Narsai. “On the Passion - ܡܲܪܒܲܥܪܘܿܒܼܬܵܐ ܕܚܲܫܵܐ.” Based upon BL Or. 5463. Digital Syriac Corpus. Last modified April 26, 2019. https://syriaccorpus.org/63.
    
        
            
                ܡܲܪܒܲܥܪܘܿܒܼܬܵܐ ܕܚܲܫܵܐ
            
            
                 f.147r 
                ܝܝܼܠܹܗ ܟܲܕ ܕܝܼܠܹܗ.
                ܡܸܐܡܪܵܐ ܕܥܸܣܪܝܢ ܘܫܲܒܥܵܐ.
                :ܘܡܸܬܐ ܡܲܪܒܲܥܪܘܿܒܼܬܵܐ ܕܚܲܫܵܐ ܥܘ[ܐ] ܒܪܝܼܟ ܕܒܩܸܛܠܹܗ ܩܲܛܠܵܗ̇ ܠܲܚܛܝܼܬܼܵܐ
                ܘܲܒܼܡܘܼܟܵܟܹܗ ܫܲܝܸܢ ܠܪ̈ܓܼܙܐ܀
                ܐܲܚܲܝ̈܀
            
            
                 1 :ܒܲܪܢܵܫܵܐ ܡܵܐܢܵܐ ܕܚܸܨܦܵܐ
                 2 ܕܣܝܼܡܵܐ ܒܹܗ ܣܝܼܡܲܬ ܚܲܝܹ̈ܐ.
                 3 :ܠܵܘ ܕܝܼܠܹܗ ܗ̤ܝ ܪܲܒܘܼܬܼܵܐ
                 4 ܐܸܠܵܐ ܕܚܲܝܠܐ ܕܥܵܒܼܘܿܕܹܗ.
                 5 :ܒܡܵܐܢܵܐ ܫܝܼܛܵܐ ܡܸܬܿܬܿܣܝܼ̈ܡܵܢ
                 6 ܝܩܝܼܪ̈ܬܵܐ ܕܒܹܝܬܼ ܐܵܕܵܡ.
                 7 :ܘܟܲܕ ܛܵܒܼ ܫܝܼܛܵܐ ܗ̄ܘ̣ ܒܲܟܼܝܵܢܹܗ
                 8 ܫܒܝܼܚ̇ܵܬܐ ܒܹܗ ܡܸܬܼܢܲܛܪ̈ܵܢ.
                 9 :ܒܡܵܐܢܵܐ ܕܢܩܐ ܐܲܬܒܼܪܵܐ
                 10 ܣܝܼܡܝܼܢ ܓܲܙ̈ܐ ܡܝܘ̈ܬܐ.
                 11 :ܘܒܦܓܪܢ ܡܵܘܠܸܕ ܚܲܫܹ̈ܐ
                 12 ܫܪܵܐ ܒܹܗ ܐܝܼܬܝܵܐ ܕܠܵܐ ܚܵܐܸܫ.
                 13 :ܚܸܨܦܵܐ ܫܝܼܛܵܐ ܒܲܪܢܫܵܐ
                 14 ܘܫܝܼܛ ܒܲܟܼܝܵܢܹܗ ܐܲܝܟ ܚܸܨܦܵܐ.
                 15 :ܘܲܕܗܵܘܹܐ ܥܘܼܡܪܵܐ ܠܒܵܪܘܿܝܹܗ
                 16 ܥܲܒܼܕܹܗ ܡܵܐܢܵܐ ܝܲܩܝܼܪܵܐ.
                 17 :ܫܒܚܼܝ ܗ̄ܘ̣ܵܐ ܘܲܦܐܹܐ ܬܘܼܩܵܢܹܗ
                 18 ܟܲܕܼ ܛܵܒܼ ܡܕܪܐ ܐܝܼܬܼܵܘܗܝ ܗ̄ܘ̣ܵܐ.
                 19 ܘܕܫܡܲܥ ܡܸ̈ܠܹܐ ܕܢܵܟܼܘܿܠܹܗ: 

                 f.147v 

                 20 ܦܫܵܐ ܠܫܝܼܛܘܼܬܵܐ ܕܲܟܼܝܵܢܹܗ.
                 21 :[...]ܠܐ ܒܣܡܬ̤ ܠܹܗ ܠܒܼܵܪܘܿܝܵܐ
                 22 ܕܢܲܗܸܠ ܒܝܼܫܵܐ ܒܬܘܼܩܵܢܹܗ.
                 23 :ܕܠܵܐ ܢܸܫܬܲܒܼܗܲܪ ܚܲܣܵܡܵܐ
                 24 ܕܒܚܲܝܠܹܗ ܚܲܣܢܹܗ ܠܐܵܕܼܵܡ.
                 25 :ܫܲܩܠܹܗ ܠܡܵܐܢܵܐ ܕܐܸܬܼܚܲܒܲܠ
                 26 ܕܡܸܕܪܹܗ ܕܐܵܕ̇ܡ ܡܵܘܝܬܵܐ.
                 27 :ܘܓܲܒܼܠܹܗ ܒܪܘܼܚܵܐ ܚܠܦ ܡܲܝ̈ܐ
                 28 ܕܢܼܗܘܹܐ ܫܲܪܝܼܪ ܬܘܼܩܸܢܹܗ.
                 29 :ܕܬܲܒܼܪܹܗ ܡܵܘܬܵܐ ܠܲܟܼܝܵܢܹܗ
                 30 ܘܚܲܒܸܠ ܫܘܼܪܵܐ ܕܨܘܼܪܵܬܹܗ.
                 31 :ܢܣܟܗ ܒܟܼܘܪܵܐ ܪܘܼܚܵܢܵܐ
                 32 ܕܠܵܐ ܢܸܫܚܲܬ̤ ܬܘܼܒܼ ܒܲܚܛܝܼܬܵܐ.
                 33 :ܫܲܩܠܹܗ ܠܨܲܠܡܲܗ ܒܵܪܘܿܝܵܐ
                 34 ܘܥܲܒܼܕܹܗ ܢܵܘܣܵܐ ܘܥܡ̣ܪ ܒܹܗ.
                 35 :ܕܠܵܐ ܢܸܫܬܲܠܲܛ ܚܲܣܵܡܵܐ
                 36 ܕܒܗܝܟܠ ܡܲܠܟܵܐ ܓܸܥܡܲܪ.
                 37 :ܚܲܕ ܡ̣ܢ ܓܸܢܣܵܐ ܕܡܵܝܘܿܬܹ̈ܐ
                 38 ܓܒܼܵܐ ܠܹܗ ܐܝܼܬܼܝܵܐ ܘܥܡ̣ܪ ܒܹܗ.
                 39 :ܘܲܒܼܪܘܼܟܵܒܼܵܐ ܕܬܘܼܩܵܢܹܗ
                 40 ܐܣܪܗ ܠܚܘܼܒܵܗ̇ ܕܲܒܼܪܝܼܬܼܵܐ.
                 41 :ܘܡܸܢܹܗ ܕܡܸܕܪܵܐ ܕܒܹܝܬܼ ܐܵܕܵܡ
                 42 ܪܲܟܼܒܼ ܨܲܠܡܵܐ ܐܲܝܟ ܐܵܕܵܡ.
                 43 :ܘܓܼܡܪܗ ܒܚܲܫܹ̈ܐ ܕܡܝܘ̈ܬܐ
                 44 ܒܝܲܕ ܚܲܝܠܵܐ ܕܐܲܠܵܗܘܼܬܹܗ.
                 45 :ܒܝܲܕ ܚܲܝܵܠܐ ܕܪܘܼܚܵܐ ܓܲܒܼܠܹܗ
                 46 ܕܠܵܐ ܙܪܥܵܐ ܕܫܵܘܬܵܦܘܼܬܼܵܐ.
                 47 :ܕܢܸܗܘܹܐ ܕܵܡܹܐ ܒܟܼܠܡܸܕܹܡ
                 48 ܠܐ̇ܕܵܡ ܨܲܠܡܵܐ ܩܲܕܡܵܝܵܐ.
                 49 :ܕܐܝܟܢܐ ܕܒܝܲܕ ܐܵܕܼܵܡ
                 50 ܥܲܠ ܡܵܘܬܵܐ ܘܚܲܒܸܠ ܓܸܢܣܹܗ.
                 51 :ܒܐܵܕܼܵܡ ܨܲܠܡܵܐ ܬܪܲܝܢܐ
                 52 ܢܸܫܪܹܐ ܟܒܝܼ̈ܫܹܐ ܡ̣ܢ ܡܵܘܬܵܐ.
                 53 :ܒܟܼܠܗܹܝܢ ܕܐܵܕܵܡ ܐܸܫܬܵܘܬܲܦ
                 54 ܒܲܪܢܫܵܐ ܐܵܕܼܵܡ ܕܲܬܼܪܹܝܢ.
                 55 :ܘܡ̣ܢ ܕܐܸܬܬܲܣܝܼ ܒܝܲܕܼ ܚܲܫܹ̈ܐ
                 56 ܦܪܲܩ ܡ̣ܢ ܡܵܘܬܵܐ ܠܡܵܝܘ̈ܬܹܐ.
                 57 :ܬܫܥܵܐ ܝܪ̈ܚܝܼܢ ܐܲܝܟ ܛܲܟܼܣܵܐ
                 58 :ܒܟܲܪܣܵܐ ܕܒܸܣܪܵܐ ܡܕܲܝܲܪܘܵܐ
                 59 ܘܒܚܸܒܼܠܹ̈ܐ ܘܚܫ̈ܐ ܕܝܠܕܵܐ.
                 60 :ܕܢܲܚ ܡ̣ܢ ܟܲܪܣܵܐ ܕܝܵܠܸܕܬܹܗ
                 61 ܝܢܸܩ ܚܲܠܒܼܵܐ ܐܲܝܟ ܫܲܒܼܪܵܐ.
                 62 :ܕܢܚܘܹܐ ܕܒܲܪ ܓܸܢܣܲܢ ܗ̄ܘ̣
                 63 :ܘܩܲܕܲܒܼ ܕܒܼܚܹ̈ܐ ܐܲܝܟ ܟܠܢܵܫ
                 64 ܕܢܸܦܪܘܿܠ ܩܘܼܒܵܠ ܛܲܝܒܲܘܼܬܼܵܐ.
                 65 :ܐܲܪܡܝܼ ܓܙܘܼܪܬܵܐ ܥܲܠ ܦܲܓܼܪܹܗ
                 66 ܕܢܸܫܬܲܪܪ ܒܹܗ ܡܘܼܠܟܵܢܵܐ.
                 67 :ܕܢܸܗܘܘܿܢ ܥܲܡܹ̈ܐܗ ܝܪ̈ܘܬܐ
                 68 ܒܗܘܼܬܪܵܐ ܕܒܘܪ̈ܟܵܬܹܗ ܕܐܲܒܼܪܵܡ.
                 69 :ܐܸܬܼܪܒܝܼ ܐܲܝܟ ܝܠܘܼܕܵܐ
                 70 ܕܝܠܘܼܕܵܐ ܗ̄ܘ̣ܵܐ ܒܫܪܪܐ.
                 71 :ܘܒܼܝܲܕ ܚܲܝܠܵܐ ܕܛܲܝܒܘܼܬܵܐ
                 72 ܬܸܐܕܲܪܓ ܠܲܓܼܡܝܼܪܘܼܬܵܐ.
                 73 :ܩܪܸܒܼ ܠܲܟܼܡܵܕܵܐ ܕܲܒܼܡܲܝ̈ܵܐ
                 74 ܕܢܸܕܪܘܿܫ ܐܘܼܪܚܵܐ ܠܡܝܘ̈ܬܹܗ.
                 75 :ܘܟܲܕ ܕܟܼܝܵܐ ܗ̄ܘ̣ܵܐ ܒܲܩܢܘܿܡܹܗ
                 76 ܕܟܼܝܼ ܛܲܡ̈ܐܹܐ ܒܲ[ܩܢܘܿ]ܡܹܗ ܒܲܥܡܵܕܹܗ.
                 77 :ܥܲܡܹܗ ܗ̄ܘ̣ܵܐ ܡ̣ܢ ܫܘܼܪܵܝܵܐ
                 78 ܡܸܠܬܹܗ ܕܐܲܒܼܵܐ ܚܝܼܕܵܝܵܐ.
                 79 :ܥܲܡܹܗ ܗ̄ܘ̣ܵܐ ܘܒܹܗ ܥܡ̇ܪ ܗ̄ܘ̣ܵܐ
                 80 ܘܠܵܐ ܡܫܵܘܬܲܦ ܗ̄ܘ̣ܵܐ ܒܡܵܟܬܹ̈ܐ.
                 81 :ܗܘ̤ ܒܲܟܼܝܢܹܗ ܪܵܒܸܐ ܗ̄ܘ̣ܵܐ
                 82 ܒܚܸܟܡܬܐ ܘܲܒܼܛܲܝܒܲܘܼܬܵܐ.
                 83 :ܘܐܝܼܬܝܵܐ ܒܕܝܼܠܹܗ ܡܩܵܘܹܐ ܗ̄ܘ̣ܵܐ
                 84 ܕܠܵܬ ܫܘܼܓܼܢܵܝܵܐ ܘܫܘܼܚܠܵܦܵܐ.
                 85 :ܥܲܡ ܐ̄ܢܫܐ ܡܬܗܦܟ ܗ̄ܘ̣ܵܐ
                 86 ܒܪܢܫܵܐ ܐܕܼܵܡ ܕܬܪܹܝܢ.
                 87 :ܕܢܦܢܹܐ ܠܐ̄ܢܫܐ ܡ̣ܢ ܛܘܿܥܝܲ
                 88 ܠܝܲܕ ܥܬܐ ܕܚܲܝܹ̈ܐ ܕܐܵܘܒܸܕܘ.
                 89 :ܠܟܐܒܹ̈ܐ ܕܦܲܓܼܪܵܐ ܡܲܐܣܹܐ ܗ̄ܘ̣ܵܐ
                 90 ܕܠܵܐ ܣܲܡܡܵܢܹ̈ܐ ܐ̄ܢܵܫܝܹ̈ܐ.
                 91 :ܘܡܘܼܡܹ̈ܐ ܕܢܲܦܫܵܐ ܡܕܲܟܹܐ ܗ̄ܘ̣ܵܐ
                 92 ܒܚܲܝܠܵܐ ܕܪܘܼܚܵܐ ܩܲܕܝܼܫܵܐ.
                 93 :ܒܛܝܢܐ ܡܥܲܘܪ ܒܒ̈ܬܐ
                 94 ܥܝܢܹ̈ܐ ܦܵܬܲܚ ܕܣܲܡܵܝ̈ܐ.
                 95 :ܘܡ̣ܢ ܢܲܚ̈ܬܹܐ ܕܥܲܠ ܗܲܕܡܵܘ̈ܗܝ
                 96 :ܡܡܲܚܬܐ ܩܢܬ̤ ܚܘܼܠܡܵܢܵܐ
                 97 :ܝܲܗ̄ܒ̣ ܠܲܚܓܼܝܼܪܹ̈ܐ ܗܲܕܡܹ̈ܐ
                 98 ܘܠܡܫܪ̈ܝܐ ܗܠܪܬܹ̈ܐ.
                 99 :ܘܦܬܲܚ ܐܸܕܢܹ̈ܐ ܣܟܝܼܪ̈ܵܬܐ
                 100 ܘܨܵܬܼ ܚܲܠܝܘܼܬܵܐ ܕܦܸܬܓܵܡܵܘ̈ܗܝ.
                 101 :ܠܟܸܐܒܹ̈ܐ ܓܠ̈ܝܐ ܪܵܕܸܦ ܗ̄ܘ̣ܵܐ
                 102 ܘܚܵܘܒܹ̈ܐ ܟܣܲܝܵ̈ܐ ܡܲܐܣܹܐ ܗ̄ܘ̣ܵܐ.
                 103 :ܘܒܓܠܝ̈ܬܐ ܡܚܵܬܹܐ ܗ̄ܘ̣ܵܐ
                 104 ܕܫܲܠܝܼܛ ܗ̄ܘ̣ ܥܲܠ ܟܲܣܝ̈ܬܐ.
                 105 ܠܡܵܘܬܵܐ ܒܩܵܠܵܐ ܦܲܩܕ ܗ̄ܘ̣ܵܐ: 

                 f.148r 

                 106 :ܕܢܦܢܹܐ ܠܡܝܼ̈ܬܹܐ ܕܒܼܠܥ
                 107 :ܘܲܒܼܚܘܼܬܵܡܵܐ ܕܦܸܬܼܓܵܡܵܘ̈ܗܝ
                 108 ܡܝܼ̈ܬܐ ܠܚ̈ܝܐ ܦܵܢܹܝܢ ܗ̄ܘ̣ܵܘ.
                 109 :ܡܝ̈ܬܐ ܠܬܵܬܼܵܐ ܕܐܸܬܼܢܚܲܡܘ
                 110 ܣܵܗܕܹ̈ܐ ܗܘ̤ܘ ܠܹܗ ܫܲܪܝܼܪܹ̈ܐ.
                 111 :ܟܲܕ ܩܵܠܹܝܢ ܥܲܠ ܢܘܼܚܵܡܵܐ
                 112 ܕܡܼܟܹܝܠ ܡܵܘܬܵܐ ܒܵܛܹܠ ܠܹܗ.
                 113 :ܠܕܲܝܘܹ̈ܐ ܒܡܸܠܬܹܗ ܪܵܕܹܦ ܗ̄ܘ̣ܵܐ
                 114 ܕܲܢܫܲܢܘܿܢ ܡ̣ܢ ܥܘܼܡܪ̈ܲܝܗܘܿܢ.
                 115 :ܟܲܕ ܩܵܥܹܝܢ ܠܹܗ ܡܵܪ̈ܘܿܕܹܐ
                 116 ܕܠܵܐ ܢܫܲܢܸܩ ܠܲܢ ܒܲܪܕܘܝܼܕ.
                 117 :ܐܵܦ ܗܸܢܘܿܢ ܟܲܕܼ ܠܵܐ ܨܵܒܹܝܢ
                 118 ܩܲܕܸܡܘ ܐܲܟܼܪܸܙܘ ܫܘܼܠܛܵܢܹܗ.
                 119 :ܕܲܥܬܝܼܕ ܕܢܸܬܿܬܿܒܲܥ ܟܲܣܝ̈ܬܐ
                 120 ܒܕܝܼܢܐ ܟܹܐܢܵܐ ܕܒܘܼܚܵܪܢܹܗ.
                 121 :ܒܚܘܼܠܡܵܢܵܐ ܕܦܲܓܼܪܵܐ ܚܵܘܝܼ
                 122 ܕܐܵܦ ܚܵܘܒܹ̈ܐ ܕܐ̄ܢܵܫܵܐ ܡܲܐܣܹܐ.
                 123 :ܘܲܒܼܗܝܼ̈ܬܐ ܬܠܬܵܐ ܕܐܩܝܼܡ
                 124 ܩܝܵܡܬܼܵܐ ܐܲܟܼܪܸܙ ܠܲܫܒܼܝܼܪܹ̈ܐ.
                 125 :ܒܕܲܝܘܹ̈ܐ ܕܪܕܦ ܡ̣ܢ ܐ̄ܢܫܐ
                 126 ܫܪ̣ܵܝܗܝ ܠܫܘܼܠܛܵܢܹܗ ܕܢܲܟܼܝܼܠܵܐ.
                 127 :ܘܐܲܦܢܝܼ ܫܒܝܼܬܹܗ ܕܫܲܒܵܝܵܐ
                 128 ܒܐ̄ܢܵܫܵܐ ܕܐܲܥܕܝܼ ܡ̣ܢ ܐܝܼܕܵܘ̈ܗܝ.
                 129 :ܩܥܵܐ ܚܲܣܵܡܵܐ ܘܐܸܬܼܡܲܪܡܲܪ
                 130 ܘܐܲܙܥܸܩ ܘܐܲܝܸܠܸܠ ܒܲܒܼܟܼܵܬܼܵܐ.
                 131 :ܕܓܢ̄ܒܿܪܵܐ ܢܦܲܩ ܠܲܩܪܵܒܼܵܐ
                 132 ܕܢܥܕܹܐ ܫܒܝܼܬܹܗ ܕܫܲܒܵܝܵܐ.
                 133 :ܟܲܢܸܫ ܚܲܝܠܵܐ ܕܫܘܼܠܛܵܢܹܗ
                 134 ܛܪܘܼܢܵܠ ܠܘܩܒ̣ܵܠ ܙܲܟܵܝܵܐ.
                 135 :ܟܲܕ ܣܒ̇ܪ ܗ̄ܘ̣ܵܐ ܕܚܵܣܸܢ ܠܹܗ
                 136 ܒܝܲܕܼ ܡܵܘܬܐ ܠܡܲܚܹܐ ܡܝܼ̈ܬܹܐ.
                 137 :ܒܲܩܪܵܒܼܵܐ ܕܠܘܼܩܒܼܵܠ ܐܵܕܼܵܡ
                 138 ܚܸܘܝܵܐ ܠܒܸܫ ܙܲܝܢܵܐ ܘܐܲܩܪܸܒܼ.
                 139 :ܘܗܵܫܵܐ ܠܘܼܩܒܵܠ ܦܪܘܿܩܲܢ
                 140 ܒܐܵܕܼܵܡ ܐܲܩܪܸܒܼ ܥܲܡ ܐܵܕܼܵܡ.
                 141 :ܒܢܲܝ̈ ܐܲܒܼܪܗܵܡ ܕܐܸܬܚܲܪܲܪܘ
                 142 ܡ̣ܢ ܥܲܒܼܕܘܼܬܼܵܐ ܕܡܸܨܪ̈ܝܹܐ.
                 143 :ܙܝܼܢܵܐ ܗܘ̤ܵܘ ܠܹܗ ܠܲܢܟܼܝܼܠܵܐ
                 144 ܘܲܠܒܸܫ ܘܐܲܩܪܸܒܼ ܥܲܡ ܡܵܪܲܢ.
                 145 :ܒܥܹܐܕܵܐ ܕܦܸܨܚܵܐ ܫܓܼܫ ܐܸܢܘܿܢ
                 146 ܛܪܘܢܐ ܠܦܠܚ̈ܐ ܕܓܼܒܼܐ ܠܹܗ.
                 147 :ܕܲܢܣܲܝܥܘܼܢܵܝܗܝ ܡܲܪ̈ܚܹܐ
                 148 ܒܝܲܕܼ ܣܲܝ̈ܦܹܐ ܕܠܫܵܢܲܝ̈ܗܘܿܢ.
                 149 :ܦܲܥ̈ܠܹܐ ܗܘ̣ܘ ܠܹܗ ܠܲܢܟܝܼܠܵܐ
                 150 ܒܢܲܝ̈ ܐܵܪܲܡ ܠܘܼܩܒܼܵܠ ܐܵܕܼܵܡ.
                 151 :ܘܫܲܡܠܝܼ ܪܸܓܼܬܹܗ ܒܐܝܼܕܲܝ̈ܗܘܿܢ
                 152 ܐܲܝܟ ܕܒܚܘܝܵܐ ܠܘܵܬ ܐܵܕܼܵܡ.
                 153 :ܠܵܘ ܕܝܼܠܹܗ ܗ̄ܘ̣ܵܐ ܨܒܼܝܵܢܵܐ
                 154 ܕܒܥܹܕܵܐ ܢܸܣܥܹܐ ܠܩܸܛܠܵܐ.
                 155 :ܡܫܝܼܚܵܐ ܫܲܡܠܝܼ ܒܲܥܒܼܵܕܵܐ
                 156 ܡܕܿܒܼܪܵܢܘܼܬܵܐ ܕܐ̄ܢܵܫܘܼܬܹܗ.
                 157 :ܒܥܹܐܕܵܐ ܝܲܗ̣ܒܼ ܢܲܦܫܹܗ ܠܕܒܸܚܵܐ
                 158 ܕܢܸܚܙܘܿܢ ܡܵܘܬܹܗ ܣܲܓܼܝ̈ܐܹܐ.
                 159 :ܕܡܵܐ ܕܡܸܬܼܢܲܚܲܡ ܡ̣ܢ ܩܲܒܼܪܵܐ
                 160 ܢܸܗܘܘܿܢ ܣܵܗܕ̈ܐ ܕܢܘܼܚܵܡܹܗ.
                 161 :ܠܕܒܼܚܵܐ ܕܦܸܨܚܵܐ ܐܸܬܛܲܝܲܒܼ
                 162 ܐܸܡܪܹܗ ܚܲܝܵܐ ܕܐܲܠܵܗܵܐ.
                 163 :ܕܒܝܲܕܼ ܕܒܼܚܵܐ ܕܲܩܢܘܿܡܹܗ
                 164 ܢܪܥܐ ܠܥܠܡܵܐ ܥܲܡ ܡܵܪܹܗ.
                 165 :ܥܒܲܕ ܦܸܨܚܵܐ ܐܲܝܟ ܢܵܡܘܿܣܵܐ
                 166 ܘܓܠ̣ܐ ܒܦܸܨܚܵܐ ܥܲܠ ܦܸܨܚܹܗ.
                 167 :ܘܲܦܠܸܓܼ ܦܓܼܕܲܗ ܠܬܲܠܡܝܼܕܼܵܘ̈ܗܝ
                 168 ܪܗܒܘܢ ܚܲܝܹ̈ܐ ܠܡܝܘ̈ܬܐ.
                 169 :ܒܥܒܕܵܐ ܚܵܘܝܼ ܚܘܼܒܹܗ
                 170 ܒܲܪ ܐܵܕܼܵܡ ܠܲܒܢܲܝ̈ ܓܸܢܣܹܗ.
                 171 :ܕܝܼܵܗܒܹܗ ܠܦܲܓܼܪܹܗ ܡܹܐܟܘܠܬܐ
                 172 ܩܕܼܵܡ ܚܲܫܵܐ ܕܲܨܠܝܼܒܼܘܼܬܹܗ.
                 173 :ܐܸܬܢܲܒܝܼ ܥܲܠ ܕܥܬܼܝ̈ܕܵܢ
                 174 ܥܲܠ ܚܲܫܹܗ ܘܥܲܠ ܡܘܼܟܵܟܹܗ.
                 175 :ܘܓܼܠܐ ܘܒܲܕܸܩ ܥܲܠ ܢܸܟܼܠܹܗ
                 176 ܕܝܼܗܘܼܕܵܐ ܡܫܠܸܡ ܪܲܒܹܗ.
                 177 :ܒܚܲܝܵܠܐ ܕܪܘܼܚܵܐ ܐܸܬܿܥܲܙܲܙ
                 178 ܥܲܠ ܒܝܼܫܘܼܬܹܗ ܕܡܲܪܵܚܵܐ.
                 179 :ܕܠܵܐ ܦܸܟܗܲܬ̤ ܡܲܪܝܼܪܘܼܬܹܗ
                 180 ܒܚܲܠܝܘܼܬܗ ܕܐ̄ܪܵܙܵܐ ܕܢܲܣܲܒܼ.
                 181 :ܥܒܼܕܹܗ ܒܐ̄ܪܙܵܐ ܫܵܘܬܵܦܵܐ
                 182 ܘܠܵܐ ܦܵܫ ܡ̣ܢ ܪܸܢܝܹܗ ܕܩܸܛܠܵܐ.
                 183 :ܐܲܫܝܼܓ ܪܸ̈ܓܼܠܵܘܗܝ ܡܲܚܹܐ ܟܠ
                 184 ܘܠܵܐ ܐܬܟܚܲܕ ܛܵܠܘܿܡܵܐ.
                 185 :ܝܵܕܲܥ ܗ̄ܘ̣ܵܐ ܠܹܗ ܠܲܢܟܼܝܼܠܵܐ
                 186 ܩܕܼܵܡ ܓܲܒܼܝܘܼܬܹܗ ܕܩܛܘܿܠܵܐ ܗ̄ܘ̣.
                 187 :ܘܛܲܠܢܹܗ ܒܚܘܼܒܹܗ ܒܲܣܝܼܡܵܐ
                 188 ܘܠܵܐ ܦܲܪܣܝܼ ܠܢܟܼܝܼܠܘܼܬܹܗ.
                 189 :ܒܠܸܠܝܵܐ ܢܦܲܩ ܗ̄ܘ̣ܵܐ ܙܹܐܦܵܢܵܐ
                 190 ܕܢܫܠܡ ܪܲܒܹܗ ܠܡܲܪ̈ܵܚܹܐ.
                 191 :ܕܢܟܼܝܼܠܵܐ ܡܲܪܗܼܒܼ ܗ̄ܘ̣ܵܐ ܠܹܗ
                 192 ܕܢܸܓܼܡܘܿܪ ܒܐܝܼܕܵܘ̈ܗܝ ܨܒܼܝܵܢܹܗ: 

