“Martyrdom of Miles and his Companions - ܤܗܕܘܬܐ ܕܡܝܠܣ ܐܲܦܸܤܦܘܿܦܵܐ ܕܫܘܿܫܲܢ: ܘܕܼܵܐܒܿܘܼܪܤܵܡ ܩܲܫܝܼܫܵܐ: ܘܲܕܼܤܝܼܢܲܝ ܡܫܲܡܫܵܢܵܐ. ܒܫܘܼܪܵܝܹܗ ܕܲܪܕܼܘܼܦܝܲܢ .” Based upon Paul Bedjan ed., Acta martyrum et sanctorum (Parisiis; Lipsiae: Harrasssowitz, 1890). Digital Syriac Corpus. Last modified November 7, 2018. https://syriaccorpus.org/489.
    
        
            
                ܤܗܕܘܬܐ ܕܡܝܠܣ ܐܲܦܸܤܦܘܿܦܵܐ ܕܫܘܿܫܲܢ: ܘܕܼܵܐܒܿܘܼܪܤܵܡ ܩܲܫܝܼܫܵܐ: ܘܲܕܼܤܝܼܢܲܝ ܡܫܲܡܫܵܢܵܐ.
                    ܒܫܘܼܪܵܝܹܗ ܕܲܪܕܼܘܼܦܝܲܢ. 
            
            
                 ܐܹܡܲܪ ܐܵܦܸܢ ܠܵܐ ܤܵܦܹ̇ܩ ܐ̄ܢܵܐ: ܐܸܫܬܲܥܸܐ ܐܵܦܸܢ ܠܵܐ ܡܵܘܦܸܐ ܐ̄ܢܵܐ.
                    ܟܲܪܝܵܐ ܗ̣̄ܝ ܠܵܗ̇ ܠܢܲܦܫܝ ܕܠܵܐ ܡܲܨܝܵܐ ܡܵܘܪܒܼܵܐ ܠܪܵܘܪ̈ܒܼܵܗܘܿܢ ܕܪܵܘܪ̈ܒܹܐ
                    ܒܬܸܫ̈ܒܿܚܵܬܼܗܘܿܢ: ܘܲܡܥܵܩܵܐ ܗ̣̄ܝ ܬܲܪܥܝܼܬܼܝ ܕܠܵܐ ܡܸܫܟܿܚܐ ܡܫܲܒܿܚܵܐ ܠܬܸܫ̈ܒܿܚܵܬܼܗܘܿܢ
                    ܕܲܫܒܼܝܼܚܹ̈ܐ ܒܪܵܘܡܪ̈ܒܼܵܬܼܗܘܿܢ: ܗܵܐ ܓܹܝܪ ܠܵܚ̈ܫܵܢ ܠܝܼ ܐܵܬܼ̈ܘܵܬܼܗܘܿܢ ܒܬܲܗܪܗܹܝܢ:
                    ܘܪ̈ܵܡܙܵܢ ܠܝܼ ܬܸܕܼܡܪ̈ܵܬܼܗܘܿܢ ܒܕܼܘܼܡܵܪܗܹܝܢ. ܗܵܐ ܚܵܐܲܪ ܒܝܼ ܫܘܼܦܪܗܘܿܢ ܒܲܫܪܵܪܹܗ:
                    ܘܤܵܘܲܚ̇ 
                 ܠܝܼ ܨܸܒܼܬܿܗܘܿܢ ܒܥܲܡܠܹܐ. ܗܵܐ ܡܲܪܬܲܚ ܠܝܼ ܚܘܼܒܿܗܘܿܢ ܒܲܥܒܼܵܕܹܗ:
                    ܘܲܡܓܼܵܘܙܠܵܐ ܠܝܼ ܪܸܚܡܲܬܼܗܘܿܢ ܒܤܘܼܗܪܵܢܵܗ̇. ܗܵܐ ܟܵܬܼ̇ܒܵܐ ܠܝܼ ܒܗܘܿܢ ܗܲܝܡܵܢܘܼܬܼܗܘܿܢ
                    ܒܢܸܨܚܵܢܵܗ̇: ܘܨܵܐܲܪ ܘܪܵܫܹܡ ܠܝܼ ܥܠܲܝܗܘܿܢ  261  ܚܘܼܡܤܵܢܗܘܿܢ ܒܙܵܟܼܘܼܬܹܗ. ܗܵܐ
                    ܡܲܗܓܸܿܐ ܠܝܼ ܒܗܘܿܢ ܩܸܛܠܗܘܿܢ ܒܚܲܫܹܗ: ܘܲܡܦܲܫܸܩ ܘܡܲܪܬܸܐ ܠܝܼ ܥܠܲܝܗܘܿܢ ܕܸܡܗܘܿܢ
                    ܒܲܪܤܵܤܹܗ. ܗܵܐ ܡܲܛܥܸܐ ܥܘܼܗܕܵܢܗܘܿܢ ܚܲܒܿܝܼܒܼܵܐ ܠܚܵܘ̈ܒܲܝ: ܘܡܲܫܸܐ ܕܘܼܟܼܪܵܢܗܘܿܢ
                    ܪܚܝܼܡܵܐ ܠܟܼܘܼ̈ܬܼܡܵܬܼܝ: ܗܵܐ ܡܚܵܘܹܝܢ ܠܹܗ ܠܪܸܥܝܵܢܝ ܓܲܢ̄ܒܵܪܹ̈ܝܗ̇ ܕܐܲܠܵܗܘܼܬܼܵܐ:
                    ܘܡܲܥܒܿܪܝܼܢ ܩܕܼܵܡ ܡܲܚܫ̈ܒܼܵܬܝ ܚܲܝ̈ܠܬܼܵܢܹܝܗ̇ ܕܐ̄ܢܵܫܘܼܬܼܵܐ. ܕܐܸܫܬܲܥܸܐ ܠܲܡ ܫܙܼܦܪܗܘܿܢ
                    ܒܕܸܕܹܩܹܗ ܡܵܠ̇ܟܿܝܼܢ ܠܝܼ: ܘܕܐܹܡܲܠܸܠ ܫܘܼܒܼܚܗܘܿܢ ܒܘܵܠܝܼܬܹܗ ܡܦܝܼܤܝܼܢ ܠܝܼ. ܕܐܹܚܵܘܸܐ
                    ܪܲܗܛܗܘܿܢ ܒܲܡܫܘܼܚܬܹܗ ܦܵܩ̇ܕܝܼܢ ܠܝܼ: ܘܕܼܵܐܘܕܲܥ ܥܲܡܠܗܘܿܢ ܒܟܲܝܠܹܗ ܡܲܠ̇̄ܝܼܢ ܠܝܼ. ܗܵܐ
                    ܥ̣ܫܸܢ ܠܹܗ ܘܝܼܪܸܒܼ ܡܲܒܘܼܥܗܘܿܢ ܒܬܲܪܥܝܼܬܼܝ: ܘܡܲܦܩܵܢܵܐ ܪܘܼܝܼܚܵܐ ܒܫܸܝܵܢܝ ܒܨܝܼܪܵܐ
                    ܠܲܝܬܿ ܠܹܗ. ܗܵܐ ܡܠ̣ܵܐ ܒܝܼ ܘܐܸܫ̣ܬܲܦܲܥ ܒܪܸܕܼܝܹܗ: ܘܤܸܦܘܵܬܼܝ̈ ܐܲܛܝܼ̈ܡܵܬܼܵܐ ܫܵܩܘܼܬܼܵܐ
                    ܠܹܗ ܠܵܐ ܦܵܬܼ̈ܚܵܢ. ܗܵܐ ܢܵܨܹ̇ܐ ܥܲܡܝ ܩܲܢܝܵܐ ܒܝܪܸܬܼܡܹܗ ܚܠܵܦ ܟܬܼܝܼ̈ܒܼܵܬܐ ܕܲܒܼܨܝܼܪ̈ܵܢ
                    ܡ̣ܢ ܗܲܒܿܘܼܬܼܗܘܿܢ: ܘܪܵܫ̇ܝܵܐ ܠܝܼ ܡܓܲܠܬܼܵܠ ܒܫܸܬܼܩܵܗ̇ ܚܠܵܦ ܐܵܬܼ̈ܘܵܬܼܵܐ ܕܲܙܥܘܿܪ̈ܝܵܢ
                    ܡ̣ܢ ܬܸܫ̈ܒܿܚܵܬܼܗܘܿܢ. 
                 ܐܸܠܵܐ ܩܵܪܘܿܝܵܐ ܢܸܬܼܒܲܝܲܢ ܒܗܵܘܢܵܐ: ܘܫܵܡ̇ܘܿܥܵܐ ܢܸܤܬܲܟܲܠ ܒܦܘܼܪܫܵܢܵܐ.
