“Disputation between the Apostle Peter and Nero - ܕܕܫܐ ܕܡܪܝ ܦܛܪܘܣ ܘܕܢܐܪܘܢ ܡܠܟܐ.” Based upon Paul Bedjan ed., Acta martyrum et sanctorum (Parisiis; Lipsiae: Harrasssowitz, 1890). Digital Syriac Corpus. Last modified December 4, 2019. https://syriaccorpus.org/524.
    
        
            
                ܕܕܫܐ ܕܡܪܝ ܦܛܪܘܣ
                ܘܕܢܐܪܘܢ ܡܠܟܐ.
            

            
                ܒܝܲܡܵܐ ܫܓܼܝܼܫܵܐ ܚܵܪܹܬܼ ܚܙܹܝ̇ܬܼ: ܐܸܠܦܹ̈ܐ ܬܪܸܥܤܲܪ ܟܲܕܼ ܪ̈ܵܕܼܝܵܢ.
                ܕܲܙܩܝܼܦ ܗ̄ܘ̣ܵܐ ܝܲܡܵܐ ܠܩܘܼܒܼܠܗܹܝܢ: ܘܲܥ̣ܒܲܪ ܒܓܼܵܘܹܗ ܘܫܲܝܸܢܵܝ̈ܗܝ܀
                ܠܐܲܪܒܲܥ ܪ̈ܘܼܚܝܼܢ ܕܝܲܡܵܐ ܬܪܲܨ: ܕܩܹܘܒܲܪܢܹܝܛܗܹܝܢ ܚܲܟܿܝܼܡ ܗ̄ܘ̣ܵܐ.
                ܘܲܟܼܡܵܐ ܕܐܸܙܕܩܸܦ̣ ܐܵܦ ܐܸܫܬܿܓܸܫ̣: ܗܸܢܹܝܢ ܚ̣ܵܘܝܼ ܙܵܟܼܘܼܬܼܗܹܝܢ܀
                ܓܲܠܠܵܘ̈ܗܝ ܕܝܲܡܵܐ ܙܩܝܼܦܝܼܢ ܗ̄ܘ̣ܵܘ: ܕܲܤܦܝܼ̈ܢܵܬܼܵܐ ܒܗܘܿܢ ܢܸܛܒ̈ܥܵܢ.
                ܘܗܸܢܹܝܢ ܬܲܪܨܵܗ̇ ܠܡܲܪܕܝܼܬܼܗܹܝܢ: ܘܡܲܢܲܥ̣ ܠܲܠܡܹܐܢܵܐ ܘܐܸܬܿܬܿܢܝܚ̣܀

                ܡ̣ܢ ܗܵܪܟܵܐ ܙܘܵܕܹ̈ܐ ܡܲܠܝܼܚ̈
                ܥܘܼܕܼܪ̈ܵܢܹܐ. ܘܟܼܠܲܢ ܐܲܟܼܚ̄ܕ ܫܲܘܝܵܐܝܼܬܼ ܢܲܤܸܩ ܫܘܼܒܼܚܵܐ ܠܐܲܒܼܵܐ ܘܠܲܒܼܪܵܐ ܘܲܠܪܘܼܚܵܐ
                    ܕܩܘܼܕܼܫܵܐ:
                ܘܲܚܢܵܢܹܗ ܢܓܸܿܢ ܟ̱ܠܹܗ ܟܸܢܫܲܢ ܡ̣ܢ ܤܵܟܹܗ: ܗܵܫܵܐ ܘܲܒܼܟܼܠ ܙܒܲܢ ܘܲܠܥܵܠܲܡ ܥܵܠܡܝܼܢ.



                 681 


                ܥܘܼܬܼܪܵܐ ܪܲܒܵܐ ܛܥܝܼ̈ܢܵܢ ܗ̣̄ܘܲܝ̈: ܘܲܕܼܠܵܐ ܤܵܟܼܵܐ ܡ̈ܦܲܠܓܼܢ ܗ̣̄ܘܲܝ̈.
                ܡܲܠܟܵܐ ܕܝܲܡܵܐ ܚ̣ܙܵܐ ܥܘܼܬܼܪܗܹܝܢ: ܘܫܲܓܼܫܹܗ ܠܝܲܡܵܐ ܕܒܹܗ ܢܸܛܒ̈ܥܵܢ܀
                ܝܲܡܐ ܐܝܼܬܼܵܘܗܝ ܗܵܢ ܥܵܠܡܵܐ: ܘܐܸܠܦܹ̈ܐ ܬܪܥܤܲܪ ܫܠܝܼܚܹ̈ܐ ܕܒܹܗ.
                ܘܝܲܡܵܐ ܕܲܙܩܝܼܦ ܠܘܼܩܒܲܠܗܘܿܢ: ܥܵܠܡܵܐ ܗ̣̄ܘ ܕܐܲܤ̣ܠܝܼ ܝܘܼܠܦܵܢܗܘܿܢ܀
                ܡܲܠܟܵܐ ܕܝܲܡܵܐ ܠܒܝܼܫܵܐ ܩܪܹܝ̇ܬܼ: ܤܵܢ̇ܐܵܐ ܕܝܼܘܫܿܥ ܘܲܕܦܵܠܚܵܘ̈ܗܝ.܆
                ܠܡܹܐܢܵܐ ܠܡܲܠܟܘܼܬܼܵܐ ܫܲܡܗܹ̇ܬܼ: ܕܲܫܠܝܼܚܹ̈ܐ ܒܓܼܵܘܵܗ̇ ܐܸܬܿܬܿܢܝܼܚܘ܀
                ܘܕܲܚ̣ܙܵܐ ܤܵܢܵܐܐ ܟܲܕܼ ܡܲܟܼܪܙܝܼܢ: ܫܠܝܼܚܹ̈ܐ ܤܒܲܪܬܼܵܐ ܕܡܲܠܟܿܘܼܬܼܵܐ.
                ܐܲܛ̣ܥܝܼ ܒܕܲܝܵܢܲܝ̈ ܥܵܠܡܵܐ: ܕܠܵܐ ܢܩܲܒܿܠܘܼܢܵܗ̇ ܠܲܤܒܲܪܬܼܗܘܿܢ܀
                ܦܵܠܚܵܐ ܙܪܝܼܙܵܐ ܐܸܫܟܲܚ̣ ܠܹܗ: ܢܹܐܪܘܿܢ ܩܹܤܲܪ ܒܹܗ ܐܸܬܿܬܿܢܝܼܚ.
                ܘܒܲܬܼܪܹܝܢ ܫܠܝܼܚܹ̈ܐ ܪܸܓܿܬܹܗ ܓܡܲܪ̣: ܒܫܸܡܥܘܿܢ ܟܹܐܦܵܐ ܘܲܒܼܦܵܘܠܘܿܣ܀
                ܫܸܡܥܘܿܢ ܠܪܗ̄ܘܿܡܹܐ ܫܲܕܲܪ ܗ̄ܘ̣ܵܐ: ܦܵܪܲܩܠܹܝܛܵܐ ܡܒܲܝܲܐ ܠܟܼܠ. ܐܲܝܟܵܐ
                ܕܢܹܐܪܘܿܢ ܡܲܡܠܸܟܼ ܗ̄ܘ̣ܵܐ: ܚܲܩܠܵܐ ܕܲܠܟܼܘܼ̈ܒܹܿܐ ܡܵܘܥܝܵܐ܀ ܟܪܘܿܙܐ
                ܕܥܲܡ̈ܡܹܐ ܦܵܘܠܘܿܣ: ܠܘܵܬܼ ܪܲܒܿ ܢܝܼܪܹܗ ܠܪܗ̄ܘܿܡܹܐ ܪܕܼܵܐ. ܘܲܫܡܲܥ̣
                ܢܹܐܪܘܿܢ ܝܘܼܠܦܵܢܗܘܿܢ: ܘܙܲܝܸܢ ܢܲܦܫܹܿܗ ܠܘܵܬܼ ܕܪܵܫܵܐ.
                ܢܹܐܪܘܿܢ. ܐܸܡ݂ܲܪ ܢܹܐܪܘܿܢ ܠܘܵܬܼ ܦܵܠܚܵܘ̈ܗܝ: ܟܲܕܼ ܡܸܬܼܥܲܙܲܪ ܡ̣ܢ
                ܚܸܡܬܹܗ. ܡܲܢ̣ܘܼ ܫܡܲܥܬܿܘܿܢ ܐܘܿ ܪ̈ܵܚܡܲܝ: ܕܠܲܡܕܼܢ̄ܬܲܢ ܓܠܝܼܠܵܝܹ̈ܐ
                ܤܠܸܩ̣ܘ! ܦܵܠܚܹ̈ܐ. ܐܲܢ̄ܬܿ ܐܘܿ ܡܲܠܟܵܐ ܠܥܵܠܲܡ ܚܝܼ: ܫܲܪܝܼܪ ܛܸܒܵܐ
                ܕܲܫܡܝܼܥ ܠܵܟܼ. ܗܵܐ ܒܲܡܕܼܝܼܢ̄ܬܲܢ ܡܸܬܼܗܲܦܟܼܝܼܢ: ܘܡܲܠܦܝܹܢ ܝܘܼܠܦܵܢ
                ܢܵܨܪܵܝܵܐ. ܢܹܐܪܘܿܢ ܒܐܲܝܢܵܐ ܐ̄ܤܟܹܿܡܵܐ ܟܲܝ ܩܵܝ̇ܡܝܼܢ: ܘܡܵܢܵܐ ܐܝܼܬܼܵܘܗܝ
                ܝܘܼܠܦܵܢܗܘܿܢ. ܕܐܲܡܪܲܚ̣ܘ ܘܐܸܬ݂ܼܵܘ ܘܠܵܐ ܐܸܙܕܟܼܝܼܘ: ܡ̣ܢ ܐܲܠܵܗܝܼ̈ܢ
                ܕܙܸܵܟܹ̇ܝܢ ܠܟܼܠ؟ ܦܵܠܚܵܐ. ܒܥܝܼ ܡܵܪܝ ܡܲܠܟܵܐ ܕܢܹܐܬܼܘܿܢ ܠܟܼܵܐ:
                ܘܲܫܡܲܥ ܡܸܠܬܼܵܐ ܡ̣ܢ ܦܘܼܡܗܘܿܢ. ܕܠܲܝܬܼ ܐܸܤܟܹܿܡܵܐ ܐܲܝܟܼ ܕܝܼܠܗܘܿܢ:



