“History of Karka d-Beth Slok - ܬܫܥܢܬܐ ܕܟܲܪܟܼܵܐ ܕܒܹܝܬܼ ܤܠܘܿܟܼ ܘܲܕܼܤܵܗ̈ܕܹܐ ܕܒܹܗ .” Based upon Paul Bedjan ed., Acta martyrum et sanctorum (Parisiis; Lipsiae: Harrasssowitz, 1890). Digital Syriac Corpus. Last modified May 2, 2019. https://syriaccorpus.org/486.
    
        
            
                 ܬܫܥܢܬܐ ܕܟܲܪܟܼܵܐ ܕܒܹܝܬܼ ܤܠܘܿܟܼ (ܟܲܪܟܿܘܼܟ؟) ܘܲܕܼܤܵܗ̈ܕܹܐ ܕܒܹܗ. 
            
            
                 ܗܵܢܵܐ ܟܲܪܟܼܵܐ ܪܲܒܵܐ: ܤܵܡ̣ ܫܲܬܼܐܸܤܵܘ̈ܗܝ ܡܲܠܟܵܐ ܕܐܵܬܼܘܿܪ: ܗܵܘ̇
                    ܕܲܒܼܤܘܼܪܚܵܐ ܤܲܪܕܵܢܵܐ ܫܡܹܗ ܗ̄ܘ̣ܵܐ. ܗܵܢܵܐ ܡܲܠܟܵܐ ܪܒܿ ܗ̄ܘ̣ܵܐ ܘܲܕܚܲܝܼܠ ܒܟܼܠܵܗ̇
                    ܬܹܒܹܝܠ: ܘܡܲܠܟܿܘܼܬܹܗ ܚܲܕܼ ܡ̣ܢ ܬܠܵܬܼܵܐ ܕܥܵܡܲܪܬܵܐ ܗ̄ܘ̣ܵܬܼ. ܗܵܢܵܐ ܤܲܪܕܵܢܵܐ ܐܝܼܬܼܵܘܗܝ
                    ܗ̄ܘ̣ܵܐ ܒܪܹܗ ܕܤܲܢܚܹܪܝܼܒܼ: ܗܵܘ̇ ܕܲܬܼܠܵܬܼܝܼܢ ܘܲܬܼܪܹܝܢ ܡܲܠܟ̈ܝܼܢ ܠܒܼܵܠܘܿܣ ܡܲܠܟܵܐ
                    ܩܲܕܼܡܵܝܵܐ ܕܐܵܬܼܘܿܪ̈ܵܝܹܐ ܐܝܼܬܼܵܘܗܝ. ܒܝܵܘܡܵܘ̈ܗܝ ܕܗܵܢܵܐ ܤܲܪܕܵܢܵܐ ܐܸܫ̣ܬܲܕܲܪ ܡ̣ܢ
                    ܐܲܠܵܗܵܐ ܝܵܘܢܵܢ ܠܢܝܼܢܘܹܐ: ܗܵܢܵܐ ܕܒܲܢܒܼܝܼܬܹܗ ܘܲܒܼܟܼܵܘܿܙܘܼܬܹܗ ܐܲܙܝܼܥ̣ ܠܢܝܼ̈ܢܘܵܝܹܐ.
                    ܘܗ̤ܘ ܤܲܪܕܵܢܵܐ ܐܸܫܬܲܥ̣ܒܲܕܼ ܠܟܼܵܪܘܿܙܘܼܬܹܗ ܕܲܢܒܼܝܼܵܐ: ܘܲܓܼܙܲܪ ܨܵܘܡܵܐ ܒܢܝܼܢܘܹܐ:
                    ܘܲܠܒܸܫ̣ܘ ܤܲܩܹ̈ܐ. ܘܲܚ̣ܙܵܐ ܐܲܠܵܗܵܐ ܬܝܵܒܼܘܼܬܼܗܘܿܢ: ܐܲܝܟܼ ܕܲܟܼܬܼܝܼܚ: ܘܐܲܗܦܸܟܼ
                    ܡܸܢܗܘܿܢ ܚܸܡܬܼܵܐ ܕܪܘܼܓܼܙܹܗ: ܘܠܵܐ ܐܵܘܒܸܿܕܼ ܐܸܢܘܿܢ. ܘܲܒܼܲܫܲܢ̄ܬܼܵܐ ܕܚܲܡܸܫܬܲܥܤܲܪ
                    ܕܗܵܘ̇ ܒܲܪ ܢܸܡܪܘܿܕܼ: ܐܲܪܒܵܩ ܡܲܠܟܵܐ ܕܡܵܕܲܝ: ܥܲܠ ܡܲܠܟܿܘܼܬܼܵܐ ܕܐܵܬܼܘܿܪ̈ܵܝܹܐ: ܕܠܵܗ̇
                    ܡܸܫܬܲܥܒܲܕܼ ܢܸܬܼܒܲܤܡܘܼܢ ܩܵܪܘܿܝܵܐ ܡܚܝܼܠܐ ܘܟܼܵܬܼܘܿܒܼܵܐ ܘܟܸܢܫܵܐ ܕܲܡ̣ܡܲܥ ܬܲܫܥܝܼܬܹܗ
                    ܕܛܘܼܒܼܵܢܵܐ: ܢܸܫܬܿܘܘܿܢ ܠܪ̈ܲܚܡܹܐ ܘܠܲܚܢܵܢܵܐ ܒܝܘܿܡ ܕܝܼܢܵܐ ܘܲܕܼܒܼܘܼܚܪܵܢܵܐ:
                    ܒܛܲܝܒܿܘܼܬܹܗ ܕܲܡܫܝܼܚܵܐ: ܗܵܘ̇ ܕܠܹܗ ܫܘܼܒܼܚܵܐ ܘܬܼܵܘܕܝܼܬܼܵܐ: ܘܠܲܐܒܼܘܼܗܝ ܘܲܠܪܘܼܚܵܐ
                    ܕܩܘܼܕܼܫܵܐ ܬܸܫܒܿܘܿܚܬܼܵܐ ܘܐܝܼܩܵܪܵܐ ܘܪܘܼܡܪܵܡܵܐ ܘܐܘܼܚܕܵܢܵܐ: ܗܵܫܵܐ ܘܲܒܼܟܼܠܙܒܲܢ
                    ܘܲܠܥܵܠܲܡ ܥܵܠܡܝܼܢ: ܐܹܝܢ ܘܐܵܡܹܝܢ. ܫܸܠ̣ܡܲܬ̤ ܬܲܫܥܝܼܬܼ ܤܵܗܕܘܼܬܹܗ ܕܛܘܼܒܼܵܢܵܐ ܡܵܪܝ
                    ܩܲܪܕܵܓܼ: ܘܠܲܐܠܵܗܵܐ ܫܘܼܒܼܚܵܐ ܐܵܡܹܝܢ.  508  ܗ̄ܘ̣ܵܐ: ܡܸܪܕܵܐ ܚ̣ܵܘܝܼ. ܗ̤ܘ
                    ܕܹܝܢ ܗܵܢܵܐ ܐܲܪܒܵܩ: ܟܲܕܼ ܡ̣ܪܲܕܼ ܥܲܠ ܡܲܠܟܿܘܼܬܼܵܐ ܕܐܵܬܼܘܿܪ̈ܝܹܐ: ܡ̣ܢ ܙܲܒܼܢܵܐ
                    ܠܙܲܒܼܢܵܐ ܩܢ̣ܵܐ ܗ̄ܘ̣ܵܐ ܥܘܼܫܢܵܐ ܘܐܸܬܼܚܲܝܲܠ̣ ܗ̄ܘ̣ܵܐ ܘܐܸܬܼܥܲܫܲܢ: ܘܗܘ̤ܵܐ ܫܦܵܝܵܐ
                    ܠܡܲܟܵܐ ܕܐܵܬܼܘܿܪ. ܘܟܲܕܼ ܥ̣ܫܸܢ ܗ̄ܘ̣ܵܐ: ܫܲܪܝܼ ܕܢܸܤܥܸܐ ܥܲܠ ܡܲܠܟ̈ܘܵܬܼܵܐ ܕܐܸܫܬܲܥ̣ܒܲܕܼ
                    ܗ̣̄ܘܲܝ̈ ܠܡܲܠܟܵܐ ܕܐܵܬܼܘܿܪ: ܘܐܲܥ̣ܕܿܝܼ ܡܸܢܗܘܿܢ ܐܲܬܼܪ̈ܵܘܵܬܼܵܐ. ܘܡ̣ܢ ܒܵܬܲܪܟܸܢ ܐܸܬ݂ܼܵܐ
                    ܒܓܲܝܤܵܐ ܠܗܵܘ̇ ܐܲܬܼܪܵܐ ܕܒܹܝܬܼ ܓܲܪ̈ܡܲܝ: ܘܲܒܼܙܲܒܼܢܵܐ ܗܵܘ̇ ܡܠܟܘܿܢܵܐ ܗ̤ܘ ܓܲܪ̈ܡܲܝ
                    ܐܝܼܬܼܵܘܗܝ ܗ̄ܘ̣ܵܐ ܘܗ̤ܘ ܐܲܚܝܼܕܼ ܗ̄ܘ̣ܵܐ ܠܹܗ ܠܐܲܬܼܪܵܐ: ܘܐܲܥ̣ܕܿܝܼ ܡܸܢܹܗ ܫܒܼܝܼܬܼܵܐ ܗ̤ܘ
                    ܐܲܪܒܵܩ ܘܒܲܙܹܗ ܠܫܘܼܠܛܵܢܹܗ. ܘܐܝܼܬܹܝܗ̇ ܗ̄ܘ̣ܵܬܼ ܡܲܠܟܿܘܼܬܹܗ ܕܗܵܢܵܐ ܓܲܪ̈ܡܲܝ: ܘܐܲܬܼܪܵܐ
                    ܕܥܠܵܘܗܝ ܐܲܡ̣ܠܸܟܼ ܗ̄ܘ̣ܵܐ: ܡ̣ܢ ܙܵܒܼܵܬ ܢܲܗܪܵܬ: ܘܲܥܕܲܡܵܐ ܠܕܸܩܠܲܬܼ ܢܲܗܪܵܐ. ܘܡ̣ܢ
                    ܕܼܩܠܲܬܼ ܥܕܲܡܵܐ ܠܛܘܼܪܵܐ ܗܵܘ̇ ܕܐܵܘܘܪܘܿܟ ܡܸܬܼܩܪܸܐ. ܘܗ̤ܘ ܛܘܼܪܵܐ ܥܕܲܡܵܐ ܠܢܲܗܪܵܐ
                    ܕܐܵܬܹܪܩܘܿܢ: ܗܵܘ̇ ܕܐܵܦ ܬܘܼܪܡܵܪܵܐ ܡܸܬܼܟܲܢܸܐ: ܘܲܥܕܲܡܵܐ ܠܠܪܸܒܼ ܐܲܬܼܪܵܐ ܘܛܘܼܪܵܐ
                    ܕܫܲܥܪܵܢ: ܘܲܥܕܲܡܵܐ ܠܹܗ ܠܙܵܒܼܵܐ ܙܥܘܿܪܵܐ. ܘܡܵܘܬܿܒܹܗ ܕܓܲܪ̈ܡܲܝ ܒܒܼܝܼܪܲܬܼ ܓܲܪ̈ܡܲܝ: ܥܲܠ
                    ܗܵܘ̇ ܛܘܼܪܵܐ ܕܐܵܘܪܘܿܟ: ܗܵܘ̇ ܕܐܵܦ ܗܵܫܵܐ ܝܼܕܲܥ ܒܸܢܝܵܢܹܗ. ܗܵܢܵܐ ܓܲܪ̈ܡܲܝ ܟܲܕܼ
                    ܐܸܬܼܐܠܸܨ ܗ̄ܘ̣ܵܐ ܡ̣ܢ ܡܲܠܟܿܘܼܬܹܗ ܕܐܲܪܒܵܩ: ܘܠܵܐ ܐܸܬܼܡ̣ܨܝܼ ܠܡܸܬܲܠ ܡܲܕܲܐܬܼܵܐ
                    ܠܡܲܠܟܿܘܼܬܼܵܐ ܗܵܝ̇ ܕܐܵܬܼܘܿܪ̈ܵܝܹܐ: ܩܲܒܸܿܠ̣ ܗ̄ܘ̣ܵܐ ܡ̣ܢ ܡܲܠܟܿܘܼܬܼܵܐ ܕܐܵܬܼܘܿܪ̈ܵܝܹܐ
                    ܫܲܠܝܼܛܵܐ ܥܲܠ ܡܲܠܟܿܘܼܬܹܗ: ܘܦܵܩ̈ܘܿܕܹܐ ܥܲܠ ܐܘܼܚܕܵܢܹܗ: ܘܬܲܥܕܝܼܪܵܐ ܕܓܼܘܼܪܵܐ ܕܦܵܠܚܹ̈ܐ
                    ܥܲܠ ܓܘܼܕܹܗ. ܘܡ̣ܢ ܗܵܝܕܹܝܢ ܦ̣ܩܲܕܼ ܗ̄ܘ̣ܵܐ ܤܲܪܓܿܘܿܢ: ܕܲܒܼܗܵܘ̇ ܐܲܬܼܪܵܐ  509 
                    ܕܫܘܼܠܛܵܢܵܐ ܕܡܲܠܟܿܘܼܬܼ ܓܲܪ̈ܡܲܝ: ܬܸܬܼܒܿܢܸܐ ܥܲܠ ܫܡܹܗ ܡܕܝܼܢ̄ܬܼܵܐ ܠܪܹܫܵܢܘܼܬܼܵܐ.
                    ܒܐܲܬܼܪܵܐ ܕܗܵܘ̇ ܫܘܼܠܛܵܢܵܐ ܕܡܸܫܬܲܥܒܲܕܼ ܗ̄ܘ̣ܵܐ ܠܹܗ ܐܲܬܼܪܵܐ ܟ̱ܠܹܗ ܐܲܝܟܼ ܕܲܠܡܵܢܵܐ:
                    ܒܦܲܪܨܘܿܦ ܡܲܠܟܵܐ: ܐܸܬܼܒܲܢܝܲܬ̤ ܕܹܝܢ ܕܬܸܗܘܸܐ ܪܹܫܵܐ ܠܗܵܘ̇ ܫܘܼܠܛܵܢܵܐ ܕܗܵܝ
                    ܡܲܠܟܿܘܼܬܼܵܐ: ܒܢ̣ܵܝܗܝ ܕܹܝܢ ܤܲܪܓܿܘܿܢ: ܘܥܲܠ ܫܡܹܗ ܫܲܡ̣ܗܹܗ ܠܟܲܪܟܼܵܐ ܕܲܒܼܢܵܐ: ܘܒܲܪ
                    ܚܹܐܪܹ̈ܐ ܥܲܒܼܕܹܗ. ܘܝܲܗ̄ܒܼ ܠܹܗ ܐܲܬܼܪܵܐ ܟܠܹܗ ܕܒܹܗ ܐܸܬܼܢܨܒܼ: ܕܢܸܗܘܘܿܢ ܠܹܗ ܥܲܒܼ̈ܕܹܐ.
                    ܘܒܹܝܬܼ ܡܲܠܟܿܘܼܬܼܵܐ ܒܢ̣ܵܐ ܒܹܗ ܒܟܲܪܟܼܵܐ ܕܲܢܲܨܒܼ: ܘܐܲܝܬܝܼ ܢܨܲܒܼ ܒܹܗ ܫܲܪܒܿܬܼܵܐ
                    ܪܲܒܿܬܼܵܐ ܡ̣ܢ ܗܵܘ̇ ܐܲܬܼܪܵܐ ܕܐܵܬܼܘܿܪ̈ܵܝܹܐ ܡ̣ܢ ܝܼܕܼܝܼܥܹ̈ܐ ܕܡܲܠܟܿܘܼܬܼܵܐ: ܝܼܕܼܝܼܥܵܐ
                    ܚܲܕܼ ܕܲܫܡܹܗ ܗ̄ܘ̣ܵܐ ܒܘܼܪܙܹܝܢ. ܘܚܸܤܢܵܐ ܙܥܘܿܪܵܐ ܒܢ̣ܵܐ ܗ̄ܘ̣ܵܐ ܠܟܲܪܟܼܵܐ ܘܒܲܦܩܲܥܬܼܵܐ
                    ܐܵܘܬܿܒܹܗ: ܘܫܘܼܪܵܐ ܙܥܘܿܪܵܐ ܥ̣ܒܲܕܼ ܠܹܗ. ܘܥܲܡ ܗܵܝ̇ ܫܲܪܒܿܬܼܵܐ ܘܛܘܿܗܡܵܐ ܪܲܒܵܐ ܟܲܢܸܫ
                    ܘܐܵܘܬܸܒܼ ܬܲܡܵܢ ܐ̄ܢܵܫܵܐ ܐܲܝܟܼ ܐܲܠܦܵܐ ܡ̣ܢ ܐܵܬܼܘܿܪ: ܐܝܼܬܼ ܕܲܠܓܼܵܘ ܡ̣ܢ ܫܘܼܪܵܐ:
                    ܘܐܝܼܬܼ ܕܲܠܒܲܪ ܡ̣ܢ ܫܘܼܪܵܬ. ܘܲܒܼܢ̣ܵܐ ܒܲܡܨܲܥܬܹܗ ܕܟܲܪܟܼܵܐ ܒܹܝܬܼ ܡܲܠܟܿܘܼܬܹܗ ܕܤܲܪܓܘܿܢ:
                    ܘܒܹܝܬ ܫܲܠܝܼܛܵܐ ܕܗܵܘ̇ ܫܲܠܝܼܛܵܐ ܕܐܵܘܬܸܒܼ ܒܓܼܵܘܹܗ. 
                 ܘܟܲܕܼ ܫܲܪܝܼ ܒܛ̇ܠܵܐ ܡܲܠܟܘܼܬܼ ܐܵܬܼܘܿܪ: ܘܡܸܬܼܚܲܒܲܠ ܫܘܼܠܛܵܢܵܐ
                    ܐܵܬܼܘܿܪܵܝܵܐ ܒܲܓܼܙܵܪ ܕܝܼܢܵܐ ܐܲܠܵܗܵܝܵܐ: ܘܲܒܼܢ̣ܵܐ ܫܘܼܪܵܐ ܕܥܲܫܝܼܢܘܼܬܼܵܐ ܐܲܪܒܵܩ:
                    ܕܗ̤ܘܝܘܼ ܐܵܕܘܸܪܒܵܕܼ ܥܲܠ ܡܲܠܟܿܘܼܬܼܐ ܕܡܵܕܼܵܝܹ̈ܐ: ܗܵܘ̇ ܕܥܲܠ ܫܡܹܗ ܐܸܫ̣ܬܲܡܲܗ ܐܲܬܼܪܵܐ
                    ܕܐܵܕܼܘܿܪܒܹܝܓܼܵܢ: ܘܫܲܪܝܼ ܕܢܹܐܬܸܐ ܥܲܠ ܢܸܡܪܘܿܕ ܒܚܲܝܠܵܐ ܪܲܒܵܐ. ܘܐܸܬܼܘܲܥܲܕܼ ܗ̄ܘ̣ܵܐ
                    ܨܹܝܕܼ ܗܵܘ ܫܲܒܼܛܹܗ ܕܐܵܬܼܘܿܪܵܝܵܐ: ܟܲܕܼ ܫܪܸܐ ܒܩܝܼܠܝܼܩܝܼܵܐ. ܘܲܡܚ̣ܵܘ ܬܲܟܼܬܘܼܫܵܐ:
                    ܘܐܸܬܼܚܤܸܢ ܠܹܗ ܐܵܬܼܘܿܪܵܝܵܐ  510  ܘܐܸܬܼܩܛܸܠ ܒܩܝܼܠܝܼܩܝܼܵܐ. ܘܒܼܵܬܲܪܟܸܢ
                    ܒܸܛܠܲܬ̤ ܠܵܗ̇ ܡܲܠܟܿܘܼܬܼܵܐ ܕܐܵܬܼܘܿܪ̈ܵܝܹܐ: ܘܐܲܡ̣ܠܟܲܬ̤ ܕܒܼܵܒܼ̈ܠܵܝܹܐ. ܘܡ̣ܢ ܕܐܵܦ ܗܵܕܹܐ
                    ܐܸܫ̣ܬܲܪܝܲܬ̤ ܠܵܗ̇: ܩܵܡܲܬ̤ ܕܡܵܕܼܵܝܹ̈ܐ. ܘܒܸܛ̣ܠܲܬ̤ ܐܵܦ ܗ̤ܝ: ܘܐܲܡ̣ܠܸܟܼ ܥܲܠ ܦܵܪܹܣ
                    ܕܲܪܝܵܘܵܫ ܒܲܪ ܦܲܛܫܲܤܦ: ܗܵܘ̇ ܕܲܡܓܿܘܼ̈ܫܹܐ ܒܲܪ ܡܝܼܢܵܨܗܲܢܝܼ ܡܫܲܡܗܝܼܢ ܠܹܗ: ܚܲܕܼ ܡ̣ܢ
                    ܡܲܠܟܹ̈ܐ ܡܠܸܟܼ ܦܵܪܹܣ: ܗܵܘ̇ ܕܲܡ̣ܚܵܐ ܩܪܵܒܼܵܐ ܥܲܡ ܐܵܠܹܟܼܤܲܢܕܪܘܿܣ ܒܲܪ ܦܝܼܠܝܼܦܘܿܣ
                    ܘܐܸܙܕܟܼܝܼ ܡܸܢܹܗ: ܘܫܲܩ̣ܠܵܗ̇ ܠܡܲܠܟܿܘܼܬܹܗ ܕܕܲܪܝܵܘܵܫ. ܘܐܲܡ̣ܠܸܟܼ ܐܵܠܹܟܼܤܲܢܕܪܘܿܣ
                    ܒܡܲܠܟܿܘܼܬܼܵܐ ܕܝܵܘ̈ܢܵܝܹܐ. ܘܡܸܛܠ ܕܠܲܝܬܿ ܗ̄ܘ̣ܵܐ ܠܹܗ ܒܢܲܝ̈ܵܐ: ܦܲܠ̣ܓܼܵܗ̇ ܠܡܲܠܟܿܘܼܬܹܗ
                    ܠܐܲܪܒܼܥܵܐ ܥܲܒܼܕܵܘ̈ܗܝ: ܘܡ̣ܢ ܒܵܬܲܪ ܡܵܘܬܹܗ ܐܲܚ̣ܕܘܼܗ̇ ܠܡܲܠܟܘܼܬܹܗ. ܕܚܲܕܼ ܡܸܢܗܘܿܢ ܫܡܹܗ
                    ܗ̄ܘ̣ܵܐ ܤܸܠܵܘܩܘܿܣ. ܗܵܢܵܐ ܒܢ̣ܵܐ ܚܲܡܫܵܐ ܟܲܪ݁ܟܼܝܼܢ: ܠܐܲܢܛܵܟܼܝܵܐ ܡܕܝܼܢ̄ܬܼܵܐ ܕܤܘܼܪܝܵܐ:
                    ܘܲܠܤܹܠܵܘܩܝܵܐ ܕܤܘܼܪܝܵܐ: ܘܲܠܤܹܠܵܘܩܝܵܐ ܕܦܝܼܤܝܼܝܵܐ: ܘܠܲܤܠܐܹܝܩ ܡܕܝܼܢ̄ܬܼܵܐ ܪܲܒܿܬܼܵܐ
                    ܕܒܹܝܬܼ ܐܵܪ̈ܵܡܵܝܹܐ: ܘܲܠܡܕܼܝܼܢ̄ܬܼܵܐ ܟܲܪܟܼܵܐ ܕܒܹܝܬܼ ܤܠܘܿܟܼ. ܗܵܢܵܐ ܕܹܝܢ ܟܲܪܟܼܵܐ ܡ̣ܢ
                    ܒܵܬܲܪ ܤܲܪܕܵܢܵܐ ܕܲܪܝܵܘܫ ܐܵܘܬܿܒܹܗ: ܘܲܒܼܢ̣ܵܐ ܠܹܗ ܫܘܼܪܵܐ ܠܒܲܪ ܡ̣ܢ ܗܵܘ̇ ܫܘܼܪܵܐ
                    ܕܲܒܼܢ̣ܵܐ ܡܲܠܟܵܐ ܕܐܵܬܼܘܿܪܘ. ܘܲܒܼܢ̣ܵܐ ܒܹܗ ܒܵܬܹ̈ܐ ܘܒܹܝܬܼ ܢܘܼܪܵܐ ܥܲܡܹܗ ܕܗܵܘ̇ ܒܹܝܬܼ
                    ܦܬܲܟܼܪܹ̈ܐ ܕܐܲܬܼܩܸܢ ܒܓܼܵܘܹܗ ܤܲܪܕܵܢܵܐ: ܘܡܸܤܬܿܓܸܕ ܗ̄ܘ̣ܵܐ ܢܸܫܪܵܐ ܘܐܲܪܥܵܐ. ܘܐܲܝܬܝܼ
                    ܕܲܪܝܘܵܫ ܫܲܪ̈ܒܼܵܬܼܵܐ ܚܲܡܸܫ ܡ̣ܢ ܐܲܬܼܪܵܐ ܕܐܸܨܛܲܗܲܪ: ܘܐܵܘܬܸܒܼ ܒܓܼܵܘܹܗ ܕܟܲܪܟܼܵܐ:
                    ܗܵܠܹܝܢ ܕܲܫܡܵܗܲܝ̈ܗܹܝܢ ܟܬܼܝܼܒܼܝܼܢ ܒܹܝܬܼ ܐܲܪ̈ܟܹܐ ܕܡܲܠܟܘܼܬܼ ܦܵܪܹܣ. ܘܒܼܵܬܲܪ ܕܲܪܝܵܘܫ
                    ܐܸܬ݂ܼܿܐ ܤܹܠܵܘܩܘܿܣ ܡܠܸܟܼ ܝܵܘܵܢ: ܗܵܘ̇ ܕܲܪܫܝܼܡ ܡ̣ܢ ܠܥܸܠ:  511  ܘܲܠܗܵܘ̇
                    ܫܘܼܪܹܗ ܕܟܲܪܟܼܵܐ ܕܲܒܼܢ̣ܵܐ ܥܲܒܼܕܹܗ ܗ̤ܘ ܬܸܠܠܵܐ: ܘܲܒܼܢ̣ܵܐ ܠܥܸܠ ܡܸܢܹܗ ܫܘܼܪܵܐ ܪܵܡܵܐ.
                    ܘܲܥ̣ܒܲܕܼ ܠܹܗ ܠܫܘܼܪܵܐ ܕܲܒܼܢܵܐ ܦܘܼܪ̈ܩܤܹܐ: ܗܵܢܵܘ ܕܹܝܢ ܒܵܪ̈ܓܐ (ܒܘܼܪ̈ܓܹܐ؟) ܫܬܝܼܢ
                    ܘܚܲܡܫܵܐ. ܘܲܥ̣ܒܲܕܼ ܠܹܗ ܠܬܲܝܡܲܢ ܡܲܕܼܢܲܚ ܬܲܪܥܵܐ ܚܲܕܼ: ܘܲܠܓܲܪܒܲܝ ܡܲܥܪܲܒܼ ܬܲܪܥܵܐ
                    ܐ̄ܚܪܹܢܵܐ. ܘܲܠܗܵܘ̇ ܬܲܪܥܵܐ ܕܐܲܝܡܲܢ ܡܲܕܢܲܚ: ܐܲܬܼܩܸܢ ܥܠܵܘܗܝ ܒܩܵܘܡܬܹܗ ܓܠܝܼܦܵܐ
                    ܕܟܹܐܦܵܐ. ܘܡ̣ܢ ܝܲܡܝܼܢܹܗ ܘܡ̣ܢ ܤܸܡܵܠܹܗ: ܥܲܠ ܝܲܕܼ ܬܲܪܥܵܐ ܗܵܢܵܐ: ܦܘܼܪ̈ܩܤܹܐ ܕܟܹܐܦܵܐ
                    ܘܟܸܠܫܵܐ. ܘܗܵܢܵܐ ܬܲܪܥܵܐ ܐܝܼܬܼܵܘܗܝ ܗ̄ܘ̣ܵܐ ܕܡܲܠܟܵܐ. ܘܗܵܘ̇ ܐ̄ܚܪܹܢܵܐ ܐܸܬܼܩ̣ܪܝܼ
                    ܗ̄ܘ̣ܵܐ: ܥܲܠ ܫܡܹܗ ܕܗܵܘ̇ ܕܐܸܬܼܒܢܝܼ ܒܪܹܫܵܢܘܼܬܹܗ: ܛܘܿܛܲܝ. ܘܲܒܼܢ̣ܵܐ ܤܹܠܵܘܩܘܿܣ ܒܓܼܵܘܹܗ
                    ܒܹܝܬܼ ܡܲܠܟܿܘܼܬܼܵܐ: ܘܐܲܬܼܩ̣ܢܹܗ ܘܫܲܪܬܿܚܹܗ ܒܫܘܼ̈ܩܹܐ ܘܒܲܦܠܵܛ̈ܘܵܬܼܵܐ: ܠܵܘ ܒܲܠܚܘܿܕܼ
                    ܠܓܼܵܘ ܡ̣ܢ ܫܘܼܪܵܐ: ܐܸܠܵܐ ܘܲܠܒܲܪ ܡ̣ܢ ܫܘܼܪܵܐ ܤܲܓܿܝܼ ܐܵܘܪܒܹܗ. ܘܦܲܠܓܹܗ ܠܫܲܒܼܥܝܼܢ
                    ܘܲܬܼܪܹܝܢ ܫܘܼ̈ܩܝܼܢ: ܘܐܲܝܬܿܝܼ ܫܲܪ̈ܒܵܬܼܵܐ ܝܼܕܼܝ̈ܥܵܬܼܵܐ ܚܲܡܸܫ ܡ̣ܢ ܐܸܨܟܲܗܲܪ ܘܐܵܘܬܸܒܼ
                    ܒܹܗ: ܥܲܡ ܫܲܪܟܵܐ ܕܐ̄ܢܵܫܵܐ ܕܐܲܝܬܿܝܼ ܡ̣ܢ ܐܲܬܲܪ ܐܲܬܲܪ. ܘܝܲܗܼ̄ܒܼ ܠܗܵܠܹܝܢ ܫܲܪ̈ܒܼܵܬܼܵܐ
                    ܚܲܡܸܫ ܕܐܲܝܬܝܼ: ܐܲܪ̈ܥܵܬܼܵܐ ܘܟܲܪ̈ܡܹܐ ܒܹܗ ܒܐܲܬܼܪܵܐ: ܘܫܲܒܼܩܹܗ ܠܟܲܪܟܼܵܐ ܕܠܵܐ
                    ܡܲܕܲܐܬܼܵܐ. ܘܲܬܼܪܸܥܤܲܪ ܫܘܼ̈ܩܝܼܢ ܥܲܠ ܫܸܡ ܬܪܸܥܤܲܪ ܫܲܪ̈ܒܼܵܢ ܝܼܕܼܝܼ̈ܥܵܢ ܐܸܬܼܟܲܢܝܼܘ
                    ܗ̄ܘ̣ܵܘ. ܘܲܕܼܫܲܪܟܵܐ ܥܲܠ ܫܸܡ ܐܘܼܡܵܢ̈ܘܵܬܵܐ ܐܸܫ̣ܬܲܡܲܗܘ ܗ̄ܘ̣ܵܘ. ܘܲܒܼܢ̣ܵܐ ܤܹܠܵܘܩܘܿܣ
                    ܥܲܠ ܫܸܡ ܥܘܼܗܕܵܢܵܐ ܕܤܲܪܕܵܢܵܐ ܡܲܠܟܵܐ: ܗܵܘ̇ ܕܲܒܼܢܵܝܗܝ ܠܟܲܪܟܼܵܐ ܩܲܕܼܡܵܝܑܬܼ: ܒܹܝܬܼ
                    ܪܲܘ̈ܩܹܐ ܥܲܠ ܓܸܢ̄ܒܼ ܒܹܝܬܼ ܡܲܠܟܿܘܼܬܼܵܐ: ܕܲܒܼܢ̣ܵܐ ܒܓܼܵܘܹܗ ܕܚܸܤܢܵܐ: ܗܵܘ̇ ܕܲܥܕܲܡܵܐ
                    ܠܗܵܫܵܐ ܤܲܪܒܿܘܿܝ ܡܸܫܬܲܡܲܗ.  512 
                
                 ܩ̣ܵܘܝܼ ܗܵܟܹܝܠ ܟܲܪܟܼܵܐ ܒܚܲܢܦܘܼܬܼܵܐ: ܡ̣ܢ ܕܐܸܬܼܒܿܢ̣ܝܼ ܥܕܲܡܵܐ
                    ܠܡܹܐܬܼܝܼܬܼܵܐ ܕܲܫܠܝܼܚܹ̈ܐ ܩܲܕܝܼ̈ܫܹܐ: ܐܲܕܲܝ ܘܡܵܪܝܼ: ܗܵܢ̇ܘܿܢ ܕܐܸܫܬܿܠܲܚ̣ܘ ܡ̣ܢ ܪܘܼܚܵܐ
                    ܕܩܘܼܕܼܫܵܐ ܠܟܼܵܪܘܿܙܘܼܬܼܵܐ ܕܐܲܬܼܪܲܢ. ܘܟܲܕܼ ܥܲܠ̣ܘ ܠܟܲܪܟܼܵܐ: ܐܸܬܼܩܲܒܲܠ̣ܘ ܡ̣ܢ ܓܲܒܼܪܵܐ
                    ܕܲܫܡܹܗ ܝܵܘܤܸܦ. ܘܟܲܕܼ ܐܸܬܿܬܲܠ̣ܡܲܕܼ ܘܲܥܡܲܕܼ ܡܸܢܗܘܿܢ: ܒܢ̣ܵܐ ܥܹܕܬܵܐ ܗܵܝ̇ ܕܝܵܘܡܵܢܵܐ
                    ܕܲܝܪܵܐ ܕܒܹܝܬܼ ܝܵܘܤܸܦ ܡܸܬܼܩܲܪܝܵܐ. ܘܡ̣ܢ ܗܵܝܕܹܝܢ ܫܘܲܚ̣ ܙܲܪܥܵܐ ܕܗܲܝܡܵܢܘܼܬܼܵܐ
                    ܕܲܡܫܝܼܚܵܐ ܒܟܲܪܟܼܵܐ: ܘܤܲܓܿܝܼ̈ܐܹܐ ܡܸܢܗܘܿܢ ܩܲܒܸܿܠ̣ܘ ܡܲܥܡܘܿܕܝܼܬܼܵܐ: ܘܲܗܘ̤ܵܘ
                    ܟܪܸ̈ܤܛܝܵܢܹܐ ܫܲܪܝܼܪܹ̈ܐ. ܘܡ̣ܢ ܘܲܒܼܢܹܗ ܕܒܼܵܠܵܫ ܡܲܠܟܵܐ ܘܲܥܕܲܡܵܐ ܠܗܸܤܪܝܼܢ ܫܢܝܼ̈ܢ
                    ܕܫܵܒܼܘܿܪ ܒܲܪ ܐܲܪܕܵܫܝܼܪ: ܕܗܵܘ̈ܝܵܢ ܫܢܲܝ̈ܵܐ ܬܸܫܥܝܼܢ: ܚܲܩܠܵܐ ܗ̄ܘ̣ܵܬܼ ܒܪܝܼܟܼܬܼܵܐ
                    ܟܲܪܟܼܵܐ: ܘܠܲܝܬܿ ܗ̄ܘ̣ܵܐ ܒܵܗ̇ ܙܝܼܙܵܢܹ̈ܐ. ܘܲܒܼܙܲܒܼܢܹܗ ܕܫܵܒܼܘܿܪ: ܡܵܐܢܝܼ ܕܟܼܠܵܗ̇
                    ܒܝܼܫܬܼܵܐ: ܓܤ̣ܵܐ (ܒܵܗ̇؟) ܡܸܪܬܹܗ ܤܵܛܵܢܵܝܬܼܵܐ: ܘܐܵܘܥ̣ܝܲܬ̤ ܙܝܼܙܵܢܹ̈ܐ ܬܪܹܝܢ:
                    ܕܲܫܡܵܗܲܝ̈ܗܘܿܢ ܐܲܕܲܝ ܘܥܲܒܼܙܲܟܼܝܵܐ ܒܢܵܘ̈ܗܝ ܕܒܼܝܼܫܵܐ. ܒܙܲܒܼܢܹܗ ܕܹܝܢ ܕܐܲܪܕܘܿܢ ܡܲܠܟܵܐ
                    ܕܐܲܫܓܼܵܢܵܝܹ̈ܐ: ܘܲܒܼܡܲܠܟܿܘܼܬܹܗ ܕܗܲܕܪܝܵܢܘܿܣ ܩܹܤܲܪ: ܟܲܕܼ ܪܕܘܼܿܦܝܵܐ ܥ̣ܫܸܢ ܥܲܠ
                    ܥܹ̈ܕܵܬܼܵܐ ܒܲܦܢܼܬܼܵܐ ܕܡܲܥܪܒܼܵܐ: ܪ݁ܵܥܵܘܵܬܼܵܐ ܘܡܲܕܲܒܿܪ̈ܵܢܹܐ ܕܬܲܡܵܢ ܒܲܥܪܘܼܩܝܵܐ
                    ܠܬܲܪܵܐ ܕܡܲܕܢܚܵܐ ܐܸܬ݂ܼܵܘ. ܘܲܠܟܿܪܟܼܵܐ ܪܹܫܵܐ ܘܲܡܕܲܒܿܪܵܢܵܐ ܡܲܢܲܥ̣ ܗ̄ܘ̣ܵܐ ܓܲܒܼܪܵܐ
                    ܐܠܲܗܵܝܵܐ: ܕܲܫܡܹܗ ܗ̄ܘ̣ܵܐ ܛܘܼܩܪܹ̈ܝܛܹܐ. ܘܲܒܼܡܲܦܤܵܢܘܼܬܼܵܐ ܕܪܹܫܵܐ ܗܵܘ̇ ܕܐܝܼܬܼ ܗ̄ܘ̣ܵܐ
                    ܒܫܲܗܵܪܓܪ: ܗ̤ܘ ܛܘܼܩܪܹ̈ܝܛܹܐ ܐܲܦܸܤܩܘܿܦܵܐ ܒܟܲܪܟܼܵܐ ܗܘ̤ܵܐ: ܘܲܬܼܪܲܝܵܢܵܐ ܠܹܗ
                    ܐܸܬܼܚ̣ܫܸܒܼ. ܡܸܛܠ ܕܡܝܼܛܪܵܦܘܿܠܹܝܛܘܼܬܼܵܐ ܡ̣ܢ ܫܠܝܼܚܹ̈ܐ ܘܡ̣ܢ ܟܘܼܪܤܝܵܐ  513 
                    ܕܐܲܢܛܝܘܿܟܼܝ ܠܫܲܗܵܓܲܪܕ ܐܸܬܼܝܲܗܒܲܬ̤: ܘܲܬܼܪܲܝܵܢܵܐ ܛܘܼܩܪܹ̈ܝܛܹܐ: ܘܲܬܼܠܝܼܬܼܵܝܵܐ
                    ܕܠܵܫܘܿܡ: ܘܲܪܒܼܝܼܥܵܝܵܐ ܕܚܸܪܒܲܬ̤ ܓܠܵܠ: ܘܲܚܡܝܼܫܵܝܵܐ ܕܕܼܵܪܵܐ. ܛܘܼܩܪܹ̈ܝܛܹܐ ܕܹܝܢ ܗ̤ܘ
                    ܒܢ̣ܵܐ ܥܹܕܬܵܐ ܠܲܒܼܢܲܝ̈ ܟܲܪܟܼܵܐ: ܘܛܲܟܸܣ ܘܤܵܡ̣ ܒܵܗ̇ ܩܵܢܘܿܢܹ̈ܐ ܘܛܲܟܼ̈ܤܹܐ ܫܠܝܼܚܹ̈ܐ:
                    ܗܵܢ̇ܘܿܢ ܕܲܒܼܗܘܿܢ ܪܵܕܹܝܐ ܬܸܫܡܸܫܬܼܵܐ ܕܲܩܠܹܝܪܘܿܣ ܕܟܲܪܟܼܵܐ ܥܕܲܡܵܐ ܠܗܵܫܵܐ. ܘܥܹܕܬܵܐ
                    ܕܲܒܼܢܵܐ ܛܘܼܩܪܹ̈ܝܛܹܐ ܗܵܝ̇ ܗ̣̄ܝ: ܕܚܲܕܼܬܼ ܬܲܡܵܢ ܝܘܿܚܲܢ ܪܵܥܵܝܵܐ ܟܲܫܝܼܪܵܐ ܘܟܼܵܗܢܵܐ
                    ܙܲܗܝܵܐ. 
                 ܘܡ̣ܢ ܒܵܬܲܪ ܥܘܼܢܕܵܢܹܗ ܕܛܘܼܩܪܹ̈ܝܛܹܐ: ܩܲܒܸܿܠ̣ ܟܘܼܪܤܝܹܗ ܥܲܒܼܕܝܼܫܘܿܥ:
                    ܘܩܵܡ̣ܘ ܐܲܦܸܤ̈ܩܘܿܦܹܐ ܚܲܕܼ ܒܵܬܲܪ ܚܲܕܼ: ܥܕܲܡܵܐ ܠܙܲܒܼܢܹܗ ܕܡܲܥܢܹܐ ܐܲܦܸܤܦܘܼܦܵܐ ܘܤܵܗܕܵܐ
                    ܢܲܨܝܼܚܵܐ. ܘܲܒܼܝ̈ܘܡܵܬܹܗ ܕܗܵܢܵܐ: ܗܘ̤ܵܐ ܪܕܘܼܦܝܵܐ ܥܲܠ ܟܪܸ̈ܤܛܝܵܢܹܐ: ܘܐܸܬܼܥܲܩ̣ܪܲܬ̤
                    ܥܹܕܬܵܐ. ܟܲܕܼ ܐܵܦ ܒܗܘܿܢ ܒܲܒܼܢܲܝ̈ ܟܲܪܟܼܵܐ ܐܸܬܼܚܲܙܝܲܬ̤ ܡܲܪܕܘܼܬܼܵܐ: ܘܡܸܢܗܘܿܢ ܗܘ̤ܵܘ
                    ܥܵܩܘܿܪܹ̈ܐ ܕܥܹܕܬܵܐ ܕܲܡܕܼܝܼܢ̄ܬܗܘܿܢ. ܘܲܗܘ̤ܵܐ ܒܹܗ ܪܕܘܼܦܝܵܐ ܒܟܲܪܟܼܵܐ: ܠܵܘ ܒܲܠܚܘܿܕܼ
                    ܒܩܸܛܠܑܵܐ: ܐܸܠܵܐ ܐܵܦ ܒܒܸܙܬܼܵܐ ܕܩܸܢ̈ܝܵܢܹܐ ܘܒܲܐܤܘܼܪܹ̈ܐ ܘܲܒܼܢܸܓܼ̈ܕܹܐ ܡܲܪܝܼܪܹ̈ܐ.