                    ܕܐܵܦܸܢ ܠܵܐ ܗ̄ܘ̣ܵܐ ܐܲܟܼܘܵܬܼܗܘܿܢ ܬܸܫ̈ܒܿܚܵܬܼܗܘܿܢ ܤܵܡ̣ܢܲܢ: ܐܸܠܵܐ ܐܲܟܼܘܵܬܼܗܘܿܢ
                    ܫܪܵܪܗܘܿܢ ܟܬܲܒܼܢܲܢ. ܡܵܘܬܿܗܘܿܢ ܘܟܲܕܘܼ: ܘܩܸܛܠܗܘܿܢ ܘܤܵܦܹ̇ܩ. ܡܵܘܬܿܗܘܿܢ ܓܹܝܪ ܚܵܐܲܪ
                    ܒܡܵܘܬܹܗ ܕܢܝܼܫܵܐ ܪܲܒܵܐ ܘܲܩܒܼܝܼܥܵܐ: ܠܹܗ ܡܕܲܡܹܝܢ ܘܫܵܕܹܝܢ: ܠܹܗ  262 
                    ܡܵܬܼ̇ܚܝܼܢ ܘܕܼܵܓܼܠ̇ܝܼܢ. ܩܸܫܬܿܗܘܿܢ ܡܲܠܝܵܐ ܬܲܟܼܫܲܦܬܼܵܐ ܘܪ̈ܲܚܡܹܐ: ܓܹܐܪܗܘܿܢ ܡܫܝܼܚ
                    ܚܲܫܵܐ ܘܕܸܡ̈ܥܹܐ. ܠܵܐ ܗ̄ܘ̣ܵܐ ܠܫܘܼܒܼܗܵܪܵܐ ܓܹܐܪܗܘܿܢ ܩܵܒܼ̇ܥܝܼܢ ܒܢܝܼܫܵܐ: ܐܸܠܵܐ
                    ܠܬܸܫܒܿܘܿܚܬܹܗ ܕܚܵܘܪܵܐ ܝܲܡܝܼܢܗܘܿܢ ܢܵܦ̇ܨܝܼܢ ܘܲܡܢܝܼܚܝܼܢ. ܡܸܢܹܗ ܘܲܥܠܵܘܗܝ ܡܸܬܼܚܲܝܲܠ
                    ܕܫܵܕܹܐ: ܗ̤ܘ ܠܹܗ ܒܹܗ ܬܵܪܹܨ ܕܪܵܥܵܐ ܕܡܵܚܹ̇ܐ. ܐܲܟܼܘܵܬܹܗ ܙܩܝܼܦ ܗ̣̄ܘ ܗܵܘ̇ ܕܫܵܕܹܐ:
                    ܕܐܲܟܼܘܵܬܹܗ ܨܸܒܼܝܵܢܹܗ ܙܲܩ̣ܦܹܗ ܒܚܘܼܒܹܗ. ܘܐܲܟܼܘܵܬܹܗ ܨܠܝܼܒܼ ܗ̣̄ܘ ܗܵܘ̇ ܕܡܵܚܹ̇ܐ:
                    ܕܐܲܟܼܘܵܬܹܗ ܚܹܐܪܘܼܬܹܗ ܨܠܲܒܼܬܹܗ ܒܪܸܚܡܬܹܗ. ܬܲܡܵܢ ܙܵܟܼܘܼܬܼܵܐ ܘܲܟܼܠܝܼܠܵܐ (ܠܛܲܪܩܵܐ؟):
                    ܕܒܲܡܠܵܛܵܠܐ ܚܵܢܹ̇ܐ ܘܕܼܵܓܹܠ. ܬܲܡܵܢ ܡܵܘܗܲܒܼܬܼܵܐ ܘܕܲܫ̈ܢܹܐ ܠܝܲܠܝܼܦܵܐ: ܕܲܒܼܡܲܪܟܼܘܼܬܼܵܐ
                    ܡܕܲܡܸܐ ܘܩܵܒܲܥ. ܬܲܡܵܢ ܢܵܓܼܕܹ̈ܐ ܘܟܼܘܼܐܵܪܵܐ ܠܫܲܒܼܪܵܐ: ܕܲܒܼܪܲܦܝܘܼܬܹܗ ܫܲܕܲܪ ܓܹܐܪܹܗ
                    ܠܬܼܵܘܫܵܐ. ܬܲܡܵܢ ܒܸܗܬܿܬܼܵܐ ܘܬܼܘܼܟܵܐ ܠܤܲܟܼܠܵܐ: ܕܲܒܼܫܘܼܥܠܵܝܹܐ ܠܵܐ ܐܸܬܼܩܲܪܲܒܼ
                    ܠܡܹܐܠܲܦ. ܬܲܡܵܢ ܙܩܝܼܦ ܘܲܡܬܼܝܼܚ ܢܝܼܫܵܐ ܡܵܪܵܐ ܕܢܝܼ̈ܫܹܐ ܨܠܝܼܒܼܵܐ. ܬܲܡܵܢ ܐܲܫܝܼܕܼ ܕܢܹܗ
                    ܕܤܵܗܕܵܐ ܪܲܒܵܐ: ܪܲܒܿܗܘܿܢ ܕܤܵܗ̈ܕܹܐ ܢܥܝܼܓܹܐ. ܬܲܡܵܢ ܚܘܼܤܵܝܵܐ ܠܚܲܛܵܝܵܐ: ܕܲܠܡܵܘܬܹܗ
                    ܒܡܵܘܬܹܗ ܡܢܲܚܸܡ. ܬܲܡܵܢ ܫܘܼܒܼܩܵܢܵܐ ܠܚܲܝܒܼܵܐ: ܕܠܲܕܼܡܹܗ ܒܲܕܼܡܹܗ ܡܚܲܤܸܐ. ܬܲܡܵܢ
                    ܦܘܼܪܥܵܬܵܐ ܠܙܲܕܲܝܼܩܵܐ: ܕܲܠܩܸܛܠܹܗ ܒܩܸܛܠܹܗ ܡܵܘܪܸܒܼ. ܬܲܡܵܢ ܙܠܝܼܚ ܕܡܵܐ ܕܤܲܓܿܝܼ̈ܐܹܐ:
                    ܕܲܚܙܵܘ ܠܲܕܼܡܹܗ ܕܲܫܦܝܼܥ ܥܲܠ ܩܲܝܤܵܐ ܘܪܵܕܹܐ. ܘܲܕܼܪܲܓܘܼ ܠܩܸܛܠܵܐ ܕܡܵܪܗܘܿܢ ܚܲܝܵܐ:
                    ܒܩܸܛܠܗܘܿܢ ܡܸܢܹܗ ܠܵܐ ܐܸܬܼܚ̣ܤܸܟܼܘ. ܘܲܕܼܫܵܘܬܸܦ̣ܘ ܡܵܘܬܿܗܘܿܢ ܒܡܵܘܬܹܗ. ܦܵܪܲܥ̇  263  ܠܗܘܿܢ ܚܲܝܲܝ̈ܗܘܿܢ ܒܚܲܝܵܘ̈ܗܝ. ܐܘܿ ܡܲܚܒܲܝ̈ ܠܲܩܛܝܼܠܵܐ ܒܕܸܡܗܘܿܢ: ܟܡܵܐ
                    ܟܲܝ ܤܵܘܚܵܐ ܩܝܵܡܬܹܗ ܠܢܘܼܚܵܡܟܼܘܿܢ! ܐܘܿ ܪ̈ܵܚܡܲܝ ܨܠܝܼܒܼܵܐ ܒܩܸܛܠܗܘܿܢ. ܟܡܵܐ ܟܲܝ
                    ܡܸܬܼܦܲܨܚ ܤܡܵܟܹܗ ܠܒܼܘܼܤܵܡܟܼܘܿܢ! ܝܲܗ̣̄ܒܼ ܠܟܼܘܼܢ: ܘܝܲܗ̄ܒܼܬܿܘܿܢ ܠܹܗ: ܕܢܸܬܸܠ ܠܟܼܘܿܢ
                    ܕܬܸܒܼܘܼܢ ܡܸܢܹܗ ܫܘܼܘܕܵܝܹܗ ܫܲܪܝܼܪܵܐ ܒܡܲܠܟܿܘܼܬܼܵܐ. ܐܲܝܟܼ ܕܐܸܡ݂ܲܪ: ܕܡ̇ܢ ܕܢܵܘܕܸܐ ܒܝܼ
                    ܩܕܼܵܡ ܒܢܲܝ̈ܢܵܫܵܐ: ܐܵܘܕܸܐ ܒܹܗ ܩܕܼܵܡ ܐܵܒܼܝ ܕܒܲܫܡܲܝܵܐ ܘܲܩܕܼܵܡ ܡܲܠܐܟܼܵܘ̈ܗܝ. 
                 ܓܲܒܼܝܘܼܬܹܗ ܕܹܝܢ ܕܡܵܪܝ ܡܝܼܠܸܣ ܛܘܼܒܼܵܢܵܐ ܗܵܟܲܢܵܐ ܗ̤ܘܵܬܼ. ܕܐܝܼܬܼܵܘܗܝ
                    ܗ̄ܘ̣ܵܐ ܡ̣ܢ ܐܲܬܢܼܪܵܐ ܕܪ̈ܵܙܝܼܩܵܝܹܐ: ܘܐܸܬܿܛܒܲܥ ܗ̄ܘ̣ܵܐ ܒܛܲܠܝܘܼܬܹܗ ܕܲܢܫܲܡܸܫ ܠܡܲܠܟܵܐ
                    ܕܐܲܪܥܵܐ. ܠܵܐ ܕܹܝܢ ܫܒܲܩ̣ܬܹܗ ܗ̄ܘ̣ܵܬܼ ܛܲܝܒܿܘܼܬܼܵܐ ܠܗܵܢܵܐ ܡܵܐܢܵܐ ܕܬܸܕܼܡܘܼܪܬܵܐ:
                    ܕܢܸܗܘܸܐ ܬܲܡܵܢ ܐܲܪܥܵܢܵܐ ܐܲܝܟܼ ܟܠܢܵܫ. ܐܸܠܵܐ ܕܒܲܪܬܹܗ ܕܲܢܫܲܡܸܫ ܠܡܲܠܟܵܐ ܫܡܲܝܵܢܵܐ:
                    ܐܲܝܟܼ ܡܲܠܲܐܟܼܵܐ ܫܡܲܝܵܢܵܐ: ܐܸܬܼܩܲܪܲܒܼ ܗ̄ܘ̣ܵܐ ܕܹܝܢ ܒܗܲܝܡܵܢܘܼܬܹܗ ܠܡܲܥܡܘܿܕܼܝܼܬܼܵܐ.
                    ܘܐܸܬܼܓܿܠ̣ܝܼ ܠܹܗ ܒܚܸܙܘܵܐ ܡ̣ܢ ܪܘܼܚܵܐ ܕܩܘܼܕܼܫܵܐ: ܕܒܼܐܘܼܪܚܵܐ ܗܵܕܹܐ ܕܬܲܠܡܝܼܕܘܼܬܼܵܐ
                    ܕܲܡܫܝܼܚܵܐ ܢܩܵܘܸܐ ܒܲܒܼܬܼܘܼܠܘܼܬܼܵܐ: ܘܲܒܼܨܵܘܡܵܐ ܐܲܡܝܼܢܵܐ ܘܲܒܼܫܲܗܪܵܐ ܬܟܼܝܼܒܼܵܐ
                    ܦܲܓܼܪܹܗ ܡܕܲܝܸܒܼ ܗ̄ܘ̣ܵܐ ܘܲܡܫܲܗܸܐ. ܘܲܒܼܝܘܼܦܠܵܢܵܐ ܐܲܠܵܗܵܝܵܐ ܢܲܦܫܹܗ ܪܵܕܹܐ ܗ̄ܘ̣ܵܐ
                    ܘܲܡܚܲܟܸܿܡ: ܘܬܲܪܥܵܐ ܪܲܒܵܐ ܕܚܲܝܹ̈ܐ ܚܲܕ̈ܬܹܐ ܒܲܡܦܲܪܢܤܵܢܘܼܬܼܵܐ ܕܐܲܠܵܗܵܐ ܠܬܲܪܥܝܼܬܹܗ
                    ܐܸܬܼܦ̣ܬܲܚ ܗ̄ܘ̣ܵܐ. ܘܡܸܠܬܼܵܐ ܡܲܚܝܵܢܝܼܬܼܵܐ ܒܠܸܒܹܿܗ ܪܵܬܼܚܵܐ ܗ̄ܘ̣ܵܬܼ ܘܡܸܫܬܲܦܥܵܐ:
                    ܘܐܲܝܟܼ ܫܲܠܗܹܒܼܝܼܬܼܵܐ ܒܓܲܪ̈ܡܵܘܗܝ ܝܵܩ̇ܕܵܐ ܗ̄ܘ̣ܵܬܼ ܘܚܵܒܵܐ. ܘܠܵܐ ܐܸܫܟܲܚ ܠܲܡܤܲܝܒܵܪܘܼ
                         264  ܒܕܼܘܼܟܿܬܼܵܐ ܗܵܝ̇ ܕܒܼܵܗ̇ ܐܸܬܿܬܲܠ̣ܡܲܕܼ: ܡܸܛܠ ܕܝܘܼܬܼܪܵܢܵܐ
                    ܠܤܲܓܿܝܼ̈ܐܹܐ ܡܙܲܡܲܢ ܗ̄ܘ̣ܵܐ ܕܢܸܗܘܸܐ. ܢܦܲܩ̣ ܕܹܝܢ ܡ̣ܢ ܒܹܝܬܼ ܠܵܦܵܛ ܡܕܼܝܼܢ̄ܬܼܵܐ:
                    ܘܲܢ̣ܚܸܬܼ ܗ̄ܘ̣ܵܐ ܠܹܗ ܠܥܝܼܠܵܡ ܡܕܝܼܢ̄ܬܼܵܐ: ܗܵܝ̇ ܕܒܼܵܗ̇ ܐܝܼܬܼ ܗ̄ܘ̣ܵܐ ܫܘܿܫܲܢ ܒܝܼܪܬܵܐ:
                    ܘܲܒܼܦܸܬܼܓܼܵܡܵܐ ܕܩܘܼܫܬܼܵܐ ܘܲܒܼܟܼܵܪܘܿܙܘܼܬܼܵܐ ܫܲܪܝܼܪܬܵܐ ܠܥܵܡ̇ܘܿܪܹ̈ܝܗ̇ ܟܠܝܘܿܡ ܡܲܠܸܦ
                    ܗ̄ܘ̣ܵܐ ܘܲܡܚܵܘܸܐ: ܟܲܕܼ ܬܠܵܬܼ ܫܢܝܼ̈ܢ ܒܛܘܼܪܵܦܵܐ ܘܒܼܐܘܼܠܨܵܢܵܐ ܥܵܡܹ̇ܠ ܗ̄ܘ̣ܵܐ ܘܠܵܐܹ̇ܐ.
