Discourse 10

pb. 115 ܠܠܘܼ̈ܒܵܒܹܐ ܕܝܵܗ̇ܒܿܝܼܢ ܠܲܢ ܐܲܒܼܵܗܲܝ̈ܢ ܒܲܟܼܬܼܵܝ̈ܗܘܿܢ: ܘܚܘܼܝܵܠܵܐ ܕܲܒܼܤܸܦܪܹ̈ܐ ܕܲܢܒܼܝܹ̈ܐ ܘܕܲܫܠܝܼܚܹ̈ܐ ܥܲܠ ܬܝܵܒܼܘܼܬܼܵܐ: ܠܵܐ ܢܸܫܩܘܿܠ ܐܸܢܘܿܢ ܬܲܥܝܼܪܵܐ ܠܲܡܫܝܼܡܚܵܢܘܼܬܼܵܐ ܥܲܠ ܠܘܼܚܵܡܹ̈ܐ ܕܲܓܼܙܵܪ ܕܝܼ̈ܢܹܐ ܐܲܠܵܗܵܝܹ̈ܐ: ܘܠܲܡܤܵܡ ܒܪܹܫܵܐ ܕܫܲܪܵܝ ܬܚܘܼ̈ܡܹܐ ܠܵܐ ܡܸܬܼܥܲܒܼܪ̈ܵܢܹܐ: ܕܥܲܠ ܐܲܝܠܹܝܢ ܕܡ̣ܢ ܪܵܘܡܵܐ ܕܝܘ̈ܡܵܬܼܵܐ ܒܦܘܼܡܵܐ ܕܟܼܠ ܩܲܕܝܼܫܵܘ̈ܗܝ ܘܟܼܠ ܙܢ̈ܝܼܢ ܕܢܵܡܘܿܤܹ̈ܐ: ܠܒܼܘܼܛܵܠܗܹܝܢ ܐܸܬܿܬܿܚܲܡܘ ܚܲܝܠܬܼܵܢܵܐܝܼܬܼ ܡ̣ܢ ܐܲܠܵܗܵܐ. ܐܲܝܟܼ ܡܲܢ ܕܲܒܼܝܲܕܼ ܗܵܕܹܐ: ܕܤܲܒܼܪܵܐ ܐܝܼܬܼ ܠܲܬܼܝܵܒܼܘܼܬܼܵܐ: ܦܘܼܪ̈ܤܹܐ ܗ̄ܘ̣ ܕܐܸܫܬܿܟܲܚܘ ܠܲܢ ܕܢܸܓܼܢܘܿܒܼ ܡ̣ܢ ܢܲܦܫܲܢ ܪܓܸܫܬܼܵܐ ܕܕܸܚܠ̱ܬܼܵܐ: ܐܲܝܟܼ ܕܢܸܫܟܲܚ ܝܲܬܝܼܪ ܫܲܪܝܵܐܝܼܬܼ ܘܲܕܼܠܵܐ ܩܸܢܛܵܐ ܠܡܸܚܛܵܐ. ܗܵܠܹܝܢ ܕܲܒܼܦܘܼܤܩܵܢܵܐ ܕܲܥܠܲܝܗܘܿܢ ܒܟܼܠ ܐܸܤܟܹܡ̈ܝܼܢ ܕܤܘܼܪܵܕܼܵܐ: ܡܫܲܪܲܪ ܒܛܲܒܼ̈ܥܲܝ ܡܸܠܲܬܼ ܐܲܠܵܗܵܐ: ܒܟܼܠܗܘܿܢ ܟܬܼܵܒܹ̈ܐ ܕܦܘܼܪܩܵܢܲܢ. ܘܡܸܢܗܹܝܢ ܡܢܵܬܼܵܢܵܐܝܼܬܼ ܓܠ̣ܵܐ ܒܤܲܓܝܼ̈ܐܹܐ ܘܲܒܼܕܲܠܝܼ̈ܠܹܐ: ܒܲܡܤܵܡ ܒܪܹ̈ܫܹܐ ܕܲܥܠܲܝܗܘܿܢ ܐܲܝܬܝܼ: ܐܲܝܟܼ ܕܲܢܚܵܘܸܐ ܕܤܵܢܹ̇ܐ ܚܛܝܼܬܼܵܐ ܗ̄ܘ̣܀ ܒܐܲܝܕܵܐ ܟܲܝ ܥܸܠܬܼܵܐ ܐܸܬܼܚܲܬܲܩܘ ܒܡܵܡܘܿܠܵܐ ܕܵܪܹ̈ܐ ܕܲܒܼܝܵܘ̈ܡܲܝ ܢܘܿܚ؟ ܠܵܐ ܗ̄ܘ̣ܵܐ ܒܝܲܕܼ ܢܸܕܿܬܼܵܐ ܕܦܲܚܙܘܼܬܼܵܐ: ܕܐܸܫܬܲܪܲܚܘ ܥܲܠ ܫܘܼܦܪܵܐ ܕܲܒܼ̈ܢܵܬܼ pb. 116 ܩܵܐܹܝܢ؟ ܠܵܐ ܪܸܚܡܲܬܼ ܟܸܤܦܵܐ ܐܝܼܬܼ ܗ̄ܘ̣ܵܐ ܒܗܵܘ̇ ܘܲܒܼܢܵܐ: ܘܠܵܐ ܤܸܓܼܓܲܬܼ ܦܬܲܟܼܪܹ̈ܐ: ܘܠܵܐ ܚܲܪܵܫܘܼܬܼܵܐ: ܘܠܵܐ ܩܪ̈ܵܒܹܐ ܕܡܸܤܬܲܕܼܪܝܼܢ ܠܘܼܩܒܲܠ ܚܕܼܵܕܹ̈ܐ܀ ܘܲܠܡܵܢܵܐ ܝܑܼܩܸܕܼܘ ܘܲܠܥܵܠܲܡ: ܚܲܡܸܫ ܡܕܼܝܼ̈ܢܵܬܼܵܐ ܕܲܤܕܼܘܿܡܵܝܹ̈ܐ؟ ܠܵܐ ܗ̄ܘ̣ܵܐ ܡܸܛܠ ܕܝܲܗ̣̄ܒܼܘ ܐܲܬܼܪܵܐ ܠܪܸܓܿܬܼܵܐ ܒܗܲܝܕܵܡܲܝ̈ܗܘܿܢ؟ ܘܐܸܫܬܲܠܛܲܬ̤ ܥܠܲܝܗܘܿܢ ܐܲܝܟܼ ܨܸܒܼܝܵܢܵܗ̇: ܒܟܼܠ ܙܢ̈ܝܼܢ ܕܛܲܢܦܘܼܬܼܵܐ؟ ܠܵܐ ܗ̄ܘ̣ܵܐ ܡܸܛܠ ܙܵܢܝܘܼܬܼܵܐ ܕܚܲܕܼ ܓܲܒܼܪܵܐ ܢܦܲܠ̣ܘ ܡ̣ܢ ܝܑܼܵܤܪܵܝܹܠ ܒܘܼܟܼܪܹܗ ܕܐܲܠܵܗܵܐ: ܥܸܤܪܝܼܢ ܘܚܲܡܫܵܐ ܐܲܠܦ̈ܝܼܢ ܒܚܲܕܼ ܪܸܡܙܵܐ ܒܡܵܘܬܵܢܵܐ؟ ܒܡܵܢܵܐ ܐܸܫܬܿܕܼܝܼ ܡ̣ܢ ܐܲܠܵܗܵܐ ܫܸܡܫܘܿܢ ܓܲܢ̄ܒܵܪ ܚܲܝܠܵܐ: ܢܙܝܼܪܵܐ ܕܡ̣ܢ ܡܲܪܒܿܥܵܐ ܘܲܡܩܲܕܫܵܐ ܠܐܲܠܵܗܵܐ: ܕܤܘܼܒܵܪܹ̈ܐ ܒܝܲܕܼ ܡܲܠܲܐܟܼܵܐ ܗܘܑ̤ܵܐ ܐܲܝܟܼ ܝܘܿܚܲܢܵܢ ܒܲܪ ܙܟܲܪܝܵܐ: ܘܲܤ̣ܥܲܪ ܒܐܝܼܕܹܗ ܚܲܝ̈ܠܹܐ ܘܐܵܬܼ̈ܘܵܬܼܵܐ. ܘܲܒܼܚܲܝܠܵܐ ܕܠܵܐ ܒܲܟܼܝܵܢܵܐ ܕܲܢܤܲܝܟܼ ܒܓܼܘܼܫܡܹܗ: ܐܵܠܹܦ ܓܲܒܼܪ̈ܝܼܢ ܒܦܲܟܵܐ ܕܲܚܡܵܪܵܐ ܚ̣ܪܲܒܼ: ܘܲܗܘ̤ܵܐ ܦܵܪܘܼܩܵܐ ܘܕܲܝܵܢܵܐ ܠܝܼܤܪܵܝܹܠ؟ ܠܵܐ ܗ̄ܘ̣ܵܐ ܒܝܲܕܼ ܕܛܲܢܸܦ̣ ܘܦܲܠܦܸܠ̣ ܗܲܕܵܡܹ̈ܐ ܡܩܲܕܫܹ̈ܐ ܒܢܸܩܦܵܐ ܕܥܲܡ ܙܵܢܝܼܬܼܵܐ: ܘܡܸܛܠ ܗܵܕܹܐ ܐܸܬܼܤܪܲܚܲܩ ܡܸܢܹܗ ܡܵܪܝܵܐ: ܘܐܸܫܬܠܸܡ ܒܐܝܼܕܼܵܐ ܕܲܒܼܥܸܠܕܒܼܵܒܼܵܘ̈ܗܝ؟ ܕܵܘܝܼܕܼ ܠܸܒܵܐ ܕܐܲܠܵܗܵܐ: ܕܡܸܛܠ ܡܝܲܬܿܪܘܼܬܹܗ: ܒܙܲܪܥܹܗ ܐܸܬܼܝܲܒܲܠ ܫܘܼܘܕܵܝܵܐ ܕܲܠܘܵܬܼ ܐܲܒܼ̈ܗܵܬܼܵܐ ܟܹܐܢܹ̈ܐ: ܘܲܨܡܲܚ̣ ܡܸܢܹܗ ܡܫܝܼܚܵܐ ܠܦܘܼܪܩܵܢܵܐ ܕܟܼܠܵܗ̇ ܬܹܒܹܝܠ: ܠܵܘ ܒܓܼܵܘܪܵܐ ܕܒܲܚܕܼܵܐ ܐܲܢ̄ܬܿܬܼܵܐ ܘܡܸܙܕܲܟܼܝܵܢܘܼܬܼܵܐ ܕܒܲܚܕܼܵܐ ܫܵܥܬܼܵܐ: ܕܡ̣ܢ ܚܵܘܪܵܐ ܕܥܲܝܢܹܗ ܩܲܒܸܠ̣ ܓܹܐܪܵܐ ܒܢܲܦܫܹܗ: ܘܐܲܩܝܼܡ̣ ܥܠܵܘ̈ܗܝ ܒܝܼܫܬܼܵܐ ܡ̣ܢ ܒܲܝܬܹܗ: ܘܪܵܕܹܦ ܗ̄ܘ̣ܵܐ ܠܹܗ ܒܪܵܐ ܕܲܢܦܲܩ̣ ܡ̣ܢ ܝܲܨܹܗ؟ ܘܗܵܕܹܐ: ܟܲܕܼ ܬܝܵܒܼܘܼܬܼܵܐ ܚ̣ܵܘܝܼ: ܘܡܵܪܝܵܐ ܐܸܡ݂ܲܪ ܠܹܗ: ܕܐܵܦ ܐܸܢܵܐ ܐܲܥ̇ܒܿܪܹܬܼ pb. 117 ܤܲܟܼܠܘܼܬܼܵܟܼ: ܠܵܐ ܬܡܘܼܬܼ. ܥܲܡ ܗܵܝ̇ ܟ̱ܠܵܗ̇ ܡܲܪܕܝܼܬܼܵܐ ܕܕܸܡܥܵܘ̈ܗܝ: ܕܡ̣ܢ ܤܲܓܝܼܐܘܼܗܹܝܢ ܬܸܫܘܝܼܬܹܗ ܡܨܲܒܲܥ ܗ̄ܘ̣ܵܐ ܒܠܲܝ̈ܠܵܘܵܬܼܵܐ܀ ܐܹܬܸܐ ܠܝܼ ܘܲܠܗܵܝ̇ ܕܐܵܦ ܡ̣ܢ ܩܕܼܵܡ ܗܵܢܵܐ. ܒܡܵܢܵܐ. ܒܡܵܢܵܐ ܐܲܕܼܪܸܟܼܘ ܕܵܘܘܼܢܹ̈ܐ ܘܲܓܼܡܘܼܪܝܵܐ ܕܦܵܤܝܼ̈ܩܵܬܼܵܐ ܠܒܲܝܬܹܗ ܕܥܹܠܝ ܟܵܗܵܢܵܐ: ܙܲܕܝܼܩܵܐ ܤܵܒܼܵܐ ܘܟܼܵܗܢܵܐ ܘܕܲܝܵܢܵܐ ܠܝܼܤܪܵܝܹܠ ܐܲܪܒܿܥܝܼܢ ܫܢ̈ܝܼܢ؟ ܠܵܐ ܗ̄ܘ̣ܵܐ ܡܸܛܠ ܦܝܼܢܚܸܣ ܘܚܲܦܢܝܼ ܒܢܵܘ̈ܗܝ: ܕܲܡܨܲܥܪܝܼܢ ܗ̄ܘ̣ܵܘ ܠܢܸܫܹ̈ܐ ܕܐܵܬܼ̈ܝܵܢ ܠܲܡܨܲܠܵܝܘܼ ܒܡܲܫܟܲܢ ܙܲܒܼܢܵܐ: ܟܲܕܼ ܠܵܐ ܗ̤ܘ ܚܛ̣ܵܐ: ܘܠܵܐ ܒܨܸܒܼܝܵܢܹܗ. ܐܸܠܵܐ ܒܲܠܚܘܿܕܼ ܕܲܒܼܗܵܝ̇ ܕܲܫܠ̣ܵܐ: ܘܲܒܼܡܸܠܬܼܵܐ ܒܲܠܚܘܿܕܼ ܐܲܟܸܣ̣: ܘܠܵܐ ܐܸܬܿܛܲܢܲܢ ܥܲܠ ܙܵܢܝܘܼܬܼܵܐ ܕܲܒܼܢܵܘ̈ܗܝ: ܘܲܬܼܒܲܥ̣ ܡܸܢܗܘܿܢ ܕܝܼܢܹܗ ܕܡܵܪܝܵܐ؟ ܘܲܕܼܠܵܐ ܐ̄ܢܵܫ ܢܸܤܒܲܪ ܕܒܲܐܝܼܠܹܝܢ ܕܡ̣ܢ ܝܵܘܡܲܝ̈ܗܘܿܢ ܚܲܛܵܚܝܑܼܢ ܗ̄ܘ̣ܵܘ ܡܚܵܘܸܐ ܡܵܪܝܵܐ ܛܢܵܢܹܗ: ܡܸܛܠ ܚܛܵܗܵܐ ܗܵܢܵܐ ܡܲܪܵܚܵܐ ܘܲܤܢܸܐ ܥܲܠ ܐܲܠܵܗܵܐ: ܗܵܐ ܒܩܲܪ̈ܝܼܒܼܵܘܗܝ ܡܚܵܘܸܐ ܛܢܵܢܹܗ: ܘܲܒܼܟܼܵܗܢܵܘ̈ܗܝ ܘܕܲܝܵܢܹ̈ܐ ܘܪܹ̈ܫܵܢܹܐ ܕܥܲܡܵܐ: ܘܲܒܼܐ̄ܢܵܫܵܐ ܐܲܝܠܹܝܢ ܕܩܲܕܝܼܫܝܼܢ ܠܹܗ: ܘܲܬܼܗܝܼܪ̈ܵܬܼܵܐ ܤ̣ܥܲܪ ܒܐܝܼܕܲܝ̈ܗܘܿܢ. ܕܐܵܦܵܠܐ ܟܲܕܼ ܗܸܢܘܿܢ ܢܸܫܪܘܿܢ ܢܵܡܘܿܤܹ̈ܐ ܕܤܵܡ̣: ܢܵܤܹ̇ܒܼ ܒܐܲܦܲܝ̈ܗܘܿܢ. ܐܲܝܟܼ ܕܲܟܼܬܼܝܼܒܼ ܒܚܲܙܩܝܹܐܹܝܠ: ܕܐܸܡ݂ܲܪ ܠܹܗ ܠܓܲܒܼܪܵܐ ܕܲܦ̣ܩܲܕܼ ܠܡܸܚܪܲܒܼ ܠܐ̄ܢܵܫܲܝ̈ ܐܘܿܪܸܫܠܸܡ ܒܚܲܪܒܵܐ ܟܤܝܼܬܼܵܐ: ܡ̣ܢ ܩܕܼܵܡ ܡܲܕܼܒܲܚ ܫܲܪܵܐ: ܘܠܵܐ ܬܚܘܼܗܝ: ܠܵܐ ܥܲܠ ܤܵܒܼܵܐ ܘܠܵܐ ܥܲܠ ܛܲܠܝܵܐ: ܘܠܵܐ ܥܲܠ ܥܠܲܝܡܵܐ. ܐܲܝܟܼ ܕܲܢܚܵܘܸܐ ܕܩܲܪ̈ܝܼܒܼܵܘܗܝ ܕܝܼܠܹܗ ܗܵܠܹܝܢ ܐܸܢܘܿܢ: ܐܲܝܠܹܝܢ ܕܸܒܼܕܸܚܠ̱ܬܼܵܐ ܘܲܒܼܬܲܚܡܲܨܬܵܐ ܡܗܲܠܟܼܝܼܢ pb. 118 ܩܕܼܵܡܵܘܗܝ: ܘܥܵܒܼ̇ܕܝܼܢ ܨܸܒܼܝܵܢܹܗ. ܩܲܕܝܼܫܵܘ̈ܗܝ ܕܡܵܪܝܵܐ ܘܩܲܪ̈ܝܼܒܼܵܘܗܝ: ܥ̇ܒܼܵܕܹ̈ܐ ܐܸܢܘܿܢ ܫܲܦܝܼܪܹ̈ܐ ܘܬܹܐܪܬܵܐ ܕܟܼܝܼܬܼܵܐ. ܡܵܐ ܕܹܝܢ ܕܡܲܤܠܹܝܢ ܠܐܘܼܪ̈ܚܵܬܼܵܐ ܕܨܸܒܼܝܵܢܹܗ ܕܡܵܪܝܵܐ: ܐܵܦ ܗ̤ܘ ܡܲܤܠܸܐ ܠܗܘܿܢ ܘܫܵܕܹܐ ܠܗܘܿܢ ܡ̣ܢ ܩܕܼܵܡܵܘܗܝ: ܘܲܡܪܝܼܡ ܡܸܗܘܿܢ ܛܲܝܒܿܘܼܬܹܗ܀ ܘܲܒܼܡܵܢܵܐ ܨܸܦܚܲܬ̤ ܓܙܝܼܪܲܬܼ ܡܪܲܝܡܵܐ ܥܲܠ ܒܹܠܛܫܵܨܲܪ ܒܐܵܬ̤ܵܐ ܕܦܲܤܲܬܼ ܐܝܼܕܼܵܐ ܠܡܲܪܵܚܘܼܬܹܗ؟ ܠܵܐ ܗ̄ܘ̣ܵܐ: ܡܸܛܠ ܕܐܲܡܪܲܚ̣ ܥܲܠ ܡܵܐܲܢܲܝ̇ ܩܘܼܕܼܫܵܐ ܕܐܲܝܬܝܼ ܡ̣ܢ ܐܘܿ ܪܸܫܠܸܡ: ܘܐܸܫܬܝܼ ܒܗܘܿܢ ܗ̤ܘ ܘܲܕܼܪ̈ܘܼܟܼܵܬܹܗ؟ ܗܵܟܲܢܵܐ ܘܡܲܢ ܕܗܲܕܵܡܹ̈ܐ ܕܲܠܩܘܼܕܼܫܹܗ ܕܡܵܪܝܵܐ ܐܸܬܼܦܪܸܫܘ ܚܕܼܵܐ ܙܒܲܢ: ܡܡܪܲܚ ܘܡܸܬܼܚܲܫܲܚ ܒܗܘܿܢ ܤܘܼܥܪܵܢܹܐ ܕܥܵܠܡܵܐ: ܗܵܕܹܐ ܟ̱ܠܵܗ̇ ܡܲܪܵܚܘܼܬܼܵܐ: ܡ̣ܢ ܫܸܠܝܵܐ ܓܙܝܼܪܲܬܼ ܡܪܲܝܡܵܐ ܨܵܦ̇ܚܵܐ ܥܠܵܗܝ: ܐܲܟܼܘܵܬܹܗ ܕܒܹܠܛܫܵܨܲܪ ܕܐܲܡܪܲܚ̣ ܥܲܠ ܡܵܐܢܹ̈ܐ ܡܩܲܕܫܹ̈ܐ ܕܡܲܦܩܝܼܢ ܡ̣ܢ ܡܲܩܕܫܹܗ ܕܡܵܪܝܵܐ. ܡܵܕܹܝܢ: ܠܵܘ ܡܸܛܠ ܬܘܼܟܼܠܵܢܵܐ ܕܲܬܼܝܵܒܼܘܼܬܼܵܐ ܘܡܸܠܹ̈ܐ ܡܠܲܒܼܒܼܵܢ̈ܝܵܬܼܵܐ ܕܲܟܼܬܼܵܒܹ̈ܐ: ܢܫܝܼܚ ܥܲܠ ܡܸܠܵܘ̈ܗܝ ܕܐܲܠܵܗܵܐ ܘܠܘܼܚܵܡܵܘ̈ܗܝ: ܘܲܢܨܲܥܪܝܼܘܗܝ ܒܤܲܢ̈ܝܵܬܼܵܐ ܕܤܘܼܥܪ̈ܵܢܲܝܢ: ܘܲܢܨܲܥܲܪ ܐܵܦ ܠܗܲܕܵܡܹ̈ܐ ܕܲܚܕܼܵܐ ܙܒܲܢ ܩܲܪܸܒܼܢܲܢ ܩܘܼܪܒܵܢܵܐ: ܐܲܝܟܼ ܕܲܒܼܗܘܿܢ ܢܸܫܬܲܡܫܘܼܢ ܩܘܼ̈ܕܼܫܹܐ ܕܝܼܠܹܗ: ܘܲܠܚܘܼܫܵܚܵܐ ܕܲܥ̇ܒܼܵܕܹܗ܀ ܗܵܐ ܡܩܲܕܫܹ̈ܐ ܚܢܲܢ ܕܐܲܠܵܗܵܐ: ܘܲܢܙܝܼܪܹ̈ܐ ܕܡ̣ܢ ܢܸܫܹ̈ܐ. ܘܐܲܝܟܼ ܐܹܠܝܼܵܐ ܕܐܹܠܝܼܫܲܥ ܘܲܒܼܢܲܝ̈ ܢܒܼܝܼܹ̈ܐ ܘܫܲܪܟܵܐ ܕܲܢܙܝܼܪܹ̈ܐ ܡܩܲܕܫܹ̈ܐ ܘܲܒܼܬܼܘܼ̈ܠܹܐ ܩܲܕܝܼ̈ܫܹܐ: ܕܐܸܤܬܿܥܲܪ ܒܐܝܼܕܲܝ̈ܗܘܿܢ ܪܵܘܪ̈ܒܼܵܬܼܵܐ ܘܲܬܼܡܝܼ̈ܗܵܬܼܵܐ: ܘܐܲܦܝܼ̈ܢ ܒܐܲܦ̈ܝܼܢ ܥܲܡ ܐܲܠܵܗܵܐ ܡܡܲܠܠܝܼܢ ܗ̄ܘ̣ܵܘ. ܘܐܲܝܟܼ ܗܵܠܹܝܢ ܕܒܼܵܬܲܪܟܸܢ: ܐܲܝܟܼ ܝܘܿܚܲܢܵܢ ܒܬܼܘܼܠܵܐ: ܘܫܸܥܘܿܢ ܩܲܕܝܼܫܵܐ: ܘܫܲܪܟܵܐ ܕܟܼܵܪ̈ܘܿܙܹܐ ܕܲܚܕܲܬܵܐ: ܕܩܲܕܸܫܘ ܢܲܦܫܗܘܿܢ pb. 119 ܠܡܵܪܝܵܐ: ܘܩܲܒܸܿܠ̣ܘ ܡܸܢܹܗ ܐ̄ܪ̈ܵܙܹܐ. ܡܸܢܗܘܿܢ ܡ̣ܢ ܦܘܼܡܹܗ: ܘܡܸܢܗܘܿܢ ܒܓܸܠܝܵܢܵܐ. ܘܲܗܘ̤ܵܘ ܡܸܨܥܵܝܹ̈ܐ ܒܹܝܬܼ ܐܲܠܵܗܵܐ ܠܲܒܼܢܲܝ̈ܢܵܫܵܐ: ܘܲܡܩܲܠܵܢܹ̈ܐ ܕܓܸܠܝܵܢܵܘ̈ܗܝ: ܘܲܡܤܲܒܿܪ̈ܵܢܹܐ ܘܲܡܤܲܒܿܪ̈ܵܢܹܐ ܕܡܲܠܟܿܘܼܬܼܵܐ ܠܥܵܡܲܪ̈ܲܝ ܬܹܒܹܝܠ.