Discourse 51
pb. 360
ܥܲܠ ܬܠܵܬܼܵܐ ܛܲܟܼܤܹ̈ܐ ܕܝܼܕܲܥܬܼܵܐ: ܘܦܘܼܪܫܵܢܵܐ ܕܦܘܼܠܚܵܢܗܘܿܢ
ܘܙܵܘܥܲܝ̈ܗܘܿܢ. ܘܥܲܠ ܗܲܝܡܵܢܘܼܬܼܵܐ ܕܢܲܦܫܵܐ: ܘܥܘܼܬܼܪܵܐ ܕܐ̄ܪ̈ܵܙܹܐ
ܕܲܟܼܤܹܝܢ ܒܵܗ̇. ܘܕܲܟܼܡܵܐ ܤܲܩܘܼܒܼܠܵܝܵܐ ܝܑܼܕܲܥܬܼܵܐ ܕܥܵܠܡܵܐ ܗܵܢܵܐ
ܒܦܘܼܪ̈ܤܹܝܗ̇: ܠܲܦܫܝܼܛܘܼܬܼ ܗܲܝܡܵܢܘܼܬܼܵܐ. ܢܐ.
ܢܲܦܫܵܐ ܗܵܟܹܝܠ ܕܒܲܫܒܼܝܼ̈ܠܹܐ ܕܕܼܘܼܒܵܪܹ̈ܝܗ̇ ܒܐܘܼܪܚܵܐ ܕܗܲܝܡܵܢܘܼܬܼܵܐ
ܪܵܕܼܝܵܐ: ܘܗ̤ܝ ܗܵܕܹܐ ܐܲܨܠܚܲܬ̤ ܠܵܗ̇ ܙܲܒܼܢ̈ܝܼܢ ܤܲܓܝܼ̈ܐܵܢ. ܦܢܵܬ̤ ܠܵܗ̇
ܬܘܼܒܼ ܥܲܠ ܦܘܼܪ̈ܤܹܐ ܕܝܼܕܲܥܬܼܵܐ: ܡܸܚܕܼܵܐ ܐܸܬܼܚܲܓܿܪܲܬ̤ ܠܵܗ̇
ܡ̣ܢ ܗܲܝܡܵܢܘܼܬܼܵܐ. ܘܐܸܬܼܚܲܤܟܲܬ̤ ܠܵܗ̇ ܡ̣ܢ ܚܲܝܠܵܐ ܗܵܘ̇ ܡܸܬܼܝܲܕܼܥܵܢܵܐ
ܕܗܲܝܡܵܢܘܼܬܼܵܐ: ܕܲܒܼܥܘܼܕܼܪ̈ܵܢܹܐ ܡܫܲܚ̈ܠ̱ܦܹܐ ܓܿܠܝܵܐ ܝܵܬܼܵܗ̇ ܒܢܲܦܫܵܐ
ܫܦܝܼܬܼܵܐ: ܕܲܕܼܠܵܐ ܥܘܼܩܵܒܼ ܒܵܗ̇ ܡܸܬܼܚܲܫܚܵܐ ܦܫܝܼܛܵܐܝܼܬܼ ܒܟܼܠܗܹܝܢ
ܕܝܼܠܵܗ̇. ܢܲܦܫܵܐ ܕܲܚܕܼܵܐ ܙܒܲܢ ܒܗܲܝܡܵܢܘܼܬܼܵܐ ܐܲܓܼܥܠܲܬ̤ ܝܵܬܼܵܗ̇
ܠܐܲܠܵܗܵܐ: ܘܲܒܼܢܸܤ̈ܝܵܢܹܐ ܤܲܓܝܼ̈ܐܹܐ ܩܲܒܿܠܲܬ̤ ܛܥ̈ܡܵܬܼܵܐ ܕܥܘܼܕܼܪ̈ܵܢܹܝܗ̇:
ܬܘܼܒܼ ܠܲܝܬܿ ܠܵܗ̇ ܪܸܢܝܵܐ ܕܲܩܢܘܿܡܵܗ̇: ܐܸܠܵܐ ܒܬܸܡܗܵܐ ܘܲܒܼܫܸܬܼܩܵܐ
ܒܠܝܼܡܵܐ. ܘܲܕܿܬܸܬܼܦܢܸܐ ܬܘܼܒܼ ܥܲܠ ܦܘܼܪ̈ܤܹܐ ܕܝܼܕܲܥܬܼܵܗ̇:
ܘܲܠܡܸܬܼܚܲܫܵܚܘܼ ܒܗܘܿܢ ܠܵܐ ܫܲܠܝܼܛܵܐ. ܕܠܵܐ ܐܲܝܟܼ ܕܲܒܼܕܲܠܩܘܼܒܼܠܵܐ
ܬܸܬܼܓܠܸܙ ܐܵܦ ܡ̣ܢ ܒܛܝܼܠܘܼܬܼܵܐ ܐܲܠܵܗܵܝܬܼܵܐ: ܗܵܝ̇ ܕܲܒܼܟܸܤܝܵܐ ܤܵܥ̇ܪܵܐ
ܠܵܗ̇ ܕܠܵܐ ܫܸܠܝܵܐ: ܘܝܵܨ̇ܦܵܐ ܕܝܼܠܵܗ̇: ܘܒܲܐܡܝܼܢܘܼ ܢܲܩܝܼܦܵܐ ܠܵܗ̇
ܒܟܼܠܕܘܼܟ. ܐܲܝܟܼ ܡ̇ܢ ܕܫܵܛܲܬ̤ ܥܠܹܝܗ̇: ܕܗ̤ܝ ܠܲܩܢܘܿܡܵܗ̇ ܤܵܦ̇ܩܵܐ
ܠܲܡܕܲܒܵܪܘܼ ܒܚܲܝܠܵܐ ܕܝܼܕܲܥܬܼܵܗ̇. ܐܲܝܠܹܝܢ ܓܹܝܪ ܕܢܘܿܗܪܵܐ ܕܗܲܝܡܵܢܘܼܬܼܵܐ
ܒܠܸܒܵܪ̈ܵܬܼܗܘܿܢ ܕܢܲܚ̣: ܠܵܐ ܬܘܼܒܼ ܕܲܢܨܲܠܘܿܢ ܥܲܠ ܢܲܦܫܗܘܿܢ ܡܲܡܪܚܝܼܢ:
ܐܵܦܠܵܐ ܕܢܸܒܼܥܘܿܢ ܡ̣ܢ ܐܲܠܵܗܵܐ ܗܲܒܼܠܲܢ ܙܲܦܠܵܢ: ܐܵܘ ܕܲܫܩܘܿܠ ܡܼܢܲܢ
pb. 361
ܙܲܦܠܵܢ: ܘܠܵܐ ܕܢܸܪܢܘܿܢ ܕܢܲܦܫܗܘܿܢ ܒܚܲܕܼ ܡ̣ܢ ܙܢܝܼ̈ܢ. ܒܗܵܝ̇
ܕܲܒܼܥܲܝ̈ܢܹܐ ܝܲܕܼܘܼ̈ܥܬܼܵܢܝܵܬܼܵܐ ܕܗܲܝܡܵܢܘܼܬܼܗܘܿܢ: ܒܟܼܠܥܸܕܵܢ ܚܵܙܹܝܢ
ܠܲܒܼܛܝܼܠܘܼܬܼܵܐ ܐܲܒܼܵܗܵܝܬܵܐ ܕܡܲܛܠܠܵܐ ܥܠܲܝܗܘܿܢ: ܡ̣ܢ ܗܵܘ̇ ܐܲܒܼܵܐ
ܫܲܪܝܼܪܵܐ ܕܙܵܟܼܝܵܐ ܥܲܙܝܼܙܘܼܬܼ ܚܘܼܒܹܗ ܠܵܐ ܡܸܬܼܡܲܫܚܵܢܝܼܬܼܵܐ: ܠܟܼܠܵܗ̇
ܪܸܚܡܬܵܐ ܕܐܲܒܼܵܗܹ̈ܐ ܕܒܸܤܪܵܐ. ܗܵܘ̇ ܕܲܡܨܸܐ ܒܚܲܝܠܵܐ ܝܲܬܝܼܪ ܡ̣ܢ ܟܠ
ܠܡܸܥܒܲܕܼ ܠܲܢ: ܘܝܲܬܝܼܪ ܡ̣ܢ ܡܵܐ ܕܫܵܐܠܝܼܢܲܢ ܘܪܵܢܹܝܢܲܢ. ܤܲܩܘܼܒܼܠܵܝܵܐ
ܓܹܝܪ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ: ܘܫܵܪܘܿܝܬܼܵܐ ܗ̣̄ܝ ܗܲܝܡܵܢܘܼܬܼܵܐ ܒܟܼܠܗܹܝܢ
ܕܝܼܠܵܗ̇: ܠܢܵܡܘܿܤܹ̈ܝܗ̇ ܕܝܼܕܲܥܬܼܵܐ. ܠܵܘ ܕܪܘܼܚ ܐܵܡܲ݁ܪܢܵܐ. ܦܤܵܩܵܐ ܓܹܝܪ
ܕܲܬܼܚܘܼܡܹ̈ܝܗ̇ ܕܝܼܕܲܥܬܼܵܐ ܗܵܢܵܘ: ܕܲܠܒܲܪ ܡ̣ܢ ܥܘܼܩܵܒܼܵܐ ܘܲܒܼܨܵܬܼܵܐ ܕܢܸܥܒܸܕܼ
ܐ̄ܢܵܫ ܚܕܼܵܐ ܡ̣ܢ ܨܒܼܘܼ ܠܵܐ ܫܲܠܝܼܛ ܠܹܗ. ܐܸܠܵܐ ܢܸܗܘܸܐ ܡܥܲܩܸܒܼ:
ܕܐܸܢ ܡܲܨܝܵܐ ܠܡܸܗܘܵܐ: ܗܵܘ̇ ܡܵܐ ܕܢܸܗܡܘܿܣ ܠܘܵܬܹܗ ܐܸܬܼܪܲܥܝܼ.
ܗܲܝܡܵܢܘܼܬܼܵܐ ܕܹܝܢ: ܡܵܢܵܐ؟ ܐܸܡܲܬܼܝ ܗܵܟܹܝܠ ܕܐܹܝܢ ܘܠܵܐ ܫܲܘܝܵܐܝܼܬܼ
ܩܪܸܒܼ ܠܘܵܬܼܵܗ̇: ܕܲܬܼܟܲܬܲܪ ܬܲܡܵܢ ܗܲܝܡܵܢܘܼܬܼܵܐ ܠܵܐ ܡܸܬܿܛܦܝܼܤܵܐ.
ܝܑܼܕܲܥܬܼܵܐ ܡ̇ܢ ܕܠܵܐ ܩܸܦ̈ܠܹܐ ܘܦܘܼܪ̈ܤܹܐ ܕܬܸܬܼܚܲܫܲܚ: ܘܐܵܦܠܵܐ
ܕܐܝܼܬܹܝܗ̇ ܡܸܬܼܝܲܕܼܥܵܐ. ܘܗ̤ܝ ܗܵܕܹܐ ܐܵܬ̤ܵܐ ܐܝܼܬܹܝܗ̇ ܕܲܦܠܝܼܓܼܘܼܬܼܵܗ̇
ܕܥܲܠ ܫܪܵܪܵܐ. ܗܲܝܡܵܢܘܼܬܼܵܐ ܕܹܝܢ: ܚܕܼܵܐ ܬܲܪܥܝܼܬܼܵܐ ܫܦܝܼܬܼܵܐ ܘܲܦܫܝܼܛܬܐ
ܒܵܥ̇ܝܵܐ: ܕܪܲܚܝܼܩܵܐ ܡ̣ܢ ܟ̱ܠܵܗ̇ ܨܢܝܼܥܘܼܬܼܵܐ ܘܲܒܼܥܵܬܵܐ ܕܦܘܼܪ̈ܤܹܐ. ܚܙܝܼ
ܐܲܝܟܲܢ ܤܲܩܘܼ̈ܒܼܠܵܝܵܢ ܠܲܚ̈ܕܼܵܕܹܐ. ܒܲܝܬܵܗ̇ ܕܗܲܝܡܵܢܘܼܬܼܵܐ: ܬܲܪܥܝܼܬܼܵܐ
ܫܒܲܪܬܵܐ: ܘܠܸܒܵܐ ܒܪܝܼܪܵܐ. ܒܲܒܼܪܝܼܪܘܼܬܼܵܐ ܠܲܡ ܕܠܸܒܿܗܘܿܢ:
ܡܫܲܒܿܚܝܼܢ ܗ̄ܘ̣ܵܘ ܠܐܲܠܵܗܵܐ. ܘܐܸܠܵܐ ܠܲܡ ܬܸܬܼܗܲܦܟܿܘܼܢ ܘܬܸܗܘܘܿܢ
ܐܲܝܟܼ ܛܠܵܝܹ̈ܐ: ܘܫܲܪܟܵܐ. ܝܑܼܕܲܥܬܼܵܐ ܕܹܝܢ: ܠܬܲܪ̈ܬܲܝܗܹܝܢ ܗܵܠܹܝܢ
pb. 362
ܪܵܕܼܘܿܦ ܐܝܼܬܹܝܗ̇ ܘܤܲܩܘܼܒܼܠܵܝܵܐ. ܝܑܼܕܲܥܬܼܵܐ: ܬܚܘܿܡܵܘ̈ܗܝ ܕܲܟܼܝܵܢܵܐ
ܢܵܛ̇ܪܵܐ: ܒܟܼܠܗܘܿܢ ܫܒܼܝܼ̈ܠܹܝܗ̇. ܗܲܝܡܵܢܘܼܬܼܵܐ ܓܹܝܪ: ܠܥܸܠ ܡ̣ܢ ܟܝܵܢܵܐ
ܥܵܒܼ̇ܕܵܐ ܡܲܪܕܝܼܬܵܗ̇. ܝܑܼܕܲܥܬܼܵܐ ܠܟܼܠ ܡܸܕܸܡ ܕܫܵܪܘܿܝܵܐ ܗ̄ܘ̣ ܕܲܟܼܝܵܢܵܐ:
ܐܵܦܠܵܐ ܠܲܡܢܲܤܵܝܘܼ ܠܘܵܬܼܵܗ̇ ܫܵܒܼ̇ܩܵܐ: ܐܸܠܵܐ ܠܡܸܫܪܵܐ ܠܗܲܠ ܡܸܢܹܗ
ܒܪܘܼܚܩܵܐ. ܗܲܝܡܵܢܘܼܬܼܵܐ ܕܹܝܢ ܡܫܲܠܛܵܠܝܼܬܼ ܦܵܩ̇ܕܵܐ ܘܐܵܡ̇ܪܵܐ: ܕܥܲܠ
ܓܵܪܤܵܐ ܠܲܡ ܘܥܲܠ ܚܲܪܡܵܢܵܐ ܬܸܕܼܪܘܿܟܼ: ܘܲܬܿܕܼܘܼܫ ܐܲܪܝܵܐ ܘܬܲܢܝܼܢܵܐ.
