Anton of Tagrit. “On Divine Providence - ܡܐܡܪ̈ܐ ܕܥܠ ܒܛܝܠܘܼܬܐ ܣܿܥܪܬ ܛܒ̈ܬܐ ܕܐܠܗܐ.” Based upon B.L. Add. 14,726. Digital Syriac Corpus. Last modified November 29, 2019. https://syriaccorpus.org/502. ܡܐܡܪ̈ܐ ܕܥܠ ܒܛܝܠܘܼܬܐ ܣܿܥܪܬ ܛܒ̈ܬܐ ܕܐܠܗܐ ܕܝܠܗ ܕܐܢܛܘܢ ܬܐܓܪܝܬܢܝܐ ܗܿܘ ܕܓܘܪܓܢ ܡܛܗܡ Memra 1 87b ܥܠ ܚܝܠܐ ܕܬܠܝܬܝܘܬܐ ܣܓܝܕܬܐ ܘܠܐ ܥܒܝܕܬܐ. ܟܿܬܒܝܢܢ ܡܐܡܪ̈ܐ ܕܥܠ ܒܛܝܠܘܬܐ ܣܿܥܪܬ ܛܒ̈ܬܐ ܕܐܠܗܐ. ܕܡܚܘܐ ܘܡܒܲܕܩ ܕܐܝܟܢܐ ܟܕܠܐ ܥܿܨܝܐ ܠܚܐܪܘܬܐ. ܡܢ ܫܘܪܥܬܐ ܘܦܐܪ̈ܐ ܕܚܛܝܬܐ ܡܥܘܿܟܐ ܠܗ܀ ܥܒܝܕܝܢ ܕܝܢ ܠܐܢܛܘܢ ܕܝܪܝܐ ܬܐܓܪܝܬܢܝܐ. ܟܕ ܥܠ ܬܐܪ̈ܬܐ ܕܟܢ̈ܘܬܐ ܚܝܣܝܢܢ: ܗܿܢܝܢ ܕܥܠ ܒܛܝܠܘܬܐ ܕܟܝܬܐ ܕܠܘܬ ܕܐܠܗܐ ܟܪ̈ܝܗܢ ܘܪܘܪܒܐܝܬ ܡܬܛܓܪ̈ܢ : ܘܝܨܝܦܐܝܬ ܡܫ̈ܐܠܢ: ܐܬܝܼܢܢ ܐܪܐ܇ ܕܒܝܕ ܡܠܬܐ ܡܚܘܝܢܝܬܐ܇ ܘܕܡܢ ܢܘܗܪܐ ܐܒܗܝܐ ܘܐܠܗܝܐ ܡܬܬܙܠܓܐ܇ ܦܠܝܪ ܦܘܪܝܬܝܢܐ ܫܥܒܼܕ ܘܗܟܢܐ܆ ܟܕ ܠܥܘܡ̈ܩܐ ܪ̈ܡܐ ܕܝܕܥܬܐ ܠܐ ܡܬܒܨܝܢܝܬܐ ܥܡ ܫܬܩܐ ܥܬܝܩܐ ܓܿܝܙܝܢܢ. ܘܠܐ ܟܝܬ ܐܢܫ܇ ܬܚܝܼܬ ܚܘܝܒܐ ܕܪܚܡܸܬ ܥܘܩܒܐ ܘܕܥܣܣܐ ܘܚܪܝܢܐ ܕܡ̈ܠܐ ܠܢ ܢܝܬܐ܇ ܡܛܠ ܟܝܬ ܕܟܕ ܥܕܟܝܠ ܥܠ ܒܛܝܠܘܬܐ ܣܥܸܪܬ ܛܒ̈ܬܐ ܠܛܢܢܐ ܐܚܝܕ ܠܢ܇ ܐܫܘܝܢܢ ܕܕܠܐ ܙܘܛܡ ܘܕܠܐ ܛܘܥܝܿ܇ ܘܠܒܪ ܡܢ ܥܕܠܝܐ ܕܣ̈ܓܝܐܐ ܗ݀ܕܐ ܢ݀ܟܣ. ܪܚܝܡܐ ܗܝ ܓܝܪ ܠܠܫ̈ܢܐ܇ ܕܠܟܠ ܕܡܫܬܿܒܚܐ ܢܩܼܗܠܘܢ ܨܘܚܝܬܐ. ܘܥܠ ܝܨܝܦܘܬܐ ܘܠܐܘܬܐ ܠܗܘܢ ܐܝܬܝܗܿ܇ ܕܠܟܠ ܡܼܠܐ ܢܓܕܘܢ ܡܘܟܟܐ ܘܟܕ ܡܿܢ ܐܢܫ ܢܗܸܘܐ ܐܟܿܝܦ܆ ܕܒܛܒܬܐ ܕܡܢ ܬܐܘܪܝܐ ܢܥܬܪ܇ ܠܗܿܢܐ ܚܬܝܪܐ ܩܿܪܝܼܢ. ܘܪܚܡ ܐܝܼܩܪܐ ܘܝ݀ܨܦ ܕܫܘܒܚܐ ܪܝܩܢܝܐ܇ ܐܢ ܕܝܢ ܬܘܒ ܢܚܿܒ: ܕܚܬܝܬܘܬܐ ܕܡܬܐܡ̈ܛܐܐ ܢܛܘܪ܆ ܘܕܚܠܬܐ ܠܐ ܡܬܝܠܦܢܝܬܐ ܣܒܪܐ ܢܿܗܘܐ ܠܗ: ܘܡܢ ܗܪܟܐܿ ܡܥܪܦܢܐ ܕܟܬܝ̈ܒܬܐ ܟܗܢ̈ܝܬܐ ܢܬܩܲܝܡ܆ ܐܘ ܕܠܫܘ̈ܒܚܐ ܕܪܘܪ̈ܒܐ ܘܛܒܝ̈ܒܐ ܕܒܦܝܠܣܘܦܘܬܐ ܗ݀ܝ ܬܡܢ ܡܟܿܢܝܢ ܠܗ܆ ܕܪܘܿܫܐ ܘܣܪܘܒܐ. ܘܚܪܝܝܐ ܘܡܥܩܒܢܐ. ܐܘ ܡܠܘܢܼ܇ ܚܦܝܼܛܐ ܡܝܬܪܐ ܪܚܡ ܚܟܡܐ. ܗܟܢܐ ܘܐܢ ܕܫܦܝܪܘܬ ܐܡ̈ܢܐ ܩܕ̈ܝܫܐ ܢܗܼܘܐ [ܟܕ ܛܥܝܼܢ] ܘܠܡܟܝܟܘܬܐ ܢܚܒܲܪ. ܘܠܕܟܝܘܬܐ ܕܡܢ ܫܗܪ̈ܐ܇ ܘܡܢܟ ܠܡܐܡܪ܇ ܠܟܠܗܿ ܥܝܪܘܬܐ ܕܥܢܘܝܘܬܐ ܢܬܥܿܛܦ. ܠܗܿܘ ܕܕܐܝܟ ܗܿܢܐ ܡܫܲܡܗܝܢ܇ ܐܣܟܡܬܢܐ ܘܕܓܠ ܫܘܘܕܝܐ. ܘܣܪܝܟܢܼܐ ܘܠܐ ܡܟܝܠ ܦܝܠܣܘܦܐ. ܥܠ ܗܿܠܝܢ ܗܟܝܠ ܡ̈ܠܐ ܦ݀ܟܝ̈ܬܐ ܘܦܟܝܗ̈ܬܐ: ܘܕܠܒܪ ܡܢ ܛܒܬܐ ܘܡܝܬܪܘܬܐ ܠܪܘܚܩܐ ܩܝܡ̈ܢ: ܡܠܘܢ ܕܝܢ ܕܒܦܪܨܘܦܐ ܕܛܒܬܐ ܡܢ ܛܒܬܐ ܕܪܚܸܡܬ ܥܡ̈ܠܐ ܓ̈ܠܙܢ: ܕܢܒܣܪ ܟܝܬ ܘܢܒܣܐ܆ ܕܗܘܝܐ ܗܪܓ ܐܠܗܝ̈ܬܐ ܐܝܬܝܗܿ܆ ܘܗܠܝܢ ܡܿܢ ܟܠܗ ܗ݀ܢܐ܇ ܐܦܠܐ ܓܝܪ ܐܝܬ ܠܝ ܝܨܝܦܘܬܐ܇ ܕܥܡ ܠܫܢ̈ܐ 88a ܙܢ̈ܝܐ ܐܬܕܠܩܒ. ܒܪܡ ܠܗܿܝ ܕܥܠܝܗܿ ܚܐܦܐ ܠܡܠܬܐ ܐܝܬ ܗܘܐ ܐܬܦܢܐ܇ ܟܕ ܡܒܕܩܝܢܢ ܕܡܿܢܐ ܗܝ ܡܠܬܐ܇ ܕܟܕ ܒܛܝܠܘܬܐ ܘܝܨܝܦܘܬܐ ܚܪ̈ܝܩܢ ܠܗܠܝܢ ܕܝܠܢ܇ ܡ̈ܘܬܐ ܥ̈ܙܝܙܐ ܡܬܬܣܪܚܝܢ܇ ܘܩ̈ܛܠܐ ܣ̈ܓܝܐܐ ܡܬܬܡܪ̈ܚܝܢ܇ ܘܩܕܡ ܫܥ̈ܬܐ ܣ̈ܓܝܐܐ ܚܘܿܠܦܐ ܕܡܼܢ ܚ̈ܝܐ ܗ݀ܠܝܢ ܚܐܫ̈ܝܢ܇ ܘܡܛܪ̈ܐ ܐܟܣ̈ܢܝܐ ܡܬܬܝܬܝܢ܇ ܘܡܘ̈ܬܢܐ ܐܐܪ̈ܝܐ ܠܚܘܕܪܐ ܕܣܝ̈ܘܩܐ ܥܿܛܝܢܿ. ܥܡ ܢܘ̈ܕܐ ܘܝ̈ܙܠܐ ܕܐܪܥܐ܇ ܘܝܩ̈ܕܢܐ ܘܚܐܦ̈ܐ ܥܙܝ̈ܙܐ ܕܢܘܪܐ܇ ܐܝܠܝܢ ܕܡܢ ܐܬܝܪ ܡܬܝܠܕܝܢ. ܗܠܝܢ ܘܣܘܓܐܐ ܕܐܚܪ̈ܢܝܬܐ܇ ܢܝܫܐ ܐܝܬ ܠܡܠܬܐ ܠܡܦܬܚܘ܇ ܘܒܬܪ ܒܬܪ ܠܡܒܲܕܩܘ܀ ܠܘܩܕܡ ܟܝܬ܆ ܗܕܐ ܥܡ ܦܪܗܣܝܐ ܢܐܡܪ: ܕܠܐ ܐܝܬ ܡܕܡ܇ ܕܒܲܚܼܪ ܘܡܪܡܠ ܡܢ ܒܛܝܠܘܬܐ. ܐܠܐ ܟܝܬ ܠܥܘܿܐ ܘܠܒܝܼܫܐ: ܘܠܛܡ̈ܐ ܘܠܕܟ̈ܝܐ܆ ܒܫܘܝܘܬ ܙܢܐ ܘܟܘܠܢܐܝܬ ܥܿܒܕ ܡܠܬܐ܇ ܗܿܘ ܛܒܿܐ ܒܟܝܢܐ ܐܠܗܐ. ܟܕ ܠܐ ܟܝܬ ܡܛܠ ܡܲܣܛܝܢܘܬܐ ܘܥܒܘܪܝܐ܇ ܠܘܬ ܡܪܫܠܢܘܬܐ ܕܡܢ ܝܕ ܪܘܓܙܐ: ܐܝܟ ܐܢܫ ܕܚܲܡܝܬܐ ܠܗ ܥܠ ܒܝ̈ܫܐ ܐܬܐ: ܘܠܐ ܡܛܠ ܙܗܝܪܘܬܐ ܘܢܛܝܪܘܬܐ ܕܦܘܩ̈ܕܢܐ ܩܕ̈ܝܫܐ܇ ܐܣܟ ܣ݀ܦܩ̈ܝ ܗܼܢܘܢ ܠܗܘܢ ܠܚܿܬܡܐ ܕܓܡܝܪܘܬܐ܇ ܡܢ ܛܒ̈ܐ ܐܝܼܕܐ ܫ݀ܒܩ. ܐܠܐ ܟܝܬ ܐܝܟ ܫܡܫܐ ܡܬܝܕܥܢܐ: ܘܒܿܪܘܝܐ ܕܢܘܗܪܐ ܡܬܪܓܫܢܐ܆ ܠܟܠܗܘܢ ܗܘ̈ܝܐ ܡܫܟܢܿ. ܫܦܝܪܘܬ ܩܘܿܝܡܐ ܥܡ ܝܲܨܝܦܘܬܐ ܡܫܪܬܚܬܐ. ܐܢܕܝܢ ܪܥܝܢܐ ܚܛܝܐ ܘܡܕܥܐ ܒܝܫܐ: ܐܘ ܒܒܢ̈ܝܢܫܐ ܐܘ ܒܫ̈ܐܕܐ: ܡܬܢܲܚܬ ܠܘܬ ܟܠ ܕܡܬܓܢܝܐ ܘܲܡܫܟܪܐ܆ ܠܡܕܥ ܚܿܫܚܐ܆ ܕܠܐ ܣܟ ܒܛܝܠܘܬܐ ܐܝܬܝܗܿ ܬܢܢ܇ ܥܠܬܐ ܕܗܕܐ ܚܫܢܝܘܬܐ. ܐܠܐ ܟܝܬ ܪܥܝܢܐ ܪܚܿܡ ܬܘ̈ܟܐ܆ ܐܢܕܝܢ ܐܢܫ ܢܐܡܪ܇ ܕܠܡܢܐ ܟܕ ܐܝܬ ܒܛܝܠܘܬܐ: ܠܒܝܼ̈ܫܐ ܕܢܡܲܠܠܘܢ ܗܠܝܢ ܕܐܝܿܟ ܗܟܢ ܡܪܫܠܐ: ܙܕܩܿ ܗܘ ܓܝܪ ܕܬܬܟܘܣ ܠܐܝܕܐ ܕܡܪ̈ܚܐ܆ ܘܬܚܓܘܼܪ ܠܗ̈ܠܟܬܐ ܕܫܪ̈ܝܚܐ: ܘܠܚܐܦܐ ܕܠܣ̈ܛܝܐ ܬܫܗܐ܇ ܘܲܬܒܛܠ ܢܟܝܠܘܬ ܡ̈ܠܐ ܕܡܪ̈ܡܝܢܐ: ܘܠܡ̈ܠܟܐ ܡܘܒ̈ܕܢܐ ܕܒܠܐܐܪ. ܘܣܟ ܠܟܠ ܥܩܼܪܐ ܡܗܪܢܐ: ܐܘ ܟܕ ܫܿܘܚ ܬܬܠـ[ـܘ]ܫ: ܐܘ ܕܩܕܡ ܝܠܝܕܘܬܗ ܬܫܗܝܘܗܝ܆ ܢܫܡܥ ܠܐ ܗܘܐ ܠܐ ܟܐܢܐܝܬ ܗܕܐ. ܕܒܛܝܠܘܬܐ ܬܪܢܐܝܬ ܚܪܝܩܐ ܠܗܠܝܢ ܕܐܝܬܝܗܝܢ. ܒܚܕ ܡܿܢ ܙܢܐ܆ ܕܬܥܲܝܢ ܘܕܬܐܨܦ ܕܟܠ܇ ܐܝܟ ܡ̈ܠܐ ܕܡܢ ܒܪܫܝܬ. ܐܬܩܝܡ ܘܐܬܼܝܬܲܬ݀ ܡܢ ܡܠܼܬ ܐܘܡܢܐ. ܒܐܚܪܢܐ ܕܝܢ܆ ܕܟܕ ܟܝܬ ܕܐܒܿ: ܘܡܢ ܫܦܝܪܘܬ ܩܘܡܿܐ ܘܡܠܚܡܘܬܐ ܦܐ݀ܫ܆ ܬܲܦܢܐ 88b ܠܪܝܫܝܬܐ ܒܝܬܝܬܐ܆ ܕܐܝܟ ܗܿܕܐ ܟܝܬ ܐܝܬ ܠܢ ܕܡܕܡܝܢܐܝܬ ܢܚܼܕܐ ܐܦ ܠܘܬ ܐܢܫ̈ܝܢ ܐܘܡ̈ܢܐ ܟܢܘ̈ܬܢ. ܝܕܝܥܐܝܬ ܠܘܬ ܐܣܘ̈ܬܐ ܕܒܝܫܬܐ. ܥܿܒܕ ܓܝܪ ܐܣܝܐ ܩܿܐܡ ܠܕܘܝܘܬܐ ܕܟܝܢܐ܆ ܨܦܬܐ ܘܝܨܝܦܘܬܐ ܐܥܝܦܐܝܬ. ܠܘܩܕܡ ܡܿܢ ܕܠܐ ܢܬܥܡܠ܇ ܒܡܚܝܠܘܬܐ ܕܡܢ ܟܘܪܗܢܐ ܗܘܼ ܦܓܪܐ. ܘܒܕܓܘܢ ܒܝܕ ܣܝܒܪ̈ܬܐ ܕܥܗ̈ܢܢ ܠܡܘܙܥ ܡܬܩܪܒ. ܐܝܟܐ ܟܝܬ ܕܠܐ ܡܢ ܒܝܫܘܬ ܙܢܐ ܕܡܐܟ̈ܠܬܐ܇ ܠܘܬ ܩܝܢܕܢܘܣ ܕܡܪܥܐ ܢܫܼܪܟ܇ ܝܕܥܝܢܢ ܗܠܝܼܢ. ܗ݀ܢܘܢ ܕܠܘܬ ܦܬܘܪ̈ܐ ܥܒ̈ܝܐ ܕܐܚ̈ܝܕܐ ܩܝܿܡܝܢ: ܐܝܛܐ ܕܝܢ. ܘܕܐܢ ܟܘܡܘܣ ܡܕܡ ܐܬܪܒܝ ܘܐܬܝܲܬܪ ܒܦܓܪܐ: ܡܢ ܗܪܟܐ ܐܨܛܠܝ ܠܘܬ ܚܫܐ܆ ܒܝܕ ܕܘܟ̈ܝܐ ܕܡܢ ܥܩܪ̈ܐ܇ ܠܗ݀ܢܐ ܣܿܡܟ ܘܡܫܪܪ܇ ܗܟܢܐ ܟܝܬ ܐܦ ܣܓܝ ܥܘܕܪ̈ܢܐ ܡܪܝܐ. ܟܕ ܓܝܪ ܡܢ ܝ݀ܬܐ ܝܲܬܬܼ ܠܟܠ܆ ܝ݀ܨܦ ܡܲܢ܆ ܘܣܓܝ ܦܪܘܩܐܝܬ ܘܐܠܗܐܝܬ܇ ܐܝܟ ܡ̈ܠܐ ܕܡܢ ܪܝܫܼܝܬܐ. ܘܡܢ ܗܪܟܐ ܠܚ̈ܝܐ ܡܿܢ ܡܠܐܟ̈ܝܐ ܘܢܦ̈ܫܢܝܐ ܢܣܿܟ ܒܗܘܢ܆ ܠܐ ܡܝܬܘܬܐ ܘܝܕܥܬܐ ܛܒ ܢܨܝܚܘܬܐ. ܠܗܿܢܘܢ ܕܝܢ ܗܘ̈ܠܢܝܐ ܘܓܫܝ̈ܡܐ: ܝܘܒܿܠܐ ܕܡܢ ܚ̈ܕܕܐ ܆ ܘܚܘܠܦܐ ܢܛܘܪܐ ܘܡܩܝܡܢܐ ܕܟܝܢܗܘܢܼ ܘܠܢܨܒ̈ܬܐ ܝܗ݀ܒ ܬܪܒܝܬܐ ܘܦܐܪ̈ܐ. ܘܠܐ ܣܛܣܝܐ ܣܘܬܬܐ ܘܗܝ ܟܕܗܝܘܬܐ ܛܒܬܐ. ܘܐܚܝܕܘܬܐ ܘܒܚ̈ܕܕܐ. ܘܠܐ ܡܬܒܨܪܢܘܬܐ. ܘܩܘܝܡܐ ܡܠܬܐ ܕܐܚܪ̈ܢܐ. ܡܛܠ ܗܿܢܐ ܐܦ ܠܚܐܪܘܬܐ ܕܗܼܝ ܐܝܬܝܗܿ ܫܲܠܝܛܘܬ ܒܝܿܬܐ: ܗ݀ܢܘ ܕܝܢ ܗܿܝ ܕܚܢܢ ܢܓܡܘܪ ܡܪܢܐܝܬ ܟܠ ܐܝܿܕܐ ܕܐܢ ܢܼܨܒܐ܆ ܐܝܠܝܢ ܕܠܚܝܠܢ ܐܬܝ̈ܢ. ܐܘ ܒܝܫ̈ܬܐ ܐܘ ܛܒ̈ܬܐ. ܢ݀ܛܪ ܐܢܬ ܡܠܬܐ ܡܠܬܐ ܕܒܪܝܫܝܬ. ܘܡܿܥܝܢ ܘܝ݀ܨܦ ܕܗܿܕܐ܇ ܕܠܐ ܬܫܬܓܢܐ ܐܘ ܬܐܒܕ. ܐܘܒܕܢܗܿ ܕܝܢ ܘܚܘܠܦـܗܿ ܡܠܬܐ ܗ݀ܘܐ ܐܝܬܘܗܝ܆ ܐܢܗܘܼ ܕܐܢܫ ܢܼܨܒܐ: ܐܘ ܠܡܬܚܫܒܘ ܐܘ ܠܡܐܡܪ܇ ܐܘ ܠܡܼܪܓ ܐܘ ܠܡܓܡܪ: ܘܗ̈ܢܝܢ ܡܢ ܡܝܬܪ̈ܬܐ ܢܬܡܨܐ ܠܡܼܬܪܥܝܐ ܘܠܡܥܒܕ܇ ܗܠܝܢ ܕܝܢ ܕܐܚܪܢܝܐܝܬ ܐܝܬܝܗܝܢ ܠܗܠܝܢ܇ ܐܘ ܠܐ ܣܟ ܢܬܡܼܨܐ܇ ܐܘ ܟܕ ܢܬܡܨܐ ܢܬܡܿܪܕ܇ ܕܠܐ ܢܬܚܿܫܒ ܕܢܚܼܫ. ܐܢ ܓܝܪ ܐܢܫ ܡܬܡܼܪܕ܇ ܘܡܬܥܿܫܡ: ܘܡܢ ܚܐܦܐ ܘܪܓܬܐ ܕܢܣܝܒ: ܐܠܘܨܐܝܬ ܘܩܛܝܪܐܝܬ ܢܦܘܫ܆ ܐܝܟܢܐ ܗܢܐ܇ ܕܐܝܬ ܠܗ ܚܐܪܘܬܐ ܢܬܩܛܪܓ܇ ܠܘ ܓܝܪ ܗ݀ܕܐ ܗܝ ܚܐܪܘܬܐ܇ ܗ݀ܘ ܡܐ ܕܬܚܝܬ ܐܘܟ̈ܕܐ ܕܩܛܝܪܐ ܘܕܥܫܘܩ̈ܝܐ ܐܬܐ. ܗܿܢܐ ܓܝܪ ܐܕܫܐ ܕܪܟܝܢܘܬܐ ܥܒܕܢܝܬܐ ܐܝܬܘܗܝ 89a ܐܠܐ ܗ݀ܝ ܐܪܐ܇ ܕܠܒܪ ܡܢܝܪܐ ܕܐܢܢܩܐ ܘܕܐܠܝܨܐ ܡܬܛܟܣܐ܇ ܘܫܘܠܛܢܐ ܐܝܬ ܠܗ܇ ܕܟܪ ܕܨ݀ܒܝܐ ܘܐܬܪ ܕܪܥܝܐ ܬܬܝܬܐ܇ ܘܐܢ ܒܕܘܒܪ̈ܐ ܪ̈ܓܝܓܐ ܕܐܪܛܐ܇ ܘܐܢ ܒܕܘܒܪ̈ܐ ܢܕܝܕ̈ܐ ܕܒܝܫܘܬܐ. ܡܛܠ ܓܝܪ ܕܒܝܕ ܟܪܘܟܝܐ ܐܡܝܢܐ ܕܒܚ̈ܕܕܐ ܩܢܝܢ ܝܘܒܠܐ: ܠܐ ܥܘܕ ܡܬܒܲܨܪܝܢ܆ ܐܪܥܐ ܐܡܿܪܝܢ ܕܟܕ ܡܬܕܠܠܐ ܕܠܡ̈ܝܐ ܡܫܬܚܠܦܐ: ܘܡ̈ܝܐ ܟܕ ܡܬܠܗܓܝܢ ܘܣܿܓܝܢ ܡܬܩܛܥܝܢ ܠܐܐܪ. ܘܐܐܪ ܬܘܒ ܠܢܘܪܐ. ܒܗܦܟܐ ܕܝܢ ܢܘܪܐ ܟܕ ܡܬܥܒܝܐ ܠܐܐܪ ܡܫܬܓܢܝܐ. ܘܐܐܪ ܠܡ̈ܝܐ. ܘܡ̈ܝܐ ܡܐ ܕܐܬܠܒܕܘ ܘܐܬܥܒܝܘ ܠܐܪܥܐ. ܡܢ ܗܪܟܐ ܘܠܐ ܒܘܨܪܐ ܘܠܐ ܬܘܣܦܬܐ ܥܿܕܐ ܥܠܝܗܘܢ ܠܗܿܕܐ ܐܡܪܝܢ ܐܢܫ̈ܐ ܦܣܝ̈ܠܝܓܝܩܘ. ܘܛܘܒܢܐܢ ܓܪܝܘܪܝܣܐ ܕܢܘܣܐ: ܒܡܐܡܪܐ ܗܿܘ ܕܐܡܝܪ ܠܗ ܥܠ ܡܦܩܒܪܘܚܐ ܕܐܫܬܬ ܝܘܡ̈ܐ ܕܐܚܘܗܝ ܒܣܝܠܝܘܣ. ܐܝܟܐ ܟܝܬ ܕܡܙܝܢ܆ ܘܠܢ ܐܣܝܪ̈ܐ ܘܒܢܝ̈ܢܫܐ܆ ܘܠܟܝܢܐ ܫܪܝܐ ܕܠܐ ܓܫܝ̈ܡܐ܆ ܘܐܢ ܠܡ̈ܠܐܟܐ ܛܒ̈ܐ ܢܐܡܪ ܐܢܫ: ܘܐܢ ܠܫܿܚܪܐ ܕܫ̈ܐܕܐ ܘܡܘܒ̈ܕܢܐ܆ ܛܒܘܬܐ ܕܒܛܝܠܘܬܐ ܗܕܐ ܠܢ ܐܝܬܝܗܿ. ܕܐܝܟ ܡܠܬܐ ܕܫܠܝܛܘܬ ܒܝܬܐ ܘܚܐܪܘܬܐ܇ ܢܚܐ ܘܢܬܩܲܝܡ܇ ܘܢܬܚܿܫܒ ܘܢܡܠܠ: ܘܢܪܓܙ ܘܢܓܼܡܘܪ. ܐܢܕܝܢ ܘܡܢ ܗܕܐ ܡܦܘܠܬܐ ܚܿܫܝܢ ܗܘܝܢ܆ ܝܕܝܥܐ ܗܝ܆ ܕܐܦ ܡܢ ܕܝܠܢܝܘܬ ܙܢܐ ܕܟܝܢܐ ܡܲܪܚܩܝܢ ܗܘܝܢ. ܕܝܠܝܬܐ ܕܝܢ ܘܫܘܘܕܥܐ ܦܪܝܫܐ ܕܟܝܢܐ ܕܠܐ ܓܫܝ̈ܡܐ܆ ܡܠܝܠܘܬܐ ܦܐܪܐ ܕܝܢ ܕܗܕܐ܆ ܡܬܚܫܿܒܢܘܬܐ. ܕܡܬܚܫܒܢܘܬܐ ܕܝܢ ܕܝܠܝܬܐ ܐܝܬܝܗܿ܆ ܠܘ ܟܝܬ ܕܗܿܕܐ ܡܢ ܢܬܪܥܐ܇ ܗܕܐ ܕܝܢ ܠܐ. ܐܘ ܕܗܿܝ ܡܢ ܝܕܥܬܐ ܢܩܝܐ. ܗܢܘ ܕܝܢ ܛܒܬܐ܇ ܠܗܿܕܐ ܕܝܢ ܠܐ܇ ܗܢܘ ܠܒܝܼܫܬܐ. ܐܠܐ ܟܝܬ܆ ܠܗ݀ܠܝܢ ܕܐܝܬܝܗ̈ܝܢ ܘܠܗܠܝܢ ܕܠܐ ܐܝܬܝܗܝܢ܆ ܠܕܩܲܝܡ̈ܢ ܟܝܬ ܘܠܕܡ̈ܣܟܝܢ: ܠܝ ܫܪ̈ܝܪܢ ܘܠܕܟ̈ܕܒܢ: ܠܕܡܒ̈ܐܫܢ ܟܝܬ ܘܠܕܡܲܐܛܐܒܢ: ܬܬܚܫܒ ܘܬܬܪܥܐ܆ ܘܡܢ ܗܪܟܐ ܐܘ ܬܩܼܦ ܐܘ ܬܪܚ. ܘܗܕܐ ܗ݀ܝ ܡܿܢ ܛܒܬܐ ܕܟܝܢܐ ܕܠܐ ܓܫܝܡ̈ܐ. ܘܥܠ ܗ݀ܕܐ ܒܛܝܠܘܬܐ ܡܲܠܝܬ ܝܘܬܪ̈ܢܐ ܕܐܠܗܐ. ܢܛܘܪܘܬܐ ܕܬܚܘܐ ܦܐܝܐ. ܠܗܿܝ ܟܝܬ݀ ܕܐܢ ܡܿܘܒܕܝܢܢ ܡܘܒܕܝܢܢ. ܠܘܬ ܟܝܢܐ ܕܠܐ ܟܝܢܐ ܕܠܐ ܡܠܬܐ܆ ܕܢܫܬܪ ܥܠ ܡܢ ܟܠܦܠܪܘܣ ܐܝܬ ܗܘܐ ܠܢ. ܕܢܗܘܐ ܐܝܟ ܓܡ̈ܠܐ ܪ̈ܡܝ ܚܘܛܪ̈ܬܐ܇ ܘܐܝܟ ܡܓܕܠ ܒܣܪܐ ܦܝܠܐ. ܗ݀ܢܘܢ ܕܐܝܟ ܕܒܣܘܓܐܐ ܕܚܕ ܚܐܦܐ ܐܝܬܝܗܘܢ ܡܪ̈ܝܥܢܐ. ܘܗܢܐ ܕܡܢ ܙܘܥܐ ܟܝܢܝܐ ܪܡܐ ܥܡܗܘܢ: ܕܢܟܘܙܘܢ ܟܝܬ܇ ܡܢ ܐܝܠܝܢ ܕܡܲܗܪ̈ܢ 89b ܠܩܘܝܡܗܘܢ܇ ܐܘ ܒܬܘܪܣܝܐ ܐܘ ܒܡܪܕܝܬܐ: ܐܘ ܒܚܫܚܬܐ ܡܕܡ ܐܚܪܬܐ܆ ܘܢܬܩܪܒܘܢ ܬܘܒ: ܠܐܝܠܝܢ ܕܥܕܪ̈ܢ ܘܠܗܘܢ ܡܲܗ̈ܢܝܢ܆ ܘܗ݀ܕܐ ܠܘ ܥܡ ܡܫܬܪܥܢܘܬܐ ܘܚܫܒܬܐ܆ ܐܠܐ ܟܕ ܡܢ ܟܝܢܐ ܡܼܬܕܚܐ ܘܡܬܢܥܓ. ܘܐܢ ܡܢ ܟ݀ܦܢ ܠܐ ܦܐ݀ܫ ܡܢ ܬܘܪܣܝܐ܇ ܐܢܗܘܼ ܕܡܐܟܘܠܬܐ ܡܛܝܒܐ. ܘܟܕ ܥܿܗܕܐ ܡܕܝܠ ܠܪܓܬܐ ܬܙܝܙܬܐ܆ ܘܟܢ ܒ݀ܗܠ. ܡܲܣܛܐ ܕܝܢ ܘܡܢ ܦܚܬܐ ܘܚܲܒܪܐ: ܘܡܢ ܟܠ ܥܣܒ ܡܡܝܬܢܐ܆ ܠܘ ܥܡ ܦܘܪܫܢܐ ܘܕܝܢܐ. ܐܠܐ ܒܝܕ ܛܒܿܬܐ ܕܡܢ ܪܓܬܐ܇ ܐܘ ܕܢܦܫ̈ܬܐ ܐܘ ܕܚ̈ܙܝܬܐ܇ ܕܐܟܚܕܐ ܟܕܼܝܢܐ ܘܐܬܝܿܐ ܥܡܗ. ܕܠܐ ܗܟܝܠ ܕܐܝܟ ܗܠܝܢ ܢܗܸܘܐ܇ ܘܡܢ ܛܒܬܗ ܕܟܝܢܢ ܢܫܬܘܚܪ: ܟܐܢܘܬܐ ܕܒܛܝܠܘܬܐ ܡܦܪܢܣܐ. ܘܡܛܠ ܗܿܢܐ܇ ܘܠܚܘ̈ܫܒܐ ܕܢܦܫܐ ܘܠܡ̈ܠܟܐ ܩ̈ܛܘܠܐ ܘܢܟܘ̈ܠܐ ܕܣܥܪ̈ܝ ܒܝܫ̈ܬܐ܇ ܘܠܡܪܕܝܬ ܐܘܪܚܐ ܕܩܛܝܠܝ ܓܒܪ̈ܐ: ܘܦܲܩܝܪܝ ܥܡ ܢܩܒ̈ܬܐ ܠܐ ܒܿܠܡܐ. ܐܝܬ ܡܢ ܐܡܬܝ܆ ܘܠܐܢ̈ܫܝܢ. ܘܗܟܢܐ ܠܘ ܠܚܘ̈ܫܒܐ ܠܥܒܝ̈ܕܬܐ ܕܝܢ ܒܪܡ܆ ܘܐܝܟܐ ܕܝܬܝܪܐܝܬ ܦܩܚܐ: ܝܕܥܿܝܢܢ ܓܝܪ ܒܕܘܟ ܠܐܢܫ܆ ܕܟܕ ܥܠ ܛܘܢܦ ܩܛܠܐ ܐܬܚܝܠ: ܐܘ ܕܥܠ ܛܡܐܘܬܐ ܕܡܫܟܒܐ ܐܬܼܐ܆ ܕܡܢ ܡ̈ܠܐ ܡܕܡ ܐܬܚܿܓܪ. ܐܠܐ ܟܝܬ܆ ܐܬܚܫܿܒ ܘܐܬܪܢܝ. ܘܡܢ ܕܢܕܝܠ ܠܚܐܦܐ ܕܨܒܝܢܐ܆ ܠܐ ܐܦܝܫ ܪܥܝܢܐ. ܘܐܬܬܘܝ ܘܢܩܼܦ ܠܗܿܝ ܕܡܠܝܐ ܫܘܟܪܐ. ܘܡܢ ܚܘܬܡܐ ܕܦܪܟܣܝܣ ܠܚܘܕ ܐܪܡܠ. ܘܟܕ ܒܗܠܝܢ ܫܲܡܫܬ ܚܐܪܘܬܐ: ܗܪܬ ܡܿܢ ܩܗܸܬ܆ ܠܘܬ ܡܦܩܢܐ ܕܨܒܘܬܐ. ܘܗܟܢܐ ܕܠܝܼܠܐܝܬ ܦܕܼܬ ܚܐܪܘܬܐ܆ ܠܘܬ ܗ݀ܝ ܕܦܩܚܐ ܐܝܟ ܕܐܡܿܝܪ. ܐܘ ܡܛܠ ܗ݀ܘ ܕܥܿܒܕ. ܐܘ ܡܛܠ ܗܿܘ ܕܚܐ݀ܫ܆ ܐܘ ܡܛܠ ܬܪ̈ܝܗܘܢ ܐܟܚܕ. ܐܝܟ ܕܝܕܥܿ ܟܝܬ ܗܘ ܕܡܪܢܐܝܬ ܛܒܐ܀ ܘܟܒܪ ܢܐܡܪ ܐܢܫ: ܟܕ ܬܒܿܥ ܠܡܠܬܐ ܕܩܕܝܡܐ ܣܝܡܐ: ܕܡܨܝܐ ܟܝܬ: ܕܬܗܸܘܐ ܚܐܪܘܬܐ ܒܐܘܬܢܛܝܐ܆ ܘܒܠܚܘܕ ܗܠܝܢ ܬܬܚܿܫܒ ܘܬܚܫ: ܘܬܚܿܒ ܘܬܡܠܐ ܐܝܠܝܢ ܕܝܐܝ̈ܢ ܘܦܪܘܩܢܢ܆ ܐܘ ܡܢ ܪܥܝܢܐ ܒܝܬܝܐ܆ ܐܘ ܟܕ ܐܠܗܐ ܢ݀ܛܪ܀ ܠܘܬ ܗܿܢܐ ܦܘܪܬܟܐ ܐܡܿܪܝܢܢ. ܐܝܟܢܐ ܗܟܝܠ ܐܡܿܪ ܐܢܬ܇ ܕܡܨܝܐ ܚܐܪܘܬܐ ܕܨܒܝܢܐ܇ ܕܬܩܼܦ ܠܝܡܝܢ̈ܝܬܐ ܠܚܘܕ. ܐܝܟ ܡܢ ܕܐܢܢܩܐ ܡܕܡ ܟܕܝܢܐ ܥܡܗܿ: ܕܠܐ ܝܗܿܒܐ ܠܗܿ ܕܬܬܦܢܐ ܠܘܬ ܗܠܝܢ ܕܫܟܝܪ̈ܢ܆ ܐܘ ܐܝܟ ܡܢ ܕܟܕ ܚܟܝܡܐ ܠܒܝܫܬܐ ܘܝܕܝܥܐ ܠܛܒܿܬܐ܇ ܡܢ ܗܿܝ ܡܢ ܠܪܘܚܩܐ ܩܝܿܡܐ ܐܝܟ ܡܣܓܦܢܝܬܐ܇ ܠܗܕܐ ܕܝܢ ܒܟܠܗ 90a ܚܝܠܐ ܓܿܡܪܐ ܐܝܟ ܡܘܬܪܢܝܬܐ. ܐܠܐ ܐܢ ܡܢ ܗܝ ܩܕܡܝܬܐ ܢܘܡܐ ܬܐܚܘܕ܆ ܐܙܠܐ ܠܗܿ ܠܢ ܚܐܪܘܬܐ ܘܚܝܠܐ ܡܬܡܿܨܝܢܐ܇ ܗܿܘ ܕܐܝܬܘܗܝ ܢܙܠܐ ܫܲܘܝܐ ܕܠܘܬ ܒܝ̈ܫܬܐ ܐܘ ܛܒ̈ܬܐ܇ ܐܝܟܢܐ ܕܩܕܡܢܢ ܐܟܣܿܢܢ܇ ܐܢܕܝܢ ܗ݀ܝ ܬܪܝܢܝܬܐ: ܐܡܿܪܝܢܢ܆ ܕܡܲܨܝܐ ܗܝ ܕܟܕ ܒܫܘܠܛܢܐ ܒܝܬܝܐ ܩܝܡܿܝܢܢ܇ ܠܟܠܗܿ ܡܢ ܫܦܝܪܘܬ ܐܡ̈ܢܐ ܕܩܕܝܫܘܬܐ ܢܬܢܩܦ܇ ܡܢ ܡܘܡ̈ܐ ܕܝܢ ܘܦܘ̈ܕܐ ܟܠܢܐܝܬ ܢܬܪܚܩ. ܡܦܝ̈ܣܝܢܢ ܗܠܝܢ: ܢܦܫ̈ܬܐ ܕܚܣ̈ܝܐ ܕܚܝ̈ܝ ܕܟܝܐܝܬ: ܘܝܗ̈ܠܐ ܘܟܢ̈ܫܐ ܕܚ̈ܝܠܘܬܐ ܛܒ̈ܐ. ܗܟܢܐ ܡܢ ܥܠ ܗܿܝ ܕܐܡܝܪܐ܇ ܕܡܲܨܝܐ ܗܝ ܚܐܪܘܬܐ ܕܡܢ ܪܥܝܢܗܿ ܬܬܢܓܕ ܠܘܬ ܛܒܬܐ ܠܚܘܕ: ܐܢܕܝܢ ܡܢ ܐܠܗܐ܆ ܚܕܐ ܡܢ ܬܪ̈ܬܝܢ. ܐܘ ܕܗܘܼ ܡܫܿܒܠ ܘܡܘܒܠ ܠܗܿ: ܒܝܕ ܦܘܩ̈ܕܢܐ ܕܟ̈ܝܐ ܘܡ̈ܠܟܐ ܙܗܝܪ̈ܐ܆ ܐܘ ܕܚܿܓܪ ܘܟܿܠܐ܇ ܡܢ ܕܠܡܗܪܥ ܐܘ ܠܡܩܦ ܠܗܢ̈ܝܢ ܕܡܣ̈ܬܠܝܢ. ܘܗܿܝ ܕܚܓܪ ܬܘܒ ܥܦܝܦܐܝܬ: ܐܘ ܕܟܿܠܐ ܠܝܠܕܗܿ ܩܕܡܝܐ ܕܒܝܫܘܬܐ܇ ܟܕ ܓܿܠܙ ܠܪܥܝܢܢ ܡܢ ܗ݀ܝ ܕܣܟ ܢܪܢܝܗܿ܆ ܐܘ ܒܝܕ ܥܘܟܪ̈ܐ ܡܕܡ ܡܥܘܘ̈ܟܐ܇ ܠܗܘܢܗܿ ܕܗܿܕܐ ܡܒܿܛܠ ܐܠܐ ܟܝܬ ܐܢܗܸܘ ܕܗܿܕܐ ܬܒܿܥ ܐܢܫ: ܕܬܐܪܐܝܬ ܐܟܚܕܐ ܘܪܕܘܐܝܬ: ܠܝܠܝܕܘܬܐ ܕܒܝܫܬܐ: ܡܿܢܢ ܢܚܿܒܠ ܗ݀ܘ ܛܒܿܐ܆ ܠܐ ܡܡܬܘܡ ܦܫܸܬ ܒܛܝܠܘܬܗܿ܇ ܕܗ݀ܕܐ ܥـ[ـܡـ]ـܪܐ ܠܘܬܢ ܬܚܘܐ. ܐܠܐ ܟܝܬ܆ ܒܟܠ ܫܘܓܢܝ ܘܒܟܠ ܛܘܟܢ: ܕܢܚܒܠ ܠܥܩܪܗܿ ܕܚܛܝܬܐ ܡܢܢ ܐܲܟܝܼܦܼ: ܒܕܘܟ ܡܿܢ ܒܝܕ ܚܲܙ̈ܝܐ ܘܢܒ̈ܝܐ. ܘܒܕܘܟ ܬܘܒ ܡ̈ܠܐܟܐ ܡܫܬܕܪ̈ܢܐ. ܒܡ̈ܠܼܟܐ. ܒܓܪ̈ܡܐ. ܒܣܝܘܡܘܬ ܢܡܘ̈ܣܐ. ܒܕܝܲܢܘܬܐ. ܐܢܕܝܢ ܗܿܝ ܢܐܡܼܪ܇ ܕܘܿܠܐ ܕܠܐ ܠܘܩܕܡ ܢܫܲܦ. ܕܢܫܘܚ ܒܢ ܥܩܪܗܿ ܕܒܝܫܬܐ܆ ܬܘܒ܆ ܠܐܬܢܛܝܐ ܕܨܒܝܢܐ ܕܢܗܓܘܡ ܡܸܬܝܬܐ. ܟܕ ܠܐ ܟܝܬ ܡܲܨܝܐ܇ ܕܡܢ ܗ݀ܝ ܕܢܬܚܿܫܒ ܒܝܫܬܐ ܢܬܝܿܬܡ܇ ܟܕ ܟܝܬ ܐܬܒܪܝܢܢ ܡܬܪ̈ܥܝܢܐ. ܘܗܿܕܐ ܠܘ ܒܝܫܬܐ ܗܝ. ܠܘ ܓܝܪ ܗܿܝ ܕܢܬܗܿܘܢܢ ܟܠܝܐ܆ ܐܠܐ ܗܿܝ ܕܒܬܪ ܕܝܢܐ ܢܬܗܘܢܢ܇ ܘܟܕ ܝܼܕܥܿ ܕܒܝܼܫܬܐ ܗܿܝ܇ ܝܨܝܦܐܝܬ ܐܘ ܢܬܗܲܓܝܗܿ ܐܘ ܢܓܡܪܝܗܿ. ܘܐܠܘ ܡܢ ܚܘܫ̈ܒܐ ܛܒ̈ܐ ܟܕ ܢܒ݀ܗܢܢ ܗܘܘ: ܐܚܪܢܝܐܝܬ ܕܝܢ ܠܐ܆ ܐܝܬ ܗܘܐ ܠܢ ܠܡܪܝܐ܆ ܕܛܒܬܐ ܦܐܪܐ ܕܟܝܢܐ ܨܐܕܝܢ ܡܫܘܙܒܐ܆ ܐܝܟܢܐ ܕܠܢܘܪܐ ܕܡܐ ܣܿܓܝ ܫܘܪ̈ܬܐ ܕܠܐܦ̈ܝ ܠܥܠ. ܘܠܡ̈ܝܐ ܚܐܦܐ ܡܫܲܪܓܠܝܐ ܕܠܒܝܬ ܬܚܬܝܢ. ܘܐܢܗܸܘ ܡܢ ܕܗ݀ܕܐ ܠܐ ܢܐܡܼܪ: ܕܘܿܠܐ ܕܬܗܘܐ ܐܝܟ ܡܣܠܝܬܐ ܡܕܡ: ܠܘܬ ܕܝܢ ܚܐܦܐ ܢܒܿܥܐ ܗܿܝ ܕܟܿܠܝܐ܆ ܬܘܒ ܚܕܐ ܡܢ ܬܪ̈ܬܝܢ ܐܡܿܪܝܢܢ. ܐܘ ܛܪܘܢܐܝܬ ܘܩܛܝܪܐܝܬ܆ ܐܘ ܒܝܕ ܥܘܘ̈ܟܐ 90b ܘܥܘܟܪ̈ܐ. ܘܒܝܕ ܥܘܟܪ̈ܐ ܬܪܝܢܐܝܬ ܬܘܒ. ܐܘ ܒܝܕ ܫܒ̈ܛܐ ܪ̈ܕܘܝܐ ܡܪ̈ܝܪܐ܆ ܐܘ ܒܝܕ ܫ̈ܦܝܐ ܕܒܡܨܥܬܐ ܘܟܘ̈ܝܢܐ܇ ܐܘܟܝܬ ܗܿܝ ܕܡܪܐܢܐܝܬ ܠܡܐܡܪ܇ ܠܐ ܥܗܢܘܬܐ ܕܣܘܥܪ̈ܢܐ. ܘܐܢ ܗܘܼ ܡܿܢ ܕܗܿܝ ܛܪܘܢܝܬܐ ܢܣܝܡ ܐܢܫ܆ ܚܿܛܐ ܗܘ. ܛܒܐ ܓܝܪ ܐܠܗܢ܆ ܕܢܥܼܨܝܗܿ ܠܚܐܪܘܬܐ܆ ܠܐ ܨܿܒܐ. ܐܢܕܝܢ ܡܿܨܐ ܠܗܿ ܚܒܿܠܗܿ. ܘܒܕܘܟ ܡܢ ܘܕܠܝܠܐܝܬ ܛܟ ܠܘܬ ܗ݀ܕܐ ܩܿܪܒ. ܐܟܡܐ ܕܠܝܗ̈ܠܐ ܕܫ̈ܕܐ ܒܿܠܡ܇ ܡܢ ܕܠܡܗܪܘ ܠܟܝܢܢ܇ ܐܘ ܠܐܢ̈ܫܐ ܝܩܝܪ̈ܝ ܕܘܒܪ̈ܐ. ܟܿܐܐ ܓܝܪ ܘܓܿܥܪ ܒܚܝܠܐ ܕܗܿܢܘܢ܆ ܐܝܟܢܐ ܕܝܕܥܿܝܢܢ ܡܢ ܟܬܒ̈ܐ܆ ܕܠܐ ܢܟܘܢ ܠܩܕ̈ܝܫܐ. ܝܕܿܥ ܙܟܪܝܐ ܘܟܬܒܿܐ ܕܗ݀ܘ ܢܨܝܚܐ܆ ܘܣܒܪܬܐ ܡܟܛܠ ܠܓܝܘܢ. ܗܟܢܐ ܘܠܗܿܢܢ ܥܿܘ̈ܠܐ ܕܒܢܝܢ̈ܫܐ ܡܝܬܐ ܩܛܝܪܐ ܒܕܘܟ܇ ܟܕ ܠܗܿܝ ܕܣܓܝܢܐܝܬ ܡܘܬܪܢܝܐ ܝܗܿܒ ܙܟܘܬܐ. ܘܒܡܕܡ ܕܒܿܪ ܘܥܫܡ ܠܚܐܪܘܬܐ. ܠܘ ܕܝܢ ܒܟܠ ܠܐ ܬܗܸܘܐ܆ ܐܠܐ ܘܠܐ ܡܿܢ ܕܗ݀ܝ ܕܣܓܝܐܐ܆ ܟܬܒܿܐ ܕܡܠ̈ܟܐ ܦܝܣ̈ܐ ܢܥܒܕܟ. ܢܒܫܬ ܓܝܪ ܐܝܕܗ ܕܐܘܿܫܛ ܥܠܘܗܝ. ܒܗ ܒܙܢܐ܆ ܘܐܒܕܢܐ ܘܥܿܛܝܐ ܥܠ ܐܢܫ̈ܝܢ ܓܡܝܪ̈ܐ ܒ̈ܥܘܿܠܐ ܡܲܝܬܐ ܡܘܫܐ ܐܡܪ. ܐܒܕܢܐ ܐܚܪܢܐ ܕܥܗܪ̈ܐ ܣܕܘ̈ܡܝܐ܇ ܘܛܘܦܐ ܠܐ ܚܣܝܐ ܕܐܓܘܒ̈ܛܝܐ܇ ܐܘ ܥܿܡܕܐ ܕܡܡ̈ܘܠܐ ܕܒܘܡ̈ܝ ܢܘܚ܇ ܘܦܘܡܐ ܦܥܝܪܐ ܕܚܝܘܬ ܐܪܥܐ܇ ܡܛܠ ܒܝ̈ܫܐ ܕܬܢ ܘܐܒܝܪܡ. ܗܘܢܐ ܘܡܘܬܐ ܕܝܢܣ̈ܩܐ ܘܫܒܪ̈ܐ܇ ܥܡ ܝܲܚ̈ܛܐ ܛܡܝܪ̈ܐ܇ ܕܐܡܝܢܝܢ ܗ݀ܘܝܢ ܚܿܙܝܢܢ܇ ܠܗܿܢܘܢ ܕܪ̈ܚܡܐ ܬܩܝ̈ܦܐ ܕܐܒܐ ܣܥܪܝܢ. ܗܿܠܝܢ ܡܢ ܩܛܝܪܐ ܗ݀ܘܝܢ܇ ܐܝܟܢܐ ܕܡܠܬܐ ܦܪܼܥܬ܇ ܒܪܡ ܘܠܐܣܛܝܐ ܡܢ ܚܐܪܘܬܐ ܕܨܒܝܢܐ ܦܐܫܿ: ܡܛܠ ܕܒܕܘܟ ܡܙܕܓܪ ܡܢ ܗ݀ܝ ܕܚܒ݀ܠܐ ܥܫܝܢܐ ܢܩܝܼܡ܆ ܘܠܐ ܐܢܫܐ. ܗܿܘ ܡܢ ܓܝܪ܆ ܡܓܪܓ ܠܣ̈ܓܝܐܐ ܠܡܪܓܙܘ. ܘܡܿܠܟ ܘܿܡܦܼܝܣ. ܘܒܠܐ ܗܝܡܢܘܬܐ ܡܿܦܠ. ܘܒܛܘܥܝܝ ܦܬܟܪܝܬܐ. ܘܒܪܓܬܐ ܡܪܚܩ܆ ܘܒܟܕܒܘܬܐ ܡܲܪܡܐ܆ ܘܡܨ̈ܘܢ ܣ̈ܓܝܐܢ ܡܲܒܥܕ. ܘܩ̈ܛܠܐ ܕܡܘܫܚܐ. ܗܟܢܐ ܘܐܢ̈ܫܐ ܚ̈ܠܫܐ: ܟܕ ܒܝܕ ܚܐܪܘܬܐ ܡܬܬܝܬܝܢ: ܠܟܠ ܐܕ݀ܫܐ ܕܥܘܠܘܬܐ ܘܕܫܟܝܪܘܬܐ ܥܒܼܪܘ. ܘܠܐ ܐܬܼܬ ܥܠܝܗܘܢ ܚܣܝܢܘܬܗ ܕܩܛܝܪܐ܆ ܘܠܐ ܥܫܘܡܝܐ ܛܲܪ ܕܚܐܪܘܬܐ. ܘܨܼܒܘ ܘܠܦܘܬ ܡܬܡܨܝܢܘܬܗܘܢ܆ ܚܲܬܡܘ ܪܓܬܐ ܕܐܒܕܢܐ. ܗܕܐ ܕܝܢ܆ ܟܕ ܥܠ ܟܠܝܘܬܐ ܕܡܢ ܩܛܝܪܐ ܡܦܬܚ ܐܢܫ ܐܡܿܪ. ܥܠ ܗܿܝ ܕܝܢ ܕܒܝܕ ܢ̈ܓܕܐ ܘܡܪ̈ܕܘܬܐ ܪ̈ܕܘܝܬܐ܆ ܬܘܒ 91a ܐܡܿܪܝܢܢ܆ ܒܗܿܦܟܐ ܠܐܦܘܕܟܣܝܣ ܕܡܛܠ ܩܛܝܪܐ. ܠܗܠ ܡܢ ܓܝܪ ܐܡܿܪܝܢ ܗܘܼܝܢ܆ ܕܗܿܝ ܕܢܬܚܫܚ ܩܛܝܪܐ܆ ܕܠܝܠܐܝܬ ܐܬܐ ܗܿܘ ܛܿܒܐ. ܒܣܘܓܐܐ ܕܝܢ ܡܲܫܦ ܘܡܪܫܠ ܠܪܥܝܢܐ ܚܐܪܝܐ. ܗܪܟܐ ܕܝܢ ܐܝܢ ܕܒܣܓܝܘ ܘܣܒܝܣܐܝܬ: ܠܥܘܟܪ̈ܐ ܕܒܝܕ ܡܪܕܘܬܐ ܡܫܕܪ. ܙܥܘܪܐܝܬ ܕܝܢ܇ ܡܬܗܐ ܘܡܗܡܐ ܡܢ ܗܠܝܢ. ܒܕܘܟ ܟܕ ܐܢܫ ܕܢܙܟܐ ܡܬܚܿܝܠ ܒܕܘܟ. ܒܟܘܪ̈ܗܢܐ ܥܣܩ̈ܝ ܠܡܬܚܠܡܘ ܠܗ ܣܐ݀ܡ. ܘܗ݀ܠܝܢ ܙܒ̈ܢܝܢ ܣ̈ܓܝܐܢ܆ ܐܦܠܐ ܕܚܐܦܐ ܡܢ ܟܝܢܐ ܐܝܬ ܠܗܘܢ܇ ܐܝܟ ܡܐ ܕܚܿܟܡܝܢ ܕܣ̈ܓܝܐܐ ܡܬܡܲܚܠܝܢ ܘܐܬܝܿܢ ܠܟܐܒ̈ܐ܇ ܐܘ ܡܢ ܡܠܝܘܬܐ ܐܘ ܡܢ ܩܘܪܐ܇ ܐܘ ܡܢ ܣܦܝܩܘܬܐ ܐܘ ܡܢ ܠܐܘܬܐ܇ ܐܠܐ ܟܝܬ ܩܕܡ ܪܕܐ ܠܗܘܢ܆ ܐܝܬ ܐܡܬܝ ܕܢܬܚܿܫܒ ܠܡܬܛܿܡܐܘ. ܘܐܝܬ ܐܡܬܝ ܕܟܕ ܛܘܝܒ ܪܥܝܢܐ ܠܗܕܐ ܡܿܝܬܐ: ܐܘ ܒܗ ܒܫܘܪܝ ܐܬܪܐ ܕܒܝܫܼܘܬܐ. ܠܐܚܪܝܢ ܕܝܢ܆ ܒܝܕ ܝܨܝܦܘܬܗ ܡܩܸܝܡܬ݀ ܟܠ܆ ܕܡܢ ܝܕ ܕܝܘ̈ܐ ܡ̈ܫܢܩܢܐ ܡܿܦܣ ܕܢܫܬܚܩ. ܐܘ ܟܕ ܠܒܝܫܘܬܐ ܕܥܬܝܕܐ ܕܐ݀ܢ ܘܡܟܣ: ܐܟܙܢܐ ܕܒܫܒܪ̈ܐ܆ ܐܘ ܟܕ ܡܒܙܚ ܠܣܘܿܓܐܐ ܪܘܫܥܐ ܘܒܝܫܘܬܐ. ܥܠ ܐܝܠܝܢ ܟܝܬ܇ ܕܡܢ ܡܓܪܬ ܪܘܚܐ ܠܐ ܐܬܚܫܒܘ ܦܘܢܝܐ܇ ܘܠܐ ܬܒܘ ܡܢ ܒܝܫܘܬܐ. ܪܕܐ ܕܝܢ ܘܠܐܚܪ̈ܢܐ܆ ܐܘ ܟܕ ܠܥܘܬܪܐ ܓܿܠܙ: ܐܢܗܼܘ ܕܗܘ̈ܠܐ ܕܒܝܫܘܬܐ ܘܡܠܘܐܐ ܕܚܡܬܐ ܘܪܕܓܬܐ ܗ݀ܘܐ ܠܐܢܫ܆ ܟܕ ܠܐܘܪܓܢܘܢ ܕܝܠܗ ܡܪܝܡ܇ ܐܝܟ ܕܝܢܼܐ ܠܐܝܕ̈ܝ ܓܝܣܐ. ܕܐܝܟ ܗܠܝܢ ܐܝܬܝܗܘܢ ܐܝܠܝܢ ܕܡܬܠܿܣܛܝܢ܇ ܐܘ ܡܘܒ̈ܠܐ ܕܐܠܦܝܗ̈ܘܢ ܥܿܡ̈ܕܢ܇ ܐܘ ܒܩܪ̈ܝܗܘܢ ܘܓܙܪ̈ܝܗܘܢ ܣܝܿܦܝܢ. ܐܦ ܟܝܬ ܘܠܡܕܥܐ ܕܢܫܪܥ ܠܘܬ ܫܝܛܘܬܐ ܫܿܒܩ. ܟܕ ܠܚܿܫܐ ܕܡܢ ܝܕ ܪܡܘܬܐ ܚܿܙܐ: ܐܟܙܢܐ ܕܒܡܝܪ̈ܐ܆ ܐܘ ܕܠܐ ܢܬܪܡܐ ܒܛܘܠܫܬܐ ܕܡܢ ܗܪ̈ܣܝܣ܇ ܘܠܗܿܘ ܐܚܪܢܐ ܐܬܐ ܕܐܒܕܢܐ ܢܬܚܙܐ. ܘܠܼܛܒ ܒܐܡܢܗ ܬܘܒ܆ ܕܡܢ ܝܕ ܚܫܐ ܐܚܿܪܝܐ ܕܢܬܡܼܚܠ ܡܿܦܣ܆ ܐܝܟܐ ܕܠܐ ܬܘܕܝܬܐ ܕܐܠܗܘܬܐ ܘܕܣܒܝܪܘܬܐ ܬܚܒܠܝܘܗܝ. ܘܣܟ ܠܣ̈ܓܝܐܐ ܒܝܕ ܡܪ̈ܕܘܬܐ ܦܬܝ̈ܟܬܐ ܡܲܪܡܐ܇ ܗܿܘ ܕܥܠ ܟܠ ܒܛܝܠܐ ܠܗ ܐܠܗܢ܀ ܘܕܡ ܠܘܬ ܗܠܝܢ ܢܐܡܪ ܐܢܫ܆ ܕܠܡܢܐ ܟܕ ܗܟܢܐ ܥܬܝܕܐ ܕܬܗܿܢܐ ܡܪܕܘܬܐ܇ ܠܘ ܥܠ ܟܠܗܘܢ ܒܝ̈ܫܐ ܐܟܚܕܐ ܪܗ݀ܛܐ܇ ܘܡܢ ܥܝܡܩܐ ܕܕܘܝܘܬܐ ܠܗܘܢ ܢܓܕܐ. ܘܬܘܒ ܡܛܠ ܡ̈ܝܐ܇ ܠܘ ܠܗ ܟܕ ܠܗ ܙܒܢ̈ܝܢ ܣܓ̈ܝܐܢ ܡ݀ܛܝܐ. ܐܝܟܐ ܟܝܬ ܕܡܢ ܟܠܗܿ ܒܝܫܘܬܐ ܕܟܝܐ ܢܬܚܘܐ܀ ܠܘܬ ܗ݀ܕܐ ܗܢܐ ܣܡܐ ܘܥܨܒܿܐ ܢܝܬܐ. ܚܟܘܡܐ ܗܼܘ ܕܗ݀ܠܝܢ ܕܥ̈ܬܝܼܕܢ ܘܕܟܠܗܝܢ 91b ܗܿܘ ܕܥܠ ܟܠ ܒܛܝܠܐ ܠܗ. ܐܘ ܡܕܡ ܐܚܪܝܢ. ܠܘ ܡܕܡ ܐܚܪܢܐ ܝ݀ܕܥ ܐܢܐ ܕܐܡܿܪ ܐܝܬ. ܒܕܓܘܢ: ܠܗܿܘ ܕܩܿܕܡ ܚܿܙܐ ܕܡܢ ܫܒܿܛܐ ܪܕܘܝܐ ܝܘܬܪ̈ܢܐ ܥܿܦܐ. ܘܡܢ ܫܦܝܪܘܬ ܪܥܝܢܐ ܘܡܢ ܒܝܫܘܬܐ ܦܐ݀ܫ܆ ܠܗܢܿܐ ܒܝܕ ܡܪܕܘܬܐ ܥܿܒܕ ܛܿܒܐ. ܠܗܿܘ ܕܝܢ: ܕܐܘ ܡܢ ܪܓܬܐ ܣܓܝܐܬܐ ܕܗܿܝ ܕܢܒܿܐܫ ܐܘ ܡܢ ܝܨܪܐ ܬܙܝܙܐ: ܡܢ ܙܢܝ ܡܪܕܘܬܐ ܝܬܝܪ ܒܝܫܐ ܗܿܘܐ܆ ܠܗܿܢܐ ܕܠܐ ܟܘܘܢܐ ܫ݀ܒܩ܀ ܕܡܚܣܪܢܝܐ ܕܝܢ ܡܪܕܘܬܐ܇ ܠܘܬ ܐܢܫ̈ܝܢ ܝܕܝܥܐ ܗܝ. ܗܕܐ ܓܝܪ ܝܕܥܿܝܢܢ ܡܢ ܬܫܥܝܬܐ܆ ܬܪ̈ܝܢ ܐܢܫ̈ܝܢ ܕܢܓܘܪܘܢ ܛܥܼܘ ܘܣܥܼܘ. ܘܚܕ ܡܿܢ ܒܝܕ ܐܫܬܐ ܫܬܝܬܝܬ ܝܪ̈ܚܐ ܐܬܪܕܝ܆ ܘܡܢ ܡܚܘܬܐ ܩܒܠ ܬܘܪ̈ܨܐ܆ ܘܐܬܼܐ ܠܥܘܡܩܐ ܕܡܝܬܪܘܬܐ. ܐܚܪܢܐ ܕܝܢ ܟܕ ܒܝܕ ܐܫܬܐ ܛܐܛܪܐܛܐܘܣ ܘܒܝܕ ܟܐܒ̈ܐ ܥܙܝ̈ܙܐ: ܕܡܢ ܡܚܘ̈ܬܐ ܕܕܝ̈ܢܐ ܐܬܪܕܝ܆ ܘܣܟ ܠܐ ܫܟܬܬ ܘܠܐ ܢܚܲܬ ܬܪܥܝܬܗ ܙܢܝܬܐ܇ ܡܢ ܕܠܡܡܠܝܘ ܪܓܬܗ ܥܘܠܬܐ܇ ܐܡܬܝ ܕܡܢ ܦܘܿܠܛܐ ܕܡܢ ܗ݀ܕܐ ܐܫܟܚ. ܘܡܛܠ ܕܟܕ ܗܿܕܐ ܐܝܟ ܗ݀ܘ ܣܟܠܐ ܒܥ̈ܒܕܐ ܗܼܘܐ܆ ܡܢ ܟܘܘ̈ܢܐ ܠܐ ܩܒܠ ܬܘܪܨܐ܆ ܡܚܘ̈ܬܐ ܕܣ̈ܓܝܐܢ ܠܟܐܢܘܬܐ ܥܬܕ. ܠܗܿܢܐ ܗܟܝܠ܆ ܐܝܿܕܐ ܕܐ݀ܢ ܐܢܬ ܕܥܕܪܐ ܗܘܬ݀ ܕܢܫܼܬܒܩ ܗ݀ܘܐ ܫܛܐ ܒܦܗܝܘܬܐ ܕܪܓܬܐ܆ ܐܘ ܕܢܬܪܕܐ܇ ܟܕ ܩܕܝܡܐ ܝܕܝܥܐ ܠܗ݀ܘ ܛܒܐ܇ ܕܠܐ ܣܿܟ ܡܢ ܒܝܫܘܬܐ ܒܗܿܠ. ܐܝܟ ܗ݀ܝ ܡܢ ܓܝܪ ܕܚܕ ܫܒܛܐ ܘܚܕ ܓܙܪ ܕܝܢܐ܇ ܐܝܬܘܗܝ ܗܘܐ ܚܝܒܐ. ܐܝܟ ܗ݀ܕܐ ܕܝܢ܆ ܕܬܪ̈ܝܢ ܡܣܡ ܒܪ̈ܝܫܐ ܐܝܬܘܗܝ ܡܬܬܚܝܒܢܐ. ܠܗܠ ܡܿܢ ܕܐܬܛܲܡܐܝ ܟܕ ܙܢܝ܆ ܗܪܟܐ ܕܝܢ ܕܗ݀ܝ ܕܐܬܛܡܝ܆ ܘܕܗܿܝ ܕܐܫܝܚ ܥܠ ܡܪܕܘܬܐ܀ ܐܠܐ ܐܡܿܪ ܐܝܬ܆ ܕܠܡܢܐ ܟܝ ܐܬܪܕܝ܇ ܗ݀ܘ ܕܐܝܟ ܗܿܢܐ ܒܝܕ ܐܩܛܝܩܘܣ܇ ܡܢ ܛܒܘܬܗܿ ܕܒܛܝܠܘܬܐ܇ ܘܠܐ ܫܒܩܬܗ ܕܠܐ ܡܪܕܘ܇ ܘܐܝܟܢܐ ܕܕܚܕ ܠܚܘܕ ܦܘܪܥܢܐ ܢܗܸܘܐ ܚܿܝܒܐ. ܗܐ ܓܝܪ ܗܪܟܐ ܐܝܟ ܡܠܬܟ܆ ܗܝܼ ܒܛܝܠܘܬܐ ܐܚܣܪܬܗ܀ ܠܘܬ ܗܿܠܝܢ ܐܡܿܪܐ ܡܠܬܐ ܫܪܝܪܬܐ܆ ܕܠܘ ܠܟܠܗܘܢ ܗ݀ܢܘܢ ܕܐܝܟ ܗܠܝܢ܇ ܫܒܛܐ ܪܕܘܝܐ ܡܫܕܪ ܡܘܬܐ. ܡܪܝܐ. ܐܦ ܓܝܪ ܚܿܙܝܢܢ ܣܘܓܐܐ ܕܦ̈ܠܚܝ ܐܣܛܪܢܝܐ: ܐܟܚܕܐ ܕܝܢ ܘܕܩ̈ܛܠܝ ܓܒܪ̈ܐ ܘܒܝ̈ܫܝ ܐܝܕܐ. ܕܒܢ̈ܝܐ ܕܠܐ ܥܩܐ ܐܣܿܐܒ. ܘܕܚ̈ܝܐ ܚܲܠܦܘ ܣܛܪ ܡܼܢ ܟܠ ܩܝܢܕܘܢܘܣ. ܠܡܢܗܘܢ ܕܝܢ ܐܢܗܸܘ ܕܪܕܐ: ܐܝܟܢܐ ܕܗܿܘ ܕܢܩ݀ܦ ܒܬܚܘܝܬܐ܆ ܠܘ ܕܠܐ ܡܠܬܐ ܐܘ ܕܠܐ ܙܕܩܐ܇ ܗܿܕܐ ܕܐܝܟ ܗܟܢ ܣܿܥܪ. ܡܛܠ ܓܝܪ 92a ܕܣ̈ܓܝܐܐ ܪܝ݀ܫܝܢ ܘܥܕܠܝܢ ܠܒܛܝܠܘܬܐ: ܟܕ ܚܿܝܪܝܢ ܒܪܘܫܥܗ ܘܥܢܬܘܬܗ ܕܡܬܦܠܚܐ: ܕܡܛܠ ܡܿܢܐ ܠܐ ܐܝܬܝ ܥܠܘܗܝ ܓܙܪ ܕܝܢܐ ܘܚܓܪܗ: ܐܝܟܢܐ ܕܡܢ ܗܕܐ ܒܝܫܘܬܐ ܢܬܪܚܩ܆ ܐܘ ܬܘܒ ܗܼܘ ܐܡܬܝ ܕܢܓܼܡܘܪ ܨܒܝܢܗ ܘܢܬܘܒ: ܒܬܪܟܢ ܢܬܚܫܿܒ: ܕܠܡܢܐ ܠܐ ܐܝܿܬܝ ܥܠܝ ܡܪܕܘܬܐ ܡܕܡ ܘܥܘܟܢܝ: ܘܐܠܘܼ ܨܼܒܐ ܗܼܘ ܢܩܝܦ ܗܘܐ ܫܘܘܙܒܐ܇ ܡܢ ܬܪ̈ܥܝܬܐ ܕܐܝܟ ܗܠܝܢ܇ ܒܙܢܐ ܐܚܪܢܐ ܬܗܸܘܐ ܐܝܬܝܗܿ ܒܛܝܠܘܬܐ ܬܚܝܬ ܡܪܫܘ܇ ܘܢܣܬܓܦܘܢ ܒܪܢܝܐ ܘܡܠܬܐ ܕܐܝܟ ܗܕܐ. ܡܢ ܗܪܟܐ ܙܒܢ ܚܕܐ ܐܘ ܬܪ̈ܬܝܢ ܫܚܿܩ ܘܪܕܐ܆ ܘܟܢ ܡܢܝܚ ܐܝܕܐ ܕܐܬܬܪܝܡܬ݀. ܕܒܝܕ ܗ݀ܢܐ ܚܕ ܢܐܠܦ܆ ܕܟܠܗܘܢ ܒܝ̈ܫܐ ܟܢܘ̈ܬܗ ܠܡܸܚܫ ܟܐܢܐ ܗܘܬ. ܡܛܠ ܕܝܢ: ܕܣܟ ܠܐ ܢ݀ܝܚܝܢ ܡܢ ܒܝܫܬܐ: ܐܢܗܼܘ ܕܡܛܠܐ ܥܠܝܗܘܢ ܡܪܕܘܬܐ: ܡܢ ܗܪܟܐ ܒܐܒܕܢܗ ܕܗܿܘ ܕܡܣܡ ܒܪ̈ܝܫܐ ܣ̈ܓܝܐܐ ܢܗܘܘܢ ܝܪ̈ܬܐ ܫܒܿܩ ܠܗܘܢܼ ܘܥܠ ܗ݀ܢܐ ܟܝܬ܆ ܡܥܫܢ ܐܝܕܐ ܬܐܪܝܬܐ: ܕܠܐ ܗܘܼܝܬ ܡܿܚܫܠ: ܟܕ ܕܝܢ ܡܢ ܝܿܕ ܒܛܝܠܘܬܐ ܐܬܪܫܲܠ: ܘܒܝܕ ܪܛܢܐ ܢܦܼܠ܆ ܘܠܐ ܣܓ̈ܝܐܐ ܟܕ ܛܡܘܢ ܬܘܒ܇ ܕܡܛܠ ܡܿܢܐ ܪ̈ܫܝܥܐ ܡܨܠܚܝܢ܇ ܟܕ ܚܿܙܝܢ ܕܐܝܠܝܢ ܕܠܗܘܢ ܡܣܿܒܗܝܢ܇ ܐܣܬܓܲܦܘ ܡܠܘܢ ܡܢ ܡܪܕܘܬܐ ܐܘ ܝܬܪܘ܆ ܐܢܓܝܪ ܟܕ ܬܪܝܢ ܐܢܫ̈ܝܢ ܒܐܝܕܐ ܢܬܩܲܛܪܓܘܢ: ܦܠܣܪ̈ܐ ܐܘ ܦܠ̈ܫܝ ܐܣ̈ܐ܇ ܘܠܐܝܕ̈ܝ ܕܝܿܢܐ ܚܕ ܡܢ ܢܐܬܼܐ: ܘܐܚܪܢܐ ܢܫܟܚ ܦܘܿܠܛܐ܇ ܘܟܕ ܡܿܬܢܓܕ ܘܚܿܣܪ: ܘܛܘܪ̈ܐ ܐܪ̈ܝܟܐ ܒܣܕܐ ܪܓܠܗ ܬܥܘܠ: ܘܐܝܕܗ ܒܟ̈ܒܠܐ ܬܬܥܪܙܠ: ܘܨܘܪܗ ܒܩܘܠܪܐ ܕܡܢ ܦܪܙܠܐ: ܒܬܪܟܢ ܕܝܢ ܢܫܬܒܸܩ ܘܥܠ ܫܕܬܗ ܢܗܸܘܐ ܐܡܿܝܢ܇ ܠܐ ܫܦܝܪ ܐܢܫ ܡܕܓܠ ܟܕ ܥܠ ܗܿܘ ܕܠܐ ܚܼܫ ܐܡܿܪ: ܕܐܠܘ ܐܬܪܕܝ ܗ݀ܘܐ ܗܘܼܐ ܛܒܿܐ܆ ܐܝܬ ܓܝܪ ܠܐܢܫ ܠܡܟܣܘ ܠܗܕܐ܆ ܕܡܢܐ ܗܿܘ ܕܐܬܪܕܝ܆ ܛܿܒܐ ܗܘܐ܆ ܠܐ ܐܪܐ ܡܿܕܝܢ ܘܠܐ ܗܢܐ܇ ܡܢ ܙܢ̈ܝܐ ܪ̈ܕܘܝܐ ܫܘܓܢܝܐ ܕܡܼܢ ܒܝܫܘܬܐ ܚܐ݀ܫ ܗܘܐ܇ ܐܢܗܼܘ ܕܡܢ ܨܒܝܢܐ ܚܐܪܝܐ ܠܐ ܐܬܐ ܗܘܐ. ܡܨܝܐ ܓܝܪ ܕܢܫܝܚ܆ ܘܝܬܝܪ ܒܝܫܐ ܢܗܼܘܐ܇ ܟܕ ܦܕܓܘܓܝܣܐ ܗ݀ܘܐ. ܐܝܟ ܫܒܪ ܡܕܥܐ ܒܛ̈ܠܝܐ܇ ܕܡܛܠ ܐܣܩܛܐ ܐܬܪܢܝ ܚܢܘܩܝܐ ܕܝܿܬܗ. ܗܟܢܐ ܡܿܢ܇ ܢܡܘܣܐ ܕܒܛܝܠܘܬܐ ܡܢ ܕܛܡܐ ܐܬܕܟܝ. ܐܝܬ ܕܝܢ ܐܦ ܒܙܢܐ ܐܚܪܢܐ܇ ܠܬܐܘܪܝܐ ܕܩܕܝܡܐ ܣܝܡܐ ܢܣܼܒ. ܕܗܼܘ ܡܿܢ ܛܿܒܐ ܐܝܟ ܐܣܝܐ ܪܒܐ܆ ܩܕܡ ܪܡܿܐ ܥ̈ܠܬܐ ܕܒܝܫܘܬܐ. ܘܠܚܕ ܡܢ܆ ܐܝܬ ܚܘܠܡܢܐ ܟܘܠܢܝܐ. ܠܐܚܪܝܐ ܕܝܢ܆ ܚܘܠܡܢܐ ܠܐ ܐܬܚܙܝ܇ 92b ܐܠܐ ܬܐܪܬܗ ܡܬܝܠܦܐ܆ ܕܠܐ ܐܪܐ܇ ܡܕܡ ܡܢ ܙܕܩ̈ܐ ܕܘܠܿܝܬܐ ܒܲܨܪ ܐܣܝܐ. ܘܟܕ ܗܼܘ ܠܟܐܒܗ ܥܿܕܠ ܕܟܡܐ ܗܘ܆ ܛܝܒܘܬܐ ܦܿܓܥ ܠܐܣܝܐ ܘܠܐ ܡܿܚܦܪ. ܠܐܚܪܢܐ ܕܝܢ ܟܕ ܚܿܟܡ ܘܩܿܕܡ ܕܐܩܿ܆ ܠܘ ܠܚܘܕ ܓܗܝܬܐ ܕܡܢ ܟܘܪܗܢܐ ܕܐܚܝܕ ܠܐ ܩ݀ܢܐ܇ ܐܠܐ ܟܝܬ ܘܡܲܣܓܐ ܡܬܛܓܪ ܘܒܐܣܝܐ ܡܬܥܕܠ: ܒܕܟܪܝܗܿ ܥܡ ܒܣܪܐ ܐܦ ܒܪܥܝܢܐ܆ ܡܢ ܗܢܐ ܠܛܘܚܐ ܣܿܐܡ܇ ܐܣܝܘܬܗ ܡܠܸܝܬ ܥܘܕܪ̈ܢܐ. ܕܐܝܟ ܗܠܝܢ ܐܝܬܝܗܘܢ܇ ܟܠܗܘܢ ܐܝܠܝܢ ܕܟܕ ܪܕܐ ܡܦܚܝܐܝܬ ܗܿܘ. ܟܐܢܐ܇ ܬܐܓܘܪܬܐ ܕܐܒܕܢܐ ܠܙܢܐ ܪܕܘܝܐ ܥܿܒܕܝܢ܇ ܟܕ ܡܠܘܬܡܝܢ ܘܡܪܛܢܝܢ܇ ܘܟܠ ܪܐܙ ܒܝܫܬܐ ܓܿܡܪܝܢ܇ ܘܐܝܟ ܚܙܝܪ̈ܐ ܠܘܩܒܠ ܩܘܢܛܪ̈ܐ܇ ܠܘܬ ܒܝܫܘܬܐ ܚܒܿܠܬܐ ܥܿܒܪܝܢ܀ ܗܟܢܐ ܡܢ܇ ܦܟܪܐ ܩܕܡܝܐ ܕܗܿܦܟܬܐ ܐܬܦܿܠܗܕ. ܫܪܝܟܐ ܕܢܚܿܘܐ܆ ܕܡܛܠ ܡܢܐ ܠܫܒܛܐ ܪܕܘܝܐ܇ ܡܢ ܒܝܫܐ ܡܢܿܬܼܐ ܡܪܝܡ܇ ܟܕ ܚܟܡ ܠܡܦܩܢܐ܇ ܘܠܘܬ ܐܝܿܢܐ ܫܘܠܡܐ ܢ݀ܥܓܐ ܠܗ ܒܝܫܘܬܐ. ܗܐ ܓܝܪ ܚܿܙܝܢܢ ܣ̈ܓܝܐܐ܇ ܕܟܠ ܟܡܐ ܕܡܬܬܥܒܕ ܕܝܢ ܢܟܦܝܢ. ܘܟܠ ܟܡܐ ܕܡܟܪ̈ܗܝܢ ܡܿܟܢܟܝܢ. ܕܐܙܕܠܠܘ ܕܝܢ ܟܕ ܐܬܚܪܪܘ܆ ܘܕܐܬܬܪܝܡܘ ܟܕ ܐܬܚܝܠܘ. ܘܠܐܢܫ ܠܒܪܐ ܥܡܝܩ ܒܚܘܪ̈ܬܐ ܚܿܙܝܢܢ܆ ܕܟܕ ܒܝܕ ܬܥܕܝܪܐ ܕܐܝܕܐ ܐ݀ܣܝܝܬܐ ܢ݀ܓܕ ܚܘܠܡܢܐ܆ ܕܐܬܲܦܬܝ ܘܫܼܡܢ. ܘܡܢ ܒܝܫܘܬܐ ܕܪܓܬܐ ܐܬܥܫܡ. ܗܠܝܢ ܗܟܢܐ. ܡܢܐ ܕܝܢ. ܒܝܕ ܗܠܝܢ ܛܟ: ܦܝܿܫܐ ܡܠܬܐ ܕܒܛܝܠܘܬܐ ܕܠܐ ܬܗܸܘܐ܆ ܥܬܝܕܐ ܕܝܢ ܒܝܕ ܟܠܗܝܢ܆ ܕܠܐ ܒܡܕܡ ܥܠܸܬ ܬܘܩܠܬܐ ܬܗܸܘܐ ܠܓܘܐ. ܘܒܕܓܘܢ ܟܕ ܒܝܕ ܡܪܕܘܬܐ ܡܟܼܠܐ ܠܒܝܫܘܬܐ܇ ܟܡܐ ܙܒܢܐ ܕܫܦܝܪ ܚܟܡ ܗܘܼ ܡܪܝܐ܇ ܐܡܬܝ ܕܝܢ ܕܝܕ݀ܥ ܕܡܢ ܗܿܕܐ ܐܡܝܢܘܬܐ܇ ܠܘܬ ܒܝܫܬܐ ܕܝܬܝܪ ܪܡܿܐ ܗܿܘ ܕܡܬܟܿܘܢ ܐܬܐ܆ ܥܿܓܠ ܠܗܿ ܘܩܦܿܠ ܠܗܿ. ܒܟܠܦܪܘܣ ܓܝܪ: ܗܿܢܐ ܐܓܘܢܐ ܝܨܝܦܘܬܐ ܡܩܝܡܐ܆ ܕܐܘ ܠܐ ܣܟ ܢܲܣܟܿܠ ܗܿܘ ܕܦܕܐ ܓܘܓܝܣܐ ܗܿܘܐ܆ ܐܘ ܕܡܢ ܦܘܕ̈ܐ ܪܘܪ̈ܒܐ ܢܼܡܿܕ. ܘܬܠܝܬܐܝܬ ܕܝܢ ܡܕܡ ܚܫ܆ ܬܕ[ܟـ]ـܝܘܗܝ. ܕܐܝܬ ܡܢ ܐܡܬܝ ܕܐܢ ܬܟܿܒܐ ܐܝܕܐ ܟܕ ܪܕܝܐ܆ ܐܬܿܐ ܐܢܫ ܠܪܘܫܥܐ ܐܚܪܢܐ܆ ܐܝܠܦ ܢܐ܆ ܡܢ ܐܝܠܝܢ ܕܠܘܬ ܚܪ̈ܫܐ ܘܐܫܘ̈ܦܐ ܪܗܛܝܢ܇ ܐܝܟܢܐ ܕܐܘ ܕܠܕܝܘܐ ܐܢܫ ܢܫܲܕܪܘܢ܇ ܐܘ ܠܟܐܒܬܢܘܬܐ ܕܗܕ̈ܡܐ ܠܡܲܚܠܡܘ܇ ܐܡܬܝ ܕܡܢ ܥܘܕܪ̈ܢܐ ܕܐܣܘ̈ܬܐ ܐܬܓܲܙܝܘ. ܠܐܚܪ̈ܢܐ ܕܝܢ: ܠܗܿܢܘܢ ܕܦܪܘܩܝܬܐ ܗ݀ܝ ܠܗܘܢ: ܗ݀ܝ ܕܢܬܕܘܘܢ ܡܢ ܚ̈ܫܐ ܕܐܝܟ ܗܠܝܢ܆ ܥܕܡܿܐ ܠܣܘ̈ܩܐ ܐܚܪ̈ܢܐ ܡ̈ܝܬܐ ܢܓ̈ܕܐ. 93a ܐܘ ܠܗܿܢܘܢ ܕܕܟܝܢ ܟܠܝܠܐ ܕܚܘܡܣܢܐ ܘܙܟܘܬܐ ܕܥܠ ܚ̈ܫܐ܆ ܐܘ ܠܗܿܢܘܢ ܕܕܠܝܠܝܢ ܠܡܼܨܛܠܝܘ ܡܦܩܢܐ ܚܐܪܢܐ܆ ܘܠܐܚܪ̈ܢܐ ܕܘܟܝܐ ܕܡܢ ܛܘ̈ܠܫܐ ܘܦܘ̈ܕܐ ܕܣܥܪܘ. ܠܐܝܠܝܢ ܕܝܢ: ܕܫܿܪܥܝܢ ܘܡܫܬܪܓܠܝܢ ܠܘܬ ܦܚܬܐ ܕܐܒܕܢܐ܆ ܣܿܡܟ ܟܕ ܡܿܦܩܢܐ ܘܩܿܪܐ ܡܢ ܟܐܒ̈ܐ܆ ܐܦܢ ܘܕܒܨܝܪ ܡܢ ܗܢܐ ܡܬܬܚܕܝܢ܀ ܐܠܐ ܟܝܬ ܥܠ ܗܠܝܢ ܡܘܣܿܦ ܡܿܒܚܢ ܗܿܘ ܪܚܿܡ ܕܝ̈ܢܐ܇ ܕܐܝܟܢܐ ܡܿܕܝܢ܇ ܠܐ ܩܿܕܡ ܘܕܝܿܢܐ ܠܕܝܘܐ ܐܘ ܠܟܘܪܗܢܐ ܗܿܘ ܛܿܥܐ܇ ܐܝܟܢܐ ܕܗܿܢܐ ܝܘܬܪܢܐ ܐܦ ܐܚܪ̈ܢܐ ܢܥܦܼܘܢ. ܠܘ ܓܝܪ ܡܢ ܟܠܢܫ ܕܐܬܬܪܝܡ ܗܐ ܚܕܝܢ. ܘܒܕܓܘܢ ܠܣ̈ܓܝܐܐ ܐܘܒܼܕܬ܇ ܐܘ ܡܢ̈ܘܬܐ ܕܦ̈ܠܚܝ ܠܕܝ̈ܘܐ܀ ܟܐܐ ܕܝܢ ܗܘܿܢܐ ܥܕܝܡܐ ܒܗܿܠܝܢ܆ ܟܕ ܠܣܓܝܐܘܬ ܥܘܫܢܐ ܕܚܐܪܘܬܐ܇ ܕܠܘܬ ܗܿܝ ܕܬܗܿܪ ܗܝܼ ܠܗܿ ܡܝܬܐ ܠܡܨܥܬܐ. ܟܕ ܓܝܪ ܗܿܘ ܕܐܚܿܝܕ ܣ̈ܘܟܢܐ ܕܟܝܢܢ ܐܢܿ ܠܢ ܦܪܘܩܿܐܝܬ: ܘܒܙܢܐ ܡܦܢܝܢܐ ܢ݀ܓܕ ܥܠܝܢ ܠܫܒܿܛܐ: ܬܪܥܝܬܐ ܕܝܢ ܟܕ ܡܬܥܝܛܐ: ܘܠܝܘܩܪܐ ܕܢܓܕܐ ܠܐ ܡܩܒܠܐ ܥܡ ܚܘܡܣܢܐ܆ ܠܘܬ ܚܪܬܐ ܕܒܝܫܘܬܐ ܫܿܪܟܐ. ܒܕܠܐ ܠܘܬ ܗܿܘ ܕܪܕܐ ܐܬܦܢܸܝܬ ܘܐܬܓܪܓܚܬ܇ ܡܛܠ ܕܟܠ ܟܐܒ ܗܘܝܘ ܐܝܬܘܗܝ ܕܡܐܣܐ܇ ܘܗܘܝܘ ܕܬܒܪ ܘܥܨܿܒ ܠܟ ܕܡ̈ܠܐ ܩܕܝܫ̈ܬܐ ܡܢܗܪ̈ܢ: ܘܠܐ ܠܡܨܪܦܢܘܬܐ ܕܐܣܝܘܬܐ ܥܪܬ܇ ܐܠܐ ܟܕ ܕܐܒܕܢܐ ܕܝܬܗܿ ܨܦܬܐ ܫܩܝܠܐ܆ ܠܘܬ ܗ݀ܝ ܕܣܓܝ ܪܡܿܐ ܒܩܝ̈ܢܕܘܢܘ ܐܬܼܬܼ. ܕܡܢ ܝܕ ܗܿܢܘܢ ܕܠܫܐܕ̈ܐ ܡܫܡܫܝܢ܆ ܡܢܝܚܢܘܬܐ ܬܒܼܥܐ. ܘܡܨܝܐ ܗܘܬ ܡܢ ܬܢܢ܇ ܕܟܕ ܥܙܝܙܐܝܬ ܡܫܼܬܩܠ ܗܘܐ ܗ݀ܘ ܪܡܿܐ܇ ܢܓܪܣ ܗܘܐ ܠܗܿܘ ܕܠܗܢܐ ܫܒܝܠܐ ܫܿܠܡ܆ ܘܟܕ ܪ̈ܓܠܘܗܝ ܣܓܝ ܚܘ̈ܝܚܢ ܗܘ̈ܝ. ܐܠܐ ܕܝܢ ܠܗܿܠܝܢ ܡܪܫܠ܆ ܐܝܟܢܐ ܕܒܘܩܝܐ ܬܬܠ ܚܐܪܘܬܐ܆ ܘܬܬܓܠܓ ܢܣܝܣܘܬܐ ܕܗܝܡܢܘܬܐ. ܟܕ ܗܟܝܠ ܠܘܬ ܗܿܘ ܡܐܣܝܢܐ ܒܝܫܐ ܘܟܘܡܪܐ ܕܕܝܘܐ܇ ܗ݀ܘ ܣܓܝ ܕܘܢܘܬܐ ܒܪܝܫܐ ܚܿܙܩ܆ ܐܢܗܸܘ ܡܢ: ܕܡܢ ܫܒܛܐ ܕܡܢ ܠܥܠ ܢܘܘܠܐ ܕܦܓܪܐ ܐܝܬ ܠܗ܆ ܡܸܬܡܨܐ ܡܢ: ܗ݀ܘ ܚܝܠܐ ܚܒܿܠܐ ܕܕܝܘܐ ܘܠܐ ܡܕܡ܇ ܠܡܚܪܪܘ ܘܠܡܕܟܝܘ ܟܪܝܗܘܬܗ. ܠܐ ܓܝܪ ܡܬܡܨܝܐ܇ ܕܗ̈ܢܝܢ ܕܡܢ ܡܪܝܐ ܒܡܣܡ ܒܪܝܫܐ ܐܬܚ̈ܙܩܝ܇ ܕܡܪܡܝܢܐ ܕܟܠܗ̈ܝܢ ܢܬܚܘܐ. ܚܠܦ ܕܝܢ ܗܠܝܢ ܒܕܘܟ܆ ܘܥܿܐܦ ܠܗ ܟܐܒܐ. ܐܘ ܟܕ ܡܪܝܐ ܡܦܣ܆ ܐܘ ܗܘ ܟܝܬ܇ ܐܝܟ ܡܢ ܕܚܒܝܒ ܠܗ ܚܘܒܿܠܐ ܘܥܛܿܝܐ ܕܟܝܢܢ. []ܛܟ: ܟܕ ܪܕܐ ܠܘܬ ܓܘܣܿܐ ܕܫ̈ܐܕܐ: ܝܗܒ ܡܪܝܐ ܕܢܫܟܚ []ܠܛܐ ܡܢ ܟܐܒܗ܆ ܐܝܟ ܡܢ ܕܠܐ ܒܗܘܢ ܟܕ ܒܗܘܢ [] ܫܒ̈ܝܠܐ ܢܬܬܘܿܫ܇ ܘܥܠ ܕܚܠܸܬ ܫ̈ܐܕܐ ܥܡܝܩܬܐ 93b ܢܬܚܿܝܠ. ܕܠܐ ܓܝܪ ܡܬܘܡ ܕܝܘܐ ܡܢ ܓܒܪܐ ܕܘܝܪܐ ܡܚܠܦ: ܐܢܗܸܘ ܕܐܝܟ ܕܒܡܣܡ ܒܪܝܫܐ ܦܘܩܕܢܐ ܩܲܒܠ: ܘܠܐ ܟܘܪܗܢܐ ܐܙܿܠ: ܐܢ ܗܟܢܐ ܥܿܕܪܐ ܕܠܐ ܢܐܙܠ: ܘܐܦܢ ܐܝܟ ܕܒܡܣܪܬܐ ܡܕܡ: ܟܠܗܿ ܫܚܪܐ ܕܕܝܘ̈ܐ ܚܪ̈ܫܐ ܢܩܗܠ܇ ܗܕܐ ܗܼܘ ܠܣܝܢܐ ܠܢ ܒܲܕܩ. ܟܕ ܠܣ̈ܓܝܐܐ ܕܡܬܒܲܥܩܝܢ ܚܼܙܝܢ܆ ܕܐܢ̈ܫܝܢ ܚܪ̈ܫܐ ܘܙܟܘܪ̈ܐ ܪܗܼܛܘ. ܘܟܕ ܦܢܛܣܝ̈ܣ ܡܕܡ ܡܚܘܝܢ܇ ܐܘ ܕܡܘܬ ܐܢܬܬܐ ܡܕܡ ܕܡܢ ܟܪܣܐ ܩܛܝܢܐܝܬ ܡܡܠܠܐ ܡܫܡܥܐ܆ ܐܘ ܕܗܼܘ ܕܝܘܐ ܕܡܛܦܣ ܒܠܫܢܐ ܕܗܿܘ ܕܡܿܪܥܬ ܠܥܙܐ ܡܕܡ܆ ܣܟ ܕܐܫܟܚܘ ܫܘܙܒܐ ܡܢ ܗܿܢܐ ܫܒܛܐ ܠܐ ܚܼܙܝܢ. ܐܠܐ ܐܝܬ ܡܢ ܐܡܬܝ܆ ܕܝܬܝܪ ܡܪܝܪܐܝܬ ܐܬܠܒܒ ܥܠܝܗܘܢ. ܐܘ ܐܝܟ ܕܒܩܕܡܝܬܐ܇ ܟܠ ܟܡܐ ܕܡܦܘܠܬܐ ܕܡܢ ܐܠܗܐ܇ ܐܬܪܐ ܝܗܸܒܬ ܠܗ ܥܠܝܗܘܢ. ܕܚܐܪܘܬܐ ܕܝܢ ܘܠܐ ܗܝܡܢܘܬܐ: ܐܝܬܝܗܿ ܥܠܬܐ ܕܗܢܐ ܐܒܕܢܐ: ܘܠܘ ܡܫܬܢܩܢܘܬܐ ܕܡܢ ܝܕ ܕܝ̈ܘܐ܆ ܡܢ ܗܪܟܐ ܐܣܬܟܠ܆ ܗܐ ܓܝܪ ܐܢܫ ܐܬܠܲܣܛܝ܆ ܘܟܠ ܕܐܝܬ ܗܘܐ ܠܗ ܐܘܒܿܕ. ܘܐܚܪܢܐ ܐܢܬܬܐ ܐܝܬ ܠܗ ܕܡܢ ܥܩܪܘܬܐ ܥܡܝܠܐ܆ ܘܟܕ ܠܘܬ ܗ݀ܝ ܕܦܩܚܐ: ܗܿܘ ܡܿܠܚܐ ܒܣܝܡܐ ܡܪܝܐ ܚܿܐܪ: ܘܕܡܘܬܪܐ ܣܡܗܿ ܠܗܿܘ ܡܢ ܠܡܣܟܢܘܬܐ: ܠܗܕܐ ܕܝܢ ܠܠܐ ܡܦܪܝܢܘܬܐ: ܟܕ ܕܚܐܦܐ ܒܝܫܐ ܐܝܬܝܗܘܢ܇ ܘܡܿܕܥܐ ܕܥܿܒܛ ܒܒܝ̈ܫܬܐ ܐܝܬ ܠܗܘܢ: ܡܢ ܕܝܘ̈ܐ ܡܘܒ̈ܕܢܐ܆ ܦܘܢܝ ܐܒܕ̈ܬܐ ܫܿܐܠܝܢ: ܘܡܢ ܗܢܘܢ ܕܒܟܠܡܕܡ ܡܗܪ̈ܢܐ ܘܒܥܠܕܒ̈ܒܝܢ ܝܗܝܒܘܬܐ ܕܒ̈ܢܝܐ. ܘܗܐ ܐܡܬܝ ܗܘܸܐ ܕܝܘܐ ܣ݀ܥܪ ܒܝܫ̈ܬܐ܇ ܡܝܬܬܢܐ ܕܗܘ̈ܝܐ ܐܘ ܒܪܘܝܐ ܕܡܕܡ. ܕܢ݀ܚܒܠ ܡܢ ܓܝܪ ܨܦܬܐ ܕܠܐ ܡܿܝܬܐ ܐܝܬ ܠܗ. ܕܢܩܒܘܥ ܕܝܢ ܘܕܢܩܝܡ ܘܠܐ ܣܟ܇ ܘܐܦܢ ܘܛܟ ܘܚܝܠܐ ܕܗܿܕܐ ܐܝܬ ܗܘܐ ܠܗ. ܐܠܐ ܟܝܬ ܠܘܬ ܗܿܝ ܕܚܐܦܐ ܠܡܠܬܐ ܐܝܬ ܗܘܐ ܐܬܦܼܢܐ܆ ܕܣܓ̈ܝܐܐ ܐܝܬܝܗܘܢ܇ ܐܝܠܝܢ ܕܟܕ ܒܚ̈ܐܦܐ ܢܣܝ̈ܣܐ ܕܠܐ ܗܝܡܢܘܬܐ ܟܪܝܗܝܢ܇ ܘܡܢ ܝܕ ܚܐܪܘܬܐ ܡܫܠܛܬܐ ܡܬܢܓܕܝܢ܇ ܠܙܢ̈ܝܐ ܕܐܣܝܘܬܐ܇ ܘܠܫܒ̈ܛܐ ܡܦܢܝ̈ܢܐ ܘܪ̈ܕܘܝܐ ܡܠܘܐܐ ܠܒܝܫܬܐ ܥܒܕܘ܇ ܘܠܥܠܬܐ ܕܥܘܕܪܢܐ ܚܘܼܣܪܢܐ ܐܩܝܡܘܗܿ ܒܐܚܪܝܢ ܓܒܐ. ܐܟܙܢܐ ܕܐܢ ܐܢܫ ܠܐܡ̈ܢܝ ܦܘܠܚܢܐ ܕܐܣܝܘܬܐ܇ ܐܘ ܠܙܝ̈ܢܐ ܕܐܬܝܗܒ ܠܗ ܩܝ̈ܡܝ ܒܐܦ̈ܐ ܕܡܢ ܒܥܠܕܒܒܘܬܐ܇ ܒܝܫ ܚܫܚܬܐ ܒܗܘܢ ܢܗܸܘܐ ܘܡܚܒܿܠܢܐ ܕܝܬܗ. ܘܒܡܓܙܪܐ ܡܿܢ ܨܒ̈ܥܬܗ ܐܘ ܕܠܝܬܗ̈ ܢܦܣܿܩ. ܘܠܟܘ̈ܝܐ ܕܝܢ 94a [ܟܕ] ܥܠ ܡܪܦܝܘܬܐ ܕܐܣܛܘܡܟܗ: ܐܠܐ ܥܠ ܥܝܢܘ̈ܗܝ ܟܕ [ܡܥـ]ـܝܪܝܢ ܢܣܝܼܡ ܐܢܘܢ. ܘܠܣܦܣܪܐ ܗܼܘ ܒܗ ܢܕܚܐ܆ ܘܬܚܝܬ ܫܢܢܐ ܕܕܘܪܛܐ ܢܝܬܐ ܗܼܘ ܠܗ ܘܥܠ ܪܘܡܚܐ܆ ܘܕܐܬܚܿܫܚ ܒܐܢܦܘܓܘܓܝ ܕܝܬܝܪ ܕܡܿܢܐ. ܐܟܙܢܐ ܕܐܢ ܬܒܪܐ ܐܘ ܫܘܚܢܐ ܒܝܫ ܣܓܝ ܠܐܢܫ ܢܥܪܨ܇ ܘܒܝܕ ܐܣܝܐ ܕܒܝ̈ܫܬܐ ܐܬܩܲܪܒ ܕܠܗ ܢܥܨܘܒ܇ ܩܠܝܠܐܝܬ ܡܛܠ ܡܿܨܪܦܢܘܬܐ ܕܡܢ ܡ̈ܠܓܡܐ܇ ܐܒܕܢܐ ܕܣܟܝܢܐ ܥܠ ܨܘܪܗ ܪܟܝܟܐ ܢܝܬܐ. ܗܟܢܐ ܡܢ ܗܟܝܠ܇ ܢ݀ܡܘܣܐ ܛܒܐ ܕܒܛܝܠܘܬܐ܇ ܒܝܕ ܙܢ̈ܝܐ ܕܡܪ̈ܕܘܬܐ ܕܐܝܟ ܗܠܝܢ܇ ܡܟܠܐ ܘܚܓܪ ܠܣܓ̈ܝܐܐ܇ ܡܢ ܫܘܟܠܠܐ ܕܒܝ̈ܫܬܐ. ܕܐܦܢ ܕܝܢ ܘܒܝܕ ܠܐ ܥܗܢܘܬܐ ܕܣܘܥܪ̈ܢܐ܇ ܗ݀ܝ ܕܐܝܬܝܗܿ ܘܡܬܐܡܪܐ ܒܥܝܕܐ ܘܟܘܝܢܐ ܘܟܝܢܬܐ܇ ܠܣܓ̈ܝܐܐ ܡܿܦܝܫ ܘܡܿܒܛܠ ܡܢ ܗ݀ܝ ܕܢܥܘܿܠܘܢܼ ܠܘ ܥܛܠܐܝܬ ܗܕܐ ܡܩܝܼܡܝܢܢ܆ ܚܿܙܝܢܢ ܓܝܪ ܘܠܓܢ̈ܒܐ ܘܠܩ̈ܛܠܝ ܓܒܪ̈ܐ: ܘܠܐܢ̈ܫܝܢ ܡܫ̈ܚܛܢܐ܆ ܕܟܕ ܚܐܦܐ ܕܣܿܥܘܪܘܬ ܒܝܫܘܬܐ ܟܠܚܕ ܡܢܗܘܢ ܢܣܼܒ: ܘܒܝܕ ܟܠ ܡܼܬܐܕܘܣ ܕܢܡܿܠܐ ܪܓܸܬ ܠܒܗ. ܐܬܝܨܦܬ ܠܗ܆ ܕܗܿܘ ܡܢ ܟܕ ܟܠܗ ܠܠܝܐ ܠܐܝ ܒܦܘܠܫܬܐ܇ܐܘ ܡܢ ܨܡܚܐ ܘܙܗܪܝܪܐ ܕܢܘܗܪܐ ܐܕܪܟ: ܐܘ ܡܢ ܡܪܓܫܢܘܬܐ ܕܗܢܿܘܢ ܕܒܒ̈ܝܬܝܐ. ܘܟܕ ܥܪܘܩܐ ܗܘܐ܆ ܦܫ ܡܢ ܗܿܝ ܕܚܘܬܡܐ ܢܬܠ ܠܒܝܫܘܬܗ. ܘܩܿܛܘܠܐ ܐܘ ܟܕ ܪܕܦ ܐܘ ܟܕ ܟܡܼܝܢ: ܘܣܝܦܐ ܐܢܝܿܦ ܘܒܥܙܩܬܐ ܐܫܘܪ: ܟܕ ܠܥܝܢܐ ܩܠܝܠ ܐܪܝܡ܆ ܠܦܪܝܫܐ ܡܢ ܩܒܘܠ ܕܩ. ܐܘ ܠܦܠܓܐ ܕܚܿܙܩ ܒܐܘܪܚܐ. ܘܟܕ ܕܚܠܬܐ ܟܡܲܣܬܗ܆ ܪܗܛܐ ܬܟܝܒܐ ܐܝܬܝ܆ ܘܒܪ ܡܢ ܡܘܠܝ ܒܝܫܘܬܐ. ܒܗ ܒܙܢܐ ܐܦ ܗ݀ܘ ܚܒܪܐ ܕܫܟܝܪܘܬܐ. ܘܥܠ ܠܬܘܢܐ܆ ܘܐܬܢܲܝܪ ܡܢ ܪܚܡܿܐ ܒܝܫܐ. ܘܟܠܗ ܕܚܿܕܐ ܗܘܐ܆ ܕܬܦܘܩ ܠܗ ܪܓܬܐ ܡܫܲܟܠܠܬܐ. ܒܬܪܟܢ ܡܿܢܐ. ܐܘ ܐܢܫ ܐܕܝܩ ܐܘ ܩܼܪܐ. ܘܡܢ ܗܪܟܐ ܐܚܦܪ ܟܠܗ ܗܘܓܝܗ. ܒܕܡܝܘܬ ܙܢܐ ܠܗܠܝܢ܆ ܐܦ ܥܠ ܗܿܘ ܟܕܒܐ܇ ܡܢ ܕܕܓ̈ܠܬܐ ܢܣܗܕ ܦܼܫ. ܘܗ݀ܘ ܕܒܩܛܝܪܐ ܥܿܫܡ܇ ܘܚܩ̈ܠܬܐ ܢܘܟܪ̈ܝܬܐ ܡܲܥܕܐ. ܘܐܚܪ̈ܢܐ ܕܠܗܠܝܢ ܕܡܿܝܢ. ܐܠܐ ܠܘܬ ܗܠܝܢ: ܛܟ ܢܗܿܦܟ ܗ݀ܘ ܪܚܡ ܥܘܩܒܐ܆ ܕܐܝܟܐ ܗܝ ܚܐܪܘܬܐ.. ܐܢܓܝܪ ܟܕ ܒܪܢܫܐ ܥܬܝܕ ܐܡܪ ܫܥܘ ܒܟܠܦܪܘܣ: ܘܟܠ ܙܢ̈ܝ ܛܘܒܢܐ ܡܛܠ ܒܝܫܬܐ ܚܘܝ ܕܠܗܿ ܢܬܡܲܛܐ: ܒܬܪܟܢ ܕܝܢ ܟܕ ܠܐ ܪܥܸܐ ܘܣܟ ܠܐ ܡܼܨܛܒܐ܇ ܦܘܫܐ ܕܡܢ ܗܿܕܐ ܢܚܼܫ܆ ܝܕܝܥܐ ܗܝ ܕܒܩܛܝܪܐ ܐܬܟܠܝ. ܐܝܟܢܐ ܡܿܕܝܢ ܒܪ ܚܐܪ̈ܐ ܗܘ. ܠܐ ܐܪܐ ܡܿܕܝܢ ܐܝܟ ܡܠܬܟ܇ ܐܝܬܝܗܿ ܚܐܪܘܬܐ ܒܗܢܘܢ ܕܐܝܟ ܗܟܢ܀ 94b ܡܢܐ ܕܝܢ ܚܢܢ ܠܘܬ ܗܿܠܝܢ ܐܡܿܪܝܢܢ. ܕܚܕܐ ܡܢ ܙܒܢ ܐܘ ܬܪ̈ܬܝܢ܇ ܡܦܼܝܫ ܘܡܢ ܒܝܫܬܐ ܡܦܩ ܗܿܘ ܛܿܒܐ܆ ܘܟܕܘ. ܐܢܕܝܢ ܡܢ ܒܬܪܟܝܢ ܢܚܼܙܐ ܠܪܥܝܢܐ ܪܚܿܡ ܬܘ̈ܟܐ܇ ܕܣܿܥܐ ܓܘܡܕܢܐܝܬ ܥܠ ܣܘܥܪܢܐ ܘܠܐܒܕܢܐ ܕܝܠܗ ܡܣܬܪܗܒ܆ ܫ݀ܒܩ ܘܡܿܢܫܼܦ. ܐܝܟܢܐ ܟܝܬ: ܕܛܒܘܬܗ ܬܬܝܼܕܥ܆ ܘܕܚܐܪܘܬܐ ܬܬܢܨܚ. ܡܛܠ ܗܿܢܐ ܡܢ ܠܥܠ ܐܡܿܪܝܢ ܗܘܼܝܢ܇ ܕܐܝܟ ܕܒܣܘܓܐܐ ܟܝܬ ܡܥܘܟ܇ ܕܐܡܬܝ ܕܘܿܠܐ ܕܒܿܪ ܒܩܛܝܪܐ. ܐܘ ܡܛܠ ܗܿܘ ܕܥܿܒܕ܆ ܐܘ ܡܛܠ ܗ݀ܘ ܕܚܐ݀ܫ. ܕܐܝܟ ܐܝܟܢ. ܐܢܬܬܐ ܐܢܫ ܗܕܝܪܬ ܒܚܙܘܐ܆ ܡܢ ܥܝܢ̈ܐ ܓܘܡܕ̈ܢܝܬܐ ܕܥܠܡܢܐ ܦܚܕܐ . ܐܬܪܚܡܬ ܢܟܦܬܐ ܗܕܐ܆ ܘܕܥܡ ܕܟܝܘܬܐ ܐܡܿܝܢ ܕܘܝܪܗܿ. ܐܪܡܝ ܗܿܘ ܥܝܢܐ. ܕܝܠ ܥܘܬܪܗ ܠܥܒܝܼܕܬܐ. ܝܨܝܦܐܝܬ ܥܠ ܚܘܒܐ ܡܣܪܗܒ ܗܘܐ. ܡܢܐ ܕܝܢ ܚܣܝܪ ܡܢ ܐܝܠܝܢ ܕܓܡܪ̈ܢ ܠܐܦܘܕܘܣ ܆ ܡܢ ܐܝܬ ܗܘܐ܇ ܡܢ ܐܦܪ̈ܣܢܐ ܘܛܘ̈ܟܢܐ ܐܢ̈ܫܝܐ. ܡܬܬܓܝܪܐ܇ ܐܢ ܛܒܿܐ ܠܐ ܡܬܬܙܝܥ ܒܬܘܠܬܐ. ܡܢܐ ܗܟܝܠ. ܠܘ ܕܘܠܝܬܐ ܗܝ ܗܕܐ: ܕܐܘ ܡܢ ܡܪܕܘܬܐ ܐܘ ܡܢ ܥܘܟܪܐ ܗܢܐ ܣܘܥܪܢܐ ܢܒܛܠ: ܐܦܢ ܡܛܠ ܗܿܘ ܕܚܿܐܫ܆ ܐܝܢ ܝܕܥ ܐܢܐ ܕܐܡܿܪ ܐܝܬ܆ ܘܡܢ ܟܠ ܦܪܘܣ. ܐܢܕܝܢ ܘܗܼܘ ܥܠܝܡܐ ܕܟܝܐ ܢܗܸܘܐ: ܘܟܕ ܐܝܬ ܟܘܝܢܐ ܚܟܝܡ ܡܪܝܐ ܕܠܐ ܢܦܼܠ܆ ܠܐ ܣܟ ܝܼܨܦ ܠܡܬܗܢܘ܇ ܟܕ ܠܢܚܫܝܪܬܢܘܬܐ ܕܪܥܝܢܐ ܚܿܙܐ. ܝܘܣܦ ܢܥܘܠ܆ ܘܒܬܘܠܬܐ ܐܢܫ ܪܓܝܓܬ ܐܦ̈ܐ܇ ܐܝܕܐ ܕܕܘܩܠܝܛܝܢܘܣ ܠܘܩܕܡ ܐܚܒ܇ ܒܬܪܟܢ ܕܝܢ ܘܛܐܕܪܛܝܣ܇ ܡ̈ܠܟܐ ܕܝܘܢ ܘܕܐܪܡܝܢ܇ ܕܙܟܼܘ ܠܪܓܬܐ ܬܙܝܙܬܐ܇ ܗܿܘ ܡܢ ܕܢܩܒ̈ܬܐ ܚ̈ܒܲܠܬܐ܇ ܗܕܐ ܕܝܢ ܠܚܝ̈ܠܐ ܕܐܒܕܢܐ. ܗܿܠܝܢ ܢܗ̈ܘܝܢ ܡܛܠ ܗܿܘ ܕܚܐ݀ܫ. ܡܛܠ ܕܝܢ ܗܿܘ ܕܥܒܼܕ ܬܘܒ܆ ܐܝܬ ܕܢܫܬܥܐ. ܐܢܫ ܐܓܘܢܣܛܐ ܒܙܢܐ܇ ܠܐ ܡܬܠܒܟܢܐ ܡܢ ܒܣܪܐ܇ ܘܟܕ ܒܟܠ ܢܐܕ ܘܡܢ ܓܠ̈ܠܝ ܪܓܬܐ ܘܡܢ ܚܐܦ̈ܝ ܚܡܬܐ ܠܪܘܚܩܐ ܩܐܡܿ܆ ܒܗܢܐ ܐܢܬܬܐ ܚܕܐ ܡܪܒܝܬ ܫܘܦܪܐ ܐܬܬܚܼܕܬ. ܡܦܼܝܣ ܗܘܐ ܠܗܿ ܓܝܪ: ܕܥܠ ܗܿܕܐ ܡܪܚܘܬܐ ܬܬܠܒܒ܆ ܡܪܘܕܐ ܣܛܢܐ. ܐܬܐܡܲܫܬ ܠܡܦܗܝܘ ܠܓܒܪܢܐ. ܐܥܠܸܬ ܠܬܘܢܐ܇ ܟܕ ܐܣܟܡܐ ܕܙܒܿܘܢܐ ܐܝܬ ܠܗ܇ ܩܪܒܸܬ ܕܬܚܼܫ܆ ܒܡܣܡ ܒܪܝܫܐ ܡܢ ܗܪܟܐ ܡܬܬܚܕܐ܆ ܟܕ ܕܝܘܐ ܡܪܝܪܐ ܠܗܿܕܐ ܡܪܥܠ. ܘܗܿܘ ܟܕ ܡܬܪܗܸܒ ܒܬܕܡܘܪܬܐ܆ [ܕ]ܡܩܒܠ ܛܝܒܘܬܐ ܠܡܫܘܙܒܢܐ. ܗܟܢܐ ܗܿܘ ܥܒܿܘܕܐ ܕܐܓ̈ܘܢܐ ܠܛܒ̈ܐ ܒܐܬܠ̈ܝܛܐ܇ ܡܢ ܫܘܪܥܬܐ ܐܡܕ. ܚܐܢ ܗܘܐ ܓܝܪ 95a ܠܣܿܘܓܐܐ ܥܡܠܗ ܗ݀ܘ ܟܐܢܐ܇ ܕܡܢ ܚܕܐ ܡܛܪܘܦܝܬܐ ܢܦܕ: ܐܢܕܝܢ ܐܢܫ ܢܐܡܼܪ: ܕܗܐ ܚܿܙܝܢܢ ܘܠܓܒܪܢܝܐ ܒܐܡܢܗ: ܕܟܕ ܩܸܪܒܬ ܕܬܡܼܘܛ܆ ܕܐܬܛܡܝ ܘܠܐ ܐܬܥܕܪ܆ ܕܗܕܐ ܫܪܝܐ ܐܣܪܚܢܢ ܡܢ ܠܥܠ. ܡܛܠ ܓܝܪ ܕܛܟ: ܒܚܫܐ ܢܕܝܕ ܡܢ ܟܠ ܕܪܡܘܬܐ ܥܬܝܕ ܗܘܼܐ ܠܡܦܠ: ܐܝܟ ܕܝ̈ܢܐ ܕܒܛܝܠܘܬܐ܆ ܒܚܫܐ ܕܡܐܟ ܕܢܬܡܟܟ ܫܒܼܩ. ܐܝܬ ܕܝܢ ܐܡܬܝ: ܕܟܕ ܬܪ̈ܝܗܘܢ ܛܒܝ̈ܢ: ܘܗ݀ܘ ܕܥܿܒܕ ܘܗ݀ܘ ܕܚܐ݀ܫ܆ ܕܠܬܪܝܗܘܢ ܣܐܡܿ ܡܠܬܐ ܡܥܘܟܢܝܬܐ. ܘܐܢܕܝܢ ܘܬܪ̈ܝܗܘܢ ܒܝ̈ܫܝܢ: ܐܝܟ ܡܐ ܕܬܪ̈ܝܢ ܐܢܫ̈ܝܢ ܠܗܝ̈ܩܝ ܠܕܡܐ: ܟܡܐ ܟܡܐ ܬ݀ܟܣ ܠܗܘܢ ܡܢ ܕܠܡܪܫܥܘ. ܐܝܟܢܐ ܕܠܐ ܬܗܸܘܐ ܕܢܓܕܦܘܢ܇ ܕܟܠܢܐܝܬ ܝܨܝܦܘܬܐ ܒܗܘܢ ܐܡܢܸܬ݀ ܐܢܕܝܢ ܠܒܐ ܒܝܫܐ ܡܢ ܡܘܠܝܢܘܬܐ ܠܐܝܬ ܗܢܐ܇ ܐܡܿܪ ܡܪܝܐ ܠܚܐܪܘܬܐ ܚܕܝ. ܘܟܕ ܥܠ ܚ̈ܕܕܐ ܣ݀ܥܝܢܢ ܒܚܟܡܬܐ: ܘܡܢ ܡܚ̈ܘܬܐ ܕܣܦܣܪ̈ܐ ܓܘܫ̈ܡܝܗܘܢ ܣܒܝܣܝܢ܇ ܗܪ ܬܡܢ ܐܒܕܢܐ ܠܚܕ̈ܕܐ ܙܡܢܘ. ܗܟܢܐ ܐܦ ܐܢܬܬܐ ܐܢܫ ܙܠܝܠܬܐ܇ ܥܡ ܥܠܝܡܐ ܦܚܙ ܒܣܪܐ ܐܬܬ ܠܡܥܗܕ܇ ܟܕ ܒܫܘܪܝܐ ܙܒܢ ܚܕܐ ܐܘ ܬܪ̈ܬܝܢ ܒܠܡ ܐܢܘܢ ܡܪܝܐ: ܘܡܢ ܚܐܦܐ ܕܢܫܬܗܘܢ ܠܐ ܐܬܪܡܝܘ܆ ܠܬܪ̈ܝܗܘܢ ܫܒܩ܇ ܕܪܡܟܐܝܬ ܥܠ ܚܕ̈ܕܐ ܢܫܘܪܘܢ܇ ܘܥܦܘܩܝܐ ܕܘܝܐ ܢܚܼܫܘܢ. ܘܗܿܠܝܢ ܡܿܢ ܟܠܗ ܗܿܢܐ. ܘܣܦܩܐ ܗܝ ܬܚܘܝܬܐ ܐܝܟ ܕܣܒܿܪ ܐܢܐ. ܡܛܠ ܕܝܢ ܕܡܠܬܐ ܕܩܕܝܡܐ ܣܝܼܡܐ ܐܝܬܝܗܿ ܗܘܬ: ܕܟܕ ܥܿܒܕ ܡܪܝܐ ܒܛܝܠܘܬܐ: ܐܘ ܒܗܘܢܐ ܐܘ ܒܢܛܘܪܘܬܐ ܕܗܠܝܢ ܕܗܘ̈ܝ: ܐܘ ܕܣܟ ܐܢ ܡܬܡܲܚܠܢ ܢܚܕܬ ܐܢܝ̈ܢ ܥܡ ܚܝܠܐ: ܘܡܢ ܗܪܟܐ ܐܡܿܪܝܢ: ܕܩܒܼܥ ܘܝܲܬܬܼ ܠܚܐܪܘܬܐ ܒܢ: ܘܝܨܦ ܕܗܿܕܐ ܠܐ ܬܐܒܿܕ: ܡܛܠ ܗܿܢܐ ܘܕܬܬܓܡܪ ܥܡ ܛܒܬܐ ܐܦ ܒܝܫܬܐ ܡܪܫܠ ܥܠ ܗܿܠܝܢ ܐܝܟ ܕܒܐܩܘܠܬܢܐ ܒܥܝܼܢܢ܆ ܕܐܢܗܼܘ ܕܥܠܼܬ ܒܝܫ̈ܬܐ ܐܘ ܛܒ̈ܬܐ ܐܝܬܝܗܿ ܚܐܪܘܬܐ ܡܫܠܛܬܐ܇ ܕܚܐܪܘܬܐ ܕܝܢ ܐܠܗܐ ܗܘ ܥܠܬܐ. ܡܿܕܝܢ ܐܪܐ ܐܘ ܕܒܝܫܬܐ ܐܟܚܕ ܘܕܛܒܬܐ ܐܠܗܐ ܗܘ ܥܠܬܐ܀ ܠܗܿܘ ܕܝܢ ܕܗܕܐ ܟܪܝܗܿ ܗܟܢܐ ܢܐܣܐ܇ ܘܠܬܪܥܝܬܐ ܡܪܥܬܐ ܕܒܗ ܢܣܡܣܡ. ܕܠܓܡܪ ܟܝܬ ܥܠܼـܬܐ ܕܒܝܫ̈ܬܐ ܐܠܗܐ ܠܐ ܐܝܬܘܗܝ. ܛܒܐ ܗܼܘ ܓܝܪ܆ ܘܡܥܝܢܐ ܕܛܒ̈ܬܐ ܠܚܘܕ. ܐܢܕܝܢ ܘܣܟ ܥܠܬܐ ܕܒܝܫ̈ܬܐ ܐܝܬ ܬܘܿܕܐ: ܡܛܠ ܕܩܝܡ ܒܢ ܠܚܐܪܘܬܐ܆ ܟܕ ܟܕ ܡܫܐܠܢܐ ܐܓܝܒܢܝ ܦܬܓܡܐ. ܐܝܟܢ ܐܝܬܘܗܝ ܥܠܬܐ ܕܗ̈ܢܝܢ ܕܓܿܡܪܐ ܚܐܪܘܬܐ. ܐܝܟ ܡܢ ܕܗܿܘ ܡܙܥ 95b ܠܗܿ܇ ܠܘܬ ܗܿܝ ܕܬܥܘܼܠ ܐܘ ܬܐܒܫ: ܐܘ ܬܐܼܛܒ ܘܬܙܕܕܩ: ܐܝܟ ܐܝܬ ܠܡܐܡܪ: ܕܒܠܥܕ ܐܠܗܐ ܠܐ ܡܫܟܚܐ ܠܡܥܒܕܘ: ܒܕܡܘܬ ܐܘܪܓܢܘܢ ܕܢ݀ܓܪܐ ܐܘ ܕܩܝܢܝܐ: ܡܲܣܪܐ ܐܘ ܢܣܛܪܐ ܐܘ ܟܠܒܬܐ: ܕܒܠܥܕ ܐܝܕܐ ܕܝܠܗ ܕܐܘܡܢܐ: ܠܐ ܡܬܬܙܝܥ ܠܡܣܪ ܐܘ ܠܡܣܪܛ ܐܘ ܠܡܐܚܕ܆ ܐܠܐ ܐܢܗܸܘ ܕܐܝܟ ܐܘܪܓܢܘܢ ܐܝܬܝܗܿ ܗܼܝ ܚܐܪܘܬܐ ܠܘܬ ܐܠܗܐ܆ ܠܐ ܣܟ܇ ܗܝܼ ܚܐܪܘܬܐ܇ ܗܘ ܡܐ ܕܐܝܬܝܗܿ ܡܟܬܪܐ. ܠܘ ܓܝܪ ܗܕܐ ܗܝ ܚܐܪܘܬܐ܇ ܗܘ ܡܐ ܕܡܢ ܐܚܪܢܐ ܘܒܝܕ ܐܚܪܢܐ܇ ܩܢܸܐ ܙܘܿܥܐ ܘܡܥܒܕܢܘܬܐ. ܐܠܐ ܟܝܬ: ܕܚܐܪܘܬܐ ܘܕܡܫܠܛܘܬܐ ܗܿܕܐ ܗܝ ܕܝܠܝܬܐ܆ ܕܗܘ ܡܐ ܕܪܓܿܐ ܘܕܪܥܝܐ܇ ܡܢ ܡܫܬܒ̈ܚܢܝܬܐ ܐܘ ܡܬܓ̈ܢܚܝܬܐ܆ ܬܥܒܕ ܘܬܡܿܠܐ. ܬܘܒ ܕܝܢ ܐܢܗܸܘ ܕܥܒܝ̈ܕܬܗܿ ܕܚܐܪܘܬܐ ܕܐܠܗܐ ܢܬܩܛܪ̈ܓܢ: ܡܛܠ ܕܣܟ ܠܗܿܢܐ ܠܗܕܐ ܐܝܬܝ܆ ܡܿܢܐ ܟܵܠܐ܇ ܕܐܦ ܕܟܠܗ̈ܝܢ ܥ̈ܒܝܕܬܐ ܕܡܢ ܝܕ ܐܟܠܩܪ̈ܨܐ ܡܫܬܡ̈ܫܢ܇ ܕܐܠܗܐ ܢܬܩܛܪ̈ܓܢ ܕܐܝܬܝ̈ܗܝܢ. ܐܝܟܢܐ ܕܬܗܸܘܐ ܗܝ ܡܠܬܐ ܒܗ ܒܗܿܢܐ ܙܢܐ. ܕܐܢܗܸܘ ܕܐܟܠܩܪܨܐ ܡܢ ܐܠܗܐ ܗܘ: ܡܪܕܘܬܐ ܕܝܢ ܘܥܘܠܘܬܐ ܕܗܿܢܐ܆ ܡܿܕܝܢ ܐܪܐ ܐܦ ܗܿܝ ܕܗܘܼ ܐܟܠܩܪܨܐ ܕܢܗܘܐ ܡܪܘܕܐ ܘܪܫܝܥܐ ܐܠܗܐ ܗܘ ܥܠܬܐ. ܗ݀ܝ ܟܝܬ ܕܝܬܝܪ ܡܢ ܟܠ ܕܘܿܝܐ. ܐܦܢ ܠܡܬܚܫܒܘܬܗܿ ܒܠܚܘܕ. ܕܒܗܿܢܐ ܗܟܝܠ ܙܢܐ ܐܦ ܥܠ ܣ̈ܓܝܐܬܐ ܡܢ ܗܠܝܢ ܕܠܘܬܢ ܗܘ̈ܝܢ ܐܝܬ ܠܢ ܕܢܐܼܡܪ. ܕܐܝܟ ܐܝܿܕܐ. ܐܢܫ ܐܘ݀ܠܕ ܒܪܐ ܪܚܝܡܐ. ܗ݀ܢܐ ܕܝܢ ܐܘ ܙܠܝܼܠܐ ܗܘܸܐ܆ ܐܘ ܡܪܚܐ ܘܐ݀ܫܕ ܕܡܐ݀ ܡܢܐ. ܐܢ ܐܢܫ ܢܗܦܟ ܘܢܐܡܼܪ: ܕܡܛܠ ܕܒܪܐ ܕܐܒܐ ܗ݀ܘ ܦܐܪܐ ܇ܗܼܘ ܕܝܢ ܥܠܝܡܐ ܓܝܪ ܗܘܼ. ܡܿܕܝܢ ܐܪܐ܆ ܐܒܘܗܝ ܐܝܬܘܗܝ ܥܠܼܬܐ ܕܓܘܪܗ ܘܕܫܪܝܚܘܬܗ. ܐܘ ܡܛܠ ܕܩܛܠ: ܐܒܘܗܝ ܐܝܬܘܗܝ ܥܠܬܐ ܕܐܫܝܕܘܬ ܕܡܐ܆ ܠܐ ܓܝܪ ܡܬܘܡ ܕܢܫܘܕ ܠܕܡܐ ܐܬܼܐ ܗܘܐ ܒܪܐ܇ ܐܠܘ ܐܒܘܗܝ ܠܝܠܝܕܘܬܐ ܘܠܗܘܢܐ ܠܐ ܐܥܿܒܪܗ ܗܘܐ. ܘܗܟܢܐ܆ ܘܠܐ ܥܠ ܐܢܫ܇ ܥܒܝܕ̈ܬܐ ܒܝ̈ܬܝܬܐ ܐܝܬ ܗܘܐ ܠܢ ܕܢܩܲܛܪܓ܇ ܟܠ ܟܡܐ ܕܐܚܪܢܐ ܥܠܬܐ ܕܐܘܣܝܗܿ ܐܝܬ ܗܘܐ. ܐܠܐ ܟܝܬ ܠܘ ܡܢ ܟܠ ܦܪܘܣ܇ ܐܢܗܸܘܐ ܕܥܠܬܐ ܕܐܘܣܝܐ ܐܒܐ܇ ܘܕܒܝ̈ܫܬܐ ܗܠܝܢ ܕܫܪܟܐ ܥܠܬܐ ܗܘ. ܗܟܢܐ ܘܠܐܠܗܐ ܐܢܗܸܘ ܕܥܠܬܐ ܕܒܪܝܬܐ ܕܚܐܪܘܬܐ ܗܼܘ ܐܝܬܘܗܝ܇ ܗܐ ܡܢ ܟܕܘ ܕܒܝܫ̈ܬܗܿ ܕܗܕܐ ܐܘ ܛܒ̈ܬܗܿ. ܗܘܢܐ ܕܝܢ ܐܢܗܸܘ ܕܗܕܐ ܬܐܚܘܕ ܢܡ̈ܐ ܕܪܫܝܥܘܬܐ ܡܫܡܠܝܬܐ ܠܒܢܝ̈ܢܫܐ܇ ܟܕ ܣܝܿܡܝܢ ܕܕܟܠ ܒܝܫܬܐ ܥܠܬܐ ܘܪܝܫܝܬܐ ܐܝܬܘܗܝ ܗܿܘ ܛܒܐ܀ ܐܠܐ ܟܝܬ: ܕܗܕܐ ܬܪܥܝܬܐ 96a [ܕܥܸـ]ـܘܠܬ ܣܓܝ: ܡܢ ܬܪ̈ܥܝܬܐ ܪܚܡܸܬ ܐܠܗܐ ܬܬܗܸܓܡ܆ [ܒـ]ـܚܕ ܗ݀ܢܐ ܦܿܘܠܓܐ ܢܩܼܝܡ. ܥܒ̈ܝܕܬܗܿ ܕܚܐܪܘܬܐ܆ ܐܘ ܕܝܠܗܿ ܕܚܐܪܘܬܐ ܠܚܘܕ ܐܝܬܝܗ̈ܝܢ: ܐܘ ܕܐܠܗܐ ܠܚܘܕ܆ ܐܘ ܕܬܪ̈ܝܗܘܢ ܡܫܘܬܦܐܝܬ. ܐܠܐ ܐܢܗܸܘ ܕܐܢܫ ܢܦܣܘܩ: ܕܕܐܠܗܐ ܠܚܘܕ ܐܝܬܝ̈ܗܝܢ܆ ܐܙܕܟܝܬ ܠܗܿ ܚܐܪܘܬܐ ܡܢ ܒܝܫ̈ܬܐ ܐܢ ܦܠܚܸܬ܆ ܘܡܢ ܛܒ̈ܬܐ ܐܢ ܣܸܥܪܬ. ܘܠܐ ܡܬܝܩܪܢܝܬܐ ܘܠܐ ܡܨܛܥܪܢܝܬܐ ܗ݀ܘܝܐ. ܐܢܕܝܢ ܕܝܠܗܿ ܕܚܐܪܘܬܐ ܠܚܘܕ܆ ܙܟܝ ܗܘ ܐܠܗܐ ܡܢ ܗ݀ܝ ܕܢܬܩܛܪܓ܇ ܡܥܝܿܢܢܐ ܕܥܠ ܒܝ̈ܫܬܗ܇ ܐܦܢ ܠܣܥܘܪ̈ܘܬܗ ܡܩ̈ܠܣܬܐ܇ ܟܕ ܣ݀ܥܪܐ ܗܝܼ ܡܥܕܪ ܐܦ ܗܘܼ. ܐܢܕܝܢ ܡܢ ܬܪ̈ܝܗܘܢ ܡܫܘܬܦܐܝܬ ܘܡܥܪܙܠܐܝܬ܆ ܐܬܚܙܝ ܠܢ ܐܠܗܐ ܡܚܝܠܐ ܘܬܚܘܒܐ. ܐܘ ܐܝܟܢܐ ܕܐܢܫ ܐܚܪܢܐ ܡܢ ܩܕܡܝܢ ܟܲܢܫ: ܕܚܒܪܐ ܘܫܘܬܦܐ ܐܝܬ ܠܐܠܗܐ ܟܡܐ ܕܥܿܒܕ ܘܒܐܝܠܝܢ ܕܓܿܡܪ܇ ܗ݀ܝ ܕܫܟܝܪܐ ܘܛ݀ܒ ܫܿܘܝܐ ܠܡܘܝܩܐ. ܥܡ ܗܠܝܢ ܕܝܢ܆ ܕܐܘ ܬܪ̈ܝܗܘܢ܇ ܐܠܗܐ ܐܡܿܪ ܐܢܐ ܘܚܐܪܘܬܐ ܐܝܬܝܗܘܢ ܡܚܝ̈ܒܐ܆ ܐܘ ܬܪ̈ܝܗܘܢ ܙܟ̈ܝܐ. ܐܠܐ ܗܠܝܢ ܡܿܢ ܢܣ̈ܬܠܝܢ. ܠܘ ܓܝܪ ܐܢ ܚܐܪܘܬܐ ܡܢ ܐܠܗܐ܇ ܘܡܥܒ̈ܕܢܘܬܗܿ ܠܘܩ̈ܒܠܼܝܬܐ ܕܗܕܐ ܡܢ ܐܠܗܐ. ܐܠܐ ܐܝܟ ܙܢܐ ܕܚܝܠܐ ܚ̈ܙܘܢܐ ܗ݀ܘ ܕܒ̈ܥܝܢܐ: ܟܕ ܡܢ ܫܡܫܐ ܢܣܿܒ ܗ݀ܘܝܐ: ܕܢܚܼܙܐ ܡܿܢ ܝܗܿܒ: ܗܿܝ ܕܝܢ ܕܗܟܢܐ ܐܘ ܗܟܢܐ ܬܚܙܐ܇ ܠܘ ܗ݀ܘ ܕܝܗܼܒ܆ ܕܝܠܗܿ ܕܝܢ ܕܥܝܢܐ: ܐܘ ܕܐܘܟ̈ܡܬܐ ܐܘ ܕܚܘܪ̈ܬܐ. ܐܘ ܕܣ̈ܢܝܬܐ ܐܘ ܕܫܦܝܪ̈ܬܐ ܬܥܲܝܢ: ܘܠܐ ܐܢܫ ܟܕ ܫܦܝܪ ܡܬܪܥܐ ܐܡܿܪ܇ ܕܡܛܠ ܕܐܙܕܠܠܬ ܥܝܢܐ ܫܡܫܐ ܙܠܠܗܿ܇ ܐܘ ܡܛܠ ܕܦܗܸܝܬ ܠܛܘܿܚܐ ܫܡܫܐ ܐܦܗܝܗܿ. ܗܘܼ ܓܝܪ ܕܗܿܝ ܕܬܚܙܐ ܠܚܘܕ ܐܝܬܘܗܝ ܥܠܼܬܐ. ܗܝܕܝܢ ܕܠܪܘܚܩܐ ܐܘ ܠܩܘܪܒܐ: ܐܘ ܙܠܝܠܐܝܬ ܐܘ ܢܟܦܐܝܬ܆ ܕܝܠܗܿ.. ܗܟܢܐ ܘܢܡܘܣ ܒܛܝܠܘܬܐ ܐܠܗܝܬܐ. ܕܗ݀ܝ ܡܢ ܕܬܣܼܦܩ ܚܐܪܘܬܐ ܠܡܥܒܕܘ. ܕܝܠܗܿ ܕܥܠܬܐ. ܗܝܕܝܢ ܕܗܟܢܐ ܐܘ ܗܟܢܐ܇ ܡܦܪܫܐܝܬ ܘܝܕܝܥܐܝܬ: ܟܐܡܸܬ ܠܘܬ ܫܪܝܚܘܬܐ ܘܢܟܦܘܬܐ: ܐܘ ܕܓܠܘܬܐ ܘܫܪܪܐ: ܘܪܡܘܬܐ ܘܡܟܝܟܘܬܐ܆ ܠܐ ܣܟ. ܒܪܡ ܓܝܪ ܠܛܒܬܐ ܟܕ ܐܢܫ ܥ݀ܒܕ܆ ܡܚܘܐ ܨܒܝܢܐ ܘܬܥܕܝܪܐ. ܠܒܝܫܬܐ ܕܝܢ ܟܕ ܦܠܿܚ܆ ܡܬܪܚܩܢܘܬܐ ܘܣܢܐܬܐ. ܐܝܟܢܐ ܟܝܬ ܕܡܕܝܢ܆ ܥܠܬܐ ܡܢ ܕܚܐܪܘܬܐ ܘܕܚܝܠܗܿ ܐܠܗܐ. ܘܕܙ̈ܢܝ ܣܥܘܪ̈ܘܬܐ ܕܝܢ ܗܼܝ ܚܐܪܘܬܐ ܘܠܘ ܐܠܗܐ. 96b ܡܕܝܢ ܐܪܐ܆ ܠܘ ܐܢ ܕܚܐܪܘܬܐ ܥܠܬܐ ܐܠܗܐ܇ ܐܦ ܕܣܥܘܪܘܬܐ ܕܗܿܕܐ ܐܠܗܐ. ܘܐܫܬܪܝ ܠܗ ܐܝܟ ܐܠܝܠܐ܇ ܣ݀ܥܝܐ ܕܗܦܿܟܬܐ ܕܐܬܐܡܪܬ܀ ܐܠܗܐ ܐܢ ܠܡ ܐܡܿܪ ܗ݀ܘ ܕܡܲܗܦܟ܆ ܢܗܼܘܐ ܕܡܫܠܛܘܬܐ ܡܢܗܿ ܐܝܬܝܗܿ ܘܠܘ ܡܢ ܐܠܗܐ. ܐܠܐ ܟܝܬ ܡܛܠ ܡܿܢܐ ܟܕ ܥܠ ܟܠ ܚܙܝܩܐ ܡܲܠܚܘܬܐ܇ ܠܒܝ̈ܫܐ ܗܿܢܘܢ ܕܒܚܐܪܘܬܐ ܡܲܥܩܠܝܢ܇ ܡܿܝܬܐ ܠܗܘܿܝܐ ܘܡܩܝܡ. ܙܕܩܿ ܗܘܐ ܓܝܪ ܕܠܗܢܿܘܢ ܠܚܘܕܢܝܬܐ ܠܗܘܝܐ܆ ܠܛܒ̈ܐ. ܐܘ ܕܡ̈ܠܐܟܐ܆ ܐܘ ܕܒܢܝ̈ܢܫܐ ܗܢܿܘܢ ܕܚܐܪܘܬܗܘܢ ܥܠܸܬ ܛܿܒܬܐ ܘܠܗܘܢ ܗܘܿܝܐ. ܐܘ ܠܐ ܝܕܥܿ ܟܠ ܐܝܬܘܗܝ ܗܿܘ ܛܿܒܐ܇ ܘܕܐܩܿ ܡܢ ܩܒܘܠ ܠܪܘܫܥܗܘܢ܇ ܘܕܠܐܝܢܐ ܡܣܡ ܒܪ̈ܝܫܐ ܗ݀ܘܝܢ ܝܪ̈ܬܐ. ܦܩܚܐ ܗܘܬ ܠܗܘܢ ܓܝܪ ܕܠܐ ܢܗܘܘܢ܆ ܐܘ ܕܗܟܢܐ ܢܚܼܘܢ. ܕܒ̈ܥܠܡܐ ܐܪ̈ܝܟܐ ܢܫܬܢܩܘܢ܀ ܠܘܬ ܗܠܿܝܢ ܐܡܿܪܝܢܢ. ܕܡܢ ܝܕ ܛܒܘܬܐ ܕܠܐ ܣܘܦܪ. ܐܦ ܟܕ ܝܕ݀ܥ ܘܩܿܕܡ ܚܿܙܐ ܠܪܘܫܥܐ ܕܒ̈ܝܫܐ܇ ܗܘܼ ܡܪܝܐ ܡܝܬܐ ܠܗܘܿܝܐ ܘܡܩܼܝܡ. ܕܛܒܘܬܐ ܓܝܪ ܡܫܡܠܝܬܐ ܗܕܐ ܗܝ܆ ܕܠܘ ܒܠܚܘܕ ܠܗܿܢܘܢ ܕܥܬܝܕܝܢ ܠܡܬܛܒܬܝܘ ܢܥܒܕ܆ ܐܠܐ ܘܠܐܝܠܝܢ ܕܠܡܥܘܠܘ ܡܛܝܒܝܢ. ܐܘ ܕܐ݀ܢ ܐܝܬ܇ ܕܠܝܬܐ ܣܟ ܕܠܐ ܢܐܼܬܘܢ܇ ܘܠܚܐܪܘܬܐ ܠܐ ܢܥܬܪܘܢܿ. ܡܛܠ ܕܐܪܫܥܬ ܚܐܪܘܬܐ܇ ܘܡܛܠ ܗܿܝ ܕܡܟܐ ܘܐܚܪܢܐ܇ ܬܒܛܠ ܗ݀ܝ ܕܪܒܐ ܘܣܓܝܐܐ ܒܚܐܪܘܬܐ ܇ ܘܡܢ ܗܪܟܐ ܗܿܘ ܛܒܐ ܠܐ ܛܒܐ ܢܬܚܘܐ܇ ܛܒܬܐ ܗܼܝ ܓܝܪ܇ ܐܘܣܝܐ ܘܝܬܐ ܕܟܠܚܕ܆ ܐܝܢ ܐܘ ܠܐ. ܝܕܝܥܐ ܗܝ ܕܛܒܬܐ ܐܡܿܪ ܐܝܬ܇ ܟܕ ܬܩ̈ܢܬܐ ܡܬܚܫܒ ܐܢܬ. ܗܟܢܐ ܕܝܢ܆ ܘܐܦ ܚܐܪܘܬܐ ܕܛܒܬܐ ܐܝܬܝܗܿ ܐܘ ܕܝܿܢܢ܇ ܟܕ ܡܠܬܐ ܕܥܠ ܗܕܐ ܡܢ ܠܟܠ ܛܟܣܢܢ. ܐܝܟܐ ܗܟܝܠ ܡܿܕܝܢ܇ ܦܐܝܐ ܗܘܬ ܕܗ݀ܘ ܛܒܐ ܢܥܼܒܕ. ܕܢܝܬܐ ܠܐܡܣܝܐ ܘܠܚܐܪܘܬܐ ܠܗܘܝܐ. ܐܦܢ ܥܬܝܕܐ ܕܒܡܕܡ ܚܐܪܘܬܐ ܘܬܐܦܕ ܐܘ ܕܠܗ̈ܠܝܢ ܢܥܼܛܐ܇ ܡܛܠ ܫܘܪ̈ܥܬܐ ܘܦܘ̈ܕܐ ܕܡܢܗܿ ܕܚܐܪܘܬܐ ܗܸܘܝܢ. ܗ݀ܝ ܟܝܬ ܕܕܡܿܝܐ܆ ܠܗ݀ܘ ܕܐܢ ܐܢܫ ܟܕ ܛܝ̈ܛܢ ܒܥ̈ܝܢܘܗܝ ܐܘ ܡܲܝܬܝܢ ܒܡܫܡܥܬܗ܇ ܐܘ ܡܪܥܠ ܒܦܓܪ[ܗ] ܢܐܡܼܪ܇ ܕܕܟܠ ܟܠܗ ܙܕܩܿ ܗܘܐ ܕܚܕ̈ܝܬܐ ܕܝܠܝ ܢܬܬܪ̈ܝܡـ[ـܢ] ܐܦ ܡܫܡܥܬܐ ܟܠܢܐܝܬ ܬܬܚܒܠ. ܘܗܸܘ ܦܓܪܐ ܠܘܬ ܡܘܬܐ ܘܐܒܕܢܐ ܢܥܼܒܪ܆ ܘܟܕ ܛܒ ܡܝܬܪܐ ܗ݀ܝ ܕܐܝܟܢ ܕܗܘܼ ܢܚܙܐ ܘܢܫܡܥ. ܘܢܚܐ ܟܝܬ ܘܢ݀ܥܒܪ. ܡܢ ܗܝ 97a ܕܟܠܢܐܝܬ ܢܬܓܠܙ܇ ܠܗ݀ܘ ܕܐܝܬ ܠܗ ܡܕܥܐ ܠܐ ܛܿܠܘܡܐ ܗܝܕܝܢ ܕܢܐܡܪ: ܕܡܛܠ ܕܟܕ ܣܟ ܫܿܪܥܐ ܚܐܪܘܬܐ: ܘܥܠܬܐ ܕܡܣܡ ܒܪܝܫܐ ܡܛܠ ܡܬܥܒܪܢܘܬܗܿ ܘܪܘܫܥܐ ܗ݀ܘܝܐ ܠܒܪܢܫܐ܆ ܐܘ ܠܡܪ̈ܘܕܐ ܫ̈ܐܕܐ: ܙܕܩ ܗܘܼܐ ܕܠܐ ܢܬܩܝܡܘܢ܆ ܕܡܿܝܐ ܟܝܿܬ܆ ܐܝܟ ܡܐ ܕܐܢܫ ܟܕ ܫ݀ܛܐ ܢܐܡܼܪ܇ ܡܛܠ ܕܒܢܗܪܐ ܐܘ ܒܪܘܒܐ ܐܘ ܣܟ ܒܐܘܣܝܐ ܕܪ̈ܕܝܐ܇ ܐܢܫ ܟܕ ܣܚܐ ܐܬܚܢܩ܇ ܘܥܠܬܐ ܕܐܒܕܢܐ ܠܒܪܢܫܐ ܗܘܘ܇ ܡܬܬܚܝܼܒܐ ܗܘܬ ܕܠܐ ܢܐܬܘܢ ܠܗܘ̈ܝܐ ܡ̈ܝܐ. ܐܘ ܕܡܛܠ ܙܠܝܩ̈ܐ ܫܡ̈ܫܢܝܐ܇ ܠܥܝܢ̈ܐ ܕܚܝܘ̈ܬܐ ܡܕܡ ܐܝܬܝܗܘܢ ܡܚܫ̈ܟܢܐ܇ ܘܠܗܒ̈ܒܐ ܬܐܕ̈ܢܝܐ ܐܝܬܝܗܘܢ ܡܚ̈ܡܝܢܐ܇ ܘܠܐ ܗܘܼܐ ܕܗܘܼ ܫܡܫܐ ܠܐ ܢـ[ـܩܘ]ܐ ܝ݀ܬܐ ܘܗܐ ܛܒܿܐ ܗ݀ܘ ܟܝܢܐ ܕܡ̈ܝܐ ܘܡܩܝܡܢܐ ܕܚ̈ܝܐ܆ ܘܚܣܝܐ ܒܚ̈ܙܝܐ ܕܣ̈ܓܝܐܐ ܫܡܫܐ ܘܒܟܠ ܡܕܡ ܥܿܕܘܪܐ ܕܐܝܟ ܗ݀ܕܐ ܐܝܬܝܗܿ܆ ܘܗ݀ܝ ܕܡܛܠ ܐܣܝܩܬܐ ܐܢܫ ܢܐܡܪ܇ ܕܡܘܒܕܢܝܬܐ ܗܝ ܡܠܘܢ ܐܘ ܩܿܝܡܸܬ ܒܐܦ̈ܐ ܕܟܝܢܐ܇ ܡܛܠ ܕܠܚܕ ܕܒܝܫܐܝܬ ܐܬܚܫܚ ܒܗܿ ܐܘܒܕܬ܇ ܘܠܐ ܙܕܩ ܕܐܣܝܿܘܬܐ ܠܥܠܡܢ ܬܥܘܠ. ܒܕܓܘܢ ܗ݀ܢܘܢ ܕܗ݀ܕܐ ܡܡܬܠܝܼܢ. ܒܝܝܫܐ ܪܓܝܓ ܠܗܘܢ ܕܐܠܗܗܘܢ ܢܗܸܘܐ. ܕܠܗ݀ܝ ܕܚ݀ܟܡܐ ܕܛܒܿܐ ܗܝ܆ ܡܛܠ ܗ݀ܝ ܕܢܩ݀ܦܐ ܠܗܿ ܕܒܝܫܐ: ܘܟܕ ܛܒ ܗܘܼ ܡܬܬܘܕܐ: ܕܠܐ ܐܝܬܘܗܝ ܥܠܬܐ ܕܗ݀ܝ ܒܝܫܐ܆ ܠܐ ܢܥܒܕ. ܐܢܐ ܓܝܪ ܗܿܕܐ܆ ܒܡܕܥܐ ܠܐ ܛܠܘܡܿܐ ܐܡܿܪ ܐܢܐ. ܕܦܐܝܐ ܗ݀ܝ ܕܠܐܘܣܝܐ ܥܡ ܚܐܪܘܬܐ ܢܩܝܡ ܐܠܗܐ܇ ܐܦ ܥܬܝܕܐ ܕܗܼܝ ܚܐܪܘܬܐ ܠܓܡܪ ܬܥܘܿܠ. ܟܕ ܗܼܘ ܠܗܿ ܡܠܬܐ ܕܗ݀ܝ ܕܬܥܘܠ ܠܐ ܐܝܬܘܗܝ. ܐܝܬ ܕܝܢ: ܗ݀ܘ ܕܗܘܿܝܐ ܢܲܨܝܐ ܚܒܝܒ ܠܟ܇ ܡܿܢܐ ܥܡ ܦܟܼܗܐ ܠܬܡܿ ܐܝܬ. ܕܕܠܐ ܢܬܩܝܿܡܘܢ ܙܕܩܝܬܐ ܗܘܬ܇ ܡܛܠ ܕܗܟܢܐ ܥܬܝܕܝܢ ܠܡܚܼܐ܇ ܘܬܒܲܛܠ ܗ݀ܝ ܕܣܓܝܐܐ ܒܛܒܘܬܐ: ܡܛܠ ܗ݀ܝ ܕܐܚܪܝܐ ܒܒܝ̈ܫܬܐ܆ ܘܟܐܡܸܬ ܗ݀ܕܐ ܐܡܿܪ ܐܢܬ܆ ܕܡܛܠ ܕܐ[ܪ]ܢܐ ܥܬܝܕ ܐܢܐ ܠܡܲܐܒܫܘ܆ ܐܠܗܐ ܠܐ ܢܗܸܘܐ ܛܿܒܼܐ܇ ܘܠܐ ܢܚܿܘܐ ܒܝ ܦܐܪܐ ܕܪܚܡܸܬ ܐܢܫܘܬܗ. ܘܥܡ ܥܘܠܐ ܘܪܘܫܥܐ ܕܫܪܟܐ܆ ܘܓܘܕܦܐ ܘܠܘܬܡܐ ܥܒܕܢܝܐ ܥܠ ܪܝܫܟ ܕܘܝܐ ܡܼܩܒܿܪ ܐܝܬ.. ܐܠܐ ܐܡܪ ܟܒܪ܆ ܗ݀ܘ ܕܝܪܒܐ ܒܡܐܡܪܐ ܕܫܪܪܐ. ܕܐܢܗܸܘ ܐܪܐ: ܕܡܢ ܩܝܢ ܛܒܘܬܐ ܪܝܫܝܬܐ܇ ܗ݀ܘ ܛܿܒ̈ܐ ܐܦ ܠܐܝܠܝܢ ܕܥܬܝܕܝܢ 97b ܠܡܪܫܥܘ ܡܲܝܬܐ ܘܡܩܝܡ܆ ܡܿܢܐ ܟܿܠܐ. ܕܟܕ ܒܗܝܟܕܗܝܘܬ ܫܦܝܥܘܬܐ ܕܛܒܘܬܐ ܡܬܚܫܚ܇ ܕܕܢܡܕܘܢ ܡܢ ܬܫܢܝܩܐ ܢܚܿܘܐ ܐܢܘܢ܇ ܘܒܝ̈ܬܝܐ ܕܛܘܒܬܢܘܬܐ ܢܥܒܕ ܐܢܘܢ.. ܠܘܬ ܗܿܕܐ ܐܡܿܪܝܢܢ܆ ܕܠܘ ܠܚܘܕ ܡܢ ܣܓܝܐܘܬ ܐܫܝܕܘܬܐ ܕܛܒܘܬܐ܇ ܠܝܿܬܐ ܘܩܘܝܡܐ ܐܝܬܝ ܠܒܝ̈ܫܐ܆ ܐܠܐ ܟܝܬ܆ ܘܕܠܐ ܬܚܣܪ ܘܬܬܐܒܫ ܗܝܼ ܛܒܘܬܐ. ܘܐܝܬܝܗܿ ܡܢ ܐܫܝܕܘܬܐ ܕܡܝܬܪܘܬܐ ܡܛܠ ܚܕܐ. ܡܠܝܘܬܐ ܕܝܢ ܘܓܡܝܪܘܬܐ ܕܝܠܗܿ ܕܡܝܬܪܘܬܐ ܡܛܠ ܐܚܪܬܐ. ܗ݀ܝ ܡܢ ܕܟܕ ܝܕܥܿ ܠܐ ܛܥܘܫܐܝܬ ܕܡܿܣܟܠܝܢ܇ ܢܬܒܛܠ ܠܗ ܕܢܩܝܡ ܐܢܘܢܼ ܗܿܕܐ ܕܝܢ: ܕܐܢܗܘ ܕܠܐ ܢܩܝܡ܆ ܘܒܗ̈ܢܝܢ ܕܡܿܪܢܐܝܬ ܐܝܬܝ̈ܗܝܢ ܛܒ̈ܬܐ ܠܐ ܢܚܘܐ ܐܢܘܢ: ܒܝܬܐ ܥܘܕ ܘܒܚܐܪܘܬܐ܆ ܕܚܣܝܪܘܬܐ ܘܕܠܐ ܡܫܡܠܝܘܬܐ ܕܛܒܘܬܗ ܡܬܬܕܝܢܐ. ܐܝܟܢܐ ܟܝܬ: ܕܐܢܗܸܘ ܕܢܒܪܐ ܥܪܨܬ܇ ܡܛܠ ܕܬܬܝܕܥ ܛܒܘܬܗ ܠܡܩܒܠܢܐ܆ ܐܠܸܨܬ ܕܐܦ ܟܠ ܡܐ ܕܠܗ ܝܕܥܿ ܛܿܒܐ܆ ܐܟܚܕ ܢܥܒܕ. ܐܢܕܝܢ ܘܟܕ ܥܒܼܕ ܐܢܘܢ: ܘܐܘܣܝܐ ܘܚܝܠܐ ܐܩܢܝ ܐܢܘܢ: ܕܗܿܝ ܕܢܗܘܘܢ ܘܕܗܿܝ ܕܢܗܘܘܢ ܫܦܝܪ: ܒܬܪܟܢ ܗ݀ܢܘܢ ܚ̈ܠܫܐ ܕܐܢܫ̈ܐ ܘܒܝ̈ܫܐ ܕܡ̈ܠܐܟܐ܇ ܡܢ ܨܒܝܢܐ ܡܪܢܝܐ ܢܚܛܘܢ܇ ܘܠܚܝ̈ܐ ܕܟ̈ܝܐ ܢܪܡܘܢ: ܘܕܗܢܝ̈ܢ ܡܣ̈ܓܦܢܝܬܐ ܕܚ̈ܝܐ ܨܦܬܐ ܢܣܼܒܘܢ: ܡܢ ܗܪܟܐ ܒܕܐܫܝܚܘ ܘܨܒܝܢܐܝܬ ܐܦܝܛܘ ܒܡܝܬܪܘܬܐ: ܢܒܥܼܐ ܐܢܫ ܘܟܕ ܠܐ ܨܿܒܝܢ ܕܗܕܐ ܢܥܒܼܕ ܐܢܘܢ ܝܪ̈ܬܐ ܚ݀ܛܐ ܘܠܚܐܪܘܬܐ ܓܿܠܙ. ܡܛܠ ܕܚܐܪܘܬܐ܆ ܫܘܠܛܢܐ ܕܒܢ ܐܝܬܝܗܿ: ܠܡܪܓ ܘܠܡܓܒܐ܇ ܇ܠܒ̈ܝܫܬܐ ܐܘ ܠܛܒ̈ܬܐ. ܘܐܢܗܸܘ ܕܓܿܒܝܐ ܘܨ݀ܒܝܐ ܒܒܝ̈ܫܬܐ܆ ܠܐ ܦܐܝܐ܇ ܕܡܢ ܗܠܝܢ ܐܠܘܨܐܝܬ [ܦܓܕܢـ]ܗܿ ܐܢܫ܇ ܩܛܪܘܢܐܝܬ ܢܘܒܠܝܗܿ܇ ܡܐ ܕܠܕܘܒܪ̈ܐ ܛܡ̈ܐܐ ܪܓܐ܇ ܘܠܛܘܥܝܝ ܦܬܟܪܝ: ܒܝܕ ܗܠܝܢ [ܓܝܪ] ܐܝܬܝܗܿ ܪܝܫܝܘܬܐ ܕܚܛܝܬܐ ܠܐܪܥܢܝܐ. ܕܗܿܠܝܢ ܕܝܢ ܦܘܪܥܢܐ܆ ܠܗ݀ܢܐ ܐܡܿܪܝܢ ܕܐܝܬܝܗܿ. ܗ݀ܢܘ ܕܝܢ ܡܬܬܨܡܚܢܘܬܐ ܕܡܢ ܝܕܥܬܐ ܕܐܠܗܐ܇ ܠܗ݀ܝ ܕܐܚܒܘ ܐܦ ܡܢ ܬܢܢ܇ ܐܨܛܒܝܘ ܓܝܪ ܕܠܐ ܢܕܥܘܢ ܠܐܠܗܐ. ܘܒܝܕ ܥܒܕ̈ܝܗܘܢ ܘܒܝܕ ܕܚܠܬܗܘܢ܆ ܘܗܘܡܐ ܕܠܗ ܐܚܒܘ ܘܪܚܡܘ܆ ܠܗ ܐܦ ܕܢܐܪܬܘܢ ܡܢ 98a ܠܗܠ ܡܫܬܘܝܢ. ܘܐܢܗܸܘ ܟܿܝܬ: ܕܡܢ ܫܟܝܪ̈ܬܐ. ܐܝܠܝܢ ܕܪܓܬ ܚܐܪܘܬܐ: ܡܢ ܗܪܟܐ ܐܦ ܡܢ ܠܗܠ: ܢܗܦܟܝܗܿ ܐܢܫ ܩܛܝܪܐܝܬ: ܢܿܥܠ ܠܗܿ ܠܚܐܪܘܬܐ܆ ܘܡܢ ܡܐ ܕܐܝܬܝܗܿ ܕܚܿܩ ܠܗܿ. ܡܿܕܝܢ ܐܪܐ܇ ܐܢܗܘ ܕܚܐܪܘܬܐ ܡܛܠ ܪܓܸܬ ܒܝܫܘܬܐ ܟܕ ܝܕܥܿܐ ܠܬܫ̈ܢܝܩܐ ܕܣܝܡܼܝܢ ܥܠܝܗܿ ܬܲܒܣܪ: ܡܠܘܢ ܕܝܢ ܬܚܒ ܠܬܫܢ̈ܝܩܐ܇ ܡܛܠ ܗܢܝܐܘܬܐ ܙܥܘܪܬܐ ܕܡܢ ܗܪܟܐ܆ ܫܦܝܪ ܕܠܐ ܬܬܥܘܠ. ܡܛܠ ܕܐܦ ܬܢܢ܆ ܕܗ̈ܢܝܢ ܟܕ ܗ̈ܢܝܢ ܡܣܬܥܪ̈ܢ ܚܿܙܝܢܢ܆ ܐܟܙܢܐ ܕܠܘܬ ܗܿܢܘܢ ܫܪ̈ܫܐ ܕܥ̈ܠܝܡܐ ܟܕ ܓܝܪ ܐܢܫ ܡܢܗܘܢ: ܡܬܢܝܪ ܘܡܢ ܪܓܬܐ ܕܘܝܬܐ ܥܿܗܪ ܘܦܿܩܪ: ܡܚܒ ܟܝܬ ܕܡܣܡ ܒܪܝܫܐ ܕܡܘܬܐ ܢܩܒܠ܆ ܘܕܢܿܡܠܐ ܪܓܬܐ ܕܘܝܬܐ ܕܒܗ ܥܫܸܢܬ. ܘܗܕܐ ܠܘܬ ܣܓ̈ܝܐܐ ܥܲܝܢܼܢ ܕܗܘܼܬ. ܘܠܗܿ ܐܦ ܡܢ ܬܫܥܝ̈ܬܐ ܚܘܕܪ̈ܢܝܬܐ ܩܒܠܢܢ܆ ܐܝܟܢܐ ܕܥܦ ܦܪܝܣ ܘܥܠ ܐܠܼܝܘܢ܆ ܘܥܠ ܒܢ̈ܝܐ ܪ̈ܚܝܡܐ ܕܐܦܪܝܡܘܣ ܘܥܠ ܓܢܒܪ ܚܝܠܐ ܐܘܟܼܠܝܘܣ܇ ܐܒܕܢ ܕܡܘܬܐ ܥܠܝܗܘܢ ܥܼܫܪ. ܡܛܠ ܪܓܬܐ ܬܙܝܬܐ. ܘܕܡܢ ܕܝܠܝ ܥܗܕ: ܐܟܙܢܐ ܕܫܡܫܘܢ܇ ܗܿܘ ܬܘܩܦܐ ܪܒܐ ܕܐܝܣܪ̈ܠܝܐ܇ ܐܝܿܢܐ ܕܡܛܠ ܫܛܝܘܬܗܿ ܕܪܓܬܐ܇ ܡܢ ܪܘܚܐ ܘܡܢ ܐܘܚܕܢܐ܇ ܘܡܢ ܕܝܢܐ ܘܡܢ ܐܝܩܪܐ܇ ܘܡܢ ܬܘܩܦ ܚܝܠܐ ܐܚܒ ܕܢܦܠ܇ ܒܠܚܘܕ ܗܢܝܢܗ ܢܥܦܐ܇ ܗܕܐ ܐܡܪܢܢ: ܕܒܙܒܢܐ ܕܝܠܢ ܓܸܕܫܬ܆ ܐܦ ܡܛܠ ܐܢܫ ܥܠܝܡܐ܇ ܕܠܩܝܛܘܢܐ ܕܡܠܟܐ ܚܒ݀ܨ ܕܢܥܘܼܠ܇ ܘܥܡ ܕܪ̈ܘܟܬܐ ܕܗܢܐ ܠܡܬܥܿܕܢܘ. ܘܟܕ ܐܬܬܕܪܟ ܗܕܡ ܗܕܡ ܐܬܦܿܠܓ. ܕܕܡܿܝܢ ܠܗܿܠܝܢ: ܐܦ ܡܛܠ ܐܢܫ̈ܐ ܚܡ̈ܬܢܐ ܫܡܼܥܢܿܢ ܟܝܬ ܘܥܲܝܢܢ. ܕܡܛܠ ܐܢܫܐ ܓܘܡܕܢܐ܆ ܠܪܩܝܥܐ ܐܬܥܠܝܘ ܘܠܥܘܡܩ̈ܐ ܕܫܝܘܠ ܐܙܠܘ. ܕܠܐ ܣܝܒܪܘ ܠܥܘܙܐ ܕܚܡܬܐ. ܘܐܡܿܪܚܘ ܘܠܡܠܟܐ ܠܝܛܘ. ܘܠܡܢܐ ܘܿܠܐ ܕܣ̈ܓܝܐܬܐ ܐܫܼܬܥܐ܇ ܟܕ ܝܕܝܥܐ ܗܝ ܕܣ̈ܓܝܐܐ: ܠܐܒܕܢܐ ܟܝܬ ܘܠܥܛܝܐ ܗ݀ܘ ܡܝܬܝܐ ܘܕܡܢ ܬܢܢ܇ ܘܟܘܠܢܝܐ ܘܕܡܢ ܠܗܠ܇ ܪܓܿܝܢ ܘܡܿܚܒܝܢ܇ ܕܒܠܚܘܕ ܪܚܡܬܗܘܢ ܬܫܼܠܡ. ܘܗܿܕܐ ܡܿܢ ܓܒܝܬܐ ܗ݀ܝ ܕܚܐܪܘܬܐ. ܗ݀ܝ ܕܐܢ ܬܬܥܨܐ: ܘܡܢ ܡܿܐ ܕܨ݀ܒܝܐ ܬܬܗܓܪ܆ ܡܬܛܿܠܡܐ. ܕܠܐ ܗܟܝܠ ܗܕܐ ܬܚܫ܆ ܫܦܝܪ ܐܪܐ܇ ܕܒܝ̈ܫܐ ܕܢܘܪܐ ܗ݀ܘܝܢ ܝܪ̈ܬܐ. ܐܚܪܢܝܐܝܬ ܕܝܢ܆ ܐܢܗܸܘ 98b ܕܠܦܘܬ ܐܲܡܢܝ̈ܗܘܢ: ܦܘܪܥܢܐ ܠܒ̈ܝܫܐ ܠܐ ܡܝܼܬܟܝܿܠ ܘܡܣܬ݀ܩܡ܆ ܚܣܪܐ ܒܡܢܬܐ ܗܿܝ ܕܣܓܝ ܪܒܐ ܟܐܢܘܬܐ. ܠܘܩܕܡ ܡܿܢ܆ ܟܕ ܒܗܕܐ ܡܬܐܡܪܐ ܡܬܒܿܝܢܝܢܢ܆ ܕܐܝܟ ܐܝܿܕܐ. ܡܦܿܠܚ ܐܢܫ ܠܟܠ ܐܕܫܿܐ ܕܥܘܿܠܘܬܐ. ܡܙܲܢܐ ܡܼܬܛܡܲܐܐ. ܩܿܛܠ. ܡܬܛܿܘܫ. ܡܓܕܦ. ܡܪܫܥ. ܐܝܿܕܐ ܐܪܐ ܟܐܢܐ ܠܦܘܬ ܗܠܝܢ. ܕܐܝܟ ܥ̈ܒܝܕܬܐ ܗܠܝܢ ܣܒܸܠܬ ܛܒ ܢܬܦܼܪܥ܆ ܐܘ ܕܢܚܿܒܪ ܒܘܣܡܐ ܘܢܝܿܚܐ ܕܩܕܝܫܐ. ܐܢܕܝܢ ܘܡܛܠ ܕܛܿܒܘܬܐ ܬܫܬܲܦܠ: ܠܒܘܣܡܐ ܕܚ̈ܣܝܐ ܢܐܬܪܘܢ ܡܛܘ̈ܫܐ܆ ܡܿܢܐ ܟܿܐܐ܇ ܕܟܠܗ ܝܲܗܠܐ ܕܡ̈ܠܟܐ ܘܟܢܘܫܬܐ ܕܙܕܝ̈ܩܐ܇ ܩܕܠܐ ܡܪܘܕܐ ܢܪܝܡܘܢ ܠܘܩܒܠ ܗܿܘ [ܛܿܒـ]ـܐ܇ ܐܝܟܢܐ ܕܟܕ ܟܠ ܡܕܡ ܬܚܝܬ ܐܘܟܪ̈ܐ ܕܚܛܝܬܐ ܡܬܟܕܢ܆ ܝܬܝܪ ܒܣܝܡܐ ܢܬܝܕܥ ܗ݀ܘ ܛܒܐ܇ ܘܡܢ ܗܪܟܐ ܗܼܝ ܛܒܘܬܐ ܡܠܘܐܐ ܠܒܝܫܼܘܬܐ ܬܗܸܘܐ. ܗ݀ܝ ܕܫܟܝܪܘܬܐ ܗܿܝ. ܘܡܬܡܝܩܢܝܬܐ ܣܘܓܐܐ. ܒܬܪܟܢ ܕܝܢ: ܐܢܗܸܘ ܕܒܗܿ ܐܚܪܬܐ ܡܬܒܲܩܝܢܢ: ܐܡܿܪ ܐܢܐ ܕܝܢ ܟܕ ܠܕܡܐ ܕܙܕܝ̈ܩܐ܇ ܕܡܫܲܬܦܲܥ ܕܠܐ ܡܪܫܘ ܚܙܝܢܢ܇ ܘܠܛܠܘܡ̈ܝܐ ܐܝܠܝܢ ܕܡܬܥܒܕܝܢ ܬܚܝܬ ܫܡܫܐ܇ ܘܠܫܘ̈ܝܕܐ ܘܠܒ̈ـ[ـܙܘܙ]ܝܐ ܥܡ ܚܘܕܪܐ ܕܙܝܡ̈ܝܐ ܕܫܪܟܐ. ܠܗ݀ܢܘܢ ܕܐܢ ܡܢ ܠܗܠ ܠܐ ܕܝܿܢܐ ܟܐܢܘܢܬܐ܇ ܘܥܝܪܬܐ ܕܦܐܝܐ ܠܐ ܥܿܒܕܐ: ܡܬܥܘܠܝܢ܆ ܘܡܬܛܿܠܡܝܢ ܐܝܠܝܢ ܕܚܫܘ. ܒܕܡܢ ܬܢܢ܆ ܠܐ ܬܟܼܣ ܘܠܐ ܬܐܪ܇ ܢܡܘܣܐ ܕܒܛܝܠܘܬܐ ܠܒܝ̈ܫܐ. ܕܐܦ ܕܝܢ ܥܡ ܗ݀ܠܝܢ: ܚܣܪܐ ܡܠܬܐ ܕܒܛܝܠܘܬܐ: ܐܢܗܼܘ ܕܠܟܣܐ ܕܪܫܝܢܘܬܗܘܢ ܠܐ ܡܿܡܼܨܝܢ ܒܝ̈ܫܐ ܡܢ ܠܗܠ܆ ܩܪܝܒܐ ܗܿܝ ܠܡܚܕܐ ܡܢ ܗܠܝܢ. ܐܢܗܸܘ ܓܝܪ ܕܡܢ ܬܡܢ: ܚܘܣܝܐ ܢ݀ܓܕ ܥܠ ܐܝܠܝܢ ܕܐܪܫܥܘ ܗܿܘ ܚܿܢܢܐ܆ ܠܡܢܐ ܟܝ ܕܢܬܟܘܣ ܠܒܝܫܬܐ ܡܢ ܗܪܟܐ ܪܡܿܝܐ ܠܗ. ܠܡܢܐ ܬܘܒ ܠܝܚܝܕܝܗ ܫܕܪ ܦܪܘܿܩܐ܇ ܘܕܡܢ ܬܚܝܬ ܢܝܼܪܐ ܕܡܚܿܒܠ ܢܦܫ̈ܬܐ ܒܸܠܐܐܪ ܠܢ ܢܲܦܩ. ܒܐܝܠܝܢ ܡ̈ܠܐ ܢܡ̈ܘܣܐ ܥܠ ܡܬܥܒܪ̈ܢܐ ܣܐܡܿ ܗܘܐ܇ ܕ[]ܗܘܢ ܠܪܘܫܥܐ ܟܐ݀ܦ ܗܘܐ ܘܡܲܪܟܢ. ܐܘ ܬܘܒ܆ ܒܐܝܕܐ ܡܠܬܐ܇ ܥܠ ܐܢ̈ܫܐ ܡܥ̈ܘܠܢܐ ܡܚܘܬܐ ܬܿܙܝܙܬܐ ܘܫ̈ܒܛܐ ܥܙ̈ܝܙܐ ܡܢ ܗܪܟܐ ܐܝܿܬܝ܇ ܠܐܚܪ̈ܢܐ ܕܝܢ ܡܢ ܡܥ̈ܘܠܢܐ ܟܘܠܢܐܝܬ ܐܪ̈ܦܝ܇ ܐܢܗܘ ܕܒܚܘܣܢܐ ܬܡܢ ܡܬܚܿܫܚ܇ ܘܠܘ ܒܕܝܢܐ ܘܒܢ̈ܓܕܐ܆ ܡܬܬܚܝܒܐ ܓܝܪ: ܐܝܟ ܒܥܬܐ ܗܕܐ ܐܘ ܗܦܟܬܐ: ܕܐܘ ܠܟܠܗܘܢ ܡܢ ܬܢܢ 99a ܢܬܒܿܥ ܐܘ ܕܐܦܠܐ ܠܚܕ ܘܠܟܘܘܢܐ ܕܡܢ ܬܡܢ ܢܛܘܪ. ܐܘ ܡܢܐ ܗܝܼ ܡܠܬܐ܇ ܕܚܕ ܡܢ ܟܕ ܟܠܗ ܟܝܠܐ ܕܥܢܬܘܬܗ ܡܲܠܝ ܐܬܼܦܿܠܛ ܕܠܐ ܢܼܓܕܐ܇ ܐܚܪܢܐ ܕܝܢ ܒܪ̈ܒܘ ܢܓ̈ܕܐ ܕܡܢ ܗܪܟܐ ܐܬܡܚܝ܇ ܐܢ ܬܡܢ ܬܪ̈ܝܗܘܢ ܡܫܬܘܝܢ. ܡܬܥܘܠ ܠܗ ܓܝܪ ܡܢ ܗܿܕܐ ܒܛܝܠܘܬܐ܇ ܗ݀ܘ ܕܗܪܟܐ ܚܫܼ܇ ܟܕ ܒܪ ܦܚܡܗ ܐܫܬܘܝ ܠܓܗܝܬܐ ܡܢ ܛܘܪܐ ܬܡܢ. ܐܠܐ ܟܝܬ: ܗ݀ܝ ܕܗܿܢܐ ܡܿܢ ܡܼܢ ܗܪܟܐ ܢܬܟܘܢ: ܚܐܪܘܬܗ ܨ݀ܒܝܐ. ܣ̈ܓܝܐܐ ܓܝܪ ܡܬܟܫܦܝܢ ܘܪܓܿܝܢ ܆ ܕܥܠ ܐܦܝ̈ ܒܝܫܘܬܗܘܢ ܬܢܢ ܢܚܫܘܢ܆ ܘܠܐ ܬܡܢ. ܐܚܪܢܐ ܕܝܢ ܗ݀ܝ ܕܒܗܦܟܐ ܪܓܿܝܢ ܘܫܐܠܿܝܢ. ܕܗܪܟܐ ܕܢܬܥܲܕܢܘܢ ܢܫܬܒܲܩܘܢ܆ ܘܬܡܢ ܐܝܟ ܕܨܿܒܐ ܢܥܼܒܕ܇ ܗ݀ܘ ܡܘܿܬܒ ܡܕܝܢܬܐ ܪܒܬܐ܇ ܘܕܝܿܢܐ ܕܥ̈ܠܡܐ ܟܠܗܘܢ܇ ܘܡܲܠܚܐ ܘܡܪܐ ܕܒܢܝ̈ܢܫܐ. ܠܗ݀ܘ ܕܥܡ ܫܬܩܐ܆ ܟܠ ܫܘܒܚܐ ܫܿܦܝܐ ܘܫܒܝܚܐ ܐܡܝܢ. Memra 2 ܐܚܪܢܐ ܕܬܪ̈ܝܢ ܕܝܠܗ ܟܕ ܕܝܠܗ܆ ܥܠܘܗܝ ܕܢܝܫܐ. ܡܛܠ ܡܪܕܘܬܐ ܕܐܠܗܐ܆ ܘܡܚܘܝܢܘܬܐ ܕܐܢ ܦܪܫܐ ܢܦܫܐ ܡܢ ܦܓܪܐ: ܒܠܥܕ ܦܘܩܕܢܐ ܕܐܠܗܐ܆ ܘܡܛܠ ܙܢ̈ܝܐ ܕܡܘܬܐ. ܬܘܒ ܐܦ ܗܟܝܠ܆ ܟܕ ܠܒܛܝܠܘܬܐ ܗ݀ܝ ܕܥܠ ܟܠ ܩܝܿܡܐ ܡܫܼܿܒܚܝܢܢ: ܘܥܠܝܗܿ ܐܝܟ ܕܥܠ ܫܘܪܐ ܕܡܢ ܫܡܿܝܪܐ ܫܦܝܪܐ ܡܠܚܡ ܬܟܝܠܝܢܢ: ܘܚܠܦܝܗܿ ܐܝܟ ܡܐ ܕ݀ܠܬܟ ܐܦܘܕܝܟܣܐ ܥܿܒܕܝܢܢ܆ ܗܠܝܢ ܐܡܿܪܝܢܢ܇ ܠܡܫܪܪܘ ܠܫܡܥܐ ܫܦܝܐ ܕܦ̈ܫܝܛܐ܇ ܐܝܟܢܐ ܕܡܢ ܣܓܝܐܘܬ ܣܘܪ̈ܥܦܐ ܕܟܕܒܘܬܐ ܢܲܡܕܘܢ܇ ܘܒܫܒ̈ܝܠܐ ܕܫܪܪܐ ܢܫܬܒܿܠܘܢ. ܬܗܘܐ ܠܢ ܕܝܢ ܗܝ܆ ܠܟܣܝܣ܆ ܡܒܕܩܢܝܬܐ ܕܗܠܝܢ ܕܐ̈ܠܨܿܢ. ܡܛܠ ܟܝܬ: ܕܐܢܗܼܘ ܒܗܠܝܢ ܕܡܢ ܐܚܪ̈ܢܐ ܐܬܥܡ̈ܠܝ: ܡܣܪܚܢܘܬܐ ܬܬܐܡܼܿܢ܆ []ـܛܐ ܘܝܿܩܪܐ ܗܝ ܡܚܫܒܬܐ. ܘܡܬܒܼܿܣܝܐ ܘܡܬܪܡܝܐ܆ ܡܛܠ ܣܒܥܐ ܗܝܼ ܡܠܬܐ. ܘܚܢܢ ܒܣܒܝܪܘܬܐ ܕܪܚܡܬ []ܝܩܪܐ ܡܬܬܨܝܼܕܝܢܢ܇ ܕܣܿܥܝܢܢ ܥܠ ܣܝ̈ܡܐ ܢܘܟܪ̈ܝܐ. ܗܘܐ ܠܢ ܕܝܢ ܒܪܕܪܝܫ ܗܼܝ ܣܘܢܛܟܣܝܣ ܐܟܚܕܐ܆ ܢܗܝܪܬܐ ܐܘ ܣܩܼܝܠܬܐ. ܐܝܟܢܐ ܟܝܬ: ܕܠܐ ܡܛܠ [] ܫܘܟܘܬܐ ܕܐܝܠܝܢ ܕܡܬܬܪ̈ܓܡܢ: ܠܘܬ ܛܫܝܘܬܐ [] ܡܢ ܛܘܥܝܝ ܗܼܘ ܡܪܥܐ ܢܬܓܪܦ: ܘܠܐ ܡܛܠ [] ܫܝܛܘܬܐ ܕܐܝܠܝܢ ܕܡܬܐܡܪ̈ܢ܇ ܠܠܘܬܐ ܢܣܿܛܪ [ܬ]ܐܘܪܝܐ. ܦܐܝܐ ܗܝ ܓܝܪ ܠܬܐܘܪܝܐ ܕܟܕ ܫܦܝܪ []ܢܝܐ܆ ܕܐܝܟ ܟܠܬܐ ܗܕܝܪܬ ܟܪܘܡܐ ܐܘ ܒܥܘܛܦܐ 99b ܕܡܢ ܠܟܣ̈ܝܣ ܬܬܟܲܢܟ. ܐܟܚܕܐ ܕܝܢ ܘܗܕܐ܇ ܥܡ ܒܛܝܠܘܬܐ ܘܪܚܡܸܬ ܥܡܠܐ ܢܥܒܕ܆ ܕܠܗܿ ܠܡܠܬܐ ܢܚܿܣܢ ܘܲܢܝܲܡܝܢ܇ ܒܝܕ ܟܪ̈ܣܝܣ ܐܒܗ̈ܝܬܐ. ܐܝܟܢ ܕܠܐ ܢܣܬܒܪ܇ ܕܐܚܪܢܝܐܝܬ ܐܘ ܐܝܟ ܫܬܐܣܬܐ ܕܣܝܼܡܐ܇ ܡܢ ܐܢܫ̈ܐ ܐܝܠܝܢ ܕܒܪܘܚܐ ܕܡܢ ܠܥܠ ܩܲܒܠܘ ܠܡܬܢܗܪܢܘܬܐ ܕܫܪܪܐ ܪܕܝܢܢ. ܡܛܠ ܟܝܬ܆ ܕܟܠ ܡܟܬܒܢܘܬܐ ܐܘ ܡܣܪܚܢܘܬܐ: ܕܡܢ ܗܠܝܢ ܐܝܠܝܢ ܕܐܬܥܗܕ: ܒܿܝܪܐ ܘܓܠܝܕܐ. ܪܘܥܐ ܗܝ ܡܠܘܢ܆ ܘܠܐ ܣܟ܇ ܗܢܝܢܐ ܡܬܬܓܪܐ ܠܝܕܥ̈ܝ ܣܘܟܠܐ. ܐܢܕܝܢ ܘܒܡܕܡ ܡܢ ܗ݀ܠܝܢ ܐܚܝܕܐ: ܘܒܡܕܡ ܓܠܝܕܐ. ܒܦܠܓ ܐܝܬ ܠܗܿ ܗ݀ܝ ܕܬܗܿܢܐ ܘܬܬܝܩܪ. ܗ݀ܠܝܢ ܐܡܼܪܬ܆ ܟܕ ܥܠ ܝܲܨܝܦܘܬܐ ܗ݀ܝ ܕܠܟܠ ܚܙܝܩܐ܇ ܐܘܩܝܢܐ ܕܠܒܐ ܐܝܬ ܠܝ. ܕܡܢܗ ܐܦ ܐ݀ܓܕ ܚܝܠܐ ܘܬܥܕܝܪܐ܆ ܟܕ ܡܛܠܬܗ ܐܝܦܝܟܪܡܛܐ ܗܠܝܢ ܡܢܣܐ ܐܢܐ ܠܣ̈ܓܝܐܐ ܠܡܬܠ܀ ܟܠ ܢܣܝܘܢܐ ܘܟܠ ܡܲܪܕܘ: ܐܝܢܐ ܕܒܪ̈ܚܡܐ ܕܐܒܐ ܟܐܢܐ ܥܠ ܥܿܠܡܐ ܡܿܡܠܟ܆ ܡܢ ܩܢ ܐܪܒܥ ܝܕܥܿܝܢܢ ܕܗܿܢܐ ܗܘܸܐ. ܐܘ ܓܝܪ ܠܡܚܪ܇ ܐܝܟܢܐ ܕܠܗ݀ܢܘܢ ܛܒ̈ܐ ܕܐܢܫ̈ܐ܆ ܐܘ ܠܐܒܿܕܢܐ ܘܠܿܥܛܝܐ܆ ܐܘ ܠܡܩܢܐ ܬܘܒ܇ ܐܟܡܐ ܕܠܥܢ̈ܬܐ ܘܥ̈ܘܠܐ܇ ܘܠܥܘ̈ܠܐ ܬܘܒ ܥܦܝܦܐܝܬ. ܐܘ ܠܡܟܣܘ ܠܒܝܫܬܐ ܕܩܝܡܐ܆ ܐܘ ܠܡܬܟܣܘ ܠܗ݀ܝ ܕܥܬܝܕܐ܆ ܒܡܘܪܐ ܡܬܠܲܬܬܐ. ܠܡܕܟܝܘ ܠܗ݀ܝ ܕܥܒܸܪܬ. ܐܢܕܝܢ ܘܙܕܝܩܐ: ܠܕܘܟܝܐ ܕܫܥܝܢܐ ܙܥܘܪܐ ܡܕܡ ܢܬܢܿܣܐ. ܐܘ ܕܠܐ ܢܚܼܛܐ ܡܿܠܦܐ ܠܗ ܡܪܕܘܬܐ܀ ܗܠܝܢ ܒܡ̈ܢܘܬܐ ܐܚܪ̈ܝܬܐ ܕܦܘܓܠܐ ܢ̈ܬܬܠܝܦܢ ܒܪܡ ܫܒܛܐ ܕܡܓܢ ܥܠ ܗܢܐ܆ ܚܕܢܝܐ ܗܘܼ ܢܝܼܫܐ. ܐܝܟܢܐ ܕܡܠܬܐ ܦܸܪܥܬ݀. ܐܡܿܪ ܐܢܐ ܕܝܢ܆ ܡܛܠ ܒܘܚܪܢܐ ܘܒܘܩܝܢܐ. ܗܿܠܝܢ ܗܟܝܠ ܡܘܪ̈ܣ ܐܪܒܥ܆ ܐܘ ܓܝܪ ܡܢ ܠܒܪ ܗܘ̈ܝܢ܆ ܐܘ ܡܢ ܒܝ̈ܬܝܬܐ. ܡܛܠ ܟܝܬ: ܕܢܡܘܣܐ ܛܒܿܐ ܕܒܛܝܠܘܬܐ ܟܕ ܪܚܡܬܢܐܝܬ ܪܕܐ: ܒܪܫܝܬ ܡܢ ܠܒܪ ܡܿܦܢܐ: ܘܒܝܕ ܩܢܝ̈ܢܐ ܡܪܬܐ ܠܩܢ̈ܝܐ: ܐܝܛܐ ܕܝܢ܆ ܐܢ ܐܝܲܬܝܸܬ ܡܪܬܝܢܘܬܐ ܦܐܪ̈ܐ܆ ܡܢܝܚ ܠܫܒܛܐ ܘܡܼܟܠܐ ܘܚܿܓܪ ܠܡܪܕܘܬܐ. ܐܢܕܝܢ ܘܠܐ. ܡܢ ܒܝܬܝ̈ܬܐ ܘܕܝ̈ܠܢܝܬܐ ܡܫܪܐ. ܘܒܗܿܝ ܡܿܢ ܠܒܥܝܪܐ ܡܡܝܬ܆ ܘܠܙܪ̈ܥܐ ܡܒܿܛܠ܆ ܐܘ ܠܦܪ̈ܕܝܣܐ ܡܥ̈ܒܐ ܓܿܠܙ. ܘܠܕܐܝܟ ܗܠܝܢ. ܒܗܿܕܐ ܕܝܢ܆ ܠܦܓܪܐ ܘܠܢܦܫܐ ܘܠܒܢ̈ܝܐ ܒܝܕ ܟܘܪ̈ܗܢܐ ܡܿܢ ܠܦܓܪܐ. ܘܒܝܕ ܫܛܝܘܬܐ ܘܡܬܬܥܒܕܢܘܬܐ ܠܢܦܫ̈ܬܐ. a00a ܘܒܝܕ ܡܘܬܐ ܘܥܛܝܐ ܠܦܐܪ̈ܐ ܕܟܪܣܐ. ܘܐܢܗܸܘ ܡܢ܇ ܕܒܗܿܠܐ ܘܢܝܚܐ ܒܝܫܘܬܐ: ܡܢ ܬܩܘܦ ܕܪܥ ܕܪܕܝܘܬܐ: ܐܬܩܸܝܬ ܘܐܬܢܩܸܠܬ ܚܛܝܬܐ ܕܐܥܬܩܸܬ܆ ܟܕ ܡܬܬܢܝܚ ܕܪܥܐ ܕܐܬܬܪܝܡ܆ ܝܡܝܢܐ ܚܝܲܝܬܐ ܥܠܘܗܝ ܡܲܓܢܐ. ܐܢܕܝܢ ܘܠܐ܆ ܒܝܕ ܐܚܪ̈ܢܝܬܐ ܕܛܒ ܡܝ̈ܫܡܢ܇ ܐܬܐ ܗ݀ܘ ܪܚܡ ܒܢܝ̈ܢܫܐ. ܘܒܥܒܕܘܬܐ ܟ݀ܕܢ܆ ܘܒܐܝܕ̈ܝ ܣܐܢ̈ܐ ܫܒ݀ܩ. ܘܠܚܪܬܐ ܡܓܠܐ ܕܐܒܿܕܢܐ ܡܢܝܦ ܥܠܘܗܝ. ܐܦ ܟܝܬ: ܘܐܝܕ̈ܝܐ ܕܣ̈ܢܐܐ ܘܕܣܩܘܪ̈ܐ܆ ܫܒܛܐ ܥܙܝܙܐ ܐܝܬܝܗܿ. ܘܡܢ ܗ݀ܢܘܢ ܕܡܢ ܠܒܪ ܠܗ݀ܢܐ ܚܟ݀ܡܝܢܢ܀ ܐܠܐ ܟܝܬ ܛܟ ܢܒܼܥܐ ܐܢܫ܆ ܕܐܢܗܸܘ ܕܨ݀ܒܐ ܗܘ ܐܠܗܐ܇ ܕܒܝܕ ܐܝܕܐ ܕܣܢ̈ܐܐ ܐܢܫ ܢܬܬܡܝܬ܇ ܘܐܢܗܸܘ ܕܠܐ ܨ݀ܒܐ܆ ܠܡܢܐ ܟܝ܇܇ ܛܡܐܘܬ ܩܼܛܠܐ ܒܣ̈ܓܝܐܐ ܡܬܬܡܪܚܐ܆ ܐܢܕܝܢ ܘܨܿܒܐ܆ ܠܡܿܢܐ ܫܚܿܩ ܘܡܿܫܢܩ ܠܩܛܘܿܠܐ܇ ܐܘ ܡܢ ܗܪܟܐ ܐܘ ܡܢ ܠܗܠ܀ ܠܘܬ ܗܠܝܢ ܗܟܢܐ ܐܓܿܝܒ ܦܬܓܡܐ. ܕܡܛܠ ܗ݀ܝ ܕܬܬܟܘܢ ܒܝܫܬܐ: ܒܕܘܟ ܡܿܢ ܝܲܨܝܦ ܐܠܗܐ ܕܗܕܐ ܬܗܸܘܐ. ܟܕ ܡܲܫܠܡ ܠܪܫܝܥܐ܇ ܠܐܝܕܐ ܚܒܠܬܐ ܕܩܿܛܘܠܐ. ܒܕܘܟ ܕܝܢ ܡܲܫܠܡܘ ܡܿܢ ܠܐ ܡܲܫܠܡ ܥܡ ܡܠܬܐ ܡܲܪܫܠܘ ܕܝܢ ܡܲܪܫܠ ܒܪܡ. ܘܐܝܟܢܐ ܟܝܬ ܕܗܿܕܐ ܐܬܢܲܗܪ ܠܢ܆ ܕܡܿܢܐ ܡܿܢ ܐܝܬܝܗܿ ܡܫܠܡܢܘܬܐ ܘܡܫܬܒܩܢܘܬܐ܆ ܥܿܪܨܐܝܬ ܢܒܿܕܩ. ܡܲܫܠܡܢܘܬܐ ܡܢ ܓܝܪ ܠܗܿܕܐ ܐܡܿܪܝܢܢ܆ ܠܗ݀ܝ ܕܒܝܕ ܥܘܕܪܢܐ ܘܣܘܝܥܐ ܕܐܝܕܐ ܚܟܝܡܬ ܒܟܠ ܕܐܠܗܐ ܡܬܦܪܢܣܐ܇ ܘܠܗ݀ܘ ܕܐܝܟܢ ܕܗܘܼ ܐܝܬ ܠܗܿ: ܕܢܚܫ ܡܢ ܐܚܪܢܐ ܡܬܦܪܣܐ. ܡܪܫܠܢܘܬܐ ܕܝܢ܆ ܠܗ݀ܝ ܕܒܿܥܝܕܐ ܡܫܬܒܩܢܘܬܐ ܡܟܢܝܢܢ܆ ܐܝܬܝܗܿ ܐܦ ܗܝ ܙܢܐ ܡܕܡ ܐܚܪܢܐ ܕܒܛܝܠܘܬܐ. ܐܘ ܟܕ ܠܐ ܕܒܪ ܒܩܛܝܪܐ ܠܚܐܪܘܬܐ ܕܗ݀ܘ ܕܣܿܥܐ ܕܢܲܒܐܫ܆ ܒܕ ܡܬܬܓܪ ܥܘܕܪܢܐ ܠܗ݀ܘ ܕܚܿܐܫ܆ ܐܘ ܟܕ ܡܿܦܣ ܘܫܒܿܩ ܕܗܕܐ ܬܗܸܘܐ. ܘܐܝܟܢܐ ܟܝܬ ܕܝܬܝܪܐܝܬ ܬܒܿܪܩ ܘܢܬܬܒܪܝܢ ܗܘܡܐ ܕܐܬܐܡܪ: ܢܣܒ ܥܠ ܐܢܫ ܡܢ ܐܘܛܘܩܪܛܘܪܘܣ܇ ܕܠܡܕܝܢܬܐ ܡܕܡ ܕܬܚܝܬ ܐܘܕܚܕܢܗܿ. ܬܪܝܢܐܝܬ ܥܿܒܕ ܡܠܬܐ ܠܘܩܕܡ ܡܢ ܒܣܝܘܿܡܘܬ ܢܡܘܣ̈ܐ ܒܐܣܛܪ ܛܝܓܘܬܐ. ܘܬܥܲܕܝܪܐ 100b ܕܡܢ ܐܝܕܐ܇ ܐܢܗܸܘ ܕܡܢ ܦܠܓܐ ܢܘܟܪܝܬܐ ܡܬܬܩܪܒܐ. ܒܬܪܟܢ ܕܝܢ: ܐܢܗܸܘ ܕܡܢ ܗܿܕܐ ܠܐ ܬܬܗܸܢܐ ܗܝ ܡܕܝܢܬܐ܇ ܘܡܢ ܪܘܡܐ ܕܟܗܝܢܘܬܐ: ܬ݀ܒܣܐ ܘܬܬܫܼܝܛ ܠܐܚܝܕܐ܆ ܒܙܢܐ ܡܕܡ ܐܚܪܢܐ ܥܿܒܕ ܡܠܬܐ ܕܗܿܕܐ. ܘܐܢ ܗܘܼ ܕܡܼܬܡܚ̈ܫܠܐ. ܘܡܢ ܐܝܕܐ ܒܪܒܪܝܬܐ ܡܬܬܩܪܒܐ܆ ܡܪܦܐ ܠܗܿ ܕܬܬܟܼܣ ܚܠ̈ܫܬܐ: ܘܥܘܪܕܢܐ ܕܡܢ ܐܝܕܐ ܡܢܗܿ ܓܿܠܙ. ܘܠܐܣܛܪ̈ܦܘܣ ܦܩܿܕ ܘܡܢܗܿ ܡܪܝܡ. ܐܝܟܢܐ ܕܢܚܟܼܡ ܠܕܘܝܬܐ܇ ܕܟܡܼܐ ܗܝ ܛܒܬܗ ܕܫܠܡܐ܆ ܡܛܠ ܩܪܣܐ ܘܩܿܪܒܐ. ܒܗܿܢܐ ܗܟܝܠ ܢܝܫܐ܇ ܠܡܕܝܢܬܐ ܐܘܟܝܬ ܠܢܦܫܐ ܕܝܠܢ܇ ܡܥܼܕ ܕܢܚܟܡ ܘܕܢܐܨܦ܇ ܗ݀ܘ ܡܠܟܐ ܪܒܐ ܘܡܪܐ ܕܟ݀ܠ. ܐܡܬܝ ܓܝܪ ܕܡܢ ܝܕ ܣܘܓܐܐ ܕܥܘܕܪ̈ܢܘܗܝ: ܠܘܬ ܡܝܬܪܘܬܐ ܠܐ ܡܬܐ݀ܡܢܝܢ. ܡܿܫܠܡ ܘܡܲܪܫܠ ܘܒܐܝ̈ܕܝ ܒܥܠܕܒ̈ܒܐ ܡܲܪܦܐ ܘܫ݀ܒܩ. ܕܗܕܐ ܕܝܢ ܗܟܢܐ ܐܝܬܝܗܿ܆ ܡܢ ܩܕ̈ܝܫܐ ܢܚܿܘܐ܇ ܐܡܬܝ ܓܝܪ ܕܐܡܿܪ ܢܒܝܐ ܥܠ ܐܘܪܫܠܡ܆ ܕܐܬܐ ܥܠܝܗܿ ܢܒܘܟܕܢܨܪ ܗܿܘ ܡܠܼܟ ܒܒܠ: ܘܕܐܫܠܡܗܿ ܡܪܝܐ ܒܐܝܕ̈ܝܗܿ. ܕܐܫܠܡ ܡܢ ܠܡܕܝܢܬܐ ܡܣܬ݀ܟܠܝܢܢ܆ ܕܗܘܼ ܓܿܡܪ ܠܐܒܿܕܢܐ ܕܡܕܝܢܬܐ܇ ܘܐܝܟ ܕܒܡܣܪܐ ܐܘ ܢܪܓܿܐ: ܬܫܡܫܬܐ ܗ݀ܘ ܒܝܫܐ ܢܒܘܟܕܢܨܪ ܠܡܕܝܢܬܐ ܥܿܘܠܬܐ ܠܐܒܕܢܐ ܗ݀ܘܐ ܗܘܐ. ܐܝܟܢ ܕܚܿܙܝܐ ܐܚܪܢܐ ܢ݀ܒܝ܇ ܕܐܢܐ ܡܕܝܠ ܐܢܐ ܘܐܢܐ ܡܝܬܐ ܐܢܐ ܠܗܘܢ܇ ܠܐ ܢܢܘܡܘܢ ܘܠܐ ܢܕܡܟܘܢܼ ܘܠܐ ܢܬܦܲܣܩ̈ܢ ܥܪ̈ܩܐ ܕܡ̈ܣܢܝܗܘܢ. ܥܠܝܟܝ ܒܪܬܝ ܥܡܝ: ܘܕܐܝܟ ܗܠܝܢ. ܟܕ ܝܗ݀ܒ ܕܢܪܢܐ ܒܕܐܝܟ ܗܠܝܢ܆ ܕܒܝܕ ܥܘܕܪܢܐ ܘܣܘܝܥܐ ܕܡܢ ܐܝܕܗ܇ ܗܝܼ ܡܕܝܢܬܐ ܡܬܲܬܚܕܐ ܗܘܬ. ܗܿܕܐ ܡܿܢ ܡܛܠ ܗܿܝ ܕܡܿܢܐ ܐܝܬܝܗܿ ܡܫܠܡܢܘܬܐ. ܡܪܫܠܢܘܬܐ ܕܝܢ ܐܝܬܝܗܿ܆ ܐܝܟ ܗܿܝ ܕܠܦܘܠܘܣ ܢܣܝܒܐ܇ ܟܕ ܡܛܠ ܪ̈ܫܝܥܐ ܕܐܢ̈ܫܐ ܐܡܿܪ܇ ܕܐܫܠܡ ܐܢܘܢ ܐܠܗܐ ܠܡܿܕܥܐ ܕܣܪܝܩܘܬܐ܇ ܘܐܫܠܡ ܐܢܘܢ ܐܠܗܐ ܠܟܐܒ̈ܐ ܕܨܥܪܐ܇ ܘܡܛܠ ܗܿܢܐ ܐܫܠܡ ܐܢܘܢ ܐܠܗܐ ܠܪ̈ܓܝܓܬܐ ܛܡ̈ܐܬܐ ܕܠܒܗܘܢ. ܒܗܠܝܢ ܗܿܝ ܕܐܫܠܡ ܚܠܦ ܗ݀ܝ ܕܐܪܫܠ ܫܒܼܩ ܘܣܼܡ. ܠܐ ܓܝܪ ܟܐܢܐ 101a ܕܢܘܕܐ܇ ܕܥܡ ܥܘܕܪܢܐ ܘܣܿܘܝܥܐ ܕܡܢܗ ܗܘܬ ܗ݀ܕܐ܇ ܐܝܟ ܫܘܘܕܥܐ ܩܕܡܝܐ ܕܡܛܠ ܡܫܠܡܢܘܬܐ. ܐܟܘܬܗܿ ܕܗ݀ܕܐ ܐܝܬܝܗܿ܇ ܘܗ݀ܝ ܕܪܒܐ ܕܥܒܪ̈ܝܐ ܡܘܫܐ ܐܡܼܪ ܡܛܠ ܩܿܛܘܠܐ ܘܕܠܐ ܟܡܲܢ ܠܗ. ܘܐܠܗܐ ܐܫܠܡܗ ܒܐܝܕܘ̈ܗܝ܇ ܥܿܒܸܕ ܠܟ ܐܬܪܐ ܕܢܥܪܘܩ ܠܬܡܢ. ܫܘܘܕܥܐ ܕܝܢ ܬܠܝܬܝܐ ܕܡܫܠܡܢܘܬܐ: ܗܕܐ ܓܝܪ ܚܕܐ ܚܣܝܪܐ ܠܢ ܠܥܘܩܒܐ܆ ܐܝܟ ܗ݀ܝ ܕܐܝܘܒ. ܐܡܼܪ ܓܝܪ ܐܠܗܐ ܠܘܬ ܡܪܡܝܢܐ܆ ܕܗܐ ܡܲܫܠܡ ܒܐܝ̈ܕܝܟ. ܘܗܿܢܐ ܫܘܘܕܥܐ܆ ܕܡܦܣܢܘܬܐ ܐܝܬܘܗܝ. ܦܪܝܫܐ ܓܝܪ ܐܝܟܢܐ ܕܡܢ ܠܥܠ ܚܘܝܢܢ܇ ܗܿܝ ܕܐܫܿܠܡ ܐܝܟ ܡܿܢ ܕܥܿܕܪ. ܡܢ ܗ݀ܝ ܕܐ݀ܫܠܡ ܐܝܟ ܡܢ ܕܐܪܫܠ ܘܠܐ ܫܿܘܙܒ܇ ܐܘ ܥܿܕܪ ܠܩܛܝܠܐ܇ ܘܗ݀ܝ ܬܘܒ ܕܐܪܫܠ ܐܝܟ ܡܿܢ ܕܐܦܿܣ ܕܗܿܕܐ ܬܗܸܘܐ. ܟܕ ܗ݀ܠܝܢ ܕܝܢ ܗܿܟܢܐ ܐܬܦܪ̈ܫܝ܆ ܢܦܼܢܐ ܘܠܘܿܬ ܒܿܥܬܐ ܕܩܕܝܡܿܐ ܣܝܡܐ܀ ܕܐܢܗܼܘ ܕܨܿܒܐ܇ ܒܥܒܕܐ ܥܿܢܬܐ ܕܩܛܘܠܐ. ܐܢܕܝܢ ܘܠܐ܆ ܠܡܢܐ ܡܪܫܠ ܕܗܿܕܐ ܬܗܸܘܐ. ܐܢܕܝܢ ܘܨܿܒܐ܆ ܠܡܢܐ ܒܝܕ ܓܙܪ ܕܝܢܐ ܕܡܢ ܗܪܟܐ ܐܘ ܡܢ ܠܗܠ ܠܗܿܢܐ ܬܒܿܥ. ܐܡܿܪܝܢܢ ܓܝܪ܆ ܕܠܦܘܬ ܨܒܼܝܢܐ ܡܬܬܕܝܢܐ ܗܝ ܣܥܘܪܘܬܐ. ܐܢܗܸܘ ܕܗܿܘ ܕܩ݀ܛܠ ܗܕܐ ܪܥܼܐ ܕܢܝܿܚܐ ܕܐܠܗܐ ܢܡܲܠܐ܆ ܡܫܬܒܚܢܐ ܗܘܼ ܒܡܿܢܬܐ ܗܿܝ ܕܣܿܓܝ ܪܒܐ. ܐܬܐ ܕܗܕܐ܆ ܛܘܒܢܐ ܫܡܘܐܝܠ܇ ܗܿܘ ܕܠܐ ܠܓ ܥܘܿܠܐ ܦܿܫܚ܇ ܘܐܠܝܐ ܬܘܒ܇ ܕܠܢܒ̈ܝܝ ܕܓܠܘܬܐ ܓܲܪܣܝ܇ ܘܒܝܕ ܛܢܢܐ ܕܣܟܝܢܗ܇ ܛܠܩ ܐܢܘܢ. ܗܿܘ ܕܕܒܚܗ ܟܗܿܢܝ ܒܟܠ ܡܕܡ ܐܝܬܘܗܝ ܗܘܐ܆ ܘܒܗ ܣܓܝܐܝܬ ܡܬܬܬܢܝܚ ܗܘܐ ܗܘܼ ܡܪܝܐ. ܠܟܘܡܪ̈ܐ ܓܝܪ ܩ̈ܛܠܝ ܢܦܫ̈ܬܐ ܓܲܪܣ܆ ܘܡܢ ܗܪܟܐ܆ ܐܦ ܐܓܪܐ ܕܨܒܝܢܗ ܘܕܢܟܣܬܗ ܡܲܣܒܪܝܢܢ ܕܢܿܣܒ. ܐܢܕܝܢ ܨܼܒܝܢܐ ܚܠܫܐ ܕܗ݀ܘ ܕܩ݀ܛܠ ܗܿܕܐ ܪܥܸܐ܇ ܕܠܟܘܪܐ ܕܚܡܬܗ ܢܫܲܗܐ: ܘܡܢ ܗܪܟܐ: ܥܠ ܐܒܕܢܐ ܕܣܟܝܢܐ ܢܣܬܪܗܒ܆ ܘܠܐܝܕ̈ܘܗܝ ܢܛܝܦ ܒܿܠܐ ܢܡܘܣܝܘܬܐ ܕܡܢ ܩܛܠܐ܆ ܒܗܿܢܐ ܡܢ܆ ܠܐ ܣܟ ܨ݀ܒܐ ܐܘ ܡܬܪܥܐ܇ ܗܿܘ ܪܚܿܡ ܒܢܝܢ̈ܫܐ ܡܪܝܐ. ܒܪܡ ܡܪܫܠ ܘܫܒܿܩ܆ ܘܠܐ ܟܿܠܐ ܕܗܿܕܐ ܬܗܘܐ. ܐܘ ܟܕ ܓܿܙܡܿ ܠܒܝܫܘܬܐ ܥܡ ܚ̈ܝܐ. ܐܟܝܢܐ ܕܒܚ̈ܛܝܐ܆ ܐܘ ܟܕ ܡܟܠܠ ܠܡܝܬܪܘܬܐ ܘܡܪܡܪܡ܇ ܐܟܙܢܐ ܕܒܙܕܝ̈ܩܐ. ܘܡܸܨܛܒܐ [ܡܿـ]ـܢ ܒܗ݀ܘ ܕܡܬܩܸܛܠ. ܠܐ ܕܝܢ ܣܟ܇ ܡܬܪܥܐ ܒܗ݀ܘ 101b ܕܩܿܛܠ. ܘܟܕ ܬܪ̈ܝܢ ܦܪ̈ܨܘܦܐ ܐܝܬܝܗܘܢ: ܚܕ ܡܿܢ ܗ݀ܘ ܕܥܿܒܕ: ܐܚܪܢܐ ܕܝܢ ܕܗܿܘ ܕܚܐ݀ܫ܆ ܒܗܿܘ ܡܿܢ ܕܥܒܼܕ ܪܘܪܒܐܝܬ ܢܦܚ ܗܿܘ ܟܐܢܐ. ܒܐܝܢܐ ܕܝܢ ܕܚܐ݀ܫ܆ ܪܒܸܬ ܡܬܩܝܡ ܨܒܝܢܗ. ܕܗ݀ܢܘܢ ܕܝܢ ܕܩܿܛܠܝܢ: ܠܘ ܗܿܕܐ ܐܝܬ ܠܗܘܢ ܒܠܒܐ܇ ܕܢܢܝܚܘܢ ܠܗ݀ܘ ܚܲܝ ܥ̈ܠܡܐ܆ ܢܡܘܣܐ ܢܩܝܡ ܒܗܿܝ ܕܐܡܿܪ܇ ܕܠܐ ܬܓܘܪ ܘܠܐ ܬܩܛܘܠ܆ ܙܡܢ ܝܕ ܐܢܫ̈ܐ ܕܡܸܗ ܢܬܐܫܕ. ܐܟܚܕܐ ܕܝܢ܆ ܘܐܝܠܝܢ ܕܐܫܕܘ ܠܕܡܿܐ ܙܟܝܐ. ܗܿܠܝܢ ܕܝܢ ܡܢ ܝܕ ܛܪܘܢܐ ܐܬܟܲܗܢܘ܆ ܥܠ ܕܠܐ ܐܥܿܛܪ: ܘܠܐ ܠܓܠܝܦܐ ܠܘܩܒܠ ܡܪܝܐ ܕܚܸܠܘ. ܘܡܪܝܐ ܠܩܘܪܒܢܐ ܕܡܗܘܢ: ܡܩܒܠܐ ܚܘܝܗ܆ ܘܟܕ ܐܝܕܗ ܕܟܗܿܢܐ ܡܲܠܝܐ ܛܘܘܫܐ. ܘܡܢ ܗܪܟܐ ܦܘܪ̈ܥܢܐ ܕܪ̈ܕܘܼܦܐ܆ ܠܘܩܒܠ ܨܒܝܢܗܘܢ ܡܬܡܿܫܚ. ܢܗܘ̈ܝܢ ܠܡ ܗܠܝܢ܆ ܡܛܠ ܐܝܠܝܢ ܕܠܕܡܐ ܙܟܝܿܐ ܐܫܿܕܝܢ. ܡܢܐ ܕܝܢ ܬܐܡܼܪ. ܡܛܠ ܐܝܠܝܢ ܕܩܸܛܠܘ ܠܩ̈ܛܘܠܐ܇ ܘܠܐܝܠܝܢ ܕܒܐܕ̈ܫܐ ܐܚܪ̈ܢܐ ܕܥܘܠܘܬܐ ܐܬܝܕܥܘ. ܠܡܐ ܐܦ ܗܿܠܝܢ: ܠܘ ܢܝܚܐ ܕܐܠܗܐ ܡܠܝܘ܀ ܕܢܝܿܚܐ ܟܝܿܬ ܕܐܠܗܐ ܡܿܠܝܘ܆ ܐܡܿܪ ܐܢܐ ܐܦ ܐܢܐ ܘܠܐ ܟ݀ܦܪ ܐܢܐ. ܒܪܡ ܠܘ ܟܕ ܗܿܢܘ ܠܗܘܢ ܢܝܼܫܐ. ܐܬܿܐ ܕܗܕܐ܇ ܕܐܢܫ ܡܢ ܡ̈ܠܟܐ ܕܒ̈ܢܝ ܝܘܡܢ ܠܩܪܒܐ ܥܠ: ܘܐܢܫ ܡܿܢ ܒܥܠܕܒܒ̈ܘܗܝ ܐܣܬܩܒܠ܆ ܘܪܡܚܗ. ܘܒܩܘܢܛܪܐ ܐܪܡܝܗ܇ ܐܝܟ ܕܡܢ ܣܩܘܒܠܐ ܕܝܢ܆ ܓܕܫܸܬ ܕܒܕܘܟܬ ܫܘܚܢܐ ܕܐܝܬ ܗܘܐ ܠܗ ܢܛܥܼܢ. ܘܟܕ ܗ݀ܢܐ ܢܬܦܼܬܩ܆ ܐܫܟܚ ܦܘܿܠܛܐ ܕܡܢ ܝܕ ܟܐܒܐ ܗܼܘ ܡܠܟܐ. ܘܗ݀ܘ ܡܿܢ ܚܐܦܐ ܐܚܿܝܕ ܗܘܐ܆ ܠܡܗܪܘ ܘܠܡܘܒܕܘ ܠܓܒܪܐ ܡܠܟܐ. ܗ݀ܢܐ ܕܝܢ ܚܲܫ܆ ܗܘܡܿܐ ܕܟܘܠܢܐܝܬ ܪܥܼܐ ܗܘܐ. ܘܟܕ ܥܒܝܕܬܐ ܚܕܐ ܗܝ: ܡܢ ܩܨ ܚܐܦܐ ܕܨܒܝܢܐ܆ ܗܿܘ ܡܢ ܩܿܛܘܠܐ. ܗܿܢܐ ܕܝܢ ܚܠܝܡܐ ܐܬܝܼܕܥ. ܕܡܣܒܗܐ ܠܗܿܕܐ ܐܦ ܡܛܠ ܐܢܫ ܚܕܘܪܐ܇ ܕܠܘ ܣܓܝ ܠܢ ܒܙܒܢܐ ܝܠܦܼܢܢ ܕܗܘܸܬ݀ ܗ݀ܢܐ ܓܝܪ܆ ܟܡܿܗ ܒܚܙܝܐ ܐܝܬܘܗܝ ܗܘܐ. ܘܐܢܫ ܓܕܘܕܐ܇ ܟܕ ܒܐܣܦܝܪܐ ܕܡܢ ܡܫ̈ܟܐ ܡ̈ܝܬܐ ܡܬܩܢܐ܇ ܒܓܘ ܒܐܪ̈ܝܬܐ ܕܡܕܝܢܬܐ ܡܫܬܥܐ ܗܘܐ܆ ܡܚܐ ܥܙܝܙܐܝܬ ܥܠ ܒܒ̈ܬܗ܆ ܟܕ ܣܲܩܘܒܠܐܝܬ ܘܐܝܟ ܕܡܢ ܟܘܝܢܐ ܗܘ ܓܒܪܐ܇ ܠܘܩܒܠ ܚܐܦܐ ܕܐܣܦܝܪܐ ܐܫܬܟܚ ܪܕܐ܆ ܘܕܡܐ ܡܢ ܥܝܢܘܗ̈ܝ ܫܘܪ܆ ܘܢܘܗܪܐ ܠܚܙ̈ܝܬܗ ܪܓܠ. ܘܥܠܝܡܐ ܐܣܝܐ ܘܡܝܬܐ ܢܘܗܪܐ ܐܬܚܼܘܝ܆ ܘܟܕ ܠܐ 102a ܨ݀ܒܐ. ܘܐܦ ܗܪܟܐ: ܟܕ ܣܥܘܪܘܬܐ ܚܕܢܝܬܐ ܗܝ. ܛܒ ܣܕܝܩ ܘܦܠܝܓ ܪܥܝܢܐ ܕܬܪ̈ܝܗܘܢ܇ ܕܗ݀ܘ ܟܝܬ ܕܥܒܼܕ ܘܕܗܿܘ ܕܚܫ. ܪܥܼܐ ܗܘܐ ܓܝܪ ܝ݀ܢܣܩܐ ܗ݀ܘ ܠܡܿܨܠܚܘ ܠܘܩܒܠ ܒܢ̈ܝ ܐܩܡ̈ܐ ܕܝܠܗ܆ ܟܕ ܠܐ ܣܦܝܪܐ ܠܒܪ ܡܢ ܬܚܘ̈ܡܐ ܡܿܥܒܪ ܣܿܐܡ܆ ܘܠܘ ܕܡܥܝܢܐ ܕܢܘܗܪܐ ܢܲܪܕܐ܇ ܡܢ ܟܘ̈ܐ ܦܬܝܚ̈ܬܐ ܘܕܠܐ ܙܗܪܐ. ܗܿܘ ܕܝܢ ܡܫܕܪܐ ܗܘ܆ ܠܟܒܪ ܕܪܕܐ ܗܘܐ ܢܡܿܢܥ܆ ܘܡܢ ܡܚܘܬܐ ܠܐ ܢܬܥܲܕܪ. ܕܐܝܟ ܗܿܢܐ ܡܕܡ ܐܝܬܝܗܿ܆ ܘܦ ܣܥܘܪܘܬܐ ܡܣܠܝܬܐ܇ ܕܡܢ ܝܕ ܩܿܛܘܠܐ ܠܩܛܠܝܐ ܡܬܬܡܿܪܚܐ. ܟܕ ܓܝܪ܇ ܗܝܼ ܣܥܘܪܘܬܐ ܚܕܐ ܗܝ ܡܕܡ. ܐܬܒܲܝܢ ܠܝ ܐܝܬ܇ ܟܡܐ ܪܚܝܩ ܘܕܚܝܩ ܨܒܼܝܢܐ ܕܐܠܗܐ ܘܕܗܿܘ ܕܩܿܛܠ. ܗܿܢܐ ܡܿܢ ܓܝܪ ܗܿܢܐ ܗܘܸܐ ܢܝܫܐ. ܕܟܕ ܠܗܿܘ ܕܒܚ܆ ܩܠܝܠ ܢܬܢܲܦܫ ܡܢ ܥܘܙܐ ܕܚܡܬܗ܇ ܐܝܟܢܐ ܕܡܢ ܠܥܠ ܐܥܗܕܢܢ܇ ܕܐܠܗܐ ܕܝܢ܆ ܕܟܕ ܗ݀ܢܐ ܡܬܼܢܲܦܩ ܡܢ ܚ̈ܝܐ ܗܿܘ ܒܪܝܫܐ܆ ܗܢܝܼܢܐ ܡܕܡ ܢܥܼܦܐ. ܘܡܢ ܗܪܟܐ ܐܘ ܡܲܫܠܡ܆ ܐܘ ܡܲܪܫܠ܆ ܐܘ ܡܲܦܣ ܕܗܕܐ ܬܬܼܓܡܼܪ. ܘܐܦ ܗܘܼ ܩ݀ܛܘܠܐ ܠܐ ܚ݀ܟܡ ܗܼܘ܇ ܕܠܘܩܒܠ ܡܪܝܐ ܐܚܝܕ ܟܠ ܐܪܝܡ ܨܘܪܗ܇ ܟܕ ܡܢ ܟܝܬ ܕܝܢܼܐ ܕܬܐܪܬܐ ܡܙܕܟܐ܆ ܘܡܛܠ ܗ݀ܕܐ ܡܢ ܟ̈ܠܗܝܢ ܗܠܝܢ.. ܗܟܝܠ ܕܝܢ: ܥܿܕܪܐ ܠܢ ܕܢܚܼܙܐ ܒܡܠܬܐ܇ ܕܟܡܐ ܘܐܝܠܝܢ ܐܢܘܢ ܙܢ̈ܝܐ܇ ܕܛܘ̈ܠܩܐ ܕܚ̈ܝܐ ܕܒܢܝ̈ܢܫܐ. ܘܐܢܗܸܘ ܕܒܥܠܼܕ ܦܘܩܕܢܐ܇ ܕܗ݀ܘ ܕܠܢܦܿܫܐ ܥܡ ܦܓܪܐ ܫܪܪ܇ ܡܚܲܠܦ ܠܚ̈ܝܐ ܗܼܘ ܒܪܝܫܐ. ܘܐܝܟܢܐ ܕܒܐܘܪܚܐ ܬܪܕܐ ܠܢ ܡܠܬܐ ܘܬܫܬܘܫܛ܆ ܠܘܩܕܡ ܥܠ ܛܿܘܿܠܩܐ ܕܚ̈ܝܐ ܬܦܸܢܐ ܠܢ ܗܼܝ ܡܠܬܐ܀ ܛܘܿܠܿܩܐ ܗܟܝܠ ܕܚ̈ܝܐ ܕܒܢܝ̈ܢܫܐ܆ ܡܢܗ ܡܿܢ ܡܼܢ ܓܙܪ ܕܝܢܼܐ ܕܐܠܗܐ ܗܘܐ. ܡܢܗ ܕܝܢ ܡܢ ܟܝܢܐ. ܐܟܚܕܐ ܕܝܢ ܘܡܢ ܚܐܪܘܬܐ ܘܡܢ ܟܘܝܢܐ. ܘܗ݀ܘ ܟܝܬ ܕܓܙܪ ܕܝܢܐ܆ ܡܢܗ ܡܿܢ ܕܠܐ ܥܠܬܐ. ܘܡܗ ܕܝܢ ܥܡ ܥܠܼܬܐ ܗ݀ܘܐ. ܘܗ݀ܘ ܕܥܡ ܥܠܬܐ܆ ܡܢܗ ܡܢ ܒܡܠܬܐ ܕܝܨܝܦܘܬܐ ܘܕܡܿܫܠܡܢܘܬܐ. ܡܢܗ ܕܝܢ܆ ܠܗܿܝ ܕܡܪܫܠܢܘܬܐ ܘܕܡܫܬܒܩܢܘܬܐ. ܕܠܐ ܥܠܼܬܐ ܡܿܢ ܗܟܝܠ: ܠܛܘ̈ܠܩܐ ܕܚ̈ܝܐ ܐܡܪܝܢܢ: ܠܐܝܠܝܢ ܕܒܝܕ ܡ̈ܠܐܟܐ ܥܙܝܪ̈ܐ ܘܕܪ̈ܚܡܝܢ ܠܝܬ ܠܗܘܢ ܡܫܬܠܡܝܢ ܕܥܡ ܚܪܝܦܘܬܐ ܘܩܛܝܪܐ܇ ܣܕܩܿܝܢ ܘܦܿܪܫܝܢ 102b ܠܡܙܘܓܘܬܐ ܕܢܦܫܐ ܘܕܦܓܪܐ. ܐܝܟ ܗ݀ܢܘܢ ܕܟܕ ܡܿܕܓܠܝܢ܇ ܐܘ ܓܥܼܝܢ ܐܘ ܡܿܓܣܝܢ܇ ܐܘ ܐܡܝܨ ܒܣܝܩܪܝܛܘܢ ܡܬܕܒܪܝܢ ܕܥܡ ܥܠܬܐ ܕܝܢ ܘܝ݀ܨܝܦܘܬܐ ܐܡܿܪܝܢܢ܆ ܐܝܟܢܐ ܕܠܡܘ̈ܬܐ ܓ̈ܘܢܝܐ ܕܠܣܓ̈ܝܐܐ ܡܢ ܒܗܘܢ ܥܿܛܐ ܗ݀ܘ ܛܿܒܐ܇ ܠܚܕܚܕ̈ܢܐ ܕܝܢ ܡܲܣܓܐ ܘܡܢܛܪ ܗܿܘ ܟܐܢܐ. ܕܐܝܟ ܗܠܝܢ ܐܝܬܝܗܘܢ ܙܘܢܙ̈ܠܐ ܘܢܘ̈ܕܐ ܕܐܪܥܐ܇ ܘܚܘ̈ܒܠܐ ܐܐܪ̈ܝܐ܇ ܕܠܚܘܕܪܐ ܕܣܝܘ̈ܩܐ ܥܿܛܝܢ܇ ܘܫܢ̈ܕܐ ܘܫ̈ܦܥܐ ܕܢܘܪܐ܇ ܗ݀ܢܘܢ ܕܒܙܒܢ ܡܢ ܐܬܝܪ܇ ܒܙܒܢ ܕܝܢ ܬܗܘ̈ܡܐ ܓܿܣܝܢ܇ ܘܐܝܬ ܐܡܬܝ ܕܒ̈ܥܢܢܐ ܗܘ̈ܝܢ. ܗܿܠܝܢ ܓܝܪ ܘܕܐܝܟ ܗܠܝܢ܆ ܥܡ ܒܛܝܠܘܬܐ ܥܠ ܥܿܠܡܐ ܡܬܬܝܬܝܢ܇ ܡܢ ܗܿܘ ܐܚܝܿܕ ܣܘ̈ܟܐ ܕܗܢܐ܇ ܟܕ ܕܘܟܿܝܐ ܣܥܿܪ ܠܒܝܬܐ ܕܛܿܡܐܘܗܝ ܕܝܪ̈ܘܗܝ. ܐܝܬ ܠܟ ܬܚܘ̈ܝܬܐ ܕܗܠܝܢ. ܘܠܘܬ ܟܬܒܿܐ܆ ܘܠܘܬ ܣܝܒܘܬܐ ܕܡܥܗܕܐ ܥܬܝ̈ܩܬܐ. ܘܛܟ ܐܦ ܒܪܓܫܐ ܚܿܙܘܝܐ. ܐܝܠܝܢ ܕܝܢ ܬܘܒ ܕܣܘܦܢܐ ܕܡܢ ܚ̈ܝܐ ܡܩܒܠܝܢ: ܒܙܢܐ ܕܡܪܫܠܢܘܬܐ ܐܝܬܝܗܘܢ܆ ܐܝܠܝܢ ܕܡܢ ܕܝ̈ܘܐ ܡܪܝܪ̈ܐ ܡܬܬܪܥܬܝܢ ܘܡܬܚܲܢܩܝܢ܇ ܐܘ ܡܢ ܝܕ ܣܿܢܐܐ ܥܿܘܠܐܝܬ ܡܬܩܲܛܠܝܢ܇ ܐܘ ܡܢ ܚܝܘ̈ܬܐ ܐܟܿܠܬ ܚ̈ܝܐ ܣܝܿܦܝܢ܇ ܐܘ ܡܢ ܪ̈ܫܦܬܐ ܘܪܡܸܝܬ ܡܪܬܐ ܡܬܢܼܟܬܝܢ ܘܡܬܥܲܣܩܝܢ܇ ܐܘ ܡܢ ܥܣ̈ܒܐ ܡܡ̈ܝܬܢܐ ܟܕ ܡܬܬܪܣܝܢ ܡܬܛܿܠܩܝܢ. ܗܠܝܢ ܓܝܪ: ܘܐܝܠܝܢ ܕܕܡܿܝܢ ܠܗܘܢ ܆ܒܒܛܝܠܘܬܐ ܡܢ ܘܥܘܕܪܢܐ ܕܡܡܠܟ ܥܠ ܥܿܠܡܐ ܠܐ ܥܘܕ ܗܘܼܝܢ. ܟܕ ܕܝܢ ܡܬܥܿܝܢ ܘܗܘܼܐ ܡܿܪܫܠ ܘܫܒܿܩ ܕܗ݀ܕܐ ܬܗܸܘܐ܆ ܘܠܐ ܟܿܠܐ. ܝܕܝܥܐ ܗܝ ܕܝܢ܆ ܕܟܕ ܠܥܘܪܕܢܐ ܕܗܘܼܐ ܡܢ ܫܘܼܢܿܝܐ ܩ݀ܕܡ ܕܐܩܿ܇ ܛܠܼܠ ܐܝܕܗ ܘܣܬܪ ܝܡܝܢܗ ܫܿܩܠ܇ ܡܢ ܚ̈ܝܐ ܕܡܬܛܿܦܛܦܝܢ ܘܡܬܩܲܦܣܝܢ. ܠܗܿܝ ܕܐܠܘܠܐ ܫܩܼܠ܆ ܘܠܐ ܕܝܘܐ ܘܠܐ ܐܪܝܐ. ܘܠܐ ܣܢܐܐ ܘܠܐ ܬܲܢܝܢܐ. ܘܠܐ ܣܲܡܐ ܕܡܲܗܪܝܢ ܗܘܘ܇ ܡܢ ܚ̈ܝܐ ܠܐܢܫ ܕܚܿܩܿܝܢ ܗܘܘ. ܗܠܝܢ܆ ܡܛܠ ܛܘ̈ܠܩܐ ܕܚ̈ܝܐ܇ ܗ݀ܘ ܕܐܝܟ ܕܒܓܙܪ ܕܝܢܐ ܗܿܘܐ ܡܠܬܐ ܦܬܚܬ. ܘܐܦ ܗ݀ܘ ܕܝܢ ܕܐܝܟ ܟܝܢܐ܆ ܠܐܕܫ̈ܐ ܐܚܪ̈ܢܐ ܡܬܚܘܩ. ܦܪܝܫܐܝܬ ܕܝܢ ܗܠܝܢ ܐܝܬܝܗܘܢ ܬܪ̈ܝܢ. ܐܘ ܓܝܪ ܡܛܠ ܠܐ ܡܛܟܣܘܬܐ ܐܢܫ ܥܿܢܕ܆ ܐܘ ܡܛܠ ܬܚܘܒܘܬܐ ܘܡܚܝܠܘܬܐ. ܠܐ ܡܛܟܣܘܬܐ ܕܝܢ ܗܿܕܐ܆ ܒܿܬܪܒܝܬܐ ܘܥܠܘܒܝܐ ܕܚܕ ܡܢ ܐܣܛܘ̈[] 103a ܕܒܦܓܪܐ ܫ݀ܘܚܐ. ܐܘ ܟܕ ܕܡܐ ܐܬܬܲܪܬܲܚ܇ ܘܡܢ ܣܓܝܐܘܬܐ ܚܿܢܩ܇ ܐܘ ܟܕ ܡܸܪܬܐ ܗ݀ܝ ܢܘܪܢܝܬܐ ܣܓܸܝܬ܇ ܘܒܚܘܡܐ ܠܦܓܪܐ ܫܲܢܩܸܬ܇ ܘܠܢܦܫܐ ܡܢ ܗܪܟܐ ܛܪܬ݀ ܐܘ ܟܕ ܐܣܛܘܟܣܐ ܗܿܘ ܡܪܝܪܐ ܐܫܬܪܬܚ܇ ܘܒܙܝܼܡܝܲܐ ܐܚܪܬܐ ܐܪ[] ܠܚ̈ܝܐ. ܘܒܐܚܪ̈ܢܝܬܐ ܕܐܝܟ ܗܠܝܢ܇ ܐܝܠܝܢ ܕܒܥܠܬܐ ܕܝܠܗܝܢ܇ ܒܪܢܫܐ ܠܚ̈ܝܐ ܡܚܲܠܦ. ܗܕܐ ܓܝܪ ܠܟܠ ܩܿܘ̈ܡܢ ܘܠܟܠ ܚܝ̈ܠܝܢ܇ ܟܕ ܡܬܬܝܬܝܐ ܠܐܒܿܕܢܐ ܕܚ̈ܝܐ ܥܿܒܕܐ. ܡܛܠ ܕܝܢ ܬܲܚܘܒܘܬܐ ܘܚܲܫܠܘܬܐ ܐܬܐ ܩܸܨܐ܆ ܐܟܙܢܐ ܕܠܣ̈ܒܐ. ܗܠ݀ܝܢ ܓܝܪ: ܘܐܦܿܢ ܡܢ ܠܐ ܡܛܟܿܣܘܬܐ ܡܡܿܕܝܢ܆ ܒܪܡ ܡܛܠ ܕܪ̈ܓܫܐ ܡܛܝܘ ܠܬܚܪܫܘ: ܘܚܝܠܐ ܐܬܢܥܓ ܡܢ ܟܕܘ ܠܡܚܝܠܘܬܐ: ܘܐܘܪ̈ܓܢܐ ܕܦܓܪܐ ܐܬܪ̈ܦܝܘ: ܠܒܝܬ ܣܢܓܪ ܫܢ̈ܘܗܝ ܕܡܘܬܐ ܥܐܠܿܝܢ: ܒܢܝܚ ܘܒܙܒܢܐ ܟܐܢܐ܇ ܐܝܟ ܫܒܠܐ ܕܡܬܓܲܡܡܐ ܒܙܒܢܗܿ. ܐܘ ܟܪܡܐ ܪܚܝܡܐ ܕܡܬܩܼܛܦ ܒܝܘܡܗ. ܘܗܿܢܐ ܡܘܬܐ ܢܝܼܚܐ ܒܿܥܝܕܐ ܡܟܢܝܢܢ ܐܘ ܣܓ̈ܝܐܐ. ܘܗܘܼ ܝܬܝܪ ܕܡܐ܇ ܕܡܘܿܬܐ ܕܟܝܢܐ ܢܬܐܡܪ. ܡܛܠ ܟܝܬ ܕܡܲܠܝ ܝܘܿܒܠܐ ܕܚܝܘ̈ܗܝ ܗܘܼ ܒܪܢܫܐ܆ ܘܥܠܬܐ ܐܚܪܬܐ ܠܐ ܐܘܕܝܬ ܘܫܿܚܬܗ܆ ܗܿܠܝܢ ܕܝܢ ܐܚܪ̈ܢܐ܇ ܡܛܠ ܕܒܥ̈ܠܬܐ ܡܕܡ ܥܙܝܠܝܢ: ܡܬܥܲܪܩܝܢ ܘܡܲܪܝܪ̈ܝܢ܆ ܘܠܘ ܒܟܠ ܠܟܝܢܐ ܩܪܝܒܝܢ. ܡܘܬܐ ܕܝܢ ܕܣ̈ܒܐ ܡܪܢܝܐ ܗܘ ܕܟܝܢܐ܆ ܐܝܟ ܡܫܘܚܬܐ ܕܦܣܝܩܐ ܠܚܝܘܬܐ܇ ܕܗ݀ܝ ܡܿܢ ܬܠܬܡܐܐ ܬܐܚܐ܇ ܗ݀ܝ ܕܝܢ ܬܠܬܝܢ ܘܐܚܪܬܐ ܬܠܬ܇ ܐܘ ܕܩܪ̈ܝܒܢ ܠܗܠܝܢ ܐܘ ܕܪ̈ܚܝܩܢ. ܘܕܡ ܢܐܡܼܪ ܐܢܫ: ܕܐܦ ܗ݀ܝ ܕܗܟܢܐ ܢܥܝܕܘܢ ܣ̈ܒܐ܆ ܠܐ ܡܛܟܣܘܬܐ ܡܕܡ ܐܝܬܝܗܿ ܐܦ ܗܼܝ. ܡܛܠ ܬܪܒܝܬܐ ܘܪܘܡܐ ܕܦܬܓܡܐ. ܐܠܐ ܠܘ ܟܠܗܘܢ܇ ܗܘ ܗܿܢܐ ܢܝܼܫܐ ܥܿܕܐ ܠܥܠܝܗܘܢܼ. ܚܙܝܿܢܢ ܓܝܪ ܠܣ̈ܓܝܐܐ܆ ܕܒܫܬܩܐ ܘܫܠܝܐ ܡܝܬܘ. ܟܕ ܟܘܪܗܢ ܘܟܼܐܒ܆ ܠܐ ܥܕܐ ܥܠܝܗܘܢ. ܘܠܐ ܗܼܘ ܦܬܓܡܐ ܐܝܟ ܥܿܝܕܐ܇ ܫܓܫ ܘܗܪܪ ܠܝܫ̈ܛܐ ܘܠܢܚܝܪ̈ܬܐ ܕܝܠܗܘܢܼ ܐܠܐ ܕܢܫܼܘ ܘܲܪܒܚܘ܆ ܐܝܟ ܒܝܬܐ ܕܒܠܝ܇ ܘܕܠܐ ܒܘܥ̈ܩܐ ܘܕܘܚ̈ܝܐ ܢܦܠ܆ ܘܥܠ ܡܢ ܙܢܝ̈ܐ ܕܡܘܬܐ ܗ݀ܘ ܕܐܝܟ ܕܒܓܙܪ ܕܝܢܐ ܘܗ݀ܘ ܕܐܝܟ ܟܝܢܐ ܗܟܢܐ. ܫܲܪܝܟܐ ܠܢ ܕܝܢ ܕܠܓܠܝܐ ܢܝܿܬܐ܆ ܐܦ ܙܘܓܐ ܗ݀ܘ ܐܚܪܝܐ܇ ܕܗܿܢܘܢ ܐܝܠܝܢ ܕܡܢ ܩܸܝܢ ܚܐܪܘܬܐ ܡܬܝܠܕ ܠܗܘܢ ܫܿܪܝܐ. ܐܘ ܕܐܝܟ ܕܡܢ 103b ܣܩܘܒܠܐ ܘܟܘܝܢܐ. ܘܗܿܢܘܢ ܡܢ ܕܡܢ ܚܐܪܘܬܐ ܘܡܫܠܛܘܬܐ ܫܿܪܝܐ ܠܗܘܢ ܢܩܿܦ܆ ܬܪܝܢܐܝܬ ܗ݀ܘܝܢ. ܩܕܡ̈ܝܐ ܐܟܙܢܐ ܕܒܩܒܪ̈ܐ. ܕܒܗܘܢܿ ܣ̈ܓܝܐܐ ܡܫܬܕܪܝܢ ܠܫܝܘܠ܇ ܡܢ ܚ̈ܠܫܐ ܘܡܢ ܢܚܫܝܪ̈ܬܢܐ. ܐܝܟܢܐ ܕܥܠ ܩܪ̈ܒܐ ܕܐܝܠܝܘܢ ܘܕܐܘܪܫܠܡ܇ ܘܕܡ̈ܠܟܘܬܐ ܐܚܪ̈ܢܝܬܐ ܐ݀ܫܪܝܢ ܕܗܘܸܬ݀ ܠܗܠܝܢ ܓܝܪ ܩܪ̈ܒܐ܆ ܚܐܪܘܬܐ ܕܨܒܝܢܐ ܩܵܪܝܐ ܘܡܲܩܗܠܐ: ܘܡܕܝܠܐ ܘܠܡܘܬܐ ܥܿܒܕܐ. ܬܪ̈ܝܢܐ ܕܝܢ܆ ܐܟܙܢܐ ܕܒܒܝܬ ܐܣܛܪܢܝܐ ܘ[]ܪ̈ܘܬܐ. ܗܐ ܓܝܪ ܝܢܣ̈ܩܐ ܒܕܘܟ ܟܕ ܒܚܡܪܐ ܐܬܲܬܪܬܲܚܘ: ܡܛܠ ܕܐܣܓܝܘ ܘܕܠܐ ܢܡܘܣ ܢܲܩܝܘ܆ ܠܚ̈ܕܕܐ ܫܝܿܓܘ ܒܣܟ̈ܝܢܐ. ܘܐܚܪ̈ܢܐ ܟܕ ܐܓܼܪܘ ܠܥܠܝܡܬܐ܇ ܒܬܪ ܕܡܢ ܚܡܪܐ ܐܬܒܘܪܪܘ: ܘܚܡܬܐ ܒܚܡܪܐ ܐܬܚܸܠܛܬ܆ ܐܓܪܐ ܕܘܝܐ ܐܟܿܝܠܘ ܠܗܿ܆ ܕܒܚܬܐ ܕܡܢ ܣܟܝܢܐ. ܗܿܠܝܢ ܣܥܸܪܬ ܚܐܪܘܬܐ ܟܕ ܒܫܘܛܠܢܗܿ ܡܫܬܛܿܝܐ. ܘܙܢܐ ܕܝܢ ܐܚܪܢܐ ܘܬܠܝܬܝܐ܇ ܕܡܘܬܐ ܗ݀ܘ ܕܡܢ ܚܐܪܘܬܐ ܐܬܥܿܬܕ܆ ܐܒܕܢܐ ܕܓܢ̈ܒܐ ܘܕܠܣ̈ܛܝܐ܇ ܕܗܿܢܘܢ ܡܢ ܟܕ ܐܬܬܨܝܕܘ ܒܦܘܠܫܬܐ܆ ܣܦܣܪܐ ܕܕܝܿܢܐ ܕܒܚܸܬ ܐܢܘܢ. ܗܿܠܝܢ ܕܝܢ ܟܕ ܒܣܝܥܬܐ ܕܓܒܪ̈ܐ ܬܓܪ̈ܐ ܐܪܥܼܘ܇ ܘܥܠ ܚ̈ܝܐ ܐ݀ܫܝܼܚܘ ܬܓܪ̈ܐ܇ ܥܠ ܠܣ̈ܛܝܐ ܐܬܚܿܝܠܘ܇ ܘܒܚܕܐ ܕܫܝܘܠ ܐܥܡܪܘ ܐܢܘܢܼ ܘܕܡܢ ܚܐܪܘܬܐ ܗܟܢܐ. ܕܡܢ ܣܩܿܘܒܠܐ ܕܝܢ ܘܟܘܝܢܐ܆ ܐܦ ܗܿܢܘܢ ܣ̈ܓܝܐܝܝ ܫܘܓܢܝܐ ܐܢܘܢ ܒܙܢܐ ܩܕܡܝܐ܆ ܐܝܟ ܡܐ ܕܚܼܙܝܢܢ ܕܠܘܬ ܐܢܫ̈ܝܢ ܗܘܐ܇ ܟܕ ܩܠܼܥܐ ܠܘܩܒܠ ܦܪܚܬܐ ܢܬܪܘܨ܇ ܐܘ ܟܿܫܛܐ ܠܘܬ ܢܝܫܐ ܐܘ ܠܘܬ ܚܝܘܬܐ ܗܠܟܬܐ܇ ܘܢܣܬܩܒܠ ܐܢܫ ܒܫܒܝܠܐ ܕܟܐܦܐ ܐܘ ܕܓܐܪܐ܇ ܘܢܼܨܓܠܦ ܐܘ ܢܫܬܢܓ܇ ܘܣܘ̈ܦܝܗ ܡܢ ܗܕܐ ܢܗܸܘܐ. ܐܟܚܕܐ ܕܝܢ܆ ܐܢ ܐܢܫ ܟܕ ܪܕܐ ܡܢ ܚܐܦܐ ܕܣܘܣܝܐ ܢ݀ܬܼܪܡܐ܇ ܘܥܡ ܡܲܛܪܘܦܝܬܗ ܚ̈ܝܘܗܝ ܢܬܪܚܩܘܢ. ܐܚܪܢܝܐܝܬ ܕܝܢ܆ ܟܕ ܢܣܿܓܐ ܐܢܫ ܢܢܿܩܐ ܥܬܝܩܐ ܘܢܬܬܩܠ܇ ܘܡܢ ܚܝ̈ܐ ܢܫܬܩܠ. ܐܘ ܟܕ ܒܫܢܬܐ ܥܡܝܩܬܐ ܢܗܸܘܐ ܡܿܛܠ܇ ܘܡܢ ܚܙܘܐ ܡܕܡ ܐܬܪܗܒ܇ ܘܟܕ ܫܘܪ ܘܩܼܡ ܪܓܠ ܡܢ ܐܓܪܐ ܐܘ ܒܓܘܒܐ ܢܣܬܩܲܒܠ ܘܢܸܦܠ. ܗܠܝܢ ܘܐܢ ܐܝܬ ܙܢܝ̈ܐ ܐܚܪ̈ܢܐ܇ ܕܡܢܢ ܕܫܥܬܐ ܣܬܝܪܝܢ܇ ܥܩܒܼܢܢ ܘܐܟܫܟܚܢܢ܇ ܕܡܢܗܘܢ ܡܘܬܐ ܡܙܕܡܲܢ. 104a ܐܝܬ ܕܝܢ ܕܠܦܘܠܓܐ ܗܿܢܐ ܪܒܝܥܝܐ܆ ܬܠܝܬܝܐ ܡܕܡ ܬܚܡܘܗܝ ܒܡܚܘܬܐ ܟܝܬ ܕܡܢ ܠܥܠ: ܘܒܙܘܥܐ ܚܐܪܝܐ܆ ܘܒܗܿܘ ܕܐܝܟ ܟܝܢܐ. ܟܕ ܠܗ݀ܘ ܕܡܢ ܟܘܝܢܐ܆ ܠܐ ܣܟ ܠܡܠܬܐ ܐܫܘܝܘܗܝ. ܘܡܬܚܝܠܝܢ܆ ܥܠ ܡܠܬܗ ܕܩܝܬܪܘܕܐ ܕܘܝܕ܇ ܗ݀ܘ ܕܡܛܠ ܒܝܫ ܡܗܲܕܝܢܘܬܐ ܫܐܘܿܠ ܐܡܼܪ܇ ܕܐܘ ܝܘܡܗ ܢܐܬܼܐ ܘܢܡܘܬ܇ ܐܘ ܡܪܝܐ ܢܡܚܝܘܗܝ ܘܢܡܘܬ܇ ܐܘ ܒܩܪܒܐ ܢܒܠܼܥ ܘܢܡܘܬ܇ ܟܕ ܠܐ ܡܬܒܝܢܝܢ܇ ܕܠܘ ܫܩܼܠ ܛܥܝܐ ܗܘܐ ܗܪܟܐ ܠܡܙܡܪܢܐ܇ ܕܥܠ ܙܢ̈ܝܐ ܕܡܘܬܐ ܐܘ ܥ̈ܠܬܐ ܕܡܲܒ̈ܥܢ ܡܘܬܐ ܢܡܠܠ܇ ܐܠܐ ܟܝܬ ܕܡܢܗ ܢܕܚܐ ܠܥܠܬܐ ܕܐܒܕܢܗ ܕܫܐܘܠ܇ ܘܡܛܠܬܗܿ ܗܟܝܠ ܕܗܿܕܐ ܠܟܣܝܣ܆ ܣ̈ܓܝܐܐ ܐܬܼܘ ܠܣܒܝܪܘܬܐ ܕܠܐ ܐܠܗ܆ ܐܝܟܢܐ ܕܢܐܡܪܘܢ܆ ܕܡܚܘܬܐ ܠܚܘܕ ܗܿܝ ܕܒܪܘܓܙܐ܇ ܕܒܿܪ ܐܠܗܐ ܠܢܦܫܐ ܡܢ ܦܓܪܐ. ܒܗܿܠܝܢ ܕܝܢ ܐܚܪ̈ܢܝܬܐ. ܠܐ ܥܘܼܕ. ܘܐܡܪܝܢ ܠܘܬܢ ܟܕ ܡܲܗܦܟܝܢ: ܘܡܢ ܙܝ̈ܢܐ ܒܝ̈ܬܝܬܐ ܦܟܿܪܝܢ ܗܠܝܢ. ܕܟܕ ܐܢܢܩܐ ܥܿܫܢܐ ܥܠ ܦܓܪܐ: ܐܘ ܡܢ ܕܓܫܐ ܕܣܦܣܪܐ: ܐܘ ܡܢ ܩܛܝܪܐ ܕܣܡܿܐ ܥܿܛܘܝܐ: ܐܘ ܡܢ ܡܚܝܠܘܬܐ ܘܬܚܘܒܘܬܐ: ܐܝܿܕܐ ܕܒܙܒܢ ܣܝܒܘܬܐ ܡܡܠܟܐ܆ ܐܬܿܐ ܒܪܝܫܐ ܠܦܘܿܠܗܕܐ ܘܒܠܥܼܕ ܦܘܩܕܢܐ ܕܗܿܘ ܕܐܣܪ܇ ܠܘܬ ܗܿܕܐ ܐܡܿܪܝܢܢ܆ ܕܦܘܕܐ ܡܕܡ ܐܥܝܦܐ܇ ܐܝܬ ܠܗܢܿܘܢ ܐܝܠܝܢ ܕܗܕܐ ܠܬܡܿܝܢ. ܠܘܩܕܡ ܡܿܢ ܡܼܢ ܡܠܬܗ ܕܡܙܡܪܢܐ ܟܗܢܝܐ. ܗ݀ܘ ܕܡܟܪܙ ܟܕ ܐܡܿܪ܇ ܕܫܩܿܠ ܐܢܬ ܪܘܚܗܘܢ ܘܡܿܝܬܝܢ܇ ܘܠܥܦܪܗܘܢ ܗ݀ܦܟܝܢ. ܐܢ ܓܝܪ ܐܝܟ ܡܠܬܗܘܢ ܠܘ ܒܦܘܩܕܢܐ ܫܒܿܩ ܒܪܢܫܐ ܠܚ̈ܝܐ. ܝܕܝܥܐ ܗܝ ܕܟܕܒܬܐ ܗܝ ܗܿܕܐ ܠܟܣ̈ܝܣ܇ ܕܫ݀ܩܠ ܐܢܬ ܪܘܚܗܘܢ ܘܡܿܝܬܝܢ. ܐܦ ܒܕܘܟܬܐ ܐܚܪܬܐ ܐܡܿܪܐ ܡܠܬܐ ܩܕܝܫܬܐ. ܠܐ ܫܩܿܠ ܡܪܐ ܡܪ̈ܘܬܐ ܢܦܫܐ܇ ܐܠܐ ܠܘܩܕܢ ܐܬܚܿܫܒ ܡܲܚܫܒܬܐ. ܒܬܪܟܢ ܕܝܢ܆ ܘܡܢ ܗܿܝ ܕܟܠܝܘܡ ܚܿܙܝܢܢ ܕܓܿܕܫܐ. ܗܐ ܓܝܪ ܣ̈ܓܝܐܐ ܐܝܬܝܗܘܢ: ܕܡܢ ܡܚܘܬܐ ܕܣܦܣܪ̈ܐ ܦܓܪ̈ܝܗܘܢ ܥܙܝܙܐܝܬ ܐܫܬܢܓܘ: ܘܠܐ ܡܝܬܘ. ܐܚܪ̈ܢܐ ܕܝܢ܆ ܟܕ ܙܥܘܪܐܝܬ ܐܚܫܸܬ ܐܢܘܢ ܡܚܘܬܐ: ܐܘ ܕܟܐ ܪܕܘܝܐ ܐܘ ܕܫܿܒܛܐ ܕܕܝܿܢܐ܆ ܐܓܗܝܘ ܡܢ ܚ̈ܝܐ܆ ܟܕ ܗܟܢܐ ܨܒܼܐ ܗܿܘ ܕܩܒܼܠ. ܘܠܐܚܪ̈ܢܐ ܟܕ ܕܡܟܝܢ ܕܒܪ. ܘܐܝܬ 104b ܠܐܝܠܝܢ ܕܟܕ ܡܫܼܬܥܝܢ. ܘܠܡܿܢܐ ܟܝ܇ ܠܗܿܢܘܢ ܕܟܠ ܫܢ̈ܕܝܢ ܥܕܘ ܥܠܝܗܘܢ܇ ܦܘܠܿܛܐ ܕܡܢ ܣܝܓܪ ܫܢܘ̈ܗܝ ܕܡܘܬܐ ܚܼܙܝܢܢ܇ ܘܠܗܠܝܢ ܟܕ ܛܒ ܡܢܝܚ̈ܢ ܇ ܐܬܐ ܐܒܕܢܐ ܚܿܙܝܐ܇ ܐܢܗܸܘ ܕܒܦܘܩܕܢܐ ܕܗ݀ܘ ܕܪ݀ܟܒ܇ ܠܐ ܡܫܬܪܪ ܗܘܐ ܡܫܟܢܐ ܕܗܢ݀ܘܢ܇ ܘܡܫܬܪܫܐ ܗܘܐ ܘܡܬܪܦܐ ܕܗܠܝܢ. ܐܝܟ ܓܝܪ ܐܢܢܩܐ ܘܩܛܝܪܐ ܕܥܿܕܐ ܥܠ ܦܓܪ̈ܐ: ܐܝܠܝܢ ܕܒܪ̈ܒܘ ܣܦܣܪ̈ܐ ܐܬܒܿܣܒܣܘ܆ ܠܐ ܘ݀ܠܐ ܗܘܐ ܕܢܚܘܢ. ܘܐܝܠܝܢ ܕܒܗܠܝܢ ܗܘܘ ܘܢܝܼܚܝܢ: ܠܐ ܦܐܝܬܐ ܗܘܬ ܕܢܫܬܪܘܢܼ ܐܠܐ ܟܝܬ: ܢܡܘܣܐ ܕܒܛܝܠܘܬܐ: ܟܕ ܛܒ̈ܬܐ ܘܡܥܕܪ̈ܢܝܬܐ ܓܿܡܪ: ܐܡܬܝ ܕܥܿܕܪ ܘܠܡܢ ܕܟܐ݀ܝܢ ܫ݀ܛܚ ܘܡܢ ܚ̈ܝܐ ܓܿܠܙ܆ ܘܐܢ ܩܕܝܡܐ ܣܝܡܐ ܥܠܬܐ ܥܿܒܘܕܬܐ ܘܐܢ ܠܐ. ܘܒܗܿܠܝܢ ܐܙܠܸܬ ܠܗܿ ܣܪܝܩܬܐ܇ ܗܦܟܬܐ ܕܘܝܬܐ ܕܐܬܐܡܲܪܬ݀ ܘܗܿܢܘܢ ܐܝܠܝܢ: ܕܦܘܠܓܐ ܬܠܝܬܝܐ ܐܩܝܡܘ ܠܢ: ܘܛܿܘܠܿܩܐ ܕܚ̈ܝܐ ܐܡܪܘ ܕܐܝܬܘܗܝ: ܐܘ ܒܡܣܡ ܒܪܝܫܐ: ܐܘ ܡܢ ܝܕ ܚܐܪܘܬܐ: ܐܘ ܡܢ ܟܝܢܐ܆ ܡܢܐ ܢܐܡܪܘܢ܇ ܟܕ ܠܗܿܠܝܢ ܕܡܢ ܟܘܿܝܢܐ ܩܿܪܝܢ. ܗܐ ܓܝܪ: ܐܝܠܢ ܕܡܢ ܝܕ ܢܿܪܓܐ ܕܦܠܼܛ ܐܬܡܝܼܬܘ: ܐܟܡܐ ܕܒܡܘܫܐ ܩܪܝܢܢ܇ ܘܠܐ ܚܐܦܐ ܡܢ ܟܝܢܐ ܐܝܬ ܗܘܐ ܠܗ܆ ܘܠܐ ܡܢ ܚܐܪܘܬܐ. ܠܐ ܓܝܪ ܣ݀ܢܐ ܗܘܼܐ ܠܗ ܐܡܿܪ܇ ܡܢ ܐܬܡܠܝ ܘܡܢ ܡܢܬܡܠܝ. ܐܠܐ ܕܝܢ ܘܠܐ ܐܝܟ ܕܒܡܣܡ ܒܪܝܫܐ ܐܝܬܘܗܝ ܗܘܐ. ܠܐ ܓܝܪ ܡܪܝܐ ܡܚܝܗܝ ܫܪܝܟܐ ܡܿܕܝܢ ܕܗܿܝ ܪܒܝܥܬܐ. ܬܫܪ܇ ܕܐܝܟ ܕܒܡܫܬܒܩܢܘܬܐ ܘܒܒܘܝܢܐ܇ ܗܝ ܓܗܝܬܐ ܕܡܢ ܚ̈ܝܐ ܬܗܸܘܐ. ܐܣܬܩܿܒܠ ܘܐܟܚܕ ܓܕܫ܆ ܗ݀ܝ ܕܚܿܫܚܐ ܠܒܪܢܫܐ ܒܡܪ[ܝܡـ]ـܢܘܬܐ ܕܚ̈ܝܐ܆ ܘܐܒܕܢܐ ܕܡܢ ܝܕ ܢܪܓܐ. ܠܗܿܘ ܕܟܕ ܚܫ ܒܝܕ ܡܠܬܐ ܕܗܿܘ ܕܐܚܝܕ ܢܦܫܗ ܡܢܗ ܐܬܩܲܦܼܣܬ: ܘܢܘܠܐ ܕܚܝܘ̈ܗܝ ܐܬܩܣܿܡܲܣ. ܕܡܚܫܒܬܐ ܕܝܢ ܗܿܕܐ ܕܐܡܪܐ: ܕܡܦܩܢܐ ܕܡܢ ܚ̈ܝܐ ܠܒܪܢܫܐ ܗܘܐ܇ ܒܠܥܕ ܡܢ ܢܡܘܼܣܐ ܕܐܠܗܐ: ܠܘܬ ܛܘܥܝܝ ܥܡܝܩܬܐ ܡܫܬܲܪܓܠܐ܆ ܡܿܢܐ ܡܬܒܥܝܐ ܐܦܢ ܕܢܐܡܪ܇ ܕܫܓܡܐ ܓܝܪ ܘܠܐ ܕܝܨܝܦܘܬܐ ܐܝܬܘܗ ܗܘܼ ܣܘܥܪܢܐ. ܘܐܝܟܢܐ ܒܐܚܪ̈ܢܝܬܐ ܠܢ ܡܬܐܡܪܐ. ܗܟܝܠ ܕܝܢ ܥܕܪܐ ܗܝ܆ ܕܟܕ ܠܡܫܘܚܬܐ ܢܩܿܦܝܢܢ܆ ܗ݀ܝ ܕܛܒ ܡܲܗܢܝܐ ܠܪ̈ܚܡܲܝ ܝܘܬܪܢܐ܆ ܠܡܘܒܿܠܐ ܕܡܠܬܐ ܗܪܟܐ ܢܢܝܼܚ. ܟܕ ܠܗܿܘ ܚܿܝ ܥ̈ܠܡܐ܇ ܘܡܲܠܚܐ ܕܚܝܝ̈ܢ ܘܡܿܪܐ ܕܟܠ: ܥܡ ܫܠܝܐ ܕܡܢ ܡܠܬܐ܆ ܦܘܪܫܢܐ 105a ܕܬܘܕܝܬܐ ܥܡ ܕܫܿܢܐ ܕܟܠ. ܬܫܒܘܚܬܐ ܡܩܲܪܒܝܢܢ. ܠܗܿܘ ܕܝܿܐܝܐ܆ ܫܘܒܚܐ ܡܚܪܪ ܡܢ ܫܠܝܐ. Memra 3 ܡܐܡܪܐ ܕܬܠܬܐ܆ ܥܠܘܗܝ ܕܫܪܒܐ ܘܡܛܠ ܬܚܘܡܐ ܕܚ̈ܝܐ ܐܢܫ̈ܝܐ ܘܕܡܿܢܘ ܩܨܐ.܀ ܕܝܠܗ ܥܠ ܐܓܘܢܐ ܬܠܬܝܐ ܡܬܩܪܒܝܢܢ: ܟܕ ܥܡ ܡܠܬܐ ܗܿܘ ܕܐܝܬ ܠܗ ܡܠܬܐ ܕܚܝ̈ܝܢ ܩܝܿܡܝܢܢ܇ ܘܕܢܒܸܨܐ ܠܐ ܡܡܪܚܝܢܢ܇ ܘܕܡܢܐ ܗܝ ܠܦܘܬ ܚܝܠܐ ܡܚܿܘܝܢܢ. ܡܬܟܝܠܝܢܢ ܕܠܐ ܡܼܿܚܦܪܝܢܢ܆ ܟܕ ܠܐ ܗܘܐ ܠܒܪ ܡܢ ܢܝܫܐ ܬܪܝܨܐ ܪܕܝܿܢܢ. ܬܗܘܐ ܠܢ ܕܝܢ ܐܦ ܗܪܟܐ ܗܝܼ ܡܠܬܐ܆ ܡܫܟܠܠܬܐ ܘܠܐ ܚܣܝܪܬܐ܆ ܘܡܡܫܚܬܐ ܘܠܐ ܐܿܫܝܕܬܐ. ܡܛܠ ܟܝܬ ܕܐܢܗܸܘ ܕܬܬܐܫܕ ܘܕܠܐ ܡܘܫܚܐ ܐܫܬ݀ܛܚ܆ ܒܡܕܥܐ ܡܲܢ ܦܗܿܝܐ܆ ܒܬܪܥܝܬܐ ܕܝܢ ܝܘܩܪܐ. ܘܒܣܿܝܡܐ ܫܝܛܘܬܐ ܡܼܿܥܒܕܐ. ܐܝܬܝܗܿ ܕܝܢ: ܐܝܟܢܐ ܕܠܐܠܦܪ̈ܐ ܠܡܐܢܐ: ܘܠܥܒ̈ܕܐ ܠܓܝܐ: ܘܠܚܙܘ̈ܩܐ ܡܫܪܝܐ܆ ܗܟܿܢܐ ܘܠܬܪܥܝܬܐ ܕܥܡܸܠܬ ܘܒܬܐܘܪܝܐ ܗܪܓܸܬ܇ ܒܗܝܠܘܬܐ ܘܚܲܪܫܘܬܐ ܕܡܢ ܡܠܬܐ. ܘܗܕܐ ܡܿܢ ܗܟܢܐ. ܘܠܘܬ ܢܝܫܗܿ ܬܦܢܐ ܬܪܓܥ ܗܝ ܡܠܬܐ. ܟܕ ܡܒܕܩܝܢܢ܇ ܕܐܢ ܐܪܐ ܟܝܬ ܘܚ̈ܝܐ ܕܝܠܢ ܒܢܝܢ̈ܫܐ܇ ܒܦܪܘܬܣܡܝܐ ܡܕܡ ܡܬܚܡܬܐ ܘܡܡܫܚܬܐ ܐܣܲܝܪܝܢ܇ ܘܚܪܝܩܐ ܗܝܼ ܘܦܣܝܩܐ܇ ܕܟܡܐ ܒܚ̈ܝܐ ܒܪܝܫܐ ܢܕܝܪ ܡܢ ܢܡܘܣܐ ܛܿܒܐ ܕܒܛܝܠܘܬܐ܇ ܡܠܘܢ ܕܝܢ ܕܗܿܘ ܕܥܠ ܚܝ̈ܝܢ ܡܠܬܐ ܐܝܬ ܠܗ. ܒ݀ܥܝܢ ܓܝܪ ܟܕ ܡܿܫܐܠܝܢ ܘܡܥܩܒܝܢ ܣ̈ܓܝܐܐ܆ ܕܐܢܗܸܘ ܕܗܿܘ ܕܠܚ̈ܝܐ ܡܲܚܠܦ܇ ܐܢ ܐܢ ܒܚܢܘܩܝܐ ܐܘ ܒܢܟܣܬܐ ܐܘ ܒܟܘܪܗܢܐ܇ ܗܪܟܐ ܘܒܗܢܐ ܙܒܼܢܐ ܘܗܟܢܐ܇ ܡܢ ܚ̈ܝܐ ܕܢܬܬܢܲܦܩ ܐܢܢܩܐ ܗܘܬ܇ ܘܠܐ ܡܫܟܚܐ ܗܘܬ ܕܬܘܒ ܢܐܚܐ. ܐܢܦܘܩܪܣܝܣ ܕܝܢ ܕܗ݀ܕܐ ܝܗܿܒܝܢܢ܆ ܟܕ ܡܢ ܬܪ̈ܥܝܬܐ ܐܒܗܝ̈ܬܐ ܕܠܝܿܢܢ. ܗ݀ܠܝܢ ܕܒܚܪܬܐ ܕܡܛܠܬܢ ܡܛܟܿܣܝܢܢ܆ ܐܝܟ ܚܬܡܿܐ ܘܟܠܝܠܐ ܘܚܣܝܐ܇ ܘܠܟܝܣܐ ܘܠܪܝܫܐ ܘܠܒܝܬܐ ܘܠܡܕܝܢܬܐ. ܐܝܟܢܐ ܕܠܐ ܢܬܒܙܙ ܘܠܐ ܢܬܫܝܛ܆ ܘܡܢ ܫܘܥ̈ܝܬܐ ܠܐ ܢܬܡܪܕ. ܕܫܥܬܐ ܕܝܢ܆ ܒܝܕ ܡܚܫ̈ܒܬܐ ܕܡܼܢܢ ܢܬܠ ܦܬܓܡܐ. ܟܕ ܐܦܘܦܢܝܣܬܐ ܠܘܩܕܡ ܥܿܒܕܝܢܼܢ. ܕܡܬܚܡܝܢ ܘܝܕܝܼܥܝܢ ܚܝ̈ܐ ܐܢܫ̈ܝܐ܆ ܘܦܪܝܫ ܗܘܼ ܐܡܬܝ܇ ܕܡܙܕܠܗܙܝܢ ܘܡܬܬܪܝܡܝܢ. ܗ݀ܝ ܕܝܢ ܕܗܟܢܐ ܐܘ ܗܟܢܐ: ܐܡܿܪܢܐ ܕܝܢ ܒܥ̈ܠܠܬܐ ܡܫܚ̈ܠܦܬܐ ܘܡܫ̈ܓܢܝܬܐ܆ ܠܐ ܡܢ ܟܕܘ ܕܦܪܝܫܝܢ ܕܝܢ ܘܡܬܚܡܝܢ ܚ̈ܝܐ ܒܘܥܕܐ ܡܕܡ܆ ܡܢ ܗܪܟܐ ܡܚܘܝܢܢ. ܡܿܢܐ ܐܡܿܪ ܐܢܬ ܐܘ̃ ܗܢܐ. ܦܪܝܫ 105b ܘܝܕܥ ܠܘܬ ܐܠܗܐ: ܡܥܠܝܐ ܕܚ̈ܝܐ ܕܟܠ ܚܕ ܡܢܢ ܕܠܿܥܠܡܐ܇ ܘܕܐܡܬܝ ܟܝܬ ܘܠܐ ܕܢܗܸܘܐ ܗܿܢܐ܆ ܕܐܝܟ ܐܝܟܢ܇ ܕܢܘܼܚ ܡܢ ܒܕܪܐ ܦܠܢ: ܘܐܒܪܗܡ ܒܐܚܪܢܐ: ܘܕܡܘܫܐ ܬܘܒ ܗܘܼ ܗܟܘܬ܆ ܐܝܢ ܐܘ ܠܐ. ܐܠܐ ܐܢ ܡܿܢ ܠܐ ܦܪܝܫ ܘܠܐ ܝܕܝܥ܆ ܕܫܓܡܐ ܗܼܘ ܣܘܥܪܢܐ܆ ܘܠܐ ܕܝܨܝܦܘܬܐ. ܘܩܒܿܥܐ ܕܢܦܫܐ ܥܡ ܦܓܪܐ. ܠܘ ܥܡ ܡܠܬܐ ܘܡܢ ܡܠܬܐ ܗܘܐ. ܐܠܐ ܐܝܟ ܫܘܥ̈ܝܬܐ ܕܣ̈ܓܝܐܐ ܗ݀ܢܘܢ ܕܐܡܿܪܝܢ܇ ܕܡܠܬܐ ܕܟܝܢܐ ܐܝܬܝܗܿ ܗܕܐ ܕܐܡܬܝ ܕܪܚܡܿܐ ܥܗܢܐܝܬ ܡܩܲܒܠ ܠܙܪ̈ܥܐ ܕܡܬܪ̈ܡܝܢ܆ ܗܪ ܬܡܢ ܡܬܝܬܐ ܘܡܬܒܪܝܐ ܡܢ ܐܠܗܐ ܗܝܼ ܢܦܫܐ. ܗܿܝ ܕܒܣܘܓܐܐ ܐܝܬܝܗܿ ܠܐ ܡܗܝܡܢܬܐ ܕܐܝܬ ܓܝܪ ܥܗܢܘܬܐ ܠܐܚܪܢܐ ܡܢ ܐܚܪܢܐ܇ ܠܡܲܦܪܫܘ ܘܠܡܝܿܒܠܘܼ ܡܬܬܘܕܝܢܘܬܐ ܗܝ. ܒܪܡ܆ ܬܟܣ ܗܿܘ ܛܒܿܐ ܠܥܗܢܘܬܐ ܙܒ̈ܢܝܢ ܣ̈ܓܝܐܢ. ܗܟܢܐ ܕܝܢ ܘܠܠܐ ܥܗܢܘܬܐ ܕܚܩܿ. ܗܿܕܐ ܟܝܬ ܘܿܟܬܒܐ ܡܲܟܣ܇ ܒܗܠܝܢ ܕܡܫܬܥܐ ܠܢ. ܟܕ ܡܛܠ ܪ̈ܚܡܐ ܕܥܩܪ̈ܬܐ ܐܡܿܪ. ܐܟܚܕܐ ܕܝܢ ܗܼܘ ܟܝܢܐ ܡܪܬܐ ܠܢ. ܕܠܘܩܒܠ ܐܡܬܝ ܕܙܪܥܐ ܡܬܪܡܐ܇ ܡܦܪܝܢܘܬܐ ܗ݀ܘܝܐ. ܘܗܿܘ ܛܒܐ܆ ܟܕ ܕܘܠܐ ܘܐܡܬܝ ܕܘ݀ܠܐ ܠܢܦܫܐ ܥܡ ܦܓܪܐ ܚܿܙܩ܆ ܘܐܢ ܐܝܬ ܥܗܢܘܬܐ܆ ܘܐܢ ܠܐ ܐܝܬ. ܗܿܕܐ ܘܐܦ ܥܠ ܥܿܠܡܐ ܝܕܥܿܝܢܢ ܕܗܘܬ݀ ܗܿܘ ܓܝܪ ܙܪܥܗ ܕܥܠܡܐ: ܟܕ ܡܬܘܡܐܝܬ ܕܢܒܼܪܐ ܪ݀ܢܐ ܗܘܐ܆ ܥܡ ܙܒܢܐ ܠܗܢܐ ܐܟܝܢܗ܆ ܘܫܿܪܐ ܠܗܿܢܐ ܥܡ ܙܒܢܐ ܘܡܠܼܬܐ ܘܐܘܠܐ ܡܬܚܡܐܝܬ ܟܝܬ܇ ܠܪܝܫܝܬܐ ܘܠܫܘܠܡܐ ܕܥܿܠܡܐ ܥܿܒܪ܆ ܗܿܘ ܐܚܿܝܕ ܣܘܟ̈ܝܐ ܕܗܢܐ. ܒܕܓܘܢ ܐܡܿܪ ܗ݀ܘ ܪܝܫܐ ܕܡܗܝܪ̈ܐ ܓܪܓܘܪܝܘܣ . ܕܗܿܘ ܕܥܒܿܕ ܐܢܬ ܟܠ ܘܗܿܦܟ ܡܫܚܠܦ ܐܢܬ ܒܡܠܬܟ ܐܘܡܢܐ܇ ܒܙܒܢܐ ܘܐܡܼܬܝ ܕܝܿܕܥ ܐܢܬ ܕܠܚܡ܇ ܒܥܘܡܩܐ ܕܚܟܡܬܟ ܘܕܦܘܪܢܣܟ. ܒܗܿܢܐ ܗܟܝܠ ܙܢܐ܆ ܐܦ ܥܠ ܚ̈ܝܐ ܕܝܠܢ ܒܢܝ̈ܫܢܐ ܐܝܬ ܠܢ ܕܢܣܬܟܠ. ܦܪܝܫ ܓܝܪ ܘܡܬܚܿܡ ܠܐܠܗܐ ܙܒܢܐ ܕܡܿܥܠܢ ܕܠܥܠܡܐ. ܘܡܡܫܚ ܐܟܚܕܐ ܘܡܬܚܡ܆ ܐܦ ܙܒܢܐ ܕܡܼܦܩܢ. ܐܠܐ ܟܒܪ ܢܒܼܥ ܥܠܝ ܐܢܫ ܡܢ ܠܙܝܙ̈ܝ ܡ̈ܠܐ ܟܕ ܐܡܿܪ ܗܕܐ܆ ܕܐܢܗܸܘ ܟܝܬ ܕܐܢܫ܇ ܕܡܢ ܒܝܬܗ ܠܐ ܢܦܼܩ ܒܗܿܝ ܫܥܬܐ: ܘܡܪܕܝܬܐ ܒܐܘܪܚܐ ܦܠܚܬ ܠܐ ܥܿܒܕ܆ ܡܢ ܩܐܪܣܐ ܕܩܛܘܠܐ ܡܬܦܿܠܛ ܗܘܐ. ܘܐܢ ܠܐ ܐܫܝܚ ܘܒܢܗܪܐ 106a ܥܒܼܪ܇ ܟܕ ܡܪܚܐܝܬ ܠܘܩܠ ܚܐܦܐ ܕܪܕܝܐ ܐܬܼܐ ܗܘܐ. ܠܐ ܥܘܕ ܡܬܚܢܩ ܗܘܐ. ܡܿܕܝܢ ܐܪܐ ܡܿܨܝܐ ܗܘܬ ܕܚܒܿܠܐ ܕܚܝ̈ܘܗܝ ܬܘܒ ܢܬܡܬܚ܆ ܘܠܘ ܒܘܿܥܕܐ ܡܕܡ ܗܿܢܐ ܡܬܚܿܡ܀ ܠܚܘܫܒܐ ܕܝܢ ܗ݀ܢܐ ܕܘܿܝܐ܆ ܠܫܘܩܦܐ ܕܐܝܟ ܗܿܢܐ ܢܬܠ. ܟܕ ܠܘܩܕܡ ܟܬܒܿܐ ܡܿܟܣ: ܡܿܢܐ ܡܬܝܼܒ ܐܢܬ ܠܝ ܦܬܓܡܐ ܥܠ ܗܿܕܐ ܐܘ̃ ܗܢܐ. ܘܒܢܘ̈ܗܝ ܘܒܢ̈ܬܗ ܕܐܝܘܒ ܆ ܐܠܘ ܬܚܝܬ ܣܬܪܐ ܕܒܝܬ ܐܚܗܘܢ ܩܫܝܫܐ ܠܐ ܗܘܘ: ܐܦܢ ܒܝܕ ܡܦܘܠܬܐ ܕܒܝܬܐ ܠܐ ܣܝܿܦܝܢ ܗܘܘ: ܐܚܪܢܝܐܝܬ ܠܐ ܡܬܛܠܩܝܢ ܗܘܘ܆ ܘܗܕܐ ܢܘܪܐ ܐܣܸܝܦܬ ܠܪ̈ܥܘܬܐ ܐܝܟ ܬܫܥܝܬܐ. ܒܗܢܐ ܙܢܐ ܐܝܬ ܠܢ ܕܢܪܢܐ܆ ܘܐܦ ܡܛܠ ܛܘܿܠܩܐ ܕܣ̈ܓܝܐܐ. ܐܝܟܢܐ ܓܝܪ ܕܗܪ ܬܡܢ܇ ܘܠܛ̈ܠܝܐ ܪ̈ܚܡܝ ܐܘܿܝܘܬܐ ܘܗ̈ܢܝܢܐ: ܘܠܥ̈ܠܢܐ ܕܒܕܒܪܐ ܘܒܕܝܪ̈ܐ: ܐܟܚܕ ܐܘܒܿܕܬ ܚܪܒܐ܆ ܗܟܢܐ ܘܐܦ ܩܨܐ ܕܡܘܬܐ ܡܕܪܟ܇ ܐܡܬܝ ܕܬܚܘܡܐ ܕܚ̈ܝܐ ܡܲܠܝܢܢ܇ ܘܥܿܕܪܐ ܗ݀ܝ ܕܡܢ ܚ̈ܝܐ ܢܫ̈ܝܐ. ܒܬܪܟܢ ܕܝܢ܆ ܘܬܘܢܝܐ ܡܕܡ ܐܝܬ ܠܢ܇ ܕܩܡ ܩܠܝܠ ܠܙܒܢܼܢ ܗܼܘܐ. ܐܢܫ ܥܠܝܡܐ܆ ܠܘܬ ܡܕܝܢܬܐ ܕܐܬܘܪ̈ܝܐ܆ ܠܛܝܓܪܝܣ ܢܗܪܐ ܦܣ݀ܩ ܗܘܐ ܘܥܒܪ܇ ܥܠ ܓܫܪܐ ܕܡܢ ܩܪ̈ܩܘܪܐ ܒܼܢܐ. ܠܘܩܒܠ ܗܢܐ ܦܠܼܚܐ ܟܕ ܠܣܘܣܝܐ ܛܪܕ܆ ܕܚܿܐ ܡܢ ܚܐܦܗ ܠܥܠܝܡܐ܆ ܘܒܓܘ ܢܗܪܐ ܐܥܡܕܗ. ܐܬܚܸܙܝܬ ܡܢ ܣܘܓܐܐ ܓܒܪ̈ܐ ܕܥܠ ܝܕ ܢܗܪܐ ܩܝܿܡܝܢ܇ ܡܦܘܠܬܐ ܕܘܝܬܐ ܕܝ݀ܢܣܩܐ. ܘܟܕ ܪܗܛܘ܆ ܫܘܘܙܒܐ ܕܚ̈ܝܐ ܐܬܬܓܪܘ ܠܗ. ܒܬܪ ܕܝܢ ܠܘ ܣܓܝ: ܟܕ ܠܒܝܬ ܒܘܬܐ ܐܬܼܐ܆ ܘܠܦܘܼܨܝܗ ܥܡ ܫܘܘܿܙܒܐ ܕܣ̈ܓܝܐܐ ܡܚܓܐ ܗܘܐ: ܘܗܢܝܐܝܬ ܡܢܩܐ ܗܘܐ: ܟܕ ܪܡܫܐ ܪܟܼܢ: ܘܠܘܬ ܡܿܓܼܣܐ ܐܬܼܐ ܡܿܢ: ܟܕ ܡܬܒܘܪܪ ܘܡܢ ܚܡܪ ܘܡܢ ܫܢܬܐ܆ ܥܠ ܐܓܪܐ ܪܓܠ. ܘܠܐܪܥܐ ܐܡܼܗ ܡܚܼܐ. ܘܒ̈ܚܙܐ ܕܫܝܘܠ ܐܓܢ܀ ܗܠܝܢ ܘܐܦ ܗܘܼ ܥܝܕܐ ܡܲܟܿܣ܇ ܗܐ ܓܝܪ ܠܣܓ̈ܝܐܐ ܝܕܥܿܝܢܢ: ܕܟܕ ܠܩܿܪܒܐ ܥܠܘ: ܘܣܦܣܪ̈ܐ ܕܠܐ ܡ̈ܢܝܢ ܒܠܥܘ: ܘܡܢ ܕܚ̈ܝܐ ܕܩܘܢܛܪ̈ܐ ܘܫܿܕܝܐ ܕܓܐܪ̈ܐ ܦܪ̈ܘܚܐ ܐܣܬܒܣܘ: ܕܟܕ ܦܢܿܝܢ ܘܡܢ ܩܪܒܐ ܗܦܿܟܝܢ: ܡܣܬܡܣܡܝܢ ܘܡܢ ܕܘܪ ܫܢܘ̈ܗܝ ܕܡܘܬܐ ܠܐ ܡܬܼܦܲܨܝܢ: ܐܚܪ̈ܢܐ ܕܝܢ ܐܝܬ ܕܟܕ ܥܕܡܐ ܠܢܦܫ̈ܬܗܘܢ ܣܝܦܐ ܥܠ: ܘܥܡ ܩ̈ܛܝܠܐ ܡܢ ܟܕܘ ܡܢܘ ܝ݀ܬܗܘܢ: ܕܟܕ ܐܬܼܘ ܐܣܘ̈ܬܐ ܡܒܥܪ̈ܝܐ ܐܝܠܝܢ 106b ܕܠܚܝܠܐ ܢܩܝܦܝܢ: ܘܐܕܪܟܘ ܐܢܘܢ ܕܥܕܟܝܠ ܡܬܢܦܫܝـ[ـܢ] ܒܝܕ ܫܩܠ ܛܥܢܐ ܐܚܠܡܘ ܐܢܘܢܼ ܗܝ ܕܝܢ ܗܿܕܐ ܓܕܫܸـ[ـܬ]. ܐܦ ܐܢܫ ܡܢ ܬܓܪ̈ܐ ܪ̈ܚܡܝ ܝܘܬܪܢܐ. ܟܕ ܓܝܪ ܥܡ ܦܲܠܓܐ ܕܣ̈ܓܝܐܐ ܠܘܬ ܡܕܢܚܐ ܪܕܐ ܗܘܐ: ܘܠܣ̈ܛܝܐ ܐܕܪܟܘ: ܘܒܕܪܐ ܥܡ ܚ̈ܕܕܐ ܐܬܥܪܙܠܘ܆ ܟܕ ܠܣܘܓܐܐ ܕܚܒܪ̈ܘܗܝ ܠܫܝܘܠ ܫܕܪܘ: ܗ݀ܢܘܢ ܒܝ̈ܫܐ ܕܐܢܫ̈ܐ܆ ܘܐܦ ܠܗܢܐ ܒܣܦܣܪܐ ܥܠ ܨܘܪܗ ܪܟܝܟܐ ܚܣܝܢܐܝܬ ܡܚܐܘܗܝ܆ ܘܡܢ ܩ̈ܛܝܠܐ ܐܬܚܫܒ. ܒܿܬܪ ܝܘܡܐ ܕܝܢ: ܟܕ ܐܢܫ̈ܝܢ ܩܘܪ̈ܝܝܐ ܠܩ̈ܛܝܠܐ ܒܥܪܘ܆ ܒܕ ܣܿܐܩ ܐܫܟܚܘܗܝ ܠܗܢܐ܆ ܛܥܢܘܗܝ ܘܡܼܢ ܗܪܟܐ ܐܘܒܠܘܗܝ܆ ܘܒܝܕ ܥܡܠܐ ܕܐܣܘ̈ܬܐ܆ ܠܚܝܘ̈ܗܝ ܕܐܬܡܼܚܠܘ ܐܣܿܓܝܘ ܚܲܝܠܘ. ܘܫ̈ܢܝܢ ܚܡܫܝܢ܇ ܡܢ ܒܬܪ ܗܝܕܝܟ ܚܝܐ. ܐܠܐ ܐܝܢ ܐܡܿܪ ܗ݀ܘ ܣܩܘܒܠܝܐ. ܗܐ ܡܚܿܝܠܘ ܚܿܝܠܬ ܠܡܠܬܢ. ܒ݀ܗܝ ܓܝܪ ܕܗ[ܪ]ܟܐ: ܟܕ ܢܦܫ̈ܬܐ ܐܚܪ̈ܢܝܬܐ ܢܓܕ ܗܘܐ܇ ܐܬܝܗܸܒܬ ܠܗ ܕܣܐܝܢܐ ܕܗܘܼ ܙܢܐ ܢܐܚܐ܆ ܡܢܐ ܐܚܪܝܢ ܓܕܫ܇ ܐܠܐ ܟܝܬ ܕܡܨܝܐ ܕܢܐܪܟ ܬܚܘܡܐ ܕܚ̈ܝܐ ܗ݀ܘ ܕܡܡܫܚ. ܐܬܼܐ ܕܗܕܐ ܚܙܩܝܐ. ܗ݀ܘ ܕܟܕ ܐܦܘܦܣܝܣ ܩܒܠ: ܕܡܿܐܬ ܐܢܬ ܘܠܐ ܚ݀ܐܐ ܐܢܬ܆ ܚܡܫܥܣܪܐ ܒܬܪܟܢ ܐܬܬܘܣ̈ܦܝܢ ܠܗ. ܐܠܐ ܐܢܐ ܡܢ ܐܘ̃ ܛܒܐ܆ ܗܕ ܐܡܿܪܢܐ܇ ܘܠܐ ܥܿܛܠܐܝܬ ܦܣܿܩ ܐܢܐ. ܕܐܢ ܟܝܬ: ܘܦܪܘܬܣܡܝܐ ܕܚܝܘ̈ܗܝ ܕܗܘܐ ܠܘ ܒܙܒܢܐ ܐܚܪܝܐ ܣܝܡܐ ܗܘܬ ܘܦܪܝܫܐ܆ ܗܪܬܡܢ ܥܡ ܫܪܟܐ ܕܟܠܗܘܢ ܚܒܪ̈ܘܗܝ܇ ܡܢ ܒܠܡܘܬܗ ܕܡܡܦܩܬܐ ܡܬܓܪܣ ܗܘܐ. ܡܛܠ ܕܝܢ ܕܢܿܘܠܐ ܕܚܝܘ̈ܗܝ: ܬܘܒ ܕܢܬܡܬܚ ܐܝܬ ܗܘܐ ܠܗ܆ ܠܐ ܐܬܓܕܕ ܗܘܐ ܗܝܕܝܟ. ܘܟܕ ܛܒ ܗܝܼ ܥܠܬܐ ܡܣܪܗܒܐ ܗܘܬ܆ ܠܗ݀ܝ ܕܒ݀ܛܠ ܗ݀ܘ ܛܿܒܐ܆ ܟܕ ܠܥܘܕܪܢܐ ܕܡܢ ܚ̈ܝܐ ܗܘܐ ܠܗ ܡܬܬܓܪ ܗܘܐ. ܐܝܬ ܕܝܢ ܕܐܚܪܢܝܐܝܬ ܐܡܪ ܐܢܬ: ܘܕܠܝܬ ܡܫܘܚܬܐ ܠܚ̈ܝܐ ܕܝܠܢ ܦܣܩ ܐܝܬ: ܘܐܝܟ ܛܒܿܐ ܒܐܬܠ̈ܝܛܐ ܠܒܥܠܕܒܒܐ ܡܢ ܙܝ̈ܢܐ ܒܝ̈ܬܝܐ ܐܪܥܿ ܐܝܬ܇ ܟܕ ܡܫܿܐܠ ܐܢܐ܆ ܐܓܝܒܝܢܝ܇ ܫܘܿܐܠܐ ܡܕܡ ܙܥܘܪܐ. ܝܕܥܬܐ ܕܐܠܗܐ: ܟܕ ܠܗܠܝܢ ܕܡܝܬܪ̈ܢ ܚܟܡܐ: ܘܠܗܠܝܢ ܕܥ̈ܬܝܕܢ ܕܢܗܘ̈ܝܢ܆ ܐܝܢ ܐܘ ܠܐ. ܐܠܐ ܐܢ ܗܘܼ ܡܢ ܕܚ݀ܟܡܐ: ܘܡܬܚܡܐܝܬ ܚ݀ܟܡܐ܆ ܘܠܗܠܝܢ ܡܝܬܪ̈ܬܐ ܚܟܡܿܐ ܘܨ݀ܒܝܐ ܘܡܥܒܕܐ: ܐܢܢܩܐ ܕܐܦ ܠܚܝ̈ܐ ܐܢܫ̈ܝܐ܆ ܡܬܚܡܐܝܬ ܬܥܼܒܕ ܫܪܝܐ܇ 107a ܟܕ ܗܿܝ ܕܡܝܬܪܐ ܚܙܝܐ ܥܡ ܡܦܩܢܐ. ܘܐܝܬܝܗܝܢ ܐܪ̈ܒܥ. ܝܕܥܬܐ. ܡܥܒܕܢܘܬܐ. ܬܚܘܡܐ ܕܚ̈ܝܐ. ܗܿܝ ܕܡܘܬܪܢܝܐ ܒܦܣܩܐ ܕܝܠܗܘܢ ܕܚ̈ܝܐ. ܡܥܒܕܢܘܬܐ ܡܢ ܥܡ ܝܕܥܬܐ܆ ܠܘ ܒܟܠܕܘܟ ܝܕܥܿܝܢܢ ܠܐܠܗܐ܆ ܐܠܐ ܐܢ ܗ݀ܝ ܕܡܘܬܪܐ. ܕܐܝܟ ܐܝܟܢ. ܗܐ ܓܝܪ ܝܕܥܿ ܐܝܟ ܪܝܫܝܬܐ ܕܚܟ̈ܡܬܐ ܠܟܠܗܝ̈ܢ ܫܟܝܪ̈ܬܐ܇ ܕܣܥܼܪܘ ܐܘ ܣ݀ܥܪܝܢ ܒܢܝ̈ܢܫܐ. ܘܠܗܠܝܢ܆ ܠܐ ܣܟ ܡܲܥܝܢ ܐܘ ܡܥܕܪ. ܡܿܥܒܕ ܕܝܢ܆ ܟܕ ܝܕ݀ܥ ܠܗܠܝܢ ܕܡܝܬܪ̈ܢ. ܐܝܟ ܗ݀ܝ ܕܒܐܘܢܓܠܝܘܢ ܐܡܝܪܐ܇ ܕܐܒܝ ܥܕܡܐ ܠܗܫܐ ܥܒܼܕ܇ ܐܦ ܐܢܐ ܥܿܒܕ ܐܢܐ. ܟܐܡܸܬ ܠܝܘܒܠܐ ܕܗܠܝܢ ܕܗܘ̈ܝ ܘܢܘܛܪܐ. ܕܐܝܟ ܐܝܿܕܐ. ܕܫܿܡܫܐ ܡܢ ܢܕܢܚ. ܕܥܣܒ̈ܐ ܬܘܒ ܢܫܘܚܘܢܼ ܘܚܝܘ̈ܬܐ ܢܐܠ̈ܕܢ ܚ̈ܝܐ. ܘܒܪܝܫܐ ܢܬܩܒܠ ܠܐ ܡܝܘܬܐ ܒܡܘܬܐ܇ ܡܛܠ ܚܠܦܬܐ ܕܒܝܕ ܝܠܝܕܘܬܐ ܡܒܠܨܐ܆ ܡܛܠ ܕܝܢ ܕܐܡܼܪܢܢ: ܕܠܘ ܟܠܗ̈ܝܢ ܐܝܠܝܢ ܕܚܟܿܡ ܗ݀ܘ ܛܿܒܐ܇ ܠܗܿܠܝܢ ܐܦ ܡܥܒܕ. ܡܛܠ ܐܩܘܠܬܝܐ܆ ܐܦ ܠܗܕܐ ܢܫܘܐ ܠܥܘܗܕܢܐ܆ ܐܦܢ ܒܡܕܡ ܡܢ ܢܝܫܐ ܦܝܿܫܝܢܢ. ܐܡܿܪܝܢܢ ܓܝܪ܆ ܕܐܦܿܠܐ ܟܠܗܝ̈ܢ ܐܝܠܝܢ ܕܡܫܟܚ ܡܿܥܒܕ. ܘܠܘ ܟܠܗܝ̈ܢ ܐܝܠܝܢ ܕܨ݀ܒܐ. ܗܐ ܓܝܪ ܨܿܒܐ܆ ܕܠܐ ܢܗܸܘܐ ܣܿܛܝܢܢ܇ ܡܢ ܦܘܩܕ̈ܢܐ ܩܕܝ̈ܫܐ. ܘܠܐ ܒܝܕ ܩܛܠܐ ܢܛܝܦ ܐܝܕ̈ܝܢ. ܘܠܐ ܦܓܪ̈ܝܢ ܒܝܕ ܫܟܝܪܘܬܐ ܕܙܢܝܘܬܐ ܢܣܝܿܒ. ܘܟܕ ܒܗܠܝܢ ܨ݀ܒܐ܆ ܠܐ ܣܟ ܡܬܪܡܸܐ ܡܥܒܕ܇ ܒܩܛܝܪܐ ܡܢ ܗܠܝܢ ܢܦܘܫ. ܢܕܥ ܬܘܒ܆ ܕܡܸܨܐ ܒܚܝܠܐ ܠܡܥܒܕ ܥ̈ܠܡܐ ܠܐ ܡܬܡ̈ܢܝܢܐ܇ ܘܕܡܫܟܚ ܕܢܒܪܐ ܠܒܪܢܫܐ܇ ܓ̈ܦܐ ܛܝܣ̈ܐ. ܘܓ̈ܦܐ ܫܲܥܘ̈ܛܐ܇ ܘܥ̈ܝܢܐ ܒܪ̈ܓܠܘܗܝ ܘܟܠܙܘܙܐ ܒܚܕܝܗ. ܐܠܐ ܠܐ ܡܥܒܕ܇ ܡܛܠ ܕܝܕܥܿ ܘܡܫܟܚ. ܐܠܐ ܠܘܬ ܢܝܼܫܗܿ ܬܦܼܢܐ ܬܪܗܛ ܠܝ ܡܠܬܐ. ܕܐܢܗܸܘ ܕܡܦܩܢܢ ܘܫܘܚܢ ܕܡܢ ܬܢܢ: ܡܬܚܡܐܝܬ ܝܕܥܿ ܐܠܗܐ܇ ܘܟܕ ܝܕܥܿ ܡܥܒܕ܇ ܡܛܠ ܕܡܝܬܪܐ ܕܐ݀ܢ ܠܗܿܢܐ܇ ܡܿܕܝܢ ܐܪܐ܆ ܡܬܚܡܝܢ ܘܡܡܫܚܝܢ ܚ̈ܝܐ ܐܢܫ̈ܝܐ. ܐܢܕܝܢ ܗܿܕܐ ܫܪܝܪܐ܆ ܢܫܢܿܘܢ ܡܠ̈ܝܗܘܢ ܗ݀ܠܝܢ ܕܐܡܿܪܝܢ܇ ܕܫܪ̈ܝܐ ܡܕܡ ܐܝܬܝܗܘܢ ܚ̈ܝܝܢ܇ ܘܡܬܩܦܣܝܢ ܘܡܬܡܲܬܚܝܢ܇ ܐܝܟ ܩܝܣܐ ܕܥܠ ܡ̈ܝܐ ܐܙܠܝܢܿ ܘܐܬܝܿܢ. ܘܦܗܿܝܢ ܘܛܿܝܦܝܢ ܠܐ ܝܕܝܥܐܝܬ ܘܠܐ ܡܬܚܡܐܝܬ܇ ܘܐܝܟ ܐܠܦܐ ܠܐ ܡܬܡܚܠܢܝܬܐ ܐܝܬܝܗܘܢ܇ ܒܠܥܕ ܪܝܫܐ ܘܫܘܠܡܐ. ܐܠܐ ܠܡ܆ ܠܐ ܐܣܝܪ ܐܠܗܐ ܒܬܚܘܡܐ 107b ܘܐܢ ܨ݀ܒܐ ܒܚ̈ܝܐ ܡܿܘܪܟ܆ ܘܐܢ ܨ݀ܒܐ ܡܲܟܪܐ܆ ܘܡܿܢܘ ܐܝܬܘܗܝ܇ ܗܿܘ ܕܬܚܝܬ ܢܝܪܐ ܕܐܢܢܩܐ. ܘܕܬܚܘܡܐ ܡܝܬܐ ܠܐܠܗܐ܇ ܐܘ ܟܒܪ܇ ܠܡܠܚܡܘܬܐ ܘܠܫܦܝܪܘܬ ܛܟܣܐ ܡܣܒܿܪ ܐܝܬ ܬܚܘܡܐ. ܐܠܐ ܐܢ ܡܢ ܗܿܕܐ ܪܢܐ ܐܝܬ܆ ܣܓܝܐܝܬ ܡܥܘܠ ܐܝܬ. ܘܠܫܪܪܐ ܡܢܟ ܙܢܩܿ ܐܝܬ. ܐܠܗܐ ܓܝܪ: ܗܿܘ ܕܒܗܠܝܢ ܕܐܝܬܝܗ̈ܝܢ ܛܟܣܐ ܣܡ܆ ܠܐ ܐܝܬܘܗܝ܇ ܕܠܐ ܡܛܟܣܘܬܐ ܘܕܫܓܘܫܝܐ. ܐܢܕܝܢ ܬܚܘܡܐ ܠܗ݀ܘ ܡܟܢܐ ܐܝܬ: ܠܡܕܡ ܩܛܝܪܢܝܐ ܘܛܘܪܢܝܐ܇ ܕܒܗ ܟܕ ܡܬܥܪܙܠ ܐܠܗܐ: ܡܬܚܡ ܠܚ̈ܝܝܢ܆ ܠܗܢܐ ܡܣܠܢܐ܆ ܘܡܿܥܕܐ ܠܗܿ. ܬܪܥܝܬܐ ܘܡܠܬܐ ܕܝܠܢ. ܠܘܬ ܐܠܗܐ ܓܝܪ ܡܗܝܡܢܝܢܢ: ܘܡܬܬܘܕܝܐ ܠܢ܆ ܕܠܗܿܠܝܢ ܐܢܢܩ̈ܝܬܐ܆ ܡܬܡܨ̈ܝܢܝܬܐ ܝܕܿܥ. ܘܠܡ̈ܬܚܡܬܐ ܠܐ ܡܬܚܡܐܝܬ. ܘܠܗܠܝܢ ܕܬܚܝܬ ܣܟܐ. ܠܐ ܡܣܝܟܐܝܬ. ܘܠܝܬ ܠܗ ܐܢܢܩܐ ܐܝܟܢܐ ܕܐܦ ܠܢ܇ ܕܒܚ̈ܐܦܐ ܡܬܡ̈ܨܝܢܐ ܘܐܢܢ̈ܩܐ ܢܬܚܒܼܫ: ܘܠܐ ܕܐܝܟ ܝܕܥܬܐ ܕܝܠܢ܇ ܠܡܬܝܕܥ̈ܢܝܬܐ ܢܣܬܟܿܠ. ܐܘ ܡܦܲܫܟܐܝܬ ܐܘ ܡܦܪܫܐܝܬ. ܕܐܝܟ ܐܝܟܢ. ܚܢܢ ܡܢ ܠܗܠܝܢ ܕܟܝܢܐܝܬ ܡܬܬܝ̈ܬܝܢ܆ ܡܬܚܡܐܝܬ ܚ݀ܟܡܝܢܢ. ܐܝܟ ܗ݀ܝ ܕܠܫܡܫܐ ܢܗܝܪܐ܇ ܘܠܐܪܥܐ ܐܛܝܡܬܐ܇ ܘܠܪܘܚܐ ܡܙܥܬܐ܇ ܘܠܢܦܫܐ ܚܝܬܐ. ܗܿܕܐ ܚܕܐ ܕܝܗܝܒܐ ܠܟܝܢܐ܆ ܡܦܪܫܐܝܬ ܚܟ݀ܡܝܢܢ. ܠܗܿܝ ܕܐܢܢܩܐ ܡܟܿܢܝܢ ܠܗܿ: ܐܢܫ̈ܐ ܐܘܡ̈ܢܝ ܡ̈ܠܐ. ܠܗܿܠܝܢ ܕܝܢ: ܕܬܚܝܬ ܟܝܢܐ ܠܐ ܟܕܝ̈ܢܝܼܢ܇ ܡܦܫܟܿܐܝܬ ܚܟ݀ܡܝܢܢ. ܐܝܟ ܗ݀ܝ ܕܐܘ ܡܬܡܲܛܪܝܢܢ ܠܡܚܪ ܐܘ ܠܐ܇ ܐܘ ܡܫܬܘܬܦܝܢܢ ܐܘ ܪܚܡܿܝܢܢ ܐܘ ܠܐ. ܠܗܠܿܝܢ ܕܡܬܡ̈ܨܝܢܝܬܐ ܡܟܢܝܢ. ܒܗ ܒܙܢܐ ܠܗܠܝܢ ܕܚܒ̈ܝܫܢ܇ ܘܡܢ ܣܟܐ ܐܬܪܢܝܐ ܚܒ̈ܝܫܢ: ܒܬܪܥܝܬܐ ܕܡܬܗܓܓܐ ܠܣ݀ܟܐ ܐܬܪܢܝܐ ܢܣܒܿܝܢܢ. ܘܠܐ ܡܲܨܝܐ ܗܘܠܢܝܘܬܐ ܕܝܠܢ ܕܠܓܘܫܡܐ ܡܣܝܟܐ܇ ܒܚܘܫܒܐ ܕܠܐ ܡܣܝܟܘܬܐ ܬܬܲܪܢܐ. ܐܠܗܐ ܕܝܢ ܗܿܘ ܬܡܝܗܐ܆ ܠܗܿܠܝܢ ܐܝܟܢܐ ܕܐܡܿܪܬ܆ ܠܥܠ ܡܢܢ ܐܘ ܐܟܘܬܢ ܐܝܬ ܠܗ܆ ܘܒܚܝܠܐ ܘܒܚܟܡܬܐ. ܘܒܕܓܘܢ ܐܦܠܐ ܬܚܝܬ ܐܢܢܩܐ ܘܬܚܘܡܐ ܡܬܟܼܕܢ܆ ܘܟܕ ܗܘܼ ܥܘܫܢܗ ܡܢ ܗ݀ܠܝܢ ܡܪܝܡ ܗܘ܆ ܠܢ ܘܠܚ̈ܝܐ ܕܝܠܢ܆ ܬܚܝܬ ܬܚܘܿܡܐ ܫܥܼܒܕ ܘܬܚܝܬ ܐܢܢܩܐ܇ ܕܫܘܪܝܐ ܘܕܫܘܠܡܐ܆ ܐܝܟܢܐ ܕܠܐ ܚܢܢ ܢܬܒܣܐ ܘܢܬܬܫܝܛ܇ ܘܡܢ ܛܟܣܐ ܢܬܢܟܪܐ ܘܢܪܡܠ. ܗܿܘ ܕܥܡ ܒܪ̈ܝܬܐ ܡܢ ܪܝܫܝܬܐ ܐܣܝܪ ܘܪܕܐ. ܫܟܝܪܐ ܗܝ ܓܝܪ ܐܢܗܸܘ 108a ܕܬܚܘܡܐ ܡܢ ܠܠܝܐ ܘܠܐܝܡܡܐ ܐܩܝܡ܇ ܘܠܚ̈ܝܘܬܐ ܟ̈ܠܗܝܢ ܥܡ ܙܒܢܐ ܡܲܫܚ ܝܠܝܕܘܬܐ ܘܬܪܒܝܬܐ܇ ܘܡܥܡܪܐ ܘܬܘܪܣܝܐ܇ ܐܝܟܢܐ ܕܐܦ ܟܪ[ܘ]ܟܝܐ ܘܣܢܘܢܝܬܐ ܕܙܒܢܐ ܕܡܥܠܗܘܢ ܝ݀ܕܥܝܢ ܐܝܟ ܡܠܬܐ ܕܟܬܒܐ܇ ܚܢܢ ܕܝܢ ܡܢ ܗܿܠܝܢ ܢܒܘܪ ܘܢܦܘܫ. ܐܢܕܝܢ ܘܚܠܦ ܐܠܗܐ ܕܐ݀ܢ ܐܢܬ: ܘܟܪܝܐ ܗܝ ܠܗ ܕܢܬܒܨܪ ܡܢ ܐܘܚܕܢܗ܆ ܘܐܡܿܪ ܐܢܬ ܠܝ ܡܲܪܡܐ ܐܝܬ: ܕܐܢ ܨܒܿܐ ܒܚ̈ܝܐ ܡܿܘܪܟ: ܘܐܢ ܨ݀ܒܐ ܡܲܟܪܐ܇ ܡܩܒܠ ܐܢܐ ܐܦ ܐܢܐ܆ ܘܬܐܢܚܬܐ ܕܚܠܝܛܐ ܥܡ ܐܘܠܝܬܐ ܡܫܕܪ ܐܢܐ܇ ܥܠ ܗ݀ܢܘܢ ܕܗܟܢܐ ܟܪܝܗܝܢ. ܘܐܡܿܪ ܐܢܐ ܐܟܚܕܐ܆ ܕܐܢ ܨ݀ܒܐ ܒܚ̈ܝܐ ܡܲܟܪܐ܆ ܟܕ ܡܿܘܣܦ ܐܢܐ ܕܐܢ ܥܿܕܪܐ ܕܢܟܪܐ. ܘܐܡܿܪ ܐܢܐ ܕܐܢ ܨ݀ܒܐ ܒܚ̈ܝܐ ܡܿܘܪܟ܆ ܘܟܕ ܝ݀ܕܥ ܘܠܐ ܥܿܒܪ ܠܗ܇ ܫܘܠܡܐ ܕܚ̈ܝܐ ܐܝܟܘ܇ ܘܐܡܬܝ ܥܿܕܪ ܕܠܐ ܢܣܿܛܐ. ܘܬܘܒ ܐܡܿܪ ܐܢܐ. ܕܐܢ ܨ݀ܒܐ ܒܚ̈ܝܐ ܡܿܘܪܟ܆ ܘܡܫܟܚ ܘܫܠܝܛ ܗܘܼ ܕܗ݀ܕܐ ܢܓܡܘܪ. ܐܠܐ ܠܐ ܨ݀ܒܐ܇ ܟܕ ܠܘܿܬ ܗ݀ܝ ܕܦܩܚܐ ܘܝܬܝܪ ܡܘܬܪܢܝܐ ܠܒܪܢܫܐ ܕܐ݀ܢ: ܡܠܬܐ ܓܝܪ ܗ݀ܝ ܕܐܡܿܪܐ: ܕܐܢ ܨܿܒܐ ܡܿܘܪܟ: ܘܐܢ ܨ݀ܒܐ ܡܟܲܪܐ܆ ܠܐܘܚܕܢܐ ܠܐ ܡܫܬܪܝܢܐ. ܘܠܚܝܠܐ ܡܫܟܚ ܟܠ ܕܐܠܗܐ ܡܩܝܿܡܐ ܠܢ. ܒܕܓܘܢ ܒܿܫܪܝܬܐ ܢܣܝܼܒ ܗܘܼ ܐܣܛܘܟܣܐ. ܐܢ ܨܿܒܐ ܗܿܕܐ ܥܿܒܕ. ܘܐܢ ܨ݀ܒܐ ܗ݀ܝ. ܒܪܡ ܟܕ ܠܘܬ ܗ݀ܝ ܗ݀ܝ ܕܦܩܚܐ܇ ܠܚܐܦܐ ܕܣܥܘܪܘܬܐ ܡܲܣܼܡܟ. ܘܡܢ ܗܪܟܐ ܠܡܠܟܐ ܗ݀ܘ ܕܐܝܣܪ̈ܠܝܐ: ܠܚܙܩܝܐ ܙܕܩ܆ ܟܕ ܠܫܘܠܡܐ ܕܚܝܘ̈ܗܝ ܠܐ ܛܿܥܐ܆ ܡܬܬܪܝܡܢܘܬܐ ܕܚ̈ܝܐ ܓܙܼܡ܇ ܒܝܕ ܡܠܐܟܘܬܗ ܕܐܫܝܥܐ. ܘܕܡܿܐܬ ܐܝܬ܇ ܘܠܐ ܚܐܐ ܐܢܬܒܝ ܠܗ. ܐܠܘ ܟܝܬ ܫܘܠܡܐ ܘܬܚܘܡܐ ܦܩܚܐ ܕܚܝܘ̈ܗܝ ܕܡܠܟܐ ܬܢܢ ܐܝܬܘܗܝ ܗܘܐ: ܘܕܬܘܒ ܢܐܚܐ ܠܗ ܠܐ ܥܿܕܪܐ ܗܘܬ: ܐܠܐ ܕܢܫܢܐ ܘܗܪ ܬܡܢ ܡܢ ܡܦܩܢܐ ܢܬܩܕܡ܆ ܠܐ ܥܘܕ܇ ܐܝܟ ܓܕܘܬܐ ܕܢܒܝܐ܇ ܘܢܘܩܝܐ ܕܡܢ ܗܿܪܟܐ ܕܕܡ̈ܥܐ܇ ܥܡ ܦܘܩ̈ܕܐ ܕܡܛܠ ܡܦܩܢܐ ܒ݀ܥܐ ܗܘܐ. ܝܕ݀ܥ ܗܘܐ ܓܝܪ ܚܙܩܝܐ܇ ܕܡܢ ܕܡܢ ܚܣܝܪܘܬܗ ܕܟܐܒܐ ܐܬܡܪܕ. ܘܩܛܝܪܐ ܕܡܪܥܐ ܕܠܓܦܪܐ ܫܪܐ܇ ܕܡ̈ܠܐ ܕܡܦܩܢܐ ܠܒܢ̈ܝ ܒܝܬܗ ܢܓܥܠ. ܐܠܐ ܟܝܬ: ܒܡܠܬܐ ܕܐܝܟ ܗܕܐ ܐܬܚܫܚ: ܗ݀ܘ ܪܝܫܐ ܕܟܠ ܥܘܕܪ̈ܢܝܢ: ܐܝܟܢܐ ܕܠܐ ܡܢ ܟܘܪܗܢܐ ܕܪܡܘܬܐ ܢܬܚܣܢ܇ ܐܝܟ ܡܢ ܕܡܢ ܥܠܸܬ ܡܝܬܪܘܬܗ܇ ܚܝܠܐ ܕܡܠܐܟܐ ܚܒܠܐ܇ ܠܝܗ̈ܠܐ ܕܐܬܘܪ̈ܝܐ ܐܪܡܝ. ܒܕܓܘܢ ܟܕ ܬܒ ܥܠܘܗܝ ܢܒـ[ـܥـ]ـܐ ܘܣܒܪܗ: 108b ܥܘܦܦܐ ܕܚ̈ܝܐ ܕܐܡܿܝܪܝܢ܆ ܐܙܥܿܩ ܘܥܡ ܬܫܒܘܚܬܐ ܐܟܪܙ. ܕܐܢܐ ܐܡܼܪܬ܆ ܕܒܪܘܡܐ ܕܝܘܡ̈ܬܐ ܕܝܠܝ ܐܙܠ. ܪܘܡܿܐ ܕܝܢ ܕܝܘܡ̈ܬܐ: ܐܡܿܪܝܢ ܐܝܠܝܢ ܕܟܕ ܐܝܟ ܗܠܝܢ ܦܘܬܚ̈ܐ ܐܬܐܡܸܢܘ ܕܐܝܬܘܗܝ܆ ܥܿܘܒܛܐ ܕܟܗܝܢܘܬܐ ܗ݀ܝ ܕܐܩܝܡ܇ ܒܝܕ ܨܠܘܬܐ ܙܕܝܩܬܐ܇ ܕܒܗܿ ܠܓܝܘ̈ܢܐ ܕܐܬܘܪ̈ܝܐ ܫܲܛܚ܇ ܐܢܕܝܢ ܘܐܝܟ ܣܘܪܚܐ ܐܢܫ ܢܩܼܪܐ܇ ܕܐܢܐ ܐܡܪܬ ܕܒܦܠܓܘܬ ܝܘܡ̈ܝ ܐܙܠ܆ ܐܦ ܗܟܢܐ ܗܘܼ ܪܥܝܢܐ܆ ܠܬܐܘܪܝܐ ܕܣܝܡܐ ܠܢ ܢܩܦ. ܗܢܘ ܕܝܢ ܦܠܓܘܬ ܝܘܡ̈ܬܐ܆ ܡܐ ܕܐܬܡܲܫܚܘ ܐܘ ܬܠܬܝܢ ܐܘ ܡܐܐ܇ ܘܒܬܪܟܢ ܡܢ ܡܫܘܚܬܐ ܢܬܩܦܕܘܢ ܘܢܬܩܦܣܘܢ܇ ܐܝܟ ܣܝܪܐ ܡܢ ܚܒܠܐ ܕܡܩܛܠܒܐ ܘܡܙܠܗܙܐ. ܐܝܟܢܐ ܟܝܬ ܕܡܢ ܗܠܝܢ܆ ܬܬܢܗܪ ܠܢ ܘܬܬܦܪܫ܆ ܕܒܬܚܘܡܐ ܡܕܡ ܘܡܫܘܚܬܐ܇ ܚ̈ܝܐ ܐܢܫ̈ܐ ܚܙܝܩܝܢ܇ ܗ݀ܝ ܕܒܥܝܕܐ ܦܪܘܬܣܡܝܐ ܐܘܟܝܬ ܘ݀ܥܕܐ ܡܟܢܝܢܢ. ܠܐ ܣܿܥܝܢܢ ܕܢܐܡܼܪ܇ ܐܝܟ ܐܝܠܝܢ ܕܒܚܫܐ ܕܡܢ ܠܠܘܬܐ ܟܪܝܗܝܢ܇ ܕܚܪܘܩܝܐ ܡܕܡ ܘܦܘܣܩܢܐ ܐܝܬ܇ ܘܬܚܘܡܐ ܥܠ ܐܠܗܐ܇ ܕܡܛܠܬܗ ܠܐ ܣܟ ܡܬܼܡܨܐ܇ ܕܢܪܟܐ ܐܘ ܕܢܘܪܟ ܒܚ̈ܝܐ ܕܐܪ̈ܥܢܝܐ. ܡܢܘ ܓܝܪ ܕܐܢܢܩܐ ܗܕܐ ܢܓܼܕ ܥܠܘܗܝ܇ ܘܠܥܡܘܪ̈ܝܗ ܩܕܡ̈ܝܐ ܕܬܒܝܠ܇ ܙܦܠܢ ܘܙܦܠܢ ܚܿܝܐ܇ ܘܕܠܐܚܪ̈ܢܐ ܙܘܠܗܙܐ ܕܚ̈ܝܐ ܢܥܒܕ܇ ܘܥܕܡܐ ܠܡܐܐ ܘܠܬܡܢܐܝܢ ܢܡܲܫܚ ܐܢܘܢ܇ ܐܝܟ ܬܚܘ̈ܡܐ ܕܘ̈ܝܕܝܐ. ܐܠܐ ܟܝܬ ܟܕ ܡܢ ܗܿܕܐ ܥܿܪܩܝܢܢ܆ ܠܘܬ ܗ݀ܝ ܕܫܦܝܪܘܬ ܕܚܠܬܐ ܐܝܬܝܗܿ ܡܬܩܪܒܝܢܢ. ܘܐܝܟܢܐ ܕܡܢ ܫܓܡܐ ܢܥܪܘܩ܆ ܐܡܿܪܝܢܢ ܕܬܚܘܡܐ ܕܚ̈ܝܐ ܝܗܼܒ ܠܢ ܗ݀ܘ ܛܿܒܐ܇ ܐܝܟ ܕܝ̈ܢܐ ܕܒܛܝܠܘܬܗ܆ ܟܕ ܠܗ݀ܝ ܕܣܓܝ ܥܕܪܐ ܠܢ ܡܕܒܪ܇ ܒܕܘܝܪܐ ܕܗܿܠܝܢ ܚ̈ܝܐ ܡ̈ܙܠܗܙܐ ܘܡܣ̈ܟܢܐ. ܘܡܲܥܒܕ ܐܝܟ ܪܘܡܿܐ ܠܐ ܡܬܡܫܚܢܐ܇ ܕܚܟܡܬܗ ܥܿܒܕܬ ܥ̈ܠܡܐ܆ ܘܡܲܦܩܢ ܘܡܲܥܠܢ ܕܠܚܝ̈ܐ ܘܕܡܢ ܚ̈ܝܐ. ܒܙܒܢܐ ܘܐܡܬܝ ܕܗܘܼ ܕܝܕ݀ܥ ܕܥܿܕܪ ܘܠܐ ܫܒܿܩ ܠܟܝܢܐ܇ ܕܗܼܘ ܡܢܗ ܢܬܬܝܬܐ ܘܠܟܪ ܕܨ݀ܒܐ ܢܪܕܐ܇ ܐܝܟ ܕܒܣܘܣܝܐ ܕܒܚܐܦܐ ܛܿܪܕ܇ ܐܘ ܠܟ ܪܕܝܐ ܘܐܫܝܕܘܬܐ ܕܪܘܚܐ ܕܠܐ ܩܝܿܡܐ ܗܝ. ܕܡܢ ܟܠܡܕܡ܇ ܕܠܐ ܡܲܕܥ ܗܝ ܘܕܠܐ ܡܠܬܐ ܗܝ ܐܦ ܕܢܣܬܟܠܝܗܿ܇ ܐܠܐ ܟܕ ܡܢ ܗܠܝܢ ܕܩܕܝܡ̈ܢ ܣܝ̈ܡܢ ܢܦܠܝܢ܇ ܥܡ ܫܪܪܐ ܘܥܡܢ ܕܐܪܝܢ܆ ܘܠܡܠܬܗ ܕܗ݀ܘ ܚܝܘܣܬܢܐ ܒܢܒ̈ܝܐ ܐܪܡܝܐ 109a ܡܥܠܝܢ ܠܢ ܠܡܨܥܬܐ. ܠܘܬ ܗܿܘ ܕܟܕ ܡܫܬܘܕܐ ܐܡܼܪ ܐܠܗܐ܆ ܕܐܢ ܐܡܿܪ ܥܠ ܥܡܐ ܘܥܠ ܡܠܟܘܬܐ: ܠܡܥܩܪ ܘܠܡܣܬܪ: ܘܠܡܣܚܦܘ ܘܠܡܘܒܕܘ: ܘܢܗܦܘܟ ܥܡܐ ܗܿܘ ܡܢ ܒܝܫܬܗ܆ ܐܦ ܐܢܐ ܐܗܦܘܟ ܡܢ ܡܐ ܕܐܬܪܥܿܝܬ ܥܠܝܗܘܢ. ܘܐܝܟ ܗܿܕܐ ܡܠܬܐ ܐܡܿܪܝܢ܆ ܠܐ ܡܫܥܒܕ ܐܠܗܐ܇ ܬܚܝܬ ܩܛܝܪܐ ܕܐܢܢܩܐ܇ ܠܘܬ ܕܝܢ ܗ݀ܢܘܢ ܕܗܠܝܢ ܡܙܡܙܡܝܢ܆ ܗܿܕܐ ܥܡ ܨܒܝܢܐ ܢܐܡܪ܆ ܕܠܘ ܬܚܝܬ ܢܝܪܐ ܕܐܢܢܩܐ ܡܿܝܬܝܢܢ ܠܐܠܗܐ ܐܘ̃ ܗܿܠܝܢ܆ ܠܝܬ ܬܚܝܬ ܐܢܢܩܐ. ܠܘ ܓܝܪ ܟܠܗ ܗܿܢܐ ܒܝܿܪܝܢܢ܇ ܡܢ ܪܓܫܬܐ ܘܡܢ ܣܘܟܠܐ܇ ܕܠܗ݀ܘ ܕܠܥܠ ܡܢ ܟܠ ܚܝܠ ܘܐܘܚܕܢ܇ ܬܚܝܬ ܩܛܝܪܐ ܢܟܼܘܦ܇ ܘܬܚܝܬ ܐܢܢܩܐ ܢܪܟܢ. ܠܘ ܓܝܪ ܥܠܘܗܝ ܚܪܝܩܐ ܕܗܟܢܐ ܢܡܫܚ ܠܚ̈ܝܝܢ܇ ܐܝܟ ܡܢܝܢܐ ܕܡܬܼܦܩܕ. ܕܡܢ ܨܦܪ ܠܪܡܫ ܢܬܚܬܡ ܪܗܛܐ ܕܦܘܠܚܢܗ܆ ܐܠܐ ܗܘܼ ܐܝܟ ܓܿܙܐ ܕܟܠ ܒܘܝܢܐ܆ ܡܫܚ ܘܠܚܝ̈ܝܢ ܣܲܩܡ܇ ܒܝܕܥܬܐ ܡܩܕܡܬܐ܇ ܐܝܿܕܐ ܕܠܥܒܿܕܐ ܚܿܙܩܐ ܒܙܒܢܐ ܟܐܢܐ܇ ܕܥܕ ܟܡܐ ܗܘܼ ܥܕܪ ܠܢ܇ ܕܒܚ̈ܝܐ ܒܣܪ̈ܢܝܐ ܢܕܝܪ܇ ܘܐܡܬܝ ܡܢ ܗ݀ܠܝܢ ܦـ[ـܩـ]ܚܐ ܗܝ ܠܢ ܕܢܬܓܙܐ. ܘܐܢܗܸܘ ܕܗܿܕܐ: ܠܐ ܢܩܒܠ ܐܝܟ ܫܪܝܪܬܐ: ܕܡܿܪܐ ܕܬܪ̈ܬܝܗܝܢ ܐܝܬܘܗܝ ܐܠܗܐ܇ ܕܐܣܿܪܢ ܟܝܬ ܘܕ݀ܫܪܝܢ܆ ܘܡܦܪܫܐܝܬ ܝܕܝܥ ܠܗ ܘܢܛܝܼܪ ܠܗ ܙܒܢܐ ܕܟܠ ܚܕܐ ܡܢܗ̈ܝܢ. ܡܢ ܟܠ ܐܠܨ̈ܬܐ ܗ݀ܝ ܕܢܿܘܕܐ܆ ܕܒܠܝܠܐܝܬ܆ ܘܒܫܓܡܐ ܗܠܝܢ ܕܝܠܢ ܡܬܬܝ̈ܬܝܢ܇ ܘܒܠܥܕ ܡܢ ܐܠܗ ܢܦܩ̈ܢ ܘܡܬܦܪ̈ܢܣܢ. ܕܠܐ ܕܝܢ ܐܒܢܐ ܕܟܫܠܐ: ܠܡܠܬܗ ܕܗ݀ܘ ܪܚܡܬܢܐ ܐܩܝܡ܆ ܐܢܐ ܠܗܕܐ ܐܕܟܐ ܠܟ. ܕܠܐ ܬܗܪܟ ܘܣܓܝ ܬܚܣܪܟ܇ ܡܫܡܥܬܐ ܠܐ ܡܢܦܩܬܐ.. ܐܝܟ ܕܒܓܪܡܐ ܐܝܬܝܗܿ ܡܠܸܬ ܐܠܗܐ. ܡܥܕ ܗܼܘ ܓܝܪ ܗܿܘ ܓܙܐ ܕܥܘܕܪ̈ܢܐ܇ ܕܒܐܣܟܝܡܐ ܕܓܲܙܡܐ ܡܦܢܝܢܐܝܬ ܢܬܚܫܚ܇ ܘܕܢܬܥܛܦ ܦܪܨܘܦܘܢܐ ܕܗ݀ܘ ܕܚܡܝܬܐ ܠܗܿ. ܟܕ ܠܘܬ ܗ݀ܝ ܕܡܥܕܪܢܝܐ ܚܐܦܐ ܐܝܬ ܠܗ. ܡܿܢ ܗܪܟܐ ܐܦ ܠܢܝ̈ܢܘܝܐ: ܒܝܕ ܝܘܢܢ ܗ݀ܘ ܚܿܙܝܐ܆ ܗܦܘܟܝܐ ܕܡܕܝܢܬܐ ܠܗܘܢ ܢܒܝ܇ ܟܕ ܠܬܝܒܘܬܗܘܢ ܘܠܦܘܪܩܢܗܘܢ ܕܒܝ̈ܫܐ ܐܬܪܐ ܝܗ݀ܒ ܗܘܐ. ܠܘ ܟܕ ܠܐ ܚܟܡ ܕܐܢ ܬܝܿܒܝܢ ܘܐܢ ܠܐ ܬܝܒܝܢ܇ ܘܡܢ ܗܪܟܐ ܐܘ ܫܘܘܙܒܐ ܐܘ ܚܘܿܒܠܐ ܢܩ݀ܦ ܠܗܘܢ܆ ܐܠܐ ܗ݀ܕܐ ܡܬܛܟܢ ܗܘܐ܇ ܗ݀ܘ ܚܝܠܐ ܡܥܠܝ ܡܢ ܛܘܟܢܐ. ܕܟܕ ܫܡܿܥܝܢ ܠܠܘܚܡܐ ܡܢ ܒܝ̈ܫܬܐ ܬܝܿܟܝܢ ܘܬܝܒܝܢ܆ ܠܐ ܢܚܼܫܘܢ ܗܿܠܝܢ ܕܠܘܚܡܐ 109b ܐܢܕܝܢ ܠܘ ܗܿܕܐ ܪܐ݀ܓ ܗܘܐ܆ ܣܓܝ ܦܫܝܩܐ ܗܘܬ ܠܗ܇ ܕܒܐܒܕܢܐ ܚܙܝܐ ܢ݀ܓܪܣ ܐܢܘܢ. ܘܥܠ ܡܐܟܘܠܬܐ ܕܢܒܝܐ ܥܿܪܘܩܐ ܠܐ ܡܣܬܢܩ ܗܘܐ܇ ܗ݀ܝ ܕܒܬܪ ܩܠܝܠ ܓܼܕܫܬ ܐܢܘܢ ܟܕ ܓܝܪ ܒܡܠܐ ܙܒܢܐ܇ ܡܢ ܦܐܪ̈ܝ ܥܒܕܝ̈ܗܘܢ ܥܢ̈ܬܐ܇ ܐܬܪܚܩܘ܆ ܥܠ ܪܘܫܥܼܗܘܢ ܦܢܼܘ. ܘܒܝܘܡ̈ܘܗܝ ܕܢܚܘܡ܆ ܕܝܢܼܐ ܕܫ݀ܘܝܢ ܠܗ ܩܒܼܠܘ: ܒܠܥܕ ܡܢ ܫܠܝܚܘܬܐ ܕܢܒܝܐ. ܒܕܚܿܕܐ ܓܝܪ ܕܒܢ ܝܠܼܦܘ ܗܘܘ ܠܗܘܢ: ܢܓܝܪܘܬ ܪܘܚܐ ܘܒܣܝܡܘܬܐ ܕܐܠܗܐ܆ ܐܫܝܚܘ. ܘܟܪܘܙܐ ܐܚܪܢܐ ܠܐ ܚܫܿܚ ܗܘܐ ܕܢܪܬܐ ܐܢܘܢܼ ܛܟ ܕܝܢ܆ ܥܡ ܦܟܢܘܬ ܘܦܟܝܗܘܬܐ ܐܡܿܪܝܢ ܗܘܘ܆ ܕܐܝܟܢܐ ܐܢܝ̈ܢ ܡܠܘܗ̈ܝ ܕܒܪ ܡܬܝ. ܐܝܟܢܐ ܓܝܪ ܕܠܡ̈ܠܘܗܝ ܕܗ݀ܘ: ܥܪܦܠܐ ܐܟܣܸܬ ܐܢܝ̈ܢ: ܗܟܢܐ ܘܥܠ ܡ̈ܠܝ ܟܪܘܙܐ ܐܚܪܢܐ ܪܢܝܿܢ ܗܘܘ. ܘܡܢ ܗܪܟܐ܆ ܥܒܿܕܐ ܕܐܒܿܕܢܐ ܟܘܠܢܝܐ ܗܘܘ. ܘܫܠܚ ܡܿܢ ܡܢ ܩܕܝܡ܆ ܘܒܝܕ ܝܘܿܢܢ ܪܕܐ ܗܘܐ ܘܓܿܙܡ ܗܘܐ ܠܗܘܢ܆ ܟܕ ܠܐ ܛܿܥܐ ܗܘܐ ܐܘ ܛܥܫ܇ ܠܬܚܘܡܐ ܕܡܣܡ ܒܪܝܫܐ ܘܠܩܼܨܐ ܗܿܘ ܕܐ݀ܬܐ ܥܠܝܼܗܘܢ ܘܠܐ ܡܟܕܒ܇ ܘܒܝܘܡ̈ܬܗ ܕܢܚܘܡ ܫܩܠ ܠܗܘܢ. ܐܠܐ ܟܝܬ ܕܠܣܓ̈ܝܐܐ: ܐܝܠܝܢ ܕܚܡܝܪܐ ܕܡܝܬܪܘܬܐ ܐܝܬ ܗܘܐ ܒܗܘܢ܆ ܒܝܕ ܡܠܬܐ ܕܓܿܙܡܐ ܘܕܠܘܚܡܐ. ܢܗܦܟ ܘܡܢ ܬܥ̈ܫܐ ܕܒܝܫܘܬܐ ܢܦܢܐ ܐܢܘܢ܆ ܘܫܘܘܙܒܐ ܕܡܢ ܕܝܢܐ ܢܫܟܢ ܠܗܘܢ. ܐܟܙܢܐ ܟܝܬ܇ ܕܐܢܫ ܬܪܐܐ ܣܓܝ ܪ̈ܥܝܢܐ܇ ܪܕܘܿܝܐ ܘܡܚܟܡܢܐ ܕܓܕܘܕ̈ܐ ܣ̈ܓܝܐܐ: ܕܣܟ̈ܠܐ ܟܝܬ ܘܣ̈ܟܘܠܬܢܐ܆ ܠܗ݀ܢܘܢ ܡܢ ܡܬܪܨ ܒܩܛܝܪܐ ܕܐܝܕ̈ܘܗܝ ܘܕܐܣܩܛܗ: ܘܟܕ ܚܪܫ ܘܛܒ ܫܬܩ ܡܢ ܐܡ̈ܢܝ ܣܡܘܬܐ ܠܗܘܢ ܡܥܒܪ: ܠܗܠܝܢ ܕܝܢ: ܒܝܕ ܡܠܬܐ ܪܫܘܝܬܐ ܡܟܘܢ: ܘܠܘܬ ܡܝܬܪܘܬܐ ܟܐ݀ܦ ܠܗܘܢ܇ ܗ݀ܝ ܕܝܬܝܪ ܡܢ ܡܐܪ̈ܓܢܐ ܠܪܥܝܢܐ ܚܐܪܝܐ ܡܬܠܡܕܐ: ܐܢܕܝܢ ܘܡܢ ܡܚܘܬܐ ܕܡܠܬܐ ܥܘܕܪܢܐ ܠܐ ܢܥܦܘܢ:̰ ܕܐܢ ܠܒܝܫܘܬ ܓܕܗܘܢ ܐܝܟ ܕܠܣܟܼ̈ܠܐ. ܒܗ ܒܙܢܐ܇ ܘܗ݀ܘ ܪܕܘܿܝܐ ܕܟܠ ܐܠܗܐ. ܠܣܟ̈ܠܐ ܡܢ ܘܒܝܫܐ: ܘܕܡܢ ܡܠܬܐ ܠܐ ܬܝܟܿܝܢ: ܒܝܕ ܫܒܛܐ ܪܕܘܝܐ ܡܫܩܦ ܠܗܘܢܼ ܠܐܝܠܢ ܕܝܢ: ܕܡܢ ܝܕ ܡܪܬܝܢܘܬܐ ܚܒܠܝܢ ܡܬܦܢܝܢܘܬܐ ܒܝܕ ܐܝܙ̈ܓܕܐ ܘܡܫܬܕܪ̈ܢܐ ܩܢܿܐ ܠܗܘܢ. ܒܕܓܘܢ܆ ܠܣ̈ܓܝܐܝ ܥܘܠܐ ܣܕܘ̈ܡܝܐ܆ ܒܝܕ ܫܬܩܐ܆ ܘܒܝܕ ܕܝܢܐ ܥܙܝܙܐܝܬ ܚܒܠ ܐܢܘܢ. ܚܟܡ ܗܘܐ ܓܝܪ܆ ܕܡܢ ܝܕ ܡ̈ܠܐ ܣܝܦܐ ܠܐ ܣܟ ܗܿܘܝܢ ܗܘܘ. ܐܝܟܢܐ ܓܝܪ܇ ܠܗ݀ܢܘܢ ܐܝܙܓܕܐ ܡܗܢܐ ܗܘܐ܇ ܠܗ݀ܢܘܢ ܐܝܠܝܢ ܕܐܦ ܠܡ̈ܠܐܟܐ ܕܠܛܘܠܩܗܘܢ ܐܫܬܠܚܘ܇ ܡܠܘܐܐ ܠܒܝܫܘܬ ܓܕܗܘܢ 110a ܐܩܝܡ ܐܢܘܢ ܠܗܿܢܘܢ ܕܝܢ: ܥܡܘܪ̈ܐ ܩܕܡ̈ܝܐ ܕܢܝܢܘܐ: ܒܝܕ ܡܠܸܬ ܡܫܬܕܪܢܐ ܠܗܘܢ ܪ݀ܕܐ ܗܘܐ܆ ܘܠܣܓ̈ܝܐܐ ܡܢ ܬܘܫܿܐ ܕܒܝܫ̈ܬܐ: ܐܦܢܝ ܐܢܘܢܼ ܘܠܚܪܬܐ ܩܒܠܘ ܕܝܢܼܐ ܕܣܕܘܡ̈ܝܐ ܟܕ ܐܡܢܝܗ̈ܘܢ ܩܕܡ̈ܐ ܚܲܒܪܘ ܗܘܘ. ܘܡܢ ܟܝ̈ܢܐ ܣܩܘܒ̈ܠܝܐ ܕܠܐ ܒܚܕܐ ܪܗܛܘ܆ ܓܙܪ ܕܝܢܐ ܥܦܝܦܐ ܩܒܠܘ ܢܗܪܐ ܓܝܪ ܕܒܓܣ ܡܕܝܢܬܗܘܢ ܪܕܐ܇ ܘܢܘܪܐ ܕܡܢ ܥܒܕ̈ܐ ܕܡܕܒܪܐ ܓܚܸܬ܆ ܗܢܘܿܢ ܡܼܢ. ܠܡܢܬܐ ܐܪܥܢܝܬܐ ܡܕܟܝܐ. ܗܿܕܐ ܕܝܢ܆ ܠܡܢܬܐ ܐܐܪܝܬܐ ܐܣܝܦܬ܆ ܗ݀ܠܝܢ ܬܫܥܝܬܐ ܠܢ ܐܠܦܬ܆ ܘܡܠܬܗ ܕܢܚܘܡ܇ ܕܪܡܙܢܐܝܬ ܓܥܝܐ ܠܕܝܢܗܘܢܼ ܐܠܐ ܛܟ ܢܐܡܼܪ ܐܢܫ܆ ܕܡܕܓܠ ܗܘܼ ܐܠܗܐ܆ ܕܡܠܟ ܙܦܠܢ ܐܘ ܙܦܠܢ܇ ܘܗܘܡܐ ܕܐܫܬܘܝ ܠܥܒ̈ܕܐ ܠܐ ܥܒܼܕ. ܠܦܘܬ ܗ݀ܕܐ ܐܡܿܪܝܢܢ: ܡܢ ܬܚܘܝܬܐ ܦܪܓܘܓܝܬܐ. ܐܢܓܝܪ ܢܐܡܪ ܪܕܘܝܐ ܠܥܠܝܡܐ܇ ܕܡܢܓܕܢܐ ܠܟ ܘܡܚܐ ܐܢܐ ܠܟ܆ ܘܡܪܝܪ̈ܬܐ ܚܪ̈ܢܝܬܐ ܠܐܕܢܘ̈ܗܝ ܢܨܘܠ܆ ܟܕ ܪܥܿܐ ܘܗܢܘ ܢܝܫܗ܆ ܕܒܝܕ ܠܘܚܡܐ ܘܕܚܠܬܐ ܡܢܬܐ ܕܡܪܕܘܬܗ ܬܫܬܘܫܛ: ܘܥܠ ܩܛܝܪܐ ܕܡܢ ܐܝܕܐ ܘܡܚܘܬܐ ܠܐ ܢܬܣܬܢܩ܆ ܠܡܐ܇ ܕܟܕܒ ܪܕܘܝܐ ܐܡܿܪܝܢܢ: ܕܡܠܟ ܠܥܠܝܡܐ ܕܡܚܐ ܘܠܐ ܡܚܐ܆ ܠܐ ܟܢܬ܇ ܐܢܗܼܘ ܕܠܘܬ ܢܝܫܐ ܘܨܒܝܢܐ ܕܝܠܗ ܚܝܪܝܢܢ܇ ܗܿܘ ܕܐܝܬܘܗܝ ܕܒܐܝܿܢܐ ܕܗܘܼ ܙܢܐ܇ ܗܘܼ ܥܠܝܡܐ ܒܡܬܐܡ̈ܛܐ ܢܬܐܡܢ. ܘܙܕ݀ܩ ܗܘܐ܆ ܕܥܡ ܬܚܘܡܐ ܠܠܟܣ̈ܝܣ ܕܝܠܗ ܢܥܒܼܕ. ܕܡܚܐ ܐܢܐ ܠܟ܆ ܐܢ ܒܩܪܝܢܟ ܡܐܡܢ ܐܢܬ. ܡܛܠ ܕܝܢ: ܕܗ݀ܝ ܕܢܡܠܘܟ ܕܡܿܚܐ ܐܢܐ ܠܟ: ܣܦܩܐ ܕܬܣܿܟܠ ܠܥܠܝܡܐ܇ ܕܡܠܬ ܡܐܝܢܘܬܗ ܐܝܬܝܗܿ܆ ܡܠܬ ܪܕܘܝܐ ܕܐܬܠܚܸܡܬ. ܠܐ ܐܣܬܢܩ ܕܥܡ ܬܚܘܡܐ ܢܐܡܪܝܗܿ܇ ܘܒܣܘܟܠܐ ܗ݀ܝ ܕܝܢ ܢܬܚܫܚ. ܒܗ ܗܟܝܠ ܒܕܡܘܬ ܙܢܐ ܐܝܬܝܗܿ܆ ܐܦ ܡܠܬܐ ܗ݀ܝ ܕܒܗܿ ܐܬܚܫܚ ܗܿܘ ܪܚܡܬܢܐ܇ ܠܘܬ ܫܪܒܬܐ ܗ݀ܝ ܕܐܬܘܪ̈ܝܐ܇ ܕܡܟܐ ܠܐܪܒܥܝܢ ܝܘܡ̈ܝܢ ܢܝܢܘܐ ܡܬܗܦܟܐ. ܟܐܡܬ. ܐܢ ܠܐ ܬܝܒܿܝܢ. ܘܟܕ ܗܢܿܐ ܢܝܫܐ ܠܠܟܣܝܣ ܐܝܬ܆ ܐܡܿܪܝܢܢ ܕܠܐ ܟܕܒ. ܐܠܘ ܓܝܪ ܐܡܼܪ܇ ܕܡܟܐ ܠܐܪܒܥܝܢ ܝܘܡ̈ܝܢ: ܘܒܟܠܦܪܘܣ ܢܝܢܘܐ ܡܬܗܦܟܐ܇ ܒܬܪܟܢ ܕܝܢ ܗܿܕܐ ܟܕ ܐܬܬܘܝܬ: ܡܫܟܚܐ ܗܘܬ ܦܘܿܠܛܐ ܕܡܢ ܗܦܘܟܝܐ܆ ܛܟ܆ ܡܙܕܕܩܐ ܕܓܠܘܬܐ. ܐܠܐ ܟܝܬ ܘܠܐ ܚܕܐ ܐܡܼܪ ܥܡ ܬܚܘܡܐ. ܘܠܐ ܕܡܢ ܟܠܦܪܘܣ ܐܒܿܕܐ܆ ܒܪܡ ܠܘܬ ܓܡܪܘܬܗ ܕܣܘܥܪܢܐ ܗ݀ܝ ܐܬܚܘܝܬ܆ ܕܡܛܠ ܗ݀ܝ ܕܢܬܘܒܘܢ܇ ܡܠܸܬ ܠܘܚܡܿܐ ܐܬܬܣܪܚܬ ܘܐܦܘܦܢܝܣܬܐ ܥܒܼܕܬ܆ 110b ܕܡܢܐ ܘܠܙܦܠܢ܇ ܡܬܥܛܝܐ ܡܕܝܢܬܐ ܗܕܐ ܢܝܢܘܐ. ܒܕܐܝܟ ܗܢܐ ܗܟܝܠ ܣܘܟܠܐ܆ ܐܦ ܡܠܸܬ ܛܘܒܢܐ ܐܪܡܝܐ܇ ܟܕ ܓܝܪ ܥܡ ܬܚܘܡܐ ܗܿܘ ܡܪܝܐ ܠܘܬܗ ܡܲܫܡܥ ܐܡܼܪ. ܕܐܢ ܐܡܼܪ ܥܠ ܙܦܠܢ ܐܘ ܙܦܠܢ ܡܠܬܐ܆ ܘܠܘ ܡܒܐܫܢܝܬܐ ܐܘ ܡܛܐܒܢܝܬܐ܇ ܘܢܬܦܢܘܢ ܗܿܢܘܢ ܘܢܫܒܩܘܢ ܠܐܡ̈ܢܝܗܘܢ ܒܝ̈ܫܐ ܐܘ ܛܒ̈ܐ܆ ܐܦܿܠܐ ܢܚܫܘܢ ܗܿܝ ܕܐܬܪܢܝܬ܇ ܠܘ ܐܝܟ ܡܢ ܕܫܪܝܪܐܝܬ ܘܕܠܐ ܬܚܘܡܐ ܐܝܬܘܗܝ ܠܗ܇ ܙܒܢܐ ܕܐܒܕܢܗܘܢ ܘܩܼܨܐ ܕܚܘܒܠܗܘܢ. ܡܬܚܡ ܠܗܓܝܪ ܘܦܪܝܫ܇ ܕܡܐ ܕܐ݀ܩܠܝܼܘ ܘܐܣܓܝܘ ܘܐܫܲܚܝܘ܇ ܥܠ ܡܠܬܐ ܗ݀ܝ ܕܠܘܚܡܐ܆ ܗ݀ܝ ܬܡܢ ܡܛܠܩ ܠܗܘܢ. ܐܢܕܝܢ ܘܥܠܝܗܿ ܡܩܝܡܝܢ: ܘܡܩܕܡܐܝܬ ܝܕܥܿ ܠܗܿܕܐ܆ ܐܦ ܕܠܘ ܗܪ ܬܡܢ ܡܓܡܪ ܠܗܘܢ܆ ܐܟܚܕܐ ܒܝܕܥܬܐ ܡܩܕܡܬܐ ܐܝܬ ܠܗܿ. ܐܟܡܐ ܕܫܦܪ ܐܟܣܬ ܬܚܘܝܬܐ ܐܬܘܪܝܬܐ ܕܐܬܢܣܸܒܬ݀ ܘܡܛܠ ܡܿܢܐ ܠܡ܇ ܦܪܓܠ ܡܘܫܐ ܗ݀ܘ ܪܕܘܝܗ ܕܢܡܘܣܐ܇ ܡܠܠܘܢ ܕܝܢ ܗ݀ܘ ܕܒܡܘܫܐ ܡܡܠܠ. ܕܠܐܓܪ̈ܐ ܡܢ ܢܚܕܪ ܬܝ̈ܟܐ܇ ܥܠ ܓܘܒܐ ܕܝܢ ܟܣܝܐ ܢܝܬܐ. ܠܘ ܐܪܐ: ܐܝܟܢܐ ܕܗܘܼ ܠܗ ܡܚܪܪܐ ܢܣܝܡ: ܡܢ ܡܿܘܐ ܐܒܕܢܝܐ ܘܥܿܛܝܐ܆ ܗܿܝ ܕܐܦ ܗܼܘ ܐܡܼܪ ܕܠܐ ܢܦܼܠ ܐܢܫ ܘܬܐܡܪ܇ ܕܡܢ ܡܪܝܐ ܗܘܬ ܠܝ܆ ܫܦܝܪ ܘܐܦܠܐ ܐܢܐ܇ ܠܘܩܒܠ ܗܿܕܐ ܡܬܚܪܐ ܐܢܐ. ܝܕܥܢܐ ܓܝܪ ܠܗܿܘ ܪܚܡܬܡܢܐ ܘܟܐܢܐ܆ ܕܠܐ ܒܡܕܡ ܕܬܘܩܠܬܐ ܠܐܢܫ ܗܘܐ܆ ܘܝ݀ܨܦ ܕܠܐ ܒܗܿܕܐ ܢܣܬܒܪ܇ ܘܕܡܣܒܪܢܘܬܐ ܥܘܠܬܐ܇ ܣܓ̈ܝܐܐ ܕܝܢܐ ܢܬܠܘܢܼ ܡܛܠ ܗ݀ܢܐ ܟܕ ܥܠܬܐ ܕܐܒܕܢܐ ܚܐܪܘܬܐ ܗܘܬ܆ ܒܡܬܥܠܝܢܘܬܐ ܕܠܪܘܡܐ ܗ݀ܘ ܕܐܓܪܐ܆ ܕܕܡ ܐܢܫ ܟܕ ܡܬܒܘܪܪ ܘܡܢ ܫܢܬܐ ܡܒܕܒܕ ܢܬܕܚܐ ܘܢܼܦܠ܇ ܠܥܠܬܐ ܢܩܛܪܓ ܥܠ ܐܠܗܐ. ܒܝܕ ܡܠܬܐ ܡܙܗܪ܆ ܕܢܥܼܒܕ ܬܝ̈ܟܐ ܠܐܓܪ̈ܐ. ܐܝܟܢܐ ܕܒܡܐܡܪܐ ܗ݀ܘ ܕܩܕܡ ܗܢܐ: ܐܝܦܘܕܝܟܣܐ ܥܒܕܝܢ܆ ܦܪܝܫ ܗܘܼ ܙܢܐ ܕܥܠܬܐ ܕܠܛܘܠܩܐ ܕܚ̈ܝܐ ܥܿܒܕܐ܇ ܡܢܗ ܕܩܨܐ ܘܕܡܘܬܐ. ܕܗܿܝ ܡܢ ܓܝܪ ܥܠܬܐ ܐܠܗܐ܇ ܠܘ ܡܢ ܟܠܦܪܘܣ܆ ܐܝܟܢܢ ܕܐܟܼܣܢܢ. ܕܫܿܪܝܐ ܕܝܢ ܘܘܕܥܘܢܕܢܐ ܐܠܗܐ: ܒܟܠܦܪܘܣ ܘܒܟܠ ܥ̈ܠܠܢ ܐܝܟܢܐ ܕܚܿܘܝܢܢ. ܠܦܬܓܡܐ ܕܝܢ ܗܿܘ ܡܘܫܝܐ܆ ܗܟܢܐ ܫܡܥܬ ܠܐܚܪ̈ܢܐ ܕܬܪܓܡܘܗܝ. ܘܐܦ ܗܘܼ ܥܿܕܪ ܗܘ܇ ܕܒܝܨܝܦܘܬܐ ܗܕܐ ܕܩܝܡܐ ܢܬܛܿܟܣ. ܡܛܠ ܓܝܪ ܐܡܿܪܝܢ: ܕܠܓܕܐ ܘܠܚܠܼܩܐ ܡܢ ܥܝܕܐ ܕܥܡ ܐܓܘܒ̈ܛܝܐ ܐܬܝܠܦܘ ܗܘܘ ܥܒܪ̈ܝܐ: ܕܗܿܘ ܡܢ ܐܝܬܘܗܝ ܡܕܡ ܕܐܝܟ 111a ܕܒܓܕܫܐ ܘܫܓܡܐ ܗܘܐ: ܡܢ ܒܝܫ̈ܬܐ ܐܘ ܡܢ ܡܝܬܪ̈ܬܐ: ܗܢܐ ܕܝܢ ܕܡܢ ܡܕܒܪܢܘܬܐ ܕܚ̈ܝܠܘܬܐ ܫ̈ܡܝܢܐ܆ ܛܥ̈ܝܐ ܟܝܬ ܘܠܐ ܛܥ̈ܝܐ ܚܪܝܩ ܘܦܣܝܩ: ܘܡܢܗ ܠܝܬ ܠܡܓܕܘ܆ ܕܠܐ ܗܟܝܠ ܒܗܕܐ ܫܢܝܘܬܐ ܥܟܪ̈ܢܐ ܢܬܟܪܗܘܢ ܘܢܓܕܦܘܢ܆ ܐܘ ܕܠܐ ܐܝܬ ܒܛܝܠܘܬܐ: ܐܝܟ ܪܥܝܢܐ ܡܛܠ ܓܕܐ ܐܘ ܕܒܝ̈ܫܬܐ ܘܛܒ̈ܬܐ܆ ܐܘ ܕܕܘܘܢܐ ܐܘ ܫܘܘܟܢܐ ܥܠ ܐܠܗܐ ܢܥܼܒܪܘܢ ܢܣܝܼܡܘܢ. ܘܠܘ ܥܠ ܥܒܝܕܬܐ ܕܚܐܪܘܬܗܘܢ ܐܝܟ ܘܠܝܬܐ܆ ܕܠܐ ܗܟܝܠ ܗܿܠܝܢ ܢܚܫܘܢ܆ ܚܫܚܐܝܬ ܦܪܓܠ ܐܢܘܢ܇ ܘܡܢ ܡܣܒܪ̈ܢܘܬܐ ܫ̈ܛܝܬܐ ܐܪܚܩ ܐܢܘܢ ܘܗܠܝܢ ܡܢ ܟܠܗ ܗܢܐ܀ ܢܦܢܐ ܕܝܢ ܡܢ ܗܪܟܐ܆ ܘܥܛܝܐ ܢ݀ܬܠ܇ ܠܚܫܘܒܐ ܦܚܝܚܐ ܕܥܡܢ ܕܐܐܪ. ܗܐ ܠܡ ܚܿܙܝܢܢ ܐܢܫ ܚܠܫܐ܇ ܕܥܠ ܦܠܓܐ ܕܦܪ̈ܝܫܐ ܐܩܠܝ. ܘܗܿܢܘܢ ܡܢ ܗܪܟܐ܆ ܣܘܦܝܗܿ ܥܒܕܘ. ܘܐܠܘ ܟܝܬ: ܗܿܕܐ ܠܐ ܥܒܕܘ܆ ܛܟ ܠܐ ܡܐܬ ܗܘܬ. ܥܡ ܗ݀ܕܐ ܕܝܢ ܐܘ̃ ܗܿܢܐ: ܠܐ ܚܼܙܝܬ ܘܠܐ ܫܡܼܥܬ: ܐܢܫ ܓܢܒܪ ܥܘܫܢܐ ܘܬܟܝܠܐ܇ ܕܥܠ ܐܢܫ̈ܝܢ ܚ̈ܠܫܐ ܐܬܠܒܒ: ܘܡܢ ܚܕ ܕܫܕܐ ܣܘܦܝܗܿ ܗܘܐ: ܐܢܐ ܕܝܢ ܫܡܼܥܬ܆ ܘܠܐ ܥܛܠܝܐܝܬ ܗܝܡܢܬ. ܕܗ݀ܘ ܕܣܓܝܐܝܬ ܒܩܐܪ̈ܣܐ ܘܩܪ̈ܒܐ ܐܨܿܠܚ܆ ܕܡܢ ܐܢܫ ܚܠܫܐ ܐܬܪܡܝ. ܟܒܪ ܟܕ ܡܲܟܣ ܗ݀ܘ ܛܒܿܐ܇ ܠܕܪܥܐ ܡܚܝܠܐ ܕܠܐ ܢܡܘܣ܇ ܕܓܢܒܪܐ ܕܥܠ ܬܘܩܦܗ ܣܡܟ. ܦܝܣ̈ܐ ܢܥܒܕܟ܆ ܛܠܝܐ ܐܠܗܝܐ. ܗ݀ܘ ܕܟܕ ܐܩ݀ܠܥ܆ ܠܓܘܠܝܕ ܕܘܝܐܝܬ ܐܡܿܝܬ. ܐܝܬ ܕܝܢ ܘܒܒ̈ܢܝܐ ܕܐܢܫ̈ܐ܆ ܕܟܕ ܚܝܠܐ ܕܬܪ̈ܝܗܘܢ ܫܘܼܐ ܒܢܙܠܐ ܗܘ: ܘܥܡ ܚܕ̈ܕܐ ܒܕܪܐ ܐܬܥܪܙܠܘ܆ ܕܐܚܪܢܐ ܠܐܚܪܢܐ ܓܲܪܣܘ. ܐܝܬ ܕܝܢ ܐܡܬܝ܆ ܕܐܦ ܚܠܿܫܐ ܠܓܢܒܪܐ ܐܡܿܝܬ܆ ܘܓܢܒܪܐ ܬܘܒ ܠܡܚܝܠ ܕܪܥܐ ܘܠܓܢܒܪܐ ܚܒܪܗ. ܘܐܢܗܼܘ ܡܢ܇ ܕܐܝܟ ܣ݀ܥܝܐ ܕܐܬܐܡܪ: ܡܩܠܚܘܬܗ ܕܚܲܠܫܐ ܕܥܠ ܦܠܓܐ ܗ݀ܝ ܥܒܼܕܬ ܥܘܢܕܢܗ܆ ܡܬܬܚܝܒܐ ܗܘܬ܆ ܕܓܢܒܪܐ ܕܡܢ ܝܕ ܚ݀ܠܫܐ ܐܫܬܪܝ܆ ܕܢܘܕܐ ܕܠܘ ܫܪܝܗܿ. ܡܢ ܚܐܦܐ ܐܚܪܢܐ ܗܘܐ܇ ܒܠܥܕ ܡܠܬܐ ܕܗ݀ܘ ܕܐܣܼܪ. ܘܐܢܗܸܘ ܡܢ: ܕܠܓܢܒܪܐ ܫܒܩ ܒ̈ܐܝܕܝ ܚܠܫܐ: ܗ݀ܘ ܡܪܗ ܕܚܝܠܐ܆ ܘܐܦ ܠܚܠܫܐ ܝܕܝܥܐ ܗܝ܆ ܗܘܼ ܛܿܪܦ ܒܐܝ̈ܕܝ ܓܢܒܪܐ. ܟܕ ܬܡܢ ܡܢ܆ ܠܥܘܫܢܐ ܕܚܛܝܬܐ ܣܚܿܦ ܗܪܟܐ ܕܝܢ܆ ܡܩܝܡ ܘܬܟܣ܇ ܠܚ̈ܝܐ ܕܒܚܛܝܬܐ ܪܕ[ܝܢ] ܟܕ ܒܬܪܬܝ̈ܗܝܢ ܠܘܬ ܗܿܝ ܕܥܕܪܐ ܚܿܐܪ. ܗ݀ܝ ܕܝܢ ܕܒܦܟܗܐ ܐܬܐܡܪܬ: ܕܐܠܘܠܐ ܥܒܼܕ ܗ݀ܘ ܙܦܠܢ܇ ܠܘܬ ܫܿܪܝܐ ܠܐ ܡܬܥܪܓܠ ܗܘܐ܆ ܠܡܘܝܩܐ ܦܬܝܐ ܫܘܿܝܐ. ܗܝܼ ܓܝܪ ܗܕܐ: ܡܨܝܐ ܕܬܪܗܛ ܥܠ ܟܠ ܨܼܒܘ. ܐܠܘ ܓܝܪ ܠܡܐܟܠ ܠܐ ܡܣܓܐ ܗܘܐ ܐܢܫ܆ ܠܐ ܡܬܟܪܗ ܗܘܐ ܘܐܠܘܠܐ ܡܬܬܪܬܚ ܗܘܐ. ܐܘ ܡܬܩܘܪܪ ܗܘܐ ܐܘ ܒܙ[ܝܡـܝـ]ـܐ ܐܚܪܬܐ ܠܐ ܡܬܬܚܕ ܗܘܐ܆ ܐܢܢܩܐ ܕܡܪܥܐ ܠܐ ܣܒܿܠ 111b ܗܘܐ. ܡܬܟܣܣܐ ܕܝܢ ܗ݀ܕܐ ܡܚܫܒܼܬܐ ܦܟܝܗܬܐ ܗܟܢܐ. ܐܠܘ ܓܝܪ ܐܢܫ ܠܐ ܐ݀ܟܠ܆ ܐܦܠܐ ܙܘܥܿܐ ܩܿܢܐ ܗܘܐ. ܡܛܠ ܕܝܢ ܕܐܟܿܠ܆ ܐܝܬ ܠܗ ܗ݀ܝ ܕܢܬܬܙܝܥ. ܘܚܛܝܐ ܠܐ ܡܬܬܡܝܬ ܗܘܐ܇ ܡܢ ܝܕ ܡܚܘܬܐ ܡܪܝܪܬܐ܇ ܐܠܘܠܐ ܕܒܣ݀ܡ ܠܗ ܪܘܫܥܐ. ܘܗܿܘ ܪܝܫ ܓܒܝܠܬܢ ܒܪܫܝܬ܆ ܡܢ ܐܝܠܢܐ ܕܚ̈ܝܐ ܘܡܢ ܦܪܕܝܣܐ܆ ܠܐ ܡܬܢܟܪܐ ܗܘܐ܇ ܐܠܘ ܡܢ ܐܝܠܢܐ ܕܝܕܥܬܐ ܠܐ ܛܥܼܡ ܗܘܐ. ܡܛܠ ܕܝܢ ܕܒܿܣܡ ܠܚܛܝܐ ܪܘܫܥܗ: ܘܠܐܕܡ ܐܬܚܠܝ ܦܐܪܐ ܘܕܘ݀ܫܐ ܕܦܘܪܩܢܐ܇ ܗ݀ܘ ܡܢ ܠܩܨܐ ܚܒܿܠܐ ܐܫܬܼܠܡ܆ ܗ݀ܢܐ ܕܝܢ ܠܐܟܣܘܪܝܐ ܕܘܝܬܐ. ܒܕܓܘܢ: ܡܛܠ ܕܡܿܩ[]ܡܐܝܬ ܝܕ݀ܥ ܐܠܗܐ: ܕܟܕ ܡܨܝܐ ܗܝ ܕܚܛܝܐ ܡܢ [ܚـ]ـܛܝܬܐ ܠܐ ܢܬܢܟܡ: ܒܪܡ ܨ݀ܒܐ ܘܠܗ݀ܕܐ ܓܿܡܪ: ܡܛܠ ܕܐ[]ܐ ܚܛܐ ܡܢ ܡܘܬܐ ܠܐ ܡܬܒܼܠܥ ܗܘܐ܇ ܡܛܠ ܕܫܦܼܪ ܠܗ ܘܚܛܐ܆ ܐܦ ܠܫܿܪܝܐ ܐܝܟ ܡܢ ܕܥܿܕܪ ܬܚܿܡ ܘܦܪܫ܆ ܗ݀ܘ ܓܝܪ ܛܿܒܐ܆ ܠܘ ܡܦܲܫܟܐܝܬ ܠܡܬܡ̈ܨܝܢܝܬܐ ܚܿܟܡ. ܐܝܟܢܐ ܕܐܦ ܚܐܪܘܬܐ ܕܝܠܢ. ܚܢܢ ܡܢ ܓܝܪ ܗܕܐ ܒܚܟܡܬܢ ܪܢܝܿܢܢ. ܕܐܠܘܠܐ ܒܩܐܪܣܐ ܘܒܩܪܒܐ ܥܠ ܗܘܐ ܐܢܫ܆ ܠܐ ܡܬܕܪܟ ܗܘܐ ܡܢ ܩܨܐ. ܘܐܠܘܠܐ ܒܓܘ ܒܝܬܐ ܕܡܲܛܝ̈ܛܢ ܐܫ̈ܝܬܗ ܐܚܪܢܐ ܠܐ ܥܠ܆ ܠܐ ܣܿܐܦ ܗܘܐ ܡܢ ܒܝܬܐ ܕܪܒܚ܇ ܐܠܗܐ ܕܝܢ ܚ݀ܟܡ ܘܩܿܕܡ ܕܐ݀ܩ܇ ܕܟܕ ܡܨܝܐ ܗܝ ܕܗܿܘ ܡܢ ܠܕܪܐ ܠܐ ܢܥܘܠ܆ ܕܥܠ ܗ݀ܝ ܕܢܥܘܠ ܝܬܝܪ ܡܬܚܝܠ܆ ܘܕܢܦܘܫ ܡܢ ܩܛܠܐ ܠܐ ܐܝܬ ܠܗ܇ ܘܕܐ݀ܩ ܡܢ ܪܘܩܚܐ ܚܿܐܪ ܠܗ. ܕܠܐ ܗܿܕܐ ܡܫܟܚܢܐܝܬ ܣ݀ܒܥ܇ ܡܛܠ ܕܠܐ ܡܬܥܒܪܢܐܝܬ ܝܕܥܗ. ܠܡܦܩܢܐ ܘܠܚܘܬܡܐ ܕܦܪܟܣܝܣ܇ ܘܠܘ ܐܝܟܢ ܕܚܢܢ܇ ܡܚܓܣܐܝܬ ܕܐܢ ܠܐ ܙܦܠܢ ܠܐ ܙܦܠܢ. ܐܢܓܝܪ ܡܛܠ ܕܐܢܫ܆ ܬܚܝܬ ܬܛܠܝܠܐ ܕܥܠ ܐܫ̈ܝܬܐ ܡܲܛܝ̈ܛܬܐ ܘܡܲܓܢ: ܥܠ ܐܬܬܡܝܬ܆ ܙܕܩܿ ܗܘܐ ܕܐܦ ܥܠ ܐܚܪ̈ܢܐ܆ ܗܝ ܟܕ ܗܝ ܦܪܟܣܝܣ ܬܫܪ. ܘܗܐ ܚܿܙܝܢܢ ܐܦ ܟܝܬ ܘܫܿܡܥܝܢܢ ܕܒܗ ܟܕ ܒܗ ܒܒܝܬܐ܇ ܟܕ ܣܓ̈ܝܐܐ ܓܢܸܝܢ ܗܘܘ: ܕܚܕ ܡܢ ܐܡܼܪ܆ ܘܡܢ [ܕܝـ]ـܪ ܫܢܘ̈ܗܝ ܕܡܘܬܐ ܐܬܦܨܝ. ܘܐ[ܚـ]ـܪܢܐ ܕܒܪܫܥܬܗ ܩܒܠ ܣܘܿܦܢܐ. ܐܠܐ ܐܡܼܪ. ܕܬܚܝܬ ܓܦܬܐ ܐܘ ܩܝܣܐ ܐܘ ܡܕܡ ܐܚܪܢܐ ܐܣܬܬܪ. ܘܐܝܟ ܕܡܢ ܓܕܫܐ܆ ܐܫܟܚ ܦܘܿܠܛܐ. ܘܗܐ ܣ̈ܓܝܐܐ ܡܢ ܕܚܠܬܐ ܠܚܘܕ ܕܡܲܛܪܘܦܝܬܗ ܕܒܝܬܐ ܩܒܠܘ ܫܘܢܝܐ܆ ܘܠܡܒܥܪܢܐ ܕܛܡܝܪ̈ܐ܆ ܠܬܘܗܬܐ ܘܠܕܘܡܪܐ ܐܫܪܟ ܐܢܘܢ ܟܕ ܬܘܝܪܝܢ܆ ܕܕܠܐ ܚܫܐ ܘܕܠܐ ܡܚܘܬܐ ܚܙܘ ܠܩܸܨܐ ܕܠܓܒܪ̈ܐ ܕܚܩܘ ܡܢ ܚ̈ܝܐ. ܠܐܚܪ̈ܢܐ ܕܝܢ܆ ܫܘܿܙܒ ܗ݀ܘ 112a ܛܿܒܐ. ܘܟܕ ܡܢ ܪܘܡܿܐ ܕܐܓܪܐ ܥܙܝܙܐܝܬ ܐܬܢܿܦܠܘ ܠܐ ܡܝܬܘ. ܐܚܪܢܐ܆ ܟܕ ܫܿܘܪܬܐ ܙܥܘܪܬܐ ܚܫ܆ ܕܒܪܫܥܬܗ ܐܙܠ ܠܫܝܘܠ. ܠܐܚܪ̈ܢܐ܆ ܡܢ ܬܗܘܡ̈ܐ ܥ̈ܡܝܩܐ ܘܚ̈ܐܦܐ ܕܪ̈ܕܝܐ ܕܡܬܓܠܠܝܢ܇ ܡܢ ܚܢܘܩܝܐ ܫܘܘܙܒܐ ܫܟܢ ܗ݀ܘ ܛܿܒܐ. ܬܦܝܣ ܕܝܢ ܗܕܐ܆ ܐܠܦܗ ܕܦܘܠܘܣ܇ ܗ݀ܝ ܕܟܠܗܘܢ ܕܢܐܪ̈ܝܗܿ ܥܠ ܚܨܐ ܐ݀ܫܝܕܐ ܕܡ̈ܝܐ ܐܣܿܡܟܼܬ݀. ܘܗܸܝ ܠܡܢ̈ܘܬܐ ܣ̈ܓܝܐܬܐ ܐܬܦܠܗܕܬ. ܘܚܕ ܡܢܗܘܢ ܕܐܬܓܪܣ ܡܢ ܡܘܬܐ ܠܐ ܫܡܿܥܝܢ. ܥܠ ܐܚܪ̈ܢܐ ܕܝܢ܆ ܗ݀ܕܐ ܐܬܛܒܒܢܢ. ܕܟܕ ܐܠܦܗܘܢ ܡܢ ܓ̈ܠܠܐ ܐܫܬܸܪܝܬ܆ ܥܡ ܡܘܒܠܗܿ ܐܦ ܠܓܒܪ̈ܝܗ ܐܪܡܸܝܬ. ܘܟܠܗܘܢ ܠܒܝܬ ܣܝܓܪ ܫܢܘ̈ܗܝ ܕܡܘܬܐ ܐܙܠܘ. ܐܝܟ ܗ݀ܝ ܕܐܕܘܣܘܣ ܠܗܿܝ ܦܠܗܕ ܘܫܪܟܐ ܟܝܡܘܢܐ܆ ܫܘܸܙܒܬ ܠܓܒܪܐ ܣ̈ܓܝ ܪ̈ܥܝܢܐ܆ ܘܛܒܥܬ ܠܚܒܪ̈ܘܗܝ ܒܝܫ̈ܝ ܥܢ̈ܝܢܐ. ܥܠ ܗܠܝܢ܆ ܐܦ ܡܢ ܠܥܠ ܢܣܒܢܢ. ܘܒܕܓܘܢ ܣ݀ܦܩܐ ܗܝ ܗܟܢܐ ܡܠܬܐ. ܘܐܟܝܢܐ ܠܡ ܐܬܘܥܕܘ܇ ܩܨ ܫܘܠܡܐ ܕܚܝܘ̈ܗܝ ܕܗ݀ܘ ܕܡܬ܇ ܘܨܒܝܢܐ ܕܩܛܘܠܐ܇ ܐܘ ܕܡܿܝܬܐ ܣܿܡܐ. ܬܗܪܐ ܗܘ ܐܡܿܪܝܢ. ܐܦܠܐ ܗܘܼ ܐܢܐ܇ ܦܐ݀ܫ ܐܢܐ ܡܢ ܕܘܡܿܪܐ ܕܬܪܥܝܬܐ܇ ܕܐܩܪܒ ܠܡܪܐ ܬܘܕܝܬܐ: ܟܕ ܒܪܒܘܬܗ ܕܣܘܥܪܢܐ ܣܓܝܐܝܬ ܬܡܗܿ ܐܢܐ. ܒܪܡ ܐܡܿܪ ܐܢܐ܆ ܕܟܕ ܠܘܬ ܗ݀ܝ ܕܡܥܕܪܢܝܐ ܘܣܓܝ ܦܪܘܩܝܐ ܠܚܝܘ̈ܗܝ ܕܗܿܘ ܕܡܬܬܡܝܬ: ܘܕܗܪܟܐ ܘܕܗܟܢܐ ܦܩܚ ܕܢܗܼܘܐ ܫܪܝܗ܆ ܠܫܪܝܐ ܥܡ ܣܥܘܪܘܬܐ ܡܪܢܝܬܐ ܐܙܘܥ. ܘܪܗܸܛܬ ܐܝܕܐ ܟܣܝܬܐ܇ ܟܕ ܠܐܝܕܐ ܓܠܝܬܐ ܚܼܙܬ܆ ܘܡܢ ܚ̈ܝܐ ܠܒܪܢܫܐ ܫܘܙܒܸܬ. ܐܢܕܝܢ ܘܗܪܟܐ ܕܢܚܠܦ ܠܚ̈ܝܐ ܠܐ ܥܿܕܪܐ ܗܘܬ܆ ܡܟܠܐ ܗܘܐ ܠܐܝܼܕܐ ܚܒܠܬܐ ܐܝܟܢܐ ܕܙܒ̈ܢܝܢ ܣ̈ܓܝܐܢ ܦܬܚܢܢ. ܐܟܚܕܐ ܕܝܢ: ܘܐܠܘ ܕܗܟܢܐ ܢܡܘܬ ܗܘܐ ܠܐ ܦܩܚܐ ܗܘܬ܆ ܒܝܕ ܙܢܐ ܐܚܪܢܐ ܕܥܘܕܪܢܐ܇ ܐܘ ܚܣܢܐ ܐܘ ܡܬܚܢܢܐ ܕܒܿܪ ܗܘܐ ܠܗ. ܐܢܕܝܢ ܟܕ ܩܿܕܡ ܝܕܥܿ ܗ݀ܘ ܕܣܘ̈ܟܢܐ ܕܥܠܡܐ ܐܝܬ ܠܗ ܒܐܝܼܕܐ. ܕܥܠܬܐ ܐܘ ܕܣܘܡܣܡܐ ܐܘ ܕܐܫܬܐ ܐܘ ܕܦܩܥܐ ܐܘ ܕܡܦܘܠܬܐ ܠܗܿܢܐ ܡܿܛܝܐ܇ ܘܣܘܟ̈ܢܐ ܕܝܨܝܦܘܬܐ ܫܒܼܩ: ܘܠܐ ܥܼܒܕ ܡܠܬܐ ܕܫܘܘ̈ܙܒܐ ܕܒܚ̈ܝܐ: ܘܠܫܪܝܗ ܕܡܢ ܚ̈ܝܐ ܐܝܟ ܦܩ̈ܚܐ ܕܢܗ܆ ܕܢܬܬܘܣܦ ܥܠ ܕܝܢܼܐ ܘܕܢܣܓܐ. ܘܠܕܝܢܐ ܢܟܠܠ ܡܬܬܚܝܒܐ ܗܝܼ ܐܡܝܢܐܝܬ. ܘܗܠܝܢ ܡܢ ܗܟܢܐ. ܗܟܝܠ ܕܝܢ ܚܫܚܐ ܗܝ: ܕܟܕ ܠܡܠܬܐ ܕܡܛܠ ܩܨܐ ܕܡܿܢܐ ܗܝ ܡܥܗܕܝܢܢ: ܘܠܗܿܕܐ ܘܡܢ ܫܓܡܐ ܘܡܢ ܚܠܩܐ ܡܪܚܩܝܢܢ܆ ܢܕܝܠ ܠܢ ܡܐܡܪܐ܆ ܟܕ ܒܝܕ ܟܪ̈ܣܝܣ ܐܒܗ̈ܝܬܐ ܐܬܬܒܪܩܘ. 112b ܠܩܨܐ ܡܢ ܗܟܝܠ ܡܫܟܚܝܢܢ܆ ܕܫܘܸܐ ܫܡܐ ܡܕܡ ܐܝܬܘܗܝ ܘܥܠ ܩـ[ـܪ̈]ܝܬܐ ܣ̈ܓܝܐܬܐ ܠܦܘܬ ܕܩܝܿܡܐ܆ ܡܠܬܐ ܕܩܕ̈ܝܫܐ ܢ݀ܓܠܐ ܠܗ. ܘܒܕܘܟ ܡܢ ܚܠܦ ܬܚܘܡܐ ܡܬܢܼܣܒ. ܒܐܚܪܬܐ ܕܝܢ ܥܠ ܡܚܘܬܐ ܘܫܒܿܛܐ ܪܕܘܝܐ. ܘܐܝܬ ܐܡܬܝ ܕܥܠ ܥܠܬܐ ܡܕܡ. ܘܒܕܘܟ ܥܠ ܡܚܘܝܢܘܬܐ ܘܝܕܥܬܐ. ܘܐܚܪܢܝܐܝܬ܆ ܥܠ ܦܘܪܩܢܐ ܘܣܘܡܩܐ. ܐܝܟܐ ܓܝܪ ܕܐܡܼܪ ܟܿܬܒܐ܇ ܟܕ ܠܝܨܝܦܬܘܐ ܡܠܚܡܬܐ ܕܐܠܗܐ ܡܫܒܚ. ܕܩܨܐ ܣܡ ܠܚܫܘܟܐ܇ ܘܠܥܠ ܣܘܦܐ ܗܼܘ ܝܕܿܥ܆ ܥܠ ܬܚܘܡܐ ܢ݀ܣܒ ܠܗ. ܗܿܘ ܕܐܝܬܘܗܝ܆ ܕܪܡܫܐ ܡܢ ܘܕܚܫܘܟܐ܆ ܫܘܢܝܗ ܕܫܡܫܐ ܥ݀ܒܕ ܐܝܡܡܐ. ܡܐ ܓܝܪ ܕܬܚܝܬ ܛܠܠܗܿ ܕܐܪܥܐ ܐܣܦܪܗ ܕܫܡܫܐ ܪܗܿܛܐ܆ ܗܪ ܬܡܢ ܛܟܣܐ ܠܠܝܐ ܚܫܘܟܐ ܐܟܿܝܼܢ ܐܠܗܐ. ܘܒܕܓܘܢ ܐܡܿܪ ܢܨܝܚܐ܇ ܕܩܨܐ ܣܡ ܠܚܫܘܟܐ. ܗܿܘ ܕܐܝܬܘܗܝ ܛܟܣܐ ܘܬܚܘ̈ܡܐ. ܐܡܬܝ ܕܝܢ ܬܘܒ ܕܐܡܿܪ: ܕܟܕ ܡܛܠ ܝܨܝܦܘܬܐ ܒܕܪܝܫ ܢܣܿܒ: ܕܡܫܛܐ ܠܚܟ̈ܝܡܐ܇ ܘܡܿܘܒܕ ܡ̈ܠܝܗܘܢ ܕܙܟ̈ܝܐ. ܘܠܙܕܝ̈ܩܐ ܘܠܚ̈ܛܝܐ ܐܟܚܕܐ ܡܣܝܦ܆ ܘܒܬܪܟܢ ܦܿܪܥ: ܕܗܿܠܝܢ ܟܠܗ̈ܝܢ ܡܢ ܩܸܨܬ ܐܘܪ̈ܚܬܗ܆ ܚܠܦ ܥܠܬܐ ܢܣܒܗ ܠܩܨܼܐ. ܐܝܟܢܐ ܕܢܗܸܘܐ ܗܘܼ ܐܣܛܘܟܣܐ ܗܟܢܐ. ܕܡܢ ܥܠܬ ܐܘܪ̈ܚܬܗ ܐܘܟܿܝܬ ܕܝܢܘܗ̈ܝ ܠܐ ܡܬܕܪ̈ܟܢܐ܇ ܗܠܝܢ ܕܕܐܝܟ ܗܟܢ ܡܕܒܪ܇ ܥܠ ܡܚܘܝܢܘܬܐ ܕܝܢ ܡܘܫܐ ܐܫܬܥܝ܆ ܟܕ ܐܝܟ ܕܡܢ ܦܪܨܘܦܐ ܕܡܪܝܐ ܐܡܼܪ. ܕܩܨܐ ܕܡܒܣܪ ܥܠ ܩܕܡܝ. ܩܨܐ ܓܝܪ ܗܿܪܟܐ ܥܠ ܡܚܘܝܢܘܬܐ ܕܓܙܪ ܕܝܢܗܘܢ ܢܣܝܒ. ܘܗܕܐ ܝܕܝܥܐ܆ ܡܛܠ ܕܠܐ ܣܟ܇ ܒܚܕ ܡܢ ܫܘܘܕ̈ܥܐ ܕܫܪܟܐ ܪܫܡ ܩܨܐ܇ ܠܬܟ ܕܢܬܢܼܣܒ ܗܿܢܐ. ܥܠ ܕܝܢ ܡܚܘܬܐ ܘܫܿܒܛܐ ܪܕܘܿܝܐ܆ ܚܙܝܐ ܚܒܩܘܩ ܢܣܼܒ. ܕܐܬܐ ܩܨܐ ܘܠܐ ܡܟܕܒ. ܘܐܢ ܡܘܚܪ ܠܐ ܬܬܩܛܠ ܠܟܘܢ ܥܠ ܦܘܪܩܐ ܕܝܢ ܘܣܿܘܩܡܐ܆ ܚܙܩܝܐܝܠ ܘܫܝܦܘܪܐ ܐܘܢܓܠܝܐ܆ ܕܗܿܘ ܡܢ ܐܡܿܪ܆ ܕܒܩܨܨܐ ܠܐ ܝܗܿܒ. ܗܿܢܐ ܕܝܢ܆ ܕܩܨ ܥܡ ܡܢ ܦܥ̈ܠܘܗܝ ܡܢ ܕܝܢܪܐ ܒܝܘܡܐ. ܗܪܟܐ ܓܝܪ ܗ݀ܝ ܕܩܨ܆ ܘܩܨܨܐ܆ ܥܠ ܦܘܪܩܢܐ ܢܣܝ̈ܒܢ. ܟܒܪ ܕܝܢ܆ ܐܦ ܥܠ ܬܚܘܡܐ ܕܚ̈ܝܐ܇ ܢ݀ܣܒ ܐܢܫ ܠܫܡܐ ܕܩܨܐ܇ ܟܕ ܒܗܿܝ ܕܕܘܝܕ ܡܬܒܲܩܐ ܕܐܡܿܪ܇ ܕܠܟܠ ܣܘܿܦܐ ܚܙܝܬ ܩܼܨܐ ܘܛܒ ܘܛܒ ܪܘܝܚ ܦܘܩܕܢܟ. ܗ݀ܠܝܢ ܗܟܝܠ ܦܪ̈ܫܢܢ܆ ܐܝܟܢܐ ܟܝܬ܇ ܕܡܢ ܡܨܝܕܬܐ ܕܛܘܥܝܝ ܢ݀ܡܕ. ܢܬܗܘܢܢ܇ ܕܟܕ ܠܫܡܐ ܕܩܨܐ ܥܠ ܡܘܬܐ ܩܿܪܝܢܢ: ܒܐܝܿܢܐ ܡܢ ܫܘܘ̈ܕܥܐ ܕܐܡܝܪܝܢ ܡܬܼܢܣܒ 113a [] ܒܗܿܘ ܟܝܬ ܕܓܙܪ ܕܝܢܐ܆ ܘܐܢ ܗܿܘ ܕܥܡ ܬܚܘܡܐ ܗܿܠܝܢ ܓܝܪ ܬܪ̈ܝܢ܆ ܐܡܝܢܐܝܬ ܡܬܚܫܚܝܢܢ. ܟܕ ܡܛܠ ܡܦܩܬܐ ܕܚ̈ܝܐ ܦܘܬܚܐ ܥܿܒܕܝܢܢ. ܘܗܠܝܢ ܡܢ ܡܛܠ ܩܨܐ. ܚܠܩܐ ܕܝܢ ܐܝܬܘܗܝ ܒܛܝܪܐ ܕܡܢܗ ܠܡܡܕܘ []ܬ. ܘܕܠܩܘܒܠܐ ܗܘ܆ ܘܡܚܒܠܢܐ ܕܚܐܪܘܬܐ. ܐܟܚܕܐ ܕܝܢ܆ ܘܕܒܟܠܡܕܡ ܢܘܟܪܝ ܠܫܓܡܐ. ܐܦ ܫܓܡܐ ܬܘܒ ܐܝܬܘܗܝ܆ ܚܐܦܐ ܡܕܡ ܕܡܢ ܨܒܘܬ ܢܦܫܐ܇ ܕܡܢ ܡ̈ܠܝܠܐ ܐܘ ܠܐ ܡ̈ܠܝܠܐ܇ ܐܘ ܡ̈ܢܦܫܐ ܐܘ ܠܐ ܡܢ̈ܦܫܐ: ܪܕܐ ܘܡܬܬܝܬܐ ܠܐ ܡܬܚܡܐܝܬ. ܘܐܦ ܗܘܼ ܬܘܒ܆ ܥܛܘܝܐ ܗܘ ܘܙܢܘܩܐ ܕܡܫܠܛܘܬ ܒܝܬܐ. ܟܕ ܗܟܝܠ: ܕܡܬܚܿܡܝܢ ܚ̈ܝܐ ܐܢܫ̈ܝܐ ܐܡܿܪܝܢܢ܇ ܘܕܡܢ ܐܠܗܐ ܚܪܩܝܢ ܘܦܣܝܩܝܢ: ܘܕܡܕܪܟ ܩܨܐ ܘܕܿܐܬܐ ܩܨܐ ܥܠ ܓܒܪܐ ܡܢ ܐܠܗܐ ܐܡܿܪܝܢܢ. ܡܢ ܗܠܝܢ ܡܚܫ̈ܒܬܐ ܫܛܝ̈ܬܐ ܘܕܠܐ ܐܠܗܐ ܕܢܓܸܗܐ ܒܟܠܦܪܘܣ ܨ݀ܒܝܢܢ. ܡܢ ܗ݀ܝ ܡܢ ܕܫܓܡܐ. ܟܕ ܠܛܟܣܐ ܘܡܫܘܚܬܐ ܕܒܫܘܪܝܐ ܘܒܫܘܠܡܐ ܕܚܝ̈ܝܢ ܚܪܝܩܝܢ ܡܿܘܕܝܢܢ܇ ܡܢ ܗܿܘ ܕܠܢܦܫܐ ܥܡ ܦܓܪܐ ܝ݀ܬܬ܇ ܘܒܙܒܢܐ ܘܠܚ̈ܝܐ ܠܗܿܕܐ ܫܿܪܐ܇ ܘܬܘܒ ܐܣܿܪ ܒܫܦܝܪܘܬ ܙܒܢܐ ܘܠܐ ܡܬܦܪܫܢܐܝܬ. ܡܢ ܚܠܩܐ ܕܝܢ ܥܿܪܩܝܢܢ܆ ܟܕ ܠܥ̈ܠܬܐ ܕܚ̈ܝܐ ܘܠܗܢ̈ܝܢ ܕܦܪ̈ܝܫܢ ܡܢ ܚܝ̈ܐ܆ ܠܘ ܒܟܠ ܦܪܘܣ܇ ܥܠ ܐܠܗܐ ܡܩܛܪܓܝܢܢ ܘܣܝܿܡܝܢܢ. ܠܐ ܓܝܪ ܚܠܩܐ܇ ܕܗܢܐ ܡܢ ܗܟܢܐ ܕܘܝܐܝܬ ܝ݀ܬܬ ܡܝܬ܇ ܗ݀ܢܐ ܕܝܢ ܛܘܒܬܢܐܝܬ ܢܫܬܢܐ܇ ܡܢ ܗ݀ܘ ܕܒܡܣܲܐܬܐ ܒܡܬܩܠܐ ܠܥܒ̈ܕܝܢ ܕܐ݀ܢ܇ ܐܦܢ ܠܐܢܫ̈ܝܢ ܡܢ܇ ܐܘ ܒܡܫܠܡܢܘܬܐ ܐܘ ܒܡܪܫܠܢܘܬܐ ܡܢ ܚ̈ܝܐ ܡܲܥܒܪ܇ ܟܕ ܗܘ ܬܚܝܬ ܩܛܝܪܐ ܠܐ ܡܪܟܢ܇ ܘܠܚܐܪܘܬܢ ܕܢܟܘܦ ܢܚܬ ܗܢܐ܆ ܠܐ ܨ݀ܒܐ. ܘܒܕܓܘܢ ܒܡܪܫܠܢܘܬܐ ܙܒ̈ܢܝܢ ܣ̈ܓܝܐܢ ܡܬܚܫܚ܆ ܘܒܡܫܠܡܢܘܬܐ܆ ܕܠܝܠܐܝܬ ܘܐܡܬܝ. ܒܗܿܝ ܟܝܬ ܕܡܫܠܡܢܘܬܐ܆ ܩܪܝܒܐ ܗܝ ܠܐܢܢܩܝ. ܡܪܫܠܢܘܬܐ ܕܝܢ܆ ܠܚܐܪܘܬܐ ܡܬܠܘܡܐ. ܟܕ ܡܪܫܠܐ ܘܫܒܿܩܐ܆ ܕܟܪ ܕܪܥܝܐ ܘܟܡܐ ܕܨܿܒܝܐ ܬܬܗܿܦܟ. ܘܡܛܠ ܡܿܢ ܚܠܩܐ ܘܫܓܡܐ܆ ܗܠܝܢ ܕܫܥܬܐ ܢܣ̈ܦܩܢ. ܡܠܐܣܛܐ ܕܒܡܠܬܐ ܗܿܝ ܕܒܬܪ ܗܕܐ܇ ܥܬܝܕܐܝܬ ܐܢܬ ܠܢ܇ ܐܢ ܐܠܗܐ ܡܦܼܣ. ܕܒܪܚܡܬ ܥܡܠܐ ܡܢܢ ܬܗܸܘܐ. ܗܟܝܠ ܕܝܢ܆ ܗܘ ܦܪ̈ܝܓܡܘܣ ܐܒܗܝ̈ܬܐ ܢܥ̈ܠܢ. ܐܝܟܢܐ ܕܠܐ ܢܬܬܕܝܢ܇ ܕܢܘܟܪ̈ܝܬܐ ܡܠܠܢܢ܇ ܟܕ ܥܡ ܬܚܘܡܐ ܠܚܝ̈ܐ ܐܢܫ̈ܝܐ 113b ܐܩܪܚܢܢ.. ܕܒܣܝܠܝܘܣ ܡܢ ܡܐܡܪܐ ܗܿܘ ܕܪܫܝܡ ܥܠܘܗܝ ܕܠܝܬܘܗܝ ܐܠܗܐ ܥܠܬܐ ܕܒܝ̈ܫܬܐ܀ ܥܘܬܪܐ ܡܢ ܓܝܪ ܡܪܝܡ ܡܢ ܗ݀ܢܘܢ ܕܡܬܚܫܚܝܢ ܒܗ܆ ܐܝܟܢܐ ܕܢܚܒܠ ܠܐܘܪܓܢܘܢ ܕܝܠܗܘܢ܇ ܗܿܘ ܕܠܘܬ ܥܘܠܐ. ܟܘܪܗܢܐ ܕܝܢ ܡܲܝܬܐ: ܥܠ ܐܝܿܠܝܢ ܕܦܩܚܐ ܠܗܘܢ܇ ܕܢܗܘܘܢ ܡܦܟܪܝܢ ܒܗܕ̈ܡܝܗܘܢ܇ ܐܘ ܕܡܬܥܘ̈ܟܢܐ ܢܗܘܘܢ ܐܝܬܝܗܘܢ ܠܗܘܢܿ ܚܐܦ̈ܐ ܗ݀ܢܘܢ ܕܠܘܬ ܗܿܝ ܕܢܚܛܘܢ. ܡ̈ܘܬܐ ܕܝܢ ܡܬܬܝܬܝܢ܆ ܐܡܬܝ ܕܬܚܘܡܐ ܕܚ̈ܝܐ ܢܬܡܲܠܘܢ܇ ܐܝܠܝܢ ܕܡܢ ܫܘܪܝܐ ܩܒܠܘ ܕܝܢܐ ܟܐܢܐ ܕܐܠܗܐ ܡܛܠ ܟܠ ܚܕ ܡܢܢ܇ ܟܕ ܡܢ ܪܘܚܩܐ ܩܕܡ ܕܐܩܿ ܗ݀ܝ ܕܦܩܚܐ ܠܟܠܚܕ ܡܢܢ܀ ܘܒܬܪ ܙܥܘܪ̈ܝܬܐ.. ܟܕ ܛܿܒ ܙܕܩܿ ܗܘܐ ܠܡܣܬܟܠܘ܆ ܕܐܡܬܝ ܡܢ ܕܡܡ̈ܫܚܬܐ ܘܡܬܐܣ̈ܝܢܝܬܐ ܟܪܝܗܝܢ ܒܢܝ̈ܢܫܐ܆ ܥܘܕܪ̈ܢܐ ܗܢ݀ܘܢ ܕܡܢ ܝܨܝܦܘܬܐ ܡܬܢܣܒܝܢ. ܐܡܬܝ ܕܝܢ ܕܕܡܝܬܪ ܡܢ ܡܢܝܚܢܘܬܐ ܢܬܚܘܐ ܗܘܼ ܚܫܐ܆ ܐܠܨܝܿܬܐ ܗ݀ܘܝܐ ܡܢܟܪܝܢܘܬܐ ܕܗ݀ܘ ܕܐܬܚܒܠ܇ ܐܝܟܢܐ ܕܠܐ ܟܕ ܒܡܚܝܕܘܬܐ ܪܚܫ ܟܘܪܗܢܐ܇ ܠܘܬ ܗܠܝܢ ܡܪ̈ܢܝܬܐ ܢܫܬܘܫܛ.. ܕܬܐܘܠܘܓܘܣ ܡܢ ܗܿܘ ܕܥܠ ܩܣܪܝܘܣ ܐܚܘܗܝ.. ܐܘ ܡܦܪܢܣܢܐ ܕܢܦ̈ܫܬܐ ܕܝܠܢ ܘܥܿܒܕ ܫܦܝܪ̈ܬܐ: ܗܿܘ ܕܥܒܕܬ ܟܠ ܘܡܫܚܠܦ ܡܬܩܢ ܐܢܬ ܒܡܠܬܟ ܐܘܡܢܐ: ܒܙܒܢܐ ܘܐܝܟ ܡܐ ܕܝܕܿܥ ܐܢܬ: ܒܥܘܡܩܐ ܕܚܟܡܬܟ ܘܕܦܘܪܢܣܟ܆ ܗܫܐ ܡܢ܆ ܩܒܠ ܠܩܣܪܝܘܣ ܪܝܫܝܬܐ ܕܚܙܘܩܝܐ ܕܝܠܢ. ܐܢܕܝܢ ܠܐܚܪܢܐ ܩܕܡܝܐ܆ ܫܒܿܩܝܢܢ. ܠܡ̈ܠܐ ܕܝܠܟ ܒܗܠܝܢ ܕܟܠ ܬܠܐ܆ ܩܒܠ ܕܝܢ ܘܠܢ ܠܚܪܬܐ ܒܙܒܢܐ ܬܪܝܼܨܐ. ܟܕ ܕܒܪܬ ܠܢ ܟܡܐ ܕܐܝܬܝܗܿ ܕܦܩܚܐ.. ܘܬܐܘܠܘܓܘܣ ܡܢ ܠܬܚܘܡܐ ܕܚ̈ܝܐ܆ ܠܐ ܐܩܪܚܗ ܘܓܠܝܗܝ܇ ܐܝܟܢܐ ܕܛܘܒܢܐ ܒܣܝܠܝܘܣ. ܒܗܿܝ ܕܝܢ ܕܣܼܡ: ܒܙܒܢܐ ܘܐܝܟ ܡܐ ܕܝܕܿܥ ܐܢܬ: ܕܬܩܒܠ ܠܢ ܒܙܒܢܐ ܬܪܝܨܐ: ܘܗܝ ܕܟܡܐ ܕܦܲܩܚ܆ ܝܗ݀ܒܐ ܠܢ ܕܢܪܢܐ܆ ܕܥܡ ܬܚܘܐ ܦܩܚܐ܆ ܘܟܡܐ ܕܥܕܪ ܢܐܚܐ ܘܒܡܫܘܚܬܐ ܡܕܡ܇ ܘܒܙܒܢܐ ܬܪܨܐ ܓܘܠܝܢ ܘܫܘܿܢܝܢ ܗܘܐ܀ ܕܩܕܝܫܐ ܐܦܪܝܡ ܡܢ ܡܐܡܪܐ ܗܿܘ ܕܠܘܩܒܠ ܒܪ ܕܝܨܢ܀ ܕܩܕܡ ܝܕܥ ܐܠܗܐ: ܕܩ̈ܛܝܠܐ ܕܡܬܩܛܠܝܢ ܡܢ ܩ̈ܛܘܠܐ. ܒܩܛܠܐ ܬܚܡ ܚܝܝ̈ܗܘܢ. ܟܕ ܪܚܩܝܩ ܡܢ ܪܫܝܥܐ܇ ܕܩܿܛܘܠܐ ܕܐܡܪܚ ܘܩܼܛܠ܇ ܘܪܚܝܩ ܬܘܒ ܐܦ ܡܢ ܫܓܡܐ܇ ܕܩܛܝܠܐ ܕܩܛܝܠ ܡܢܫܠܝ. ܐܢܗܼܘ ܗܟܝܠ ܕܩܛܝܠܐ: 114a ܕܠܐ ܒܩܨܗ ܐܙܠ ܫܓܡܐ ܗܘ܆ ܘܐܢ ܒܩܨܗ ܐܙܠ ܟܫܠܐ ܗܘ. ܥܠܝ ܗܘܼ ܕܝܢ ܐܠܗܐ܆ ܡܢ ܫܓܡܐ ܐܦ ܡܢ ܟܫܼܠܐ. ܠܘ ܫܓܡܐ ܗܘ ܟܕ ܩܪܒ ܩܨܐ. ܘܠܘ ܟܫܠܐ ܗܘ ܕܥܬܝܕ [ܕ]ܝܢܐ. ܘܟܕ ܛܒ ܕܝܢ ܗܐ ܐܬܦ̈ܫܩܝ܆ ܣܢܝ̈ܩܢ ܐܢܝ̈ܢ ܥܠ ܦܘܫܩܐ܆ ܥܛܠ ܗܘܼ ܓܝܪ ܕܐܝܟܢܐ܇ ܐܣܬܩܒܠܘ ܒܚܕܐ ܫܥܐ܇ ܩܨܗ ܟܣܝܐ ܕܩܛܝܠܐ܇ ܥܡ ܨܒܝܢܗ ܕܩܿܛܘܠܐ ܕܩܛܝܠܐ ܒܩܨܗ ܢܐܙܠ܆ ܘܩ݀ܛܘܠܐ ܒܕܝܢܐ ܢܚܘܒ܀ ܦܓܪܐ ܕܢܦܪܘܩ ܡܢ ܢܦܫܐ܆ ܕܐܠܗܐ ܐܝܬܝܗܿ ܒܪܘܝܐ. ܕܢܦܫܐ ܕܝܢ ܡܢ ܦܓܪܐ܆ ܐܦ ܗܿܘ ܕܡܿܬܝܐܒ ܠܡܝܬܪܘܬܐ. ܘܐܢ ܠܐܢܫ: ܡܬܗܝܡܢܝܐ ܘܠܩܘܫܬܢܝܐ ܡܢܐ܇ ܟܬܒܿܐ ܗܿܘ ܕܡܬܩܪܐ ܕܡܣ̈ܩܬܐ: ܗܿܘ ܕܚܪܝܢܐ ܘܦܘܠܓܝܐ ܕܕܡܢܘ ܐܝܬܘܗܝ ܒܦܘܡ ܣ̈ܓܝܐܐ ܡܬܗܦܟ: ܐܢܫܝܢ ܓܝܪ ܕܐܘܓܪܝܣ: ܐܚܪܢܐ ܕܝܢ ܕܩܣܪܝܐ ܐܘܣܒܝܣ: ܘܕܡܩܪܝܣ ܪܒܐ ܒܝܚ̈ܝܕܝܐ: ܘܕܦܝܠܝܟܣܢܘܣ ܡܒܓܝܐ ܐܡܿܪ ܕܐܝܬܘܗܝ܆ ܠܘܬܗ ܡܫܕܪܝܢܢ ܠܗ܆ ܘܟܕ ܒܡܐܡܪܐ ܗܿܘ ܫܒܝܥܝܐ ܐܝܢܐ ܕܡܟܬܒ ܠܗ ܥܠ ܦܘܩܕܢܐ ܕܟ̈ܐܢܐ ܦܓܥ܆ ܡܢ ܬܡܢ ܢܚܕܐ. ܕܠܐ ܗܘܐ ܢܘܪܟܝܬܐ ܠܥܙܝܢ. ܗܝܕܝܢ ܕܘܝܕ: ܕܗܐ ܒܡܫܘܚܬܐ ܢܗܒܼܬ ܝܘܡ̈ܝ: ܘܗܿܘ ܕܦܪܘܩܢ: ܕܠܐ ܗܐ ܬܪ̈ܬܝܢ ܨܦܪ̈ܝܢ ܡܙܕ̈ܒܢܢ ܒܬܪ̈ܝܢ ܐܣܪ̈ܝܢ ܘܕܐܝܟ ܗܠܝܢ. ܐܝܟ ܡܐ ܕܩܪ̈ܝܚܢ ܘܠܟܠܢܫ ܒܨܝܪ ܩܠܝܠ ܝܕܝ̈ܥܢ܆ ܠܗܿܠܝܢ ܥܿܒܪܝܢܢ܀ ܘܟܪ̈ܣܝܣ ܐܒܗ̈ܝܬܐ ܗܠܝܢ. ܘܕܫܪܟܐ ܕܝܢ ܬܗܸܘܐ ܨܠܘܬܐ. ܡܨܠܐ ܐܢܐ ܓܝܪ: ܘܒܘܪ̈ܟܐ ܕܠܒܿܐ ܟܐܦ ܐܢܼܐ. ܠܣܦܝܪ̈ܐ ܡܢ܆ ܕܟܕ ܡܢ ܕܛܡ̈ܐܐ ܘܪܚܡܬ ܛܘܓܪܐ ܥܿܪܩܝܢ܆ ܠܫܪܪܐ ܦܫܝܛܐ ܢܩܦܘܢ܆ ܘܠܐ ܢܬܬܫܝܛ ܠܗܘܢ ܗܢܐ܇ ܡܢ ܩܨ ܚܠܫܘܬܐ ܕܣܝܘܡܗ. ܘܡܢ ܚܣܡܐ ܢܐܪܚܘܢܼ ܘܗܿܝ ܕܛܘܒܢܐ ܐܦܪܝܡ ܢܚܫܘܢ ܕܡܪܬܐ ܕܚܦܝܛܐܝܬ ܡܦܝܣ܇ ܘܗܕܐ ܕܐܝܟ ܗܟܢܐ ܡܿܠܟ. ܐܡܬܝ ܠܡ ܕܚܝ̈ܠܬܢܐ ܘܡ̈ܚܝܠܐ: ܒܝܬ ܨܗ̈ܘܢܐ ܥܠ ܡ̈ܝܐ ܢܥܩܒܘܢ܆ ܐܦܢ ܚ̈ܠܫܐ ܢܓܕܫ ܘܢܫܟܚܘܢܗܿ ܠܡܥܝܢܐ܆ ܥܡܗܘܢ ܡܬܗܢܝܢ ܘܐܟܚܕ ܚܿܕܝܢ܆ ܐܦ ܚ̈ܝܠܬܢܐ܆ ܘܠܘ ܡܛܠ ܕܚ̈ܠܫܐ ܐܫܟܚܘܗܿ ܦܝܫܝܢ ܘܡܦܝܛܝܢ܇ ܘܡܢ ܦܘܓܝܐ ܕܨܗܝܘܢ ܡܛܠ ܚܣܡܐ ܡܪܡܠܝܢ. ܗܟܢܐ ܘܐܝܠܝܢ ܕܥܠ ܫܪܝܪܬܐ ܡܥܩܒܝܢ: ܐܢ ܢܓܕܫ ܘܒܐܝܕܐ ܕܚܠܫܐ ܬܗܸܘܐ܆ ܠܐ ܬܬܪܩ ܟܕ ܡܢ ܢܘܟܬܬܐ ܕܚܣܡܐ ܟܪܝܗܝܢܢ. ܠܐܠܗܐ ܕܝܢ܆ ܕܠܝ ܢܣܓܐ ܢܥܕܪ. ܘܥܠܝ 114b ܒܛܝܒܘܬܗ ܪܡܸܬ ܡܢ ܡܼܕܥܐ ܢ݀ܓܢ. ܘܒܟܠ ܐܘܪܚܐ܆ ܡܢ ܒܝܫܘܬܐ ܡܢ ܢܫܗܝܢ ܘܢܦܨܝܢ. ܘܒܟܠ ܥܼܠܐ ܘܒܟܠ ܡܠܐ܆ ܫܘܬܦܗܿ ܘܓܡܘܪܗܿ ܘܡܝܩܪܢܗܿ ܢܫܪܪܢܝ. ܘܒܫܘܒܚܗ ܫܲܦܝܐ: ܘܒܝܕ ܝܕܥܬܗ ܡܪܝܡܬܐ܆ ܘܗܪܟܐ ܘܬܡܢ ܢܫܘܚܝ ܕܐܬܥܕܢܼ ܠܗ݀ܘ ܕܝܐܐ܆ ܫܘܒܚܐ ܠܡܚܪܪ ܡܢ ܫܠܝܐ. Memra 4 ܕܝܠܗ ܡܐܡܪܐ ܪܒܝܥܝܐ ܡܛܠܬܗ ܕܢܡܘܣܐ ܕܒܛܝܠܘܬܐ܆ ܘܡܛܠ ܫܓܡܐ ܘܚܠܩܐ. ܘܐܟܚܕ ܡܛܠ ܡܣܟ̈ܢܘܬܐ ܘܥܘܬܪ̈ܐ. ܕܝܠܗ ܕܐܢܛܘܢ ܬܐܓܪܝܬܢܝܐ ܗܿܘ ܕܓܘܪܓܢ ܡܛܗܡ. ܚܠܐ ܗܘܼ ܦܐܪܐ ܕܥܡܠܐ. ܘܠܐܘܬܐ ܪܥܡ ܕܝܢܐ ܗܿܘܢܐ܆ ܡܥܝܢܢܝܬܐ ܗܝ ܕܟܠ ܛܒ̈ܢ. ܘܐܝܬ ܠܡܫܟܚܘ ܕܠܗܿܘ ܕܡܬܚܒܢܢ܆ ܡܢ ܓܘܢܝܚܗ ܠܟܠ ܛܘܪ̈ܦܝܢ ܡܬܢܥܓ. ܘܚ̈ܙܝܐ ܠܟܠ ܡܘܝܩܐ ܡܫܘܝܢ ܠܗ. ܘܠܐ ܚܿܐܢܝܢ ܠܗ܇ ܟܕ ܚܿܙܝܢ ܠܕܘܝܘܬܗ. ܠܟܫܝܪܐ ܕܝܢ ܐܢܗܘ ܡܼܢ: ܕܟܕ ܣܓܝ ܥܡܠ ܘܬܥܼܫ ܘܠܐܝ܆ ܦܐܪܐ ܘܗܢܝܢܐ ܐܬܥܦܝ: ܡܝܩܪܝܢ ܠܗ ܘܡܣܓܝܢ ܠܗ: ܘܥܡ ܛܘܒܘܗܝ܆ ܐܦ ܩܘܠܣܐ ܡܢܩܝܢ ܠܗ. ܘܐܢ ܠܐ ܐܬܝܿܐ ܒܐܝܕܘ̈ܗܝ: ܘܦܿܐܕ ܘܡܢ ܦܐܪܐ ܦܿܐܫ܆ ܠܥܕܠܝܐ ܠܐ ܡܩܪܒܝܢ ܠܗ. ܒܕܓܘܢ ܐܦ ܠܝ: ܕܝܨܦܬܐ ܘܝܨܝܦܘܬܐ ܪܡܝܐ ܠܝ: ܘܠܐܘܬܐ ܕܠܐ ܡܝܬܐ ܟܪܝܟܐ ܠܝ: ܕܥܠ ܒܛܝܠܘܬܐ ܪܡܿܬ ܡܢ ܡܕܥܐ ܕܐܠܗܐ ܐܒܕܩ܆ ܘܕܟܡܐ ܗܝ ܘܕܐܝܟ ܐܝܿܕܐ ܗܝ ܐܚܿܘܐ܇ ܘܕܠܐ ܙܘܛܡ ܘܕܠܐ ܥܕܠܝ ܠܗܕܐ ܐܟܪܙ܆ ܦܐܝܐ ܠܝ܆ ܕܠܘܬ ܬܦܢܟܐ ܕܝܨܘ̈ܬܢܐ ܘܕܟܫܪ̈ܐ ܥܝ̈ܢܐ ܕܡܕܥܐ ܐܨܕ: ܘܐܝܟ ܙܢܐ ܕܡܥܩ̈ܡܝ ܐܓܘ̈ܓܐ ܘܚܦܪ̈ܝ ܒܪ̈ܬܐ: ܘܥܡ̈ܕܝ ܒܬܗ̈ܘܡܐ ܘܚܝ̈ܛܝ ܒܡܛܠܝܩܘܢ ܒܬܪ ܟܣܦܐ ܐܗܘܐ: ܟܠܗܘܢ ܓܝܪ ܗܠܝܢ ܟܢܝܫܐܝܬ: ܟܠ ܟܡܐ ܕܒܥܘܡ̈ܩܐ ܡܿܝܫܝܼܢ. ܟܠܗ ܗܢܐ ܥܡܗܘܢ ܦܐܪ̈ܐ ܡܿܝܬܐ ܘܡ̈ܥܝܢܐ ܡܿܢ܆ ܪ̈ܕܝܐ ܫ̈ܦܝܥܐ ܙܠܥ̈ܢ. ܘܒ̈ܙܬܐ ܩܪ̈ܝܪܬܐ ܕܛܒ ܣ̈ܓܝܐܝܢ܆ ܘܝܨ̈ܝܦܝ ܕܡܛܠܝܩܘܢ܆ ܡܢ ܥܢܩ̈ܐ ܙܥܘܪ̈ܝܬܐ܆ ܐܣ̈ܛܘܢܐ ܕܟܣܦܐ ܡܫܟܚܝܢ. ܘܡܢ ܬܗܘܡ̈ܐ ܟܐܦ̈ܐ ܛܒ̈ܬܐ ܕ݀ܠܝܢ܇ ܣܚ̈ܝܐ ܡܒܣ̈ܝܝ ܥܠ ܚ̈ܝܐ. ܘܕܠܐ ܐܠܐܐ܆ ܒܝܕ ܥ̈ܒܕܐ ܕܪܚܡܬ ܥܡܠܐ ܡܬܕܟܪ ܐܢܐ: ܘܦܐܪ̈ܐ ܕܡܢ ܝܨܝܦܘܬܐ ܗܘܿܝܢ ܐ݀ܡܪܢܐ: ܘܡܢ ܢܝܼܫܐ ܕܪܡܸܐ ܠܝ ܡܫܬܘܚܪ ܐܢܐ܆ ܠܘܬ ܡܠܬܐ ܗ݀ܝ ܕܠܡܠܬܢ ܐܚܝܿܕܐ ܐܬܦܢܐ܆ ܘܟܕ ܒܐܒܘܗܿ ܗ݀ܘܐ ܐܢܐ ܚܐܪ ܐܢܐ܆ ܥܡ ܨܠܘܬܐ ܠܘܬ ܡܐܡܪܐ ܐܩܪܘܒ܆ ܘܐܝܟܢܐ ܟܝܬ ܕܒܐܩܘܠܘܬܢܐ ܠܢ ܡܠܬܐ ܬܪܕܐ: ܠܡ̈ܠܐ ܕܕܚ̈ܩܢ ܠܒܛܝܠܘܬܐ ܘܠܬܘܫܐ ܕܒܝܫ̈ܬܐ ܠܣ̈ܓܝܐܐ ܢ̈ܓܕܢ܆ ܐܦܠܐ. ܘܟܕ ܐܝܟ ܕܠܫܒ̈ܝܠܐ ܚܫ̈ܘܟܐ: 115a ܒܝܕ ܡܠܬܐ ܕܫܪܪܐ ܡܢܗܪܝܢܢ܆ ܘܕܢ݀ܣܛܘܢ ܡܢܗܘܢ ܠܐܢ̈ܫܐ ܪ̈ܚܡܝ ܐܠܗܐ ܢܥܒܕ. ܗܠܝܢ ܕܝܢ ܐܝܬܝܗܘܢ܆ ܐܝܟܢܐ ܕܒܡܠܬܐ ܕܩܕܡ ܗ݀ܕܐ ܐܫܼܬܘܝܢܢ܆ ܕܦܬܝܐܝܬ ܢܣܼܒ܇ ܡܛܠ ܫܡܐ ܕܫܓܡܐ ܘܕܚܠܩܐ܇ ܡܘܣܦ ܐܢܐ ܕܝܢ ܐܟܚܕ܇ ܐܦ ܡܛܠ ܓܕܫܐ ܘܟܘܝܢܐ ܘܣܘܩܒܠܐ. ܘܐܢ ܐܝܬ ܐܚܪ̈ܢܐ ܕܠܗܿܠܝܢ ܕܡܿܝܢ. ܘܚܠܩܐ ܡܢ ܐܝܬܘܗܝ܆ ܐܢܢܩܐ ܕܡܢܗܿ ܠܝܬ ܠܡܫܬܘܙܒܘ. ܡܬܦܠܓ ܕܝܢ܆ ܠܬܪ̈ܬܝܢ ܬܪ̈ܥܝܢ. ܠܡܢܗܿ ܡܢ ܓܝܪ܆ ܕܡܢ ܟܘܟ̈ܒܐ ܐܝܬܘܗܝ ܐܡܿܪܝܢ. ܡܢܗ ܕܝܢ܆ ܡܢ ܐܠܗܐ ܡܼܿܒܕܝܢ. ܢܣܼܒ ܕܝܢ ܫܘܪܝܐ܆ ܡܢ ܡܠܬܐ ܕܒ̈ܢܝܐ ܕܚ̈ܢܦܐ. ܗܿܠܝܢ ܓܝܪ: ܠܡܕܒܪܢܘܬܐ ܘܦܘܪܢܣܐ ܕܐܝܠܝܢ ܕܥܠ ܐܪܥܐ ܘܕܗܢܐ ܟܠ܆ ܠܚܠܩܐ ܘܠܡܬܟܪܟܢܘܬܐ ܕܗܿܘ ܕܐܠܘ ܡܦܘܣ ܫܿܟܢܘ܆ ܟܕ ܠܡܬܘܥܕܢܘܬܐ ܕܫܒܥܐ ܢܗܝܪ̈ܐ ܛܥ̈ܝܐ: ܥܡ ܚܕ ܡܢ ܬܪ̈ܥܣܪ ܙܘ̈ܕܢܐ: ܐܡܼܪ ܕܟܕܝܢܝܢ ܣܓܝܦܘܬܐ ܘܚ̈ܫܐ. ܘܛܘܒܬܢܘܬܐ ܘܫܘܒܚܐ. ܘܝܠܝܕܘܬܐ ܘܡܘܬܐ. ܡܣܟܢܘܬܐ ܘܥܘܬܪܐ. ܘܟܘܪܗܢܐ ܘܚܘܠܡܢܐ. ܘܒܘܝܢܐ ܘܫܝܛܘܬܐ. ܘܣܘܓܐܐ ܕܣܩ̈ܘܒܠܝܬܐ ܐܚܪ̈ܢܝܬܐ. ܘܠܣܥܘܪܘܬܐ ܕܡܢ ܝܕ ܚܐܪܘܬܐ. ܨܢܝܥܘܬܐ ܐܡܿܪ ܐܢܐ ܘܢܟܦܘܬܐ. ܘܡܪܚܡܢܘܬܐ ܘܚܪܡܘܬܐ. ܗܠܝܢ ܕܡܚܠܩ ܗܘ ܚ̈ܠܝܩܢ ܕܢܓܕܫ̈ܢ܆ ܘܠܐ ܐܝܬ ܦܪܘܣ܇ ܕܢܡܐܕ ܘܕܢܥܕܐ ܡܢܗܝܢ ܐܡܿܪܝܢ. ܕܐܝܟ ܐܝܕܐ: ܕܟܕ ܙܘܣ ܒܕܘܟܬܐ ܦܿܠܢܝܬ ܢܩܘܡ܆ ܓܒܪ ܡܠܟ ܠܥܠܡܐ ܢܥܘܼܠ. ܘܟܕ ܫܡܫܐ ܒܐܪܝܐ܆ ܚܠܝܨܐ ܘܢܚܫܝܪܬܢܐ ܢܬܝܠܕ܆ ܘܐܢܗܼܘ ܕܒܐܪܝܣ ܥܡ ܐܪܝܐ܆ ܕܓܢܒܪ ܘܕܩܛܘܠ ܢܗܸܘܐ ܐܡܿܪܝܢ. ܘܐܢ ܩܪܘܢܘܣ ܒܥܩܪܒܐ ܢܬܘܥܕ܆ ܕܡܪܝܪ ܗܼܘ ܘܚܪܡܢ ܒܗܿܝ ܫܥܐ ܢܬܝܿܠܕ. ܘܒܗܪܡܝܣ ܡܠܝܠܘܬܐ ܬܒܿܥܝܢ. ܘܒܐܦܪܘܕܝܛܐ ܫܘܦܪܐ ܘܫܪܝܚܘܬܐ ܘܓܕܐ ܛܿܒܐ. ܘܗܟܢܐ ܟ݀ܕܢܝܢ܇ ܠܡܬܟܪܟܢܘܬܐ ܕܛܥ̈ܝܐ ܘܕܠܐ ܛ̈ܥܝܐ. ܘܠܗܝ̈ܢ. ܘܦܘܪܢܣܐ ܕܗܢܐ ܟܠ ܡܗܝܡܢܝܢ. ܘܗܢܐ ܡܿܢ ܫܘܘܕܥܐ ܩܕܡܝܐ ܕܚܠܩܐ ܡܢܗܿ ܕܗܕܐ ܣܪܝܘܬ ܪܝܚܐ܇ ܟܕ ܐܪܝܚ ܒܢ̈ܝܐ ܕܚܢ̈ܦܐ ܗܠܝܢ ܚܕ̈ܬܐ ܕܐܝܬ ܚܠܩܐ ܐܡܪܘ܇ ܘܒܟܠ ܡܕܡ ܐܫܘܝܘ ܥܡ ܚ̈ܢܦܐ ܥܬܝ̈ܩܐ܇ ܘܠܥܒܝܕ̈ܬܐ ܕܚܐܪܘܬܐ ܛܠܡܼܘ. ܘܠܚܘ̈ܒܠܐ ܘܠܬܘ̈ܩܢܐ ܘܠܐܝܩܪ̈ܐ ܘܠܫܘܢ̈ܩܐ܆ ܕܡܢ ܐܢܢܩܐ ܗܘܿܝܢ ܩܛܪܓܘ. ܒܪܡ ܒܗܿܝ ܫܚܠܦܘ܆ ܕܡܢ ܐܠܗܐ ܚܪ̈ܝܩܢ ܘܚ̈ܠܝܩܢ ܗܠܝܢ ܐܘܕܝܘ. ܘܕܟܠ ܠܡ ܒܪܝܫ ܡܬܝܠܕ: ܠܟܠ ܡܢ ܪܝܫܗ ܠܡ ܟܬܝܒ. ܕܕܐܝܟ ܐܝܿܢܐ 115b ܘܐܝܟܢܐ ܐܝܬ ܠܗ. ܐܢ ܟܿܦܘܪܐ ܘܐܢ ܣܿܪܘܚܐ. ܘܐܢ ܡܗܝܡܢܐ ܘܐܢ ܥܿܕܘܪܐ. ܘܐܢ ܨܚܝܐ ܘܐܢ ܡܸܠܐ ܢܼܿܟܦܘ. ܘܐܢ ܥܒܿܕܐ ܘܐܢ ܥܿܒܕܐ. ܘܐܢ ܒܪ ܚܐܪ̈ܐ ܘܐܢ ܢܟܦܐ. ܘܣܟ ܠܡܐܡܪ܆ ܐܢ ܕܘܝܿܐ ܘܐܢ ܛܘܒܬܢܐ. ܘܗܿܢܐ ܡܢ ܐܢܢܩܐ. ܫܓܡܐ ܕܝܢ܆ ܠܬܪ̈ܥܝܬܐ ܣ̈ܓܝܐܬܐ ܡܣܬܲܪܥܦ. ܘܒܟܠܡܕܡ ܠܩܘܒܠܝܐ ܗܘ ܠܚܠܼܩܐ. ܐܘ ܓܝܪ ܡܢ ܓܕܐ: ܐܘ ܡܢ ܣܩܘܒܠܐ ܐܘ ܡܢ ܟܘܝܢܐ܆ ܐܘ ܡܢ ܓܕܫܐ ܐܡܪܘ ܕܐܝܬܘܗܝ. ܘܓܕܐ ܡܢ ܕܐܝܟ ܐܝܟܢ. ܐܢ ܐܢܫ ܟܕ ܬܬܩܠ ܒܒܪܐ ܢܦܼܠ. ܐܘ ܐܫܟܚ ܣܝܡܬܐ. ܐܘ ܐܣܬܿܡܝ. ܠܗܕܐ ܡܛܪܘܦܝܬܐ܆ ܠܒܪ ܡܢ ܡܠܬܐ ܘܝܨܝܦܘܬܐ ܕܝ݀ܢܝܢ ܠܗ܆ ܘܠܓܕܐ ܛܿܒܐ ܐܘ ܒܝܫܐ ܦ݀ܠܓܝܢ ܠܗ܇ ܬܘܒ ܠܐܡܪܝܢ. ܕܦܠܢܝܬ ܫܦܝܪܬܐ ܢܣܼܒ: ܘܕܒܝܐܝܘܬܐ܆ ܠܫܡܫܐ ܘܠܣܗܪܐ ܦܚܡܐ. ܘܒܥܪܝܡܘܬܐ ܘܒܒܘܝܢܐ ܣܓܝ ܡܼܿܠܝܐ. ܘܠܗܢܐ ܛܘܼܒܢ ܓܕܐ ܩܪ̈ܝܢ: ܠܐܚܪܢܐ ܟܕ ܒܐܘܪܚܐ ܚܙܩ: ܘܟܠܡܐ ܕܐܝܬ ܠܗ ܡܢ ܣܝܥܬܐ ܕܠܣ̈ܛܐ ܐܬܬܥܕܝܢ: ܘܥܕܡܐ ܠܦܪܝܣܐ ܐܩܝܡܘܗܝ܆ ܥܡ ܚܚܝܐ ܕܟܿܪܝܢ ܠܗ ܘܐܡܿܪܝܢ܆ ܘܝ ܦܠܢ ܒܝܼܫ ܓܕܐ. ܓܕܫܐ܆ ܠܡܦܘܠܬܐ ܕܡܢ ܐܓܪܐ: ܐܘ ܠܨܘܠܦܬܐ: ܘܠܫܘܡ̈ܬܐ ܐܚܪ̈ܢܝܬܐ ܕܠܦܓܪܐ ܥܡ̈ܠܢ. ܘܣܩܘܒܠܐ܆ ܐܟܙܢܐ ܕܟܕ ܥܿܒܪ ܐܢܫ ܒܫܘܩܐ܇ ܡܢ ܐܢܫ ܪܘܝܐ ܐܘ ܫܢܝܐ ܒܣܦܣܪܐ ܐܘ ܒܚܘܛܪܐ ܢܒܠܼܥ ܘܢܫܬܪܐ. ܣܩܘܒܠܐ ܠܝܛܐ܆ ܘܦܓܥܐ ܒܝܫܐ ܠܗܿܘ ܕܕܐܝܟ ܗ݀ܢܐ ܡܿܟܢܝܢ. ܟܘܝܢܐ ܕܝܢ ܐܦ ܗܘ܆ ܒܕܡܝܘܬ ܙܢܐ ܠܗܿܠܝܢ ܕܐܬܐܡܪ ܢܦ݀ܩ. ܫܓܡܐ ܕܝܢ: ܢܣܝܒܘܬ ܫܡܐ ܐܝܬ ܠܗ܆ ܐܝܟ ܡܠܐܐ ܡܕܡ ܕܢܗܪܐ܇ ܕܓܿܪܦ ܘܫܓܡ ܥܡܗ܇ ܠܩܝ̈ܣܐ ܥ̈ܒܝܐ ܘܠܬܘܪ̈ܐ ܒܩܪ̈ܝܐ. ܘܠܟܠ ܡܐ ܕܐܢ ܢܣܬܩܒܠ ܕܐܝܟ ܐܝܟܢ. ܗܘܦܪܟܐ ܠܡ ܦܠܢ ܪܓܼܙ. ܘܟܕ ܡܬܢܩܡ ܘܡܢ ܡܣܟ̈ܠܢܘܗܝ ܡܬܦܪܥ܆ ܦܓܕ ܘܠܦܠܓܘܗ̈ܝ ܠܒܿܛ. ܘܦܪܓܠ. ܕܠܐ ܬܚܘܣܘܢ. ܘܟܕ ܒܦܘܪܥܢܘܬܐ ܫܪܝܘ܆ ܥܡ ܡܣ̈ܟܠܢܐ܆ ܐܦ ܗܢܿܘܢ ܕܠܐ ܐܬܥܒܪܘ ܗܘܘ ܥܒܼܕܐ ܕܚܪܒܐ. ܘܒܫܓܡܐ ܠܛܒ̈ܐ ܘܠܒܝ̈ܫܐ ܕܒܚܘ. ܘܠܡ̈ܟܝܟܐ ܘܠܒܥܪܝܪ̈ܝܐ ܢܟܣܘ. ܘܐܟܚܕ ܠܪ̈ܚܡܐ ܘܠܣ̈ܢܐܐ. ܘܦܠܢ ܒܗ ܒܫܓܡܐ ܐܙܠ. ܕܗ݀ܕܐ ܬܪܥܝܬܐ ܪܝܫܐ ܗܘܐ܆ ܗܘܠܐ ܦܝܠܣܘܦܐ ܐܝܦܝܩܘܪܘܣ. ܗܢܐ ܓܝܪ ܠܥܠܡܿܐ ܡܢ: ܕܠܝܬ ܠܗ ܥܒܿܘܕܐ ܐܘܕܝ܆ ܘܡܬܘܡܝܐ ܘܕܠܐ ܦ݀ܛܪ. ܕܐܡܝܢܐ ܘܕܠܐ ܣܿܐܒ. ܐܟܚܕܐ ܕܝܢ ܘܕܠܝܬ ܠܗ ܝܨܘܦܐ ܘܡܥܝܢܢܐ. ܐܠܐ ܕܗܼܘ ܡܢ ܝܬܗ ܐܬܼܐ. ܘܕܠܐ ܡܿܠܚܐ ܪܕܐ. ܘܠܡܪܕܘܬܐ ܡܩܒܠ܆ ܐܟܙܢܐ ܕܚܘܝܐ ܕܡܬܛܠܐ܆ 116a ܘܫܿܕܐ ܠܡܿܫܒܗ ܥܬܝܩܐ܇ ܒܝܕ ܨܘܡܐ ܢܓܝܪܐ܇ ܘܒܝܕ []ܪ̈ܘܪܐ ܐܠܨ̈ܐ܆ ܘܐܟܙܢܐ ܕܢܫܪܐ ܛܝܣܐ܇ ܒܝܕ ܚܘܪܒܐ ܕܡܢ [ܙ]ܠܝܩ̈ܐ ܫܡܫ̈ܢܝܐ܇ ܘܒܝܕ ܡܥܝܢܐ ܕܪ̈ܕܝܐ ܡܚܕܬ ܐܒܪ̈ܘܗܝ ܘܚܝܘ̈ܗܝ ܡܿܛܠܐ. ܗܟܢܐ ܘܗܘܼ ܗ݀ܢܐ ܐܡܿܪ ܗܘܐ܇ ܕܒܝܕ ܡܡ̈ܘܠܐ ܘܒܝܕ ܝܩ̈ܕܢܐ܇ ܘܒܝܕ ܥܛܪ̈ܐ ܡܡ̈ܝܬܢܐ܇ ܡܬܕܟܐ ܘܩܿܢܐ ܚܘܕܬܐ ܥܠܡܐ. ܒܗ ܒܙܢܐ܆ ܘܥܠ ܟܝܢܐ ܕܒܢܝ̈ܢܫܐ ܐܡܿܪ܇ ܕܗܘܼܘ ܘܗ݀ܘܝܢ ܘܠܐ ܡܘܿܦܝܢ܇ ܒܕܩܢܝܢ ܚܘܕܬܐ܇ ܒܝܕ ܚܠܦܬܐ ܕܡܢ ܝܠܝܕܘܬܐ܇ ܘܕܟܕ ܕܿܐ [ܚـ]ـܡܿܐ܆ ܐܚܪܢܐ ܚܠܦܘܗܝ ܡܫܘܚ ܟܝܢܐ. ܒܗ ܒܙܢܐ܆ ܘܥܠ ܓܢܣܐ ܕܚܝܘ̈ܬܐ܇ ܘܕܐܫ̈ܐ ܕܢܨܒ̈ܬܐ܇ ܘܟܪܘܟܝܐ ܕܒܚ̈ܕܕܐ ܕܐܣܛܘܝ̈ܟܝܐ܇ ܐܬܚܝܠ ܘܕܢܐܡܪ ܐܡܪܚ. ܠܗ݀ܢܐ ܗܟܝܠ ܟܘܪܗܢܐ܆ ܣ̈ܓܝܐܐ ܐܝܼܪܬܘ. ܡܠܘܢ ܕܝܢ: ܟܠܗܿ ܓܘܕܐ ܕܒܪܝܪܐ. ܘܡܠܘܢ܆ ܟܕ ܕܚ݀ܠܝܢ ܕܠܐ ܢܬܬܚܕܘܢ܇ ܒܬܪܥܝܬܐ ܡܣܠܝܬܐ ܕܚܠܩܼܐ. ܘܠܐ ܦܲܪܫܘ܇ ܕܐܝܿܕܐ ܗܝ ܐܘܪܚܐ ܡܠܟܝܬܐ ܘܫܒܝܠܐ. ܙܕܩܿ ܓܝܪ ܕܟܕ ܒܗܿܠܝܢ ܫܘܪ̈ܥܬܐ ܒܝܫ̈ܬܐ ܡܕܥܢ ܡܿܩܬܢܝܢܢ܆ ܕܠܐ ܡܢ ܟܪܒܕܝܣ ܘܠܐ ܡܢ ܣܩܘܒܠܐ ܐܦܠܐ ܕܡܚܫܒܬܢ ܬܬܢܼܟܐ. ܐܦ ܓܝܪ: ܗܕܐ ܡܠܟܐ ܠܢ ܩܪ̈ܒܐ܇ ܐܘܟܝܬ ܡܚܫܒܬܐ ܥܪܝܡܬܐ ܘܣܒܝܬܐ܇ ܕܡܢ ܚܠܩܐ܆ ܐܦ ܡܢ ܫܓܡܐ ܠܪܘܚܩܐ ܢܪܕܐ. ܘܠܐ ܡܛܠ ܕܚܠܬܐ ܕܚܠܩܐ܇ ܢܐܡܼܪ ܕܡܓܕܫ ܓܕܫ܆ ܘܟܕ ܬܪ̈ܝܢ ܡܣܬܡܣܡܝܢ: ܘܡܢ ܡܪܬܐ ܕܚܘܝܐ ܝܢܩܼܘ: ܕܗ݀ܘ ܡܿܢ ܢܬܝܿܒ ܘܦܘܿܠܛܐ ܢܫܟܿܚ: ܗ݀ܢܐ ܕܝܢ ܢܬܥܘܩܕ ܘܒܥܘܒܐ ܕܟܪܣܗ ܣܘܓܐܐ ܕܡܥܘ̈ܗܝ ܢܬܦܣܩܘܢ܆ ܘܠܐ ܗ݀ܝ ܐܚܪܬܐ܇ ܕܚܠܝܩܐ ܗܘܬ ܘܚܪܝܩܐ ܗܘܬ܇ ܕܗ݀ܘ ܕܙܢܝ ܘܩܛܠ܇ ܠܐ ܡܫܟܚ ܗܘܐ ܕܢܬܢܿܟܦ ܘܕܢܫܿܬܝܢ. ܚܬܝܡܐ ܗܘܬ ܘܓܪܝܡܐ ܗܘܬ܇ ܕܠܐ ܕܝܢܼܐ ܓܝܪ܆ ܬܪ̈ܬܝܗܝܢ ܗ݀ܠܝܢ ܡܪ̈ܢܝܬܐ ܐܝܬܝܗ̈ܝܢ. ܘܗ݀ܝ ܕܦܣܩܐ܇ ܕܕܠܐ ܡܠܬܐ ܟܠܗܝܢ܆ ܘܗ݀ܝ ܬܘܒ ܐܚܪܬܐ ܕܐܡܿܪܐ܇ ܕܒܡܠܬܐ ܘܝܨܝܦܘܬܐ ܐܟܚܕ ܟܠܗܝ̈ܢ܇ ܘܡܢ ܥܪ̈ܩܐ ܕܚܐܪܘܬܐ ܠܢ ܓܿܠܙܐ. ܐܠܐ ܡܬܒܥܝܐ: ܕܟܕ ܠܗ݀ܘ ܕܥܠ ܥܠܡܐ ܦܓܘܕܐ ܩܿܐܡ ܗܢ̈ܝܢ ܕܡܕܒܪܢܘܬܐ ܦܠܓܝܢܢ. ܕܡܐܚܐ ܘܕܡܐܣܐ ܢܗܝܡܢ. ܘܕܠܗܢܐ ܡܢ܆ ܥܘܪܕܢܐ ܕܡܢ ܚܝ̈ܐ ܡܿܫܟܢ܆ ܠܐܚܪܢܐ ܕܝܢ܆ ܐܚܪܢܝܐܝܬ ܡܿܣܪܚ ܥܘܕܪܢܗ܆ ܟܕ ܕܕܢܟܬܪ ܒܚܝ̈ܐ ܕܝܬܝܪ ܚܫܚܿܐ ܒܩܐ. ܗܠܝܢ ܕܝܢ ܕܚܐܪܘܬܐ܆ ܠܗ ܢܫܒܘܩ ܕܣ݀ܥܪܐ. ܘܠܐ ܗܘܐ ܟܝܬ܇ 116b ܕܡܢ ܐܠܗܐ ܥܠܝܗܿ ܦܠܝܓܢ܇ ܘܕܬܚܫ ܐܢܝ̈ܢ ܠܝܬ ܦܪܘܣ. ܐܢܓܝـ[ـܪ] ܥܒ̈ܕܝܗ ܕܚܐܪܘܬܐ ܠܐܠܗܐ ܡܢܝܢ: ܘܒܕܡܘܬܐ ܕܐܘܪܓܢـ[ـܘܢ] ܠܨܒܝܢܗ ܗ݀ܘܝܢܢ: ܕܐܘ ܒܝ̈ܫܬܐ ܐܘ ܛܒ̈ܬܐ ܢܓܡܘܪ [] ܠܘܩܕܡ ܡܢ܆ ܕܐܝܟ ܒܥܝܪܐ ܕܠܐ ܡܠܬܐ ܢܗܸܘܐ ܫܪܐ ܘܐ݀[] ܕܘܒܪܢ ܡܬܬܝܬܝܢܢ. ܘܟܠ ܐܝܿܢܐ ܕܗܼܘ ܡܢ ܚܐܦ̈ܐ ܕܪ̈ܓܝܢ ܕܒܢ ܢܫܘܚ܆ ܠܐ ܦ݀ܝܫܝܢܢ ܡܢ ܫܘܡܠܝܗ. ܒܬܪܟܢ ܕ[ܝܼܢ] ܕܢܦܝܛ܆ ܘܢܫܘܛ ܠܢܡ̈ܘܣܐ ܡܬܬܝܬܝܢܢ܆ ܠܡܢܐ ܓܝܪ ܐܙܠ ܠܗܘܢ ܢܡܘܣ̈ܐ܇ ܠܗܿܢܘܢ ܕܐܢܢܩܐ ܟܕܝܢܐ ܥܡܗܘܢ܇ ܘܕܢܚܘܢ ܐܝܟ ܢܡ̈ܘܣܐ ܠܐ ܫܒܿܩܐ܇ ܡܛܠ ܕܟܝܢܗܘܢ ܣܩܘܒܠܐܝܬ ܐܬܿܐ ܠܘܬ ܡܝܬܪܘܬܗܘܢ ܕܢܡ̈ܘܣܐ. ܕܬܠܬ܆ ܕܡܛܠ ܟܠ ܡܪ̈ܕܘ ܢܦܘܫܘܢܼ ܘܡܐܝܢܘܬܐ ܢܓܝܪܬܐ ܥܠ ܟܠ ܐܘܡ̈ܢܘ ܐܘ ܝܕ̈ܥܢ ܢܚܼܫܘܢ. ܘܣܦܪܐ ܘܣܒܐ܇ ܠܣܟܠܐ ܘܠܫܒܪܐ܆ ܠܐ ܢܟܘܦܘܢ ܬܚܝܬ ܡܪܕܘܬܐ. ܘܩܝܢܝܐ ܘܢܓܪܐ܆ ܠܣܟܬܐ ܘܠܐܒܘܬܐ܇ ܘܠܬܪܥܐ ܘܠܬܪܘܢܘܣ܆ ܠܐ ܢܥܒܕܘܢ܆ ܠܡܢܐ ܓܝܪ܇ ܚܫܿܚ ܬܘܩܦܐ ܘܡܪܕܘܬܐ܇ ܠܗ݀ܘ ܟܝܬ ܕܐܢ ܡܬܪܕܐ ܘܐܠܐ܇ ܣܦܝܪܐ ܘܡܗܝܪܐ ܐܝܬ ܗܘ ܠܗ ܕܢܗܸܘܐ ܡܢ ܟܠ ܥܪܝܨܘ. ܐܘ ܢܓܪܐ ܐܘ ܩܝܢܝܐ܆ ܠܡܢܐ ܡܥܡܠ ܘܡܠܐܐ ܢܦܫܗ܇ ܟܕ ܐܢ ܥܡܿܠ ܘܐܢ ܒܗܠ܇ ܕܢܗܘܘܢ ܡ̈ܐܢܐ ܡܢ ܟܠܦܪܘܣ ܐܝܬ ܠܗܘܢ܇ ܘܥܡ ܣܝܘܿܡܘܬ ܢܡ̈ܘܣܐ ܡܪܕܘܬܐ ܘܐܘܡܢܘܬܐ ܕܡܣܬܠܝܢ. ܐܦ ܕܝܿܢܘܬܐ ܬܒܼܛܠ. ܘܠܐ ܢܬܟܠܠܘܢ ܓܒܪ̈ܐ ܛܒ̈ܐ܆ ܘܠܐ ܢܬܬܣܝܡ ܒܪܝܫܐ ܕܡܬܥܒܪ̈ܢܐ. ܘܐܟܙܢܐ ܕܠܐ ܡܫܬܟܚ ܚܘܝܐ ܟܕ ܡܣܓܐ ܕܢܨܘܡ: ܘܠܐ ܢܫܪܐ ܟܕ ܪܘܪܒܐܝܬ ܢܓܕܘܠ ܓܦܗ: ܘܠܐ ܟܢ̈ܦܝ ܫܒܚ̈ܝܢ ܥܠ ܡܫܩܠܐ ܕܐܒܪ̈ܝܗܿ ܘܠܐ ܛܘܿܣܐ ܥܠ ܫܘܦܪܗ܆ ܘܠܐ ܐܪܝܐ ܥܠ ܚܝܠܗ܆ ܘܠܐ ܒܗܡܘܬ ܥܠ ܪܒܘܬܗ: ܟܠܚܕ ܓܝܪ ܡܢܗܘܢ ܫܘܒܚܐ ܡܢ ܟܝܢܐ ܩܒܠ: ܘܠܐ ܨܼܒܐ ܕܢܗܸܘܐ ܗܘܿܡܐ ܕܐܝܬܘܗܝ: ܠܐ ܓܝܪ ܐܝܬܘܗܝ ܗܘܐ ܩܕܡ ܕܢܼܨܒܐ܆ ܗܟܢܐ ܘܠܐ ܥܢܘܝܐ ܥܠ ܨܘܡܗ ܘܚܠܝܨܘܬܗ܇ ܘܥܠ ܫܘܦܪܐ ܕܢܦܫܗ ܘܐܬܠܝܛܘܬܗ܇ ܢܬܩܠܣ ܘܢܬܟܠܠ: ܗܟܢܐ ܕܝܢ. ܘܠܐ ܐܣܘܛܘܣ ܢܬܓܢܐ܇ ܘܠܐ ܙܠܝܠܐ ܢܨܛܚܐ. ܐܟܡܐ ܕܐܦܠܐ ܠܟܘܕܪܐ ܘܠܢܘܢܐ ܡܡܟܟܝܢܢ ܘܡܨܚܝܢܢ܇ ܥܠ ܝܥܢܘܬܐ ܘܫܪܝܟܘܬܐ. ܥܡ ܗܿܠܝܢ ܕܝܢ܆ ܐܦ ܠܡܬܚܫܒܢܘܬܐ ܘܡܬܪܥܝܢܘܬܐ ܐܝܟ ܕܡܢ ܨܐܕܝܗܘܢ܆ ܕܚܩ̈ܝܢ ܘܡܣܠܝܢ ܘܝܬܝܪ ܡܢܗܘܢ ܆ܐܝܠܝܢ ܕܐܝܟ ܕܒܫܓܡܐ ܪܢܘ܇ ܠܕܘܒܪܐ ܕܥܠܡܐ ܪܒܐ܇ ܘܠܦܪ̈ܟܣܝܣ ܐܢܫܝ̈ܬܐ. ܐܢܗܘ ܓܝܪ 117a ܕܐܝܟ ܣܘܣܝܐ ܕܡܢ ܦܓܘܕܬܐ ܘܐܦܣܪܐ ܡܓܙܝ: ܛܿܪܕ ܒܚܐܦܐ ܠܐ ܡܠܝܠܐܝܬ܇ ܘܠܟܐ ܘܠܗܠ ܡܪܓܠ ܘܪܕܐ ܚܪܝܦܐܝܬ: ܘܠܟܠ ܟܪ ܕܐܙܠ ܚܐܦܐ ܡܢ ܟܝܢܐ ܪܚܡ ܦܗܝܐ ܡܫܬܥܝܢܐ: ܘܐܝܟ ܐܠܦܐ ܕܥܠ ܚܨܐ ܕܪܕܢܐ ܫܦܝܪ ܡܬܩܢܐ: ܕܡܢ ܡܿܫܒܐ ܕܐܬܼܐ ܡܢ ܚܪܬܗܿ ܡܬܢܓܕܐ: ܘܠܘܬ ܩܬܪ̈ܐ ܘܠܘܬ ܟܪ̈ܘܟܝܬܐ ܡܬܛܪܝܐ ܠܐ ܦܐܝܐܝܬ: ܗܟܢܐ ܡܢ ܓܕܐ ܡܕܡ ܐܚܝܕ: ܘܠܕܘܒܪ ܚܝ̈ܝܢ ܠܟܪ ܕܨܿܒܐ: ܡܦܗܐ ܠܐ ܪܚܝܡܐܝܬ܆ ܡܿܢܐ ܓܿܕܫ. ܕܢܫܒܘܩ ܠܠܩܐ ܕܡܚܫܒܬܐ܆ ܘܢܦܘܫ ܘܢܬܓܪܕܐ ܡܢ ܦܐܪ̈ܘܗܝ ܕܗܢܐ . ܠܐ ܢܬܚܫܒ ܕܢܬܢܩܦ. ܘܠܐ ܕܢܙܪܘܥ܆ ܘܠܐ ܕܢܪܕܐ. ܐܠܐ ܟܝܬ ܕܡܟܐܝܬ ܟܕ ܓܿܗܠܝܢܢ ܢܬܢܿܩܦ. ܘܒܩܪܐܝܬ ܘܐܝܟ ܥܪ̈ܕܐ ܒܝܕ ܫ̈ܢܐ ܚܪ̈ܝܦܬܐ ܡܢ ܐܪܥܐ ܢܓܕ ܠܢ ܬܘܪܣܝܐ. ܘܣܟ ܟܠܗܝ̈ܢ ܥܒܝ̈ܕܬܢ܆ ܕܠܐ ܡܕܥ ܘܕܠܐ ܒܘܝܢ ܡܢܢ ܢܬܓܡܪ̈ܢ. ܘܡܢ ܗܪܟܐ ܗܘܼ ܙܘܥܿܐ ܕܬܐܘܪܝܐ܆ ܢܬܪܩܩ ܘܡܢ ܐܝܩܐ ܢܬܚܫܒ. ܐܠܐ ܗ݀ܠܝܢ ܠܪܘܚܩܐ ܡܢܢ ܢܕܝܪ̈ܢ. ܡܛܠ ܟܝܬ ܕܟܕ ܐܬܒܪܝܢܢ ܡܬܚ̈ܫܒܢܐ܆ ܕܒܫܓܡܐ ܥܒܝܕ̈ܬܢ ܢܕܪ̈ܝܢ ܛܒ ܣܟܠܐ. ܘܟܕ ܟܝܬ ܒܢ̈ܝ ܚܐܪ̈ܐ ܐܬܬܟܝܢܢ܆ ܕܡܢ ܩܛܝܪܐ ܚܠܩܢܝܐ ܢܬܡܪܕ܆ ܐܦ ܗܝܼ ܡܣܠܝܐ. ܐܠܐ ܟܕ ܣܢܐܓܪ̈ܝܐ ܥܿܒܕܝܢ ܠܫܓܡܐ ܘܠܫܒܝܠܐ ܠܟܝܢܐ ܐܡܿܪܝܢ: ܕܗܐ ܚܕܝܢܢ ܕܥ̈ܠܬܐ ܡܕܡ ܢܩܝ̈ܦܢ ܡܢ ܟܝܢܐ܇ ܕܥܒܪ̈ܢ ܣܘܿܦܢܐ. ܘܐܝܬ ܐܡܬܝ ܕܡ̈ܣܓܝܢ ܚ̈ܒܠܢ ܣܘܪ̈ܚܢܐ. ܐܝܬ ܕܝܢ ܒܙܒܢ. ܕܡ̈ܣܓܝܢ ܥ̈ܒܕܢ ܥܘܕܪܢܐ. ܘܠܙܪ̈ܥܐ ܘܠܢܨܒ̈ܬܐ. ܘܠܝܬܘܬܐ ܘܲܠܕܝܪ̈ܝܗܿ܆ ܗܟܢܐ ܘܗܟܢܐ ܟܝܢܐ ܡܝܬܐ. ܕܐܝܟ ܐܝܟܢ ܪ̈ܘܚܐ ܗ̈ܢܝܢ ܕܒܥܘܒܐ ܕܐܪܥܐ ܕܘܝܪܐ ܡܼܛܐ ܐܢܝ̈ܢ: ܟܕ ܡܬܪ̈ܒܝܢ ܘܡܬܥ̈ܫܢܢ: ܢܙ̈ܠܐ ܢܘ̈ܕܐ ܕܡܕ̈ܝܢܬܐ ܡܢܗܝܢ ܗ݀ܘܐ. ܘܡܢ ܗܪܟܐ܆ ܠܫܝܘܠ ܣ̈ܓܝܐܐ ܡܬܥܪܓܠܝܢ. ܒܕܘ̈ܟܝܬܐ ܕܝܢ ܐܚܪ̈ܢܝܬܐ: ܟܕ ܡ̈ܬܚܝܠܢ ܡܢ ܥܘ̈ܒܐ ܕܝܠܗܝ̈ܢ ܢܦ̈ܩܢ: ܘܒܡܲܦܩܗܝܢ ܡܒܘܥܐ ܕܡ̈ܝܐ ܡܪ̈ܕܝܢ: ܥܡ ܡܠܬܐ ܕܝܢ ܕܟܝܢܐ܆ ܐܦ ܐܐܪ ܐܬܐ. ܘܡܬܩܘܪܪ ܘܝ̈ܩܕܢܐ ܣ̈ܓܝܐܐ ܡܫܕܪ. ܘܒܝܘܡ̈ܬܐ ܣ̈ܓܝܐܐ ܒܝܕ ܓܠܝܕܐ ܥܿܛܐ. ܘܠܗܢ̈ܝܢ ܕܫ̈ܘܚܢ ܥܠ ܐܪܥܐ ܡܣܝܛ. ܒܗ݀ܢܘܢ ܕܝܢ ܬܐܕ̈ܢܝܐ܆ ܫܘܒܐ ܚܣܝܢܐ ܡܟܟ. ܘܠܫܚ̈ܐ ܕܫ̈ܒܠܐ ܡܢ ܦܐܪ̈ܐ ܡܪܡܐ܆ ܘܠܐܝ̈ܠܢܐ ܡܢ ܦܩ̈ܚܐ ܐܦ ܡܢ ܦܐܪ̈ܐ ܐܟܚܕܐ ܡܲܕܘܐ. ܘܠܐܚܪ̈ܢܐ ܚܘܣܪ̈ܢܐ ܕܠܐ ܡ̈ܢܝܢ ܣ݀ܥܪ. ܟܕ ܡܣܓܐ ܡܬܢܲܝܪ. ܘܡܢ ܥܘܙܐ ܕܫܡܫܐ ܒܩܝܛܐ ܡܬܪܬܚ 117b ܥܡ ܗܿܠܝܢ ܕܝܢ܆ ܣ̈ܓܝܐܝ ܚ̈ܝܐ ܐܝܬܝܗܘܢ܇ ܕܝܪ̈ܝܗܿ ܕܬܝܡܢܐ. ܘܫܚ̈ܝܩܝ ܚ̈ܝܐ ܘܙܥܘܪ̈ܝ ܚ̈ܝܐ ܗܿܢܘܢ ܕܒܓܪܒܝܐ. ܘܒܐܐܪ ܦܠܢ ܠܡ܆ ܫܘܦܪܐ ܡܿܡܠܟ. ܒܐܚܪܢܐ ܕܝܢ܆ ܕܡܘܬܐ ܡܬܥܪܩܢܝܬܐ. ܗ݀ܠܝܢ ܘܐܚܪ̈ܢܝܬܐ ܕܐܝܟ ܗܠܝܢ ܐܡܿܪܝܢ܇ ܐܝܠܝܢ ܕܣܝܘܓܪ̈ܝܣܐ ܚܠܦ ܫܓܡܐ ܥܒܿܕܝܢ: ܘܚܠܦ ܟܝܢܐ ܟܠ ܡܠܬܐ ܐܝܬ ܠܗܘܢ. ܚܢܢ ܕܝܢ ܠܘܬ ܗܠܝܢ܆ ܡܢܐ ܡܿܓܝܼܒܝܼܢܢ܇ ܐܘ ܗܕܐ. ܡܢ ܗܿܘ ܡܠܝܢܗ ܕܥܠܡܐ܆ ܟܠ ܟܝܢܢ ܐܬܐ ܘܡܫܬܒܲܠ. ܘܒܗܠܝܢ ܒܝ̈ܬܝܬܐ܆ ܘܒܡܦܘܠܬܐ ܕܡܢ ܗܠܝܢ ܒܝ̈ܬܝܬܐ. ܘܗܝ ܟܕܗܝܘܬܐ ܡܢ ܘܠܐ ܡܫܬܚܠܦܢܘܬܐ ܒܐܣ̈ܛܘܟܝܐ ܘܒܚܝ̈ܘܬܐ ܘܒܟܠ ܓܢܣ ܕܢܨ̈ܒܬܐ ܡܲܥܒܕ܆ ܟܕ ܠܘܬ ܥܘܕܪܢܐ ܕܡܢ ܝܕ ܟܗܝܢܘܬܐ ܕܗܿܘܝܐ ܠܒܢܝܢ̈ܫܐ ܚܿܙܐ. ܘܣܓܝܐܘܬ ܫܘ̈ܓܢܝܐ ܘܦܘ̈ܕܐ: ܘܒܐܣܛܘ̈ܝܟܝܐ ܘܒܗܠܝܢ ܐܚܪ̈ܢܝܬܐ ܡܥܒܕ܆ ܟܕ ܠܘܬ ܗ݀ܝ ܕܝܬܝܪ ܥܿܕܪܐ ܚܿܐܪ. ܘܡܛܠ ܗܿܢܐ ܥ̈ܠܬܐ ܡܕܡ ܥܡ ܟܝܢܐ ܐܠܘܬ ܕܟܕ ܡܢ ܡܬܦܪܟܠܝܢܢ ܒܢܫ̈ܒܐ ܕܚܛܝܬܐ. ܡܢ ܗܿܠܝܢ ܢܬܢܟܐ. ܟܕ ܕܝܢ ܐܡܲܢ̈ܝܢ ܡܬܿܪܨܝܢܢ܇ ܠܘ ܒܠܚܘܕ ܠܐ ܢܬܢܟܐ ܗ̈ܝܢ܆ ܐܠܐ ܟܝܬ ܘܪܘܪܒܐܝܬ ܢܬܥܕܪ. ܘܡܢ ܗܪܟܐ ܠܗ݀ܝ ܕܬܚܝܬ ܠܘܡܦܘܣ܆ ܕܬܬܪܥܠ ܡܢ ܪ̈ܘܚܐ ܡܲܪܫܠ. ܘܠܪ̈ܘܚܐ ܐ[ܐܪ̈]ܝܬܐ܆ ܡܲܪܫܠ ܡܪܦܐ ܕܒܝܕ ܫܘܟ̈ܢܐ ܘܒܝܕ ܓܠܝܕ̈ܐ ܠܡܘܥ̈ܝܬܐ ܕܙܪ̈ܥܐ ܢܗܪ̈ܢ ܘܠܢܨܝܚܘܬ ܙܠܝܩܘ̈ܗܝ ܕܫܡܫܐ ܠܐ ܕܚܿܩ܇ ܟܕ ܡܬܚܲܪܝܢ ܘܡܬܠܿܗܛܝܢ܇ ܘܩܝܢ̈ܕܘܢܘ ܪܘܪ̈ܒܐ ܓܿܡܪܝܢ. ܘܫܿܪܐ ܬܚܘܡܐ ܕܝܡܐ܆ ܘܫ݀ܒܐ ܠܕܝܪ̈ܐ ܕܐܪܥܐ. ܗ݀ܠܝܢ ܥܿܒܕ. ܗܿܘ ܕܐܡܿܪ ܠܫܡܫܐ ܘܠܐ ܕܢܚ܇ ܘܡܦܩ ܪ̈ܘܚܐ ܡܢ ܐܘܨܪ̈ܐ܇ ܘܒܪܫܝܬ ܣܼܡ ܚܠܐ ܬܚܘܡܐ ܠܝܡܐ܇ ܘܬܠܐ ܠܐܪܥܐ ܥܠ ܠܐ ܡܕܡ܇ ܘܟܠ ܒܪܡܙܐ ܕܨܒܝܢܗ ܡܸܨܐ ܣܿܥܪ. ܐܡܬܝ ܓܝܪ: ܕܠܘܬ ܠܐ ܡܛܟܣܘܬܐ ܕܚܛܝܬܐ ܡܕܥܢ ܢܪܫܠ܆ ܠܦܓܘܕ̈ܘܗܝ ܕܥܠܡܐ ܫܒܿܩ܆ ܘܠܘܬ ܚܒܿܠܐ ܘܠܐ ܡܛܿܟܣܘܬܐ ܐܦ ܗܘܼ ܥܿܒܪ. ܘܡܛܠ ܟܝܬ: ܕܡܢ ܐܝܠܝܢ ܕܟܕ ܐܬܝܩܪܝܢ ܠܐ ܐܘܕܝܢܢ܇ ܘܠܘܬ ܡܝܬܪܘܬܐ ܠܐ ܩܿܪܒܝܢܢ܆ ܒܗ̈ܝܢ ܐܦ ܢܬܪܕܐ܇ ܘܢܐܠܦ ܚܝܠܐ ܡܢ ܐܝܠܝܢ ܕܚܫܿܝܢܢ܇ ܟܕ ܠܐ ܐܫܬܘܕܥܢܢ ܡܢ ܐܝܠܝܢ ܕܫܦܝܪ ܗܘ̈ܝ ܠܢ܇ ܐܝܟܢ ܕܬܐܘܠܘܓܘܣ ܐܡܿܪ.. ܡܼܢ ܗܪܟܐ ܠܪ̈ܘܚܐ ܗ̈ܢܝܢ ܕܒܥ̈ܘܒܐ ܕܐܪܥܐ ܡܕܝܪ̈ܢ: ܫܒܩ ܕܠܬܒܝܠ ܢܫܓ̈ܫܢ: ܘܗܦܘܟܝܐ ܕܡܕ̈ܝܢܬܐ܇ ܘܐܒܕܢܐ ܕܝܬܒܝ̈ܗܝܢ ܢ̈ܥܒܕܢ܆ ܐܝܟܢ ܕܛ݀ܒܐ ܐܦܪܡ ܐܡܼܪ. ܗܘܬ 118a ܐܡܿܪ ܐܪܥܐ ܠܥܠ ܡܢ ܥܘܠܐ܆ ܕܠܐ ܣܝܒܪܬ ܕܬܗܘܐ ܬܚܘܬܘܗܝ. ܘܪܒܐ ܕܐܘܝܕ: ܚܿܐܪ ܒܐܪܥܐ ܘܙܝܥܐ. ܘܟܐܐ ܒܛܘܪ̈ܐ ܘܬܐܢ̈ܝܢ. ܕܟܝܢܐ ܕܝܢ܆ ܟܕ ܡܬܬܪܫܠ܆ ܘܡܢ ܦܓ̈ܘܕܐ ܕܡܕܒܪܢܘܬܐ ܦܐ݀ܫ: ܡܢ ܦܘܕܐ ܕܠܐ ܡܛܟܣܘܬܐ ܡܕܡ ܡܬܩܕܡ܆ ܗܕܐ ܬܚܘܐ. ܛܘܪܐ ܓܝܪ ܚܕ ܐܝܬ ܪܒܐ. ܒܗܢܐ ܪܥܼܠܐ ܘܙܘܢܙܠܐ܆ ܟܠ ܥܕܢ ܘܥܕܢ ܗ݀ܘܐ. ܘܠܐ ܣܿܟ܇ ܕܙܡܝ ܠܥܡܘܪ̈ܘܗܝ ܝܕܥܿܝܢܢ. ܛܟ܆ ܕܠܐ ܫܘܿܝܢ ܠܥܛܿܝܐ. ܘܐܠܘ ܟܝܬ: ܗܼܘ ܙܘܥܿܐ ܘܚܐܦܐ ܕܪܘܚܐ: ܡܢ ܗܿܘ ܕܥܠ ܥܿܠܡܐ ܩܐܡܿ܆ ܠܐ ܡܬܚܓܪ ܗܘܐ܆ ܠܐ ܣܟ܇ ܕܢܼܚܘܢ ܒܗܕܝܪ̈ܘܗܝ ܥܘܙܐܗܿ ܕܪܘܚܐ ܡܪܦܐ ܗܘܐ. ܐܚܪܬܐ ܕܝܢ ܕܘܟܬܐ. ܟܕ ܠܐ ܣܟ ܒܗܿ ܪܘܚܐ ܐܬܥܲܪܡܬ܆ ܕܠܐ ܣܘܟܝ ܡܢ ܥܘܙܐ ܕܪܘܚܐ ܐܬܢܘܕܬ܆ ܘܐܒܕܢܐ ܕܣ̈ܓܝܐܐ ܒܗܿ ܐܫܬܟܚ. ܘܐܢܫ̈ܝܢ ܙܥܘܪ̈ܐ܆ ܕܠܐ ܣܒܪܐ ܚܙܘ ܫܘܘܙܒܐ. ܒܗ݀ܕܐ ܕܝܢ ܕܘܟܬܐ ܡܢ ܒܛܝܠܘܬܗܿ ܕܛܝܒܘܬܐ܆ ܚܕ ܕܚܕܥܣܪ ܝܘܡ̈ܝܢ ܒܬܛܠܝܠܐ ܐܟܣܝ܆ ܐܝܟ ܕܡܢ ܚܙ̈ܐ ܕܫܝܘܠ܆ ܐܢܫ̈ܐ ܡܩܒܪ̈ܢܐ ܐܥܕܝܘܗܝ܇ ܟܕ ܢܗܡܬܐ ܕܝܠܗ ܚܘܸܝܬ ܐܢܘܢܟܪ ܕܪܡܸܐ ܗܘܐ. ܗܟܢܐ܆ ܘܐܦ ܡܛܠ ܝܡܐ ܫܡܥܼܢܢ. ܕܟܕ ܡܿܣܓܐ ܡܬܬܓܝܼܚ: ܘܒܟܠ ܫܢܐ ܒܫܢܐ ܡܬܓܠܠ ܘܚܐܦܐ ܬܩܝܦܐ ܢܣ݀ܒ܆ ܠܐ ܫܒܼܐ ܘܠܐ ܐܗܿܪ ܠܐܪܥܐ ܫܒܒܬܗ. ܟܕ ܬܟܿܣ ܘܡܟܿܠܐ ܠܗ݀ܢܐ ܢܡܘܣܐ ܕܚ̈ܝܐ ܒܕܘܟ ܕܝܢ܆ ܕܟܕ ܡܢ ܪܡܙܐ ܫܲܪܝܐ ܡܪܫܠܢܘܬܐ ܐܫܟܚ܆ ܥܿܛܝܐ ܪܒܐ ܠܡܕܝ̈ܢܬܐ ܘܠܓܙܪ̈ܬܐ ܕܒܓܘܗ ܥܲܬܕ. ܘܫܡܫܐ ܟܕ ܐܬܟܘܪ܆ ܐܪܘܝܐ ܠܣܘܓܐܐ ܕܝ̈ܠܝܕܐ܆ ܘܣܓܦ ܠܚܝܠܐ ܡܦܪܝܢܐ ܕܢܨ̈ܒܬܐ. ܗ݀ܠܝܢ ܘܕܐܝܟ ܗܠܝܢ ܥ̈ܠܬܐ܇ ܟܕܢ ܗ݀ܘ ܡܝܬܝܢܐ ܕܟ݀ܠ ܥܡ ܟܝܢܐ ܟܠܗ. ܕܒܗ̈ܝܢ ܒܚ̈ܫܐ܆ ܟܕ ܡܬܪܨܝܢ ܡܬܒܣܡܝܢ. ܘܟܕ ܡܣܛܝܢ ܘܚܿܛܝܢ ܡܬܡܣܪܝܢ. ܘܒܟܠ ܐܬܪ ܘܒܟܠ ܕܘܟܐ܆ ܗܘܡܐ ܕܠܥܘܕܢܐ ܘܠܦܘܢܩܐ ܦܪܝܫ ܘܝܗܝܒ ܡܢ ܐܠܗܐ܆ ܡܦܢܐ ܠܗ ܠܘܬ ܕܘܢܩܐ ܡܐ ܕܚܛܝܬܐ ܡܡܠܟܐ. ܘܐܝܟܢܐ ܟܝܬ: ܕܪܘܼܟܒܐ ܡܘܬܪ ܘܬܪܒܝܬܐ ܒܬܘܪܣܝܐ ܠܟܠܗܘܢ ܓܘܫ̈ܡܐ܆ ܕܒܬܪ ܐܪ̈ܒܥܐ ܡܢ ܐܪ̈ܒܥܐ ܝܗܒ ܪܝܫܝܬܐ܆ ܗܟܢܐ ܘܦܘܠܗܕܐ ܘܒܘܕܪܐ ܘܩܘܡܐ ܘܡܓܙܝܘܬܐ܇ ܡܢܗܘܢ ܟܕ ܡܢܗܘܢ ܕܢܗܸܘܐ ܐܘ ܡܲܦܼܣ ܐܘ ܡܪܫܠ܆ ܐܘ ܓܡܪ܇ ܘܡܢ ܗܪܟܐ ܡܢ ܐܪܥܐ ܕܙܪ̈ܥܐ ܡܫܘܚܐ: ܘܩܢܝܐ ܕܥܒܘܪܐ ܣܒܝܣܐܝܬ ܡܬܪܒܸܐ ܒܗܿ܆ ܒܝܕ ܟܘܪܢܐ ܘܫܘܿܒܝܐ ܠܗܕܐ ܐܓܿܪܣ܆ ܘܒܝܕ ܟܦܢܐ ܠܥܡܘܪ̈ܝܗ ܕܐ݀ܢ ܘܡܢܘܠ. ܘܐܝܟܐ ܬܘܒ܆ ܕܡܪܥܝܬܐ 118b ܡܕܡ ܐܝܬܝܗܿ: ܘܟܗܝܢܐ ܘܥܒܝܛܐ ܒܦܪ̈ܕܝܣܐ ܘܒ̈ܥܒܐ܆ ܒܝܕ ܥܛܪ̈ܐ ܡܡ̈ܝܬܢܐ ܫ݀ܛܚ ܘܫ݀ܕܐ ܠܕܝܪ̈ܝܗ܇ ܘܡܢ ܐܐܪ ܕܠܥܠ ܡܢܗܘܢܼ ܣܘܦܢܐ ܕܣܘܓܐܗܘܢ ܣܿܥܪ ܘܐܝܬ ܐܝܟܐ܆ ܕܒܝܕ ܓܢܣܐ ܕܫܪܝܨܐ ܘܕܩܡ̈ܨܐ܇ ܕܕܠܐ ܣܒܪ ܘܕܠܐ ܣܘܟܝ܇ ܓܿܣܝܐ ܐܪܥܐ܆ ܘܛܿܥܢ ܐܐܪ. ܘܠܗܟܗܝܢܘܬܐ ܥܡ ܚ̈ܝܐ ܓܙ݀ܡ. ܘܣܟ ܠܡܐܡܪ: ܒܟܠ ܐܬܪ ܘܒܟܠ ܕܘܟܐ܇ ܗܘܡܿܐ ܕܦܪܝܫ ܠܒܘܣܡܐ܆ ܗ݀ܢܐ ܡܫܬܠܚ ܠܫܘܢܩܐ܆ ܐܠܐ ܛܟ ܢܐܡܼܪ ܐܢܫ ܕܚܿܙܝܢܢ ܕܒܬܪ ܦܠܢ܆ ܡܘܬܢܐ ܕܣ̈ܓܝܐܐ ܗܘܼܐ܇ ܟܕ ܫܪܥܘܛܐ ܫܢܬܢܝܐ ܥܿܛܐ ܠܕܝܪ̈ܘܗܝ. ܘܡܢܗܘܢ ܐܫܬܘܙܒܘ܆ ܟܕ ܐܒܥܕܘ ܠܛܘܪܐ. ܡܣܬܒܪܐ ܠܝ ܕܗܿܘ ܕܗܿܕܐ ܐܡܼܪ ܠܚܝܠܐ ܕܐܠܗܐ܆ ܠܐ ܣܟ ܚ݀ܟܡ. ܕܡܛܠܬܗ ܟܕ ܡܫܒܚ ܪܒܐ ܕܐܘܝܕ ܐܡܼܪ. ܕܐܢ ܐܣܼܩ ܠܫܡܝܐ ܬܡܢ ܐܢܬ. ܘܐܢ ܐܚܘܬ ܠܫܝܘܠ ܐܦ ܬܡܢ ܐܝܬܝܟ. ܘܐܢ ܐܪܝܡ ܟܢܦ̈ܝ ܐܝܟ ܕܢܫܪܐ: ܘܐܫܪܐ ܒܚܪܬܗ ܕܝܡܐ܆ ܐܦ ܬܡܢ ܐܝܕܟ ܬܐܚܕܢܝ܆ ܘܬܕܒܪܢܝ ܝܡܝܢܟ. ܘܢܒܝܐ ܐܚܪܢܐ ܟܕ ܡܛܠ ܐܝܣܪ̈ܠܝܐ ܕܡܢ ܢܝܪܐ ܕܐܠܗܐ ܨ݀ܒܝܢ ܠܡܪܚܩܘ܆ ܘܬܚܝܬ ܟܬܦܿܐ ܕܐܬܘܪ̈ܝܐ ܘܕܡܨܪ̈ܝܐ ܗܼܢܘܢ ܠܗܘܢ ܟ݀ܕܢܝܢ ܗܘܘ܆ ܐܡܼܪ ܐܝܟ ܕܡܢ ܦܪܨܘܦܗ ܕܡܪܝܐ܆ ܕܠܡܨܪܝܢ ܐܬܼܐ ܘܠܐܬܘܪ ܐܙܠ܆ ܐܝܟܐ ܕܢܐܙܠܘܢ܆ ܐܦܪܣ ܥܠܝܗܘܢ ܡܨܝܕܬܝ. ܘܐܚܪܢܐ ܬܘܒ ܐܡܪ܆ ܕܐܟܙܢܐ ܕܢܦܘܩ ܐܢܫ ܠܕܒܪܐ: ܘܬܦܓܥ ܒܗ ܕܒܼܐ܇ ܘܢܥܘܠ ܠܒܝܬܐ ܘܢܡܘܣ ܐܝܕܗ ܥܠ ܐܣܬܐ: ܘܢܟܬܝܘܗܝ ܚܘܝܐ܆ ܗܟܢܐ ܗܼܘ ܝܘܡܢܗ ܕܡܪܝܐ. ܚܫܘܟ ܘܠܐ ܢܗܝܪ. ܕܐܝܟ ܗ݀ܢܐ ܗܼܘ ܚܝܠܗ ܕܡܪܝܐ܇ ܐܡܬܝ ܕܥܠ ܪ̈ܫܝܥܐ ܡܬܓܐܐ. ܐܡܬܝ ܓܝܪ: ܕܟܪܟܐ ܘܡܕܝܢܬܐ ܐܝܟ ܕܒܡܣܡ ܒܪܝܫܐ ܬܩܒܠ ܟܘܘܢܐ܆ ܕܘ݀ܝܐ ܗܘ ܠܝ܇ ܗܿܘ ܕܦܠܝܛܐ ܘܡܫܘܙܒܐ ܨܒܿܐ ܕܢܗܸܘܐ. ܕܡܪܝܐ ܗܝ ܓܝܪ ܐܪܥܐ ܘܡܘܠܝܗܿ ܕܝܠܗܿ. ܐܡܿܪ ܡܙܡܪ ܟܗܢ̈ܝܬܐ. ܐܢܓܝܪ ܠܐ ܒܗܿܕܐ܆ ܒܗܿܕܐ ܨܿܐܕ ܠܗ. ܘܡܼܢ ܡܨܝܕܬܐ ܕܐܒܕܢܐ ܠܐ ܥܘܼܕ ܥܪܩ. ܐܠܐ ܐܢ ܐܪܐ܇ ܒܢܡܘܣܐ ܕܙܕܝܩܘܬܐ ܣܿܪܟ. ܘܒܩܝ̈ܡܐ ܕܩܕܝܫܘܬܐ ܡܬܓܘܣ. ܐܝܟ ܡܐ ܕܐܦ ܥܠ ܟܗܢܝܬܐ ܐܘܪܫܠܡ ܗܘܸܐ. ܟܕ ܓܝܪ ܕܘܒܪ ܚܝܝ̈ܗܘܢ ܛܐܡܝܘ: ܘܒܡܲܩܕܫܘܢ ܘܟܘܢܗܢܗܘܢ ܠܩܕܝܫܐ ܕܝܣܪܝܠ ܐܪܓܙܘ܆ ܒܝܕ ܡ̈ܠܐܟܐ 119a ܥܙ̈ܝܙܐ ܣܘܦܝܗܘܢ ܡܼܛܐ. ܒܠܚܘܕ ܕܝܢ ܐܡܿܪܘ ܡܢ ܕܝܢܼܐ ܐܝܠܝܢ ܕܒܝܕ ܐܟܿܝܼܦܘܬܐ ܕܗܿܘ ܕܠܒܝܼܫ ܗܘܐ ܒܘܼܨܐ܇ ܪܘܫܡܐ ܒܝܬ ܥܝܢܝ̈ܗܘܢ ܩܒܠܘ܇ ܕܥܠ ܢܡܘܣܝܘܬܗܘܢ ܘܕܟܝܘܬܗܘܢ ܡܒܕܩ ܗܘܐ. ܐܢܕܝܢ ܘܐܢܫ܆ ܫܘܘܙܒܐ ܡܢ ܐܬܪܐ ܡܬܕܝܚܐ ܐܫܟܚ: ܟܕ ܡܢܗ ܕܐܬܪܐ ܐܬܪܚܩ: ܐܝܟܢܐ ܕܗܿܢܘܢ ܕܡܢ ܫܪܥܘܛܐ ܐܡܕܘ ܒܡܬܥܠܝܢܘܬܐ ܕܠܛܘܪܐ܆ ܒܗܿܢܐ ܣܪܝܕܐ ܕܡܝܬܪܘܬܐ܆ ܘܚܡܝܪܐ ܕܬܝܒܘܬܐ ܐܡܿܪܝܢܢ ܕܐܫܬܟܚ. ܘܡܢ ܗܪܟܐ ܘܡܢ ܕܝܢܐ ܐܡܪܘ ܟܕ ܐܠܗܐ ܐܙܝܥܗ܆ ܐܘ ܟܕ ܡܠܐܟܐ ܩܕܝܫܐ ܐܕܝܠܗ܆ ܐܘ ܟܕ ܬܐܪܬܗ ܫܢܝܬܗ܇ ܚܠܦ ܐܬܪܐ ܘܐܫܟܚ ܚ̈ܝܐ. ܘܒܡܓܠܐ ܕܥܠ ܪ̈ܫܝܥܐ ܐܬܢܝܸܦܬ܆ ܠܐ ܐܬܓܡܡ. ܡܛܠ ܟܝܬ ܕܚܪܒܐ ܕܠܛܝܫܐ ܘܣܦܣܪܐ ܕܪܘܝܐ܇ ܠܕܡܐ ܕܙܕܝ̈ܩܐ ܥܡ ܗܿܘ ܕܥ̈ܘܠܐ ܡܢܩܝܐ܆ ܟܕ ܡܠܦܐ܆ ܕܠܐ ܢܚܿܒ ܕܘܝܪܐ ܕܒܝ̈ܫܐ܇ ܗ݀ܘ ܕܠܕܘܒܪ̈ܐ ܕܣ̈ܓܝܐܐ ܡܿܥܕܐ. ܘܡܛܠ ܗܿܢܐ ܠܙܕܝܩܐ ܠܘܛ܆ ܒܝܕ ܫܠܝܚܘܬܐ ܕܡ̈ܠܐܟܐ ܡܢ ܐܬܪܐ ܛܡܐܐ ܓܠܘܝ ܘܐܦܩܗ. ܘܡܢ ܠܘܬ ܒܝ̈ܫܐ ܒ̈ܒܠܝܐ܆ ܩܿܪܐ ܘܠܥܡܗ ܢ݀ܓܕ. ܟܕ ܒܝܕ ܢܒܝܐ ܐܡܼܪ܆ ܕܥܪܘܩܘ ܥܪܘܩܘ ܡܢ ܒܒܠ. ܘܠܘܬܗ ܠܐ ܬܬܩܪܒܘܢܼ ܘܟܠ ܕܒܗܿ ܢܫܬܟܚ܆ ܢܬܕܩܪ ܒܚܪܒܐ. ܡܛܠ ܕܡܪܝܐ ܐܚܿܒ ܕܢܗܸܘܐ ܨܒܝܢܗ܇ ܒܒܒܠ ܘܒܐܪܥܐ ܕܟ̈ܠܕܝܐ. ܗ݀ܕܐ ܕܝܢ܆ ܟܕ ܒܚܢܢܐ ܘܒܚܘܣܢܐ܇ ܡܬܚܫܚ ܡܪܝܐ ܡܛܠ ܙܕܝܩ̈ܐ ܣܿܥܪ ܘܡܓܲܠܘܐ܆ ܘܡܦܩ ܠܗܘܢ ܡܢ ܐܬܪܐ܇ ܕܪܥܿܐ ܠܗ ܐܒܕܢܐ܇ ܘܡܢ ܡܠܐܟܐ ܕܡܘܬܐ. ܡܿܓܢ ܥܠܘܗܝ ܘܡܣܬܪ ܠܗ. ܐܘ ܒܝܕ ܚܙܘܐ ܩܕܝܫܐ ܐܘ ܒܝܕ ܡܿܠܐܟܐ ܝ݀ܨܘܦܐ܆ ܐܘ ܒܝܕ ܢܒܝܐ ܘܓܒܪܐ ܚܿܙܝܐ܇ ܡܢ ܬܡܢ ܡܫܢܐ ܠܗ܇ ܐܝܟܢܐ ܕܐܡܿܕܢܢ ܠܡܐܡܪ܇ ܐܢܕܝܢ ܗܘ: ܡܛܠ ܚܐܪܘܬܐ ܕܨܒܝܢܗ: ܡܢܐܬܪܐ ܕܐܪܓܙܘ ܘܡܬܬܕܝܢ ܥܿܪܩ܆ ܐܘ ܠܐ ܣܿܟ ܦܿܘܠܛܐ ܡܫܟܚ܀ ܐܢ ܡܢ ܒܝܫܘܬܗ ܠܐ ܦܐ݀ܫ܆ ܐܘ ܐܢܗܸܘ ܕܐܫܟܚ܇ ܦܬܓܡܐ ܛܿܒܐ ܗ݀ܘܐ ܒܠܒܗ܇ ܡܛܠܬܗ ܐܦ ܠܐܬܪܐ܇ ܐܢܿܕ ܘ݀ܓܥܨܗ. ܐܡܿܪܢܐ ܕܝܢ܆ ܕܢܚܡܣܢ ܒܛܒܘܬܐ. ܘܢܪܦܐ ܦܐܪ̈ܝ ܬܝܒܘܬܐ. ܕܠܘ ܕܝܢ ܡܢ ܐܝܩܐ ܘܐܝܟ ܕܒܫܓܡܐ܆ ܦܘܿܠܛܐ ܕܡܢ ܡܘܬܐ ܠܐܢܫ̈ܝܢ ܗ݀ܘܐ: ܘܿܐܢܕܝܢ ܠܐ܆ ܗܕܐ ܬܩܝܼܡ. ܕܚܕܚ̈ܕܢܐ ܡܡܕܝܢ ܡܢ ܡܘܬܐ ܘܐܒܿܕܢܐ ܕܫܪܥܘܛܐ܆ ܐܦ ܟܕܒܗ ܒܿܐܬܪܐ 119b ܡܕܝܪܝܢ. ܐܚܪ̈ܢܐ ܕܝܢ܆ ܕܐܦ ܟܕ ܫܢܝܘ ܣܝܿܦܝܢ ܘܡܿܝܬܝܢ. ܐܘ ܒܗ ܟܕ ܒܗ ܒܟܐܒܐ܆ ܐܘ ܒܙܢܐ ܐܚܪܢܐ. ܕܕܡܝܐ ܠܗܕܐ܆ ܐܦ ܡܛܠ ܡܪ̈ܕܘܬܐ ܐܚܪ̈ܢܝܬܐ ܥܿܝܢܢܢ. ܕܐܝܟ ܐܝܟܢ. ܥܠ ܩܡ̈ܨܐ ܐܘ ܥܠ ܒܪܕܐ. ܟܕ ܓܝܪ ܡ̈ܠܐܟܐ ܛܒ̈ܐ܇ ܕܥܠ ܢܛܘܪܘܬܐ ܐܘ ܡܛܐܒܢܘܬܐ ܐܘ ܡܦܢܝܢܘܬܐ ܕܝܠܢ ܩܝܿܡܝܢ: ܕܝܢܐ ܡܕܡ ܡܫܬܠܚܝܢ ܕܥܠܝܢ ܢܓܙܪܘܢ: ܐܝܟܢܐ ܕܡܢ ܬܘܿܫܐ ܕܒܝܫܘܬܐ ܠܢ ܢ݀ܦܢܘܢ: ܒܛܝܠܐܝܬ ܒܪܕܐ ܐܘ ܩܡ̈ܨܐ ܥܠ ܦܐܪ̈ܝ ܚܩ̈ܠܬܗܘܢ ܡܕܝܠܝܢ: ܘܗ݀ܕܐ ܚܿܙܝܢܢ ܕܗ݀ܘܝܐ܆ ܥܢܢܐ ܓܝܪ ܕܒ̈ܢܝ ܒܪܕܐ ܟܕ ܒܕܘܟ ܡܗܪܐ܆ ܠܐ ܣܟ ܡܚܫܐ. ܘܥܠ ܚܕ ܬܚܘܡܐ ܘܒܚܕܐ ܚܩܠܐ ܚܩܠܗ ܕܪܫܝܥܐ܆ ܡܬܛܒܚܐ ܡܢ ܝܕ ܒܿܪܕܐ ܡܬܪܫܫܐ. ܗ݀ܝ ܕܝܢ ܕܙܕܝܩܐ ܡܿܡܕܐ. ܘܒܚܕ ܐܬܪ ܘܒܚܕ ܟܪܟܐ܆ ܩܘܪ̈ܝܐ ܬܪ̈ܬܝܢ ܕܥܠ ܓܝܒ ܚ̈ܕܕܐ ܝܬܒ̈ܢ ܫܡ̈ܥܢܢ. ܕܐܟܚܕܐ ܣܘܦܢܐ ܓܡܝܪܐ ܡܢ ܝܕ ܒܪܕܐ ܚܫܘ ܦܐܪ̈ܝܗ: ܗܝ ܕܝܢ ܐܚܪܬܐ܆ ܕܠܐ ܐܬܗܿܪܬ ܐܦܠܐ ܒܡܕܡ. ܘܗܝ ܕܬܡܝܗܐ܆ ܒܕܡܘܬ ܚܘܝܐ ܥܩܠܩܠܐ ܡܫܬܒܠܐ ܡܢ ܡܠܐܟܐ ܗܝ ܥܢܢܐ. ܘܡܫܩܠܗܿ ܡܢ ܡܥܪܒܐ. ܘܟܕ ܚܕܐ ܩܪܝܬܐ ܣܥܼܪܬ܆ ܡܢ ܐܚܪܬܐ ܥܿܕܝܐ. ܘܠܓܪܒܝܐ ܡܬܥܿܠܝܐ܆ ܘܟܕ ܐܚܪ̈ܢܝܬܐ ܬܡܢ ܡܛܠܩܐ܆ ܠܘܬ ܐܚܪ̈ܢܝܬܐ ܠܦܢܝܬ ܡܕܢܚܐ ܐܘ ܠܬܝܡܢܐ ܫ݀ܚܩܐ. ܘܣܓ̈ܝܐܬܐ ܒܡܨܥܬܐ ܡܪܦܝܐ܆ ܕܠܐ ܚܘܼܣܪܢ ܘܕܠܐ ܣܘܓܿܦܢ. ܘܐܝܬ ܠܡܬܗܪ ܗܪܟܐ ܘܠܡܼܚܙܐ ܠܥܒܿܕܐ ܕܟܝܢܐ. ܕܐܝܟܢܐ ܦܿܐܫ ܘܡܛܠ ܡܕܒܪܢܘܬܐ ܩܿܐܡ. ܕܣܘܓܐܗܝܢ ܕܥ̈ܢܢܐ: ܡܐ ܕܡܢ ܡܥܪܒܐ ܐܘ ܡܢ ܡܕܢܚܐ ܢܓܿܕܐ ܠܗܝ̈ܢ ܪ̈ܘܚܐ܆ ܒܫܒܝܠܐ ܬܪܝܨܐ ܡܕܒܪܐ ܠܗܝ̈ܢ. ܘܒܢܘܛܦܬܗܝܢ ܙܠܥ̈ܢ ܘܠܐܪܥܐ ܡܪ̈ܘܝܢ. ܗܟܢܐ ܘܥܠ ܩܡ̈ܨܐ ܫܡܥܢܢ. ܟܕ ܓܝܪ ܐܕܝܠܗ ܡܿܠܐܟܐ ܝܨܘܦܐ܇ ܘܟܪ̈ܟܐ ܣ̈ܓܝܐܐ ܫܚܩ ܒܗ܆ ܒܬܚܘܡܐ ܕܐܬܪܐ ܐܚܪܢܐ܆ ܐܫܠܡܗ ܠܐܒܕܢܐ. ܘܠܫܒܛܐ ܫܚܿܩ ܣܓ̈ܝܐܐ܆ ܒܐܚܪܢܐ ܕܡܢܗ ܥܙܝܙ ܫܚܼܩ ܘܫܕܝܗܝ. ܐܓܝܚ ܓܝܪ ܥܠܘܗܝ ܪܘܚܐ ܣܓܝܐܬܐ܆ ܘܕܠܐ ܢܥܘܠ ܠܐܬܪܐ ܠܘܩܕܡ ܚܓܪܗ. ܒܬܪܟܢ ܕܝܢ܆ ܒܝܕ ܥܢܢܐ ܕܒܢ̈ܝ ܒܪܕܐ ܪܡܚܗ ܘܥܛܝܗܝ܇ ܘܒܕܡܘܬ ܟ̈ܫܝܢ ܕܩܛܝ̈ܠܝ ܚܪܒܐ ܣܡܗ. ܘܠܐܬܪܐ ܥܡ ܟܠܗܘܢ ܕܝܪ̈ܘܗܝ܆ ܫܘܙܒ ܡܠܐܟܐ ܝܨܘܦܐ. ܢܗܘ̈ܝܢ ܗܠܝܢ ܠܡ܆ ܐܝܟܢܐ ܕܐܡܼܪܬ. ܡܢܐ ܕܝܢ ܠܘܩܒܠ ܗ݀ܝ ܐܚܪܬܐ ܬܗܿܦܟ܇ ܠܐܝܿܠܝܢ ܕܡܛܠ ܥܗܢܘܬܐ. ܐܘ ܒܝܫܘܬ ܥܿܝܕܐ ܕܕܘ̈ܟܝܬܐ܇ ܗ݀ܢܘܢ ܡܢ ܣ̈ܓܝܐܝ ܝܘܡ̈ܬܐ 120a ܘܫܟܝܪ̈ܝ ܕܡܘܬܐ ܟܿܝܢܐ ܚܘܝ ܐܢܘܢ܇ ܗܠܝܢ ܕܝܢ ܡܙ̈ܠܗܙܝ ܚ̈ܝܐ ܘܚ̈ܠܫܝ ܚܝܠܐ ܛܟܣ ܐܢܘܢܼ ܗܟܢܐ ܘܡܗܝܪ̈ܐ ܘܙܪ̈ܝܙܐ ܐܬܪ̈ܘܬܐ ܐܚܪ̈ܢܐ ܡܪܒܝܢ ܕܡܛܠ ܥܗܢܘܬܐ. ܘܕܠܐ ܬܐܪܟ ܘܬܐܬܐ ܠܢ ܡܠܬܐ܇ ܟܕ ܗܿܠܝܢ ܕܒܐܝܕܐ ܒܐܝܕܐ ܡܬܥܗܕܐ: ܠܟܠܗܘܢ ܐܝܠܝܢ ܕܟܕ ܒܦܢܝܬܐ ܡܕܡ ܕܗܿܢܐ ܟܠ ܚܠܝܕܝܢ: ܘܐܘ ܡܬܒܨܪܝܢ ܠܗܘܢ ܚ̈ܝܐ ܐܘ ܝܿܪܟܝܢ ܠܗܘܢ: ܐܘ ܫܦܝܪܝܢ ܐܘ ܣܢܝܢ: ܐܘ ܫܪܝܚܝܢ ܐܘ ܢܟܦܝܢ: ܐܘ ܕܘܒܪܐ ܕܟܠ ܚܕ ܡܢ ܐܬܪ̈ܘܬܐ ܐܘ ܥܝܕ̈ܐ ܕܥܡ̈ܡܐ܆ ܒܬܪܟܢ ܡܢܐ. ܐܒܕ ܠܗ ܢܡܘܣܐ ܕܒܛܝܠܘܬܐ܇ ܘܟܝܢܐ ܗܘܼ ܡܢܗ ܡܝܬܐ ܐܘ ܡܬܬܝܬܐ܆ ܠܐ ܥܘܕ. ܐܠܐ ܟܝܬ ܗܘ ܟܝܢܐ. ܐܝܟ ܡܠܬܐ ܕܡܟܝܢܢܗ ܪܗܿܛ. ܘܗܼܢܘܢ ܒܢܝ̈ܢܫܐ܆ ܚ̈ܝܐ ܡܢ܆ ܠܦܘܬ ܗ݀ܝ ܡܢ ܕܥܿܕܪܐ ܡܢ ܐܠܗܐ ܡܬܡܫܚܝܢ ܠܗܘܢ. ܠܕܘܝܪܐ ܕܝܢ܆ ܐܝܟ ܕܪܥܝܼܢ ܘܟܪ ܕܨ݀ܒܝܢ ܠܗܢܐ ܡܬܚܡܝܢ. ܘܕܚ̈ܝܐ ܟܝܬ܆ ܠܘ ܫܡܫܐ ܡܫܿܚ ܠܟܘܫܝܐ܇ ܗܕܐ ܬܣܟܠܟ܆ ܕܐܦ ܒܗܘܢ܆ ܥܿܒܼܪܝܢ ܓܕܘ̈ܕܐ ܠܫܝܘܠ܆ ܘܡܫܬܩܦܝܢ ܫܒܪ̈ܐ ܡܢ ܚ̈ܝܐ. ܘܐܝܬ ܐܡܬܝ܆ ܕܒܝܕ ܡܘܬܢܐ ܣܓܝܐܐ ܕܟܪ̈ܟܐ ܘܒܢܝ̈ܢܫܐ ܣܓ̈ܝܐܐ ܥܿܒܪܝܢ. ܐܘ ܠܐ ܟܝ ܐܝܬ ܒܗ̈ܝܢ ܕܠܐ ܓܕܘܕܐ ܕܥܒܼܪ ܠܫܝܘܠ܇ ܘܠܐ ܥܒܪܐ ܘܐܦܠܐ ܫܒܪܐ܇ ܕܡܝܬ ܕܠܐ ܒܝܘܡܗ. ܣܒܪܢܐ ܕܠܓܡܪ. ܟܕܒܬܐ ܗܝ ܗܿܕܐ. ܡܛܠ ܕܟܡܐ ܕܠܟܠ܆ ܒܗ ܒܙܢܐ ܥܕ̈ܩܐ ܕܐܚܝܕ ܥܠܡܐ ܥܠܝܗܘܢ ܚܪ̈ܝܩܝܢ. ܐܦ ܟܝܬ ܘܒܓܪܒܝܐ܆ ܠܦܘܬ ܥܿܕܪܐ ܠܚܝ̈ܝܗܘܢ ܕܥܡܘܪ̈ܝܗ ܡܬܡܫܚܝܢ. ܘܒܗܘܢ܆ ܐܦ ܣ̈ܒܐ. ܬܩܕܢܝܐ ܡܢ ܝܕ ܒܛܝܠܘܬܐ ܡܫܬ݀ܟܚܝܢ. ܫܘܦܪܐ ܕܝܢ ܘܣܘܟܠܐ: ܥܡ ܚܪܝܦܘܬܐ ܘܚܝܠܐ܇ ܕܒܐܬܪ ܐܬܪ ܡܫܬܟܚܝܢ܆ ܠܥܗܢܘܬܐ ܦ݀ܠܓܝܢܢ. ܡܛܠ ܟܝܬ ܕܚܐܪܘܬܐ: ܐܢܗܘ ܡܢ ܕܪܥܝܐ: ܕܒܐܬܪ̈ܘܬܐ ܗ݀ܢܘܢ ܕܟܘܪܗ ܕܫܡܫܐ ܥܙܝܙ ܒܗܘܢ ܬܲܝܬܐ ܠܒܪܢܫܐ܆ ܠܐ ܟ݀ܠܝܐ. ܘܟܕ ܠܗ ܬܡܢ ܡܟܢܫܐ܆ ܠܐܝܿܢܐ ܥܿܒܕܐ ܠܓܘܢܗ܆ ܘܫܟܝܪܐ. ܘܩܛܝܢܐ ܠܓܘܫܡܐ܆ ܘܫܿܝܘܒܐ. ܘܡܢ ܗܪܟܐ ܚܨܐ ܘܢܦܨܐ ܗܘܐ. ܠܐܚܪܢܐ ܗܼܕܝܬ݀ ܚܐܪܘܬܐ܆ ܘܒܐܬܪ̈ܘܬܐ ܡܡ̈ܫܚܐ ܦܠܓܸܬ ܠܗ ܕܘܝܪܐ. ܘܟܕ ܒ̈ܛܠܠܐ ܘܒܩܪܝܪܐ ܐܬܐܼܡܢ܆ ܗܕܝܪܐ ܘܦܐܝܐ ܒܟܪܘܡܐ ܐܬܚܘܝ. ܒܪܡ ܘܟܕ ܗܟܢܐ ܚܐܪܘܬܐ ܣ݀ܥܪܐ: ܐܢܸܗܘ ܟܝܬ ܕܠܐ ܥܿܕܪ: ܡܢ ܪܘܡܿܐ ܕܒܛܝܠܘܬܐ: ܠܫܘܦܪܐ ܡܢ܆ ܗܦܟ ܠܣܢܝܘܬܐ܇ ܐܘ ܒܡܪܥܐ܆ ܐܘ ܒܥܠܬܐ 120b ܡܕܡ ܐܚܪܬܐ. ܘܠܚܝܠܐ ܡܬܚܒ. ܘܠܡܕܥܐ ܡܿܦܗܐ ܘܡܿܫܛܐ. ܘܠܥܗܢ̈ܘܬܐ ܕܕܘܟ̈ܝܬܐ ܘܕܘܝܪܐ܆ ܥܿܨܐ. ܘܒܢܣ̈ܝܘܢܐ ܘܒܣ̈ܩܘܒܠܐ ܡܪܡܐ. ܘܡܢ ܥܗܢܘܬܐ ܒܝܬܝܬܐ ܕܚ݀ܩ ܠܗܝܢ. ܘܡܬܦܨܚ ܒܗܿܠܝܢ ܗ݀ܘ ܡܠܟܐ ܪܒܐ܇ ܟܕ ܕܐ݀ܢ ܠܥܠܡܐ ܠܟܪ ܕܨ݀ܒܐ܇ ܘܠܟܐ ܘܠܟܐ ܡܛܠ ܗ݀ܝ ܕܥܿܕܪܐ ܡܘܒܼܠ ܠܗ. ܟܕ ܒܟܠ ܡܕܡ܆ ܠܝܘܬܪܢܐ ܕܚܝ̈ܝܢ ܡܬܬܓܪ. ܘܝܗ݀ܒ ܥ̈ܠܬܐ ܡܕܡ܇ ܒܟܝܢܐ ܝ݀ܠܘܕܐ ܕܟܠ܆ ܕܥܡܗܝܢ ܘܒܐܝܕܝ̈ܗܝܢ܆ ܚ̈ܝܐ ܕܐܪ̈ܥܢܝܐ ܢܦܩܘܢܼ ܘܠܫܡܫܐ ܡܿܢ܆ ܪܝܫܐ ܕܢܘܗܪܐ ܐܩܝܡܗ. ܘܠܢܦܫܐ܆ ܒܕܡܐ ܘܒܣܘܩܐ ܐܣܼܪ. ܘܠܘ ܡܛܠ ܕܫܘܢܝܐ ܕܗܿܠܝܢ ܕܢܦܫܐ ܥܒܿܕ. ܕܒܪ̈ܘܝܗܿ ܕܢܦܫܐ ܐܝܬܝܗܘܢ ܡܬܬܝܬܝܢܢ ܕܢܐܡܼܪ. ܗܟܢܐ ܘܠܐ ܐܢ ܥܗܢܘܬܐ ܡܕܡ ܦܠܝܓܐ ܠܟܝܢܐ܇ ܕܗܕܐ ܡܢ ܗܟܢܐ ܢܝܬܐ ܗܕܐ ܕܝܢ ܗܟܢܐ܇ ܡܢ ܦܓܘܕ̈ܐ ܕܡܕܒܪܢܘܬܐ ܠܥܒܘܕܗ ܕܥܿܠܡܐ ܓܿܠܙܝܢܢ. ܐܠܐ ܐܝܟ ܘܠܝܬܐ ܕܢܘܕܐ܆ ܠܗܿ ܐܟܚܕ ܘܠܥ̈ܠܠܬܗܿ܆ ܒܝܕ ܥܒܘܕܗ ܡܬܬܚܝܒܐ ܕܢܐܣܿܘܪ. ܘܗܠܝܢ ܡܿܢ ܗܟܢܐ. ܘܡܦܝܣܢܘܬܐ ܗܕܐ ܗܝ. ܘܐܢ ܡܢ ܘܣܦܩܐ܆ ܛܝܒܘ ܠܗ݀ܘ ܕܫܟܢ. ܐܢܕܝܢ ܘܠܐ܆ ܐܚܪܢܐ ܐܢܫ ܡܢ ܪ̈ܚܡܝ ܥܡܠܐ܆ ܒܐܚܪ̈ܢܝܬܐ ܢܥܠ ܘܢܥܕܪ ܠܡܠܬܢ. ܚܢܢ ܕܝܢ ܕܫܥܬܐ܆ ܠܘܬ ܒܥ̈ܬܐ ܐܚܪ̈ܢܝܬܐ ܢܬܬܣܝܡ ܘܠܦܘܬ ܚܝܠܐ ܒܘܕܩܐ ܢܥܒܕ. ܝܕܝܥܐ ܗܝ܆ ܕܟܕ ܒܦܣܝ̈ܝܬܐ ܡܬܚܫܚܝܢܢ܇ ܕܕܡ ܡܢ ܫܘܘܕܝܢ ܢܦܼܠ܆ ܐܡܼܪ ܐܢܛܘܢ. ܐܡܪ ܠܝ ܐܝܬܝ܇ ܪܘܚܐ ܗ݀ܘ ܕܒܫܡܝܐ ܪ̈ܡܐ ܥܿܡܪ ܐܢܬ܇ ܘܣܘ̈ܟܝܐ ܕܥܠܡܐ ܪܒܐ ܐܚܝܕ ܐܢܬ܇ ܘܒܩܕܝ̈ܫܐ ܡܓܢ ܐܢܬ܇ ܘܥ̈ܝܢܐ ܚܙ̈ܝܬܐ ܠܗܠܝܢ ܡܫܟܢ ܐܢܬ. ܡܿܢܐ ܗܝ ܡܠܬܐ܇ ܕܟܕ ܬܪ̈ܝܢ ܐܢܫ̈ܝܢ ܥܢ̈ܬܐ ܒܐܘܪܚܐ ܪܓܠܘ܇ ܘܩܨܐ ܪܒܐ ܥܠܝܗܘܢ ܐܬܼܐ܇ ܕܒܪ̈ܩܐ ܟܒܪ̈ܝܬܢܝܐ ܕܣܿܪܚܝܢ܇ ܗܿܘ ܡܢ ܚܕ ܠܐܒܕܢ ܗܘܐ܇ ܘܗܿܘ ܐܚܪܢܐ ܦܘܠܛܐ ܐܚܪܝܐ ܐܫܟܚ. ܒܝܕ ܦܘܡܐ ܕܓܒܪܐ ܚܣܝܐ ܗ݀ܕܐ ܠܓܝܒܢܝ ܪܘܚܐ܇ ܕܟܕ ܩܕܡ ܘܡܢ ܩܒܘܠ ܝܕܥܼ ܗܘ ܡܪܝܐ܇ ܕܗ݀ܘ ܡܿܢ ܕܐ݀ܒܕ ܠܐ ܣܟ ܬܐܒܿ ܗܘܐ܇ ܘܡܢ ܡܚܘܬܐ ܕܟܢܬܗ ܠܐ ܐܝܬܪ ܗܘܐ܆ ܐܡܝܬܗ. ܠܗ݀ܘ ܕܝܢ ܕܫܿܪܟ܆ ܝܕ݀ܥ ܗܘܐ ܕܡܪܗܒܬܐ ܕܚܠܬܐ ܘܡܢ ܒܝܫܘܬܐ ܩܿܦܣܐ ܠܗ. ܘܠܘܬ ܬܝܒܘܬܐ ܡܩܪܒܐ ܠܗ ܘܦܪܐ̈ܐ ܕܬܝܒܘܬܐ ܡܚܘܝܐ ܠܗ. ܬܘܒ ܐܬܦܫܟ ܐܢܛܘܢܼ ܕܐܢ ܐܪܐ ܐܝܬ ܝܘܬܪܢܐ ܠܗ݀ܘ ܕܐܬܬܒܪܩ܇ ܡܢ ܬܝܒܘܬܗ ܘܡܝܬܪܘܬܗ ܕܗܘܼ 121a ܕܫܪܟ ܘܬܘܒ ܗܘ ܪܘܚܐ܆ ܒܝܕ ܐܚܪܢܐ ܡܝܬܐ ܪ̈ܐܙܐ ܐܢܗܪܗ܇ ܐܢܓܝܪ ܡܢ ܬܪ̈ܝܢ ܚܛܝ̈ܝܢ: ܚܕ ܢܒܠܥ ܕܐܚܪܝܢ ܢܟܘܙ܆ ܟܐܢܐ ܗܝ ܗܕܐ ܠܐܠܗܐ܇ ܕܝܘܬܪܢܗܘܢ ܕܓܿܘܐ ܢܗܸܘܐ. ܕܬܐܬܐ ܡܚܘܬܗ ܕܗ݀ܘ ܕܒܠܼܥ܆ ܘܬܝܒܘܬܗ ܕܗܘ ܕܕܕܚܠ܆ ܘܢܬܬܣ̈ܝܡܢ ܒܡܸܨܥܬ ܓܘܐ܆ ܘܢܬܦ̈ܠܓܢ ܒܡ̈ܢܘܬܐ: ܬܘܒ ܗܿܕܐ ܥܿܩܒ. ܕܠܡܢܐ ܚܕ ܟܕ ܒܠܼܥ܇ ܘܪ̈ܒܘ ܣܦܣܪ̈ܐ ܘܢܓ̈ܕܐ ܩܒܠ. ܡܢ ܡܘܬܐ ܝܥܢܐ ܐܬܬܥܕܝ܇ ܘܐܚܪܢܐ ܕܚܼܙܐ ܩܪܒܐ܇ ܡܢ ܕܚܠܬܗ ܐܙܠ ܠܫܝܘܠ܆ ܘܠܗܿܕܐ ܡܢ ܡܕܥܐ ܪܢܐ ܟܐ[ܢܐ] []ـܬܐ܆ ܒܗ݀ܝ ܕܦܩܿܚܐ ܘܥܿܕܪܐ ܐܡܼܪ ܘܣܡܗܿ. ܕܥܘܕܪܢܐ ܡܢ ܓܝܪ ܠܗ݀ܘ ܬܚܡ ܐܒܐ܆ ܣܦܣܪ̈ܐ ܘܢܓ̈ܕܐ. ܐܘ ܠܘ ܠܣܓ̈ܝܐܐ ܚܕܝܬ܇ ܕܚܒܪ̈ܘ ܠܐܡ̈ܢܐ ܕܩܕܝܫܘܬܐ܇ ܡܛܠ ܚܫ̈ܐ ܕܡܢ ܡܪܕܘܬܐ. ܠܗܢܐ ܕܝܢ܆ ܒܙܢܐ ܕܡܦܩܢܐ ܥܿܕܪ. ܚ݀ܟܡ ܗܘܼ ܓܝܪ܆ ܕܚܘܣܪܢܐ ܘܙܝܡܝܐ ܝ݀ܠܕܝܢ ܚܝܘ̈ܗܝ܇ ܐܢ ܒܥܿܠܡܐ ܥܿܒܘܪܐ ܢܕܝܪ. ܘܡܢ ܗܪܟܐ ܠܚܕ ܡܢ܆ ܟܕ ܛܒ ܡܬܐܠܨ ܡܢ ܟܐܒ̈ܐ. ܘܠܫܝܘܠ ܐܡܗ ܩܪܐ ܗܘܐ. ܠܐ ܐܦ݀ܩ ܡܢ ܚ̈ܝܐ. ܘܐܚܪܢܐ ܕܒܼܪ ܘܫܿܢܝܗ܆ ܟܕ ܗܟܝܠ ܒܣܡܘ ܠܗ ܚ̈ܝܐ܇ ܘܪܒܬܐ ܠܗ ܠܚܙܘܩܝܗ. ܬܘܒ. ܐܬܒܥܝ. ܕܠܡܿܢܐ ܠܥܿܢܬܐ ܘܠܿܥܘܠܐ ܢܘܓܪܐ ܡܪܦܐ܇ ܘܒܚ̈ܝܐ ܕܚܛܝܼـܬܐ ܕܢܕܝܪ ܡܪܫܠ. ܘܠܗܕܐ ܐܓܝܒ. ܐܝܟܢܐ ܕܐܝܟ ܫܒܛܐ ܡܪܝܪܐ ܠܣ̈ܓܝܐܐ ܒܐܝܕ̈ܝܗܘܢ ܡܢ ܒܝܫܘܬܐ ܢܕܟܐ. ܐܝܟܢܐ ܕܠܢܘܡ̈ܝܩܐ ܕܐܢ̈ܫܐ ܒܙܒ̈ܢܝܢ ܚܕܝܢ. ܕܟܕ ܒܠܥܘ܆ ܠܐܢܫ̈ܐ ܚ̈ܠܫܝ ܚܝܠܐ܇ ܘܡܢ ܒ̈ܬܐ ܘܡܢ ܚܩ̈ܠܬܐ܇ ܠܒܝܫ̈ܐ ܘܠܝܬܡ̈ܐ ܓܙܝܘ. ܕܥܠܝܗܘܢ܆ ܥܘܼܠܐ ܐܚܪܢܐ ܐܬܼܐ. ܘܒܙܘܙܝܐ ܪܒܐ ܥܠܝܗܘܢ ܣܼܡܟ. ܘܥܕܡܐ ܠܦܪܝܣܐ ܐܩܝܡ ܐܢܘܢ. ܬܘܒ ܚܙܝܬ܆ ܘܠܥܘܕܪܢܐ ܕܣ̈ܓܝܐܐ ܠܗܕܐ ܡܫܬܥܐ ܐܢܐ. ܕܦܠܓܐ ܟܠܗܿ: ܟܕ ܪܘܪܒܐܝܬ ܡܙܝܢܐ܆ ܒܐܝ̈ܕܝ ܐܢܫ̈ܐ ܚ̈ܠܫܐ܇ ܫܒܼܩ ܘܐܪܫܠ ܡܠܬܐ ܡܠܐ ܟܐܢܘܬܐ܆ ܘܣܘܦܢܐ ܘܥܿܛܝܐ ܕܝܠܗܘܢ ܥܒܕܘ. ܐܝܬܝܗܿ ܗܘܬ ܕܝܢ ܦܠܓܐ ܗܿܝ܆ ܪܫܝܥܬܐ ܟܠܗܿ. ܟܕ ܓܝܪ ܡܢ ܐܬܪܐ ܕܐܬܘܪ̈ܝܐ. ܐܢܫ̈ܝܢ ܙ̈ܠܝܠܐ ܒܐܡ̈ܢܝܗܘܢ ܛܝܦ̈ܝ ܒܥܒܝ̈ܕܬܗܘܢ܆ ܠܘܩܒܠ ܒܪܒܪ̈ܝܐ ܐܙܕܝܢܘ܆ ܘܚܐܦܐ ܢܣܒܘ ܕܠܐ ܒܘܝܢܐ: ܕܒܢܫܝܗܘܢ ܡܢ ܪܡܟܐܝܬ ܢܙܢܘܢ܆ ܥܠܝܗܘܢ ܕܝܢ ܘܥܠ ܝܠ̈ܕܐ ܕܟܪܣܗܘܢ ܠܐ ܢܿܪܚܡܘܢ܆ ܚܝܠ ܡܪܝܐ ܠܗܿܢܘܢ ܠܐ ܡܫ̈ܘܬܦܐ ܘܪ̈ܚܡܝ ܨܕܝܐ܆ ܘܣܘܦܿܢܐ ܕܝܠܗܘܢ ܥܒܕܘ. ܘܕܒܝܫ̈ܬܗܘܢ ܕܡܢ ܢܘܓܪܐ܆ ܚܕܐ ܦܘܪܥܢܘܬܐ ܩܒܠܘ܆ ܕܒܚܬܐ ܕܡܢ ܐܝܕܐ ܒܪܒܪܝܬܐ. ܬܘܒ܆ ܥܠ ܫܒܪ̈ܐ ܕܕܠܐ ܒܙܒܢܗܘܢ ܐܝܟ ܡܠܬܐ 121b ܕܝܠܢ܇ ܡܠܬܐ ܒܥܼܐ ܐܢܛܘܢ. ܘܠܗ݀ܕܐ܆ ܡܢ ܩܨ ܚܡܫ ܐܫܟܚ܇ ܐܝܟ ܡܠܬܐ ܕܐܒܗ̈ܬܐ. ܩܕܡܝܬܐ܆ ܟܕ ܡܟܿܣ ܠܒܿܛܢܐ ܥܘܠܐ. ܕܢܗ ܠܡ ܓܝܪ ܠܕܘܝܕ ܘܩܛܠ ܠܒܪܗ܆ ܐܝܟ ܒܪ ܓܘܪ̈ܐ܇ ܕܠܐ ܟܝܬ ܬܚܘܝܬܐ ܡܘܒܕܢܝܬܐ ܠܣܓ̈ܝܐܐ ܢܗܸܘܐ ܗܘ ܦܐܪܐ. ܕܬܪ̈ܬܝܢ܆ ܐܢܼܗܘ ܕܠܪܚܡܸܬ ܟܣܦܐ ܡܨܢܥܬܐ܇ ܚ݀ܙܐ ܕܡܿܫܘܚܐ ܘܣܿܓܝܐ ܒܐܒ̈ܗܐ܇ ܡܢ ܥܠܸܬ ܒܢ̈ܝܐ ܕܡܬܝܠܕܝܢ. ܐܦ ܓܝܪ ܠܣܓ̈ܝܐܐ ܚܙܝܢܢ܇ ܕܡܢ ܨܦܬܐ ܘܝܨܝܦܘܬܐ ܕܥܠ ܟܣܦܐ ܐܒܿܕܝܢ܇ ܘܥܠܬܐ ܕܒܢ̈ܝܐ ܣ݀ܝܡܝܢ. ܐܚܪ̈ܢܐ ܕܝܢ܆ ܩܢܝܢ ܘܟܕ ܠܝܬ ܠܗܘܢ ܒܢ̈ܝܐ. ܘܡܬܟܣܣܝܢ܆ ܗܢܿܘܢ ܒܝܕ ܗܿܠܝܢ܆ ܘܗܠܼܝܢ ܒܝܕ ܗܿܢܘܢ ܕܠܐ ܐܝܬܝܗܘܢ ܒ̈ܢܝܐ܇ ܥܠܬܐ ܕܗ݀ܕܐ ܚܫܢܝܘܬܐ. ܕܬܠܬ܆ ܟܕ ܠܒܝܫܘܬܗܘܢ ܚ݀ܙܐ ܘܡܝܩܪ ܠܐܒܿܐ ܙܕܝܩܐ܇ ܕܠܐ ܢܫܼܘܚ ܦܐܪܐ ܕܚܛܝܬܐ. ܕܐܪܒܥ܆ ܐܢܗܘܼ ܕܝܬܝܪ ܡܢ ܟܠܢܫ ܥܬܝܕܝܢ ܕܢܗܘܘܢ ܥ̈ܘܠܐ܇ ܘܓܡܝܪ̈ܐ ܡܕܡ ܒܪܘܫܥܐ. ܕܚܡܫ܆ ܐܝܟܢܐ ܕܠܦܘܚܪܐ ܗ݀ܘ ܕܫܡܝܐ܆ ܢܣܒܘܣ ܒܝܕ ܩܪ̈ܝܐ܇ ܘܡܛܛܠ ܗ݀ܢܐ ܐܝܟ ܕܠܠܐ ܚ̈ܛܝܐ ܘܕܠܚܠܘܠܐ ܗܿܘ ܫܘܝܢ ܫܩܠ ܠܗܘܢ ܕܠܐ ܢܚܣܪ ܠܗ܇ ܘܡܢ ܡܢܝܢܐ ܫܠܡܠܡܐ ܥܪܒܐ ܕܡܐܐ. ܗ݀ܠܝܢ ܥ̈ܠܬܐ܆ ܩܕܝ̈ܫܐ ܐܡܪܘ ܐܢܝ̈ܢ. ܘܐܘ ܒܗܿܝ ܐܘ ܒܗܕܐ܆ ܐܘ ܛܟ ܒܐܚܪܬܐ. ܐܘ ܟܒܪ ܒܗ݀ܕܐ ܐܘ ܒܗ݀ܝ܇ ܡܢ ܕܘܿܝܪܐ ܕܚ̈ܝܐ ܕܬܢܢ܇ ܡܥܒܪ ܐܠܗܐ ܠܫܒܪܐ. ܘܐܢ ܡܢ: ܒܡ̈ܠܐ ܗܠܝܢ ܐܝܟ ܠܐ ܣܦܩܬܐ ܐܢܝ̈ܢ ܠܗܝ̈ܢ ܡܛܝܦ ܐܢܫ܆ ܠܕܝ̈ܢܐ ܠܐ ܡܬܒܨ̈ܝܢܐ܇ ܚܒܠܐ ܕܬܪܥܝܬܗ ܢܫܲܡܪ܆ ܘܗ݀ܝ ܕܐܢܛܘܢ ܗܿܘ ܪܒܐ. ܐܦ ܗܼܘ ܢܫܡܼܥ. ܗܢܐ ܓܝܪ ܟܕ ܐܣܓܝ ܐܬܚܿܢܢ܇ ܕܡܢܐ ܗ݀ܝ ܡܦܩܬܐ ܕܡܢ ܚ̈ܝܐ܇ ܗ݀ܠܝܢ ܕܠܫܒܪ̈ܐ ܟܒܪ ܗ݀ܘܝܐ܇ ܕܡܪܝܐ ܢܚܘܝܘܗܝ܆ ܦܬܓܡܐ ܗ݀ܢܐ ܐܬܬܓܝܒ ܥܠܘܗܝ. ܕܐܢܛܘܢܝܐ܆ ܢܦܫܟ ܕܥ. ܠܕܝ̈ܢܐ ܕܝܢ ܕܝܠܝ܆ ܠܐ ܬܒܨܼܐ ܘܡܢ ܗܪܟܐ ܐܦ ܚܢܢ܆ ܒܗ݀ܝ ܕܟܒܪ ܐܘ ܛܟ ܐܘ ܕܡ܇ ܠܥܠܬܗܿ ܕܡܚܘܝܢܘܬܐ ܐܣܪܝܢ. ܘܗܟܢܐ܆ ܟܕ ܠܘ ܚܢܢ ܡܢܢ܇ ܠܗܿ ܠܡܚܘܝܢܘܬܐ ܐܣܪܚܢܢ.. ܐܡܿܪ ܐܢܛܘܢ܀ ܕܥܕܪܐ ܕܝܠܢܝ ܐܬܬܕܝܢܬ ܠܝ܆ ܕܐܦ ܥܠ ܡܡܘܢܐ ܘܡܣܟܢܘܬܐ ܐܣܼܒ. ܘܐܡܿܪ ܐܝܟ ܚܝܠܐ ܐܠܝܠܐ ܕܝܠܝ܇ ܕܐܢ ܟܠ ܥܘܬܪܐ ܡܢ ܐܠܗܐ ܗܘ. ܐܦ ܓܝܪ ܠܣܓ̈ܝܐܐ ܫܡܥܬ ܕܗܕܐ ܒܥܼܘ. ܘܠܝ ܘܠܐܚܪ̈ܢܐ ܗܝ ܗ݀ܕܐ ܫܿܐܠ ܘܫܿܐܠܝܢ.. ܡܢ ܥܘܬܪܐ܆ ܗܿܘ ܡܢ ܒܝܕ ܒܛܝܠܘܬܐ ܘܬܥܕܝܪܐ ܕܡܢ ܠܥܠ ܘܕܐܠܗܐ ܡܼܬܩܢܐ܆ ܗܿܘ ܕܝܢ ܒܝܕ ܡܪܫܠܝܢܘܬܐ ܘܡܢ ܝܕ ܚܐܪܘܬܐ. ܕܚܐܪܘܬܐ 122a ܕܝܢ܆ ܗܿܘ ܡܿܢ ܒܝܕ ܨܦܬܐ ܘܛܘܟ̈ܝܐ܇ ܐܘ ܕܬܐܓܪ̈ܬܐ ܐܘ ܕܐܘܡ̈ܢܘܬܐ܆ ܗ݀ܘ ܕܝܢ ܒܝܕ ܥ̈ܠܘܒܝܐ. ܐܚܪܢܐ ܥܘܬܪܐ܆ ܕܡܢ ܐܟܠܩܪܨܐ. ܐܚܪܢܐ ܡܢ ܣܘܩܒܠܐ ܘܟܘܝܢܐ ܟܕ ܐܠܗܐ ܡܿܪܫܠ. ܡܪܫܠ ܕܝܢ ܘܫܒܿܩ܆ ܐܢܗܼܘ ܕܠܩܿܢܝܐ ܠܐ ܡܿܗܪ. ܐܢܕܝܢ ܘܡܪܗ܆ ܡܛܠ ܕܒܘܩܝܐ ܚܐܪܘܬܐ ܬܬܠܨ. ܣ̈ܓܝܐܐ ܓܝܪ ܐܡܿܪܝܢ܇ ܡܐ ܕܡܢ ܡܪܪܐ ܘܥܕܪ̈ܐ ܕܨܪܝܟܘܬܐ ܡܬܢܘܠܝܢ܇ ܘܒܥܝܢܐ ܡܪܝܪܬܐ ܘܡܠܝܬ ܚܪܡܘܬܐ ܕܥܬܝܪ̈ܐ ܡܨܕܝܢ܇ ܕܐܠܘ ܝܗܒ ܗܘܐ ܠܝ ܐܠܗܐ ܥܘܬܪܐ܆ ܣܓܝ ܦܠܐܝܬ ܘܡܘܬܪܢܐܝܬ ܠܗ݀ܢܐ ܡܕܒܪ ܗܘܝܬ܇ ܘܡܢ ܗܪܟܐ ܡܪܫܠ ܐܠܗܐ ܕܗ݀ܕܐ ܠܗܘܢ ܬܓܕܫ܆ ܟܕ ܠܚܐܪܘܬܐ ܘܠܡ̈ܠܝܗ ܕܐ݀ܢ܇ ܕܠܐ ܟܝܬ ܩܝܡܐ ܡܢ ܒܝܫܘܬܗܿ. ܘܐܝܟܢܐ ܕܠܐ ܬܦܗܐ ܠܝ ܡܢ ܢܝܫܐ ܡܠܬܐ. ܐܗܦܘܟ ܘܒܝܕ ܬܚܘܝܬܐ ܐܒܪܨ܇ ܠܩܦ̈ܠܐܐ ܕܦܘܠܓܐ ܕܐܬܐܡܪ. ܥܘܬܪܐ ܡܢ ܓܝܪ ܐܝܗܝܒ ܡܢ ܐܠܗܐ ܐܝܬܘܗܝ܆ ܐܝܟ ܗܿܘ ܕܙܕܝ̈ܩܐ. ܐܝܟܢܐ ܕܡܛܠ ܐܝܣܚܩ ܐܡܼܪ ܗ݀ܘ ܪܒܐ ܕܥܒܪ̈ܝܐ܇ ܕܙܪܥ ܒܝܫܬܐ ܗ݀ܝ ܘܐܥܠ ܡܐܐ ܕܣܥܪ̈ܐ܇ ܘܒܪܟܗ ܡܪܝܐ ܘܝܪܒ ܓܒܪܐ ܗܿܘ ܪܒܐ ܕܥܒܪ̈ܝܐ. ܘܡܛܠ ܐܝܘܒ ܬܘܒ܇ ܕܡܪܝܐ ܐܘܣܿܦ ܥܠ ܟܡܐ ܕܐܝܬ ܗܘܐ ܠܗ ܐܥܦܐ. ܘܕܕܡܿܝܢ ܠܗܠܝܢ. ܥܘܬܪܐ ܕܝܢ ܕܡܢ ܐܘܡܢܘܬܐ ܘܐܝܕܐ܆ ܐܝܟ ܐܝܠܝܢ ܕܚܿܫܠܝܢ ܐܢܪ̈ܝܢܛܐ ܐܘ ܡܬܚܟܡܝܢ ܨܒܘ̈ܬܐ ܡ̈ܠܟܝܬܐ܇ ܘܕܕܡ̈ܝܐ ܪܘܪ̈ܒܐ ܡܬܬܩܠܝܢܿ ܒܗܝ̈ܢ܇ ܒܗܢܿܐ ܙܢܐ ܩܿܢܝܢ: ܐܟܪ̈ܐ ܘܐܪ̈ܓܘܒܠܐ ܘܢܓܪ̈ܐ܇ ܘܠܛ̈ܝܝ ܓܐܪ̈ܐ ܘܣܩ̈ܠܝ ܣܦܣܪ̈ܐ ܘܙܩܘܪ̈ܐ. ܘܣܟ ܟܠ ܐܘܡܢܘ ܘܨܼܢܥܐ܇ ܕܒܗܿ ܫܦܝܪ̈ܝ ܚܫܚܬܐ ܗ݀ܘܝܢ ܐܚܝܕ̈ܝܗܿ. ܘܡܢܗܿ ܗܢܝܢܐ ܥܿܦܝܢ ܘܩܢܝܢܐ ܡܿܣܓܝܢ.. ܕܐܝܟ ܗܠܝܢ ܐܝܬܝܗܘܢ ܣܘܓܘܣܛܪ̈ܐ ܐܘܟܝܬ ܡܥܪ̈ܦܢܐ܇ ܘܐܝܠܝܢ ܕܡܢ ܐܬܪ ܐܬܪ ܪܕܝܢ ܡܛܠ ܥܒܝܕ̈ܬܐ ܢܘܟܪ̈ܝܬܐ܇ ܐܘ ܒ̈ܐܠܦܐ܇ ܐܘ ܒܗ̈ܒܠܬܐ ܘܕܐܝܟ ܗܠܝܢ.. ܥܘܬܪܐ ܕܝܢ ܗ݀ܘ ܕܬܐܓܪ̈ܬܐ܆ ܠܘܿܝܐ ܠܗ ܝܨܝܦܘܬܐ ܘܨܦܬܐ ܘܠܐܘܬܐ ܡܢܬܝܬܐ. ܘܠܘ ܕܝܢ ܗܟܢܐ܇ ܐܝܟܢܐ ܕܠܓܒܪ̈ܐ ܐܘܡ̈ܢܐ. ܒܪܡ ܥܪܝܡܘܬܐ ܘܡܕܪܡܘܬܐ: ܘܣܘܓܿܐܬ ܨܢܝܥܘܬܐ ܘܡܠܬܟܘܬܐ ܛܒ ܡܢ ܟܠܡܕܡ ܠـ[ـܗ]ܢܐ ܠܗ. ܘܟܕ ܗܝܼ ܚܐܪܘܬܐ ܝܨܦܿܐ ܘܡܨܛܢܥܿܐ܆ ܠܐ ܣܟ ܡܬܚܣܢܐ ܡܢ ܐܠܗܐ. ܐܦܢ ܒܕܘܟ ܘܠܐܢ̈ܫܝܢ܇ ܐܝܟ [ܕ]ܦܝܠܣܘܦܐ ܐܢܫ ܐܡܼܪ܇ ܕܐܝܬ ܕܠܐܐ ܘܪܗ݀ܛ ܘܥܿܡܠ. ܘܒܟ̈ܠܗܝܢ ܗܘ ܡܫܬܘܚܪ ܘܫܪܟܐ܀ 122b ܠܘܝܐ ܕܝܢ܆ ܐܦ ܚܛܝܬܐ ܠܬܐܓܪ̈ܬܐ܆ ܐܝܟܢܐ ܕܐܢܫ ܐܚܪܢܐ ܐܡܼܪ ܕܒܝܬ ܙܒܘܝܐ ܠܡܙܒܢܐ ܬܩ݀ܦܝܢ ܚ̈ܛܗܐ܇ ܐܝܟܢܐ ܕܒܝܢܬ ܟܐܦܐ ܠܚܒܪܬܗܿ ܣܟܬܐ ܥܿܐܠܐ܆ ܘܕ݀ܚܢܘܝܐ ܠܐ ܡܙܕܕܩ ܡܢ ܚ̈ܛܗܐ܇ ܘܒܡܘܡ̈ܬܐ ܘܒܟܕܒܘܬܐ ܗܿܢܐ ܐܡܝܢܐܝܬ ܩܐܡ܇ ܘܒܥ̈ܠܘܒܝܐ ܟܣ̈ܝܐ ܘܠܐ ܡܬܚ̈ܙܝܢܐ ܐܡܝܢܐܝܬ ܪܕܐ. ܙܢܐ ܕܝܢ ܪܒܝܥܝܐ ܕܥܘܬܪܐ: ܗܿܘ ܕܒܥ̈ܠܘܒܝܐ ܘܒܚ̈ܛܘܦܝܐ ܡܬܟܢܫ܆ ܐܟܙܢܐ ܕܗܿܘ ܕܠܘܬ ܗܘܦܪ̈ܟܘ ܘܢܘܡܝ̈ܩܐ ܕܗ݀ܠܝܢ܆ ܘܗ݀ܘ ܕܠܘܬ ܠܣ̈ܛܝܐ ܘܓܝܣ̈ܐ. ܗܿܘ ܕܠܘ ܐܝܟ ܕܒܣܘܓܐܐ ܡܟܬܪ܆ ܡܛܠ ܕܚܠܝܛ ܒܕ̈ܡܥܐ ܢܘܟܪ̈ܝܬܐ܇ ܘܐܝܬ ܐܡܬܝ ܘܒܕܡܐ ܕܒܢ̈ܝ ܫܪܒܬܐ. ܐܝܟܢܐ ܕܚܟܝܡܐ ܬܘܒ ܐܡܼܪ. ܕܩܢܝܢܐ ܕܡܢ ܥܘܼܠܐ ܢܙܥܼܪ. ܘܕܡܬܟܢܫ ܒܙܕܝܩܘܬܐ܆ ܢܼܣܓܐ. ܘܟܡܐ ܕܢܨܝܚܐ ܐܝܘܒ ܐܡܼܪ. ܕܐܢܐ ܚܙܝܬ ܪܫܝܥܐ ܕܡܨܠܚ܆ ܘܐܒ݀ܕܐ ܕܝܪܗ ܡܢܫܠܝ. ܢܬܪܚܩܘܢ ܒܢܘ̈ܗܝ ܡܢ ܦܘܩܕ̈ܢܐ ܘܕܐܝܟ ܗܠܝܢ܀ ܙܢܐ ܕܝܢ ܚܡܝܫܝܐ ܕܥܘܬܪܐ܆ ܗܿܘ ܕܡܢ ܝܕ ܫܐܕ̈ܐ ܡܬܟܢܫ ܐܝܬܘܗܝ܆ ܐܝܟ ܗ݀ܘ ܕܠܘܬ ܐܫܘ̈ܦܐ ܘܟ̈ܠܕܝܐ܇ ܘܙܟܪ̈ܐ ܘܓܒܪ̈ܐ ܡܢܚܫ̈ܢܐ܇ ܘܡ̈ܡܠܠܝ ܥܬܝܕ̈ܬܐ ܘܒܨܘ̈ܡܐ ܘܐܣܛܪ̈ܘܠܘܓܐ ܘܚܝܪ̈ܝ ܒܟܘܟ̈ܒܐ. ܕܗܠܝܢ ܓܝܪ ܥܘܬܪܐ ܡܢ ܐܓܪܐ ܕܚܛܝܬܐ ܡܬܟܢܫ܆ ܘܡܢ ܕܝܘܿܐ ܕܓܿܠܐ ܥܬܝܼܪ̈ܬܐ ܕܣ̈ܓܝܐܐ. ܕܐܝܟ ܐܝܟܢ. ܐܢܫ ܪܕܐ܆ ܘܡܢ ܓܝܣ̈ܐ ܐܬܬܪܝܡܸܬ ܡܘܒܠܗ. ܐܬܐ ܠܘܬ ܚܪܫܐ܆ ܘܡܠܟ ܠܗ ܐܠܦ ܕܟܣܦܐ. ܐܘ ܦܠܓܘܬܐ ܕܡܘܒܠܗ. ܣܛܢܐ ܕܝܢ ܐܒܘܗܿ ܕܚܛܝܬܐ܆ ܗ݀ܘ ܕܠܒܿܛ ܠܠܣܛܝܐ ܕܥܠ ܥܒܪܐ ܢܬܠܒܒ ܘܢܓܝܣܝܘܗܝ܆ ܝܕܥܿ ܡܿܢܘ܇ ܠܬܓܪܐ ܚܲܠܨ܇ ܐܘ ܒܒܝܬܐ ܐܘ ܒܐܘܪܚܐ. ܘܡܢ ܗܪܟܐ ܓܿܠܐ ܠܓܒܪܐ ܟܠܕܝܐ. ܘܟܕ ܥܒܿܕܐ ܡܫܬܒܚ܆ ܡܬܝܗܒ ܠܗ ܡܐ ܕܐܬܒܥܝ. ܗܟܢܐ ܘܠܬܡܝܕ̈ܝܗܘܢ ܓܡܝܪ̈ܐ ܡܚܘܝܢ ܣܝܡ̈ܬܐ ܕܒܓܘ ܐܪܥܐ ܛܡܝܪ̈ܢ ܕܝ̈ܘܐ. ܘܐܢܗܼܘ ܕܟܕ ܠܗܠܝܢ ܢ݀ܣܒܝܢ: ܢܨܒܘܢ ܒܬܪܟܢ ܕܠܘܬ ܡܪܝܐ ܢܨܛܠܘܢ: ܘܥܒܕܘܬܐ ܩܕܡܝܬܐ ܡܢ ܨܘܪܗܘܢ ܢܪܝܡܘܢ܆ ܒܝܕ ܫܩܠ ܛܥܢܐ ܐܘ ܕܓܝܣ̈ܐ ܐܘ ܕܐܚܝܕ̈ܐ ܐܘ ܕܡܕܡ ܐܚܪܢܐ܇ ܡܪܝܡ ܘܡܢܗܘܢ ܩܿܦܠ ܠܗܝܢ. ܘܡܛܠ ܗ݀ܢܐ ܠܣ̈ܓܝܐܐ ܡܢ ܚܪ̈ܫܐ ܠܐ ܝܗ݀ܒ ܘܠܐ ܡܓܥܠ܇ ܣܝܡ̈ܬܐ ܡܣܬܪ̈ܬܐ ܕܒܓܘ ܬܘܢ̈ܝܗ ܕܐܪܥܐ ܚܡ̈ܝܠܢ. ܕܕܡ ܢܬܚܪܪܘܢ ܡܢ ܣܢܝܩܘܬܐ. ܘܡܢ ܢܝܪܗ ܥܘܿܠܐ ܢ݀ܓܗܘܢܼ ܐܠܐ ܥܡ ܨܦܬܐ ܘܨܪܝܟܘܬܐ ܐܡܝܢܐܝܬ ܡܕܘܐ ܠܗܘܢ܆ ܕܠܗ ܢܬܥܒܕܕܘܢ܆ ܘܒ݀ܥܢܬܘܬܗ ܢܦܠܼܚܘܢܼ ܘܡܢ ܗܪܟܐ ܐܦ 123a ܨܪ̈ܝܟܐ ܘܟܠ̈ܕܝܐ ܐܝܬ. ܐܠܐ ܠܡܢܐ ܟܕ ܥܠ ܥ̈ܠܬܐ ܕܥܘܬܪ̈ܐ ܢܝܫܐ ܐܝܬ ܠܝ ܕܐܒܿܕܩ܇ ܠܘܬ ܡܣܟܢܘܬܐ ܘܨܪܝܟܘܬܐ. ܐܫܬܘܓܪܬ ܢܚܿܬܬ. ܙܢܐ ܕܝܢ ܫܬܝܬܝܐ ܕܥܘܬܪܐ܇ ܗܿܘ ܕܐܡܿܪܝܢ ܕܐܝܟ ܕܒܟܘܝܢܐ ܘܓܕܐ ܗܘܐ: ܟܕ ܡܪܫܠܢܘܬܐ ܗ݀ܘܝܐ ܡܢ ܗ݀ܘ ܕܐܚܝܕ: ܐܝܟ ܕܠܒܘܩܝܐ ܕܚܐܪܘܬܐ ܐܝܬܘܗܝ܆ ܐܟܙܢܐ ܕܐܢܫ܇ ܕܟܕ ܡܥܡܩ ܐܓܘܓܐ܇ ܐܘ ܚܐ݀ܛ ܒܐܪܐ܇ ܘܣܝܡܬܐ ܕܕܗܒܐ ܐܘ ܕܟܣܦܐ ܢܫܟܚ܇ ܐܘ ܕܟܕ ܒܕܘܟ̈ܝܬܐ ܚܪ̈ܒܬܐ ܚܡܪ̈ܐ ܐܘ ܟܒܩܪ̈ܐ ܪ݀ܥܐ܇ ܘܐܝܟܢܿܐ ܕܐܡܿܪܝܢ ܡܛܠ ܨ݀ܝܕܐ܇ ܐܘ ܕܟܕ ܠܥܠܝܡ̈ܐ ܢܘ̈ܢܐ ܙܒܢ܇ ܒܝܕ ܡܨܝܼܕܬܗ ܢܓܕ ܘܫܼܠܐ. ܡܠܝܪܐ ܕܗܒܢܝܐ ܕܬܠܬ ܪ̈ܓܠܘܗܝ. ܘܐܝܟܢܐ ܕܥܠ ܡܠܟܐ ܕܣܐ̈ܡܝܐ ܐܡܪܝܢ܇ ܕܥܙܩܬܗ ܐܒܗܝܬܐ ܕܒܡ̈ܝܐ ܚܒ̈ܢܐ ܘܥܡܝ̈ܩܝ ܓܘܝܐ ܕܝܡܐ ܢܦܠܸܬ܇ ܒܪܕܪܝܫ ܨܝܕܐ ܒܝܕ ܢܘܢܐ ܟܕ ܠܐ ܪܓܝܫ ܠܒܝܬ ܡܠܟܐ ܙܒܢܗܿ܇ ܗ݀ܠܝܢ ܫܟܚܬܐ܇ ܘܐܚܪ̈ܝܬܐ ܕܠܗ̈ܠܝܢ ܕܡ̈ܝܢ. ܥܘܬܪܐ ܘܛܘܒܬܢܘܬܐ ܠܣ̈ܓܝܐܐ ܝܗ̈ܒܢ. ܘܡܢ ܝܕ ܡܫܬܒܩܢܘܬܐ ܐܘ ܐܝܕܐ ܝܨܝܦܬ ܟܠ ܡܬܩ̈ܢܝܢ. ܗܠܝܢ ܐܢܘܢ܇ ܙܢ̈ܝܐ ܘܪ̈ܝܫܐ ܟܘ̈ܠܢܝܐ܇ ܕܡܢܗܘܢ ܥܘܬܪܐ ܗܘܠܢܝܐ܇ ܠܒܢ̈ܝ ܐܪܥܐ ܡܬܩܗܠ ܘܐܝܟ ܕܒܣܘܓܐܐ ܡܬܟܢܫ. ܠܚܕܚ̈ܕܢܐ ܕܝܢ: ܒܠܥܕ ܡܢ ܗ݀ܠܝܢ ܙܢܝ̈ܐ ܕܐܬܐܡܪ܆ ܡܫܟܚܝܢܢ ܕܥܘܬܪܐ ܡܬܩܢܝܐ܇ ܐܝܟ ܕܠܘܬ ܦܐܕܓܘܓܐ ܐܘ ܟܘܡܪܐ܇ ܐܘ ܩܝܬܪܘܕܐܘܒܪ ܬܘܒܠܩܝܢ܇ ܐܘ ܒܪܬ ܐܡܢܐ ܕܐܦܪܘܕܝܛܝ܇ ܐܘ ܡܠܘܟܐ ܥܫܝܢܐ܇ ܐܘ ܛܪܟܢܐ ܢܡܝܚܐ܇ ܕܒܦܪܨܘܦܐ ܕܡܢܨ̈ܚܢܐ܇ ܢܣܿܒ ܫܘܚܕܐ ܡܢ ܥܫ̈ܝܢܐ܇ ܐܝܬ ܐܡܬܝ ܕܝܢ܆ ܕܠܛܒ ܒܐܡܢܗ ܘܟܗܢܝ ܒܙܢܗ܆ ܦܘܪ̈ܫܢܐ ܕܚܘ̈ܒܐ ܣ̈ܓܝܐܐ ܡܩܿܪܒܝܢ. ܘܡܢ ܗܿܪܟܐ ܥܘܬܪܐ ܣܓܝܐܐ ܠܐܝܕܐ ܐܬܐ. ܘܐܣܟܡܬܢܐ ܥܬܝܪܐ ܚܼܙܝܢܢ. ܐܝܟܢܐ ܕܐܦ ܪܝܫܢܐ ܝܥܿܢܐ ܥܲܝܢܢ. ܠܝ ܕܝܢ܆ ܟܠ ܐܕ݀ܫܐ ܕܥܘܬܪܐ ܬܚܝܬ ܫܫܠܬܐ ܕܝܥܢܘܬܐ ܡܬܦܼܟܪ. ܒܠܥܕ ܙܘܥܐ ܩܕܡܝܐ܇ ܕܐܘ ܡܬܝܿܗܒ ܡܢ ܐܠܗܐ܇ ܐܘ ܡܬܩܢܐ ܒܬܥܝܫܘܬܐ. ܕܫܪܟܐ ܕܝܢ ܡܐܣܪܬܐ ܕܥܿܘܠܐ ܐܝܬܝܗܘܢ ܠܝ. ܘܕܫܘܝܐ ܠܢܘܪܐ ܕܣܕܘ̈ܡܝܐ ܘܠܐ ܬܐܡܼܪ ܠܝ܇ ܕܪܝܫ ܟܘܡܪ̈ܐ ܦܠܢ܇ ܘܦܠܢ ܣܦܝܪܐ. ܐܢܗܘ ܓܝܪ: ܕܡܢ ܟܣܦܐ ܐܘ ܡܢ ܟܝܣܐ: ܠܒܗ ܘܐܝܕܗ ܡܛܪ̈ܛܫܢ܆ ܕܘ݀ܝܐ ܗܘ ܠܝ ܗܿܢܐ. ܘܒܪܗ ܕܣܡܠܐ. ܘܐܕܫ̈ܐ ܡܢ ܕܥܘܬܪܐ ܗܠܝܢ܆ ܕܡܣܟܢܘܬܐ ܕܝܢ܆ ܬܠܬܐ ܐܝܬܝܗܘܢ ܓܝܣ̈ܝܢ. ܩܕܡܝܐ ܟܘܪܐ ܕܒܘܚܪܢܐ ܕܡܢ ܐܠܗܐ ܥܠ ܐܢܫܐ ܡܫܬܓܪ. ܐܘ 123b ܠܒܘܩܝܐ ܐܝܟ ܕܠܛܒܿܐ܆ ܐܘ ܕܠܬܘܟܣܐ ܕܥܢܬܘܬܐ ܐܝܟܢܐ ܕܠܒܝ̈ܫܐ. ܗܘܠܐ ܓܝܪ ܡܕܡ ܐܝܬܘܗܝ ܟܣܦܐ܇ ܕܟܠܗܝ̈ܢ ܣܥܘܪ̈ܘܬܐ ܫ̈ܛܝܬܐ܆ܐܦܢ ܠܘ ܠܟܠ. ܘܡܛܠ ܗ݀ܢܐ ܐܘ ܡܥܘܟ ܠܒܪܢܫܐ ܢܩܢܝܘܗܝ ܗܘܼ ܡܪܝܐ܆ ܐܘ ܒܬܪܟܢ܇ ܡܢܢ ܫܒܿܠ ܠܗ܀ ܐܕܫܿܐ ܕܝܢ ܬܪܝܢܐ܆ ܕܡܢ ܫܦܠܘܬ ܐܝܕܐ ܘܡܐܝܢܘܬܐ ܥܿܕܐ ܥܠ ܒܪܝܫܐ܆ ܬܠܝܬܝܐ ܕܝܢ܆ ܡܢ ܨܒܝܢܐ ܡܐܪܢܝܐ. ܘܗܟܢܐ ܒܝܕ ܐܬܪ̈ܘܬܐ ܣܓ̈ܝܐܐ ܚܿܙܩ. ܕܩܕܡܝܐ ܒܗܘܢ ܘܛܿܒܐ܆ ܗܿܘ ܕܡܛܠ ܫܘܒܚܐ ܕܥܘܬܪܐ ܕܫܡ̈ܝܢܐ. ܘܣܿܒܪܐ ܕܦܘܪ̈ܥܢܐ ܕܡܢ ܠܗܠ܇ ܡܡܠܟ ܘܗ݀ܘܐ ܒܪܝܫܐ܆ ܐܝܟܢܐ ܕܨܪܝܟܘܬܐ ܕܐܠܝܐ܇ ܘܡܣܟܢܘܬܗܘܢ ܕܫ̈ܠܝܚܐ. ܬܪܝܢܐ ܕܝܢ ܘܒܝܫܐ܆ ܗ݀ܘ ܕܪ̈ܓܝܓܬܗ ܫܟܝܪ̈ܬܐ ܥ̈ܒܕܢ ܠܗ: ܐܝܟܢܐ ܕܓܘܕ̈ܐ ܕܪ̈ܘܢܐ ܘܝܗ̈ܠܐ ܕܪ̈ܚܡܝ ܐܣܛܪ̈ܢܝܐ܇ ܗܢܿܘܢ ܕܣܝ̈ܡܬܐ ܐܒܗ̈ܝܬܐ ܘܓ̈ܙܐ ܕܟܫܝܪ̈ܐ ܛܠܩܘ܇ ܕܠܗܘܬܐ ܪܚܡܸܬ ܟܪܣܐ ܚܡܪ̈ܢܐ ܢܡܼܠܘܢ܇ ܘܠܗܪܬܐ ܕܪܓܬ ܚܿܘܐ ܢܓܡܪܘܢ. ܘܡܢ ܡܐ ܕܚܡܝܠ ܦܫܘ܆ ܘܠܡܐ ܕܪܓܘ ܘܪܚܸܡܘ ܠܐ ܩܪܸܒܘ. ܒܕܫܩܝܐ ܕܚܡܪܐ ܪܘܝܘܬܐ ܡܘܣܦ. ܘܗܘܿܦܐ ܕܪܓܬܐ ܒܡܘܠܝܗ ܝܬܝܪ ܕܠܩܿ܀ ܐܕ݀ܫܐ ܕܝܢ ܬܠܝܬܝܐ ܕܨܪܝܩܟܘܬܐ: ܕܡܨܥܝܬܐ ܡܕܡ ܐܝܬܘܗܝ܇ ܘܠܐ ܒܝܫܐ ܐܦܠܐ ܕܝܢ ܛܒܐ܇ ܗܢܘܿܢ ܐܝܠܝܢ܇ ܕܡܛܠ ܬܫܒܘܚܬܐ ܪܝܩܚܬܐ ܕܥܿܠܡܐ ܕܝܘܒܐ܇ ܪܘܪܒܝ ܢܦܫܐ ܠܒܪ ܡܢ ܗ݀ܝ ܕܡܡܫܚܐ ܗܘ̈ܝܢ܇ ܘܟܠܡܕܡ ܕܐܝܬ ܠܗܘܢ ܠܥܝܢܐ ܕܒܢܝ̈ܢܫܐ ܡܿܦܩܝܢ܇ ܐܝܟܢܐ ܕܩܘ̈ܠܣܐ ܡܢ ܟܠܢܫ ܢܨܝܕܘܢ. ܗ݀ܢܐ ܓܝܪ ܐܕ݀ܫܐ܆ ܒܕܠܘ ܡܛܠܬܗܿ ܕܛܒܬܐ ܗܿܘܐ. ܠܐ ܡܬܩܛܪܓ ܛܿܒܐ. ܡܛܠ ܕܝܢ: ܕܐܝܟܢ ܕܗܘܼ ܗܢܝܢܐ ܘܦܐܪܐ ܡܝܬܐ ܠܣ̈ܓܝܐܐ܆ ܐܦܠܐ ܒܝܫܐ ܡܬܐܡܪ. ܐܦܢ ܚܢܢ ܘܟܠܗܘܢ ܗ݀ܢܘܢ ܕܒܥܕܬܐ܇ ܒܝܫܐ ܠܗܿܢܐ ܐܕ݀ܫܐ ܩܿܪܝܢܢ. ܗܠܝܢ ܐܢܘܢ ܐܕܫ̈ܐ ܕܡܣܟܢܘܬܐ. ܐܢܕܝܢ ܘܐܚܪܢܐ ܡܕܡ ܐܝܬ: ܕܒܗ ܠܕܘܝܘܬܐ ܕܣܢܝܩܘܬܐ: ܗܿܘ ܕܘܿܝܐ ܒܪܝܫܐ ܚܿܙܐ: ܐܘ ܩܫܝܘܬܐ ܕܥܿܒܚ ܡܿܕܐܬܐ: ܐܘ ܙܒܢܐ ܫܲܬܿܢܝܐ ܕܡܢ ܥܠܠܬܐ ܐܦܿܕ ܐܪ̈ܥܬܐ: ܐܘ ܟܘܪܗܢܐ ܠܓܒܪܐ ܠܚܘܕܢܐ ܗܿܘ ܕܐܬܐܡܢ ܘܡܛܠܬܗ ܗܘܼܐ ܒܙܝܙܐ: ܐܘ ܡܢ ܚܪܡܿܘܬܐ ܕܓܢܒ̈ܐ ܐܘ ܕܓܝܣ̈ܐ ܐܢܫ ܢܬܒܠܥ: ܟܠܗܘܢ ܗܿܠܝܢ ܘܕܐܝܟ ܗܠܝܢ܆ ܒܗܿܢܘܢ ܬܪ̈ܝܢ ܐܡ̈ܢܐ ܩܕ̈ܡܝܐ ܕܨܪܝܟܘܬܐ ܢܬܬܣܝ̈ܡܢ. ܐܡܪܢܐ ܕܝܢ܆ ܐܘ ܠܡܬܒܚܪܘ ܐܘ ܠܡܬܩܢܝܘ ܠܗܿܠܝܢ ܗܟܝܠ ܐܕܫ̈ܐ ܦܠܲܝܢܢ ܘܦܲܬܲܚܢܢ 124a ܐܝܟܢܐ ܕܟܕ ܠܗܘܢ ܪ̈ܥܝܢܐ ܡܩܒܠ܆ ܠܘ ܠܟܠ ܥܘܬܪܐ܇ ܕܡܢ ܐܠܗܐ ܐܝܬܘܗܝ ܢܐܡܪ܇ ܘܚܒܪܐ ܕܠܣ̈ܛܝܐ ܘܕ̈ܟܠܕܝܐ܇ ܘܕܓܒܪ̈ܐ ܥ̈ܠܘܒܐ ܠܐܠܗܐ ܢܥܒܕ. ܝܗܒ ܠܢ ܓܝ ܚܐܪܘܬܐ ܕܨܒܝܢܐ. ܘܒܗܿܕܐ ܚܝܠܐ ܣܲܬܬ. ܘܡܿܪܫܠ ܠܗܿ ܥܕ ܕ݀ܐܢ ܠܗܿ: ܕܟܕ ܕܪܥܝܐ ܬܬܝܿܬܐ܇ ܘܡܐ ܕܪܥܝܐ ܬܡܲܠܐ ܘܬܣܥܘܪ. ܘܠܓܒܪܐ ܓܝܣܐ ܠܐ ܕܚ݀ܩ܇ ܘܟܕ ܐܝܕܗ ܥܿܘܠܬܐ ܥܠ ܥܘܬܪܐ ܢܘܟܪܝܐ ܡܪܡܐ܇ ܟܕ ܒ݀ܩܐ ܕܝܬܿܝܪ ܗܿܘ ܕܡܬܢܟܪܐ ܡܢ ܥܘܬܪܐ܇ ܡܢ ܨܪܝܟܘܬܐ ܘܕܘܝܘܬܐ. ܘܐܢܸܗܘ ܕܗ̈ܘܠܐ ܕܓܘܕܦܐ ܥܒܕ ܠܡܣܟܢܘܬܐ܆ ܫܩܿܠ ܠܗܿ. ܘܟܗܝܢܘܬܐ ܚܠܦ ܗܿܕܐ ܦܠܓ ܠܗ. ܐܢܕܝܢ ܘܐܝܬܘܗܝ ܐܢܫ ܡܪܛܢܢܐ: ܘܚܟܡ ܕܡܐ ܕܥܿܬܪ: ܩ݀ܛܠ ܘܡܙܲܢܐ ܘܐܚܪ̈ܢܝܬܐ ܥܢܬܘܬܐ ܓܡܪ܆ ܒܗܿ ܒܫܝܫܠܬܐ ܕܡܣܟܢܘܬܐ ܟܕ ܡܦܲܟܪ ܡܪܦܐ ܠܗ. ܠܐܚܪܢܐ ܕܚܫ݀ܚ ܠܗ ܠܗ ܥܘܬܪܐ: ܘܡܕܒܪܢܐ ܟܐܢܐ ܕܡܡܘܢܐ ܗܘܐ: ܘܚܲܢܢ ܘܡܪܚܦܢ ܒܨܒܝܢܗ ܘܒܐܕܗ܆ ܡܣܓܐ ܘܡܒܪܟ ܟܠ ܡܐ ܕܩܢܸܐ. ܘܕܪ ܘܕܪ ܠܟܗܝܢܘܬܗ ܒܝܘܒܠܐ ܡܿܬܚ. ܘܡܐ ܕܒܬܪ ܡܘܬܗ ܢܝܒܼܠܘ ܝܠܕܘ̈ܗܝ: ܘܟܣܦ ܝܘܪܬܢܗ ܕܐܒܘܗܘܢ ܟܐܢܐ: ܗܘܠܐ ܠܚܛܝܬܗܘܢ ܐܩܝܡܘܗܝ܆ ܫ݀ܩܠ ܠܗ. ܘܟܐ݀ܦ ܘܡܪܟܢ ܠܗܘܢ܇ ܬܚܝܬ ܢܝܪܐ ܥܛܠ ܠܡܣܬܝܒܪܘ ܕܡܣܟܢܘܬܐ܇ ܗ݀ܘ ܕܥܠ ܟܠ ܐܢܫ ܒܗܿ ܒܕܡܘܬܐ ܗܿܘ ܣܢܝܐܐ ܘܣܒܝܥܐ ܘܩܕܡ ܕܢܚܫܝܘܗܝ ܕܚܝܠܐ܇ ܘܒܬܪ ܕܢܚܫܝܘܗܝ ܡܬܥܪܩܢܐ܇ ܘܡܐ ܕܐܓܿܗܝܢܢ ܡܢܗ ܝܩܝܪ ܕܘܟܪܢܐ. ܡܛܠ ܕܝܢ ܕܐܝܬ ܣ̈ܓܝܐܐ܆ ܕܟܕ ܡܬܪܫܫܝܢ ܒܢܝܪܐ ܕܨܪܝܟܘܬܐ܇ ܘܡܢܣܝܢ ܚܫ̈ܝܗܿ ܡܪܝܪ̈ܐ ܕܗܕܐ: ܘܕܟܡܐ ܥܛܠܐ ܕܩܕܡ ܐܦ̈ܐ ܕܣܓ̈ܝܐܐ ܢܬܡܟܟ: ܘܠܗ ܠܢܣܝܢܐ ܡܬܥܿܗܕܝܢ ܡܐ ܕܐܬܼܟܿܗܢܘ: ܠܗܠܝܢ ܦܠܓ ܥܘܬܪܐ ܡܪܝܐ. ܒܕܚܿܟܡ ܐܝܟ ܝܕ݀ܥ ܟܠ܆ ܕܕܘܟܪܢܗܿ ܕܕܘܝܘܬܐ܆ ܠܘܬ ܬܚܢܢܬܐ ܕܒܢ̈ܝ ܫܪܒܬܐ ܢ݀ܓܕ ܠܗܘܢ. ܠܐܚܪ̈ܢܐ ܕܝܢ ܡܣܟ̈ܢܐ ܚ݀ܟܡ܆ ܕܥܘܗܕܢܗܿ ܕܡܣܟܢܘܬܐ ܡܥܒܕ ܠܗܘܢ܆ ܕܥܠ ܟܝܣܐ܆ ܐܝܕܐ ܩܲܠܘܛܬܐ ܘܩܫܝܬܐ ܢܝܬܘܢ܆ ܘܠܘܬ ܪ̈ܚܡܐ ܚܪܡܘܬܐ ܡܥܝܪ ܒܗܘܢ܇ ܕܘܟܪܢܐ ܕܚܫ̈ܐ ܕܨܪܝܟܘܬܐ. ܘܡܢ ܗܪܟܐ ܠܗ ܠܢܝܪܐ ܕܢܪܝܡ ܡܢܗܘܢ ܠܐ ܡܬܪܡܐ. ܘܒܗܿܠܝܢ ܣܩܘ̈ܒܠܝܬܐ: ܘܒܐܚܪ̈ܢܝܬܐ ܕܠܗܿܠܝܢ ܕܡ̈ܝܢ܆ ܐܡܿܪ ܐܢܐ ܕܝܢ ܟܘܪܗܢܐ ܘܚܘܠܡܢܐ: 124b ܚܠܫܘܬܐ ܘܚܝܠܐ: ܘܓܙܝܘܬܐ ܕܪ̈ܓܫܐ ܘܣܓܝܦܘܬܐ܇ ܘܥܪܝܡܘܬܐ ܘܦܫܝܛܘܬܐ܇ ܘܫܘܦܪܐ ܘܣܢܝܩܘܬܐ܇ ܫܘܠܛܢܐ ܘܫܘܥܒܕܐ܇ ܐܘ ܡܪܘܬܐ ܘܥܒܕܘܬܐ: ܗܠܝܢ ܐܢ ܐܝܬ ܠܩܘܒ̈ܠܝܬܐ ܐܚܪ̈ܢܝܬܐ܆ ܒܗܝܢ ܕܐ݀ܢ ܗܿܘ ܡܿܠܚܐ ܝܕܘܥܬܢܐ ܕܟܠ܇ ܘܠܟܐ ܘܠܗܠ ܘܠܟܠ ܟܪ܇ ܠܟܝܢ ܕܒܢܝ̈ܢܫܐ ܡܗܲܕ ܡܫܲܒܠ. ܒܟܠܦܪܘܣ ܕܝܢ܆ ܠܘܬ ܗ݀ܝ ܕܦܘܪܩܝܐ ܘܣܓܝ ܦܩܝܚܐ܀ ܐܠܐ ܟܝܬܢܘܕܐ. ܘܥܡ ܟܠ ܣܘܩܐ܆ ܢܬܠ ܦܘܪܫܢܐ ܕܬܘܕܝܬܐ܇ ܘܕܒܚܬܐ ܫܦܝܬܐ ܕܬܫܒܘܚܬܐ. ܟܕ ܒܬܘܗܬܐ ܘܒܬܕܡܘܪܬܐ ܡܲܣܓܝܢܢ ܠܗ܆ ܘܗܿܠܝܢ ܥܡ ܬܗܪܐ ܐܡܿܪܝܢܢ. ܐܘ̃ ܙܪܘܥܗ ܕܥܠܡܿܐ ܘܡܣܬܬܢܗ܇ ܐܘ̃ ܐܚܝܕ ܣܘܟ̈ܝܐ ܘܡܡܠܚܢܐ ܕܗܢܐ ܟܠ. ܐܘ̃ ܡܗܕܝܢܐ ܘܡܫܒܠܢܐ܇ ܕܗܘܿܢܐ ܘܡܕܥܝܐ ܐܢܫܝܐ. ܘܣܿܥܘܪܐ ܕܣܘ̈ܟܠܐ. ܐܘ̃ ܗܘܢܐ ܠܐ ܡܬܗܘܢܐ ܠܓܡܪ: ܘܡܠܬܐ ܕܡܢ ܡܠܬܐ ܥܿܪܩܐ܇ ܘܪܘܚܐ ܕܠܪ̈ܘܚܐ ܠܐ ܗܘ̈ܠܢܝܬܐ ܗܘܼ ܩܒܼܥ. ܐܘ̃ ܐܠܗܐ ܕܒܢܝ̈ܢܫܐ ܕܝܠܟ ܘܡܪܐ ܘܐܒܿܐ ܡܪܚܡܢܐ܇ ܐܘ̃ ܛܘܒܬܢ ܕܠܐ ܡܘܫܚܐ܇ ܘܡܥܝܢܐ ܕܟܠܗ ܪܘܚܦܐ܇ ܗܘ ܕܟܕ ܒܟܐܢܘܬܐ ܘܒܛܝܒܘܬܐ ܠܗܠܝܢ ܕܝܠܢ ܢܛܪ ܐܢܬ܇ ܠܛܝܒܘܬܐ ܗ݀ܝ ܕܥܿܠܒܐ ܝܗܒ ܐܢܬ܇ ܘܠܚܐܪܘܬܐ ܒܫܒܝܠܐ ܕܒܛܝܠܘܬܐ ܡܕܒܪ ܐܢܬ܇ ܘܐܝܟ ܕܠܨܠܡܐ ܕܝܠܟ ܡܢ ܐܘܟ̈ܕܐ ܕܥܫܘܡܝܐ ܡܥܕܐ ܐܢܬ܇ ܘܒܠܚܘܕ ܐܝܟ ܐܣܝܿܐ ܛܒܐ ܕܒ̈ܝܫܬܐ ܡܢ ܬܛܘܫܘܬܐ ܕܫܟܝܪ̈ܬܐ ܠܗܕܐ ܡܕܟܐ ܐܢܬ܇ ܘܐܝܟ ܬܐܪܐ ܘܡܥܝܢܐ ܕܬܐܘܪܝܐ ܡܢ ܦܘܕ̈ܐ ܕܒܼܬܐܘܪܝܐ ܠܗܕܐ ܡܣܬܬ ܐܢܬ. ܐܘ̃ ܡܘܬܒ ܡܕܝܢܬܐ ܪܒܬܐ܇ ܘܐܒܿܐ ܘܥܿܒܘܕܐ ܕܥ̈ܠܡܐ ܕܐܬܝܿܢ܇ ܘܡܚܟܡܢܐ ܘܡܢܗܪܢܐ ܕܗܘ̈ܝܐ ܟܠܗܘܢ܇ ܗ݀ܢܘܢ ܕܟܕ ܒܟ ܐܬܝܬܬܘ ܒܟ ܒܟܠܫܥ ܐܦ ܐܝܬܝܢ܇ ܘܬܘܪܣܝܐ ܡܪܘܿܚܐ ܡܢܟ ܘܒܐܝܕ̈ܝܟ ܡܬܦܫܛ ܠܗܘܢ. ܐܘ̃ ܨܡܚܐ ܫܘܼܐ ܠܝܠܘܕܗ܇ ܘܕܒܟ ܡܬܬܨܡܚܝܢ ܘܒܟ ܕܝ݀ܨܝܢ ܚ̈ܝܠܘܬܐ ܛܒ̈ܐ܇ ܟܕ ܡܢ ܡܥܝܢܐ ܕܙ̈ܓܠܐ ܝܕܘ̈ܥܬܐ ܕܠܝܿܢ܇ ܘܡܫܟܢܝܢ ܐܦ ܗ݀ܝ ܕܢܬܬܨܡܚ ܘܢܨܡܚ܇ ܘܡܢ ܢܘܗܪܐ ܕܝܕܥܬܐ ܢܥܼܪܐ ܘܠܘܬ ܐܚܪܢܐ ܢܥܒܪ܇ ܐܘ ܬܠܝܬܝܐ ܘܠܚܘܕܝܐ܇ ܗܿܘ ܕܟܕ ܟܠܟ ܥܡ ܟܠܗܝ̈ܢ ܕܡܢܟ ܡܢ ܡܿܟܘܬܢ ܦܝ̈ܫܢ܇ ܘܒܠܚܘܕ ܟܡܐ ܕܢܫܟܚ ܠܣܥܘܪ̈ܘܬܟ ܕܠܘܬܢ܇ ܡܢܟ ܢܣܿܒܝܢܢ. ܒܙܒܢ ܕܝܢ ܐܦ ܕܡܢܐ ܘܕܐܝܟ ܐܝܠܝܢ ܬܡܝܗ̈ܬܐ ܒܢ ܘܠܘܬܢ܇ ܘܣܥܼܪܬ ܘܣ݀ܥܪ ܐܢܬ ܕܢܕܪܟ ܡܫܬܘܝܢܢ: ܐܢ ܐܪܐ ܘܚܢܢ ܠܢ ܠܘܬ ܗܕܐ ܡܢ ܗܪܟܐ ܡܚܘܝܢܢ ܕܫܘܝܢܢ. ܘܒܪܼܚܡܬ ܥܡܠܐ 125a ܠܛܦܝܠܬܢ ܡܕܟܝܢܢ܀ ܫܠܡܘ ܐܪ̈ܒܥܐ ܡܐܡܪ̈ܐ ܕܥܠ ܒܛܝܠܘܬܐ. ܕܥܒܼܝܕܝܢ ܠܐܢܛܘܢ ܕܝܪܝܐ ܬܐܓܪܝܬܢܝܐ ܗܿܘ ܕܓܘܪܓܢ ܠܫܪܒܬܐ ܕܐܒܗ̈ܘܗܝ ܡܲܛܗܡ܀