܐ ܘܒܝ̈ܫܬܐ ܘܫܪܪܐ ܘܕܓܠܘܬܐ ܐܝܬܘ ܠܗܿ ܐܝܟ ܗܕܡ̈ܐ ܕܦܓܪܐ ܡܙܝܥܝܢ ܠܗ ܘܠܐ ܡܥܒܕܝܢ
                    ܠܗ ܡܛܠ ܕܚܣܝܪܝܢ ܡܢ ܫܘܡܠܝܐ ܘܠܐ ܥܗܢܝܢ. 
            
            
                ܩܦܠܐܘܢ ܕܥܣܪܝܢ ܘܬܡܢܝܐ
                ܕܡܚܘܐ ܕܐܝܟܐ ܐܝܬܝܗܿ ܢܦܫܐ. ܠܒܪ ܡܢ ܦܓܪܐ ܐܘ ܠܓܘ ܡܢ ܦܓܪܐ. 
                ܐܘ ܠܒܪ ܡܢ ܦܓܪܐ ܘܠܓܘ ܡܢ ܦܓܪܐ. 
                ܐܢܫ̈ܝܢ ܡܢ ܗܟܝܠ ܥܒܕܝܢ ܡܛܠ ܢܦܫܐ ܦܘܠܓܐ ܗܢܐ: ܕܢܦܫܐ ܠܡ ܐܘ ܐܝܬܝܗܿ ܠܒܪ ܡܢ
                    ܦܓܪܐ ܐܘ ܠܓܘ ܘܠܒܪ: 
                ܢܦܫܐ ܐܝܬܝܗܿ: 
                
                     ܐܘ ܠܒܪ ܡܢ ܦܓܪܐ
                     ܐܘ ܠܓܘ ܡܢ ܦܓܪܐ
                     ܐܘ ܠܓܘ ܘܠܒܪ
                
                ܥܒܕܝܢ ܗܢܐ ܦܘܠܓܐ ܗܠܝܢ ܟܕ ܙܪܒܝܢ ܠܫܡܘܥܐ ܕܚܕܐ ܡܢ ܬܠܬ ܫܩًܘܗܝ ܢܦܢܘܢ.
                    ܘܐܢܫ̈ܝܢ ܡܢ ܐܡܪܝܢ ܕܠܒܪ ܡܢ ܦܓܪܐ ܐܝܬܝܗܿ. ܘܐܡܪܝܢܢ ܕܠܐ ܫܪܝܪܐ ܗܕܐ. ܐܠܘ ܓܝܪ ܠܒܪ ܡܢ ܦܓܪܐ
                    ܐܝܬܝܗܿ ܗܘܬ. ܠܐ ܡܙܝܥܐ ܗܘܬ ܒܗ ܚܘܫ̈ܒܐ.  f.63b  ܐܚܪ̈ܢܐ ܕܝܢ ܐܡܪܝܢ ܕܠܓܘ ܡܢ
                    ܦܓܪܐ ܐܝܬܝܗܿ. ܘܐܡܪܝܢܢ ܕܐܦܠܐ ܗܕܐ ܫܪܝܪܐ ܦܫܝܛܐܝܬ. ܐܠܘ ܓܝܪ ܠܓܘ ܡܢ ܦܓܪܐ ܐܝܬܝܗܿ ܗܘܬ
                    ܣܦܝܩܝܢ ܗܘܘ ܗܕܡ̈ܐ ܒܪ̈ܝܐ ܕܦܓܪܐ ܡܢܗܿ. ܢܦܫܐ ܓܝܪ ܒܟܠܗ ܦܓܪܐ ܫܪܝܐ ܟܕ ܠܝܬ ܡܢܗ ܚܕܐ ܡܢܬܐ
                    ܕܓܠܝܙܐ ܡܢܗܿ ܐܘ ܡܢ ܚܝܘܬܗܿ. (ܠܓܘ) ܘܠܒܪ ܡܢ ܦܓܪܐ. ܘܐܡܪܝܢܢ ܕܐܦܠܐ ܗܕܐ ܫܪܝܪܐ. ܐܠܘ ܓܝܪ
                    ܡܢ ܦܓܪܐ ܐܝܬܝܗܿ ܗܘܬ ܡܬܦܣܩܢܝܬܐ ܐܝܬܝܗܿ ܗܘܬ. ܐܝܟ ܐܐܪ ܕܐܝܬܘܗܝ ܠܓܘ ܡܢ ܦܓܪܐ ܘܠܒܪ ܡܢ
                    ܦܓܪܐ. ܡܕܝܢ ܠܐ ܡܬܐܡܪܐ ܢܦܫܐ ܕܐܝܬܝܗܿ ܠܐ ܠܒܪ ܡܢ ܦܓܪܐ ܘܠܐ ܠܓܘ ܡܢ ܦܓܪܐ ܘܐܦܠܐ ܠܓܘ ܘܠܒܪ.
                    ܐܠܐ ܘܐܡܪܝܢܢ ܕܐܝܬܝܗܿ ܒܟܠܗ ܦܓܪܐ ܟܕ ܡܚܝܕܐ ܥܡܗ. 
            
            
                ܩܦܠܐܘܢ ܕܥܣܪܝܢ ܘܬܫܥܐ
                ܕܡܚܘܐ ܕܟܠܗܘܢ ܗܕܡܐ ܕܦܓܪܐ ܡܚܝܕܐ ܢܦܫܐ. ܐܘ ܥܡ ܚܕ ܡܢܗܘܢ. 
                ܙܕܩ ܕܝܢ ܕܢܥܩܒ ܗܪܟܐ: ܥܡ ܟܠܗܘܢ ܡܬܚܝܕܐ ܘܣܪܝܓܐ. ܐܘ ܥܡ ܚܕ ܗܕܡܐ ܒܠܚܘܕ.
                    ܘܒܢ̈ܝܐ ܡܢ ܕܐܣܘܬܐ ܐܡܪܝܢ ܕܥܡ ܡܘܚܐ ܡܚܝܕܐ ܘܒܗ ܥܡܪܐ. ܘܝܕܝܥܐ ܠܡ ܗܕܐ ܡܢ ܗܿܝ ܕܟܕ ܡܬܢܟܐ
                    ܡܘܚܐ ܡܬܢܟܝܢ ܡܥܒܕܢ̈ܘܬܗܿ ܕܢܦܫܐ ܕܐܝܬܝ̈ܗܝܢ ܡܠܝ̈ܠܬܐ. ܐܚܪ̈ܢܐ ܕܝܢ ܐܡܪܝܢ ܕܥܡ ܠܒܐ ܡܚܝܕܐ
                    ܘܒܗ ܥܡܪܐ.  f.63b  ܘܝܕܥܝܐ ܗܕܐ ܡܢ ܗܿܝ ܕܡܙܝܥܐ ܒܗ ܚܘܫ̈ܒܐ ܘܡܚܫ̈ܒܬܐ. ܘܐܡܪܝܢܢ
                    ܕܬܪ̈ܬܝܗܝܢ ܗܠܝܢ ܡܣܒܪ̈ܢܘܬܐ ܕܓ̈ܠܬܐ ܐܝܬܝ̈ܗܝܢ ܘܝܕܝܥܐ ܗܕܐ ܡܢ ܗܿܝ ܕܐܠܘ ܗܟܢܐ ܐܝܬܘܗܝ ܗܘܐ
                    ܣܘܥܪܢܐ. ܡܢ ܢܦܫܐ ܘܡܢ ܡܘܚܐ ܠܚܘܕ ܡܪܟܒ ܒܪܢܫܐ. ܐܘ ܡܢ ܢܦܫܐ ܘܡܢ ܠܒܐ ܒܠܚܘܕ ܘܠܘ ܡܢ ܢܦܫܐ
                    ܘܡܢ ܦܓܪܐ. ܐܠܐ ܗܿܝ ܕܡܢ ܡܘܚܐ ܒܠܚܘܕ ܘܡܢ ܢܦܫܐ ܡܪܟܒ ܒܪܢܫܐ. ܕܓܠܬܐ ܐܝܬܝܗܿ. ܗܿܟܢܐ ܐܦ ܗܿܝ
                    ܕܡܢ ܢܦܫܐ ܘܡܢ ܠܒܐ ܒܠܚܘܕ. ܡܕܝܢ ܕܓ̈ܠܬܐ ܐܝܬܝ̈ܗܝܢ ܬܪ̈ܬܝܗܝܢ ܗܠܝܢ ܬܪ̈ܥܝܬܐ. ܚܢܢ ܕܝܢ
                    ܐܡܪܝܢܢ ܕܢܦܫܐ ܡܚܝܕܐ ܠܟܠܗ ܦܓܪܐ ܟܕ ܠܝܬ ܒܗ ܘܠܐ ܚܕ ܗܕܡܐ ܙܥܘܪܐ ܘܪܒܐ ܕܓܠܝܙ ܡܢܗ ܘܡܢ
                    ܚܝܘܬܗܿ ܐܠܐ ܕܡܚܝܕܐ ܠܟܠܗ ܦܓܪܐ ܘܝܕܝܥܐ ܗܕܐ ܕܗܟܢܐ ܐܝܬܝܗܿ ܡܢ ܗܗܿܝ ܕܒܪܢܫܐ ܡܢ ܦܓܪܐ ܘܢܦܫܐ
                    ܡܪܟܒ. 
            
            
                ܩܦܠܐܘܢ ܕܬܠܬܝܢ
                ܕܡܥܩܒ ܡܛܠ ܢܦܫܐ ܕܟܕ ܡܫܬܚܠܦܐ ܡܢ ܛܒܬܐ ܠܘܬ ܒܝܫܬܐ. ܘܡܢ ܚܘܒܐ ܠܘܬ ܣܢܐܬܐ. ܟܝܢܗܿ ܐܝܬܘܗܝ
                    ܕܡܫܬܚܠܦ ܘܡܫܬܓܢܐ ܐܘ ܨܒܝܢܗܿ. 
                ܡܫܐܠ ܗܪܟܐ ܐܢܫ ܟܕ ܐܡܪ ܕܢܦܫܐ ܟܕ ܡܫܬܚܠܦܐ ܡܢ ܛܒܬܐ ܠܘܬ ܒܝܫܬܐ. ܘܡܢ ܚܘܒܐ
                    ܠܘܬ  f.64a  ܣܢܐܬܐ. ܘܡܢ ܙܕܝܩܘܬܐ ܠܘܬ ܥܘܠܘܬܐ ܘܠܘܬ ܫܪܟܐ ܕܟܠܗܝܢ ܐܢܛܝܦܣܝܣ ܕܐܝܟ
                    ܗܠܝܢ. ܟܝܢܗܿ ܐܝܬܘܗܝ ܕܡܫܬܚܠܦ ܐܘ ܨܒܝܢܗܿ. ܘܐܡܪܝܢܢ ܕܟܝܢܗܿ ܕܢܦܫܐ ܠܐ ܣܟ ܡܫܬܚܠܦ. ܘܝܕܝܥܐ
                    ܡܢ ܗܕܐ. ܟܝܢܗܿ ܕܢܦܫܐ ܚܝ̈ܐ ܐܝܬܘܗܝ ܐܝܟ ܕܐܡܪܢܢ ܡܢ ܠܥܠ. ܘܠܐ ܡܝܘܬܘܬܐ ܘܠܐ ܓܘܫܡܢܝܘܬܐ.
                    ܘܚܝ̈ܠܝܗܿ ܟܝܢ̈ܝܐ ܐܝܬܝܗܘܢ: ܡܕܥܐ ܘܡܠܝܠܘܬܐ ܘܫܪܟܐ ܕܚܘܝܢܢ ܡܢ ܠܥܠ. ܝܕܝܥܐ ܗܟܝܠ ܕܠܐ
                    ܡܫܬܚܠܦ ܟܝܢܗܿ ܕܢܦܫܐ ܘܐܦܠܐ ܚܝܠܗܿ ܒܚܝ̈ܐ ܡܢ ܗܿܝ ܕܠܐ ܗܿܘܝܐ ܡܢ ܚܝܬܐ ܘܠܐ ܚܝܬܐ. ܘܐܦܠܐ
                    ܡܫܬܚܠܦܐ ܡܢ ܠܐ ܡܝܘܬܘܬܐ ܠܘܬ ܡܝܘܬܘܬܐ. ܘܡܢ ܪ̈ܘܚܢܝܬܐ ܠܘܬ ܓܘܫܡܢ̈ܝܬܐ. ܘܠܐ ܡܫܬܚܠܦܐ ܡܢ
                    ܡܕܥܘܬܐ ܠܘܬ ܡܠܝܠܘܬܐ. ܡܕܝܢ ܟܝܢܗܿ ܕܢܦܫܐ ܠܐ ܡܫܬܚܠܦ ܚܠܦ ܚܝܬܐ ܗܿܘܐ ܠܐ ܚܝܬܐ ܘܚܠܦ
                    ܪܘܚܢܝܬܐ ܓܘܫܡܢܝܬܐ. ܘܚܠܦ ܠܐ ܡܝܘܬܘܬܐ ܡܝܘܬܘܬܐ. ܘܚܠܦ ܠܐ ܡܠܝܠܬܐ ܘܠܐ ܡܡܕܥܬܐ. ܐܠܐ ܨܒܝܢܗܿ
                    ܐܝܬܘܗܝ ܕܡܫܬܚܠܦ ܡܢ ܛܒܬܐ ܠܘܬ ܒܝܫܬܐ. ܘܡܢ ܡܫܬܡܥܢܘܬܐ ܠܘܬ ܠܐ ܡܫܬܡܥܢܘܬܐ. ܘܡܢ ܚܘܒܐ ܠܘܬ
                    ܣܢܐܬܐ. ܘܡܢ ܙܕܝܩܘܬܐ ܠܘܬ ܥܘܠܘܬܐ ܘܕܫܪܟܐ. 
            
            
                ܩܦܠܐܘܢ ܕܬܠܬܝܢ ܘܚܕ
                ܕܡܚܘܐ  f.64b  ܕܒܡܢܐ ܦܪܝܫܝܢ ܗܠܝܢ ܬܠܬܐ ܡܢ ܚܕܕܐ ܗܘܢܐ ܐܡܪ ܐܢܐ
                    ܘܪܘܚܐ ܘܢܦܫܐ. 
                ܗܘܢܐ ܘܪܘܚܐ ܘܢܦܫܐ ܬܠܬܐ ܐܘ ܬܪܝܢ ܐܘ ܚܕ. ܘܐܢ ܬܠܬܐ ܐܝܬܝܗܘܢ. ܐܘ ܬܪܝܢ
                    ܒܡܢܐ ܦܪܝܫܝܢ ܡܢ ܚܕܕܐ. ܘܐܡܪܝܢܢ ܕܐܦܘܠܝܢܪܝܣ ܗܿܘ ܕܗܘܐ ܐܦܝܣܩܘܦܐ ܕܠܝܕܝܩܝܐ ܐܡܪ ܕܐܚܪܢܐ
                    ܐܝܬܘܗܝ ܗܘܢܐ ܡܢ ܢܦܫܐ. ܘܥܠܗܕܐ ܫܬܐܣܬܐ ܘܠܗ ܠܕܘܓܡܗ. ܟܕ ܐܦ ܠܗܠܝܢ ܕܫܪܟܐ ܐܘܣܦ ܒܢܐ ܥܠܝܗܿ
                    ܠܦܘܬ ܫܘ ܕܝܠܗ. ܐܪܝܣܛܛܠܝܣ ܕܝܢ ܐܡܪ ܕܗܘܢܐ ܐܝܬܘܗܝ ܗܿܘ ܕܒܚܝܠܐ ܐܟܚܕܐ ܐܬܬܩܢ ܒܒܪܐܢܫܐ. ܗܿܘ
                    ܕܝܢ ܒܡܥܒܕܢܘܬܐ ܕܡܢ ܠܒܪ ܥܐܠ. ܘܠܘ ܠܘܬ ܗܿܝ ܕܬܗܘܐ ܐܝܬܝܗܿ ܝܬܗ ܕܒܪܐܢܫܐ ܡܫܡܠܐ. ܐܠܐ ܠܘܬ
                    ܫܘܫܛܐ ܕܝܕܥܬܐ ܕܬܐܘܪ̈ܝܣ ܕܟܝ̈ܢܐ ܡܗܢܐ ܟܠܗܘܢ ܒܢܝ̈ܢܫܐ ܕܐܝܬ ܠܗܘܢ ܗܘܢܐ ܡܥܒܕܢܘܬܐ ܡܬܐܡܪܝܢ.
                    ܦܠܛܘܢ ܕܝܢ ܠܐ ܐܡܪ ܕܐܝܬܘܗܝ ܒܪܢܫܐ ܡܢ ܦܓܪܐ ܘܢܦܫܐ. ܐܠܐ ܢܦܫܐ ܕܦܓܪܐ ܡܬܚܫܚܐ. ܘܐܚܪ̈ܢܐ ܕܝܢ
                    ܐܡܪܝܢ ܕܗܘܢܐ ܐܝܬܘܗܝ ܕܐܟܙܢܐ ܕܥܝܢܐ ܐܝܬܝܗܿ ܒܦܓܪܐ. ܗܟܢܐ ܐܦ ܗܘܢܐ. ܐܝܬܘܗܝ ܥܝܢܗܿ ܕܢܦܫܐ.
                    ܐܘܟܝܬ ܚܝܠܐ ܚܙܘܝܐ ܕܝܠܗܿ. ܘܐܚܪ̈ܢܐ ܐܚܪܢܝܐܝܬ ܐܣܒܪܘ ܘܐܡܪܘ. ܚܢܢ ܕܝܢ ܐܡܪܝܢܢ ܕܚܕܐ ܘܗܝ ܟܕ
                    ܗܝ ܐܝܬܝܗܿ ܢܦܫܐ ܘܪܘܚܐ ܘܗܘܢܐ. ܘܚܕ ܡܕܡ ܐܝܬܝܗܘܢ  f.65a  ܬܠܬܝܗܘܢ. ܗܠܝܢ ܓܝܪ
                    ܬܠܬܐ ܫܡܗܐ ܐܝܬܝܗܘܢ ܕܡܫܘܕܥܝܢ ܠܚܕ ܟܝܢܐ ܘܩܢܘܡܐ ܕܣܝܡ. ܝܕܝܥܐ ܓܝܪ ܕܚܕ ܘܗܝ ܟܕ ܗܝ ܐܝܬܝܗܿ
                    ܢܦܫܐ ܘܪܘܚܐ ܘܗܘܢܐ ܡܢ ܗܠܝܢ ܡܚܘܝ̈ܢܘܬܐ. 
                (ܐ): ܐܢ ܠܘ ܗܟܢܐ ܐܝܬܝܗܿ ܡܫܬܟܚ ܒܪܐܢܫܐ ܕܡܪܟܒ ܡܢ ܐܪܒܥܐ ܟܝ̈ܢܐ. ܡܢ ܢܦܫܐ
                    ܐܡܪ ܐܢܐ. ܘܡܢ ܗܘܢܐ ܘܡܢ ܪܘܚܐ ܘܡܢ ܦܓܪܐ. 
                ܒ: ܐܢ ܠܘ ܗܟܢܐ ܐܝܬܝܗܿ ܡܫܬܟܚܝܢ ܗܠܝܢ ܬܠܬܐ. ܢܦܫܐ ܐܡܪ ܐܢܐ ܘܗܘܢܐ ܘܪܘܚܐ
                    ܬܠܬܐ ܩܢܘܡܐ ܘܬܠܬܐ ܟܝ̈ܢܐ ܕܝܠܢ̈ܝܐ. ܐܝܢܐ ܡܢܗܘܢ ܡܥܒܕ ܒܦܓܪܐ ܘܐܝܢܐ ܠܐ. ܐܘ ܐܦ ܬܠܬܝܗܘܢ
                    ܡܥܒܕܝܢ. ܘܐܝܢܐ ܡܢ ܬܠܬܝ̈ܗܘܢ ܡܬܦܪܥ ܠܦܘܬ ܥܒܕܘܗܝ ܘܐܝܢܐ ܠܐ. ܐܦ ܬܠܬܝܗܘܢ ܡܬܦܪܥܝܢ. ܗܠܝܢ
                    ܗܟܝܠ ܫܟܝܪ̈ܘܬܐ ܐܝܬܝܗܝܢ ܘܫܛܘܪ̈ܘܬܐ ܪܘܪ̈ܒܬܐ. 
                ت: ܝܕܝܥܐ ܕܚܕ ܐܝܬܝܗܘܢ ܬܠܬܝ̈ܗܘܢ ܗܠܝܢ. ܡܢ ܗܿܝ ܕܟܬܒܐ ܟܗܢܝܐ ܚܕ ܐܡܪܘ
                    ܕܐܝܬܝܗܘܢ ܘܕܡܫܡܗܝܢ ܠܗܿ ܠܢܦܫܐ ܗܘܢܐ. ܘܠܗܘܢܐ ܢܦܫܐ. ܘܠܢܦܫܐ ܪܘܚܐ. ܘܠܪܘܚܐ ܢܦܫܐ. ܡܙܡܪ
                    ܟܗܢܝ̈ܬܐ ܡܢ ܕܘܝܕ ܐܡܪ ܡܛܠ ܒܪܢܫܐ: ܕܢܦܩܐ ܪܘܚܗ ܘܗܿܦܟ ܠܐܘܪܥܗ1 ܡܙܡܘܪܐ:4:145. ܘܫܠܝܡܘܢ
                    ܒܪܗ ܕܗܢܐ ܐܡܪ: ܕܗܿܦܟ ܦܓܪܐ ܠܐܪܥܐ ܘܪܘܚܐ ܗܿܦܟܐ ܠܘܬ ܡܪܝܐ ܕܝܗܒܗܿ2 ܩܘܗܠܬ:8:12. ܙܟܪܝܐ ܕܝܢ
                    ܢܒܝܐ ܐܡܪ: ܕܒܪܐ ܪܘܚܗ ܕܒܪܐܢܫܐ ܒܓܘܗ3 ܙܟܪܝܐ: 1:12.  f.65b  ܐܫܥܝܐ ܕܝܢ ܬܘܒ
                    ܐܡܪ ܕܢܦܫܝ ܐܬܐܘܒܬ ܠܟ ܐܦ ܒܠܠܝܐ ܪܘܚܝ ܡܩܕܡܐ ܠܘܬܟ4 ܐܫܥܝܐ ܢܒܝܐ:9:26. ܗܐ ܗܠܝܢ ܟܠܗܝܢ ܠܢܦܫܐ
                    ܫܡܗܘ ܘܩܪܘ ܪܘܚܐ. ܘܠܪܘܚܐ ܢܦܫܐ. ܕܩܕܝܫܐ ܝܘܐܢܢܝܣ ܐܦܝܣܩܘܦܐ ܕܩܘܣܛܢܛܝܢܘܦܠܝܣ ܡܢ ܦܘܫܩܐ
                    ܕܐܓܪܬܐ ܕܬܪܬܝܢ ܕܠܘܬ ܩܘܪ̈ܝܢܬܝܐ: ܡܢܐ ܗܟܝܠ ܥܦܪܐ ܒܠܚܘܕܘܗܝ ܐܝܬܘܗܝ ܐܕܡ ܐܦ ܐܘܣܝܐ ܐܚܪܬܐ
                    ܐܝܬ ܗܘܐ ܠܗܿ ܒܪܬ ܓܢܣܐ ܕܗܠܝܢ ܕܠܥܠ ܘܠܐ ܡܓܫܡܐ ܗܿܝ ܕܢܦܫܐ ܘܪܘܚܐ ܩܪܐ ܠܗܿ ܟܬܒܐ ܠܟܠ ܐܢܫ
                    ܝܕܝܥܐ ܕܐܦ ܗܕܐ ܐܝܬ ܗܘܐ ܠܗ. ܒܪܬ ܓܢܣܐ ܕܗܠܝܢ ܕܠܥܠ ܘܠܐ ܡܓܫܡܐ ܗܿܝ ܕܢܦܫܐ ܘܪܘܚܐ ܩܪܐ ܠܗܿ
                    ܟܬܒܐ. ܠܟܠ ܐܢܫ ܝܕܝܥܐ ܕܐܦ ܗܕܐ ܐܝܬ ܗܘܐ ܠܗ. ܐܦ ܗܢܐ ܡܠܦܢܐ ܩܕܝܫܐ ܘܒܚܝܪܐ ܐܡܪ ܕܠܗܿ ܟܕ
                    ܠܗܿ ܠܐܘܣܝܐ ܠܗܕܐ ܡܫܡܗ ܟܬܒܐ ܢܦܫܐ ܐܦ ܪܘܚܐ. ܘܐܦ ܩܕܝܫܐ ܓܪܝܓܪܝܘܣ ܬܐܘܠܘܓܘܣ ܒܡܐܡܪܐ ܕܝܠܕܐ
                    ܡܫܡܗ ܘܠܗܿ ܠܢܦܫܐ ܪܘܚܐ ܡܛܠ ܒܪܢܫܐ ܕܐܝܬܘܗܝ ܪܘܚܐ ܐܪܥܢܝܐ ܘܫܡܝܢܐ. ܙܒܢܝܐ ܘܠܐ ܡܝܘܬܐ.
                    ܡܬܚܙܝܢܐ ܘܡܬܝܕܥܢܐ. ܡܨܥܝܐ ܕܪܒܘܬܐ ܘܕܡܟܝܟܘܬܐ. ܠܗ ܟܕ ܠܗ ܪܘܚܐ ܘܒܣܪܐ. ܪܘܚܐ ܡܛܠ ܛܝܒܘܬܐ.
                    ܒܣܪܐ ܡܛܠ ܪܡܘܬܐ. ܚܙܐ ܐܢܬ ܐܝܟܢܐ ܫܡܗܗܿ ܠܢܦܫܐ ܪܘܚܐ. ܡܕܝܢ ܢܦܫܐ ܪܘܚܐ ܘܗܘܢܐ ܚܕ ܟܝܢܐ ܡܕܡ
                    ܕܝܠܢܝܐ ܐܝܬܝܗܘܢ. 
            
