Narsai: On the Three Children - ܥܲܠ ܚܲܢܲܢܝܵܐ ܘܥܲܙܲܪܝܵܐ ܘܡܝܼܫܵܐܹܝܠ

1 :ܒܢܲܝ̈ ܡܘܼܠܟܵܢܵܐ ܢܚܸܬܼܘ ܒܲܫܒܼܝܼܬܼܵܐ ܠܒܹܝܬܼ ܒܵܒܼܠܵܝܹ̈ܐ 2 ܘܠܵܐ ܐܸܬܼܪܲܦܝܼܘ ܡ̣ܢ ܬܘܼܟܼܠܵܢܵܐ ܕܡܘܼܠܟܵܢܲܝ̈ܗܘܿܢ ܀ 3 :ܪ̈ܵܚܡܲܝ ܫܲܝܢܵܐ ܚ̣ܝܢܵܐ ܚܙ݂ܲܩܘ ܠܲܦܢܝܼܬܼܵܐ ܕܪ̈ܲܓܿܘܼܙܬܼܵܢܹܐ 4 ܘܠܵܐ ܦܵܓܼ ܚܘܼܒܵܐ ܕܪܸܚܡܲܬܼ ܩܘܼܫܬܵܐ ܡ̣ܢ ܡܲܕܿܥܲܝ̈ܗܘܿܢ ܀ pb. 315 5 :ܛܥܝܼܢܲܝ̈ ܢܝܼܫܵܐ ܪܫܲܡ̣ ܒܵܪܘܿܝܵܐ ܥܲܠ ܪܸ̈ܓܼܫܲܝܗܘܿܢ 6 ܫܪ̣ܵܘ ܒܹܝܬܼ ܚܲܢܦܹ̈ܐ ܘܠܵܐ ܐܸܬܿܕܲܡܝܼܘ ܒܲܥܝܵܕܲܝ̈ܗܘܿܢ ܀ 7 :ܩܲܢܝܲܝ̈ ܛܲܥܡܵܐ ܥܵܠ̣ܘ ܘܐܸܬܼܚܲܠܲܛܘ ܥܲܡ ܦܲܟܿܝܼܗܹ̈ܐ 8 ܘܠܵܐ ܦܟ݂ܲܗ ܛܲܥܡܵܐ ܕܪܸ̈ܥܝܵܢܲܝܗܘܿܢ ܡ̣ܢ ܘܵܠܝܼܬܼܵܐ ܀ 9 :ܠܒܼܘܼܫܲܝ̈ ܙܲܝܢܵܐ ܢܵܡܘܿܣܵܝܵܐ ܚܫܝܼܠ ܡ̣ܢ ܪܘܼܚܵܐ 10 ܩܵܡ̣ܘ ܒܹܝܬܼ ܣܸܕܼܪܹ̈ܐ ܕܲܩܪ̈ܲܒܼܬܼܵܢܹܐ ܘܠܵܐ ܐܸܬܼܪܲܦܝܼܘ ܀ 11 :ܪ̈ܵܗܛܲܝ ܪܲܗܛܵܐ ܕܙܲܕܿܝܼܩܘܼܬܼܵܐ ܕܠܵܐ ܒܘܼܣܪܵܢܵܐ 12 ܥܡ݂ܲܪܘ ܥܲܡ ܛܲܡ̈ܠܹܐ ܘܠܵܐ ܦܵܫ̣ܘ ܘܐܲܗܡܝܼܘ ܡ̣ܢ ܥܲܡܠܲܝ̈ܗܘܿܢ ܀ 13 :ܐܵܓܼܘܿܢܸܣܛܹ̈ܐ ܐܵܚܕܵܝ̈ ܕܲܪܵܐ ܥܲܡ ܚܘܼܬܼܚܵܬܹ̈ܐ 14 ܦܲܕܼ ܐܝܼ̈ܕܲܝܵܐ ܕܐܵܚܘܿܕܲܝ̈ܗܘܿܢ ܡ̣ܢ ܓܘܼܫܡܲܝ̈ܗܘܿܢ ܀ 15 :ܒܢܲܝ̈ ܐܲܒܼܪܵܗܵܡ ܪܵܚܡܵܐ ܒܚܝܼܪܵܐ ܕܫܲܪܝܼܪ ܚܘܼܒܹܿܗ 16 ܥܲܠ̣ܘ ܠܐܵܓܼܘܿܢܵܐ ܘܲܙܟܼܵܘ ܘܲܢܦܲܩ̣ܘ ܐܲܝܟ ܐܲܒܼܘܼܗܘܿܢ ܀ 17 :ܠܐܵܓܼܘܿܢ ܚܲܫܹ̈ܐ ܥܲܠ̣ܘ ܙܲܟܵܝܹ̈ܐ ܒܢܲܝ̈ ܙܲܟܵܝܵܐ 18 ܘܣܲܟܿܝܼܘ ܘܲܫܠܸܡ̣ܘ ܠܗܵܝ̇ ܒܲܪ̄ܬܼ ܩܵܠܵܐ ܕܲܠܘܵܬܼ ܐܲܒܼܪܵܐ ܀ 19 :ܒܐܲܒܼܪܵܡ ܕܲܡܝܼܘ ܒܣܘܼܟܵܝ ܣܲܒܼܪܵܐ ܕܠܵܐ ܡܸܬܿܕܲܓܲܠ 20 ܘܗܲܝܡܸܢܘ ܘܐܲܫܲܪܘ ܠܲܕܪ̈ܲܚܝܼܩܵܢ ܐܲܝܟ ܩܲܪ݁ܝܼܒܼܵܢ ܀ 21 :ܒܲܕܼܡܘܼܬܼ ܢܝܼܫܵܐ ܩܒ݂ܲܥܘ ܢܸܣܝܵܢܹܗ ܩܕܼܵܡ ܥܲܝܢܲܝ̈ܗܘܿܢ 22 ܘܲܚܢܵܘ̣ ܣܲܓܿܝܼ ܠܘܵܬܼ ܥܘܼܕܼܪܵܢܵܐ ܕܡ̣ܢ ܐܲܠܵܗܵܐ ܀ 23 :ܠܵܐ ܐܸܬܼܦܲܠܲܓܼ ܐܲܒܼܪܵܡ ܟܹܐܢܵܐ ܒܡܵܘܬܵܐ ܕܲܒܼܪܹܗ 24 ܘܠܵܐ ܒܢܲܝ̈ ܐܲܒܼܪܵܐ ܕܚܸܠܘ ܡ̣ܢ ܡ̇ܘܬܵܐ ܕܲܩܢܘܿܡܲܝ̈ܗܘܿܢ ܀ 25 :ܒܗܵܘܢܵܐ ܚܵܪ̣ܘ ܒܹܗ ܟܲܕܼ ܡܲܣܸܩ ܠܹܗ ܒܪܹܗ ܠܲܥܠܵܬܼܵܐ 26 ܘܝܲܗ̣̄ܒܼܘ ܓܘܼܫܡܲܝ̈ܗܘܿܢ ܠܫܲܠܗܹܒܼܝܼܬܼܵܐ ܕܢܸܬܿܕܲܡܘܿܢ ܒܹܗ ܀ 27 :ܗܲܝܡܵܢܘܼܬܼܵܐ ܠܒܸܫ̣ܘ ܐܲܝܟ ܙܲܝܢܵܐ ܥܠ ܙܵܘܥܲܝ̈ܗܘܿܢ 28 ܘܗܲܝܡܸܢܘ ܕܲܡܨܸܐ ܚܹܝܠ ܥܘܿܕܼܪܵܢܹܗ ܠܡܸܙܟܵܐ ܠܢܘܼܪܵܐ ܀ 29 :ܒܗܲܝܡܵܢܘܼܬܼܵܐ ܐܲܩܠܝܼܘ ܘܒܲܣܲܪܘ ܥܲܠ ܒܵܒܼܠܵܝܹ̈ܐ 30 ܕܲܚܙ̣ܵܘ ܕܲܪܦܸܐ ܫܘܼܘܕܵܝ ܡܸܠܹ̈ܐ ܕܟܲܠܕܵܝܘܼܬܼܵܐ ܀ 31 :ܒܗܲܝܡܵܢܘܼܬܼܵܐ ܓܒܼܵܘ ܕܲܢܡܘܼܬܼܘܼܢ ܡ̇ܘܬܵܐ ܕܙܲܒܼܢܵܐ 32 ܘܠܵܘ ܢܸܬܼܓܲܠܙܘܼܢ ܡ̣ܢ ܣܘܼܟܵܝܵܐ ܕܡܘܼܠܟܵܢ ܟܹܐܢܹ̈ܐ ܀ 33 :ܪܢܵܘ̣ ܕܲܦܫܝܼܩ ܗ̄ܘ̣ ܠܗܲܝܡܵܢܘܼܬܼܵܐ ܠܡܸܚܣܲܢ ܡ̇ܘܬܼܵܐ 34 ܘܠܵܐ ܚܲܫܸܒܼܘ ܗ̄ܘ̣ܵܘ ܠܡܸܬܼܦܲܨܵܝܼܘ ܡ̣ܢ ܝܼܩܕܵܢܵܐ ܀ 35 :ܥܗܲܕܘ ܕܐܸܢ ܡ̇ܝ̇ܬܿܝܼܢ ܒܐܘܼܪܚܵܐ ܕܡ̇ܘܬܵܐ ܪܵܕܹܝܢ ܐܲܝܟ ܟܠ 36 ܘܐܸܢ ܠܵܐ ܡ̇ܝ̇ܬܿܝܼܢ ܡܡܵܬܼ ܗ̄ܘ̣ ܡ̇ܝ̇ܬܿܝܼܢ ܐܲܝܟ ܡ̇ܝܘܿܬܹ̈ܐ ܀ 37 :ܒܡܵܘܬܵܐ ܚܵܪ̣ܘ ܗ̄ܘ̣ܵܘ ܘܒܲܣܲܪ ܘܐܲܫܝܼܛܘ ܠܐܲܪ̈ܥܵܢܵܝܹܐ 38 ܘܲܩܕܼܵܡ ܡ̇ܘܬܵܐ ܪܚܸܡܘ ܕܲܢܡܘܼܬܼܘܼܢ ܡ̇ܘܬܵܐ ܕܣܲܒܼܪܵܐ ܀ pb. 316 39 :ܣܲܒܼܪܵܐ ܗܘ̤ܵܐ ܠܗܘܿܢ ܐܲܝܟ ܗܲܕܿܝܼܠܵܐ ܒܐܘܼܪܚܵܐ ܕܚܲܫܹ̈ܐ 40 ܘܚܵܘܝܼ ܐܸܢܘܿܢ ܫܒܼܝܼܠ ܚܘܼܡܣܵܢܵܐ ܕܠܲܝܬܿ ܒܹܗ ܩܸܢܛܵܐ ܀ 41 :ܒܐܲܬܼܪܵܐ ܕܩܸܢܛܵܐ ܩܵܡ̣ܘ ܫܲܪܝܼܪܹ̈ܐ ܠܒܼܝܼܫܲܝ̈ ܣܲܒܼܪܵܐ 42 ܘܲܠܒܼܝܼܒܼܵܐܝܼܬܼ ܣܲܝܒܲܪܘ ܚܲܫܹ̈ܐ ܕܚܵܫܘܿܫܲܝ̈ܗܘܿܢ ܀ 43 :ܒܲܕܼܡܘܼܬܼ ܐܲܪܝܵܐ ܪܗܸܒܼ ܒܵܒܼܵܠܵܝܵܐ ܕܢܲܪܗܸܒܼ ܐܸܢܘܿܢ 44 ܘܚܲܫܒ̣ܿܘܼܗܝ ܩܵܠܹܗ ܐܲܝܟ ܩܵܠ ܒܵܩܵܐ ܕܙܵܐܹ̇ܡ ܒܐܵܐܲܪ ܀ 45 :ܐܲܝܟ ܬܲܢܝܼܫܵܐ ܪܫܲܦ̣ ܦܘܼܩܕܵܢܹܗ ܕܲܡܢܝܼܬܼ ܐܸܢܘܿܢ 46 ܘܚܲܫ̣ܒܿܘܼܗܝ ܠܚܹܐܦܹܗ ܚܘܼܠܕܵܐ ܕܚܵܠܹ̇ܕ ܘܠܵܐ ܡܨܸܐ ܕܢܲܟܸܿܐ ܀ 47 :ܨܲܠܡܵܐ ܪܲܒܵܐ ܥܒ݂ܲܕܼ ܒܲܨܬܝܼܥܘܼ ܨܢܝܼܥ ܒܲܚܛܝܼܬܼܵܐ 48 ܕܲܢܨܘܼܕ ܒܹܗ ܟܠ ܠܘܵܬܼ ܛܵܥܝܘܼܬܼܵܐ ܕܟܲܠܕܵܝܘܼܬܼܵܐ ܀ 49 :ܨܲܠܡܵܐ ܚܵܘܝܹܗ ܪܘܼܚ ܓܸܠܝܵܢܵܐ ܕܪܲܒܼ ܗ̄ܘ̣ܵܐ ܘܲܫܒܼܝܼܚ 50 ܘܲܨܒܼܵܐ ܕܲܢܩܝܼܡ ܨܲܠܡܵܐ ܕܛܘܼܥܝܲܝ ܒܐ̄ܪܵܙ ܗܵܘ̇ ܕܲܚ̣ܙܵܐ ܀ 51 :ܚܙ̣ܵܐ ܕܲܡܨܲܒܲܬܼ ܨܲܠܡܵܐ ܕܲܚܙ̣ܵܐ ܐܘܼܡܵܢܵܐܝܼܬܼ 52 ܘܲܒܼܥ̣ܵܐ ܕܲܢܪܝܼܡ ܪܹܫܵܢܘܼܬܹܗ ܠܦܘܼܬܼ ܪܲܒܿܘܼܬܹܗ ܀ 53 :ܚܸܠܡܵܐ ܨܵܪ ܠܹܗ ܨܠܸܡ ܫܘܼܠܛܵܢܹܗ ܕܢܸܣܬܲܟܲܠ ܒܹܗ 54 ܘܗܘ̤ ܐܸܫܬܿܢܝܼ ܘܨܵܪ ܣܘܼܟܵܠܵܐ ܠܘܼܩܒܲܠ ܩܘܼܫܬܵܐ ܀ 55 :ܚܙ̣ܵܝܗܝ ܗ̄ܘ̣ܵܐ ܚܸܠܡܵܐ ܘܲܗܦ݂ܲܟ ܘܲܛܥ̣ܵܝܗܝ ܕܢܸܒܼܥܸܐ ܒܥܵܬܹܗ 56 ܘܡ̣ܢ ܕܐܸܬܼܦܲܫܲܩ ܗܦ݂ܲܟ ܘܐܸܨܛܲܢܲܥ ܕܢܲܛܥܸܐ ܒܚܸܙܘܸܗ ܀ 57 :ܓܠ̣ܵܐ ܠܹܗ ܢܒܼܝܼܵܐ ܕܗܘ̤ܝܘܼ ܪܹܫܵܐ ܕܕܲܗܒܼܵܐ ܛܵܒܼܵܐ 58 ܘܲܪܢ̣ܵܐ ܕܢܸܣܲܩ ܠܕܲܪܓܼܵܐ ܪܵܡ̇ܐ ܒܬܼܘܼܩܵܢ ܨܲܠܡܵܐ ܀ 59 :ܚܵܘܝܹܗ ܕܐܵܒܹ̇ܕܼ ܒܲܓܼܙܵܪ ܕܝܼܢܵܐ ܕܡ̣ܢ ܐܲܠܵܗܵܐ 