On Solomon - ܥܲܠ ܫܠܹܝܡܘܿܢ ܘܥܲܠ ܓܒܝܼܬܹܗ ܘܥܲܠ ܕܝܢܘܼܬܹܗ

1 :ܕܘܝܼܕ ܡܲܠܟܵܐ ܫܩ̣ܠ ܫܘܠܛܢܵܐ ܕܡܠܟܘܼܬ ܥܵܠܲܡ 2 ܘܝܗܒܹܗ ܠܒܼܪܗ ܕܠܵܐ ܢܬܕܓܲܠ ܫܘܼܘܕܵܝ ܡܸܠܵܘ̈ܗܝ. 3 :ܚܙ̣ܵܐ ܒܲܪ ܐܝܫܲܝ ܕܒܝܘܒܠܹܗ ܟܣܹܐ ܡܘܼܠܟܵܢܵܐ 4 ܘܙܗܪ ܠܲܒܼܪܗ ܕܠܵܐ ܢܬܪܦܹܐ ܘܒܘܒܸܕ ܕܲܪܓܹܗ. 5 :ܫܡܲܥ ܕܠܥܠܲܡ ܡܬܝܼܚ ܗ̄ܘ̣ ܫܒܼܛܵܐ ܕܪܹܫܢܵܘܼܬܹܗ 6 ܘܩܲܕܸܡ ܝܗܒܗ ܬܓܹܗ ܠܒܼܪܗ ܒܲܥܬܝܼܕܘܼܬܼܵܐ. 7 :ܒܚܵܝܵܘ̈ܗܝ ܝܗܒ̣ܠܗ ܬܓܼܐ ܕܝܗ̣ܒܠܹܗ ܡܲܠܟܵܐ ܕܥܲܠ ܟܠ 8 ܕܚ̣ܙܵܐ ܕܥܬܝܕ ܒܝܼܫܐ ܠܡܸܚܛܲܦ ܪܒܘܼܬ ܕܪܓܹܗ. 9 :ܛܒܼܥܗ ܠܬܓܹܗ ܒܛܝܒܼܥܵܐ ܕܡܸܫܚܵܐ ܕܠܵܐ ܢܸܫܬܚܠܲܦ 10 ܘܒܸܚܙܹܐ ܒܝܼܫܵܐ ܘܢܚܕܐ ܒܒܸܙܚܵܐ ܕܫܘܘܕܵܝ ܡܪܹܗ. 11 :ܒܡܫܚܵܐ ܕܩܘܕܫܵܐ ܛܒܼܥܹܗ ܠܬܵܓܹܗ ܡܲܠܟܵܐ ܢܒܼܝܼܬܼܵܐ 12 ܕܠܵܐ ܢܟܘܢܝܗܝ ܢܟܼ̈ܠܐ ܨܢܝ̈ܥܹܐ ܕܢܟܘܠܬܢܹ̈ܐ. 13 :ܡܦ̣ܣ ܗ̄ܘ̣ܵܐ ܟܐܢܵܐ ܕܕܪܐܐܚ̇ܕ ܒܪܹܗ ܥܲܡ ܒܝܼܫܵܐ 14 ܘܩܕܡ ܡܫܚܗ ܕܬܫܲܪܲܥ ܡܢܗ ܐܝܕܵܐ ܕܒܝܼܫܵܐ. 15 :ܠܫܠܝܡܘܿܢ ܝܗܒ̣ ܬܓܼܐ ܘܕܲܪܓܼܵܐ ܕܪܫܢܘܼܬܼܵܐ 16 ܕܢܗܘܹܐ ܫ̇ܠܡ ܫܡܹܗ ܒܥ̇ܒܕܐ ܠܫܝܢܵܐ ܕܐ̄ܢܫܵܐ. 17 :ܫܝܢܵܐ ܪܵܒܵܐ ܟܣܹܐ ܗ̄ܘ̣ܵܐ ܒܫܡܵܐ ܕܐܬܢܬܝܼ ܠܹܗ 18 ܘܓܼܠܝܗܝ ܕܵܘܝܼܕ ܒܬܵܓܼܵܐ ܘܕܪܓ̣ܐ ܕܐܓܥܸܠ ܒܐܝܼܕܵܘ̈ܗܝ. 19 :ܫܡܹܗ ܩܕܡܝܵܐ ܪܚܝܼܡ ܠܐܠܵܗܵܐ ܩܪ̣ܝܗܝ ܓܸܠܝܢܵܐ 20 ܘܫܡܵܐ ܐ̄ܚܪܢܐ ܪܚ̇ܡ ܫܲܝܢܵܐ ܕܒܢܝ̈ܫܐ. 21 :ܫܡܗ̈ܐ ܕܐܢܹ̈ܐ ܐܬܟܢܝܼܘ ܠܹܗ ܒܢܒܝܼܘܼܬܼܵܐ 22 ܚܲܕ ܡ̣ܢ ܢܵܬܲܢ ܘܚܲܕ ܡ̣ܢ ܕܵܘܝܼܕ ܢܒܼܝܹ̈ܐ ܒܚܝܼܕܹ̈ܐ 23 :ܢܬܢ ܢܫܝܼܵܐ ܩ̣ܪܵܝܗܝ ܝܲܕܝܼܕܵܐ ܡܪܝܵܐ ܪܚܡܹܗ 24 ܘܕܘܝܕ ܟܢܝܗ ܫܠܝܡܘܿܢ ܫܲܝܢܵܐ ܡܫܝܢ ܐ̄ܢܫܵܐ. 25 :ܢܡܘܣܐܝܼܬ ܣܡ̣ܘ ܠܹܗ ܫܡܵܗܹ̈ܐ ܠܢܡܘܿܣܝܵܐ 26 ܕܠܘܩܕܼܵܡ ܢܪܚܡ ܠܐܠܗ ܟܠܵܐ ܘܟܢ ܠܥܒܕܵܘܗܝ. 27 :ܪܚܡܲܬ ܩܘܼܫܬܼܵܐ ܘܪܵܚܡܲܬܼ ܫܲܝܢܵܐ ܡܠܹܝܢ ܫܘܼܡܗܵܘ̈ܗܝ 28 ܘܒܬܪܬܝܗܹܝܢ ܫܒܼܵܐ ܒܲܪ ܐܝܼܫܲܝ ܕܢܓܼܡܘܪ ܠܲܒܼܪܹܗ. 29 :ܚܟܝܡܐܝܼܬ ܣܥ̣ܪ ܚܲܟܝܡܵܐ ܒܫܘܼܠܵܡ ܚܲܝܵܘ̈ܗܝ 30 ܕܐܲܡܠܟ ܠܒܼܪܹܗ ܘܐܲܠܦܹܗ ܚܝܠܵܐ ܕܟܣܹܐ ܒܫܡܹܗ. 31 :ܠܒܪܹܗ ܐܫܠܸܡ ܬܓܹܗ ܘܕܲܪܓܹܗ ܡܲܠܟܵܐ ܟܹܐܢܵܐ 32 ܕܢܗܘܹܐ ܪܵܕܐ ܥܲܡ ܝܘܒܠܹܗ ܫܘܘܕܵܝ ܡܸܠܵܘ̈ܗܝ. 33 :ܠܫܘܘܕܵܝ ܡܪܹܗ ܪܚܸܡ ܫܪܝܼܪܵܐ ܡ̣ܢ ܟܠܡܸܕܡ 34 ܘܐܦ ܗܘ̤ ܡܵܪܹܗ ܦܲܪܥܹܗ ܚܘܒܵܐ ܕܪܲܒ ܡ̣ܢ ܚܘܼܒܹܗ. 35 :ܒܝܲܕ ܣܘܥܪ̈ܢܹܐ ܚܬܸܡ ܡܠܘ̈ܗܝ ܨܝܕ ܒܲܪ ܒܲܝܬܹܗ 36 ܕܝܩܲܪ ܠܒܼܪܗ ܒܚܟܡܲܬܼ ܩܘܼܫܬܵܐ ܕܕܡܝܵܐ ܠܕܬܒܘܼܗܝ. 37 :ܒܐܒܘܼܗܝ ܕܡܝܼ ܒܲܪ ܚܟܝܼܡܵܐ ܒܪܸܫ ܡܲܠܟܘܼܬܹܗ 38 ܘܐܲܝܟ ܝܠܘܕܹܗ ܬܒܼܥ ܟܹܐܢܘܼܬܵܐ ܘܡܟܟ ܥܘ̣ܠܵܐ. pb. f.276r 39 :ܠܘܩܒܼܵܠ ܥܘ̣ܠܵܐ ܙܹܝܢ ܢܦܲܫܹܗ ܓܲܢ̄ܒܪܐܝܼܬ 40 ܘܐܝܟ ܐܲܬܠܹܝܛܵܐ ܢܚܸܬ ܠܐܓܘܿܢܵܐ ܕܙܕܝܼܩܘܼܬܼܵܐ. 41 :ܛܲܠܝܵܐ ܫܒܼܪܐ ܐܚܲܕ ܫܒܼܛܵܐ ܕܪܫܢܘܼܬܼܵܐ 42 ܘܐܲܪܝܼܡ ܐܝܼܕܹܗ ܠܡܢܓܼܕܘܼ ܠܥܘ̣ܠܵܐ ܛܪܘܢܵܐ. 43 :ܢܟܼܠܵܐ ܩܫܝܵܐ ܡܬܚܹܗ ܠܥܘܠ̣ܐ ܕܒܢܲܝ̈ ܥܲܡܹܗ 44 ܘܡ̣ܢ ܩܫܝܼܘܼܬܹܗ ܕܚܸܠܘ ܥܘ̣̈̇ܠܐ ܕܒܼܒܹܝܬ ܥܲܡܡܹ̈ܐ. 45 :ܒܩܫܝܘܼܬ ܢܓܕܘ̈ܗܝ ܬܗ̣ܪܘ ܥܘ̈̇ܠܐ ܘܬܗܲܪܘ ܟܸܐܢܹ̈ܐ 46 ܕܟܼܡܵܐ ܕܡ̇ܐ ܡܲܡܠܠܵܐ ܕܦܘܼܡܹܗ ܠܐܒܘܼܗܝ ܕܵܘܝܼܕ. 47 :ܚܟܡܲܬܼ ܩܘܼܫܬܐ ܕܒܝܠܕܹܗ ܫܡ̣ܥܘ ܡ̣ܢ ܦܘܼܡܹܗ 48 ܘܕܚܸܠܘ ܡܢܹܗ ܛܒܹ̈ܐ ܘܒܝܼܫܹ̈ܐ ܘܨܵܬܼܘ ܦܘܼܩܕܢܵܘ̈ܗܝ. 49 :ܪܸܡܙܵܐ ܕܓܒܵܝܗܝ ܐܪܡܝܼ ܩܸܢܛܵܐ ܒܪ̈ܥܝܢܲܝܗܘܿܢ 50 ܘܟܲܕ ܠܐܨܒܹܝܢ ܫܠܸܡܘ ܠܓܒܼܝܬܹܗ ܘܝܩܲܪܘ ܕܲܪܓܹܗ. 51 :ܗܘ̤ ܬܘܼܒܼ ܪܡܙܵܐ ܚܲܝܸܠ ܙܘܥܵܘ̈ܗܝ ܒܚܝܹܠ ܚܟܡ̈ܬܐ 52 ܘܥܕܹܗ ܠܗܘܢܹܗ ܣܝܡܲܬܼ ܡܬܠ̈ܐ ܕܲܣܬܝܼܪ̈ܵܬܵܐܐ. 53 ܐܲܝܟ ܒܹܝܬܼ ܓܲܙܵܐ ܦܬܚܹܗ ܠܗܵܘܢܹܗ ܒܥܲܡܵܐ ܨܪܝܼܟܐ 54 ܘܐܥܬܪ ܐܸܢܘܿܢ ܒܒܼܘܚܪܵܢ ܕܝܼܢܵܐ ܕܒܹܝܬܼ ܛܵܒܼ ܘܲܠܒܝܼܫ. 55 :ܨܪܝܼܟ ܗ̄ܘ̣ܵܐ ܥܡܵܐ ܡ̣ܢ ܒܘܼܚܪܢܵܐ ܕܕܝ̇ܢܘܼܬܹܗ 56 ܘܪܕܦܹܗ ܠܚܫܟܵܐ ܕܡܣܒܼ ܒܐܦܹ̈ܐ ܡ̣ܢ ܓܵܘ ܥܲܡܵܐ. 57 :ܒܕܝܢܵܐ ܕܩܛܠܵܐ ܒܚܪܹܗ ܠܕܩܕܵܡ ܪܸܡܙܵܐ ܕܓܒܼܵܝܗܝ 58 ܘܕܚ̣ܙܵܐ ܕܕܟܹܐ ܨܪܹܗ ܠܫܘܼܦܪܹܗ ܠܥܹܝܢ ܚܙܝ̈ܐ. 59 :ܒܝܲܕ ܙܢܝ̈ܬܐ ܙܠܝܼܠ̈ܬܐ ܒܩܵܝܗܝ ܠܲܫܪܵܪܹܗ 60 ܘܒܣܘܥܪ̈ܢܹܐ ܦܫܩܹܗ ܠܫܡܹܗ ܕܪܚ̇ܡ ܫܲܝܢܵܐ ܗ̄ܘ̣. 61 :ܬܲܪܬܹܝܢ ܫܛܝ̈ܢ ܥܡ̣ܪ ܫܘܒܐܝܼܬ ܟܲܕ ܠܵܐ ܫܘܝ̈ܢ 62 ܘܒܛܢ ܘܐܘܸܠܓ ܥܘ̤̈ܠܐ ܫܘܝ̈ܐ ܒܢܩܦܵܐ ܠܝܼܓܼܵܐ. 63 :ܠܵܐ ܫܘܝܼ̈ܬܐ ܒܛܸܢ ܫܲܘܝܵܐܝܼܬ ܒܙܒܼܢܵܐ ܫܘܝܵܐ 64 ܘܡܢܥ ܘܡܛܝ̈ ܠܛܟܼܣܵܐ ܕܝܼܠܕܵܐ ܕܣܝܼܡ ܒܟܼܝܢܵܐ. 65 :ܠܵܐ ܫܲܘܝܘܼܬܼܗܹܝܢ ܓܠܬ̤ ܬܚܦܝܼܬܼܵܐ ܕܣܘܼܥܪ̈ܢܲܝܗܹܝܢ 66 ܘܐܥܠܲܬ̤ ܐܸܢܹܝܢ ܠܒܘܼܚܪܢ ܟܘܪܐ ܕܕܝܼܢܵܐ ܟܹܐܢܵܐ. 67 :ܙܠܝܼܠܐܝܼܬ ܕܡܟ ܫܝ̈ܛܬܐ ܐܝܟ ܕܡ̈ܥܕܵܢ 68 ܘܚܣܟ ܐܢܝܢ ܝܘܩܪܐ ܕܫܸܢܬܼܵܐ ܘܠܵܐ ܢܵܕ ܘܐܲܪܓܸܫ. 69 :ܚܕܵܐ ܓܹܝܪ ܕܡܟܬ̤ ܘܩܛܠܲܬ̤ ܠܒܼܪܗ̇ ܚܒܢܢܐܝܼܬ 70 ܘܚܕܵܐ ܛܒܥܬ̤ ܘܠܵܐ ܐܬܬܥܝܼܪܲܬ̤ ܒܚܘܼܠܵܨ ܥܵܘ̣ܠܵܗ̇. 71 :ܡܠܝܬ̤ ܥܘܠ̣ܐ ܕܡܟܲܬ̤ ܩܛܠܲܬ̤ ܘܩܡܲܬ̤ ܓܸܢܒܲܬ̤ 72 ܘܡܠܝܬ̤ ܪ̈ܚܡܹܐ ܫܟܒܲܬ̤ ܫܬܩܲܬ̤ ܘܩܡܬ̤ ܬܡܗܬ̤. 73 :ܠܒܲܪ ܡ̣ܢ ܛܟܼܣܵܐ ܙܟܬܗ̇ ܫܢܬܵܐ ܠܚܒܢܢܬܵܐ 74 ܘܠܵܐ ܐܬܬܥܝܲܪܬ̤ ܠܩܵܠ ܝܠܘܼܕܵܗ̇ ܟܲܕ ܡ[ܬ]ܛܪܦ. 75 :ܝܘܼܩܪܵܐ ܕܥܘ̣ܠܵܗ̇ ܢܦܸܠ ܥܲܠ ܥܘܸܠܗ̇ ܘܫܬܸܩ ܚܲܝܵܘ̈ܗܝ 76 ܘܡ̣ܢ ܕܐܬܬܥܝܼܪܲܬ̤ ܠܐ ܐܬܬܥܝܼܪܲܬ̤ ܥܘܿܠܘܬܵܗ̇. 77 :ܦܓܪܗ̇ ܒܠܚܘܿܕ ܢܕ ܡ̣ܢ ܫܢܬܵܐ ܕܝܲܩܝܼܪܘܼܬܼܵܐ 78 ܘܢܦܫܗ̇ ܛܒܥܲܬ̤ ܒܝܘܩܪܵܐ ܕܥܘ̣ܠܵܐ ܕܠܑܵܐ ܒܲܡܫܘܚܬܵܐ. 79 :ܥܘ̣ܠܐ ܩܫܝܬܼܵܐ ܨܒܲܬ̤ ܕܬܫܡܸܫ ܒܡܘܬܹܗ ܕܒܼܪܵܗ̇ 80 ܘܚܠܦ ܥܘ̣ܠܗ̇ ܒܛܢܬ̤ ܘܝܠܕܲܬ̤ ܥܘ̣ܠܵܐ ܥܦܝܼܦܵܐ. 81 :ܚܙܬ̤ ܫܛܝܼܬܵܐ ܕܗܘ̤ܬ ܓܘܡܟܵܐ ܒܝܲܕ ܪܦܝܘܼܬܵܗ̇ 82 ܘܒܛܢܬ̤ ܢܟܼܠ̇ܐ ܘܠܝܕܵܬ̤ ܥܵܘ̣ܠܵܐ ܕܬܐܣܹܐ ܨܲܥܪܵܗ̇. 83 :ܚܙܬ̤ ܕܐܬܓܙܝܬ̤ ܡ̣ܢ ܬܪܒܝܼܬܼܵܐ ܕܦܹܐܪܵܐ ܡܠܝܼܠܵܐ 84 ܘܙܩܪܲܬ̤ ܢܚܬܵܐ ܕܓܢܒܘܬ̈ܐ ܕܬܬܟܣܹܐ ܒܹܗ. 85 :ܐܲܝܟ ܓܲܝܣܵܐ ܢܦܠܲܬ̤ ܡ̣ܢܫܲܠܝ ܥܲܠ ܒܲܪܬ ܙܘܓܵܗ̇ 86 ܘܚܛܦܬ̤ ܡܸܢܗ̇ ܥܘ̤ܠܐ ܚܝܵܐ ܘܣܡܬ̤ ܚܝܼܬܼܵܐ. 87 :ܥܘ̤ܠܐ ܒܥܘ̤ܠܵܐ ܨܒܬ̤ ܕܐܚܠܦ ܡܠܝܲܬ̤ ܥܵܘ̣ܠܵܐ 88 ܘܥܘ̇ܠܐܝܼܬ ܫܩܠܲܬ̤ ܚܝܵܐ ܘܣܡܲܬ̤ ܡܝܼܬܼܵܐ. pb. f.276v 89 :ܚܝܐ ܫܩܠܬ̤ ܘܡܝܵܬܐ ܣܵܡܲܬ̤ ܚܘܨܦܢܝܼܬܼܵܐ 90 ܘܟܲܕ ܡܬܦܪܣܐ ܕܬܐܣܹܐ ܚܸܣܕܵܗ̇ ܣܓܝܼ ܠܹܗ ܨܲܥܪܵܗ̇. 91 :ܒܥܘܸܠܐ ܚܝܐ ܨܒܬ̤ ܕܬܨܒܸܬ ܣܢܝܘܼܬ ܢܲܦܫܵܗ̇ 92 ܘܒܒܼܪܗ̇ ܡܝܼܬܐ ܨܒܬ̤ ܕܬܨܥܲܪ ܠܦܐܝܘܼܬ ܪ̈ܲܚܡܹܐ. 93 :ܒܝܠܕܗ̇ ܡܦܪܬ̤ ܓܘܼܡܕܢܐܝܼܬ ܕܠܵܘ ܕܝܼܠܵܗ̇ ܗ̄ܘ̣ 94 ܘܠܕܠܗ̇ ܕܝܼܠܗ̇ ܩܪܬܹܗ ܕܝܼܠܵܗ̇ ܟܕ ܠܵܐ ܐܝܼܬܼܵܘܗܝ. 95 :ܠܕܠܐ ܕܝܠܗ̇ ܥܦܸܩ ܥܘܒܗ̇ ܥܕܲܡܵܐ ܠܨܦܪܵܐ 96 ܘܠܐ ܝܕܥܵܐ ܗ̄ܘ̣ܵܬ ܕܐܬܐ ܢܘܼܗܪܵܐ ܘܡܦܪܣܹܗ ܠܗ̇. 