Galatians (Peshitta Version) - ܐܓܪܬܐ ܕܦܘܠܘܣ ܕܠܘܬ ܓܠܛܝ̈ܐ

1 Chapter 1 1 1 ܦ݁ܰܘܠܳܘܣ ܫܠܺܝܚܳܐ ܂ ܠܳܐ ܡܶܢ ܒ݁ܢܰܝܢܳܫܳܐ̈ ܂ ܘܠܳܐ ܒ݁ܝܰܕ݂ ܒ݁ܰܪܢܳܫܳܐ ܂ ܐܶܠܳܐ ܒ݁ܝܰܕ݂ ܝܶܫܽܘܥ ܡܫܺܝܚܳܐ ܁ ܘܰܐܠܳܗܳܐ ܐܰܒ݂ܽܘܗ̱ܝ . ܗܰܘ ܕ݁ܰܐܩܺܝܡܶܗ ܡܶܢ ܒ݁ܶܝܬ݂ ܡܺܝܬ݂ܶܐ̈ . 2 ܘܟ݂ܽܠܗܽܘܢ ܐܰܚܶܐ̈ ܕ݁ܥܰܡܝ ܆ ܠܥܺܕ݂ܳܬ݂ܳܐ̈ ܕ݁ܺܐܝܬ݂ ܒ݁ܓ݂ܰܠܰܛܺܝܰܐ . 3 ܛܰܝܒ݁ܽܘܬ݂ܳܐ ܥܰܡܟ݂ܽܘܢ ܂ ܘܰܫܠܳܡܳܐ ܡܶܢ ܐܰܠܳܗܳܐ ܐܰܒ݂ܳܐ ܆ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ . 4 ܗܰܘ ܕ݁ܝܰܗ̱ܒ݂ ܢܰܦ݂ܫܶܗ ܚܠܳܦ݂ ܚܛܳܗܰܝܢ̈ ܇ ܕ݁ܰܢܦ݂ܰܨܶܝܢ ܡܶܢ ܥܳܠܡܳܐ ܗܳܢܳܐ ܒ݁ܺܝܫܳܐ ܇ ܐܰܝܟ݂ ܨܶܒ݂ܝܳܢܶܗ ܕ݁ܰܐܠܳܗܳܐ ܐܰܒ݂ܽܘܢ . 5 ܕ݁ܠܶܗ ܫܽܘܒ݂ܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ ܀ 6 ܡܶܬ݁ܕ݁ܰܡܰܪ ܐ̱ܢܳܐ ܐܰܝܟ݁ܰܢܳܐ ܒ݁ܰܥܓ݂ܰܠ ܡܶܬ݂ܗܰܦ݂ܟ݁ܺܝܢ ܐܢ̱ܬ݁ܽܘܢ ܡܶܢ ܡܫܺܝܚܳܐ ܂ ܗܰܘ ܕ݁ܰܩܪܳܟ݂ܽܘܢ ܒ݁ܛܰܝܒ݁ܽܘܬ݂ܶܗ ܇ ܠܰܐ̱ܚܪܺܬ݂ܳܐ ܣܒ݂ܰܪܬ݂ܳܐ . 7 ܐܰܝܕ݂ܳܐ ܕ݁ܠܳܐ ܐܺܝܬ݂ܶܝܗ . ܐܶܠܳܐ ܐ̱ܢܳܫܳܐ ܗܽܘ ܐܺܝܬ݂ ܕ݁ܕ݂ܳܠܚܺܝܢ ܠܟ݂ܽܘܢ ܇ ܘܨܳܒ݂ܶܝܢ ܕ݁ܰܢܫܰܚܠܦ݂ܽܘܢ ܣܒ݂ܰܪܬ݂ܶܗ ܕ݁ܰܡܫܺܝܚܳܐ . 8 ܐܳܦ݂ ܐܶܢ ܚܢܰܢ ܕ݁ܶܝܢ ܂ ܐܰܘ ܡܰܠܰܐܟ݂ܳܐ ܡܶܢ ܫܡܰܝܳܐ ܁ ܢܣܰܒ݁ܰܪܟ݂ܽܘܢ ܠܒ݂ܰܪ ܡܶܢ ܡܳܐ ܕ݁ܣܰܒ݁ܰܪܢܳܟ݂ܽܘܢ ܆ ܢܶܗܘܶܐ ܚܪܶܡ . 9 ܐܰܝܟ݁ܰܢܳܐ ܕ݁ܡܶܢ ܠܽܘܩܕ݂ܰܡ ܐܶܡܪܶܬ݂ ܆ ܘܗܳܫܳܐ ܬ݁ܽܘܒ݂ ܐܳܡܰܪ ܐ̱ܢܳܐ . ܕ݁ܶܐܢ ܐ̱ܢܳܫ ܡܣܰܒ݁ܰܪ ܠܟ݂ܽܘܢ ܠܒ݂ܰܪ ܡܶܢ ܡܳܐ ܕ݁ܩܰܒ݁ܶܠܬ݁ܽܘܢ ܆ ܢܶܗܘܶܐ ܚܪܶܡ . 10 ܗܳܫܳܐ ܓ݁ܶܝܪ ܠܰܒ݂ܢܰܝܢܳܫܳܐ̈ ܗܽܘ ܡܦ݁ܺܝܣ ܐ̱ܢܳܐ ܁ ܐܰܘ ܠܰܐܠܳܗܳܐ ܆ ܐܰܘ ܠܰܒ݂ܢܰܝܢܳܫܳܐ̈ ܒ݁ܳܥܶܐ ܐ̱ܢܳܐ ܕ݁ܶܐܫܦ݁ܰܪ ܆ ܐܶܠܽܘ ܓ݁ܶܝܪ ܥܕ݂ܰܡܳܐ ܠܗܳܫܳܐ ܠܰܒ݂ܢܰܝܢܳܫܳܐ̈ ܫܳܦ݂ܰܪ ܗ̱ܘܺܝܬ݂ ܆ ܥܰܒ݂ܕ݁ܳܐ ܕ݁ܰܡܫܺܝܚܳܐ ܠܳܐ ܗܳܘܶܐ ܗ̱ܘܺܝܬ݂ ܀ 11 ܡܰܘܕ݁ܰܥ ܐ̱ܢܳܐ ܠܟ݂ܽܘܢ ܕ݁ܶܝܢ ܐܰܚܰܝ̈ ܆ ܕ݁ܰܣܒ݂ܰܪܬ݂ܳܐ ܕ݁ܶܐܣܬ݁ܰܒ݁ܪܰܬ݂ ܡܶܢܝ ܆ ܠܳܐ ܗܘܳܬ݂ ܡܶܢ ܒ݁ܰܪܢܳܫܳܐ . 12 ܐܳܦ݂ܠܳܐ ܓ݁ܶܝܪ ܐܶܢܳܐ ܡܶܢ ܒ݁ܰܪܢܳܫܳܐ ܩܰܒ݁ܶܠܬ݁ܳܗ ܘܺܝܠܶܦ݂ܬ݁ܳܗ ܆ ܐܶܠܳܐ ܒ݁ܓ݂ܶܠܝܳܢܳܐ ܕ݁ܝܶܫܽܘܥ ܡܫܺܝܚܳܐ . 13 ܫܡܰܥܬ݁ܽܘܢ ܓ݁ܶܝܪ ܗܽܘܦ݁ܳܟ݂ܰܝ̈ ܕ݁ܡܶܢ ܩܕ݂ܺܝܡ ܕ݁ܒ݂ܺܝܗܽܘܕ݂ܳܝܽܘܬ݂ܳܐ ܆ ܕ݁ܝܰܬ݁ܺܝܪܳܐܝܺܬ݂ ܪܳܕ݂ܶܦ݂ ܗ̱ܘܺܝܬ݂ ܥܺܕ̱݁ܬ݁ܶܗ ܕ݁ܰܐܠܳܗܳܐ ܂ ܘܚܳܪܶܒ݂ ܗ̱ܘܺܝܬ݂ ܠܳܗ . 14 ܘܡܶܬ݂ܝܰܬ݁ܰܪ ܗ̱ܘܺܝܬ݂ ܒ݁ܺܝܗܽܘܕ݂ܳܝܽܘܬ݂ܳܐ ܆ ܛܳܒ݂ ܡܶܢ ܣܰܓ݁ܺܝܶܐܐ̈ ܒ݁ܢܰܝ̈ ܫܢܰܝ̈ ܕ݁ܺܐܝܬ݂ ܗ̱ܘܳܐ ܒ݁ܛܽܘܗܡܝ . ܘܝܰܬ݁ܺܝܪܳܐܝܺܬ݂ ܛܳܐܶܢ ܗ̱ܘܺܝܬ݂ ܒ݁ܝܽܘܠܦ݁ܳܢܳܐ ܕ݁ܰܐܒ݂ܳܗܰܝ̈ . 15 ܟ݁ܰܕ݂ ܨܒ݂ܳܐ ܕ݁ܶܝܢ ܗܰܘ ܡܰܢ ܕ݁ܦ݂ܰܪܫܰܢܝ ܡܶܢ ܟ݁ܪܶܣ ܐܶܡܝ ܂ ܘܰܩܪܳܢܝ ܒ݁ܛܰܝܒ݁ܽܘܬ݂ܶܗ ܆ 16 ܕ݁ܢܶܓ݂ܠܶܐ ܒ݁ܪܶܗ ܒ݁ܺܝ ܂ ܕ݁ܶܐܣܰܒ݁ܪܺܝܘܗ̱ܝ ܒ݁ܥܰܡ̱ܡܶܐ̈ ܆ ܒ݁ܰܪ ܫܳܥܬ݂ܶܗ ܠܳܐ ܓ݁ܠܺܝܬ݂ ܠܒ݂ܶܣܪܳܐ ܘܠܰܕ݂ܡܳܐ . 17 ܘܠܳܐ ܐܶܙܶܠ̱ܬ݂ ܠܽܐܘܪܺܫܠܶܡ ܠܘܳܬ݂ ܫܠܺܝܚܶܐ̈ ܕ݁ܡܶܢ ܩܕ݂ܳܡܰܝ . ܐܶܠܳܐ ܐܶܙܶܠ̱ܬ݂ ܠܰܐܪܰܒ݂ܺܝܰܐ ܂ ܘܬ݂ܽܘܒ݂ ܗܶܦ݂ܟ݁ܶܬ݂ ܠܕ݂ܰܪܡܣܽܘܩ . 