            
                ܩܦܠܐܘܢ ܕܬܠܬܝܢ ܘܬܪܝܢ
                ܕܡܚܘܐ ܕܢܦܫܐ ܐܡܬܝ  f.66a  ܕܡܫܬܪܝܐ ܡܢ ܦܓܪܐ ܠܐ ܐܒܕܐ 
                ܐܠܐ ܢܛܝܪܐ ܐܘ ܡܩܝܡܐ ܒܩܘܝܡܐ ܕܝܠܗܿ
                ܢܦܫܐ ܗܟܝܠ ܐܡܬܝ ܕܡܫܬܪܝܐ ܡܢ ܦܓܪܐ ܕܥܡܗ ܐܣܝܪܐ ܘܡܬܦܪܫܐ ܡܢܗ ܠܐ ܐܒܕܐ. ܐܠܐ
                    ܢܛܝܪܐ ܐܘ ܡܩܝܡܐ ܒܩܘܝܡܐ ܕܝܠܗܿ ܕܝܠܢܐܝܬ. ܘܝܕܝܥܐ ܕܗܟܢܐ ܐܝܬܝܗܿ ܡܢ ܗܠܝܢ ܡܚܘܝ̈ܢܘܬܐ: 
                ܐ: ܟܠܡܕܡ ܕܐܝܬܘܗܝ ܘܠܗ ܡܩܝܡ ܐܘ ܒܐܚܪܢܐ. ܗܢܐ ܗܟܝܠ ܕܡܩܝܡ ܒܐܚܪܢܐ ܟܕ ܠܐ
                    ܩܢܐ ܩܝܡܐ ܕܝܬܗ. ܡܚܒܠ ܠܗܿܘ ܡܕܡ ܕܒܗ ܡܩܝܡ ܘܦܢܐ ܐܡܝܢܐܝܬ ܠܘܬܗ. ܡܛܠ ܕܟܝܢܗ ܒܩܘܝܡܗ ܕܗܿܘ
                    ܡܬܢܛܪ. ܘܐܢ ܡܬܚܒܠ ܗܿܘ ܐܦ ܗܘ ܐܒܕ. ܢܦܫܐ ܗܟܝܠ ܟܕ ܐܝܬܝܗܿ ܒܦܓܪܐ ܙܒܢ̈ܝܢ ܣܓܝ̈ܐܢ ܡܫܠܡܐ ܠܗ
                    ܒܨܒܝܢܗܿ ܠܫܢ̈ܕܐ ܘܠܡܘܬܐ ܐܝܟܢܐ ܕܢܫܬܪܐ ܘܢܬܚܒܠ. ܘܗܕܐ ܥܒܕܐ ܒܗ ܐܡܬܝ ܕܡܬܚܙܐ ܠܗܿ ܕܥܕܪ
                    ܠܗܿ. ܐܠܘ ܓܝܪ ܩܝܡܐ ܕܝܬܗܿ ܠܝܬ ܗܘܐ ܠܗܿ ܟܕ ܡܬܦܪܫܐ ܗܘܬ ܡܢܗ ܠܐ ܡܫܠܡܐ ܗܘܬ ܠܗ ܕܢܐܒܕ ܡܛܠ
                    ܕܝܕܥܐ ܗܘܬ ܕܐܡܬܝ ܕܐܒܕ ܗܘ ܐܦ ܐܒܕܐ ܗܘܬ. ܐܠܐ ܒܗܿܝ ܕܝܗܒܐ ܠܗ ܕܢܡܘܬ ܘܢܬܚܒܠ ܝܕܥܝܢܢ ܕܟܕ
                    ܡܬܦܪܫܐ ܡܢܗ ܩܢܝܐ ܩܘܝܡܐ ܕܝܬܗܿ. ܘܡܩܝܡܐ ܡܢܗܿ ܘܠܗܿ ܩܢܘܡܐ ܕܝܠܗܿ. 
                ܒ: ܝܕܝܥܐ ܕܡܩܝܡܐ ܒܩܘܝܡܗܿ ܡܢ ܒܬܪ ܕܡܬܦܪܫܐ ܡܢ ܗܗܿܝ ܕܐܝܬܝܗܿ ܐܘܣܝܐ ܐܝܟ
                    ܕܩܕܡܢܢ ܚܘܝܢܢ ܒܬܐܘܪ̈ܝܣ ܥܠܝ̈ܬܐ. ܘܐܘܣܝܐ ܡܩܝܡܐ  f.66b  ܡܢܗܿ ܘܠܗܿ ܟܕ ܠܐ ܣܢܝܩܐ
                    ܥܠ ܐܚܪܢܐ ܕܬܬܩܝܡ ܒܗ. 
                ت: ܦܓܪܐ ܡܢ ܐܝܬܘܗܝ ܐܘܪܓܢܘܢ ܕܢܦܫܐ ܡܛܠ ܕܒܗ ܦܠܚܐ ܛܒܬܐ ܘܒܝ̈ܫܬܐ ܘܗܿܘ
                    ܕܡܥܒܕ ܒܐܘܪܓܢܘܢ ܠܐ ܡܬܚܒܠ ܟܕ ܐܫܕܐ ܠܗ ܠܐܘܪܓܢܘܢ ܕܝܠܗܿ. ܒܕܓܘܢ ܐܟܙܢܐ ܕܢܓܪܐ ܠܐ ܡܬܚܒܠ ܟܕ
                    ܫܕܐ ܠܥܫܦܗ ܘܠܡܣܪܐ. ܐܠܐ ܢܛܝܪ ܘܩܝܡ. ܘܐܝܟܢܐ ܕܐܪܕܝܟܠܐ ܠܐ ܡܬܚܒܠ ܟܕ ܫܕܐ ܠܬܘܡܗ(؟). ܐܠܐ
                    ܕܢܛܝܪ ܘܩܝܡ. ܗܟܢܐ ܐܦ ܢܦܫܐ ܟܕ ܡܬܦܪܫܐ ܡܢ ܦܓܪܐ ܕܐܝܬܘܗܝ ܐܘܪܓܢܘܢ ܕܝܠܗܿ ܠܐ ܐܒܕܐ ܘܠܐ
                    ܡܬܚܒܠܐ ܐܠܐ ܕܢܛܝܪܐ ܘܩܝܡܐ. ܡܕܝܢ ܐܚܪܝܢ ܐܝܬܝܢ ܚܢܢ ܘܐܚܪܝܢ ܕܝܠܢ. ܐܚܪܝܢ ܗܠܝܢ ܕܗܿܘ ܕܝܠܢ.
                    ܚܢܢ ܡܢ ܐܝܬܘܗܝ ܢܦܫܐ. ܕܝܠܢ ܕܝܢ ܐܝܬܘܗܝ ܦܓܪܐ. ܗܠܝܢ ܕܝܢ ܕܗܿܘ ܕܝܠܢ ܐܝܬܝܗܘܢ ܩܢܝ̈ܢܐ.
                    ܘܦܝܠܘܣܘܦܘܬܐ ܡܢ ܝܨܦܐ ܥܠܝܢ. ܐܣܝܘܬܐ ܕܝܢ ܝܨܦܐ ܥܠ ܗܿܘ ܕܥܠܝܢ. ܬܓܪ̈ܬܐ ܕܝܢ ܕܟܠܓܢܣ ܝܨܝ̈ܦܢ
                    ܥܠ ܗܠܝܢ ܕܗܿܘ ܕܝܠܢ. ܘܐܝܠܝܢ ܕܐܚܪܬܐ ܘܐܚܪܬܐ ܐܘܡܢܘܬܐ ܝܨܦܐ ܥܠܝܗܘܢ ܐܚܪܬܐ ܘܐܚܪܬܐ ܐܘܣܝܐ
                    ܐܝܬ ܠܗܘܢ. ܡܕܝܢ ܐܝܟ ܐܘܣܝܐ. ܐܘܣܝܐ ܐܝܬܝܗܿ ܢܦܫܐ ܣܛܪ ܡܢ ܐܘܣܝܐ ܕܦܓܪܐ. ܟܕ ܡܬܦܪܫܐ ܡܢܗܿ
                    ܘܠܗܿ ܢܛܝܪܐ. ܕ: ܝܕܝܥܐ ܕܢܛܝܪܐ ܘܩܝܡܐ ܡܢ ܒܬܪ ܕܡܬܦܪܫܐ ܡܢ ܦܓܪܐ ܡܢ ܗܿܝ ܕܐܝܬܝܗܿ ܠܐ
                    ܡܝܘܬܬܐ. ܐܝܟ ܕܚܘܝܢܢ ܒܩܦܠܐܘܢ ܕܫܬܬܥܣܪ. ܘܠܐ  f.67a  ܡܝܘܬܬܐ. ܠܐ ܣܟ ܐܒܕܐ. ܐܠܐ
                    ܢܛܝܪܐ ܘܩܝܡܐ ܟܕ ܡܚܝܕܐ ܥܡ ܐܚܪܢܐ ܟܕ ܡܬܦܪܫ ܡܢܗ. 
                ܗܿ: ܣܗܕܝܢ ܟܬܒܐ ܩܕܝ̈ܫܐ ܕܢܛܝܪܐ ܢܦܫܐ ܘܩܝܡܐ ܡܢ ܒܬܪ ܕܡܫܬܪܝܐ ܡܢ ܦܓܪܐ.
                    ܐܡܪ ܐܠܗܐ ܠܡܘܫܐ: ܐܢܐ ܐܢܐ ܐܠܗܗ ܕܐܒܪܗܡ ܘܕܐܝܣܚܩ ܘܕܝܥܩܘܒ1 ܡܦܩܢܐ:3-2:6. ܘܐܠܗܐ ܠܐ
                    ܗܘܐ ܕܡܝ̈ܬܐ ܐܠܐ ܕܚܝ̈ܐ2
                            ܡܬܝ:32:22. ܘܒܝܕ ܗܕܐ ܕܐܡܪ ܕܠܐ ܕܡܝ̈ܬܐ ܐܠܐ ܕܚܝ̈ܐ ܚܘܝ ܕܢܦܫ̈ܬܗܘܢ
                    ܚܝܢ ܘܢܛܝܪ̈ܢ ܘܩܝ̈ܡܢ. ܘܫܠܝܡܘܢ ܐܡܪ: ܕܗܿܦܟ ܥܦܪܐ ܠܐܪܥܐ ܐܝܟ ܕܗܘܐ ܘܪܚܐ ܦܢܝܐ ܠܘܬ
                        ܡܪܝܐ3
                            ܩܘܗܠܬ:8:12. ܚܘܝ ܕܢܛܝܪܐ ܢܦܫܐ ܘܚܝܐ ܘܩܝܡܐ. ܘܡܪܝܐ ܐܡܪ ܒܐܘܢܓܠܝܘܢ:
                    ܕܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ. ܢܦܫܐ ܕܝܢ ܠܐ ܡܫܟܚܝܢ ܠܡܩܛܠ4 ܡܬܝ:28:10. ܘܒܗܕܐ ܕܐܡܪ
                    ܕܠܐ ܡܬܩܛܠܐ ܢܦܫܐ. ܬܪܬܝܢ ܚܘܝ: ܚܕܐ ܡܢ ܕܢܦܫܐ ܕܠܐ ܓܫܘܡ ܐܝܬܝܗܿ. ܒܗܿܝ ܕܠܐ ܡܩܒܠܐ ܚܫ̈ܐ
                    ܓܘܫܡܢ̈ܝܐ. ܐܚܪܬܐ ܕܝܢ ܕܠܐ ܡܝܘܬܬܐ ܗܝ. ܘܗܿܘ ܕܠܐ ܡܝܘܬܐ ܐܝܬܘܗܝ ܢܛܝܪ ܘܡܩܝܡ ܟܕ ܠܐ ܐܒܕ
                    ܘܠܐ ܡܬܚܒܠ. ܘܬܘܒ ܐܡܪ ܒܬܫܥܝܬܐ ܕܥܠ ܠܥܙܪ܆ ܕܡܢ ܒܬܪ ܕܡܝܬ ܥܬܝܪܐ ܘܐܬܩܒܪ. ܐܘܒܠܘܗܝ ܡܠܐܟܐ
                    ܠܥܙܪ ܠܥܘܒܗ ܕܐܒܪܗܡ ܘܕܫܐܠ ܥܬܝܪܐ ܡܝ̈ܐ ܡܢ ܐܒܪܗܡ. ܒܗܿܝ ܗܟܝܠ ܕܐܡܪ ܐܘܒܠܘܗܝ ܡܠܐܟܐ ܠܥܙܪ
                    ܠܥܘܒܗ ܕܐܒܪܗܡ ܦܬܓܡܐ  f.67b  ܠܥܬܝܪܐ. ܒܗܠܝܢ ܟܠܗܝܢ ܚܘܝ ܕܢܦܫ̈ܬܐ ܟܕ ܡܫܬܪ̈ܝܢ ܡܢ
                    ܦܓܪ̈ܐ ܚܝ̈ܢ ܘܢܛܝܪ̈ܢ ܘܩܝ̈ܡܢ ܒܩܢܘܡܝ̈ܗܝܢ. ܘܬܘܒ ܐܡܪ ܦܐܘܠܘܣ ܗܘ ܡܛܠܬܗ ܕܐܬܥܠܝ ܥܕܡܐ ܠܫܡܝܐ
                        ܕܬܠܬܐ5 ܐܓܪܬܐ
                            ܕܬܪܬܝܢ ܩܘܪ̈ܝܢܬܝܐ:2:12. ܘܐܘܣܦ ܕܐܢ ܒܦܓܪ ܘܐܢ ܕܠܐ ܦܓܪ ܠܐ ܝܕܥ
                    ܐܢܐ. ܐܢ ܢܦܫܗ ܕܠܐ ܦܓܪܗ ܐܬܥܠܝܬ ܐܝܟܢܐ ܕܗܘ ܐܡܪ ܝܕܝܥܐ ܡܕܝܢ ܕܡܢ ܒܬܪ ܕܡܬܦܪܫܐ ܢܦܫܐ ܡܢ
                    ܦܓܪܐ ܩܝܡܐ ܘܢܛܝܪܐ ܐܝܟܢܐ ܕܐܦ ܢܦܫܗ ܕܫܠܝܚܐ ܐܬܦܪܫܬ ܡܢ ܦܓܪܗ ܟܕ ܢܛܝܪܐ. ܘܬܘܒ ܟܬܒ
                    ܠܥܒܪ̈ܝܐ: ܕܐܬܕܟܪ ܠܐܝܠܢ ܕܐܠܝܨܝܢ ܐܝܟ ܐܢܫ̈ܐ ܕܒܣܪܐ ܠܒܝܫܝܢ ܐܢܬܘܢ. ܐܢ ܗܟܝܠ ܐܚܪܢܐ ܗܘ ܗܿܘ
                    ܕܠܒܫ. ܘܐܚܪܢܐ ܗܘ ܗܿܘ ܕܡܬܠܒܫ. ܝܕܝܥܐ ܗܝ ܕܐܚܪܢܐ ܗܘ ܟܝܢܗܿ ܕܢܦܫܐ. ܘܐܚܪܢܐ ܗܘ ܟܝܢܗ ܕܦܓܪܐ
                    ܗܿܘ ܕܠܒܫ ܠܗܿ. ܘܐܝܟܢܐ ܕܗܿܘ ܕܠܒܫ ܠܒܘܫܐ ܡܢ ܒܬܪ ܕܫܠܚ ܠܗ ܚܝ ܘܢܛܝܪ ܘܩܝܡ. ܗܟܢܐ ܘܐܦ ܢܦܫܐ
                    ܢܛܝܪܐ ܘܩܝܡܐ ܡܢ ܒܬܪ ܕܫܠܚܐ ܠܗ ܠܦܓܪܐ ܠܒܘܫܗܿ. 
            
            
                ܩܦܠܐܘܢ ܕܬܠܬܝܢ ܘܬܠܬܐ
                ܕܡܚܘܐ ܕܡܢ ܒܬܪ ܕܡܬܦܪܫܐ ܢܦܫܐ ܡܢ ܦܓܪܐ ܢܛܝܪܐ ܝܕܥܬܗܿ ܘܡܪܓܫܢܘܬܗܿ ܘܥܘܗܕܢܗܿ. ܘܒܕܓܘܢ ܝܕܥܐ
                    ܘܡܪܓܫܐ ܘܥܗܕܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. 
                ܩܕܡܐܝܬ ܡܢ ܙܕܩ ܕܢܥܩܒ ܕܐܝܠܝܢ ܐܝܬܝܗܘܢ ܕܐܡܪܝܢ ܕܠܐ ܢܛܝܪܐ ܝܕܥܬܗܿ ܡܢ ܒܬܪ
                    ܕܡܬܦܪܫܐ ܡܢ ܦܓܪܐ. ܒܬܪܟܢ ܢܣܝܡ  f.68a  ܣܥܝܗܘܢ ܕܥܠ ܗܕܐ ܘܫܪ̈ܝܝܗܘܢ. ܘܗܝܕܝܢ
                    ܢܚܘܐ ܫܘܒܚܐ ܕܝܠܢ ܘܐܡܪܝܢܢ ܕܢܣܛܘܪ̈ܝܢܘ ܘܐܢܫ̈ܝܢ ܐܚܪ̈ܢܐ ܥܡܗܘܢ ܐܝܬܝܗܘܢ ܕܐܡܪܝܢ ܕܠܐ ܢܛܝܪܐ
                    ܝܕܥܬܗܿ ܕܢܦܫܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. ܘܒܕܓܘܢ ܠܐ ܝܕܥܐ ܐܦܠܐ ܥܗܕܐ. ܘܡܚܘܝܢ ܠܗܕܐ ܒܝܕ
                    ܣܥܝܐ ܗܠܝܢ: 
                ܣܥܝܐ ܡܢ ܕܝܠܗܘܢ ܩܕܡܝܐ ܐܝܬܘܗܝ ܗܢܐ: 
                ܐܢ ܝܕܥܬܐ ܠܡ ܕܢܦܫ̈ܬܐ ܢܛܝܪ̈ܢ ܡܢ ܒܬܪ ܕܡܬܦܪ̈ܫܢ ܡܢ ܦܓܪ̈ܐ. ܘܢܦܫ̈ܬܐ ܡܢ
                    ܕܙܕܝ̈ܩܐ ܝܕܥܢ ܕܛܒܬܐ ܣܥܪ̈ܢ ܘܒܕܓܘܢ ܚܕܝܢ ܕܕܪ̈ܫܝܥܐ ܕܝܢ ܝܕܥܢ ܕܒܝܫ̈ܬܐ ܣܥܪ̈ܢ ܘܒܕܓܘܢ
                    ܡܬܬܥܝ̈ܩܢ. ܘܚܕܘܬܐ ܘܥܩܬܐ ܘܒܘܣܡܐ ܘܫܘܢܩܐ ܐܝܬܝܗܝܢ. ܡܕܝܢ ܠܘ ܟܐܢܘܬܐ ܕܐܠܗܐ ܡܬܚܙܝܐ ܒܗܠܝܢ
                    ܕܢܦܫ̈ܬܐ ܥܡ ܦܓܪ̈ܐ ܣܥܪ̈ܢ ܛܒܬܐ ܘܒܝܫ̈ܬܐ ܘܢܦܫ̈ܬܐ ܡܬܒܣܡܢ ܘܡܫܬܢ̈ܩܢ ܒܠܥܕ ܡܢ ܦܓܪ̈ܝܗܘܢ
                    ܐܝܠܝܢ ܕܥܡܗܘܢ ܣܥܪܝܢ ܛܒܬܐ ܘܒܝܫ̈ܬܐ. 
                ܚܢܢ ܕܝܢ ܫܪܝܢܢ ܠܣܥܝܗܘܢ ܗܢܐ ܒܝܕ ܗܠܝܢ ܐܡܪܝܢܢ ܕܚܕܘܬܐ ܘܥܩܬܐ ܠܘ ܡܠܟܘܬܐ
                    ܘܓܝܗܢܐ ܐܝܬܝܗܝܢ. ܘܐܦܠܐ ܒܘܣܡܐ ܘܫܘܢܩܐ. ܚܕܘܬܐ ܓܝܪ ܘܥܩܬܐ ܕܡܛܠ ܣܘܥܪܢܐ ܗܿܘ ܕܡܛܠܬܗܿ ܗܘܝܢ
                    ܐܝܬܝܗܝܢ  f.68b  ܘܣܒ ܬܚܘܝܬܐ ܕܥܠ ܗܕܐ. ܗܢܘܢ ܬܪܝܢ ܥܒܕܐ ܕܦܪܥܘܢ ܕܚܒܝܫܝܢ ܗܘܘ
                    ܒܝܬ ܐܣܝܪ̈ܐ ܥܡ ܝܘܣܦ܆ ܕܠܗܿܘ ܚܕ ܡܢܗܘܢ ܐܡܪ ܠܗ ܝܘܣܦ ܕܡܢ ܒܬܪ ܬܠܬܐ ܝܘܡ̈ܝܢ ܡܗܦܟ ܠܟ ܦܪܥܘܢ
                    ܬܫܡܫܬܗ. ܠܗܿܘ ܕܝܢ ܐܚܪܢܐ ܐܡܪ ܠܗ. ܕܡܢ ܒܬܪ ܬܠܬܐ ܝܘܡ̈ܝܢ ܩܛܠ ܠܟ ܦܪܥܘܢ1 ܒܪܝܬܐ:40.
                    ܘܒܕܓܘܢ ܗܿܘ ܡܢ ܚܕ ܡܢ ܚܕ ܡܢ ܗܿܘ ܥܕܢܐ ܫܪܝ ܚܕܐ ܛܒ. ܗܢܐ ܕܝܢ ܡܬܬܥܝܩ ܪܒܬ. ܚܕܘܬܐ ܗܟܝܠ
                    ܕܗܿܘ ܕܠܘܬ ܬܫܡܫܬܗ ܕܦܪܥܘܢ ܘܥܩܬܗ ܕܗܿܘ. ܠܘ ܩܛܠܐ ܐܝܬܝܗܿ ܗܘܬ ܐܠܐ ܥܩܬܐ ܕܡܛܠ ܩܛܠܗ. ܬܘܒ
                    ܕܝܢ ܐܠܘ ܐܢܫ ܡܠܟܐ ܐܡܪ ܠܬܪܝܢ ܡܢ ܦܠܚ̈ܘܗܝ. ܠܚܕ ܡܢ ܝܗܒ ܐܢܐ ܠܟ ܠܡܚܪ ܡܐܐ ܐܠܦ̈ܝܐ ܕܝܢܪ̈ܐ.
                    ܠܐܚܪܝܢ ܕܝܢ ܩܛܠ ܐܢܐ ܠܟ. ܒܕܓܘܢ ܗܿܘ ܡܢ ܚܕܐ ܗܘܐ. ܗܢܐ ܕܝܢ ܡܬܬܥܝܩ ܗܘܐ. ܠܐ ܐܡܪܝܢ ܗܘܝܢ
                    ܚܕܘܬܗ ܕܗܿܘ ܡܐܐ ܐܦ̈ܝܐ ܕܝܢܪ̈ܐ. ܘܐܦܠܐ ܥܩܬܗ ܕܗܿܘ ܩܛܠܐ ܐܝܬܝܗܿ ܗܘܬ. ܐܠܐ ܥܩܬܐ ܕܡܛܠ
                    ܩܛܠܐ. ܗܟܢܐ ܘܠܐ ܚܕܘܬܐ ܕܚܕܝܢ ܢܦܫ̈ܬܐ ܕܙܕܝ̈ܩܐ ܡܢ ܒܬܪ ܕܡܬܦܪ̈ܫܢ ܡܢ ܦܓܪ̈ܐ ܡܠܟܘܬܐ ܘܒܘܣܡܐ
                    ܐܝܬܝܗܘܢ. ܘܐܦܠܐ ܥܩܬܐ ܕܡܬܬܥܝ̈ܩܢ ܢܦܫ̈ܬܐ ܕܪ̈ܫܝܥܐ. 
                ܐ: ܬܘܒ ܕܝܢ ܐܡܪܝܢܢ ܗܟܢܐ ܦܪܝܫܐ ܚܕܘܬܐ ܘܥܩܬܐ ܕܡܛܠ ܣܘܥܪܢܐ ܐܝܟ ܕܦܪܝܫ
                    ܚܝܠܐ ܡܢ ܡܥܒܕܢܘܬܐ. ܐܟܙܢܐ ܕܐܡܪܝܢܢ  f.69a  ܕܫܒܪܐ ܡܢ ܒܚܝܠܐ ܢܓܪܐ ܐܝܬܘܗܝ
                    ܒܡܥܒܕܢܘܬܐ ܕܝܢ ܠܝܬܘܗܝ ܢܓܪܐ. ܡܕܝܢ ܘܐܦܠܐ ܚܕܘܬܐ ܘܥܩܬܐ. ܕܡܛܠ ܣܘܥܪܢܐ ܐܝܢܐ ܕܗܘ. ܗܘ ܟܕ
                    ܗܘ ܣܘܥܪܢܐ ܐܝܬܝܗܘܢ. ܐܠܐ ܐܚܪ̈ܢܝܬܐ ܘܐܚܪ̈ܢܝܬܐ. 
                ܒ: ܘܬܘܒ ܗܟܢܐ ܒܘܣܡܐ ܡܢ ܕܒܡܠܟܘܬܐ ܕܫܡܝܐ ܠܐ ܚܙܬܗ ܥܝܢܐ ܕܒܣܪܐ ܘܠܐ ܐܕܢܐ
                    ܫܡܥܬܗ. ܘܐܦܠܐ ܥܠ ܠܒܐ ܕܒܪܢܫܐ ܣܠܩ2 ܩܘܪ̈ܝܢܬܝܐ ܩܕܡܝܬܐ:9:2 ܐܝܟ ܕܟܬܝܒ. ܗܟܢܐ ܐܦ
                    ܫܘܢܩܐ ܕܒܓܝܗܢܐ. ܚܕܘܬܐ ܕܝܢ ܘܥܩܬܐ ܘܐܦܢ ܥܝܢܐ ܕܒܣܪܐ ܠܐ ܚܙܬ ܐܢܝܢ. ܒܗܿܝ ܕܓܕܫܐ ܐܢܝܢ.
                    ܐܕܢܐ ܕܒܣܪܐ ܫܡܥܬ ܐܢܝܢ ܘܣܠܩ ܥܠ ܠܒܐ ܕܒܪܢܫܐ. ܡܕܝܢ ܠܝܬܝܗܿ ܚܕܘܬܐ ܘܥܩܬܐ. ܗܠܝܢ ܕܢܩًܦܢ
                    ܠܢܦ̈ܫܬܐ ܕܒܢܝ̈ܢܫܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. ܒܘܣܡܐ ܕܡܠܟܘܬܐ ܘܫܘܢܩܐ ܕܒܓܝܗܢܐ ܐܝܟܢܐ
                    ܕܗܠܝܢ ܐܡܪܝܢ. ܘܣܥܝܗܘܢ ܕܝܢ ܬܪܝܢܐ ܐܝܬܘܗܝ ܗܢܐ: ܢܦܫܐ ܠܡ ܐܝܬ ܠܗܿ ܒܟܝܢܗܿ ܝܕܥܬܐ
                    ܘܡܪܓܫܢܘܬܐ ܘܥܘܗܕܢܐ. ܟܕ ܡܚܝܕܐ ܥܡ ܦܓܪܐ. ܡܕܝܢ ܕܡܫܬܪܝܐ ܡܢܗ ܠܝܬ ܠܗܿ ܗܠܝܢ ܕܟܝܢܗܿ ܥܕܡܐ
                    ܕܡܢ ܕܪܝܫ ܡܬܪܟܒܐ ܥܡ ܦܓܪܐ. ܐܟܙܢܐ ܕܢܘܪܐ ܕܡܬܪܟܒܐ ܥܡ ܗܘܠܐ. ܡܚܡܐ ܘܡܢܗܪܐ ܟܕ ܚܡܝܡܘܬܐ
                    ܘܡܢܗܪܢܘܬܐ ܕܟܝܢܗܿ ܐܝܬܝ̈ܗܝܢ. ܡܕܝܢ ܕܡܫܬܪܝܐ ܡܢ ܗܘܠܐ ܠܐ ܡܚܡܐ  f.69b  ܐܦܠܐ
                    ܡܢܗܪܐ ܟܕ ܡܐ ܕܡܢܕܪܝܫ ܡܬܪܟܒܐ ܥܡ ܗܘܠܐ. ܗܟܢܐ ܠܡ ܐܦ ܢܦܫܐ ܠܐ ܝܕܥܐ ܐܦܠܐ ܡܪܓܫܐ ܘܠܐ ܥܗܕܐ
                    ܒܬܪ ܕܡܫܬܪܝܐ ܡܢ ܦܓܪܐ ܥܕܡܐ ܕܡܬܪܟܒܐ ܥܡ ܦܓܪܐ ܡܢܕܪܝܫ. ܫܪܝܐ: ܢܘܪܐ ܗܿܝ ܕܐܝܬܝܬܘܢ
                    ܠܬܚܘܝܬܐ. ܟܕ ܐܫܬܪܝܬ ܡܢ ܗܘܠܐ. ܠܐ ܐܘܒܕܬ ܚܡܝܡܘܬܐ ܘܠܡܢܗܪܢܘܬܐ ܕܩܢܝܐ ܗܘܬ ܠܗܝܢ ܟܝܢܐܝܬ.
                    ܐܠܐ ܒܗܿܝ ܒܢܘܪܐ ܢܛܝܪ̈ܢ ܗܠܝܢ ܐܝܢܝ̈ܘܬܐ. ܘܐܦܢ ܠܟܘܢ ܡܬܚܙًܝܢ. ܗܟܢܐ ܘܐܦ ܐܪܡܘܢܝܐ ܕܦܓܪܐ
                    ܠܐ ܡܬܢܛܪܐ ܡܛܠ ܕܡܫܬܪܐ. ܒܢܦܫܐ ܕܝܢ ܢܛܝܪ̈ܢ ܟܝܢܐܝܬ. ܘܐܦܢ ܠܐ ܡܬܚܘܝܐ ܠܗܝܢ ܒܦܓܪܐ. ܐܟܙܢܐ
                    ܕܟܕ ܡܬܢܟܐ ܐܘܪܓܢܘܢ ܒܐܝܕܐ ܕܗܝ ܐܘܡܢܐ ܠܐ ܡܬܢܟܐ ܥܡܗ. ܒܗܿܘ ܡܐ ܕܟܝܢܐܝܬ ܩܢܐ. ܠܐ ܓܝܪ
                    ܡܬܦܣܩܐ ܡܠܬܐ ܡܢ ܩܝܬܪܘܕܐ ܐܦܠܐ ܐܒܕܐ ܒܪܬ ܩܠܗ ܐܢ ܡܬܦܣܩܐ ܡܢܬܐ ܡܢ ܩܝܬܪܐ. ܘܐܦܠܐ ܨܒܥܗ
                    ܕܢܓܪܐ ܡܬܦܣܩܐ ܐܢ ܡܬܬܒܪ ܡܣܪܗ ܘܥܫܦܗ. ܗܟܢܐ ܘܐܦ ܢܦܫܐ ܗܿܘ ܡܐ ܕܟܝܢܐܝܬ ܩܢܝܐ ܠܗܿ ܠܐ ܡܘܒܕܐ
                    ܠܗ ܡܛܠ ܕܡܫܬܪܝܐ ܡܢ ܦܓܪܐ. ܘܗܠܝܢ ܡܢ ܐܝܬܝܗܘܢ ܣܥܝ̈ܐ ܕܝܠܗܘܢ ܘܫܪܝܐ ܕܝܠܢ. 
                ܙܕܩ ܕܝܢ ܕܢܦܪܫ ܩܕܡܐܝܬ ܕܒܡܢܐ ܦܪܝܫܐ ܝܕܥܬܗܿ ܕܢܦܫܐ ܡܢ ܡܪܓܫܢܘܬܗܿ ܘܡܢ
                    ܡܬܥܗܕܢܘܬܗܿ ܘܡܢ ܥܘܗܕܢܗܿ. ܘܐܡܬܝ ܕܡܦܪܫܝܢܢ ܠܗܠܝܢ ܐܪܒܥ ܡܢ ܚܕܕܐ ܒܬܪܟܢ  f.70a 
                    ܡܚܘܝܢܢ ܕܢܛܝܪܐ ܝܕܥܬܗܿ ܘܥܘܗܕܢܗܿ ܕܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ ܘܒܕܓܘܢ ܝܕܥܐ ܘܥܗܕܐ.
                    ܝܕܥܬܐ ܗܟܝܠ ܕܦܫܐ ܐܝܬܝܗܿ ܗܿܝ ܕܒܗܿ ܝܕܥܐ ܠܣܘܥܪ̈ܢܐ ܐܠܗܝܐ ܘܐܢܫ̈ܝܐ. ܘܒܗܿ ܝܕܥܐ ܠـܨܒܘܬܐ
                    ܛܒܬܐ ܘܒܝ̈ܫܬܐ. ܘܡܘܬܪ̈ܢܝܬܐ ܘܡܚܣܪ̈ܢܝܬܐ ܘܕܫܪܟܐ. ܘܐܝܟ ܕܒܣܟܐ ܠܡܐܡܪ ܝܕܥܬܗܿ ܕܢܦܫܐ ܐܝܬܝܗܿ
                    ܚܝܠܐ ܕܒܗ ܝܕܥܐ ܠـܨܒܘܬܐ. ܘܡܪܓܫܢܘܬܗܿ ܕܝܢ ܕܢܦܫܐ ܠܘ ܐܚܪܬܐ ܐܝܬܝܗܿ ܡܢ ܝܕܥܬܗܿ. ܐܠܐ ܗܝ ܟܕ
                    ܗܝ ܐܝܬܝܗܿ ܝܕܥܬܗܿ ܡܢ ܡܢ ܗܕܐ. ܓܘܫܡܐ ܡܢ ܐܘܟܝܬ ܦܓܪܐ ܟܕ ܓܫܦ ܒܗ ܡܕܡ ܩܪܝܪܐ ܐܘ ܚܡܝܡܐ ܐܘ
                    ܚܠܝܐ ܐܘ ܚܡܘܨܐ ܐܘ ܕܫܪܟܐ. ܡܪܓܫ ܒܗ. ܟܕ ܐܝܬ ܒܗ ܢܦܫܐ ܕܐܚܪܬܐ ܗܝ ܡܢܗ ܕܩܢܝܐ ܝܕܥܬܐ ܕܐܚܪܬܐ
                    ܗܝ ܡܪܓܫܢܘܬܗܿ ܗܝ ܟܕ ܗܝ ܐܝܬܝܗܿ ܝܕܥܬܗܿ. ܗܿܝ ܓܝܪ ܕܬܪܓܫ ܢܦܫܐ ܒܣܘܥܪܢܐ ܠܘ ܡܕܡ ܐܚܪܢܐ
                    ܐܝܬܝܗܿ ܐܠܐ ܗܿܝ ܕܬܕܥ ܠܣܘܥܪ̈ܢܐ. ܡܕܝܢ ܡܪܓܫܢܘܬܐ ܕܢܦܫܐ ܗܝ ܟܕ ܗܝ ܐܝܬܝܗܿ ܝܕܥܬܗܿ.
                    ܘܝܕܥܬܗܿ ܗܝ ܟܕ ܗܝ ܡܪܓܫܢܘܬܗܿ. 
                ܢܚܘܐ ܗܫܐ ܕܡܢܐ ܦܪܝܫ ܥܘܗܕܢܐ ܡܢ ܡܬܥܗܕܢܘܬܐ: ܩܕܡܐܝܬ ܡܢ ܐܡܪܝܢܢ ܕܣܘܥܪ̈ܢܐ
                    ܬܠܝܬܐܝܬ ܡܣܬܥܪܝܢ ܡܢܗܘܢ ܡܢ ܙܒܢܐ ܕܥܒܪ ܡܢܗܘܢ ܡܢ ܙܒܢܐ ܕܩܐܡ ܡܢܗܘܢ ܬܘܒ  f.70b 
                    ܒܙܒܢܐ ܕܥܬܝܕ. ܥܘܗܕܢܐ ܗܟܝܠ ܐܝܬܘܗܝ ܡܟܢܫܢܐ ܘܢܛܘܪܐ ܕܝܕܥܬܐ ܘܝܘܠܦ̈ܢܐ ܕܣܘܥܪ̈ܢܐ ܕܐܣܬܥܪ
                    ܒܙܒܢܐ ܕܥܒܪ. ܘܝܕܝܥܐ ܗܕܐ ܡܢ ܗܿܝ ܕܠܐ ܐܢܫ ܐܡܪ ܕܥܗܝܕ ܐܢܐ ܗܿܘ ܕܚܙܐ ܐܢܐ ܘܫܡܥ ܐܢܐ. ܘܐܦܠܐ
                    ܕܥܗܕ ܐܢܐ ܗܿܘ ܡܕܡ ܕܥܬܝܕ ܠܡܗܘܐ. ܐܠܐ ܕܥܗܕ ܐܢܐ ܗܿܘ ܡܕܡ ܕܥܒܪ. ܣܘܥܪ̈ܢܐ ܕܝܢ ܗܠܝܢ ܕܒܙܒܢܐ
                    ܕܩܐܡ ܒܝܕ ܪܓܫܬܐ ܘܝܕܥܬܐ ܡܪܓܫܝܢܢ ܒܗܘܢ ܘܝܕܥܝܢܢ ܠܗܘܢ. ܐܢ ܡܢ ܡܬܪ̈ܓܫܢܐ ܐܢܘܢ ܒܝܕ ܪܓܫܬܐ
                    ܕܦܓܪܐ ܡܪܓܫܝܢܢ ܒܗܘܢ. ܐܢܕܝܢ ܡܬܝܕܥܢܐ ܒܝܕ ܝܕܥܬܐ ܕܢܦܫܐ ܝܕܥܝܢܢ ܠܗܘܢ. ܣܘܥܪ̈ܢܐ ܕܥܬܝܕܝܢܢ
                    ܒܝܕ ܣܒܪܐ ܘܣܘܟܝܐ ܣܝܡܝܢ ܠܐ ܓܝܪ ܐܢܫ ܝܕܥ ܐܝܠܝܢ ܕܥܬܝ̈ܕܢ ܠܡܗܘܐ ܐܠܐ ܐܢ ܐܬܝܗܒ ܠܗ ܫܘܟܢܐ
                    ܕܢܒܝܘܬܐ ܡܢ ܐܠܗܐ. ܠܐ ܐܡܪ: ܕܡܣܟܝܢܐ ܘܡܣܪ ܐܢܐ ܕܢܗܘܐ ܙܦܠܢ. ܐܘ ܠܐ ܢܗܘܐ. ܡܕܝܢ ܥܘܗܕܢܐ
                    ܐܝܬܘܗܝ ܡܟܢܫܢܐ ܘܡܢܛܪܢܐ ܕܝܘܠܦ̈ܢܐ ܕܒܙܒܢܐ ܕܥܒܪ. ܡܬܥܗܕܢܘܬܐ ܕܝܢ ܐܝܬܝܗܿ ܗܿܝ ܕܩܕܝܡܐ ܠܗܿ
                    ܡܬܢܫܝܢܘܬܐ. ܘܒܕܓܘܢ ܥܘܗܕܢܐ ܐܡܪܝܢܢ ܕܐܝܬ ܠܗܿ ܠܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ. ܠܘ
                    ܡܬܥܗܕܢܘܬܐ ܗܟܝܠ ܟܕ ܡܪܟܒܐ ܢܦܫܐ ܥܡ ܦܓܪܐ ܡܬܐܡܪ ܥܠ ܢܦܫܐ. ܡܛܠ ܡܬܢܫܝܢܘܬܐ ܡܢ ܥܠܬ ܡܘܙܓܘܗܝ
                    ܕܦܓܪܐ ܗܿܘܝܐ. ܘܥܘܗܕܢܐ  f.71a  ܕܝܢ ܐܝܬܘܗܝ ܕܢܦܫܐ ܟܕ ܡܪܟܒܐ ܥܡ ܦܓܪܐ. ܘܟܕ
                    ܡܫܬܪܝܐ ܡܢܗ ܘܡܢ ܒܬܪ ܕܡܫܬܪܝܐ ܡܢܗ. ܙܕܩ ܬܘܒ ܕܢܚܘܐ ܕܡܢ ܐܝܟܐ ܐܬܬܝܬܝܘ ܐܢܫ̈ܝܢ ܕܢܐܡܪܘܢ
                    ܕܒܛܠ ܥܘܗܕܢܗܿ ܕܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ. ܘܐܡܪܝܢܢ: ܠܘ ܡܢ ܗܿܝ ܕܒܛܠܐ ܡܬܥܗܕܢܘܬܗܿ
                    ܘܟܕ ܐܣܒܪܘ ܕܥܘܗܕܢܐ ܡܬܥܗܕܢܘܬܐ ܐܝܬܘܗܝ ܐܡܪܘ ܕܒܛܠ ܥܘܗܕܢܐ. ܚܢܢ ܕܝܢ ܐܡܪܝܢܢ ܕܣܓܝ ܦܪܝܫܝܢ
                    ܗܠܝܢ ܡܢ ܚܕܕܐ ܕܐܝܟ ܐܝܟܢ ܡܬܢܫܝܢܘܬܐ ܡܢ ܚܫܐ ܗܝ ܕܦܓܪܐ. ܘܡܬܥܗܕܢܘܬܐ ܠܡܬܢܫܝܢܘܬܐ ܢܩܝܦܐ.
                    ܡܕܝܢ ܐܦ ܡܬܥܗܕܢܘܬܐ ܚܫܐ ܗܝ ܕܦܓܪܐ. ܥܘܗܕܢܐ ܕܝܢ ܚܫܐ ܟܝܢܝܐ ܕܢܦܫܐ. ܘܒܕܓܘܢ ܠܐ ܒܛܠ ܡܢ
                    ܢܦܫܐ ܟܕ ܡܫܬܪܝܐ ܡܢ ܦܓܪܐ. ܡܟܝܠ ܕܝܢ ܕܗܠܝܢ ܐܬܦܪ̈ܫܝ ܘܐܬܚܘܝ ܢܗܝܪܐܝܬ. 
                ܗܫܐ ܕܝܢ ܕܡܢ ܒܬܪ ܕܡܬܦܪܫܐ ܡܢ ܦܓܪܐ ܢܛܝܪܐ ܝܕܥܬܗܿ ܘܥܘܗܕܢܗܿ. ܘܒܕܓܘܢ ܝܕܥܐ
                    ܘܥܗܕܐ. ܝܕܝܥܐ ܗܕܐ ܗܟܢܐ ܗܝ ܡܢ ܗܠܝܢ ܡܚܘܝܢ̈ܘܬܐ: ܩܕܡܐܝܬ ܚܝ̈ܠܐ ܕܢܦܫܐ ܡܢܗܘܢ ܡܢ ܐܝܬܝܗܘܢ
                    ܟܝܢ̈ܝܐ ܡܢܗܘܢ ܕܝܢ ܓܕܫܢ̈ܝܐ. ܘܟܝܢ̈ܝܐ ܡܢ ܐܝܬܝܗܘܢ ܡܕܥܐ ܬܪܥܝܬܐ ܝܕܥܬܐ ܡܠܝܠܘܬܐ ܪܘܥܐܝܬܢܝܐ
                    ܥܘܗܕܢܐ ܘܕܫܪܟܐ. ܓܕܫܢ̈ܝܐ ܕܝܢ ܐܝܬܝܗܘܢ ܚܡܬܐ ܪܓܬܐ ܪܓܫܬܐ ܕܒܚܡܫܐ ܪ̈ܓܫܐ. ܦܢܛܣܝܐ ܘܗܠܝܢ
                    ܕܕܡ̈ܝܢ ܠܗܠܝܢ. ܐܟܡܐ ܕܚܘܝܢܢ ܒܩܦܠܐܘܢ ܕܥܣܪܐ. ܟܕ ܡܬܦܪܫܐ ܗܟܝܠ ܢܦܫܐ ܡܢ ܦܓܪܐ ܚܝ̈ܠܐ
                    ܓܕܫܢ̈ܝܐ  f.71b  ܒܛܠܝܢ ܡܢܗܿ ܕܠܐ ܦܘܫܟܐ. ܡܛܠ ܕܡܢ ܥܠܬ ܦܓܪܐ ܓܕܫ ܠܗܿ. ܚܝ̈ܠܐ
                    ܕܝܢ ܟܝܢ̈ܝܐ ܠܐ ܣܟ ܒܛܠܝܢ ܡܢܗܿ ܡܢ ܒܬܪ ܕܡܫܬܪܝܐ ܡܢ ܦܓܪܐ. ܘܝܕܝܥܐ ܗܕܐ ܡܢ ܬܪܬܝܢ. ܚܕܐ ܡܢ
                    ܡܢ ܗܿܝ ܕܟܝܢܐܝܬ ܢܨܝܒܝܢ ܒܗܿ. ܘܐܚܪܬܐ ܡܢ ܗܿܝ ܕܐܢ ܗܠܝܢ ܚܝ̈ܠܐ ܟܝܢ̈ܝܐ ܒܛܠܝܢ ܡܢܗܿ. ܒܛܠ
                    ܟܝܢܗܿ. ܡܛܠ ܕܠܘ ܡܢ ܡܕܡ ܐܚܪܢܐ ܐܝܬܘܗܝ ܟܝܢܗܿ ܗܿܘ ܕܐܝܬܘܗܝ ܚܝ̈ܐ ܣܛܪ ܡܢ ܗܠܝܢ ܚܝ̈ܠܐ. ܐܦ
                    ܗܠܝܢ ܚܝ̈ܠܐ ܡܕܡ ܐܚܪܢܐ ܐܝܬܝܗܘܢ ܣܛܪ ܡܢ ܟܝܢܗܿ. ܠܘ ܓܝܪ ܓܘܫܡܐ ܐܝܬܝܗܿ ܐܝܟܢܐ ܕܢܗܘܘܢ
                    ܚܝ̈ܠܐ ܕܝܠܗܿ ܟܝܢ̈ܝܐ ܣܛܪ ܡܢ ܟܝܢܗܿ. ܐܠܐ ܪܘܚܢܝܬܐ ܐܝܬܝܗܿ ܘܕܠܐ ܓܫܘܡ. ܘܒܕܓܘܢ ܟܝܢܗܿ
                    ܐܝܬܘܗܝ ܕܚܝ ܘܡܬܡܕܥ ܘܡܬܪܥܐ ܘܝܕܥ ܘܡܠܝܠ ܘܡܬܬܙܝܥ ܡܢ ܝܬܗܿ ܘܥܗܕ. ܡܕܝܢ ܢܛܝܪܐ ܝܕܥܬܗܿ
                    ܘܥܘܗܕܢܗܿ ܕܢܦܫܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. 
                ܬܪܝܢܝܬܐ ܐܡܪܝܢܢ ܚܟܝ̈ܡܐ ܕܡܠܝܠܘܬܐ ܬܪܝܢ ܐܕܫ̈ܐ ܐܝܬ ܠܗܿ. ܚܕܐ ܡܢ ܡܟܢܫܢܐ
                    ܕܝܕܥܬܐ. ܐܚܪܢܐ ܕܝܢ ܐܚܘܕܐ ܕܐܝܠܝܢ ܕܐܬܟܢܫܘ. ܘܠܗܿܘ ܡܢ ܡܟܢܫܢܐ ܩܪܐܘܗܝ ܡܚܫܒܬܐ. ܠܗܢܐ ܕܝܢ
                    ܐܚܘܕܐ ܫܡܗܘܗܝ ܥܘܗܕܢܐ. ܘܡܠܝܠܘܬܐ ܚܝܠܐ ܐܝܬܝܗܿ ܕܢܦܫܐ ܘܟܕ ܫܪܝܐ ܒܦܓܪܐ. ܘܟܕ ܡܫܢܝܐ ܡܢܗ.
                    ܐܝܬܘܗܝ ܠܗܿ ܗܢܐ ܚܝܠܐ. ܘܡܠܝܠܘܬܐ ܗܠܝܢ ܬܪܝܢ ܚܝ̈ܠܐ ܐܝܬ ܠܗܿ. ܡܟܢܫܢܐ ܐܡܪ ܐܢܐ ܘܐܚܘܕܐ.
                    ܡܕܝܢ ܟܕ ܡܬܦܪܫܐ ܢܦܫܐ ܡܢ ܦܓܪܐ ܡܬܚܫܒܐ ܘܥܗܕܐ ܐܝܠܝܢ ܕܣܥܪܬ  f.72a  ܗܪܟܐ.
                    ܬܠܝܬܐܝܬ ܐܝܬܝܗܿ ܡܩܒܠܢܘܬܐ ܕܠܘܬ ܫܟܝܪܘܬܐ ܐܢ ܠܝܬ ܝܕܥܬܐ ܘܥܘܗܕܢܐ ܠܢܦܫܐ ܡܢ ܒܬܪ ܕܡܬܦܪܫܐ
                    ܡܢ ܠܐ ܙܕܩ ܕܢܥܒܕ ܕܘܟܪܢܐ ܠܥܢܝ̈ܕܐ ܕܦܩܕܝܢ ܠܢ ܩܢܘܢܐ ܕܫܠܝ̈ܚܐ. ܦܘܠܘܣ ܕܝܢ ܦܩܕ ܒܩܢܘܢܐ
                    ܕܝܠܗ ܗܟܢܐ: ܕܢܫܬܡܠܐ ܥܘܗܕܢܐ ܕܐܝܠܝܢ ܕܕܡܟܘ. ܠܬܠܬܐ ܝܘܡ̈ܝܢ. ܡܛܠ ܕܠܬܠܬܐ ܝܘܡ̈ܝܢ ܩܡ ܡܪܢ
                    ܡܢ ܩܒܪܐ. ܘܠܬܫܥܐ ܝܘܡ̈ܝܢ ܡܛܠ ܥܘܗܕܢܐ ܕܐܝܠܝܢ ܕܚܐܝܢ ܘܕܗܿܢܘܢ ܕܫܟܒܘ. ܘܠܬܠܬܝܢ ܝܘܡ̈ܝܢ ܐܝܟ
                    ܢܡܘܣܐ ܥܬܝܩܐ. ܡܛܠ ܡܘܫܐ ܗܟܝܠ ܬܠܬܝܢ ܝܘܡ̈ܝܢ ܐܬܒܥܘ ܥܒܪ̈ܝܐ. ܐܢ ܠܝܬ ܠܢܦܫܐ ܝܕܥܐ ܘܥܘܗܕܢܐ
                    ܡܢ ܒܬܪ ܕܡܬܦܪܫܐ ܡܢ ܦܓܪܐ ܡܢ ܝܬܝܪܘ ܘܕܠܐ ܚܫܚܘ ܡܟܪܙ ܡܫܡܫܢܐ ܒܩܘܪܒܐ ܒܥܕܢܐ ܕܪ̈ܐܙܐ ܩܕܝ̈ܫܐ
                    ܢܬܥܗܕ ܠܗܿܢܘܢ ܕܩܕܡܘ ܫܟܒܘ. ܐܠܐ ܢܛܝܪܐ ܝܕܥܬܐ ܕܢܦܫܐ ܘܥܘܗܕܢ̈ܝܗܿ ܡܢ ܒܬܪ ܕܡܫܬܪܝܐ ܡܢ
                    ܦܓܪܐ. ܠܐ ܙܕܩ ܠܢ ܕܐܝܬܝܢ ܟܪ̈ܝܛܝܢܐ ܕܢܫܐܠ ܡܢ ܢܦܫ̈ܬܐ ܕܣܗܕܐ ܘܩܕܝ̈ܫܐ ܕܢܬܟܫ̈ܦܢ ܚܠܦܝܢ
                    ܠܐܠܗܐ. ܐܢ ܠܐ ܢܛܝܪ ܥܘܗܕܢܗܿ ܕܢܦܫܐ. ܘܝܕܥܬܗܿ ܡܢ ܒܬܪ ܕܡܫܬܪܝܐ ܡܢ ܦܓܪܐ ܠܚܕܐ ܕܘܟܬܐ ܘܠܚܕ
                    ܐܘܘܢܐ ܡܬܬܘܒܠܢ ܢܦܫ̈ܬܐ ܕܡܗܝ̈ܡܢܐ ܩܕܝ̈ܫܐ ܘܢܦܫ̈ܬܐ ܕܪ̈ܫܝܥܐ ܘܛܒܐ ܥܕܡܐ ܠܝܘܡܐ ܕܩܝܡܬܐ. ܡܛܠ
                    ܕܐܢ ܡܢ ܘܠܐ ܝܕܥܢ ܘܠܐ ܦܪ̈ܝܫܢ ܒܚܕܐ ܫܘܝܘܬܐ ܐܝܬܝܗܿ ܠܘܬܗܝܢ  f.72b  ܐܠܐ ܒܚܕܐ
                    ܕܘܟܬܐ ܩܝ̈ܡܢ ܘܡܬܢܛܪ̈ܢ ܐܘ ܒܕܘܟܝ̈ܬܐ ܣܓܝ̈ܐܬܐ. ܒܕܘܟܝ̈ܬܐ ܢܗܝܪ̈ܬܐ ܐܘ ܒܕܘܟܝ̈ܬܐ ܚܫܘܟܬܐ.
                    ܐܢܕܝܢ ܠܕܘܟܝ̈ܬܐ ܡܦܪ̈ܫܬܐ ܡܬܬܘܒܠܢ ܢܦܫ̈ܬܐ ܕܩܕܝ̈ܫܐ ܘܕܪ̈ܫܝܥܐ ܠܗܠܝܢ ܡܢ ܐܘܘܢܐ ܢܗܝܪ̈ܐ ܘܥܡ
                    ܡܠܐܟܐ. ܗܠܝܢ ܕܝܢ ܠܐܘܘܢܐ ܚܫܘܟܝܐ ܘܥܡ ܫܐܕܐ. ܝܕܝܥܐ ܕܢܛܝܪܐ ܝܕܥܬܗܿ ܕܢܦܫܐ ܘܥܘܗܕܢܗܿ. ܡܕܝܢ
                    ܐܝܟܐ ܕܢܬܬܪ̈ܝܡܢ ܗܠܝܢ ܫܟܝܪ̈ܘܬܐ ܓܠܝܐ ܘܕܢܝܚܐ ܕܐܝܬ ܝܕܥܬܐ ܘܥܘܗܕܢܐ ܠܢܦܫ̈ܬܐ ܡܢ ܒܬܪ
                    ܕܡܫܬܪ̈ܝܢ ܡܢ ܦܓܪ̈ܐ. ܘܒܕܓܘܢ ܝܕܥܢ ܘܥܗܕܢ. ܘܪܒܝܥܝܬܐ: ܝܕܝܥܐ ܗܕܐ ܕܡܢ ܣܗܕܘܬܐ ܕܡܢ ܟܬܒܐ
                    ܩܕܝ̈ܫܐ. ܐܡܪ ܗܟܝܠ ܡܪܢ ܒܐܘܢܓܠܝܘܢ ܒܬܫܥܝܬܐ ܕܥܠ ܥܬܝܪܐ ܘܠܥܙܪ ܗܟܢܐ1 ܠܘܩܐ:31-19 :16: ܕܡܝܬ
                    ܠܥܙܪ ܘܐܘܒܠܘܗܝ ܡܠܐܟܐ ܠܥܘܒܗ ܕܐܒܪܗܡ. ܘܡܝܬ ܐܦ ܗܿܘ ܥܬܝܪܐ ܘܐܬܩܒܪ ܘܟܕ ܡܫܬܢܩ ܒܫܝܘܠ ܐܪܝܡ
                    ܥܝܢ̈ܘܗܝ ܘܚܙܐ ܠܐܒܪܗܡ ܡܢ ܪܘܚܩܐ. ܘܠܥܙܪ ܒܥܘܒܗ. ܘܐܪܝܡ ܩܠܗ ܘܐܡܪ ܐܒܝ ܐܒܪܗܡ ܐܬܪܚܡ
                    ܥܠܝ܆ܘܫܕܪ ܠܥܙܪ ܕܢܨܒܘܥ ܨܒܥܗ ܒܡܝ̈ܐ ܘܢܪܛܒ ܠܝ ܠܫܢܝ ܡܛܠ ܕܗܐ ܡܫܬܢܩ ܐܢܐ ܒܫܠܗܒܝܬܐ ܗܕܐ.
                    ܐܡܪ ܠܗ ܒܪܝ ܐܬܕܟܪ ܕܩܒܠܬ ܛܒܬܟ ܒܚܝ̈ܝܟ ܘܠܥܙܪ ܒܝܫ̈ܬܗ. ܘܥܡ ܗܠܝܢ ܗܘܬܐ ܪܒܬܐ ܩܝܡܐ ܒܝܢܬܢ.
                    ܘܐܝܠܝܢ  f.73a  ܕܨܒܝܢ ܕܢܥܒܪܘܢ ܡܢ ܠܘܬܟܘܢ ܠܘܬܢ ܠܐ ܡܫܟܚܝܢ. ܘܐܦܠܐ ܡܢ ܠܘܬܢ
                    ܠܘܬܟܘܢ. ܐܡܪ ܠܗ ܒܥܐ ܐܢܐ ܡܢܟ ܕܬܫܕܪܝܘܗܝ ܠܒܝܬ ܐܒܝ. ܚܡܫܐ ܓܝܪ ܐܚܝ̈ܢ ܐܝܬ ܠܝ ܢܐܙܠ ܢܣܗܕ
                    ܐܢܘܢ ܕܠܐ ܐܦ ܗܢܘܢ ܢܐܬܘܢ ܠܕܘܟܬܐ ܗܕܐ ܕܬܫܢܝܩܐ ܘܕܫܪܟܐ. ܒܗܿܝ ܓܝܪ ܕܐܘܒܠܘܗܝ ܡܠܐܟܐ ܠܠܥܙܪ
                    ܠܥܘܒܗ ܕܐܒܪܗܡ ܬܪܬܝܢ ܚܘܝ. ܚܕܐ ܡܢ ܕܒܩܘܝܡܐ ܕܝܠܢܝܐ ܡܩܝܡܐ ܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ.
                    ܐܚܪܬܐ ܕܝܢ ܕܡܠܐܟܐ ܡܘܒܠܝܢ ܠܢܦܫ̈ܬܐ ܕܩܕܝ̈ܫܐ. ܒܗܿܝ ܕܐܪܝܡ ܥܝܢ̈ܘܗܝ ܥܬܝܪܐ ܗܕܐ ܕܨܒܝܢܐ
                    ܐܝܬܝܗܿ ܕܢܦܫܐ ܡܕܝܢ ܢܛܝܪ ܨܒܝܢܗܿ. ܒܗܿܝ ܕܝܢ ܕܚܙܐ ܠܐܒܪܗܡ ܗܕܐ ܕܝܕܥܬܐ ܐܝܬܝܗܿ. ܒܗܿܝ ܕܩܥܐ
                    ܘܐܡܪ ܐܒܝ ܐܒܪܗܡ ܐܬܪܚܡ ܥܠܝ. ܓܠܝܐ ܕܗܕܐ ܐܝܬܝܗܿ ܕܢܦܫܐ ܡܕܝܢ ܢܛܝܪܐ ܡܠܝܠܘܬܐ. ܐܡܪ ܓܝܪ
                    ܫܠܝܚܐ ܦܐܘܠܘܣ: ܕܚܝ̈ܐ ܕܝܠܝ ܡܫܝܚܐ ܗܘ ܘܐܢ ܐܡܘܬ ܝܘܬܪܢܐ ܗܘ ܠܝ1 ܐܓܪܬܐ ܕܠܘܬ
                        ܦܝܠܝܦܣ̈ܝܐ:21:1. ܗ ܡܦܚܡܘ ܡܦܚܡ ܫܠܝܚܐ ܚܝ̈ܘܗܝ ܕܗܪܟܐ ܥܡ ܚܝ̈ܐ ܕܡܢ ܕܡܐܬ
                    ܘܐܡܪ: ܕܐܢ ܟܕ ܫܪܝܐ ܗܘܬ ܢܦܫܗ ܒܦܓܪܗ ܝܕܥܐ ܗܘܬ ܘܡܣܬܟܠܐ ܗܘܬ ܘܥܗܕܐ ܗܘܬ ܘܡܢ ܒܬܪ ܕܡܫܬܪܝܐ
                    ܡܢ ܦܓܪܐ ܐܘ ܡܐܬ ܗܘܐ ܠܐ ܝܕܥܐ ܗܘܬ ܘܠܐ ܡܣܬܟܠܐ ܗܘܬ ܢܦܫܗ ܘܠܐ ܥܗܕܐ ܗܘܬ. ܗܢܐ ܚܘܣܪܢܐ ܗܿܘܐ
                    ܠܗܿ ܘܣܘܓܦܢܐ. ܘܐܝܟܢܐ  f.73b  ܡܕܝܢ ܕܐܢ ܐܡܘܬ ܝܘܬܪܢܐ ܗܘ ܠܝ. ܘܐܢ ܐܟܡܐ ܕܝܕܥܐ
                    ܡܣܬܟܠܐ ܗܘܬ. ܘܥܗܕܐ ܗܘܬ ܢܦܫܗ ܟܕ ܫܪܝܐ ܗܘܬ ܒܦܓܪܐ. ܗܟܢܐ ܡܢ ܒܬܪ ܕܡܬܦܪܫܐ ܗܘܬ ܡܢ ܦܓܪܐ.
                    ܐܝܟܢܐ ܐܡܪ ܗܘܐ ܕܝܘܬܪܢܐ ܗܘ ܠܝ ܐܢ ܐܡܘܬ. ܗܕܐ ܚܘܣܪܢܐ ܐܝܬܝܗܿ ܘܠܘ ܝܘܬܪܢܐ. ܐܠܐ ܝܕܝܥܐ
                    ܘܓܠܝܐ ܕܡܢ ܒܬܪ ܕܡܫܬܪܝܐ ܢܦܫܐ ܡܢ ܦܓܪܗ ܘܡܐܬ ܝܬܝܪ ܝܕܥܐ ܘܡܣܬܟܠܐ ܘܝܬܝܪ ܡܬܚܫܒܐ ܘܥܗܕܐ. ܡܢ
                    ܗܿܝ ܕܐܡܪ ܕܐܢ ܐܡܘܬ ܝܘܬܪܢܐ ܗܘ ܠܝ. ܡܕܝܢ ܟܕ ܡܫܬܪܝܐ ܢܦܫܐ ܡܢ ܦܓܪܐ ܝܬܝܪ ܝܕܥܐ ܘܡܣܬܟܠܐ
                    ܘܥܗܕܐ ܡܢ ܟܕ ܐܝܬܝܗܿ ܗܘܬ ܒܦܓܪܐ. 
            