ܠܝܼܕܼܥܬܼܵܐ: ܕܸܚܠܬܼܵܐ ܢܲܩܝܼܦܵܐ. ܠܗܲܝܡܵܢܘܼܬܼܵܐ ܕܹܝܢ: ܢܘܼܟܼܠܵܢܵܐ. ܟܡܵܐ
ܕܲܒܼܦܘܿܪ̈ܤܹܝܗ̇ ܕܝܼܕܲܥܬܼܵܐ ܪܵܕܹܐ ܒܲܪܢܵܫܵܐ: ܠܵܐ ܡܸܬܼܚܲܪܲܪ ܡ̣ܢ ܕܸܚܠܬܼܵܐ:
ܘܐܵܦܠܵܐ ܠܚܹܐܪܘܼܬܼܵܐ ܕܢܸܫܬܘܸܐ ܡܲܨܝܵܐ. ܡܵܐ ܕܹܝܢ ܕܲܢܩܸܦ̣ ܠܵܗ̇
ܠܗܲܝܡܵܢܘܼܬܼܵܐ: ܡܸܚܕܼܵܐ ܐܲܝܟܼ ܒܲܪ ܚܹܐܪܹ̈ܐ ܘܡܲܠܟܵܐ ܕܢܲܦܫܹܗ: ܘܐܲܝܟܼ
ܒܪܵܐ ܕܐܲܠܵܗܵܐ: ܒܟܼܠܡܸܕܸܡ ܒܚܹܐܪܘܼܬܼܵܐ ܡܸܬܼܚܲܫܲܚ ܡܫܲܠܛܵܐܝܼܬܼ.
ܒܲܪܢܵܫܵܐ ܕܐܸܫܟܲܚ ܩܠܝܼ̈ܕܹܐ ܕܗܲܝܡܵܢܘܼܬܼܵܐ: ܐܲܝܟܼ ܐܲܠܵܗܵܐ ܡܸܬܼܚܲܫܚ
ܒܟܼܠܗܘܿܢ ܟܝܵܢܹ̈ܐ ܕܲܒܼܪܝܼܬܼܵܐ. ܠܗܲܝܡܵܢܘܼܬܼܵܐ ܓܹܝܪ ܫܲܠܝܼܛ ܠܵܗ̇:
ܐܵܦ ܒܪܝܼܬܼܵܐ ܚܕܼܵܬܵܐ ܠܡܸܒܼܪܵܐ: ܒܲܕܼܡܘܼܬܼܵܐ ܕܐܲܠܵܗܵܐ. ܨܒܲܝܬܿ ܠܲܡ:
ܘܟܼܠ ܡܸܕܸܡ ܩܵܡ̣ ܩܕܼܵܡܲܝܟܼ. ܘܲܙܒܼܢ̈ܝܼܢ ܤܲܓܝܼ̈ܐܵܢ: ܡ̣ܢ ܠܵܐ ܡܸܕܸܡ
ܟܠܡܸܕܸܡ ܤܸܦܩܲܬ̤ ܠܡܸܥܒܲܕܼ.
ܝܑܼܕܲܥܬܼܵܐ ܟܹܝܬܼ: ܒܸܠܥܵܕܼ ܡ̣ܢ ܡܠܘܿܐܹ̈ܐ: ܕܬܸܥܒܸܿܕܼ ܡܸܕܸܡ ܠܵܐ
ܡܸܫܟܿܚܵܐ. ܝܑܼܕܲܥܬܼܵܐ ܡܲܢ: ܠܗܵܘ̇ ܡܵܐ ܕܠܵܐ ܐܸܬܼܝܼܗܸܒܼ ܠܲܟܼܝܵܢܵܐ:
ܠܡܸܦܤܲܥ ܥܠܵܘܗܝ ܠܵܐ ܡܲܡܪܚܵܐ. ܕܐܲܝܟܼ ܐܲܝܟܲܢ؟ ܗܵܝ̇ ܓܹܝܪ
ܕܲܟܼܝܵܢܵܐ ܫܲܪܝܵܐ ܕܡܲܝ̈ܵܐ ܠܵܐ ܡܩܲܒܸܠ ܠܥܸܠ ܡ̣ܢ ܚܲܨܹܗ ܕܘܼܪ̈ܟܵܬܼܵܐ
ܒܸܤܪ̈ܵܢܵܝܬܼܵܐ: ܘܕܼܵܐ̇ܠܹܡ ܠܢܘܼܪܵܐ ܡܵܘܩܕܼܵܐ ܠܹܗ: ܘܲܠܡܲܡܪܵܚܘܼ ܥܲܠ
pb. 363
ܗܵܠܹܝܢ ܕܩܹܘܲܢܕܹܝܢܘܿܣ ܐܝܼܬܹܝܗ̇. ܠܗܵܕܹܐ ܝܑܼܕܲܥܬܼܵܐ: ܙܗܝܼܪܵܐܝܼܬܼ
ܢܵܛ̇ܪܵܐ. ܘܲܕܬܸܦܩܘܿܕܼ ܠܡܸܥܒܲܪ ܥܲܠ ܗܵܢܵܐ ܬܚܘܼܡܵܐ: ܠܲܓܼܡܵܪ ܠܵܐ
ܡܸܬܿܛܦܝܼܤܵܐ. ܗܲܝܡܵܢܘܼܬܼܵܐ ܕܹܝܢ ܡܫܲܠܛܵܐܝܼܬܼ ܦܵܩ̇ܕܵܐ ܗܵܕܹܐ ܟܲܕܼ
ܐܵܡ̇ܪܵܐ: ܕܐܸܢ ܠܲܡ ܬܗܲܠܸܟܼ ܥܲܠ ܢܘܼܪܵܐ: ܠܵܐ ܬܵܘܩܵܕܵܟܼ. ܘܢܲܗܪ̈ܵܘܵܬܼܵܐ:
ܠܵܐ ܢܸܓܼܪܦܘܼܢܵܟܼ. ܘܗ̤ܝ ܗܵܕܹܐ ܙܲܒܼܢ̈ܝܼܢ ܤܲܓܝܼ̈ܐܵܢ ܤܸܥܪܲܬ̤ ܗܲܝܡܵܢܘܼܬܼܵܐ:
ܠܥܹܝܢ ܟ̱ܠܵܗ̇ ܒܪܝܼܬܼܵܐ. ܕܐܸܠܘܼ ܠܝܼܕܲܥܬܼܵܐ ܐܸܬܼܝܼܗܸܒܼ ܐܲܬܼܪܵܐ ܬܲܡܵܢ:
ܠܲܓܼܡܵܪ ܠܲܡܢܲܤܵܝܘܼ ܠܘܵܬܼ ܕܐܲܝܟܼ ܗܵܠܹܝܢ: ܠܵܐ ܡܲܦܤܵܐ ܗ̄ܘ̣ܵܬܼ.
ܒܗܲܝܡܵܢܘܼܬܼܵܐ ܓܹܝܪ: ܤܲܓܝܼ̈ܐܹܐ ܠܦܘܼܡܵܗ̇ ܕܫܲܠܗܹܒܼܝܼܬܼܵܐ ܥܲܠܘ:
ܘܚܲܝܠܵܗ̇ ܕܢܘܼܪܵܐ ܝܵܩܹܕܬܵܐ ܦܲܓܸܕܼܘ: ܘܲܕܼܠܵܐ ܢܸܟܼܝܵܢ ܒܓܼܵܘܵܗ̇ ܩܵܘܝܼܘ:
ܘܥܲܠ ܚܲܨܹܗ ܕܝܲܡܵܐ ܐܲܝܟܼ ܕܥܲܠ ܐܲܪܥܵܐ ܝܲܒܿܝܼܫܬܼܵܐ ܗܲܠܸܟܼܘ. ܘܗܵܐ
ܗܵܠܹܝܢ ܟܠܗܹܝܢ ܠܥܸܠ ܡ̣ܢ ܟܝܵܢܵܐ ܐܸܢܹܝܢ: ܘܤܲܩܒܼܘܼܠܵܐ ܠܩܸܦ̈ܠܹܝܗ̇
ܕܝܼܕܲܥܬܼܵܐ. ܚ̣ܙܲܝܬܿ ܠܗܲܝܡܵܢܘܼܬܼܵܐ: ܐܲܝܟܲܢ ܙܲܥܙܥܲܬ̤ ܠܫܲܬܼܐܸܤܹ̈ܝܗ̇
ܕܝܼܕܲܥܬܼܵܐ: ܘܚܵܘܝܲܬ̤ ܤܪ̈ܝܼܩܹܐ ܠܟܼܠܗܘܿܢ ܦܘܼܪ̈ܤܹܝܗ̇ ܘܢܵܡܘܿܤܹ̈ܝܗ̇؟
ܚ̣ܙܲܝܬܿ ܠܝܼܕܲܥܬܼܵܐ: ܐܲܝܟܲܢ ܢܵܛ̇ܪܵܐ ܬܚܘܼܡܵܘ̈ܗܝ ܕܲܟܼܝܵܢܵܐ؟ ܚ̣ܙܲܝܬܿ
ܘܲܠܗܲܝܡܵܢܘܼܬܼܵܐ: ܐܲܝܟܲܢ ܦܵܤ̇ܥܵܠ ܠܥܸܠ ܡ̣̤ܢ ܟܝܵܢܵܐ ܠܡܸܥܒܲܕܼ ܫܒܼܝܼ̈ܠܹܐ
ܕܡܲܪܕܝܼܬܼܵܗ̇؟ ܚܲܡܫܵܐ ܐܲܠܦܹ̈ܐ ܕܲܫܢܲܝ̈ܵܐ ܚܲܤܝܼܪ ܝܲܬܿܝܼܪ: ܦܘܼܪ̈ܤܹܐ
ܕܝܼܕܲܥܬܼܵܐ ܡܕܲܒܿܪܝܼܢ ܗ̄ܘ̣ܵܘ ܠܥܵܠܡܵܐ. ܘܠܲܓܼܡܵܪ ܠܲܡܪܵܡܘܼ ܪܹܫܹܗ
ܡ̣ܢ ܐܲܪܥܵܐ: ܘܲܠܡܲܪܓܵܫܘܼ ܒܚܲܝܠܵܐ ܕܥܵܒܼܘܿܕ݂ܹܗ ܠܵܐ ܐܸܬܼܡܨܝܼ.
ܥܕܲܡܵܐ ܕܕܸܢܚܲܬ̤ ܠܲܢ ܗܲܝܡܵܢܘܼܬܼܵܐ: ܘܚܲܪܲܪܬܲܢ ܡ̣ܢ ܬܥܵܫܵܐ ܕܥܲܡ̈ܠܹܐ
ܕܒܲܐܪ̈ܥܵܢܝܵܬܼܵܐ: ܘܡ̣ܢ ܫܘܼܥܒܵܕܼܵܐ ܤܪܝܼܩܵܐ ܕܒܼܵܬܲܪ ܦܸܗܝܵܐ ܕܡܲܓܵܢ.
ܘܐܵܦ ܗܵܫܵܐ ܬܘܼܒܼ ܕܐܸܫܟܲܚܢܲܢ ܝܲܡܵܐ ܕܠܵܐ ܡܸܬܼܓܫܸܫ ܘܓܲܙܵܐ ܕܠܵܐ
pb. 364
ܡܸܤܬܲܝܲܟ: ܨܹܝܕܼ ܪܨܝܼܢܵܐ ܡܸܤܟܹܢܵܐ ܪܓܼܝܼܓܼܵܐ ܠܲܢ ܠܡܸܫܪܲܟܼ. ܠܲܝܬܿ
ܝܑܼܕܲܥܬܼܵܐ ܕܠܵܐ ܤܢܝܼܩܵܐ: ܘܲܟܼܡܵܐ ܐܸܢ ܗܥܵܬܼܪܵܐ. ܠܗܲܝܡܵܢܘܼܬܼܵܐ ܓܲܙܹܝ̈ܗ̇
ܫܡܲܝܵܐ ܘܐܲܪܥܵܐ: ܠܵܐ ܡܤܲܝܟܼܝܼܢ.
ܠܵܐ ܡܬܼܘܿܡ ܚܲܤܝܼܪ ܠܹܗ ܡܸܕܸܡ: ܠܗܵܘ̇ ܕܲܒܼܬܼܘܼܠܵܢܵܐ
ܕܗܲܝܡܵܢܘܼܬܼܵܐ ܠܸܒܹܗ ܤܡܝܼܟܼ. ܘܟܲܕܼ ܡܸܕܸܡ ܠܲܝܬܿ ܠܹܗ: ܒܗܲܝܡܵܢܘܼܬܼܵܐ
ܟܠܡܸܕܸܡ ܐܲܚܝܼܕܼ. ܐܲܝܟܼ ܕܲܟܼܬܼܝܼܒܼ: ܕܟܼܠܡܸܕܸܡ ܕܬܸܫ̱ܐܠܘܼܢ ܒܲܨܠܘܿܬܼܵܐ
ܘܲܬܼܗܲܝܡܢܘܼܢ: ܬܸܤܒܼܘܼܢ. ܘܬܼܘܼܒܼ: ܡܪܲܢ ܩܲܪܝܼܒܼ ܗ̄ܘ̣. ܕܡܸܕܸܡ:
ܠܵܐ ܬܹܐܨܦܘܼܢ. ܝܑܼܕܲܥܬܼܵܐ ܒܐܲܡܝܼܢܘܼ: ܦܘܼܪ̈ܤܹܐ ܒܵܥ̇ܝܵܐ ܠܢܘܼܛܵܪܵܐ
ܕܩܲܢܵܚܹ̈ܗ̇. ܗܲܝܡܵܢܘܼܬܼܵܐ ܗܵܟܹܝܠ ܡܵܢܵܐ؟ ܐܸܢ ܠܲܡ ܡܲܪܝܵܐ ܠܵܐ ܒܵܢܹ̇ܐ
ܒܲܝܢܵܐ ܘܢܵܛܲܪ ܩܪܝܼܬܼܵܐ: ܤܪܝܼܩܵܐܝܼܬܼ ܥܵܡܹ̇ܠ ܐܲܝܢܵܐ ܕܒܼܵܢܹ̇ܐ ܘܫܵܗܲܪ
ܠܡܸܛܲܪ. ܠܵܐ ܡܸܡܬܼܘܿܡ ܐܲܝܢܵܐ ܕܲܒܼܗܲܝܡܵܢܘܼܬܼܵܐ ܡܸܬܼܓܵܘܲܣ:
ܒܦܘܼܪ̈ܤܹܐ ܡܸܬܼܚܲܫܲܚ. ܝܑܼܕܲܥܬܼܵܐ ܓܹܝܪ ܒܟܼܠܕܼܘܼܟ: ܠܕܸܚ̱ܠܬܼܵܐ
ܡܩܲܠܤܵܐ. ܐܲܝܟܼ ܕܐܵܦ ܚܲܟܝܼܡܵܐ ܐܸܡ݂ܲܪ: ܕܐܲܝܢܵܐ ܠܲܡ ܕܕܵܚܹ̇ܠ
ܠܸܒܹܗ: ܛܘܼܒܼܵܘܗ. ܡܵܢܵܐ ܕܹܝܢ ܗܲܝܡܵܢܘܼܬܼܵܐ؟ ܕܚܸܠ̣ ܠܲܡ: ܘܫܲܪܝܼ
ܠܡܸܛܒܲܥ. ܘܬܼܘܼܒܼ: ܠܵܐ ܠܲܡ ܢܤܲܒܼܬܘܿܢ ܪܘܼܚܵܐ ܕܕܸܚܠܬܼܵܐ
ܠܥܲܒܼܕܘܼܬܼܵܐ: ܐܸܠܵܐ ܪܘܼܚܵܐ ܕܤܝܼܡܲܬܼ ܒܢܲܝ̈ܐ: ܠܚܹܐܪܘܼܬܼܵܐ
ܕܲܒܼܗܲܝܡܵܢܘܼܬܼܵܐ: ܘܬܼܘܼܟܼܠܵܢܵܐ ܕܒܲܐܠܵܗܵܐ. ܘܠܵܐ ܠܲܡ ܬܸܕܼܚܲܠ
ܡܸܢܗܘܿܢ: ܕܕܲܠܡܵܐ ܐܹܬܼܒܿܪܵܟܼ ܩܕܼܵܡܲܝܗܘܿܢ. ܢܲܩܝܼܦܵܐ ܒܟܼܠܙܒܲܢ
ܕܸܚܠܬܼܵܐ ܠܲܦܠܝܼܓܼܘܼܬܼܵܐ: ܘܲܦܠܝܼܓܼܘܼܬܼܵܐ ܠܲܒܼܨܵܬܼܵܐ. ܘܥܘܼܩܵܒܼܵܐ
ܠܦܘܼܪ̈ܤܹܐ: ܘܦܘܼܪ̈ܤܹܐ ܠܝܼܕܲܥܬܼܵܐ. ܘܗ̤ܝ ܗܵܕܹܐ ܕܒܼܵܨܝܵܐ ܘܲܡܥܲܩܒܼܵܐ
ܒܟܼܠܙܒܲܢ: ܦܠܝܼܓܼܘܼܬܼܵܐ ܘܕܸܚܠܬܼܵܐ ܡܫܵܘܕܥܵܐ. ܒܗܵܝ̇ ܕܠܵܘ ܒܟܼܠܙܒܲܢ
ܒܟܼܠܡܸܕܸܡ ܡܲܨܠܚܵܐ ܝܑܼܕܲܥܬܼܵܐ: ܐܲܝܟܼ ܡܵܐ ܕܡ̣ܢ ܠܥܸܠ ܐܸܬܼܚܵܘܝܲܬ̤.
pb. 365
ܙܲܒܼܢ̈ܝܼܢ ܤܲܓܼܝܼ̈ܐܵܢ ܓܸܕܼܫܹ̈ܐ ܥܲܤ̈ܩܹܐ ܘܥܸܠ̈ܠܵܬܼܵܐ ܤܲܓܝܼ̈ܐܵܬܼܵܐ ܡܸܤܬܲܩ̈ܒܿܠܵܢ:
ܕܩܹܘܲܢܕܹܝܢܘܿܣ ܡܲܠ̈ܝܵܢ. ܐܲܝܠܹܝܢ ܕܟܼܠ ܟ̱ܠܹܗ ܝܑܼܕܲܥܬܼܵܐ ܘܦܘܼܪ̈ܤܹܐ
ܕܚܸܟܼܡܬܵܐ ܕܲܢܥܲܕܪܘܼܢ ܬܲܡܵܢ ܡܸܕܸܡ: ܠܵܐ ܡܸܫܟܿܚܝܼܢ. ܗܵܢܹܝܢ
ܕܥܲܤܩܘܼܬܼܗܹܝܢ ܡܵܪܕܵܐ: ܠܟܼܠܹܗ ܚܲܝܠܵܐ ܕܲܬܼܚܘܼ̈ܡܹܐ ܕܝܼܕܲܥܬܼܵܐ
ܐ̄ܢܵܫܵܝܬܵܐ. ܗܲܝܡܵܢܘܼܬܼܵܐ ܓܹܝܪ: ܠܵܐ ܡܸܡܬܼܘܿܢ ܚܵܒܲܬ̤ ܡ̣ܢ ܡܸܕܸܡ. ܡܵܢܵܐ
ܓܹܝܪ ܤܵܦ̇ܩܵܐ ܕܲܬܼܥܲܕܲܪ ܝܑܼܕܲܥܬܼܵܐ ܐ̄ܢܵܫܵܝܬܼܵܐ: ܒܬܲܟܼܬܘܼ̈ܫܹܐ ܓܠܲܝ̈ܵܐ
ܕܠܘܼܩܒܲܠ ܟܝܵܢܹ̈ܐ ܠܵܐ ܡܸܬܼܚܲܙ̈ܝܵܢܹܐ: ܘܚܲܝ̈ܠܹܐ ܠܵܐ ܡܓܲܫܡܹ̈ܐ: ܥܲܡ
ܐ̄ܚܪ̈ܵܝܬܼܵܐ ܤܲܓܝܼ̈ܐܵܬܼܵܐ؟
ܚ̣ܙܲܝܬܿ ܡܚܝܼܠܘܼܬܼ ܚܲܝܠܵܗ̇ ܕܝܼܕܲܥܬܼܵܐ: ܘܬܼܘܼܩܦܵܐ ܕܚܲܝܠܵܗ̇
ܕܗܲܝܡܵܢܘܼܬܼܵܐ. ܝܑܼܕܲܥܬܼܵܐ: ܠܟܼܠ ܕܢܵܟܼܘܿܝܵܐ ܗ̄ܘ̣ ܕܲܟܼܝܵܢܵܐ: ܠܡܸܬܼܩܲܪܵܒܼܘܼ
ܠܘܵܬܹܗ ܚܵܤ̇ܟܵܐ ܠܬܲܠܡܝܼ̈ܕܹܝܗ̇. ܚܙܝܼ ܓܹܝܪ ܗܵܪܟܵܐ ܠܚܲܝܠܵܗ̇
ܕܗܲܝܡܵܢܘܼܬܼܵܐ: ܡܵܢܵܐ ܦܵܩ̇ܕܵܐ ܠܲܒܼ̈ܢܹܝܗ̇ ܒܫܹܡܝ ܠܲܡ: ܫܹ̈ܐܕܹܐ
ܢܲܦܩܘܼܢ: ܘܲܚ̈ܘܵܘܵܬܼܵܐ ܢܸܫܩܠܘܼܢ. ܘܐܸܢ ܤܲܡܵܐ ܕܡܵܘܬܵܐ ܢܸܫܬܘܿܢ:
ܠܵܐ ܢܲܗܲܪ ܐܸܢܘܿܢ. ܝܑܼܕܲܥܬܼܵܐ ܠܟܼܠ ܕܒܼܐܘܼܪܚܵܗ̇ ܪܵܕܹܝܢ: ܗܵܕܹܐ ܦܵܩܕܵܐ
ܐܲܝܟܼ ܢܵܡܘܿܤܹ̈ܝܗ̇: ܕܡ̣ܢ ܫܘܼܪܵܝܵܐ ܠܟܼܠܡܸܕܸܡ ܥܲܠ ܚܲܪܬܹܗ ܢܥܲܩܒܼܘܼܢ:
ܘܗܵܝܕܹܝܢ ܢܫܲܪܘܿܢ. ܕܕܲܠܡܵܐ ܟܹܝܬܼ ܡܵܪܕܵܐ ܚܲܪܬܹܗ ܕܤܘܼܥܪܵܢܵܐ
ܠܲܬܼܚܘܼ̈ܡܹܐ ܕܚܲܝܠܵܐ ܐ̄ܢܵܫܵܝܵܐ: ܘܲܬܼܥܵܫܹ̈ܐ ܕܡܲܓܵܢ ܤܵܒܼ̇ܠܝܼܢ: ܟܲܕܼ
ܡܸܫܬܲܟܼܚܵܐ ܠܗܘܿܢ ܠܵܐ ܡܸܬܼܡܲܨܝܵܢܝܼܬܼܵܐ ܘܥܲܤܩܲܬܼ ܠܲܗܘܵܝܵܐ.
ܗܲܝܡܵܢܘܼܬܼܵܐ ܕܹܝܢ: ܡܵܢܵܐ ܐܵܡ̇ܪܵܐ؟ ܟܠܡܸܕܸܡ ܠܲܡ ܡܸܫܟܿܚܵܐ ܠܡܸܗܘܵܐ
ܠܗܵܘ̇ ܕܲܡܗܲܝܡܸܢ: ܡܸܛܠ ܕܠܵܐ ܥܛܸܠ ܠܐܲܠܵܗܵܐ ܡܸܕܸܡ. ܐܹܝܘ
ܥܘܼܬܼܪܵܐ ܠܵܐ ܡܸܬܼܡܲܠܠܵܢܵܐ: ܘܝܲܡܵܐ ܥܲܬܝܼܪ ܒܓܲܠܠܵܘ̈ܗܝ ܘܲܒܼܤܝܼ̈ܡܵܬܹܗ
pb. 366
ܬܡܝܼ̈ܗܵܬܼܵܐ: ܘܫܸܦ̈ܥܹܐ ܕܚܲܝܠܵܗ̇ ܕܗܲܝܡܵܢܘܼܬܼܵܐ! ܕܲܟܼܡܵܐ ܡܲܠܝܵܐ
ܠܘܼܒܵܒܼܵܐ: ܘܲܟܼܡܵܐ ܗܲܢܝܼܐܵܐ ܘܡܲܠܝܵܐ ܬܘܼܟܼܠܵܢܵܐ ܡܲܪܕܝܼܬܼܵܐ ܕܥܲܡܵܗ̇!
ܘܡܵܘܒ̈ܠܹܝܗ̇: ܟܡܵܐ ܦܫܝܼ̈ܩܵܢ! ܘܦܘܼܠܚܵܢܵܗ̇: ܟܡܵܐ ܗܲܢܝܼ! ܐܲܝܢܵܐ
ܕܐܸܫܬܘܝܼ ܠܲܛܥܵܡܬܼܵܐ ܕܗܲܝܡܵܢܘܼܬܼܵܐ: ܘܬܼܘܼܒܼ ܦܢ̣ܵܐ ܥܲܠ ܝܑܼܕܲܥܬܼܵܐ
ܕܢܲܦܫܵܐ: ܠܵܐ ܦܪܝܼܫܵܐ ܨܒܼܘܼܬܹܗ ܡ̣ܢ ܐܲܝܢܵܐ ܕܐܸܫܟܲܚ ܡܲܪܓܵܢܝܼܬܼܵܐ
ܤܲܓܝܼܐܲܬܼ ܕܡܲܝ̈ܵܐ: ܘܚܲܠܦܵܗ̇ ܒܦܘܼܠܤܵܐ ܕܲܢܚܵܫܵܐ. ܕܐܲܪܦܝܼ ܠܚܹܐܪܘܼܬܼܵܐ
ܡܫܲܠܲܛܬܼܵܐ: ܘܐܸܬܼܦܢܝܼ ܥܲܠ ܦܘܼܪ̈ܤܹܐ ܕܡܸܤܟܹܢܘܼܬܼܵܐ: ܕܲܡܠܹܝܢ
ܕܚܸܠܬܼܵܐ ܕܥܲܒܼܕܘܼܬܼܵܐ:
ܠܵܐ ܗ̄ܘ̣ܵܐ ܝܑܼܕܲܥܬܼܵܐ ܡܲܤܠܝܵܐ: ܐܸܠܵܐ ܗܲܝܡܵܢܘܼܬܼܵܐ ܡܥܲܠܝܵܐ ܡܸܢܵܗ̇.
ܘܐܸܢ ܡܲܤܠܹܝܢܲܢ: ܠܵܐ ܗ̄ܘ̣ܵܐ ܠܵܗ̇ ܠܝܼܕܲܥܬܼܵܐ ܡܲܤܠܹܝܢܲܢ: ܚܵܣ! ܐܸܠܵܐ
ܠܦܘܼܪ̈ܫܵܢܹܐ ܕܲܡܫܲܚܠܦܘܼܬܼ ܛܲܟܼܤܹ̈ܐ ܕܲܒܼܗܘܿܢ ܪܵܕܹܝܵܐ: ܠܘܼܩܒܲܠ
ܫܒܼܝܼܚܘܼܬܼܵܐ ܕܲܟܼܝܵܢܵܐ: ܘܲܠܬܼܓܼܡܵܐ ܕܫܹ̈ܐܕܹܐ ܡܸܬܼܚܲܝܢܵܐ. ܐܲܝܠܹܝܢ ܕܒܼܵܬܲܪܟܸܢ
ܡܦܲܪܫܝܼܢܲܢ ܠܗܘܿܢ ܢܲܗܝܼܪܵܐܝܼܬܼ: ܘܕܲܟܼܡܵܐ ܕܲܪ̈ܓܹܐ ܐܝܼܬܼ ܕܲܒܼܗܘܿܢ
ܪܵܕܹܝܵܐ ܝܑܼܕܲܥܬܼܵܐ: ܘܐܲܝܠܹܝܢ ܦܘܼܪ̈ܫܵܢܹܐ ܐܝܼܬܼ ܒܟܼܠܚܲܕܼ ܡܸܢܗܘܿܢ.
