Narsai: On Job - ܥܲܠ ܐܝܼܘܿܒܼ ܙܲܕܿܝܼܩܵܐ

1 :ܠܝܘܼܬܼܪܵܢ ܐ̄̇ܢܵܫܵܐ ܪܫܲܡ̣ ܒܵܪܘܿܝܵܐ ܕܘܼܟܼܪܵܢ ܐ̄ܢܵܫܵܐ 2 ܕܲܒܼܥܘܼܗܕܵܢܵܐ ܕܟܹܐܢܹ̈ܐ ܕܲܢܨܲܚܘ ܢܚܲܟܸܿܡ ܐ̄ܢܵܫܵܐ ܀ 3 :ܘܟܲܕܼ ܠܹܗ ܓܠܸܐ ܗ̄ܘ̣ܵܐ ܨܼܒܼܝܵܢ ܟܹܐܢܹ̈ܐ ܐܲܝܟ ܝܵ̇ܕܲܥ ܟܠ 4 ܠܵܐ ܨܒܼܵܐ ܢܟܲܣܸܐ ܥܘܼܬܼܪܵܐ ܕܟܲܢܸܫܘ ܒܝܲܕܼ ܥܲܡܠܲܝ̈ܗܘܿܢ ܀ 5 :ܪܫܲܡ̣ ܕܘܼܟܼܪܵܢܵܐ ܕܲܫܡܵܗܲܝ̈ܗܘܿܢ ܒܣܸܦܪܵܐ ܕܡܸܠܵܘ̈ܗܝ 6 ܘܐܲܝܟ ܗܲܕܿܝܼܠܹ̈݁ܐ ܕܪܲܫ ܒܐܝܼܕܲܝ̈ܗܘܿܢ ܐܘܼܪܚܵܐ ܠܚܲܝܹ̈ܐ ܀ pb. 255 7 :ܒܲܕܼܡܘܼܬܼ ܛܲܒܼܥܹ̈ܐ ܩ̣ܒܲܥ ܒܲܟܼܬܼܵܒܼܵܘ̈ܗܝ ܫܸܡ ܢܲܨܝܼܚܹ̈ܐ 8 ܘܲܓܼܕܲܠ ܐܸܢܘܿܢ ܟܠܝܼܠܵܐ ܦܲܐܝܵܐ ܠܪܹܫ ܙܵܟܼܘܼܬܼܵܐ ܀ 9 :ܣܵܡ̣ ܥܲܡܠܲܝ̈ܗܘܿܢ ܐܲܝܟ ܫܲܬܸܐܣܬܼܵܐ ܒܣܸܦܪܹ݁ܐ ܕܡܸܠܵܘ̈ܗܝ 10 ܕܢܸܒܼܢܘܿܢ ܐ̄ܢܵܫܵܐ ܕܘܼܒܵܪ̈ܲܝܗܘܿܢ ܥܲܠ ܥܲܡܠܲܝ̈ܗܘܿܢ ܀ 11 :ܐܲܝܟ ܢܲܗܝܼܪܹ̈ܐ ܫܡܸܫܵܐ ܘܣܲܗܪܵܐ ܩ̣ܒܲܥ ܥܲܡܠܲܝ̈ܗܘܿܢ 12 ܕܲܒܼܕܸܠܩܲܝ̈ܗܘܿܢ ܢܚܵܘܘܿܢ ܢܘܗܪܵܐ ܠܢܲܦܫܵܐ ܟܣܝܼܬܼܵܐ ܀ 13 :ܡܝܼ̈ܠܹܐ ܕܫܲܝܢܵܐ ܣܵܡ̣ ܒܲܟܼܬܼܵܒܼܵܘ̈ܗܝ ܫܸܡ ܙܲܕܿܝܼܩܹ̈ܐ 14 ܕܢܸܕܲܥ ܟܠܢܵܫ ܐܲܝܟܲܢ ܢܗܲܠܸܟ ܒܥܲܡܠܹ̈ܐ ܕܢܲܦܫܵܐ ܀ 15 :ܗܘ̤ܵܘ ܡܲܚܙܝܼܬܼܵܐ ܒܕܼܘܼܒܵܪ̈ܲܝܗܘܿܢ ܠܥܲܝܢܲܝ̈ ܠܸܒܵܐ 16 ܕܢܸܡܪܘܿܩ ܟܠܢܵܫ ܣܲܢܝܼܘܼܬܼ ܬܲܦܫܹܗ ܒܝܲܕܼ ܥܲܡܠܲܝ̈ܗܘܿܢ ܀ 17 :ܠܵܘ ܩܘܼܠܵܣܹ̈ܐ ܓܕܲܠ ܒܼܵܘܿܝܵܐ ܠܟܹܐܢܹ̈ܐ ܕܪܲܚܡ̣ܘܼܗܝ 18 ܕܘܼܒܵܪ̈ܲܝܗܘܿܢ ܩ̣ܒܲܥ ܐܲܝܟ ܢܝܼܫܵܐ ܠܲܕܼܒܼܵܬܲܪܗܘܿܢ ܀ 19 :ܒܗܘܿܢ ܚܵܐ̇ܲܪ ܗ̄ܘ̣ܵܐ ܟܲܕܼ ܚܵܫ̇ܝܼܢ ܗ̄ܘ̣ܵܘ ܒܚܲܫܲܝ̈ ܦܲܓܼܪܵܐ 20 ܘܲܒܼܚܘܼܡܣܵܢܗܘܿܢ ܡܸܬܼܒܲܩܸܐ ܗ̄ܘ̣ܵܐ ܟܲܕܼ ܒܵܠ̇ܥܝܼܢ ܗ̄ܘ̣ܵܘ ܀ 21 :ܚܲܝܠܹܗ ܚܲܝܸܠ ܠܪܸ̈ܥܝܵܢܲܝܗܘܿܢ ܒܐܵܓܼܘܿܢܲܝ̈ܗܘܿܢ 22 ܘܲܒܼܥܘܼܕܼܪܵܢܹܗ ܫܩܲܠ̣ܘ ܙܵܟܼܘܼܬܼܵܐ ܒܬܲܟܼܬܿܘܼܫܲܝ̈ܗܘܿܢ ܀ 23 :ܠܵܘ ܥܲܡ ܒܸܣܪܵܐ ܥܒ݂ܲܕܼܘ ܬܲܟܼܬܿܘܼܫܵܐ ܒܸܣܪ݁ܵܢܵܝܹܐ 24 ܥܲܡ ܪܹܫ ܐܵܐܲܪ ܢܚܸܬܼܘ ܠܐܵܓܼܘܿܢܵܐ ܒܙܵܘܥܲܝ̈ ܢܲܦܫܵܬܐ ܀ 25 :ܟܬ݂ܲܒܼ ܒܵܪܘܿܝܵܐ ܢܸܨܚܵܢܲܝ̈ܗܘܿܢ ܘܣܵܡ̣ ܒܹܝܬܼ ܐܲܪ̈ܟܹܐ 26 ܕܢܹܐܠܲܦ ܟܠܢܵܫ ܥܲܠ ܬܲܟܼܬܿܘܼܫܵܐ ܕܒܸܣܪܵܐ ܘܪܘܼܚܵܐ ܀ 27 :ܒܗܵܢ ܬܲܟܼܬܿܘܼܫܵܐ ܕܥܲܡ ܪ̈ܘܼܚܵܢܹܐ ܢܨܲܚ ܐܵܦ ܐܝܼܘܿܒܼ 28 ܘܠܵܐ ܟܹ̇ܠܩܲܪܨܵܐ ܙܟܼܵܐ ܒܐܵܓܼܘܿܢܵܐ ܒܝܲܕܼ ܚܘܼܡܣܵܢܹܗ ܀ 29 :ܘܕܲܙܟܼܵܐ ܒܸܣܪܵܐ ܠܪܹܫܵܐ ܕܐܵܐܲܪ ܘܚܵܒܼ ܪܘܼܚܵܢܵܐ 30 ܪܫܲܡ̣ ܒܵܘܿܝܵܐ ܙܵܟܼܘܼܬܼ ܐ̄ܢܵܫܵܐ ܘܚܵܘܒܲܬܼ ܫܹܐܕܹ̈ܐ ܀ 31 :ܟܬ݂ܲܒܼ ܕܘܼܟܼܪܵܢܹܗ ܕܐܝܼܘܿܒܼ ܟܹܐܢܵܐ ܒܲܣܦܲܪ ܡܸܠܵܘ̈ܗܝ 32 ܘܲܩܪ̣ܵܝܗܝ ܓܲܒܼܪܵܐ ܕܢܹܐܠܲܦ ܟܠܢܵܫ ܕܦܲܓܼܪܵܢܵܝܵܐ ܗ̄ܘ̣ ܀ 33 :ܐܵܘܕܼܵܥ ܐܲܢܼܪܹܗ ܘܚܵܘܝܼ ܥܲܡܹܗ ܕܐܲܕܼܘܿܡܵܝܵܐ ܗ̄ܘ̣ 34 ܕܢܸܕܲܥ ܟܠܢܵܫ ܕܥܲܦܪܵܢܵܝܵܐ ܗ̄ܘ̣ ܓܒܼܝܼܠ ܡ̣ܢ ܐܲܪܥܵܐ ܀ 35 :ܬܢܵܐ̣ ܕܘܼܒܵܪ̈ܵܘܗܝ ܕܬܲܡܝܼܡ ܘܲܬܼܪܝܼܨ ܘܟܹܐܝܢ ܘܲܡܫܲܡܠܲܝ 36 ܘܡܲܣܓܸܿܐ ܡܝܲܩܲܪ ܡܸܠܲܬܼ ܡ̇ܪܹܗ ܒܫܲܦܝܘܼܬܼ ܢܲܦܫܵܐ ܀ 37 :ܥܗ݂ܲܕܼ ܩܸܢܝܵܢܵܘ̈ܗܝ ܘܪܲܒܿܘܼܬܼ ܥܘܼܬܼܪܹܗ ܕܟܲܗܝܼܢ ܒܐܲܪܥܵܐ 38 ܘܠܵܐ ܐܸܬܼܦܲܟܲܪ ܒܝܲܕܼ ܩܸܢܝܵܢܵܘ̈ܗܝ ܒܐܲܪ̈ܥܵܢܝܵܬܼܵܐ ܀ 39 :ܚܵܘܝܼ ܟܠܝܼܠܹ̈ܐ ܦܐܲܝ̈ܵܐ ܕܲܒܼܢܵܘ̈ܗܝ ܒܡܸܢܝܵܢ ܥܸܣܪܵܐ 40 ܘܠܵܐ ܦܲܟܲܗܬܹܗ ܪܸܚܡܲܬܼ ܝܲܠܕܵܘ̈ܗܝ ܠܚܘܼܒܵܐ ܕܡ̇ܪܹܗ ܀ 41 :ܩܲܠܸܣ ܘܐܵܘܪܸܒܼ ܠܲܚܦܝܼܛܘܼܬܹܗ ܕܲܠܘܵܬܼ ܝܼܠܕܵܘ̈ܗܝ 42 ܕܲܒܼܝܲܕܼ ܕܸܒܼܚܹ̈ܐ ܡܚܲܣܸܐ ܟܠܢܵܫ ܕܕܲܠܡܵܐ ܐܲܣܟܸܿܠܘ ܀ pb. 256 43 :ܐܲܥ̣ܠ ܫܲܪܒܵܐ ܕܪܸܚܡܲܬܼ ܟܹܐܢܹ̈ܐ ܒܥܸܠܬܼ ܐܝܼܘܿܒܼ 44 ܕܐܸܬܹ̇ܝܢ ܟܠܫܵܥ ܠܲܡܨܲܠܵܝܘܼ ܒܲܬܼܪܵܗ ܟܹܐܢܵܐ ܀ 45 :ܗܘ̤ܵܐ ܠܲܡ ܝܵܘܡ̇ܐ ܐܲܝܟ ܕܲܡܥܵܕܼܝܢ ܒܢܲܝ̈ ܐܹܠܘܿܗܝܼܡ 46 ܘܐܸܬܼܵܘ ܠܲܡܩܵܡ ܕܼܵܡ ܐܲܠܵܗܵܐ ܒܫܲܦܝܘܼܬܼ ܢܲܦܫܫܵܐ ܀ 47 :ܐܲܥܸܠ ܫܲܪܒܵܐ ܕܐܵܟܹ̇ܠܩܲܪܨܵܐ ܕܥܲܡܗܘܿܢ ܐܸܬܼܵܐ 48 ܘܩܵܡ̣ ܒܲܝܢܵܬܼܗܘܿܢ ܩܕܼܵܡ ܐܲܠܵܗܵܐ ܠܵܘ ܕܲܢܨܲܠܸܐ ܀ 49 :ܬܪܹܝܢ ܛܘܼܝܵܒܼܝܼ̈ܢ ܕܲܬܼܪܹܝܢ ܓܲܒܼܝܼ̈ܢ ܓܠ̣ܵܐ ܒܵܪܘܿܝܵܐ 50 ܨܸܒܼܝܵܢ ܟܹܐܢܵܐ ܘܪܸܓܲܬܼ ܒܝܼܫܵܐ ܕܠܘܼܩܒܲܠ ܟܹܐܢܹ̈ܐ ܀ 51 :ܠܵܘ ܒܲܟܼܝܵܢܵܐ ܘܠܵܘ ܒܲܚܙܵܬܼܵܐ ܐܸܡܲ݁ܪ ܕܐܸܬܼܵܘ 52 ܠܵܐ ܓܹܝܪ ܡܲܨܝܵܐ ܥܒܼܝܹ̈ܐ ܕܢܸܚܙܘܿܢ ܠܲܟܼܣܸܐ ܡ̣ܢ ܟܠ ܀ 53 :ܚܘܼܫܵܒܲܝ̈ܗܘܿܢ ܨܒܼܵܐ ܕܲܢܒܲܕܸܿܩ ܕܟܹܐܢܹ̈ܐ ܘܒܼܝܼܫܹ̈ܐ 54 ܕܡܸܛܠ ܡ̇ܢܵܐ ܚܦܝܼܛܝܼܢ ܟܠܫܵܥ ܠܲܬܼܪܲܥ ܪܵܡ̇ܐ ܀ 55 :ܠܵܐ ܗ̄ܘ̣ܵܐ ܠܟܲܣܝܵܐ ܚܵܙܹ̇ܝܢ ܟܹܐܢܹ̈ܐ ܒܝܲܕܼ ܗܵܝ̇ ܕܐܵܬܹܿܝܢ 56 ܘܠܵܐ ܣܵܛܵܢܵܐ ܡܨܸܐ ܕܲܢܡܲܠܸܠ ܥܲܡ ܐܝܼܬܼܘܼܬܼܵܐ ܀ 57 :ܘܐܸܢ ܙܲܕܿܝܼܩܹ̈ܐ ܚܵܙܹ̇ܝܢ ܠܟܲܣܝܵܐ ܒܫܲܦܝܘܼܬܼ ܢܲܦܫܵܐ 58 ܐܲܝܟܲܢ ܡܲܨܝܵܐ ܕܐܵܟܹ̇ܠܩܲܪܨܵܐ ܢܚܘܼܪ ܒܐܲܠܵܗܵܐ . 59 :ܡ̇ܕܹܝܢ ܙܵܕܹܩ ܕܠܵܘ ܐܲܝܟ ܫܸܡܥܵܐ ܢܨܘܼܪ ܣܘܼܟܵܠܵܐ 60 ܠܕܲܠܓܼܵܘ ܢܸܒܼܨܸܐ ܘܠܵܐ ܢܸܬܿܬܲܩܲܠ ܒܒܲܪ݁ܵܝܵܬܼܵܐ . 61 :ܒܗܵܕܹܐ ܬܸܢܘܲܝ ܐܸܡܲ݁ܪ ܕܐܸܬܼܵܘ ܒܢܲܝ̈ ܙܲܕܿܝܼܩܵܐ 62 ܠܡܸܦܪܲܥ ܢܸܕܼܪܵܐ ܕܫܲܦܝܘܼܬܼ ܢܲܦܫܵܐ ܠܗܵܘ̇ ܚܵܙܹ̇ܐ ܟܠ ܀ 63 :ܒܝܼܫܵܐ ܐܸܬܼܵܐ ܕܢܹܐܟܼܘܿܠ ܩܲܪܨܵܐ ܕܐܝܼܘܿܒܼ ܟܹܐܢܵܐ 64 ܠܵܘ ܕܲܢܩܲܪܸܒܼ ܕܸܒܼܚܹ̈ܐ ܕܚܘܼܒܵܐ ܐܲܝܟ ܙܲܕܿܝܼܩܹ̈ܐ ܀ 65 :ܠܚܘܼܫܵܒܼ ܢܸܟܼܠܹܗ ܨܒܼܵܐ ܕܲܢܦܲܪܣܸܐ ܒܥܸܠܬܹܗ ܕܐܝܼܘܿܒܼ 66 ܟܲܕܼ ܡܲܠܸܦ ܠܲܢ ܕܗܵܢܵܘ̇ ܗܸܪܓܹܿܗ ܕܠܘܼܩܒܲܠ ܟܹܐܢܹ̈ܐ ܀ 67 :ܪܲܒܿܘܼܬܼ ܥܘܼܬܼܪܹܗ ܕܐܝܼܘܿܒܼ ܟܹܐܢܵܐ ܚܙ̣ܵܐ ܣܵܩܘܿܪܵܐ 68 ܘܕܲܠܚܹܗ ܚܣܵܡܵܐ ܕܲܠܡܵܢ ܟܲܗܝܼܢ ܘܢܵܨܲ̇ܚ ܒܐܲܪܥܵܐ ܀ 69 :ܫܸܡ ܕܘܼܒܵܪ̈ܵܘܗܝ ܕܬܲܡܝܼܡ ܘܲܬܼܪܝܼܨ ܫܡ݂ܲܥ ܚܲܣܵܡܵܐ 70 ܘܙܲܩܬ݂ܲܘܼܗܝ ܩܵܠܹ̈ܐ ܕܟܼܠܢܵܫ ܬܵܢܹ̇ܐ ܥܲܡܠܵܘ̈ܗܝ ܕܐܝܼܘܿܒܼ ܀ 71 :ܒܩܵܠ ܒܵܪܘܿܝܵܐ ܡܸܬܼܢܲܓܲܕܼ ܗ̄ܘ̣ܵܐ ܐܵܟܹ̇ܠܩܲܪܨܵܐ 72 ܕܡܲܟܼܪܸܙ ܟܠܫܵܥ ܥܲܠ ܟܹܐܢܘܼܬܹܗ ܘܬܲܡܝܼܡܘܼܬܹܗ ܀ 73 :ܛܸܒܵܐ ܕܥܲܡܠܵܘ̈ܗܝ ܘܲܕܼܙܸܕܼܩܵܬܹ̈ܗ ܦܪ݂ܲܚ ܒܲܒܼܪܝܼܬܼܵܐ 74 ܘܒܲܕܼܡܘܼܬܼ ܓܹܐܪܹ̈ܐ ܒܠܲܥ̣ ܒܲܚܣܵܐ ܒܫܲܦܝܼܪ̈ܵܬܹܗ ܀ 75 :ܛܢܵܢܵܐ ܕܪܘܼܓܼܙܵܐ ܫܵܓܲܪ ܗ̄ܘ̣ܵܐ ܠܹܗ ܠܗܵܘ̇ ܚܲܣܵܡܵܐ 76 ܕܡ̇ܢܲܐ ܗ̄ܝܼ ܗܵܕܹܐ ܕܥܲܡ ܩܸܢܝܵܢܹ̈ܐ ܐܵܦ ܕܘܼܒܵܪܹ̈ܐ ܀ 77 :ܒܢܘܼܪܵܐ ܕܚܸܡܬܼܵܐ ܡܸܬܼܓܵܘܙܲܠ ܗ̄ܘ̣ܵܐ ܐܸܟܹ̇ܠ ܩܲܪܨܵܐ 78 ܕܒܲܐܝܠܹܝܢ ܦܘܼܪ̈ܣܹܐ ܢܲܝܬܸܿܐ ܠܓܸܠܝܵܐ ܢܼܟܼܠܹܗ ܟܲܣܝܵܐ ܀ 79 :ܗܘ̤ ܥܲܡ ܢܲܦܫܹܗ ܐܸܣ݂ܲܪ ܐ̄ܪܵܙܵܐ ܘܪܲܟܸܿܒܼ ܬܸܢܘܲܝ 80 ܕܡܹܐܟܲܠܩܲܪܨܵܐ ܡܨܸܐ ܕܢܨܲܚܸܐ ܥܲܡܠܵܘ̈ܗܝ ܕܐܝܼܘܿܒܼ ܀ pb. 257 81 :ܒܗܵܕܹܐ ܬܸܢܘܲܝ ܐܸܡ݂ܲܪ ܕܐܸܬܼܵܐ ܩܕܼܵܡ ܐܲܠܵܗܵܐ 82 ܕܢܹܐܟܼܘܿܠ ܩܲܪ̈ܨܵܘܗܝ ܕܟܹܐܢܵܐ ܐܝܼܘܿܒܼ ܕܠܵܘ ܙܲܕܿܝܼܩܵܐ ܗ̄ܘ̣ ܀ 83 :ܗܘ̤ ܥܲܡ ܢܲܦܫܹܗ ܠܵܘ ܥܲܡ ܟܲܣܝܵܐ ܡܲܠܸܠ ܘܐܸܡ݂ܲܪ 84 ܕܚܸܕܼܪܹܬܼ ܒܐܲܪܥܵܐ ܘܦܸܪܣܹ̇ܬܼ ܢܸܫܒܲܝ̈ ܠܲܡܨܵܕ ܐ̄ܢܵܫܵܐ ܀ 85 :ܐܝܼܘܿܒܼ ܒܲܠܚܘܿܕܼ ܦܲܣܸܩ ܢܸܫܒܲܝ̈ ܘܬܲܒܲܪ ܦܲܚܲܝܝ̈ 86 ܘܠܵܐ ܐܸܬܼܥܲܪܩܲܠ ܒܲܡܨܸܝ̈ܕܼܵܬܼܵܐ ܘܩܸܛܪ̈ܲܝ ܥܵܘ̣ܠܵܐ ܀ 87 :ܟܲܗܝܼܢ ܒܐܲܪܥܵܐ ܘܲܚܠܝܼܡ ܓܘܼܫܡܹܗ ܘܚܝܼܨ ܪܸܥܝܵܢܹܗ 88 ܘܢܵܨ̇ܲܚ ܛܸܒܵܐ ܕܫܲܦܝܼܪ݁ܵܬܹܗ ܒܐܲܪܒܲܥ ܦܸܢ̈ܝܵܢ ܀ 89 :ܕܐܸܩܪܘܿܒܼ ܘܐܸܒܼܩܹܝܘܗܝ ܠܵܐ ܡܲܦܸܣ ܠܝܼ ܪܸܡܙܹܗ ܕܡ̇ܪܹܗ 90 ܕܐܲܝܟ ܐܲܬܼܠܹܝܛܵܐ ܠܒܼܝܼܫ ܘܲܡܙܲܝܲܢ ܒܝܹܚܠ ܥܘܼܕܼܪܵܢܹܗ ܀ 91 :ܚܹܝܠ ܒܵܪܘܿܝܵܐ ܟܠ̣ܵܢܝ ܡ̣ܢ ܨܹܐܕܼܵܘܗܝ ܕܐܲܩܪܸܒܼ ܥܲܡܹܗ 92 ܘܐܸܠܘܼܠܵܐ ܗܘ̤ ܟܒܲܪ ܐܲܝܟ ܟܠܢܵܫ ܚܵܣܹ̇ܝܢ ܗ̄ܘܹ̇ܝܬܼ ܠܹܗ ܀ 93 :ܡܲܢ ܕܹܝܢ ܝܲܗ̣̄ܒܼ ܠܝܼ ܐܲܬܼܪܵܐ ܕܐܸܡܚܹܝܘܗܝ ܒܝܲܕܼ ܩܸܢܝܵܢܵܘ̈ܗܝ 