                    ܘܬܲܡܵܢ ܡ̣ܢ ܕܪܲܓܼ ܠܲܕܼܪܲܓܼ ܒܚܘܼܒܹܿܗ ܕܲܠܘܵܬܼ ܥܹܕܬܵܐ ܕܐܲܠܵܗܵܐ ܠܐܲܦܸܤܩܘܿܩܦܘܼܬܼܵܐ
                    ܡܲܛ̣ܝܼ ܗ̄ܘ̣ܵܐ: ܡ̣ܢ ܤܝܵܡ ܐܝܼܕܼܵܐ ܕܓܲܕܼܝܲܗ̣̄ܒܼ ܐܲܦܸܤܩܘܿܦܵܐ ܕܒܹܝܬܼ ܠܵܦܵܛ
                    ܡܕܼܝܼܢ̄ܬܼܵܐ: ܗܵܘ̇ ܕܐܵܦ ܗ̤ܘ ܒܤܵܗܕܘܼܬܼܵܐ ܛܵܒܼܬܼܵܐ ܕܥܲܠ ܐܲܦܲܝ̈ ܡܫܝܼܚܵܐ ܐܸܬܼܟܲܠܲܠ̣.
                    ܘܲܒܼܗܵܠܹܝܢ ܫ̈ܢܲܝܵܐ ܕܲܗܘ̤ܵܐ ܬܲܡܵܢ ܘܐܸܫܬܿܚܸܩ̣ ܛܘܼܒܼܵܢܵܐ ܡܝܼܠܸܣ: ܡܸܕܸܿܡ ܠܲܢܝܵܚ
                    ܐܲܠܵܗܵܐ ܘܠܲܢܚܵܝܹܗ ܡܕܼܝܼܢ̄ܬܼܵܐ ܗܵܝ̇ ܠܵܐ ܐܸܬܼܦܲܬܢܝܲܬ̤. ܘܲܟܼܡܵܐ ܙܲܒܼܢܝܼ̈ܢ ܚܲܡ̣ܤܸܢ
                    ܒܐܘܼܠܨܵܢܵܘ̈ܗܝ: ܥܕܲܡܵܐ ܕܪܲܓܼܡ̣ܘܼܗܝ ܒܫܘܼ̈ܩܹܝܗ̇ ܘܓܲܪܘܼܗܝ ܘܐܲܦܩ̣ܘܼܗܝ ܠܒܲܪ ܡܸܢܵܗ̇:
                    ܘܟܼܠܝܘܿܡ ܡܲܚ̈ܘܵܬܼܵܐ ܒܵܠܲܥ̇ ܗ̄ܘ̣ܵܐ ܘܲܡܤܲܝܒܲܪ. ܘܟܲܕܼ ܚ̣ܙܵܗ̇ ܕܤܲܓܿܝܼ ܐܲܚܝܼܕܼܵܐ
                    ܒܲܦܬܲܟܼܪܘܼܬܼܵܐ ܘܒܲܡܓܼܘܼܫܘܼܬܼܵܐ: ܐܲܪܦܝܵܗ̇ ܘܫܲܢ̣ܝܼ. ܘܲܒܼܝܵܘܡܵܐ ܕܲܢܦܲܩ̣ ܡܸܢܵܗ̇
                    ܠܵܛ̣ܵܗ̇ ܘܐܸܡ݂ܲܪ ܗܵܟܲܢܵܐ: ܕܥܲܠ ܕܠܵܐ ܨܒܲܝܬܿܝ ܕܬܸܬܼܒܿܢܝܼܢ ܘܬܸܫܬܲܟܼܠܠܝܼܢ ܒܲܫܠܵܡܵܐ:
                    ܢܩܘܼܡ ܥܠܲܝܟܿܝ ܡ̣ܢ ܫܸܠܝܵܐ ܥܩܘܼܪܝܵܐ ܕܲܩܛܝܼܪܵܐ ܘܚܘܼܪܒܵܐ ܕܲܪܗܝܼܒܼܘܼܬܼܵܐ. ܢܸܤܬܲܬܼܪܘܼܢ
                    ܒܸܝܵܢܲܝܼ̈ܟܿܝ ܪ̈ܵܡܹܐ: ܘܢܸܬܼܒܲܕܪܘܼܢ ܥܵܡ̇ܘܿܪ̈ܲܝܟܝ ܚܬܼܝܼܪܹ̈ܐ. 
                 ܘܡ̣ܢ ܒܵܬܲܪ ܬܠܵܬܼܵܐ ܝܲܪ̈ܚܝܼܢ ܠܡܲܦܲܩܬܹܗ: ܐܲܤ̣ܟܸܿܠܘ ܪ̈ܵܘܪܒܼܵܢܹܝܗ̇
                         265  ܕܲܡܕܼܝܼܢ̄ܬܼܵܐ ܒܡܲܠܟܵܐ: ܘܫܲܕܲܪ ܦܝܼ̈ܠܹܐ ܬܠܵܬܼܡܵܐܐ: ܘܲܗ̣ܦܲܟܼܘ
                    ܠܡܸܕܼܝܵܪܹ̈ܝܗ̇: ܘܩܲܛܸܠ̣ܘ ܠܟܼܠܗܘܿܢ ܥܵܡ̇ܘܿܪܹ̈ܝܗ̇. ܘܥܲܒܼܕܘܼܗ̇ ܐܲܝܟܼ ܦܩܲܥܬܼܵܐ:
                    ܘܙܲܪܥܘܼܗ̇ ܒܲܪܓܲܢܬܼܵܐ [ܗܵܢܵܘ ܕܹܝܢ ܚܲܪܕܠܵܐ: ܘܲܐ̄ܚܪ̈ܵܢܹܐ ܕܫܲܡܪܵܐ [ܫܲܡܪܵܐ؟ ܫܸܡܪܵܐ؟]
                    ܗ: ܒܲܪܚܲܠܝܵܐ]: ܥܕܲܡܵܐ ܠܝܵܘܡܵܢܵܐ. 
                 ܗ̤ܘ ܕܹܝܢ ܩܲܕܝܼܫܵܐ ܐܸܙܲܠ̣ ܗ̄ܘ̣ܵܐ ܠܐܘܿܪܫܠܸܡ: ܟܲܕܼ ܡܸܕܸܿܡ ܠܲܝܬܿ
                    ܗ̄ܘ̣ܵܐ ܥܠܵܘܗܝ ܐܸܠܵܐ ܐܸܢ ܐܹܘܲܢܓܲܠܝܼܘܿܢ ܒܬܲܪܡܵܠܵܐ. ܘܡ̣ܢ ܬܲܡܵܢ ܢ̣ܚܸܬܼ
                    ܠܐܵܠܹܟܼܤܲܢܕܪܝܼܵܐ ܡܕܼܝܢ̄ܬܼܵܐ: ܡܸܛܠ ܫܸܡܥܵܐ ܕܐܹܘܢܹܡܝܼܣ ܛܘܼܒܼܵܢܵܐ: ܬܲܠܡܝܼܕܹܗ
                    ܕܐܲܢܛܘܿܢ ܪܹܫܵܐ ܕܠܲܒܼܝܼ̈ܠܹܐ. ܘܲܗܘ̤ܵܐ ܬܲܡܵܢ ܫ̈ܢܲܝܵܐ ܬܲܪܬܹܝܢ: ܟܲܕܼ ܤܵܥܲ݁ܪ ܗ̄ܘ̣ܵܐ
                    ܐܲܚܹ̈ܐ ܘܕܲܝܪ̈ܵܬܼܗܘܿܢ ܕܲܒܼܡܲܕܼܒܿܪܵܐ. ܘܟܲܕܼ ܦܢ̣ܵܐ ܗ̄ܘ̣ܵܐ ܠܡܹܐܬܼܵܐ ܠܐܲܬܼܪܹܗ:
                    ܐܸܫ̣ܟܲܚ ܓܲܒܼܪܵܐ ܚܲܕܼ ܐܲܒܼܝܼܠܵܐ: ܕܥ̇ܵܡܲܪ ܗ̄ܘ̣ܵܐ ܒܲܡܥܲܪܬܼܵܐ ܒܲܠܚܘܿܕܼܵܘܗܝ. ܘܟܲܕܼ
                    ܩܵܝ̇ܡܝܼܢ ܒܲܨܠܘܿܬܼܵܐ ܬܪ̈ܲܝܗܘܿܢ ܒܥܸܕܵܢܵܐ ܕܨܲܦܪܵܐ: ܡ̣ܢ ܫܸܠܝܵܐ ܐܸܬܼܚ̣ܙܝܼ ܠܗܘܿܢ
                    ܚܸܘܝܵܐ ܚܲܕ ܪܲܒܵܐ ܕܡܸܬܼܩܪܸܐ ܗ̄ܘ̣ܵܐ ܝܵܘܫܦܑܵ: ܘܲܡܫܲܟܲܪ ܗ̄ܘ̣ܵܐ ܚܸܙܘܹܗ ܛܵܒܼ ܘܲܕܼܚܝܼܠ:
                    ܘܗܵܘܹ̇ܐ ܗ̄ܘ̣ܵܐ ܬܠܵܬܼܝܼܢ ܘܬܲܪܬܹܝܢ ܐܲܡܝܼ̈ܢ. ܘܫܲܪܝܼ ܕܢܸܥܘܿܠ ܠܵܗ̇ ܠܲܡܥܲܪܬܼܵ ܐܲܝܟܼ
                    ܥܝܵܕܹܗ: ܡܸܛܠ ܕܬܲܡܵܢ ܥܵܡܲ݁ܪ ܗ̄ܘ̣ܵܐ. ܡܝܼܠܸܣ ܕܹܝܢ ܛܘܼܒܼܵܢܵܐ ܟܲܕܼ ܚ̣ܙܵܝܗܝ: ܠܵܐ
                    ܐܸܬܼܪܗܸܒܼ ܘܐܸܬܿܬܿܙܝܼܥ̣: ܐܸܠܵܐ ܐܸܬܼܠܲܒܲܒܼ ܘܲܦܫܲܛ̣ ܐܝܼܕܹܗ ܠܘܵܬܹܗ ܘܐܸܡ݂ܲܪ ܠܹܗ:
                    ܚܸܘܝܵܐ ܡܲܪܝܼܪܵܐ ܘܲܒܼܥܸܠܕܒܼܵܒܼܵܐ ܕܐ̄ܢܵܫܘܼܬܼܵܐ: ܠܡܵܢܵܐ ܡܲܡܪܲܚ ܐܲܢ̄ܬܿ ܕܬܲܦܸܩ ܠܲܢ
                    ܠܒܲܪ: ܘܬܸܥܘܿܠ ܐܲܢ̄ܬܿ ܠܓܼܵܘ؟ ܗܵܐ ܓܹܝܪ ܗܵܫܵܐ ܪܘܼܡܚܹܗ  266  ܕܡܵܪܝܵܐ
                    ܬܸܨܪܹܝܟܼ ܡ̣ܢ ܪܹܫ ܠܪܹܫ ܐܲܝܟܼ ܕܲܠܬܸܕܼܡܘܼܪܬܵܐ. ܘܒܲܪ ܫܵܥܬܹܗ ܐܸܬܼܢܦܲܚ̣ ܚܸܘܝܵܐ ܗܵܘ̇
                    ܟ̱ܠܹܗ: ܘܲܦ̣ܩܲܥ ܡ̣ܢ ܪܹܫܹܗ ܥܕܲܡܵܐ ܠܕܼܘܼܢܒܹܗ. ܫܲܐܠܹܗ ܕܹܝܢ ܡܝܼܠܸܣ ܠܐܲܚܵܐ ܗܵܘ̇
                    ܘܐܸܡ݂ܲܪ ܠܹܗ: ܚܙܸܐ ܗ̄ܘ̣ܵܐ ܠܵܟܼ ܗܵܢܵܐ ܚܸܘܝܵܐ ܡ̣ܢ ܩܕܝܼܡ ܗܵܪܟܵܐ؟ ܘܐܸܡ݂ܲܪ ܠܹܗ:
                    ܕܐܲܡܝܼܢܵܐܝܼܬܼ ܒܗܵܕܹܐ ܡܥܲܪܬܵܐ ܥܵܡܲ݁ܪ ܗ̄ܘ̣ܵܐ: ܘܐܵܦ ܠܝܼ ܙܲܒܢܵܐ ܐܝܼܬܼ ܠܝܼ ܒܵܗ̇:
                    ܘܡܸܕܸܿܡ ܠܵܐ ܐܲܗ̣ܪܲܢܝ. ܡܝܼܠܸܣ ܕܹܝܢ ܛܘܼܒܼܵܢܵܐ ܥܲܕܠܹܗ ܤܲܓܿܝܼ ܘܐܸܡ݂ܲܪ ܠܹܗ: ܟܲܕܼ
                    ܐܲܠܵܗܵܐ ܒܲܓܼܙܵܪ ܕܝܼܢܹܗ ܒܥܸܠܕܒܼܵܒܼܘܼܬܼܵܐ ܤܵܡ̣ ܒܹܝܬܼ ܒܢܲܝ̈ܢܵܫܵܐ ܠܚܸܘܝܵܐ: ܐܲܢ̄ܬܿ
                    ܡܸܛܠ ܡܵܢܵܐ ܒܤܵܢ̇ܐܵܐ ܡܗܲܝܡܸܢ ܗ̣̄ܘܲܝܬܿ: ܘܥܲܡܹܗ ܒܚܲܕܼ ܗܘܼܡܪܵܐ ܗܵܘܹ̇ܐ ܗ̣̄ܘܲܝܬܿ؟
                    ܗܵܝܟܹܿܝܢ ܫܲܢ̣ܝܹܗ ܠܐܲܚܵܐ ܗܵܘ̇ ܡ̣ܢ ܬܲܡܵܢ ܠܕܼܘܼܟܿܬܼܵܐ ܐ̄ܚܠܪܹܬܼܵܐ. 
