Ephrem the Syrian. “Nativity 23.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/571. ܫܽܘܚܠܳܦ ܩܳܠܳܐ ܥܽܘܢܝܳܐ : ܫܽܘܒܚܳܐ ܠܟܽܠܳܟ ܡܶܢ ܟܽܠ ܫܽܘܒܚܳܐ ܠܟܽܠܳܟ ܡܶܢ ܟܽܠ 1 ܡܰܢܽܘ ܟܰܝ ܟܰܕ ܡܳܝܽܘܬܰܐ ܗ̱ܘ ܕܢܶܫܬܰܥܶܐ ܥܰܠ ܡܰܚܶܐ ܟܽܘܠ ܕܰܫܒܰܩ ܪܰܘܡܳܐ ܕܪܰܒܽܘܬܶܗ ܘܐܶܬܬܰܚܬܺܝ ܠܰܙܥܽܘܪܽܘܬܳܐ ܡܰܘܪܶܒ ܟܽܠ ܒܺܝܠܺܝܕܽܘܬܶܗ ܐܰܘܪܶܒ ܪܶܥܝܳܢܝ ܚܰܠܳܫܳܐ ܕܐܶܫܬܰܥܶܐ ܥܰܠ ܡܰܘܠܳܕܳܟ ܠܳܐ ܗܘܳܐ ܕܐܶܒܨܶܐ ܪܰܒܽܘܬܳܟ ܐܶܠܳܐ ܕܐܰܟܪܶܙ ܛܰܝܒܽܘܬܳܟ ܒܪܺܝܟ ܕܰܟܣܶܐ ܘܰܓܠܳܐ ܒܫܰܪ̈ܒܰܘܗܝ 2 ܕܽܘܡܳܪܰܐ ܗ̱ܘ ܪܰܒܳܐ ܕܰܒܪܳܐ ܕܰܫܪܳܐ ܟܽܠܶܗ ܒܓܰܘ ܦܰܓܪܳܐ ܥܡܰܪ ܒܶܗ ܟܽܠܶܗ ܘܣܰܦܶܩ ܠܶܗ ܫܪܳܐ ܒܶܗ ܟܰܕ ܠܳܐ ܐܶܣܬܰܝܰܟ ܨܶܒܝܳܢܶܗ ܟܽܠܶܗ ܒܶܗ ܗܘܳܐ ܟܽܠܶܗ ܣܳܟܶܗ ܠܳܐ ܒܶܗ ܗܘܳܐ ܡܰܢ ܣܳܦܶܩ ܠܰܡܡܰܠܳܠܽܘ ܕܟܰܕ ܟܽܠܶܗ ܒܦܰܓܪܳܐ ܫܪܳܐ ܗܘܳܐ ܬܽܘܒ ܟܽܠܶܗ ܒܟܽܠܳܗܿ ܫܪܳܐ ܗܘܳܐ ܒܪܺܝܟ ܗܽܘ ܕܠܳܐ ܣܳܟ ܕܐܶܣܬܰܝܰܟ 3 ܪܰܒܽܘܬܳܟ ܟܰܣܝܳܐ ܗ̱ܝ ܡܶܢܰܢ ܛܰܝܒܽܘܬܳܟ ܓܰܠܝܳܐ ܩܕܳܡܰܝܢ ܐܶܫܠܶܐ ܡܳܪܝ ܡܶܢ ܪܰܒܽܘܬܳܟ ܘܐܶܡܰܠܶܠ ܥܰܠ ܛܰܝܒܽܘܬܳܟ ܛܰܝܒܽܘܬܳܟ ܐܶܬܬܰܠܝܰܬ ܒܳܟ ܘܐܰܪܟܶܢܬܳܟ ܨܶܝܕ ܒܺܝܫܽܘܬܰܢ ܛܰܝܒܽܘܬܳܟ ܥܽܘܠܳܐ ܥܒܰܕܬܳܟ ܛܰܝܒܽܘܬܳܟ ܐܢܳܫܳܐ ܥܒܰܕܬܳܟ ܩܶܦܣܰܬ ܦܶܫܛܰܬ ܪܰܒܽܘܬܳܟ ܒܪܺܝܟ ܚܰܝܠܳܐ ܕܰܙܥܰܪ ܘܺܝܪܶܒ 4 ܫܽܘܒܚܳܐ ܠܕܰܗܘܳܐ ܬܰܚܬܳܝܳܐ ܟܰܕ ܥܶܠܳܝܰܐ ܗ̱ܘ ܒܰܟܝܳܢܶܗ ܗܘܳܐ ܒܚܽܘܒܶܗ ܒܽܘܟܪܳܐ ܠܡܰܪܝܰܡ ܟܰܕ ܒܽܘܟܪܰܐ ܗ̱ܘ ܕܐܰܠܳܗܽܘܬܳܐ ܗܘܳܐ ܒܰܫܡܳܐ ܝܰܠܕܳܐ ܠܝܰܘܣܶܦ ܟܰܕ ܝܰܠܕܶܗ ܗܽܘ ܕܥܶܠܳܝܳܐ ܗܘܳܐ ܒܨܶܒܝܳܢܶܗ ܒܰܪܢܳܫܳܐ ܟܰܕ ܐܰܠܳܗܰܐ ܗ̱ܘ ܒܰܟܝܳܢܶܗ ܫܒܺܝܚ ܨܶܒܝܳܢܳܟ ܘܰܟܝܳܢܳܟ ܒܪܺܝܟ ܫܽܘܒܚܳܟ ܕܰܠܒܶܫ ܨܰܠܡܰܢ 5 ܐܳܦ ܗܺܝ ܡܳܪܝ ܝܺܠܺܝܕܽܘܬܳܟ ܗܘܳܬ ܠܳܗܿ ܐܶܡܳܐ ܕܒܶܪ̈ܝܳܬܳܐ ܕܡܶܢ ܕܪܺܝܫ ܚܶܒܠܰܬ ܝܺܠܕܬܶܗ ܠܐܢܳܫܽܘܬܳܐ ܗܳܝ ܕܺܝܠܶܕܬܳܟ ܝܺܠܶܕܬܳܟ ܦܰܓܳܪܢܳܐܺܝܬ ܐܰܘܠܶܕܬܳܗܿ ܪܽܘܚܳܢܳܐܺܝܬ ܟܽܠܶܗ ܕܐܶܬܰܝܬ ܠܝܰܠܕܳܐ ܕܬܰܘܠܶܕ ܐܢܳܫܳܐ ܒܰܕܡܽܘܬܳܟ ܗܘܳܐ ܡܰܘܠܳܕܳܟ ܡܰܘܠܶܕ ܟܽܠ ܒܪܺܝܟ ܕܰܛܠܺܝ ܘܰܠܟܽܠ ܛܰܠܺܝ 6 ܕܰܓܪܰܣ ܗܘܳܐ ܣܰܒܪܳܐ ܕܐܢܳܫܳܐ ܣܰܓܺܝ ܗܘܳܐ ܣܰܒܪܳܐ ܒܡܰܘܠܳܕܳܟ ܣܰܒܪܳܐ ܛܳܒܳܐ ܣܰܒܰܪܘ ܗܘܰܘ ܥܶܠܳܝ̈ܶܐ ܠܰܒܢܰܝ̈ܢܳܫܳܐ ܣܛܳܢܳܐ ܕܰܦܣܰܩ ܣܰܒܪܰܢ ܣܰܒܪܶܗ ܒܐܺܝ̈ܕܰܘܗܝ ܦܳܣܶܩ ܗܘܳܐ ܕܰܚܙܳܐ ܕܰܣܓܺܝ ܠܶܗ ܣܰܒܪܳܐ ܗܘܳܐ ܝܰܠܕܳܟ ܠܰܕܠܳܐ ܣܰܒܪܳܐ ܡܰܒܽܘܥܳܐ ܕܓܳܣܶܐ ܣܰܒܪܳܐ ܒܪܺܝܟ ܣܰܒܪܳܐ ܕܐܺܝܬܺܝ ܣܒܰܪܬܳܐ 7 ܝܽܘܡ ܡܰܘܠܳܕܳܟ ܠܳܟ ܕܳܡܶܐ ܕܰܪܓܺܝܓ ܘܰܪܚܺܝܡ ܐܰܟܘܳܬܳܟ ܕܠܳܐ ܚܙܰܝܢܳܗܿ ܠܺܝܠܺܝܕܽܘܬܳܟ ܘܚܰܒܶܒܢܳܗܿ ܐܰܝܟ ܕܰܒܙܰܒܢܳܗܿ ܒܝܰܘܡܳܟ ܗܽܘ ܚܳܙܶܝܢܰܢ ܠܳܟ ܟܶܐܡܰܬ ܥܽܘܠܳܐ ܐܰܟܘܳܬܳܟ ܟܰܕ ܡܶܬܚܰܒܰܒ ܡܶܢ ܟܽܠܢܳܫ ܗܳܐ ܕܳܝ̈ܨܳܢ ܒܶܗ ܥܺܕ̈ܳܬܳܐ ܨܳܒܶܬ ܝܰܘܡܳܟ ܘܐܶܨܛܒܬ ܒܪܺܝܟ ܝܰܘܡܳܟ ܕܰܗܘܳܐ ܚܠܳܦܰܝܢ 8 ܝܰܗܒ ܠܰܢ ܝܰܘܡܳܟ ܡܰܘܗܰܒܬܳܐ ܕܠܰܝܬ ܬܽܘܒ ܠܐܰܒܳܐ ܐܰܟܘܳܬܳܗܿ ܠܳܐ ܗܘܳܐ ܣܪ̈ܳܦܶܐ ܫܰܕܰܪ ܠܰܢ ܐܳܦܠܳܐ ܟܪ̈ܽܘܒܶܐ ܢܚܶܬܘ ܨܶܐܕܰܝܢ ܠܳܐ ܐܶܬܰܘ ܥܺܝܪ̈ܶܐ ܫܶܡ̈ܫܶܐ ܐܶܠܳܐ ܒܽܘܟܪܳܐ ܕܡܶܫܬܰܡܰܫ ܡܰܢܽܘ ܡܨܶܐ ܕܶܢܣܦܰܩ ܢܰܘܕܶܐ ܕܪܰܒܽܘܬܳܐ ܕܠܳܐ ܡܶܬܡܰܫܚܳܐ ܒܐܽܘܪܝܳܐ ܫܺܝܛܳܐ ܪܰܡܝܳܐ ܗܘܳܬ ܒܪܺܝܟ ܕܝܰܗܒ ܠܰܢ ܟܽܠ ܕܰܩܢܳܐ ܗܘܳܐ 9 ܠܗܰܘ ܕܳܪܳܐ ܚܰܕܺܝ ܝܰܠܕܳܟ ܘܰܠܕܳܪܰܢ ܚܰܕܺܝ ܝܰܘܡܳܟ ܥܳܦ ܠܶܗ ܛܽܘܒܳܐ ܕܗܰܘ ܕܳܪܳܐ ܕܰܚܙܰܘ ܝܰܠܕܳܟ ܐܳܦ ܝܰܘܡܳܟ ܙܥܰܪ ܠܶܗ ܛܽܘܒܳܐ ܕܐܰܚܪ̈ܳܝܶܐ ܕܝܽܘܡ ܝܰܠܕܳܟ ܚܳܙܶܝܢ ܒܰܠܚܽܘܕ ܕܐܶܬܦܰܠܰܓܘ ܕܶܝܢ ܩܰܪ̈ܺܝܒܶܐ ܣܓܺܝ ܠܶܗ ܛܽܘܒܳܐ ܕܰܐܚܪ̈ܳܝܶܐ ܕܟܰܕ ܠܳܐ ܚܙܰܐܽܘܟ ܗܰܝܡܶܢܘ ܒܳܟ ܒܪܺܝܟ ܛܽܘܒܳܟ ܕܐܶܬܰܘܣܰܦ ܠܰܢ 10 ܕܳܨܘ ܗܘܰܘ ܡܓܽܘ̈ܫܶܐ ܡܶܢ ܪܽܘܚܩܳܐ ܐܰܟܪܶܙܘ ܣܶܦܪ̈ܶܐ ܡܶܢ ܩܽܘܪܒܳܐ ܢܒܺܝܳܐ ܚܰܘܺܝ ܩܶܪܝܳܢܶܗ ܘܐܳܦ ܗܶܪܘܕܶܣ ܦܰܩܪܽܘܬܶܗ ܣܶܦܪ̈ܶܐ ܚܰܘܺܝܘ ܦܽ̈ܘܫ̈ܳܩܶܐ ܡܓܽܘ̈ܫܶܐ ܚܰܘܺܝܘ ܩܽܘܪ̈ܒܳܢܶܐ ܕܽܘܡܳܪܰܐ ܗ̱ܘ ܕܥܰܠ ܚܰܕ ܥܽܘܠܳܐ ܪܗܶܛܘ ܒܰܝ̈ܬܳܝܶܐ ܒܣܶܦܰܝ̈ܗܽܘܢ ܘܽܢܘܟܪ̈ܳܝܶܐ ܒܩܽܘܪ̈ܒܳܢܰܝܗܽܘܢ ܒܪܺܝܟ ܝܰܠܕܳܟ ܕܐܰܕܺܝܠ ܟܽܠܳܐ 11 ܟܶܢܦܳܗܿ ܕܡܰܪܝܰܡ ܐܰܬܗܰܪܬܳܢܝ ܕܣܶܦܩܶܬ ܠܳܟ ܡܳܪܝ ܘܥܰܦܶܩܬܳܟ ܙܥܽܘܪܝܳܐ ܗܘܳܬ ܟܽܠܳܗܿ ܒܪܺܝܬܳܐ ܕܰܬܟܰܣܶܐ ܗܘܳܬ ܪܰܒܽܘܬܳܟ ܐܰܪܥܳܐ ܘܰܫܡܰܝܳܐ ܟܪ̈ܝܳܢ ܠܡܶܗܘܳܐ ܒܛܽܘܦܣܳܐ ܕܟܢ̈ܦܳܬܳܐ ܕܰܢܟܰܣܝ̈ܳܢ ܐܰܠܳܗܽܘܬܳܟ ܙܥܽܘܪܝܳܐ ܗ̱ܝ ܠܳܟ ܟܶܢܦܳܗܿ ܕܐܰܪܥܳܐ ܘܪܰܒܳܐ ܗ̱ܝ ܠܳܟ ܟܶܢܦܳܗܿ ܕܡܰܪܝܰܡ ܫܪܳܐ ܒܟܶܢܦܳܐ ܘܐܰܣܺܝ ܒܟܶܢܦܶܗ 12 ܟܪܶܟ ܥܰܙܪܽܘܪ̈ܶܐ ܒܫܺܝܛܽܘܬܳܐ ܘܐܶܬܩܰܪܰܒܘ ܠܶܗ ܩܽܘܪ̈ܒܳܢܶܐ ܠܒܶܫ ܢܰܚ̈ܬܶܐ ܒܰܥܠܰܝܡܽܘܬܳܐ ܘܰܢܦܰܩܘ ܡܶܢܗܽܘܢ ܥܽܘܕܪ̈ܳܢܶܐ ܠܒܶܫ ܡܰܝ̈ܳܐ ܕܡܰܥܡܽܘܕܺܝܬܳܐ ܘܐܶܬܩܰܪܰܒܘ ܡܶܢܗܽܘܢ ܙܰܠܺܝ̈ܩܶܐ ܠܒܶܫ ܟܶܬܳܢ̈ܶܐ ܒܡܺܝܬܽܘܬܳܐ ܘܐܶܬܚܰܘܺܝܘ ܒܗܽܘܢ ܢܶܨ̈ܚܳܢܶܐ ܥܰܡ ܡܽܘ̈ܟܳܟܰܘܗܝ ܪ̈ܽܘܡܪܳܡܰܘܗܝ ܒܪܺܝܟ ܕܐܰܩܶܦ ܫܽܘܒܚܶܗ ܠܚܰܫܶܗ 13 ܟܽܠܗܽܘܢ ܗܳܠܶܝܢ ܫܽܘ̈ܚܠܳܦܶܐ ܕܰܫܠܰܚ ܘܰܠܒܶܫ ܚܢܳܢܳܐ ܕܐܶܬܦܪܶܣ ܕܢܶܠܒܰܫ ܠܐܳܕܳܡ ܬܶܫܒܽܘܚܬܳܐ ܗܳܝ ܕܰܫܠܰܚ ܗܘܳܐ ܟܪܶܟ ܥܰܙܪܽܘܪ̈ܶܐ ܥܰܡ ܛܰܪ̈ܦܰܘܗܝ ܘܰܠܒܶܫ ܢܰܚ̈ܬܶܐ ܚܠܳܦ ܡܶܫ̈ܟܰܘܗܝ ܗܘܳܐ ܥܡܺܝܕܳܐ ܡܶܛܽܠ ܥܰܘܠܶܗ ܘܰܚܢܺܝܛܳܐ ܡܶܛܽܠ ܡܰܘܬܶܗ ܩܳܡ ܘܐܰܩܺܝܡܶܗ ܒܬܶܫܒܽܘܚܬܳܐ ܒܪܺܝܟ ܕܰܢܚܶܬ ܠܰܒܫܶܗ ܘܰܣܠܶܩ 14 ܟܰܕ ܣܳܦܶܩ ܗܘܳܐ ܡܰܘܠܳܕܳܟ ܠܰܒ̈ܢܰܝ ܐܳܕܳܡ ܐܰܝܟ ܐܳܕܳܡ ܐܳܘ ܪܰܒܳܐ ܕܰܗܘܳܐ ܥܽܘܠܳܐ ܒܝܰܠܕܳܟ ܡܶܢ ܕܪܺܝܫ ܐܰܘܠܶܕܬܳܢܝ ܐܳܘ ܕܰܟܝܳܐ ܕܰܗܘܳܐ ܥܡܺܝܕܳܐ ܣܚܽܘܟ ܢܶܣܚܶܝܢ ܡܶܢ ܨܳܐܬܳܐ ܐܳܘ ܚܰܝܳܐ ܕܰܗܘܳܐ ܚܢܺܝܛܳܐ ܚ̈ܰܝܶܐ ܒܡܰܘܬܳܟ ܢܶܬܬܰܓܰܪ ܐܰܘܕܳܐ ܠܟܽܠܳܟ ܒܡܶܠܳܐ ܟܽܠ ܫܽܘܒܚܳܐ ܠܟܽܠܳܟ ܡܶܢ ܟܽܠܰܢ