Narsai. “On the Wheat and the Tares - ܥܠ ܡܬܠܐ ܗ̇ܘ ܕܙܪܥܐ ܘܙܝܙ̈ܢܐ.” Based upon BL Or. 5463. Digital Syriac Corpus. Last modified April 26, 2019. https://syriaccorpus.org/80.
    
        
            
                ܥܠ ܡܬܠܐ ܗ̇ܘ ܕܙܪܥܐ ܘܙܝܙ̈ܢܐ
            
            
                 f.336r 

                ܣܛ.. ܕܙܪܥܵܐ ܘܙܝܙ̈ܢܐ..
                :ܕܝܼܠܹܗ ܕܵܕܕܝܼܠܹܗ ܡܸܐܡܪܵܐ ܕܫܸܬܝܢ ܘܬܸܫܥܵܐ
                ܕܥܒܝܕ ܠܹܗ ܥܲܠ ܡܬܠܐ ܗ̇ܘ ܕܙܪܥܵܠ ܘܙܝܙ̈ܢܹܐ܀ 
            
            
                 1 :ܙܲܪܥܵܐ ܛܵܒܵܐ ܫܡ̣ܗ ܗ̄ܘ̣ܵܐ
                 2 ܡܫܝܼܚܵܐ ܠܡܠܵܬܐ ܕܝܘܼܠܦܢܹܗ.
                 3 :ܙܝܼܙܢܹ̈ܐ ܕܥܵܘ ܥܡܹܗ
                 4 ܩܪ̣ܵܐ ܠܝܘܠܦܢܹܗ ܕܢܕܝܼܠܵܐ.
                 5 :ܠܥܵܠܡܵܐ ܡܬܠܹܗ ܒܩܝܵܬܐ
                 6 ܘܢܦܫܹܗ ܩ̣ܪܐ ܡܪܹܐ ܒܝܵܬܐ.
                 7 :ܘܙܪܥܵܐ ܛܒܼܵܐ ܕܝܘܼܠܦܢܹܗ
                 8 ܕܩܒܠܬܹܗ ܐܪܥܵܐ ܕܢܦܫܵܐ.
                 9 :ܗܘ̇ ܕܹܝܢ ܕܙܪܲܥ ܙܝܙ̈ܢܹܐ
                 10 ܐܝܼܬܼܵܘܗܝ ܣܹܢܐܗ ܕܟܼܝܼܢܲܢ.
                 11 :ܕܙܪܲܥ ܡܸܠܬܐ ܕܝܘܼܠܦܢܹܗ
                 12 ܘܐܘܥܝܼ ܣܕܩܹ̈ܐ ܘܦܘܠ̈ܓܹܐ.
                 13 :ܐܡ̣ܪ ܕܹܝܢ ܕܕܡܸܟܼܘ ܐ̄ܢܫ̈ܐ
                 14 ܥܲܠ ܕܐܗܡܝܼܘ ܡ̣ܢ ܘܠܝܼܬܼܵܐ.
                 15 :ܐܲܝܟ ܐܟܪܵܐ ܕܡܬܪܦܹܐ
                 16 ܘܣ̇ܓ̣ܵܐ ܝܲܥܪܵܐ ܒܓܵܘ ܚܲܩܠܵܐ.
                 17 :ܥܒܕܹ̈ܐ ܕܹܝܢ ܟܐܢܹ̈ܐ ܕܚܙ̣ܵܘ
                 18 ܙܝܙܢܹ̈ܐ ܒܝܼܢܲܬܼ ܚ̈ܛܹܐ.
                 19 :ܠܡܪܗܘܿܢ ܩܲܪܸܩܼܘ ܫܘܼܐܠܵܐ
                 20 ܕܠܵܐ ܙܲܪܥܵܐ ܛܒܵܐ ܐܪܡܝܼܬܼ.
                 21 :ܦܢܝܼ ܕܹܝܢ ܡܪܐ ܠܥܒܕܹ̈ܐ
                 22 ܗܘ̇ ܝܕܘܥܵܐ ܕܢܣܝ̈ܬܐ.
                 23 :ܕܒܥܠܕ ܒܒܼܵܐ ܣܥ̣ܪ ܗܕܹܐ
                 24 ܕܢܚܒܸܠ ܙܪܥܵܐ ܕܝܘܼܠܦܵܢܝ.
                 25 :ܪܬܲܚܘ ܕܹܝܢ ܥܒܕ̈ܐ ܒܲܛܢܢܵܐ
                 26 ܘܠܡܪܵܐ ܛܒܼܵܐ ܐܸܡܹܲܪܘ.
                 27 :ܕܢܐܙܲܠ ܘܢܓܸܒܐ ܙܝܙܢܹ̈ܐ
                 28 ܕܠܵܐ ܢܕܘܕܘܢ ܡܘܥܝܬ̤ ܚ̈ܛܹܐ.
                 29 :ܐܡ̣ܪ ܕܹܝܢ ܡܪܵܐ ܥܠܒܼܕܹ̈ܐ
                 30 :ܗܘ̇ ܒܣܝܼܡܵܐ ܠܛܢܢܹ̈ܐ
                 31 :ܫܒܘܩܘ ܠܡ ܪܒܹܝܢ ܫܲܘܝܵܐܝܼܬ
                 32 ܥܕܡܵܐ ܕܗ̇ܘܸܐ ܫܘܼܠܡܵܐ.
                 33 :ܕܲܠܡܵܐ ܢܬܥܡܪ̈ܢ ܚ̈ܛܹܐ
                 34 ܥܲܡ ܙܝܙܢܹ̈ܐ ܡܲܪܝܼܪܹ̈ܐ.
                 35 :ܟܕ ܡܘܕܲܥ ܥܲܠ ܫܘܼܚܠܦܵܐ
                 36 ܕܟܒܼܪ ܦܢܝܢ ܡ̣ܢ ܥܘ̣ܠܵܐ.
                 37 ܠܵܐ ܡܪܝ ܛܥܝܢ ܠܝܕܥܬܵܟ.
                 38 :ܕܙܝܙܢܵܐ ܠܵܐ ܡܸܫܬܚܠܸܦ
                 39 :ܕܡܪܝܼܪܘܼܬܗ ܕܟܝܼܢܐ ܗ̄ܝ̣
                 40 ܘܠܵܐ ܡܨܐ ܕܡܨܐ ܠܲ[...]ܢܹܗ.
                 41 :ܡܠܝܼܠܐ ܗ̄ܘ̣ ܠܲܡ ܗܵܢܵܐ ܙܲܪܥܵܐ
                 42 ܘܫܠܝܼܛ ܗ̄ܘ̣ ܥܲܠ ܨܒܼܝܵܢܹܗ.
                 43 :ܘܕܠܝܼܠܵܐ ܠܹܗ ܕܢܫܬܚܠܲܦ
                 44 ܐܲܝܟ ܨܒܝܼܢܵܐ ܕܚܐܪܘܬܹܗ.
                 45 :ܬܚܘܝܼܬܼܵܐ ܕܗܕܹܐ ܩܲܒܼܠܘܼ
                 46 ܡ̣ܢ ܗܵܠܹܝܢ ܕܩܕܡܲܝܗܘܿܢ.
                 47 :ܕܙܝܙܢܹ̈ܐ ܗܘ̤ܘ ܡܪܝܼܪܹ̈ܐ
                 48 ܘܐܫܬܚܠܦܘ ܘܗܘ̤ܘ ܚ̈ܛܹܐ.
                 49 :ܙܝܙܢ̈ܐ ܗ̄ܘ̣ܵܐ ܐܲܒܼܪܗܵܡ
                 50 ܘܩܨܒܼܝܢܹܗ ܐܸܫܬܚܲܠܦ.
                 51 :ܘܗܘ̤ܵܐ ܦܹܐܪܵܐ ܕܒܘܼܣܡܵܐ
                 52 ܘܐܬܚܠܝܼܘ ܒܹܗ ܡܲܪܝܪܹ̈ܐ.
                 53 :ܙܟܼܝ ܡܟܣܵܐ ܙܝܙܢܵܐ
                 54 ܕܟܲܢܸܫ ܒܙܬܵܐ ܕܐ̄ܚܪ̈ܢܹܐ.
                 55 :ܘܗܘ̤ܐ ܚܛܬܐ ܒܨܒܝܢܹܗ
                 56 :ܘܗܦܟ ܘܙܪܥ ܙܸܕܩ̈ܬܐ
                 57 :ܙܝܼܙܢܵܐ ܗ̄ܘ̣ܵܘ ܓܲܝܣܵܐ
                 58 ܘܒܲܕܡܵܐ ܕܐ̄ܢܫܐ ܐܬܪܒܝܼ.
                 59 :ܘܕܚܙ̣ܵܐ ܬܲܗܪܵܐ ܒܙܩܝܼܦܵܐ
                 60 ܚܲܠܛ ܢܦܫܹܗ ܒܝܼܢܬܿ ܚ̈ܛܹܐ.
                 61 :ܦܵܘܠܘܿܣ ܪܲܒܵܐ ܙܝܙܢܵܐ
                 62 ܕܩܦܝܚ ܚ̈ܛܐ ܒܡܘܥܝܼܬܹܗ.
                 63 :ܛܢܢܵܐ ܕܠܘܩܒܼܠ ܩܘܼܫܬܐ
                 64 ܕܗܦܟ ܘܗܘ̤ܐ ܚܠܦ ܩܘܼܫܬܐ.
                 65 :ܐܲܟܪܵܐ ܕܐܲܣܓܝܼ ܘܙܪܲܥ
                 66 ܝܘܼܠܦܫܹܗ ܒܐܪܵܒܠܦܢܝܵܢ.
                 67 :ܘܦܠ̣ܚ ܐܪܥܵܐ ܕܢܦܫ̈ܬܐ
                 68 ܘܡܠܵܐ ܥܠܡܵܐ ܡ̣ܢ ܦܹܐܪ̈ܘܗܝ.
                 69 :ܗܵܐ ܙܝܙܢܹ̈ܐ ܕܐܫܬܚܠܲܦܘ
                 70 ܘܗܘ̤ܘ ܚ̈ܛܹܐ ܓܒܝ̈ܬܐ.
                 71 :ܠܟܘ ܐܪܵܐ ܕܐܲܝܠܹܝܢ ܕܛܥܵܘ
                 72 ܘܠܵܐ ܨܒܵܘ ܕܢܦܢܘܿܢ ܠܝܼܕܥܵܬܐ.
                 73 :ܡܪܩܝܘܢ ܙܝܙܢܵܐ ܩܕܡܵܐ
                 74 ܕܝܥܵܐ ܒܐܫܟܪܐ ܕܚܛܹ̈ܐ.
                 75 :ܘܐܸܫܬܝܼ ܡܛܪܵܐ ܕܝܘܼܠܦܢܵܐ
                 76 ܘܩܘܝܼ ܒܡܪܬܵܐ ܕܨܒܼܝܢܹܗ.
                 77 :ܟܲܠܒܵܐ ܗ̄ܘ̣ܵܐ ܕܦܩ̣ܪ ܘܫܢ̣ܵܐ
                 78 ܘܢܒܲܚ ܠܘܩܒܼܠ ܥܒܘܿܕܹܿܗ.
                 79 :ܘܐܟܼܪܸܙ ܒܬܠܬܐ ܪܹ̈ܫܝܼܢ
                 80 ܟܐܢܵܐ ܘܛܒܵܐ ܘܐܦ ܒܝܼܫܵܐ.
                 81 :ܙܝܼܙܢܵܐ ܐܚܪܹܢܵܐ ܡܵܐܢܝܼ
                 82 ܕܡܥܛܲܦ ܒܐܣܟܹܝܡ ܚ̈ܛܹܐ.
                 83 :ܕܐܒܼܵܐ ܕܟܼܡܝܢ ܒܓܼܙܪܵܐ
                 84 ܘܐܲܝܟ ܐܸܡܪܵܐ ܡܚܵܘܹܐ ܢܦܫܹܗ.
