Balai of Balsh. “On the Dedication of the Church as Qenneshrin - ܥܠ ܚܘܕܬܐ ܕܥܕܬܐ ܕܐܬܼܒܢܝܬ ܚܕܬܝܬ ܒܩܢܫܪܝܢ ܡܕܝܢܬܐ.” Based upon Julian Joseph Overbeck ed., S. Ephraemi Syri, Rabulae episcopi Edesseni, Balaei aliorumque Opera selecta e codicibus syriacis manuscriptis in museo Britannico et bibliotheca Bodleiana asservatis primus (Oxonii [Oxford]: Clarendoniano, 1865). Digital Syriac Corpus. Last modified November 30, 2019. https://syriaccorpus.org/503.
    
        
             251 
            
                ܡܕܪ̈ܫܐ ܕܡܪܝ ܒܠܝ ܟܘܪ ܐܦܣܩܘܦܐ܆
                ܥܠ ܚܘܕܬܐ ܕܥܕܬܐ ܕܐܬܼܒܢܝܬ ܚܕܬܝܬ ܒܩܢܫܪܝܢ ܡܕܝܢܬܐ.

            
            
                1
                ܐܝܢܐ ܕܠܐܝ ܒܒܝܬܟ ܢܚܕܐ܆
                ܕܐܬܩܢ ܥܘܡܪܐ ܠܡܪܗ ܕܒܪܝܗܝ.
                ܘܢܬܠ ܛܘܒܐ ܠܢܦܫܗ܇܇
                ܐܝܢܐ ܕܒܥܒܕ ܐܝ̈ܕܘܗܝ ܢܚܼܬܿ ܪܘܚܐ

            
            
                2
                 ܕܡܟܝܠ ܕܒܝܬܐ ܗܘ ܕܐܠܗܘܬܐ܆
                ܟܠ ܥܘܕܪ̈ܢܝܢ ܒܗ ܡܫܬܟܚܝܢ.
                ܥܘܡܪܐ ܗܘ ܒܐܪܥܐ܆
                ܕܒܗ ܡܬܠܒܟܐ ܗܿܝ ܛܝܒܘܬܐ ܠܡܐܫܕ ܪ̈ܚܡܼܐ

            
            
                3
                 ܒܒܝܬܗ ܝܬܿܒ ܘܡܣܟܐ ܠܢ܇
                ܕܢܥܘܠ ܢܒܥܐ ܡܢܗ ܚܢܼܢܐ.
                ܠܐ ܟܿܠܐ ܠܢ ܕܠܐ ܡܫܿܢܝܢ ܚܢܢ
                ܡܢ ܓܘ ܥܘܡܪܗܼ ܕܚܐܢ ܗܘ ܠܢ

            
            
                4
                ܠܘ ܓܝܪ ܥܘܡܪܐ ܫܚܝܡܐ ܐܝܬܘܗܝܼ.
                ܫܡܝܐ ܗܘ ܒܐܪܥܐܿ ܕܡܪܗܼ ܒܓܘܗ.
                ܘܚܠܦ ܥܝܪ̈ܐܼ ܟܗ̈ܢܐ ܕܟ̈ܝܐ
                ܕܡܫܡܝܢ ܒܗ ܠܐܠܗܘܬܐ

            
            
                5
                ܥܘܡܪܐ ܒܪܘܡܐ ܒܝܬܐ ܒܥܘܡܩܐܼ.
                ܘܠܐ ܡܬܿܦܠܓܼ ܘܠܟܠ ܣܿܦܩ.
                ܐܢ ܕܝܢ ܬܒܼܨܝܘܗܝ ܟܠܗܼ ܒܪܘܡܐ ܗܘ.
                ܘܐܢ ܗܼܘ ܕܬܒܥܝܘܗܝܿ ܟܠܗܼ | ܒܥܘܡܩܐ ܗܘ
                 252 

            
            
                6
                ܐܢ ܗܼܘ ܕܬܡܪܚܼ ܪܡ ܗܘ ܡܢܟ.
                ܘܐܢܗܘܼ ܕܬܪܚܡܼ ܩܪܝܒ ܗܘ ܠܟ.
                ܐܢ ܕܬܥܿܩܒܼ ܗܐ ܒܫܡܝܐ ܗܘ.
                ܘܐܢ ܕܬܗܝܡܼܢ ܗܐ ܒܝܬ ܩܘܕܫܐ ܗܘ

            
            
                7
                ܐܢ ܗܼܘ ܕܬܒܥܐ ܐܝܟ ܕܠܡܨܒܐܼ.
                ܒܪܘܡܗ ܡܿܡܕ ܡܢ ܨܢܥ̈ܬܟ.
                ܘܐܢ ܬܬܝܐܒ ܐܝܟ ܕܠܡܚܙܐܼ.
                ܒܚܘܒܗ ܩܪܝܒ ܠܦܫܝܛܘܬܟ

            
            
                8
                ܡܚܼܝܠ ܗܘ ܚܝܠܟ ܡܢ ܡܠܐܟ̈ܐܼ.
                ܘܦܿܚܡ ܕܪܓܟ ܠܕܪ̈ܘܚܢܐ.
                ܠܗܘܢ ܬܫܡܫܬܐ ܟܕ ܕܚܝܠܝܼܢ.
                ܘܠܢ ܡܟܘܠܬܐ ܕܦܫܝܩܐ ܠܢ

            
            
                9
                ܕܢܗܘܐ ܫܟܝܚ ܠܢ ܒܝܬ ܐܪ̈ܥܢܐܼ.
                ܒܢܼܐ ܠܗ ܒܝܬܐ ܒܝܬ ܦܓܪ̈ܢܐ.
                ܐܬܩܢ ܡ̈ܕܒܚܐ ܐܘܪ̈ܘܬܐܼ.
                ܕܒܗܘܢ ܬܐܟܘܠ ܥܕܬܐ ܚ̈ܝܐ

            
            
                10
                ܠܐ ܐܢܫ ܢܦܚܐܗܪܟܐ ܗܘ ܡܿܠܟܐܼ.
                ܒܓܘ ܒܝܬ ܩܘܕܫܐܼ ܢܥܘܠ ܢܚܙܝܘܗܝ.
                ܐܝܟܐ ܕܦܫܝܩ ܠܟܪܝܗܘܬܐܿ.
                ܩܐܡ ܐܣܝܐ ܘܡܣܟܐ ܠܗܿ

            
            
                11
                ܟܣܝܐ ܢܘܪܐ ܘܓܠܼܐ ܦܓܪܐܼ.
                ܕܠܐ ܬܓܥܨ ܠܗܿ ܐܝܕܐ ܕܐܢܫܐ.
                ܕܚܝܼܠ ܒܫܡܝܐ ܘܒܣܝܡ ܒܐܪܥܐܼ.
                ܕܐܝܢܐ ܕܩܿܪܒܼ ܠܐ ܢܬܩܢܫܛ

            
            
                12
                ܗܘ̈ܝ ܫܬܐܣ̈ܐ ܩܕܝܫ̈ܬܐܼ.
                ܘܒܫܡܟ ܚܝܐ ܣܡܘ ܟܐܦ̈ܝܗܝܢ.
                ܐܥܠ ܬܪ̈ܥܐ ܙܕܝܩܘܬܐܼ.
                ܕܥܠܘ̈ܠܝܗܘܢ ܟܢܝܫܝܢ ܒܫܡܟ

            
            
                13
                ܕܪ̈ܐ ܡ̈ܠܝܢ ܩܠ ܐܘܫ̈ܥܢܐܼ.
                ܘܥܘܡܪܐ ܪܥܿܡ ܩܠ ܗܘ̈ܠܠܐ.
                ܘܡܢ ܒܿܪ̈ܝܐ ܘܡܢ ܓܘ̈ܝܐܼ.
                ܕܠܩܿ ܫܘܒܚܐܼ ܐܝܟ ܠܟ̈ܦܝܕܐ

            
            
                14
                ܐܬܪܐ ܡܨܒܼܬ ܒܫܘܒܚܐ ܡܟܠܠܼ. ܕܝܘܡ ܕܥܐܕܐ ܗܘܼ ܘܕܡܫܬܘܬܐ. ܓܢܘܢܐ ܚܼܕܬܐ ܡܫܝܚܐ ܚܬܢܐܼ. ܥܝܪ̈ܐ
                    ܚܿܕܝܢ ܐܢܫܐܼ ܡܘܕܝܢ

            
            
                15
                ܡܕܒܚܐ ܡܬܼܩܢ ܩܘܫܬܐ ܠܒܝܫܼ.
                ܟܗܢܐ ܩܐܡܼ ܢܘܪܐ ܚܫܿܠ.
                ܠܚܡܐ ܫܩܿܠ ܦܓܪܐ ܝܗܒܿ܆
                ܚܡܪܐ ܡܩܿܒܠܼ ܘܕܡܐ ܡܿܦܠܓ

            
            