                 ܗ̤ܘ ܕܹܝܢ ܛܘܼܒܼܵܢܵܐ ܪܕܼܵܐ ܗ̄ܘ̣ܵܐ ܘܐܸܬܼ݂ܵܐ ܠܲܢܨܲܝܼܒܼܝܼܢ ܡܕܼܝܢ̄ܬܼܵܐ:
                    ܘܐܸܫ̣ܟܲܚ ܟܲܕܼ ܥܹܕܬܵܠ ܡܸܬܼܒܲܢܝܵܐ ܡ̣ܢ ܐܝܼܕܲܝ̈ ܝܲܥܩܘܿܒܼ ܐܲܦܸܤܩܘܿܦܵܐ. ܘܟܲܕܼ ܚ̣ܙܵܝܗܝ
                    ܗ̄ܘ̣ܵܐ ܠܓܲܒܼܪܵܐ ܕܪܲܒܿ ܗ̄ܘ̣ܵܐ ܘܲܡܝܲܬܲܪ: ܘܒܸܝܵܢܹܗ ܫܒܼܝܼܚ ܘܲܗܕܼܝܼܪ: ܗܘ̤ܵܐ ܬܲܡܵܢ
                    ܩܲܠܝܼܠ ܙܲܒܼܢܵܐ: ܘܲܢܚ̣ܬܼ ܗ̄ܘ̣ܵܐ ܠܹܗ ܠܚܲܕܝܲܒܼ. ܘܡ̣ܢ ܬܲܡܵܬ ܫܲܕܲܪ ܠܹܗ ܕܘܼܠܵܐ
                    ܕܫܹܐܪܵܝܵܐ ܕܠܵܐ ܒܲܙܥܙܿܪ: ܐܲܝܟܼ ܕܠܲܢܦܲܩܬܼܵܐ ܕܒܲܝܬܼܵܐ. 
                 ܘܲܢܚܵܬܼ ܗ̄ܘ̣ܵܐ ܠܹܗ ܠܒܹܝܬܼ ܐܲܪ̈ܵܡܵܝܹܐ: ܘܐܸܤܬܲܩܒܲܠ̣ ܗ̄ܘ̣ܵܐ
                    ܒܚܸܪܝܵܢܵܐ ܪܲܒܵܐ ܕܲܐܲܦܸܤܩܘܿܦܵܐ ܕܲܤܠܹܝܩ ܘܲܩܛܝܼܤܦܘܿܢ: ܕܡܸܬܼܩܪܸܐ ܗ̄ܘ̣ܵܠ ܦܵܦܵܐ ܒܲܪ
                    ܥܲܓܲܝ. ܘܲܚ̣ܙܵܝܗܝ ܗ̄ܘ̣ܵܐ ܕܡܸܬܿܬܿܪܝܼܡ ܗ̄ܘ̣ܵܐ ܥܲܠ ܐܲܦܸܤܩ̈ܘܿܦܹܐ ܕܐܲܬܼܪ̈ܵܘܵܬܼܵܐ
                    ܕܲܟܼܝܼܫܝܼܢ ܗ̄ܘ̣ܵܘ ܠܬܲܡܵܢ ܐܲܝܟܼ ܕܲܠܼܕܼܝܼܢܹܗ:  267  ܘܡܸܫܬܲܥܠܸܐ ܗ̄ܘ̣ܵܐ
                    ܬܘܼܒܼ ܐܵܦ ܥܲܠ ܩܲܫܝܼ̈ܫܹܐ ܘܲܡܫܲܡ̈ܫܵܢܹܐ ܕܲܡܕܼܝܼܢ̄ܬܹܗ. ܘܝܼܕܲܥ̣ ܪܵܡܘܼܬܼܵܐ ܕܓܲܒܼܪܐ
                    ܕܲܥܠܲܝܗܘܿܢ ܘܡܲܦܘܼܠܬܹܗ ܕܡ̣ܢ ܐܲܠܵܗܵܐ: ܘܩ̣ܵܡ ܒܲܡܨܲܥܬܼܵܐ ܘܐܸܡ݂ܲܪ ܠܹܗ: ܕܥܲܠ ܡܵܢܵܐ
                    ܡܲܡܪܲܚ ܐܲܢ̄ܬܿ ܘܡܸܬܿܬܿܪܝܼܡ ܐܲܢ̄ܬܿ ܥܲܠ ܐܲܝܲܚ̈ܟ ܘܗܕܵܡܲܝ̈ܟ: ܘܚܵܤܹ̇ܡ ܐܲܢ̄ܬܿ ܒܗܘܿܢ
                    ܡܲܓܵܢ ܘܲܤܦܝܼܩܵܐܝܼܬܼ ܐܲܝܟܼ ܐ̄ܢܵܫܵܐ ܕܠܵܐ ܐܲܠܵܗ؟ ܠܵܐ ܗ̄ܘ̣ܵܐ ܗܵܟܲܢܵܐ ܟܬܼܝܼܒܼ: ܕܡ̇ܢ
                    ܕܗܵܘܹ̇ܐ ܠܟܼܘܿܢ ܪܹܫܵܐ: ܢܸܗܘܸܐ ܠܟܘܿܢ ܥܲܒܼܕܵܐ؟ ܐܸܡ݂ܲܪ ܠܹܗ ܦܵܦܵܐ: ܐܲܢ̄ܬܿ ܡܲܠܸܦ
                    ܐܲܢ̄ܬܿ ܠܝܼ ܗܵܠܹܝܢ: ܐܘܿ ܤܲܟܼܠܵܐ؟ ܠܵܐ ܗܵܐ ܓܹܝܪ ܘܐܵܦ ܐܸܢܵܐ ܝܵܕܲܥ̇ ܐ̄ܢܵܐ ܠܗܹܝܢ. ܘܒܲܪ
                    ܫܵܥܬܹܗ ܩܪܸܒܼ ܘܤ̣ܵܡܹܗ ܠܐܹܘܲܢܓܲܠܝܼܘܿܢ ܕܲܒܼܬܲܪܡܵܠܹܗ ܥܲܠ ܒܹܤܲܕܝܵܐ ܩܕܼܵܡܵܘܗܝ ܘܐܸܡ݂ܲܪ
                    ܠܹܗ: ܕܐܸܢ ܡܹܢܝ. ܕܝܼܠܝ ܐܲܝܟܼ ܕܡ̣ܢ ܒܲܪܢܵܫܵܐ ܠܵܐ ܨܵܒܹ̇ܝܬܿ ܠܡܹܐܠܲܦ: ܐܸܬܿܬܿܕܝܼܢ
                    ܡܵܕܹܝܢ ܡ̣ܢ ܐܹܘܢܓܲܠܝܼܘܿܢ ܕܡܵܪܲܢ: ܗܵܢܵܐ ܕܲܩܕܼܵܡ ܥܲܝܢܲܝ̣̈ ܒܲܪ̈ܵܝܵܬܼܵܐ ܗܵܐ ܤܝܼܡ:
                    ܡܸܛܠ ܕܠܵܠܐ ܚܵܙܹ̇ܐ ܐܲܢ̄ܬܿ ܦܘܼܩܕܵܢܹܗ ܒܥܲܝܢܵܐ ܟܤܝܼܬܼܵܐ ܕܢܲܪܥܝܼܬܼܵܟܼ. ܗ̤ܘ ܕܹܝܢ
                    ܦܵܦܵܐ: ܒܚܸܡܢܹܗ ܒܝܼܫܬܼܵܐ ܐܲܪܝܼܡ̣ ܐܝܼܕܹܗ ܒܪܘܼܓܼܙܹܗ: ܘܛܲܪܸܦ̣ ܥܠܵܘܗܝ ܕܐܹܘܲܢܓܲܠܝܼܘܿܢ.
                    ܘܐܸܡ݂ܲܪ: ܕܡܲܠܸܠ ܐܹܘܲܢܓܲܠܝܼܘܿܢ ܡܲܠܸܠ. ܐܸܬܿܬܿܙܝܥ̣ ܕܹܝܢ ܩܲܕܿܝܼܫܵܐ ܡܝܼܠܸܣ: ܘܲܪܗܵܛ̣
                    ܫܲܩ̣ܠܹܗ ܠܐܹܘܲܢܓܲܠܝܼܘܿܢ: ܘܢܲܫ̣ܩܹܗ ܘܤ̣ܵܡܹܗ ܥܲܠ ܥܲܝܢܵܘ̈ܗܝ. ܘܲܒܼܩܵܠܵܐ ܪܵܡܵܐ ܠܸܫܡܥܵܐ
                    ܕܟܼܠܹܗ ܟܸܢܫܵܐ ܗܵܘ̇: ܕܥܲܠ ܕܐܲܡܪܲܚ̣ܬܿ ܒܫܘܼܒܼܗܵܪܵܟܼ ܥܲܠ ܡܸܠܵܘ̈ܗܝ ܚܲܝ̈ܬܼܵܐ ܕܡܵܪܢ:
                    ܗܵܐ ܡܲܛ̣ܝܼ ܡܲܠܲܐܟܹܗ: ܘܢܸܡܚܹܝܟܼ ܥܲܠ ܦܸܠܓܼܵܟܼ ܘܢܵܘܒܿܫܹܗ: ܘܬܸܗܘܸܐ ܕܸܚܠܬܼܵܐ
                    ܘܤܘܼܪܵܕܼܵܐ ܠܤܲܓܿܝܼ̈ܐܹܐ. ܘܠܵܐ ܬܡܼܘܼܬܼ ܡ̣ܢ ܚܕܼܵܐ: ܐܸܠܵܐ ܬܦܘܼܫ ܠܐܵܬ̤ܵܐ
                    ܘܲܠܬܼܕܼܡܘܼܪܬܵܐ. ܘܒܲܪܫܲܥܬܹܗ ܢ̣ܚܸܬܼ ܒܲܕܼܡܘܼܬܼ ܒܲܪܩܵܐ ܡ̣ܢ ܫܡܲܝܵܐ:  268 
                    ܘܲܡ̣ܚܵܝܗܝ ܘܝܲܒܿܫܹܗ ܠܦܸܠܓܹܗ. ܘܲܢܦܲܠ̣ ܗ̄ܘ̣ܵܐ ܥܲܠ ܚܲܕܼ ܓܲܒܹܿܗ ܒܬܲܫܢܝܼܩܵܐ ܕܠܵܐ
                    ܡܸܬܼܡܲܠܲܠ ܫܢܝܼ̈ܢ ܬܲܪܬܲܥܸܤܪܹ̈ܐ: ܘܲܒܼܗܵܢܵܐ ܐܘܼܠܨܵܢܵܐ ܡ̣ܝܼܬܼ: ܘܲܗ̤ܘܵܬܼ ܕܸܚܠܬܼܵܐ
                    ܘܙܵܘܸܥܬܼܵܐ ܒܟܼܠܹܗ ܟܸܢܵܫܵܐ ܗܵܘ̇. 
