Narsai: On Reproof - ܥܲܠ ܡܲܟܿܣܵܢܘܼܬܼܵܐ

1 :ܒܹܝܬܼ ܐܲܣܝܼܪܹ̈ܐ ܕܡ̇ܝܘܿܬܼܘܼܬܼܵܐ ܚܒܼܝܼܫ ܒܲܪܢܵܫܵܐ 2 ܘܠܵܐ ܪܵܓܵܐ ܠܹܗ ܕܢܸܦܘܿܩ ܡܸܢܹܗ ܐܵܦܠܵܐ ܒܡܵܘܬܹܿܗ ܀ 3 :ܒܓܼܵܘ ܢܵܡܲܪܬܵܐ ܕܚܵܫܘܿܫܘܼܬܼܵܐ ܪܡܸܐ ܚܲܠܵܫܵܬܐ 4 ܘܠܵܐ ܗܲܢܝܼ ܠܹܗ ܠܡܸܬܼܦܲܠܵܛܘܼ ܡ̣ܢ ܩܲܫܝܘܼܬܼܵܗ̇ ܀ 5 :ܒܚܲܒܼܠܹ̈ܐ ܩ̈ܫܲܝܵܐ ܕܲܪ̈ܓܼܝܼܓܼܵܬܼܵܐ ܦܟܼܝܼܪ ܗ̄ܘ̣ ܘܲܫܕܹܐ 6 ܘܠܵܐ ܡܢܵܚ ܕܲܢܩܘܼܡ ܡ̣ܢ ܡܲܦܘܼܠܬܵܐ ܕܲܪ̈ܓܼܝܼܓܼܵܬܹܗ ܀ 7 :ܪܸܚܡܲܬܼ ܪܸܓܿܬܼܵܐ ܕܲܪ̈ܓܼܝܼܬܼܵܐ ܫܲܪܝܵܐ ܒܓܼܵܘܹܗ 8 ܘܣܲܦܝܼܦܵܐ ܒܹܗ ܒܲܕܼܡܘܼܬܼ ܢܘܼܪܵܐ ܒܩܲܝܣܹ̈ܐ ܕܥܵܒܼܵܐ ܀ 9 :ܒܢܘܼܪ ܚܘܼܬܼܚܵܬܹ̈ܐ ܕܵܠܹܩ ܟܠܹ̈ܗ ܒܟܼܠܥܸܕܵܢܝܼ̈ܢ 10 ܘܠܲܝܬܿ ܥܸܕܵܢܵܐ ܕܠܵܐ ܡܸܫܬܿܠܗܲܒܼ ܒܚܲܕܼ ܡ̣ܢ ܚܲܫܝܼ̈ܢ ܀ 11 :ܒܓܼܵܘ ܗܲܕܵܡ̇ܘ̈ܗܝ ܛܡܝܼܪܵܐ ܢܘܼܪܵܐ ܕܲܪ̈ܓܼܝܼܓܼܵܬܹܗ 12 ܘܠܵܐ ܡܸܬܼܕܲܥܟܵܐ ܥܕܲܡ̇ܐ ܕܕܼܵܥܟܵܐ ܡ̇ܝܘܿܬܼܘܼܬܹܗ ܀ 13 :ܐܲܝܟ ܫܸܫܠܬܵܐ ܪܲܡܝܵܐ ܒܢܲܦܫܹܗ ܪܸܚܡܲܬܼ ܟܣܸܦܵܐ 14 ܘܠܑܵܐ ܡܸܫܬܲܪܝܵܐ ܥܕܲܡ̇ܐ ܕܫܵܪܹܐ ܡ̇ܘܬܵܐ ܠܦܲܓܼܪܹܗ ܀ 15 :ܒܢܝܼܪܵܐ ܕܫܘܼܒܼܚܵܐ ܟܕܼܝܼܢܝܼܢ ܙܵܘܥܹ̈ܐ ܕܦܵܪܘܿܫܘܼܬܹܗ 16 ܘܐܸܠܵܐ ܬܲܒܼܪܹܗ ܝܘܿܡ ܥܘܼܢܕܵܢܵܐ ܠܵܐ ܡܸܬܼܚܲܪܲܪ ܀ 17 :ܩܹܐܡ̇ܐ ܩܲܫܝܵܐ ܕܪܸܓܼܬܼ ܒܸܣܪܵܐ ܪܡܸܐ ܒܗܲܕܵܡ̇ܘ̈ܗܝ 18 ܘܲܡܫܲܥܒܸܿܕܼ ܠܹܗ ܐܲܝܟ ܕܲܠܚܲܝܘ̄ܬܼܵܐ ܕܠܵܐ ܒܘܼܝܵܢܵܐ ܀ 19 :ܙܲܝܢܵܐ ܗ̄ܝܼ ܩܲܫܝܵܐ ܡ̇ܝܘܿܬܼܘܼܬܼܵܐ ܘܠܹܗ ܠܵܐ ܩܲܫܝܵܐ 20 ܘܒܹܝܬܼ ܐܲܣܝܼܪܹ̈ܐ ܗ̄ܝܼ ܕܚܵܫܘܿܫܘܼܬܼܵܐ ܘܠܹܗ ܠܵܐ ܚܫܝܼܒܼܵܐ ܀ 21 :ܡ̇ܘܬܵܐ ܟܣܸܐ ܒܵܗ̇ ܒܪܸܚܡܲܬܼ ܟܸܣܦܵܐ ܘܠܹܗ ܐܲܝܟ ܚܲܝܹ̈ܐ ܗ̄ܝܼ 22 ܘܢܸܓܼ̈ܕܹܿܐ ܥܦܝܼܦܹ̈ܐ ܪܸܚܡܲܬܼ ܫܘܼܒܼܚܵܐ ܘܠܹܗ ܒܘܼܣܵܡܵܐ ܗ̄ܝܼ ܀ 23 :ܢܘܼܪܵܐ ܘܬܵܘܠܥܵܐ ܢܸܒܼܥ̈ܢ ܡܸܢܵܗ̇ ܕܪܸܓܲܬܼ ܒܸܣܪܵܐ 24 ܘܠܹܗ ܐܲܝܟ ܚܸܠܡܵܐ ܚܫܝܼܒܼ ܫܘܼܢܵܩܵܐ ܕܣܝܼܡ ܒܲܟܼܬܼܵܒܹ̈ܐ ܀ pb. 341 25 :ܐܲܝܟ ܠܵܐ ܡܝܼܠܵܐ ܪܵܕܹܐ ܒܐܘܼܪܚܵܐ ܕܲܡܠܝܼܠܘܼܬܹܗ 26 ܘܐܲܝܟ ܫܲܬܿܝܼܩܵܐ ܕܵܐܹ̇ܫ ܛܲܟܼܣܵܐ ܕܦܵܪܘܿܫܘܼܬܹܗ ܀ 27 :ܚܲܝܘ̄ܬܼܢܵܐܝܼܬܼ ܡܕܲܡܸܐ ܒܲܙܢܵܘ̈ܗܝ ܘܲܒܼܗܘܼ̈ܦܵܟܼܵܘܗܝ 28 ܘܲܒܼܨܝܼܪ ܩܲܠܝܼܠ ܠܵܐ ܒܨܝܼܪ ܡܸܕܸܿܡ ܡ̣ܢ ܚܵܝ̈ܘܵܬܼܵܐ ܀ 29 :ܠܚܲܝܘ̄ܬܼܵܐ ܕܵܡܹ̇ܐ ܠܵܐ ܗ̄ܘ̣ܵܐ ܕܕܼܵܡܹ̇ܐ ܐܸܠܵܐ ܕܨܵܒܹ̇ܐ 30 ܕܐܸܠܘܼ ܕܨܵܒܹ̇ܐ ܠܲܝܬܿ ܕܥܵܨܹ̇ܐ ܠܹܗ ܐܲܝܟ ܕܲܠܚܪܫܵܐ ܀ 31 :ܠܵܘ ܐܲܝܟ ܚܲܪ̈ܫܹܐ ܟܕܼܝܼܢ ܒܲܬܼܥܵܫܐ ܕܐܲܪ̈ܥܵܢܝܵܬܼܵܐ 32 ܘܠܵܐ ܟܲܕܼ ܠܵܐ ܪܓܼܝܼܫ ܛܵܥܹ̇ܐ ܒܛܘܼܥܝܲܝ ܕܲܪ̈ܓܼܝܼܓܼܵܬܼܵܐ ܀ 33 :ܡܦܵܣ ܕܲܡܠܝܼܠܵܐ ܗ̄ܘ̣ ܘܠܵܐ ܡܸܬܿܛܦܝܼܣ ܠܵܗ̇ ܠܲܡܠܝܼܠܘܼܬܹܗ 34 ܪܓܼܝܼܫ ܕܲܥܪܝܼܡܵܐ ܗ̄ܘ̣ ܘܠܵܐ ܡܸܬܼܥܲܪܲܡ ܠܘܼܩܒܲܠ ܚܲܫܵܘ̈ܗܝ ܀ 35 :ܥܪܝܼܡ ܕܲܢܣܲܓܸܿܦ ܘܲܦܫܝܼܛ ܠܲܡܦܵܫ ܡ̣ܢ ܣܘܼܓܼܦܵܢܵܐ 36 ܨܢܝܼܥ ܕܲܢܕܲܓܸܿܠ ܘܒܼܘܿܪ ܕܲܢܬܲܪܓܸܿܡ ܫܲܪܝܼܪ̈ܵܬܼܵܐ ܀ 37 :ܡܠܝܼܠ ܕܲܢܡܲܠܸܠ ܐܲܝܠܹܝܢ ܕܥܵܕܼܪ̈ܵܢ ܠܲܡܚܝܼܠܘܼܬܹܗ 38 ܘܫܲܬܿܝܼܩ ܘܲܚܪܸܫ ܠܲܡܵܟܼܵܘܵܢܘܼ ܙܢܲܝ̈ ܒܝܼܫܘܼܬܹܗ ܀ 39 :ܦܵܪܘܿܫ ܙܲܡܗܝܼܪ ܠܡܸܦܪܲܫ ܐܲܝܕܵܐ ܕܫܲܦܝܼܪܵܐ ܠܹܗ 40 ܘܠܸܠ ܘܲܡܕܼܵܘܲܕܼ ܠܡܸܒܼܣܲܪ ܡܘܼܡܹ̈ܐ ܕܲܫܟܼܝܼܪ݁ܵܬܹܗ ܀ 41 :ܚܬܝܼܪ ܒܝܼܕܲܥܬܹܗ ܘܥܵܕܹ̇ܠ ܠܚܲܪ̈ܫܹܐ ܕܠܵܐ ܝܵܕܼܘܿܥܝܼܢ 42 ܘܗܘ̤ ܠܵܐ ܡܸܡܬܼܘܿܡ ܥ̣ܕܲܠ ܠܲܩܢܘܿܡܹܗ ܒܐܲܝܠܹܝܢ ܕܲܥܕܼܝܼܠ ܀ 43 ܥܕܼܝܼܠ ܡ̣ܢ ܟܠ ܘܠܵܐ ܡܸܬܼܪܲܥܸܐ ܕܥܲܠ ܡ̇ܢ ܗܵܟܲܢ ܀ 44 :ܕܵܐܹܢ ܥܵܘ̣ܠܵܐ ܕܲܠܒܲܪ ܡܸܢܹܗ ܚܲܬܿܝܼܬܼܵܐܝܼܬܼ 45 ܘܲܒܼܣܲܢ̈ܝܵܬܼܵܐ ܕܲܠܓܼܵܘ ܡܸܢܹܗ ܠܵܐ ܡܸܬܼܒܲܩܸܐ ܀ 46 :ܐܘܿ ܕܲܝܵܢܵܐ ܕܕܼܵܐܹ̇ܢ ܟܠܵܐ ܒܟܼܘܼܪ ܒܘܼܚܵܢܹܗ 47 ܒܚܘܿܪ ܟܲܪ̈ܝܵܬܼܵܟ ܐܲܝܟ ܓܼܠ̈ܝܵܬܼܵܐ ܕܲܟܼ̈ܢܵܘܵܬܼܵܟ ܀ 48 :ܡܚܲܝܸܒܼ ܚܲܒܼܪ݁ܵܘܗܝ ܡ̇ܐ ܕܚܲܝܵܒܼܝܼܢ ܚܵܘܒܲܬܼ ܚܵܘ̈ܒܹܿܐ 49 ܚܲܝܸܒܼ ܐܲܢ̄ܬܿ ܠܵܟ ܒܚܲܝܵܒܼܘܼܬܼܵܐ ܕܚܵܘܒܲܬܼ ܚܲܘܒܲܝ̈ܟ ܀ 50 :ܡܛܲܟܸܿܣ ܚܲܪ̈ܫܹܐ ܕܢܸܬܿܕܲܡܘܿܢ ܠܹܗ ܒܲܡܠܝܼܠܘܼܬܼܵܐ 51 ܛܲܟܸܿܣ ܚܲܝܲܝ̈ܟ ܕܢܸܗܘܘܿܢ ܕܵܡܹ̇ܝܢ ܠܲܕܼܡܲܠܵܠܹ̈ܐ ܀ 52 :ܥܵܨܹ̇ܐ ܟܝܵܢܹ̈ܐ ܠܵܐ ܦܲܪ̈ܘܿܫܹܐ ܒܦܵܪܘܿܫܘܼܬܹܗ 53 ܥܨܝܼ ܠܲܟܼܝܵܢܵܟ ܕܢܸܦܪܘܿܫ ܫܲܦܝܼܪ ܫܲܦܝܼܪ̈ܵܬܼܵܐ ܀ 54 :ܡܲܩܢܸܐ ܥܝܵܕܼܵܘ̈ܗܝ ܠܲܕܼܠܵܐ ܝܵ̇ܕܼܥܝܼܢ ܡܸܠܲܬܼ ܐ̄ܢܵܫܵܐ 55 ܥܲܝܸܕܼ ܐܲܢ̄ܬܿ ܠܵܟ ܒܐܲܠܹܝܢ ܕܲܩܢܸܐ ܟܝܵܢ ܚܹܐܪܘܼܬܼܵܟ ܀ 56 :ܡܲܪܡܸܐ ܦܓܼܘܼ̈ܕܹܐ ܒܦܘܼܡ ܫܲܬܿܝܼܩܹ̈ܐ ܕܢܸܪܕܿܘܿܢ ܫܲܦܝܼܪ 57 ܦܲܓܸܕܼ ܙܵܘܥܲܝ̈ܟ ܕܢܸܗܘܸܐ ܡܫܲܝܲܢ ܪܲܗܛܵܐ ܕܐܘܼܪܚܵܟ ܀ pb. 342 58 :ܦܵܠܲ݁ܚ ܐܲܪܥܵܐ ܘܦܵܣܹ̇ܠ ܛܘܼܪܹ̈ܐ ܒܟܲܫܝܼܪܘܼܪܬܹܗ 