Ephrem the Syrian. “Nativity 26.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/574. ܫܽܘܚܠܳܦ ܩܳܠܳܐ ܥܽܘܢܺܝܬܳܐ : ܒܪܺܝܟ ܝܰܠܕܳܟ ܡܰܦܨܰܚ ܟܽܠ ܒܶܪ̈ܝܳܬܳܐ 1 ܩܰܕܡܳܝܬܳܐ ܫܰܢ̱ܬܳܐ ܕܝܰܠܕܶܗ ܕܦܳܪܽܘܩܰܢ ܪܺܝܫܳܐ ܗ̱ܝ ܕܛܳܒ̈ܳܬܳܐ ܘܫܶܬܐܶܣܬܳܐ ܕܚ̈ܰܝܶܐ ܗܺܝ ܗܺܝ ܛܥܺܝܢܳܐ ܓܶܝܪ ܣܽܘܓܳܐܐ ܕܢܶܨ̈ܚܳܢܶܐ ܘܣܳܟܳܐ ܕܥܽܘܕܪ̈ܳܢܶܐ ܐܰܝܟ ܝܰܘܡܳܐ ܩܰܕܡܳܝܳܐ ܕܰܒܪܺܝܫܺܝܬ ܥܰܡܽܘܕܳܐ ܪܰܒܳܐ ܕܒܶܪ̈ܝܳܬܳܐ ܗܽܘܝܽܘ ܛܥܺܝܢ ܒܶܢܝܳܢܳܗܿ ܕܰܒܪܺܝܬܳܐ ܘܝܽܘܡ ܒܽܘܟܪܳܐ ܥܽܘܕܪ̈ܳܢܶܐ ܠܐܢܳܫܽܘܬܳܐ 2 ܫܰܢ̱ܬܳܐ ܫܢܰܬ ܬܰܪ̈ܬܶܝܢ ܕܝܰܠܕܶܗ ܕܦܳܪܽܘܩܰܢ ܡܓܽܘܫ̈ܶܐ ܦܨܺܝܚܺܝܢ ܒܳܗܿ ܦܪ̈ܺܝܫܳܝܶܐ ܟܡܺܝܪܺܝܢ ܒܳܗܿ ܓܰܙ̈ܶܐ ܦܬܺܝܚܺܝܢ ܒܳܗܿ ܡܰܠܟ̈ܶܐ ܪܗܺܝܒܺܝܢ ܒܳܗܿ ܘܥܽܘ̈ܠܶܐ ܢܟܺܝܣܺܝܢ ܒܳܗܿ ܒܳܗܿ ܗܽܘ ܓܶܝܪ ܐܶܬܩܰܪܰܒܘ ܒܒܶܝܬ ܠܚܶܡ ܩܽܘܪ̈ܒܳܢܶܐ ܪ̈ܓܺܝܓܶܐ ܘܰܕܚ̈ܺܝܠܶܐ ܚܽܘܒܳܐ ܓܶܝܪ ܕܰܗܒܳܐ ܩܰܪܶܒ ܗܘܳܐ ܘܰܚܣܳܡܳܐ ܒܣܰܝܦܳܐ ܝ̈ܰܠܽܘܕܶܐ 3 ܘܝܰܘܡܶܗ ܕܡܰܢܗܰܪ ܟܽܠ ܦܨܺܝܚ ܗܽܘ ܒܡܰܘܠܳܕܶܗ ܐܣܛܽܘܢ ܙܰܠܺܝ̈ܩܶܐ ܗܽܘ ܕܰܪܕܰܦ ܒܙܰܗܪܺܝܪ̈ܰܘܗܝ ܥܒܳܕ̈ܶܐ ܕܚܶܫܽܘܟܳܐ ܒܛܽܘܦܣܶܗ ܕܗܰܘ ܝܰܘܡܳܐ ܕܒܶܗ ܐܶܬܒܪܺܝ ܢܽܘܗܪܳܐ ܘܣܰܕܩܶܗ ܠܚܶܫܽܘܟܳܐ ܗܰܘ ܕܰܦܪܺܝܣ ܥܰܠ ܫܽܘܦܪܳܐ ܕܒܶܪ̈ܝܳܬܳܐ ܙܰܠܺܝܩܳܐ ܕܡܰܘܠܳܕܶܗ ܕܦܳܪܽܘܩܰܢ ܥܰܠ ܣܶܕܩܶܗ ܠܚܶܫܽܘܟܳܐ ܕܥܰܠ ܠܶܒܳܐ 4 ܝܰܘܡܳܐ ܩܰܕܡܳܝܳܐ ܪܺܝܫܳܐ ܘܫܽܘܪܳܝܳܐ ܛܽܘܦܣܰܐ ܗ̱ܘ ܕܥܰܩܪܳܐ ܕܐܰܦܪܰܥ ܠܟܽܠ ܡܶܕܶܡ ܝܰܘܡܶܗ ܕܦܳܪܽܘܩܰܢ ܣܰܓܺܝ ܫܒܺܝܚ ܡܶܢܶܗ ܕܰܢܨܺܝܒ ܒܓܰܘ ܬܺܒܶܝܠ ܡܰܘܬܶܗ ܓܶܝܪ ܐܰܝܟ ܫܶܪܫܳܐ ܒܓܰܘ ܐܰܪܥܳܐ ܘܽܢܘܚܳܡܶܗ ܐܰܝܟ ܪܺܝܫܳܐ ܒܰܫܡܰܝܳܐ ܠܟܽܠ ܦܶܢܝ̈ܳܢ ܡܶܠܰܘ̈ܗܝ ܐܰܝܟ ܣܰܘ̈ܟܰܘܗܝ ܘܐܳܦ ܦܺܐܪܶܗ ܦܰܓܪܶܗ ܠܐܳܟܽܘ̈ܠܰܘܗܝ 5 ܝܰܘܡܳܐ ܬܪܰܝܳܢܳܐ ܢܫܰܒܰܚ ܒܡܰܘܠܳܕܶܗ ܕܰܒܪܳܐ ܬܪܰܝܳܢܳܐ ܘܩܳܠܶܗ ܕܩܰܕܡܳܝܳܐ ܪܩܺܝܥܳܐ ܦܩܰܕ ܘܰܗܘܳܐ ܡܰܝ̈ܳܐ ܦܪܰܫ ܕܰܠܥܶܠ ܘܝ̈ܰܡܡܶܐ ܟܰܢܶܫ ܕܰܠܬܰܚܬ ܗܰܘ ܕܰܦܪܰܫ ܒܶܝܬ ܡ̈ܰܝܳܐ ܘܰܠܡ̈ܰܝܳܐ ܢܳܡ ܥܺܝܪ̈ܶܐ ܦܪܰܫ ܘܰܢܚܶܬ ܨܶܝܕ ܐܢܳܫܳܐ ܚܠܳܦ ܡ̈ܰܝܳܐ ܕܦܰܩܶܕ ܘܐܶܬܟܰܢܰܫܘ ܡܰܒܽܘܥܳܐ ܕܚ̈ܰܝܶܐ ܬܪܰܥ ܘܐܰܫܩܺܝ 6 ܝܰܘܡܳܐ ܬܠܺܝܬܳܝܳܐ ܟܠܺܝܠܳܐ ܕܡܰܙܡܽܘܪ̈ܶܐ ܢܶܦܬܽܘܟ ܒܡܰܕܪ̈ܳܫܶܐ ܘܢܰܘܫܶܛ ܒܚܰܕ ܩܳܠܳܐ ܠܝܰܠܕܶܗ ܕܗܰܘ ܕܐܰܘܥܺܝ ܦܰܩ̈ܚܶܐ ܘܗܰܒ̈ܳܒܶܐ ܒܝܰܘܡܳܐ ܬܠܺܝܬܳܝܳܐ ܗܳܫܳܐ ܕܶܝܢ ܗܽܘ ܟܽܠܶܗ ܡܰܘܥܶܐ ܟܽܠ ܗܰܒܳܒܳܐ ܩܰܕܺܝܫܳܐ ܢܚܶܬ ܘܰܗܘܳܐ ܡܶܢ ܐܰܪܥܳܐ ܨܗܺܝܬܳܐ ܫܘܰܚ ܘܰܣܠܶܩ ܕܰܢܨܰܒܶܬ ܘܰܢܟܰܠܶܠ ܙܰܟܳܝ̈ܶܐ 7 ܝܰܘܡܳܐ ܐܪܒܺܝܥܳܝܳܐ ܚܰܕ ܒܐܪ̈ܰܒܰܥ ܢܰܘܕܶܐ ܠܝܰܠܕܶܗ ܕܗܰܘ ܕܰܒܪܳܐ ܒܝܰܘܡܳܐ ܪܒܺܝܥܳܝܳܐ ܙܰܘܓܳܐ ܕܢܰܗܺܝܪ̈ܶܐ ܕܰܠܗܽܘܢ ܣܓܶܕܘ ܣܰܟ̈ܠܶܐ ܘܐܶܬܥܰܘܰܪܘ ܘܐܶܣܬܰܡܺܝܘ ܢܚܶܬ ܠܶܗ ܗܰܘ ܡܳܪܳܐ ܕܢܰܗܺܝܪ̈ܶܐ ܘܐܰܝܟ ܫܶܡܫܳܐ ܡܶܢ ܟܰܪܣܳܐ ܐܰܙܠܶܓ ܠܰܢ ܠܰܣܡܰܝ̈ܳܐ ܦܬܰܚܘ ܙܰܗܪܺܝܪ̈ܰܘܗܝ ܙܰܠܺܝܩܰܘ̈ܗܝ ܐܰܢܗܰܪܘ ܠܛܳܥܰܝ̈ܳܐ 8 ܝܰܘܡܳܐ ܚܡܺܝܫܳܝܳܐ ܢܫܰܒܰܚ ܠܗܰܘ ܕܰܒܪܳܐ ܒܝܰܘܡܳܐ ܚܡܺܝܫܳܝܳܐ ܪ̈ܰܚܫܳܐ ܘܬܰܢܺܝ̈ܢܶܐ ܕܡܶܢ ܓܶܢܣܗܽܘܢ ܚܶܘܝܳܐ ܢܟܰܠ ܐܰܛܥܝܳܗܿ ܠܐܶܡܰܢ ܫܒܰܪܬܳܐ ܕܠܳܐ ܠܶܒܳܐ ܕܒܰܫܒܪܬܳܐ ܒܰܙܰܚ ܗܘܳܐ ܢܳܟܽܘܠܳܐ ܡܶܢ ܝܰܘܢܳܐ ܐܶܬܦܰܪܣܺܝ ܙܺܐܦܳܢܳܐ ܡܶܢ ܥܽܘܒܳܐ ܬܰܡܺܝܡܳܐ [ܕܢܰܚ ܘܰܢܦܰܩ ܚܰܟܺܝܡܳܐ] ܕܪܰܨܶܗ ܠܰܨܢܺܝܥܳܐ 9 ܝܰܘܡܳܐ ܫܬܺܝܬܳܝܳܐ ܢܫܰܒܰܚ ܠܗܰܘ ܕܰܒܪܳܐ ܒܰܥܪܽܘܒܬܳܐ ܠܐܳܕܳܡ ܕܒܺܝܫܳܐ ܚܣܰܡ ܗܘܳܐ ܒܶܗ ܐܰܝܟ ܪܳܚܡܳܐ ܢܶܟܠܶܐ ܐܰܦܨܰܚ ܘܐܰܘܫܶܛ ܠܶܗ ܣܰܡܳܐ ܒܡܶܐܟܽܘܠܬܳܐ ܣܰܡ ܚ̈ܰܝܶܐ ܐܶܬܦܪܶܣ ܠܰܬܪ̈ܰܝܗܽܘܢ ܠܒܶܫ ܦܰܓܪܳܐ ܘܐܶܬܩܰܪܰܒ ܠܰܬܪ̈ܰܝܗܽܘܢ ܡܳܝܽܘܬܳܐ ܛܰܥܡܶܗ ܘܰܚܝܳܐ ܒܶܗ ܒܠܰܘܥܳܐ ܕܐܰܟܠܶܗ ܐܶܣܬܰܪܰܩ 10 ܝܰܘܡܳܐ ܫܒܺܝܥܳܝܳܐ ܢܩܰܕܶܫ ܠܩܰܕܺܝܫܳܐ ܕܰܠܫܰܒܬܳܐ ܩܰܕܶܫ ܕܰܢܢܺܝܚ ܠܚ̈ܰܝܘܳܬܳܐ ܛܳܒܳܐ ܕܠܳܐ ܠܐܳܐ ܝܺܨܶܦ ܕܐܢܳܫܽܘܬܳܐ ܘܝܺܨܶܦ ܕܚ̈ܰܝܘܳܬܳܐ ܕܶܢܦܠܰܬ ܠܳܗܿ ܚܺܐܪܽܘܬܳܐ ܬܚܶܝܬ ܢܺܝܪܳܐ ܐܶܬܳܐ ܠܝܰܠܕܳܐ ܘܐܶܫܬܰܥܒܰܕ ܕܰܢܚܰܪܰܪ ܒܠܰܥ ܦܰܟܳܐ [ܕܥܰܒܕܶܗ] ܒܶܝܬ ܕܺܝܢܳܐ ܬܒܰܪ ܢܺܝܪܳܐ ܕܥܰܠ ܚܺܐܪ̈ܶܐ ܐܰܝܟ ܡܳܪܳܐ 11 ܝܰܘܡܳܐ ܬܡܺܝܢܳܝܳܐ ܕܰܓܙܳܪ ܠܥܶܒܪ̈ܳܝܶܐ ܢܰܘܕܶܐ ܠܗܰܘ ܕܰܦܩܰܕ ܠܗܰܘ ܒܰܪ ܫܡܶܗ ܝܶܫܽܘܥ ܕܢܶܓܙܽܘܪ ܒܛܰܪܢܳܐ ܠܥܰܡܳܐ ܕܰܓܙܺܝܪ ܦܰܓܪܶܗ ܘܠܶܒܶܗ ܚܢܰܦ ܡܶܢ ܠܓܰܘ ܗܳܐ ܒܝܰܘܡܳܐ ܬܡܺܝܢܳܝܳܐ ܐܰܝܟ ܥܽܘܠܳܐ ܠܰܓܙܽܘܪܬܳܐ ܐܶܬܳܐ ܗܘܳܐ ܓܙܰܪ ܟܽܠ ܟܰܕ ܐܳܬܶܗ ܕܐܰܒܪܳܗܳܡ ܥܰܠ ܒܶܣܪܶܗ ܫܟܰܪܬܶܗ ܣܡܺܝܬܳܐ ܒܰܪܬ ܨܶܗܝܽܘܢ 12 ܝܰܘܡܳܐ ܥܣܺܝܪܳܝܳܐ ܢܫܰܒܰܚ ܒܡܶܢܝܳܢܶܗ ܝܽܘܕ ܓܶܝܪ ܐܳܬܽܘܬܶܗ ܕܝܶܫܽܘܥ ܫܡܳܐ ܦܰܐܝܳܐ ܥܶܣܪܳܐ ܗܺܝ ܒܡܶܢܝܳܢܳܐ ܗܳܢܳܐ ܕܐܰܝܟ ܡܳܪܳܐ ܡܰܗܦܶܟ ܠܡܶܢ̈ܝܳܢܶܐ ܠܥܶܣܪܳܐ ܓܶܝܪ ܡܳܐ ܕܣܳܠܶܩ ܡܶܢܝܳܢܳܐ ܗܳܦܶܟ ܠܶܗ ܬܽܘܒ ܡܶܢ ܚܰܕ ܕܢܶܫܪܶܐ ܐܳܘ ܪܳܐܙܳܐ ܪܰܒܳܐ ܕܰܒܝܶܫܽܘܥ ܕܚܰܝܠܶܗ ܗܽܘ ܡܰܗܦܶܟ ܒܶܪ̈ܝܳܬܳܐ 13 ܒܽܘܟܪܳܐ ܡܕܰܟܶܐ ܟܽܠ ܒܝܰܘܡܳܐ ܕܕܽܘܟܳܝܶܗ ܕܰܟܝܳܗܿ ܠܬܰܕܟܺܝܬܳܐ ܕܒܽܘܟܪ̈ܶܐ ܘܐܶܬܩܰܪܰܒ ܡܳܪܳܐ ܕܩܽܘܪܒܳܢܳܐ ܐܶܣܬܢܶܩ ܕܩܽܘܪ̈ܒܳܢܶܐ ܢܩܰܪܶܒ ܕܦܳܪܰܚܬܳܐ ܒܡܰܘܠܳܕܶܗ ܐܶܫܬܠܶܡ ܕܶܡ̈ܘܳܬܳܐ ܒܬܰܕܟܺܝܬܶܗ ܘܰܓܙܽܘܪܬܶܗ ܦܶܠܐ̈ܬܳܐ ܐܶܬܳܐ ܦܪܰܥ ܚ̈ܰܘܒܳܬܳܐ ܒܡܰܚܬܶܗ ܒܢܽܘܚܳܡܶܗ ܣܠܶܩ ܫܰܕܰܪ ܣܺܝ̈ܡܳܬܳܐ