Narsai. “On the Martyrs - ܥܲܠ ܣܵܗ̈ܕܹܿܐ.” Based upon BL Or. 9363. Digital Syriac Corpus. Last modified April 26, 2019. https://syriaccorpus.org/70.
    
        
            
                ܥܲܠ ܣܵܗ̈ܕܹܿܐ
            
            
                 f.137v 
                ܡܹܐܡܪܵܐ܀ ܠ܀
                ܕܣܵܗ̈ܕܹܐ܀
                ܐܲܚܲܝ̈.
            
            
                 1 ܚܲܝܠܵܐ ܕܲܢܚܬܼ ܥܲܡ ܐܲܬܼ̈ܠܹܝܛܐ ܒܐܵܓܼܘܿܢܲܝ̈ܗܘܿܢ.
                 2 :ܒܵܟ ܐܸܬܼܚܲܝܲܠ ܠܡܸܬܼܢܵܐ ܫܘܼܦܪܵܐ ܕܢܸܨܚܵܢܲܝ̈ܗܘܿܢ
                 3 ܒܪܵܐ ܕܲܒܼܚܘܼܒܹܗ ܣܲܝܒܲܪܘ ܣܵܗ̈ܕܹܐ ܩܹܐܪ̈ܣܹܐ ܟܲܕܡܵܐ.
                 4 :ܗܲܒܼܠܝܼ ܡܸܠܬܐ ܕܡܛܝܵܐ ܕܐܸܬܼܢܸܐ ܩܘܠܵܣܲܝ̈ܗܘܿܢ
                 5 ܐܘܿ ܕܲܒܼܚܘܼܒܹܗ ܐܲܪܘܝܼ ܠܐ̄ܢܵܫܵܐ ܘܕܼܵܫܘ ܥܲܠ ܡܵܘܬܵܐ.
                 6 :ܐܲܫܩܵܢܝ ܚܘܼܒܵܟ ܕܐܹܡܲܠܸܠ ܒܵܟ ܩܘܼ̈ܠܣܲܝܗܘܿܢ
                 7 ܩܛܝܼܠܵܐ ܕܲܟܼܪ̣ܫ ܐܘܼܪܚܵܐ ܕܚܲܫܹ̈ܐ ܠܚܲܝ̈ܠܵܘܵܬܹܗ.
                 8 :ܢܥܝܼܪܵܝ ܚܲܫܵܟ ܥܲܠ ܫܲܪ̈ܒܲܝܗܘܿܢ ܦܵܪܘܿܫܵܐܝܼܬܼ
                 9 ܚܲܬܼܢܵܐ ܩܛܝܼܠܵܐ ܕܲܒܼܡܸܫܬܿܘܼܬܹܗ ܫܹܐܕܹ̈ܐ ܪܡܹܝܢ ܗ̄ܘ̣ܵܘ.
                 f.138r 
                 10  ܗܲܒܼܠܝܼ ܕܐܸܡܙܘܿܓܼ ܛܸܒܹܿܗ ܕܩܸܛܠܵܟ ܒܹܝܬܼ ܫܵܪܘܼܬܼܵܟ.
                 11 :ܒܵܟ ܡܵܪܝ ܐܸܩܪܘܿܒܼ ܠܲܡܡܲܠܵܠܘܼ ܥܲܠ ܚܲܫܲܝ̈ܗܘܿܢ
                 12 ܕܐܸܠܵܐ ܐܸܢ ܒܵܟ ܠܵܐ ܡܸܬܼܝܲܕ ܝܲܕܥܝܼܢ ܢܸܨܚܵܢܲܝ̈ܗܘܿܢ.
                 13 :ܐܲܢ̄ܬܘܼ ܫܘܼܦܪܵܐ ܕܟܼܠ ܕܐܸܬܼܩܲܪܲܒܼ ܠܲܓܼܡܝܼܪܘܼܬܼܵܐ
                 14 ܘܐܲܢ̄ܬܿܘܼ ܟܠܝܼܠܵܐ ܕܟܼܠ ܕܐܸܬܼܢܲܨܲܚܘ ܒܐܵܓܼܘܿܢܲܝ̈ܗܘܿܢ.
                 15 :ܒܚܲܫܵܟ ܕܝܼܠܵܟ ܐܲܡܣܲܪܘ ܣܵܗ̈ܕܹܐ ܥܲܠ ܚܲܫܝ̈ܗܘܿܢ
                 16 ܘܥܲܠ ܕܲܚ̣ܙܵܘ ܒܵܟ ܟܹܐܒܹ̈ܐ ܣܲܝܒܲܪܘ ܐܘܼܠܨܵܢܲܝ̈ܗܘܿܢ.
                 17 :ܗܲܒܼܠܝܼ ܡܵܪܢ ܕܐܸܓܼܕܘܿܠ ܫܘܼܦܪܵܐ ܕܲܠܝܼܠܲܝ̈ܗܘܿܢ
                 18 ܡ̣ܢ ܒܹܝܬܼ ܓܲܙܵܟ ܕܲܡܠܸܐ ܥܘܼܬܼܪܵܐ ܠܲܕܩܵܪܸܒܼ ܠܹܗ.
                 19 :ܗܠܹܝܢ ܕܲܛܥܲܢܘ ܝܘܼܩܪܹܗ ܕܚܲܫܵܟ ܥܲܠ ܦܲܓܼܪ̈ܝܗܘܿܢ
                 20 ܘܲܒܼܡܲܚ̈ܘܵܬܗܘܿܢ ܐܣܸܩܘ ܨܲܠܡܵܟ ܠܲܙܩܝܼܦܘܼܬܼܵܐ.
                 21 :ܗܵܠܹܝܢ ܕܐܲܩܠܝܼܘ ܥܲܠ ܣܲܦܣܹܪܵܐ ܘܥܲܠ ܓܵܘܙܲܠܬܵܐ
                 22 ܘܕܲܫܘ ܥܲܠ ܓܡ[...]ܪܹ̈ܐ ܒܪܹܬܚܵܐ ܕܚܘܼܒܵܟ ܡܸܛܠܵܬܼܵܟ.
                 23 :ܗܵܠܹܝܢ ܕܲܓܼܚܸܕܘ ܠܘܼܩܒܲܠ ܣܲܝܦܵܐ ܟܲܕ ܡܸܬܼܩܲܛܠܝܼܢ
                 24 ܘܲܦܨܝܼܚܵܐܝܼܬܼ ܝܲܗ̣̄ܒܼܘ ܠܲܦܣܵܩܵܐ ܗܲܕܵܡܲܝ̈ܗܘܿܢ.
                 25 :ܗܵܠܹܝܢ ܕܲܪܗܸܛܘ ܠܘܼܩܒܼܵܠ ܩܸܛܠܵܬ ܒܚܹܐܦܵܐ ܪܲܒܵܐ
                 26 ܘܩܲܒܸܿܠܘ ܣܲܝܦܵܐ ܐܲܝܟ ܡܵܘܗܲܒܼܬܼܵܐ ܕܡܲܠܝܵܐ ܛܘܼܒܹ̈ܐ.
                 27 :ܗܵܠܹܝܬ ܕܲܗܘ̤ܵܘ ܐܘܼܟܼܠܵܐ ܠܢܘܼܪܵܐ ܘܲܠܚܲܝ̈ܘܵܬܵܐ
                 28 ܘܠܵܐ ܙܵܥܘ ܘܐܲܫܦܸܠܘ ܟܲܕ ܡܸܬܼܚܲܪܒܝܼܢ ܡܸܛܠܵܬܼܵܟ.
                 29 :ܗܵܠܹܝܢ ܕܲܫܒܲܩܘ ܥܵܠܡܵܐ ܘܓܸܢܣܵܐ ܡܸܛܠܵܬܼܵܟ
                 30 ܘܲܣܢ̣ܵܘ ܒܵܬܹ̈ܐ ܘܐܲܚܹ̈ܐ ܘܛܘܼܗ̈ܡܹܐ ܕܠܵܟ ܢܸܬܼܩܲܪܒܼܘܼܢ.
                 31 :ܪܵܚܡܵܐ ܕܫܲܪܝܼܪ ܐܸܠܵܐ ܒܩܘܼܫܬܵܐ ܠܵܐ ܡܸܬܼܢܲܨܲܚ
                 32 ܘܐܸܢ ܠܵܐ ܡܵܐܲܬܼ ܡܸܛܠ ܪܵܚܡܹܐ ܠܵܐ ܡܲܚܸܒܼ ܠܹܗ.
                 33 :ܗܵܢܵ̇ܘ ܚܘܼܒܵܐ ܘܲܕܪܲܒܿ ܡܸܢܹܗ ܐ̄ܚܪܹܢܵܐ ܠܵܐ ܐܝܼܬܼ
                 34 ܕܡܸܛܠ ܪܵܚܡܹܗ ܐ̄ܢܵܫ ܟܲܕ ܚܵܕܹܐ ܠܡܵܘܬܵܐ ܢܸܩܪܘܿܒܼ.
                 f.138v 
                 35  ܒܚܲܝܹ̈ܐ ܪ̈ܚܝܼܡܹܐ ܘܲܒܼܓܹܐܘ̈ܬܼܵܐ ܘܲܒܼܒܼܘܼܣܵܡܹ̈ܐ: 
                 36 ܐܲܝܢܵܐ ܕܡܲܚܸܒܼ ܠܵܐ ܒܚܝܼܪ ܚܘܼܒܹܗ ܒܹܝܬܼ ܦܵܪ̈ܘܿܫܹܐ.
                 37 :ܢܘܼܪܵܐ ܒܚܵܪܵܐ ܠܕܲܗܒܼܵܐ ܕܲܟܝܼܵܐ ܐܸܢ ܫܲܦܝܼܪ ܗ̄ܘ̣
                 38 ܘܡܵܘܬܵܐ ܒܚܲܫܹ̈ܐ ܒܵܩܹ̇ܐ ܠܡܘܼܒܵܐ ܕܐܸܢ ܫܲܪܝܼܪ ܗ̄ܘ̣.
                 39 :ܐܸܢ ܠܵܐ ܥܸܐܸ̇ܠ ܕܲܗܒܼܵܐ ܠܟܼܘܼܪܵܐ ܘܡܸܬܼܦܲܚܲܪ ܒܹܗ
                 40 ܕܢܸܬܿܬܨܝܼܪ ܥܠܵܘܗܝ ܨܲܠܡܵܐ ܕܡܲܠܟܵܐ ܦܘܼܪܣܵܐ ܠܵܐ ܐܝܼܬܼ.
                 41 ܘܐܸܢ ܠܵܐ ܩܵܪܹܒܼ ܐ̄ܢܵܫ ܠܐܘܼܠܨܵܢܵܐ ܥܕܲܡܵܐ ܠܡܵܘܬܵܐ.
                 42 ܠܵܐ ܡܸܬܿܬܿܨܝܼܪ ܒܹܗ ܨܲܠܡܵܐ ܕܚܘܼܒܵܐ ܕܐܠܸܵܗܘܼܬܿܐ.
                 43 :ܕܲܗܒܼܵܐ ܒܟܼܘܼܪܵܐ ܡܩܲܒܹܠ ܛܲܒܼܒܼܐ ܕܢܸܗܘܸܐ ܨܲܠܡܵܐ
                 44 ܘܐ̄ܢܵܫܵܐ ܒܚܲܫܹ̈ܐ ܡܩܝܼܡ ܒܹܗ ܨܲܠܡܵܐ ܕܐܲܠܵܗܘܼܬܼܵܐ.
