Paulus Bedjan ed., Mar Isaacus Ninivita. De perfectione religiosa. (Paris/Leipzig: Otto Harrassowitz, 1909)
    
        
            
                ܕܲܟܼܡܵܐ ܡܘܼ̈ܫܚܵܬܼܵܐ ܐܝܼܬܼ ܠܝܼܕܲܥܬܼܵܐ: ܘܡܘܼ̈ܫܚܵܬܵܐ ܕܤܝܼ̈ܡܵܢ
                ܠܡܲܝܡܵܢܘܼܬܼܵܐ. ܡܕ.
            
            
                ܐܝܼܬܼ ܝܑܼܕܲܥܬܵܐ ܕܩܲܕܝܼܡܵܐ ܠܗܲܝܡܵܢܘܼܬܼܵܐ: ܘܐܝܼܬܼ ܝܑܼܕܲܥܬܵܐ ܕܡ̣ܢ
                ܗܲܝܡܵܢܘܼܬܼܵܐ ܡܸܬܼܝܲܠܕܵܐ. ܝܑܼܕܲܥܬܵܐ ܕܩܲܕܝܼܡܵܐ ܠܗܲܝܡܵܢܘܼܬܼܵܐ: ܝܑܼܕܲܥܬܵܐ
                ܟܝܵܢܵܝܬܵܐ. ܕܡ̣ܢ ܗܲܝܡܵܢܘܼܬܼܵܐ ܡܸܬܼܝܲܠܕܵܐ: ܝܑܼܕܲܥܬܵܐ ܪܘܼܚܵܢܵܝܬܵܐ. ܡܵܢܲܐ
                ܗ̣̄ܝ ܝܑܼܕܲܥܬܵܐ ܟܝܵܢܵܝܬܵܐ؟ ܝܑܼܕܲܥܬܵܐ ܦܵܪܫܲܬܼ ܛܵܒܼܬܵܐ ܡ̣ܢ ܒܝܼܫܬܵܐ: ܘܡܸܬܼܩܲܪܝܵܐ:
                ܐܵܦ ܦܵܪܘܿܫܘܼܬܼܵܐ ܟܝܵܢܵܝܝܬܵܐ. ܗܵܕܹܐ ܕܢܸܕܲܥ ܛܵܒܼܬܵܐ ܡ̣ܢ ܒܝܼܫܬܵܐ: ܟܝܵܢܵܐܝܼܬܼ
                ܕܠܵܐ ܝܘܼܠܦܵܢܵܐ: ܒܲܟܼܝܵܢܵܐ ܡܠܝܼܠܵܐ ܤܵܡ̣ ܐܲܠܵܗܵܐ. ܡ̣ܢ ܝܘܼܠܦܵܢܵܐ ܕܹܝܢ:
                ܬܵܘܤܲܦܬܵܐ ܫܵܩ̇ܠܵܐ. ܠܲܝܬܿ ܕܠܵܐ ܕܵܝ̇ܠܵܐ ܒܹܗ ܗܵܕܹܐ. ܘܗܵܢܵܘ ܚܲܝܠܵܐ
                ܕܝܕܲܥܬܼܵܐ ܕܢܲܦܫܵܐ ܡܠܝܼܠܬܵܐ ܟܝܵܢܵܐܝܼܬܼ: ܗܵܢܵܘ ܕܹܝܢ: ܦܵܪܘܿܫܘܼܬܼܵܐ
                ܕܛܵܒܼܬܼܵܐ ܘܒܼܝܼܫܬܵܐ ܬܸܬܿܙܝܼܥ ܒܵܗ̇ ܕܠܵܐ ܫܲܠܘܵܐ. ܐܲܝܠܹܝܢ ܡ̇ܢ ܕܡ̣ܢ
                ܗܵܕܹܐ ܚܲܤܝܼܪܝܼܢ: ܠܬܲܚܬܿ ܡ̣ܢ ܛܲܟܼܤܵܐ ܕܲܡܠܝܼܠܘܼܬܼܵܐ ܐܸܢܘܿܢ. ܐܲܝܠܹܝܢ
                ܕܹܝܢ ܕܗܵܕܹܐ ܫܡܼܝܼܚܵܐ ܒܗܘܿܢ: ܬܪܝܼܨܵܐܝܼܬܼ ܒܲܟܼܝܵܢܵܐ ܢܲܦܫܵܢܵܝܵܐ ܩܵܝ̇ܡܝܼܢ:
                
                 319 
                
                ܟܲܕܼ ܠܵܐ ܡܚܲܒܲܠ ܒܗܘܿܢ ܗܵܘ̇ ܡܸܕܸܡ ܕܡ̣ܢ ܐܲܠܵܗܵܐ ܠܲܟܼܝܵܢܵܐ ܢܲܦܫܵܢܵܝܵܐ
                ܐܸܬܼܝܼܗܸܒܼ: ܠܐܝܼܩܵܪܵܐ ܕܲܡܠܝܼܠܘܼܬܹܗ. ܠܐܲܝܠܹܝܢ ܕܗܵܕܹܐ ܝܑܼܕܲܥܬܵܐ ܦܵܪܫܲܬܼ
                ܛܵܒܼܬܵܐ ܡ̣ܢ ܒܝܼܫܬܵܐ ܐܵܘܒܸܿܕܼܘ: ܡܚܲܤܸܕܼ ܢܒܼܝܼܵܐ: ܒܲܪܢܵܫܵܐ ܠܲܡ ܒܐܝܼܩܵܪܹܗ
                ܠܵܐ ܐܸܬܼܒܲܝܲܢ. ܐܝܼܩܵܪܹܗ ܕܲܟܼܵܝܵܢܵܐ ܡܠܝܼܠܵܐ: ܗ̤ܝ ܗ̣̄ܝ ܦܵܪܘܿܫܘܼܬܼܵܐ: ܦܵܪܫܲܬܼ
                ܛܵܒܼܬܵܐ ܡ̣ܢ ܒܝܼܫܬܵܐ. ܘܟܹܐܢܵܐܝܼܬܼ ܠܐܲܝܠܹܝܢ ܕܐܵܘܒܸܿܕܼܘ ܗܵܕܹܐ: ܕܲܡܝܼ
                ܠܲܒܼܥܝܼܪܵܐ ܠܵܐ ܩܲܢܝܲܬܼ ܢܲܦܫܵܐ ܦܵܪܘܿܫܬܼܵܐ ܘܲܡܠܝܼܠܬܵܐ. ܒܗܵܕܹܐ ܡܟܼܵܢܵܐ
                ܠܡܸܫܟܵܚܘܼ ܠܐܘܼܪܚܵܐ ܕܐܲܠܵܗܵܐ: ܘܗܵܕܲܐ ܗ̣̄ܝ ܝܑܼܕܲܥܬܵܐ ܟܝܵܢܵܝܬܐ
                ܕܩܲܕܝܼܡܵܐ ܠܗܲܝܡܵܢܘܼܬܼܵܐ: ܘܐܝܼܬܹܝܗ̇ ܐܘܼܪܚܵܐ ܕܲܠܘܵܬܼ ܐܲܠܵܗܵܐ. ܒܵܗ̇
                ܕܹܝܢ ܒܗܵܕܹܐ ܕܢܸܕܲܥ: ܦܵܪܹܫ ܕܛܵܒܼ ܡ̣ܢ ܕܒܼܝܼܫ: ܡܩܲܒܸܠ
                ܠܵܗ̇ ܠܗܲܝܡܵܢܘܼܬܼܵܐ. ܟܲܕܼ ܤܵܗܹ̇ܕܼ ܗ̤ܘ ܚܲܝܠܵܐ ܕܲܟܼܝܵܢܵܐ: ܕܫܲܦܝܼܪ ܗ̄ܘ̣
                ܕܐ̄ܢܵܫ ܢܗܲܝܡܸܢ: ܒܡܲܢ ܕܗܵܠܹܝܢ ܟܠܗܹܝܢ ܐܲܝܬܝܼ ܠܲܡܘܵܝܵܐ: ܘܲܕܼܢܲܫܲܪ
