Ephrem the Syrian. “Nativity 7.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/555.
    
        
            
                
                    
                    ܒܰܪ ܩܳܠܶܗ
                    
                
                
                    1
                    ܒܝܰܠܕܶܗ ܕܰܒܪܳܐ ܪܰܘܒܳܐ ܪܰܒܳܐ 
                    ܗܘܳܐ ܒܶܝܬ ܠܚܶܡ ܕܰܢܚܶܬܘ ܥܺܝܪ̈ܶܐ 
                    ܫܰܒܰܚܘ ܬܰܡܳܢ ܪܰܥܡܳܐ ܪܰܒܳܐ 
                    ܗܘܰܘ ܩܳܠܰܝ̈ܗܽܘܢ ܒܗܰܘ ܩܽܠ ܫܽܘܒܚܳܐ 
                    ܐܶܬܘ ܫ̈ܰܬܺܝܩܶܐ ܘܫܰܒܰܚܘ ܠܰܒܪܳܐ 
                    
                    ܥܽܘܢܺܝܬܳܐ : ܒܪܺܝܟ ܗܽܘ ܥܽܘܠܳܐ ܕܚܰܘܳܐ ܘܐܳܕܳܡ
                    ܒܶܗ ܐܶܬܥܰܠܰܡܘ 
                    
                
                
                    2
                    ܛܥܶܢܘ ܬܽܘܒ ܘܐܶܬܰܘ ܪ̈ܳܥܰܘܳܬܳܐ 
                    ܛܽܘܒ̈ܶܐ ܕܥܳܢܳܐ ܚܰܠܒܳܐ ܚܰܠܝܳܐ 
                    ܒܶܣܪܳܐ ܕܰܟܝܳܐ ܫܽܘܒܚܳܐ ܦܰܐܝܳܐ 
                    ܦܪܰܫܘ ܘܝܰܗܒܘ ܠܝܰܘܣܶܦ ܒܶܣܪܳܐ 
                    ܠܡܰܪܝܰܡ ܚܰܠܒܳܐ ܘܠܰܒܪܳܐ ܫܽܘܒܚܳܐ 
                    
                
                
                    3
                    ܛܥܶܢܘ ܩܰܪܶܒܘ ܠܶܗ ܐܶܡܰܪ ܚܰܠܒܳܐ 
                    ܠܐܶܡܰܪ ܦܶܨܚܳܐ ܒܽܘܟܪܳܐ ܠܒܽܘܟܪܳܐ 
                    ܕܶܒܚܳܐ ܠܕܶܒܚܳܐ ܐܶܡܰܪ ܙܰܒܢܳܐ 
                    ܠܐܶܡܰܪ ܩܽܘܫܬܳܐ ܚܶܙܘܳܐ ܦܰܐܝܳܐ 
                    ܕܐܶܡܪܳܐ ܠܐܶܡܪܳܐ ܡܶܬܩܰܪܰܒ ܗܘܳܐ 
                    
                
                
                    4
                    ܦܥܳܐ ܗܘܳܐ ܐܶܡܪܳܐ ܕܟܰܕ ܡܶܬܩܰܪܰܒ
                    ܩܽܘܕܡܰܬ ܒܽܘܟܪܳܐ ܐܰܘܕܺܝ ܠܐܶܡܪܳܐ 
                    ܕܐܶܬܳܐ ܚܰܪܰܪ ܥܶܪ̈ܒܶܐ ܘܬܰܘܪ̈ܶܐ 
                    ܡܶܢ ܕܶܒܚ̈ܳܬܳܐ ܘܠܐܶܡܰܪ ܦܶܨܚܳܐ 
                    ܕܝܰܒܶܠ ܘܐܶܬܳܐ ܦܶܨܚܶܗ ܕܰܒܪܳܐ
                    
                
                
                    5
                    ܩܰܪܶܒܘ ܘܰܣܓܶܕܘ ܠܶܗ ܪ̈ܳܥܰܘܳܬܳܐ 
                    ܥܰܡ ܚܽܘܛܪ̈ܰܝܗܽܘܢ ܫܶܐܠܘ ܒܰܫܠܳܡܶܗ 
                    ܟܰܕ [ܡܶܬܢܰܒܶܝܢ] ܫܠܶܡ [ܐܳܘ ܪܰܒܳܐ 
                    ܕܪ̈ܳܥܰܘܳܬܳܐ] ܚܽܘܛܪܶܗ ܕܡܽܘܫܶܐ 
                    ܢܰܘܕܶܐ ܠܚܽܘܛܪܳܟ ܪܳܥܶܐ ܟܽܘܠܳܐ
                    
                
                
                    6
                    ܠܳܟ ܓܶܝܪ ܡܰܘܕܶܐ ܡܽܘܫܶܐ ܕܰܗܘܰܘ 
                    ܐܶܡܪ̈ܰܘܗܝ ܕܺܐܒ̈ܶܐ ܘܰܗܘܰܘ ܥܶܪ̈ܒܰܘܗܝ
                    ܐܰܝܟ ܬܰܢܺܝ̈ܢܶܐ ܘܰܢܩܰܘ̈ܳܬܶܗ 
                    ܚܰܝܽܘܬ ܫܶܢܳܐ ܒܚܽܘܪܒܳܐ ܕܚܺܝܠܳܐ
                    ܦܶܩܪܰܬ ܥܳܢܶܗ ܘܣܶܥܪܰܬ ܥܠܰܘܗܝ
                    
                
                
                    7
                    ܠܳܟ ܕܶܝܢ ܢܰܘܕܽܘܢ ܪ̈ܳܥܰܘܳܬܳܐ
                    ܕܐܰܢܬ ܗܽܘ ܡܫܰܝܶܢ ܕܺܐܒ̈ܶܐ ܘܐܶܡܪ̈ܶܐ 
                    ܒܓܰܘ ܡܰܪܥܺܝܬܳܐ ܐܰܢܬ ܗܽܘ ܥܽܘܠܳܐ 
                    ܕܩܰܫܺܝܫ ܡܶܢ ܢܽܘܚ ܘܰܛܠܶܐ ܡܶܢ ܢܽܘܚ
                    ܕܫܰܝܶܢ ܟܽܘܠܳܐ ܐܰܝܟ ܟܽܘܝܠܳܐ 
                    
                
                
                    8
                    ܕܰܘܺܝܕ ܐܰܒܽܘܟ ܡܶܛܽܠ ܐܶܡܪܳܐ 
                    ܐܰܪܝܳܐ ܩܛܰܠ ܗܘܳܐ ܐܰܢܬ ܗܽܘ ܩܳܛܶܠ
                    ܐܳܘ ܒܰܪ ܕܰܘܺܝܕ ܕܺܐܒܳܐ ܟܰܣܝܳܐ 
                    ܕܰܩܛܰܠ ܠܐܳܕܳܡ ܐܶܡܪܳܐ ܒܪܺܝܪܳܐ 
                    ܕܰܪܥܳܐ ܘܰܦܥܳܐ ܒܗܰܘ ܦܰܪܕܰܝܣܳܐ 
                    
                
                
                    9
                    ܒܗܰܘ ܩܳܠ ܫܽܘܒܚܳܐ ܢܳܕ ܟ̈ܰܠܠܳܬܳܐ 
                    ܘܐܶܬܩܰܕܰܫ ܗܘܰܝ̈ ܘܰܒܬܽܘ̈ܠܳܬܳܐ 
                    ܘܐܶܬܢܰܟܰܦ ܗܘܰܝ̈ ܘܐܳܦ ܫܰܒܪ̈ܳܬܳܐ 
                    ܘܐܶܙܕܰܗܺܝ ܗܘܰܝ̈ ܩܰܕܶܡ ܐܶܬܰܝ̈ 
                    ܟܶܢ̈ܫܺܝܢ ܟܶܢ̈ܫܺܝܢ ܘܰܣܓܶܕ ܠܰܒܪܳܐ 
                    
                
                
                    10
                    ܐܶܬܰܝ̈ ܣܳܒ̈ܳܬܳܐ ܕܩܽܘܪܰܝܬ ܕܰܘܺܝܕ 
                    ܨܶܝܕ ܒܰܪܬ ܕܰܘܺܝܕ ܒܪܶܟ ܘܐܶܡܰܪ
                    ܛܽܘܒܶܝܗܿ ܠܡܳܬܰܢ [ܕܰܢܗܰܪ ܫܽܘ̈ܩܶܝܗܿ]
                    ܒܨܶܡܚܶܗ ܕܐܺܝܫܰܝ [ܝܰܘܡܳܢ ܬܰܩܶܢ 
                    ܟܽܘܪܣܰܝ ܕܰܘܺܝܕ ܒܳܟ ܒܰܪ ܕܰܘܺܝܕ]
                    
                
                
                    11
                    ܩܥܰܘ ܗܘܰܘ ܣܳܒ̈ܶܐ ܒܪܺܝܟ ܗܽܘ ܥܽܘܠܳܐ 
                    ܕܥܳܠܶܡ ܠܐܳܕܳܡ ܐܰܟܪܺܝ ܕܰܚܙܳܐ 
                    ܕܰܥܬܶܩ ܘܰܒܠܺܝ ܘܚܶܘܝܳܐ ܕܩܰܛܠܶܗ 
                    ܫܠܰܚ ܘܐܶܬܛܠܺܝ ܒܪܺܝܟ ܗܽܘ ܥܽܘܠܳܐ 
                    ܕܚܰܘܳܐ ܘܐܳܕܳܡ ܒܶܗ ܐܶܬܥܰܠܰܡܘ
                    
                
                
                    12
                    ܐܶܡܰܪ ܢܰܟ̈ܦܳܬܳܐ ܦܺܐܪܳܐ ܒܪܺܝܟܳܐ 
                    ܒܰܪܶܟ ܦܺܐܪ̈ܺܝܢ ܠܳܟ ܢܶܬܝܰܗܒܽܘܢ 
                    ܐܰܝܟ ܒܰܟܳܪ̈ܶܐ ܪܬܰܚ ܘܐܶܬܢܰܒܺܝ
                    ܥܰܠ ܝܰܠܕܰܝ̈ܗܶܝܢ ܕܟܰܕ ܡܶܬܩܰܛܠܺܝܢ 
                    ܠܶܗ ܡܶܬܩܰܛܦܺܝܢ ܐܰܝܟ ܪܺܫܺܝܬܳܐ 
                    
                
                
                    13
                    ܪܰܚܶܦ ܛܰܥܢܳܝܗܝ ܗ̈ܘܰܝ ܥܰܩܪ̈ܳܬܳܐ 
                    ܚܰܒܶܒ ܘܐܶܡܰܪ ܦܺܐܪܳܐ ܒܪܺܝܟܳܐ 
                    ܕܠܳܐ ܙܽܘܘܳܓܳܐ ܒܰܪܶܟ ܥܽܘܒ̈ܺܝܢ 
                    ܡܶܢ ܙܽܘܘܳܓܳܐ ܚܽܘܢ ܥܰܩܪܽܘܬܰܢ
                    ܝܰܠܕܳܐ ܬܡܺܝܗܳܐ ܕܰܒܬܽܘܠܽܘܬܳܐ