Eusebius of Caesarea. “Ecclesiastical History, Book 7 - ܣܦܪܐ ܫܒܥܐ ܕܬܫ̈ܥܝܬܐ ܕܥܕܬܐ.” Based upon William Wright and Norman McLean eds., The ecclesiastical history of Eusebius in Syriac (Cambridge: University Press, 1898). Digital Syriac Corpus. Last modified April 26, 2019. https://syriaccorpus.org/481.
    
        
            
                
                     317 

                    ܟܕ ܥܪܝܩ ܗܘܐ ܒܐܬܪ̈ܘܬܐ ܕܦܠܣܛܝܢܐ. ܫܒܥ ܫ̈ܢܝܢ ܚܙܝܢ ܗܘܘ ܠܗ. ܥܕܬܐ ܕܝܢ
                        ܕܐܘܪܫܠܡ ܡܢ ܒܬܪ ܗܡܢܐܘܣ ܐܦܣܩܘܦܐ. ܗܿܘ ܕܡܢ ܩܕܝܡ ܐܘܕܥܢܢ ܥܠܘܗܝ. ܙܒܕܐ ܩܒܠ ܬܫܡܫܬܐ
                        ܕܬܡܢ. ܒܬܪ ܩܠܝܠ ܕܝܢ ܙܒܢܐ ܟܕ ܐܬܢܝܚ ܗܢܐ. ܗܪܡܘܢ ܐܚܪܝܐ ܩܒܠ ܬܪܢܘܣ ܕܫ̈ܠܝܚܐ. ܕܢܛܝܪ
                        ܗܘܐ ܬܡܢ ܥܕܡܐ ܠܙܒܢܐ ܕܪܕܘܦܝܐ. ܒܐܠܟܣܢܕܪܝܐ ܕܝܢ ܟܕ ܩܡ ܒܐܦܣܩܦܘܬܐ ܡܪܩܘܣ ܬܡܢܥܣܪ̈ܐ
                        ܫ̈ܢܝܢ. ܡܢ ܒܬܪ ܡܘܬܗ ܕܕܝܘܢܣܘܣ. ܬܐܘܢܝܣ ܩܒܠ ܡܢ ܒܬܪܗ. ܘܒܝܘܡ̈ܬܗ ܕܗܢܐ ܒܐܠܟܣܢܕܪܝܐ.
                        ܥܡ ܦܢܐܪܝܘܣ ܩܫܝܫܐ ܐܦ ܐܟܝܠܘܣ ܐܝܕܝܥ ܗܘܐ. ܘܡܠܦܢܘܬܐ ܕܗܝܡܢܘܬܐ ܩܕܝܫܬܐ ܐܚܝܕ ܗܘܐ ܬܡܢ.
                        ܕ̈ܠܝܠܐ ܕܝܢ ܡܫܬܟܚܝܢ ܗܘܘ ܕܒܕܡܘܬܗ. ܕܒܥܒܕܐ ܕܦܝܠܣܘܦܘܬܐ. ܘܒܕܘܒܪ̈ܐ ܕܝܘܠܦܢܐ ܕܣܒܪܬܐ
                        ܚܪܝܦܐܝܬ ܩܐܡ ܗܘܐ. ܡܢ ܒܬܪ ܕܝܢ ܕܫܡܫ ܬܪܘܢܘܣ ܬܫܥܣܪ̈ܐ ܫ̈ܢܝܢܿ ܩܒܠ ܡܢ ܒܬܪܗ ܐܦܣܩܦܘܬܐ
                        ܦܛܪܘܣ ܒܐܠܟܣܢܕܪܝܐ. ܘܐܫܬܒܚ ܝܬܝܪܐܝܬ. ܬܪܬܥܣܪ̈ܐ ܫ̈ܢܝܢ ܒܐܦܣܩܦܘܬܐ. ܕܒܪ ܗܘܐ ܕܝܢ ܥܕܬܐ
                        ܬܠܬ ܫ̈ܢܝܢ ܩܕܡ ܪܕܘܦܝܐ. ܘܫܪܟܐ ܕܙܒܢܐ ܕܕܘܒܪܗ. ܒܢܓܝܪܘܬ ܪܘܚܐ ܣܓܝܐܬܐ ܢܦܫܗ ܡܕܒܪ ܗܘܐ.
                        ܘܐܝܟ ܕܠܝܘܬܪܢܐ ܕܥܕ̈ܬܐ. 
                     318 

                    ܝܨܝܦ ܗܘܐ ܕܝܗܠܝܢ ܪܘܪܒܐܝܬ.. ܬܡܢ ܗܟܝܠ ܒܫܢܬ ܬܫܥ ܕܪܕܘܦܝܐ. ܐܬܦܣܩ ܪܫܗ
                        ܘܐܨܛܒܬ ܒܟܠܝܠܐ ܕܣܗܕܘܬܐ. ܥܕܡܐ ܠܗܪܟܐ ܢܣܝܟ ܫܪܒܐ ܕܡܝܒܠܢܘܬܐ ܕܡܢ ܝܘܡ̈ܝ ܝܠܝܕܘܬܗ
                        ܕܦܪܘܩܢ. ܥܕܡܐ ܕܐܣܬܬܪ ܥ̈ܕܬܐ ܒܪܕܘܦܝܐ ܕܗ̈ܘܝܢ ܬܠܬܡܐܐ ܘܚܡܫ ܫ̈ܢܝܢ. ܡܢ ܗܫܐ ܕܝܢ ܢܫܬܥܐ
                        ܥܠ ܐܝܠܝܢ ܕܐܬܓܒܪܘ ܒܐܝܓܘܢܐ. ܕܥܠ ܐ̈ܦܝ ܕܚܠܬ ܐܠܗܐ. ܕܐܝܠܝܢ. ܘܕܐܝܟܢܐ ܐܝܬܝܗܘܢ ܗܘܘ.
                        ܒܟܬܒܐ ܢܫܒܘܩ ܥܘܗܕܢܐ ܠܐܝܠܝܢ ܕܐܬܝܢ ܒܬܪܢܿ܀ 
                
                
                    ܫܡܠ ܣܦܪܐ ܕܫܒܥܐ.
                    ܀ ܀ ܀ ܀