Ephrem the Syrian. “Nativity 27.” Based upon Edmund Beck ed., "Des heiligen Ephraem des Syrers Hymnen De Nativitate (Epiphania).". Digital Syriac Corpus. Last modified December 17, 2019. https://syriaccorpus.org/575. ܫܽܘܚܠܳܦ ܩܳܠܳܐ ܥܽܘܢܝܳܐ : ܠܳܟ ܬܶܫܒܽܘܚܬܳܐ ܒܰܪ ܡܳܪܶܐ ܟܽܠ. ܬܰܢܺܝ 1 ܗܘܳܐ ܢܽܘܗܪܳܐ ܐܰܝܟ ܟܳܪܽܘܙܳܐ ܠܗܰܘ ܢܰܗܺܝܪܳܐ ܕܝܶܠܕܰܬ ܡܰܪܝܰܡ ܗܘܳܐ ܓܶܝܪ ܒܰܛܢܶܗ ܒܙܳܟܽܘܬ ܢܽܘܗܪܳܐ ܗܘܳܐ ܬܺܘܒ ܝܰܠܕܶܗ ܒܙܳܟܽܘܬ ܫܶܡܫܳܐ ܒܪܺܝܟ ܙܰܟܳܝܳܐ 2 ܝܽܘܕ ܣܺܝܡܳܐ ܒܪܺܝܫܶܗ ܕܰܫܡܳܟ ܒܥܶܣܪܳܐ ܣܺܝܡܳܐ ܒܢܺܝܣܳܢ ܝܰܪܚܳܐ ܒܰܥܣܺܝܪܳܝܳܐ ܥܰܠܬ ܠܟܰܪܣܳܐ ܒܪܳܐܙ ܡܶܢܝܳܢܳܐ ܕܰܓܡܺܝܪܽܘܬܳܐ ܐܺܝܬܰܘܗܝ ܒܰܛܢܳܟ 3 ܡܶܢܝܳܢܳܐ ܕܥܶܣܪܳܐ ܫܰܠܡܰܐ ܗ̱ܘ [ܒܥܶܣܪܳܐ ܒܢܺܝܣܳܢ ܥܠܰܬ ܠܟܰܪܣܳܐ ܡܶܢܝܳܢܳܐ ܬܽܘܒ ܕܶܫܬܳܐ ܓܡܺܝܪܰܐ ܗ̱ܘ ܒܶܫܬܳܐ ܒܟܳܢܽܘܢ ܠܫܬܳܐ ܓܰܒ̈ܺܝܢ ܚܰܕܺܝ ܝܰܠܕܳܟ 4 ܡܶܢܝܳܢܳܐ ܕܥܶܣܪܳܐ ܣܳܟܰܐ ܗ̱ܘ] ܘܰܫܬܺܝܬܳܝܳܐ ܣܳܟܳܐ ܕܣ̈ܳܟܶܐ ܒܥܶܣܪܳܐ ܒܰܛܢܶܗ ܒܫܰܬܳܐ ܝܰܠܕܶܗ ܠܐܰܪ̈ܒܰܥ ܦܶܢܝ̈ܳܢ [ܘܪܰܘܡܳܐ ܘܥܽܘܡܩܳܐ] ܚܰܕ ܝܰܠܕܶܗ 5 ܫܡܶܗ ܕܝܰܘܣܶܦ ܠܳܐ ܣܳܦܶܩ ܗܘܳܐ ܕܐܰܒܳܐ ܢܗܶܐ ܠܳܟ ܕܰܡܚܺܝܠܳܐ ܗܘܳܐ ܫܡܳܟ ܗܽܘ ܝܰܗܒ ܠܶܗ ܝܽܘܕ ܐܳܬܽܘܬܳܐ ܫܡܳܟ ܗܽܘ ܚܰܝܶܠ ܠܰܫܡܶܗ ܕܝܰܘܣܶܦ ܕܐܰܒܳܐ ܢܗܶܐ ܠܳܟ 6 ܡܫܺܝܚܳܐ ܬܽܘܒ ܪܺܝܫ ܐܳܬܘ̈ܳܬܶܗ ܠܰܫܡܳܗܿ ܕܡܰܪܝܰܡ ܝܰܗܒ ܒܰܚܢܳܢܶܗ ܗܳܐ ܬܠܶܝܢ ܫܡܳܗܰܝ̈ܗܽܘܢ ܒܰܫ̈ܡܳܗܰܘܗܝ ܒܚܰܝܠܶܗ ܬܠܶܝܢ ܗܘܰܘ ܐܳܦ ܓܽܘܫܡ̈ܰܝܗܽܘܢ ܥܰܡ ܟܽܠ ܒܶܪ̈ܝܳܢ 7 ܡܰܪܝܰܡ ܓܶܝܪ ܗܳܝ ܕܰܛܥܶܢܬܶܗ ܒܟܰܪܣܳܐ ܘܟܶܢܦܳܐ ܠܶܗ ܠܰܡܫܺܝܚܳܐ ܪܺܝܫ ܐܳܬܘ̈ܳܬܶܗ ܕܰܫܡܳܐ ܡܫܺܝܚܰܐ ܗ̱ܘ ܛܥܶܢܬܶܗ ܠܰܫܡܶܗ ܒܰܕܡܽܘܬ ܚܰܝܠܶܗ ܕܰܛܥܺܝܢ ܓܽܘܫܡܳܗܿ 8 ܡܰܪܝܰܡ ܓܝܶܪ ܠܳܐ ܡܰܨܝܳܐ ܗܘܳܬ ܒܶܠܥܳܕ ܚܰܝܠܶܗ ܠܡܶܛܥܰܢ ܦܰܓܪܶܗ ܚܰܘܺܝ ܕܟܰܣܝܳܐ ܒܐܺܝܕܳܐ ܕܓܰܠܝܳܐ ܕܐܳܦܠܳܐ ܫܡܳܗܰܝ̈ܗܽܘܢ ܡܶܢ ܒܶܠܥܳܕ̈ܰܘܗܝ ܐܶܫܟܰܚܘ ܕܢܶܗܽܘܘܢ 9 ܐܳܬܘ̈ܳܬܶܗ ܪ̈ܺܝܫܳܝܳܬܳܐ ܝܰܗܒ ܠܐܰܒ̈ܳܗܰܘܗܝ ܕܰܗܘܰܘ ܪ̈ܺܝܫܰܘܗܝ ܘܐܰܝܟ ܕܐܶܨܛܰܠܰܬܘ ܒܶܗ ܦܰܓܪ̈ܰܝܗܽܘܢ ܗܳܟܰܢ ܨܒܳܬ ܐܳܦ ܒܰܫܡ̈ܳܗܰܘܗܝ ܠܰܫܡ̈ܳܗܰܝܗܽܘܢ 10 ܐܳܦܠܳܐ ܬܽܘܒ ܗܽܘ ܝܽܘܚܰܢܳܢ ܒܶܠܥܳܕ ܚܰܝܠܶܗ ܐܰܥܡܶܕ ܦܰܓܪܶܗ ܝܽܘܕ ܗܽܘ ܛܥܶܢܬܶܗ ܠܫܶܡ ܝܽܘܚܰܢܳܢ ܐܰܝܟ ܕܰܛܥܶܢ ܗܘܳܐ ܚܰܝܠܶܗ ܕܝܶܫܽܘܥ ܠܶܗ ܠܝܽܘܚܰܢܳܢ 11 ܐܶܢܗܽܘ ܕܶܝܢ ܕܐܶܫܰܐܶܠ ܫܽܘܦܪܳܐ ܕܰܟܬܺܝ̈ܒܳܬܶܗ ܠܰܫܡ̈ܳܗܰܝܗܽܘܢ ܐܶܢܗܽܘ ܕܫܽܘܦܪܶܗ ܓܰܐܝܳܐ ܡܙܰܓ ܒܰܫܡ̈ܳܗܰܝܗܽܘܢ ܟܡܳܐ ܟܺܝܬ ܡܙܰܓ ܚܰܝܠܶܗ ܟܰܣܝܳܐ ܒܰܫܡ̈ܳܗܰܝܗܽܘܢ 12 ܘܐܰܝܟܰܢܳܐ ܕܰܠܡܶܢܝܳܢܳܐ ܥܶܣܪܳܐ ܕܰܪ̈ܓܺܝܢ ܐܺܝܬ ܠܶܗ ܒܰܠܚܽܘܕ ܫܬܳܐ ܓܰܒܺܝ̈ܢ ܐܺܝܬ ܠܰܒܪܺܝܬܳܐ ܪܰܘܡܳܐ ܘܥܽܘܡܩܳܐ ܘܐܰܪ̈ܒܰܥ ܦܶܢ̈ܝܳܢ ܕܰܡܠܶܝܢ ܡܶܢܳܟ 13 ܝܽܘܕ ܐܳܬܽܘܬܳܐ ܕܝܶܫܽܘܥ ܡܰܠܟܰܢ ܐܺܝܬܶܝܗܿ ܡܰܠܟܰܬ ܟܽܠ ܡܶܢܝܳܢܺܝ̈ܢ ܒܰܓܡܺܝܪܽܘܬܳܗܿ ܬܠܶܝܢ ܚܽܘܫܒܳܢ̈ܶܐ ܐܰܝܟ ܕܰܒܝܶܫܽܘܥ ܗܳܐ ܡܶܬܡܰܙܓܺܝܢ ܟܽܠ ܪ̈ܶܥܝܳܢܺܝܢ 14 ܪܰܒ ܡܶܢ ܟܽܠ ܢܚܶܬ ܗܘܳܐ ܟܽܠܶܗ ܠܘܳܬ ܡܽܘܟܳܟܳܐ ܕܠܳܐ ܡܶܬܡܰܠܰܠ ܗܦܰܟ ܬܽܘܒ ܡܶܢܶܗ ܕܗܰܘ ܡܽܘܟܳܟܳܐ ܘܐܶܚܰܕ ܪܰܘܡܳܐ ܕܠܳܐ ܡܶܣܬܰܝܰܟ ܥܰܠ ܝܰܡܺܝܢܳܐ 15 ܪܰܒ ܬܶܗܪܳܐ ܕܡܶܢ ܗܰܘ ܪܰܘܡܳܐ ܠܳܐ ܕܪܰܓ ܗܘܳܐ ܒܩܰܠܺܝܠ ܩܰܠܺܝܠ ܕܢܶܚܽܘܬ ܢܺܐܬܶܐ ܠܰܙܥܽܘܪܽܘܬܳܐ ܦܪܰܚ ܡܶܢ ܥܽܘܒܳܗܿ ܕܐܰܠܳܗܽܘܬܳܐ ܠܘܳܬ ܐܢܳܫܽܘܬܳܐ 16 ܫܶܡܫܳܐ ܓܶܝܪ ܗܰܘ ܫܶܡܫܳܟ ܐܰܝܟ ܕܰܒܦܽܘܡܳܐ ܪܳܐܙܳܟ ܡܰܟܪܶܙ ܒܣܰܬܘܳܐ ܠܫܶܦܠܳܐ ܒܛܽܘܦܣܳܟ ܢܳܚܶܬ ܠܪܰܘܡܳܐ ܒܩܰܝܛܳܐ ܒܕܽܘܡܝܳܟ ܣܳܠܶܩ ܘܥܰܠ ܟܽܠ ܡܰܡܠܶܟ 17 ܘܐܳܦ ܛܽܘܦܣܶܗ ܕܒܰܛܢܳܟ ܪܰܒܽܘܠܺܝ ܘܰܕܝܽܘܚܰܢܳܢ ܗܰܘ ܟܳܪܽܘܙܳܟ ܪܳܐܙ ܒܶܛܢܰܝ̈ܟܽܘܢ ܐܳܦ ܡܰܘܠܳܕܟܽܘܢ ܒܢܽܘܗܪܳܐ ܘܚܶܫܟܳܐ ܨܺܝܪܺܝܢ ܘܰܓܠܶܝܢ ܠܰܕܡܶܣܬܰܟܰܠ 18 ܕܝܽܘܚܰܢܳܢ ܗܘܳܐ ܗܘܳܐ ܒܰܛܢܶܗ ܒܬܶܫܪܺܝܢ ܕܰܣܥܳܐ ܒܶܗ ܚܶܫܽܘܟܳܐ ܒܰܛܢܳܟ ܕܺܝܠܳܟ ܗܘܳܐ ܗܘܳܐ ܒܢܺܝܣܳܢ ܕܡܰܡܠܶܟ ܢܽܘܗܪܳܐ ܥܰܠ ܚܶܫܽܘܟܳܐ ܘܰܡܫܰܥܒܶܕ ܠܶܗ 19 ܡܰܘܕܶܐ ܐܢܳܐ ܠܝܰܠܕܳܟ ܩܰܕܡܳܐ ܕܰܟܣܶܐ ܘܰܓܢܺܝܙ ܡܶܢ ܟܽܠ ܒܶܪ̈ܝܳܢ ܬܽܘܒ ܡܰܘܕܶܐ ܐܢܳܐ ܠܝܰܠܕܳܟ ܕܰܬܪܶܝܢ ܕܰܓܠܶܐ ܘܰܛܠܶܐ ܡܶܢ ܟܽܠ ܒܶܪ̈ܝܳܢ ܕܰܗ̈ܘܰܝ ܒܐܺܝ̈ܕܰܝܟ 20 ܡܰܘ̈ܠܳܕܰܘܗܝ ܕܺܝܚܺܝܕܳܝܳܐ ܚܰܕ ܥܶܠܳܝܳܐ ܘܚܰܕ ܬܰܚܬܳܝܳܐ ܚܰܕ ܢܽܘܟܪܳܝܳܐ ܕܰܠܟܽܠ ܢܽܘܟܪܳܝ ܘܚܰܕ ܒܰܪ ܛܽܘܗܡܳܐ ܕܰܠܐܢܳܫܽܘܬܳܐ ܡܳܚܶܝܢ ܟܽܠܶܗ 21 ܝܰܘܡܳܐ ܬܽܘܒ ܕܡܰܘܠܳܕܳܟ ܐܰܝܟ ܕܰܒܪܳܐܳܙܐ ܒܟܳܢܽܘܢ ܟܳܐܶܢ ܕܒܶܗ ܡܰܥܕܶܐ ܢܽܘܗܪܳܐ ܡܶܢ ܚܶܫܽܘܟܳܐ ܫ̈ܳܥܶܐ ܕܰܒܠܰܥ ܐܰܝܟ ܕܐܰܥܕܺܝܬܳܢ ܡܶܢ ܒܳܠܽܘܥܰܢ 22 ܠܒܰܛܢܳܟ ܨܳܐܰܪ ܢܺܝܣܳܢ ܕܰܩܥܳܐ ܕܗܳܐ ܠܰܡ ܢܽܘܗܪܳܐ ܚܒܺܝܫ ܒܟܰܪܣܳܐ ܒܟܳܢܽܘܢ ܢܦܰܩܘ ܗܘܰܘ ܙܰܘܓܳܐ ܕܢܽܘܗܪ̈ܶܐ ܐܰܢܬ ܡܶܢ ܟܰܪܣܳܐ ܘܫܶܡܫܳܐ ܥܰܡܳܟ ܡܶܢ ܓܰܘ ܚܶܫܟܳܐ