59 ܦܠܘܿܚ ܪܸܥܝܵܢܵܟ ܕܢܸܛܥܲܢ ܦܹܐܪܹ̈ܐ ܕܕܸܚܠܲܬܼ ܩܘܼܫܬܵܐ ܀ 60 :ܡܟܲܒܸܿܫ ܓܼܠ̈ܠܹܐ ܘܚܵܣܹ̇ܢ ܪ̈ܘܼܚܹܐ ܒܐܘܼܡ̇ܢܘܼܬܹܗ 61 ܟܲܒܸܿܫ ܗܵܘܢܵܟ ܕܠܵܐ ܢܸܬܼܒܲܥܪܲܪ ܒܡܲܫܒܼܵܐ ܕܥܵܘ̣ܠܵܐ ܀ 62 :ܨܵܐܹ̇ܕܼ ܪ̈ܲܚܫܵܐ ܘܛܵܡܲ݁ܪ ܦܲܚܹ̈ܐ ܠܚܲܝܘܲܬܼ ܫܵܢܵܐ 63 ܨܘܼܕܼ ܠܲܥܝܵܕܹ̈ܐ ܣܢܲܝܵ̈ܐ ܕܢܲܦܫܵܟ ܐܲܝܟ ܕܲܠܚܲܪ̈ܫܹܐ ܀ 64 :ܥܵܩܲ݁ܪ ܟܘܼ̈ܒܹܿܐ ܡ̣ܢ ܚܲܩ̈ܠܵܬܼܵܐ ܫܲܬܿܝܼ̈ܩܵܬܼܵܐ 65 ܥܩܘܿܪ ܒܝܼ̈ܫܵܬܼܵܟ ܐܲܝܟ ܙܝܼܙܵܢܹ̈ܐ ܡ̣ܢ ܓܵܘ ܚܲܩܠܵܐ ܀ 66 :ܡܫܲܝܸܢ ܥܵܠܡܵܐ ܒܡܸܠܲܬܼ ܫܲܝܢܵܐ ܕܫܲܪܝܵܐ ܒܓܼܵܘܹܗ 67 ܫܲܝܹܢ ܝܲܨܪܵܟ ܒܹܗ ܒܐܸܣܟܹܿܡܵܐ ܕܲܡܫܲܝܢܘܼܬܼܵܟ ܀ 68 :ܥܸܠܲܬܼ ܫܲܝܢܵܐ ܐ̄ܢܬܿ ܐܘܿ ܒܲܪܢܵܫܵܐ ܫܡܵܐ ܝܲܩܝܼܪܵܐ 69 ܝܲܩܲܪ ܠܲܫܡܵܟ ܕܠܐ ܢܸܬܿܕܵܘܲܕܼ ܫܲܝܢܵܐ ܒܲܫܡܵܟ ܀ 70 :ܒܫܲܝܢܵܐ ܕܲܫܡܵܟ ܢܛܝܼܪ ܘܲܡܫܲܝܲܢ ܥܵܠܡܵܐ ܕܙܲܒܼܢܵܐ 71 ܛܲܪ ܚܹܐܪܘܼܬܼܵܟ ܕܠܵܐ ܬܸܬܼܒܲܙܲܚ ܒܠܵܐ ܚܹܐܪܘܼܬܼܵܐ ܀ 72 ܩܪܵܒܼܵܐ ܟܲܣܝܵܐ ܐܝܼܬܼ ܠܵܟ ܥܲܡ ܟܠ ܘܲܠܟܼܠ ܥܲܡܵܟ. 73 ܠܵܐ ܬܸܬܼܪܲܦܸܐ ܕܠܵܐ ܬܸܬܼܚܲܝܲܒܼ ܘܲܬܼܚܲܝܸܒܼ ܟܠ ܀ 74 :ܩܪܵܒܼܵܟ ܐܲܠܨܲܢܝ ܕܐܹܡܲܪ ܥܲܡܵܟ ܡܹܐܡܪܵܐ ܕܡܸܠܹ̈ܐ 75 ܘܠܵܐ ܚܝܼܨܘܼܬܼܵܟ ܥܨܵܬܲܢܝ ܕܐܸܪܫܹܝܟ ܐܲܝܟ ܕܲܠܪܲܦܝܵܐ ܀ 76 :ܬܵܐ ܫܡܲܥ ܫܸܡܥܵܐ ܕܚܲܝܵܒܼܘܼܬܼܵܟ ܡ̣ܢ ܚܲܝܵܒܼܘܼܬܝ 77 ܘܕܼܘܼܢ ܟܹܐܢܵܐܝܼܬܼ ܐܸܢ ܟܹܐܢܵܐܝܼܬܼ ܡܚܲܝܸܒܼ ܐܲܢ̄ܬܿ ܠܵܟ ܀ 78 :ܒܟܼܘܼܪ ܒܘܼܚܪܵܢܵܐ ܕܦܵܪܘܿܫܘܼܬܼܵܟ ܒܚܘܿܪ ܦܸܬܼܓܼܵܡܲܝ̈ 79 ܘܲܚܙܝܼ ܫܲܦܝܼܪ ܓܸܠܝܵܢ ܙܹܐܦܵܐ ܕܙܹܐܦܵܢܘܼܬܼܵܟ ܀ 80 :ܐܲܝܟ ܕܲܒܼܕܼܝܼܢܵܐ ܒܩܘܼܡ ܐܵܡ̇ܘܿܪܵܐ ܐܵܦ ܫܵܡ̇ܘܿܥܵܐ 81 ܘܐܲܝܢܵܐ ܕܚܵܐܹ̇ܒܼ ܠܵܐ ܢܸܬܼܥܲܣܲܩ ܠܡܸܒܼܣܲܪ ܥܵܘ̣ܠܹܗ ܀ 82 :ܫܡܲܥ ܟܹܝܬܼ ܘܐܹܡܲܪ ܡܹܐܡܪܵܐ ܕܲܥܠܲܝܟ ܐܘܿ ܒܲܪܢܵܫܵܐ 83 ܕܡܸܛܠ ܡ̇ܢܵܐ ܡܕܼܵܘܲܕܼ ܥܘܼܡܪܵܟ ܘܒܲܛܝܼܠ ܪܲܗܛܵܟ ܀ 84 :ܠܡܢܵܐ ܕܵܡܹ̇ܐ ܕܘܼܒܵܪ ܚܲܝܲܝ̈ܟ ܠܲܕܼܚܲܝ̈ܘܵܬܼܵܐ 85 ܘܢܘܼܟܼܪܵܝ ܛܲܟܼܣܵܐ ܠܛܲܟܼܣܵܐ ܬܲܩܦܢܵܐ ܕܲܡܠܝܼܠܘܼܬܼܵܐ ܀ 86 :ܠܡܵܢܵܐ ܕܠܝܼܚܵܐ ܒܪܝܼܬܼܵܐ ܒܬܸܛܪܵܐ ܕܡܲܪܝܼܪܘܼܬܼܵܟ 87 ܘܠܲܝܬܿ ܣܘܼܥܪܵܢܵܐ ܕܲܚܠܸܐ ܛܲܥܡܹܗ ܒܦܘܼܡ ܣܵܥܘܿܪ̈ܵܘܗܝ ܀ 88 :ܠܡܵܢܵܐ ܡܫܲܚܠܲܦ ܫܘܼܠܚܵܦ ܙܲܒܼܢܹ̈ܐ ܡ̣ܢ ܟܠ ܙܲܒܼܢܝܼ̈ܢ 89 ܘܠܲܝܬܿ ܠܹܗ ܕܘܼܡܝܵܐ ܕܕܼܵܡܹ̇ܐ ܠܙܲܒܼܢܹ̈ܐ ܕܲܩܕܼܵܡܲܝܗܘܿܢ ܀ 90 :ܠܡܵܢܵܐ ܠܵܐ ܫܘܸܐ ܪܲܗܛܵܐ ܫܲܘܝܵܐ ܕܫܘܼܚܠܵܦܲܝ̈ܗܘܿܢ 91 ܘܥܲܠ ܡ̇ܢ ܥܵܠ̇ܒܿܝܼܢ ܐܵܘ ܡܸܬܼܥܲܠܒܿܝܼܢ ܠܒܲܪ ܡ̣ܢ ܛܲܟܼܣܵܐ ܀ 92 :ܠܡܵܢ ܕܸܡܹ̇ܐ ܩܲܝܛܵܐ ܠܩܲܝܛܵܐ ܘܣܲܬܼܘܵܐ ܠܣܲܬܼܘܵܐ 93 ܘܡܸܛܠ ܡ̇ܢܵܐ ܡܝܲܬܿܪ ܘܲܒܼܨܝܼܪ ܥܲܪܝܵܐ ܘܚܘܼܡ̇ܐ ܀ 94 :ܠܡܵܢ ܟܲܕܼ ܚܲܕܼ ܗ̄ܘ̣ ܪܸܗܛܵܐ ܕܝܲܪ̈ܚܹܐ ܘܲܕܼܝܵܘ̈ܡ̇ܬܼܵܐ 95 ܠܵܐ ܡܸܬܼܡܲܠܸܐ ܡ̇ܙܘܿܢ ܚܲܝܲܝ̈ܢ ܐܲܝܟ ܕܲܒܼܩܲܕܼܡ̇ܐ ܀ pb. 343 96 :ܠܡܵܢ ܚܲܣܝܼܪ݁ܵܢ ܐܲܪ̈ܥܵܢܝܵܬܼܵܐ ܒܥܘܼܡܪܵܐ ܕܐ̄ܢܵܫܵܐ 97 ܘܠܵܐ ܡܸܬܼܦܲܢܸܐ ܐܲܓܼܪܵܐ ܛܵܒܼܵܐ ܠܥܲܡܠܹ̈ܐ ܫܚܝܼܩܹ̈ܐ ܀ 98 :ܠܡܵܢܵܐ ܡܙܲܠܗܲܙ ܥܘܼܡܪܵܐ ܕܙܲܒܼܢܵܐ ܥܲܡ ܕܲܠܥܵܠܲܡ 99 ܘܠܲܝܬܿ ܒܹܗ ܒܕܼܵܪܲܢ ܕܲܩܢܸܐ ܕܐܲܪܥܵܐ ܐܵܘ ܕܲܡܡܲܝܵܐ ܀ 100 :ܠܡܵܢ ܣܲܓܿܝܼܐܝܼܢ ܟܹܐܢܹ̈ܐ ܕܦܲܓܼܪܵܐ ܘܲܕܼܪܥܝܵܢܵܐ 101 ܘܠܲܝܬܿ ܒܲܢ ܕܲܚܠܝܼܡ ܦܲܓܼܪܵܢܵܐܝܼܬܼ ܘܪܘܼܚܵܢܵܐܝܼܬܼ ܀ 102 :ܠܡܵܢܵܐ ܣܒܼܝܼܣܵܐ ܠܵܐ ܝܼܕܲܥܬܼܵܐ ܒܟܼܠܗܘܿܢ ܬܸܓܼܡܹ̈ܐ 103 ܘܠܲܝܬܿ ܚܲܟܿܝܼܡܵܐ ܕܡܲܐܣܸܐ ܟܹܐܢܹ̈ܐ ܕܗܸܕܼܝܘܿܛܘܼܬܼܵܐ ܀ 104 :ܒܛܸܠܘ̣ ܡ̣ܢ ܥܲܡܲܢ ܐܵܣܵܘ̈ܬܼܵܐ ܕܦܲܓܼܪܵܐ ܘܢܲܦܫܵܐ 105 ܘܠܲܝܬܿ ܕܲܒܼܛܝܼܠ ܠܹܗ ܥܲܠ ܚܘܼܠܡܵܢܲܢ ܐܵܦܠܵܐ ܒܡܸܠܬܼܵܐ ܀ 106 :ܓܲܪܕܲܝܼܘ ܡܸܢܲܢ ܝܵܕܼܥܲܝ̈ ܚܲܫܹ̈ܐ ܕܚܵܫܘܿܫܘܼܬܼܵܐ 107 ܘܩܲܪܝܼܒܼ ܓܸܢܣܲܢ ܕܲܢܢܲܓܿܕܼܘܼܢܵܝܗܝ ܚܲܫܹ̈ܐ ܘܟܹܐܒܹ̈ܐ ܀ 108 :ܚܫܸܟ ܠܹܗ ܥܵܠܡܵܐ ܒܚܸܫܘܿܟܼܘܼܬܼܵܐ ܕܠܵܐ ܝܼܕܲܥܬܼܵܐ 109 ܘܛܵܟ ܡܝ̇ܫܝܼܢܲܢ ܐܸܣܹ̈ܐ ܒܛܲܗܪܵܐ ܐܲܟܼܡܵܐ ܕܲܟܼܬܼܝܼܒܼ ܀ 110 :ܥܒ݂ܲܪ ܣܘܼܿܟܵܠܵܐ ܕܕܸܚܠܲܬܼ ܩܘܼܫܬܵܐ ܡ̣ܢ ܪܸܥܝܵܢܲܢ 111 ܘܠܵܐ ܦܵܫ̣ ܡܸܕܸܿܡ ܕܠܵܐ ܡܲܢܲܥ ܠܹܗ ܠܘܵܬܼ ܠܵܐ ܡܸܕܸܿܡ ܀ 112 :ܐܘܿ ܟܡܵܐ ܩܲܫܝܵܐ ܩܲܫܝܘܼܬܼ ܠܸܒܲܢ ܡ̣ܢ ܟܠ ܕܲܩܫܸܐ 113 ܕܠܵܐ ܡܸܬܼܒܲܝܢܵܐ ܒܝܲܕܼ ܩܲܫ̈ܝܵܬܼܵܐ ܕܲܡ̈ܢܲܓܿܕܵܢ ܠܵܗ̇ ܀ 114 :ܐܘܿ ܟܡܵܐ ܣܲܡܝܵܐ ܥܲܝܢܵܐ ܕܢܲܦܫܲܢ ܡ̣ܢ ܘܵܠܝܼܬܵܐ 115 ܕܠܵܐ ܡܸܬܼܪܲܟܼܢܵܐ ܠܡܸܚܙܵܐ ܡܘܼܡܹ̈ܐ ܕܐܲܡܝܼܢܝܼܢ ܒܵܗ̇ ܀ 116 :ܐܘܿ ܟܡܵܐ ܝܲܩܝܼܪ ܫܸܡܥܹܗ ܕܗܵܘܢܲܢ ܩܲܠܝܼܠ ܫܸܡܥܵܐ 117 ܕܫܵܡܲ݁ܥ ܘܲܫܠܸܐ ܘܠܵܐ ܡܲܫܡܲܥ ܠܲܢ ܐܲܝܕܵܐ ܕܦܲܐܝܵܐ ܀ 118 :ܐܘܿ ܟܡܵܐ ܡܲܗܡܸܐ ܟܝܵܢ ܚܹܐܪܘܼܬܿܢ ܡ̣ܢ ܚܹܐܪܘܼܬܹܗ 119 ܕܠܵܐ ܡ̇ܘܕܲܥ ܠܲܢ ܙܸܕܼܩܹ̈ܐ ܕܦܲܐܝܼܝܼܢ ܠܲܒܼܢܲܝ̈ ܚܹܐܪܹ̈ܐ ܀ 120 :ܐܘܿ ܟܡܵܐ ܣܵܢܹ̇ܐ ܝܲܨܪܲܢ ܗܘ̤ ܠܹܗ ܕܠܵܐ ܒܲܡܫܘܼܚܬܼܵܐ 121 ܕܠܵܐ ܡܲܬܼܘܸܐ ܠܲܢ ܕܲܢܬܼܘܼܒܼ ܩܲܠܝܼܠ ܡ̣ܢ ܒܝܼ̈ܫܵܬܲܢ ܀ 122 :ܒܵܠܲܥ ܦܲܓܼܪܲܢ ܘܠܵܐ ܟܲܪܝܵܐ ܠܹܗ ܥܲܠܐ ܒܘܼܣܒܵܣܹܗ 123 ܘܗܵܦܹ̇ܟ ܠܐܲܪܥܵܐ ܘܠܵܐ ܡܸܬܼܚܲܫܲܒܼ ܕܡ̇ܢܲܐ ܗ̄ܝܼ ܥܸܠܬܼܵܐ ܀ 124 :ܠܵܐ ܪܵܢ݂̇ܝܢܲܢ ܕܡܵܢܲܐ ܗ̄ܝܼ ܥܸܠܬܼܵܐ ܕܢܸܓܼܕܲܝ̈ ܦܲܓܼܪܲܢ 125 ܘܠܵܐ ܒܵܥܹ̇ܝܢܲܢ ܒܥܵܬܼܵܐ ܕܚܲܫܹ̈ܐ ܕܲܡܥܝܼܩܝܼܢ ܠܲܢ ܀ 126 :ܠܟܹܐܦ ܛܲܪܵܢܵܐ ܕܵܡܹ̇ܐ ܠܸܒܵܢ ܩܕܼܵܡ ܡܲܚ̈ܘܵܬܼܵܐ 127 ܘܲܕܼܠܵܐ ܚܵܐܹ̇ܫ ܗܵܐ ܡܲܚܫܝܼܢ ܠܹܗ ܚܲܫܹ̈ܐ ܣܒܼܝܼܣܹ̈ܐ ܀ 128 :ܟܹܐܒܹ̈ܐ ܣܒܼܝܼܣܝܼܢ ܘܚܲܫܹ̈ܐ ܡܥܝܼܩܝܼܢ ܘܡ̇ܘܬܵܐ ܡܣܲܪܗܸܒܼ 129 ܘܗܘ̤ ܠܵܐ ܕܵܡܹ̇ܐ ܐܲܝܟ ܕܲܫܡܝܼܥ ܠܹܗ ܚܕܼܵܐ ܡ̣ܢ ܗܵܠܹܝܢ ܀ 130 ܟܲܦܢܵܐ ܟܵܐܹ̇ܦ ܫܸܒܼܝܵܐ ܕܵܒܲܪ ܘܚܲܪܒܵܐ ܡܣܝܼܦܵܐ: pb. 344 131 ܘܗܵܘܢܲܢ ܡܲܓܲܣ ܐܲܝܟ ܕܲܒܼܥܲܪܣܵܐ ܕܗܲܢܝܼܐܘܼܬܼܵܐ ܀ 132 :ܩܪܵܒܼܵܐ ܬܵܩܹ̇ܦ ܩܹܐܪܣܵܐ ܣܵܓܹ̇ܐ ܕܡ̇ܐ ܡܸܫܬܲܦܲܥ 133 ܘܲܠܪܸܥܝܵܢܲܢ ܐܲܝܟ ܠܵܐ ܡܸܕܸܿܡ ܚܫܝܼܒܼ ܟܠ ܡܸܕܸܿܡ ܀ 134 :ܣܸܕܼܩܹ̈ܐ ܒܥܹܕܿܬܵܐ ܫܓܼܘܼܫܝܹ̈ܐ ܒܚܲܢܦܹ̈ܐ ܘܗܸܪܬܼܵܐ ܒܟܼܠ ܕܘܼܟ 135 ܘܐܸܢ ܐ̄ܢܵܫ ܬܸܒܲܥ̇ ܕܲܪܓܼܝܼܫܝܼܢܲܢ ܠܵܐ ܪܓܼܝܼܫܝܼܢ ܚ̄ܢܲܢ ܀ 136 :ܠܲܝܬܿ ܥܘܼܗܕܵܢܵܐ ܕܢܸܓܼܕܲܝ̈ ܦܲܓܼܪܲܢ ܒܓܼܵܘ ܪܸܥܝܵܢܲܢ 137 ܘܐܸܢ ܠܵܐ ܐܝܼܬܼ ܕܠܵܘ ܒܲܫܪܵܪܵܐ ܢܛܝܼܪ ܨܹܝܕ ܒܲܪܢܵܫ ܀ 138 :ܠܵܘ ܒܲܫܪܵܪܵܐ ܢܛܝܼܪ ܥܘܼܗܕܵܢܵܐ ܕܫܲܪܝܼܪ݁ܵܬܼܵܐ 139 ܒܲܕܼܠܵܐ ܫܵܠ̈ܡܵܢ ܡܸܠܲܝ̈ ܦܘܼܡ̇ܐ ܠܗܵܘܢܵܐ ܕܲܠܓܼܵܘ ܀ 140 :ܐܝܼܬܼ ܗ̄ܘ̣ ܕܬܼܵܢܹ̇ܐ ܥܘܼܗܕܵܢ ܡܸܠܹ݁̈ܐ ܒܡܸܠܹ̈ܐ ܒܲܠܚܘܿܕܼ 141 ܘܡ̣ܢ ܪܸܥܝܵܢܹܗ ܠܚܸܐ ܥܘܼܗܕܵܢܵܐ ܕܫܲܦܝܼܪ݁ܵܬܼܵܐ ܀ 142 :ܐܝܼܬܼ ܗ̄ܘ̣ ܕܲܡܗܝܼܪ ܙܢܲܝ̈ ܛܵܒܼ̈ܬܼܵܐ ܠܡܸܫܬܲܥܵܝܘܼ 143 ܘܲܒܼܚܘܼܫܵܒܼܵܘ̈ܗܝ ܣܒܼܝܼܣ ܩܸܢܝܵܢܵܐ ܕܲܫܟܼܝܼܪ݁ܵܬܼܵܐ ܀ 144 :ܐܝܼܬܼ ܗ̄ܘ̣ ܕܛܲܢܵܢ ܠܡܸܬܼܒܲܥ ܗܵܘ̣ܠܵܐ ܥܲܙܝܼܙܵܐܝܼܬܼ 145 ܘܥܵܘ̣ܠܵܐ ܕܢܲܦܫܹܗ ܐܸܦܠܵܐ ܒܡܸܠܬܼܵܐ ܡܨܸܐ ܪܵܫܹ̇ܐ ܠܹܗ ܀ 146 :ܐܝܼܬܼ ܕܲܡܨܲܚܸܐ ܠܓܲܝܵܪܘܼܬܼܵܐ ܘܓܼܢܵܒܼܘܼܬܼܵܐ 147 ܘܐܲܬܲܝܗܹܝܢ ܒܹܗ ܘܠܵܐ ܡܸܬܼܪ̈ܲܫܝܵܢ ܡ̣ܢ ܚܹܐܪܘܼܬܹܐ ܀ 148 :ܐܝܼܬܼ ܗ̄ܘ̣ ܕܲܠܒܼܝܼܫ ܐ̄ ܣܟܹܿܝܡ ܢܲܟܼܦܘܼܬܼܵܐ ܘܲܟܼܢܝܼܟܼܘܼܬܼܵܐ 149 ܘܠܲܝܬܿ ܙܲܠܝܼܠ ܣܲܓܼܝܼ ܐܲܝܟ ܪܸܥܝܵܢܹܗ ܀ 150 :ܐܝܼܬܼ ܕܲܡܚܵܘܸܐ ܐܲܦܹ̈ܐ ܕܚܘܼܒܵܐ ܨܹܝܕܼ ܚܲܒܿܝܼܒܹܗ 151 ܘܝܲܨܪܹܗ ܕܲܠܓܼܵܘ ܠܵܛܹ̇ܫ ܣܲܝܦܵܐ ܠܲܕܼܡ̇ܐ ܀ 152 :ܐܝܼܬܼ ܗ̄ܘ̣ ܕܡܲܟܼܪܸܐ ܥܲܠ ܥܵܩܵܬܼܵܐ ܟܲܕܼ ܠܵܠ ܡܲܟܼܪܸܐ 153 ܘܕܵܡܹ̇ܐ ܠܕܹܐܒܼܵܐ ܕܲܠܒܼܝܼܫ ܕܘܼܡܵܐ ܕܥܸܪܒܵܐ ܒܢܸܟܼܠܵܐ ܀ 154 :ܐܝܼܬܼ ܗ̄ܘ̣ ܕܝܵܕܲܥ ܠܲܡܩܲܟܪܵܓܼܘܼ ܠܲܫܟܼܝܼܪ݁ܵܬܼܵܐ 155 ܘܲܫܟܼܝܼܪ݁ܵܬܼܵܐ ܕܲܐܓܼܵܘ ܡܸܢܹܗ ܠܵܐ ܫܟܼܝܼܪ̈ܵܢ ܠܹܗ ܀ 156 :ܐܝܼܬܼ ܗ̄ܘ̣ ܕܩܵܪܹܿܐ ܒܣܸܦܪ̈ܲܝ ܪܘܼܚܵܐ ܪܗܸܛܪܵܪܵܐܝܼܬܼ 157 ܘܲܠܥܸܓܼ ܗܵܘܢܹܗ ܠܡܸܓܼܡܲܪ ܡܸܠܹ̈ܐ ܒܝܲܕܼ ܣܘܼܥܪ̈ܵܢܹܐ ܀ 158 :ܐܝܼܬܼ ܕܲܡܦܲܫܸܩ ܐܵܦ ܣܘܼܟܵܠܵܐ ܕܲܣܬܼܝܼܪ̈ܵܬܼܵܐ 159 ܘܠܵܐ ܡܸܬܼܒܲܝܲܢ ܒܢܸܟܼܠܹ̈ܐ ܣܬܼܝܼܪܹ̈ܐ ܕܲܒܼܪܸܥܝܵܢܹܗ ܀ 160 :ܐܝܼܬܼ ܕܲܡܥܲܗܸܕܼ ܥܲܠ ܬܲܒܼܥ̈ܬܼܵܐ ܕܕܼܝܼܢܵܐ ܕܲܥܬܼܝܼܕܼ 161 ܘܠܹܗ ܠܵܐ ܫܲܪܝܼܪ ܐܵܦܠܵܐ ܕܐܝܼܬܼܵܘܗܝ ܡ̇ܪܹܗ ܕܕܼܝܼܢܵܐ ܀ 162 :ܐܝܼܬܼ ܕܲܡܙܲܗܲܪ ܕܠܵܐ ܐ̄ܢܵܫ ܢܲܥܘܸܠ ܒܲܕܼܠܵܐ ܕܝܼܠܹܗ 163 ܘܡܲܣܓܸܿܐ ܛܵܡܲܪ ܦܲܚܹ̈ܐ ܢܟܼܝܼܠܹ̈ܐ ܕܢܸܥܠܘܿܒܼ ܚܲܒܼܪ̈ܵܘܗܝ ܀ 164 :ܐܝܼܬܼ ܕܲܡܓܲܢܸܐ ܠܪܸܚܡܲܬܼ ܟܸܣܦܵܐ ܓܲܢ̄ܒܵܪܵܐܝܼܬܼ 165 ܘܲܡܣܲܬܿܬܼܵܐ ܒܹܗ ܐܲܝܟ ܥܸܩܵܪܵܐ ܒܥܘܼܡܩܵܐ ܕܐܲܪܥܵܐ ܀ 166 :ܐܝܼܬܼ ܕܲܡܟܲܐܲܪ ܠܪܸܚܡܲܬܼ ܫܘܼܒܼܚܵܐ ܐܘܼܡ̇ܢܵܐܝܼܬܼ 167 ܘܟܲܡܝܼܢܵܐ ܒܹܗ ܐܲܝܟ ܐܵܟܹܕܼܢܵܐ ܒܢܸܩܥܹ̈ܐ ܕܫܘܿܥܵܐ ܀ pb. 345 168 :ܐܝܼܬܼ ܕܲܡܛܲܢܸܦ ܒܪܸܓܲܬܼ ܒܸܪܪܵܐ ܐܲܝܟ ܙܲܟܵܝܵܐ 169 ܘܲܡܛܲܒܲܥ ܒܵܗ̇ ܐܲܝܟ ܕܲܒܼܗܵܘܬܼܵܐ ܕܠܵܐ ܡܸܬܼܥܲܒܼܪܵܐ ܀ 170 :ܐܝܼܬܼ ܕܢܵܕܵܐ ܠܹܗ ܡ̣ܢ ܚܲܣܵܡܹ̈ܐ ܘܢܲܟܿܘܼܠܬܼܵܢܹ̈ܐ 171 ܘܣܲܦܝܼܦܵܐ ܒܹܗ ܢܘܼܪܵܐ ܕܪܘܼܓܼܙܵܐ ܠܘܼܩܒܲܠ ܚܲܒܼܪ݁ܵܘ̈ܗܝ ܀ 172 :ܐܝܼܬܼ ܕܲܡܒܲܙܲܚ ܒܚܘܼܬܼܪܵܐ ܢܕܝܼܕܼܵܐ ܘܲܒܼܪܵܡܘܼܬܼܵܐ 173 ܘܠܵܐ ܡܸܬܼܡܲܫܚܵܐ ܪܵܡܘܼܬܼ ܪܘܼܚܹܗ ܕܲܟܼܡܵܐ ܪܵܡ̇ܐ ܀ 174 :ܐܝܼܬܼ ܕܲܡܡܲܝܸܩ ܒܪ݁ܲܓܿܘܼܙܬܼܵܢܹܐ ܘܲܒܼܚܸܡܬܼܵܢܹ̈ܐ 175 ܘܡ̇ܐ ܕܡܸܬܼܚܲܡܲܬܼ ܠܵܘ ܚܸܡܘܼܬܼܵܢܵܐ ܗ̄ܘ̣ ܐܸܠܵܐ ܕܲܝܘܵܐ ܗ̄ܘ̣ ܀ 176 :ܐܝܼܬܼ ܕܲܡܩܲܛܪܸܓܼ ܢܵܛܪ̈ܲܝ ܐܲܟܿܬܼܵܐ ܠܩܲܪ̈ܝܼܒܲܝܗܘܿܢ 177 ܘܗܘ̤ ܠܕܼܵܪܕܵܪ̈ܝܼܢ ܠܵܐ ܡܲܥܒܲܪ ܠܵܗ̇ ܠܐܲܟܿܬܼܵܐ ܕܪܘܼܓܼܙܹܐ ܀ 178 :ܐܝܼܬܼ ܗ̄ܘ̣ ܕܚܲܪܝܼܦ ܚܵܘܪܵܐ ܕܥܲܝܢܵܘ̈ܗܝ ܠܡܸܚܙܵܐ ܓܸܠܹ̈ܐ 179 ܘܲܒܼܩܵܪ̈ܝܵܬܼܵܐ ܕܲܒܼܒܼܵܒܼܵܬܹ̈ܗ ܠܵܐ ܡܸܬܼܒܲܩܸܐ ܀ 180 :ܐܝܼܬܼ ܕܟܲܪܝܵܐ ܠܹܗ ܘܐܲܒܼܝܼܠ ܘܲܡܥܵܩ ܥܲܠ ܣܲܢ̈ܝܵܬܼܵܐ 181 ܘܥܘܼܗܕܵܢ ܥܵܘ̣ܠܹܗ ܠܵܐ ܣܠܸ̣ܩ ܡܸܡܬܼܘܿܡ ܥܲܠ ܪܸܥܝܵܢܹܗ ܀ 182 :ܐܝܼܬܼ ܕܡܸܬܿܬܲܢܲܚ ܥܲܠ ܒܝܼ̈ܫܬܼܵܐ ܪܵܥܘܿܡ̇ܐܝܼܬܼ 183 ܘܥܲܠ ܒܝܼܫܵܬܹ̈ܗ ܠܵܐ ܚܲܫ̣ ܘܐܲܟܼܪܝܼ ܡ̣ܢ ܝܘܿܡ ܕܲܗܘ̤ܵܐ ܀ 184 :ܘܐܝܼܬܼ ܕܲܡܦܲܠܸܓܼ ܐܵܦ ܙܸܕܼܩܵܬܼ̈ܐ ܡ̣ܢ ܐܸܢ̈ܩܵܬܼܵܐ 185 ܘܐܸܢ ܦܵܓܲܥ ܒܹܗ ܝܲܬܼܡ̇ܐ ܒܫܘܼܩܵܐ ܡܪܝܼܡ ܡܲܪܛܘܼܛܹܗ ܀ 186 :ܐܝܼܬܼ ܕܲܡܬܲܪܓܸܿܡ ܪ̈ܘܼܚܵܢܝܵܬܼܵܐ ܩܕܼܵܡ ܫܵܡܘܿܥܹ̈ܐ 187 ܘܐܲܣܝܼܪ ܘܲܚܢܝܼܩ ܒܦܲܓܼܪ̈ܵܢܝܵܬܼܵܐ ܕܠܵܐ ܣܲܒܼܥܘܼܬܼܵܐ ܀ 188 :ܐܝܼܬܼ ܕܲܡܨܲܠܸܠ ܒܵܩܹ̈ܐ ܫܝܼܛܹ̈ܐ ܡܘܼܡܹ̈ܐ ܕܚܲܒܼܪ̈ܵܘܗܝ 189 ܘܒܼܵܠܲܥ̇ ܓܼܿܡܠܹ̈݁ܐ ܚܵܘ̈ܒܹܿܐ ܫܟܼܝܼܪܹ̈ܐ ܕܡ̇ܘܠܸܕܼ ܠܸܒܹܿܗ ܀ 190 :ܐܝܼܬܼ ܗ̄ܘ̣ ܕܲܣܒܼܝܼܪ ܕܒܹܗ ܗ̄ܘ̣ ܡܣܲܝ̈ܟܼܵܢ ܫܲܦܝܼܪ̈ܵܬܼܵܐ 191 ܘܪܲܚܝܼܩ ܡܸܢܗܹܝܢ ܐܲܟܼܡܵܐ ܕܪܲܚܝܼܩ ܛܵܘܪܵܐ ܕܪܲܚܝܼܩ ܀ 192 :ܐܝܼܬܼ ܕܡܸܬܼܩܲܠܲܣ ܟܲܕܵܒܼܵܐܝܼܬܼ ܡ̣ܢ ܟܲܕܵܒܹ̈ܐ 193 ܘܐܸܠܘܼ ܐܝܼܬܼ ܗ̄ܘ̣ܵܐ ܦܘܼܡ̇ܐ ܠܟܹܐܦܹ̈ܐ ܩܥܲܝ̈ ܕܐܘܿܗ ܡܸܢܹܗ ܀ 194 :ܟܡܵܐ ܐܝܼܬܼ ܕܝܼܪܸܒܼܘ ܘܲܩ̣ܢܵܘ ܕܲܪܓܼܵܐ ܕܪܹܫܵܢܘܼܬܼܵܐ 195 ܘܠܵܐ ܫܵܘܹ̇ܝܢ ܗ̄ܘ̣ܵܘ ܕܢܸܗܘܘܿܢ ܥܲܒܼ̈ܕܹܿܐ ܠܥܲܒܼ̈ܕܹܿܐ ܕܥܲܒܼ̈ܕܹܿܐ ܀ 196 :ܟܡܵܐ ܐܝܼܬܼ ܕܲܚ̣ܝܵܘ ܒܟܲܗܝܼܢܘܼܬܼܵܐ ܘܚܘܼܠܡܵܢ ܦܲܓܼܪܵܐ 197 ܘܠܵܐ ܘܵܠܹ̇ܐ ܗ̄ܘ̣ܵܐ ܕܢܸܕܼܢܲܚ ܫܵܡܫܵܐ ܥܲܠ ܚܲܝܲܝ̈ܗܘܿܢ ܀ 198 :ܟܡܵܐ ܐܝܼܬܼ ܕܐܲܛܥܝܼܘ ܒܲܡ̈ܢܵܘܵܬܼܵܐ ܕܐܸܣܟܹܿܝܡ ܐܸܣܟܹܿܝܡ 199 ܘܲܥܬܼܝܼܕܼ ܝܵܘܡ̇ܐ ܕܢܸܓܼܠܸܐ ܙܹܐܦܵܐ ܕܐܸܣܟܹܿܡܲܝ̈ܗܘܿܢ ܀ 200 :ܟܡܵܐ ܐܝܼܬܼ ܕܲܗܘ̤ܵܘ ܒܹܝܬܼ ܡ̇ܘ̈ܡ̇ܬܼܵܐ ܠܫܲܒܼܪ̈ܲܝ ܠܸܒܵܐ 201 ܘܲܒܼܝܘܿܡ ܕܝܼܢܵܐ ܗܵܘܹ̇ܝܢ ܓܘܼܚܟܵܐ ܠܚܲܙܵܚܲܝ̈ܗܘܿܢ ܀ 202 ܟܡܵܐ ܫܘܼܚ̈ܠܵܦܝܼܢ ܕܠܵܐ ܡܸܬܼܡܢܹܝܢ ܒܹܝܬܼ ܒܢܲܝ̈ܢܵܫܵܐ: pb. 346 203 ܘܠܲܝܬܿ ܒܲܪܢܵܫܵܐ ܕܪܵܢܹ̇ܐ ܒܥܵܘ̣ܠܵܐ ܕܲܒܼܢܲܝ̈ܢܵܫܵܐ ܀ 204 :ܒܟܹܐܢܹ̈ܐ ܣܢܲܝ̈ܵܐ ܕܥܵܘ̣ܠܵܐ ܣܲܢܝܵܐ ܟܪܝܼܗܝܼܢ ܐ̄̈ܢܵܫܵܐ 205 ܘܠܵܐ ܝܲܨܝܼܦܝܼܢ ܕܲܚܒܼܵܪ̈ܵܬܼܵܐ ܕܪܸ̈ܥܝܵܢܲܝܗܘܿܢ ܀ 206 :ܒܪܸ̈ܥܝܵܢܲܝܗܘܿܢ ܡܣܲܬܲܪ ܟܹܐܒܼܵܐ ܕܪܸ̈ܥܝܵܢܲܝܗܘܿܢ 207 ܘܠܵܐ ܡܸܬܼܦܲܣܝܼܢ ܕܲܢܣܝܼܡܘܼܢ ܠܹܗ ܣܲܡܵܐ ܕܥܵܗܹ̇ܢ ܀ 208 :ܠܵܐ ܝܼܕܲܥܬܼܵܐ ܥܵܘܪܲܬ̤ ܐܸܢܘܿܢ ܡ̣ܢ ܘܵܠܝܼܬܼܵܐ 209 ܘܚܵܪ̣ܘ ܒܲܚܕܼܵܕܹ̈ܐ ܟܲܕܼ ܡܸܬܼܚܲܪܒܿܝܼܢ ܡ̣ܢ ܚܲܒܼܪ̈ܲܝܗܘܿܢ ܀ 210 :ܬܵܘ ܫܲܬܿܝܼܩܹ̈ܐ ܚܙܵܘ ܡܲܠܠܹ݁̈ܐ ܟܡܵܐ ܐܸܫܬܲܬܲܩܘ 211 ܕܡܝܼܬܼܘ ܒܲܚܛܝܼܬܼܵܐ ܘܠܑܵܐ ܢܵܕܼܘ ܘܐܲܪܓܸܿܫܘ ܒܥܘܼܢܕܵܢܲܝ̈ܗܘܿܢ ܀ 212 :ܡܲܢ ܡܝܼܬܼ ܡ̇ܘܬܵܐ ܕܕܼܵܡܹ̇ܐ ܠܡܵܘܬܵܐ ܕܡܝܼܬܼܵܐ ܕܕܼܵܪܲܢ 213 ܕܡܲܚܬܼ ܟܠܢܵܫ ܘܠܵܐ ܐ̄ܢܵܫ ܝܵ̇ܕܲܥ ܕܡ̇ܢܵܘ̇ ܡܵܘܬܹ̇ܐ ܀ 214 :ܒܐܲܝܢܵܐ ܕܵܪܵܐ ܥܫܸ̣ܢ ܒܝܼ̈ܫܵܬܼܵܐ ܐܲܝܟ ܒܝܼ̈ܫܬܲܢ 215 ܕܟܲܕܼ ܣܲܓܿܝܼ̈ܐܢ ܠܵܐ ܡܸܣ̈ܬܲܒܼܥܵܢ ܠܣܵܥܘܿܪ̈ܲܝܗܹܝܢ ܀ 216 :ܕܠܵܐ ܣܲܒܼܥܘܼܬܼܵܐ ܪܚܝܼܡܵܐ ܒܝܼܫܬܵܐ ܠܪܸܥܝܵܢ ܒܝܼܫܹ̈ܐ 217 ܘܗܵܢܵܘ̇ ܬܸܡܗܵܐ ܕܲܟܼܡܵܐ ܒܝܼܫܵܐ ܘܲܟܼܡܵܐ ܪܚܝܼܡܵܐ ܀ 218 :ܒܝܼܫܘܼܬܼ ܒܝܼܫܬܵܗ̇ ܥܨܵܬܲܢܝ ܕܐܸܒܼܥܸܐ ܥܲܠ ܒܝܼܫܘܼܬܼܵܗ̇ 219 ܕܲܒܼܓܲܠܝܘܼܬܼܵܗ̇ ܢܸܚܙܘܿܢ ܐ̄ܢܵܫܵܐ ܠܲܩܢܘܿܡܲܝ̈ܗܘܿܢ ܀ 220 :ܣܲܢܝܘܼܬܼ ܒܝܼܫܬܵܗ̇ ܥܸܒܼܕܲܬ̤ ܐ̄̈ܢܵܫܵܐ ܣܲܢܝܲܝ̈ ܚܸܙܘܵܐ 221 ܘܨܵܪܬܵܗ̇ ܒܡܸܠܹ̈ܐ ܕܲܢܚܘܼܪܘܼܢ ܒܵܗ̇ ܕܲܟܼܡܵܐ ܣܲܢܝܵܐ ܀ 222 :ܠܲܫܟܼܝܼܪܘܼܬܼܵܗ̇ ܓܲܢܝܲܬ̤ ܡܸܠܲܬܼܝ ܘܲܡܓܲܢܸܐ ܦܘܼܡܝ 223 ܕܢܸܕܲܥ ܟܠܢܵܫ ܠܲܡܓܲܢܵܝܘܼ ܙܲܢܲܝ̈ ܒܝܼ̈ܫܬܼܵܐ ܀ 224 :ܙܢܲܝ̈ ܒܝܼ̈ܫܬܼܵܐ ܚܙܹ̇ܝܬܼ ܕܲܡܓܲܢܹܝܢ ܠܲܒܼܢܲܝ̈ܢܵܫܵܐ 225 :ܘܚܸܫܹ̇ܬܼ ܣܲܓܿܝܼ ܥܲܠ ܓܘܼܢܵܝܵܐ ܕܪܲܒܿܘܼܬܼ ܛܘܿܗܡܲܢ 226 ܛܘܿܗܡ̇ܐ ܪܲܒܵܐ ܩܪ̣ܵܝܗܝ ܒܵܪܘܿܝܵܐ ܠܛܘܿܗܡܲܢ ܪܲܒܵܐ ܀ 227 :ܒܗܵܝ̇ ܕܐܲܪܝܼܡܹܗ ܠܘܵܬܼ ܫܘܼܡ̇ܗܵܐ ܕܪܲܒܿܘܼܬܼ ܝܵܬܹܗ 228 :ܒܗܵܢ ܫܘܼܡ̇ܗܵܐ ܫܲܡܗܹܗ ܪܹܫܵܐ ܕܪܹܫܝܼܬܼ ܚܲܝܲܝ̈ܢ 229 ܟܲܕܼ ܚܵܙܹ̇ܩ ܗ̄ܘ̣ܵܐ ܕܢܹܐܙܲܠ ܢܲܡܠܸܟ ܒܐܲܬܼܪܵܐ ܕܪܵܘܡ̇ܐ ܀ 230 :ܓܲܒܼܪܵܐ ܠܲܡ ܚܲܕܼ ܕܐܝܼܬܼܵܘܗܝ ܛܘܿܗܡܹܗ ܛܘܿܗܡ̇ܐ ܪܲܒܵܐ 231 ܐܸܙܲܠ ܠܐܲܬܼܪܵܐ ܕܪܵܚܝܼܩ ܣܲܓܿܝܼ ܕܢܲܡܠܸܟ ܬܲܡ̇ܢ ܀ 