ܘܒܲܐܝܠܹܝܢ ܙܵܘ̈ܥܹܐ ܢܵܒܼ̇ܗܵܐ ܒܟܼܠܚܲܕܼ ܡ̣ܢ ܛܲܟܼܤܹ̈ܐ: ܡܵܐ ܕܲܒܼܗܘܿܢ
ܡܩܵܘܝܵܐ. ܘܲܕܼܒܲܐܝܢܵܐ ܡ̣ܢ ܗܵܠܹܝܢ ܛܲܟܼܤܹ̈ܐ: ܟܲܕܼ ܪܵܕܹܝܵܐ ܒܹܗ: ܗܵܘ̇ܝܵܐ
ܤܲܩܘܼܒܼܠܵܐ ܠܗܲܝܡܵܢܘܼܬܼܵܐ: ܘܢܵܦ̇ܩܵܐ ܠܒܲܪ ܡ̣ܢ ܟܝܵܢܵܐ. ܘܐܲܝܠܹܝܢ
ܐܸܢܘܿܢ ܦܘܼܪ̈ܫܵܢܹܐ ܕܦܘܼܠܚܵܢܵܐ ܕܒܹܗ. ܘܠܲܐܝܢܵܐ ܛܲܟܼܤܵܐ: ܟܲܕܼ
ܬܲܗܦܟܼܝܼܘܗܝ ܠܢܝܼܫܵܗ̇ ܩܲܕܼܡܵܝܵܐ: ܐܵܬܼ̇ܝܵܐ ܠܲܟܼܝܵܢܵܝܘܼܬܼܵܗ̇: ܘܡܲܬܼܩܢܵܐ
ܕܲܪ̈ܓܹܐ ܩܕܼܵܡ ܗܲܝܡܵܢܘܼܬܼܵܐ ܒܕܼܘܼܒܵܪܹ̈ܝܗ̇ ܫܲܦܝܼܪܹ̈ܐ. ܘܲܥܕܲܡܵܐ ܠܐܲܝܟܵܐ
ܡܡܲܢܥܝܼܢ ܠܵܗ̇ ܦܘܼܪ̈ܫܵܢܹܐ ܕܛܲܟܼܤܵܐ ܗܵܢܵܐ. ܘܕܲܐܝܟܲܢ ܬܸܥܒܲܪ ܡ̣ܢ
pb. 367
ܗܵܢܵܐ: ܠܗܵܘ̇ ܕܲܡܥܲܠܲܝ ܡܸܢܹܗ. ܘܡܵܢܵܐ ܐܸܢܘܿܢ ܙܢܲܝ̈ ܦܘܼܠܚܵܢܵܐ
ܕܛܲܟܼܤܵܐ ܗܵܘ̇ ܐ̄ܚܪܵܝܵܐ: ܕܐܲܝܟܼ ܕܒܼܐܝܼܩܵܪܵܐ ܗ̤ܘܝܘܼ ܩܲܕܼܡܵܝܵܐ.
ܘܕܸܐܡܲܬܼܝ ܡܸܬܼܚܲܝܕܼܵܐ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ: ܘܗܵܘ̇ܝܵܐ ܥܲܡܵܗ̇ ܚܕܼܵܐ:
ܘܠܵܒܼ̇ܫܵܐ ܡܸܢܵܗ̇ ܙܵܘ̈ܥܹܐ ܢܘܼܪ̈ܵܢܹܐ ܘܡܸܫܬܲܓܼܪܵܐ ܒܪܘܼܚܵܐ: ܘܩܵܢ̇ܝܵܐ
ܐܸܒܼܪܹ̈ܐ ܕܠܵܐ ܚܵܫܘܿܫܘܼܬܼܵܐ: ܘܡܸܬܼܥܲܠܝܵܐ ܡ̣ܢ ܬܸܫܡܸܫܬܼܵܐ ܕܐܲܪ̈ܥܵܢܵܝܵܬܵܐ
ܠܐܲܬܼܪܵܐ ܕܥܲܒܼܘܿܕܼܵܗ̇: ܥܲܡ ܢܝܼ̈ܫܹܐ ܐ̄ܚܪ̈ܵܢܹܐ. ܕܒܲܕܓܼܘܿܢ ܙܵܕܹܩ ܠܲܢ
ܠܡܸܕܲܥ: ܕܗܲܝܡܵܢܘܼܬܼܵܐ ܡܥܲܠܲܝ ܗ̄ܘ̣ ܕܲܪܓܼܵܐ ܕܦܘܼܠܚܵܢܵܗ̇ ܡ̣ܢ
ܕܝܼܕܲܥܬܼܵܐ. ܐܵܦ ܗ̤ܝ ܝܑܼܕܲܥܬܼܵܐ: ܒܗܲܝܡܵܢܘܼܬܼܵܐ ܡܸܬܼܓܲܡܪܵܐ. ܘܩܵܢ̇ܝܵܐ
ܚܲܝܠܵܐ ܠܡܸܤܲܩ ܠܥܸܠ: ܘܲܠܡܲܪܓܵܫܘܼ ܒܗܵܘ̇ ܕܲܡܥܲܠܲܝ ܡ̣ܢ ܟ̱ܠܵܗ̇
ܡܲܪܓܫܵܢܘܼܬܼܵܐ: ܘܲܠܡܸܚܙܵܐ ܨܸܡܚܹܗ ܕܗܵܘ̇ ܕܠܵܐ ܡܸܬܿܕܪܸܟܼ: ܡ̣ܢ
ܗܵܘܢܵܐ ܘܝܼܕܲܥܬܼܵܐ ܕܲܥܒܼܝܼ̈ܕܹܐ.
ܝܼܕܲܥܬܼܵܐ ܗܵܟܹܝܠ: ܕܲܪܓܼܵܐ ܗ̣̄ܝ ܕܒܼܵܗ̇ ܤܵܠܹ̇ܩ ܐ̄ܢܵܫ ܠܪܵܘܡܵܐ
ܕܗܲܝܡܵܢܘܼܬܼܵܐ. ܕܟܲܕܼ ܡܲܛܝܼ ܠܘܵܬܼܵܗ̇: ܠܵܐ ܬܘܼܒܼ ܚܵܫ̇ܚܵܐ ܗܵܕܹܐ.
ܗܵܫܵܐ ܠܲܡ ܩܲܠܝܼܠ ܗ̄ܘ̣ ܡ̣ܢ ܤܲܓܝܼ ܝܵܕܼܥ̇ܝܼܢܲܢ: ܘܩܲܠܝܼܠ ܗ̄ܘ̣ ܡ̣ܢ
ܤܲܓܝܼ ܡܸܤܬܲܟܿܠܝܼܢܲܢ. ܡܵܐ ܕܹܝܢ ܕܐܸܬܲܬ̤ ܓܡܝܼܪܘܼܬܼܵܐ: ܒܸܛܠܲܬ̤ ܠܵܗ̇
ܘܐܵܦ ܗܵܝ̇ ܕܩܲܠܝܼܠ. ܗܲܝܡܵܢܘܼܬܼܵܐ ܗܵܟܹܝܠ: ܐܲܝܟܼ ܕܲܒܼܥܲܝ̈ܢܹܐ ܡܚܵܘ̇ܝܵܐ
ܠܲܢ: ܫܪܵܪܵܗ̇ ܕܗܵܝ̇ ܓܡܝܼܪܘܼܬܼܵܐ ܕܲܥܬܼܝܼܕܼܵܐ. ܒܗܲܝܡܵܢܘܼܬܼܵܐ ܡܵܕܹܝܢ
ܝܵܠܦ̇ܝܼܢܲܢ ܥܲܠ ܗܵܝ̇ ܠܵܐ ܡܸܬܿܕܲܪܟܵܢܘܼܬܼܵܐ: ܘܠܵܐ ܗ̄ܘ̣ܵܐ ܒܥܘܼܩܵܒܼܵܐ
ܘܚܲܝܠܵܐ ܕܝܼܕܲܥܬܼܵܐ. ܟܠܗܘܿܢ ܥ̇ܒܼܵܕܹ̈ܐ ܕܙܲܝܼܩܘܼܬܼܵܐ: ܨܵܘܡܵܐ: ܙܸܕܼܩܬܼܵܐ:
ܫܲܗܪܵܐ: ܩܲܕܝܼܫܘܼܬܼܵܐ: ܥܲܡ ܫܲܪܟܵܐ ܐܲܝܠܹܝܢ ܕܲܒܼܦܲܓܼܪܵܐ ܡܸܬܼܦܲܠ̈ܚܵܢ:
ܘܚܘܼܒܵܐ ܕܲܠܘܵܬܼ ܩܲܪܝܼܒܼܵܐ: ܡܘܼܟܵܟܼܵܐ ܕܠܸܒܵܐ: ܫܘܼܒܼܩܵܢܵܐ ܕܤܲܟܼ̈ܠܘܵܬܼܵܐ:
ܘܗܸܪܓܵܐ ܕܫܲܦܝܼܪ̈ܵܬܼܵܐ: ܥܘܼܩܵܒܼܵܐ ܕܐ̄ܪ̈ܵܙܹܐ ܕܒܲܟܼܬܼܵܒܹ̈ܐ ܩܲܕܝܼ̈ܫܹܐ
pb. 368
ܡܚܲܦܹܝܢ: ܘܥܸܢܝܵܢܵܐ ܕܡܲܕܥܵܐ ܒܥܲܡ̈ܠܹܐ ܕܛܵܒܼ̈ܬܼܵܐ: ܘܲܠܡܸܛܲܪ ܬܚܘܼ̈ܡܹܐ
ܕܚܲܫܲܝ̈ ܢܲܦܫܵܐ: ܘܫܲܪܟܵܐ ܕܲܡܝܲܬܿܪ̈ܵܬܼܵܐ ܐܲܝܠܹܝܢ ܕܲܒܼܢܲܦܫܵܐ ܡܸܬܼܓܲܡܪܵܢ:
ܗܵܠܹܝܢ ܟܠܗܹܝܢ ܥܲܠ ܝܑܼܕܲܥܬܼܵܐ ܤܢܝܼ̈ܩܵܢ: ܘܗ̤ܝ ܐܝܼܬܹܝܗ̇ ܡܛܲܪܤܵܢܝܼܬܼܗܹܝܢ.
ܘܟܼܠܗܘܿܢ ܗܵܠܹܝܢ ܥܕܲܟܹܝܠ ܕܪ̈ܓܹܐ ܐܸܢܘܿܢ: ܕܲܒܼܗܘܿܢ ܤܵܠ̇ܩܵܐ ܢܲܦܫܵܐ
ܠܪܵܘܡܵܐ ܡܥܲܠܝܵܐ ܕܗܲܝܡܵܢܘܼܬܼܵܐ: ܘܲܡܝܲܬܿܪ̈ܵܬܼܵܐ ܡܸܬܼܩܲܪ̈ܝܵܢ. ܕܘܼܒܵܪܵܐ
ܕܹܝܬ ܕܗܲܝܡܵܢܘܼܬܼܵܐ: ܘܐܵܦ ܠܥܸܠ ܡ̣ܢ ܡܝܲܬܪܘܼܬܼܵܐ ܗ̄ܘ̣ ܦܘܼܠܚܵܢܹܗ.
ܠܵܐ ܗ̄ܘ̣ܵܐ ܕܥܲܡܠܵܐ ܗ̄ܘ̣: ܐܸܠܵܐ ܕܲܢܝܵܚܵܐ ܡܫܲܠܡܵܢܵܐ. ܘܒܼܘܼܝܵܐܵܐ:
ܘܡܲܡܠܸܐ ܒܠܸܒܵܐ. ܘܲܒܼܙܵܘ̈ܥܹܐ ܕܢܲܦܫܵܐ ܡܸܬܼܓܲܡܪܵܐ. ܟܠܗܘܿܢ
ܟܲܟܼܤܹ̈ܐ ܬܗܝܼܪܹ̈ܐ ܕܕܼܘܼܒܵܪܵܐ ܪܘܼܚܵܢܵܝܵܐ: ܕܐܝܼܬܼܵܘܗܝ ܦܘܼܠܚܵܢܹܗ
ܡܲܪܓܫܵܢܘܼܬܼܵܐ ܕܲܒܼܚܲܝ̈ܠܹܐ ܪ̈ܘܼܚܵܢܹܐ: ܘܒܼܘܼܤܵܡܵܐ ܘܲܪܘܵܙܵܐ ܕܢܲܦܫܵܐ:
ܘܚܘܼܒܵܐ ܘܚܲܕܼܘܼܬܼܵܐ ܕܒܲܐܠܵܗܵܐ: ܘܫܲܪܟܵܐ ܕܟܼܠܡܸܕܸܡ ܕܡܸܫܬܲܟܲܢ
ܒܗܵܘ̇ ܕܘܼܒܵܪܵܐ: ܠܢܲܦܫܵܐ ܕܲܫܘܵܬ̤ ܒܛܲܝܒܿܘܼܬܼܵܐ ܠܗܵܝ̇ ܛܘܼܒܼܬܼܵܢܘܼܬܼܵܐ:
ܐܲܝܟܼ ܪܸ̈ܡܙܿܐ ܕܲܛܥܝܼܢܝܼܢ ܟܬܼܵܒܹ̈ܐ ܩܲܕܝܼ̈ܫܹܐ: ܒܗܲܝܡܵܢܘܼܬܼܵܐ ܡܸܬܼܚܲܡܪܵܢ
ܡܸܟܵܐ ܠܘܵܬܼܵܗ̇ ܡ̣ܢ ܐܲܠܵܗܵܐ ܥܲܬܝܼܪ ܒܡܵܘ̈ܗܒܼܵܬܹܗ.
ܐܸܠܵܐ ܐܵܡܲ݁ܪ ܐ̄ܢܵܫ: ܕܐܸܢ ܗܵܢܹܝܢ ܟܠܗܹܝܢ ܛܵܒܼ̈ܬܼܵܐ ܘܲܥ̇ܒܼܵܕܹ̈ܐ
ܕܲܡܝܲܬܿܪܘܼܬܼܵܐ ܕܡ̣ܢ ܠܥܸܠ ܐܸܬܼܐܡܲܪܘ: ܘܐܵܦ ܚܤܝܼܟܼܘܼܬܼܵܐ ܕܡ̣ܢ
ܒܝܼ̈ܫܵܬܼܵܐ: ܘܲܠܡܸܦܪܲܫ ܙܵܘ̈ܥܹܐ ܩܲܛܝܼ̈ܢܹܐ ܕܒܼܢܲܦܫܵܐ ܢܵܒܼܗ̇ܝܼܢ: ܘܬܲܟܼܬܘܼܫܵܐ
ܕܥܲܡ ܚܘܼ̈ܫܵܒܹܐ: ܘܐܵܓܼܘܿܢܵܐ ܕܠܘܼܩܒܲܠ ܚܲܫܹ̈ܐ ܡܓܲܪ̈ܓܼܵܢܹܐ: ܘܫܲܪܟܵܐ:
ܕܒܸܠܥܵܕܲܝܗܹܝܢ ܐܵܦ ܠܵܐ ܗ̤ܝ ܗܲܝܡܵܢܘܼܬܼܵܐ ܡܲܨܝܵܐ ܠܲܡܚܵܘܵܝܘܼ ܚܲܝܠܵܗ̇
ܒܡܲܥܒܿܕܼܵܢܘܼܬܼܵܗ̇ ܕܢܲܦܫܵܐ: ܗܵܠܹܝܢ ܟܠܗܹܝܢ ܝܑܼܕܲܥܬܼܵܐ ܗ̣̄ܝ ܓܵܡܘܿܪܬܗܹܝܢ:
ܐܲܝܟܲܢ ܡܵܕܹܝܢ ܡܸܬܼܪܲܢܝܵܐ: ܕܤܲܩܘܼܒܼܠܵܝܵܐ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ؟
pb. 369
ܫܪܵܝܵܐ ܕܦܘܼܫܵܟܼܵܐ. ܬܠܵܬܼܵܐ ܐܸܢܘܿܢ ܛܲܟܼܤܹ̈ܐ: ܕܡܸܬܼܝܲܕܼܥܵܢܵܐܝܼܬܼ
ܒܗܘܿܢ ܤܵܠ̇ܩܵܐ ܘܢܵܚ̇ܬܼܵܐ ܝܑܼܕܲܥܬܼܵܐ. ܕܲܠܦܘܼܬܼ ܫܘܼ̈ܚܠܵܦܹܐ ܕܐܲܬܼܪ̈ܵܘܵܬܼܵܐ
ܕܲܒܼܗܘܿܢ ܪܵܕܹܝܵܐ: ܗܵܟܲܢܵܐ ܡܩܲܒܿܠܵܐ ܫܘܼܚܠܵܦܵܐ: ܐܵܦ ܡܤܲܓܦܵܐ ܐܵܘ
ܡܥܲܕܼܪܵܐ. ܐܵܡܲ݁ܪܢܵܐ ܕܹܝܢ ܬܠܵܬܼܵܐ ܛܲܟܼܤ̈ܝܼܢ: ܦܲܓܼܪܵܐ: ܢܲܦܫܵܐ: ܪܘܼܚܵܐ.