                 f.148v 

                 193 :ܪܓܼܝܼܓܼ ܗ̄ܘ̣ܵܐ ܠܩܛܠܹܗ ܚܣܵܡܵܐ
                 194 ܩܕܲܡ ܝܵܘܡܵܐ ܕܝܼܠܝܼܕܘܼܬܹܗ.
                 195 :ܘܒܝܗܘܼܕܵܐ ܐܲܝܟ ܡܨܥܝܵܐ
                 196 ܐܲܝܬܝܼ ܠܓܸܠܝܵܐ ܬܲܪܥܝܼܬܹܗ.
                 197 :ܗܘ̤ܵܐ ܝܗܘܼܕܵܐ ܐܲܝܟ ܐܲܝܟ ܐܝܼܙܓܲܕܵܐ
                 198 ܠܐܵ ܟܼܠܩܲܪܨܵܐ ܚܲܣܡܵܐ.
                 199 :ܘܫܲܕܪܹܗ ܠܟܸܢܫܵܐ ܕܡܲܪ̈ܚܹܐ
                 200 ܕܢܨܘܕܘܢ ܚ̈ܝܐ ܠܡܵܘܬܐ.
                 201 :ܒܛܝܼ̈ܡܹܐ ܙܲܒܼܢܹܗ ܓܲܢܵܒܵܐ
                 202 ܠܙܵܒܸܢ ܥܵܠܡܹ̈ܐ ܡ̣ܢ ܡܵܘܬܵܐ.
                 203 :ܫܩ݂ܲܠ ܛܝܼܡܵܘ̈ܗܝ ܡܲܚܢܘܼܩܝܼܬܐ
                 204 ܘܙܲܒܸܢ ܚܲܝܹ̈ܐ ܠܒܹܝܬܼ ܡܝܼ̈ܬܐ.
                 205 :ܐܘ ܡܙܒ̇ܢ ܚ̈ܝܐ ܠܡܵܘܬܵܐ
                 206 ܕܠܵܐ ܚܵܫܸܒ ܘܐܟܢ ܙܒܢ.
                 207 :ܝܲܗ̣̄ܒ ܡܘܗܲܒܼܬܵܐ ܕܠܵܐ ܦܸܚܡܵܐ
                 208 ܘܲܫܩܲܠ ܛܝܼܡܹ̈ܐ ܙܠܝܠܐ.
                 209 :ܒܬܠܬܝܼܢ ܕܟܸܣܦܵܐ ܘܲܒ̇ܢܹܗ
                 210 ܠܲܡܚܲܪܪܵܢܹܗ ܕܟܼܝܼܵܢܲܢ.
                 211 :ܘܫܠܡܲܬ̤ ܡܸܠܬܹܗ ܕܢܒܝܼܵܐ
                 212 ܕܚ̣ܙܵܐ ܒܪܘܼܚܵܐ ܩܕܼܵܡ ܕܵܪܹ̈ܐ.
                 213 :ܫܲܡܠܝܼ ܟܠܗܹܝܢ ܒܲܩܢܘܿܡܹܗ
                 214 ܡܲܚܹܐ ܟܠ ܡܸܛܠ ܟܠܐ.
                 215 :ܘܐܸܬܼܢܲܒܝܼ ܥܲܠ ܡܘܼܟܵܟܹܗ
                 216 ܘܥܲܠ ܨܒܼܝܵܢܵܐ ܕܬܲܠܡܝܼܕܵܘ̈ܗܝ.
                 217 :ܟܠܟܼܘܿܢ ܠܲܡ ܡܬܟܫܠܝܼܢ ܐ̄ܢܬܘܿܢ
                 218 ܡܵܐ ܕܲܩܪܸܒܼ ܙܲܒܼܢܵܐ ܕܚܲܫܵܐ.
                 219 :ܘܫܵܒܼܩܝܼܬܘܿܢ ܠܝܼ ܒܲܠܚܘܿܕܲܝ
                 220 ܘܠܵܐ ܡܥܲܙܝܼܬܘܿܢ ܒܐܘܼܠܨܢܲܝ̈.
                 221 :ܒܚܘܼܒܹܗ ܫܸܡܥܘܿܢ ܐܸܫܬܲܒܼܗܲܪ
                 222 ܘܲܠܚܵܬܿ ܡܵܪܲܢ ܐܡ̣ܪ ܗ̄ܘ̣ܵܐ.
                 223 :ܕܠܵܐ ܡܸܡܬܘܿܡ ܟܵܦܪ ܐ̄ܢܵܐ ܒܵܟ
                 224 ܘܠܵܐ ܡܲܫܦܸܠ ܐ̄ܢܵܐ ܩܕܼܵܡ ܚܲܫܹ̈ܐ.
                 225 :ܒܲܐܡܹܝܢ ܚܲܬܸܡ ܡܚܐ ܟܠ
                 226 ܠܘܵܬܼ ܫܘܼܒܵܗ̇ ܪܹܗ ܕܚܲܡܝܼܡܵܐ.
                 227 :ܕܲܬܠܵܬܼ ܙܲܒܼܢܝܼܢ ܡܬܪܦܐ ܐܲܢ̄ܬ
                 228 ܒܟܼܦܘܪܝܵܐ ܒܥܸܕܲܢ ܚܲܫܹ̈ܐ.
                 229 :ܚܵܘܝܼ ܐܸܢܘܿܢ ܠܬܿܠܡܝܼܕܵܘ̈ܗܝ
                 230 ܕܚܲܫܵܐ ܒܨܒܝܵܢܹܗ ܣܒ̇ܠ.
                 231 :ܘܠܵܐ ܗ̄ܘ̣ܵܐ ܩܛܝܼܪܵܬ ܥܵܨܐ ܠܹܗ
                 232 ܠܘܵܬܼ ܡܘܼܟܵܟܹܗ ܕܲܨܠܝܼܒܼܵܐ.
                 233 :ܩܘܡܘ ܠܲܡ ܢܵܐܙܲܠ ܐܸܡܲܪ ܗ̄ܘ̣ܵܐ
                 234 ܟܲܕ ܩܪܸܒܼ ܠܹܗ ܙܒܼܢܵܐ ܕܚܲܫܵܐ.
                 235 :ܟܲܕ ܡܘܼܕܲܥ ܕܲܒܼܨܒܝܵܢܹܗ
                 236 ܝ̇ܗܒ ܢܲܦܫܹܗ ܠܐܚܘܼܪ̈ܘܗܝ.
                 237 :ܢܦ݂ܲܩ ܕܢܨܠܹܐ ܒܲܠܚܘܿܕܵܘܗܝ
                 238 ܘܲܕܒܲܪ ܥܲܡܹܗ ܠܬܲܠܡܝܼܕܵܘ̈ܗܝ.
                 239 :ܕܒܲܨܠܘܿܬܹܗ ܢܲܐܠܸܦ ܐܸܢܘܿܢ
                 240 ܕܚܵܫܚܝܢ ܪ̈ܲܚܡܹܐ ܒܐܘܼܠܨܵܢܵܐ.
                 241 :ܬܠܵܬ ܙܲܒܼܢܝܼ̈ܢ ܨܠܝܼ ܒܚܲܫܵܐ
                 242 ܘܗܵܕܹܐ ܐܸܡ݂ܪ ܒܲܨܠܘܿܬܹܗ.
                 243 :ܕܐܸܢܗܘ̤ ܕܡܵܨܝܵܐ ܠܵܐ ܐܸܫܬܝܼܘܗܝ
                 244 ܠܟܵܣܹܗ ܕܡܵܘܬܵܐ ܒܵܠܘܿܥܵܐ.
                 245 :ܒܚܲܫܵܐ ܨܲܠܝܼ ܦܵܘܿܩܲܢ
                 246 ܩܕܼܵܡ ܚܲܫܹܗ ܐܲܝܟ ܚܵܫܘܿܫܵܐ.
                 247 :ܘܩܸܛܪܬ̤ ܕܘܼܥܬܼܵܐ ܕܗܲܕܵܡܵܘ̈ܗܝ
                 248 ܡ̣ܢ ܣܘܼܪܵܕܹܗ ܕܨܲܒܝܼܒܼܵܐ.
                 249 :ܐܸܬܼܚܘܝܼ ܠܹܗ ܡ̣ܢ ܫܡܲܝܵܐ
                 250 :ܡܠܐܟܼܵܐ ܕܡܝܲܚܠ ܠܹܗ
                 251 :ܕܠܵܐ ܢܫܦܠ ܒܹܗ ܒܐܓܼܘܿܢܵܐ
                 252 ܕܙܟܼܘܬܵܐ ܢܵܣܸܒܼ ܡܸܢܹܗ.
                 253 :ܒܩܵܠܹ̈ܐ ܕܡܠܹܝܢ ܠܘܼܒܵܒܼܵܐ
                 254 ܡܚܲܝܸܠ ܗ̄ܘ̣ܵܐ ܠܹܗ ܡܠܐܟܼܵܐ.
                 255 :ܪܘ[...]ܐ ܕܟܵܣܹܗ ܕܡܘܬܼܵܐ ܝ̇ܒܗ ܠܵܟ
                 256 ܟܠܝܼܠܵܐ ܒܵܬܼܪܸ ܙܵܟܘܿܬܵܟ.
                 257 :ܠܵܐ ܬܲܫܦܸܠ ܒܡܚ̈ܠܬܐ
                 258 ܒܸܣܪܢܵܐ ܓܸܢܣܹܗ ܕܐܵܕܼܵܡ.
                 259 :ܕܠܲܫܒܝܼܚ̈ܬܐ ܡܩܲܪܸܒ ܠܵܟ
                 260 ܨܠܝܼܒܵܐ ܒܫܘܼܠܵܡ ܐܵܓܘܿܢܵܟ.
                 261 :ܣܲܝܒܵܪ ܚܲܫܹ̈ܐ ܚܵܫܘܿܫܵܐ
                 262 ܘܐܸܫܬܝܼ ܟܵܣܵܠ ܕܒܹܝܬܼ ܐܵܕܼܵܡ.
                 263 :ܕܠܲܪܘܡܵܐ ܡܸܬܥܲܠܹܐ ܐܲܢ̄ܬܿ
                 264 :ܒܵܬܲܪ ܚܲܫܵܐ ܘܡܘܼܟܵܟܼܵܐ
                 265 :ܢܹܐܬܘܢ ܗܫܐ ܛܥ̈ܝܐ
                 266 ܐܸܘܛܸܝܟܹܐ ܘܡܢܘ̈ܬܐ.
                 267 :ܘܲܢܚܵܘܘܿܢ ܐܲܝܟ ܕܡܥܵܕܝܢ
                 268 ܨܠܘܿܬܵܐ ܘܚܲܫܵܐ ܕܡ̇ܢ ܐܸܢܘܿܢ.
                 269 :ܡܲܢܘ̣ ܕܨܲܠܝܼ ܩܕܼܵܡ ܚܲܫܵܐ
                 270 ܚܲܟܝܼܡܵܐ ܚܲܣܝܼܪ ܗܵܘܢܵܐ.
                 271 :ܘܠܲܡ̇ܢ ܚܲܝܸܠ ܪܘܼܚܵܫܵܐ
                 272 ܓܠܝܼ ܘܒܲܕܸܩ ܠܝܼ ܣܘܼܟܵܠܟ.
                 273 :ܝܵܪܲܥܢܵܐ ܐܲܝܟ ܕܡܥܕ ܐܲܢ̄ܬܿ
                 274 ܠܪܵܘܡܵܐ ܕܠܲܥ̣ܠ ܣܵܠܸܩ ܐܲܢ̄ܬܿ.
                 275 :ܘܠܐܝܼܬܝܵܐ ܡܸܠܬܼܵܐ ܕܡ̣ܢ ܐܲܒܼܵܐ
                 276 ܠܚܲܫܵܐ ܡܬܲܚܬܹܐ ܓܘܼܪܦܵܟ.
                 277 :ܐܘ ܓܘܼܢܚܐ ܕܠܵܐ ܡܸܬܡܲܠܲܠ
                 278 ܐܘ ܥܘ̣ܠܐ ܕܠܵܐ ܡܸܬܼܚܲܣܹܐ.
                 279 :ܕܚܝܼܠܵܐ ܕܐܲܚܝܼܕ ܠܲܒܼܪܝܼܬܼܵܐ
                 280 ܡܚܝܼܠܵܐ ܥܲܒܼܕܘܼܗܝ ܒܐܵܓܼܘܿܢܵܐ.
                 281 :ܐܘܿ ܨܒܼܝܵܢܵܐ ܡܲܪܚܵܐ
                 282 ܕܟܼܡܵܐ ܐܲܡܪܲܚ ܘܐܸܫܠܲܥܠܝܼ.
                 283 ܕܗܘ̇ ܕܥܒܲܕ ܪܘܼܚ ܡܲܠܲܐܟܵܘ̈ܗܝ: 

                 f.149r 

                 284 ܡ̣ܢ ܥܝܼܪܵܐ ܡܸܬܚܲܝܲܠ ܗ̄ܘ̣ܵܐ.
                 285 :ܠܡܲܢܘ ܡܨܲܠܹܐ ܗ̄ܘ̣ܵܐ ܡܸܠܬܵܐ
                 286 ܐܘ ܕܲܓܠܝܼܙ ܡ̣ܢ [...] ܒܘܼܝܵܢܵܐ.
                 287 :ܕܫܘܼܠܛܵܢܵܐ ܩܢܐ ܒܐܝܼܬܘܼܬܵܐ
                 288 ܒܲܕܡܘܼܬܼ ܐܲܒܼܵܐ ܝܵܠܘܿܕܹܗ.
                 289 :ܐܲܝܟܵܢ ܐܲܫܠܸܦ ܡ̣ܢ ܚܲܫܹ̈ܐ
                 290 ܗܘ̇ ܚܲܝܠܵܐ ܕܛܥܝܼܢ ܛܠܵܐ.
                 291 :ܘܥܘܼܕܪܢܵܐ ܠܡ̇ܢ ܫܵܐܸܠ ܗ̄ܘ̣ܵܐ
                 292 ܗܘ̇ ܝܵܗܘܒܼܵܐ ܕܛܒ̈ܬܐ.
                 293 :ܡ̇ܢ ܣܲܝܥܹܗ ܒܒܵܪܘܿܝܘܼܬܼܵܐ
                 294 ܟܲܕ ܐܲܝܬܝܼ ܟܠ ܠܲܗܘܵܝܵܐ.
                 295 :ܕܗܵܫܵܐ ܒܚܲܫܹܗ ܕܨܲܠܝܼܫܵܐ
                 296 ܩܪ̣ܵܐ ܡܲܠܐܟܼܵܐ ܠܥܘܼܕܪܵܢܹܗ.
                 297 :ܚܡܘܠ ܓܘܼܕܦܲܝ̈ܟ ܡܲܪܵܚܵܐ
                 298 ܠܵܐ ܚܵܫܚܝܼܢ ܠܲܢ ܦܘܼܫܵܩܲܝ̈ܟ.
                 299 :ܙܪܲܥܵܐ ܗ̄ܝ̣ ܛܵܒܵܐ ܬܵܘܕܝܼܬܲܢ
                 300 ܠܵܐ ܬܸܚܠܘܿܛ ܒܵܗ̇ ܙܝܼܙܵܢܲܝ̈ܟ.
                 301 :ܠܵܐ ܬܸܬܲܚܬܹܐ ܡܸܠܬܹܗ ܕܐܲܒܼܵܐ
                 302 ܠܚܫܹ̈ܐ ܕܩܢܹܝܢ ܡܝܘܬ̈ܐ.
                 303 :ܘܠܵܐ ܬܲܣܩܝܼܘܗܝ ܠܝܼܚܝܼܕܵܝܵܐ
                 304 ܥܲܠ ܥܘܼܕܪܢܵܐ ܕܬܘܼܩܵܢܹܗ.
                 305 :ܡ̇ܢ ܡܲܠܸܠ ܐܲܝܟ ܗܵܢ ܥܘ̣ܠܵܐ
                 306 ܡ̇ܢ ܐܲܡܪܲܚ ܐܲܝܟ ܗܵܢ ܛܥܝܵܐ.
                 307 :ܕܚܲܝܠܵܐ ܡܝܲܚܸܠ ܪ̈ܘܚܫܐ
                 308 ܡܚܝܼܠܵܐ ܚܲܫܒܘܼܗܝ ܒܲܨ ܠܝܼܒܵܐ.
                 309 :ܠܵܐ ܬܛܥܘܿܢ ܐܵܘ ܡܪ̈ܚܹܐ
                 310 ܠܵܐ ܒܨܝܼܪ ܡܸܠܬܐ ܡ̣ܢ ܐܲܒܼܘܼܗܝ.
                 311 :ܘܠܵܘ ܥܘܼܕܪܢܵܐ ܫܵܐܸܠ ܗ̄ܘ̣ܵܐ
                 312 ܒܪܵܘܿܝܵܐ ܡ̣ܢ ܪܘܼܚܵܢܵܐ.
                 313 :ܦܲܓܼܪܢܵܐ ܗ̄ܘ̣ ܕܡܨܠܹܐ ܗ̄ܘ̣ܵܐ
                 314 ܕܣܢܝܼܩ ܗ̄ܘ̣ܵܐ ܥܲܠ ܥܘܼܕܪ̈ܢܵܐ.
                 315 :ܚܵܫܘܿܫܵܐ ܕܚܸܠ ܡ̣ܢ ܚܲܫܹ̈ܐ
                 316 ܕܠܘܹܝܢ ܚܲܫܹ̈ܐ ܠܲܟܼܝܵܢܹܗ.
                 317 :ܒܲܪ ܓܸܢܣܲܢ ܡܸܬܟܲܫܲܦ ܗ̄ܘ̣ܵܐ
                 318 ܚܠܵܦ ܢܲܦܫܹܗ ܘܟܢܘ̈ܬܐ.
                 319 :ܕܝ̇ܕܲܥ ܗ̄ܘ̣ܵܐ ܕܚܵܫܲܓ ܗ̄ܘ̣ܵܐ ܠܹܗ
                 320 ܥܘܼܕܪܵܢܵܐ ܒܥܸܕܵܢ ܚܲܫܵܐ.
                 321 :ܗܘ̤ܝܘ ܕܲܕܼܚܸܠ ܡ̣ܢ ܚܲܫܵܐ
                 322 :ܕܚ̣ܙܵܐ ܟܝܵܢܹܗ ܕܡܵܝܘܬܵܐ ܗ̄ܘ̣
                 323 :ܘܥܲܠ ܗܵܕܹܐ ܡܚܲܝܸܠ ܗ̄ܘ̣ܵܐ ܠܹܗ
                 324 ܡܠܐܟܼܵܐ ܒܥܸܕܵܬ ܚܲܫܵܐ.
                 325 :ܒܫܲܪܵܪܵܐ ܨܲܠܝܼ ܘܲܕܚܸܠ
                 326 ܘܠܵܘ ܒܐܣܟܹܝܡܵܐ ܫܐܝܼܠܵܐܹܝܬ.
                 327 :ܘܒܲܫܪܵܪܵܐ ܡܚܲܝܸܠ ܗ̄ܘ̣ܵܐ ܠܹܗ
                 328 ܡܲܠܲܐܟܵܐ ܐܲܝܟ ܕܠܐ ܠܹܝܛܵܐ.
                 329 :ܐܸܢ ܠܵܘ ܒܲܫܪܵܪܵܐ ܨܠܝܼ
                 330 ܡܵܕܹܝܢ ܠܵܐ ܗ̄ܘ̣ܵܐ ܒܲܪܢܵܫܵܐ ܗ̄ܘ̣.
                 331 :ܒܲܛܝܼܠ ܡܵܕܹܝܢ ܬܘܼܟܠܵܢܲܢ
                 332 :ܠܵܐ ܬܛܲܒܥܘܼܢܵܝܗܝ ܡܲܪ̈ܚܹܐ
                 333 ܠܲܟܼܝܢܲܢ ܒܗܵܘܬܵܐ ܕܡܵܘܬܐ.
                 334 :ܫܒܘܩܘ ܡܸܬܪܡܪܲܡ ܕܝܼܚܝܲܢ
                 335 ܒܐܲܝܼܩܵܪܵܐ ܥܲܡ ܒܲܪ ܓܸܢܣܲܢ.
                 336 :ܨܠܝܼ ܒܚܲܫܵܐ ܚܵܫܘܿܫܵܐ
                 337 ܘܩܲܒܸܿܠ ܐܝܼܬܝܵܐ ܒܵܥܘܿܬܹܗ.
                 338 :ܘܐܲܫܠܸܡ ܢܲܦܫܹܗ ܠܐ ܚܘܿܕܘ̈ܗܝ
                 339 ܕܢܫܡܠܹܐ ܠܒ̇ܕܐ ܕܐܲܒܼܘܼܗܝ.
                 340 :ܡܛܠܝܼ ܟܸܢܫܵܐ ܕܡܲܪ̈ܚܹܐ
                 341 ܘܝܗܘܼܕܵܐ ܐܲܝܟ ܗܕܚ̣ܐ.
                 342 :ܘܩܪܒ ܘܫܠܡܗ ܠܚܢܢܐ
                 343 ܘܢܲܫܩܹܗ ܢܟܝܼܠܐ ܠܒܲܣܝܼܡܵܐ.
                 344 :ܐܘܿ ܬܲܠܡܝܼܕܵܐ ܙܹܐܦܵܢܵܐ
                 345 ܐܘܿ ܪܵܚܡܵܐ ܕܲܢܟܝܼܠ ܚܘܼܒܹܗ.
                 346 :ܕܛܲܥܝܼܢ ܣܲܝܦܲܐ ܒܪܸܥܝܵܢܹܗ
                 347 ܘܒܣܦܘ̈ܬܹܗ ܢܘܼ̈ܫܩܵܬܵܐ.
                 348 :ܥܲܠ ܗܝ̇ ܕܐܝܬܝܬ ܐܡ̣ܪ ܠܹܗ
                 349 ܕܩܪ̣ܝܗܝ ܪܚܡܐ ܟܲܕܲܒܼܵܐ.
                 350 :ܣܥܘܿܪ ܨܒܼܝܵܢܵܟ ܡܲܪܵܚܵܐ
                 351 ܡ̇ܢ ܢܫܸܩ ܐܲܢ̄ܬܿ ܠܝܼ ܒܐܣܟܹܡܵܐ.
                 352 :ܒܢܘܿܫܩܬܐ ܠܲܡ ܡܲܫܠܸܡ ܐܲܢ̄ܬܿ ܠܝܼ
                 353 ܬܲܠܡܝܼܕܵܐ ܡܙܲܒܸܢ ܪܲܒܹܗ.
                 354 :ܠܡܵܢܵܐ ܡܟܲܣܹܐ ܐܲܢ̄ܬܿ ܒܲܫܠܵܡܵܐ
                 355 ܣܲܝܦܵܐ ܠܛܝܼܫܵܐ ܕܪܥܝܟܟ.
                 356 :ܠܡ̇ܢ ܒܵܥܹܝܢ ܐ̄ܢܬܘܿܢ ܐܡ̣ܪ ܗ̄ܘ̣ܵܐ
                 357 ܒܗܝܼܠܵܐ ܠܟܸܢܫܵܐ ܕܡܪ̈ܚܹܐ.
                 358 :ܘܐܲܪܡܝܼ ܐܸܢܘܿܢ ܥܲܠ ܐܲܪܥܵܐ
                 359 ܕܲܢܚܵܘܹܐ ܚܹܝܠ ܪܲܒܘܼܬܹܗ.
                 360 :ܣܝܦ̈ܐ ܫܩܲܠܘ ܗ̄ܘ̣ܵܘ ܬܲܠܡܝܼܕܹ̈ܐ
                 361 ܕܚܙ̣ܵܘ ܕܣܥ̣ܘ[...] ܡܲܪ̈ܵܚܹܐ.
                 362 :ܘܪܬܲܚ ܫܸܡܥܘܿܢ ܒܲܛܢܵܢܵܐ
                 363 ܐܲܝܟ ܕܢܫܠܸܡ ܫܘܼܘܕܵܝܹܗ.
                 364 :ܒܐܸܕܢܵܐ ܕܦܣܲܩ ܣܒ̇ܪ ܗ̄ܘ̣ܵܐ
                 365 ܕܡܫܡܠܹܐ ܚܘܼܒܵܐ ܕܪܲܒܹܗ.
                 366 :ܘܐܦ ܝ̇ܕܥ ܟܠ ܦܲܢܝܼ ܠܹܗ
                 367 ܕܟܲܕܘܿ ܣܦܸ̇ܩ ܥܘܼܕܪܵܢܵܟ.
                 368 :ܚܵܘܝܼ ܚܘܼ ܒܹܗ ܒܲܣܝܼܡܵܐ
                 369 ܐܲܝܟ ܕܦܲܐܹܐ ܗ̄ܘ̣ܵܐ ܠܡܹܐܬܝܼܬܹܗ.
                 370 :ܘܣܵܡܲܗ̇ ܠܹܐܕܢܵܐ ܒܪܸܫ ܓܘܼܫܡܵܐ
                 371 ܘܠܵܐ ܒܗܸܬ ܟܹܢܫܵܐ ܕܡܲܪ̈ܚܹܐ.
                 372 :ܠܒܹܝܬ ܕܝܼܢܵܐ ܢܲܓܼܕܘܼܗܝ ܘܐܸܙܲܠ
                 373 :ܕܢܸܫܬܐ ܐܲܝܟ ܚܲܝܵܒܼܵܐ
                 374 ܘܫܲܒܼܩܘܼܗܝ ܘܲܥܪܲܩܘ ܬܲܠܡܝܼܕܼܵܘ̈ܗܝ: 