                    ܐܲܝܟܲܢܵܐ ܕܐܵܦ ܢܸܫܹ̈ܐ ܒ̈ܢܵܬܼ ܩܝܵܡܵܐ: ܕܡܸܫܬܵܘ̈ܕܝܵܢ ܗ̣̄ܘܲܝ̈ ܒܬܼܘܼܠܘܼܬܼܵܐ: ܕܐܸܬܲܝ̈
                    ܗ̣̄ܘܲܝ̈ ܡ̣ܢ ܡܕܝܼܢܲܬܼ ܡܲܠܟܿܘܼܬܼܵܐ: ܡܸܛܠ ܥܸܠܲܬܼ ܪܕܘܼܦܝܵܐ ܕܲܗܘ̤ܵܐ ܒܥܹܕܬܵܐ ܘܥܵܡܪ̈ܵܢ
                    ܒܲܡܕܼܝܼܢ̄ܬܲܢ: ܐܸܬܼܐܟܸܠ̣ܘ ܩܲܪ̈ܨܲܝܗܹܝܢ ܩܕܼܵܡ ܦܲܝܓܼܵܢ ܤܲܠܵܪ: ܡ̣ܢ ܐ̄ܢܵܫܵܐ
                    ܡܵܢܝܼܢܵܝܹ̈ܐ ܕܐܝܼܬܼ ܗ̄ܘ̣ܵܘ ܒܵܗ̇ ܒܲܡܕܝܼܢ̄ܬܼܵܐ. ܘܲܦ̣ܩܲܕܼ ܗܵܘ̇ ܚܲܪܡܵܢܵܐ: ܕܲܠܒܲܪ ܡ̣ܢ
                    ܡܕܼܝܼܢ̄ܬܼܵܐ: ܒܕܘܼܟܿܬܼܵܐ ܕܡܸܬܼܩܲܪܝܵܐ ܚܵܘܪܵܐ: ܢܸܬܼܩܲܛ̈ܠܵܢ.  514  ܘܒܼܵܬܲܪ
                    ܟܘܼܠܵܠܗܹܝܢ ܕܩܲܕܿܝܼ̈ܫܵܬܼܵܐ: ܒܕܘܼܟܿܬܼܵܐ ܗܵܝ̇ ܕܒܼܵܗ̇ ܐܸܬܼܟܲܠܲܠܹܝ̈ܢ: ܡ̣ܢ ܕܡܸܗܹܝܢ
                    ܝܼܥܲܬ̤ ܐܹܬܵܐ: ܘܲܗܘ̤ܵܬܼ ܠܐܵܤܝܘܼܬܼܵܐ ܠܐܲܝܠܹܝܢ ܕܒܼܵܗ̇ ܐܸܬܼܓܵܘܲܤ̣ܘ. ܡܵܢܝܼ̈ܢܵܝܹܐ ܕܹܝܢ
                    ܟܲܕܼ ܚ̣ܙܵܘ ܬܸܕܼܡܘܼܪܬܵܐ ܕܐܸܤ̣ܬܲܥܪܲܬ̤: ܠܵܗ̇ ܠܬܹܬܵܐ ܦܲܤ̣ܩܘܼܗ̇: ܘܲܠܕܼܘܼܟܿܬܼܵܗ̇ ܗܵܝ̇
                    ܐܵܘܩ̣ܕܘܼܗ̇ ܒܢܘܼܪܵܐ. ܐܲܠܵܗܵܐ ܕܹܝܢ ܕܲܠܪ̈ܚܵܡܵܘܗܝ ܠܵܐ ܫܵܒܹ̇ܩ ܕܢܸܬܿܬܿܫܝܼܛܘܼܢ ܡ̣ܢ
                    ܒܥܸܠܕܒܼܵܒܹ̈ܐ: ܐܲܫܠܸܛ̣ ܒܗܘܿܢ ܟܹܐܒܼܵܐ ܕܐܲܪܖܝܵܐ ܕܲܡܢܵܘܲܠ ܗ̄ܘ̣ܵܐ ܠܗܘܿܢ: ܥܕܲܡܵܐ
                    ܕܤܵܦ̣ܘ ܘܲܓܼܡܲܪܘ ܡ̣ܢ ܡܕܝܼܢ̄ܬܼܵܐ. ܘܠܵܗ̇ ܠܕܘܼܟܿܬܼܵܐ ܗܵܝ̇: ܕܐܸܬܼܢܲܨܲܚ̣ ܒܵܗ̇
                    ܩܲܕܿܝܼ̈ܫܵܬܼܵܐ: ܐܝܼܬܼܵܘܗܝ ܫܡܵܗ̇ ܒܹܝܬܼ ܬܹܬܵܐ ܥܕܲܡܵܐ ܠܝܵܘܡܵܢܵܐ: ܘܗܵܫܵܐ ܥܒܝܼܕܼܵܐ
                    ܒܹܝܬܼ ܓܵܘܤܵܐ ܠܟܼܠܗܘܿܢ ܡܗܲܝܡ̈ܢܹܐ. ܘܡ̣ܢ ܫܢܵܐ ܠܲܫܢܵܐ: ܡܵܐ ܕܲܡܫܲܡܠܹܝܢ ܥܘܼܗܕܵܢܵܐ
                    ܕܝܵܘܡܵܐ ܪܲܒܵܐ ܕܲܨܠܝܼܒܼܘܼܬܼܵܐ: ܘܤܵܠ̇ܩܝܼܢ ܠܒܹܝܬܼ ܤܵܗ̈ܕܹܐ ܪܲܒܵܐ ܐܲܝܟܼ ܥܝܵܕܼܵܐ
                    ܕܲܡܕܼܝܼܢ̄ܬܼܵܐ: ܟܢܘܼܫܝܵܐ ܟ̱ܠܹܗ ܥܹܕܬܵܢܵܝܵܐ: ܪܵܥܝܵܐ ܘܡܲܪܥܝܼܬܹܗ ܒܟܼܠ ܬܸܓܼܡܹܝ̈ܗ̇:
                    ܘܲܨܠܝܼܒܼܵܐ ܒܪܹܫܗܘܿܢ ܘܲܩܕܼܵܡܲܝܗܘܿܢ: ܤܵܛܹ̇ܝܢ ܠܒܹܝܬܼ ܬܹܬܵܐ ܒܙܵܘܚܵܐ ܤܲܓܿܝܼܵܐܐ: ܥܲܡ
                    ܬܸܫ̈ܒܿܚܵܬܼܵܐ ܘܩܵܠܹ̈ܐ ܩܲܕܿܝܼ̈ܫܹܐ ܕܬܼܵܘܕܝܼܬܼܵܐ: ܕܦܲܐ̈ܝܵܢ ܠܐܲܠܵܗܵܐ ܡܵܪܵܐ ܕܟܼܠ:
                    ܠܒܸܗܬܿܬܼܵܐ ܕܟܼܵܦܘܿܪܹ̈ܐ ܘܲܠܫܘܼܒܼܗܵܪܵܐ ܕܲܡܗܲܝ̈ܡܢܹܐ: ܘܲܥܠܲܝܢ ܚܲܛܵܝܹ̈ܐ ܪ̈ܲܚܡܹܐ
                    ܘܲܚܢܵܢܵܐ ܘܦܘܼܪܩܵܢܵܐ: ܐܵܡܹܝܢ܀ ܗܵܠܹܝܢ ܗܵܟܲܢܵܐ. 
                 ܡܸܛܠ ܥܲܫܝܼܢܘܼܬܹܗ ܕܹܝܢ ܕܲܪܕܼܘܼܦܝܵܐ: ܐ̄ܢܵܫܵܐ ܙܥܘܿܪ̈ܲܝ ܒܡܸܢܝܢܵܐ ܡ̣ܢ
                    ܟܲܪܟܼܵܐ ܥܲܡ ܪܵܥܝܵܐ ܘܓܲܢ̄ܒܵܪ ܚܲܝܠܵܐ ܒܚܵܝܲܪܬܵܐ ܕܥܲܠ ܓܸܢ̄ܒܼ ܟܲܪܟܼܵܐ: ܒܘܲܥܪܵܐ
                    ܕܐܵܓܼܘܼܪܤܵܐ ܚܲܕܼ ܕܚܵܨܵܐ ܡܸܬܼܩܪܸܐ: ܒܸܢ̈ܝܵܢܹܐ ܙܥܘܿܪܹ̈ܐ ܐܲܝܟܼ ܕܲܠܥܹܕܬܵܐ ܥ̣ܒܲܕܼܘ:
                    ܘܩܘܼܕܼܫܵܐ ܡܲܛܫܝܵܐܝܼܬܼ ܬܲܡܵܢ ܫܵܩ̇ܠܝܼܢ ܗ̄ܘ̣ܵܘ. ܘܟܲܕܼ ܐܲܪܓܸܫ̣ܘ ܗ̄ܘ̣ܵܘ ܚܲܢ̈ܦܹܐ
                    ܛܵܥܲܝ̈ܵܐ ܒܐܲܬܼܠܹܝܛܵܐ  515  ܙܪܝܼܙܵܐ: ܠܬܲܡܵܢ ܐܸܙܲܠ̣ܘ ܥܠܵܘܗܝ. ܘܐܲܝܟܼ
                    ܚܲܝ̈ܘܵܬܼܵܐ ܤܵܪ̈ܘܿܚܵܬܼܵܐ ܕܠܵܐ ܪ̈ܲܚܡܹܐ ܐܸܫ̣ܬܲܢܲܕܼܘ ܒܹܗ. ܘܟܲܕܼ ܚ̣ܙܵܘ ܕܲܠܨܸܒܼܝܵܢܗܘܿܢ
                    ܠܵܐ ܫܵܠܹ̇ܡ: ܘܠܵܐ ܡܚܲܠܸܦ ܫܪܵܪܵܐ ܒܟܲܕܵܒܼܘܼܬܼܵܐ: ܪܲܓܼܡ̣ܘܼܗܝ ܒܡܲܤܲܩܬܼܵܐ ܕܲܠܥܸܠ ܡ̣ܢ
                    ܚܵܨܵܐ. ܘܲܢ̣ܤܲܒܼ ܟܠܝܼܠܵܐ ܕܤܵܗܕܘܼܬܼܵܐ ܒܲܪܓܼܘܼܡܝܵܐ ܕܟܹ̈ܐܦܹܐ. 
                 ܘܒܼܵܬܼܪܹܗ ܩܵܡ̣ ܒܲܕܕܲܒܿܪܵܢܘܼܬܼܵܐ ܐܝܼܤܚܵܩ ܛܘܼܒܼܵܢܵܐ ܡ̣ܢ ܫܲܪܒܿܬܼܵܐ
                    ܝܼܕܼܝܼܥܬܼܵܐ: ܘܐܵܦ ܗ̤ܘ ܐܸܬܼܟܲܠܲܠ̣ ܒܤܵܗܕܘܼܬܼܵܐ: ܘܪܲܓܼܡ̣ܘܼܗܝ ܚܹܐܪܹ̈ܐ ܕܟܲܪܟܼܵܐ:
                    ܕܒܲܫܡܵܐ ܟܪܸ̈ܤܛܝܵܢܹܐ ܩܵܪܹܝܢ ܗ̄ܘ̣ܵܘ ܢܲܦܫܗܘܿܢ: ܕܐܸܬܼܐܠܸܨܘ ܡ̣ܢ ܦܘܼܩܕܵܢܵܐ ܕܡܲܠܟܵܐ.
                    ܘܐܸܬܼܪܓܸܡ ܒܬܸܠܠܵܐ ܕܲܠܥܸܠ ܡ̣ܢ ܟܸܢܵܪ ܩܪܝܼܬܼܵܐ ܕܲܒܼܢܸܩܵܛܘܼܪ ܐܵܘܢܵܐ. ܘܩܵܡ̣ ܡ̣ܢ
                    ܒܵܬܼܪܹܗ ܝܘܿܚܲܢܵܢ: ܗܵܘ̇ ܕܗ̤ܘ: ܥܲܡ ܡܵܪܝ ܝܲܥܩܘܿܒܼ ܐܲܦܸܤܩܘܿܦܵܐ ܕܲܢܨܝܼܒܼܝܼܢ:
                    ܘܝܘܿܚܲܢܵܢ ܐܲܦܸܤܩܘܿܦܵܐ ܕܐܲܪܒܹܿܝܠ: ܒܲܟܼܢܘܼܫܝܵܐ ܩܲܕܿܝܼܫܵܐ ܕܲܬܼܠܵܬܼܡܵܐܐ
                    ܘܲܬܼܡܲܢܬܲܥܤܲܪ ܨܵܡ̇ܚܝܼܢ ܗ̄ܘ̣ܵܘ: ܘܒܼܵܬܲܪ ܝܘܿܚܲܢܵܢ ܩܵܡ̣ ܥܲܩܸܒܼܠܵܗܵܐ. ܗܵܢܵܐ ܕܹܝܢ
                    ܛܘܼܒܼܵܢܵܐ ܟܲܕܼ ܐܝܼܬܼܵܘܗܝ ܐܲܝܟܼ ܒܲܪ ܫܢܝܼ̈ܢ ܚܲܡܫܲܥܸܤܪܹ̈ܐ: ܫܲܪܝܼ ܒܥܲܡ̈ܠܹܐ
                    ܕܲܡܝܲܬܿܪܘܼܬܼܵܐ: ܘܙܸܕܼ̈ܩܵܬܼܵܐ ܥܵܒܹ̇ܕܼ ܗ̄ܘ̣ܵܐ: ܗܵܟܲܢܵܐ ܕܐܵܦ ܕܲܗܒܼܵܐ ܘܤܹܐܡܵܐ
                    ܘܲܠܒܼܘܼ̈ܫܹܐ ܟܲܤܝܵܐܝܼܬܼ ܫܵܩܹ̇ܠ ܗ̄ܘ̣ܵܐ ܡ̣ܢ ܐܲܒܼܵܗܵܘ̈ܗܝ: ܘܠܲܐܟܼܤܢܵܝܹ̈ܐ ܡܦܲܠܸܓܼ
                    ܗ̄ܘ̣ܵܐ. ܘܟܲܕܼ ܫܡܲܥ̣ ܐܲܒܼܘܼܗܝ ܕܐܝܼܬܼܵܘܗܝ ܗ̄ܘ̣ܵܐ ܒܬܲܪܥܵܐ ܕܡܲܠܟܵܐ: ܘܩܵܐܹ̇ܡ ܗ̄ܘ̣ܵܐ
                    ܒܕܲܪܓܼܵܐ ܕܪܸܕܼܝܵܐ ܕܒܵܙܕܲܝ. ܐܲܝܟܼ ܕܢܸܫܬܲܦܲܪ ܠܡܲܠܟܵܐ: ܟܦܲܪ ܒܲܡܫܝܼܚܵܐ ܘܲܤ̣ܓܸܕܼ
                    ܠܢܘܼܪܵܐ. ܗ̤ܘ ܕܹܝܢ ܛܘܼܒܼܵܢܵܐ ܐܲܪܦ̣ܝܼ ܒܹܝܬܼ ܐܲܒܼܵܗܵܘ̈ܗܝ: ܘܲܢܦܲܩ̣ ܠܐܲܟܼܤܸܢܝܵܐ.  516  ܘܡܸܛܠ ܥܲܡܠܵܘ̈ܗܝ ܪܵܘܪ̈ܒܹܐ ܘܢܸܨܚܵܢܵܘ̈ܗܝ ܫܒܼܝܼܚܹ̈ܐ: ܐܸܬܼܓܿܒܼܝܼ
                    ܕܢܲܩܘܼܡ ܒܲܡܕܲܒܿܪܵܢܘܼܬܼܵܐ ܕܥܹܕܬܵܐ ܕܝܼܠܹܗ ܕܟܲܪܬܼܵܐ. ܘܡ̣ܢ ܕܩܵܡ̣: ܒܢܵܗ̇ ܠܥܹܕܬܵܐ
                    ܕܐܸܬܼܥܲܩ̣ܪܲܬ̤ ܒܝܵܘ̈ܡܲܝ ܡܲܥܢܹܐ. ܘܚܸܫ̈ܠܵܬܼܵܐ ܕܕܲܗܒܼܵܐ ܘܲܕܼܤܹܐܡܵܐ ܥܲܡ ܫܹܐܪ̈ܵܝܹܐ
                    ܘܡܵܐܢܹ̈ܐ ܘܲܦܪ̈ܓܹܐ: ܠܡܘܼܠܵܝ ܬܸܫܡܸܫܬܼܵܐ: ܝܲܗ̣̄ܒܼ ܒܵܗ̇. ܘܡ̣ܢ ܒܵܬܲܪ ܕܡ̣ܝܼܬܼܘ
                    ܐܲܒܼܵܗܵܘ̈ܗܝ: ܟ̱ܠܹܗ ܓܲܙܵܐ ܕܐܸܫܟܲܚ̣ ܠܗܘܿܢ: ܝܗ̣ܒܹܗ ܠܥܹܕܬܵܐ. ܘܬܲܠ̣ܡܸܕܼ ܘܐܲܡ̣ܡܸܕܼ
                    ܗ̄ܘ̣ܵܐ ܠܤܲܓܿܝܼ̈ܐܹܐ. ܘܥܲܡ ܗܵܠܹܝܢ ܘܐܵܦ ܠܲܩܪܝܼܬܼܵܐ ܕܬܼܝܼܫܝܼܢ ܡܸܬܼܩܲܪܝܵܐ: ܗܵܝ̇ ܕܥܲܠ
                    ܫܸܡ ܬܸܫܥܝܼܢ ܫܲܪ̈ܒܼܵܢ: ܕܐܝܬܝܼ ܫܵܒܼܘܿܪ ܡܲܠܟܵܐ ܡ̣ܢ ܡܲܝܫܵܢ ܘܲܢܨܲܒܼ ܒܵܗ̇: ܐܸܫܬܲܡ̣ܗܲܬ̤
                    ܗܵܟܲܢܵܐ. ܘܤܵܓܼܕܝܼܢ ܗ̄ܘ̣ܵܘ ܠܢܵܢܝܼ ܕܲܝܘܵܐ: ܕܐܲܝܬܝܼܘ ܥܲܡܗܘܿܢ ܡ̣ܢ ܐܲܬܼܪܗܘܿܢ. ܚܲܕܼ
                    ܡ̣ܢ ܚܲܡܫܵܐ ܕܝܼܠܵܗ̇ ܕܲܩܪܝܼܬܼܵܐ: ܝܵܪܬܿܘܼܬܼܵܐ ܕܐܲܒܼܵܗܵܘ̈ܗܝ ܕܝܼܠܹܗ ܕܛܘܼܒܼܵܢܵܐ
                    ܐܝܼܬܹܝܗ̇ ܗ̄ܘ̣ܵܬܼ: ܗܵܝ ܕܩܸܢܝܵܢܵܐ ܒܪܵܘܡܵܐ ܟܸܘܤܪܘܵܐܢ ܡܸܬܼܩܲܪܝܵܐ ܗ̄ܘ̣ܵܬܼ: ܥܲܠ ܫܡܵܐ
                    ܕܐܲܒܼܵܗܵܘ̈ܗܝ ܕܛܘܼܒܼܵܢܵܐ. ܠܵܗ̇ ܠܗܵܕܹܐ ܩܪܝܼܬܼܵܐ ܬܲܠܡ̣ܼܵܗ̇ ܗ̤ܘ ܢܲܨܝܼܚܵܐ: ܘܐܲܥ̣ܠܵܗ̇
                    ܠܲܛܝܵܪܵܐ ܕܚܲܝܹ̈ܐ. 
                 ܘܡܸܛܠ ܐܵܬܼ̈ܘܵܬܼܵܐ ܘܬܸܕܼܡܪ̈ܵܬܼܵܐ ܕܤܵܥܲ݁ܪ ܗ̄ܘ̣ܵܐ ܪܸܡܙܵܐ ܫܡܲܝܵܢܵܐ
                    ܒܐܝܼܕܼܵܘ̈ܗܝ: ܦܪܲܚ̣ ܗ̄ܘ̣ܵܐ ܘܲܡܛܵܐ ܛܸܒܵܐ ܕܢܸܨܚܵܢܵܘ̈ܗܝ ܠܒܹܗܪܵܡ ܒܲܪ ܫܵܒܼܘܿܪ ܡܲܠܟܵܐ
                    ܕܦܵܪܹܣ: ܕܐܝܼܬܼ ܗ̄ܘ̣ܵܬܼ ܠܹܗ ܒܲܪܬܼܵܐ ܘܡܸܬܼܡܲܥܤܵܐ ܗ̄ܘ̣ܵܬܼ ܡ̣ܢ ܫܹܐܕܼܵܐ ܛܲܢܦܵܐ. ܘܟܲܕܼ
                    ܐܸܬܼܒܿܥ̣ܝܼ ܩܲܕܿܝܼܫܵܐ ܥܲܩܒܼܠܵܗܵܐ ܠܬܲܡܵܐ: ܤܵܡ̣ ܥܠܹܝܗ̇ ܕܲܛܠܝܼܬܼܵܐ ܐܝܼܕܼܵܐ
                    ܘܐܸܬܼܚܲܠܡܲܬ̤. ܘܐܲܦ̣ܝܼܤܹܗ ܠܡܲܠܟܵܐ ܕܠܵܐ ܢܸܬܼܥܲܩܪ̈ܵܢ ܥܹ̈ܕܵܬܼܵܐ: ܘܐܲܝܠܹܝܢ ܕܐܸܬܼܥ̣ܩܲܪ
                         517  ܢܸܬܼܒܲܢ̈ܝܵܢ. ܘܫܲܡ̣ܥܥܹܗ ܡܲܠܟܵܐ: ܘܲܗܘ̤ܵܐ ܐܲܝܟܼ ܨܸܒܼܝܵܢܹܗ.
                    ܘܠܲܬܿܪܹܝܢ ܫܦܵܝܹ̈ܐ: ܠܡܵܐܢܝܼ ܘܲܠܙܵܪܵܕܘܼܐܫܬ: ܕܐܸܬܼܚܙܝܼܘ ܒܙܲܒܼܢܹܗ ܕܢܲܨܝܼܚܵܐ: ܥ̣ܩܲܪ
                    ܘܒܲܛܸܠ̣. ܘܲܠܟܼܵܦܘܿܪܘܼܬܼܵܐ ܘܲܠܡܵܪܘܿܕܼܘܼܬܼܵܐ ܕܲܒܼܬܲܪܬܹܝܢ ܫܲܪ̈ܒܼܵܢ ܐܸܬܼܚܲܙܝܲܬ̤:
                    ܗܵܢܹ̇ܝܢ ܕܐܲܝܬܿܝܼ ܤܲܪܕܵܢܵܐ: ܘܲܢܨܲܒܼ ܒܹܗ ܒܟܲܪܟܼܵܐ. ܕܲܫܡܵܗܲܝ̈ܗܘܿܬܢ ܐܝܼܬܲܝܗܘܿܢ
                    ܗܵܠܹܝܢ: ܦܲܪܹܝܢ ܗܵܘ̇ ܕܲܟܼܦܲܪ: ܘܒܼܵܠܵܫ ܗܵܘ̇ ܕܲܡ̣ܪܲܕܼ. ܠܦܲܪܹܝܢ ܒܲܪ ܥܲܡܲܠܟܵܐ
                    ܘܲܠܒܼܵܠܵܫ ܗܵܕܹܐ ܝܵܪܬܘܼܬܼܵܐ ܒܝܼܫܬܼܵܬܐ ܗܘ̤ܵܬܼ ܠܹܗ ܒܟܲܪܟܼܵܐ. ܘܲܠܗܵܢܵܐ ܙܲܪܥܵܐ ܒܝܫܵܐ
                    ܥ̣ܩܲܪ ܢܲܨܝܼܚܵܐ ܥܲܩܸܒܼܠܵܗܵܐ: ܘܚܲܝܸܒܼ ܐܸܢܘܿܢ ܒܲܕܼܪܵܫܹܗ. ܒܪܲܡ ܕܹܝܢ ܗܸܢ̣ܘܿܢ ܒܲܙܒܲܢ
                    ܓܲܠܝܵܐܝܼܬܼ ܘܒܲܙܒܲܢ ܟܲܤܝܵܐܝܼܬܼ: ܥܕܲܡܵܐ ܠܙܲܒܼܢܹܗ ܕܟܼܘܼܪܤܘܼ ܩܵܝ̇ܡܝܼܢ ܗ̄ܘ̣ܵܘ ܥܲܡ
                    ܥܸܩܵܪܹܗ ܡܲܪܝܼܪܵܐ ܕܡܵܐܢܝܼ ܠܝܼܛܵܐ: ܘܐܵܦ ܗܸܢܘ̣ܿܢ ܒܛܸܠ̣ܘ. 