18 ܘܡܶܢ ܒ݁ܳܬ݂ܰܪ ܬ݁ܠܳܬ݂ ܫܢܺܝܢ̈ ܆ ܐܶܙܶܠ̱ܬ݂ ܠܽܐܘܪܺܫܠܶܡ ܕ݁ܶܐܚܙܶܐ ܠܟ݂ܺܐܦ݂ܳܐ . ܘܩܰܘܺܝܬ݂ ܠܘܳܬ݂ܶܗ ܝܰܘܡܳܬ݂ܳܐ̈ ܚܰܡܶܫܬ݁ܰܥܣܰܪ . 19 ܠܰܐ̱ܚܪܺܝܢ ܕ݁ܶܝܢ ܡܶܢ ܫܠܺܝܚܶܐ̈ ܠܳܐ ܚܙܺܝܬ݂ ܆ ܐܶܠܳܐ ܐܶܢ ܠܝܰܥܩܽܘܒ݂ ܐܰܚܽܘܗ̱ܝ ܕ݁ܡܳܪܰܢ . 20 ܗܳܠܶܝܢ ܕ݁ܶܝܢ ܕ݁ܟ݂ܳܬ݂ܶܒ݂ ܐ̱ܢܳܐ ܠܟ݂ܽܘܢ ܆ ܗܳܐ ܩܕ݂ܳܡ ܐܰܠܳܗܳܐ ܕ݁ܠܳܐ ܡܟ݂ܰܕ݁ܶܒ݂ ܐ̱ܢܳܐ . 21 ܡܶܢ ܒ݁ܳܬ݂ܰܪ ܗܳܠܶܝܢ ܆ ܐܶܬ݂ܺܝܬ݂ ܠܰܐܬ݂ܪܰܘܳܬ݂ܳܐ̈ ܕ݁ܣܽܘܪܺܝܰܐ ܘܰܕ݂ܩܺܝܠܺܝܩܺܝܰܐ . 22 ܘܠܳܐ ܝܳܕ݂ܥܳܢ̈ ܗ̱ܘܰܝ̈ ܠܺܝ ܒ݁ܰܐܦ݁ܺܝܢ̈ ܥܺܕ݂ܳܬ݂ܳܐ̈ ܕ݁ܒ݂ܺܝܗܽܘܕ݂ ܂ ܗܳܠܶܝܢ ܕ݁ܒ݂ܰܡܫܺܝܚܳܐ . 23 ܐܶܠܳܐ ܗܳܕ݂ܶܐ ܒ݁ܰܠܚܽܘܕ݂ ܫܳܡܥܺܝܢ ܗ̱ܘܰܘ . ܕ݁ܗܰܘ ܕ݁ܡܶܢ ܩܕ݂ܺܝܡ ܪܳܕ݂ܶܦ݂ ܗ̱ܘܳܐ ܠܰܢ ܆ ܗܳܫܳܐ ܗܳܐ ܡܣܰܒ݁ܰܪ ܗܰܝܡܳܢܽܘܬ݂ܳܐ ܇ ܗܳܝ ܕ݁ܡܶܢ ܩܕ݂ܳܡ ܙܰܒ݂ܢܳܐ ܡܣܰܚܶܦ݂ ܗ̱ܘܳܐ . 24 ܘܰܡܫܰܒ݁ܚܺܝܢ ܗ̱ܘܰܘ ܒ݁ܺܝ ܠܰܐܠܳܗܳܐ ܀

2 Chapter 2 1 ܬ݁ܽܘܒ݂ ܕ݁ܶܝܢ ܡܶܢ ܒ݁ܳܬ݂ܰܪ ܐܰܪܒ݁ܰܥܶܣܪܶܐ ܫܢܺܝܢ̈ ܆ ܣܶܠܩܶܬ݂ ܠܽܐܘܪܺܫܠܶܡ ܂ ܥܰܡ ܒ݁ܰܪܢܰܒ݂ܰܐ . ܘܕ݂ܶܒ݂ܪܶܬ݂ ܥܰܡܝ ܠܛܺܛܳܘܣ . 2 ܣܶܠܩܶܬ݂ ܕ݁ܶܝܢ ܒ݁ܓ݂ܶܠܝܳܢܳܐ . ܘܰܓ݂ܠܺܝܬ݂ ܠܗܽܘܢ ܣܒ݂ܰܪܬ݂ܳܐ ܕ݁ܡܰܟ݂ܪܶܙ ܐ̱ܢܳܐ ܒ݁ܥܰܡ̱ܡܶܐ̈ . ܘܚܰܘܺܝܬ݂ܳܗ ܠܰܐܝܠܶܝܢ ܕ݁ܡܶܣܬ݁ܰܒ݂ܪܺܝܢ ܗ̱ܘܰܘ ܕ݁ܡܶܕ݁ܶܡ ܐܺܝܬ݂ܰܝܗܽܘܢ ܒ݁ܰܝܢܰܝ ܘܰܠܗܽܘܢ ܆ ܕ݁ܰܡ ܣܪܺܝܩܳܐܝܺܬ݂ ܪܶܗܛܶܬ݂ ܂ ܐܰܘ ܪܳܗܶܛ ܐ̱ܢܳܐ . 3 ܐܳܦ݂ ܛܺܛܳܘܣ ܕ݁ܥܰܡܝ ܕ݁ܰܐܪܡܳܝܳܐ ܗ̱ܘܳܐ ܆ ܠܳܐ ܐܶܬ݂ܶܐܢܶܣ ܕ݁ܢܶܓ݂ܙܽܘܪ . 4 ܡܶܛܽܠ ܕ݁ܶܝܢ ܐܰܚܶܐ̈ ܕ݁ܰܓ݁ܳܠܶܐ̈ ܕ݁ܥܰܠܘ ܥܠܰܝܢ ܇ ܕ݁ܢܶܓ݁ܫܽܘܢ ܚܺܐܪܽܘܬ݂ܳܐ ܕ݁ܺܐܝܬ݂ ܠܰܢ ܒ݁ܝܶܫܽܘܥ ܡܫܺܝܚܳܐ ܂ ܐܰܝܟ݁ܰܢܳܐ ܕ݁ܰܢܫܰܥܒ݁ܕ݂ܽܘܢܳܢܝ . 5 ܐܳܦ݂ܠܳܐ ܡܠܶܐ ܫܳܥܳܐ ܐܶܬ݂ܪܡܺܝܢ ܠܫܽܘܥܒ݁ܳܕ݂ܗܽܘܢ ܆ ܕ݁ܰܫܪܳܪܳܗ ܕ݁ܰܣܒ݂ܰܪܬ݂ܳܐ ܢܩܰܘܶܐ ܠܘܳܬ݂ܟ݂ܽܘܢ . 6 ܗܳܢܽܘܢ ܕ݁ܶܝܢ ܕ݁ܡܶܣܬ݁ܰܒ݂ܪܺܝܢ ܕ݁ܺܐܝܬ݂ܰܝܗܽܘܢ ܡܶܕ݁ܶܡ ܆ ܡܰܢ ܕ݁ܶܝܢ ܐܺܝܬ݂ܰܝܗܽܘܢ ܠܳܐ ܒ݁ܛܺܝܠ ܠܺܝ ܇ ܐܰܠܳܗܳܐ ܓ݁ܶܝܪ ܒ݁ܰܐܦ݁ܰܝ̈ ܒ݁ܢܰܝܢܳܫܳܐ̈ ܠܳܐ ܢܳܣܶܒ݂ ܇ ܗܶܢܽܘܢ ܕ݁ܶܝܢ ܗܳܠܶܝܢ ܆ ܡܶܕ݁ܶܡ ܠܳܐ ܐܰܘܣܶܦ݂ܘ ܠܺܝ ܂ 7 ܐܶܠܳܐ ܐ̱ܚܪܳܢܝܳܐܝܺܬ݂ . ܚܙܰܘ ܓ݁ܶܝܪ ܕ݁ܶܐܬ݂ܗܰܝܡܢܶܬ݂ ܣܒ݂ܰܪܬ݂ܳܐ ܕ݁ܥܽܘܪܠܽܘܬ݂ܳܐ ܆ ܐܰܝܟ݂ ܕ݁ܶܐܬ݂ܗܰܝܡܰܢ ܟ݁ܺܐܦ݂ܳܐ ܒ݁ܰܓ݂ܙܽܘܪܬ݁ܳܐ . 8 ܗܰܘ ܓ݁ܶܝܪ ܕ݁ܚܰܦ݁ܶܛ ܠܟ݂ܺܐܦ݂ܳܐ ܒ݁ܰܫܠܺܝܚܽܘܬ݂ܳܐ ܕ݁ܰܓ݂ܙܽܘܪܬ݁ܳܐ ܆ ܚܰܦ݁ܶܛ ܐܳܦ݂ ܠܺܝ ܒ݁ܰܫܠܺܝܚܽܘܬ݂ܳܐ ܕ݁ܥܰܡ̱ܡܶܐ̈ . 9 ܘܟ݂ܰܕ݂ ܝܺܕ݂ܰܥܘ ܛܰܝܒ݁ܽܘܬ݂ܳܐ ܕ݁ܶܐܬ݂ܝܰܗܒ݁ܰܬ݂ ܠܺܝ ܇ ܝܰܥܩܽܘܒ݂ ܘܟ݂ܺܐܦ݂ܳܐ ܘܝܽܘܚܰܢܳܢ ܇ ܗܳܢܽܘܢ ܕ݁ܡܶܣܬ݁ܰܒ݂ܪܺܝܢ ܗ̱ܘܰܘ ܕ݁ܺܐܝܬ݂ܰܝܗܽܘܢ ܥܰܡܽܘܕ݂ܶܐ̈ ܆ ܝܰܡܺܝܢܳܐ ܕ݁ܫܰܘܬ݁ܳܦ݂ܽܘܬ݂ܳܐ ܝܰܗ̱ܒ݂ܘ ܠܺܝ ܘܰܠܒ݂ܰܪܢܰܒ݂ܰܐ . ܕ݁ܰܚܢܰܢ ܒ݁ܥܰܡ̱ܡܶܐ̈ ܂ ܘܗܶܢܽܘܢ ܒ݁ܰܓ݂ܙܽܘܪܬ݁ܳܐ . 10 ܒ݁ܰܠܚܽܘܕ݂ ܕ݁ܰܠܡܶܣܟ݁ܺܢܶܐ̈ ܗܘܰܝܢ ܥܳܗܕ݁ܺܝܢܰܢ . ܘܶܐܬ݂ܒ݁ܛܶܠ ܠܺܝ ܕ݁ܗܺܝ ܗܳܕ݂ܶܐ ܐܶܥܒ݁ܕ݂ܺܝܗ ܀ 11 ܟ݁ܰܕ݂ ܐܶܬ݂ܳܐ ܕ݁ܶܝܢ ܟ݁ܺܐܦ݂ܳܐ ܠܰܐܢܛܺܝܳܘܟ݂ܺܝ ܆ ܒ݁ܰܐܦ݁ܰܘܗ̱ܝ̈ ܐܰܟ݁ܶܣܬ݁ܶܗ . ܡܶܛܽܠ ܕ݁ܡܶܬ݁ܬ݁ܰܩܠܺܝܢ ܗ̱ܘܰܘ ܒ݁ܶܗ . 