97 :ܥܕܵܢ ܨܦܪܐ ܐܥܝܼܪ ܐܸܢܘܿܢ ܠܙܠܝܼ̈ܠܬܐ 98 ܘܩܡ ܕܢܢܨܪ̈ܵܢ ܠܕܠ̈ܐ ܕܝܼܠܗܹܝܢ ܐܲܝܟ ܠܕܝܼܠܗܹܝܢ. 99 :ܓܢܒܼܘܼܬܼܵܐ ܗܦܟܬܹܗ ܠܛܟܼܣܐ ܕܝܠܕܬܵܐ 100 ܘܟܕ ܕܝܠܗܹܝܢ ܗ̄ܘ̣ܵܘ ܘܠܵܘ ܕܝܠܗܹܝܢ ܗ̄ܘ̣ܵܘ ܫܪܝܼܪܐܝܼܬ. 101 :ܠܕܠܵܐ ܕܝܼܠܗܹܝܢ ܛܥܲܢ ܬܪܬܝܗܹܝܢ ܟܲܕܒܼܵܐܝܼܬ 102 ܥܕܡܵܐ ܕܐܲܟܣܗ̇ ܥܸܕܢ ܨܦܪܵܐ ܠܟܕܒܘܼܬܼܵܐ. 103 :ܨܦܪܐ ܚܘܝܗ̇ ܠܟܕܒܘܼܬܼܵܐ ܒܦܪܨܘܿܦ ܥܘ̤̈ܠܐ 104 ܘܒܨܘܪ̈ܬܗܘܿܢ ܦܪܣ ܘܓܼܠܵܗ̇ ܠܢܟܼܝܠܘܼܬܼܵܐ. 105 :ܒܦܪܨܘܿܦ ܥܘ̤ܠܐ ܚܪܬ̤ ܐܡܹܗ ܕܥܘ̤ܠܐ ܚܝܵܐ 106 ܘܚܙܬ̤ ܕܡܝܬܐ ܕܪܡܹܐ ܒܥܘܼܒܵܗ̇ ܠܵܘ ܕܝܼܠܗ̇ ܗ̄ܘ̣. 107 :ܓܡܚܵܐ ܐܚܕܗ̇ ܥܲܠ ܣܘܼܥܪ̈ܢܹܐ ܕܕܠܵܐ ܢܵܡܘܿܣ 108 ܕܓܢܝܼܒ ܥܘ̤ܠܵܗ̇ ܘܪܡܐ ܒܥܪܣܗ̇ ܥܘ̤ܠܐ ܐ̄ܚܪܢܵܐ. 109 ܕܠܵܐ ܢܡܘܣܵܐ ܣܥܬ̤ ܣܪܘܚܬܵܐ ܥܲܠ ܒܲܪܬ ܙܵܘܓܵܗ̇. 110 ܘܚܪܡܵܢܵܐܝܼܬܼ ܓܢܒܬ̤ ܡܸܢܵܗ̇ ܥܘ̤ܠܐ ܚܝܵܐ. 111 ܙܝܢܵܐ ܕܚܘܼܨܦܵܐ ܠܒܸܫ ܪܥܝܢܗ̇ ܕܚܘܨܦܢܝܼܬܼܵܐ. 112 ܘܫܪܝܬ̤ ܣܪܒܼܵܐ ܕܠܵܘ ܕܝܠܗ̇ ܗܘ̤ ܥܘ̤ܠܐ ܡܝܬܼܵܐ. 113 :ܐܲܝܟ ܕܒܐ ܓܼܘܢܵܐ ܢܦ̣ܠ ܬܪܬܝܗܹܝܢ ܒܚܘܼܫܵܐ ܘܚܘܸܨܦܵܐ 114 ܘܡܬܟܬ̈ܫܵܢ ܗܘ̣̈ܝ ܥܲܠ ܙܟܘܬܵܐ ܕܥܘ̤ܠܐ ܚܝܵܐ. 115 :ܐܡܹܗ ܕܚܝܐ ܒܙܝܒܵܐ ܕܚܘܼܒܵܐ ܡܬܟܬܫܵܐ ܗ̄ܘ̣ܵܬ 116 ܘܐܡܹܗ ܕܡܝܼܬܼܵܐ ܒܙܲܝܢܵܐ ܢܟܝܼܠܐ ܕܣܪܘܿܒܼܘܼܬܼܵܐ. 117 :ܐܡܗ ܕܚܝܐ ܪ̈ܲܚܡܹܐ ܥܨܵܐܘܼܗ̇ ܕܬܒܼܥܐ ܕܝܼܠܵܗ̇ 118 ܘܚܨܦܵܐ ܓܪܓܵܗ̇ ܠܚܘܼܨܦܢܝܼܬܼܵܐ ܕܬܚܛܘܿܦ ܡܓܢ. 119 :ܩܪܒܼܵܐ ܪܒܵܐ ܥܒܲܕ ܫܛܝ̈ܬܐ ܥܲܠ ܥܘ̤ܠܝ̈ܗܹܝܢ 120 ܘܠܐ ܢܚ ܩܸܐܪܣܗܹܝܢ ܥܕܡܵܐ ܕܫܡܲܥ ܡܠܟܵܐ ܘܲܥܡܵܐ. 121 :ܛܒܵܐ ܕܩܸܛܠܵܐ ܫܡ̣ܥ ܒܲܪ ܕܵܘܝܼܕ ܕܐܬܼܐ ܠܐܸܕܢܵܘ̈ܗܝ 122 ܘܛܢ ܘܐܬܥܙܲܙ ܠܡܦܫܩܘ ܫܡܹܗ ܒܥ̇ܒܕܐ. 123 :ܠܫܝܢܵܐ ܕܐ̄ܢܫܐ ܓܒ̣ܝܗܝ ܦܘܩܕܢܵܐ ܕܫܠܝܼܛ ܥܲܠ ܟܠ 124 ܘܫܪܝ ܐܵܦ ܗܘ̤ ܠܡܫܝܢܘܼ ܠܐ̄ܢܫܐ ܒܫܡܗ. 125 :ܒܝܲܕ ܣܘܥܪ̈ܢܹܐ ܨܒܼܵܐ ܕܢܲܚܵܘܝܼܘܗܝ ܠܫܝܢܵܐ ܕܫܡܗ 126 ܘܙܲܡܸܢ ܘܩ̣ܪܐ ܠܫܒܛܲܝ̈ ܥܲܡܵܐ ܠܡܫܡܲܥ ܕܝܼܢܹܗ. 127 :ܟܠܗܘܿܢ ܫܒ̈ܛܐ ܟܢܲܫܘ ܕܢܨܘܼܬܘܢ ܕܝܢܵܐ ܚܲܕܬܵܐ 128 ܕܒܚܲܕ ܬܘܼܬܹܗ ܢܚܙܘܿܢ ܚܲܝܠܵܐ ܕܒܼܒܲܪ ܕ̈ܘܝܼܕ. 129 :ܚܲܝܠܵܐ ܕܝܗܒ̣ ܒܹܗ ܚܹܝܠ ܚܟܡ̈ܬܐ ܟܲܢܸܫ ܐܸܢܘܿܢ 130 ܕܒܓܠܝ̈ܬܐ ܢܚܙܘܿܢ ܚܲܝܠܵܐ ܕܣܬܝܼܪ̈ܬܐ. 131 :ܟܢܫ̈ܝܼܢ ܟܢܫܝ̈ܢ ܩܡ̣ܘ ܟܠ ܬܓܡܝܼ̈ܢ ܕܲܢܨܘܬܘܼܢܵܝܗܝ 132 ܘܡܣܟܝܼܢ ܗ̄ܘ̣ܵܘ ܕܐܸܡܲܬܝ ܢܦܬܲܚ ܬܪܲܥ ܪܥܝܢܹܗ. 133 :ܒܕܡܘܼܬ ܡܦ̈ܢܹܐ ܡܬܝܐܒܝܼܢ ܗ̄ܘ̤ܵܘ ܥܠܝܡܹ̈ܐ ܘܣܒܹ̈ܐ 134 ܠܡܫܡܲܥ ܡܸܠܬܐ ܡ̣ܢ ܦܘܼܡ ܛܲܠܝܵܐ ܕܐܡܠܟ ܡ̣ܢܫܸܠܝ. 135 :ܒܚܒ̈ܐܐ ܕܪܓܬܐ ܩܡܘ ܟܠ ܡܘܼܫܚܵܢ ܒܥܕܵܢ ܕܝܼܢܵܐ 136 ܕܐܡܬܝ ܢܘܠܸܕ ܠܒܹܗ ܕܡܲܠܟܵܐ ܕܝܼܢܹܗ ܕܥܘ̤ܠܐ. 137 :ܐܦ ܠܹܗ ܠܡܲܠܟܐ ܚܒܼܠܹ̈ܐ ܕܩܘܼܫܬܼܵܐ ܥܨܝ̇ܢ ܗ̄ܘ̣ܵܘ ܠܹܗ 138 ܕܐܡܲܬܝ ܢܸܓܼܠܹܐ ܟܣܝܘܼܬ ܥܘܠܐ ܩܕܼܵܡ ܚܲܙܝܹ̈ܐ. pb. f.277r 139 :ܐܲܝܛ ܝܵܠܕܬܵܐ ܩܡ ܪܥܝܢܹܗ ܕܡܵܘܠܸܕܼ ܡܬܠܹ̈ܐ 140 ܘܡܚܒܠ ܗ̄ܘ̣ܵܐ ܕܡܘܠܕ ܡܸܠܬܼܵܐ ܕܠܵܐ ܒܘܼܣܪܵܢܵܐ. 141 :ܦܩ̣ܕ ܚܕܝܼܡܵܐ ܘܥܲܠ ܫܛܝ̈ܬܐ ܘܩܡ ܒܹܝܬܼ ܕܝܼܢܵܐ 142 ܘܫܲܪܝܼ ܒܥܝ̈ܢ ܚܕܵܐ ܡ̣ܢ ܚܘܒܵܐ ܘܚܲܕܵܐ ܒܚܘܼܨܦܵܐ. 143 :ܐܡܹܗ ܕܚܐ ܬܢܬ̤ ܬܫܥܝܼܬܼܵܐ ܒܲܣܝܼܡܵܐܝܼܬ 144 ܘܐܸܡܹܗ ܕܡܝܼܬܼܵܐ ܡܚܬ̤ ܒܟܼܪܘܡܐ ܓܘܼܡܕܢܐܝܼܬ. 145 :ܪܚܡܬ̤ ܥܘ̤ܠܗ̇ ܬܒܥܬ̤ ܥܘ̤ܠܵܗ̇ ܚܢܒܢܐܝܼܬ 146 ܘܩܛܠܬ̤ ܠܒܪܗ̇ ܩܥܲܬ̤ ܒܫܝܐܝܼܬ ܕܠܵܐ ܟܘܼܚܕܵܐ. 147 :ܒܚܘܨܦܢܝܼܬܼܵܐ ܬܡܲܗ ܒܲܪ ܕܘܝܼܕ ܕܟܼܡܵܐ ܠܒܼܝܼܒܼܵܐ 148 ܘܚܪ ܘܐܬܒܝܢ ܕܐܝܟܵܢ ܢܫܠܝܗ̇ ܠܫܓܝܼܫܘܼܬܵܗ̇. 