94 ܘܢܹܐܠܲܦ ܟܠܢܵܫ ܕܡ̣ܢ ܡ̇ܝܘܿܬܹ̈ܐ ܗ̄ܘ̣ ܠܒܼܝܼܫܲܝ̈ ܚܲܫܹ̈ܐ ܀ 95 :ܒܟܲܗܝܼܢܘܼܬܹܗ ܚܠܝܼܡ ܪܸܥܝܵܢܹܗ ܥܲܡ ܗܲܕܵܡ̇ܘ̈ܗܝ 96 ܘܐܸܠܘܼ ܐܸܬܿܬܿܥܝܼܩ ܩܸܢܝܵܢܵܘ̈ܗܝ ܡܸܬܼܪܲܦܸܐ ܗ̄ܘ̣ܵܐ ܀ 97 :ܠܵܐ ܡܲܟܸܿܟܼܬܹܗ ܡܸܣܟܹܿܢܘܼܬܼܵܐ ܘܚܲܣܝܼܪܘܼܬܼܵܐ 98 ܘܡܸܛܠ ܗܵܕܹܐ ܠܵܐ ܡܸܬܿܬܲܩܲܠ ܒܪܘܼܛܵܢ ܡܸܠܵܘ̈ܗܝ ܀ 99 :ܠܵܐ ܚ̣ܛܲܦ ܡܸܢܹܗ ܡ̇ܘܬܵܐ ܝܲܥܢܵܐ ܓܸܙܪܵܐ ܕܐ̄ܢܵܫܵܐ 100 ܘܐܸܠܘ̣ ܬܲܒܿܪܹܗ ܐܸܒܼܠܵܐ ܕܝܲܠܕܵܘ̈ܗܝ ܒ̣ܛܸ݂ܢ ܨܘܿܚ̈ܝܵܬܼܵܐ ܀ 101 :ܒܟܲܗܝܼܢܘܼܬܼܵܐ ܡܩܲܛܪܸܓܼ ܗ̄ܘ̣ܵܐ ܠܹܗ ܒܝܼܫܵܐ ܠܐܝܼܘܿܒܼ 102 ܕܥܘܼܬܼܪܹܗ ܓܕ݂ܲܠ ܠܹܗ ܟܠܝܼܠ ܢܸܨܚܵܢܹ̈ܐ ܘܠܵܘ ܨܼܒܼܝܵܢܹܗ ܀ 103 :ܠܢܸܟܼܠܹ̈ܐ ܕܪܲܟܸܿܒܼ ܥܲܠ ܙܲܕܿܝܼܩܵܐ ܓܠ̣ܵܐ ܒܵܪܘܿܝܵܐ 104 ܒܝܲܕܼ ܗܵܝ̇ ܕܐܲܟܼܬܸܿܒܼ ܕܲܡܫܲܐܸܠ ܠܹܗ ܐܲܝܟ ܠܵܐ ܝܵ̇ܕܲܥ ܀ 105 :ܠܵܘ ܒܵܪܘܿܝܵܐ ܫܲܐܸܠ ܠܒܼܝܼܫܵܐ ܕܢܹܐܠܲܦ ܐܘܼܪܚܹܗ 106 ܘܠܵܐ ܡ̇ܪܘܿܕܼܵܐ ܚܙ̣ܵܐ ܐܵܘ ܡܲܠܸܠ ܥܲܡ ܝܵ̇ܕܲܥ ܟܠ ܀ 107 :ܒܗܵܠܹܝܢ ܩܵܠܹ̈ܐ ܡܥܵܕܼ ܒܵܪܘܿܝܵܐ ܠܡܸܬܼܚܲܫܵܚܘܼ 108 ܘܲܠܬܼܘܼܩܵܢܵܘ̈ܗܝ ܡܫܲܐܸܠ ܟܠܫܵܥ ܐܲܝܟ ܠܵܐ ܝܵ̇ܕܲܥ ܀ 109 :ܫܲܐܸܠ ܠܐܵܕܷܼܵܡ ܕܐܲܝܵܟܵܐ ܐ̄ܢܬܿ ܐܵܕܸܵܡ ܟܲܕܼ ܚܵܙܹ̇ܐ ܠܹܗ 110 ܘܫܲܐܸܠ ܠܩܵܐܹܝܢ ܕܐܲܝܟܵܘ ܐܲܚܘܼܟ ܘܝ̇ܵܕܲܥ ܕܐܲܝܟܵܘ ܀ 111 :ܐܲܫܡܲܥ ܩܵܠܵܐ ܒܪܘܼܓܼܙܵܐ ܕܵܣܕܼܘܿܡ ܕܐܸܚܘܿܬܼ ܐܸܚܙܸܐ 112 ܕܐܸܢ ܐܲܝܟ ܛܸܒܵܐ ܕܐܸܬܼܵܐ ܨܹܐܕܲܝ ܥܒ݂ܲܕܼܘ ܐܵܘ ܫܲܡܠܝܼܘ ܀ 113 :ܗܵܪܟܵܐ ܠܒܼܝܼܫܵܐ ܕܡ̣ܢ ܐܲܝܡܸܟܸܵܐ ܫܲܐܸܠ ܕܐܸܬܿܝܬܿ 114 ܟܲܕܼ ܡܲܠܸܦ ܠܲܢ ܕܒܲܐܪܥܵܐ ܚܵ̇ܕܲܪ ܘܡܲܛܥܸܐ ܠܐ̄ܢܵܫܵܐ ܀ 115 :ܒܝܲܕܼ ܫܘܼܐܸܠܲܐ ܨܒܼܵܐ ܕܲܢܒܲܕܸܿܩ ܢܸܟܼܠܹܗ ܕܒܼܝܼܫܵܐ 116 ܕܡܹܐܟܲܠ ܩܲܪܨܵܐ ܡܪܲܟܸܿܒܼ ܟܠܫܵܥ ܥܲܠ ܙܲܕܿܝܼܩܹ̈ܐ ܀ 117 ܗܵܐ ܣܵܡ̣ܬܿ ܠܸܒܵܟ ܥܲܠ ܥܲܒܼܕܿܝ ܐܝܼܘܿܒܼ ܓܠ̣ܵܝܗܝ ܚܘܼܫܵܒܹܗ: pb. 258 118 ܕܠܲܝܬܿ ܐܲܟܼܘܵܬܹܗ ܕܬܲܡܝܼܡ ܘܲܬܼܪܝܼܨ ܘܲܡܝܲܩܲܪ ܠܝܼ ܀ 119 :ܦܲܢܝܼ ܒܝܼܫܵܐ ܠܘܵܬܼ ܒܵܪܘܿܝܵܐ ܠܵܘ ܒܲܪ̄ܬܼ ܩܵܠܵܐ 120 ܚܘܼܫܵܒܼ ܢܸܟܼܠܹܗ ܨܒܼܵܐ ܕܢܼܟܼܬܸܿܒܼ ܠܲܢ ܒܝܲܕܼ ܦܘܼܢܵܝܹܗ ܀ 121 :ܐܲܢ̄ܬܿ ܠܲܡ ܐܲܓܸܿܢܬܿ ܐܝܼܕܼܵܐ ܕܪ̈ܲܚܡܹܐ ܥܲܠ ܩܸܢܝܵܢܵܘ̈ܗܝ 122 ܘܲܒܼܥܘܼܕܼܪܵܢܵܟ ܩܢܸܐ ܚܘܼܠܡܵܢܵܐ ܘܟܲܗܝܼܢ ܒܐܲܪܥܵܐ ܀ 123 :ܒܚܲܝܠܵܟ ܢܵܨܲܚ ܫܡܹܗ ܒܲܒܼܪܝܼܬܼܵܐ ܐܲܝܟ ܬܲܡܝܼܡܵܐ 124 ܣܲܒܼ ܥܘܼܕܼܪܵܢܵܟ ܘܗܵܐ ܡܸܬܼܓܲܢܸܐ ܡ̣ܢ ܟܠ ܒܲܪܢܵܫ ܀ 125 :ܒܚܲܝܠܵܟ ܢܵܨ̇ܚ ܫܡܹܗ ܒܲܒܼܪܝܼܬܼܵܐ ܐܲܝܟ ܬܲܡܝܼܡܵܐ 126 ܣܲܒܼ ܥܘܼܕܼܪܵܢܵܟ ܘܗܵܐ ܡܸܬܼܓܲܢܸܐ ܡ̣ܢ ܟܠ ܒܲܪܢܵܫ ܀ 127 :ܢܲܚܬܵܐ ܕܪ̈ܲܚܡܹܐ ܦܪܝܼܣ ܥܲܠ ܐܝܼܘܿܒܼ ܐܲܝܟ ܬܲܟܼܣܝܼܬܼܵܐ 128 ܬܠܝܼ ܝܲܡܝܼܢܵܟ ܘܗܵܐ ܡܸܬܼܓܼܠܝܵܐ ܣܲܢܝܘܼܬܼ ܢܲܦܫܹܗ ܀ 129 :ܕܲܗܒܼܵܐ ܕܡܸܠܬܼܵܟ ܩܪܝܼܡ ܥܲܠ ܙܹܐܦܵܐ ܕܣܲܢܝܘܼܬܼ ܢܲܦܫܹܗ 130 ܘܒܹܗ ܡܸܬܼܩܲܒܲܠ ܢܚܵܫܹܗ ܟܲܣܝܵܐ ܒܲܓܼܡܘܼܬܼ ܕܲܗܒܼܵܐ ܀ 131 :ܗܲܒܼܠܝܼ ܕܐܸܒܼܩܹܝܘܗܝ ܒܚܘܼܣܪܵܢ ܢܸܟܼܣܵܘ̈ܗܝ ܐܲܝܟ ܕܲܒܼܟܼܘܼܪܵܐ 132 ܘܐܸܓܼܠܹܝܘܗܝ ܠܙܹܐܦܵܐ ܕܪܲܦܝܘܼܬܼ ܢܲܦܫܹܗ ܕܠܵܘ ܫܲܪܝܼܪܵܐ ܗ̄ܘ̣ ܀ 133 :ܒܟܼܗܝܼܢܘܼܬܹܗ ܚܠܝܼܡ ܪܸܥܝܵܢܹܗ ܘܠܵܐ ܡܸܬܼܪܲܦܸܐ 134 ܒܪܲܒܿܘܼܬܼ ܢܸܟܼܣܵܘ̈ܗܝ ܪܵܡ̇ܐ ܪܘܼܚܹܗ ܐܲܝܟ ܫܲܪܝܼܪܵܐ ܀ 135 :ܡ̣ܢ ܡ̇ܝܘܿܬܹ̈ܐ ܗ̄ܘ̣ ܠܒܼܝܼܫܲܝ̈ ܚܲܫܹ̈ܐ ܓܒܼܝܼܠ ܡ̣ܢ ܥܲܦܪܵܐ 136 ܘܐܸܢ ܥܵܒܼܲ݁ܪ ܒܹܗ ܢܲܗܪܵܐ ܕܨܸܢ̈ܥܵܬܼܝ ܡܼܬܿܬܿܪܸܐ ܡܸܕܼܪܹܗ ܀ 137 :ܦܬܲܚ ܠܝܼ ܬܲܪܥܵܐ ܕܐܸܥܘܿܠ ܨܹܐܕܼܵܘܗܝ ܒܝܲܕܼ ܩܲܛܝܼܢܘܼܬܼܝ 138 ܘܡܲܬܼܘܲܗ ܐ̄ܢܵܐ ܠܹܗ ܒܛܸܒܹ̈ܐ ܒܝܼܫܹ̈ܐ ܘܙܵܐܲܥ ܠܸܒܸܿܗ ܀ 139 :ܠܲܝܬܿ ܡ̇ܝܘܿܬܼܵܐ ܕܠܵܐ ܟܵܪܝܵܐ ܠܹܗ ܒܐܲܒܼܕܵܢ ܢܸܟܼܣܵܘ̈ܗܝ 140 ܘܠܲܝܬܿ ܚܵܫ̇ܘܿܫܵܐ ܕܠܵܐ ܡܸܬܼܪܲܦܸܐ ܒܛܸܒܵܐ ܒܝܼܫܵܐ ܀ 141 :ܗܵܠܹܝܢ ܗܘ̤ ܒܹܗ ܡܸܬܼܚܲܫܲܒܼ ܗ̄ܘ̣ܵܐ ܐܵܟܹ̇ܿܠ ܩܲܪܨܵܐ 142 ܘܠܵܘ ܥܲܡ ܡ̇ܪܹܗ ܥܢܸܐ ܗ̄ܘ̣ܵܐ ܡܡܲܠܲܠ ܗܵܘ̇ ܡܲܪܵܚܵܐ ܀ 143 :ܚܲܝܠܵܐ ܕܡܸܠܹ̈ܐ ܪܫܝܼܡ ܒܲܟܼܬܵܒܹ̈ܐ ܐܲܝܟ ܗܵܘ̇ ܕܲܗ̤ܘܲܝ̈ 144 ܠܵܐ ܕܹܝܢ ܡܲܠܸܠ ܟܲܣܝܵܐ ܡܸܡܬܼܘܿܡ ܥܲܡ ܡ̇ܪܘܿܕܼܵܐ ܀ 145 :ܒܪܸܡܙܵܐ ܝܲܗ̣̄ܒܼ ܠܹܗ ܐܲܬܼܪܵܐ ܠܒܼܝܼܫܵܐ ܒܙܵܘܥܹ̈ܐ ܟܣܲܝܵܐ 146 ܐܲܝܟ ܡ̇ܐ ܕܣܵܥܲ݁ܪ ܨܹܝܕܼ ܪ̈ܘܼܚܵܢܹܐ ܟܲܕܼ ܡܸܫܬܲܠܚܝܼܢ ܀ 147 :ܓܠ̣ܵܐ ܠܹܗ ܪܸܡܙܵܐ ܠܵܐܟܹ̇ܠ ܩܲܪܨܵܐ ܩܲܛܝܼܢܵܐܝܼܬܼ 148 ܕܗܵܐ ܡܲܫܠܲܡ ܠܵܟ ܟܠܡܵܐ ܕܲܩܢܸܐ ܐܝܼܘܿܒܼ ܒܐܲܪܥܵܐ ܀ 149 :ܚܙ̣ܵܐ ܡ̇ܪܘܿܕܼܵܐܬ ܕܐܲܗܡܝܼ ܛܵܒܼܵܐ ܡ̣ܢ ܒܲܪ ܒܲܝܬܹܿܗ 150 ܘܟܲܢܸܫ ܚܲܝܠܵܘ̈ܗܝ ܐܲܝܟ ܕܠܲܩܪܵܒܼܵܐ ܠܘܼܩܒܲܠ ܐܝܼܘܿܒܼ ܀ 151 :ܒܝܲܕܼ ܩܸܢܝܵܢܵܘ̈ܗܝ ܣܒ݂ܲܪ ܡܲܪܵܚܵܐ ܕܡܲܪܗܸܒܼ ܗ̄ܘ̣ܵܐ ܠܹܗ 152 ܘܒܲܐܒܼܕܵܢ ܢܸܟܼܣܵܘ̈ܗܝ ܒܥ̣ܵܐ ܕܲܢܪܲܦܸܐ ܠܒܸܢܝܵܢ ܢܲܦܫܹܗ ܀ 153 :ܠܵܐ ܝܵ̇ܕܲܥ ܗ̄ܘ̣ܵܐ ܕܠܝܼܚ ܒܲܚܣܵܡܵܐ ܕܠܘܼܩܒܲܠ ܟܹܐܢܹ̈ܐ 154 ܕܠܵܐ ܕܵܠܲܚ̇ ܠܵܗ̇ ܠܫܲܦܝܘܼܬܼ ܢܲܦܫܹܗ ܩܵܠ ܚܘܼܣܪܵܢܵܐ ܀ pb. 259 155 :ܐܲܝܟ ܚܵܫܘܿܫܵܐ ܚܵܐܲ݁ܪ ܗ̄ܘ̣ܵܐ ܒܹܗ ܪܦܸܐ ܪܥܝܵܢܵܐ 156 ܘܠܵܐ ܝܵ̇ܕܲܥ ܗ̄ܘ̣ܵܐ ܕܚܵܣܹ̇ܢ ܚܲܫܵܘ̈ܗܝ ܒܝܲܕܼ ܕܘܼܡܣܵܢܹܗ ܀ 157 :ܠܵܘ ܟܲܣ̈ܝܵܬܼܵܐ ܕܒܸܠܵܐ ܒܵܕܹܩ ܐܲܝܟ ܒܵܪܘܿܝܵܐ 158 ܘܠܵܐ ܚܘܼܫܵܒܼܵܐ ܕܢܲܦܫܵܐ ܒܵܨܹ̇ܐ ܐܲܝܟ ܝܵ̇ܕܲܥ ܟܠ ܀ 159 :ܘܐܸܠܘܼ ܡܦܵܣ ܗ̄ܘ̣ܵܐ ܩܕܼܵܡ ܬܲܟܼܬܿܘܼܫܵܐ ܕܡܲܚܵܒܼ ܚܵܐܹ̇ܒܼ 160 ܠܵܐ ܢܵܚܹ̇ܬܼ ܗ̄ܘ̣ܵܐ ܠܪܲܪܵܐ ܩܲܫܝܵܐ ܕܥܲܡ ܙܲܕܲܝܼܩܵܐ ܀ 161 :ܒܠܵܐ ܝܼܕܲܥܬܼܵܐ ܙܲܝܹܢ ܢܲܦܫܹܗ ܘܥܲܠ̣ ܠܲܩܪܵܒܼܵܐ 162 ܘܫܲܪܝܼ ܕܢܸܫܕܸܿܐ ܓܹܐܪܵܐ ܕܚܸܡܬܹܗ ܒܩܸܢܝܵܢ ܟܹܐܢܵܐ ܀ 163 :ܗܘ̤ܵܐ ܠܲܡ ܝܵܘܡ̇ܐ ܕܲܟܼܢܝܼܫܝܼܢ ܒܹܗ ܝܲܠܕܵܘ̈ܗܝ ܕܐܝܼܘܿܒܼ 164 ܘܡܲܠܲܐܟ ܒܝܼܫܵܐ ܐܲܝܬܿܝܼ ܣܒܲܪܬܼܵܐ ܕܓܼܝܣܵܐ ܕܲܢܦܲܠ̣ ܀ 165 :ܐ̄ܬܼܵܐ ܐܝܼܙܓܲܕܵܐ ܠܘܵܬܼ ܙܲܕܼܝܼܩܵܐ ܘܲܪܗܝܼܒܼ ܩܵܠܵܐ 166 ܕܢܲܬܼܘܲܗ ܡܸܢܫܹܠܝ ܠܠܸܒܵܐ ܬܩܢܵܐ ܒܛܸܒܵܐ ܪܗܝܼܒܼܵܐ ܀ 167 :ܢܦ݂ܲܠܪ ܠܲܡ ܓܲܝܣܵܐ ܘܲܕܒܲܪ ܬܵܘܪܹ̈ܐ ܥܲܡ ܐܲܬܵܢܹ̈ܐ 168 ܘܡܝܼܬܼܘ ܐܲܟܵܪܹ̈ܐ ܘܪ̈ܵܥܵܘܵܬܼܵܐ ܒܪܘܓܼܙܵܐ ܩܲܫܝܵܐ ܀ 169 :ܪܲܟܸܿܒܼ ܒܝܼܫܵܐ ܥܸܠܬܼܵܐ ܕܢܲܛܥܸܐ ܒܲܫܡܵܐ ܕܓܼܝܼܣܵܐ 170 ܘܚܵܘܝܼ ܫܹܐܕܵܐ ܐܲܝܟ ܫܲܒܵܝܹ̈ܐ ܕܢܦ݂ܲܠܘ ܘܲܕܼܒܲܪܘ ܀ 171 :ܐ̄ܢܵܐ ܠܲܡ ܒܲܠܚܘܿܕܼ ܦܸܠ̇ܛܹܬܼ ܡܸܢܹܗ ܕܓܼܝܣܵܐ ܕܲܢܦܲܠ 172 ܘܐܸܬܹܿܝܬܼ ܕܐܸܬܼܢܸܐ ܡܸܕܹܿܡ ܕܲܓܼܕܲܫ ܕܠܵܐ ܚܵܘܣܵܢܵܐ ܀ 173 :ܘܥܲܕܼ ܩܲܕܼܡ̇ܝܵܐ ܡܲܫܸܠܸܡ ܛܸܒܵܐ ܕܓܼܝܣܵܐ ܕܢܲܦܲܠ 174 ܡܲܛܝܼ ܐ̄ܚܪܹܢܵܐ ܘܲܛܥܝܼܢ ܛܸܒܵܐ ܕܥܵܢܹ̈ܐ ܕܐܸܒܼܕܲܬ̤ ܀ 175 :ܢܘܼܪܵܐ ܕܪܵܘܡ̇ܐ ܢܸܦܠܲܬ̤ ܡ̣ܢ ܫܹܠܝ ܒܲܕܼܡܘܼܬܼ ܒܲܪܩܵܐ 176 ܘܝܸܩܕܲܬ̤ ܥܵܢ̈ܐ ܘܪ̈ܵܥܵܘܵܬܼܵܐ ܒܫܲܠܗܹܒܼܝܼܬܼܵܐ ܀ 177 :ܐ̄ܢܵܐ ܠܲܡ ܒܲܠܚܘܿܕܼ ܦܵܫܹ̇ܬܼ ܬܲܡ̇ܢ ܕܐܲܝܬܸܿܐ ܣܒܲܪܬܼܵܐ 178 ܕܠܵܘ ܟܹܐܢܵܐܝܼܬܼ ܣܥܲܪ ܒܵܪܘܿܝܵܐ ܨܹܝܕܼ ܩܸܢܝܵܢܲܝ̈ܟ ܀ 179 :ܚܘܼܒܼܠܹ̈ܐ ܒܝܼܫܹ̈ܐ ܦܲܪ̣ܥܵܟ ܡ̇ܪܵܟ ܚܠܵܦ ܙܸܕܼܩܵܬܼܟ 180 ܕܐܲܚܸܬܼ ܢܘܼܪܵܐ ܘܓܼܡܲܪ ܥܵܢܹ̈ܐ ܕܠܵܐ ܚܵܣܵܢܵܐ ܀ 181 :ܐܘܿ ܠܲܢܟܼܝܼܠܵܐ ܕܲܛܡ݂ܲܪ ܦܲܚܹ̈ܐ ܘܟܲܣܝܼ ܐܸܢܘܼܢ 182 ܕܠܵܐ ܢܸܬܼܝܲܕܼܥܘܼܢ ܠܐܲܝܢܵܐ ܕܪܵܕܹܐ ܬܲܡܝܼܡܵܐܝܼܬܼ ܀ 183 :ܫܲܓܼܫܹܗ ܠܐܵܐܲܪ ܘܐܵܣܸܦ ܢܘܼܪܵܐ ܘܐܵܘܩܸܕܼ ܥܵܢ̈ܐ 184 ܘܩܵܡ̣ ܕܲܢܨܲܚܸܐ ܒܥܵܘ̣ܠܵܐ ܕܲܣܥ݂ܲܪ ܠܡܵܪܹܗ ܕܐܝܼܘܿܒܼ ܀ 185 :ܗܘ̤ ܠܲܡ ܐܲܚܸܡ ܢܘܼܪܵܐ ܕܝܼܠܹܗ ܘܝܸܩܕܲܬ̤ ܥܲܢ̈ܐ 186 ܘܠܵ ܐܩܸܨ ܠܵܟ ܕܸܒܼܚܹ̈ܐ ܕܟܲܝܹ̈ܐ ܕܲܡܩܲܪܸܒܼ ܗ̣̄ܘܲܝܬܿ ܀ 187 :ܠܵܫ ܫܠܸܡ ܛܸܒܵܐ ܕܝܲܩܕܵܢ ܥܵܢܹ̈ܐ ܘܪ̈ܵܥܵܘܬܼܵܐ 188 ܘܐܸܬܼܵܐ ܐ̄ܚܪܹܢܵܐ ܕܛܲܥܝܼܢ ܛܸܒܵܐ ܕܓܼܡܠܹ̈ܐ ܕܐܸܒܲܕܼܘ ܀ 189 :ܬܠܵܬܼ ܠܲܡ ܓܘܼܕܲܝܼ̈ܢ ܗܘ̤ܵܘ ܟܲܠܕܵܝܹ̈ܐ ܠܲܬܼܠܵܬܼ ܪ̈ܘܼܚܝܼܢ 190 ܘܲܕܼܒܲܪܘ ܓܼܡܠܹ̈ܐ ܘܲܩܛܲܠܘ ܐ̄ܢܵܫܵܐ ܘܐܸܠܵܐ ܗ̄ܘ̣ ܦܵܫܹ̇ܬܼ ܀ pb. 260 191 :ܬܠܵܬܼܵܐ ܓܹܐܪ̈ܝܼܢ ܫܕܼܵܐ ܡ̇ܪܘܿܕܼܵܐ ܒܛܸܒܹܿ̈ܐ ܬܠܵܬܼܵܐ 192 ܘܠܵܐ ܒܸܪܨܲܬ̤ ܒܹܗ ܚܕܼܵܐ ܠܘܿܠܝܼܬܼܵܐ ܒܙܲܝܢܹܗ ܕܐܝܼܘܿܒܼ ܀ 193 :ܬܠܵܬܼ ܣܲܒܼܪ݁ܵܬܼܵܐ ܡܥܝܼܩܵܢ̈ܝܵܬܼܵܐ ܐܲܦܸܠ ܒܐܸܕܼܢܵܘ̈ܗܝ 194 ܘܠܵܐ ܐܸܬܿܕܲܠܚܲܬ̤ ܫܲܦܝܘܼܬܼ ܢܲܦܫܹܗ ܒܬܸܛܪܹܗ ܕܒܼܝܼܫܵܐ ܀ 195 :ܬܠܵܬܼܵܐ ܥܘܼܩܣܝܼ̈ܢ ܚܲܠܸܦ ܘܲܡ̣ܚܵܝܗܝ ܒܫܸܡܥܹ̈ܐ ܬܠܵܬܼܵܐ 196 ܘܠܵܐ ܦܸܧܚܲܬ̤ ܒܹܗ ܡܸܪܲܬܼ ܒܦܲܓܼܪܹܗ ܕܐܝܼܘܿܒܼ ܀ 197 :ܬܠܵܬܼ ܙܲܒܼ̈ܢܵܬܼܵܐܬ ܐܲܥܸܠ ܒܲܚܪܹܗ ܒܟܼܘܼܪ ܒܘܼܚܪܵܢܵܐ 198 ܘܚܵܘܝܼ ܫܘܼܦܪܹܗ ܕܲܗܒܼܵܐ ܕܢܲܦܫܹܗ ܕܲܟܼܡܵܐ ܢܲܗܝܼܪ ܀ 199 :ܐܲܫܒܿܝܼ ܬܵܘܪܹ̈ܐ ܘܐܵܘܩܸܕܼ ܥܵܢ̈ܐ ܘܲܕܼܒܲܪ ܓܼܡܠܹ̈ܐ 200 ܬܠܵܬܼܵܐ ܢܸܫܒܿܝܼ̈ܢ ܘܦܲܣܸܩ ܐܸܢܘܿܢ ܩܲܠܝܼܠ ܓܸܦܹ̈ܐ ܀ 201 :ܬܠܵܬܼ ܙܲܒܼܢܵܬܼ̈ܐ ܢܚܸܬܼ ܠܐܵܓܼܘܿܢܵܐ ܐܲܬܼܠܹܝܛ ܥܵܘ̣ܠܵܐ 202 ܘܒܲܬܼܠܵܬܲܝ̈ܗܹܝܢ ܣܠܸ̣݂ܩ ܟܲܕܼ ܒܲܗܝܼܬܼ ܕܠܵܐ ܙܵܟܼܘܼܬܼܵܐ ܀ 203 :ܗ̤ܘܲܝ̈ ܨܸܢܥܵܬܹ̈ܗ ܒܲܛܝܼ̈ܠܵܬܼܵܐ ܠܘܵܬܼ ܬܲܡܝܼܡܵܐ 204 ܘܠܵܐ ܐܸܬܼܥܲܪܩܲܠ ܒܲܡܨܝܼ̈ܕܵܬܼܵܐ ܕܐܘܼܡ̇ܢܘܼܬܹܗ ܀ 205 :ܚܵܒܼ݂ ܒܐܵܓܼܘܿܢܹ̈ܐ ܬܠܵܬܼܵܐ ܕܲܥܒ݂ܲܕܼ ܐܵܟܹ̇ܠܩܲܪܨܵܐ 206 ܘܚܲܠܸܦ ܙܲܝܢܵܐ ܘܚܲܕܸܿܬܼ ܕܵܪܵܐ ܕܲܟܼܒܲܪ ܢܸܙܟܸܿܐ ܀ 207 :ܒܢܘܼܪܵܐ ܕܚܸܡܬܹܗ ܡܸܬܼܓܵܘܙܲܠ ܗ̄ܘ̣ܵܐ ܗܵܘ̇ ܚܲܣܵܡܵܐ 208 ܕܒܲܐܝܠܹܝܢ ܦܘܼܪ̈ܣܹܐ ܢܙܝܼܥ ܠܐܲܬܼܠܹܝܛܵܐ ܒܝܲܕܼ ܪܘܼܛܵܢܵܐ ܀ 209 :ܛܢܵܢܵܐ ܕܪܘܼܓܼܙܹܗ ܫܵܓܲ̇ܪ ܗ̄ܘ̣ܵܐ ܠܵܗ̇ ܠܡܲܪܝܼܪܘܼܬܹܗ 210 ܘܡܸܫܬܲܠܗܲܒܼ ܗ̄ܘ̣ܵܐ ܕܲܢܣܝܼܦ ܢܘܼܪܹܗ ܒܝܲܠܕܵܘ̈ܗܝ ܕܐܝܼܘܿܒܼ ܀ 211 :ܒܫܘܼܠܵܩ ܛܸܒܵܐ ܕܓܼܡܠܹ̈ܐ ܕܐܸܒܲܕܼܘ ܚܲܕܸܿܬܼ ܛܸܒܵܐ 212 ܕܡܲܪܝܼܪ ܫܸܡܥܹܗ ܘܗܵܦܹ̇ܟ ܪ̈ܲܚܡܹܐ ܘܕܵܠܲܚ ܢܲܦܫܵܐ ܀ 213 :ܒܢܲܝܝ̈ܟ ܠܲܡ ܫܲܒܼܥܵܐ ܥܲܡ ܐܲܚܘܵܬ̈ܗܘܿܢ ܒܣܵܡܵܐ ܛܲܝܸܒܼܘ 214 ܘܲܠܘܵܬܼ ܒܘܼܟܼܪܵܐ ܟܢ݂ܲܫܘ ܒܐܵܘܝܘܼܬܼܵܐ ܐܲܝܟ ܕܲܡܥܵܕܼܝܼܢ ܀ 215 :ܪܘܼܚܵܐ ܩܫܝܼܬܼܵܐ ܢܸܫܒܲܬ̤ ܡܸܢܫܹܠܝ ܕܠܵܐ ܒܲܥܝܵܕܼܵܐ 216 ܘܙܵܥ ܫܲܬܼܐܸܣܵܘ̈ܗܝ ܕܒܲܝܬܵܐ ܘܲܢܦ݂ܲܠ ܘܲܛ̣ܡܲܪ ܐܸܢܘܿܢ ܀ 217 :ܢܦܲܠ̣ ܬܲܛܠܝܼܠܵܐ ܘܲܛܡ݂ܲܪ ܐܸܢܘܿܢ ܠܥܸܣܪ̈ܵܬܢܲܝܗܘܿܢ 218 ܘܚܲܠܸܛ ܕܸܵܡܗܘܿܢ ܥܲܡ ܟܵܣܲܝ̈ܗܘܿܢ ܒܲܣܡܵܟܲܝ̈ܗܘܿܢ ܀ 219 :ܠܒܹܫ ܡ̇ܪܘܿܕܼܵܐ ܐ̄ܣܟܹܿܝܡ ܚܵܘܣܵܢܵܐ ܕܢܲܛܥܸܐ ܒܐܝܼܘܿܒܼ 220 ܘܒܲܕܼܡܘܼܬܼ ܪܵܚ̇ܡܵܐ ܚܵܘܝܼ ܢܲܦܫܹܗ ܒܛܸܒܵܐ ܕܲܒܼܢܵܘ̈ܗܝ ܀ 221 :ܠܵܐ ܠܲܡ ܡܸܡܬܼܘܿܡ ܓܸܕܼܫܲܬ̤ ܗܵܕܹܐ ܠܘܵܬܼ ܙܲܕܿܝܼܩܹ̈ܐ 222 ܘܠܵܐ ܦܪ݂ܲܥ ܛܵܒܼܵܐ ܗܵܢ ܦܘܼܪܥܵܢܵܐ ܠܲܕܼܪܵܚܹ̇ܡ ܠܹܗ ܀ 223 :ܠܘܵܬܼܵܟ ܐܝܼܘܿܒܼ ܗ̣ܦܲܟ ܒܵܪܘܿܝܵܐ ܛܲܟܼܣܵܐ ܕܪ̈ܲܚܡܵܘܗܝ 224 ܘܠܵܐ ܚܓܲܛ ܪ̈ܲܚܡܹܐ ܒܪܘܼܓܼܙܵܐ ܕܐܲܝܬܿܝܼ ܥܲܠ ܩܸܢܝܵܢܲܝ̈ܟ ܀ 225 :ܠܵܐ ܣܸܦܩܲܬ̤ ܠܹܗ ܕܐܵܘܩܸܕܼ ܥܵܢ̈ܟ ܘܐܲܫܒܿܝܼ ܓܲܡܠܲܝ̈ܟ 226 ܘܐܸܫܕܼ ܚܸܡܬܹܗ ܥܲܠ ܝܵܪ̈ܘܿܬܲܝܟ ܘܩܲܛܸܠ ܐܸܢܘܿܢ ܀ pb. 261 227 :ܠܵܘ ܟܹܐܢܵܐܝܼܬܼ ܣܥ݂ܲܪ ܒܵܪܘܿܝܵܐ ܕܲܛܠ݂ܲܡ ܥܲܡܠܝ̈ܟ 228 ܘܢܸܗܘܸܐ ܕܲܐ̄ܚܪܹܝܢ ܣܥ̣ܵܐ ܥܲܠ ܝܲܠܕܲܝ̈ܟ ܡܨܸܐ ܗ̄ܘ̣ܵܐ ܕܢܸܟܼܠܹܝܘܗܝ ܀ 229 :ܐܸܢܗܘ̤ ܕܫܲܪܝܼܪ ܚܘܼܒܹܿܗ ܨܹܐܕܲܝܟ ܥܲܠ ܡ̇ܢ ܐܲܗܡܝܼ 230 ܘܐܸܢ ܟܹܐܢܵܐܝܼܬܼ ܦܵܪܲܥ ܥܲܡܠܹ̈ܐ ܠܡܵܢ ܐܲܥܘܸܠ ܒܵܟ ܀ 231 :ܐܘܿ ܠܲܢܟܼܝܼܠܵܐ ܕܠܵܐ ܣܸܦܩܲܬ̤ ܠܹܗ ܚܲܪܒܵܐ ܕܐ̄ܢܵܫܵܐ 232 