“Cause of all Causes: Book 1 - ܡܐܡܪܐ ܩܕܡܝܐ ܕܥܠ ܝܕܥܬܐ ܕܫܪܪܐ .” Based upon C. Kayser ed., Das Buch von der Erkenntniss der Wahrheit oder der Ursache aller Ursachen (Leipzig: J.C. Hinrichs’sche Buchhandlung, 1889). Digital Syriac Corpus. Last modified November 30, 2019. https://syriaccorpus.org/506. Book 1 Chapter 1 ܬܘܒ ܟܕ ܡܼܢ ܡܪܐ ܛܒܿܐ ܡܬܚܝܠܝܼܢܢ. ܘܡܼܢ ܛܒܿܘܬܗ ܐܠܗܿܝܬܐ ܡܬܚܟܡܝܼܢܢ. ܡܫܪܝܢܢ ܒܡܐܡܪܐ ܩܕܡܝܐ ܕܥܠ ܝܕܥܬܐ ܕܫܪܪܐ ܕܠܘܬ ܟܿܠܗܘܿܢ ܥܡܼܡ̈ܐ ܕܬܚܝܼܬ ܫܡܿܝܐ. ܐܝܼܬ ܒܗ ܩܦ̈ܠܐܐ ܥܣܪܐ. ܩܦܠܐܘܢ ܐܘܟܝܼܬ ܪܝܼܫܐ ܩܕܡܝܐ ܥܠ ܗܿܝ ܕܡܢܐ ܘܿܠܐ ܠܒܪܢܫܐ ܠܡܼܕܥ ܘܠܡܐܠܦ ܒܪܢܫܐ ܡܿܢ ܗܟܝܼܠ ܐܝܼܬܘ̄ ܚܝܐ ܡܠܝܼܠܐ ܡܿܝܘܬܐ. ܕܡܒܪܟܒ ܡܼܢ ܢܦܫܐ ܚܝܬܐ ܘܡܠܝܼܠܬܐ. ܕܒܟܝܿܢܗܿ ܫܦܝܪܐ ܘܢܗܝܼܪܐ. ܘܥܠܗܿܝ ܐܝܼܬܝܗܿ ܡܩܒܠܢܝܼܬܐ ܕܗܘܢܐ ܘܕܝܼܕܥܬܐ ܐܡܝܼܢܐܝܬ ܘܕܠܐ ܣܟܐ. ܘܡܼܢ ܦܓܪܐ ܗܘܼܠܢܝܐ ܘܝܩܝܼܪܐ ܕܡܩܝܡ ܡܼܢ ܐܪܒܥܐ ܐܣܛܘܼܟ̈ܣܐ. ܕܡܢܼܗܘܢ ܡܩܝܡ ܘܡܛܟܣ ܥ݀ܠܡܐ ܗܿܢܐ ܟܿܠܗ ܡܬܚܙܝܢܐ. ܘܡܛܠ ܕܠܐ ܐܝܼܬܘܗܝ ܐܝܟ ܚܝ̈ܘܬܐ ܐܚܪ̈ܢܝܬܐ ܕܠܐ ܡܠܼܬܐ. ܐܠܐ ܡܫܘܬܦ ܒܡܠܼܬܐ ܕܝܼܕܥܬܐ. ܘܐܝܼܬ ܒܗ ܟܝܿܢܐ ܕܡܩܒܠ ܝܼܕܥܬܐ ܟܡܐ ܕܡܬܝܗܒܐ ܠܗ ܚܟܼܡܬܐ. ܘܡܿܨܐ ܣܿܠܩ ܘܡܼܬܥܠܐ ܒܝܼܕܥܬܗ ܘܗܘܢܐ ܥܕܡܐ ܠܪ̈ܘܡܐ ܠܐ ܡܬܡܫ̈ܚܢܐ ܘܠܐ ܡܣܬܝܟ̈ܢܐ. ܐܝܠܝܢ ܕܠܘ ܡܼܢ ܟܬܒܐ ܘܠܐ ܡܼܢ ܫܡܥܐ ܝܿܠܦ ܘܝܿܕܥ ܠܗܝܢ ܐܠܐ ܡܼܢ ܛܟܼܣܐ ܫܒܝܼܚܐ ܕܕܘܒܪ̈ܐ ܡܝܬܪ̈ܐ ܕܡܚܘܐ ܒܩܢܘܼܡܗ. ܙܿܕܩ ܠܗ ܕܢܒܼܥܐ ܘܢܥܩܒ ܘܢܐܠܦ ܐܡܝܼܢܐܝܼܬ. ܕܡܢܐ ܟܝ ܐܝܼܬܘܗܝ ܗܼܘ ܟܝܿܢܗ ܕܝܼܠܗ ܕܒܪܐܢܫܐ. ܘܠܡܢܐ ܐܝܼܬܘ̄ ܘܡܛܠܡܢܐ. ܡܛܠ ܕܛܟܼܣܐ ܐܝܼܬ ܠܟܿܠ ܡܕܡ. ܘܐܦ ܙ݀ܕܩ ܠܗ ܕܒܛܟܼܣܐ ܢܬܚܫܚ ܘܢܕܥ ܕܡܢܐ ܘܿܠܐ ܠܗ ܩܕܡܐܝܼܬ ܕܢܐܠܦ ܘܢܼܕܥ. ܘܡܼܢ ܐܝܟܐ ܢܫܼܪܐ ܒܝܘܼܠܦܢܐ ܕܝܕܥܬܗ ܕܫܪܪܐ. ܘܐܝܿܕܐ ܗܿܝ ܫܬܐܣܬܐ ܩܕܡܝܬܐ ܕܙ݀ܕܩ ܕܢܪܡܐ ܘܕܐܝܟ ܐܝܠܝܢ ܒܢܝ̈ܢܐ 14 ܐܝܬ ܠܗ ܕܢܒܼܢܐ ܥܠܝܗܿ. ܘܕܥܕܡܐ ܠܐܝܟܐ ܢܣܩ ܘܢܼܬܥܠܐ ܒܢܝܿܢܗ. ܘܕܡܼܢ ܐܝܿܟܐ ܢܫܪܐ ܒܐܘܼܪܚܐ ܗܕܐ ܕܝܼܕܥܬܐ ܕܫܪܪܐ ܕܦܪܫܐ ܫܪܪܐ ܡܼܢ ܕܓܠܘܼܬܐ. ܘܢܘܼܗܪܐ ܡܼܢ ܚܫܘܼܟܐ. ܘܩܘܫܬܐ ܡܢ ܫܘܼܩܪܐ. ܘܝܕܥܬܐ ܡܼܢ ܛܥܿܝܘܼܬܐ. ܘܡܛ݀ܠ ܕܟܿܠ ܕܡܗܠܟ ܒܢܘܼܗܪܐ܆ ܠܐ ܛܥܿܐ ܘܠܐ ܡܬܬܘܗܝ. ܐܠܐ ܝܿܕܥ ܐܝܟܢܐ ܡܗܠܟ ܘܠܐܝܟܐ ܐܙܿܠ. ܘܡܿܛܐ ܠܐܝܟܐ ܕܨ݀ܒܐ ܘܡܫܼܬܡܠܐ ܢܝܼܫܗ ܕܣܝܼܡ ܒܪܥܝܿܢܗ. ܘܡܩܒܠ ܣܘܼܟܝܗ ܘܗܿܘܐ ܠܗ ܫܘܼܠܡܐ ܛܒܿܐ ܠܣܘܥܪܢܗ. ܘܚܪܬ ܫܦܝܼܪܬܐ ܠܟܿܠܗ ܕܘܼܒܪܗ. ܡܿܢ ܕܝܢ ܕܪܕܐ ܒܚܫܘܟܐ ܠܐ ܝܿܕܥ ܠܐ ܐܙܿܠ. ܘܠܐ ܢ݀ܣܒܐ ܫܘܼܠܡܐ ܛܒܿܐ ܡܪܕܝܬܗ. ܐܠܐ ܛܿܥܐ ܒܬܘܫܐ. ܘܠܐܒܕܢܐ ܫܪܟܐ ܚܪܒܬܗ. ܗܿܟܢ ܐܝܼܬܝܗܿ ܝܼܕܥܬܐ ܕܫܪܪܐ. ܘܗܿܠܝܢ ܦܘܪ̈ܫܢܐ ܐܝܬ ܒܝܢܬ݀ ܫܪܪܐ ܠܕܓܠܘܼܬܐ. ܒܝܬ ܛܒܿܬܐ ܠܒܝܼܫܬܐ. ܘܒܝܬ ܢܘܼܗܪܐ ܠܚܫܘܼܟܐ. ܡܛ݀ܠ ܕܫܪܪܐ ܘܛܒܿܬܐ ܘܢܘܼܗܪܐ ܐܝܼܬܝܗܘܢ ܘܩܢܘܼ̈ܡܐ ܡܩܝܼܡ̈ܐ ܐܢܘܢ. ܘܐܝܼܬ ܠܗܘܢ ܫܘܼܪܝܐ ܐܘܟܝܼܬ ܪܝܫܝܼܬܐ ܘܐܝܼܬܘܼܬܐ. ܕܓܠܘܼܬܐ ܕܝܢ ܘܒܝܼܫܬܐ ܘܚܫܘܼܟܐ ܠܝܬ ܐܢܘܢ. ܘܠܐ ܩܢܘܼ̈ܡܐ ܐܝܼܬ ܠܗܘܿܢ ܐܦܠܐ ܐܝܼܬܘܼܬܐ. ܐܠܐ ܓܠܝܼܙܘܼܬܐ ܕܡܼܢ ܡܕܡ ܐܝܼܬܝܗܘܢ ܐܘܟܝܬ ܡܬܬܪܝܼܡܢܘܬܐ. ܐܝܟ ܗ݀ܝ ܕܢܐܡܪ ܐ̱ܢܫ ܕܢܗܝܼܪ ܐܝܼܡܡܐ ܗܕܐ ܐܝܬܝܗܿ ܫܪܝܼܪܐ. ܘܐܢ ܢܐܡܪ ܕܠܐ ܢܗܝܼܪ ܐܝܼܡܡܐ. ܗܕܐ ܘܠܐ ܡܕܡ ܐܝܬܝܗܿ ܘܠܐ ܫܪܝܼܪܐ. ܒܠܠܝܐ ܕܝܢ ܕܡܬܓܠܙ ܥ݀ܠܡܐ ܡܼܢ ܫܡܼܫܐ. ܘܡܬܬܪܝܡܝܢ ܙ̈ܠܝܼܩܘܗܝ ܡܼܢ ܐܪܥܐ ܗ݀ܘܐ ܚܫܘܟܐ. ܟܕ ܠܝܬܘܗܝ ܒܩܢܘܼܡܗ ܡܕܡ ܗܼܘ ܚܫܘܼܟܐ. ܐܠܐ ܓܠܝܼܙܘܼܬܐ ܕܡܼܢ ܛܒܿܬܐ. ܘܗܿܠܝܢ ܐܝܬܝܗܘܢ ܓܕ̈ܫܐ ܥܠ̈ܘܼܠܐ ܕܠܐ ܩܢܘܡܐ. ܘܠܘ ܓܼܕ̈ܫܐ ܡܟܬܪ̈ܢܐ ܒܟܝܿܢܐ ܐܝܟ ܢܘܼܗܪܐ ܒܐܣܦܝܼܪܗ ܕܫܡܼܫܐ. ܘܚܘܪܘܼܬܐ ܒܬܠܓܐ [ܘܐܘܿܟܡܘܼܬܼܐ] ܒܥܘܼܪܒܐ. ܘܡܛܠ ܕܠܝܬ ܠܐ [ܩܢܘܡܐ] ܘܐܝܼܬܘܼܬܐ ܠܚܫܘܟܐ ܘܠܕܓܠܘܼ[ܬܼܐ ܘܒܝܼܫܬܐ] ܐܦܠܐ ܚܝܠܬܢܘܼܬܐ ܩܿܢܝܼܢ. ܐܠܐ [ܡܚܝܼ̈ܠܡܐ] ܘܕܠܝܼ̈ܠܝ ܠܡܙܕܟܝܢܘܼܬܐ [ܒܠܚܘܕ ܐܢ] ܢܨܛܒܐ ܘܢܓܼܒܐ ܒܐܚܪܘܬܐ ܟܝܢܝܬܐ] ܡܕܡܝܬ݀ ܒܐܠܗܐ [ܕܬܬܝܗܒܬ ܠܒܪܢܫܐ] ܚܣܡܐܝܬ ܠܛܒܿܬܐ [ܘܣܢܝܬ ܠܒܼܝܫܬܐ] ܘܗܿܝܕܝܢ ܫܪܝܪܐ [ܚܐܪܘܬܗ ܘܨܒܝܢܗ ܕܡܐ] ܒܟܝܿܢܗ. ܐܢܕܝܢ ܡܗ[ܡܐ ܒܛܒܬܐ ܐܘ] ܘܠܐ ܨ݀ܒܐ ܒܗܿ܆ ܥܐܠܐ ܥܠܘ[ܗܝ ܓܕܫܢܐܝܼܬܼ] ܒܝܼܫܬܐ. ܗܿܝܕܝܢ ܡܼܬܥܒܕܕ ܠܒܝܼܫܬܐ ܕܐܡܠܟܬ݀ ܥܠܘܗܝ 15 ܒܨܒܝܢܗ. ܘܡܘܒܕ ܚܐܪܘܼܬܗ ܘܠܐ ܡܩܘܐ ܒܟܝܿܢܗ. ܐܦܠܐ ܕ݀ܡܐ ܠܥܿܒܘܕܗ. ܘܡܿܢ ܕܗܿܟܢ ܗܿܘ ܘܠܐ ܩܼܡ ܒܫܪܪ ܟܝܿܢܗ ܘܒܪܝܼܬܗ. ܕܓܠܐ ܗܿܘ ܘܒܚܫܼܟܐ ܪܕܐ ܘܠܐܒܕܢܐ ܫܿܪܟ. ܘܥܠ ܗܠܝܢ ܠܐ ܣܢܝܼܩܝܼܢܢ ܣܓܝ̈ܐܬܐ ܠܡܐܡܪ ܘܠܡܚܘܝܘܼ ܒܝܕ ܡ̈ܠܐ ܘܬܚܘ̈ܝܬܐ. ܡܛܠ ܕܠܣܓ̈ܝܐܐ ܢܗܝܪ̈ܢ ܘܓܠ̈ܠܝܢ ܘܝܼܕܝܥ̈ܢ. ܬܘܼܒ ܡܼܢ ܟܝܿܢܐ ܘܬܘܼܒ ܡܼܢ ܝܘܠܦܢܐ. ܗܿܫܐ ܗܟܝܼܠ ܕܝܕܝܼܥܐ ܘܓܠܝܐ ܠܟܿܠ ܐ̄ܢܫ ܕܫܪܪܐ ܢܘܼܗܪܐ ܐܝܼܬܘܗܝ. ܘܛܒܿܬܐ ܘܫܪܝܪܐ ܘܐܝܼܬܘܗܝ. ܘܕܓܠܘܬܐ ܚܫܼܟܐ ܐܝܼܬܝܗܿ ܘܒܝܼܫܬܐ. ܘܠܝܬܝܗܿ ܘܠܐ ܫܪܝܪܐ. ܐܠܐ ܓܼܕܫܐ ܗܿܘ ܥܠܘܼܒܐ ܘܓܢܒܐ. ܡܿܕܝܢ ܙ݀ܕܩ [ܠܢ ܕܢܓܼܒܿܐ] ܘܢܨܿܛܒܐ ܒܫܪܪܐ ܕܐܝܬܘܗܝ [ܢܘܼܗܪܐ ܕܡܘܒܿܠ] ܠܚܝ̈ܐ ܫܪ̈ܝܪܐ ܘܛܘܼܒ̈ܬܢܐ [ܘܥܠܡ̈ܝܼܢܝܐ] ܢ݀ܣܠܐ ܠܕܓܠܘܼܬܐ ܕܐܝܼܬܝܗܿ [ܚܫܘܿܟܼܐ܆ ܡܘܒܿܠ] ܠܐܒܕܢܐ ܕܠܥܿܠܡ. ܡܕܝܢ [ܘܠܐ ܠܢ ܕܢܐܨܿܦ] ܘܢܥܿܩܒ ܩܕܡܐܝܼܬ [ܥܠ ܫܪܪܐ] ܚܬܝܼܬܐܝܼܬ. ܘܐܡܼܬܝ [ܕܚܙܝܢ ܢܘܗܪܐ] ܕܫܪܪܐ܆ ܫܦܝܼܪ [ܗܝܕܝܢ ܡܗܠܟܝܼܢܢ] ܟܿܠ ܟܪ ܕܨܿܒܝܢܢ [ܐܝܟ ܐܝܠܝܢ ܕܣܝܡܝܼܢ] ܫܬܐܣܬܐ ܚܠܝܼܡܬܐ [ܘܥܡܝܼܩܬܐ ܘܡܫܬܣـ]ـܬܐ. ܘܟܠܗܿ ܒܢܝܿܢܗܘܢ [ܡܣܬܡ݀ܡܟ ܘܡـ]ـܫܬܡܠܐ ܐܝܟ ܨܒܝܿܢܗܘܢ.. [ܗܫܐ ܐܘܿ ܪ̈ܚܡܝ] ܘܐܚ̈ܝ ܘܗܕ̈ܡܝ ܟܿܠܗܘܢ ܒܢܝ̈ܢܫܐ ܫܿܡܘܼܥ̈ܐ ܕܗܿܠܝܢ. ܝܿܕܥܝܢ ܕܡܿܢ ܕܡܫܪܐ ܒܣܘܼܥܪܢܐ ܐܝܢܐ ܕܗܘܼ. ܡܼܢ ܫܘܼܪܝܐ ܙܕܿܩ ܠܗ ܕܢܫܪܐ. ܘܐܝܟ ܛܟܣܼܐ ܢܼܕܐ. ܕܫܩܠ ܫܘܼܠܝܐ ܣܘܼܥܪܢܗ. ܐ݀ܢܕܝܢ ܠܐ ܡܫܪܐ ܡܛܟܣܐܝܼܬ ܘܡܼܢ ܐܝܟܐ ܕܙܕܿܩ ܕܢܫܪܐ. ܐܠܐ ܒܠܝܼܠܐܝܼܬ ܡܼܢ ܡܨܥܬܗ ܕܫܘܥܪܢܐ ܐܘ ܒܚܪܬܗ. ܐܠܐ ܐܢ ܚܘܼܣܪܐ ܘܒܘܼܒܠܐ ܠܐ ܝܿܬܪ. ܘܠܫܘܼܡܠܝܐ ܠܐ ܡܿܛܐ ܣܪܝܼܩܐ ܗܿܘ ܥܿܡܠܗ. ܡܿܕܝܢ ܠܟܿܠܢ ܙܕܿܩ ܠܢ ܕܡܼܢ ܐܝܟܐ ܕܙܕܿܩ ܘܐܝܼܬܘܗܝ ܫܘܼܪܝܗ ܕܣܘܼܥܪܢܐ ܢܫܪܐ ܚܢܢ ܡܿܢ ܒܡܼܠܬܐ ܘܐܢܬܘܢ ܒܫܼܡܥܐ܀ ܫܘܼܪܝܐ ܕܝܢ ܐܝܼܬܘܗܝ ܗܿܢܐ.. ܢܚܼܫܘܒ ܟܿܠܢ ܕܝܘܡܢܐ ܐܬܒܼܪܝܢܢ ܘܥܠܼܢܢ ܠܥܿܠܡܐ ܗܿܢܐ. ܗܿܢܘ ܫܘܼܪܝܐ ܫܪܝܼܪܐ ܘܚܬܝܼܬܐ ܕܠܿܚܡ ܠܟܿܠܗܘܿܢ ܥܡܼܡ̈ܐ. ܒܗܿܝ ܕܡܩܒܼܠ ܥܠ ܟܿܠܗܘܢ. ܘܠܐ ܡܼܨܝܐ ܠܐ̱ܢܫ ܕܢܓܠܝܘ̄ ܣܟ. ܐܬܒܪܝܼܢܢ ܕܝܢ ܡܼܢ ܡܿܢ ܐܝܢܐ ܕܗܼܘ. ܘܐܛܝܒܢܢ ܟܿܠܢ ܒܦܩܥܬܐ ܡܕܡ ܪܘܝܼܚܬܐ ܣܿܓܝܼ ܕܠܝܬ ܒܗܿ ܥܕܟܝܼܠ ܡܕܡ ܣܟ. ܠܐ ܛܘܪ̈ܐ ܘܠܐ ܡܥܪ̈ܐ. ܘܠܐ ܐܝܼ̈ܠܢܐ. ܘܠܐ ܙܪ̈ܥܐ. ܘܠܐ ܒܢܝ̈ܢܐ. ܘܠܐ ܩܢܝ̈ܢܐ. ܐܒܐ ܚܢܢ ܒܠܚܘܼܕܝܢ ܥܪ̈ܛܠܝܐ. ܘܚܙܝܢܢ ܚܢܢ ܠܢ ܕܐܝܼܬ ܠܢ ܦܓܪܐ ܚܫܘܫܐ. ܘܠܥܼܠ ܡܢܼܢ ܫܡܼܫܐ ܘܢܗܝܪ̈ܐ ܕܫܪܟܐ. ܘܐܐܪ ܡܫܬܚܠܦܢܐ. ܘܠܬܼܚܬ ܡܼܢܢ ܐܪܥܐ ܘܡܝ̈ܐ. ܘܐܪܓܫܼܢܢ ܕܐܝܼܬ ܒܢ ܟܝܿܢܐ ܐ̱ܚܪܢܐ ܫܦܝܪܐ ܘܢܗܝܼܪܐ. ܕܐܝܬܝܗܿ ܗܕܐ ܢܦܫܐ ܡܠܝܼܠܬܐ 16 ܘܗܘܢܐ ܝܕܘܥܬܢܐ. ܘܐܝܼܬ ܒܢ ܚܝܘܼܬܐ. ܘܗܿܝܕܝܢ ܫܪܝܼ ܗܢܐ ܦܓܪܐ ܚܿܐܫ ܡܼܢ ܫܘܼܚܠ̈ܦܐ ܕܐܐܪ ܕܠܥܠ ܡܼܢܢ. ܒܙܒܢ ܡܿܢ ܡܘܩܕ ܠܢ ܫܡܼܫܐ ܒܚܘܼܡܗ ܘܡܫܠܗܒ. ܘܒܙܒܢ ܬܘܼܒ ܡܣܝܛ ܠܢ ܐܐܪ ܒܥܙܝܼܙܘܼܬܐ ܕܩܘܪܗ ܘܡܪܛܒ ܠܢ. ܒܛ̈ܐܠܐ ܘܪ̈ܣܝܼܣܐ. ܘܐܪܥܐ ܬܘܼܒ ܕܬܚܘܼܬܝܢ ܟܕ ܡܼܬܚܠܛܐ ܒܡܝ̈ܐ ܘܗܘܝܐ ܛܝܼܢܐ ܘܣܝܢܐ ܘܡܠܘܬܐ ܠܢ. ܘܟܕ ܗܿܠܝܢ ܚܫܢܢ ܒܿܥܝܢܢ ܢܛܝܼܪܘܼܬܐ ܕܡܼܢ ܗܿܠܝܢ ܡܐܚܫܢ̈ܝܬܗ ܕܦܓܪܐ. ܗܿܝܕܝܢ ܫܪܝ ܗܿܢܐܢ ܡܕܡ ܓܘܝܐ ܕܒܢ. ܗ̄ ܗܘܢܐ ܝܕܘܼܥܬܢܐ ܡܘܠܕ ܚܘܼܫ̈ܒܐ ܘܡܬܼܦܪܣܝ ܕܢܥܼܒܕ ܢܛܝܼܪܘܼܬܐ ܠܒܪ ܙܘܓܗ ܦܓܪܐ ܡܼܢ ܚܫ̈ܐ ܗܿܠܝܢ. ܘܐܡܼܪܢܢ ܕܗܐ ܡܫܝܼܡܝܢ ܠܗ. ܘܐܬܼܚܫܒ ܕܬܛܠܝܼܠܐ ܡܕܡ ܙ݀ܕܩ ܕܢܗܘܐ ܠܥܼܠ ܡܼܢܢ. ܕܢܟܼܠܐ ܡܢܼܢ ܠܚܘܼܡܗ ܕܫܡܼܫܐ ܘܠܥܙܝܼܙܘܬܐ ܕܐܐܪ ܘܕܡܛܪܐ. ܗܿܢܘ ܚܘܼܫܒܐ ܩܕܡܝܐ ܕܐܬܿܗܘܢܢ ܒܪܐܢܫܐ. ܒܬܪܟܢ ܬܘܼܒ ܐܬܼܚܫܒܢܢ ܕܗܿܢܐ ܬܛܠܝܼܠܐ ܣܢܝܼܩ ܥܠ ܐܣ̈ܐ ܕܛܥ̈ܢܢ ܠܗ. ܘܬܘܼܒ ܐܬܚܫܒܢܢ ܕܐܦ ܗܿܠܝܢ ܐܣ̈ܐ ܣܢ̈ܝܼܩܢ ܥܠ ܥܘܼܡܩܐ ܕܫ̈ܬܐܣܐ ܡܫܪ̈ܪܬܐ ܕܐܣܿܠ̈ܩܢ ܥܠܝܗܝܢ. ܗܪܟܐ ܫܠܡ ܚܘܼܫܒܐ ܕܒܢܝܿܢܗ ܕܡܫܟܢܐ ܕܐܬܩܪܝܼ ܒܝܬܐ. ܘܐܝܟܐ ܕܫܠܼܡ ܚܘܼܫܒܐ܆ ܡܼܢ ܬܡܿܢ ܙܕܿܩ ܕܬܫܪܐ ܣܥܘܼܪܘܼܬܐ. ܘܐܝܟܐ ܕܩܕܡ ܫܪܝ ܘܐܬܼܗܘܢܢ ܚܘܼܫܒܐ. ܬܡܿܢ ܗܿܘܐ ܫܘܠܡܐ ܠܣܥܘܼܪܘܬܐ. ܘܐܬܩܪܝܼ ܗܿܢܐ ܫܘܼܠܡܐ ܕܩܕܡ ܡܬܗܘܢܢ. ܐܝܟ ܕܐܦ ܝܕܝܼܥܐ ܗܿܕܐ ܠܣܓܝ̈ܐܐ. ܘܗܿܟܢܐ ܘܥܠ ܫܪܒܐ ܕܢܦܫܐ ܕܠܘ ܙܕܿܩ ܕܢ݀ܬܚܫܒ. ܕܗܿܐ ܚܿܙܝܢܢ ܕܐܝܼܬ ܠܗܿ ܚ̈ܫܐ ܡܐܚܫ̈ܢܐ ܘܡܫܝܼܡ̈ܢܐ ܕܐܝܬܝܗܘܢ ܚܫܼܟܐ ܕܠܐ ܝܼܕܥܬܐ. ܘܛܥܿܝܘܬܐ ܕܕܓܠܘܬܐ. ܕܐܝܬܝܗܘܢ ܗܿܠܝܢ ܚܫ̈ܐ ܓܢ̈ܒܐ ܕܥ݀ܐܠܝܢ ܥܠ ܢܦܫܐ ܒܚܫܼܟܐ ܕܠܠܝܐ ܕܛܥܿܝܘܬܐ. ܘܟܕ ܗܿܠܝܢ ܥ݀ܐܠܝܢ ܥܠܝܗܿ ܓܕܫܢܐܝܼܬ. ܡܘܠܕܝܢ ܒܗܿ ܟ݀ܠܗܘܢ ܚܫ̈ܐ ܒܝ̈ܫܐ ܕܫܪܟܐ. ܘܫܪܟܐ ܠܐܒܕܢܐ ܓܡܝܼܪܐ. ܘܐܟܡܐ ܕܐܬܦܪܣܢܢ ܥܠ ܣܘܓܦ̈ܢܘܗܝ ܕܦܓܪܐ. ܘܥܒܼܕܢܢ ܠܗ ܒܝܬܐ ܘܣܬܪܢܝܗܝ ܒܗ ܘܐܬܼܢܛܪ ܡܼܢ ܗܿܠܝܢ ܡܐܚܫܢܝ̈ܬܗ ܥܡ ܣܘܓܦ̈ܢܐ ܐ̱ܚܪ̈ܢܐ ܕܥܬܝܕܝܢ ܗܘܼܘ ܠܗ: ܐܠܘܼܠܐ ܕܐܣܬܬܪ ܒܒܝܬܐ ܠܓܘ ܡܼܢ ܐܣ̈ܐ ܘܬܪ̈ܥܐ. ܗܿܟܢܐ ܝܬܝܪ ܘܿܠܐ ܠܢ ܕܢ݀ܬܦܪܣ ܥܠ ܢܦܫܐ ܕܗܼܝ ܐܝܼܬܝܗܿ ܡܪܬܗ ܕܦܓܪܐ. ܘܢ݀ܥܒܕ ܠܗܿ ܒܝܬ ܡܣܬܪܢܐ ܡܼܢ ܣܘܓܦ̈ܢܐ ܕܥܿܕܝܼܢ ܥܠܝܗܿ ܒܟܿܠ ܙܒܢ. ܘܐܝܿܟܢܐ ܕܒܝܬܐ ܗܿܢܐ ܕܐܬܒܢܝܼ ܠܦܓܪܐ. ܡܢܛܪ ܠܗ ܡܼܢ ܚܘܼܡܐ ܘܡܼܢ ܩܘܼܪܐ ܘܡܼܢ ܡܛܪܐ. ܘܡܼܢ ܛܠܘܼܫܘܼܬܐ ܕܛܝܼܢܐ ܘܕܣܝܿܢܐ. ܘܡܼܢ ܚܝ̈ܘܬܐ ܚܒܠ̈ܬܐ ܘܪ̈ܚܫܐ ܩ݀ܛܘܼܠܐ ܘܡܼܢ ܓܢ̈ܒܐ ܘܒܥܠܕܒ̈ܒܐ ܘܒܬܪ ܕܡܫܘܙܒ ܠܗ ܡܼܢ ܗܿܠܝܢ ܟܿܠܗܝܢ ܬܘܼܒ ܡܢܝܼܚ ܠܗ ܒܟܿܠܗܝܢ 17 ܚܫܚ̈ܬܗ. ܗܟܢܐ ܘܒܝܬܐ ܕܡܬܬܩܢ ܠܢܦܫܐ. ܡܢܛܪ ܠܗܿ ܡܼܢ ܣܿܓܝܼ ܣܘܓܦ̈ܢܐ ܕܝܬܝܼܪ ܡܼܢ ܗܠܝܢ ܐܝܟ ܕܥܬܝܼܕܝܢܢ ܕܢܚܘܐ ܒܝܕ ܐܠܗܐ ܕܡܗܕܐ ܘܡܚܟܡ. ܘܒܗܿܠܝܢ ܫܠܼܡ ܩܦܠܐܘܢ ܩܕܡܝܐ ܥܡ ܐܠܗܐ ܕܡܗܕܐ. Chapter 2 ܩܦܠܐܘܢ ܕܬܪܝܢ ܕܐܝܟܢ ܡܬܝܕܥ ܫܪܪܐ ܚܬܝܼܬܐܝܼܬ ܒܬܪ ܗܟܝܼܠ ܕܚܘܝܢܢ ܕܡܿܢܐ ܙܕ݀ܩ ܠܒܪܐܢܫܐ ܕܢܕܥ ܘܢܐܠܦ ܩܕܡܐܝܼܬ. ܗ̄ ܕܢܥܩܒ ܚܬܝܼܬܐܝܼܬ ܥܠ ܫܪܪܐ ܘܢܦܪܫܝܘ̄ ܡܼܢ ܕܓܠܘܬܐ. ܬܘܼܒ ܐ݀ܡܪܝܢܢ ܕܟܬܒܐ ܗܿܢܐ ܕܩܕܡܝܢ ܒܢܝܼܫܐ ܛܒܿܐ ܕܚܘܼܒܐ ܫܪܝܼܪܐ ܘܐܠܗܝܐ ܐܬܟܬܒ ܠܟܿܠܗܘܿܢ ܥܡܼܡ̈ܐ ܓܘܢܐܝܬ. ܠܝܘܬܪܢܐ ܪܒܐ ܕܢܦܫܐ ܘܢܛܝܼܪܘܼܬ ܦܓܪܐ. ܕܗܿܢܘܢ ܕܥܬܝܕܝܢ ܕܢܫܡܥܘܼܢܝܗܝ. ܘܠܥܘܼܗܕܢܐ ܛܒܿܐ ܕܟܬܘܼܒܐ ܡܚܝܼܠܐ ܘܣܢܝܼܩܐ. ܠܬܫܒܘܚܬܐ ܕܝܢ ܘܐܝܼܩܪܐ ܕܚܕ ܡܪܐ ܕܟܿܠܐ ܘܥܒܘܼܕܐ ܘܒܪܘܼܝܐ ܘܡܦܪܢܣܢܐ ܚܟܝܼܡܐ. ܗܿܘ ܕܡܢܼܗ ܗܼܝ ܟܿܠ ܛܒܿܬܐ ܡܫܡܠܝܬܐ. ܘܗܘܼ ܝ݀ܗܒ ܡܠܼܬܐ ܕܝܼܕܥܬܐ ܫܪܝܼܪܬܐ ܠܐܡܘܼܪܐ. ܘܣܘܼܟܠܐ ܘܒܘܼܝܢܐ ܚܬܝܼܬܐ ܠܫܿܡܘܼܥܐ. ܐܢ ܟܝܼܬ ܘܬܪ̈ܝܗܘܢ ܒܢܝܼܫܐ ܕܚܘܼܒܐ ܘܡܟܝܼܟܘܼܬܐ ܘܕܚܠܼܬ ܐܠܗܐ ܡܬܼܚܫܚܝܼܢ. ܣܛܪ ܡܼܢ ܟܿܠ ܚܫܐ ܣܢܝܐ ܕܚܣܡܐ. ܘܙܐܦܐ ܕܒܝܼܫܘܼܬܐ ܘܫܘܼܒܚܐ ܣܪܝܼܩܐ ܢܕܝܕ ܥܠ ܐܠܗܐ. ܘܪܡܿܘܼܬܐ ܛܡܐܬܐ ܢܨܝܬ݀ ܥܡ ܐܠܗܐ. ܡܛ݀ܠ ܕܟܿܠܗܘܢ ܥܡܼ̈ܡܐ ܕܐܝܼܬ ܒܟܿܠܗ ܥ݀ܠܡܐ. ܢܦܼܠܬ݀ ܒܝܢܬܗܘܢ ܣܩܘܼܒܠܝܘܬܐ ܪܒܬܐ. ܘܥܡ ܐܪܝܼܟܘܼܬ ܙܒܢܐ ܘܡܬܼܚܐ ܕܫܝܢ̈ܝܐ. ܣܓܝܬ݀ ܣܩܘܼܒܠܝܘܼܬܐ ܘܢܦܼܩܬ݀ ܣܢܝܐܬܐ ܘܠܣܓܝܼ ܒܝܼܫ̈ܬܐ ܕܥܠ̈ܝܼ ܓܕܫܢܐܝܬ ܐܝܟ ܓܢܒ̈ܐ ܠ̈ܠܝܼܝܼܐ ܥܠ ܓܢܼܣܐ ܕܒܢܝ̈ܢܫܐ. ܘܡܼܢ ܝܕ ܗܟܢ ܢܦܼܠܬ݀ ܒܝܢܬܗܘܢ ܦܠܝܼܓܘܬܐ ܘܠܐ ܡܬܬܦܝܼܣܢܘܬܐ ܕܠ̈ܚܕܕܐ. ܘܡܼܢ ܗܿܠܝܢ ܐܬܡܿܛܝܼܘ ܠܒܥܠܕܒܒܘܬܐ ܪܒܬܐ ܘܐܒܕܢܐ ܕܚܕܕ̈ܐ ܗܿܠܝܢ ܐܚ̈ܐ ܪ̈ܚܝܼܩܿܐ ܒܢ̈ܝ ܚܕ ܐܒܐ ܛܒܿܐ ܘܒܣܝܼܡܐ. ܥܒܼ̈ܕܝ ܚܕ ܡܿܠܟܐ ܪܒܐ ܘܡܪܚܡܢܐ ܘܣܿܓܝܼ ܥܬܝܪܐ. ܘܬܠ̈ܡܝܼܕܝ ܚܕ ܡܠܦܢܐ ܫܪܝܼܪܐ ܕܩܘܼܫܬܐ ܘܣܿܓܝܼ ܚܟܝܼܡܐ. ܘܣܛܼܐ ܟܿܠܚܕ ܠܣܛܪ ܘܥܒܼܕ ܠܗ ܟܬܒܐ ܘܬܘܕܝܼܬܐ ܘܢ݀ܡܘܣ̈ܐ ܘܥܝ̈ܕܐ. ܘܐܬܕܒܪܘ ܒܗܘܿܢ ܥܕܡܐ ܠܝܘܡܢܐ. ܘܒܡܕܡ ܡܼܢ ܗܿܠܝܢ ܦܠܝܓܝܢ ܥܠ ܚܕ̈ܕܐ. ܘܒܡܕܡ ܫܘܝܢ ܘܐܘܝܢ ܐܝܟ ܕܥܬܝܕܝܼܢܢ ܕܢܚܘܐ ܒܝܕ ܐܠܗܐ. ܟܿܠ ܫܪܒܐ ܒܕܘܼܟܬܗ. ܘܐܝܟܢܐ ܕܠ݀ܚܡ ܠܗ. ܡܼܛܠ ܗܿܟܝܼܠ ܕܚܕ ܡܼܢ ܥܡܼ̈ܡܐ ܟܬܒ̈ܐ ܠܣܛܪ ܐܝܼܬ ܠܗ ܢ݀ܡܘ̈ܣܐ ܘܥܝ̈ܕܐ ܘܬܿܕܝ̈ܬܐ. ܠܐ ܡܩܒܠ ܟܬܒܐ ܗܢܐ ܕܗܿܘ. ܘܠܐ ܗܿܘ ܕܗܢܐ. ܘܠܐ ܢ݀ܡܘ̈ܣܐ 18 ܘܠܐ ܥܝ̈ܕܐ ܥܡ ܫܪܟܐ ܕܐܚܪ̈ܢܝܬܐ. ܘܕܡܼܢ ܐܝܟܐ ܥܠܼܬ݀ ܦܠܝܓܘܼܬܐ ܗܿܕܐ ܡܚܘܝܢܢ ܐܢ ܨܿܒܐ ܡܪܐ ܕܟܠܢ. ܐܝܟܢܐ ܕܟܕ ܡܦܩܝܼܢܢ ܠܗܘܢ. ܘܦܿܝܫܝܢ ܡܪ̈ܘܗܝ ܕܒܝܬ ܕܠܐ ܩܢܼܛܐ. ܒܢܝܿܚܐ ܕܠܐ ܡܪܢܝܼܬܐ. ܗܿܘ ܕܩܪܐ ܢܼܣܬܟܠ܀ ܡܛܠ ܕܦܠܝܓܝܢ ܥܡܼ̈ܡܐ ܥܠ ܚܕ̈ܕܐ. ܘܠܐ ܡܩܒܠܝܢ ܬܘܕ̈ܝܬܐ ܘܟܬܒ̈ܐ ܘܢ݀ܡܘܣ̈ܐ ܕܚܕ̈ܕܐ. ܠܐ ܡܿܨܝܐ ܘܠܐ ܙ݀ܕܩ ܠܢ ܕܢܬܚܫܚ ܒܬܚܘܝܬܐ ܕܚܕ ܡܼܢ ܟ̈ܬܒܐ ܘܠܐ ܕܢܝܬܐ ܣܗܕܘܼܬܐ ܡܼܢ ܢ݀ܡܘܣܐ ܘܬܘܕܝܼܬܐ ܕܐܚܪܝܢ ܥܠ ܐܚܪܢܐ. ܡܛ݀ܠ ܕܠܐ ܡܩܿܒܠ. ܚܕܐ ܡܛ݀ܠ ܢܝܼܫܐ ܕܬܘܕܝܬܐ ܕܠܒܝܼܟ. ܘܐܚܪܬܐ ܡܼܢ ܛܟܼܣܐ ܕܕܘܼܒܪܐ ܘܝܘܼܠܦܢܐ ܘܢ݀ܡܘܣܐ ܕܒܗ ܐܬܪܕܝ. ܘܡܼܢ ܪܚܝܼܩܘܼܬܐ ܘܠܐ ܥܼܢܝܢܐ ܘܚܫܚܬܐ ܕܥܡ ܚܕ̈ܕܐ. ܡܛ݀ܠ ܗܿܟܢ ܗܿܐ ܡܼܢ ܟܕ ܫܪܝܢܢ ܒܟܬܒܐ ܗܢܐ. ܣܟ ܠܐ ܐܬܚܫܚܢܢ ܐܦܠܐ ܒܚܕܐ ܡܠܼܬܐ ܕܣܩܘܼܠܝܐ ܠܚܕ ܡܼܢ ܥܡܼ̈ܡܝܢ. ܘܠܐ ܒܢܝܼܫܐ ܕܬܘܕܝܬܐ. ܐܦܠܐ ܕܥܝܿܕܐ ܘܕܘܒܪܐ. ܘܚܟܝܼܡ̈ܐ ܘܝܕܘ̈ܥܬ̈ܢܐ ܡܣܼܬܟܠܝܢ ܟܕ ܩܿܪܝܢ. ܡܛܠ ܕܗܿܘ ܕܒܢܝܼܫ ܚܘܒܐ ܫܪܝܼܪܐ ܘܐܠܗܝܐ ܒܿܥܐ ܕܢܘܕܐ ܕܠܐ̱ܚܪܝܢ ܒܗܿܝ ܕܡܐܚܒ. ܒܡܕܡ ܕܡܨܝܐ ܠܗ ܕܢܫܼܡܥ ܘܡܩܿܒܠ ܗܘܢܗ. ܣܿܗܕܐ ܥܠܘܗܝ ܣܘܼܟܠܗ ܘܟܝܿܢܗ. ܙܕܿܩ ܕܢܬܚܫܚ ܥܡܗ. ܐܝܿܟܢܐ ܕܗܿܘ ܕܨܿܒܐ ܕܢܐܡܪ ܠܐܢܫ ܡܕܡ. ܒܠܫܢܐ ܕܝ݀ܕܥ ܗܿܘ ܙܕܿܩ ܠܗ ܕܢܡܠܠ ܥܡܗ. ܕܢܕܥ ܘܢܣܼܬܟܠ ܡܡܠܠܗ. ܘܗܿܘ ܕܨ݀ܒܐ ܕܢܢܝܼܚ ܠܐܢܫ ܒܡܼܐܟܘܼܠܬܐ. ܒܐܕ̈ܫܐ ܕܚܿܫܚܝܢ ܠܗ ܙܕܿܩ ܕܢܢܝܼܚܝܼܘܗܝ. ܗ̄ ܐܢ ܝܠܘܼܕܐ ܗܿܘ ܒܚܠܒܐ ܘܡܝ̈ܐ. ܘܐܢ ܟܪܝܼܗܐ ܗܿܘ ܒܫܩ̈ܝܐ ܘܣܡ̈ܡܢܐ. ܘܐܢ ܡܚܝܼܠܐ ܗܿܘ ܒܝܪܩܐ ܘܙܪ̈ܥܘܢܐ. ܘܐܢ ܓܒܪܐ ܗܿܘ ܡܫܡܠܝܐ ܘܚܠܝܼܡܐ. ܒܡܐܟ̈ܠܬܐ ܚ̈ܠܝܼܡܬܐ ܕܠܚܡܐ ܘܒܣܪܐ ܘܫܪܟܐ ܕܦܬܒ̈ܓܐ. ܐܝܿܟܢܐ ܕܐܦ ܐܒܐ ܥܡ ܒܪܗ ܝ݀ܠܘܕܐ ܒܠܫܢܗ ܕܝܼܠܗ ܕܝܠܘܕܐ ܡܡܠܠ ܥܡܗ ܐܝܟ ܕܗܼܘ ܡܫܡܗ ܠܐܒܐ ܘܠܐܡܼܐ ܘܠܐܚ̈ܐ ܘܠܫܪܟܐ ܕܨܒ̈ܘܬܐ. ܘܠܘ ܒܡܡܠܠܐ ܓܡܝܪ̈ܐ ܕܝܼܠܗܘܢ ܡܫܡܠ̈ܝܐ. ܘܐܝܿܟܢܐ ܟܝ ܢܥܼܒܕ ܗܿܘ ܕܨܿܒܐ ܕܢܢܝܼܚ ܘܢܥܕܪ ܠܟܿܠܗܘܿܢ ܥܡܼ̈ܡܐ ܓܘܢܐܝܼܬ ܒܡܠܼܬ ܕܝܼܕܥܬܐ. ܟܕ ܒܡܠܼܬܐ ܕܟܬܒܐ ܠܐ ܡܼܬܚܫܚ ܒܬܚܘܝܼܬܐ. ܐܘܿ ܒܣܿܗܕܘܬܐ. ܐܢܿܐ ܕܝܢ ܗܿܟܢ ܐ݀ܡܪ ܐܢܼܐ. ܐܝܟ ܕܐܦ ܡܬܚܫܒ ܐܢܐ. ܕܐܝܟ ܢܝܼܫܗ ܘܬܪܥܝܬܗ ܘܨܒܝܿܢܗ ܕܐܢܫ. ܡܼܬܝܗܒ ܠܗ ܡܼܢ ܠܥܼܠ ܗ̄ ܐܢ ܒܢܝܼܫ ܚܘܼܒܐܫܪܝܼܐܐ ܘܐܠܗܝܐ ܒܙܢܐ ܕܡܟܝܼܟܘܼܬܐ ܘܢܝܼܫܐ ܬܪܝܼܨܐ ܕܡܚܪܪ ܡܼܢ ܟܿܠ ܚܫܐ ܣܢܝܐ ܘܙܐܦܢܘܼܬܐ. ܨܿܒܐ ܒܪܐܢܫܐ ܕܢܥܕܪ ܠܐܚ̈ܘ̄ ܘܗܕܡ̈ܘܗܝ. ܒܪܝܼܬܐ ܘܬܘܼܩܢܐ ܕܒܪܘܼܝܐ ܕܝܼܠܗ. ܡܛܠ ܚܘܼܒܗ ܘܛܒܿܘܼܬ ܨܒܝܿܢܐ 19 ܕܝܼܠܗ ܕܡܪܐ ܕܓܘܐ ܕܪܚܿܡ ܒܪܝܼܬܗ ܘܓܒܝܼܠܬܗ. ܗܘܼ ܗܿܘ ܡܪܐ ܛܒܿܐ ܘܪܚܿܡ ܒܢܝ̈ܢܫܐ. ܘܨܿܒܐ ܒܚܝ̈ܐ ܘܛܒܿܬܐ ܘܥܘܼܕܪܢܐ ܕܟܿܠܗܘܿܢ. ܝ݀ܗܒ ܠܗ ܝܼܕܥܬܐ ܘܗܘܢܐ ܘܚܡܬܐ. ܘܣܿܐܡ ܒܦܘܼܡܗ ܡܠܼܬܐ ܡܥܕܪܢܝܼܬܐ ܠܐܡܘܪܐ ܬܪܝܼܨ ܢܝܼܫܐ. ܘܠܫܿܡܘܼܥܐ ܒܪܝܼܟܐ ܘܡܟܝܼܟܐ ܕܡܚܪܪ ܡܼܢ ܟܿܠܗ ܚܣܡܐ. ܣܘܼܟܠܐ ܘܒܘܝܢܐ. ܘܠܬܫܒܘܚܬܐ ܕܫܡܗ ܕܝܗܘܼܒܐ. ܘܠܥܘܼܕܢܐ ܕܟܿܠܗܘܿܢ ܓܒ̈ܐ܀ ܗܿܫܐ ܚܒܝܼ̈ܒܝ܆ ܕܠܐ ܡܨܝܐ ܘܠܐ ܙ݀ܕܩ ܠܢ ܕܢܬܚܫܚ ܥܕܟܝܼܠ ܒܡܠܼܬܐ ܕܬܚܘܼܝܬܐ ܐܘܿ ܣܿܗܕܘܼܬܐ ܡܢ ܟܬܒܐ. ܢܣܩ ܘܢܬܥܠܐ ܒܡܚܫܒܬܢ. ܕܡܼܢ ܐܝܿܟܐ ܐܬܝܼܠܕ ܘܐܬܩܒܠ ܟܬܒܐ. ܘܡܼܢ ܕܢܣܝܼܒ ܟܬܒܐ ܝܘܼܠܢܐ ܕܚܫܿܚ ܠܗ. ܢܣܒ ܐܦ ܚܢܢ ܡܕܡ ܕܚܫܚ ܠܟܿܠܢ. ܘܢܦܪܢܼܣ ܒܗ ܠܚܕܕ̈ܐ. ܡܢܘܼ ܕܝܢ ܗܢܐ ܘܐܝܟܘ. ܘܐܡܿܪܝܢܢ ܕܐܒܘܗܝ ܕܟܬܒܐ ܐܝܬܘ̄ ܥܡ ܟܿܠܢ. ܘܩܫܝܼܫܗ ܕܟܬܒܐ ܐܝܼܬܘ̄ ܐܒܐ ܕܟܿܠܢ. ܐܒܘܗܝ ܕܝܢ ܕܟܬܒܐ ܐܝܬܘ̄ ܡܕܥܐ. ܗܢܐ ܐܘܠܕ ܠܟܬܒܐ. ܘܠܟܿܠܗܘܿܢ ܝܘܼܠ̈ܦܢܐ ܘܚܟܡ̈ܬܐ ܘܐܡ̈ܢܘܬܐ. ܒܪܡ ܒܡܥܒܕܢܘܼܬܐ ܟܣܝܼܬܐ ܘܡܘܗܒܬܐ ܡܪܐܢܝܬܐ ܕܒܪܘܼܝܐ ܛܒܿܐ ܘܥܬܝܼܪ ܒܫܘܘ̈ܟܢܐ ܘܚܟܝܼܡ ܒܡܘܗܒ̈ܬܐ. ܩܫܝܼܫܗ ܕܝܢ ܕܟܬܒܐ ܐܝܬܘܗܝ ܐܒܐ ܕܟܿܠܢ. ܐܝܼܬܘܗܝ ܟܝܿܢܐ ܕܐܝܬܝܼ ܠܢ ܠܗܘܝܐ ܘܐܝܼܬܘܼܬܐ. ܡܕܝܢ ܕܫܐܠܝܢܢ ܡܼܢ ܥܒܘܼܕܗ ܕܝܢܐ ܕܢܚܟܡ ܗܕܝܘܼܛܘܬܢ ܒܡܟܬܒܢܘ̄ ܗܕܐ ܕܠܘܬܟܘܢ ܐܘܿ ܪ̈ܚܝܼܡܐ ܘܚܒ̈ܝܼܒܐ ܘܐܚ̈ܐ ܡܝܩܪ̈ܐ ܡܢܗ ܕܟܝܢܐ ܐܒܐ ܕܟܿܠܢ. ܢܬܚܫܚ ܒܟܿܠܗܿ ܡܠܼܬܐ ܕܡܪܕܝܬܐ ܗܕܐ ܕܣܝܼܡܐ ܩܕܡܝܢ ܥܕܡܐ ܠܙܒܢܿܐ ܕܗܼܘ ܟܝܿܢܐ ܡܠܦ ܠܢ ܕܫܪܝܪ ܟܬܒܐ. ܘܡܢܗ ܕܟܝܿܢܐ ܐܝܬܘܗܝ ܘܠܢ ܢܘܼܟܪܝܐ. ܘܡܩܒܠ ܠܗ ܗܘܢܢ ܘܡܚܫܒܬܢ. ܗܿܝܕܝܢ ܐܦ ܒܡܠܼܬܐ ܕܟܬܒܐ ܢܼܬܚܫܚ ܐܝܟܢܐ ܕܘܿܠܐ. ܡܐܠܠܘܢ ܐܝܟܐ ܕܨ݀ܒܐ. ܘܐܝܟ ܕܝ݀ܗܒܐ ܛܝܒܘܼܬܗ ܕܡܪܐ ܕܟܝܿܢܐ ܘܕܟܬܒܐ ܘܕܟܿܠܢ. ܘܐܠܘܼ ܗܕܐ ܡܟܬܒܢܘܼܬܐ ܐܢ ܡܼܢ ܚܟܝܼܡ̈ܐ ܘܡܫ̈ܡܗܐ ܕܒܥܿܠܡܐ ܐܘܿ ܒܚܕ ܡܼܢ ܥܡܼܡ̈ܝܢ ܥܒܝܼܕܐ ܗܘܼܬ݀. ܐܘܿ ܠܚܕ ܡܼܢ ܡܠܦ̈ܢܐ ܒܚܝܪ̈ܐ. ܐܘܿ ܠܚܕ ܡܼܢ ܪܘܪ̈ܒܢܐ ܕܐܬܝܼܕܥܘ ܒܥܿܠܡܐ. ܐܘܿ ܠܚܕ ܡܼܢ ܡ̈ܠܟܐ ܕܐܬܼܢܨܚܘ ܒܐܪܥܐ܆ ܠܐ ܪܒܐ ܗܘܼܬ݀ ܨܒܘܼܬܐ. ܡܐܠܠܘܢ ܐܦܠܐ ܡܬܗܝܡܢܐ ܗܘܼܬ݀. ܐܘܿ ܡܼܬܩܒܠܐ ܠܘܬ݀ ܟܿܠ ܥܡܼ̈ܡܝܢ. ܒܗܿܝ ܕܡܬܬܥܝܼܪ ܗܘܼܐ ܠܘܼܩܒܠ ܡܟܬܒܢܘܼܬܐ ܚܣܡܐ ܘܣܩܘܼܒܠܝܘܼܬܐ ܐܠܐ ܒܗܧܕܐ ܝܪܒܐ ܬܫܒܘܚܬܗ ܕܝܗܘܼܒܐ. ܘܡܼܬܗܝܡܢ ܘܡܼܬܩܒܠ ܡܟܬܒܢܐ. ܘܡܬܪܚܡ ܘܡܬܚܢܢ ܘܡܼܬܥܕܪ ܒܡܠܼܬܐ ܕܨܠܘܿܬܐ. ܒܗܿܝ ܕܐܝܼܬܘ̄ ܐܢܫ ܙܥܘܼܪܐ ܘܒܨܝܼܪܐ. ܫܝܼܛܐ ܘܫܚܝܼܡܐ. ܘܗܕܝܘܼܛܐ ܘܒܪܝܪ ܠܒܐ. 20 ܕܟܿܠ ܕܚܿܙܐ ܠܗ ܐܘܿ ܫܿܡܥ ܛܒܼܗ ܡܬܼܚܿܢܢ ܠܗ ܘܡܐܚܒܼ ܠܗ. ܘܡܨܠܐ ܚܠܦ ܥܘܼܕܪܢܗ. ܡܼܛܠ ܕܠܘ ܡܛܠ ܝܘܼܬܪܢܐ ܦܓܪܢܝܐ ܥܒܼܕ ܘܐܟܼܬܒ ܗܿܠܝܢ. ܘܠܐ ܡܛܠ ܩܘܼܠ̈ܣܐ ܥ̈ܠܡܢܝܐ ܘܬܫܒܘܼܚܬܐ ܣܪܝܼܩܬܐ ܘܠܐ ܡܩܼܘܝܢܝܼܬܐ. ܘܠܐ ܡܛܠ ܚܕ ܚܫܐ ܒܝܼܫܐ ܘܙܐܦܢܐ܆ ܐܠܐ ܒܠܚܘܕ ܡܛܠ ܚܘܼܒܐ ܐܠܗܝܐ. ܘܡܛܠܥܘܼܕܪܢܐ ܕܓܘܐ ܕܟܿܠܗܘܿܢ ܒܢܝ̈ܢܫܐ. ܡܐܠܠܘ ܘܐܝܟ ܕܡܢܚ ܠܐܠܗܐ ܥܘܼܕܪܢܐ ܕܒܪܝܼܬܗ. ܘܐܝܟ ܕܠܬܫܒܘ̄ܗ ܕܫܡܗ ܡܫܒܚܐ ܘܣܓܝܼܕܐ. ܘܠܘ ܡܼܛܠ ܕܡܟܬܒ ܠܐ̱ܢܫ ܫܚܝܼܡܐ. ܘܐܢ ܡܬܗܢܐ ܐܢܬ ܘܡܬܒܣܡ ܘܡܼܬܥܪܕ ܡܼܢ ܫܡܼܥܗ܆ ܐܘܕܐ ܘܩܘܼܒܠ ܛܝܒܘܼܬܐ ܕܝܗܘܼܒܐ ܛܒܿܐ ܘܡܠܦܢܐ ܚܟܝܼܡܐ ܘܡܦܪܢܣܢܐ ܥܬܝܼܪܐ. ܨܠܐ ܚܠܦ ܥܘܼܕܪܢܐ ܕܡܟܬܒܢܐ ܣܢܝܼܩܐ ܚܠܦ ܫܦܼܠܐ ܕܟܬܝܼܒܬܗ ܒܠܚܘܼܕ ܕܨܒܝܿܗܢܗ ܛܒܿܐ ܘܚܘܼܒܗ ܫܪܝܼܪܐ. ܘܗܿܟܢ ܐܬܚܙܝܼ ܡܪܐ ܛܒܿܐ ܕܥܒܼܕ ܡܼܢ ܫܘܼܪܝܐ ܕܥܠܿܡܐ. ܕܒܝܕ ܫܝܼ̈ܛܐ ܘܒܨܝܼܪ̈ܝ ܓܢܼܣܐ ܘܒܪ̈ܝܼܪܝ ܠܒܐ ܘܫܚܝܼ̈ܡܐ ܕܒܢܝ̈ܢܫܐ. ܐܥܒܕ ܘܝܗܼܒ ܡܠܼܬܐ ܕܥܘܼܕܪܢܐ.. ܘܫܕܪ ܠܫܪܟܐ ܕܒܢܝ̈ܢܫܐ ܗܿܠܝܢ ܕܥܬܝܼܕܝܼܢܢ ܕܢܕܟܪ ܐܢܘܢ܆ ܐܝܟܐ ܕܙܕܩ ܘܨ݀ܒܐ ܡܪܢ. ܘܒܗܕܐ ܝܬܝܪ ܝܪܒܐ ܬܫܒܘ̄ ܕܡܪܐ ܛܒܿܐ. ܘܡܬܗܝܡܢܐ ܡܠܼܬܐ ܘܡܬܩܒܠܐ ܕܡܢܼܗ ܐܝܬܝܗܿ. ܒܗܿܝ ܕܠܘ ܥܡ ܚܟܝܼܡ̈ܘܗܝ ܕܥܿܠܡܐ ܘܡܠ̈ܦܢܐ ܡܫܡ̈ܗܐ ܘܪܘܪ̈ܒܢܐ ܡܫܕܪ ܡܠܼܬܗ. ܐܠܐ ܥܡ ܦܫ̈ܝܼܛܐ ܘܗܕܝܼܘ̈ܛܐ. ܘܒܪ̈ܝܪܝ ܠܒܐ. ܘܗܿܠܝܢ ܣܦ̈ܩܢ ܒܗܢܐ ܢܝܼܫܐ. ܐܦܢ ܣܓܼܝܬ݀ ܡܠܬܐ ܝܬܝܪ ܡܼܢ ܙܕܩܐ. ܐܠܐ ܥܠܼܬܐ ܥܨܬ݀ ܕܗܿܠܝܢ ܢܼܬܐܡܪ̈ܢ ܩܕܡܐܝܬ܀ ܘܗܫܐ ܬܘܼܒ ܢ݀ܐܡܪ ܘܢܘܕܥ ܕܐܝܟܢ ܡܬܝܕܥ ܫܪܪܐ ܚܬܝܼܬܐܝܼܬ. ܘܢܿܪܕܐ ܒܛܟܼܣܐ ܕܡܠܼܬܐ ܣܕܝܼܪܐܝܼܬ. ܐܡܼܪܢܢ ܡܼܢ ܠܥܼܠ ܘܚܘܝܼܢܢ ܒܪܝܼܫܐ ܕܩܕܡ ܗܿܢܐ. ܕܐܝܿܟܢܐ ܕܐܠܼܨ ܘܥܼܨܐ ܠܢ ܟܝܿܢܗ ܕܦܓܪܐ ܕܢܣܬܪܝܼܘܗܝ ܡܼܢ ܡܐܚܫ̈ܢܝܬܗ. ܘܗܘܢܢ ܐܬܦܪܣ ܘܒܼܢܐ ܠܗ ܒܝܬܐ ܠܢܛܝܼܘܼܬܗ. ܗܟܢܐ ܙܕܿܩ ܕܐܦ ܢܬܒܢܐ ܒܝܬܐ ܢܦܫܢܐ. ܐܘܟܝܬ ܪܘܼܚܢܐ ܠܢܦܫܢ ܪܘܚܢܝܿܬܐ. ܘܕܐܡܼܪܢܢ ܘܐܬܕܟܪܢܢ ܗܫܐ ܢܦܫܢܐ ܘܪܘܼܚܢܐ. ܠܘ ܚܕ ܐܢܘܢ܆ ܐܠܐ ܬܪ̈ܝܢ. ܚܕ ܢܦܫܢܐ ܘܐܚܪܢܐ ܪܘܼܚܢܐ. ܥܡ ܗܿܘ ܩܕܡܝܐ ܕܦܓܪܐ ܕܗܘܝܢ ܟ݀ܠܗܘܿܢ ܬܠܬܐ. ܘܗܿܘ ܩܕܡܝܐ ܕܦܓܪܐ ܒܢܝܼܢܢ ܘܒܢܝܢܢ ܥܕܟܝܠ ܕܡܬܬܚܝܼܒ ܠܗ. ܘܗܿܘ ܢܦܫܢܐ ܗܟܘܬ ܐܠܨܐ ܠܢ ܕܢܒܢܝܘ̄ ܘܡܨܝܢܢ ܘܡܬܬܝܼܒ ܠܢ. ܗܿܘ ܕܝܢ ܪܘܼܚܢܐ ܐܠܗܐ ܒܢܝܗ. ܘܐܢ ܟܝܼܬ ܘܚܢܢ 21 ܨ݀ܒܝܢܢ ܘܝ݀ܨܦܝܢܢ ܘܡܦܝܼܣܝܼܢܢ ܘܫܿܘܝܢܢ. ܘܥܠ ܗܠܝܢ ܐܡܼܪܝܢܢ ܢܗܝܪܐܝܬ. ܐܡܬܝ ܕܨܿܒܐ ܡܪܐ ܛܒܿܐ ܘܡܬܡܛܝܢܢ ܠܕܘܼܟܬܐ ܕܠܿܚܡܐ ܠܗܝܢ. ܗܿܫܐ ܕܝܢ ܙܕܿܩ ܠܢ ܕܢܬܿܩܢ ܒܝܬܐ ܡܣܬܪܢܐ ܘܡܢܛܪܢܐ ܠܢܦܫܢ ܐܝܟ ܕܐܩܝܼܡܢܢ ܒܝܬܐ ܠܦܓܪܢ ܘܐܟܡܐ ܕܡܫܠܗܒ ܚܘܡܐ ܠܦܓܪܢ. ܗܟܢ ܗܿܐ ܚܿܙܝܢܢ ܕܚܘܡܗܿ ܕܪܓܬܐ ܘܕܚܡܼܬܐ ܕܢܨܝܼܒܐ ܒܟܝܿܢܢ ܡܫܠܗܒ ܠܢܦܫܢ. ܘܐܟܡܐ ܕܩܘܪܐ ܘܪܛܝܼܒܘܼܬܐ ܡܨܪܦ ܠܦܓܪܢ. ܒܝܕ ܓܠܝܼܙܘܼܬܐ ܕܙܠ̈ܝܩܝ ܫܡܼܫܐ. ܗܟܘܬ ܩܘܼܪܐ ܕܡܗܡܝܢܘܼܬܐ ܘܪܛܝܼܒܘܬܐ ܕܪ̈ܓܝܓܬܐ ܡܛܒܥ ܠܢܦܫܢ ܒܝܕ ܓܠܝܼܙܘܼܬ ܙܠ̈ܝܼܩܝ ܝܕܥܬܐ ܕܫܪܪܐ. ܘܐܟܡܐ ܕܚܝ̈ܘܬܐ ܚܒܠ̈ܬܐ ܡܚܒ̈ܠܢ ܠܓܦܪܐ ܠܒܪ ܡܼܢ ܐܣ̈ܝ ܒܝܬܐ. ܗܟܘܬ ܚܫ̈ܐ ܣܢܝ̈ܐ ܡܚܒܠܝܼܢ ܢܦܫܐ ܕܐܝܼܬܝܗܿ ܠܒܪ ܡܼܢ ܐܣ̈ܝ ܚܟܼܡܬܐ ܫܪܝܼܪܬܐ. ܕܐܝܼܬܝܗܘܢ ܚܣܡܐ. ܘܐܟܬܐ. ܘܣܢܼܐܬܼܐ. ܘܫܘܼܒ̄ ܣܪܝܼܩܐ. ܘܪܘܓܙܐ. ܘܥܼܨܝܢܐ. ܘܥܩܿܬܐ. ܘܪܚܡܼܬ݀ ܟܣܼܦܐ. ܥܡ ܫܪܟܐ ܕܐܝܟ ܗܿܠܝܢ. ܘܕܥܫܝܢ ܡܼܢ ܟܿܠܗܘܿܢ ܪܡܘܬܐ ܢܨܝܬ ܥܡ ܐܠܗܐ. ܥܡ ܚܬܝܼܪܘܼܬܐ ܘܫܘܼܒܗܪܐ. ܘܐܟܡܐ ܕܓܢܒ̈ܐ ܚܛܦܝܼܢ ܘܡܚܠܨܝܼܢ ܡܼܢ ܒܝܬܐ ܕܠܐ ܡܚܣܢ ܒܐܣ̈ܐ ܘܒܬܪ̈ܥܐ. ܗܿܟܢܐ ܘܚܫ̈ܐ ܕܕܓܠܘܼܬܐ ܘܛܥܝܿܘܬܐ ܕܠܐ ܝܕܥܬܐ ܥ̈ܐܠܝܢ ܥܠ ܢܦܫܐ ܕܠܐ ܡܚܣܢܐ ܒܚܟܼܡܬܐ ܫܪܝܼܪܬܐ. ܘܡܚܠܨܝܢ ܡܢܗ ܿܟܿܠܗܝܢ ܛܒ̈ܬܐ ܕܒܟܝܿܢܗܿ. ܘܕܩܢܬ݀ ܬܘܼܒ ܒܝܕ ܝܨܝܼܦܘܼܬܗܿ. ܡܿܕܝܢ ܘܿܠܐ ܠܢ ܕܝܬܝܪ ܚܦܝܼܛܐܝܼܬ ܘܒܝܨܝܦܘܼܬܐ ܣܓܝܼܐܬܐ ܢܬܚܟܡ ܘܢܬܦܪܣ. ܘܢܿܩܝܼܡ ܒܝܬܐ ܕܝܕܥܬܐ. ܘܢܚܣܢ ܒܗ ܢܦܫܢ. ܘܗܿܕܐ ܝܕܥܬܐ ܣܢܝܼܩܐ ܥܠ ܕܘܪܫܐ ܘܝܘܼܠܦܢܐ. ܘܗܿܢܐ ܡܬܩܢܐ ܡܼܢ ܥܘܼܩܒܐ ܕܥܠ ܫܪܪܐ. ܕܢܬܝܼܕܥ ܘܢܬܦܪܫ ܡܼܢ ܕܓܠܘܼܬܐ. ܡܼܢ ܗܪܟܐ ܘܿܠܐ ܠܢ ܕܢܫܪܐ ܒܒܢܝܿܢܐ ܕܝܕܥܬܗ ܕܫܪܪܐ ܕܐܝܼܬܘܗܝ ܢܘܼܗܪܐ ܘܛܝܒܘܼܬܐ. ܐܟܡܐ ܕܡܼܢ ܫ̈ܬܐܣܐ ܫܪܝܼܢܢ ܒܬܘܼܩܢܗ ܕܒܝܬܐ ܡܣܬܪܢܗ ܕܦܓܪܐ. ܕܐܝܿܟܢܐ ܕܝܢ ܡܬܝܼܕܥ ܗܿܢܐ. ܐܡܼܪܢܢ ܡܼܢ ܟܕܘܼ ܠܐܝܢܐ ܕܐܣܬܿܟܠ. ܘܬܘܼܒ ܐ݀ܡܪܝܢܢ ܘܡܢܗܪܝܢܢ ܢܘܼܗܪܐ ܡܿܢ ܡܕܡ ܐܝܬܘܗܝ ܘܐܝܼܬ ܠܗ ܩܢܘܼܡܐ ܘܐܘܣܝܐ. ܘܣܝܼܡ ܒܐܣܦܝܼܪܗ ܕܫܡܼܫܐ. ܟܕ ܐܝܼܬ ܢܘܼܗܪ̈ܐ ܐܚܪ̈ܢܐ ܒܟܝ̈ܢܐ ܕܟ̈ܐܦܐ ܘܕܡܪ̈ܓܢܝܐ ܘܕܦܪ̈ܚܕܘܼܕܐ ܘܐܕ̈ܫܐ ܐ̱ܚܪ̈ܢܐ. ܚܫܼܟܐ ܕܝܢ ܠܝܬܘܗܝ ܡܕܡ ܡܩܝܼܡܐ ܐܠܐ ܓܠܝܼܙܘܼ̄ ܘܥܿܠܡܐ ܗܢܐ ܘܒܪܢܫܐ ܐܝܼܬܝܗܘܢ. ܘܩܢܘܼܡ̈ܐ ܐܢܘܢ. ܘܐܝܼܬ ܠܗܘܿܢ ܟܝܿܢܐ ܘܐܘܣܝܐ. ܗܿܝܕܝܢ ܕܢܐܡܪ ܐܢܫ ܕܠܝܬܘܗܝ ܥܿܠܡܐ ܘܠܐ ܒܪܢܫܐ. ܘܠܐ ܡܕܡ ܐܝܬܝܗܿ. ܥܡ ܣܓܝ̈ܐܬܐ ܕܕܐܝܟ ܗܿܠܝܢ. ܡܿܕܝܢ ܐܝܼܬ ܫܪܪܐ ܚܬܝܼܬܐܝܬ ܒܥܿܠܡܐ. ܘܢܘܼܗܪܐ ܐܝܬܘ̄. ܕܐܝܬܝܗܿ ܝܼܕܥܬܗ ܕܫܪܪܐ. ܘܗܼܘ ܫܪܪܐ ܟܝܿܢܐ 22 