                 85 ܬܢܝܼܢܵܐ ܕܝܼܢܸܩ ܡܸܪܬܵܐ 

                 f.336v 
                 86 ܘܐܫܩܝܼ ܡܢܗ̇ ܠܩܪ̈ܝܼܒܵܘܗܝ.
                 87 :ܥܩܪܐ ܩ̇ܛܠ ܐ̄ܢܵܫܵܐ
                 88 ܕܡܬܪܒܹܐ ܡܨܥܲܬܼ ܚ̈ܛܹܐ.
                 89 :ܠܛܝܪܵܐ ܡܨܝܪܬܵܐ ܕܡ̇ܐ
                 90 ܕܠܟܼܠ ܕܡ̈ܘܵܢ ܡܫܬܚܠܲܦ.
                 91 ܒܚܪܫܘܼܬܼܵܐ ܫܘܬܦܐ ܗ̄ܘ̣.
                 92 ܘܒܡܓܼܫܘܬܐ ܩܪܝܒܼܵܐ ܗ̄ܘ̣.
                 93 :ܦܣܩܹܗ ܠܣܕܪܹܗ ܕܟܼܝܼܢܵܢ
                 94 ܘܛܠܡܹܗ ܠܦܓܼܪܵܐ ܡ̣ܢ ܚܲܝܹ̈ܐ.
                 95 :ܘܒܸܕܵܐ ܗܘ̤ ܡ̣ܢ ܪܥܝܢܹܗ
                 96 ܕܩܝܡܵܬܐ ܕܢܦܫܵܐ ܗ̄ܝ̣ ܒܲܠܚܘܿܕ.
                 97 :ܒܬܪܹܝܢ ܕܹܝܢ ܪܹ̈ܫܝܼܢ ܩܐܹܡ
                 98 ܣܟܵܐ ܟܠܹܗ ܕܝܘܼܠܦܢܹܗ.
                 99 :ܘܛܒܼܵܐ ܘܒܝܼܫܵܐ ܩ̣ܪܵܐ ܐܸܢܘܿܢ
                 100 ܠܦܘܼܬ ܣܘܥܪ̈ܢܹܐ ܕܬܪܝܗܘܢ.
                 101 :ܚܛܬܐ ܗܘ̣ܐ ܕܹܝܬ ܒܲܪ ܕܝܨ[ܢ]
                 102 ܕܗܦܟ ܘܗܘ̤ܐ ܙܝܙܢܵܐ.
                 103 :ܘܕܚܙܲܬ̤ ܥܹܕܬ̇ܐ ܫܘܼܚܠܵܦܹܗ
                 104 ܥܩܪܬܹܗ ܡ̣ܢ ܒܝܢܲܬ ܚ̈ܛܹܐ.
                 105 :ܡ̣ܢ ܐܡܪܹ̈ܐ ܗ̄ܘ̣ܵܐ ܕܡܪܥܝܼܬܼܵܐ
                 106 ܘܗܦܲܟ ܢܟ̇ܬ ܡܪܥܝܼܬܼܵܐ.
                 107 :ܘܛܪܕܘ ܥܠܠܢ̈ܐ ܫܕܐܘܼܗܝ
                 108 ܘܚ̣ܠܛ ܢܦܫܹܗ ܥܲܡ ܕܐܒܹ̈ܐ.
                 109 :ܩܲܫܝ̈ܬܐ ܕܒ̣ܥܵܐ ܕܢܙܟܹܐ
                 110 ܘܗ̣ܦܟ ܘܫܕܵܐ ܒܩܢܘܡܹܗ.
                 111 :ܕܪܘܿܫܵܐ ܕܠܘܩܒܼܵܠ ܚܒܼܪ̈ܘܗܝ
                 112 :ܕܗܦܲܟ ܚܫܪ̣ܵܐ ܝܘܼܠܦܫܹܗ
                 113 :ܚ̣ܢܵܐ ܠܒܨܬܼܵܐ ܕܟܼܠܡܸܕܡ
                 114 ܘܐܥܸܠ ܐܝܬܝܹ̈ܐ ܣܓܝ̈ܠܐ.
                 115 :ܘܟܲܕ ܣܒܲܪ ܕܐܫܘܲܚ ܐܘܒܕ
                 116 ܗܘ̤ܐ ܢܘܟܼܪܝܐ ܠܫܪܪܵܐܘ.
                 117 :ܚܛܬܵܐ ܕܗܦܟܲܬ̤ ܡܘܥܝܬܵܗ̇
                 118 ܦܘܠܵܐ ܕܗܘ̤ܵܐ ܙܝܙܢܵܐ.
                 119 :ܘܒܝܲܕ ܐܲܢ̄ܬܬܵܐ ܐܫܬܦܲܠ
                 120 ܐܝܟ ܫܡܫܘܢ ܕܛܚܢ ܪܚܝܵܐ.
                 121 :ܩܪܹܗ ܗ̄ܘ̣ܵܐ ܐܦ ܗܘ̤ ܠܡܫܬܘܼܬܼܵܐ
                 122 ܘܢܦܲܩ ܘܲܗ̤ܵܘܐ ܢܘܟܼܪܵܝܐ.
                 123 ܘܦܣܩܹܗ ܠܣܒܼܪܹܗ ܡ̣ܢ ܚ̈ܝܐ.
                 124 ܘܡܲܠܸܠ ܥܘ̣ܠܵܐ ܥܲܠ ܪܸܡܵܐ.
                 125 :ܕܠܐ ܩܢܘܿܡܵܐ ܠܲܡ ܐܝܼܬܵܘܗܝ ܗ̄ܘ̣ܵܐ
                 126 ܒܪܵܐ ܠܲܡ ܠܘܩܕܵܡ ܥܲܡ ܐܒܘܼܗܝ.
                 127 :ܐܲܝܟ ܩܠܵܐ ܫܚܝܼܡܵܐ ܕܡܠܬܼܵܐ
                 128 ܕܠܐ ܩܢܐ ܩܢܘܡܵܐ ܒܟܼܝܢܵܐ.
                 129 :ܟܲܕ ܣܐܸܩ ܠܹܗ ܫܘܼܪܵܝܵܐ
                 130 :ܡ̣ܢ ܝܲܠܕܵܐ ܕܡܪ̈ܝܡ ܘܲܠܟܼܵܐ
                 131 :ܠܗ̇ܘ ܕܫܘܸܐ ܥܲܡ ܝܠܘܿܕܹܗ
                 132 ܘܠܵܐ ܛܠܹܐ ܡܢܹܗ ܒܐܝܬܘܼܬܼܵܐ.
                 133 :ܘܡܢܵܐ ܢܥܒܸܕ ܡܲܪܚܵܐ
                 134 ܟܲܕ ܡܟܸܣ ܠܹܗ ܝܘܚܢܵܢ.
                 135 :ܕܒܪܫܝܬ ܠܲܡ ܐܝܼܬܘܗܝ ܗ̄ܘ̣ܵܐ
                 136 ܚܝܕܝܵܐ ܥܲܡ ܝܵܠܘܕܹܿܗ.
                 137 :ܒܥܠܡܵܐ ܬܡ̇ܢ ܐܝܬܼܘܗܝ ܗ̄ܘ̣ܵܐ
                 138 ܘܥܠܡܹ̈ܐ ܒܐܝܼܕܼܵܘ̈ܗܝ ܐܸܬܬܩܲܕܘ.
                 139 :ܘܗܘ̤ ܕܝܼܠܹܗ ܠܕܝܼܠܹܗ ܐܬܼܵܐ
                 140 ܘܕܝܼܠܹܗ ܠܵܐ ܩܒܸܠܘ ܡܸܠܬܹܗ.
                 141 :ܐܲܝܠܹܝܢ ܕܫܡܥܘ ܝܘܠܦܢܹܗ
                 142 ܝܪ̈ܬܹܐ ܕܫܘܒܼܚܹܗ ܣܡ ܐܸܢܘܿܢ.
                 143 :ܘܫܘܬܸܦ ܐܢܘܿܢ ܒܐܝܼܩܪܵܐ
                 144 ܒܫܡܵܐ ܕܠܐ ܡܝܘܬܘܼܬܼܵܐ.
                 145 :ܗܵܐ ܬܚܘܝܼܬܼܵܐ ܕܲܕܢܝܼܚܵܐ
                 146 ܐܝܟ ܫܡܫܵܐ ܩܕܼܵܡ ܝܕܘ̈ܥܹܐ.
                 147 :ܘܚܙܵܝܹܐ ܐܝܟ ܕܒܚܫܪܐ
                 148 ܡܬܬܩܠܝܼܢ ܒܡܠܲܝ̈ ܪܘܼܚܵܐ.
                 149 :ܘܠܢܛܝܼܢܘܿܣ ܙܝܙܢܵܐ
                 150 ܕܒܩܝܡܬܼܵܐ ܕܦܓܼܪܵܐ ܟ̇ܦܪ.
                 151 :ܘܟܬܒܸ̈ܐ ܕܡܠܲܝ̈ ܪܘܼܚܵܐ
                 152 ܐܲܝܟ ܢܘܟܪ̈ܝܹܐ ܚܫܝܼܒܼܝܼܢ ܠܹܗ.
                 153 :ܪܘܫܥܹܗ ܕܹܝܢ ܪܒܵܐ ܗܵܢܵܘ
                 154 ܕܡܫܬܒܗܲܪ ܒܹܗ ܓܲܠܝܵܐܝܼܬ.
                 155 :ܕܗܘ̤ ܠܲܡ ܡܸܠܬܐ ܐܫܬܚܠܲܦ
                 156 ܘܠܐ ܫܩܲܠ ܦܓܼܪܵܐ ܡ̣ܢ ܡܲܪܝܡ.
                 157 :ܒܚܲܩܠܵܐ ܕܚܛܐ ܪܒܹܗ ܗ̄ܘ̣ܵܐ
                 158 ܐܪܝܘܿܣ ܕܛܠܡ ܩܘܼܫܬܼܵܐ.
                 159 ܘܡܣܬܲܪ ܗ̄ܘ̣ܵܐ ܒܐܣܟܹܝܡܵܐ.
                 160 ܕܠܵܐ ܢܓܼܬܐ ܡܪܝܼܪܘܼܬܹܗ.
                 161 :ܕܐܒܼܵܐ ܗ̄ܘ̣ܵܐ ܕܠܒܝܼܫ ܕܘܡܝܵܐ
                 162 ܘܡܣܬܲܪ ܗ̄ܘ̣ܵܐ ܒܓܙܪܵܐ.
                 163 :ܘܟܲܕ ܐܪܓܸܫܘ ܪ̈ܥܘܬܵܐ
                 164 ܛܪܕܘܼܗܝ ܡ̣ܢ ܓܵܘ ܡܲܪܥܝܼܬܼܵܐ.
                 165 :ܘܐܲܝܬܝܼ ܠܓܸܠܝܵܐ ܚܘܫܒܵܘܗܝ
                 166 ܘܓܼܠܐ ܙܸܐܦܵܐ ܕܪܥܝܼܢܹܗ.
                 167 :ܘܐܒܲܥ ܫܘܼܩܪܵܐ ܡ̣ܢ ܠܒܹܗ
                 168 ܘܡܲܠܸܠ ܥܘ̣ܠܵܐ ܣܦܘ̈ܬܹܗ.
                 169 :ܩ̣ܪܵܐ ܠܲܒܼܪܵܐ ܒܪܝܼܬܼܵܐ ܕܐܲܒܼܵܐ
                 170 ܘܪܘܼܚܵܐ ܬܘܼܩܢܵܐ ܕܐܒܼܵܐ. 

                 f.337r 
                 171 :ܗܘ̤ ܠܲܡ ܐܝܼܬܵܘܗܝ ܒܲܠܚܘܕܵܘܗܝ
                 172 ܘܒܼܪܵܐ ܘܪܘܼܚܵܐ ܡܫܡܢܢܵܘ̈ܗܝ.
                 173 :ܐܲܒܼܵܐ ܠܲܡ ܕܠܵܐ ܫܘܼܪܵܝܐ ܗ̄ܘ̣
                 174 ܘܒܼܪܵܐ ܘܪܘܼܚܵܐ ܠܟܼܵܐ ܡܸܢܹܗ.
                 175 :ܘܥܲܠ ܗܵܕܹܐ ܕܒܼܪܵܐ ܐܸܢܘܿܢ
                 176 :ܙܒܼܢܵܐ ܐܝܼܬ ܒܹܝܬܼ ܠܹܗ ܘܲܠܗܘܿܢ
                 177 :ܘܐܸܢ ܠܲܒܼܪܵܐ ܒܪܝܼܬܼܵܐ ܥܲܒܼܕܹܗ
                 178 ܐܲܝܟ ܡܠܬܹܗ ܕܡܓܼܕܦܢܵܐ.
                 179 :ܡܵܢܵܐ ܟ̇ܠܐ ܟܠܡܸܕܡ
                 180 ܒܪܵܐ ܕܐܲܠܗܵܐ ܢܸܬܼܟܲܢܹܐ.
                 181 :ܓܒܪܝܠ ܐܦ ܡܝܼܟܵܐܹܝܠ
                 182 ܒܨܒܝܢ ܐܒܼܵܐ ܐܬܬܩܢܘ.
                 183 :ܘܟܲܕ ܛܒܼ ܪܘܼܚܵܐ ܐܝܬܲܝܗܘܿܢ
                 184 ܒܨܝܼܕܲܝܢ ܡ̣ܢ ܫܸܡ ܐܝܼܬܘܼܬܵܐ.
                 185 :ܘܐܢܗܘ̤ ܕܫܘܐ ܬܘܩܢܵܐ
                 186 ܕܒܼܪܐ ܘܕܝܼܠܗܘܿܢ ܫܲܘܝܐܝܼܬ.
                 187 :ܫܡܵܐ ܗ̄ܘ̣ ܫܐܝܼܠܐ ܕܩܢܐ ܒܠܚܘܿܕ
                 188 ܘܪܚܝܼܩ ܡܢܹܗ ܒܣܘܥܪ̈ܢܹܐ.
                 189 :ܙܝܼܙܢܵܐ ܐ̄ܚܪܢܵܐ ܚܲܒܼܪܹܗ
                 190 ܥܛܠ ܗ̄ܘ̣ ܫܡܗ ܡ̣ܢ ܪܡܒܐ.
                 191 :ܝܕܘܿܥܐ ܕܹܝܢ ܦܪܫ ܠܹܗ
                 192 ܡ̣ܢ ܦܐܪ̈ܐ ܕܒܝܲܕ ܡ̈ܐܘܗܝ.
                 193 ܫܚ̇ܛ ܐܦ ܗܘ̤ ܬܘܕܝܼܬܼܵܐ
                 194 ܡ̣ܢ ܫܪܵܪܵܐ ܕܗܝܡܢܘܼܬܵܐ.
                 195 ܘܒܼܥܐ ܕܢܣܬܘܪ ܒܢܝܢܵܐ.
                 196 ܕܫܸܬܐܣܵܘ̈ܗܝ ܠܵܐ ܡܙܕܟܼܝ̈ܢ.
                 197 :ܠܵܐ ܠܲܡ ܐܫܬܩܠܲܬ̤ ܢܲܦܫܵܐ
                 198 ܥܲܡ ܦܓܼܪܵܐ ܡ̣ܢ ܦܪܘܿܩܲܢ.
                 199 :ܐܠܵܐ ܦܓܼܪܵܐ ܡܝܘܬܵܐ
                 200 ܫܩܠ ܠܹܗ ܡܸܠܬܼܵܐ ܘܥܡ̣ܪ ܒܹܗ.
                 201 :ܘܟܲܕ ܝܕܥ ܕܡܬܦܪܣܐ ܠܹܗ
                 202 ܐܝܬܝܼ ܠܓܠܝܵܐ ܓܘܼܕܢܹܗ.
                 203 :ܐܨܛܢܲܥ ܦܘܼܪܣܵܐ ܐܚ̄ܪܹܢܵܐ
                 204 ܕܢܣܬܬܲܪ ܒܹܗ ܥܲܕ ܙܒܼܢܵܐ.
                 205 :ܘܗܦ̣ܟ ܘܐܘܕܝܼ ܐܦ ܒܗܵܕܹܐ
                 206 ܕܦܲܓܪܐ ܘܢܦܫܵܐ ܫܩܲܠ ܡܪܲܢ.
                 207 :ܘܡܕܥܵܐ ܠܲܡ ܒܠܚܘܿܕܼ ܐܪܦܝܼ
                 208 ܕܐܦܗܘ̤ ܩܢܘܡܵܐ ܗ̄ܘ̣ ܕܬܠܬܵܐ.
                 209 :ܘܥܲܠ ܡܢ̇ܐ ܠܐ ܒܕܩܘ ܠܲܢ
                 210 ܟܬ̈ܒܹܐ ܟܠܗܘܿܢ ܥܲܠܗܵܕܹܐ.
                 211 :ܘܝܬܝܼܪ ܡ̣ܢ ܟܠܗܘܿܢ ܡܘܫܹ̇ܐ
                 212 ܗܘ̇ ܕܐܟܬܸܒܼ ܥܲܠ ܬܘܩܢܲܢ.
                 213 :ܘܟܒܲܪ ܫܝܼܛܵܐ ܐܬܚܟܲܡ
                 214 ܝܬܝܼܪ ܡܸܢܹܗ ܕܒܲܪ ܥܡܪܲܡ.
                 215 :ܘܐܫܟܲܚ ܡܸܕܹܡ ܝܬܝܼܪܵܐ
                 216 ܡܕܥܵܐ ܩܢܘܿܡܵܐ ܕܬܠܵܬܐ.
                 217 :ܗܵܐ ܙܪܥܹܗ ܕܩ̇ܛܠ ܐ̄ܢܫܐ
                 218 ܕܙܪܥܹܗ ܒܢܦܫܵܐ ܕܬܲܥܡܝܪܵܘ̈ܗܝ.
                 219 :ܘܫܓܫ ܠܐܪܥܵܐ ܒܙܝܼܙܵܢܵܘ̈ܗܝ
                 220 ܘܐܪܡܝܼ ܣܕܩܹ̈ܐ ܒܫܡܝܵܐ.
                 221 :ܒܩܲܕܼܡܵܐ ܙܝܙܢܹ̈ܐ ܙܪܲܥ ܗ̄ܘ̣ܵܐ
                 222 ܣܛܢܵܐ ܒܝܫܬܼ ܚ̈ܛܹܐ.
                 223 :ܘܐܩܝܼܡ ܣܕܩܹ̈ܐ ܘܦܘܼܠܓܹ̈ܐ
                 224 ܐܲܝܟ ܣܕܪܹ̈ܐ ܠܘܼܩܒܼܵܠ ܩܘܼܫܬܼܵܐ.
                 225 :ܘܕܚܙ̣ܵܐ ܕܚܒܬ̤ ܡܲܫܪܝܼܬܹܗ
                 226 ܘܙܟܼܐ ܩܘܼܫܬܐ ܒܫܡ ܒܫܡܫܸܘ̈ܗܝ.
                 227 :ܐܨܛܢܲܥ ܦܘܼܪܣܵܐ ܐ̄ܚܪܹܢܵܐ
                 228 ܘܥܲܠ ܘܟܡܢ ܒܝܢܲܬ̣ ܚ̈ܛܹܐ.
                 229 :ܚ̣ܙܵܐ ܕܒܓܸܠܝܵܐ ܠܵܐ ܙ̇ܟܐ
                 230 ܘܫܪܝܼ ܡܩܪܒ ܒܟܡܐܢܹ̈ܐ.
                 231 ܘܗܘ̤ܵܐ ܗ̄ܘ̣ܵܐ ܐܲܝܟ ܒܲܝܬܝܵܐ.
                 232 :ܘܐܲܝܟ ܡܲܠܦ ܫܪܝܪ̈ܬܵܐ
                 233 ܚܙܵܐ ܠܣܒܪܬܵܐ ܕܐܣܬܲܦܲܩܲܬ̤.
                 234 ܥܠܟܠ ܥܡܡܝ̈ܢ ܘܠܫܢܝܼ̈ܢ.
                 235 :ܘܐܸܚܕܲܬ̤ ܢܘܡܹ̈ܐ ܒܟܠܦܢܸ̈ܢܝܵܢ
                 236 ܘܥܩܕܲܬ̤ ܡܘܣܹ̈ܐ ܕܚܢܦܘܼܬܼܵܐܘ
                 237 :ܘܠܒܸܫ ܐܣܟܹܝܡ ܬܲܠܡܝܼܕܼܵܐ
                 238 :ܕܠܵܐ ܢܚܘܹܐ ܙܹܐܦܵܐ ܒܓܠܝܵܐ
                 239 ܕܝܼܕܥ ܕܲܢܕܝܕ ܝܘܠܦܢܹܗ.
                 240 :ܘܒܓܸܠܝܵܐ ܠ̇ܐ ܡܸܬܩܒܲܠ
                 241 ܚܙܵܐ ܡܢܘܿܣܐ ܕܢܗܝܼܪ ܗ̄ܘ̣.
                 242 :ܘܡܢܗܲܪ ܥܝܼܢܹ̈ܐ ܕܢܦܫ̈ܬܐ
                 243 ܘܡܦܢܐ ܥܛܠ̈ܐ ܠܦܝܣܵܐ.
                 244 :ܩܕܪܫ ܐܘܼܪܚܵܐ ܠܡܠܟܘܼܬܼܵܐ
                 245 ܘܟܣܝܼ ܣܢܝܘܼܬ ܚܘܼܫܵܒܵܘ̈ܗܝ.
                 246 :ܒܢܚܬܐ ܦܐܝܵܐ ܕܫܸܡ ܢܘܼܗܪܵܐ
                 247 ܘܥܲܠ ܘܐܣܬܬܲܪ ܒܟܡܐܢܹ̈ܐ.
                 248 :ܘܦܫܝ̈ܛܐ ܠܐ ܐܪܓܸܫܘ ܒܹܗ
                 249 :ܦܪܣ ܬܚܦܝܼܬܼܵܐ ܥܲܠ ܢܲܦܫܵܐ
                 250 :ܘܥܘܪܹܗ ܠܢܘܼܗܪܵܐ ܕܝܕܥܬܼܵܐ
                 251 ܫܬܸܩ̣ ܡܕܥܵܐ ܡ̣ܢ ܪ̈ܓܫܹܐ.
                 252 ܕܠܐ ܢܣܬܟܠ ܘܠܵܝܼܬܼܵܐ.
                 253 ܐܚܫܟ ܢܘܼܗܪܵܐ ܕܒܒ̈ܬܐ: 

                 f.337v 
                 254 ܡ̣ܢ ܩܪܝܢܵܐ ܕܟܬܒܹ̈ܐ.
                 255 :ܘܣܟܪ ܐܕܢܹ̈ܐ ܕܡܫܥܬܵܐ
                 256 ܕܠܵܐ ܢܨܘ̈ܬܢ ܡܸܠܲܝ̈ ܪܘܼܚܵܐ.
                 257 :ܠܫܢܵܐ ܢܒܼܥܵܐ ܕܡܸܠܹ̈ܐ
                 258 ܕܪܕܝܹܗ ܡܡܬܘܡ ܠܵܐ ܩ̇ܛܥ.
                 259 :ܥܲܒܼܕܹܗ ܠܥܓܐ ܘܚܓܼܝܪܵܐ
                 260 ܕܠܵܐ ܢܡܠܸܠ ܪ̈ܘܚܢܝܵܬܼܵܐ.