                 ܘܡ̣ܢ ܬܲܡܵܢ ܐܸܙܲܠ̣ ܗ̄ܘ̣ܵܐ ܠܹܗ ܠܐܲܬܼܪܵܐ ܕܡܲܝܫܵܢ: ܠܘܵܬܼ ܓܲܒܼܪܵܐ ܚܲܕܼ
                    ܝܼܚܕܼܵܝܵܐ ܕܥܵܡܲܪ ܗ̄ܘ̣ܵܐ ܒܡܲܕܼܒܿܪܵܐ. ܘܲܓܼܕܲܫ ܕܡܵܪܹܗ ܕܐܲܬܼܪܵܐ ܗܵܘ̇ ܟܪܝܼܗ ܗ̄ܘ̣ܵܐ
                    ܒܟܹܐܒܼܵܐ ܥܲܛܠܵܐ ܫܢܲܝ̈ܵܐ ܬܪܬܹܝܢ: ܘܐܸܫ̣ܬܿܡܲܥ ܗ̄ܘ̣ܵܐ ܠܹܗ ܕܐܸܬ݂ܼܵܐ ܡܝܼܠܸܣ ܠܬܲܡܵܢ.
                    ܘܫܲܕܲܪ ܘܒܵܥܹ̇ܐ ܗ̄ܘ̣ܵܐ ܡܸܢܹܗ: ܐܲܝܟܼ ܕܢܹܐܙܲܠ ܠܘܵܬܹܗ. ܗܵܝܕܹܿܝܢ ܐܸܡ݂ܲܪ ܠܗܵܘ̇
                    ܕܐܸܡ݂ܲܪ: ܕܙܸܠ. ܘܡܵܐ ܕܥܹܵ̇ܠ ܐܢ̄ܬܿ: ܐܸܡ݂ܲܪ ܒܩܵܠܵܐ ܪܵܡܵܐ: ܕܐܸܡ݂ܲܪ ܡܝܼܠܸܣ: ܕܒܲܫܡܹܗ
                    ܕܝܼܫܘܿܥ ܢܵܨܪܵܝܵܐ ܐܸܬܼܚܲܠܡ ܘܩܘܼܡ ܗܲܠܸܟܼ݂ ܘܗܵܕܹܐ ܐܸܬܼܥܲܒܼܕܲܬ̤ ܗܵܟܲܢܵܐ: ܘܲܗ̤ܵܬܼ
                    ܡܫܲܡܠܝܵܐܝܼܬܼ: ܘܐܸܬܼܚ̣ܠܸܡ ܗܵܘ̇ ܓܲܒܼܪܵܐ: ܘܩܵܡ̣ ܐܸܬ݂ܼܵܐ ܠܘܵܬܹܗ: ܘܲܡܫܲܒܲܚ ܗ̄ܘ̣ܵܐ
                    ܠܐܲܠܵܗܵܐ: ܗ̤ܘ ܘܲܒܼ̈ܢܲܝ ܐܲܬܼܪܵܐ ܗܵܘ̇. ܘܤܲܓܿܝܼ̈ܠܹܐ ܐܸܬܿܬܲܠܡܲܕܼ. ܡܸܛܠ ܗܵܕܹܐ ܐܵܬ̤ܵܐ. 
                 ܘܬܼܘܼܒܼ ܐܲܝܬܝܼܘ ܠܘܵܬܹܗ ܥܠܲܝܡܵܐ ܚܲܕܼ: ܕܪܘܼܚܵܐܠ ܕܒܲܪ ܐܸܓܵܪܵܐ
                    ܥܵܕܼܝܵܐ ܗ̄ܘ̣ܵܬܼ ܥܠܵܘܗܝ: ܘܡ̣ܢ ܛܲܠܝܘܼܬܹܗ ܒܵܗ̇ ܡܸܫܬܲܢܲܩ ܗ̄ܘ̣ܵܐ. ܘܒܼܵܗ̇ ܒܫܵܥܬܼܵܐ
                    ܕܲܚ̣ܙܵܝܗܝ: ܨܲܠܝܼ ܘܚܲܬܼܡܹܗ ܒܲܫܡܹܗ ܕܝܼܫܘܿܥ: ܘܫܲܢܝܲܬ̤ ܡܸܢܹܗ ܪܘܼܚܵܐ ܗܵܝ̇: ܘܬܼܘܼܒܼ
                    ܠܵܐ ܐܸܬܲܬ̤ ܥܠܵܘܗܝ. ܘܤܲܓܿܝܼ̈ܐܬܼܵܐ ܕܐܲܝܟܼ ܗܵܠܹܝܢ ܐܸܤ̣ܬܿܥܲܪ ܒܐܝܼܕܹܗ ܒܐܲܬܼܪܵܐ ܗܵܘ̇:
                    ܐܲܝܟܼ ܕܲܠܬܸܫܒܿܘܿܚܬܼܵܐ ܕܐܲܠܵܗܵܐ. 
                 ܘܡ̣ܢ ܬܲܡܵܢ ܐܸܙܲܠ̣ ܗ̄ܘ̣ܵܐ ܠܹܗ ܠܐܲܬܼܪܹܗ ܠܒܹܝܬܼ ܪ̈ܵܙܝܼܩܵܝܹܐ.  269  ܘܥܲܠ̣ ܗ̄ܘ̣ܵܐ ܠܲܩܪܝܼܬܼܵܐ ܚܕܼܵܐ: ܕܐܝܼܬܼ ܗ̄ܘ̣ܵܐ ܒܵܗ̇ ܐܲܢ̄ܬܿܬܼܵܐ ܚܕܼܵܐ
                    ܪܲܒܿܬܼܵܐ: ܕܲܡܫܲܪܹܝܢ ܗ̄ܘ̣ܵܘ ܟܠܗܘܿܢ ܗܲܕܵܡܹܝܗ̇ ܒܟܼܘܼܪܗܵܢܵܐ ܩܲܫܝܵܐ ܫܢܲܝ̈ܵܐ ܬܫܲܥ.
                    ܘܐܸܫܬܿܡܲܥ̣ ܛܸܒܹܿܗ ܐܲܝܟܵܐ ܕܲܫܪܸܐ. ܘܫܲܩ̣ܠܘܼܗ̇ ܥܲܒܼ̈ܕܼܝܹܗ̇: ܘܐܲܝܬܿܝܘܼܗ̇ ܠܘܵܬܹܗ
                    ܠܬܲܡܵܢ. ܘܗ̤ܘ ܚ̣ܵܪ ܒܵܗ̇ ܘܲܚ̣ܙܵܗ̇ ܕܠܲܝܼܨܵܐ: ܡܸܛܠ ܕܪܲܓܿܝܼ ܒܵܥܝܵܐ ܗ̄ܘ̣ܵܬܼ ܡܸܢܹܗ.
                    ܗܵܝܕܹܿܝܢ ܐܸܡ݂ܲܪ ܠܵܗ̇: ܡܗܲܝܡܢܵܐ ܐܲܢ̄ܬܿܝ ܒܚܲܕܼ ܐܲܠܵܗܵܐ: ܗܵܘ̇ ܕܗܘ̤ܝܘܼ ܒܲܠܚܘܿܕܼܵܘܗܝ
                    ܡܫܟܲܚ ܡܲܐܤܸܐ ܠܹܟܼܝ؟ ܐܵܡܪܵܐ ܠܹܗ: ܡܗܲܝܡܢܵܐ ܐ̄ܢܵܐ ܡܵܪܝ: ܕܗ̤ܘܝܘܼ ܚܲܕܼ ܐܲܠܵܗܵܐ
                    ܒܲܠܚܘܿܕܼܵܘܗܝ: ܘܠܲܝܬܿ ܐ̄ܚܪܹܢܵܐ ܠܒܲܪ ܡܸܢܹܗ. ܗܵܝܕܹܿܝܢ ܩ̣ܵܡ ܘܨܲܠܝ̣: ܘܐܲܚ̣ܕܵܗ̇
                    ܒܐܝܼܕܼܵܗ̇ ܘܐܸܡ݂ܲܪ ܠܵܗ̇: ܒܲܫܡܹܗ ܕܐܲܠܵܗܵܐ ܕܗܲܝܡܸܢܬܿܝ ܒܹܗ: ܩܘܼܡܝ ܗܲܠܸܟܼܝ:
                    ܘܲܗ̤ܘܲܝܬܿܝ ܫܲܪܝܵܐ ܡ̣ܢ ܟܘܼܪܗܵܢܹܟܼܝ. ܘܒܼܵܗ̇ ܒܫܵܥܬܼܵܐ ܐܸܬܼܚܲܠ̣ܡܲܬ̤ ܐܲܢ̄ܬܿܬܼܵܐ ܗܵܝ̇
                    ܡ̣ܢ ܟܘܼܪܗܵܢܵܗ̇: ܘܩܵܡܲܬ̤ ܘܐܸܙܲܠ̄ܬ̤ ܠܒܲܝܬܵܗ̇: ܘܲܗܘ̤ܵܬܼ ܚܲܕܼܘܼܬܼܵܐ ܒܟܼܠܵܗ̇ ܗܵܝ̇
                    ܩܪܝܼܬܼܵܐ. 

                 ܘܒܼܵܗ̇ ܒܲܩܪܝܼܬܼܵܐ ܗܵܝ̇ ܐܸܬ݂ܼܵܐ ܠܘܵܬܹܗ ܬܪܹܝܢ ܓܲܒܼܪ̈ܝܼܢ: ܕܢܵܘܡܸܐ
                    ܚܲܕܼ ܠܚܲܒܼܪܹܗ ܡܸܛܠ ܓܢܘܼܒܼܬܼܵܐ ܕܡܸܕܸܿܡ. ܐܸܡ݂ܲܪ ܠܹܗ ܡܝܼܠܸܣ ܠܗܵܘ̇ ܕܝܵܡܹ̇ܐ: ܐܵܪܵܐ
                    ܒܹܪܝ: ܠܵܐ ܬܹܐܡܸܐ ܒܕܲܓܵܠܘܼܬܼܵܐ: ܘܬܸܛܠܡܝܼܘܗܝ ܠܚܲܒܼܪܵܟܼ ܒܟܼܠܵܗ̇ ܗܵܕܹܐ ܨܸܒܼܘܼܬܼܵܐ.
                    ܘܠܵܐ ܫܲܡ̣ܥܹܗ: ܘܐܲܡ̣ܪܲܚ ܘܝܼܡܵܐ. ܗܵܝܕܹܿܝܢ ܚ̣ܵܪ ܒܹܗ ܛܘܼܒܼܵܢܵܐ ܘܐܸܡ݂ܲܪ ܠܹܗ: ܕܐܸܢܗ̤ܘ
                    ܕܲܒܼܩܘܼܫܬܼܵܐ ܝܼܡܲܝܬܿ: ܙܸܠ ܟܲܕܼ ܫܲܪܝܼܪ ܐܲܢ̄ܬܿ ܘܲܚܠܝܼܡ ܠܒܲܝܬܵܟܼ. ܘܐܸܠܵܐ ܓܲܪܒܹܗ
                    ܕܓܲܚܙܝܼ ܬܸܠܒܲܫ: ܘܟܲܕܼ ܒܲܗܝܼܬܼ ܐܲܢ̄ܬܿ ܬܸܦܘܿܩ  270  ܡ̣ܢ ܗܵܪܟܵܐ. ܘܡܸܚܕܼܵܐ
                    ܐܲܓܼܪܸܒܼ ܓܲܒܼܪܵܐ ܗܵܘ̇ ܟ̱ܠܹܗ: ܘܲܗܘ̤ܵܬܼ ܕܸܚܠܬܼܵܐ ܪܲܒܿܬܼܵܐ ܒܟܼܠܵܗ̇ ܩܪܝܼܬܼܵܐ ܗܵܝ̇:
                    ܘܤܲܓܿܝܼ̈ܐܹܐ ܐܸܬܿܬܲܠܡܲܕܼܘ ܒܵܗ̇ ܡ̣ܢ ܚܲܢܦܘܼܬܼܵܐ. 