                 f.149v 

                 375 ܘܠܵܐ ܩܵܘܝܼܘ ܥܲܡܹܗ ܒܚܲܫܵܐ.
                 376 :ܫܸܡܥܘܿܢ ܒܵܬܪܹܗ ܐܙ̇ܠ ܗ̄ܘ̣ܵܐ
                 377 ܕܢܚܙܹܐ ܚܲܪܬܵܐ ܕܫܘܼܐܵܠܹܗ.
                 378 :ܓܲܪܓܹܗ ܚܘܼܒܹܗ ܠܛܢܢܐ
                 379 ܘܥ݂ܲܠ ܥܲܡ ܪܲܒܹܗ ܠܒܹܝܬܼ ܕܝܢܵܐ.
                 380 :ܫܲܐܠܘܼܗܝ ܕܲܚ̈ܫܹܐ ܠܬܲܡܝܼܡܵܐ
                 381 ܕܠܡܵܐ ܐܵܦ ܐܲܢ̄ܬܿ ܬܲܠܡܝܼܕܵܐ ܐܲܢ̄ܬܿ.
                 382 :ܘܩܝܬ̤ ܗ̄ܘ̣ܵܬ ܚܲܡܝܼܡܘܼܬܹܗ
                 383 ܘܛܥ̣ܐ ܠܟܼܠܗܘܿܢ ܫܘܼܘܕܵܝܵܘ̈ܗܝ.
                 384 :ܚܲܫܵܐ ܕܡܵܘܬܵܐ ܐܲܙܝܼܥܹܗ
                 385 ܠܗܘ̇ ܪܹܫܵܐ ܕܲܬܪܹܥܣܲܪܬܵܐ.
                 386 :ܘܐܸܬܪܦܝܼ ܘܚܵܒܼ ܨܒܼܝܵܢܹܗ
                 387 ܒܟܦܘܼܪܝܵܐ ܕܬܲܠܵܬܼ ܙܲܒܼܢܝܼ̈ܢ.
                 388 :ܒܨܲܦܪܵܐ ܚܵܪܒܹܗ ܦܪܘܿܩܲܢ
                 389 ܟܲܕ ܢ̇ܦܸܩ ܡ̣ܢ ܒܹܝܬ ܕܝܼܢܵܐ.
                 390 :ܘܒܲܚܝܵܪܹܗ ܡܲܟܸܣ ܗ̄ܘ̣ܵܐ ܠܹܗ
                 391 ܕܐܲܝܟܵܘ ܚܘܼܬܪܵܟ ܛܲܢܵܢܵܐ.
                 392 :ܐܸܬܬܲܢܲܚ ܫܸܡܥܘܿܢ ܘܲܒܼܕܵܐ
                 393 ܕܥܲܗܕܹܗ ܪܲܒܹܗ ܫܘܼܘܕܵܝܹܗ.
                 394 :ܕܐܸܫܬܵܘܕܝܼ ܕܠܵܐ ܟܦ̇ܪ ܐ̄ܢܵܐ
                 395 ܘܝܼܡܵܐ ܕܠܵܐ ܝܵܕܲܥ ܐܲܢ̄ܐ ܠܹܗ.
                 396 :ܠܵܐ ܐܩܨ ܠܗ ܣܲܟܼܠܘܼܬܼܵܐ
                 397 ܪܲܒܵܐ ܠܪܹܫܵܐ ܕܬܲܠܡܝܼ̈ܕܹܐ.
                 398 :ܕܥܲܠ ܗ̇ܝ ܫܲܒܼܩܹܗ ܕܢܬܪܦܹܐ
                 399 ܕܬܣܲܒܼ ܡܸܠܬܹܗ ܫܘܼܠܵܡܵܐ.
                 400 :ܪܸܫ ܒܸܢܝܵܢܵܐ ܕܝܘܼܠܦܵܢܹܗ
                 401 ܣܵܡܹܗ ܠܪܹܫܵܐ ܕܲܫܠܝܼܚ̈ܐ.
                 402 :ܘܒܟܦܘܪܝܹܗ ܘܲܬܼܘܵܬܼ ܢܲܦܫܹܗ
                 403 ܕܪܲܫ ܒܹܗ ܐܘܼܪܚܵܐ ܠܐܒܝܼ̈ܕܹܐ.
                 404 :ܩܕܼܵܡ ܦܝܼܠܛܘܿܣ ܐܲܩܝܼܡܘܼܗܝ
                 405 ܠܙܲܟܵܝܵܐ ܐܲܝܟ ܚܲܝܵܒܼܵܐ.
                 406 ܟܲܕ ܫܵܓܼܫܝܼܢ ܠܹܗ ܠܕܝ̇ܢܐ
                 407 ܕܡܲܠܟܘܼܬܼܵܐ ܨܒܼܵܐ ܕܢܸܚܛܘܿܦ ܠܹܗ.
                 408 :ܘܥܲܠ ܗܵܕܹܐ ܡܫܲܐܸܠ ܗ̄ܘ̣ܵܐ ܠܹܗ
                 409 ܦܝܼܠܵܛܘܿܣ ܟܲܕܼ ܕܵܐܸܢ ܠܹܗ.
                 410 ܕܐܸܢ ܡܲܠܟܵܐ ܐܲܢ̄ܬ ܐܲܝܟ ܕܐܸܡ݂ܲܪܘ.
                 411 ܒܢܲܝ̈ ܥܵܡܵܟ ܘܲܟܼܢܵܘܵܬ̈ܟ.
                 412 :ܠܵܐ ܕܹܝܢ ܦܲܢܝܼ ܦܸܬܼܓܼܵܡܵܐ
                 413 ܕܫܬܩܵܐ ܦܐܹܐ ܗ̄ܘ̣ܵܐ ܠܡܘܼܟܵܟܹܗ.
                 414 :ܕܬܫܠܡ ܡܸܠܬܹܗ ܒܥ̇ܒܕܐ
                 415 ܕܠܵܐ ܦܬܲܚ ܦܘܼܡܹܗ ܒܡܡܟܹܗ.
                 416 :ܩܕܼܵܡ ܦܝܼܠܵܛܘܿܣ ܩܵܥܹܝܢ ܗ̄ܘ̣ܵܘ
                 417 ܒܢܲܝ̈ ܐܲܒܼܪܵܗܵܡ ܛܵܠܘܿܡܹ̈ܐ.
                 418 :ܕܙܩܘܦܝܗܝ ܠܚܲܝܵܒܼ ܡܵܘܬܵܐ
                 419 ܕܫܲܓܼܫܹܗ ܠܥܲܡܲܢ ܘܐܲܙܝܼܗ.
                 420 :ܕܝ̇ܢܐ ܕܠܵܘ ܡ̣ܬ ܥܲܡܵܐ ܗ̄ܘ̣
                 421 ܙܲܕܸܩ ܘܩ̣ܥܐ ܕܙܲܟܵܝܵܐ ܗ̄ܘ̣.
                 422 :ܘܥܲܡܵܐ ܕܝܵܕܲܥ ܠܐܲܠܵܗܵܐ
                 423 ܒܙܹܐܦܵܐ ܚܲܦܝܗ̇ ܠܟܹܐܢܘܼܬܼܵܐ.
                 424 :ܩܲܒܠܘܼܗܝ ܠܕܡܹܗ ܛܵܠܘܿܡܹ̈ܐ
                 425 ܕܢܸܗܘܹܐ ܥܠܲܝܗܘܿܢ ܠܲܬܒܲܥܵܬܐ.
                 426 :ܕܠܥܝܵܪܬܵܐ ܕܩܸܛܠܹܗ ܣܵܡܡܘܼܗ̇
                 427 ܕܢܸܬܚܲܝܒܘܿܢ ܒܵܗ̇ ܝܲܠܕܲܝ̈ܗܘܿܢ
                 428 :ܐܲܫܝܼܓ ܐܝܼܕܼܵܘ̈ܗܝ ܕܝ̇ܢܐ
                 429 ܘܚܲܣܝܼ ܢܲܦܫܹܗ ܡ̣ܢ ܩܸܛܠܹܗ.
                 430 :ܘܕܲܒܼܪܘܼܗܝ ܘܲܢܦܲܩ̣ܘ ܛܵܠܘܿܡܹ̈ܐ
                 431 ܕܢܨܥܪܘܼܢܵܝܗܝ ܒܨܠܝܼܒܼܵܐ.
                 432 :ܚܘܼܫܵܒܼܵܐ ܕܢܟܼܠܵܐ ܪܵܟܸܒܘ
                 433 ܥܲܡ ܪܵܒܗܘܿܢ ܐܵܟ̇ܠܩܲܪܨܵܐ.
                 434 :ܕܒܨܠܝܼܒܼܵܐ ܫ̇ܘܹܐ ܕܢܡܘܼܬ
                 435 ܐܲܝܟ ܥܒ̇ܪ ܥܲܠ ܢܵܡܘܿܣܵܐ.
                 436 :ܥܲܡ ܓܲܝܵܣܹ̈ܐ ܐܬܪܥܝܼܘ
                 437 ܕܢ̄ܨܚ ܕܢܨܚܘܢܵܝܗܝ ܡܲܪ̈ܚܹܐ.
                 438 :ܕܟܲܕ ܚܵܝܪܝܼܢ ܒܹܗ ܚܲܙ̈ܝܹܐ
                 439 ܥܲܡ ܣܪ̈ܘܿܚܹܐ ܢܸܡܢܘܼܢܵܝܗܝ.
                 440 :ܒܪܸܫ ܩܲܝܣܵܐ ܪܲܟܸܒܘ ܩܲܒܼܥܘܼܗܝ
                 441 ܕܢܸܗܘܹܐ ܚܙܵܬܐ ܠܚܲܙ̈ܝܹܐ.
                 442 :ܟܲܕ ܗܘ̤ ܕܝܼܠܹܗ ܡܫܲܡܠܹܐ ܗ̄ܘ̣ܵܐ
                 443 ܡܵܘܬܹܗ ܒܓܸܠܝܵܐ ܡܲܟܼܪܸܙ ܗ̄ܘ̣ܵܐ.
                 444 :ܡ̣ܢ ܟܵܗܢܹ̈ܐ ܡܬܡܝܲܩ ܗ̄ܘ̣ܵܐ
                 445 ܘܡ̣ܢ ܥܲܡܵܐ ܡܸܬܒܲܙܲܚ ܗ̄ܘ̣ܵܐ.
                 446 ܕܗ̇ܘ ܥܘܼܡܪܵܐ ܕܐܠܗܘܼܬܵܐ.
                 447 :ܘܐܲܠܵܗܘܼܬܵܐ ܡܙܝܼܥܵܐ ܗ̄ܘ̣ܵܬ
                 448 ܠܲܟܼܝܵܢܹܗ ܥܲܠ ܡܡܵܟܹܗ.
                 449 :ܢܚܬܐ ܕܐܒܼܥܵܐ ܠܒܼܝܼܫܝܼܢ ܗ̄ܘ̣ܵܘ
                 450 ܫܡܲܝܵܐ ܘܐܲܪܥܵܐ ܘܟܼܠ ܕܒܼܗܘܿܢ.
                 451 :ܥܲܠ ܗܘ̇ ܦܓܼܪܐ ܩܕܝܼܫܵܐ
                 452 ܕܡܨܛܥܪ ܗ̄ܘ̣ܵܐ ܡ̣ܢ ܛܲܡ̈ܐܹܐ.
                 453 :ܫܸܡܫܵܐ ܥܪܲܩ̣ ܩܛܲܫܝܼ ܢܘܼܗܪܹܗ
                 454 ܘܣܲܗܪܵܐ ܠܲܕܡܵܐ ܐܸܫܬܲܚܠܲܦ.
                 455 ܕܠܵܐ ܢܸܬܒܲܣܡܘܿܢ ܛܵܠܘܿܡܹ̈ܐ: 

                 f.150r 

                 456 ܡ̣ܢ ܦܲܐܝܘܼܬܵܐ ܕܕܸܠܩܲܝ̈ܗܘܿܢ.
                 457 :ܠܐܲܪܥܵܐ ܙܵܘܥܵܐ ܡܲܪܥܸܠ ܗ̄ܘ̣ܵܐ
                 458 ܘܫܘܼ݁ܥܹܐ ܘܟܸܐܦܹ̈ܐ ܡܨܲܪܹܐ ܗ̄ܘ̣ܵܐ.
                 459 :ܟܲܕ ܡܟܣܝܼܢ ܗ̄ܘ̣ܵܘ ܫܲܬܝܼ̈ܩܹܐ
                 460 ܠܠܸܒܵܐ ܩܲܫܝܵܐ ܕܡܲܪ̈ܚܹܐ.
                 461 :ܪܘܼܚܵܐ ܨܪܵܐ ܠܐܲܦܲܝ̈ ܬܲܪܥܵܐ
                 462 ܘܨܲܥܪܹܗ ܠܗܲܝܟܵܠ ܚܘܼܣܵܝܵܐ.
                 463 :ܘܚܵܘܝܼ ܕܡܲܪܦܹܐ ܘܫܵܒܸܩ ܠܹܗ
                 464 ܕܣܕܩܹܗ ܠܢܚܬ̇ܐ ܕܢܲܟܼܦܘܼܬܹܗ.
                 465 :ܩܲܒܼܪܹ̈ܐ ܕܟܸܐܢܹ̈ܐ ܐܸܬܦܲܬܲܚܘ
                 466 ܕܐܲܙܝܼܥ ܐܸܢܘܿܢ ܦܘܼܩܕܵܢܵܐ.
                 467 :ܕܢܸܗܘܘܸܐ ܡܝܼ̈ܬܹܐ ܟܵܪ̈ܙܿܘܹܐ
                 468 ܕܲܩܝܵܡܘܬܹܗ ܕܡܲܚܹܐ ܡܝܼ̈ܬܐ.
                 469 :ܒܨܨܹ̈ܐ ܣܲܬܪܘܼܗܝ ܡܲܪ̈ܲܚܹܐ
                 470 ܠܝܘ ܠܝܵܘܣܸܦ ܕܪܟܸܒܼ ܠܹܗ ܡܸܠܬܵܐ.
                 471 :ܘܡܸܠܬܐ ܐܲܙܝܼܥ ܫܲܬܝܼܩܹ̈ܐ
                 472 :ܕܢܕܘܢܘܿܢ ܥܲܡ ܡܲܠܠܹ̈ܐ
                 473 :ܡܸܨܥܲܬ̤ ܓܲܝܵܣܹ̈ܐ ܙܲܩܦܘܼܗܝ
                 474 ܐܲܝܟ ܣܵܥܘܿܪܵܐ ܕܒܼܝܼ̈ܫܬܵܐ.
                 475 :ܘܟܲܕ ܠܵܐ ܨܒܹܝܢ ܚܬܡܘ ܗ̄ܘ̣ܵܘ
                 476 ܦܠܸܐܬܵܐ ܕܢܒܼܝܼܘܼܬܵܐ.
                 477 :ܠܓܝܣܵܐ ܕܡ̣ܢ ܝܲܡܝܼܢܵܐ
                 478 ܬܿܗܪܵܐ ܢܓܕܹܗ ܠܲܬܘܬܵܐ.
                 479 :ܘܒܲܚܲܒܿܪܹܗ ܡܸܬܥܲܕܲܠ ܗ̄ܘ̣ܵܐ
                 480 ܕܢܫܠܝܘܼܗܝ ܡ̣ܢ ܓܘܼܕܦܹܗ.
                 481 :ܒܩ̈ܠܹܐ ܕܲܡܠܹܝܢ ܚܸ̈ܢܵܓܬܐ
                 482 ܡܬܟܫܲܦ ܗ̄ܘ̣ܵܐ ܓܲܝܵܣܵܐ.
                 483 :ܟܲܕ ܫܵܐܸܠ ܗ̄ܘ̣ܵܐ ܫܘܼܒܼܩܵܢܵܐ
                 484 ܕܢܸܫܘܝܲܝ ܪ̈ܲܚܡܹܐ ܒܝܘܿܡ ܕܝܼܢܵܐ.
                 485 :ܒܥܲܝܢܵܐ ܟܣܝܼܬܼܵܐ ܕܪܸܥܝܵ[...]ܐ
                 486 ܚܙܵܗ̇ ܠܡܲܠܟܘܼܬܵܐ ܕܲܫܡܲܝܵܐ.
                 487 :ܘܲܠܘܵܬܼ ܡܵܪܲܢ ܐܸܡ̣ܪ ܗ̄ܘ̣ܵܐ
                 488 ܕܐܫܘܢܝ ܕܐܸܚܙܝܼܗ̇ ܠܡܲܠܟܘܼܬܵܟ.
                 489 :ܐܘ ܬܗܪܵܐ ܕܒܓܝܵܣܵܐ
                 490 :ܡܸܬܼܡܲܠܲܠ ܗ̄ܘ̣ܵܐ ܠܐܲܪ̈ܥܵܢܹܐ
                 491 :ܕܠܨܠܝܼܒܵܐ ܕܲܨܲܠܝܼܒܼ ܥܲܡܹܗ
                 492 ܡܲܠܟܘܼܬܼܵܐ ܫܵܐܸܠ ܗ̄ܘ̣ܵܐ ܠܹܗ.
                 493 :ܠܵܐ ܕܹܝܢ ܛܲܠܡܹܗ ܡܲܚܹܐ ܟܠ
                 494 ܠܓܼܝܵܣܵܐ ܐܲܓܼܪܵܐ ܕܡܸܠܵܘ̈ܗܝ.
                 495 :ܘܦܲܢܝܼ ܘܝܲܗ̣̄ܒ ܠܹܗ ܦܘܼܪܥܵܢܵܐ
                 496 :ܡܲܠܟܘܼܬܼܵܐ ܚܠܵܦ ܬܵܘܕܝܼܬܼܵܐ
                 497 :ܒܥ̇ܒܕܵܐ ܓܲܡܪܹܗ ܨܐܕܵܘܗܝ
                 498 ܠܫܘܼܘ ܕܐܸܫܬܵܘܕܝܼ ܠܹܗ.
                 499 :ܕܐܲܥܠܹܗ ܥܲܡܹܗ ܒܝܲܕܼ ܢܲܦܫܹܗ
                 500 ܠܦܪܕܿܝܼܣܵܐ ܒܲܥܕܲܢ ܡܵܘܬܹܗ.
                 501 :ܐܘܿ ܬܲܗܪܵܐ ܕܲܒܼܓܵܓܘܿܠܬܵܐ
                 502 ܒܡܝܘܬܵܐ ܡܸܬܡܲܡܠܲܠ ܗ̄ܘ̣ܵܐ.
                 503 :ܕܦܲܓܼܪܵܐ ܕܲܩܒܝܼܥ ܒܲܨܠܝܼܒܼܵܐ
                 504 ܐܘܼܪܚܵܐ ܠܲܠܕܼܢ ܕܵܪܸܫ ܗ̄ܘ̣ܵܐ.
                 505 :ܐܘ ܡܝܼܬܵܐ ܕܡܘܼܬܹܗ ܐܲܟܼܪܸܙ
                 506 ܚܵܝܵܬ ܡܝܼ̈ܬܐ ܠܥܲܢܝܼܕ̈ܐ.
                 507 :ܐܘ ܦܟܝܼܪܵܐ ܕܲܒܼܪܸܫ ܩܲܝܣܵܐ
                 508 ܕܫܪܐ ܦܟܪܹ̈ܐ ܕܲܚܛܝܼܬܼܵܐ.
                 509 :ܒܚܲܫܹ̈ܐ ܕܡܵܘܬܵܐ ܚܵܐܹ̇ܫ ܗ̄ܘ̣ܵܐ
                 510 :ܦܲܓܼܪܵܐ ܠܒܘܿܫܹܗ ܕܝܼܚܝܼܕܵܐ
                 511 :ܘܠܵܐ ܫܲܒܼܩܹܗ ܘܫܲܢܝܼ ܡܸܢܹܗ
                 512 ܐܵܦܠܵܐ ܒܲܥܕܢ ܡܘܼܟܵܟܹܗ.
                 513 :ܠܹܗܘ̤ ܡܲܓܼܥܸܠ ܗ̄ܘ̣ܵܐ ܢܲܦܫܹܗ
                 514 ܡܝܘܬܵܐ ܟܲܕ ܟܪܝܵܐ ܠܹܗ.
                 515 :ܕܒܼܐܝܼܕܲܝ̈ܟ ܠܲܡ ܣܵܐܸܡ ܐ̄ܢܵܐ ܢܲܦܫܝ
                 516 ܦܢܵܗ̇ ܠܥܘܼܡܪܗ̇ ܒܲܫܠܵܡܵܐ.
                 517 :ܪܫܹܗ ܐܪܟܸܢ ܒܨܠܝܼܒܼܵܐ
                 518 ܘܐܫܠܸܡ ܢܲܦܫܹܗ ܠܒܵܪܘܿܝܵܐ.
                 519 :ܟܲܕ ܣܵܗܸܕ ܫܘܼܢܵܝ ܢܲܦܫܹܗ
                 520 ܕܡܵܘܬܹܗ ܠܵܐ ܗ̄ܘ̣ܵܐ ܕܩܲܛܝܼܪܵܐ ܗ̄ܘ̣.
                 521 :ܗܵܐ ܥܸܕܲܢܵܐ ܕܲܡܚܵܘܹܐ
                 522 ܚܲܫܵܐ ܘܡܵܘܬܵܐ ܕܡ̇ܢ ܐܸܢܘܼܢ.
                 523 :ܟܲܕ ܡܲܠܸܦ ܠܲܢ ܒܲܪ ܓܸܢܣܲܢ
                 524 ܕܠܵܐ ܡܫܵܘܬܲܦ ܡܸܠܬܐ ܒܚܲܫܵܘ̈ܗܝ.
                 525 :ܒܐܝܕܲܝ̈ܟ ܠܲܡ ܣܵܐܸ̇ܡ ܐ̄ܢܵܐ ܢܲܦܫܝ
                 526 ܢܸܒܥܹܐ ܢܲܦܫܵܐ ܕܡ̇ܢ ܐܝܼܬܹܝܗ̇.
                 527 :ܕܡܸܠܬܐ ܚܝܕܵܐ ܕܡ̣ܢ ܐܲܒܼܵܐ
                 528 ܐܘ ܕܟܢܬܢ ܒܲܪ ܐܵܕܼܵܡ.
                 529 :ܠܲܝܬ ܢܦܲܫܵܐ ܠܲܐ ܠܗܘܼܬܼܵܐ
                 530 ܗܪܛܝܼܩܵܐ ܠܵܐ ܬܛܥܐ.
                 531 :ܕܠܵܐ ܗ̄ܘ̣ܵܐ ܒܢܦܫܵܐ ܡܬܩܝܡܵܐ
                 532 ܚܝܘܼܬܵܐ ܕܐܲܠܵܗܘܼܬܼܵܐ.
                 533 :ܢܲܦܫܵܐ ܕܡܝܘܬܵܐ ܐܝܼܬܹܝܗ̇
                 534 ܗܘ̇ ܕܲܠܒܝܼܫ ܗ̄ܘ̣ܵܐ ܗܲܕܵܡܹ̈ܐ.
                 535 :ܘܕܩܪܒ ܚܲܫ̈ܐ ܠܗܲܕܵܡܵܘ̈ܗܝ
                 536 ܫܲܢܲܝܲܬ̤ ܡܸܢܹܗ ܒܐܘܼܠܨܵܢܵܐ.
                 537 :ܕܢܲܦܫܵܐ ܐܝܼܬ ܗ̄ܘ̣ܵܐ ܒܗ̇ܘ ܦܲܓܼܪܵܐ
                 538 ܕܲܓܼܒܼ̇ܐ ܡܸܠܬܐ ܠܲܥܡܘܪܹܝܗ.
                 539 :ܣܗܕܐ ܗܝ̤ ܥܲܠ ܫܘܼܢܵܝܵܗ̇
                 540 ܕܫܒܩܬܹܗ ܒܠܸܕܢ ܚܲܫܵܐ. 

                 f.150v 

                 541 :ܚܵܫܘܿܫܵܐ ܗ̄ܘ̣ܵܐ ܕܚܵܐܸ̇ܫ ܗ̄ܘ̣ܵܐ
                 542 :ܒܚܫ̈ܐ ܩܫܝ̈ܐ ܕܲܨܠܝܼܒܵܐ
                 543 :ܟܲܕ ܩ̇ܥܐ ܗ̄ܘ̣ܵܐ ܒܚܸܢ̈ܓܬܐ
                 544 ܕܐܲܠܗܝ ܐܲܠܵܗܝ ܠܵܐ ܬܸܪܦܝܫܝ.
                 545 :ܠܵܘ ܡܸܠܬܐ ܡܸܬܟܫܦ ܗ̄ܘ̣ܵܐ
                 546 ܠܲܐܒܘܼܗܝ ܕܐܝܼܬܼܵܘܗܝ ܚܲܕ ܥܲܡܹܗ܀
                 547 :ܠܲܝܬܿ ܐܲܠܵܗܵܐ ܠܲܐܠܵܗܵܝܵܐ
                 548 :ܐܘܛܝܹܟܹܐ ܡ̇ܢ ܢ̇ܨܐ ܐܲܢ̄ܬ
                 549 :ܠܵܘ ܡܸܠܬܐ ܐܲܪܟܸܢ ܪܸܫܹܗ
                 550 ܘܲܐܫܸܠܡ ܢܲܦܫܹܗ ܒܲܨܠܝܼܫܵܐ.
                 551 :ܢܸܒܼܥܐ ܕܚܲܝܹ̈ܐ ܠܵܐ ܡܵܐܸܬ̇
                 552 ܚܡܘܿܠ ܓܘܼܕܵܦܝ̈ܟ ܡܲܪܚܵܐ.
                 553 :ܠܵܐ ܗ̄ܘ̣ܵܐ ܒܐܝܼܬܵܝܐ ܐܸܬܩܥܘ
                 554 ܨܨ̈ܝܐ ܘܪܘܼܡܚܵܐ ܕܒܕܦܢܵܐ
                 555 :ܠܲܝܬܿ ܗܲܕܵܡܹ̈ܐ ܠܚܝܼܕܵܐ
                 556 ܗܪܣܝܘܛܵܐ ܠܵܐ ܬܡܪܲܚ.
                 557 :ܒܸܣܪܵܢܵܐ ܗ̄ܘ̣ ܕܡܩܒܠ ܗ̄ܘ̣ܵܐ
                 558 ܦܲܓܼܪܹܗ ܒܩܲܝܣܵܐ ܕܲܨܠܝܼܒܵܐ.
                 559 :ܗܘ̤ ܡܩܲܪܸܒ ܗ̄ܘ̣ܵܐ ܒܵܠܘܿܬܵܐ
                 560 ܕܲܣܬܝܼܩ ܗ̄ܘ̣ܵܐ ܥܲܠ ܥܘܼܕܪܵܢܵܐ.
                 561 :ܦܲܓܼܪܵܢܵܐ ܗ̄ܘ̣ ܕܛܠܸܢ ܡܵܘܬܵܐ
                 562 ܕܡܵܝܘܬܵܐ ܗ̄ܘ̣ܵܐ ܒܲܟܸܝܵܢܹܗ.
                 563 :ܘܠܝܼܚܝܼܕ̇ܐ ܡܸܬܟܲܫܲܦ ܗ̄ܘ̣ܵܐ
                 564 ܕܒܲܥܥܓܼ ܢܦܫܹܗ ܢܦܫܐ ܠܹܗ.
                 565 :ܗܘ̤ ܐܲܪܟܸܢ ܪܸܫܹܗ ܒܩܲܝܣܵܐ
                 566 ܘܐܲܫܠܸܡ ܢܦܲܫܹܗ ܠܒܵܪܘܿܝܵܐ.
                 567 :ܘܟܲܕ ܢܲܦܫܹܗ ܫܢܝܲܬ̤ ܠܲܥܕܼܢ
                 568 ܦܲܓܼܪܹܗ ܩܵܘܝܼ ܒܓܼܵܘ ܩܲܒܼܪܵܐ.
                 569 :ܠܵܐ ܫܲܒܩܹܗ ܡܸܠܬܹܗ ܕܐܲܒܼܵܐ
                 570 :ܠܥܘܼܡ[...] ܕܟܼܝܵܐ ܕܓܼܒܼܵܬ ܠܹܗ
                 571 :ܘܟܲܕ ܒܹܗ ܗܘ̣ܐ ܡ̣ܢ ܫܘܼܪܵܝܵܐ
                 572 ܒܡܵܟ̈ܬܹܗ ܠܵܐ ܚܵܐܸܫ̇ ܗ̄ܘ̣ܵܐ.
                 573 :ܠܵܐ ܡ̣ܢ ܡܬܘܿܡ ܫܲܢܝܼ ܡܸܢܹܗ
                 574 ܠܵܐ ܒܚܲܫܹ̈ܐ ܘܠܵܐ ܒܲܨܠܝܼܒܼܵܐ.
                 575 :ܘܠܵܐ ܡܸܡܬܘܿܩ ܚܲܫ ܒܲܟܼܝܢܹܗ
                 576 ܒܚܲܫܹ̈ܐ ܕܣܲܝܒܵܪ ܒܲ[...]ܗ ܦܲܓܼܪܵܢܵܐ.
                 577 :ܒܲܠܥܹܗ ܡܵܘܬܵܐ ܠܡܵܝܘܬܿܐ
                 578 ܘܠܵܐ ܚܙ̣ܵܐ ܚܒ̇ܠܐ ܒܹܝܬܼ ܡܝܼ̈ܬܹܐ.
                 579 :ܕܠܵܐ ܝܸܗܒܲܬ̤ ܠܹܗ ܢܒܼܝܼܘܼܬܼܵܐ
                 580 ܠܡܵܘܬܼܵܐ ܕܢܸܣܥܹܐ ܥܲܠ ܦܲܓܼܪܹܗ.
                 581 :ܒܪܘܼܡܚܵܐ ܕܩܪܘܼܗܝ ܒܹܝܬܼ ܐܸܠܥܵܘ̈ܗܝ
                 582 ܘܲܪܕܵܐ ܕܡܵܐ ܘܡܲܝ̈ܐ ܡܸܢܹܗ.
                 583 :ܘܠܵܐ ܬܒܲܪ ܓܲܪܡܵܐ ܒܗܲܕܵܡܵܘ̈ܗܝ
                 584 ܐܲܝܟ ܐܪܙܐ ܕܐܟܬܼܒܼ ܡܘܼܫܹܐ.
                 585 :ܦܲܠܸܓܘ ܢܲܚܬܵܘ̈ܗܝ ܡܲܪ̈ܚܹܐ
                 586 ܘܲܐܪܡܝܼܘ ܦܸܣܹ̈ܐ ܒܲܝܢܵܬܗ̈ܘܿܢ.
                 587 ܘܫܸܠܡܲܬ̤ ܡܸܠܬܹܗ ܒܥܒ̇ܕܐ 
                 588 ܢܒܝܼܘܼܬܵܐ ܕܐܲܒܼܘܼܗܝ ܕܵܘܝܼܕ.
                 589 :ܐܚܸܬܼܘ ܦܲܓܼܪܹܗ ܡ̣ܢ ܩܲܝܣܵܐ
                 590 ܘܲܒܼܩܲܒܼܪܵܐ ܐܲܥܸܠܘ ܣܵܡܘܼܗܝ.
                 591 :ܘܠܵܐ ܚܲܒܸܠ ܡܵܘܬܹܗ ܠܦܲܓܼܪܹܗ
                 592 ܕܠܵܐ ܐܓ̇ܪ ܗ̄ܘ̣ܵܐ ܒܹܝܬܼ ܡܝܼ̈ܬܹܐ
                 593 :ܬܠܵܬܐ ܝܵܘܡܝܼ̈ܢ ܩܵܘܝܼ ܗ̄ܘ̣ܵܐ
                 594 ܒܓܵܘ ܩܲܒܼܪܵܐ ܡܲܚܹܐ ܚܝܼ̈ܬܹܐ.
                 595 :ܘܐܸܡ̣ܪ ܕܝܼܢ̇ܐ ܥܲܡ ܡܵܘܬܵܐ
                 596 ܘܲܫܪ̣ܵܐ ܘܒܲܛܸܠ ܫܘܼܠܛ̇ܢܹܗ.
                 597 :ܥܲܡܹܗ ܗ̄ܘ̣ܵܐ ܡܸܠܬܐ ܕܠܲܒܼܫܹܗ
                 598 ܟܲܕ ܡܲܓܲܣ ܗ̄ܘ̣ܵܐ ܒܓܵܘ ܩܲܒܼܪܵܐ.
                 599 :ܘܠܵܐ ܚܵܐܹ̇ܫ ܗ̄ܘ̣ܵܐ ܒܝܲܕܼ ܚܲܫܵܘ̈ܗܝ
                 600 ܕܪܵܡ ܗ̄ܘ̣ ܟܝܵܢܹܗ ܡ̣ܢ ܚܲܫܹ̈ܐ.
                 601 :ܒܡܲܠܲܟܹ̈ܐ ܡܙܲܚܲܝ ܗ̄ܘ̣ܵܐ ܠܹܗ
                 602 ܡܸܠܬܐ ܠܦܲܓܼܪܹܗ ܩܲܕܝܼܫܵܐ.
                 603 :ܘܡܲܣܟܝܼܢ ܠܹܗ ܪ̈ܘܼܚܵܢܹܐ
                 604 ܠܪܸܡܙܵܐ ܕܝܼܠܹܗ ܕܡܲܚܐ ܟܠ.
                 605 :ܫܲܠܸܡ ܨܹܐܕܼܵܘܗܝ ܫܘܼܘܕܵܝܵܘ̈ܗܝ
                 606 ܡܸܠܬܹܗ ܕܐܲܒܼܵܐ ܚܼܝܼܕܵܐ.
                 607 :ܘܡ̣ܢ ܕܲܫܪܵܐ ܡܵܘܬܵܐ ܠܦܲܓܼܪܹܗ
                 608 ܢܲܚܡܹܗ ܠܲܬܠܵܬܵܐ ܝܵܘܡܝܼ̈ܢ.
                 609 :ܐܘ ܡܝܼܬܼܵܐ ܕܒܲܠܥܹܗ ܡܵܘܬܵܐ
                 610 ܘܗܲܦܟ ܩܲܛܠܹܗ ܠܩܵܛܘܿܠܹܗ.
                 611 :ܘܬܲܒܼܪܹܗ ܠܥܘܼܩܣܹܗ ܡܲܪܝܼܪܵܐ
                 612 ܘܲܦܪܗܗ̇ ܠܡܸܪܬܹܗ ܡ̣ܢ ܐ̄ܢܵܫܵܐ.
                 613 :ܐܘ ܥܲܦܪܵܢܵܐ ܕܐܸܬܟܲܬܲܫ
                 614 ܥܲܡ ܪܘܚܵܐ ܘܪܹܫܵܐ ܕܐܵܐܲܪ.
                 615 :ܘܦܲܪܣܝܼ ܠܫܸܐܕܹ̈ܐ ܒܙܵܟܘܼܬܹܗ
                 616 ܘܐܒܗܸܬ ܐܸܢܘܿܢ ܒܲܩܢܘܿܡܹܗ.
                 617 :ܩܪܵܒܼܵܐ ܥܒܲܕ ܗ̄ܘ̣ܵܐ ܒܲܪ ܓܸܢܣܲܢ
                 618 ܥܲܡ ܡܵܘܬܵܐ ܘܐܵܟ̇ܠܩܲܪܨܵܐ.
                 619 :ܘܲܙܟܼܵܐ ܒܚܲܝܠܵܐ ܕܠܵܒܘܿܫܹܗ
                 620 ܠܲܛܪ̈ܘܢܹܐ ܬܪܹܝܢ ܕܐܸܫܬܲܥܠܝܼܘ.
                 621 :ܩܪܒܐ ܗ̄ܘ̣ܵܐ ܕܚܵܒܼ ܒܹܗ ܐܵܕܼܵܡ
                 622 ܘܚܵܒܼ ܟܠܹܗ ܟܝ̇ܢܹܗ ܥܲܡܹܗ. 