                16
                | ܡܕܒܚܐ ܕܟܐܦ̈ܐ ܘܛܥܝܢ ܣܒܪܐܼ.
                 253 
                ܘܟܗܢܐ ܕܟܝܐ ܠܪܘܚܐ ܩܿܪܐ.
                ܥܡܐ ܕܟܢܝܫ ܩܕܝܫ ܩܿܥܐܼ.
                ܡܿܠܟܐ ܕܫܡܿܥܼ ܪ̈ܚܡܼܐ ܡܫܦܥ

            
            
                17
                ܩܪܢܐ ܕܚܘܒܐ ܒܐܪܥܐ ܬܩܪܐܼ.
                ܟܢܘܫܘ ܓܘ̈ܕܝܟܘܢ ܠܐܝܩܪ ܒܝܬܐ
                ܐܓܪܐ ܝܗܿܒ ܗܿܘ ܕܩܪܟܘܢܼ.
                ܒܒܝܬܐ ܚܼܕܬܐܼ ܚ̈ܝܐ ܚ̈ܕܬܐ

            
            
                18
                ܐܝܢܐ ܕܠܐܝ ܢܝܚܐ ܫܩܿܠܼ.
                ܘܐܝܢܐ ܕܥܡܿܠ ܚ̈ܝܐ ܡܫܟܚ.
                ܐܝܢܐ ܕܢܿܕܪ ܢܟ̈ܣܘܗܝ ܣܿܓܝܼܢ.
                ܘܐܝܢܐ ܕܫܿܠܡܼ ܫܚܪ̈ܘܗܝ ܡܦܪܝܢ

            
            
                19
                ܕܠܐܝ ܒܚܝܠܗ ܓܘܫܡܗ ܫܐܪ܆
                ܕܩܪܒܼ ܒܐܝܕܗ ܓܙܗ ܣܿܓܐܿ.
                ܕܐܝܬܝ ܢܕܪܐ ܣܒܪܐ ܡܫܟܚܼ.
                ܘܥܡܐ ܕܟܢܼܫ ܥܡܗܘܢ ܦܿܠܓ.

            
            
                20
                ܕܗܠܝܢ ܕܥܡܼܠܘ ܡܛܠ ܕܐܬܿܝܼܢ.
                ܘܗܠܝܢ ܕܐܬܿܝܢ ܡܛܠ ܕܒܢܘ.
                ܗܠܝܢ ܕܐܬܘ ܘܗܠܝܢ ܕܥܼܡܠܘܼ.
                ܒܚܕ ܦܘܪܥܢܐ ܫܘܬܦ ܡܪܢ

            
            
                21
                ܬܠܬܐ ܒܫܡܟ ܥܕܬܐ ܐܢܘܢܼ.
                ܐܠܦ̈ܐ ܒܒܝܬܟ ܢܿܛܪ ܐܢܘܢ.
                ܕܥܕܬܐ ܕܠܒܐ ܥܼܡܠܘ ܘܐܝܬܝܘ ܠܗܼ.
                ܠܗܝܟܠ ܩܘܕܫܐ ܕܒܿܢܼܐ ܒܫܡܟ

            
            
                22
                ܬܗܘܐ ܦܐܝܐ ܥܕܬܐ ܕܠܓܘܼ.
                ܐܝܟ ܕܗܕܝܪܐ ܥܕܬܐ ܕܠܒܪ.
                ܬܫܪܐ ܒܕܠܓܘ ܘܬܛܪ ܕܠܒܪ܆
                ܕܚܬܝܡ ܒܡܫܟ ܠܒܐܼ ܘܒܝܬܐ

            
            
                23
                ܟܗ̈ܢܐ ܕܗܘܼܘ ܗܝܟܠ ܪܘܚܟܼ.
                ܐܬܟܫܪܘ ܒܗ ܒܒܢܝܢ ܒܝܬܟ.
                ܒܿܪܟ ܐܢܘܢ ܕܠܒܐ ܘܒܝܬܐܼ.
                ܒܥܼܡܠܐܼ ܘܚܘܒܐ ܨܒܬܘ ܠܫܡܟ

            
            
                24
                ܟܗܢܐ ܕܒܢܼܐ ܩܘܡܗ ܢܓܪ ܫ̈ܢܝܐ
                ܢܟܗܢ ܒܥܘܡܪܐ ܕܨܒܿܬ.
                ܘܬܥܠܘܒ ܢܦܫܗ ܒܫܘܦܪܐ ܟܣܝܐܼ.
                ܠܨܒܬܐ ܓܠܝܐ ܕܛܥܢ ܒܝܬܐ

            
            