                 ܘܫܲܢ̣ܝܼ ܗ̄ܘ̣ܵܐ ܡ̣ܢ ܬܲܡܵܢ ܕܢܹܐܙܲܠ ܠܕܼܘܼܟܿܬܼܵܐ ܐ̄ܚܪܹܬܼܵܐ: ܘܐܸܙܲܠ̣ܘ
                    ܗ̄ܘ̣ܵܘ ܥܲܡܹܗ ܐܲܝܟܼ ܕܒܲܠܘܝܼܬܼܵܐ ܐܲܚܹ̈ܐ ܬܪܹܝܢ. ܘܢܲܗܪܵܐ ܚܲܕܼ ܪܲܒܵܐ ܦܓܲܥ̣ ܒܗܘܿܢ:
                    ܘܲܟܼܠ̣ܵܐ ܐܸܢܘܿܢ ܝܵܘܡܵܐ ܚܲܕܼ ܥܠܵܘܗܝ: ܡܸܛܠ ܕܠܵܐ ܝܲܗ̣̄ܒܼ ܗ̄ܘ̣ܵܐ ܡܲܥܒܿܪܵܐ ܒܪܸ̈ܓܼܠܹܐ.
                    ܗܵܝܕܹܝܢ ܐܲܦܝܼܣ ܐܸܢܘܿܢ ܠܐܲܚܹ̈ܐ ܗܵܢ̇ܘܿܢ: ܘܩ̣ܵܡ ܘܨܲܠܝܼ: ܘܲܫ̣ܪܵܐ ܐܸܢܘܿܢ ܕܢܸܥܛܦܘܼܢ
                    ܠܕܼܘܼܟܲܬܼܗܘܿܢ. ܗܸܢ̣ܘܿܢ ܕܹܝܢ ܐܲܪܚܸܩ̣ܘ ܡܸܢܹܗ ܩܲܠܝܼܠ: ܟܲܕܼ ܢܵܛ̇ܪܝܼܢ ܗ̄ܘ̣ܵܘ ܠܹܗ:
                    ܕܡܵܢܵܐ ܟܲܝ ܥܵܒܹ̇ܕܼ: ܐܵܘ ܐܲܝܟܲܢܵܐ ܥܵܒܲܪ. ܘܩ̣ܵܡ ܗ̤ܘ ܘܨܲܠܝܼ: ܘܗܲܠܸܟܼ ܥܠܵܘܗܝ ܥܲܠ
                    ܢܲܗܪܵܐ ܘܲܥ̣ܒܲܪ: ܟܲܕܼ ܐܵܦܠܵܐ ܡܤܵܐܢܵܘ̈ܗܝ ܫ̣ܪܵܐ ܡ̣ܢ ܪܸ̈ܓܼܠܵܘܗܝ܀ ܘܐܸܤܬܼܩ̣ܒܲܠ ܗ̄ܘ̣ܵܐ
                    ܒܲܩܪܝܼܬܼܵܐ ܚܕܼܵܐ: ܘܐܸܫܟܲܚ̣ ܗ̄ܘ̣ܵܐ ܒܵܗ̇ ܓܲܒܼܪܵܐ ܡܟܫܲܡܫܵܢܵܐ: ܟܲܕܼ ܡܸܬܼܡܲܠܲܠ ܗ̄ܘ̣ܵܐ
                    ܒܲܨܒܼܘܼܬܼܵܐ ܕܓܼܵܘܪܵܐ. ܘܲܩ̣ܪܵܝܗܝ ܘܲܪܫܵܝܗܝ ܗ̄ܘ̣ܵܐ ܒܵܗ̇ ܒܥܹܕܬܵܐ ܘܐܸܡ݂ܲܪ ܠܹܗ:
                    ܕܐܵܘܕܵܐ ܒܹܪܝ: ܐܸܢܗ̤ܘ ܕܐܝܼܬܹܝܗ̇ ܨܒܼܘܼܬܼܵܐ ܗܵܕܹܐ ܠܘܵܬܼܵܟܼ: ܘܩܲܪܸܒܼ ܬܝܵܒܼܘܼܬܼܵܐ
                    ܠܘܵܬܼ ܐܲܠܵܗܥܵܐ: ܡܸܛܠ ܕܲܡܪܲܚܡܵܢܵܐ ܗ̣̄ܘ: ܘܫܵܒܹ̇ܩ ܠܵܟܼ. ܘܠܵܐ ܬܲܡܪܲܚ: ܟܼܲ݊ ܠܵܐ
                    ܩܲܕܿܝܼܫ ܐܲܢ̄ܬܿ: ܕܲܬܼܫܲܡܸܫ ܩܕܼܵܡܵܘܗܝ: ܕܲܡ ܟܹܐܢܘܼܬܹܗ ܡ̣ܢ ܫܸܠܝܵܐ ܬܵܘܒܿܕܼܵܟܼ. ܗ̤ܘ
                    ܕܹܝܢ ܓܲܒܼܪܵܐ ܗܵܘ̇ ܐܲܚܨܸܦ ܘܐܸܡ݂ܲܪ ܠܹܗ: ܐܘܿܗ ܡܵܪܝ: ܠܵܐ ܬܸܚܛܸܐ ܘܬܹܐܡܪܲܢܝ  271  ܒܝܼܫܵܐܝܼܬܼ: ܡܸܛܠ ܕܲܒܼܕܲܓܵܠܘܼܬܼܵܐ ܥܫܝܼܩ ܐ̄ܢܵܐ ܒܗܵܕܹܐ ܨܒܼܘܼܬܼܵܐ.
                    ܘܬܼܘܼܒܼ ܐܲܡ̣ܪܲܚ ܘܲܫܩܲܠ̣ ܟܬܼܵܒܼܵܐ ܕܕܼܵܘܝܼܕܸ: ܘܩ̣ܵܡ ܥܲܠ ܒܹܝܡ ܕܲܢܙܲܡܲܪ. ܘܢܸܦܩܲܬ̤
                    ܥܠܵܘܗܝ ܐܲܝܟܼ ܦܲܤܲܬܼ ܐܝܼܕܼܵܐ ܡ̣ܢ ܒܹܝܬܼ ܡܲܩܕܫܵܐ: ܘܲܡܚܵܬܹܗ ܥܲܠ ܐܲܦܵܘ̈ܗܝ: ܘܲܢܦܲܠ̣
                    ܡ̣ܢ ܫܸܠܝܵܐ ܘܡ̣ܘܼܬܼ. ܘܲܗܘ̤ܵܬܼ ܕܸܚܠܬܼܵܐ ܪܒܿܬܼܵܐ ܒܟܼܠܹܗ ܐܲܬܼܪܵܐ ܗܵܘ̇܀ ܒܵܗ̇ ܕܹܝܢ
                    ܒܲܩܪܝܼܬܼܵܐ ܗܵܝ̇ ܐܲܝܬܝܼܘ ܠܹܗ ܛܲܠܝܵܐ ܚܕܼ: ܕܡ̣ܢ ܟܪܸܣ ܐܸܡܹܗ ܥܲܠ ܒܘܼܪ̈ܟܵܘܗܝ ܫܵܐܹܦ
                    ܗ̄ܘ̣ܵܐ: ܡܸܛܠ ܕܪܸ̈ܓܼܠܵܘܗܝ ܥܲܡ ܫܵܩܵܘ̈ܗܝ ܡܦܲܬܼ̈ܠܵܢ ܗ̣̄ܘܲܝ̈. ܘܟܲܕܼ ܚ̣ܙܵܝܗܝ: ܩ̣ܵܡ
                    ܘܨܲܠܝܼ. ܘܐܲܚ̣ܕܹܗ ܒܐܝܼܕܹܗ ܘܐܸܡ݂ܲܪ ܠܹܗ: ܒܲܫܡܹܗ ܕܝܼܫܘܿܥ ܢܲܨܪܵܝܵܐ ܩܘܼܡ ܗܲܠܸܟܼ. ܘܒܲܪ
                    ܫܵܥܬܹܗ ܫܲܪ ܪܸ̈ܓܼܠܵܘܗܝ: ܘܐܸܬܼܦܲܫܛ̣ܘ ܫܵܩܵܘ̈ܗܝ: ܘܐܸܬܼܚܠܸܡ ܘܩ̣ܵܡ ܗܲܠܸܟܼ. ܒܲܪ ܥܸܤܪܝܼܢ
                    ܕܹܝܢ ܫܢܝܼ̈ܢ ܐܝܼܬܼܵܘܗܝ ܗ̄ܘ̣ܵܐ ܛܲܠܝܵܐ ܗܵܘ̇ ܕܐܸܬܼܐܲܤ̣ܝܼ. 
                 ܥܲܠ ܐܵܬܼ̈ܘܵܬܼܵܐ ܕܹܝܢ ܘܥܲܠ ܐܵܤ̈ܘܵܬܼܵܐ ܪܵܘܪ̈ܒܼܵܬܼܵܐ: ܕܲܒܼܞܲܝܠܵܐ
                    ܕܐܲܠܵܗܵܐ ܡܸܤܬܲܥܪ̈ܵܢ ܗ̣̄ܘܲܝ̈ ܒܐܝܼܕܹܗ: ܠܵܐ ܐܸܫܟܲܚܢ ܟܠܗܹܝܢ ܠܡܸܟܼܬܲܒܿ: ܡܸܛܠ
                    ܕܤܲܓܿܝܼ̈ܐܢ ܗ̣̄ܘܲܝ̈. ܐܵܬܹ̇ܝܢܲܢ ܕܹܝܢ ܒܟܲܪ̈ܝܵܬܼܵܐ ܠܡܸܗܲܛ ܠܘܵܬܼ ܐܵܬ̤ܵܐ ܪܲܒܿܬܼܵܐ
                    ܕܲܕܼܡܹܗ: ܘܲܠܘܵܬܼ ܚܲܫܵܐ ܡܝܲܬܿܝܼܪܵܐ ܕܩܸܛܠܹܗ: ܘܲܠܘܵܬܼ ܤܵܗܕܘܼܬܼܵܠ ܫܒܼܝܼܚܵܐ ܟܠܝܼܠܵܐ
                    ܕܢܸܨܚܵܢܵܘ̈ܗܝ. ܫܡܲܥ̣ ܗ̄ܘ̣ܵܐ ܕܹܝܢ ܒܛܸܒܵܐ ܕܬܘܼܠܡܵܕܹܗ ܡܵܪܹܗ ܕܐܲܬܼܪܵܐ ܗܵܘ̇: ܕܲܫܡܹܗ
                    ܗ̄ܘ̣ܵܐ ܗܘ̇ ܪܡܝܼܙܕ ܓܼܘܼܦܪܝܼܙ. ܪܲܫܝܼܥܵܐ ܗ̄ܘ̣ܵܐ ܕܹܝܢ ܘܲܚܬܼܝܼܪܵܐ ܘܪܵܡܵܐ ܘܫܲܒܼܗܪܵܢܵܐ.