                 45 :ܒܵܠܲܥ ܕܲܗܒܼܵܐ ܪܸܒܿܘܼ ܙܲܒܼܢ̈ܝܼܢ ܥܲܠ ܣܸܕܵܢܵܐ
                 46 ܘܟܸܢ ܥܵܒ̇ܕܝܼܢ ܠܹܗ ܚܫܠܬܼܵܐ ܠܬܼܵܓܼܐ ܒܫܘܼܦܪܵܐ ܕܩܢܐ.
                 47 :ܘܗܵܟܢ ܣܵܗ̈ܕܹܐ ܒܝܲܕ ܡܲܚ̈ܘܼܬܼܗܘܿܢ ܫܘܼܦܪܵܐ ܐܸܫܟܲܚܘ
                 48 ܘܗܵܐ ܒܟܼܠܝܼܠܹܗ ܕܡܲܠܟܵܐ ܓܕܝܼܠܝܼܢ ܟܲܕ ܡܸܬܼܢܲܨܚܝܼܢ.
                 49 :ܛܪ̈ܘܼܢܹܐ ܕܐ̄ܢܵܫܵܐ ܗܘ̤ܵܘ ܐܘܼܡܵܢܹ̈ܐ ܡܗܝܼܪܹ̈ܐ ܕܲܚܫܲܠܘ
                 50 ܐ̄ܢܵܫܵܐ ܒܚܲܫܹ̈ܐ ܘܲܣܕܲܪ ܐܸܢܘܿܢ ܒܹܝܬܼ ܡܲܠܟܿܘܼܬܼܵܐ.
                 51 :ܦܲܓܼܪܵܐ ܕܣܵܗ̈ܕܹܐ ܐܲܝܟ ܕܲܠܕܲܗܒܼܵܐ ܒܢܘܼܪܵܐ ܣܵܡܘܼܗܝ
                 52 ܘܲܥܒܲܕܘ ܡܸܢܹܗ ܬܵܓܼܐ ܕܬܲܗܪܵܐ ܠܡܲܠܟܵܐ ܪܲܒܵܐ.
                 53 :ܒܢܸ̈ܓܼܕܹܐ ܚܲܫܠܘܼܗܝ ܘܲܒܼܡܲܚ̈ܘܼܬܼܵܐ ܣܵܡ̣ܘ ܒܹܗ ܫܘܼܦܪܵܐ
                 54 ܒܚܲܪ ܬܹܗ ܢܘܼܪܵܐ ܘܩܲܒܸܿܠ ܨܘܼܪܬܵܐ ܕܠܵܐ ܡܸܬܼܚܲܒܿܠܵܐ.
                 55 :ܒܠܲܥܘ ܐܲܝܟ ܕܲܗܒܼܵܐ ܘܲܩܢ̣ܵܘ ܫܘܼܦܪܵܐ ܐܲܝܟ ܚܸܫ̈ܠܵܬܼܵܐ
                 56 ܕܲܠܬܲܨܒܿܝܼܬܼܵܐ ܕܟܲܠܬܼܵܐ ܢܸܗܘܘܿܢ ܒܹܝܬܼ ܡܸܫܬܿܘܼܬܼܵܐ.
                 57 :ܚܲܬܼܢܵܐ ܩܛܝܼܠܵܐ ܙܲܡܸܢ ܐܸܢܘܿܢ ܠܒܹܝܬܼ ܡܸܫܬܘܼܬܼܵܐ
                 58 ܘܐܲܝܬܿܝܼܘ ܗܸܢ̣ܘܿܢ ܕܸܡܗܘܿܢ ܥܲܡܗܘܿܢ ܪ̈ܘܼܡܝܵܢܲܝܗܘܿܢ.
                 59 ܣܡܵܟܼܵܐ ܕܢܘܼܗܪܵܐ ܕܲܡܠܸܐ ܚܪ̈ܝܼܒܹܐ ܗܵܐ ܚܵܙܹ̇ܐ ܐ̄ܢܵܐ.
                 f.139r 
                 60  ܨܵܘܪܹ̈ܐ ܦܣܝ̈ܩܹܐ ܘܦܲܓܼܪܹ̈ܐ ܢܣܝܼܪܹ̈ܐ ܘܓܼܘܼܫ̈ܡܹܐ ܣܪ̈ܝܼܩܹܐ. 
                 61 :ܪܹ̈ܫܹܐ ܩܛ̈ܝܼܠܹܐ ܘܲܫܪܲܟܼܘܿܕܹܐ ܕܟܼܠ ܣܘܼܪ̈ܕܝܼܢ
                 62 ܘܲܡܠܸܐ ܡܸܢܗܘܿܢ ܒܲܝܬܵܐ ܪܲܒܵܐ ܕܒܹܝܬܼ ܡܸܫܬܿܘܼܬܼܵܐ.
                 63 :ܘܒܲܝܫܵܬܼ ܗܵܠܹܝܢ ܟܲܠܬܵܐ ܒܬܼܘܼܠܬܵܐ ܦܨܝܼܚܲܬ̤ ܪܲܒܲܬܼ
                 64 ܘܚܲܒܿܝܼܒܼܝܼܢ ܠܵܗ̇ ܚܸܙ̈ܘܸܐ ܡܫܲܟܼܪܹ̈ܐ ܕܦܘܼܣܵܩܲܝ̈ܗܘܿܢ.
                 65 :ܡܢܲܓܲܕ ܗܵܢܵܐ ܘܲܦܠܝܼܥ ܗܵܢܵܐ ܘܲܩܛܝܼܠ ܗܵܢܵܐ
                 66 ܡܒܲܣܒܲܣ ܗܵܢܵܐ ܘܲܣܪܝܼܩ ܗܵܢܵܐ ܘܲܫܩܝܼܠ ܗܵܢܵܐ.
                 67 :ܐܝܼܬܼ ܕܲܦܟܼܝܼܪܝܼܢ ܘܐܝܼܬܼ ܕܲܩܛܝܼܠܝܼܢ ܡ̣ܢ ܪ̈ܕܘܿܦܹܐ
                 68 ܚܲܕ ܡܸܬܼܦܲܫܲܚ ܘܚܲܕܼ ܡܸܬܼܢܲܬܲܦ ܡ̣ܢ ܚܵܝܵܬܼܵܐ.
                 69 :ܘܐܝܼܬܼ ܕܡ̣ܢ ܢܘܼܪܵܐ ܣܵܠܩܵܐ ܣܘܵܬܹܗ ܐܲܝܟ ܗܹܪܘܿܡܹܐ
                 70 ܐ̄ܚܪܹܢܵܐ ܡܦܲܫܲܚ ܟܲܕ ܡܸܬܢܲܬܲܦ ܡ̣ܢ ܥܵܘ̈ܠܹܐ.
                 71 :ܗܵܘ̇ ܐܸܬܼܦܲܪܣܝܼ ܘܗܵܘ̇ ܐܸܬܼܒܲܣܒܲܣ ܘܗܵܘ̇ ܐܸܬܼܦܲܣܲܩ
                 72 ܟܠܗܘܿܢ ܣܲܝܒܲܪܘ ܟܠ ܐܘܼܠܨܵܢ̈ܝܼܢ ܥܵܘܠܹ̇ܐܝܼܬܼ.
                 73 :ܣܡܵܟܼܵܐ ܪܲܒܵܐ ܕܲܙܩܝܼܦܘܼܬܼܵܐ ܡܵܪܲܬ̤ ܚܲܫܹ̈ܐ
                 74 ܘܐܝܢܵܐ ܕܥܲܠ̣ ܠܹܗ ܚܲܡܪܵܐ ܕܟܹܐܒܸ̈ܐ ܥܨܲܪ ܠܹܗ ܘܐܸܫܬܿܝܼ.
                 75 :ܙܡܝܼ̈ܢܹܐ ܕܲܩܪܵܐ ܚܲܬܼܢܵܐ ܕܪܵܘܡܵܐ ܘܥܲܡܹܗ ܥܲܠ̣ܘ ܗ̄ܘ̣ܵܘ
                 76 ܦܸܓܼܥܲܬ̤ ܗ̄ܘ̣ܵܬܼ ܒܗܘܿܢ ܚܲܪܒܵܐ ܠܛܝܼܫܬܵܐ ܒܹܝܬܼ ܡܸܫܬܿܘܼܬܹܗ.
                 77 :ܢܘܼܪܵܐ ܕܝܲܩܕܵܐ ܥܲܡ ܣܲܦܣܹܪܐ ܕܨܲܗܝܵܬ ܠܲܕܡܵܐ
                 78 ܢܩܵܫܵܐ ܕܟܹܐܦܹ̈ܐ ܘܚܘܼܪܵܩ ܫܸܢܹ̈ܐ ܕܐܲܪ̈ܝܵܘܵܬܼܵܐ.
                 79 :ܥܲܡ ܬܸܢܵܢܵܐ ܪܲܒܵܐ ܕܣܵܠܹ̇ܩ ܡ̣ܢ ܝܲܩܕܵܢܵܐ
                 80 ܚܸܡܬܼܵܐ ܕܚܲܢ̈ܦܹܐ ܕܕܲܡܝܵܐ ܒܓܲܠ̈ܠܹܝܗ̇ ܠܝܲܡܵܐ ܪܲܒܵܐ.
                 81 :ܒܗܵܢ ܐܸܣܟܹܿܡܵܐ ܕܗܵܠܹܝܢ ܚܲܫܹ̈ܐ ܥܝܲܕܘ ܩܲܕܝܼ̈ܫܐ
                 82 ܘܲܦܨܝܼܚܵܐܝܼܬܼ ܣܲܝܒܲܪܘ ܟܹܐܒܹ̈ܐ ܕܠܵܐ ܪܘܼܥܵܡܵܐ.
                 83 :ܦܫܝܼܩ ܗ̄ܘ̣ ܠܚܘܼܒܵܐ ܕܠܵܐ ܢܸܬܼܪܲܥܲܡ ܟܲܕ ܡܸܨܛܲܥܲܪ
                 84 ܕܟܼܠ ܓܹܝܪ ܣܵܒܹ̇ܠ ܘܲܡܣܲܝܒܲܪ ܟܠ ܐܲܟܼܡܵܐ ܕܲܟܼܬܼܝܼܒܼ.
                 f.139v 
                 85  ܟܹܐܒܹ̈ܐ ܘܚܲܫܹ̈ܐ ܥܲܡ ܐܘܼܠܨܵܒܹ̈ܐ ܘܢܸܓܼ̈ܕܹܐ ܣܲܝܒܲܪܘ: 
                 86 ܣܵܗ̈ܕܹܐ ܒܚܘܼܒܿܗܘܿܢ ܟܲܕ ܡܸܬܼܩܲܙܚܝܼܢ ܡ̣ܢ ܥܵܘ̈̇ܠܹܐ.
                 87 :ܣܓܼܘܼܠܵܐ ܕܚܲܝܹ̈ܐ ܕܲܒܼܝܲܕܼ ܪܘܼܡܚܵܐ ܥܨܲܪܘ ܝܗ̄ܘܼ̈ܕܵܝܹܐ
                 88 ܐܲܪܘܝܼ ܠܣܵܗ̈ܕܹܐ ܒܚܲܡܪܹܗ ܕܢܸܛܠܘܿܢ ܐܘܼܠܨܵܢܲܝ̈ܗܘܿܢ.