                25
                ܕܛܥܢ ܠܒܗ ܗܝܟܠ ܡܪܗܼ.
                ܢܥܘܠ ܕܟܝܐ ܠܒܝܬ ܩܕܝܫ̈ܐ.
                ܘܟܕ ܡܬܬܢܝܚ ܐܢܬ ܥܠ ܬܪܥܝܬܐܼ.
                ܬܬܠ ܐܓܪܐ ܕܒܢܝܢ ܐܣ̈ܐ

            
            
                26
                ܗܢܐ ܒܝܬܐ ܓܠܝܐ ܡܟܪܙ܇
                ܥܠ ܪܥܝܢܗ ܕܐܝܢܐ ܕܒܢܝܗܝ.
                ܕܢܗܝܪ ܘܦܐܐ ܠܒܐ ܕܠܓܘܼ.
                | ܗܘܼܐ ܦܪܝܫ ܚܘܒܗ ܒܗܢܐ ܓܠܝܐ
                 254 

            
            
                27
                ܠܟܗܢܐ ܬܫܡܥ ܪܘܚܐ ܕܩܘܕܫܐܼ.
                ܕܠܐܒܐ ܘܠܒܪܐ ܐܬܩܢ ܥܘܡܪܐ.
                ܬܩܿܒܠ ܢܕܪ̈ܐ ܥܡ ܩܘܪܒܢܐܼ.
                ܕܒܝܬܐ ܘܢܕܪ̈ܐܼ ܡܛܠܬܟ

            
            
                28
                ܟܠܼܐ ܗܘܐ ܠܕܘܝܕ ܡܢ ܒܢܝܢܐܼ.
                ܠܟܘܢ ܕܝܢ ܚܿܦܛܼ ܘܐܬܟܫܪܬܘܢ.
                ܕܘܝܕ ܓܒܼܝܐ ܦܫ ܡܢ ܒܝܬܐܼ.
                ܚܕܘ ܕܒܢܝܬܘܢܼ ܘܕܫܟܠܠܬܘܢ

            
            
                29
                ܫܠܝܡܘܢ ܕܫܿܘܼܐ ܕܢܒܢܐ ܒܝܬܐܼ.
                ܚܣܟܗ ܡܪܗ ܡܢ ܬܟܬܘܫܐ.
                ܟܗ̈ܢܐ ܕܒܢܘ ܒܝܬܐ ܠܝܫܘܥܼ.
                ܢܿܛܼܪ ܐܢܘܢ ܡܢ ܕܘܘܕܐ

            
            
                30
                ܠܟܘܠܗܿ ܐܪܥܐ ܐܢܝܚ ܡܪܢ܇
                ܒܝܘܡ̈ܝ ܫܠܝܡܘܢ ܡܢ ܬܟܬܘܫܐ.
                ܐܟ ܒܝܘܡ̈ܬܟܘܢ ܢܚܣܘܟ ܡܪܢܼ.
                ܠܥܕܬܐ ܟܠܗܿ ܡܢ ܚܪ̈ܝܢܐ

            
            
                31
                ܡܨܐ ܗܘܐ ܚܝܠܗ ܒܿܢܐ ܒܝܬܐܿ.
                ܐܝܟ ܒܪ̈ܝܬܐ ܕܒܢܼܐ ܪܡܙܗ.
                ܒܢܼܐ ܗܘܐ ܠܐܢܫܐ ܘܐܢܫܐ ܒܢܘ ܠܗܼ.
                ܫܘܒܚܐ ܠܪ̈ܚܼܡܐ ܕܟܡܐ ܪܚܡܘܢܝ

            
            
                32
                ܗܼܘ ܕܠܐ ܣܟܐ ܘܐܢܚܢܢ ܣܟܐܼ.
                ܒܢܼܐ ܠܢ ܥܠܡܐܼ ܘܐܢܚܢܢ ܒܝܬܐ.
                ܪܒܐ ܕܐܢܫܐ ܕܒܢܘ ܒܝܬܐܿ.
                ܠܚܝܠܐ ܡܬܝܚܐ ܕܠܟܠ ܥܒܿܪ

            
            
                33
                ܫܿܪܐ ܕܝܢ ܥܡܢ ܐܝܟ ܒܣܝܡܐܼ.
                ܘܐܝܟ ܚܒܝܒܐ ܢܓܼܕܢ ܨܕܘܗܝ.
                ܥܡܿܪ ܥܡܢ ܘܡܓܪܓ ܠܼܢ.
                ܕܢܣܩ ܟܠܢ ܢܥܡܪ ܥܡܗ

            
            