                    ܘܫܕܲܪ ܘܐܲܝܬܝܹܗ ܠܡܲܗܠܸܕܓܪܕ ܡܕܼܝܼܢ̄ܬܼܵܐ ܕܪ̈ܵܙܝܼܩܵܝܹܐ: ܘܐܲܤ̣ܪܹܗܥ ܬܲܡܵܢ  272  ܥܸܕܵܢ ܒܥܸܕܵܢ ܘܲܠܗܵܠܹܝܢ ܬܪܹܝܢ ܬܲܠܡܝܼܕܼܵܘ̈ܗܝ ܥܲܡܹܗ ܠܐܵܒܘܼܪܤܵܡ ܘܲܠܤܝܼܢܲܝ. ܘܐܵܦ
                    ܒܡܲܚ̈ܘܵܬܼܵܐ ܘܐܵܦ ܒܢܸ̈ܓܼܕܿܐ ܐܸܫ̣ܬܢܲܕܼ ܒܗܘܿܢ ܬܲܪܬܹܝܢ ܙܲܒܼܢ̈ܝܼܢ: ܐܲܝܟܼ ܕܢܸܤܓܿܕܼܘܼܢ
                    ܠܫܸܡܫܵܐ: ܗܸܢܘܿܢ ܕܹܝܢ ܤܲܓܿܝܼ ܓܵܚ̇ܟܿܝܼܢ ܗ̄ܘ̣ܵܘ ܥܵܠܘܗܝ: ܘܲܢܒܲܤܪܝܼܢ ܗ̄ܘ̣ܵܐ ܥܲܠ
                    ܪܵܡܘܼܬܹܗ ܘܫܘܼܥܠܵܝܹܗ ܕܲܥܠܲܝܗܘܿܢ: ܘܒܲܫܪܵܪܗܘܿܢ ܩܵܝܡܝܼܢ ܗ̄ܘ̣ܵܘ: ܘܬܸܫܒܿܘܿܚܬܼܵܐ
                    ܕܐܲܠܵܗܗܘܿܢ ܡܵܘܪܒܼܝܼܢ ܗ̄ܘ̣ܵܘ ܒܗܲܝܡܵܢܘܼܬܼܵܐ ܘܲܒܼܩܘܼܫܬܼܵܐ. 
                 ܘܲܠܗܸܦܟܿܬܵܗ̇ ܕܫܲܢ̄ܬܼܵܐ ܒܹܗ ܒܙܲܒܼܢܵܐ ܕܐܸܤ݂ܲܪ ܐܸܢܘܿܢ ܒܹܗ: ܗ̤ܘܵܐ
                    ܗ̄ܘ̣ܵܐ ܠܹܗ ܢܲܚܫܝܼܪܵܐ ܠܒܲܪ ܒܛܘܼܪܵܐ ܠܹܗ ܠܗܵܢܵܐ ܪܲܫܝܼܥܵܐ: ܘܠܸܒܹܗ ܤܲܓܿܝܼ ܚܵܕܹܐ
                    ܗ̄ܘ̣ܵܐ ܒܓܲܐܝܘܼܬܹܗ: ܘܲܦ̣ܩܲܕܼ ܘܐܲܦܸܩ̣ܘ ܐܸܢܘܿܢ ܠܩܲܕܝܼ̈ܫܹܐ ܬܠܵܬܲܝ̈ܗܘܿܢ ܒܫܸܠܵܬܼܗܘܿܢ.
                    ܘܟܲܕܼ ܩܵܡ̣ܘ ܩܕܼܵܡܵܘܗܝ: ܫܲܐܠܹܗ ܠܡܸܝܼܠܸܣ ܛܘܼܒܼܵܢܵܐ ܐܲܝܟܼ ܕܲܒܼܒܸܙܚܵܐ ܘܐܸܡ݂ܲܪ ܠܹܗ:
                    ܕܡܵܢܵܐ ܐܝܼܬܲܝܟ؟ ܐܲܠܵܗܵܐ ܐܲܢ̄ܬܿ ܐܵܘ ܒܲܪܢܵܫܵܐ؟ ܘܗܲܝܡܵܢܘܼܬܼܵܟܼ ܐܲܝܕܵܐ ܗ̣̄ܝ؟
                    ܘܝܘܼܠܦܵܢܵܟܼ ܡܵܢܐ ܗ̣̄ܘ؟ ܚܵܘܵܐ ܠܲܢ ܫܪܵܪܵܟܼ ܘܢܸܕܲܥܹܗ: ܐܲܝܟܼ ܕܢܸܬܿܬܲܠܡܲܕܼ ܠܵܟܼ.
                    ܘܐܸܢܗ̤ܘ ܕܹܝܢ ܕܠܵܐ ܨܵܒܹ̇ܐ ܐܲܢ̄ܬܿ ܠܡܸܓܼܠܵܐ ܠܲܢ ܥܲܠ ܗܵܘ̇ ܡܸܕܸܿܡ ܕܐܲܚܝܼܕܼ ܐܲܢ̄ܬܿ:
                    ܐܲܝܟܼ ܕܲܚܕܼܵܐ ܡ̣ܢ ܗܵܠܹܝܢ ܚܲܝܵܘ̈ܬܼܵܐ ܝܵܘܡܵܢܵܐ ܪܹܫܵܟܼ ܡܸܢܵܟܼ ܫܵܩܹ̇ܠ ܐ̄ܢܵܐ: ܗ̤ܘ
                    ܕܹܝܢ ܛܘܼܒܼܵܢܵܐ ܝܼܕܲܥ̣ ܢܸܟܼܠܹܗ ܕܓܲܒܼܪܵܠ ܘܕܲܓܵܠܘܼܬܹܗ: ܘܐܸܡ݂ܲܪ ܠܹܗ: ܕܐܸܢܵܐ ܒܲܪܢܵܫܵܐ
                    ܐ̄ܢܵܐ: ܘܠܵܐ ܗ̄ܘܹ̇ܝܬܼ ܐܲܠܵܗܵܐ. ܘܗܲܝܡܵܢܘܼܬܼܝ ܫܲܪܝܼܪܬܵܐ ܠܙܹܐܦܵܟܼ ܕܲܓܵܠܵܐ ܠܵܐ ܓܵܠܹ̇ܐ
                    ܐ̄ܢܵܐ: ܘܝܘܼܠܦܵܢܝ ܕܲܟܼܝܵܐ ܒܐܸܕܼܢܲܝ̈ܟ ܛܲܡ̈ܐܬܼܵܐ ܠܵܐ ܢܵܤܹ̇ܝܟܼ ܐ̄ܢܵܐ. ܐܸܠܵܐ ܗܵܐ
                    ܐܵܡܲ݁ܪ ܐ̄ܢܵܐ ܠܵܟܼ ܦܸܬܼܓܼܵܡܵܐ ܬܪܝܼܨܵܐ: ܕܘܵܝ ܠܵܟܼ ܘܵܝ ܠܵܟܼ  273  ܐܘܿ
                    ܥܵܘ̇ܠܵܐ ܒܝܼܫܵܐ: ܘܲܠܟܼܠ ܐܲܝܠܹܝܢ ܕܐܲܟܼܘܵܬܼܵܟܼ ܪܲܫܝܼܥܵܐܝܼܬܼ ܕܠܵܐ ܐܲܠܵܗ ܩܵܝ̇ܡܝܼܢ.
                    ܕܲܒܼܟܹܐܢܘܼܬܹܗ ܐܲܠܵܗܵܐ ܕܵܐܹ̇ܢ ܠܟܼܘܿܢ ܒܥܵܠܡܵܐ ܕܐܵܬܹ̇ܐ ܒܓܹܗܲܢܵܐܬ ܘܚܸܫܘܿܟܼܵܐ
                    ܕܲܡܥܲܬܲܕ: ܘܦܵܪܲܥ ܠܪܵܡܘܼܬܼܟܼܘܿܢ ܒܸܵܟܼܝܵܐ ܘܚܘܼܪܵܩ ܫܵܢܹ̈ܐ ܠܥܵܠܲܡ ܥܵܠܡܝܼܢ. ܥܲܠ ܕܠܵܐ
                    ܝܼܕܲܥܬܿܘܿܢ ܕܗ̤ܘ ܝܲܗ̣̄ܒܼ ܠܟܼܘܿܢ ܗܵܠܹܝܢ ܛܵܒܼ̈ܬܼܵܐ: ܕܲܒܼܗܹܝܢ ܝܵܘܡܵܢܵܐ ܡܸܬܼܓܲܐܹܝܢ
                    ܐܢ̄ܬܿܘܿܢ ܘܡܸܬܼܦܲܢܩܝܼܢ. ܗ̤ܘ ܕܹܝܢ ܗܵܢܵܐ ܥܵܘ̇ܠܵܐ ܥܲܠ ܟܘܼܤܝܵܐ ܝܵܬܹ̇ܒܼ ܗ̄ܘ̣ܵܐ:
                    ܘܐ̄ܢܵܫܵܬ ܤܲܓܿܝܼ̈ܐܹܐ ܩܵܝ̇ܡܝܢ ܗ̄ܘ̣ܵܘ ܩܕܼܵܡܵܘܗܝ. ܘܟܲܕܼ ܫܡܲܥ̣ ܗܵܠܹܝܢ: ܐܸܬܼܓܼܵܘܙܲܠ̣
                    ܛܵܒܼ. ܘܩ̣ܵܡ ܒܚܵܡܬܹܗ ܘܲܡܫܲܛ̣ ܢܝܼܙܵܪܹܗ ܕܲܡܨܲܡܲܕܼ ܗ̄ܘ̣ܵܐ ܥܲܠ ܥܲܛܡܹܗ: ܘܲܡܚ̣ܵܝܗܝ
                    ܠܩܲܕܝܼܫܵܐ ܡܝܼܠܸܣ ܒܟܲܬܼܦܹܗ ܡ̣ܢ ܩܕܼܵܡܵܘܗܝ: ܘܲܢܦܲܩ̣ ܠܒܸܤܬܿܪܹܗ. ܘܒܹܗ ܒܗܵܢܵܐ ܛܢܵܢܗܘܿܢ
                    ܕܥܵܘ̣ܠܵܐ: ܐܲܚܘܼܗܝ ܕܝܼܠܹܗ ܕܗܵܢܵܐ ܪܲܫܝܼܥܵܐ: ܕܲܫܡܹܗ ܗ̄ܘ̣ܵܐ ܢܲܪܤܵܐ: ܫܡܲܛ̣ ܐܵܦ ܗ̤ܘ
                    (ܢܝܼܙܵܪܹܗ؟): ܘܲܡܚ̣ܵܝܗܝ ܒܓܲܒܹ̈: ܘܲܢܦܲܩ̣ ܡ̣ܢ ܩܕܼܵܡܵܘܗܝ. ܘܟܲܕܼ ܛܵܒܼ ܢܲܨܝܼܚܵܐ
                    ܒܬܲܪ̈ܥܹܝܗ̇ ܕܲܫܝܘܿܠ ܢܵܩܹ̇ܫ ܗ̄ܘ̣ܵܐ: ܘܲܙܡܝܼܢܵܐ ܒܲܤܡܵܟܼ ܡܵܘܬܵܐ ܕܢܸܓܼܢܸܐ ܡܸܤܬܲܪܗܲܒܼ
                    ܗ̄ܘ̣ܵܐ: ܒܡܵܘܬܹܗ ܪܚܝܼܡܵܐ ܥܲܠ ܡܵܘܬܿܗܘܿܢ ܕܚܝܼܠܵܐ ܡܸܬܼܢܲܒܸܿܐ ܗ̄ܘ̣ܵܐ: ܟܲܕܼ ܫܲܘܝܵܐܝܼܬܼ
                    ܠܲܬܼܪ̈ܲܝܗܘܿܢ ܐܲܚܹ̈ܐ ܗܵܠܹܝܢ ܐܸܡ݂ܲܪ ܗ̄ܘ̣ܵܐ: ܡܸܛܠ ܕܤܲܓܼܝܼ ܐܸܬܼܐܵܘܝܼܬܿܘܿܢ
                    ܒܐܲܚܘܼܬܼܟܼܘܿܢ ܒܝܼܫܬܼܵܐ ܘܐܸܬܼܐܤܲܪܬܿܘܿܢ ܒܚܲܒܼܘܼܬܼܟܼܘܿܢ ܡܲܪܝܼܪܬܵܐ ܠܡܸܩܛܲܠ ܠܚܲܤܝܵܐ
                    ܘܲܠܡܹܐܫܲܕܼ ܕܡܵܐ ܡܲܓܵܢ: ܗܵܐ ܠܲܡܚܵܪ ܒܗܵܢܵܐ ܥܸܕܼܵܢܵܐ ܕܸܡܟܼܘܿܢ ܥܲܡ ܚܕܼܵܕܗܹܐ ܡ̣ܢ
                    ܐܝܼܕܲܝ̈ ܚܕܼܵܕܹ̈ܐ  274  ܒܕܼܘܼܟܿܬܼܵܐ ܗܵܕܹܐ ܢܬܼܐܫܸܕܼ. ܘܢܸܠܥܘܼܢ ܟܲܠܒܹ̈ܐ
                    ܕܸܡܟܼܘܿܢ: ܘܦܵܪܲܚܬܼܵܐ ܕܲܫܡܲܝܵܐ ܬܹܐܟܼܘܿܠ ܒܸܤܪܟܼܘܿܢ. ܘܬܸܬܼܓܲܙܸܐ ܐܸܡܟܼܘܿܢ ܡ̣ܢ
                    ܬܪ̈ܲܝܟܿܘܿܢ: ܘܢܲܪ̈ܡܠܵܢ ܢܸܫܲܝ̈ܟܿܘܿܢ ܡܸܢܟܼܘܿܢ ܒܝܵܘܡܵܐ ܚܲܕܼ. ܘܟܲܕ ܗܵܠܹܝܢ ܐܸܡ݂ܲܪ
                    ܗ̄ܘ̣ܵܐ: ܢܲܦܫܹܗ ܕܩܲܕܝܼܫܵܐ ܫܲܢܝܲܬ̤ ܡܸܢܹܗ. 