                 261 :ܠܒܹܵܐ ܡܠܟܵܐ ܕܗܕܡܹ̈ܐ
                 262 ܢܒܼܠܐ ܕܟܼܠܗܹܝܢ ܚܟܡ̈ܬܐ.
                 263 :ܚܠܸܨ ܡܢܹܗ ܣܝ̈ܡܬܹܗ
                 264 ܘܐܪܡܝܼ ܒܹܗ ܡ̣ܢ ܚܪ̈ܘܒܵܘܗܝ.
                 265 :ܐܘ ܦܘܪ̈ܣܵܘܗܝ ܟܡܵܐ ܩܝܼܛܝܼܢ
                 266 ܘܨܢܥܬܹ̈ܐ ܟܡܵܐ ܥܡܝܼ̈ܩܵܢ.
                 267 :ܐܘ ܣܡ ܡܵܘܬܼܵܐ ܩܛܘܿܠܵܐ
                 268 ܕܚܠܝܼܵܛܐ ܒܗ ܚܲܠܝܘܼܬܼܵܐ.
                 269 :ܠܵܐ ܠܵܡ ܫܸܦܝܼܪ ܪܸܥܝܢܵܐ
                 270 ܕܟܬܒܹ̈ܐ ܐܠܗ̈ܝܹܐ.
                 271 :ܘܠܐ ܝ̇ܬܪ ܐܝܢܵܐ ܕܩ̇ܪܹܐ
                 272 ܐܠܵܐ ܕܢܐܠܲܦ ܫܘܒܼܗܵܪܵܐ.
                 273 :ܩܪܐ ܠܡ ܣܓܝܼ ܘܫܟܐ ܠܹܗ
                 274 ܘܫܪܝܼ ܒܨܐ ܘܡܥܡܸܩ.
                 275 :ܘܗܪܓܼ ܣܓܝܼ ܒܟܬܒ̈ܐ
                 276 ܛܥ̣ܐ ܘܢܦ̣ܩ ܡ̣ܢ ܘܠܝܼܵܬܐ.
                 277 :ܐܘ ܥܘ̣ܠܵܐ ܕܠܐ ܡܬܡܠܲܠ
                 278 ܕܐܟܼܪܸܙ ܒܝܼܫܵܐ ܒܦܘܼܡ ܥܲܛ̈ܠܹܐ.
                 279 ܝܘܠ̣ܦܢܵܐ ܢܘܗܪܵܐ ܕܢܲܦܫܵܐ: ܗܸ[...]ܢܘܿܢ ܥܲܒܼܕܘܼܗܝ ܚܫܘܟܵܐ.
                 280 :ܐܘܪܼܚܵܐ ܕܪܝܫܬܼܵܐ ܕܟܬܼܒܹ̈ܐ
                 281 ܡܠܐܘܼܗ̇ ܣܟ̈ܠܹܐ ܬܘܩ̈ܐܹܐ.
                 282 :ܠܵܐ ܠܲܡ ܬܫܡܲܥ ܦܘܼܫܩܵܐ
                 283 ܘܠܐ ܬܨܘܼܬܼ ܡܠܬܼܵܐ ܕܕܪܝܼܫܵܐ.
                 284 :ܗܘܝܼ ܐܲܝܟ ܣܡܝ̇ܐ ܠܟܼܬܒܼܵܐ
                 285 ܘܐܝܟ ܚܪܫܵܬ ܠܘܬ ܬܘܕܲܓܵܡܵܐ.
                 286 :ܥܪܘܿܩ ܡ̣ܢ ܡ̈ܐܐ ܕܚܕܝܼܡܹ̈ܐ
                 287 ܕܠܐ ܢܛܥܘܢܵܟ ܫܪ̈ܒܲܝܗܘܿܢ.
                 288 :ܣܦܩܐ ܠܲܡ ܒܠܚܘܿܕ ܗܵܕܹܐ
                 289 ܕܢܗܝܸܡܢ ܕܠܐ ܥܘܩܒܼܵܐ.
                 290 :ܡ̣ܢ ܐܝܟܵܐ ܝܕܥܬܘܢ ܗܕܹܐ
                 291 ܐܘ ܣܢ̈ܐܹܐ ܕܡܲܠܲܝ̈ ܪܘܼܚܵܐ.
                 292 :ܕܕܪܫܬܘܿܢ ܐܘܪܚܵܐ ܚܕܬܵܐ
                 293 ܘܛܥܝܬܘܿܢ ܒܫܒܝܼܠ ܙܐܵܦܵܐ.
                 294 :ܐܥܢܝܼ ܐܢܘܿܢ ܣܛܢܵܐ
                 295 ܒܛܘܥܝܲܝ ܕܙܪ̈ܲܥ ܒܐܕܢܲܝ̈ܗܘܿܢ.
                 296 :ܕܡܗܝܼܟܝܢ ܒܦܣܝܼ̈ܩܬܼܵܐ
                 297 ܘܬܢܹܝܢ ܚܠܡܹ̈ܐ ܫܛܘܪܹ̈ܐ.
                 298 :ܘܠܐ ܣ̇ܦܩ ܕܐܛܥܝܼ ܐܸܢܘܿܢ
                 299 ܒܬܘܩ̈ܠܬܐ ܟܕ ܥܝܼܪܼܝܢ ܗ̄ܘ̣ܵܘ.
                 300 :ܐܠܵܐ ܡܚܘܹܐ ܚܙܘܢܹ̈ܐ
                 301 ܕܢܬܗ̇ܝܡܢ ܐܲܝܟ ܫܪܝܼܪ̈ܐ.
                 302 :ܐܘ ܒܥܠܕܪܹܗ ܕܟܝܢܲܢ
                 303 ܕܟܼܡܵܐ ܐܘܼܡܢ ܒܩܪ̈ܩܹܐ.
                 304 :ܘܣܗ̇ܕ ܦܘܠܘܿܣ ܥܲܠܗܕܹܐ
                 305 ܟܕ ܡܘܕܲܥ ܥܲܠ ܨܸܢ̈ܥܵܬܹܗ
                 306 :ܕܬܟܬܘܫܲܢ ܠܲܡ ܠܵܐ ܠܝܼܬܵܘܗܝ
                 307 ܥܲܡ ܒܣܪܢܵܐ ܕܐܟܘܬܲܢ.
                 308 :ܐܠܵܐ ܥܲܡ ܪ̈ܫܹܐ ܕܐܵܐܲܪ
                 309 ܪܘܼܚܐ ܕܡܩܪܲܒܼ ܥܲܡ ܒܸܣܪܵܐ.
                 310 :ܒܫܘܪܝܹܗ ܓܹܝܪ ܕܩܪܒܼܵܐ
                 311 :ܟܠ ܦܘܼܪ̈ܣܝܼܢ ܡܨܸܛܢܲܥ ܗ̄ܘ̣ܵܐ
                 312 :ܘܟܠܝܘܿܡ ܙܝܢܵܐ ܡܚܕܬ ܗ̄ܘ̣ܵܐ
                 313 ܕܥܲܡ ܝܕܘܥܹ̈ܐ ܡܩܪܸܒܼ ܗ̄ܘ̣ܵܐ.
                 314 :ܗܫܵܐ ܠܲܡ ܠܐ ܡܐܩܥܝ̈ܢ
                 315 ܨܢܥ̈ܬܐ ܠܐܘܼܡܢܘܼܬܹܗ.
                 316 :ܕܡܪܡܲܙ ܐܸܢ ܪܵܡܸܙ ܒܲܠܚܘܿܕ
                 317 ܫܡܠܝܹܘ ܣܟܼ̈ܠܹܐ ܨܒܼܝܢܹܗ.
                 318 :ܐܸܢ ܕܹܝܢ ܒܥ̇ܐ ܕܢܨܘܕܼܵܢ
                 319 ܒܟܘܗܗܢܵܐ ܕܪܚܡܲܬܼ ܟܣܦܵܐ.
                 320 :ܦܕܝܼܡ ܗ̄ܘ̣ܵܐ ܠܹܗ ܨܒܝܢܲܢ
                 321 ܘܟܬܝܼܒܼ ܕܗܒܼܐ ܥܲܠ ܠܒܲܢ.
                 322 :ܪܚܡܲܬܼ ܫܘܒܼܚܵܐ ܐܸܢ ܡܥܸܠ
                 323 :ܣܡܐ ܕܗܲܢܝܼ ܒܚܙܬܹܗ
                 324 :ܪܓܼܝܼܓܼܝܼܢܲܢ ܠܹܗ ܛܵܒܼ ܡܸܢܹܗ
                 325 ܘܟܒܪ ܡܢܢ ܝܵܠܦ ܠܵܗ.
                 326 :ܒܪܓܝܵܬܐ ܐܸܢ ܡܩܪܸܒܼ ܥܲܡܲܢ
                 327 :ܩܒܝܼܥܝܼܢ ܙܘܡ̈ܝܗ̇ ܒܟܼܝܢܲܢ
                 328 ܘܡܡܠܟ ܗܘ̤ ܒܲܠܚܘܿܕ ܡ̇ܠܟ.
                 329 :ܘܐܬ̇ܐ ܠܓܸܠܝܵܐ ܣܘܼܥܪܝܵܐ
                 330 ܪ̈ܫܹܐ ܬܠܵܝܵܬܐ ܕܟܼܠ ܚܫܝܼ̈ܢ.
                 331 :ܗܢܘܿܢ ܐܢܘܿܢ ܕܬܢܝܢܲܢ
                 332 :ܘܡܵܐ ܕܒܗܠܹܝܢ ܫܥܒܼܕ ܠܲܢ
                 333 ܩܡ ܠܹܗ ܗܘ̤ ܐܲܝܟ ܙܟܝܐ.
                 334 :ܒܗܵܠܹܝܢ ܚܫܹ̈ܐ ܐܩܪܸܒܼ ܗ̄ܘ̣ܵܐ
                 335 ܥܲܡ ܪܫܝܬܹܗ ܕܟܼܝܼܢܲܢ.
                 336 :ܘܬܟܝܼܠ ܗ̄ܘ̣ܵܐ ܕܒܼܗܘܿܢ ܙܟܹܐ
                 337 ܐܲܝܟ ܕܒܙܒ̈ܢܐ ܩܕܡ̈ܝܹܐ.ܕ
                 338 :ܝ̇ܕܥ ܗ̄ܘ̣ܵܐ ܓܹܝܪ ܡܵܪܘܿܕܵܐ
                 339 ܘܲܫܩܝܼܠܵܐ ܠܹܗ ܒܢܸܣܝܵܢܵܐ. 

                 f.338r 
                 340 :ܕܲܒܼܗܵܠܹܝܢ ܚܲܫܹ̈ܐ ܐܲܣܝܼܪ
                 341 ܟܠܹܗ ܟܝܵܢܵܐ ܕܡܵܝ̈ܘܿܬܹܐ.
                 342 :ܘܲܠܒܸܫ ܐܸܢܘܿܢ ܐܲܝܟ ܙܝܼܢܵܐ
                 343 ܒܬܲܟܼܬܘܼܫܵܐ ܕܠܘܩܒܼܵܠ ܡܵܪܲܢ.
                 344 :ܟܲܕ ܣܵܒ̇ܪ ܗ̄ܘ̣ܵܐ ܡܲܪܵܚܵܐ
                 345 ܕܒܲܕܡܘܼܬ ܐܵܕܼܵܡ ܡܲܛܥܸܐ ܠܹܗ.
                 346 :ܗܵܪܟܵܐ ܠܵܐ ܩܵܡ ܨܢܵܬܹ̈ܐ
                 347 ܘܠܵܐ ܦܘܼܕ̈ܣܹܐ ܕܐܘܼܡܵܢܘܼܬܹܗ.
                 348 :ܕܲܡܙܲܝܲܢ ܗ̄ܘ̣ܵܐ ܕܲܠܩܘܼܒܼܠܹܗ
                 349 ܒܙܲܝܼܢܵܐ ܕܪܘܼܚܵܐ ܟܲܣܝܵܬܝܼܬܼ.
