Ephrem the Syrian. “Nativity 15.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/563. ܒܰܪ ܩܳܠܶܗ 1 ܒܳܟ ܐܶܫܪܶܐ ܘܰܬܟܺܝܠܳܐ ܐ̱ܢܳܐ ܕܒܳܟ ܐܶܫܠܰܡ ܐܶܢܳܐ ܐܶܦܬܰܚ ܦܽܘܡܝ ܘܐܰܢܬ ܡܠܺܝ ܦܽܘܡܝ ܐܶܢܳܐ ܠܳܟ ܐܰܪܥܳܐ ܘܐܰܢܬ ܐܰܟܳܪܳܐ ܙܪܽܘܥ ܒܺܝ ܩܳܠܳܟ ܙܳܪܰܥ ܢܰܦܫܶܗ ܒܟܰܪܣܳܐ ܕܐܶܡܝ ܥܽܘܢܺܝܬܳܐ : ܫܽܘܒܚܳܐ ܠܳܟ ܡܳܪܝ ܘܒܐܺܝܕܳܟ ܠܐܰܒܽܘܟ ܒܝܽܘܡ ܡܰܘܠܳܕܳܟ 2 ܒܺܝ ܬܰܗܺܝܪ̈ܳܢ ܟܽܠ ܢܰܟ̈ܦܳܬܳܐ ܒܢ̈ܳܬ ܥܶܒܪ̈ܳܝܶܐ ܘܰܒܬܽܘ̈ܠܳܬܳܐ ܒܢ̈ܳܬ ܪ̈ܺܫܳܢܶܐ ܒܳܟ ܗܽܘ ܚܣܺܝܡܳܐ ܒܰܪܬ ܡܶܣܟܺܢ̈ܶܐ ܒܳܟ ܗܽܘ ܛܰܢܺܝܢܳܐ ܒܰܪܬ ܚ̈ܰܠܳܫܶܐ ܡܰܢ ܝܰܗܒܳܟ ܠܺܝ 3 ܒܰܪ ܥܰܬܺܝܪܳܐ ܕܰܣܢܳܐ ܥܽܘܒܳܐ ܕܥܰܬܺܝܪ̈ܳܬܳܐ ܡܰܢܽܘ ܢܰܓܕܳܟ ܨܶܝܕ ܡܶܣ̈ܟܺܢܶܐ ܕܝܰܘܣܶܦ ܣܢܺܝܩ ܘܐܶܢܳܐ ܨܪܺܝܟܳܐ ܛܥܶܢܘ ܬܶܓܳܪ̈ܰܝܟ ܘܐܰܝܬܺܝܘ ܕܰܗܒܳܐ ܠܒܶܝܬ ܡܶܣܟܺܢ̈ܶܐ 4 ܚܙܳܬ ܡܓܽܘܫ̈ܶܐ ܣܓܺܝ̈ ܩܺܝ̈ܢܳܬܳܗܿ ܒܩܽܘܪ̈ܒܳܢܰܝܗܽܘܢ ܕܗܳܐ ܣܳܓܽܘ̈ܕܰܝܟ ܚܕܺܝܪ̈ܺܝܢ ܠܺܝ ܐܳܦ ܩܽܘܪ̈ܒܳܢܰܝܟ ܟܪ̈ܺܝܟܺܝܢ ܠܺܝ ܒܪܺܝܟ ܗܽܘ ܥܽܘܠܳܐ ܕܥܰܒܕܳܗܿ ܠܐܶܡܶܗ ܟܶܢܳܪ ܩܳܠܰܘ̈ܗܝ 5 ܘܰܕܟܶܢܳܪܳܐ ܠܡܳܪܶܗ ܚܳܐܰܪ ܠܳܟ ܚܳܐܰܪ ܦܽܘܡܝ ܢܕܺܝܠ ܨܶܒܝܳܢܳܟ ܠܶܫܳܢ ܐܶܡܳܟ ܘܰܕܝܶܠܦܶܬ ܒܳܟ ܒܰܛܢܳܐ ܚܰܕܬܳܐ ܢܺܐܠܰܦ ܒܳܟ ܦܽܘܡܝ ܝܰܠܕܳܐ ܚܰܕܬܳܐ ܕܫܽܘܒܚܳܐ ܚܰܕܬܳܐ 6 ܘܐܶܢ ܥ̈ܛܠܳܬܳܐ ܠܳܟ ܠܳܐ ܥ̈ܛܠܳܢ ܕܰܦܫ̈ܺܝܩܳܢ ܐܶܢܶܝܢ ܕܒܰܛܢܳܟ ܥܽܘܒܳܐ ܕܠܳܐ ܙܽܘܘܳܓܳܐ ܘܰܕܠܳܐ ܙܰܪܥܳܐ ܟܰܪܣܳܐ ܝܺܠܶܕܬܳܟ ܦܫܺܝܩ ܗܽܘ ܠܦܽܘܡܳܐ ܕܢܰܦܪܶܐ ܘܢܰܣܓܶܐ ܫܽܘܒܚܳܟ ܪܰܒܳܐ 7 ܗܳܐ ܥܫܺܝܩܳܐ ܐܢܳܐ ܘܰܛܠܺܝܡܳܐ ܐܢܳܐ ܘܰܦܨܺܝܚܳܐ ܐܢܳܐ ܡܠܶܝܢ ܐܶܕܢܰܝ̈ ܚܶܣܕܳܐ ܘܒܶܙܚܳܐ ܘܰܙܥܽܘܪ ܗܽܘ ܠܺܝ ܟܡܳܐ ܕܐܶܣܰܝܒܰܪ ܕܪ̈ܶܒܽܘ ܥܳܩ̈ܳܢ ܡܶܫܟܰܚ ܪ̈ܕܰܦ ܚܰܕ ܒܽܘܝܳܐܳܟ 8 ܘܰܕܡܶܢܳܟ ܒܶܪܝ ܠܳܐ ܒܣܺܝܪܳܐ ܐܢܳܐ ܐܰܦܰܝ̈ ܓܠܶܝܢ ܘܕܰܥܫܺܝܩܳܐ ܐܢܳܐ ܒܶܛܢܶܬ ܝܶܠܕܶܬ ܕܶܝܢ ܩܽܘܫܬܳܐ ܕܰܡܙܰܟܶܐ ܠܺܝ ܕܐܶܢܗܽܘ ܕܬܳܡܳܪ ܙܟܳܬ ܒܝܗܽܘܕܳܐ ܟܡܳܐ ܐܶܙܟܶܐ ܒܳܟ 9 ܕܰܘܺܝܕ ܐܰܒܽܘܟ ܙܡܺܝܪܬܳܐ ܙܡܰܪ ܠܳܟ ܥܰܕܠܳܐ ܬܺܐܬܶܐ ܕܠܳܟ ܢܶܬܩܰܪܰܒ ܕܰܗܒܳܐ ܕܰܫܒܳܐ ܙܡܺܝܪܬܳܐ ܕܰܙܡܰܪ ܥܰܪܛܶܠܐܝܺܬ ܗܳܐ ܒܰܥܒܳܕܳܐ ܟܫܝܳܐ ܩܕܳܡܰܝܟ ܡܽܘܪܳܐ ܘܕܰܗܒܳܐ 10 ܘܡܳܐܐ ܘܰܚܡܫܺܝܢ ܙܡܺܝܪ̈ܳܢ ܕܙܰܡܰܪ ܒܳܟ ܐܶܬܡܰܕܰܟ ܕܰܣܢܺܝܩܺܝܢ ܐܶܢܽܘܢ ܟܽܠ ܦܶܬܓܳܡ̈ܶܐ ܕܰܢܒܺܝܽܘܬܳܐ ܥܰܠ ܒܽܘܣܳܡܳܟ ܕܰܕܠܳܐ ܡܶܠܚܳܟ ܥܰܠ ܒܽܘܣܳܡܳܟ ܕܰܕܠܳܐ ܡܶܠܚܳܟ ܦܰܟܺܝ̈ܗܳܢ ܐܶܢܶܝܢ ܟܽܘܠ ܚܶܟ̈ܡܳܬܳܐ