Balai of Balsh. “On Bishop Acacius - ܥܠ ܡܪܝ ܐܩܩ ܛܘܒܢܐ ܐܦܣܩܘܦܐܚܕܬܝܬ ܒܩܢܫܪܝܢ ܡܕܝܢܬܐ.” Based upon Julian Joseph Overbeck ed., S. Ephraemi Syri, Rabulae episcopi Edesseni, Balaei aliorumque Opera selecta e codicibus syriacis manuscriptis in museo Britannico et bibliotheca Bodleiana asservatis primus (Oxonii [Oxford]: Clarendoniano, 1865). Digital Syriac Corpus. Last modified November 30, 2019. https://syriaccorpus.org/504.
    
        
            
                On Bishop Acacius I
                

                    ܡܕܪ̈ܫܐ ܕܡܪܝ ܒܠܝ ܕܐܡܝܪܝܢ ܠܗܼ.
                    ܥܠ ܡܪܝ ܐܩܩ ܛܘܒܢܐ ܐܦܣܩܘܦܐ.
                    ܥܠ ܩܠܐܼ ܕܐܘ ܡܪܝ ܒܓܢܝ̈ܟ܀

                
                
                    1
                    ܐܒܘܢ ܒܥܝܕܟ ܥܼܒܿܕ ܒܝ ܛܝܒܘܬܐܼ.
                    ܘܩܿܪܒ ܒܥܘܬܐ ܠܡܪܟ ܕܢܬܠ ܠܝܿ.
                    ܕܐܿܡܪ ܢܨܚܢܟ

                
                
                    2
                    ܐܢܐܢܬ ܠܐ ܬܗܡܐܿ ܡܪܟܼ ܠܐ ܟܿܠܐ.
                    ܘܦܬܿܚ ܘܝܗܿܒ ܠܝ ܠܐ ܗܘܐ ܕܫܿܘܐ ܐܢܐܼ.
                    ܐܠܐ ܕܐܢܬ ܫܿܘܼܝܬ

                
                
                    3
                    ܦܘܟܠܗܝܢ ܦܐܝ̈ܬܐ ܕܩ̈ܢܝܢ ܬܫܒܘܚܬܐܼ.
                    ܒܥܘܡܪܟ ܟܢ̈ܝܫܢ ܗܘ̈ܝ. ܘܚܦܝܛ ܠܫܢܟܼ
                    ܘܙܪܥܿ ܙܗܝܘܬܐ

                
                
                    4
                    ܦܓܘ̈ܕܐ ܪܡܿܐ ܗܘܐ ܚܝܪܟ ܒܥܠܝܡܿܐܼ.
                    ܘܥܝܢܟ ܒ̈ܛܠܝܐ ܛܡܼܪܬ ܙܘܗܪܐܿ.
                    ܕܢܟܦܘܬܐ ܢܩܢܘܢ

                
                
                    5
                    ܐܝܢܐ ܕܫܿܡܥ ܗܘܐ ܠܡܠܬܟ ܘܡܗܿܝܡܢ܆
                    ܘܐܠܐ ܠܕܘܒܪܟ ܚܿܙܐ ܘܡܫܪ ܗܘܐܼ.
                    ܣܗܕܟܼ ܥܼܡܠܟ ܗܘܐ

                
                
                    6
                    ܠܚܘܒܐ ܕܐܠܗܐ ܥܡܼܪܬܝܗܝܼ ܒܥܒܿܕܐܼ.
                    ܘܒܬܪ ܕܩܢܝܬܝܗܝ ܒܡ̈ܠܐ ܦܠܓܿܬܝܗܝܼ.
                    ܕܢܼܣܓܘܢ ܠܟ ܚܒܪ̈ܐ

                
                
                    7
                    ܒܐܝܠܝܢ ܕܬܩ̈ܢܐ ܗܘܘܼ ܠܒܟ ܪܘܙ ܗܘܐ.
                    ܘܠܐܝܠܝܢ ܕܡܚܝܠܝܢ ܩܠܟ ܡܚܝܿܠ ܗܘܐܼ.
                    ܕܥܡ ܬܩܢ̈ܐ | ܢܪܕܘܢ
                     260 

                
                
                    8
                    ܠܐܝܢ ܕܩܿܢܼܐ ܗܘܐܿ ܡܠܟܬܝܗܝܼ ܕܠܐ ܢܘܒܕ.
                    ܘܠܐܝܢܐ ܕܚܣܝܪܐ ܗܘ ܡܢܟ ܫܿܡܥ ܘܠܐܼܝ
                    ܘܥܼܡܠܼ ܕܢܗܘܐ ܠܗ

                
                
                    9
                    ܕܥܬܝܪ ܫܡܼܥ ܡܢܟܼ ܕܓܙܗ ܢܗܐ ܡܢܿܬܗ܇
                    ܕܠܐ ܢܢܘܿܡ ܘܢܕܡܟ ܘܢܐܬܘܢ ܓܿܝܣ̈ܐܼ.
                    ܒܕܡ̈ܐ ܘܬܘܬܐ

                
                
                    10
                    ܐܝܕ ܡܘܫܛ ܗܘܝܬ ܕܢܩܘܡܘܢ ܕܢܦܠܘܼ.
                    ܒܡܠܬܟ ܣܿܡܟ ܗܘܝܬ ܠܐܝܢܐ ܕܩܐܡܿ ܗܘܐܿ.
                    ܕܠܐ ܢܿܦܠܼ ܘܢܡܘܬ

                
                
                    11
                    ܫܠܚܬܗܿ ܐܬܠܝܛܐ ܠܪܚܡܬ ܩ̈ܢܝܢܐ:
                    ܘܒܕܪܐ ܩܢܘܡܟ ܠܚܘܕܘܗܝ ܠܐܿܐ ܗܘܐܼ.
                    ܘܢܨܚܼ ܕܡܣܪܩ

                
                
                    12
                    ܪܕܝܼܬ ܒܗ ܕܠܐ ܕܚܼܠܐ ܒܢܐܪܒܐ ܕܓܝܿܣ̈ܐ:
                    ܕܩܢܘܡܟ ܒܠܚܘܕ ܒܥܠܡܐ ܥܼܒܪ ܘܛܥܼܢ.
                    ܚܠܦ ܥܘܬܪܐ ܚܘܒܐ

                
                
                    13
                    ܬܓܘܪܬܟ ܕܐܥܼܕܝܬ ܣܡܬܗܿ ܩܕܡ ܟܠ ܐܢܫ:
                    ܕܠܟ ܗܘܼ ܒܘܝܐܐ ܘܠܚܪܝܢ ܬܚܘܝܬܐܼ.
                    ܕܐܟܘܬܟ ܢܠܐܐ

                
                
                    14
                    ܐܨܛܢܥ ܒܝܪܫܐ ܘܒܟ ܚܒ̈ܝ ܨܢ̈ܥܬܗ:
                    ܕܠܒܝܫ ܐܢܬ ܦܓܪܐ ܘܠܐ ܒܼܪܨ ܒܟ ܓܐܪܐܼ.
                    ܕܫܪܝܢܟܼ ܨܘܡܐ ܗܘ

                
                
                    15
                    ܕܦܓܪܟ ܠܐ ܢܟܠܟܿ ܒܝܫܼܐܼ ܠܐ ܚܣܼܢܟ.
                    ܠܐ ܐܬܟܼܒܫ ܡܪܕܟ ܕܐܠܝܠܐ ܡܢܟ
                    ܠܐ ܩܡ ܕܠܩܘܒܠܟ

                
                
                    16
                    ܡܠܼܟܬܿ ܥܠ ܥܼܡܠܐ ܢܦܫܟܼ ܘܐܬܼܥܢܝܬ.
                    ܘܦܓܪܐ ܕܥܿܕܪ ܠܗܿ ܡܠܼܟܗܿ ܓܒܿܐ ܗܘܐܼ.
                    ܕܝܘܬܪܢ ܓܘܐ ܗܘܐ

                
                
                    17
                    ܥܝ̈ܕܘܗܝ ܫܼܒܩ ܦܓܪܐ ܘܣܼܡܟ ܠܘܬ ܢܦܫܐ:
                    ܘܕܚܙܬܗ ܕܠܘܗܿ ܠܚܡܗܿ ܐܘܟܠܬܗܼ.
                    ܨܘܡܐܼ ܘܨܠܘܬܐ

                
                
                    18
                    ܘܡܢ ܕܐܥܝܕ ܦܓܪܟ ܒ̈ܥܝܕܝ ܪܘܚܟܼ.
                    ܕܒܣܼܡ ܠܗ ܐܘܟܠܗܼܿ ܗܼܦܟ ܘܗܘܼܐ ܕܪܘܚܐܿ.
                    ܕܠܚܡܗ ܠܐ ܢܘܒܕ

                
                
                    19
                    ܘܕܘܒܪ̈ܐ ܛ̈ܒܐ ܐܬܩܢ ܠܗ ܓܦ̈ܐܿ. |
                     261 
                    ܠܦܓܪܐ ܕܥܡ ܢܦܫܐ ܢܦܪܚ ܘܢܡܿܛܐܿ.
                    ܠܗܿܘ ܢܘܗܪܐ ܕܥܕܢ
                
            

            
                On Bishop Acacius II
                
                    . ܕܬܪܝܼܢ ܒܪ ܩܠܗ .

                
                
                    1
                    ܩܢܘܡܐ ܚܕ ܗܘܐ ܠܟ ܐܘ ܐܒܘܢ ܣܒܐ܆
                    ܘܪܒܘ ܒܗ ܫܘܦܪ̈ܝܢ ܕܟܠ ܚܕ ܒܠܚܘܕܘܗܝܼ.
                    ܠܚܒܪ̈ܘܗܝ ܥܿܠܒ ܗܘܐ

                
                
                    2
                    ܘܐܝܢܐ ܕܚܿܙܐ ܗܘܐ ܬܗܿܪ ܘܬܡܿܗ ܗܘܐܿ.
                    ܕܒܚܕ ܒܪ ܐܢܫܐ ܐܝܬ ܒܗ ܕܡ̈ܘܼܬܐܿ.
                    ܕܟܐܢ̈ܐ ܣ̈ܓܝܐܐ

                
                
                    3
                    ܒܓܘܫܡܟ ܐܬܢܼܨܒܬܿ ܕܟܝܬܐ ܒܬܘܠܘܬܟ:
                    ܩܘܝ ܒܟ ܫܘܦܪܗܿ ܕܐܓܪ ܒܟ ܦܐܪܗܿ܆
                    ܒܛܘܒܗܿ ܐܥܬܪܬܟ

                
                
                    4
                    ܝܗܼܒܬ ܒܟ ܢܘܗܪܗܿ ܕܐܫܟܚܬܟ ܥܘܡܪܗܿ:
                    ܘܟܕ ܟܣܝܐ ܨܡ̈ܚܝܗܿ ܡܢܟ ܡܕܝܩܝܢ ܗܘܘܼ.
                    ܕܒܗ ܬܘܒ ܬܨܛܿܒܬ

                
                
                    5
                    ܛܼܪܕ ܬܘܒ ܨܒܝܢܟ ܪܓܬܐ ܡܢ ܓܘܫܡܟܼ.
                    ܕܠܐ ܬܣܚܐ ܨܐܬܐ ܕܬܘܟܡ ܓܐܝܘܬܐܿ.
                    ܕܡܪܝܬܐ ܢܦܫܐ

                
                
                    6
                    ܠܐ ܗܘܼܬ ܐܪܚܬܿܐ ܙܠܝܠܬܐ ܒܓܘܫܡܟܼ.
                    ܘܥܠ ܗܿܝ ܠܐ ܪܓܼܙܬ ܢܟܦܬܐ ܒܬܘܠܘܬܟ܇
                    ܕܟܠܗܝܢ ܫ̈ܢܝܗܿ ܥܡܟ

                
                
                    7
                    ܘܠܘܩܒܠ ܕܟܝܘܬܗܿ ܙܗ̈ܝܢ ܚܒܪ̈ܬܗܿ܇
                    ܨܘܡܐ ܙܕܩ̈ܬܐ ܘܡܥܕܪܝܢ ܗܘܘ ܠܗܿ܇
                    ܒܢܘܣܟ ܠܕܟܝܘܬܐ

                
                
                    8
                    ܩܝܿܡ ܗܘ ܛܘܒܐ ܕܝܗܼܒܬܿ ܠܐܿܠܝܐ:
                    ܠܐ ܛܠܼܡܬ ܥܘܡܪܐ ܕܗܘܼܐ ܒܗ ܢܘܚܗܿ܆
                    ܒܪܘܡܐ ܗܘܐ ܝܘܬܪܢܗܿ

                
                
                    9
                    ܚܝܠܟ ܓܢܒܪܐ ܚܼܣܢ ܒܟ ܥܣܩ̈ܬܐܼ.
                    ܕܦܟܪ̈ܝ ܦܓܪܟ ܦܣܿܩ ܨܒܝܢܟ܇
                    ܒܣܝܦܟ ܢܩܕܘܬܟ

                    ܓ̈ܠܝܢ ܘܕܢܝܚ̈ܢ ܕܒܓܘܫܡܟ ܣܝ̈ܡܢ܆
                    ܟܠܗܝܢ ܦܐܝ̈ܬܐ ܗܠܝܢ ܕܐܡܪܢܼܢ.
                    ܟܕ ܐܝܬ ܕܫܒܩܢ

                
                
                    10
                    ܫܘܦܪܐ ܕܫܒܪܘܬܟܼ ܢܛܪܬܗ ܥܠܝܡܘܬܟ.
                    ܕܡܢ ܟܪܣܐ ܕܟܝܐ ܘܠܩܒܪܐ ܙܗܝܐܼ.
                    ܒܢܘܚܡܐ ܓܒܼܝܐ ܐܢܬ

                
                
                    11
                    ܕܟܐ ܗܘܐ ܡܘܠܕܟ | ܘܙܿܗܐ ܥܘܢܕܢܟܼ.
                     262 
                    ܕܐܝܟ ܕܐܝܬܝܟ ܝܠܕܐ ܫܼܩܠ ܐܓܥܠܟ ܡܘܬܐ݂ܿ
                    ܠܩܒܪܐ ܕܠܐ ܚܘ̈ܒܐ

                
                
                    12
                    ܘܕܠܐ ܡܣܝܒܪ ܠܗܿ ܩܒܪܐ ܠܕܟܝܘܬܟ܆
                    ܝܿܠܕ ܘܝܗܿܒ ܠܟ ܠܥܘܒܐ ܕܡܠܟܘܬܐܼ.
                    ܟܕ ܒܟ ܦܐܝܘܬܟ

                
                
                    13
                    ܐܓܪ ܐܝܓܘܢܟ ܘܥܼܬܪ ܢܨܚܢܟܼ.
                    ܘܟܡܐ ܕܡܥܬܩ ܗܘܐܼ ܡܥܫܢ ܥܿܫܢ ܗܘܐܿ.
                    ܘܙܟܿܐ ܘܢܨܿܚ ܗܘܐ

                
                
                    14
                    ܠܣܒܐ ܥܣܼܩ ܪܕܐ ܕܦܫܝܩ ܠܥܠܝܡܿܐ:
                    ܘܥܼܡܠܬܿ ܣܝܒܘܬܟ ܘܥܠܝܡ̈ܐ ܬܗܼܪܘ ܒܗܿ܆
                    ܘܪܗܛܘܼ ܘܠܐ ܩܕܡܘܟ

                
                
                    15
                    ܚܝܨܐ ܗܘܬ ܪܓܠܟ ܒܗܠܟܬܐ ܕܐܘܪܚܐܿ.
                    ܕܢܩܼܠܬܿ ܙܗܝܘܬܟ ܫܒܝܠܐ ܡܢ ܟܐܦ̈ܐܿ.
                    ܕܬܪܕܐ ܕܠܐ ܩܢܛܐ

                
                
                    16
                    ܦܓܪܟ ܡܿܚܠ ܗܘܐ ܘܥܼܡܠܟ ܥܿܫܢ ܗܘܐ:
                    ܓܘܫܡܐ ܒܨܿܪ ܗܘܐ ܘܪܗܛܟ ܣܿܓܐ ܗܘܐܼ.
                    ܕܚܝܠܟܼ ܡܪܟ ܗܘܐ

                
                
                    17
                    ܥܒܕܘܗܝ ܓܘܪ̈ܓܚܐ ܠܦܓܪܐ ܫܪܕܘܕܐܼ.
                    ܕܚܢܩܘܗܝ ܩܘ̈ܦܚܐ. ܐܬܿܐ ܦܫ ܓܘܫܡܟܼ
                    ܕܢܦܫܐ ܥܝܪܐ ܒܗ

                
                
                    18
                    ܠܐ ܐܠܨܘܗܿ ܠܢܦܫܟ ܣܘܥܪ̈ܢܝ ܦܓܪܟ:
                    ܕܪܕܦܼܬܿ ܕܟܝܘܬܐ ܠܥܝ̈ܕܝ ܒܣܪܐܼ.
                    ܕܠܪܘܚܟ ܬܚܐ

                
                
                    19
                    ܥܩܒܟ ܣܝܡܐ ܗܘܬ ܥܠ ܪܝܫ ܪܫܘܦܐܼ.
                    ܕܠܐ ܢܗܦܘܟ ܪܢܝܟ ܘܢܕܒܘܨ ܠܩܢܘܡܟ܇
                    ܘܐܢܬ ܡܢܟ ܬܡܘܬ

                
                
                    20
                    ܘܡܪܟ ܕܪܚܡܬܝܗܝ ܚܝܿܠ ܬܪܥܝܬܟܼ.
                    ܕܒܓܘܗܿ ܬܐܚܘܕ ܘܬܩܛܘܠ ܚܘܫ̈ܒܐܿ.
                    ܫ̈ܥܛܐ ܒ̈ܢܝ ܦܓܪܐ

                
                
                    21
                    ܟܠܗܝܢ ܐܪ̈ܓܝܓܬܐ ܕܡ̈ܟܝ ܒܟ ܘܐܫܿܬܬܩܝ܆
                    ܘܗܘ̈ܝ ܡ̈ܝܬܬܐ ܕܡܼܛܘ ܝܪ̈ܚܝܗܝܼܢ.
                    ܘܠܐ ܢܦܩܘ ܥܼܘ̈ܠܝܗܝܢ

                
                
                    22
                    ܩܘܫܬܐ ܝܿܠܕ ܗܘܝܬ ܥܘܼܠܐ ܩܿܛܠ ܗܘܝܬܼ.
                    ܕܨܒܝܢܟ ܣܝܦܐ ܛܒܿܚ ܒܝܼܫ̈ܬܐܿ.
                    ܘܐܚܝ ܛܒ̈ܬܐ

                
                
                    23
                    ܕܦܓܪܟ ܚܿܣܢ ܗܘܝܬܼ ܠܡܪܕܐ ܟܒܿܫ ܗܘܝܬ.
                    ܕܦܿܠܛ ܡܢ ܓܘܫܡܗ ܠܐ ܐܝܬ ܕܙܟܿܐ ܠܗܼ.
                    ܠܟܠ ܙܟܝܼܬ ܕܙܟܝܬܝܗܝ

                
                
                    24
                    | ܦܝܢܚܣ ܛܢܿܢܐ ܕܥܘܫܢܗ ܕܟܝܘܬܗܼ.
                     263 
                    ܕܙܟܼܐ ܠܚܕ ܓܘܫܡܗܼ ܠܬܪܝܢ ܩܼܛܠ ܛܡ̈ܐܐܿ.
                    ܕܪܘܫܥܐ ܒܟܼܪ ܩܘܕܡܘܗܝ

                
                
                    25
                    ܘܐܦ ܠܟ ܛܘܒܢܐ ܛܢܼܢܟ ܡܠܟ ܗܘܐܿ.
                    ܕܠܦܓܪܟ ܬܥܨܐ ܘܠܢܦܫܟ ܬܫܡܥܿ.
                    ܕܬܪܝܗܘܢ ܢܚܘܢ
                
            

            
                On Bishop Acacius III
                

                    . ܕܬܠܬܐܼ ܒܪ ܩܠܗ .

