Ephrem the Syrian. “Nativity 10.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/558.
    
        
            
                
                    
                    ܒܰܪ ܩܳܠܶܗ
                    
                
                
                    1
                    ܠܺܝܰܐ ܘܪܳܚܶܝܠ ܙܰܠܦܰܐ ܘܒܰܠܗܰܐ 
                    ܟܰܕ ܢܰܨܰܪ ܗܘܰܝ ܠܗܳܢܽܘܢ ܪ̈ܓܺܝܓܶܐ
                    ܬܪ̈ܶܥܣܰܪ ܕ[ܝܠܶܕ̈ܝ] ܕܐܢܳܫܽܘܬܳܐ ܗܘܰܘ 
                    ܢܽܘܨܳܪ̈ܰܝܗܶܝܢ ܕܡܳܪܽܘܬܳܐ ܐܶܢܶܝܢ 
                    ܟܽܠ ܢܽܘܨܪ̈ܳܬܳܟ ܡܳܪܳܐ ܕܐܰܚܰܘ̈ܗܝ
                    
                
                
                    2
                    ܕܢܶܬܗܰܝܡܰܢ ܗܘܳܐ ܐܳܦ ܢܽܘܚܳܡܳܟ 
                    ܒܶܝܬ ܟܳܦܽܘܪ̈ܶܐ ܠܓܰܘ ܡܶܢ ܩܰܒܪܳܐ 
                    ܚܬܺܝܡܳܐ ܣܳܡܽܘܟ ܕܰܚܬܰܡܘ ܟܺܐܦܳܐ
                    ܘܩܳܡܘ ܢܳܛܽܘܪ̈ܶܐ ܚܠܳܦܰܝܟ ܗܘܳܬ
                    ܕܰܚܬܰܡܘ ܩܰܒܪܳܟ ܐܳܘ ܒܰܪ ܚܰܝܳܐ 
                    
                
                
                    3
                    ܟܰܕ ܩܰܒܪܽܘܟ ܗܘܰܘ ܐܶܠܳܐ ܐܰܪܫܶܠܘ
                    ܫܰܒܩܽܘܟ ܘܐܶܙܰܠܘ ܐܺܝܬ ܗܘܳܐ ܐܰܬܪܳܐ 
                    ܠܰܡܕܰܓܳܠܽܘ ܕܡܶܓܢܰܒ ܓܰܢܒܽܘܟ
                    ܐܳܘ ܡܰܚܶܐ ܟܽܠ ܟܰܕ ܡܶܨܛܰܢܥܺܝܢ 
                    ܠܶܡܚܬܰܡ ܩܰܒܪܳܟ ܐܰܣܓܺܝܘ ܫܽܘܒܚܳܟ
                    
                
                
                    4
                    ܛܽܘܦܣܳܐ ܗܘܳܐ ܠܳܟ ܐܳܦ ܕܳܢܺܝܐܶܝܠ
                    ܐܳܦ ܠܳܥܳܙܳܪ ܚܰܕ ܒܓܽܘܒܳܐ 
                    ܕܥܰܡ̈ܡܶܐ ܚܰܬܡܽܘܗܝ ܘܚܰܕ ܕܰܒܩܰܒܪܳܐ 
                    ܕܥܰܡܳܐ ܦܰܬܚܶܗ ܗܳܐ ܢܺܝܫ̈ܰܝܗܽܘܢ 
                    ܘܰܚܬܳܡܰܝ̈ܗܽܘܢ ܐܰܟܶܣܘ ܐܶܢܽܘܢ
                    
                
                
                    5
                    ܦܬܺܝܚ ܗܘܳܐ ܦܽܘܡܗܽܘܢ ܐܶܠܽܘ ܦܰܬܚܽܘܗܝ
                    ܩܰܒܪܳܟ ܘܐܶܙܰܠܘ ܕܰܣܟܰܪܘ ܩܰܒܪܳܟ 
                    ܘܰܚܬܰܡܘ ܘܰܛܒܰܥܘ ܦܽܘܡܗܽܘܢ ܣܰܟܪܽܘܗܝ
                    ܘܟܰܕ ܠܳܐ ܪ̈ܓܺܝܫܺܝܢ ܕܚܰܦܺܝܘ ܩܰܒܪܳܟ 
                    ܚܳܦܘ ܪ̈ܺܝܫܰܝܗܽܘܢ ܟܽܠ ܥܳܫ̈ܽܘܩܶܐ 
                    
                
                
                    6
                    ܒܢܽܘܚܳܡܳܟ ܕܶܝܢ ܐܰܦܺܝܣܬ ܐܶܢܽܘܢ 
                    ܥܰܠ ܡܰܘܠܳܕܳܟ ܕܰܚܬܺܝܡ ܓܽܘܒܳܐ 
                    ܘܰܛܒܺܝܥ ܩܰܒܪܳܐ ܕܰܟܝܳܐ ܒܓܽܘܒܳܐ 
                    ܘܰܚܝܳܐ ܒܩܰܒܪܳܐ ܣܳܗ̈ܕܶܐ ܗܘܰܘ ܠܳܟ 
                    ܓܽܘܒܳܐ ܘܩܰܒܪܳܐ ܕܰܚܬܺܝܡܺܝܢ ܗܘܰܘ
                    
                
                
                    7
                    ܟܰܪܣܳܐ ܘܰܫܝܽܘܠ ܝܰܒܶܒ ܘܰܩ̈ܥܰܝ 
                    ܥܰܠ ܢܽܘܚܳܡܳܟ ܟܰܪܣܳܐ ܒܛܶܢܬܳܟ
                    ܕܰܚܬܺܝܡܳܐ ܗܘܳܬ ܫܝܽܘܠ ܝܺܠܶܕܬܳܟ 
                    ܕܛܰܒܺܝܥܳܐ ܗܘܳܬ ܫܝܽܘܠ ܝܺܠܶܕܬܳܟ
                    ܕܛܰܒܺܝܥܳܐ ܗܘܳܬܿ ܕܠܳܐ ܒܰܟܝܳܢܳܐ 
                    ܟܰܪܣܳܐ ܒܶܛܢܰܬ ܘܰܫܝܽܘܠ ܝܶܗܒܰܬ
                    
                
                
                    8
                    ܚܬܺܝܡ ܗܘܳܐ ܩܰܒܪܳܐ ܕܐܰܓܥܶܠܘ ܗܘܰܘ ܠܶܗ 
                    ܕܰܢܛܰܪ ܡܺܝܬܳܐ ܒܬܽܘܠ ܗܘܳܐ ܥܽܘܒܳܐ 
                    ܕܠܳܐ ܐܢܳܫ ܚܰܟܡܶܗ ܥܽܘܒܳܐ ܒܬܽܘܠܳܐ 
                    ܘܩܰܒܪܳܐ ܚܬܺܝܡܳܐ ܐܰܝܟ ܫܺܝܦܽܘܪ̈ܶܐ 
                    ܠܥܰܡܳܐ ܚܰܪܫܳܐ ܒܐܶܕܢܶܗ ܩܥܰܘ ܠܶܗ 
                    
                
                
                    9
                    ܟܰܪܣܳܐ ܚܬܺܝܡܳܐ ܟܺܐܦܳܐ ܛܒܺܝܥܳܐ 
                    ܒܶܝܬ ܥܳܫܽܘ̈ܩܶܐ ܠܒܰܛܢܳܐ ܥܰܫܩܽܘܗܝ
                    ܕܰܙܪܰܥ ܐܢܳܫܰܐ ܗ̱ܘ ܘܰܠܢܽܘܚܳܡܳܐ 
                    ܕܚܽܘܠܳܨ ܐܢܳܫܰܐ ܗ̱ܘ ܚܬܳܡܳܐ ܘܛܰܒܥܳܐ 
                    ܐܰܟܶܣܘ ܘܐܰܦܺܝܣܘ ܕܰܫܡܰܝܳܢܳܐ ܐܰܢܬ 
                    
                
                
                    10
                    ܩܳܡ ܠܶܗ ܥܰܡܳܐ ܒܶܝܬ ܡܰܘܠܳܕܳܟ
                    ܘܰܠܢܽܘܚܳܡܳܟ ܥܫܰܩ ܡܰܘܠܳܕܳܟ
                    ܒܰܣܪܶܗ ܡܰܘܬܳܟ ܫܪܳܐ ܢܽܘܚܳܡܳܟ 
                    ܬܰܟܣܶܗ ܝܰܠܕܳܟ ܬܪ̈ܶܝܢ ܐܰܬܠܺܝܛܺܝ̈ܢ 
                    ܡܰܚܶܝܢ ܗܘܰܘ ܠܶܗ ܠܦܽܘܡܳܐ ܕܰܥܫܰܩ 
                    
                
                
                    11
                    ܐܳܦ ܐܶܠܺܝܳܐ ܐܶܙܰܠܘ ܒܳܥܶܝܢ ܠܶܗ 
                    ܒܰܝܢܳܬ ܛܽܘܪ̈ܶܐ ܟܰܕ ܒܳܥܶܝܢ ܠܶܗ 
                    ܗܶܢܽܘܢ ܒܐܰܪܥܳܐ ܝܰܬܺܝܪ ܫܪܳܬ 
                    ܕܐܶܬܥܰܠܺܝ ܠܶܗ ܒܥܳܬܗܽܘܢ ܣܶܗܕܰܬ
                    ܕܠܳܐ ܐܶܫܟܰܚܬܶܗ ܕܐܶܬܥܰܠܺܝ ܠܶܗ 
                    
                
                
                    12
                    ܐܶܢ ܕܶܝܢ ܢܒܺܝ̈ܶܐ ܕܰܒܣܽܘܠܳܩܶܗ 
                    ܪ̈ܓܶܫܘ ܕܐܶܠܺܝܳܐ ܐܰܝܟ ܐܶܬܦܰܠܰܓܘ 
                    ܥܰܠ ܡܰܣܰܩܬܶܗ ܟܡܳܐ ܟܰܝ ܥܰܫܩܽܘܗܝ
                    ܛܰܡ̈ܐܶܐ ܠܰܒܪܳܐ ܒܢܳܛܽܘܪ̈ܰܝܗܽܘܢ 
                    ܐܰܟܶܣ ܐܶܢܽܘܢ ܕܐܶܬܢܰܚܰܡ ܠܶܗ