ܘܟܲܕܼ ܚܕܼܵܐ ܗ̣̄ܝ ܝܑܼܕܲܥܬܼܵܐ ܒܲܟܼܝܵܗ̇: ܠܦܘܼܬܼ ܗܘܵܝܵܗ̇ ܕܲܒܼܗܵܠܹܝܢ
ܐܲܬܼܪ̈ܵܘܵܬܼܵܐ ܡܸܬܼܝܲܕ̈ܥܵܢܹܐ ܡܸܬܼܓܲܫܡܵܐ ܘܡܸܬܼܩܲܢܵܐ. ܘܲܡܫܲܚܠܦܵܐ ܐܵܦ
ܐܼܲܤܵܢܹ̈ܝܗ̇: ܐܵܦ ܡܲܥܒܿܕܼܵܢܘܼܬܼܵܐ ܕܙܵܘ̈ܥܹܝܗ̇. ܫܡܲܥ ܡܵܕܹܝܢ ܛܲܟܼܤܹ̈ܐ
ܕܦܘܼܠܚܵܢܵܗ̇: ܘܥܸܠ̈ܠܵܬܼܵܐ ܕܡܸܛܠܵܬܼܗܹܝܢ ܡܤܲܓܦܵܐ ܐܵܘ ܡܥܲܕܼܪܵܐ.
ܝܑܼܕܲܥܬܼܵܐ ܗܵܟܹܝܠ: ܡܵܘܗܲܒܼܬܼܵܐ ܗ̣̄ܝ ܕܡ̣ܢ ܐܲܠܵܗܵܐ ܠܲܟܼܝܵܢܵܐ ܕܲܡܠܝܼ̈ܠܹܐ
ܡ̣ܢ ܫܘܼܪܵܝ ܗܘܵܝܗܘܿܢ ܐܸܬܼܝܲܗܒܲܬ̤. ܘܲܦܫܝܼܛܬܵܐ ܗ̣̄ܝ ܘܠܵܐ
ܡܸܬܼܦܲܠܓܼܵܢܝܼܬܼܵܐ ܒܲܟܼܝܵܢܵܗ̇: ܐܲܝܟܼ ܢܘܼܗܪܹܗ ܕܫܸܡܫܵܐ. ܩܵܢ̇ܝܵܐ ܕܹܝܢ
ܫܘܼ̈ܚܠܵܦܹܐ ܘܦܘܼ̈ܠܵܓܹܐ: ܠܦܘܼܬܼ ܦܘܼܠܚܵܢܵܗ̇.
ܟܲܟܼܤܵܐ ܩܲܕܼܡܵܝܵܐ ܕܝܼܕܲܥܬܼܵܐ. ܐܸܡܲܬܼܝ ܕܲܠܪܸܚܡܬܼܵܐ ܕܦܲܓܼܪܵܐ ܢܵܩ̇ܦܵܐ
ܗ̤ܝ ܝܑܼܕܲܥܬܼܵܐ: ܗܵܠܹܝܢ ܐܲܤܵܢܹ̈ܐ ܟܵܢ̇ܫܵܐ: ܕܐܝܼܬܲܝܗܘܿܢ: ܥܘܼܬܼܪܵܐ: ܫܒܼܚܵܐ
ܤܪܝܼܩܵܐ: ܐܝܼܩܵܪܵܐ: ܤܸܩ̈ܠܹܐ: ܢܝܵܚܹ̈ܐ ܕܦܲܓܼܪܵܐ: ܦܘܼܪ̈ܤܹܐ ܠܢܘܼܛܵܪܹܗ
ܡ̣ܢ ܐܲܝܠܹܝܢ ܕܤܲܩܘܼܒܼܠܵܐ ܐܸܢܹܝܢ ܕܲܟܼܝܵܢܵܐ ܕܦܲܚܼܪܵܐ: ܚܘܼܦܵܛܵܐ ܕܚܸܟܼܡܬܼܵܐ
ܕܲܡܠܝܼܠܘܼܬܼܵܐ ܕܚܵܫ̇ܚܵܐ ܠܲܡܕܲܒܿܪܵܢܘܼܬܼܵܐ ܕܥܵܠܡܵܐ ܗܵܢܵܐ: ܘܲܠܡܸܗܘܵܐ
ܡܲܒܿܥܵܢܵܐ ܕܚܲܕܿܬܼܘܼܬܼ ܫܟܼܵܚ̈ܬܼܵܐ ܕܐܘܼܡܵܢ̈ܘܵܬܼܵܐ ܘܝܘܼ̈ܠܦܵܢܹܐ: ܘܫܲܪܟܵܐ
ܐܲܝܠܹܝܢ ܕܲܠܦܲܓܼܪܵܐ ܡܟܲܠ̈ܠܵܢ ܒܥܵܠܡܹܗ ܗܵܢܵܐ ܡܸܬܼܚܲܙܝܵܢܵܐ. ܡ̣ܢ
ܕܝܼ̈ܠܵܝܵܬܼܵܐ ܕܗܵܕܹܐ ܝܑܼܕܲܥܬܼܵܐ ܐܝܼܬܲܝܗܹܝܢ: ܗܵܢܹܝܢ ܕܡ̣ܢ ܠܥܸܠ ܠܘܼܩܒܲܠ
ܗܲܝܡܵܢܘܼܬܼܵܐ ܤܕܼܝܼܪ̈ܵܢ. ܗܵܕܹܐ ܕܐܵܦ ܝܑܼܕܲܥܬܼܵܐ ܫܚܝܼܡܬܼܵܐ ܡܸܬܼܩܲܪܝܵܐ:
ܡܸܛܠ ܕܲܡܫܲܠܚܵܐ ܡ̣ܢ ܟ̱ܠܹܗ ܪܸܢܝܵܐ ܐܲܠܵܗܵܝܵܐ. ܘܲܡܚܝܼܠܘܼܬܼܵܐ ܕܠܵܐ
pb. 370
ܡܸܬܼܡܲܠܠܵܐ ܡܲܥܠܵܐ ܥܲܠ ܡܲܕܥܵܐ: ܡܸܛܠ ܐܲܚܝܼܕܼܘܼܬܼܵܗ̇ ܕܲܒܼܦܲܓܼܪܵܐ:
ܘܟܼܠܵܢܵܝܘܼܬܼ ܡܲܪܢܝܼܬܼܵܗ̇ ܕܲܒܼܗܵܢܵܐ ܥܵܠܡܵܐ. ܗܵܕܹܐ ܗܵܟܹܝܠ ܡܫܘܼܚܬܼܵܐ
ܕܝܼܕܲܥܬܼܵܐ: ܕܐܝܼܬܼ ܟܠ ܟ̱ܠܹܗ ܚܲܝܠܵܐ ܡܸܬܼܝܲܓܼܥܵܢܵܐ ܘܲܡܕܲܒܪܵܢܵܐ ܟܲܤܝܵܐ
ܠܘܵܬܼ ܒܲܪܢܵܫܵܐ: ܐܵܘ ܒܛܝܼܠܘܼܬܼܵܐ ܐܲܠܵܗܵܝܬܼܵܐ ܕܝܵܨ̇ܦܵܐ ܕܝܼܠܹܗ: ܠܲܓܼܡܵܪ
ܠܵܐ ܪܵܢܝܵܐ. ܐܸܠܵܐ ܟ̱ܠܵܗ̇ ܛܵܒܼܬܼܵܐ ܕܗܵܘܝܵܐ ܨܹܝܕܼ ܒܲܪܢܵܫܵܐ: ܘܫܘܼܘܙܵܒܹܗ
ܕܡ̣ܢ ܢܸܟܼܝܵܢܹ̈ܐ: ܘܲܢܛܝܼܪܘܼܬܹܗ ܕܡ̣ܢ ܓܸܕܼܫܹ̈ܐ ܥܲܤܩܹ̈ܐ: ܘܡ̣ܢ
ܤܲܩܘܼ̈ܒܼܠܹܗ ܤܲܓܝܼ̈ܐܹܐ ܕܢܲܩܦܝܼܢ ܠܲܟܼܝܵܢܲܢ ܒܓܸܠܝܵܐ ܘܲܒܼܟܸܤܝܵܐ: ܒܝܲܕܼ
ܚܦܝܼܛܘܼܬܼܵܗ̇ ܘܦܘܼܪ̈ܤܹܐ ܕܝܼܠܵܗ̇ ܪܵܢܝܵܐ ܕܐܝܼܬܲܝܗܹܝܢ. ܗܵܕܹܐ ܡܫܘܼܚܬܼܵܐ
ܕܝܼܕܼܥܬܼܵܐ ܗ̣̄ܝ ܕܪܵܢܝܵܐ ܗܵܝ̇ ܕܐܲܡܝܼܪܵܐ: ܕܐܵܡ̇ܪܝܼܢ ܕܠܲܝܬܿ ܠܲܡ
ܡܕܲܒܿܪܵܢܘܼܬܼܵܐ ܒܗܵܠܹܝܢ ܕܡܸܬܼܚܲܙ̈ܝܵܢ. ܘܒܲܕܼܓܼܘܿܢ: ܕܲܬܼܦܘܼܫ ܡ̣ܢ
ܐܲܡܝܼܢܘܼܬܼ ܡܲܪܢܝܼܬܼܵܐ: ܘܕܸܚܠܬܼܵܐ ܕܲܚܠܵܦ ܗܵܠܹܝܢ ܕܦܲܓܼܪܵܐ: ܠܵܐ
ܡܸܫܟܚܵܐ. ܘܡܸܛܠܗܵܢܵܐ: ܙܥܘܿܪܘܼܬܼ ܢܲܦܫܵܐ: ܟܲܪܝܘܼܬܼܵܐ: ܦܤܵܩ
ܤܲܒܼܪܵܐ: ܕܸܚܠܬܼܵܐ ܕܫܹ̈ܐܕܹܐ: ܩܸܢܛܵܐ ܕܡ̣ܢ ܒܢܲܝ̈ܢܵܫܵܐ: ܛܸܒܹ̈ܐ ܕܓܲܝܵܤܹ̈ܐ:
ܫܸܡ̈ܥܹܐ ܕܡܵܘ̈ܬܵܢܹܐ: ܪܸܢܝܵܐ ܕܟܼܘܼܪ̈ܗܵܢܹܐ: ܡܲܪܢܝܼܬܼܵܐ ܕܚܲܤܝܼܪܘܼܬܼ
ܡܵܙܘܿܢܵܐ: ܡܸܬܿܬܿܙܝܼܥܵܢܘܼܬܼܵܐ ܕܡ̣ܢ ܡܵܘܬܵܐ: ܕܸܚܠܬܼܵܐ ܕܪ̈ܲܚܫܵܐ ܘܚܲܝ̈ܘܵܬܼܵܐ:
ܘܫܲܪܟܵܐ ܕܐܲܝܟܼ ܗܵܠܹܝܢ. ܘܒܲܕܼܡܘܼܬܼ ܝܲܡܵܐ ܡ̣ܢ ܓܲܠ̈ܠܹܐ: ܡܸܫܬܲܓܼܫܵܐ
ܒܟܼܠܗܘܿܢ ܥܸܕܼܵܢܹ̈ܐ ܕܐܝܼܡܵܡܹ̈ܐ ܘܠܲܝ̈ܠܵܘܵܬܼܵܐ: ܕܠܵܐ ܝܵܕܼܥܵܐ ܠܡܸܫܕܵܐ
ܨܸܦܬܼܵܗ̇ ܥܲܠ ܐܲܠܵܗܵܐ ܒܬܼܘܼܟܼܠܵܢܵܐ ܕܗܲܝܡܵܢܘܼܬܼܵܐ ܕܒܹܗ. ܡܸܛܠܗܵܢܵܐ
ܒܦܘܼܪ̈ܤܹܐ ܘܨܸܢ̈ܥܵܬܼܵܐ ܡܸܬܼܚܲܫܚܵܐ: ܒܟܼܠܗܹܝܢ ܕܝܼܠܵܗ̇. ܘܐܸܡܲܬܼܝ
ܕܡܸܬܼܒܲܛܠܝܼܢ ܦܘܼܪ̈ܤܹܝܗ̇ ܒܲܚܕܼܵܐ ܡ̣ܢ ܥܸܠ̈ܠܵܢ: ܒܲܕܼ ܠܵܐ ܚܵܙ̇ܝܵܐ
ܠܡܦܲܪܤܵܢܘܬܼܵܐ ܟܤܝܼܬܼܵܐ: ܥܲܡ ܒܢܲܝ̈ܢܵܫܵܐ ܢܵܨ̇ܝܵܐ: ܐܲܝܟܼ ܡܥܵܘ̈ܟܼܵܢܹܐ
pb. 371
ܘܤܵܩܘܿܪܹ̈ܐ ܕܝܼܠܵܗ̇. ܒܵܗ̇ ܓܹܝܪ ܒܗܵܕܹܐ ܝܑܼܕܲܥܬܼܵܐ ܢܨܝܼܒܼ ܐܝܼܠܵܢܵܐ ܗܵܘ̇
ܕܛܵܒܼܬܼܵܐ ܘܲܕܼܒܼܝܼܫܬܼܵܐ: ܕܐܝܼܬܼܵܘܗܝ ܥܵܩܘܿܪܹܗ ܕܚܘܼܒܵܐ. ܗ̤ܝ ܒܵܨ̇ܝܵܐ
ܡܘܼ̈ܡܹܐ ܩܲܛܝܼ̈ܢܹܐ ܕܒܲܐ̄ܚܪ̈ܵܢܹܐ: ܘܒܼܘܼܨܵܪܹ̈ܐ ܘܲܡܚܝܼ̈ܠܵܬܼܵܐ ܕܲܒܼܢܲܝ̈ܢܵܫܵܐ:
ܘܐܵܪܘܿܥܘܼܬܼܵܐ ܕܲܕܼܪܵܫܵܐ: ܘܲܗ̈ܦܵܟܼܵܬܼܵܐ ܕܡܸܠܹ̈ܐ: ܘܨܸܢ̈ܥܵܬܼܵܐ ܡܕܲܪ̈ܡܵܬܼܵܐ:
ܘܫܲܪܟܵܐ ܕܟܼܠܗܘܿܢ ܦܘܼܪ̈ܤܹܐ ܡܨܲܥܪ̈ܵܢܵܘܗܝ ܕܒܲܪܢܵܫܵܐ ܒܵܗ̇
ܐܝܼܬܲܝܗܘܿܢ. ܒܵܗ̇ ܐܵܦ ܚܘܼܬܼܪܵܐ ܘܪܵܡܘܼܬܼܵܐ: ܒܗܵܝ̇ ܕܥܲܠ ܩܢܘܿܡܵܗ̇
ܤܵܝ̇ܡܵܐ ܟܠܗܹܝܢ ܕܗܵܘ̈ܝܵܢ: ܐܸܢ ܕܲܫܠܵܡܵܐ ܐܸܢܹܝܢ: ܘܠܵܘ ܥܲܠ ܐܲܠܵܗܵܐ.
