Narsai: On John 1:14 - ܥܲܠ ܗ̇ܝ ܕܡܸܠܬܼܵܐ ܒܸܣܪܵܐ ܗܘ̤ܵܐ ܘܐܲܓܸܢ ܒܲܢ

1 :ܐܘܪܚܵܐ ܚܲܕܬܵܐ ܕܪܲܫܲܬ̤ ܠܲܢ 2 ܡܸܠܬܼܵܐ ܕܐܲܟܼܬܸܒܼ ܝܘܿܚܲܢܵܢ. 3 :ܘܲܪܕܵܐ ܒܵܗ̇ ܗܘ̤ ܩܲܕܡܵܝܲܬ 4 ܘܲܗܘ̤ܵܐ ܠܟܼܠܲܢ ܗܲܕܝܼܵܐܐ. 5 :ܕܪܲܫ ܐܘܼܪܚܵܐ ܨܝܕ ܐܝܼܬܘܼܬܼܵܐ 6 ܘܚܵܘܝܼ ܕܲܚܕܵܐ ܗ̄ܝ̣ ܫܲܘܝܘܼܬܼܵܐ. 7 :ܕܐܲܒܼܵܐ ܘܝܲܠܕܹܗ ܚܲܕ ܐܸܢܘܿܢ 8 ܘܠܲܝܬ ܙܒܼܢܵܐ ܒܹܝܬܼ ܠܹܗ ܠܝܲܠܘܹܗ. 9 :ܗܘ̤ܬ ܒܲܪܬ ܩܵܠܹܗ ܐܲܝܟ ܪܲܥܡܵܐ 10 ܘܐܲܙܥܸܩ ܒܐܲܪ̈ܒܲܠܦܸܢܝܵܬܼܵܐ. 11 :ܘܫܲܦܝܼܪ ܟܲܢܝܹܗ ܒܲܪ ܪܲܥܡܵܐ 12 ܕܐܲܟܼܪܸܙ ܡܸܠܬ̇ܐ ܕܒܸܪܵܫܝܼܬ. 13 :ܫܡܲܥܘ ܥܲܡܡܹ̈ܐ ܘܨܘܼܬܼܘ ܐܸܡ̈ܘܬܼܵܐ 14 ܣܒܲܪܬܵܐ ܚܲܕܬܵܐ ܕܡܲܟܼܪܸܙ ܐ̄ܢܵܐ. 15 :ܐܲܒܼܵܐ ܕܐܵܘܠܸܕ ܡ̣ܢ ܥܘܼܒܹܗ 16 ܒܪܵܐ ܕܠܵܐ ܛܠܹܐ ܡ̣ܢ ܝܵܠܘܿܕܹܗ. 17 :ܒܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ 18 ܘܐܝܼܬܼܵܘܗܝ ܗ̄ܘ̣ܵܐ ܠܘܵܬܼ ܐܲܠܵܗܵܐ. 19 :ܘܗܘ̤ ܡܸܠܬܼܵܐ ܐܲܠܵܗܵܐ ܗ̄ܘ̣ܵܐ 20 ܒܲܩܢܘܿܡܵܐ ܘܲܒܫܘܼܠܛܵܢܵܐ. 21 :ܐܘ ܐ̄ܪܵܙܵܐ ܕܡܟܣܲܝ ܗ̄ܘ̣ܵܐ 22 ܡ̣ܢ ܕܵܪܹ̈ܐ ܘܡ̣ܢ ܫܲܪܒܵܬ̇ܐ. 23 :ܘܒܲܪ ܪܲܥܡܵܐ ܒܲܕܸܩ ܘܲܓܼܠܵܝܗܝ 24 ܠܥܸܠܝܹ̈ܐ ܘܠܲܬܿܚܬܵܝܹ̈ܐ. 25 :ܐܘ ܝܘܿܚܲܢ̇ܢ ܟܵܪܘܿܙܵܐ 26 ܓܸܢܣ݂ܹܗ ܕܐܵܕܼܵܡ ܬܚܵܘܒܹܿܐ.܆ 27 ܕܝܲܗܒ̣ ܠܹܗ ܩܠܝܼ̈ܕܹܐ ܪܘܼܚ ܩܘܼܕܫܵܐ. 28 :ܘܲܦܬܲܚ ܓܲܙܵܐ ܕܐܝܼܬܼܘܼܬܼܵܐ 29 ܣܠܸܩ ܘܡܲܛܵܐ ܠܪܵܘܡܵܐ ܕܪ̈ܵܘܡܹܐ. 30 ܠܥܸܠ ܡ̣ܢ ܟܸܢ̈ܫܹܐ ܕܪ̈ܘܼܚܵܢܹܐ. 31 ܘܩܲܪܒܹܗ ܚܲܝܠܵܐ ܕܛܲܝܒܘܼܬܼܵܐ: ܕܲܢܡܲܠܸܠ ܥܲܠ ܐܝܼܬܘܼܬܵܐ. 32 :ܩܲܒܸܠ ܚܲܝܠܵܐ ܘܫܘܼܠܛܵܢܵܐ 33 ܘܐܲܟܼܪܸܙ ܡܸܠܬܼܵܐ ܕܲܒܼܪܵܫܝܼܬ. 34 :ܕܲܒܼܪܵܐ ܒܪܵܫܝܼܬ ܐܝܼܬܼܵܘܗܝ ܗ̄ܘ̣ܵܐ 35 ܡܬܘܡܵܐܝܼܬܼ ܥܲܡ ܝܵܠܘܿܕܹܗ. 36 :ܐܝܼܬܵܘܝܗ ܡܸܡܬܘܿܡ ܥܲܡ ܐܲܒܼܘܗܝ 37 ܐܲܝܟ ܨܡܸܚܵܐ ܥܲܡܹܗ ܕܫܸܡܫܵܐ. 38 :ܕܠܵܐ ܩܲܕܝܼܡ ܫܸܡܫܵܐ ܠܨܡܚܹܗ 39 ܘܠܵܐ ܫܸܡܫܵܐ ܠܵܗ̇ ܠܐܸܣܦܹܝܪܵܗ̇. 40 :ܨܡܚܹܗ ܕܫܸܡܫܵܐ ܥܲܡܹܗ ܗ̄ܘ̣ܵܐ 41 :ܥܲܡ ܐܲܒܼܵܐ ܐܝܼܬܼܵܘܗܝ ܝܲܠܕܹܗ 42 ܘܠܲܝܬ ܙܲܒܼܢܼܵܐ ܕܲܦ̣ܪܝܲܫ ܡܸܢܹܗ. 43 :ܐܲܒܼܵܐ ܩܢܘܿܡܵܐ ܗ̄ܘ̣ ܫܪܲܝܪܼܵܐ 44 ܘܒܼܪܵܐ ܩܢܘܿܡܵܐ ܕܐܲܟܼܘܵܬܹܗ. 45 :ܘܟܲܕ ܡܸܬܼܟܲܢܹܐ ܠܹܗ ܐܲܒܼܵܐ 46 ܠܲܝܬ ܙܲܒܼܫܵܐ ܒܹܝܬܼ ܠܹܗ ܠܝܲܠܕܹܗ. 47 :ܟܝܵܢܵܐ ܗ̄ܘ̣ ܕܐܝܼܵܬܼܘܗܝ ܡ̣ܢ ܥܵܠܲܡ 48 ܘܠܲܝܬ ܫܘܼܪܵܝܵܐ ܠܐܝܼܬܘܼܬܹܗ. 49 :ܘܠܵܐ ܐܲܒܼܵܐ ܫܲܪܝܼ ܕܢܸܗܘܹܐ 50 ܘܠܵܐ ܒܪܵܐ ܐܝܼܬܼ ܙܲܒܼܢܵܐ ܠܝܲܠܕܹܗ. 51 :ܐܲܒܼܵܐ ܐܝܼܬܝܵܐ ܡܬܘܿܡܵܝܵܐ 52 ܕܠܲܝܬ ܙܲܒܼܪܵܐ ܕܠܵܐ ܐܲܒܼܵܐ ܗ̄ܘ̣ܵܐ. 53 :ܘܲܒܼܪܼܵܐ ܓܡܝܼܪܵܐ ܕܠܵܐ ܚܲܣܝܼܪ 54 :ܕܠܲܝܬܿ ܙܲܒܼܢܵܐ ܕܠܵܘ ܚܼܝܼܕܵܐ ܗ̄ܘ̣ 55 :ܪܲܚܝܼܩ ܐܝܼܬܝܵܐ ܡ̣ܢ ܙܲܒܼܢܹ̈ܐ 56 ܘܙܲܒܼܢܹ̈ܐ ܘܥܠܡܹ̈ܐ ܠܓܼܵܘ ܡܸܢܹܗ. 57 :ܘܐܲܝܟܵܢ ܡܨܝܵܐ ܕܢܸܣܬܲܝܲܟ 58 ܐܝܼܬܝܵܐ ܒܲܙܒܼ̈ܢܹܐ ܥܵܒܼܘܿܕܹ̈ܐ. 59 :ܘܲܟܼܡܵܐ ܕܢܸܒܼܥܹܐ ܚܘܼܫܵܒܼܵܐ 60 ܠܗܠ ܡ̣ܢ ܙܒܼ̈ܫܹܐ ܡܸܫܟܲܚ ܠܹܗ. 61 :ܘܠܵܐ ܫܲܪܝܼ ܐܲܒܼܵܐ ܒܝܲܠܕܹܗ 62 ܘܠܵܐ ܙܲܒܼܢܵܐ ܠܝܲܠܕܹܗ ܕܐܲܒܼܵܐ. 63 :ܡܸܠܬܹܗ ܟܲܢܝܹܗ ܝܘܿܚܲܢܵܢ 64 ܕܐܝܼܬܵܘܗܝ ܡܸܡܬܘܿܡ ܥܲܡ ܐܲܒܘܼܗܝ. 65 :ܘܒܲܕܡܘܼܬ ܡܸܠܬܼܵܐ ܥܲܡ ܢܦܲܫܵܐ 66 ܕܡܸܢܵܗ̇ ܗ̣ܝ ܘܥܲܡܵܗ̇ ܐܝܼܬܼܝܗ̇. 