ܕܡܟܢ ܘܫܟܝܼܚ. ܘܟܝܢܐ ܐܝܬܝܼ ܟܿܠ ܠܗܘܝܐ. ܡܕܝܢ ܟܝܿܢܐ ܕܐܝܬܝܼ ܟܿܠ ܠܗܘܝܐ ܘܠܐܝܼܬܘܬܐ. ܗܼܘ ܐܝܼܬܘܗܝ ܫܪܪܐ ܚܬܝܼܬܐ. ܡܕܝܢ ܠܘܬ݀ ܟܬܒܐ ܕܟܝܿܢܐ ܢܪܗܛ. ܘܒܗ ܢܼܩܪܐ ܘܡܢܗ ܢܐܠܦ ܥܠ ܟܿܠ ܡܕܡ ܕܡܬܒܥܐ ܠܢ ܘܙܕܿܩ ܠܢ ܠܡܐܠܦ. ܘܒܗܿܠܝܢ ܐܬܚܬܡ ܩܦܠܐܘܢ ܕܬܪܝܢ ܒܝܕ ܐܠܗܐ ܕܗܕܝ. Chapter 3 ܬܘܼܒ ܥܡ ܐܠܗܐ ܕܡܚܟܡ ܩܦܠܐܘܢ ܕܬܠܬܐ ܕܡܢܐ ܐܝܬܘܗܝ ܫܪܪܐ ܘܡܿܢܐ ܐܝܼܬܝܗܿ ܕܓܠܘܼܬܐ ܒܬܪ ܗܿܟܝܼܠ ܬܪܝܢ ܩܦ̈ܠܐܐ ܕܐܬܐܡܼܪܘ. ܕܡܿܢܐ ܘܿܠܐ ܠܒܪܢܫܐ ܠܡܼܐܕܥ ܘܕܢܼܐܠܦ. ܗܿܢܘ ܕܝܢ ܕܢܥܩܒ ܚܬܝܼܬܐܝܼܬ ܥܠ ܫܪܪܐ. ܘܢܦܪܫܝܼܘܗܝ ܡܼܢ ܕܓܠܘܼܬܐ. ܘܕܐܝܟܢ ܡܬܝܼܕܥ ܫܪܪܐ ܚܬܝܼܬܐܝܼܬ. ܕܐܝܼܬܘܗܝ ܫܦܝܘܬܗܿ ܕܢܦܫܐ ܕܒܗܿ ܚܿܝܪܐ. ܒܟܝܿܢܐ ܚܬܝܼܬܐܝܼܬ ܘܡܫܚܐ ܠܫܪܪܐ. ܢܐܡܪ ܗܿܫܐ ܕܡܢܐ ܐܝܼܬܘܗܝ ܗܼܘ ܫܪܪܐ. ܘܡܢܐ ܐܝܼܬܝܗܿ ܕܓܠܘܼܬܐ. ܘܐܡܿܪܝܢܢ ܕܫܪܪܐ܆ ܐܝܬܘܗܝ ܡܕܡ ܕܐܝܼܬܘܗܝ. ܘܕܓܠܘܼܬܐ ܐܝܬܝܗܿ ܡܕܡ ܕܠܝܬܘܗܝ. ܘܫܪܪܐ ܩܿܐܡ ܠܢܦܫܗ ܘܡܫܪܪ ܗܼܘ ܥܠܘܗܝ ܒܗܿܝ ܕܐܝܼܬܘܗܝ. ܕܓܠܘܼܬܐ ܕܝܢ ܠܐ ܩܿܝܡܐ ܠܢܦܫܗܿ ܒܗܿܝ ܕܠܝܬܝܗܿ. ܘܐܟܙܢܐ ܕܚܫܼܟܐ ܓܠܝܼܙܘܼܬܗ ܕܢܘܗܪܐ ܐܝܼܬܘܗܝ. ܘܒܝܼܫܬܐ ܓܠܝܼܙܘܼܬܗܿ ܕܛܒܿܬܐ. ܗܟܘܬ ܘܕܓܠܘܬܐ ܓܠܝܼܙܘܬܗ ܕܫܪܪܐ. ܘܢܘܼܗܪܐ ܘܛܒܿܬܐ ܐܝܼܬܝܗܘܢ. ܚܫܼܟܐ ܕܝܢ ܘܒܝܫܬܐ ܠܝܬ ܐܢܘܢ. ܐܠܐ ܓܠܝܼܙܘܼܬܐ ܕܗܿܠܝܢ ܡܬܼܐܡܪܝܢ. ܫܪܪܐ ܕܝܢ ܝܬܝܪ ܚܝܠܬܢ ܡܼܢ ܗܿܠܝܢ. ܒܗܿܝ ܕܐܝܼܬܘܗܝ ܐܡܝܼܢܐܝܼܬ. ܘܩܿܐܡ ܠܢܦܫܗ. ܘܐܝܟܐ ܕܫܪܪܐ ܐܝܼܬ ܐܡܝܼܢܐܝܼܬ܆ ܕܓܠܘܼܬܐ ܣܟ ܠܐ ܡܨܝܐ ܕܬܗܼܘܐ ܐܝܼܬܝܗܿ ܒܗܿܝ ܕܠܝܬ ܐܡܼܬܝ ܕܠܝܬ ܫܪܪܐ. ܗܿܐ ܐܬܚܘܝܬ݀ ܕܣܟ ܟܘܼܠܢܐܝܼܬ ܠܝܬ ܕܓܠܘܼܬܐ. ܘܫܪܝܪܐ ܐܝܬ ܚܬܝܼܬܐܝܼܬ. ܘܗܿܢܘ ܕܘܼܡܪܐ. ܘܕܐܝܟܢ ܡܕܡ ܕܠܝܬܘܗܝ ܣܟ. ܗܿܘܐ ܡܬܼܐܡܪ ܘܐܝܼܬ ܠܗ ܫܡܐ. ܗܿܢܐ ܕܝܢ ܗܿܘܐ ܠܘܬ݀ ܡܿܢ ܕܓܠܝܼܙ ܡܼܢ ܫܪܪܐ. ܘܐܢ ܠܐ ܥܣܩܐ ܗܘܼܬ݀ ܡܠܼܬܐ ܥܠ ܫܡܘܼ̈ܥܐ܆ ܐ݀ܡܪ ܗܘ݀ܝܬ ܕܣܘܓܐܗ ܕܥ݀ܠܡܐ ܠܒܪ ܡܼܢ ܫܪܪܐ ܐܝܼܬܝܗܘܢ ܘܕ̈ܠܝܼܠܐ ܐܢܘܢ ܕܐܫܼܟܚܘ ܠܫܪܪܐ. ܘܐܝܠܝܢ ܕܐܫܼܟܚܘ ܠܫܪܪܐ ܒܗ ܐܬܚܝܕܘ ܘܐܬܢܼܗܪܘ. ܘܐܡܠܼܟܘ ܒܐܪܥܐ ܘܒܫܡ̈ܝܐ. ܘܣܟ ܒܥܠܕܒܒܐ ܠܝܬ ܠܗ. ܘܠܐ ܣܩܘܼܒܠܐ ܘܠܐ ܣ݀ܐܢܐ. ܘܠܐ ܥܘܼܟܪܐ. ܒܗܿܝ ܕܕܠܘܼܬܐ ܠܐ ܓܢܒܬܗ ܘܠܐ ܫܠܛܼܬ݀ ܒܗ. ܒܗܿܝ ܕܒܢܘܼܗܪܐ ܗܿܘ ܐܡܝܼܢܐܝܬ. ܘܗܢܐ ܐܬܼܕܡܝ ܠܒܪܘܝܗ ܘܫܪܪ ܠܒܪܝܬܗ ܘܠܡܠܼܬܐ ܗܿܝ ܕܐܡܝܼܪܐ. ܕܒܨܠܡܗ ܕܒܪܘܝܗ ܐܝܼܬܘ̄ ܒܪܝܐ. ܘܗܢܐ ܐܪܙܐ ܪܒ ܗܼܘ. ܘܗܿܫܐ ܠܐ ܡܨܝܐ ܕܢܬܦܫܿܩ. ܒܗܿܝ ܕܫܘܼܪܝܗ ܕܟܬܒܐ ܕܿܡܐ ܠܚܠܒܐ ܕܝ̈ܠܘܼܕܐ. ܘܟܡܐ ܕܡܬܥܠܡ ܝܠܘܕܐ ܐܦ ܡܐܟ̈ܠܬܗ. ܥܕܡܐ ܕܗܿܘܐ ܓܡܝܼܪܐ ܒܩܘܡܬܐ ܡܫܡܠܝܬܐ ܕܟܠ ܐܕܫ̈ܝܢ. 23 ܕܐܝܟܢܐ ܕܝܢ ܡܬܝܼܕܥ ܫܪܪܐ ܐܡܼܪܢܢ ܘܡܼܬܐܡܪ. ܐܝܢܝܘܼܬܗ ܕܝܢ ܕܫܪܪܐ ܠܐ ܡܨܝܐ ܕܡܼܢ ܫܡܼܥܐ ܕܡܠܼܬܐ ܘܡܼܢ ܩܪܝܢܐ ܕܟ̈ܬܒܐ ܢܬܝܼܕܥ. ܐܠܐ ܗܼܘ ܗܿܘ ܕܐܫܼܟܚܗ ܠܫܪܪܐ ܘܝܕܥܗ ܡܼܢ ܗܿܠܝܢ ܐܬܘ̈ܬܐ܆ ܡܐܚܒ ܘܡܛܐܒ ܠܟܿܠܗܘܿܢ ܒܢܝ̈ܢܫܐ. ܡܥܼܠܝ ܡܼܢ ܟܿܠܗܘܿܢ ܚܫ̈ܐ ܣ̈ܢܝܐ. ܟܿܠܗ ܫܘܼܠܛܢܗ ܕܗܢ ܥܿܠܡܐ ܘܫܘܼܒܚܗ ܘܩܢܝܘܼܬܗ܆ ܐܝܟ ܠܐ ܡܕܡ ܚܫܝܼܒ̈ܢ ܠܗ. ܟܿܠܗܝܢ ܟܣܝ̈ܬܐ ܓܠ̈ܝܢ ܠܗ. ܘܚܝܠܐ ܘܡܥܒܕܢܘܼܬܐ ܘܐ̱ܪܙܐ ܟܣܝܐ ܕܛܡܝܪ ܒܟܿܠܡܕܡ ܕܐܝܼܬ ܒܐܪܥܐ ܝ݀ܕܥ. ܟ݀ܠܡܕܡ ܡܫܼܬܡܥ ܠܨܒܝܿܢܗ ܘܦܘܼܩܕܢܗ. ܡܠ̈ܝܼܠܐ ܘܡܢܦ̈ܫܐ ܘܠܐ ܡܢܦ̈ܫܐ. ܘܐܣܛܘܼܟ̈ܣܐ ܘܟ݀ܠ ܕܡܼܢܗܘܿܢ. ܒܗܿܝ ܕܚܿܙܝܢ ܒܗ ܨܠܡܐ ܫܪܝܼܪܐ ܕܒܪܘܼܝܗ. ܕܫܦܐ ܘܫܦܝܼܪ ܘܠܐ ܡܫܼܬܚܠܦ. ܗܿܘ ܕܝܢ ܕܠܐ ܡܛܐ ܠܗܿܟܢ ܘܠܐ ܪܓܝܼܫ ܒܗܿܠܝܢ. ܕܓܠܘܼܬܐ ܢ݀ܨܝܐ ܥܡܗ. ܘܚܫܼܟܐ ܡܥܪܙܠ ܒܗ. ܘܒܝܼܫܘܼܬܐ. ܚܫ̈ܐ ܓܢܒ̈ܐ ܘܓܫܢ̈ܝܐ ܕܥܠ ܥܠ ܟܝܿܢܐ ܫܦܝܐ ܘܫܦܝܼܪܐ. ܡܕܝܢ ܐܚ̈ܝ ܚܒ̈ܝܼܒܐ. ܕܗܿܠܝܢ ܗܿܟܢܐ ܐܝܼܬܝܗܝܢ. ܘܗܿܢܘ ܛܟܼܣܐ ܕܟܝܢܢ. ܘܡܼܢ ܗܿܝ ܫܦܝܘܼܬܐ ܕܒܝܬܐ ܘܛܒܿܘܬܐ ܪܒܬܐ ܐܝܼܬܘ̄ ܛܘܼܗܡܢ. ܘܬܘܼܒ ܡܨܝܐ ܠܢ ܘܦܫܝܼܩ ܥܠܝܢ ܕܠܬܡܿܢ ܢܬܥܠܐ ܐܢ ܨܒܿܝܢܢ. ܒܝܼܫܬܐ ܗܿܝ ܒܝܬܐ ܘܐܒܕܢܐ ܓܡܝܼܪܐ. ܘܐܢ ܡܗܡܝܢܢ ܡܼܢ ܛܒܿܬܐ ܗܕܐ ܪܒܬܐ ܘܠܐ ܡܣܼܬܝܟܢܝܼܬܐ ܕܫܟܝܼܚܐ ܒܟܝܿܢܢ. ܘܠܿܒܟܝܢܢ ܕܓܠܘܼܬܐ ܓܢܒܬܐ. ܕܠܝܬܝܗܿ ܣܟ ܘܠܐ ܫܟܝܼܚܐ ܒܟܝܿܢܢ. ܘܒܗܿܠܝܢ ܐܬܚܬܡ ܪܝܫܐ ܗܢܐ ܕܬܠܬܐ ܒܝܕ ܐܠܗܐ ܕܡܚܟܡ ܀ ܀ ܀ Chapter 4 ܬܘܼܒ ܥܠ ܐܠܗܐ ܕܡܗܕܐ ܪܝܫܐ ܐܘܟܝܼܬ ܩܦܠܐܘܢ ܕܐܪܒܥܐ. ܕܐܝܟܢ ܡܬܝܼܕܥ ܕܐܝܼܬ ܐܠܗܐ. ܐܠܗܐ ܡܫܒܚܐ ܘܫܪܝܪܐ. ܗܿܘ ܕܐܝܼܬܝܟ ܐܝܼܬܝܐ ܡܬܘܼܡܝܐ. ܕܠܐ ܡܬܕܪܟ ܘܠܐ ܡܬܼܢܩܦ. ܠܐ ܡܬܼܦܫܩ ܠܐ ܡܬܡܠܠ ܒܠܫܢܐ ܕܒܣܼܪܐ. ܠܐ ܡܬܕܪܟ ܠܚܘܫ̈ܒܝ ܗܘܢܐ. ܠܐ ܡܣܼܬܝܟ ܒܡܠܼܬܐ ܘܟܬܒܐ. ܠܐ ܡܬܬܡܝܼܫ ܡܼܢ ܟܼܢܦ̈ܝ ܬܪܥܝܼܬܐ. ܘܡܢܐ ܐ݀ܣܓܐ ܘܐܦܿܩܩ ܩܕܡ ܡܪܘܼܬܟ. ܕܐܦܠܐ ܡܠܼܬܐ ܕܥܠ ܠܐ ܡܼܬܕܪܟܢܘܼܬܐ ܘܓܢܝܼܙܘܼܬܟ ܡܣܼܬܝܟܐ. ܝܿܗܒ ܐܢܬ ܕܝܢ ܘܡܢܗܪ ܐܢܬ ܠܗܘ̈ܢܐ ܫܦ̈ܝܐ ܕܢܕܥܘܼܢܟ ܐܝܟ ܕܡܨܝܐ ܠܗܘܢ. ܘܐܝܟ ܡܫܘܼܚܬܐ ܕܫܦܝܘܼܬܗܘܢ. ܡܐܠܠܘܢ ܕܝܢ ܐܝܟ ܕܐܢܬ ܨܿܒܐ ܐܢ̱ܬ ܘܐܝܿܟܢܐ ܕܨܿܒܐ ܐܢ̱ܬ. ܘܝܿܕܥܐ ܪܒܘܬ ܝܼܕܥܬܟ ܝܿܕܥܬ ܟܿܠ ܕܗܘܼܐ ܘܗܿܘܐ ܡܼܢ ܥܿܠܡ. ܐܝܟ ܗܿܘ ܕܩܕܡ ܥܝ̈ܢܝܟ ܐܝܼܬܘܗܝ ܕܠܐ ܫܘܼܚܠܦ. ܕܥܕܪܐ ܠܗܘܿܢ ܠܝܕܘ̈ܥܐ ܘܡܨܝܢ ܝ݀ܕܥܝܢ. ܡܫܒܚ ܫܡܟ ܪܒܐ ܘܡܫܒܚܐ ܡܫܒܚ ܐܡܝܢܐܝܼܬ ܒܬܫܒܘܚܬܗ ܫܒܝܼܚܬܐ ܘܡܫܒܚܬܐ. ܣܓܝܕ ܐܝܩܪܟ. ܬܘܕܝܼ 24 ܠܡܪܘܬܟ. ܐܘ̄ ܕܠܐ ܣܿܦܩܝܢ ܘܠܐ ܡܘܦܝܢ ܘܠܐ ܡܣܝܟܝܢ ܟܿܠܗܘܿܢ ܒܪ̈ܝܐ ܕܢܫܒܚܘܼܢܟ ܒܗܿܝ ܕܡܫܒܚ ܐܢܬ ܘܓܡܝܼܪ ܘܡܫܡܠܝ. ܘܠܐ ܚܼܣܝܼܪ ܐܢܬ ܐܘ̃ ܡܪܐ ܛܒܿܐ ܘܒܪܘܝܐ ܚܟܝܼܡܐ ܘܡܦܪܢܣܢܐ ܥܬܝܼܪܐ. ܗܒܼܠܢ ܗܘܢܐ ܫܦܝܐ ܘܢܦܫܐ ܢܗܝܼܪܬܐ. ܘܒܪܝ ܒܢ ܠܒܐ ܕܟܝܐ. ܕܢܡܠܠ ܒܟ ܥܠܝܟ ܘܡܛܠܬܟ. ܐܝܟ ܕܨ݀ܒܝܐ ܪܒܘܬܟ ܘܝ݀ܗܒܐ ܛܝܒܘܼܬܟ. ܘܝ݀ܕܥܐ ܚܟܝܼܡܘܬܟ ܕܡܨܝܐ ܠܢ ܕܢܐܡܪ ܘܣܦܩܝܼܢܢ ܕܢ݀ܫܡܥ. ܘܐܦ ܚܢܢ ܕܘ̈ܝܐ ܡܡܚܝܼܢܢ ܥܠ ܗܿܠܝܢ ܕܠܐ ܫܿܘܝܢܢ. ܐܠܐ ܐܢܬ ܨܒܼܝܬ ܐܘ̄ ܛܒܿܐ ܕܬܘܕܥ ܠܒܪ̈ܝܬܟ ܥܠ ܐܝܼܬܘܼܬܟ. ܘܥܠ ܗܿܝ ܒܼܪܝܬ ܐܢܝܢ ܕܢܕܥܘܼܢܟ ܘܢܥܬܪܘܢ ܡܼܢ ܒܝܬܓܙܟ ܠܐ ܡܼܬܚܬܡܢܐ. ܘܢܬܼܚܟܡܘܢ ܡܼܢ ܝܼܕܥܬܟ ܠܐ ܡܣܼܬܝܟܢܝܬܐ. ܘܢܼܬܒܣܡܘܢ ܒܟ ܐܡܝܼܢܐܝܬ ܘܕܠܐ ܫܘܼܠܡܐ. ܡܛܠ ܗܿܠܝܢ ܡܪܝ ܒܼܪܝܬ ܠܒܪ̈ܝܬܟ ܘܠܘ ܕܢܫܒܚܘܼܢܟ ܠܟ ܕܫܒܝܼܚ ܐܢܬ ܘܪܡ ܘܡܥܠܝ ܡܼܢ ܟܿܠ ܬܫܒܘܼܚܬܐ ܕܡܫܒ̈ܚܢܐ. ܐܠܐ ܗܼܢܘܢ ܣܢܝܼܩܝܢ ܘܚܣܝܼܪܝܢ. ܘܥܠ ܗܿܝ ܡܫܒܚܝܢ ܠܟ ܕܢܬܼܩܪܒܘܢ ܠܘܬ݀ ܪܒܘܬܟ. ܘܢܬܥܕܪܘܢ ܗܼܢܘܢ ܘܢܐܪܒܘܢ ܡܼܢ ܬܫܒܘ̄ ܕܡܫܒܚܝܢ ܠܟ. ܒܪܝܼܟ ܐܝܼܩܪܟ ܡܼܢ ܟܿܠ. ܘܣܓܝܼܕ ܐܢܬ ܡܼܢܟܿܠ. ܘܡܫܒܚ ܫܡܟ ܘܡܗܪܕ ܘܡܪܡܪܡ ܠܥܠܡܥܿܠܡܝܢܐܡܝܢ܀ ܒܫܪܪܐ ܚܒܝܼ̈ܒܝ ܕܟܿܠ ܐܡܿܪ ܘܡܗܝܡܢ ܕܐܝܼܬ ܐܠܗܐ. ܘܠܘ ܒܢܝ̈ܢܫܐ ܒܠܚܘܕ. ܐܠܐ ܐܦ ܫ̈ܐܕܐ܆ ܡܗܝܡܢܝܢ ܘܙܿܝܥܝܢ ܘܪܥܿܠܝܢ ܡܼܢ ܬܫܒܘ̄ ܕܫܡܗ ܕܚܝܼܠܐ ܘܡܫܒܚܐ. ܐܠܐ ܣܘܓܐܗܘܢ ܕܒܢܝ̈ܢܫܐ ܒܡܠܼܬܐ ܒܠܚܘܼܕ ܐ݀ܡܪܝܢ ܕܐܝܼܬ ܐܠܗܐ. ܘܒܝܼܕܥܬܐ ܦܫܝܼܛܬܐ ܣܿܓܝܼ ܒܨܝܼܪܬܐ ܝܿܕܥܝܢ ܠܗ. ܕܠ̈ܝܼܠܐ ܕܝܢ ܙܘܥܘܼܪ̈ܐ ܐܢܘܢ ܐܝܠܝܢ ܕܪܓܝܼܫܝܢ ܒܗ. ܘܗܿܠܝܢ ܡܕܡ ܒܨܝܼܪܐ ܐܕܪܟܘ. ܘܐܝܟ ܚܕܐ ܛܘܼܦܬܐ ܡܼܢ ܟ݀ܠܗ ܝܡܐ ܪܒܐ ܕܒܟܿܠܗܿ ܬܐܒܝܠ ܘܐܝܟ ܚܕܐ ܦܪܕܬܐ ܡܼܢ ܟܿܠܗ ܚܠܐ ܕܐܝܼܬ ܥܠ ܐܪܥܐ ܘܒܝܡ̈ܡܐ ܘܒܢܗܪ̈ܘܬܐ. ܘܟܕ ܡܕܡ ܒܨܝܼܪܐ ܡܢ ܗܕܪܐ ܕܬܫܒܘ̈ܗ ܐܙܠܓ ܥܠܝܗܘܢ. ܣܦܼܘ ܘܐܫܬܠܗܒܘ ܒܢܘܼܪܐ ܕܚܘܼܒܗ. ܘܐܬܓܘܙܠܘ ܒܪܚܡܬܗ ܘܛܥܼܘ ܢܦܫܗܘܢ ܘܟܝܿܢܗܘܢ. ܘܐܝܟ ܫܢ̈ܝܐ ܗܘܼܘ ܠܘ ܚܙ̈ܠܝܐ ܕܠܐ ܡܦܣܝܢ ܘܠܐ ܪܓܝܼܫܝܢ ܒܡܕܡ ܕܐܪܓܼܘ. ܐܠܐ ܐܚ̈ܝ ܘܚܒ̈ܝܼܒܐ. ܡܛܠ ܕܩܕܡܢܢ ܐܡܼܪܢܢ ܡܼܢ ܠܥܼܠ. ܕܗܟܢܐ ܢܚܫܘܼܒ ܢܦܫܢ ܐܝܟ ܗܿܘ ܕܝܘܡܢܐ ܥܠܢܢ ܠܥܿܠܡܐ ܗܿܢܐ ܟܿܠܢ ܥܡ ܟܿܠܢ. ܘܐܬܟܢܫܢܢ ܐܟܚܕܐ ܒܦܩܥܬܐ ܡܕܡ ܡܕܒܪܝܬܐ ܐܝܟ ܕܐܡܼܪܢܢ. ܘܒܿܥܝܢܢ ܕܢܥܩܒ ܥܡ ܚܕܕ̈ܐ. ܘܢܒܝܝܢ ܒܚܘܼܫ̈ܒܝܢ ܘܢܫܟܚܝܘ̄ ܠܫܪܪܐ ܚܬܝܼܬܐ ܘܢܩܦ ܠܗ. ܗܿܟܢܐ ܡܕܝܢ ܚܬܝܬܐܝܼܬ ܙܕܿܩ ܠܢ ܕܢܥܩܒ ܘܢܐܠܦ. ܕܐܢ 25 ܐܝܬ ܐܠܗܐ ܘܡܪܐ ܘܡܕܒܪܢܐ ܠܗܢܐ ܟܿܠ ܐܘܿ ܠܐ. ܡܢ ܫܪ̈ܒܐ ܘܣܗܕܘ̈ܬܐ ܚܬܝܼ̈ܬܐ ܘܡܫܪܪ̈ܢܝܬܐ ܘܡܩܢܝܬ݀ ܦܝܣܐ ܠܟܿܠܗܘܿܢ ܥܡܼ̈ܡܐ ܕܬܚܝܬ ܫܡܿܝܐ. ܡܼܢ ܐܝܟܐ ܕܡܩܒܠ ܗܘܢܐ ܕܟ݀ܠܗܘܢ ܘܣܿܦܩܐ ܝܼܕܥܬܗܘܢ. ܘܡܼܨܝܐ ܠܗܘܿܢ ܕܢܫܡܼܥܘܢ ܘܢܣܼܬܟܠܘܢ. ܘܢܗܝܡܼܢܘܢ ܠܫܪܪܐ. ܗܿܘ ܕܡܬܓܠܐ ܘܡܬܝܕܥ ܠܗܘܿܢ ܡܼܫܬܪܪ ܒܠ̈ܒܝܗܘܢ. ܘܢܬܐܘܘܢ ܟܿܠܗܘܢ ܥܠܘܗܝ ܘܢܣܗܕܘܢ ܘܢܘܕܘܢ. ܘܐܟܡܐ ܕܚܘܝܢܢ ܡܼܢ ܥܼܠ. ܕܟܕ ܐܫܿܬܟܚܢܢ ܒܦܩܥܬܐ ܗܕܐ ܡܕܒܪܝܬܐ. ܐܬܦܪܣܢܢ ܡܛܠ ܫܪ̈ܒܐ ܡܐܚܫ̈ܢܐ ܕܦܓܪ̈ܝܢ. ܘܐܬܚܫܒܢܢ ܘܒܢܝܢܢ ܒܝܬܐ ܠܣܼܬܪܢ. ܘܡܕܡ ܕܩܕܡܢܢ ܐܬܗܘܢܢ ܕܐܝܼܬܘ̄ ܬܛܠܝܼܠܐ. ܗܘܼ ܗܘܼܐ ܫܘܼܠܡܗ ܕܣܘܼܥܪܢܐ. ܘܫܘܼܠܡܗ ܕܚܘܼܫܒܐ ܕܐܬܗܘܢܢ ܗܘܼ ܗܘܼܐ ܫܘܼܪܝܗ ܕܣܘܼܥܪܢܐ. ܕܐܝܼܬܘܗܝ ܪܡܝܐ ܕܫܬܐܣܬܐ ܕܒܝܬܐ. ܗܟܢܐ ܐܦ ܐܬܚܫܒܢܢ ܕܝܬܝܼܪܐܝܬ ܙܕܿܩ ܠܢ ܕܢ݀ܒܢܐ ܒܝܬܐ ܕܝܼܕܥܬܐ ܠܗܿܘ ܡܕܡ ܝܕܘܼܥܬܢܐ ܘܩܛܝܼܢܐ ܕܐܝܬ ܒܢ ܕܐܝܬܝܗܿ ܢܦܫܢ. ܘܐܟܡܐ ܕܬܛܠܝܼܠܐ ܕܒܝܬܐ ܐܝܼܬܘ̄ ܫܘܼܠܡ ܣܘܥܪ̈ܢܐ ܕܩܕܡ ܐܬܗܘܢܢ. ܗܟܢܐ ܐܝܼܬܝܗܿ ܓܡܝܼܪܘܬܗ ܕܗܘܢܐ ܫܘܼܠܡ ܥ݀ܒ̈ܕܐ ܘܣܘܼܥܪ̈ܢܐ ܕܡܝܬܪܘܼܬܐ ܕܩܕܡ ܐܬܗܘܢܢ. ܘܐܟܡܐ ܕܐܝܼܬܝܗܝܢ ܐܣ̈ܐ ܚܘܼܫܒܐ ܕܬܪܝܢ܆ ܘܐܦ ܣܥܘܪ̈ܘܬܐ ܕܬܪ̈ܬܝܢ ܠܛܥܘܢܘܬܗ ܕܬܛܠܝܼܠܐ. ܗܟܢܐ ܐܝܼܬܝܗܘܢ ܥ݀ܒ̈ܕܐ ܘܣܘܼܥܪ̈ܢܐ ܛܒ̈ܐ. ܘܚܘܼܫܒ̈ܐ ܕܟ̈ܝܐ ܘܦܘܼܠܚܢܐ ܡܠܝܼܠܐ ܕܡܝܬܪܘܼܬܐ. ܡܩܪܒܢܐ ܕܠܘܬ ܫܘܼܡܠܝܐ ܕܓܡܝܼܪܘܼܬܐ. ܘܐܟܡܐ ܕܐܝܬܝܗܝܢ ܫܬܐܣ̈ܐ ܫܘܼܠܡܗ ܕܚܘܼܫܒܐ ܘܫܘܼܝܗ ܕܣܘܼܥܪܢܐ ܗܟܢܐ ܐܝܬܝܗܿ ܝܕܥܬܗ ܕܫܪܪܐ. ܫܬܐܣܬܐ ܘܫܘܼܪܝܐ ܕܟܿܠܗܝܢ ܛܒ̈ܬܐ ܕܡܥ̈ܠܝܢ ܘܡܣ̈ܩܢ ܘܡܩܪ̈ܒܢ ܠܗܘܢܐ ܐ̱ܢܫܝܐ ܠܘܬ݀ ܓܡܝܼܪܘܼܬܐ ܡܫܡܠܝܬܐ. ܘܐܟܙܢܐ ܕܗܿܘ ܕܡܪܡܐ ܫܬܐܣܬܐ ܡܫܪܪܬܐ ܘܦܠܚ ܒܢܘܼܗܪܗ ܕܐܝܼܡܡܐ ܠܫܘܼܠܡܐ ܛܒܿܐ ܘܫܦܝܼܪܐ ܣܿܠܩ ܘܡܼܬܡܛܐ ܒܟܝܿܢܗ. ܗ̣ܿܢܐ ܘܗܿܘ ܕܡܫܪܐ ܕܢܕܥ ܘܢܥܩܒ ܘܢܫܼܟܚ ܠܫܪܪܐ. ܘܢܗܠܟ ܘܢܪܕܐ ܗܿܘܢܗ ܒܕܝܥܬܐ ܕܢܘܼܗܪܗ ܕܫܪܪܐ. ܠܫܘܼܠܡܐ ܛܒܿܐ ܘܫܦܝܼܪܐ ܣܿܠܩ ܘܡܬܼܡܛܐ ܥܕܡܐ ܠܪܘܡܐ ܡܥܠܝܐ ܕܓܡܝܼܪܘܬܐ. ܡܕܝܢ ܐܚ̈ܝ ܚܒܝܼܒ̈ܐ. ܡܼܢ ܗܿܐ ܡܟܐ ܡܼܢ ܗܿܕܐ ܫܬܐܣܬܐ ܫܪܝܪܬܐ ܙܕܩ ܠܢ ܕܢܫܪܐ ܬܩܢܐܝܬ ܘܚܟܝܼܡܐܝܼܬ. ܘܡܠܝܼܠܐܝܬ ܒܐܘܼܪܚܐ ܗܕܐ ܢܗܝܼܪܬܐ ܕܒܝܢܝܿܢܢ ܪܘܼܚܢܝܐ ܘܡܩܘܝܢܐ. ܘܡܣܩ ܠܪܘܡܐ ܡܥܠܝܐ ܕܫܡܿܝܐ. ܡܢܐ ܕܝܢ ܐܝܼܬܘܗܝ ܫܪܪܐ ܫܪܝܪܐ ܘܢܘܼܗܪܐ ܡܢܗܪܢܐ. ܘܝܼܕܥܬܐ ܓܡܝܼܪܬܐ ܘܚܟܼܡܬܐ ܡܥܠܝܬܐ. ܘܐܝܼܬܘܼܬܐ ܡܬܘܼܡܝܬܐ ܘܐܘܣܝܐ ܡܥܠܝܬܐ. ܘܐܝܼܬܘܗܝ ܗܘܼܐ ܘܗܘ ܐܝܼܬܘܗܝ ܐܡܝܼܢܐܝܬ. ܘܗܼܘ ܟܕ ܗܼܘ ܐܝܼܬܘ̄ ܠܥܿܠܡܝܢ. ܗܿܠܝܢ ܕܝܢ ܕܐܝܬܝܗܘܢ ܗܫܐ. 26 ܐܝܬ ܐܡܬܝ ܕܠܐ ܐܝܼܬܝܗܝܢ ܗܘܼ̈ܝ ܘܗܿܘܐ ܐܡܬܝ ܕܠܐ ܗܘ̈ܝܢ. ܗܼܘ ܕܝܢ ܐܡܝܼܢܐܝܬ ܐܝܼܬܘ̄ ܗܘܼܐ ܘܐܝܼܬܘܗܝ. ܘܗܼܘ ܗܘܿܐ ܐܝܼܬܘ̄. ܡܕܝܢ ܗܿܘ ܕܐܝܼܬܘܗܝ ܐܡܝܼܢܐܝܬ܆ ܫܪܝܪ ܡܼܢ ܐܝܠܝܢ ܕܠܐ ܐܝܬܗܝܢ ܐܡܝܢܐܝܼܬ. ܡܕܝܢ ܗܼܘ ܐܝܼܬܘܗܝ ܫܪܪܐ ܫܪܝܪܐ. ܘܟܿܠ ܕܐܝܼܬܘܗܝ ܠܒܪ ܡܼܢ ܐܠܗܐ ܠܐ ܡܕܡ ܐܝܼܬܘ̄ ܕܐܝܬܝܗܿ ܕܓܠܘܼܬܐ. ܗܿܫܐ ܕܝܢ ܙ݀ܕܩ ܠܢ ܕܥܠ ܣܒܪܗ ܘܥܠ ܬܘܼܟܠܢܗ ܕܗܿܘ ܐܝܼܬܘ̄ ܫܪܝܪܐܝܼܬ. ܕܢܫܪܐ ܘܢܥܩܒ ܘܢܡܪܚ ܘܢܒܝܝܢ ܚܿܬܝܼܬܐܝܼܬ ܕܐܢ ܐܝܼܬܘܗܝ ܘܐܝܟܢ ܡܬܼܝܕܥܐ ܕܐܝܼܬܘܗܝ. ܗܿܢܘ ܕܝܢ ܘܐܦܢ ܡܡܪܚܐ ܡܠܼܬܐ. ܕܐܝܟܢ ܡܬܝܕܥܐ ܚܬܝܼܬܐܝܼܬ ܘܡܬܗܝܡܢܐ ܥܠ ܟܿܗܘܿܢ ܥܡܼ̈ܡܐ. ܘܡܬܼܩܒܠܐ ܒܣܗܕ̈ܘܬܐ ܫܪܝܪ̈ܬܐ ܘܬܚܘ̈ܝܬܐ ܡܿܩܢܝ̈ܬ݀ ܦܝܿܣܐ ܠܗܘܢܐ ܘܡܕܥܐ ܕܟܿܠܗܘܿܢ. ܕܐܢ ܐܝܼܬ ܐܠܗܐ ܘܡܪܐ ܘܡܕܒܪܢܐ ܠܗܢܐ ܟܿܠ ܐܘܿ ܠܐ. ܗܿܢܘ ܫܘܪܝܐ ܕܟܿܠ ܝܕ̈ܥܢ. ܘܫܬܐܣܬܐ ܕܟܿܠ ܚܟ̈ܡܢ. ܘܥܠܬ݀ ܒܥܬܐ ܕܟܿܠ ܛܒ̈ܢ܀ ܗܿܫܐ ܢܟܢܫ ܗܘܢܢ ܡܼܢ ܦܗܝܐ. ܘܚܘܼܫ̈ܒܝܢ ܡܼܢ ܡܪ̈ܢܝܬܐ ܡܕܘܕܢܝ̈ܬܐ. ܘܢܗܼܘܐ ܒܥܘܼܡܪܐ ܒܗܝܼܠܐ ܘܒܕܘܼܟܬܐ ܫܠܝܐ ܘܢܝܼܚܐ ܡܼܢ ܩ̈ܠܐ ܫܓܝܼܫ̈ܐ ܘܛܒܼ̈ܐ ܕ̈ܠܝܼܚܐ ܘܕ̈ܘܼܚܝܐ ܕܥܿܠܡܐ ܗܢܐ ܣܓܝ. ܡܚܫ̈ܘܼܠܐ ܘܡܿܠܐ ܫܚܿܩ̈ܐ ܘܛܘܼܪ̈ܦܐ. ܘܡܥܼܪܡ ܒܥܠ̈ܥܠܐ ܘܥܪ̈ܦܠܐ. ܘܢܣܝܼܡ ܒܠܐ ܒܐܝܠܝܢ ܕܡܼܬܐܡܪ̈ܢ ܒܟܬܒܐ ܗܿܢܐ. ܘܬܘܼܒ ܢܬܒܝܢ ܒܙܘ̈ܥܐ ܕܚܘܼܫ̈ܒܐ ܟܝܢ̈ܝܐ ܕܡܘܠܕ ܪܥܝܢܢ. ܡܛܠ ܕܟܝܢܗܿ ܕܢܦܫܐ ܫܿܦܐ ܘܢܗܝܼܪ. ܘܐܡܼܬܝ ܕܡܬܕܟܝܐ ܡܼܢ ܚܫ̈ܐ ܢܘܼܟܪ̈ܝܐ ܕܕܠܿܚܝܢ ܠܫܦܝܘܼܬܗܿ. ܙܘ̈ܥܐ ܩܛܝܼܢ̈ܐ ܘܚܘܼܫ̈ܒܐ ܬܗܝܼܪ̈ܐ ܘܡܚܟ̈ܡܢܐ ܡܫܘܕ̈ܥܝ ܫܪܪܐ ܡܝܝܬܐ ܐܝܟܢ ܗܿܟܝܢ ܘܿܠܐ ܠܢ ܕܢܕܥ ܐܢ ܐܝܼܬ ܐܠܗܐ ܐܘܟܝܼܬ ܒܪܘܝܐ ܘܡܕܒܪܢܐ ܕܟܿܠ ܒܐܝܢܐ ܟܬܒܐ ܢܩܪܐ. ܡܼܢ ܐܝܢܐ ܡܠܦܢܐ ܢܫܿܡܥ. ܡܼܢ ܐܝܢܐ ܚܟܝܼܡܐ ܢܐܠܦ. ܠܐܝܢܐ ܣܗܕܐ ܫܪܝܪܐ ܢܗܝܡܢ. ܥܠ ܣܗܕܘܼܬܐ ܕܐܝܢܐ ܣܒܐ ܥܬܝܼܩܐ ܘܩܕܡܝܐ ܡܦܣ ܘܝܿܕܥ ܠܟܿܠܗܝܢ. ܢܿܩܝܼܡ ܟܿܠܢ ܘܢܬܼܐܘܐ ܘܢܿܣܗܕ ܥܠ ܝܘܠܦܢܗ ܫܪܝܪܐ ܘܡܩܒܠܐ. ܕܗܿܐ ܟܿܠܢ ܝܘܡܢܐ ܥܠܼܢܢ ܠܥܿܠܡܐ ܘܐܢܫ ܐܚܪܝܢ ܠܐ ܩܕܝܿܡ ܠܢ. ܠܐ ܢܒܝܐ ܘܠܐ ܡܠܦܢܐ ܘܠܐ ܣܦܼܪܐ ܘܠܐ ܟܬܒܐ. ܕܡܨܝܐ ܠܢ ܕܟܿܠܢ ܡܢܗ ܢܿܫܡܥ ܘܢܗܝܡܢ. ܡܛܠ ܕܩܕܡܢܢ ܚܘܝܢܢ ܕܡܼܢ ܟ̈ܬܒܐ ܕܐܝܼܬ ܠܥܡܼܡ̈ܐ ܠܐ ܡܼܨܝܐ ܕܢܬܗܝܡܢ ܫܪܪܐ ܓܘܢܐܝܬ ܥܠ ܟܿܠ. ܒܗܿܝ ܕܣܩܘܒܠܝܼܝܼܢ ܠܚܕ̈ܕܐ. ܘܠܐ ܡܼܬܩܒܠܝܢ ܡܼܢ ܟܠܗܿ ܥܡܪܬܐ. ܘܐܝܼܬ ܣܓܝ̈ܐܐ ܕܠܐ ܟܬܒ̈ܐ ܩܪܘ. ܘܠܐ ܪܓܝܼܫܝܢ ܣܟ ܕܐܝܟܢ ܐܬܒܪܝ 27 ܥ݀ܠܡܐ. ܘܠܐ ܕܡܢܐ ܓܕܫ ܐܘܿ ܕܥܬܝܼܕ ܕܢܗܼܘܐ. ܡܿܕܝܢ ܗܿܘ ܐܝܼܬܘ̄ ܣܗܕܐ ܫܪܝܪܐ ܘܡܗܝܡܢܐ ܕܡܨܝܐ ܕܢܚܿܘܐ ܠܫܪܪܐ ܚܬܝܼܬܐ. ܗܿܘ ܕܠܐ ܣܢܝܼܩ ܥܠ ܥܘܕܪܢܐ ܘܣܗܕܘܼܬܐ ܕܐܚܪܝܢ ܠܐ ܕܟܬܒܐ ܘܠܐ ܕܡܠܦܢܐ. ܐܠܐ ܗܼܘ ܫܪܪܗ ܣܿܗܕܐ ܥܠ ܢܦܫܗ. ܕܗܼܘ ܐܝܼܬܘ̄ ܣܗܕܐ ܫܪܝܪܐ ܘܡܠܦܢܐ ܚܬܝܼܬܐ ܘܟܬܒܐ ܥܬܝܼܩܐ. ܐܒܐ ܘܡܠܦܢܐ ܕܟܿܠܢ. ܐܝܟܢ ܕܝܢ܆ ܢܿܫܡܥ ܒܣܘܼܟܠܐ ܐܟܡܐ ܕܡܼܢ ܠܥܠ ܐܡܼܪܢܢ. ܡܐܠܠܘܢ ܡܼܢ ܐܝܟܐ ܕܙܿܕܩ ܕܢܫܪܐ ܘܢܿܥܩܒ. ܕܗܘܼ ܐܝܬܘܗܝ ܫܘܼܪܝܐ ܘܡܠܦܢܐ ܚܬܝܬܐ. ܚܢܢ ܗܟܝܼܠ ܒܢܝ̈ܢܫܐ ܡܠ̈ܝܼܠܐ ܕܐܝܼܬܝܢ ܒܟܝܿܢܢ ܡܩܒܠ̈ܝ ܗܘܢܐ ܘܝܼܕܥܬܐ. ܗܿܐ ܚܿܙܝܢܢ ܬܪ̈ܝܢ ܫܪ̈ܒܐ ܡܬܚܙ̈ܝܢܐ ܘܡܬܪ̈ܓܫܢܐ. ܘܫܘ̈ܝܼܝܼ ܠܕܘܡܪܐ ܪܒܐ ܘܠܐ ܡܬܕܪܢܐ. ܒܗܿܝ ܕܛܡܝܼܪܐ ܒܗܘܢ ܝܕܥܬܐ ܟܣܝܼܬܐ ܘܚܟܼܡܬܐ ܪܒܬܐ. ܕܐܝܼܬܝܗܘܢ ܬܪܝܢ ܥܠ̈ܡܐ ܗܿܠܝܢ ܡܬܚܙ̈ܝܢܐ ܘܡܬܪ̈ܓܫܢܐ. ܚܕ ܥ݀ܠܡܐ ܗܿܢܐ ܪܒܐ ܕܡܼܢ ܫܡܿܝܐ ܘܡܼܢ ܐܪܥܐ ܘܒܪ̈ܝܬܐ ܗܿܠܝܢ ܟܿܠܗܝܢ ܕܒܡܼܨܥܬܐ. ܘܐܚܪܢܐ܆ ܥ݀ܠܡܐ ܙܥܘܼܪܐ ܘܥܦܝܼܦܐ ܕܐܝܬܘ̄ ܒܪܐܢܫܐ. ܗ̄ ܚܢܢ ܟܕ ܚܢܢ ܕܡܩܝܼܡܝܼܢܢ ܡܢ ܐܪܒܥܐ ܐܣܛܘܼܟ̈ܣܐ ܡܩܝܼܡ̈ܢܘ̄ ܕܗܢܐ ܥ݀ܠܡܐ ܪܒܐ. ܘܡܼܢ ܟܝܿܢܐ ܐ̱ܚܪܢܐ ܪܘܼܚܢܝܐ ܘܩܛܝܼܢܐ ܕܟܿܣܐ ܒܢ. ܘܐܝܼܬܘܗܝ ܒܢ ܐܡܝܼܢܐܝܼܬ ܚܝܐ ܘܡܥܒܕܢܐ ܕܐܝܬܝܗܿ ܢܦܫܐ ܚܝܬܐ ܘܡܠܝܼܠܬܐ ܘܪܘܚܢܝܬܐ ܡܩܒܠܢܝܼܬܐ ܕܚܟܼܡܬܐ. ܘܟܕ ܐܫܿܬܟܚܢܢ ܒܗܕܐ ܦܩܥܬܐ ܪܘܝܼܚܬܐ ܕܥܠܡܐ ܫܪܝ ܗܿܢܐ ܡܕܡ ܟܣܝܐ ܘܡܠܝܼܠܐ ܕܒܢ ܡܥܒܕ ܒܪ̈ܓܫܐ. ܗܿܠܝܢ ܒܪ̈ܝܐ. ܕܐܝܼܬܝܗܘܢ ܚܙܬܐ ܘܫܡܼܥܐ ܘܣܼܘܩܐ ܘܛܥܡܬܐ ܘܓܫܼܬܐ ܘܡܥܠ ܡܢܗܘܢ ܛܒ̈ܐ ܣܓܝ̈ܐܐ ܠܓܘ ܡܢܗ. ܠܒܪܬ ܕܝܼܢܐ ܟܣܝܐ ܕܕܝܢܐ ܟܐܢܐ ܕܒܠܒܗ. ܘܡܦܚܡ ܥܡ ܚܡܫܐ ܐ̱ܚܪ̈ܢܐ ܓܘܝ̈ܐ ܕܐܝܼܬܝܗܘܢ ܗܼܘܢܐ. ܘܡܕܥܐ. ܘܚܘܼܫܒܐ. ܘܣܘܟܠܐ. ܘܒܘܝܢܐ. ܘܥܿܒܕ ܬܡܿܢ ܣܘܠܘܓܝܣܡܘܿܣ ܪܒܬܐ. ܗ̄ ܟܢܝܼܫܘܼܬ ܚܘܼܫ̈ܒܐ. ܘܫܪܝ ܡܥܩܒ ܘܡܒܚܢ ܫܪܒܐ ܫܪܒܐ. ܘܡܼܬܒܝܢ ܒܗ ܚܬܝܼܬܐܝܬ ܕܢܕܥ ܘܢܼܐܠܦ. ܡܢܘܼ ܐ̱ܪܙܐ ܗܿܢܐ ܪܒܐ ܕܟܝܿܢܐ. ܘܛܟܼܣܐ ܕܒܗ ܒܒܪܐܢܫܐ ܣܝܼܡ. ܐܝܼܬܘ̄ ܡܥܒܕܢܐ ܐܡܝܼܢܐ. ܒܗܿܝ ܕܐܝܼܬܘܗܝ ܚܝܐ ܡܠܝܼܠܐ. ܘܩܛܝܼܢܐ ܘܪܘܚܢܝܐ. ܠܐ ܒܿܛܠ ܘܠܐ ܢܿܐܚ ܡܼܢ ܡܥܒܕܢܘܬܗ. ܕܐܝܼܬܝܗܿ ܥܘܼܩܒܐ ܕܟܣܝ̈ܬܐ ܐܝܟ ܟܝܿܢܗ ܟܣܝܐ ܘܐ̱ܪܙܢܝܐ. ܘܩܕܡܐܝܼܬ ܡܿܢ ܚܪ ܠܥܼܠ ܘܚܼܙܐ ܠܗܿܕܐ ܩܘܼܒܬܐ ܫܒܝܼܚܬܐ 28 ܡܬܼܝܚܬ݀ ܒܚܼܟܡܬܐ ܪܒܬܐ ܘܕܘܼܡܪܐ ܣܓܝܐܐ. ܘܫܪܝ ܡܬܼܒܩܐ ܒܥܙܝܼܙܘܼܬ ܢܘܼܗܪܗ ܕܫܡܫܐ. ܒܡܨܡܚܘ̄ܗܿ ܡܫܬܚܠܢܝܼܬܐ ܕܣܗܪܐ. ܒܙ̈ܠܓܐ ܢܗܝܼܪ̈ܐ ܕܟܘ̈ܟܒܐ. ܒܣܕܝܼܕܘܬܗܘܢ ܘܡܛܟܣܘܬܗ̄ ܒܪ̈ܗܛܐ ܡܫܚ̈ܠܦܐ ܕܐܣܟܝܼܡ̈ܝܗܘܢ ܘܕܙܠ̈ܝܩܝܗܘܢ. ܒܣܩܒܘܠܝܘܬ ܪܗܼܛܗܘܢ ܡܬܗܪܢܝܼܬܐ ܕܠܘܼܩܒܠ ܟܪܘܼܟܝܐ ܕܡܘܙܠܬܐ ܒܚܐܦܐ ܐ̱ܚܪܢܐ ܕܩܛܝܼܪܐ ܕܕܒܝܪܝܢ ܥܡ ܡܘܙܠܬܐ ܒܪܒܣܼܬܪܐܝܬ ܠܟܪܘܼܟܝܐ ܒܚܐܦܐ ܘܩܠܝܼܠ ܡܼܢ ܒܪܩܐ ܕܝܠܗܿ ܕܡܘܙܠܠܐ ܒܓܕܫ̈ܐ ܗܿܠܝܢ ܘܐܬܘ̈ܬܐ ܕܡܬܚܘܝܢ ܒܗܿ. ܘܟܕ ܢ݀ܞܚܬ ܥܡܗܿ ܚܘܪܐ ܒܪܝܐ ܘܒܘܼܝܢܐ ܓܘܝܐ܀ ܬܘܼܒ ܐܬܒܩܝ ܒܿܐܐܪ ܗܿܢܐ ܘܒܪܒܘܬܗ ܕܪܩܝܼܥܐ. ܒܡܫ̈ܒܐ ܕܪ̈ܘܼܚܐ ܡܫܚ̈ܠܦܬܐ. ܒܛܟܼܣܐ ܕܥܢ̈ܢܐ. ܒܚܼܙܬܐ ܕܚܝܼܠܬܐ ܕܒܪ̈ܩܐ ܒܩ̈ܠܐ ܥܫܝܼ̈ܢܐ ܕܪ̈ܥܡܐ. ܒܣܒܝܼܣܘ̄ ܕܡܛܪ̈ܐ ܘܪ̈ܣܝܼܣܐ. ܒܝܪ̈ܚܘ̄ ܕܣܗܪܐ. ܒܫܬܢܝܘܼܬܗ ܕܫܡܼܫܐ. ܒܟܪܘܼܟܝܐ ܕܙܒ̈ܢܐ. ܒܡܛܟܣܘܼܬܐ ܡܬܗܪܢܝܼܬܐ ܕܟܿܠܗܼܝܢ ܕܐܡܝܪ̈ܢ ܘܕܣܓܝ̈ܐܬܐ ܕܐܟܘܬܗܝܢ. ܬܘܼܒ ܚܙܼܐ ܘܐܨܕ ܒܓܼܢ̈ܣܐ ܕܥܘܦܐ ܗܿܢܐ ܕܛܐܣ ܒܐܐܪ. ܒܐܕ̈ܫܐ ܣܓܝ̈ܐܐ ܕܛܝܪܐ ܘܦܪܚܬܐ. ܒܐܣܟܝܼܡ̈ܝܗܘܢ. ܒܓܘ̈ܢܝܗܘܢ. ܒܩ̈ܠܝܗܘܢ. ܒܙܡܪ̈ܝܗܘܢ. ܒܢܘܼܨܪ̈ܬܗܘܢ. ܒܙܒܢ̈ܝܗܘܢ. ܒܥܒܕܗܘܢ. ܒܚܫܚܬܗܘܢ. ܥܡ ܟܿܠܗ ܛܟܼܣܐ ܕܟܝܿܢܗܘܿܢ. ܬܘܼܒ ܚܙܼܐ ܥܠ ܐܪܥܐ ܚܝ̈ܘܬܐ ܡܫܚܠ̈ܦܬܐ ܘܒܥܝܼܪ̈ܐ ܣܓܝ̈ܐܐ. ܡܢܗܝܢ ܚܒ̈ܠܬܐ ܘܚܝ̈ܠܬܢܝܬܐ ܘܥܼܫ̈ܝܼܢܬ݀ ܚܝܠܐ. ܡܢܗܝܢ ܬܘܼܒ ܪܘܪ̈ܒܬ ܐܣܟܝܼܡܐ ܘܡܬܼܟܬܫܢܝ̈ܬܐ. ܡܢܗܝܢ ܐܟ̈ܠܬ݀ ܒܣܼܪܐ. ܘܡܼܢܗܝܢ ܪ̈ܥܝܬ݀ ܒܥܣܼܒܐ. ܘܡܢܼܗܝܢ ܢܝܼܚ̈ܬܐ. ܘܠܐ ܡܗܪ̈ܢܝܬܐ. ܘܡܢܼܗܝܢ ܡܫܝ̈ܢܐ ܘܡܬܩܢܝ̈ܢܝܬܐ. ܡܢܼܗܝܢ ܡܬܼܟܕܢܢܝ̈ܬܐ ܘܦܠ̈ܘܚܬܐ. ܡܢܼܗܝܢ ܛܥܘܼܢ̈ܬܐ ܘܡܬܪ̈ܟܒܢܝܬܐ ܘܡܬܼܟܒ̈ܫܢܝܬܐ. ܡܢܼܗܝܢ ܒܥܪܝܪ̈ܝܬܐ ܘܠܐ ܡܬܼܟܒ̈ܢܝܬܐ. ܡܢܼܗܝܢ ܡܬܼܐܟ̈ܠܢܝܬܐ ܘܡܬܼܬܪ̈ܣܢܝܬܐ ܘܡܢܼܗܝܢ ܬܘܼܒ ܠܐ ܡܬܼܐܟ̈ܠܢܝܬܐ. ܡܢܼܗܝܢ ܚܘܼܒ̈ܢܝܬܐ ܘܡܬܼܩܢ̈ܝܢܝܬܐ. ܡܢܼܗܝܢ ܨܢܝܼܥ̈ܬܐ ܘܚܪ̈ܥܬܐ. ܡܢܼܗܝܢ ܬܡܝܼ̈ܡܬܐ ܘܒܣܝܼܡ̈ܬܐ. ܟܕ ܐܝܼܬ ܒܗܝܢ ܫܘܼܚܠ̈ܦܐ. ܘܕܠܐ ܦܐܪ̈ܐ ܘܕܢܨ̈ܒܬܐ ܘܣܝܼܚ̈ܐ ܘܛܪ̈ܦܐ ܘܥܣ̈ܒܐ ܣܓܝ̈ܐܐ. ܘܓܼܢܣ̈ܐ ܕܙܪ̈ܥܘܼܢܐ. ܘܝܪ̈ܩܐ ܘܫܠܘܩܐ. ܘܠܫܼܘܚܠ̈ܦܐ 29 ܣܿܓܝ̈ܐܐ. ܕܒܟܝܿܢܗܘܢ. ܗ̄ ܒܓܘܢ̈ܝܗܘܢ ܘܒܪ̈ܝܼܚܢܝܗܘܢ. ܘܒܛܥܡ̈ܬܗܘܢ. ܘܒܡܥܒܕܢܘ̈ܬܗܘܢ. ܘܒܕܝܼܠ̈ܝܬܗܘܢ. ܥܡ ܣܓܝ̈ܐܐ ܕܒܗܘܢ܀ ܬܘܼܒ ܟܕ ܚܪ ܠܟܐ ܘܠܟܐ ܚܼܙܐ ܠܪ̈ܟܫܐ ܣ̈ܓܝܐܐ ܕܥܠ ܐܪܥܐ. ܐܡܿܪ ܐܢܐ ܕܝܢ. ܬܢܝܼܢ̈ܐ ܪܘܪ̈ܒܐ ܘܥܫܝܼܢ̈ܐ. ܘܓܼܢ̈ܣܐ ܕܐܟܕܢ̈ܐ ܘܚܘܘ̈ܬܐ ܚܪ̈ܡܢܐ ܫܕ̈ܝܼܝܼ ܡܪܬܐ ܘܩܛܘܼ̈ܠܐ. ܘܥܩܪ̈ܒܐ ܘܥܘܼܩܒܪ̈ܐ ܘܬܘܠ̈ܥܐ ܘܚܒܫܘܼܫ̈ܐ ܘܫܘܫ̈ܡܢܐ ܥܡ ܫܪܟܐ ܕܣܓܝ̈ܐܐ ܕܡܬܝ̈ܠܕܢ ܡܼܢ ܐܪܥܐ ܘܡܡ̈ܝܬܢ ܘܡܘܒܕ̈ܢ ܠܒܢܝ̈ܢܫܐ ܘܥܒܕ̈ܢ ܣܘܓܦ̈ܢܐ ܣܓܝ̈ܐܐ܀ ܘܟܕ ܗܠܟ ܒܐܪܥ ܬܘܼܒ ܠܟܐ ܘܠܗܠ. ܚܼܙܐ ܒܗܿ ܫܘܼܚܠ̈ܦܐ ܣܿܓܝ̈ܐܐ ܘܠܐ ܡܣܼܬܝܟ̈ܢܐ. ܘܕܐܝܼܬ ܒܗܘܢ ܐ̱ܪ̈ܙܐ ܟܣ̈ܝܐ ܘܠܡܚܣܢ ܡܬܕܪ̈ܟܢܐ. ܐܡܿܪ ܐܢܼܐ ܕܝܢ. ܪܘܡܐ ܪܒܐ ܕܛܘܼܪ̈ܐ. ܡܥܠܝܘܼܬܐ ܕܪ̈ܡܬܐ. ܫܛܝܼܚܘܼܬܐ ܕܦܩ̈ܥܬܐ. ܪܘܝܼܚܘܼܬܐ ܕܡܕܒܪ̈ܐ. ܓܘ̈ܢܐ ܡܫܚ̈ܠܦܐ ܕܒܗ ܒܟܝܢ ܐܪܥܐ. ܕܡܫܚܠ̈ܦܝܢ ܣܿܓܝܼ ܒܟܝܿܢܗܘܢ ܘܒܡܥܒܕܢ̈ܘܬܗܘܢ ܒܓܘܼܢ̈ܝܗܘܢ. ܘܒܛܥܡ̈ܬܗܘܢ. ܘܒܣܥܘܪ̈ܘܬܗܘܢ ܥܡ ܙܝܼܘܐ ܘܫܘܼܒܚܐ ܕܒܟܐܦ̈ܐ ܛܒ̈ܬܐ ܘܛܒ̈ܥܐ ܘܒܠܘܪ̈ܐ ܘܡܪ̈ܓܢܝܬܐ ܝܩܝܼܪ̈ܬܐ ܘܫܒܝܼܚ̈ܬ݀ ܓܘܢܐ ܘܡܙܗܪܘܼܬܐ ܥܡ ܓܘܼܫܡܐ ܐ̱ܚܪ̈ܢܐ ܕܕܗܒܐ ܘܣܐܡܐ ܘܢܚܫܐ ܘܐܢܟܐ ܘܒܐܪܐ ܘܦܪܙܠܐ ܘܕܐܝܟ ܗܿܠܝܢ܀ ܘܬܘܼܒ ܟܕ ܡܬܟܪܟܼ ܒܒܪܝܬܐ. ܡܛܼܐ ܠܩܘܼܪܒܐ ܕܝܡ̈ܡܐ ܠܐ ܡܬܼܥܒܪ̈ܢܐ. ܘܐܬܼܒܩܝܼ ܘܬܗܼܪ ܒܪܒܘܼܬܗܘܢ ܘܫܛܝܼܚܘܼܬܗܘܢ ܘܩܒܝܼܘܬܗܘܢ ܘܡܬܬܙܝܥܢܘܼܬܗܘܢ ܘܢܗܝܼܪܘܬܗܘܢ ܘܛܥܡܗܘܢ. ܘܟܕ ܐܨܕ ܒܓܘܗܘܢ ܚܼܙܐ ܠܪ̈ܚܫܐ ܣܓܝ̈ܐ ܕܓܢܼܣ̈ܐ ܡܫܚܠ̈ܦܐ ܕܢܘܼ̈ܢܐ ܕܒܗܘܢ. ܕܪܘܪܒܝܢ ܒܓܘܼܫܡ̈ܝܗܘܢ ܘܡܫܚܠܦܝܢ ܒܐܣܟܝܼܡ̈ܝܗܘܢ ܣܓܝ̈ܐܝܢ ܒܐܕܫ̈ܝܗܘܢ. ܘܟܡܝܘܼܬܗܘܢ ܠܐ ܡܬܕܪܟܢܐ. ܥܡ ܐܕ̈ܫܐ ܐܚܪ̈ܢܐ ܘܟܝ̈ܢܐ ܡܫܚܠ̈ܝ ܡܥܒܕܢܘ̈ܬܐ ܕܒܐܫ̈ܬܗܘܢ. ܕܬܗܘܼ̈ܡܐ. ܕܐܝܟ ܚܠ̈ܝܼܙܘܢܐ ܘܙ̈ܠܦܐ ܘܓܠܐ ܘܣܪ̈ܛܢܐ܆ ܥܡ ܫܪܟܐ ܕܐܚܪ̈ܢܝܬܐ܀ ܬܘܒ ܟܕ ܪܕܐ ܗܼܘ ܦܓܼܥ ܒܢܗܪ̈ܘܬܐ ܣܓܝ̈ܐܐ ܪܘܪ̈ܒܐ ܘܡܼܨܥ̈ܝܐ ܘܙܥܘܼܪ̈ܐ. ܘܚܼܙܐ ܡܒܘܼܥ̈ܐ ܘܪ̈ܕܝܐ ܘܥܝܢ̈ܬܐ. ܘܪ̈ܨܝܢܐ. ܘܫܩܝ̈ܬܐ ܘܩܒܝ̈ܬܐ ܣܓܝ̈ܐܬܐ ܕܒܬܐܒܝܠ. ܘܚܼܙܐ ܐܦ ܒܗܿܠܝܢ ܪ̈ܚܫܐ ܣܓܝ̈ܐܐ ܘܓܼܢܣ̈ܐ ܐܚܼܪ̈ܢܐ ܕܢܘܼ̈ܢܐ ܘܐܘܪ̈ܕܥܐ ܘܝܿܩܪ̈ܘܪܐ. ܘܐܚܪ̈ܢܝܬܐ ܣܓܝ̈ܐܬܐ ܕܥܒܪ̈ܢ ܠܚܝܠܐ ܕܡܠܬܐ ܘܠܟܡܝܘܬܐ ܕܡܢܼܝܢܐ. ܘܠܡܕܪܢܘܼܬܐ ܕܝܕܥܬܐ. ܕܐܝܬܝܗܝܢ ܘ݀ܫܟܝܼܚ̈ܢ ܒܥܠܡܐ ܗܿܢܐ܀ ܘܟܕ ܚܼܙܐ ܒܪܐܢܫܐ ܠܗܠܝܢ ܟܿܠܗܝܼܢ 30 ܘܐܨܕ ܒܗܘܢܗ ܘܐܬܒܩܝܼ ܒܪܥܝܢܗ. ܘܐܬܼܒܝܢ ܒܚܘܼܫܒܗ. ܬܗܼܪ ܘܬܡܼܗ ܘܐܬܕܡܪ. ܘܬܘܼܒ ܐܥܒܼܕ ܚܝܠܐ ܟܣܝܐ ܕܟܝܿܢܐ ܡܠܝܼܠܐ ܕܒܗ. ܘܫܪܝ ܡܬܚܫܒ ܘܡܥܩܒ ܥܠ ܗܿܠܝܢ ܟܿܠܗܝܢ ܕܡܬܼܚ̈ܙܝܢ ܒܫ̱ܝܐ ܘܒܐܪܥܐ ܥܡ ܫܪܟܐ ܕܟܠܗܘܿܢ ܫܘܼܚܠ̈ܦܐ ܬܗܝܼܪ̈ܐ ܕܒܒܪܝܼܬܐ ܘܡܛܟܣܘܼܬܐ ܡܫܪܪܬܐ. ܘܠܐ ܡܬܼܒܠܒܠܢܝܬܐ ܕܩܘܝܿܡܗ ܕܥ݀ܠܡܐ. ܕܐܪܐ ܟܝ ܡܼܢ ܐܝܟܘ ܗܿܢܐ ܟܿܠ ܘܡܼܢ ܐܡܬܝ. ܘܡܼܢ ܡܢܐ ܘܡܛܠ ܡܿܢܐ. ܘܐܝܟܢܐ. ܘܥܕܡܐ ܠܐܡܼܬܝ. ܐܪܐ ܗܼܘ ܡܼܢ ܢܦܫܗ ܐܝܼܬܘ̄. ܐܘܿ ܡܢ ܐ̱ܚܪܝܢ ܐܬܼܩܝܡ. ܡܼܢ ܥ݀ܠܡ ܗܼܝ ܪܝܼܫܝܼܬܐ ܕܩܕܝܼܡܘܼܬܗ. ܐܘܿ ܐܝܼܬ ܐ̱ܚܪܝܢ ܕܪܝܼܫܝ ܘܩܕܡܝ ܡܢܗ. ܘܟܕ ܒܗܠܝܢ ܡܬܼܗܦܟ ܗܘܼܐ ܒܪܐܢܫܐ ܒܪ̈ܓܫܐ ܓܘ̈ܝܐ ܘܙܘ̈ܥܐ ܪ̈ܥܝܢܝܐ. ܘܐܟܡܐ ܕܐܝܼܬܘܗܝ ܟܝܿܢܐ ܟܣܝܐ ܕܒܗ ܫܦܝܐ ܘܕܟܝܐ ܘܢܗܝܼܪܐ ܘܡܩܒܠܢܐ ܕܗܘܢܐ ܘܕܝܼܕܥܬܐ. ܘܕ݀ܡܐ ܠܡܚܙܝܼܬܐ. ܕܟܡܐ ܕܡܬܼܡܪܟܐ ܒܟܝܿܢܗܿ ܕܬܫܼܬܦܐ ܘܬܬܼܡܪܩܝ ܘܢܬܼܚܙܐ ܒܗܿ ܟܿܠ ܐܣܟܝܼܡܐ ܘܓܘܢܐ ܘܨܘܼܪܬܐ ܕܩܕܡܝܗܿ ܚܬܝܼܬܐܝܼܬ ܘܕܠܐ ܫܘܼܚܠܦ. ܗܟܘܬ ܐܦ ܗܼܘ ܟܝܿܢܐ ܩܛܝܼܢܐ ܕܒܒܪܐܢܫܐ ܟܡܐ ܕܡܐܨܕ ܡܬܗܘܢܢܐܝܬ ܘܡܬܚܫܒ ܝܕܘܥܬܢܿܐܝܼܬ. ܡܬܕܿܟܐ ܘܫ݀ܦܐ ܘܢ݀ܗܪ ܘܚ݀ܙܐ ܘܡܕܪܟ ܫܪ̈ܒܐ ܘܚܝ̈ܠܐ ܘܟܝ̈ܢܐ ܘܝܕ̈ܥܬܐ ܘܚܟܼܡ̈ܬܐ ܕܡܼܢ ܕܩܝܼܡ ܠܐ ܡܬܕܪ̈ܟܢ ܗ̈ܘܝ ܠܗ. ܘܟܡܐ ܕܡܬܓܘܐ ܒܚܘܼܫ̈ܒܘ̄ ܘܡܼܬܗܘܢܢ܆ ܬܘܼܒ ܣܿܠܦ ܘܡܼܬܥܠܐ ܕܠܐ ܫܘܼܠܡ. ܗܿܝܕܝܢ ܕܢܼܚ ܒܪܥܝܢܗ ܣܘܼܟ̈ܠܐ ܐ̱ܚܪ̈ܢܐ ܘܫܪܝ ܡܼܬܒܩܐ ܗܘܼ ܒܗ ܘܡܥܩܒ ܥܠ ܝ݀ܬܗ. ܘܡܬܚܫܒ ܥܠ ܢܦܫܗ ܬܗܝܼܪܐܝܬ. ܘܣܿܓܝ ܡܬܕܡܪܢܐܝܬ. ܘܐܡܿܪ ܕܡܐ ܠܝ ܘܠܡܼܬܗܪ ܘܠܡܬܕܡܪܘ ܘܠܡܥܩܒܘܼ ܒܗܢܐ ܥ݀ܠܡܐ. ܕܣܓܝ ܪܒ ܘܿܪܘܝܼܚ ܘܠܐ ܡܬܕܪܟ ܡܼܢ ܪܒܘܼܬܗ ܘܣܓܝܘܼܬܗ. ܐܬ݀ܒܩܐ ܐܢܐ ܒܩܢܘܼܡܝ ܘܐܬܚܫܒ ܥܠ ܟܝܿܢܝ. ܕܡܢܐ ܡܕܡ ܐܝܿܬܝ. ܕܗܿܐ ܐܢܿܐ ܬܗܪܐ ܘܕܘܡܪܐ ܐܝܿܬܝ ܠܐ ܡܣܬܝܟܢܐ. ܘܫܪܝ ܩܕܡܐܝܬ ܡܼܢ ܒܪܘܝܘܼܬܗ ܕܠܒܪ ܡܥܿܩܒ ܘܡܐܨܕ ܘܬ݀ܗܪ. ܘܐܝܟܢܐ ܐܬܪܟܒ ܓܘܼܫܡܐ ܗܿܢܐ ܘܐܬܼܒܢܝ ܘܐܬܬܣܝܼܡ. ܐܝܿܟܢܐ ܪܫܐ ܐܬܩܼܒܥ. ܘܐܬܼܬܩܢܘ ܒܗ ܗܿܠܝܢ ܫܪ̈ܒܐ ܣܓܝ̈ܐܐ ܬܿܗܝܪ̈ܐ. ܐܝܿܟܐ ܝܼܥܐ ܣܥܪܐ ܘܚܦܝܗܿ ܠܩܪܩܦܬܐ ܒܝܼܥܬܢܿܝܬܐ ܘܗܕܪܗܿ. ܐܝܿܟܢܐ ܐܬܼܦ̈ܬܚܝ ܥܝ̈ܢܐ. ܘܐܬܬܣܝܼܡ ܒܗܿܝܢ ܗܿܢܐ ܢܘܼܗܪܐ ܕܬܕܡܘܼܪܬܐ. ܕܗܐ ܒܒܬܐ ܐܝܟ ܦܪܕܬܐ ܕܚܪܕܠܐ ܙܥܘܼܪܝܐ. ܘܚܿܙܝܐ ܗܕܐ ܟܠܗܿ ܫܛܝܼܚܘܼܬܐ ܪܘܝܼܚܬܐ. ܘܕܝܿܩܐ ܪܚܝܼܩܘܼܬܐ ܣܿܓܝܐܬܐ. ܠܡܢܐ ܫܘܚܠ̈ܦܐ ܣܓܝ̈ܐܐ ܒܗܿ ܘܬܼܗܪ̈ܐ ܡܬܗܪ̈ܢܐ. ܐܝܟܢ ܐܬܩܒ̈ܥܝ ܐܕ̈ܢܐ ܘܐܬܢܩܒܘ ܠܗܝܢ ܢܩ̈ܒܐ 31 ܒܪܫܐ ܒܓܘ ܨܕܥܐ ܠܘܼܩܒܠ ܡܘܼܚܐ ܡܦܬܠܐܝܼܬ ܘܐܝܟ ܩܘܟܠܝܘܢ ܡܕܡ. ܐܝܿܟܢܐ ܬܘܼܒ ܬܪ̈ܥܐ ܠܣܘܩܐ ܒܢܚܝܼܪ̈ܐ ܡܼܢ ܠܬܚܼܬ ܠܥܼܠ. ܘܠܐ ܡܼܢ ܠܥܼܠ ܠܬܚܼܬ. ܕܠܡܐ ܢܦܠ ܒܗܝܢ ܡܕܡ ܘܢܐܚܫ ܐܢ̈ܝܢ. ܐܝܟܢܐ ܛܥܡܬܐ ܒܚܼܟܐ ܘܠܘܓܠܓܐ ܒܠܫܢܐ. ܘܩܿܠܐ ܡܼܢ ܩܢܝܐ. ܘܡܫܪܪܘܼܬܐ ܕܥܪ̈ܫܐ ܛܚܢ̈ܬܐ. ܘܣܕܝܼܪܘܼܬܐ ܒܫܢ̈ܐ ܡܦܣ̈ܩܢܝܬܐ. ܐܝܟܢܐ ܫܿܪܐ ܡܠܟܐ ܡܘܼܚܐ ܒܩܝܛܘܼܢܐ ܗܿܘ ܓܘܝܐ. ܬܚܝܬ ܩܘܼܒܬܐ ܗܕܐ ܫܒܝܼܚܬܐ ܠܓܘ ܡܼܢ ܬܪ̈ܥܐ ܗܿܠܝܢ ܡܥ̈ܠܝ ܫܪ̈ܒܐ ܕܬܕܡܘܼܪܬܐ ܘܡܦܩ̈ܝ ܣܘܥܪ̈ܢܐ ܕܕܘܼܡܪܐ. ܠܡܢܐ ܗܿܠܝܢ ܟܿܠܗܘܿܢ ܫܘܚܠ̈ܦܐ ܣܓܝ̈ܐܐ ܘܕܠܐ ܡܢܝܢ ܒܪܫܐ ܘܡܢܘ̈ܬܗ. ܐܝܟ ܕܐܦܠܐ ܐܫܟܼܚܘ ܠܡܣܝܟܘܼ ܒܢ̈ܝ ܐܣܘ̈ܬܐ ܕܦܓܪܐ ܒܣܿܓܝܼ ܟ̈ܬܒܐ ܘܡ̈ܠܐ. ܘܡܐܡܪ̈ܐ ܘܝܘܼ̈ܠܦܢܐ ܡܫܚ̈ܠܦܐ ܘܣܓܝ̈ܐܐ. ܐܝܟܢ ܬܘܼܒ ܨܘܪܐ ܐܫܬܪܪ ܒܝܢܬ݀ ܟܬܦ̈ܬܐ ܕܡܣܡ̈ܟܢ ܠܗ ܥܡ ܫܪܟܐ ܕܪܘܼܟܒܗ ܘܗܿܠܝܢ ܕܒܓܘܗ. ܐܝܟܢܐ ܐܬܡܼܬܚܘ ܨܝ̈ܠܐ ܘܕܪ̈ܥܐ ܘܒܝܢܬܗܘܢ ܫܪ̈ܝܬܐ ܠܡܬܟܦܦܘܼ ܘܠܡܼܬܦܫܛܘܼ ܥܡ ܘܐܪ̈ܝܕܐ ܘܓܕ̈ܐ ܕܒܗܘܢ. ܐܝܟܢ ܬܘܼܒ ܐܝܼܕ̈ܝܐ ܒܩܘ̈ܓܐ ܘܨܒܼܥ̈ܬܐ ܘܣܓܝ̈ܐܬܐ ܕܒܗܝܢ. ܥܡ ܡܥܒܕܢ̈ܘܬܐ ܬܗܝܼܪ̈ܬܐ ܘܣܥܘܼܪ̈ܬܐ ܐܘܡܢܘ̈ܬܐ ܘܟܬܝܼܒ̈ܬܐ ܡܫܚ̈ܠܦܬܐ ܕܒܗܘܢ. ܕܣܘܓܐܗ ܕܚܝܠܐ ܘܛܟܼܣܐ ܕܡܠܝܼܠܘܼܬܐ ܒܗܝܢ ܘܡܼܢܗܝܢ ܡܬܝܼܕܥ܆ ܐܝܟܢ ܚܕܝܐ ܘܕܬܕ̈ܝܐ ܘܟܪܣܐ ܘܚܨܐ ܘܐ̈ܠܥܐ ܘܗܕܡ̈ܐ ܕܫܪܟܐ. ܐܝܟܢ ܬܘܼܒ ܛܚܝ̈ܬܐ ܘܥܛܡ̈ܬܐ ܘܒܘܼܪ̈ܟܐ ܘܫܩ̈ܐ ܘܩܘܼܪ̈ܨܠܐ ܘܪ̈ܓܠܐ ܘܫܪ̈ܝܬܗܘܢ ܘܨܒܥ̈ܬܗܘܢ. ܘܣܓܝ̈ܐܬܐ ܕܒܗܘܢ ܥܡ ܫܪܟܐ ܕܪܘܼܟܒ ܗܕ̈ܡܐ ܘܓܪ̈ܡܐ ܘܓܝ̈ܕܐ ܕܪܘܟܒܗ ܕܦܓܪܐ. ܗܕ̈ܡܐ ܬܘܼܒ ܓܘܝ̈ܐ ܕܥ݀ܒܪܝܢ ܠܚܝܠܐ ܕܡܠܼܬܐ ܘܠܝܼܕܥܬܐ ܕܗܘܢܐ. ܐܝܟܢ ܬܠܝܢ ܒܩܢܝܐ܆ ܠܒܐ ܘܪܐܬܐ ܘܝܼܫܛܐ ܘܐܣܛܘܼܡܟ̈ܐ ܘܟܪ̈ܣܬܐ ܘܡ̈ܥܝܐ ܘܬܪܒܐ ܘܐܚܪ̈ܢܝܬܐ ܕܥܡܗܘܢ. ܐܝܟܢ ܬܘܼܒ ܣܝܡܐ ܟܒܪܕܐ ܡܪܐܢܐܝܬ ܡܼܢ ܝܡܝܼܢܐ. ܘܛܚܠܐ ܡܼܢ ܣܡܠܐ. ܘܟܘܼܠ̈ܝܬܐ ܡܟܐ ܘܡܟܐ. ܘܫܠܦܘܼܚܬܐ ܘܡܐܢ̈ܝ ܙܪܥܐ. ܥܡ ܡܥܒܕܢܘ̈ܬܐ ܬܗܝܼܪ̈ܬܐ ܕܢܦܫܐ ܡܠܝܼܠܬܐ ܕܒܗܝܢ. ܐ݀ܡܪ ܐܢܼܐ ܗܘܢܐ ܒܡܘܼܚܐ ܡܼܕܥܐ ܘܚܘܼܫܒ̈ܐ ܒܟܘܼܠ̈ܝܬܐ. ܚܡܼܬܐ ܒܠܒܐ. ܪܓܬܐ ܒܟܒܕܐ. ܥܡ ܐܚܪ̈ܢܝܬܐ ܣܓ̈ܝܐܬܐ ܕܡܥܒܕܐ ܡܠܝܠܘܬܐ ܒܗܘܢ. ܘܕܠܐ ܗܼܢܘܢ ܒܛܝܼܠܐ ܗ݀ܝ ܡܥܒܕܢܘܬܐ ܕܡܢܿܬܐ ܗܿܝ. ܐܝܟܐ ܐܢܘܢ ܘܐܝܟܢ ܣܝܼܡܝܢ ܐܪܒܥܐ ܟܘܼܡ̈ܘܼ ܐܘܟܝܬ ܚܠܼܛܐ ܗ̄ ܕܡܐ ܘܦܠܓܡܐ ܘܡܼܪܬܐ ܣܘܡܩܬܐ. ܐܘܟܝܬ 32 ܚܪܘܥܬܐ. ܘܡܼܪܬܐ ܐܘܼܟܡܬܐ. ܥܡ ܫܪܟܐ ܕܣܿܓܝ̈ܐܬܐ ܕܬܘܼܩܢܗ ܕܦܓܪܐ. ܘܪܘܼܟܒ ܗܕܡ̈ܘܗܝ ܒܪ̈ܝܐ ܘܓܘܝ̈ܐ. ܐܝܟ ܕܐܡܝܼܪ ܥܠܝܗܘܢ ܒܟ̈ܬܒܐ ܣܓܝ̈ܐܐ ܕܐܝܦܘܩܪܐܛܝܣ ܘܕܒܝܬ ܓܠܝܢܘܣ. ܘܫܪܟܐ ܕܒܢ̈ܝ ܐܣ̈ܘܬܐ ܕܐܟܬܼܒܘ ܥܠ ܗܿܠܝܢ ܣܿܓܝܼ ܦܬܝܐܝܼܬ ܘܚܬܝܼܬܐܝܬ. ܘܗܿܠܝܢ ܡܿܢ ܚܘܼܫ̈ܒܐ ܕܥܠ ܦܓܪܐ ܒܠܚܘܼܕ. ܕܐܡܝܼܪ ܠܚܕ ܡܼܢ ܚܟܝܼܡ̈ܝ ܒܚܫܚ̈ܬܗ ܕܦܓܪܐ ܘܚ̈ܫܐ ܕܟܘܼܪ̈ܗܢܘ̄. ܕܚ̈ܝܐ ܠܡ ܕܟܿܠܗ ܡܬܼܚܐ ܕܙܒܢܐ ܕܚܝ̈ܘܗܝ ܕܐܢܫ ܟܪܝܢ ܘܙܥܘܪ̈ܝܢ ܘܠܐ ܣܿܦܩܝܢ ܠܡܐܠܦ ܘܠܡܼܕܥ ܐܘܼܪܟܗܿ ܘܣܓܝܐܘܬܗܿ ܘܪܘܝܼܚܘܼܬܗܿ ܐܘܡܢܘܼܬܐ ܕܥܠ ܟܘܪ̈ܗܢܘܗܝ ܕܦܓܪܐ ܒܠܚܘܼܕ. ܥܠ ܪܒܘܼܬܗܿ ܕܝܢ ܕܢܦܫܐ ܚܝܬܐ ܘܡܠܝܼܠܬܐ ܘܪܘܚܢܝܬܐ. ܐܘܟܝܼܬ ܗܘܢܐ ܝܕܘܼܥܬܢܐ ܕܒܢ. ܘܥܠ ܟܝܿܢܗ ܘܡܥܠܝܘܬܗ. ܘܚܫ̈ܝܗܝ ܘܪ̈ܓܫܘܗܝ. ܘܕܝ̈ܠܝܬܗ ܘܡܥܒܕܢܘ̈ܬܗ. ܘܫܪܟܐ ܕܝܼܕܥܬܐ ܕܥܠܘܗܝ ܘܡܠܼܬܐ. ܐܝܠܝܢ ܡ̈ܠܐ ܣ̈ܦܩܢ. ܘܐܝܠܝܢ ܡܐܡܪ̈ܐ ܡܣܝܟܝܢ. ܘܐܝܠܝܢ ܟ̈ܬܒܐ ܥ݀ܪܝܢ. ܘܡܼܢܘܼ ܡܘܦܐ. ܘܡܢܘܼ ܡܿܨܐ ܠܡܐܡܪ ܘܠܡܫܼܡܥ. ܐܝܟ ܕܐܦܠܐ ܟܿܠܗܘܢ ܚܟܝܼ̱̈ܐ ܩܕܡ̈ܝܐ ܕܒܝܬ ܢܡܪܘܕ ܬܠ̈ܡܝܕܝ ܝܘܢܝܛܘܿܢ ܩܛܝܼܢ ܗܘܢܐ. ܘܣܿܓܝܼ ܝܼܕܥܬܐ. ܘܐܦܠܐ ܦܝ̈ܠܠܘܣܘܦܐ ܥܬܝܼܩ̈ܐ ܕܡܼܢ ܐܓܐܬܐܕܡܘܿܢ ܘܐܣܩܠܝܦܝܕܝܣ. ܘܕܒܝܬ ܐܪܡܝܣ ܚܟܝܼܡ ܒܟܿܠ ܗܿܝ ܬܠ̈ܝܼܬܝ ܪ̈ܒܘܼܬܐ. ܘܕܒܝܬ ܦܝܬܐܓܘܪܘܿܣ. ܘܦܠܐܛܘܿܢ. ܘܥܘܪܙܠ ܡ̈ܠܐ ܘܡܠܦܢܘܼܬܐ ܡܠܝܼܠܬܐ ܘܩܛܝܼܢܬܐ ܘܣܿܓܝ̈ܐܬ ܡܢ̈ܘܬܐ ܕܐܪܝܣܛܘܛܐܠܝܣ. ܥܡ ܣܓܝ̈ܐܐ ܕܩܕܡܝܗܘܢ ܘܥܡܗܘܢ ܘܒܬܪܗܘܢ. ܠܐ ܐܬܡܼܨܝܼܘ ܠܡܣܿܝܟܘܼ ܒܣܿܓܝܼ ܟ̈ܬܒܐ ܘܡܟܬܒܢܘ̈ܬܐ ܘܡܐܡܪ̈ܐ. ܟܝܿܢܗܿ ܕܢܦܫܐ ܡܠܝܼܠܬܐ ܘܝܕܘܼܥܬܢܝܬܐ. ܘܝܕ̈ܥܬܐ ܘܚܟܼܡ̈ܬܐ ܕܡܨܝܐ ܕܬܕܥܝ ܘܕܬܪܟܝ. ܘܐܝܟܢܐ ܡܿܨܝܼܢ ܗܘܼܘ ܕܢܣܝܟܘܢ ܒܢ̈ܝ ܥ݀ܠܡܐ ܗܿܢܢܐ. ܠܗܿܘ ܡܕܡ ܕܟܿܠܗ ܗܿܢ ܥ݀ܠܡܐ ܠܐ ܥܪܐ ܠܗ ܘܠܐ ܡܣܝܟ ܠܗ. ܘܐܝܼܬܘܗܝ ܗܘܢܐ ܕܒܪܐܢܫܐ. ܗܿܘ ܕܒܚܕ ܥܕܢܐ ܙܥܘܼܪ̈ܐ ܡܬܟܪܟ ܠܟܿܠܗܿ ܡܼܬܥܡܪܢܝܼܬܐ. ܘܡ݀ܛܐ ܠܟܿܠܗܘܿܢ ܣܘ̈ܦܐ. ܘܫܡܚ ܠܟܿܠܗܘܢ ܪ̈ܘܡܐ ܘܥܘܼܡܩ̈ܐ. ܘܥ݀ܡܕ ܒܬܗܘܼ̈ܡܐ ܥܡܝܼܩ̈ܐ ܕܟܿܠܗܘܢ ܝܡܡ̈ܐ. ܘܢ݀ܚܬ ܠܬܼ̇ܚܬ ܡܼܢ ܟܿܠܗܿ ܐܪܥܐ ܘܣܿܠܩ ܠܥܼܠ ܡܼܢ ܟܿܠܗܘܢ ܫܡ̈ܝܐ. ܘܠܐܘܼ ܐܝܼܬ ܗܘܼܐ ܐܝܟ ܗܿܢ ܥ݀ܠܡܐ ܪ̈ܒܘܼ ܐܚܪ̈ܢܐ ܒܟܿܠܗܘܿܢ ܗܘܼܐ ܒܚܕܐ ܫܥܐ ܘܠܐ ܡܬܥܘܟ ܗܘܼܐ. ܘܠܐ ܣܿܦܩܝܢ ܗܘܼܘ ܠܗ. ܐܠܘ ܬܘܼܒ ܐܝܼܬ ܒܟܝܿܢܗ ܠܡܼܣܩ ܘܠܡܼܬܥܠܝܘܼ ܠܪ̈ܘܡܐ ܠܐ ܡܬܼܡܫܚ̈ܢܐ ܘܠܡܕܪܟܘܼ ܟܝ̈ܢܐ ܠܐ ܡܣܼܬܝܟܢܐ. ܘܟܕ ܚܪ ܒܪ 33 ܐܢܫܐ ܘܐܬܼܒܩܝܼ ܒܗܿܠܝܢ ܟܿܠܗܝܢ ܕܒܬܪ̈ܝܗܘܢ ܗܿܠܝܢ ܥܠ̈ܡܐ. ܥ݀ܠܡܐ ܪܒܐ ܕܐܝܼܬܝܗܿ ܒܪܝܬܐ ܗܿܕܐ. ܘܥ݀ܠܡܐ ܙܥܘܼܪܐ. ܕܐܝܼܬܘ̄ ܗܼܘ ܒܪܐܫܢܐ ܕܫܿܪܐ ܒܗ ܡܕܡ ܐܚܪܢܐ ܕܪܒ ܡܼܢ ܟܠܗܿ ܒܪܝܬܐ. ܘܚܙܼܐ ܘܐܕܪܟ ܒܗܘܿܢ ܒܗܿܠܝܢ ܬܪܝܢ ܥܠ̈ܡܐ ܫܪ̈ܒܐ ܣܓܝ̈ܐܐ. ܘܫܘܼܚܠ̈ܦܐ ܘܟܝ̈ܢܐ ܘܛܘܼܟܣ̈ܐ ܘܫܦܝܼܪܘܼܬ ܩܘܼܝ̈ܡܐ. ܘܐܚܪ̈ܢܝܬܐ ܕܠܐ ܡܣܼܬܝܟ̈ܢ ܘܠܐ ܡܼܨܝܐ ܕܟ݀ܠܗܝܢ ܢܼܬܐܡܪ̈ܢ ܗܿܫܐ. ܐܦܠܐ ܡܢ݀ܬܐ ܡܼܢܗܝܢ. ܕܠܐ ܬܬܼܡܬܚܝ ܠܗܿ ܡܠܼܬܐ ܣܿܓܝܼ ܘܬܫܼܛܪܝ ܘܬܐܩܪܝ ܥܠ ܫܡ̈ܘܥܐ. ܬܡܼܗ ܘܬܗܼܪ ܘܐܬܼܒܠܗܝ ܘܐܬܼܕܡܪ. ܘܫܪܝ ܬܘܼܒ ܡܬܚܫܒ ܝܬܝܪ ܩܛܝܢܐܝܬ. ܘܡܢܥܩܼܒ ܢܗܝܼܪܐܝܬ ܘܐܡܿܪ ܕܡܼܢ ܐܝܟܐ ܗܿܠܝܢ ܟ݀ܠܗܝܢ. ܐܪܐ ܗܿܠܝܢ ܟܿܠܗܝܢ ܠܐ ܡܬܕܪ̈ܟܢܝܬܐ ܘܠܐ ܡܣܼܬܝܟ̈ܢܝܬܐ ܕܝܼܠܝ ܘܕܒܝܼ ܒܟܝܿܢܝ ܘܒܩܢܘܼܡܝ. ܡܼܢ ܐܝܟܐ. ܡܢܘܼ ܒܪܼܢܝ. ܡܢܘܼ ܥܒܕܢܝ. ܡܢܘܼ ܬܩܢܢܝ. ܡܢܘܼ ܛܟ݀ܣ ܘܣܼܡ ܗܿܠܝܢ ܟܿܠܗܝܢ ܒܟܝܿܢܝ. ܡܼܢ ܐܝܟܘ ܕܘܼܡܪܐ ܗܿܢܐ ܠܐ ܡܣܼܬܝܟܢܐ. ܡܼܢ ܐܝܟܐ ܬܕܡܘܪܬܐ ܗܕܐ ܠܐ ܡܣܼܬܝܟܢܝܼܬܐ. ܡܼܢ ܐܝܟܐ ܐܬܼܟܢ̈ܫܝ ܒܝܼ ܗܿܠܝܢ. ܡܼܢ ܐܝܟܐ ܐܝܿܬܝ܆ ܘܡܢܘܼ ܐܝܬܼܝܢܝ ܠܗܘܿܝܐ. ܐܢܐ ܠܝܼ ܠܐ ܒܪܝ݀ܬ ܘܥܒܿܕܬ ܘܬ݀ܩܢܬ. ܕܗܿܐ ܡܼܢ ܩܕܡ ܡܘܠܕܐ ܕܝܠܝ ܠܐ ܝ݀ܕܥ ܐܢܼܐ ܘܠܐ ܡܬܼܥܗܕ ܐܢܼܐ. ܘܠܐ ܡܦܣ ܐܢܐܼ ܒܡܕܡ. ܘܐܢܿܐ ܡܼܢܝ ܘܥܠܝ ܠܐ ܗܘ݀ܝܬ. ܘܐܬܝܿܬ ܠܗܘܿܝܐ. ܘܠܗܿܕܐ ܬܫܒܘ̄ ܘܬܕܡܘܪܬܐ ܪܒܬܐ ܡܢܟܿܠ ܦܪܘܿܣ ܐ̱ܚܪܢܐ ܐܝܼܬܘ̄ ܗܿܝ ܕܒܪܢܝ ܘܥܒܼܕܢܝ ܘܐܬܩܼܢܢܝ ܘܐܝܬܼܝܢܝ ܠܗܘܝܐ. ܫܪܝܪܐܝܼܬ ܥܒܘܼܕܐ ܐܝܼܬ ܠܝܼ. ܘܠܘ ܒܠܚܘܕ ܕܒܼܪܢܝ ܘܐܬܩܼܢܢܝ. ܐܠܐ ܕܐܡܝܼܢܐܝܬ ܡܦܪܢܣ ܠܝܼ ܘܒܛܝܼܠ ܠܗ ܥܠ ܩܘܼܝܡ ܚܝ̈ܝ ܟܕ ܠܐ ܡܗܡܐ ܡܼܢܝ ܐܦܠܐ ܐܝܟ ܪܦܦܐ ܙܥܘܼܪܐ. ܘܗܿܢܐ ܡܕܡ ܟܣܝܐ ܘܢܗܝܼܪܐ ܘܝܕܘܼܥܬܢܐ ܕܐܝܬ ܒܝܼ ܡܼܢ ܠܓܘ. ܗܿܐ ܣ݀ܗܕܐ ܘܡܫܪܪ ܠܝ ܕܗܿܟܢ ܐܝܼܬܝܗܿ. ܘܡܪܐ ܐܝܼܬ ܠܝܼ ܘܒܪܘܼܝܐ. ܘܥܒܿܘܕܐ ܘܡܦܪܢܣܢܐ. ܘܗܼܘ ܟܝܿܢܗ ܕܗܿܢܐ ܡܕܡ ܪܘܼܚܢܝܐ ܘܡܠܝܼܠܐ ܘܢܗܝܪܐ ܕܒܝܼ. ܒܟܿܠܗ ܡܥܒܕܢܘܬܐ ܕܒܗ ܘܒܟܿܠܗ ܚܝܠܗ. ܪܓܬܗ ܘܝܐܝܼܒܘܼܬܗ ܠܘܬܗ ܕܗܿܝ ܒܿܪܘܝܐ ܗܿܐ ܣܘܚܐ ܘܠܗܝܼܩܐ ܘܪܓܝܓܐ. ܘܠܗ ܒܿܥܝܐ. ܘܡܐܚܒ ܟܝܿܢܗ ܟܝܢܐܝܬ ܘܪܚܡܼܬܢܐܝܬ. ܘܐܝܟ ܗܿܘ ܕܩܪܝܼܒܐ ܐ̱ܚܝܢܘܼܬܐ ܕܟܝܿܢܗ ܠܟܝܿܢܐ ܕܡܪܐ ܘܥܒܘܕܐ. ܘܡܕܡ ܕܡܘܼܬܐ ܘܨܠܡܐ ܐܝܬ ܒܗ ܡܼܢܗ. ܡܿܕܝܢ ܐܫܬܪܪܬ݀ ܘܐܬܝܕܥܬ݀ ܕܡܪܐ ܐܝܼܬ ܠܝܼ ܘܥܒܘܕܐ. ܐܢܿܐ ܒܪܐܢܫܐ. ܬܘܼܒ ܕܝܢ ܘܟܕ ܐܬܒܩܝܬ ܒܗܢ ܥ݀ܠܡܐ ܪܒܐ ܘܪܘܝܼܚܐ ܕܒܗ ܩܿܐܡ ܐܢܼܐ. ܘܒܬܗܪܐ ܪܒܐ ܕܡܛܟܣܘܬܗ ܘܕܘܡܪܐ ܪܒܐ ܕܫܦܝܪܘܬ ܩܘܝܡܗ ܘܒܟ݀ܠܗܝܢ ܗܿܠܝܢ ܕܐܬܐܡܼܪܗ ܡܼܢ ܠܥܼܠ ܟܐܡܬ ܗܘܼ ܒܪܢܫܐ ܡܼܬܚܫܒ 34 ܘܐܡܿܪ. ܕܡܼܢ ܐܝܟܐ ܗܿܠܝܢ ܟܿܠܗܝܢ ܕܒܥܿܠܡܐ. ܡܐܠܠܘܢ ܗܼܘ ܗܿܢܐ ܘܗܠܝܢ ܕܒܗ ܕܐܪܐ ܗܘܼ ܡܼܢ ܢܦܫܗ ܐܝܼܬܘܗܝ ܐܝܟ ܐܘܛܘܡܐܛܘܿܢ ܡܕܡ ܕܡܼܢ ܨܒܘܼܬ ܢܦܫܗ. ܠܐ ܡܬܗܝܡܢܐ ܗܿܕܐ ܥܠ ܬܕܡܪ̈ܬܐ ܪܘܪ̈ܒܬܐ ܘܛܘܼܟ̈ܣܐ ܘܟܝ̈ܢܐ ܘܫܘܼܚܠ̈ܦܐ ܕܒܗ. ܡܼܢ ܟܿܠܦܪܘܿܣ ܬܘܼܒ ܡܕܡ ܐܝܼܬ ܕܩܕܝܡ ܠܗ. ܗܿܝ ܕܗܼܘ ܐܝܬܼܝܗ ܠܗܘܿܝܐ. ܘܒܪܝܗܝ ܘܥܒܕܗ ܘܬ݀ܩܢܗ ܘܛܟܼܣܗ ܒܗܿܕܐ ܡܠܚܡܘܼܬܐ ܬܗܝܼܪܬܐ ܘܫܦܝܼܪܬܐ. ܘܟܝܿܢܐ ܢܗܝܼܪܐ ܘܩܛܝܼܢܐ ܕܒܝܼ ܗܿܐ ܣܿܗܕ ܥܠܘܗܝ ܕܗܿܟܢ ܐܝܬܝܗܿ. ܘܐܝܟ ܕܐܢܿܐ ܐܫܬܪܪܬ݀ ܘܝܿܕܥܬ ܕܐܝܼܬ ܠܝܼ ܡܪܐ ܘܥܒܘܼܕܐ ܘܡܦܪܢܣܢܐ ܐܡܝܼܢܐ. ܗܟܘܬ ܐܦ ܠܗܢܐ ܪܒܐ ܘܪܘܝܼܚܐ ܡܪܐ ܐܝܼܬ ܠܗ. ܘܡܠܟܐ ܐܝܼܬ ܠܗܿܕܐ ܡܝܕܢܬܐ ܫܒܝܼܚܬܐ ܘܫܦܝܼܪܬܐ. ܘܡܛܟܣܢܐ ܘܡܕܒܪܢܐ ܘܡܦܪܢܣܢܐ. ܘܕܒܛܝܼܠ ܠܗ ܐܡܝܼܢܐܝܬ ܥܠ ܟܪܘܼܟܝܗ ܘܩܘܼܝܡܗ ܘܡܛܟܣܘܬܗ. ܘܠܐ ܡܼܨܝܐ ܕܢܗܡܐ ܡܼܢ ܝܨܝܼܦܘܼܬܐ ܕܥܠܘܗܝ ܚܕ ܪܦܦܐ ܙܥܘܼܪܐ. ܘܐܠܐ܆ ܟܿܠܗ ܐܒܿܕ ܗܘܼܐ ܘܡܬܚܒܠ. ܘܣܓܝܼ ܩܪܝܼܒ ܠܗ ܘܒܗ ܐܝܼܬܘ̄. ܘܒܟܿܠܗ ܥ݀ܠܡܐ ܟܿܠܗ ܥܒܘܕܐ ܫܟܝܼܚ ܘܩܪܝܼܒ ܐܝܟ ܢܦܫܐ ܠܦܓܪܐ. ܘܐܝܟ ܚܡܝܼܡܘܼܬܐ ܠܓܘܼܫܡܐ ܚܝܐ. ܗܿܐ ܐܚ̈ܝܐ ܚܒܝܼܒ̈ܐ ܘܪ̈ܚܝܼܡܐ ܟܿܠܗܘܿܢ ܕܒܥܡܪܬܐ. ܐܬܝܕܥܬ݀ ܘܐܫܬܪܪܬ݀ ܫܪܝܼܪܐܝܬ ܘܚܬܝܼܬܐܝܼܬ ܕܠܐ ܦܘܼܠܓ ܕܐܝܼܬ ܐܠܗܐ ܐܘܟܝܬ ܡܪܐ ܘܥܒܘܼܕܐ ܘܒܪܘܼܝܐ ܠܗܢܐ ܟܿܠ. ܗܿܐ ܥܩܒܢܢ ܘܒܚܢܢ ܘܐܬܼܒܩܝܼܢܢ ܒܟܬܒܗ ܕܟܝܿܢܐ. ܘܩܼܪܝܢܢ ܘܒܣܦܪܗ ܕܡܕܥܐ. ܘܝܼܠܦܢܢ ܘܝܼܕܥܢܢ ܕܐܝܼܬ ܐܠܗܐ ܠܗܢܐ ܟܿܠ. ܘܩܪܝܼܒ ܠܗܿ ܘܒܗ ܐܝܼܬܘܗܝ. ܥܠܗܿܝ ܡܿܨܐ ܡܦܪܢܣ ܘܣܿܦܩ ܠܒܛܝܼܠܘܬܗ ܕܥܠ ܟܿܠܗ. ܠܝܬ ܟܫܼܠܐ ܘܠܐ ܬܘܼܒ ܦܘܼܠܓܐ ܥܠ ܗܢܐ ܡܿܪܐ ܘܒܪܘܼܝܐ ܘܡܦܪܢܣܢܐ. ܗܿܘ ܐܝܬܝܼ ܟܿܠ ܠܗܘܿܝܐ. ܘܡܿܨܼܐ ܚܝܼܠ ܟܿܠ. ܘܗܿܠܝܢ ܡܿܢ ܒܗܿܢܐ ܩܦܠܐܘܢ ܐܬܚܘ̈ܝܼܝܢ ܡܼܢ ܟܝܿܢܐ ܘܡܼܢ ܝܼܕܥܬܐ ܟܝܢܝܿܬܐ ܕܐܝܼܬ ܐܠܗܐ. ܘܬܘܼܒ ܐܢܢ ܨܒܿܐ ܗܼܝ ܥܠܼܬܐ ܕܟܿܠܗܝܢ ܘܒܪܘܝܐ ܕܟܿܠ. ܬܘܼܒ ܣܿܓܝܼ ܡܚܘܝܢܢ ܥܕܟܝܠ ܒܟܿܠܗܘܿܢ ܩܦ̈ܠܐܐ ܘܡܐܡܪ̈ܐ ܕܩܕܡܝܢ ܥܠ ܐܝܼܬܘܼܬܗ ܘܥܠ ܣܓܝ̈ܐܬܐ ܕܡܬܕܪ̈ܟܢ ܠܟܝܿܢܢ ܡܛܠܬܗ. ܘܐ݀ܠܨܐ ܠܢ ܡܢܟܿܠܦܪܘܿܣ ܝܼܕܥܬܗܝܢ. ܘܗܿܝ ܕܐܡܼܪܢܢ ܥ݀ܠܡܐ ܪܒܐ ܘܙܥܘܼܪ̈ܐ ܡܬܪ̈ܓܫܢܐ. ܘܕܚܕ ܗܿܘ ܪܒܐ. ܗܿܢ ܥ݀ܠܡܐ ܪܒܐ ܐܝܼܬܘ̄. ܘܐܚܪܢܐ ܥ݀ܠܡܐ ܙܥܘܼܪ̈ܐ ܒܪܐ̱ܢܫܐ ܐܝܼܬܘ̄. ܕܐܝܿܟܢܐ ܕܝܢ ܐܝܼܬܘ̄ ܗܿܘ ܒܪܐܢܫܐ ܥ݀ܠܡܐ ܙܥܘܼܪ̈ܐ. ܗܟܘܬ݀ ܒܫܪ̈ܒܐ ܕܩܕܡܝܢ ܡܚܘܝܐ ܡܠܼܬܐ ܐܝܟܐ ܕܨ݀ܒܐ ܒܪܘܼܝܐ ܘܡܬܩܢܢܐ. ܬܘܼܒ ܘܥܠ ܣܓܝ̈ܐܬܐ ܕܡܼܬܒܥ̈ܝܢ ܘܚܫܚ̈ܢ ܠܩܘܝܡܐ 35 ܕܨܠܡܗ ܕܫܪܪܐ. ܐܢܕܝܢ ܘܐܢܫ ܡܼܢ ܚܟ̈ܝܼܡܐ ܘܪ̈ܚܡܝ ܡ̈ܠܐ ܣܩܝܼ̈ܠܬܐ. ܢܦܓܼܥ ܘܢܩܼܪܐ ܠܗܕܐ ܡܟܬܒܢܘܬܐ ܓܘܢܝ݀ܬܐ ܘܢܼܚܙܐ ܕܠܐ ܣܩܝܼܠܐ ܡܠܼܬܐ ܒܚܟܼܡܬܐ ܕܦܝܼܠ̈ܠܘܣܘܦܐ ܡܬܼܚܫܚ ܒܟܪ̈ܝܬܐ ܕܚܿܒ̈ܫܢ ܐܪ̈ܝܼܟܬܐ. ܘܩܦܝܼܣ̈ܬܐ ܕܡܬܦܫ̈ܛܢ ܠܣܿܓܝܼ ܡܬܝܚ̈ܬܐ ܐܝܟ ܛܟܼܣܐ ܕܡܠ̈ܦܢܘܬܐ ܕܓܪ̈ܡܛܝܩܝܐ ܘܣܘܼܦܣ̈ܛܐ ܕܒܝܬ ܐܪܝܣܛܘܿܛܠܝܣ ܘܟܢܘ̈ܬܗ. ܘܐܝܟ ܥܘܪܙܠ ܡܼ̈ܠܝܗܘܢ ܥܡܘ̈ܛܬܐ. ܘܪܘܼܟܒ ܦܼ̈ܠܐܬܗܘܢ ܚܫܘܟ̈ܬܐ. ܘܐܝܟ ܫܪܟܐ ܕܦܘܐܝ̈ܛܐ ܘܡܟܬܒ̈ܢܐ ܕܡܼܢ ܒܝܬ ܝܘܢ. ܡܼܬܟܫܦܝܢܢ ܠܚܟܝܼܡܘܼܬܗ ܕܠܐ ܢܼܥܕܘ ܘܢܩܛܪܓ ܠܣܝܘܿܡܐ ܦܫܝܼܛܐ ܘܬܚܘܼܒܐ. ܒܗܿܝ ܕܠܘ ܥܠ ܗܿܠܝܢ ܒܛܝܠ ܠܗ ܕܢܨܒܬ ܡ̈ܠܐ ܣܩܝܼܠ̈ܬܐ. ܘܢܩܦܘܣ ܡܐܡܪ̈ܐ ܘܢܚܼܒܘܫ ܣܘܼܟ̈ܠܐ ܘܢܪܟܒ ܡܬ̈ܠܐ ܘܢܼܬܚܫܚ ܒܦܼ̈ܠܐܬܐ. ܘܢܥܟܪ ܠܩܪ̈ܘܝܐ ܢܓܼܠܘܙ ܡܢ ܚܬܝܼܬܘܼܬܐ ܠܣܓܝ̈ܐܐ. ܡܛܠ ܕܡܠܼܬܐ ܦܝܠܠܘܣܘܼܦܝܬܐ ܣܝܘܡܘܼܬܐ ܓܪܡܛܝܩܝܬܐ. ܠܚܕܚܕ̈ܢܐ ܕܠ̈ܝܠܐ ܪܚܝܡܐ. ܐܢ ܟܝܬ ܘܡܗܢܝܐ. ܠܣܓܝ̈ܐܐ ܕܝܢ ܡܐܠܠܘܢ ܠܣܘܓܐܗܘܢ ܕܒܢܝ̈ܢܫܐ ܥܣܩܬ݀ ܠܣܘܼܟܠܐ ܐܝܼܬܝܗܿ ܘܠܐ ܡܗܢܝܢܝܼܬܐ. ܡܠܼܬܐ ܕܝܢ ܦܫܝܼܛܬܐ ܘܫܚܝܼܡܿܬܐ ܘܣܝܘܼܡܘܬܐ ܡܦܫܩܬܐ. ܢܗܝܼܪܬܐ ܗܿܝ ܘܦܫܝܼܩܬ݀ ܠܣܘܼܟܠܐ. ܘܠܟܿܠܗ ܓܘܐ ܕܒܢܝ̈ܢܫܐ ܡܬܢܣܒܢܝܼܬܐ ܘܡܗܢܝܢܝܼܬܐ. ܠܚܟܝܡ̈ܐ ܘܠܗܕܝܘ̈ܛܐ. ܠܝܕܘܥ̈ܬܢܐ ܘܠܒܘܼܪ̈ܐ ܘܠܥܪ̈ܝܡܐ ܘܠܦܫܝܼ̈ܛܐ. ܘܚܢܢ ܢܝܼܫܢ ܡܼܢ ܥܠܬ݀ ܚܘܼܒܐ ܐܠܗܝܐ ܘܫܪܝܼܐ ܕܠܘܬ ܐܚ̈ܝܢ ܘܗܕ̈ܡܝܢ ܒܢܝ̈ܢܫܐ ܟܿܠܗܘܿܢ ܫܘ̈ܝܼܝܼ ܠܢ ܒܒܪܝܬܐ ܘܒܟܝܿܢܐ ܘܒܓܢܼܣܐ. ܘܬܚܝܼܬ ܡܪܘܼܬܐ ܘܒܛܝܼܠܘܬܐ ܘܡܦܪܢܣܢܘܬܐ ܕܡܪܐ ܛܒܿܐ ܘܡܪܚܡܢܐ. ܗܿܘ ܕܨ݀ܒܐ ܕܟܿܠܗܘܿܢ ܒܢܝ̈ܢܫܐ ܢܚܘܿܢ ܘܠܝܕܥܬܐ ܕܫܪܪܐ ܢܐܬܘܿܢ. ܘܠܐ ܒܛܝܼܠ ܠܢ ܥܠ ܩܘܼܠ̈ܣܐ ܡܫܒܚ̈ܢܐ. ܘܠܐ ܥܠ ܝܘܬܪ̈ܢܐ ܥܒܘܼܪ̈ܐ. ܡܚܪ ܓܝܪ ܡܫܼܬܪܝܢܢ ܡܼܢ ܚܝ̈ܐ ܗܿܠܝܢ ܥܒܘܼܪ̈ܐ. ܘܡܫܢܝܢܢ ܡܼܢ ܥ݀ܠܡܐ ܗܿܢܐ ܓܫܝܼܡܐ ܘܡܪܟܒܐ. ܘܠܐ ܩܘܼܠ̈ܣܐ ܡܗܢܝܢ ܠܢ. ܐܦܠܐ ܝܘܬܪ̈ܢܐ ܡܿܛܝܢ ܠܘܬܢ. ܐܠܐ ܒܠܚܘܼܕ ܥܘܼܗܕܢܐ ܛܒܿܐ ܒܡܠܼܬܐ ܕܨܠܘܿܬܐ ܕܟܿܠ ܕܦܿܓܥ ܒܗܿܠܝܢ. ܡܿܢ ܕܗܘܼ ܐܝܼܬܘ̄ ܡܼܢ ܟܿܠܗܘܢ ܥܡܼܡ̈ܐ ܢܒܼܥܐ ܥܠܝܢ ܪ̈ܚܡܼܐ ܒܪܘܝܐ ܘܥܒܘܼܕܐ ܕܟܠܢ. ܗܿܘ ܕܠܗ ܡܬܬܚܝܼܒܐ ܬܫܼܒܘ̄ ܘܬܘܕܝܬܐ ܘܣܓܕܬܐ ܘܩܘܼܒܠܛܝܒܘܬܐ ܡܼܢ ܟܿܠ. ܡܫܒܚ ܫܡܗ ܡܫܒܚܐ. ܡܒܪܟܐ ܡܪܘܼܬܗ. ܡܪܡܪܡ ܐܘܚܕܢܗ . ܣܓܝܼܕ ܐܝܼܩܪܗ. ܡܫܒܚ ܒܥܒܘܼܕܘܬܗ. ܬܡܝܼܗ ܒܒܪܘܝܘܼܬܗ. ܛܘܒܬܢ ܒܨܒܝܿܢܗ. ܚܟܝܼܡ ܒܝܼܕܥܬܗ. ܥܬܝܼܪ 36 ܒܡܘܗܒ̈ܬܗ ܠܐ ܡܣܼܬܝܟܐ ܪܒܘܼܬܗ. ܠܐ ܡܬܕܪܟܐ ܐܝܼܬܘܼܬܗ. ܠܐ ܡܬܼܡܫܚܐ ܣܿܥܘܪܘܬܗ. ܠܟ ܡܪܢ ܒܪܘܝܐ ܘܥܒܘܕܢ ܡܫܒܚܝܼܢܢ ܘܡܘܕܝܢܢ ܘܣܓܕܝܢܢ ܠܟ ܡܪܡܪܡܝܢܢ ܘܡܗܕܪܝܢܢ. ܘܡܒܪܟܝܢܢ ܘܡܘܪܒܝܢܢ ܠܟ ܘܡܩܠܣܝܢܢ ܘܡܗܠܠܝܼܢܢ. ܒܟ ܡܗܝܡܢܝܼܢܢ ܕܐܢܬ ܗܘܼ ܡܪܐ ܘܡܠܟܐ ܘܐܚܝܼܕܐ ܕܟܿܠܢ. ܠܐ ܡܪܝ ܬܪܓܙ ܥܠܝܢ ܕܐܡܼܪܚܢܢ ܠܡܥܩܒܘ ܥܠ ܐܝܼܬܘܼܬܟ. ܠܐ ܡܪܝ ܬܚܝܒ ܠܢ ܕܣܥܝܢܢ ܠܡܒܚܢܘ ܥܠ ܡܪܘܬܟ. ܠܐ ܡܪܝ ܬܕܚܘܩ ܠܢ ܕܐܬܩܪܒܢܢ ܕܢܒܨܐ ܠܒܪܘܝܘܼܬܟ. ܐܢܬ ܡܪܝ ܒܪܝܬ ܒܢ ܟܝܿܢܐ ܡܪܚܐ ܘܠܐ ܡܬܼܠܒܟܢܐ ܕܣܿܥܐ ܠܡܼܬܥܠܝܘ ܠܘܬܟ. ܐܢܬ ܡܪܝ ܬܩܢܼܬ ܒܢ ܗܘܢܐ ܡܠܝܼܠܐ ܒܕܡܘܼܬ ܨܠܡܟ ܡܫܒܚܐ ܘܩܕܝܼܫܐ ܘܠܐ ܡܬܕܪܟܢܐ ܘܠܐ ܡܼܬܚܙܝܢܐ ܘܠܐ ܡܬܦܫܩܢܐ. ܐܢܬ ܡܪܝ ܝܗܼܒܬ ܠܢ ܚܐܪܘܬܐ ܡܫܠܛܬܐ ܡܠܟܬܐ ܠܐ ܡܬܼܥܨܢܝܬܐ ܕܗܡܣܬ݀ ܒܟܿܠ ܪܘܪ̈ܒܢ. ܘܡܡܣܪܬ݀ ܥܠ ܟܿܠ ܕܚܠ̈ܢ. ܒܚܘܼܒܐ ܗܿܝ ܡܪܝ ܐܬܠܒܒܢܢ ܕܢܬܩܪܒ ܠܘܬ݀ ܡܬܼܩܪܒܢܘܬܟ. ܒܚܡܼܬܐ ܡܪܝ ܐܫܿܬܓܪܢܢ ܘܐܡܿܪ ܚܢܢ ܕܢ݀ܣܩ ܠܘܬ݀ ܠܐ ܡܼܬܡܿܫܚܢܘܬܟ. ܥܠ ܣܒܪܐ ܕܒܣܝܼܡܘܼܬܟ ܐܬܬܟܠܢܢ ܐܘ̃ ܛܒܿܐ ܘܒܣܝܼܡܐ. ܡܪܚܡܢܐ ܘܡܪܚܦܢܐ ܕܢܼܬܥܿܠܐ ܠܘܬ݀ ܠܐ ܡܬܕܪܟܢܘܬܟ. ܒܪܝܟ ܐܢܬ ܡܼܢ ܟܿܠ ܘܡܫܒܚ ܠܥܿܠܡ ܥܿܠܡܝܢ ܕܠܐ ܫܘܼܠܡ ܐܡܝܢ܀ ܘܒܗܿܠܝܢ ܫܠܼܡ ܩܦܠܐܘܢ ܕܐܪܒܥܐ ܒܝܕ ܐܠܗܐ ܕܗܕܝ܀ Chapter 5 ܥܡ ܐܠܗܐ ܕܡܚܟܡ ܩܦܠܐܘܢ ܕܚܡܫܐ܆ ܥܠܗܿܝ ܕܐܢ ܚܕ ܐܝܬܘܗܝ ܐܠܗܐ ܐܘܿ ܣܓܝ̈ܐܐ ܐܝܼܬܝܐ ܝܼܚܝܼܕܝܐ ܘܟܝܿܢܐ ܠܚܘܼܕܝܐ ܘܐܘܣܝܐ ܠܐ ܡܬܼܕܡܝܢܝܬܐ ܘܠܐ ܡܬܼܦܫܩܢܝܼܬܐ. ܠܐ ܡܼܬܕܪܟܢܝܼܬܐ. ܡܪܐ ܓܢܝܼܙܐ ܘܡܠܟܐ ܡܫܒܚܐ. ܘܐܚܝܼܕܐ ܡܿܨܼܐ ܚܝܠ ܟܿܠ. ܒܪܘܼܝܐ ܛܒܿܐ. ܘܥܿܒܘܕܐ ܚܟܝܼܡܐ. ܘܡܦܪܢܣܢܐ ܥܬܝܼܪܐ ܐܘܿ ܪܫܝܼܬܐ ܡܬܘܼܡܝܬܐ ܘܩܕܝܼ̱ܘܼܬܐ ܕܠܝܬ ܠܗܿ ܫܘܼܪܝܐ ܘܠܐ ܡܬܕܪܟܐ. ܘܠܐ ܗܿܘܐ ܠܗܿ ܫܘܼܠܡܐ. ܐܘ̃ ܥܠܼܬܐ ܛܒܿܬܐ ܕܥܼܠܬ݀ ܟܿܠ ܥ̈ܠܠܢ. ܕܠܝܬ ܠܟܝ ܨܠܡܐ ܡܬܝܕܥܢܐ. ܘܠܐ ܕܡܘܼܬܐ ܡܬܚܙܝܿܢܝܼܬܐ. ܘܠܐ ܬܚܘܝܼܬܐ ܡܼܬܦܫܩܿܢܝܼܬܐ. ܐܘ̃ ܐܝܼܬܘܼܬܐ ܡܬܘܼܡܝܬܐ ܕܠܝܬ ܪܫܝܼܬܐ ܠܐܝܼܬܘܬܗܿ. ܘܡܥܠܝܘܼܬܐ ܪܡܬܐ ܕܠܝܬ ܠܥܠ ܡܢܼܗܿ ܐܦܠܐ ܕܩܪܝܼܒ ܠܘܥܕܗܿ. ܘܥܘܼܡܩܐ ܕܠܝܬ ܓܫܐ ܠܥܡܝܼܩܘܼܬܗ. ܘܠܐ ܣܘܦܐ ܠܬܗܘܼܡܘܼܬܗ. ܐܘ̃ ܝܼܚܝܼܕܝܐ ܒܠܚܘܼܕܝܘܬܐ ܡܬܘܡܿܝܬܐ ܒܐܝܼܬܘܼܬܐ. ܘܠܐ ܡܼܬܕܪܟܢܐ ܒܓܢܝܼܙܘܼܬܐ. ܐܘ̃ ܛܒܿܐ ܒܡܪܢܝܘܬܐ ܘܚܟܝܼܡܐ 37 ܒܒܪܘܝܘܬܐ ܘܥܬܝܼܪܐ ܒܡܦܪܣܢܘܬܐ. ܐܘ̃ ܡܪܚܡܢܐ ܒܟܝܿܢܐ ܘܡܪܚܦܢܐ ܒܣܥܘܼܪܘܬܐ. ܘܫܦܝܼܥ ܒܡܘܗ̈ܒ̄ ܗܿܒ ܘܫܟܢ ܘܐܥܼܬܪ ܠܢ ܨܪ̈ܝܼܟܐ ܘܡܣܟ̈ܢܐ ܘܣܢܝܼ̈ܩܐ. ܨܪ̈ܝܼܟܝ ܒܟܝܿܢܐ ܐܟܡܐ ܕܫܦܪ ܠܨܒܝܿܢܟ ܘܦܩܕܐ ܡܪܘܘܬܟ ܘܝ݀ܕܥܐ ܚܟܼܡܬ݀ ܬܪܥܝܼܬܟ ܕܦܩܚܐ ܠܢ ܘܥܕܪܐ ܠܢ ܘܡܚܟܡܐ ܠܢ ܟܕ ܠܐ ܫܿܘܝܢܢ ܥܠ ܠܚܘܕܝܘܼܬ݀ ܡܪܘܼܬܟ ܘܠܐ ܡܫܘܬܦܘܼܬ ܫܘܼܠܛܢܟ ܘܠܐ ܡܕܡܝܘܼܬ ܟܣܝܘܼܬܟ. ܛܒܿ ܐܢܬ ܒܟܝܿܢܟ ܡܪܢ. ܚܟܝܼܡ ܐܢܬ ܒܣܥܘܪ̈ܘܬܟ. ܥܬܝܼܪ ܐܢܬ ܘܫܦܝܼܥ ܒܡܘܗ̈ܒܬܟ. ܠܘ ܟܕ ܡܡܪܚܝܼܢܢ ܒܿܨܝܢܢ. ܘܠܘ ܟܕ ܣܿܥܝܢܢ ܡܥܩܒܝܼܢܢ. ܘܠܘ ܟܕ ܫ݀ܛܝܢܢ ܡܒܚܢܝܼܢܢ. ܐܠܐ ܡܘܕܝܢܢ ܟܕ ܠܐ ܡܬܟܫܠܝܼܢܢ. ܘܡܗܝܡܢܝܢܢ ܟܕ ܠܐ ܡܼܬܦܼܠܓܝܼܢܢ. ܘܡܫܒܚܝܼܢܢ ܟܕ ܠܐ ܫܿܠܝܢܢ. ܐܠܐ ܒܿܥܝܢܢ ܡܼܢ ܡܪܚܡܢܘܼܬܟ. ܡܪܐ ܛܒܿܐ ܘܒܣܝܼܡܐ ܕܟ݀ܠܢ. ܚܟܡ ܡܪܝ ܠܗܕܝܘܼܛܘܬܢ ܥܠ ܠܚܘܼܕܝܘܼܬ ܡܪܘܬܟ ܠܚܘܕܝܿܬܐ ܕܐܡܝܼܢܐܝܬ ܘܕܠܐ ܫܘܼܠܡ ܢܿܘܕܐ ܘܢܣܓܘܕ ܘܢ݀ܫܒܚ ܠܡܠܟܘܼܬܟ ܚܕܢܝܿܬܐ ܡܠܟܘܬ ܟܿܠ ܡܠܟ̈ܘܢ ܘܡܪܬ݀ ܟܠ ܥܿܠܡܝܢ. ܕܐܚܝܼܕ ܐܢ̱ܬ ܟܿܠ ܫܘܼܠܛܢ ܠܥܿܠܡܥܠܡܝܼܢ ܐܡܝܢ܀ ܒܩܦܠܐܘܢ ܕܥܒܼܪ ܐܬܚܘܝܬ ܡܢ ܟܝܿܢܐ ܘܚܘܼܫ̈ܒܐ ܟܝ̈ܢܝܐ ܕܒܢ. ܕܫܪܝܼܪܐܝܼܬ ܐܝܼܬ ܐܠܗܐ. ܐܘܟܝܬ ܡܪܝܐ ܘܒܪܘܼܝܐ ܘܡܦܪܢܣܢܐ ܠܗܢܐ ܟܠ܀ ܗܿܫܐ ܬܘܼܒ ܡܛܠ ܚܬܝܼܬܘܼܬܗ ܕܫܪܪܐ. ܬܘܼܒ ܡܥܩܒܐ ܡܠܼܬܐ. ܘܡܒܚܢܢܐ ܬܪܥܝܼܬܐ. ܘܒܿܨܝܐ ܡܚܫܒܬܐ. ܕܐܪܐ ܟܝ ܚܕ ܗܼܘ ܡܪܐ ܘܒܪܘܝܐ ܘܡܦܪܢܣܢܐ ܕܗܢܐ ܟܿܠ. ܐܘܿ ܬܪܝܢ. ܐܘܿ ܬܠܬܐ. ܐܘܿ ܣܓܝ̈ܐܐ. ܘܟܿܠܚܕ ܡܢܗܘܢ ܡܕܡ ܡܕܡ ܒܪܐ ܘܥܒܿܕ ܘܡܦܪܢܣ. ܘܟܿܠܚܕ ܡܢܼܗܘܢ ܫܘܠܛܢܐ ܥܠ ܡܕܡ ܕܐܝܼܬ ܠܗ ܘܬܚܘܼܡܐ ܐܚܝܼܕ ܘܡܕܒܪ. ܕܗܿܐ ܚܿܙܝܢܢ ܒܥ݀ܠܡܐ ܫܘܼܚܠ̈ܦܐ ܣܿܓܝ̈ܐܐ. ܢܘܼܗܪܐ ܘܚܫܘܿܟܐ. ܣܬܘܐ ܘܩܝܛܐ. ܫܟܝܼܚܘܬܐ ܘܓܠܝܼܙܘܬܐ. ܐܝܼܬܘܼܬܐ ܘܡܬܬܪܝܼܡܢܘܼܬܐ. ܚܘܼܠܡܢܐ ܘܟܘܼܪܗܢܐ. ܩܘܼܝܡܐ ܘܚܘܼܒܠܐ. ܪܘܼܟܒܐ ܘܫܪܝܐ. ܐܘܝܘܼܬܐ ܘܣܩܘܼܒܠܝܘܬܐ. ܢܘܼܪܐ ܘܡ̈ܝܐ. ܥܦܪܐ ܘܪܘܼܚܐ. ܚܝ̈ܐ ܘܡܘܬܐ. ܥܡ ܣܿܓܝ̈ܐܬܐ ܐ̱ܚܪ̈ܢܝܬܐ ܕܠܐ ܡܬܚܒܫ̈ܢ ܬܚܝܼܬ ܣܟܐ. ܘܠܐ ܢܦܠ̈ܢ ܬܚܝܼܬ ܡܼܢܝܢܐ ܕܡܬܚܫܒܐ ܬܪܥܝܼܬܐ ܘܡܬܗܓܓܐ ܘܒ݀ܨܝܐ. ܗܿܫܐ ܕܝܢ ܡܼܢ ܡܢܘܼ ܢܐܠܦ. ܡܼܢ ܡܿܢ ܢ݀ܫܡܥ ܥܠ ܗܿܠܝܢ. ܠܡܢܘܼ ܢܿܗܝܡܢ. ܡܼܢ ܐܝܟܐ ܢ݀ܕܥ. ܐܝܢܐ ܢܫܬܪܪ. ܘܐܝܼܟܢ ܢ݀ܬܚܟܡ. ܕܗܿܐ ܠܚܕܕ̈ܐ ܠܐ ܫܡܥܝܼܢ ܘܠ̈ܚܕܕܐ ܠܐ ܡܗܝܡܢܝܢܢ. ܘܡܼܢ ܚܕ̈ܕܐ ܠܐ ܡܬܛܦܝܼܣܝܼܢܢ ܒܗܿܝ ܕܠܟ̈ܬܒܐ ܕܚܕ̈ܕܐ ܠܐ ܡܩܒܠܝܼܢܢ. ܘܠܡܠܒܢܘܼܬܐ ܠܐ ܫܿܠܡܝܢܢ. ܘܠܡܼ̈ܠܐ ܠܐ ܡܫܪܝܼܢܢ. ܡܕܝܢ 38 ܡܼܢ ܐܝܟܐ ܢܐܠܦ. ܒܐܝܢܐ ܟܬܒܐ ܢܩܼܪܐ. ܒܐܝܢܐ ܣܦܼܪܐ ܢܬܼܗܓܐ. ܠܝܬ ܟܬܒܐ ܕܫܪܝܪ. ܘܠܐ ܣܦܼܪܐ ܕܚܬܝܼܬ. ܘܠܐ ܡܠܦܢܐ ܕܡܬܗܝܡܢ. ܐܝܟ ܐܒܐ ܫܪܝܼܪܐ ܕܟ݀ܠܢ. ܟܬܒܐ ܓܘܢܝܐ ܕܟܿܠܢ. ܡܠܦܢܐ ܚܟܝܼܡܐ ܘܡܢܗܝܡܢܐ ܕܥܠ ܟ݀ܠܢ. ܗܢܐ ܕܝܢ ܐܝܼܬܘܗܝ ܟܝܿܢܐ. ܕܡܢܗ ܟܿܠܢ ܘܒܗ ܟܿܠܢ. ܘܬܚܝܼܬ ܫܘܼܠܛܢܗ ܘܡܦܪܢܣܢܘܼܬܗ ܟܿܠܢ ܒܗ ܢܗ ܢܩܼܪܐ. ܒܗ ܢܼܬܗܓܐ. ܒܗ ܢ݀ܗܪܘܓ. ܘܡܢܗ ܢܿܐܠܦ ܢܗܝܼܪܐܝܼܬ ܘܚܬܝܼܬܐܝܼܬ ܘܫܪܝܼܪܐܝܬ. ܥܠܗܿܝ ܕܝܢ ܕܚܕ ܗܼܘ ܡܪܐ ܘܒܪܘܼܝܐ ܘܡܦܪܢܣܢܐ ܐ ܘܿ ܣܓܝ̈ܐܐ. ܐܝܟܢ ܕܝܢ ܢܿܩܪܐ ܒܗ ܒܟܝܿܢܐ ܘܢܬܗܓܐ. ܐܡܿܪܝܢܢ. ܚܢܢ ܗܿܟܝܠ ܒܢ̈ܝܢܫܐ ܗܿܢܘܢ ܕܐܫܬܼܟܚܢܢ ܒܗܕ ܦܩܥܬܗ ܕܥ݀ܠܡܐ. ܘܐܬܼܚܫܒܢܢ ܘܒܢܝܢܢ ܒܝܬܐ ܠܣܘܼܬܪ ܦܓܪܢ. ܘܐܬܚܫܒܢܢ ܕܐ݀ܠܨܐ ܥܠ ܐ̱ܚܪܢܐ ܠܗܿܘ ܟܣܝܐ ܕܐܝܼܬ ܒܢ ܕܐܝܼܬܝܗܿ ܢܦܫܢ. ܘܟܕ ܫܪܝܢܢ ܠܡܒܢܝܗ ܠܒܝܬܐ ܢܦܢܫܐ ܕܢܦܫܐ. ܫܪܝܼܢܢ ܠܡܟܢܫܘܼ ܐܕ̈ܫܐ ܕܚܿܫܚܝܢ ܠܩܘܼܝܡܗ. ܕܐܝܼܬܝܗܘܢ ܝܘܠܦ̈ܢܐ ܘܚܟ̈ܡܬܐ ܕܓܡܪܝܢ ܒܢ ܝܕܥܬܗ ܚܬܝܼܬܬܐ ܕܫܪܪܐ. ܘܟܕ ܐܬܟܪܟܢܢ ܠܡܟܢܫܘܼ ܗܿܠܝܢ ܒܗܿ ܒܢܦܫܢ. ܐܘܟܝܼܬ ܗܘܢܢ ܝܕܘܥܬܢܐ. ܡܼܢ ܗܿܠܝܢ ܕܡܼܬܚܙܝ̈ܢ ܠܢ. ܕܐܝܼܬܝܗܝܢ ܫܡܝ̈ܐ ܘܐܪܥܐ. ܘܟܿܗܠܝܢ ܕܡܢܼܗܝܢ ܘܒܗܝܢ. ܘܟܕ ܒܗܿܠܝܢ ܡܼܬܟܪܟܝܢ ܗܘܼܝܢ. ܣܠܼܩ ܒܢ ܚܘܼܫܒܐ ܕܡܼܢ ܐܝܟܐ ܐܢܝܢ ܗܿܠܝܢ ܟ݀ܠܗܝܢ ܕܡܬܚܙ̈ܝܢ. ܘܚܢܢ ܒܢܝ̈ܢܫܐ. ܗ̄ ܒܪܝܘܬܢ ܘܓܘܝܘܬܢ ܓܠܝܘܼܬܢ ܘܟܣܝܘܼܬܢ. ܘܐܫܿܟܚܢܢ ܘܐܫܬܪܪܢܢ ܕܡܪܐ ܘܒܪܘܝܐ ܘܡܦܪܢܣܢܐ ܐܝܼܬ ܠܟܿܠܢ. ܘܟܕ ܬܘܼܒ ܨܿܒܝܢܢ ܠܡܕܥ ܗܿܐ ܐܠܦ̈ܐ ܣܿܓܝ̈ܐܐ ܕܫܢ̈ܝܐ. ܕܠܐ ܗܘܼܐ ܫܘܼܚܠܦܐ ܡܕܡ ܓܘܢܝܐ ܒܗܿܢܐ ܟܿܠ. ܘܗܿܠܝܢ ܫܘܚܠ̈ܦܐ ܕܝܠ̈ܢܝܐ ܕܓܕܫܝܼܢ ܐܝܠܝܢ ܕܐܡܼܪܢܢ ܡܼܢ ܠܥܼܠ ܘܕܐܟܘܬܗܝܢ. ܠܘ ܫܘܼܚܠ̈ܦܐ ܣܩܘܒ̈ܠܝܐ ܘܡܫܬܓܢܝ̈ܐ ܟܘܠܢܐܝܬ ܐܢܘܢ. ܐܠܐ ܡܩܘܝ̈ܢܐ ܘܡܟܬܪ̈ܢܐ ܒܗ ܒܟܝܿܢܐ ܘܡܢܗ ܘܒܡܥܒܕܢܘܬܗ. ܗܠܝܢ ܕܝܬܝܪ ܩܿܥܝܢ ܘܡܚܘܝܢ ܢܗܝܼܪܐܝܼܬ ܠܫܪܝܼܪܘܼܬܗ ܘܡܟܬܪܢܘܼܬܗ ܕܟܝܿܢܐ ܚܬܝܼܬܐ ܘܠܐ ܡܫܬܚܠܦܢܐ. ܒܗܿܝ ܕܗܼܢܘܢ ܫܘܼܚܠ̈ܦܐ ܗܼܝ ܟܕ ܗܼܘ ܣܘܥܪܢܐ ܡܚܘܝܢ ܘܡܝܬܝܢ ܐܡܝܼܢܐܝܬ ܒܛܟܣܐ ܡܠܚܡܐ ܘܠܐ ܡܬܒܠܒܠܢܐ ܘܣܕܝܪܘܬܐ ܫܒܝܼܚܬܐ ܪܕܝܬ݀ ܡܛܟܣܐܝܼܬ ܕܠܐ ܦܘܼܠܗܕܐ ܘܫܘܼܚܛܐ ܨܘܫܘܫܐ. ܗܿܐ ܡܼܢ ܟܕ ܐܬܡܼܬܚ ܫܡܿܝܐ ܘܫܪܝ ܒܟܪܘܼܟܝܐ ܚܪܝܼܦܐ ܕܡܘܙܠܬܐ܆ ܠܐ ܣܟ ܐܬܟܠܝܬ݀ ܡܪܕܝܬܗܿ ܐܝܟ ܚܕ ܪܦܦܐ. ܘܠܐ ܫܡܼܫܐ ܚܦܝܼ ܢܘܼܗܪܗ. ܐܦܠܐ ܣܗܪܐ ܐܬܟܠܝܬ݀ 39 ܡܼܢ ܬܫܡܫܬܗܿ. ܘܠܐ ܟܘܟ̈ܒܐ ܚܫܼܟܘ ܙ̈ܠܝܩܝܗܘܢ. ܐܦܠܐ ܐܫܬܚܠܦ ܢ݀ܡܘܿܣܐ ܕܡܪܕܝܬܗܘܢ. ܘܠܐ ܗܘܼܬ݀ ܫܡܿܝܐ ܐܪܥܐ. ܐܠܐ ܐܪܥܐ ܫܡܿܝܐ. ܘܠܐ ܝܡ̈ܡܐ ܝܒܝܼܫܬܐ. ܐܦܠܐ ܝܒܫܐ ܝܡܐ. ܘܠܐ ܕܥܟܼܘ ܡܝ̈ܐ ܠܢܘܼܪܐ. ܐܦܠܐ ܙ݀ܕܩܬ݀ ܪܘܼܚܐ ܠܥܦܪܐ. ܠܐ ܗܘܼܐ ܣܬܘܐ ܩܝܛܐ. ܘܐܠܐ ܩܝܛܐ ܣܬܘܐ. ܘܠܐ ܐܝܼܡܡܐ ܠܠܝܐ. ܘܐܦܠܐ ܠܠܝܐ ܐܝܼܡܡܐ. ܐܠܐ ܡܛܟܣܐܝܼܬ ܘܫܒܝܼܚܐܝܼܬ ܗܿܐ ܪܪܝܐ ܡܪܝܕܬܗ ܕܥ݀ܠܡܐ ܕܠܐ ܫܘܼܚܠܦ ܘܕܠܐ ܒܘܼܠܒܠ. ܘܡܼܢ ܗܿܠܝܢ ܝܼܠܦܢܢ ܕܚܕ ܗܼܘ ܡܪܐ ܘܚܕ ܗܼܝ ܒܪܘܼܝܐ ܘܥܒܘܼܕܐ. ܘܚܕܗܼܘ ܡܦܪܢܣܢܐ. ܘܡܕܒܪܢܐ ܕܠܝܬ ܠܗ ܚܒܪܐ ܘܠܐ ܫܘܬܦܐ ܘܠܐ ܕܘܼܡܝܐ ܘܠܐ ܣܩܘܼܒܠܐ. ܒܗܿܝ ܕܡܿܨܼܐ ܚܝܼܠ ܟܿܠ ܐܝܼܬܘ̄ ܘܠܐ ܣܢܝܼܩ ܥܠ ܡܥܕܪܢܐ. ܘܠܐ ܥܠ ܫܘܬܦܐ܀ ܬܘܼܝ ܕܝܢ ܗܿܐ ܚܿܙܝܢܢ ܕܟܿܠ ܡܪܘܼܬܐ ܐܘܿ ܡܠܟܘܼܬܐ ܐܘܿ ܡܦܪܢܣܢܘܼ̄ ܐܘܿ ܡܕܒܪܢܘܼܬܐ ܕܥܡܐ. ܐܘܿ ܐܘܡܢܘܼܬܐ. ܐܘܿ ܡܠܦܢܘܼܬܐ ܕܐܝܼܬ ܒܗܿ ܫܘܬܦܘܼܬܐ ܠܬܪܝܢ ܐܘܿ ܠܣܓܝ̈ܐܐ ܥܡ ܚܕܕ̈ܐ. ܡܢܟܿܠܦܪܘܿܣ ܣܩܘܼܒܠܝܘܬܐ ܗܿܘܐ ܒܗܿ. ܘܐܝܟܐ ܕܣܩܘܼܒܠܝܘܬܐ ܐܝܼܬ. ܐܦ ܥܼܨܝܢܐ ܗܿܘܐ ܘܡܨܘܼܬܐ. ܘܐܝܟܐ ܕܗܿܠܝܢ ܐܝܼܬ. ܠܝܬ ܩܘܼܝܡܐ ܡܫܪܪܐ ܠܐ ܡܫܼܬܚܠܦܢܐ. ܐܦܠܐ ܡܛܟܣܘܼܬܐ ܠܐ ܡܼܬܒܠܒܠܢܝܼܬܐ. ܐܦܠܐ ܣܕܝܼܪܘܬܐ ܠܐ ܡܬܦܠܗܕܢܝܼܬܐ. ܐܠܐ ܫܘܼܚܠܦܐ. ܘܒܘܼܠܒܠܐ ܘܦܘܼܠܗܕܐ. ܘܡܼܢ ܟܕ ܥܠܢܼܢ ܠܥܿܠܡܐ. ܠܐ ܚܙܝܼܢܢ ܒܘܼܠܒܠܐ ܠܡܛܟܣܘܼܬܗ. ܡܕܝܢ ܚܕ ܗܼܝ ܒܠܚܘܼܕ ܡܩܝܡܢܗ ܘܡܛܟܣܢܗ ܘܡܕܒܪܢܗ. ܘܗܼܘ ܒܠܚܘܼܕܘܗܝ ܡܦܪܢܣ ܠܗ ܐܡܝܼܢܐܝܼܬ ܘܒܛܝܼܠ ܠܗ ܥܠܘܗܝ. ܘܐܟܙܢܐ ܕܟܿܠ ܐܬܪܐ. ܐܘܿ ܥܡܐ ܕܐܝܼܬ ܠܗ ܕ̈ܝܿܢܐ ܣܓܝ̈ܐܐ ܘܡܕܒܪ̈ܢܐ. ܐܡܝܼܢܐܝܼܬ ܒܩܪ̈ܒܐ ܘܬܟܬܘܼܗܣܐ ܐܝܼܬܘܗܝ ܘܒܡܨܘ̈ܬܐ ܘܠܐ ܩܿܐܡ ܘܠܐ ܡܫܬܡܠܐ ܘܠܐ ܥ݀ܡܪ ܘܠܐ ܡܟܫܪ. ܗܟܘܬ݀ ܐܠܘܼ ܐܝܼܬ ܗܘܼܐ ܠܒܪ̈ܝܬܐ ܣܿܓܝܼ ܡܪ̈ܝܐ ܘܡܕܒܪ̈ܢܐ. ܣܟ ܠܐ ܩܝܿܡܐ ܗܘܼܬ݀. ܘܐܟܙܢܐ ܕܐܝܟ ܕܐܝܼܬ ܚܕ ܡܠܟܐ ܘܚܕ ܫܠܝܼܛܐ ܘܡܕܒܪܢܐ. ܘܐܝܬܘܗܝ ܚܝܠܬܢܐ ܘܚܟܝܼܡܐ ܘܥܬܝܼܪܐ ܘܛܒܿܐ ܘܡܪܚܢܐ ܘܡܼܬܡܨܝܢܐ ܒܟܿܠ ܕܨܿܒܐ. ܟܿܠܗ ܐܘܼܚܕܢܗ ܒܛܒܿܬܐ ܘܫܝܢܐ ܐܝܼܬܘܗܝ ܘܒܚܕ ܢܿܡܘܿܣܐ ܫܦܝܼܪܐ ܘܡܛܟܣܘܼܬܐ ܫܒܝܼܚܬܐ ܘܢܛܝܼܪܘܬܐ. ܗܟܘܬ݀ ܡܛܠ ܕܚܕ ܗܼܘ ܡܪܐ ܘܒܪܘܼܝܐ ܘܥܒܘܕܐ ܡܕܒܪܢܐ ܕܒܪܝܼܬܐ. ܐܝܼܬܝܗܿ ܒܫܝܢܐ ܘܒܫܦܝܼܪܘܬ ܡܛܟܣܘܼܬܐ. ܘܐܟܙܢܐ ܕܐܝܟܐ ܕܐܝܼܬ ܚܕ ܡܠܟܐ ܚܝܠܬܢܐ ܘܡܫܼܡܠܝ ܒܟܿܠܗܝܢ ܕܐܡܼܪܢܢ ܘܡܕܒܪ ܟܐܢܐܝܼܬ ܘܚܟܝܼܡܐܝܼܬ ܡܠܟܘܼܬܗ. ܡܛ݀ܠ ܗܿܕܐ ܥܙܝܼܙ ܘܕܚܝܼܠ ܥܠ ܟ݀ܠܗ ܥܡܐ ܕܒܐܘܼܚܕܢܗ ܘܬܚܝܼܬ ܫܘܠܛܢܗ. 