ܗܲܝܢܵܘܼܬܼܵܐ ܕܹܝܢ: ܥܲܠ ܛܲܝܒܿܘܼܬܼܵܐ ܤܵܝ̇ܡܵܐ ܥܒܼܝܼ̈ܕܵܪܬܼܵܗ̇. ܡܸܛܠܗܵܢܵܐ
ܠܡܸܬܿܬܿܪܵܡܘܼ ܠܵܐ ܡܸܫܟܿܚܵܐ: ܐܲܝܟܼ ܕܲܟܼܬܼܝܼܒܼ: ܕܟܼܠܡܸܕܸܡ ܠܲܡ
ܡܸܫܟܲܚ ܐ̄ܢܵܐ ܚܲܝܠܵܐ: ܒܛܲܝܒܿܘܼܬܼܵܐ ܕܲܡܤܲܝܵܐ ܠܝܼ. ܘܬܼܘܼܒܼ: ܠܵܐ
ܐܸܢܵܐ: ܐܸܠܵܐ ܛܲܝܒܿܘܼܬܼܵܐ ܕܥܲܡܝ. ܘܗܵܝ̇ ܕܐܸܡ݂ܲܪ ܛܘܼܒܼܵܢܵܐ ܫܠܝܼܚܵܐ:
ܕܝܼܕܲܥܬܼܵܐ ܡܲܚܬܿܪܵܐ. ܥܲܠ ܗܵܕܹܐ ܝܑܼܕܲܥܬܼܵܐ ܐܸܡ݂ܲܪ: ܕܠܵܐ ܡܡܲܙܓܼܵܐ
ܒܗܲܝܡܵܢܘܼܬܼܵܐ ܘܬܼܘܼܟܼܠܵܢܵܐ ܕܒܲܐܠܵܗܵܐ: ܘܠܵܘ ܥܲܠ ܝܑܼܕܲܥܬܼܵܐ ܕܲܫܪܵܪܵܐ:
ܚܵܣ! ܝܑܼܕܲܥܬܼܵܐ ܓܹܝܪ ܕܲܫܪܵܪܵܐ: ܒܡܲܟܿܝܼܟܼܘܼܬܼܵܐ ܓܵܡܪܵܐ ܠܢܲܦ̈ܫܵܬܼܵܐ
ܕܩܲܢܵܚܚܹ̈ܗ̇. ܐܲܝܟܼ ܡܘܼܫܹܐ ܘܕܼܵܘܝܼܕܼ ܘܐܹܫܲܥܝܵܐ ܘܦܲܛܪܘܿܣ ܘܦܵܘܠܘܿܣ:
ܘܫܲܪܟܵܐ ܕܩܲܕܝܼ̈ܫܹܐ: ܕܐܸܫܬܿܘܝܼܘ ܠܝܼܕܲܥܬܼܵܐ ܓܡܝܼܪܬܵܐ: ܐܲܝܟܼ ܬܚܘܼܡܹܗ
ܕܲܟܼܝܵܢܵܐ. ܘܲܒܼܗܵܝ̇ ܕܲܒܼܫܘܼܚܠܵܦ ܚܸܙ̈ܘܵܢܹܐ ܘܓܸܠܝܵܢܹ̈ܐ ܐܲܠܵܗܵܝܹ̈ܐ: ܘܒܲܚܙܵܬܼܵܐ
ܡܥܲܠܲܝܬܼܵܐ ܕܪ̈ܘܼܚܵܢܝܬܼܵܐ: ܘܲܒܼܐ̄ܪ̈ܵܙܹܐ ܠܵܐ ܡܸܬܼܡܲܠ̈ܠܵܢܹܐ ܡܸܬܼܒܲܠܥܵܐ
ܝܼܕܲܥܬܼܗܘܿܢ ܒܲܐܡܝܼܢܘܼ. ܡ̣ܢ ܦܸܚܡܵܐ ܕܗܵܠܹܝܢ: ܥܲܦܪܵܐ ܘܩܸܛܡܵܐ
ܚܫܝܼܒܼܵܐ ܢܲܦܫܗܘܿܢ ܒܥܲܝܢܲܝ̈ܗܘܿܢ. ܗܵܝ̇ ܝܑܼܕܲܥܬܼܵܐ ܐ̄ܚܪܹܬܼܵܐ: ܘܵܠܝܵܐܝܼܬܼ
ܡܸܬܼܚܲܬܪܵܐ. ܡܸܛܠ ܕܲܒܼܚܸܫܘܿܟܼܵܐ ܪܵܕܼܝܵܐ: ܘܡ̣ܢ ܦܸܚܡܵܐ ܕܗܵܠܹܝܢ
ܕܒܲܐܪܥܵܐ ܒܵܩ̇ܝܵܐ ܨܸܒܼ̈ܘܵܬܼܵܗ̇. ܘܕܲܐܝܼܬܼ ܡܸܕܸܡ ܕܲܡܝܲܬܲܪ: ܠܵܐ ܝܵܕܼܥܵܐ.
pb. 372
ܘܟܼܠܗܘܿܢ ܐܲܝܠܹܝܢ ܕܡܸܬܼܚܲܛܦܝܼܢ ܡ̣ܢ ܪܵܡܘܼܬܼܵܐ: ܡܸܛܠ ܕܡ̣ܢ
ܗܵܠܹܝܢ ܕܒܲܐܪܥܵܐ ܘܲܕܼܦܲܓܼܪܵܐ ܬܵܩ̇ܠܝܼܢ ܕܘܼܒܵܪ̈ܲܝܗܘܿܢ: ܘܥܲܠ ܦܘܼܠܚܵܢܵܐ
ܡܸܤܬܲܡܟܿܝܼܢ: ܘܠܵܐ ܗ̄ܘ̣ܵܐ ܒܠܵܐ ܡܸܬܿܕܲܪ̈ܟܵܢܝܬܼܵܐ ܡܲܥܠܝܼܢ ܗܵܘܢܗܘܿܢ.
ܟܡܵܐ ܕܲܒܼܗܵܢܘܿܢ ܓܲܠ̈ܠܹܐ ܕܙܝܼܘܵܐ ܡܫܲܒܿܚܵܐ ܕܐܲܠܵܗܘܼܬܼܵܐ ܗܵܪܓܝܼܢ:
ܘܦܘܼܠܚܵܢܗܘܿܢ ܠܥܸܠ ܐܝܼܬܼܵܘܗܝ: ܠܵܐ ܡܸܨܛܲܠܝܵܐ ܬܲܪܥܝܼܬܼܗܘܿܢ
ܠܡܸܪܢܵܐ ܒܲܫܟܼܝܼܪ̈ܵܬܼܵܐ ܘܲܒܼܚܘܼ̈ܫܵܒܹܐ ܤܪ̈ܝܼܩܹܐ. ܐܲܝܠܹܝܢ ܓܹܝܪ ܕܲܒܼܢܘܼܗܪܵܐ
ܪܵܕܹܝܢ: ܠܵܐ ܡܸܫܟܿܚܝܼܢ ܠܡܸܛܥܵܐ. ܡܸܛܠܗܵܢܵܐ: ܟܠܗܘܿܢ ܐܲܝܠܹܝܢ
ܕܛܵܥܹ̇ܝܢ ܡ̣ܢ ܢܘܼܗܪܵܐ ܕܝܼܕܲܥܬܼܵܐ ܕܲܒܼܪܹܗ ܕܐܲܠܵܗܵܐ: ܘܤܵܛܹ̇ܝܢ ܡ̣ܢ
ܩܘܼܫܬܼܵܐ: ܒܗܵܠܹܝܢ ܫܒܼܝܼ̈ܠܹܐ ܪܵܕܹܝܢ. ܗܵܢܵܐ ܛܲܟܼܤܵܐ ܩܲܕܼܡܵܝܵܐ ܕܝܼܕܲܥܬܼܵܐ:
ܡܵܐ ܕܲܠܪܸܚܡܬܼܵܐ ܕܦܲܓܼܪܵܐ ܢܵܩ̇ܦܵܐ. ܠܵܗ̇ ܗ̄ܘ̣ ܡܲܤܠܹܝܢܲܢ:
ܘܤܲܩܘܼܒܼܠܵܝܵܐ ܐܵܡ̇ܪܝܼܢܲܢ ܕܐܝܼܬܹܝܗ̇: ܠܵܘ ܒܲܠܚܘܿܕܼ ܠܗܲܝܡܵܢܘܼܬܼܵܐ:
ܐܸܠܵܐ ܘܲܠܟܼܠܗܘܿܢ ܥ̇ܒܼܵܕܹ̈ܐ ܕܲܡܝܲܬܿܪܘܼܬܼܵܐ.
ܛܲܟܼܤܵܐ ܕܲܬܼܪܹܝܢ ܕܝܼܕܲܥܬܼܵܐ. ܐܸܡܲܬܼܝ ܓܹܝܪ ܕܲܠܢܝܼܫܵܐ ܩܲܕܼܡܵܝܵܐ
ܬܸܫܒܿܘܿܩ: ܘܲܠܘܵܬܼ ܗܸܪܓܵܐ ܘܪܸܚܡܬܼܵܐ ܕܢܲܦܫܵܐ ܦܵܢܝܵܐ: ܗܵܢܹܝܢ
ܫܲܦܝܼܪ̈ܵܬܼܵܐ ܕܡ̣ܢ ܠܥܸܠ ܪ̈ܫܝܼܡܵܢ ܦܵܠ̇ܚܵܐ: ܒܙܵܘ̈ܥܹܝܗ̇ ܕܢܲܦܫܵܐ ܥܲܡ
ܪܸ̈ܓܼܫܵܘܗܝ ܕܦܲܓܼܪܵܐ: ܒܢܘܼܗܪܵܐ ܕܲܟܼܝܵܢܵܗ̇. ܗܵܢܵܘ ܕܹܝܢ: ܨܵܘܡܵܐ:
ܨܠܘܿܬܼܵܐ: ܡܪܲܚܡܵܢܘܼܬܼܵܐ: ܩܸܪܝܵܢܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܒܢܝܼ̈ܫܲܝ
ܡܝܲܬܿܪܘܼܬܼܵܐ: ܬܲܟܼܬܘܼܫܵܐ ܕܠܘܼܩܒܲܠ ܚܲܫܹ̈ܐ: ܥܲܡ ܫܲܪܟܵܐ: ܟܠܗܘܿܢ
ܓܹܝܪ ܤܘܼܥܪ̈ܢܹܐ ܫܲܦܝܼܪܹ̈ܐ: ܘܦܘܼܪ̈ܫܵܢܹܐ ܡܝܲܬܿܪܹ̈ܐ ܕܲܒܼܢܲܦܫܵܐ
ܡܸܬܼܚܙܹܝܢ: ܘܛܲܟܼܤܹ̈ܐ ܬܡܝܼ̈ܗܹܐ ܕܲܒܼܥܹܕܬܹܗ ܕܲܡܫܝܼܚܵܐ ܡܸܫܬܲܡܫܝܼܢ:
ܒܛܲܟܼܤܵܐ ܗܵܢܵܐ ܡܸܨܥܵܝܵܐ ܕܝܼܲܕܲܥܬܼܵܐ: ܓܵܡܪܵܐ ܪܘܼܚܵܐ ܕܩܘܼܕܼܫܵܐ
pb. 373
ܒܡܲܥܒܿܕܼܵܢܘܼܬܼܵܐ ܕܚܲܝܠܵܗ̇. ܘܗ̤ܝ ܕܵܪܫܵܐ ܒܠܸܒܲܢ ܫܒܼܝܼ̈ܠܹܐ: ܕܲܠܘܵܬܼ
ܗܲܝܡܵܢܘܼܬܼܵܐ ܡܡܲܢܥܝܼܢ. ܘܒܼܵܗ̇ ܡܟܲܢܫܝܼܢܲܢ ܙܘܵܪܹ̈ܐ ܠܗܵܘ̇ ܥܵܠܡܲܢ
ܫܲܪܝܼܪܵܐ. ܘܲܥܕܲܡܵܐ ܬܘܼܒܼ ܠܗܵܪܟܵܐ: ܥܕܲܟܹܝܠ ܓܫܝܼܡܬܼܵܐ ܗ̣̄ܝ ܝܑܼܕܲܥܬܼܵܐ.
ܘܲܡܪܲܟܲܒܼܬܼܵܐ ܐܵܦܸܢ ܒܲܡܝܲܬܪܘܼܬܼܵܐ ܥܲܢܝܵܐ: ܘܐܵܦܸܢ ܗ̤ܝ ܗ̣̄ܝ ܐܘܼܪܚܵܐ
ܕܲܡܝܲܒܿܠܵܐ ܠܲܢ ܠܘܵܬܼ ܗܲܝܡܵܢܘܼܬܼܵܐ. ܐܝܼܬܼ ܗ̄ܘ̣ ܓܹܝܪ ܛܲܟܼܤܵܐ:
ܕܲܡܥܲܠܲܝ ܡܸܢܵܗ̇. ܕܐܸܢ ܡܲܟܼܫܪܵܐ: ܡܸܫܟܿܚܵܐ ܠܡܸܬܿܕܲܪܵܓܼܘܼ ܒܤܘܼܝܵܥܹܗ
ܕܲܡܫܝܼܚܵܐ: ܟܲܕܼ ܤܵܝ̇ܡܵܐ ܫܲܬܼܤܬܼܵܐ ܠܦܘܼܠܚܵܢܵܗ̇: ܫܸܠܝܵܐ ܕܡ̣ܢ
ܒܢܲܝ̈ܢܵܫܵܐ: ܘܩܸܪܝܵܢܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܘܲܨܠܘܿܬܼܵܐ. ܘܫܲܪܟܵܐ ܕܛܵܒܼ̈ܬܼܵܐ:
ܒܗܵܠܹܝܢ ܡܸܬܼܓܲܡܪ̈ܵܢ. ܗܵܕܹܐ ܗ̣̄ܝ ܡܫܘܼܚܵܬܼܵܐ ܕܬܲܪܬܹܝܢ ܕܝܼܕܲܥܬܼܵܐ:
ܕܒܼܵܗ̇ ܡܸܬܼܦܲܠ̈ܚܵܢ ܟܠܗܹܝܢ ܫܲܦܝܼܪ̈ܬܼܵܐ. ܘܡܸܬܼܩܲܪܝܵܐ: ܝܑܼܕܲܥܬܼܵܐ
ܕܤܘܼܥܪ̈ܢܹܐ. ܡܸܛܠ ܕܲܒܼܤܘܼܥܪ̈ܵܢܹܐ ܡܸܬܼܪ̈ܲܓܼܫܵܢܹܐ ܒܪܸ̈ܓܼܫܲܝ ܦܲܓܼܪܵܐ
ܓܵܡܪܵܐ ܤܵܥܘܿܪܘܼܬܼܵܗ̇: ܒܛܲܟܼܤܵܐ ܕܲܠܒܲܪ.