60 ܘܐܲܩܝܼܡ ܡܸܪܕܵܐ ܕܠܵܐ ܢܸܫܬܿܥܒܲܕܼ ܠܡܸܠܲܝ̈ ܪܘܼܚܵܐ ܀ 61 :ܙܲܝܢܵܐ ܕܚܘܼܬܼܪܵܐ ܠܒܸܫ̣ ܗ̄ܘ̣ܵܐ ܣܲܟܼܠܵܐ ܠܘܼܩܒܲܠ ܩܘܼܫܬܵܐ 62 ܘܫܲܪܝܼ ܕܢܲܩܪܸܒܼ ܥܲܡ ܟܹܐܢܘܼܬܼܵܐ ܥܵܘ̇ܠܵܐܝܼܬܼ ܀ 63 :ܩܪܵܒܼܵܐ ܕܥܵܘ̣ܠܵܐ ܥܲܬܸܿܕܼ ܠܸܒܹܿܗ ܕܲܡܠܸܐ ܥܵܘ̣ܠܵܐ 64 ܕܢܸܚܪܘܿܒܼ ܣܸܕܼܪܹ̈ܐ ܕܲܒܲܢܲܝ̈ ܩܘܼܫܵܐ ܒܣܹܝܦܵܐ ܕܥܵܘ̣ܠܹܗ ܀ 65 :ܦܲܩ݂ܲܕܼ ܘܐܸܬܿܬܲܩܲܢ ܨܲܠܡܵܐ ܕܲܚܫ݂ܲܠ ܒܓܼܵܘ ܪܸܥܝܵܢܹܗ 66 ܘܙܲܡܸܢ ܥܲܡܡܹ̈ܐ ܘܲܡܕܼܝܼ̈ܢܵܬܼܵܐ ܠܣܸܓܼܕܲܬܼ ܙܹܐܦܹܗ ܀ 67 :ܚܲܫ̣ܠܹܗ ܒܠܸܒܹܿܗ ܘܐܲܟܸܿܢ ܐܲܦܸܣ ܘܚܲܫܠ̣ܘܼܗܝ ܐ̄ܢܵܫܵܐ 68 ܨܵܪܹܗ ܒܗܵܘܢܹܗ ܘܐܲܟܸܿܢ ܨܵܪܘܼܗܝ ܓܵܓܦܲܝ̈ ܨܲܠܡܹ̈ܐ ܀ 69 :ܫܹܐܕܹ̈ܐ ܡܲܠ̣ܟܿܘܼܗܝ ܕܲܢܨܲܘܼܪ ܨܲܠܡܵܐ ܐܲܝܟ ܪܸܓܲܬܼܗܘܿܢ 70 ܘܗܸܢܘ̣ܿܢ ܚܵܘܝܘܼܗܝ ܕܐܲܝܟܲܢ ܘܲܟܼܡܵܐ ܥܸܥܒܸܿܕܼ ܪܵܘܡܹܗ ܀ 71 :ܗܸܢܘ̣ܿܢ ܐܲܠܸܦܘ ܐܵܦ ܠܐܘܼܡ̇ܢܹ̈ܐ ܕܲܡܪܲܟܿܒܼܘܼܢܵܝܗܝ 72 ܕܢܸܗܘܘܿܢ ܓܵܡ̇ܪܝܼܢ ܨܸܒܼܝܵܢܲܝ̈ܗܘܿܢ ܒܦܲܐܝܘܼܬܼ ܚܸܙܘܹܗ ܀ 73 :ܐ̄ܪܵܙܵܐ ܪܲܟܸܿܒܼܘ ܢܲܟܿܘܼܠܬܼܵܢܹ̈ܐ ܥܲܡ ܟܲܠܕܼܵܝܹ̈ܐ 74 ܕܢܲܛܥܘܿܢ ܐ̄ܢܵܫܵܐ ܒܵܬܲܪ ܛܘܼܥܝܲܝ ܒܐܸܣܟܹܿܝܡ ܨܲܠܡ̇ܐ ܀ pb. 317 75 :ܫܬܿܝܼܢ ܠܲܡ ܐܲܡܝܼ̈ܢ ܝܲܗ̣̄ܒܼܘ ܡܘܼܫ̈ܚܵܬܼܵܐ ܕܢܸܗܘܸܐ ܪܵܘܡܹܗ 76 ܕܬܸܗܘܸܐ ܬܗܝܼܪܵܐ ܚܙܵܬܹܗ ܠܟܼܠܢܵܫ ܐܵܦ ܡ̣ܢ ܪܘܼܚܩܵܐ ܀ 77 :ܫܸܬܼ ܬܘܼܒܼ ܐܲܡܝܼ̈ܢ ܥܒ݂ܲܕܼܘ ܠܹܗ ܦܬܼܵܝܵܐ ܐܲܝܟ ܡ̇ܐ ܕܲܨܒܼܵܘ 78 :ܕܲܠܦܘܼܬܼ ܪܵܘܡܹܗ ܢܸܗܘܸܐ ܡܫܲܪܲܪ ܐܵܦ ܪܘܼܟܵܒܹܗ 79 :ܘܸܟܼܒܲܪ ܗܵܕܹܐ ܡ̣ܠܲܟܼܘ ܗ̄ܘ̣ܵܘ ܕܲܝܘܸ̈ܐ ܠܟܲܠܕܼܵܝܘܼܬܼܵܐ 80 ܕܐܵܘܪܸܒܼ ܨܲܠܡܵܐ ܕܢܹܐܪܲܒܼ ܣܲܓܿܝܼ ܫܘܼܠܛܵܢ ܡܲܠܟܵܐ ܀ 81 :ܘܸܟܼܒܲܪ ܐܸܡ݂ܲܪ ܕܫܘܼܛܘ ܝܘܼܠܦܵܢܵܐ ܕܝܗ̄ܘܼܕܼܵܝܘܼܬܼܵܐ 82 ܕܠܵܐ ܢܸܫܬܲܩܠܘܼܢ ܒܢܲܝ̈ ܓܵܠܘܼܬܼܵܐ ܥܲܠ ܡܲܠܟܿܘܼܬܼܵܐ ܀ 83 :ܟܒܲܪ ܐܵܦ ܨܲܠܡܵܐ ܒܗܵܕܹܐ ܬܸܢܘܲܝ ܗܘ̤ܵܐ ܬܘܼܩܵܢܹܗ 84 ܕܲܢܨܘܼܕܼܘܼܢ ܒܹܗ ܪ̈ܵܚܡܲܝ ܩܘܼܫܬܵܐ ܐܲܝܟ ܕܲܒܼܦܲܚܹ̈ܐ ܀ 85 :ܡܦܵܣܝܼܢ ܗ̄ܘ̣ܵܘ ܓܹܝܪ ܒܪܸܚܡܲܬܼ ܟܹܐܢܹ̈ܐ ܕܨܹܝܕܼ ܟܹܐܢܘܼܬܼܵܐ 86 ܥܲܠ ܗܵܝ̇ ܐܵܘܪܸܒܼܘ ܘܲܡ̣ܬܲܚܘ ܢܸܫ̈ܒܹܿܗ ܕܨܲܠܡܵܐ ܪܲܒܵܐ ܀ 87 :ܘܒܲܕܡܘܼܬܼ ܦܲܚܵܐ ܣܵܡ̣ܘܼܗܝ ܒܐܲܪܥܵܐ ܠܕܲܗܒܼܵܐ ܚܫܝܼܠܵܐ 88 ܕܲܒܼܦܲܐܝܘܼܬܹܗ ܢܸܣܢܘܿܢ ܫܘܼܦܪܵܐ ܕܦܲܐܝܘܼܬܼ ܢܲܦܫܵܐ ܀ 89 :ܫܘܼܦܪܵܐ ܕܟܹܐܢܹ̈ܐ ܐܲܪܡܝܼ ܛܢܵܢܵܐ ܕܟܲܠܕܵܝܘܼܬܼܵܐ 90 ܕܡܸܛܠ ܡ̇ܢܵܐ ܝ̄ܪܸܒܼ ܘܐܸܬܼܢܲܨܲܚ ܫܪܵܪܵܐ ܕܲܒܼܗܘܿܢ ܀ 91 :ܢܘܼܪܵܐ ܕܚܸܡܬܼܵܐ ܐܲܣܝܼܦܘ ܫܹܐܕܹ̈ܐ ܒܫܹܐܕܹ̈ܐ ܓܫܝܼܡܹ̈ܐ 92 ܕܲܢܛܲܠܩܘܼܢ ܒܵܗ̇ ܫܸܡ ܐܲܠܵܗܵܐ ܕܲܒܼܢܲܝ̈ ܐܲܒܼܪܵܡ ܀ 93 :ܐܲܝܟ ܕܲܒܼܩܲܝܣܹ̈ܐ ܫܲܓܼܪܘܼܗ̇ ܠܚܸܡܬܹܗ ܕܡܲܠܟܵܐ ܛܪܘܼܢܵܐ 94 ܕܢܸܗܘܸܐ ܡܓܼܵܘܙܸܠ ܦܘܼܩܕܵܢ ܡܸܠܬܹܗ ܛܵܒܼ ܡ̣ܢ ܢܘܼܪܵܐ ܀ 95 :ܟܵܣܵܐ ܕܪܘܼܓܼܙܵܐ ܝܲܗ̣̄ܒܼܘ ܠܹܗ ܕܢܸܫܬܸܿܐ ܠܡܲܠܟܵܐ ܕܪܘܼܓܼܙܵܐ 96 ܘܐܸܫܬܿܝܼ ܘܲܪܘܝܼ ܘܲܛܥ̣ܵܐ ܗܵܘܢܹܗ ܒܬܸܛܪܵܐ ܕܛܘܼܥܝܲܝ ܀ 97 :ܓܼܡܪܹܗ ܠܨܲܠܡܵܐ ܡܠܸܐ ܚܘܼܣܪܵܢܵܐ ܐܲܝܟ ܨܸܒܼܝܵܢܹܗ 98 ܘܲܥܒ݂ܲܕܼ ܥܹܐܕܼܵܐ ܕܢܸܬܼܥܲܝܕܼܘܼܢ ܒܹܥ ܐ̄ܢܵܫܵܐ ܒܥܵܘ̣ܠܵܐ ܀ 99 :ܦܩ݂ܲܕ ܦܘܼܩܕܵܢܵܐ ܕܡܠܸܐ ܫܪܵܝܵܐ ܕܕܸܚܠܲܬܼ ܩܘܼܫܬܵܐ 100 ܘܲܟܼܬ݂ܲܒܼ ܣܲܩܪܵܐ ܕܡܸܬܼܩܲܝܡܵܐ ܒܹܗ ܕܲܓܵܠܘܼܬܼܵܐ ܀ 101 :ܫܠ݂ܲܚ ܐܝܼܙܓܲܕܹ̈ܐ ܠܟܼܠ ܐܲܬܼܪ̈ܵܘܵܢ ܨܹܝܕܼ ܟܠ ܥܲܡܡܝܼ̈ܢ 102 ܘܫܲܪܝܼܘ ܡܣܲܒܿܪܝܼܢ ܣܒܲܪܬܼܵܐ ܕܡܲܠܝܵܐ ܚܘܼܣܪܵܢ ܢܲܦܫܵܐ ܀ 103 :ܫܡܲܥܘ ܠܲܡ ܥܲܡܡܹ̈ܐ ܦܘܼܩܕܵܢ ܡܲܠܟܵܐ ܩܵܥ̣ܵܘ ܟܵܪ̈ܘܿܙܹܐ 104 ܦܘܿܩܘ ܒܲܚܦܝܼܛܘܼ ܓܡܘܿܪܘ ܚܘܼܣܪܵܢܵܐ ܕܲܢܩܘܿܡܲܝ̈ܟܿܘܿܢ ܀ 105 ܗܵܟܲܢܵܐ ܠܲܡ ܦܩ݂ܲܕܼ ܪܹܫ ܡܲܠܟܵܐ ܪܹܫܵܐ ܕܕܲܗܒܼܵܐ: pb. 318 106 ܕܬܼܵܘ ܦܲܢܵܘ ܠܝܼ ܣܸܓܼܕܲܬܼ ܚܘܼܒܵܐ ܒܨܲܠܡܵܐ ܕܢܸܒܼܕܹܿܬܼ ܀ 107 :ܣܸܓܼܕܲܬܼ ܚܘܼܒܵܐ ܚܲܝܵܒܼܝܼܬܿܘܿܢ ܕܲܬܼܡܲܠܘܿܢ ܠܝܼ 108 ܦܪܘܿܥܘ ܚܵܘܒܲܬܼܟܼܘܿܢ ܕܠܵܐ ܬܸܬܼܢܲܓܿܕܼܘܼܢ ܐܲܝܟ ܚܲܝܵܒܹ̈ܐ ܀ 109 :ܠܟܼܘܼܪ ܒܘܼܚܪܵܢܵܐ ܨܒܹ̇ܝܬܼ ܕܐܲܥܸܠܟܼܘܿܢ ܒܥܸܠܲܬܼܨܲܠܡܵܐ 110 ܕܐܸܚܙ̣ܐ ܕܡܲܢ̣ܘܼ ܝܲܬܿܝܼܪ ܡܲܚܸܒܼ ܫܘܼܠܛܵܢ ܡ̇ܪܘܼܬܼܝ ܀ 111 :ܠܡܵܪܘܼܬܼܝ ܕܥܲܠ ܟܠ ܒܥܹ̇ܝܬܼ ܕܐܹܢܲܣܸܐ ܕܣܸܥ̇ܪܹܬܼ 112 ܕܐܹܠܲܦ ܕܡܲܢ̣ܘ ܕܲܡܥܲܨܸܐ ܠܵܗ̇ ܡܲܪܵܚܵܐܝܼܬܼ ܀ 113 :ܘܗܵܐ ܦܵܩܹ̇ܕܼ ܐ̄ܢܵܐ ܘܲܡܚܲܬܸܿܡ ܐ̄ܢܵܐ ܫܛܵܪܵܐ ܕܡܸܠܲܬܼܝ 114 ܐܲܪܡ̇ܘ ܐܝܼܕܼܵܐ ܘܲܚܬܼܘܿܡܘ ܒܵܬܲܪܝ ܒܝܲܕܼ ܣܸܓܼܓܲܬܼܘܿܢ ܀ 115 :ܘܗܵܐ ܐܵܡܲ̇ܪ ܐ̄ܢܵܐ ܘܲܡܣܲܗܸܕܼ ܐ̄ܢܵܐ ܠܥܹܝܢ ܟܠ ܘܲܒܼܟܼܠ 116 ܕܟܼܠܢܵܫ ܕܲܢܫܘܼܛ ܦܘܼܩܕܵܢ ܡܼܠܲܬܼܝ ܒܢܘܼܪܵܐ ܢܹܐܩܲܕܼ ܀ 117 :ܚܙܵܘ ܠܑܵ ܬܸܒܼܣܘܿܢ ܥܲܠ ܦܘܼܩܕܵܢܵܐ ܕܣܵܡܹ̇ܬܼ ܒܐܲܪܥܵܐ 118 ܕܠܵܐ ܬܸܬܼܚܲܝܒܼܘܼܢ ܒܓܼܙܵܪ ܕܝܼܢܵܐ ܕܲܕܠܵܐ ܪ̈ܲܚܡܹܐ ܀ 119 :ܢܦ݂ܲܩܘ ܫܲܠܝܼܛܹ̈ܐ ܘܟܲܢܫܸܘ ܥܲܡܡܹ̈ܐ ܠܥܹܐܕܼܵܐ ܕܨܲܠܡܵܐ 120 ܘܫܲܡܠܝܼܘ ܘܲܓܼܡܲܪܘ ܦܘܼܩܕܵܢ ܡܲܠܟܵܐ ܐܲܝܟ ܕܐܸܬܼܦܲܩܲܕܼܘ ܀ 121 :ܐܲܪܟܸܿܢ ܟܠܢܵܫ ܪܹܫܹܗ ܒܚܘܼܒܵܐ ܐܵܘ ܡ̣ܢ ܩܸܢܛܵܐ 122 ܘܝܲܩܲܪܘ ܘܲܣܓܸܕܼܘ ܡܠܝܼܠܹ̈ܐ ܠܚܲܪܫܵܐ ܕܠܵܐ ܒܘܼܝܵܢܵܐ ܀ 123 :ܦܘܼܩܕܵܢ ܡܲܠܡܵܐ ܐܲܪܗܸܒܼ ܐܸܢܘܿܢ ܩܲܠܝܼܠܵܐܝܼܬܼ 124 ܘܠܵܐ ܐܵܫܬܵܘܚܲܪܘ ܠܡܸܟܲܦ ܒܘܼܪܟܵܐ ܩܕܼܵܡ ܫܲܬܿܝܼܩܵܐ ܀ 125 :ܥܢܵܢܵܐ ܕܒܲܪܕܼܵܐ ܗܘ̤ܵܐ ܦܘܼܩܕܵܢܵܐ ܥܲܠ ܪܹ̈ܫܲܝܗܘܿܢ 126 ܘܚܸܒܼܛܲܬ̤ ܐܸܢܘܿܢ ܥܲܙܝܼܙܵܐܝܼܬܼ ܕܠܵܐ ܚܵܘܣܵܢܵܐ ܀ 127 :ܐܲܝܟ ܥܲܠܥܵܠܘ ܢܸܫܒܲܬ̤ ܚܸܡܬܹܗ ܒܹܝܬܼ ܣܸܕܼܪ̈ܲܝܗܘܿܢ 128 ܘܛܲܒܿܥܲܬ̤ ܐܸܠܦܵܐ ܕܪܸ̈ܥܝܵܢܲܝܗܘܿܢ ܒܣܸܓܼܕܲܬܼ ܙܹܐܦܵܐ ܀ 129 :ܟܠܗܹܝܢ ܐܸܠܦܹ̈ܐ ܒܵܒܼܵܠܵܝܵܬܼܵܐ ܛܒ݂ܲܥ ܒܲܚܛܝܼܬܼܵܐ 130 ܘܲܬܼܠܵܬܼ ܒܲܠܚܘܿܕܼ ܝܗ̄ܘܼ̈ܕܼܵܝܵܬܼܵܐ ܦܵܫ̣ ܒܲܙܗܝܼܪܘܼ ܀ 131 :ܠܟܼܠܗܹܝܢ ܫܸܒܿܠܹ̈ܐ ܕܚܲܩܠܵܐ ܕܐܵܬܼܘܿܪ ܚ̣ܒܲܛ ܠܘܼܚܵܡܵܐ 132 ܘܲܬܼܠܵܬܼ ܡܸܢܗܹܝܢ ܥܸܒܼܪ݁ܵܝܵܬܼܵܐ ܠܵܐ ܐܸܬܿܬܲܒܲܪ ܀ 133 :ܒܟܼܠܹܗ ܟܲܪܡ̇ܐ ܕܲܒܼܢܲܝ̈ ܢܸܡܪܘܿܕܼ ܣܒܲܟ ܡ̇ܫܘܿܛܵܐ 134 ܘܩܵܘܝܼ ܣܲܬܹ̈ܐ ܕܒܹܝܬܼ ܐܲܒܼܪܵܗܵܡ ܟܲܕܼ ܫܲܪܝܼܪ̈ܵܢ ܀ 135 :ܦܲܐܝܘܼܬܼ ܦܹܐܪܹ̈ܐ ܕܲܒܼܣܵܘ̈ܟܲܝܗܹܝܢ ܚܙ̣̰ܵܘ ܟܲܠܕܵܝܹ̈ܐ 136 ܘܐܲܟܼܪܝܼܘ ܕܥܲܠ ܡ̇ܢ ܠܵܐ ܐܸܬܼܚܲܒܲܠܘ ܐܵܦ ܦܹܐܪ̈ܲܝܗܹܝܢ ܀ 137 :ܛܢܵܢܵܐ ܕܪܘܼܓܼܙܵܐ ܠܒܸܫ̣ܘ ܡܲܪ̈ܲܚܹܐ ܥܲܠ ܬܲܡܝܼܡܹ̈ܐ 138 ܕܥܲܠ ܡ̇ܢ ܥܲܨܝܼܘ ܦܘܼܩܵܕܵܢ ܡܲܠܟܵܐ ܕܝܲܩܲܪ ܐܸܢܘܿܢ ܀ 139 :ܛܢܵܢܵܐ ܕܲܒܼܗܹܝܢ ܐܲܣܸܦ ܥܲܛܠܹ̈ܐ ܒܥܲܠܲܝ̈ ܠܸܒܵܐ 140 ܕܲܚܙܝܼ ܡܲܠܟܵܐ ܟܡܵ ܐܲܫܝܼܛܘܼܟ ܫ̈ܒܲܝܵܐ ܕܝܲܩܲܪܬܿ ܀ 141 :ܝܲܩܲܪܬܿ ܐܸܢܘܿܢ ܝܲܬܼܿܝܼܪ ܡ̣ܢ ܟܠ ܘܫܵܛ̣ܘܼܟ ܡ̣ܢ ܟܠ 142 ܐܲܫܠܸܛܬܿ ܐܸܢܘܿܢ ܘܐܲܪܝܼܡܘ ܥܸܩܵܒܼܵܐ ܕܲܢܕܼܘܼܫܘܼܢܵܟ ܀ 143 ܫܲܓܿܘܼܫܬܼܵܢܹ̈ܐ ܫܓܲܫܘ̣ ܠܲܫܝܼܫܵܐ ܥܲܠ ܚܲܟܿܝܼܡܹ̈ܐ: pb. 319 144 ܘܐܲܪܝܼܡ ܩܵܠܹܗ ܘܲܩܥ̣ܵܐ ܒܚܸܡܬܼܵܐ ܕܠܵܐ ܬܲܪܥܘܼܬܼܵܐ ܀ 145 :ܐܹܝܢ ܓܲܠܘܵܝܹ̈ܐ ܒܢܲܝ̈ ܓܵܠܘܼܬܼܵܐ ܕܲܓܸܿܠܘ ܫܘܼܠܛܵܢܝ 146 ܠܡܵܢ ܐܲܣܠܝܼܬܿܘܿܢ ܡܸܠܲܬܼ ܦܘܼܩܕܵܢܝ ܩܕܼܵܡ ܚܲܝ̈ܠܵܘܵܬܼܝ ܀ 147 :ܐܹܝܢ ܬܵܚܘܿܒܹ̈ܐ ܕܲܣܒ݂ܲܥܘ ܠܲܚܡܵܐ ܡ̣ܢ ܦܲܪ̈ܟܿܘܼܟܲܝ 148 ܠܡܵܢܵܐ ܦܪܲܥܬܿܘܿܢ ܚܘܼܒܼܠܹ̈ܐ ܒܝܼܫܹ̈ܐ ܠܲܕܼܝܲܩܲܪܟܼܘܿܢ ܀ 149 :ܐܹܝܢ ܝܗ̄ܘܼܕܵܝܹ̈ܐ ܕܟܲܢܝܼܬܼ ܐܸܢܘܿܢ ܒܫܸܡ ܐܲܠܵܗܲܝ̈ 150 ܠܡܵܝܢ ܐܲܫܸܛܬܿܘܿܢ ܣܸܓܼܕܲܬܼ ܨܲܠܡܵܐ ܕܝܲܩܲܪ ܨܸܒܼܝܵܢܝ ܀ 151 :ܐܹܝܢ ܚܸܪ̈ܚܵܝܹܐ ܕܠܵܐ ܐܸܬܼܒܲܝܲܢܘ ܒܐܝܼܩܵܪ̈ܲܝܗܘܿܢ 152 ܠܡܵܢ ܨܲܥܲܪܬܿܘܿܢ ܪܲܒܿܘܼܬܼ ܕܲܪܓܼܵܐ ܕܡܲܠܟܿܘܼܬܼܝ ܕܥܲܠ ܟܠ ܀ 153 :ܐܹܝܢ ܦܲܟܿܝܼܗܹ̈ܐ ܕܠܵܐ ܦܪ݂ܲܩ ܐܸܢܘܿܢ ܒܹܝܬܼ ܣܸܓܼܕܲܬܼܗܘܿܢ 154 ܠܡܵܢ ܒܲܙܲܚܬܿܘܿܢ ܒܥܹܐܕܼܵܐ ܕܥܸܒܼ̇ܕܹܿܬܼ ܠܐܲܠܵܗܝ ܪܲܒܵܐ ܀ 155 :ܠܵܐ ܙܵܥܘ̣ ܢܲܟܼܦܹ̈ܐ ܡ̣ܢ ܠܘܼܚܵܡܹܗ ܕܲܚܬܼܝܼܪ ܢܲܦܫܵܐ 156 ܘܠܵܐ ܐܸܬܼܪܲܦܝܼܘ ܡ̣ܢ ܬܘܼܟܼܠܵܢܵܐ ܕܕܼܚܠܲܬܼ ܩܘܼܫܬܵܐ ܀ 157 :ܠܵܐ ܒܥܵܘ̣ ܥܸܕܼܪܵܐ ܠܘܼܩܒܲܠ ܩܹܐܪܣܵܐ ܕܩܲܫܝܘܼܬܼ ܚܸܡܬܹܗ 158 ܘܠܵܐ ܐܸܬܿܬܲܚܬܿܝܼܘ ܕܲܢܦܝܼܣܘܼܢܵܝܗܝ ܐܵܦܠܵܐ ܒܡܸܠܬܼܵܐ ܀ 159 :ܠܵܐ ܠܲܡ ܚܵܫܲ݁ܚ ܦܝܵܣܵܐ ܕܡܸܠܹ̈ܐ ܠܡܲܠܟܵܐ ܦܲܢܝܼܘ 160 ܘܠܵܐ ܣܢܝܼܩܝܼܢܲܢ ܕܢܸܦܘܿܩ ܪܘܼܚܵܐ ܥܲܠ ܠܘܼܚܵܡܲܝ̈ܟ ܀ 161 :ܣܥܘܿܪ ܨܼܒܼܝܵܢܵܟ ܘܐܲܢܝܼܚ ܚܸܡܬܼܵܟ ܐܲܝܟ ܕܲܡܥܵܕܲܬܿ 162 ܚܢܲܢ ܠܵܐ ܡܲܨܝܵܐ ܕܢܸܛܥܸܐ ܒܛܘܼܥܝܲܝ ܕܣܸܓܼܕܲܬܼ ܨܲܠܡܵܟ ܀ 163 :ܫܡܲܝܵܐ ܘܐܲܪܥܵܐ ܠܵܐ ܡܦܝܼܣܝܼܢ ܠܲܢ ܕܢܸܣܥܘܿܪ ܗܵܕܹܐ 164 ܘܥܝܼܪܹ̈ܐ ܘܐ̄ܢܵܫܵܐ ܠܵܐ ܚܵܣ̇ܢܝܼܢ ܠܵܗ̇ ܠܓܲܢ̄ܒܵܪܘܼܬܲܢ ܀ 165 :ܚܵܣ ܠܲܢ ܕܢܸܛܥܸܐ ܠܲܫܡܵܐ ܪܲܒܵܐ ܕܒܹܝܬܼ ܐܲܒܼܪܵܗܵܡ 166 ܘܲܢܫܘܼܛ ܬܸܢܘܲܝ ܕܒܹܝܬܼ ܒܵܪܘܿܝܵܐ ܠܐܲܒܼܵܗ̈ܬܼܵܢ ܀ 167 :ܚܵܣ ܠܵܐ ܬܸܗܘܸܐ ܕܢܲܪܟܸܿܢ ܪܹܫܲܢ ܩܕܼܵܡ ܫܲܬܿܝܼܩܵܐ 168 ܘܢܸܩܪܸܐ ܐܲܠܵܗ ܠܠܵܐ ܐܲܠܵܗܵܐ ܕܪܲܟܸܿܒܼ ܙܹܐܦܵܐ ܀ 169 :ܚܵܣ ܠܲܢ ܕܢܸܗܘܸܐ ܥܲܒܼ̈ܕܹܿܐ ܠܥܲܒܼܕܵܐ ܕܥܲܒܼ݂ܕܿܘܼܗܝ ܥܲܒܼ̈ܕܹܿܐ 170 ܘܢܹܐܡܲܪ ܕܲܡܨܸܐ ܥܒܼܝܼܕܵܐ ܠܡܸܗܘܵܐ ܚܠܵܦ ܥܵܒܼܘܿܕܼܵܐ ܀ 171 :ܠܵܐ ܓܹܝܪ ܪܵܘܡ̇ܐ ܐܵܦܠܵܐ ܥܘܼܡܩܵܐ ܘܠܵܐ ܡܲܠܲܐܟܹ̈ܐ 172 ܐܵܦܠܵܐ ܒܪܝܼܬܼܵܐ ܐ̄ܚܪܹܬܼܵܐ ܐܸܢ ܐܝܼܬܼ ܬܫܲܚܠܸܦ ܡܸܠܬܲܢ ܀ 173 :ܗܵܐ ܣܲܗܸܕܢܵܟ ܦܘܼܫ ܡ̣ܢ ܡܸܠܹ̈ܐ ܘܚܵܘܵܐ ܥܒܼܵܕܹ̈ܐ 174 ܒܩܝܼ ܨܸܒܼܝܵܢܲܢ ܒܢܘܼܪܵܐ ܕܚܸܡܬܼܵܟ ܘܲܚܙܝܼ ܕܫܲܪܝܼܪ ܀ 175 :ܫܡ݂ܲܥ ܒܵܒܼܠܵܝܵܐ ܡܸܠܹ̈ܐ ܕܡܲܠ̈ܝܵܢ ܒܘܼܛܵܠ ܨܲܠܡܹܗ 176 ܘܲܫܓܲܫ ܢܲܦܫܹܗ ܡܲܪܝܼܪܵܐܝܼܬܼ ܠܒܲܪ ܡ̣ܢ ܛܲܟܼܣܵܐ ܀ 177 ܦܸܪܚܲܬ̤ ܡܸܪܬܼܵܐ ܕܡܲܪܝܼܪܘܼܬܹܗ ܒܓܼܵܘ ܚܘܼܫܵܒܼܵܘ̈ܗܝ: pb. 320 178 ܘܲܩ̣ܪܵܐ ܥܲܒܼܕܵܘ̈ܗܝ ܘܙܲܝܸܢ ܐܸܢܘܿܢ ܠܡܸܫܓܲܪ ܢܘܼܪܵܐ ܀ 179 :ܫܓܼܘܿܪܘ ܐܲܬܿܘܿܢܵܐ ܫܲܒܼܥܵܐ ܐܲܥܦܹ̈ܿܐ ܦܩ݂ܲܕ ܚܲܪܡ̇ܢܵܐ 180 ܕܐܹܩܲܛܸܠ ܒܵܗ̇ ܒܢܲܝ̈ ܓܵܠܘܼܬܼܵܐ ܕܫ̇ܛܘ̣ ܦܘܼܩܕܵܢܲܝ̈ ܀ 181 :ܚܠܘܿܛܘ ܥܲܡ ܩܲܝܣܹ̈ܐ ܡܸܕܸܿܡ ܕܲܡܨܸܐ ܠܡܸܫܓܲܪ ܝܲܬܼܝܼܪ 182 ܘܐܸܬܼܒܲ ܥܝܵܪܬܵܐ ܕܨܲܠܡܵܐ ܕܐܲܠܵܗܝ ܡ̣ܢ ܥܵܒܼܪ݁ܵܝܹܐ܀ 183 :ܩ̣ܪܸܒܼܘ ܟܠ ܥܲܡܡܝܼ̈ܢ ܕܐܸܬܼܵܘ ܠܥܹܐܕܼܵܐ ܕܣܸܓܼܕܲܬܼ ܨܲܠܡܵܐ 184 ܢܹܐܬܼܘܿܢ ܘܢܸܙܘܿܢ ܝܲܩܕܵܢ ܐ̄ܢܵܫܵܐ ܕܫܵܛ̣ܘ ܝܲܩܝܼܪܘܼܬܼܝ ܀ 185 :ܠܥܹܝܢ ܣܲܓܿܝܼ̈ܠܹܐ ܐܲܫܝܼܛ ܐܸܢܘܿܢ ܠܲܡܫܝܼܛܵܢܲܝ̈ 186 ܕܢܸܚܙܸܐ ܟܠܢܵܫ ܘܠܵܐ ܢܲܫܬܿܥܠܸܐ ܠܘܼܩܒܲܠ ܡܼܠܲܝ̈ ܀ 187 :ܓ̣ܡܲܪܘ ܟܲܠܕܵܝܹ̈ܐ ܪܸܓܲܬܼ ܡܲܠܟܵܐ ܪܓܼܝܼܓܼ ܠܐܲܒܼܪܵܢܵܐ 188 ܘܲܫܓܲܪܘ ܢܘܼܪܵܐ ܘܙܲܡܸܢܘ ܥܲܡܡܹ̈ܐ ܐܲܝܟ ܕܐܸܬܼܦܲܩܲܕܼܘ ܀ 189 :ܟܢܲܫ̣ܘ ܓܲܪ̈ܒܿܕܼܵܝܹܐ ܐܵܦ ܬܸܒܼܬܵܝܹ̈ܐ ܟܸܢܫܝܼ̈ܢ ܟܸܢܫܝܼ̈ܢ 190 ܘܩܵܡ̣ܘ ܡ̇ܕܵܝܹ̈ܐ ܘܐܵܠܵܢܝܹ̈ܐ ܓܘܼܕܲܝܼ̈ܢ ܓܘܼܕܲܝܼ̈ܢ ܀ 191 :ܟܸܢܫܵܐ ܪܲܒܵܐ ܟܢܵܫ̣ܘ ܠܲܚܙܵܬܼܵܐ ܕܝܲܣܲܪ̈ܠܵܝܹܐ 192 ܕܢܸܚܙܘܿܢ ܬܲܗܪܵܐ ܕܚܘܼܡܣܵܢ ܐ̄ܢܵܫܵܐ ܕܙܵܟܹ̇ܐ ܠܢܘܼܪܵܐ ܀ 193 :ܥܲܝܢܵܐ ܕܟܼܠܢܵܫ ܠܘܵܬܼ ܐܲܬܿܘܿܢܵܐ ܨܲܕܲܝܼܕܼܵܐ ܗ̄ܘ̣ܵܬܼ 194 ܘܠܵܐ ܣܵ̇ܦ̇ܩܵܐ ܗ̣̄ܘܵܬܼ ܠܡܸܬܼܒܲܩܵܝܢܘܼ ܒܚܲܡܝܼܡܘܼܬܹܗ ܀ 195 :ܦܩ݂ܲܕܼ ܚܲܪܡ̇ܢܵܐ ܠܲܚ̈ܘܵܘܵܬܼܵܐ ܕܚܲܪܡܝܼܢ ܡܸܢܹܗ 196 ܘܲܦܟ݂ܲܪܘ ܐܸܢܘܿܢ ܠܩܲܢܝܲܝ̈ ܚܲܝܠܵܐ ܒܲܠܒܼܘܼܫܲܝ̈ܗܘܿܢ ܀ 197 :ܒܢܲܝ̈ܬܹܿܐ ܦܐ̈ܝܵܐ ܕܥܲܠ ܓܘܼܫ̈ܡܲܝܗܘܿܢ ܦܲܟܲܪܘ ܐܸܢܘܿܢ 198 ܕܬܸܣܲܦ ܢܘܼܪܵܐ ܩܲܠܝܼܠܵܐܝܼܬܼ ܒܗܲܕܵܡܲܝ̈ܗܘܿܢ ܀ 199 :ܒܪܘܼܓܼܙܵܐ ܣܲܥ̣ܪܘܼܗ̇ ܪ̈ܲܓܿܘܼܙܬܼܵܢܹܐ ܨܹܝܕܼ ܬܲܡܝܼܡܹ̈ܐ 200 ܕܲܢܢܝܼܚܘܼܢ ܒܵܗ̇ ܩܲܫܝܼܘܼܬܼ ܚܸܡܬܼܵܐ ܕܪܸ̈ܥܝܵܢܲܝܗܘܿܢ ܀ 201 :ܛܥܲܢ̣ܘ ܐܲܟܿܬܼܵܢܹ̈ܐ ܠܡܲܠ̈ܝܲܝ ܫܲܝܢܵܐ ܚܲܪܡ̇ܢܵܐܝܼܬܼ 202 ܘܲܫܕܼܵܘ ܐܸܢܘܿܢ ܒܡܸܨܥܲܬܼ ܢܘܼܪܵܐ ܥܵܘ̇ܠܵܐܝܼܬܼ ܀ 203 :ܢܚܸܬܼܘ ܫܲܪܝܼܪܹ݁ܐ ܘܩܵܡ̣ܘ ܒܐܲܬܿܘܿܢܵܐ ܒܲܒܼܗܝܼܠܘܼܬܼܵܐ 204 ܘܩܲܒܸܿܠ ܐܸܢܘܿܢ ܥܝܼܪܵܐ ܕܢܘܼܪܵܐ ܓܘܼܒܵܢܵܐܝܼܬܼ ܀ 205 :ܚܲܕܼ ܡܲܠܲܐܟܼܵܐ ܫܠ݂ܲܚ ܒܵܪܘܿܝܵܐ ܨܹܝܕܼ ܫܲܪܝܼܪ̈ܵܘܗܝ 206 ܕܢܸܛܲܪ ܐܸܢܘܿܢ ܡ̣ܢ ܢܸܟܼܝܵܢܹ̈ܐ ܕܫܲܠܗܹܒܼܝܼܬܼܵܐ ܀ 207 :ܪܘܼܚܵܐ ܕܛܲܠܵܐ ܥܒ݂ܲܕܼ ܪܘܼܚܵܢܵܐ ܒܓܼܵܘ ܐܲܬܿܘܿܢܵܐ 208 ܘܲܦܟ̣ܲܗ ܥܘܼܙܵܐ ܕܚܲܡܝܼܡܘܼܬܼܵܐ ܒܩܲܪܝܼܪܘܼܬܼܵܐ ܀ 209 :ܫܲܒܼܛܵܐ ܕܢܘܼܪܵܐ ܐܸܚܲܕܼ ܒܐܝܼܕܹܗ ܢܘܼܪܵܢܵܝܵܐ 210 ܘܛܲܪܕܵܗ̇ ܠܢܘܼܪܵܐ ܕܠܵܐ ܬܸܬܼܩܲܪܲܒܼ ܨܹܝܕܼ ܗܲܕܵܡܹ̈ܐ ܀ 211 :ܢܘܼܪܵܐ ܠܢܘܼܪܵܐ ܚܙ̣ܵܬ̤ ܘܐܸܬܼܪܲܗܗܒܲܬ̤ ܘܥܵܩܲܬ̤ ܘܲܛܫܵܬ̤ 212 ܘܠܵܐ ܣܦ݂ܲܩ ܥܘܼܙܵܗ̇ ܠܡܸܬܼܒܲܩܵܝܘܼ ܒܚܸܙܘܵܐ ܕܲܚܙ̇ܬ̤ ܀ 213 :ܚܙ̇ܬܼܵܐ ܕܚܝܼܠܬܵܐ ܚܙ̇ܬ̤ ܝܵܩܹ̇ܕܿܬܵܐ ܒܐܝܼܕܼܵܐ ܕܪܘܼܚܵܐ 214 ܘܲܛܥܵܬ̤ ܛܲܟܼܣܵܗ̇ ܘܫܲܪܝܲܬ̤ ܪܵܕܹܝܵܐ ܠܒܲܪ ܡ̣ܢ ܛܲܟܼܣܵܗ̇ ܀ 215 ܦܓܼܕܹ̈ܐ ܕܢܘܼܪܵܐ ܐܲܡܝܼ ܥܝܼܪܵܐ ܒܦܘܼܡ̇ܐ ܕܢܘܼܪܵܐ: pb. 321 216 ܘܛܲܟܸܿܣ ܪܲܗܛܵܐ ܕܲܒܼܠܝܼܠܘܼܬܼܵܗ̇ ܕܠܵܐ ܬܸܬܼܒܲܥܪܲܪ ܀ 217 :ܛܲܟܼܣܵܐ ܢܸܛܪܲܬ̤ ܦܵܪܘܿܫܬܵܐ ܩܕܼܵܡ ܦܵܪ݁ܘܿܫܹܐ 218 ܘܠܵܐ ܐܸܬܼܝܲܥܢܲܬ̤ ܠܡܸܒܼܠܲܥ ܣܲܓܿܝܼ ܐܲܝܟ ܕܲܡܥܵܕܼܵܐ ܀ 219 :ܡܲܢ̣ܘܼ ܡܸܡܬܼܘܿܡ ܚܙ̣ܵܐ ܬܸܕܡܘܼܪܬܵܐ ܐܲܝܟ ܕܲܒܼܟܹܐܢܹ̈ܐ 220 ܦܘܼܡ̇ܐ ܝܲܥܢܵܐ ܕܣܝܼܡ ܒܹܗ ܐܘܼܟܼܠܵܐ ܘܠܵܐ ܩܵܪܸܒܼ ܠܹܗ ܀ 221 :ܡܲܢ ܐܸܬܼܒܲܩܝܼ ܒܫܲܠܗܹܒܼܝܼܬܼܵܐ ܫܝܘܿܠ ܒܵܠܲܥܬܼܵܐ 222 ܕܣܸܢܫܹܠܝ ܟܲܕܼ ܠܵܐ ܣܸܒܼܥܲܬ̤ ܡ̣ܢ ܝܘܿܡ ܕܲܗܘ̤ܵܬܼ ܀ 223 :ܡܲܢ ܣܵܡ̣ ܓܸܙܪܵܐ ܒܦܘܼܡ ܐܲܪܝܘܿܬܼܵܐ ܡܚܲܒܵܠܵܢܝܼܬܼܵܐ 224 ܘܠܵܐ ܩܸܪܒܲܬ̤ ܠܹܗ ܐܲܟܼܡܵܐ ܕܢܘܼܪܵܐ ܠܦܲܓܼܪܹ̈ܐ ܕܢܲܟܼܦܹ̈ܐ ܀ 225 :ܐܘܿ ܠܲܟܼܝܵܢܵܐ ܕܲܛܥ̣ܵܐ ܟܝܵܢܹܗ ܕܠܵܐ ܒܲܥܝܵܕܼܵܐ 226 ܘܲܫܒ݂ܲܩ ܛܲܟܼܣܹܗ ܘܲܪܕܼܵܐ ܒܐܘܼܪܚܵܐ ܕܠܵܐ ܚܲܙܝܵܐ ܠܹܗ ܀ 227 :ܐܘܿ ܠܐܵܟܼܘܿܠܬܵܐ ܕܲܟܼܡܵܐ ܕܬܹܐܟܼܘܿܠ ܛܵܒܼ ܡܸܬܼܝܲܥܢܵܐ 228 ܕܓܸܙܪܲܬ̤ ܨܵܘܡ̇ܐ ܘܚܸܣܠܲܬ̤ ܦܘܼܡ̇ܗ̇ ܡ̣ܢ ܡܹܐܟܼܘܼܠܬܵܐ ܀ 229 :ܐܘܿ ܠܝܵܩܹܕܿܬܵܐ ܕܲܟܼܡܵܐ ܕܬܹܐܩܲܕܼ ܥܘܼܙܵܗ̇ ܣܵܓܹ̇ܐ 230 ܕܩܸܪܲܬ̤ ܚܸܡܬܸܵܗ̇ ܒܥܸܕܵܢ ܩܹܐܪܣܵܐ ܕܓܲܢ̄ܒܵܪܘܼܬܼܵܗ̇ ܀ 231 :ܐܘܿ ܠܢܲܒܼܪܲܫܬܵܐ ܕܲܟܼܡܵܐ ܕܣܵܦ̇ܐ ܬܘܼܒܼ ܡܸܬܼܝܲܥܢܵܐ 232 ܕܣܸܦܲܬ̤ ܣܲܓܿܝܼ ܘܠܵܐ ܐܸܬܼܝܥܢܲܬ̤ ܣܲܦܝܼܦܘܼܬܼܵܗ̇ ܀ 233 :ܐܘܿ ܟܡܵܐ ܘܐܲܝܟܲܢ ܢܹܐܡܲܪ ܕܲܗܘ̤ܵܐ ܗܵܕܹܐ ܕܲܗܘ̤ܵܬܼ 234 :ܕܣܝܼܡܵܐ ܚܲܒܿܬܼܵܐ ܒܦܘܼܡ ܝܵܩܹܕܲܬܵܐ ܘܠܵܐ ܡܸܬܿܢܲܟܼܝܵܐ 235 :ܐܘܿ ܟܡܵܐ ܥܲܙܝܼܘ ܟܹܐܢܹ̈ܐ ܢܲܟܼܦܹ̈ܐ ܠܡܸܚܙܵܐ ܥܘܼܙܵܗ̇ 236 ܘܠܵܐ ܐܸܬܼܢܲܟܼܝܲܬ̤ ܚܙܵܬܼܵܐ ܕܦܲܓܼܪܵܐ ܡ̣ܢ ܓܵܘܙܲܠܬܵܐ ܀ 237 :ܐܘܿ ܟܡܵܐ ܣܲܝܒܲܪ ܥܲܝ̈ܢܲܝ ܒܸܣܪܵܐ ܠܡܸܚܙܵܐ ܬܲܗܪܵܐ 238 ܕܐܵܦ ܪ̈ܘܼܚܵܢܹܐ ܬܗܲܪܘ ܘܐܸܬܿܕܲܡܲܪܘ ܒܪܲܒܿܘܼܬܼ ܬܲܗܪܵܗ̇ ܀ 239 :ܐܲܪܒܿܝܼܢ ܘܲܬܼܫܲܥ ܐܲܡܝܼ̈ܢ ܣܸܠܩܲܬ̤ ܫܲܠܗܹܒܼܝܼܬܼܵܐ 240 ܘܲܟܼܡܵܐ ܕܣܸܠܩܲܬ̤ ܗܵܟܲܢ ܢܸܚܬܲܬ̤ ܕܠܵܐ ܡܘܼܫ̈ܚܵܬܼܵܐ ܀ 241 :ܡܲܢ ܟܲܝ ܐܲܪܡܝܼ ܡܫܘܼܚܬܼܵܐ ܒܐܵܐܲܪ ܘܲܣܠܸ݂ܩ ܡܲܫ̣ܚܹܗ 242 ܕܗܵܐ ܠܵܐ ܡܲܨܝܵܐ ܠܡܸܡܫܲܚ ܡܸܕܹܿܡ ܒܸܠܥܵܕܼ ܡܸܕܸܿܡ ܀ 243 :ܐܲܝܕܵܐ ܗ̄ܝܼ ܐܝܼܕܼܵܐ ܕܠܸܒܼܟܲܬ̤ ܩܲܢܝܵܐ ܠܥܸܠ ܡ̣ܢ ܢܘܼܪܵܐ 244 ܘܡܸܫܚܲܬ̤ ܚܘܼܛܵܐ ܡ̣ܢ ܐܲܬܿܘܿܢܵܐ ܠܫܘܼܠܵܡ ܕܸܠܩܵܗ̇ ܀ 245 :ܗܵܘ̇ ܦܘܼܩܕܢܵܐ ܕܐܲܪܡܝܼ ܒܦܘܼܡ̇ܗ̇ ܦܓܼܘܼܕܹ̈ܐ ܕܫܸܬܼܩܵܐ 246 ܗܘ̤ܝܘܼ ܡܲܫ̣ܚܵܗ̇ ܒܪܘܼܚ ܓܸܠܝܵܢܵܐ ܒܦܘܼܡ ܕܵܢܝܐܹܝܠ ܀ 247 :ܗܵܘ̇ ܕܐܸܡ݂ܲܪ ܠܵܗ̇ ܕܬܸܛܲܪ ܛܲܟܼܣܵܗ̇ ܕܠܵܐ ܒܲܥܝܵܕܼܵܐ 248 ܗܘ̤ ܓܠ̣ܵܐ ܠܥܲܒܼܕܹܿܗ ܕܲܟܼܡܵܐ ܐܲܡܝܼ̈ܢ ܣܸܠܩܲܬ̤ ܒܐܵܐܲܪ ܀ 249 :ܡ̣ܢ ܟܠ ܝܵܘ̈ܡܝܼܢ ܚܵܘܝܲܬ̤ ܕܸܠܩܵܗ̇ ܒܗܵܘ̇ ܥܸܕܵܢܵܐ 250 ܕܢܸܬܼܒܲܩܘܿܢ ܒܵܗ̇ ܐܵܟܼ̈ܠܲܝ ܩܲܪ̈ܨܹܐ ܕܫܲܓܼܪܘܼܗ̇ ܡܲܓܵܢ ܀ 251 ܥܲܡܗܘܿܢ ܕܵܢܲܬ̤ ܒܝܲܕܼ ܡܲܣܲܩܬܵܐ ܕܠܲܐܦܲܝ̈ ܪܵܘܡ̇ܐ: pb. 322 252 ܕܲܚܙܵܘ ܐ̄ܢܵܫܵܐ ܟܡܵܐ ܐܸܬܿܬܿܪܝܼܡܲܬ̤ ܘܢܸܛܪܲܬ̤ ܛܲܟܼܣܵܐ ܀ 253 :ܚܘܼܪܘ ܟܲܠܕܵܝܹ̈ܐ ܩܥܵܬ̤ ܫܲܬܿܝܼܩܬܵܐ ܨܹܝܕܼ ܡܲܠܵܠܹ̈ܐ 254 ܟܲܕܼ ܢܘܼܪܵܐ ܐ̄ܢܵܐ ܗܘܹ̇ܝܬܼ ܠܵܐ ܢܘܼܪܵܐ ܩܕܼܵܡ ܒܸܣܪ̈ܵܢܹܐ ܀ 255 :ܐܘܼܟܼܠܵܐ ܕܒܸܣܪܵܐ ܐܵܘܫܸܛܬܿܘܿܢ ܠܝܼ ܕܐܸܬܿܬܲܪܣܸܐ ܒܹܗ 256 ܘܗܵܐ ܣܝܼܡ ܩܘܼܕܡܲܝ ܘܲܡܣܲܪܸܕ ܠܝܼ ܕܠܵܐ ܐܸܩܪܘܿܒܼ ܠܹܗ ܀ 257 :ܢܘܼܪܵܐ ܒܫܸܬܼܩܵܐ ܘܥܝܼܪܵܐ ܩܒܵܠܵܐ ܒܲܚܸܢܘ ܕܝܼܢܵܐ 258 ܘܙܲܟܿܝܼܘ ܘܚܲܝܸܒܼܘ ܠܲܬܼܪܹܝܢ ܓܼܒܿܝܼ̈ܢ ܦܵܪܘܿܫܵܐܝܼܬܼ ܀ 259 :ܠܟܹܐܢܹ̈ܐ ܢܛܲܪܘ ܗ̄ܘ̣ܵܘ ܘܲܠܥܵܘ̈ܠܹܐ ܪܕܼܵܘ ܩܲܫܝܵܐܝܼܬܼ 260 ܕܢܹܐܠܲܦ ܟܠܢܵܫ ܕܚܹܝܠ ܥܵܒܼܘܿܕܼܵܐ ܫܪܸܐ ܗ̄ܘ̣ܵܐ ܒܥܲܒܼܕܵܘ̈ܗܝ ܀ 261 :ܚܹܝܠ ܥܵܒܼܘܿܕܵܐ ܚܙܵܬ̤ ܢܲܒܼܪܲܫܬܵܐ ܒܲܥ̇ܒܼܵܕܼ ܐܝܼܕܼܵܘ̈ܗܝ 262 ܘܚܵܓܲܬ̤ ܡܸܢܹܗ ܘܠܵܐ ܩܸܪܒܲܬ̤ ܠܹܗ ܐܲܝܟ ܕܲܡܥܵܕܼܵܐ ܀ 263 :ܥܝܵܕܼܵܗ̇ ܗܵܢܵܘ̇ ܕܬܲܟܸܿܐ ܟܠܫܵܥ ܠܲܕܼܩܵܪܸܒܼ ܠܵܗ̇ 264 ܘܗܵܪܟܵܐ ܫܸܬܼܩܲܬ̤ ܘܠܵܐ ܢܟܼܵܬ̤ ܦܲܓܼܪܹ̈ܐ ܡܸܬܼܢܲܟܼܝܵܢܹ̈ܐ ܀ 265 :ܐܲܝܟ ܕܲܒܼܥܲܪܣܵܐ ܕܗܲܢܝܼܐܘܼܬܼܵܐ ܓܠ̣ܵܘ ܒܵܗ̇ ܟܹܐܢܹ̈ܐ 266 ܘܗ̤ܝ ܐܲܝܟ ܐܲܡܬܼܵܐ ܫܲܡܫܲܬ̤ ܛܲܟܼܣܵܐ ܕܲܦܠܸܐ ܠܥܲܒܼ̈ܕܹܿܐ ܀ 267 :ܓܢܘܿܢܵܐ ܦܲܐܝܵܐ ܗܘ̤ܵܐ ܐܲܬܿܢܵܐ ܠܦܲܐ̈ܝܲܝ ܢܲܦܫܵܐ 268 ܘܲܡܕܲܝܠܝܼܢ ܗ̄ܘ̣ܵܘ ܥܝܼܪܹ̈ܐ ܘܢܘܼܪܵܐ ܩܕܼܵܡ ܐܲܦܲܝ̈ܗܘܿܢ ܀ 269 :ܐܲܝܟ ܕܲܒܼܢܵܘܣܵܐ ܕܲܩܕܼܘܿܫ ܩܘܼܕܼܫܹ̈ܐ ܩܵܡ̣ܘ ܒܲܨܠܘܿܬܼܵܐ 270 ܘܩܲܪܸܒܼܘ ܬܲܡ̇ܢ ܕܸܒܼܚܹ̈ܐ ܕܟܲܝ̈ܵܐ ܕܪܼ̈ܥܝܵܢܲܝܗܘܿܢ ܀ 271 :ܒܚܲܫܹ̈ܐ ܪܲܒܵܐ ܨܲܠܝܼܘ ܢܲܟܼܦܹ̈ܐ ܚܵܫܘܿܫܑܵܐܝܼܬܼ 272 ܘܪܵܥܘܿܡܵܐܝܼܬܼ ܒܥܵܘ̣ ܘܐܸܬܼܟܲܫܲܦܘ ܥܲܠ ܚܲܝܲܝ̈ܗܘܿܢ ܀ 273 :ܒܩܵܠܵܐ ܕܩܘܼܕܼܫܵܐ ܦܪܲܥܘ ܬܵܘܕܲܝܼܬܼܵܐ ܠܕܲܐܚܝܼ ܐܸܢܘܿܢ 274 ܘܲܒܼܦܘܼܪܫܵܢܵܐ ܪܲܟܸܿܒܼܘ ܡܸܠܹ̈ܐ ܕܲܙܡܝܼܪ݁ܵܬܼܵܐ ܀ 275 :ܒܪܝܼܟ ܒܼܵܪܘܿܝܵܐ ܩܥ̣ܵܘ ܩܲܕܿܝܼܫܹ̈ܐ ܩܲܕܿܝܼܫܵܐܝܼܬܼ 276 ܕܲܢܛ݂ܲܪ ܚܲܝܲܝ̈ܢ ܡ̣ܢ ܢܸܟܼܝܵܢܹ̈ܐ ܕܫܲܠܗܹܒܼܝܼܬܼܵܐ ܀ 277 :ܒܪܝܼܟ ܕܲܓ̣ܠܵܐ ܒܲܢ ܐܵܬܼܵܐ ܕܪ̈ܲܚܡܵܘܗܝ ܕܲܓܼܙܵܪ ܕܝܼܢܹܗ 278 ܘܒܲܕܸܿܩ ܒܐܝܼܕܲܢ ܚܹܝܠ ܪܲܒܿܘܼܬܹܗ ܕܚܹܝܠ ܟܠ ܡܸܫܟܲܚ ܀ 279 :ܒܪܝܼܟ ܕܲܕܪܲܫ ܒܲܢ ܐܘܼܪܚܵܐ ܠܐ̄ܢܵܫܵܐ ܠܘܵܬܼ ܝܼܕܲܥܬܹܗ 280 ܘܥܲܒܼܕܲܢ ܣܵܗ̈ܕܹܿܐ ܕܪܲܒܿܘܼܬܼ ܚܲܝܠܹܗ ܒܹܝܬܼ ܒܵܒܼܠܵܝܹ̈ܐ ܀ 281 :ܒܪܝܼܟܼܘܼ ܕܙܲܝܸܢ ܥܝܼܪܹ݁ܐ ܕܢܘܼܪܵܐ ܒܙܲܝܢܵܐ ܕܲܫܡܹܗ 282 ܘܲܥܒ݂ܲܕܼ ܒܹܐܪܣܵܐ ܥܲܡ ܝܵܩܹܕܿܬܵܐ ܚܠܵܦ ܗܲܕܵܡܲܝ̈ܢ ܀ 283 :ܒܪܝܼܟܼܘܼ ܕܐܲܠܸܦ ܛܲܟܼܣܵܐ ܠܢܘܼܪܵܐ ܒܠܝܼܠܲܬܼ ܒܐܘܼܟܼܠܵܗ̇ 284 ܘܲܒܼܦܘܼܪܫܵܢܵܗ̇ ܐܲܒܼܗܸܬܼ ܚܘܼܬܼܪܵܐ ܕܠܑܵܐ ܦܵܪ̈ܘܿܫܹܐ ܀ 285 :ܒܛܲܟܼܣܵܐ ܕܢܘܼܪܵܐ ܬܗܲܪܘ ܒܵܒܼܠܵܝܹ̈ܐ ܒܠܝܼ̈ܠܲܝ ܛܲܟܼܣܵܐ 286 ܕܡܲܢ ܟܲܝ ܐܲܪܡܝܼ ܦܓܼܘܼܕܹ̈ܐ ܕܫܸܬܼܩܵܐ ܒܒܲܥܪܝܼܪܵܝܬܵܐ ܀ 287 :ܫܸܠܝܵܗ̇ ܢܲܓܼܕܹܿܗ ܠܠܸܒܹܿܗ ܕܥܲܛܠܵܐ ܠܘܵܬܼ ܒܘܼܝܵܢܵܐ 288 ܘܫܲܪܝܼ ܒܵܥܹ̇ܐ ܥܒܵܬܼܵܐ ܕܚܲܝܠܵܐ ܕܚܲܣܢܹ݂ܗ ܠܚܲܝܠܹܗ ܀ pb. 323 289 :ܓܘܼܢܚܵܐ ܪܲܒܵܐ ܢܦܲܠ̣ ܥܲܠ ܡܲܠܟܵܐ ܘܚܲܠܵܘܵܬܹ̈ܐ 290 ܕܲܚܙ̣ܵܘ ܢܘܼܪܵܐ ܕܠܵܐ ܡܸܫܬܿܠܛܵܐ ܒܐܘܼܟܼܠܵܐ ܕܝܲܗ̣̄ܒܼܘ ܠܵܗ̇ ܀ 291 :ܚܙ̣ܵܘ ܕܐܲܣܝܼܪܵܐ ܘܠܵܐ ܡܸܬܼܩܲܪܒܼܵܐ ܠܝܼܣܲܪ̈ܠܵܝܹܐ 292 ܘܲܫܪܵܐ ܦܘܼܡܵܗ̇ ܠܲܡܚܲܒܵܠܘܼ ܠܐܵܟܼ̈ܠܲܝ ܩܲܪ̈ܨܹܐ ܀ 293 :ܚܙ̣ܵܘ ܕܲܒܼܒܲܝܬܵܗ̇ ܒܗܝܼܠܵܐ ܘܫܲܠܝܵܐ ܡ̣ܢ ܣܘܼܥܪܵܢܵܗ̇ 294 ܘܲܠܒܲܪ ܡܸܢܵܗ̇ ܟܬܼܝܼܫܵܐ ܘܩܵܥ̇ܝܵܐ ܒܲܥܪܝܼܪܵܐܝܼܬܼ ܀ 295 :ܚܙ̣ܵܐܘܼܗ̇ ܕܦܸܟܼܣܲܬ̤ ܥܲܙܝܼܙܘܼܬܼܵܗ̇ ܒܓܼܵܘ ܐܲܬܿܘܿܢܵܐ 296 ܘܢܸܦܩܲܬ̤ ܚܵܘܝܲܬ̤ ܬܘܼܩܦܵܐ ܕܚܲܝܠܵܗ̇ ܒܲܡܬܲܩܢܵܢܹ̈ܝܗ̇ ܀ 297 :ܠܐܸܒܼܠܵܐ ܗܦܲܟܼܬܹܗ ܠܥܹܐܕܼܵܐ ܕܨܲܠܡܵܐ ܒܝܲܕܼ ܦܘܼܪܫܵܢܵܗ̇ 298 ܘܲܦ̣ܢܵܐ ܩܵܠܵܐ ܕܲܘܡܝܼܪ݁ܵܬܼܵܐ ܠܘܵܬܼ ܐܘܿܠ̈ܝܵܬܼܵܐ ܀ 299 :ܟܠܵܗ̇ ܒܵܒܹܠ ܚܵܕܵܝܵܐ ܗ̄ܘ̣ܵܬܼ ܒܹܗ ܥܒܲܕܿܥܹܐܕܼ ܡܲܠܟܵܐ 300 ܘܕܲܚܙܵܬ̤ ܡܲܠܟܵܐ ܕܠܵܐ ܫܲܪ ܡܸܠܵܘ̈ܗܝ ܒܟܼܵܬ̤ ܘܐܸܬܼܐܲܒܼܠܲܬ̤ ܀ 301 :ܒܐܸܒܼܠܹܗ ܕܡܲܠܟܵܐ ܐܲܒܼܝܼܠܝܼܢ ܗ̄ܘ̣ܵܘ ܚܲܝܠܵܘܵܬܹ̈ܐ 302 ܕܲܚܙ̣ܵܘ ܕܲܢܦܲܠ ܪܵܘܡ̇ܐ ܕܠܸܒܹܿܗ ܡ̣ܢ ܬܘܼܟܼܠܵܢܹܗ ܀ 303 :ܬܟܼܝܼܠ ܗ̄ܘ̣ܵܐ ܣܲܟܼܠܵܐ ܕܡܹܐܪܲܒܼ ܝܵܪܹܒܼ ܒܥܸܠܲܬܼ ܨܲܠܡܵܐ 304 ܘܕܲܚ̣ܙܵܐ ܕܫܵܛ̣ܘܼܗܝ ܛܠܵܝܹ̈ܐ ܫܒܲܝܵ̈ܐ ܒܗܸܬܼ ܘܐܸܬܼܟܲܐܲܪ ܀ 305 :ܣܒ݂ܲܪ ܦܲܟܿܝܼܗܵܐ ܕܲܠܦܘܼܬܼ ܪܵܡܡܹܗ ܡܪܝܼܡ ܫܘܼܠܛܵܢܹܗ 306 ܘܲܕܼܒܼܙܲܚܘ ܒܹܗ ܒܢܲܝ̈ ܓܵܠܘܼܬܼܵܐ ܐܲܚܕܹܿܗ ܓܘܼܢܚܵܐ ܀ 307 :ܓܘܼܚܢܵܐ ܐܲܚܕܹܿܗ ܟܲܕܼ ܚܵܪ̣ܵ ܘܲܚܙ̣ܵܐ ܛܠܵܝܹ̈ܐ ܒܢܘܼܪܵܐ 308 ܕܲܡܗܲܠܟܼܝܼܢ ܗ̄ܘ̣ܵܘ ܘܠܵܐ ܡܸܬܼܟܵܘܹܝܢ ܗܲܕܵܡܲܝ̈ܗܘܿܢ ܀ 309 :ܗܸܢܘ̣ܿܢ ܐܸܢܘܿܢ ܐܘܵ ܕܲܠܡܵܐ ܠܵܐ ܪܢ̣ܵܐ ܚܸܪܝܵܝܵܐ 310 ܒܚܲܝܹ̈ܐ ܡܗܲܠܟܼܝܼܢ ܐܵܘ ܕܲܠܡܵܐ ܟܲܝ ܠܵܐ ܫܲܪܝܼܪܵܐ ܀ 311 :ܚܕܲܬܵܐ ܗ̄ܝܼ ܕܲܗܘ̤ܵܬܼ ܒܹܝܬܼ ܒܵܒܼܠܵܝܹ̈ܐ ܘܠܵܐ ܚܲܙܝܵܐ ܠܝܼ 312 ܘܐܸܢ ܫܲܪܝܼܪܵܐ ܕܲܓܵܠ ܣܲܒܼܪܵܐ ܕܣܲܟܼܝܼܢܲܢ ܠܹܗ ܀ 313 :ܣܲܟܿܝܼܢ ܕܢܹܐܪܲܒܼ ܒܝܲܕܼ ܪܲܒܿܘܼܬܼܵܐ ܕܨܲܠܡܵܐ ܕܲܥܒ݂ܲܕܼܢ 314 ܘܗܵܐ ܙܥܲܪ̄ܢ ܡ̣ܢ ܟܠ ܕܚܲܣܢܘܼ̣ܗܝ ܠܚܲܠܲܢ ܬܠܵܬܼܵܐ ܓܲܒܼܪ̈ܝܼܢ ܀ 315 :ܬܠܵܬܼܵܐ ܓܼܒܼܪ̈ܝܼܢ ܫܕܼܝܹܢ ܒܐܲܬܿܘܿܢܵܐ ܐܲܝܟ ܕܲܠܡܵܘܬܵܐ 316 ܘܗܵܐ ܚܵܙܹ̇ܐ ܐ̄ܢܵܐ ܕܕܼܵܫܘܼܗܝ ܘܩܵܡ̣ܘ ܘܐܲܗܸܠܘ ܗ̄ܘ̣ܵܘ ܒܲܢ ܀ 317 :ܬܠܵܬܼܵܐ ܝܲܗ̣̄ܒܼܢܲܢ ܕܢܸܗܘܘܿܢ ܐܘܼܟܼܠܵܐ ܠܫܲܠܗܹܒܼܝܼܬܼܵܐ 318 ܘܐܲܣܪ̣ܘܼܗܝ ܠܦܘܼܡ̇ܗ̇ ܡ̣ܢ ܦܲܓܼܪ̈ܲܝܗܘܿܢ ܘܫܲܡܪܘܼܗ̇ ܒܥܲܡܲܢ ܀ 319 :ܬܠܵܬܼܵܐ ܫܲܒܼܛ̈ܝܼܢ ܦܣܲܩ̣̄ܢ ܡ̣ܢ ܣܲܬܵܐ ܕܒܹܝܬܼ ܐܲܒܼܪܵܗܵܡ 320 ܘܗܵܐ ܚܵܙܹ̇ܐ ܐ̄ܢܵܐ ܕܐܲܦܪܲܥ ܡܸܢܗܘܿܢ ܐ̄ܚܪܹܢܵܐ ܕܲܗܕܼܝܼܪ ܀ 321 :ܗܸܕܼܪܵܐ ܪܲܒܵܐ ܡܲܠܝܵܐ ܚܙܵܬܹܗ ܕܲܪܒܼܝܼܥܵܝܵܐ 322 ܘܲܡܫܲܓܼܢܲܝ ܗ̄ܘ̣ ܙܝܼܘܵܐ ܕܐܲܦܵܘ̈ܗܝ ܡ̣ܢ ܕܲܥܒܼܝܼܕܹ̈ܐ ܀ 323 :ܥܵܠܹ̇ܒܼ ܚܸܙܘܹܗ ܐܵܦ ܠܲܚܙܵܬܼܵܗ̇ ܕܫܲܠܗܹܒܼܝܼܬܼܵܐ 324 ܘܸܟܼܒܲܪ ܡܸܢܹܗ ܚܵܓܲܬ̤ ܢܘܼܪܵܐ ܦܵܪܘܿܫܵܐܝܼܬܼ ܀ 325 :ܟܒܲܪ ܗܘ̤ ܛܲܪܕܵܗ̇ ܡ̣ܢ ܦܲܓܼܪ̈ܲܝܗܘܿܢ ܕܲܒܼܢܲܝ̈ ܫܸܒܼܝܵܐ 326 ܘܐܲܠܦܵܗ̇ ܕܬܸܦܘܿܩ ܬܸܚܪܘܿܒܼ ܣܸܕܼܪܹ̈ܐ ܕܚܲܝ̈ܠܵܘܵܬܲܢ ܀ pb. 324 327 :ܟܒܲܪ ܗܘ̤ ܝܲܗ̣̄ܒܼ ܒܵܗ̇ ܦܵܪܘܿܫܘܼܬܼܵܐ ܒܠܵܐ ܦܵܪܘܿܫܬܵܐ 328 ܘܲܒܼܦܘܼܩܕܵܢܹܗ ܩܢܵܬ̤ ܫܘܼܠܛܵܢܵܐ ܕܬܲܚܸܐ ܘܲܬܸܡܝܼܬܼ ܀ 329 :ܡ̇ܢܲܐ ܗ̄ܝܿ ܗܵܕܹܐ ܕܓܸܕܫܲܬ̤ ܒܐܲܪܥܲܢ ܘܲܒܼܝܵܘ̈ܡ̇ܬܲܢ 330 ܕܗܵܐ ܡܢܲܓܸܿܕܼ ܠܲܢ ܢܸܓܼܕܵܐ ܕܢܲܦܫܲܢ ܐܲܝܟ ܕܲܠܒܼܝܼܫܹ̈ܐ ܀ 331 :ܠܲܒܼܢܲܝ̈ ܫܸܒܼܝܵܐ ܒܥ݂ܲܝܢ ܕܲܢܢܲܓܸܿܕܼ ܥܲܠ ܕܐܲܫܝܼܛܘܼܢ 332 ܘܲܗܦ݂ܲܟ ܢܲܓܿܕܲܢ ܘܲܡܢܲܓܸܿܕܼ ܠܲܢ ܥܲܙܝܼܙܵܐܝܼܬܼ ܀ 333 :ܒܢܘܼܪܵܐ ܣܒ݂ܲܪܢܲܢ ܕܢܸܬܼܒܲܥ ܡܸܢܗܘܿܢ ܥܝܵܪܬܵܐ ܕܨܲܥܪܲܢ 334 ܘܗܵܐ ܢܲܦܝܼܩܵܐ ܘܬܼܵܒܼ̇ܥܵܐ ܡܸܢܲܢ ܥܝܵܪܬܵܐ ܕܕܸܡܗܘܿܢ ܀ 335 :ܬܵܘ ܢܸܬܼܩܲܪܲܒܼ ܨܹܝܕܼ ܐܲܬܿܘܿܢܵܐ ܐܵܦܸܢ ܩܸܢܛܵܐ ܗ̄ܘ̣ 336 ܘܲܢܦܝܼܣ ܐܸܢܘܿܢ ܕܲܢܦܝܼܣܘܼܢܵܗ̇ ܕܠܵܐ ܬܵܘܒܸܿܕܼ ܠܲܢ ܀ 337 :ܬܵܘ ܢܸܬܼܓܵܘܲܣ ܒܕܸܚܠܲܬܿ ܩܘܼܫܬܵܐ ܕܐܲܚܝܼܕܼܝܼܢ ܒܵܗ̇ 338 ܕܕܲܡ ܢܸܬܼܦܲܨܸܐ ܡ̣ܢ ܝܲܩܕܵܢܵܐ ܕܫܲܠܗܹܒܼܝܼܬܼܵܐ ܀ 339 :ܬܵܘ ܫܲܘܝܵܐܝܼܬܼ ܢܸܒܼܥܸܐ ܡܸܢܗܘܿܢ ܚܘܼܒܵܢܵܐܝܼܬܼ 340 ܕܢܸܦܩܘܼܢ ܒܲܥܓܲܠ ܡ̣ܢ ܐܲܬܿܘܿܢܵܐ ܘܬܸܫܠܸܬ ܢܘܼܪܵܐ ܀ 341 :ܒܩܸܢܛܵܐ ܘܚܘܼܒܵܐ ܩܪܸ̣݂ܒܼ ܗ̄ܘ̣ܵܐ ܡܲܠܟܵܐ ܘܲܒܼܢܲܝ̈ ܡܸܠܟܹܿܗ 342 ܘܲܒܼܥ̣ܵܘ ܘܐܲܦܝܼܣܘ ܠܡܸܬܼܢܲܓܿܕܵܢܹ̈ܐ ܕܣܲܓܿܝܼ ܥܠܲܥ̣ܢܲܢ ܀ 343 :ܬܵܘ ܦܘܼܩܘ ܥܲܒܼܕܵܘ̈ܗܝ ܕܐܲܠܵܗ ܟܠܵܐ ܡ̣ܢ ܐܲܬܿܘܿܢܵܐ 344 ܘܫܲܠܵܘ ܡܸܢܲܢ ܚܸܡܬܼܵܐ ܕܢܘܼܪܵܐ ܕܲܠܚܝܼܡܵܐ ܠܲܢ ܀ 345 :ܬܵܘ ܦܘܿܩܘ ܟܹܐܢܹ̈ܐ ܦܵܠ̇ܚܲܝ̈ ܩܘܼܫܬܵܐ ܕܠܵܐ ܒܘܼܣܪܵܢܵܐ 346 ܘܲܗܘ̤ܵܘ ܚܠܵܦܲܝܢ ܣܢܹܐܓܼܕܹ̈ܐ ܒܕܝܼܢܵܐ ܠܘܵܬܼ ܟܹܐܢܘܼܬܼܵܐ ܀ 347 :ܬܵܘ ܣܲܩܘ ܢܲܟܼܦܹ̈ܐ ܡ̣ܢ ܐܵܓܼܘܿܢܵܐ ܕܙܲܕܿܝܼܩܘܼܬܼܵܐ 348 ܣܲܓܿܝܼ ܠܐܝܼܬܿܘܿܢ ܘܚܲܝܸܒܼܬܿܘܿܢܵܗ̇ ܠܒܼܒܹܠ ܐܵܬܼܘܿܪ ܀ 349 :ܬܵܘ ܙܲܟܵܝܹ̈ܐ ܢܘܼܚܘ ܡ̣ܢ ܩܹܐܪܣܵܐ ܕܥܲܡ ܒܝܼܫܘܼܬܿܢ 350 ܕܗܵܐ ܐܸܬܼܓܲܠܝܲܬ̤ ܚܲܝܵܒܼܘܼܬܲܢ ܠܥܹܝܢ ܟܠ ܒܸܪ̈ܝܵܢ ܀ 351 :ܩܹܐܪܣܵܐ ܕܥܵܘ̣ܠܵܬ ܥܒ݂ܲܕܿܢܲܢ ܥܲܡܟܼܘܿܢ ܥܵܘ̇ܠܵܐܝܼܬܼ 352 ܘܕܵܚܙ̣ܵܐ ܟܹܐܢܵܐ ܗܲܦܟܹ݂ܿܗ ܠܥܵܘ̣ܠܲܢ ܥܲܠ ܒܝܼܫܘܿܬܲܢ ܀ 353 :ܟܹܐܝܢ ܐܲܠܵܗܟܼܘܿܢ ܘܫܲܪܝܼܪ ܚܘܼܒܹܿܗ ܕܲܠܘܵܬܼ ܥܲܒܼܕܵܘ̈ܗܝ 354 ܘܐܲܝܟ ܟܹܐܢܘܼܬܹܗ ܙܲܟܿܝܼ ܠܥܲܒܼܕܵܘ̈ܗܝ ܘܚܲܝܸܒܼ ܥܵܘ̣ܠܵܢ ܀ 355 :ܕܿܓܵܠ ܒܸܕܼܝܵܐ ܕܟܲܠܕܵܝܘܼܬܼܵܐ ܕܐܲܚܝܼܕܝܼܢܲܢ 356 ܘܐܸܠܘܼ ܫܲܪܝܼܪ ܐܲܝܟܵܘ ܚܲܝܠܹܗ ܕܠܵܐ ܩܵܡ̣ ܒܐܲܦܲܝ̈ܢ ܀ 357 :ܒܗܵܕܹܐ ܕܲܗܘ̤ܵܬܼ ܢܹܐܠܲܦ ܟܠܢܵܫ ܫܲܪܝܼܪܵܐܝܼܬܼ 358 ܕܠܲܝܬܿ ܐܲܠܵܗܵܐ ܕܲܡܨܸܐ ܠܡܸܦܪܲܩ ܐܸܠܵܐ ܐܸܢ ܚܲܕܼ ܀ 359 :ܒܗܵܕܹܐ ܕܲܣܥ݂ܲܪ ܬܸܗܘܸܐ ܐܵܬܼܵܐ ܕܓܲܢ̄ܒܵܪܘܼܬܹܗ 360 ܕܠܲܝܬܼ ܒܐܲܠܵܗܹ̈ܐ ܚܹܝܠ ܥܘܼܕܼܪ̈ܵܢܹܐ ܐܸܠܵܐ ܐܸܢ ܒܹܗ ܀ 361 :ܒܗܵܕܹܐ ܢܚܘܼܪܘܼܢ ܟܠܗܘܿܢ ܥܲܡܡܹ̈ܐ ܘܐܲܠܵܗܲܝ̈ܗܘܿܢ 362 ܘܢܸܚܙܘܿܢ ܛܘܼܥܝܲܝ ܕܲܦܬܲܟܼܪ̈ܲܝܗܘܿܢ ܕܲܟܼܡܵܐ ܫܝܼܛܵܐ ܀ 363 :ܫܝܼܛ ܟܠ ܐܲܠܵܗ ܕܠܵܐ ܡܨܸܐ ܠܡܸܦܪܲܩ ܠܲܕܼܣܵܓܹ̇ܕܼ ܠܹܗ 364 ܘܝܲܩܝܼܪ ܡ̣ܢ ܟܠ ܐܲܝܢܵܐ ܕܚܵܘܝܼ ܚܲܝܠܹܗ ܒܥܲܒܼܕܵܘ̈ܗܝ ܀ pb. 325 365 :ܥܲܒܼܕܵܘ̈ܗܝ ܐܲܢ̄ܬܿܘܿܢ ܕܐܲܠܵܗ ܟܠܵܐ ܕܫܲܠܝܼܛ ܥܲܠ ܟܠ 366 ܘܗܵܐ ܣܵܗܕܿܘܼܬܼܵܐ ܕܐܲܠܵܗܘܼܬܹܗ ܒܲܒܼܢܲܝ̈ ܒܲܝܬܹܿܗ ܀ 367 :ܗܵܠܹܝܢ ܡܲܠܸܠ ܚܬܼܝܼܪ ܪܸܝܵܢܵܐ ܟܲܕܼ ܠܵܐ ܨܵܒܹ̇ܐ 368 ܕܲܚܙ̣ܵܐ ܕܚܲܣܢܹ݂ܗ ܚܹܝܠ ܥܵܒܼܘܿܕܼܵܐ ܕܒܲܙܲܚ ܗ̄ܘ̣ܵܐ ܒܹܗ ܀ 369 :ܒܸܙܚܵܐ ܪܲܒܵܐ ܐܸܫܲܕܼ ܦܘܼܡܹܗ ܥܲܠ ܥܵܒܼܘܿܕܼܵܐ 370 ܘܲܗܦ݂ܲܟ ܘܩܲܠܣܹܗ ܠܥܹܝܢ ܟܠ ܥܲܡܡ̈ܝܼܢ ܟܲܕܼ ܠܵܐ ܨܵܒܹ̇ܐ ܀ 371 :ܒܐܲܪܥܵܐ ܕܲܝܗܘܼܕܼ ܐܲܗܸܠ ܘܲܓܼܚܸܟ ܥܲܠ ܡ̇ܪܘܼܬܹܗ 372 ܘܒܲܐܪܥܹܗ ܕܝܼܠܹܗ ܦܲܪ̣ܥܹܗ ܚܘܼܒܼܠܵܐ ܕܒܼܝܼܫ ܡ̣ܢ ܕܝܼܠܹܗ ܀ 373 :ܒܒܹܝܬܼ ܬܘܼܟܼܠܵܢܹܗ ܣܲܚܦܹܗ ܘܲܫܕܼܵܝܗܝ ܡ̣ܢ ܬܘܼܟܼܠܵܢܹܗ 374 ܘܚܵܘܝܹܗ ܕܦܲܟܿܝܼܗ ܚܹܝܠ ܥܘܼܕܼܪܵܢܵܐ ܕܲܚܬܼܝܼܪ ܗ̄ܘ̣ܵܐ ܒܹܗ ܀ 375 :ܣܒ݂ܲܪ ܕܲܒܼܚܲܝܠܹܗ ܚܲܣܢܹܗ ܠܥܲܡܹܗ ܘܒܲܛܸܠ ܥܹܐܕܼܵܘ̈ܗܝ 376 ܘܐܲܟܿܣܹܗ ܒܐܲܬܪܹܗ ܕܠܵܘ ܕܝܼܠܹܗ ܗ̣̄ܘܵܬܼ ܗܵܝ̇ ܙܵܟܼܘܼܬܼܵܐ ܀ 377 :ܪܢ̣ܵܐ ܟܲܕܼ ܥܲܩܪܹ̣ܗ ܠܗܲܝܟܲܠ ܩܘܼܕܼܫܵܐ ܕܚܵܒܼܘ ܓܵܡܘܿܪ̈ܵܘܗܝ 378 ܘܚܲܟܿܡܹܗ ܒܥܲܒܼܕܵܘ̈ܗܝ ܕܠܵܐ ܢܸܫܬܲܒܼܗܲܪ ܡܲܪܵܚܵܐܝܼܬܼ ܀ 379 :ܒܥܲܒܼܵܕܵܘ̈ܗܝ ܕܵܢܵܗ̇ ܠܡܲܪܵܚܘܼܬܹܗ ܚܲܟܿܝܼܡܵܐܝܼܬܼ 380 ܕܠܵܐ ܢܸܣܒܲܪ ܠܹܗ ܕܗܘ̤ ܡܸܬܼܟܲܬܲܫ ܥܲܡ ܥܲܛܠܘܼܬܹܗ ܀ 381 :ܠܥܲܒܼܕܵܘ̈ܗܝ ܐܲܦܝܼܣ ܕܢܕܼܘܼܫܘܼܢܵܝܗܝ ܐܲܝܟ ܕܲܠܫܝܼܛܵܐ 382 ܕܢܸܕܲܥ ܕܲܟܼܡܵܐ ܦܲܟܿܝܼܗ ܚܲܝܠܵܐ ܕܡܸܫܬܲܒܲܗܪ ܒܹܗ ܀ 383 :ܘܸܟܼܒܲܪ ܪܸܡܙܹܗ ܐܙܝܼܥ ܠܸܒܹܿܗ ܕܢܸܥܒܸܿܕܼ ܨܲܠܡܵܐ 384 ܕܲܒܼܝܲܕܼ ܨܲܠܡܵܐ ܢܨܘܼܪ ܟܲܣܝܘܼܬܹܗ ܩܕܼܵܡ ܒܵܒܼܵܬܹ̈ܗ ܀ 385 :ܟܒܲܪ ܗܘ̤ ܐܲܛܢܹܗ ܕܢܸܩܪܸܐ ܡܠܝܼܠܹ̈ܐ ܠܣܸܓܼܕܲܬܼ ܚܲܪܫܵܐ 386 ܕܡ̇ܐ ܕܡܸܬܼܟܲܬܿܫܝܼܢ ܢܵܘܕܲܥ ܐܸܢܘܿܢ ܚܹܝܠ ܪܲܒܿܘܼܬܹܗ ܀ 387 :ܟܒܲܪ ܗܘ̤ ܚܲܦܸܛ ܠܐܵܟܼ̈ܠܲܝ ܩܲܪ̈ܨܹܐ ܠܡܸܫܓܲܪ ܢܘܼܪܵܐ 388 ܕܡ̇ܐ ܕܡܸܙܕܲܟܼܝܵܐ ܢܲܟܼܪܸܙ ܚܲܝܠܹܗ ܒܲܒܼܢܲܝ̈ ܒܲܝܬܹܿܗ ܀ 389 :ܒܗܵܕܹܐ ܬܸܢܘܲܝ ܟܒܲܪ ܠܵܐ ܬܲܒܼܥܹܗ ܡ̣ܢ ܫܘܼܪܵܝܵܐ 390 ܕܠܵܐ ܬܸܗܘܸܐ ܠܹܗ ܡܲܟܿܣܵܢܘܼܬܼܵܐ ܕܠܵܐ ܝܘܼܬܼܪܵܢܵܐ ܀ 391 :ܠܵܘ ܟܲܕܼ ܥܵܨܹ̇ܐ ܣܥ݂ܲܪ ܐܵܘ ܣܵܥܲ݁ܪ ܗܵܠܹܝܢ ܕܐܸܡ̇ܪܹܬܼ 392 ܐܸܠܵܐ ܕܐܲܗܡܝ ܘܠܵܐ ܬܒܲܥ̣ ܐܸܢܘܿܢ ܡ̣ܢ ܫܘܼܪܵܝܵܐ ܀ 393 :ܡܨܸܐ ܗ̄ܘ̣ܵܐ ܕܢܸܬܼܒܲܥ ܨܲܥܪܵܐ ܕܲܫܡܹܗ ܘܕܲܒܼܢܲܝ̈ ܒܲܝܬܹܿܗ 394 ܘܐܲܗܡܝܼ ܘܲܫ̣ܬܸܩ ܥܲܕܼ ܡܸܬܼܓܼܠܝܵܐ ܒܝܼܫܘܼܬܼ ܒܝܼܫܹ̈ܐ ܀ 395 :ܒܒܼܝܼܫܘܼܬܼ ܒܝܼܫܹ̈ܐ ܡܥܵܕܼ ܡܸܬܼܢܲܨܲܚ ܚܹܝܠ ܪܲܒܿܘܼܬܹܗ 396 ܕܢܸܓܼܠܹܐ ܠܐ̄ܢܵܫܵܐ ܥܘܼܬܼܪܵܐ ܪܲܒܵܐ ܕܡܲܓܿܪܲܬܼ ܪܘܼܚܹܗ ܀ 397 :ܒܡܲܓܼܪܲܬܼ ܪܘܼܚܹܗ ܛܲܥܢ̣ܹܗ ܠܥܲܛܠܵܐ ܢܒܼܘܿܟܲܕܢܵܨܲܪ 398 ܘܕܲܚܙ̣ܵܐ ܕܐܲܪܫܲܥ ܠܒܲܪ ܡ̣ܢ ܛܲܟܼܣܵܐ ܐܲܟܿܣܹܗ ܒܛܲܟܼܣܵܐ ܀ 399 :ܐܲܝܟ ܨܲܝܵܕܼܵܐ ܩܵܡ̣ ܥܲܠ ܝܡܵܐ ܕܡܲܓܿܪܲܬܼ ܪܘܼܚܹܗ 400 ܘܝܲܗ̣̄ܒܼ ܠܹܗ ܓܵܪܓܵܐ ܐܲܝܟ ܕܲܠܢܘܼܢܵܐ ܥܕܲܡ̇ܐ ܕܨܵܕܹܗ ܀ pb. 326 401 :ܡܨܝܼܕܲܬܵܐ ܕܚܘܼܒܹܿܗ ܐܵܘܚܸܕܼ ܒܐܝܼܕܼܵܐ ܕܲܒܼܢܲܝ̈ ܒܲܝܬܹܿܗ 402 ܘܲܚܠܵܦ ܡܲܝܵ̈ܐ ܦܲܪܣܵܗ̇ ܢܘܼܪܵܐ ܥܲܠ ܒܵܒܼܵܠܵܝܹ̈ܐ ܀ 403 :ܒܢܘܼܪܵܐ ܘܡܲܝ̈ܵܐ ܩܵܡ̣ܘ ܨܲܝܕܹ̈ܐ ܐܲܠܵܗܵܝܹ̈ܐ 404 ܘܐܘܼܡܡ̇ܢܵܐܝܼܐܼ ܨܵܕܼܘܼܗ̇ ܠܒܼܵܒܹܠ ܨܵܝܕܲܬܼ ܥܲܡܡܹ̈ܐ ܀ 405 :ܒܲܕܼܡܘܼܬܼ ܢܘܼܢܹ̈ܐ ܒܥܲܛ̣ܘ ܩܲܕܼܡ̇ܝܲܬܼ ܒܲܩܪ̈ܵܒܲܝܗܘܿܢ 406 ܘܕܲܚܙ̣ܵܘ ܕܲܢܦܲܠܘ̣ ܠܓܼܵܘ ܡ̣ܢ ܢܸܫ̈ܒܹܿܐ ܒܗܸܬܼܘ ܘܐܸܫܬܲܬܲܩܘ ܀ 407 :ܫܓܼܝܼܫܝܼܢ ܗ̄ܘ̣ܵܘ ܛܵܒܼ ܟܲܕܼ ܣܵܚܹ̇ܝܢ ܗ̄ܘ̣ܵܘ ܒܓܲܠܠܹ̈ܐ ܕܙܹܐܦܵܐ 408 :ܘܕܲܢܓܲܕܼ ܐܸܢܘܿܢ ܪܸܡܙ̇ܐ ܠܝܲܒܼܫܵܐ ܛܠܸ݂ܩܘ ܚܲܝܲܝ̈ܗܘܿܢ 409 :ܐܘܼܟܼܠܵܐ ܠܢܘܼܪܵܐ ܝܲܗ̣̄ܒܼܘ ܦܲܓܼܪ̈ܲܝܗܘܿܢ ܕܢܘܼܢܹ̈ܐ ܡܠܝܼܠܹ̈ܐ 410 ܘܐܲܝܠܸܠܘ ܘܲܩܥ̣ܵܘ ܟܲܕܼ ܡܸܬܿܛܵܘܹܝܢ ܒܫܲܠܗܹܒܼܝܼܬܼܵܐ ܀ 411 :ܒܩܵܠܵܐ ܪܵܡ̇ܐ ܩܥ̣ܵܐ ܒܵܒܼܵܠܵܝܵܐ ܢܘܼܢܵܐ ܕܝܲܒܼܫܵܐ 412 ܕܬܼܵܘ ܨܲܝܕܹ̈ܐ ܣܲܩܘ ܡ̣ܢ ܝܲܡܵܐ ܕܫܲܠܗܹܒܼܝܼܬܼܵܐ ܀ 413 :ܬܵܘ ܣܲܩܘ ܐ̄ܢܵܫܵܐ ܨܵܝ̈ܕܲܝ ܐ̄ܢܵܫܵܐ ܕܠܵܐ ܒܐܝܿܕܲܝܵܐ 414 ܟܲܕܿܘܼ ܨܵܕܿܬܿܘܿܢ ܠܨܲܝܵܕܲܝ̈ܟܿܘܿܢ ܒܐܘܼܟܼܠܵܐ ܕܢܘܼܪܵܐ ܀ 415 :ܟܸܢܫܝܼ̈ܢ ܟܸܢܫܝܼ̈ܢ ܐܸܬܿܛܲܝܲܒܼܘ ܗ̄ܘ̣ܵܘ ܥܲܡܡܹ̈ܐ ܠܡܸܚܙܵܐ 416 ܟܲܕܼ ܢܵܦ̇ܩܝܼܢ ܗ̄ܘ̣ܵܘ ܣܵܗ̈ܕܹܿܐ ܒܚܝܼܪܹ̈ܐ ܡ̣ܢ ܓܵܘ ܢܘܼܪܵܐ ܀ 417 :ܓܘܼܕܲܝܼ̈ܢ ܓܘܼܕܲܝܼ̈ܢ ܩܵܡ̣ܘ ܟܠ ܬܸܓܼܡܝܼ̈ܢ ܓܲܒܼܪܹ̈ܐ ܘܢܸܫܹ̈ܐ 418 ܠܡܸܬܼܒܲܩܵܝܘܼ ܒܪܲܒܿܘܼܬܼ ܚܲܝܠܵܐ ܕܙܲܟܿܝܼ ܐܸܢܘܿܢ ܀ 419 :ܒܬܲܗܪܵܐ ܪܲܒܵܐ ܡܸܬܼܒܲܩܹܝܢ ܗ̄ܘ̣ܵܘ ܒܐܲܝܕܵܐ ܕܲܗܘ̤ܵܬܼ 420 ܘܫܲܪܝܼܪܵܐ ܗ̣̄ܘܵܬܼ ܘܠܵܐ ܫܲܪܝܼܪܵܐ ܠܪܸ̈ܥܝܵܢܲܝܗܘܿܢ ܀ 421 :ܐܝܼܬܹܝܗ̇ ܘܠܲܝܬܹܿܝܗ̇ ܡܸܬܼܪܵܢܹܝܢ ܗ̄ܘ̣ܵܘ ܓܠܝܼܙܲܝ̈ ܗܵܘܢܵܐ 422 ܗܸܢܘ̣ܿܢ ܐܸܢܘܿܢ ܐܵܘ ܛܸܠܵܠܵܐ ܕܕܼܵܡܹ̇ܐ ܠܓܼܘܼܫܡܵܐ ܀ 423 :ܒܹܝܬܼ ܦܘܼܪܬܵܟܼܵܐ ܢܲܦܝܼܠܝܼܢ ܗ̄ܘ̣ܵܘ ܦܠܝܼ̈ܓܲܝ ܠܸܒܵܐ 424 ܘܐܲܝܟ ܕܲܒܼܚܸܠܡܵܐ ܡܸܬܿܕܲܡܪܝܼܢ ܗ̄ܘ̣ܵܘ ܒܩܘܼܫܬܵܐ ܓܲܠܝܵܐ ܀ 425 :ܒܩܘܼܫܬܵܐ ܩܵܘܝܼܘ ܟܹܐܢܹ̈ܐ ܒܢܘܼܪܵܐ ܕܠܵܐ ܢܸܟܼܝܵܢܵܐ 426 ܥܕܲܡ̇ܐ ܕܲܢܦܲܩ̣ܘ ܠܵܐ ܫܲܪ ܩܘܼܫܬܵܐ ܠܠܵܐ ܫܲܪܝܼܪܹ̈ܐ ܀ 427 :ܢܦܲܩ̣ܘ ܫܲܪܝܼܪܹ̈ܐ ܟܲܕܼ ܫܲܪܝܼܪܝܼܢ ܫܲܪܝܼܪܵܐܝܼܬܼ 428 ܘܲܚܙ̣ܵܘ ܐܸܢܘܿܢ ܠܑܵ ܫܲܪܝܼܪܹ݁ܐ ܘܟܸܢ ܐܸܫܬܲܪܲܪܘ ܀ 429 :ܢܦܲܩ̣ܘ ܟܲܕܼ ܫܵܠ̇ܡܝܼܢ ܒܗܲܕܵܡܲܝ̈ܗܘܿܢ ܘܒܲܠܒܼܫܲܝ̈ܗܘܿܢ 430 ܘܠܵܐ ܛܥܵܬ̤ ܡܸܢܬܼܵܐ ܡ̣ܢ ܪܹ̈ܫܲܝܗܘܿܢ ܘܡ̣ܢ ܢܲܚܬܲܝ̈ܗܘܿܢ ܀ 431 :ܢܦܲܩ̣ܘ ܟܲܕܼ ܨܵܡܲܚ̇ ܫܪܵܪܵܐ ܕܲܒܼܗܘܿܢ ܛܵܒܼ ܡ̣ܢ ܕܲܗܒܼܵܐ 432 ܘܲܫܪܲܓܼ ܥܲܝܢܹ̈ܐ ܕܚܲܙܵܝܲܝ̈ܗܘܿܢ ܒܢܲܗܝܼܪܘܼܬܹܗ ܀ 433 :ܢܦܲܩ̣ܘ ܟܲܕܼ ܥܛܝܼܦܝܼܢ ܢܲܚܬܵܐ ܓܼܠܝܵܐ ܘܫܘܼܒܼܚܵܐ ܟܲܣܝܵܐ 434 ܘܲܡܫܲܒܿܚܝܼܢ ܗ̄ܘ̣ܵܘ ܠܲܫܡܵܐ ܚܲܝܵܐ ܕܫܲܒܲܚ ܐܸܢܘܿܢ ܀ pb. 327 435 :ܢܦܲܩ̣ܘ ܡ̣ܢ ܢܘܼܪܵܐ ܟܲܕܼ ܕܵܝ̇ܫܝܼܢ ܠܵܗ̇ ܬܚܹܝܬܼ ܪܸ̈ܓܼܠܲܝܗܘܿܢ 436 ܘܗܵܢܵܘ̇ ܬܲܗܪܵܐ ܕܠܵܐ ܥܕܵܐ ܥܠܲܝܗܘܿܢ ܐܵܠܦܵܐ ܪܹܚܝܵܐ ܀ 437 :ܢܒܼܝܼܵܐ ܣܵܗܹ̇ܕܼ ܕܲܗܘ̤ܵܐ ܣܵܗ̇ܕܵܐ ܒܦܘܼܡ ܚܲܝ̈ܘܵܬܼܵܐ 438 ܕܐܲܣܗܸܕܼ ܘܐܸܡ݂ܲܪ ܕܠܵܐ ܥܕܵܐ ܥܠܲܝܗܘܿܢ ܪܹܝܢܵܐ ܕܢܘܼܪܵܐ ܀ 439 :ܬܡܝܼܗ ܐܵܓܼܘܿܢܵܐ ܕܲܥܒ݂ܲܕܼܘ ܒܐܲܪܥܵܐ ܐܲܪ̈ܥܵܢܵܝܹܐ 440 ܘܲܙܥܘܿܪ ܦܘܼܡ̇ܐ ܕܲܒܼܢܲܝ̈ ܐܲܪܥܵܐ ܕܢܹܐܡܲܪ ܕܲܟܼܡܵܐ ܗ̄ܘ̣ ܀ 441 :ܪܲܒܿ ܢܸܨܚܵܢܵܐ ܕܚܘܼܡܣܵܢܲܝ̈ܗܘܿܢ ܕܲܒܼܢܲܝ̈ ܫܸܒܼܝܵܐ 442 ܘܲܡܚܝܼܠ ܩܲܝܢܵܐ ܕܠܸܫܵܢ ܒܸܣܪܵܐ ܠܲܡܨܵܐ ܫܘܼܦܪܹܗ ܀ 443 :ܡ̇ܪܗܘܿܢ ܒܲܠܚܘܿܕܼ ܝܵ̇ܕܲܥ ܠܲܡܨܵܪ ܨܠܸܡ ܫܘܼܦܪ̈ܲܝܗܘܿܢ 444 ܘܠܲܡܬܲܢܵܝܘܼ ܥܲܠ ܚܘܼܡܣܵܢܵܐ ܕܪ̈ܲܥܝܵܢܲܝܗܘܿܢ ܀ 445 :ܗܘ̤ܝܘܼ ܕܐܲܨܲܚ ܚܹܝܠ ܪܲܒܿܘܼܬܼܵܐ ܒܠܸܫܵܢܲܝ̈ܗܘܿܢ 446 ܘܲܟܼܬ݂ܲܒܼ ܒܣܸܦܪ̈ܵܘܗܝ ܝܘܿܡ ܙܵܟܼܘܼܬܼܵܐ ܒܐܲܪܥܵܐ ܀ 447 :ܐܲܝܟ ܡܲܚܙܝܼܬܼܵܠ ܩܒ݂ܲܥ ܙܵܟܼܘܼܬܼܗܘܿܢ ܒܲܟܼܬܼܝܼ̈ܒܼܵܬܼܵܐ 448 ܕܲܢܚܘܼܪܘܼܢ ܒܵܗ̇ ܪ̈ܵܗܛܲܝ ܪܲܗܛܵܐ ܕܙܲܕܿܝܼܩܘܼܬܼܵܐ ܀ 449 :ܛܢܵܢܵܐ ܐܲܪܡܝܼܘ ܒܝܲܕܼ ܥܲܡܠܲܝ̈ܗܘܿܢ ܠܲܕܼܒܼܵܬܲܪܗܘܿܢ 450 ܕܢܸܗܘܘܿܢ ܚܵܢܹ̇ܝܢ ܠܢܝܿܫܵܐ ܬܪܝܼܨܵ ܕܕܘܼܒܵܪ݁ܲܝܗܘܿܢ ܀ 451 :ܠܝܘܼܬܼܪܵܢ ܥܲܒܼܕܵܗ̇ ܕܐܲܫܒܿܝܼ ܐܸܢܘܿܢ ܠܒܹܝܬܼ ܒܵܒܼܠܵܝܹ̈ܐ 452 ܕܲܒܼܚܲܫܲܝ̈ܗܘܿܢ ܢܲܩܢܸܐ ܛܲܥܡܵܐ ܠܲܕܼܦܲܟܿܝܼܗܝܼܢ ܀ 453 :ܫܲܦܝܼܪ ܣܲܥ̣ܪܵܗ̇ ܕܐܲܗܡܝܼ ܡܸܢܗܘܿܢ ܘܲܗܘ̤ܵܘ ܥܲܒܼ̈ܕܹܿܐ 454 ܕܲܒܼܫܘܼܥܒܵܕܼܗܘܿܢ ܢܚܵܘܸܐ ܫܘܼܒܼܚܵܐ ܕܓܼܢ̄ܒܵܪܘܼܬܹܗ ܀ 455 :ܚܲܟܿܝܼܡܵܐܝܼܬܼ ܫܬܸܩ̣ ܟܲܕܼ ܥܲܠ̣ܘ ܗ̄ܘ̣ܵܘ ܠܟܼܘܼܪ ܒܘܼܚܪܵܢܵܐ 456 ܕܲܒܼܒܼܘܼܚܪܵܢܗܘܿܢ ܢܚܵܘܸܐ ܙܹܐܦܵܐ ܕܟܲܠܕܵܝܘܼܬܼܵܐ ܀ 457 :ܐܘܼܡ̇ܢܵܐܝܼܬܼ ܪܲܟܿܒܹܗ ܠܫܲܪܒܵܐ ܕܢܸܨܚܵܢܲܝ̈ܗܘܿܢ 458 ܕܡ̇ܐ ܕܡܸܬܼܬܲܢܸܐ ܢܹܐܠܲܦ ܟܠܢܵܫ ܠܡܸܬܼܢܲܨܵܚܘܼ ܀ 459 :ܓܼܢ̄ܒܵܪܵܐܝܼܬܼ ܥܲܕܲܪ ܐܸܢܘܿܢ ܒܐܵܓܼܘܿܢ ܚܲܫܹ̈ܐ 460 ܕܢܲܩܢܸܐ ܣܲܒܼܪܵܐ ܠܲܕܼܡܸܬܼܢܲܣܹܝܢ ܒܚܵܫܘܿܫܘܼܬܼܵܐ ܀ 461 :ܟܹܐܝܢ ܐܵܦ ܢܸܓܼܕܵܐ ܕܢܲܓܸܿܕܼ ܪܸܡܙܹܗ ܠܪ̈ܵܕܼܘܿܦܲܝܗܘܿܢ 462 ܕܠܵܐ ܐ̄ܢܵܫ ܢܲܡܪܲܚ ܠܡܸܫܬܲܩܵܠܘܼ ܥܲܠ ܡܲܟܿܝܼܪܹ̈ܐ ܀ 463 :ܙܲܕܿܝܼܩ ܕܝܼܢܹܗ ܘܟܹܐܝ ܒܘܼܚܪܵܢܹܗ ܘܚܲܟܿܝܼܡ ܪܸܡܙܹܗ 464 ܘܠܵܐ ܐ̄ܢܵܫ ܝܵ̇ܕܲܥ ܠܡܸܬܼܢܵܐ ܫܲܦܝܼܪ ܙܢܲܝ̈ ܚܸܟܼܡܵܬܹ̈ܗ ܀ 465 :ܐܲܫܒܿܝܼ ܠܥܲܡܵܐ ܕܲܓܼܒܼܵܐ ܠܲܫܡܹܗ ܠܒܹܝܬܼ ܒܵܒܼܵܠܵܝܹ̈ܐ 466 ܘܲܒܼܫܘܼܥܒܵܕܹܗ ܡܲܟܸܿܟ ܛܘܼܥܝܲܝ ܕܟܼܠܕܵܝܘܼܬܼܵܐ ܀ 467 :ܬܪܝܹܢ ܝܘܼܬܼܪܵܢܹܐ ܥܦܝܦܹ̈ܐ ܣܸܥܪܲܬ̤ ܣܵܥܘܿܪܘܼܬܹܗ 468 ܕܲܒܼܝܲܕܼ ܥܲܡܹܗ ܐܲܠܸܦ ܥܲܡܡܹ̈ܐ ܕܡ̇ܪܵܐ ܗ̄ܘ̣ ܕܥܲܠ ܟܠ ܀ 469 :ܠܥܲܡܵܐ ܘܥܵܡܡܹ̈ܐ ܚܲܟܸܿܡ ܪܸܡܙܹܗ ܒܐܲܝܕܲܐ ܕܲܣܥ݂ܲܪ 470 ܕܲܪܕܼܵܐ ܐܸܢܘܿܢ ܘܲܩ̣ܢܵܐ ܐܸܢܘܿܢ ܚܲܕܼ ܒܐܝܼܕܲܝ̈ ܚܲܕܼ ܀ 471 ܐܲܝܟ ܕܲܒܼܫܲܒܼܛܵܐ ܐܲܪܝܼܡ ܐܸܢܘܿܢ ܚܲܕܼ ܥܲܠ ܚܲܒܼܪܹܗ: pb. 328 472 ܘܢܲܓܸܿܕܼ ܥܲܡܵܐ ܒܐܝܼܕܲܝ̈ ܥܲܡܡܹ̈ܐ ܘܥܲܡܡܹ̈ܐ ܒܥܲܡܵܐ ܀ 473 :ܬܵܘ ܟܹܝܬܼ ܢܹܐܠܲܦ ܚܹܝܠ ܚܸܟܼ̈ܡܵܬܹܗ ܒܝܲܕܼ ܡܲܪܕܿܘܼܬܹܗ 474 ܘܲܢܙܲܕܸܿܩ ܠܹܗ ܪܲܒܿܘܼܬܼ ܫܘܼܒܼܚܵܐ ܕܦܲܐܝܵܐ ܠܲܫܡܹܗ ܀ ܥܘܼܢܵܝܵܐ: ܫܘܼܒܼܚܵܐ ܠܚܲܝܠܵܐ ܕܚܲܝܸܠ ܠܣܵܗ̈ܕܹܿܐ: ܘܲܢܨܲܚ̣ܘ ܘܲܙܟܼܵܘ ܒܐܵܓܼܘܿܢܵܐ ܀