Ephrem the Syrian. “Nativity 9.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/557. ܒܰܪ ܩܳܠܶܗ 1 ܡܰܢ ܗܺܝ ܬܶܡܪܰܚ ܬܺܐܡܰܪ ܠܰܒܪܳܗܿ ܐܰܝܟ ܒܰܨܠܽܘܬܳܐ ܣܰܒܪܳܗܿ ܕܐܶܡܶܗ ܐܰܝܟ ܐܰܠܳܗܳܐ ܪܚܽܘܡܳܗܿ ܘܰܒܪܳܗܿ ܐܰܝܟ ܒܰܪ ܐܢܳܫܳܐ ܒܕܶܚܠܳܐ ܘܪܳܚܡܳܐ ܙܳܕܶܩ ܠܐܶܡܳܟ ܕܰܬܩܽܘܡ ܩܽܘܕܡܰܝܟ ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܒܝܰܘܡܳܐ ܕܕܶܢܚܳܟ ܡܶܢ ܡܰܪܥܺܝܬܳܟ 2 ܒܰܪ ܒܳܪܽܘܝܳܐ ܐܰܢܬ ܕܳܡܶܐ ܠܐܰܒܽܘܗܝ ܐܰܝܟ ܥܳܒܽܘܕܳܐ ܥܒܰܕ ܠܶܗ ܒܟܰܪܣܳܐ ܦܰܓܪܳܐ ܢܰܟܦܳܐ ܠܰܒܫܶܗ ܘܰܢܦܰܩ ܘܐܰܠܒܶܫ ܫܽܘܒܚܳܐ ܠܰܡܚܺܝܠܽܘܬܰܢ ܒܪ̈ܰܚܡܶܐ ܕܐܰܝܬܺܝ ܡܶܢ ܨܶܝܕ ܐܰܒܽܘܗܝ 3 ܡܶܢ ܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܙܽܘܦܳܐ ܐܶܬܳܐ ܠܳܟ ܟܽܘܪܣܝܳܐ ܘܬܳܓܳܐ ܡܶܢ ܒܶܝܬ ܕܰܘܺܝܕ ܛܽܘܗܡܳܐ ܘܓܶܢܣܳܐ ܡܶܢ ܐܰܒܪܳܗܳܡ ܡܰܢ ܗܺܝ ܬܺܐܡܰܪ ܗܳܟܰܢ ܠܰܒܪܳܗܿ ܐܰܝܟ ܕܐܶܡܳܟ ܠܳܟ 4 ܗܘܺܝܬ ܠܺܝ ܠܡܺܐܢܳܐ ܡܶܛܽܠܳܬܳܟ ܝܰܡܳܐ ܪܰܒܳܐ ܗܳܐ ܙܡܺܝܪ̈ܳܬܶܗ ܕܐܰܒܽܘܟ ܕܰܘܺܝܕ ܥܰܡ ܡܶܠܰܝ̈ܗܽܘܢ ܬܽܘܒ ܕܰܢܒܺܝ̈ܶܐ ܒܰܕܡܽܘܬ ܐܶܠܦ̈ܶܐ ܣܰܦܶܩ ܨܶܐܕܰܝ ܥܽܘܬܪܳܟ ܪܰܒܳܐ 5 ܕܰܘܺܝܕ ܐܰܒܽܘܟ ܗܰܘ ܡܰܙܡܽܘܪܳܐ ܕܰܡܳܐܐ ܘܰܥܣܰܪ ܬܪ̈ܶܝܢ ܡܶܢܝ̈ܳܢܺܝܢ ܐܰܝܟ ܠܰܟܠܺܝܠܳܐ ܓܕܰܠ ܠܳܟ ܘܐܶܬܳܐ ܐܳܘ ܙܰܟܳܝܳܐ ܒܗܽܘܢ ܬܶܬܟܰܠܰܠ ܘܥܰܠ ܝܰܡܺܝܢܳܐ ܬܶܣܰܩ ܬܶܬܶܒ 6 ܟܠܺܝܠܰܐ ܗ̱ܘ ܪܰܒܳܐ ܗܰܘ ܡܶܢܝܳܢܳܐ ܕܰܓܕܺܝܠ ܒܰܡܳܐܐ ܕܒܶܗ ܬܶܬܟܰܠܰܠ ܐܰܠܳܗܽܘܬܳܟ ܟܠܺܝܠܳܐ ܙܥܽܘܪܳܐ ܕܡܶܢܝܳܢ ܥܶܣܪ̈ܶܐ ܟܰܠܶܠ ܪܺܫܳܐ ܕܐܢܳܫܽܘܬܳܟ ܐܳܘ ܢܰܨܺܝܚܳܐ 7 ܡܶܛܽܠܳܬܳܟ ܢܶܫ̈ܶܐ ܪܗܶܛ ܗܘܰܝ̈ ܒܳܬܰܪ ܓܰܒܪ̈ܶܐ ܬܳܡܳܪ ܪܶܓܰܬ ܓܰܒܪܳܐ ܕܐܰܪܡܰܠ ܘܪܳܥܽܘܬ ܪܶܚܡܰܬ ܓܰܒܪܳܐ ܕܰܣܐܶܒ ܐܳܦ ܗܳܝ ܪܳܚܳܒ ܕܰܫܒܳܬ ܓܰܒܪ̈ܶܐ ܒܳܟ ܐܶܫܬܰܒܝܰܬ 8 ܢܶܦܩܰܬ ܬܳܡܳܪ ܘܰܒܚܶܫܽܘܟܳܐ ܓܰܢܒܰܬ ܢܽܘܗܪܳܐ ܘܰܒܛܰܡܐܽܘܬܳܐ ܓܶܢܒܰܬ ܩܽܘܕܫܳܐ ܘܰܒܦܽܘܪܣܳܝܳܐ ܓܶܢܒܰܬ ܥܶܠܰܬ ܠܳܟ ܝܰܩܺܝܪܳܐ ܡܰܦܶܩ ܢܰܟ̈ܦܶܐ ܡܶܢ ܙܰܠܺܝ̈ܠܶܐ 9 ܚܙܳܝܗܝ ܣܛܳܢܳܐ ܘܰܩܢܰܛ ܘܰܪܗܶܛ ܐܰܝܟ ܕܰܢܥܰܟܰܪ ܐܶܕܟܰܪ ܕܺܝܢܳܐ ܘܠܳܐ ܕܶܚܠܰܬ ܗܘܳܬ ܪܰܓܡܳܐ ܘܣܰܝܦܳܐ ܘܠܳܐ ܩܶܢܛܰܬ ܗܘܳܬ ܡܰܠܶܦ ܓܰܘܪܳܐ ܓܰܘܪܳܐ ܟܠܳܐ ܗܘܳܐ ܕܠܳܟ ܢܶܟܠܳܐ ܗܘܳܐ 10 ܩܽܘܕܫܳܐ ܗܘܳܐ ܓܶܝܪ ܓܰܘܪܳܗܿ ܕܬܳܡܳܪ ܡܶܛܽܠܳܬܳܟ ܠܳܟ ܨܰܗܝܳܐ ܗܘܳܬ ܢܶܒܥܳܐ ܕܰܟܝܳܐ ܝܺܗܘܕܳܐ ܓܰܠܙܳܗܿ ܡܶܢܰܢ ܫܳܩܽܘܬܳܟ ܡܥܺܝܢܳܐ ܨܗܺܝܬܳܐ ܓܶܢܒܰܬ ܫܶܩܝܳܟ ܡܶܢ ܡܰܒܽܘܥܶܗ 11 ܗܘܳܬ ܐܰܪܡܰܠܬܳܐ ܡܶܛܽܠܳܬܳܟ ܠܳܟ ܗܽܘ ܪܶܓܰܬ ܪܶܗܛܰܬ ܘܰܗܘܳܬ ܬܽܘܒ ܙܳܢܺܝܬܳܐ ܡܶܛܽܘܠܳܬܳܟ ܠܳܟ ܗܽܘ ܣܶܘܚܰܬ ܢܶܛܪܰܬ ܘܰܗܘܳܬ ܡܩܰܕܰܫܬܳܐ ܠܳܟ ܗܽܘ ܪܶܚܡܰܬ 12 ܪܳܥܽܘܬ ܬܶܣܬܰܒܰܪ ܕܰܒܥܳܬ ܥܽܘܬܪܳܟ ܥܰܠ ܠܶܗ ܡܽܘܐܳܒ ܬܶܚܕܶܐ ܬܳܡܳܪ ܕܐܶܬܳܐ ܡܳܪܳܗܿ ܕܰܫܡܳܗܿ ܐܰܟܪܶܙ ܥܰܠ ܒܰܪ ܡܳܪܳܗܿ ܐܳܦ ܟܽܘܢܳܝܳܗܿ ܠܳܟ ܩܳܪܶܐ ܗܘܳܐ ܕܬܺܐܬܶܐ ܨܶܐܕܶܝܗܿ 13 ܒܳܟ ܐܶܙܕܰܠܰܠ ܝܰܩܺܝܪ̈ܳܬܳܐ ܡܢܰܟܶܦ ܟܽܘܠܳܐ ܠܳܟ ܗܽܘ ܓܶܢܒܰܬ ܒܶܝܬ ܐܽܘܪ̈ܚܳܬܳܐ ܕܪ̈ܰܫ ܐܽܘܪܚܳܐ ܠܒܶܝܬ ܡܰܠܟܽܘܬܳܐ ܕܚ̈ܰܝܶܐ ܓܶܢܒܰܬ ܠܳܐ ܣܦܰܩ ܣܰܝܦܳܐ ܕܰܢܡܺܝܬܳܗܿ ܗܘܳܐ 14 ܪܳܥܽܘܬ ܨܶܝܕ ܓܰܒܪܳܐ ܒܐܶܕܪܳܐ ܢܶܦܠܰܬ ܡܶܛܽܠܳܬܳܟ ܐܰܚܨܶܦ ܚܽܘܒܳܗܿ ܡܶܛܽܠܳܬܳܟ ܡܰܠܶܦ ܚܽܘܨܳܦܳܐ ܠܟܽܘܠ ܬܰܝܳܒ̈ܶܐ ܐܰܡܣܰܪ ܐܶܕܢܶܝ̈ܗܿ ܥܰܠ ܟܽܠ ܩܳܠܺܝ̈ܢ ܡܶܛܽܠ ܩܳܠܳܟ 15 ܓܡܽܘܪܬܳܐ ܕܪܶܚܫܰܬ ܒܥܰܪܣܶܗ ܕܒܳܥܳܙ ܣܶܠܩܰܬ ܢܶܦܠܰܬ ܚܙܳܬ ܪܰܒ ܟܽܘܡܪܳܐ ܕܰܟܣܶܐ ܒܚܰܨܶܗ ܢܽܘܪܳܐ ܠܦܺܝܪܡܶܗ ܪܶܗܛܰܬ ܘܰܗܘܳܬ ܥܓܰܠܬܶܗ ܕܒܳܥܳܙ ܠܳܟ ܗܽܘ ܝܶܠܕܰܬ ܬܰܘܪܳܐ ܕܦܰܛܡܳܐ 16 ܠܩܳܛܳܐ ܠܶܩܛܰܬ ܡܶܛܽܠ ܚܽܘܒܳܟ ܓ̈ܰܠܶܐ ܟܰܢܫܰܬ ܦܪܰܥܬܳܗܿ ܒܰܥܓܰܠ ܐܰܓܪܳܐ ܕܫܰܦܠܳܗܿ ܚܠܳܦ ܫ̈ܢܳܢܶܐ ܫܶܪܫܳܐ ܕܡܰܠܟ̈ܶܐ ܘܰܚܠܳܦ ܓ̈ܰܠܶܐ ܟܰܦܳܐ ܕܚ̈ܰܝܶܐ ܕܶܢܚܰܬ ܡܶܢܳܗܿ