12 ܕ݁ܥܰܕ݂ܠܳܐ ܢܺܐܬ݂ܽܘܢ ܐ̱ܢܳܫܳܐ ܡܶܢ ܠܘܳܬ݂ ܝܰܥܩܽܘܒ݂ ܆ ܥܰܡ ܥܰܡ̱ܡܶܐ̈ ܐܳܟ݂ܶܠ ܗ̱ܘܳܐ . ܟ݁ܰܕ݂ ܐܶܬ݂ܰܘ ܕ݁ܶܝܢ ܆ ܢܓ݂ܰܕ݂ ܗ̱ܘܳܐ ܢܰܦ݂ܫܶܗ ܂ ܘܰܦ݂ܪܰܫ . ܡܶܛܽܠ ܕ݁ܕ݂ܳܚܶܠ ܗ̱ܘܳܐ ܡܶܢ ܗܳܢܽܘܢ ܕ݁ܡܶܢ ܓ݁ܙܽܘܪܬ݁ܳܐ . 13 ܘܶܐܬ݂ܪܡܺܝܘ ܗ̱ܘܰܘ ܥܰܡܶܗ ܠܗܳܕ݂ܶܐ ܐܳܦ݂ ܫܰܪܟ݁ܳܐ ܕ݁ܺܝܗܽܘܕ݂ܳܝܶܐ̈ ܆ ܗܳܟ݂ܰܢܳܐ ܕ݁ܳܐܦ݂ ܒ݁ܰܪܢܰܒ݂ܰܐ ܐܶܬ݂ܕ݁ܒ݂ܰܪ ܗ̱ܘܳܐ ܠܡܶܣܰܒ݂ ܒ݁ܰܐܦ݁ܰܝܗܽܘܢ̈ ܀.܀.܀܀ 2 14 ܘܟ݂ܰܕ݂ ܚܙܺܝܬ݂ ܕ݁ܠܳܐ ܐܳܙܺܠ̱ܝܢ ܬ݁ܪܺܝܨܳܐܝܺܬ݂ ܒ݁ܰܫܪܳܪܶܗ ܕ݁ܶܐܘܰܢܓ݁ܶܠܺܝܳܘܢ ܆ ܐܶܡܪܶܬ݂ ܠܟ݂ܺܐܦ݂ܳܐ ܠܥܺܝܢ ܟ݁ܽܠܗܽܘܢ . ܐܶܢ ܐܰܢ̱ܬ݁ ܕ݁ܺܝܗܽܘܕ݂ܳܝܳܐ ܐܰܢ̱ܬ݁ ܐܰܪܡܳܐܝܺܬ݂ ܚܳܝܶܐ ܐܰܢ̱ܬ݁ ܂ ܘܠܳܐ ܝܺܗܽܘܕ݂ܳܐܝܺܬ݂ ܆ ܐܰܝܟ݁ܰܢܳܐ ܐܳܠܶܨ ܐܰܢ̱ܬ݁ ܠܥܰܡ̱ܡܶܐ̈ ܕ݁ܺܝܗܽܘܕ݂ܳܐܝܺܬ݂ ܢܺܚܽܘܢ . 15 ܚܢܰܢ ܓ݁ܶܝܪ ܕ݁ܡܶܢ ܟ݁ܝܳܢܰܢ ܝܺܗܽܘܕ݂ܳܝܶܐ̈ ܚ̱ܢܰܢ ܁ ܘܠܳܐ ܗܘܰܝܢ ܡܶܢ ܥܰܡ̱ܡܶܐ̈ ܚܰܛܳܝܶܐ̈ ܇ 16 ܡܶܛܽܠ ܕ݁ܝܳܕ݂ܥܺܝܢܰܢ ܕ݁ܠܳܐ ܡܶܙܕ݁ܰܕ݁ܰܩ ܒ݁ܰܪܢܳܫܳܐ ܡܶܢ ܥܒ݂ܳܕ݂ܶܐ̈ ܕ݁ܢܳܡܽܘܣܳܐ ܇ ܐܶܠܳܐ ܒ݁ܗܰܝܡܳܢܽܘܬ݂ܳܐ ܕ݁ܝܶܫܽܘܥ ܡܫܺܝܚܳܐ . ܐܳܦ݂ ܚܢܰܢ ܒ݁ܶܗ ܒ݁ܝܶܫܽܘܥ ܡܫܺܝܚܳܐ ܗܰܝܡܶܢܢ ܆ ܕ݁ܡܶܢ ܗܰܝܡܳܢܽܘܬ݂ܶܗ ܕ݁ܰܡܫܺܝܚܳܐ ܢܶܙܕ݁ܰܕ݁ܰܩ ܇ ܘܠܳܐ ܡܶܢ ܥܒ݂ܳܕ݂ܶܐ̈ ܕ݁ܢܳܡܽܘܣܳܐ . ܡܶܛܽܠ ܕ݁ܡܶܢ ܥܒ݂ܳܕ݂ܶܐ̈ ܕ݁ܢܳܡܽܘܣܳܐ ܂ ܠܳܐ ܡܶܙܕ݁ܰܕ݁ܰܩ ܟ݁ܽܠ ܒ݁ܣܰܪ . 17 ܐܶܢ ܕ݁ܶܝܢ ܟ݁ܰܕ݂ ܒ݁ܳܥܶܝܢܰܢ ܕ݁ܢܶܙܕ݁ܰܕ݁ܰܩ ܒ݁ܰܡܫܺܝܚܳܐ ܆ ܐܶܫܬ݁ܟ݂ܰܚܢ ܠܰܢ ܐܳܦ݂ ܚܢܰܢ ܚܰܛܳܝܶܐ̈ ܆ ܡܳܕ݂ܶܝܢ ܝܶܫܽܘܥ ܡܫܺܝܚܳܐ ܡܫܰܡܫܳܢܳܐ ܗ̱ܘ ܕ݁ܰܚܛܺܝܬ݂ܳܐ . ܚܳܣ . 18 ܐܶܢ ܓ݁ܶܝܪ ܠܰܐܝܠܶܝܢ ܕ݁ܣܶܬ݂ܪܶܬ݂ ܬ݁ܽܘܒ݂ ܠܗܶܝܢ ܒ݁ܳܢܶܐ ܐ̱ܢܳܐ ܆ ܚܰܘܺܝܬ݂ ܥܰܠ ܢܰܦ݂ܫܝ ܕ݁ܥܳܒ݂ܰܪ ܥܰܠ ܦ݁ܽܘܩܕ݁ܳܢܳܐ ܐ̱ܢܳܐ . 19 ܐܶܢܳܐ ܓ݁ܶܝܪ ܒ݁ܢܳܡܽܘܣܳܐ ܠܢܳܡܽܘܣܳܐ ܡܺܝܬ݂ܶܬ݂ ܂ ܕ݁ܠܰܐܠܳܗܳܐ ܐܺܚܶܐ . 20 ܘܥܰܡ ܡܫܺܝܚܳܐ ܙܩܺܝܦ݂ ܐ̱ܢܳܐ . ܘܡܶܟ݁ܺܝܠ ܠܳܐ ܗ̱ܘܳܐ ܐܶܢܳܐ ܚܰܝ ܐ̱ܢܳܐ ܆ ܐܶܠܳܐ ܚܰܝ ܒ݁ܺܝ ܡܫܺܝܚܳܐ . ܘܗܳܢܳܐ ܕ݁ܗܳܫܳܐ ܚܰܝ ܐ̱ܢܳܐ ܒ݁ܰܒ݂ܣܰܪ ܆ ܒ݁ܗܰܝܡܳܢܽܘܬ݂ܳܐ ܗ̱ܘ ܕ݁ܰܒ݂ܪܶܗ ܕ݁ܰܐܠܳܗܳܐ ܚܰܝ ܐ̱ܢܳܐ . ܗܰܘ ܕ݁ܰܐܚܒ݂ܰܢ ܂ ܘܝܰܗ̱ܒ݂ ܢܰܦ݂ܫܶܗ ܚܠܳܦ݂ܰܝܢ . 21 ܠܳܐ ܛܳܠܶܡ ܐ̱ܢܳܐ ܛܰܝܒ݁ܽܘܬ݂ܶܗ ܕ݁ܰܐܠܳܗܳܐ . ܐܶܢ ܓ݁ܶܝܪ ܒ݁ܝܰܕ݂ ܢܳܡܽܘܣܳܐ ܗ̱ܝ ܙܰܕ݁ܺܝܩܽܘܬ݂ܳܐ ܆ ܡܫܺܝܚܳܐ ܡܰܓ݁ܳܢ ܡܺܝܬ݂ ܀

3 Chapter 3 1 ܐܳܘ ܚܰܣܺܝܪܰܝ̈ ܪܶܥܝܳܢܳܐ ܓ݁ܰܠܰܛܳܝܶܐ̈ ܅ ܡܰܢܽܘ ܚܣܰܡ ܒ݁ܟ݂ܽܘܢ . ܕ݁ܗܳܐ ܐܰܝܟ݂ ܗܰܘ ܕ݁ܰܡܨܳܪ ܂ ܨܺܝܪ ܗ̱ܘܳܐ ܩܕ݂ܳܡ ܥܰܝܢܰܝܟ݁ܽܘܢ̈ ܝܶܫܽܘܥ ܡܫܺܝܚܳܐ ܂ ܟ݁ܰܕ݂ ܨܠܺܝܒ݂ . 2 ܗܳܕ݂ܶܐ ܒ݁ܰܠܚܽܘܕ݂ ܨܳܒ݂ܶܐ ܐ̱ܢܳܐ ܕ݁ܶܐܕ݁ܰܥ ܡܶܢܟ݂ܽܘܢ . ܡܶܢ ܥܒ݂ܳܕ݂ܶܐ̈ ܕ݁ܢܳܡܽܘܣܳܐ ܢܣܰܒ݂ܬ݁ܽܘܢ ܪܽܘܚܳܐ ܆ ܐܰܘ ܡܶܢ ܫܶܡܥܳܐ ܕ݁ܗܰܝܡܳܢܽܘܬ݂ܳܐ ܆ 3 ܗܳܟ݂ܰܢܳܐ ܣܰܟ݂ܠܺܝܢ ܐܢ̱ܬ݁ܽܘܢ ܆ ܕ݁ܫܰܪܺܝܬ݁ܽܘܢ ܒ݁ܪܽܘܚܳܐ ܇ ܘܗܳܫܳܐ ܒ݁ܰܒ݂ܣܰܪ ܡܫܰܠܡܺܝܢ ܐܢ̱ܬ݁ܽܘܢ ܆ 4 ܗܳܠܶܝܢ ܟ݁ܽܠܗܶܝܢ ܐܺܝܩܺܐ ܣܰܝܒ݁ܰܪܬ݁ܽܘܢ ܆ ܘܶܐܫܬ݁ܽܘܦ݂ ܕ݁ܶܝܢ ܐܺܝܩܺܐ . 5 ܗܰܘ ܗܳܟ݂ܺܝܠ ܕ݁ܝܰܗ̱ܒ݂ ܒ݁ܟ݂ܽܘܢ ܪܽܘܚܳܐ ܇ ܘܣܳܥܰܪ ܒ݁ܟ݂ܽܘܢ ܚܰܝܠܶܐ̈ ܆ ܡܶܢ ܥܒ݂ܳܕ݂ܶܐ̈ ܕ݁ܢܳܡܽܘܣܳܐ ܐܰܘ ܡܶܢ ܫܶܡܥܳܐ ܕ݁ܗܰܝܡܳܢܽܘܬ݂ܳܐ ܆ 6 ܐܰܝܟ݁ܰܢܳܐ ܕ݁ܗܰܝܡܶܢ ܐܰܒ݂ܪܳܗܳܡ ܠܰܐܠܳܗܳܐ ܆ ܘܶܐܬ݂ܚܰܫܒ݁ܰܬ݂ ܠܶܗ ܠܙܰܕ݁ܺܝܩܽܘ . 