Ephrem the Syrian. “Nativity 8.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/556. ܒܰܪ ܩܳܠܶܗ 1 ܒܪܺܝܟ ܐܺܝܙܓܰܕܳܐ ܕܰܛܥܶܢ ܘܐܶܬܳܐ ܫܰܝܢܳܐ ܪܰܒܳܐ ܪ̈ܰܚܡܶܐ ܕܐܰܒܽܘܗܝ ܐܰܪܟܶܢ ܨܶܐܕܰܝܢ ܚ̈ܰܘܒܰܝܢ ܕܺܝܠܰܢ ܠܳܐ ܐܰܣܶܩ ܠܶܗ ܥܒܰܕ ܬܰܪܥܽܘܬܳܐ ܠܗܳܝ ܡܳܪܽܘܬܳܐ ܥܰܡ ܩܶܢܝ̈ܳܢܶܝܗܿ ܥܽܘܢܺܝܬܳܐ : ܫܽܘܒܚܳܐ ܠܕܶܢܚܳܟ ܐܰܠܳܗܳܝܳܐ ܘܐܢܳܫܳܝܳܐ 2 ܫܒܺܝܚ ܚܰܟܺܝܡܳܐ ܕܚܰܝܶܢ ܚܰܠܶܛ ܐܰܠܳܗܽܘܬܳܐ ܥܰܡ ܐܢܳܫܽܘܬܳܐ ܚܰܕ ܡܶܢ ܪܰܘܡܳܐ ܘܚܰܕ ܡܶܢ ܥܽܘܡܩܳܐ ܟܝ̈ܳܢܶܐ ܡܰܙܶܓ ܐܰܝܟ ܣܰܡܡ̈ܳܢܶܐ ܘܗܘܳܐ ܨܰܠܡܳܐ ܐܰܠܳܗ ܒܰܪ ܐܢܳܫ 3 ܐܳܘ ܛܰܢܳܢܳܐ ܕܰܚܙܳܝܗܝ ܠܐܳܕܳܡ ܕܰܗܘܳܐ ܥܰܦܪܳܐ ܘܚܶܘܝܳܐ ܚܰܪܡܳܐ ܟܰܕ ܐܳܟܶܠ ܠܶܗ ܫܪܳܐ ܚܰܬܺܝܬܳܐ ܒܓܰܘ ܦܰܟܺܝܗܳܐ ܥܰܒܕܶܗ ܡܰܠܚܳܐ ܕܒܳܗܿ ܡܶܬܥܰܘܰܪ ܚܶܘܝܳܐ ܠܺܝܛܳܐ 4 ܒܪܺܝܟ ܚܰܢܳܢܳܐ ܕܰܚܙܳܐ ܪܽܘܡܚܳܐ ܨܶܝܕ ܦܰܪܕܰܝܣܳܐ ܕܰܟܠܳܬ ܐܽܘܪܚܳܐ ܕܐܺܝܠܳܢ ܚ̈ܰܝܶܐ ܘܐܶܬܳܐ ܫܩܰܠ ܠܶܗ ܦܰܓܪܳܐ ܕܰܒܠܰܥ ܕܒܰܬܪܰܥ ܣܛܶܪܶܗ ܢܶܬܪܽܘܥ ܐܽܘܪܚܳܐ ܠܓܰܘ ܦܰܪܕܰܝܣܳܐ 5 ܫܒܺܝܚ ܚܰܢܳܢܳܐ ܕܰܒܩܰܫܝܽܘܬܳܐ ܠܳܐ ܐܶܬܚܰܫܰܚ ܘܰܕܠܳܐ ܩܛܺܝܪܳܐ ܒܚܶܟܡܳܐ ܢܨܰܚ ܗܘܳܐ ܕܢܶܬܶܠ ܛܽܘܦܣܳܐ ܠܰܒܢܰܝ̈ܢܳܫܳܐ ܕܰܒܝܰܕ ܚܰܝܠܳܐ ܘܚܶܟܡܳܐ ܢܶܙܟܽܘܢ ܦܳܪܽܘܫܳܐܺܝܬ 