                
                
                    1
                    ܒܕܡܘܬ ܐܘܡܢܐ ܙܝܢܐ ܚܫܿܠ ܗܘܝܬ܆
                    ܘܠܦܓܪܐ ܕܐܢܫܐ ܡܓܢ ܡܠܒܫ ܗܘܝܬܼ.
                    ܕܐܟܘܬܟ ܢܙܟܘܢ


                
                
                    2
                    ܒܥܕܢ ܬܟܬܘܫܐܼ ܒܩܕܡܐ ܢܦܩܿ ܗܘܝܬ.
                    ܘܐܡܬܝ ܕܫܝܢܐ ܗܘܐܼ ܒܙܝܢܐ ܥܼܡܠ ܗܘܝܬܿ.
                    ܕܬܠܒܫ ܠܚܪ̈ܢܐ

                
                
                    3
                    ܠܗܿ ܕܝܢ ܡܿܠܦ ܗܘܼܝܬܼ ܠܐܝܕܐ ܕܣܿܥܪ ܗܘܝܬ.
                    ܘܗܼܝ ܗܿܝ ܣܿܥܪ ܗܘܝܬܼ ܐܝܕܐ ܕܦܩܝܕܐܿ.
                    ܕܬܗܘܐ ܡܢ ܡܪܟ

                
                
                    4
                    ܦܘܡܟܼ ܐܡܿܪ ܗܘܐ ܘܥܼܡܠܟ ܣܿܗܕܐ ܗܘܐ:
                    ܕܦܐܪ̈ܘܗܝ ܕܬܘܪܓܡܟ ܟܢܦܟ ܡܠܝܐ ܗܘܬܼ.
                    ܥ̈ܒܿܕܐܼ ܘܦܘܠܚ̈ܢܐ

                
                
                    5
                    ܗܠܝܢ ܕܓܘ ܦܘܡܟܼ ܗ̈ܢܼܝܢ ܒܓܘ ܓܘܫܡܟ.
                    ܠܡܠܬܐ ܕܠܫܝܟ ܥܒܿܕܟ ܡܫܪܪ ܗܘܐܼ.
                    ܒܡ̈ܠܐ ܘܣܘܥܪ̈ܢܐ

                
                
                    6
                    ܕܡܘܼܬܐ ܐܝܟ ܕܟܬܝܒ ܒܢܦܫܟܼ ܡܚܘܐ ܗܘܝܬ.
                    ܕܠܘܩܕܡ ܣܥܿܪ ܗܘܝܬ ܡܕܡ ܕܐܡܿܪ ܗܘܝܬ

                
                
                    7
                    ܡܕܡ ܕܥܒܿܕ ܗܘܝܬ ܠܗܿ ܗܼܘ ܦܘܡܟ ܣܐܡܿ ܗܘܐ ܠܟܠ ܐܢܫ ܢܡܘܣܐ.
                    ܘܐܕܢܐ ܕܫܡܥܬܟ.
                    ܣܗܕܬ ܠܗܼ ܥܝܢܐ ܕܬܘܪܓܡܟ ܒܟ ܗܘܐ

                
                
                    8
                    ܒܣܿܡ ܠܫܿܡܘܥܐ ܝܘܠܦܢܟ ܐܒܘܢ..
                    ܕܦܪܝܣ ܥܠ ܝܘܩܢܟ ܡܐܡܪ ܠܫܢܟܼ.
                    ܘܣ̈ܗܕܢ ܒ̈ܒܬܐ

                
                
                    9
                    ܐܦܠܐ ܒܬܪܥܝܬܐ ܪܫܐܘܟ ܫ̈ܡܘܥܐܼ.
                    ܕܡܠܬܐ ܕܠܫܢܟܼ ܒܫܘܦܪܗ ܕܦܘܪܩܢܟ܇
                    ܩܒܝܥܐ ܒܓܘ ܓܘܫܡܟ

                
                
                    10
                    ܐܕ̈ܢܐ | ܘܒ̈ܒܬܐܼ. ܫܪܪܐ ܫܡ̈ܥܝ ܘܚ̈ܙܝ.
                     264 
                    ܕܟܕ ܫܡܥܐ ܐܕܢܐܼ ܗܐ ܒܣܡܐ ܥܝܢܐܿ.
                    ܒܫܡܥܐ ܘܒܚܙܬܐ

                
                
                    11
                    ܫܦܝܪ ܡܿܠܦ ܗܘܝܬܼ. ܡܛܠ ܕܥܒܿܕ ܗܘܝܬ.
                    ܘܐܬܩܒܠ ܡ̈ܠܝܟ ܡܛܠ ܦܘ̈ܠܚܢܝܟܼ.
                    ܕܡܪܟ ܥܕܪ ܒܟ

                
                
                    12
                    ܡܿܢ ܡܨܐ ܕܢܛܥܢ ܗܘܐ ܦܐܪ̈ܘܗܝ ܕܬܘܪܓܡܟ.
                    ܩܢܘܡܟ ܡܣܝܒܪ ܗܘܐ ܠܝܘܩܪܐ ܕܦܣܿܩ ܗܘܐܿ.
                    ܘܣܡܐ ܠܫܢܟ

                
                
                    13
                    ܚܕ ܗܘܐ ܐܝܠܢܟ ܘܦܐܪ̈ܘܗܝܼ ܣܓܝܐܝܢ.
                    ܕܒܚܕ ܒܪ ܐܢܫܐ ܫܘܦܪ̈ܐ ܕܠܐ ܡܢܝܼܢ.
                    ܕܥܠܝܟ ܦܪܝܣܝܢ ܗܘܘ

                
                
                    14
                    ܐܟܼ̈ܝ ܒ̈ܒܬܐ ܚܙܬܐ ܡܛܟܣܬܐܼ.
                    ܘܐܼܟܠܬ ܡܫܡܥܬܐ ܩܠܐ ܕܕܟܝܘܬܐܿ.
                    ܕܦܘܡܟ ܙܡܿܪ ܗܘܐ

                
                
                    15
                    ܟܠ ܝܘܡ ܡܬܩܛܦܝܢ ܦܐܪ̈ܐ ܕܣܘ̈ܟܬܟ܆
                    ܘܥܼܓܠ ܡܬܝܠܕܝܢ ܚܪ̈ܢܐ ܚܠܦܝܗܘܢܼ.
                    ܕܟܠܝܘܡ ܡܬܝܠܕܝܢ

                
                
                    16
                    ܬܘܟܠܢܟ ܡܪܟ ܕܢܨܒܗ ܠܩܢܘܡܟܼ.
                    ܥܠ ܡ̈ܝܐ ܚܝ̈ܐܼ ܘܟܠ ܝܘܡ ܡܦܪܥ ܗܘܝܬ܇
                    ܦܐܪܐ ܕܬܩܢܘܬܐ

                
                
                    17
                    ܫܠܝܚܐ ܟܬܼܒ ܣܦܼܪܐ ܕܪܘܚܐܼ ܘܩܒܠܬܝܗܝ.
                    ܬܗܼܪ ܒܟ ܕܬܚܿܬܝܗܝ ܘܠܐ ܗܘܐ ܕܩܪܝܬܗܝܼ.
                    ܐܠܐܼ ܕܢܛܪܬܝܗܝ

                
                
                    18
                    ܫ̈ܒܝܠܐ ܒܫ̈ܘܚܠܦܐ ܕܪܫܼ ܠܟ ܒܦܘܩ̈ܕܢܘܗܝܼ.
                    ܘܗܼܘܝܬ ܗܠܟܐ ܕܣܿܦܩ ܠܐܘܪ̈ܚܬܐܿ.
                    ܕܚܘܝ ܕܪܘܫܐ

                
                
                    19
                    ܒܟܘܪܐ ܕܐܘ̈ܠܨܢܘܗܝ ܥܼܒܪܬܿ ܚܐܪܘܬܟ.
                    ܒܕܝܠܗ ܚܿܙܐ ܗܘܝܬ ܒܕܝܠܟ ܪܘܙ ܗܘܝܬܼ.
                    ܕܕܡܿܝ ܒܗ ܥܡܼܠܟ

                
                
                    20
                    ܒܝܡܐ ܘܒܝܡ̈ܡܐ ܐܟܪܙܬ ܘܐܬܛܿܪܦܼ.
                    ܘܗܐ ܒܝܡܐ ܐܦ ܐܢܬܼ ܘܒܐܪܒܥ ܦܢܝ̈ܬܐܿ.
                    ܒܥܕܬܐ ܥܡܼܠܟ


                    ܨܦܬܐ ܗܿܝ ܕܟܬܼܒ ܫܠܝܚܐ ܠܒܫܬܗܿ ܗܘܝܬ܆
                    ܘܡܛܠ ܥܕ̈ܬܐ ܒܟܠ ܕܘܟ ܥܿܡܠ ܗܘܝܬܼ.
                    ܕܠܡܪܟ ܬܢܝܚ

                
                
                    21
                    ܠܫܘܪܐ ܕܚܪܝܢܐܼ ܒܫܝܢܟ ܬܿܪܥ ܗܘܝܬ.
                    ܘܪ̈ܡܬܐ ܕܪܘܓܙܐ ܒܚܘܒܐ ܡܡܟܟ ܗܘܝܬܼ.
                    ܕܥܕܬܐ | ܬܫܬܝܢ
                     265 

                
                
                    22
                    ܝܘܩܪܐ ܝܩܝܪܐ ܚܫܒܬܝܗܝ ܩܠܝܠܐܼ.
                    ܕܥܼܡܠܐ ܡܘܣܦ ܗܘܝܬܼ. ܕܠܐܓܪܐ ܥܿܗܕ ܗܘܝܬ܇
                    ܕܩܨܝܨ ܠܠܐܝܘܬܟ

                
                
                    23
                    ܒܥܘܬܐ ܫܿܐܠܬ ܘܠܫܪܒܟ ܩܿܪܒܬ:
                    ܢܦܪܐ ܒܟ ܠܫܢܝ ܕܪܚܡܬܟ ܬܪܥܝܬܝܼ.
                    ܠܡܪܟ ܐܫܦܪ ܒܟ
                
            

            
                On Bishop Acacius IV
                

                    . ܕܐܪܒܥܐܼ ܒܪ ܩܠܗ .

                
                
                    1
                    ܠܫܪܒܟ ܥܿܛܦ ܐܢܐ ܕܡܢܟ ܐܬܥܕܪ܆
                    ܕܐܚܒܒ ܚܘܒܟ ܕܠܐ ܫܿܪܐ ܡܓܢ܇ ܠܗܘܢܐ ܕܗܿܕܣ ܒܗ

                
                
                    2
                    ܟܠܝܘܡ ܒܿܥܐ ܗܿܘܝܬ ܕܚܙܝܬܝ ܐܨܕ ܒܟ:
                    ܘܕܚܕܝ ܒܟ ܡܕܥܝ ܬܒܣܡ ܒܟ ܒܥܘܬܝܼ.
                    ܘܬܩܕܝܟ ܪܚܡܬܝ

                
                
                    3
                    ܪܥܝܢܝ ܪܦܬܿ ܒܟ ܘܠܫܢܝ ܐܿܠܨ ܠܗܼ.
                    ܕܠܐ ܣܿܦܩ ܓܠܝܐ ܕܢܿܦܩܼܟ ܟܣ̈ܝܬܐܿ.
                    ܕܡܬܚܿܫܒ ܗܘܢܐ

                
                
                    4
                    ܕܒܥܼܐ ܕܢܬܗܪ ܒܟ ܐܬܿܐܼ ܘܚܿܙܐ ܗܘܐܿ.
                    ܥܘܡܪܟ ܕܡ̈ܣܟܢܐ ܘܐܝܕܟ ܕܝܗܘ̈ܒܐܿ.
                    ܕܥܕ ܝܿܠܕܐ ܒܛܢܼܬ

                
                
                    5
                    ܟܠܝܘܡ ܙܪܥܿ ܗܘܝܬ ܘܐܘܨܪܟ ܣܿܓܐ ܗܘܐܼ.
                    ܘܐܝܕܟ ܕܪܘܝܚܐܼ ܠܐ ܙܟܼܬ ܠܥܘܬܪܟ ܕܒܐܝܕܟ܇
                    ܡܪܟ ܝܗܿܒ ܗܘܐ

                
                
                    6
                    ܡܣܟܝܢ ܗܘܐ ܥܘܡܪܟ ܘܐܝܕܟ ܥܬܝܪܐܼ݂
                    ܕܟܠܝܘܡ ܡܠܝܐ ܗܘܬ ܠܟܦ̈ܢܐܢ ܬܘܪܣܝܐܿ.
                    ܦܐܪ̈ܐ ܕܙܕܩ̈ܬܐ

                
                
                    7
                    ܠܥܝܕܐ ܕܐܝܕܟܼ ܡܪܢ ܙܐܢ ܗܘܐܿ.
                    ܕܥܝܕܟ ܢܩܘܐ ܕܐܩܢܝܬܗܿ ܠܥܝܕܟ܇
                    ܪ̈ܚܡܼܐ ܕܝܗܘܒܐ