67 :ܐܝܼܬܼܵܘܗܝ ܗ̄ܘ̣ܵܐ ܒܪܵܐ ܥܲܡ ܐܲܒܼܘܼܗܝ 68 ܘܐܸܬܼܵܐܐ ܠܥܵܠܡܵܐܘܲܥܡܹܗ ܗ̄ܘ̣ܵܐ. 69 ܠܵܐ ܚܸܙܩܲܬ̤ ܡܸܠܬܼܵܐ ܡܸܡܬܘܿܡ. 70 ܡ̣ܢ ܢܲܦܫܵܐ ܘܫܲܢܝܲܬ̤ ܡܸܢܵܗ̇. 71 :ܘܠܵܐ ܒܪܵܐ ܚܙܲܩ ܡ̣ܢ ܝܵܠܘܿܕܹܗ 72 ܘܐܲܪܚܸܩ ܡܸܢܹܗ ܒܫܘܢܵܝܵܐ. 73 :ܚܵܙܩܵܐ ܡܸܠܬܼܵܐ ܠܟܼܠ ܦܸܢ̈ܝܵܢ 74 ܘܠܵܐ ܡܫܢܝܵܐ ܡ̣ܢ ܨܝܕ ܢܲܦܫܵܐ. 75 :ܘܟܲܕ ܐܝܼܬܹܝܗ̇ ܒܐܝܼܙܓܲܕܘܼܬܵܐ 76 ܐܝܼܬܹܝܗ̇ ܒܢ̣ܦܫܵܐ ܟܲܕ ܐܝܼܬܹܝܗ̇. 77 :ܚܙܲܩ ܐܵܦ ܡܸܠܵܬܐ ܡ̣ܢ ܐܲܒܼܵܐ 78 ܘܐܸܬܼܵܐ ܠܥܘܼܡܪܲܢ ܡܵܝܘܵܬܼܵܐ. 79 ܘܟܲܕ ܒܲܟܼܝܵܢܲܢ ܥܵܡܲܪ ܗ̄ܘ̣ܵܐ: pb. f.340v 80 ܟܠܹܗ ܒܲܐܒܼܘܼܗܝ ܐܝܼܬܼܵܘܗܝ ܗ̄ܘ̣ܵܐ. 81 :ܠܵܐ ܡܸܬܼܚܲܙܝܵܐ ܓܲܠܝܵܐܝܼܬܼ 82 ܡܸܛܠܬܐ ܕܐܝܼܬܼܝܗ̇ ܡ̣ܢ ܢܲܦܫܵܐ. 83 :ܘܡܵܐ ܕܐܸܬܪܵܫܡܲܬ̤ ܒܲܕ ܝܘܼܬܼܵܐ 84 ܡܸܬܼܚܲܙܝܵܐ ܒܝܲܕ ܐܬܘ̈ܬܐ. 85 :ܘܟܲܕ ܛܵܒܼ ܚܲܒܼܫܵܗ̇ ܒܐܬܘ̈ܬܐ 86 ܘܣܲܝܟܵܗ̇ ܒܢܲܚ̈ܬܹܐ ܕܲܕܝܘܼܬܼܵܐ. 87 :ܒܐܬ̈ܘܬܵܐ ܒܲܫܡܵܐ ܐܝܼܬܹܝܗ̇ 88 ܘܟܼܠܵܗ̇ ܫܪܝܵܐ ܒܓܼܵܘ ܢܲܦܫܵܐ. 89 :ܕܝܘܵܬܐ ܚܲܙ̈ܝܵܢ ܒܵܫܲܬ̈ܐ 90 ܟܲܕ ܡܸܬܼܒܲܩܝܵ̈ܢ ܒܲܐܬܘ̈ܬܐ. 91 :ܘܡܸܠܬܐ ܟܝܵܢܵܗ̇ ܠܐ ܝܸܗܒܲܬ̤ 92 ܕܬܣܐܲܝܟ ܡ̣ܢ ܒܵܒܼܵܬܐ. 93 :ܟܣܹܐ ܗ̄ܘ̣ܵܐ ܒܪܐ ܥܲܡ ܝܵܠܘܿܕܹܗ 94 ܡ̣ܢ ܥܸܠܬܼܵܐ ܘܬܲܚ̈ܬܹܝ̈ܐ. 95 :ܘܐܸܬܼܚܵܘܝܼ ܠܲܢ ܒܨܒܼܝܢܹܗ 96 ܒܕܝܘܬܵܐ ܕܦܲܓܼܪܹܗ ܕܐܵܕܼܵܡ. 97 :ܘܟܲܕ ܠܒܸܫ ܢܲܚܬܐ ܕܲܟܼܝܵܢܲܢ 98 ܐܸܬܥܛܲܦ ܒܐܠܗܘܼܬܹܗ. 99 :ܨܒܼܝܵܢܹܗ ܫܪܵܐ ܒܲܟܼܝܵܢܲܢ 100 ܘܩܵܘܝܼ ܟܝܵܢܹܗ ܒܟܲܣܝܘܼܬܹܗ. 101 :ܠܵܐ ܣܲܝܟܹܗ ܦܲܓܼܪܵܐ ܕܲܠܒܸܫ 102 ܠܲܟܼܝܵܢܹܗ ܕܠܵܐ ܡܸܣܬܲܝܟ. 103 :ܘܠܵܐ ܚܙܵܬܵܗ̇ ܥܲܝܢܵܐ ܕܒܸܣܪܵܐ 104 ܠܟܲܣܝܘܼܬܼܵܐ ܕܐܲܠܵܗܘܼܬܹܗ. 105 :ܒܐܝܕܹܗ ܐܡܪ ܝܘܿܚܲܢܵܢ 106 ܕܐܸܬܬܩܲܢ ܟܠ ܡܵܐ ܕܲܗܘ̤ܵܐ. 107 :ܘܠܵܐ ܗ̄ܘ̣ܵܐ ܡܸܕܸܡ ܒܸܠܵܥܵܕܵܘܗܝ 108 ܕܗ̤ܘ ܨܒܼܵܐ ܘܛܲܟܸܣ ܟܠ ܕܲܗܘ̤ܵܐ. 109 :ܢܸܒܼܥܵܐ ܗ̄ܘ̣ ܕܲܡܠܹܐ ܚܲܝܘܼܬܼܵܐ 110 ܕܩܢܐ ܚܲܝܹ̈ܐ ܒܲܕܝܵܢܗ. 111 :ܘܡ̣ܢ ܚܲܝܘܼܬܵܐ ܕܒܼܟܼܝܵܢܹܗ 112 ܦܲܠܸܓ ܚܲܝܹ̈ܐ ܠܬܘܼܩܵܢܵܘ̈ܗܝ. 113 :ܚܲܝܹ̈ܐ ܢܘܼܗܪܵܐ ܐܝܼܬܲܗܘܿܢ 114 ܕܪܵܕܦܝܼܢ ܚܸܫܟܵܐ ܡ̣ܢ ܢܘܼܗܪܵܐ. 115 :ܘܚܸܫܟܵܐ ܕܛܘܼܥܝܲܝ ܠܵܐ ܐܲܕܪܸܟ 116 ܕܲܢܥܵܘܸܟ ܪܲܗܛܹܗ ܕܢܘܼܗܪܵܐ. 117 :ܒܥܵܠܡܵܐ ܡܸܡܬܘܿܡ ܐܝܼܬܼܵܘܗܝ ܗ̄ܘ̣ܵܐ 118 ܘܥܵܠܡܵܐ ܠܐܝܼܕܼܵܘ̈ܗܝ ܐܸܬܿܬܲܩܲܢ. 119 :ܘܟܲܕ ܥܵܠܡܵܐ ܕܝܼܠܹܗ ܐܝܼܬܼܵܘܗܝ 120 ܠܵܐ ܨܒܼܵܐ ܥܵܠܡܵܐ ܕܢܵܘܕܹܐ ܒܹܗ. 121 :ܠܕܝܼܠܹܗ ܐܸܬܼܵܐ ܒܵܪܘܿܝܵܐ 122 ܘܕܝܼܠܹܗ ܠܵܐ ܩܲܒܸܠܘ ܡܸܠܬܹܗ. 123 :ܘܐܲܝܠܹܝܢ ܕܲܫܡ݂ܲܥܘ ܦܘܼܩܕܵܢܵܘ̈ܗܝ 124 ܩܢܵܘ ܫܘܼܠܛܢܵܐ ܕܲܒܼܢ̈ܝܵܐ. 125 :ܒܢܲܝ̈ܐ ܕܝܼܠܹܗ ܟܲܢܝܼ ܠܲܢ 126 ܒܪ̈ܲܚܡܹܐ ܕܚܵܘܝܼ ܨܝܕ ܓܸܢܣܲܢ. 127 :ܕܐܵܘܠܸܕ ܠܲܢ ܪܘܼܚܵܢܵܐܝܼܬ 128 ܒܲܥܡܵܕ̇ܐ ܕܡܲܝ̈ܐ ܘܪܘܼܚܵܐ. 129 :ܨܒܼܝܵܢܹܗ ܛܵܒܼܵܐ ܚܵܘܼܝܢ 130 ܕܲܝܲܩܪܲܢ ܒܲܫܡܵܐ ܕܲܒܼܢܲܝܵ̈ܐ. 131 :ܘܫܲܪܪܹܗ ܠܲܫܡܵܐ ܕܲܒܼܪܘܼܬܼܵܐ 132 ܕܲܓܼܒܼܵܐ ܠܹܗ ܥܡܘܼܪܝܵܐ ܒܲܒܼܢܵܘ̈ܗܝ. 