                 89 :ܐܲܣܓܝܘ ܘܐܸܫܬܿܝܼܘ ܡ̣ܢ ܗܵܘ̇ ܚܲܡܣܵܐ ܕܲܙܩܝܼܦܘܼܬܼܵܐ
                 90 ܥܕܲܡܵܐ ܕܐܵܦܵܠܵܐ ܒܢܘܼܪܵܐ ܐܲܪܓܸܿܫܘ ܒܐܵܓܼܘܿܢܲܝ̈ܗܘܿܢ.
                 91 :ܥܒܲܕ ܗ̄ܘ̣ܵܐ ܐܸܢܘܿܢ ܚܲܡܪܵܐ ܕܐܸܫܬܿܝܼܘ ܡ̣ܢ ܓܵܓܼܘܼܠܬܵܐ
                 92 ܕܢܸܗܘܘܿܢ ܡܗܲܠܟܼܝܼܢ ܥܲܠ ܓܵܘܙܲܠܬܼܵܐ ܟܲܕ ܚܵܕܹܝܢ ܗ̄ܘ̣ܵܘ.
                 93 :ܕܡܵܐ ܡ̣ܢ ܣܸܛܪܹܗ ܕܡܲܠܟܿܐ ܡܫܝܼܚܵܐ ܡܫܲܚܘ ܒܐܵܓܼܘܿܢܵܐ
                 94 ܘܫܸܪܥܲܬ̤ ܡܸܢܗܘܿܢ ܐܝܼܕܹܗ ܪܵܡܬܼܵܐ ܕܵܒܼܥܸܠܕܒܼܵܒܼܵܐ.
                 95 :ܕܵܘܝܵܐ ܕܐܲܩܪܸܒܼ ܘܐܲܪܡܝܼ ܠܐܵܕܵܡ ܒܹܝܬܼ ܐܝܼܠܵܢܹ̈ܐ
                 96 ܗܘ̤ ܐܸܬܼܟܲܬܲܫ ܕܢܲܪܡܸܐ ܠܣܵܗ̈ܕܹܐ ܩܕܼܵܡ ܕܲܝ̈ܢܹܐ.
                 97 :ܪܘܚܵܐ ܕܫܘܼܩܪܵܐ ܕܙܸܡܪܲܬ̤ ܢܸܟܼܠܵܐ ܠܚܵܘܵܐ ܒܐܸܕܢܹܝ̈ܗ̇
                 98 ܫܲܕܠܲܬ̤ ܐܸܢܘܿܢ ܕܬܲܟܼܦܲܪ ܐܸܢܘܿܢ ܒܲܥܪܝܼܡܘܼܬܼܵܗ̇.
                 99 :ܠܵܐ ܕܹܝܢ ܩܲܒܸܿܠܘ ܡܲܠܟܵܐ ܒܝܼܫܵܐ ܘܡܹܐܡܪܹܗ ܣܲܢܝܵܐ
                 100 ܕܲܥܪܝܼܡܝܼܢ ܗ̄ܘ̣ܵܘ ܡ̣ܢ ܬܲܢܼܝܼܢܵܐ ܕܐܲܛܥܝܼ ܐܸܢܘܿܢ.
                 101 :ܡ̣ܢ ܝܘܼܠܦܢܹܗ ܡܗܝܼܪܵܐ ܕܝܼܫܘܿܥ ܐܸܬܼܚܲܟܲܡܘ ܗ̄ܘ̣ܵܘ
                 102 ܘܐܸܬܿܕܲܪܲܫܘ ܗ̄ܘ̣ܵܘ ܒܲܗܪܝܼܡܘܼܬܼܵܐ ܘܬܲܡܝܼܡܘܼܬܼܵܐ.
                 103 :ܗܘ̤ ܒܲܣܒܲܪܬܹܗ ܦܲܩܸܕ ܐܸܢܘܿܢ ܘܐܵܠܸܦ ܐܸܢܘܿܢ
                 104 ܕܢܼܗܘܘܿܢ ܕܵܡܼ̇ܝܢ ܐܵܦ ܠܝܵܘ̈ܢܹܐ ܘܠܲܚ̈ܘܵܘܵܬܼܵܐ.
                 105 :ܒܬܲܡܝܼܡܘܼܬܼܵܐ ܠܝܵܘ̈ܢܹܐ ܕܵܡܹ̇ܝܢ ܐܲܝܟ ܕܝܼܠܸܦܘ ܗ̄ܘ̣ܵܘ
                 106 ܘܟܲܕ ܡܸܬܼܩܲܛܠܝܼܢ ܫܠܹܝܢ ܘܲܦܫܝܼܛܝܼܢ ܒܹܝܬܼ ܩܵܛ̈ܘܿܠܹܐ.
                 107 :ܐܸܠܘܼ ܐܝܼܬܼ ܗ̄ܘ̣ܵܐ ܪܘܼܓܼܙܵܐ ܒܝܵܘܢܵܐ ܠܵܐ ܥܵܡܪܵܐ ܗ̄ܘ̣ܵܬܼ
                 108 ܥܲܡ ܗܵܘ̇ ܕܲܠܚܝܼܡ ܥܲܠ ܦܲܪ̈ܘܼܓܹܝܗ̇ ܠܲܡܩܲܛܵܠܘ.
                 109 :ܘܲܕܫܲܦܝܼܪܵܐ ܗ̄ܝ̣ ܗܵܕܹܐ ܩܢܵܐ ܘܼܗ̇ ܐܵܦ ܬܲܠܡܝܼ̈ܕܹܐ
                 f.140r 
                 110 ܕܠܵܐ ܢܸܬܼܚܲܡܬܼܘܼܢ ܡܵܐ ܕܡܸܬܼܚܲܪܒܿܝܼܢ ܡ̣ܢ ܥܵܘ̈̇ܠܹܐ. 