                 f.151r 

                 623 :ܠܲܒܼܫܹܗ ܐܝܼܬܵܝܵܬ ܠܒܲܪ ܐܵܕܼܵܡ
                 624 ܘܲܙܟܲܝ ܒܹܗ ܠܲܒܢܲܝ̈ ܓܸܢܣܹܗ.
                 625 :ܠܲܬܠܬܵܐ ܝܵܘܡܝ̈ܢ ܫܲܠܚܵܗ̇
                 626 ܠܡܵܝܘܿܬܘܼܬܼܵܐ ܕܟܼܝܵܢܹܗ.
                 627 :ܘܩܲܛܠܗ̇ ܒܒܸܣܪܹܗ ܠܲܚܛܝܼܬܼܵܐ
                 628 ܘܝܲܗ̄ܒ̣ ܙܵܟܼܘܬܵܐ ܠܡܵܝܘ̈ܬܹܐ.
                 629 :ܒܚܲܝܠܵܐ ܕܐܝܼܬܝܵܐ ܕܥܡ̣ܪ ܒܹܗ
                 630 ܢܚܸܬ ܠܐܵܓܼܘܿܢܵܐ ܘܐܸܬܢܨܚ.
                 631 :ܘܲܒܼܚܠܵܐ ܕܝܼܠܹܗ ܚܲܣܢܹܗ
                 632 ܠܡܵܘܬܐ ܘܒܲܛܸܠ ܫܘܼܠܛܵܢܹܗ.
                 633 :ܥܲܡܹܗ ܗ̄ܘ̣ܵܐ ܟܲܕ ܚܵܐܸܫ ܗ̄ܘ̣ܵܐ
                 634 ܘܠܵܐ ܡܫܵܘܿܬܼܦ ܗ̄ܘ̣ܵܐ ܒܡܵܟܵܬܹ̈ܗ.
                 635 :ܘܡ̣ܢ ܕܐܸܬܼܢܣܝܼ ܠܟܼܠܡܸܕܹܡ
                 636 ܓܲܡܪܹܗ ܒܚܲܫܵܐ ܕܲܩܢܘܿܡܹܗ.
                 637 :ܠܗܲܝܟܵܠ ܦܲܓܼܪܹܗ ܒܲܪܵܝܵܐ
                 638 ܫܪܵܐ ܡܵܘܬܵܐ ܒܝܲܕܼ ܡܲܪ̈ܵܚܹܐ.
                 639 :ܘܲܒܢ̣ܝܗܝ ܡܸܠܬܐ ܘܲܥ̣ܡܪ ܒܹܗ
                 640 ܒܸܢܝܵܢܵܐ ܕܠܵܐ ܬܘܼܒ ܙ̇ܐ̇ܥ.
                 641 :ܠܗܵܢܵܐ ܢܵܘܣܵܐ ܐܡ̣ܪ ܗ̄ܘ̣ܵܐ
                 642 ܕܲܫܪܵܐܘܼܗܝ ܘܲܡܩܝܼܡ ܐ̄ܢܵܐ ܠܹܗ.
                 643 :ܟܲܕ ܡܲܠܸܦ ܠܹܗ ܠܫܵܡܘܿܥܹ̈ܐ
                 644 ܕܫܪܝܵܐ ܗ̄ܘ̣ ܕܦܲܓܼܪܵܐ ܒܲܠܚܘܿܕ.
                 645 :ܠܵܐ ܡܸܫܬܲܪܝܵܐ ܐܝܼܬܘܼܬܼܵܐ
                 646 ܕܠܲܝܬ ܫܘܼܪܵܝܵܐ ܠܐܝܼܬܘܼܬܼܵܐ.
                 647 :ܫܪܵܝܵܐ ܕܦܲܓܼܪܵܐ ܗ̄ܘ̣ ܡܵܝܘܬܵܐ
                 648 ܘܗܘ̤ ܛܥܸܡ ܡܵܘܬܵܐ ܒܲܠܚܘܿܕ̇ܘܗܝ.
                 649 :ܒܲܫܪܵܝܵܐ ܕܦܲܓܼܪܸܗ ܐܲܠܸܦ
                 650 ܕܒܲܪܢܵܫܵܐ ܗ̄ܘ̣ܵܐ ܚܵܫܘܿܫܵܐ.
                 651 :ܘܲܕܩܡ ܠܲܬܠܬܵܐ ܝܵܘܡܝܼܢ
                 652 ܚܵܘܝܼ ܚܲܝܠܵܐ ܕܐܲܩܝܼܡܹܗ.
                 653 :ܒܨܝܼܪ ܗ̄ܘ̣ܵܐ ܟܝܵܢܲܢ ܡܵܝܘܬܵܐ
                 654 ܕܗܘ̤ ܢܸܗܘܹܐ ܠܹܗ ܦܪܵܘܿܩܵܐ.
                 655 :ܘܠܲܒܼܫܹܗ ܐܝܼܬܝܵܐ ܠܟܼܝܼܢܲܢ
                 656 ܘܚܲܪܪ ܒܹܗ ܟܠܹܗ ܓܸܢܣܲܢ.
                 657 :ܪܵܡܵܐ ܒܚܘܒܹܗ ܐܸܬܬܲܚܬܼܝ
                 658 ܕܲܢܩܝܼܡ ܠܐܵܕܵܡ ܡܝܘܬܵܐ.
                 659 :ܘܲܒܙܲܝܢܵܐ ܕܚܵܒܼ ܒܹܗ ܐܵܕܼܵܡ
                 660 ܙܲܟܼܝܹܗ ܐܝܼܢܝܐ ܠܒܲܪ ܐܵܕܼܵܡ.
                 661 :ܠܡܲܟܝܼܟܼܵܐ ܨܒܼܵܐ ܕܢܥܲܠܹܐ
                 662 ܠܵܘ ܗܘ̤ ܢܚܸܬܼ ܨܝܕ ܡܵܟ̈ܬܼܵܐ.
                 663 :ܠܥܲܦܪܢܵܐ ܪܲܡܪܸܡ ܘܐܲܣܸܩ
                 664 ܠܐ ܝܼܩܵܪܵܐ ܕܥܲܡ ܪܲܒܘܼܬܹܗ.
                 665 :ܥܝܼܪܬܵܐ ܕܥܒܲܪ ܦܘܼܩܕܵܢܵܐ
                 666 ܚܝܒܼ ܗ̄ܘ̣ܵܐ ܓܸܢܣܹܗ ܕܐܵܕܼܵܡ.
                 667 ܘܲܕܠܵܐ ܦܲܪܥܘܼܗ̇ ܡܵܝܘ̈ܬܹܗ.
                 668 ܦܲܪܥܵܗ̇ ܐܝܼܬܝܵܐ ܒܒܲܪ ܐܵܕܼܵܡ.
                 669 :ܡܵܝܘܬܵܐ ܡܝܼܬ ܒܲܟܼܝܵܢܹܗ
                 670 ܘܐܝܼܬܝܵܐ ܩܵܘܝܼ ܒܲܘܼܝܵܢܹܗ.
                 671 :ܘܲܒܼܝܲܕ ܚܲܝܠܵܐ ܕܐܝܼܬܘܼܬܵܐ
                 672 ܙܟܼܵܐ ܡܵܝܘܬܵܐ ܘܐܸܢܲܚܲܡ.
                 673 :ܠܵܘ ܥܵܒܘܿܕܼܵܐ ܚܵܐܸ̇ܫ ܗ̄ܘ̣ܵܐ
                 674 ܒܚܲܫܹ̈ܐ ܕܡܵܘܬܵܐ ܕܲܨܠܝܼܒܵܐ.
                 675 :ܒܲܪ ܐܵܕܵܡ ܗ̄ܘ̣ܵܐ ܕܦܪܥ ܗ̄ܘ̣ܵܐ
                 676 ܒܚܲܫܹܗ ܫܛܪܐ ܕܒܹܝܬ ܐܵܕܼܵܡ.
                 677 :ܡܕܿܒܼܪܵܢܘܼܬܵܐ ܡܲܠܝܼ ܒܹܗ
                 678 ܒܦܲܓܪܵܢܵܐ ܚܠܵܦ ܡܵܝܘ̈ܬܐ.
                 679 :ܘܲܒܼܡܵܘܬܹܗ ܘܲܒܼܢܘܼܚܵܡܗ
                 680 ܟܠܹܗ ܟܝܵܢܲܢ ܡܝܼܬ ܘܲܚܝܵܐ.
                 681 :ܠܒܼܘܫܹܗ ܥܒܕܗ ܠܟܲܣܝܘܼܬܹܗ
                 682 ܘܡܲܚܙܝܼܬܵܐ ܠܲܢ ܡܵܝܘ̈ܬܹܐ.
                 683 :ܕܲܒܼܙܵܘ̈ܥܹܐ ܕܢܲܦܫܵܐ ܢ̣ܚܙܹܐ
                 684 ܠܟܲܣܝܼܘܼܬܹܗ ܒܲܐܒܘܿܫ ܦܲܓܼܪܢ.
                 685 :ܠܫܲܝܢܵܐ ܕܡܠܝܼܠܹ̈ܐ ܢܲܣܒܹܗ
                 686 ܐܲܝܟ ܪܹܫܝܼܬܵܐ ܡ̣ܢ ܟܠܲܢ.
                 687 :ܕܢܹܐܣܘܿܪ ܒܹܗ ܚܘܼܒܵܐ ܕܲܫܪܵܐ
                 688 ܐܵܕܼܵܡ ܒܲܥܒܵܪ ܦܘܼܩܕܵܢܹܗ.
                 689 :ܠܟܼܠܹܗ ܟܝܵܢܵܐ ܕܡܲܠܝܼ̈ܠܹܐ
                 690 ܝܲܩܲܪ ܒܵܗ ܒܲܢܣܝܼܒܘܼܬܹܗ.
                 691 :ܕܡܚܝܢܢ ܠܲܢ ܒܲܟܼܝܵܢܵܐ
                 692 ܫܘܬܸܦ ܐܸܢܘܿܢ ܒܐܢܩܵܪܹܗ.
                 693 :ܠܗܵܕܹܐ ܪܲܒܘܼܬܵܐ ܕܲܡܛܲܬ̤
                 694 ܠܲܡܠܝܼ̈ܠܹܐ ܒܝܲܕ ܒܲܪ ܓܸܢܣܲܢ.
                 695 ܛܲܠܡܘܼܗ̇ ܥܛܠ̈ܐ ܘܚܪ̈ܚܹܐ.
                 696 ܒܗܦܟ̈ܬܐ ܕܡܸܠܲܝ̈ܗܘܿܢ.
                 697 :ܠܵܐ ܫܒܼܩܝܼܢ ܠܹܗ ܠܲܟܼܝܢܲܢ
                 698 ܕܢܸܬܝܩܲܪ ܒܲܫܒ̈ܝܼܚܵܐܬܐ.
                 699 :ܘܠܵܐ ܝܵܗܒܝܼܢ ܠܹܗ ܕܢܸܬܪܲܡܪܲܡ
                 700 ܥܲܡ ܐܲܠܵܗܵܐ ܢܵܣܘܿܒܹܗ.
                 701 :ܬܪܹܝܢ ܥܘ̤ܠ̈ܐ ܕܠܵܐ ܡܬܚܣܝܼܢ
                 702 ܒܛܢܘ ܘܝܼܠܸܕܘ ܗܲܪ̈ܛܝܼܩܹܐ.
                 703 :ܕܬܲܚܬܝܼܘ ܐܝܼܬܝܵܐ ܠܫܝܼ̈ܛܵܬܐ
                 704 ܘܛܠܡܘ ܦܓܪܢ ܡ̣ܢ ܚܲܝܹ̈ܐ.
                 705 :ܣܲܢܐܹ̈ܐ ܕܦܓܪܐ ܐܝܼܬܲܝܗܘܿܢ
                 706 ܘܦܠܝܼܓܝ̈ ܥܲܠ ܐܲܝܬܘܼܬܵܐܘ
                 707 :ܕܠܐܝܼܬܝܵܐ ܥܒܲܕܘ ܠܹܗ ܫܘܼܪܵܝܵܐ
                 708 ܘܦܓܪܐ ܛܠ̣ܡܘ ܠܲܢܣܝܼܒܘܼܬܹܗ.
                 709 :ܩܪܵܒܼܗܘܿܢ ܠܘܼܩܒܵܠ ܐܝܼܬܘܼܬܼܵܐ ܗ̄ܘ̣
                 710 ܕܡܲܚܫܝܼܢ ܠܹܗ ܒܝܲܕ ܡܸܠܲܝ̈ܗܘܿܢ. 

                 f.151v 

                 711 ܘܬܲܟܼܘܼܫܗܘܿܢ ܥܲܡ ܐ̄ܢܸܫܘܼܬܵܐ ܗ̄ܘ̣ܵ[ܐ]
                 712 ܕܠܵܐ ܡܫܘܹܝܢ ܠܵܗ̇ ܠܪܒܘܼܬܼܵܐ.
                 713 :ܥܲܡ ܣܦܪܹ̈ܐ ܕܡܸܠܲܝ̈ ܪܘܼܚܵܐ
                 714 ܢ̇ܨܝܹܢ ܟܠܢܵܫ ܘܲܕܬܝܼܫܝܼܢ.
                 715 :ܕܡܚܘܝܼܢ ܠܲܢ ܦܘܼܪܫܵܢܵܐ
                 716 ܕܟܼܝܢܹ̈ܐ ܬܪܹܝܢ ܕܗܘ̤ܘ ܚܹܕ.
                 717 :ܠܵܐ ܫܡܥܝܼܢ ܗܲܪ̈ܛܝܼܩܹܐ
                 718 ܠܟܵܪ̈ܘܿܙܹܐ ܕܡܸܠܲܝ̈ ܪܵܘܼܚܵܐ.
                 719 :ܕܩ̇ܥܹܝܢ ܒܲܕܡܘܼܬ ܫܝܼܦܘܿܪܹ̈ܐ
                 720 ܥܲܠ ܪܘܼܡܪܡܹܗ ܕܒܲܪ ܓܸܢܣܲܢ.
                 721 :ܢܸܐܬܹܐ ܪܹܫܵܐ ܕܲܫܠܚܹ̈ܐ
                 722 ܘܢܲܟܸܣ ܒܸܕܝܵܐ ܕܡܸܠܲܝ̈ܗܘܿܢ.
                 723 :ܘܥܲܡ ܝ̄ܗܘܕ̈ܝܹܐ ܚܲܒܼܪ̈ܝܗܘܿܢ
                 724 ܒܩܲܛܪܸܓܼ ܐܸܢܘܿܢ ܠܲܣܡܲܝܵ̈ܐ.
                 725 :ܢܹܐܡܲܪ ܟܹܐܦܵܐ ܠܲܚܬܝܼܪܹ̈ܐ ܠܲܚܬܝܼܪܹ̈ܐ
                 726 ܝ̄ܗܘܕ̈ܝܹܐ ܚܕ̈ܬܹܐ ܕܲܢܒ݂ܲܥܘ.
                 727 :ܕܡܵܪܝܵܐ ܘܲܡܫܝܼܚܵܐ ܥܲܒܼܕܹܗ
                 728 ܐܲܠܵܗܵܐ ܠܦܓܪܢ ܕܢܣܲܒܼܘ
                 729 :ܡܢܘ ܠܡܢܘ ܥܒܲܓ ܡܵܪܵܝܵܐ
                 730 ܫܸܡܥܘܿܢ ܒܘܼܟܼܪܵܐ ܕܬܵܘܕܝܼܬܿܢ.
                 731 :ܦܲܫܸܩ ܠܲܢ ܚܹܝܠ ܬܵܡ̣ܝܬܵܟ
                 732 ܕܢܲܟܸܣ ܒܵܗ̇ ܠܗܪ̈ܛܝܼܩܹܐ.
                 733 :ܐܹܝܬܵܝܵܐ ܠܲܡ ܡܸܠܬܹܗ ܕܐܲܒܼܵܐ
                 734 ܫܩ̣ܠ ܠܟܼܝܢܲܢ ܘܥܡ̣ܪ ܒܗ.
                 735 :ܘܥܲܒܼܕܹܗ ܡܵܪܝܵܐ ܘܲܡܫܚܵܐ
                 736 ܒܐܝܼܩܪܵܐ ܥܲܡ ܪܲܒܘܼܬܹܗ.
                 737 :ܠܗܵܢܵܐ ܝܼܫܘܿܥ ܕܲܨܠܲܒܼܬܘܿܢ
                 738 ܫܡܲܥ̣ܘ ܝܗ̄ܘܕܝܹ̈ܐ ܬܲܪ̈ܲܝܵܢܹܐ.
                 739 :ܫܵܘܬܵܦܵܐ ܥܲܒܼܕܹܗ ܒܫܘܼܒܼܚܵܐ
                 740 ܐܝܼܬܼܝܵܐ ܘܪܲܡܪܸܡ ܫܘܼܠܛܵܢܹܗ.
                 741 :ܗܘ̤ ܪܹܫܝܼܬܹܗ ܕܲܟܼܝܵܢܲܢ
                 742 ܟܲܟܸܣ ܐܸܢܘܿܢ ܠܲܚܬܝܼܪܹ̈ܐ.
                 743 :ܕܚܵܘܝܼ ܒܵܬܲܪ ܢܘܼܚܵܡܹܗ
                 744 ܪܘܼܟܵܒܼ ܦܲܓܼܪܹܗ ܠܬܲܠܡܝܼܕ̈ܵܘܗܝ.
                 745 :ܢ̄ܨܘܿܬܿ ܢܨܘܬܘܢܵܝܗܝ ܥܲܡ ܬܠܡܝܼ̈ܕܹܐ
                 746 ܐܵܦܸܢ ܟܦܪܝܼܢ ܒܐ̄ܢܫܘܼܬܹܗ.
                 747 :ܕܪܘܼܚܵܐ ܠܵܐ ܩܢܹܐ ܗܲܕܡܹ̈ܐ
                 748 ܐܲܝܟ ܡܵܐ ܕܚܵܘܝܼ ܠܬܲܠܡܝܼܕܵܘ̈ܗܝ.
                 749 :ܓܘܼܫܘܼܢܵܫܝ ܠܲܡ ܘܐܸܬܒܲܩܵܘ
                 750 ܒܲܦܓܼܪܵܐ ܘܓܲܪ̈ܡܹܐ ܕܲܩܢܹܐ ܐ̄ܢܵܐ.
                 751 :ܘܐܲܟܼܪܸܙܘ ܗܕܹܐ ܒܟܼܠ ܥܲܡܡܝܼ̈ܢ
                 752 ܕܒܦܲܓܼܪܵܐ ܘܓܲܪ̈ܡܹܐ ܩܵܡܸ̇ܬ.
                 753 :ܗܵܐ ܚܵܘܝܼ ܠܲܢ ܓܲܠܝܵܐܝܼܬܼ
                 754 ܒܬܲܪ ܩܸܛܠܹܗ ܘܢܘܼܚܵܡܹܗ.
                 755 :ܕܦܲܓܼܪܢܵܐ ܗ̄ܘ̣ ܕܛܠܸܡ ܡܵܘܬܵܐ
                 756 ܘܠܵܐ ܡܫܘܬܦ ܡܸܠܬܐ ܒܚܲܫܵܘ̈ܗܝ.
                 757 :ܘܐܸܢ ܠܵܐ ܢܸܐܡܪܘܿܢ ܓܲܠܝܵܐܝܼܬܼ
                 758 ܡܚܫܲܝ̈ ܠܐܝܼܬܝ̇ܐ ܒܡܸܠܲܝ̈ܗܘܿܢ.
                 759 :ܕܒܵܪܘܿܝܵܐ ܗ̄ܘ̣ ܕܡܲܚܵܘܹܐ ܗ̄ܘ̣ܵܐ
                 760 ܒܸܣܪܵܐ ܘܓܲܪ̈ܡܹܐ ܒܲܟܼܝܢܹܗ.
                 761 :ܥܠܲܝܗܘܿܢ ܢܸܗܦܘܿܟ ܪܸܫܝܵܢܵܐ
                 762 ܕܬܼܒܲܥܬܼܵܐ ܕܗܵܠܹܝܢ ܕܬܢ̇ܝܬ.
                 763 :ܕܒܬ ܕܒܲܠܒܸܠܘ ܘܐܲܟܼܪܸܙܘ ܦܘܼܪܫܵܢܵܐ
                 764 ܕܡܲܟܼܪܸܙ ܦܲܓܼܪܵܐ ܕܐܝܼܬܘܼܬܼܵܐ.
                 765 :ܒܲܬܼܪܹܝܢ ܫܘܼܪ̈ܝܹܐ ܚܲܒܼܒܘܼܗܝ
                 766 ܠܒܼܵܪܘܿܝܵܐ ܕܠܵܐ ܫܘܼܪܝܵܐ.
                 767 :ܚܲܕ ܡ̣ܢ ܟܲܪܣܵܐ ܕܒܲܪܬ ܐ̄ܢܵܫܵܐ
                 768 ܘܐ̄ܚܪܢܐ ܡ̣ܢ ܓܵܘ ܩܲܒܼܪܵܐ.
                 769 :ܐܘܿܗ ܡ̣ܢ ܓܘܼܡܕܵܐ ܕܡܲܪ̈ܚܹܐ
                 770 ܕܟܼܡܵܐ ܐܲܡܪܲܚܘ ܘܐܸܫܬܲܥܠܝܼܘ.
                 771 :ܕܐܝܼܬܼܘܼܬܼܵܐ ܕܠܵܐ ܡܸܬܕܲܪܟܵܐ
                 772 ܣܝ̄ ܣܲܝܟܘܼܗ̇ ܒܟܲܪܣ̇ܐ ܘܲܒܼܩܲܒܼܪܵܐ.
                 773 :ܬܵܘ ܐܲܚܲܝ̈ ܐܲܝܟ ܦܪ̈ܘܼܫܹܐ
                 774 ܢܸܒܼܚܘܿܪ ܒܘܼܫܵܬܐ ܡ̣ܢ ܙܹܐܦܵܐ.
                 775 :ܘܲܢܫܝܼܓ ܢܚܬ̇ܐ ܕܬܘܕܝܼܬܲܢ
                 776 ܡ̣ܢ ܬܸܛܪܐ ܕܗܲܪ̈ܛܝܼܩܹܐ.
                 777 :ܢܸܦܣܘܿܩ ܐܸܢܘܿܢ ܡ̣ܢ ܓܘܼܫܡܢ
                 778 ܠܗܕܡܹ̈ܐ ܢܣܝܼ̈ܣܹܐ ܘܡܲܪ̈ܥܹܐ.
                 779 :ܕܗܵܐ ܪܗܸܛ ܟܹܐܒܵܐ ܕܡܸܠܲܝ̈ܗܘܿܢ
                 780 ܘܐܚܕ ܢܘܿܡܹ̈ܐ ܒܣܓܼܝܼ̈ܠܹܐ.
                 781 :ܢܛܪܘܿܕ ܐܸܢܘܿܢ ܡ̣ܢ ܥܢ̈ܐ
                 782 ܠܕܸܐܒܹ̈ܐ ܕܒܲܣܒܸܣܘ ܡܲܪܥܝܿܬܵܐ.
                 783 :ܕܒܸܐܣܟܹܝܡ ܐܸܡܕܹ̈ܐ ܡܸܬܼܕܡܲܝܼܢ
                 784 ܟܲܕ ܢܘܼܟܼܪ̈ܵܚܹܝܢ ܠܲܫܪܵܪܵܐ.
                 785 :ܠܵܐ ܢܸܚܠܘܿܛ ܒܹܗ ܒܲܫܪܵܪܲܢ
                 786 ܙܝܼܙܵܢܹ̈ܐ ܕܦܸܬܼܓܵܡܲܝ̈ܗܘܿܢ.
                 787 :ܕܡܵܘܥܝܼܢ ܟܠܢܵܫ ܦܘܼܠܸܓܹ̈ܐ
                 788 ܒܬܘܕܝܼܬܵܐ ܕܥܲܠ ܐܝܼܬܘܼܬܵܐ.
                 789 :ܢܹܐܣܘܿܪ ܚܘܼܒܵܐ ܕܬܲܪܥܲܝܬܲܢ
                 790 ܒܗܲܝܡܵܢܘܼܬܗܘܿܢ ܕܲܫܠܝܼܚܹ̈ܐ.
                 791 :ܕܗܸܢܘܿܢ ܚܲܙܩܘܼܗ̇ ܠܐ̄ܢܵܫܘܼܬܲܢ
                 792 ܒܬܘܕܝܼܬܼܵܐ ܕܗܲܝܡܵܢܘܼܬܼܵܐ.
                 793 :ܒܬܵܘܕܝܼܬܹܗ ܕܫܸܡܥܘܿܢ ܢܸܒܢܹܐ
                 794 ܒܸܢܝܵܢܵܐ ܕܗܲܝܡܵܢܘܼܬܲܢ.
                 795 :ܘܒܲܠܘܝܼܬܹܗ ܕܦܵܘܠܘܿܣ ܢܸܕܲܕܹܐ
                 796 ܕܕܲܪܲܫ ܐܘܼܪܚܵܐ ܠܲܫܡܲܝܵܐ.
                 797 ܒܫܲܘܝܘܼܬܵܐ ܕܲܬܪܹܥܣܲܪܬܵܐ: 

                 f.152r 

                 798 :ܢܵܘܕܹܐ ܥܲܡܗܘܿܢ ܐܲܝܟ ܫܸܡܥܘܿܢ
                 799 :ܕܡܵܪܝܵܐ ܘܲܡܫܝܼܚܵܐ ܥܲܒܼܕܗ
                 800 ܒܵܪܘܿܝܵܐ ܠܦܓܼܪܢ ܕܢܲܣܲܒ܀ ܫܠܸܡ܀