133 :ܡܠܸܬܐ ܐܸܡ݂ܲܪ ܝܘܿܚܲܢܵܢ 134 ܕܗܘ̤ܵܐ ܒܸܣܪܵܬܐ ܘܐܲܓܸܿܢ ܒܲܢ. 135 :ܘܲܚܙܲܝܢ ܫܘܼܒܚܵܐ ܕܪܲܒܘܼܬܹܗ 136 ܒܐܦܲܝ̈ ܬܲܪܥܵܐ ܕܐ̄ܢܵܫܘܼܬܼܵܐ. 137 :ܗܘ̤ܵܐ ܠܲܢ ܒܸܣܪܵܐ ܘܲܥܡܲܪ ܒܲܢ 138 ܘܚܵܝܘܝܼ ܠܲܢ ܫܘܼܒܼܚܹܗ ܟܲܣܝܵܐ. 139 :ܘܟܲܕ ܗܘ̤ ܟܲܣܝܵܐ ܗ̄ܘ̣ ܒܲܟܼܝܵܢܗ 140 ܒܝܲܕ ܦܓܪܲܢ ܚܵܘܝܼ ܫܘܼܒܼܚܹܗ. 141 :ܠܵܘ ܠܲܗܘܵܝܵܐ ܐܸܬܬܲܚܬܼܝ 142 ܒܗܝ̇ ܕܐܸܡܪ ܕܲܗܘ̤ܵܐ ܒܸܣܪܵܐ. 143 :ܐܸܠܵܐ ܪܲܟܸܒ ܠܹܗ ܒܸܣܪܵܐ 144 ܘܲܥܡܲܪ ܒܹܗ ܒܝܲܕ ܨܒܼܝܵܢܹܗ. 145 :ܠܵܐ ܓܹܝܪ ܡܨܝܵܐ ܕܵܒܪܘܿܝܵܐ 146 ܠܲܗܘܵܝܵܐ ܚܲܕ ܬܵܐ ܢܸܐܬܹܐ. 147 :ܘܠܵܐ ܠܐܝܼܬܘܼܬܼܵܐ ܕܠܵܐ ܫܘܪܲܝ 148 ܡܬܚܡ ܠܵܗ̇ ܙܒܼܢܵܐ ܕܝܲܠܕܵܐ. 149 :ܐܸܢ ܕܹܝܢ ܡܸܡܬܘܿܡ ܐܝܼܬܵܘܗܝ ܗ̄ܘ̣ܵܐ 150 ܐܲܝܟܵܢ ܐܸܬܼܵܐ ܠܲܗܵܘܝܵܐ. 151 :ܘܐܸܢ ܗܘ̤ ܕܐܸܬܼܵܐ ܠܲܗܘܵܝܵܐ 152 ܪܲܚܝܼܩ ܡ̣ܢ ܗ̇ܝ ܕܐܝܼܬܵܘܗܝ ܗ̄ܘ̣ܵܐ. 153 :ܠܲܝܬ ܫܘܕܵܝܵܐ ܘܫܘܼܠܵܡܵܐ 154 ܠܐܝܼܬܘܼܬܼܵܐ ܕܐܝܼܬܹܝܗ̇ ܡܸܡܬܘܿܡ. 155 :ܘܡܸܕܡ ܕܐܵܬܹܐ ܠܲܗܘܵܝܵܐ 156 ܗܵܘܝܹܗ ܩܲܕܝܼܡ ܠܲܟܼܝܵܢܹܗ. 157 :ܐܸܢܗܘ̤ ܕܐܝܼܬܝܵܐ ܗ̄ܘ̣ ܥܲܡ ܐܲܒܼܵܐ 158 ܠܵܐ ܡܸܣܬܲܝܲܟ ܒܲܟܿܝܵܢܹܗ. 159 :ܘܐܸܢ ܣܝܟ ܢܲܦܫܗ ܒܟܲܪܣܵܐ 160 :ܠܵܘ ܐܝܼܬܝܵܐ ܗ̄ܘ̣ ܥܲܡ ܝܵܠܘܿܕܹܗ 161 :ܐܸܢܗܘ̤ ܕܲܒܼܟܼܠܕܘܼܟ ܐܝܼܬܵܘܗܝ 162 :ܘܐܸܬܼܵܐ ܗܵܫܵܐ ܠܲܗܘܵܝܵܐ 163 :ܐܲܝܟܵܢ ܩܲܒܸܠ ܬܘܼܩܵܢܵܐ 164 ܡܢܵܬܼܵܐ ܡܸܢܹܗ ܐܘ ܟܠܹܗ. 165 :ܐܸܢܗܘ̤ ܕܟܼܠܹܗ ܐܸܣܬܲܝܲܟ 166 ܠܵܐ ܩܢܹܐ ܗ̇ܝ ܕܠܵܐ ܡܸܣܬܲܝܲܟ. 167 ܘܐܸܢ ܒܲܡܢܵܬܼܵܐ ܐܸܣܬܲܝܲܟ: pb. f.341r 168 :ܘܐܸܢܗܘ̤ ܕܐܝܼܬ ܠܹܗ ܕܢܸܣܬܲܝܲܟ 169 ܐܘ ܟܠܹܗ ܐܘ ܒܲܡܵܢܵܬܐ. 170 :ܐܵܦ ܐܲܒܼܵܐ ܡܸܣܬܲܝܵܟܵܢܵܐ ܗ̄ܘ̣ 171 ܕܡܸܢܹܗ ܗ̄ܘ̣ ܟܝܵܢܵܐ ܕܲܒܼܪܸܐ. 172 :ܐܲܝܟܵܢ ܒܐܲܒܼܘܼܗܝ ܐܝܼܬܼܵܘܗܝ ܗ̄ܘ̣ܵܐ 173 ܘܥܵܡ̇ܪ ܗ̄ܘ̣ܵܐ ܒܟܲܪܣܵܐ ܕܒܸܣܪܵܐ. 174 :ܗܵܕܹܐ ܗ̣̄ܝ ܒܠܵܬܼܵܐ ܕܡܸܬܼܒܲܥܝܵܐ 175 ܕܲܥܡܘܪ̈ܝܐ ܕܐܲܝܟܵܢ ܩܲܒܸܠ. 176 :ܘܐܸܢܗܘ̤ ܕܐܵܡܪܝܼܢ ܚܸܪ̈ܚܵܝܹܐ 177 ܕܐܝܼܬܵܘܗܝ ܗ̄ܘ̣ܵܐ ܒܟܲܪܣܵܐ ܘܵܪܘܡܵܐ. 178 :ܕܫܲܠܝܼܛ ܗ̄ܘ̣ ܢܦܲܠܸܓ̣ ܝܵܬܹܗ 179 ܕܢܸܗܘܹܐ ܒܪܵܘܡܵܐ ܘܲܒܼܥܘܼܫܩܵܐ. 180 :ܡܵܕܹܝܢ ܩܲܕܝܼܡ ܨܒܼܝܵܢܹܗ 181 ܠܲܟܼܝܵܢܹܗ ܕܐܝܼܬܼܵܘܗܝ ܡܸܡܬܘܿܡ. 182 :ܕܗܵܐ ܨܒܼܝܵܢܹܗ ܡܫܲܠܒܸܕ ܠܹܗ 183 ܘܲܡܣܲܝܸܟ ܠܹܗ ܠܲܟܼܝܵܢܹܗ. 184 :ܘܐܸܢܗܘ̤ ܕܫܠܝܼܛ ܨܒܼܝܵܢܹܗ 185 ܕܢܥܕܐ ܘܲܢܙܲܟܹܐ ܠܲܟܝܵܢܹܗ. 186 :ܡܵܕܹܝܢ ܟܠܫܵܥ ܡܸܫܬܲܚܠܲܦ 187 ܐܲܝܟ ܡܵܐ ܕܨܵܒܹܐ ܨܒܼܝܵܢܹܗ. 188 :ܘܐܸܢ ܨܒܵܝܼܵܢܹܗ ܡܕܲܒܲܪ ܠܹܗ 189 ܠܲܟܼܝܵܢܹܗ ܐܲܝܟ ܡܵܐ ܕܨܵܒܹܐ. 190 :ܐܲܝܟܵܐ ܗ̄ܝ̣ ܡܵܕܹܝܢ ܐܝܼܬܘܼܬܼܵܐ 191 ܕܩ̣ܢܵܐ ܟܝܵܢܹܗ ܡܬܘܿܡܵܐܝܼܬ. 192 :ܬܹܐܙܲܠ ܗܵܕܐ ܡܲܪܫܘܼܬܼܵܐ 193 ܒܵܬܲܪ ܓܘܼܕܵܐ ܕܚܪ̈ܚܹܵܐ. 194 :ܕܬܚܬܝܼܘ ܠܐܝܬܼܝܐ ܠܫܝܼܛ̈ܬܐ 195 ܕܣܲܝܟܘܼܗܝ ܒܥܘܼܒܐ ܕܒܲܪܬ ܐ̄ܢܵܫܵܐ. 196 :ܐܵܪܵܐ ܓܠܝܼܙܲܝ̈ ܡ̣ܢ ܢܘܼܗܪܵܐ 197 ܘܪ̈ܕܝܲܝ ܒܐܘܼܪܚܵܐ ܕܚܸܫܘܿܟܼܵܐ. 198 :ܐܲܝܟܵܢ ܡܵܨܝܵܐ ܕܢܸܣܬܲܝܲܟ 199 ܟܝܵܢܵܐ ܐܝܼܬܝܵܐ ܒܥܒ̈̇ܕܘܗܝ. 200 :ܐܲܝܟ ܡܸܠܬܼܵܐ ܕܗܲܪ̈ܵܛܝܼܩܹܐ 201 ܪܲܒ ܬܘܼܩܵܢܹܗ ܛܵܒܼ ܡܸܢܹܗ. 202 :ܕܡܨܐ ܡܣܝܟ ܠܲܟܼܝܵܢܹܗ 203 :ܐܲܝܟܵܢ ܩܲܒܸܠ ܪܘܼܟܵܒܵܐ 204 ܟܝܵܢܵܐ ܕܩܲܛܝܼܢ ܡ̣ܢ ܪܘܼܚܵܐ. 205 :ܟܲܕ ܐܝܼܬܼܵܘܗܝ ܗ̄ܘ̣ܵܐ ܒܲܘܼܝܵܢܹܗ 206 ܐܵܘ ܒܟܼܒܢܵܐ ܕܠܵܐ ܕܝܼܠܹܗ. 207 :ܬܵܘ ܦܲܫܸܩܘ ܠܲܢ ܐ̄ܪ̈ܵܙܲܝܼܟܘܿܢ 208 ܥܘܼܪ̈ܠܐ ܕܠܵܐ ܓܙܲܪܘ ܠܸܒܿܝܼ̈ܗܘܿܢ. 209 :ܘܐܲܠܸܦܘ ܕܐܲܝܟܵܢ ܢܵܘܕܹܐ 210 ܥܲܠ ܡܸܠܬܼܵܐ ܕܲܗܘ̤ܵܐ ܒܸܣܪܵܐ. 211 :ܐܵܘ ܦܲܫܩܘ ܠܲܢ ܕܐܲܝܟܲܢܵܐ 212 ܥܡ̣ܪ ܡܸܠܬܼܵܐ ܒܓܼܵܘ ܗܲܕܵܡܹ̈ܐ. 213 :ܐܘ ܥܬܕܘ ܙܲܝܢܵܐ ܕܢܩܪܸܒܼ 214 ܘܢܼܚܙܸܐ ܕܡ̇ܢ ܗܝ ܙܟܘܼܬܼܵܐ. 215 :ܟܢܫܘ ܟܠܗܘܿܢ ܓܹܐܪ̈ܲܝܟܘܿܢ 216 ܘܲܡܐܬܘܚܘ ܝܬܪܹ̈ܐ ܕܩܸ̈ܬܵܬܼܵܐ. 217 :ܘܣܝܼܡܘ ܡܸܠܬܼܵܐ ܕܗܘ̤ܵܐ ܒܸܣܪܵܐ 218 ܢܝܼܫܵܐ ܘܢܸܚܙܹܐ ܡ̇ܢ ܚܵܢܹܐ. 219 :ܥܲܠ ܡܸܠܬܐ ܕܲܗܘ̤ܵܐ ܒܸܣܪܵܐ 220 ܐܝܼܬܼܵܘܗܝ ܟܠܹܗ ܬܲܟܬܘܼܫܵܐ. 221 :ܘܡܦܣ ܐ̄ܢܵܐ ܕܡܸܛܠ ܗܵܕܹܐ 222 ܛܲܝܸܒܬܘܿܢ ܙܲܝܢܵܐ ܠܩܘܼܒܼܠܲܢ. 223 :ܒܙܲܝܢܵܐ ܕܪܲܒܟܘܿܢ ܨܵܒܹܝܢ ܐ̄ܢܬܘܿܢ 224 ܠܡܸܥܒܲܕ ܥܲܡܲܢ ܬܲܟܬܘܼܫܵܐ. 225 :ܕܗܘ̤ ܚܫܲܠ ܙܲܝܢܵܐ ܘܐܲܠܒܸܫܟܘܿܢ 226 ܠܘܼܩܒܼܵܠ ܡܸܠܬܐ ܕܡ̣ܢ ܐܲܒܼܵܐ. 227 :ܬܵܘ ܥܲܡ ܪܲܒܟܼܘܿܢ ܡܸܨܪ̈ܵܝܹܐ 228 ܘܢܸܒܼܥܹܐ ܚܲܝܠܹܗ ܕܦ̣ܬܓܼܵܡܵܐ. 229 :ܘܢܸܚܙܹܐ ܗܘܝܵܐ ܕܐܲܝܟܲܢܵܐ 230 :ܫܲܪܝܼ ܕܢܸܗܘܹܐ ܒܵܪܘܿܝܵܐ 231 :ܟܲܕ ܐܝܼܬܼܵܘܗܝ ܪܲܟܸܒ ܢܲܦܫܹܗ 232 ܐܘ ܗܵܫܵܐ ܫܲܪܝ ܕܢܗܸܘܹܐ. 233 :ܐܘ ܕܲܠܡܵܐ ܐ̄ܚܪܹܢܵܐ ܪ̈ܟܸܒ 234 ܘܗ̤ܘ ܪ̈ܲܚܝܼܩ ܡ̣ܢ ܪܘܼܟܵܒܼܵܐ. 235 :ܐܸܢܗܘ̤ ܕܲܗܘ̤ܵܐ ܠܵܐ ܐܝܼܬܼܵܘ̈ܗܝ 236 ܘܐܸܢ ܐܝܼܬܼܵܘܗܝ ܠܵܐ ܗ̄ܘ̣ܵܐ ܗܵܫܵܐ. 237 :ܕܐܝܼܬܝܵܐ ܠܵܐ ܡܨܹܐ ܕܢܲܩܲܒܸܠ 238 ܗܵܘܝܵܐ ܒܵܬܲܪ ܐܝܼܬܼܘܼܬܹܗ. 239 :ܗܘ̤ܵܐ ܒܸܣܪܐ ܐܲܝܟ ܡܸܠܲܟܼܘܿܢ 240 ܡܢܵܬܼܵܐ ܡܸܢܹܗ ܐܘ ܟܠܹܗ. 241 :ܘܐܲܝܟܵܢ ܡܵܨܝܵܐ ܕܢܸܬܼܦܲܠܲܓܼ 242 ܟܝܵܢܵܐ ܕܠܵܐ ܩܢܹܐ ܕܘܼܟܵܒܼܵܐ. 243 :ܐܸܢܗܘ̤ ܕܟܼܠܹܗ ܐܸܬܼܪܲܟܲܒܼ 244 ܡܵܕܹܝܢ ܟܠܹܗ ܐܸܣܬܲܝܟ. 245 :ܘܡܣܝܲܟ ܗ̄ܘ̣ܵܐ ܡ̣ܢ ܟܠܕܘܼܟ 246 ܘܥ̇ܡ̣ܪ ܗ̄ܘ̣ܵܐ ܒܲܪܣܵܐ ܒܲܠܚܘܕܿ. 247 :ܘܐܸܢܗܘ̤ ܕܗ̈ܕܹܐ ܗܵܟܼܵܢܵܐ ܗ̣̄ܝ 248 ܐܲܝܟܵܐ ܗ̣ܝ ܗ̇ܝ ܕܠܵܐ ܡܸܣܬܲܝܲܟ. 249 :ܕܗܵܐ ܣܲܝܟܹܗ ܥܘܼܒܵܐ ܕܒܸܣܪܵܐ 250 ܐܲܝܟ ܨܢܥܬܼܵܐ ܕܪܲܟܸܒܼܬܘܿܢ. 251 :ܘܐܸܢܗܘ̤ ܕܡܸܢܹܗ ܢܸܬܪܲܟܲܒܼ 252 ܘܡܸܢܹܗ ܩܵܘܝܼ ܒܲܟܼܝܵܢܹܗ. 253 :ܐܲܝܟܵܐ ܗ̣̄ܝ ܡܵܕܹܝܢ ܫܘܼܝܘܼܬܼܵܐ 254 ܕܗܵܐ ܐܬܦܠܲܓܼ ܩܲܟܼܝܵܢܹܗ. 255 ܐܸܢܗܘ̤ ܕܡܸܠܬܐ ܗܘ̤ܵܐ ܒܸܣܪܵܐ: pb. f.341v 256 ܢܸܒܼܥܵܐ ܒܸܣܪܵܐ ܕܡ̇ܢ ܐܝܼܬܼܵܘܗܝ. 257 :ܥܲܡܹܗ ܐܲܚܬܹܗ ܡ̣ܢ ܪܵܘܡܵܐ 258 ܐܘ ܒܸܣܪܵܐ ܕܐ̄ܢܵܫܵܐ ܐܝܼܬܼܵܘܗܝ. 259 :ܐܢܗܘ̤ ܩܢܘܿܡܹܗ ܗܘ̤ܐ ܒܸܣܪܵܐ 260 ܘܒܸܣܪܵܐ ܠܵܐ ܫܩܲܠ ܡ̣ܢ ܡܲܪܝܲܡ. 261 ܡ̇ܢ ܥܕܪܬܗ ܠܟܼܝܼܢܲܢ:܆ 262 ܗ̇ܝ ܕܲܗܘ̤ܵܐ ܒܸܣܪܵܐ ܕܒܼܝܼܠܹܗ. 263 :ܒܲܛܝܼܠ ܡܵܕܹܝܢ ܡܘܼܠܟܵܢܵܐ 264 ܗ̇ܘ ܕܐܸܫܬܵܘܕܝܼ ܠܘܵܬܼ ܕܵܘܝܼܕ. 265 :ܘܒܲܫܡܵܐ ܫܐܝܼܠܵܐ ܡܸܬܟܲܢܹܐ 266 ܒܲܪ ܕܵܘܝܼܕ ܟܕ ܠܵܐ ܐܝܼܬܼܵܘܗܝ. 267 :ܡ̇ܢ ܐܸܬܼܥܲܕܲܪܘ ܡܵܝܘ̈ܬܹܐ 268 ܡ̣ܢ ܡܸܠܬܼܵܐ ܕܲܗܘ̤ܵܐ ܒܸܣܪܵܐ. 269 :ܕܗܘ̤ ܒܲܟܼܝܵܢܹܗ ܗܘ̤ܐ ܒܸܣܪܵܐ 270 ܘܟܝܼܢܲܢ ܩܵܘܝܼ ܒܫܸܦܠܹܗ. 271 :ܠܲܝܟܐ ܗ̄ܝ̣ ܡܵܕܹܝܢ ܕܡܒܛܲܠ 272 ܓܙܲܪ ܕܝܼܢܵܐ ܕܡܵܘܬܵܐ ܡܸܢܲܢ. 273 :ܕܠܵܐ ܫܩܲܠ ܦܲܓܼܪܵܐ ܡ̣ܢ ܡܲܪܝܲܡ 274 ܫܩܲܠ ܠܹܗ ܡܸܠܬܼܵܐ ܘܲܥܡܲܪ ܒܹܗ. 275 :ܘܗܵܕܹܐ ܦܲܐܝܵܐ ܠܝܕܼܵܘ̈ܥܹܐ 276 ܘܣܵܗܸܕ ܩܘܼܫܬܵܐ ܠܡܸܠܲܝ̈ܗܘܿܢ. 277 :ܡܵܕܹܝܢ ܐܝܼܬܝܵܐ ܠܵܐ ܡܨܝܵܐ 278 ܕܢܗܘܹܐ ܒܸܣܪܵܐ ܠܲܩܢܘܿܡܹܗ. 279 :ܘܗܵܘܝܵܐ ܕܟܲܕ ܒܸܣܪܵܐ ܪܲܚܝܼܩ 280 ܡ̣ܢ ܐܝܼܬܘܼܬܼܵܐ ܕܠܵܐ ܫܘܼܪܵܝ. 281 :ܡܵܢܵܐ ܦܪܝܼܣܵܐ ܬܲܚܦܝܼܬܵܐ 282 ܕܨܢܥܵܬܐ ܥܲܠ ܡܸܠܲܝ̈ܟܘܿܢ. 283 :ܓܠ̣ܘ ܢܝܼܫܵܐ ܕܪܸ̈ܥܝܵܢܲܝܟܿܘܿܢ 284 ܘܬܲܪܓܸܡܘ ܒܲܕ ܡܘܼܬ ܐܵܪܝܼܘܿܣ. 285 :ܠܹܗܘ̤ ܡܚ̈ܝܠܢ ܡܸܠܲܝܼ̈ܟܘܿܢ 286 ܘܠܹܗ ܡܣܲܝܼܥܝܼܢ ܦܹܬܓܡܲܝܼ̈ܟܘܿܢ. 287 :ܕܡܼܦܪ ܒܐܝܼܬܘܼܬܹܗ ܕܲܒܼܪܵܐ 288 ܘܲܩܪܵܝܗܝ ܥܲܒܼܕܵܐ ܘܫܲܡܵܫܵܐ. 289 :ܗܵܢܵܘ ܟܠܹܗ ܬܲܟܼܬܘܼܫܹܗ 290 ܕܐܵܪܝܼܘܿܣ ܬܲܠܡܝܼܕ ܙܐܹܦܵܐ. 291 :ܕܡܲܙܥܲܪ ܠܲܒܼܪܵܐ ܡ̣ܢ ܐܲܒܼܵܐ 292 ܘܡܫܵܐ ܠܹܗ ܡ̣ܢ ܒܪܸܝ̈ܬܹܗ. 293 :ܠܢܝܼܫܵܐ ܕܝܼܠܹܗ ܚܵܢܹܝܢ ܐ̄ܢܬܘܿܢ 294 ܐܵܦ ܐ̄ܢܬܘܿܢ ܐܘ ܚܸܪ̈ܚܹܐ. 295 :ܘܲܡܣܟܹܝܢ ܐܢ̄ܬܘܿܢ ܒܐܸܣܟܹܝܡܵܐ 296 ܪܘܼܫܥܵܐ ܕܟܼܣܹܐ ܒܡܸܠܲܝ̈ܟܘܿܢ. 297 :ܦܘܩܘ ܡ̣ܢ ܥܵܢ̈ܐ ܡܲܪ̈ܵܚܹܐ 298 ܒܐܸܣ݂ܝܡ ܐܸܡܪܹ̈ܐ ܠܵܐ ܬܛܥܘܿܢ. 299 ܕܚܲܒܸܠܬܘܼܢܵܝܗܝ ܠܦܘܼܪܫܵܢܵܐ:܆ 300 ܕܟܝܢܹ̈ܐ ܬܪܹܝܢ ܕܲܗܘ̤ܵܘ ܚܲܕ. 301 :ܣܥ̣ܐ ܪܘܼܫܥܵܐ ܕܓܘܼܕܼܵܦܲܝ̈ܗܘܿܢ 302 ܘܐܸܬܼܥܲܠܝܼ ܠܪܵܘܡܵܐ ܕܪܵܘܡܹܐ. 303 :ܘܬܵܚܬܝܼ ܠܐܝܼܬܼܝܵܐ ܡ̣ܢ ܣܵܟܹܗ 304 ܘܐܲܣܪܹܗ ܒܚܒܼ̈ܠܐ ܕܗܲܕܵܡܹ̈ܐ. 305 :ܫܡܲܝܵܐ ܘܐܲܪܥܵܐ ܨܘܼܬܼܘ ܘܲܫܡܲܥܘ 306 [ܪ]ܘܼܫܥܵܐ ܕܡܲܠܸܠܘ ܡܲܪ̈ܵܚܹܐ. 307 :ܕܐܝܼܬܘܼܬܼܵܐ ܕܠܵܐ ܡܸܬܼܕܲܪܲܟܵܐ 308 ܣܲܝܸܟܘ ܚܲܒܼܫܘܼܗ̇ ܒܓܵܘ ܟܲܪܣܵܐ. 309 :ܒܲܕܡܘܼܬ ܣܲܟܿܪܵܐ ܒܲܩܪܵܒܼܵܐ 310 ܐܲܚܕܘܼܗ̇ ܠܗܵܕܹܐ ܒܲܪܬ ܩܵܐܐ. 311 :ܕܗܘ̤ ܡܸܠܬܼܵܐ ܪܲܟܸܒ ܝܵܬܹܗ 312 ܘܲܗܘ̤ܵܐ ܒܸܣܪܵܐ ܐܲܝܟ ܕܲܟܬܝܼܒ. 313 :ܐܲܝܟܵܐ ܕܗܘ̤ܐ ܩܲܒܸܠܬܘܿܢ 314 ܐܘ ܡܲܠܦ̈ܢܹܐ ܕܚܲܕ̈ܬܵܬܼܵܐ. 315 :ܘܛܥܝܬܘܢ ܗ̇ܝ ܕܲܥܡܲܪ ܒܲܢ 316 :ܘܠܵܐ ܒܚܢܬܘܢ ܣܘܼܟܵܠܵܗ̇ 317 :ܥܡ݂ܲܪ ܒܲܢ ܐܸܡܲܪ ܝܘܿܚܲܢܵܢ 318 :ܡܲܢܘܼ ܒܡܲܢܘܼ ܥܡ̇ܪ ܗ̄ܘ̣ܵܐ 319 :ܗܵܐ ܒܲܕܸܩܘ ܠܲܢ ܓܲܠܝܵܐܝܼܬ 320 ܥܡܘܼܪܝܵܐ ܕܲܬܼܪܹܝܢ ܕܲܗܘ̤ܵܘ ܚܲܕ. 321 :ܐܸܢܗܘ̤ ܕܥܡܘܪܝܵܐ ܐܸܡ̣ܲܪ 322 ܗ̇ܝ ܕܲܗܘ̤ܵܐ ܒܲܢ ܡܸܬܼܒܲܥܝܵܐ. 323 :ܕܗܵܐ ܡܵܨܝܵܐ ܕܢܸܥܡܲܪ ܡܵܕܹܢ 324 ܐܵܦ ܟܲܕ ܠܲܝܬܵܘܗܝ ܗ̇ܝ ܕܗܵܘܝܵܐ. 325 :ܐܸܢܗܘ̤ ܕܲܥܡܲܪ ܒܲܐ̄ܚܪܹܢܵܐ 326 ܗܵܘܝܵܐ ܡܵܕܹܝܢ ܝܲܬܝܼܪܵܐ ܗ̄ܘ̣. 327 :ܘܗܵܕܹܐ ܦܲܐܝܵܐ ܠܲܟܼܝܵܢܹܗ 328 ܕܢܸܥܡܲܪ ܟܲܕ ܠܵܐ ܡܸܣܬܲܝܲܟ. 329 :ܬܵܘ ܗܵܟܹܝܠ ܐܘ ܫܵܡܘܿܥܵܐ 330 ܒܲܚܸܢ ܡܸܠܲܝ̈ ܐܸܢ ܟܹܐ̈ܢܵܢ. 331 :ܘܲܒܼܡܣܵܐܬܵܐ ܕܕܲܥܝܢܵܟ 332 ܬܩܘܠ ܦܸܬܓܵܡܲܝ̈ ܐܸܢ ܙܐ̇ܠܝܢ. 333 ܠܵܐ ܢܕܵܘܕܵܟ ܫܸܡܥܵܐ ܕܡܸ̈ܐܹܐ:܆ 334 ܕܡܬܐܲܡܪ̈ܵܢ ܒܲܗܦܵܟܼܵܬܵܐ. 335 :ܠܵܘ ܕܲܒܼܨܵܬܵܐ ܐܝܼܬܼܝܗܹܝܢ 336 ܐܸܠܵܐ ܒܥܵܬ̣ܵܐ ܕܝܘܼܪܵܢܵܐ. 337 :ܒܥܵܬܐ ܗ̣ܝ ܕܡܸܠܬܼܵܐ ܥܘܼܕܪܵܢܵܐ 338 ܘܟܼܣܸܐ ܒܵܗ̇ ܣܲܒܼܪܵܐ ܕܚܲܝ̈ܢ.