            
                ܩܦܠܐܘܢ ܕܬܠܬܝܢ ܘܐܪܒܥܐ
                ܕܡܥܩܒ ܕܐܪܐ ܐܝܟܢܐ ܕܦܓܪܐ ܒܥܝ̈ܢܐ ܡܢ ܚܙܐ ܒܐܕܢܐ ܕܝܢ ܫܡܥ܆ܘܒܡܢ̈ܘܬܐ
                    ܐܚܪ̈ܢܝܬܐ ܐܚܪܢܝܐܝܬ ܡܥܒܕ܆ܗܟܢܐ ܐܦ ܢܦܫܐ ܒܚܕܐ ܡܢܬܐ ܡܢ ܚܙܝܐ ܒܐܚܪܬܐ ܕܝܢ ܫܡܥܐ ܘܝܕܥܐ
                    ܘܐܚܪܢܝܐܝܬ ܐܝܬ ܠܗܿ ܠܗܕܐ. 
                ܡܫܐܠ ܐܢܫ ܘܡܥܩܒ ܟܕ ܐܡܪ ܕܐܝܟܢܐ ܕܦܓܪܐ ܡܢ ܒܥܝ̈ܢܐ ܚܙܐ ܒܐܕܢܐ ܫܡܥ.
                    ܒܢܚܝܪ̈ܐ ܕܝܢ ܣܐܩ. ܘܒܡܢ̈ܘܬܐ ܐܚܪ̈ܢܝܬܐ ܐܚܪܢܝܐܝܬ ܡܥܒܕ܆ܗܟܢܐ ܐܦ ܢܦܫܐ. ܒܚܕܐ ܡܢܬܐ ܡܢ
                    ܚܙܝܐ. ܒܐܚܪܬܐ ܕܝܢ ܫܡܥܐ. ܘܒܐܚܪܬܐ ܝܕܥܐ ܘܡܣܬܟܠܐ ܐܘ ܐܚܪܢܝܐܝܬ ܐܝܬ ܠܗܿ ܠܗܕܐ. 
                ܘܩܕܡܐܝܬ ܡܢ ܡܥܩܒܝܢܢ ܕܡܛܠ ܡܢܐ ܒܥܝ̈ܢܐ ܒܠܚܘܕ ܚܙܐ ܦܓܪܐ. ܘܠܘ ܒܟܠܗ ܚܙܐ.
                    ܘܡܛܠ ܡܢܐ  f.74a  ܒܐܕܢܐ ܒܠܚܘܕ ܫܡܥ. ܘܡܛܠ ܡܢܐ ܒܢܚܝܪ̈ܐ ܒܠܚܘܕ ܣܐܩ. ܘܠܘ ܒܟܠܗ.
                    ܒܬܪܟܢ ܕܝܢ ܐܡܪܝܢܢ ܡܛܠ ܢܦܫܐ ܕܐܝܟܢܐ ܫܡܥܐ ܘܚܙܝܐ ܘܡܣܬܟܠܐ ܟܠܗܿ ܘܝܕܥܐ. ܒܥܝ̈ܢܐ ܗܟܝܠ
                    ܒܠܚܘܕ ܚܙܐ ܦܓܪܐ ܡܛܠ ܕܩܢ̈ܝܢ ܐܚܝܢܘܬܐ ܠܘܬ ܢܘܗܪܗ ܕܫܡܫܐ. ܒܗܿܝ ܕܡܫܚܠܦܐ ܓܒܝܠܬܗܝܢ ܡܢ ܟܠܗ
                    ܦܓܪܐ ܕܐܝܟ ܐܝܟܢ. ܥܝܢܐ ܗܟܝܠ ܕܟܝܐ ܘܫܦܝܐ ܘܢܗܝܪܐ ܘܡܒܪܩܐ ܘܡܙܠܓܐ. ܘܒܝܕ ܗܠܝܢ ܩܢܝܐ
                    ܐܚܝܢܘܬܐ ܠܘܬ ܢܘܗܪܗ ܕܫܡܫܐ. ܒܗܿܝ ܕܢܘܗܪܗ ܕܫܡܫܐ ܕܟܐ ܘܫܦܐ ܘܢܗܝܪ ܘܡܒܪܩ ܘܡܙܠܓ. ܘܒܕܓܘܢ ܟܕ
                    ܢܛܝܪ ܢܘܗܪܗ ܕܫܡܫܐ ܥܠ ܥܝܢܐ ܝܗܒ ܠܗܿ ܕܬܚܙܐ ܡܛܠ ܐܚܝܢܘܬܐ ܕܩܢܝܐ ܠܘܬܗ. ܗܟܢܐ ܐܦ ܗܢܘܢ
                    ܕܚܦܝܪܝܢ ܩًܬܬܐ ܒܐܪܥܐ ܐܡܬܝ ܕܡܬܓܠܙܝܢ ܡܢ ܢܘܗܪܗ ܕܫܡܫܐ ܘܡܡܠܟ ܥܠܝܗܘܢ ܚܫܘܟܐ ܡܝܬܝܢ ܠܩܢܐ
                    ܕܢܚܫܐ ܕܡܙܠܓ ܣܓܝ ܘܣܝܡܝܢ ܠܗ ܬܚܝܬ ܚܝܕܚܪܘܪܐ ܕܗܠܝܢ ܩًܬܬܐ. ܗܝܕܝܢ ܡܩܒܠܐ ܠܩܢܐ ܢܘܗܪܗ
                    ܕܫܡܫܐ ܡܢ ܠܥܠ ܡܛܠ ܐܚܝܢܘܬܐ ܕܩܢܐ ܢܚܫܐ ܠܘܬܗ ܕܢܘܗܪܐ ܒܗܿܝ ܕܫܦܐ ܘܕܟܐ ܘܡܙܠܓ ܣܓܝ ܘܡܗܦܟܐ
                    ܠܗ ܠܩܢܐ ܠܢܘܗܪܐ ܗܿܘ. ܘܗܟܢܐ ܡܫܕܪ ܠܗ ܠܗܢܐ ܓܒܐ ܘܠܗܿܗ ܓܒܐ ܥܕܡܐ ܕܡܢܗܪ ܠܐܝܠܝܢ ܕܚܦܪܝܢ
                    ܐܪܥܐ. ܐܦ ܥܠ  f.74b  ܘܣܐܡܐ ܕܟܝܐ ܕܡܙܠܓ ܐܦ ܥܠ ܡܝ̈ܐ ܕܕܟܝܢ ܘܫܦܝܢ ܘܡܙܠܓ. ܐܡܬܝ
                    ܕܢܦܠ ܥܠܝܗܘܢ ܢܘܗܪܗ ܕܫܡܫܐ ܥܒܪܝܢ ܙܠܓܐ ܡܕܡ ܢܗܝܪܐ ܕܢܦܠ ܥܠ ܐܣܬܐ ܐܝܕܐ ܕܩܪܝܒܐ. ܡܕܝܢ
                    ܝܕܝܥܐ ܕܡܛܠܗܕܐ ܥܝܢܐ ܒܠܚܘܕ ܡܢ ܟܠܗ ܦܓܪܐ ܚܙܝܐ ܡܛܠ ܕܩܢܝܐ ܐܚܝܢܘܬܐ ܠܘܬ ܢܘܗܪܗ ܕܫܡܫܐ.
                    ܐܕܢ̈ܐ ܕܝܢ ܡܛܠܗܕܐ ܗܢܝܢ ܫܡܥܢ ܒܠܚܘܕ ܟܕ ܟܠܗ ܦܓܪܐ ܠܐ ܫܡܥ ܡܛܠ ܕܢܩܝ̈ܒܢ ܚܪܘܪ̈ܐ ܕܝܠܗܝܢ ܡܢ
                    ܠܒܪ ܘܥܕܡܐ ܠܡܘܚܐ. ܘܠܝܬ ܡܕܡ ܒܡܨܥܬܐ. ܘܡܐ ܕܡܬܬܙܝܥ ܐܐܪ ܡܩܛܢ ܠܗ ܠܩܠܐ ܘܠܐ ܡܬܟܠܐ ܥܕܡܐ
                    ܕܡܥܠ ܠܗ ܒܚܪܘܪܐ ܕܐܕܢ̈ܐ. ܘܢܩܫ ܠܗ ܒܡܘܚܐ ܘܡܪܓܫ ܒܗ. ܗܟܢܐ ܐܦ ܢܚܝܪܐ ܡܛܠ ܥܠܬܐ ܐܚܪܬܐ ܗܘ
                    ܒܠܚܘܕܘܗܝ ܣܐܩ ܘܠܘ ܐܦ ܟܠܗ ܦܓܪܐ. ܡܕܝܢ ܦܓܪܐ ܡܛܠ ܕܐܝܬܘܗܝ ܡܪܟܒܐ ܡܢ ܡܢ̈ܘܬܐ ܡܫܚ̈ܠܦܬܐ ܐܘ
                    ܣܓܝ̈ܐܬܐ ܠܘ ܟܠܗ ܚܙܐ. ܘܠܘ ܟܠܗ ܫܡܥ ܐܘ ܣܐܩ ܐܠܐ ܒܚܕܐ ܡܢܬܐ ܡܢ ܚܙܐ. ܒܐܚܪܬܐ ܡܢ ܫܡܥ.
                    ܘܒܐܚܪܬܐ ܣܐܩ. ܘܒܐܚܪܬܐ ܐܚܪܢܝܐܝܬ ܡܥܒܕ ܘܓܐܫ. ܢܦܫܐ ܕܝܢ ܠܘ ܗܟܢܐ ܐܠܐ ܟܠܗܿ ܚܙܝܐ. ܘܟܠܗܿ
                    ܫܡܥܐ. ܘܟܠܗܿ ܡܣܬܟܠܐ ܘܝܕܥܐ. ܘܝܕܝܥܐ ܗܕܐ ܕܗܟܢܐ ܐܝܬܝܗܿ ܡܢ ܗܿܝ ܕܐܝܬܝܗܿ  f.75a 
                    ܦܫܝܛܬܐ ܘܪܘܚܢܝܬܐ. ܘܦܫܝܛܬܐ ܘܪܚܢܝܬܐ. ܠܐ ܡܪܟܒܐ ܥܡ ܡܢܘܬܐ. ܘܒܕܓܘܢ ܠܝܬ ܠܗܿ ܡܢܘܬܐ ܕܒܗܝܢ
                    ܚܙܝܐ ܘܐܚܪ̈ܢܝܬܐ ܕܒܗܝܢ ܫܡܥܐ. ܘܐܚܪ̈ܢܝܬܐ ܕܒܗܝܢ ܝܕܥܐ ܘܟܠܗܿ ܡܣܬܟܠܐ. ܘܟܠܗܿ ܝܕܥܐ. ܐܦ
                    ܡܠܐܟܐ ܗܟܢܐ ܐܝܬܝܗܘܢ ܟܠܚܕ ܚܕ ܡܢܗܘܢ ܟܠܗ ܚܙܐ ܘܟܠܗ ܫܡܥ ܘܟܠܗ ܝܕܥ. ܡܕܝܢ ܢܦܫܐ ܟܕ ܡܬܦܪܫܐ
                    ܡܢ ܦܓܪܐ ܟܠܗܿ ܚܙܝܐ ܘܟܠܗܿ ܫܡܥܐ. ܘܟܠܗܿ ܝܕܥܐ ܘܡܣܬܟܠܐ ܘܟܠܗܿ ܡܪܓܫܐ ܘܥܗܕܐ. ܡܛܠ ܕܪܘܚܢܝܬܐ
                    ܗܝ. ܘܕܠܐ ܓܫܘܡ ܘܦܫܝܛܬܐ ܘܠܐ ܡܪܟܒܬܐ. 
            
            
                ܩܦܠܐܘܢ ܕܬܠܬܝܢ ܘܚܡܫܐ
                ܥܠ ܗܿܝ ܕܟܕ ܡܬܦܪܫܐ ܢܦܫܐ ܡܢ ܦܓܪܐ ܐܝܠܝܢ ܝܕܥܐ ܐܝܠܝܢ ܠܐ ܝܕܥܐ
                ܟܕ ܡܬܦܪܫܐ ܢܦܫܐ ܡܢ ܦܓܪܐ. ܗܠܝܢ ܡܣܬܟܠܐ ܘܝܕܥܐ: 
                ܝܕܝܥܐ ܗܝ ܠܗܿ ܘܝܕܥܐ ܥܒܝܕܬܐ ܗܝ
                ܘܝܕܥܐ ܕܥܒܘܕܐ ܐܝܬ ܠܗܿ
                ܘܝܕܥܐ ܕܒܦܓܪܐ ܗܘܬ
                ܘܝܕܥܐ ܕܫܢܝܬ ܡܢܗ
                ܘܝܕܥܐ ܕܥܬܝܕܐ ܕܬܣܒܝܘܗܝ ܠܦܓܪܐ ܕܝܠܗܿ ܒܝܘܡܐ ܕܩܝܡܬܐ
                ܘܝܕܥܐ ܠܡ̈ܠܐܟܐ ܘܠܫ̈ܐܕܐ. ܟܕ ܡܬܘܥܕܝܢ ܠܘܬ ܡܦܩܢܗܿ ܕܡܢ ܦܓܪܐ
                ܘܝܕܥܐ ܠܢܦܫ̈ܬܐ ܕܐܝܬ ܐܝܟܐ ܕܗܿܘܝܐ ܥܡܗܝܢ ܥܕܡܐ ܠܩܝܡܬܐ
                ܘܝܕܥܐ ܕܐܝܠܝܢ ܣܥܪܬ ܗܪܟܐ ܐܢ ܛܒܬܐ ܘܐܢ ܒܝ̈ܫܬܐ
                ܘܝܕܥܐ ܠܗܿܘ ܕܢܛܝܪ ܠܗܿ  f.75b  ܐܢ ܒܘܣܡܐ ܐܝܬܘܗܝ ܘܐܢ
                    ܬܫܢܝܩܐ
                ܝܕܥܐ ܐܦ ܡܪܓܫܐ ܒܩܘܪ̈ܒܢܐ ܕܡܬܩܪܒܝܢ ܚܠܦܝܗܿ
                ܗܠܝܢ ܘܕܐܝܟ ܗܠܝܢ ܝܕܥܐ ܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ. ܘܝܕܝܥܐ ܗܕܐ ܕܗܟܢܐ
                    ܐܝܬܝܗܿ ܡܢ ܗܿܝ ܕܢܛܝܪܐ ܝܕܥܬܗܿ ܘܡܪܓܫܢܘܬܗܿ ܘܣܘܟܠܗܿ ܘܥܘܗܕܢܗܿ ܘܫܪܟܐ ܕܚܝ̈ܠܝܗܿ ܟܝܢ̈ܝܐ ܡܢ
                    ܒܬܪ ܕܡܫܢܝܐ ܡܢ ܦܓܪܐ. ܗܠܝܢ ܕܝܢ ܐܚܪ̈ܢܝܬܐ ܠܐ ܝܕܥܐ ܠܗܝܢ ܢܦܫܐ ܡܢ ܒܬܪ ܕܡܫܬܪܝܐ ܡܢ ܦܓܪܐ.
                    ܠܐ ܓܝܪ ܝܕܥܐ ܕܐܝܠܝܢ ܣܥܪܝܢܢ ܗܪܟܐ ܡܢ ܒܬܪ ܕܡܫܢܝܐ ܘܠܐ ܝܕܥܐ ܐܢ ܙܒܢ̈ܐ ܛܒܐ ܐܝܬܝܗܘܢ ܠܘܬܢ
                    ܐܘ ܒܝ̈ܫܐ. ܘܠܐ ܝܕܥܐ ܟܝܬ ܡܪ̈ܕܘܬܐ ܕܡܫܬܕܪ̈ܢ ܥܠܝܢ ܡܢ ܐܠܗܐ. ܘܠܐ ܝܕܥܐ ܐܝܠܝܢ ܕܪ̈ܚܝܩܢ
                    ܡܢܗܿ. ܗܠܝܢ ܠܐ ܝܕܥܐ ܢܦܫܐ ܡܢ ܒܬܪ ܕܡܫܢܝܐ ܡܢ ܦܓܪܐ ܘܐܦܠܐ ܐܝܠܝܢ ܕܕܡܝ̈ܢ ܠܗܿ. ܘܝܕܝܥܐ ܗܕܐ
                    ܕܗܟܢܐ ܐܝܬܝܗܿ ܡܢ ܗܿܝ ܕܢܦܫܐ ܡܣܝܟܬܐ ܗܝ ܘܒܕܓܘܢ ܡܣܝܟܬܐ ܗܝ ܐܦ ܝܕܥܬܗܿ ܡܢ ܐܢܢܩܝ. ܗܿܘ ܡܢ
                    ܓܝܪ ܕܠܐ ܡܣܝܟ ܟܝܢܗ ܐܦ ܝܕܥܬܗ ܠܐ ܡܣܝܟܐ. ܗܿܘ ܕܝܢ ܕܡܣܝܟ ܟܝܢܗ ܐܦ ܝܕܥܬܗ ܡܣܝܟܐ. ܘܒܕܓܘܢ
                    ܐܠܗܐ ܕܠܐ ܡܣܝܟ ܟܝܢܗ ܐܦܠܐ ܝܕܥܬܗ. ܡܠܐܟܐ ܕܝܢ ܘܢܦܫ̈ܬܐ ܡܣܝܟܝܢ ܟܝܢ̈ܝܗܘܢ ܐܦ ܝܕܥܬܗܘܢ. ܘܐܢ
                    ܝܕܥܬܗܿ ܕܢܦܫܐ ܡܣܝܟܐ ܐܝܟܢܐ ܕܐܦ ܟܝܢܗܿ ܡܣܝܟ ܗܘ.  f.76a  ܡܕܝܢ ܠܐ ܝܕܥܐ ܡܢ ܒܬܪ
                    ܕܡܫܢܝܐ ܡܢ ܦܓܪܐ ܐܝܠܝܢ ܕܣܥܪܝܢܢ ܗܪܟܐ. ܘܠܐ ܠܐܝܠܝܢ ܕܐܝܬܝܢ ܒܗ. ܘܐܦܠܐ ܠܐܝܠܝܢ ܕܪܚܝܩܝܢ
                    ܡܢܗܿ. ܐܠܐ ܐܢ ܡܬܝܗܒܐ ܠܗܿ ܗܕܐ ܝܕܥܬܐ ܡܢ ܐܠܗܐ ܐܝܟ ܕܒܫܘܟܢܐ ܐܝܟܢܐ ܕܝܗܒ ܢܒܝܘܬܐ ܠܢܒܝܐ
                    ܘܩܕܡ ܚܙܘ ܠܥܬܝ̈ܕܬܐ ܘܠـܪ̈ܚܝܩܬܐ ܒܥܝ̈ܢܐ ܕܢܒܝܘܬܐ ܘܡܠܠܘ ܥܠܝܗܘܢ. ܡܕܝܢ ܐܢ ܡܬܝܗܒܐ ܠܗܿ
                    ܠܢܦܫܐ ܗܕܐ ܝܕܥܬܐ ܐܝܟ ܕܒܫܘܟܢܐ ܡܢ ܐܠܗܐ ܗܿܘ ܕܡܨܐ ܟܠ ܚܝܠܐ ܝܕܥܐ. ܒܪܡ ܕܝܢ ܗܠܝܢ ܝܕܥܬܐ
                    ܐܚܪ̈ܢܝܬܐ ܕܐܡܪܢܢ ܡܢ ܠܥܠ ܝܕܥܐ ܠܗܝܢ ܫܪܝܪܐܝܬ ܘܡܪܢܐܝܬ. ܘܡܛܠ ܕܢܛܝܪܝܢ ܚܝ̈ܠܝܗܿ ܟܝܢ̈ܝܐ܆
                    ܕܒܗܘܢ ܝܕܥܐ ܠܗܝܢ. 
            
            
                ܩܦܠܐܘܢ ܕܬܠܬܝܢ ܘܐܫܬܐ
                ܕܥܠ ܐܝܠܝܢ ܕܡܬܘܥܕܝܢ ܘܡܬܟܢܫܝܢ ܠܘܬܗܿ ܕܢܦܫܐ ܟܕ ܡܫܬܪܝܐ ܡܢ ܦܓܪܐ
                ܘܐܡܪܝܢܢ ܕܡܬܟܢܫܝܢ ܘܡܬܘܥܕܝܢ ܠܘܬܗܿ ܡܠܐܟܐ ܘܫܐܕܐ ܘܦܓܥܝܢ ܒܗܿ. ܘܡܛܠ ܡܢܐ
                    ܡܬܘܥܕܝܢ ܠܘܬܗܿ ܘܦܓܥܝܢ ܒܗܿ ܟܝ. ܘܐܡܪܝܢܢ ܕܡܠܐܟܐ ܡܢ ܡܬܟܢܫܝܢ ܠܘܬܗܿ ܡܛܠ ܕܨܒܝܢ ܕܬܐܙܠ
                    ܥܡܗܘܢ ܘܒܕܓܘܢ ܬܢܝܢ ܕܘܒܪ̈ܝܗܿ ܛܒܐ. ܗܟܘܬ ܐܦ ܫܐܕܐ ܡܬܟܢܫܝܢ ܠܘܬܗܿ ܡܛܠ ܕܨܒܝܢ ܕܥܡܗܘܢ ܬܐܙܠ
                    ܘܒܕܓܘܢ ܬܢܝܢ ܕܘܒܪ̈ܝܗܿ ܒܝ̈ܫܐ. ܘܝܕܝܥܐ ܗܕܐ ܕܡܬܟܢܫܝܢ ܘܡܬܘܥܕܝܢ ܠܘܬ ܢܦܫܐ ܟܕ ܡܬܦܪܫܐ ܡܢ
                    ܦܓܪܐ ܡܠܐܟܐ ܘܫܐܕܐ  f.76b  ܘܦܓܥܝܢ ܒܗܿ ܡܢ ܗܠܝܢ ܣܗܕܘܬܐ ܫܪܝܪ̈ܬܐ: ܐܡܪ ܡܪܝܐ
                    ܒܐܘܢܓܠܝܘܢ ܠܘܬ ܐܝܠܝܢ ܕܠܐ ܬܪܣܝܘܗܝ ܘܐܦܠܐ ܝܨܦܘ ܕܝܠܗ ܒܝܕ ܡܣܟܢܐ ܗܟܢܐ: ܕܙܠ ܠܟܘܢ ܡܢܝ
                    ܠܝ̈ܛܐ ܠܢܘܪܐ ܕܠܥܠܡ ܗܿܝ ܕܡܛܝܒܐ ܠܐܟܠܩܪܨܐ ܘܠܡܠܐܟܘܗܝ1 ܡܬܝ:41:25. ܘܐܡܪ ܬܘܒ ܒܫܪܒܐ ܕܥܠ ܥܬܝܪܐ
                    ܘܠܥܙܪ: ܕܟܕ ܡܝܬ ܠܥܙܪ ܐܘܒܠܘܗܝ ܡܠܐܟܐ ܠܥܘܒܗ ܕܐܒܪܗܡ2 ܠܘܩܐ:22:16. ܐܦ ܝܗܘܕܐ ܫܠܝܚܐ ܐܡܪ ܒܐܓܪܬܐ
                    ܩܬܘܠܝܩܝ ܡܛܠ ܬܟܬܘܫܐ ܕܗܘܐ ܠܣܛܢܐ ܒܥܠܕܪܐ ܥܡ ܡܝܟܐܝܠ ܡܠܐܟܐ ܡܛܠ ܩܒܘܪܬܗ ܕܡܘܫܐ ܗܟܢܐ:
                    ܡܝܟܐܝܠ ܠܡ ܗܿܘ ܪܝܫ ܡܠܐܟܐ. ܐܡܬܝ ܕܠܐܟܠܩܪܨܐ ܡܡܠܠ ܗܘܐ. ܟܕ ܕܐܢ ܗܘܐ ܡܛܠ ܦܓܪܗ ܕܡܘܫܐ ܠܐ
                    ܐܡܪܚ ܕܢܝܬܐ ܥܠܘܗܝ ܓܘܕܦܐ ܐܠܐ ܐܡܪ ܠܗ ܕܢܓܥܘܪ ܒܟ ܡܪܝܐ1 ܐܓܪܬܐ ܕܝܗܘܕܐ:9. ܝܕܝܥܐ
                    ܬܘܒ ܡܢ ܬܫܥܝܬܐ ܕܥܠ ܐܢܛܘܢܝܘܣ ܝܚܝܕܝܐ. ܕܡܬܢܐ ܠܗܿ ܐܬܐܢܐܣܝܘܣ ܐܦܝܣܩܘܦܐ ܕܐܠܟܣܢܕܪܝܐ
                    ܘܩܕܝܫܐ ܡܪܝ ܣܐܘܝܪܐ ܕܐܢܛܝܘܟܝܐ ܗܟܢܐ: ܟܕ ܥܬܝܕ ܗܘܐ ܗܟܝܠ ܠܡ ܒܙܒܢ ܐܢܛܘܢܝܘܣ ܠܡܐܟܠ ܠܚܡܐ.
                    ܩܡ ܕܢܨܠܐ ܒܥܕܢܐ ܕܬܫܥ ܫܥܝܢ ܘܐܪܓܫ  f.77a  ܗܘܐ ܕܐܬܥܠܝ ܡܕܥܗ. ܘܣܒܪ ܕܠܒܪ ܡܢ
                    ܦܓܪܗ ܐܝܬܘܗܝ ܗܘܐ. ܐܠܐ ܚܙܐ ܗܘܐ ܢܦܫܗ ܕܒܐܐܪ ܡܬܥܠܐ ܗܘܐ. ܘܠܘܬ ܐܠܗܐ ܡܫܢܐ ܗܘܐ ܟܕ ܡܠܐܟܐ
                    ܡܫܝ̈ܢܐ ܘܪ̈ܚܡܝ ܐܢܫ̈ܐ ܐܙܠܝܢ ܗܘܘ ܩܕܡܘܗܝ ܘܡܠܘܝܢ ܗܘܘ ܠܗ. ܘܟܕ ܡܢܬܐ ܡܢ ܡܪܕܝܬܗܿ ܪܕܐ. ܚܙܐ
                    ܐܚܪ̈ܢܐ ܥܝ̈ܦܐ ܘܡܪܝܪ̈ܝܐ ܕܚܪܝܦܐܝܬ ܘܕܚܝܠܐܝܬ ܚܝܪܝܢ. ܕܐܬܘ ܘܩܡܘ ܠܩܘܒܠܗ ܒܐܐܪ ܘܥܒܕܝܢ ܗܘܘ
                    ܠܗ ܗܘܘ ܠܗ ܡܥܒܪ̈ܢܐ ܘܟܠܝܢ ܗܘܘ ܡܢ ܕܠܡܥܒܪ. ܐܡܪثܝܢ ܗܘܘ ܠܗ ܕܐܚܝܕܝܢܢ ܠܡ ܐܟܡܐ ܕܚܝܒܐ
                    ܐܝܬܝܟ ܕܗܠܝܢ ܕܝܠܢ. ܘܟܕ ܨܒܝܢ ܗܘܘ ܫܐܕܐ ܗܢܘܢ ܕܠܣܘܥܪ̈ܢܐ ܗܿܢܘܢ ܕܡܢ ܝܠܝܕܘܬܗ ܢܬܢܘܢ.
                    ܡܠܐܟܐ ܗܿܢܘܢ ܕܡܠܘܝܢ ܗܘܘ ܠܗܿ ܟܐܝܢ ܗܘܘ ܒܗܘܢ ܘܐܡܪܝܢ. ܕܒܘܨܪ̈ܘܗܝ ܟܠܗܘܢ ܘܚܛܗܘܗܝ ܗܠܝܢ
                    ܕܡܢ ܝܠܝܕܘܬܗ ܘܥܕܡܐ ܠܕܝܪܝܘܬܗ ܥܛܐ ܐܢܘܢ ܡܪܝܐ ܒܝܕ ܛܝܒܘܬܗ. ܐܠܐ ܒܕܘܒܪ̈ܘܗܝ ܘܒܢܨܚܢ̈ܘܗܝ
                    ܗܠܝܢ ܕܡܢ ܒܬܪ ܕܗܘܐ ܕܝܪܝܐ ܘܐܫܬܘܕܝ ܠܐܠܗܐ. ܒܣܝܪܝܢ ܐܢܬܘܢ ܡܟܝܠ ܠܡܩܪܒܘ ܘܠܐ ܐܝܬ ܠܟܘܢ
                    ܥܠܬܐ ܡܕܡ ܕܩܘܛܪܓܐ. ܘܗܝܕܝܢ ܥܪܩܘ ܟܠܗܘܢ ܘܐܬܦܠܗܕܘ ܘܒܕܡܘܬ ܬܢܢܐ  f.77b  ܐܬܛܠܩܘ
                    ܘܐܬܚܪܪܬ ܐܘܪܚܗ ܘܗܘܬ ܕܠܐ ܡܬܟܠܝܢܝܬܐ. ܘܗܟܢܐ ܐܬܥܠܝܬ ܢܦܫܗ ܥܕܡܐ ܕܐܬܡܢܥܬ ܠܐܝܟܐ ܕܡܛܬ ܘܡܢ
                    ܒܬܪ ܗܠܝܢ ܐܬܟܢܫܬ ܥܠܘܗܝ ܡܚܫܒܬܗ ܘܐܬܕܡܝ ܠܗ ܕܗܦܟ ܠܘܬ ܦܓܪܗ. ܘܗܘܐ ܟܠܗ ܒܩܠܝܬܗ. ܟܕ ܬܡܝܗ
                    ܗܘܐ ܒܡܚܫܒܬܗ ܐܘܕܝ ܠܐܠܗܐ ܥܠ ܡܕܡ ܕܓܕܫ ܘܡܬܕܡܪ ܗܘܐ ܣܓܝܐܝܬ ܥܠ ܗܿܝ ܕܕܐܝܟ ܐܝܟܢܐ ܡܬܥܕܪ
                    ܥܠܝܢ ܚܝ̈ܠܘܬܐ ܒܝ̈ܫܐ. ܥܡ ܢܦܫܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. ܘܐܝܕܐ ܣܐܢܐܬܐ ܡܪܝܪܬܐ ܐܝܬ ܠܗܘܢ
                    ܠܩܘܒܠܗܿ. ܘܒܕܓܘܢ ܛܥܗܿ ܠܡܐܟܘܠܬܐ ܟܕ ܓܘ ܟܪܣܗ ܕܟܦܢܐ ܩܗܐ. ܘܪܚܡܬܐ ܢܓܕܐ ܗܘܬ ܠܗ ܠܘܬ ܗܿܝ
                    ܕܢܫܬܘܕܥ ܚܬܝܬܐܝܬ ܕܐܢ ܫܪܝܪ ܗܿܘ ܡܕܡ ܕܚܙܐ ܐܘ ܠܐ. ܡܛܠ ܗܕܐ ܒܥܢܘܝܘܬܐ ܡܥܨܪ ܗܘܐ ܠܓܘܫܡܗ.
                    ܘܒܕܘܒܪ̈ܐ ܡܝܬܪ̈ܐ ܡܥܡܠ ܠܦܓܪܗ ܗܘ ܣܒܐ. ܗܒܕܓܘܢ ܒܚܕ ܡܢ ܠܝ̈ܠܘܬܐ ܡܫܝܚܐ ܩܪܐ ܠܗ ܟܕ ܐܡܪ:
                    ܐܢܛܘܢܝܐ ܗܠܟ ܦܘܩ ܠܒܪ ܘܚܙܝ. ܘܟܕ ܢܦܩ ܠܒܪ ܚܙܐ ܒܕܡܘܬܐ ܕܓܒܪܐ ܡܕܡ ܕܩܐܡ ܒܡܨܥܬ ܐܪܥܐ.
                    ܘܒܩܘܡܗ ܡܢ ܡܛܐ ܗܘܐ ܥܕܡܐ ܠܫܡܝܐ. ܒܚܙܬܗ  f.78a  ܕܝܢ ܐܝܬܘܗܝ ܕܚܝܠܐ ܘܡܫܟܪܐ.
                    ܘܕܥܒܪܐ ܗܘܬ ܣܢܝܘܬܗ ܠܡܫܘܚܬܗ. ܘܚܙܐ ܚܕܪܘܗܝ ܥܡܐ ܣܓܝܐܐ ܕܦܪܚܝܢ ܡܢ ܐܪܥܐ ܘܡܬܥܠܝܢ ܒܓ̈ܦܐ
                    ܩܕܡܝܗܘܢ ܡܢ ܦܪܚܝܢ ܗܘܘ ܥܕܡܐ ܠܘܬ ܐܝܕܘܗܝ. ܘܗܝܕܝܢ ܢܦܠܝܢ ܗܘܘ ܘܡܬܕܚܝܢ ܠܬܚܬ. ܡܢܗܘܢ ܕܝܢ
                    ܦܪܚܝܢ ܗܘܘ ܘܡܬܥܠܝܢ ܠܥܠ ܡܢ ܕܪ̈ܥܘܗܝ ܘܡܬܦܠܛܝܢ ܗܘܘ ܡܢ ܠܒܘܟܝܗ ܕܗܿܘ. ܘܡܛܠ ܗܿܢܘܢ ܡܢ
                    ܕܦܪܚܝܢ ܗܘܘ ܘܢܦܠܝܢ ܬܚܘܬܘܗܝ ܣܓܝ ܚܕܐ ܗܘܐ ܘܡܬܗܢܐ. ܡܛܠ ܕܝܢ ܗܢܘܢ ܕܡܬܥܠܝܢ ܗܘܘ ܠܥܠ ܡܢܗ
                    ܣܓܝ ܡܬܬܥܝܩ ܗܘܐ ܘܡܬܡܪܡܪ. ܘܡܚܪܩ ܗܘܐ ܫܢܘܗܝ ܘܡܬܚܡܬ. ܘܟܕ ܗܢܐ ܚܙܘܐ ܚܙܐ ܐܢܛܘܢܝܘܣ ܡܚܕܐ
                    ܡܫܝܚܐ ܠܘܬܗ ܐܡܪ ܗܘܐ: ܕܐܣܬܟܠ ܒܗܿܘ ܡܐ ܕܡܬܚܙܐ ܠܟ. ܘܒܪ ܫܥܬܗ ܐܣܬܟܠ ܕܡܥܒܪܬܐ ܐܝܬܝܗܿ ܗܘܬ
                    ܕܢܦܫ̈ܬܐ ܗܿܝ ܕܡܬܚܙܝܐ ܗܘܬ ܠܗ ܒܚܙܘܐ. ܗܿܘ ܡܢ ܓܝܪ ܓܒܪܐ ܐܪܝܟܐ ܐܝܬܘܗܝ ܗܘܐ ܐܟܠܩܪܨܐ ܫܠܝܛܐ
                    ܕܐܐܪ ܘܕܪܘܚܐ ܐܝܟ ܕܐܡܪ ܫܠܝܚܐ ܠܗܢܐ ܦܐܘܠܘܣ1 ܐܦܣ̈ܝܐ:2:2. ܗܢܘܢ ܕܝܢ ܕܦܪܚܝܢ ܗܘܘ ܘܢܦܠܝܢ
                    ܬܚܘܬܘܗܝ ܐܝܬܝܗܘܢ ܗܘܘ ܗܿܢܘܢ ܕܒܢܫ̈ܒܐ ܕܚܛܗܐ  f.78b  ܐܬܥܪܩܠܘ ܘܒܙܢ̈ܝܐ ܕܒܝܫܘܬܐ
                    ܐܬܛܪܛܫܘ ܘܒܡܨܝܕܬܗ ܕܗܿܘ ܐܬܬܚܕܘ. ܗܿܢܘܢ ܕܝܢ ܕܦܪܚܝܢ ܗܘܘ ܘܡܬܥܠܝܢ ܠܥܠ ܡܢܗ ܐܝܬܝܗܘܢ ܗܿܢܘܢ
                    ܕܫܕܘ ܡܢܗܘܢ ܚܫ̈ܐ ܕܒܣܪܐ ܘܝܘܩܪܐ ܐܪܥܢܝܐ ܕܚܛܗܐ ܘܐܫܬܘܙܒܘ ܡܢ ܦܚ̈ܘܗܝ ܕܗܿܘ. ܘܒܕܘܒܪ̈ܐ
                    ܩܕܝ̈ܫܐ ܠܫܡܝܐ ܦܪܚܘ. ܡܕܝܢ ܝܕܝܥܐ ܡܢ ܗܠܝܢ ܕܟܕ ܡܬܦܪܫܐ ܢܦܫܐ ܡܢ ܦܓܪܐ ܡܬܟܢܫܝܢ ܘܡܬܘܥܕܝܢ
                    ܠܘܬܗܿ ܡܠܐܟܐ ܘܫܐܕܐ. ܐܬܐܢܐܣܝܘܣ ܕܐܠܟܣܢܕܪܝܐ ܡܘܣܦ ܡܝܬܐ ܡܛܠܬܗ ܕܩܕܝܫܐ ܐܢܛܘܢܝܘܣ ܝܬܝܪ
                    ܚܦܛܗ ܕܢܬܢܨܚ ܒܣܝܒܘܬܐ ܘܢܬܥܢܘܐ. ܘܒܕܓܘܢ ܟܕ ܐܝܬܘܗܝ ܒܙܒܢ ܒܛܘܪܐ ܐܪܝܡ ܥܝܢ̈ܘܗܝ ܠܫܡܝܐ ܘܚܙܐ
                    ܡܢܫܝܠ ܠܐܢܫ ܕܡܣܬܠܩ. ܘܢܦܠܬ ܥܠܘܗܝ ܕܚܠܬܐ ܘܬܘܗܬܐ ܟܕ ܝܗܒ ܛܘܒܐ ܠܗܿܘ ܕܐܫܬܘܝ ܠܗܕܐ ܡܣܩܬܐ
                    ܘܫܐܠ ܗܘܐ ܡܢ ܡܪܝܐ ܕܢܘܕܥܝܘܗܝ ܕܡܢܐ ܐܝܬܘܗܝ ܗܘܐ. ܘܡܢ ܫܡܝܐ ܩܠܐ ܐܫܬܡܥ ܠܗ ܕܐܡܪ ܕܗܕܐ
                    ܐܝܬܝܗܿ ܢܦܫܗ ܕܐܡܘܢ ܗܿܘ ܕܥܡܪ ܗܘܐ ܒܢܛܝܪܐ ܐܬܪܐ. ܐܝܬܘܗܝ ܗܘܐ ܕܝܢ ܗܢܐ ܓܒܪܐ ܩܕܝܫܐ ܘܒܚܝܪܐ
                    ܝܚܝܕܝܐ ܡܥܠܝܐ ܡܢ ܛܠܝܘܬܗ ܘܥܕܡܐ ܠܣܝܒܘܬܗ. ܗܿܘ ܕܝܪܒ ܫܘܠܡܗ ܝܬܝܪ  f.79a  ܡܢ
                    ܫܘܪܝܗ. ܗܿܘܐ ܗܘܐ ܡܢ ܢܛܝܪܘܣ ܐܬܪܐ ܕܒܗ ܥܡܪ ܗܘܐ ܥܕܡܐ ܠܛܘܪܐ ܕܒܗ ܥܡܪ ܗܘܐ ܐܢܛܘܢܝܘܣ ܡܪܕܐ
                    ܝܓّ ܝܘܡܝܢ ܐܝܟ ܕܐܡܪܝܢ. 
                ܐܦ ܡܠܦܢ̈ܐ ܩܕܝ̈ܫܐ ܣܗܕܝܢ. ܕܟܕ ܡܬܦܪܫܐ ܢܦܫܐ ܡܢ ܦܓܪܐ ܡܬܘܥܕܝܢ ܠܘܬܗܿ
                    ܡܠܐܟܐ ܘܫܐܕܐ ܘܦܓܥܝܢ ܒܗܿ. ܕܩܕܝܫܐ ܕܝܘܢܢܘܣܝܘܣ ܗܿܘ ܕܡܢ ܕܝܢ̈ܐ ܕܐܪܝܘܣ ܦܓܘܣ ܐܦܣܩܘܦܐ
                    ܕܐܬܝܢܣ ܡܕܝܢܬܐ ܡܢ ܐܓܪܬܐ ܕܠܘܬ ܕܡܐܦܠܝܘܣ ܒܪ ܩܝܡܐ: ܙܕܩ ܕܝܢ ܠܡܕܥ ܕܠܐܝܠܝܢ ܡܢܣܝܢ ܣܥܪܘ
                    ܠܡܥܘܠܘ ܒܐܢܫ. ܠܘ ܡܢ ܗܕܐ ܗܐ ܡܢ ܟܕܘ ܣܥܪܘ ܠܘܬܗ. ܘܕܠܩܘܒܠܐ ܕܗܕܐ ܠܡܐܛܒܘ ܠܐܢܫ. ܗܿܘ ܡܐ
                    ܕܨܒܘ. ܢܦܫܗܘܢ ܓܝܪ ܐܥܡܪܘ ܘܡܢ ܟܠ ܦܪܘܣ ܐܘ ܡܝܬܪܘܬܐ ܐܠܗܝܬܐ ܐܘ ܚܫ̈ܐ ܒܥܪܝܪ̈ܝܐ. ܘܗܠܝܢ
                    ܡܝܬܪ̈ܐ ܡܢ ܒܢ̈ܝ ܘܥܕܐ ܘܒܢ̈ܝ ܠܘܝܬܐ ܗܿܘܝܢ ܕܡܠܐܟܐ ܬܢܢ ܘܠܗܠ. ܘܝܪܬܝܢ ܥܡܗܘܢ ܐܘܘܢܐ ܛܘܒܬܢܐ
                    ܒܥܠܡܐ ܗܿܘ ܕܠܐ ܡܬܚܒܠ. ܘܗܿܘܝܢ ܥܡ ܐܠܗܐ ܠܥܠܡ ܥܠܡܝܢ. ܗܿܝ ܕܐܦ ܪܒܐ ܘܡܥܠܝܐ ܝܬܝܪ ܡܢ ܟܠܗܝܢ
                    ܛܒܬܐ. ܗܿܢܘܢ ܕܝܢ ܐܚܪ̈ܢܐ ܝܬܝܪ ܢܦܠܝܢ ܐܟܚܕܐ ܡܢ ܫܠܡܐ ܐܠܗܝܐ ܗܿܘ ܕܝܠܗܘܢ. ܘܗܪܟܐ ܬܘܒ ܐܦ
                    ܡܢ ܒܬܪ ܡܘܬܗܘܢ ܥܡ ܫܐܕܐ ܒܥܪܝܪ̈ܝܐ ܡܬܟܢܫܝܢ. ܡܛܠ ܗܕܐ ܗܟܝܠ ܐܟܝܦܘܬܐ ܣܓܝܐܬܐ ܙܕܩ ܕܬܗܘܐ ܠܢ
                    ܘܢܗܘܐ ܥܡ ܡܪܢ ܒܟܠܙܒܢ ܘܠܐ ܥܡ ܫܐܕܐ.  f.79b  ܕܩܕܝܫܐ ܬܐܘܦܝܠܘܣ ܐܦܣܩܘܦܐ
                    ܕܐܠܟܣܢܕܪܝܐ ܡܢ ܬܘܪܓܡܐ ܕܡܪܬܝܢܘܬܐ: ܠܐ ܛܥܝܐ ܐܚ̈ܝ ܐܝܕܐ ܕܚܠܬܐ ܘܙܘܥܬܐ ܘܐܢܢܩܝ ܐܝܬ ܠܢ
                    ܕܢܚܙܐ ܐܡܬܝ ܕܢܦܫܐ ܡܢ ܦܓܪܐ ܡܬܦܪܫܐ. ܡܬܘܥܕܝܢ ܓܝܪ ܥܠܝܗܿ ܚܝ̈ܠܘܬܐ ܕܕܠܩܘܒܠܐ ܘܪ̈ܝܫܢܐ
                    ܕܚܫܘܟܐ ܐܚܝܕܝ ܥܠܡܐ ܕܒܝܫܘܬܐ. ܫܠܝ̈ܛܢܐ ܘܡܪ̈ܘܬܐ ܘܪܘܚܐ ܕܒܝܫܘܬܐ. ܘܒܙܘܥܬܐ ܡܕܝܢ ܐܚܕܝܢ ܠܗܿ
                    ܠܢܦܫܐ ܟܕ ܡܝܬܝܢ ܠܗܿ ܟܠܗܘܢ ܚܛܗܐ ܕܚܛܬ ܒܝܕܥܬܐ ܘܒܠܐ ܒܝܕܥܬܗܿ ܡܢ ܛܠܝܘܬܗܿ ܘܥܕܡܐ ܠܙܒܢܐ
                    ܗܿܘ ܕܒܗ ܐܬܬܚܕܬ. ܘܩܝܡܝܢ ܘܡܩܛܪܓܝܢ ܟܠܗܝܢ ܗܠܝܢ ܕܡܢܗܿ ܐܣܬܥܪ̈ܝ. ܘܬܘܒ ܚܝ̈ܠܘܬܐ ܕܐܠܗܐ
                    ܐܬܝܢ ܘܩܝܡܝܢ ܠܘܩܒܠ ܦܪܨܘܦܐ ܕܗܠܝܢ ܕܕܠܩܘܒܠܐ ܘܐܦ ܗܢܘܢ ܫܦܝܪ̈ܬܐ ܕܝܠܗܿ ܬܢܝܢ. ܘܡܟܝܠ ܒܐܝܢܐ
                    ܪܥܠܐ ܣܒܪ ܐܢܬ ܕܗܿܘܝܐ ܒܗܿܝ ܫܥܬܐ. ܥܕܡܐ ܕܐܬܐ ܦܣܩܐ ܘܚܪܘܪ̈ܐ ܗܿܘܝܢ ܠܗܿ. ܕܩܕܝܫܐ ܣܐܘܝܪܐ
                    ܡܢ ܐܓܪܬܐ ܕܠܘܬ ܬܐܘܡܐ ܐܦܝܣܩܘܦܐ ܕܓܪܡܩܝܐ: ܡܐ ܓܝܪ ܕܡܬܦܪܫܐ ܢܦܫܐ ܡܢ ܦܓܪܐ. ܒܬܪ ܫܘܢܝܐ ܕܡܢ
                    ܦܓܪܐ ܦܓܥܝܢ ܒܗܿ ܚܝ̈ܠܘܬܐ ܡܠܐܟܝܐ ܘܛܒܐ ܘܣܝܥܬܐ ܕܫܐܕܐ ܒܝ̈ܫܐ. ܐܝܟܢܐ ܕܠܦܘܬ ܡܥܒܕܢܘܬܐ
                    ܕܥܒܕܐ ܛܒܐ ܗܠܝܢ ܕܣܥܪܬ ܐܘ ܛܒܐ ܐܘ ܒܝ̈ܫܐ  f.80a  ܠܘܬ ܐܬܪ̈ܘܬܐ ܕܙܕܩܝܢ. ܐܘ ܗܠܝܢ
                    ܐܘ ܗܿܢܘܢ ܢܩܒܠܘܢܗܿ ܕܬܬܢܛܪܝ ܥܕܡܐ ܠܝܘܡܐ ܐܚܪܝܐ ܗܿܘ ܕܒܗ ܩܝܡܝܢܢ ܟܠܢ. ܐܘ ܠܕܝܢܐ ܐܘ ܠܚܝ̈ܐ
                    ܕܠܥܠܡ. ܐܘ ܠܫܠܗܒܝܬܐ ܕܢܘܪܐ ܕܠܐ ܕܥܟܐ. ܐܘ ܠܡܠܟܘܬܐ ܕܫܡܝܐ ܕܠܝܬ ܠܗܿ ܫܘܠܡܐ ܡܬܬܘܒܠܝܢ. ܡܢ
                    ܟܬܒܐ ܕܐܫܥܝܐ ܕܪܫܡ ܡܛܠ ܚܕܘܬܐ ܕܗܿܘܝܐ ܠܢܦܫܐ ܗܿܝ ܕܒܥܝܐ ܕܬܫܬܥܒܕ ܠܐܠܗܐ: ܐܡܬܝ ܓܝܪ ܕܢܦܫܐ
                    ܢܦܩܐ ܡܢ ܥܠܡܐ ܗܢܐ ܐܙܠܝܢ ܥܡܗܿ ܡܠܐܟܐ. ܘܗܝܕܝܢ ܢܦܩܝܢ ܠܐܘܪܥܗܿ ܚܝ̈ܠܘܬܐ ܕܚܫܘܟܐ ܕܒܥܝܢ
                    ܕܢܐܚܕܘܢܗܿ ܠܡܬܒܨܝܘ. ܐܢܗܘ ܕܐܝܬ ܠܗܘܢ ܒܗܿ ܡܕܡ ܡܢ ܕܝܠܗܘܢ ܗܝܕܝܢ ܠܘ ܡܠܐܟܐ ܡܩܪܒܝܢ ܥܡܗܘܢ
                    ܐܠܐ ܥܒܕܐ ܗܿܢܘܢ ܕܥܒܕܬ ܡܣܬܪܝܢ ܘܡܢܛܪܝܢ ܠܗܿ ܡܢܗܘܢ. ܕܠܐ ܢܬܩܪܒܘܢ ܠܗܿ. ܐܢ ܕܝܢ ܕܟܝܢ
                    ܥܒܕܝܗܿ. ܗܿܝܕܝܢ ܡܒܚܝܢ ܩܕܡܝܗܿ ܡܠܐܟܐ ܥܕܡܐ ܕܬܐܪܘܥ ܠܐܠܗܐ ܒܚܕܘܬܐ. ܗܿܝܕܝܢ ܒܗܿܝ ܫܥܬܐ
                    ܛܥܝܐ ܠܗܿ ܠܥܒܕܐ ܕܒܥܠܡܐ ܗܢܐ ܘܠܟܠܗ ܥܡܠܗ. ܕܩܕܝܫܐ ܡܪܝ ܝܥܩܘܒ ܐܦܝܣܩܘܦܐ ܕܐܘܪܗܝ ܡܢ ܡܐܡܪܐ
                    ܕܥܠ ܬܘܩܢܗ ܕܒܪܢܫܐ: ܒܬܪ ܡܠܬܐ ܕܥܠ ܩܒܪ̈ܐ ܘܚܝ̈ܐ ܕܒܪܢܫܐ ܕܒܥܠܡܐ ܗܢܐ. ܒܬܪܟܢ ܡܢܐ ܡܘܬܐ
                    ܘܚܒܠܐ ܕܒܩܒܪܐ ܘܫܪܝܐ ܘܦܘܠܗܕܐ ܕܗܕܡ̈ܐ ܕܦܓܪܐ ܒܓܘ ܐܪܥܐ ܘܒܘܕܪܐ ܕܓܪ̈ܡܝܢ ܠܘܬ  f.80b  ܫܝܘܠ. ܐܡܪ ܟܕ ܦܓܪܐ ܡܢ ܡܫܬܪܐ ܠܥܦܪܐ ܐܝܟ ܦܣܩܐ ܕܐܠܗܐ. ܘܡܢ ܬܡܢ ܟܠܚܕ ܡܢ
                    ܐܣܛܘܟܣܐ ܡܫܢܐ ܨܝܕ ܒܪ ܓܢܣܗ. ܡܝ̈ܐ ܘܐܐܪ ܘܢܘܪܐ ܥܕܡܐ ܕܫܪܝܪܐܝܬ ܥܦܪܐ ܒܠܚܘܕ ܢܫܬܟܚ ܕܠܘܬ
                    ܐܪܥܐ ܘܥܦܪܐ ܒܪ ܓܢܣܗ. ܢܦܫܐ ܕܝܢ ܡܫܢܝܐ ܐܘ ܠܘܬ ܢܦܫ̈ܬܐ ܕܙܕܝ̈ܩܐ. ܐܘ ܠܘܬ ܢܦܫ̈ܬܐ ܕܪ̈ܫܝܥܐ
                    ܥܡ ܫܚܪ̈ܐ ܕܫܐܕܐ ܡܪ̈ܘܕܐ ܡܚܕܐ ܐܝܟ ܦܣܩܐ ܕܢܦܩ ܥܠܝܗܿ ܡܢ ܐܠܗܐ. ܥܕ ܡܛܐ ܙܒܢܐ ܕܩܝܡܬܐ ܕܟܠܗ
                    ܓܢܣܐ ܐܢܫܝܐ. ܘܕܕܝܢܐ ܘܕܦܘܪܥܢܐ ܟܐܢܐ ܗܿܘ ܕܡܬܬܚܝܒ ܠܟܠ ܐܢܫ ܐܝܟ ܥܒܕܘܗܝ ܘܐܝܟ ܕܘܒܪ̈ܐ ܐܘ
                    ܣܥܘܪ̈ܘܬܐ ܕܗܪܟܐ. ܗܐ ܢܗܝܪܐܝܬ ܚܘܝܘ ܠܢ ܡܠܦܢ̈ܐ ܒܚܝܪ̈ܐ ܘܬܪ̈ܝܨܝ ܫܘܒܚܐ. ܕܟܕ ܡܬܦܪܫܐ ܢܦܫܐ
                    ܡܢ ܦܓܪܐ ܡܬܘܥܕܝܢ ܘܡܬܟܢܫܝܢ ܠܘܬܗܿ ܡܠܐܟܐ ܘܫܐܕܐ. ܘܦܓܥܝܢ ܒܗܿ ܟܕ ܡܠܐܟܐ ܡܢ ܡܝܬܝܢ ܫܦܝܪ̈ܬܗ
                    ܡܛܠ ܕܨܒܝܢ ܕܥܡܗܘܢ ܬܐܙܠ. ܫܐܕܐ ܕܝܢ ܡܩܛܪܓܝܢ ܣܢ̈ܝܬܗܿ ܒܗܿܝ ܕܒܥܝܢ ܕܥܡܗܘܢ ܬܐܙܠ. 
            
            
                ܩܦܠܐܘܢ ܕܬܠܬܝܢ ܘܫܒܥܐ
                ܕܡَܟܣ ܠܗܢܘܢ ܕܐܡܪܝܢ ܕܢܦܫ̈ܬܐ ܡܬܟܪ̈ܟܢ ܘܡܫܢ̈ܝܢ ܡܢ ܦܓܪܐ ܠܦܓܪܐ܆
                ܘܡܚܘܐ ܠܬܘܕܝܬܗܘܢ ܕܕܓܠܬܐ ܗܝ
                ܐܢܫ̈ܝܢ ܡܢ  f.81a  ܚܢ̈ܦܐ ܐܡܪܝܢ ܕܢܦܫ̈ܬܐ ܡܬܟܪ̈ܟܢ ܘܡܫܢ̈ܝܢ ܡܢ
                    ܦܓܪܐ ܠܦܓܪܐ. ܠܦܘܬ ܛܒܬܐ ܘܒܝ̈ܫܬܐ ܕܣܥܪ̈ܢ. ܐܢ ܠܡ ܣܥܪܬ ܢܦܫܐ ܛܒܬܐ ܡܫܢܝܐ ܡܢ ܗܿܘ ܦܓܪܐ
                    ܕܣܥܪܬ ܒܗ ܛܒܬܐ ܠܦܓܪܐ ܐܚܪܢܐ ܕܡܝܬܪ ܘܫܦܝܪ ܡܢܗ. ܘܐܢ ܒܝ̈ܫܬܐ ܣܥܪܬ ܡܫܢܝܐ ܡܢ ܗܿܘ ܦܓܪܐ
                    ܠܦܓܪܐ ܐܚܪܢܐ ܕܒܨܝܪ ܘܣܢܐ ܡܢ ܗܿܘ ܕܒܗ ܣܥܪܬ ܒܝ̈ܫܬܐ. ܚܢܢ ܕܝܢ ܐܡܪܝܢܢ ܕܕܓܠܬܐ ܐܝܬܝܗܿ ܗܕܐ
                    ܕܐܡܪܝܢ ܘܡܣܠܝܬܐ. ܘܝܕܝܥܐ ܡܢ ܗܠܝܢ (ܐ) ܢܦܫܐ ܡܢ ܝܕܘܥܬܐ ܐܝܬܝܗܿ ܘܥܗܘܕܬܐ. ܝܕܥܬܐ ܓܝܪ
                    ܘܥܘܗܕܢܐ ܚܝ̈ܠܐ ܟܝܢ̈ܝܐ ܕܝܠܗܿ ܐܝܬܝܗܘܢ ܐܝܟ ܕܚܘܝܢܢ ܒܬܐܘܪ̈ܝܣ ܥܠܝ̈ܬܐ. ܘܒܕܓܘܢ ܝܕܥܐ ܠܗܠܝܢ
                    ܕܣܥܪܬ. ܘܐܦ ܥܗܕܐ ܠܗܝܢ. ܘܐܠܘ ܡܢ ܦܓܪܐ ܠܦܓܪܐ ܡܬܟܪܟܐ ܗܘܬ ܘܡܫܢܝܐ. ܟܕ ܡܫܢܝܐ ܗܘܬ ܠܚܕ ܡܢ
                    ܦܓܪ̈ܐ ܥܗܕܐ ܗܘܬ ܠܗܿܘ ܡܐ ܕܣܥܝܪ ܗܘܐ ܠܗܿ ܒܦܓܪܐ ܗܿܘ ܕܡܢܗ ܫܢܝܬ. ܘܗܐ ܟܕ ܝܕܥܝܢܢ ܕܢܦܫ̈ܬܐ
                    ܕܡܚܝ̈ܕܢ ܥܡ ܦܓܪ̈ܐ ܐܢܫ̈ܝܐ ܝܘܡܢ ܠܐ ܥܗܕܢ ܕܗܘܝ ܒܦܓܪ̈ܐ ܐܚܪ̈ܢܐ ܐܦܠܐ ܕܣܥܪ̈ܝ ܒܗܘܢ ܠܐ ܛܒܬܐ
                    ܘܐܦܠܐ ܒܝ̈ܫܬܐ. ܐܢܕܝܢ ܡܗܦܟܝܢ ܘܐܡܪܝܢ ܕܝܕܥܬܐ ܘܥܘܗܕܢܐ ܠܘ ܕܢܦܫܐ ܐܝܬܝܗܿ ܒܠܚܘܕ ܘܠܐ ܕܦܓܪܐ
                    ܒܠܚܘܕ ܐܠܐ ܕܬܪ̈ܝܗܘܢ ܐܟܚܕܐ  f.81b  ܗܕܐ ܗܦܟܬܐ ܫܪܝܐ ܠܢ ܒܩܦܠܐܘܢ ܕܬܠܬܝܢ ܘܬܠܬܐ
                    ܕܡܚܘܐ ܕܢܛܝܪܐ ܝܕܥܬܗܿ ܘܥܘܗܕܢܐ ܡܢ ܒܬܪ ܕܡܬܦܪܫܐ ܡܢ ܦܓܪܐ. (ܒ) ܢܦܫ̈ܬܐ ܕܡܫܢ̈ܝܢ ܡܢ ܓܘܫ̈ܡܐ
                    ܠܓܘܫ̈ܡܐ ܚܕܐ ܡܢ ܬܪܬܝܢ ܢܩܦܐ ܠܗܝܢ ܡܢ ܐܢܢܩܝ ܐܘ ܐܠܗܐ ܡܫܢܐ ܠܗܝܢ ܐܘ ܗܢܝܢ ܡܫܢ̈ܝܢ. ܘܐܢ
                    ܐܠܗܐ ܡܢ ܡܫܢܐ ܠܗܝܢ ܡܛܠ ܦܘܪܥܢܐ ܕܛܒܬܐ ܘܒܝ̈ܫܬܐ. ܠܘ ܟܐܢܐܝܬ ܥܒܕ. ܡܛܠ ܕܚܝ̈ܠܐ ܕܢܦܫܐ
                    ܢܩܝܦܝܢ ܠܡܘܙًܓܐ ܕܦܓܪܐ. ܒܕܓܘܢ ܒܝܕ ܦܓܪܐ ܦܠܚܐ ܛܒܬܐ ܘܒܝ̈ܫܬܐ. ܘܙܕܩ ܗܘܐ ܕܥܡܗܝܢ ܕܢܦܫ̈ܬܐ
                    ܢܫܢܐ ܐܦ ܠܡܘܙًܓܘܗܝ ܕܦܓܪܐ ܗܢܘܢ ܕܥܡܗܘܢ ܦܠܚܬ ܛܒܬܐ ܘܒܝ̈ܫܬܐ. ܐܢܕܝܢ ܗܢܝܢ ܢܦܫ̈ܬܐ ܡܫܢ̈ܝܢ
                    ܡܢ ܦܓܪ̈ܐ ܠܦܓܪ̈ܐ ܐܘ ܟܝܢܐܝܬ ܡܫܢ̈ܝܢ ܐܘ ܨܒܝܢܐܝܬ. ܘܐܢ ܡܢ ܟܝܢܐܝܬ ܡܫܢ̈ܝܢ ܙܕܩ ܗܘܐ
                    ܕܢܫܢ̈ܝܢ ܥܣܪܝܢ ܠܚܕܐ ܕܘܟܬܐ ܕܥܗܢܐ ܠܗܝܢ. ܐܢܕܝܢ ܨܒܝܢܐܝܬ ܙܕܩ ܗܘܐ ܕܢܫܢ̈ܝܢ ܠܓܘܫ̈ܡܐ ܚܫܘܫܐ
                    ܘܓܒܝܐ. ܐܢ ܒܨܒܝܢܗܝܢ ܣܝܡ ܗܘܐ ܫܘܢܝ̈ܗܝܢ. 
                ܘܗܠܝܢ ܡܢ ܒܘܚ̈ܢܐ ܟܝܢ̈ܝܐ ܕܡܚܘܝܢ ܕܠܐ ܡܫܢ̈ܝܢ ܢܦܫ̈ܬܐ ܡܢ ܓܘܫܡܐ ܠܓܘܫܡܐ.
                    ܣܗܕܘܬܐ ܕܝܢ ܕܡܢ ܟܬܒܐ ܩܕܝ̈ܫܐ ܐܝܬܝܗܝܢ ܗܠܝܢ: ܢܒܝܐ ܡܢ ܡܙܡܪ ܟܗܢܝ̈ܬܐ ܕܘܝܕ ܐܡܪ: ܕܨܗܝܐ ܗܝ
                    ܠܟ ܢܦܫܝ ܐܠܗܐ ܚܝܐ ܕܐܡܬܝ ܐܬܐ ܘܐܚܙܐ ܐܦܝ̈ܟ1 ܡܙܡܘܪ̈ܐ:2:42.  f.82a  ܫܠܝܡܘܢ
                    ܕܝܢ ܒܪܗ ܕܗܢܐ ܐܡܪ: ܕܦܓܪܐ ܠܡ ܗܿܦܟ ܠܐܪܥܐ܆ܘܪܘܚܐ ܠܘܬ ܡܪܝܐ ܕܝܗܒܗܿ2 ܩܘܗܠܬ: 8:12. ܘܡܪܢ ܐܡܪ
                    ܡܛܠ ܠܥܙܪ ܒܐܘܢܓܠܝܘܢ: ܕܡܝܬ ܘܐܘܒܠܘܗܝ ܡܠܐܟܐ ܠܥܘܒܗ ܕܐܒܪܗܡ3 ܠܘܩܐ:22:16. ܐܣܛܦܢܘܣ
                    ܪܝܫܐ ܘܩܕܡܝܐ ܕܣܗܕܐ ܟܕ ܐܬܪܓܡ ܐܡܪ ܡܪܢ ܝܫܘܥ ܡܫܝܚܐ ܩܒܠ ܪܘܚܝ4 ܦܪܟܣܝܣ ܕܫܠܝܚ̈ܐ:59:7.
                    ܘܫܠܝܚܐ ܦܐܘܠܘܣ ܐܡܪ ܕܪܓܝܓ ܐܢܐ ܕܐܦܛܪ ܕܥܡ ܡܫܝܚܐ ܐܗܘܐ5 ܦܝܠܝܦܣ̈ܝܐ:23:1. 
                ܡܕܝܢ ܐܬܝܕܥܬ ܒܝܕ ܗܠܝܢ ܟܠܗܝܢ ܕܠܐ ܡܫܢ̈ܝܢ ܢܦܫ̈ܬܐ ܡܢ ܦܓܪ̈ܐ ܠܦܓܪ̈ܐ ܘܐܦܠܐ
                    ܡܬܟܪ̈ܟܢ ܡܢ ܓܘܫ̈ܡܐ ܠܓܘܫ̈ܡܐ. 
            
            
                ܩܦܠܐܘܢ ܕܬܠܬܝܢ ܘܬܡܢܝܐ
                ܕܡܚܘܐ ܕܢܦܫ̈ܬܐ ܐܝܟܐ ܗܘܝܢ ܥܕܡܐ ܠܝܘܡܐ ܕܩܝܡܬܐ
                ܡܫܐܠ ܐܢܫ ܘܐܡܪ: ܕܢܦܫ̈ܬܐ ܕܒܢܝ̈ܢܫܐ ܐܡܬܝ ܕܡܫܢ̈ܝܢ ܡܢ ܦܓܪ̈ܐ ܐܝܟܐ ܗܘܝܢ
                    ܥܕܡܐ ܠܩܝܡܬܐ. ܘܐܢܫ̈ܝܢ ܡܢ ܐܡܪܝܢ ܕܒܗܢܐ ܐܐܪ ܕܒܝܬ ܠܢ ܘܠܫܡܝܐ ܐܝܬܝܗܝܢ. ܘܒܗ ܗܘܝܢ ܥܕܡܐ
                    ܠܝܘܡܐ ܕܢܘܚܡܐ. ܩܕܝܫܐ ܕܝܢ ܡܪܝ ܐܝܘܢܢܝܣ ܕܩܘܣܛܢܛܢܘܦܠܝܣ ܡܣܠܐ ܠܗܿ ܠܗܕܐ ܬܪܥܝܬܐ ܘܚܢܢ ܥܡܗ.
                    ܘܐܡܪܝܢܢ ܕܠܐ ܫܪܝܪܐ ܗܕܐ. ܘܝܕܝܥܐ ܕܠܐ ܫܪܝܪܐ ܡܢ ܗܠܝܢ ܡܚܘܝ̈ܢܘܬܐ (ܐ) ܐܢ ܒܗܢܐ ܐܐܪ
                    ܐܝܬܝܗܘܢ ܢܦܫ̈ܬܐ ܡܢ ܒܬܪ ܕܦܪ̈ܝܫܢ ܡܢ ܦܓܪ̈ܐ܆ܡܛܠ ܡܢܐ ܐܡܪܝܢܢ ܕܐܝܬ ܥܠܡܐ ܐܚܪܢܐ. ܠܐ  f.82b  ܡܟܝܠ ܡܬܒܥܐ ܠܢ ܥܠܡܐ ܐܚܪܢܐ ܐܢ ܒܗܢܐ ܐܐܪ ܐܝܬܝܗܝܢ. (ܒ) ܝܕܝܥܐ ܕܠܘ ܒܗܢܐ
                    ܐܐܪ ܐܝܬܝܗܝܢ ܡܢ ܗܿܝ ܕܐܘܒܠܘܗܝ ܡܠܐܟܐ ܠܠܥܙܪ ܡܣܟܢܐ ܠܥܘܒܗ ܕܐܒܪܗܡ ܐܝܟ ܕܐܡܪ ܡܪܢ. ܘܡܢ ܗܿܝ
                    ܕܒܥܐ ܥܬܝܪܐ ܕܢܐܬܐ ܢܣܗܕ ܠܐܚܘܗܝ ܘܠܐ ܐܫܬܒܩ. ܘܡܢ ܗܿܝ ܕܗܿܘ ܥܬܝܪܐ ܐܚܪܢܐ ܟܕ ܒܥܐ ܕܢܣܬܘܪ
                    ܒܝܬ ܩܦܣܘܗܝ ܐܬܐܡܪ ܠܘܬܗ ܕܒܗܢܐ ܠܠܝܐ ܕܒܪܝܢ ܠܗܿ ܠܢܦܫܟ ܡܢܟ. ܘܡܢ ܗܿܝ ܕܐܡܪ ܕܘܝܕ ܠܘܬ ܐܠܗܐ
                    ܕܐܡܬܝ ܐܬܐ ܘܐܚܙܐ ܐܦܝ̈ܟ. ܘܐܦ ܡܢ ܗܿܝ ܕܐܡܪ ܫܠܝܚܐ ܦܐܘܠܘܣ ܕܪܓܝܓ ܐܢܐ ܕܐܦܛܪ ܕܥܡ ܡܫܝܚܐ
                    ܐܗܘܐ. ܡܕܝܢ ܐܡܬܝ ܕܡܫܢ̈ܝܢ ܢܦܫ̈ܬܐ ܡܢ ܦܓܪ̈ܐ ܠܘ ܒܗܢܐ ܐܐܪ ܗܘܝܢ ܥܕܡܐ ܠܝܘܡܐ ܕܩܝܡܬܐ.
                    ܐܟܙܢܐ ܕܗܠܝܢ ܐܡܪܘ ܐܚܪ̈ܢܐ ܕܝܢ ܐܡܪܝܢ. ܕܢܦܫ̈ܬܐ ܡܿܢ ܕܟ̈ܐܢܐ ܘܕܙܕܝ̈ܩܐ ܘܕܫ̈ܠܝܚܐ ܘܕܣܗ̈ܕܐ
                    ܘܕܩܕܝ̈ܫܐ. ܘܕܐܝܟ ܗܠܝܢ. ܟܕ ܡܫ̈ܢܝܢ ܡܼܢ ܦܓܪ̈ܐ. ܥܡ ܡܠ̈ܐܟܐ ܡܬܚ̈ܠܛܢ ܘܥܡܗܘܢ ܗܘ̈ܝܢ ܥܕܡܐ
                    ܠܝܘܡܐ ܕܩܝܡܬܐ ܢܿܦܫ̈ܬܐ ܕܝܢ ܕܪ̈ܫܝܼܥܐ ܘܕܥ̈ܘܿܠܐ. ܥܡ ܫܐܕ̈ܐ ܗܘ̈ܝܢ ܘܥܡܗܘܢ ܘܥܡܗܘܢ
                    ܡܬܚ̈ܠܛܢܿ ܥܕܡܐ ܠܝܘܡ ܕܩܝܡܬܐ. ܚܢܢ ܕܝܢ ܐܡܿܪܝܢܢ. ܕܗܕܐ ܫܪܝܪܬܐ ܐܝܬܝܗܿ ܣܥܪܢܝܬܐ ܘܙܡܢܐ  f.83a  ܡܘܕܝܼܢܢ ܘܐܦ ܡܗܝܡܢܝܢܢ. ܐܠܐ ܠܐ ܣܿܦܩܐ ܗܕܐ ܠܘܬ ܫܪܝܐ ܘܫܐܘܼܠܐ ܘܬܡܬܐ.
                    ܡܛܠ ܕܫܘܐܠܐ ܗܟܢܐ ܬܒܿܥ ܕܐܝܟܐ ܒܐܝܿܕܐ ܕܘܟܬܐ ܗܘ̈ܝܢ ܢܦܫ̈ܬܐ ܟܕ ܡܬܦܪ̈ܫܢ ܡܼܢ ܦܓܪ̈ܐ ܥܕܠܐ
                    ܠܝܘܡܐ ܕܩܝܡܬܐ: ܐܚܪ̈ܢܐ ܕܝܢ ܐܡܿܪܝܢ ܕܢܦܫ̈ܬܐ ܕܝܢ ܐܡܬܝ ܕܡܼܬܦܪ̈ܫܢ ܡܼܢ ܦܓܪ̈ܐ ܠܐ ܗܘܝ̈ܢ
                    ܒܕܘܟܬܐ. ܡܛܠ ܕܪ̈ܘܚܢܝܬܐ ܐܝܬܝܗ̈ܝܢ. ܘܠܕܐ ܓܫܘܡ. ܘܗܿܘ ܕܐܝܬ̄ܘ ܪܘܚܢܝܐ ܘܕܠܐ ܓܫܘܡ. ܠܐ
                    ܣܢܝܼܩ ܥܠ ܕܘܟܬܐ ܕܢܗܘܐ ܒܗܿ. ܡܕܝܢ ܠܡ ܢܦܫ̈ܬܐ ܟܕ ܡܬܦܪ̈ܫܢ ܡܼܢ ܦܓܪ̈ܐ. ܠܐ ܗܘ̈ܝܢ ܒܕܘܟܬܐ.
                    ܘܩܕܡܐܝܬ ܡܿܢ ܙ݀ܕܩ ܕܢܐܡܼܪ ܥܠ ܐܬܪܐ ܘܥܠ ܕܘܟܬܐ. ܒܬܪܟܢ ܐܡܿܪܝܢܢ ܥܠ ܢܦܫ̈ܬܐ ܐܢ ܗܘ̈ܝܢ
                    ܒܕܘ̈ܟܝܬܐ ܟܕ ܡܬܦܪ̈ܫܢ ܡܼܢ ܦܓܪ̈ܐ ܐܘܿ ܠܐ. ܡܕܝܢ ܢܐܢܡܼܪ ܥܠ ܐܬܪܐ ܕܡܢܐ ܐܝܬܘܗܝ. ܘܐܡܿܪܝܢܢ
                    ܕܡܛܠ ܐܬܪܐ. ܬܪ̈ܥܝܬܐ ܣܓ̈ܝܐܬܐ ܐܬܪ̈ܥܝܘ ܦܝܠܘܣ̈ܦܐ ܟܕ ܡܢܗܘܢ ܡܢ ܐܡܼܿܪܝܢ ܕܐܝܿܬܘ̄ ܐܘܪܟܐ
                    ܘܦܬܝܐ ܒܠܚܘܕ. ܡܕܝܢ ܕܥܘ ܒܪ̈ܓܫܐ ܡܬܼܕܪܟ. ܐܠܐ ܒܗܘܢܐ ܡܬܝܼܕܥ. ܡܢܗܘܢ ܕܝܢ ܐܡܪܘ ܕܐܬܪܐ
                    ܐܝܬ̄ܘ ܗܿܘ ܡܐ ܕܚܿܒܫ ܠܣܘ̈ܦܐ ܕܝܠܗ ܕܓܘܫܡܐ ܐܚܪ̈ܢܐ ܕܝܢ ܐܡܼܪ ܕܐܬܪܐ ܐܝܬ̄ܘ ܗܿܘ ܡܐ ܕܐܝܬ
                    ܒܝܬ  f.83b  ܚܨܦܐ ܠܚܡܪܐ ܘܗܿܘ ܡܐ ܕܐܝܬ ܒܝܢܬ ܓܘܫܡܐ ܠܐܐܪ. ܡܕܡ ܡܬܪܢܐ ܕܐܝܬ ܒܝܬ
                    ܚܨܼܦܐ ܠܚܡܪܐ. ܘܒܝܬ ܡܝܐ ܠܩܩܠܬܐ. ܘܒܝܢܬ ܓܘܫܡܐ ܕܐܢܫ ܠܐܐܪ ܗܿܘ ܕܟܪܝܼܟ. ܐܚܪ̈ܢܐ ܕܝܢ
                    ܐܚܢܝܐܝܬ ܐܬܪܥܝܼܘ ܘܐܡܼܪܘ ܡܛܠ ܐܬܪܐ. ܕܠܘ ܕܘܼܟܬܐ ܐܝܬܝܗܿ. [] ܕܢܟܿܢܼܫ ܠܡܣܒܪ̈ܢܘܬܐ
                    ܘܠܬܪ̈ܥܝܬܗܘܢ ܕܥܠ ܐܬܪܐ. ܘܗܠܝܢ ܡܿܢ ܥܠ ܗ݀ܝ ܕܡܿܢܐ ܗܘ ܐܬܪܐ. ܕܘܟܬܐ ܕܝܢ ܐܝܬܝܗܿ ܐܬܪܐ
                    ܕܡܥܼܪܙܠ ܥܡ ܐܘܣܝܐ. ܐܟܙܢܐ ܕܕܘܟܬܐ ܕܝܿܬܒ ܒܗܿ ܐܢܫ ܐܘܿ ܕܕܡܿܟ ܒܗܿ. ܒܕܘ̈ܟܝܬܐ ܓܝܪ ܐܡܿܪܝܢܢ
                    ܕܩܿܐܡ ܝܘܚܢܢ ܡܼܢ ܐܢܢܩܝ. ܘܒܕܘܟܬܐ ܐܟܬܒ ܣܘܩܪܛܝܣ ܡܼܢ ܟܠ ܦܪܘܣ. ܘܗܠܝܢ ܡܿܢ ܥܠ ܐܬܪܐ ܘܥܠ
                    ܕܘܟܬܐ ܣܦ̈ܩܢ ܠܦܘܬ ܥܕܢܐ. ܢ݀ܥܩܒ ܗܫܐ ܥܠ ܢܦܫ̈ܬܐ ܕܐܡܬܝ ܕܡܫܢ̈ܝܢ ܡܼܢ ܦܓܪ̈ܐ ܣܢܝ̈ܩܢ ܥܠ
                    ܐܬܪܐ ܘܥܠ ܕܘܟܬܐ ܕܢܗܘ̈ܝܢ ܒܗܿ ܐܘܿ ܠܐ ܘܐܡܿܪܝܢܢ ܕܓܘܫܡ̈ܐ ܡܢ ܣܢܝܩܝܢ ܥܠ ܐܬܪܐ ܘܥܠ ܕܢܗܘܼܘܢ
                    ܒܗܘܢ ܡܛܠ ܕܐܝܬܝܗܘܢ ܡܪ̈ܟܒܐ ܘܣܢܝܼܩܢ ܥܠ ܐܘܪܟܐ ܘܪܡܐ ܘܦܬܝܐ ܘܐܝܬ ܠܗܘܢ ܐܦ ܘܣܦ̈ܐ ܠܐ ܓܘܫܡ
                    ܕܝܢ ܡܛܠ ܕܠܐ ܡܢ [ܟܩܘ] ܐܦܠܐ ܐܝܬ ܠܗ ܐܘܪܟܐ ܘܥܣܥܩܐ ܘܦܬܝܐ ܠܐ ܣܢܝܼܩ ܥܠ ܐܬܪܐ ܘܐܦܠܐ ܥܠ
                    ܕܘܟܬܐ.  f.84a  ܐܠܐ ܐܢ ܗܕܐ ܗܟܢܐ ܐܝܬܝܗܿ. ܟܒܪ ܐܡܿܪ ܐܢܫ ܡܕܝܢ ܫܪܝܪܝܢ ܗܢ݀ܘܢ
                    ܕܐܡܿܪܘ ܡܼܢ ܠܥܠ ܕܢܦܫ̈ܬܐ ܐܡܬܝ ܕܡܬܦܪ̈ܫܢ ܡܼܢ ܦܓܪ̈ܐ ܠܐ ܗܘ̈ܝܢ ܒܕܘܟܬܐ ܘܐܡܿܪܝܢܢ ܕܕܘܟܬܐ
                    ܬܪܝܢܐܝܬ ܡܬܐܡܪܐ ܕܘܟܬܐ ܕܥܿܗܢܐ ܠܓܫ̈ܘܡܐ ܕܢܗܘܘܢ ܒܗܿ. ܘܕܘܟܬܐ ܕܥܿܗܢܐ ܠܠܐ ܓܫܘܡ ܕܢܗܼܘܐ
                    ܒܗܿ ܡܛܠ ܕܟܠ ܡܣܝܟܐ ܥܠ ܕܘܟܬܐ ܣܢܝܼܩ ܡܼܢ ܐܢܢܩܝ. ܘܒܕܓܘܢ ܡܠ̈ܐܟܐ ܡܣܝ̈ܟܐ ܐܝܬܝܗܘܢ. ܘܡܛܠ
                    ܕܡܣܝܟܝܢ ܒܕܘܟܬܐ ܐܝܬܝܗܘܢ ܡܼܢ ܐܢܢܩܝ ܘܕܘܟܬܐ ܡܿܢ ܗ݀ܝ ܕܥܿܗܢܐ ܠܓܘܫ̈ܡܐ ܥܣܪܐ ܙܢ̈ܝܐ
                    ܡܬܐܡܪܐ. ܠܥܠ ܠܬܚܬ ܠܝܡܝܢܐ ܠܣܡܠܐ ܠܩܘܕܡܼܐ ܠܒܣܬܪܐ ܗܪܟܐ ܠܗܠ ܒܩܪܝܒܘܬܐ ܒܪܚܝܩܘܬܐ ܟܠ
                    ܓܘܫܡ̈ܐ ܗܟܝܠ ܕܐܝܬ ܒܚܕܐ ܡܼܢ ܗܠܝܢ ܕܘܟ̈ܝܬܐ ܐܝܬ̄ܘ ܕܘܟܬܐ ܕܝܢ ܕܢܦܫ̈ܬܐ ܘܠܐ ܚܕ ܡܼܢ ܗܠܝܢ
                    ܐܝܬܝܗܿ. ܐܠܐ ܐܝܬܝܗܿ ܕܘܟܬܐ ܕܢܦܫ̈ܬܐ ܪ̈ܘܚܢܝܬܐ ܣܛ ܘܩܛܝ̈ܢܬܐ ܕܥܗܢܐ ܠܢܦܫ̈ܬܐ ܕܢܗܘ̈ܝܢ ܒܗܝܢ
                    ܡܕܝܢ ܘܒܕܘܟܬܐ ܐܝܬܝܗܝܢ ܢܦܫ̈ܬܐ ܕܦܼܪ̈ܝܫܢ ܘܫ̈ܢܝܢ ܡܼܢ ܦܓܪ̈ܐ. ܡܼ̤ܢ ܐܢܢܩܝ. ܡܼܢ ܓܘܢ ܫܐܘܠܐ
                    ܥܕܟܝܠ ܢܛܝܼܪ. ܒܐܝܟܐ ܒܐܝܿܕܐ ܕܘܟܬܐ ܗܘܿܝܐ ܥܕܡܐ ܠܩܝܡܬܐ. ܘܐܡܿܪܝܢܢ ܕܢܦܫ̈ܬܐ ܕܙܕܝ̈ܩܐ
                    ܘܕܟ̈ܐܢܐ ܘܕܩܕܝ̈ܫܐ ܒܦܪܕܝܣܐ. ܕܢܦܼܩ  f.84b  ܡܢܗ ܐܕܡܼ. ܢܦܫ̈ܬܐ ܕܝܢ ܕܫܠܝ̈ܚܐ
                    ܘܕܣܗ̈ܕܐ ܘܕܓܝܪ̈ܐ ܗܿܢܘܢ ܕܝܬܝܪ ܒܝܬܝܢ ܠܐܠܗܐ. ܠܥܠ ܡܼܫܢ ܫܡܝܐ ܗܘ̈ܝܢ. ܢܦܫ̈ܬܐ ܕܝܢ
                    ܕܪ̈ܫܝܼܥܐ ܘܕܥܿܘ̈ܠܐ ܒܕܘܟ̈ܝܬܐ ܚܫܘ̈ܟܬܐ ܕܐܝܬ ܬܚܝܬ ܐܪܥܐ ܗܘ̈ܝܢ ܥܕܡܐ ܠܩܝܡܬܐ. ܐܚܪ̈ܢܐ ܕܝܢ
                    ܐܡܿܪܝܢ ܕܢܦܫ̈ܬܐ ܕܪ̈ܫܝܥܐ ܒܐܬܪ̈ܘܬܐ ܕܚܫܘܟܐ ܗܘ̈ܝܢ ܥܕܡܐ ܠܢܘܚܡܐ. ܕܒܦܪܕܝܣܐ ܕܝܢ ܗܘ̈ܝܢ
                    ܕܟܐܢ̈ܐ ܘܕܙܕܝ̈ܩܐ ܘܕܫܠ̈ܝܚܐ ܘܕܣ̈ܗܕܐ ܘܕܡܗܝ̈ܡܢܐ ܫܪ̈ܝܪܐ ܕܚܝܼܘ ܒܕܘܒܪ̈ܐ ܡܝܬܪ̈ܐ ܥܕܡܐ
                    ܠܩܝܡܬܐ. ܐܡܬܝ ܕܡܫܢܝ̈ܢ ܡܼܢ ܦܓܪ̈ܐ ܝܕܝܼܥܐ ܡܼܢ ܗ݀ܝ ܕܠܬܡܢ ܐܥܠܗܿ ܐܠܗܐ ܠܢܦܫܗ ܕܓܝܣܐ ܟܕ
                    ܐܡܼܪ ܠܗ ܕܝܘܡܢܐ ܥܡܝ ܬܗܘܼܐ ܒܦܪܕܝܣܐ. ܬܘܒ ܕܝܢ ܝܕܝܥܐ ܡܼܢ ܣܗ̈ܕܘܬܐ ܕܡܠܐܘ[] ܕܡܠܦ̈ܢ
                    ܬܪ̈ܝܨܝ ܫܘ̄ ܕܥܠ ܗܕܐ ܕܩܕܝܫܐ ܓܪܝܓܪܝܣ ܬܐܘܠܘܓܘܣ ܡܢ ܡܐܡܪܐ ܕܥܠ ܦܨܚܐ ܒܙܒܢܐ ܕܡܕܒܪܢܘܬܗ
                    ܕܚܿܫܐ. ܘܠܐ ܡܼܢ ܚܕܐ ܡܼܢ ܡܢܘ̈ܬܐ ܐܬܪܚܩܼܬ݀ ܐܠܗܘܬܐ ܕܠܐ ܡܬܡܢ̈ܘܬܐ ܐܢܫ̈ܝܢ ܡܘܗ̈ܒܬܗ ܕܐܠܗܐ
                    ܐܦܢ ܠܢܦܫܐ ܡܼܢ ܦܓܪܐ ܒܨܒܝܢܗܿ ܦܪܫܼܬ݀. ܘܒܬܪ̈ܝܗܘܢ ܟܬܪܬ݀ ܘܚܘܝܬ݀ ܓܝܪ ܦܓܪܐ ܡܢ ܒܗ݀ܝ
                    ܕܚܒܿܠܐ ܕܡܼܢ ܡܘܬܐ ܠܐ ܩܒܠ. ܫܪܬ݀ ܠܗܿ ܘܕܐܚܝܕ ܗܘܐ  f.85a  ܐܘܚܕܢܗ ܕܡܘܬܐ ܒܝܕ
                    ܢܦܫܐ ܕܝܢ ܬܪܨܬ݀ ܐܘܪܚܐ ܠܓܝܣܐ ܠܘܬ ܡܠܥܬܗ ܕܦܪܕܝܣܐ. ܘܬܪ̈ܬܝܗܝܢ ܐܟܚܕܐ ܡܬܬܥ̈ܒܕܢ ܒܝܕ
                    ܬܪ̈ܝܘܢ ܟܕ ܐܠܗܘܬܐ ܛܒܬܐ ܘܠܥܒܕܐ ܗܘܬ ܒܝܕ ܠܐ ܡܬܼܚܒܠܢܘܬܐ ܕܦܓܪܐ ܫܪܝܗܝ ܠܦܓܪܐ ܒܝܕ ܕܝܢ ܗ݀ܝ
                    ܕܢܦܫܐ ܕܡܿܥܡܪܐ ܕܝܠܗܿ ܡܬܚܫܚܐ ܗܘܬ݀ ܦܘܢܝܐ ܕܒܢ̈ܝ ܐܢܫܐ ܕܠܦܪܕܝܣܐ. ܘܕܩܕ ܡܪܝ ܐܝܘܐܢܢܝܣ
                    ܐܦܝܣܩܦ̄ ܕܩܘܣܛܢܛܝܢܘܦܠܝܣ ܡܢ ܡܐܡܪܐ ܕܥܠ ܝܕܥܬܐ ܕܛܒܬܐ ܘܕܒܝܫܬܐ ܡܬܼܩܪܐ ܗܘܐ ܐܝܠܢܐ ܗܿܘ
                    ܕܐܟܼܠ ܡܢܗܿ ܐܕܡ ܥܠ ܠܗ ܓܝܣܐ ܠܦܪܕܝܣܐ ܐܡܿܪܝܢܢ. ܘܗܕܐ ܡܢܐ. ܕܠܡܐ ܓܝܪ ܗܠܝܢ ܐܢܝ̈ܢ ܛܥ̈ܬܐ
                    ܗܠܝܢ ܕܐܠܗܐ ܡܠܟܼ ܠܢ. ܠܐ ܫ݀ܡܥ ܐܢܬ ܠܦܐܘܠܘܣ ܐܠܗܝܐ ܕܐܡܿܪ ܕܛܒ̈ܬܐ ܗܠܝܢ ܕܥܡܝܢܐ ܠܐ ܚܼܙܬ݀
                    ܘܐܕܢܐ ܠܐ ܫܡܼܥܬ݀. ܘܥܠ ܠܒܐ ܕܒܪܐܢܫܐ ܠܐ ܣܠܼܩ. ܦܪܕܝܣܐ ܕܝܢ ܕܥܝܢܐ ܚܘܬ ܗܘܐ ܙܢܼܐ ܫܡܥܬܼܗ
                    ܘܠܒܗ ܕܒܪܢܫܐ ܩܒܠܗ ܡܛܠܬܗ ܓܝܪ ܕܐܝܟ ܗܠܝܢ ܗܐ ܝܘܡ̈ܬܐ ܣܓܝ̈ܐܐ ܡܡܠܠܝܢ. ܐܝܟܢܐ ܗܟܢܐ ܐܬܦܼܪܥ
                    ܛܒܬ̈ܗ ܕܓܝܣܐ. ܠܘ ܓܝܪ ܠܦܪܕܝܣܐ ܐܫܬܘܝ ܐܠܗܐ ܕܡܥܠ ܠܢ ܐܠܐ ܠܗܿ ܠܫܡܝܐ. ܘܐܦܠܐ ܡܠܟܘܬܐ
                    ܕܦܪܕܝܣܐ. ܐܠܐ ܡܠܟܘܬܐ ܕܫܡܝܐ ܐܟܼܪܙܘ. ܫܪܝ  f.85b  ܓܝܪ ܠܡܟܪܙܘ ܘܠܡܐܡܪ ܬܘܒ
                    ܩܼܪܒܬ݀ ܠܗܿ ܡܠܟܘܬܐ. ܐܠܐ ܡܠܟܘܬܐ ܕܫܼܡܝܐ ܐܢ ܗܟܝܠ ܡܠܟܘܬܐ ܕܫܡܝܐ ܐܫܬܘܕܝ. ܠܦܪܕܝܣܐ ܕܝܢ
                    ܐܥܠ ܠܓܝܣܐ ܠܐ ܥܕܟܝܠ ܦܪܥܗ ܛܒ̈ܬܗ ܕܩܕܝܫܐ ܦܠܘܟܣܢܐ ܕܡܒܘܓ ܟܕ ܓܝܪ ܬܠܐ ܗܘܐ ܡܪܢ ܚܠܦܝܢ
                    ܒܙܩܝܦܐ. ܘܥܡܗ ܙܩܝܦܝܼܢ ܗܘܘ ܬܪ̈ܝܢ ܓܝܣ̈ܐ ܟܬܝܼܒ ܕܗܝܡܢ ܒܗ ܗ݀ܘ ܓܝܣܐ ܕܡܼܢ ܝܡܝܢܐ ܘܐܡܼܪ
                    ܠܘܬܗ ܕܐܬܕܟܪܝܢܝ ܡܪܝ ܡܐ ܕܐ݀ܬܐ ܐܢܬ ܒܡܠܟܘܬܟ. ܘܡܚܕܐ ܝܫܘܥ ܐܫܬܘܕܝ ܠܗ ܘܐܡܼܪ ܠܘܬܗ ܕܐܡܝܢ
                    ܐܡܿܪ ܐܢܼܐ ܠܟ ܕܝܘܡܢܐ ܥܡܝ ܬܗܘܼܐ ܒܦܪܕܝܣܐ. ܘܒܬܪ ܩܠܝܠ. ܕܒܪܗܿ ܒܪ ܫܥܬܗ ܠܢܦܫܗ ܕܙܘܥܐ ܘܐܝܟ
                    ܕܐܫܬܘܕܝ ܠܗ ܐܘܒܠܗܿ ܥܡܗ ܠܦܪܕܝܣܐ. ܐܝܟܢܐ ܕܢܦܫ̈ܬܐ ܕܟܠܗܘܢ ܙܕܝܩ̈ܐ ܚܕܪ̈ܘܗܝ ܐܝܬܝܗܝܢ ܗܘ̈ܝ.
                    ܘܐܠܦ ܕܦܓܪܢܐܝܬ ܬܬܒܣܡ ܒܩܒܪܐ. ܘܥܠ ܠܘܬ ܦܓܼܪ̈ܐ ܕܒܓܘ ܩܒܪ̈ܐ ܐܝܬܝܗܘܢ. ܘܣܒܪܘ ܐܢܘܢ
                    ܕܩܝܿܡܝܢ. ܡܢܐ ܘܒܝܕ ܢܦܫܗ ܣܥܼܪ ܠܢܦܫ̈ܬܐ ܕܙܕܝܩ̈ܐ ܘܕܚ̈ܛܝܐ ܠܡܢܗܝܢ ܒܦܪܕܝܣܐ. ܘܠܡܢܗܝܢ ܒܓܘ
                    ܫܝܘܠ. ܘܐܫܬܘܕܝ ܠܗܝܢ ܦܘܢܝܐ ܕܠܘܬ ܦܓܪ̈ܝܗܝܢ ܘܒܬܪ ܐܚܪ̈ܢܝܬܐ ܟܕ ܓܝܪ  f.86a  ܐܙܼܠ
                    ܠܦܪܕܝܣܐ ܘܕܒܪܗܿ ܕܬܗܘܼܐ ܥܡܗ ܠܢܦܫܗ ܕܓܝܣܐ ܕܬܟܿܬܪ ܒܨܠܝܒܐ ܐܪܝܡ ܠܟܪܘܒܐ ܘܠܫܢܢܐ ܕܚܪܒܐ
                    ܕܢܿܛܪܝܢ ܗܘܘ ܠܦܪܕܝܣܐ ܘܐܥܠ ܥܡܗ ܠܢܦܫ̈ܬܐ ܕܟܠܗܘܢ ܙܕܝܩ̈ܐ ܗܠܝܢ ܕܠܒܪ ܦܗ̈ܝܢ ܗܘ̈ܝ. ܟܕ ܠܐ
                    ܡܫܬܒܩ̈ܢ ܗܘ̈ܝ ܡܼ̤ ܢܛܘܪ̈ܐ ܠܡܥܼܠ. ܘܬܡܢ ܒܝܕ ܢܦܫܗ ܘܐܟܼܪܙܘ ܦܘܪܩܢܐ ܘܦܘܢܝܐ ܕܠܘܬ
                    ܦܓܪ̈ܝܗܝܢ. ܟܕ ܒܠܚܘܕ ܠܟܪܘܒܐ ܐܪܝܡ ܐܠܐ ܐܦ ܠܗܝܢ ܟܿܢܼܫ ܘܐܥܼܠ ܠܦܪܕܝܣܐ. ܘܫܪܪ ܠܗܝܢ ܩܝܡܬܐ
                    ܕܦܓܪ̈ܝܗܝܢ ܒܝܕ ܡܠܬܐ ܕܝܠܗ. ܘܡܼܢ ܬܡܢ ܘܥܕܡܐ ܠܗܫܐ. ܘܬܘܒ ܥܕܡܐ ܕܫܿܠܡ ܥܠܡܐ. ܟܠ ܢܦܫܐ ܕܚܕ
                    ܡܼܢ ܙܕܝܼܩ̈ܐ ܕܡܫܢܝܐ ܡܼܢ ܦܓܪܐ ܥܐܠܐ ܠܦܪܕܝܣܐ. ܘܬܡܢ ܡܕܝܪܐ ܥܕܡܐ ܠܙܒܢܐ ܕܡܬܝܬܗ: ܕܚܛܝ̈ܐ
                    ܕܝܢ ܐܝܬܝܗܝܢ ܒܓܘ ܫܝܘܠ. ܘܥܠ ܗܕܐ ܐܦ ܠܬܡܢ ܐܡܿܪ ܟܬܒܐ. ܕܐܙܠܼ ܐܠܗܐ ܒܝܕ ܢܦܫܗ ܠܦܪܕܝܣܐ ܠܘ
                    ܒܠܚܘܕ ܢܦܫ̈ܬܐ ܕܙܕܝ̈ܩܐ ܥܠ̈ܝ ܝܬܝܪܐܝܬ. ܐܠܐ ܐܝܟ ܕܣܿܒܪ ܐܢܼܐ ܘܗܢܘܢ ܡܠܐܟ̈ܐ. ܐܢ ܓܝܪ ܗܿܘ
                    ܕܡܼܢ ܡܠܐܟ̈ܐ ܪܒ. ܠܐ ܟܬܝܒ ܕܥܠ ܠܗ ܐܠܐ ܒܠܚܘܕ ܕܡܼܢ ܠܒܪ ܢ݀ܛܪ ܗܘܐ. ܐܝܟܢܐ ܠܐ ܬܟܝܼܠܐܝܬ
                    ܢܐܡܼܪ ܕܐܦܠܐ ܡܼܢ ܗܠܝܢ ܚܝ̈ܠܐ ܐܚܪ̈ܢܐ ܘܪ̈ܘܚܢܐ ܐܫܬܒܩܼܘ ܕܢܥܘܼܠ ܠܬܡܢ. 
            