6 ܛܽܘܒܶܝܗܿ ܠܥܳܢܳܟ ܕܐܰܢ̱ܬ ܗܽܘ ܬܰܪܥܳܗܿ ܘܐܰܢ̱ܬ ܗܽܘ ܚܽܘܛܪܳܗܿ ܘܐܰܢ̱ܬ ܗܽܘ ܪܳܥܝܳܗܿ ܘܐܰܢ̱ܬ ܗܽܘ ܫܶܩܝܳܗܿ ܐܰܢ̱ܬ ܡܰܠܳܚܳܗܿ ܐܳܦ ܣܳܥܽܘܪܳܗܿ ܐܳܘ ܠܺܝܚܺܝܕܳܐ ܕܰܦܪܳܐ ܘܰܣܓܳܐ ܒܟܽܠ ܥܽܘܕܪ̈ܳܢܺܝܢ 7 ܐܶܬܰܘ ܐܰܟܳܪ̈ܶܐ ܘܰܣܓܶܕܘ ܩܽܘܕܡܰܘܗܝ ܕܐܰܟܰܪ ܚ̈ܰܝܶܐ ܐܶܬܢܰܒܺܝܘ ܠܶܗ ܟܰܕ ܡܶܬܦܰܨܚܺܝܢ ܒܪܺܝܟ ܐܰܟܳܪܳܐ ܕܒܶܗ ܡܶܬܦܰܠܚܳܐ ܐܰܪܥܳܐ ܕܠܶܒܳܐ ܚܶܛܰܘ̈ܗܝ ܟܰܢܶܫ ܠܐܰܘܨܰܪ ܚ̈ܰܝܶܐ 8 ܐܶܬܰܘ ܦܰܠܳܚ̈ܶܐ ܘܝܰܗܒܘ ܫܽܘܒܚܳܐ ܠܢܽܘܪܒܳܐ ܕܐܰܦܪܰܥ ܡܶܢ ܥܶܩܳܪܶܗ ܘܓܽܘܙܥܶܗ ܕܐܺܝܫܰܝ ܣܓܽܘܠܳܐ ܒܬܽܘܠܳܐ ܕܣܰܬܳܐ ܨܗܺܝܬܳܐ ܢܶܗܘܶܐ ܡܳܐܢ̈ܶܐ ܠܚܰܡܪܳܟ ܚܰܕܬܳܐ ܕܰܡܚܰܕܶܬ ܟܽܠ 9 ܒܳܟ ܢܶܫܬܰܝܰܢ ܟܰܪܡܶܗ ܕܚܰܒܺܝܒܝ ܕܝܰܗܒ ܚܰܪ̈ܽܘܒܶܐ ܐܰܛܥܶܡ ܓܽܘ̈ܦܢܰܘܗܝ ܡܶܢ ܢܶܨܒ̈ܳܬܳܟ ܢܶܛܥܰܢ ܟܽܠܶܗ ܡܶܢ ܒܽܘܪ̈ܟܳܬܳܐ ܦܺܐܪܶܗ ܢܶܪܥܶܐ ܠܡܳܪܶܐ ܟܰܪܡܳܐ ܕܐܶܬܠܰܚܰܡ ܠܶܗ 10 ܐܶܬܰܘ ܢܰܓܳܪ̈ܶܐ ܡܶܛܽܠ ܝܰܘܣܶܦ ܨܶܝܕ ܒܰܪ ܝܰܘܣܶܦ ܒܪܺܝܟ ܗܽܘ ܝܰܠܕܳܟ ܪܺܝܫ ܢܰܓܳܪ̈ܶܐ ܕܒܶܗ ܐܶܬܪܰܫܡܰܬ ܐܳܦ ܟܽܘܺܝܠܳܐ ܒܶܗ ܐܶܬܪܰܟܰܒ ܡܫܰܟܶܢ ܙܰܒܢܳܐ ܕܰܗܘܳܐ ܠܙܰܒܢܳܐ 11 ܐܰܘܕܳܐ ܒܰܫܡܳܗܿ ܕܐܽܘܡܳܢܽܘܬܰܢ ܕܬܶܗܘܶܐ ܚܽܘܬܪܰܢ ܬܶܥܒܶܕ ܢܺܝܪܳܐ ܕܩܰܠܺܝܠ ܐܳܦ ܢܺܝܚ ܥܰܠ ܫܳܩܽܘܠܰܘ̈ܗܝ ܬܶܥܒܶܕ ܟܰܝܠܳܐ ܕܠܳܐ ܡܨܶܐ ܕܢܶܗܘܶܐ ܙܺܐܦܳܐ ܒܓܰܘܶܗ ܕܰܡܠܶܐ ܩܽܘܫܬܳܐ 12 ܐܳܦ ܡܰܣܰܐܬܳܐ ܬܶܪܟܰܒ ܬܶܥܒܶܕ ܡܶܢ ܟܺܐܢܽܘܬܳܐ ܕܐܰܝܢܳܐ ܕܙܳܐܶܠ ܒܳܗܿ ܡܶܬܩܰܛܪܰܓ ܘܐܰܝܢܳܐ ܕܰܓܡܺܝܪ ܒܳܗܿ ܡܶܬܢܰܨܰܚ ܬܩܽܘܠ ܒܳܗܿ ܟܺܐܢܳܐ ܪ̈ܰܚܡܶܐ ܘܚܽܘ̈ܒܶܐ ܐܰܝܟ ܕܰܝܳܢܳܐ 13 ܣܰܪܳܐ ܠܐܺܝܣܚܳܩ ܟܰܕ ܢܰܨܰܪܬܶܗ ܐܰܝܟ ܕܰܠܥܰܒܕܳܐ ܕܰܛܥܺܝܢ ܝܽܘܩܢܳܐ ܕܡܰܠܟܳܐ ܡܳܪܶܗ ܥܰܠ ܟܰܬܦ̈ܳܬܶܗ ܢܺܝܫܳܐ ܕܩܰܝܣܶܗ ܐܳܦ ܥܰܠ ܐܺܝܕ̈ܰܘܗܝ ܦܟܳܪ̈ܶܐ ܘܚ̈ܰܫܶܐ ܐܪܳܙܳܐ ܕܨ̈ܶܨܶܐ 14 ܪܳܚܶܝܠ ܩܥܳܬ ܠܒܰܥܠܳܗܿ ܐܶܡܪܰܬ ܗܰܒ ܠܺܝ ܒ̈ܢܰܝܳܐ ܛܽܘܒܶܝܗܿ ܠܡܰܪܝܰܡ ܕܟܰܕ ܠܳܐ ܫܶܐܠܰܬ ܫܰܪܝܰܬ ܒܥܽܘܒܳܗܿ ܩܰܕܺܝܫܳܐܺܝܬ ܐܰܘ ܡܰܘܗܰܒܬܶܗ ܕܰܫܕܳܬ ܢܰܦܫܳܗܿ ܥܰܠ ܢܳܣܽܘܒܶܝ̈ܗܿ 15 ܚܰܢܳܐ ܒܕܶܡ̈ܥܶܐ ܡܰܪܺܝܪ̈ܳܬܳܐ ܝܰܠܕܳܐ ܫܶܐܠܰܬ ܣܰܪܳܐ ܘܪܰܦܩܳܐ ܒܢܶܕܪ̈ܶܐ ܘܡ̈ܶܠܶܐ ܘܐܳܦ ܐܠܺܝܫܒܰܥ ܬܽܘܒ ܒܰܨܠܽܘܬܳܗܿ ܠܢܽܘܓܪܳܐ ܪܰܒܳܐ ܬܽܘܒ ܒܰܨܠܽܘܬܳܗܿ ܠܢܽܘܓܪܳܐ ܪܰܒܳܐ ܟܰܕ ܐܶܫܬܰܿܢܰܩ ܟܶܢ ܐܶܬܒܰܝܰܐ 16 ܛܽܘܒܶܝܗܿ ܠܡܰܪܝܰܡ ܕܰܕܠܳܐ ܢܶܕܪ̈ܶܐ ܘܰܕܠܳܐ ܨܠܽܘܬܳܐ ܒܰܒܬܽܘܠܽܘܬܳܗܿ ܒܶܛܢܰܬ ܝܶܠܕܰܬ ܡܳܪܳܐ ܕܟܽܠܗܽܘܢ ܒܢܰܝ̈ ܚܰܒܪ̈ܳܬܳܗܿ ܕܰܗܘܰܘ ܘܗܳܘܶܝܢ ܢܰܟ̈ܦܶܐ ܘܟܺܐܢ̈ܶܐ ܟܽܘܡܪ̈ܶܐ ܘܡܰܠܟ̈ܶܐ 17 ܡܰܢ ܗܺܝ ܬܢܰܨܰܪ ܝܰܠܕܳܗܿ ܒܥܽܘܒܳܗܿ ܒܰܕܡܽܘܬ ܡܰܪܝܰܡ ܡܰܢ ܗܺܝ ܬܶܡܪܰܚ ܬܶܩܪܶܐ ܠܰܒܪܳܗܿ ܒܰܪ ܥܳܒܽܘܕܳܐ ܒܰܪ ܒܳܪܽܘܝܳܐ ܡܰܢ ܗܺܝ ܡܶܡܬܽܘܡ ܕܰܩܪܳܬ ܠܰܒܪܳܗܿ ܒܰܪܥܶܠܳܝܳܐ 18 ܝܰܒܶܒܘ ܚ̈ܰܬܢܶܐ ܥܰܡ ܟ̈ܰܠܠܳܬܳܐ ܒܪܺܝܟ ܗܽܘ ܥܽܘܠܳܐ ܕܰܗܘܳܬ ܐܶܡܶܗ ܟܰܠܰܬ ܩܽܘܕܫܳܐ ܛܽܘܒ ܠܰܚܠܽܘܠܳܐ ܕܐܰܢ̱ܬ ܒܓܰܘܶܗ ܕܐܳܦܶܢ ܚܰܡܪܶܗ ܢܰܘܦܶܐ ܡܶܢ ܫܶܠܝ ܒܳܟ ܣܳܓܶܐ ܬܽܘܒ 19 ܩܥܰܘ ܝ̈ܰܠܽܘܕܶܐ ܒܪܺܝܟ ܕܰܗܘܳܐ ܠܰܢ ܐܰܚܳܐ ܘܚܰܒܪܳܐ ܒܰܝܢܳܬ ܫܽܘ̈ܩܶܐ ܒܪܺܝܟ ܗܽܘ ܝܰܘܡܳܐ ܕܰܒܝܰܕ ܣܰܘ̈ܟܶܐ ܢܶܬܶܠ ܫܽܘܒܚܳܐ ܠܐܺܝܠܳܢ ܚ̈ܰܝܶܐ ܕܰܪܟܶܢ ܪܰܘܡܶܗ ܨܶܝܕ ܫܰܒܪܽܘܬܰܢ 20 ܫܡܰܥ ܢܶܩܒ̈ܳܬܳܐ ܕܗܳܐ ܒܬܽܘܠܬܳܐ ܠܰܡ ܬܶܒܛܰܢ ܬܺܐܠܰܕ ܣܒܰܪ ܚܺܐܪ̈ܳܬܳܐ ܕܡܶܢܗܶܝܢ ܬܶܕܢܰܚ ܐܳܦ ܓܰܐܝ̈ܳܬܳܐ ܕܡܶܢܗܶܝܢ ܬܶܡܨܰܚ ܒܪܺܝܟ ܗܽܘ ܪܰܘܡܳܟ ܕܰܪܟܶܢ ܘܰܕܢܰܚ ܡܶܢ ܡܶܣܟܺܢ̈ܶܐ 21 ܐܶܬܢܰܒܺܝ ܗܘܰܝ̈ ܐܳܦ ܫܰܒܪ̈ܳܬܳܐ ܕܰܫܩܺܝܠܳܢ ܠܶܗ ܠܳܟ ܡܳܪܝ ܐܶܗܘܶܐ ܕܐܶܢ ܣܰܢܝܳܐ ܐ̱ܢܳܐ ܘܐܶܢ ܦܰܐܝܳܐ ܐ̱ܢܳܐ ܘܐܶܢ ܫܰܦܠܳܐ ܐ̱ܢܳܐ ܠܳܟ ܛܰܪܩܳܐ ܐ̱ܢܳܐ ܓܢܽܘܢܳܐ ܕܦܳܛܰܪ ܒܳܟ ܚܰܠܶܦܬܶܗ 22 ܘܰܕܛܰܠܝܽܘܬܳܐ ܐܳܦ ܚܰܨܺܝܦܳܐ ܗ̱ܝ ܐܳܦ ܡܰܠܳܠܳܐ ܟܢܰܫ ܫܰܒܪ̈ܳܬܳܐ ܒܢ̈ܳܬ ܥܶܒܪ̈ܳܝܶܐ ܚܰܟܺܝܡ̈ܳܬܳܐ ܘܐܠܝ̈ܳܬܳܐ ܒܢܽܘܨܳܪ̈ܰܝܗܶܝܢ ܗܦܰܟ [ܐܽܘܠܝ̈ܳܬܳܐ] ܠܰܢܒܺܝܽܘܬܳܐ