Ephrem the Syrian. “Nativity 19.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/567. ܕܰܬܪܶܥܣܰܪ̈ ܒܰܪ ܩܳܠܶܗ 1 ܚܳܒܘ ܥܽܘܙܺܝܳܐ ܘܝܽܘܬܳܡ ܘܐܳܚܳܙ ܒܰܩܪ̈ܳܒܰܝܗܽܘܢ ܚܠܳܦ ܓܳܠܽܘܬܳܐ ܕܢܶܚܬܰܬ ܠܐܳܬܽܘܪ ܡܓܽܘ̈ܫܶܐ ܐܶܬܰܘ ܠܰܢ ܒܰܫܺܝܪ̈ܳܬܳܐ ܦܳܚ ܒܫܽܘ̈ܩܰܝܢ ܪܺܝܚܳܐ ܛܳܒܳܐ ܕܒܶܣ̈ܡܳܢܰܝܗܽܘܢ ܥܽܘܢܺܝܬܳܐ : ܠܳܟ ܬܶܫܒܽܘܚܬܳܐ ܒܰܪ ܡܳܪܶܐ ܟܽܠ ܕܰܠܟܽܠ ܡܰܚܶܐ 2 ܕܒܰܪ ܚܰܢܳܢܳܐ ܐܰܢܬ ܚܰܢܬ ܐܶܢܽܘܢ ܒܰܣܺܝܡܽܘܬܳܟ ܕܒܰܪ ܛܰܢܳܢܳܐ ܐܰܢܬ ܬܶܒܥܰܬ ܐܶܢܽܘܢ ܥܙܺܝܙܽܘܬܳܟ ܕܒܰܪ ܥܰܬܺܝܪܳܐ ܐܰܢܬ ܐܰܝܟ ܪܶܚܡܰܬܗܽܘܢ ܦܪܰܥܘ ܚܽܘ̈ܒܠܰܝܗܽܘܢ ܒܩܽܘܪ̈ܒܳܢܰܝܗܽܘܢ 3 ܡܶܙܓܰܬ ܐܶܢܶܝܢ ܕܠܳܐ ܠܰܢ ܬܰܟܪܺܝ ܘܰܠܗܽܘܢ ܬܺܚܶܐ ܕܰܫܒܰܘ ܟܶܣܦܰܢ ܐܰܝܬܺܝܘ ܕܰܗܒܳܐ ܕܡܰܚܺܝܘ ܓܽܘܫܡܰܢ ܐܰܝܬܺܝܘ ܡܽܘܪܳܐ ܕܐܰܘܩܶܕܘ ܩܽܘܕܫܰܢ ܠܒܽܘܢܬܳܐ ܩܰܪܺܒܘ ܠܐܰܠܳܗܽܘܬܳܟ 4 ܡܽܘܪܗܽܘܢ ܒܳܥܶܐ ܥܰܠ ܣܰܝ̈ܦܰܝܗܽܘܢ ܕܰܒܗܽܘܢ ܩܛܰܠܽܘܢ ܕܰܗܒܗܽܘܢ ܒܳܥܶܐ ܥܰܠ ܣܺܝ̈ܡܳܬܰܢ ܕܒܰܙܘ ܗܘܰܘ ܓ̈ܰܙܶܐ ܕܒܶܝܬ ܚܶܙܰܩܝܳܐ ܠܒܽܘܢܬܗܽܘܢ ܡܪܰܥܝܳܐ ܠܐܰܠܳܗܽܘܬܳܟ ܕܐܰܪܓܶܙܘ ܠܐܰܒܽܘܟ 5 ܕܰܫܠܰܚ ܐܳܚܳܙ ܠܐܳܬܽܘܪܳܝܳܐ ܕܣܰܩ ܘܰܦܪܽܘܩܰܝܢܝ ܕܐܶܫܬܰܦܰܠܘ ܗܘܰܘ ܒܳܟ ܐܶܬܪܰܡܪܰܡܘ ܠܘܳܬܳܟ ܐܶܬܰܘ ܒܰܗܡܺܝܪ̈ܰܝܗܽܘܢ ܚܠܳܦ ܝܽܘܟܳܢܝܳܐ ܗܡܰܝܪܳܐ ܕܰܫܒܰܘ ܡܶܢ ܒܶܝܬ ܕܰܘܺܝܕ 6 ܕܒܺܐܝ̈ܙܓܰܕܰܘܗܝ ܫܰܥܒܶܕ ܐܳܚܳܙ ܢܰܦܫܶܗ ܠܐܳܬܽܘܪ ܒܳܟ ܐܶܫܬܰܥܒܰܕܘ ܒܐܺܝܙ̈ܓܰܕܰܝܗܽܘܢ ܕܰܣܓܶܕ ܫܰܒܛܶܗ ܕܓܽܘܪܝܳܐ ܕܐܰܪܝܳܐ ܠܳܟ ܗܽܘ ܣܓܺܝܕܳܐ ܣܓܶܕܘ ܥܰܙܺܝ̈ܙܶܐ ܕܡܶܣܬܰܓܕܺܝܢ ܗܘܰܘ 7 ܕܰܣܥܰܘ ܘܰܣܠܶܩܘ ܐܳܪܳܡ ܘܐܰܦܪܶܝܡ ܕܶܚܠܰܬ ܨܶܗܝܽܘܢ ܕܠܳܐ ܬܰܪܡܶܠ ܠܳܗܿ ܡܶܢ ܒܶܝܬ ܕܰܘܺܝܕ ܕܰܫܒܰܩ ܐܳܚܳܙ ܘܰܥܪܰܩ ܘܰܢܦܰܩ ܗܽܘ ܐܶܫܰܥܝܳܐ ܣܒܰܪܬܳܟ ܝܰܗܒ ܠܳܗܿ ܕܥܰܡܰܢ ܗܽܘ ܐܺܝܠ 8 ܗܳܐ ܒܬܽܘܠܬܳܐ ܠܰܡ ܬܶܒܛܰܢ ܬܺܐܠܰܕ ܕܠܳܐ ܙܽܘܘܳܓܳܐ ܚܶܠܡܰܐ ܗ̱ܘ ܠܺܝ ܟܰܝ ܐܳܘ ܥܠܽܘܠܳܐ ܕܗܳܐ ܥܰܠ ܒܽܘܪ̈ܟܰܝ ܥܰܡܰܢܽܘܐܶܝܠ ܐܰܒܛܶܠ ܡܶܢ ܟܽܠ ܘܰܠܡܳܪܶܐ ܟܽܠ ܐܰܘܕܳܐ ܒܟܽܘܠ ܝܽܘܡ 9 ܘܕܰܒܬܽܘ̈ܠܘܳܬܳܐ ܒܨܶܗܝܽܘܢ ܨܰܥܰܪܘ ܠܐܶܡܳܟ ܝܰܩܰܪܘ ܝܰܠܕܳܐ ܒܬܽܘܠܳܐ ܕܰܠܒܶܫ ܐܶܢܽܘܢ ܒܬܽܘ̈ܠܶܐ ܕܐܶܡܶܗ ܘܰܢܦܰܩ ܥܰܡܶܗ ܐܰܢܬ ܠܺܝ ܝܰܠܕܳܐ ܡܟܺܝܪܳܐ ܘܰܒܪܳܐ ܐܳܦ ܐܰܠܳܗܳܐ 10 ܐܳܦ ܒܳܒܠܳܝ̈ܶܐ ܣܠܶܩܘ ܗܘܰܘ ܫܰܩܶܦܘ ܫܰܒܪ̈ܶܐ ܒܺܝܗܽܘܕ ܒܳܟ ܝ̈ܰܠܽܘܕܶܐ ܐܶܫܬܰܝܰܢܘ ܗܘܰܘ ܕܒܳܟ ܣܳܪ̈ܽܘܚܶܐ ܗܘܰܘ ܣܳܓܽܘ̈ܕܶܐ ܕܨܰܥܰܪܘ ܣܳܒ̈ܶܐ ܝܰܩܰܪ ܛܰܠܝܳܐ ܕܡܶܢ ܟܽܠ ܩܰܫܺܝܫ 11 ܫܰܕܪܰܬ ܒܳܒܶܠ ܐܳܦ ܩܽܘܪ̈ܒܳܢܶܐ ܠܗܰܘ ܚܶܙܰܩܝܳܐ ܬܡܰܗܘ ܐܺܝ̈ܙܓܰܕܶܐ ܕܰܚܙܰܘ ܓܰܙ̈ܰܘܗܝ ܡܳܢܳܐ ܚܰܘܺܝܬ ܐܰܢܬ ܠܰܡܓܽܘܫ̈ܶܐ ܬܶܗܪܳܐ ܚܰܘܺܝܬ ܕܰܣܓܶܕܘ ܗܘܰܘ ܠܳܟ ܟܰܕ ܡܶܣܟܺܝܢ ܐܰܢܬ 12 ܐܳܦܶܢ ܪܰܒ ܗܘܳܐ ܗܰܝܟܰܠ ܫܶܢܳܐ ܕܰܡ̈ܠܰܟܝ ܥܰܡܰܢ ܪܰܒ ܗܽܘ ܡܶܢܶܗ ܘܰܦܐܶܐ ܡܶܢܶܗ ܓܦܺܝܦܳܐ ܙܥܽܘܪܳܐ ܕܒܶܗ ܐܺܝܠܶܕܬܳܟ ܒܓܰܘ ܥܰܙܪܽܘܪ̈ܶܐ ܚܙܰܘ ܬܶܫܒܽܘܚܬܳܟ ܪ̈ܳܥܰܘܳܬܳܐ 13 ܟܝܳܢܳܐ ܙܥܽܘܪܳܐ ܐܶܢ ܣܳܡ ܬܳܓܳܐ ܒܬܳܓܳܐ ܝܺܪܶܒ ܟܝܳܢܳܟ ܪܰܒ ܗܽܘ ܒܰܪ ܡܶܣ̈ܟܺܢܶܐ ܘܒܳܟ ܗܽܘ ܝܳܪܶܒ ܡܶܕܶܡ ܕܰܙܥܽܘܪ ܘܐܶܢ ܐܢܳܫ ܟܰܘ̈ܒܶܐ ܢܣܺܝܡ ܒܪܺܫܳܟ ܐܰܝܟ ܬܳܓܳܐ ܐܶܢܽܘܢ 14 ܓܽܘܫܡܳܐ ܫܺܝܛܰܐ ܗ̱ܘ ܡܶܨܛܰܒܰܬ ܡܶܢ ܒܶܪ̈ܽܘܠܶܐ ܒܳܟ ܝܰܩܺܝܪܳܐ ܐܳܦ ܫܺܝ̈ܛܳܬܳܐ ܗܘܺܝ ܦܰܐܝ̈ܳܬܳܐ ܕܢܰܩܦܳܟ ܪܰܒ ܗܽܘ ܕܐܳܦܶܢ ܟܺܐܦܳܐ ܐܢܳܫ ܢܶܫܕܶܐ ܒܳܟ ܡܰܪܓܳܢܺܝܬܳܐ ܗ̱ܝ 15 ܘܐܳܦ ܗܺܝ ܕܽܘܥܬܳܟ ܠܐܰܝܢܳܐ ܕܰܫܘܳܐ ܡܰܥܡܽܘܕܺܝܬܳܐ ܗ̱ܝ ܘܰܚܠܶܐ ܕܢܰܚ̈ܬܰܝܟ ܠܐܰܝܢܳܐ ܕܰܟܪܺܝܗ ܢܶܒܥܶܐ ܗܽܘ ܪܰܒܳܐ ܕܟܽܘܠ ܥܽܘܕܪ̈ܳܢܺܝܢ ܘܐܳܦܶܢ ܪܽܘܩܳܟ ܢܶܡܛܶܐ ܠܐܰܦ̈ܶܐ ܡܰܢܗܰܪ ܥܰܝ̈ܢܶܐ ܗܽܘ 16 ܐܶܢ ܥܰܠ ܟܺܐܦܳܐ ܬܶܣܡܽܘܟ ܪܺܫܳܟ ܦܠܰܓܘ ܚܰܛܦܽܘܗܿ ܘܐܶܢ ܗܽܘ ܕܬܶܕܡܰܟ ܥܰܠ ܩܺܩܰܠܬܳܐ ܗܘܳܬ ܠܳܗܿ ܥܺܕܬܳܐ ܠܰܨ̈ܠܰܘܳܬܳܐ ܘܐܶܢ ܬܶܩܨܶܐ ܬܽܘܒ ܠܰܚܡܳܐ ܫܚܺܝܡܳܐ ܠܰܢ ܣܰܡ ܚ̈ܰܝܰܐ ܗ̱ܘ 17 ܡܰܢܽܘ ܢܨܰܚܶܝܟ ܕܐܳܦ ܨܽܘܚܺܝܬܳܟ ܒܽܘܪܟܰܬ ܥܰܡ̈ܡܶܐ ܗܺܝ ܡܰܢܽܘ ܢܡܺܝܬܳܟ ܕܐܳܦ ܡܺܝܬܽܘܬܳܟ ܡܶܠܰܬ ܚ̈ܰܝܶܐ ܗܺܝ ܠܰܒ̈ܢܰܝ ܐܢܳܫܳܐ ܘܐܳܦܶܢ ܩܰܝܣܳܐ ܬܶܣܰܩ ܬܶܪܟܰܒ ܐܶܡܰܪ ܦܶܨܚܳܐ ܐܰܢܬ 18 ܕܪܰܒ ܗܽܘ ܛܽܘܪܳܟ ܡܶܢ ܝܳܠܶܕܬܳܟ ܐܶܬܶܒ ܐܶܢܽܘܚ ܗܘܺܝ ܠܺܝ ܠܡܺܐܢܳܐ ܘܐܶܬܓܰܘܰܣ ܒܳܟ ܟܝܳܢܳܐ ܪܰܒܳܐ ܕܠܳܐ ܡܶܬܬܰܪܓܰܡ ܐܰܦܶܣ ܠܐܶܡܳܟ ܕܬܶܫܬܽܘܩ ܡܶܢܳܟ ܕܰܠܐܺܝ ܦܽܘܡܳܗܿ 19 ܟܠܺܝ ܡܰܘܗܰܒܬܳܟ ܡܶܢ ܟܶܢܳܪܳܟ ܕܰܢܢܽܘܚ ܩܰܠܺܝܠ ܕܐܰܢܬ ܐܰܠܶܦܬܳܢܝ ܟܽܘܠ ܡܳܐ ܕܐܶܡܪܶܬ ܐܰܢܬ ܐܰܠܶܦܰܝܢܝ ܐܰܝܟܰܢ ܐܶܫܬܽܘܩ ܕܐܰܢܬ ܐܰܠܐܺܝܬܳܢܝ ܐܰܢܬ ܐܰܢܺܝܚܰܢܝ ܫܽܘܒܚܳܐ ܠܐܰܒܽܘܟ