                 111 :ܠܪܝܼܡ ܗ̄ܘ̣ ܚܸܘܝܵܐ ܕܢܛܲܪ ܢܲܦܫܹܗ ܡ̣ܢ ܢܸܟܼܝܵܢܹ̈ܐ
                 112 ܘܲܙܗܝܼܪܵܐܝܼܬܼ ܚܵܝܹ̇ܐ ܟܠܝܘܿܡ ܐܲܝܟ ܚܲܟܿܝܼ̈ܡܹܐ.
                 113 :ܝܵܕܲܥ ܗ̄ܘ̣ ܓܹܝܪ ܒܲܥܪܝܼܡܘܼܬܹܗ ܐܲܝܟܵܐ ܕܡܸܬܬܿܚܸܕ
                 114 ܕܪܹܫܹܗ ܪܵܨܝܼܢ ܘܥܲܠ ܗܵܝ̇ ܥܵܪܹܩ ܡ̣ܢ ܣܵܩܘܪ̈ܘܗܝ.
                 115 :ܐܸܢ ܓܹܝܪ ܓܲܪܣܵܐ ܕܡܸܬܿܬܿܚܸܕ ܕܲܒܼܵܠ̇ܥ ܛܲܫܝܼ ܪܹܫܹܗ
                 116 ܘܐܲܫܠܸܡ ܟܠܹܗ ܦܲܓܼܪܹܗ ܠܚܲܫܹ̈ܐ ܘܠܲܡܚ̈ܘܵܬܼܵܐ.
                 117 :ܪܹܫܵܐ ܕܢܲܦܫܵܐ ܗܲܝܡܵܢܘܼܬܼܵܐ ܗ̄ܝ̣ ܒܹܝܬܼ ܦܵܪ̈ܘܿܫܹܐ
                 118 ܘܠܵܗ̇ ܢܵܛ̇ܪܝܼܢ ܗ̄ܘ̣ܵܘ ܣܵܗ̈ܕܹܐ ܒܕܼܝܼܢܵܐ ܕܗ̤ܝ ܠܵܐ ܬܸܒܲܠܲܥ.
                 119 :ܫܪܵܪܗܘܿܢ ܒܲܠܚܘܿܕ ܝܲܨܝܦܝܼ̈ܢ ܗ̄ܘ̣ܵܘ ܠܲܡܛܵܪܘ
                 120 ܒܲܥܪܝܼܡܘܼܬܼܵܐ ܕܲܚ̈ܘܘܵܬܵܐ ܕܲܡܠܹܝܢ ܡܸܪܬܼܵܐ.
                 121 :ܠܗܲܝܡܵܢܘܼܬܼܵܐ ܪܹܫܵܐ ܕܚܲܝܹ̈ܐ ܠܒܲܟܼܘ ܒܲܙܗܝܼܪܘܼ
                 122 ܘܝܲܗ̄ܒܼ݂ܘ ܠܲܦܣܵܩܵܐ ܘܲܠܒܼܘܼܣܒܵܣܵܐ ܗܲܕܵܡܲܝ̈ܗܘܿܢ.
                 123 :ܚܲܝܹ̈ܐ ܕܚܸܘܝܵܐ ܒܪܹܫܹܗ ܐܸܢܘܿܢ ܘܐܸܢ ܪܵܨܝܼܢ ܠܹܗ
                 124 ܐܵܘܒܸܕ ܚܲܝܵܘ̈ܗܝ ܘܥܲܠ ܗܵܘ̄ ܪܹܫܹܗ ܡܛܲܫܸܐ ܛܠܝܘܼܡ.
                 125 :ܘܚܲܝܹ̈ܐ ܕܢܲܦܫܵܐ ܒܗܲܝܡܵܢܘܼܬܼܵܐ ܬܠܹܝܢ ܘܲܢܛܝܼܪܝܼܢ
                 126 ܘܐܸܢ ܐܸܬܼܢܲܟܲܝܲܬ̤ ܗܲܝܡܵܢܘܼܬܼܵܐ ܚܲܝܹ̈ܐ ܐܸܒܲܕܘ.
                 127 :ܘܐܵܠܵܨܵܐ ܕܢܛܲܪ ܗܲܝܡܵܢܘܼܬܼܵܐ ܡ̣ܢ ܡܲܟܼܫܘܼ̈ܠܹܐ
                 128 ܐܲܝܟ ܕܐܵܦ ܚܸܘܝܵܐ ܡܛܲܫܸܐ ܪܹܫܹܗ ܡ̣ܢ ܡܲܚ̈ܘܵܬܼܵܐ.
                 129 :ܗܲܟܲܢ ܣܵܗ̈ܕܹܐܐ ܒܕܼܚܵܠܐ ܢܲܛܪܘܼܗ̇ ܠܗܲܝܡܵܢܘܼܬܼܵܐ
                 130 ܘܟܲܕ ܒܵܠܥܝܼܢ ܗ̄ܘ̣ܵܘ ܡ̣ܢ ܕܲܝ̈ܢܐ ܗ̤ܝ ܠܵܐ ܒܸܠܥܲܬ̤.
                 131 :ܒܚܲܝܹ̈ܐ ܐ̄ܚܪ̈ܢܹܐ ܕܲܥܬܼܝܼܕܝܼܢ ܗ̄ܘ̣ܵܘ ܐܲܪܓܹܿܫܘ ܣܵܗ̈ܕܹܐ
                 132 ܘܡܸܛܠ ܗܵܕܹܐ ܝܲܗ̣̄ܒܼܘ ܦܲܓܼܪ̈ܝܗܘܿܢ ܠܡܸܣܒܲܠ ܚܲܫܹ̈ܐ.
                 133 :ܒܚܲܫܹ̈ܐ ܕܣܲܝܒܲܪܘ ܘܲܒܼܡܲܚ̈ܘܵܬܼܗܘܿܢ ܐܲܙܝܼܥܘ ܠܐܲܪܥܵܐ
                 134 ܕܥܵܠܡܵܐ ܐ̄ܚܪܹܢܵܐ ܐܝܼܬܼ ܠܐܲܠܵܗܵܐ ܕܪܲܒܿ ܡ̣ܢ ܗܵܢܵܐ.
                 f.140v 
                 135 :ܣܲܝܒܲܪܘ ܚܲܫܹ̈ܐ ܒܥܸܠܲܬܼ ܚܲܢ̈ܦܹܐ ܥܕܲܡܵܐ ܕܗܲܝܡܸܢܘ 
                 136 ܘܐܫܲܪܘ ܕܐܝܼܬܹ ܗ̄ܘ̣ ܡܸܕܸܢ ܟܲܣܝܵܐ ܕܲܪܓܸܝܫܝܼܢ ܒܹܗ.
                 137 :ܚܙ̣ܵܘ ܪ̈ܕܘܿܦܹܐ ܕܲܟܼܡܵܐ ܦܨܝܼܚܝܼܢ ܠܘܼܩܒܲܠ ܡܵܘܡܵܐ
                 138 ܘܐܲܙܝܼܥ ܐܸܢܘܿܢ ܬܲܗܪܵܐ ܪܲܒܵܬ ܠܲܡܩܲܠܵܣܘ.
                 139 :ܘܫܲܪܝܼܘ ܪܵܢܹ̇ܝܢ ܕܐܸܠܘܼ ܚܲܝܹ̈ܐ ܐ̄ܚܪ̈ܢܹܐ ܠܵܐ ܐܝܼܬܼ
                 140 ܠܵܐ ܡܒܲܣܪܝܼܢ ܗ̄ܘ̣ܵܘ ܐ̄ܢܵܫܵܐ ܗܵܕܢ ܥܲܠ ܚܲܝܲܝ̈ܗܘܿܢ.
                 141 :ܒܡܸܕܸܡ ܪܲܒܵܐ ܕܲܟܼܣܸܐ ܚܬܼܝܼܪܝܼܢ ܟܲܕ ܡܸܬܼܩܲܛܠܝܼܢ
                 142 ܘܥܲܠ ܗܵܝ̇ ܪܵܗ̇ܛܝܼܢ ܐܘܼܩܒܲܠ ܣܲܝܦܵܐ ܒܠܸܒܵܬ ܕܲܟܼܝܵܐ.
                 143 :ܒܣܲܒܼܪܵܐ ܛܵܒܼܵܐ ܕܲܫܒܝܼܚ ܘܲܟܼܣܸܐ ܪܓܼܝܼܫܝܼܢ ܗܵܠܹܝܢ
                 144 ܘܒܲܕܓܼܘܿܢ ܫܵܛܝܼܢ ܠܟܼܠ ܡܲܚ̈ܘܵܬܼܵܐ ܘܲܠܠܘܼܚܵܡܹ̈ܐ.
                 145 :ܡܲܢܘܼ ܗܵܢܵܐ ܝܼܫܘܿܥ ܕܡܵܝܬܹܿܝܢ ܡܸܛܠܵܬܹܗ
                 146 ܘܲܠܡ̇ܢ ܒܲܫܡܹܗ ܚܬܼܝܼܪܝܼܢ ܗܵܠܹܝܢ ܟܲܕ ܡܸܬܼܩܲܛܠܝܼܢ.
                 147 :ܠܡ̇ܢ ܡܵܘܕܹܝܢ ܒܹܗ ܥܕܲܡܵܐ ܠܡܵܘܬܵܐ ܚܲܒܿܝܼܒܼܵܐܝܼܬܼ
                 148 ܘܣܵܒܼܠܝܼܢ ܚܲܫܹ̈ܐ ܘܠܵܐ ܟܦܵܪܝܼܢ ܒܹܗ ܒܐܘܼܠܨܵܢܲܝ̈ܗܘܿܢ.
                 149 :ܕܲܙܩܝܼܦ ܐܵܡ̇ܪܝܼܢ ܘܕܲܩܛܝܼܠ ܡܲܟܼܪܙܝܼܢ ܘܲܠܡܵܢܵܐ ܟܵܝ
                 150 ܘܲܚܬܼܝܼܪܝܼܢ ܒܹܗ ܟܲܕ ܣܵܓܸ̇ܕܝܼܢ ܠܹܗ ܠܥܹܝܢ ܣܲܓܹ̇ܝ̈ܐܹܐ.
                 151 :ܠܡ̇ܢ ܣܵܓܲܕܝܼܢ ܠܹܗ ܐܸܢ ܒܲܪܢܵܫܵܐ ܗ̄ܘ̣ ܕܲܡܐܐ ܚܲܫܹ̈ܐ
                 152 ܘܐܸܢ ܠܵܘ ܚܲܝܵܐ ܗ̄ܘ̣ ܐܲܝܟܲܢ ܡܵܝ̇ܬܿܝܼܢ ܡܸܛܠܵܬܹܗ.
                 153 :ܚܲܝܠܵܐ ܪܲܒܵܐ ܐܝܼܬܼ ܒܗܵܘ̇ ܕܲܙܩܝܼܦ ܡ̣ܢ ܝܗ̄ܘܼܕܼܵܝܹ̈ܐ
                 154 ܘܫܵܘܹ̇ܐ ܒܚܘܼܒܹܗ ܠܲܒܼܢܵܝ̈ܢܵܫܵܐ ܕܲܢܗܲܝܡܢܘܼܢ ܒܹܗ.
                 155 :ܐܵܘ ܐܲܠܵܗܵܐ ܗ̄ܘ̣ ܐܵܘ ܒܲܪܢܵܫܵܐ ܗ̄ܘ̣ ܒܪܹܗ ܕܐܲܠܵܗܵܐ
                 156 ܚܲܝܠܵܐ ܐܝܼܬܼ ܒܹܗ ܕܢܵܓܹ̇ܕ ܐ̄ܢܵܫܵܐ ܠܗܲܝܡܵܢܘܼܬܹܗ.
                 157 :ܒܝܲܕ ܐܘܼ̈ܠܨܵܢܹܐ ܕܣܲܝܒܲܪܘ ܣܵܗ̈ܕܹܐ ܡ̣ܢ ܪ̈ܕܘܿܦܹܐ
                 158 ܗܵܠܹܝܢ ܡܲܠܸܠܘ ܚܲܢ̈ܦܹܐ ܕܲܚܙ̣ܵܘ ܛܘܼܪ̈ܦܲܝܗܘܿܢ.
                 159 :ܘܡܸܛܠ ܗܵܠܹܝܢ ܚܲܢ̈ܦܹܐ ܕܝܲܩܲܪܘ ܠܲܐܩܝܼܦܘܼܬܼܵܐ
                 f.141r 
                 160 ܡ̣ܢ ܚܲܫܲܝ̈ܗܘܿܢ ܟܲܢܸܫܘ ܥܲܡܵܐ ܠܟܼܵܪܘܿܙܘܼܬܼܵܐ.
                 161 :ܬܗܲܪܘ ܚܲܙܝܹ̈ܐ ܟܲܕܡܵܐ ܕܣܲܝܒܲܪܘ ܟܠ ܡܲܚ̈ܘܵܬܼܵܐ
                 162 ܘܲܕܠܵܐ ܡܲܓܿܢ ܒܵܠܥܝܼܢ ܗܲܝܡܸܢܘ ܥܵܠܡܵܐ ܟܠܹܗ.
                 163 :ܗܘ̤ܵܘ ܠܹܗ ܣܵܗ̈ܕܹܐ ܠܲܒܼܪܵܬ ܩܘܿܟܼܪܵܐ ܒܐܘܼ ܠܨܵܢܲܝ̈ܗܘܿܢ
                 164 ܕܚܲܝܹ̈ܐ ܐ̄ܚܪ̈ܢܹܐ ܐܝܼܬܼ ܠܹܗ ܕܢܸܬܸܿܠ ܠܲܕܪܵܚܸ̇ܡ ܠܹܗ.
                 165 :ܒܕܼܡܗܘܿܢ ܟܲܬܼܒܿܘܼܗ̇ ܠܗܲܝܡܵܢܘܼܬܼܵܐ ܕܐܲܠܵܗ ܟܠܵܐ
                 166 ܘܲܒܼܡܵܘܬܿܝ̈ܗܘܿܢ ܗܘ̤ܵܘ ܡܲܠܵܦܢܹ̈ܐ ܕܫܲܪܝܼܪ̈ܬܼܵܐ.
                 167 :ܠܵܘ ܡܸܠܲܝ̈ܗܘܿܢ ܐܸܬܼܩܲܒܲܠ ܗ̄ܘ̣̈ܝ ܥܲܠ ܫܵܡܘ̈ܥܹܐ
                 168 ܘܠܵܘ ܒܲܥܒܼ̇ܕܵܐ ܕܗܲܝܡܵܢܘܼܬܼܗܘܿܢ ܕܲܟܼܡܵܐ ܫܲܪܝܼܪ.
                 169 :ܡ̣ܢ ܡܲܚ̈ܘܵܬܼܵܐ ܘܚܲܫܹ̈ܐ ܕܲܣܒܲܠ̣ܘ ܥܲܠ ܦܲܓܼܪ̈ܝܗܘܿܢ
                 170 ܝܼܕܝܥ ܟܠܢܵܫ ܕܠܵܐ ܣܪܝܼܩ ܥܲܡܠܵܐ ܕܦܘܼܪ̈ ܫܵܢܲܝܗܘܿܢ.
                 171 :ܗܵܐ ܣܵܗܕܘܼܬܼܗܘܿܢ ܨܝܼܪܵܬ ܒܚܲܫܹ̈ܐ ܕܲܩܢܘܿܡܲܝ̈ܗܘܿܢ
                 172 ܘܡܲܠܦܵܢܘܼܬܼܗܘܿܢ ܟܬܼܝܼܒܼܵܐ ܒܢܸܓܼ̈ܕܹܐ ܕܥܲܠ ܦܲܓܼܪ̈ܝܗܘܿܢ.
                 173 :ܘܲܠܣܵܗܕܘܼܬܼܗܘܿܢ ܡܲܫܲܪ ܟܠܢܵܫ ܠܲܡܩܲܒܵܠܘ
                 174 ܥܲܠ ܕܲܒܼܕܸܡܗܘܿܢ ܚܬܲܡܘ ܗ̄ܘ̣ܵܘ ܘܩܲܒܸܿܠܘ ܦܘܼܪ̈ܫܵܢܲܝܗܘܿܢ.
                 175 :ܡܝܼܬܼܘ ܥܲܠ ܣܲܒܼܪܵܐ ܕܲܚܙ̣ܵܘ ܣܵܗ̈ܕܹܐ ܕܐܝܼܬܼ ܢܘܼܚܵܡܵܐ
                 176 ܒܪܝܼܟܼܘܼ ܡܝܼܫܚܵܐ ܕܟܵܠܸܠܘ ܠܣܵܗ̈ܕܵܘ̈ܗܝ ܒܐܓܼܵܘܿܢܲܝ̈ܗܘܿܢ܀
                 ܫܘܼܠܵܡܹܗ: ܫܘܼܒܼܚܵܐ ܠܵܟ ܡܵܪܵܐ ܕܟܼܠܵܐ. ܕܠܵܐ ܒܵܗ̇ܬܿܝܼܢ ܕܲܡܪܒܿܪܝܼܢ ܒܵܟ ܀