7 ܕ݁ܰܥܘ ܗܳܟ݂ܺܝܠ ܕ݁ܰܐܝܠܶܝܢ ܕ݁ܡܶܢ ܗܰܝܡܳܢܽܘܬ݂ܳܐ ܐܶܢܽܘܢ ܆ ܗܶܢܽܘܢ ܐܶܢܽܘܢ ܒ݁ܢܰܝܳܐ̈ ܕ݁ܰܐܒ݂ܪܳܗܳܡ . 8 ܡܶܛܽܠ ܓ݁ܶܝܪ ܕ݁ܩܰܕ݁ܶܡ ܝܺܕ݂ܰܥ ܐܰܠܳܗܳܐ ܂ ܕ݁ܰܒ݂ܗܰܝܡܳܢܽܘܬ݂ܳܐ ܗ̱ܘ ܡܶܙܕ݁ܰܕ݁ܩܺܝܢ ܥܰܡ̱ܡܶܐ̈ ܆ ܩܰܕ݁ܶܡ ܣܰܒ݁ܰܪ ܠܰܐܒ݂ܪܳܗܳܡ . ܐܰܝܟ݂ ܕ݁ܶܐܡܰܪ ܟ݁ܬ݂ܳܒ݂ܳܐ ܩܰܕ݁ܺܝܫܳܐ . ܕ݁ܒ݂ܳܟ݂ ܢܶܬ݂ܒ݁ܰܪܟ݂ܽܘܢ ܟ݁ܽܠܗܽܘܢ ܥܰܡ̱ܡܶܐ̈ . 9 ܡܳܕ݂ܶܝܢ ܡܗܰܝܡܢܶܐ̈ ܗ̱ܘ ܡܶܬ݂ܒ݁ܰܪܟ݂ܺܝܢ ܒ݁ܰܐܒ݂ܪܳܗܳܡ ܡܗܰܝܡܢܳܐ . 10 ܐܰܝܠܶܝܢ ܓ݁ܶܝܪ ܕ݁ܡܶܢ ܥܒ݂ܳܕ݂ܶܐ̈ ܐܶܢܽܘܢ ܕ݁ܢܳܡܽܘܣܳܐ ܆ ܬ݁ܚܶܝܬ݂ ܠܰܘܛܬ݂ܳܐ ܐܶܢܽܘܢ . ܟ݁ܬ݂ܺܝܒ݂ ܓ݁ܶܝܪ ܆ ܕ݁ܠܺܝܛ ܗ̱ܽܘ ܟ݁ܽܠܡܰܢ ܕ݁ܠܳܐ ܢܶܥܒ݁ܶܕ݂ ܟ݁ܽܠ ܕ݁ܰܟ݂ܬ݂ܺܝܒ݂ ܒ݁ܢܳܡܽܘܣܳܐ ܗܳܢܳܐ . 11 ܕ݁ܠܳܐ ܕ݁ܶܝܢ ܡܶܙܕ݁ܰܕ݁ܰܩ ܐ̱ܢܳܫ ܒ݁ܢܳܡܽܘܣܳܐ ܠܘܳܬ݂ ܐܰܠܳܗܳܐ ܆ ܗܳܕ݂ܶܐ ܓ݁ܰܠܝܳܐ ܗ̱ܝ . ܡܶܛܽܠ ܕ݁ܰܟ݂ܬ݂ܺܝܒ݂ . ܕ݁ܙܰܕ݁ܺܝܩܳܐ ܒ݁ܗܰܝܡܳܢܽܘܬ݂ܳܐ ܢܺܚܶܐ . 12 ܢܳܡܽܘܣܳܐ ܕ݁ܶܝܢ ܠܳܐ ܗ̱ܘܳܐ ܡܶܢ ܗܰܝܡܳܢܽܘܬ݂ܳܐ ܆ ܐܶܠܳܐ ܡܰܢ ܕ݁ܢܶܥܒ݁ܶܕ݂ ܐܰܝܠܶܝܢ ܕ݁ܰܟ݂ܬ݂ܺܝܒ݂ܳܢ̈ ܒ݁ܶܗ ܂ ܢܺܚܶܐ ܒ݁ܗܶܝܢ ܀ 13 ܠܰܢ ܕ݁ܶܝܢ ܡܫܺܝܚܳܐ ܙܰܒ݂ܢܰܢ ܡܶܢ ܠܰܘܛܬ݂ܳܐ ܕ݁ܢܳܡܽܘܣܳܐ ܆ ܘܗܽܘ ܗܘܳܐ ܚܠܳܦ݂ܰܝܢ ܠܰܘܛܬ݂ܳܐ . ܟ݁ܬ݂ܺܝܒ݂ ܓ݁ܶܝܪ ܆ ܕ݁ܠܺܝܛ ܗ̱ܽܘ ܟ݁ܽܠܡܰܢ ܕ݁ܡܶܬ݁ܬ݁ܠܶܐ ܒ݁ܩܰܝܣܳܐ . 14 ܕ݁ܰܒ݂ܥܰܡ̱ܡܶܐ̈ ܬ݁ܶܗܘܶܐ ܒ݁ܽܘܪܟ݁ܬ݂ܶܗ ܕ݁ܰܐܒ݂ܪܳܗܳܡ ܒ݁ܝܶܫܽܘܥ ܡܫܺܝܚܳܐ . ܘܰܚܢܰܢ ܢܶܣܰܒ݂ ܫܽܘܘ̱ܕ݁ܳܝܳܐ ܕ݁ܪܽܘܚܳܐ ܒ݁ܗܰܝܡܳܢܽܘܬ݂ܳܐ ܀ 15 ܐܰܚܰܝ̈ ܆ ܐܰܝܟ݂ ܕ݁ܒ݂ܶܝܬ݂ ܒ݁ܢܰܝܢܳܫܳܐ̈ ܐܳܡܰܪ ܐ̱ܢܳܐ . ܕ݁ܕ݂ܺܝܰܬ݂ܺܩܺܐ ܕ݁ܒ݂ܰܪܢܳܫܳܐ ܕ݁ܶܐܫܬ݁ܰܪܪܰܬ݂ ܆ ܐ̱ܢܳܫ ܠܳܐ ܡܰܣܠܶܐ ܐܰܘ ܡܫܰܚܠܶܦ݂ ܒ݁ܳܗ ܡܶܕ݁ܶܡ . 16 ܠܰܐܒ݂ܪܳܗܳܡ ܕ݁ܶܝܢ ܐܶܬ݂ܡܠܶܟ݂ ܡܽܘܠܟ݁ܳܢܳܐ ܂ ܘܰܠܙܰܪܥܶܗ . ܘܠܳܐ ܐܶܡܰܪ ܠܶܗ ܕ݁ܰܠܙܰܪܥܰܝܟ݁̈ ܂ ܐܰܝܟ݂ ܕ݁ܰܠܣܰܓ݁ܺܝܶܐܐ̈ ܆ ܐܶܠܳܐ ܠܙܰܪܥܳܟ݂ ܂ ܐܰܝܟ݂ ܕ݁ܰܠܚܰܕ݂ ܆ ܗܰܘ ܕ݁ܺܐܝܬ݂ܰܘܗ̱ܝ ܡܫܺܝܚܳܐ ܀ 17 ܗܳܕ݂ܶܐ ܕ݁ܶܝܢ ܐܳܡܰܪ ܐ̱ܢܳܐ . ܕ݁ܕ݂ܺܝܰܬ݂ܺܩܺܐ ܕ݁ܡܶܢ ܩܕ݂ܺܝܡ ܐܶܫܬ݁ܰܪܪܰܬ݂ ܡܶܢ ܐܰܠܳܗܳܐ ܒ݁ܰܡܫܺܝܚܳܐ ܆ ܢܳܡܽܘܣܳܐ ܗܽܘ ܕ݁ܰܗܘܳܐ ܡܶܢ ܒ݁ܳܬ݂ܰܪ ܐܰܪܒ݁ܰܥ ܡܳܐܐ ܘܰܬ݂ܠܳܬ݂ܺܝܢ ܫܢܺܝܢ̈ ܇ ܠܳܐ ܡܶܫܟ݁ܰܚ ܕ݁ܢܰܣܠܶܝܗ ܘܰܢܒ݂ܰܛܶܠ ܡܽܘܠܟ݁ܳܢܳܐ . 18 ܐܶܢ ܕ݁ܶܝܢ ܡܶܢ ܢܳܡܽܘܣܳܐ ܗ̱ܝ ܝܳܪܬ݁ܽܘܬ݂ܳܐ ܆ ܡܶܟ݁ܺܝܠ ܠܳܐ ܗ̱ܘܳܬ݂ ܡܶܢ ܡܽܘܠܟ݁ܳܢܳܐ . ܠܰܐܒ݂ܪܳܗܳܡ ܕ݁ܶܝܢ ܒ݁ܡܽܘܠܟ݁ܳܢܳܐ ܗ̱ܘ ܝܰܗ̱ܒ݂ ܠܶܗ ܐܰܠܳܗܳܐ . 19 ܡܳܢܳܐ ܗܳܟ݂ܺܝܠ ܢܳܡܽܘܣܳܐ . ܡܶܛܽܠ ܡܰܣܛܝܳܢܽܘܬ݂ܳܐ ܐܶܬ݁ܬ݁ܰܘܣܰܦ݂ ܆ ܥܕ݂ܰܡܳܐ ܕ݁ܢܺܐܬ݂ܶܐ ܙܰܪܥܳܐ ܂ ܗܰܘ ܕ݁ܠܶܗ ܗܘܳܐ ܫܽܘܘ̱ܕ݁ܳܝܳܐ . ܘܶܐܬ݂ܺܝܗܶܒ݂ ܗܽܘ ܢܳܡܽܘܣܳܐ ܒ݁ܝܰܕ݂ ܡܰܠܰܐܟ݂ܶܐ̈ ܂ ܒ݁ܺܐܝܕ݂ܳܐ ܕ݁ܡܶܨܥܳܝܳܐ . 20 ܡܶܨܥܳܝܳܐ ܕ݁ܶܝܢ ܠܳܐ ܗ̱ܘܳܐ ܕ݁ܚܰܕ݂ . ܐܰܠܳܗܳܐ ܕ݁ܶܝܢ ܚܰܕ݂ ܗ̱ܽܘ . 21 ܢܳܡܽܘܣܳܐ ܗܳܟ݂ܺܝܠ ܣܰܩܽܘܒ݂ܠܳܐ ܗ̱ܘ ܕ݁ܡܽܘܠܟ݁ܳܢܳܐ ܕ݁ܰܐܠܳܗܳܐ ܆ ܚܳܣ . ܐܶܠܽܘ ܓ݁ܶܝܪ ܐܶܬ݂ܺܝܗܶܒ݂ ܗ̱ܘܳܐ ܢܳܡܽܘܣܳܐ ܂ ܐܰܝܢܳܐ ܕ݁ܡܶܫܟ݁ܰܚ ܗ̱ܘܳܐ ܠܡܰܚܳܝܽܘ ܆ ܫܰܪܺܝܪܳܐܝܺܬ݂ ܡܶܢ ܢܳܡܽܘܣܳܐ ܗܳܘܝܳܐ ܗ̱ܘܳܬ݂ ܙܰܕ݁ܺܝܩܽܘܬ݂ܳܐ . 22 ܐܶܠܳܐ ܚܒ݂ܰܫ ܟ݁ܬ݂ܳܒ݂ܳܐ ܟ݁ܽܠܡܶܕ݁ܶܡ ܬ݁ܚܶܝܬ݂ ܚܛܺܝܬ݂ܳܐ ܆ ܕ݁ܡܽܘܠܟ݁ܳܢܳܐ ܒ݁ܗܰܝܡܳܢܽܘܬ݂ܳܐ ܕ݁ܝܶܫܽܘܥ ܡܫܺܝܚܳܐ ܢܶܬ݂ܺܝܗܶܒ݂ ܠܰܐܝܠܶܝܢ ܕ݁ܰܡܗܰܝܡܢܺܝܢ ܀.܀.܀܀ 3 23 ܥܰܕ݂ܠܳܐ ܕ݁ܶܝܢ ܬ݁ܺܐܬ݂ܶܐ ܗܰܝܡܳܢܽܘܬ݂ܳܐ ܆ ܢܳܡܽܘܣܳܐ ܢܳܛܰܪ ܗ̱ܘܳܐ ܠܰܢ ܇ ܟ݁ܰܕ݂ ܚܒ݂ܺܝܫܺܝܢܰܢ ܠܗܰܝܡܳܢܽܘܬ݂ܳܐ ܂ ܕ݁ܰܥܬ݂ܺܝܕ݂ܳܐ ܗܘܳܬ݂ ܠܡܶܬ݂ܓ݁ܠܳܝܽܘ . 24 ܢܳܡܽܘܣܳܐ ܗܳܟ݂ܺܝܠ ܬ݁ܳܪܐܳܐ ܗܘܳܐ ܠܰܢ ܠܘܳܬ݂ ܡܫܺܝܚܳܐ ܂ ܕ݁ܡܶܢ ܗܰܝܡܳܢܽܘܬ݂ܳܐ ܢܶܙܕ݁ܰܕ݁ܰܩ . 25 ܟ݁ܰܕ݂ ܐܶܬ݂ܳܬ݂ ܕ݁ܶܝܢ ܗܰܝܡܳܢܽܘܬ݂ܳܐ ܆ ܠܳܐ ܗܘܰܝܢ ܬ݁ܚܶܝܬ݂ ܬ݁ܳܪܐܶܐ̈ . 26 ܟ݁ܽܠܟ݂ܽܘܢ ܓ݁ܶܝܪ ܒ݁ܢܰܝܳܐ̈ ܐܰܢ̱ܬ݁ܽܘܢ ܕ݁ܰܐܠܳܗܳܐ ܒ݁ܗܰܝܡܳܢܽܘܬ݂ܳܐ ܕ݁ܝܶܫܽܘܥ ܡܫܺܝܚܳܐ . 27 ܐܰܝܠܶܝܢ ܓ݁ܶܝܪ ܕ݁ܒ݂ܰܡܫܺܝܚܳܐ ܥܡܰܕ݁ܬ݁ܽܘܢ ܂ ܠܰܡܫܺܝܚܳܐ ܠܒ݂ܶܫܬ݁ܽܘܢ . 28 ܠܰܝܬ݁ ܝܺܗܽܘܕ݂ܳܝܳܐ ܂ ܘܠܳܐ ܐܰܪܡܳܝܳܐ . ܠܰܝܬ݁ ܥܰܒ݂ܕ݁ܳܐ ܂ ܘܠܳܐ ܒ݁ܰܪ ܚܺܐܪܶܐ̈ . ܠܰܝܬ݁ ܕ݁ܶܟ݂ܪܳܐ ܂ ܘܠܳܐ ܢܶܩܒ݁ܬ݂ܳܐ . ܟ݁ܽܠܟ݂ܽܘܢ ܓ݁ܶܝܪ ܚܰܕ݂ ܐܰܢ̱ܬ݁ܽܘܢ ܒ݁ܝܶܫܽܘܥ ܡܫܺܝܚܳܐ . 29 ܘܶܐܢ ܕ݁ܰܡܫܺܝܚܳܐ ܐܢ̱ܬ݁ܽܘܢ ܆ ܡܶܟ݁ܺܝܠ ܙܰܪܥܶܗ ܐܰܢ̱ܬ݁ܽܘܢ ܕ݁ܰܐܒ݂ܪܳܗܳܡ ܂ ܘܝܳܪܬ݁ܶܐ̈ ܒ݁ܡܽܘܠܟ݁ܳܢܳܐ ܀

4 Chapter 4 1 ܐܳܡܰܪ ܐ̱ܢܳܐ ܕ݁ܶܝܢ ܕ݁ܰܟ݂ܡܳܐ ܙܰܒ݂ܢܳܐ ܕ݁ܝܳܪܬ݁ܳܐ ܛܠܶܐ ܆ ܠܳܐ ܦ݁ܪܺܝܫ ܡܶܢ ܥܰܒ݂ܕ݁ܶܐ̈ ܇ ܟ݁ܰܕ݂ ܡܳܪܶܐ ܗ̱ܽܘ ܕ݁ܟ݂ܽܠܗܽܘܢ . 2 ܐܶܠܳܐ ܬ݁ܚܶܝܬ݂ ܐܶܦ݁ܺܛܪܳܘܦ݁ܶܐ̈ ܐܺܝܬ݂ܰܘܗ̱ܝ ܂ ܘܪܰܒ݁ܰܝ̈ ܒ݁ܳܬ݁ܶܐ̈ ܆ ܥܕ݂ܰܡܳܐ ܠܙܰܒ݂ܢܳܐ ܕ݁ܣܳܡ ܐܰܒ݂ܽܘܗ̱ܝ . 3 ܗܳܟ݂ܰܢܳܐ ܐܳܦ݂ ܚܢܰܢ ܂ ܟ݁ܰܕ݂ ܝܰܠܽܘܕ݂ܶܐ̈ ܗ̱ܘܰܝܢ ܆ ܬ݁ܚܶܝܬ݂ ܐܶܣܛܽܘܟ݁ܣܰܘܗ̱ܝ̈ ܕ݁ܥܳܠܡܳܐ ܡܫܰܥܒ݁ܕ݂ܺܝܢ ܗܘܰܝܢ . 4 ܟ݁ܰܕ݂ ܡܛܳܐ ܕ݁ܶܝܢ ܫܽܘܠܳܡܶܗ ܕ݁ܙܰܒ݂ܢܳܐ ܆ ܫܰܕ݁ܰܪ ܐܰܠܳܗܳܐ ܠܰܒ݂ܪܶܗ ܇ ܘܰܗܘܳܐ ܡܶܢ ܐܰܢ̱ܬ݁ܬ݂ܳܐ ܇ ܘܰܗܘܳܐ ܬ݁ܚܶܝܬ݂ ܢܳܡܽܘܣܳܐ ܆ 5 ܕ݁ܠܰܐܝܠܶܝܢ ܕ݁ܰܬ݂ܚܶܝܬ݂ ܢܳܡܽܘܣܳܐ ܐܶܢܽܘܢ ܢܶܙܒ݁ܶܢ ܂ ܘܰܢܩܰܒ݁ܶܠ ܣܺܝܡܰܬ݂ ܒ݁ܢܰܝܳܐ̈ . 6 ܘܕ݂ܺܐܝܬ݂ܰܝܟ݁ܽܘܢ ܕ݁ܶܝܢ ܒ݁ܢܰܝܳܐ̈ ܆ ܫܰܕ݁ܰܪ ܐܰܠܳܗܳܐ ܪܽܘܚܳܐ ܕ݁ܰܒ݂ܪܶܗ ܠܠܶܒ݁ܰܘܳܬ݂ܟ݂ܽܘܢ̈ . ܗܳܝ ܕ݁ܩܳܪܝܳܐ ܐܰܒ݂ܰܐ ܐܰܒ݂ܽܘܢ ܀ 7 ܡܶܟ݁ܺܝܠ ܠܳܐ ܗܘܰܝܬ݁ܽܘܢ ܥܰܒ݂ܕ݁ܶܐ̈ ܂ ܐܶܠܳܐ ܒ݁ܢܰܝܳܐ̈ . ܘܶܐܢ ܒ݁ܢܰܝܳܐ̈ ܂ ܐܳܦ݂ ܝܳܪܬ݁ܶܐ̈ ܕ݁ܰܐܠܳܗܳܐ ܒ݁ܝܰܕ݂ ܝܶܫܽܘܥ ܡܫܺܝܚܳܐ . 8 ܗܳܝܕ݁ܶܝܢ ܓ݁ܶܝܪ ܟ݁ܰܕ݂ ܠܳܐ ܝܳܕ݂ܥܺܝܢ ܗ̱ܘܰܝܬ݁ܽܘܢ ܠܰܐܠܳܗܳܐ ܆ ܦ݁ܠܰܚܬ݁ܽܘܢ ܠܗܳܢܽܘܢ ܂ ܕ݁ܡܶܢ ܟ݁ܝܳܢܗܽܘܢ ܠܳܐ ܗ̱ܘܰܘ ܐܰܠܳܗܶܐ̈ . 9 ܗܳܫܳܐ ܕ݁ܶܝܢ ܕ݁ܺܝܕ݂ܰܥܬ݁ܽܘܢ ܠܰܐܠܳܗܳܐ : ܘܝܰܬ݁ܺܝܪܳܐܝܺܬ݂ ܕ݁ܶܐܬ݂ܺܝܕ݂ܰܥܬ݁ܽܘܢ ܡܶܢ ܐܰܠܳܗܳܐ ܆ ܬ݁ܽܘܒ݂ ܗܦ݂ܰܟ݂ܬ݁ܽܘܢ ܠܟ݂ܽܘܢ ܥܰܠ ܗܳܢܽܘܢ ܐܶܣܛܽܘܟ݁ܣܶܐ̈ ܡܰܪܥܶܐ̈ ܘܡܶܣܟ݁ܺܢܶܐ̈ ܇ ܘܡܶܢ ܕ݁ܪܺܝܫ ܨܳܒ݂ܶܝܬ݁ܽܘܢ ܠܡܶܫܬ݁ܰܥܒ݁ܳܕ݂ܽܘ ܠܗܽܘܢ ܆ 10 ܝܰܘܡܶܐ̈ ܁ ܘܝܰܪܚܶܐ̈ ܁ ܘܙܰܒ݂ܢܶܐ̈ ܁ ܘܰܫܢܰܝܳܐ̈ ܂ ܢܳܛܪܺܝܬ݁ܽܘܢ . 11 ܕ݁ܳܚܶܠ ܐ̱ܢܳܐ ܂ ܕ݁ܰܠܡܳܐ ܣܪܺܝܩܳܐܝܺܬ݂ ܠܺܐܝܬ݂ ܒ݁ܟ݂ܽܘܢ . 