                34
                ܙܚ ܡܢ ܐܬܪܗ ܓܒܼܐ ܠܗ
                ܥܕܬܐܼ݂ ܕܢܪܦܐ ܐܬܪܢܼ ܘܢܓܒܐ ܠܥܕܢܿ
                ܗܘܼܐ ܐܠܗܐ ܒܝܢܬ ܐܢܫܐܼ.
                ܕܢܗܘܘܢ ܐܢܫܐ ܥܡ ܐܠܗܐ

            
            
                35
                ܡܕܒܚܗ ܡܬܼܩܢ ܘܣܡܝܟ ܥܡܼܢ.
                ܫܘܒܚܗ ܡܫܿܘܝܼ ܘܓܢܝܢ ܐܢܫܐ.
                ܐܟܠܢܢ ܥܡܗ ܥܠ ܦܬܘܪܢܼ.
                ܐܿܟܠ ܥܡܢ ܥܠ ܦܬܘܪܗ

            
            
                36
                ܣܓܝܕ ܠܐܝܩܪܗ ܘܠܪܒܘܬܗܼ
                ܕܗܪܟܐ ܦܓܪܗܼ ܘܠܗܠ ܐܓܪܗ.
                ܡܕܒܚܐ ܒܐܪܥܐ ܡܠܼܐ ܡܢ ܦܓܪܗܼ.
                ܘܚ̈ܝܐܼ ܘܫܘܒܚܐ ܒܝܬ ܡܠܟܘܬܐ

            
            
                37
                ܫܩܠܘ ܬܠܡ̈ܝܕܐ | ܠܚܡܐ ܕܒܪܟܼ.
                 255 
                ܘܩܪܝܗܝ ܦܓܪܐܼ ܘܠܕܡܗ ܚܡܪܐ.
                ܐܿܟܠܬ ܥܡܟܘܢ ܪܙܐ ܒܥܕܬܐܼ.
                ܬܘܒ ܬܐܟܠܘܢ ܥܡܝ ܒܝܬ ܡܠܟܘܬܐ

            
            
                38
                ܕܝܠܟ ܡܪܢ ܡܟܝܟܘܬܐܼ.
                ܟܪܣܐ ܘܐܘܪܝܐ ܨܠܝܒܐܼ ܘܫܝܘܠ.
                ܕܐܢܫܐ ܒܚܘܒܟ ܥܬܝܪ̈ܬܐܼ.
                ܪܘܡܐ ܘܫܘܒܚܐܿ ܟܠܝܠܐܼ ܘܥܕܢ

            
            
                39
                ܟܝܢܢ ܕܐܪܥܐ ܩܪܝܬܝܗܝ ܠܥܕܢܼ.
                ܒܪܘܡܐ ܚܝܠܟܼ ܘܒܐܪܥܐ ܐܘܡܪܟ.
                ܥܿܠܝܼܬ ܓܢܣܢ ܕܢܿܣܒܼ ܫܘܒܚܐܼ.
                ܬܚܿܬܼܝܬ ܫܘܒܚܟܼ ܕܢܪܝܡ ܨܥܪܢܿ

            
            
                40
                ܠܟ ܡܠܟܘܬܐ ܘܠܢ ܡܪܝ ܒܝܬܐܼ.
                ܕܒܢܘ ܒܝܬܐܼ ܫܩܠܘ ܡܠܟܘܬܐ.
                ܠܚܡܐ ܡܩܿܪܒ ܟܗܢܐ ܒܫܡܟܼ.
                ܘܡܢܗ ܦܓܪܐܼ ܠܥܢܟ ܫܿܕܝܼܬ

            
            
                41
                ܐܝܟܐ ܐܢܬ ܡܪܢ ܗܐ ܒܡܫܝܐܼ.
                ܘܐܝܟܐ ܢܒܥܝܟܼ ܗܐ ܒܝܬ ܩܘܕܫܐ.
                ܕܪܡ ܠܢ ܪܘܡܐ ܘܠܐ ܡܿܛܝܢ ܚܢܼܢ.
                ܒܥܕܬܟ ܢܚܙܝܟܼ ܕܦܫܝܩܐ ܠܢ

            
            
                42
                ܟܘܪܣܝܟ ܕܠܥܠ ܒܢܘܪܐ ܡܬܼܩܼܢ.
                ܘܡܢܼܘ ܡܡܪܚ ܢܩܪܘܒ ܨܐܕܘܗܝ.
                ܚܝܠܟ ܚܝܐ ܒܠܚܡܐ ܥܡܿܪ܆
                ܘܕܪܚܿܡ ܠܗܼ ܩܪܒܿ ܛܿܥܡ

            
            