                
                
                    8
                    ܬܘ̈ܢܐ ܕܥܘܡܪܟ ܣܦܝܩܝܢ ܘܣܪܝܩܝܼܢ.
                    ܘܥܘܒ̈ܐ ܕܨܒ̈ܥܬܟ ܡܿܠܼܝܼܢ ܘܡܬܐܫܕܝܢ܇
                    ܠܟ̈ܦܢܐ ܣܒܥܘܬܐ

                
                
                    9
                    ܐܙܼܕܟܼܝܬܿ ܐܝܕܟ ܕܪܒܼܐ ܠܗ ܓܙܟ܆
                    ܕܬܬܠ ܡܡܿܪܐ ܘܝܬ ܘܡܠܘܐܟ ܥܫܢܟܼ.
                    ܕܡܪܟ ܪܒ ܡܢܟ

                
                
                    10
                    ܘܕܥܒܼܕܬ ܦܘܩ̈ܕܢܘܗܝ ܥܒܼܕ ܗܼܘ ܨܒܝܢܟܼ.
                    ܕܩܪܝܬܝܗܝ ܘܥܢܟ ܘܟܫܼܐ ܣܝܡ̈ܬܐܿ.
                    ܕܐܝܕܟ ܬܫܬܒܚ

                
                
                    11
                    ܫܩܠܬ ܡܢ | ܡܪܟ ܐܓܪܐ ܚܠܦ ܕܝܠܟܼ.
                     266 
                    ܘܥܦܗܿ ܘܡܘܣܦ ܠܟ ܕܐܠܼܦܬ ܠܚܪ̈ܢܐܿ.
                    ܕܢܚܙܘܢ ܘܢܕܡܿܘܢܿ

                
                
                    12
                    ܐܝܟ ܝܐܝܒܐ ܠܨܘܡܐ ܒܚܘܒܐ ܩܿܪܒ ܗܘܝܬ܆
                    ܘܫܿܪܝܬܼ ܒܡܫܟܐ ܠܟܪܣܐ ܒܒ̈ܣܝܬܐܼ.
                    ܒܘܣܡܟܼ ܒܥܕܢ

                
                
                    13
                    ܠܐ ܐܟܠܼܬ ܝܥܢܐܝܬܼ ܘܠܐ ܨܡܼܬ ܚܬܝܪܐܝܬ.
                    ܦܿܠܓܼܬ ܡܬܩ̈ܠܐ ܠܘܩܒܠ ܛܥܘ̈ܢܐܼ.
                    ܘܗܠܝܼܢ ܠܟܘܠܠܟ

                
                
                    14
                    ܘܐܡܬܝ ܕܐܟܿܠ ܗܘܝܬ ܠܨܘܡܐ ܦܿܠܚ ܗܘܝܬ܆
                    ܕܦܬܘܪܟ ܕܟܝܐ ܐܘܟܠܗ ܨܘܡܐ ܗܘܐܼ.
                    ܕܦܓܪܐ ܗܘ ܣܡܟ ܗܘܝܬ

                
                
                    15
                    ܕܠܐ ܢܬܚܼܒ ܓܘܫܡܐ ܘܢܦܘܫ ܡܢ ܪܗܛܐܼ.
                    ܙܟܝܬܝܗܝ ܕܠܐ ܬܥܪܘܩ ܡܢ ܓܘܗ ܢܦܫܐܿ.
                    ܥܕ ܣܥܪܐ ܐܘܪܚܗܿ

                
                
                    16
                    ܨܝܡܐ ܛܪܩܐ ܠܐ ܥܒܪܟ ܣܒܐ ..
                    ܘܕܒܩܘܟ ܕܡܚܝܠܝܼܢ ܘܐܡܬܢܬܝܗܝ ܨܘܡܟ܇
                    ܠܘܩܒܠ ܗ̈ܠܟܐ

                
                
                    17
                    ܠܐ ܐܬܚܬܪ ܨܘܡܟ ܥܠ ܐܝܢܐ ܕܡܚܼܝܠ܆
                    ܘܠܐ ܐܬܢܙܪ ܦܘܡܟ ܥܠ ܐܝܢܐ ܕܐܟܿܠܼ.
                    ܕܥܡ ܟܠ ܟܠ ܬܗܘܐ

                
                
                    18
                    ܬܗܪܐ ܚܼܙܝܢ ܚܢܢ ܒܟ ܢܫܒܚ ܠܦܘܪܫܢܟ܆
                    ܕܟܕ ܐܟܿܠܼܬ ܨܘܡܐ ܗܘ. ܘܟܕ ܨܝܿܡܼܬ ܐܘܟܠܐ ܗܘܼ.
                    ܘܥܒܿܕܗܘܢܼ ܚܕ ܗܘ

                
                
                    19
                    ܐܟܠܼܬ ܓܝܪ ܕܠܐ ܬܚܣܪ. ܘܨܡܼܬ ܬܘܒܼ ܕܠܐ ܬܟܫܠ.
                    ܐܘܟܠܟ ܥܘܕܪܢܐ ܗܘ ܘܨܡܟ ܝܘܬܪܢܐ ܗܘܼ.
                    ܕܡܘܼܬܟ ܬܩܘܐ ܒܢ

                
                
                    20
                    ܫܿܠܡܼܬ ܕܟ̈ܬܝܒܢ ܘܠܐ ܐܟܠܼܬ ܒܠܚܘܕܝܟ܆
                    ܘܒܕܓܘܢ ܨܐܡ ܗܘܝܬ ܕܥܡ ܟܠ ܟܠ ܬܗܘܐܼ.
                    ܕܠܣܡ̈ܝܟܐ ܬܥܕܪ

                
                
                    21
                    ܐܘܪܬ ܦܬܘܪܟ ܒܕܡܘܬ ܬܘܪܓܡܟܼ.
                    ܕܦܘܡܟ ܩܕܝܫܐ ܫܒܚ ܙܗܝܐܝܬܼ.
                    ܘܐܟܼܠ ܕܟܝܐܝܬ

                
                
                    22
                    ܕܡܿܠܠ ܟܣ̈ܝܬܐ ܘܐܟܼܠ ܕܟܝ̈ܬܐ܆
                    ܘܬܪܓܡ ܥܠ ܨܘܡܐ ܘܚܣܼܠ ܣ̈ܦܘܬܗܼ.
                    ܕܡܠܬܗܼ ܒܗ ܬܫܠܡ

                
                