                ܠܡܸܠܬܼܵܐ ܕܦܘܼܩܕܵܢܵܘ̈ܗܝ ܘܲܕܼܢܸܥܒܸܿܕܼ ܐܸܢܘܿܢ. ܘܡܸܢܵܗ̇ ܕܗܵܕܹܐ ܕܗܲܝܡܸܢ:
                ܡܸܬܼܝܲܠܕܵܐ ܕܸܚܠܲܬܼ ܐܲܠܵܗܵܐ. ܠܵܗ̇ ܕܹܝܢ ܠܕܸܚܠܲܬܼ ܐܲܠܵܗܵܐ: ܟܲܕܼ ܢܸܩܲܦ
                ܠܦܘܼܠܚܵܢܵܗ̇: ܘܩܲܠܝܼܠ ܢܸܤܲܩ ܒܵܗ̇ ܒܦܘܼܠܚܵܢܵܐ: ܡܵܘܠܕܼܵܐ ܠܗܵܝ̇
                ܝܑܼܕܲܥܬܼܵܐ ܪܘܼܚܵܢܵܝܬܵܐ ܕܐܸܡ݂ܲܪܢܲܢ: ܕܡ̣ܢ ܗܲܝܡܵܢܘܼܬܼܵܐ ܡܸܬܼܝܲܠܕܵܐ. ܠܵܘ
                ܕܲܦܫܝܼܛܵܐܝܼܬܼ: ܡܸܢܵܗ̇ ܕܗܲܝܡܵܢܘܼܬܼܵܐ ܡܸܬܼܝܲܠܕܵܐ. ܡ̣ܢ ܗܲܝܡܵܢܘܼܬܼܵܐ
                ܒܲܠܚܘܿܕܼ ܫܚܝܼܡܬܵܐ: ܠܵܐ ܡܸܬܼܝܲܠܕܵܐ ܝܑܼܕܲܥܬܵܐ ܪܘܼܚܵܢܵܝܬܵܐ: ܐܸܠܵܐ ܡ̣ܢ
                ܗܲܝܡܵܢܘܼܬܼܵܐ ܕܸܚܠܲܬܼ ܐܲܠܵܗܵܐ ܡܸܬܼܝܲܠܕܵܐ. ܘܲܠܕܸܚܠܲܬܼ ܐܲܠܵܗܵܐ ܟܲܕܼ
                ܢܫܲܪܸܐ ܒܦܘܼܠܚܵܢܵܗ̇: ܡ̣ܢ ܦܘܼܠܚܵܢܵܐ ܕܕܸܚܠܲܬܼ ܐܲܠܵܗܵܐ ܡܸܬܼܝܲܠܕܵܐ
                ܝܑܼܕܲܥܬܵܐ ܪܘܼܚܵܢܵܬܵܐ: ܐܲܝܝܟܼ ܡܸܠܬܹܗ ܕܛܘܼܒܼܵܢܵܐ ܡܦܲܫܩܵܢܵܐ: ܡܵܐ ܠܲܡ
                ܓܹܝܪ ܕܐ̄ܢܵܫ ܩܵܢܹ̇ܐ ܨܒܼܝܵܢܵܐ ܕܢܲܩܝܼܦ ܠܕܸܚܠܲܬܼ ܐܲܠܵܗܵܐ: ܘܬܲܪܥܝܼܬܼܵܐ
                ܬܪܝܼܨܬܵܐ: ܕܠܝܼܠܵܐܝܼܬܼ ܢܵܤܹ̇ܒܼ ܓܸܠܝܵܢܵܐ ܕܟܲܤ̈ܝܵܬܵܐ. ܓܸܠܝܵܢܵܐ ܕܟܲܤ̈ܝܵܬܵܐ
                
                 320 
                
                ܩܵܪܹܐ: ܠܝܼܕܲܥܬܵܐ ܪܘܼܚܵܢܵܝܬܵܐ. ܠܵܘ ܕܗ̤ܝ ܕܸܚܠܲܬܼ ܐܲܠܵܗܵܐ ܝܵܠܕܵܐ ܠܵܗ̇
                ܠܗܵܕܹܐ. ܡܸܕܸܡ ܕܠܵܐ ܒܲܟܼܝܵܢܵܐ ܤܝܼܡ ܠܡܵܘܠܵܕܼܘܼ: ܠܵܐ ܡܲܨܝܵܐ.
                ܐܸܠܵܐ ܡܵܘܗܒܲܬܼ ܡܵܘܗܒܲܬܼ ܡܸܬܼܝܲܗܒܵܐ ܗ̤ܝ ܝܑܼܕܲܥܬܵܐ: ܠܦܘܼܠܚܵܢܵܐ ܕܕܸܚܠܲܬܼ
                ܐܲܠܵܗܵܐ.
                ܟܲܕܼ ܕܹܝܢ ܬܥܲܩܸܒܼ ܫܲܦܝܼܪ: ܦܘܼܠܚܵܢܵܐ ܕܕܸܚܠܲܬܼ ܐܲܠܵܗܵܐ ܡܸܫܟܲܚ
                ܐܲܢ̄ܬܿ: ܕܗ̤ܝ ܗ̣̄ܝ ܬܝܵܒܼܘܼܬܼܵܐ. ܘܝܼܕܲܥܬܼܵܐ ܪܘܼܚܵܢܵܝܬܐ ܕܗܵܪܟܵܐ: ܗܵܝ̇
                ܗ̣̄ܝ ܕܐܸܡ݂ܲܪܢܲܢ: ܕܗܵܘ̇ ܡܸܕܸܡ ܕܲܒܼܡܲܥܡܘܿܕܼܝܼܬܼܵܐ ܢܤܲܒܼܢܲܢ ܪܲܗܒܼܘܿܢܹܗ:
                ܒܲܬܼܝܵܒܼܘܼܬܼܵܐ ܢܵܤ̇ܒܿܝܼܢܲܢ ܫܘܼܟܵܢܹܗ. ܫܘܼܟܵܢܵܐ ܕܐܸܡ݂ܲܪܢܲܢ ܕܒܲܬܼܝܵܒܼܘܼܬܼܵܐ
                ܢܵܤ̇ܒܿܝܼܢܲܢ: ܗ̤ܝ ܗ̣̄ܝ ܝܑܼܕܲܥܬܼܵܐ ܕܪܘܼܚ: ܕܲܒܼܦܘܼܠܚܵܢܵܐ ܕܕܸܚܠܲܬܼ
                ܐܲܠܵܗܵܐ ܡܸܬܼܝܲܗܒܵܐ ܡܵܘܗܒܲܬܼ. ܝܑܼܕܲܥܬܼܵܐ ܪܘܼܚܵܢܵܝܬܵܐ ܐܝܼܬܹܝܗ̇: ܡܲܪܓܫܵܢܘܼܬܼܵܐ
                ܕܐܲܝܠܹܝܢ ܕܟܲܤ̈ܝܵܢ. ܡܵܐ ܕܹܝܢ ܕܐܲܪܓܸܫ̣ ܐ̄ܢܵܫ ܒܗܵܠܹܝܢ ܕܠܵܐ ܡܸܬܼܚܲܙ̈ܝܵܢ
                ܘܕܲܡܝܲܬܿܪ̈ܵܢ ܤܲܓܝܼ: ܕܡܸܢܗܹܝܢ ܢܵܤ̇ܒܵܐ ܫܘܼܡܵܗܵܐ ܗ̤ܝ ܪܘܼܚܵܢܘܼܬܼܵܗ̇
                ܕܝܼܕܲܥܬܵܐ: ܡܸܬܼܝܲܠܕܵܐ ܒܵܗ̇ ܒܗܵܕܹܐ ܡܲܪܓܫܵܢܘܼܬܼܵܐ: ܗܲܝܡܵܢܘܼܬܼܵܐ
                ܐ̄ܚܪܹܬܼܵܐ. ܠܵܘ ܕܤܲܩܘܼܒܼܠܵܐ ܠܗܵܝ̇ ܩܲܕܼܡܵܝܬܵܐ: ܐܸܠܵܐ ܕܲܡܫܲܪܪܵܐ ܠܗܵܝ̇
                ܕܗܲܝܡܸܢ. ܩܵܪܹܝܢ ܠܵܗ̇ ܕܹܝܢ: ܗܲܝܡܵܢܘܼܬܼܵܐ ܕܲܚܙܵܝܝܵܐ. ܥܕܲܡܵܐ ܠܗܵܝܕܹܝܟ:
                ܫܸܡܥܵܐ. ܗܵܫܵܐ ܕܹܝܢ: ܚܙܵܝܵܐ. ܫܲܪܝܼܪܵܐ ܚܙܵܬܼܵܐ ܡ̣ܢ ܫܸܡܥܵܐ. ܗܵܠܹܝܢ