12 ܗܘܰܘ ܐܰܟ݂ܘܳܬ݂ܝ ܆ ܡܶܛܽܠ ܕ݁ܳܐܦ݂ ܐܶܢܳܐ ܐܰܟ݂ܘܳܬ݂ܟ݂ܽܘܢ ܗܘܺܝܬ݂ ܀ ܐܰܚܰܝ̈ ܆ ܒ݁ܳܥܶܐ ܐ̱ܢܳܐ ܡܶܢܟ݂ܽܘܢ . ܠܳܐ ܡܶܕ݁ܶܡ ܐܰܣܟ݁ܶܠܬ݁ܽܘܢ ܒ݁ܺܝ . 13 ܝܳܕ݂ܥܺܝܢ ܐܢ̱ܬ݁ܽܘܢ ܓ݁ܶܝܪ ܕ݁ܒ݂ܰܟ݂ܪܺܝܗܽܘܬ݂ ܒ݁ܶܣܪܝ ܣܰܒ݁ܰܪܬ݁ܟ݂ܽܘܢ ܗ̱ܘܺܝܬ݂ ܡܶܢ ܩܕ݂ܺܝܡ . 14 ܘܢܶܣܝܽܘܢܳܐ ܕ݁ܒ݂ܶܣܪܝ ܠܳܐ ܫܳܛܬ݁ܽܘܢ ܂ ܘܠܳܐ ܢܰܕ݁ܬ݁ܽܘܢ . ܐܶܠܳܐ ܐܰܝܟ݂ ܕ݁ܰܠܡܰܠܰܐܟ݂ܳܐ ܕ݁ܰܐܠܳܗܳܐ ܩܰܒ݁ܶܠܬ݁ܽܘܢܳܢܝ ܆ ܘܰܐܝܟ݂ ܕ݁ܰܠܝܶܫܽܘܥ ܡܫܺܝܚܳܐ . 15 ܐܰܝܟ݁ܰܘ ܗܳܟ݂ܺܝܠ ܛܽܘܒ݂ܟ݂ܽܘܢ . ܣܳܗܶܕ݂ ܐ̱ܢܳܐ ܓ݁ܶܝܪ ܥܠܰܝܟ݁ܽܘܢ ܁ ܕ݁ܶܐܠܽܘ ܡܶܫܟ݁ܚܳܐ ܗ̱ܘܳܬ݂ ܆ ܥܰܝܢܰܝܟ݁ܽܘܢ̈ ܚܳܨܶܝܢ ܗܘܰܝܬ݁ܽܘܢ ܂ ܘܝܳܗܒ݁ܺܝܢ ܠܺܝ . 16 ܕ݁ܰܠܡܳܐ ܒ݁ܥܶܠܕ݁ܒ݂ܳܒ݂ܳܐ ܗ̱ܘܺܝܬ݂ ܠܟ݂ܽܘܢ ܁ ܕ݁ܰܐܟ݂ܪܙܶܬ݂ ܠܟ݂ܽܘܢ ܫܪܳܪܳܐ . 17 ܚܳܣܡܺܝܢ ܒ݁ܟ݂ܽܘܢ ܂ ܠܳܐ ܗ̱ܘܳܐ ܠܫܰܦ݁ܺܝܪܬ݁ܳܐ . ܐܶܠܳܐ ܠܡܶܚܒ݁ܰܫܟ݂ܽܘܢ ܗ̱ܽܘ ܨܳܒ݂ܶܝܢ ܆ ܕ݁ܰܐܢ̱ܬ݁ܽܘܢ ܬ݁ܶܗܘܽܘܢ ܚܳܣܡܺܝܢ ܒ݁ܗܽܘܢ . 18 ܫܰܦ݁ܺܝܪ ܗ̱ܽܘ ܕ݁ܶܝܢ ܕ݁ܬ݂ܶܬ݂ܚܰܣܡܽܘܢ ܒ݁ܫܰܦ݁ܺܝܪܳܬ݂ܳܐ̈ ܒ݁ܟ݂ܽܠܙܒ݂ܰܢ ܆ ܘܠܳܐ ܐܶܡܰܬ݂ܝ ܕ݁ܰܠܘܳܬ݂ܟ݂ܽܘܢ ܐ̱ܢܳܐ ܒ݁ܰܠܚܽܘܕ݂ ܀ 19 ܒ݁ܢܰܝ̈ ܆ ܐܰܝܠܶܝܢ ܕ݁ܡܶܢ ܕ݁ܪܺܝܫ ܡܚܰܒ݁ܶܠ ܐ̱ܢܳܐ ܇ ܥܕ݂ܰܡܳܐ ܕ݁ܢܶܬ݁ܬ݁ܨܺܝܪ ܒ݁ܟ݂ܽܘܢ ܡܫܺܝܚܳܐ ܆ 20 ܨܳܒ݂ܶܐ ܗ̱ܘܺܝܬ݂ ܕ݁ܶܝܢ ܕ݁ܶܐܗܘܶܐ ܠܘܳܬ݂ܟ݂ܽܘܢ ܗܳܫܳܐ ܆ ܘܶܐܫܰܚܠܶܦ݂ ܒ݁ܰܪ̱ܬ݂ ܩܳܠܝ : ܡܶܛܽܠ ܕ݁ܬ݂ܰܡܺܝܗ ܐ̱ܢܳܐ ܒ݁ܟ݂ܽܘܢ . 21 ܐܶܡܰܪܘ ܠܺܝ ܂ ܐܰܢ̱ܬ݁ܽܘܢ ܐܰܝܠܶܝܢ ܕ݁ܨܳܒ݂ܶܝܢ ܕ݁ܢܶܗܘܽܘܢ ܬ݁ܚܶܝܬ݂ ܢܳܡܽܘܣܳܐ ܆ ܠܶܗ ܠܢܳܡܽܘܣܳܐ ܠܳܐ ܫܳܡܥܺܝܢ ܐܢ̱ܬ݁ܽܘܢ ܆ 22 ܟ݁ܬ݂ܺܝܒ݂ ܓ݁ܶܝܪ ܕ݁ܠܰܐܒ݂ܪܳܗܳܡ ܬ݁ܪܶܝܢ̈ ܒ݁ܢܺܝܢ̈ ܗܘܰܘ ܠܶܗ . ܚܰܕ݂ ܡܶܢ ܐܰܡܬ݂ܳܐ ܂ ܘܚܰܕ݂ ܡܶܢ ܚܺܐܪܬ݁ܳܐ . 23 ܐܶܠܳܐ ܗܰܘ ܕ݁ܡܶܢ ܐܰܡܬ݂ܳܐ ܒ݁ܰܒ݂ܣܰܪ ܐܶܬ݂ܺܝܠܶܕ݂ . ܗܰܘ ܕ݁ܶܝܢ ܕ݁ܡܶܢ ܚܺܐܪܬ݁ܳܐ ܒ݁ܡܽܘܠܟ݁ܳܢܳܐ ܗܘܳܐ . 24 ܗܳܠܶܝܢ ܕ݁ܶܝܢ ܐܺܝܬ݂ܰܝܗܶܝܢ ܦ݁ܶܠܳܐܬ݂ܳܐ̈ ܕ݁ܬ݂ܰܪܬ݁ܶܝܢ̈ ܕ݁ܺܝܰܬ݂ܺܩܰܣ̈ . ܚܕ݂ܳܐ ܕ݁ܡܶܢ ܛܽܘܪ ܣܺܝܢܰܝ ܂ ܝܳܠܕ݁ܳܐ ܠܥܰܒ݂ܕ݁ܽܘܬ݂ܳܐ . ܕ݁ܺܐܝܬ݂ܶܝܗ ܗܳܓ݂ܳܪ . 25 ܗܳܓ݂ܳܪ ܓ݁ܶܝܪ ܛܽܘܪܳܐ ܗܽܘ ܕ݁ܣܺܝܢܰܝ ܇ ܕ݁ܒ݂ܰܐܪܰܒ݂ܺܝܰܐ ܆ ܘܫܳܠܡܳܐ ܠܗܳܕ݂ܶܐ ܐܽܘܪܺܫܠܶܡ ܇ ܘܦ݂ܳܠܚܳܐ ܥܰܒ݂ܕ݁ܽܘܬ݂ܳܐ ܗܺܝ ܘܰܒ݂ܢܶܝܗ̈ . 26 ܗܳܝ ܕ݁ܶܝܢ ܐܽܘܪܺܫܠܶܡ ܥܶܠܳܝܬ݁ܳܐ ܂ ܚܺܐܪܬ݁ܳܐ ܗ̱ܝ ܆ ܕ݁ܺܐܝܬ݂ܶܝܗ ܐܶܡܰܢ . 27 ܟ݁ܬ݂ܺܝܒ݂ ܓ݁ܶܝܪ ܆ ܕ݁ܶܐܬ݂ܒ݁ܰܣܰܡܝ ܥܩܰܪܬ݂ܳܐ ܂ ܗܳܝ ܕ݁ܠܳܐ ܝܳܠܕ݁ܳܐ . ܘܶܐܬ݂ܦ݁ܰܨܚܝ ܘܰܓ݂ܥܳܝ ܂ ܗܳܝ ܕ݁ܠܳܐ ܡܚܰܒ݁ܠܳܐ . ܡܶܛܽܠ ܕ݁ܰܣܓ݂ܺܝܘ ܒ݁ܢܶܝܗ̈ ܕ݁ܨܳܕ݂ܺܝܬ݂ܳܐ ܂ ܝܰܬ݁ܺܝܪ ܡܶܢ ܒ݁ܢܶܝܗ̈ ܕ݁ܰܒ݂ܥܺܝܠܬ݁ܳܐ ܀ 28 ܚܢܰܢ ܕ݁ܶܝܢ ܐܰܚܰܝ̈ ܆ ܐܰܝܟ݂ ܐܺܝܣܚܳܩ ܂ ܒ݁ܢܰܝ̈ ܡܽܘܠܟ݁ܳܢܳܐ ܚܢܰܢ . 29 ܘܰܐܝܟ݂ ܕ݁ܗܳܝܕ݁ܶܝܢ ܂ ܗܰܘ ܕ݁ܺܝܠܺܝܕ݂ ܗ̱ܘܳܐ ܒ݁ܒ݂ܶܣܪܳܐ ܪܳܕ݂ܶܦ݂ ܗ̱ܘܳܐ ܠܗܰܘ ܕ݁ܰܒ݂ܪܽܘܚܳܐ ܆ ܗܳܟ݂ܰܢܳܐ ܐܳܦ݂ ܗܳܫܳܐ . 30 ܐܶܠܳܐ ܡܳܢܳܐ ܐܶܡܰܪ ܟ݁ܬ݂ܳܒ݂ܳܐ . ܐܰܦ݁ܶܩܶܝܗ ܠܰܐܡܬ݂ܳܐ ܘܠܰܒ݂ܪܳܗ ܆ ܡܶܛܽܠ ܕ݁ܠܳܐ ܢܺܐܪܰܬ݂ ܒ݁ܪܳܗ ܕ݁ܰܐܡܬ݂ܳܐ ܥܰܡ ܒ݁ܪܳܗ ܕ݁ܚܺܐܪܬ݁ܳܐ . 31 ܚܢܰܢ ܗܳܟ݂ܺܝܠ ܐܰܚܰܝ̈ ܆ ܠܳܐ ܗܘܰܝܢ ܒ݁ܢܰܝ̈ ܐܰܡܬ݂ܳܐ ܐܶܠܳܐ ܒ݁ܢܰܝ̈ ܚܺܐܪܬ݁ܳܐ .