ܛܲܟܼܤܵܐ ܕܲܬܼܠܵܬܼܵܐ ܕܝܼܕܲܥܬܼܵܐ: ܕܗ̤ܘܝܘܼ ܛܲܟܼܤܵܐ ܕܫܘܼܡܠܵܝܵܐ.
ܕܐܲܝܟܲܢ ܕܝܼܢ ܡܸܬܼܩܲܛܢܵܐ ܘܩܵܢ̇ܝܵܐ ܪܘܼܚܵܢܘܼܬܼܵܐ: ܘܡܲܤܒܿܗܵܐ ܒܕܼܘܼܒܵܪܵܐ
ܕܗܵܢܘܿܢ ܚܲܝ̈ܠܵܘܵܬܼܵܐ ܠܵܐ ܡܸܬܼܚܲܙ̈ܝܵܢܹܐ: ܐܲܝܠܹܝܢ ܕܬܸܫܡܸܫܬܿܗܘܿܢ ܠܵܐ
ܗ̄ܘ̣ܵܐ ܒܤܵܥܘܿܪܘܼܬܼܵܐ ܡܸܬܼܪܲܓܼܫܵܢܝܼܬܼܵܐ ܕܥܲܡ̈ܠܹܐ: ܐܸܠܵܐ ܒܪܸܢܝܵܐ ܕܡܲܕܼܥܵܐ
ܡܸܬܼܓܲܡܪܵܐ: ܫܡܲܥ. ܡܵܐ ܕܹܝܢ ܕܗ̤ܝ ܝܑܼܕܲܥܬܼܵܐ ܐܸܬܼܥܲܠܝܲܬ̤ ܡ̣ܢ
ܐܲܪ̈ܥܵܢܵܝܬܼܵܐ ܘܡ̣ܢ ܪܸܢܝܵܐ ܕܦܘܼܠܚܵܢܵܐ: ܘܫܲܪܝܲܬ̤ ܠܲܡܢܲܤܵܝܘܼ ܙܵܘ̈ܥܹܝܗ̇
ܒܐܲܝܠܹܝܢ ܕܲܠܓܼܵܘ ܡ̣ܢ ܥܲܝ̈ܢܹܐ ܡܚܲܦ̈ܝܵܢ: ܘܫܵܛܲܬ̤ ܠܵܗ̇ ܒܲܡܢܵܬܼܵܐ
ܥܘܼ̈ܗܕܵܢܹܐ ܕܨܸܒܼ̈ܘܵܬܼܵܐ: ܕܡܸܢܗܘܿܢ ܗܵܘܹ̇ܐ ܦܘܼܬܵܠܵܐ ܕܚܲܫܹ̈ܐ. ܘܦܸܫܛܲܬ̤
ܝܵܬܼܵܗ̇ ܠܥܸܠ: ܘܢܸܩܦܲܬ̤ ܠܗܲܝܡܵܢܘܼܬܼܵܐ ܒܪܸܝܢܵܐ ܕܥܵܠܡܵܐ ܕܲܥܬܼܝܼܕܼ:
ܘܪܸܚܡܬܼܵܐ ܕܡܘܼ̈ܠܟܵܢܹܐ: ܘܥܘܼܩܵܒܼܵܐ ܕܥܲܠ ܟܲܤ̈ܝܵܬܼܵܐ. ܗܵܝܕܹܝܢ ܗ̤ܝ
pb. 374
ܗܲܝܡܵܢܘܼܬܼܵܐ ܒܵܠ̇ܥܵܐ ܠܵܗ̇ ܠܝܼܕܲܥܬܼܵܐ: ܘܗܵܦ̇ܟܵܐ ܝܵܠܕܵܐ ܠܵܗ̇ ܡܸܢܕܪܹܫ:
ܟܲܕܼ ܐܝܼܬܹܝܗ̇ ܟ̱ܠܵܗ̇ ܒܟܼܠܵܗ̇ ܕܪܘܼܚ. ܗܵܝܕܝܼܢ ܡܸܫܟܿܚܵܐ ܛܵܝ̇ܤܵܐ
ܒܐܲܬܼܪ̈ܵܘܵܬܼܵܐ ܠܵܐ ܓܫܝܼ̈ܡܹܐ: ܘܲܠܡܸܓܲܫ ܥܘܼ̈ܡܩܹܐ ܕܝܲܡܵܐ ܠܵܐ
ܡܸܬܼܓܲܫܫܵܢܵܐ ܕܲܡܕܲܒܿܪܵܢܘܼܬܼܵܐ ܬܡܝܼܗܬܵܐ ܘܐܲܠܵܗܵܝܬܼܵܐ: ܕܒܲܟܼ̈ܝܵܢܹܐ
ܡܸܬܼܝܲܕܼ̈ܥܵܢܹܐ ܘܡܸܪ̈ܲܓܼܫܵܢܹܐ: ܘܲܠܡܸܒܼܨܵܐ ܐ̄ܪ̈ܵܙܹܐ ܪ̈ܘܼܚܵܢܹܐ: ܕܲܒܼܡܲܕܥܵܐ
ܦܫܝܼܛܵܐ ܘܩܲܛܝܼܢܵܐ ܡܸܬܿܕܲܪܟܿܝܼܢ. ܗܵܝܕܹܝܢ ܪܸ̈ܓܼܫܹܐ ܓܵܘܵܝܹ̈ܐ: ܡܸܬܿܬܿܥܝܼܪܝܼܢ
ܠܦܘܼܠܚܵܢܵܐ ܕܪܘܼܚ: ܐܲܝܟܼ ܛܲܟܼܤܵܐ ܕܗܵܘܹ̇ܐ ܒܗܵܘ̇ ܗܘܼܦܵܟܼܵܐ
ܕܠܵܐ ܡܵܝܘܿܬܼܘܼܬܼܵܐ ܘܠܵܐ ܡܸܬܼܚܲܒܿܠܵܢܘܼܬܼܵܐ. ܡܛܸܠ ܕܲܩܝܵܡܬܼܵܐ
ܡܸܬܼܝܲܕܼܥܵܢܝܼܬܼܵܐ ܐܲܝܟܼ ܕܲܒܼܐ̄ܪܵܙܵܐ ܩܲܒܸܠ̣ܘ ܡܸܟܵܐ: ܠܬܲܚܘܝܼܬܼܵܐ ܫܲܪܝܼܪܬܵܐ
ܕܗܵܘ̇ ܚܘܼܕܵܬܼܵܐ ܕܓܼܵܘܵܐ܀ ܗܵܠܹܝܢ ܐܸܢܘܿܢ ܬܠܵܬܼܵܐ ܛܲܟܼܤܹ̈ܐ ܕܝܼܕܲܥܬܼܵܐ:
ܕܲܒܼܗܘܿܢ ܡܤܲܝܲܟ ܟ̱ܠܹܗ ܪܲܗܛܵܐ ܕܒܲܪܢܵܫܵܐ: ܕܦܲܓܼܪܵܐ: ܘܢܲܦܫܵܐ:
ܘܪܘܼܚܵܐ. ܡ̣ܢ ܕܲܡܫܲܪܸܐ ܒܲܪܢܵܫܵܐ ܠܡܸܦܪܲܫ ܒܹܝܬܼ ܛܵܒܼܬܼܵܐ ܠܒܼܝܼܫܬܼܵܐ:
ܘܲܥܕܲܡܵܐ ܕܢܵܦܹ̇ܩ ܡ̣ܢ ܥܵܠܡܵܐ: ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ ܥܵܐ̇ܠܵܐ
ܝܑܼܕܥܕܲܡܵܐ ܕܢܵܦܹ̇ܩ ܡ̣ܢ ܥܵܠܡܵܐ: ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ ܥܵܐ̇ܠܵܐ
ܝܑܼܕܲܥܬܼܵܐ ܕܢܲܦܫܹܗ: ܘܫܘܼܡܠܵܝܵܐ ܕܟܼܠܹܗ ܥܵܘ̣ܠܵܐ ܘܪܘܼܫܥܵܐ: ܘܤܵܟܼܵܐ
ܕܟܼܠܵܗ̇ ܙܲܕܝܼܩܘܼܬܼܵܐ: ܘܲܠܡܸܓܲܫ ܥܘܼ̈ܡܩܹܐ ܕܟܼܠܗܘܿܢ ܐ̄ܪ̈ܵܙܹܐ ܕܪܘܼܚ:
ܚܕܼܵܐ ܝܑܼܕܲܥܬܼܵܐ ܤܵܥ̇ܪܵܐ ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ. ܘܲܒܼܗܹܝܢ ܐܝܼܬܹܝܗ̇:
ܟ̱ܠܵܗ̇ ܡܸܬܿܬܿܙܝܼܥܵܢܘܼܬܼܵܐ ܕܗܵܘܢܵܐ ܕܤܵܠܹ̇ܩ ܐܵܘ ܢܵܚܹ̇ܬܼ: ܒܛܵܒܼ̈ܬܼܵܐ:
ܐܵܘ ܒܼܒܼܝܼ̈ܫܵܬܼܵܐ: ܐܵܘ ܒܡܸܨܥܵܝܘܼܬܼܵܐ. ܠܗܵܠܹܝܢ ܡܘܼ̈ܫܚܵܬܼܵܐ ܩܵܪܹܝܢ ܐܲܒܼܵܗ̈ܬܼܵܐ:
ܟܝܵܢܵܐ: ܠܒܲܪ ܡ̣ܢ ܟܝܵܢܵܐ: ܠܥܸܠ ܡ̣ܢ ܟܝܵܢܵܐ. ܘܗܵܠܹܝܢ ܐܸܢܹܝܢ ܬܠܵܬܼ
ܦܸܢ̈ܝܵܢ: ܕܲܠܗܹܝܢ ܡܸܬܼܥܲܠܸܐ ܘܡܸܬܿܬܲܚܬܸܐ ܥܘܼܗܕܵܢܵܗ̇ ܕܢܲܦܫܵܐ
ܡܲܠܵܠܬܼܵܐ: ܐܲܝܟܼ ܕܐܲܡܝܼܪ. ܐܵܘ ܒܲܟܼܝܵܢܵܐ ܦܵܠ̇ܚܵܐ ܙܲܕܝܼܩܘܼܬܼܵܐ: ܐܵܘ
ܠܥܸܠ ܡ̣ܢ ܟܝܵܢܵܐ ܡܸܬܼܚܲܛܦܵܐ ܒܥܘܼܗܕܵܢܵܗ̇ ܒܬܹܐܘܿܪܝܼܵܐ ܕܲܠܘܵܬܼ
pb. 375
ܐܲܠܵܗܵܐ: ܐܵܘ ܠܒܲܪ ܡ̣ܢ ܟܝܵܢܵܐ ܬܸܦܘܿܩ ܠܡܸܪܥܵܐ ܚܙܝܼܪܹ̈ܐ: ܐܲܝܟܼ
ܗܵܘ̇ ܕܐܵܘܒܸܕܼ ܥܘܼܬܼܪܵܐ ܕܦܵܪܘܿܫܘܼܬܹܗ: ܟܲܕܼ ܦܵܠܲܚ ܗ̄ܘ̣ܵܐ ܥܲܡ
ܫܸܚܪܵܐ ܕܫܹ̈ܐܕܹܐ.
ܛܲܟܼܤܵܐ ܓܹܝܪ ܩܲܕܼܡܵܝܵܐ ܕܝܼܕܲܥܬܼܵܐ: ܡܫܲܗܝܵܢܵܐ ܗ̄ܘ̣ ܕܢܲܦܫܵܐ ܡ̣ܢ
ܥܲܡ̈ܠܹܐ ܕܲܒܼܪܲܗܛܼܵܐ ܕܒܼܵܬܲܪ ܛܵܒܼ̈ܬܼܵܐ. ܘܛܲܟܼܤܵܐ ܡܸܨܥܵܝܵܐ: ܡܲܪܬܚܵܢܵܐ
ܗ̄ܘ̣ ܕܢܲܦܫܵܐ ܒܚܹܐܦܵܐ ܕܪܲܗܛܵܐ ܕܲܒܼܕܲܪ̈ܓܹܐ ܕܗܲܝܡܵܢܘܼܬܼܵܐ. ܘܛܲܟܼܤܼܵܐ
ܬܠܝܼܬܼܵܝܵܐ: ܦܵܘܫܵܐ ܗ̄ܘ̣ ܕܢܲܦܫܵܐ ܡ̣ܢ ܦܘܼܠܚܵܢܵܐ: ܘܛܘܼܦܤܵܐ ܗ̄ܘ̣
ܕܗܵܝ̇ ܕܲܥܬܼܝܼܕܼܵܐ: ܕܒܼܪܸܢܝܵܐ ܒܲܠܚܘܿܕܼ ܕܡܲܕܼܥܵܐ ܡܸܬܼܒܲܤܡܵܐ: ܒܐ̄ܪ̈ܵܙܹܐ
ܕܛܵܒܼ̈ܬܼܵܐ ܕܲܥܬܼܝܼ̈ܕܼܵܢ. ܐܸܠܵܐ ܡܸܛܠ ܕܲܥܕܲܟܹܝܠ ܠܵܐ ܐܸܬܼܥܲܠܝܼ ܟܝܵܢܵܐ
ܡ̣ܢ ܛܲܟܼܤܵܐ ܕܡܵܝܘܿܬܼܘܼܬܼܵܐ ܘܡ̣ܢ ܝܘܼܩܪܵܐ ܕܒܸܤܪܵܐ: ܕܢܸܗܘܸܐ
ܓܡܝܼܪܵܐܝܼܬܼ ܒܗܵܝ̇ ܕܘܼܚܵܢܘܼܬܼܵ ܕܲܡܥܲܠܝܵܐ ܡ̣ܢ ܡܸܨܛܲܠܝܵܢܘܼܬܼܵܐ: ܘܠܵܐ
ܡܲܨܝܵܐ ܕܠܲܓܼܡܝܼܪܘܼܬܼܵܐ ܕܠܵܐ ܚܲܤܝܼܪܵܐ ܢܫܲܡܸܫ ܒܥܵܠܡܵܐ ܕܡܵܝܘܿܬܼܘܼܬܼܵܐ:
ܘܢܲܪܦܸܐ ܠܲܟܼܝܵܢܵܐ ܕܒܸܤܪܵܐ ܓܡܝܼܪܵܐܝܼܬܼ: ܟܲܕܼ ܥܕܲܟܹܝܠ ܒܵܗ̇ ܡܸܬܼܗܲܦܲܟܼ:
ܒܫܘܼܢܵܝܵܐ ܗܵܘܹ̇ܐ ܒܗܵܢܵܐ ܘܲܒܼܗܵܘ̇. ܟܲܕܼ ܒܲܙܒܲܢ ܐܲܝܟܼ ܡܸܤܟܹܢܵܐ ܘܲܤܢܝܼܩܵܐ
ܥܲܢܝܵܐ ܢܲܦܫܵܐ ܒܛܲܟܼܤܵܐ ܗܵܘ̇ ܡܸܨܥܵܝܵܐ ܕܝܼܕܲܥܬܼܵܐ: ܒܲܡܝܲܬܪ̈ܵܬܼܵܐ
ܕܒܲܟܼܝܵܢܵܐ ܤܝܼ̈ܡܵܢ ܒܚܲܝܠܵܐ ܠܡܸܦܠܲܚ: ܡܸܛܠ ܟܝܵܢܹܗ ܕܦܲܓܼܪܵܐ.