                 350 :ܡ̣ܢ ܒܬܲܪ ܗ̇ܝ ܙܵܟܼܘܼܬܼܵܐ
                 351 ܕܲܙܟܼܵܐ ܟܝܵܢܲܢ ܥܲܡ ܡܵܪܲܢ.
                 352 :ܘܪܵܘܡܵܐ ܘܥܘܼܡܩܵܪ ܐܲܪܓܸܫܘ ܒܵܗ̇
                 353 ܘܲܒܼܟܼܠ ܦܸܢ̈ܝܵܢ ܐܸܬܟܲܪܙܲܬ̤.
                 354 :ܗܵܐ ܝܲܗ̄ܒ̣ܢܲܢ ܠܹܗ ܡܲܫܡܲܥܬܲܢ
                 355 ܘܥ݂ܲܠ ܘܲܫܪܵܐ ܒܲܢ ܐܲܝܟ ܕܲܨܒܵܐ.
                 356 :ܘܲܗܘ̤ܵܐ ܠܹܗ ܐܲܝܟ ܕܡܸܢܲܢ ܗ̄ܘ̣
                 357 ܘܠܵܐ ܡܢܲܟܼܪܝܼܢ ܠܹܗ ܒܿܝܼܵܬܵܝܹ̈ܐ.
                 358 :ܠܦܝܼܚܵܐ ܠܹܗ ܐܲܪܥܵܐ ܕܢܲܦܫܲܢ
                 359 ܘܥܩܝܵܐ ܠܹܗ ܐܵܦ ܡܲܫܡܲܥܬܲܢ.
                 360 :ܘܡܪܡܹܐ ܙܲܪܥܵܐ ܕܝܘܼܠܦܵܢܹܗ
                 361 ܘܐܵܬܹܝܢ ܦܹܐܪ̈ܵܘܗܝ ܚܲܕ ܒܲܡܵܐܐ.
                 362 :ܥܩܲܪܢܵܝܗܝ ܠܙܲܪܥܵܐ ܕܝܘܼܠܦܵܢܹܗ
                 363 ܕܲܡܫܝܼܚܵܐ ܡ̣ܢ ܪܸܥܝܵܢܲܢ.
                 364 :ܘܩܲܒܸܒܢܲܢ ܙܪܲܥܹܗ ܕܒܼܝܼܫܵܐ
                 365 ܘܗܲܢܝܼܐܝܼ̈ܢ ܠܲܢ ܙܝܼܙܵܢܵܘ̈ܗܝ.
                 366 :ܐܝܼܬܲܝܢ ܒܲܫܡܵܐ ܓܵܘ̈ܝܹܐ
                 367 ܘܲܒܼܕܘܼܒܵܪ̈ܲܝܢ ܒܲܪ̈ܝܹܐ.
                 368 :ܩܪܹܝܢܲܢ ܦܵܠܚܹ̈ܐ ܕܲܡܫܝܼܚܵܐ
                 369 ܘܠܵܦܚܹܝܢܲܢ ܠܲܒܼܥܸܠܕܵܪܵܐ.
                 370 :ܪܸܓܬܐ ܣܢܝܼܬܼܵܐ ܕܚܲܛܝܼܬܼܵܐ
                 371 ܗܲܢܝܼܝܼ ܠܲܢ ܫܸܩܝܵܗ̇ ܣܲܓܝܼ.
                 372 :ܘܟܸܣܦܵܐ ܥܸܩܪ ܒܝܼ̈ܫܬܐ
                 373 ܫܬܝܼܠ ܥܸܩܵܪܹܗ ܒܓܼܵܘ ܠܸܒܲܢ.
                 374 :ܪܸܚܡܲܬܼ ܫܘܼܒܼܚܵܐ ܣܵܡ ܡܵܘܬܵܐ
                 375 ܦܲܚܵܐ ܕܩܵܛܸܠ ܒܲܟܼܡܹܐܢܵܐ.
                 376 :ܦܟܼܝܼܪܝܼܢܲܢ ܒܲܡܨ̈ܝܼܕܵܬܹܗ
                 377 :ܘܠܵܐ ܪܓܝܼܫܝܼܢ ܚܢܲܢ ܒܐܲܣܘܼܪ̈ܘܗܝ
                 378 :ܚܣܵܡܵܐ ܣܝܼܦܵܐ ܩܵܛܘܿܠܵܐ
                 379 ܕܩܵܛܸܠ ܢܲܦܫܵܐ ܥܲܡ ܦܲܓܼܪܵܐ.
                 380 :ܫܪܹܐ ܒܓܵܘܲܢ ܐܲܝܟ ܪܲܒ ܚܲܝܠܵܐ
                 381 ܘܲܡܙܲܚܝܼܢ ܠܹܗ ܚܘܼܒܵܒܲܝ̈ܢ.
                 382 :ܚܘܼܬܼܪܵܐ ܡܵܘܒܸܕ ܬܲܩܢܵܬܹ̈ܐ
                 383 ܪܚܡܵܐ ܩܵܛܸܠ ܚܲܒܼܝܒܼܵܘ̈ܗܝ.
                 384 :ܠܒܼܝܼܫܝܼܢ ܚܢܲܢ ܠܹܗ ܐܲܝܟ ܢܚܲܬܵܐ
                 385 ܘܲܡܨܲܒܲܬܼ ܒܹܗ ܪܸܥܝܵܢܲܢ.
                 386 :ܕܓܵܠܘܼܬܼܵܐ ܕܐܵܘܼܠܸܕ ܗ̄ܘ̣ܵܐ
                 387 :ܐܵܟܸܠ ܩܲܪܨܵܐ ܒܫܘܼܕܵܝܵܐ
                 388 :ܥܒܼܝܼܕ ܠܸܫܵܢܲܢ ܐܝܼܙܲܓܲܕܵܐ
                 389 ܘܲܡܫܲܡܸܫ ܠܗܘܿܢ ܠܣܘܼܥܪ̈ܵܢܹܝܗ̇.
                 390 :ܛܥܝܵܢܵܝܗܝ ܠܛܲܟܼܣܵܐ ܕܬܘܼܠܡܵܕܢ
                 391 ܘܲܢܦܲܩܢܲܢ ܡ̣ܢ ܘܵܠܝܼܬܼܵܐ.
                 392 :ܘܟܼܠܢܵܫ ܪܲܒܵܐ ܗ̄ܘ̣ ܕܲܩܢܘܿܡܹܗ
                 393 ܟܲܕ ܕܲܒܼܪ ܐܲܝܟ ܨܒܼܝܵܢܹܗ.
                 394 :ܢܒܲܥܘ ܠܲܢ ܣܦܪܹ̈ܐ ܗܵܦܟܵܝܹ̈ܐ
                 395 ܕܡܠܦܝܼܢ ܒܣܸܦܪܹ̈ܐ ܗܵܦܟܼܝܹ̈ܐ.
                 396 :ܘܪܲܚܝܼܩܝܼܢ ܡ̣ܢ ܘܵܠܝܼܬܼܵܐ
                 397 ܗ̇ܝ ܕܲܟܼܬܵܒܹ̈ܐ ܐܲܠܦܘ ܠܲܢ.
                 398 :ܐܘܼܪܚܵܐ ܕܕܲܪܲܫܘ ܩܲܕܡܵܝܹ̈ܐ
                 399 :ܘܫܲܦܝܵܐ ܗ̄ܘ̣ܵܬ ܡ̣ܢ ܗܲܝܡܵܢܘܼܬܼܵܐ
                 400 ܕܐܲܟܼܕܲܙܘ ܟܠܗܘܿܢ ܫܘܼܝܵܐܝܼܬ.
                 401 :ܘܣܵܛܵܢܵܐ ܒܝܲܕ ܙܝܼܙܵܢܵܘ̈ܗܝ
                 402 ܐܵܘܥܝܼ ܒܵܗ̇ ܣܸܕܩܹ̈ܐ ܦܠܝܼ̈ܠܹܐ.
                 403 :ܡ̣ܢ ܚܲܕ ܢܸܒܼܥܵܐ ܕܝܘܼܠܦܵܢܵܐ
                 404 ܐܸܫܬܝܼܘ ܟܠܗܘܿܢ ܝܘܼܠܦܲܢܹ̈ܐ.
                 405 :ܘܐܲܝܟ ܬܲܦܹ̈ܿܐ ܠܐܲܪ̈ܒܲܥܦܸܢܝܵܢ
                 406 ܐܲܫܩܝܼܡ ܠܐܲܪܥܵܐ ܒܡܸܠܲܝ̈ܗܘܿܢ.
                 407 :ܐܲܝܟ ܢܘܼܗܪܐ ܗܘ̤ܵܘ ܒܲܒܼܪܝܼܬܼܵܐ
                 408 ܘܐܲܢܗܲܪܘ ܥܵܠܡܵܐ ܒܕܸܠܩܲܝ̈ܗܘܿܢ.
                 409 :ܘܐܲܝܟ ܡܸܠܝܵܐ ܒܝܲܕ ܡܸܠܲܝ̈ܗܘܿܢ
                 410 ܐܲܝܦܢܝܼܘ ܥܛ̈ܠܹܐ ܠܲܦܝܵܣܹ̈ܐ.
                 411 :ܠܒܸܫܘ ܙܲܝܢܵܐ ܠܘܼܩܒܼܵܠ ܒܝܼܫܵܐ
                 412 ܕܠܵܐ ܢܸܬܼܪܘܿܥ ܣܸܕܪ̈ܲܝ ܩܘܼܫܬܼܵܐ.
                 413 :ܘܲܒܼܚܲܫܹ̈ܐ ܕܲܩܢܘܿܡܲܝ̈ܗܘܿܢ
                 414 ܣܓܲܘ ܬܘܼܪ̈ܥܵܬܹܗ ܕܲܟܼܝܵܢܲܢ.
                 415 :ܟܲܕ ܕܹܝܢ ܡܲܛܝܼ ܫܘܼܠܵܡܵܐ
                 416 ܕܚܲܝܵܘ̈ܗܘܿܢ ܕܲܩܪ̈ܲܒܼܬܵܢܹܐ.
                 417 :ܘܲܫܟܸܒܼܘ ܫܸܢܬܼܵܐ ܕܲܢܚܵܝܵܐ
                 418 ܥܲܠ ܥܲܡܠܵܐ ܕܦܘܼܠܚܵܢܲܝ̈ܗܘܿܢ.
                 419 ܥܲܠ ܣܵܛܵܢܵܐ ܒܲܟܼܡܹܐܢܹ̈ܐ.
                 420 ܘܐܲܪܡܝܼ ܬܸܛܪܵܐ ܕܝܘܼܠܦܵܢܹܗ: 

                 f.338v 
                 421 ܘܕܲܠܚܵܗ̇ ܠܟܼܠܵܗ̇ ܡܲܪܥܝܼܬܵܐ.
                 422 :ܒܡܲܪܝܼܪܘܼܬܼܵܐ ܕܙܝܼܙܵܢܵܘ̈ܗܝ
                 423 ܚܙܵܐ ܕܲܕܡܸܟܼܘ ܢܲܚܫܝܼܪ̈ܬܵܢܹܐ.
                 424 :ܘܫܲܪܝܼ ܥܩ̇ܪ ܓܲܠܝܵܐܝܼܬ
                 425 ܘܲܒܼܝܼܕ ܣܸܕܩ̈ܕܹܐ ܘܦ̈ܘܼܠܵܓܹܐ.
                 426 ܕܣܲܓܼܝܹ̈ܐ.
                 427 :ܚܲܕ ܓܘܼܫܡܵܐ ܫܲܦܝܵܐ ܕܥܹܕܬܵܐ
                 428 ܕܡ̣ܢ ܣܲܓܝܼ̈ܐܹܐ ܡܸܬܼܩܲܝܲܡ.