ܘܫܲܪܝܼ ܕܢܹܐܫܘܿܕܼ ܡܸܪܲܬܼ ܪܘܼܓܼܙܹܗ ܥܲܠ ܒܵܪܘܿܝܵܐ ܀ 233 :ܗܘ̤ ܠܲܡ ܐܲܫܸܒܼ ܪܘܼܚܵܐ ܕܪܘܼܓܼܙܵܐ ܘܩܲܛܸܠ ܝܲܠܕܲܝ̈ܟ 234 ܘܲܕܼܣܵܥܹ̇ܐ ܠܵܟ ܒܥܹ̇ܐ ܕܲܢܥܝܼܩܵܟ ܒܝܲܕܼ ܝܵܪ̈ܘܿܬܲܝܟ ܀ 235 :ܒܕܲܪܵܐ ܕܲܒܼܢܵܘ̈ܗܝ ܣܒܲܪ݂ ܡ̇ܪܘܿܕܼܵܐ ܕܚܵܣܹ̇ܝܢ ܗ̄ܘ̣ܵܐ ܠܹܗ 236 ܕܕܲܡ ܥܵܨܹ̇ܐ ܠܹܗ ܚܘܼܒܹܿܗ ܕܝܲܠܕܵܘ̈ܗܝ ܘܡ̇ܘܠܸܕܼ ܪܸܛܢܵܐ ܀ 237 :ܠܚܲܪܬܼܵܐ ܢܲܛܪܹܗ ܐܵܟܹ̇ܠܩܲܪܨܵܐ ܠܕܵܪܵܐ ܩܲܫܝܵܐ 238 ܕܝܵ̇ܕܲܥ ܕܐܲܣܝܼܪ ܚܘܼܒܵܐ ܕܐ̄ܢܵܫܵܐ ܠܘܵܬܼ ܝܲܠܕܲܝ̈ܗܘܿܢ ܀ 239 :ܬܠܵܬܼܵܐ ܩܪ̈ܵܒܹܐ ܥܒ݂ܲܪ ܡ̇ܪܘܿܕܼܵܐ ܥܲܡ ܙܲܕܿܝܼܩܵܐ 240 ܘܒܲܪܒܼܝܼܥܵܝܵܐ ܣܲܦܸܩ ܓܹܐܪ̈ܵܘܗܝ ܘܩܵܡ̣ ܟܲܕܼ ܒܲܗܝܼܬܼ ܀ 241 :ܒܗܵܢ ܬܲܟܼܬܿܘܼܫܵܐ ܬܠܸܐ ܗ̄ܘ̣ܵܐ ܣܲܒܼܪܹܗ ܘܲܡܣܲܟܸܿܐ ܗ̄ܘ̣ܵܐ 242 ܕܫܸܡ ܨܘܿܚܝܼܬܼܵܐ ܢܸܫܡܲܜܥ ܒܲܠܚܘܿܕܼ ܘܢܸܙܟܹܿܝܘܗܝ ܠܐܝܼܘܿܒܼ ܀ 243 :ܠܵܐ ܓܹܝܪ ܣܸܠܩܲܬ̤ ܪܸܓܲܬܼ ܢܲܦܫܹܗ ܠܘܵܬܼ ܫܘܼܠܵܡܵܐ 244 ܘܠܵܐ ܐܲܢܝܼܚܹܗ ܗܵܘ̇ ܬܲܡܝܼܡܵܐ ܒܫܸܡ ܨܘܿܚܝܼܬܼܵܐ ܀ 245 :ܐܘܿ ܐܲܬܼܠܹܝܛܵܐ ܕܙܲܕܿܝܼܩܘܼܬܼܵܐ ܕܲܟܼܡܵܐ ܚܲܡܣܸܢ 246 ܘܠܵܐ ܐܸܬܼܪܲܦܝܼ ܒܝܲܕܼ ܨܸܢ̈ܥܵܬܹܗ ܕܲܒܼܠܕܲܪܵܐ ܀ 247 :ܐܘܿ ܡ̇ܝܘܿܬܼܵܐ ܠܒܼܝܼܫ ܗܲܕܵܡܹ̈ܐ ܕܲܙܟܼܵܐ ܠܚܲܫܹ̈ܐ 248 ܐܘܿ ܒܸܣܪܵܐ ܕܐܸܚܲܪ ܕܵܪܵܐ ܥܲܡ ܪܘܼܚܵܢܵܐ ܀ 249 :ܐܘܿ ܒܲܪ ܐܵܕܼܵܡ ܥܲܦܪܵܐ ܕܐܲܪܥܵܐ ܕܲܛܥ̣ܵܐ ܟܝܵܢܹܗ 250 ܘܠܵܐ ܦܲܟܿܗܬܹܗ ܪܸܚܡܲܬܼ ܝܲܠܕܸܵܘ̈ܗܝ ܠܚܘܼܒܵܐ ܕܡ̇ܪܹܗ ܀ 251 :ܐܘܿ ܪܸܥܝܵܢܵܐ ܟܕܼܝܼܢ ܥܲܡ ܚܲܫܹ̈ܐ ܕܡ̇ܝܘܿܬܼܘܼܬܼܵܐ 252 ܕܠܵܐ ܐܸܬܼܪܲܦܝܼ ܒܚܲܫܵܐ ܕܲܒܼܢܵܘ̈ܗܝ ܠܘܵܬܼ ܪܘܼܛܵܢܵܐ ܀ 253 :ܐܘܿ ܐܵܕܼܵܡܘܿܣ ܕܦܲܠܚܹ݂ܗ ܒܝܼܫܵܐ ܩܫܲܝ̈ܵܐ 254 ܘܠܵܐ ܐܸܬܼܪܲܟܲܟ ܒܲܫܡܘܼ̈ܥܵܬܼܵܐ ܡܥܝܼܢ̈ܝܝܵܬܼܵܐ ܀ 255 :ܠܵܘ ܠܲܟܼܝܵܢܹܗ ܛܥ̣ܵܐ ܡ̇ܝܘܿܬܼܵܐ ܒܚܲܫܹ̈ܐ ܕܲܣܒܹܲܠ 256 ܘܠܵܘ ܐܲܝܟ ܣܵܢܹ̇ܐ ܚܘܼܒܵܐ ܕܲܒܼܢܵܘ̈ܗܝ ܠܵܐ ܪܲܛܸܢ ܗ̄ܘ̣ܵܐ ܀ 257 :ܚܵܐܹ̇ܫ ܗ̄ܘ̣ܵܐ ܓܹܝܪ ܒܚܲܫܹ̈ܐ ܕܲܒܼܢܵܘ̈ܗܝ ܘܲܕܼܩܸܢܝܵܢܵܘ̈ܗܝ 258 ܘܡܲܬܼܒܲܝܲܐ ܗ̄ܘ̣ܵܐ ܒܪܸܚܡܲܬܼ ܡ̇ܪܹܗ ܘܠܵܐ ܡܸܬܼܪܲܦܸܐ ܀ 259 :ܚܘܼܒܵܐ ܒܚܘܼܒܵܐ ܦܲܚܼܡ ܐܝܼܘܿܒܼ ܐܲܝܟ ܦܵܪܘܿܫܵܐ 260 ܘܲܥܠ݂ܲܒܼ ܚܘܼܒܵܐ ܕܪܸܚܡܲܬܼ ܡ̇ܪܹܗ ܠܚܘܼܒܵܐ ܕܲܒܼܢܵܘ̈ܗܝ ܀ 261 :ܐܲܟܼܪܝܼ ܣܲܓܿܝܼ ܥܲܠ ܩܸܢܝܵܢܵܘ̈ܗܝ ܘܠܵܐ ܪܲܛܸܢ ܗ̄ܘ̣ܵܐ 262 ܚܲܫ̣ ܥܲܠ ܝܲܠܕܼܵܘ̈ܗܝ ܘܒܲܝܲܐ ܚܲܫܹܗ ܒܪܸܚܡܲܬܼ ܡ̇ܪܹܗ ܀ 263 :ܨܪܵܐ ܠܲܦܪܝܼܣܵܐ ܬܲܟܼܣܝܼܬܼ ܦܲܓܼܪܹܗ ܘܣܲܦܲܪ ܣܲܥܪܹܗ 264 ܘܠܵܐ ܨܪܵܐ ܠܸܒܹܿܗ ܒܝܲܕܼ ܦܘܼܠܵܓܼܵܐ ܕܥܲܠ ܒܵܪܘܿܝܹܗ ܀ pb. 262 265 :ܥܲܪܛܸܠ ܢܸܦܩܹ̇ܬܼ ܟܲܕܼ ܐܸܬܼܝܲܠܕܹܿܬܼ ܐܸܡ̣ܲܪ ܟܹܐܢܵܐ 266 ܘܥܲܪܛܸܠ ܐܸܗܦܘܿܟ ܕܠܵܐ ܬܲܟܼܣܝܼܬܼܵܐ ܐܲܝܟ ܡ̇ܐ ܐܸܬܹܿܝܬܼ ܀ 267 :ܐܲܠܵܗܝ ܝܲܗ̣̄ܒܼ ܠܝܼ ܘܲܗ̣ܦܲܟ ܫܲܩ̣ܠܹܗ ܫܲܠܝܼܛ ܪܸܡܙܹܗ 268 ܫܡܹܗ ܢܸܬܼܒܲܪܲܟ ܡ̣ܢ ܩܸܢܝܵܢܵܘ̈ܗܝ ܥܲܠ ܟܠ ܕܲܒܼܪ̣ܵܐ ܀ 269 :ܦܪܲܥ ܬܲܡܝܼܡܵܐ ܩܵܠ ܬܵܘܕܲܝܼܬܼܵܐ ܚܠܵܦ ܝܵܪ̈ܘܿܬܼܵܘܗܝ 270 ܘܚܲܬܸܿܡ ܡ̇ܪܹܗ ܥܲܠ ܚܘܼܡܣܵܢܹܗ ܕܠܵܐ ܚ̣ܟܵܐ ܘܪܲܛܸܢ ܀ 271 :ܫܠܸܡ̣ ܬܲܟܼܬܿܘܼܫܵܐ ܕܡ̇ܘܬܵܐ ܕܲܒܼܢܵܘ̈ܗܝ ܘܲܕܼܩܸܢܝܵܢܵܘ̈ܗܝ 272 ܘܫܲܪܝܼ ܡܚܲܕܸܿܬܼ ܙܲܝܢܵܐ ܐ̄ܚܪܹܢܵܐ ܠܐܲܒܼܕܵܢ ܦܲܓܼܪܵܐ ܀ 273 :ܒܢܘܼܪܵܐ ܕܪܘܼܓܼܙܹܗ ܡܸܫܬܲܢܲܩ ܗ̄ܘ̣ܵܐ ܠܘܼܩܒܲܠ ܐܝܼܘܿܒܼ 274 ܕܐܲܝܢܵܐ ܦܲܚܵܐ ܢܥܲܡܸܩ ܢܸܛܡܘܿܪ ܠܩܲܠܝܼܠܘܼܬܹܗ ܀ 275 :ܐܸܒܼܠܵܐ ܗ̄ܘ̣ ܪܲܒܵܐ ܐܸܢ ܙܵܟܹ̇ܐ ܠܝܼ ܥܲܦܪܹܗ ܕܐܵܕܼܵܐ 276 ܘܡܲܗܸܠ ܓܵܚܹ̇ܟ ܒܲܪ ܕܚܝܼܚܵܐ ܥܲܠ ܪܘܼܚܵܢܵܐ ܀ 277 :ܫܒܹ̇ܝܬܼ ܩܸܢܝܵܢܵܘ̈ܗܝ ܘܠܲܒܸܿܒܼ ܢܲܦܫܹܗ ܒܬܼܘܼܟܼܠܵܢ ܡ̇ܪܹܗ 278 ܩܸܛ̇ܠܹܬܼ ܠܲܒܼܢܵܘ̈ܗܝ ܘܒܲܪܸܟ ܠܲܫܡܹܗ ܕܗܘ̤ ܝܲܗ̣̄ܒܼ ܘܲܢܣ݂ܲܒܼ ܀ 279 :ܝܸܕܼܥܹ̇ܬܼ ܡܸܟܹܿܝܠ ܕܠܵܐ ܡܸܬܼܪܲܦܸܐ ܒܒܲܪ̈ܵܝܵܬܼܵܐ 280 ܘܠܵܐ ܡܸܚܸܫ ܠܹܗ ܟܹܐܒܵܐ ܕܝܲܠ̈ܕܵܘܗܝ ܐܲܝܟ ܕܲܩܢܘܿܡܹܗ ܀ 281 :ܠܗܲܝܟܲܠ ܦܲܓܼܪܹܗ ܙܵܕܹܩ ܡܸܟܹܿܝܠ ܕܐܸܩܪܘܿܒܼ ܘܐܸܣܬܿܘܿܪ 282 ܕܐܸܢ ܠܵܐܚܵܐܹ̇ܫ ܒܝܲܕܼ ܗܲܕܵܡ̇ܘ̈ܗܝ ܠܵܐ ܡܸܬܼܪܦܸܐ: ܀ 283 :ܗܵܠܹܝܢ ܗܘ̤ ܒܹܗ ܡܸܬܼܚܲܫܲܕܼ ܗ̄ܘ̣ܵܐ ܥܵܘ̇ܠܵܐܝܼܬܼ 284 ܕܢܲܝܬܸܿܐ ܠܓܸܠܝܵܐ ܪܸܓܼܬܼ ܢܸܟܼܠܹܗ ܡܸܬܼܝܲܐܲܒܼ ܗ̄ܘ̣ܵܐ ܀ 285 :ܓܠ̣ܵܝܗܝ ܒܵܪܘܿܝܵܐ ܠܢܸܟܼܠܹܗ ܟܲܣܝܵܐ ܒܝܲܕܼ ܗܵܝ̇ ܕܐܲܟܼܬܸܿܒܼ 286 ܕܐܸܬܼܵܐ ܐܵܦ ܗܘ̤ ܥܲܡ ܙܲܕܿܝܼܩܹ̈ܐ ܩܕܼܵܡ ܐܲܠܵܗܵܐ ܀ 287 :ܠܚܘܼܫܵܒܼ ܢܸܟܼܠܹܗ ܦܪܣܝܼ ܪܸܡܙܵܐ ܒܝܲܕܼ ܫܘܼܐܵܠܵܐ 288 ܘܗܘ̤ ܠܹܗ ܐܲܟܸܿܣ ܒܝܲܕܼ ܗܵܝ̇ ܕܐܸܡ݂ܲܪ ܕܚܸܕܼ̇ܪܹܬܼ ܒܐܲܪܥܵܐ ܀ 289 :ܗܵܐ ܣܵܡ̣ܬܿ ܠܸܒܵܟ ܥܲܠ ܥܲܒܼܕܿܝ ܐܝܼܘܿܒܼ ܐܲܫܡܲܥ ܨܹܐܕܼܵܘܗܝ 290 ܕܬܲܡܝܼܡ ܘܲܬܼܪܝܝܼܨ ܘܠܲܝܬܿ ܐܲܟܼܟܵܬܹܗ ܕܲܡܝܲܩܲܪ ܠܝܼ ܀ 291 :ܠܵܐ ܡܸܬܼܪܲܦܸܐ ܡ̣ܢ ܟܹܐܢܘܼܬܼܵܐ ܘܬܲܡܝܼܡܘܼܬܼܵܐ 292 ܘܡܲܛܸܢ ܐܲܢ̄ܬܿ ܠܝܼ ܕܐܵܘܒܸܿܕܼ ܒܐܝܼܕܲܝ̈ܟ ܠܥܲܒܼܕܵܐ ܛܵܒܼܵܐ ܀ 293 :ܦܲܢܝܼ ܢܟܼܠܵܐ ܠܪܸܡܙܵܐ ܟܲܣܝܵܐ ܕܡ̣ܢ ܒܵܪܘܿܝܵܐ 294 ܕܠܵܘ ܕܝܼܠܹܗ ܗ̄ܘ̣ ܡܸܫܟܵܐ ܕܲܒܼܠܲܥ ܒܓܹܐܪܹ̈ܐ ܕܲܡܚܘܼܬܼܝ ܀ 295 :ܟܠ ܠܲܡ ܕܲܩܢܸܐ ܝܵܗܹ̇ܒܼ ܓܲܒܼܪܵܐ ܘܡܲܚܸܐ ܢܲܦܫܹܗ 296 ܕܢܲܦܫܵܐ ܗ̄ܘ̣ ܒܲܠܚܘܿܕܼ ܪܵܚܹ̇ܡ ܐ̄ܢܵܫܵܐ ܡ̣ܢ ܟܠܡܸܕܸܿܡ ܀ 297 :ܘܐܸܢ ܨܵܒܹ̇ܐ ܐܲܢ̄ܬܿ ܕܬܹܐܠܲܦ ܗܵܕܹܐ ܥܢ̣ܵܐ ܡܲܪܵܚܵܐ 298 ܐܵܘܫܸܛ ܐܝܼܕܼܵܟ ܘܲܡܚܝܼܘܗܝ ܩܲܠܝܼܠ ܘܗܵܐ ܟܵܦܲ݁ܪ ܒܵܟ ܀ 299 :ܘܐܸܢ ܡܵܚܹ̇ܐ ܐܲܢ̄ܬܿ ܫܲܒܼܛܵܐ ܕܐܝܼܕܼܵܟ ܥܲܠ ܗܲܕܵܡ̇ܘ̈ܗܝ 300 ܒܐܲܦܲܝ̈ܟ ܩܵܐܹ̇ܡ ܘܲܡܨܲܚܸܐ ܠܵܟ ܕܠܵܐ ܟܘܼܚܵܕܼܵܐ ܀ 301 ܚܵܪ̣ ܝܵ̇ܕܲܥ ܟܠ ܒܪܸܓܲܬܼ ܢܲܦܫܹܗ ܕܐܵܟܹ̇ܠܩܲܪܨܵܐ: pb. 263 302 ܘܝܲܗ̣̄ܒܹܿܗ ܠܐܝܼܘܿܒܼ ܕܢܸܚܘܿܬܼ ܥܲܡܹܗ ܠܕܼܪܵܐ ܕܦܵܓܼܪܹܗ ܀ 303 :ܗܵܐ ܠܲܡ ܡܲܫܠܲܡ ܐܝܼܘܿܒܼ ܒܐܝܼܕܲܝ̈ܟ ܪܡܲܙ̣ ܠܹܗ ܟܲܣܝܵܐ 304 ܢܲܦܫܹܗ ܒܲܠܚܘܿܕܼ ܠܵܐ ܡܲܦܲܝ ܠܵܟ ܠܡܸܣܲܒܼ ܡܵܢܹܗ ܀ 305 :ܐܲܪܓܸܿܫ ܒܝܼܫܵܐ ܕܐܲܗܡܝܼ ܛܵܒܼܵܐ ܡ̣ܢ ܒܲܪ ܒܲܝܬܹܿܗ 306 ܘܲܡ̣ܬܲܚ ܩܸܫܬܹܿܗ ܘܲܡ̣ܠܵܗ̇ ܓܹܐܪܹ̈ܐ ܕܢܘܼܪܵܐ ܕܪܘܼܓܼܙܹܗ ܀ 307 :ܢܦܲܩ̣ ܠܲܡ ܒܝܼܫܵܐ ܘܲܡ̣ܚܲܝܗܝ ܠܐܝܼܘܿܒܼ ܒܫܘܼܚܢܵܐ ܒܝܼܫܵܠ 308 ܡ̣ܢ ܪܹܫ ܓܘܼܫܡܹܗ ܥܕܲܡ̇ܐ ܠܪܸ̈ܓܼܠܵܘܗܝ ܕܠܵܐ ܚܵܘܣܵܐ ܀ 309 :ܫܒܘܼܚܢܵܐ ܣܲܪܝܵܐ ܢܲܣܟܹܿܗ ܠܦܲܓܼܪܹܗ ܐܲܝܟ ܕܲܒܼܟܼܘܼܪܵܐ 310 ܘܲܡ̣ܪܲܩ ܡܸܢܹܗ ܨܵܐܬܼܵܐ ܕܚܲܫܹ̈ܐ ܒܪܸܬܼܚܹܗ ܩܲܫܝܵܐ ܀ 311 :ܣܲܦܸܩ ܐܸܢܘܿܢ ܠܓܹܐܪ̈ܲܝ ܚܸܡܬܹܗ ܒܢܘܼܪܵܐ ܕܲܫܓܲܪ 312 ܘܦܲܓܼܪܹܗ ܕܐܝܼܘܿܒܼ ܡܸܫܦܲܪ ܫܲܦܲ݁ܪ ܒܫܲܠܗܹܒܼܝܼܬܼܵܐ ܀ 313 :ܢܚܸܬܼܘ ܕܲܪܵܪܹ̈ܐ ܬܪܹܝܢ ܕܲܠܩܲܘܼܒܼܠܹ̈ܐ ܠܒܹܝܬܼ ܬܲܟܼܬܿܘܼܫܵܐ 314 ܪܹܫܵܐ ܕܐܵܐܲܪ ܘܦܲܓܼܪܵܢܵܝܵܐ ܠܒܼܝܼܫ ܗܲܕܵܡܹ̈ܐ ܀ 315 :ܙܟܼܵܐ ܦܲܓܼܪܵܢܵܐ ܠܪܘܼܚܵܢܵܝܵܐ ܒܚܹܝܠ ܨܸܒܼܝܵܢܵܐ 316 ܘܚܵܒܼ݂ ܪܘܼܚܵܢܵܐ ܡ̣ܢ ܦܲܓܼܪܵܐ ܒܪܲܦܝܘܼܬܼ ܢܲܦܫܵܐ ܀ 317 :ܩܵܡ̣ ܐܲܬܼܠܹܝܛܵܐ ܕܙܲܕܿܝܼܩܘܼܬܼܵܐ ܒܐܸܣܛܵܕܼܝܼܘܿܢ 318 ܘܐܸܚܲܕܼ ܕܵܪܵܐ ܒܸܣܪܵܢܵܝܵܐ ܥܲܡ ܪܘܼܚܵܢܵܐ ܀ 319 :ܟܢܲܫ݂ܘ ܚܲܘܵܝܹ̈ܐ ܕܐܲܬܼܠܹܝܛܘܼܬܼܵܐ ܟܸܢܫܲܝ̈ ܪܵܘܡ̇ܐ 320 ܘܲܬܼܗܲܪܘ ܐܲܟܲܚ̄ܕܼ ܒܦܲܓܼܪܵܢܵܝܵܐ ܕܲܙܟܼܵܐ ܠܪܘܼܚܵܐ ܀ 321 :ܐܘܿ ܬܲܟܼܬܿܘܼܫܵܐ ܚܲܕܼܬܼܵܐ ܕܲܗܘ̤ܵܐ ܕܠܵܐ ܒܲܥܝܵܕܼܵܐ 322 ܕܐܲܝܢܵܐ ܕܒܼܵܠܲ݁ܥ ܠܹܗ ܡܸܬܼܦܲܢܸܐ ܟܠܝܼܠ ܙܵܟܼܘܼܬܼܵܐ ܀ 323 :ܒܠܲܥ̣ ܦܲܓܼܪܵܢܵܐ ܡ̣ܢ ܪܘܼܚܵܢܵܐ ܘܒܲܣܒܸܿܣ ܓܘܼܫܡܹܗ 324 ܘܲܒܼܚܘܼܒܵܠܹܗ ܫܲܩ݂ܲܠ ܙܵܟܼܘܼܬܼܵܐ ܐܲܝܟ ܫܲܪܝܼܪܵܐ ܀ 325 :ܣܬ݂ܲܪ ܡ̇ܪܘܿܕܼܵܐ ܠܒܸܢܝܵܢ ܦܲܓܼܪܹܗ ܘܲܒܼܢ̣ܵܐ ܠܢܲܦܫܹܗ 326 ܒܪ̣ܵܐ ܗܲܕܵܡ̇ܘ̈ܗܝ ܘܚܲܝܸܨ ܙܵܘܥܵܘ̈ܗܝ ܒܝܲܕܼ ܚܘܼܡܵܣܵܢܵܐ ܀ 327 :ܢܝܼܫܵܐ ܩ̣ܒܲܥܘ ܗ̄ܘ̣ܵܘ ܒܝܼܫܵܐ ܘܐܝܼܘܿܒܼ ܒܹܝܬܼ ܐܵܓܼܘܿܢܵܐ 328 ܕܐܲܝܢܵܐ ܕܚܵܢܹ̇ܐ ܒܝܲܕܼ ܨܸܒܼܝܵܢܐ ܟܠܝܼܠܵܐ ܢܵܣܹ̇ܒܼ ܀ 329 :ܡ̣ܬܲܚ ܨܼܒܼܝܵܢܹܗ ܦܲܓܼܪܵܢܵܝܵܐ ܠܢܝܼܫܵܐ ܕܲܩ̣ܒܲܥܘ 330 ܘܣܲܩܦܸܩ ܓܹܐܪ̈ܵܘܗܝ ܪܘܼܚܵܢܵܝܵܐ ܠܟܼܵܐ ܡ̣ܢ ܢܝܼܫܵܐ ܀ 331 :ܐܘܿ ܩܲܫܬܵܐ ܕܲܢܨܲܚ ܘܲܙܟܼܵܐ ܒܟܼܠ ܬܲܟܼܬܿܘܼܫܝܼ̈ܢ 332 ܘܚܲܕܼ ܥܲܦܪܵܢܵܐ ܪܡ̇ܝ̣ܗܝ ܟܲܕܼ ܝܲܬܿܝܼܒܼ ܘܲܫܠܝܼܚ ܙܲܝܢܹܗ ܀ 333 :ܐܘܿ ܡ̇ܝܘܿܬܼܵܐ ܟܝܵܢܵܐ ܫܝܼܛܵܐ ܕܕܵܪܫܘܼܗܝ ܕܲܝܘܹ̈ܐ 334 ܕܩܵܡ̣ ܟܲܕܼ ܢܲܦܝܼܠ ܐܲܪܡܝܼ ܐܸܢܘܿܢ ܬܲܚܬܲܝ ܪ̈ܓܼܠܵܘܗܝ ܀ 335 :ܐܘܿ ܐܲܬܼܠܹܝܛܵܐ ܦܲܓܼܪܵܢܵܝܵܐ ܕܐܲܚܕܵܝ̈ܗܝ ܪ̈ܘܼܚܹܐ 336 ܘܦܲܠܸܛ ܢܲܦܫܹܗ ܝܲܩܝܼܪ ܓܘܼܫܡܵܐ ܡ̣ܢ ܩܲܠܝܼܠܹ̈ܐ ܀ 337 :ܐܘܿ ܡܲܠܵܚܵܐ ܕܪܵܕܹܐ ܒܝܲܡܵܐ ܒܣܲܬܼܘܵܐ ܩܲܫܝܵܐ 338 ܘܠܵܐ ܛܲܒܲܥܬܼܵܗ̇ ܫܓܼܝܼܫܘܼܬܼ ܓܼܠ̈ܠܹܐ ܠܗܲܝܡܵܢܘܼܬܹܗ ܀ pb. 264 339 :ܫܲܓܼܫܹܗ ܒܝܼܫܵܐ ܒܝܲܡܵܐ ܕܦܲܓܼܪܹܗ ܥܲܡ ܪܸܥܝܵܢܹܗ 340 ܘܐܲܣܪ̣ܵܗ̇ ܠܸܐܠܦܵܐ ܒܚܘܼܡܣܵܢ ܢܲܦܫܹܗ ܕܠܵܐ ܬܸܬܿܛܲܒܲܥ ܀ 341 :ܢܫܲܒܼ݂ܘ ܒܹܗ ܛܸܒܹܿܐ ܐܲܝܟ ܥܲܠܥܵܠܹ̈ܐ ܘܠܵܐ ܐܸܬܼܪܲܦܝܼ 342 ܘܢܲܩ̣ܫܹܗ ܚܲܫܵܐ ܕܡ̇ܘܬܵܐ ܕܲܒܼܢܵܘ̈ܗܝ ܘܠܵܐ ܐܸܬܼܦܲܠܲܓܼ ܀ 343 :ܚܲܒܼܛܵܗ̇ ܒܝܼܫܵܐ ܠܚܲܩܠܵܐ ܕܦܲܓܼܪܹܗ ܒܒܲܪܕܼܵܐ ܕܟܹܐܒܹ̈ܐ 344 ܘܲܦܪ݂ܲܥ ܦܘܼܡܹܗ ܩܵܠ ܬܸܫܒܿܘܿܚܬܵܐ ܚܠܵܦ ܓܘܼܕܵܦܵܐ ܀ 345 :ܫܒܼ݂ܵܐ ܩܸܢܝܵܢܵܘ̈ܗܝ ܐܵܟܹ̇ܠܩܲܪܨܵܐ ܕܢܸܫܒܸܿܐ ܠܸܒܹܿܗ 346 ܘܣܲܬܲܪ ܥܘܼܬܼܪܵܐ ܕܟܲܣܝܘܼܬܼ ܢܲܦܫܹܗ ܒܓܼܵܘ ܡ̣ܢ ܩܘܼܫܬܵܐ ܀ 347 :ܕܠܵܐ ܐܸܬܼܪܲܦܝܼ ܒܐܲܒܼܕܵܢ ܢܸܟܼܣܵܘ̈ܗܝ ܘܚܲܫܲܝ̈ ܦܲܓܼܪܹܗ 348 ܓܼܕܲܠ ܠܹܗ ܡ̇ܪܹܗ ܟܠܝܼܠ ܙܵܟܼܘܼܬܼܵܐ ܚܠܵܦ ܐܘܼܠܨܵܢܵܘ̈ܗܝ ܀ 349 :ܕܲܕܼܪܲܫ ܐܘܼܪܚܵܐ ܨܹܝܕܼ ܟܹܐܢܘܼܬܼܵܐ ܒܦܘܼܪܫܵܢ ܢܲܦܫܹܗ 350 ܥܲܒܼ݂ܕܹܿܗ ܐܘܼܪܚܵܐ ܕܢܸܪܕܿܘܿܢ ܐ̄ܢܵܫܵܐ ܒܕܼܘܼܡܝܵܐ ܕܥܲܡܠܵܘ̈ܗܝ ܀ 351 :ܕܩܲܒܸܿܠ ܢܝܼܫܵܐ ܕܙܵܟܼܘܼܬܼ ܩܘܼܫܬܵܐ ܠܘܼܩܒܲܠ ܒܝܼܫܵܐ 352 ܪܫܲܡ̣ ܕܘܼܟܼܪܵܢܹܗ ܒܲܕܼܡܘܼܬܼ ܨܲܠܡܵܐ ܠܓܼܵܘ ܡ̣ܢ ܣܸܦܪ̈ܵܘܗܝ ܀ 353 :ܐܲܝܟ ܡܲܚܙܝܼܬܼܵܐ ܠܫܲܦܝܘܼܬܼ ܢܲܦܫܵܐ ܟܬ݂ܲܒܼ ܕܘܼܟܼܪܵܢܹܗ 354 ܕܢܸܡܪܘܿܩ ܟܠܢܵܫ ܣܲܢܝܘܼܬܼ ܢܲܦܫܹܗ ܒܫܘܼܦܪ̈ܵܘܗܝ ܕܐܝܼܘܿܒܼ ܀ 355 :ܒܗܵܕܹܐ ܬܸܢܘܲܝ ܩܲܠܸܣ ܐܸܢܘܿܢ ܛܵܒܼܵܐ ܠܟܹܐܢܹ̈ܐ 356 ܕܢܸܗܘܘܿܢ ܨܲܠܡܵܐ ܒܝܲܕܼ ܥܲܡܠܲܝ̈ܗܘܿܢ ܠܟܲܣܝܘܼܬܼ ܩܘܼܫܬܵܐ ܀ 357 :ܠܵܘ ܩܘܼܠܵܣܹ̈ܐ ܐܲܪ̈ܥܵܢܵܝܹܐ ܓܼܕܲܠ ܠܐܲܬܼܠܹܝܛܵܘ̈ܗܝ 358 ܛܢܵܢܵܐ ܐܲܪܡܝܼ ܒܐܲܪܥܵܐ ܠܐ̄ܢܵܫܵܐ ܠܘܵܬܼ ܟܹܐܢܘܼܬܼܵܐ ܀ 359 :ܒܚܲܫܵܘ̈ܗܝ ܕܐܝܼܘܿܒܼ ܦܬ݂ܲܚ ܐܵܓܼܘܿܢܵܐ ܠܐܲܬܼܠܹܝܛܘܼܬܼܵܐ 360 ܘܫܲܪܝܼ ܒܸܣܪܵܐ ܠܡܹܐܚܲܕܼ ܕܲܪܵܐ ܥܲܡ ܪ̈ܘܼܚܵܢܹܐ ܀ 361 :ܗܘ̤ܵܘ ܢܸܨܚܵܢܵܘ̈ܗܝ ܐܲܝܟ ܟܵܪ̈ܘܿܙܹܐ ܒܐܸܕܼܢܲܝ̈ ܟܠܢܵܫ 362 ܕܚܲܡܣܸܢܘ ܐ̄ܢܵܫܵܐ ܘܠܵܐ ܬܸܬܼܪܲܦܘܿܢ ܒܚܲܫܲܝ̈ ܦܲܓܼܪܵܐ ܀ 363 :ܐܲܝܟ ܫܝܼܦܘܿܪܵܐ ܩܵܥܹ̇ܐ ܟܠܢܵܫ ܥܲܠ ܙܵܟܼܘܼܬܹܗ 364 ܕܩܲܠܝܼܠ ܙܲܒܼܢܵܐ ܘܲܙܥܘܿܪ ܚܲܫܵܐ ܘܪܲܒܿ ܦܘܼܪܥܵܢܵܐ ܀ 365 :ܥܲܡ ܟܠ ܘܲܒܼܟܼܠ ܗܘ̤ ܡܸܣܬܵܘܲܕܼ ܒܚܲܫܹܐ ܕܲܣܒܲܠ 366 ܕܠܵܐ ܠܲܡ ܫܵܘܹ̇ܝܢ ܚܲܫܹ̈ܐ ܕܙܲܒܼܢܵܐ ܠܫܘܼܒܼܚܵܐ ܕܲܥܬܼܝܼܕܼ ܀ 367 :ܢܸܗܘܸܐ ܐܝܼܘܿܒܼ ܐܲܝܟ ܡܲܚܙܝܼܬܼܵܐ ܠܪܲܦܝܘܼܬܼ ܢܲܦܫܲܢ 368 ܕܟܲܕܼ ܦܲܓܼܪܵܢܵܐ ܗ̄ܘ̣ ܒܚܲܫܲܝ̈ ܦܲܓܼܪܵܐ ܙܟܼܵܐ ܠܪܘܼܚܵܢܵܐ ܀ 369 :ܒܐܘܼܪܚܵܐ ܕܥܲܡܠܵܘ̈ܗܝ ܢܸܪܕܸܿܐ ܟܠ ܫܵܥ ܕܠܵܐ ܪܘܼܛܵܢܵܐ 370 ܘܲܒܼܚܘܼ ܡܣܵܢܹܗ ܢܸܬܼܪܘܿܨ ܢܝܼܫܵܐ ܠܗܲܝܡܵܢܘܼܬܲܢ ܀