                 682 


                ܘܢܘܼܟܼܪܵܝ ܠܥܵܠܡܵܐ ܝܘܼܠܦܵܢܗܘܿܢ. ܢܹܐܪܘܿܢ. ܓܘܼܢܚܵܐ ܗ̣̄ܘ ܪܲܒܼܵܐ
                ܕܲܗܘ̤ܵܐ ܥܠܲܝܢ: ܟܒܲܪ ܐܲܠܵܗܝܼ̈ܢ ܡܸܬܼܒܲܛܠܝܼܢ. ܐܵܦ ܢܵܘܤܲܝ̈ܗܘܿܢ
                ܡܸܤܬܲܚܦܝܼܢ: ܘܡܵܢܵܐ ܢܸܥܒܸܿܕܼ ܐܸܢ ܗܵܘܝܵܐ؟ ܦܵܠܚܹ̈ܐ. ܓܘܼܢܚܵܐ ܗ̣̄ܘ
                ܪܲܒܵܐ ܐܲܝܟܼ ܕܐܸܡܲܪ̣ܬܿ: ܕܟܼܠ ܥܲܡܡ̈ܝܼܢ ܡܵܢܵܟܼ ܙܵܥ̇ܝܼܢ. ܘܐܸܢ ܬܪܹܝܢ
                ܓܲܒܼܪ̈ܝܼܢ ܙܵܟܹ̇ܝܢ ܠܵܟܼ: ܓܘܼܢܚܵܐ ܗ̣̄ܘ ܪܲܒܵܐ ܒܓܼܵܘ ܥܵܠܡܵܐ! ܢܹܐܪܘܿܢ.
                ܕܒܲܪܘ ܘܐܲܝܬܵܘ ܐܸܢܘܿܢ ܠܝܼ ܠܟܼܵܐ: ܘܐܸܫܡܲܥ ܡܸܠܬܼܵܐ ܡ̣ܢ ܦܘܼܡܗܘܿܢ.
                ܕܐܸܢ ܠܐܲܠܵܗܝܼ̈ܢ ܠܵܐ ܤܵܓܼܕܿܝܼܢ: ܗܲܕܵܡ ܗܲܕܵܡ ܢܸܬܼܦܲܤܩܘܼܢ. ܦܵܠܚܹ̈ܐ.
                ܕܝܼܠܲܢ ܗܵܕܹܐ ܕܢܸܬܿܛܦܝܼܣ ܠܵܟܼ: ܘܢܲܝܬܸܿܐ ܠܓܲܒܼܪܹ̈ܐ ܕܐܸܡܲܪܼܬܿ ܠܲܢ.
                ܘܲܪܗܸܛ̣ܘ ܘܐܸܙܲܠ̣ܘ ܟܲܕܼ ܪܵܘܙܝܼܢ: ܘܐܲܩܝܼܡ̣ܘ ܐܸܢܘܿܢ ܩܕܼܵܡ ܟܘܼܪܤܝܹܗ.
                ܢܹܐܪܘܿܢ. ܗܵܠܹܝܢ ܐܸܢܘܿܢ ܕܐܲܙܝܼܥܘ ܠܲܢ: ܘܫܲܓܼܫܘܼܗ̇ ܠܪܗ̄ܘܿܡܹܐ
                ܥܲܫܝܼܢܬܼܵܐ؟ ܩܪܘܿܒܼܘ ܘܚܵܘܵܘ ܠܝܼ ܝܘܼܠܦܵܢܟܼܘܿܢ: ܘܡ̇ܢ ܫܲܕܲܪܟܼܘܿܢ