                 ܘܡ̣ܢ ܒܵܬܲܪ ܕܲܫ̣ܟܸܒܼ ܚܲܤܝܵܐ ܕܐܲܠܵܗܵܐ ܥܲܩܸܒܼܠܵܗܵܐ: ܠܒܲܪܚܲܕܼܒܿܫܲܒܵܐ
                    ܓܒܼܵܬ̤ ܡܲܪܥܝܼܬܼܵܐ ܕܲܒܼ̈ܢܲܝ ܟܲܪܟܼܵܐ. ܤܗܝܼܕܼ ܗ̄ܘ̣ܵܐ ܓܹܝܪ ܒܐܲܬܼ̈ܘܵܬܼܵܐ
                    ܘܬܸܕܼܡܪ̈ܵܬܼܵܐ: ܘܲܒܼܟܼܠ ܥܒܼܵܕܐ ܡܝܲܬܿܪܹ̈ܐ. ܘܡ̣ܢ ܕܲܫܟܸܒܼ ܐܵܦ ܗܵܢܵܐ ܛܘܼܒܼܵܢܵܐ: ܩܵܡ̣
                    ܡ̣ܢ ܒܵܬܼܪܹܗ ܐܲܟܼܤܢܵܝܵܐ: ܓܲܒܼܪܵܐ ܬܲܡܝܼܡܵܐ ܘܡܲܟܿܝܼܟܼܵܐ ܘܲܡܫܲܡܠܲܝ ܒܙܲܕܝܼܩܘܼܬܼܵܐ.
                    ܘܡ̣ܢ ܕܐܵܦ ܗܵܢܵܐ ܢܲܨܝܼܚܵܐ ܫܲܢ̣ܝܼ ܠܘܵܬܼ ܡܵܪܹܗ: ܩܲܒܸܿܠ̣ ܟܘܼܪܤܝܹܗ ܓܲܒܼܝܵܐ ܘܲܡܝܲܬܿܪܵܐ
                    ܘܲܡܨܲܒܲܬܼ ܒܫܘܼܦܪܹ̈ܐ ܪ̈ܘܼܚܵܢܵܝܹܐ ܡܵܪܝ ܫܵܒܼܘܿܪ ܒܪܲܙ ܡܸܢܹܗ ܕܟܲܪܟܼܵܐ. ܘܫܲܪܒܿܬܹܗ
                    ܐܝܼܬܹܝܗ̇ ܗܵܝ̇ ܕܡܸܬܼܩܲܪܝܵܐ ܕܒܹܝܬܼ ܐܲܪܕܵܫܝܼܪ ܒܲܪ ܫܵܒܼܘܿܪ ܒܪܲܙ. ܗܵܢܵܐ ܕܹܝܢ ܓܲܒܼܝܵܐ
                    ܐܲܪܦ̣ܝܼ ܠܲܡܕܲܒܿܪܵܢܘܼܬܼܵܐ: ܘܲܢܦܲܩ̣ ܠܹܗ ܠܕܲܝܪܵܐ ܕܐܲܒܼܝܼ̈ܠܹܐ: ܘܬܲܡܵܢ ܦܵܠܲܚ̇ ܗ̄ܘ̣ܵܐ
                    ܥܲܡܗܘܿܢ ܙܲܗܝܵܐܝܼܬܼ ܒܟܼܠܵܗ̇ ܕܲܟܼܝܘܼܬܼܵܐ  518  ܘܩܲܕܿܝܼܫܘܼܬܼܵܐ. ܘܲܒܼܤܲܝܦܵܐ
                    ܕܪܘܼܚܵܐ ܕܐܲܚܝܼܕܼ ܗ̄ܘ̣ܵܐ: ܥ̣ܩܲܪ ܘܕܲܟܿܝܼ ܙܝܼܙܵܢܵܘ̈ܗܝ ܕܡܵܐܢܝܼ ܡ̣ܢ ܚܲܩܵܠܵܐ ܗܵܝ̇
                    ܕܟܲܪܟܼܵܐ. ܘܠܲܒܼ̈ܢܲܝ ܓܸܢܤܹܗ ܕܐܝܼܬܲܝܗܘܿܢ ܗ̄ܘ̣ܵܘ ܡ̣ܢ ܫܲܪܒܵܬܼܵܐ ܗܵܝ̇ ܕܐܲܝܬܝܼ
                    ܤܹܠܵܘܦܩܘܿܣ ܡ̣ܢ ܐܲܬܼܪܵܐ ܕܐܸܨܛܲܗܲܪ: ܥ̣ܒܲܕܼ ܐܸܢܘܿܢ ܡܵܐܢܹ̈ܐ ܕܟܲܝ̈ܵܐ ܠܫܸܡ ܒܵܪܘܿܝܵܐ.
                    ܘܲܒܼܢ̣ܵܐ ܒܝܵܪܬܿܘܼܬܼܘܿܢ ܒܲܝܬܼܵܐ ܠܐܲܟܼܤܢܵܝܹ̈ܐ: ܕܒܹܗ ܡܸܬܼܩܲܒܿܠܝܼܢ ܘܡܸܬܿܬܿܢܝܼܚܝܼܢ
                    ܟܪ̈ܝܼܗܹܐ ܘܠܲܝܼ̈ܨܹܐ ܘܡܸܤ̈ܟܹܢܹܐ ܘܲܤܢܝܼ̈ܩܹܐ. ܘܝܲܗ̣̄ܒܼ ܠܹܗ ܠܒܲܝܬܼܵܐ ܘܲܦܪܲܫ̣ ܠܹܗ
                    ܩܸܢܵܝܵܢܵܐ ܠܐܲܓܼܪܵܐ ܕܐܵܤܘ̈ܬܼܵܐ ܕܗܵܘܹ̇ܝܢ ܒܹܗ: ܘܲܠܬܼܘܼܪܤܝܵܐ ܕܨܸܒܼ̈ܘܵܬܼܵܐ ܕܚܵܫ̈ܚܵܢ
                    ܠܐܲܝܠܹܝܢ ܕܐܵܬܹ̇ܝܢ ܠܡܸܬܼܐܲܤܵܝܘܼ. 
                 ܘܡ̣ܢ ܕܐܸܬܼܟܿܢܸܫ̣ ܒܲܫܠܵܡܵܐ ܠܘܵܬܼ ܡܵܪܹܗ: ܩܵܡ̣ ܠܹܗ ܒܵܬܼܪܹܗ
                    ܐܲܬܼܠܹܝܛܵܐ ܢܲܨܝܼܚܵܐ: ܟܵܗܢܵܐ ܢܲܟܼܦܵܐ ܘܢܵܘܤܵܐ ܕܩܲܕܝܼܫܘܼܬܼܵܐ: ܡܵܪܝ ܝܘܿܚܢܵܢ: ܗܵܘ̇
                    ܕܐܲܫܬܲܡ̣ܠܝܼ ܒܬܲܪ̈ܬܲܝܗܹܝܢ: ܗܵܢܵܘ ܕܹܝܢ ܒܟܼܵܗܢܘܼܬܼܵܐ ܘܲܒܼܤܵܗܕܘܼܬܼܵܐ. ܒܙܲܒܼܢܹܗ ܕܹܝܢ
                    ܕܗܵܢܵܐ: ܝܲܙܕܓܲܪܕ ܗܵܘ̇ ܐܝܼܬܼܵܘܗܝ ܚܡܝܼܫܵܝܵܐ ܠܫܵܒܼܘܿܪ: ܡܲܡܠܸܟܼ ܗ̄ܘ̣ܵܐ ܒܐܲܪܥܵܐ
                    ܕܦܵܪܹܣ. ܘܒܲܕܼܡܘܼܬܼ ܫܵܒܼܘܿܪ ܐܵܦ ܗ̤ܘ ܐܲܩ̣ܝܼܡ ܕܪܘܼܦܝܵܐ ܥܲܠ ܥܹܕܬܹܗ ܕܐܲܠܵܗܵܐ: ܟܲܕܼ
                    ܥܕܲܡܵܐ ܠܲܫ̈ܢܲܝܵܐ ܫܒܲܥ ܒܲܤܝܼܡܵܐܝܼܬܼ ܡܸܬܿܕܲܒܲܪ ܗ̄ܘ̣ܵܐ. ܘܲܒܼܫܢ̄ܬܼܵܐ ܕܲܬܼܡܵܢܹܐ ܩ̣ܛܲܠ
                    ܒܲܪܬܹܗ: ܕܐܝܼܬܹܝܗ̇ ܗ̄ܘ̣ܵܬܼ ܐܲܢ̄ܬܿܬܹܗ: ܘܲܠܪܵܘܪ̈ܒܼܵܢܹܐ ܕܡܲܠܟܿܘܼܬܹܗ. ܘܐܸܙܲܠ̣
                    ܠܐܲܬܼܪܵܐ ܕܛܲܫܘܿܠ: ܘܫܲܥ̣ܒܸܕ ܠܡܲܠܟܿܘܿܢܹ̈ܐ ܕܬܲܡܵܢ. ܘܲܒܼܢ̣ܵܐ ܬܲܡܵܢ ܡܕܝܼܢ̄ܬܼܵܐ:
                    ܘܲܩ̣ܪܵܗ̇ ܥܲܠ ܫܡܹܗ: ܫܲܗܪܸܤܬܵܢ ܝܲܙܓܲܪܕ. ܘܟܲܕܼ ܬܲܡܵܢ ܗ̄ܘ̣ܵܐ: ܛ̣ܪܲܕ ܠܲܟܼܪ̈ܤܛܝܵܢܹܐ
                    ܡ̣ܢ ܡܲܫܪܝܼܬܹܗ. ܤ̣ܒܲܪ ܠܹܗ ܕܵܘܝܝܵܐ: ܕܡܸܛܠ ܟܪܸ̈ܤܛܝܵܢܹܐ ܙܵܟܹ̇ܝܢ ܠܹܗ ܒܥܸܠܕܒܼܵܒܹ̈ܐ.
                    ܘܲܓܒܼܵܐ ܓܲܒܼܪܹ̈ܐ ܡܓܼܘܼ̈ܫܹܐ ܬܡܵܢܝܵܐ ܐܲܠܦܹ̈ܐ: ܘܲܫܩܲܠ̣ ܡܸܢܗܘܿܢ  519 
                    ܓܲܒܼܪܘܼܬܼܗܘܿܢ: ܘܐܲܩ̣ܝܼܡ ܐܸܢܘܿܢ ܥܲܠ ܬܸܫܡܸܫܬܹܗ: ܘܤܓܿܝܼ̈ܐܐ ܡܸܢܗܘܿܢ ܡ̣ܝܼܬܼܘ ܒܗܵܢܵܐ
                    ܓܙܵܪ ܕܝܼܢܵܐ. ܘܲܠܛܲܟܼܤܵܐ ܗܵܘ̇ ܕܐܝܼܬܼ ܗ̄ܘ̣ܵܐ ܒܡܲܠܟܲܝ̈ ܦܵܪܹܣ: ܕܲܒܼܟܼܠ ܪܹܫ ܝܲܪܚܵܐ
                    ܒܫܲܒܼܥܵܐ ܝܵܘ̈ܡܝܼܢ: ܟܠ ܚܲܕܼ ܚܲܕܼ ܡ̣ܢ ܝܼܕܝܼ̈ܥܹܐ ܢܸܥܘܿܠ ܘܢܹܐܡܲܪ ܕܝܼܢܵܐ ܕܲܛܠܝܼ̈ܡܹܐ:
                    ܘܟܼܠ ܤܘܼܥܪ̈ܵܢܹܐ ܐܲܝܠܹܝܢ ܕܠܵܘ ܛܵܒܼܵܐܝܼܬܼ ܡܸܬܼܦܲܪܢܤܝܼܢ ܢܵܘܕܲܥ ܩܕܼܵܡ ܡܲܠܟܵܐ: ܠܗܵܢܵܐ
                    ܛܲܟܼܤܵܐ ܐܲܥ̣ܒܿܪܹܗ ܗܵܘ̇ ܪܲܫܝܼܥܵܐ. ܘܟܲܕܼ ܗܦܲܟܼ ܡ̣ܢ ܛܲܫܘܿܠ ܘܐܸܬܼܵܐ ܠܒܹܝܬܼ
                    ܡܲܠܟܿܘܼܬܹܗ: ܟܬܼ̇ܒܼ ܠܛܲܗܡܝܼܙ ܓܲܪܕ ܡܘܼܢܪܵܙܕܒܸܕ ܕܐܝܼܬܼܵܘܗܝ ܗ̄ܘ̣ܵܐ ܒܲܢܨܝܼܒܼܝܼܢ:
                    ܕܡܸܬܼܦܲܫܲܩ ܡܛܲܟܿܤܵܢܵܐ ܕܲܡܓܼܘܼܫܘܼܬܼܵܐ: ܕܢܹܐܙܠܘܼܢ ܥܲܡܹܗ ܤܵܪܘܿܫܵܐ ܘܪܵܙܪܵܕܝܼ
                    ܕܐܲܬܼܪܵܐ ܕܐܲܪܙܘܿܢ: ܕܲܫܡܹܗ ܗ̄ܘ̣ܵܐ ܐܵܕܼܘܿܦܪܵܙܓܲܪܕ: ܘܕܼܵܤܬܿ ܒܸܪܗܵܡ ܪܵܕ ܕܚܲܕܝܲܒܼ
                    ܘܲܕܼܒܹܝܬܼ ܓܲܪ̈ܡܲܝ: ܕܲܫܡܹܗ ܗ̄ܘ̣ܵܐ ܤܘܿܪܝܼܢ. ܕܢܹܐܙܠܘܼܢ ܠܟܲܪܟܼܵܐ ܬܠܵܬܲܝ̈ܗܘܿܢ:
                    ܘܲܒܼܫܸ̈ܕܠܹܐ ܘܲܒܼܡܵܘ̈ܗܒܼܵܬܼܵܐ ܢܹܐܠܨܘܼܢ ܠܲܟܼܪܸ̈ܤܛܝܵܢܹܐ ܕܗܵܠܹܝܢ ܐܲܪܒܿܥܵܐ
                    ܐܲܬܼܪ̈ܵܘܵܬܼܵܐ: ܕܲܠܗܘܿܢ ܡܕܲܒܿܪܝܼܢ ܗ̄ܘ̣ܵܘ ܗܵܠܹܝܢ ܐܲܪܒܿܥܵܐ ܫܲܠܝܼܛܵܢܝܼ̈ܢ ܕܲܪܫܝܼܡܝܼܢ
                    ܡ̣ܢ ܠܥܸܠ: ܥܕܲܡܵܐ ܕܟܼܵܦ̇ܪܝܼܢ ܒܲܡܫܝܼܚܵܐ ܘܤܵܓܼܕܝܼܢ ܠܢܘܼܪܵܐ. ܘܐܸܢܗ̤ܘ ܕܲܠܫܸܡܫܵܐ ܠܵܐ
                    ܤܵܓܼܕܝܼܢ: ܘܲܠܢܘܼܪܵܐ ܘܡܲܝ̈ܵܐ ܠܵܐ ܡܕܲܒܿܚܝܼܢ: ܠܢܸ̈ܓܼܕܹܐ ܘܠܲܤܪ݁ܵܩܹܐ ܘܲܠܡܵܘܬܵܐ
                    ܕܤܲܝܦܵܐ ܢܸܫܬܲܠܡܘܼܢ. 
                 ܘܐܸܬܼ݂ܵܐ ܘܥܲܠ̣ ܠܟܲܪܟܼܵܐ ܛܲܗܡܝܼܙ ܓܲܪܕ ܘܲܕܼܥܲܡܹܗ: ܒܚܲܡܸܫܬܲܥܤܲܪ
                    ܒܬܲܡܘܼܙ ܝܲܪܚܵܐ. ܘܲܠܪܹ̈ܫܹܐ ܘܚܹܐܪܹ̈ܐ ܘܫܲܪܟܵܐ ܕܝܼܕܼܝܼ̈ܥܹܐ ܕܲܒܼܟܲܪܟܼܵܐ: ܢܲܓܸܕܼܘ:
                    ܘܐܲܪܡ̣ܝܼܘ ܒܹܝܬܼ ܐܲܤܝܼܪܹ̈ܐ. ܘܫܲܕܲܪܘ ܦܲ̈ܝ̈ܓܹܐ ܕܠܵܐ ܪ̈ܲܚܡܹܐ  520 
                    ܠܐܲܬܼܪ̈ܵܘܵܬܼܵܐ ܪ̈ܲܚܝܼܩܹܐ: ܘܦܲܩܸܕܼܘ ܐܸܢܘܿܢ: ܕܟܼܠ ܕܡܸܫܟܿܚܝܼܢ ܐܢ̄ܬܿܘܿܢ ܡ̣ܢ
                    ܟܪܸ̈ܤܛܝܵܢܹܐ: ܒܐܲܤܘܼܪܹ̈ܐ ܩܫܲܝ̈ܵܐ ܢܹܐܬܼܘܿܢ ܠܗܵܪܟܵܐ. ܕܐܸܢ ܠܵܐ ܟܸܦ̇ܪܝܼܢ
                    ܒܗܲܝܡܵܢܘܼܬܼܗܘܿܢ: ܒܡܵܘ̈ܬܹܐ ܡܫܲܚ̈ܠܦܹܐ ܢܹܐܒܼܕܿܘܼܢ. ܝܘܿܚܲܢܵܢ ܕܹܝܢ ܐܲܦܸܤܩܘܿܦܵܐ
                    ܕܟܲܪܟܼܵܐ: ܟܲܕܼ ܚ̣ܙܵܐ ܐܲܝܕܵܐ ܕܲܗܘ̤ܵܬܼ: ܠܦܵܛܪܝܼܪܵܟܵܐ ܕܐܲܢܛܝܘܿܟܼܝ ܟܬܲܒܼ: ܕܲܢܨܲܠܘܿܢ
                    ܥܠܵܘܗܝ ܘܥܲܠ ܡܲܪܥܝܼܬܹܗ: ܕܲܢܥܲܕܲܪ ܐܸܢܘܿܢ ܐܲܠܵܗܵܐ: ܘܲܕܼܢܲܦܸܩ ܐܸܢܘܿܢ ܒܙܵܟܼܘܼܬܼܵܐ ܡ̣ܢ
                    ܐܵܓܼܿܘܿܢܵܐ ܗܵܢܵܐ ܕܠܹܗ ܐܸܬܼܩ̣ܪܝܼܘ. ܗ̤ܘ ܕܹܝܢ ܩܲܕܝܼܫܵܐ ܝܘܿܚܲܢܵܢ: ܡ̣ܢ ܝܵܘܡܵܐ ܕܥܲܠ̣
                    ܛܲܗܡܝܼܙ ܓܲܪܕ ܠܟܲܪܟܼܵܐ: ܡ̣ܢ ܚܲܡܸܫܬܲܥܤܲܪ ܒܬܲܡܘܼܙ ܘܲܥܕܲܡܵܐ ܠܥܸܤܪܝܼܢ ܒܐܵܒܿ ܝܲܪܚܵܐ:
                    ܡ̣ܢ ܗܲܝܟܿܠܵܐ ܠܵܐ ܢܦܲܺܩ̣. ܐܸܠܵܐ ܗ̤ܘ ܥܲܡ ܡܲܪܥܝܼܬܹܗ ܒܥܹܕܬܵܐ ܟܢܝܼܫܝܼܢ ܗ̄ܘ̣ܵܘ:
                    ܘܩܵܪܹܝܢ ܗ̄ܘ̣ܵܘ ܠܐܲܠܵܗܵܐ ܒܲܚܢܲܓܼܬܼܵܐ ܕܢܹܐܬܸܐ ܠܥܘܼܕܼܪܵܢܗܘܿܢ. ܘܲܒܼܗܘܿܢ ܒܗܵܢ̇ܘܿܢ
                    ܝܵܘ̈ܡܵܬܼܵܐ ܦ̣ܩܲܕܼ ܛܲܗܡܝܼܙ ܓܲܪܕ: ܘܦܲܪܫ̣ܘܗܝ ܠܪܵܥܝܵܐ ܡ̣ܢ ܡܲܪܥܝܼܬܹܗ: ܘܐܲܡ̣ܝܘܼܗܝ
                    ܒܹܝܬܼ ܐܲܤܝܼܪܹ̈ܐ: ܥܲܡ ܤܘܿܓܼܵܐܐ ܕܲܟܼܪܸ̈ܤܛܝܵܢܹܐ ܕܐܲܤܝܼܪܝܼܢ ܗ̄ܘ̣ܵܘ ܬܲܡܵܢ: ܘܐܵܠ̇ܨܝܼܢ
                    ܗ̄ܘ̣ܵܘ ܠܹܗ ܕܢܸܤܓܿܘܿܕܼ ܠܫܸܡܫܵܐ. ܘܟܲܕܼ ܢܦܲܩ̣ ܡ̣ܢ ܒܲܝܬܹܗ ܕܡܵܪܝܵܐ ܕܢܹܐܙܲܠ: ܘܲܚ̣ܙܵܝܗܝ
                    ܠܕܲܝܵܢܵܐ: ܒܩܵܠܵܐ ܪܵܡܵܐ ܐܸܡ݂ܲܪ ܠܹܗ ܠܛܲܗܙܝܼܓܲܪܕ: ܫܠܵܡ ܠܵܟܼ ܕܲܝܵܢܵܐ
                    ܘܡܸܬܿܬܿܕܝܼܢܵܢܵܐ: ܫܠܵܡ ܠܵܟܼ ܪܵܕܼܘܿܝܵܐ ܘܡܸܬܼܪܲܟܼܝܵܢܵܐ: ܫܠܵܡ ܠܵܟܼ ܡܓܼܘܼܫܵܐ
                    ܘܡܵܘܕܝܵܢܵܐ ܘܤܵܗܕܐ. ܐܲܤܓܵܐ ܠܵܟܼ ܛܲܗܝܼܙܓܲܪܕ: ܐܲܤܓܵܐ ܥܒܸܕܼ ܠܵܟܼ ܤܝܼܥܵܬܼܵܐ: ܕܥܲܡܵܗ̇
                    ܬܹܐܪܘܿܥ ܐܲܦܲܝ̈ ܚܲܬܼܢܵܐ ܕܙܲܡܢܲܢ ܠܡܲܠܟܿܘܼܬܹܗ. ܗܵܐ ܓܹܝܪ ܚܵܙܹ̇ܐ ܐ̄ܢܵܐ ܠܵܟܼ:  521  ܕܒܲܕܼܡܘܼܬܼ ܫܸܡܥܘܿܢ ܟܹܐܦܵܐ ܐܵܦ ܐܲܢ̄ܬܿ: ܒܵܬܲܪ ܪܹܫܵܟܼ ܥܬܼܝܼܕܼ ܐܲܢ̄ܬܿ
                    ܕܬܸܬܠܸܐ ܒܲܙܩܝܼܦܵܐ ܚܠܵܦ ܫܡܹܗ ܕܲܡܫܝܼܚܵܐ. ܐܲܤܝܼܪܝܼܢ ܗ̄ܘ̣ܵܘ ܕܝܢ ܥܲܡ ܝܘܿܚܲܢܵܢ
                    ܛܘܼܒܼܵܢܵܐ: ܐ̄ܢܵܫܵܐ ܪܵܘܪ̈ܒܹܗ ܡ̣ܢ ܫܲܪܒܿܬܼܵܐ ܝܼܕܼܝܼܥܬܼܵܐ ܕܒܹܗ ܒܟܲܪܟܼܵܐ. ܕܚܲܕܼ
                    ܡܸܢܗܘܿܢ ܐܝܼܬܼܵܘܗܝ ܗ̄ܘ̣ܵܐ ܐܝܼܤܚܵܩ ܒܲܪ ܗܘܿܪܡܝܼܙܓܲܪܕ: ܘܐܲܪܕܵܫܝܼܪ ܒܲܪ ܐܲܪܙܵܢܵܝܵܐ:
                    ܘܐܲܒܼܪܵܗܵܡ ܘܫܲܒܼܥܵܐ ܐ̄ܚܪ̈ܵܢܝܼܢ ܥܲܡܗܘܿܢ. ܕܡܸܢܗܘܿܢ ܚܲܡ̣ܤܸܢܘ ܒܲܫܪܵܪܗܘܢ: ܘܡܸܢܗܘܿܢ
                    ܟܦܲܪܘ. ܐܝܼܤܚܵܩ ܕܹܝܢ ܒܲܪ ܗܘܿܪܡܝܼܙܕ: ܟܲܕ ܐܝܼܬܼܵܘܗܝ ܒܐܲܤܘܼܪܹ̈ܐ ܕܲܚܠܵܦ ܕܚܠܲܬܼ
                    ܐܲܠܵܗܵܐ: ܦܬܲܚ̣ ܦܘܼܡܹܗ ܗ̤ܘ ܛܘܼܒܼܵܢܵܐ ܘܐܸܡ݂ܲܪ ܠܹܗ ܠܛܲܗܡܝܼܙ ܓܲܪܕ ܒܲܢܒܼܝܼܘܼܬܼܵܐ
                    ܡܸܠܹ̈ܐ ܕܕܵܡ̈ܝܵܢ ܠܗܵܢܹ̇ܝܢ ܕܐܸܡ݂ܲܪ ܠܹܗ ܛܘܼܒܼܵܢܵܐ ܝܘܿܚܲܢܵܢ: ܕܲܥܬܼܝܼܕܼ ܐܲܢ̄ܬܿ ܗ̣̄ܘ
                    ܐܘܿ ܛܲܗܡܝܼܙ ܓܲܪܕ: ܕܬܸܬܼܟܲܠܲܠ ܒܤܵܗܕܘܼܬܼܵܐ ܛܵܒܼܬܼܵܐ ܕܲܚܠܵܦ ܡܵܪܲܢ. ܘܲܚܠܵܦ ܕܐܹܒܼܵܐ:
                    ܗܵܘܹ̇ܐ ܐܲܢ̄ܬܿ ܐܸܡܪܵܐ: ܘܝܵܗܹ̇ܒܼ ܐܲܢ̄ܬܿ ܦܲܓܼܪܵܟܼ ܕܸܒܼܚܬܼܵܐ ܚܲܝܬܼܵܐ ܘܩܲܕܿܝܼܫܬܼܵܐ
                    ܘܲܡܩܲܒܲܠܬܐ ܕܫܵܦ̇ܪܵܐ ܠܐܲܠܵܗܵܐ. 
