Ephrem the Syrian. “Nativity 11.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/559. ܒܰܪ ܩܳܠܶܗ 1 ܠܐܶܡܳܟ ܡܳܪܰܢ ܠܳܐ ܐܢܳܫ ܝܳܕܰܥ ܐܰܝܟܰܢ ܢܶܩܪܶܝܗܿ ܒܬܽܘܠܬܳܐ ܢܶܩܪܶܝܗܿ ܝܰܠܕܳܗܿ ܩܳܐܶܡ ܘܰܡܙܰܘܰܓܬܳܐ ܠܳܐ ܐܢܳܫ ܚܰܟܡܳܗܿ ܐܶܢ ܗܽܘ ܕܐܶܡܳܟ ܠܳܐ ܡܶܬܕܰܪܟܳܐ ܠܳܟ ܡܰܢ ܢܣܰܦܶܩ ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܕܕܰܠܺܝܠ ܠܶܗ ܟܽܠ ܐܰܝܟ ܡܳܪܶܐ ܟܽܠ 2 ܐܶܡܳܟ ܗܺܝ ܓܶܝܪ ܗܺܝ ܒܰܠܚܽܘܕܶܝܗܿ ܘܚܳܬܳܟ ܥܰܡ ܟܽܠ ܗܘܳܬ ܠܳܟ ܐܶܡܳܐ ܗܘܳܬ ܠܳܟ ܚܳܬܳܐ ܡܟܺܝܪܬܳܟ ܗܺܝ ܬܽܘܒ ܥܰܡ ܢܰܟ̈ܦܳܬܳܐ ܒܟܽܠܡܶܕܶܡ ܗܽܘ ܗܳܐ ܨܰܒܶܬܬܳܗܿ ܫܽܘܦܪܳܐ ܕܐܶܡܶܗ 3 ܡܟܺܝܪܬܳܐ ܗܘܳܬ ܓܶܝܪ ܗܳܝ ܕܰܟܝܳܢܳܐ ܥܰܕ ܠܳܐ ܬܺܐܬܶܐ ܒܶܛܢܰܬ ܗܘܳܬ ܕܶܝܢ ܕܠܳܐ ܒܰܟܝܳܢܳܐ ܒܳܬܰܪ ܕܐܶܬܰܝܬ ܐܳܘ ܩܰܕܺܝܫܳܐ ܘܰܒܬܽܘܠܬܳܐ ܗܘܳܬ ܟܰܕ ܝܺܠܶܕܬܳܟ ܩܰܕܺܝܫܳܐܺܝܬ 4 ܩܢܳܬ ܒܳܟ ܡܰܪܝܰܡ ܫܰܪ̈ܒܶܐ ܟܽܠܗܽܘܢ ܕܰܒܥܺܝ̈ܠܳܬܳܐ ܒܰܛܢܳܐ ܒܓܰܘܳܗܿ ܕܠܳܐ ܙܽܘܘܳܓܳܐ ܚܰܠܒܳܐ ܒܰܬܕܶܝ̈ܗܿ ܕܠܳܐ ܒܰܥܝܳܕܳܐ ܠܐܰܪܥܳܐ ܨܗܺܝܬܳܐ ܒܰܡܥܺܝܢܳܐ ܕܚܰܠܒܳܐ ܥܒܰܕܬܳܗܿ ܡܶܢ ܫܶܠܝ 5 ܐܶܢ ܠܳܟ ܬܶܛܥܰܢ ܛܽܘܪܳܟ ܪܰܒܳܐ ܐܰܩܶܠ ܝܽܘܩܪܶܗ ܐܶܢ ܠܳܟ ܬܰܘܟܶܠ ܡܶܛܽܘܠ ܕܰܟܦܶܢܬ ܐܶܢ ܠܳܟ ܬܰܫܩܶܐ ܕܰܨܒܰܝܬ ܨܗܰܝܬ ܐܶܢ ܠܳܟ ܬܶܥܦܽܘܩ ܓܡܽܘܪܬܳܐ ܕܪ̈ܰܚܡܶܐ ܢܶܛܪܰܬ ܥܽܘܒܳܗܿ 6 ܬܶܗܪܳܐ ܗ̱ܝ ܐܶܡܳܟ ܥܰܠ ܠܳܗܿ ܡܳܪܳܐ ܘܰܗܘܳܐ ܥܰܒܕܳܐ ܥܰܠ ܡܰܠܳܠܳܐ ܘܰܫܠܺܝ ܒܓܰܘܳܗܿ ܥܰܠ ܠܳܗܿ ܪܰܥܡܳܐ ܘܫܰܬܶܩ ܩܳܠܶܗ ܥܰܠ ܪܳܥܶܐ ܟܽܘܠ ܐܶܡܪܳܐ ܗܘܳܐ ܒܳܗܿ ܢܦܰܩ ܟܰܕ ܦܳܥܶܐ 7 ܛܶܟܣ̈ܶܐ ܗܦܰܟܬ ܟܰܪܣܳܐ ܕܐܶܡܳܟ ܡܰܬܩܶܢ ܟܽܘܠܳܐ ܥܰܠ ܥܰܬܺܝܪܳܐ ܢܦܰܩ ܟܰܕ ܡܶܣܟܺܝܢ ܥܰܠ ܠܳܗܿ ܪܳܡܳܐ ܢܦܰܩ ܟܰܕ ܡܰܟܺܝܟ ܥܰܠ ܠܳܗܿ ܙܺܝܘܳܐ ܘܰܠܒܶܫ ܘܰܢܦܰܩ ܓܰܘܢܳܐ ܫܺܝܛܳܐ 8 ܥܰܠ ܓܰܢܒܳܪܳܐ ܘܰܠܒܶܫ ܩܶܢܛܳܐ ܡܶܢ ܓܰܘ ܟܰܪܣܳܐ ܥܰܠ ܙܳܐܶܢ ܟܽܘܠ ܘܰܩܢܳܐ ܟܰܦܢܳܐ ܥܰܠ ܡܰܫܩܶܐ ܟܽܘܠ ܘܰܩܢܳܐ ܨܶܗܝܳܐ ܥܰܪܛܶܠ ܘܰܫܠܺܝܚ ܢܦܰܩ ܗܘܳܐ ܡܶܢܳܗܿ ܡܰܠܒܶܫ ܟܽܠܳܐ