                 429 :ܦܸܠܓܹܗ ܗܘ̤ ܠܲܡܢܵܘܵܬܼܵܐ
                 430 ܒܝܲܕ ܫܘܼ̈ܚܠܵܦܹܐ ܕܝܘܼܠܦܵܢܵܘ̈ܗܝ.
                 431 :ܚܲܩܐܵܐ ܕܦܲܠܚܘ ܟܲܫܝܪܹ̈ܐ
                 432 ܒܝܲܕ ܚܲܫܹ̈ܐ ܕܐܘܼܠܨܵܢܲܝ̈ܗܘܿܢ.
                 433 :ܩܲܕܲܪ ܘܲܡܠܵܗ̇ ܙܝܼܙܵܢܵܘ̈ܗܝ
                 434 ܘܐܲܘܥܝܼ ܒܵܗ̇ ܝܼܥܪܵܐ ܣܲܢܝܵܐ.
                 435 :ܥܵܢ̈ܐ ܛܵܥܝܼܬܼܵܐ ܕܟܸܿܢܫ
                 436 ܗܘ̇ ܪܲܒܵܐ ܕܪ̈ܵܥܵܘܵܬܼܵܐ.
                 437 :ܥܠ̣ܘ ܕܐܸܒܹ̈ܐ ܒܕܲܡܘܼܬܼ ܐܸܡܪܹ̈ܐ
                 438 ܘܒܲܣܒܸܣܘ ܓܘܼܫܡ̈ܐ ܕܡܲܪܥܝܼܬܼܵܐ.
                 439 :ܢܸܒܼܥܵܐ ܚܲܠܝܵܐ ܕܢܵܡܘܿܣܵܐ
                 440 ܕܡܫܩܹܐ ܗ̄ܘ̣ܵܐ ܐܲܪܥܵܐ ܕܢܲܦܫܵܐ.
                 441 :ܫܲܚܠܸܦ ܗܘ̤ ܠܒܼܢ̈ܬ ܩܵܠܵܘ̈ܗܝ
                 442 ܕܠܵܐ ܢܩܲܒܠܘܢ ܗܲܪ̈ܛܝܼܩܹܐ.
                 443 :ܘܡ̇ܢ ܠܵܐ ܢܸܒܼܕܹܐ ܥܲܠ ܗܵܕܹܐ
                 444 ܕܢܵܘ̈ܣܸܐ ܕܨܲܒܸܬܼ ܪܘܼܚܩܘܼܕܫܵܐ.
                 445 :ܗܘ̤ܵܘ ܥܘܼܡܪܵܐ ܠܪܘܼܚܵܐ ܛܲܡܵܐܐ
                 446 ܕܝܲܗܒ̣ܘ ܡܲܫܡܲܥ̈ܬܐ ܠܲܢܟܼܝܼܐܹܐ.
                 447 :ܫܒܼܝ̈ܐ ܕܦܲܢܵܘ ܒܲܨܠܝܼܒܼܵܐ
                 448 ܡ̣ܢ ܫܸܒܼܝܹܗ ܕܐܵܟܸܠܩܲܪܨܵܐ.
                 449 :ܗܦܲܟܼܘ ܘܐܸܫܬܲܥܒܲܕܘ ܠܲܢܟܝܼܐܵܐ
                 450 ܒܨܒܼܝܵܢܵܐ ܘܠܵܐ ܒܩܲܛܝܼܕܵܐ.
                 451 ܙܡܝܼ̈ܢܹܐ ܕܩܪܲܬ̤ ܛܲܝܒܘܼܬܼܵܐ.
                 452 ܠܡܸܫܬܘܼܬܼܵܐ ܕܚܲܬܸܢܵܐ ܕܪܵܘܡܵܐ.
                 453 :ܗܵܐ ܢܦܲܩ̣ܘ ܘܲܗܘ̤ܵܘ ܢܘܼܟܵܪ̈ܝܹܐ
                 454 ܕܠܵܐ ܢܸܬܼܒܲܣܡܘܢ ܒܲܚܠܘܼܠܵܐ.
                 455 :ܡ̇ܢ ܠܵܐ ܢܲܟܼܪܹܐ ܥܲܠ ܗܵܕܹܐ
                 456 ܘܣܲܒܼܪܵܐ ܕܚܲܝ̈ܢ ܕܓܸܠܢܵܝܗܝ.
                 457 :ܘܲܩ̣ܢܘܿܡܵܐ ܕܥܲܬܼܝ̈ܕܵܬܼܵܐ
                 458 ܚܲܠܸܦܢܵܝܗܝ ܒܲܐܪ̈ܥܢܝܵܬܼܵܐ.
                 459 :ܘܡܲܢ̣ܘ ܡܸܫܟܲܚ ܕܲܢܬܸܿܪܸܨ
                 460 ܣܲܢܝܵܬܐ ܒܲܒܝܵܘ̈ܡܵܬܲܢ.
                 461 :ܕܐܸܣܬܲܬܲܬ̤ ܒܲܢ ܒܝܼ̈ܫܵܬܼܵܐ
                 462 ܒܢܘܼܓܼܪܵܐ ܪܲܒܵܐ ܕܲܥܝܵܕܼܵ݁ܐ.
                 463 :ܥܫܸܢ ܠܹܗ ܟܹܐܒܲܢ ܡ̣ܢ ܣܡܵܐ
                 464 ܘܢܵܕܘ ܡܸܢܗ ܐܣ̈ܘܵܬܼܵܐ.
                 465 :ܘܠܵܐ ܡܨܐ ܡܩܪܒܼ ܝܵܕܘܥ̈ܐ
                 466 ܟܘܼܘܵܢܵܐ ܠܟܹܐܒܹ̈ܐ ܕܢܦܲܫܲܢ.
                 467 :ܡܲܠܦܵܢܹ̈ܐ ܠܒܸܫܘ ܪ̈ܡܘܼܬܼܵܐ
                 468 ܘܝܵܠܦܹ̈ܐ ܩܕܵܠܵܐ ܩܲܫܝܵܐ.
                 469 :ܘܢܝܼܪܵܐ ܢܝܼܚܵܐ ܘܒܲܣܝܼܡܵܐ
                 470 ܥܲܒܼܕܘܼܗܝ ܩܲܫܝܵܐ ܠܛܵܥܘܿܢܵܘ̈ܗܝ.
                 471 :ܢܒܲܥ ܚܲܕܬܵܬܼܵܐ ܒܝܵܘܡܬܲܢ
                 472 ܡ̣ܢ ܡܲܠܦܵܢܹ̈ܐ ܗܸܕܝܘ̈ܛܹܐ.
                 473 :ܟܲܕ ܣܝܡܝܼܢ ܠܲܢ ܢܵܡܘܿܣܵܐ
                 474 ܠܡܛܲܪ ܫܥܹ̈ܐ ܘܝܵܡܬܼܵܐ.
                 475 :ܫܒܩܘܼ ܐܘܼܪܚܵܐ ܕܕܲܪܲܫܘ ܟܸܐܢܹ̈ܐ
                 476 ܘܪܕܵܘ ܒܵܗ̇ ܐܵܦ ܝܵܕܘܥܹ̈ܐ.
                 477 :ܘܲܢܦܲܩܘ ܪܵܕܹܝܢ ܒܲܫܝܼ̈ܐܹܐ
                 478 ܕܛܥܝܘܼܬܼܵܐ ܕܐܲܠܦܸܘ ܒܝܼܫܹ̈ܐ.
                 479 :ܣܲܝܟܘܼܗܝ ܠܟܼܠܹܗ ܢܵܡܘܿܣܵܐ
                 480 ܒܲܢܛܘܼܪ̈ܵܬܵܐ ܕܝܵܘ̈ܡܵܬܼܵܐ.
                 481 :ܘܚܕܬܘ ܠܲܢ ܝܗܘܕܵܝܘܼܬܼܵܐ
                 482 ܒܢܵܡܘ̈ܣܹܐ ܚܲܕ̈ܬܹܐ ܕܐܲܫܠ̣ܡܘ.
                 483 :ܘܐܲܣܠܝܼܘ ܠܲܟܼܬܵܒܲܝ̈ ܪܘܼܚܵܐ
                 484 ܘܲܠܚܘܼܬܪܵܢܵܐ ܕܡܸܠܲܝ̈ܗܘܿܢ.
                 485 :ܘܡ̣ܢ ܒܸܕܝܵܐ ܕܪܸ̈ܥܝܵܢܲܝ̈ܗܘܿܢ
                 486 ܣܡܵܘ ܢܵܡܘܿܣܹ̈ܐ ܢܘܼܟܵܪ̈ܝܹܐ.
                 487 :ܫܒܲܩܘ ܕܢܸܬܢܘܿܢ ܥܲܠ ܚܘܼܒܵܐ
                 488 ܘܥܲܠ ܣܲܒܼܪܵܐ ܘܗܲܝܼܡܵܢܘܼܬܼܵܐ.
                 489 :ܘܥܢܝܢ ܟܠܫܵܥ ܘܡܬܢܝܢ
                 490 ܚܸܠܡܸ̈ܐ ܣܦܝ̈ܩܹܐ ܘܫܵܛܘܿܪܹ̈ܐ.
                 491 :ܘܐܸܢܗܘ̤ ܕܢܸܟܼܐܹܐ ܝܵܕܘܿܥܵܐ
                 492 ܘܢܸܟܼܠܹܐ ܒܸܕܝܵܐ ܕܡܸܠܲܝ̈ܗܘܿܢ.
                 493 :ܠܛܸܫܘ ܣܲܝܦܵܐ ܕܠܸܫܵܢܲܝ̈ܗܘܿܢ
                 494 :ܘܩܲܛܠܘܼܗܝ ܟܠܗܘܿܢ ܒܚܣܵܡܵܐ
                 495 :ܗܵܢܵܐ ܠܲܡ ܡܸܒܨܵܐ ܒܵܨܹܐ
                 496 ܘܲܦܠܝܼܓ ܗ̄ܘ̣ ܥܲܠ ܐܲܠܵܗܵܐ.
                 497 :ܘܝܘܼܠܦܵܢܵܐ ܚܲܕܬܵܐ ܡܲܠܸܦ
                 498 ܘܠܵܐ ܡܗܲܝܡܲܢ ܕܫܲܪܝܼܪ ܚܸܠܡܵܐ.
                 499 :ܡܲܢܘܼ ܕܡܲܠܸܦ ܚܲܝܕ̈ܬܵܬܼܵܐ
                 500 ܐܘ ܕܣܡܝܼܢ ܡ̣ܢ ܝܼܕܲܥܬܵܐ.
                 501 :ܗܘ̇ ܕܡܬܢܐ ܕܲܟܬܵܒܼܵܐ
                 502 ܐܘ ܗ̇ܘ ܕܡܩܝܼܡ ܠܹܗ ܒܕܝܵܐ.
                 503 :ܥܘܪܘܼܗܝ ܠܢܘܼܗܪܵܐ ܕܝܼܕܲܥܬܵܐ
                 504 ܘܠܵܐ ܨܒܼܘ ܕܢܐܬܘܢ ܠܲܦܝܵܣܵܐ.
                 505 ܘܲܒܨܝܕܼܵܐ ܗ̄ܘ̣ ܠܹܗ ܠܲܚܬܝܼܪܵܐ: 

                 f.339r 
                 506 ܕܢܸܬܼܡܲܟܲܟ ܢܸܐܬܹܐ ܠܩܘܼܫܵܬܐ.
                 507 :ܘܡ̣ܢ ܟܠ ܓܲܒܝܼ̈ܢ ܣܵܛܵܢܵܐ
                 508 ܨܒܼܝܵܢܵܘ̈ܗܝ ܗܵܐ ܡܸܬܓܲܡܪܝܼܢ.
                 509 :ܒܒܲܪ̈ܵܝܹܐ ܐܵܘܥܝܼ ܣܸܕ̈ܩܹܐ
                 510 ܘܲܒܼܓܵܘܵܝܹ̈ܐ ܚܸܪ̈ܝܵܢܹܐ.