                 ܛܲܗܡܝܼܙ ܓܲܪܕ ܕܹܝܢ ܒܲܪ ܫܵܥܬܹܗ ܦ̣ܩܲܕܼ: ܘܐܸܬܼܒܿܙܸܙܘ ܩܸܢ̈ܝܵܢܹܐ
                    ܘܡܲܪ̈ܗܵܛܹܐ ܕܲܒܼ̈ܢܲܝ ܟܲܪܟܼܵܐ ܡ̣ܢ ܚܲܢ̈ܦܹܐ ܘܡܵܢܝܼ̈ܢܹܐ. ܗܵܢ̇ܘܿܢ ܕܹܝܢ ܕܲܦܩܝܼܕܝܼܢ
                    ܗ̄ܘ̣ܵܘ ܠܲܡܟܲܢܵܫܘܼ ܘܲܠܡܲܝܬܵܝܘܼ ܟܪܸ̈ܤܛܝܵܢܹܐ ܡ̣ܢ ܐܲܬܲܪ ܐܲܬܲܪ: ܢܦܲܩ̣ܘ ܒܚܹܐܦܵܐ
                    ܒܲܥܪܝܼܪܵܝܵܐ: ܘܟܲܢܸܫ̣ܘ ܘܐܲܝܬܝܼܘ: ܠܵܘ ܒܲܠܚܘܿܕܼ ܠܓܲܒܼܪܹ̈ ܘܲܠܢܼܫܹ̈ܐ ܒܢܲܝ̈ ܥܵܠܡܵܐ:
                    ܐܸܠܵܐ ܐܵܦ ܠܐܲܦܸܤܩ̈ܘܹܦܹܐ ܘܩܲܫܝܼ̈ܫܹܐ ܘܡܫܲܡ̈ܫܵܢܹܐ. ܗܵܢܵܘ ܕܹܝܢ ܡܝܼܛܪܵܦܘܿܠܹܝܛܵܐ
                    ܕܐܲܪܒܹܿܝܠ: ܘܐܲܦܸܤܩܘܿܦܵܐ ܕܒܹܝܬܼ ܢܘܼܗܲܕܪܵܐ: ܘܐܲܦܸܤܩܘܿܦܵܐ ܕܡܲܥܲܠܬܼܵܐ. ܘܥܲܡܗܘܿܢ
                    ܡܝܼܛܪܵܦܘܿܠܹܝܛܵܐ ܕܫܲܗܵܪܓܲܪܕ. ܘܲܬܼܪܲܝܵܢܹܗ ܝܘܿܚܵܢܵܢ ܕܟܲܪܟܼܵܐ:  522 
                    ܘܲܬܼܠܝܼܬܼܵܝܵܐ ܕܠܵܫܘܿܡ: ܘܲܪܒܼܝܼܥܵܝܵܐ ܕܡܵܚܘܿܙܵܐ: ܘܲܚܡܝܼܫܵܝܵܐ ܕܚܸܪܒܲܬ̤ ܓܠܵܠܵ:
                    ܘܲܫܬܝܼܬܼܵܝܵܐ ܕܕܼܵܪܵܐ ܩܪܝܼܬܼܵܐ ܕܥܲܠ ܓܸܢ̄ܒܼ ܙܵܒܼܵܐ ܙܥܘܿܪܵܐ. ܗܵܠܹܝܢ ܪ̈ܵܥܵܘܵܬܼܵܐ ܥܲܡ
                    ܩܹܠܝܪܘܿܣ ܕܝܼܠܗܘܿܢ: ܘܤܘܿܓܼܵܐܐ ܕܡܲܪ̈ܥܝܵܬܼܗܘܿܢ: ܐܸܬ݂ܼܵܘ ܠܟܲܪܟܼܵܐ ܦܨܝܼܚܵܐܝܼܬܼ:
                    ܕܲܢܩܲܒܿܠܘܼܢ ܟܠܝܼ̈ܠܹܐ ܕܤܵܗܕܘܼܬܼܵܐ ܥܲܡ ܚܲܕܼܘܼܬܼܵܐ ܪܲܒܿܬܼܵܐ. ܘܟܲܕܼ ܥܲܠ̣ܘ ܗ̄ܘ̣ܵܘ:
                    ܨܠܝܼܒܼܵܐ ܫܘܼܒܼܗܵܪܗܘܿܢ ܐܵܬܹ̇ܐ ܗ̄ܘ̣ܵܐ ܒܪܹܫܗܘܿܢ: ܟܲܕ ܡܙܲܚܝܼܢ ܠܹܗ ܒܬܸܫܡܸܬܼܵܐ
                    ܙܗܝܼܬܼܵܐ ܘܲܒܼܗܘܼ̈ܠܵܠܹܐ: ܗܵܘܹ̇ܝܢ ܗ̄ܘ̣ܵܘ ܕܹܝܢ ܒܡܸܢܝܵܢܵܐ: ܐܲܝܟܼ ܕܐܵܡ̇ܪܵܐ ܡܸܠܬܼܵܐ:
                    ܡܵܐܐ ܘܲܬܼܠܵܬܼܝܼܢ ܘܲܬܼܠܵܬܼܵܐ ܐܲܠܦܝܼ̈ܢ: ܠܒܲܪ ܡ̣ܢ ܒܢܲܝ̈ ܟܲܪܟܼܵܐ ܕܐܲܤܝܼܪܝܼܢ ܗ̄ܘ̣ܵܘ
                    ܒܹܝܬܼ ܐܲܤܝܼܪܹ̈ܐ: ܕܗܵܘܹ̇ܝܢ ܗ̄ܘ̣ܵܘ ܥܸܤܪܝܼܢ ܐܲܠܦܝܼ̈ܢ. ܘܟܲܕܼ ܫܡܲܥ̣ܘ ܗܵܢ̇ܘܿܢ
                    ܕܲܒܼܒܹܝܬܼ ܐܲܤܝܼܪܹ̈ܐ ܩܵܠ ܪ̈ܲܥܡܹܐ ܕܬܸܫܡܸܫܬܼܵܐ ܕܗܵܢ̇ܘܿܢ ܕܐܸܬ݂ܼܵܘ: ܟܸܢ̈ܫܹܐ ܟܠܗܘܿܢ
                    ܡܙܲܡ̈ܢܲܝ ܠܡܲܠܟܘܼܬܼܵܐ: ܚ̣ܕܼܝܼܘ ܚܲܕܼܘܼܬܼܵܐ ܪܲܒܿܬܼܵܐ ܕܛܵܒܼ. ܕܒܹܝܬܼ ܛܲܗܡܝܼܙ ܓܲܪܕ
                    ܕܹܝܢ ܟܲܕܼ ܚܙ̣ܸܵܘ ܪܸ̈ܒܿܘܵܬܼܵܐ ܕܟܸܢܫܹ̈ܐ: ܘܩܵܠܵܐ ܪܵܡܵܐ ܕܬܸܫ̈ܒܿܚܵܬܼܗܘܿܢ: ܤܲܓܿܝܼ
                    ܐܸܬܿܬܿܙܝܼܥ̣ܘ ܗ̄ܘ̣ܵܘ: ܟܲܕܼ ܤ̣ܒܲܪܘ ܠܗܘܿܢ ܕܪܵܘܒܵܐ ܗܘ̤ܵܐ. 
                 ܘܲܤܠܸܩ̣ ܛܲܗܝܼܙ ܓܲܪܕ ܠܕܘܼܟܿܬܼܵܐ ܗܵܝ̇ ܕܡܸܬܼܩܲܪܝܵܐ ܕܒܹܝܬܼ ܬܹܬܵܐ:
                    ܗܵܝ̇ ܕܐܸܬܼܩܲܛܲܠ̣ܘ ܒܵܗ̇ ܤܵܗ̈ܕܐ ܒܝܵܘ̈ܡܲܝ ܫܵܒܼܘܿܪ ܡܲܠܟܵܐ. ܘܝܼܬܸܠܼ ܥܲܠ ܟܘܼܪܤܝܵܐ
                    ܕܕܲܝܵܢܘܼܬܼܵܐ: ܘܲܤ̣ܕܲܪ ܩܕܼܵܡ ܟܸܢ̈ܫܹܐ ܗܵܢ̇ܘܿܢ: ܟܠ ܡܵܐܢܲܝ̈ ܫܸܢ̈ܕܹܐ ܕܲܙܢܝܼ̈ܢ ܙܢܝܼ̈ܢ:
                    ܘܐܸܡ݂ܲܪ ܠܗܘܿܢ: ܕܝܲܙܕ ܓܲܕܪ ܡܲܠܟܵܐ ܗܵܟܲܢ ܦ̣ܩܲܕܼ: ܕܐܸܢ ܠܡܲܠܟܿܘܼܬܹܗ ܘܲܠܦܘܼܩܕܵܢܵܘ̈ܗܝ
                    ܠܵܐ ܫܵܡ̇ܥܝܼܢ ܐܢ̄ܬܿܘܿܢ: ܘܨܼܒܼܝܵܢܹܗ ܠܵܐ ܥܵܒܼ̇ܕܝܼܢ ܐܢ̄ܬܿܘܿܢ: ܘܲܠܫܸܡܫܵܐ ܐܲܠܵܗܵܐ
                    ܪܲܒܵܐ ܠܵܐ ܤܵܓܼܕܝܼܢ ܐܢ̄ܬܿܘܿܢ: ܘܲܠܢܘܼܪܵܐ ܘܡܲܝܵ̈ܐ ܒܢܵܘ̈ܗܝ ܕܗܘܿܪܡܝܼܙܕ ܠܵܐ  523  ܡܝܲܩܪܝܼܢ ܐܢ̄ܬܿܘܿܢ: ܚܲܝܲܝ̈ܟܿܘܿܢ ܒܗܵܠܹܝܢ ܡܸܬܿܛܲܠܩܝܼܢ. ܟܲܕܼ ܥܲܡ
                    ܫܸܢ̈ܕܹܐ: ܐܝܼܬܼ ܗ̄ܘ̣ܵܐ ܥܲܡܗܘܿܢ ܐܵܦ ܦܝܼ̈ܠܹܐ ܫܸܬܿܬܲܥܤܲܪ: ܕܐܲܝܬܿܝܼܘ ܐܸܢܘܿܢ ܐܲܝܟܼ
                    ܕܲܢܕܘܼܫܘܼܪ ܠܟܼܠܗܘܿܢ ܐܲܝܠܹܝܢ ܕܠܵܐ ܟܵܦ̇ܪܝܼܢ ܒܲܡܫܝܼܚܵܐ. ܒܪܝܼܟܼܵܐ ܕܹܝܢ ܐܝܼܤܚܵܩ:
                    ܫܩܲܠ̣ ܐܸܢܘܿܢ ܠܡܵܐ̈ܢܲܝ ܫܸܢ̈ܕܹܐ ܘܢܲܫܸܩ̣ ܐܸܢܘܿܢ: ܘܤ̣ܵܡ ܐܸܢܘܿܢ ܥܲܠ ܥܲܝܢܵܘ̈ܗܝ
                    ܘܐܸܡ݂ܲܪ: ܫܠܵܡ ܠܗܘܿܢ ܠܗܵܠܹܝܢ ܦܲܪ̈ܙܠܹܐ: ܕܲܒܼܗܘܿܢ ܥܵܐ̇ܠܝܼܢܲܢ ܠܗܵܝ̇ ܦܵܠܵܛܝܼܢ
                    ܕܡܲܠܟܿܘܼܬܼ ܪܵܘܡܵܐ: ܘܡܸܬܼܒܲܤܡܝܼܢܲܢ ܒܲܡ̈ܛܲܠܠܲܝ ܢܘܼܗܪܵܐ ܕܐܸܬܿܛܲܝܲܒܼ ܠܲܢ ܡ̣ܢ ܡܵܪܲܢ
                    ܡܫܝܼܚܵܐ: ܡ̣ܢ ܩܕܼܵܡ ܬܲܪ̈ܡܝܵܬܹܗ ܕܥܵܠܡܵܐ. ܘܲܦܬܲܚ̣ ܦܘܼܡܹܗ ܘܐܸܡ݂ܲܪ ܠܕܲܝܵܢܵܐ: ܡܵܢܵܐ
                    ܩܵܐܹ̇ܡ ܐܲܢ̄ܬܿ ܐܘܿ ܕܲܝܵܢܵܐ؟ ܩܪܘܿܒܼ ܡܸܟܹܿܝܠ ܘܲܥܒܸܕܼ ܡܸܕܸܡ ܕܲܦܩܝܼܕܼ ܐܲܢ̄ܬܿ. ܡܸܛܠ
                    ܕܲܚܢܲܢ ܟ̱ܠܲܢ ܗܵܐ ܡܛܲܝܒܼܝܼܢܲܢ ܕܲܢܡܘܼܬܼ ܚܲܕܲܝܵܐܝܼܬܼ ܚܠܵܦ ܫܡܹܗ ܕܡܵܪܲܢ ܝܼܫܘܿܥ
                    ܡܫܝܼܚܵܐ. ܕܲܝܵܢܵܐ ܕܹܝܢ ܟܲܕܼ ܫܡܲܥ̣ ܗܵܠܹܝܢ: ܦܩ݂ܲܕܼ ܘܡܲܬܼܚܘܼܬܝ ܠܩܲܕܝܼܫܵܐ ܐܝܼܤܚܵܩ ܥܲܠ
                    ܐܼܲܪܥܵܐ ܒܐܲܪܒܿܥܵܐ ܗܲܕܵܡܵܘ̈ܗܝ: ܘܲܢܩܲܫ̣ܘ ܤܸܟܹ̈ܐ ܒܐܝܼܕܼܵܘ̈ܗܝ ܘܲܒܼܪܸ̈ܓܼܠܵܘܗܝ.
                    ܘܤܲܪܩ̣ܘܼܗܝ ܠܦܲܓܼܪܹܗ ܒܡܲܤܪ̈ܩܹܐ ܕܦܲܪܙܠܵܐ: ܥܕܲܡܵܐ ܕܲܫܠܲܚ̣ ܒܸܤܪܹܗ ܡ̣ܢ ܓܲܪ̈ܡܵܘܗܝ.
                    ܘܟܲܕܼ ܡܬܼܝܼܚ ܗ̄ܘ̣ܵܐ ܥܲܠ ܫܘܿܥܵܐ ܕܒܝܬܼ ܬܹܬܵܐ: ܘܤܵܩ̇ܝܼܢ ܗ̄ܘ̣ܵܘ ܠܹܗ ܪ̈ܲܫܝܼܥܹܐ: ܕܡܹܗ
                    ܪܵܕܹ̇ܐ ܗ̄ܘ̣ܵܐ ܘܢܵܚܹ̇ܬܼ ܠܦܸܩܥܵܐ ܗܵܘ̇ ܕܐܝܼܬܼ ܒܹܝܬܼ ܬܹܬܵܐ܆ ܘܟܲܕܼ ܗ̤ܘ ܩܲܕܝܼܫܵܐ
                    ܡܸܬܼܢܲܓܲܕܼ ܗ̄ܘ̣ܵܐ: ܦ̣ܩܲܕܼ ܛܲܗܡܝܼܙ ܓܲܪܕ: ܕܢܹܐܬܼܘܿܢ ܟܠܗܘܿܢ ܐܲܝܠܹܝܢ ܕܐܲܤܝܼܪܝܼܢ ܡܸܛܠ
                    ܡܫܝܼܚܵܐ ܠܒܹܝܬܼ ܕܝܼܢܵܐ ܕܥܲܠ ܓܸܢ̄ܒܼ ܒܹܝܬܼ ܬܹܬܵܐ ܘܢܸܫܬܲܐܠܘܼܢ. ܘܐܸܢ ܗ̤ܘ ܕܠܵܐ
                    ܟܵܦ̇ܪܝܼܢ ܒܲܫܡܹܗ ܕܲܡܫܝܼܚܵܐ: ܐܲܟܼܘܵܬܹܗ ܕܐܝܼܤܚܵܩ ܢܸܬܼܢܲܓܿܕܼܘܼܢ. ܥܲܡܵܐ ܕܹܝܢ  524  ܕܲܟܼܪܸ̈ܤܛܝܵܢܹܐ ܩܲܕܝܼ̈ܫܹܐ ܘܲܓܼܒܲܝ̈ܵܐ: ܟܲܕ ܝܼܕܲܥ̣ܘ ܕܲܩ̣ܪܸܒܼ ܠܹܗ
                    ܙܲܒܼܢܵܐ ܕܒܹܗ ܡܸܬܼܟܲܠܠܝܼܢ: ܐܸܬܼܟܲܢܲܫ̣ܘ ܠܥܹܕܬܵܐ ܪ̈ܵܥܵܘܵܬܼܵܐ ܥܲܡ ܡܲܪ̈ܥܝܵܬܼܗܘܿܢ:
                    ܘܲܥ̣ܒܲܕܼܘ ܩܘܼܕܵܫܵܐ: ܘܐܸܫܬܵܘܬܲܦ̣ܘ ܒܐ̄ܪ̈ܵܙܹܐ ܡܲܚ̈ܝܵܢܹܐ. ܘܥܲܦܸܩ̣ܘ ܘܢܲܫܸܩ̣ܘ
                    ܠܲܚ̈ܕܼܵܕܹܐ ܒܢܘܼܫܩܬܼܵܐ ܩܲܕܝܼܫܬܼܵܐ: ܘܲܢܦܲܩ̣ܘ ܟܲܕ ܛܥܝܼܢܝܼܢ ܨܠܝܼܒܼܵܐ ܘܐܵܙ̇ܠܝܼܢ
                    ܒܬܸܫܡܸܫܬܼܵܐ ܥܕܲܡܵܐ ܠܒܹܝܬܼ ܬܹܬܵܐ. ܘܟܲܕܼ ܚ̣ܙܵܐܘܼܗܝ ܠܩܲܕܝܼܫܵܐ ܐܝܼܤܚܵܩ ܕܲܡܬܼܝܼܚ
                    ܘܤܵܪܩܝܼܢ ܠܹܗ ܠܓܼܘܼܫܡܹܗ: ܐܲܪܝܼܡ̣ܘ ܩܵܠܗܘܿܢ ܘܝܲܗ̣̄ܒܼܘ ܬܸܫܒܿܘܿܚܬܼܵܐ ܠܐܲܠܵܗܵܐ.
                    ܘܚܲܝ̣ܠܘܼܗܝ ܠܛܘܼܒܼܵܢܵܐ ܘܠܲܒܿܒܼܘܼܗܝ: ܕܠܵܐ ܬܸܬܼܩܲܛܲܥ ܠܹܗ ܒܐܘܼ̈ܠܨܵܢܹܐ ܗܵܠܹܝܢ.
                    ܕܲܝܵܢܵܐ ܕܹܝܢ ܦ̣ܩܲܕܼ: ܘܐܲܝܬܝܼܘ ܢܸܦܛܵܐ ܘܲܡܫܲܚ̣ܘ ܓܲܪ̈ܡܵܘܗܝ ܕܩܲܕܿܝܼܫܵܐ: ܘܐܵܘܚܸܕܼܘ
                    ܒܗܘܿܢ ܢܘܼܪܵܐ. ܘܟܲܕܼ ܝܸܗ̣ܒܲܬ̤ ܩܵܠܵܐ ܫܲܠܗܹܒܼܝܼܬܼܵܐ ܕܢܘܼܪܵܐ ܒܓܲܪ̈ܡܵܘܗܝ ܕܢܲܨܝܼܚܵܐ:
                    ܘܩܲܪܝܼܒܼ ܗ̄ܘ̣ܵܐ ܕܲܢܫܲܢܸܐ ܠܘܵܬܼ ܡܵܪܹܗ: ܐܲܪܝܼܡ ܩܵܠܹܗ ܘܒܲܪܸܟܼ ܠܤܸܕܼܪ̈ܵܘܗܝ ܕܝܼܤܪܵܝܹܠ
                    ܕܐܲܠܵܗܵܐ: ܘܐܸܟܼܠܲܠ̣ ܒܤܵܗܕܘܼܬܼܵܐ ܛܵܒܼܬܼܵܐ. 
