Ephrem the Syrian. “Nativity 17.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/565. ܒܰܪ ܩܳܠܶܗ 1 ܛܰܥܢܰܢܝ ܥܽܘܠܳܐ ܕܰܛܥܺܝܢܳܐ ܐܢܳܐ ܐܶܡܪܰܬ ܡܰܪܝܰܡ ܘܐܰܪܟܶܢ ܟܶܢܦܰܘ̈ܗܝ ܘܰܫܩܰܠ ܣܳܡܰܢܝ ܒܰܝܢܳܬ ܓܶܦܰܘ̈ܗܝ ܘܰܓܕܰܠ ܒܳܐܰܐܪ ܘܐܶܫܬܰܘܕܺܝ ܠܺܝ ܕܪܰܘܡܳܐ ܘܥܽܘܡܩܳܐ ܕܰܒܪܶܟܝ ܢܶܗܽܘܘܢ ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܒܰܪ ܒܳܪܽܘܝܳܐ ܕܰܠܟܽܠ ܡܰܚܶܒ 2 ܚܙܺܝܬ ܓܰܒܪܺܝܐܶܝܠ ܕܰܩܪܳܝܗܝ ܡܳܪܳܐ ܘܰܠܪܰܒ ܟܽܘܡܪ̈ܶܐ ܥܰܒܕܳܐ ܣܳܒܳܐ ܕܙܰܝܰܚ ܛܰܥܢܶܗ ܚܙܺܝܬ ܠܰܡܓܽܘ̈ܫܶܐ ܟܰܕ ܡܶܬܟܦܶܝܢ ܘܰܠܗܶܪܽܘܕܶܣ ܟܰܕ ܡܶܬܒܰܠܗܶܐ ܕܐܶܬܳܐ ܡܰܠܟܳܐ 3 ܐܳܦ ܣܛܳܢܳܐ ܕܚܳܢܶܩ ܫܰܒܪ̈ܶܐ ܕܢܺܐܒܰܕ ܡܽܘܫܶܐ ܩܳܛܶܠ ܫܰܒܪ̈ܶܐ ܕܰܢܡܽܘܬ ܚܰܝܳܐ ܠܡܶܨܪܶܝܢ ܐܶܥܪܽܘܩ ܕܐܶܬܳܐ ܠܺܝܗܽܘܕ ܕܢܶܠܐܶܐ ܘܢܶܦܗܶܐ ܕܰܠܨܰܝܳܕܶܗ ܒܳܥܶܐ ܕܰܢܨܽܘܕ 4 ܒܰܒܬܽܘܠܽܘܬܳܗܿ ܛܰܪ̈ܦܶܐ ܕܒܶܙܚܳܐ ܠܶܒܫܰܬ ܚܰܘܳܐ ܐܶܡܳܟ ܠܶܒܫܰܬ ܒܰܒܬܽܘܠܽܘܬܳܗܿ ܢܰܚܬܳܐ ܕܫܽܘܒܚܳܐ ܕܰܠܟܽܠ ܣܳܦܶܩ ܦܪܺܝܣܳܐ ܙܥܽܘܪܳܐ ܕܦܰܓܪܳܐ ܝܰܗܒܬ ܠܰܡܟܰܣܶܐ ܟܽܠ 5 ܛܽܘܒܶܝܗܿ ܠܐܺܝܕܳܐ ܕܐܰܢܬ ܒܠܶܒܳܗܿ ܘܰܒܪܶܥܝܳܢܳܗܿ ܒܺܝܪܰܬ ܡܰܠܟܳܐ ܗܺܝ ܒܳܟ ܒܰܪ ܡܰܠܟܳܐ ܘܰܩܕܽܘܫ ܩܽܘ̈ܕܫܶܐ ܠܳܟ ܪܰܒ ܟܽܘܡܪ̈ܶܐ ܠܳܐ ܨܶܦܬܳܐ ܠܳܗܿ ܐܳܦ ܠܳܐ ܬܥܳܫܳܐ ܕܒܰܝܬܳܐ ܘܓܰܒܪܳܐ 6 ܗܘܳܬ ܬܽܘܒ ܚܰܘܳܐ ܢܶܩܥܶܐ ܘܩܰܒܪܳܐ ܠܚܶܘܝܳܐ ܠܺܝܛܳܐ ܕܥܰܠ ܘܰܥܡܰܪ ܒܳܗܿ ܡܶܠܟܶܗ ܒܺܝܫܳܐ ܗܘܳܬ ܠܶܗ ܠܰܚܡܳܐ ܕܰܗܘܳܬ ܥܰܦܪܳܐ ܐܰܢܬ ܗܽܘ ܠܰܚܡܰܢ ܘܐܰܢܬ ܗܽܘ [ܓܢܽܘܢܰܢ] ܘܐܶܣܛܰܠ ܫܽܘܒܚܰܢ 7 ܕܐܺܝܬ ܠܳܗܿ ܩܽܘܕܫܳܐ ܐܶܢ ܩܰܢܺܝܛܳܐ ܗܳܐ ܢܳܛܽܘܪܶܗ ܕܐܺܝܬ ܠܳܗܿ ܥܽܘܠܳܐ ܗܳܐ ܫܰܒܽܘܩܶܗ ܕܐܺܝܬ ܠܳܗܿ ܫܺܐܕܳܐ ܗܳܐ ܪܳܕܽܘܦܶܗ ܘܰܕܟܺܐܒܰܝ̈ܗܽܘܢ ܗܳܐ ܥܳܨܽܘܒܳܐ ܠܰܬܒܳܪ̈ܰܝܗܽܘܢ 8 ܕܐܺܝܬ ܠܳܗܿ ܝܰܠܕܳܐ ܢܺܐܬܶܐ ܢܶܗܘܶܐ ܐܰܚܳܐ ܠܰܪܚܽܘܡܝ ܕܐܺܝܬ ܠܳܗܿ ܒܰܪܬܳܐ ܐܳܘ ܒܰܪܬ ܛܽܘܗܡܳܐ ܬܺܐܬܳܐ ܬܶܗܘܶܐ ܡܟܺܝܪܰܬ ܝܰܩܺܝܪܝ ܘܕܐܺܝܬ ܠܶܗ ܥܰܒܕܳܐ ܢܶܫܪܶܝܘܗܝ ܢܺܐܬܶܐ ܢܶܦܠܽܘܚ ܡܳܪܶܗ 9 ܒܰܪ ܚܺܐܪ̈ܶܐ ܒܶܪܝ ܕܰܫܩܰܠ ܢܺܝܪܳܟ ܚܰܕ ܗܽܘ ܐܰܓܪܶܗ ܘܥܰܒܕܳܐ ܕܰܛܥܶܢ ܙܰܘܓܳܐ ܕܢܺܝܪ̈ܶܐ ܕܰܬܪ̈ܶܝܢ ܡܳܪ̈ܺܝܢ ܕܰܠܥܶܠ ܘܕܰܠܬܰܚܬ ܬܪ̈ܶܝܢ ܠܶܗ ܛܽܘܒ̈ܺܝܢ ܘܰܬܪ̈ܶܝܢ ܐܰܓܪ̈ܺܝܢ ܕܰܬܪ̈ܶܝܢ ܝܽܘܩܪ̈ܺܝܢ 10 ܒܰܪܬ ܚܺܐܪ̈ܶܐ ܒܶܪܝ ܐܰܡܬܳܟ ܗܺܝ ܬܽܘܒ ܐܶܢ ܠܳܟ ܬܶܦܠܽܘܚ ܘܰܡܫܰܥܒܰܕܬܳܐ ܒܳܟ ܒܰܪܬ ܚܺܐܪ̈ܶܐ ܗܺܝ ܒܳܟ ܬܶܬܒܰܝܰܐ ܕܰܡܚܰܪܰܪܬܳܐ ܗ̱ܝ ܚܪ̈ܽܘܪܶܐ ܟܣܰܝ̈ܳܐ ܒܥܽܘܒܳܗܿ ܣܺܝܡܺܝܢ ܐܶܢ [ܠܳܟ] ܬܶܪܚܰܡ 11 ܐܳܘ ܢܰܟ̈ܦܳܬܳܐ ܣܘܰܚ ܠܶܗ ܠܰܪܚܽܘܡܝ ܕܰܒܟܶܝܢ ܢܶܫܪܶܐ ܘܐܳܦ ܛܰܡ̈ܐܳܬܳܐ ܕܰܢܩܰܕܰܫܟܶܝܢ ܐܳܦ ܥܺܕ̈ܬܐ ܕܰܢܨܰܒܬܟܶܝܢ ܒܰܪ ܒܳܪܽܘܝܰܐ ܗ̱ܘ ܕܐܶܬܳܐ ܕܢܶܒܕܽܘܩ ܟܽܠ ܒܶܪ̈ܝܳܬܳܐ 12 [ܫܡܰܝܳܐ] ܚܕܶܬ ܕܰܣܓܶܕܘ ܣ̈ܰܟܠܶܐ [ܠܟܽܠ] ܢܰܗܺܝܪ̈ܶܐ ܚܰܕܶܬ ܠܐܰܪܥܳܐ ܕܒܶܠܝܰܬ ܒܐܳܕܳܡ ܓܒܺܝܠܬܳܐ ܚܰܕܬܳܐ ܗܘܳܬ ܒܳܪܽܘܩܶܗ ܘܕܰܠܟܽܠ ܣܳܦܶܩ ܬܳܪܶܨ ܦܰܓܪ̈ܶܐ ܥܰܡ ܪ̈ܶܥܝܳܢܶܐ 13 ܬܰܘ ܣܡܰܝ̈ܳܐ ܘܰܕܠܳܐ ܟܶܣܦܳܐ ܣܰܒܘ ܢܰܗܺܝܪ̈ܶܐ ܬܰܘ ܚܓܺܝܪ̈ܳܬܳܐ ܣܰܒܘ ܪ̈ܶܓܠܰܝܟܽܘܢ ܕܽܘ̈ܓܶܐ ܘܚܰܪ̈ܫܶܐ ܣܰܒܘ ܩܳܠܰܝ̈ܟܽܘܢ ܘܕܐܺܝܕܶܗ ܦܫܺܝܓܳܐ ܦܫܺܝ̈ܓܶܐ ܢܶܣܒܽܘܢ ܐܳܦ ܐܺܝܕܰܝ̈ܗܽܘܢ 14 ܒܰܪ ܒܳܪܽܘܝܰܐ ܗ̱ܘ ܕܰܡܠܶܝܢ ܓܰܙܰܘܗ̈ܝ ܟܽܠ ܥܽܘܕܪ̈ܳܢܺܝܢ ܠܐܰܝܢܳܐ ܕܰܣܢܺܝܩ ܡܶܢ ܒܳܒ̈ܳܬܳܐ ܢܺܐܬܶܐ ܨܶܐܕܰܘܗܝ ܛܺܝܢܳܐ ܥܳܒܶܕ ܘܰܡܫܰܚܠܶܦ ܠܶܗ ܒܶܣܪܳܐ ܥܳܒܶܕ ܥܰܝ̈ܢܶܐ ܡܰܢܗܰܪ 15 ܒܛܺܝܢܳܐ ܙܥܽܘܪܳܐ ܚܰܘܺܝ ܕܒܐܺܝܕܶܗ ܓܒܺܝܠ ܕܰܚܺܝܚܳܢ ܢܰܦܫܳܐ ܕܡܺܝܬܳܐ ܬܽܘܒ ܣܶܗܕܶܬ ܠܶܗ ܕܒܶܗ ܗܽܘ ܢܦܺܝܚܳܐ ܢܶܫܡܰܬ ܐܢܳܫܳܐ ܒܣܳܗ̈ܕܶܐ ܐܚܪ̈ܳܝܶܐ ܐܶܬܗܰܝܡܰܢ ܠܶܗ ܕܒܰܪ ܩܰܕܡܳܝܰܐ ܗ̱ܘ 16 ܟܢܽܘܫܘ ܬܰܘ ܓܰܪ̈ܒܶܐ ܘܰܕܠܳܐ ܥܰܡܠܳܐ ܣܰܒܘ ܕܽܘܟܳܝܳܐ ܠܳܐ ܓܶܝܪ ܣܢܺܝܩ ܐܰܝܟ ܐܶܠܺܝܫܰܥ ܕܰܫܒܰܥ ܙܰܒܢܺܝ̈ܢ ܒܢܰܗܪܳܐ ܢܶܥܡܰܕ ܠܳܐ ܬܽܘܒ ܡܰܠܶܐܐ ܕܰܠܐܺܝܘ ܟܳܗ̈ܢܶܐ ܒܰܪ̈ܣܺܝܣܰܝܗܽܘܢ 17 ܫܒܰܥ [ܕܐܶܠܺܝܫܰܥ] ܒܪܳܙܳܐ ܕܰܟܺܝ [ܕܰܫܒܰܥ ܪ̈ܽܘܚܺܝܢ ܘܙܽܘܦܳܐ ܘܰܕܡܳܐ ܛܽܘܦܣܰܐ ܗ̱ܘ] ܪܰܒܳܐ ܠܳܐ ܐܺܝܬ ܐܰܬܪܳܐ ܠܢܽܘܟܪܳܝܽܘܬܳܐ ܠܳܐ ܡܶܬܢܰܟܪܳܐ ܒܰܪ ܡܳܪܶܐ ܟܽܠ ܡܶܢ ܡܳܪܶܐ ܟܽܠ 18 ܐܶܢ ܓܶܝܪ ܟܺܐܢܳܐ ܐܰܓܪܶܒ ܦܰܓܪܳܐ ܘܐܰܢܬ ܡܕܰܟܶܐ ܓܳܒܶܠ ܦܰܓܪܳܐ ܣܢܳܝܗܝ ܠܦܰܓܪܳܐ ܘܐܰܢܬ ܪܚܶܡܬܳܝܗܝ ܐܶܠܳܐ ܓܒܰܠܬܳܝܗܝ ܚܽܘܒ̈ܠܶܐ ܕܐܰܪܡܺܝܬ ܥܠܰܘܗܝ ܩܳܥܶܝܢ ܕܒܰܪ ܒܳܪܽܘܝܳܐ ܐܰܢܬ