232 :ܒܐܲܬܼܪܵܐ ܕܪܵܘܡ̇ܐ ܐܲܡܠܸܟ ܓܸܢܣܲܢ ܒܝܲܕܼ ܒܲܪ ܓܸܢܣܲܢ 233 ܘܲܛܥ̣ܵܝܗܝ ܓܸܢܣܲܢ ܠܫܘܼܘܕܵܝ ܡܸܠܹ̈ܐ ܕܲܠܘܵܬܼ ܓܸܢܣܲܢ ܀ 234 :ܐܲܣܩܲܢ ܐܲܡܝܼܪ ܘܐܵܘܬܿܒܲܢ ܥܲܡܹܗ ܠܥܸܠ ܒܲܫܡܲܝܵܐ 235 ܘܠܲܝܬܿ ܥܘܼܗܕܵܢܵܐ ܕܗܵܝ̇ ܡܲܣܲܩܬܵܐ ܒܓܼܵܘ ܪܸܥܝܵܢܲܢ ܀ 236 :ܕܒܼܵܥܹ̇ܐ ܚܠܵܦܲܝܢ ܟܬܿܒܼ ܟܵܪܘܿܙܵܐ ܕܟܼܵܪܘܿܙܘܼܬܹܗ 237 ܘܐܸܢ ܐ̄ܢܵܫ ܢܸܒܼܥܸܐ ܠܵܐ ܐ̄ܢܵܫ ܝܵ̇ܕܲܥ ܕܐܲܝܟܵܐ ܟܬܼܝܼܒܼܵܐ ܀ 238 :ܠܲܝܬܿ ܥܘܼܗܕܵܢܵܐ ܕܲܟܼܬܼܝܼ̈ܒܼܵܬܼܵܐ ܒܪܸܥܝܵܢ ܐ̄ܢܵܫܵܐ 239 ܘܐܸܢ ܐܝܼܬܼ ܠܵܐ ܐܝܼܬܼ ܕܦܸܠܓܿܘܼܬܼ ܐ̄ܢܵܫܵܐ ܥܢܸܐ ܒܲܬܼܘܵܬܼܵܐ ܀ 240 ܒܦܸܠܓܼܘܼܬܼ ܐ̄ܢܵܫܵܐ ܗܵܪܓܼܝܼܢ ܐ̄ܢܵܫܵܐ ܒܡܸܠܲܝ̈ ܪܘܼܚܵܐ: pb. 347 241 ܒܗܵܘ̇ ܒܲܪܢܵܫܵܐ ܕܫܝܼܛܵܐ ܡܢܵܬܹܗ ܘܲܒܼܨܝܼܪ ܗܸܪܓܹܿܗ ܀ 242 :ܦܲܓܼܪܵܐ ܗ̄ܘ̣ ܫܝܼܛܵܐ ܕܲܥܢܸܐ ܒܗܸܪܓܵܐ ܕܝܲܩܝܼܪ݁ܵܬܼܵܐ 243 ܘܢܲܦܫܵܐ ܦܐܝܼܬܼܵܐ ܕܲܡܟܵܐ ܘܫܲܠܝܵܐ ܡ̣ܢ ܦܘܼܠܚܵܢܵܐ ܀ 244 :ܘܵܝ ܠܹܗ ܠܓܸܢܣܲܢ ܠܐܲܝܢܵܐ ܫܸܦܠܵܐ ܢܚܸܬܼ ܐܝܼܩܵܪܹܗ 245 ܕܲܫܒ݂ܲܩ ܕܲܠܥܸܠ ܘܐܲܥܢܝܼ ܢܲܦܫܹܗ ܒܐܲܪ̈ܥܵܢܝܬܼܵܐ ܀ 246 :ܘܵܝܠܹܗ ܠܥܲܡܲܢ ܕܐܲܝܟܵܐ ܫܸܪܟܲܬ̤ ܛܵܒܼܬܼܵܐ ܕܛܘܼܒܹܗ 247 ܕܛܥ̣ܵܐ ܩܝܵܡܵܐ ܕܲܥܬܼܝܼ̈ܕܼܵܬܼܵܐ ܒܲܕܼܡܸܬܼܚܲܙ̈ܝܵܢ ܀ 248 :ܠܲܕܼܡܸܬܼܚܲܙ̈ܝܵܢ ܪܚܸܡ̣ܘ ܡ̇ܝ̈ܘܿܬܹܐ ܪ̈ܵܚܡܲܝ ܦܸܗܝܵܐ 249 ܘܐܲܝܟ ܠܵܐ ܡܸܕܸܿܡ ܚ̣ܫܲܒܼܘ ܝܘܼܬܼܪ݁ܵܢܹܐ ܕܫܲܪܝܼܪ݁ܵܬܼܵܐ ܀ 250 :ܐܘܿ ܗܲܦܟܵܝܹ̈ܐ ܕܗܲܦ̣ܟܿܘܼܗܝ ܠܛܲܟܼܣܵܐ ܕܫܲܦܝܼܪ݁ܵܬܼܵܐ 251 ܘܲܣܢ̣ܵܘ ܛܘܼܒܹ̈ܐ ܘܲܪܚܡ̣ܘ ܢܸܓܼ̈ܕܹܿܐ ܕܠܵܐ ܫܘܼܠܵܡܵܐ ܀ 252 :ܐܘܿ ܡܲܪ̈ܝܼܕܹܐ ܕܲܕܠܚ̣ܘܼܗܝ ܠܫܲܝܢܵܐ ܒܚܸܪ̈ܝܵܢܲܝܗܘܿܢ 253 ܘܫܲܪܝܼܘ ܥܵܒܼ̇ܕܲܝܼܢ ܩܪܵܒܼܵܐ ܟܲܣܝܵܐ ܥܲܡ ܐܲܚܲܝ̈ܗܘܿܢ ܀ 254 :ܠܡܲܚܣܸܢ ܝܲܠܦܘܼܗ̇ ܠܐܘܼܪܚܵܐ ܕܫܲܝܢܵܐ ܒܚܲܕܼ ܡ̣ܢ ܐ̄ܢܵܫܵܐ 255 ܘܩܲܠܝܼܠܵܐܝܼܬܼ ܛܥ̣ܵܐܘܼܗܝ ܠܢܝܼܫܵܐ ܕܚܵܘܝܼ ܐܸܢܘܿܢ ܀ 256 :ܕܠܵܐ ܒܨܸܒܼܝܵܢܗܘܿܢ ܐܲܦܢܝܼ ܐܸܢܘܿܢ ܡ̣ܢ ܨܹܝܕܼ ܛܘܼܥܝܲܝ 257 ܘܲܒܼܨܸܒܼܝܵܢܗܘܿܢ ܫܵܛ̣ܘ ܦܘܼܩܕܵܢܹ̈ܐ ܕܦܲܩܸܕܼ ܐܸܢܘܿܢ ܀ 258 :ܚܘܿܒܵܐ ܘܫܲܝܢܵܐ ܐܲܠܸܦ ܐܸܢܘܿܢ ܠܡܸܛܲܪ ܨܹܐܕܼܵܘܗܝ 259 ܘܐܲܝܟ ܕܲܠܛܲܒܼܥܵܐ ܐܲܪܡܝܼ ܐܸܢܘܿܢ ܥܲܠ ܪ̈ܓܼܫܲܝܗܘܿܢ ܀ 260 :ܒܗܵܠܹܝܢ ܐܸܡ݂ܲܪ ܕܢܸܕܲܥ ܥܵܠܡܵܐ ܕܬܲܠܡܝܼܕܲܝ̈ ܐ̄ܢܬܿܘܿܢ 261 ܒܚܘܼܒܵܐ ܘܫܲܝܢܵܐ ܕܲܡܚܵܘܿܝܬܿܘܿܬ ܚܲܕܼ ܨܹܝܕܼ ܚܲܒܼܪܹܗ ܀ 262 :ܢܸܒܼܥܸܐ ܡ̇ܕܹܝܢ ܐܸܢ ܐܝܼܬܼ ܗܵܠܹܝܢ ܒܕܼܵܪܲܢ ܥܲܣܩܵܐ 263 ܘܢܸܚܙܸܐ ܨܹܝܕܼ ܡܲܢ ܩܲܝܵܡ ܢܝܼܫܵܐ ܕܚܘܼܒܵܐ ܘܫܲܝܢܵܐ ܀ 264 :ܒܥܹܕܿܬܵܐ ܢܸܒܼܓܹܝܗ̇ ܠܗܵܕܹܐ ܒܥܵܬܵܐ ܕܚܘܼܒܵܐ ܘܫܲܝܢܵܐ 265 ܐܲܝܟܵܐ ܕܝܲܗ̣̄ܒܵܗ̇ ܗܵܘ̇ ܡܲܠܦܵܢܵܐ ܕܫܲܦܝܼܪ݁ܵܬܼܵܐ ܀ 266 :ܡ̣ܢ ܒܲܝܬܵܝܹ̈ܐ ܢܹܐܠܲܦ ܢܝܼܫܵܐ ܕܡ̇ܪܹܐ ܒܲܝܬܵܐ 267 ܕܗܸܢܘ̣ܿܢ ܝܵ̇ܕܼܥܝܼܢ ܠܡܸܚܢܵܐ ܫܲܦܝܼܪ ܠܫܲܦܝܼܪ̈ܵܬܼܵܐ ܀ 268 :ܓܠܵܝ ܠܲܢ ܥܹܕܿܬܵܐ ܠܐ̄ܪ̈ܵܙܹܐ ܕܝܼܠܸܦܬܿܝ ܡ̣ܢ ܡ̇ܟܼܘܿܪܹܟܼܝ 269 ܕܢܸܠܸܦ ܐܸܢܘܿܢ ܠܲܕܼܒܼܵܥܹ̇ܝܢ ܠܲܢ ܒܥܵܬܼܵܐ ܕܲܥܒܠܲܝܟܿܝܼ ܀ 270 :ܡܟܼܝܼܪܲܬܼ ܡܲܠܟܵܐ ܕܡܲܟܼܪܵܗ̇ ܡܲܠܟܵܐ ܒܕܸܒܼܚܵܐ ܕܦܲܓܼܪܹܗ 271 ܦܲܫܸܩܝ ܠܲܒܼܢܲܝ̈ܟܿܝ ܬܸܡܘܲܝ ܕܲܗܘ̤ܵܬܼ ܒܲܡܟܼܝܼܪܘܼܬܹܟܼܝ ܀ 272 :ܛܥ݂ܲܝܬܿܝ ܠܹܟܼܝ ܟܲܠܬܼܵܐ ܩܝܵܡܵܐ ܕܐܲܩܝܼܡܬܿܝ ܥܲܡ ܡ̇ܟܼܘܿܪܟܼܝ 273 ܘܕܲܓܸܿܠܬܿܝ ܐܸܢܘܿܢ ܠܕܵܫܢܹ̈ܐ ܕܪܘܼܚܵܐ ܕܝܲܗ̣̄ܒܼ ܠܹܟܼܝ ܒܚܘܼܒܹܿܗ ܀ 274 :ܒܕܼܵܫܢܹ̈ܐ ܫܒܼܝܼ̈ܚܹܐ ܘܚܲܝܠܹ̈ܐ ܕܚܝܼܠܹ̈ܐ ܝܲܩܪܹܟܼܝ ܡܲܠܟܵܐ 275 ܐܲܝܟܵܐ ܐܸܢܘܿܢ ܚܵܘܵܝ ܡܸܕܹܿܡ ܕܐܲܩܝܼܡ ܨܹܐܕܲܝܟܿܝ ܀ 276 :ܐܲܝܟܵܐ ܗ̄ܝܼ ܐܸܣܛܠܵܐ ܕܲܙܩܲܪ ܝܲܗ̣̄ܒܼ ܠܹܟܼܝ ܡ̣ܢ ܓܵܘܡܲܝܵ̈ܐ 277 ܐܸܨܛܲܐܝܲܬ̤ ܠܵܗ̇ ܒܨܵܐܬܼܵܐ ܣܢܝܼܬܼܵܐ ܕܲܫܟܼܝܼܪ݁ܵܬܹܟܼܝ ܀ pb. 348 278 :ܐܲܝܟܵܘ ܛܲܒܼܥܵܐ ܕܪܘܼܚ ܓܸܠܝܵܢܵܐ ܕܣܵܡ̣ ܠܹܟܼܝ ܒܐܝܼܕܲܝܟܿܝ̈ 279 ܢܦ݂ܲܠ ܠܹܗ ܘܐܸܒܲܕܼ ܠܵܘ ܡ̣ܢ ܕܲܪܓܹܗ ܐܸܠܵܐ ܡܸܢܹܟܼܝ ܀ 280 :ܐܲܝܟܵܘ ܬܵܓܼܵܐ ܘܫܘܼܠܛܵܢ ܪܵܘܡ̇ܐ ܕܡܲܓܼܥܲܠ ܗ̄ܘ̣ܵܐ ܠܹܟܼܝ 281 ܠܲܝܬܵܘܗܝ ܨܸܐܕܲܝܟܿܝ ܒܲܕܼܠܵܐ ܩܵܘܝܼܬܿܝܼ ܒܚܘܼܒܵܐ ܨܹܐܕܼܵܘܗܝ ܀ 282 :ܡܲܢ ܒܲܙ ܥܘܼܬܼܪܹܟܼܝ ܩܲܢܝܲܬܼ ܥܘܼܬܼܪܵܐ ܐܲܠܵܗܵܝܵܐ 283 ܚܲܫܹ̈ܐ ܠܙܝܼܙܹ̈ܐ ܘܫܹ̈ܐܕܹܐ ܛܪ̈ܘܼܢܹܐ ܐܘܿܗ ܡ̇ܢ ܓܲܕܼܫܹܟܼܝ ܀ 284 :ܚܲܫܹ̈ܐ ܘܫܹܐܕܹ̈ܐ ܒܲܙܘܼܗܝ ܠܓܲܙܵܐ ܕܲܒܼܢܲܝ̈ ܥܹܕܿܬܵܐ 285 ܘܗܥܵܐ ܡܸܬܼܟܲܪܟܿܝܼܢ ܐܲܝܟ ܚܵܕܼܘܿܪܹ݁ܐ ܠܡܸܫܐܲܠ ܙܸܕܼܩܵܐ ܀ 286 :ܐܲܝܟ ܓܲܝܵܣܹ̈ܐ ܥܲܠ̣ܘ ܚܲܫܲܝ̈ܗܘܿܢ ܠܪܸ݁ܥܝܵܢܲܝܗܘܿܢ 287 ܘܚܲܠܸܨܘ ܐܸܢܘܿܢ ܘܠܵܐ ܢܵܕܼܘ ܘܐܲܪܓܸܿܫܘ ܒܬܲܚܠܘܼܨܲܝ̈ܗܘܿܢ ܀ 288 :ܒܫܸܢܬܼܵܐ ܕܥܵܘ̣ܠܵܐ ܛܒܲܥ̣ܘ ܙܵܘܥܲܝ̈ܗܘܿܢ ܥܲܡ ܪܸ̈ܓܼܫܲܝܗܘܿܢ 289 ܘܐܸܒܲܕܼܘ ܡܸܢܗܘܿܢ ܚܘܿܒܵܐ ܘܣܲܒܼܪܵܐ ܘܗܲܝܡܵܢܘܼܬܼܵܐ ܀ 290 :ܬܠܵܬܼܵܐ ܐܵܕܼܫܹ̈ܐ ܩܢܹܝܢ ܗ̄ܘ̣ܵܘ ܒܐܲܪܥܵܐ ܕܒܹܝܬܼ ܡܲܥܡܲܪܗܘܿܢ 291 ܘܐܵܘܒܸܿܕܼܘ ܐܸܢܘܿܢ ܒܠܵܐ ܝܼܕܲܥܬܼܵܐ ܕܣܘܼܥܪ̈ܵܢܲܝܗܘܿܢ ܀ 292 :ܠܲܝܬܿ ܕܲܡܗܲܝܡܸܢ ܠܲܝܬܿ ܕܲܡܣܲܒܲܪ ܐܵܦܠܵܐ ܕܡܲܚܸܒܼ 293 ܘܐܸܢ ܗܵܠܹܝܢ ܠܲܝܬܿ ܐܲܒܿܝܼܕܼ ܡܸܢܲܢ ܣܲܒܼܪܹܗ ܕܓܸܢܣܲܢ ܀ 294 :ܒܗܲܝܡܵܢܘܼܬܼܵܐ ܘܣܲܒܼܪܵܐ ܘܚܘܼܒܵܐ ܚܝܵܬ̤ ܡܝܼܬܼܘܼܬܲܢ 295 ܘܐܲܝܟܲܢ ܢܸܚܸܐ ܟܲܕܼ ܪܲܚܝܼܩܝܼܢ ܚܲܝܲܝ̈ܢ ܡܸܢܲܢ ܀ 296 ܠܵܐ ܫܲܘܝܘܼܬܼܵܐ ܚ̣ܙܵܘ ܡܲܚܝܵܢܲܝ̈ܢ ܘܲܥܪܲܩܘ ܡܸܢܲܢ ܀ 297 ܘܦܵܫ̣ܘ ܒܲܪܢܵܫܲܢ ܐܲܝܟ ܒܲܪܢܵܫܵܐ ܕܠܲܝܬܿ ܒܹܗ ܢܲܦܫܵܐ ܀ 298 :ܕܠܵܐ ܚܲܝܘܼܬܼܵܐ ܕܗܲܝܡܵܢܘܼܬܼܵܐ ܚܵܐܹ̇ܝܢ ܐ̄ܢܵܫܵܐ 299 ܘܒܸܠܥܵܕܼ ܣܲܒܼܪܵܐ ܘܚܘܼܒܵܐ ܪܵܕܹܝܢ ܒܣܘܼܥܪ̈ܵܢܲܝܗܘܿܢ ܀ 300 :ܢܸܟܼܠܵܐ ܕܠܸܒܿܗܘܿܢ ܣܲܕܼܩܹܗ ܠܢܲܚܬܵܐ ܕܗܲܝܡܵܢܘܼܬܼܵܐ 301 ܘܩܵܡ̣ܘ ܐܲܝܟ ܐܵܕܼܵܡ ܥܲܪܛܸܠܵܐܝܼܬܼ ܕܠܵܐ ܬܲܟܼܣܝܼܬܼܵܐ ܀ 302 :ܥܲܪܛܸܠ ܩܵܝ̇ܡܝܼܢ ܝܲܠ̈ܕܹܿܝܗ̇ ܕܥܹܕܿܬܵܐ ܕܠܵܐ ܢܲܟܼܦܘܼܬܼܵܐ 303 ܘܡܲܗܠܝܼܢ ܫܹܐܕܹ̈ܐ ܐܲܝܟ ܡ̇ܐ ܕܐܲܗܸܠܘ ܒܐܵܕܼܵܡ ܒܲܥܕܹܢ ܀ 304 :ܓܘܼܚܟܵܐ ܪܲܒܵܐ ܗܘ̤ܵܬܼ ܡܲܫܪܝܼܬܼܵܐ ܕܓܸܢܣܹܗ ܕܐܵܕܼܵܡ 305 ܘܗܵܢ̇ܘ ܓܘܼܚܟܵܐ ܕܒܼܵܬܲܪ ܚܲܝܲܝ̈ܢ ܡܝܼܬܼܢ ܒܲܚܛܝܼܬܼܵܐ ܀ 306 :ܚܛܝܼܬܼܵܐ ܘܡ̇ܘܬܵܐ ܠܒܼܝܼܟܼܝܼܢ ܗ̄ܘ̣ܵܘ ܠܲܢ ܐܲܝܟ ܡܸܫܟܵܢܵܐ 307 ܘܩܵܡ̣ ܚܲܕܼ ܡܸܢܲܢ ܘܡܲܫܟܸܿܢ ܦܲܓܼܪܹܗ ܘܚܲܪܲܪ ܦܲܓܼܪܲܢ ܀ 308 :ܒܲܡܠܸܐ ܙܲܒܼܢܵܐ ܡܲܫܟܸܿܢ ܦܲܓܼܪܹܗ ܠܵܘ ܟܠ ܟܠܹܗ 309 ܬܠܵܬܼܵܐ ܝܵܘܡܝܼ̈ܢ ܩܵܘܝܼ ܒܡܵܘܬܵܐ ܘܲܚ̣ܵܐ ܘܐܲܚܝܼ ܀ 310 :ܬܠܵܬܼܵܐ ܝܵܘܡܝܼ̈ܢ ܦܣ݂ܲܩ ܠܹܗ ܕܢܸܗܘ̤ܐ ܒܡܸܫܟܵܢܘܼܬܼܵܐ 311 ܘܲܦܢ̣ܵܐ ܘܢܲܣܒ̣ܵܗ̇ ܠܡܸܫܟܵܢܘܼܬܼܵܐ ܕܟܼܠܹܗ ܓܸܢܣܹܗ ܀ 312 ܒܢܘܼܚܵܡ ܦܲܓܼܪܹܗ ܢܲܚܸܡ ܦܲܓܼܪܹ̈ܐ ܕܲܟܼܢܵܘܵܬܹ̈ܐ: pb. 349 313 ܘܫܵܘܬܸܿܦ ܐܸܢܘܿܢ ܒܛܵܒܼܬܼܵܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 314 :ܚܲܝܘܼܬܼ ܚܲܝܹ̈ܐ ܚܠ݂ܲܛ ܒܲܟܼܝܵܢܲܢ ܡܠܸܐ ܡܝܼܬܼܘܼܬܼܵܐ 315 ܘܲܪܦܲܬܼܘ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܒܡܵܝܘܿܬܼܘܼܬܲܢ ܀ 316 :ܒܗܵܠܹܝܢ ܚܲܝܹ̈ܐ ܚܝܵܬ̤ ܐ̄ܢܵܫܘܼܬܲܢ ܒܒܲܪ ܐ̄ܢܵܫܘܼܬܲܢ 317 ܘܗ̣ܦܟܲܬ̤ ܡܝܼܬܲܬ̤ ܒܐ̄ܢܵܫܵܝܵܬܼܵܐ ܐܲܝܟ ܕܲܒܼܩܲܕܼܡ̇ܐ ܀ 318 :ܡ̇ܘܬܵܐ ܥܦܝܼܦܵܐ ܡܝܼܬܼܘ ܡ̇ܝܘܿܬܹ̈ܐ ܒܗܵܢܵܐ ܙܲܒܼܢܵܐ 319 ܚܲܕܼ ܕܲܟܼܝܵܢܵܐ ܘܚܲܕܼ ܕܲܚܛܝܼܬܼܵܐ ܘܵܝܵܐ ܥܦܝܼܦܵܐ ܀ 320 :ܒܦܲܓܼܪܵܐ ܘܢܲܦܫܵܐ ܡ̇ܝ̇ܬܿܝܼܢ ܡܝܼܬܹ̈ܐ ܕܲܒܼܝ̈ܘܡ̇ܬܲܢ 321 ܘܠܲܝܬܿ ܕܲܒܼܛܝܼܠ ܠܹܗ ܥܲܠ ܢܘܼܚܵܡܵܐ ܕܒܲܬܼܘܵܬܼ ܢܲܦܫܵܐ ܀ 322 :ܬܘܵܬܼܵܐ ܕܢܲܦܫܵܐ ܡܢܲܚܡܵܐ ܠܦܲܓܼܪܹ݁ܐ ܘܲܠܗܲܕܵܡܹ̈ܐ 323 ܘܫܲܠܝܵܐ ܢܲܦܫܵܐ ܘܠܵܐ ܡܸܬܿܬܵܘܝܵܐ ܥܲܠ ܣܘܼܥܪ̈ܵܢܹܝܗ̇ ܀ 324 :ܘܵܝܠܹܟܼܝ ܢܲܦܫܵܐ ܘܝܲܬܿܝܼܪ ܘܵܝܠܹܟܼܝ ܢܲܦܫܵܐ ܕܟܼܵܗܢܹ̈ܐ 325 ܕܠܵܐ ܡܸܬܿܬܿܥܝܼܪܲܬܿܝ ܠܲܡܪܲܚܵܡܘܼ ܥܲܠ ܒܢܲܝ̈ ܓܸܢܣܹܟܼܝ ܀ 326 :ܟܵܗܢܹ̈ܐ ܢܼܬܿܠܘܼܢ ܕܝܼܢܵܐ ܥܦܝܼܦܵܐ ܕܗܵܠܹܝܢ ܡ̇ܘ̈ܬܹܿܐ 327 ܕܐܸܠܘܼ ܩܵܘܝܼܘ ܒܗܲܝܡܵܢܘܼܬܼܵܐ ܚܲܝ ܗ̄ܘ̣ܵܐ ܟܠܢܵܫ ܀ 328 :ܗܸܢܘ̣ܿܢ ܫܠܚ̣ܘܼܗ̇ ܠܗܲܝܡܵܢܘܼܬܼܵܐ ܢܵܚܬܵܐ ܪܓܼܝܼܓܼܵܐ 329 ܘܕܲܚܙ̣ܵܘ ܫܹܐܕܹ̈ܐ ܪܗܸܛܘ ܨܹܝܕܼ ܟܠܢܵܫ ܕܲܢܫܲܠܚܘܼܢܵܝܗܝ ܀ 330 :ܗܸܢܘܿܢ ܣܲܕܼܩܘܼܗܝ ܠܚܘܼܒܵܐ ܫܲܘܝܵܐ ܒܠܵܐ ܫܲܘܝܘܼܬܼܗܘܿܢ 331 ܘܗܸܢܘ̣ܿܢ ܦܲܣܩ̣ܘܼܗ̇ ܠܐܘܼܪܚܵܐ ܕܫܲܝܢܵܐ ܒܡܲܐܝܼܢܘܼܬܼܗܘܿܢ ܀ 332 :ܡܸܢܗܘܿܢ ܢܸܒܼܥܲܬ̤ ܡ̇ܝܘܿܬܼܘܼܬܼܵܐ ܒܚܲܝܘܼܬܼ ܚܲܝܲܝ̈ܢ 333 ܒܕܼܣܥ̇ܘ ܘܐܸܡܲܪܘ ܕܝܵܗܹ̇ܒܼ ܚܲܝܹ̈ܐ ܡܝܼܬܼ ܒܲܙܩܝܼܦܵܐ ܀ 334 :ܠܗܵܝ̇ ܚܲܝܘܼܬܼܵܐܕܝܸܗܒܲܬ̤ ܚܲܝܹ̈ܐ ܠܗܵܘ̇ ܕܐܲܚܝ̣ ܠܲܢ 335 ܡܡܝܼܬܼܝܼܢ ܟܵܗܢܹ̈ܐ ܒܓܼܘܼܕܵܦܲܝ̈ܗܘܿܢ ܕܲܕܼܠܵܐ ܢܵܡܘܿܣ ܀ 336 :ܗܵܢ ܓܘܼܕܵܦܵܐ ܕܲܠܚܵܗ̇ ܠܐܲܪܥܵܐ ܘܲܠܥܵܡܘܿܪܹ̈ܝܗ̇ 337 ܘܗܵܐ ܙܩܝܼܦ ܟܠܢܵܫ ܥܲܠ ܡܲܢ ܕܐܸܡܲܪ ܕܚܲܝܵܐ ܠܵܐ ܡܝܼܬܼ ܀ 338 :ܡ̇ܘܬܵܐ ܥܦܝܼܦܵܐ ܡܡܝܼܬܼ ܠܲܟܼܢܵܬܹܗ ܡܡܝܼܬܼ ܠܐܲܠܵܗܵܐ 339 ܐܸܢ ܠܵܐ ܡ̇ܘܕܹܿܐ ܐܲܝܟ ܬܵܘܕܿܝܼܬܼܵܐ ܕܗܲܦܟܵܝܘܼܬܹܗ ܀ 340 :ܐܵܪܵܐ ܣܲܟܼܠܵܐ ܐܲܝܟܵܐ ܚܙ̣ܵܐ ܠܵܟ ܐܝܼܬܼܝܵܐ ܕܡ̇ܐܹ̇ܬܼ 341 ܘܡܲܢ̣ܘܼ ܐܲܠܦܵܟ ܕܬܸܩܛܘܿܠ ܚܲܒܼܪܵܟ ܕܠܵܐ ܩܵܛܹ̇ܠ ܠܵܟ ܀ 342 :ܩܛܝܼܠ ܒܲܚܛܵܗܵܘ̈ܗܝ ܠܡܵܢ ܩܵܛܹ̇ܠ ܐܲܢ̄ܬܿ ܠܲܕܼܠܵܐ ܡ̇ܐܹܬܼ 343 ܫܢܝܵܐ ܒܚܘܼܬܼܪܵܐ ܠܡܵܢ ܡܸܫܬܿܢܹܝܬܿ ܠܡܸܚܪܲܒܼ ܚܲܒܼܪ̈ܲܝܟ ܀ 344 :ܚܲܪܒܵܐ ܕܣܲܟܼܠܹ̈ܐ ܪ̈ܵܕܼܦܲܝ ܫܲܝܢܵܐ ܫܸܠܛܲܬ̤ ܒܐܲܪܥܵܐ 345 ܘܗܵܐ ܚܵܪܒܵܐ ܠܹܗ ܠܥܵܠܡܵܐ ܒܣܲܝܦܵܐ ܕܡ̇ܝܘܿܬܼܘܼܬܼܵܐ ܀ 346 :ܣܲܝܦܵܐ ܕܚܲܫܹ̈ܐ ܛܥܝܼܢ ܡܲܚܫܵܢܵܐ ܒܪܹܫ ܠܸܫܵܢܹܗ 347 ܘܚܵܪܹܒܼ ܣܸܕܼܪܹ̈ܐ ܕܠܵܐ ܫܵܠ̇ܡܝܼܢ ܠܹܗ ܒܚܵܫܘܿܫܘܼܬܼܵܐ ܀ 348 ܩܪܵܒܼܵܐ ܚܲܕܼܬܼܵܐ ܕܚܵܫܘܿܫܘܼܬܼܵܐ ܦܓܲܠ ܒܝܼ ܗܵܫܵܐ: pb. 350 349 ܘܗܵܐ ܡܓܲܪܸܓܼ ܠܝܼ ܕܐܸܫܕܹܿܐ ܡܸܠܲܝ̈ ܒܲܡܥܲܬܿܕܼܵܢܵܘ̈ܗܝ ܀ 350 :ܡܸܠܹ̈ܐ ܪܓܼܝܼܓܼ ܐ̄ܢܵܐ ܕܐܸܫܕܹܿܐ ܒܣܸܪܹ̈ܐ ܕܲܡܥܲܬܿܕܵܢܵܘ̈ܗܝ 351 ܕܛܵܟ ܢܸܬܼܒܲܕܿܪܘܼܢ ܡ̣ܢ ܐܵܘܝܘܼܬܼܵܐ ܕܚܵܫܘܿܫܘܿܬܼܵܐ ܀ 352 :ܗܝ̤ ܟܬܼܝܼܫܘܼܬܼܗܘܿܢ ܠܵܐ ܫܵܒܼܩܵܐ ܠܝܼ ܕܐܲܗܡܸܐ ܡܸܢܗܘܿܢ 353 ܘܗ̤ܝ ܥܵܨ̇ܝܵܐ ܠܝܼ ܕܐܸܚܠܘܿܛ ܫܸܡܗܘܿܢ ܒܟܼܠܗܘܿܢ ܫܲܪ̈ܒܲܝ ܀ 354 :ܒܫܲܪܒܵܐ ܕܚܲܫܹ̈ܐ ܕܚܵܫܘܿܫܘܼܬܲܢ ܚܸܙܩܲܬ̤ ܡܸܠܲܬܼܝ 355 ܫܸܡܥܹ̇̄ܬܼ ܚܲܫܵܐ ܘܚܸܠܛܹ̇ܬܼ ܫܲܪܒܹܿܗ ܒܫܲܪܒܵܐ ܕܚܲܫܲܝ̈ܢ ܀ 356 :ܒܚܲܫܲܝ̈ܢ ܚܸܫܹ̇ܬܼ ܘܪܲܟܿܒܹܬܼ ܡܸܠܹ̈ܐ ܕܡܲܠ̈ܝܵܢ ܚܲܫܹ̈ܐ 357 ܘܲܦܓܲܥ ܠܹܗ ܒܝܼ ܫܲܪܒܵܐ ܕܚܲܫܵܐ ܕܪܲܒܿ ܡ̣ܢ ܚܲܫܹ̈ܐ ܀ 358 :ܒܝܼܫܹ̈ܐ ܢܲܬܼܦܲܢܝ ܚܲܫܵܐ ܪܲܒܵܐ ܕܥܲܠ ܥܵܒܼܘܿܕܼܵܐ 359 ܘܫܸܒܼܩܹ̇ܬܼ ܕܐܸܬܼܢܸܐ ܚܲܫܝ̈ ܢܲܦܲܫܲܢ ܘܬܸܡܗܹܬܼ ܠܝܼ ܒܹܗ ܀ 360 :ܬܸܡܗܵܐ ܐܲܚܕܲܢܝ ܥܲܠ ܗܵܢ ܚܲܫܵܐ ܕܒܲܐܠܵܗܘܼܬܼܵܐ 361 ܘܲܙܥܲܪ̣ ܠܹܗ ܒܝܼ ܪܸܢܝܵܐ ܕܚܲܫܲܝ̈ܢ ܒܦܸܚܡܵܐ ܕܝܼܠܹܗ ܀ 362 :ܟܒܲܪ ܕܹܝܢ ܥܝܵܪܬܹܿܗ ܕܗܵܢܵܐ ܚܲܫܵܐ ܡܸܬܿܬܲܒܼܥܝܼܢܲܢ 363 ܥܲܠ ܗܵܝ̇ ܬܲܩܝܼܦ ܩܪܵܒܼܵܐ ܕܥܲܡܲܡ ܡ̣ܢ ܟܠ ܙܲܒܼܢܝܼ̈ܢ ܀ 364 :ܟܒܲܪ ܗܘ̤ ܨܲܥܪܵܐ ܕܚܵܫܘܿܫܘܼܬܼܵܐ ܕܛܵܫܘ ܒܐܝܼܬܼܘܼܬܼܵܐ 365 ܗܘ̤ ܡܣܲܪܗܸܒܼ ܠܹܗ ܠܟܲܦܢܵܐ ܘܫܸܒܼܝܵܐ ܥܲܠ ܢܲܦܫܵܬܲܢ ܀ 366 :ܟܒܲܪ ܓܘܼܕܵܦܵܐ ܕܛܵܠܘܿܡܘܼܬܼܵܐ ܕܦܲܓܼܪܵܐ ܕܡܸܢܲܢ 367 :ܡܥܝܼܪ ܟܘܼܪ̈ܗܵܢܹܐ ܘܡܲܒܲܥ ܟܹܐܒܹ̈ܐ ܥܲܠ ܗܲܕܵܡܲܝܼ̈ܢ 368 :ܟܒܲܪ ܡܘܼܙܵܓܼܵܐ ܕܥܵܛܹ̇ܐ ܟܝܵܢܹ̈ܐ ܚܲܕܼ ܒܲܐ̄ܚܪܹܢܵܐ 369 ܗܘ̤ ܥܵܒܹ̇ܕܼ ܠܹܗ ܠܫܘܼܚܠܵܦ ܙܲܒܼܢܹ̈ܐ ܕܠܵܐ ܢܸܬܿܛܲܟܲܣ ܀ 370 :ܟܒܲܪ ܨܘܿܚ̈ܝܵܬܼܵܐ ܕܨܲܚܝܼܘ ܣܲܟܼܠܹ̈ܐ ܠܝܵܕܼܥܲܝ̈ ܩܘܼܫܬܵܐ 371 ܗܸܢܹܝܢ ܐܸܢܹܝܢ ܕܲܡ̈ܢܲܕܿܕܼܵܢ ܠܲܢ ܒܟܼܠ ܐܸܣܟܹܿܡܝܼ̈ܢ ܀ 372 :ܕܡ̇ܐ ܙܲܟܵܝܵܐ ܕܐܸܫܲܕܼܘ ܥܲܛܠܹ̈ܐ ܡܲܪܲܚܵܐܝܼܬܼ 373 ܗܘ̤ ܡܚܲܦܸܛ ܠܹܗ ܠܡܵܘܬܵܐ ܕܢܸܒܲܪ ܩܲܠܝܼܠܵܐܝܼܬܼ ܀ 374 :ܛܢܵܢܵܐ ܣܲܟܼܠܵܐ ܕܛܲܢ̣ܘ ܗܸܕܼܝܘܿܛܹ̈ܐ ܒܣܲܟܿܘܼܠܬܼܵܢܹ̈ܐ 375 ܗܘ̤ ܡܥܝܪܼ ܪܘܼܓܼܙܵܐ ܘܡܲܒܲܥ ܚܸܡܬܼܵܐ ܘܡܲܝܬܸܿܐ ܩܲܡܨܵܐ ܀ 376 :ܗܵܐܠܹܝܢ ܕܲܠܚܵܝ̈ܗܘܿܢ ܠܫܲܝܢܵܐ ܠܪܲܓܿܝܼܙܘܼܬܲܢ 377 ܘܗܵܐ ܫܓܼܝܼܫ ܥܵܠܡܵܐ ܒܲܕܼܡܘܼܬܼܝܲܡܵܐ ܒܝܲܕܼ ܡܲܚܫܘܼܠܹ̈ܐ ܀ 378 :ܚܲܫܹ̈ܐ ܩܫܲܝܵ̈ܐ ܢܵܩ̇ܫܝܼܢ ܠܐܸܠܦܵܐ ܕܡ̇ܝܘܿܬܼܘܼܬܲܢ 379 ܘܠܲܝܬܿ ܡܲܠܵܚܵܐ ܕܝܵ̇ܕܲܥ ܦܘܼܪ̈ܣܹܐ ܕܲܠܡܹܐܝܢ ܫܲܝܢܵܐ ܀ 380 :ܒܒܹܝܬܼ ܡܲܚܫܘܼܠܹ̈ܐ ܕܠܵܐ ܝܼܕܲܥܬܼܵܐ ܩܵܐܹ̇ܡ ܓܸܢܣܲܢ 381 ܘܠܲܝܬ ܒܹܗ ܒܓܸܢܣܲܢ ܩܹܘܒܲܪܢܹܝܛܵܐ ܡܫܲܠܸܐ ܪܘܼܓܼܙܵܐ ܀ 382 :ܠܲܝܬܿ ܕܲܡܫܲܝܸܢ ܪܘܼܓܼܙܵܐ ܕܚܲܫܹ̈ܐ ܕܠܘܼܩܒܲܠ ܐ̄ܢܵܫܵܐ 383 ܘܠܲܝܬܿ ܕܲܡܪܲܟܸܿܟ ܟܹܐܒܼܵܐ ܩܲܫܝܵܐ ܕܚܸܡܬܼܵܐ ܩܫܝܼܬܼܵܐ ܀ 384 :ܒܚܸܡܬܼܵܐ ܩܫܝܼܬܼܵܐ ܠܚܝܼܡܝܼܢ ܐ̄ܢܵܫܵܐ ܠܲܒܼܢܲܝ̈ܢܵܫܵܐ 385 ܘܗܵܘ̇ ܡܸܫܬܲܒܲܚ ܕܝܵ̇ܕܲܥ ܦܘܼܪ̈ܣܹܐ ܠܡܸܓܼܡܲܪ ܪܘܼܓܼܙܹܗ ܀ pb. 351 386 :ܒܢܸܟܼܠܵܐ ܢܵܨ̇ܚܝܼܢ ܐܵܦ ܡܸܬܼܩܲܠܣܝܼܢ ܢܲܟܿܘܼܠܬܼܵܢܹ̈ܐ 387 ܘܕܲܨܢܝܼܥ ܣܲܓܿܝܼ ܡܝܲܩܲܪ ܣܲܓܿܝܼ ܒܹܝܬܼ ܟܲܕܵܒܹ̈ܿܐ ܀ 388 :ܙܹܐܦܵܐ ܡܲܨܠܲܚ ܛܵܒܼ ܡ̣ܢ ܩܘܼܫܬܵܐ ܒܙܲܒܼܢܲܢ ܒܝܼܫܵܐ 389 ܘܟܲܕܵܒܼܘܼܬܼܵܐ ܪܚܝܼܡܵܐ ܝܲܬܿܝܼܪ ܡ̣ܢ ܟܹܐܢܘܼܬܼܵܐ ܀ 390 :ܠܲܝܬܿ ܟܹܐܢܘܼܬܼܵܐ ܘܠܵܐ ܟܠ ܟܠܹܗ ܘܠܵܐ ܒܚܲܕܼ ܬܸܓܼܡܵܐ 391 ܕܐܵܦ ܫܲܪܝܼܪܹ̈ܐ ܠܵܐ ܫܲܪܝܼܪܝܼܢ ܠܦܘܼܬܼ ܕܲܣܒܼܝܼܪܝܼܢ ܀ 392 :ܫܸܓܼܡܵܐ ܕܵܒܲܪ ܠܟܼܠܗܘܿܢ ܬܸܓܼܡܹ̈ܐ ܛܵܒܹ̈ܐ ܘܒܼܝܼܫܹ̈ܐ 393 ܐܵܦ ܗ̤ܝ ܛܵܒܼܬܼܵܐ ܡܙܝܼܓܼܵܐ ܗ̄ܝ ܒܝܼܫܬܵܐ ܥܲܡ ܛܵܒܼܘܼܬܼܵܗ̇ ܀ 394 :ܠܲܝܬܿ ܒܲܫܪܵܪܵܐ ܫܪܵܪܵܐ ܕܲܕܟܸܐ ܡ̣ܢ ܟܘܼ̈ܬܼܡ̇ܬܼܵܐ 395 ܟܲܕܼ ܠܲܝܬܼܿ ܐ̄ܢܵܫܵܐ ܕܠܵܘ ܒܲܪ ܐ̄ܢܵܫܵܐ ܗ̄ܘ̣ ܘܚܲܫܵܘ̈ܗܝ ܥܲܡܹܗ ܀ 396 :ܒܚܲܫܹ̈ܐ ܡܟܲܬܿܡ ܟܠܹܗ ܓܸܢܣܵܐ ܐܵܕܼܵܡ̇ܝܵܐ 397 ܘܐܲܝܢܵܘ ܐܵܕܼܵܡ ܕܠܵܘ ܐܲܕܿܡܬܼܵܐ ܗ̄ܘ̣ ܪܘܼܕܵܒܼ ܦܲܓܼܪܹܗ ܀ 398 :ܚܲܕܼ ܗ̄ܘ̣ ܐܵܕܼܵܡ ܕܠܵܐ ܐܸܬܼܟܲܬܲܡ ܒܐܵܕܼܵܡ̇ܬܹ̈ܗ 399 ܗܵܘ̇ ܕܲܫܓܼܝܼܫܝܼܢ ܣܲܟܼܠܹ̈ܐ ܒܫܲܪܒܵܐ ܕܦܲܓܼܪܵܢܘܼܬܹܗ ܀ 400 :ܚܲܕܼ ܗ̄ܘ̣ ܕܚܲܣܢܹ̣ܗ ܠܩܹܐܪܣܵܐ ܩܲܫܝܵܐ ܕܚܵܫܘܿܫܘܼܬܼܵܐ 401 ܗܵܘ̇ ܕܲܒܼܚܲܫܹܗ ܡܲܚܝܼܢ ܥܲܛܠܹ̈ܐ ܠܠܵܐ ܚܵܫܘܿܫܵܐ ܀ 402 :ܚܲܕܼ ܗ̄ܘ̣ ܕܲܙܟܼܵܐ ܘܣܵܗܹ̇ܕܼ ܦܘܼܡܹܗ ܕܗܘ̤ܝܘܼ ܕܲܙܟܼܵܐ 403 ܡ̇ܕܹܝܢ ܓܼܠܝܵܐ ܗ̄ܝܼ ܕܠܲܝܬܿ ܙܲܟܝܵܐ ܐܸܠܵܐ ܐܸܢ ܚܲܕܼ ܀ 404 :ܠܲܝܬܿ ܙܲܟܸܝܵܐ ܘܝܲܬܼܝܼܪܵܐܝܼܬܼ ܒܗܵܢܵܐ ܙܲܒܼܢܵܐ 405 ܕܙܲܒܿܢܵܗ̇ ܟܠܢܵܫ ܠܫܲܪܝܼܪܘܼܬܼܵܐ ܒܡܲܣܲܒ ܒܐܲܦܹ̈ܐ ܀ 406 :ܒܡܲܣܲܒܼ ܒܐܲܦܹ̈ܐ ܩܵܐܹ̇ܡ ܟܠܢܵܫ ܒܐܲܦܲܝ̈ ܚܲܒܼܪܹܗ 407 ܘܐܲܝܟ ܛܼܠܵܠܵܐ ܥܸܵܒܼܪ̈ܵܢ ܥܵܒܼܪ̈ܵܢ ܡܸܠܹ̈ܐ ܕܠܵܐ ܣܘܼܥܪ̈ܵܢܹܐ ܀ 408 :ܡܸܠܹ̈ܐ ܡܙ̇ܘܸܕܼ ܪܵܚܡܵܐ ܠܪܵܚܡܹܗ ܘܚܲܒܼܪܵܐ ܠܚܲܒܼܪܹܗ 409 ܫܠܵܡ ܠܝܼ ܫܠܵܡ ܠܵܟ ܘܠܲܝܬܿ ܣܘܼܥܪܵܢܵܐ ܕܐܝܼܬܼ ܒܹܗ ܫܠܵܡܵܐ ܀ 410 :ܒܦܘܼܡ̇ܐ ܒܲܚܚܘܿܕܼ ܡܫܲܠܸܡ ܦܘܼܡ̇ܐ ܠܦܘܼܡ̇ܐ ܟܢܵܬܹܗ 411 ܘܗܵܘܢܵܐ ܠܵܐ ܪܓܼܝܼܫ ܕܐܸܡܲܬܼܝ ܫܲܠܸܡ ܦܘܼܡ̇ܐ ܠܦܘܼܡ̇ܐ ܀ 412 :ܗܵܟܲܢ ܐܝܼܬܼܵܘܗܝ ܚܘܼܒܵܐ ܒܕܼܵܪܲܢ ܢܲܟܿܘܼܠܬܼܵܢܵܐ 413 ܘܲܢܟܼܝܼܠܵܐܝܼܬܼ ܫܵܪܹܐ ܘܚܵܙܹ̇ܩ ܒܟܼܠ ܣܘܼܥܪ݁ܵܢܝܼܢ ܀ 414 :ܒܗܵܕܹܐ ܐܵܬ̇ܐ ܕܨܵܪܲܬ̤ ܡܸܠܲܬܼܝ ܨܹܝܕܼ ܕܘܼܒܵܪܲܢ 415 ܘܛܵܟ ܠܵܐ ܣܸܦܩܲܬ̤ ܠܲܡܕܲܡ̇ܘ ܕܘܼܡܝܵܐ ܠܕܼܘܼܡܝܵܐ ܀ 416 :ܠܲܝܬܿ ܨܲܝܵܪܵܐ ܕܣܵܦܹ̇ܩ ܕܲܢܨܘܼܪ ܕܘܼܡܝܹܗ ܕܥܵܘ̣ܠܲܢ 417 ܒܲܕܼܣܲܓܿܝܼ̈ܐܵܢ ܙܢܲܝ̈ ܒܝܼܫܵܬܹ̈ܗ ܡ̣ܢ ܣܲܡܡܵܢܵܘ̈ܗܝ ܀ 418 :ܠܵܐ ܡܸܬܼܡܲܢ̈ܝܵܢ ܐܘܼ ܡ̇ܢ̈ܘܵܬܼܵܐ ܕܲܫܟܼܝܼܪ̈ܵܬܲܢ 419 ܒܲܕܼܠܲܝܬܿ ܣܵܦܪܵܐ ܕܢܹܐܚܘܿܕܼ ܣܵܟܼܗܹܝܢ ܒܓܼܵܘ ܨܸܒܼܥܵܬܹ̈ܗ ܀ 420 :ܒܨܝܼܪܵܐ ܐܝܼܕܼܵܐ ܕܬܹܐܚܘܿܕܼ ܩܸܫܬܹܿܗ ܕܕܼܵܪܲܢ ܒܝܼܫܵܐ 421 ܘܲܡܚܝܼܠ ܦܘܼܡ̇ܐ ܕܢܸܬܼܢܸܐ ܡܸܠܹ̈ܐ ܕܟܲܕܵܒܼܘܼܬܹܗ ܀ 422 ܟܲܕܵܒܼܘܼܬܼܵܐ ܡܲܠ݁̈ܝܵܢ ܡܸܠܹ̈ܐ ܕܠܵܐ ܣܘܼܥܪ̈ܵܢܝܼܢ: pb. 352 423 ܘܲܕܼܠܵܐ ܡܟܲܕܸܿܒܼ ܠܵܐ ܡܸܬܼܐܲܫܪܵܐ ܟܲܕܵܒܼܘܼܬܹܗ ܀ 424 :ܚܣܵܡܵܐ ܘܚܘܼܪܵܐ ܠܒܼܝܼܫܝܼܢ ܢܘܼܡܹܐ ܕܟܼܠ ܐܲܬܼܪ̈ܵܘܵܢ 425 ܘܠܲܝܬܿ ܣܘܼܥܪܵܢܵܐ ܕܠܵܐ ܒܹܗ ܐܸܢܘܿܢ ܘܗܘ̤ ܨܹܐܕܲܝܗܘܿܢ ܀ 426 :ܚܲܪܡ̇ܢܵܐ ܚܵܙ̇ܩܝܼܢ ܘܫܵܪܹܝܢ ܒܣܘܼܥܪ݁ܵܢܲܝܗܘܿܢ 427 ܘܐܲܝܟ ܨܸܒܼܝܵܢܗܘܿܢ ܨܵܒܹ̇ܝܢ ܕܲܢܩܘܼܡ ܥܵܠܡܵܐ ܘܥܲܡܠܹܐ ܀ 428 :ܒܚܘܼܬܼܪܵܐ ܣܵܥܲ݁ܪ ܚܬܝܼܪ ܪܸܥܝܵܢܵܐ ܐܲܝܕܵܐ ܕܣܵܥ̇ܲܪ 429 ܘܚܵܣܘܿܡܘܼܬܼܵܐ ܡܠܸܐ ܚܲܣܵܡܵܐ ܠܘܼܩܒܲܠ ܟܠܢܵܫ ܀ 430 :ܬܪܹܝܢ ܐܲܪ̈ܝܵܘܵܢ ܒܲܥܪܝܼܪ݁ܵܝܹܐ ܫܪܹܝܢ ܥܲܡ ܐ̄ܢܵܫܵܐ 431 ܘܠܵܐ ܐ̄ܢܵܫ ܝܵ̇ܕܲܥ ܕܲܢܚܘܼܪ ܫܲܦܝܼܪ ܒܣܘܼܪ̈ܚܵܢܲܝܗܘܿܢ ܀ 432 :ܚܒܼܵܠܵܐ ܪܲܒܵܐ ܥܒ݂ܲܕܼܘ ܒܲܒܼܪܝܼܬܼܵܐ ܘܬܼܘܼܒܼ ܥܵܒܼ̇ܕܿܝܼܢ ܒܵܗ̇ 433 ܘܠܲܝܬܿ ܕܡܸܬܼܒܲܝܲܢ ܘܪܵܢܹ̇ܐ ܘܚܵܐܹ̇ܫ ܥܲܠ ܚܘܼܒܵܠܗܘܿܢ ܀ 434 :ܒܲܥܪܝܼܪܵܐܝܼܬܼ ܢܵܗ̇ܡܝܼܢ ܟܠܢܵܫ ܒܚܘܼܒܵܠܲܝ̈ܗܘܿܢ 435 ܘܙܵܝܥ̇ܝܼܬ ܘܢܵܝ̇ܕܲܝܼܢ ܒܲܝܢܵܬܼ ܐ̄ܢܵܫܵܐ ܐܲܝܟ ܚܲܝ̈ܘܵܬܼܵܐ ܀ 436 :ܠܵܐ ܚܝܼܠ ܩܵܠܵܐ ܕܐܲܪ̈ܝܵܘܵܬܼܵܐ ܥܲܠ ܚܲܝ̈ܘܵܬܼܵܐ 437 ܐܲܝܟ ܕܲܕܚܝܼܠܝܼܢ ܚܣܵܡܵܐ ܘܚܘܼܬܼܪܵܐ ܥܲܠ ܐ̄ܢܵܫܵܘܼܬܼܵܐ ܀ 438 :ܠܵܐ ܣܲܓܸܿܦܬܼܵܗ̇ ܚܲܝܘܲܬܼ ܫܸܢܵܐ ܠܚܲܝܘܲܬܼ ܫܸܢܵܐ 439 ܐܲܝܟ ܣܘܼܓܼܦܵܢܹ̈ܐ ܕܣܲܓܸܿܦܘ ܐ̄ܢܵܫܵܐ ܠܲܒܼܢܲܝ̈ܢܵܫܵܐ ܀ 440 :ܠܵܐ ܐܸܬܼܢܲܟܲܝܲܬ̤ ܬܘܼܒܼ ܦܵܪܲܚܬܼܵܐ ܡ̣ܢ ܦܵܪܲܚܬܼܵܐ 441 ܐܲܝܟ ܢܸܟܼܝܵܢܵܐ ܕܐܲܟܿܝܼܘ ܪ̈ܵܚܡܹܐ ܠܚܒܿܝܼܒܲܝ̈ܗܘܿܢ ܀ 442 :ܡܝܲܬܲܪ ܫܲܝܢܵܐ ܕܠܵܐ ܡܲܠܵܠܹ̈ܐ ܡ̣ܢ ܕܲܡܠܝܼܠܹ̈ܐ 443 ܘܲܢܛܝܼܪ ܚܘܼܒܵܐ ܒܲܟܼܝܵܢܲܝ̈ܗܘܿܢ ܛܵܒܼ ܡ̣ܢ ܨܹܐܕܲܝܢ ܀ 444 :ܒܸܕܼܝܵܐ ܡܲܠܝܵܐ ܡܸܠܬܼܵܐ ܕܐܸܡ̇ܪܹܬܼ ܐܸܢ ܫܲܪܝܼܪܵܐ 445 ܕܲܒܼܫܲܬܼܿܝܼܩܹ̈ܐ ܩܲܝܵܡ ܚܘܼܒܵܐ ܘܒܲܢ ܠܵܐ ܐܝܼܬܼܵܘܗܝ ܀ 446 :ܘܬܼܘܼܒܼ ܢܸܬܼܒܲܝܲܢ ܒܡܸܠܬܼܵܐ ܕܲܥܠܲܝܢ ܘܐܵܦܸܢ ܗܵܫܵܐ 447 ܘܢܲܥܸܠ ܚܲܫܹ̈ܐ ܥܲܠ ܣܘܼܥܪ݁ܵܢܹܐ ܕܚܵܫܘܿܫܘܼܬܲܢ ܀ 448 :ܒܚܲܫܵܐ ܢܸܒܼܣܘܿܪ ܠܚܲܫܲܝ̈ ܢܲܦܫܲܢ ܘܡܘܿܡܲܝ̈ ܦܲܓܼܪܲܢ 449 ܘܛ̇ܟ ܢܸܬܼܐܲܣܸܐ ܡ̣ܢ ܚܵܘ̈ܒܵܬܼܵܐ ܕܦܲܓܼܪܵܐ ܘܢܲܦܫܑܵܐ ܀ 450 :ܒܟܹܐܢܘܼ ܢܹܐܡܲܪ ܕܝܼܢܵܐ ܟܹܐܢܵܐ ܥܲܡ ܪܸܥܝܵܢܲܢ 451 ܕܸܟܼܒܲܪ ܢܸܓܼܗܸܐ ܡ̣ܢ ܗܵܘ̇ ܕܝܼܢܵܐ ܕܠܵܐ ܫܘܼܠܵܡܵܐ ܀ 452 :ܕܝܼܢܵܐ ܕܢܲܦܫܲܢ ܟܬܼܝܼܒܼ ܕܲܡܒܲܛܸܠ ܕܝܼܢܵܐ ܕܲܥܬܼܝܼܕܼ 453 ܡ̇ܕܹܝܢ ܝܲܨܪܲܢ ܠܒܼܝܼܟ ܒܹܝܬܼ ܕܝܼܢܵܐ ܕܲܬܼܢܵܢ ܘܕܲܠܗܲܠ ܀ 454 :ܬܵܐ ܒܲܪܢܵܫܵܐ ܡܲܠܟܵܐ ܕܐܲܚܝܼܕܼ ܬܪܹܝܢ ܒܹܝܬܼ ܕܝܼܢܹ̈ܐ 455 ܫܪܝܼ ܣܘܼܥܪ̈ܵܢܲܝܟ ܘܚܲܪܲܪ ܢܲܦܫܵܟ ܡ̣ܢ ܥܸܕܼܠܵܝܵܐ ܀ 456 :ܒܕܼܝܼܢܵܐ ܕܲܢܼܢܵܢ ܚܲܝܸܒܼ ܐܲܢ̄ܬܿ ܠܵܟ ܐܲܝܟ ܨܼܒܼܝܵܢܵܟ 457 ܕܠܵܐ ܬܸܬܼܚܲܝܲܒܼ ܒܕܼܝܼܢܵܐ ܕܠܲܝܬܿ ܒܹܗ ܨܸܒܼܝܵܢ ܢܲܦܫܵܟ ܀