                 ܘܲܦܲܩܕܼ ܕܲܝܵܢܵܐ ܕܢܲܝܬܿܘܿܢ ܡ̣ܢ ܒܵܬܼܪܹܗ ܠܟܼܵܗܢܵܐ ܙܲܗܝܵܐ ܝܘܿܚܲܢܵܢ:
                    ܐܲܦܸܤܩܘܿܦܵܐ ܕܝܼܠܹܗ ܕܟܲܪܟܼܵܠ. ܘܩܲܪܒܼܘܼܗܝ ܠܗܵܝ̇ ܕܘܼܟܼܬܼܵܐ ܕܒܼܵܗ̇ ܡܲܬܼܚܘܼܗܝ
                    ܠܢܲܨܝܼܚܵܐ ܐܝܼܤܚܵܩ: ܘܦܲܤܸܩ̣ܘ ܐܝܼܕܼܵܘ̈ܗܝ: ܘܪܵܕܹ̇ܐ ܕܡܹܗ ܘܢܵܚܹ̇ܬܼ ܠܹܗ ܠܗܵܘ̇ ܦܸܩܥܵܐ
                    ܕܒܹܝܬܼ ܬܹܬܵܐ. ܘܟܸܢ ܐܲܝܬܝܼܘ ܐܸܢܘܿܢ ܠܹܗ ܘܠܸܫܬܝܼܢ ܠܐ̄ܚܪ̈ܵܢܹܐ ܕܥܲܡܹܗ: ܠܢܲܚܠܵܐ
                    ܕܲܒܼܡܲܕܼܢܚܹܵܗ ܕܒܹܝܬܼ ܬܹܬܵܐ. ܗܸܢ̣ܘܿܢ ܕܹܝܢ ܩܲܕܿܝܼ̈ܫܹܐ: ܟܲܕܼ ܪܵܗܛ̇ܝܼܢ ܗ̄ܘ̣ܵܘ
                    ܩܲܠܝܼܠܵܐܝܼܬܼ ܘܲܡܗܲܠܠܝܼܢ ܒܲܙܡܝܼܪ̈ܵܬܹ ܕܕܼܵܘܝܼܕ: ܐܸܬ݂ܼܵܘ ܠܕܼܘܼܟܿܬܼܵܐ ܗܵܝ̇ ܕܨܲܠܝܵܐ
                    ܗ̄ܘ̣ܵܬܼ ܠܦܲܚܹܗ ܕܡܵܘܬܵܐ. ܘܲܦ̣ܩܲܕܼ ܕܲܝܵܢܵܐ: ܘܲܩ̣ܪܵܘ ܩܕܼܵܡܲܝܗܘܿܢ ܟܬܼܵܒܼܵܐ ܕܡܲܠܟܵܐ:
                         525  ܕܐܝܼܬܼ ܗ̄ܘ̣ܵܐ ܒܹܗ ܕܲܪ̈ܓܹܐ ܘܡܵܘ̈ܗܒܼܵܬܼܵܐ ܘܫܘܼ̈ܠܛܵܢܹܐ ܠܟܼܠ
                    ܕܟܼܵܦܲܪ ܒܲܡܫܝܼܚܵܐ. ܘܟܼܠ ܕܠܵܐ ܡܸܬܿܛܦܝܼܣ ܘܟܼܵܦܲܪ: ܤܲܝܦܵܐ ܢܘܼܪܵܐ: ܢܸܓܼܕܹ̈ܐ:
                    ܤܪ݁ܵܩܹܐ. ܥܢ̣ܵܘ ܕܹܝܢ ܩܲܕܝܼ̈ܫܹܐ ܡ̣ܢ ܚܲܕܼ ܦܘܼܡ ܘܐܸܡ݂ܲܪܘ: ܡܵܘ̈ܗܒܼܵܬܹܗ ܕܡܲܠܟܵܐ ܠܹܗ
                    ܢܸܗܘ̈ܝܵܢ: ܘܫܘܼ̈ܠܛܵܢܹܐ ܘܕܲܪ̈ܓܹܐ ܠܲܐ̄ܚܪ̈ܵܢܹܐ ܢܸܬܸܿܠ. ܠܲܢ ܕܹܝܢ ܐܝܼܬܼ ܠܲܢ ܤܝܼܡܬܼܵܐ
                    ܒܲܫܡܲܝܵܐ: ܕܠܵܐ ܓܵܝܙܵܐ ܠܥܵܠܲܡ. ܘܡ̣ܢ ܬܲܡܵܢ ܡܤܲܟܹܿܝܢܲܢ ܠܡܲܚܵܢܲܢ ܠܡܵܪܲܢ ܝܼܫܘܿܥ
                    ܡܫܝܼܚܵܐ: ܕܗ̤ܘ ܢܫܲܚܠܸܦ ܦܲܓܼܪܵܐ ܕܡܘܼܟܵܟܲܢ: ܕܢܸܗܘܸܐ ܒܲܪ ܕܡܘܼܬܼܵܐ ܕܦܲܓܼܪܵܐ
                    ܕܫܘܼܒܼܚܹܗ. ܘܟܲܕܼ ܫܡܲܥ̣ ܕܲܝܵܢܵܐ: ܦ̣ܩܲܕܼ ܥܲܠ ܢܲܨܝܼܚܹ̈ܐ: ܘܐܝܼܬܼ ܕܦܲܤܸܩ̣ܘ
                    ܪܸ̈ܓܼܠܵܘܗܝ: ܘܐܝܼܬܼ ܕܩܲܛܲܥ̣ܘ ܠܸܫܵܢܹܗ: ܘܐܝܼܬܼ ܕܚܲܨܝܼܘ ܥܲܝܢܵܘ̈ܗܝ: ܘܐܝܼܬܼ ܕܲܢܫܲܛ̣ܘ
                    ܡܸܫܟܵܐ ܕܪܹܫܹܗ. ܘܲܠܫܘܼܠܵܡ ܐܵܓܼܘܿܢܗܘܿܢ: ܦ̣ܩܲܕܼ ܕܲܝܵܢܵܐ: ܘܐܲܝܬܝܼܘ ܩ̈ܢܲܝܵܐ
                    ܘܲܫܒܸܫ̈ܬܹܐ: ܘܲܒܼܥ̣ܵܘ ܥܲܝܛܪܵܢܵܐ ܕܢܸܡܫܚܘܼܢ ܩܲܝ̈ܤܹܐ. ܘܥܲܝܛܪܵܢܵܐ ܒܐܲܬܼܪܲܢ ܠܵܐ
                    ܐܸܫܟܲܚ̣ܘ. ܘܲܡܫܲܚ̣ܘ ܐܸܢܘܿܢ ܢܸܦܛܵܐ: ܘܐܵܘܬܸܒܼܙ ܐܸܢܘܿܢ ܠܩܲܕܼܝܼ̈ܫܹܐ ܒܲܡܨܲܥܬܼܵܐ:
                    ܘܲܠܝܘܿܚܲܢܵܢ ܐܲܦܸܤܩܘܿܦܵܐ ܒܪܹܫܗܘܿܢ. ܘܐܵܘܚܵܕܼܘ ܢܘܼܪܵܐ ܒܩܲܝ̈ܤܹܐ: ܘܐܵܘܩܸܕܼܘ
                    ܦܲܓܼܪ̈ܲܝܗܘܿܢ ܕܐܲܬܼܠܹܝ̈ܛܹܐ: ܘܗܵܟܲܢܵܐ ܐܸܫܬܲܡ̣ܠܝܼܘ ܒܤܵܗܕܘܼܬܼܵܐ ܕܲܚܠܵܦ ܡܫܝܼܚܵܐ.
                    ܗܵܘܹ̇ܝܢ ܗ̄ܘ̣ܵܘ ܕܹܝܢ ܒܡܸܢܝܵܢܵܐ: ܐܲܦܸܤܩܿܦܵܐ: ܘܕܼܵܕܝܼܫܘܿܥ ܘܫܘܼܒܼܚܵܠܝܼܫܘܼܿܥ
                    ܘܒܵܘܟܼܬܝܼܫܘܿܥ ܩܲܫܝܼ̈ܫܹܐ ܕܥܲܡܿܗ: ܘܥܸܤܪܝܼܢ ܘܲܬܼܡܵܢܝܵܐ ܝܼܕܼܝܼ̈ܥܹܐ ܘܲܡܗܲܝ̈ܡܢܹܐ:
                    ܡܸܢܹܗ ܕܟܲܪܟܼܵܐ. ܗܵܠܹܝܢ ܐܸܬܼܟܲܠܲܠ̣ܘ ܒܝܵܘܡܵܐ ܩܲܕܼܡܵܝܵܐ: ܒܗܸܤܪܝܼܢ ܘܐܲܪܒܿܥܵܐ ܒܐܵܒܿ
                    ܝܲܪܚܵܐ ܒܝܘܿܡ ܥܪܘܼܒܼܬܼܵܐ: ܕܐܝܼܬܹܝܗ̇ ܫܲܒܿܬܼܵܐ ܕܫܸܬܼ ܕܒܼܵܬܲܪ ܨܵܘܡܵܐ ܕܲܫܠܝܼܚܹ̈ܐ.  526  p ܘܲܒܼܥܸܤܪܝܼܢ ܘܚܲܡܫܵܐ ܕܝܼܠܹܗ ܕܠܵܒܿ ܒܝܘܿܡ ܫܲܒܿܬܼܵܐ: ܐܲܦܸܩ̣ܘ ܠܵܗ̇
                    ܠܕܘܼܟܿܬܼܵܐ ܗܵܝ̇: ܕܒܼܵܗ̇ ܐܸܬܼܟܲܠܠܲܬ̤ ܤܝܼܥܬܼܵܐ ܩܲܕܼܡܵܝܬܼܵܐ ܡ̣ܢ ܗܵܡ̇ܘܿܪ̈ܵܘܗܝ
                    ܕܟܲܪܟܼܵܐ: ܐܲܠܦܹ̈ܐ ܬܠܵܬܼܵܐ: ܗܵܢ̇ܘܿܢ ܕܲܫܡܵܗܲܝ̈ܗܘܿܢ ܟܬܼܝܼܒܼܝܼܢ ܒܲܟܼܬܼܵܒܼܵܐ ܕܚܲܝܹ̈ܐ:
                    ܘܲܢܦܲܩ̣ ܛܲܗܡܝܼܙܓܲܪܕ: ܘܲܒܼܢ̣ܵܘ ܥܠܵܬܼܵܐ: ܘܐܲܠܲܨܲܘ̣ ܐܸܢܘܿܢ ܠܟܲܪ̈ܟܼܵܝܹܐ ܕܲܢܕܲܒܿܚܘܼܢ.
                    ܘܲܩ̣ܥܵܘ ܚܲܝ̈ܦܠܬܼܵܢܲܝ ܒܐܲܠܵܗܗܘܿܢ ܘܐܸܡ݂ܲܪܘ: ܚܵܣ ܠܲܢ ܕܢܸܫܒܿܘܿܩ ܠܲܡܫܝܼܚܵܐ ܕܲܗܘ̤ܵܐ
                    ܚܠܵܦܲܝܢ ܕܸܒܼܚܬܼܵܐ: ܘܲܢܕܲܒܲܚ ܠܫܹ̈ܐܕܹܐ ܡܵܪ̈ܘܿܕܹܐ. ܘܟܲܕܼ ܐܲܥ̣ܕܝܼܘ ܥܠܲܝܗܘܿܢ
                    ܐܘܼ̈ܠܨܵܢܹܐ ܪܵܘܪ̈ܒܹܐ: ܗܸܢ̣ܘܿܢ ܝܲܬܿܝܼܪܵܐܝܼܬܼ ܡܸܬܼܚܲܠܝܼܢ ܗ̄ܘ̣ܵܘ ܒܲܡܫܝܼܚܵܐ.
                    ܘܠܲܒܼ̈ܢܲܝ ܬܸܫܡܸܫܬܼܵܐ ܕܲܩܠܹܝܪܘܿܣ ܕܐܝܼܬܼ ܗ̄ܘ̣ܵܐ ܒܗܘܿܢ: ܕܲܫܡܵܗܲܝ̈ܗܘܿܢ ܐܝܼܤܚܵܩ
                    ܥܠܲܝܗܘܿܢ ܘܐܸܬܼܪܓܸܡ̣ܘ ܒܟܹ̈ܐܦܹܐ ܒܡܲܤܩܵܢܵܐ ܕܲܠܥܸܠ ܡ̣ܢ ܟܸܢܵܪ ܩܪܝܼܬܼܵܐ. ܘܲܠܢܫܹ̈ܐ
                    ܬܲܪܬܹܝܢ ܒ̈ܢܵܬܼ ܩܵܝܡܵܐ ܡܸܢܹܗ ܕܟܲܪܟܼܵܐ: ܙܩܲܦ̣ܘ ܐܸܢܹܝܢ ܒܦܸܠܓܹܗ ܕܡܲܤܩܵܢܵܐ ܗܵܘ̇:
                    ܘܲܪܓܲܡ̣ܘ ܐܸܢܹܝܢ ܥܲܠ ܙܩܝܼܦܲܝ̈ܗܹܝܢ. ܘܠܲܐܒܼܪܵܗܵܡ ܘܫܸܡܥܘܿܢ ܘܡܲܥܢܹܐ: ܚ̣ܦܲܪܘ ܕܘܼܟܿܬܼܵܐ
                    ܒܪܹܫܹܗ ܕܡܲܤܩܵܢܵܐ: ܐܲܝܟܵܐ ܕܐܸܬܼܪܓܸܡ̣ܘ ܕܒܹܝܬܼ ܐܸܤܛܲܦܵܢܘܿܣ: ܘܐܲܝܬܝܼܘ ܐܸܢܘܿܢ ܟܲܕܼ
                    ܪܡܹܝܢ ܒܗܘܿܢ ܦܲܪ̈ܙܠܹܐ ܩܫܲܝ̈ܲܐ. ܘܫܲܪܟܵܐ ܕܓܼܘܼܕܵܐ ܡܒܲܪܲܟܼܬܼܵܐ ܕܲܬܼܠܵܬܼܵܐ ܐܲܠܦܝܼ̈ܢ:
                    ܐܸܬܼܟܲܠܲܠ̣ܘ ܒܕܼܘܼܟܿܬܼܵܐ ܗܵܝ̇ ܕܝܸܩܼܕܼܘ ܒܵܗ̇ ܕܒܹܝܬܼ ܝܘܿܚܲܢܵܢ ܒܝܵܘܡܵܐ ܩܲܕܼܡܵܝܵܐ.
                    ܕܒܹ̇ܝܬܼ ܐܲܒܼܪܵܗܵܡ ܕܹܝܢ ܘܫܸܡܥܘܿܢ ܘܡܲܥܢܹܐ ܕܲܪܫܝܼܡܝܼܢ ܡ̣ܢ ܠܥܸܠ: ܫܲܕܲܪܘ ܥܠܲܝܗܘܿܢ
                    ܦܲܝ̈ܓܹܐ: ܘܲܡܚ̣ܵܘ ܐܸܢܘܿܢ ܒܓܹܐܪܹ̈ܐ ܒܹܗ ܒܚܸܦܪܵܐ ܕܝܵܬܼ̇ܒܿܝܼܢ ܗ̄ܘ̣ܵܘ. ܘܐܲܚܸܡ̣ܘ ܨܸܨܹ̈ܐ
                    ܘܲܕܼܥܲܨܘܼ  527  ܒ̈ܒܼܵܒܼܵܬܼܵܐ ܕܥܲܝܢܲܝ̈ܗܘܿܢ: ܥܲܡ ܨܸܵܨܸ̈ܐ ܐ̄ܚܪ̈ܵܢܹܐ ܟܲܕܼ
                    ܫܓܼܝܼܪܝܼܢ ܒܢܘܼܪܵܐ: ܕܒܲܙܲܥܘ ܒܗܘܿܢ ܓܘܼܫܡܲܝ̈ܗܘܿܢ ܕܢܲܨܝܼܚܹ̈ܐ. ܗܵܠܹܝܢ ܐܸܬܼܟܲܠܲܠ̣ܘ
                    ܒܝܵܘܡܵܐ ܕܲܬܼܪܹܝܢ: ܒܥܸܤܪܝܼܢ ܘܚܲܡܫܵܐ ܒܐܵܒܿ: ܒܝܘܿܡ ܫܲܒܿܬܼܵܐ. 
                 ܘܲܒܼܝܵܡܵܐ ܕܚܲܕܼܒܿܫܲܒܵܐ: ܝܵܘܡܵܐ ܕܲܬܼܠܵܬܼܵܐ ܠܟܼܘܼܠܵܠܗܘܿܢ
                    ܕܢܲܨ̈ܝܼܚܹܐ: ܦ̣ܩܲܕܼ ܛܲܗܡܝܼܙܓܲܪܕ: ܘܐܲܦܸܩ̣ܘ ܠܵܗ̇ ܠܕܼܘܼܟܿܬܼܵܐ ܗܵܝ̇ ܕܒܹܝܬܼ ܕܝܼܢܵܐ:
                    ܬܡܵܢܝܵܐ ܐܲܠܦܝܼ̈ܢ ܘܲܬܼܫܲܥܡܵܐܐ ܘܐܲܪܒܿܥܝܼܢ ܢܲܦܫ̈ܢ: ܗܵܢ̇ܘܿܢ ܕܐܲܝܬܝܼܘ ܡ̣ܢ ܩܘܼܪ̈ܝܵܐ
                    ܘܲܡܕܝܼ̈ܢܵܬܼܵܐ ܕܪ̈ܲܚܝܼܩܵܢ ܘܲܕܼܩܲܪ̈ܝܼܒܲܢ: ܟܲܕܼ ܐܝܼܬܼ ܥܲܡܗܘܿܢ ܡܝܼܛܪܵܦܘܿܠܹܝܛܝܼܣ
                    ܕܫܲܗܵܪܓܲܪܕ: ܘܐܲܦܸܤܩܘܼܦܵܐ ܕܠܵܫܘܿܡ: ܘܲܕܼܡܵܚܘܿܙܵܐ: ܘܲܕܼܚܸܪܒܲܬ̤ ܓܠܵܠ: ܘܐܲܦܸܤܩܘܿܦܵܐ
                    ܕܕܲܪܵܐ ܩܪܝܼܬܼܵܐ. ܘܟܲܕܼ ܐܸܬܼܟܲܬܢܲܫ̣ܘ: ܠܐܲܦܸܤ̈ܩܘܿܦܹܐ ܐܵܘܬܸܒܼ ܐܸܢܘܿܢ ܒܲܠܚܘܿܕܲܝܗܘܿܢ
                    ܟܲܕܼ ܦܟܡܼܪܝܼܢ: ܘܠܲܦܠܲܓܼܵܐ ܗܵܝ̇ ܕܩܲܕܝܼ̈ܫܹܐ ܐܲܥܸܠ̣ܘ ܐܸܢܘܿܢ ܤܝܼ̈ܥܵܢ ܤܝܼ̈ܥܵܢ
                    ܠܫܘܼܐܵܠܵܐ. ܘܡ̣ܢ ܕܐܵܘܕܝܼܘ ܟܠܗܘܿܢ ܘܠܵܐ ܟܦܲܪܘ: ܘܐܸܫܟܲܚ̣ܘ ܐܸܢܘܿܢ ܚܲܢ̈ܦܹܐ: ܕܟܼܠܗܘܿܢ
                    ܚܕܼܵܐ ܢܦܸܫ ܘܲܚܕܼܵܐ ܐܲܪܥܝܼܬܼܵܐ ܐܝܼܬܼ ܠܗܘܿܢ: ܐܲܩ̣ܝܼܡ ܥܠܲܝܗܘܿܢ ܕܲܝܵܢܵܐ: ܐ̄ܢܵܫܵܐ
                    ܡܲܪ̈ܵܚܹܐ ܘܲܕܼܠܵܐ ܪ̈ܲܚܡܹܐ: ܡܓܼܘܼ̈ܫܹܐ ܐܲܝܟܼ ܬܠܵܬܼܵܐ ܐܲܠܦܝܼ̈ܢ. ܘܲܠܡܸܢܗܘܿܢ
                    ܕܩܲܕܝܼ̈ܫܹܐ ܚ̣ܪܲܒܼܘ ܒܤܲܝܦܵܐ: ܘܲܠܡܸܢܗܘܿܢ ܐܲܫܠܸܡ̣ܘ ܠܝܲܩܕܵܢܵܐ ܕܢܘܼܪܵܐ: ܐ̄ܚܪ̈ܵܢܹܐ
                    ܐܸܬܼܢ̣ܤܲܪܘ: ܐ̄ܚܪ̈ܵܢܹܐ ܐܸܬܼܪܓܸܡ̣ܘ: ܐ̄ܚܪ̈ܵܢܹܐ ܐܲܪܡ̣ܝܼܘ ܠܗܘܿܢ ܚܲܠܵܐ ܘܒܲܪܓܲܢܬܼܵܐ
                    ܕܐܝܼܬܼܵܘܗܝ ܚܲܪܕܠܵܐ ܒܦܘܼܡܗܘܿܢ ܘܲܒܼܥܲܝܢܲܝ̈ܗܘܿܢ ܘܒܲܢܚܝܼܪ̈ܲܝܗܘܿܢ ܥܕܲܡܵܐ ܕܡ̣ܝܼܬܼܘ.
                    ܘܲܒܼܦܵܤܝܼ̈ܩܵܬܼܵܐ ܠܡܹܐܡܲܪ: ܒܢܸܓܼ̈ܕܹܐ ܘܲܒܼܡܵܘ̈ܬܹܐ  528  ܡܫܲܚ̈ܠܦܹܐ ܫ̣ܪܵܘ
                    ܐܸܢܘܿܢ ܐܢܲܨܝܼܚܹ̈ܐ ܡ̣ܢ ܥܵܠܡܵܐ ܗܵܢܵܐ: ܕܢܸܥܒܿܪܘܼܢ ܠܐܲܬܼܪܗܘܿܢ ܘܢܹܐܙܠܘܼܢ
                    ܠܝܵܪܬܿܘܼܬܼܗܘܿܢ: ܕܐܝܼܬܹܝܗ̇ ܢܘܼܗܪܵܐ ܘܚܲܝܹ̈ܐ ܘܲܫܠܵܡܵܐ. 