                43
                ܡܗ̈ܝܡܢܐ ܒܐܘܪܝܟ ܚܿܙܝܢ ܝܬܒܟܼ.
                ܘܫܘܒܚܟ ܕܙܩܝܪ ܥܠ ܥܙܪ̈ܘܪܐ.
                ܕܚ̈ܠܢ ܥܝ̈ܢܐ ܡܢ ܙܠܝܩ̈ܝܟܼ.
                ܘܦܫܝܩ ܠܐܝܕܐ ܠܡܛܥܢ ܦܓܪܟ

            
            
                44
                ܐܘ ܡܐ ܥܙܝܙ ܘܟܡܐ ܒܣܝܡܼ.
                ܐܘ ܡܐ ܬܩܝܦܼ ܘܟܡܐ ܡܟܝܟ.
                ܐܘ ܡܐ ܕܠܩܿ ܘܟܡܐ ܢܿܛܪ܆
                ܐܘ ܟܡܐ ܫܡܿܥܼ ܘܟܡܐ ܛܿܥܢ

            
            
                45
                ܚܠܝܛ ܕܝܢ ܥܡܢ ܐܝܟ ܡܟܝܟܐܼ.
                ܘܝܗܿܒ ܦܓܪܗܼ ܐܝܟ ܒܣܝܡܐ.
                ܘܗܿܦܟ ܝܬܒܿ ܐܝܟ ܕܝܿܢܐܼ.
                ܘܠܘܩܒܠ ܥܼܡ̈ܠܐ ܓܿܙܪ ܕܝܢܼܐ

            
            
                46
                ܒܪܘܡܐ ܥܙܝܙ ܒܐܪܥܐ ܡܟܝܟܼ.
                ܫܿܪܐ ܒܪܩܝܥܐܼ ܓܿܢܼܐ ܒܡܥܪܬܐ.
                ܢܘܪܐ ܡܟܣܝ ܢܚ̈ܬܘܗܝ ܢܿܛܪ܆ ܪܛܢܐ܆
                ܪܛܢܐ ܫܡܿܥܼ ܚܘܒܗ ܡܣܝܒܪ

            
            
                47
                ܪܩܝܥܐ ܕܠܥܠ ܠܐ ܐܚܿܕ ܠܗܼ.
                | ܘܫܼܪܐ ܒܒܝܬܐܼ ܘܡܣܝܒܪ ܠܗ.
                 256 
                ܚܝܪܗ ܡܪܗܒ ܠܒܝܬ ܓܒܪܝܐܝܠܼ.
                ܘܡܪܡ ܛܥܢܬܗܼ ܘܒܗܝܠܐ ܗܘܬ

            
            
                48
                ܣܡ ܪܒܘܬܗ ܒܟܪܣܐ ܕܐܡܗܼ.
                ܠܥܘܒܗܿ ܚܝܿܠܼ ܠܡܛܥܢ ܝܘܩܪܐ.
                ܘܫܠܗܒܝܬܐ ܣܼܥܪ ܥܙܪ̈ܘܪܐܼ.
                ܘܢܿܛܪ ܐܢܘܢ ܡܢ ܝܩܕܢܐ

            
            
                49
                ܪܒܼܥ ܗܘܐ ܒܐܘܪܝܐ ܐܝܟ ܡܟܝܟܐܼ.
                ܣܓܼܫܗܿ ܠܒܒܠ ܐܝܟ ܥܙܝܙܐ.
                ܪ̈ܥܘܬܐ ܚܙܘ ܝܠܘܕܐܼ.
                ܡܓܘ̈ܫܐ ܒܿܕܩܘܼ ܕܡܠܟ ܡ̈ܠܟܐ ܗܘ

            
            
                50
                ܐܦ ܠܗܿ ܠܡܪܝܡ ܬܗܪܐ ܢܐܚܘܕ܆
                ܕܟܠ ܚ̈ܕܬܬܐ ܢܒ̈ܥܝ ܘܐܬܟܪܟܗܿ.
                ܕܠܐ ܫܘܬܦܐ ܝܠܕܐ ܗܼܘܐ ܠܗܿ܆
                ܐܝܟ ܕܠܡܿܠܟܐ ܨܒܘ ܩܘܪ̈ܒܢܘܗܝ

            
            
                51
                ܡܥܪܬܐ ܫܠܝܐ ܘܐܘܪܝܐ ܡܠܝܐܼ.
                ܨܗܝܘܢ ܕܡܟܐ ܘܒܒܠܼ ܥܝܪܐ.
                ܗܿܝ ܕܣܢܬܗ ܒܢܘܗܪܗ ܚܼܫܟܬܼ.
                ܥܕܬܐ ܪܚܡܬܗܼ ܒܝܠܕܗ ܢܗܼܪܬ

            
            
                52
                ܗܘܼܐ ܠܗܿ ܝܠܕܐ ܠܒܪܬ ܠܘ̈ܝܐܼ.
                ܒ̈ܢܬܗ ܕܝܬܪܘܢ ܫܩܠܝܗܝ ܡܢܗܿ.
                ܫܟܪܬܗ ܓܝܪ ܗܿܝ ܕܝܠܕܬܗܼ.
                ܘܐܫܬܘܕܥܬܗ ܗܿܝ ܕܫܩܠܬܗ

            
            
                53
                ܣܢܗܿ ܗܘܐ ܠܐܡܗ ܥܠ ܕܣܢܬܗܼ.
                ܕܟܕ ܝܠܕܬܗܼ ܠܐ ܐܚܒܬܗ.
                ܪܚܡܗܿ ܠܥܕܬܐ ܕܟܕ ܐܩܒܠܬܗܼ.
                ܒܟܢܦܗܿ ܛܥܼܢܬ ܐܦ ܚܒܒܬܗ

            
            
                54
                ܒܒܠ ܫܠܼܚܬ ܛܘܒܐ ܠܝܗܘܕ܆
                ܫܡܼܥܬ ܨܗܝܘܢܼ ܠܩܛܠܐ ܩܡܼܬ.
                ܒܝܕ ܩܘܪ̈ܒܢܐ ܕܫܼܕܪܬ ܒܒܠ܇
                ܕܪܫܼ ܗܘܐ ܚܣܡܐ ܫܒܝܠܐ ܒܨܗܝܘܢ

            
            
                55
                ܥܒܪܝܢ ܒܐܘܪܚܐ ܘܣܛܘ ܥܠܘ ܠܗܿ܆
                ܒܫ̈ܘܠܝܗܘܢ ܬܒܪܘܗܝ ܠܒܗܿ.
                ܘܦܼܬܚܬ ܣܼܦܪ̈ܐ ܘܠܒܟܗܿ ܙܘܥܐܼ.
                ܟ̈ܬܒܐ ܟܬܒܘܗܿ ܒܣܚ̈ܝܦܬܐ

            
            
                56
                ܣܿܦܪ̈ܐ ܕܩܪܘ ܝܗܒܘ ܦܘܫܚܐܼ.
                ܕܒܒܝܬ ܠܚܡܼ ܡܫܝܚܐ ܕܢܿܚ.
                ܘܥܼܬܕܬܿ ܢܦܫܗܿ ܕܩܼܪܬ ܐܢܘܢܼ.
                ܕܡܕܡ ܕܣܼܢܬ ܦܩܘ ܠܗܿ

            
            
                57
                ܟܘܟܒܐ ܐܝܬܝ ܠܡܓܘܫ̈ܝܐܼ.
                ܕܢܐܠܦܘܢ ܪܙܗ ܡܢ ܥܒܪ̈ܝܐ.
                ܟܬܒܐ ܕܦܬܼܚܬ ܠܒܪܐ ܕܝܠܼܕܬ܆
                | ܫܪܪܐ ܐܠܦ ܠܡܓܘܫ̈ܝܐ
                 257 

            
            
                58
                ܒܝܗܘܕ ܝܠܦܘ ܡܢ ܕܡܛܐܘܗܿ܆
                ܕܥܼܡܠܐ ܕܐܘܪܚܐܼ ܠܘ ܒܛܝܼܠܐ ܗܘ.
                ܕܡܕܡ ܕܫܚܩܘ ܪ̈ܥܝܢܝܗܘܢܼ.
                ܫܡܥܘ ܦܘܫܩܗܼ ܘܐܫܬܪܪܘ ܒܗ

            
            
                59
                ܟܘܟܒܐ ܡܢ ܠܥܠ ܛܿܫܝ ܢܦܫܗܼ.
                ܕܢܚܼܘ ܩܪ̈ܝܢܐܼ ܘܡܠܠܘ ܚܘܠܦܘܗܝ.
                ܫܬܼܩ ܒܫܡܝܐ ܕܚܼܙܐ ܠܣܿܦܪ̈ܐܼ.
                ܕܐܪ̈ܙܘܗܝ ܓܠܿܝܢ ܠܒ̈ܢܝ ܒܒܠ

            
            