5 Chapter 5 1 ܩܽܘܡܘ ܗܳܟ݂ܺܝܠ ܒ݁ܚܺܐܪܽܘܬ݂ܳܐ ܗܳܝ ܕ݁ܰܡܫܺܝܚܳܐ ܚܰܪܪܰܢ ܆ ܘܠܳܐ ܬ݁ܶܬ݂ܟ݁ܰܕ݂ܢܽܘܢ ܬ݁ܽܘܒ݂ ܒ݁ܢܺܝܪܳܐ ܕ݁ܥܰܒ݂ܕ݁ܽܘܬ݂ܳܐ ܀.܀.܀܀ 4 2 ܗܳܐ ܐܶܢܳܐ ܦ݁ܰܘܠܳܘܣ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܶܐܢ ܬ݁ܶܬ݂ܓ݁ܰܙܪܽܘܢ ܂ ܡܫܺܝܚܳܐ ܡܶܕ݁ܶܡ ܠܳܐ ܡܰܗܢܶܐ ܠܟ݂ܽܘܢ . 3 ܡܣܰܗܶܕ݂ ܐ̱ܢܳܐ ܕ݁ܶܝܢ ܬ݁ܽܘܒ݂ ܠܟ݂ܽܠ ܒ݁ܰܪܢܳܫ ܕ݁ܡܶܬ݂ܓ݁ܙܰܪ ܆ ܕ݁ܚܰܝܳܒ݂ ܗ̱ܽܘ ܕ݁ܟ݂ܽܠܶܗ ܢܳܡܽܘܣܳܐ ܢܶܥܒ݁ܶܕ݂ . 4 ܐܶܬ݂ܒ݁ܰܛܰܠܬ݁ܽܘܢ ܠܟ݂ܽܘܢ ܡܶܢ ܡܫܺܝܚܳܐ ܂ ܐܰܝܠܶܝܢ ܕ݁ܰܒ݂ܢܳܡܽܘܣܳܐ ܡܶܙܕ݁ܰܕ݁ܩܺܝܬ݁ܽܘܢ . ܘܡܶܢ ܛܰܝܒ݁ܽܘܬ݂ܳܐ ܢܦ݂ܰܠܬ݁ܽܘܢ . 5 ܚܢܰܢ ܓ݁ܶܝܪ ܒ݁ܪܽܘܚܳܐ ܕ݁ܡܶܢ ܗܰܝܡܳܢܽܘܬ݂ܳܐ ܂ ܠܣܰܒ݂ܪܳܐ ܕ݁ܙܰܕ݁ܺܝܩܽܘܬ݂ܳܐ ܡܩܰܘܶܝܢܰܢ . 6 ܒ݁ܰܡܫܺܝܚܳܐ ܓ݁ܶܝܪ ܝܶܫܽܘܥ ܆ ܠܳܐ ܓ݁ܙܽܘܪܬ݁ܳܐ ܡܶܕ݁ܶܡ ܐܺܝܬ݂ܶܝܗ ܂ ܘܠܳܐ ܥܽܘܪܠܽܘܬ݂ܳܐ ܆ ܐܶܠܳܐ ܗܰܝܡܳܢܽܘܬ݂ܳܐ ܕ݁ܡܶܬ݂ܓ݁ܰܡܪܳܐ ܒ݁ܚܽܘܒ݁ܳܐ ܀ 7 ܫܰܦ݁ܺܝܪ ܪܳܗܛܺܝܢ ܗܘܰܝܬ݁ܽܘܢ ܆ ܡܰܢܽܘ ܕ݁ܰܘܶܕ݂ܟ݂ܽܘܢ ܇ ܕ݁ܠܰܫܪܳܪܳܐ ܠܳܐ ܬ݁ܶܬ݁ܛܦ݁ܺܝܣܽܘܢ . 8 ܦ݁ܝܳܣܟ݂ܽܘܢ ܠܳܐ ܗ̱ܘܳܐ ܡܶܢ ܗܰܘ ܕ݁ܰܩܪܳܟ݂ܽܘܢ . 9 ܚܡܺܝܪܳܐ ܩܰܠܺܝܠ ܟ݁ܽܠܳܗ ܓ݁ܒ݂ܺܝܠܬ݁ܳܐ ܡܰܚܡܰܥ . 10 ܐܶܢܳܐ ܬ݁ܟ݂ܺܝܠ ܐ̱ܢܳܐ ܥܠܰܝܟ݁ܽܘܢ ܒ݁ܡܳܪܰܢ ܆ ܕ݁ܡܶܕ݁ܶܡ ܐ̱ܚܪܺܝܢ ܠܳܐ ܡܶܬ݂ܪܰܥܶܝܬ݁ܽܘܢ . ܘܰܐܝܢܳܐ ܕ݁ܕ݂ܳܠܰܚ ܠܟ݂ܽܘܢ ܆ ܗܽܘ ܢܣܰܝܒ݁ܪܺܝܘܗ̱ܝ ܠܕ݂ܺܝܢܳܐ ܂ ܡܰܢ ܕ݁ܺܐܝܬ݂ܰܘܗ̱ܝ ܀ 11 ܐܶܢܳܐ ܕ݁ܶܝܢ ܐܰܚܰܝ̈ ܆ ܐܶܠܽܘ ܥܕ݂ܰܟ݁ܺܝܠ ܓ݁ܙܽܘܪܬ݁ܳܐ ܡܰܟ݂ܪܶܙ ܗ̱ܘܺܝܬ݂ ܆ ܠܡܳܢܳܐ ܡܶܬ݂ܪܕ݂ܶܦ݂ ܗ̱ܘܺܝܬ݂ . ܕ݁ܰܠܡܳܐ ܐܶܬ݂ܒ݁ܰܛܰܠ ܠܶܗ ܟ݁ܶܫܠܶܗ ܕ݁ܰܙܩܺܝܦ݂ܳܐ ܆ 12 ܐܶܫܬ݁ܽܘܦ݂ ܕ݁ܶܝܢ ܐܳܦ݂ ܡܶܦ݂ܣܰܩ ܢܶܦ݂ܣܩܽܘܢ ܗܳܢܽܘܢ ܕ݁ܕ݂ܳܠܚܺܝܢ ܠܟ݂ܽܘܢ . 13 ܐܰܢ̱ܬ݁ܽܘܢ ܕ݁ܶܝܢ ܠܚܺܐܪܽܘܬ݂ܳܐ ܗ̱ܘ ܐܶܬ݂ܩܪܺܝܬ݁ܽܘܢ ܐܰܚܰܝ̈ ܆ ܒ݁ܰܠܚܽܘܕ݂ ܠܳܐ ܬ݁ܶܗܘܶܐ ܚܺܐܪܽܘܬ݂ܟ݂ܽܘܢ ܠܥܶܠܰܬ݂ ܒ݁ܶܣܪܳܐ ܂ ܐܶܠܳܐ ܒ݁ܚܽܘܒ݁ܳܐ ܗܘܰܝܬ݁ܽܘܢ ܡܶܫܬ݁ܰܥܒ݁ܕ݂ܺܝܢ ܚܰܕ݂ ܠܚܰܕ݂ . 14 ܟ݁ܽܠܶܗ ܓ݁ܶܝܪ ܢܳܡܽܘܣܳܐ ܒ݁ܰܚܕ݂ܳܐ ܡܶܠܬ݂ܳܐ ܡܶܬ݂ܡܰܠܶܐ ܆ ܒ݁ܗܳܝ ܂ ܕ݁ܬ݂ܰܚܶܒ݂ ܠܩܰܪܺܝܒ݂ܳܟ݂ ܐܰܝܟ݂ ܢܰܦ݂ܫܳܟ݂ . 15 ܐܶܢ ܕ݁ܶܝܢ ܚܰܕ݂ ܠܚܰܕ݂ ܡܢܰܟ݁ܬ݂ܺܝܬ݁ܽܘܢ ܘܳܐܟ݂ܠܺܝܬ݁ܽܘܢ ܆ ܚܙܰܘ ܕ݁ܰܠܡܳܐ ܚܰܕ݂ ܡܶܢ ܚܰܕ݂ ܬ݁ܣܽܘܦ݂ܽܘܢ ܀ 16 ܐܳܡܰܪ ܐ̱ܢܳܐ ܕ݁ܶܝܢ ܕ݁ܰܒ݂ܪܽܘܚܳܐ ܗܘܰܝܬ݁ܽܘܢ ܡܗܰܠܟ݂ܺܝܢ ܆ ܘܪܶܓ݁ܬ݂ܳܐ ܕ݁ܒ݂ܶܣܪܳܐ ܠܳܐ ܡܶܢ ܡܬ݂ܽܘܡ ܬ݁ܶܥܒ݁ܕ݂ܽܘܢ . 17 ܒ݁ܶܣܪܳܐ ܓ݁ܶܝܪ ܪܳܐܶܓ݂ ܡܶܕ݁ܶܡ ܕ݁ܢܳܟ݂ܶܐ ܠܪܽܘܚܳܐ ܆ ܘܪܽܘܚܳܐ ܪܳܓ݁ܳܐ ܡܶܕ݁ܶܡ ܕ݁ܢܳܟ݂ܶܐ ܠܒ݂ܶܣܪܳܐ . ܘܰܬ݂ܪܰܝܗܽܘܢ̈ ܣܰܩܽܘܒ݂ܠܶܐ̈ ܐܶܢܽܘܢ ܚܰܕ݂ ܕ݁ܚܰܕ݂ ܆ ܕ݁ܠܳܐ ܡܶܕ݁ܶܡ ܕ݁ܨܳܒ݂ܶܝܬ݁ܽܘܢ ܬ݁ܶܗܘܽܘܢ ܥܳܒ݂ܕ݁ܺܝܢ . 18 ܐܶܢ ܕ݁ܶܝܢ ܒ݁ܪܽܘܚܳܐ ܡܶܬ݁ܕ݁ܰܒ݁ܪܺܝܢ ܐܢ̱ܬ݁ܽܘܢ ܆ ܠܳܐ ܗܘܰܝܬ݁ܽܘܢ ܬ݁ܚܶܝܬ݂ ܢܳܡܽܘܣܳܐ . 19 ܝܺܕ݂ܺܝܥܺܝܢ ܐܶܢܽܘܢ ܓ݁ܶܝܪ ܥܒ݂ܳܕ݂ܰܘܗ̱ܝ̈ ܕ݁ܒ݂ܶܣܪܳܐ . ܕ݁ܺܐܝܬ݂ܰܝܗܽܘܢ ܆ ܙܳܢܝܽܘܬ݂ܳܐ . ܛܰܢܦ݂ܽܘܬ݂ܳܐ . ܨܰܚܢܽܘܬ݂ܳܐ . 20 ܦ݁ܽܘܠܚܳܢܳܐ ܕ݁ܰܦ݂ܬ݂ܰܟ݂ܪܶܐ̈ . ܚܰܪܳܫܽܘܬ݂ܳܐ . ܒ݁ܥܶܠܕ݁ܒ݂ܳܒ݂ܽܘܬ݂ܳܐ . ܚܶܪܝܳܢܳܐ . ܛܢܳܢܳܐ . ܚܶܡܬ݁ܳܐ . ܥܶܨܝܳܢܳܐ . ܦ݁ܳܠܰܓ݂ܘܳܬ݂ܳܐ̈ . ܣܶܕ݂ܩܶܐ̈ . 21 ܚܣܳܡܳܐ . ܩܶܛܠܳܐ . ܪܰܘܳܝܽܘܬ݂ܳܐ . ܙܡܳܪܳܐ . ܘܟ݂ܽܠ ܕ݁ܰܠܗܳܠܶܝܢ ܕ݁ܳܡܶܝܢ . ܘܰܐܝܠܶܝܢ ܕ݁ܗܳܠܶܝܢ ܣܳܥܪܺܝܢ ܂ ܐܰܝܟ݂ ܕ݁ܡܶܢ ܠܽܘܩܕ݂ܰܡ ܐܶܡܪܶܬ݂ ܠܟ݂ܽܘܢ ܆ ܐܳܦ݂ ܗܳܫܳܐ ܐܳܡܰܪ ܐ̱ܢܳܐ ܇ ܕ݁ܡܰܠܟ݁ܽܘܬ݂ܶܗ ܕ݁ܰܐܠܳܗܳܐ ܠܳܐ ܝܳܪܬ݁ܺܝܢ ܀ 22 ܦ݁ܺܐܪܶܐ̈ ܕ݁ܶܝܢ ܕ݁ܪܽܘܚܳܐ ܐܺܝܬ݂ܰܝܗܽܘܢ ܆ ܚܽܘܒ݁ܳܐ . ܚܰܕ݂ܽܘܬ݂ܳܐ . ܫܠܳܡܳܐ . ܡܰܓ݁ܪܰܬ݂ . ܪܽܘܚܳܐ . ܒ݁ܰܣܺܝܡܽܘܬ݂ܳܐ . ܛܳܒ݂ܽܘܬ݂ܳܐ . ܗܰܝܡܳܢܽܘܬ݂ܳܐ . 