ܘܒܲܙܒܲܢ ܐܲܝܟܼ ܐܲܝܠܹܝܢ ܕܪܘܼܚܵܐ ܕܤܝܼܡܲܬܼ ܒܢܲܝ̈ܵܐ ܢܤܲܒܼܘ: ܒܐ̄ܪ̈ܵܙܹܐ
ܕܚܹܐܪܘܼܬܼܵܐ ܡܸܬܼܒܲܤܡܵܐ ܒܡܵܘܗܲܒܼܬܼܵܐ ܕܪܘܼܚ: ܐܲܝܟܼ ܟܡܵܐ
ܕܲܠܝܵܗܘܿܒܼܵܗ̇ ܫܵܦ̇ܪܵܐ. ܘܬܼܘܼܒܼ ܦܵܢ̇ܝܵܐ ܠܡܸܤܟܹܿܢܘܼܬܼܵܐ ܕܥܵܠܡܵܗ̇:
ܗܵܢܵܘ ܕܹܝܢ ܕܦܲܓܼܪܵܐ: ܟܲܕܼ ܙܗܝܼܪܵܐ ܒܹܗ ܒܦܲܓܼܪܵܐ: ܕܠܵܐ ܢܸܫܒܹܝܗ̇
ܒܲܡܓܲܪ̈ܓܼܵܢܝܬܼܵܐ ܕܲܫܟܼܝܼ̈ܚܵܢ ܒܥܵܠܡܹܗ: ܒܝܲܕܼ ܙܵܘܥܵܘ̈ܗܝ ܫܓܼܝܼ̈ܫܹܐ
ܘܡܸܨ̈ܛܲܠܝܵܢܹܐ. ܒܕܲܟܼܡܵܐ ܕܲܬܼܚܹܝܬܼ ܐܲܦܲܝ̈ ܬܲܪܥܵܐ ܕܒܸܤܪܵܐ ܚܒܼܝܼܫܵܐ:
pb. 376
ܠܲܝܬܿ ܠܵܗ̇ ܬܘܼܟܼܠܵܢܵܐ. ܠܲܝܬܿ ܓܹܝܪ ܚܘܼܪܵܪܵܐ ܓܡܝܼܪܵܐ ܒܥܵܠܡܵܐ ܠܵܐ
ܓܡܝܼܪܵܐ. ܟ̱ܠܹܗ ܓܹܝܪ ܦܘܼܠܚܵܢܵܐ ܕܝܼܕܲܥܬܼܵܐ: ܕܥܲܠܡܵܐ ܗ̄ܘ̣ ܘܲܕܿܕܼܘܼܪܵܫܵܐ
ܗ̄ܘ̣. ܥ̇ܒܼܵܕܹ̈ܐ ܕܹܝܢ ܕܗܲܝܡܵܢܘܼܬܼܵܐ: ܠܵܐ ܗ̄ܘ̣ܵܐ ܒܥܲܡ̈ܠܹܐ ܡܸܬܼܦܲܠܚܝܼܢ.
ܡܸܛܠ ܕܲܒܼܙܵܘ̈ܥܹܐ ܪ̈ܘܼܚܵܢܹܐ ܒܡܲܥܕܼܵܢܘܼܬܼܵܐ ܥܲܪܛܸܠܵܝܵܬܼܵܐ ܕܢܲܦܫܵܐ
ܡܸܬܼܓܲܡܪܝܼܢ: ܘܲܠܥܸܠ ܡ̣ܢ ܪܸ̈ܓܼܫܹܐ. ܩܲܛܝܼܢܵܐ ܓܹܝܪ ܗܲܝܡܵܢܘܼܬܼܵܐ ܡ̣ܢ
ܝܑܼܕܲܥܬܼܵܐ: ܐܲܝܟܼ ܡܵܐ ܕܝܼܕܲܥܬܼܵܐ ܡ̣ܢ ܤܘܼܥܪ̈ܵܢܹܐ ܡܸܬܼܪ̈ܓܼܫܵܢܹܐ. ܟܠܗܘܿܢ
ܓܹܝܪ ܩܲܕܝܼ̈ܫܹܐ ܕܲܠܕܼܘܼܒܵܪܵܐ ܪܘܼܚܵܢܵܐ ܐܸܫܬܿܘܝܼܘ: ܕܐܝܼܬܼܵܘܗܝ ܬܲܗܪܵܐ
ܕܒܲܐܠܵܗܵܐ: ܒܚܲܝܠܵܐ ܕܗܲܝܡܵܢܘܼܬܼܵܐ ܡܸܬܿܕܲܒܿܪܝܼܢ: ܒܒܼܘܼܤܵܡܵܐ ܕܕܼܘܼܒܵܪܵܐ
ܗܵܘ̇ ܕܲܠܥܸܠ ܡ̣ܢ ܟܝܵܢܵܐ. ܗܲܝܡܵܢܘܼܬܼܵܐ ܕܹܝܢ ܐܵܡܲ݁ܪܢܵܐ: ܠܵܘ ܠܗܵܝ̇
ܕܲܝܢܲܗܝܡܸܢ ܐ̄ܢܵܫ ܒܦܘܼܪܫܵܢܵܐ ܕܲܩܢܘܿܡܹ̈ܐ ܤܓܿܝܼ̈ܕܹܐ ܕܐܝܼܬܼܵܘܬܼܵܐ:
ܘܲܒܼܕܼܝܼ̈ܠܵܝܬܼܵܐ ܕܲܟܼܝܵܢܵܗ̇: ܘܒܲܡܕܲܒܿܪܵܢܘܼܬܼܵܐ ܬܡܝܼܗܬܵܐ ܕܲܗܘ̤ܵܬܼ
ܒܐ̄ܢܵܫܘܼܬܲܢ ܒܲܢܤܝܼܒܼܘܼܬܹܗ ܕܲܟܼܝܵܢܲܢ. ܐܸܠܵܐ ܗܲܝܡܵܢܘܼܬܼܵܐ ܗܵܕܹܐ ܐܵܡܲ݁ܪܢܵܐ:
ܠܢܘܼܗܪܵܐ ܡܸܬܼܝܲܕܼܥܵܢܵܐ: ܕܡ̣ܢ ܛܲܝܒܿܘܼܬܼܵܐ ܕܵܢܲܚ ܒܢܲܦܫܵܐ.
ܘܲܒܼܤܵܗܕܘܼܬܼܵܐ ܕܪܸܥܝܵܢܵܐ ܤܵܡܹ̇ܟܼ ܠܠܸܒܵܐ ܠܵܐ ܦܠܝܼܓܼܵܐܝܼܬܼ: ܒܲܦܝܵܤܵܐ
ܕܤܲܒܼܪܵܐ ܕܪܲܝܼܩ ܡ̣ܢ ܟܠܗܹܝܢ ܡܲܤܒܪ̈ܵܢܘܵܬܼܵܐ: ܘܠܵܐ ܒܝܘܼܒܵܠܵܐ
ܕܡ̣ܢ ܡܲܫܡܲܥ ܐܸܕܼܢܵܐ. ܘܲܡܚܵܘܸܐ ܠܵܗ̇ ܒܥܲܝ̈ܢܹܐ ܪ̈ܘܼܚܵܢܵܝܬܼܵܐ: ܐ̄ܪ̈ܵܙܹܐ
ܛܡܝܼܪܹ̈ܐ ܕܲܒܼܢܲܦܫܵܐ: ܘܥܘܼܬܼܪܵܐ ܓܢܝܼܙܵܐ ܕܐܲܠܵܗܘܼܬܼܵܐ: ܕܲܡܤܲܬܲܪ ܡ̣ܢ
ܥܲܝ̈ܢܹܐ ܕܲܒܼܢܲܝ̈ ܒܸܤܪܵܐ: ܘܡܸܬܼܓܠܸܐ ܒܪܘܼܚܵܐ ܠܐܲܝܠܹܝܢ ܕܥܲܠ
ܦܵܬܼܘܿܪܹܗ ܕܲܡܫܝܼܚܵܐ ܡܸܬܼܪܲܒܹܝܢ ܒܗܸܪܓܵܐ ܕܢܵܡܘܿܤܵܘ̈ܗܝ. ܐܲܝܟܼ
ܕܐܸܡ݂ܲܪ: ܕܐܸܢ ܦܘܼܩ̈ܕܵܢܲܝ ܬܸܛܪܘܼܢ: ܡܫܲܕܲܪܢܵܐ ܠܟܼܘܿܢ ܪܘܼܚܵܐ
ܦܵܪܲܩܠܹܝܛܵܐ: ܗܵܘ̇ ܕܥܵܠܡܵܐ ܠܵܐ ܡܸܫܟܲܚ ܠܲܡܩܲܒܵܠܘܼܬܹܗ:
pb. 377
ܘܲܢܚܵܘܹܝܟܼܘܿܢ ܟ̱ܠܹܗ ܫܪܵܪܵܐ. ܗܵܟܲܢܵܐ ܘܲܡܚܵܘܸܐ ܠܹܗ ܠܒܲܪܢܵܫܵܐ
ܚܲܝܠܵܐ ܩܲܕܝܼܫܵܐ: ܕܡܲܓܸܢ ܥܠܵܘܗܝ ܒܟܼܠܥܸܕܵܢ܀ ܚܲܝܠܵܐ ܗܵܘ̇:
ܗ̤ܘ ܐܝܼܬܼܵܘܗܝ ܦܵܪܲܩܠܹܝܛܵܐ. ܒܚܲܝܠܵܗ̇ ܕܗܵܕܹܐ ܗܲܝܡܵܢܘܼܬܼܵܐ
ܡܸܫܬܲܓܼܪܵܢ ܟܠܗܹܝܢ ܡܢܵܘ̈ܬܼܵܗ̇ ܕܢܲܦܫܵܐ ܐܲܝܟܼ ܕܲܒܼܢܘܼܪܵܐ:
ܘܡܲܤܪܵܐ ܥܲܠ ܟܠ ܩܹܘܲܢܕܹܝܢܘܿܣ ܒܬܼܘܼܟܼܠܵܢܵܐ ܕܥܲܠ ܐܲܠܵܗܵܐ.
ܘܒܸܐܒܼܪܹ̈ܐ ܕܡ̣ܢ ܗܲܝܡܵܢܘܼܬܼܵܐ ܡܸܬܼܥܲܠܝܵܐ ܡ̣ܢ ܚܘܿܓܼܬܼܵܗ̇ ܕܲܒܼܪܝܼܬܼܵܐ
ܗܵܕܹܐ ܡܸܬܼܚܲܙܝܵܢܝܼܬܼܵܐ: ܘܐܲܝܟܼ ܪܵܘܝܵܐ ܗܵܘܝܵܐ ܒܐܲܡܝܼܢܘܼ ܒܬܲܗܪܵܐ ܕܡܲܪܢܝܬܼܵܐ
ܕܒܲܐܠܵܗܵܐ. ܘܲܒܼܚܸܙܘܵܐ ܠܵܐ ܡܪܲܟܿܒܼܵܐ: ܘܲܒܼܤܘܼ̈ܟܵܠܹܐ ܕܠܵܐ ܚܸܙܘܵܐ ܕܥܲܠ
ܟܝܵܢܵܐ ܐܲܠܵܗܵܝܵܐ: ܡܥܲܝܕܼܵܐ ܠܹܗ ܠܡܲܕܥܵܐ ܠܲܡܚܵܪ ܒܗܸܪܓܵܐ ܕܥܲܠ
ܟܲܤܝܘܼܬܹܗ. ܥܕܲܡܵܐ ܓܹܝܪ ܕܢܹܐܬܸܐ ܗܵܘ̇ ܕܐܝܼܬܼܵܘܗܝ ܫܘܼܡܠܵܝܵܐ
ܕܐ̄ܪ̈ܵܙܹܐ: ܘܲܠܓܸܠܝܵܢܹܗ ܥܹܝܢ ܒܲܓܼܠܸܐ ܢܸܫܬܿܘܸܐ: ܗܲܝܡܵܢܘܼܬܼܵܐ ܡܫܲܡܫܵܐ
ܒܹܝܬܼ ܐܲܠܵܗܵܐ ܠܩܲܕܝܼ̈ܫܹܐ ܐ̄ܪ̈ܵܙܹܐ ܕܠܵܐ ܡܸܬܼܡܲܠܠܝܼܢ. ܕܲܠܗܘܿܢ ܢܸܫܬܿܘܸܐ
ܒܛܲܝܒܿܘܼܬܹܗ ܕܲܡܫܝܼܚܵܐ: ܗܵܪܟܵܐ ܒܪܲܗܒܼܘܿܢܵܐ: ܘܬܲܡܵܢ ܒܲܩܢܘܿܡܹ̈ܐ
ܚܲܬܝܼ̈ܬܹܐ ܒܡܲܠܟܿܘܼܬܼܵܐ ܕܲܫܡܲܝܵܐ: ܥܲܡ ܟܠܗܘܿܢ ܪ̈ܵܚܡܵܘܗܝ. ܐܵܡܹܝܢ.
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 51” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/442.Bibliography:
“Discourse 51.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/442.Show Citation Styles