                60
                ܦܬܚܘ ܣܼܦܪ̈ܝܗܘܢ ܘܐܓܢܝ ܢܘܗܪܗܼ.
                ܢܚܼܬ ܗܘܐܼ ܘܨܡܼܚ ܒܟ̈ܬܒܝܗܘܢ.
                ܛܦܘ ܣܿܦܪ̈ܝܗܘܢ ܘܚܘܝ ܨܡ̈ܚܘܗܝܼ.
                ܠܡܓܘܫ̈ܝܐ ܕܝܠܦܘܗܝ ܡܢܼܘ

            
            
                61
                ܪܕܝܿܢ ܒܐܘܪܚܐ ܘܗܼܘ ܒܫܡܝܐܼ.
                ܒܣܿܦܪ̈ܐ ܩܿܪܝܼܢ ܘܗܼܘ ܒܟܬܒ̈ܐ.
                ܡܛܘ ܒܝܬ ܠܚܡ ܘܗܼܘ ܒܡܥܪܬܐܼ.
                ܘܣܡܟܘ ܠܐܘܪܝܐܼ ܘܗܼܘ ܒܥܙܪ̈ܘܪܐ

            
            
                62
                ܟܘܟܒܗ ܨܐܪ ܠܐܠܗܘܬܗܼ.
                ܘܕܐܝܬܘܗܝ ܟܣܝܐ ܘܠܝܐ ܡܘܕܥ.
                ܡܚܘܐ ܐܘܪܚܐ ܐܝܟ ܐܠܗܐܼ.
                ܘܡܓܣ ܒܐܘܪܝܐ ܐܝܟ ܒܪ ܐܢܫܐ

            
            
                63
                ܛܥܢܬܗ ܫܡܝܐ ܥܕܐ ܠܨܗܝܘܢܼ.
                ܕܢܚܼ ܠܗ ܒܣܼܦܪ̈ܐ ܒܟܪܟܐ ܕܝܗܘܕ.
                ܗܼܘ ܒܟܬܒ̈ܐ ܘܗܼܘ ܒܡܫܝܐܼ.
                ܕܠܥܠ ܘܠܬܚܬܼ ܗܘܝܘ ܡܪܐ

            
            
                64
                ܡܓܘܫ̈ܐ ܐܠܨܘܗܿ ܕܬܩܿܘܡ ܬܐܠܦܼ.
                ܡܢ ܓܘ ܣܼܦܪ̈ܝܗܿ ܡܕܡ ܕܛܥܼܬ.
                ܘܕܐܝܟܐ ܕܢܚܿ ܡܝܟܐ ܓܠܼܐ ܠܗܿ܆
                ܡܓܘܫ̈ܐܼ ܠܬܡܢ ܬܪܨܘܗܿ ܠܐܘܪܚܐ

            
            
                65
                ܐܘܪܚܐ ܕܐܬܘ ܡܛܠܬܗܿ܆
                ܟܕ ܡܬܩܪܝܐ ܡܓܘܫ̈ܐ ܝܠܦܘܗܿ.
                ܐܙܠܘ ܡܟܝܠ ܒܬܟܝܠܘܬܐܼ.
                ܕܐܕܪܟܘ ܩܘܫܬܐ ܡܢ ܣܼܦܪ̈ܝܗܘܢ

            
            
                66
                ܕܬܟܦܘܪ ܡܟܝܠ ܠܐ ܡܨܝܐ ܗܘܬܼ.
                ܣܼܦܪ̈ܐ ܕܝܠܗܼܿ ܪܙܐ ܓܠܘ ܠܗܿ.
                ܗܘܼܐ ܩܪܝܢܗܿ ܣܗܕܐ ܘܐܟܣܼ.
                ܠܦܠܝܓܘܬܐ ܕܒܪܥܝܢܗܿ

            
            
                67
                ܒܟܠ ܕܟ̈ܬܝܒܢ ܠܫܡܝܟ ܫܘܒܚܐܼ.
                ܡܫܝܚܐ ܕܓܠܼܐ ܪ̈ܙܐ ܠܥܕܬܗ.
                ܕܐܢ ܗܼܘ ܕܬܛܥܐ ܩܼܪܬ ܒܢ̈ܒܝܐܼ.
                ܦܢܼܬ ܥܠ | ܐܘܪܚܐ ܕܗܝܡܢܘܬܐ
                 258 

            
            
                68
                ܐܦ ܥܠ ܒܝܬܟ ܢܒ̈ܝܐ ܡܠܠܘܼ.
                ܕܢܗܘܐ ܡܬܼܩܢ ܥܠ ܪܝܫ ܛܘܪܐ.
                ܘܐܝܟ ܕܝܠܦܢܢ ܡܛܠܬܗ܆
                ܗܐ ܨܒܬܢ ܚܢܢ ܐܣ̈ܝ ܫܘܒܚܟ