                 ܦܩܲܕ ܗ̄ܘ̣ܵܐ ܕܹܝܢ ܗ̤ܘ ܗܵܢܵܐ ܪܲܫܝܼܥܵܐ ܥܲܠ ܐܵܒܘܼܪܤܵܡ ܘܤܝܼܢܲܝ
                    ܢܲܨܝܼܚܹ̈ܐ: ܘܐܲܤܸܩ̣ܘ ܐܸܢܘܿܢ ܠܬܲܪܬܹܝܢ ܪ̈ܵܡܬܼܵܐ ܠܘܼܩܒܲܠ ܚܕܼܵܕܹ̈ܐ. ܘܫܲܕܲܪ ܡ̣ܢ ܚܲܝܠܹܗ
                    ܓܲܒܼܪܹ̈ܐ ܤܲܓܿܝܼ̈ܐܹܐ: ܘܲܪܡ̣ܘ ܐܸܢܘܿܢ ܬܲܡܵܢ ܒܹܗ ܒܥܸܕܵܢܵܐ ܗܵܘ̇ ܕܐܸܬܼܩ̣ܛܸܠ ܒܹܗ ܡܝܼܠܸܣ
                    ܛܘܼܒܼܵܢܵܐ. 
                 ܒܵܬܼ ܗ̄ܘ̣ܵܐ ܠܹܗ ܕܹܝܢ ܗ̤ܘ ܗܵܢܵܐ ܓܘܼܦܪܝܼܙ ܒܕܼܘܼܟܿܬܼܵܐ ܗܵܝ̇. ܘܟܲܕܼ
                    ܢܸܓܼܗܲܬ̤: ܐܸܵܬ݂ܵܐ ܗ̄ܘ̣ܵܐ ܠܹܗ ܢܲܚܫܝܼܪܵܐ ܕܚܲܝ̈ܘܵܬܼܵܐ ܕܠܵܐ ܒܲܙܥܘܿܪ. ܘܐܲܪܝܼܡܹܗ
                    ܠܸܒܹܿܗ ܒܓܲܐܝܘܼܬܹܗ ܘܐܸܫܬܲܩܲܠ̣: ܘܐܲܕܸܫ ܗ̄ܘ̣ܵܐ ܘܐܲܥ̣ܒܲܪ ܡ̣ܢ ܐܸܕܼܢܹܗ ܡܸܠܬܹܗ
                    ܕܫܲܪܝܼܪܵܐ. ܘܒܹܗ ܒܥܸܕܵܢܵܐ ܕܐܸܬܼܩ̣ܛܸܠ ܒܹܗ ܡܝܼܠܸܣ ܛܘܼܒܼܵܢܵܐ: ܓܙܝܼܪܲܬܼ ܡܪܲܝܡܵܐ
                    ܡܲܛܝܲܬ̤ ܥܠܲܝܗܘܿܢ ܕܐܲܚܹ̈ܐ ܗܵܢ̇ܘܿܢ ܩܪ̈ܲܒܼܬܼܵܢܹܐ: ܝܲܠܝܼ̈ܦܲܝ ܩܸܫܬܼܵܐ ܘܲܙܪ̈ܝܼܙܲܝ
                    ܒܢܲܝܙܟܼܵܐ: ܡܢܦܩܲܝ̈ ܒܲܕܼܡܵܐ ܘܲܚܦܝܼܛܲܝ̈ ܒܢܲܚܫܝܼܪܵܐ. ܡܸܛܠ ܕܐܲܝܠܬܼܵܐ ܚܕܼܵܐ ܬܸܪܥܲܬ̤
                    ܡܵܐܢܹ̈ܐ ܗܵܢ̇ܘܿܢ ܕܟܸܬܵܢܵܐ: ܕܲܒܼܗܘܿܢ ܚܒܼܝܼ̈ܫܵܢ ܗ̣̄ܘܲܝ̈ ܚܲܝܵܘ̈ܬܼܵܐ: ܘܢܸܦ̣ܩܲܬ̤
                    ܩܲܠܝܼܠܵܐܝܼܬܼ: ܘܲܪܟܸܒܼܘ ܒܵܬܼܪܵܗ̇ ܬܪ̈ܲܝܗܘܿܢ ܩܲܠܝܼ̈ܠܹܐ ܡܵܝ̈ܬܲܝ ܩܲܠܝܼܠܵܐܝܼܬܼ: ܥܲܠ
                    ܕܲܩ̣ܛܲܠܘ ܩܲܠܝܼܠܵܐܝܼܬܼ. ܘܐܸܬܿܬܲܚܲܡ̣ܘ ܚܲܕܼ ܡ̣ܢ ܗܵܢܵܐ ܓܲܒܵܐ ܘܚܲܕܼ ܡ̣ܢ ܗܵܢܵܐ:
                    ܘܐܲܫ̣ܘܝܼܘ ܫ̣ܕܵܘ ܬܪ̈ܲܝܗܘܿܢ ܓܹܐܪܹ̈ܐ: ܕܐܲܝܟܼ ܕܗܵܐ ܠܲܡ ܬܪ̈ܲܝܗܘܿܢ ܒܐܘܼܡܵܢܘܼܬܼܵܐ
                    ܠܘܼܩܒܲܠ ܚ̈ܕܼܵܕܹܐ ܢܸܡܚܘܿܢܵܗ̇. ܘܓܹܐܪܹܗ ܕܓܼܘܼܦܪܝܼܙ ܦܫܲܛ̣ ܘܲܥ̣ܒܲܪ ܒܟܲܪܤܹܗ ܕܢܲܪܤܵܐ:
                    ܘܓܹܐܪܹܗ ܕܢܲܪܤܵܐ  275  ܬܪܲܨ. ܘܲܢܦܲܩ̣ ܒܚܲܕܹܝܗ ܕܓܼܘܼܦܪܝܼܙ. ܘܲܢܦܲܠ̣ܘ ܗܵܠܹܝܢ
                    ܩܲܫܵܬܹ̈ܐ ܬܪ̈ܲܝܗܘܿܢ: ܘܡ̣ܝܬܼܘ ܬܲܡܵܢ ܒܵܗ̇ ܒܕܼܘܼܟܿܬܼܵܐ ܗܵܝ̇ ܕܐܸܬܼܩ̣ܛܸܠ ܒܵܗ̇
                    ܛܘܼܒܼܵܢܵܐ ܡܝܼܠܸܣ. ܘܲܗܘ̤ܵܘ ܚܙܵܬܼܵܐ ܕܬܸܡܗܵܐ ܘܫܸܡܥܵܐ ܕܙܵܘܸܥܬܼܵܐ ܠܟܼܠܹܗ ܐܲܬܼܪܵܐ
                    ܗܵܘ̇: ܘܐܸܵܟܲܠ̣ ܚܲܝ̈ܘܵܬܼܵܐ ܘܦܵܪ̈ܚܵܬܼܵܐ ܦܲܓܼܪ̈ܲܝܗܘܿܢ. ܡܸܛܠ ܕܦܲܪ̈ܤܵܝܹܐ ܠܵܐ
                    ܩܵܒܼ̇ܪܝܼܢ: ܥܕܲܡܵܐ ܕܡܸܬܼܢܲܦܲܠ ܒܸܤܪܵܐ ܡ̣ܢ ܓܲܪ̈ܡܹܐ: ܘܗܵܝܕܹܝܢ ܠܗܘܿܢ ܠܓܲܪ̈ܡܹܐ
                    ܡܤܲܬܿܪܝܼܢ. 
                 ܫ̈ܠܲܕܹܐ ܕܹܝܢ ܕܤܵܗ̈ܕܹܐ ܬܠܵܬܲܝ̈ܗܘܿܢ: ܒܹܗ ܒܠܸܠܝܵܐ ܓܲܢܲܒܼܘ ܐܸܢܹܝܢ
                    ܒܢܲܝ̈ ܐܲܬܼܪܵܐ: ܘܐܵܘܒܸܿܠ̣ܘ ܩ̣ܒܲܪܘ ܐܸܢܹܝܢ ܒܲܩܪܝܼܬܼܵܐ ܚܕܼܵܐ ܕܲܫܡܵܗ̇ ܡܲܠܩܝܼܢ.
                    ܗܵܟܲܢܵܐ ܕܐܵܦ ܒܡܵܘܬܿܗܘܿܢ ܬܸܕܼܡܘܼܪܬܵܐ ܪܲܒܿܬܼܵܐ ܐܸܬܼܚܲܙܝܲܬ̤ ܒܗܘܿܢ: ܡܸܛܠ ܕܫܲܒܵܝܹ̈ܐ
                    ܐܲܡܝܼܢܝܼܢ ܗ̄ܘ̣ܵܘ ܐܵܬܹ̇ܝܢ ܒܟܼܠܙܒܲܢ ܥܲܠ ܗܵܘ̇ ܐܲܬܼܪܵܐ: ܐܲܝܟܼ ܕܢܸܫܒܿܘܿܢ ܘܢܸܚܪܒܼܘܼܢ.
                    ܘܲܟܼܡܵܐ ܙܲܒܼܢܝܝܼ̈ܢ ܡܲܛ̣ܝܼܘ ܥܕܲܡܵܐ ܠܲܬܼܚܘܼ̈ܡܹܝܗ̇ ܕܲܩܪܝܼܬܼܵܐ ܗܵܝ̇: ܘܐܸܬܼܟܿܠ̣ܝܼܘ:
                    ܘܡܸܕܸܿܡ ܚܒܼܵܠܵܐ ܠܵܐ ܤ̣ܥܲܪܘ ܬܲܡܵܢ. ܘܗܲܝܡܸܢ̣ܘ ܥܵܡ̇ܘܿܪܹ̈ܝܗ̇: ܕܡܸܛܠ ܒܘܼܪܟܿܬܼܵܐ
                    ܕܓܲܪ̈ܡܹܐ ܕܙܲܕܝܼ̈ܩܹܐ ܕܤܝܼܡܝܼܢ ܒܓܼܵܘܵܗ̇ ܠܵܐ ܐܸܫܬܲܠܲܛ̣ܘ ܕܢܸܥܠܘܼܢ. 
            
            
                ܐܸܬܼܟܲܠܲܠ̣ܘ ܕܹܝܢ ܩܲܕܝܼ̈ܫܹܐ ܒܲܬܼܠܵܬܲܥܤܲܪ ܒܢܸܫܪܝܼ ܐ̄ܚܪܵܝ ܒܲܕܼܤܲܗܪܵܐ.