܆ 339 :ܕܡܩܪܒܼܐ ܠܹܗ ܠܲܟܼܝܵܢܲܢ 340 ܠܐܝܼܩܵܪܵܐ ܕܨܲܠܡܵܐ ܕܐܘܼܒܼܕ. 341 ܬܲܟܼܬܘܼܫܲܢ ܡܸܛܠ ܗܵܕܹܐ ܗ̄ܘ̣: pb. f.342r 342 ܕܠܵܐ ܙܥܲܪ ܡܸܠܬܼܵܐ ܒܲܥܡܘܿܪܝܵܐ. 343 :ܐܸܠܵܐ ܕܲܫܩܲܠ ܠܟܼܝܵܢܲܢ 344 ܘܝܲܩܪܹܗ ܒܫܘܼܒܼܚܵܐ ܕܪܲܒܘܼܬܹܗ. 345 :ܗܵܕܹܐ ܒܠܵܬܐ ܕܲܥܡܘܼܪܝܵܐ 346 ܕܒܵܥܝܹܢܲܢ ܥܲܡ ܡܲܪ̈ܚܹܐ. 347 :ܕܠܵܐ ܐܸܬܼܒܲܨܪܲܬ̤ ܐܝܼܬܘܼܬܼܵܐ 348 ܒܲܥܡܘܼܪܝܵܐ ܕܥܲܡ ܐ̄ܢܵܫܘܼܬܼܵܐ. 349 :ܗ̇ܝ ܕܲܗܘ̤ܵܐ ܗܵܕܹܐ ܗ̄ܝ̣ ܕܲܥܡܲܪ 350 ܘܗ̇ܝ ܕܲܥܡܲܪ ܕܲܢܣܲܒܼ ܐ̄ܢܵܫܐ. 351 :ܘܟܲܣܝܼ ܙܝܘܵܐ ܕܪܲܒܘܼܬܹܗ 352 ܒܢܲܚܬܼܵܐ ܕܦܲܓܼܪܵܐ ܡܵܝܘܿܬܼܵܐ. 353 :ܢܵܘܣܵܐ ܕܦܲܓܼܪܵܐ ܪܲܟܸܒܼ ܠܹܗ 354 ܡܸܠܬܵܐ ܐܝܼܬܝܵܐ ܘܲܥܡܲܪ ܒܹܗ. 355 :ܘܠܵܘ ܗܘ̤ ܩܲܒܸܠ ܪܘܟܒܼܵܐ 356 ܪܘܼܫܥܵܐ ܕܗܲܪܵܛܝܼܩܹܐ. 357 :ܠܵܐ ܡܸܣܬܲܝܲܟ ܒܲܕܝܵܢܹܗ 358 ܢܸܬܬܲܚܬܹܐ ܨܝܕ ܪܘܼܟܵܒܼܵܐ. 359 ܐܵܦܠܵܐ ܢܵܘܣܵܐ ܕܲܪܲܟܸܒܼ ܠܹܗ. 360 ܠܵܐ ܣܦܩ ܣܲܝܟܹܗ ܠܲܟܼܝܵܢܹܗ. 361 :ܠܵܘ ܒܲܟܼܝܵܢܹܗ ܥܵܡܲܪ ܗ̄ܘ̣ܵܐ 362 ܒܒܲܪܢܵܫܵܐ ܕܲܫܩܲܠ ܡܸܢܲܢ. 363 :ܐܸܠܵܐ ܥܡܘܼܪܝܵܐ ܕܨܒܼܝܵܢܵܐ 364 ܘܲܚܕܵܝܘܼܬܼܵܐ ܕܠܵܐ ܦܘܼܪܵܫ. 365 :ܙܩܲܪ ܡܸܠܬܼܵܐ ܢܲܚܬܵܐ ܕܒܸܣܪܵܐ 366 ܕܲܢܟܲܣܹܐ ܒܹܗ ܪܲܒܘܼܬܹܗ. 367 :ܕܢܸܚܙܘܿܢ ܐ̄ܢܵܫܵܐ ܒܒܲܪܢܵܫܵܐ 368 ܨܠܲܡܵܐ ܕܫܘܼܒܼܚܵܐ ܕܪܲܒܘܼܬܹܗ. 369 :ܡܘܠܟܵܢܵܐ ܕܠܵܐ ܡܸܬܼܕܲܓܲܠ 370 :ܡ̣ܠܟ ܠܐܲܒܼܪܵܗܵܡ ܘܲܠܕܵܘܝܼܕ 371 :ܘܓܲܡܪܹܗ ܗܵܫܵܐ ܒܲܥܒ̈ܕܵܐ 372 ܒܪܹܫܝܼܬܼܵܐ ܕܡ̣ܢ ܒܹܝܬܼ ܕܵܘܝܼܕ. 373 :ܠܲܝܬܼܵܘܗܝ ܡܸܠܬܼܵܐ ܒܲܪ ܕܵܘܝܼܕ 374 ܚܸܪ̈ܚܹܵܐ ܡ̇ܢ ܢܨܵܝܹܢ ܐ̄ܢܬܘܿܢ. 375 :ܒܲܪ ܕܵܘܝܼܕ ܒܲܪ ܓܸܢܣܲܢ ܗ̄ܘ̣ 376 ܕܢܲܣܒܹܗ ܡܸܠܬܼܵܐ ܘܥ݂ܲܡܲܪ ܒܹܗ. 377 :ܟܠܹܗ ܨܸܒܼܝܵܢܹܗ ܫܲܡ̣ܠܝ 378 ܡܸܠܬܼܵܐ ܒܦܲܓܼܪܵܐ ܘܲܥܡ݂ܲܪ ܒܹܗ. 379 :ܘܟܲܕ ܨܸܒܼܝܵܢܹܗ ܒܹܗ ܣܲܝܟ 380 ܟܝܵܢܹܗ ܒܹܗ ܠܵܐ ܐܸܣܬܲܝܲܟ. 381 :ܒܹܗ ܗ̄ܘ̣ܵܐ ܟܠܹܗ ܒܨܒܼܝܵܢܹܗ 382 ܘܒܲܟܼܝܵܢܹܗ ܒܹܗ ܘܲܒܼܟܼܠܕܘܿܟ. 383 :ܕܗܵܕܹܐ ܦܲܐܝܵܐ ܠܥܵܒܼܘܿܕܵܐ 384 ܕܠܵܐ ܢܣܬܿܝܲܟ ܒܲܥܒ̈̇ܕܵܘܗܝ. 385 :ܥܒܼܕܐ ܗܘ̣ ܕܝܼܠܹܗ ܗ̄ܘ̣ ܦܲܓܼܪܵܐ 386 ܕܲܨܒܼܵܐ ܕܢܸܗܘܹܐ ܠܹܗ ܥܘ̣ܡܪܵܐ. 387 :ܘܲܕܠܵܬ ܣܲܝܟܹܗ ܠܲܟܼܝܵܢܹܗ 388 ܥܡܲܪ ܒܹܗ ܟܠܹܗ ܒܨܒܼܝܵܢܹܗ. 389 :ܘܲܟܒܲܪ ܢܨܵܝܼܢ ܚܸܪ̈ܚܵܐ 390 ܥܲܡ ܡܸܠܲܝ̈ܢ ܐܲܝܟ ܪܡܥܵܕܹܝܢ. 391 :ܕܐܲܝܟܵܢ ܥܒܼܝܼܕܵܐ ܘܥܵܒܼܘܿܕܵܐ 392 :ܚܲܕ ܦܲܪܨܘܿܦܵܐ ܩܵܪܹܝܢ ܐ̄ܢܬܘܿܢ 393 :ܥܒܼܝܼܕܵܐ ܠܢܵܘܣܵܐ ܩܪܹܐ ܐ̄ܢܵܐ 394 ܪܪܲܟܸܒ ܡܸܠܬܼܵܐ ܠܲܥܡܘܪܝܹܗ. 395 :ܘܥܒܼܘܿܕܵܐ ܠܹܗ ܠܝܼܚܕܝܵܐ 396 ܕܲܨܒܼܵܐ ܕܢܸܥܡܲܪ ܒܲܥܒܼܵܕܹܗ. 397 :ܐܲܝܟ ܢܲܦܫܵܐ ܘܦܲܓܼܪܵܐ ܕܫܘܼܝܢ 398 ܘܚܲܕ ܦܲܪܨܘܼܦܵܐ ܡܸܬܟܲܢܝܢ. 399 :ܢܲܦܫܵܐ ܟܝܵܫܵܐ ܗ̄ܘ̣ ܕܚܝܼܘܼܬܼܵܐ 400 ܘܦܲܓܼܪܵܐ ܟܝܵܢܵܐ ܡܵܝܘܿܬܼܵܐ. 401 :ܘܚܲܕ ܦܲܪܨܘܿܦܵܐ ܡܸܬܼܟܲܢܝܼܢ 402 ܬܪܹܝܢ ܘܕܲܦܪܫܝܼܢ ܚܲܕ ܡ̣ܢ ܚܲܕ. 403 :ܡܸܠܬܼܵܐ ܟܝܵܢܵܐ ܕܐܝܼܬܼܘܵܬܼܐ 404 ܘܦܲܓܼܪܵܐ ܟܝܵܢܵܐ ܕܐ̄ܢܵܫܘܼܬܼܵܐ. 405 :ܚܲܕ ܥܲܒܼܕܵܐ ܘܚܲܕ ܥܒܼܘܿܕܵܐ 406 ܚܲܕ ܐܸܢܘܿܢ ܒܲܚܕܵܝܘܼܬܼܵܐ. 407 :ܚܒܝܼܫܵܐ ܢܲܦܫܵܐ ܒܓܼܵܘ ܦܲܓܼܪܵܐ 408 ܘܣܘ̣ܥܪܵܢܵܗ̇ ܠܒܲܪ ܡ̣ܢ ܦܲܓܼܪܵܐ. 409 :ܘܟܲܕ ܦܲܓܼܪܵܐ ܒܲܚܕܵܐ ܕܡܼܵܐ ܗ̄ܘ̣ 410 ܙܵܘܥܵܗ̇ ܕܢܲܦܫܵܐ ܒܟܼܠ ܦܸܢ̈ܝܵܢ. 411 :ܫܪܹܐ ܗ̄ܘ̣ܵܐ ܡܸܠܬܼܵܐ ܒܓܼܵܘ ܦܲܓܼܪܵܐ 412 :ܘܐܝܼܬܼܵܘܗܝ ܗ̄ܘ̣ܵܐ ܒܪܵܘܡܵܐ ܘܥܘܼܡܩܵܐ 413 :ܘܲܡܣܲܝܟܵܐ ܗ̄ܘ̣ܵܬ ܐ̄ܢܵܫܘܼܬܹܗ 414 ܘܐܲܠܵܗܘܼܬܹܗ ܒܟܼܠ ܦܸܢ̈ܝܵܢ. 415 :ܠܵܐ ܚܵܫܵܐ ܢܲܦܫܵܐ ܒܦܲܓܪܵܐ 416 ܟܲܕ ܡܸܬܼܢܲܓܼܕܝܼܢ ܗܲܕܵܡܹ̈ܐ. 417 :ܘܠܵܐ ܐܲܠܵܗܘܼܬܼܵܐ ܚܵܫܲܬ̤ 418 ܒܚܲܫܹ̈ܐ ܕܦܲܓܼܪܵܐ ܕܥܸܡܪܲܬ̤ ܒܹܗ. 419 :ܘܐܸܢܗܘ̤ ܕܢܲܦܫܵܐ ܠܵܐ ܚܵܐ ܫܵܐ 420 ܕܲܥܒܼܝܼܕܬܵܐ ܗ̄ܝ̣ ܒܲܕܡܘܼܬ ܦܲܓܼܪܵܐ. 421 :ܐܲܝܟܵܢ ܚܵܐܫ̇ܐ ܐܝܼܬܘܼܬܼܵܐ 422 ܕܪܵܡ ܗ̄ܘ̣ ܟܝܵܢܵܗ̇ ܡ̣ܢ ܚܲܫܹ̈ܐ. 423 :ܚܵܐܫܵܐ ܢܲܦܫܵܐ ܥܲܡ ܦܲܓܼܪܵܐ 424 ܒܚܘܼܒܵܐ ܘܠܵܐ ܗ̄ܘ̣ܵܐ ܒܲܟܼܝܵܢܵܐ. 425 :ܘܡܸܬܼܐܲܡܪܝܼܢ ܚܲܫܹ̈ܐ ܕܦܲܓܼܪܵܐ 426 ܐܵܦ ܥܲܠ ܢܲܦܫܵܐ ܫܐܝܼܠܵܐܝܼܬ. 427 :ܚܲܕ ܥܲܒܼܕܹܗ ܥܲܡܹܗ ܒܫܘܼܒܼܚܵܐ 428 ܠܒܲܪܢܵܫܵܐ ܕܲܫܩܲܠ ܡܸܢܲܢ. pb. f.342v 429 :ܘܡܸܛܠ ܚܘܼܒܹܗ ܕܲܠܘܵܬܲܢ 430 ܢܣܲܒܼ ܡܵܪܵܬܼܵܐ ܥܲܠ ܢܲܦܫܹܗ. 431 :ܫܵܪܵܝܵܐ ܢܲܦܫܵܐ ܒܓܼܵܘ ܦܲܓܼܪܵܐ 432 ܘܠܵܐ ܚܵܙܹܝܢ ܠܵܗ̇ ܚܲܙܵܝܹ̈ܐ. 433 :ܘܟܲܕ ܒܲܟܼܝܵܢܵܗ̇ ܡܣܲܝܲܟܼܬܼܵܐ ܗ̄ܝ̣ 434 ܠܵܐ ܣܝܟܗ̇ ܥܲܝܢܹ̈ܐ ܕܒܸܣܪܵܐ. 435 :ܥܡܲܪ ܐܵܦ ܡܸܠܬܐ ܒܲܟܼܝܵܢܲܢ 436 ܘܠܵܐ ܐܸܣܬܲܝܲܟ ܒܲܟܼܝܵܢܲܢ. 437 :ܕܥܲܡܘܼܪܝܵܐ ܗ̄ܘ̣ܵܐ ܕܨܒܼܝܵܢܵܐ 438 ܘܠܵܐ ܗ̄ܘ̣ܵܐ ܥܡܘܼܪܝܵܐ ܕܲܟܼܝܵܢܵܐ. 439 :ܗܵܐ ܬܲܚܘܼܝܬܼܵܐ ܒܲܟܝܵܢܲܢ 440 :ܕܲܟܼܝܵܢ̈ܐ ܬܪܹܝܢ ܕܲܗܘ̤ܵܘ ܚܲܕ 441 :ܚܲܕ ܚܲܝܵܐ ܘܚܲܕ ܡܵܝܘܿܬܼܵܐ 442 ܘܚܲܕ ܟܲܣܝܵܐ ܘܲܐܚܪܼܝܢ ܓܲܠܝܵܐ. 443 :ܬܵܘ ܗܵܟܹܝܠ ܐܘ ܚܸܪ̈ܚܹܵܐ 444 ܢܸܒܼܥܹܐ ܒܥܵܬܵܐ ܕܘܵܠܝܼܬܼܵܐ. 445 :ܘܡܲܟܸܟܘ ܪܵܘܡܵܐ ܕܡܸܠܲܝ̈ܟܘܿܢ 446 ܘܕܲܥܘ ܠܲܟܼܝܵܢܟܼܘܿܢ ܚܲܠܵܫܵܐ. 447 :ܬܪܦܹܐ ܒܠܵܬܼܵܐ ܕܐܝܼܬܘܼܬܼܵܐ 448 ܕܐܝܼܬܘܼܬܼܵܐ ܕܠܵܐ ܡܸܬܼܕܲܪܟܵܐ. 449 :ܘܲܥܡܲܠܸܠ ܥܲܠ ܒܲܪ ܓܸܢܣܲܢ 450 ܕܢܲܣܒܹܗ ܐܝܼܬܼܝܵܐ ܘܲܥܡܲܪ ܒܹܗ. 451 :ܥܡܲܪ ܒܹܗ ܘܠܵܐ ܣܲܝܲܟ ܝܵܬܹܗ 452 ܕܠܵܐ ܩܢܹܐ ܟܝܵܢܹܗ ܕܢܣܬܝܲܟ. 453 :ܚܲܫ ܡܵܝܘܿܬܵܐ ܒܲܟܼܝܵܢܹܗ 454 ܘܠܵܐ ܩܪܒܼܘ ܚܲܫܹ̈ܐ ܠܐܝܼܬܘܼܬܼܵܐ. 455 :ܨܠܲܡܵܐ ܡܠܝܼܠܵܐ ܪܲܟܸܒܼ ܠܹܗ 456 ܕܲܢܚܵܘܹܐ ܒܹܗ ܫܘܼܠܛܵܢܹܗ. 457 :ܕܲܡܠܝܼܠܹ̈ܐ ܟܲܕ ܚܵܙܹܝܢ ܠܹܗ 458 :ܢܝܲܩܪܘܿܢ ܟܲܣܝܵܐ ܒܲܕ ܓܲܠܝܵܐ 459 :ܒܩܲܕܘܿܫ ܩܘܼܕܫܹ̈ܐ ܕܟܲܣܝܘܼܬܹܗ 460 ܥܡܲܪ ܒܹܗ ܐܝܼܬܼܝܵܐ ܟܲܣܝܵܐܝܼܬܼ. 461 :ܘܲܒܼܡܸܨܥܵܝܵܐ ܒܲܪ ܓܸܢܣܲܢ 462 ܚܵܙܝܹܢܲܢ ܨܲܠܡܵܐ ܕܫܘܼܒܼܚܹܗ. 463 :ܘܥܲܠ ܗܵܕܹܐ ܓܒܝܗܝ ܘܲܥܡܲܪ ܒܹܗ 464 ܕܟܸܣܝܵܐ ܒܓܸܠܝܵܐ ܢܸܬܼܒܲܕܲܩ. 465 :ܘܒܲܐܦܲܝ̈ ܬܲܪܥܵܐ ܕܟܲܣܝܘܼܬܹܗ 466 ܢܸܣܓܘܿܕ ܠܲܟܼܝܵܢܹܗ ܟܲܣܝܵܐ. 467 :ܥܲܒܼܕܹܗ ܡܵܪܵܐ ܥܲܠ ܒܿܝܼܬܹܗ 468 ܘܫܲܠܝܼܛܵܐ ܥܲܠ ܩܸܢܝܵܢܵܘ̈ܗܝ. 469 :ܘܲܫܥܒܸܕ ܠܹܗ ܪܵܘܡܵܐ ܘܥܘܼܡܩܵܐ 470 ܡܠܝܼ̈ܠܹܐ ܘܚܵܪ̈ܫܹܐ ܫܲܘܝܵܐܝܼܬ. 471 :ܒܹܗ ܐܸܬܚܲܕܲܬ ܬܘܼܩܵܢܵܐ 472 ܕܨܲܠܡ̇ܢ ܕܐܲܫܚܸܬ ܒܲܚܛܝܼܬܼܵܐ. 473 :ܘܫܸܠܡܲܬ̤ ܨܐܕܲܝܼܢ ܒܲܥܒܼܵܕܵܐ 474 ܗ̇ܝ ܕܲܩ̣ܪܲܢ ܨܲܠܡܵܐ ܕܝܼܠܹܗ. 475 :ܠܹܗ ܣܵܓܼܕܝܼܢ ܥܝܼܪܹ̈ܐ ܘܐ̄ܢܵܫ̈ܐ 476 ܐܝܟ ܨܠܲܡܵܐ ܓܲܠܝܵܐ ܕܡܲܠܟܵܐ. 477 :ܟܲܕ ܡܸܬܿܬܲܡܗܝܢ ܒܲܚܙܲܬܹܗ 478 ܚܠܵܦ ܟܲܣܝܘܼܬܹܗ ܕܚܝܼܕܼܵܐ. 479 :ܒܒܘܼܝܵܢܵܐ ܫܡܲܥ ܘܐܸܣܬܲܟܲܠ 480 ܫܵܡܘܿܥܵܐ ܗܵܠܹܝܢ ܕܲܬܢܚܸ̇ܬܼ. 