                ܟܠܗܹܝܢ: ܡ̣ܢ ܗܵܝ̇ ܝܑܼܕܲܥܬܼܵܐ ܦܵܪܫܲܬܼ ܛܵܒܼܬܼܵܐ ܡ̣ܢ ܒܝܼܫܬܵܐ: ܕܒܲܟܼܝܵܢܵܐ
                ܢܵܒܼ̇ܗܵܐ: ܡܸܬܼ̈ܝܲܠܕܵܢ. ܘܗܵܕܲܐ ܗ̣̄ܝ ܙܲܪܥܵܐ ܕܲܡܝܲܬܿܪܘܼܬܼܵܐ ܕܐܲܡܝܼܪܵܐ. ܡܵܐ
                ܕܹܝܢ ܕܲܠܗܵܕܹܐ ܡܚܲܦܹܝܢܲܢ ܠܵܗ̇ ܒܨܸܵܢܲܢ ܪܵܚܹ̇ܡ ܪ̈ܓܼܝܼܓܼܵܬܵܐ: ܡ̣ܢ ܗܵܠܹܝܢ
                ܟܠܗܹܝܢ ܛܵܒܼ̈ܬܼܵܐ ܢܵܦ̇ܠܝܼܢܲܢ. ܠܵܗ̇ ܠܗܵܕܹܐ ܝܑܼܕܲܥܬܵܐ ܢܲܩܝܼܦܵܐ: ܕܩܵܪܵܐ
                ܐܲܡܝܼܢܵܐ ܕܬܹܐܪܬܵܐ. ܥܵܩܬܼܵܐ: ܘܟܲܪܝܘܼܬܼܵܐ. ܕܸܚܠܬܵܐ ܕܐܲܠܵܗܵܐ: ܘܟܼܘܼܚܵܕܼܵܐ
                ܕܡ̣ܢ ܟܝܵܢܵܐ. ܟܲܪܝܘܼܬܼܵܐ ܕܥܲܠ ܐܲܦܲܝ̈ ܡܸܬܼܥܲܒܼܪ̈ܵܢܘܵܬܼܵܐ ܕܡܸܢܩܕܹܝܡ:
                
                 321 
                
                ܘܲܚܦܝܼܛܘܼܬܼܵܐ ܕܐܲܝܠܹܝܢ ܕܘܵܠ̈ܝܵܢ. ܥܘܼܗܕܵܢܵܐ ܐܲܡܝܼܢܵܐ ܕܡܵܘܬܵܐ:
                ܘܪܸܢܝܵܐ ܡܫܲܢܩܵܢܵܐ ܕܡܲܥܒܲܪܬܵܐ ܗܵܕܹܐ: ܘܝܲܨܝܼܦܘܼܬܼܵܐ ܕܲܙܘܵܕ̈ܝܝܹܗ̇:
                ܘܬܲܟܼܫܲܦܬܵܐ ܚܲܫܝܼܫܬܵܐ ܕܡ̣ܢ ܐܲܠܵܗܵܐ: ܕܫܲܦܝܼܪ ܢܸܥܘܿܠ ܒܗܵܢܵܐ ܬܲܪܥܵܐ:
                ܕܐܝܼܬܼܵܘܗܝ ܡܲܥܒܲܪܬܵܐ ܕܟܼܠܹܗ ܟܝܵܢܵܐ. ܒܲܤܝܘܼܬܼܵܐ ܕܥܲܠ ܥܵܠܡܵܐ:
                ܘܐܵܓܼܘܿܢܵܐ ܫܲܦܝܼܪܵܐ ܕܥܲܠ ܐܲܦܲܝ̈ ܡܝܲܬܿܪܘܼܬܼܵܐ. ܗܵܠܹܝܢ ܟܠܗܹܝܢ:
                ܒܗܵܕܹܐ ܝܑܼܕܲܥܬܼܵܐ ܟܝܵܢܵܝܬܵܐ ܫܟܼܝܼ̈ܚܵܢ. ܢܒܲܝܸܢ ܐ̄ܢܵܫ ܕܘܼܒܵܪܹܗ ܡ̣ܢ ܗܵܠܹܝܢ.
                ܡܵܐ ܕܲܒܼܗܵܠܹܝܢ ܐܝܼܬܼܵܘܗܝ ܒܲܪܢܵܫܵܐ: ܒܐܘܼܪܚܵܐ ܕܲܟܼܝܵܢܵܐ ܪܵܕܹܐ. ܡܵܐ
                ܕܹܝܢ ܕܡ̣ܢ ܗܵܠܹܝܢ ܐܸܬܼܥܲܠܝܼ ܘܲܡܛ̣ܵܐ ܠܚܘܼܒܵܐ: ܐܸܬܼܥܲܠܝܼ ܡ̣ܢ ܗܵܝ̇
                ܕܲܟܼܝܵܢܵܐ: ܘܲܥ̣ܒܲܪ ܡܸܢܹܗ ܐܵܓܼܘܿܢܵܐ ܘܕܸܚܠܬܵܐ ܘܠܹܐܘܬܼܵܐ. ܡ̣ܢ ܗܵܠܹܝܢ
                ܕܐܸܬܼܐܡܲܪ: ܢܲܦܚܸܡ ܐ̄ܢܵܫ ܨܸܒܼ̈ܘܵܬܹܗ: ܒܐܲܝܕܵܐ ܪܵܕܹܐ؟ ܒܗܵܝ̇ ܕܲܠܬܲܚܬܿ
                ܡ̣ܢ ܟܝܵܢܵܐ: ܐܵܘ ܒܲܟܼܵܢܵܐ: ܐܵܘ ܒܗܵܠܹܝܢ ܕܲܠܥܸܠ ܡ̣ܢ ܟܝܵܢܵܐ؟ ܡ̣ܢ
                ܗܵܠܹܝܢ ܦܘܼܪ̈ܫܵܢܹܐ ܕܢܲܗܝܼܪܵܐܝܼܬܼ ܐܸܬܼܐ̱ܡܲܪܘ: ܦܫܝܼܩܵܐܝܼܬܼ ܡܨܸܐ ܕܢܲܕܼܪܸܟܼ
                ܐ̄ܢܵܫ: ܕܘܼܒܵܪܵܐ ܕܟܼܠܗܘܿܢ ܚܲܝܵܘ̈ܗܝ. ܐܸܡܲܬܼܸܝ ܕܲܒܼܗܵܠܹܝܢ ܕܲܟܼܝܵܢܵܐ
                ܕܲܪ̈ܫܝܼܡܵܢ ܬܢܵܢ ܠܵܐ ܐܝܼܬܲܝܟ: ܘܲܒܼܗܵܢܹܝܢ ܕܲܠܥܸܠ ܡ̣ܢ ܟܝܵܢܵܐ ܠܵܐ:
                ܝܑܼܕܼܝܼܸܥܵܐ ܗ̣̄ܝ ܕܲܠܬܲܚܬܿ ܡ̣ܢ ܟܝܵܢܵܐ ܫܪܸܐ ܐܲܢ̄ܬܿ.