                 ܘܗܵܝܕܹܿܝܢ ܐܸܫ̣ܬܲܕܲܪ ܚܲܕܼ ܡ̣ܢ ܫܲܠܝܼ̈ܛܵܢܹܐ ܕܥܲܡ ܛܲܗܡܝܼܙ ܓܲܕܪ: ܠܘܵܬܼ
                    ܐܲܦܸܤܩ̈ܘܿܦܹܐ ܗܵܠܹܝܢ ܕܡ̣ܢ ܠܥܸܠ ܪܫܝܼܡܝܼܢ. ܘܐܸܬ݂ܼܵܐ ܘܫܲܐܸܠ̣ ܐܸܢܘܿܢ ܕܡܲܢ̣ܘܼ
                    ܪܹܫܟܼܘܿܢ؟ ܘܟܲܕܼ ܐܸܫܬܲܬܲܩ̣ܘ ܟܠܗܘܿܢ: ܐܲܤܝܼܪ ܗ̄ܘ̣ܵܐ ܬܲܡܵܢ ܛܲܠܝܵܐ ܚܲܕܼ ܒܲܪ
                    ܐܲܪܡܲܠܬܼܵܐ ܡܸܢܹܗ ܕܟܲܪܟܼܵܐ: ܕܲܫܡܹܗ ܗ̄ܘ̣ܵܐ ܕܝܼܢܕܿܘܿܝ: ܐܲܝܟܼ ܕܝܼܢܕܿܘܿܢ ܩܲܕܼܡܵܝܵܐ
                    ܕܲܒܼܝܵܘ̈ܗܝ ܫܵܒܼܘܿܪ: ܒܥܸܠܬܹܗ ܕܗܵܢܵܐ ܕܝܼܢܕܿܘܿܢ ܐܸܬܲܬ̤ ܡܝܼܛܪܵܦܘܿܠܹܝܛܘܼܬܼܵܐ
                    ܠܟܲܪܟܼܵܐ. ܩܵܡ̣ ܓܹܝܪ ܓܲܢ̄ܒܵܪܵܐܝܼܬܼ ܘܐܸܡ݂ܲܪ ܠܗܘܿܢ ܠܐܲܒܼ̈ܗܵܬܼܵܐ: ܐܸܬܼܚܲܝܲܠܘ
                    ܐܲܒܼܵܗܲܝ̈ܢ ܒܡܵܪܲܢ ܘܠܵܐ ܬܸܕܼܚܠܘܼܢ: ܘܗܲܒܼܘ ܦܸܬܼܓܼܵܡܵܐ ܠܲܒܼܥܸܠܕܒܼܵܒܹ̈ܐ. ܘܐܸܢ ܠܵܐ:
                    ܗܲܒܼܘ ܫܲܠܡܘܼܬܼܵܐ ܠܪܹܫܵܢܘܼܬܼܵܐ ܕܲܟܲܪܟܼܵܐ: ܘܲܚܢܲܢ ܡܩܲܒܿܠܝܼܢܲܢ ܚܠܵܦܲܝܟܘܿܢ ܫܸܢ̈ܕܹܐ
                    ܕܪ̈ܵܕܼܘܿܦܹܐ. ܗܵܝܕܹܿܝܢ ܒܵܗ̇ ܒܫܵܥܬܵܪܐ ܡܝܼܛܪܵܦܘܿܠܹܝܛܵܐ ܕܫܲܗܵܪܓܲܪܕ ܘܐܲܦܸܤܩ̈ܘܿܦܹܐ
                    ܕܥܲܡܹܗ: ܫܠܸܡ̣ܘ ܘܲܟܼܬܲܒܼܘ ܘܲܛܒܲܥ̣ܘ ܒܲܟܼܬܼܵܒܼܵܐ ܘܐܸܡ݂ܲܪܘ: ܕܠܵܟܼ ܙܵܕܼܩܵܐ
                    ܡܝܼܛܪܵܦܘܿܠܹܝܛܘܼܬܼܵܐ ܐܘܿ ܛܲܠܝܵܐ: ܕܲܗܘ̤ܵܐ ܐܹܠܝܼܵܐ ܬܪܲܝܵܢܵܐ ܘܕܼܵܘܝܼܕܼ ܛܲܠܝܵܐ:
                    ܒܫܵܥܬܼܵܐ ܗܵܕܹܐ ܕܐܘܼܠܨܵܢܵܐ. ܘܡ̣ܢ ܝܵܘܡܵܐ ܗܵܘ̇ ܐܸܫܬܲܪܪܲܬ̤ ܒܟܲܪܟܼܵܐ ܪܹܫܵܢܘܼܬܼܵܐ
                    ܕܡܝܼܛܪܵܦܘܼܠܹܝܛܘܼܬܼܵܐ. ܘܤܵܡ̣ܘ ܐܝܼܕܼܵܐ ܥܠܵܘܗܝ ܘܒܲܪܟܼܘܼܗܝ ܒܗܘܿܢ ܒܐܲܤܘܼܪ̈ܲܝܗܘܿܢ.
                    ܘܟܲܕܼ ܚ̣ܙܵܘ ܚܲܢ̈ܦܹܐ ܕܲܒܼܫܘܼܒܼܗܵܪܗܘܿܢ ܩܵܝܡ̇ܝܼܢ ܟܪܸ̈ܤܛܝܵܢܹܐ: ܘܲܒܼܩܵܢܘܿܢܲܝ̈ܗܘܿܢ ܕܠܵ
                    ܕܸܚܠܵܐ ܪܵܕܹܝܢ: ܚ̣ܪܲܒܼܘ ܐܸܢܘܿܢ ܒܤܲܝ̈ܦܹܐ. ܘܩܲܕܼܡܵܝܑܬܼ ܩܛܲܠ̣ܘ  529 
                    ܠܲܫܒܝܼܝܼܚܵܐ ܕܝܼܢܕܿܘܿܢ: ܘܗܵܝܕܹܿܝܢ ܠܐܲܦܸܤ̈ܩܘܿܦܹܐ ܘܠܲܐ̄ܚܪ̈ܵܢܹܐ ܥܲܡܗܘܿܢ: ܕܡܸܢܗܘܿܢ
                    ܡ̣ܢ ܟܲܪܟܼܵܐ: ܘܡܸܢܗܘܿܢ ܡ̣ܢ ܕܘܼܟܼܵܐ ܕܘܼܟܵܐ. 
                 ܐܲܢ̄ܬܿܬܼܵܐ ܕܹܝܢ ܚܕܼܵܐ ܕܡ̣ܢ ܫܒܼܵܒܼܘܼܬܼܵܐ ܕܒܹܝܬܼ ܙܵܕܘܿܩ: ܕܲܫܡܵܗ̇
                    ܗ̄ܘ̣ܵܐ ܫܝܼܪܝܼܢ: ܗܵܕܹܐ ܠܲܚܡܵܐ ܐܵܦ̇ܵܝܵܐ ܗ̄ܘ̣ܵܬܼ ܒܒܲܝܬܵܗ̇. ܘܟܲܕܼ ܫܸܡ̣ܥܲܬ̤
                    ܕܐܸܬܼܟܲܠܲܠ̣ܘ ܩܲܕܝܼ̈ܫܹܐ: ܫܸܒܼܩܲܬ̤ ܠܠܲܚܡܵܗ̇ ܘܲܠܠܲܝܫܵܗ̇ ܒܐܵܨܘܼܬܼܵܐ: ܘܕܸܒܼܪܲܬ̤
                    ܠܲܬܼܪܹܝܬ ܒܢܹܝ̈ܗ̇ ܥܲܡܵܗ̇: ܚܲܕܼ ܥܲܠ ܟܲܬܼܦܵܗ̇ ܘܚܲܕܼ ܒܐܝܼܕܼܵܗ̇. ܘܪܸܗܛܲܬ̤ ܘܐܸܫܟܲܚ̣ܬܹܗ
                    ܠܕܼܝܵܢܵܐ ܛܲܗܡܝܼܙܓܲܪܕ: ܠܬܲܚܬܿ ܡ̣ܢ ܚܵܘܪܵܐ. ܘܟܲܕܼ ܠܒܼܝܼܟܼܵܐ ܒܲܦܓܼܘܼܕܬܹܗ ܕܤܘܼܤܝܵܐ
                    ܕܲܪܟܼܝܼܒܼ ܗ̄ܘ̣ܵܐ: ܐܵܘܡ̣ܝܵܬܹܗ ܦܵܪܤܵܝܼܬܼ: ܕܠܵܐ ܢܸܓܼܠܙܝܼܗ̇ ܡ̣ܢ ܐܘܼܪܚܐ ܕܒܼܵܗ̇
                    ܐܸܫ̣ܬܲܕܲܪܘ ܤܵܗ̈ܕܹܐ ܩܲܕܝܼ̈ܫܹܐ. ܘܲܥܛܲܦ̣ ܕܲܝܵܢܵܐ ܟܲܕܼ ܬܵܗܲܪ ܒܵܗ̇ ܒܲܨܒܼܘܼܬܼܵܐ. ܘܡ̣ܢ
                    ܕܐܲܦܝܼܤܵܗ̇ ܠܐܲܢ̄ܬܿܬܼܵܐ ܕܲܢܼܦܘܼܫ ܡ̣ܢ ܪܸܥܝܵܢܵܗ̇: ܗܵܘ̇ ܕܒܹܗ ܩܵܝܵܡܐ ܗ̄ܘ̣ܵܬܼ: ܘܠܵܐ
                    ܐܸܬܿܛܦܝܼܤܲܬ̤: ܦ̣ܩܲܕܼ ܥܠܹܝܗ̇: ܘܐܸܫܬܿܩܸܠ̣ ܪܹܫܵܗ̇ ܒܤܲܝܦܵܐ ܘܕܲܒܼܪܵܗ̇ ܗܵܘ̇ ܩܲܫܝܼܫܵܐ.
                    ܗܵܘ̇ ܕܹܝܢ ܒܪܵܗ̇ ܙܥܘܿܪܵܐ: ܢܦܲܠ̣ ܗ̄ܘ̣ܵܐ ܥܲܠ ܫܠܲܕܵܐ ܕܐܸܡܹܗ ܘܕܲܐܚܘܼܗܝ ܟܲܕܼ ܒܵܟܹ̇ܐ:
                    ܘܫܵܩܹ̇ܠ ܗ̄ܘ̣ܵܐ ܡ̣ܢ ܕܸܡܗܘܿܢ: ܘܫܵܐܹ̇ܦ ܗ̄ܘ̣ܵܐ ܒܥܲܝܢܵܘ̈ܗܝ ܘܲܒܼܓܼܘܼܫܡܹܗ. ܘܲܟܼܡܵܐ
                    ܕܕܲܝܵܢܵܐ ܘܚܲܢ̈ܦܹܐ ܫܵܩ̇ܠܝܼܢ ܗ̄ܘ̣ܵܘ ܠܹܗ ܠܘܵܬܼܗܘܿܢ: ܘܲܡܫܲܕܠܝܼܢ ܗ̄ܘ̣ܵܘ ܠܹܗ
                    ܒܡܵܘ̈ܗܒܼܵܬܼܵܐ ܘܲܒܼܡܸܠܹ̈ܐ: ܗ̤ܘ ܠܘܵܬܼ ܫܠܲܕܹ̈ܐ ܕܐܸܡܹܗ ܘܕܲܐܚܘܼܗܝ ܪܵܗܹܛ̇ ܗ̄ܘ̣ܵܐ.
                    ܘܢܵܦܹ̇ܠ ܗ̄ܘ̣ܵܐ ܥܠܲܝܗܘܿܢ: ܘܲܡܢܲܫܸܩ ܗ̄ܘ̣ܵܐ ܠܗܘܿܢ ܟܲܕܼ ܒܵܟܹ̇ܐ. ܘܗܵܝܕܹܿܝܢ ܩܲܛ̣ܠܘܼܗܝ
                    ܚܲܪ̈ܡܹܐ ܘܐܵܦ ܠܹܗ. 
                 ܘܡ̣ܢ ܒܵܬܲܪ ܕܐܸܬܼܩܲܛܲܠ̣ܘ ܗܵܠܹܝܢ: ܦܬܲܚ̣ ܡܵܪܝܵܐ ܥܲܝܢܵܘ̈ܗܝ ܕܛܲܗܡܝܿܙ
                    ܓܲܪܕ: ܘܲܚ̣ܙܵܐ ܤܸܒܠܬܼܵܐ ܕܤܝܼܡܵܐ ܒܐܲܪܥܵܐ: ܘܪܹܫܵܗ̇ ܡܵܛ̇ܐ  530  ܠܲܫܡܲܝܵܐ:
                    ܘܤܵܠ̇ܩܝܼܢ ܒܵܗ̇ ܟܠܗܘܿܢ ܕܐܸܬܼܩܲܛܲܠܘ ܡܸܢܹܗ. ܘܡܵܪܝܵܐ ܩܵܐܹ̇ܡ ܠܥܸܠ ܡܸܢܵܗ̇: ܘܤܵܐܹ̇ܡ
                    ܠܗܘܿܢ ܟܠܝܼ̈ܠܹܐ ܗܕܝܼܪܹ̈ܐ ܡܲܫܒܼܝܼܚܹ̈ܐ. ܘܡܸܚܕܼܵܐ ܐܲܫܬܲܚ̣ܠܲܦ ܪܸܥܝܵܢܹܗ ܕܕܲܝܵܢܵܐ
                    ܠܲܬܼܝܵܒܼܘܼܬܼܵܐ: ܘܲܩܥ̣ܵܐ ܘܐܸܡ݂ܲܪ ܒܩܵܠܵܐ ܪܵܡܵܐ: ܕܐܸܢܵܐ ܟܪܸܤܛܝܵܢܵܐ ܐܝܼܬܲܝ: ܐܲܝܟܼ
                    ܢܒܼ̈ܝܼܵܘܼܬܼܵܐ ܕܲܥܠܵܘܗܝ. ܘܐܵܠܹ̇ܐ ܗ̄ܘ̣ܵܐ ܠܢܲܦܫܹܗ ܘܒܼܵܟܹ̇ܐ: ܘܡܸܬܼܟܲܫܲܦ ܗ̄ܘ̣ܵܐ
                    ܠܲܡܫܝܼܚܵܐ: ܕܲܢܚܲܤܸܐ ܠܹܗ ܕܡܵܐ ܕܤܵܗ̈ܕܹܐ ܕܐܸܬܼܐܫܸܕܼ ܡܸܢܹܗ. ܘܟܲܕܼ ܫܡܲܥ̣ ܝܲܙܕܓܲܪܕ
                    ܡܲܠܟܵܐ: ܕܐܲܪܦ̣ܝܼ ܛܲܗܡܝܼܙ ܓܲܕܪ ܠܲܡܓܼܘܼܫܘܼܬܼܵܐ ܘܐܵܘܕܝܼ ܒܲܡܫܝܼܚܵܐ: ܦ̣ܩܲܕܼ ܥܠܵܘܗܝ
                    ܕܲܒܼܢܸ̈ܓܼܕܹܐ ܢܸܫܬܲܐܲܠ. ܘܡ̣ܢ ܕܐܲܥ̣ܠܘܼܗܝ ܠܫܸܢ̈ܕܹܐ ܘܠܲܐܤܘܼܪ݂̈ܬ ܘܠܲܚܒܼܘܼ̈ܫܝܹܐ
                    ܘܲܠܡܲܚ̈ܘܵܬܼܵܐ ܘܠܲܤܪ̈ܵܩܹܐ: ܘܲܚ̣ܙܵܐܘܼܗܝ ܕܠܵܐ ܐܲܫܦܸܠ̣ ܒܐܵܓܼܘܿܢܵܐ: ܦ̣ܩܲܕܼ ܥܠܵܘܗܝ
                    ܡܲܠܟܵܐ: ܕܒܲܙܩܝܼܦܵܐ ܒܵܬܲܪ ܪܹܫܹܗ ܢܸܬܿܬܿܠܸܐ. ܘܗܵܟܲܢܵܐ ܐܸܬܼܟܲܠܲܠ̣ ܒܤܵܗܕܘܼܬܼܵܐ
                    ܛܵܒܼܬܼܵܐ ܛܘܼܒܼܵܢܵܐ ܛܲܗܡܝܼܙ ܓܲܪܕ ܒܥܸܤܪܝܼܢ ܘܚܲܡܫܵܐ ܒܐܝܼܠܘܿܠ ܝܲܪܚܵܐ: ܒܝܘܿܡ ܬܪܹܝܢ
                    ܒܫܲܒܵܐ. ܘܨܲܠܝܼ ܒܙܲܒܼܢܵܐ ܕܟܼܘܼܠܵܠܹܗ ܘܲܒܼܥ̣ܵܐ ܡ̣ܢ ܐܲܠܵܗܵܐ: ܕܟܼܠܢܵܫ ܕܡܸܬܿܕܟܲܪ ܫܡܹܗ
                    ܕܛܲܗܡܝܼܙ ܓܲܪܕ: ܒܟܼܠ ܐܘܼܠܨܵܢܵܐ ܘܟܼܘܼܪܗܵܢܵܐ ܐܲܝܢܵܐ ܕܗ̤ܘ: ܢܸܬܼܥܲܕܲܪ ܡ̣ܢ ܐܲܠܵܗܵܐ. 
                 ܗܵܢܵܘ ܗܵܟܹܝܠ ܙܢܵܐ ܕܟܼܘܼܠܵܠܗܘܿܢ ܕܗܵܠܹܝܢ ܤܵܗ̈ܕܹܐ ܬܪܸܥܤܲܪ ܐܲܠܦܝܼ̈ܢ:
                    ܘܗܵܟܲܢ ܐܸܫܬܲܡ̣ܠܝܼܘ ܒܲܟܼܠܝܼ̈ܠܹܐ ܕܙܵܟܼܘܼܬܼܵܐ. ܘܲܠܟܼܠܲܢ ܢܲܫܘܸܐ ܡܵܪܲܢ ܒܲܨ̈ܠܵܘܵܬܼܗܘܿܢ
                    ܠܤܲܒܼܪܗܘܿܢ ܫܲܪܝܼܪܵܐ ܘܲܠܒܼܘܼܤܵܡܗܘܿܢ ܫܒܼܝܼܚܵܐ. 
                 ܡܵܪܘܿܢ ܕܹܝܢ ܛܘܼܒܼܵܢܵܐ: ܐܲܦܸܤܩܘܿܦܵܐ ܕܝܼܠܹܗ ܕܟܲܪܟܼܵܐ: ܒܪܸܚܡܲܬܼ
                    ܐܲܠܵܗܵܐ ܕܲܫܟܼܝܼܚܵܐ ܗ̄ܘ̣ܵܬܼ ܒܹܗ: ܒܢ̣ܵܐ ܒܕܘܼܟܿܬܼܵܐ ܗܵܝ̇ ܕܒܼܵܗ̇ ܐܸܬܼܟܲܠܲܠ̣ܘ  531  ܢܲܨܝܼܚܹ̈ܐ ܕܲܝܪܵܐ: ܘܥܵܒܹ̇ܕܼ ܗ̄ܘ̣ܵܐ ܠܗܘܿܢ ܕܘܼܟܼܪܵܢܵܐ ܟܠ ܫܢܵܐ ܒܲܫܢܵܐ
                    ܒܪܸܬܼܚܵܐ ܚܲܡܝܼܡܵܐ ܕܗܲܝܡܵܢܘܼܬܹܗ. ܗ̤ܘ ܥܲܡ ܡܵܪܝ ܒܵܒܼܘܿܝ ܩܵܬܼܘܿܠܝܼܩܵܐ ܟܲܢܸܫ̣ܘ
                    ܤܘܼܢܗܵܕܼܘܿܣ ܕܐܲܦܸܤ̈ܩܘܿܦܹܐ ܕܒܹܝܬܼ ܓܲܪܲܡܲܝ ܐܵܦ ܕܚܲܕܝܲܒܼ: ܘܲܟܼܬܲܒܼܘ ܘܲܚܬܲܡ̣ܘ
                    ܘܐܲܫܠܸܡ̣ܘ ܒܬܸܢܘܲܝ ܫܲܪܝܼܪܬܵܐ: ܕܢܸܗܘܸܐ ܥܹܐܕܼܵܐ ܕܕܘܼܟܼܪܵܢܵܐ ܠܩܲܕܝܼ̈ܫܹܐ ܗܵܠܹܝܢ
                    ܬܠܵܬܼܵܐ ܝܵܘ̈ܡܝܼܢ ܒܫܲܢ̄ܬܼܵܐ: ܗܵܢܵܘ ܕܹܝܢ: ܒܲܥܪܘܼܒܼܬܼܵܐ ܘܲܒܼܫܲܒܿܬܼܵܐ ܘܲܒܼܚܲܕܼ
                    ܒܿܫܲܒܵܐ ܕܫܲܒܿܬܼܵܐ ܕܫܸܬܼ ܕܒܼܵܬܲܪ ܨܵܘܡܵܐ ܕܲܫܠܝܼܚܹ̈ܐ. ܡܸܛܠ ܕܐܵܦ ܡܝܼܛܪܵܦܘܿܠܹܝܛܵܐ
                    ܕܚܲܕܝܲܒܼ ܬܲܡܵܢ ܐܸܬܼܟܲܠܲܠ̣: ܘܐܲܦܸܤܩܘܿܦܵܐ ܕܒܹܝܬܼ ܢܘܼܗܲܕܪܵܐ: ܘܐܲܦܸܤܩܘܿܦܵܐ
                    ܕܡܲܥܲܠܬܼܵܐ: ܘܗܵܢ̇ܘܿܢ ܐ̄ܚܪ̈ܵܢܹܐ ܕܥܲܗܘܿܢ: ܕܲܒܼܗܵܝ̇ ܓܘܼܕܵܐ ܪܲܒܿܬܼܵܐ ܐܸܬܼܟܲܠܲܠ̣ܘ
                    ܗ̄ܘ̣ܵܘ ܢܲܨܝܼ̈ܚܹܐ: ܘܗܵܐ ܟܬܼܝܼܒܼ ܘܤܝܼܡ ܒܒܹܝܬܼ ܐܲܪ̈ܟܹܐ ܕܥܹܕܬܵܐ ܕܲܡܕܝܼܢ̄ܬܼܵܐ
                    ܡܝܛܪܦܘܠܝܛܐ: ܕܟܼܠ ܡ̣ܢ ܐܲܦܸܤ̈ܩܘܿܦܹܐ ܕܗܹܘܦܲܪ̈ܟܿܝܼܵܣ ܕܟܲܪܟܼܵܐ: ܕܲܡܒܲܛܸܠ ܘܠܵܐ ܐܵܬܹ̇ܐ
                    ܠܲܟܼܢܘܼܫܝܼܗܘܿܢ ܕܤܵܗ̈ܕܹܐ ܢܲܨܝܼܚܹ̈ܐ: ܤܛܲܪ ܡ̣ܢ ܥܸܠܬܼܵܐ ܕܟܼܘܼܪܗܵܢܵܐ ܐܵܘ ܕܐܵܢܲܢܩܹܐ
                    ܕܓܼܵܕܼܫܵܐ: ܘܲܒܼܨܒܼܝܵܢܹܗ ܡܲܗܡܸܐ ܘܲܡܒܲܤܲܪ ܥܲܠ ܩܵܢܘܿܢܵܐ ܕܐܸܬܿܬܿܤ̣ܝܼܡ ܡ̣ܢ
                    ܐܲܒܼ̈ܗܵܬܼܵܐ: ܠܲܡܫܲܡܠܵܝܘܼ ܬܸܫܡܸܫܬܹܗ ܠܵܐ ܫܲܠܝܼܛ ܒܡܸܠܬܹܗ ܕܡܵܪܲܢ. 