                 511 :ܠܵܐ ܐܸܬܬܲܢܲܝܝ ܝܵܕܘܿܥܵܐ
                 512 ܥܲܠ ܓܘܼܢܚܵܐ ܕܲܒܝܵܘ̈ܡܵܬܲܢ.
                 513 :ܕܙܪܥܹܗ ܛܵܒܼܵܐ ܕܲܡܫܝܼܚܵܐ
                 514 ܚܲܢܩܹܗ ܒܝܼܫܵܐ ܒܙܝܼܙܵܢܵܘ̈ܗܝ.
                 515 :ܡ̇ܢ ܕܹܝܢ ܐܲܥܝܼܪ ܠܐ[...]ܡܵܝܵܐ
                 516 ܘܩܵܡ ܒܟܝܼ ܠܲܢ ܒܐܘܼ̈ܠܝܵܬܹܗ.
                 517 :ܕܗܘ̤ ܝܵܕܲܥ ܗ̄ܘ̣ܵܐ ܕܢܬܢܹܐ
                 518 ܥܲܠ ܒܝܼ̈ܫܵܬܵܐ ܕܲܚܛܵܗܹ̈ܐ.
                 519 :ܕܲܗܒܼܵܐ ܛܵܒܼ̇ܐ ܗܵܐ ܡܲܣܠܝܼ
                 520 ܘܡܩܒܸܠ ܙܹܐܦܵܐ ܒܓܸܠܝܵܐ.
                 521 :ܕܝܲܩܝܼܪܹ̈ܐ ܫܝܼܛܝܼܢ ܘܲܒܼܣܹܝܢ
                 522 ܘܐܝܼܩܵܪܵܐ ܕܣܲܟܼܠܵܐ ܢܨܚ.
                 523 :ܬܵܐܚܙ̣̰ܵܝ ܟܹܐܢܵܐ ܒܲܪ ܐܵܡܘܿܨ
                 524 ܥܵܘ̣ܠܵܐ ܕܥܲܡܡܹ̈ܐ ܐܲܝܟ ܕܥܲܡܵܐ.
                 525 :ܕܲܠܒܼܝܼܫܵܐ ܩܪܵܐܘܼܗܝ ܛܵܒܼܵܐ
                 526 ܘܠܛܒܼܵܐ ܫܲܡܗܘܼܗܝ ܒܝܼܫܵܐ.
                 527 :ܚܠܲܛܘ ܚܲܠܝܵܐ ܥܲܡ ܡܲܪܝܼܪܵܐ
                 528 :ܘܙܹܐܦܵܢܵܐ ܥܲܡ ܫܲܪܝܼܪܵܐ
                 529 :ܕܚܘܼܬܼܪܵܐ ܡܒܲܠܒܲܠ ܛܘܼܟܵܣܹ̈ܐ
                 530 :ܕܠܵܐ ܡܬܒܚܪܵܐ ܘܵܠܝܼܬܼܵܐ
                 531 :ܩܘܡ ܦܲܠܵܚܵܐ ܕܢܲܦܫ̈ܬܐ
                 532 ܦܵܘܠܘܿܣ ܪܲܒܵܐ ܘܲܫܒܝܼܚܵܐ.
                 533 :ܘܲܚܙܝܼ ܚܲܩܵܠܐ ܕܝܘܼܠܦܵܢܵܟ
                 534 ܕܲܡܠܵܗ̇ ܒܝܼܫܵܐ ܡ̣ܢ ܝܲܥܪܹܗ.
                 535 :ܐܲܪܕܸܟܸܠܵܐ ܕܲܒܼܫܵܐ ܘܫܲܟܠܸܠ
                 536 ܥܕܬ̈ܐ ܒܐܲܪܒܲܥ ܦܸܢ̈ܝܵܢ.
                 537 :ܬܵܘ ܚܙܝܼ ܪܵܘܡܹܗ ܕܒܸܢܝܵܢܵܟ
                 538 ܟܲܕ ܣܬܵܪܝܼܢ ܠܹܗ ܗܸܕܝ̈ܘܿܛܹܐ.
                 539 :ܡܲܠܵܚܵܐ ܕܲܪܕܵܐ ܒܝܼܡܵܐ
                 540 ܘܢܛܲܪ ܐܸܠܦܹܗ ܡ̣ܢ ܓܲܠܠܹ̈ܐ.
                 541 :ܩܘܡ ܘܲܚܙܝܼ ܐܸܠܦܹܗ ܕܥܹܕܬܵܐ
                 542 ܕܫܲܚ̈ܩܵܢ ܠܵܗ̇ ܪ̈ܘܼܚܹܐ ܛ̈ܠܲܝܵܐ.
                 543 :ܫܸܡܥܘܿܢ ܪܲܒܵܐ ܕܲܫܠܝܼܚܹ̈ܐ
                 544 :ܨܲܝܼܵܕܵܐ ܕܢܘܼ̈ܢܹܐ ܘܐ̄ܢܵܫ̈ܐ
                 545 :ܬܵܐ ܚܙܝܼ ܡܨܝܼܕܬܹܗ ܕܝܘܼܠܦܵܢܵܟ
                 546 ܕܣܲܕܩܵܗ̇ ܒܝܼܫܵܐ ܒܚܸܪ̈ܝܵܢܵܘ̈ܗܝ.
                 547 :ܐܲܠܦܵܐ ܒܝܵܘܵܡܵܐ ܨܵܐܸܕ ܗ̄ܘܹܝܬܼ
                 548 ܒܗ̇ܘ ܚܲܝܠܵܐ ܕܲܫܠܝܼܚܘܼܬܵܐܘ
                 549 :ܘܒܲܕܲܪ ܡܸܢܗܘܿܢ ܣܲܓ̈ܝܼܐܹܐ
                 550 ܐܵܟܸܠܩܲܪܨܵܐ ܒܲܚܣܵܡܹܗ.
                 551 :ܫܠܝܼܚܹ̈ܐ ܬܪܹܥܣܲܪ ܢܲܗܝܼܪܹ̈ܐ
                 552 ܕܢܗܲܪ ܥܵܠܡܵܐ ܒܕܸܠܩܲܝ̈ܗܘܿܢ.
                 553 :ܩܘܡܘ ܘܲܪܕܘܼܦܘ ܡ̣ܢ ܐ̄ܢܵܫܘܼܬܲܢ
                 554 ܥܲܪܦܸܠܵܐ ܕܲܦܪܲܣ ܒܝܼܫܵܐ.
                 555 :ܐܝܼܙܓܲܕܹ̈ܐ ܕܫܲܕܲܪ ܡܲܠܟܵܐ
                 556 ܠܫܲܝܢܵܐ ܕܟܼܠܵܗ̇ ܥܡܪܬܵܐ.
                 557 :ܬܵܘ ܫܲܝܸܢܘ ܣܸܕܩܹ̈ܐ ܕܐܲܪܡܝܼ
                 558 ܐܟܸܠܩܲܪܨܵܐ ܒܥܹܕ̈ܬܵܐ.
                 559 :ܦܲܠܵܚܹ̈ܐ ܕܐܲܪܥܵܐ ܕܥܲܡܡܹ̈ܐ
                 560 ܕܥܲܩܲܪܘ ܝܥܪܵܐ ܕܚܲܢܦܘܼܬܼܵܐ.
                 561 :ܩܘܡܘ ܕܲܟܵܘ ܚܲܩܠܵܗ̇ ܕܥܹܕܬܵܐ
                 562 ܡ̣ܢ ܙܝܼܙܵܢܵܘ̈ܗܝ ܕܲܢܟܼܝܼܠܵܐ.
                 563 :ܡܸܠܚܵܐ ܕܡܕܟܲܬ̤ ܦܲܟܝܼ̈ܗܹܐ
                 564 ܘܲܩܢܵܘ ܒܵܗ̇ ܛܲܥܡܵܐ ܚܲܠܝܵܐ.
                 565 :ܒܦܸܬܓܵܡܲܝ̈ܗܘܿܢ ܢܸܬܘܡܕܟܼܘܿܢ
                 566 ܪܸ̈ܥܝܵܢܹܐ ܕܚܲܒܸܠ ܒܝܼܫܵܐ.
                 567 :ܬܵܘ ܐܲܚܲܝ̈ ܢܸܦܢܹܐ ܠܐܘܼܪܚܵܐ
                 568 ܕܲܕܪܲܫ ܩܘܼܫܬܼܵܐ ܒܲܫܠܚܝܹ̈ܐ.
                 569 :ܘܠܵܐ ܢܛܥܐ ܒܲܫܒܝܼܠ ܙܹܐܦܵܐ
                 570 ܕܣܲܓܼܝ̈ܐܢ ܒܹܗ ܬܘܼܩ̈ܠܵܬܼܵܐ.
                 571 :ܬܵܘ ܢܸܬܼܩܲܪܲܒܼ ܠܲܦܝܵܣܵܐ
                 572 ܕܦܸܬܼܓܵܡܲܝ̈ܗܘܿܢ ܕܲܟܼܬܵܒܸ̈ܐ.
                 573 :ܘܢܲܐܣܹܐ ܡܘܼܡܹ̈ܐ ܕܲܩܢܘܿܡܲܢ
                 574 :ܒܡܸܠܹ̈ܐ ܕܐܲܟܼܬܸܒܼ ܪܘܼܚ ܩܘܼܕܫܵܐ
                 575 :ܘܲܢܣܲܒܼ ܣܡܵܐ ܠܲܥܨܵܒܼܢ
                 576 ܡ̣ܢ ܥܸܩܵܪܵܐ ܕܡܸܠܝ̈ܗܘܿܢ.
                 577 :ܕܝܵܕܥܝܼܢ ܚܲܫܵܘ̈ܗܝ ܕܲܟܝܵܢܲܢ
                 578 ܘܡܵܨܝܹܢ ܕܢܐܣܘܿܢ ܫܘܼ̈ܡܵܬܹܗ.
                 579 :ܢܓܼܥܹܐ ܟܸܐܒܹܗ ܕܲܟܵܝܢܲܢ
                 580 :ܠܐܣܘ̈ܬܐ ܚܲܪܝܲܡܹܐ
                 581 :ܘܠܵܐ ܢܸܒܼܗܲܬ ܟܲܕ ܡܘܕܝܼܢܲܢ
                 582 ܒܡܘܼ̈ܡܐ ܣܢܲܝܵ̈ܐ ܕܚܛܵܗܲܝ̈ܢ.
                 583 :ܢܸܬܼܩܲܪܲܒܼ ܢܸܫܐܲܠ ܪ̈ܚܡܹܐ
                 584 ܡ̣ܢ ܝܲܡ̇ܐ ܪܲܒܵܐ ܕܪ̈ܲܚܡܹܐ.
                 585 :ܕܐܫܠܦ ܓܲܙܵܐ ܕܡܵܘܗܲܒܼܬܹܗ
                 586 ܥܲܠ ܒܝܼܫܹ̈ܐ ܘܥܲܠ ܛܵܠܘܼܡܹ̈ܐ.
                 587 :ܢܫܲܦܠܲ ܕܸܡܥܹ̈ܐ ܕܒܵܒܵܚ̈ܬܲܢ
                 588 ܥܲܠ ܟܘܼ̈ܠܡܵܬܼܵܐ ܕܚܲܛܵܗܲܝ̈ܢ.
                 589 :ܘܲܢܢܲܟܸܦ ܙܠܲܝܠܘܼܬܲܢ
                 590 ܡ̣ܢ ܦܲܚܵܐ ܕܛܵܥܹܝܢܲܢ ܒܹܗ.
                 591 ܢܸܪܕܿܦ ܡܸܢܲܢ ܪܵܡܘܼܬܼܵܐ: 

                 f.339v 
                 592 ܘܢܸܥܩܘܿܪ ܡܸܢܲܢ ܠܲܚܣܵܡܵܐ.