23 ܡܰܟ݁ܺܝܟ݂ܽܘܬ݂ܳܐ . ܡܣܰܝܒ݁ܪܳܢܽܘܬ݂ܳܐ . ܥܰܠ ܗܳܠܶܝܢ ܢܳܡܽܘܣܳܐ ܠܳܐ ܣܺܝܡ . 24 ܐܰܝܠܶܝܢ ܕ݁ܶܝܢ ܕ݁ܕ݂ܰܡܫܺܝܚܳܐ ܐܶܢܽܘܢ ܆ ܒ݁ܶܣܪܗܽܘܢ ܙܩܰܦ݂ܘ ܂ ܥܰܡ ܟ݁ܽܠܗܽܘܢ ܟ݁ܺܐܒ݂ܰܘܗ̱ܝ̈ ܘܰܪܓ݂ܺܝܓ݂ܳܬ݂ܶܗ̈ . 25 ܢܺܚܶܐ ܗܳܟ݂ܺܝܠ ܒ݁ܪܽܘܚܳܐ ܆ ܘܰܠܪܽܘܚܳܐ ܢܶܫܠܰܡ . 26 ܘܠܳܐ ܢܶܗܘܶܐ ܣܪܺܝܩܰܝ̈ ܫܽܘܒ݂ܚܳܐ ܇ ܕ݁ܡܰܩܠܺܝܢ ܚܰܕ݂ ܥܰܠ ܚܰܕ݂ ܂ ܘܚܳܣܡܺܝܢ ܚܰܕ݂ ܒ݁ܚܰܕ݂ ܀

6 Chapter 6 1 ܐܰܚܰܝ̈ ܆ ܐܶܢ ܐ̱ܢܳܫ ܡܶܢܟ݂ܽܘܢ ܢܶܬ݂ܩܰܕ݁ܰܡ ܒ݁ܣܰܟ݂ܠܽܘܬ݂ܳܐ ܆ ܐܰܢ̱ܬ݁ܽܘܢ ܐܰܝܠܶܝܢ ܕ݁ܰܒ݂ܪܽܘܚ ܐܰܢ̱ܬ݁ܽܘܢ ܇ ܐܰܬ݂ܩܢܽܘܗ̱ܝ ܒ݁ܪܽܘܚܳܐ ܡܰܟ݁ܺܝܟ݂ܬ݁ܳܐ . ܘܰܗܘܰܝܬ݁ܽܘܢ ܙܗܺܝܪܺܝܢ ܆ ܕ݁ܕ݂ܰܠܡܳܐ ܐܳܦ݂ ܐܰܢ̱ܬ݁ܽܘܢ ܬ݁ܶܬ݂ܢܰܣܽܘܢ . 2 ܘܰܛܥܰܢܘ ܝܽܘܩܪܳܐ ܕ݁ܰܚܕ݂ܳܕ݂ܶܐ̈ ܆ ܕ݁ܗܳܟ݂ܰܢܳܐ ܡܡܰܠܶܝܬ݁ܽܘܢ ܢܳܡܽܘܣܶܗ ܕ݁ܰܡܫܺܝܚܳܐ . 3 ܐܶܢ ܓ݁ܶܝܪ ܐ̱ܢܳܫ ܣܳܒ݂ܰܪ ܕ݁ܺܐܝܬ݂ܰܘܗ̱ܝ ܡܶܕ݁ܶܡ ܂ ܟ݁ܰܕ݂ ܠܳܐ ܐܺܝܬ݂ܰܘܗ̱ܝ ܆ ܢܰܦ݂ܫܶܗ ܡܰܛܥܶܐ . 4 ܐܶܠܳܐ ܐ̱ܢܳܫ ܥܒ݂ܳܕ݂ܶܗ ܢܶܗܘܶܐ ܒ݁ܳܩܶܐ ܆ ܘܗܳܝܕ݁ܶܝܢ ܒ݁ܰܝܢܰܘܗ̱ܝ ܠܢܰܦ݂ܫܶܗ ܢܶܗܘܶܐ ܫܽܘܒ݂ܗܳܪܶܗ ܂ ܘܠܳܐ ܒ݁ܰܐ̱ܚܪܳܢܶܐ̈ . 5 ܟ݁ܽܠܢܳܫ ܓ݁ܶܝܪ ܡܰܘܒ݁ܠܳܐ ܕ݁ܢܰܦ݂ܫܶܗ ܢܶܫܩܽܘܠ . 6 ܢܶܫܬ݁ܰܘܬ݁ܰܦ݂ ܕ݁ܶܝܢ ܗܰܘ ܕ݁ܫܳܡܰܥ ܡܶܠܬ݂ܳܐ ܠܗܰܘ ܡܰܢ ܕ݁ܡܰܫܡܰܥ ܠܶܗ ܂ ܒ݁ܟ݂ܽܠܗܶܝܢ ܛܳܒ݂ܳܬ݂ܳܐ̈ . 7 ܠܳܐ ܬ݁ܶܛܥܽܘܢ . ܐܰܠܳܗܳܐ ܠܳܐ ܡܶܬ݂ܒ݁ܰܙܰܚ . ܡܶܕ݁ܶܡ ܕ݁ܙܳܪܰܥ ܓ݁ܶܝܪ ܒ݁ܰܪ ܐ̱ܢܳܫܳܐ ܂ ܗܰܘ ܗ̱ܽܘ ܚܳܨܶܕ݂ . 8 ܡܰܢ ܕ݁ܒ݂ܰܒ݂ܣܰܪ ܙܳܪܰܥ ܆ ܡܶܢ ܒ݁ܶܣܪܳܐ ܚܒ݂ܳܠܳܐ ܗ̱ܘ ܚܳܨܶܕ݂ . ܘܡܰܢ ܕ݁ܰܒ݂ܪܽܘܚ ܙܳܪܰܥ ܆ ܡܶܢ ܪܽܘܚܳܐ ܚܰܝܶܐ̈ ܕ݁ܰܠܥܳܠܰܡ ܢܶܚܨܽܘܕ݂ . 9 ܘܟ݂ܰܕ݂ ܥܳܒ݂ܕ݁ܺܝܢܰܢ ܕ݁ܛܳܒ݂ ܆ ܠܳܐ ܗ̱ܘܳܬ݂ ܡܳܐܢܳܐ ܠܰܢ . ܢܶܗܘܶܐ ܓ݁ܶܝܪ ܙܰܒ݂ܢܳܐ ܕ݁ܢܶܚܨܽܘܕ݂ ܆ ܘܠܳܐ ܬ݁ܶܡܰܐܢ ܠܰܢ . 10 ܗܳܫܳܐ ܗܳܟ݂ܺܝܠ ܥܰܕ݂ ܙܰܒ݂ܢܳܐ ܐܺܝܬ݂ ܠܰܢ ܆ ܢܶܦ݂ܠܽܘܚ ܛܳܒ݂ܳܬ݂ܳܐ̈ ܠܘܳܬ݂ ܟ݁ܽܠܢܳܫ . ܝܰܬ݁ܺܝܪܳܐܝܺܬ݂ ܠܘܳܬ݂ ܒ݁ܢܰܝ̈ ܒ݁ܰܝܬ݁ܳܐ ܕ݁ܗܰܝܡܳܢܽܘܬ݂ܳܐ . 11 ܚܙܰܘ ܐܰܝܠܶܝܢ ܟ݁ܬ݂ܺܝܒ݂ܳܢ̈ ܟ݁ܶܬ݂ܒ݁ܶܬ݂ ܠܟ݂ܽܘܢ ܒ݁ܺܐܝܕ݂ܰܝ̈ . 12 ܐܰܝܠܶܝܢ ܕ݁ܨܳܒ݂ܶܝܢ ܕ݁ܢܶܫܬ݁ܰܒ݂ܗܪܽܘܢ ܒ݁ܒ݂ܶܣܪܳܐ ܆ ܗܶܢܽܘܢ ܐܳܠܨܺܝܢ ܠܟ݂ܽܘܢ ܕ݁ܬ݂ܶܬ݂ܓ݁ܰܙܪܽܘܢ ܇ ܕ݁ܒ݂ܰܠܚܽܘܕ݂ ܒ݁ܰܙܩܺܝܦ݂ܶܗ ܕ݁ܰܡܫܺܝܚܳܐ ܠܳܐ ܢܶܬ݂ܪܰܕ݂ܦ݁ܽܘܢ . 13 ܐܳܦ݂ܠܳܐ ܓ݁ܶܝܪ ܗܶܢܽܘܢ ܗܳܠܶܝܢ ܕ݁ܓ݂ܳܙܪܺܝܢ ܢܳܛܪܺܝܢ ܢܳܡܽܘܣܳܐ ܆ ܐܶܠܳܐ ܨܳܒ݂ܶܝܢ ܕ݁ܬ݂ܶܬ݂ܓ݁ܰܙܪܽܘܢ ܇ ܕ݁ܰܒ݂ܒ݂ܶܣܪܟ݂ܽܘܢ ܕ݁ܺܝܠܟ݂ܽܘܢ ܢܶܫܬ݁ܰܒ݂ܗܪܽܘܢ . 14 ܠܺܝ ܕ݁ܶܝܢ ܠܳܐ ܢܶܗܘܶܐ ܠܺܝ ܕ݁ܶܐܫܬ݁ܰܒ݂ܗܰܪ ܆ ܐܶܠܳܐ ܒ݁ܰܙܩܺܝܦ݂ܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ . ܕ݁ܒ݂ܶܗ ܥܳܠܡܳܐ ܙܩܺܝܦ݂ ܠܺܝ ܇ ܘܶܐܢܳܐ ܙܩܺܝܦ݂ ܐ̱ܢܳܐ ܠܥܳܠܡܳܐ . 15 ܠܳܐ ܓ݁ܶܝܪ ܓ݁ܙܽܘܪܬ݁ܳܐ ܐܺܝܬ݂ܶܝܗ ܡܶܕ݁ܶܡ ܂ ܘܠܳܐ ܥܽܘܪܠܽܘܬ݂ܳܐ ܆ ܐܶܠܳܐ ܒ݁ܪܺܝܬ݂ܳܐ ܚܕ݂ܰܬ݂ܳܐ . 16 ܘܰܐܝܠܶܝܢ ܕ݁ܰܠܗܳܢܳܐ ܫܒ݂ܺܝܠܳܐ ܫܳܠܡܺܝܢ ܆ ܫܠܳܡܳܐ ܢܶܗܘܶܐ ܥܠܰܝܗܽܘܢ ܘܪܰܚܡܶܐ̈ ܇ ܘܥܰܠ ܐܺܝܣܪܳܝܶܠ ܕ݁ܰܐܠܳܗܳܐ ܀ 17 ܡܶܟ݁ܺܝܠ ܠܺܝ ܐ̱ܢܳܫ ܥܰܡܠܳܐ ܠܳܐ ܢܰܪܡܶܐ ܆ ܐܶܢܳܐ ܓ݁ܶܝܪ ܟ݁ܽܘܬ݂ܡܳܬ݂ܶܗ̈ ܕ݁ܡܳܪܰܢ ܝܶܫܽܘܥ ܒ݁ܦ݂ܰܓ݂ܪܝ ܫܩܺܝܠ ܐ̱ܢܳܐ . 18 ܛܰܝܒ݁ܽܘܬ݂ܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܟ݂ܽܘܢ ܐܰܚܰܝ̈ ܂ ܐܰܡܺܝܢ ܀.܀.܀܀