            
                ܩܦܠܐܘܢ ܕܬܠܬܝܢ ܘܬܫܥܐ
                ܕܡܚܘܐ  f.86b  ܕܥܡ ܐܝܠܝܢ ܬܓܡ̈ܐ ܘܛܟܣ̈ܐ ܡܬܚ̈ܠܛܢ ܢܦܫ̈ܬܐ ܟܕ
                    ܡܬܦܪ̈ܫܢ ܡܼܢ ܦܓܪ̈ܐ
                ܢܦܫ̈ܬܐ ܕܒܢܝ̈ܢܫܐ ܟܕ ܡܫܬܪܪܝܢ ܡܼܢ ܦܓܪ̈ܐ ܘܡܫܢܝ̈ܢ ܡܢܗܘܢ ܥܡ ܐܝܠܝܢ ܛܟܣ̈ܐ
                    ܘܬܓ̈ܡܐ ܡܬܚ̈ܠܛܢ ܥܕܠܐ ܠܩܝܡܬܐ. ܘܐܡܿܪܝܢܢ ܕܢܦܫ̈ܬܐ ܕܙܕܝܩ̈ܐ ܘܕܫܠ̈ܝܚܐ ܘܕܣܗ̈ܕܐ ܐܘ ܕܢܒ̈ܝܐ
                    ܘܕܟܐܢ̈ܐ ܘܕܩܕܝ̈ܫܐ ܟܕ ܡܫܢ̈ܝܢ ܡܼܢ ܦܓܪ̈ܐ ܥܡ ܡ̈ܠܐܟܐ ܗܘ̈ܝܢ ܘܥܡܗܘܢ ܡܬܚ̈ܠܛܢ ܥܕܡܐ ܠܩܝܡܬܐ.
                    ܡܛܠ ܕܡܠܐܟ̈ܐ ܡܕܝܪܝܢ ܠܥܠ ܡܼܢ ܫܡܝܐ ܘܐܦ ܒܦܪܕܝܣܐ ܬܘܒ. ܢܦܫ̈ܬܐ ܕܝܢ ܕܪ̈ܫܝܼܥܐ ܘܕܥ̈ܘܿܠܐ ܟܕ
                    ܡܬܦܪ̈ܫܢ ܡܼܢ ܦܓܪ̈ܐ. ܥܡ ܫܐܕ̈ܐ ܗܘ̈ܝܢ ܘܥܡܗܘܢ ܡܬܚ̈ܠܛܢ ܥܕܡܐ ܠܩܝܡܬܐ. ܘܝܕܥܝܢܢ ܗܠܝܢ ܕܗܟܢܐ
                    ܐܝܬܝܗܝܢ ܡܢ ܗܠܝܢ ܡܚܘܝ̈ܢܘܬܐ. ܚܕܐ ܝܕܝܥܐ ܡܼܢ ܡܠܬܐ ܕܟܐܢܘܬܐ. ܢܦܫ̈ܬܐ ܓܝܪ ܐܝܠܝܢ ܕܟܕ
                    ܐܝܬܝܗܝܢ ܒܦܓܪ̈ܐ ܒܥܠܡܐ ܗܢܐ. ܦܠ̈ܚܢܐ ܕܘܒܪ̈ܐ ܡܝܬܪ̈ܐ ܕܕ݀ܡܝܢ ܘܡܢܝܼܚ̈ܝܢ ܠܡܠܐܟ̈ܐ. ܐܡܬܝ
                    ܕܡܫܬܪܪܝܢ ܡܼܢ ܦܓܪ̈ܐ ܡܬܚ̈ܠܛܢ ܥܡ ܡܠܐܟ̈ܐ ܘܗܘܝ̈ܢ ܥܡܗܘܢ ܐܝܟ ܡܕܡ ܕܙܿܕܩܝܢ ܗܢܼ̈ܝܢ ܥܠܝܗܝܢ
                    ܘܪܚܡܼܘ. ܢܦܫ̈ܬܐ ܕܝܢ ܐܝܠܝܢ ܕܟܕ ܫ݀ܪܝܢ ܥܠܝܗܝܢ ܘܪܚܡܼܘ. ܢܦܫ̈ܬܐ ܕܝܢ ܐܝܠܝܢ ܕܟܕ ܫ݀ܪܝܢ
                    ܗܘ̈ܝ ܒܦܓܪܐ ܒܥܠܡܐ ܗܢܐ: ܦ݀ܠܚܝܢ ܕܘܒܪ̈ܐ  f.87a  ܒܝܼܫ̈ܐ ܘܫܟܝܪ̈ܐ ܕܡܢܚ̈ܝܢ
                    ܘܡܚܕܝܢ ܠܫܐ̈ܕܐ. ܐܡܬܝ ܕܡܫܬܪܝܢ ܡܼܢ ܦܓܪ̈ܐ ܟܐܢܐܝܬ ܡܬܚ̈ܠܛܢ ܥܡ ܫܐܕ̈ܐ ܘܗܘ̈ܝܢ ܥܡܗܘܢ. ܐܝܟ
                    ܡܕܡ ܕܙܿܕܩܝܢ ܗܢܝ̈ܢ ܥܠܝܗܝܢ ܘܪܚܡܘ ܕܬܪ̈ܬܝܢ ܝܕܝܼܥܼܐ ܬܘܒ ܡܼܢ ܗܜܝ ܕܡܬܘ݀ܥܕܝܢ ܘܐܬܝ݀ܝܢ ܠܘܬ
                    ܢܦܫܐ ܟܕ ܡܫܬܪܝܐ ܘܢܿܦܩܐ ܡܼܢ ܦܓܪܐ ܡܠܐܟ̈ܐ ܘܫܐܕ̈ܐ ܘܡܬܼܟ݀ܢܫܝܢ ܡܼܢ ܬܪ̈ܝܢ ܓܒ̈ܐ ܠܘܩܒܠ
                    ܚܕ̈ܕܐ ܘܟܠܚܕ ܡܢܗܘܢ ܨ݀ܒܐ ܕܥܡܗ ܬܐܙܠܼ ܗ݀ܝ ܢܦܫܐ ܘܡܼܬܟܬܫܝܢ ܥܠ ܗܕܐ ܐܝܟܢܐ ܕܚܿܘܝܢܢ
                    ܒܩܦܠܐܘܢ ܕܬܠ̈ܬܝܢ ܘܫ̈ܬܐ ܩܕ̄ ܐܬܐܢܣܝܘܢ ܐܦܝܣ̄ܩ ܕܐܬܝܢܘܣ ܡܕܝܢܬܐ ܡܼܢ ܐܓܪܬܐ ܕܠܘܬ ܕܡܦܠܝܣ
                    ܒܪ ܩܝܡܐ ܙܿܕܩ ܠܡܼܕܥ ܠܐܝܠܝܢ ܡܢܣܝܢ ܠܡܗܠܟܘܢ ܒܐܢܫ. ܠܘ ܡܼܢ ܗܕܐ. ܗܐ ܡܼܢ ܟܕܘ ܘܣܒܪܘ ܠܘܬܗ
                    ܘܠܩܘܒܠܐ ܕܗܕܐ ܠܡܐܛܒܘ ܠܐܢܫ. ܗܿܘ ܡܐ ܕܨܒܼܘ ܒܢܦܫܗܘܢ ܓܝܪ ܐܥܡܼܪܘ ܡܢ ܟܠܦܪܘܣ ܘܡܣܝܟ
                    ܒܩܦܠܐܘܢ ܕܬܠܝܢ ܘܫ̈ܬܐ ܘܫܪܟܐ.
            