149 :ܚܙܗ̇ ܕܠܒܼܝܼܒܼܵܐ ܟܪܘܡܵܐ ܩܲܫܝܵܐ ܕܣܪܘܿܒܘܼܬܼܵܐ 150 ܘܒܠܥܕ ܣܗܕ̈ܐ ܠܵܐ ܡܬܬܟܣܵܐ ܟܕܒܘܼܬܵܗ̇. 151 :ܚܙ̣ܵܐ ܕܐܸܢ ܐܡ̇ܪ ܕܕܝܼܠܵܗ̇ ܐܝܬܼܘܗܝ ܥܘ̤ܠܵܐ ܡܝܼܬܼܵܐ 152 ܣܪܒܐ ܠܩܘܼܒܼܠܹܗ ܟܡܐ ܐܸܢ ܡܠܟܵܐ ܗ̄ܘ̣ ܕܠܵܘ ܕܝܼܠܹܗ ܗ̄ܘ̣. 153 :ܚܪ ܕܐܸܢ ܦܵܩܸܕ̇ ܢܬܠܘܢ ܥܘ̤ܠܵܐ ܠܚܪܡܢܝܼܬܼܵܐ 154 ܪܢܐ ܥܡܐ ܕܡ[...]ܒܼ ܒܐܦܵܐ ܥܒܕ ܒܗ ܒܕܝܫܵܐ. 155 :ܚܙ̣ܸܵܐ ܕܐܸܢ ܫ̇ܪܐ ܚܪܝܵܢ ܢܫܹ̈ܐ ܕܠܵܐ ܢܸܣܝܢ̇ܐ 156 ܠܵܐ ܡܬܓܠܝܵܐ ܚܟܡܲܬܼ ܩܘܼܫܬܵܐ ܕܫܪܝܵܐ ܒܛܵܘܹܗ. 157 :ܚܟܝܡܐܝܼܬ ܚܵܪ ܒܹܗ ܒܕܝܼܢܵܐ ܕܐܬܩܪܲܒ ܠܹܗ 158 ܘܒܢܐܣܝܢܵܐ ܒܲܕܸܩ ܘܓ̣ܠܝܗܝ ܠܥܝܢ ܚܙܝܹ̈ܐ. 159 :ܒܝܲܕ ܢܣܝܢܵܐ ܦܩ̣ܕ ܚܟܝܼܡܵܐ ܒܲܪ ܚܟܼܝܼ̈ܡܹܐ 160 ܕܢܐܬܹܐ ܣܲܝܦܵܐ ܘܢܫܪܹܐ ܗܸܪܬܵܐ ܕܬܪܬܝܼܢ ܢܫܝܼ̈ܢ. 161 :ܠܟܼܘܪܐ ܕܣܝܦܵܐ ܢܥܸܠ ܐܸܢܹܝܢ ܠܙܐܝܼ̈ܠܬܐ 162 ܘܢܚܙܹܐ ܐܝܼܕܐ ܗ̄ܝ̣ ܐܡܹܗ ܕܚܝܐ ܘܐܡܹܗ ܕܡܝܼܬܼܵܐ. 163 :ܣܝܦܐ ܢܗܘܹܐ ܣܗܕܵܐ ܓܲܠܝܵܐ ܒܥܘ̣ܠܵܐ ܟܲܣܝܵܐ 164 ܘܗܘ̤ ܢܒܼܕܸܩܠܲܢ ܕܕܡ̇ܢ ܐܝܼܬܵܘܗܝ ܥܘ̤ܠܵܐ ܚܲܝܵܐ. 165 :ܗܘ̤ ܢܓܼܠܹܐ ܠܲܢ ܥܲܠ ܛܫܝ̈ܬܹܗ ܕܝܨܪܵܐ ܢܟܝܼܠܵܐ 166 ܘܢܫܬܥܐ ܠܲܢ ܕܐܝܟܢ ܚܠܦ ܥܘ̤ܠܵܐ ܒܥܘ̤ܠܐ. 167 :ܒܬܗܪܵܐ ܪܲܒܵܐ ܩܡ̣ܘ ܥܒܪܵܝܹܐ ܒܦܘܼܩܕܵܢ ܡܲܠܟܵܐ 168 ܘܡܬܕܡܪܝܼܢ ܗ̄ܘ̣ܵܘ ܒܕܝܼܢܵܐ ܚܲܕܬܵܐ ܕܠܵܐ ܒܲܥܝܵܕܵܐ. 169 :ܒܹܝܬܼ ܦܘ̈ܠܓܐ ܩܡܘ ܫܡܘܥܵܘ̈ܗܝ ܕܒܥ̇ܐ ܣܲܝܦܵܐ 170 ܕܫܪܝܼܪ ܕܝܼܢܹܗ ܐܘ ܠܵܐ ܫܲܪܝܼܪ ܡܬܪܢܹܝܢ ܗ̄ܘ̣ܵܘ. 171 :ܠܦܝܓܼܝܼ̈ ܠܸܒܵܐ ܕܓܘܼܚܟܵܐ ܚܲܫܒܘܼܗ̇ ܠܡܠܬܼܵܐ ܕܐܡ̣ܪ 172 ܘܪ̈ܚܡܝ ܩܘܫܬܐ ܪܢܵܘ ܕܫܪܪܐ ܟܣܹܐ ܒܦܘܼܩܕܵܢܵܐ. 173 :ܒܠܵܐ ܫܘܝܘܼܬܵܐ ܕܪ̈ܥܝܢܲܝܗܘܿܢ ܚܪ ܒܲܪ ܕܵܘܝܼܕ 174 ܘܒܥ̣ܐ ܣܝܦܵܐ ܕܢܒܚܘܿܪ ܐܸܢܘܿܢ ܥܲܡ ܣ̄ ܙܲܢܝ̈ܬܐ. 175 :ܐܲܝܟ ܕܠܢܫ̈ܐ ܐܥܸܠ ܐܢܘܿܢ ܠܟܼܘܿܪ ܒܘܼܚܪܢܵܐ 176 ܘܕܟܝܼ ܡܢܗܘܿܢ ܠܙܐܦܵܐ ܢܕܝܼܕܵܐ ܕܠܵܐ ܫܲܘܝܘܼܬܼܵܐ. 177 :ܐܬܵܐ ܣܲܝܦܵܐ ܘܩܲܣܛܘܼܢܪܵܐ ܩܡܘ ܒܹܝܬ ܕܝܢܵܐ 178 ܘܦܩܕ ܡܠܟܵܐ ܠܡܦܣܲܩ ܠܲܬܼܪܹܝܢ ܠܥܘ̤ܠܵܐ ܚܲܝܵܐ. 179 :ܦܘܼܣܩ̣ܘܗܝ ܠܲܬܪܸܝܢ ܠܥܘ̤ܠܐ ܚܲܝܵܐ ܦܩܲܕ ܒܲܪ ܕܵܘܝܼܕ 180 ܘܗܒܼܘ ܗܲܕܡܵܘ̈ܗܝ ܦܠܓܐ ܠܚܕܵܐ ܘܠܦܓܐ ܠܚܕܵܐ. 181 :ܥܲܠ ܚܝܘܬܹܗ ܟܬܝܫ̈ܢ ܩܥܝ̈ܢ ܙܠܝ̈ܠܬܐ 182 ܢܘܦܘܢ ܚܝܘ̈ܗܝ ܘܗܵܐ ܡܫܬܝܼ̈ܢܲܢ ܡ̣ܢ ܬܟܬܘܼܫܵܐ. 183 :ܒܩܐ ܪܣܵܐ ܪ̈ܡܝܢ ܕܐܝܕܐ ܬܸܙܟܹܐ ܒܩܢܝܢ ܚܲܝܵܘ̈ܗܝ 184 ܢܣܒܢ ܡܢܹܗ ܒܚܕܵܐ ܫܘܝܘܼ ܡܫܠܹܐ ܩܸܐܪܣܵܐ. 185 :ܐܡܹܗ ܕܚܲܝܵܐ ܚܙܬ̤ ܦܘܼܩܕܵܢܹܗ ܕܡܲܠܟܵܐ ܕܪܗܝܼܒ 186 ܘܪܢܬ̤ ܕܟܒܪ ܒܩܘܼܫܬܐ ܒ̇ܥܐ ܠܡܩܛܲܠ ܠܲܒܼܪܵܗ̇. 