40 ܘܡܢ ܕܚܼܠܬܗ ܘܡܛܟܣܘܼܬ ܢ݀ܡܘܣ̈ܘܗܝ܆ ܠܐ ܡܿܨܼܐ ܐܢܫ ܕܢܣܓܦ ܠܚܒܪܗ. ܐܦܠܐ ܢܚܼܛܘܦ ܬܫܡܫܬܗ ܐܘܿ ܕܪܓܗ ܐܘܿ ܐܝܼܩܪܗ. ܐܦܠܐ ܢܬܬܪܝܼܡ ܐܢܫ ܥܠ ܐܘܼܚܕܢܐ ܘܝܬܘܬܐ ܕܚܒܪܗ. ܥܡ ܣܿܓܝ ܫܒܝܼ̈ܚܬܐ ܘܬܪ̈ܝܼܨܬܐ ܕܡܬܼܢܛܪ̈ܢ ܡܼܢ ܕܚܠܼܬܗ ܕܡܠܟܐ ܥܙܝܼܙܐ. ܗܟܘܬ݀ ܘܟܝ̈ܢܐ ܣܿܓܝ ܕܒܒܪܝܼܬܐ. ܟܕ ܣܿܓܝܼ ܣܩܘܼܒ̈ܠܝܼܝܼܢ ܠܚܕܕ̈ܐ. ܡܛ݀ܠ ܕܚܕ ܗܼܘ ܡܪܐ ܘܝܨܘܼܦܐ ܘܡܕܒܪܢܐ ܘܡܠܟܐ ܚܝܠܬܢܐ ܘܕܚܝܼܠܐ ܠܐ ܣܟ ܐܬܡܨܝܘ ܠܡܣܓܦܘ. ܗܿܢܘ ܕܝܢ ܩܕܡܐܝܬ܆ ܐܣܛܘܼܟ̈ܣܐ ܐܒܗ̈ܐ ܘܡܩܝܼܡ̈ܢܘ̄ ܕܥ݀ܠܡܐ. ܕܣܿܓܝܼ ܣܩܘܼܒ̈ܠܝܼܝܼܢ ܠܚܕܕ̈ܐ ܒܟܝܿܢܗܘܢ ܘܡܒܥܒܕܢܘܼܬܗܘܢ. ܐܡܿܪ ܐܢܼܐ ܕܝܢ ܢܘܪܐ ܠܡ̈ܝܐ. ܘܪܘܼܚܐ ܠܥܦܪܐ. ܘܝܡܐ ܠܝܒܫܐ. ܥܡ ܣܓܝ̈ܐܬܐ ܕܡܼܢ ܗܿܠܝܢ ܐܣܛܘܼܟ̈ܣܐ. ܕܠܘ ܒܠܚܘܕ ܣܩܘܼܒܠܝܘܼܬܐ ܐܠܐ ܥܒܼܕܘ. ܐܠܐ ܡܐܠܠܘܢ ܡܠܚܡܘܼܬܐ ܘܡܛܣܘܼܬܐ ܘܫܦܝܼܪܘܼܬ ܩܘܼܝܡܐ. ܘܟܿܠܗܘܢ ܫܘܼܚܠ̈ܦܐ ܘܣܩܘܼܒ̈ܠܐ ܡܢܬܢ̈ܝܐ ܕܩܕܡܘ ܐܬܼܐܡܪܘ. ܕܥܠܝܗܘܢ ܘܡܛܠܬܗܘܢ ܦܠܝܓܐ ܗܘܼܬ݀ ܡܚܫܒܬܐ. ܕܕܠܡܐ ܠܘ ܚܕ ܗܼܘ ܡܪܐ. ܗܼܢܘܢ ܝܬܝܼܪܐܝܼܬ ܡܫܪܪܝܢ ܘܣܿܗܕܝܢ ܥܠ ܚܕܢܝܘܼܬܗ ܘܡܪܢܝܘܼܬܗ. ܒܗܿܝ ܕܣܩܘܒܠܝܘܼܬܗܘܢ ܢ݀ܡܘܿܣܐ ܡܩܝܼܡܢܐ ܘܐܡܝܼܢܐ ܐܝܼܬܘ̄. ܘܠܘ ܫܘܼܚܠܦܐ ܚܼܕܬܐ ܘܟܠܢܝܐ. ܘܟܝܿܢܐ ܗܿܐ ܢ݀ܛܪ ܠܟܿܠ ܡܕܡ ܫܦܝܼܪ ܡܛܟܣܐܝܼܬ ܘܕܠܐ ܒܘܼܠܒܠ. ܐܝܟ ܕܐܟܝܼܢܗ ܘܒܪܝܗܝ ܘܛܟܣܗ ܗܿܘ ܚܕ ܥ݀ܒܘܕܐ ܚܟܝܼܡܐ ܘܚܝܠܼܬܢܐ. ܡܕܝܢ ܠܝܬ ܠܡܬܦܠܓܘܼ ܬܘܼܒ ܥܠܗܕܐ. ܐܠܐ ܠܡܬܗܝܡܢܘܼ ܘܠܡܘܕܝܘܼ ܐܝܟ ܚܝܠܗ ܕܫܪܪܐ ܕܐܝܬܚܘܝܼ ܘܐܫܼܬܪܪ ܚܬܝܼܬܐܝܼܬ ܕܚܕ ܗܼܝ ܒܠܚܘܼܕܘܗܝ ܐܝܼܬܝܐ ܡܬܘܼ̱ܝܐ ܒܪܘܼܝܐ ܘܡܕܒܪܢܐ ܘܫܠܝܼܛ ܥܠ ܟܿܠ܀ ܬܘܼܒ ܕܝܢ ܐܡܿܪܝܢܢ ܐ̱ܚܪܬܐ ܕܝܬܝܪ ܚܝܠܼܬܢܝܐ. ܗܿܐ ܚܿܙܝܢܢ ܚܢܢ ܒܢܝ̈ܢܫܐ ܕܐܫܿܬܟܚܢܢ ܒܪ̈ܝܐ ܘܥܒܝܼܕ̈ܐ ܒܦܩܥܬܐ ܗܿܕܐ ܕܥ݀ܠܡܐ ܕܐܝܼܬ ܥܡܢ ܒܒܪܝܬܐ ܚܝ̈ܘܬܐ ܒܥܪ̈ܝܪܝܬܐ ܘܚܝܠ̈ܬܢܝܬܐ ܘܥܫܝܢ̈ܬ݀ ܒܚܝܠܐ. ܘܪ̈ܚܫܐ ܬܘܼܒ ܩܛܘܼ̈ܠܐ ܘܡܘܒ̈ܕܢܐ. ܡܢܘܼ ܟܝ ܟ݀ܠܐ ܠܗܿܠܝܢ ܡܼܢ ܕܠܡܚܒܠܘܼ ܘܠܡܘܒܕܘܼ. ܐܠܐ ܪܡܼܙܗ ܕܗܿܝ ܚܕ ܡܪܝܐ ܡܕܒܪܢܐ. ܡܢܘܼ ܗܿܐ ܡܫܥܒܕ ܠܝܡܐ ܬܩܝܼܦܐ ܒܓܠ̈ܠܘܗܝ ܡܬܼܥܪ̈ܡܢܐ ܘܡܚܫܘܼܠ̈ܘܗܝ ܫܓܝܼ̈ܫܐ. ܠܒܪܐܢܫܐ ܕܢܪܟܒ ܥܠ ܚܨܗ ܘܕܐ݀ܫ ܥܠ ܐܦ̈ܘܗܝ ܘܢܫܼܠܛ ܘܢܛܘܦ ܘܢܐܙܠ ܠܐܝܟܐ ܕܨܿܒܐ. ܡܢܘܼ ܗܿܐ ܢ݀ܛܪ ܠܗ ܡܼܢ ܬܢܝܼܢ̈ܐ ܕܚܝܼ̈ܠܐ ܘܩܝܼ̈ܛܐ ܪ̈ܘܪܒܐ ܘܥܫ̈ܝܼܢܐ. ܘܫܪܟܐ ܕܚܝ̈ܘܬܐ ܒܝܼܫ̈ܬܐ ܕܒܬܗܘܼܡܗ ܕܝܿܡܐ ܥܡܪ̈ܢ. ܡܢܘܼ ܕܗܿܐ ܡܫܝܢ ܠܝܒܫܐ ܒܣܘܓܐܐ ܕܣܘܓܦ̈ܢܘܗܝ 41 ܘܢ݀ܛܪ ܠܒܪܐܢܫܐ ܡܼܢ ܐܪ̈ܝܘܬܐ ܘܢܡܼܪ̈ܐ ܣܪ̈ܘܼܚܐ ܘܕܐܒ̈ܐ ܚܛܘܼ̈ܦܐ ܘܚܘ̈ܘܬܐ ܚܪ̈ܡܢܐ ܘܫܪܟܐ ܕܚܝ̈ܘܬܐ ܚܒ̈ܠܬܐ ܘܪ̈ܚܫܐ ܣܪ̈ܘܼܚܐ. ܡܢܘܼ ܢ݀ܛܪ ܘܡܪܚܦ ܫܒܪ̈ܐ ܡܼܢ ܣܘܓܦ̈ܢܐ ܣܓܝ̈ܐܐ ܕܚܕܪ̈ܝܗܘܢ ܘܒܝܢ̈ܬܗܘܢ. ܝܬܝܼܪܐܝܬ ܒܙܒܢ ܫܢܼܬܐ ܘܠܝ̈ܠܘܬܐ. ܟܕ ܫܿܪܝܢ ܒܢܝ̈ܢܫܐ ܒܛܘܼܪ̈ܦܐ ܘܚܩ̈ܠܬܐ ܘܕܡܝܼܟܝܢ ܐܝܟ ܡܝܼ̈ܬܐ ܡܼܢ ܫܦܼܠܐ. ܡܢܘܼ ܥܝܼܪܐ ܘܢ݀ܛܘܪܐ ܕܗܿܐ ܩܿܐܡ ܥܠ ܡܛܪܬܗܘܢ ܘܡܣܬܪ ܥܠܝܗܘܢ ܘܡܫܘܙܒ ܠܗܘܢ ܡܼܢ ܚܝ̈ܘܬܐ ܚܒ̈ܠܬܐ ܘܪ̈ܚܫܐ ܡ̈ܠܝܼܠܐ܆ ܝܬܝܪ ܡܼܢܢ ܡ̈ܠܝܼܠܐ ܗܿܐ ܡܫܡܫܝܢ ܘܥ݀ܒܕܝܢ ܨܒܝܿܢܐ ܘܦܘܼܩܕܢܐ ܕܡܪܐ ܥܙܝܼܙܐ. ܘܗܼܢܘܢ ܚܿܙܝܢ ܒܢ ܨܠܡܗ ܘܙ݀ܝܥܝܢ ܘܕ݀ܚܠܝܢ ܡܼܢ ܡܚܝܼܠܘܼܬܢ ܐܦ ܡܫܬܥܒܕܝܢ ܠܒܨܝܼܪܘܼܬ ܚܝܠܢ. ܡܢܘܼ ܟܒܫ ܩܕܡܝܢ ܠ̈ܦܝܼܠܐ ܥܫܝܼ̈ܢܐ. ܘܠܓܡ̈ܠܐ ܛܥܿܘܢ̈ܐ ܘܠܬܘܪ̈ܐ ܘܓܡܘܼܫ̈ܐ ܚܝܠܼ̈ܬܢܐ. ܘܠܣܘ̈ܣܘܬܐ ܩܠ̈ܝܼܠܐ ܥܡ ܫܪܟܐ ܕܐܚܪ̈ܢܐ. ܐܠܐ ܗܿܝ ܚܕ ܡܪܐ ܕܟܿܠܢ. ܕܚܿܙܝܢ ܒܢ ܨܠܡܗ ܘܕܚܿܠܝܢ ܡܼܢܢ ܘܡܫܼܬܥܒܕܝܢ ܩܕܡܝܢ. ܘܠܝܬ ܥܡܗ ܐ̱ܚܪܝܢ. ܘܠܐ ܡܨܝܐ ܕܢܗܼܝܐ ܥܡܗ ܫܘܬܦܐ ܐ̱ܚܪܢܐ ܒܡܠܟܘܼܬܗ܆ ܗܿܠܝܢ ܡܿܢ ܐܬܚܘܝܼܝܢ ܗܿܫܐ ܥܠܗܿܝ ܕܚܕ ܗܼܝ ܐܠܗܐ ܒܠܚܘܕܘܗܝ. ܟܕ ܐܝܼܬ ܝܬܝܼܪ ܣܿܓܝ̈ܐܬܐ ܐܚܪ̈ܢܝܬܐ ܕܡܚ̈ܘܝܢ ܘܡܫܪܪܢ ܕܚܕ ܗܼܘ ܒܠܚܘܼܕܘܗܝ ܐܠܗܐ ܝܿܕܥܝܢܢ ܡܢ ܫܡܝܿܐ ܘܡܼܢ ܐܐܪ ܘܣܕܝܼܪܘܼܬ ܥܢ̈ܢܐ ܘܛܟܼܣ̈ܐ ܕܡܼܛܪ̈ܐ ܘܕܪ̈ܣܝܼܣܐ. ܘܚܫܝܼܠܘܼܬ ܒܪܕܐ ܘܚܒܝܼܛܘܼܬ ܙܪ̈ܝܼܒܬܐ ܬܐܕܢ̈ܝܬܐ ܘܬܫܪ̈ܝܬܐ. ܘܩ̈ܠܐ ܥܫܝܼ̈ܢܐ ܕܪ̈ܥܡܐ ܘܦܩ̈ܥܐ ܕܚܝܼ̈ܠܐ ܕܒܪ̈ܩܐ. ܥܡ ܣܿܓܝ̈ܐܬܐ ܐ̱ܚܪ̈ܢܝܬܐ. ܗܿܠܝܢ ܕܥܕܟܝܠ ܡܬܚܘ̈ܝܢ ܒܩܦ̈ܠܐܐ ܕܩܕܡܝܢ ܥܡ ܡܪܝܐ ܕܡܗܕܐ ܘܡܚܟܡ. ܟܿܠ ܫܪܒܐ ܒܕܘܼܟܬܗ ܘܐܝܟܐ ܕܠܚܡ ܠܗ. ܐܢܕܝܢ ܘܐܢܫ ܡܼܢ ܐܝܠܝܢ ܕܠܐ ܐܬܕܪܫܘ ܒܝܕ̈ܥܬܐ ܕܡܚܟ̈ܡܢ ܘܡܗܕܝ̈ܢ ܥܠ ܚܬܝܼܬܘܼܬܗ ܕܫܪܪܐ܆ ܕܡܬܼܦܠܓ ܥܕܟܝܠ ܥܠ ܚܕܢܝܘܼܬܗ ܕܡܪܐ. ܘܐ݀ܡܪ ܕܐܢ ܚܕ ܗܼܝ ܡܪܐ ܘܒܿܪܘܝܐ ܘܫܠܝܼܛܐ ܘܡܦܪܢܣܢܐ. ܘܗܿܢܐ ܛܒܿܐ ܗܿܝ ܒܟܝܿܢܗ ܘܥܿܒܕ ܛܒ̈ܬܐ. ܘܟܿܠ ܕܒܼܪܐ ܘܥܒܼܕ ܛܒܿ ܘܫܦܝܝܪ. ܡܼܢ ܐܝܡܟܐ ܡܿܕܝܢ ܗܿܠܝܢ ܒܝܼܫ̈ܬܐ ܘܣܢ̈ܝܬܐ ܕܐܝܬ ܘܫܟܝܼܚ̈ܢ ܒܥ݀ܠܡܐ. ܥܡ ܐ̱ܚܪ̈ܢܝܬܐ ܕܡܼܬܬܝܬܝ̈ܢ ܘܗܿܘ̈ܝܢ. ܡܢܘ ܥܒܼܕ ܗܿܠܝܢ ܕܐܝܼܬ. ܘܡܢܘܼ ܡܥܒܕ ܘܡܝܬܐ ܗܿܝܢ ܕܗܘܝ̈ܢ ܟܕ ܗܿܘ ܚܕ ܛܒܿ ܗܼܘ ܘܥ݀ܒܕ ܛܒ̈ܬܐ. ܡܢܘ ܒܼܪܐ ܘܥܒܼܕ ܐܪ̈ܝܘܬܐ ܐܟܘ̈ܠܐ ܘܢܡܪ̈ܐ ܣܪ̈ܘܼܚܐ ܘܕܐܒ̈ܐ ܚܛܘܼܦ̈ܐ. ܘܐܡܬܝ ܕܦܩܪܝܢ ܝܬܝܪ ܡܘܒܕ̈ܢܐ ܘܡܚܒ̈ܠܢܐ ܗܿܘܝܢ. ܡܢܘܼ ܥܒܼܕ ܕܐܒ̈ܐ ܡܚܒ̈ܠܢܝܬܐ ܘܝܕ̈ܒܐ ܐܟܠ̈ܬ݀ ܐܢܫ̈ܐ. ܘܬܥ̈ܠܐ ܫ̈ܝܼܛܐ 42 ܥܡ ܫܪܟܐ ܕܚܝ̈ܘܬܐ ܡܚܒܠ̈ܢܝܬܐ ܕܒܢܝ̈ܢܫܐ ܘܒܥܝܼܪ̈ܐ ܘܩܢܝܘܼܬܐ. ܡܼܢ ܐܝܟܐ ܬܢܝܼ̈ܢܐ ܕܚܝܼ̈ܠܐ. ܘܚܘ̈ܘܬܐ ܚܪ̈ܡܢܐ ܘܓܪ̈ܣܐ ܘܐܟܕ̈ܢܐ ܘܥܩܼܪ̈ܒܐ. ܥܡ ܫܪܟܐ ܕܪ̈ܚܐ ܐܫܕ̈ܝ ܡܼܬܐ. ܡܢܘܼ ܡܕܫܪ ܩܡܨܐ ܘܙܚܿܠܐ ܘܡܢܝܢܐ ܕܗܼܘ ܩܪܝܬܐ ܘܡܫܘܛܐ ܥܡ ܫܪܟܐ ܕܡܚܒ̈ܠܝ ܥܠ̈ܠܬܐ. ܘܡܘܒܕ̈ܝ ܣܒܪܐ ܕܚܝ̈ܐ ܕܒܢܝ̈ܢܫܐ. ܡܢܘܼ ܚܒܛ ܒܪܕܐ ܘܡܘܒܕ ܒܓܠܝܼܕܐ ܘܚܿܢܩ ܒܛܘܦ̈ܢܐ ܘܛܡܿܪ ܒܪ̈ܥܠܐ ܘܙܘ̈ܥܐ. ܘܦܿܬܚ ܐܪܥܐ ܘܒܿܠܥܐ ܣܓܝ̈ܐܐ. ܡܢܘܼ ܡܘܩܕ ܒܒܪ̈ܩܐ ܘܡܣܝܼܩ ܒܦܩ̈ܥܐ ܘܚܿܢܩ ܒܠ̈ܗܓܐ ܒܝܼ̈ܫܐ ܘܩܝܛܝ̈ܐ ܘܡܣܝܛ ܒܚܘܼܡܐ ܘܡܨܪܦ ܘܡܡܝܼܬ ܒܬܠܓܐ ܘܩܘܼܪܐ. ܡܢܘܼ ܡܥܝܼܪ ܩܪ̈ܒܐ ܘܩܐܪ̈ܣܐ. ܘܪܡܿܐ ܚܪ̈ܒܐ ܘܫܓܘܼܫ̈ܝܐ. ܘܡܩܛܪ ܗ̱ܪ̈ܬܐ ܘܬܟܬܘܼܫ̈ܐ. ܘܡܥܒܕ ܩܛ̈ܠܐ ܘܡܘ̈ܬܢܐ ܓܢܝܼܚ̈ܐ. ܘܥܒܕ ܫܒ̈ܝܐ ܘܓܝܣ̈ܐ ܪ̈ܕܘܦܐ. ܘܡܚܪܒ ܡܕܝܼܢ̈ܬܐ ܘܥܩܪ ܟܪ̈ܟܐ ܟܗܝܼ̈ܢܐ ܥܡ ܣܿܓܝܼ ܓܢܝܼܚ̈ܬܐ ܕܐܝܟ ܗܿܠܝܢ ܡܫܝܼܡ̈ܢܝܬܐ ܘܒܝܼܫ̈ܬܐ ܡܓܡܪ̈ܢܝܬܐ. ܟܕ ܚܕ ܗܼܘ ܫܠܝܼܛܐ ܘܡܕܒܪܢܐ. ܘܗܿܢܐ ܡܪܚܡܢܐ ܗܿܘ ܛܒܿܐ ܘܚܝܘܼܣܬܢܐ. ܡܿܢ ܕܒܟܝܿܢܐ ܛܒܿܐ ܗܿܘ. ܘܒܬܪܥܝܼܬܐ ܡܪܚܡܢܐ ܗܿܘ. ܘܒܡܘܗ̈ܒܬܐ ܛܒ̈ܬܐ ܫܦܝܼܥܐ ܗܿܘ. ܐܝܟܢ ܥ݀ܒܕ ܗܿܠܝܢ ܓܢܝܼܚ̈ܬܐ ܪܘܪ̈ܒܬܐ ܘܒܝܼܫ̈ܬܐ ܕܡܬܝܒ̈ܠܢ ܠܚܒܠܐ ܣܿܓܝܐܐ ܘܠܥܘܠܐ ܘܪܘܼܫܥܐ ܘܠܐ ܢܿܡܘܣ̈ܝܘܬܐ ܐܝܟ ܕܡܥܕ ܗܘܼܐ ܡܼܢ ܩܪ̈ܒܐ ܘܬܟܬܘܼܫ̈ܐ ܘܫܒܼܝܐ ܕܛܠ̈ܝܐ ܘܫܒܪ̈ܐ ܘܢܫ̈ܐ ܘܒܬܘ̈ܠܬܐ. ܘܥܒܕܘܼ̄ ܡܪܝܼܪܬܐ ܕܒܢ̈ܝ ܚܐܪ̈ܐ ܘܚܐܪ̈ܬܐ. ܘܥܩܘܼܪܝܐ ܕܒܬܝ̈ܗܘܢ ܘܐܒܕܢܐ ܕܐܬܪ̈ܘܬܗܘܢ. ܡܢܘܼ ܬܘܼܒ ܡܝܬܐ ܥܠ ܦܓܪ̈ܐ ܕܒܢܝ̈ܢܫܐ ܗܿܠܝܢ ܚܘܼܒ̈ܠܐ ܣܓܝ̈ܐܐ ܘܣܘܼܪ̈ܚܢܐ. ܐ݀ܡܪ ܐܢܼܐ ܕܝܢ܆ ܟܐܒ̈ܐ ܥܣܩ̈ܐ ܘܟܘܪ̈ܗܢܐ ܠܐ ܡܼܬܐܣܝ̈ܢܐ. ܕܐܝܟ ܦܩܪܘܼܬܐ ܘܫܢܝܘܼܬܐ ܘܡܬܬܥܒܕܢܘܼܬܐ ܒܝܼܫܬܐ. ܘܡܥܝܼܣܘܼܬܐ. ܘܐܪܝܼܢܘܬܐ. ܘܚܙܙܝܬܐ. ܘܒܪܨܘܼܬܐ. ܘܓܪܒܐ. ܘܒܗܿܩܝܬܐ ܘܡܫܪܝܘܼܬܐ. ܘܟܦܝܼܦܘܼܬܐ. ܘܚܓܝܼܣܘܼܬܐ. ܘܦܫܝܼܓܘܼܬܐ. ܘܣܡܝܘܼܬܐ. ܘܕܘܓܘܬܐ. ܘܚܪܫܘܼܬܐ ܐܘܟܝܬ ܦܐܩܘܼܬܐ. ܘܠܥܓܘܼܬܐ. ܥܡ ܣܿܓܝܼ ܟܐܒ̈ܐ ܡܫܝܼܡ̈ܢܐ ܘܠܐ ܡܬܼܐܣܝ̈ܢܐ. ܕܣܿܓܝܼ ܦܩܚ ܗܘܼܐ ܡܘܬܐ ܕܚܕ ܥܕܢ ܘܓܗܝܬܐ ܕܡܢܼܗܘܢ ܘܠܐ ܫܘܼܢܩ̈ܐ ܐܡܝܼܢ̈ܐ ܘܡܘܬܐ ܕܟܿܝܘܼܡ ܒܗܿܝܢ ܚܝ̈ܐ ܡܠ̈ܝܝ ܛܘܼܪ̈ܦܐ ܘܫܼܢ̈ܕܐ ܡܪܝܪ̈ܐ ܥܡ ܣܓܝ̈ܐܬܐ ܕܐܝܟ ܗܿܠܝܢ ܕܡܪܬܚܫܒܐ ܘܡܝܬܝܐ ܬܪܥܝܼܬܐ ܡܬܦܠܓܢܝܼܬܐ. ܕܕܠܡܐ ܠܘ ܚܕ ܗܼܘ ܒܪܘܼܝܐ ܘܡܕܒܪܢܐ ܕܗܿܠܝܢ ܫܘܼܚܠ̈ܦܐ ܣܓܝ̈ܐܐ. ܐܠܐ ܐܟܡܐ ܕܗܿܘ ܛܒܿܐ ܒܼܪܐ ܘܥܒܼܕ ܛܒ̈ܬܐ ܘܡܥܕܪ̈ܢܝܬܐ. ܗܿܟܢ ܐܝܼܬ ܘܐܚܪܢܐ ܒܝܼܫܐ ܕܒܪܐ ܘܥܒܼܕ ܗܿܠܝܢ ܒܝܼܫ̈ܬܐ ܡܣܓܦܢ̈ܝܬܐ. ܐܟܡܐ ܕܐܝܼܬ ܢܘܼܗܪܐ ܘܚܫܘܼܟܐ ܒܒܪܝܼܬܐ. ܐܘܿ ܕܠܡܐ ܬܘܼܒ ܣܿܓܝܼ 43 ܡܪ̈ܘܬܐ. ܘܟܿܠ ܚܕ ܒܪܐ ܘܥܒܼܕ ܡܕܡ ܡܕܡ. ܘܗܿܐ ܡܕܒܪ ܘܡܦܪܢܣ ܠܗ ܐܝܟ ܟܝܿܢܗ ܘܐܝܟ ܨܒܝܿܢܗ. ܕܠܘܬ݀ ܡܚܫܒ̈ܬܐ ܦܠ̈ܝܓܬܐ ܕܐܝܟ ܗܿܠܝܢ ܐܡܿܪܝܢܢ ܘܡܫܪܪܝܢܢ ܦܠܝܓܘܬܗܝܢ. ܘܡܐܣܝܢܢ ܟܪܝܗܘܬܗܝܢ. ܘܡܚܝܠܝܼܢܢ ܡܚܝܼܠܘܼܬܗܝܢ ܒܚܝܠܗ ܘܥܘܕܪܢܗ ܘܡܚܝܠܢܘܼܬܗ ܕܫܪܪܐ ܢܗܝܼܪܐ. ܘܡܢܗܪ ܟܿܠ ܕܨ݀ܒܐ ܕܢܗܠܟ ܒܢܘܼܗܪܗ. ܥܠ ܗܿܝ ܩܕܡܢܢ ܚܘܝܼܢܢ ܡܼܢ ܠܥܠ ܒܩܦ̈ܠܐܐ ܕܥܒܼܪܘ܆ ܚܬܝܼܬܘܼܬܗ ܘܐܝܼܬܘܼܬܗ ܘܟܝܿܢܗ ܘܩܢܘܼܡܗ ܕܫܪܪܐ ܒܬܚ̈ܘܼܝܬܐ ܣܓܝ̈ܐܬܐ. ܘܕܓܠܘܼܬܗܿ ܕܕܓܠܘܼܬܐ ܘܠܐ ܐܝܼܬܘܼܬܗܿ ܘܕܠܝܬ ܠܗܿ ܟܝܿܢܐ ܘܠܐ ܝܬܐ ܘܠܐ ܩܢܘܼܡ̈ܐ. ܐܠܐ ܐܝܼܬܝܗܿ ܡܕܡ ܕܠܐ ܐܝܼܬܘܗܝ. ܐܦܠܐ ܚܫܘܼܟܐ ܐܝܼܬܘ̄ ܡܕܡ ܐܠܐ ܓܠܝܼܙܘܼܬܐ ܕܢܘܼܗܪܐ ܘܛܠܼܠܐ ܕܓܘܼܫܡܐ. ܗܟܘܬ݀ ܐܦܠܐ ܒܝܼܫܬܐ ܐܝܼܬ ܒܟܝܿܢܐ ܘܠܐ ܐܝܼܬܝܗܿ. ܘܠܐ ܐܝܼܬ ܠܗܿ ܟܝܿܢܐ ܘܠܐ ܩܢܘܼܡܐ ܘܠܐ ܝܬܐ. ܐܠܐ ܒܠܚܘܼܕ ܗܿܘܝܐ ܓܠܝܼܙܘܼܬܐ ܕܡܼܢ ܛܒܿܬܐ. ܘܠܘ ܗܼܝ ܗܿܘܝܐ ܡܢܗܿ ܘܒܗܿ. ܐܝܟܢ ܡܼܨܝܐ ܕܬܗܼܝܐ ܗܼܝ ܟܕ ܠܝܬ ܠܗܿ ܐܝܼܬܘܼܬܐ ܘܠܐ ܟܝܿܢܐ ܘܠܐ ܩܢܘܼܡܐ. ܐܠܐ ܬܪܥܝܼܬܐ ܐܘܟܝܼܬ ܨܒܝܿܢܐ. ܘܙܘ̈ܥܐ ܕܚܐܪܘܼܬܐ ܡܝܬܝܢ ܠܗܿ ܠܗܘܿܝܐ ܐܡܬܝ ܕܡܬܓܠܙܝܢ ܡܼܢ ܛܒܿܬܐ. ܘܐܡܼܬܝ ܕܐܫܼܬܪܪܢܢ ܕܠܝܬ ܒܝܼܫܬܐ ܒܟܝܿܢܐ ܘܒܐܝܼܬܘܼܬܐ. ܐܝܟܢ ܡܼܨܝܐ ܠܢ ܕܢܿܐܡܪ ܥܠ ܡܕܡ ܕܒܝܼܫܐ ܗܿܘ ܒܟܝܿܢܗ. ܡܿܕܝܢ ܗܿܠܝܢ ܟܿܠܗܝܢ ܕܐܬܼܐܡܪ̈ܝ ܡܼܢ ܡܚܫܒ̈ܬܐ ܦ̈ܠܝܼܓܬܐ. ܘܠܘ ܒܝܼܫ̈ܬܐ ܐܢ̈ܝܢ ܡܣܓܦܢ̈ܝܬܐ. ܐܠܐ ܛܒ̈ܬܐ ܡܥܕܪ̈ܢܝܬܐ. ܘܗܼܢܝܢ ܗܿܠܝܢ ܝܬܝܼܪܐܝܬ ܘܚܬܝܼܬܐܝܼܬ ܡܚܘ̈ܝܢ ܘܡܫܪܪ̈ܢ ܠܢ ܕܚܕ ܗ̱ܘܼ ܡܪܐ ܘܒܪܘܼܝܐ ܘܡܕܒܪܢܐ ܕܝܼܠܢ ܘܕܝܠܗܝܢ. ܘܡܬܐܡܪ̈ܢ. ܐܠܐ ܡܪ̈ܕܘܬܐ ܡܟܘܢ̈ܢܝܬܐ ܘܡܬܪ̈ܨܢܝܬܐ ܕܕܘܒܪܐ ܕܚܝ̈ܝܢ ܕܟܕ ܢܿܕܚܠ ܡܼܢ ܕܐܝܟ ܗܿܠܝܢ ܢܬܕܒܪ ܬܩܢܿܐܝܼܬ ܘܢܫܦܪ ܠܡܪܢ ܐܝܟ ܨܒܝܿܢܗ. ܘܗܕܐ ܬܩܢܘܼܬ ܕܘܒܪ̈ܐ ܘܫܦܘܼܪܝܐ ܕܠܨܒܝܿܢܗ. ܠܘ ܠܗ ܡܘܬܪܐ. ܒܗܿܝ ܕܠܘ ܣܢܝܼܩܐ ܐܝܼܬܘ̄ ܘܠܐ ܚܣܝܼܪܐ. ܐܠܐ ܠܢ ܕܝܼܠܢ ܣܿܓܝܼ ܡܘܬܪܐ ܘܡܥܕܪܐ. ܕܚܐܝܼܢܢ ܒܫܝܢܐ ܘܒܫܠܡܐ ܕܥܡ ܚܕ̈ܕܐ. ܘܢܛܝܼܪܘ̄ ܘܫܦܝܼܪܘܬ ܩܘܝܡܐ ܘܢܝܿܚܬܐ ܘܒܗܝܼܠܘܼܬܐ. ܘܗܿܠܝܢ ܡܙܡܢܢ ܠܢ ܛܒ̈ܬܐ ܕܠܐ ܫܘܼܠܡ. ܘܢܝܚܬܐ ܕܠܥܿܠܡ ܘܚܝ̈ܐ ܕܠܐ ܥ݀ܒܪܝܢ. ܐܝܟ ܕܥܬܝܼܕܝܢܢ ܕܢܚܘܐ ܒܝܕ ܡܪܝܐ ܕܨ݀ܒܐ ܘܡܗܕܐ ܘܡܚܟܡ. ܡܕܝܢ ܡܪ̈ܕܘܬܐ ܐܒܗܝ̈ܬܐ ܘܟܘܘ̈ܢܐ ܡܚܟ̈ܡܢܐ ܠܐ ܡܬܼܐܡܪ̈ܢ ܒܝܼܫ̈ܬܐ. ܐܠܐ ܡܐܠܠܘܢ ܛܒ̈ܬܐ. ܒܗܿܝ ܕܛܒ̈ܬܐ ܡܥܒܕ̈ܢ ܘܡܝ̈ܬܝܢ. ܒܝܼܫܬܐ ܕܝܢ ܣܟ ܠܝܬ ܒܟܝܿܢܐ ܘܠܐ ܐܝܬܝܗܿ. ܐܠܐ ܚܐܪܘܬܐ ܝܿܠܕܐ ܠܗܿ. ܐܡܬܝ ܕܒܝܼܫܐܝܼܬ ܡܬܚܫܚܐ ܒܗܿ. 44 ܡܿܢ ܕܩ݀ܛܠ ܘܡܿܚܐ ܠܐ̱ܢܫ܆ ܒܝܼܫܬܐ ܥ݀ܒܕ ܒܨܒܝܿܢܗ. ܡܿܢ ܕܩ݀ܛܠ ܘܡܿܚܐ ܒܢܿܡܘܿܣܐ ܐܝܟ ܕܬܚܡܬ ܠ̈ܣܝܡܝ ܢܿܡܘܿܣܐ. ܛܒܿܬܐ ܣܿܥܪ ܒܟܿܠܗܿ ܓܘܐ. ܥܡ ܣܓܝ̈ܐܬܐ ܕܐܝܟ ܗܿܠܝܢ ܕܐܝܬ ܥܠܝܗܝܢ ܡܠܼܬܐ ܘܒܘܼܚܢܐ ܣܿܓܝܐܐ. ܘܠܟܿܠ ܐ̱ܢܫ ܝܼܕܝܼܥ̈ܢ. ܝܬܝܼܪܐܝܼܬ ܠܡܕܪ̈ܫܝ ܒܥܿܠܡܐ ܘܫܡ̈ܥܝ ܢܿܡܘ̈ܣܐ. ܘܗܿܢܐ ܥ݀ܠܡܐ ܒܝܬ ܡܪܕܘܬܐ ܐܘܟܝܬ ܒܝܬ ܝܘܠܦܢܐ ܐܝܼܬܘ̄ ܐܝܟ ܐܣܟܘܠܐ ܕܛܠ̈ܝܐ. ܕܠܡܐ ܡܛ݀ܠ ܗܘܼܦܟܐ ܘܡܼܬܟܪܟܢܘܼܬܐ ܕܒܐܣܟܘܠܝ ܡܬܼܪܕܐ ܐܟܡܿܢ ܕܒܗܿ ܢܩܘܐ ܠܥܠܡ܆ ܠܐ. ܐܠܐ ܕܢܐܠܦ ܬܡܿܢ ܚܟܡܬܐ ܘܝܼܕܥܬܐ ܕܐܝܟܢ ܢܼܬܗܦܟ ܒܥ݀ܠܡܐ ܘܗܿܦܟ ܠܒܝܬ ܐܒ̈ܗܘܗܝ ܘܝ݀ܪܬ ܠܗܘܢ ܘܡܩܘܐ ܒܝܪܬܘܼܬܗ. ܡܿܕܝܢ ܥ݀ܠܡܐ ܐܚܪܢܐ ܐܝܼܬ ܠܐܠܗܐ. ܘܗܿܘ ܐܝܼܬܘ̄ ܝܪܬܘܬܢ ܥܠܡܝܼܢܝܬܐ. ܗܘܼܝܘܼ ܕܪܕܐ ܘܡܟܘܢ ܠܢ ܒܡܪ̈ܕܘܬܐ ܗܿܠܝܢ ܟܿܠܗܝܢ ܕܐܡܝܪ̈ܢ ܐܟܡܿܢ ܕܢܿܕܚܠ ܘܠܐ ܢܿܚܛܐ. ܐܠܐ ܢܥܒܼܕ ܛܒ̈ܬܐ ܒܗܢ ܥ݀ܠܡܐ ܕܥܿܒܪ ܘܢܐܪܬ ܛܒ̈ܬܗ ܕܗܿܘ ܥ݀ܠܡܐ ܕܠܐ ܥ݀ܒܪ. ܘܐܠܘ ܗܿܠܝܢ ܡܪ̈ܕܘܬܐ ܘܥܣܩ̈ܬܐ ܘܕܚܝܼܠ̈ܬܐ. ܡܐܠܠܘܢ ܡܚܒܠ̈ܢܝܬܐ ܘܡܘܒܕܢܝ̈ܬܐ܆ ܡܪ̈ܝܐ ܘܒܪ̈ܘܼܝܐ ܛܒ̈ܐ. ܘܣܩܘܼܒ̈ܠܐ ܡܓܡܪ̈ܢܐ ܘܡܘܒܕ̈ܢܐ ܕܚܕܕ̈ܐ ܐܝܼܬܝܗܘܢ. ܘܡܒܛܠ̈ܢܐ ܘܥ݀ܛܘܼܝ̈ܐ ܘܠܘ ܡܩܝܼܡ̈ܢܐ ܘܡܢܛܪ̈ܢܐ ܘܡܕܒܪ̈ܢܐ. ܐܟܙܢܐ ܕܢܘܼܗܪܐ ܘܚܫܘܼܟܐ. ܚܘܠܡܢܐ ܘܟܘܪܗܢܐ. ܫܝܢܐ ܘܚܪܒܐ. ܘܣܿܓܝ̈ܐܬܐ ܕܐܝܟ ܗܿܠܝܢ. ܘܐܠܘ ܡܪ̈ܝܐ ܣܿܓܝ̈ܐܐ ܐܝܼܬ ܗܘܼܐ ܠܥܿܠܡܐ. ܒܣܩܘܼܒܠܝܘܼܬܗܘܢ ܕܠܘܬ݀ ܚܕܕ̈ܐ ܡܘܒܕ ܗܘܼܐ ܠܗܘܢ ܚܕܕ̈ܐ ܗ̄ ܚܝܠ̈ܬܢܐ ܠܡܚܝܼܠܐ. ܐܘܿ ܟܿܠܗܘܢ ܡܬܓܡܪ ܗܘܼܐ ܠܗܘܢ. ܡܼܢ ܣܩܘܼܒܠܝܘܼܬܐ ܕܒܝܢܬܗܘܢ. ܐܘܿ ܡܚ̈ܝܼܠܐ ܕܒܗܘܢ. ܘܗܿܐ ܚܿܙܝܢܢ ܘܢܣܝܼܢܢ ܒܗܿܠܝܢ ܟܿܠܗܘܿܢ ܐ̈ܠܦܐ ܕܫܢܝ̈ܐ. ܕܠܐ ܒܛܠ ܡܼܢ ܥ݀ܠܡܐ ܡܕܡ. ܐܠܐ ܟܿܠܗܝܢ ܒܪ̈ܝܬܐ ܟܿܠܚܕܐ ܒܟܝܿܢܗܿ ܢܛܝܼܪܐ ܘܐܝܟ ܛܟܼܣܗܿ. ܘܠܐ ܐܬܼܒܠܒܠ ܡܕܡ ܡܼܢ ܡܛܟܣܘܼܬܐ ܕܫܡܿܝܐ ܘܕܐܪܥܐ. ܘܟܪܘܼܟܝܐ ܕܙܒ̈ܢܐ. ܘܟܝܢ̈ܝܬܐ ܟܿܠܗܝܢ ܕܡܼܢ ܐܣܛܘܼܟ̈ܣܐ. ܡܿܕܝܢ ܚܕ ܗܼܘ ܒܠܚܘܼܕܘܗܝ ܡܪܐ ܘܥܒܘܼܕܐ ܘܡܕܒܪܢܐ. ܘܐܟܙܢܐ ܬܘܼܒ ܕܡܠ̈ܟܘܬܐ ܕܒܥ݀ܠܡܐ ܗܿܢܐ. ܐܦܢ ܐܝܼܬ ܗܘܼܐ ܒܗܝܢ ܥܫܝܼܢ̈ܬܐ ܘܣܿܓܝܼ ܚܝܠ̈ܬܢܝܬܐ. ܐܠܐ ܡܛܠ ܣܩܘܼܒܠܝܘܼܬܐ ܕܓܕܫܬ݀ ܘܓܕܫܐ ܐܡܝܼܢܐܝܬ ܒܝܢܬܗܝܢ. ܣܓܝ̈ܐܬܐ ܡܼܢܗܝܢ ܓܡܪ ܠܚܕܕ̈ܐ ܘܐܘܒܕܘ ܘܥܩܼܪܘ ܘܥܼܛܘ ܡܼܢ ܐܪܥܐ ܕܘܼܟܪܢܗܝܢ. ܗܟܘܬ݀ ܐܠܘܼ ܣܿܓܝܼ ܐ̈ܠܗܐ ܘܡܪ̈ܝܐ ܐܝܼܬ ܗܘܼܐ. ܘܗܿܠܝܢ ܠܘ ܡܓܢ ܟܬܼܒܢܢ. ܛܒܿ ܝܕܿܥܝܢܢ ܕܟܿܠܗܘܢ ܥܡܼ̈ܡܐ ܕܐܝܼܬ ܒܐܪܥܐ ܚܕ ܐܠܗܐ ܡܘܕܝܢ 45 ܡܪܐ ܘܥ݀ܒܘܕܐ ܘܡܕܒܪܢܐ. ܐܠܐ ܒܪܡ ܡܥܕܝܢ ܚܘܼܫܒ̈ܢܐ ܒܝܼܫ̈ܐ ܘܡܬܚܫܒܝܢ ܘܡܓܕܦܝܢ ܘܡܬܼܗܓܓܝܢ ܕܕܠܡܐ ܐܝܼܬ ܡܪ̈ܝܐ ܘܡܕܒܪ̈ܢܐ ܣܛܪ ܡܼܢ ܚܕ. ܐܟܡܿܢ ܕܡܼܢ ܗܕܐ ܢܼܬܪܦܘܢ. ܘܬܡܠܟܼܝ ܥܠܝܗܘܢ ܕܓܠܘܼܬܐ ܘܚܛܝܼܬܐ ܘܢܐܒܕܘܢ ܡܼܢ ܢܘܼܗܪܗ ܕܫܪܪܐ. ܘܢܐܙܠܘܢ ܚܫܘܼܟܐ ܕܠܥܿܠܡ. ܘܬܘܼܒ ܐܝܬ ܐ̱ܚܪ̈ܢܐ ܕܒܠܐ ܝܕܥܬܗ ܕܫܪܪܐ ܫܿܛܪܝܢ. ܘܐܟܡܿܢ ܕܡܥܠܝܢ ܠܗ ܠܐܠܗܐ ܛܒܿܐ. ܡܘܪܒܝܢ ܠܗ ܘܐ݀ܡܪܝܢ܆ ܚܣ ܠܗ ܠܐܠܗܐ ܛܒܿܐ ܘܡܪܚܢܐ ܘܡܢܗܪܢܐ. ܕܢܒܼܪܐ ܐܘܿ ܢܥܒܼܕ ܕܐܝܟ ܗܿܠܝܢ. ܘܐܝܟܢ ܡܝܬܐ ܘܪܕܐ ܒܗܿܠܝܢ ܡܚ̈ܘܬܐ ܡܫܝܼܡܢ̈ܝܬܐ. ܟܕ ܠܐ ܝܿܕܥܝܢ ܕܒܗܿܠܝܢ ܚܘܼܫ̈ܒܐ ܣܢ̈ܝܐ ܘܬܪ̈ܥܝܬܐ ܡܣܠ̈ܝܬܐ ܗܿܐ ܟܿܦܪܝܢ ܒܫܪܪܐ ܘܡܙܥܪܝܢ ܚܝܠܗ ܕܐܠܗܐ. ܘܠܐ ܝܿܕܥܝܢ ܠܡܦܼܪܫ ܫܪܪܐ ܡܼܢ ܕܓܠܘܼܬܐ. ܘܒܝܼܫ̈ܬܐ ܡܼܢ ܛܒ̈ܬܐ. ܠܝܬ ܣܟ ܒܝܼܫܬܐ ܒܟܝܿܢܐ. ܐܠܐ ܗܿܝ ܕܡܬܼܥܒܕܐ ܒܨܒܝܿܢܐ ܕܚܐܪܘܼܬܗ ܕܒܪܢܫܐ. ܐܦܠܐ ܡܥܒܕܢܘ̄ ܐ̱ܚܪܬܐ ܐܝܬ ܕܒܩܛܝܼܪܐ ܙܟܿܝܐ ܘܥ݀ܫܡܐ ܠܚܐܪܘܼܬܗ ܕܒܪܢܫܐ ܠܡܥܼܒܕ ܒܝܼܫܬܐ. ܓܘܪ̈ܓܐ ܕܝܢ ܐܝܬ ܘܡܣܒܪ̈ܢܬܐ ܒܚܘܼܫ̈ܒܐ ܡܼܢ ܡܥܒܕܢܘ̄ ܒܝܼܫܬܐ ܕܠܘ ܒܟܝܿܢܗܿ ܘܒܪܝܼܬܗܿ ܒܝܼܫܐ ܗܘܼܬ݀ ܡܼܢ ܩܕܝܼܡ. ܣܘܼܥܪܢܐ ܕܝܢ ܕܒܝܼܫܬܐ ܕܚܐܪܘܬܐ ܐܝܼܬܘ̄. ܒܠܚܘܼܕ ܒܙܘܥܐ ܕܨܒܝܿܢܐ ܒܝܬܝܐ ܘܠܘ ܒܩܛܝܼܪܐ. ܡܕܝܢ ܠܝܬ ܣܟ ܒܝܼܫܬܐ ܒܟܝܿܢܐ ܠܐ ܡܕܡ ܒܝܼܫܐ. ܐܠܐ ܟܿܠ ܡܕܡ ܡܛܠ ܛܒܿܬܐ ܘܥܘܼܕܪܢܐ ܗܘܼܐ ܘܗܿܘܐ. ܘܚܕ ܗܼܘ ܐܠܗܐ ܒܿܪܘܝܐ ܘܥ݀ܒܘܕܐ ܘܡܕܒܪܢܐ ܕܟܿܠ. ܡܪܐ ܕܟܿܠ ܘܡܨܐ ܟܿܠ. ܘܡܦܪܢܣ ܟܠ ܒܚܟܡܬܐ ܪܒܬܐ ܕܒܛܝܼܠܘܼܬܗ ܕܥܠ ܟܿܠ ܘܝܨܝܼܦܘܼܬܗ ܕܥܠ ܟܿܠ. ܕܠܗ ܡܫܒܚܝܼܢܢ ܘܡܒܪܟܝܢܢ ܘܡܘܪܒܝܼܢܢ ܒܗ. ܡܘܕܝܢܢ ܘܡܗܝܡܢܝܢܢ. ܘܡܬܓܘܣܝܼܢܢ. ܘܥܠܘܗܝ ܬܟܝܼܠܝܢܢ ܘܡܣܒܪܝܢܢ. ܘܡܣܟܝܢܢ. ܘܐܡܿܪܝܢܢ ܡܼܢ ܟܿܠܗ ܚܝܠܢ. ܘܡܼܢ ܟܠܗ ܢܦܫܢ܆ ܒܟܠܗ ܫܪܪܢ ܘܝܕܥܬܢ ܘܬܘܕܝܬܢ. ܕܚܕ ܗܼܝ ܐܝܼܬܝܐ ܡܬܘܼ̱ܝܐ ܘܥܠܡܝܼܢܝܐ. ܕܠܐ ܫܘܪܝ ܘܠܐ ܡܫܠܡ. ܐܠܐ ܐܝܬܘ̄ ܐܡܝܢܐܝܬ. ܚܕ ܐܠܗܐ. ܚܕ ܡܪܐ. ܚܕ ܒܪܘܝܐ. ܚܕ ܥܒܘܕܐ. ܚܕ ܡܠܟܐ. ܚܕ ܫܠܝܼܛܐ. ܚܕ ܐܚܝܼܕܐ. ܚܕ ܡܢܛܪܢܐ. ܚܕ ܡܕܒܪܢܐ. ܚܕ ܡܦܪܢܣܢܐ. ܚܕ ܟܝܿܢܐ ܠܐ ܡܬܕܪܟܢܐ. ܚܕܐ ܐܘܣܝܐ ܠܐ ܡܬܦܫܩܢܝܬܐ. ܚܕܐ ܐܝܬܘܬܐ ܡܬܘܼܡܝܬܐ. ܘܥܠܡܝܼܢܝܬܐ ܕܠܗ ܫܘ̄ ܘܬܘܕܝܬܐ ܘܣܓܕܬܐ ܡܼܢ ܟܿܠܗܘܢ ܥܡܼܡ̈ܐ ܘܛܘܼܗ̈ܡܐ ܘܫܪ̈ܒܬܐ ܘܡܼܢ ܟܿܠܗܘܿܢ ܟܝ̈ܢܐ ܡܠ̈ܝܼܠܐ ܘܠܐ ܡ̈ܠܝܼܠܐ. [ܡܢܦ̈ܫܐ] ܘܠܐ ܡܢܦ̈ܫܐ. ܘܕܡܬܚ̈ܙܝܢ ܘܕܠܐ 46 ܡܬܚ̈ܙܝܢ ܐܝܡܢܐ ܘܒܟܿܠ ܕܪ̈ܝ ܥ̈ܠܡܐ ܠܥܿܠܡܥܠܡܝܢ ܐܡܝܢ. ܘܒܗܿܠܝܢ ܫܠܡ ܩܦܠܐܘܢ ܕܚܡܫܐ ܒܝܕ ܐܠܗܐ ܕܡܚܟܡ. Chapter 6 ܬܘܼܒ ܥܡ ܐܠܗܐ ܕܡܗܕܐ ܩܦܠܐܘܢ ܕܫܬܐ. ܥܠܗܿܝ ܕܟܡܐ ܩܢܘܼ̈ܡܐ ܘܕܝܼܠܝ̈ܬܐ ܐܝܬܘܗܝ ܐܠܗܐ. ܗܘܢܐ ܪܒܐ ܘܚܟܡܬܐ ܐܝܼܬܝܼܝܼܬܐ ܘܚܝܐ ܘܡܚܝܢܐ. ܘܝܿܗܒ ܚܝ̈ܐ ܠܟܿܠܗܘܢ ܡܫܘܬܦ̈ܝ ܒܚ̈ܝܐ ܡܬܼܝܕܥ̈ܢܐ ܘܡܬܪ̈ܓܫܢܐ. ܐܢܬ ܗܼܝ ܒܠܚܘܼܕܝܟ ܗܘܢܐ ܡܪܢܝܐ. ܒܿܪܐ ܟܿܠ ܗܘܢ̈ܝܢ. ܐܢܬ ܗܼܘ ܚܟܡܼܬܐ ܪܒܬܐ ܡܪܬ݀ ܟܿܠ ܚܟܼ̈ܡܢ. ܘܡܚܟܡܬ݀ ܟܿܠ ܚܟܝܼܡ̈ܐ ܡܠ̈ܝܼܠܐ. ܓܫܝܼܡ̈ܐ ܘܠܐ ܓܫܝܼܡ̈ܐ. ܐܢܬ ܗܼܘ ܚܝܐ ܘܡܚܝܢܐ ܡܒܘܼܥ ܟܿܠ ܚ̈ܝܐ. ܘܝܿܗܒ ܚ̈ܝܐ ܠܟܿܠ ܡܫܘܬܦ̈ܝ ܒܚܝ̈ܐ. ܠܟ ܡܫܒܚܝܼܢܢ ܠܟ ܡܒܪܟܝܼܢܢ ܠܟ ܡܘܪܒܝܼܢܢ. ܡܼܢܟ ܒܿܥܝܢܢ ܟܕ ܣܿܓܕܝܼܢܢ. ܡܢ ܫܐܠܝܼܢܢ ܟܕ ܡܘܕܝܢܢ. ܠܟ ܡܦܝܼܣܝܼܢܢ ܘܡܼܬܟܫܦܝܼܢܢ ܟܕ ܒܪܟܝܢܢ ܩܕܡ ܡܪܘܼܬܟ. ܬܘܼܒ ܡܡܪܚܝܼܢܢ ܟܕ ܠܐ ܫܿܘܝܢܢ ܕܢܬܼܩܪܒ ܠܘܬ݀ ܠܐ ܡܬܼܩܪܒܢܘܼܬܟ. ܬܘܼܒ ܣܿܠܩܝܢܢ ܠܡܥܩܒܘܼ ܠܠܐ ܡܬܼܥܩܒܢܘܼܬܟ. ܬܘܼܒ ܡܚܨܦܝܼܢܢ ܠܡܕܪܟܘܼ ܠܠܐ ܡܬܕܪܟܢܘܼܬܟ ܒܗܝܡܢܘܼܬ ܡܪܝ ܡܬܩܪܒܝܼܢܢ. ܒܣܒܪܐ ܪܒܐ ܡܥܩܒܝܼܢܢ. ܒܚܘܼܒܐ ܝ݀ܩܘܕܐ ܡܬܼܓܘܙܠܝܼܢܢ ܒܢܘܼܪܐ ܕܪܚܡܼܬܟ ܗܿܡܣܝܢܢ. ܕܢܕܪܟ ܠܗܿܘ ܡܐ ܕܨ݀ܒܝܐ ܟܣܝܘܼܬܐ ܕܬܚܘܐ ܠܚܫܘܼܒܘܼܬܢ. ܘܡܢܼܚ ܠܓܢܝܼܙܘܬܟ ܠܡܚܘܝܘܼ ܠܣܡܝܘܬܢ. ܘܫܿܦܪ ܠܨܒܝܿܢܟ ܠܡܚܟܡܘܼ ܠܗܕܝܘܼܛܘܼܬܢܿ ܠܘ ܐܝܟ ܕܐܝܬܝܟ ܒܟܝܿܢܟ. ܡܛܠ ܕܠܐ ܡܼܨܝܐ ܗܿܕܐ ܕܬܬܝܼܕܥܝ ܠܒܪ̈ܝܐ ܘܥܒܝܼܕ̈ܐ. ܐܠܐ ܐܝܟ ܕܡܼܨܝܐ ܝܼܕܥܬܢ ܝܗܝܼܒܬ݀ ܡܼܢ ܚܟܡܼܬܟ ܕܬܕܪܟܝ ܘܬܣܬܟܠܝ ܗܿܘ ܡܕܡ ܕܡܫܪܪ ܠܒܝܢ ܒܗܝܡܢܘܼ̄ ܬܪܝܼܨܬܐ ܕܒܟ. ܘܬܘܕܝܬܐ ܫܪܝܼܪܬܐ ܘܡܘܕܝܢܘܬܐ ܡܪܐܢܝܼܬܐ. ܗܘܢܐ ܙܥܘܪܐ ܕܒܼܪܐ ܗܘܢܟ ܪܒܐ ܘܠܐ ܡܣܼܬܟܝܢܐ ܗܿܐ ܡܡܪܚ ܕܢܕܥܟ ܘܕܢܫܒܚܟ. ܝܕܥܬܐ ܡܠܝܼܠܬܐ ܕܝܗܼܒܬ݀ ܠܢ ܚܟܼܡܬܟ ܪܒܬܐ ܘܠܐ ܡܬܼܡܫܚܢܝܼܬܐ. ܗܿܐ ܗܡܣܐ ܕܬܬܚܟܡܿܝ ܒܟ ܘܬܪܡܪܡܟ. ܚܝܘܼܬܐ ܕܒܢ ܘܢܫܡܬܢ ܡܬܬܙܝܼܥܬ݀ ܡܼܢ ܚܝܘܼܬܟ ܐܘ̃ ܝ݀ܗܒ ܚܝ̈ܐ ܠܟܿܠ. ܗܿܐ ܣܿܥܝܐ ܠܡܐܚܐ ܒܟ ܪܘܚܢܐܝܬ ܘܠܡܡܼܬܩ ܚ̈ܝܐ ܡܼܢ ܐܝܼܬܘܼܬܟ. ܗܼܒܠܢ ܐܘ̃ ܫܦܝܼܥ ܒܡܘܗܒ̈ܬܐ. ܐܥܬܪ ܠܢ ܐܘ̃ ܥܬܝܼܪ ܒܫܘܼܟ̈ܢܐ. ܡܠܐ ܣܘܼܢܩܢ ܚܣܝܼܪܘܼܬܢ. ܐܘ̃ ܒܝܬ ܓܘܣܐ ܡܠܝܐ ܡܥܬܪ ܟܿܠ ܣܘܼܢܩܢ. ܘܡܩܘܐ ܒܠܐ ܚܣܝܼܪܘܼܬܐ. ܒܪܝܼܟ ܐܢܬ ܡܪܝ ܘܣܓܝܼܕ ܐܝܼܩܪܟ. ܬܘܕܝ ܠܡܪܘܬܟ. ܡܼܢ ܟܿܠܢ ܒܪ̈ܝܐ ܘܥܒ̈ܝܼܕܐ ܕܒܪܬ݀ ܐܠܗܘܼܬܟ ܐܡܝܼܢܐܝܬ ܘܒܟܿܠ ܙܒܢ ܘܠܥ̈ܠܡܝ ܥܠ̈ܡܐ ܐܡܝܢ܀ ܗܫܐ ܕܝܢ ܕܝܼܕܥܢܢ ܘܐܫܼܬܪܪܢܢ ܟܿܠܢ ܚܒ̈ܝܼܒܝ. 47 ܡܼܢ ܢܦܫܢ ܘܟܝܿܢܢ ܘܦܪܘܫܘܬ݀ ܝܼܕܥܬܢ. ܘܡܼܢ ܟܝܢ ܥܿܠܡܐ ܗܿܢܐ ܕܒܗ ܐܬܒܪܝܼܢܢ. ܕܫܪܝܪܐܝܬ ܡܪܐ ܘܒܪܘܝܐ ܘܥܿܒܘܕܐ ܐܝܬ ܠܢ ܘܠܟܿܠܗܿ ܒܪܝܼܬܐ. ܘܕܚܕ ܗܼܘ ܒܠܚܘܼܕܘܗܝ ܐܫܼܬܘܕܥܢܢ. ܬܘܼܒ ܙ݀ܕܩ ܠܢ ܐܝܟ ܟܝܿܢܐ ܕܡܠܝܼܠܘܬܐ ܕܐܝܼܬ ܒܢ. ܕܢܥܩܒ ܘܢܒܚܢ ܒܬܪܥܝܼܬܢ ܘܢܬܚܫܒ ܒܗܘܢܐ ܗܿܢܐ ܡܩܒܠܢܐ ܕܝܼܕܥܬܐ ܕܐܬܝܼܩܒ ܠܢ ܐܝܠܝܢ ܕܡܨܝܐ ܝܼܕܥܬܢ ܘܡܪܕ ܗܘܢܐ ܕܒܢ ܕܢܿܣܬܟܠ ܥܠ ܒܪܘܝܢ. ܡܐܠܠܘܢ ܐܝܠܝܢ ܕܗܼܘ ܡܪܢ ܘܥ݀ܒܘܕܢ ܝܗܼܒ ܘܝ݀ܗܒ ܠܢ. ܘܝ݀ܕܥ ܕܣܿܦܩܝܼܢܢ ܘܡܕܪܟ ܗܘܢܐ ܕܒܼܪܐ ܒܢ. ܘܫܿܦܪ ܠܨܒܝܿܢܗ ܘܡܥܕܪ ܠܟܝܿܢܢ. ܬܘܼܒ ܗܟܝܼܠ ܡܼܬܚܫܒ ܗܘܢܐ ܡܕܡ ܟܣܝܐ ܘܡܠܝܼܠܐ ܘܩܛܝܼܢܐ ܕܐܝܬ ܒܢ. ܘܡܼܬܥܠܐ ܘܡܬܼܩܛܢ ܐܝܟ ܟܝܿܢܗ ܕܠܐ ܣܟ ܫ݀ܠܐ ܐܘܿ ܢ݀ܐܚ ܡܼܢ ܡܣܩ̈ܬܐ ܘܪܘܡܪ̈ܡܐ ܕܠܥܠ. ܟܡܐ ܕܡܬܝܼܗܒ ܠܗ. ܡܐܠܠܘܢ ܘܠܦܘܼܬ ܕܘܼܟܝܿܗ ܕܡܼܢ ܚܫ̈ܐ ܘܗܘܼܦ̈ܟܐ ܥܠ̈ܡܢܝܐ. ܕܐܪܐ ܟܝ ܡܢܐ ܡܕܡ ܐܝܬܘܗܝ ܥܒܘܼܕܐ ܕܝܼܠܢ. ܕܐܝܬܘܗܝ ܘܕܚܕ ܗܼܘ ܐܫܼܬܪܪܢܢ. ܐܠܐ ܟܝ ܚܝ̈ܐ ܐܝܼܬܘ̄. ܡܠܝܼܠܐ ܐܝܼܬܘ̄. ܗܘܢܐ ܐܝܼܬܘ̄. ܡܢܐ ܟܝ ܐܝܼܬܘ̄. ܐܦܢ ܐܝܼܬܝܐ ܡܬܘܼܡܝܐ ܕܠܐ ܫܘܼܪܝ ܘܕܠܐ ܣܟ ܫܘܼܠܡ ܐܝܼܬܘ̄. ܐܦܠܐ ܡܬܕܪܟܐ ܐܝܼܬܘܼܬܗ. ܘܠܐ ܡܣܼܬܝܟܐ ܪܒܘܼܬܗ. ܘܠܐ ܡܬܥܩܒ ܟܝܿܢܗ. ܘܠܐ ܡܬܼܒܨܝܐ ܡܕܒܪܢܘܼܬܗ. ܐܦܠܐ ܡܬܬܡܝܼܫܝܢ ܕܝܢ̈ܘܗܝ. ܘܠܐ ܡܬܝܕ̈ܥܢ ܐܘܼܪ̈ܚܬܗ. ܐܠܐ ܕܡܿܢܐ ܡܕܡ ܟܝ ܐܝܼܬܘ̄ ܐܠܗܢ ܙ݀ܕܩ ܠܢ ܕܢܿܕܥ. ܐܝܠܝܢ ܕܗܼܘ ܨ݀ܒܐ ܕܢܘܕܥ ܠܢ. ܡܛܠ ܕܐܢܗܘܼ ܠܐ ܝ݀ܗܒ ܠܢ ܡܕܥܐ ܘܣܘܼܟܠܐ ܕܥܠ ܡܪܘܼܬܗ ܐܝܟ ܕܫܿܦܪ ܠܗ. ܠܢ ܡܚܝܼ̈ܠܐ ܘܚܫܘܼ̈ܟܐ ܠܐ ܣܟ ܡܼܨܝܐ ܠܢ ܕܢ݀ܚܘܪ ܒܚܘܼܫܒ ܡܕܥܢ ܠܘܬ݀ ܪܘܡܐ ܡܥܠܝܐ ܕܠܐ ܡܬܕܪܟܢܘܼܬܗ ܘܐܠܐ ܓܿܗܪܝܢܢ ܘܥܡܛ ܢܘܼܗܪܐ ܕܡܕܥܢ ܡܪܚܐ. ܐܟܙܢܐ ܕܓܿܗܪܢ ܥܝ̈ܢܐ ܕܚܙܬ݀ ܦܓܪܐ ܠܡܚܪ ܡܬܼܒܩܝܢܐܝܼܬ ܒܐܣܦܝܼܪܗ ܕܫܡܼܫܐ ܗܿܢܐ ܡܼܬܚܙܝܢܐ. ܘܠܐܝܟܐ ܐܝܼܬ ܠܢ ܕܢܣܩ ܘܢܬܥܠܐ ܒܗܘܢܢ. ܕܗܿܐ ܠܐ ܡܬܕܪܟܐ ܡܥܠܝܘܼܬܗ. ܘܐܝܟܢ ܐܝܼܬ ܠܢ ܕܢܿܬܚܫܒ ܥܠܘܗܝ ܘܕܡܬܗܪ ܠܟܿܠ ܗܘ̈ܢܝܢ ܫܪܒܗ. ܘܐܝܟܐ ܐܝܼܬ ܠܢ ܕܢܩܪܐ ܘܢܫܼܡܥ ܡܛ݀ܠܬܗ. ܕܗܿܐ ܟܿܠܗܘܿܢ ܣܦܪ̈ܐ ܘܟܬܒ̈ܐ ܘܡܐܡܪ̈ܐ ܘܡ̈ܠܐ ܠܐ ܣܿܦܩܝܢ ܕܢܡܠܠܘܢ ܫܪܒܗ. ܡܕܝܢ ܬܘܼܒ ܠܘܬ݀ ܐܒܐ ܩܫܝܼܫܐ ܡܠܦܢܐ ܕܝܼܠܢ ܢܗܦܘܟ ܗ̄ ܠܘܬ݀ ܟܝܿܢܐ ܕܐܝܬܝܼ ܟܿܠܢ ܠܗܘܿܝܐ. ܗܿܢܘ ܡܠܦܢܐ ܚܟܝܼܡܐ ܕܠܝܬ ܣܟ ܠܡܼܬܦܠܓܘܼ ܥܠ ܡܠܦܢܘܼܬܗ ܠܟܿܠܗܘܢ ܥܡܼ̈ܡܐ ܘܠܫ̈ܢܐ ܘܛܘܼܗ̈ܡܐ ܘܫܪ̈ܒܬܐ. ܘܟܕ ܐܬܿܒܩܝܼܢܢ ܩܕܡܐܝܼܬ ܚܢܢ ܒܢ. ܘܚܼܙܝܢܢ ܘܐܪܓܫܢܢ ܒܗܿܢܐ ܗܘܢܐ ܠܐ ܡܬܼܡܫܚܢܐ ܕܒܢ. ܕܐܝܟܢ ܓܿܢܐܼ ܘܝܬܝܼܒ ܐܝܟ ܡܠܟܐ ܪܒܐ ܒܪܝܫܢ. 48 ܘܦܩܕ ܒܐܬܪ̈ܘܬܐ. ܘܡܿܛܐ ܠܣܘܦ̈ܐ ܘܚܿܙܐ ܪ̈ܘܡܐ ܘܥܘܼܡ̈ܩܐ ܒܝܕ ܚܘܼܫܒܐ ܡܠܝܼܠܐ ܘܟܝܿܢܐ ܕܝܼܠܗ. ܘܒܝܕ ܚܝܘܼܬܐ ܕܡܬܬܙܝܼܥܐ ܒܗ ܒܝܕ ܪܘܼܚܐ ܚܝܬܐ ܕܒܗܿ. ܚܿܐܪ ܒܡܚܙܝܼܬܐ ܪܒܬܐ ܘܫܦܝܼܥܬܐ ܕܝܼܠܗ ܕܟܝܿܢܐ. ܘܚܿܙܐ ܒܗܿ ܠܨܠܡܐ ܕܒܪܘܼܝܗ ܗܿܘ ܕܒܛܝܒܘܼܬܗ ܘܒܡܪܚܡܢܘܼܬܗ ܒܼܝܗܝ ܒܨܠܡܐ ܕܪܒܘܼܬܗ. ܘܡܼܬܚܫܒ ܘܐܡܿܪ ܒܪܥܝܿܢܗ. ܕܐܢ ܐܢܿܐ ܒܪܝܐ ܘܥܒܝܼܕܐ ܗܿܢܐ ܗܘܢܐ ܪܒܐ ܘܫܒܝܼܚܐ ܐܝܬ ܠܝ. ܡܿܕܝܢ ܒܿܪܘܝܐ ܐܝܟܢ ܗܿܘ ܬܗܘܼܡܐ ܠܐ ܡܬܬܓܝܼܫܢܐ ܕܗܘܢܗ. ܗܘܢܐ ܪܒܐ ܘܠܐ ܡܬܕܪܟܢܐ ܘܒܡܘܼܥܐ ܕܟܿܠ ܗܘܿܢܝܢ. ܗܼܘ ܐܘܠܕ ܘܥܒܼܕ ܟܿܠ ܗܘ̈ܢܝܢ. ܟܕ ܗܼܘ ܡܼܢ ܐ̱ܚܪܝܢ ܗܘܢܐ ܐܠܐ ܐܬܝܼܠܕ ܘܐܬܥܒܕ. ܡܕܝܢ ܗܘܢܐ ܪܒܐ ܘܐܒܐ ܕܟܿܠ ܗܘ̈ܢܝܢ ܕܪ̈ܘܼܚܢܐ ܘܕܦܓܪ̈ܢܐ ܐܝܼܬܘ̄ ܡܪܐ ܘܒܪܘܝܐ ܐܠܗܐ ܕܟܿܠܢ. ܬܘܼܒ ܕܝܢ ܡܼܬܚܫܒ ܒܪܢܫܐ ܘܐܡܪ ܒܪܥܝܿܢܗ. ܕܐܢ ܐܢܿܐ ܒܪܝܐ ܘܥܒܝܼܕܐ ܗܿܢܐ ܚܘܼܫܒܐ ܕܬܗܼܪܐ ܐܘܟܝܼܬ ܡܠܼܬܐ ܡܠܝܼܠܬܐ ܝܿܠܕ ܗܘܢܝ ܒܠܒܝ. ܘܐܡܝܼܢܐܝܼܬ ܐܝܼܬܝܗܿ ܒܝ ܡܢܗ ܕܐܒܐ ܪܒܐ ܗܘܢܐ ܡܒܘܼܥܐ ܘܝ݀ܠܘܕܐ ܕܟܿܠ ܡܠܼܬܐ ܘܚܘܼܫܒܐ. ܡܕܝܢ ܡܪܝ ܘܐܠܗܝ ܕܝܗܼܒ ܠܝ ܗܕܐ ܡܠܝܼܠܘܼܬܐ ܚܟܝܼܡܬܐ ܘܡܚܫܒܬܐ ܝܕܘܼܥܬܢܝܼܬܐ ܕܡܘܠܕ ܐܡܝܼܢܐܝܬ ܗܘܢܝ. ܟܡܐ ܟܝ ܚܟܝܼܡܐ ܡܠܼܬܗ ܘܪܒܐ ܡܚܫܒܬܗ. ܘܐܢ ܐܢܿܐ ܒܪܝܐ ܘܥܒܝܼܕܐ ܕܝܼܠܗ ܕܡܠܼܬܐ ܚܟܝܼܡܬ݀ ܒܟܿܠ. ܠܐ ܡܬܼܥܪܝܐ ܘܠܐ ܡܣܬܝܟܐ ܡܠܬܝ ܐܡܼܬܝ ܕܬܬܙܝܥ ܒܪܘܼܚܝ. ܐܝܟܢ ܡܕܡ ܡܠܬ݀ ܗܘܢܗ ܕܡܪܝ ܐܘܟܝܼܬ ܡܚܫܒܬܗ ܡܬܬܙܝܼܥܬ݀ ܒܪܘܼܚܗ ܡܬܕܪܟܐ ܐܘܿ ܡܣܼܬܝܟܐ ܡܼܢ ܡܠܼܬܐ ܕܝܼܠܢ ܒܢܝ̈ܢܫܐ. ܒܿܬܪ ܩܠܝܼܠ ܡܚܘܝܢܢ. ܡܕܡ ܡܠܼܬܐ ܝܕܘܥܬܢܝܬܐ ܚܟܝܼܡܬ݀ ܒܟܿܠ ܐܘܟܝܬ ܡܚܫܒܬܐ ܪܒܬܐ ܐܝܬ ܠܗ ܠܗܘܢܐ ܐܒܗܝܐ ܕܡܪܝ ܘܐܠܗܝ. ܘܬܘܼܒ ܡܬܼܢܐ ܘܡܼܬܚܫܒ ܒܪܢܫܐ ܒܬܪܥܝܬܗ. ܘܐܡܿܪ. ܕܐܢ ܐܢܿܐ ܒܪܝܐ ܘܥܒܝܼܕܐ ܚܝ ܐܢܼܐ ܒܪܘܼܚܝ ܘܒܦܓܪܝ. ܘܡܼܬܬܙܝܼܥ ܐܢܼܐ ܒܬܪ̈ܬܝܗܝܢ. ܗܿܢܘ ܕܝܢ ܒܚܝܘܼܬܗ ܕܦܓܪܝ ܘܒܚܘܼܫ̈ܒܐ ܘܙܘ̈ܥܐ ܕܪܘܼܚܝ. ܘܐܝܼܬ ܒܝ ܗܿܕܐ ܚܝܘܼܬܐ ܐܘܟܝܼܬ ܪܘܼܚܐ ܡܐܚܝܢܝܼܬܐ ܕܝܼܠܝ. ܡܿܕܝܢ ܪܘܚܗ ܕܡܪܝ. ܟܡܐ ܪܒܐ ܘܫܒܝܼܚܐ ܚܝܘܼܬܗ ܝܿܗܒܬ݀ ܚܝ̈ܐ ܠܟܿܠ ܡܫܘ̈ܬܦܝ ܒܚ̈ܝܐ ܡܼܬܝܕܥ̈ܢܐ ܘܡܬܪ̈ܓܫܢܐ. ܡܠ̈ܝܼܠܐ ܘܠܐ ܡܠ̈ܝܼܠܐ. ܡܕܝܢ ܫܪܝܼܪܐܝܼܬ ܚܝܬܐ ܘܡܐܚܝܢܝܼܬܐ ܘܝ݀ܗܒܬ݀ ܚ̈ܝܐ ܐܝܼܬܝܗܿ ܪܘܼܚܗ ܩܕܝܼܫܬܐ ܘܡܫܒܚܬܐ ܕܡܪܝ. ܘܡܼܢ ܗܿܠܝܢ ܚܘܼܫ̈ܒܐ ܟܝܢ̈ܝܐ ܘܫܪ̈ܝܪܐ ܐܫܬܪܪܢܢ ܡܿܢ ܕܚܝܐ ܗܿܝ ܡܪܢ. ܘܗܘܢܐ ܪܒܐ ܐܝܼܬ ܠܗ ܡܒܘܥܐ ܕܟܠ ܗܘ̈ܢܝܢ. ܘܐܒܐ 49 ܕܡܠܼܬܐ ܘܡܚܫܒܬܐ ܚܟܝܼܡܬܐ ܕܒܗܿ ܒܼܪܐ ܘܥܒܼܕ ܟܿܠ ܒܪ̈ܝܢ. ܘܪܘܼܚܐ ܚܝܬܐ ܐܝܼܬ ܒܗ. ܕܒܗܿ ܡܬܬܙܝܼܥ ܡܼܢ ܝ݀ܬܗ. ܘܡܙܝܼܥ ܟܿܠ ܕܡܬܬܙܝܼܥ. ܗܿܠܝܢ ܬܠܬܐ ܫܪ̈ܒܐ ܫܟܝܼܚܝܼܢ ܘܐܝܬܝܗܘܢ ܐܘܣܝܐܝܬ ܘܡܬܘܡܐܝܬ ܒܐܠܗܢ. ܗ̄ ܗܘܢܐ ܘܡܠܼܬܐ ܐܘܟܝܼܬ ܡܚܫܒܬܐ ܘܪܘܼܚܐ ܚܝܬܐ ܘܡܐܚܝܢܝܼܬܐ. ܕܡܼܢܗ ܕܟܝܿܢܢ ܕܒܪܝܗܝ ܒܨܠܡܗ ܝܼܠܦܢܢ ܗܿܠܝܢ ܚܬܝܼܬܐܝܼܬ. ܘܠܝܬ ܠܡܼܬܦܠܓܘܼ ܥܠ ܗܿܠܝܢ. ܘܗܘܢܐ ܝܿܠܘܕܐ ܐܝܼܬܘܗܝ ܕܡܚܫܒܬܐ ܐܡܝܼܢܐܝܬ. ܘܒܗܿܝ ܕܚܝ ܒܡܥܒܕܢܘܼܬܐ ܕܚܝܘܼܬܗ ܐܘܟܝܼܬ ܪܘܚܗ ܚܝܬܐ. ܣܿܥܪܐ ܡܚܫܒܬܗ. ܘܒܪܝܐ ܘܥ݀ܒܕܐ ܟܿܠ ܕܨ݀ܒܝܐ. ܘܐܝܟܢܐ ܕܚܢܢ ܐܝܼܬ ܠܢ ܗܘܢܐ ܕܡܘܠܕ ܡܚܫܒܬܐ ܐܘܟܝܼܬ ܡܠܼܬܐ ܐܡܝܼܢܐܝܬ ܒܠܒܢ. ܘܟܣܝܐ ܒܢ ܟܿܠܗܿ. ܘܠܐ ܝܕܝܼܥܐ ܠܐܚܪܝܢ. ܘܐܡܼܬܝ ܕܨܿܒܝܢܢ ܒܝܕ ܚܝܘܬܐ ܕܒܢ ܐܘܟܝܬ ܒܪܘܼܚܢ ܕܗܝܼ ܢܫܡܬܢ. ܡܦܩܝܼܢܢ ܠܗ ܠܓܫܝܼܡܘܼܬܐ ܒܝܕ ܩܠܐ ܕܡܼܢ ܦܓܪܢ ܘܡܼܬܝܕܥܐ ܠܟܿܠ ܐ̱ܢܫ. ܗܟܘܬ ܘܡܪܢ. ܐܘܠܕ ܗܘܢܗ ܡܚܫܒܬܐ ܟܝܿܢܐܝܼܬ ܐܘܟܝܼܬ ܡܠܼܬܐ. ܘܐܦܠܐ ܡܚܫܒܬܐ ܐܝܼܬ ܐܝܟܐ ܕܠܝܬ ܗܘܢܐ. ܘܐܝܟܐ ܕܐܝܼܬ ܗܘܢܐ ܘܡܚܫܒܬܐ ܚܝ̈ܐ ܐܝܼܬ. ܡܛܠ ܕܕܠܐ ܚܝܘܼܬܐ ܠܐ ܡܼܨܝܐ ܕܢܗܼܘܐ ܗܘܢܐ ܘܡܚܫܒܬܐ. ܐܠܐ ܒܗܿܝ ܕܗܘܢܐ ܐܝܬܘܗܝ ܥܠܼܬܐ ܘܡܒܘܥܐ. ܠܗ ܙ݀ܕܩ ܘܡܬܬܚܝܼܒ ܫܡܐ ܕܐܒܗܘܼܬܐ. ܒܗܿܝ ܕܗܼܘ ܐܝܼܬܘܗܝ ܐܒܐ ܡܪܐܢܝܐ. ܘܡܢܐ ܐܝܼܬܘ̄ ܡܪܐܢܝܐ. ܗ̄ ܕܠܝܬ ܠܗ ܬܘܼܒ ܐܟܘܬܗ ܕܕܡܿܐ ܠܗ ܕܢܬܼܩܪܐ ܒܫܡܐ ܗܿܢܐ ܡܫܒܚܐ ܕܐܒܗܘܬܐ. ܒܗܿܝ ܕܐܡܝܼܢܐܝܼܬ ܐܝܬܘܗܝ ܐܒܐ. ܡܛܠ ܕܠܐ ܐܝܼܬܘ̄ ܝܠܕܐ ܕܐܚܪܝܢ ܗܘܢܐ. ܕܐܝܼܬܘ̄ ܗܘܼܐ ܒܪܝܐ ܐܘܟܝܼܬ ܝܠܕܐ ܕܐܚܪܝܢ. ܘܗܿܝܕܝܢ ܗܘܼܐ ܐܒܐ ܕܐܚܪܝܢ. ܐܠܐ ܐܒܐ ܐܡܝܼܢܐܝܬ ܗܼܘ ܗܘܢܐ ܕܡܠܼܬܐ ܐܘܟܝܼܬ ܡܚܫܒܬܐ ܝܕܘܼܥܬܢܝܼܬܐ. ܘܡܛ݀ܠܗܕܐ ܘ݀ܠܝܐܝܬ ܘܫܪܝܼܪܐܝܼܬ ܐܝܬܘ̄ ܐܒܐ ܡܪܐܢܝܐ ܕܠܝܬ ܐ̱ܚܪܝܢ ܐܒܐ ܕܕܡܿܐ ܠܗ. ܘܡܢܗ ܐܫܬܡܗܬ݀ ܟܿܠ ܐܒܗܘܬܐ ܕܒܫܡܿܝܐ ܘܒܐܪܥܐ. ܒܪܡ ܟܿܠ ܐܒܐ ܐܘܿ ܪܫܐ ܕܐܚܪܝܢ ܕܗܘܼܐ ܗܼܘ ܝܠܕܐ ܘܡܫܥܒܕܐ ܠܐܚܪܝܢ ܐܝܟ ܛܟܣܼܣܐ ܟܕ ܐܬܩܫܫ܆ ܗܘܼܐ ܐܒܐ ܘܪܝܫܐ ܠܐܚܪ̈ܝܐ. ܕܡܢܗ ܘܡܼܢ ܒܬܪܗ. ܗܿܘ ܠܐ ܡܬܼܐܡܪ ܐܒܐ ܡܪܐܢܝܐ. ܡܕܝܢ ܐܬܝܼܕܥܬ݀ ܘܐܫܼܬܪܪܬ݀ ܕܚܕ ܗܼܘ ܐܒܐ ܡܪܐܢܝܐ ܕܡܢܗ ܐܫܼܬܡܗܬ݀ ܟܿܠ ܐܒܗܘܬܐ. ܘܗܿܢܐ ܐܝܼܬܘܗܝ ܗܘܢܐ ܪܒܐ ܕܐܠܗܘܬܐ. ܘܥܠܬܐ ܪܝܫܬܐ ܕܟܠ ܥ̈ܠܠܼܢ܀ ܡܠܼܬܗ ܕܝܢ ܕܗܘܢܐ ܐܘܟܝܼܬ ܡܚܫܒܬܗ ܡܬܐܡܪ ܝܠܕܗ. ܡܛܠ ܕܡܠܼܬܐ ܡܼܢ ܗܘܢܐ ܝܠܝܼܕܐ ܠܘ ܚܕܬܐܝܬ ܘܒܬܪܟܢ. ܐܠܐ ܥܡܗ ܐܝܼܬܝܗܿ ܡܠܼܬܗ ܐܝܼܬܝܐܝܼܬ ܘܡܬܘܼܡܐܝܼܬ ܘܥܿܠܡܝܼܢܐܝܼܬ. ܘܠܐ ܣܟ ܡܼܣܬܝܟܐ ܐܘܿ ܡܼܬܕܪܟܐ. ܘܐܝܼܬܝܗܿ ܨܠܡܗ ܘܝܘܩܢܗ ܘܨܡܚܗ ܕܗܘܢܐ ܡܬܘܼܡܝܐ. ܒܪ ܟܝܿܢܗ ܘܡܼܢ ܐܘܣܝܐ ܕܝܠܗ ܠܐ ܡܬܼܦܠܓܢܐܝܼܬ ܘܠܐ 50 ܣܟ ܡܣܼܬܕܩܢܐܝܬ ܫܘܝܬ݀ ܒܫܘ̄ ܘܐܝܼܬܘܼܬܐ ܘܚܝܠܐ. ܗܿܢܐ ܐܬܼܩܪܝ ܘܐܝܼܬܘ̄ ܝܠܕܗ ܕܐܒܐ ܐܘܟܝܬ ܒܪܐ ܝܼܚܝܼܕܝܐ ܘܡܪܢܝܐ ܕܐܒܐ ܠܚܘܼܕܝܐ ܘܡܪܢܝܐ. ܒܗ݀ܝ ܕܠܝܬ ܝܠܕܐ ܐܚܪܢܐ ܕܕܡܿܐ ܠܗ. ܘܠܝܬ ܠܗܘܢܐ ܐܒܐ܆ ܡܠܼܬܐ ܐ̱ܚܪܬܐ ܐܠܐ ܐܢ ܗܼܘ ܒܠܚܘܼܕܘܗܝ. ܡܛ݀ܠ ܕܠܐ ܡܼܨܝܐ ܕܢܗܼܘܘܢ ܠܐܠܗܐ ܬܪ̈ܬܝܢ ܡ̈ܠܐ. ܐܘܿ ܬܪ̈ܬܝܢ ܡܚܫܒ̈ܬܐܬܐ. ܐܦܠܐ ܠܡܠܐܟܐ ܐܢܿ ܠܒܪ ܐܢܫܐ. ܡܿܕܝܢ ܚܕ ܗܼܝ ܡܠܼܬܐ ܕܐܠܗܐ. ܘܐܝܼܬܘ̄ ܐܝܼܬܝܝܐ ܘܡܬܘܼܡܝܐ. ܘܫܿܘܐ ܠܗ ܠܐܒܐ ܒܫܘܼ̄ ܘܒܐܝܼܩܪܐ. ܡܛ݀ܠ ܕܠܘ ܐܚܪܢܐ ܗܼܘ ܠܒܪ ܡܢܗ. ܘܐܦܠܐ ܛܠܐ ܐܘܿ ܙܥܘܼܪ ܡܼܢܗ ܐܠܐ ܐܝܼܬܘ̄ ܡܠܼܬܗ ܘܚܟܼܡܬܗ ܘܡܚܫܒܬܗ ܕܒܗ ܐܬܼܒܪܝܘ ܟܿܠܗܘܿܢ ܥܠ̈ܡܐ. ܘܒܗ ܩܿܝܡܝܢ ܘܐܝܬܝܗܘܢ. ܘܐܠܗܐ ܡܼܬܐܡܪ ܘܚܝܠܗ ܕܐܒܘܼܗܝ ܘܚܟܡܼܬܗ. ܝܠܕܐ ܐܘܟܝܼܬ ܒܪܝ ܡܪܢܝܐ ܡܼܬܐܡܪ ܕܐܒܐ ܡܪܢܝܐ. ܒܗܿܝ ܕܒܪܐ ܗܿܘ ܐܡܝܼܢܐܝܼܬ ܡܛ݀ܠ ܕܡܠܼܬܐ ܗܿܘ ܕܝܼܠܝܼܕ ܡܼܢ ܗܘܢܐ. ܘܗܼ، ܡܠܼܬܐ. ܠܐ ܡܼܨܝܐ ܕܢܫܼܬܚܠܦ ܘܢܗܼܘܐ ܗܘܢܐ ܘܢܘܠܕ ܡܠܼܬܐ ܐܚܪܬܐ. ܘܢܗܼܘܐ ܠܡܼܠܬܐ ܡܠܼܬܐ. ܘܠܚܘܼܫܒܐ ܚܘܫܒܐ. ܐܠܐ ܐܡܝܼܢܐܝܬ ܡܠܼܬܐ ܝܠܕܐ ܗܿܘ ܕܗܘܢܐ. ܘܠܘ ܝ݀ܠܘܕܐ ܕܐܚܪܝܢ ܡܠܼܬܐ ܘܡܛܠܗܕܐ ܘܿܠܝܐܝܬ ܘܫܪܝܼܪܐܝܬ ܐܝܬܘ̄ ܝܠܕܐ ܐܘܟܝܼܬ ܒܪܐ ܡܪܢܝܐ. ܕܠܝܬ ܐܚܪܝܢ ܝܠܕܐ ܐܘܟܝܬ ܒܪܐ ܕܕ݀ܡܐ ܠܗ. ܘܡܢܗ ܐܫܼܬܡܗܬ݀ ܝܼܠܝܼܕܘܼܬܐ ܐܘܟܝܼܬ ܒܪܘܼܬܐ. ܡܪܢܐܝܬ. ܘܠܐ ܐܝܼܬܘ̄ ܐܦܠܐ ܗܘܼܐ ܐܘܿ ܗܿܘܐ ܐܒܐ ܕܐܚܪܝܢ ܡܠܼܬܐ. ܘܠܐ ܡܼܨܝܐ ܡܿܕܝܢ ܝܠܕܐ ܗܿܘ ܡܪܢܝܐ ܐܡܝܼܢܐܝܬ ܫܿܘܐ ܠܐܒܐ ܗܘܢܐ ܒܐܝܼܬܘܼܬܐ ܘܡܪܘܬܐ ܘܚܝܠܐ ܘܨܒܝܿܢܐ ܘܫܘܼܒ̄ ܘܣܓܕܬܐ ܘܬܘܕܝܬܐ. ܘܟܿܠܗ ܡܠܼܬܐ ܒܐܒܐ ܗܘܢܐ ܐܝܼܬܘ̄. ܘܒܟܿܠܕܘܟ ܠܐ ܡܣܬܕܩܢܐܝܬ ܘܠܐ ܡܼܬܦܠܓܢܐܝܬ ܘܠܐ ܡܣܼܬܝܟܢܐܝܬ. ܕܐܝܟܢ ܕܝܢ܆ ܫܡܼܥ ܩܠܝܼܠ ܐܝܟ ܕܡܼܨܝܐ ܠܢ ܕܢܐܡܪ. ܘܠܟ ܕܬܫܡܼܥ. ܐܬܒܩܐ ܐܢܬ ܒܟ. ܘܚܙܼܝ ܘܐܣܬܟܠ ܕܐܝܼܬ ܒܟ ܗܘܢܐ ܪܒܐ ܡܒܘܼ݁ܐ ܘܝܠܘܕܐ ܕܟܿܠ ܡܠܼܬܐ. ܘܚܟܼܡܬܐ ܘܚܘܼܫܒܐ. ܒܨܠܡܗ ܘܒܕܡܘܼܬܗ ܕܡܪܟ ܘܥܒܘܕܟ. ܘܗܿܕܐ ܡܠܼܬܐ ܐܘܟܝܼܬ ܚܘܼܫܒܐ ܕܝܼܠܝܕ ܒܗܘܢܟ ܘܟܣܝܐ ܒܠܼܒܟ. ܕܐܝܬܘ̄ ܥܘܼܒܗ ܕܗܘܢܟ. ܘܐܡܼܬܝ ܕܨ݀ܒܐ ܐܢܬ ܕܬܦܘܼܩ ܠܓܠܝܐ ܡܬܬܙܝܼܥ ܐܢܬ ܒܪܘܼܚܟ ܐܘܟܝܬ ܒܚܝܘܼܬܟ. ܘܡܪܟܒ ܐܢܬ ܠܪܘܚܢܘܼܬܗܿ ܕܡܠܬܼܟ ܒܓܫܝܼܡܘܼܬܗ ܕܩܠܟ ܕܐܝܼܬܘܗܝ ܐ݀ܐܪ ܕܡܬܼܢܦܚ ܡܼܢ ܪܐܬܟ ܒܩܢܟ. ܘܡܫܡܥ ܐܢܬ ܠܡܠܼܬܟ ܪܘܚܢܝܬܐ ܘܟܣܝܬ݀ ܒܥܘܼܒܗ ܕܗܘܢܟ. ܠܝ ܘܠܟܿܠ ܫ݀ܡܘܼ̈ܥܐ. ܐܘܿ ܡܓܫܡ ܐܢܬ ܠܗܿ ܠܡܠܼܬܟ ܟܣܝܼܬܐ ܘܪܘܚܢܝܿܬܐ ܒܕܝܘܬܐ ܘܒܟܪܛܝܼܣܐ. ܘܡܼܬܝܕܥܐ ܪܘܚܢܘܬܗܿ ܪܘܚܢܐܝܬ ܒܝܕ ܦܘܪ̈ܣܐ 51 ܕܪܘܼܟܒܐ ܗܿܢܐ ܕܕܝܘܼܬܐ ܘܟܪܛܝܼܣܐ ܠܝ ܘܠܣܓܝ̈ܐܐ. ܘܡܼܢ ܚܕ ܠܚܕ ܡܬܝܒܠܐ ܒܩܿܠܐ ܘܒܟܬܝܼܒ̈ܬܐ. ܘܡܼܬܡܠܐ ܡܢܗܿ ܟܿܠܗ ܥܠܿܡܐ. ܒܐܕܢ̈ܝ ܫܿܡܘܼܥ̈ܐ ܘܒܠܒܘ̈ܬܐ ܕܩܪ̈ܘܼܝܐ ܘܠܘܬ݀ ܟܿܠܚܕ ܐܝܼܬܝܗܿ ܡܫܡܠܝܐܝܼܬ ܘܓܡܝܼܪܐܝܼܬ ܕܠܐ ܒܘܼܨܪ ܘܗܟܘܬ ܟܿܠܗܿ ܠܘܬܟ ܒܥܘܼܒܗ ܕܗܘܢܟ ܐܝܼܬܝܗܿ ܡܫܡܠܝܐܝܬ ܘܓܡܝܼܪܐܝܬ ܕܠܐ ܫܘܼܢܝ ܘܕܠܐ ܫܘܼܚܠܦ. ܘܐܢ ܐܢܬ ܒܪܝܐ ܘܥܒܝܕܐ ܡܠܬܟ ܝܠܝܼܕܬ݀ ܡܼܢ ܗܘܢܟ ܐܝܼܬܝܗܿ ܠܐ ܡܣܼܬܝܟܢܐܝܼܬ ܘܐܬܡܠܝ ܡܢܗܿ ܟܿܠܗ ܗܿܢ ܥ݀ܠܡܐ. ܘܐܢ ܐܝܼܬ ܗܘܼܐ ܐܟܘܬܗ ܪ̈ܒܘܼ ܥܠ̈ܡܝܢ ܐ̱ܚܪ̈ܢܐ. ܘܠܐ ܐܣܼܬܼ݀ܝܟܬ݀ ܘܠܐ ܐܬܼܥܪܝܬ ܡܼܢ ܟܿܠܗܘܢ ܘܡܢ ܠܘܬܟ ܠܐ ܫܢܝܬ݀ ܘܠܐ ܐܫܼܬܚܠܦܬ݀. ܡܕܝܢ ܟܡܐ ܠܟܡܐ ܡܠܼܬܐ ܐܠܗܐ ܘܚܟܡܼܬܐ ܕܗܘܢܐ ܪܒܐ ܡܒܘܼܥܐ ܕܟܿܠ ܗܘ̈ܢܝܢ. ܕܐܝܼܬܘܗܝ ܒܪܘܼܝܐ ܘܥܒܘܼܕܐ ܘܝܗܘܼܒܐ ܕܟܿܠ ܡܠܼܬܐ ܘܚܟܼܡܬܐ ܘܚܘܼܫܒܐ܆ ܐܝܟܢ ܡܣܼܬܝܟ ܐܘܿ ܡܬܼܥܪܐ ܡܼܢ ܟܿܠܗܘܿܢ ܥܠ̈ܡܐ. ܘܟܕ ܐܝܼܬܘܗܝ ܒܥܘܼܒܗ ܕܐܒܘܼܗܝ ܟܣܝܐܝܼܬ ܘܓܢܝܼܙܐܝܼܬ. ܟܿܠܗ ܒܟܿܠ ܕܘܼ̣ ܐܝܼܬܘ̄ ܡܫܡܠܝܐܝܼܬ ܟܕ ܠܐ ܡܫܢܐ ܡܢ ܥܘܼܒܐ ܕܐܒܘܼܗܝ. ܐܝܟ ܕܐܦܠܐ ܡܠܼܬܟ ܕܐܬܡܠܝܼ ܡܢܗܿ ܟܿܠ. ܫܢܝܬ݀ ܡܼܢ ܠܒܼܟ ܕܐܝܼܬܘ̄ ܥܘܼܒܗ ܕܗܘܢܟ. ܘܐܝܿܝܟܢܐ ܕܡܠܼܬܟ ܪܘܼܚܢܝܬܐ ܕܟܣܝܐ ܒܠܒܟ ܪܘܚܢܐܝܼܬ. ܐܢ ܠܐ ܡܬܬܙܝܼܥܐ ܒܪܘܼܚܟ. ܘܬܡܓܫܡܐ ܒܩܿܠܐ ܐܘܿ ܒܟܪܛܝܼܣܐ ܘܕܝܘܼܬܐ ܠܐ ܡܬܝܕܥܐ ܠܐܚܪܝܢ. ܗܟܘܬ݀ ܐܦ ܡܠܼܬܗ ܕܐܠܗܐ ܕܐܬܼܩܪܝ ܝܠܕܗ܆ ܕܐܝܼܬܘ̄ ܚܝܠܗ ܘܚܟܼܡܬܗ ܘܒܪ ܟܝܿܢܗ ܘܒܪ ܐܝܼܬܘܼܬܗ. ܘܟܡܐ ܕܟܿܣܐܼ ܗܘܼܐ ܒܥܘܼܒܗ ܐܝܟ ܡܠܼܬܟ ܒܠܒܟ ܠܐ ܝܼܕܝܼܥ ܗܘܼܐ ܠܚܕܐ ܡܼܢ ܒܪ̈ܝܬܐ. ܟܕ ܕܝܢ ܨܒܼܐ ܒܚܘܼܒܗ ܘܒܛܝܒܘܼܬܗ. ܕܢܘܕܥ ܐ̱ܪ̈ܙܝ ܟܣܝܘܼܬܗ ܘܥܠ ܐܝܼܬܘܼܬܗ ܠܒܪ̈ܝܬܗ. ܐܙܝܼܥ ܝ݀ܬܗ ܒܪܘܼܚܗ ܐܘܟܝܼܬ ܚܝܘܼܬܗ ܩܕܝܼܫܬܐ. ܘܪܟܒ ܡܠܼܬܗ ܒܩܠܐ ܘܡܠܠ ܥܡܢ ܒܕܡܘ̈ܬܐ ܘܒܡ̈ܢܘܬܐ ܒܙܒܢ ܐܝܟ ܕܫܦܼܪ ܠܗ. ܘܐܝܟ ܕܡܼܨܝܐ ܗܘܼܬ݀ ܠܢ ܕܢܫܼܡܥ ܘܢܕܥ ܘܢܣܬܟܠ ܠܦܘܬ݀ ܕܥܕܪܐ ܗܘܼܬ݀ ܠܢ ܘܠܿܚܡ ܗܘܼܐ ܠܙܒܢܢ. ܟܿܠ ܙܒܢܐ ܒܙܒܢܗ. ܒܿܬܪ ܕܝܢ ܕܐܬܕܪܫ ܥܠܿܡܐ ܒܩ̈ܠܘܗܝ ܕܐܠܗܐ ܘܫܡܼܥ ܡܠܼ̈ܘܗܝ܆ ܘܐܬܥܝܕ ܒܥܢܝ̈ܢܐ ܐܠܗ̈ܝܐ. ܘܐܪܓܫܼ ܒܥܒܘܼܕܗ ܘܝܼܕܥ ܠܐܠܗܗ. ܒܚܪܬܗܘܢ ܕܝܢ ܕܙܒ̈ܢܐ ܐܬܓܫܡ ܗܼܘ ܡܠܼܬܐ ܐܠܗܐ ܒܒܣܪܐ ܕܝܠܢ ܒܪܟܝܿܢܢ ܐܝܟ ܡܠܼܬܐ ܕܝܼܠܢ ܒܟܪܛܝܼܣܐ ܘܕܝܘܬܐ ܘܗܼܐ ܒܪܢܫܐ ܐܟܘܬܢ ܘܒܟܿܠ ܡܕܡ ܐܬܕܡܝܼ ܠܢ ܣܼܛܪ ܡܼܢ ܚܛܝܼܬܐ. ܘܡܕܒܪܢܘܬܐ ܗܕܐ ܕܥܒܼܕ ܒܗܿܝ ܕܐܬܒܣܪ ܗܼܘ ܡܠܼܬܐ ܐܠܗܐ ܒܡܥܒܕܢܘܬܐ ܕܪܘܼܚܗ ܩܕ̄. ܒܬܪܟܢ ܡܚܘܝܢܢ ܦܬܝܐܝܼܬ ܐܝܟ ܕܝܿܗܒܐ ܛܝܒܘܼܬܗ ܘܨܿܒܝܐ ܡܪܘܼܬܗ ܘܗܼܘ ܡܠܼܬܐ ܕܐܬܒܣܪ ܒܒܣܪܐ ܗܿܘ ܕܠܒܝܼܫ ܗܘܼܐ ܐܝܼܬܘ̄ ܗܘܼܐ ܟܿܠܗ. ܘܒܟܿܠ ܕܘܟ 52 ܘܠܘܬ݀ ܟܿܠ ܕܫܡܼܥ ܛܒܼܗ. ܘܗܝܡܢ ܒܗ. ܒܠܒܐ ܕܟܿܠ ܕܗܝܡܢ ܒܗ ܐܝܼܬܘ̄ ܗܘܼܐ ܠܘܬ݀ ܟܿܠ ܚܕ ܟܿܠܗ. ܘܒܫܡܿܝܐ ܘܒܐܪܥܐ. ܘܥܡ ܡ̈ܠܐܟܐ. ܘܥܡ ܟܿܠ ܟܿܠܗ. ܘܒܥܘܼܒܗ ܕܐܒܘܗܝ ܐܝܼܬܘ̄ ܗܘܼܐ ܟܿܠܗ. ܟܕ ܠܐ ܣܟ ܫܢܝܼ ܘܠܐ ܐܫܬܚܠܦ ܐܘܿ ܐܫܬܓܢܝܼ. ܐܝܟ ܕܐܦܠܐ ܡܠܼܬܟ ܕܝܼܠܟ ܫܢܝܬ݀ ܡܼܢ ܠܒܟ. ܘܟܿܠܗ ܠܘܬܟ ܘܒܗܘܢܟ ܐܝܼܬܝܗܿ ܘܒܟܿܠܕܘܟ ܘܟܿܠ ܐܬܡܠܝܼ ܡܢܗܿ. ܗܟܢ ܐܬܪܢܐ ܘܐܬܚܫܒ ܥܠ ܡܠܼܬܐ ܐܠܗܐ ܒܪܘܼܝܐ ܘܒܥܘܼܕܐ ܕܟܿܠ ܡܼ̈ܠܝܢ ܘܟܿܠ ܚܟ̈ܡܢ. ܗܿ، ܠܐ ܡܼܬܕܪܟܢܐ ܘܠܐ ܡܣܼܬܝܟܢܐ. ܕܨܒܼܐ ܕܢܒܕܩ ܥܠ ܢܦܫܗ ܠܒܪ̈ܝܬܗ. ܠܘ ܐܝܟ ܕܐܝܼܬܘܗܝ ܒܪܒܘܼܬܗ ܠܐ ܡܬܕܪܟܢܝܼܬܐ. ܐܠܐ ܐܝܟ ܕܡܼܨܝܐ ܠܗܘܿܢ ܠܥܒ̈ܝܼܕܐ ܕܢܕܥܘܼܢܝܗܝ. ܟܿܠ ܚܕ ܐܝܟ ܡܫܘܼܚܬܐ ܕܝܕܥܬܗ. ܡܐܠܠܘܿܢ ܠܦܘܬ ܕܟܝܘܬ ܢܦܫܗ ܘܡܪܝܼܩܘܼܬ ܪܥܝܿܢܗ ܘܫܦܝܘܼܬ ܗܘܢܗ. ܘܨܠܝܼܠܘܼܬ ܚܘܼܫ̈ܒܘ̄ ܘܕܟܝܘܼܬ ܠܒܼܗ. ܗܿܢܐ ܡܠܼܬܗ ܐܘܟܝܼܬ ܚܟܼܡܬܗ ܘܡܚܫܒܬܗ ܕܗܘܢܐ ܪܒܐ ܘܥܠܼܬܐ ܪܝܼܫܝܼܬܐ ܕܐܝܼܬܘ̄ ܐܒܐ ܡܬܘܼܡܝܐ ܘܡܪܐܢܝܐ. ܐܬܼܩܪܝܼ ܐܦ ܗܼܘ ܘܐܫܼܬܡܗ ܒܪܐ ܝܼܚܝܼܕܝܐ ܘܝܠܕܐ ܡܪܢܝܐ ܕܚܕ ܝ݀ܠܘܕܐ ܠܚܘܕܝܐ ܘܐܒܐ ܡܪܐܢܝܐ.. ܚܝܘܼܬܗ ܕܝܢ ܕܐܠܗܐ ܐܘܟܝܼܬ ܪܘܼܚܗ. ܡܛܠ ܕܐܝܼܬܘܗܝ ܪܘܼܚܐ ܘܚ̈ܝܐ ܕܐܠܗܐ. ܐܬܩܪܝܼ ܘܐܝܼܬܘ̄ ܩܕܝܼܫܐ ܘܐܠܗܐ. ܗܟܘܬ݀ ܒܪ ܟܝܿܢܗ ܘܐܝܼܬܘܼܬܗ ܘܡܬܘܡܝܘܼܬܗ ܘܐܝܟܢ ܡܼܨܝܐ ܕܢܗܼܘܐ ܐܝܼܬ. ܐܡܬܼܝ ܕܗܘܢܐ ܘܡܠܼܬܐ ܠܝܬ ܠܗ ܚ̈ܝܐ ܒܗ. ܘܚܝ̈ܘܗܝ ܐܝܼܬܝܗܘܢ ܪܘܼܚܗ. ܘܗܿܢܐ ܪܘܼܚܐ ܕܐܠܗܐ ܩܕܝܼܫܐ ܐܝܼܬܘ̄. ܘܐܠܗܐ ܡܼܬܐܡܪ. ܒܗܿܝ ܕܗܼܘ ܡܼܢ ܝ݀ܬܗ ܡܼܬܬܙܝܼܥ ܘܠܘ ܐ̱ܚܪܢܐ ܡܙܝܼܥ ܠܗ. ܐܟܡܐ ܕܚܝܘܼܬܐ ܕܒܟ ܗܼܝ ܡܙܝܼܥܐ ܠܟ. ܘܠܘ ܐ̱ܚܪܝܢ ܡܙܝܼܥ ܠܗܿ ܒܟ ܣܛܪ ܡܼܢ ܒܪܘܼܝܟ. ܗܼܘ ܕܝܢ ܐܠܗܐ ܡܫܒܚܐ ܠܝܬ ܠܗ ܒܪܘܝܐ ܘܥܒܘܼܕܐ ܐ̱ܚܪܢܐ ܕܡܙܝܼܥ ܠܪܘܼܚܗ ܒܗ. ܐܠܐ ܗܼ، ܪܘܼܚܗ ܡܼܢ ܢܦܫܗ ܡܼܬܬܙܝܼܪܥ ܘܡܙܝܼܥ ܠܟܿܠ ܕܒܫܡܿܝܐ ܘܒܐܪܥܐ. ܘܠܝܬ ܡܕܡ ܣܟ ܠܐ ܒܫܡܝܐ ܘܠܐ ܒܐܪܥܐ ܕܡܬܬܙܝܼܥ ܡܼܢ ܝܿܬܗ܆ ܐܠܐ ܗܼ، ܪܘܼܚܗ ܩܕ̄ ܕܐܠܗܐ. ܒܗ ܡܬܼܬܙܝܼܥ ܐܠܗܐ ܘܚܝ ܘܐܝܼܬܘ̄ ܒܗ ܐܡܝܼܢܐܝܬ. ܘܒܗ ܒܪܘܼܚܗ ܢܦܘܼܩܐ ܕܡܼܢܗ ܒܡܥܒܕܢܘܼܬܗ ܕܐܬܓܠܝ ܡܠܬܐ ܝܼܠܝܼܕܐ ܕܒܥܘܼܒܐ ܕܗܘܢܐ ܐܒܐ ܟܿܣܐܼ ܗܘܼܐ. ܘܒܙܒܢ ܐܬܪܟܒ ܥܡ ܩܠܐ ܘܐܫܼܬܡܥ ܒܕܡ̈ܘܬܐ ܘܒ̈ܡܢܘܬܐ. ܘܒܬܪܟܢ ܐܬܓܫܡ ܗܼܘ ܡܠܼܬܐ ܒܡܥܒܕܢܘܬܐ ܕܪܘܼܚܐ ܩܕܝܼܫܐ ܒܒܼܣܪܐ ܘܐܬܝܼܕܥ ܠܒܪ̈ܝܬܐ. ܐܟܡܐ ܕܪܘܼܚܐ ܡܙܝܼܥ ܠܟ ܘܡܒܪܟܒ ܐܢ̱ܬ ܡܠܼܬܟ ܒܩܠܐ ܘܡܫܡܥ ܐܢ̱ܬ ܠܐܚܪ̈ܢܐ. ܐܘܿ ܡܥܒܕܐ ܗܼܝ ܪܘܼܚܟ ܒܐܝܕ̈ܝܟ ܘܡܙܝܼܥܐ ܠܗܝܢ ܕܬܓܫܡ ܡܠܼܬܟ ܒܕܝܘܼܬܐ ܘܟܪܛܝܼܣܐ ܘܬܚܘܐ ܠܟܿܠ. ܗܟܘܬ݀ ܐܥܒܕ ܪܘܼܚܗ 53 ܕܗܘܢܐ ܪܒܐ ܐܠܗܐ ܐܒܐ. ܘܐܬܝܼܕܥ ܘܐܬܓܠܝܼ ܡܠܼܬܗ ܕܐܝܼܬܘ̄ ܝܠܕܗ ܕܗܘܢܐ ܠܒܪ̈ܝܬܐ ܟܿܠܗܝܢ. ܒܙܒܢ ܒܩ̈ܠܐ ܘܓܠ̈ܝܢܐ ܕܗܘܼܘ ܥܠ ܢܒ̈ܝܐ ܒܟܿܠ ܕܪ ܘܕܪ. ܘܒܬܪܟܢ ܒܒܼܣܪܐ ܗܼܘ ܕܠܒܼܫ ܡܠܼܬܐ ܒܡܥܒܕܢܘ̄ ܕܪܘܼܚܗ ܩܕ̄. ܗܿܢܘ ܐܠܗܐ ܫܪܝܼܪܐ ܒܪܘܝܐ ܘܥܒܘܕܐ ܕܟܿܠ. ܕܡܼܬܬܿܘܕܐ ܡܣܬܓܕ ܘܡܫܼܬܒܚ ܡܼܢ ܟܿܠ. ܕܐܝܼܬܘ̄ ܗܘܢܐ ܪܒܐ ܡܒܘܼ݁ܐ ܕܟܿ ܗܘ̈ܢܝܢ. ܘܡܬܐܡܪ ܐܒܐ ܡܪܢܝܐ. ܥܠܼܬܐ ܪܝܫܝܼܬܐ ܕܟܿܠ ܥ̈ܠܼܠܢ. ܘܐܝܬ ܠܗ ܡܠܼܬܐ ܕܡܼܬܐܡܪܐ ܝܠܕܗ ܘܒܪܐ ܝܼܚܝܼܕܝܐ ܘܡܪܢܝܐ. ܡܒܘܼܥܐ ܕܟܿܠ ܡܠ̈ܝܢ. ܘܝܿܗܘܼܒܐ ܕܟܿܠ ܚܟܼ̈ܡܢ. ܘܐܝܼܬ ܒܗ ܚܝ̈ܐ. ܗܿܢܘ ܕܝܢ ܐܝܼܬܘ̄ ܚܝܐ. ܕܐܝܼܬܘ̄ ܚܝܘܼܬܗ. ܘܡܬܐܡܪ ܪܘܚܗ ܩܕ̄ ܢܦܘܼܩܐ ܕܡܢܗ. ܘܥܡ ܝܼܠܝܼܕܘܼܬܐ ܕܡܠܼܬܐ ܕܡܼܢ ܥܘܼܒܗ. ܗܿܠܝܢ ܬܠܬܐ ܩܢܘܼ̈ܡܐ ܐܝܼܬ ܒܚܕܐ ܐܠܗܘܬܐ. ܗܘܢܐ ܘܡܠܼܬܐ ܘܪܘܼܚܐ. ܘܕܝܼܠܝܬܐ ܕܗܘܢܐ. ܝܠܘܕܘܼܬܐ. [ܘܕܝܠܝܬܐ ܕܡܠܼܬܐ ܝܠܝܕܘܬܐ.] ܘܕܝܼܠܝܬܐ ܕܪܘܚܐ ܩܕ̄ ܢܦܿܘܩܘܬܐ. ܘܫܡܐ ܘܛܟܣܼܐ ܕܗܿܘܢܐ ܐܒܐ. ܘܕܡܠܼܬܐ ܒܪܐ. ܘܕܪܘܚܐ ܕܐܝܼܬܘ̄ ܚܝܘܼܬܗ ܪܘܚܐ ܩܕܝܼܫܐ. ܩܢܘܼܡ̈ܐ ܬܠܬܐ ܫܡ̈ܗܐ ܬܠܬܐ. ܕܝܠ̈ܝܬܐ ܬܠ̈ܬ. ܟܝܿܢܐ ܕܝܢ ܚܕ. ܚܕܐ ܡܪܘܬܐ. ܚܕܐ ܡܥܒܕܢܘܬܐ. ܚܕܐ ܐܝܬܘܼܬܐ ܡܬܘܼܡܝܬܐ. ܚܕ ܨܒܝܿܢܐ. ܚܕ ܚܝܠܐ. ܚܕ ܫܘܼܛܠܢܐ. ܚܕܐ ܐܠܗܘܬܐ ܒܬܠܝܼܬܝܘܼܬܐ. ܘܬܠܝܼܬܝܘܼܬܐ ܒܚܕܐ ܐܠܗܘܼܬܐ. ܗܕܐ ܗܼܝ ܬܠܝܼܬܝܘܼܬܐ ܩܕܝܼܫܬܐ ܕܡܬܬܘܕܝܐ ܡܼܢ ܢܨܪ̈ܝܐ. ܗܿܢܘ ܕܝܢ ܐܒܐ ܘܒܪܐ ܘܪܘܼܚܐ ܩܕܝܼܫܐ ܚܕ ܐܠܗܐ ܫܪܝܼܪܐ. ܕܡܣܬܓܕ ܘܡܫܼܬܒܚ ܡܢ ܡܗܝܼܡ̈ܢܐ ܫܪ̈ܝܪܐ. ܗܿܢܘ ܫܡܐ ܡܫܒܚܐ ܕܬܠܝܼܬܝܘܼܬܐ ܣܓܝܼܕܬܐ. ܕܒܗܿ ܥ݀ܡܕܝܢ ܟܪ̈ܝܣܛܝܢܐ ܐܘܟܝܼܬ ܡܫܝ̈ܚܝܐ. ܘܐܬܝܼܠܕܘ ܡܼܢ ܡܝ̈ܐ ܘܪܘܼܚܐ. ܡܘܠܕܐ ܚܕܬܐ ܘܪܘܚܢܝܐ.. ܘܗܿܠܝܢ ܕܫ݀ܥܬܐ ܥܠ ܐ̱ܪ̈ܙܐ ܕܬܠܝܼܬܝܘܬܐ ܩܢܘܼܡ̈ܐ ܘܫܡ̈ܗܐ ܘܕܝܼܠ̈ܝܬܐ ܕܚܕ ܐܠܗܐ ܫܪܝܪܐ ܣܿܦܩܢ. ܘܐܝܠܝܢ ܕܥܕܟܝܠ ܚܣܝܪ̈ܢ ܘܙܕܿܩ ܗܘܼܐ ܕܢܬܡ̈ܠܠܢ ܘܢܬܗܝܡ̈ܢܢ ܘܢܬܼܬܘ̈ܕܝܢ܆ ܥܠ ܐ̱ܪܙܐ ܪܒܐ ܘܡܫܒܚܐ ܕܬܠܝܼܬܝܘܼܬܐ ܣܓܝܼܕܬܐ ܘܩܕܝܫܬܐ. ܒܬܪܟܢ ܐܢ ܨܒܿܐ ܡܪܝܐ ܘܡܦܣ ܟܬܿܒܝܼܢܢ. ܟܕ ܡܿܛܝܢܢ ܠܫܪܒܐ ܕܦܘܪܫ ܬܘܕܝ̈ܬܐ ܕܟܿܠܗܘܢ ܥܡܼ̈ܡܐ ܒܡܐܡܪܐ ܘܒܩܦܠܐܘܢ ܕܥܠ ܗܝܡܢܘܼܬܐ ܘܬܘܕܝܬܐ ܕܟܪ̈ܣܛܝܢܐ. ܘܒܗܿܠܝܢ ܫܠܡ ܩܦܠܐܘܢ ܕܫܬܐ ܒܝܕ ܐܠܗܐ ܕܚܟܡ ܀ ܀ ܀ Chapter 7 ܬܘܼܒ ܥܡ ܐܠܗܐ ܕܡܗܕܐ ܩܦܠܐܘܢ ܕܫܒܥܐ ܥܠܗܿܝ ܕܐܢ ܐܝܼܬ ܠܗ ܫܡܐ ܚܬܝܼܬܐ ܠܐܠܗܐ܆ ܐܘܿ ܠܐ. ܡܒܪܟ ܘܡܫܒܚ ܘܡܪܡܪܡ ܫܡܐ ܣܓܝܼܕܐ ܘܕܚܝܼܠܐ ܘܩܕܝܼܫܐ ܕܡܪܐ ܘܥܒܘܕܐ ܘܒܪܘܼܝܐ ܕܟ݀ܠܗܝܢ ܡܬܼܝܕܥܢ̈ܝܬܐ ܘܠܐ ܡܼܬܚܙ̈ܝܢܝܬܐ ܘܕܡܬܪ̈ܓܫܢܝܬܐ ܘܕܡܬܚܙܝ̈ܢܝܬܐ ܗܿܘ ܕܐܝܼܬܘ̄ ܐܝܬܝܐ ܡܬܘܼܡܝܐ. 54 ܕܠܝܬ ܠܗ ܫܘܪܝܐ ܘܠܐ ܗܿܘܐ ܠܗ ܫܘܼܠܡܐ. ܗܿܘ ܕܒܐ ܡܬܕܪܟ ܡܼܢ ܟܿܠܗܘܢ ܥܒ̈ܝܼܕܐ. ܫܡ̈ܝܢܐ ܘܐܪ̈ܥܢܝܐ. ܡܬܝܕܥ̈ܢܐ ܘܡܬܪ̈ܓܫܢܐ. ܘܠܐ ܡܬܥܩܒ ܘܠܐ ܡܬܦܫܩ ܘܠܐ ܡܣܬܝܟܐ ܡܠܼܬܐ ܕܥܠܘܗܝ. ܘܗܿܘ ܕܐܝܼܬܘ̄ ܐܝܬܝܐ ܡܬܘܡܝܐ ܘܩܕܝܼܡ ܠܟܿܠ. ܘܠܝܬ ܗܘܼܐ ܩܕܡܘܗܝ ܡܿܢ ܕܢܣܝܼܡ ܠܗ ܫܡܐ. ܐܟܡܐ ܕܗܼܘ ܒܪܐ ܒܪ̈ܝܬܐ. ܘܠܟܿܠܗܘܢ ܣܡ ܟܘܼܢ̈ܝܐ ܘܫܡ̈ܗܐ. ܕܒܗܘܢ ܐܘܕܥ ܐܢܘܢ ܘܦܪܫ ܐܢܘܢ ܠܟܿܠ ܚܕ ܒܫܡ̈ܗܝܗܘܢ ܘܟܘܢ̈ܝܼܝܼܗܘܢ ܘܟܝܢ̈ܝܗܘܢ ܘܩܢܘܼܡ̈ܝܗܘܢ ܘܛܟܣ̈ܝܗܘܢ ܘܕܝ̈ܠܝܬܗܘܢ ܘܦܘܠܚܢܗܘܿܢ ܐܝܟܢ ܡܿܕܝܢ ܡܼܨܝܐ ܕܢܬܝܼܕܥ ܠܗ ܫܡܐ [ܘܢܬܬܣܝܼܡ ܠܗ ܟܘܢܝܐ ܡܢ ܒܪ̈ܝܬܐ ܕܠܐ] ܡܕܪ̈ܟܢ ܠܗ. ܐܦܠܐ ܡܼܨܝܐ ܠܗܘܢ ܕܢܥܩܒܘܢܝܗܝ ܘܢܦܫܩܘܼܢܝܗܝ ܘܢܡܠܠܘܢ ܥܠ ܐܝܼܬܘܼܬܗ ܡܬܘܡܝܬܐ ܘܠܐ ܡܬܗܘܢܢܝܼܬܐ. ܘܢܣܝܼܡܘܢ ܠܗ ܫܡܐ ܘܟܘܢܝܐ. ܐܠܐ ܐܢܗܘܼ ܕܗܼܘ ܢܣܝܡ ܠܢܦܫܗ ܫܡܐ ܘܢܘܕܥ ܠܗ ܟܘܼܢܝܐ. ܘܐܠܐ ܐܚܪܝܢ ܡܼܢ ܒܪ̈ܝܬܗ ܠܐ ܡܿܨܐܼ. ܐܦܠܐ ܡܕܪܟ ܐܘܿ ܝܕܥ ܕܐܝܟܢ ܢܣܝܼܡ ܠܗ ܫܡܐ. ܘܟܿܠܗܘܿܢ ܫܡ̈ܗܐ ܕܩܼܪܐܘܘܗܝ ܘܣܡܼܘ ܠܗ. ܡܪܝܐ. ܐܘܟܝܬ ܡܪܝܐ ܕܩܪܐܘܘܼܗܝ. ܡܼܢ ܫܡܐ ܕܡܪܘܬܐ ܐܝܼܬܘܗܝ. ܟܠܡܿܢ ܕܐܝܼܬܘ̄ ܡܪܐ ܠܥܠܡܐ ܐܘܿ ܠܩܢܝܿܢܐ. ܐܘܿ ܠܐܬܪܐ ܘܠܫܪܟܐ ܕܐܝܟ ܗܿܠܝܢ. ܡܪܝܗ ܐܝܬܘ̄ ܐܘܟܝܬ ܡܪܗ. ܐܠܗܐ ܕܝܢ܆ ܗܟܘܬ ܡܼܢ ܫܡܐ ܕܐ̈ܠܗܐ ܕܟܢܫܘ ܥܡܡܼ̈ܐ ܡܼܢ ܫܘܼܪܝܐ ܠܟܿܠ ܕܐܬܚܘܝܼ ܢܨܝܼܚܐ ܒܥܿܠܡܐ. ܐܘܿ ܒܚܠܝܼܨܘܼܬܐ ܐܘܼ ܒܓܢܒܪܘܼܬܐ ܐܘܿ ܒܢܒܝܘܼܬܐ. ܐܘܿ ܒܚܟܼܡܬܐ ܘܠܡܠܼܬܐ ܪܕܝܼܬܐ ܒܡܠܦܢܘܼܬܐ. ܐܘܿ ܒܣܥܘܪܘܼܬ ܚܗܠܐ ܘܬܕܡܪ̈ܬܐ. ܐܘܿ ܒܙܟܘܼܬܐ ܕܩܪ̈ܒܐ ܘܐܬܠܝܼܨܘܼܬܐ ܕܟܫܝܪ̈ܐ. ܐܘܿ ܒܥܢܘܝܘܼܬܐ ܘܥܡܘܼܪܝܐ ܠܚܘܼܕܝܐ ܕܒܛܘܼܪ̈ܐ ܘܡܕܒܪ̈ܐ ܘܒܚܘܼܪ̈ܒܐ ܓܠ̈ܝܼܙܝ ܡܼܢ ܐܢܫܘܼܬܐ. ܐܘܿ ܒܢܙܝܼܪܘܼܬܐ ܘܨܘ̈ܡܐ ܘܫܗܪ̈ܐ ܘܩܘ̈ܡܐ ܘܨܠ̈ܘܬܐ ܕܩܕܡ ܥܒܘܕܐ ܘܡܦܪܢܣܢܐ ܕܟܿܠ. ܐܘܿ ܒܠܒܝܼܒܘܼܬܐ ܘܠܐ ܡܫܼܬܚܠܦܢܘܬܐ ܕܡܼܢ ܬܘܕܝܬܐ ܐܒܗܝܬܐ ܘܣܒܝܼܠܘܼܬ ܫܼܢ̈ܕܐ ܘܐܘܼܠ̈ܨܢܐ ܣܓܝ̈ܐܐ ܕܥܠ ܗܿܟܢ ܥܕܡܐ ܠܗ ܠܡܘܬܐ ܥܙܝܼܙܐ. ܕܟܿܠܡܿܢ ܕܒܚܕܐ ܡܼܢ ܗܿܠܝܢ ܘܕܐܝܟ ܗܿܠܝܢ ܐܬܼܢܨܚ ܘܥܒܼܪ ܡܼܢ ܥ݀ܠܡܐ. ܩܠܣܘܼܗܝ ܘܫܒܚܘܼܗܝ ܒܢܝ̈ܢܫܐ ܕܒܙܒܢܗ. ܘܫܡܗܘܗܝ ܐܠܗܐ ܦܠܢ. ܘܗܘܼܘ ܡܝܬܝܢ ܥܘܼܗܕܢܗ ܐܡܝܼܢܐܝܬ. ܘܐܦ ܡܣܩܝܢ ܠܗ ܨܘܼܪܬܐ ܐܘܿ ܡܩܝܼܡܝܢ ܨܠܡܐ ܒܕܡܘܼܬܗ ܠܐܝܼܩܪܗ. ܘܥ݀ܒܕܝܢ ܠܗ ܕܘܼܟܪܢܐ. ܘܬܿܢܝܢ ܢܼܨܚܢܗ. ܘܡܝܩܪܝܢ ܨܘܪܬܗ ܐܘܿ ܨܠܡܗ. ܐܟܡܐ ܕܐܦ ܝܘܡܢ ܟܿܡܢ ܕܡܚܘܐ ܢܼܨܚܢܐ ܐܝܢܐ ܕܗܼܘ ܡܫܡܗܝܢ ܠܗ ܩܕܝܼܫܐ. ܐܘܿ ܣܗܕܐ ܫܪܝܪܐ. ܗܟܘܬ݀ ܐܦ ܗܿܠܝܢ ܩܕܡ̈ܝܐ 55 ܡܫܡܗܝܢ ܗܘܼܘ ܠܗ ܐܠܗܐ. ܘܠܗܿܘ ܕܣܿܓܝ ܢܨܚ̈ܢܐ ܗܿܘܐ ܗܘܼܐ. ܐܘܿ ܪܝܼܫܐ ܘܩܕܡܝܐ ܕܐܚܪ̈ܢܐ ܘܥܠܼܬܐ ܘܡܓܪܓܢܐ ܘܡܚܦܛܢܐ ܕܥܠ ܢܨܚ̈ܢܐ. ܡܪܐ ܘܐܠܗ ܡܟܢܝܢ ܗܘܼ، ܠܗ. ܘܡܼܢ ܗܿܢܐ ܥܝܿܕܐ ܩܿܪܝܢ ܗܘܼܘ ܠܥܒܘܕܐ ܐܠܗܐ. ܘܐܝܠܝܢ ܕܚܬܝܼܬܐܝܼܬ ܩܿܪܝܢ ܗܘܼܘ ܐܠܗܐ ܕܐܠܗ̈ܐ. ܐܘܟܝܬ ܐܠܗ ܐ̈ܠܗܝܢ ܡܫܡܗܝܢ ܗܘܼ، ܠܗ. ܗܟܘܬ݀ ܘܠ̈ܚܝܠܐ ܕܒܡܘܙܠܬܐ ܐܘܟܝܬ ܠܢܗܝܼܪ̈ܐ ܪܘܪ̈ܒܐ ܕܒܫܡܿܝܐ. ܕܐܝܟ ܗܿܠܝܢ ܫܒ̈ܥܐ ܛܥܝ̈ܐ ܕܐܝܼܬܝܗܘܢ ܫܡܼܫܐ ܘܣܗܪܐ ܘܟܐܘܢ ܘܒܝܠ ܘܢܪܝܓ ܘܒܠܬܝ ܘܢܒܘ. ܐ̈ܠܗܐ ܡܟܢܝܢ ܗܘܼ، ܠܗܘܢ. ܘܐܦܿ ܨܠ̈ܡܐ ܘܨܘܼܪ̈ܬܐ ܡܩܝܼܡܝܢ ܗܘܼܘ ܠܗܢ. ܥܡ ܨܠܘ̈ܬܐ ܘܒܥܘ̈ܬܐ. ܘܡܼܢ ܕܐܝܟ ܗܿܠܝܢ ܐܬܥܝܕܘ ܠܡܼܩܪܐ ܐܠܗܐ ܠܗܿ، ܥܒܘܼܕܐ ܘܒܪܘܼܝܐ. ܐܚܪ̈ܢܐ܆ ܥܠܼܬܐ ܩܕܡܝܬܐ ܩܿܪܝܢ ܗܘܼܘ ܠܗ. ܘܥܠܼܬ ܟܿܠ ܥܠܼܢ. ܐܚܪ̈ܢܐ ܐܠܗܐ ܓܢܝܼܙܐ. ܐܚܪ̈ܢܐ ܗܘܪܡܝܙܕ. ܐܚܪ̈ܢܐ ܐܝܼܬܝܐ ܡܬܘܼܡܝܐ ܡܼܢ ܐܝܬܘܬܗ ܘܡܬܘܡܝܘܼܬܗ. ܐܚܪ̈ܢܐ ܒܿܪܘܝܐ ܡܼܢ ܒܪܘܝܘܬܗ. ܘܥܒܘܕܐ ܡܼܢ ܥܒܘܕܘܬܗ. ܘܛܒܿܐ ܡܼܢ ܡܪܝܐ ܛܒܢܘܼܬܗ. ܘܥܬܝܪܐ ܡܼܢ ܫܦܝܼܥܘܼܬܗ. ܘܚܟܝܼܡܐ ܡܼܢ ܚܟܝܼܡܘܼܬ ܣܥܘܪ̈ܘܬܗ. ܘܡܪܚܡܢܐ ܡܼܢ ܡܪܚܡܢܘܼܬܗ. ܗܟܘܬ݀ ܘܫܪܟܐ ܕܫܡ̈ܗܐ ܕܡܟܢܝܢ ܠܗ. ܡܼܢ ܕܝܼܠ̈ܝܬܐ ܕܚܙܘ ܘܝܠܦܘ ܕܐܝܼܬ ܒܗ. ܕܐܝܟ ܢ݀ܛܘܪܐ܆ ܘܥܝܼܪܐ܆ ܘܡܣܬܪܢܐ ܘܡܪܚܦܢܐ ܘܡܦܪܢܣܢܐ܆ ܘܡܕܒܪܢܐ. ܘܚܝ̈ܐ ܘܚܝܘܼܣܬܢܐ. ܘܢܓܝܼܪ ܪܘܼܚܐ. ܘܡܿܨܐܼ ܟܿܠ. ܘܡܪܐ ܟܿܠ.ܘܐܚܝܼܕ ܟܿܠ. ܘܚܝܠܬܢ ܒܟܿܠ. ܘܚܟܝܼܡ ܒܟܿܠ. ܘܝܿܕܥ ܟܿܠ. ܘܛܘܼܒܬܢ ܒܟܿܠ. ܘܡܫܒܚܐ. ܘܣܓܝܼܕܐ. ܘܩܕܝܼܫܐ܆ ܘܟܐܢܐ. ܘܕܝܿܢܐ. ܘܡܐܚܝܢܐ. ܘܡܬܼܒܝܢܢܐ. ܘܡܬܪܣܝܢܐ. ܘܡܚܟܡܢܐ. ܘܡܗܕܝܢܐ. ܘܢܘܼܗܪܐ ܫܪܝܼܪܐ. ܘܢܘܪܐ ܐܟܿܠܬܐ ܘܠܐ ܗܘܠܢܝܿܬܐ. ܘܩܪܒܬܢܐ ܘܥܙܝܼܙܐ. ܘܓܢ̱ܒܪ ܚܝܠܐ. ܘܬܩܝܼܦܐ ܘܓܐܝܐ ܘܡܫܩܠܐ. ܘܪܡܿܐ. ܘܫܠܝܼܛܐ. ܘܡܠܟܐ ܘܡܠܟ ܡܠܟ̈ܐ ܘܡܪܐ ܡܪ̈ܘܬܐ. ܘܨܒܐܘܬ. ܘܐܠܘܗܝܡ. ܘܐܕܘܢܝ. ܘܐܝܠܫܕܝ. ܥܡ ܫܪܟܐ ܕܫܡ̈ܗܐ ܐܚܪ̈ܢܐ ܘܟܘܼܢ̈ܝܐ ܕܩܪܝܢ ܗܘܼܘ ܠܗ ܒܗܘܿܢ ܥܡܼ̈ܡܐ ܟܿܗܘܢ ܕܐܪܥܐ. ܟܿܠ ܚܕ ܒܠܫܢܗ ܘܒܗܿܘ ܡܕܡ ܕܡܝܩܪ ܘܡܪܢܝ ܘܪܒ ܠܘܬܗܘܢ. ܘܗܿܠܝܢ ܟܿܠܗܘܢ ܫܡ̈ܗܡܐ ܡܼܢ ܥܝ̈ܕܐ ܘܛܟܼܣ̈ܐ ܘܣܘܥܪ̈ܢܐ ܕܒܥܠܡܢ ܐܬܬܣܝܼܡܘ ܘܐܫܬܡܗܘ ܥܠ ܗܿܘ ܡܪܐ ܘܒܪܘܼܝܐ. ܕܠܝܬ ܫܡܐ ܠܐܝܼܬܘܼܬܗ. ܘܠܐ ܟܘܢܝܐ ܠܡܬܘܼܡܝܘܼܬܗ. ܡܛܠ ܕܠܥܼܠ ܡܼܢ ܗܿܠܝܢ ܐܝܼܬܘ̄. ܗܿ، ܠܐ ܡܬܕܪܟܢܐ ܘܠܐ ܡܬܼܥܩܒܢܐ. ܘܠܐ ܡܣܼܬܝܟܢܐ. ܘܠܥܼܠ ܡܼܢ ܛܒܿܘܼܬܐ. ܘܡܼܢ ܡܪܚܡܢܘܼܬܐ ܘܡܼܢ ܩܕܝܼܫܘܼܬܐ ܕܠܗ ܣܓܕ ܘܡܘܕܐ ܘܡܫܒܚ ܟܿܠ ܫܡ ܕܡܫܼܬܡܗ ܒܐܪܥܐ ܘܒܫܡܝܐ. ܘܠܗ ܡܘܪܒ ܘܡܩܠܣ ܘܡܒܪܟ ܟܿܠ 56 ܠܫܢ ܕܪ̈ܘܼܚܢܐ ܘܕܦܓܪ̈ܢܐ. ܘܡܫܼܬܒܚ ܬܘܼܒ ܘܡܬܼܝܕܥܐ ܪܒܘܼܬܗ ܘܡܪܘܼܬܗ ܘܥܒܘܿܕܘܼܬܗ. ܘܚܟܡܬܗ ܡܼܢ ܟܿܠܗܝܢ ܒܪ̈ܝܬܐ ܕܚܐܝ̈ܢ ܘܡܬܬܙܝܼܥ̈ܢ ܘܪ̈ܚܫܢ ܘܪ̈ܓܫܢ ܘܡܼܬܚܙ̈ܝܢ ܘܡܼܬܝܕܥܢ. ܡܿܕܝܢ ܡܢܘܼ ܡܿܨܼܐ ܕܢܕܥ ܚܬܝܼܬܐܝܼܬ ܫܡܗ. ܐܘܿ ܡܢܘܼ ܡܿܨܼܐ ܘܝܿܕܥ ܕܢܣܝܼܡ ܠܗ ܫܡܐ. ܠܗܿܘ ܐܝܼܬܝܐ ܡܬܘܼܡܝܐ ܘܠܐ ܡܬܕܪܟܢܐ. ܐܘܿ ܡܼܢ ܐܝܟܐ ܐܝܼܬ ܠܢ ܚܢܢ ܕܢܪܟܒ ܘܢܘܿܥ ܫܡܗ ܒܡܠܼܬܐ ܕܝܼܠܢ ܡܪܟܒܬܐ ܕܡܼܢ ܡܠܼܬܐ ܘܩܠܐ ܕܡܬܢܦܚ ܡܼܢ ܐܐܪ ܗܢܐ. ܠܗܿܘ ܦܫܝܼܛܐ ܘܠܐ ܡܪܟܒܐ ܘܡܙܝܼܥ ܠܟܿܠ. ܘܗܼܘ ܡܼܢ ܐܚܪܝܢ ܠܐ ܡܼܬܬܙܝܼܥ. ܠܥܼܠ ܡܼܢ ܡܠܼܬܐ ܐܝܼܬܘܗܝ ܘܒܗܿܝ ܕܠܐ ܡܣܝܟ ܠܗ ܡܐܡܪܐ. ܠܐ ܡܕܪܟ ܠܗ ܗܘܢܗܐ. ܠܐ ܒܿܨܐ ܠܗ ܚܘܼܫܒܐ ܠܐ ܡܿܐܫ ܠܗ ܪܥܝܢܐ. ܠܐ ܡܬܼܥܩܒ. ܠܐ ܡܣܬܝܟ. ܠܐܡܬܼܐܡܪ. ܒܗܿܝ ܕܠܥܼܠ ܡܼܢ ܟܿܠ ܙܘܥܐ ܕܚܘܼܫܒܐ ܘܪܦܬܐ ܕܪܥܝܿܢܐ. ܘܡܕܪܟܢܘ̄ ܕܗܘܢܐ ܐܝܼܬܘ̄. ܠܥܼܠ ܡܼܢ ܟܿܠ. ܠܬܚܼܬ ܡܼܢ ܟܿܠ. ܠܟܐ ܡܼܢ ܟܿܠ. ܠܓܘ ܡܼܢ ܟܿܠ. ܠܒܪ ܡܼܢ ܟܿܠ. ܘܗܼܘ ܐܝܼܬܘ̄ ܟܿܠ. ܘܡܢܗ ܟܿܠ. ܘܒܗ ܟܿܠ. ܒܗܿܝ ܕܡܢܗ ܫܪܝܼ ܟܿܠ. ܘܒܗ ܩܿܐܡ ܟܿܠ. ܘܠܗ ܗܦܟ ܟܿܠ. ܫܘܒܚܐ ܠܗ ܥܠ ܕܝܼܢܘ̈ܗܝ ܠܐ ܡܬܕܪ̈ܟܢܐ. ܫܘܒܚܐ ܠܗ ܥܠ ܪܒܘܼܬ ܡܘܗܒ̈ܬܗ. ܫܘܼܒܚܐ ܠܗ ܥܠ ܣܓܝܐܘܬ ܛܝܒܘܼܬܗ. ܗܿܘ ܠܐ ܡܬܕܪܟܢܐ ܘܠܐ ܡܣܼܬܝܟܢܐ. ܘܠܐ ܡܬܼܗܘܢܢܐ ܒܪܝܗܝ ܠܒܪܐ̱ܢܫܐ ܒܨܠܡܗ. ܘܒܗ ܚܘܝܼ ܠܕܡܘܼܬܗ. ܗ̄ ܒܗܘܢܐ ܗܿܢܐ ܕܐܝܼܬ ܠܢ ܠܐ ܡܬܼܠܒܟܢܐ ܘܠܐ ܡܼܬܥܪܝܢܐ. ܘܠܐ ܡܣܬܝܟܢܐ. ܘܐܝܼܬܬܝܢ ܫܠ̈ܝܼܛܝ ܒܝܬܢ. ܒܗܿܝ ܕܐܝܼܬ ܠܢ ܚܐܪܘܬܐ ܠܡܥܼܒܕ ܨܒܝܿܢܢ ܐܟܘܬܗ ܘܒܕܡܘܬܗ. ܘܥ ܗܿܠܝܢ ܒܡܐܪܡܪ̈ܐ ܐܚܪ̈ܢܐ ܕܩܕܡܝܢ ܡܚܘܝܢܢ ܦܬܝܐܝܼܬ ܘܝܬܝܼܪܐܝܬ ܒܝܕ ܐܠܗ ܕܡܚܝܠ܀ ܡܕܝܢ ܗܟܝܼܠ܆ ܐܝܿܕܐ ܚܬܝܼܬܐ ܕܢܥܒܼܕ. ܘܐܝܟܢ ܢܩܼܪܐ ܘܢܫܡܗ ܠܒܪܘܝܢ ܘܥܒܘܕܢ. ܒܐܝܠܝܢ ܫܡ̈ܗܐ ܢܩܪܝܘܗܝ. ܒܐܝܠܝܢ ܟܘܼܢ̈ܝܐ ܢܨܠܐ ܘܢܒܥܐ ܡܢܗ. ܘܢܿܬܟܫܦ ܠܗ. ܐܝܿܟܢܐ ܢܫܒܚܝܼܘܗܝ ܘܢܒܪܟܝܘܗܝ ܘܢܪܡܪܡ ܠܫܡܗ. ܕܗܿܐ ܠܥܼܠ ܡܼܢ ܟܿܠ ܡܼܠܬܐ ܕܡܠܓܠܓ ܠܫܢܐ ܐܝܬܘܗܝ. ܘܠܥܼܠ ܡܼܢ ܟܿܠ ܙܘܥܐ ܕܪܦܬܟ ܒܬܪܥܝܼܬܐ. ܘܠܓܘ ܡܼܢ ܟܿܠ ܚܘܼܫܒܐ ܕܡܘܠܕ ܗܘܢܐ. ܗܿܝ ܕܝܢ ܕܚܬܝܼܬܐ ܘܙܕܩܿܐ ܠܢ ܕܢܿܡܐܪ ܘܢܫܿܡܗ ܠܗܿܘ ܠܐ ܡܬܕܪܟܢܐ. ܕܗܕܐ ܐܝܼܬܝܗܿ ܒܠܚܘܕ. ܗ̄ ܗܿܘ ܕܐܝܼܬܘ̄ ܐܡܝܼܢܐܝܬ. ܟܐܡܬ݀ ܗܼܘ ܐܝܬܘ̄ ܗܘܼܐ ܡܼܢ ܒܪܝܼܫܝܬ. ܠܘ ܕܗܘܼܐ ܡܼܢ ܒܪܝܫܝܬ. ܐܠܐ ܕܐܝܼܬܘ̄ ܗܘܼܐ ܟܕ ܠܝܬ ܠܗ ܪܫܝܼܬܐ ܣܼܛܪ ܡܼܢ ܝ݀ܬܗ. ܘܗܼܘ ܟܕ ܗܼܘ ܐܝܼܬܘܗܝ ܐܡܝܼܢܐܝܼܬ ܒܟܿܠܙܒܢ ܕܠܐ ܫܘܼܚܠܦ. ܘܗܼܘ ܬܘܼܒ ܟܕ ܗܼܘ ܐܝܼܬܘܗܝ ܠܥ̈ܠܡܝ ܥ݀ܠܡܝܢ ܕܠܐ ܣܘܼܦ ܘܕܠܐ ܫܘܼܠܡ. 57 ܡ̈ܠܐܟܐ ܕܝܢ ܘܒܢܝ̈ܢܫܐ. ܐܝܼܬ ܗܘܼܐ ܐܡܼܬܝ ܕܠܐ ܐܝܼܬܝܗܘܢ ܗܘܼܘ. ܘܐܝܼܬܝܗܘܢ ܬܚܼܝܬ ܫܘܼܚܠܦܐ ܘܡܫܬܚܠ̈ܦܢܐ. ܡܼܢ ܡ̈ܠܐܟܐ ܢܗܝܼܪ̈ܐ ܐܫܼܬܚܠܦܘ ܒܙܒܢ ܘܗܘܼܘ ܕܝܘ̈ܐ ܚܫܘܼܟ̈ܐ ܘܒܢܝ̈ܢܫܐ܆ ܒܙܒܢ ܗܘܝܢ ܛܒ̈ܐ ܘܒܙܒܢ ܟ̈ܐܢܐ. ܘܒܙܒܢ ܥܿܘ̈ܠܐ. ܘܒܪ̈ܝܬܐ ܬܘܼܒ ܐܚܪ̈ܢܝܬܐ ܕܡܼܢ ܐܣܛܘܼܟ̈ܣܐ ܐܝܼܬ ܐܡܼܬܝ ܕܠܐ ܐܝܼܬܝܗܘܢ ܗܘܼܘ. ܘܗܿܘܐ ܬܘܼܒ ܐܡܼܬܝ ܕܥܒܪܝܢ ܘܠܐ ܐܝܼܬܝܗܘܢ. ܥܒܘܕܐ ܕܝܢ ܘܒܪܘܝܐ ܐܝܼܬܝܐ ܡܬܘܼܡܝܐ. ܐܝܼܬܘܗܝ ܗܘܼܐ ܘܐܝܼܬܘܗܝ ܐܡܝܼܢܐܝܼܬ. ܘܗܘܼ ܢܗܼܘܐ ܐܝܼܬܬܘ̄ ܠܥܿܠܡ ܥ݀ܠܡܝܢ. ܗܿܢܘ ܫܡܐ ܫܪܝܼܪܐ ܘܚܬܝܼܬܐ ܕܡܼܨܝܐ ܠܢ ܕܢܫܡܗ ܠܗܿܘ ܠܐ ܡܬܕܪܟܢܐ ܘܠܐ ܡܣܼܬܝܟܢܐ. ܘܕܠܥܼܠ ܡܼܢ ܟܿܠ ܫܡܐ ܘܟܘܢܝܐ ܕܡܫܼܬܡܗ ܒܫܡܝܐ ܘܒܐܪܥܐ. ܘܐܡܼܬܝ ܕܝܢ ܕܒܢܝܼܫܐ ܕܨܠܘܿܬܐ ܢܩܪܒ ܠܗܿ ܬܫܒܘܼܚܬܐ ܘܬܘܕܝܼܬܐ ܘܣܓܕܬܐ. ܘܒܥܘܼܬܐ ܘܬܟܫܦܬܐ ܘܦܝܿܣܐ. ܒܐܝܢܐ ܕܗܼܘ ܫܡܐ ܕܬܫܡܝܘܗܝ. ܡܩܒܠ ܨܠܘܼܬܟ. ܐܡܬܝ ܕܒܝܼܫܐ ܬܪܝܼܨܐ ܘܡܘܼܟܟܐ ܘܗܝܡܢܘܼܬܐ ܫܦܝܼܬܐ ܘܦܫܝܼܛܘܼܬܐ ܬܡܝܼܡܬܐ ܡܩܪܒ ܐܢܡܬ ܨܠܘܿܬܟ ܡܼܢ ܠܒܐ ܕܟܝܐ ܘܢܦܫܐ ܬܪܝܼܨܬܐ. ܟܕ ܣܟ ܠܐ ܡܼܬܪܢܐ ܐܢܬ ܥܠܘܗܝ ܕܡܘܼܬܐ ܘܨܠܡܐ ܡܪܟܒܐ. ܘܐܦܠܐ ܡܬܼܗܓܓ ܐܢܬ ܠܗ ܐܝܟ ܨܘܼܪܬܐ ܡܕܡ. ܐܘܿ ܕܡܘܼܬܐ ܕܡܼܢ ܗܿܠܝܢ ܕܡܼܬܚܙ̈ܝܢ. ܠܐ ܕܫܡܝܐ. ܘܠܐ ܕܪܩܝܥܐ. ܘܠܐ ܕܐܐܪ. ܘܠܐ ܕܫܡܼܫܐ. ܐܘܿ ܣܗܪܐ ܐܘܿ ܟܘܟ̈ܒܐ. ܘܠܐ ܕܢܘܼܗܪܐ ܗܿܢܐ ܡܼܬܚܙܝܢܐ. ܘܠܐ ܕܢܘܼܪܐ ܗܕܐ ܓܘܼܫܡܢܝܿܬܐ. ܘܠܐ ܕܝܡܐ ܘܠܐ ܕܝܒܫܐ. ܘܠܐ ܣܟ ܕܚܕ ܡܕܡ ܬܬܼܪܢܐ. ܐܘܿ ܬܬܼܚܫܒ ܥܠܘܗܝ. ܥܠ ܦܫܝܼܛܐ ܘܠܐ ܡܪܟܒܐ. ܘܠܐ ܕܢܦܿܠ ܬܚܝܬ ܚܘܼܫܒܐ ܐܘܿ ܡܼܬܕܪܟܢܘ̄ ܐܘܿ ܡܬܼܗܘܢܢܘܼܬܐ. ܗܿܘ ܓܝܪ ܕܒܪܐ ܟܿܠ ܕܡܼܬܚ̈ܙܝܢ ܘܕܠܐ ܡܬܚ̈ܙܝܢ. ܘܟܿܠ ܡܿܠܐܼ ܡܢܗ. ܘܗܼܘ ܠܐ ܡܬܼܥܪܐ ܘܠܐ ܡܣܼܬܝܟ. ܘܐܠܘ ܐܝܼܬ ܗܘܼܐ ܐܝܟ ܗܿܕܐ ܒܪܝܼܬܐ ܐܠܦ ܐ̈ܠܦܝܢ ܘܪ̈ܒܘ ܪ̈ܒܘܢ ܒܪ̈ܝܬܐ ܘܥܠ̈ܡܐ ܐܚܪ̈ܢܐ. ܠܐ ܣܟ ܡܣܝܟܝܢ ܗܘܼܘ ܠܗ. ܐܘܿ ܡܬܥܪܐ ܗܘܼܐ ܡܢܼܗܘܢ. ܘܒܟܿܠܕܘܟ ܟܿܠܗ ܐܝܼܬܘܗܝ ܕܠܐ ܫܘܼܢܝ ܘܕܠܐ ܫܘܼܚܠܦ ܘܕܠܐ ܙܘܼܥܙܥ. ܐܝܟܢ ܡܼܨܝܐ ܕܢܬܗܓܓ ܠܗ ܕܡܘܼܬܐ ܐܘܿ ܨܘܼܪܬܐ ܣܟ ܡܕܡ ܕܡܕܪܟܐ ܠܗ ܡܚܫܒܬܐ. ܡܕܢܚ ܕܝܢ ܘܡܢܗܪ ܠܪܥܝܢܐ ܕܗܘ̈ܢܐ ܫܦ̈ܝܐ ܘܠܒ̈ܘܬܐ ܕܟ̈ܝܐ. ܠܦܘܼܬ ܫܦܝܘܼܬܗܘܢ ܘܕܟܝܘܼܬܗܘܢ. ܘܡܪܝܼܩܘܼܬܗܘܢ ܘܨܠܝܼܠܘܼܬܗܘܢ. ܘܡܣܬܟܠܝܼܢ ܗܿܠܝܢ ܘܡܼܬܢܗܪܝܢ ܒܡܗܘܢ̈ܝܗܘܢ ܒܙܘ̈ܥܐ ܩܛܝܼܢ̈ܐ ܘܚܘܼܫܒ̈ܐ ܪ̈ܘܼܚܢܝܐ. ܘܡܕܡ ܕܠܐ ܡܼܬܡܠܠ ܒܠܫܢܐ ܕܒܼܣܪܐ. ܐܦܠܐ ܡܼܬܦܫܩ ܒܠܫܢܐ ܓܫܝܼܡܐ ܐܘܿ ܡܬܬܪܓܡ ܒܩܿܠܐ ܡܪܟܒܐ. ܘܥܠ 58 ܗܿܠܝܢ ܬܘܼܒ ܢܗܝܼܪܐܝܬ ܐܝܟܐ ܘܿܠܐ ܡܚܘܝܢܢ ܐܝܟ ܕܝܿܗܒܐ ܛܝܒܘܬܗ.. ܐܝܼܬ ܬܘܼܒ ܬܠܬܐ ܟܘܼܢ̈ܝܐ ܕܠܚܡܝܢ ܕܢܬܼܟܢܐ ܒܗܘܿܢ. ܗܿܘ ܕܐܝܼܬܘ̄ ܠܥܼܠ ܡܼܢ ܟܿܠ ܫܡ ܘܟܘܼܢܝ. ܐܠܐ ܡܼܢ ܣܥܘܼܪ̈ܘܬܗ ܕܠܘܬ݀ ܒܪ̈ܝܬܗ. ܝܼܠܦܢܢ ܕܒܗܘܢ ܢܟܢܝܘܗܝ ܘܢܫܡܝܼܘܗܝ. ܕܗܼܢܘܢ ܗܿܠܝܢ ܬܠܬܐ ܫܡܗ̈ܝܢ. ܚܿܒܫܝܢ ܘܡܣܝܟܝܢ ܠܟܿܠ ܫܡܐ ܘܟܘܼܢܝ ܕܐܫܬܡܗ ܒܗ. ܐܝܼܬܝܗܘܢ ܕܝܢ ܗܿܠܝܢ. ܛܒܿܐ ܘܥܬܝܼܪܐ ܘܚܟܝܼܡܐ. ܒܗܿܠܝܢ ܬܠܬܐ ܟܘܼܢ̈ܝܢ. ܡܣܝܟܝܢ ܟܿܗܠܘܢ ܫܡ̈ܗܝܢ ܕܐܬܕܟܪܢܢ ܡܼܢ ܠܥܠ. ܘܕܠܐ ܐܬܕܟܪܢܢ ܒܟܬܒܐ ܗܢܐ. ܘܠܿܚܡܝܢ ܠܗ ܡܪܐܢܐܝܼܬ. ܡܼ̰ܠ ܕܗܼܘ ܐܝܼܬܘܗܝ ܓܡܝܼܪܐ ܘܡܫܡܠܝܐ ܘܫܪܝܼܪܐ ܒܟܿܠܗܘܿܢ. ܛܒܿܐ ܗܿܘ ܓܝܪ ܘܡܒܘܼܥܐ ܕܟܿܛܒ̈ܢ. ܗܿܘ ܕܡܼܢ ܛܒܿܘܬܗ ܒܠܚܘܕ ܐܝܬܝܼ ܗܿܠܝܢ ܟܿܠܗܝܢ ܠܗܘܝܐ. ܕܡܬܼܚܙ̈ܝܢ ܘܕܠܐ ܡܬܼܚܙ̈ܝܢ. ܟܕ ܠܝܬ ܡܿܢ ܕܒܼܥܐ ܡܼܢܗ ܐܘܿ ܐܦܝܼܣܗ ܐܘܿ ܐܡܼܪ ܠܗ. ܡܛ݀ܠ ܕܠܝܬ ܗܘܼܐ ܟܝܢܐ ܐ̱ܚܪܢܐ ܐܘܿ ܐܘܣܝܐ ܐܚܪܬܐ ܕܩܕܡܘ̄ ܐܘܿ ܥܡܗ ܕܬܒܼܥ ܡܼܢܗ. ܐܠܐ ܒܗܿܝ ܕܐܝܼܬܘܗܝ ܛܒܿܐ ܒܟܝܿܢܗ ܘܟܿܠܗܿ ܛܒܿܘܼܬܐ. ܡܐܠܠܘܢ ܕܝܢ ܘܠܥܼܠ ܡܢ ܟܿܠ ܛܒܿܘܼܬܐ܇ ܒܛܝܒܘܼܬܗ ܥܒܼܕ ܗܿܠܝܢ ܟܿܠܗܝܢ ܘܐܝܬܝ ܠܗܘܝܐ. ܘܒܬܪ ܕܒܼܪܐ ܘܐܬܩܼܢ ܐܢܝܢ܆ ܠܐ ܫܒܼܩ ܐܢ̈ܝܢ ܫܚܝܼܡܐܝܬ. ܐܠܐ ܐܘܪܒ ܘܝܩܪ ܐܢܘܢ. ܘܐܛܐܒ ܠܗܘܿܢ ܘܐܥܼܬܪ ܐܢܘܢ ܒܟܿܠ ܛܘܼܒ̈ܝܢ. ܘܐܡܝܼܢܐܝܼܬ ܕܠܐ ܫܠܘܐ ܡܛܐܒ ܠܗܘܢ. ܒܗܿܝ ܕܒܛܝܼܠ ܠܗ ܥܠܝܗܘܢ. ܘܡܦܪܢܣ ܠܗܘܢ. ܘܡܕܒܪ ܘܡܢܿܛܪ ܘܡܫܘܙܒ. ܡܕܝܢ ܗܼܘ ܒܠܚܘܼܕܘܗܝ ܐܝܼܬܘ̄ ܛܒܿܐ [ܡܪܢܐܝܬ ܕܠܐ ܣܟ ܡܫܬܚܠܦ ܡܢ ܛܒܘܬܗ. ܒܗܿܝ ܕܟܝܢܐܝܬ ܐܝܬܘܗܝ ܛܒܐ] ܘܡܐܛܒܢܐ.. ܥܬܝܼܪܐ ܕܝܢ ܐܝܼܬܘܗܝ ܗܟܘܬ݀ ܡܪܐܢܐܝܼܬ ܘܡܒܘܼܥܐ ܕܟܿܠ ܥܘܼܬܪ̈ܝܢ. ܘܝܿܗܘܼܒܐ ܘܡܫܟܢܢܐ. ܘܡܥܬܪܢܐ ܓܡܝܼܪܐ ܕܐܥܬܪ ܘܡܥܬܪ ܠܟܿܠ. ܘܗܼܘ ܠܐ ܡܬܼܒܨܪ. ܐܘܿ ܣܟ ܚܿܣܪ. ܘܝܬܝܼܪ ܡܼܢ ܝܨܝܼܦܘܬܐ ܕܢܣܿܘܒ̈ܐ ܠܡܫܼܩܠ܆ ܝ݀ܨܦ ܗܼܘ ܘܨ݀ܒܐ ܘܪܓܝܓ ܠܡܬܠ. ܗܼܘ ܐܥܬܪ ܠܡ̈ܠܐܟܐ ܒܫܘܼܟ̈ܢܐ. ܘܠܫܡܿܝܐ ܒܢܗܝܼܪ̈ܐ. ܘܠܡܘܙܠܬܐ ܒܚܝܠ̈ܘܬܐ. ܘܠܐܐܪ ܒܥܢ̈ܢܐ. ܘܠܟܿܠܗ ܪܩܝܼܥܐ ܒܫܘܼܚܠ̈ܦܐ ܘܓܢ̈ܣܐ ܕܛܝܪܐ ܘܦܪ̈ܚܬܐ. ܠܐܪܥܐ ܒܐܝ̈ܠܢܐ ܘܥܣܼ̈ܒܐ ܘܝܥܝ̈ܬܐ. ܠܡܪ̈ܓܐ ܒܗܒܒ̈ܐ ܘܙܗܪ̈ܐ ܘܫܘܼܫ̈ܢܐ܇ ܠܛܘܼܪ̈ܐ ܒܐܪ̈ܙܐ ܘܫܪ̈ܘܝܢܐ. ܘܡܒܘܼ̈ܥܐ ܘܥܝܢ̈ܬܐ. ܠܦܩ̈ܥܬܐ ܒܢܗܪ̈ܘܬܐ ܘܫܼܦ̈ܥܐ. ܠܬܗܘܼܡ̈ܐ ܒܩܒܝ̈ܬܐ ܘܝܡ̈ܡܐ ܠܐ ܡܬܼܥܒܪ̈ܢܐ. ܠܝܡܡ̈ܐ ܬܘܼܒ ܘܠܢܗܪ̈ܘܬܐ ܒܪ̈ܚܫܐ ܠܐ ܡܣܬܝܟ̈ܢܐ ܕܢܘܼ̈ܢܐ ܘܩܝ̈ܛܐ ܘܬܢܝܢ̈ܐ. ܠܝܒܝܼܫܬܐ ܬܘܼܒ ܒܚܝܘ̈ܬܐ ܘܒܥܝܪ̈ܐ ܘܪ̈ܟܫܐ ܘܒܩܪ̈ܐ ܘܥܢ̈ܐ ܘܪ̈ܡܟܐ ܘܫܝܪ̈ܬܐ ܕܟܿܠ ܓܢܼܣ̈ܝܢ. ܐܦܩܼ ܬܘܼܒ ܡܼܢ ܐܪܥܐ ܟܝܿܢܐ ܝܩܝܼܪ̈ܐ ܠܚܫܚܬܐ ܕܒܢܝ̈ܢܫܐ 59 ܘܩܘܼܝܡ ܥ݀ܠܡܐ. ܕܐܝܟ ܡܼ̈ܛܐܠܐܣ ܐܘܟܝܼܬ ܢܦ̈ܩܐ ܘܚܦܪ̈ܐ ܕܕܗܒܐ ܘܣܐܡܐ ܘܐܢܟܐ ܘܢܚܫܐ ܘܐܒܪܐ ܘܦܪܙܠܐ ܥܡ ܐܕܫ̈ܐ ܐܚܪ̈ܢܐ ܕܠܐ ܡܢܝܢܐ: ܥܡ ܛܒ̈ܥܐ ܛܒ̈ܐ ܘܟܐܦ̈ܝ ܫܘܼܒܚܐ܆ ܘܒܪ̈ܘܠܐ ܘܝܩܘܼܢ̈ܬܐ ܘܙܡܪ̈ܓܕܐ ܘܩܪ̈ܟܕܢܐ ܘܣܦܝܼ̈ܠܐ ܘܝܫܦܗ ܒܐܘܨܪ ܐܪ̈ܙܐ ܘ݀ܫܦܗ ܘܣܕܘܢ ܥܡ ܫܪܟܐ ܕܝܼܕܝܼܥܝܼܢ ܘܫܟܝܼܚܝܢ. ܐܣܼܩ ܬܘܼܒ ܡܼܢ ܝܡܐ ܡܪ̈ܓܢܝܬܐ ܛܒ̈ܬܐ ܘܝܩܝܼܪ̈ܬܐ ܕܡܝ̈ܐ. ܥܡ ܫܪܟܐ ܕܚܠ̈ܝܼܙܘܢܐ ܘܐܪ̈ܓܘܢ ܘܨܘܼܒ̈ܥܐ ܫܦܝܼܪ̈ܐ. ܐܥܼܬܪ ܬܘܼܒ ܠܒܢܝ̈ܢܫܐ ܘܠܪ̈ܟܫܐ ܘܒܥܝܼܪ̈ܐ. ܒܚܝܠܐ ܘܓܢܒܪܘܼܬܐ ܘܠܒܝܼܒܘܼܬܐ ܘܡܚܡܣܢܢܘܬܐ. ܥܡ ܪ̈ܒܘ ܪ̈ܒܘܢ ܫܪ̈ܒܐ ܘܣܿܥܘܪ̈ܘܬܐ ܡܝܩܪ̈ܬܐ ܘܝܩܝܼܪ̈ܬܐ ܕܐܥܼܬܪ ܠܥܿܠܡܐ ܡܼܬܝܕܥܢܐ ܘܡܼܬܚܙܝܢܐ. ܟܕ ܠܝܬ ܕܐܦܝܼܣܗ ܘܒܥܼܐ ܡܼܢܗ. ܘܗܿܢܘ ܥܬܝܼܪܐ ܡܪܐܢܝܐ ܕܐܥܼܬܪ ܠܟܿܠ ܫܦܝܼܥܐܝܬ ܘܠܡܝܐܝܼܬ ܘܓܡܝܼܪܐܝܼܬ. ܘܗܼܘ ܣܟ ܠܐ ܚܣܼܪ ܐܘܿ ܚܿܣܪ. ܐܘܿ ܡܬܒܨܪ ܡܼܢ ܥܬܝܼܪܘܬܗ ܡܫܡܠܝܬܐ܀ ܚܟܝܼܡܐ. ܐܘܟܝܼܬ ܚܟܝܼܡ ܒܟܿܠ ܡܬܐܡܪ ܘܐܝܼܬܘ̄. ܒܗܿܝ ܕܗܼܘ ܐܝܼܬܘܗܝ ܚܟܝܼܡܐ ܡܫܡܠܝܐ ܘܡܪܢܝܐ ܘܓܡܝܪ ܒܚܟܡܬܐ ܟܝܢܝܬܐ. ܡܛܠ ܕܡܢܗ ܢ݀ܒܥ̈ܢ ܟܿܠ ܚܼܟ̈ܡܢ ܘܡܼܬܝܗ̈ܒܢ ܟܿܠ ܝܕ̈ܥܢ. ܘܡܢܘܼ ܡܿܨܼܐ ܕܢܣܝܟ ܐܘܿ ܕܢܕܪܟ ܚܟܡܼܬܗ ܡܠܝܬ݀ ܟܿܠ ܦܘܼܪ̈ܫܢ. ܘܝܼܕܥܬܗ ܚܿܟܡܬ݀ ܟܿܠ ܣܘܼܥܪ̈ܢ. ܘܟܿܠ ܝܕ̈ܥܢ. ܘܡܢܘܼ ܡܿܨܼܐ ܕܢܣܝܟ ܐܘܿ ܕܢܕܪܟ ܚܟܡܼܬܗ ܡܿܠܝܬ݀ ܟܿܠ ܦܘܼܪ̈ܫܢ. ܘܝܼܕܥܬܗ ܚܿܟܡܬ݀ ܟܿܠ ܣܘܼܥܪ̈ܢ. ܘܟܿܠ ܡܼܠ̈ܝܢ ܘܟܿܠ ܚܘܼܫ̈ܒܝܢ ܕܗܘܘ ܘܗܿܘܝܢ. ܓܠܝܐܝܼܬ ܘܟܣܝܐܝܬ. ܘܒܗܘܢ ܒܬܐܘܘ̈ܢܐ ܟܣ̈ܝܐ ܘܥܡܝܼܩ̈ܐ ܕܠ̈ܒܘܬܐ. ܘܗ̈ܘܢܐ ܕܟܿܠܗܘܢ ܡ̈ܠܝܼܠܐ. ܐܝܟ ܗܿܘ ܕܼܢ ܟܼܕܘܼ ܗܘܼܘ ܘܐܫܬܡܠܝܼܘ ܐܝܟ ܕܥܬܝܼܕܝܢ ܕܢܗܼܘܘܢ. ܐܘܿ ܢܬܬܙܝܼܥܘ ܒܗܢ ܘܡܚܫܒܬܐ܆ ܩܕܡ ܝܕܥ ܐܢܘܢ ܩܕܡ ܬܪ̈ܡܝܬܗ ܕܥܿܠܡܐ. ܘܗܼܘ ܝܗܼܒ ܘܫܟܢ ܪܘܼܚܐ ܕܚܟܼܡܬܐ ܘܡܕܥܐ ܘܣܘܟܠܐ ܘܝܼܕܥܬܐ ܘܕܡܩܕܡܘܼܬ ܒܘܕ̈ܩܐ ܕܥܬܝܼܕ̈ܬܐ ܠܡܠܐܟ̈ܐ ܘܠܒܢܝ̈ܢܫܐ ܒܚܟܼܡܬܐ ܪܒܬܐ ܘܬܗܝܼܪܬܐ. ܘܠܐ ܣܟ ܡܼܬܕܪܟܢܝܼܬܐ ܠܥܒ̈ܝܼܕܐ. ܒܼܪܐ ܘܐܩܝܼܡ ܠܚܝ̈ܠܘܬܐ ܫܡ̈ܝܢܐ. ܘܛܟܼܣ ܠܬܐܓܡ̈ܝܗܘܢ ܘܠܓܘܕ̈ܝܗܘܢ ܘܠܟܢܼܫ̈ܝܗܘܢ ܘܠܦܘܼܠܚܢܗܘܢ ܘܬܫܡܫܬܗܘܢ ܘܡܼܬܚ ܠܫܡܿܝܐ ܘܐܟܪܟ ܠܡܘܙܠܬܐ. ܘܣܕܪ ܠܢܗܝܼܪ̈ܐ ܘܬܚܿܡ ܠܡܪܕܝܬܗܘܢ ܘܙܘܥܝ̈ܗܘܢ ܘܡܬܟܪܟܢܘܬܗܘܢ ܘܟܿܠܗ ܢܿܡܘܣܗܘܢ. ܘܐܫܼܒ ܠܐܐܪ ܗܿܢܐ ܠܣܘܩܐ ܕܟܿܠ ܕܚܝ܆ ܘܡܬܼܬܙܝܼܥ. ܘܠܩܘܼܝܡ ܒܪܝܼܬܐ ܘܡܛܟܣܘܼܬ ܥܢ̈ܢܐ ܘܡܼܛܪ̈ܐ ܘܪ̈ܣܝܼܣܐ. ܘܬܚܡܗ ܒܫܘܚܠ̈ܦܐ ܬܗܝܼܪ̈ܐ. ܠܢܛܝܼܪܘܼܬܐ ܘܬܪܒܝܼܬܐ ܘܫܦܝܼܪܘܬ ܩܘܼܝܡܐ 60 ܘܡܪܕܝܬܐ ܕܥܿܠܡܐ. ܒܚܟܼܡܬܐ ܪܒܬܐ ܘܠܐ ܡܬܕܪܟܢܝܼܬܐ. ܛܟܼܣ ܙܒ̈ܢܐ ܘܫܢ̈ܝܐ ܘܝܪ̈ܚܐ ܘܫܒ̈ܐ ܘܐܝܡ̈ܡܐ ܘܠܝ̈ܠܘܬܐ ܘܫܥ̈ܐ ܘܥܕ̈ܢܐ. ܘܒܪܐ ܘܬܩܢ ܒܢܝ̈ܢܫܐ ܘܒܥܝܼܪ̈ܐ ܘܚܝ̈ܘܬܐ ܘܦܪ̈ܚܬܐ ܘܪ̈ܚܫܐ ܘܫܪܟܐ ܕܓܢܼܣ̈ܐ ܕܟܿܠ ܕܚܝ ܘܪܚܫ ܘܡܼܬܬܙܝܼܥ ܒܕܝܼܠ̈ܝܬܗܘܢ. ܘܐܕܫ̈ܝܗܘܢ ܘܩܢܘܼܡ̈ܝܗܘܢ ܘܓܘ̈ܢܝܗ̄ ܘܡܦܬܟܘܼܬܗܘܢ ܘܨܘܼܬܗܘܢ ܘܥܝܕܗܘܢ ܘܣܥܘܼܪ̈ܬܗܘܢ ܘܬܫܡܫ̈ܬܗܘܢ ܘܡܦܪܝܢܘܼܬܗܘܢ ܘܬܘ̈ܠܕܬܗܘܢ ܘܬܘܪܣܝܗܘܢ ܘܬܪܒܝܼܬܗܘܢ ܘܚܠܝܼܛܘܼܬܗܘܢ ܘܦܪܝܼܫܘܼܬܗܘܢ ܘܟܢܼܫ̈ܝܗܘܢ ܘܡܒܕܪܘܬܗܘܢ ܥܡ ܣܿܓܝ̈ܐܬܐ ܕܒܟܝܿܢܗܘܢ ܘܒܕܝܼܠ̈ܝܬܗܘܢ. ܒܚܟܼܡܬܐ ܬܗܝܼܪܬܐ ܪܩܼܥ ܠܐܪܥܐ ܘܐܪܘܚ ܦܩ̈ܥܬܐ ܘܥܠܝܼ ܛܘܼܪ̈ܐ ܘܐܣܼܩ ܪ̈ܡܬܐ. ܘܨܒܬ ܐܢܝܢ ܒܐܝܼܠ̈ܢܐ ܘܝܥܝ̈ܬܐ ܘܥܣܼ̈ܒܐ ܘܦܩ̈ܚܐ ܘܗܒ̈ܒܐ ܡܦ̈ܬܟܐ ܕܟܿܠܓܢܣ ܕܡܬܗܪܝܢ ܠܚܙ̈ܝܐ ܒܫܘܼܚܠܦ ܓܘܢܝ̈ܗܘܢ ܘܪܝܼܚܗܘܢ ܘܛܥܡ̈ܬܗܘܢ ܥܡ ܫܪܟܐ ܕܡܥܒܕ̈ܢܘܬܗܘܢ. ܟܕ ܐܪܥܐ ܕܢܿܦܩܝܢ ܡܢܗܿ ܚܕ ܗܼܘ ܟܝܿܢܗ ܘܠܐ ܓܘܢܐ ܐܝܼܬ ܠܗܿ ܘܠܐ ܛܥܡܐ ܘܠܐ ܪܝܼܚܐ. ܐܬܼܒܝܢ ܬܘܼܒ ܒܩܒܝ̈ܬܐ ܕܫܼܛܚ̈ܐ ܕܝܡ̈ܡܐ ܘܐܬܗܘܢ ܠܒܪܘܼܬܗܘܢ ܘܠܪܡܘܼܬܗܘܢ ܘܡܥܪܡܘܼܬܗܘܢ. ܘܐܬܕܡܪ ܐܝܿܟܢܐ ܚܒܝܼܫܐ ܗܿܝ ܟܿܠܗܿ ܡܬܬܙܝܼܥܢܘܼܬܗܘܢ. ܘܙܩܝܼܦܘܼܬ ܓܠ̈ܠܝܗܘܢ ܘܡܚܫܘܼܠ̈ܝܗܘܢ. ܠܓܘ ܡܼܢ ܬܚܘܼܡܐ ܕܚܠܐ ܪܦܝܐ ܘܒܕܝܪܐ. ܐܬܚܫܒ ܬܘܼܒ ܠܣܓܝܘܼܬ ܓܢܼ̈ܣܐ ܘܐܕܫ̈ܐ ܕܢܘܼ̈ܢܐ ܘܪ̈ܚܫܐ ܣܿܓܝ̈ܐܐ ܕܒܬܗܘܼܡ̈ܝܗܘܢ. ܥܡ ܡܪ̈ܓܢܝܬܐ ܫܒܝܼܚ̈ܬܐ ܘܟܐܦ̈ܝ ܫܘܼܒܚܐ ܕܒܥܘܼܡܩ̈ܝܗܘܢ ܘܡܢܐ ܐܣܿܓܐ ܘܐܡܪ ܥܠ ܚܟܼܡܬܐ ܡܠܝܬ݀ ܦܘܼܪ̈ܫܢܐ ܘܠܐ ܡܼܬܥܩܒܢܝܬܐ. ܕܠܐ ܡܼܨܝܐ ܠ̈ܡܠܐܟܐ ܘܠܒܢ̈ܝ ܐܢܫܐ ܟܿܠܗܘܢ ܕܢܒܼܨܘܢ ܘܢܕܪܟܘܢ ܒܼܨܪܐ ܙܥܘܪܐ ܬܗܘܼܡܐ ܪܒܐ ܘܥܘܼܡܩܐ ܠܐ ܡܬܼܡܫܚܢܐ ܕܚܟܼܡܬܐ ܘܝܼܕܥܬܐ ܕܗܿܘ ܚܟܝܼܡ ܒܟܿܠ ܒܠܚܘܼܕܘ̄. ܘܫܒܘܼܩ ܣܿܓܝ̈ܐܬܐ ܘܠܐ ܡܣܼܬܝܟ̈ܢܝܬܐ ܕܐܩܝܼܡ ܘܥܒܼܕ ܘܛܟܣ ܘܥܒܼܕ ܘܛܟܣ ܥܿܒܘܕܐ ܚܟܝܼܡܐ ܒܝܼܕܥܬܗ ܠܐ ܡܬܕܪܟܢܝܼܬܐ. ܘܗܦܘܼܟ ܠܘܬ݀ ܢܦܫܟ ܘܐܬܒܩܐ ܐܢܬ ܒܟ ܘܐܬܼܒܝܢ ܒܒܪܝܼܬܟ ܘܬܗܪ ܘܐܬܕܡܪ ܐܢܬ ܒܟ. ܐܝܟܢ ܒܟ ܡܣܝܟ̈ܢ ܟܿܠܗܝܢ ܒܪ̈ܝܬܐ ܕܡܬܼܝܕܥ̈ܢܐ ܘܡܬܪ̈ܓܫܢܐ. ܕܡܠ̈ܝܼܠܐ ܘܠܐ ܡܠ̈ܝܼܠܐ. ܕܪ̈ܓܘܫܐ ܘܠܐ ܪ̈ܓܘܫܐ. ܘܗܿܝ ܕܪܒܐ ܡܼܢ ܟܿܠܗܝܢ ܘܝܬܝܪ ܬܡܝܼܗܐ ܘܠܕܘܼܡܪܐ ܫܿܘܝܐ ܪܒܐ. ܕܥܒܝܼܕ ܐܢܡܬ ܒܨܠܡܗ ܘܕܡܘܼܬܗ ܕܥܒܘܼܕܟ. ܘܐܝܼܬܝܟ ܐܣܪܐ ܘܡܟܢܫܐ ܘܐܚܿܘܕܐ ܕܟܿܠܗܝܢ ܒܪ̈ܝܬܐ ܘܕܒܪܘܝܐ. ܘܐܼܠܘ ܪ̈ܒܘ ܫ̈ܢܝܢ ܚܝܐ ܗܘܝܼܬ ܒܥܿܠܡܐ. ܠܐ ܣܿܦܩ ܐܢܡܬ ܘܠܐ ܡܣܝܟ ܐܢܡܬ ܕܬܐܠܦ ܠܚܟܼܡܬܐ ܪܒܬܐ ܕܩܘܼܝܡܟ ܘܒܪܝܼܬܟ ܕܝܼܠܟ. ܡܕܝܢ ܥܠ ܒܪܘܼܝܟ ܘܫܪܟܐ ܕܒܪ̈ܝܬܗ ܘܐܡܪ̈ܙܐ ܪܘܪ̈ܒܐ ܘܚܟܼܡ̈ܬܐ ܬܗܝܼܪ̈ܬܐ ܕܛܡܝܪ̈ܢ ܒܟܝ̈ܢܐ ܘܗܘܿܝ̈ܐ. 61 ܐܝܟܢܐ ܡܿܨܼܐ ܐܢܬ ܠܡܕܪܟܘ ܐܘܿ ܠܡܣܝܟܘ ܝܕܥܬܐ ܕܥܠܝܗܘܢ. ܐܬܚܫܒ ܐܢܬ ܥܠ ܝܿܬܟ. ܐܝܟܢ ܡܚܝܕܐ ܢܦܫܟ ܪܘܼܚܢܝܿܬܐ ܘܢܗܝܼܪܬܐ ܘܩܛܝܼܢܬܐ ܘܡܩܒܠܢܝܼܬܐ ܘܕܗܘܢܐ ܘܕܝܕܥܬܐ. ܥܡ ܦܓܪܟ ܗܢܐ ܥܒܝܐ ܘܓܫܝܼܡܐ ܘܝܩܝܼܪܐ ܘܡܪܟܒܐ ܘܣܛܘܟܣܐ. ܘܐܼܠܘ ܐܝܟ ܕܐܡܿܪܬ ܪ̈ܒܘ ܫܢ̈ܝܐ ܚܝܐ ܗܘܼܝܬ܆ ܠܐ ܣܿܦܩ ܗܘܼܷܬ ܕܬܐܠܦ ܥܠ ܟܝܿܢܗܿ ܕܢܦܫܟ ܘܐܝܟܢܝܘܼܬܗܿ ܘܕܡܼܢ ܐܝܟܐ ܗܿܝ. ܘܡܢܝܘܬܗܿ ܘܐܣܘܝܐ ܕܝܿܠܗܿ ܘܪ̈ܓܫܝܗܿ ܘܕܝ̈ܠܝܬܗܿ ܘܡܥܒܕ̈ܢܘܬܗܿ. ܘܐܝܟܢ ܫܪܝܐ ܒܦܓܪܐ ܘܡܚܝܕܐ ܩܛܝܼܢܘܼܬܗܿ ܒܥܒܝܘܼܬܗ. ܐܦܠܐ ܬܘܼܒ ܥܠܘܗܝ ܕܦܓܪܐ ܡܿܨܼܐ ܐܢܬ ܠܡܕܪܟܘܼ ܟܝܿܢܗ ܘܩܘܼܝܡܗ ܕܒܓܒܪܐ ܘܙܥܘܪܘܬܗ ܕܒܐܢܡܬܬܐ. ܘܪܘܼܟܒ ܨܘܪ̈ܬܗ ܕܒܟܪܣܐ. ܘܩܒܝܼܥܘܼܬ ܗܕ̈ܡܘܗܝ ܓܘ̈ܝܐ ܘܒܪ̈ܝܐ. ܘܡܛܟܣܘܼܬ ܪ̈ܓܫܘܗܝ ܘܕܝ̈ܠܝܬܗܘܢ ܘܡܥܒܕ̈ܢܘܬܗܘܢ ܘܟܝ̈ܢܝܗܘܢ ܘܣܥܘܪ̈ܘܬܗܘܢ ܘܐܝܟܢ ܡܩܒܠ ܬܘܼܪܣܝܐ ܘܦܫܪܐ ܘܬܪܒܝܼܬܐ. ܘܐܝܟܢ ܐܝܼܬܝܗܘܢ ܟܘܼܡ̈ܘܼ ܐܘܟܝܼܬ ܚܠܼ̈ܛܐ ܒܒܼܣܪܐ ܘܒܓܪ̈ܡܐ ܘܒܘܪ̈ܝܕܐ. ܘܫܪ̈ܝܢܐ ܘܡܫܼܟܐ ܘܣܥܪܐ ܘܛܦܼܪ̈ܐ. ܘܐܝܟܢ ܪܗܿܛ ܚܝܠܐ ܕܡܐܟܘܼܠܬܐ ܘܫܩܼܝܐ ܒܟܿܠܗ ܓܘܼܫܡܐ ܡܼܢ ܣܥܪܐ ܘܥܕܡܐ ܠܛܦܼܪ̈ܐ. ܘܐܝܟܢ ܡܥܒܕ ܚܝܠܐ ܕܣܡܡ̈ܢܐ ܘܚܝܠܐ ܕܥܩܪ̈ܐ ܒܟܘܼ̈ܡܘ ܘܒܡܘܙܓܗ ܕܓܘܼܫܡܐ ܘܟܝܿܢܗ. ܥܡ ܣܿܓܝ̈ܐܬܐ ܕܐܦܠܐ ܫܡܗ̈ܝܗܘܢ ܡܣܝܟܝܼܢܢ ܕܢܐܡܪ. ܗܟܘܬ ܘܒܓܘܼܫ̈ܡܐ ܟܿܠܗܘܿܢ ܕܚܝ̈ܘܬܐ ܐܚܪ̈ܢܐ. ܘܒܟܿܠܗܘܿܢ ܟܝ̈ܢܐ ܘܗܘܝ̈ܐ ܕܒܐܪܥܐ ܘܒܝܡ̈ܡܐ ܘܢܗܪ̈ܘܬܐ ܘܒܐܐܪ ܘܒܪܩܝܼܥܐ ܘܒܡܘܙܠܬܐ ܘܒܫܿܡܝܐ. ܘܠܥܼܠ ܡܼܢ ܫܡܿܝܐ ܕܡܼܬܚܙ̈ܝܢ ܘܒܐܬܪ̈ܘܬܐ ܕܡܠܐܟ̈ܐ ܘܫܪܟܐ ܕܚܝ̈ܠܘܬܐ ܥ̈ܠܼܝܐ ܫܪܝܼܪܐܝܼܬ ܠܐ ܡܣܼܬܝܟܐ ܘܠܐ ܡܬܕܪܟܐ ܚܟܼܡܬܐ ܪܒܬܐ ܕܗܿܘ ܚܟܝܼܡ ܒܟܿܠ ܒܠܚܘܼܕܘܗܝ܀ ܗܿܢܘ ܚܟܝܼܡܐ ܘܓܡܝܼܪܐ ܘܡܫܡܠܝܐ ܘܠܗ ܙܕܿܩ ܕܢܟܢܐ ܘܢܫܡܗ ܚܟܝܼܡܐ ܒܠܚܘܼܕܘܗܝ. ܡܕܝܢ ܐܫܼܬܪܪܬ݀ ܕܚܟܝܼܡܐ ܗܘܼܝܘܼ ܡܪܢܝܐ ܕܠܝܬ ܣܟܐ ܠܣܘܼܟܠܐ ܕܝܕܥܬܗ. ܒܗܿܠܝܢ ܡܟܝܠ ܡܬܝܼܕܥ ܘܡܬܟܢܐ ܘܡܫܬܡܗ ܗܿܘ ܠܐ ܡܬܕܪܟܢܐ. ܗ̄ ܗܿܘ ܕܐܝܼܬܘܗܝ ܐܡܝܼܢܐܝܼܬ. ܘܐܝܼܬܘܗܝ ܛܒܿܐ ܘܥܬܝܼܪܐ ܘܚܟܝܼܡܐ ܓܡܝܼܪܐܝܼܬ ܘܡܫܡܠܝܐܝܬ. ܘܠܗ ܬܫܒܘܿܚܬܐ ܠܥܡܥܠܡܝܢܐܡܝܢ܀ ܘܒܗܿܠܝܢ ܫܠܡ ܩܦܠܐܘܢ ܕܫܒܥܐ ܒܝܕ ܐܠܗܐ ܕܚܝܠ ܘܥܕܪ ܀܀܀ Chapter 8 ܬܘܼܒ ܩܦܠܐܘܢ ܕܚ̄ ܥܡ ܐܠܗ ܕܡܚܟܡ. ܥܠܗܿܝ ܕܐܢ ܗܼܘ ܐܝܼܬܘ̄ ܥܠܼܬܐ ܕܟܿܠ ܥ̈ܠܼܠܢ ܘܒܪܘܼܝܐ ܕܟܿܠ ܒܪ̈ܝܢ. ܩܕܡܐܝܬ ܚܘܝܬ݀ ܡܠܼܬܐ ܒܝܕ ܐܠܗܐ ܕܚܟܡ. ܒܩܦ̈ܠܐܐ ܐܘܟܝܼܬ ܒܪ̈ܫܐ ܕܡܢ ܠܥܼܠ 62 ܐܬܐܡܪܘ܇ ܘܒܼܚܢܬ݀ ܟܝܿܢܐܝܼܬ ܒܡܕܥܐ ܘܣܘܼܟܿܠܐ ܡܢܼܗܘܢ ܕܗܘ̈ܝܐ. ܘܟܝܿܢܗ ܕܗܢ ܥ݀ܠܡܐ ܪܒܐ. ܘܟܝܿܢܗ ܕܒܪܢܫܐ ܐܝܼܬܘܗܝ ܥܠܡܐ ܙܥܘܪܐ ܕܐܝܼܬ ܡܪܐ ܘܥܒܘܕܐ ܘܒܪܘܝܐ ܠܗܢܐ ܟܿܠ. ܘܐܝܼܬܘܗܝ ܚܕ ܟܝܿܢܐ. ܘܡܪܐ ܘܫܠܝܼܛܐ ܕܡܬܝܼܕܥ ܒܬܠܬܐ ܩܢܘܼܡ̈ܐ ܐܘܟܝܬ ܕܝ̈ܠܝܬܐ. ܕܐܝܬܝܗܘܢ ܗܿܘܢܐ ܘܡܠܼܬܐ ܘܪܘܚܐ ܚܝܐ. ܘܕܝܼ̈ܠܝܬܗܘܢܿ ܝܠܘܕܘܬܐ ܘܝܼܠܝܼܕܘܬܐ ܘܢ݀ܦܘܩܘܬܐ. ܘܐܬܼܟܢܝܼܘ ܐܒܐ ܘܒܪܐ ܘܪܘܼܚܐ ܩܕܝܼܫܐ. ܬܠܝܬܝܘܬܐ ܣܓܝܼܕܬܐ ܚܕܐ ܐܠܗܘܼܬܐ ܡܫܒܚܬܐ. ܚܕ ܐܝܼܬܝܐ ܡܬܘܼܡܝܐ ܕܐܝܬܘ̄ ܐܡܝܼܢܐܝܬ. ܘܐܝܬܘܼܗܝ܇ ܛܒܿܐ ܘܥܬܝܼܪܐ ܘܚܟܝܼܡܐ. ܘܒܗܿܝ ܕܝܕܥܢܢ ܘܐܫܿܬܪܪܢܢ ܡܢܗ ܕܟܝܿܢܐ ܘܡܕܥܐ. ܕܚܕ ܗܘ ܒܠܚܘܼܕܘܗܝ. ܘܐܝܼܬܘܗܝ ܐܝܼܬܝܐ ܡܬܘܡܝܐ ܕܐܝܼܬܘ̄ ܐܡܝܼܢܐܝܼܬ ܕܠܝܬ ܗܘܼ ܡܼܢ ܩܕܡܘܗܝ ܐܦܠܐ ܗܿܘܐ ܡܼܢ ܒܿܬܪܗ. ܐܠܐ ܕܗܼܘ ܐܝܬܘܗܝ ܕܠܐ ܫܘܼܪܝ ܘܕܠܐ ܫܘܼܠܡ ܡܼܢ ܥ݀ܠܡ ܘܠܥܿܠܡ ܥܿܠܡܝܢ.. ܡܿܕܝܢ ܫܪܝܪܐܝܬ ܘܕܠܐ ܦܘܠܓ ܗܼܘ ܐܝܼܬܘܗܝ ܥܠܼܬܐ ܕܟܿܠ ܥ̈ܠܼܠܢ ܘܒܪܘܝܐ ܕܟܿܠ ܒܪ̈ܝܢ. ܩܕܡܐܝܬ ܒܗܿܝ ܕܐܝܼܬܘ̄ ܚܝܐ ܘܡܠܝܼܠܐ. ܘܡܛܠ ܕܗܼܘ ܒܪܐ ܠܟܿܠ ܕܚܝ ܘܡܠܝܼܠ ܥܡ ܫܪܟܐ ܕܒܪ̈ܝܬܐ܆ ܐܝܼܬܘܼܗܝ ܗܘܢܐ ܪܒܐ. ܘܗܘܢܐ܆ ܐܝܼܬܘܗܝ ܥܠܼܬܐ ܕܡܠܬܐ ܐܘܟܝܬ ܡܚܫܒܬܐ. ܘܕܚܝܘܼܬܐ ܕܐܝܼܬܘ̄ ܪܘܼܚܐ ܚܝܐ. ܠܘ ܕܗܘܼܘ ܡܼܢ ܒܬܪܗ. ܡܛܠ ܕܠܐ ܡܨܝܐ ܕܢܗܘܐ ܗܿܘܢܐ ܣܛܪ ܡܼܢ ܡܠܼܬܐ ܘܪܘܼܚܐ. ܐܠܐ ܕܥܡܗ ܘܒܗ ܐܝܼܬܝܗܘܢ ܟܝܿܢܐܝܬ ܘܐܘܣܝܐܝܼܬ. ܚܕ ܨܒܝܿܢܐ ܚܕ ܚܝܠܐ ܚܕ ܫܘܼܠܛܢܐ. ܚܕ ܡܪܘܼܬܐ. ܐܠܐ ܕܥܡܗ ܘܒܗ ܐܝܼܬܝܗܘܢ ܟܝܿܢܐܝܬ ܘܐܘܣܝܐܝܼܬ. ܚܕ ܨܒܝܿܢܐ ܚܕ ܚܝܠܐ ܚܕ ܫܘܼܠܛܢܐ. ܚܕ ܡܪܘܼܬܐ. ܚܕ ܐܠܗܘܬܐ. ܚܕܐ ܐܝܼܬܘܼܬܐ. ܬܠܝܼܬܝܘܼܬܐ ܠܐ ܦܠܝܼܓܬܐ ܘܠܐ ܡܣܬܕܩܢܝܼܬܼܐ ܘܠܐ ܒܠܝܼܠܠܐ. ܐܒܐ ܕܐܝܼܬܘ̄ ܗܘܢܐ. ܡܬܐܡܪ ܥܠܼܬܐ. ܘܒܪܐ ܕܐܝܼܬܘܗܝ ܡܠܼܬܐ. ܘܪܘܼܚܐ ܚܝܐ ܘܩܕܝܫܐ. ܡܬܼܐܡܪܝܢ ܥܠ̈ܬܼܢܐ ܕܝܢ ܥܠܼܬܐ ܘܥܡ ܥܠܼܬܐ. ܗܿܢܐ ܚܕ ܐܝܼܬܝܐ ܡܬܘܼܡܝܐ ܕܡܬܝܼܕܥ ܒܬܠܬܐ ܐܘܟܝܼܬ ܬܠܝܼܬܝܘܼܬܐ. ܗܘ ܒܠܚܘܼܕܘܗܝ ܐܝܼܬܘܗܝ ܕܐܝܼܬܘܗܝ ܐܡܝܼܢܐܝܬ. ܐܝܼܬܘܗܝ ܥܠܼܬܐ ܕܟܿܠ ܘܒܪܘܼܝܐ ܕܟܠ. ܘܥܠܼܬܐ ܡܿܢ ܐܝܼܬܘ̄ ܕܟܿܠ. ܒܗܿܝ ܕܐܝܼܬܘܗܝ܆ ܐܝܬܝܼ ܠܟܿܠ ܠܗܘܿܝܐ. ܘܗܘܼܐ ܥܠܼܬܐ ܕܟܿܠ ܕܗܘܼܐ.. ܒܪܘܝܐ ܕܝܢ. ܒܗܿܝ ܕܗܼܘ ܒܼܪܐ ܘܐܬܩܢ ܟܿܠ ܕܗܘܼܐ ܡܼܢ ܠܐ ܡܕܡ. ܘܒܗܿܝ ܕܐܡܼܪܢܢ ܡܼܢ ܠܐ ܡܕܡ ܒܪܐ ܘܐܬܩܢ ܒܪ̈ܝܬܐ. ܒܗܿܝ ܕܠܝܬ ܗܘܼܐ ܡܕܡ ܐ̱ܚܪܝܢ ܣܛܪ ܡܼܢܗ. ܕܡܼܢܗ ܢܒܼܪܐ ܘܢܬܩܢ ܠܒܪ̈ܝܬܐ. ܡܠܼܬܐ ܕܥܠ ܗܿܟܢ܆ ܣܿܓܝܐܐ ܗܿܝ ܘܓܢܝܼܙܐ ܘܐܪܙܢܝܐ ܘܟܣܝܐ ܡܼܢ ܠܐ ܕܟ̈ܝܐ. ܡܛܠ ܕܒܪܢܫܐ ܢܦܫܢܐ. ܠܐ ܡܩܒܠ ܪ̈ܘܼܚܢܝܬܐ. ܫܿܛܝܘܼܬܐ ܐܢ̈ܝܢ ܠܗ. ܒܪܢܫܐ ܕܝܢ ܪܘܼܚܢܐ܆ ܟܠܡܕܡ ܝܿܕܥ ܘܕ݀ܐܢ ܟܐܢܐܝܬ ܘܬܪܝܨܐܝܬ ܐܟܡܐ ܕܐܝܼܬܘܗܝ ܥܬܝܼܪܐܝܬ. ܒܗܿܝ ܕܨܠܝܼܠ ܗܘܢܗ ܘܫܦܝܐ ܢܿܦܫܗ ܘܕܟܐ ܠܒܗ ܘܡܪܝܼܩ ܪܥܝܿܢܗ ܡܼܢ 63 ܟܿܠ ܕܠܘܼ̇ܝܐ ܚܫܘܼܟܘܼܬܐ ܕܡܪ̈ܢܝܬܐ ܣܪ̈ܝܼܩܬܐ ܘܕܘܘ̈ܕܐ ܕܥ݀ܠܡܐ ܗܿܢܐ. ܗܿܘ ܕܢܗܝܼܪܐ ܚܙܬܗ. ܕܟܝܐܝܬ ܚܿ؛ܐ ܒܢܘܼܗܪܗ ܕܫܡܫܐ ܠܟܿܠܗܝܢ ܒܪ̈ܝܬܐ ܘܠܟܿܠܗܿ ܐܣܟܝܡܗ ܕܥܿܠܡܐ ܗܿܢܐ. ܗܿܘ ܕܝܢ ܕܟܪܝܼܗܐ ܘܡܚܝܼܠܐ ܘܢܣܝܼܣܐ ܚܘܬܗ܆ ܒܗܘܪܐܝܼܬ ܥܡܘܛܐܝܼܬ ܚܿܙܐ ܠܨܒ̈ܘܬܗ ܕܥ݀ܠܡܐ ܗܿܢܐ. ܘܠܐ ܡܼܨܝܐ ܕܢܚܘܼܪ ܠܘܬ ܢܘܗܪܗ ܥܙܝܼܙܐ ܕܫܡܼܫܐ ܗܿܢܐ. ܡܛ݀ܠ ܕܬܘܼܒ ܝܬܝܼܪ ܥ݀ܡܛܐ ܚܙܿܬܗ ܢܣܝܼܣܬܐ ܒܗܿܝ ܕܓ݀ܗܪ ܡܛܠ ܟܪܝܼܗܘܬܐ ܕܚܘܬܗ. ܡܕܝܢ ܚܒܝܼܒ̈ܝ ܕܕܟܝܘܼܬܐ ܕܠܒܢ ܢܐܨܦ ܘܡܪܝܼܩܘܼܬ݀ ܪܥܝܢܢ ܡܼܢ ܚܫ̈ܐ ܕܚܛܝܼܬܐ. ܘܕܫܦܝܘܬ݀ ܢܦܫܢ ܘܨܠܝܠܘܼܬ ܗܘܢܢ. ܘܗܝܕܝܢ ܟܿܠ ܡܕܡ ܢܗܝܼܪܐܝܬ ܘܬܪܝܨܐܝܼܬ ܚܿܙܝܢܢ ܒܥܝ̈ܢܝ ܬܪܥܝܼܬܢ. ܘܡܣܼܬܟܠܝܼܢܢ ܒܡܕܥܢ. ܘܡܪܓܫܝܼܢܢ ܒܝܼܕܥܬܢ ܩܛܝܼܢܬܐ ܘܪܘܼܚܢܝܿܬܐ. ܐܟܙܢܐ ܕܡܚܙܝܼܬܐ. ܟܡܐ ܕܡܬܼܡܪܩܐ ܫܦܝܐ ܘܢܗܪܐ ܘܚܿܙܐ ܒܗܿ ܐܢܫ ܐܦ̈ܘܗܝ ܘܟ݀ܠܗܝܢ ܨܘܪ̈ܬܗ ܫܦܝܐܝܼܬ ܘܬܪܝܨܐܝܼܬ. ܥܕܡܐ ܠܘܪ̈ܝܕܐ ܩܛܝܼܢ̈ܐ. ܘܡܢ̈ܝ ܣܥܪܐ ܘܬܠ̈ܝܼܦܐ ܕܥܝ̈ܢܐ ܘܙܦܼ̈ܐ ܕܒܗܝܢ. ܗܿܟܢܐ ܘܒܡܿܚܙܝܬܐ ܕܢܦܫܗ ܐܡܬܼܝ ܕܡܼܬܡܪܩܐ ܘܡܼܬܕܟܝܐ ܡܼܢ ܟܿܠܗܿ ܗܘܠܢܝܘܼܬܐ ܕܚܫ̈ܐ. ܚܿܙܝܐ ܠܟܿܠ ܡܕܡ ܪܘܚܢܐܝܼܬ ܘܡܣܼܬܟܠܐ ܘܡܫܬܪܪܐ ܘܩܢܝܐ ܦܝܿܣܐ ܕܐܝܟܢܐ ܗܘܼܐ ܟ݀ܠܡܕܡ ܡܼܢ ܠܐ ܡܕܡ. ܘܬܗܪܐ ܘܡܼܬܕܡܪܐ ܒܗܿܘ ܐܝܬܝܐ ܡܬܘܼܡܝܐ ܘܒܪܘܼܝܐ ܚܟܝܼܡܐ. ܗܿܘ ܕܠܝܬ ܗܼܘܐ ܡܼܢ ܩܕܡܘܗܝ ܘܠܐ ܗ݀ܘܐ ܡܼܢ ܒ݀ܬܪܗ. ܗܿܘ ܕܟܿܠ ܡܢܗ ܘܟܿܠ ܒܗ ܘܟܿܠ ܒܐܝܼܕܗ. ܗܿܘ ܕܡܢܗ ܟܿܠܡܕܡ ܘܠܘܬܗ ܗܿܦܟ ܟܿܠ ܡܕܡ ܗܿܘ ܕܒܗ ܐܝܼܬܘܗܝ ܟܿܠ ܡܕܡ. ܘܗܼܘ ܐܝܼܬܘ̄ ܒܟܠ ܡܕܡ. ܐܝܟ ܢܦܫܐ ܒܦܓܪܐ. ܘܐܝܟ ܚܡܝܼܡܘܼ̄ ܒܓܘܫܡܐ ܚܿܝܐ. ܘܐܝܟ ܢܘܼܗܪܐ ܒܐܐܪ. ܐܡܪܙܐ ܗܿܘ ܪܒܐ ܘܠܐ ܡܣܼܬܝܟܢܐ. ܬܗܼܪܐ ܗܿܘ ܟܣܝܐ ܘܠܐ ܡܬܼܦܫܩܢܐ. ܕܘܼܡܪܐ ܗܿܘ ܥܡܝܼܩܐ ܘܚܟܡܼܬܐ ܪܘܚܢܝܿܬܐ. ܘܡܿܢ ܕܐܫܼܬܘܝܼ ܕܢܣܼܬܟܠܝܘܗܝ ܘܢܪܓܫ ܒܗ ܒܝܕ ܕܟܝܘܼܬܗ ܘܩܕܝܼܫܘܼܬ݀ ܦܓܪܗ ܘܫܦܝܘܼܬ ܢܦܫܗ܆ ܗܿܘ ܚ݀ܙܐ ܢܘܼܗܪܗ ܘܛܥܿܡ ܚܝܠܘܼܬܗ. ܘܪܘܿܙ ܒܪܚܼܡܬܗ ܘܝܩܕ ܒܚܘܼܒܗ. ܘܡܫܬܠܗܒ ܘܡܫܬܓܪ ܒܢܘܼܪܐ ܡܚܕܝܢܝܼܬܐ ܕܣܐܦܐ ܒܗ. ܘܛ݀ܥܐ ܥ݀ܠܡܐ ܘܟܿ ܕܒܗ. ܘܐܡܝܼܢܐܝܬ ܒܗ ܡܐܨܕ ܘܗܪܓ ܘܡܬܓܘܐ ܘܡܼܬܥܠܐ ܠܪ̈ܘܡܐ ܠܐ ܡܬܼܡܫܚ̈ܢܐ ܕܝܼܕܥܬܐ ܫܪܝܼܪܬܐ ܘܪܘܼܚܢܝܿܬܐ. ܘܡܪܓܼܫ ܘܡܼܣܬܟܠ ܘܡܫܼܬܪܪ ܥܠ ܟܿܠܡܕܡ ܕܠܐ ܡܼܬܡܿܠܠ ܒܦܘܼܡܐ ܕܒܪܢܫܐ. ܘܠܐ ܡܬܬܪܓܡ ܒܠܫܢܐ ܕܒܣܪܐ. ܠܐ ܡܼܬܪܫܡ ܒܕܝܘܼܬܐ ܘܟܪܛܝܣܐ. ܠܐ ܡܣܬܝܟ ܒܡܐܡܪܐ ܘܬܫܥܝܼܬܐ. ܡܛ݀ܠ ܕܠܘܼ ܡܪܟܒܐ ܗܿܘ ܡܕܡ ܕܚܿܙܐ ܘܡܼܣܬܟܠ܆ 64 ܕܢܼܬܦܫܩ ܘܢܬܝܕܥ ܒܡܠܼܬܐ ܡܪܟܒܬܐ ܐܘܿ ܒܓܘܼܫܡܐ ܕܟܪܛܝܣܐ. ܐܠܐ ܕܘܡܝܐ ܗܿܘ ܕܚܙܼܬܐ ܪܘܚܢܝܿܬܐ ܕܡ̈ܠܐܟܐ ܪ̈ܘܼܚܢܐ ܘܠܐ ܡܪ̈ܟܒܐ. ܐܝܟ ܛܟܣܼܐ ܕܚܫܚܬܐ ܕܚܙܼܬܐ ܘܬܐܘܪܝܐ ܕܥܿܠܡܐ ܚܼܕܬܐ ܕܥܬܝܼܕ ܕܢܗܼܘܐ ܘܢܬܼܒܣܡܘܢ ܛܒ̈ܐ ܘܙܕܝܼܩ̈ܐ. ܡܕܝܢ ܫܪܝܪܐܝܼܬ ܚܕܐ ܗܿܝ ܛܒܿܬܐ ܩܕܡܿܝܬܐ ܘܥܠܼܬܐ ܕܟܿܡܕܡ ܕܒܫܡܿܝܐ ܘܒܪܩܝܼܥܐ ܘܒܐܐܪ ܘܒܐܪܥܐ ܘܒܝܡ̈ܡܐ ܘܒܬܗܘܼܡ̈ܐ. ܗܼܝ ܗܘܼܬ݀ ܘܐܝܼܬܝܗܿ ܥܠܼܬ݀ ܟܿܠ ܥ̈ܠܼܠܢ. ܘܒܪܝܬ݀ ܟܿܠ ܒܪ̈ܝܢ. ܠܝܬ ܗܘܼܐ ܡܕܡ ܘܠܝܬ ܘܠܐ ܗܿܘܐ. ܣܼܛܪ ܡܼܢ ܥܠܼܬܐ ܩܕܡܝܬܐ ܗܿܝ ܕܐܝܼܬܝܗܿ ܐܡܝܼܢܐܝܬ ܘܠܝܬ ܠܥܼܠ ܡܢܗܿ. ܘܠܐ ܠܗܠ ܡܢܗܿ. ܘܠܐ ܠܒܪ ܡܢ̈ܿ. ܘܠܐ ܠܟܐ ܡܢܗܿ. ܘܐܟܚܕܐ ܠܡܐܡܪ ܦܣܘܼܩܐܝܬ ܘܡܣܝܟܐܝܼܬ. ܠܝܬ ܣܛܼܪ ܡܢܗܿ. ܡܕܝܢ ܗܼܘ ܐܝܼܬܘܗܝ ܥܠܼܬ݀ ܟܿܠ ܥ̈ܠܼܠܢ. ܘܒܪܝܬ݀ ܟܿܠ ܒܪ̈ܝܢ. ܘܠܗ ܫܘܼ̄ ܘܬܘܕܝܼܬܐ ܡܼܢ ܟܿܠ ܐܡܝܢ܀ ܘܒܗܿܠܝܢ ܫܠܡ ܩܦܠܐܘܢ ܕܬܡܢܝܐ ܒܝܕ ܐܠܗܐ ܕܚܟܡ܀ Chapter 9 ܬܘܼܒ ܥܡ ܐܠܗܐ ܕܡܗܕܐ ܩܦܠܐܘܢ ܕܛ̄ ܥܠܗܿܝ ܕܐܢܗܘܼ ܝ݀ܨܦ ܘܡܕܒܪ ܟܿܠ ܘܒܛܝܼܠ ܠܗ ܥܠ ܟܿܠ܆ ܐܘܿ ܠܐ. ܗܿܘ ܕܐܝܼܬܘܗܝ ܐܡܝܼܢܐܝܬ ܐܝܼܬܝܐ ܡܬܘܼܡܝܐ. ܘܥܠܼܬ݀ ܟܿܠ ܥ̈ܠܼܠܢ. ܘܒܪܘܝܐ ܕܟܿܠ ܒܪ̈ܝܢ. ܕܗܼܘ ܒܠܚܘܕܘܗܝ ܐܝܼܬܘ̄ ܐܡܝܼܢܐܝܼܬ ܕܠܐ ܫܘܼܚܠܦ. ܘܗܼܘ ܒܪܐ ܘܐܬܩܢ ܟܿܠ ܡܕܡ ܡܼܢ ܠܐ ܡܕܡ ܐܝܟ ܕܗܼܘ ܠܚܘܼܕ ܝ݀ܕܥ. ܘܐܝܠܝܢ ܕܫܘܝܢ ܘܨ݀ܒܐ ܠܡܓܠܐ ܠܗܘܿܢ. ܡܛ݀ܠܕܗܼܘ ܒܪܐ ܘܥܒܼܕ ܟܿܠܡܕܡ ܠܗ ܐܠܨܐ ܘܡܬܬܚܝܼܒܐ. ܡܐܠܠܘܢ ܘܡܿܨܼܐ ܕܢܐܨܦ ܘܢܕܒܪ ܟܿܡܕܡ ܐܝܟ ܨܒܝܿܢܗ ܘܐܝܟ ܕܫܪ ܠܗ. ܗܿܝ ܕܗܼܘ ܒܛܝܼܠ ܠܗ ܥܠ ܟܿܠ ܡܕܡ. ܡܛܠ ܕܗܼܘ ܐܝܼܬܘ̄ ܡܪܝܐ ܕܟܿܠܡܕܡ ܘܐܚܝܼܕ ܟܿܠ ܡܕܡ. ܘܐܢ ܐܒܐ ܘܐܡܐ ܕܟܝܢܐ ܕܒܥܿܠܡܐ ܗܿܢܐ. ܝܨܿܦܝܢ ܚܦܝܼܛܐܝܼܬ ܘܡܕܒܪܝܢ ܬܪܒܝܼܬܐ ܕܒܢܝ̈ܗܘܢ ܘܡܦܪܢܣܝܢ ܩܘܼܣܡ ܚܝ̈ܝܗܘܢ. ܘܣܓܝܼ ܒܛܝܼܠ ܠܗܘܢ ܥܠ ܚܘܼܠܡܢܗܘܢ ܘܢܛܝܼܪܘܼܬ. ܘܠܐ ܣܟ ܡܗܡܝܢ ܠܐ ܒܐܝܼܡܡܐ ܘܠܐ ܒܠܠܝܐ. ܒܗܿܝ ܕܟܝܿܢܐܝܬ ܣܝܼܡ ܒܗܘܢ ܚܘܼܒܐ ܐܒܗܝܐ ܕܠܘܬܗܘܢ. ܘܪܚܡܼܬܐ ܚܒܝܼܒܬܐ ܘܚܕܘܼܬܐ ܕܒܗܘܿܢ. ܡܢܟܿܠܦܪܘܿܣ ܐܠܨ ܠܗܘܢ ܟܝܿܢܐ ܕܪ̈ܚܼܡܐ ܐܒܗ̈ܝܐ ܕܒܗܘܿܢ ܕܢܐܨܦܘܢ ܕܒܢ̈ܝܗ̄ ܚܦܝܼܛܐܝܬ ܘܢܕܒܪܘܢ ܐܢܘܢ ܫܦܝܼܪ. ܘܒܒܛܝܼܠܘܼܬܐ ܣܿܓܝܐܬܐ ܢܪܒܘܢ ܐܢܘܢ ܘܢܩܝܼܡܘܢ ܚܝ̈ܝܗܘܢ ܟܿܠ ܙܒܢܐ ܒܙܒܢܗ ܠܦܘܼܬ ܩܘܡ̈ܬܗܘܢ. ܘܐܝܟ ܡܫܘܼܚܬܐ ܕܬܪܒܝܼܬܗܘܢ. ܒܙܒܢ ܚܠܒܐ ܪܟܝܼܟܐ. ܘܬܘܼܒ ܒܬܪ ܩܠܝܼܠ ܒܫܩܼ̈ܝܐ ܘܣܪ̈ܦܐ ܕܡܼܢ ܩܡܼܚܐ ܘܚܠܒܐ ܘܬܘܼܒ ܒܬܪܟܢ ܒܬܘܪ̈ܣܝܐ ܪ̈ܦܝܐ ܘܪ̈ܟܝܼܟܐ. ܘܒܬ ܟܿܠ ܡܕܡ ܒܡܐܟܘܼܠܬܐ ܕܟܠܡܕܡ. ܗܟܘܬ݀ ܘܒܡܣܚ̈ܘܬܐ ܘܡܫ̈ܚܐ ܘܟܘܼܪܟ ܦܣܼܩ̈ܝܬܐ ܘܥܪ̈ܣܘܢܝܬܐ ܩܠ̈ܝܼܠܬܐ 65 ܠܡܼܬܛܥܢܘ ܘܠܡܬܢܕܢܕܘ. ܘܒܙܒܢ ܟܘܼܪ̈ܗܢܐ ܠܡܣܡܣܡܘܼ. ܘܠܡܼܥܨܒ ܘܠܡܐܣܝܘܼ ܟܪܝܼܗܘܼܬܐ ܐܝܿܕܐ ܕܗܼܝ. ܘܠܡܪܕܐ ܐܢܘܢ ܒܝܘܼܠܦ̈ܢܐ ܕܚܿܫܚܝܢ ܠܗܘܿܢ. ܘܠܡܠܦܘ ܐܢܘܢ ܘܐܘܡܢ̈ܘܬܐ ܠܩܘܼܝܿܡ ܚܝ̈ܝܗܘܢ ܥܡ ܫܪܟܐ ܕܣܿܓܝ̈ܐܬܐ ܕܡܣܼܬܥܪ̈ܢ ܡܼܢ ܐܒ̈ܗܐ ܠܘܬ݀ ܒܢ̈ܝܐ ܒܝܨܝܼܦܘܼܬܐ ܪܒܬܐ ܥܡ ܒܛܝܼܠܘܬܐ ܣܿܓܝܐܬܐ. ܐܝܟ ܕܠܟܿܠ ܐܡܢ ܝܼܕܝܼܥܐ ܡܼܢ ܟܝܿܢܐ ܘܢܼܣܝܿܢܐ. ܘܐܢ ܐܒ̈ܗܐ ܕܒܼܣܪܐ ܗܿܕܐ ܟܿܠܗܿ ܝܨܝܼܦܘܼܬܐ ܪܒܬܐ ܐܝܼܬ ܠܗܘܢ ܥܠ ܒܢܝ̈ܗܘܢ ܟܕ ܒܝܼܕܥܬܐ ܘܠܐ ܡܗܡܝܢܘܼܬܐ ܡܕܒܪܝܢ ܠܗܘܢ ܘܡܦܪܢܣܝܢ ܩܘܼܝܡ ܚܝ̈ܝܗܘܢ ܘܣܿܓܝܼ ܒܛܝܼܠ ܠܗܘܿܢ ܥܠ ܬܪܒܝܼܬܗܘܢ ܘܢܛܝܪܘܼܬܗܘܿܢ ܘܡܪܕܘܬܗܘܢ. ܡܕܝܢ ܟܡܐ ܝܬܝܪܐܝܼܬ ܗܿܘ ܐܒܐ ܡܪܚܡܢܐ ܘܚܝܘܼܣܬܢܐ ܗܿܘ ܡܪܐ ܛܒܿܐ ܘܫܦܝܼܥܐ ܒܪܚܡܼܬܐ ܟܝܿܢܝܬܐ ܘܪܚܡܼܬܐ ܪܘܼܚܢܝܿܬܐ. ܗܿܘ ܒܪܘܝܐ ܘܥܒܘܼܕܐ ܘܡܬܩܢܢܐ ܚܟܝܼܡܐ ܕܥܒܕܢ ܒܨܠܡܗ ܘܕܡܘܼܬܗ ܝܿܨܦ ܘܡܦܪܢܣ ܠܢ ܘܠܟܿܠܗܿ ܒܪܝܼܬܗ. ܘܒܛܝܼܠ ܠܗ ܣܿܓܝܼ ܥܠ ܩܘܼܝܡܐ ܘܢܛܝܼܪܘܼܬܐ ܕܟܿܠ. ܘܗܿܠܝܢ ܠܘ ܟܕ ܡܫܦܠ ܐܘܿ ܠܐܐܪ ܐܘܿ ܬܥܿܫ ܒܡܪ̈ܢܝܬܐ ܐܝܟ ܥܒ̈ܝܼܕܐ. ܐܠܐ ܪܡܼܙܗ ܡܕܒܪ ܘܡܦܪܢܣ ܘܡܩܝܼܡ ܘܡܢܿܛܪ ܘܡܪܒܐ ܘܡܬܪܣܐ ܘܡܐܚܐ ܠܟܿܠ. ܘܐܟܙܢܐ ܕܐ̱ܢܫ ܝ݀ܨܦ ܘܡܕܒܪ ܚܝ̈ܘܗܝ ܒܝܕܥܬܐ ܘܚܟܼܡܬܐ ܟܡܐ ܕܡܨܐ ܘܡܕܪܟ ܗܘܢܗ ܘܡܪܢܼܣ ܢܦܫܗ ܫܦܝܼܪ. ܘܒܛܝܼܠ ܠܗ ܥܠ ܩܘܼܝܡ ܚܝܘ̈ܗܝ. ܘܚܘܼܠܡܢ ܦܓܪܗ. ܘܢܛܝܪܘܼܬܗ ܒܟܿܠܗܝܢ ܡܬܼܒ̈ܥܝܢܝܬܗ ܘܚܫܚ̈ܬܗ. ܝܬܝܼܪ ܡܼܢ ܗܿܟܢ ܝ݀ܨܦ ܘܡܕܒܪ ܘܡܦܪܢܣ ܘܡܢܛܪ ܘܡܩܝܼܡ ܗܿܘ ܒܪܘܼܝܐ ܛܒܿܐ ܘܥܬܝܼܪܐ ܘܚܟܝܼܡܐ ܕܒܪܝܼܬܗ ܘܥܒܿܕ ܐܝܼܕ̈ܘܗܝ. ܐܢ ܟܝܬ ܘܐܝܕ̈ܝܐ ܡܫܡܗܝܼܢܢ ܥܠ ܐܠܗܐ. ܐܝܟ ܕܡܼܨܝܐ ܐܝܿܬܝܢ ܓܘܼܫܡܗ ܘܗܕ̈ܡܘܗܝ. ܐܦܢ ܡܡܪܚܐ ܡܠܼܬܐ ܕܬܐܡܪܝ ܪܘܼܟܒܐ ܥܠ ܗܿܘ ܦܫܝܼܛܐ ܘܠܐ ܡܪܟܒܐ. ܐܠܐ ܠܦܘܼܬ݀ ܕܡܼܨܝܐ ܠܢ ܕܢ݀ܣܬܿܟܠ ܡܼܢ ܡܠܼܬܐ ܡܪܟܒܬܐ ܠܪܘܚܢܝܘܼܬܐ ܕܫܪܒܐ. ܚܢܢ ܘܟܿܠܗܿ ܒܪܝܼܬܐ ܐܝܼܬܝܢ ܩܢܝܘܼܬܗ ܘܝܪܬܘܼܬܗ. ܘܠܐ ܩܿܢܼܐ ܡܕܡ ܣܛܪ ܡܼܢܢ. ܘܥܠܗܿܝ ܣܿܓܝܼ ܒܛܝܼܠ ܠܗ ܥܠ ܛܒ̈ܬܢ. ܘܐܟܙܢܐ ܕܐ̱ܢܫ ܨ݀ܒܐ ܘܪܓܝܓ ܕܢܗܼܘܐ ܚܟܝܼܡܐ ܘܓܡܝܪܐ ܘܡܫܡܠܝܐ ܘܠܐ ܚܣܝܼܪܐ ܒܦܓܪܐ ܥܡ ܫܪܟܐ ܕܟܿܠܗ ܡܘܼܠܝ ܨܒܝܿܢܗ ܘܪܓܬܗ ܗܿܟܢ ܨܒܿܐ ܐܠܗܐ ܘܝܬܝܪ ܡܼܢ ܗܿܟܢ ܟܡܐ ܕܪܡ ܘܡܥܠܝ ܘܛܒܿ ܡܼܢܢ ܘܪܓܝܓ ܣܿܓܝܼ ܠܛܒ̈ܬܢ. ܕܢܗܼܘܐ ܓܡܝܼܪ̈ܐ ܘܡܫܡܠ̈ܝܐ ܒܟܿܠܡܕܡ. ܠܘ ܐܝܟ ܡ̈ܠܐܟܐ ܒܠܚܘܼܕ܆ ܐܠܐ 66 ܐܟܘܬܗ ܕܝܼܠܗ ܨܒܿܐ ܘܪܓܝܓ ܕܢܗܼܘܐ ܟܿܠܢ ܐܼܠܘܼ ܡܼܨܝܐ ܗܘܼܬ݀. ܘܕܒܗ ܕܝܼܠܗ ܢܬܕܡܐ ܟܡܐ ܕܡܘܨܝܐ. ܘܐܢ ܨܒܿܐ ܐܢܬ ܕܬܘܼܒ ܢܗܝܼܪܐܝܼܬ ܬܕܥ ܘܬܣܬܿܟܠ ܘܬܼܫܬܪܪ ܥܠ ܚܝܠܗ ܠܐ ܡܬܡܚܠܢܐ ܘܡܿܨܼܐ ܟܿܠ. ܕܐܝܟܢ ܡܼܨܝܐ ܕܢܕܒܪ ܘܢܦܪܢܣ ܟܿܠ ܗܼܘ ܒܠܚܘܼܕܘܝ. ܗ̄ ܠܥܠܼ̈ܝܐ ܒܟܠܗܘܿܢ ܛܟܼܣ̈ܝܗܘܢ ܘܬܐܓܡ̈ܝܗܘܢ. ܘܓܘܼܕܝ̈ܘܢ ܕܚܝܠ̈ܘܬܐ ܫܡ̈ܝܢܐ ܘܠܫܡ̈ܝܐ ܘܫܡܝ ܫܡ̈ܝܐ. ܘܟܿܠܗܘܢ ܚܘܕܪ̈ܝܗܘܢ. ܘܠܡܘܙܠܬܐ ܒܟܿܠܗܘܿܢ ܐܣܟ̈ܝܼܡܝܗܿ ܘܡܬܬܙܝܥܢ̈ܘܬܗܿ. ܘܠܟܘܟ̈ܒܐ ܘܪ̈ܗܼܛܝܗܿܘܢ ܘܙܘܥ̈ܝܗܘܢ ܘܟܿܠܗ ܢܿܡܘܣܗܘܢ. ܘܠܪܩܝܥܐ ܘܠܐܬܝܪ ܢܘܪܢܐ. ܘܠܐܐܪ ܘܠ̈ܥܢܢܐ ܘܙܒ̈ܢܐ ܘܥܕ̈ܢܐ. ܘܫܘܼܚ̈ܠܦܐ ܕܟܿܠܗ ܕܘܼܒܪܐ ܘܛܘܼܟܣܐ ܕܝܪ̈ܚܐ ܘܫܒ̈ܐ ܘܠܝ̈ܠܘܬܐ ܘܐܝܡ̈ܡܐ. ܘܠܟܠܿܗܘܢ ܓܼܢ̈ܣܐ ܘܐܕܫ̈ܐ ܕܥܘܦܐ ܘܛܝܪܐ ܘܦܪܚܬܐ. ܘܕܪ̈ܚܫܐ ܘܒܥܝܼܪܐ ܘܚܝ̈ܘܬܐ ܡܼܬܩܢܝܢ̈ܝܬܐ ܕܒܓܘ ܫܝܢܐ. ܘܗܿܢܘܢ ܕܠܒܪ ܒܡܕܒܪ̈ܐ ܘܫܩܝܼܦ̈ܐ ܥ݀ܡܪ̈ܢ. ܘܕܢܘܼܢ̈ܐ ܘܩܝܼܛ̈ܐ ܘܟܿܠ ܕܪܚܿܫ ܒܡ̈ܝܐ ܘܒܓܘ ܐܪܥܐ. ܘܠܐܝܼܠ̈ܢܐ ܕܦܐܪ̈ܐ ܘܟܿܠܗܘܿܢ ܐܪ̈ܙܐ ܘܥܣܼܒ̈ܐ ܘܐܪ̈ܥܐ ܘܦܩܚ̈ܐ ܘܟܿܠܗܝܢ ܝ̈ܥܝܬܐ. ܘܠܐܪܥܐ ܘܟܿܗܘܿܢ ܣܘܦ̈ܐ ܘܦܼܢܝ̈ܬܐ. ܡܢ ܥܒܼܪ̈ܝܗܿ ܘܥܕܡܐ ܠܥܒܼܪ̈ܝܗܿ. ܘܠܗܘܢ ܠܒܢܝ̈ܢܫܐ ܡ̈ܠܝܼܠܐ ܕܒܨܠܡܗ ܘܕܡܘܼܬܗ. ܗ̄ ܠܡܠܐܟ̈ܐ ܘܐܚ̈ܝܼܕܐ ܘܫ̈ܠܝܼܛܢܐ. ܘܡܕܒܪ̈ܢܐ ܘܪ̈ܝܫܝ ܥܡܼ̈ܡܐ ܘܪ̈ܝܼܫܝ ܚܝܠ̈ܘܬܐ. ܘܠܩܘܘܼ̈ܡܐ ܘܪܘܪ̈ܒܢܐ ܘܕ̈ܝܿܢܐ ܘܡ̈ܠܦܢܐ. ܘܠܟܿܠܗܘܢ ܐܟܚܕܐ. ܥܡܼ̈ܡܐ ܘܓܢܼ̈ܣܐ ܘܐܡܼܘ̈ܬܐ ܘܠ̈ܫܢܐ ܘܫܪ̈ܒܬܐ ܘܛܟܼܣ̈ܐ. ܘܐܡ̈ܢܐ ܕܓܒܪ̈ܐ ܐܟܚܕܐ ܘܢܫ̈ܐ ܘܛܠ̈ܝܐ ܘܠܟܿܠܗ ܕܘܼܒܪܗܘܢ ܘܩܘܼܝܡ ܚܝ̈ܝܗܘܢ ܘܚܫܚ̈ܬܗܘܿܢ. ܘܢܛܝܼܪܘܼܬܗܘܢ ܘܬܪܒܝܼܬܗܘܢ ܘܟܿܠܗ ܗܘܼܦܟܗܘܢ. ܘܐܟܚܕܐ ܠܡܐܡܪ ܠܟܿܠ ܕܡܼܬܚܙܐ ܘܠܐ ܡܼܬܚܙܐ. ܕܐܝܼܬܘ̄ ܘܒܪܬ݀ ܡܪܘܬܗ. ܘܛܥܝܢ ܚܝܠܗ ܘܡܕܒܪ ܨܒܝܿܢܗ ܫܡܼܥ ܟܿܠܗܝܢ ܚܬܝܼܬܐܝܬ ܘܐܝܟ ܕܝܿܗܒܐ ܛܝܒܘܼܬܗ ܠܡܐܡܪ. ܘܡܼܨܝܐ ܠܡܚܘܝܘ ܘܠܡܫܼܡܥ. ܩܕܡܐܝܬ ܕܥ ܕܗܿܘ ܥ݀ܠܡܐ ܪܒܐ ܘܥܠܼܝܐ ܘܪܘܼܚܢܝܐ ܕܚܝܠ̈ܘܬܐ ܠܐ ܓܫܝܼܡ̈ܐ ܘܠܐ ܡܼܬܚܙܝܢ̈ܐ. ܣܿܓܝܼ ܪܒ ܘܪܘܝܼܚ ܡܼܢ ܗܿܢܐ ܥܿܠܡܐ. ܪܒܐ ܘܥܠܼܝܐ ܘܪܘܼܚܢܝܐ ܕܚܝܠ̈ܘܬܐ ܠܐ ܓܫܝܼܡ̈ܐ ܘܠܐ ܡܼܬܚܙܝ̈ܢܐ. ܣܿܓܝܼ ܪܒ ܘܪܘܝܼܚ ܡܼܢ ܗܿܢܐ ܥ݀ܠܡܐ. ܠܥܼܠ ܡܼܢ ܡܠܼܬܐ ܘܡܫܘܼܚܬܐ. ܕܥ݀ܒܪܐ ܠܡܫܘܼܚܬܐ ܪܒܘܼܬܗ. ܘܠܝܬ ܣܿܟܐ ܠܡܼܢܝ̈ܢܐ ܕܬܐܓܡ̈ܐ ܘܓܘܼ̈ܕܐ ܘܝܗ̈ܠܐ ܘܠܓܝܘܼ̈ܢܐ ܕܐ̈ܠܦܐ ܘܪ̈ܒܘܬܐ ܕܚܝܠ̈ܘܬܐ ܕܒܗ. ܗܘܼ ܡܪܝܐ ܛܒܿܐ ܘܒܪܘܝܐ ܚܟܝܼܡܐ ܘܡܿܨܼܐ ܟܿܠ ܘܐܚܝܼܕ ܟܿܠ ܘܡܦܪܢܣ ܟܿܠ. ܗܘܼܝܘܼ ܢܘܼܗܪܗܘܢ ܘܬܫܒܘܚܬܗܘܢ ܘܡܐܟܘܼܠܬܗܘܢ ܘܬܫܡܫܬܐ ܕܦܘܼܠܚܢܗܘܢ. ܘܚܝܠܗ ܩܘܼܝܡܗܘܢ ܘܡܼܬܬܙܝܼܥܢܘܼܬܗܘܢ. ܘܨܒܝܿܢܗ ܟܿܠܗ ܥܒܕܗܘܢ. ܒܗ ܚܐܝܝܢ ܘܐܝܼܬܝܗܘܢ ܘܗܼܘ ܐܝܼܬܘܗܝ ܐܝܟ ܢܦܫܐ ܒܦܓܪܐ ܕܡܐܚܐ ܘܡܙܝܼܥ ܘܡܦܪܢܼܣ. ܗܘܼܝܘܼ ܬܘܼ ܡܬܬܙܝܼܥܢܘܼܬܗܘܢ ܕܫܡ̈ܝܫܡ̈ܝܐ ܒܚܘܼܕܪ̈ܝܗܘܢ ܘܕܡܘܙܠܬܐ 67 ܒܟܿܠܗܘܢ ܐܣܟܝܼܡ̈ܝܗܿ ܘܙܠܝܼܡܘܼܬܗܿ ܘܡܼܬܟܪܟܢܘܼܬܗܿ. ܗܼܘ ܐܝܼܬܘܗܝ ܢܘܼܗܪܐ ܕܟܘܟ̈ܒܐ ܘܨܡ̈ܚܝܗ̄ ܘܙܠ̈ܓܠܝܗܘܢ. ܘܚܝܠܗ ܐܝܼܬܘ̄ ܪܗܛܗܘܢ ܘܕܢܚ̈ܝܗܘܢ ܘܥܪ̈ܒܝܗܘܢ ܘܟܿܠܗ ܢ݀ܡܘܣܗܘܢ ܪܬܼܚܐ ܕܚܝܠܗ ܐܝܼܬܘ̄ ܐܬܝܪ ܢܘܼܪܢܐ ܘܡܘܩܕܢܐ. ܘܗܼܘ ܐܝܼܬܘ̄ ܪܛܝܼܒܘܼܬܐ ܕܒܥܢ̈ܢܐ. ܘܡܟܢܫܢܐ ܘܡܪܒܝܢܐ ܕܡܼܛܪ̈ܐ ܘܪ̈ܣܝܼܣܐ ܕܒܗܘܢ. ܘܡܛܟܣܢܐ ܕܟ݀ܠܚܕܐ ܚܐ ܡܼܢ ܛܘܼ̈ܦܝ ܡܼܛܪܐ ܘܛܐܠܐ ܘܬܠܓܐ ܘܒܪܕܐ ܘܓܠܝܼܕܐ ܘܚܕܐ ܛܘܼܦܐ ܡܼܢ ܒܠܥܕܘܗܝ ܠܐ ܢ݀ܚܬܐ. ܐܠܐ ܐܝܟ ܕܨ݀ܒܐ ܘܐܝܿܟܢܐ ܕܨܿܒܐ ܘܐܝܟܐ ܕܨ݀ܒܐ. ܗܘܼ ܐܝܼܬܘܗܝ ܟܪܘܟܝܐ ܕܙܒ̈ܢܐ ܘܡܬܼܚܐ ܕܫܢ̈ܝܐ ܘܡܦܪܫܢܐ ܕܝܪ̈ܚܐ. ܘܡܛܟܣܢܐ ܕܐܝܡ̈ܡܐ ܘܠܝܠ̈ܘܬܐ. ܘܡܬܚܡܢܐ ܕܫܥ̈ܐ ܘܕܛܘܪ̈ܐ ܘܪ̈ܦܦܐ. ܗܘܼܝܘܼ ܚܝܘܼܬܗ ܕܟܿܠܗ ܥܘܦܐ ܕܫܡܿܝܐ ܒܟܿܠܗ ܓܢܼܣ̈ܘܗܝ ܘܕܫ̈ܘܗܝ ܘܦܘܪ̈ܫܢܘܗܝ ܘܓܕ̈ܫܘܗܝ ܘܩܢܘܼܡ̈ܘܗܝ. ܗܘܼܝܘܼ ܟܝܿܢܗܘܢ ܘܡܙܝܼܥܢܘ̄ ܘܡܘܠܕܢܗܘܢ ܘܡܪܒܝܢܗܘܢ ܘܡܬܪܣܝܢܗܘܢ ܘܡܨܝܪܢܗܘܢ ܘܡܢܨܢܗܘܢ ܘܡܠܥܙܢܗܘܢ ܘܡܨܘܨܢܗܘܢ ܘܡܠܦܢܗܘܢ ܘܡܛܟܣܢܗܘܢ. ܕܐܝܟܢ ܡܢܼܗܘܢ ܐܝܼܬܝܗܘܢ ܟܢܼܫ̈ܝܢ ܟܢܼܫ̈ܝܢ ܘܪ̈ܦܝܢ ܘܪ̈ܦܝܢ. ܘܡܢܼܗܘܢ ܐ̈ܠܦܐ ܕܠܐ ܡܢܝ̈ܢ ܒܚܕ ܟܢܼܫܐ. ܘܡܢܼܗܘܢ ܙܥܘܼܪ̈ܝ ܒܡܼܢܝܢܐ. ܘܡܢܼܗܘܢ ܙܘ̈ܓܝܢ ܘܙ̈ܓܝܢ. ܒܦܪ̈ܚܝܗܘܢ. ܘܡܢܼܗܘܢ ܚܕ ܚܕ. ܘܡܢܼܗܘܢ ܣܿܓܝܼ ܠܥܼܠ ܡܬܬܪܝܼܡܝܼܢ ܘܡܬܥܠܝܢ. ܘܡܢܼܗܘܢ ܒܡܼܨܥܬ݀ ܐܐܪ. ܘܡܼܢܗܘܢ ܥܡ ܐܪܥܐ ܘܡܼܢܗܘܢ ܥܡ ܒܢܝ̈ܢܫܐ ܥ݀ܡܪܝܢ. ܘܡܢܼܗܘܢ ܒܒܢܼܝ̈ܢܐ ܘܫܘܪ̈ܐ. ܘܒܦܪ̈ܝܼܣܐ ܘܒܐܝܼܠ̈ܢܐ ܘܡܼܢܗܘܢ ܒܛܘܪ̈ܐ ܪ̈ܡܐ. ܘܡܼܢܗܘܢ ܒܫܩܝܼܦ̈ܐ. ܘܡܼܢܗܘܢ ܒܕܡܒܪ̈ܐ ܚܘܼܪ̈ܒܐ. ܘܒܣܿܓܝ ܫܘܼܚܠ̈ܦܐ ܕܥܝ̈ܕܐ ܘܩ̈ܠܐ ܘܠ̈ܥܼܙܐ ܘܢܘܼܨܪ̈ܬܐ ܘܙܢ̈ܝܐ ܕܓܢܼܣ̈ܐ. ܘܡܦܬܟܘܼܬ ܓܘ̈ܢܐ ܫܒܝܼܚ̈ܐ ܘܬܗܝܼܪ̈ܐ ܕܥܿܒܪܝܢ ܠܗܘܢܐ. ܘܠܐ ܡܣܝܟ ܡܐܡܪܐ ܒܟܿܠܗܘܢ. ܐܝܼܬܘ̄ ܐܝܟ ܪܛܝܼܒܘܼܬܐ ܒܡܝ̈ܐ. ܘܠܝܬ ܚܕ ܡܪܛܘܼܢܐ ܙܥܘܼܪܐ ܐܦܢ ܚܕܐ ܡܼܢܬܐ ܒܗܝܢ ܒܦܪ̈ܚܬܐ ܕܠܐ ܗܼܘ ܐܝܼܬܘܗܝ ܩܘܼܝܡܗ ܘܡܛܣܢܗ ܘܟܿܠܗܘܿܢ ܓܢܼܣܗܘܢ ܘܐܕܫ̈ܝܗܘܢ ܘܐܣܟܝܡ̈ܝܗܘܢ ܘܡܬܬܙܝܼܥܢܘܼܬܗܘܢ ܘܥܝܕ̈ܝܗܘܢ ܘܓܘܢ̈ܝܗܘܢ ܥܡ ܟܿܠܗ ܕܫܪ̈ܒܐ ܕܒܗܘܢ. ܐܡܪܙܗ ܟܣܝܐ ܨܝܼܪ ܒܗܘܢ. ܘܠܕܟ̈ܝܼܝܼ ܠܒܐ ܡܬܝܼܕܥ ܐܝܟܢ ܐܝܼܬܘܗܝ ܘܡܬܼܚܙܐ ܒܗܘܢ. ܗܟܘܬ ܬܘܼܒ ܗܘܼܝܘܼ ܩܘܼܝܡ ܟܝܿܢܐ ܕܪ̈ܟܫܐ ܘܒܥܝܼܪ̈ܐ ܘܚܝܘܼܬܐ ܟܿܠܗܿ ܕܒܓܘ ܘܠܒܪ ܒܚܘܼܪܒܐ܆ ܘܚܝܠܗ ܟܿܣܐܼ ܒܗܘܿܢ. ܘܣܼܡ ܒܟܿܠܚܕ ܕܝܠ̈ܝܬܐ ܘܥܝ̈ܕܐ ܘܙܢܝ̈ܐ ܡܫܚ̈ܠܦܐ ܘܡܬܗܪ̈ܢܐ. ܬܩܝܼܦܘܼܬ ܥܘܼܫܢܐ ܕܦܝܼ̈ܠܐ. ܘܚܝܠܬܢܘܬܐ ܕܐܪ̈ܝܘܬܐ. ܘܛܥܿܘܢܘܬܐ ܕܓܡ̈ܠܐ ܘܪܒܘܼܬ ܓܘܫܡ̈ܝܗܘܢ ܘܒܨܝܼܪܘܬ ܬܘܪܣܗܘܢ. ܘܢܓܝܪܘܬ ܪܘܼܚܗܘܢ. ܫܘܥܒܕܐ ܕܩܫܝܘܬ ܬܘܪ̈ܐ ܘܓܡܘܫ̈ܐ. 68 ܘܟܘܒܫܐ ܕܓܢܼܣ̈ܐ ܕܣܘܣ̈ܘܬܐ ܚܬܝܼܪ̈ܐ ܘܩܠ̈ܝܼܠܐ ܘܫܩܘ̈ܠܐ ܥܡ ܫܪܟܐ ܕܟܘܕܢ̈ܘܬܐ. ܘܚܡܪ̈ܐ ܡܣܝܒܪ̈ܝ ܬܚܝܼܬ ܛܥ̈ܢܐ ܘܡܘܒ̈ܠܐ ܝܩܝܪ̈ܬܐ. ܥܢ̈ܬܐ ܬܘܼܒ ܘܒܩܪ̈ܬܐ ܝܗ̈ܒܝ ܬܘܪܣܝܐ ܕܚܠܒܐ ܘܚܐܘܬܐ ܘܫܘܼܡܢܐ ܘܓܘܼܒ̈ܢܐ. ܘܡܫ̈ܟܝܗܘܢ ܠܚܫܚ̈ܬܐ ܣܿܓܝ̈ܐܬܐ. ܘܥܡܪܗܘܢ ܘܣܥܪܗܘܢ ܠܠܒܘܼܫ̈ܐ ܘܓ̈ܠܐ ܘܦܪ̈ܣܐ ܘܣܩ̈ܐ ܘܠܣܘܥܪ̈ܢܐ ܣܿܓܝ̈ܐܐ. ܥܡ ܣܿܓܝ ܫܪ̈ܒܐ ܘܙܢ̈ܝܐ ܕܚܫܚ̈ܬܐ ܘܬܘܼܪܣܝܐ ܘܣܡܡ̈ܢܐ ܕܡܼܢ ܒܣܪܗܘܢ ܘܓܪ̈ܡܝܗܘܢ. ܘܫܪܟܐ ܕܗܕܡ̈ܝܗܘܢ ܕܚܝ̈ܘܬܐ ܘܒܥܝܼܪ̈ܐ. ܠܓܘ ܫܝܢܐ ܥܡ ܒܢܝ̈ܢܫܐ ܡܼܬܩ̈ܢܝܢ. ܘܗܿܠܝܢ ܕܠܒܪ ܒܚܘܼܪܒܐ ܡܪܝܕ̈ܢ ܘܘܡܕܝܪ̈ܢ. ܬܘܼܒ ܝܬܝܼܪ ܒܝܬܝܼܪ. ܕܠܐ ܐܿܠܨܐ ܕܟܿܠܗܝܢ ܢ݀ܬܢܐ ܘܢܬܼܡܬܚ ܣܿܓܝܼ ܫܪܟܐ ܕܡܠܼܬܐ ܘܢܐܩܪ ܥܠ ܫ݀ܡܘ̈ܥܐ. ܠܟܿܠܗܝܢ ܗܿܠܝܢ ܚܝܠܗ ܘܪܡܼܙܗ ܕܐܠܗܐ ܡܕܒܪ ܘܡܦܪܢܣ. ܘܐܝܼܬ ܡܼܢܗܝܢ ܕܡܼܢ ܚܒܪ̈ܬܗܝܢ ܡܬܬܪ̈ܣܝܢ. ܘܐܝܼܬ ܕܡܼܢ ܥܣܼܒܐ ܘܥܩܪ̈ܐ ܕܐܪܥܐ. ܘܥܠ ܫܪܟܐ ܕܥܝܿܕ̈ܝܗܘܢ ܕܒܒܛܢܐ ܘܝܼܠܝܼܕܘܬܐ ܘܬܪܒܝܼܬܐ ܥܡ ܫܪܟܐ ܕܕܝܼܠ̈ܝܬܐ ܐܚܪ̈ܢܝܬܐ. ܐܢ ܢܚܘܼܐ ܐܢܫ ܘܢܐܠܦ ܟܿܠܗܝܢ. ܠܥܼܠ ܡܼܢ ܡܠܼܬܐ ܘܡܚܫܒܬܐ. ܬ݀ܗܪ ܘܡܼܬܕܡܪ ܥܠ ܐܟܬܐ ܕܓܡ̈ܠܐ. ܘܚܬܝܼܪܘܼܬܐ ܕܣܘܣ̈ܘܬܐ. ܘܡܫܪ̈ܕܘܬܐ ܕܟܘܼܕ̈ܢܘܬܐ. ܘܡܩܝܼܡܘܬ ܨܒܝܢܐ ܕܚܡܪ̈ܐ. ܘܚܘܼܒܐ ܘܦܪܘܼܫܘܬܐ ܕܒܟ̈ܠܒܐ. ܥܡ ܡܿܚܡܣܢܢܘ̄ ܣܿܓܝܐܬܐ ܕܒܫܗܪܐ. ܘܢܛܝܼܪܘܼܬܐ ܘܪܓܘܫܘܬܐ ܘܢ݀ܒܘܚܘܿܬܐ. ܥܡ ܣܿܓܝ ܙܢ̈ܝܐ ܕܕܘܡܪܐ ܕܩܒܝܼܥ̈ܢ ܘܫܟܝܼܚ̈ܢ ܒܟܝܿܢܐ ܕܟܿܠܚܕ ܚܕ ܡܢܼܗܘܢ. ܠܟܿܠܗܝܢ ܗܿܠܝܢ ܚܝܠܗ ܡܕܒܪ ܘܡܛܣ ܒܗܘܢ. ܘܗܿܟܢ ܒܛܝܼܠ ܠܗ ܘܡܿܨܼܐ ܘܡܕܪܟ ܒܝܕ ܝܨܝܼܦܘܼܬܗ ܠܐ ܡܣܼܬܟܢܝܼܬܐ. ܕܚܕܐ ܡܢܼܬܐ ܡܼܢ ܗܿܝܢ ܟܿܠܗܘܢ ܓܼܢܣ̈ܐ ܘܐܕܫ̈ܐ ܕܚܝܘ̈ܬܐ ܘܒܥܝܪ̈ܐ ܘܪ̈ܟܫܐ ܘܣܛܪ. ܠܐ ܢ݀ܦܠܐ ܡܢܼܗܘܢ ܡܼܢ ܒܠܥܕܘܗܝ. ܘܒܗܿܝ ܚܕܐ ܡܢܼܬܐ ܙܢܘܪܬܐ ܘܫܝܼܛܬܐ ܬ݀ܡܢ ܫܟܝܼܚ ܘܐܝܼܬܘܗܝ ܐܠܗܐ. ܠܘ ܡܢܬܐ ܡܢܗ ܐܝܟ ܡܣܝܟܐ ܘܡܬܦܣܩܢܐ. ܐܠܐ ܟܿܠܗ ܕܠܐ ܫܘܚܠܗ. ܗܟܘܬ݀ ܬܘܼܒ ܘܠܪ̈ܚܫܐ ܕܒܓܘ ܐܪܥܐ ܘܒܝܡܡ̈ܐ ܘܢܗܪ̈ܘܬܐ. ܚܝܠܗ ܘܪܡܼܙܗ ܘܨܒܝܿܢܗ ܡܕܒܪ ܘܡܦܪܢܣ. ܘܒܗ ܡܬܬܙܝܼܥܝܢ ܘܐܝܼܬܝܗܘܢ. ܘܐܠܐ ܐܝܟܢ ܩܿܝܡܝܢ ܗܘܼܘ ܘܐܝܟܢ ܐܝܼܬܝܗܘܢ ܗܘܼܘ. ܐܠܘܼ ܠܐ ܕܗܼܘ ܡܛܟܣ ܡܘܠܕܢܘܬܗܘܢ ܘܬܪܒܝܼܬܗܘܢ ܘܬܘܪܣܝܗܘܢ ܘܗܘܼܦܟܗܘܢ ܘܣܡ ܬܘܼܒ ܒܟܝܢܗܘܢ ܘܒܓܘܼܫܡ̈ܝܗܘܢ ܘܒܗܕ̈ܡܝܗܘܢ ܦܪܘܫܐܝܬ ܚܝ̈ܠܐ ܘܡܥܒܕܢ̈ܘܬܐ ܕܕܘܡܪܐ ܕܥܿܒܪ̈ܢ ܠܚܝܠܐ ܕܡܠܼܬܐ. ܘܝܗܼܒ ܠܗܘܢ ܕܘܼܟ̈ܝܬܐ ܠܡܪܕܐ. ܘܠܢܛܝܼܪܘܬܐ ܘܚܣܝܼܢܘܼܬܐ. ܘܠܡܼܢܗܘܢ ܝܗܼܒ ܙܝܢܐ ܘܕܝܼܠܝܬܐ ܡܕܡ ܠܢܛܝܼܪܘܬܗ̄. 69 ܡܢܗܘܢ ܒܦܘܼܡ̈ܝܗܘܢ ܘܐܚܪ̈ܢܐ ܒܢܝܒ̈ܝܗܘܢ. ܘ.ܐܚܪ̈ܢܐ ܒܠ̈ܒܝܗܘܢ ܘܒܟܪ̈ܣܬܗܘܢ܆ ܘܐܚܪ̈ܢܐ ܒܕܘܢܒ̈ܬܗܘܢ ܚܪ̈ܝܦܬܐ ܘܒܥܘܼܩ̈ܣܝܗܘܢ. ܘܐܚܪ̈ܢܐ ܒܡܫܟ̈ܝܗܘܢ ܕܐܝܟ ܓܐܪܐ ܡܼܢ ܩܫܼܬܐ ܟܿܫܛܝܢ ܡܼܢ ܓܘܫܡ̈ܝܗܘܢ ܠܢܛܝܼܪܘܬܗܘܢ. ܘܐܚܪ̈ܢܐ ܒܛܦܪ̈ܝܗܘܢ. ܘܟܠܚܕ ܒܙܢܐ ܙܢܐ ܠܬܡܼܗܐ ܪܒܐ ܘܬܕܡܘܪܬܐ. ܡܿܢ ܕܣܿܐܡ ܒܿܠܐ ܘܡܣܼܬܿܟܠ ܠܒܬܫܒܘܚܬܐ ܪܒܬܐ ܕܒܪܘܝܐ ܚܟܝܼܡܐ ܘܡܦܪܢܣܢܐ. ܐܝܼܠ̈ܢܐ ܬܘܼܒ ܘܥܣܼܒ̈ܐ ܘܙܪ̈ܥܘܢܐ ܘܥܩܪ̈ܐ ܘܫܪܟܐ ܕܦܩ̈ܚܐ ܘܗܒ̈ܒܐ ܘܓܼܢܣ̈ܐ ܡܫܚܠ̈ܦܐ ܘܐܕ̈ܫܐ ܕܫܿܘܚܝܢ ܡܼܢ ܐܪܥܐ. ܠܐ ܡܼܨܝܐ ܡܠܼܬܐ ܠܡܐܡܪ ܘܠܡܣܝܟܘܼ. ܐܝܟܢ ܟܕ ܚܕ ܗܼܘ ܟܝܿܢܗܿ ܕܐܪܥܐ ܘܠܐ ܛܥܡܐ ܐܝܼܬ ܠܗܿ ܘܠܐ ܓܘܢܐ ܘܠܐ ܪܝܼܚܐ. ܗܿܠܝܢ ܟܿܠܗܘܢ ܟܝ̈ܢܐ ܡܫܚܠ̈ܦܐ ܡܦܩܐ ܘܡܪܒܝܐ ܕܥܿܒܪܝܢ ܠܣܟܐ ܕܡܢܝܿܢܐ. ܟܡܐ ܙܢܝ̈ܐ ܕܦܐܪ̈ܐ ܕܚܕ ܐܕܫܐ. ܟܡܐ ܦܘܼܪ̈ܫܢܐ ܘܫܘܼܚܠ̈ܦܐ ܒܓܘܢ̈ܐ ܘܛܥܡܐ ܘܪܝܼܚܐ ܕܥܢܼ̈ܒܐ ܘܬܼܐܢ̈ܐ ܘܙܝ̈ܬܐ ܘܪ̈ܘܼܡܢܐ ܘܚܙܘܼܪ̈ܐ ܘܫܪܟܐ ܕܦܐܪ̈ܐ ܘܐܒܼܒ̈ܢܐ. ܗܿܟܘܬ ܘܕܙܪ̈ܥܘܢܐ ܘܥܩܪ̈ܐ ܘܗܒ̈ܒܐ. ܡܼܢ ܐܝܟܐ ܟܝ ܩܢܼܘ ܠܗܿܠܝܢ ܚܝ̈ܠܐ ܘܡܥܒܕܢܘ̈ܬܐ ܘܕܝܠ̈ܝܬܐ ܘܐܣܟܡ̈ܐ ܘܓܘ̈ܢܐ ܘܛܥܡܐ ܘܪܝܼܚܐ ܘܡܦܬܟܘܼܬܐ ܣܿܓܝܐܬܐ. ܟܕ ܚܕ ܗܼܘ ܟܝܿܢܗܿ ܘܓܘܢܗܿ ܘܛܥܡܗܿ ܕܐܪܥܐ ܕܡܢܗܿ ܫܿܘܚܝܢ. ܘܡܼܢ ܚܕ ܡܒܘܼܥܐ ܫܿܬܝܐ ܓܢܬܐ ܕܟܿܠܗܘܿܢ ܬܫܝܠܝܢ ܘܢܨܝܼܒܝܢ ܘܙܪܝܼܥܝܼܢ. ܘܚܕ ܡܫܒܐ ܕܐܐܪ ܡܩܒܠܝܢ. ܘܚܕ ܗܼܘ ܫܡܼܫܐ ܕܙܠܝܼܩܘܗܝ ܕܥܠܝܗܘܢ ܫܿܟܢܝܢ. ܗܿܠܝܢ ܟܿܠܗܘܢ ܫܘܼܚܠ̈ܦܐ ܠܐ ܡܼܬܡܢ̈ܝܢܐ ܘܡܬܗܪ̈ܢܐ ܒܚܝܠܐ ܘܡܥܒܼܕܢܘܬܐ. ܕܒܗܘܿܢ ܡܼܢ ܐܝܟܐ ܩܢܼܘ ܘܐܫܼܬܡܠܝܼܘ. ܘܐܬܼܒܠܗܝܼ ܪܥܝܢܐ ܘܬܡܼܗ ܡܕܥܐ. ܘܐܬܼܕܘܕ ܗܘܢܐ. ܘܠܐ ܣܟ ܡܨܝܐ ܕܢܐܡܪ ܘܢܚܘܐ ܡܐܡܪܐ ܘܝܘܼܠܦܢܐ ܐܢܫܝܐ. ܚܕ ܡܼܢ ܐܠܦ ܐܠܦ̈ܝܢ ܘܪ̈ܒܘܼ ܪ̈ܒܘܢ ܕܡܕܒܪܢܘܼܬܐ ܘܡܦܪܢܣܢܘܼܬܐ ܘܒܛܝܼܠܘܬܐ ܐܠܗܿܝܬܐ. ܐܝܟܢ ܡܫܼܬܚܠܦܐ ܠܪ̈ܒܘܼ ܪ̈ܒܘܢ ܥܠ ܪ̈ܒܘܢ. ܘܕܠܐ ܣܟܐ ܕܫܘܼܚܠ̈ܦܐ ܕܟܝ̈ܢܐ ܘܕܝܠ̈ܝܬܐ ܘܚܝ̈ܠܐ ܘܡܥܒܕ̈ܢܘܬܐ ܘܓܘ̈ܢܐ ܘܐܣܟ̈ܡܐ. ܘܪܝܼܚܐ ܘܛܥܡܐ ܘܓܼܫܬܐ. ܟܕ ܚܕ ܗܼܘ ܚܝܠܗ ܘܟܝܿܢܗ ܘܨܒܝܿܢܗ ܕܡܪܐ ܚܟܝܼܡܐ ܕܡܥܒܕ ܒܗܿܠܝܢ ܟܿܠܗܝܢ܀ ܥܠ ܬܐܘܪܝܐ ܕܝܢ ܪܘܚܢܿܝܬܐ ܘܝܕܥܬܐ ܫܪܝܼܪܬܐ ܕܚܝܠܐ ܟܣܝܐ ܘܐܪܙܐ ܪܒܐ ܕܐܝܼܬ ܘܓܢܝܼܙ ܘܛܡܝܼܪ ܒܗܘܢ ܒܗܘܝ̈ܐ ܘܟܝ̈ܢܐ ܕܒܒܪܝܼܬܐ. ܠܐ ܡܼܨܝܐ ܕܡܼܢ ܟܪܛܝܼܣܐ ܘܕܝܘܼܬܐ ܢܼܬܝܠܦܘܿܢ. ܐܦܠܐ ܡܼܢ ܡܠܼܬܐ ܩܠܢܿܝܬܐ ܘܫܡܼܥܐ ܕܒܐܕ̈ܢܝ ܒܣܼܪܐ. ܐܠܐ ܡܼܢ ܕܘܼܒܪ̈ܐ ܬܩ̈ܢܐ ܘܡܣܪܩܘܼܬܐ ܕܡܼܢ ܟܿܠܗ ܥ݀ܠܡܐ. ܘܒܗܝܼܠܘܼܬ ܚܘܼܫܒܐ ܕܡܼܢ ܟܿܠܗܝܢ ܡܪ̈ܢܝܬܐ. ܘܗܘܦܟܐ ܕܒܫܼܠܝܐ ܘܠܚܘܼܕܝܘܬܐ 70 ܒܨܘܡܐ ܒܫܗܪܐ ܘܨܠܘܿܬܐ. ܘܗܪܓܐ ܐܡܝܼܢܐ ܕܒܗ ܒܥܒܘܕܐ. ܘܒܡܕܒܪܢܘܼܬܐ ܡܠܝܬ݀ ܦܘܼܪ̈ܫܢܐ ܣܿܓܝ̈ܐܐ ܘܠܐ ܡܼܬܡܠ̈ܠܢܐ. ܕܡܼܢ ܗܪܟܐ ܡܬܼܦܬܚ ܬܪܥܐ ܩܕܡܝܐ ܕܝܼܕܥܬܐ ܕܡܫܘܼܚܬܐ ܩܕܡܝܬܐ ܕܡܝܬܪܘܼܬܐ. ܘܡܬܼܐܡܪܐ ܬܐܘܪܝܐ ܕܓܘܫ̈ܡܐ. ܗ̄ ܕܟܿܠ ܡܕܡ ܕܡܼܬܚܙܐ ܘܡܬܓܫܫ. ܘܐܝܼܬܘܗܝ ܠܓܘ ܡܼܢ ܚܘܼܕܪܐ ܗܿܢܐ ܕܫܡܿܝܐ ܕܟܪܝܼܟܐ ܠܒܪܝܼܬܐ ܐܝܟ ܫܪܩܬܐ ܐܘܟܝܼܬ ܩܠܦܐ ܠܒܝܼܥܬܐ. ܘܝܿܕܥ ܘܡܼܣܬܟܠ ܡܿܢ ܕܡܿܛܐ ܠܗܿ. ܠܟܿܠܗܝܢ ܗܿܠܝܢ ܐܟܡܐ ܕܐܝܼܬܝܗܝܢ ܘܝܿܕܥ ܪܘܚܢܐܝܬ ܠܟܿܠܗ ܐܪܙܐ ܪܒܐ ܕܟܿܣܐܼ ܘܛܡܝܼܪ ܒܗܝܢ܇ ܘܚܿܙܐ ܠܗ ܠܥܒܘܕܐ ܘܒܿܪܘܝܐ ܒܟܿܠܗܝܢ. ܐܡܪܙܢܐܝܼܬ ܘܪܘܼܚܢܐܝܬ ܘܟܣܝܐܝܼܬ. ܡܬܼܗܘܢܢܐܝܼܬ ܒܡܥܕܐ ܩܛܝܼܢܐ ܘܣܘܼܟܠܐ ܪܘܚܢܝܐ. ܘܐܢܗܘܼ ܕܡܚܡܣܢ ܒܗ ܒܕܘܼܒܪܐ ܡܝܬܪܐ ܪܕܐ ܬܩܢܐܝܬ ܕܠܐ ܕܕܘܕ. ܣܿܠܩ ܘܡܼܬܥܠܐ ܒܝܕܥܬܗ. ܡܼܢ ܬܐܘܪܝܐ ܠܬܐܘܪܝܐ. ܘܡܼܢ ܝܕܥܬܐ ܠܝܕܥܬܐ ܕܝܬܝܪ ܪܡܐ ܘܡܥܠܝܐ ܡܼܢ ܩܕܡܝܬܐ. ܘܥ݀ܐܠ ܘܡܬܓܘܐ ܒܐܡܪ̈ܙܐ ܐܠܗ̈ܝܐ. ܥܕܡܐ ܕܡܿܛܐ ܠܪ̈ܘܡܐ ܠܐ ܡܼܬܡܫܚ̈ܢܐ܆ ܘܠܣܘܼܟ̈ܠܐ ܬܗܝܼܪ̈ܐ ܘܠܐ ܡܬܼܦܫܩ̈ܢܐ. ܘܡܼܬܓܡܪ ܘܡܼܫܬܡܠܐ ܘܚܿܙܐ ܠܥܒܘܕܗ ܒܢܦܫܗ ܕܝܼܠܗ ܠܐ ܡܣܼܬܝܟܢܐܝܼܬ. ܘܕܫܥܬܐ ܢܿܫܒܘܩ ܡܠܼܬܐ ܕܥܠ ܗܿܠܝܢ ܥܕ ܡܿܛܝܢܢ ܠܥܕܢܗܝܢ ܘܐܝܟܐ ܘܿܠܐ ܢܬܼܡܠܠ ܥܠܝܗܘܢ ܐܝܟ ܕܡܼܨܝܐ. ܡܐܠܠܘܢ ܐܝܟ ܕܝܿܗܒܐ ܘܡܚܟܡܐ ܛܝܒܘܼܬܐ ܐܠܗܝܬܐ. ܗܿܝ ܥܬܝܼܪܬ݀ ܒܟܿܠ ܘܡܥܬܪܬ݀ ܟܿܠ ܕܠܐ ܚܣܡ. ܘܢ݀ܦܢܐ ܥܠ ܛܟܼܣܐ ܕܡܠܼܬܢ ܘܢܚܬܡ ܠܩܦܠܐܘܢ ܗܿܢܐ ܕܥܠ ܝܨܝܼܦܘܬܐ ܘܡܦܪܢܣܢܘܼܬܐ ܠܐ ܡܣܼܬܝܟܢܝܼܬܐ ܕܥܠ ܟܿܠ ܕܥܿܒܘܼܕܐ ܕܟܿܠ. ܕܠܘ ܐ̱ܚܪ̈ܢܐ ܐܩܝܼܡ ܥܠ ܬܫܡܫܬܐ ܘܝܨܝܼܦܘܼܬܐ ܕܒܪ̈ܝܬܗ. ܐܟܙܢܐ ܕܥܒܕܝܢ ܘܡܛܟܣܝܢ ܡܠܟܝܗܿ ܕܐܪܥܐ ܘܫܠ̈ܝܼܛܢܝܗܿ. ܐܝܟ ܕܐܫܬܪܓܪܓܘ ܐ̱ܢܫ̈ܝܢ ܚܫܘܼ̈ܟܝ ܗܘܢܐ ܘܣܡ̈ܝܝ ܝܼܕܥܬܐ. ܘܐܡܼܪܘ ܘܐܠܦܘ ܠܐ ܝܠܝܼܦܐܝܬ ܘܠܐ ܫܪܝܼܪܐܝܬ. ܕܣܒܼܪܘ ܒܗܿܕܐ ܕܗܿܐ ܠܡ ܡܝܩܪܝܢ ܠܗܿ ܠܥܼܠܬܐ ܩܕܡܝܬܐ ܠܐ ܡܬܚܬܝܼܢ ܠܗܿ ܠܬܫܡ̈ܫܬܐ ܫܚܝܼܡ̈ܬܐ ܕܒܥܿܠܡܐ. ܘܕܡܣܼܬܒܪ̈ܢ ܣܥܝܼܪ̈ܬܐ ܘܫܝܼܛܬ̈ܐ. ܐܠܐ ܠܡ ܕܠܐܚܪ̈ܢܐ ܐܩܝܼܡ ܥܠ ܦܘܼܪ̈ܢܣܐ ܗܿܠܝܢ. ܘܗܼܘ ܓܢܝܼܙ ܘܪܡ ܘܡܥܠܝ ܒܐܝܼܬܘܼܬܗ. ܘܠܐ ܝܿܕܥܝܢ ܘܠܐ ܡܣܼܬܟܠܝܼܢ ܥܛܠ̈ܝ ܠܒܐ܆ ܠܡܒܨܪܘܼ ܗܿܐ ܡܒܨܪܝܼܢ ܒܐܝܼܩܪܗ ܕܥܒܘܼܕܐ. ܘܠܘ ܡܘܪܒܘܼ ܡܘܪܒܝܢ ܠܗ. ܘܐܢ ܫܡܼܫܐ ܗܿܢܐ ܡܬܪܓܫܢܐ ܕܐܝܼܬܘܗܝ ܚܕܐ ܡܼܢ ܒܪ̈ܝܬܗ. ܡܥܒܕ ܚܝܠܗ ܒܟܿܠܗܿ ܒܪܝܼܬܐ ܘܠܝܬ ܕܛ݀ܫܐ ܡܼܢ ܠܗܓܗ. ܘܫܿܟܢܝܢ ܙܠ̈ܝܩܘܗܝ ܥܠ ܫܦܝܼܪ̈ܐ ܘܕܟ̈ܝܐ ܘܒܣܝܼܡ̈ܐ ܘܢܩ̈ܕܐ. ܘܥܠ ܣܪܝܘܼܬܐ ܘܢܕܝܕܘܼܬܐ. ܘܨܿܥܠܘܼܬܐ. ܘܗܼܘ܆ ܠܐ ܡܨܛܝܐܐ ܘܠܐ ܡܣܼܬܓܦ. ܐܦܠܐ ܣܿܟ ܡܼܬܟܿܬܡ. ܐܠܐ 71 ܡܐܠܘܢ ܡܕܟܐ ܘܡܨܠܠ ܘܡܢܩܕ ܠܟܿܠܡܕܡ. ܘܥܡ ܗܿܠܝܢ ܗܼܘ ܡܐܚܐ ܘܡܪܒܐ ܘܡܝܒܠ ܘܡܝܬܐ ܠܫܘܼܡܠܝܐ ܠܟܿܠܗܘܿܢ ܟܝ̈ܢܐ ܐܚܪ̈ܢܐ. ܟܡܐ ܡܕܝܢ ܚܝܠܗ ܘܪܡܼܙܗ ܕܗܿܘ ܡܿܨܐܼ ܟܿܠ ܐܚܝܼܕ ܟܿܠ. ܡܐܠܠܘܢ ܕܝܢ ܢܘܼܗܪܗ ܕܫܡܼܫܐ ܘܟܝܿܢܗ ܘܡܥܒܕܢܘܬܗ܆ ܚܝܠܗ ܕܝܼܠܗ ܕܒܪܘܼܝܐ ܐܝܼܬܘ̄. ܕܡܥܒܕ ܗܿܠܝܢ ܟܿܠܗܝܢ. ܒܗܿܝ ܕܒܟܿܠ ܐܝܼܬܘ̄ ܘܠܟܿܠ ܩܪܝܼܒ ܐܝܟ ܚܝܠܗ ܕܫܡܼܫܐ ܒܗܘ̈ܝܐ. ܘܐܝܟ ܐܣܛܘܟ̈ܣܐ ܒܟܝ̈ܢܐ. ܘܐܝܟ ܢܦܫܐ ܒܦܓܪܐ. ܠܚܝܘܼܬܗ ܘܠܩܘܼܝܡܗ. ܗܼܘ ܐܝܼܬܘ̄ ܡܫܬܣܢܐ ܕܐܪܥܐ ܥܠ ܡܝ̈ܐ. ܘܗܼܘ ܛܥܝܢ ܠܟܿܠܗܘܢ. ܗܼܘ ܐܝܼܬܘܗܝ ܪܘܝܼܚܘܼܬܐ ܕܦܩܥ̈ܬܐ ܘܩܒܝܼܥܘܬܐ ܕܪ̈ܡܬܐ. ܘܪܒܘܼܬܐ ܕܛܘܼܪ̈ܐ. ܗܼܘ ܐܝܼܬܘܗܝ ܩܫܝܘܼܬܐ ܕܟܐܦ̈ܐ. ܘܐܛܝܼܡܘܬܐ ܕܫܘܥ̈ܐ. ܘܒܕܝܪܘܼܬܐ ܕܚܠܐ. ܘܠܒܘܫܐ ܕܠܒܬܗܿ ܕܐܪܥܐ. ܗܼܘ ܐܝܼܬܘܗܝ ܫܛܝܼܚܘܬܐ ܕܝܡܼ̈ܡܐ ܘܩܒܝܘܼܬܐ ܕܬܗܘܼܡ̈ܐ. ܘܙܘܥܐ ܘܪܛܝܼܒܘܼܬܐ ܕܒܡ̈ܝܐ. ܗܼܘ ܐܝܼܬܘ̄ ܚܨܐ ܛܥܝܼܢ ܠܫܬܐܣ̈ܝ ܬܒܝܠ. ܘܥܡܘܼܕܐ ܘܣܡܘܼܟܐ ܕܟܿܠܗܿ ܒܪܝܼܬܐ. ܗܘܼܝܘܼ ܠܥܼܠ ܡܼܢ ܟܿܠ. ܘܠܬܚܬ ܡܼܢ ܟܿܠ. ܘܠܓܘ ܡܼܢ ܟܿܠ ܘܠܒܪ ܡܼܢ ܟܿܠ. ܘܥܠܗܿܝ ܡܼܨܝܐ ܕܢܦܪܢܣ ܠܟܿܠ. ܒܗܿܝ ܕܐܚܝܼܕ ܠܟܿܠ. ܘܠܝܬ ܕܘܼ̣ܬܐ ܕܣܦܝܼܩܐ ܡܢܗ. ܘܠܐ ܡܨܝܐ ܕܬܗܘܼܐ ܣܟ. ܡܛܠ ܕܗܼܘ ܐܝܼܬܘܗܝ ܗܘܼܐ ܘܡܕܡ ܠܝܬ ܗܘܼܐ. ܘܡܕܡ ܕܗܘܼܐ ܡܢܗ ܗܘܼܐ. ܘܒܗ ܐܝܼܬܘܗܝ. ܘܠܒܪ ܡܢܗ ܠܐ ܡܬܐܡܪ ܡܕܡ. ܗܘܼܝܘܼ ܬܘܼܒ ܨܝܪܐ ܕܒܢܝ̈ܢܫܐ ܒܟܪ̈ܣܬܐ ܘܡܪܟܒܢܐ ܘܡܒܢܝܿܢܐ ܘܡܩܛܪܢܐ ܒܗܕ̈ܡܐ ܘܒܣܼܪܐ ܘܓܪ̈ܡܐ ܘܘܪ̈ܝܕܐ ܘܡܦܠܓܢܐ ܕܟܘܼܡ̈ܘ. ܘܡܪܗܛܢܐ ܕܕܡܐ ܘܡܛܟܣܢܐ ܕܟܿܠܗܘܢ ܪ̈ܓܫܐ ܓܘܝ̈ܐ ܘܒܪ̈ܝܐ. ܦܓܪ̈ܢܐ ܘܪ̈ܘܼܚܢܐ. ܘܡܠܒܫܢܐ ܕܡܫ̈ܟܐ. ܘܡܘܥܝܢܐ ܕܣܥܪܐ ܘܕܩܢܐ. ܘܡܬܪܨܢܐ ܕܩܘܡ̈ܬܐ ܘܕܡܼܘ̈ܬܐ ܘܩܢܘܼ̈ܡܐ ܘܨܘܼܪ̈ܬܐ. ܗܘܼ ܡܚܝܕ ܘܡܠܚܡ ܢܦܫܐ ܪܘܚܢܝܬܐ ܘܩܛܝܢܬܐ ܘܝܕܘܼܥܬܢܝܼܬܐ ܘܡܠܝܼܠܬܐ܆ ܥܡ ܦܓܪܐ ܥܒܝܐ ܘܝܩܝܼܪܐ ܘܡܪܟܒܐ. ܘܐܟܡܐ ܕܢܦܫܐ ܐܝܼܬܝܗܿ ܚܝܘܼܬܗ ܘܡܙܝܼܥܢܝܼܬܗ ܕܦܓܪܐ܆ ܗܟܘܬ ܗܼܘ ܐܠܗܐ ܐܝܼܬܘܗܝ ܚܝܘܼܬܗܿ ܘܡܙܝܼܥܢܗܿ ܘܡܠܝܼܠܘܼܬܗܿ ܕܢܦܫܐ ܘܝܕܥܬܗܿ ܘܚܡܬܗܿ ܘܡܚܫܒܬܗܿ. ܘܒܝܕ ܡܨܥܝܘܬܗܿ ܕܢܦܫܐ ܩܛܝܼܢܬܐ ܘܪܘܼܚܢܝܿܬܐ ܥܒܝܼܕܬ݀ ܒܨܠܡܗ ܘܕܡܘܼܬܗ܆ ܡܚܝܕ ܘܫܿܪܐܼ. ܘܐܝܼܬܘܗܝ ܣܘܩܗ ܘܢܫܡܬܗ ܕܒܪܢܫܐ ܘܚܝ̈ܘܗܝ ܘܩܘܼܝܡܗ. ܒܗ ܚܝ ܘܡܬܬܙܝܼܥ ܐܝܼܬܘܗ̄ ܒܪܢܫܐ. ܘܡܠܝܼܠ ܘܝܕܘܥܬܢ ܘܡܕܪܟ ܘܚܿܟܡ ܠܐ ܡܬܼܕܪ̈ܟܢܝܬܐ ܘܠܐ ܡܣܬܝܟܢ̈ܝܬܐ ܘܩܠܝܼܠ ܘܛ݀ܐܣ ܘܒܚܕ ܪܦܦܐ ܥܿܒܪ ܒܟܿܠܗܘܢ 72 ܣܿܘܦ̈ܐ ܘܪ̈ܘܡܐ ܘܥܘܼܡ̈ܩܐ ܘܟܿܠ ܦܢ̈ܝܢ. ܒܪܡ ܕܝܢ ܝܗܼܒ ܘܫܟܢ ܠܗ ܡܘܗܒܬܐ ܪܒܬܐ ܘܐܠܗܿܝܬܐ܆ ܕܐܝܼܬܝܗܿ ܫܠܝܼܛܘܼܬ ܒܝܿܬܐ. ܘܒܗܿܕܐ ܐܝܼܬܘܗܝ ܨܠܡܗ ܘܕܡܘܼܬܗ ܕܒܪܘܼܝܗ. ܕܟܿܠ ܕܨ݀ܒܐ ܘܪܐܓ ܘܡܬܚܫܒ ܥܿܒܕ. ܘܥܠܗܿܝ ܐܬܬܣܝܼܡ ܠܗ ܢܿܡܘܿܣܐ. ܡܛܠ ܕܐܝܼܬ ܠܗ ܚܐܪܘܼܬܐ ܘܫܠܝܼܛܘܼܬ ܒܝܿܬܐ. ܚܝܘ̈ܬܐ ܕܝܢ ܐܚܪ̈ܢܝܬܐ ܡܛܠ ܕܠܝܬ ܠܗܝܢ ܡܠܝܼܠܘܼܬܐ ܘܠܐ ܚܐܪܘܼܬܐ. ܠܐ ܐܬܬܣܝܼܡ ܠܗܝܢ ܢܿܡܘܿܣܐ. ܘܒܗܿܝ ܕܐܬܬܣܝܼܡ ܠܒܪܢܫܐ ܢܿܡܘܿܣܐ ܘܦܘܼܩܕܢܐ ܕܢܛܪܝܼܘܗܝ܆ ܐܬܼܝܕܥܬ݀ ܚܐܪܘܬܗ ܘܫܠܝܼܛܘܼܬ ܒܝܿܬܗ. ܕܐܢ ܨ݀ܒܐ ܢ݀ܛܪ ܠܗ ܘܡܫܼܬܡܥ ܘܡܫܬܼܬܥܒܕ ܒܨܒܝܢ ܚܐܪܘܬܗ. ܘܐܢ ܨܿܒܐ܆ ܠܐ ܢ݀ܛܪ ܘܥܿܨܐ ܘܠܐ ܡܫܼܬܡܥ ܘܠܐ ܡܫܼܬܢܥܒܕ. ܘܥܠܗܿܝ ܐܬܓܙܪ ܠܗ ܚܝ̈ܐ ܘܡܘܬܐ. ܕܐܢ ܫܿܡܥ ܒܨܒܝܿܢ ܚܐܪܘܼܬܗ܆ ܚܿܝܐ ܠܥܿܠܡܝܼܢܐܝܬ ܒܒܘܼܣܡܐ. ܘܐܢ ܥ݀ܨܐ ܒܗ ܒܨܒܝܢ ܚܐܪܘܬܗ܆ ܡܿܐܬ ܡܬܝܕܥܢܐܝܬ ܘܡܫܼܬܢܩ ܥ݀ܠܡܝܼܢܐܝܬ. ܘܐܝܟ ܐܒܐ ܘܡܠܦܢܐ ܥܝܼܪܐ ܘܚܦܝܼܛܐ ܕܠܐ ܣܿܟ ܡܗܡܐ ܚܕ ܪܦܦܐ܆ ܐܝܼܬܘܗܝ ܠܗ ܐܠܗܐ ܝܨܘܼܦܐ ܘܡܦܪܢܣܢܐ ܘܣܿܓܝܼ ܒܛܝܼܠ ܠܗ ܥܠܘܗܝ. ܡܼܢ ܫܘܼܪܝ ܨܘܼܪܬܗ ܕܒܟܪܣܐ. ܘܥܡ ܟܿܠܗܝܢ ܡܘܼܫܚ̈ܬܗ ܘܬܪܒܝܼܬܗ. ܘܗܘܼܦܟܗ. ܘܟܕ ܥܝܼܪ ܘܟܕ ܕܡܝܼܟ. ܘܟܕ ܡܙܕܕܩ ܘܟܕ ܡܣܟܠ. ܘܟܕ ܡܼܬܒܣܡ ܘܟܕ ܡܫܼܬܢܩ. ܘܟܕ ܡܼܬܢܣܐ ܘܟܕ ܡܼܬܪܘܚ. ܘܒܟܿܠܗܘܿܢ ܕܘܼܒܪ̈ܘܗܝ. ܘܗܿܟܢ ܩܪܝܼܒ ܠܗ ܘܐܝܼܬܘ̄ ܒܗ ܝܬܝܼܪ ܡܼܢ ܢܦܫܐ ܒܦܓܪܐ. ܐܝܟ ܕܒܣܟܐ ܠܡܐܡܪ. ܗܿܟܢ ܐܝܼܬܘ̄ ܐܠܗܐ ܒܒܪܝܼܬܗ ܟܿܠܗܿ ܡܼܢ ܣܿܟܗܿ ܐܝܟ ܢܦܫܐ ܒܦܓܪܐ. ܘܐܝܟ ܚܡܝܼܡܘܼܬܐ ܒܓܘܼܫܡܐ ܚܝܐ. ܘܐܝܟ ܪܛܝܼܒܘܼܬܐ ܒܡܝ̈ܐ. ܘܐܝܟ ܢܘܼܗܪܐ ܒܐܐܪ. ܘܠܝܬ ܣܟ ܕܘܼܟܬܐ ܕܣܦܝܼܩܐ ܡܢܗ ܘܠܐ ܡܼܨܝܐ ܕܬܗܼܘܐ. ܐܦܠܐ ܕܬܐܡܪ ܐܘܿ ܕܬܫܼܬܡܗܝ. ܘܡܛܠܗܕܐ ܗܼܘ ܐܚܝܼܕ ܟܿܠ. ܘܡܙܝܼܥ ܠܟܿܠ. ܘܝ݀ܨܦ ܠܟܠ. ܘܒܛܝܼܠ ܠܗ ܥܠ ܟܿܠ. ܘܡܐܚܐ ܘܡܐܛܒ ܘܡܢܛܪ ܠܟܿܠ. ܘܠܗ ܡܬܬܚܝܼܒܐ ܬܫܒܘܼ̇ܬܐ ܘܬܘܕܝܬܐ ܘܣܓܕܬܐ ܡܼܢ ܟܿܠ. ܠܥܿܠܡܥܠܡܝܢ ܐܡܝܢ: ܘܒܗܿܠܝܢ ܫܠܡ ܩܦܠܐܘܢ ܕܬܫܥܐ ܒܝܕ ܐܠܗܐ ܕܚܝܠ ܘܥܕܪ܀܀ Chapter 10 ܬܘܼܒ ܥܡ ܐܠܗܐ ܕܡܚܟܡ ܩܦܠܐܘܢ ܕܝ̄ ܥܠܗܿܝ ܕܐܢ ܡܬܼܕܪܟ ܐܠܗܐ܆ ܐܘܿ ܠܐ ܡܼܬܕܪܟܢܐ ܗܿܘ. ܕܐܝܼܬܘܗܝ ܐܠܗܐ ܘܕܚܕ ܗܼܘ ܒܠܚܘܼܕܘܗܝ ܡܪܐ ܘܥ݀ܒܘܼܕܐ ܘܫܠܝܼܛܐ ܘܐܚܝܼܕ ܟܿܠ. ܘܐܕܝܼܬܘ̄ ܬܠܬܐ ܩܢܘܼ̈ܡܐ. ܗܘܢܐ ܘܡܠܼܬܐ ܘܪܘܼܚܐ. ܕܡܫܼܬܡܗܝܢ ܐܒܐ ܘܒܪܐ ܘܪܘܚܐ ܩܕܝܼܫܐ. ܚܕܐ ܬܠܝܼܬܝܘܼܬܐ ܣܓܝܼܕܬܐ ܘܩܕܝܫܬܐ ܘܡܫܒܚܬܐ. ܐܝܼܬܝܼܝܼܬܐ ܘܡܬܘܼܡܝܬܐ ܕܠܐ ܫܘܼܪܝ ܘܕܠܐ ܫܘܼܠܡ. ܘܕܚܕ ܗܼܘ ܫܡܗ ܗܿܘ ܕܐܝܼܬܘܗܝ ܐܡܝܢܐܝܼܬ. ܘܗܼܘ ܐܝܬܘܗܝ ܥܠܼܬܐ ܕܟܿܠ ܥܠܼ̈ܠܢ. ܘܒܪܘܼܝܐ ܕܟܿܠ ܒܪ̈ܝܢ. ܘܗܘܼ ܝ݀ܨܦ ܘܡܕܒܪ ܘܡܦܪܢܣ 73 ܘܒܛܝܠ ܠܗ ܥܠ ܟܿܠ. ܒܗܿܝ ܕܗܼܘ ܐܚܝܕ ܟܿܠ. ܡܿܨܐܼ ܚܝܼܠ ܟܿܠ. ܩܕܡܬ݀ ܐܬܼܝܕܥܬ݀ ܘܐܫܼܬܪܪܬ݀ ܠܘܬܢ ܘܐܬܗܝܡܢܬ݀ ܘܐܬܬܘܕܝܬ݀. ܒܝܕ ܣܘܠܘܓܝܣ̈ܡܘ ܗܿܠܝܢ ܕܩܕܡܘ ܘܟܘܼܢܫ ܚܘܼܫܒ̈ܐ ܘܬܚܘܝ̈ܬܐ ܟܝܢ̈ܝܬܐ ܕܠܝܬ ܠܡܼܬܦܠܓܘ ܥܠܝܗܘܢ ܐܦܠܐ ܠܡܬܗܦܟܘܼ. ܗܿܫܐ ܕܝܢ܆ ܬܘܼܒ ܡܒܚܢܐ ܡܠܼܬܐ ܘܗܿܡܣܐ ܠܡܼܬܪܢܝܘܼ. ܕܐܢ ܐܪܥܐ ܘܡܼܨܝܐ ܕܢܼܬܕܪܟ ܘܢܬܝܼܕܥ ܗܼܘ ܥܒܘܕܐ ܘܒܪܘܝܐ ܕܐܫܼܬܡܗ ܐܠܗܐ ܡܼܢ ܒܪܝܬܗ. ܝܬܝܼܪܐܝܬ ܡܼܢ ܡܠ̈ܝܼܠܐ ܘܝܕܘܼܥܬ̈ܢܐ ܡܫܘܬܦ̈ܝ ܒܗܘܢܐ ܘܒܝܼܕܥܬܐ. ܘܐܢ ܡܼܨܝܐ ܕܢܬܕܪܟ ܡܢܼܗܘܢ ܓܡܝܼܪܐܝܬ ܘܡܫܡܠܝܐܝܬ ܡܼܬܕܪܟ. ܐܘܿ ܡܢܬܢܐܝܼܬ. ܐܝܟ ܕܐܝܼܬܘܗܝ ܒܟܝܿܢܗ. ܐܘܿ ܐܝܟ ܕܨ݀ܒܐ ܕܢܘܕܥ ܐܢܘܢ ܠܦܘܬ ܕܫܘܝܢ. ܘܐܬܕܟܝܼܘ ܘܐܨܛܠܠܘ ܘܡܨܝܢ ܘܡܕܪܟܝܢ. ܐܘܿ ܟܘܼܠܢܐܝܼܬ ܠܐ ܡܼܬܕܪܟ ܘܠܐ ܡܬܼܦܫܩ ܘܐܢ ܐܦ ܒܪ̈ܝܬܐ ܐܚܪ̈ܢܝܬܐ ܠܐ ܡܠ̈ܝܼܠܬܐ ܡܪ̈ܓܫܢ ܒܗ ܘܐܝܼܬ ܟܘܼܠܢܐܝܼܬ ܠܐ ܡܼܬܕܪܟ ܘܠܐ ܡܬܼܦܫܩ ܘܐܢ ܐܦ ܒܪ̈ܝܬܐ ܐܚܪ̈ܢܝܬܐ ܠܐ ܡܠ̈ܝܼܠܬܐ ܡܪ̈ܓܫܢ ܒܗ ܘܐܝܼܬ ܠܗܝܢ ܝܕܥܬܐ ܕܥܠܘܗܝ. ܐܘܿ ܠܐ. ܠܐ ܫܠܝܼܛ ܘܠܐ ܡܦܣ ܠܗܘ̈ܢܐ ܠܐ ܨܠ̈ܝܼܠܐ. ܘܠܠܒ̈ܘܬܐ ܠܐ ܕܟܝ̈ܐ ܘܠܚܘܼܫܒ̈ܐ ܠܐ ܙܗܝ̈ܐ. ܠܡܼܬܪܢܝܘܼ ܘܠܡܬܗܘܢܢܘܼ ܘܠܡܼܬܚܫܒܘ ܥܠ ܗܿܘ ܩܕܝܫ ܒܟܿܠ. ܘܣܓܝܼܕ ܡܼܢ ܟܿܠ. ܘܐܚܝܼܕ ܠܟܿܠ. ܘܡܕܒܪ ܠܟܿܠ. ܘܡܿܨܐܼ ܚܝܼܠ ܟܿܠ. ܗܿܘ ܠܐ ܡܬܕܪܟܢܐ ܘܠܐ ܡܬܗܘܢܢܐ. ܘܠܐ ܡܼܬܡܠܠܢܐ ܘܠܐ ܡܬܼܦܫܩܢܐ. ܘܠܐ ܡܬܼܩܪܢܐ. ܘܠܐ ܡܬܼܥܩܒܢܐ ܘܠܐ ܡܣܼܬܝܟܢܐ ܠܗܘܿܢܐ ܕܒܪ̈ܝܐ ܘܥܒܝܼܕ̈ܐ. ܠܐ ܡܼܨܝܐ ܠܡܿܢ ܕܟܪܝܗ ܘܢܣܝܼܣܐ ܚܙܬܗ܆ ܠܡܚܪ ܘܠܡܼܬܒܩܝܘ ܒܙ̈ܠܝܼܩܝ ܫܡܼܫܐ ܨܡܘܼܚܬܢܐ. ܘܐܢ ܡܚܨܦ ܘܡܡܪܚ ܠܡܚܪ ܘܠܡܼܬܒܩܝܘ܆ ܓܿܗܪ ܘܥܡܛ ܘܨ݀ܦܚ ܥܠ ܚܙܼܬܗ ܫܪ̈ܓܪܝܬܐ. ܘܬ݀ܡܗ ܘܬ݀ܗܪ ܘܡܫܬܢܩ. ܗܿܟܘܬ݀ ܡܿܢ ܕܠܐ ܐܬܕܟܝ ܘܐܨܛܠܠ ܡܼܢ ܚܫ̈ܐ ܒܝܼ̈ܫܐ ܘܚܘܼܫܒ̈ܐ ܣܢ̈ܝܐ. ܘܐܬܼܩܕܫ ܦܓܪܗ ܘܐܙܕܗܝܼ ܒܕܟܝܘܼܬܐ ܘܩܕܝܼܫܘܼܬܐ. ܘܐܬܼܕܪܫ ܒܥܢܘܿܝܘܼܬܐ. ܒܨܘܡܐ ܘܢܙܝܼܪܘܼܬܐ ܘܫܗܪܐ ܘܨܠܘܿܬܐ. ܘܐܬܼܡܪܩ ܪܥܝܿܢܗ ܡܼܢ ܡܪ̈ܢܝܬܗ ܕܥܿܠܡܐܬ. ܘܐܪܚܼܩ ܡܼܢ ܟܿܠܗ ܗܘܼܦܟܗ. ܘܛܥܼܐ ܟܿܠܗ ܥܘܼܗܕܢܗ. ܘܥܡܼܪ ܒܫܼܠܝܐ ܘܒܗܝܼܠܘܼܬܐ ܘܚܣܝܼܟܘܼܬܐ ܕܡܼܢ ܟܿܠ ܥܢܼܝܢ. ܣܛܪ ܡܼܢ ܕܟܝ̈ܐ ܘܡܝܬܪ̈ܐ. ܘܐܣܼܬܪܩ ܡܼܢ ܟܿܠ ܩܢܝܢ ܕܒܪܝܼܬܐ. ܣܛܪ ܡܼܢ ܚܫܚܬܐ ܐܿܠܨ݀ܝܬܐ ܫܚܝܼܡܬܐ ܘܒܨܝܼܪܬܐ ܕܡܨܝܐ ܠܡܢܛܪܘܼ ܢܦܫܐ ܒܦܓܪܐ. ܘܐܡܝܼܢܘܼܬ ܚܘܪܐ ܕܒܐܠܗܐ ܪܘܼܚܢܐܝܬ ܘܡܼܬܗܘܢܢܐܝܬ ܘܗܿܪܓܐ ܕܒܗ ܘܕܡܕܒܪܢܘܬܗ ܘܒܟܝܢ ܒܪ̈ܝܬܗ. ܥܡ ܬܟܫܦܬܐ ܘܒܿܥܘܿܬܐ ܕܡܢܗ܆ ܡܿܢ ܕܣܼܛܪ ܡܼܢ ܗܿܠܝܢ ܐܡܡܪܚ ܠܡܼܬܪܢܝܘ ܥܠ ܗܿܘ ܟܝܿܢܐ ܛܘܼܒܬܢ ܒܟܿܠ.] ܪܘܓܙܐ ܢܿܫܡ ܠܩܘܼܒܠܗ ܘܓ݀ܗܪ 74 ܗܘܢܗ ܘܚܿܫܟ ܠܒܗ܆ ܘܡܕܡ ܚܠܦ ܡܕܡ ܡܫܬܪܓܪ ܘܡܬܼܚܠܡܠܡ ܘܡܣܼܬܟܠ ܘܫܿܢܐ ܘܡܬܪܘܕ ܘܡܬܼܒܠܒܠ ܡܕܥܗ ܘܬܡܿܗ ܘܡܼܬܒܠܗܐ ܘܫܿܛܪ ܘܨܿܒܪ ܘܢ݀ܦܩ ܡܼܢ ܗܘܢܗ. ܡܛܠ ܕܠܘ ܕܝܼܠܢ ܒܪ̈ܝܐ ܘܥܒܝܼܕ̈ܐ ܐܝܼܬܝܗܿ ܠܡܡܪܚܘܼ ܘܠܡܥܩܒܘܼ ܘܠܡܒܼܨܐ ܠܗܿܘ ܟܝܿܢܐ ܛܘܼܒܬܢܐ ܘܠܐ ܡܬܕܪܟܢܐ. ܐܠܐ ܡܿܢ ܕܪܐ݀ܓ ܠܡܼܕܥ ܗܼܘ ܠܗ ܩܕܡܐܝܬ. ܘܗܿܝܕܝܢ ܠܡܪܓܫܘܼ ܒܥܿܒܘܼܕܗ ܘܠܡܕܥܗ ܐܝܟ ܕܡܼܨܝܐ ܠܡܕܪܟܘ. ܕܕܘܼ̣ܝ ܠܒܗ ܢܐܨܦ ܩܕܡܐܝܼܬ ܘܕܫܦܝܘܼܬܐ ܕܢܦܫܗ ܘܡܨܠܠܘܬܐ ܕܗܘܢܗ. ܘܗܿܠܝܢ ܗܘܝ̈ܢ ܒܟܘܼܒܫܐ ܕܦܓܪܐ ܘܬܩܢܘܼܬ ܕܘܒܪܐ. ܘܡܪܝܼܩܘܬ ܪܥܝܿܢܐ ܘܙܗܝܘܼܬ ܚܘܼܫ̈ܒܐ ܐܝܟ ܕܐܡܼܪܢܢ ܡܼܢ ܠܥܼܠ. ܥܡ ܫܒܝܼܩܘܼܬܐ ܘܪܚܘܼܩܝܐ ܘܡܬܢܟܪܝܢܘܼܬܐ ܕܡܼܢ ܟܿܠܗܝܢ ܡܥܘܟ̈ܢܝܬܐ ܕܒܥܿܠܡܐ. ܘܗܿܝܕܝܢ ܠܦܘܼܬ ܡܝܬܪܘܼܬ ܕܘܼܒܪ̈ܘܗܝ ܘܬܡܝܼܡܘܼܬܗ ܕܒܦܘܼܠܚܢܐ ܐܠܗܝܐ ܘܗܪܓܐ ܪܘܼܚܢܝܐ. ܘܕܘܼܪܫܐ ܕܒܝܕܥܬܐ ܫܪܝܼܪܬܐ. ܣܿܠܦ ܘܡܬܼܥܠܐ ܘܥ݀ܐܠ ܘܡܼܬܓܘܐ ܒܐܡܪ̈ܙܐ ܐܠܗ̈ܝܐ. ܘܡܼܬܓܠܝܢ ܠܗ ܐܡܪ̈ܙܐ ܟܣܝ̈ܐ ܘܓܢ̈ܝܙܐ. ܘܝܪܒ ܘܡܬܼܥܠܡ ܘܡܬܼܚܝܠ ܘܡܫܼܬܪܪ ܥܠ ܗܿܠܢ ܕܡܬܝ̈ܕܥܢ ܠܗ. ܘܡܩܒܠ ܫܘܼܟ̈ܢܐ ܪܘܪ̈ܒܐ ܕܠܐ ܣܿܠܩܝܢ ܗܘܼܘ ܥܠ ܒܠܗ. ܘܡܐܓܢ ܥܠܘܗܝ ܚܝܠܐ ܪܒܐ ܕܫܪܪܐ. ܘܝ݀ܗܒ ܠܗ ܣܘܼܟܠܐ ܘܒܘܼܝܿܢܐ ܘܡܕܥܐ ܘܦܪܘܼܫܘܼܬܐ ܠܡܼܦܪܫ ܫܪܪܐ ܡܼܢ ܕܓܠܘܼܬܐ. ܘܩܘܼܫܬܐ ܡܼܢ ܫܘܼܩܪܐ. ܘܚܬܝܼܬܘܼܬܐ ܡܠܒܒܢܝܼܬܐ ܡܼܢ ܛܘܥܝܼܝܼ ܒܠܝܠܬܐ ܘܪܘܼܚܐ ܕܕܘܘܕܐ. ܗܿܝܕܝܢ ܡܫܪܐ ܠܡܥܼܠ ܒܬܪܥܐ ܕܝܼܕܥܬܐ ܕܫܪܪܐ. ܘܠܡܼܣܩ ܒܕܪ̈ܓܐ ܕܡܘܼܫ̈ܚܬܐ. ܘܠܡܼܬܓܘܝܘܼ ܒܬܐܘܪܝܐܣ ܪ̈ܘܼܚܢܝܬܐ. ܘܡܼܢܗܝܢ ܕܗܿܠܝܢ ܘܒܗܝܢ܆ ܡܫܪܐ ܠܡܚܼܙܐ ܠܗܿܘ ܠܐ ܡܬܼܚܙܝܢܐ. ܐܝܟ ܕܨ݀ܒܐ ܠܡܚܘܝܘܼ ܠܗ ܢܦܫܗ. ܠܦܘܼܬ ܡܫܘܼܚܬܗ ܘܕܘܼܒܪܗ ܘܡܕܪܟܢܘܬ ܝܼܕܥܬܗ ܘܠܦܘܼܬ ܫܦܝܘܼܬܐ ܘܡܪܝܼܩܘܬܐ ܕܡܚܙܝܬܐ ܕܢܦܫܗ. ܘܐܡܼܬܝ ܕܣܿܠܩܐ ܠܪܘܡܐ ܕܝܼܕܥܬܐ ܘܡܼܬܥܠܐ ܠܣܟܗܿ ܕܓܡܝܼܪܘܼܬܐ. ܘܡܼܬܡܛܐ ܠܡܫܘܼܚܬܐ ܪܒܬܐ. ܗܿܝܕܝܢ ܟܕ ܒܠܩ ܥܠ ܗܿܘ ܐܬܪܐ ܕܕܟܝܘܼܬܐ. ܘܨܿܡܚ ܥܠܘܗܝ ܙܠܓܗ ܕܫܪܪܐ. ܚܿܙܐ ܪܘܝܼܚܘܼܬܐ ܣܿܓܝܐܬܐ. ܘܪ̈ܘܡܐ ܡܥܠܝ̈ܐ ܘܠܐ ܡܬܼܡܫܚ̈ܢܐ ܘܣܘܼܟ̈ܠܐ ܬܗܝܼܪ̈ܐ ܘܠܐ ܡܬܼܦܫܩ̈ܢܐ. ܘܬܗܪܐ ܕܠܐ ܡܬܠܡܠܠ ܘܕܘܼܡܪܐ ܕܠܐ ܡܣܼܬܝܟ. ܘܪܒܘܼܬܐ ܕܠܐ ܡܼܬܡܫܚܐ. ܘܐܝܼܬܘܼܬܐ ܕܠܐ ܡܬܕܪܟܐ. ܘܟܕ ܡܪܓܫ ܒܗܿܝ ܡܪܘܼܬܐ ܛܘܼܬܢܝܼܬܐ. ܘܠܐ ܡܼܬܡܠܠܢܝܼܬܐ ܘܠܐ ܡܼܬܚܫܒ ܥܠ ܢܦܫܗ ܘܟܝܿܢܗ ܕܡܿܢܘ ܘܡܼܢ ܡܘܿܢ ܘܐܝܟܢ ܐܝܼܬܘܗܝ. 75 ܫܿܐܛ ܗܼܘ ܠܗ ܘܙܿܥܪ ܒܥܝ̈ܢܝ ܢܦܫܗ. ܘܡܬܡܟܟܐ ܬܪܥܝܼܬܗ ܘܐܝܟ ܥܦܪܐ ܘܩܼܛܡܐ ܚܫܒ ܢܦܫܗ ܠܘܬ ܗܿܝ ܪܒܘܼܬܐ. ܘܐܝܟ ܛܡܐܘܬܐ ܘܢܕܝܼܕܘܬܐ ܠܘܬ ܗܿܝ ܩܕܝܫܘܼܬܐ. ܘܐܝܟ ܬܘܠܥܐ ܫܝܼܛܬܐ ܘܡܣܠܝܬܐ ܠܘܬ݀ ܗܿܝ ܛܘܼܒܬܢܘܼܬܐ ܡܥܠܝܬܐ. ܗܿܝܕܝܢ ܐܝܟ ܟܝܿܢܐ ܘܕܝܼܠܝܬܐ ܕܒܟܐܦܐ ܕܢܓܢܛܝܣ ܕܢܬܿܦ ܠܦܪܙܠܐ ܠܘܬܗ. ܗܿܟܢ ܢܬܦܐ ܠܗ ܛܝܒܘܼܬܐ ܕܐܝܼܬܘܼܬܐ ܠܘܬܗܿ. ܘܚܙܝܼ ܠܕܘܼܡܪܐ ܘܬܐܘܪܝܐ ܪܒܬܐ ܕܒܟܐܦܐ ܗܿܕܐ ܡܓܢܛܝܣ܆ ܕܟܡܐ ܫܦܝܐ ܘܕܟܝܐ ܡܼܢ ܗܘܼ̈ܠܐ ܐ̱ܚܪܬܐ܆ ܪܗܝܼܒܐܝܬ ܢ݀ܬܦܐ ܠܦܪܙܠܐ ܠܘܬܗܿ ܘܡܼܬܕܒܩ ܒܗܿ. ܐܢܕܝܢ ܡܬܬܠܘܼܬܐ ܒܗܘܼܠܐ ܐ̱ܚܪܬܐ ܕܐܝܟ ܬܘ̈ܡܐ ܘܒܼܨ̈ܠܐ. ܘܕܐܝܟ ܗܿܠܝܢ ܣܪ̈ܝܬ݀ ܪܝܼܚܐ܆ ܒ݀ܛܠܐ ܡܥܒܕܢܘܬܗܿ. ܘܠܐ ܣܟ ܢ݀ܬܦܐ ܠܦܪܙܠܐ. ܥܕܡܐ ܕܬܘܼܒ ܬܗܼܘܐ ܥܠܝܗܿ ܒܛܝܼܠܘܬܐ ܘܬܬܫܝܓ ܒܚܠܐ ܬܩܝܼܦܐ ܘܒܡ̈ܝܐ ܕܟ̈ܝܐ ܘܬܬܡܪܩܝ ܡܼܢ ܟܿܠܗܿ ܨܐܘܼܬܐ ܘܪܝܼܚܐ ܣܪܝܐ ܕܢܩܦ ܠܗܿ. ܗܿܝܕܝܢ ܗܿܦܟܐ ܠܟܝܿܢܗܿ ܩܕܡܝܐ. ܗܟܘܬ ܢܦܫܐ ܕܒܪܐܢܫܐ ܟܡܐ ܕܫܦܝܐ ܘܢܩܕܐ ܘܕܟܝܐ ܡܼܢ ܗܘܼܠܢܝܘܼܬܐ ܕܚܫ̈ܐ ܒܝܼ̈ܫܐ ܘܚܘܼܫ̈ܒܐ ܣܢ̈ܝܐ. ܡܬܼܢܬܦܐ ܠܘܬ݀ ܡܪܗܿ ܘܡܼܬܢܩܦܐ ܠܥܒܘܼܕܗܿ. ܐܢܕܝܢ ܡܼܬܥܪܙܠܐ ܒܚܫ̈ܐ ܗܿܠܝܢ ܒܝܼܫ̈ܐ܆ ܡܙܕܗܡܐ ܘܡܣܼܬܡܝܐ ܘܢ݀ܦܩܐ ܡܼܢ ܕܝܼܠܝܬܐ ܕܟܝܿܢܗ ܘܡܼܬܪܚܩܐ ܡܼܢ ܝܕܥܬܐ ܕܫܪܪܐ ܘܡܪܓܫܢܘܼܬܐ ܕܒܪܘܝܗܿ. ܐܢܕܝܢ ܬܬܫܝܓܝ ܡܼܢ ܨܿܐܘܬܐ ܕܟܘܼܬܡ̈ܬܐ. ܘܬܬܡܪܩܝ ܡܼܢ ܣܪܝܘܬܐ ܕܚܫ̈ܐ ܘܙܗܡܘܼܬܐ ܕܚܘܼܫ̈ܒܐ ܒܝܕ ܚܝܠܐ ܡܨܪܦܢܐ ܕܥܡ̈ܠܐ ܕܬܝܒܘܼܬܐ. ܘܡܝ̈ܐ ܢܩ̈ܕܐ ܕܕܡ̈ܥܐ ܕܡܬܼܬܘܝܢܘܬܐ ܘܬܼܗܦܘܼܟܝ ܠܟܝܿܢܗܿ ܩܕܡܝܐ. ܘܠܫܦܝܘܼܬܐ ܕܩܢܘܼܡܗܿ. ܗܷܿܕܝܢ ܬܘܼܒ ܡܪܓܫܐ ܒܡܪܗܿ ܘܡܼܬܢܩܦܐ ܠܥܒܘܕܗܿ. ܘܟܕ ܡܬܼܕܟܐ ܗܘܢܐ ܘܡܼܨܛܠܠ ܡܼܢ ܚܫ̈ܐ. ܡܬܡܪܩ ܘܡܫܼܬܦܠܐ ܡܼܢ ܟܿܠܗܿ ܗܘܼܠܢܝܘܼܬܐ ܘܬܐܛܪܢܘܼܬܐ ܕܥܿܠܡܐ. ܘܣܿܠܩ ܘܡܼܬܥܠܐ ܘܡܬܓܘܐ ܒܬܐܘܪ̈ܝܐܣ ܪ̈ܘܚܢܝܬܐ ܐܟܝ ܕܐܬܚܘܝܬ݀ ܡܼܢ ܠܥܼܠ. ܘܡܼܬܡܛܐ ܠܓܡܝܼܪܘ̄ ܡܫܡܠܝܬܐ. ܬܘܼܒ ܠܐ ܦܿܐܫ ܠܗ ܪܓܬܐ ܐܘܿ ܨܒܝܿܢܐ ܐܘܿ ܡܚܫܒܬܐ. ܐܠܐ ܚܕ ܒܠܚܘܼܕ. ܗ̄ ܠܡܪܓܫܘܼ ܒܥܿܒܘܕܗ. ܘܠܡܬܪܢܝܘܼ ܥܠܘܗܝ ܘܠܡܗܪܓ ܒܗ. ܕܡܼܢ ܗܿܕܐ ܚܿܕܐ ܘܡܬܼܒܣܡ ܘܪܘܙ ܘܡܼܬܥܫܢ ܘܡܬܦܨܚ ܘܡܼܬܓܠܐ. ܕܐܠܘ ܟܿܠܗ ܥܿܠܡܐ ܠܗ ܡܼܬܝܗܒ. ܐܝܟ ܩܼܛܡܐ ܫܝܼܛܬܐ ܘܐܝܟ ܙܒܼܠܐ ܣܪܝܐ ܫܿܐܛ ܠܗ. ܘܠܐ ܣܟ ܡܨܛܠܐ ܐܦܠܐ ܕܢܚܘܼܪ ܒܗ. ܒܘܼܣܡܗ ܕܝܢ ܠܐ ܡܼܬܡܠܠܢܐ ܐܝܼܬܘ̄ ܐܝܟ ܕܐܡܼܪܢܢ ܗܪܓܐ ܕܒܪܡܗ. ܕܐܝܟܢ ܕܝܢ ܩܠܝܠ ܡܼܢ ܣܿܓܝܼ 76 ܡܐܠܠܘܢ ܐܝܟ ܕܡܼܨܝܐ ܠܡܐܡܪ ܘܠܡܫܼܡܥ ܐܡܿܪܝܢܢ܀ ܐܡܼܬܝ ܗܿܟܝܼܠ ܕܡܬܓܡܪ ܒܪܢܫܐ. ܘܡܬܕܟܐ ܠܒܗ ܘܡܨܛܠܠ ܗܘܢܗ. ܘܡܪܓܼܫ ܒܒܪܘܝܗ. ܡܫܪܐ ܠܡܬܪܢܝܘܼ ܥܠܘܗܝ. ܘܡܠܥܩܒܘܼ ܘܠܡܒܼܥܝܗ. ܘܡܛ݀ܠ ܕܠܝܬ ܠܗ ܬܘܼܒ ܐܬܪܐ ܘܠܐ ܝܿܕܥ ܐܘܼܪܚܐ ܐܚܪܬܐ ܠܡܐܙܠ ܒܗܿ ܘܠܡܥܩܒܘ ܥܠܘܗܝ ܣܛܪ ܡܼܢ ܒܪ̈ܝܬܗ. ܒܗܝܢ ܡܬܟܪܟ ܘܦܿܗܐ ܟܕ ܪ݀ܬܚ ܒܚܘܼܒܗ ܘܡܫܼܠܗܒ ܒܪܚܼܡܬܗ. ܘܒܿܥܐ ܠܗ ܠܗܿܘ ܕܝܬܝܪ ܡܼܢ ܟܿܠ ܡܕܡ ܪܚܝܼܡ ܘܚܒܝܼܒ ܘܛܒܿ ܘܫܦܝܼܪ ܘܥܬܝܼܪ ܘܚܟܝܼܡ. ܡܛܠ ܕܒܗܘܿܢ ܒܗܘ̈ܝܐ ܘܟܝ̈ܢܐ ܕܒܪ̈ܝܬܐ ܚܿܙܐ ܕܘܪ̈ܟܬܗ ܘܐܬܪ ܥܩܼܒ̈ܬܗ. ܘܥܠ ܗܿܝ ܝܬܝܪ ܫ݀ܢܐ ܘܡܫܼܬܠܗܒ ܘܪܗܛ ܘܠܐ ܡܩܘܐ. ܘܡܬܟܪܟ ܟܕ ܣܦܝܼܦ ܒܪܚܼܡܬܗ. ܘܒܿܥܐ ܠܗ ܠܗܿܘ ܕܝܬܝܪ ܡܼܢ ܟܿܠ ܡܕܡ ܪܚܝܼܡ ܘܚܒܝܼܒ ܘܛܒܿ ܘܫܦܝܼܪ ܘܥܬܝܼܪ ܘܚܟܝܼܡ. ܡܛܠ ܕܒܗܘܿܢ ܒܗܘ̈ܝܐ ܘܟܝ̈ܢܐ ܕܒܪ̈ܝܬܐ ܚܿܙܐ ܕܘܪ̈ܟܬܗ ܘܐܬܪ ܥܩܼܒ̈ܬܗ. ܘܥܠ ܗܿܝ ܝܬܝܪ ܫܿܢܐ ܘܡܫܼܬܠܗܒ ܘܪܗܛ ܘܠܐ ܡܩܘܐ. ܘܡܬܟܪܟ ܟܕ ܣܦܝܼܦ ܒܪܚܡܬܗ. ܘܐܝܟ ܡܣܒܪ ܕܗܐ ܩܪܝܼܒ ܘܡܼܛܐ ܘܐܕܪܟ ܠܗܿܘ ܚܒܝܼܒܐ. ܘܟܕ ܚܿܙܐ ܐܬܪ ܕܘܼܪ̈ܟܬܗ. ܘܒܙܒܢ ܙܒܢ ܐܝܟ ܛܠܢܝܼܬܗ. ܘܡܛ݀ܠ ܕܥܕܟܝܠ ܒܦܓܪܐ ܐܣܝܼܪ ܘܒܐܪܥܐ ܐܝܼܬܘ̄ ܕܘܼܝܪܗ. ܡܼܢ ܬ݀ܡܢ ܡܫܪܐ ܒܒܥܬܗ. ܘܟܕ ܪܕܐ ܒܐܪܥܐ ܚܙܼܐ ܕܘܼܪ̈ܟܬܗ ܘܐܬܪ ܥܩܼܒ̈ܬܗ ܟܕ ܪܩܼܥܗܿ ܘܫܪܪܗܿ ܘܫܬܣܗܿ ܥܠ ܪܡܼܙܐ ܕܚܝܠܗ. ܘܟܕ ܦ݀ܗܐ ܘܒ݀ܥܐ ܠܗ܆ ܦܓܥܼܘ ܒܗ ܛܘܪ̈ܐ ܘܪ̈ܡܬܐ ܘܣܠܼܩ ܒܒܥܬܗ ܘܐܫܼܟܚ ܕܘܟܬ݀ ܐܝܼܕ̈ܘܗܝ ܟܕ ܛ݀ܦܚ ܗܘܼܐ ܠܗܢ ܘܡܩܝܼܡ ܘܡܥܠܐ ܘܡܪܡܪܡ. ܘܟܕ ܡܬܟܪܟ ܒܝܢܬ݀ ܥܿܒ̈ܐ ܘܐܝܼܠ̈ܢܐ ܘܦܪ̈ܕܝܣܐ܆ ܘܡܗܠܟ ܥܠ ܡܪ̈ܓܐ ܡܦ̈ܬܟܝ ܒܓܘܢ̈ܐ ܕܦܩ̈ܚܐ ܘܗܒ̈ܒܐ. ܚܙܼܐ ܫܘܼܦܪܗ ܥܠ ܐܝܼܠ̈ܢܐ ܘܢܣܼܒ ܛܥܡܗ ܡܼܢ ܦܐܪ̈ܐ. ܘܣܼܩ ܪܝܼܚܗ ܡܼܢ ܗܒ̈ܒܐ. ܘܚܼܙܐ ܦܐܝܘܼܬܗ ܥܠ ܙܗܪ̈ܐ ܘܫܘܼܫ̈ܢܐ. ܘܟܕ ܪܕܐ ܘܡܬܟܪܟ ܒܫܝܢܘܼܬܗ ܣܦܝܼܦܬ݀ ܒܡܪܗ. ܦܓܥܼܘ ܒܗ ܝܡ̈ܡܐ ܘܢܗܪ̈ܘܬܐ. ܘܚܼܙܐ ܛܠܢܝܼܬܗ ܒܓܘ ܡܝ̈ܐ. ܘܚܝܠܗ ܒܝܢܬ݀ ܓܠ̈ܠܐ. ܘܕܘܪ̈ܟܬܗ ܥܠ ܚܨܐ ܕܡܚܫ̈ܘܼܠܐ. ܐܡܣܼܪ ܗܘܢܐ ܝܿܩܕ ܒܪܚܼܡܬܗ ܘܫܘܪ ܘܥܠ ܠܓܘ ܝܡܐ. ܐܬܢܘܓ ܒܝܢܬ݀ ܓܠ̈ܠܐ. ܐܫܬܩܦ ܒܝܢܬ݀ ܡܚܫ̈ܘܼܠܐ. ܠܐ ܫܦܠܘܼܗܝ ܛܘܼܪ̈ܦܐ. ܘܠܐ ܬܗܝܼܘܗܝ ܡܡ̈ܘܼܠܐ. ܚܙܼܐ ܐܘܼܪ̈ܚܬܗ ܒܓܘ ܝܡ̈ܡܐ. ܘܫܒܝܼܠ̈ܘܗܝ ܒܡܝ̈ܐ ܣܿܓܝ̈ܐܐ. ܥܡܼܕ ܒܥܘܼܡ̈ܩܐ ܘܢܚܬ ܠܬܗ̈ܘܼܡܐ. ܐܫܼ̣ܚ ܥܩܼܒ̈ܬܗ ܒܬܚ̈ܬܝܬܗܘܢ ܕܬܗ̈ܘܼܡܐ ܟܕ ܡܘܠܕ ܘܡܪܒܐ ܘܡܬܪܣܐ ܘܡܛܟܣ ܠܟܿܠܗ ܪ̈ܚܫܐ ܕܒܥܘܼܡ̈ܩܐ. ܚܙܼܝܗܝ ܬ݀ܡܢ ܓܠܿܦ ܛܒ̈ܥܐ ܛܒ̈ܐ ܘܟܐܦ̈ܝ ܫܘ̄. ܟܕ ܚܿܫܠ ܡܪ̈ܓܢܝܬܐ ܫܒܝܼܚ̈ܬܐ. ܚܼ؛ܐ ܫܘܼܦܪܗ ܒܟܝܿܢܗܘܢ. ܘܙܝܼܘܗ ܒܐܦ̈ܝܗܘܢ. ܢܚܼܬ ܠܗ ܗܘܢܐ ܠܬܼ̇ܬ ܡܼܢ ܫܬܐܣ̈ܝ ܬܒܝܠ. ܚܙܼܐ ܕܪ̈ܥܘܗܝ ܟܕ ܛܥܝܼܢܝܢ ܠܒܪܝܬܗ. ܘܚܝܠܗ 77 ܟܕ ܡܣܡܟ ܠܗܿ ܕܠܐ ܬܨܠܐ ܠܚܕ ܡܼܢ ܓܒ̈ܝܢ. ܣܠܩ ܡܼܢ ܬ݀ܡܢ ܟܕ ܒܿܥܐ ܠܗ ܝܩܕ ܘܡܫܼܬܠܗܒ ܒܪܚܼܡܬܗ. ܣܦܝܼܦ ܘܪܗܝܼܒ ܘܚܦܝܼܛ ܘܪܗܿܛ ܒܬܪ ܥܩܼܒ̈ܬܗ. ܠܐ ܐܬܼܟܠܝܼ ܡܼܢ ܝܡܡ̈ܐ. ܘܠܐ ܐܬܼܥܘܟ ܡܼܢ ܓܠ̈ܠܐ. ܘܠܐ ܦܼܫ ܒܬܗܘܼ̈ܡܐ. ܫܪܝ ܠܡܼܣܩ ܘܠܡܼܬܥܠܝܘܼ ܡܼܢ ܐܪܥܐ ܒܒܥܬܗ. ܣܼܩ ܢܫܡܼܬܗ ܡܼܢ ܐܐܪ. ܚܙܼܐ ܡܦܬܟܘܼܬ݀ ܨܘܼܪ̈ܬܗ ܒܓܼܢܣ̈ܐ ܕܦܪ̈ܬܐ. ܨܘܒܥܢ̈ܘܗܝ ܒܓܦܼ̈ܐ. ܓܘܢ̈ܘܗܝ ܒܩܢܘܼܡܐ. ܢܘܼܨܪ̈ܬܗ ܡܼܢ ܩ̈ܠܐ. ܠ̈ܥܼܙܘܗܝ ܒܠ̈ܫܼܢܐ. ܬܫܒ̈ܚܬܗ ܡܼܢ ܟܠ ܓܢܼܣ̈ܐ. ܚܼܙܐ ܬܘܼܒ ܛܠܢܝܼܬܗ ܒܥܢ̈ܢܐ. ܫܦܼ̈ܥܐ ܘܪ̈ܣܝܼܣܐ ܕܪܕܝܢ ܡܼܢ ܡܒܘܼܥ̈ܘܗܝ. ܐܝܼܕ̈ܘܗܝ ܕܚܿܫ̈ܠܢ ܐܣܦܝܼܪܗ ܕܒܪܕܐ. ܡܫܒ̈ܘܗܝ ܕܡܩܫ̈ܝܢ ܡܝ̈ܐ. ܘܡܚ̈ܬܢ ܬܠܓܐ ܐܝܟ ܥܡܪܐ. ܘܪܡܝܢ ܓܠܝܼܕܐ ܐܝܟ ܦ̈ܬܐ. ܩܠ̈ܘܗܝ ܥܫܝܼ̈ܢܐ ܒܪ̈ܥܡܐ. ܢܘܗܪܗ ܥܙܝܼܙܐ ܒܒܪ̈ܩܐ. ܐܬܪ ܕܘܼܪ̈ܟܬܗ ܥܠ ܚܨܐ ܕܥܢ̈ܢܐ. ܙܗܪܐ ܕܩܫܼܬܗ ܒܝܢܬ݀ ܫܦܼ̈ܥܐ. ܣܠܼܩ ܬܘܼܒ ܘܐܬܼܥܠܝܼ ܗܘܢܐ ܚܨܝܼܦܐ ܝܿܩܕ ܒܪܚܡܬ݀ ܡܪܗ ܚܼܙܐ ܠܫܡܝ̈ܐ ܕܡܫܬܥܝܢ ܫܘܼܒܚܗ. ܘܠܪܩܝܼܥܐ ܕܡܚܙܐ ܥܒܿܕ ܐܝܼܕ̈ܘܗܝ. ܚܙܼܐ ܨܘܼܪ̈ܬܗ ܒܫܡܫܐ. ܢܘܼܗܪܗ ܒܙܠ̈ܝܼܩܘܗܝ. ܚܝܠܗ ܒܚܡܝܼܡܘܼܬܗ. ܨܒܝܿܢܗ ܒܡܥܒܕܢܘܼܬܗ. ܘܐܟܚܕܐ ܠܡܐܡܪ܆ ܠܗܿ ܠܕܡܘܼܬܗ ܘܠܝܘܼܩܢܗ ܬ݀ܡܢ. ܘܐܟܙܢܐ ܕܫܡܼܫܐ ܡܬܚܙܝܢ ܒܗ ܬܠܬܐ ܫܪ̈ܒܝܢ. ܗ̄ ܐܣܦܝܼܪܗ܆ ܒܕܡܘܼܬ ܗܘܢܐ ܐܒܐ. ܘܨܡ̈ܚܘ̄܆ ܐܝܟ ܡܠܼܬܐ ܕܡܼܢ ܗܘܢܐ ܐܝܼܬܘ̄ ܒܪܐ ܝܼܚܝܕܝܐ. ܘܚܡܝܼܡܘܼܬܗ܆ ܐܝܟ ܪܘܼܚܐ ܘܚ̈ܝܐ ܕܒܗܘܢܐ ܘܡܠܼܬܐ ܕܐܝܼܬܘ̄ ܪܘܼܚܐ ܩܕܝܼܫܐ. ܗܿܟܢ ܡܼܬܚܙܝܐ ܒܗ ܗܼܝ ܬܠܝܼܬܝܘܬܐ ܚܕܢܝܬܐ ܣܓܝܼܕܬܐ ܘܡܫܒܚܬܐ. ܚܕ ܡܪܝܐ ܐܚܝܼܕ ܟܘܠܐ. ܚܙܼܐ ܬܘܼܒ ܨܡܼܚ̈ܘܗܝ ܒܣܗܪܐ. ܙܠ̈ܓܘܗܝ ܢܗܝܷܪ̈ܐ ܒܟܘܟܒ̈ܐ. ܢܿܡܘܿܣܗ ܒܡܘܙܠܬܐ. ܡܙܝܼܥܢܘܼܬܗ ܘܪܡܼܙܗ ܒܟܪܘܼܟܝܐ ܕܟܘܟܒ̈ܐ ܕܫܡܝ̈ܐ. ܪܒܘܼܬܐ ܕܚܝܠܗ ܒܫܡ̈ܝ ܫܡ̈ܝܐ ܥܠ̈ܝܼܐ. ܘܟܕ ܬܡܿܢ ܠܥܠ ܡܕܝܪ ܗܘܢܐ. ܘܚܙܼܝܗܝ ܠܚܒܝܼܒܐ ܕܟܿܠܗ ܨܘܼܪܬܗ ܘܕܡܘܼܬܗ ܘܝܘܩܢܐ ܕܫܘܼܒܚܗ ܘܙܝܼܘܐ ܕܪܒܘܬܗ ܬܡܿܢ ܐܝܼܬܘܗܝ. ܐܕܝܼܩ ܡܼܢ ܬ݀ܡܢ ܡܼܢ ܗܿܘ ܪܘܡܐ ܡܥܠܝܐ ܘܚܪ ܒܬܗܘܼܡ̈ܐ ܬܚܬ̈ܝܐ. ܘܐܨܕ ܠܬܼܚܬ ܡܼܢ ܫܬܐܣ̈ܝ ܬܐܒܝܠ. ܘܗܼܘ ܟܕ ܗܼܘ ܚܝܠܐ ܘܥܘܼܫܢܐ ܕܪܒܘܼܬܗ ܬ݀ܡܢ ܐܝܼܬܘܗܝ ܘܛܥܝܢ ܠܫܬܐܣ̈ܝ ܥܿܠܡܐ. ܘܣܡܝܼܟܝܢ ܕܪ̈ܥܘܗܝ ܠܐܣ̈ܝ ܬܒܝܠ. ܘܟܿܠܗ ܠܬܼܚܬ ܘܟܿܠܗ ܠܥܼܠ. ܟܿܠܗ ܠܓܘ ܘܟܿܠܗ ܠܒܪ. ܟܿܠܗ ܒܝܡܐ ܘܟܿܠܗ ܒܝܒܫܐ. ܟܿܠܗ ܠܓܘ ܒܚܠ̈ܝܼܠܝܗܿ ܕܐܪܥܐ. ܘܒܓܘ ܐܛܝܼܡܘܼܬܐ ܕܫܘܼ̈ܥܐ ܘܛܪ̈ܢܐ. ܘܠܓܘ ܒܠܒܐ 78 ܕܟܐܦ̈ܐ ܘܕܩܝܣ̈ܐ ܘܕܥܣܼܒ̈ܐ ܘܕܗܒ̈ܒܐ. ܘܗܼܘ ܟܕ ܗܼܘ ܙܝܼܘܐ ܕܐܦ̈ܝܗܘܢ. ܘܫܘܼܦܪܐ ܕܓܘܢ̈ܝܗܘܢ ܘܗܼܘ ܠܬܚܼܬ ܡܼܢ ܐܪܥܐ. ܘܗܼܘ ܟܕ ܗܼܘ ܠܥܼܠ ܡܼܢ ܐܪܥܐ. ܗܼܘ ܐܝܼܬܘ̄ ܣܘܩܐ ܕܐܐܪ. ܘܗܼܘ ܐܝܼܬܘܗܝ ܢܘܼܗܪܗ ܘܗܼܘ ܡܙܝܼܥܢܗ. ܘܗܼܘ ܐܝܼܬܘܗܝ ܡܘܠܕܢܐ ܘܡܪܒܝܢܐ ܘܡܦܪܚܢܐ ܕܥܘܦܐ ܕܫܡܝܐ. ܘܗܼܘ ܐܝܼܬܘ̄ ܡܨܝܪܢܗܘܢ ܘܨܘܼܒ̈ܥܢܐ ܫܒܝܼܚ̈ܐ ܕܓܦ̈ܝܗܘܢ. ܗܼܘ ܐܝܼܬܘ̄ ܒܟܢܘܫܝܐ ܕܥܢ̈ܢܐ. ܘܟܿܠܗ ܒܪܛܝܼܒܘܼܬܐ ܕܪ̈ܣܝܣܝܗܘܢ. ܟܿܠܗ ܒܪܩܝܼܥܐ ܘܟܿܠܗ ܒܡܘܙܠܬܐ. ܟܿܠܗ ܒܟܘܟ̈ܒܐ ܘܦܫܝܼܛ ܥܡ ܙܠ̈ܓܝܗܘܢ. ܟܿܠܗ ܒܫܡܿܝܐ ܘܒܫܡܝ ܫܡܿܝܐ ܟܿܠܗ܀ ܘܟܕ ܡܬܒܩܐ ܒܗ ܗܘܢܐ ܒܥܒܘܼܕܐ ܠܐ ܡܣܼܬܝܟܢܐ ܘܠܐ ܡܼܬܕܪܟܢܐ ܕܟܿܠܗ ܒܟܿܠ ܕܘܟ ܐܝܼܬܘ̄ ܠܐ ܡܬܦܣܩܢܐܝܼܬ. ܘܠܟܿܠ ܟܪ ܕܚܿܐܪ ܘܡܬܒܩܐ. ܬ݀ܡܢ ܗܼܝ ܛܠܢܝܼܬܗ. ܘܐܬܪ ܥܩܒ̈ܬܗ ܘܕܘܪ̈ܟܬܗ. ܒܟܿܠ ܕܘܼܟ ܝܨܝܼܦܘܼܬܗ ܘܡܦܪܢܣܢܘܼܬܗ. ܠܟܿܠ ܩܪܝܼܒ ܘܥܡ ܟܿܠ ܐܝܼܬܘܗܝ. ܘܒܓܘ ܟܿܠ ܘܨܝܼܕ ܟܿܠ. ܘܒܟܿܠ ܕܘܼܟ. ܘܠܐ ܡܣܼܬܝܟ ܘܠܐ ܡܬܕܪܟ. ܘܠܐ ܡܬܼܠܒܟ ܘܠܐ ܡܬܼܡܫܚ ܘܠܐ ܡܬܼܟܠܐ ܘܠܐ ܡܩܘܐ. ܐܝܟ ܪܥܡܐ ܢ݀ܗܡ ܩܿܠܗ ܘܐܝܟ ܒܪܩܐ ܩܠܝܼܠ ܘܡܪܕ ܡܼܢ ܚܙܿܬܐ. ܐܝܟ ܢܫܡܬܐ ܩܪܝܼܒ. ܘܐܝܟ ܣܘܦ̈ܐ ܡܒܥܕ. ܘܐܝܟ ܒܐܝܼܕܐ ܡܣܬܼܒܪ. ܘܐܝܟ ܥܠܥܠܐ ܡܫܢܐ. ܗܼܘ ܩܪܝܼܒ ܘܝ݀ܨܦ ܘܡܦܪܢܣ. ܘܗܼܘ ܡܨܝܒ ܡܙܘܢܐ ܕܟܿܠ ܘܡܛܝܼܒ. ܗܼܘ ܢ݀ܛܪ ܘܡܫܘܙܒ ܘܗܼܘ ܡܬܪܣܐ ܘܡܪܒܐ. ܗܼܘ ܡܝܬܐ ܟܿܠ ܠܗܘܿܝܐ. ܘܡܐܚܐ ܘܡܕܒܪ. ܘܗܼܘ ܫܿܩܠ ܪ̈ܘܼܚܬܐ ܘܡܡܝܬ ܘܕܒܿܪ ܐܝܟ ܕܨܒܿܐ. ܘܟܕ ܒܗܿܠܝܢ ܟܿܠܗܝܢ ܚܿܙܐ ܠܗ ܗܘܢܐ. ܘܡܼܬܒܩܐ ܒܗ ܕܠܐ ܡܬܼܠܒܟ ܘܠܐ ܡܼܣܬܝܟ. ܬܡܿܗ ܘܬܗܿܪ ܘܡܬܕܡܪ ܘܡܬܼܒܠܗܐ. ܒܥܡܝܼܩܘܼܬ ܕܝܢ̈ܘܗܝ ܠܐ ܡܬܕܪ̈ܟܢܐ ܘܠܐ ܡܬܬܡܝܼܫ̈ܢܐ. ܘܠܐ ܡܬܥܩ̈ܒܢܐ. ܐܝܟܢ ܠܟܿܠ ܩܪܝܼܒ ܘܡܦܪܢܼܣ ܘܒܟܿܠ ܐܝܬܘܗܝ ܘܡܕܒܪ. ܘܥܠ ܟܿܠ ܒܛܝܼܠ ܠܗ ܘܡܢܛܪ. ܗܕܐ ܡܚܫܒܬܐ ܘܚܙܼܬܐ ܕܬܕܡܘܼܪܬܐ ܘܬܼܗܪܐ ܘܬܡܼܗܐ ܕܒܦܘܼܪ̈ܢܣܘ̄ ܡ̈ܠܝܝ ܚܟܼܡܬܐ ܘܝܕܥܬܐ ܕܒܪܘܝܐ. ܡܬܼܐܡܪܐ ܡܼܢ ܓܡܝܼܪ̈ܝ ܒܚܟܼܡܬܐ ܪܘܼܚܢܝܿܬܐ ܬܐܘܪܝܐ ܕܕܝܼܢܐ ܘܕܒܛܝܼܠܘܼܬܐ. ܐܘܟܝܼܬ ܕܡܦܪܢܣܘܼܬܐ ܘܟܕ ܗܘܢܐ ܡܕܡܝ ܒܥܒܘܕܗ. ܬܘܼܒ ܠܟܐ ܘܠܟܐ ܛܐܿܣ ܘܡܬܟܪܟ ܒܒܥܬܗ ܕܚܒܝܼܒܐ ܘܪܚܝܼܡܐ ܘܡܪܐ ܛܒܿܐ ܘܡܫܠܗܼܒ ܠܟܿܠ ܒܪܚܡܼܬܗ. ܘܐܝܟ ܟܝܿܢܗ ܩܠܝܼܠܐ ܠܟܿܠ ܟܪ ܦܿܪܚ ܘܠܐ ܡܬܼܟܠܐ. ܛܐܿܣ ܘܪܗܿܛ ܘܠܐ ܡܬܠܒܟ ܘܠܐ ܡܩܘܐ ܝܬܝܪ ܡܼܢ ܪܘܼܚܐ ܩܠܝܼܠܐ ܠܟܿ ܟܕ ܦܿܪܚ ܘܠܐ ܡܬܼܟܠܐ. ܛܐܿܣ ܘܪܗܿܛ ܘܠܐ ܡܬܠܒܟ ܘܠܐ ܡܩܘܐ ܝܬܝܪ ܡܼܢ ܪܘܼܚܐ ܪܕܐ ܘܡܣܪܗܒ. ܘܐܝܟ ܒܪܩܐ ܩܠܝܼܠ ܘܠܐ ܡܫܼܬܘܚܪ. ܠܐ ܐܬܼܟܠܝܼ ܒܒܪܝܼܬܐ ܗܕܐ ܘܠܐ ܐܬܠܒܟ 79 ܨܝܕ ܡܬܚܙ̈ܝܢܝܬܐ. ܠܐ ܩܘܝܼ ܠܘܬ݀ ܡܬܪ̈ܓܢܝܬܐ. ܘܡܛܠ ܕܟܝܿܢܗ ܐܝܼܬܘ̄ ܪܘܼܚܢܝܐ ܘܐܝܟ ܐܘܣܝܐ ܕܡܠܐܟ̈ܐ. ܠܬܡܿܢ ܣܟ ܐܦ̈ܘܗܝ ܠܡܼܣܩ ܒܒܥܬܗ ܕܫܦܝܼܪܐ. ܚܼܙܐ ܫܒܝܼܠ̈ܘܗܝ ܒܡܪ̈ܘܡܐ ܥ̈ܠܼܝܐ. ܘܕܘܼ̈ܟܬܗ ܠܥܼܠ ܡܼܢ ܟܠܗܘܿܢ ܫܡ̈ܝܐ ܘܫܡ̈ܝ ܫܡ̈ܝܐ ܡܬܼܚܙܝܢ̈ܐ ܘܠܐ ܡܬܼܚ̈ܙܝܢܐ. ܣܠܼܩ ܘܐܬܼܥܠܝܼ ܠܡܪ̈ܘܡܐ. ܓܕܠ ܘܡܼܛܐ ܠܡܕܝܪ̈ܐ ܠܐ ܡܬܼܡ̈ܫܚܢܐ. ܛܣܼ [ܘܦܪܼܚ ܘܫܼܪܐ ܒܝܢܬ ܟܢ̈ܫܐ ܥ̈ܠܝܐ. ܢܩܼܫ] ܘܦܬܼܚ ܘܥܠ ܘܠܐ ܐܬܟܠܝܼ ܠܡܕܝܼܢܬ݀ ܪ̈ܘܼܚܢܐ ܘܐܬܼܚܠܛ ܒܓܘܼܕ̈ܐ ܕܪ̈ܘܼܚܢܐ. ܐܬܼܗܦܟ ܒܝܢܬ݀ ܐܘܣ̈ܝܐܣ ܕܚܝܠ̈ܘܬܐ ܫܡ̈ܝܢܐ. ܗܿܠܟ ܒܝܢܬ݀ ܬܐܓܡ̈ܐ ܝܩܘ̈ܕܐ. ܫܪܝ ܒ݀ܥܐ ܘܡܥܩܒ. ܘܡܐܨܕ ܘܡܫܐܠ. ܥܠ ܗܿܘ ܠܐ ܡܼܬܚܙܝܢܐ. ܥܠ ܗܿܘ ܠܐ ܡܬܥܩܒܢܐ. ܥܠ ܗܿܘ ܠܐ ܡܬܼܕܪܟܢܐ. ܠܐ ܝܩܕ ܡܼܢ ܓܘܙܠܬܐ. ܠܐ ܐܬܚܪܟ ܡܼܢ ܓܘܼܡܪ̈ܐ ܕܫܠܗܒܝܼܬܐ. ܠܐ ܣܦܼ ܘܐܬܼܛܠܩ ܡܼܢ ܢܒܪܫܬܐ ܕܚܝܼܠܬܐ. ܠܐ ܙ݀ܥ ܡܼܢ ܣܼܕܪ̈ܝܗܘܢ . ܘܠܐ ܟܘܼܙ ܡܼܢ ܛܟܼܣ̈ܝܗܘܢ. ܠܐ ܕܚܼܠ ܡܼܢ ܬܐܓܡ̈ܝܗܘܢ. ܘܠܐ ܐܬܼܥܘܪ ܡܼܢ ܙܝܼܘܐ ܪܒܐ ܕܙܠܝܼܩ̈ܝܗܘܢ. ܐܘ̃ ܚܘܼܒܐ ܟܡܐ ܝܿܨܝܼܦ ܐܢܡܬ܆ ܘܕܬܫܼܠܐ ܠܐ ܝܿܕܥ ܐܢܡܬ. ܠܐܝܟܐ ܐܣܩܬ݀ ܠܗܘܢܐ ܒܪܝܐ ܘܥܒܝܼܕܐ܆ ܒܒܥܬܗ ܕܒܪܘܝܐ. ܘܥܒܘܕܐ. ܠܐܝܟܐ ܐܬܥܠܝܬ݀. ܠܐܝܟܐ ܐܬܪܡܼܪܬ. ܐܝܟܢ ܐܬܚܝܠܼܬ ܘܐܬܝܼܬ ܠܗܿܪܟܐ. ܐܝܟܢ ܐܡܼܪܚܬ ܘܫܘܼܪܬ ܠܡܼܥܠ ܠܐܬܪܐ ܕܪ̈ܘܚܢܐ. ܐܝܟܢ ܐܚܨܦܬ ܘܐܬܼܠܒܒܬ ܠܡܒܼܥܐ ܠܗܿܘ ܟܝܢܐ ܛܘܼܒܬܢܐ ܘܠܐ ܒܪܝܐ. ܠܗܿܝ ܐܘܣܝܐ ܡܥܠܝܬܐ ܘܠܐ ܥܒܝܼܕܬܐ. ܠܗܿܝ ܐܝܼܬܘܼܬܐ ܡܬܘܼܡܝܬܐ ܘܠܐ ܡܼܬܕܪܟܢܝܼܬܐ. ܒܐܝܠܝܢ ܙܘ̈ܥܐ ܟܝ ܡܬܗܦܟ ܐܢܬ. ܘܒܐܝܢܐ ܟܝ ܛܟܼܣܐ ܩܿܐܡ ܐܢܬ. ܐܠܐ ܒܗܝ̄ܡ ܠܐ ܦܠܝܼܓܬܐ ܗܿܠܝܢ ܡܣܼܬܥܪ̈ܢ. ܒܣܒܪܐ ܫܪܝܼܪܐ ܗܿܠܝܢ ܡܬܼܒ̈ܥܝܢ ܒܚܘܼܒܐ ܓܡܝܼܪܐ ܠܐ ܡܘܡܬܢܐ ܗܿܠܝܢ ܡܬܬܼܡܪ̈ܚܢ ܥܼܠ ܠܗ ܗܘܢܐ ܟܕ ܡܚܙܩ ܒܬܠܬܐ ܫܼܪ̈ܝܢܐ ܠܐ ܡܬܼܒܙ̈ܥܢܐ. ܗܝܡܢܘܼܬܐ ܘܣܒܪܐ ܘܚܘܼܒܐ. ܘܫܪܐ ܒܝܢܬ݀ ܟܢܼ̈ܫܐ ܕܓܘܙܠܬܐ ܐܝܟ ܫܿܢܝܐ ܘܣܦܝܼܦܐ ܒܠܝܼܥ ܒܪܚܡܼܬܐ ܡܘܩܕܢܝܼܬܐ ܪܚܝܼܡ ܡܼܢ ܟܿܠ. ܘܚܒܝܼܒ ܡܼܢ ܟܿܠ. ܘܫܪܝܼ ܒܿܥܐ ܠܗ ܒܝܬ ܟܢܼܫ̈ܝܗܘܢ. ܥܠ ܠܡܕܝܢܬ݀ ܡܠܐܟ̈ܐ. ܐܘܪܝܼܫܠܡ ܫܡܿܝܢܝܼܬܐ ܒܝܬ ܡܥܡܪܐ ܕܪ̈ܘܼܚܢܐ. ܗܿܠܝܟ ܒܝܢܬ݀ ܫܘܼܩ̈ܝܗܿ. ܪܕܐ ܘܕܝܪ ܒܦܠ̈ܛܘܬܗܿ. ܦܓܥ̈ܢ ܒܗ ܒܢ̈ܬ ܐܘܪܝܼܫܠܡ ܗܕܐ. ܗ̄ ܚܝܠ̈ܘܬܐ ܫܡܝ̈ܢܐ. ܡܫܐܠ ܘܡܥܩܒ ܥܠ ܫܦܝܼܪܐ. ܚܙܼܐ ܝܘܼܩܢܗ ܥܠ ܦܪ̈ܨܘܦܝܗܘܢ. ܙܝܼܘܐ ܕܫܘܼܒܚܗ ܥܠ ܐܦ̈ܝܗܘܢ. ܙܘܥ̈ܘܗܝ ܒܠܒ̈ܘܬܗܘܢ. ܪ̈ܦܬܘܗܝ ܒܚܘܼܫܒ̈ܝܗܘܢ. ܩܠ̈ܘܗܝ ܒܦܘܡ̈ܝܗܘܢ. 80 ܬܘܪ̈ܓܡܘܗܝ ܒܠ̈ܫܢܝܗܘܢ. ܢܥܡ̈ܬܗ ܒܓܓܪ̈ܬܗܘܢ. ܬܫܼܒ̈ܚܬܗ ܒܠ̈ܥܼܙܝܗܘܢ. ܒܘܼܪ̈ܟܬܗ ܬܫܡܼܫ̈ܬܗܘܢ. ܩܘܼܕܫ̈ܘܗܝ ܦܘܼܠܚܢܗܘܢ. ܨܒܝܿܢܗ ܥܒܕܝܗܘܿܢ. ܦܘܩܕ̈ܢܘ̄ ܢܛܘܪܘܬܗܘܢ. ܣܘܩܗ ܚܝ̈ܝܗܘܢ. ܩܢܘܼܡܗ ܬܘܼܪܣܗܘܢ. ܙܝܼܘܗ ܢܘܼܗܪܗܘܢ. ܬܫܒܘܿܚܬܗ ܐܝܼܩܪܗܘܢ. ܪܘܼܡܪܡܗ ܗܘܠ̈ܠܝܗܘܢ. ܥܡ ܟܿܠܗܘܢ ܡܼܬܚܙܐ. ܘܨܝܕ ܟܿܠܗܘܢ ܡܼܬܝܕܥ. ܐܒ ܟܿܠܗܘܢ ܐܝܼܬܘܗܝ. ܠܟܿܠܗܘܢ ܐܚܝܼܕ. ܒܟܿܠܗܘܢ ܡܼܬܡܠܠ. ܠܟܿܠܗܘܢ ܡܦܪܢܣ. ܠܟܿܠܗܘܢ ܡܕܒܪ ܡܼܢ ܟܿܠܗܘܢ ܡܣܼܬܓܕ. ܡܼܢ ܟܿܠܗܘܢ ܡܫܼܬܒܚ. ܡܼܢ ܟ݀ܠܗܘܢ ܡܼܬܬܘܕܐ. ܡܼܢ ܟܿܠܗܘܢ ܡܬܪܡܪܡ. ܘܡܬܼܩܠܣ ܘܡܼܬܒܪܟ ܘܡܼܬܩܕܫ ܘܡܼܬܢܨܪ ܘܡܼܬܗܿܠܠ. ܘܗܼܘ ܠܐ ܡܣܼܬܝܟ. ܘܒܕܘܟ ܠܐ ܡܟܬܪ ܘܠܚܙܬܗ ܠܐ ܡܩܘܐ. ܘܡܼܢ ܡܚܫܒܬܐ ܠܐ ܡܬܼܠܒܟ. ܘܟܕ ܚܙܼܐ ܗܘܢܐ ܠܟܿܠܗ ܙܝܼܘܐ ܕܪܒܘܼܬܗ ܒܓܘܕܐ ܩܕܡܝܬܐ ܐܘܟܝܼܬ ܛܟܼܣܐ ܕܣܕܪܐ ܕܥܕܬܐ ܕܡܠܐܟ̈ܐ. ܣܠܼܩ ܬܘܼܒ ܘܐܬܼܥܠܝܼ ܠܓܘܼܕܐ ܬܪܝܢܝܼܬܐ ܕܒܗܿ ܛܟܣܼܐ ܕܬܪܝܢ ܕܣܕܪܐ ܕܒܥܕܬܐ ܕܪ̈ܒܝ ܡܠܐܟ̈ܐ. ܘܗܿܐ ܬܘܼܒ ܟܿܠܗ ܗܼܕܪܐ ܕܫܘܼܒܚܗ ܥܡܗܘܢ ܘܒܝܢܬܗܘܿܢ ܘܥܠܝܗܘܢ. ܗܘܼ ܟܿܠܗ ܬܡܿܢ ܗܘܼܐ ܘܗܼܘ ܟܿܠܗ ܗܪܟܐ ܐܫܼܟܚܗ. ܟܕ ܡܼܢ ܬܡܿܢ ܠܐ ܫܢܝ ܒܟܝܿܢܗ ܠܐ ܐܫܼܬܚܠܦ. ܘܡܼܢ ܕܘܟ ܠܐ ܡܪܚܩ ܘܒܟܿܠ ܐܬܪ ܫܟܝܼܚ. ܬܘܼܒ ܐܬܥܠܝܼ ܠܛܟܼܣܐ ܬܠܝܼܬܝܐ ܕܐܪ̈ܟܐܣ ܥܠ̈ܝܬܐ ܕܣܕܪ̈ܐ ܕܪ̈ܝܼܫܢܘܬܐ. ܘܗܿܐ ܟܿܠܗ ܬ݀ܡܢ ܗܘܼܐ ܬܫܒܼܘܚܬܐ ܕܐܝܼܩܪܗ. ܘܝܘܼܩܢܐ ܕܫܘܼܒܚܗ ܥܠ ܐܦ̈ܝܗܘܢ. ܘܟܕ ܨܝܕ ܟܿܠܗܘܢ ܥܩܒ ܘܒܝܢܬ݀ ܟܿܠܗܘܢ ܐܬܟܪܟ ܗܘܢܐ ܚܨܝܼܦܐ ܒܚܘܼܒܐ ܝ݀ܩܘܕܐ. ܠܐ ܩܼܡ ܥܠܘܗܝ ܚܬܝܼܬܐܝܼܬ. ܘܠܐ ܐܬܼܠܒܟ ܡܢܼܗ. ܘܠܐ ܟܬܪ ܠܥܘܩܿܒܗ. ܠܐ ܐܬܕܪܟ ܠܡܚܫܒܬܗ. ܬܘܼܒ ܐܬܥܠܝܼ ܘܐܬܪܡܪܡ ܠܡܕܝܢܬܐ ܕܬܪ̈ܬܝܢ. ܥܠ ܠܥܕܬܐ ܬܪܝܢܝܬܐ. ܚܙܼܐ ܕܩܿܝܡܝܢ ܒܗܿ ܬܠܬ ܓܘܕ̈ܝܢ ܐܚܪ̈ܢܝܬܐ ܕܒܢ̈ܝ ܢܘܼܗܪܐ ܣܕܝܪ̈ܝܢ ܒܗܿ ܬܠܬܐ ܛܟܼܣ̈ܝܢ ܕܥܝܪ̈ܝ ܪܘܡܐ. ܫܘܠ̈ܛܢܐ ܘܡܪ̈ܘܬܐ ܘܚܝܠ̈ܘܬܐ. ܕܡܩܠܣܝܼܢ ܘܡܗܕܪܝܢ ܘܡܪܡܪܡܝܼܢ ܠܡܪܘܼܬܐ ܡܪܢܝܬܐ. ܡܬܝܼܕܥ ܒܩܘܼܠ̈ܣܝܗܘܿܢ ܚܒܝܼܒܐ. ܡܬܓܐܐ ܒܗܼܕܪ̈ܝܗܘܢ. ܡܙܕܝܚ ܒܪ̈ܘܡܪܡܝܗܘܢ. ܗܿܟܘܬ ܬܘܼܒ ܘܗܿܪܟܐ ܟܿܠܗ ܐܝܼܬܘ̄. ܘܒܟܿܠܗܘܿܢ ܡܬܼܝܼܕܥ. ܘܠܟܿܠܗܘܢ ܐܚܝܼܕ. ܡܕܒܪ ܘܡܦܪܢܼܣ. ܘܒܕܘܟ ܠܐ ܡܼܬܥܪܐ. ܘܒܐܬܪܐ ܠܐ ܡܣܬܝܟ. ܘܡܼܢ ܚܕ ܡܢܼܗܘܢ ܠܐ ܡܬܥܩܒ. ܬܘܼܒ ܐܬܚܝܠ ܘܐܬܚܙܩ ܡܼܬܥܪܐ. ܘܒܐܬܪܐ ܠܐ ܡܣܬܝܟ. ܘܡܼܢ ܚܕ ܡܢܼܗܘܢ ܠܐ ܡܬܼܥܩܒ. ܬܘܼܒ ܐܬܚܝܠ ܘܐܬܚܙܩ ܗܘܢܐ ܡܪܐܢܝܐ. ܣܠܼܩ ܘܐܬܪܡܪܡ ܠܓܘܼܕܐ ܥܠܝܬܐ. ܥܠ ܒܠܒܝܼܒܘܼܬܐ ܠܥܕܬܐ ܬܠܝܬܝܬܐ ܕܒܢ̈ܝ 81 ܓܘܙܠܬܐ. ܚܙܼܐ ܬܘܼܒ ܬܡܿܢ ܬܠܬܐ ܣܕܪ̈ܝܢ ܪ̈ܣܡܝ ܢܘܼܪܐ. ܡܒܪܩ ܙܝܼܘܐ ܕܐܦ̈ܝܗܘܢ. ܘܢܬܪ̈ܢ ܓܘܼܡܪ̈ܐ ܡܼܢ ܐܒܪ̈ܝܗܘܢ. ܛܟܼܣܐ ܕܡ̈ܘܬܒܐ. ܘܐܚܪܢܐ ܕܣܪ̈ܦܐ ܫܬܝܼ̈ܬܝܼܝܼ ܓܦ̈ܐ. ܘܕܬܠܬܐ ܕܟܪ̈ܘܼܒܐ ܣܿܓܝ̈ܐܝ ܥܝ̈ܢܐ. ܠܟܿܗܘܢ ܐܦ̈ܐ ܘܓܝ̈ܓܠܐ ܕܫܠܗܒܝܼܬܐ. ܫܓܝܼܪܝܢ ܒܢܘܪܐ. ܡܬܼܢܒܪܫܝܢ ܒܓܘܙ̈ܠܬܐ. ܩܕܡܝ̈ܐ ܡܗܠܠܝܢ. ܬܪ̈ܝܢܐ ܡܩܕܫܝܢ. ܬܠ̈ܝܼܬܝܐ ܡܒܪܟܝܢ. ܣܠ̈ܩܢ ܟܿܠܗܝܢ ܬܫܒܚ̈ܬܐ ܕܩܕܡ̈ܝܐ ܘܡܼܨ̈ܥܝܐ ܠܓܘܕܐ ܗܕܐ ܬܠܝܼܬܝܐ ܡܟ̈ܢܫܝܢ ܟܿܠܗܝܢ ܬܘܕ̈ܝܬܐ ܘܗܕܪ̈ܐ ܘܩܘܼܠ̈ܣܐ ܘܪܘܡܪ̈ܡܐ ܘܗܘܼ̈ܠܠܐ ܘܩܘܕܫ̈ܐ. ܘܚܠܝܼܛܝܢ ܒܒܘܼܪ̈ܟܬܐ ܕܟܪ̈ܘܼܒܐ ܗܿܢܘܢ ܕܠܥܠ ܡܼܢ ܚܨܝ̈ܗܘܢ ܡܛܟܣܐ ܘܣܝܼܡܐ ܒܙܝܼܘܐ ܪܒܐ ܘܬܫܒܘ̄ ܡܪܟܒܬܐ ܗܿܝ ܡܪܢܝܬܐ. ܒܗܿ ܟܕܝܢܢ ܚܝ̈ܘܬܐ ܕܚܝܼܠ̈ܬܐ ܘܡܠ̈ܠܬܐ ܡܢܿܒܪ̈ܫܬ݀ ܒܢܘܼܪܐ ܠܐ ܗܘܼܢܝܬܐ. ܘܠܥܼܠ ܡܼܢܗܿ ܫܘܼܒܚܐ ܕܠܐ ܡܬܡܠ. ܙܝܼܘܐ ܕܠܐ ܡܼܬܦܫܩ ܢܘܼܗܪܐ ܕܠܐ ܡܣܼܬܝܟ. ܐܬܪܐ ܗܿܘ ܕܠܝܬ ܠܗ ܕܡܘܼܬܐ. ܕܘܼܟܬܐ ܗܿܝ ܠܐ ܡܬܼܬܕܝܼܫܢܝܼܬܐ ܠܗܘܢܐ ܥܒܝܼܕܐ. ܠܐ ܡܬܕܪܟܢܝܼܬܐ ܠܡܚܫܒܬܐ. ܬܡܿܢ ܐܬܼܒܠܗܝܼ ܗܘܢܐ. ܐܬܕܘܕ ܪܥܝܿܢܐ ܬ݀ܡܗ ܡܕܥܐ. ܒܛܼܠܘ ܚܘܼܫ̈ܒܐ. ܫܠܝܼܘ ܙܘ̈ܥܐ. ܐܫܼܬܬܩܘ ܡܠ̈ܝܼܠܐ. ܥܦܼܬ݀ ܡܠܼܬܐ. ܩܼܡ ܬܚܘܼܡܐ ܠܐ ܡܬܼܥܒܪܢܐ. ܐܬܡܨܥ ܣܝܿܓܐ ܠܐ ܡܼܬܬܪܥܢܐ. ܐܬܪܐ ܗܿܘ ܕܟܪܝܼܟ ܠܗ ܫܘܼܪܐ ܠܐ ܡܼܬܚܣܢܢܐ. ܣܝܼܡܝܼܢ ܥܠܘ̄ ܬܪ̈ܥܐ ܠܐ ܡܼܬܦܬܚ̈ܢܐ. ܩܿܐܡ ܥܠܝܗܘܢ ܢܿܛܘܼܪܐ ܥܝܼܪܐ ܕܠܐ ܢܿܐܡ ܘܠܐ ܕܿܡܟ. ܐܚܝܼܕ ܪܘܼܡܚܐ ܕܚܝܼܠܬܐ. ܘܠܒܝܼܟ ܫܢܢܐ ܡܠܝܬ݀ ܙܿܘܥܬܐ ܕܡܗܦܟܐ ܕܚܝܼܠܐܝܬ ܒܬܗܼܪܐ ܪܒܐ ܘܕܘܼܡܪܐ ܡܿܠܐܼ ܪܥܼܠܐ ܕܠܐ ܬܥܘܼܠܝ ܠܬܡܿܢ ܡܚܫܒܬܐ. ܘܠܐ ܬܕܪܘܼܟܝ ܒܐܬܪܐ ܗܿܘ ܡܠܼܬܐ ܕܥܘܩܿܒܐ. ܕܚܝܼܠ ܐܬܪܐ ܘܙܝܼܥ ܫܘܼܠܛܢܐ. ܬܡܿܢ ܫܪܐ ܫܬܼܩܐ ܪܒܐ. ܡܡܠܟ ܬܗܼܪܐ ܠܐ ܡܬܼܡܠܠܢܐ. ܠܐ ܫܠܝܼܛ ܘܠܐ ܡܦܼܣ ܠܗ ܠܙܘ̈ܥܝ ܡܚܫܒܬܐ ܠܡܕܪܟ ܒܐܬܪܐ ܗܿܢܐ ܠܐ ܐܝܢܝܐ. ܘܠܐ ܟܡܢܝܐ. ܘܠܐ ܡܼܬܕܪܟܢܐ. ܘܠܐ ܡܼܬܩܪܒܢܐ. ܘܟܕ ܩܼܡ ܗܘܢܐ ܘܬܗܪ ܘܪܬܝܼܬ ܘܡܒܠܗܝ. ܘܙܿܐܥ ܘܡܫܬܼܩ. ܘܕܚܝܼܠ ܘܪܥܠ ܘܡܕܘܕ. ܬܘܼܒ ܣܡܟܘܼܗܝ ܪ̈ܚܡܐ ܘܐܬܚܝܠ. ܒܗܿܝ ܕܠܘ ܟܕ ܡܥܩܼܒ ܐܡܼܪܚ. ܘܠܐ ܟܕ ܒܿܨܐ ܐܚܼܨܦ. ܘܠܐ ܟܕ ܕܪܫ ܐܫܼܬܥܠܝܼ. ܐܠܐ ܒܗܝܡܢܘܬܐ ܐܫܬܪܪ ܒܣܒܪܐ ܐܬܠܒܒ. ܒܚܘܼܒܐ ܐܬܚܙܩ. ܘܡܼܢ ܬܡܿܢ ܡܼܢ ܪܘܡܐ ܠܐ ܡܼܬܡܫܚܢܐ. ܡܼܢ ܗܿܘ ܐܬܪܐ ܡܥܠܝܐ. ܡܼܢ ܗܿܝ ܕܘܼܟܬܐ ܠܐ ܡܬܬܕܝܼܫܢܝܼܬܐ. ܐܛܝܪ ܗܘܢܐ ܚܙܼܬܗ ܘܓܕܠ ܘܢܚܼܬ ܥܕܡܐ ܠܥܘܼܡܩ̈ܐ ܬܚ̈ܬܝܐ. ܐܬܟܪܟ ܒܟܿܠܦ̈ܢܝܢ. ܘܚܕܪ ܒܟܿܠ ܣܘܦ̈ܝܢ. ܘܐܨܕ ܘܚܼܙܝܗܝ ܒܟܿܠ ܐܬܪ ܘܒܟܿܠ ܕܘܼܟ. ܟܿܠܗ ܐܝܟ ܕܐܝܼܬܘܗܝ ܕܠܐ ܫܘܼܢܝ ܘܕܠܐ ܙܘܼܥܙܥ ܘܕܠܐ ܫܘܼܚܠܦ ܘܗܐ ܬܘܼܒ 82 ܟܿܠܗ ܒܟܿܠܗܝܢ ܥܕ̈ܬܐ ܕܪ̈ܘܼܚܢܐ. ܘܒܟܿܠܗܘܢ ܬܐܓܡ̈ܐ ܠܐ ܗܘܼܠ̈ܢܝܐ. ܘܥܡ ܟܿܠܗܘܢ ܣܼܕܪ̈ܐ ܕܢܘܼܪܐ ܠܐ ܗܘܼܠܢܝܿܬܐ ܘܪܘܼܚܐ ܠܐ ܓܫܝܼܡܬܐ ܒܢ̈ܝ ܓܘܙܠܬܐ. ܘܟܿܠܗ ܫܘܼܒܚܐ ܕܐܝܼܩܪܗ ܠܥܼܠ ܡܼܢ [ܡܪܟܒܬܐ. ܙܝܘܐ ܕܪܒܘܬܗ ܠܥܠ ܡܢ] ܬܪܘܢܘܣ ܡܥܠܝܐ. ܗܼܕܪܐ ܕܬܫܒܘܚܬܗ܆ ܠܥܼܠ ܡܼܢ ܟܘܼܣܝܐ ܕܚܝܼܠܐ ܕܪܒܘܬܐ. ܘܟܕ ܩܿܐܡ ܗܘܢܐ ܘܡܒܠܗܝ ܬܗܝܼܪ ܘܡܫܬܼܩ܆ ܒܛܝܼܠ̈ܢ ܡܚܫܒ̈ܬܗ. ܫܿܠܝܢ ܙܘܥ̈ܘܗܝ. ܫܟܘܼܬܝܢ ܚܘܫܒ̈ܘܗܝ. ܘܗܿܐ ܡܼܢ ܫܝܠ ܩܿܠܐ ܠܐ ܗܘܼܠܢܝܐ ܐܫܬܡܥ ܠܗ. ܪܡܼܙܐ ܕܚܝܼܠܐ ܠܚܼܫ ܒܐܕܢ̈ܘܗܝ. ܡܠܼܬܐ ܪܘܚܢܿܝܬܐ ܠܥܙܬ݀ ܠܗ. ܟܕ ܚܠܝܐ ܘܒܣܝܼܡܐ ܘܡܠܝܐ ܠܘܒܒܐ ܘܡܚܝܠܐ ܬܪܥܝܬܐ ܕܠܐ ܬܬܛܠܩܝ ܢܫܡܬܐ ܡܼܢ ܕܚܠܬܐ. ܕܠܐ ܡܼܬܥܩܒ ܒܪܘܝܐ. ܘܠܐ ܡܬܕܪܟ ܥܒܘܼܕܐ. ܠܐ ܡܼܬܦܫܩ ܐܝܼܬܝܐ ܡܬܘܼܡܝܐ. ܠܐ ܡܬܗܘܢܢ ܗܿܘ ܕܐܝܼܬܘܗܝ ܐܡܝܼܢܐܝܼܬ. ܗܿܝ ܕܠܗ ܦܐܝܐ ܘܙܕܿܩܐ ܘܡܬܬܚܝܼܒܐ. ܬܫܒܘܼ̇ܬܐ ܘܬܘܕܝܬܐ ܘܣܓܕܬܐ. ܡܼܢ ܟ݀ܠܗܘܢ ܒܪ̈ܝܐ ܘܥܒܝܼܕ̈ܐ. ܡܬܼܝܕ̈ܥܢܐ ܘܡܬܪ̈ܓܫܢܐ. ܘܡܢ̈ܦܫܐ ܘܠܐ ܡܢܦ̈ܫܐ. ܪ̈ܓܘܫܐ ܘܠܐ ܪ̈ܓܘܫܐ. ܒܟܿܠܙܒܢ ܘܠܥ̈ܠܡܝ ܥ̈ܠܡܐ ܐܡܝܢ.. ܘܒܗܿܠܝܢ ܫܠܡ ܩܦܠܐܘܢ ܕܥܣܪܐ ܒܝܕ ܐܠܗܐ ܕܚܝܠ ܘܥܕܪ. ܫܠܡ ܡܐܡܪܐ ܩܕܡܝܐ ܕܥܠ ܝܕܥܬܐ ܕܫܪܪܐ ܕܐܝܼܬ ܒܗ ܩܦ̈ܠܐܐ ܥܣܪܐ.