Ephrem the Syrian. “Nativity 12.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/560. ܒܰܪ ܩܳܠܶܗ 1 ܡܰܢܽܘ ܚܙܳܐ ܟܰܝ ܥܽܘܠܳܐ ܕܩܰܫܺܝܫ ܡܶܢ ܝܺܠܶܕܬܶܗ ܥܰܠ ܩܰܫܺܝܫܳܐ ܘܐܶܬܛܠܺܝ ܒܳܗܿ ܢܦܰܩ ܟܰܕ ܝܰܠܽܘܕ ܘܪܰܒܺܝ ܒܚܰܠܒܳܗܿ ܥܰܠ ܙܽܘܥܳܪ ܒܳܗܿ ܢܦܰܩ ܘܝܺܪܶܒ ܒܳܗܿ ܬܶܗܪܳܐ ܪܰܒܳܐ ܥܽܘܢܺܝܬܳܐ : ܫܽܘܒܚܳܐ ܒܝܰܘܡܳܟ ܠܕܶܢܚܳܟ ܟܰܣܝܳܐ ܘܠܐܰܒܳܐ ܕܫܰܠܚܳܟ 2 ܥܽܘܠܳܐ ܒܟܰܪܣܳܐ ܚܬܳܡܳܐ ܩܰܝܳܡ ܕܰܒܬܽܘܠܽܘܬܳܐ ܗܘܳܬ ܠܳܟ ܟܰܪܣܳܐ ܗܰܝܟܰܠ ܡܰܠܟܳܐ ܘܐܰܦܰܝ̈ ܬܰܪܥܳܐ ܒܬܽܘ̈ܠܶܐ ܕܰܥܠܰܘܗܝ ܒܬܽܘ̈ܠܶܐ ܡܶܢ ܒܰܪ ܒܰܛܢܳܐ ܡܶܢ ܓܰܘ ܦܶܗܝܳܐ ܪܰܒܳܐ 3 ܐܳܘ ܠܩܺܒܽܘܬܳܐ ܕܰܣܦܺܝܩܳܐ ܗܘܳܬ ܘܰܚܬܺܝܡܳܐ ܗܘܳܬ ܘܟܰܕ ܗܺܝ ܛܒܺܝܥܳܐ ܢܦܰܩ ܡܶܢ ܓܰܘܳܗܿ ܛܰܒܥܳܐ ܪܰܒܳܐ ܕܰܡܠܶܟ ܡܰܠܟ̈ܶܐ ܣܳܗܕܳܐ ܩܳܥܶܐ ܕܗܳܝ ܡܰܘܗܰܒܬܳܐ ܠܰܘ ܕܰܟܝܳܢܳܐ ܗ̱ܝ 4 ܠܓܶܢܣܳܐ ܕ[ܢܶܫ̈ܶܐ] ܒܬܽܘ̈ܠܶܐ ܕܰܗܘܰܘ ܡܶܛܽܠܳܬܳܟ ܕ[ܢܰܫܰܪ] ܒܰܛܢܳܟ ܗܰܘ ܩܰܕܺܝܫܳܐ ܠܓܰܘ ܡܶܢ ܚܶܬܡ̈ܶܐ ܫܪܳܬ ܕܰܟܝܽܘܬܳܟ ܚܬܳܡܳܐ ܡܰܟܶܣ ܠܐܰܝܢܳܐ [ܕܰܣܪܶܒ] ܕܐܶܡܳܟ ܓܶܢܒܰܬ 5 ܠܓܰܘ ܡܶܢ ܚܶܬܡܳܐ ܫܰܪܝܰܬ ܐܳܦ ܗܳܫܳܐ ܒܓܰܘ ܢܰܟ̈ܦܳܬܳܐ ܘܐܶܢ [ܐܢܳܫ ܥܫܶܩ ܠܰܡܟܺܝܪ̈ܳܬܳܟ] ܚܳܬܡܳܐ ܫܰܠܝܳܐ ܢܳܨܶܦ ܠܐܽܘܪܥܶܗ ܐܰܦ̈ܰܝ ܬܰܪܥܳܐ ܚܬܺܝܡܳܐ ܩܳܥܶܐ ܕܡܰܠܟܰܢ ܬܰܡܳܢ 6 ܚܶܬܡܳܐ ܣܳܗܶܕ ܠܰܡܟܺܝܪ̈ܳܬܳܟ ܘܰܠܝܳܠܶܕܬܳܟ ܠܓܰܘ ܡܶܢ ܚܳܬܡܳܐ ܫܪܳܐ ܗܘܰܝܬ ܒܐܶܡܳܟ ܘܢܰܟ̈ܦܳܬܳܐ ܠܓܰܘ ܡܶܢ ܛܰܒܥܳܐ ܢܶܙܟܶܐ ܚܬܳܡܳܟ ܠܰܡܟܺܝܪ̈ܳܬܳܟ ܐܰܝܟ ܕܠܐܶܡܳܟ 7 ܕܩܽܘܕܫܰܐ ܗ̱ܘ ܪܰܒܳܐ ܕܠܳܐ ܡܶܬܗܰܝܡܰܢ ܒܰܝܢܳܬ ܛܰܡ̈ܐܶܐ ܚܳܬܡܳܐ ܘܛܰܒܥܳܐ ܕܰܡܠܶܟ ܡ̈ܰܠܟܶܐ ܡܦܺܝܣ ܕܰܢܛܺܝܪܳܐ ܗܺܝ ܡܰܪܓܳܢܺܝܬܳܐ ܣܢܓܪ̈ܶܐ ܛܳܒ̈ܶܐ ܩ̈ܢܰܝ ܐܰܡ̈ܗܳܬܳܟ ܒܶܝܬ ܥܳܫ̈ܽܘܩܶܐ 8 ܐܶܢ ܒܰܚܬܳܡܳܐ ܠܳܐ ܡܶܬܗܰܝܡܰܢ ܗܰܘ ܒܶܝܬ ܓܰܙܳܐ ܒܶܠܥܳܕ ܛܰܒܥܳܐ ܡܰܢܽܘ ܡܨܶܐ ܗܘܳܐ ܠܰܡܗܰܝܡܳܢܽܘ ܕܠܳܐ ܐܶܬܚܰܠܰܨ ܐܰܦܺܝܣ ܐܰܠܳܗܳܐ ܚܠܳܦ ܩܰܕܺܝܫܰܘ̈ܗܝ ܠܰܒ̈ܢܰܝܢܳܫܳܐ 9 ܫܪܰܝܬ ܒܡܰܪܝܰܡ ܘܰܥܫܰܩܘ ܛܰܡ̈ܐܶܐ ܕܠܳܐ ܒܰܛܢܳܐ ܠܳܟ ܘܕܰܫܪܰܝܬ ܗܳܫܳܐ ܒܓܰܘ ܢܰܟ̈ܦܳܬܳܐ ܗܳܐ ܡܶܬܥܰܫܩܳܢ ܐܰܝܟ ܒܰܛܢ̈ܳܬܳܐ [ܥܫܰܩܘ ܠܰܕܒܰܛܢܳܐ ܘܠܰܕܠܳܐ] ܒܰܛܢܳܐ ܓܽܘܢܚܳܐ [ܪܰܒܳܐ] 10 [ܫܽܘܪܳܟ] ܢܳܛܰܪ ܠܰܡܟܺܝܪ̈ܳܬܳܟ ܐܰܝܟ ܕܠܶܐܡܳܟ [ܘܐܶܢ] ܓܰܢܳܒܰܐ ܗ̱ܘ ܕܐܶܬܳܐ ܠܡܶܓܢܰܒ ܒܳܟ [ܢܶܬܒܰܛܰܠ] ܐܳܦ ܢܶܬܛܰܠܰܩ ܘܐܶܢ ܥܳܫܽܘܩܰܐ ܗ̱ܘ ܕܐܶܬܳܐ ܠܡܶܥܫܰܩ ܒܳܟ ܢܶܫܬܰܬܰܩ 11 ܠܳܟ ܬܶܫܒܽܘܚܬܳܐ [ܡܕܰܟܶܐ] ܠܥܳܢܶܗ ܐܰܝܟ ܕܠܶܐܡܶܗ ܘܰܠܢܰܟ̈ܦܳܬܶܗ ܐܰܝܟ ܝܳܠܶܕܬܶܗ ܘܠܐܰܡ̈ܗܳܬܶܗ ܐܰܝܟ ܡܰܝܢܰܩܬܶܗ ܡܶܢܗܶܝܢ ܘܡܶܢܳܗܿ ܐܳܦ ܡܶܢ ܟܽܘܠܰܢ ܫܽܘܒܚܳܐ ܠܰܫܡܳܟ