            
                 ܩܦܠܐܘܢ ܕܐܪܒܥܝܢ
                ܕܡܥܩܒ ܐܝܢܐ ܐܬܒܼܪܝ ܒܨܠܡܐ ܕܐܠܗܐ ܢܦܫܐ ܐܘܿ ܦܓܪܐ ܐܘܿ ܬܪ̈ܝܗܘܢ ܐܟܚܕܐ ܘܡܢܘ
                    ܨܠܡܐ ܕܐܠܗܐ ܕܒܗ ܐܬܒܪܝ ܒܪܢܫܐ ܘܕܡܘܼܬܐ. 
                ܐܝܢܐ ܐܝܬܘܗܝ ܒܨܠܡܐ ܕܐܠܗܐ  f.87b  ܢܦܫܐ ܐܘܿ ܦܓܪܐ ܐܘܿ ܬܪ̈ܝܗܘܢ
                    ܐܟܚܕܐ. ܘܐܡܿܪܝܢܢ ܕܢܦܫܐ ܠܚܘܕ. ܘܝܕܝܼܥܐ ܡܼܢ ܐܠܗܐ ܐ̄ ܐܠܗܐ ܐܝܬ̄ܘ ܦܚܛܐ ܘܕܠܐ ܓܫܘܡ ܘܠܐ
                    ܡܬܚܿܒܠܢܐ ܘܠܐ ܡܿܝܘܬܐ. ܐܝܢܐ ܗܟܝܠ ܡܼܢ ܗܠܝܢ ܬܪ̈ܝܢ ܐܝܬܘܗܝ ܨܠܡܗ. ܢܦܫܐ ܕܐܝܬܝܗܿ ܦܫܝܛܬܐ
                    ܘܠܐ ܓܘܫܡܢܝܬܐ ܘܠܐ ܡܿܝܘܬܬܐ ܘܠܐ ܡܬܚܿܒܠܢܝܬܐ. ܐܘܿ ܦܓܪܐ ܕܐܝܬ̄ܘ ܡܪܟܒܐ ܘܓܘܫܡܢܝܐ
                    ܘܡܬܚܿܒܠܢܐ ܘܡܿܝܘܬܐ ܝܕܝܥܼܐ ܗܝ ܕܢܦܫܐ ܘܠܘ ܦܓܪܐ ܒ ܐܝܢܐ ܐܝܬܘܗܝ ܒܨܠܡܐ ܕܐܠܗܐ. ܦܓܪܐ ܕܐܝܼܬ
                    ܠܗ ܐܣܟܝܡܐ ܕܕܟܪ̈ܐ ܘܕܢܩܼܒ̈ܬܐ. ܐܘܿ ܢܦܫܐ ܕܡܥܠܝܐ ܡܼܢ ܗܠܝܢ ܝܕ̈ܝܼܥܐ ܗܝ ܕܢܦܫܐ. ܓ ܐܠܘ
                    ܦܓܪܐ ܕܡܼܢ ܐܣܛܘܟܣ̈ܐ ܡܪ̈ܟܒܼ ܐܝܬ̄ܘ ܨܠܡܗ ܕܐܠܗܐ. ܐܦ ܚܝ̈ܘܬܐ ܠܐ ܡ̈ܠܝܠܬܐ ܒܨܠܡܐ ܕܐܠܗܐ
                    ܐܝܬܗܝܢ ܗܘ̈ܝ ܗ݀ܝ ܕܪܫܝܥܬܐ ܗܝ ܘܕܓܠܬܐ. ܡܕܝܢ ܐܬܝܿܕܥܬ݀ ܒܝܕ ܗܠܝܢ ܕܢܦܫܐ ܠܚܘܕ ܐܝܬܝܗܿ
                    ܒܨܠܡܐ ܕܐܠܗܐ. ܙܿܕܩ ܗܫܐ ܕܢܥܩܒ ܕܒܡܢܐ ܐܝܬܝܗܿ ܢܦܫܐ ܒܨܠܡܐ ܕܐܠܗܐ ܘܐܡܿܪܝܢܢ ܕܒܗܠܝܢ ܐܝܬܝܗܿ
                    ܢܦܫܐ ܒܨܠܡܐ ܕܐܠܗܐ ܘܐܡܿܪܝܢܢ ܕܒܗܠܝܢ ܙܢ̈ܝܐ ܐ̄ ܐܠܗܐ ܐܝܬܘܗܝ ܠܐ ܓܫܘܡ ܠܐ ܓܘܫܡܢܐ ܠܐ
                    ܡܬܚܙܝܢܐܢ ܠܐ ܡܿܝܘܬܐ ܗܟܢܐ ܐܦ ܢܦܫܐ. ܒ̄ ܐܝܟܢܐ ܕܐܠܗܐ ܚܿܙܠ ܠܟܠ ܡܪܢܐܝܬ ܘܫܪܝܪܐܝܬ  f.88a  ܗܟܢܐ ܐܦ ܢܦܫܐ ܚܿܙܝܐ ܠܟܠ ܒܦܢܛܣܝܐ ܘܠܘ ܫܪܝܪܐܝܬ. ܐܚܪܬܐ. ܐܝܟܢܐ ܕܐܠܗܐ
                    ܫܠܝܛ ܥܠ ܒܪ̈ܝܘܬܐ ܘܫܠܼܛܘ ܠܡ ܒܢܘ̈ܢܝ ܝܡܐ. ܘܒܦܪܚܬܐ ܕܫܡܝܐ ܘܕܫܪܟܐ ܚܼܐܪܘܬܐ ܘܫܠܝܛܘܬ ܒܝܿܬܐ
                    ܕܝܗܼܒ ܠܢܦܫܐ. ܐܝܟܢܐ ܓܝܪ ܕܐܠܗܐ ܟܠ ܕܨ݀ܒܐ ܥܿܒܕ ܡܼܢ ܕܡܫܟܚܝܢ ܕܢܗܘ̈ܝܢ ܠܗ ܕ ܒܗܿܝ
                    ܕܡܫܘܥ̈ܝܢ ܠܗ ܠܒܪܢܫܐ ܒܪ̈ܝܬܐ ܓܘܫܡܢ̈ܝܬܐ ܘܒܪ̈ܝܬܐ ܡܪ̈ܝܬܐ ܡܫܒܚ̈ܢ ܠܒܪܘܝܗܝܢ ܐܠܗܐ܇ ܐܢ
                    ܓܫܘܡܢ̈ܝܬܐܘܐܢ ܠܐ ܓܘܫ̈ܡܢܝ̄ ܗ̄ ܗ݀ܝ ܕܣܿܥܪ ܒܪܢܫܐ ܐܘܼܡܢ̈ܘܬܐ ܘܒ݀ܢܐ ܒ̈ܬܐ ܘ݀ܒܪܐ ܐܝܟ ܐܠܗܐ.
                    ܗ݀ܝ ܕܠܡ̈ܠܐܟܐ ܫܟܝܼܚܐ ܘܐܦܠܐ ܠܚܝ̈ܘܬܐ ܗ݀ܝ ܕܠܐ ܡܠܬܐ. ܘ̄. ܗ݀ܝ ܕܝܗܼܒ ܠܗ ܠܒܪܢܫܐ ܕܢܗܘܼܐ
                    ܒܕܘܟܬܗ ܒܗܢܐ ܟܠ. ܐܝܟ ܥܒܼܕܐ ܕܗ݀ܘܐ ܒܕܟܬ ܡܪܗ. ܒܡܕܝܢܬܗ ܘܒܒܝܬܗ. .ܙܙ̄. ܐܠܗܐ ܣ݀ܥܪ ܚܝ̈ܠܐ
                    ܘܬܕܡܪ̈ܬܐ ܐܡܿܪ ܐܢܼܐ ܕܝܢ ܡܐܚܐ ܡܝ̈ܬܐ. ܡܕܟܐ ܓܪ̈ܒܐ. ܘܡܦܬܚ ܣܡ̈ܝܐ ܐܣܿܪ ܘܫܿܪܐ ܠܫܡܝܐ
                    ܘܕܫܪܟܐ ܘܗܟܐ ܟܝܢܐܝܬ ܣ݀ܥܪ ܐܠܗܐ. ܝܗܼܒܗܿ ܕܝܢ ܠܗܕܐ ܐܦ ܠܒܪܢܫܐ ܒܛܝܒܘܬܗ ܘܐܝܟ ܫܘܟܢܐ.
                    ܐܝܟܢܐ ܕܐܠܗܐ ܐܝܬ̄ܘ ܒܒܪܝܬܗ. ܘܡܥܒܕ ܘܡܦܪܢܣ ܠܗܿ ܟܕ ܠܐ ܡܬܼܚܙܐ. ܗܟܢܐ ܘܐܦ ܢܿܦܫܐ ܐܝܬܝܗܿ
                    ܒܓܦܪܐ [ܣܿܥܒ] ܘܡܿܥܒܼܕܐ  f.88b  ܒܗ ܘܡܦܪܢܣܐ ܠܗ ܟܝܼܠܐ ܡܬܚܙܝܐ ܚ̄. ܐܡܿܪ ܐܠܗܐ
                    ܢܥܒܼܕ ܒܪܢܫܐ ܒܨܠܡܢ ܗ̄ ܒܗܿܘ ܙܢܐ ܕܥܬܝܕ ܡܠܬܐ ܐܠܗܐ ܕܢܬܒܿܣܪ ܘܢܗܼܘܐ ܒܪܢܫܐ ܡܫܡܠܝܐ ܕܠܐ
                    ܫܘܚܠܦܐ. ܐܝܟܢܐ ܕܫܠܝܚܐ ܐܠܗܝܐ ܐܡܿܪ ܒܪܢܫܐ ܩܕܡܝܐ ܥܦܪܐ ܕܡܼܢ ܐܪܥܐ. ܘܒܪܢܫܐ ܕܬܪ̈ܝܢ ܡܪܝܐ
                    ܡܼܢ ܫܡܝܐ. ܘܒܕܓܘܢ ܐܝܟܢܐ ܕܒܪܢܫܐ ܡܪܟܒ ܡܼ̤ܢ ܢܦܫܐ ܘܡܼܢ ܦܓܪܐ ܚܕ ܩܢܘܡܐ ܘܚܕ ܟܝܢܐ ܡܪܟܒܐ.
                    ܗܟܢܐ ܘܐܦ ܡܫܝܚܐ ܡܼܢ ܐܠܗܘܬܐܘܡܼܢ ܐܢܫܘܬܐ ܚܕ ܩܢܘܡܐ ܘܚܕ ܟܝܢܐ ܡܪܟܒܐ. ܐܝܟܢܐ ܕܐܦ ܗܼܘ ܟܕ
                    ܗܘܼ ܫܠܝܚܐ ܦܐܘܠܘܣ ܐܡܼܪ. ܐܝܟܢܐ ܠܡ ܕܛܠ̈ܝܐ ܐܫܬܘܬܦܘ ܠܒܣܪܐ ܘܕܡܐ. ܗܟܢܐ ܐܦ ܡܠܬܐ ܐܠܗܐ
                    ܐܫܬܿܘܬܦܘ ܠܐܢܫܘܬܐ ܗ̄ ܗܕܐ ܐܡܼܪ ܐܝܟܢܐ ܕܢܦܫܐ ܕܛܠܝ̈ܐ ܥܡ ܒܣܪܐ ܘܕܡܐ ܚܕ ܩܢܘܡܐ. ܘܚܕ ܟܝܢܐ
                    ܡܪܟܒܐ. ܗܟܢܐܐܦ ܡܠܬܐ ܐܠܗܐ ܥܡ ܒܣܪܐ ܡܢܦܫܐ [ܣܥܡܕܥܐ] ܚܕ ܩܢܘܡܐ ܘܚܕ ܟܝܢܐ ܡܪܟܒܐ ܛ̄. ܐܠܗܐ
                    ܬܠ̈ܬܐ ܩܢܘܡ̈ܐ ܐܝܬܘܗܝ. ܐܒܐ ܘܒܪܐ ܘܪܘܚܐ ܩܕܝܫܐ. ܐܠܐ ܝܠܝܼܕܐ ܐܒܐ. ܒܪܐ ܕܝܢ ܝܠܝܼܕܐ ܘܪܘܚܐ
                    ܢ݀ܦܘܩܐ. ܒܗܢܐ ܗܟܝܠ ܨܠܡܐ  f.89a  ܒܪܐ ܐܦ ܠܬܠ̈ܬܐ ܩܢܘܡ̈ܐ ܒܕܪܢܫܐ. ܐܕܡ ܐܡܿܪ
                    ܐܢܼܐ ܘܚܘܐ ܘܫܝܬ. ܠܐܕܡ ܡܿܢ ܒܪܝܼܗܝ ܠܐ ܝܠܝܼܕܐ ܠܫܝܬ ܕܝܠܢ ܝܠܝܕܐ. ܠܚܘܐ ܢ݀ܦܘܩܬܐ. ܘܗܠܝܢ
                    ܡܢ ܙܢܝ̈ܐ ܥܠ ܨܠܡ̈ܐ ܕܐܠܗܐ ܕܒܗ ܐܬܒܼܪܝ ܒܪܢܫܐ. ܢܥܿܩܼܒ ܬܘܒ ܗܫܐ. ܥܠ ܗ݀ܝ ܕܒܐܝܿܕܐ ܐܝܬܘܗܝ
                    ܒܪܢܫܐ ܕܡܘܼܬܐ ܕܐܠܗܐ ܡܛܠ ܕܗܟܢܐ ܟܬܝܼܒ ܕܐܡܪ ܐܠܗܐ. ܢܥܒܼܕ ܒܪܢܫܐ ܒܨܠܡܢ ܘܕܡܘܬܢ. ܘܐܡܿܪܝܢܢ
                    ܕܐܠܗܐ ܐܝܬܘܗܝ ܛܒܐ ܘܟܐܢܐ ܘܩܕܝܫܐ ܘܡܪܚܡܢܐ. ܟܝܢܐܝܬ ܥܒܕܗ ܗܟܝܠ ܠܒܪܢܫܐ ܕܢܬܕܡܿܐ ܒܛܝܒܘܬܗ
                    ܘܒܟܐܢܘܬܗ ܘܒܩܕܝܫܘܬܗ ܘܒܡܪܚܡܢܘܬܗ܆ ܟܠ ܟܡܐ ܕܡܨܝܐ ܕܢܬܕܡܿܐ. ܘܗܟܢܐ ܢܗܘܼܐ ܛܒܐ ܘܟܐܢܐ ܘܩܕ̄
                    ܘܡܪܚܡܢܐ ܐܝܟܢܐ ܕܐܡܼܪ ܡܪܢ ܒܐܘܢܓܠܝܘܢ. ܕܗܘܼܘ ܡܪ̈ܚܡܢܐ ܐܝܟܢܐ ܕܐܒܟܘܟܘܢ ܕܒܡܫܝܐ ܡܪܚܡܢ ܗܘ.
                    ܢܥܩܒ ܕܝܢ ܬܘܒ ܥܠ ܦܓܪܐ ܕܡܬܼܐܡܪ ܨܠܡܐ ܕܐܠܗܐ. ܐܝܟ ܕܡܼܢ ܚܕܝܘܬܗ ܕܥܡ ܢܦܫܐ ܡܬܐܡܼܪ. ܡܛܠ
                    ܚܕܝܘܬܗ ܗܟܝܠ ܢܦܫܐ ܠܦܓܪܐ ܗܠܝܢ ܕܝܠܗܿ. ܘ݀ܣܒܐ ܘܫܿܩܠܐ ܗܠܝܢ ܕܦܓܪܐ. ܘܡܛܠ ܗܕܐ ܥܠܬܐ
                    ܕܚܕܝܘܬܐ ܡܬܐܡܼܪ ܟܠܗ ܒܪܢܫܐ. ܕܒܨܠܡܐ ܕܐܠܗܐ ܐܝܬ̄ܘ ܘܒܕܡܘܬܐ  f.89b  ܫܡܐ ܓܝܪ
                    ܕܒܪܢܫܐ ܠܡܪܒܟܐ ܕܡܼܢ ܢܦܫܐ ܘܦܓܪܐ ܡܫܘܕܥܼ ܘܒܕܓܘܢ ܐܦ ܛܘܒܢܐ ܡܘܫܐ ܗܟܢܐ ܐܟܼܬܒ. ܐܡܼܪ ܠܗ
                    ܐܠܗܐ ܢܥܒܼܕ ܐܢ̈ܫܐ ܒܨܠܡܢ ܘܕܡܘܼܬܢ. ܟܠ ܟܡܐ ܕܐܣܝܼܪܐ ܢܦܫܐ ܒܦܓܪܐ ܘܡܚܝܕܐ ܥܡܗ ܝܿܗܒܐ ܠܗ
                    ܕܢܬܼܩܪܐ ܨܠܡܐ ܕܐܠܗܐ ܘܕܡܘܼܬܐ ܐܝܟ ܕܡܼܢ ܚܕܝܘܬܐ. ܟܕ ܕܝܢ ܡܫܬܪܝܐ ܡܢܗ ܠܐ ܝ݀ܗܒܐ ܠܗ ܗܕܐ.
                    ܘܒܕܓܘܢ ܢܦܫܐ ܡܿܢ ܡܢܗܿ ܘܠܗܿ ܡܪܢܐܝܬ ܐܝܬܗܿ. ܨܠܡܐ ܘܕܡܘܼܬܐ ܕܐܠܗܐ. ܦܓܪܐ ܕܝܢ ܐܝܟ ܕܡܼܢ
                    ܚܕܝܘܬܐ ܡܫܘܬܦܘܬܐ ܘܐܫܝܠܐܝܬ ܡܬܐܡܼܪ ܨܠܡܐ ܘܕܡܘܬܐ ܕܐܠܗܐ. 
                ܩܦܠܐܘܢ ܕܡܚܿܘܐ ܕܝ݀ܬܪܝܢ ܥܢܝ̈ܕܐ ܡܼܢ ܩܘܪ̈ܒܢܐ ܕܚܠܝܗܘܢ ܡܬܩܿܪܒܝܢ 
                ܕܦܠܕ ܐܦܝܣ̄ ܕܗܠܝܦܝܘܣ܆ ܬܫܥܝܬܐ ܕܐܟܬܒ ܥܠ ܝܚ̈ܝܕܝܐ. ܐܢܫ ܐܪܚܩ ܡܼܢ ܥܠܡܐ
                    ܗܢܐ ܘܐܝܬ ܗܘܐ ܠܗ ܐܢܬܬܐ ܘܒܪܬܐ ܬܘܒ ܕܡܝܼܬܬ݀ ܟܕ ܐܝܬܝܗܿ ܗܘܬ ܥܕܟܝܠ ܡܼܢ ܫܡܘ̈ܥܐ. ܦܿܠܓ
                    ܐܒܘܗܿ ܡܢܬܐ ܕܡܛܬܗܿ ܙܕܩ̈ܬܐ ܠܡܣܟ̈ܢܐ܆ ܘܐܡܗܿ ܬܘܒ ܐܦ ܕܝܠܗܿ ܠܐ ܫܿܠܝܐ ܗܘܬ ܡܼܢ ܕܡܦܝܼܣܐ
                    ܠܐܠܗܐ ܥܠ ܒܪܬܗܿ ܕܥܢܼܕܬ݀ ܡܼܢ ܥܠܡܐ ܟܕ ܠܐ ܥܡܝܕܐ. ܐܫܬܡܼܥ ܠܗ ܕܝܢ ܩܠܐ ܟܕ ܡܨܼܿܠܐ ܕܥܡܼܕܬ݀
                    ܠܗܿ ܒܪܬܟ ܠܐ ܬܟܼܪܐ ܠܟ. ܗܘܼ ܕܝܢ ܠܐ ܗܿܝܼܡܢ. ܐܡܼܪ ܗܟܝܠ ܬܘܒ ܩܠܐ ܗܿܘ ܠܐ ܡܬܚܼܿܙܝܢܐ  f.90a  ܚܦܘܪ ܩܒܪܗܿ ܘܚܦܼܪ ܘܠܐ ܐܫܟܚܗܿ: ܫܼܿܢܝܬ݀ ܓܝܪ ܘܐܬܬܣܝܼܡܬ݀ ܥܡ ܡܗܝܡ̈ܢܐ.
                    ܩܕܝܫܐ ܝܘܚܢܢ ܕܩܘܣܛܐܢܛܝܢܘܦܘܠܝܣ܆ ܡܼܢ ܡܐܡܪܐ ܕܐܪ̈ܒܥܝܢ ܘܚܕ ܕܐܓܪܬܐ ܩܕܡܝܬܐ ܕܠܘܬ
                    ܩܘܪ̈ܝܢܬܝܐ ܐܢܕܝܢ ܘܚܛܝ̈ܐ ܐܙܠܼܘ: ܡܛܠ ܗܕܐ ܙܕܩܿ ܕܢܚܼܕܐ܆ ܕܐܬܦܼܣܩܘ ܡܼܢ ܚ̈ܛܗܐܼ ܘܠܐ
                    ܐܘܣܦܼܘ ܥܠ ܒܝܫ̈ܬܐ. ܘܕܬܥܕܪ ܐܝܟ ܕܡܫܟܚܐ܇ ܠܘ ܒܕܡ̈ܥܐ ܐܠܐ ܒܨ̈ܠܘܬܐ ܘܒܬܟ̈ܫܦܬܐ. ܘܒܙܕܩ̈ܬܐܼ
                    ܘܒܩܘܪ̈ܒܢܐ. ܠܘ ܓܝܪ ܫܚܝܼܡܐܝܬ ܗܕܐ ܐܫܬܟܼܚܬ̇܇ ܘܐܦܠܐ ܣܪܝܩܐܝܬ ܥܘܗܕܢܐ ܥܿܒܕܝܢܢ. ܕܗܿܢܘܢ
                    ܕܥܢܼܕܘ ܩܕܡ ܪ̈ܐܙܐ ܐܠܗ̈ܝܐ܇ ܘܚܠܦܝܗܘܢ ܡܩܪܒܝܢܢ܇ ܟܕ ܒ݀ܥܝܢܢ ܡܢ ܗܿܢ ܐܡܼܪܐ ܕܣܝܼܡ܇ ܗܿܘ
                    ܕܫܩܼܠ ܚܛܝܬܗ ܕܥܠܡܐ. ܐܠܐ ܐܝܟܢܐ ܕܒܘܝܐܐ ܢܗܘܐ ܠܗܿܢܘܢ ܡܼܢ ܗܪܟܐ. ܘܠܘ ܣܪܝܩܐܝܬ ܗܿܘ ܕܩܐܡ
                    ܠܘܬ ܡܕܒܚܐ܇ ܟܕ ܡܫܬܡܠܝܢ ܪ̈ܐܙܐ ܕܚ̈ܝܠܐ. ܡܙܥܿܩ ܚܠܦ ܟܠܗܘܢ ܗ݀ܢܘܢ ܕܕܡܟܼܘ ܒܡܫܝܚܐ. ܘܚܠܦ
                    ܗ݀ܢܘܢ ܕܕܘܟܪ̈ܢܝܗܘܢ ܡܫܡܠܝܢ. ܐܠܘ ܓܝܪ ܥܘܗ̈ܕܢܐ ܚ̈ܠܦܝܗܘܢ ܠܐ ܗ݀ܘܝܢ ܗܘܘ. ܠܘ ܓܝܪ ܬܐܘܛܪܘܢ
                    ܐܝܬܝܗܘܢ ܗܠܝܢ ܕܝܠܢ ܘܚܣ܆ ܒܦܘܩܕܢܐ ܓܝܪ ܕܪܘܚܐ ܡܬܓܡܪ̈ܢ ܗܘ̈ܝ ܗܠܝܢ. ܢܥܕܪ ܐܢܘܢ ܗܟܝܠ܆
                    ܘܕܘܟܪ̈ܢܐ ܚܠܦܝܗܘܢ ܢܫܡܠܐ. ܐܢ ܓܝܪ ܠܒ̈ܢܘܗܝ ܕܐܝܘܒ: ܕܒܚ̈ܐ ܕܩܼܿܪܒ ܐܒܘܗܘܢ ܕܟܝ܆ ܡܢܐ ܡܬܚܪܐ
                    ܐܢܬ. ܕܐܦܢ ܚܢܢ ܚܠܦ ܗ݀ܢܘܢ ܕܥܢܼܕܘ ܡܿܩܪܒܝܢܢ܇ ܗ݀ܘܐ ܠܗܘܢ ܒܘܝܐܐ ܡܕܡ. ܡܥܕ ܗܘ ܓܝܪ  f.90b  ܐܠܗܐ. ܠܐܚܪ̈ܢܐܼ ܚܠܦ ܐܚܪ̈ܢܐ ܢܫܼܿܟܢ. ܘܗܕܐ ܡܚܘܐ ܠܗܿ ܦܐܘܠܘܣ ܟܕ ܐܡܿܪ.
                    ܐܝܟܢܐ ܕܡܼܢ ܦܪ̈ܨܘܦܐ ܣܓ̈ܝܐܐ. ܫܘܘܟܢܐ ܕܒܢ ܒܝܕ ܣܓ̈ܝܐܐ ܢܬܬܘܼܐ ܚܠܦܝܗܘܢ. ܠܐ ܗܟܝܠ ܬܐܡܼܢ
                    ܠܢ ܟܕ ܡܥܕܪܝܢܢ ܠܗ݀ܢܘܢ ܕܥܢܼܕܘ. ܘܡܩܪܒܝܢܢ ܚܠܦܝܗܘܢ ܘܡܦܝܼܣܼܝܢܢ ܕܚܠܝܗܘܢ ܨܠ̈ܘܬܐ
                    ܢܫܬܡ̈ܠܝܢ. ܕܘܟܪܢ ܓܝܪ ܕܓܘܐ ܕܬܟܝܼܠ ܣܝܼܡ. ܘܡܛܠܗܕܐ ܟܕ ܬܟܝܠܝܼܢܢ ܒ݀ܥܝܢܢ ܚܠܦ ܬܐܒܝܠ.
                    ܗܝܿܕܝܢ ܘܠܗܿܢܘܢ ܥܡ ܣܗ̈ܕܐ ܩ݀ܪܝܢܢ ܠܗܘܢ ܥܡ ܡܘܕܝ̈ܢܐ ܥܡ ܟܗ̈ܢܐ. ܐܦ ܓܝܪ ܚܕ ܦܓܪܐ ܐܝܬܝܢ
                    ܟܠܢ ܐܦܢ ܫܒܝܝܚܝܼܢ ܗܕܡ̈ܐ ܡܼܢ ܗܕܡ̈ܐ. ܘܡܫܟܚܐ ܕܡܼܢ ܟܠܕ ܕܘܟ ܢܟܢܫ ܠܗܘܢ ܫܘܒܩܢܐ. ܡܼ̤
                    ܨܠ̈ܘܬܐ ܡܼܢ ܩܘܪ̈ܒܢܐ ܕܚܠܦܝܗܘܢ. ܡܼܢ ܗ݀ܢܘܢ ܕܥܡܗܘܢ ܡܬܩܼܪܝܢ. ܡܢܐܗܟܝܠ ܟ݀ܐܒ ܠܟ ܡܢܐ ܕܝܢ
                    ܐܒܝܼܠ ܐܢܬ. ܟܕ ܡܫܟܼܚܐ ܕܗܢܐ ܟܠܗ ܫܘܒܩܿܢܐ ܬܟܢܫ ܠܗܿܘ ܕܥܢܼܕ ܕܝܠܗ ܟܕ ܕܝܠܗ ܡܼ̤ ܡܐܡܪܐ
                    ܕܐܫܬܝܢ ܘܬܪ̈ܝܢ ܕܦܼܘܫܩܐ ܕܐܘܢܓܠܝܘܢ ܕܝܘܚܢܢ ܐܢܓܝܪ ܚܛܝܐ ܗܿܘ ܕܡܝܼܬ. ܘܒܣܘܓܐܐ ܠܐܠܗܐ
                    ܐܪܓܼܙ. ܙܿܕܩ ܠܡܒܼܟܐ. ܗ̄ ܠܘ ܠܒܟܝܼܐ ܒܠܚܘܕ ܗܕܐ ܓܝܪ ܠܗܿܘ ܡܕܡ ܠܐܡ ܥܥܕܪܐ. ܐܠܐ ܢܣܥܘܼܪ
                    ܗܠܝܢ ܕܡܨܝ̈ܢ ܒܘܝܐܐ ܠܡܥܒܼܕ ܠܗ. ܙܕܩ̈ܬܐ ܘܩܘܪ̈ܒܢܐ ܐܝܩܪܗ ܕܡܝܼܬܐ. ܠܘ ܐܘܠ̈ܝܬܐ ܘܝܠ̈ܠܬܐ
                         f.91a  ܐܠܐ ܬܫܒܚ̈ܬܐ ܘܙܡܝܪ̈ܬܐ ܘܕܬܬܒܿܝܢ ܬ݀ܩܢܐܝܬ. ܗܿܘ ܓܝܪ ܕܦܼܪܫ ܡܼ̤
                    ܡܠܐ̈ܟܐ ܡܬܼܠܿܘܐ. ܐܦܢ ܐܢܫ ܠܫܠܕܙܘܠܐ ܘܥܠܼܩܐ. ܐܢܕܝܢ ܐܢܫ ܐܝܬ̄ܘ ܛܢܦܐ. ܐܦܢ ܟܠܗܿ ܡܕܝܢܬܐ
                    ܬܠܘܝܘܗܝ ܠܐ ܢܬܪܡܪܡ. ܒܿܥܐ ܐܢܐ ܕܬܝܩܪܝܘܗܝ ܠܗܿܘ ܕܐܙܼܠ ܐܚܪܢܝܐܝܬ ܬܝܩܪܝܘܗܝ ܟܕ ܥܿܒܕ ܐܢܬ
                    ܙܕܩܬܐ ܕܝܠܗ ܡܢ ܡܐܡܪܐ ܕܬܠܬܐ ܕܦܘܫܩܐ ܕܐܓܪܬܐ ܕܠܘܬ ܦܝܠܝܦܝܣܝܐ: ܠܘ ܣܪܝܩܐܝܬ ܐܬܬܣܝܡ ܒܢܡܘܣܐ
                    ܡܢ ܫܠܝܚܐ܇ ܕܥܠ ܪ̈ܐܙܐ ܕܚ̈ܝܼܠܐ ܥܘܗܕܢܐ ܕܗ݀ܢܘܢ ܕܥܢܕܘ ܢܗܘܐ. ܝ݀ܕܥܝܢܢ ܓܝܪ ܕܝܘܬܪ̈ܢܐ
                    ܣܓ̈ܝܐܐ ܗ݀ܘܐ ܠܗܘܢ. ܘܝܘܬܪܢܐ ܕܠܐ ܙܥܘܪ. ܐܡܬܝ ܓܝܪ ܕܥܡܐ ܟܠܗ ܩܐܡ ܘܡܬܝ̈ܚܢ ܐܝ̈ܕܘܗܝ:
                    ܘܡܘܼܠܝܐ ܟܗܢܝܐ܆ ܘܩܕܝܼܡܐ ܣܝܼܡܐ ܕܒܚܬܐ ܐܠܗܝܬܐ ܕܚܝܠܬܐ܆ ܐܝܟܢܐ ܠܐ ܢܦܝܣ ܠܐܠܗܐ܇ ܟܕ ܚܠܦ
                    ܗܠܝܢ ܡܬܟܫܦܝܢܢ. ܐܠܐ ܗܕܐ ܡܿܢ ܡܛܠ ܗ݀ܢܘܢ ܕܥܢܕܘ ܒܗܝܡܢܘܼܬܐ. ܫܡ̈ܘܥܐ ܕܝܢ ܐܦ ܠܗ ܠܗܢܐ
                    ܒܘܝܐܐ ܡܫܬܘܝܢ. ܐܠܐ ܓܠܝܼܙܝܢ ܡܢ ܟܠܗ ܗܢܐ ܥܘܕܪܢܐ. ܣܛܪ ܡܼܢ ܚܕ ܡܕܡ. ܐܝܢܘ ܕܝܢ ܗܢܐ ܕܡܫܟܚܐ
                    ܕܠܡܣ̈ܟܢܐ ܚܠܦܝܗܘܢ ܢܬܼܠ. ܒܘܝܐܐ ܗܘ ܓܝܪ ܣܘܥܪܢܐ. ܥܒܕܢ ܓܝܪ ܐܠܗܐ. ܟܕ ܨ݀ܒܐ ܕܡܼܢ ܚ̈ܕܕܐ
                    ܢܐܼܬܪ܆ ܠܡܢܐ ܓܝܪ ܚܠܦ ܫܝܢܐ  f.91b  ܘܩܘܿܝܡܐ ܕܥܠܡܐ. ܦ݀ܩܕ ܕܢܨܿܠܐ ܠܡܢܐ ܡܛܠ
                    ܟܠܗܘܢ ܒܢܝܢ̈ܫܐ. ܗܐ ܗܪܟܐ ܒܟܿܠܗܘܢ ܐܝܬ ܠܣܛ̈ܝܐ ܘܡܚ̈ܠܨܝ ܩܒܪ̈ܐ ܘܓܢ̈ܒܐ ܘܗܠܝܢ ܕܡ̈ܠܝܢ ܪ̈ܒܘ
                    ܒܝܫ̈ܬܐ. ܐܠܐ ܒܪܡ ܚܠܦ ܟܠܢܫ ܡܨܠܝܢܢ ܕܟܒܼܪ ܗ݀ܘܝܐ ܠܗ ܡܬܦܿܢܝܢܘܬܐ. ܐܟܙܢܐ ܗܟܝܠ ܕܚܠܦ ܚ̈ܝܐ
                    ܡܨܠܝܢܢ. ܗ݀ܢܘܢ ܕܒܡܕܡ ܠܐ ܡܫܚܠܦܝܢ ܡܝ̈ܬܐ. ܗܟܢܐ ܡܫܟܚܐ ܕܚܠܦ ܗ݀ܢܘܢ ܢܨܠܐ. ܬܘܒ ܕܝܢ ܡܩܪܒܝܢ
                    ܗܘܘ ܝܗܘܕܐ ܡܩܒܝ ܘܗܠܝܢ ܕܥܡܗ ܡܼ̤ ܒܢ̈ܝ ܐܝܣܪܐܝܠ ܥܡ ܐܕܣܥ̈ܝܐ. ܐܙܕܝܼܘ ܗܠܝܢ ܕܒܝܬ ܝܗܘܕܐ
                    ܘܐܬܼܘ ܠܘܬ ܝܗܘܕܐ ܒܬܪ ܝܘܡܐ ܘܐܡܿܪܝܢ ܠܗ ܢܣܒܼܘܢ ܘܢܩܒܼܪܘܢ ܦܓܪ̈ܐ ܕܗ݀ܢܘܢ ܕܢܦܠܼܘ ܒܩܒܪ̈ܐ
                    ܕܐܒܗܝ̈ܗܘܢ. ܘܟܕ ܩ݀ܒܪܝܢ ܠܗܘܢ ܐܫܟܚܼܘ ܕܐܝܬ ܬܚܝܼܬ ܠܒܘ̈ܫܐ ܕܚܕ ܚܕ ܡܢܗܘܢ ܡܛܫܝ ܕܗܒܐ ܡܼܢ
                    ܦܬܟܪ̈ܐ ܕܡܿܢܝܢ ܡܼ̤ ܗܢܿܘܢ ܕܦ݀ܩܕ ܢܡܘܣܐ ܕܠܐ ܢܬܩܿܪܒܘܢ ܠܗܘܢ ܘܐܬܝܿܕܥܬ݀ ܘܐܬܗܝܡܢܬ݀ ܗܕܐ
                    ܠܟܠܗܘܢ. ܕܡܼܛܠܗܕܐ ܨܒܘܬܐ ܢܦܠܼܘ. ܟܠܗܘܢ ܒܼܪܟܘ ܠܐܠܗܐ ܥܠ ܕܝܢܼܗ ܟܐܢܐ. ܗܿܘ ܕܠܐ [ܥܡܢ]
                    ܕܡܛܫ̈ܝܢ ܗܘ̈ܝ ܡܝܬܐ ܘܡܚܘܐ ܠܓܠܝܼܐ. ܘܫܪܝܘ ܠܡܨܿܠܝܘ ܘܠܡܒܥܼܐ ܡܼܢ ܐܠܗܐ.  f.92a 
                    ܕܠܐ ܡܛܠ ܗܕܐ ܬܬܚܫܼܒ ܠܗܘܢ ܗܕܐ ܚܼܛܝܬܐ ܡܫܡܠܝܬܐ. ܘܐܪܡܝܼ ܝܗܘܕܐ ܥܠ ܟܠܗ ܥܡܐ. ܕܢܬܼܠܘܢ
                    ܟܣܦܐ. ܘܓܒܼܐ ܬܠ̈ܬܐ ܐܠܦܝ̈ܢ ܕܟܣܦܼܐ. ܘܫܕܪ ܠܐܘܪܝܫܠܝܼܡ ܕܢܩܪܒܘܢ ܩܘܪ̈ܒܢܐ ܚܠܝܗܘܢ. ܘܟܐܢܐܝܬ
                    ܘܙܿܕܩܐܝܬ. ܥܒܼܕ ܡܛܠ ܣܒܪܐ ܕܩܝܡܬܐ ܕܡܢ ܒܝܬ ܡܝ̈ܬܐ. ܐܠܘܠܐ ܓܝܪ ܕܣܿܒܪ ܗܘܐ ܘܡܣܟܐ ܗܘܐ
                    ܠܩܝܡܬܐ ܕܡܼܢ ܒܝܬ ܡ̈ܝܬܐ. ܦܟܝܗܼܘܬܐ ܗܘܼܬ ܗܕܐ ܘܫܝܼܛܘܬܐ ܕܚܠܦ ܡܝ̈ܬܐ ܐܢܫ ܢܨܠܐ ܘܢܩܪܒ
                    ܩܘܪ̈ܒܢܐ ܚܿܐܪ ܗܘܐ ܓܝܪ ܘܡܣܿܟܐ
            
            
                ܫܠܡ ܟܬܒܐ ܕܢܦܫܐ ܕܥܒܝܼܕ ܠܡܘܫܐ ܒܪ ܟܐܦܐ 
                ܡܫܡܠܝܐܝܬ ܐܝܟ ܚܝܠܐ ܕܝܗܒ ܡܪܢ ܝܫܘܥ ܫܘ̄ ܠܫܡܗ ܠܥܠܡܝܢ 
                ܐܢܗܼܘ ܗܟܝܠ ܕܫܪܟܐ ܟܕ ܢܨܝܚ̈ܘܬܐ ܙܒܢ̈ܢܝܬܐ ܥܒܼܕܘ ܠܦܘܪ̈ܥܢܐ ܘܣܪ̈ܝܩܐ
                    ܐܫܬܘܝܼܘܿ ܠܡܼܬܥܗܕܘ ܒܐܝܠܝܢ ܕܥܒܼܕܘ ܕܒܕܪ̈ܐ ܥܬܝܪ̈ܐ ܠܥܘܗܕܢܐ ܢܬܬܝܬܘܢ. ܘܟܕ ܬܘܒ ܡܐܠܠܘܢ ܠܐ
                    []ـܪ̈ܢܝܐ ܘܗܠܝܢ ܕܡܢܗܘܢ ܐܬܥܒܼܕܘ ܘܐܣܬܥܼܪܘ ܕܠܥܘܗܕܢ ܛܒܐ ܢܬܬܝܬܘܢ ܩܕܡ ܒܪܘܝܐ. ܟܕ ܠܫܡ̈ܗܐ
                    ܒܝܕ ܟܐܦ̈ܐ ܓܠܝܦ̈ܬܐ ܘܕܝܪ̈ܬܐ ܐܨܼܕܘ ܘܛܟܣܘ ܒܦܼܕܬܐ ܕܒܛܟܣܼܐ ܘܚܿܝܠܼܐ ܡܫܡ̄. ܒܥ̈ܒܕܐ ܕܝܢ
                    ܕܡܒܥܕ ܡܼܢ ܘ݀ܠܝ̈ܬܐ ܬܠܡܝܕ ܪܒܢ ܬܐܒܝܠܝܐ ܪܒܢ ܝܘܣܐ ܐܬܓܪܕܐ ܡܼ̤ ܡܬܥܗܕܢܘܬܐ ܛܒ̈ܬܐ ܘܫܐܠ̈ܬܐ
                    ܚܣܝ̈ܬܐ ܕܪ̈ܒܢܐ ܚܪܝܦܝ ܕܘܩ̈ܐ ܘܝܬܝܪ ܛܘܠܝ̈ܩܐ. ܗܢ݀ܘܢ ܕܒܩܦܝܼܣܘܬ ܡܛܟܣܘܬ ܙܘܓ̈ܝܢܐ ܗܠܝܢ
                    ܕܡܼܢ ܬܚܘܒܘܬܝ ܐܬܬܨܿܝܬ݀. ܐܝܟ ܕܠܡܦܝܓܘܬ ܡܨܛܗܝܢܘܬܗܘܢ ܕܥܬܝܕܝܢ ܕܢܒܚܼܪܘܢ ܠܚܘ̈ܩܐ ܗܠܝܢ
                    ܕܡܢܝ ܐܬܪܝܫܼܡܬ܇ ܘܡܛܠܗܕܐ ܟܕ ܗܕܐ ܬܟܝܠܘܼܬܐ ܗܘܬ ܠܝ ܕܐܟܼܦ ܒܐܝܟܦܘܼܬܐ ܕܐܝܟ ܗܕܐ ܐܟܡܢ
                    ܕܕܘܝܘܬܝ ܬܐܬܪ ܬܟܝܠ ܐܢܼܐ ܒܣܒܪܐ ܕܝܬܝܪ ܪܒ. ܕܠܝ ܠܝܘܬܪܢܐ ܪܒܐ ܬܗܘܐ ܗܕܐ  f.92b 
                    ܘܢ݀ܓܗܐ ܡܼܢ ܛܘܪ̈ܦܐ ܘܓܕ̈ܫܐ ܘܬܥܝܫܼܘܬܐ ܕܓܿܕܫܝܢ ܠܕܐܟܘܬܝ ܒܗܢ ܕܘܝܪ̈ܐ ܬܢܢܝ̈ܐ ܒܝܕ
                    ܬܥܕܝܪܘܬܐ ܘܟܘܫܦܐ ܕܡܬܐ ܘܫܐܠܬܐ ܕܦܪ̈ܘܫܐ ܘܬܐܘܦܝ̈ܠܐ ܘܥܗܝܪ̈ܐ. ܕܚܠܦ ܥܡܠܐ ܘܣܟܝܠܘܬܐ ܕܗܪܓܬ
                    ܐ݀ܫܬܘܐ ܕܚܪܘܪ̈ܐ ܕܡܢ ܡܐܟܝܢܘܬܗ ܕܕܠܩܘܒܠܐ ܘܓܕܫ̈ܘܗܝ ܕܥܪ̈ܨܢ ܥܠܝܢ ܐܢܿܩܚ. ܘܡܣܚܝܐ ܐܬ݀ܚܙܐ
                    ܡܼܢ ܡܠܬܟܘܬܐ ܣܥܓܠܓܠܐ ܡܼ̤ ܨܘܥܨܥ̈ܐ ܘܠܐ ܢܡܘܣܝܘ̈ܬܐ ܕܐܘܬܢܛܐܝܬ ܥܿܒܕܬ݀ ܘܡܚܪܪܐ ܡܼܢ
                    ܚܪܙܘܦܘܬܐ. ܒܟܘܫܦܐ ܕܢܛܪ̈ܝ ܐܘܦܘܬܝܩܝ ܕܝܠܗ ܘܕܕܩܢܣ̈ܐ ܫܘܝ̈ܠܝ ܪܘܫܡܐ
                    ܕܝܠܗ܀܀܀܀܀܀܀܀܀܀܀܀܀܀܀܀
                ܐܢܿܕܝܢ ܒܿܚܪ ܐܢܬ ܐܘ̃ ܦܪܘܫܐ ܣܟܘܠܣܬܝܩܐ ܘܟܕ ܡܫܟܚ ܐܢܬ ܡ̈ܠܐ ܕܠܐ ܒܥܝܕ ܐܘܿ
                    ܦܘ̈ܕܐ ܐܘ ܫܿܢܙ ܐܢܬ ܡܢܗܝܢ. ܬܪܨ ܐܝܟ ܡܬܡܨܝܢܘܬ ܣܟܝܠܘܬܐ ܕܒܟ ܠܐ ܕܝܢ ܢܬܪܩܛ ܠܒܟ ܥܠܝ .
                    ܘܠܥܕܠܝܐ ܝܿܗܒ ܐܢܬ ܐܬܪܐ ܘܬܛܗܐ ܠܡܠܬܐ ܫܠܝܚܝܬܐ. ܘܬܬܚܿܝܓ ܡܛܠ ܠܐ ܝܠܝܦܘܬܝ ܡܛܠ ܕܒܫܓܼܡܐ
                    ܕܠܐ ܝܠܝܦܘܬܐ ܐܬܬܚܕܬ݀ ܘܒܚܘܓܬܐ ܕܥܛܠܘܬܐ. ܐܠܐ ܟܕ ܡܬܕܟܼܪ ܐܢܬ ܠܚܘܼܒܐ ܕܐܝܬܝܗܿ ܚܼܙܩܐ
                    ܕܓܡܝܕܘܬܐ. ܐܬܥܗܕ ܠܝ ܠܚܛܝܐ ܒܡܠܬܐ ܕܠܝ ܝܘܬܪܢܐ ܢܗܘܐ ܒܗܿ. ܐܝܟܢܐ ܕܐܬܚܼܢܢ ܡܼܢ ܓܪܩܝܐ ܗܿܘ
                    ܡܫܟܚܢܐ ܕܐܒܝ̈ܕܐ. ܘܟܕ ܠܝ ܠܡܬܥܗܕܢܘܬܐ ܕܛܒܘܬܐ ܡܝܬܐ ܐܢܬ ܐܦ ܐܢܬ ܬܬܚܣܐ ܘܬܥܘܼܦ ܐܓܪܐ
                    ܒܥܐܦ̈ܐ ܟܕ ܠܝ ܡܠܬܐ ܕܚܘܣܝܐ ܡܼܢ ܦܘܡܟ ܡܫܡܪ ܐܢܬ ܘܐܦ ܠܗܿܢܘܢ ܕܝܼܨܦ ܡܛܠܬܝ ܘܠܐܒܗ̈ܝ ܕܦܓܪ
                    ܘܕܪܘܚ ܡܕܟܪܐܝܬ ܡܠܬ ܫܠܝܚܐ ܐܘܟܝܬ ܦܘܩܕܢܐ ܡܡܿܠܐ ܐܢܬ ܗ݀ܝ ܕܒܐܟܝܼܦܘܬܐ ܥܠ ܚܕ̈ܕܐ ܢܨܠܐ
                    ܕܡܬܐܣܝܢܢ.
                ܣܝܡܝܢ ܝܘܡ ܚܕ ܒܫܒܐ ܒܬܡܢܝܐ ܝܘܡ̈ܬܐ ܒܬܫܪܝ ܩܕܝܡ ܒܫܢܬ ܐܠܦ ܘܚܡܫܡܐܐ
                    ܘܐܪܒܥܝܢ ܘܫܬ ܒܕܝܪܐ ܕܡܪܝ ܒܪ ܨܘܡܐ ܓܪܒܝܝܐ ܕܨܝܕ ܩܘܪ̈ܝܐܣ ܚܫܪܝ ܘܒܓܕܫܝܗ ܒܐܬܪܐ ܕܘܥ̈ܕܐܐ
                    ܡܚܣܢܬ ܒܐܠܗܐ.