187 :ܚܙܬ̤ ܕܐܪܝܡܹܗ ܩܣܛܘܢܪܵܐ ܠܣܝܦܵܐ ܠܛܝܼܫܵܐ 188 ܘܪܗܸܛܘ ܪ̈ܚܡܝܗ̇ ܘܐܚܕܘܼܗ̇ ܠܐܹܝܕܹܗ ܡ̣ܢ ܕܲܠܡܸܩܛܲܠ. 189 ܟܝܢܵܐ ܙܩܬܵܗ̇ ܠܡܬܒܲܥ ܚܘܼܒܵܐ ܕܣܝܼܡ ܒܟܝܼܢܵܐ: pb. f.277v 190 ܘܐܠܦܗ̇ ܠܡܟܼܠܐ ܡܘܬܼܵܐ ܪܗܝܼܒܼܵܐ ܕܦܘܼܩܕܵܢ ܡܲܠܟܵܐ. 191 :ܠܵܐ ܒܲܪ ܕܘܝܕ ܠܵܐ ܟܹܐܝܢ ܕܝܼܢܵܟ ܩܥܲܬ̤ ܒܼܝܢ ܕܝܼܢܵܐ 192 ܘܠܵܘ ܟܹܐܢܵܐܝܼܬ ܦܩܲܕܬܿ ܥܲܠ ܥܘ̤ܠܵܐ ܚܝܵܐ ܕܢܡܘܼܬ. 193 :ܥܩܸܒ ܫܦܝܼܪ ܡܠܟܵܐ ܟܐܢܵܐ ܘܟܸܢ ܩܲܛܠ ܐ̄ܢܬ 194 ܘܠܵܐ ܬܣܬܪܗܲܒܼ ܠܡܐ ܫܲܕ ܠܲܕܡܵܐ ܕܠܵܐ ܒܘܼܚܪܵܢܵܐ. 195 :ܚܘܪܒܲܪ ܟܐܢܵܐ ܒܐܒܘܟ ܟܐܢܵܐ ܘܐܸܕܲܡܵܐ ܠܹܗ 196 ܘܝܩܲܪ ܩܘܫܬܼܵܐ ܕܕܣܹܐ ܒܫܡܵܟ ܐܝܟ ܝܵܠܘܿܕܲܟ. 197 :ܚܙܝܼ ܠܐ ܬܫܪܐ ܬܚܘܡܵܐ ܟܐܢܵܐ ܕܬܚܸܡ ܐܒܘܼܟ 198 ܘܠܵܐ ܬܬܝܠܦ ܠܡܲܥܠܲܒܼ ܐ̄ܢܫܐ ܒܡܣܒ ܒܐܦܹ̈ܐ. 199 :ܠܵܐ ܬܬܸܠ ܠܹܗ ܐܲܬܪܲܐ ܠܥܘܼܠܵܐ ܠܡܸܬܪܵܘܪܵܒܘܼ 200 ܒܲܕ ܚ̇ܙܐ ܠܟ ܕܪܕܐ ܐܢܬ ܒܐܘܼܪܚܵܐ ܕܢܟܼܝܼܠܘܼܬܼܵܐ. 201 :ܠܵܐ ܬܚܒܠܝܼܘܗܝ ܠܥܘ̣ܠܐ ܚܝܵܐ ܟܕ ܠܵܐ ܚܲܝܒ 202 ܘܠܵܐ ܬܬܛܥܲܦ ܒܕܡܵܐ ܚܲܣܝܵܐ ܕܪܡ ܡ̣ܢ ܚܘܒܹ̈ܐ. 203 :ܗܒܼܝܗܝ ܟܠܹܗ ܠܚܘܼܨܦܢܝܼܬܼܵܐ ܘܢܸܗܘܹܐ ܕܝܼܠܵܗ̇ 204 ܘܠܵܐ ܬܦܠܓܝܼܘܗܝ ܠܡܢܘ̈ܬܐ ܕܠܵܐ ܠܝܘܼܬܪܢܵܐ. 205 :ܠܵܐ ܡܨܝܵܐ ܐ̄ܢܐ ܕܐܚܙܐ ܒܡܵܘܬܹܗ ܟܕ ܡܬܦܣܲܩ 206 ܘܐܸܢ ܚܙܝܵܐ ܐ̄ܢܵܐ ܛܵܒܼ ܠܝܼ ܡܵܘܬܼܵܐ ܛܵܒܼ ܡ̣ܢ ܚܲܝܹ̈ܐ. 207 :ܐܹܝܘ ܠܟܼܝܢܵܐ ܟܡܵܐ ܛܲܢ ܘܲܬܼܒܵܥ ܬܒܼܥܬܐ ܕܚܘܼܒܹܗ 208 ܘܠܵܐ ܐܬܪܦܝܼ ܒܥܕܢ ܩܸܐܪܣܵܐ ܕܒܥܠܕܪܹܗ. 209 :ܐܹܝܘ ܟܡܵܐ ܐܩܪܸܒܼ ܓܲܢ̄ܒܪܐܝܬ ܠܘܼܩܒܼܵܠ ܣܲܝܦܵܐ 210 ܘܠܐ ܝܗ̣ܒ ܐܬܪܐ ܕܢܸܬܪܘܿܥ ܣܕܪܐ ܕܚܲܡܝܼܡܘܼܬܹܗ. 211 :ܐܝܘ ܟܡܵܐ ܥܙܝܼ ܠܡܸܬܟܬܫܘܼ ܚܘܼܒܵܢܵܐܝܼܬ 212 ܘܠܵܐ ܚܒܼ ܘܐܫܦܸܠ ܡ̣ܢ ܦܘܼܩܕܢܵܐ ܕܡܲܟܵܐ ܘܚܲܝܠܹܗ. 213 :ܐܝܘ ܠܙܢܝܼܵܬܐ ܪܵܚܡܢܝܼܬܵܐ ܟܡܵܐ ܓܵܠܘ ܪ̈ܚܡܹܝܗ̇ 214 ܕܝܗܒܬ̤ ܥܘ̤ܠܐ ܠܚܘܼܨܦܢܝܼܬܵܐ ܕܒܲܠܚܘܿܕ ܢܚܐ. 215 :ܐܘ ܠܫܛܝܼܬܵܐ ܚܪ ܡܢܝܼܬܼܵܐ ܟܡܵܐ ܠܵܐ ܚܣܬ̤ 216 ܕܫܐ ܠܬ̤ ܕܢܡܘܼܬ ܥܘ̤ܠܐ ܚܝܵܐ ܕܠܵܐ ܬܬܦܪܣܹܐ. 217 :ܐܘ ܟܡܵܐ ܩܢܬ̤ ܗ̄ܘ̣ܵܬ ܓܘܼܡܕܵܢܵܐܝܼܬ ܠܸܒܵܐ ܕܟܹܐܦܵܐ 218 ܕܠܵܐ ܐܬܪܟܘܬ̤ ܟܲܕ ܚܪ ܣܲܝܦܵܐ ܠܩܘܼܒܼܠܹܗ ܕܛܲܠܝܵܐ. 219 :ܐܘ ܟܡܵܐ ܩܥܬ̤ ܗܘ̤ܬ ܚܘܨܦܢܝܼܬܼܵܐ ܩܕܼܵܡ ܒܲܪ ܕܵܘܝܼܕ 220 ܕܠܵܐ ܕܝܼܠܝ ܢܸܗܘܹܐ ܐܵܦ ܠܵܐ ܕܝܼܠܟܹܝ ܡܢܘܼܬ ܐܲܝܟ ܕܦܣܝܼܩ. 221 :ܒܚܘܨܦܗ̇ ܬܡܗ ܗ̄ܘ̣ܵܐ ܫܠܹܝܡܘܿܢ ܫܝܢܐ ܡܫܝܸܢ ܐ̄ܢܵܫܵܐ 222 ܘܡܢܹܗ ܕܚܘܼܨܦܗ̇ ܝܲܠܦܹܗ ܠܢܟܼܠܐ ܕܟܼܣܹܐ ܒܠܸܒܵܗ̇. 223 :ܒܚܘܼܒܵܐ ܘܪ̈ܚܡܹܐ ܕܐܸܡܹܗ ܕܛܲܠܝܵܐ ܬܡܗ ܒܲܪ ܕܵܘܝܼܕ 224 ܘܡ̣ܢ ܚܢ̈ܓܬܗ̇ ܦܪ̣ܫ ܘܐܣܬܟܲܠ ܕܗ̤ܝ ܗ̣̄ܝ ܐܸܡܹܗ. 225 :ܗ̇ܝ ܗ̤ܝ ܐܸܡܹܗ ܘܣܗܲܕ ܚܘܼܒܵܗ̇ ܕܕܝܼܠܗ̇ ܐܝܼܬܵܘܗܝ 226 ܗܒܼ ܟܲܕ ܚܲܝ ܘܬܚܕܐ ܒܚܝ̈ܘܗܝ ܐܲܝܟ ܡܵܐ ܕܫܐܲܠܲܬ̤. 227 :ܙܟܬ̤ ܙܢܝܼܬܼܵܐ ܘܣܡ ܠܵܗ̇ ܡܲܠܟܵܐ ܟܠܝܼܠܵܐ ܥܘ̣ܠܗ̇ 228 ܘܒܼܗܸܬܼ ܚܘܼܨܦܗ̇ ܕܚ̄ܘܨܦܢܝܼܬܼܵܐ ܘܢܦܩܲܬ̤ ܥܲܪܛܸܠ. 229 ܟܠܝܼܠ ܩܘܠܣܹ̈ܐ ܓܕܠܘ ܚܙ̈ܝܹܐ ܠܡܲܠܟܿܐ ܟܹܐܢܵܐ. 230 ܕܫܦܝܼܪ ܙܟܝܼ ܘܫܲܦܝܼܪ ܚܲܝܸܒܼ ܚܲܟܝܡܵܐܝܼܬ. 231 :ܒܕܝܼܢܵܐ [ܟܣܝܵܐ] ܟܣܝܵܐ ܓܠܐ ܟܐܢܘܼܬܼܵܐ ܕܒܼܪ ܥܝܢܹܗ 232 ܘܐܣܗܸܕ ܥܡܵܐ ܕܫܲܪܝܼܪ ܕܝܼܢܹܗ ܘܟܹܐܝܢ ܒܘܼܚܪܵܢܹܗ. 233 :ܒܕܝܼܢܵܐ ܝܲܠܦܘܼܗܝ ܕܐܝܼܬ ܒܹܗ ܚܲܝܵܠܐ ܠܡܠܒܲܕ ܕܝܼܢܵܐ 234 ܘܕܚܸܠܘ ܡܸܢܹܗ ܘܝܲܩܪܘ ܕܪܓܼܐ ܕܪܹܫܵܢܘܼܬܹܗ. 235 :ܐܲܝܟ ܕܒܕܘܪܐ ܒܚܪ ܠܩܢܘܡܹܗ ܒܒܘܼܚܪܵܢ ܢܫܹ̈ܐ 236 ܘܚܵܘܝܼ ܫܘܼܦܪܵܐ ܕܕܟܝܘܼܬ ܢܦܲܫܹܗ ܠܒܢܲܝ̈ ܥܲܡܹܗ. 237 :ܐܦ ܒܪܵܘܿܝܵܐ ܕܚܙܵܝܗܝ ܕܲܕܟܹܐ ܡ̣ܢ ܒܘܼܒܪܢܵܐ 238 ܨܒܬܗ ܒܚܸܙܘܵܐ ܘܬܲܪܓܸܡ ܥܡܹܗ ܚܹܝܠ ܚܸܟܡ̈ܬܹܗ. 239 ܒܚܸܙܘܵܐ ܕܠܠ̣ܝܵܐ ܡܲܠܸܠ ܥܲܡܹܗ ܕܥܝܼܪ ܥܝܵܢܹܐܗ: pb. f.278r 240 ܘܦܲܩܕܹܗ ܕܢܸܐܫܲܠ ܚܘܡܲܬܼ ܩܘܼܫܬܐ ܕܕܝܼܢܵܐ ܟܹܐܢܵܐ. 241 :ܫܐܲܠ ܐܡ̣ܪ ܠܹܗ ܐܝܟ ܠܐܝ̇ܕܥ ܡܢܐ ܒ̇ܥܐ 242 ܘܐܢܵܐ ܐܓܼܡܘܿܪ ܫܐܠܲܬܼ ܢܦܫܵܟ ܒܝܲܕܼ ܣܘܥܪ̈ܢܹܐܹ 243 :ܗܒܼ ܠܝܼ ܠܒܵܐ ܘܐܦ ܣܘܟܠܵܐ ܥܢܵܐ ܒܲܪ ܕܵܘܝܼܕ 244 ܘܐܬܒܲܥ ܩܘܼܫܬܐ ܘܐܟܸܣ ܙܹܐܦܐ ܕܠܵܐ ܒܘܼܣܪܢܵܐ. 245 :ܕܝܼܢܵܐ ܟܹܐܢܵܐ ܫܐܸܠ ܒܲܪ ܕܘܼܝܼܕ ܡ̣ܢ ܒܵܪܘܿܝܵܐ 246 ܘܐܵܦ ܒܪܘܿܝܵܐ ܡ̣ܠܵܝܗܝ ܒܘܼܝܵܢܵܐ ܘܫܪܪ ܡܸܠܵܘ̈ܗܝܝ. 247 :ܠܘܩܕܵܡ ܝܗ̣ܒ ܠܹܗ ܚܟܡܲܬܼ ܠܒܵܐ ܠܡܸܫܡܲܥ ܕܝܼܢܵܐ 248 ܘܬܘܼܒܼ ܐܘܣܸܦ ܠܹܗ ܥܘܼܬܪܵܐ ܕܙܒܼܢܵܐ ܘܟܗܝܼܢܘܼܬܼܵܐ. 249 :ܒܬܪܹܝܢ ܥܘܼܬܪ̈ܝܼܢ ܨܒܬܹܗ ܠܕܪܓܼܵܐ ܕܪܹܫܢܘܼܬܹܗ 250 ܒܚܟܡܲܬܼ ܢܦܫܵܐ ܘܦܐܝܘܼܬ ܨܒܼܬܼܵܐ ܕܦܓܼܪ̈ܢܝܵܬܼܵܐ. 251 :ܒܪ̈ܘܚܢܝܵܬܼܵܐ ܘܦܓܪ̈ܢܝܬܐ ܥܬܲܪ ܒܲܪ ܕܵܘܝܼܕ 252 ܘܪܘܚܢܐܝܼܬ ܘܦܓܼܪܢܐܝܼܬ ܫܦܲܪ ܘܐܨܛܒܲܬ. 253 :ܒܦܓܼܪܐ ܘܢܲܦܫܹܗ ܫܦܲܪ ܠܲܐܠܵܗܵܐ ܘܠܒܒܝ̈ܢܫܵܐ 254 ܘܒܢܼܐ ܘܨܒܸܬ ܗܝܘܠ ܩܘܼܕܫܵܐ ܠܣܕܲܬܼ ܡܵܪܹܗ. 255 :ܒܝܵܬܐ ܒܢ̣ܵܐ ܠܹܗ ܠܕܡܠܹܝܢ ܡܸܢܹܗ ܫܡܲܝܵܐ ܘܐܪܥܵܐ 256 ܘܟܲܕ ܠܵܐ ܥܡ̇ܪ ܒܥ̇ܒܕ ܐܝܼܕܼܵܘ̈ܗܝ ܥܡ̣ܪ ܒܹܗ ܒܚܘܼܒܵܐ. 257 :ܒܝܲܕ ܓܲܠܝ̈ܬܐ ܚܘܼܒܹܗ ܚܵܘܝܼ ܨܝܕ ܒܲܪ[ܒ]ܝܬܹܗ 258 ܕܟܲܕ ܗܘ̤ ܒܟܼܠ ܗܘ̣ ܓ̣ܒܵܐ ܠܹܗ ܥܘܼܡܪܵܐ ܒܒܲܝܬܐ ܕܙܒܼܢܵܐ. 259 :ܪܒܘܼܬ ܚܘܼܒܹܗ ܕܕܵܘܝܼܕ ܪܒܵܐ ܓܠ̣ܐ ܒܒܲܪ ܕܵܘܝܼܕ 260 ܘܫܘܘܕܵܝ ܡܠܵܘ̈ܗܝ ܓ̣ܡܪ ܒܥ̇ܒܕܐ ܐܲܝܟ ܕܐܸܫܬܵܘܕܝܼ. 261 :ܡܠܟܘܼܬ ܥܠܲܡ ܐܫܬܘܕܝܼ ܠܹܗ ܠܒܼܪܹܗ ܕܐܝܼܫܲܝ 262 ܘܐܡܠܟ ܠܒܼܪܹܗ ܘܝܲܗ̄ܒ̣ܠܗ ܥܘܼܬܼܪܐ ܘܚܟܡܲܬܼ ܠܸܒܵܐ. 263 :ܒܪܒܘܼܬ ܥܘܼܬܼܪܹܗ ܘܚܟܡܲܬܼ ܢܦܫܹܗ ܬܗܲܪܘ ܟܠ ܥܲܡܡܝܼ̈ܢ 264 ܘܢܦܩ ܛܒܐ ܕܕܝܢܘܼܬܹܗ ܒܥܒܪ̈ܝܹܗ̇ ܕܐܲܪܥܵܐ. 265 :ܠܟܼܠ ܐܬܪ̈ܘܵܢ ܢܩ̣ܦ ܗ̄ܘ̣ܵܐ ܛܒܵܐ ܕܕܢܘܼܬܹܗ 266 ܘܒܼܟܼܠ ܥܡܡܝ̈ܢ ܡܬܬܢܝܼܢ ܗ̄ܘ̣ܵܘ ܕܙܪ̈ܝ ܕܝܼܢܵܘ̈ܗܝ. 267 :ܠܫܡܥܵܐ ܕܕܝܼܢܵܘ̈ܗܝ ܪܓܼܘ ܘܐܬܝܐܲܒܲܘ ܡܲܠܟܹ̈ܐ ܕܥܡܡܹ̈ܐ 268 ܘܫܲܕܪܘ ܕܫܢܹ̈ܐ ܕܢܦܝܼܣܘܼܢܵܝܗܝ ܕܢܚܙܘܿܢ ܐܲܦܵܘܗܝ. 269 :ܬܲܗܪܐ ܕܫܡܹܗ ܐܪܗܸܒܼ ܐܸܢܘܿܢ ܠܡܠܝ̈ܝ ܥܘܼܬܼܪܵܐ 270 ܘܙܥܘ ܘܐܬܒܠܗܝܘ ܡ̣ܢ ܪܒܘܼܬܵܐ ܕܟܣܝܵܐ ܒܲܫܡܹܗ. 271 :ܫܡܵܐ ܕܲܟܼܣܹܐ ܒܹܗ ܐܪܡܝܼ ܩܢܛܵܐ ܠܩܢܝ̈ܝ ܚܲܝܵܠܵܐ 272 ܘܟܲܕ ܠܵܐ ܨ̇ܒܝܢ ܟܕܲܢܘ ܨܘܪ̈ܝܗܘܿܢ ܒܢܝܼܪܵܐ ܕܲܫܡܹܗ. 273 :ܕܚܸܠܘ ܡܨܪ̈ܝܐ ܬܗܲܪܘ ܟܘܫ̈ܝܹܐ ܬܡܲܗܘ ܢܗܕܘ̈ܝܹܐ 274 ܘܛܥܲܢܘ ܘܐܝܬܝܼܘ ܕܫܢܹ̈ܐ ܦܐܝ̈ܐ ܕܢܩܪܒܼܘܢ ܠܹܗ. 275 :ܨܒܼܘ ܪ̈ܲܚܝܼܩܹܐ ܟܢܲܫܘ ܒܪ̈ܝܐ ܚܒܨܘ ܒܝܬܝܹ̈ܐ 276 ܠܡܫܡܲܥ ܡܸܢܹܗ ܚܸܟܼܡܲܬܼ ܩܘܼܫܬܼܵܐ ܕܐܬܝܼܗܒܲܬ̤ ܠܹܗ. 277 :ܩܘܼܫܬܼܵܐ ܒܓܸܠܝܐ ܡܬܨܲܝܝ ܗ̄ܘ̣ܵܐ ܒܬܪܲܥ ܒܲܝܬܹܗ 278 ܘܒ ܘܫܸܡ ܒܪܘܿܝܵܐ ܡܫܬܒܲܝܝ ܗ̄ܘ̣ܵܐ ܒܪܹܫܵܢܘܼܬܹܗ. 279 :ܐܠܗ ܟܠܐ ܡܬܩܠܲܣ ܗ̄ܘ̣ܵܐ ܡ̣ܢ ܟܠ ܦܘܼܡܝܼ̈ܢ 280 ܘܠܵܐ ܐܠܗ̈ܐ ܡܬܒܣܪܝܼܢ ܗ̄ܘ̣ܵܘ ܡ̣ܢ ܟܠ ܠܸܫܵܢ. 281 :ܒܕܫܢ̈ܐ ܕܡܲܠܟܹ̈ܐ ܡܲܠܟܵܐ ܕܥܲܠ ܟܠ ܡܸܬܼܝܲܩܲܪ ܗ̄ܘ̣ܵܐ 282 ܘܦܬܟܪܘܼܬܼܵܐ ܕܕܚܠܲܬܼ ܫܐܕ̈ܐ ܡܬܬܫܝܛܵܐ ܗ̄ܘ̣ܵܐ. 283 :ܒܪܝܟ ܐܲܠܗܵܐ ܕܫܪܹܐ ܒܥܲܡܹܗ ܩܥ̣ܵܘ ܟܠ ܥܡܡܝܼ̈ܢ 284 ܘܙܥ ܡܪܘܕܐ ܕܒܛܠ ܩ̇ܠܐ ܕܫܸܡ ܐܲܠܗܘ̈ܗܝ. 285 :ܚܘܒܲܬܼ ܫܘܼܒܼܚܵܐ ܦܪܲܥܘ ܟܠ ܥܡܡܝܼ̈ܢ ܒܝܲܕܼ ܒܲܪ ܕܵܘܝܼܕ 286 ܘܐܚܕܹܗ ܓܘܼܢܚܵܐ ܕܫܒܚܘ ܐ̄ܢܫܐ ܒܝܲܕ ܒܲܪ ܐ̄ܢܵܫܵܐ. 287 :ܫܸܡ ܒܪܘܿܝܵܐ ܡܬܢܨܲܚ ܗ̄ܘ̣ܵܐ ܒܝܲܕ ܒܲܪܢܫܵܐ 288 ܘܫܓܼܪܗ ܚܣܡܵܐ ܕܡܛܠ ܡܵܢܵܐ ܝܼܪܸܒ ܥܲܦܪܵܢܵܐ. 289 ܐܒܼܠܵܐ ܪܲܒܵܐ ܠܒܸܫ ܚܲܣܡ̇ܐ ܒܐܝܼܩܵܪ ܡܵܪܹܗ: pb. f.278v 290 ܘܫܪܝܼ ܡܪܟܸܒܼ ܦܘܼܪ̈ܣܹܐ ܨܢܝ̈ܥܹܐ ܕܢܫܝܼܛ ܠܲܫܡܹܗ. 291 :ܙܲܝܢܵܐ ܕܢܟܼܠܐ ܥܬܸܕ ܠܸܒܹܗ ܕܢܲܟܼܘܼܠܬܵܢܵܐ 292 ܕܢܥܒܸܕ ܩܸܐܪܣܵܐ ܥܲܡ ܒܵܪܘܿܝܵܐ ܒܝܲܕ ܒܲܪܢܫܵܐ. 293 :ܟܠܹܗ ܙܝܢܵܐ ܕܡܪܝܼܪܘܼܬܹܗ ܣܥܪ ܡܪܘܕܵܐ 294 ܕܢܩܝܼܡ ܡܪܕܵܐ ܥܲܠ ܟܐܢܘܼܬܵܐ ܕܒܼܪܲܪ ܕܵܘܝܼܕ. 295 :ܟܠܹܗ ܚܝܠܹܗ ܙܡܢ ܘܩ̣ܪܐ ܠܘܵܬܼ ܬܟܬܘܼܫܵܐ 296 ܕܒܟܼܠ ܦܘܪ̈ܣܝܼܢ ܢܡܟܟ ܪܘܡܵܐ ܕܕܚܠܲܬܼ ܩܘܼܫܬܼܵܐ. 297 :ܟܢܸܫ ܕܝܘܵܘ̈ܗܝ ܣܥ̣ܪ ܠܓܼܝܘܵܬܵܘ̈ܗܝ ܩܪ̣ܐ ܫܡܫܵܘ̈ܗܝ 298 ܕܢܕܪܘܼܢܵܝܗܝ ܒܩܐܪܣܵܐ ܩܲܫܝܵܐ ܕܐܣܬܩܒܲܠ ܠܹܗ. 299 :ܥܡܸܩ ܦܚܵܘ̈ܗܝ ܛܡ̣ܪ ܢܸܟܝܵܢܵܘ̈ܗܝ ܦܪܣ ܨܢܥ̈ܬܹܗ 300 ܕܢܨܘܕ ܐ̄ܢܫܐ ܕܐܬܝܼܩܲܪ ܒܹܗ ܫܸܡ ܒܪܘܿܝܵܐ. 301 :ܡܨܝܕܬܐ ܕܥܘ̣ܠܐ ܙܩܲܕ ܙܹܐܦܵܢܵܐ ܠܒܲܪ ܫܪܵܝܼܪܵܐ 302 ܕܢܬܥܪܩܲܠ ܒܗ̇ ܡܛܥܐ ܗܘܢܹܗ ܘܢܘܒܸܕ ܕܲܪܲܓܹܗ. 303 :ܒܩܛܪ̈ܐ ܨܢܝ̈ܥܹܐ ܕܒܢ̈ܬ ܚܵܘܵܐ ܩܲܛܲܪ ܨܵܕܹܗ 304 ܕܠܵܐ ܢܬܦܠܲܛ ܡ̣ܢ ܢܘܝ̈ܢܹܐ ܕܡܲܪܝܼܪܘܼܬܹܗ. 305 :ܐܝܟ ܓܝܣܵܐ ܟܡܸܢ ܚܲܣܡܵܐ ܒܫܒܝܼܠ ܢܫܹ̈ܐ 306 ܕܚ̣ܵܐ ܕܬܡ̇ܢ ܐܡܝܼܢ ܥܒ̇ܪ ܡܲܠܟܵܐ ܫܠܝܡܘܿܢ. 307 :ܒܐܘܼܪܚܵܐ ܕܡܲܠܟܐ ܟܡܸܢ ܫܲܒܼܝܵܐ ܘܒܼܢܝ̈ ܐ̄ܪܵܙܹܗ 308 ܘܫܘܪ ܡ̣ܢܫܠܸܝ ܘܨܵܕܹܗ ܠܡܠܟܵܐ ܘܫܲܠܚ ܨܒܼܬܹܗ. 309 :ܟܠܗ ܨܒܬܹܗ ܕܫܸܡ ܒܪܘܿܝܵܐ ܚܛܦ ܡ̣ܢ ܪܹܫܹܗ 310 ܘܫܒܼܩܹܗ ܥܪܛܸܠ ܕܠܵܐ ܬܚܦܝܼܬܵܐ ܕܕܚܠܲܬܼ ܩܘܼܫܬܼܵܐ. 311 :ܦܲܚܐ ܕܐܒܘܼܗܝ ܨܠ̣ܐ ܠܹܗ ܠܐܲܪܵܝܵܐ ܡܪܗܸܒܼ ܥܲܡܡܹ̈ܐ 312 ܘܐܲܝܟ ܕܠܕܵܘܝܼܕ ܨܵܕܹܿܗ ܐܦ ܠܹܗ ܒܪܚܡܲܬܼ ܢܫܹ̈ܐ. 313 :ܒܪܹ ܚܡܲܬ ܢܸܫܹ̈ܐ ܨܕܹܗ ܒܝܼܫܵܐ ܠܡܠܝܼܠ ܗܵܘܢܵܐ 314 ܘܒܥܢܝܢܗܹܝܢ ܟܠ̣ܵܐ ܥܢܝܢܹܗ ܡ̣ܢ ܟܐܢܘܼܬܼܵܐ. 315 :ܒܚܒܼܠܵܐ ܕܢܸܫܹ̈ܐ ܦܟܪܹܗ ܠܥܘܫܢܹܗ ܕܓܢܒܵܪ ܚܲܝܠܵܐ 316 ܘܐܥܸܠ ܚܒܼܫܹܗ ܒܹܝܬ ܐܲܣܝܼܪܹ̈ܐ ܕܠܵܐ ܝܼܕܲܥܬܼܵܐ. 317 :ܒܠܐ ܝܼܕܲܥܬܼܵܐ ܐܣܪܹܗ ܨܢܝܼܥܵܐ ܠܚܟܝܼܡ ܡ̣ܢܟܠ 318 ܕܠܵܐ ܗ̄ܘ̣ܵܐ ܦܫܝܼܩ ܠܹܗ ܠܡܠܟܬܫܘܼ ܠܘܼܩܒܼܵܠ ܢܸܟܼܠܵܘ̈ܗܝ. 319 :ܢܫܹ̈ܐ ܫܕ݂ܲܪ ܐܝܟ ܓܫܘܿܫܹ̈ܐ ܘܓܼܵܫ ܚܹܐܪܘܼܬܹܗ 320 ܘܐܦܝܼܣ ܐܸܢܘܿܢ ܕܢܦܝܣ̈ܢܝܗܝ ܕܢܛܠܐ ܒܐ̄ܪܵܙܵܘܗܝ. 321 :ܒܢܫܹ̈ܐ ܛܫܝܗ̇ ܠܡܪܝܼܪܘܼܬܹܗ ܚܸܘܝܵܐ ܨܢܝܼܥܵܐ 322 ܘܒܠܫܢܗܹܝܢ ܕܒܨܗ ܒܛܘܥܝܲܝ ܐܲܝܟ ܕܒܥܘܩܣܵܐ. 323 :ܡܚܘܬܵܐ ܒܝܪܫܬܼܵܐ ܡܚܝܵܗܝ ܚܲܪܡܫܵܐ ܠܚܠܝܹܡ ܢܦܫܵܐ 324 ܘܦܲܪܚܲܬ̤ ܡܸܪܬܵܐ ܕܚܪܡܢܘܼܬܹܗ ܒܟܼܠܗܘܿܢ ܪܸ̈ܓܼܫܵܘܗܝ. 325 ܐܝܟ ܬܢܝܼܢܵܐ ܐܕܝܼܩ ܢܟܼܠܵܐ ܡ̣ܢ ܒܹܝܬܼ ܢܸܫܹ̈ܐ. 326 ܘܢܟܬܹܗ ܒܢܦܫܵܐ ܘܢܬܼܪ ܣܲܥܪܵܐ ܕܪܸܫ ܪܥܝܢܹܗ. 327 :ܒܕܡܘܼܬ ܓܪܣܵܐ ܓܣܗ̇ ܗ̄ܘ̣ܐ ܠܡܪܬܹܗ ܥܲܠ ܗܲܕܵܡܵܘ̈ܗܝ 328 ܘܦܪܚܲܬ̤ ܘܡܘܛܬ̤ ܥܕܲܡܵܐ ܠܙܘ̈ܥܹܐ ܟܣܝ̈ܐ ܕܢܲܦܫܹܗ. 329 :ܠܩܵܛܐ ܨܚܢܵܐ ܒܕܪ ܡܪܘܕܵܐ ܩܕܡ ܒܒܬܹ̈ܗ 330 :ܘܐܝܟ ܕܠܥܘܦܵܐ ܓܪܓ ܡܓܕܹܗ ܠܘܵܬܼ ܫܘܼܓܵܫܘܵܗ̈ܝ 331 :ܢܫܒܹ̈ܐ ܕ̈ܦܝܐ ܕܙܠܲܝܼܠܘܼܬܼܵܐ ܦܪܣ ܙܠܝܼܠܵܐ 332 ܘܒܼܗܘܿܢ ܨܕܗ̇ ܠܩܲܠܝܼܠܘܼܬܹܗ ܕܢܫܪܐ ܫܠܹܝܡܘܿܢ. 333 :ܐܝܘ ܠܩܝܼܠܵܐ ܕܨܕܝ̈ܗܝ ܥܝ̈ܢܐ ܙܠܝܼܠ̈ܬܐ 334 ܘܐܥܸܠ ܚܲܒܼܫܹܗ ܒܢܘܡ̈ܐ ܩܫܝ̈ܐ ܕܦܬܟܼܪܘܼܬܼܵܐ. 335 :ܐܝܘ ܠܓܢ̄ܒܪܐ ܕܚܣܢܝܗ̈ܝ ܐܠ̈ܥܹܐ ܦܚܚ̈ܬܐ 336 ܘܫܩܠ ܙܝܢܵܐ ܕܫܸܡ ܒܵܪܘܿܝܵܐ ܡ̣ܢ ܪܥܝܢܹܗ. 337 :ܐܝܘ ܠܫܦܝܼܪܵܐ ܕܪܚܝܼܡ ܗ̄ܘ̣ܵܐ ܛܵܒܼ ܒܦܓܼܪܗ ܡܦܫܹܗ 338 ܕܐܣܢܝܼ ܫܘܼܦܪܹܗ ܒܢܩܦܵܐ ܣܢܝܵܐ ܕܙܲܠܝܼܠܘܼܬܵܐ. 339 :ܐܝܘ ܠܚܟܝܼܡܵܐ ܕܐܦ ܪ̈ܘܚܢܹܐ ܬܗܲܪܘ ܒܝܼܕܲܥܬܹܗ 340 ܕܐܥܢܝܼ ܢܲܦܫܹܗ ܥܲܡ ܫܛܝ̈ܬܐ ܘܥܒܕ̈ܝܗܝ ܣܟܼܠܵܐ. 341 ܐܘ ܠܝܕܘܿܥܵܐ ܒܕܩ ܐ̄ܪ̈ܙܐ ܕܣܬܝܪ̈ܬܵܐ: pb. f.279r 342 ܕܬܗܸܠܘ ܘܲܓܚܸܟܘ ܫܐܕܹ̈ܐ ܛܪ̈ܘܢܹܐ ܥܲܠ ܚܸܟܡܬܹܗ. 343 :ܐܝܘ ܠܚܟܝܼܡܵܐ ܕܐܣܝܼ ܒܡܸܠܵܘ̈ܗܝ ܟܪ̈ܝܗܲܝ ܢܫܦܵܐ 344 ܕܐܟܪܗ ܢܦܫܗ ܒܟܐܒܵܐ ܢܕܝܕܵܐ ܕܦܬܟܪܝܼܬܼܵܐ. 345 :ܐܝܘ ܠܫܪܝܼܪ̈ܵܐ ܕܫܬܩ ܛܘܼܥܝܲܝ ܕܠܵܐ ܠܗܹ̈ܐ 346 ܕܫܒܩ ܐܘܪܚܵܐ ܕܡܠܲܬܼ ܩܘܫܬܼܵܐ ܘܪܵܕܹܐ ܒܲܬܘܫܵܐ. ܘܲܪܟܼܵܐ 347 :ܐܝܘ ܠܬܪܝܨܵܐ ܕܐܪܝܼܡ ܪܹܫܵܐ ܕܙܝܼܩܘܼܬܼܵܐ 348 ܕܐܪܟܢ ܪܹܫܵܐ ܕܫܪܝܼܪܘܼܬܹܗ ܩܕܼܵܡ ܕܓܼܠܹ̈ܐ. 349 :ܐܹܝܘ ܠܫܝܦܘܿܪܵܐ ܕܐܬܗܲܪ ܥܡܡܹ̈ܐ ܒܩܵܠ ܢܸܥܡ̈ܬܹܗ 350 ܕܫܬܩܘ ܩ̈ܠܐ ܕܫܦܝܼܪ̈ܬܹܗ ܦܬܟܼܪܹ̈ܐ ܚܲܪ̈ܲܫܹܐ. 351 :ܐܹܝܘ ܠܟܢܪܵܐ ܕܡܬܪܓܸܡ ܗ̄ܘ̣ܵܐ ܚܟܡܲܬܼ ܩܘܼܫܬܼܵܐ 352 ܕܦܣܸܩܘ ܐܢܹܝܢ ܕܝܘ̈ܐ ܨܢܝܼ̈ܥܹܐ ܠܡܲܢܝ̈ ܢܦܫܹܗ. 353 :ܐܝܘ ܠܐܒܘܒܿܐ ܕܙܡ̇ܪ ܗ̄ܘ̣ܵܐ ܒܹܗ ܨܒܼܝܵܢ ܡܵܪܹܗ 354 ܕܬܒܼܪܘܗܝ ܫܐܕ̈ܐ ܘܠܵܐ ܣܦ̣ܩ ܒܩܸܠ ܪܘܼܚ ܓܸܠܝܢܵܐ. 355 :ܐܹܝܘ ܠܵܟ ܡܲܠܟܵܐ ܗܕܝܼܪ ܡ̣ܢ ܡܠܟ̈ܐ ܕܗܘ̤ܘ ܘܗ̇ܘܹܝܢ 356 ܕܐܫܛܝܬ ܕܪܓܵܟ ܠܥܹܝܬ ܐܪ̈ܥܢܹܐ ܘܫܡܝܢܹ̈ܐ. 357 :ܡ̇ܢ ܠܵܐ ܢܬܡܗ ܥܲܠ ܫܝܛܘܿܬܹܗ ܕ[...]ܩܝܼܪ ܡ̣ܢ ܟܠ 358 ܕܐܫܝܼܛ ܗܘ̤ ܠܵܗ̇ ܠܝܲܩܝܼܪܘܼܬܹܗ ܒܕܠܵܐ ܦܐ̈ܝܢ. 359 :ܡ̇ܢ ܠܵܐ ܢܟܼܪܐ ܥܲܠ ܡܘܼܟܵܟܹܗ ܕܪܡ ܒܝܼܕ ܥܬܹܗ 360 ܕܐܪܦܝܼ ܗܪܓܐ ܕܪ̈ܘܢܝܵܬܼܵܐ ܘܬܪܓܡ ܒܕܝܵܐ. 361 :ܡ̇ܢ ܠܐ ܢܚܫ ܥܲܠ ܫܘܚܠܦܗ ܕܝܲܡܵܐ ܪܲܒܵܐ 362 ܕܓܙ ܚܟ̈ܡܬܹܗ ܘܝܼܒܸܫ ܢܒܼܥܵܐ ܕܦܪܘܿܫܘܼܬܹܗ. 363 :ܡ̇ܢ ܠܵܐ ܢܒܼܟܐ ܥܲܠ ܐܘܼܡܢܵܐ ܡܪܟܸܒܼ ܡܲܬܠܹ̈ܐ 364 ܕܗܘ̤ܐ ܡܲܬܠܵܐ ܘܗܵܐ ܡܬܬܢܹܐ ܓܘܼܚܟܗ ܒܟܼܠܘܼܟ. 365 :ܡ̇ܢ ܠܵܐ ܢܕܚܲܠ ܡ̣ܢ ܫܪ̈ܥܬܼܵܐ ܕܠܵܐ ܝܼܕܼܥܬܼܵܐ 366 ܕܟܲܕ ܠܵܐ ܝ̇ܕܥ ܫ̇ܪܥ ܘܢ̇ܦܠ ܒܫܟܝܼܪ̈ܬܵܐ. 367 :ܡ̣ܢ ܠܵܐ ܢܩܢܲܛ ܥܲܠ ܛܫܝܼܬ̈ܐ ܕܒܓܼܘ ܢܦܫܵܐ 368 ܕܟܕ ܠܵܐ ܡܲܪܓܸܫ ܣܥ̇ܝܢ ܚܲܫܹ̈ܐ ܘܒܙܹ̇ܝܢ ܥܘܼܬܪܹܗ. 369 :ܡ̇ܢ ܠܐ ܢܗܘܹܐ ܘܗܝܼܪ ܒܩܪܒܼܵܐ ܕܥܲܡ ܢܟܼܘܿܠܹܗ 370 ܕܪܒܘ ܦܚ̈ܝܢ ܡܥܡܩ ܛܡܪ ܩܕܵܡ ܪܥܝܢܹܗ. 371 :ܡ̇ܢ ܠܵܐ ܢܛܲܪܓܲܙ̈ܝ ܢܦܲܫܹܗ ܡ̣ܢ ܫܒܝܵܐ 372 ܕܠܦܲܝ ܐܝܼܡܵܡ ܐܡܹܝܢ ܢܛܪ ܬܪܲܥ ܣܝܼܡ̈ܬܹܗ. 373 :ܐܸܢ ܚܟܝܼܡܵܐ ܒܙܘܼܗ̇ ܚܫ̈ܐ ܠܚܟܡܲܬܼ ܢܦܫܹܗ 374 ܡܢ̣ܘ ܡܫܟܲܝܝ ܠܡܛܲܪ ܓܲܙܵܘ̈ܗܝ ܡ̣ܢ ܢܟܼܝ̈ܫܹܐ. 375 :ܐܸܢ ܩܠܝܼܠܵܐ ܨܕܘܼܗܝ ܒܢܸܒܒܹ̈ܐ ܫ̈ܐܕܐ ܕܢܸܫ̈ܐ 376 ܡ̇ܢ ܠܵܐ ܢܸܥܪܘܿܩ ܡ̣ܢ ܥܸܢܝܵܢܵܐ ܕܒܢ̈ܬ ܚܵܘܵܐ. 377 :ܐܸܢ ܓܲܢ̄ܒܪܵܐ ܢܦ̣ܠ ܒܡܨܝܼܕܵܬܼܵܐ ܕܫܘܓܵܫܲܝ̈ܗܹܝܢ 378 ܡ̇ܢ ܠܵܐ ܢܸܥܪܘܿܩ ܠܚܘܼܒܵܐ ܕܠܒܲܪ ܡ̣ܢ ܦܘܼܪ̈ܣܲܝܗܹܝܢ܀