                 593 :ܘܲܢܨܘܿܒܼ ܚܘܼܒܵܐ ܒܪܸܥܝܵܢܲܢ
                 594 ܥܲܡ ܣܲܒܼܪܵܐ ܘܗܲܝܡܵܢܘܼܬܼܵܐ.
                 595 :ܘܢܸܥܩܘܿܪ ܡܸܢܲܢ ܙܝܼܵܙ̈ܢܹܐ
                 596 ܕܐܵܘܥܝܼ ܒܝܼܫܵܐ ܒܲܚܣܵܡܹܗ.
                 597 :ܘܲܢܩܲܒܸܠ ܙܲܪܥܵܐ ܛܵܒܼܵܐ
                 598 ܕܙܪܥܲܬ̤ ܒܲܢ ܡܸܠܲܬ̤ ܚܲܝܹ̈ܐ.
                 599 :ܢܸܦܠܘܿܚ ܐܲܪܥܵܐ ܕܢܲܦܗܫܵܬܲܢ
                 600 ܘܢܸܥܩܘܿܪ ܝܲܥܪܵܐ ܕܲܚܛܗܲܝ̈ܢ.
                 601 :ܘܲܢܛܲܝܸܒܼ ܠܹܗ ܡܲܫܡܥܬܲܢ
                 602 ܠܝܘܼܠܦܵܢܵܐ ܚܲܝܵܐ ܕܪܘܼܚܵܐ.
                 603 :ܗܵܐ ܣܲܡܡܵܢܹ̈ܐ ܕܲܟܼܬܵܒܹ̈ܐ
                 604 ܬܵܘ ܢܸܬܩܪܲܒܼ ܨܐܕܲܝܗܘܿܢ.
                 605 :ܘܲܒܼܕܸܡ̈ܥܹܐ ܕܲܬܘܿܬ ܢܲܦܫܵܐ
                 606 ܢܲܐܣܹܐ ܟܸܐܒܹ̈ܐ ܕܡܲܚ̈ܘܵܬܲܢ.
                 607 :ܗܵܐ ܫܠܝܼܚܹ̈ܐ ܐܵܣܘ̈ܬܼܵܐ
                 608 ܕܥܲܨܒܘܼܗܝ ܠܟܹܐܒܼܵܐ ܕܐ̄ܢܵܫܘܼܬܲܢ.
                 609 :ܢܚܵܘܹܐ ܠܗܘܿܢ ܟܸܐܒܹ̈ܐ ܕܢܲܦ̣ܫܲܢ
                 610 ܕܲܢܥܲܕܪܘܿܢ ܠܲܟܼܪܝܼܗܘܿܢ.
                 611 :ܗܵܐ ܝܲܡܵܐ ܕܲܪ̈ܲܚܡܹܐ ܡܵܪܲܢ
                 612 ܢܸܩܪܘܼܒܼ ܘܢܸܫܐܲܠ ܥܘܼܕܪܵܢܵܐ.
                 613 :ܕܢܝܼܫܵܐ ܕܡܹܐܬܼܝܼܬܹܗ ܗܵܢܵܘ
                 614 ܕܚܲܛܝܹ̈ܐ ܢܸܦܢܘܿܢ ܨܹܐܕܵܘܗܝ.
                 615 :ܒܡܵܢܵܐ ܢܪܥܝܼܗ̇ ܠܟܹܐܢܘܼܬܼܵܐ
                 616 ܕܠܵܐ ܬܩܲܛܪܸܓܼ ܠܲܢ ܒܹܝܬܼ ܕܝܼܢܵܐ.
                 617 :ܕܠܲܝܬ ܬܲܡ̇ܢ ܐܲܬܼܪܵܐ ܠܕܸܡ̈ܥܹܐ
                 618 ܘܠܵܐ ܠܲܬܘܼܬܼܵܐ ܘܠܲܦܝܵܣܵܐ.
                 619 :ܩܪܸܒܼ ܠܹܗ ܙܲܒܼܢܵܐ ܕܡܹܐܬܝܼܬܹܗ
                 620 ܕܚܲܬܼܢܵܐ ܕܙܡܢ ܠܲܚܠܘܿܠܹܗ.
                 621 :ܢܛܲܝܸܒܼ ܢܲܚܬܹ̈ܐ ܠܡܸܫܬܘܼܬܼܵܐ
                 622 ܕܠܵܐ ܢܸܗܘܸܐ ܬܲܡ̇ܢ ܓܘܼܚܟܵܐ.
                 623 :ܗܵܐ ܙܲܒܼܢܵܐ ܕܢܸܬܿܬܲܓܲܪ ܒܹܗ
                 624 ܒܟܲܟܪܵܐ ܕܝܲܗ̣ܒ ܠܲܢ ܦܪܵܘܿܩܲܢ.
                 625 :ܠܵܐ ܢܛܲܒܹܐ ܟܸܣܦܵܐ ܕܡܸܠܬܹܗ
                 626 ܕܠܵܐ ܢܸܩܪܹܝܢ ܥܲܒ̈ܕܹܐ ܒܝܼ̈ܫܹܐ.
                 627 :ܢܲܪܡܹܐ ܡܸܫܚܵܐ ܒܲܠܡܦܝܼܕܲܝ̈ܢ
                 628 ܕܠܵܐ ܢܸܚܣܪܲ ܠܲܢ ܡܵܐ ܕܐܵܬܹܐ.
                 629 :ܕܥܲܡ ܚܲܡܸܫ ܚܲܘ̈ܝܼܡܵܬܼܵܐ
                 630 ܢܸܥܘܿܠ ܥܲܡܹܗ ܠܲܓܼܢܘܿܢܵܐ.
                 631 :ܐܘ ܕܐܸܬܛܲܒܲܥ ܒܲܚܛܝܼܬܵܐ
                 632 ܩܘܡ ܡ̣ܢ ܫܸܢܬܵܐ ܕܟܘܼܪܗܵܢܵܟ.
                 633 :ܕܗܵܐ ܩܪܸܒܼ ܠܹܗ ܨܦܲܪܵܐ ܪܲܒܵܐ
                 634 ܘܡܟܐܲܪ ܠܲܚܒܸܢܵܢܹ̈ܐ.
                 635 :ܦܥ̈ܠܐ ܕܐܓܼܪܲܬܼ ܛܲܝܠܲܘܼܬܼܵܐ
                 636 ܒܫܘܼܠܵܡ ܦܘܼܠܚܵܫܹܗ ܕܝܵܘܡܵܐ.
                 637 :ܣܲܟܵܘ ܠܐܲܓܼܪܵܐ ܕܡܵܘܗܲܒܼܬܹܗ
                 638 ܕܬܫܘܘܿܢ ܥܲܡܗܘܿܢ ܕܩܲܕܡܵܝܹ̈ܐ.
                 639 :ܗܵܐ ܦܬܲܚ ܬܲܪܥܵܐ ܕܲܚܢܵܢܹܗ
                 640 ܢܩܪܹܐ ܠܪ̈ܲܚܡܹܐ ܠܐܝܼܠܲܢ.
                 641 :ܕܲܢܥܲܕܪܘܼܢܲܢ ܒܐܵܓܼܘܿܢܵܐ
                 642 ܕܬܲܟܬܘܼܫܵܘ̈ܗܝ ܕܠܵܐ ܟܸܠܩܲܪܨܵܐ.
                 643 :ܡܲܬܠܵܐ ܕܙܲܪܥܵܐ ܕܙܝܼܙܵܢܹ̈ܐ
                 644 ܗܘ̤ ܢܓܕܢܝ ܕܐܸܡ̣ܪ ܩܘܼܫܬܼܵܐ.
                 645 :ܕܚܲܙܹܝܬܼ ܕܲܫܘܲܚ ܝܘܠܦܵܢܵܐ
                 646 ܕܙܲܪܥܵܐ ܕܡܸܠܬܹܗ ܕܢܟܝܼܠܵܐ.
                 647 :ܘܟܲܕ ܒܵܥܹܐ ܗ̇ܘܹܝܬ ܕܐܹܩܲܛܪܸܓܼ
                 648 ܠܡܲܪܝܼܪܘܼ̇ܬܼܵܐ ܕܙܝܼܙܵܢܵܘ̈ܗܝ.
                 649 :ܓܫܸܢ ܠܹܗ ܟܹܐܒܼܵܐ ܕܵܓܘܼܝܹ̈ܐ
                 650 ܛܵܒܼ ܡ̣ܢ ܥܵܘ̣ܠܵܐ ܕܒܲܪ̈ܝܹܐ.
                 651 :ܒܪ̈ܝܹܐ ܣܕܲܩܘ ܡܲܪܥܝܼܬܵܐ
                 652 ܘܲܢܦܲܩܘ ܘܲܗܘ̤ܵܘ ܢܘܼܟܼܪ̈ܝܹܐ.
                 653 :ܘܓܵܘ̈ܝܹܐ ܛܥܵܘ ܒܵܬܲܪܲܗܘܿܢ
                 654 ܘܣܲܒܼܪܝܼܢ ܕܲܠܓܼܵܘ ܐܝܼܬܲܝܗܘܿܢ.
                 655 :ܫܲܒܼܘܼܗ̇ ܠܐܘܼܪܚܵܐ ܕܟܼܬܵܒܹ̈ܐ
                 656 ܕܣܝܼܡܝܼܢ ܒܵܗ̇ ܡܠܝܼ̈ܠܹܐ ܕܫܲܝܢܵܐ.
                 657 :ܘܲܢܦܲܩܘ ܦܵܗܹ̇ܝܢ ܒܫܲܒ̈ܝܼܐܹܐ
                 658 ܕܲܡܠܹܝܢ ܩܸܢܛܵܐ ܕܓܲܝܵܣܹ̈ܐ.
                 659 :ܒܠܲܥܘ ܘܐܸܬܼܒܲܣܒܲܣܘ ܓܘܼܫܲܝ̈ܗܘܿܢ
                 660 ܘܠܵܐ ܐܲܪܓܸܫܘ ܟܲܕ ܡܬܡܚܝܢ.
                 661 :ܕܢܟܝܼܠܵܐ ܐܲܛܥܝܼ ܐܸܢܘܿܢ
                 662 ܒܫܸܕ̈ܠܹܐ ܝܼܥܢܹ̈ܐ ܕܫܘܼܓܼܵܫܵܘ̈ܗܝ.
                 663 :ܛܢܵܢܵܐ ܕܗܵܠܹܝܢ ܐܲܥܝܪܵܢܝ
                 664 ܕܚܲܫܵܐ ܕܟܹܐܒܲܝ̈ܢ ܬܵܢܹܐ ܐ̄ܢܵܐ.
                 665 :ܕܲܟܼܒܲܪ ܗܘ̤ ܢܥܝܼܪ ܟܘܼܘܵܢܵܐ
                 666 ܠܕܵܡܟܹ̈ܐ ܕܲܛܒܲܥܘ ܒܲܚܛܝܼܬܼܵܐ.
                 667 :ܒܲܟܐܬܵܐ ܒܥܹܝܬ ܕܐܸܬܫܲܗܹܐ
                 668 ܥܲܙܝܙܘܼܬܵܗ̇ ܕܐܸܫܵܬܲܢ.
                 669 :ܕܟܹܐܒܵܐ ܕܥܲܬܸܩ ܒܲܥܝܵܕܵܐ
                 670 ܒܣܲܡܵܐ ܕܥܲܙܝܙ ܢܸܬܐܲܣܹܐ.
                 671 :ܡܫܝܼܚܵܐ ܕܚܲܕܸܬ ܬܘܼܩܵܢܲܟ
                 672 ܠܵܐ ܬܲܗܡܹܐ ܡ̣ܢ ܒܵܥܘܿܬܲܢ.
                 673 :ܒܪ̈ܲܚܡܹܐ ܩܪܲܝܬܲܢ ܝܵܪ̈ܘܿܬܲܝܟ
                 674 ܠܵܐ ܬܸܡܢܹܝܢ ܥܲܡ ܢܘܼܟܪ̈ܵܝܹܐ.