                ܕܬܹܐܬܼܘܿܢ ܠܟܼܵܐ؟ ܫܸܡܥܘܿܢ. ܗܵܐ ܐܘܿ ܡܲܠܟܵܐ ܐܸܠܘܼ ܝ̄ܠܸܦ̣ܬܿ: ܡ̣ܢ
                ܝܘܼܠܦܵܢܹܗ ܕܲܡܫܲܕܲܪܵܢܝ. ܠܵܐ ܓܹܝܪ ܒܐܲܪܥܵܐ ܡܲܡܠܸܟܼ ܗ̣̄ܘܲܝܬܿ: ܐܵܦ
                ܒܲܫܡܲܝܵܐ ܟܘܼܪܤܝܵܟܼ ܒ̣[...]ܬ. ܢܹܐܪܘܿܢ. ܘܡܲܢ̣ܘܼ ܐܝܼܬܼܵܘܗܝ ܡܫܲܕܪܵܢܟܼܘܿܢ:
                ܕܪܲܒܿ ܫܘܼܠܛܵܢܹܗ ܡ̣ܢ ܗܵܢ ܕܝܼܠܝ؟ ܘܐܸܢ ܐܝܼܙܓܲܕܵܐ ܐܝܼܬܲܝܟ ܠܹܗ:
                ܫܝܼܛ ܗ̣̄ܘ ܡܲܠܟܵܐ ܕܐܲܢ̄ܬܿ ܦܵܠܚܹܗ. ܫܸܫܥܘܿܢ. ܘܒܼܝܼ ܬܘܼܒܼ ܠܵܐ
                ܬܚܘܼܪ ܕܲܒܼܨܝܼܪ ܐ̄ܢܵܐ: ܘܲܒܼܫܝܼܛܘܼܬܼ ܡܸܠܲܝ̈ ܠܵܐ ܬܚܘܼܪ. ܚܙܝܼ
                ܐܵܬܼ̈ܘܵܬܹܗ ܕܲܡܫܲܕܲܪܵܢܝ: ܕܲܡܝܲܚܲܝ̈ܒܼܵܢ ܠܹܗ ܠܝܘܼܠܦܵܢܟܼܘܿܢ. ܢܹܐܪܘܿܢ.
                ܙܸܠ ܐܘܿ ܤܵܒܼܵܐ ܤܲܓܿܝܼ ܛ̣ܥܲܝܬܿ: ܦܘܼܩ ܡ̣ܢ ܡܕܼܝܼܢ̄ܬܲܢ ܕܐܸܬܲܝܬܿ
                ܠܵܗ̇. ܡܲܢ̣ܘܼ ܫܲܕܪܵܟܼ ܕܬܹܐܬܸܐ ܠܟܼܵܐ: ܕܲܥܠܵܘܗܝ ܬܟܼܝܼܠ ܐܲܢ̄ܬܿ
                ܘܡܸܫܬܲܒܼܗܪܲܬܿ؟ ܫܸܡܥܘܿܢ. ܙܲܒܼܢܵܐ ܓܹܝܪ ܕܐܸܦܘܿܩ ܠܵܐ ܡ̣ܛܵܐ:
                ܥܕܲܡܵܐ ܕܐܸܦܠܘܿܚ ܠܲܡܕܼܝܼܢ̄ܬܿܟܼܘܿܢ. ܘܐܸܥܩܘܿܪ ܡܸܢܵܗ̇ ܟܘܼ̈ܒܹܿܐ ܕܒܼܵܗ̇:



                 683 


                ܘܐܸܙܪܘܿܥ ܒܓܼܵܘܵܗ̇ ܙܲܪܥܹܗ ܕܡܵܪܝ. ܢܹܐܪܘܿܢ. ܚܙܝܼ ܐܘܿ ܤܵܒܼܵܐ
                ܤܲܓܿܝܼ ܛ̣ܥܲܝܬܿ: ܕܙܹܝܘܿܣ ܘܚܲܒܼܪ̈ܵܘܗܝ ܟܘܼ̈ܒܹܿܐ ܩ̣ܪܲܝܬܿ. ܥܲܠ ܡ̇ܢ
                ܬܟܼܝܼܠ ܐܲܢ̄ܬܿ ܘܲܡܨܲܥܪܲܬܿ: ܠܐܲܠܵܗܲܝ̈ ܪ̈ܗܘܿܡܹܐ ܪܲܒܿܬܼܵܐ؟ ܫܸܡܥܘܿܢ. ܚܙܝܼ
                ܐܘܿ ܡܲܠܟܵܐ ܟܡܵܐ ܫܝܼܛ ܐ̄ܢܵܐ: ܕܐܵܦܠܵܐ ܡܸܠܲܝ̈ ܪ̈ܚܝܿܡܹܐ ܥܠܲܝܟܼ.
                ܕܲܚܢܲܢ ܕܫܝܼ̈ܛܵܢ ܩܕܼܵܡ ܟܘܼܪܤܝܵܟܼ: ܒܝܲܕܼ ܐܵܬܼ̈ܘܵܬܼܵܐ ܕܡܸܬܼܚܲܙ̈ܝܵܢ.
                ܢܹܐܪܘܿܢ. ܛܸܒܵܐ ܫܡܝܼܥ ܠܝܼ ܕܗܵܘ̇ ܡܵܪܟܼܘܿܢ: ܒܢܲܝ̈ ܐܘܿ ܪܸܫܠܸܡ
                ܒܩܲܝܤܵܐ ܬܠ̣ܵܘ. ܘܐܸܢ ܫܲܪܝܼܪܵܐ ܐܲܝܟܼ ܕܐܵܡ̇ܪܝܼܢ: ܒܩܲܒܼܪܵܐ ܐܸܬܿܬܿܤ̣ܝܼܡ
                ܐܲܝܟܼ ܟܠܢܵܫ. ܫܸܡܥܘܿܢ. ܛܸܒܵܐ ܫܲܪܝܪ ܕܲܫܡܝܼܥ ܠܵܟܼ: ܒܩܲܒܼܪܵܐ
                ܐܸܬܼܿܬܿܤ̣ܝܼܡ ܐܲܝܟܼ ܟܠܢܵܫ. ܘܩܵܡ̣ ܡ̣ܢ ܩܲܒܼܪܵܐ ܘܠܵܐ ܐܸܬܼܢܟܼܝܼ:
                ܘܠܲܫܡܲܝ̈ ܫܡܲܝܵܐ ܤܠܸܩ̣ ܘܐܸܤܬܿܡܸܟܼ. ܢܹܐܪܘܿܢ. ܝܵܗܹ̇ܒܼ ܐ̄ܢܵܐ ܠܵܟܼ
                ܕܲܫ̈ܢܹܐ ܬܪܹܝܢ: ܡܵܘܬܵܐ ܘܚܲܝܹ̈ܐ ܐܲܚܹ̈ܐ ܬܪܹܝܢ. ܐܸܢ ܟܵܦܲܪ ܐܲܢ̄ܬܿ ܚܲܝܹ̈ܐ ܩܢܝܼ:
                ܘܐܸܢ ܠܵܐ ܟܵܦܪܲܬܿ ܡܵܘܬܵܐ ܛܥܲܡ. ܟܹܐܦܵܐ. ܝܼܫܘܿܥ ܐܲܠ̣ܦܲܢ ܘܐܸܡ݂ܲܪ
                ܠܲܢ: ܕܟܼܠ ܕܢܸܟܼܦܘܿܪ ܒܝܼ ܐܸܟܼܦܘܿܪ ܒܹܗ. ܘܟܼܠ ܕܢܵܘܕܸܐ ܒܝܼ ܒܗܵܢ
                ܥܵܠܡܵܐ: ܒܡܲܠܟܿܘܼܬܼ ܫܡܲܝܵܐ ܐܹܝܲܩܪܝܼܘܗܝ. ܢܹܐܪܘܿܢ. ܟܦܘܿܪ ܒܲܡܫܝܼܚܵܐ
                ܕܠܹܗ ܡܲܟܿܪܙܲܬܿ: ܘܲܒܼܓܼܵܘ ܪܗܘܿܡܹܐ ܐܹܝܲܩܪܵܟܼ. ܘܠܘܼܩܒܲܠ ܡܲܠܟܿܘܼܬܼܝ
                ܠܵܐ ܬܸܬܼܚܪܸܐ: ܘܬܲܛܥܸܐ ܠܪܗ̄ܘܿܡܹܐ ܥܲܫܝܼܢܬܼܵܐ. ܫܸܡܥܘܿܢ. ܟܲܕܼ ܛܢܵܢܵܐ
                ܕܡܲܠܟܵܐ ܠܸܒܼܫܹ̇ܬܼ: ܠܘܼܩܒܲܠ ܡܲܠܟܵܐ ܗܵܘ̇ ܕܐܲܡܠܟܲܢܝ. ܘܠܵܐ
                ܝܵܕܲܥ̇ ܐܲܢ̄ܬܿ ܐܘܿ ܕܵܘܝܵܐ: ܕܪܵܘܡܵܐ ܘܥܘܼܡܩܵܐ ܒܪܸܡܙܹܗ ܬܠܹܝܢ.
                ܢܹܐܪܘܿܢ. ܠܵܘ ܗܹܪܘܿܕܹܣ ܒܥ̣ܵܐ ܕܢܸܩܛܠܝܼܘܗܝ: ܗܵܘ̇ ܕܐܵܡܪܲܬܿ
                ܕܗ̤ܘ ܐܲܡܠܟܲܢܝ؟ ܘܐܸܢ ܒܢܲܝ̈ ܡܸܨܪܹܝܢ ܠܵܐ ܤܲܬܿܪܘܼܗܝ: ܠܵܐ ܦܵܐܿܫ̇



                 684 


                ܗ̄ܘ̣ܵܐ ܒܓܼܵܘ ܥܵܠܡܵܐ. ܟܹܐܦܵܐ. ܠܵܟܼ ܐܘܿ ܢܹܐܪܘܿܢ ܠܵܐ ܫܡܝܼܥ ܠܵܟܼ:
                ܕܲܠܗܹܪܘܿܕܹܣ ܡ̇ܢ ܐܲܕܼܪܟܹܗ. ܢܼ̈ܓܼܕܹܐ ܩ̈ܫܲܝܵܐ ܘܲܡܫܲܚ̈ܠܦܹܐ: ܘܐܲܟܸܿܢ
                ܫܲܢ̣ܝܼ ܡ̣ܢ ܥܵܠܡܵܐ. ܢܹܐܪܘܿܢ. ܡܵܢܵܘ̇ ܤܘܼܟܵܠ ܕܠܵܟܼ ܢܸܬܿܛܦܝܼܣ:
                ܘܢܲܫܲܪ ܡܸܠܲܝ̈ܟ ܘܲܢܗܲܝܝܡܢܵܟܼ. ܕܗܵܘ̇ ܕܲܠܢܲܦܫܹܗ ܠܵܐ ܦܲܨܝܼ: ܕܢܲܚܸܐ
                ܠܲܐ̄ܚܪܹܝܢ ܐܲܝܟܲܢ ܡܨܸܐ؟ ܦܲܛܪܘܿܣ. ܡܵܘܬܵܠܐ ܕܲܫܠܲܛ̣ ܥܲܠ ܛܘܿܗܡܲܢ:
                ܫ̣ܪܵܝܗܝ ܗ̄ܘ̣ܐ ܘܒܲܛ̣ܠܹܐ ܒܲܩܝܵܡܬܹܿܗ. ܘܒܹܝܬܼ ܓܲܙܵܐ ܕܲܫܝܘܿܠ
                ܚܲܠ̣ܨܹܗ: ܘܤܲܟܿܪܵܗ̇ ܠܦܘܼܡܵܗ̇ ܕܒܼܵܠܲܥܬܼܵܐ. ܢܹܐܪܘܿܢ. ܢܹܐܬܸܐ ܡܵܪܟܼ
                ܘܲܢܦܲܨܸܝܟ: ܟܲܕܼ ܦܵܩܹ̇ܕܼ ܐ̄ܢܵܐ ܙܩܝܼܦܵܐ ܥܠܲܝܟܼ. ܘܐܸܢ ܫܲܪܝܼܪ ܗ̣̄ܘ ܐܲܝܟܼ
                ܕܐܵܡܪܲܬܿ: ܢܸܕܲܥ ܟܠܢܵܫ ܕܫܲܠܝܼܛ ܥܠܲܝ. ܫܸܡܥܘܿܢ. ܢܩܘܼܡ
                ܦܝܼܠܵܛܘܿܣ ܘܲܢܟܲܚܕܼܵܟܼ: ܗܵܘ̇ ܕܒܹܝܬܼ ܕܝܼܢܹܗ ܩ̣ܵܡ ܘܐܸܬܿܬܿܕܝܿܢ.
                ܕܐܝܼܕܼܵܘ̈ܗܝ ܐܲܫܝܼܓܼ ܗ̄ܘ̣ܵܐ ܡ̣ܢ ܕܡܹܗ: ܟܲܕܼ ܝܵܕܲܥ̇ ܗ̄ܘ̣ܵܐ ܕܡܵܪܵܐ ܗ̄ܘ̣
                ܕܟܼܠ. ܢܹܐܪܘܿܢ. ܤܵܒܼܵܐ ܤܲܟܼܠܵܐ ܠܵܐ ܝܵܕܼܥܲܬܿ: ܕܡܵܘܬܵܟܼ ܘܚܲܝܲܝ̈ܟ
                ܒܐܝܼܕܲܝ̈ ܟܤܹܝܢ؟ ܠܡܵܢܵܐ ܐܲܡܪܲܚ̣ܬܿ ܕܲܬܼܨܲܥܪܲܢܝ: ܠܵܐ ܝܵܕܲܥ̇ ܐܲܢ̄ܬܿ
                ܕܩܸܨܵܟܼ ܡ̣ܛܵܐ؟ ܫܸܡܥܘܿܢ. ܤܵܒܼܵܐ ܐܝܼܬܲܝ ܐܲܝܟܼ ܕܐܸܡ݂ܲܪܬܿ: ܘܡܵܪܝܵܐ
                ܕܲܓܼܒܼܵܢܝ ܗ̤ܘ ܫܲܕܲܪܲܢܝ. ܕܐܸܗܘܸܐ ܐܲܒܼܵܐ ܘܐܲܪܬܸܿܐ ܠܟܼܠ: ܘܐܲܦܢܸܐ
                ܠܟܼܠ ܐ̄ܢܵܫ ܠܘܵܬܼ ܡܵܪܝܵܐ. ܢܹܐܪܘܿܢ. ܥܠܲܝܢ ܗ̣̄ܘ ܒܲܠܚܘܿܕܼ ܕܲܡܫܲܕܪܲܬܿ:
                ܐܵܘ ܠܟܼܠ ܥܲܡ̈ܡܝܼܢ ܡܲܟܼܪܸܙ ܐܲܢ̄ܬܿ؟ ܘܐܸܢܗ̤ܘ ܕܪܗ̄ܘܿܡܹܐ ܕܲܡܛܵܬ̤
                ܠܵܟܼ: ܐܵܦܠܵܐ ܒܪܗܘܿܡܹܐ ܡܸܬܼܩܲܒܿܒܠܲܬܿ. ܟܐܦܵܐ. ܥܲܡ̈ܡܹܐ ܟܠܗܘܿܢ
                ܕܲܡܒܲܕܿܪܝܼܢ: ܓܲܒܼܪܹ̈ܐ ܬܪܸܥܤܲܪ ܡܲܠܟܿܝܼ̈ܢ ܠܗܘܿܢ. ܘܠܝܼ ܒܓܼܵܘ
                ܪܗ̄ܘܿܡܹܐ ܦܸܨܬܼܵܐ ܡܛܵܬ̤: ܡ̣ܢ ܪܘܼܚܩܘܼܕܼܫܵܐ ܕܗ̤ܘ ܫܲܕܪܲܢܝ. ܢܹܐܪܘܿܢ.



                 685 


                ܦܵܘܠܘܿܣ ܡܵܕܹܝܢ ܐܲܝܟܼ ܕܐܸܡ݂ܲܪܬܿ: ܥܲܡܵܟܼ ܐܝܼܬܼܵܘܗܝ ܟܲܕܼ ܡܲܟܼܪܸܙ.
                ܘܠܲܬܼܪ̈ܲܝܟܿܘܿܢ ܗ̣̄ܘ ܒܲܠܚܘܿܕܼ ܡܛܵܬ̤: ܪܗܘܿܡܹܐ ܪܲܒܿܬܼܵܐ ܘܥܲܫܝܼܢܬܼܵܐ؟
                ܦܲܛܪܘܿܣ. ܦܵܘܠܘܣ ܒܲܠܚܘܿܕܼ ܠܥܲܡܹ̈ܐ ܗ̣̄ܘ ܡ̣ܛܵܐ: ܢܲܟܼܪܸܙ
                ܘܢܲܠܸܦ ܐܵܦ ܢܲܪܬܸܿܐ. ܘܫܲܠܝܼܛ ܗ̣̄ܘ ܠܹܗ ܡ̣ܢ ܡܵܪܝܵܐ: ܕܢܲܦܢܸܐ
                ܠܥܲܡ̈ܡܹܐ ܕܲܒܼܟܼܠ ܕܘܼܟܿ. ܢܹܐܪܘܿܢ. ܨܲܝܵܕܲܐ ܗ̣ܘܲܝܬܿ ܐܲܝܟܼ ܕܐܵܡ̇ܪܝܼܢ:
                ܘܲܫܒܼܩ̣ܬܿ ܨܲܝܕܵܐ ܕܪܲܒܿܝܼܬܿ ܒܹܗ. ܘܐܘܼܡܵܢܘܼܬܼܵܐ ܐ̄ܚܪܹܬܼܵܐ ܓܒܲܝܬܿ: ܐܲܝ̇ܕܵܐ
                ܕܲܠܝܲܝܲܝ̈ܟ ܡܵܘܒܿܕܼܵܐ. ܫܸܡܥܘܿܢ. ܨܲܝܕܵܐ ܕܢܘܼ̈ܢܹܐ ܠܵܐ ܐܵܘܬܿܪܲܢܝ:
                ܕܐܹܨܘܼܕܼ ܠܐ̄ܢܵܫܵܐ ܤܝܼܡܵܐ ܠܝܼ. ܘܗܵܫܵܐ ܐ̄ܢܵܫܵܐ ܨܵܐܹ̇ܕܼ ܐ̄ܢܵܐ: ܕܢܸܗܘܘܿܢ
                ܥܲܒܼ̈ܕܹܐ ܠܲܡܫܲܕܲܪܵܢܝ. ܢܹܐܪܘܿܢ. ܩܲܠܝܼܠ ܙܲܒܼܢܵܐ ܐܸܠܘܼ ܨܠܲܝܬܿ: ܐܝܼܬܼ
                ܠܵܟܼ ܕܬܸܚܸܐ ܒܓܼܵܘ ܥܵܠܡܵܐ. ܘܗܵܫܵܐ ܕܐܲܡܪܲܚ̣ܬܿ ܘܡܹܢܝ ܠܵܐ ܕܚܸܠ̣ܬܿ:
                ܫܵܠ̇ܡܝܼܢ ܚܲܝܲܝ̈ܟ ܡ̣ܢ ܥܵܠܡܵܐ. ܟܹܐܦܵܐ. ܩܲܕܸܡ ܡܵܪܲܢ ܐܵܦ ܙܲܗܪܲܢ:
                ܕܠܵܐ ܬܸܬܿܙܝܼܥܘܼܢ ܐܘܿ ܪ̈ܵܚܡܲܝ. ܡ̣ܢ ܐܲܝܠܹܝܢ ܕܦܲܓܼܪܵܐ ܩܵܛ̇ܠܝܼܢ:
                ܘܲܠܢܲܦܫܵܬܼ̈ܟܼܘܿܢ ܠܵܐ ܡܵܘܒܿܕܼܝܼܢ. ܢܹܐܪܘܿܢ. ܪܹܫ ܡܲܠܟܿܘܼܬܲܢ ܪܗܘܿܡܹܐ
                ܗ̄ܘ̣ܵܬܼ: ܟܠ ܡܵܘܬܵܐ ܕܒܹܗ ܡܵܝܬܲܬܿ. ܫܸܡܥܘܿܢ. ܪܹܫ ܡܲܠܟܿܘܼܬܼܵܟܼ
                ܐܲܝܟܼ ܕܐܸܡ݂ܲܪܬܿ: ܪܗܘܿܡܹܐ ܐܝܼܬܹܝܗ̇ ܥܲܫܝܼܢܬܼܵܐ. ܙܲܪܥܵܐ ܛܵܒܼܵܐ ܙܸܪܥܹ̇ܬܼ
                ܒܵܗ̇: ܙܩܝܼܦܵܐ ܗܲܒܼܠܝܼ ܐܲܓܼܪܵܐ ܕܥܲܡܠܝ. ܢܹܐܪܘܿܢ. ܫܲܦܝܼܪ ܐܲܓܼܪܵܐ
                ܕܲܒܼܥܲܝܬܿ ܡܹܢܝ: ܗܵܘ̇ ܕܐܵܦ ܡܵܪܵܟܼ ܒܹܗ ܐܸܙܕܩܸܦܼ. ܐܲܓܼܪܹܗ ܕܦܵܘܠܘܿܣ
                ܤܲܝܦܝ ܢܸܗܘܸܐ: ܘܠܵܟܼ ܒܲܙܩܝܼܦܵܐ ܐܹܝܲܩܪܵܟܼ. ܫܸܡܥܘܿܢ. ܫܡܲܥ
                ܘܐܲܫܐܸܠܲܢܝ ܚܕܼܵܐ ܫܸܐܠܬܼܵܐ: ܕܡܵܪܝ ܟܲܕܼ ܐܸܙܕܩܸܦ̣ ܪܹܫܹܗ ܠܥܸܠ.



                 686 


                ܪܹܫܝ ܠܬܲܚܬܿ ܢܸܗܘܸܐ ܘܪܸ̈ܓܼܠܲܝ ܠܥܸܠ: ܕܠܵܐ ܫܵܘܹ̇ܐ ܐ̄ܢܵܐ ܕܐܲܝܟܼ
                ܡܵܪܝ ܐ̄ܙܕܩܸܦ܀ ܬܬܗܲܪܘ ܚܲܙܵܝܹ̈ܐ ܟܲܕܼ ܩܵܝ̇ܡܝܼܢ: ܒܤܵܒܼܵܐ ܠܒܼܝܼܒܼܵܐ
                ܘܲܡܗܲܝܡܢܵܐ. ܐܹܝܘ ܠܵܟܼ ܟܹܐܦܵܐ ܩܥ̣ܵܘ ܡܗܲܝܡ̈ܢܹܐ: ܟܡܵܐ ܫܲܪܝܼܪܵܐ
                ܫܲܬܼܐܸܤܬܼܵܟܼ܀ ܬܬܵܘܕܝܼ ܠܛܵܒܼܵܐ ܩܥ̣ܵܘ ܡܗܲܝ̈ܡܢܹܐ: ܕܲܫܡܵܟܼ
                ܐܸܙܓܪܲܥ̣ ܒܹܝܬܼ ܡܲܥܡܪܲܢ. ܘܐܵܦ ܓܲܪ̈ܡܲܝܗܘܿܢ ܕܲܫܠܝܼܚܲܝ̈ܟ: ܢܸܗܘܘܿܢ
                ܤܢܹܐܓܼܪܵܐ ܠܲܡܗܲܝܡܢܲܝ̈ܟ܀