                    23
                    ܘܥܕܪ ܠܢ | ܨܘܡܟ ܘܐܘܬܪ ܦܬܘܪܟܼ.
                     267 
                    ܕܐܕܢܐ ܪܘܼܙܬ ܒܟܼ ܘܟܪܣܐ ܙܓܼܪܬ ܒܟ܇
                    ܪܓܼܬ ܒܘܣܪܢܐ

                
                
                    24
                    ܠܟܠ ܐܢܫ ܕܡܿܠܦ ܗܘܝܬ ܕܡܘܬܼܐ ܩܐܡ ܗܘܝܬ܆
                    ܕܫܠܝܚܐ ܕܟܬܼܒ ܢܚܕܐ ܕܫܡܠܝܬܝܗܝܼ.
                    ܕܒܩܢܘܡܟ ܚܿܙܝܼܬ

                
                
                    25
                    ܒܥܕܬܐ ܙܗܝܘܬܟ ܒܫܘܩܐ ܢܟܦܘܬܐܼ.
                    ܥܕܬܐ ܛܥܝܢ ܠܒܟ ܒܟܠ ܕܘܟ ܕܫܿܪܐ ܗܘܐܿ.
                    ܦܓܪܟ ܩܕܝܫܐ

                
                
                    26
                    ܥܢܐ ܕܪܚܡܬܟ ܒܟܠ ܕܘܟ ܠܘܝܐ ܠܟܼ.
                    ܕܬܐܬܪ ܡܢ ܩܠܟ ܘܬܪܥܐ ܒܚܙܬܟ܆
                    ܛܘ̈ܦܣܐ ܡܢ ܦܓܪܟ
                
            

            
                On Bishop Acacius V
                

                    . ܕܚܡܫܐܼ ܒܪ ܩܠܗ .

                
                
                    1
                    ܡܟܝܠ ܐܫܬܒܗܪ ܕܐܝܓܘܢܝ ܐܫܿܬܠܡܼ.
                    ܘܬܨܘܬܢܝ ܦܪܘܩܝ ܕܩܿܢܝܬ ܓܠܝܘܬܐܿ.
                    ܕܠܐ ܥܿܨܝܬ ܦܘܩܕܢܟ

                
                
                    2
                    ܒܥܕܢ ܦܘܪܫܢܐ ܙܕܩ ܫܘܒܗܪܐܼ.
                    ܕܠܐ ܐܝܬ ܬܘܟܠܢܐ ܥܕܡܐ ܠܥܘܢܕܢܐܼ.
                    ܕܢܟܠܐ ܡܠܝܢ ܚ̈ܝܐ

                
                
                    3
                    ܟܠ ܝܘܡ̈ܝ ܚܝ̈ܝ ܒܩܢܛܐ ܡܗܠܟ ܗܿܘܝܬ܆
                    ܕܡܛܘܠ ܡܪ̈ܗܛܝ ܒܨܦܬܐ ܪܕܿܐ ܗܿܘܝܬܼ.
                    ܡܟܝܠ ܦܫ ܩܢܛܐ

                
                
                    4
                    ܚܼܬܿܡܐ ܗܘ ܥܘܢܕܢܐ ܕܢܿܛܪ ܬܓܘܪܬܐܼ.
                    ܕܡܩܿܒܠ ܪܗܛܐ ܘܡܿܫܠܼܡ ܓܘܥܠܢܐܼ.
                    ܠܟܠܢܫܼ ܐܝܟ ܥܼܡܠܗ

                
                
                    5
                    ܡܬܚܝܒܠܝܢ ܦܓܪ̈ܐ ܘܡܬܢܛܪܝܢ ܥܼܡ̈ܠܐ:
                    ܘܡܬܢܚܡܝܢ ܓܘܫ̈ܡܐ ܘܐܬܿܝܢ ܣܘܥܪ̈ܢܐܼ.
                    ܘܡܢܗܘܢ ܦܘܪ̈ܥܢܐ

                
                
                    6
                    ܫܬܩ ܡܠܼܐ ܙܒܢܐ ܦܓܪܐ ܥܠ ܥܦܪܐܼ.
                    ܘܐܝܟ ܕܒܼܛܠ ܙܘ̈ܥܘܗܝ ܠܐ ܡܬܛܥܝܢ ܥܼܡ̈ܠܘܗܝܼ.
                    ܕܟܬܘܒܗܘܢ ܚܟܝܡ.

                
                
                    7
                    ܣܥܪܢܢ ܘܛܥܝܢܢ ܘܐܢܬ ܢܿܛܪܬܼ ܕܝܠܼܢ.
                    ܒܥܕܢ ܢܘܚܡܐ ܡܬܩܪܝܢ ܒܡܫܡܥܬܢ܇
                    ܥ̈ܒܿܕܐ ܕܦܠܚܢܢ

                
                
                    8
                    ܘܕܛܼܥܐ ܛܒ̈ܬܗ ܢܒ̈ܥܢ ܩܕܡ ܥܝܢ̈ܘܗܝܼ.
                    ܘܛܘܒܘܗܝ ܡܐ ܕܚܼܙܐ ܕܠܐ ܥܒܪ ܠܛܒ̈ܬܗ
                    ܡܢܝܢ ܒܝ̈ܫܼܬܗ

                
                
                    9
                    ܒܥܠܡܐ ܩܿܢܛ | ܗܿܘܝܬ ܕܐܬܢܐ ܠܟ ܥܼܡ̈ܠܝܼ.
                     268 
                    ܕܒܝܫܼܐ ܒ̈ܥܼܠܠܬܐ ܦܚ̈ܐ ܛܿܡܪ ܗܘܐܼ.
                    ܦܿܠܛܬ ܡܢ ܢܫ̈ܒܘܗܝ

                
                
                    10
                    ܥܠ ܬܪܥܟ ܩܿܡܬ ܒܠܠܝܐ ܘܒܐܝܡܡܐܼ.
                    ܕܢܣܿܝܬ ܕܠܐ ܫܿܪܝܼܬ ܡܓܢ ܠܢܩ̈ܘܫܐܿ.
                    ܐܢ ܡܓܪܝܢ ܪܘܚܐ

                
                
                    11
                    ܠܡܐܐ ܫ̈ܢܝܢ ܚܝ̈ܝ ܒܐܓܪܐ ܡܛܘ ܥܡܟܼ.
                    ܘܐܝܟ ܝܘܡܐ ܩܕܡܐ ܥܿܡܠܬ ܒܐܚܪܝܐܼ.
                    ܕܠܟ ܐܣܓܐ ܐܫܦܪ

                
                
                    12
                    ܐܿܘܪܬ ܓܘܪܓܐ ܐܝܟ ܣܝܡܬܐ ܠܒ̈ܢܝܼ.
                    ܕܢܩܢܘܢ ܡܪ̈ܗܛܐ ܕܒܝܘܡ ܥܘܢܕܢܐܿ.
                    ܡܩܢܝܢ ܫܘܒܗܪܐ

                
                
                    13
                    ܫܡܥܬܟ ܦܪܘܩܐ ܘܢܿܛܪܬ ܦܘܩܕܢܟܼ.
                    ܘܡܟܝܠ ܒܥܿܐ ܐܢܢܐ ܦܘܫܪܢܐ ܕܡܿܠܝܟ܇
                    ܠܟܐܢ̈ܐ ܕܢܩܦܘ ܠܟ

                
                
                    14
                    ܟܠܝܘܡ ܣܛܢܐ ܩܪ̈ܒܘܗܝ ܡܚܿܠܦ ܗܘܐ:
                    ܒܣܟܪܐ ܕܗܝܡܢܘܬܝ ܓܐܪ̈ܘܗܝ ܡܘܪܥ ܗܿܘܝܬܼ.
                    ܘܬܿܒܪܬ ܙܟܘܬܗ

                
                
                    15
                    ܠܐ ܥܿܒܕܬ ܪܓܬܝ ܒܫܪܝܢܝ ܫܪ̈ܝܬܐ܆
                    ܘܠܐ ܗܘܼܐ ܠܠܘܠܝܬܐ ܐܬܪܐ ܒܬܢܘܪܐܼ.
                    ܕܟܘܪܟ ܢܣܟܗ ܠܝ

                
                
                    16
                    ܐܝܬܒ ܘܨܿܠܿܐ ܠܝ ܒܝܫܼܐ ܘܠܐ ܨܕܢܝܼ.
                    ܘܚܙܢܝ ܘܟܼܪܝܝܬܿ ܠܗ ܕܠܐ ܣܡ ܒܦܿܠܚܟ܇
                    ܚܕܐ ܫܘܡܬܐ ܕܣܢܝܐ

                
                
                    17
                    ܥܒܿܪܬ ܒܝܬ ܢܟ̈ܠܘܗܝ ܘܠܐ ܥܪܩܠܘܢܝ ܢܫ̈ܒܘܗܝܼ.
                    ܘܩܿܡܬ ܒܩܪ̈ܒܘܗܝܼ ܘܢܿܛܪܬ ܗܕܡ̈ܝ܇
                    ܡܢ ܣܘܪܛܬܐ ܕܓܐܪܗ

                
                
                    18
                    ܠܐ ܨܕܢܝ ܢܟܠܗ ܘܠܐ ܕܒܨܢܝ ܣܝܦܗܼ.
                    ܕܫܿܬ ܒܝܬ ܦܚ̈ܘܗܝ ܘܥܒܿܪܬ ܒܝܬ ܓܐܪ̈ܘܗܝܼ.
                    ܘܢܿܦܩܬ ܙܟܝܐ

                
                
                    19
                    ܠܟ ܚܕܘܬܐ ܒܥܘܢܕܢܝ ܕܢܿܛܪܬ ܩܢܘܡܝ ܕܟܝܐܼ.
                    ܘܠܒܥܠܕܒܒܝ ܐܒܠܐ ܕܠܐ ܚܝܒܢܝ ܢܟܠܗ܇
                    ܘܠܐ ܐܚܣܪܢܝ ܓܐܪܗ

                
                
                    20
                    ܥܡܝ ܚܼܙܩܬܿ ܚܕܘܬܝ ܕܠܟ ܚܕܘܬܐ ܗܘ ܥܘܢܕܢܝܼ.
                    ܘܕܡܥܩ ܒܥܠ ܪܕܐ ܛܒ ܪܘܙܐ ܬܪܥܝܬܝܿ.
                    ܕܦܿܠܛܬ ܘܠܐ ܠܒܟܢܝ

                
                
                    21
                    ܫܒܩܬܢܝ ܥܡ ܒܝܼܫܐ ܕܐܥܒܕ ܬܟܬܘܫܐܼ.
                    ܘܠܐ ܐܿܙܥܪܬ ܫܘܒܚܟ | ܕܠܐ ܐܙܕܟܝ ܥܒܼܕܟ܇
                     269 
                    ܡܢ ܣܢܐܐ ܕܩܘܫܬܟ

                
                
                    22
                    ܒܥܘܕܪܢܟ ܦܪܘܩܝ ܩܪܒܗ ܡܫܿܗܐ ܗܘܿܝܬܼ.
                    ܘܟܠ ܝܘܡ ܡܿܩܼܪܒ ܗܘܐ ܘܟܠ ܝܘܡ ܒܗܿܬ ܗܘܐܼ.
                    ܒܙܝܢܟ ܙܟܐ ܗܿܘܝܬ

                
                
                    23
                    ܠܐ ܙܟܢܝ ܒܩܪ̈ܒܘܗܝ ܕܥܡܝ ܗܘܬ ܛܝܒܘܬܟܼ.
                    ܗܦܼܟ ܣܡ ܠܝ ܫܕܠܐ. ܘܐܢܐ ܕܢܣܝܬܗܼ.
                    ܒܣܿܪܬ ܪ̈ܓܝܓܬܗ

                
                
                    24
                    ܚܡܪܗ ܡܣܠܐ ܗܘܿܝܬ ܕܚܠܟ ܥܗܕ ܗܘܿܝܬܼ.
                    ܦܘܪ̈ܦܥܐ ܫܿܛܬ ܕܥܗܿܕܬ ܠܡܪܪ̈ܐ܇
                    ܕܦܠܚܼܘܗܝ ܩܿܪܒܘ ܠܟ

                
                
                    25
                    ܙܩܿܦܬ ܠܟ ܚܝ̈ܝ ܕܪܢܿܝܬ ܒܨܠܝܒܟܼ.
                    ܘܦܫܿܛܬ ܠܟ ܐܝ̈ܕܝ ܕܚܿܙܝܬ ܥܠ ܩܝܣܐܿ.
                    ܕܝܠܟ ܕܡ̈ܬܝܚܢ


                    ܒܙܚܟ ܫܿܡܥ ܗܘܿܝܬ ܘܒܐܝܩܪ ܡܒܣܐ ܗܘܿܝܬܼ.
                    ܪܘܩܟ ܥܿܗܕ ܗܘܿܝܬ ܘܠܩܢܘܡܝ ܐܿܠܨ ܗܘܿܝܬ܇
                    ܕܢܛܥܢ ܘܢܣܝܒܪ

                
                
                    26
                    ܒܟܘܬܝܢܟ ܕܐܫܠܚܘ ܫܿܛܬ ܠܠܒܘܫܐ.
                    ܕܝܩܪܬܗ ܠܨܥܪܟ ܒܠܒܘܫܝ ܕܡܡܟܟܼ.
                    ܟܣܢܝ ܬܫܒܘܚܬܟ