                 ܗܵܢܵܘ ܢܸܨܚܵܢܗܘܿܢ ܬܡܝܼܗܵܐ ܕܩܲܕܝܼ̈ܫܹܐ: ܘܥܲܡܠܵܐ ܕܐܵܓܼܘܿܢܗܘܿܢ
                    ܫܒܼܝܼܚܵܐ ܕܤܪܵܗ̈ܕܹܐ ܙܗܲܝ̈ܐ ܘܐܲܬܼܠܹܝܛܹ̈ܐ ܙܪ̈ܝܼܙܹܐ. ܘܛܵܒܼ ܒܦܵܤܝܼ̈ܩܵܬܼܵܐ ܐܸܬܼܐܡ݂ܲܪ:
                    ܘܤܵܒܲܪܬܢܵܐ ܕܤܵܦ̈ܩܵܢ ܗܵܠܹܝܢ: ܐܵܦܸܢ ܪ̈ܵܚܡܲܝ ܒܘܼܠܦܵܢܵܐ ܝܲܬܿܝܼܪ ܡܸܬܼܝܲܐܒܼܝܼܢ
                    ܠܡܸܫܡܲܥ. ܚܢܲܢ ܕܹܝܢ ܐܲܝܲܚ̈: ܝܵܪ̈ܬܹܐ ܘܲܒܼ̈ܢܲܝܵܐ ܕܩܲܕܝܼ̈ܫܹܐ: ܘܲܒܼܢܲܝ̈ ܝܵܪܬܿܘܼܬܹܗ
                    ܕܲܡܫܝܼܚܵܐ ܡܟܲܠܠܵܢܗܘܿܢ:  532  ܢܹܐܚܘܿܕܼ ܓܵܘܤܵܐ ܒܲܨ̈ܠܵܘܵܬܼܗܘܿܢ. ܘܢܸܬܼܟܲܫܲܦ
                    ܠܡܵܪܗܘܿܢ ܡܵܪܵܐ ܕܓܼܵܘܵܐ: ܕܲܫܠܵܡܹܗ ܘܫܲܝܢܹܗ ܘܪ̈ܲܚܡܵܘܗܝ ܢܸܫܬܲܦܥܘܼܢ ܒܟܼܠܗܘܿܢ ܤܵܘ̈ܦܹܐ
                    ܕܲܒܼܪܝܼܬܼܵܐ. ܘܲܢܢܲܛܲܪ ܥܹܕܬܹܗ ܒܲܚܢܵܢܹܗ: ܒܗܸܕܼܪܵܐ ܕܩܲܕܝܼ̈ܫܹܐ ܕܲܒܼܓܼܵܘܵܗ̇ ܥܕܲܡܵܐ
                    ܠܓܸܠܝܵܢܹܗ ܕܡ̣ܢ ܫܡܲܝܵܐ: ܘܲܢܗܲܕܪܝܼܗ̇ ܒܒܼܘܼܤܵܡܵܐ ܕܪ̈ܵܥܵܘܵܬܼܵܗ̇ ܙܲܗܝ̈ܵܐ ܘܟܲܫܝܼܪܹ̈ܐ
                    ܐܲܝܟܼ ܫܘܼܘܕܵܝܹܗ ܕܲܠܘܵܬܼܵܗ̇. ܘܲܠܛܘܼܪܵܐ ܩܲܕܝܼܫܵܐ ܤܝܼܢܲܝ ܬܪܲܝܵܢܵܐ ܒܹܝܬܼ ܫܟܼܝܼܢܬܼܵܐ
                    ܐܲܠܵܗܵܝܬܼܵܐ: ܡܛܲܠܬܼܵܐ ܕܢܘܼܗܪܵܐ ܕܲܡܙܲܚܝܐ ܤܝܼܡܲܬܼ ܓܲܪ̈ܡܲܝܗܘܿܢ ܕܩܲܕܝܼ̈ܫܹܐ: ܬܸܤܓܸܐ
                    ܒܵܗ̇ ܬܸܫܒܿܘܿܚܬܼܵܐ ܘܬܹܐܪܲܒܼ ܒܵܗ̇ ܬܵܘܕܝܼܬܼܵܐ: ܘܬܸܬܿܪܝܼܡ ܩܲܪܢܵܗ̇ ܥܕܲܡܵܐ ܠܲܫܡܲܝܵܐ:
                    ܒܝܲܕܼ ܚܲܝܠܵܐ ܕܢܲܨܝܼܚܹ̈ܐ: ܟܹܐܦܹ̈ܐ ܩܲܕܝܼ̈ܫܬܼܵܐ ܕܫܲܕܼ̈ܝܵܢ ܒܕܼܵܪ̈ܘܗܝ. ܘܲܢܙܲܗܸܐ
                    ܠܦܵܠܚܹ̈ܐ ܟܫܝܼܪܹ̈ܐ ܕܲܒܼܓܼܵܘܵܗ̇ ܠܡܵܪܝܵܐ ܦܵܠ̇ܚܝܼܢ ܘܫܵܦ̇ܪܝܼܢ: ܕܲܡܫܲܡ̈ܫܵܢܹܐ
                    ܕܙܲܕܝܼܩܘܼܬܼܵܐ ܘܲܕܼܩܲܕܝܼܫܘܼܬܼܵܐ ܬܚܵܘܸܐ ܐܸܢܘܿܢ ܛܲܝܒܿܘܼܬܼܵܐ ܐܲܠܵܗܵܝܬܼܵܐ: ܐܲܝܟܼ
                    ܒܢܲܝ̈ܵܐ ܚܲܒܿܝܼ̈ܒܹܐ ܕܤܵܗ̈ܕܹܐ ܢܲܨܝܼܚܹ̈ܐ. ܘܲܠܒܲܪܢܵܫܵܐ ܕܐܲܠܵܗܵܐ: ܢܲܨܝܼܚ ܒܲܥ̇ܒܼܵܕܹܗ
                    ܕܡܵܪܝܵܐ: ܩܵܝܘܿܡܑܵ ܕܒܲܝܬܹܗ ܩܲܕܝܼܫܵܐ ܚܤܝܼܡܵܐ ܒܫܲܦܝܼܪ̈ܵܬܼܵܐ: ܕܲܒܼܪܘܼܬܵܢܵܐܝܼܬܼ
                    ܦܵܠܲܚ̇ ܒܹܝܬܼ ܐܲܒܼܵܗܵܘ̈ܗܝ: ܢܵܘܤܸܦ ܡܵܪܝܵܐ ܒܐܝܼܕܼܵܘ̈ܗܝ ܬܸܢܝܵܐ ܕܐܝܼܕܹܗ ܕܝܲܡܝܼܢܵܐ:
                    ܒܟܼܠ ܬܵܘ̈ܤܦܵܬܼܵܐ ܕܒܼܘܼܪ̈ܟܵܬܼܵܐ ܕܡ̣ܢ ܫܡܲܝܵܐ ܘܡ̣ܢ ܐܲܪܥܑܵܐ: ܒܲܨ̈ܠܵܘܵܬܼܗܘܿܢ
                    ܕܩܲܕܝܼ̈ܫܹܐ: ܘܢܸܫܬܘܸܐ ܠܢܘܼܗܪܵܐ ܕܒܲܡܛܲܠܠܲܝ̈ܗܘܿܢ. ܕܲܠܗܵܘ̇̄ ܢܘܼܗܪܵܐ ܘܲܠܗܵܝ̇
                    ܬܸܫܒܿܘܿܚܬܼܵܐ ܢܲܫܘܸܐ ܡܵܪܲܢ ܝܼܫܘܿܥ ܡܫܝܼܚܵܐ ܐܠܵܗܵܐ ܕܥܲܠ ܟܠ: ܐܵܦ ܠܟܸܢܫܲܢ ܒܟܼܠ
                    ܬܸܓܼܡܵܘ̈ܗܝ ܘܛܘܼܟܵܤܵܘ̈ܗܝ: ܐܵܡܹܝܢ. 
                 ܟܲܕܼ ܐܵܦ ܗܵܕܹܐ ܡܵܘܕܥܝܼܢܲܢ: ܕܗܵܟܲܢܵܐ ܛܲܛܸܿܤ̣ܘ ܐܲܒܼܵܗܲܝ̈ܢ ܡ̣ܢ  533  ܩܕܝܼܡ: ܕܲܒܼܝܵܘܡܵܐ ܕܲܥܪܘܼܒܼܬܼܵܐ ܢܸܗܘܸܐ ܕܘܼܟܼܪܵܢܵܐ ܕܝܼܠܗܘܿܢ ܕܤܵܗ̈ܕܹܐ
                    ܢܲܨܝܼܚܹ̈ܐ: ܕܡܝܼܛܪܵܦܘܿܠܹܝܛܵܐ ܘܕܲܐܦܸܤܩ̈ܘܿܦܹܐ ܘܲܕܼܩܲܫܝܼ̈ܫܹܐ ܘܕܲܡܫܲܡ̈ܫܵܢܹܐ
                    ܘܲܕܼܡܲܪܥܝܼܬܼܵܐ ܒܪܝܼܟܼܬܼܵܐ ܕܲܬܼܪܸܥܤܲܪ ܐܲܠܦܝܼ̈ܢ: ܕܡܸܛܠ ܡܫܝܼܚܵܐ ܐܸܬܼܟܲܠܲܠ̣ܘ:
                    ܘܲܒܼܫܲܒܿܬܼܵܐ ܕܕܘܼܟܼܪܵܢܗܘܿܢ ܕܲܫܠܝܼܚܹ̈ܐ ܩܲܕܝܼ̈ܫܹܐ: ܐܲܒܼܵܗܲܝ̈ܗܘܿܢ ܕܤܵܗ̈ܕܼܐ
                    ܢܲܨܝܼܚܹ̈ܐ܀ ܐܲܝܠܹܝܢ ܡܵܘ̈ܬܹܐ ܡܲܪܝܼܪܹ̈ܐ ܫܒܲܩ̣ܘ ܗܵܠܹܝܢ ܕܲܝ̈ܢܹܐ ܥܘ̈ܠܹܐ: ܕܥܲܠ ܤܵܗ̈ܕܹܐ
                    ܕܲܢ̄ܒܵܪܲܝ ܚܲܝܠܵܐ ܠܵܐ ܐܲܝܬܝܼܘ ܐܸܢܘܿܢ؟ ܐܵܘ ܐܲܝܠܹܝܢ ܫܸܢ̈ܕܹܐ ܬܲܩܝܼ̈ܦܹܐ ܘܫܘܼܢܵܩܹ̈ܐ
                    ܥܲܙܝܼ̈ܙܹܐ ܐܲܪܦ̣ܝܼܘ ܤܵܢܐܹܝ̈ܗ̇ ܕܥܹܕܬܵܐ: ܕܲܠܥܲܒܼܕܵܘ̈ܗܝ ܫܲܪܝܼܪܹ̈ܐ ܕܲܡܫܝܼܚܵܐ ܠܵܐ
                    ܐܲܤ̣ܒܸܿܠܘ ܐܸܢܘܿܢ؟ ܐܵܘ ܡ̣ܢ ܐܲܝܠܹܝܢ ܟܵܤܹ̈ܐ ܕܚܲܫܹ̈ܐ ܘܕܲܡܪܵܪܹ̈ܐ ܐܲܗܡ̣ܝܼܘ
                    ܒܥܸܠܕܒܼܵܒܼܵܘ̈ܗܝ ܕܥܲܡܲܢ: ܕܠܲܚܠܝܼ̈ܨܹܐ ܡܸܬܼܟܲܬܿܫܲܝ̈ ܒܚܲܝܠܗܘܿܢ ܒܐܘܼܠܨܵܢܲܝ̈ܗܘܿܢ ܠܵܐ
                    ܐܲܫܩ̣ܝܼܘ ܐܸܢܘܿܢ؟ ܐܝܼܬܼ ܕܲܒܼܟܲܦܢܵܐ ܘܲܒܼܨܲܗܝܵܐ ܡܛܲܪܦܝܼܢ ܗ̄ܘ̣ܵܘ ܠܗܘܿܢ: ܘܕܼܵܐܹ̇ܒܼ
                    ܗ̄ܘ̣ܵܐ ܦܲܓܼܪܗܘܿܢ ܘܡܲܝ̇ܬܝܼܢ ܗ̄ܘ̣ܵܘ. ܘܐܝܼܬܼ ܕܟܲܕܼ ܥܠܹܝܢ ܒܵܬܲܪ ܪܹܫܗܘܿܢ
                    ܒܛܲܗܪ̈ܘܵܬܼܵܐ: ܫܵܠܲܚ̇ ܗ̄ܘ̣ܵܐ ܒܸܤܪܗܘܿܢ: ܘܡܵܝ̇ܬܝܼܢ ܗ̄ܘ̣ܵܘ. ܘܐܝܼܬܼ (ܕܲܒܼܦܘܼܫܵܚܵܐ؟)
                    ܕܟܲܬܼܦܵܬܼܗܘܿܢ: ܒܲܡܬܼܵܚܵܐ ܕܓܲܒܼܪܹ̈ܐ: ܡܸܫܬܿܪܹܝܢ ܗ̄ܘ̣ܵܘ ܘܡܵܝ̇ܬܝܼܢ. ܘܐܝܼܬܼ
                    ܕܲܒܼܡܲܚ̈ܘܵܬܼܵܐ ܤܪ̈ܝܼܚܵܬܼܵܐ ܕܟܼܠܝܘܿܡ ܡܒܲܤܒܿܤܝܼܢ ܗ̄ܘ̣ܵܘ (ܠܓܲܒܲܝ̈ܗܘܿܢ؟)
                    ܒܲܚܒܼܵܪ̈ܵܬܼܵܐ: ܘܡܵܝ̇ܬܝܼܢ ܗ̄ܘ̣ܵܘ. ܘܐܝܼܬܼ ܕܲܒܼܡܵܙܘܿܪ̈ܝܵܬܼܵܐ ܩܲܫ̈ܝܵܬܼܵܐ
                    ܕܲܦܢܵܬܼ̈ܗܘܿܢ ܘܓܲܪ̈ܡܲܝܗܘܿܢ ܡܬܲܒܿܪܝܼܢ ܗ̄ܘ̣ܵܘ: ܘܡܵܝ̇ܬܝܼܢ ܗ̄ܘ̣ܵܘ. ܘܐܝܼܬܼ ܕܟܲܕܼ
                    ܦܟܼܝܼܪܝܼܢ: ܒܥܲܪܝܵܐ ܘܒܲܓܼܠܝܼܕܼܵܐ ܫܵܕܹܝܢ ܗ̄ܘ̣ܵܘ ܠܗܘܿܢ: ܥܕܲܡܵܐ ܕܝܵܒܹ̇ܫ ܗ̄ܘ̣ܵܐ
                    ܓܘܼܫܡܗܘܿܢ: ܘܡܵܝ̇ܬܝܼܬ ܗ̄ܘ̣ܵܘ.  534  ܘܐܝܼܬܼ ܕܲܒܼܡܲܤܦܪ̈ܵܢܹܐ ܕܚܝܼܠܵܐܝܼܬܼ
                    ܩܲܠܝܼܠ ܒܸܤܪܗܘܿܢ ܡ̣ܢ ܓܲܪ̈ܡܲܝܗܘܿܢ ܫܵܩ̇ܠܝܼܢ ܗ̄ܘ̣ܵܘ: ܘܡܵܝ̇ܬܝܼܢ ܗ̄ܘ̣ܵܘ. ܘܐܝܼܬܼ
                    ܕܒܲܢܫܵܛܵܐ ܩܲܫܝܵܐ: ܡܲܪܝܼܪܵܐܝܼܬܼ ܡܸܫܟܿܗܘܿܢ ܡܸܢܗܘܿܢ ܡܲܫܠܝܼܚܢ ܗ̄ܘ̣ܵܘ ܘܡܵܝ̇ܬܝܼܢ.
                    ܘܐܝܼܬܼ ܕܲܒܼܡܲܤܵܪܹ̈ܐ: ܪܗܝܼܒܼܵܐܝܼܬܼ ܚܘܼܡܪܹ̈ܐ ܕܲܚܲܨ̈ܗܘܿܢ ܢܵܤ̇ܪܝܼܢ ܗ̄ܘ̣ܵܘ ܘܡܵܝ̇ܬܝܼܢ.
                    ܘܐܝܼܬܼ ܕܲܒܼܡܲܩܕܚܹ̈ܐ: ܥܲܙܝܼܙܵܐܝܼܬܼ ܒܚܲܫܵܐ ܪܲܒܵܐ ܩܘܼܪ̈ܨܠܲܝܗܘܿܢ ܡܲܒܙܥܝܼܢ ܗ̄ܘ̣ܵܘ
                    ܘܡܵܝ̇ܬܝܼܢ. ܘܐܝܼܬܼ ܕܲܨܠܵܦܹ̈ܐ ܕܩܲܢܝܵܐ ܥܲܠ ܩܵܘ̈ܡܵܬܼܗܘܿܢ ܤܵܕܼܪܝܼܢ ܗ̄ܘ̣ܵܘ: ܘܡܲܬܢܹ̈ܐ
                    ܥܠܲܝܗܘܿܢ ܚܵܠ̇ܨܝܼܡ ܗ̄ܘ̣ܵܘ: ܘܚܲܕܼ ܚܲܕܼ ܥܲܡ ܒܸܤܪܵܐ ܘܲܓܼܝܵܕܹ̈ܐ ܫܵܡ̇ܛܝܼܢ ܗ̄ܘ̣ܵܘ
                    ܘܡܵܝ̇ܬܝܼܢ. ܐܝܼܬܼ ܕܒܲܪܓܼܘܼܡܝܵܐ ܕܟܹ̈ܐܦܹܐ: ܕܠܵܐ ܪ̈ܲܚܡܝܼܢ ܡܦܲܥܥܝܼܢ ܗ̄ܘ̣ܵܘ ܠܗܘܿܢ
                    ܘܡܵܝ̇ܐܝܼܢ. ܤܛܲܪ ܡ̣ܢ ܫܸܢ̈ܕܹܐ ܐ̄ܚܪ̈ܵܢܹܐ ܕܐܵܦ ܢܚܝܼܪ̈ܲܝܗܘܿܢ ܦܵܤ̇ܩܝܼܢ ܗ̄ܘ̣ܵܘ:
                    ܘܐܸܕܢܲܝ̈ܗܘܿܢ ܘܨܸܒܼ̈ܬܼܗܘܿܢ ܡܩܲܛܥܝܼܢ ܗ̄ܘ̣ܵܘ: ܘܥܲܝܢܲܝ̈ܗܘܿܢ ܡܥܵܘܪܝܼܢ ܗ̄ܘ̣ܵܘ:
                    ܘܫܵܩܲܝ̈ܗܘܿܢ ܘܒܼܘܼܪ̈ܟܲܝܗܘܿܢ ܒܐܲܪ̈ܙܦܵܬܼܵܐ ܡܬܲܒܿܪܝܼܢ ܗ̄ܘ̣ܵܘ. ܘܐܝܼܬܼܿ ܕܒܲܟܼܪ̈ܵܘܵܬܼܵܐ
                    ܕܪܸ̈ܓܼܠܲܝܗܘܿܢ ܬܵܠܹ̇ܝܢ ܗ̄ܘ̣ܵܘ ܠܗܘܿܢ. ܘܐܝܼܬܼ ܕܚܸܨ̈ܦܹܐ ܬܚܹܝܬܼ ܫܚܵܘܬܼ̈ܗܘܿܢ ܡܛܲܦܹܝܢ
                    ܗ̄ܘ̣ܵܘ ܠܗܘܿܢ ܘܡܵܝ̇ܬܝܼܢ. ܘܐܝܼܬܼ ܕܲܒܼܡܲܪ̈ܤܘܼܦܹܐ ܩܸܛܡܵܐ ܡܵܠܹ̇ܝܢ ܗ̄ܘ̣ܵܘ: ܘܪܹ̈ܫܲܝܗܘܿܢ
                    ܒܗܘܿܢ ܡܵܘܫܛܝܼܢ ܗ̄ܘ̣ܵܘ. ܘܐܝܼܬܼ ܕܚܲܠܵܐ ܘܒܲܪܓܲܢܬܼܵܐ ܒܲܢܚܝܼܪ̈ܲܝܗܘܿܢ ܢܵܤ̇ܟܝܼܢ ܗ̄ܘ̣ܵܘ:
                    ܘܡܸܢܹܗ ܬܘܼܒܼ ܘܐܵܦ ܒܲܚܒܼܵܪ̈ܵܬܼܗܘܿܢ ܫܵܝ̇ܦܝܼܢ ܗ̄ܘ̣ܵܘ. ܘܐܝܼܬܼ ܕܲܡܚܲܛܹ̈ܐ ܬܚܹܝܬܼ
                    ܛܸܦܪ̈ܲܝܗܘܿܢ ܕܠܵܐ ܚܵܘܤܵܢ ܡܫܲܦܕܝܼܢ ܗ̄ܘ̣ܵܘ. ܘܐܝܼܬܼ ܕܲܒܼܫܲܘܼ̈ܩܹܐ: ܕܟܼܘܼܒܲܝ̈ܗܘܿܢ (ܠܵܐ
                    ܡܫܲܦܹܒܝܢ؟) ܝܘܿܡ ܡ̣ܢ ܝܘܿܡ ܢܸܓܼܕܲܝ̈ܗܘܿܢ ܡܚܲܕܬܝܼܢ ܗ̄ܘ̣ܵܘ. ܘܒܼܵܬܲܪ ܗܵܠܹܝܢ ܟܠܗܘܿܢ  535  ܚܲܫܹ̈ܐ ܘܬܲܫܢܝܼ̈ܕܹܐ ܥܲܙܝܼ̈ܙܹܐ ܘܲܩ̈ܫܲܝܵܐ: ܪܹ̈ܫܲܝܗܘܿܢ ܒܤܲܝܦܵܐ
                    ܫܵܩ̇ܠܝܼܢ ܗ̄ܘ̣ܵܘ. 
            
            
                 ܫܸܠܡܲܬ̤ ܬܲܫܥܝܼܬܼܵܐ ܕܟܲܪܟܼܵܐ ܕܒܹܝܬܼ ܤܠܘܿܟܼ: ܘܲܕܼܤܵ̈ܗ̈ܕܹܐ ܩܲܕܝܼ̈ܫܹܐ
                    ܕܒܹܗ ܐܸܬܼܟܲܠܲܠ̣ܘ ܘܐܸܬܼܢܲܨܲܚܘ ܒܤܵܗܕܘܼܬܼܵܐ ܛܵܒܼܬܼܵܐ ܕܲܚܠܵܦ ܡܵܪܲܢ ܘܦܵܪܘܿܩܲܢ ܝܼܫܘܿܥ
                    ܡܫܝܼܚܵܐ.