481 :ܠܵܐ ܢܕܼܵܘܕܘܢܵܟ ܚܘܼܫܵܒܹ̈ܐ 482 ܥܲܠ ܡܸܠܬܼܵܐ ܕܲܗܘ̤ܵܐ ܒܸܣܪܵܐ. 483 :ܗܵܐ ܕܸܪܫܸ̇ܬܼ ܐܘܪܚܵܐ ܩܪ̈ܲܡܲܝܟ 484 :ܬܵܐ ܪܕܝܼ ܒܵܬܲܪ ܦܸܬܼܓܡܲܝ̈ 485 :ܕܢܸܒܼܥܵܐ ܕܚܲܝܹ̈ܐ ܡܸܫܟܿܚ ܐܲܢ̄ܬ 486 ܒܫܘܼܠܵܡ ܐܘܼܪܚܵܐ ܕܕܸܪܫܸܬ ܠܵܟ. 487 :ܫܲܒܝܲܝ ܠܐܝܼܬܼܝܵܐ ܒܟܲܣܝܘܼܬܹܗ 488 ܒܓܠܝܵܐ ܕܢܣܲܒܼ ܠܲܥܡܘܼܪܝܹܗ. 489 :ܘܝܲܩܲܪ ܡܲܠܟܵܐ ܒܝܲܕ ܨܠܲܢܡܹܗ 490 :ܕܡܲܠܟܵܐ ܒܨܠܡܹܗ ܡܸܬܼܝܲܩܲܪ 491 :ܕܥܲܣܩܵܐ ܐܘܼܪܚܵܐ ܕܢܪܕܐ ܒܵܗ̇ 492 ܨܝܕ ܐܝܼܬܼܘܼܬܼܵܐ ܕܠܵܐ ܫܘܼܪܵܝ. 493 :ܒܒܲܪܓܸܢܣܲܢ ܐܲܝܟ ܗܲܕܝܼܚܐ 494 :ܕܲܪܲܫ ܠܲܢ ܐܘܼܪܚܵܐ ܕܟܣܝܘܼܬܼܵܐ 495 :ܕܠܵܐ ܡܨܐ ܟܝܵܢܵܐ ܕܥܒܝܼ̈ܕܹܐ 496 ܕܢܸܬܼܒܲܩܹܐ ܒܐܝܼܬܝܵܐ ܓܡܝܼܪܵܐ. 497 :ܩܨܲܠܡܵܐ ܕܪܲܟܸܒܼ ܚܵܘܝܼ ܠܲܢ 498 ܫܘܿܒܚܵܐ ܦܲܐܝܵܐ ܕܟܲܣܝܘܼܬܹܗ. 499 :ܒܲܗܡܲܝܼܪܵܐ ܕܢܣ̇ܒܼ ܡܸܢܲܢ 500 ܐܲܣܪܹܗ ܠܚܕܒܵܐ ܕܒܸܪ̈ܝܵܬܼܵܐ. 501 :ܘܲܒܼܡܸܨܥܵܝܵܐ ܒܲܪ ܓܸܢܣܲܢ 502 ܫܲܝܸܢ ܠܲܢ ܥܲܡ ܪܲܒܘܼܬܹܗ. 503 :ܗܵܕܐ ܗ̄ܝ̣ ܥܸܠܬܼܵܐ ܕܡܹܐܬܝܼܬܹܗ 504 :ܕܢܹܐܬܹܐ ܢܚܲܕܸܬ ܬܘܼܩܵܢܲܢ 505 :ܘܢܹܐܣܘܿܪ ܫܲܝܢܵܐ ܕܐܬܪܦܝܼ 506 ܒܡܨܥܝܘܼܬܹܗ ܕܪܫܝܼܬܲܢ. 507 :ܠܒܘܼܝܵܐܵܐ ܕܝܼܠܲܢ ܪܲܟܸܒ 508 ܢܵܘܣܵܐ ܕܒܸܣܪܵܐ ܘܲܥܡܲܪ ܒܹܗ. 509 :ܕܢ̣ܣܓܘܿܕ ܒܹܝܬ ܩܘܼܕܫܵܐ ܕܠܲܒܲܪ 510 ܠܗ̇ܘ ܕܲܟܼܣܹܐ ܒܲܩܕܘܫ ܩܘܼܕ̈ܫܹܐ. 511 ܠܩܘܼܕܫܵܐ ܒܲܪܵܝܵܐ ܕܦܲܓܼܪܹܗ: pb. f.343r 512 ܒܥܲܝ̈ܢܹܐ ܕܒܸܣܪܵܐ ܚܵܙܝܹܢܲܢ. 513 :ܘܠܲܩܕܘܿܫ ܩܘܼ̈ܕܫܹܐ ܕܟܲܣܝܘܼܬܹܗ 514 ܒܙܵܘܥܹ̈ܐ ܕܢܲܦܫܵܐ ܪ̈ܘܼܚܵܢܹܐ. 515 :ܒܦܪܣܵܐ ܕܦܲܓܼܪܹܗ ܕܐܵܕܼܵܡ 516 ܟܠܹܝܢ ܥܸܠܝܹ̈ܐ ܘܬܲܚܵܬܹܝ̈ܐ. 517 :ܘܠܲܝܬܼ ܫܘܼܠܛܵܢܵܐ ܠܲܥܒܼܝܼ̈ܕܹܐ 518 ܕܢܸܚܙܘܿܢ ܩܘܼܕܫܵܐ ܕܐܝܼܬܘܼܬܼܵܐ. 519 :ܗܵܐ ܕܪܝܼܫܵܐ ܐܘܼܪܚܵܐ ܠܝܲܚܹ̈ܐ 520 ܬܵܘ ܚܸܪ̈ܚܹܵܐ ܘܲܪܕܵܘ ܒܵܗ̇. 521 :ܘܠܵܐ ܬܸܬܲܩܠܘܿܢ ܒܲܫܒܝܼܵܠܐ 522 ܕܦܘܠܵܓܼܵܐ ܕܪܸ̈ܥܝܵܢܲܝܟܘܿܢ. 523 :ܒܬܵܘܕܝܼܬܼܵܐ ܕܥܲܠ ܐܝܼܬܘܼܬܼܵܐ 524 ܠܵܐ ܢܸܚܠܘܿܛ ܒܵܗ̇ ܦܘܼܠܵܓܼܵܐ. 525 :ܕܫܘܹܐ ܒܪܵܐ ܥܲܡ ܝܵܠܘܿܕܹܗ 526 :ܠܵܐ ܢܬܲܚܬܝܼܘܗܝ ܠܲܡܚ̈ܝܼܠܵܬܼܵܐ 527 :ܢܵܘܕܹܐ ܕܡܸܠܬܼܵܐ ܠܒܸܫ ܒܸܣܪܵܐ 528 ܘܲܨܒܼܵܐ ܘܥܲܡܲܪ ܒܲܟܼܝܵܢܲܢ. 529 :ܟܲܕܼ ܠܵܐ ܣܲܝܟܹܗ ܠܲܟܼܝܵܢܹܗ 530 ܢܵܘܣܵܐ ܕܒܸܣܪܵܐ ܕܲܥܡ̣ܪ ܒܹܗ. 531 :ܥܡ݂ܲܪ ܒܹܗ ܟܠܹܗ ܒܨܒܼܝܵܢܹܗ 532 ܘܩܵܘܝܼ ܟܠܹܗ ܒܐܝܼܬܼܘܼܬܹܗ. 533 :ܘܲܢܣܲܒܼ ܒܲܫܡܵܐ ܡܵܟܼܬܹ̈ܗ 534 ܘܠܹܗ ܫܵܘܬܸܦ ܒܲܫܒܼܚܵܬܹ̈ܗ. 535 :ܬܵܘ ܚܲܝܒܹ̈ܐ ܒܢܲܝ̈ ܐܵܕܼܵܡ 536 ܢܸܦܪܘܿܠ ܩܘܼܒܵܠ ܛܲܝܒܘܼܬܼܵܐ. 537 :ܠܛܵܒܼܵܐ ܕܫܵܘܬܸܦ ܠܲܟܼܝܵܢܲܢ 538 ܒܲܫܒܼܚ̈ܝܵܬܼܵܐ ܕܪܲܒܘܼܬܹܗ. 539 :ܐ̄ܚܪܹܢܵܐ ܕܝܼܠܹܗ ܟܲܕ ܕܝܼܠܹܗ