Hebrews (Peshitta Version) - ܐܓܪܬܐ ܕܠܘܬ ܥܒܪ̈ܝܐ

1 Chapter 1 1 1 ܒ݁ܟ݂ܽܠ ܡܢܰܘܳܢ̈ ܘܰܒ݂ܟ݂ܽܠ ܕ݁ܶܡܘܳܢ̈ ܁ ܡܰܠܶܠ ܐܰܠܳܗܳܐ ܥܰܡ ܐܰܒ݂ܳܗܰܝܢ̈ ܒ݁ܰܢܒ݂ܺܝܶܐ̈ ܡܶܢ ܩܕ݂ܺܝܡ . 2 ܘܰܒ݂ܗܳܠܶܝܢ ܝܰܘܡܳܬ݂ܳܐ̈ ܐ̱ܚܪܳܝܶܐ̈ ܁ ܡܰܠܶܠ ܥܰܡܰܢ ܒ݁ܰܒ݂ܪܶܗ . ܕ݁ܠܶܗ ܣܳܡ ܝܳܪܬ݁ܳܐ ܕ݁ܟ݂ܽܠܡܶܕ݁ܶܡ . ܘܒ݂ܶܗ ܥܒ݂ܰܕ݂ ܠܥܳܠܡܶܐ̈ . 3 ܕ݁ܗܽܘܝܽܘ ܨܶܡܚܳܐ ܕ݁ܫܽܘܒ݂ܚܶܗ ܁ ܘܨܰܠܡܳܐ ܕ݁ܺܐܝܬ݂ܽܘܬ݂ܶܗ ܁ ܘܰܐܚܺܝܕ݂ ܟ݁ܽܠ ܒ݁ܚܰܝܠܳܐ ܕ݁ܡܶܠܬ݂ܶܗ . ܘܗܽܘ ܒ݁ܰܩܢܽܘܡܶܗ ܥܒ݂ܰܕ݂ ܕ݁ܽܘܟ݁ܳܝܳܐ ܕ݁ܰܚܛܳܗܰܝܢ̈ ܘܺܝܬ݂ܶܒ݂ ܥܰܠ ܝܰܡܺܝܢܳܐ ܕ݁ܪܰܒ݁ܽܘܬ݂ܳܐ ܒ݁ܰܡܪܰܘܡܶܐ̈ . 4 ܘܗܳܢܳܐ ܟ݁ܽܠܶܗ ܝܺܪܶܒ݂ ܡܶܢ ܡܰܠܰܐܟ݂ܶܐ̈ ܆ ܐܰܝܟ݂ ܡܳܐ ܕ݁ܰܡܝܰܬ݁ܰܪ ܫܡܳܐ ܕ݁ܺܝܪܶܬ݂ ܡܶܢ ܕ݁ܺܝܠܗܽܘܢ . 5 ܠܰܐܝܢܳܐ ܓ݁ܶܝܪ ܡܶܢ ܡܰܠܰܐܟ݂ܶܐ̈ ܡܶܡܬ݂ܽܘܡ ܐܶܡܰܪ ܐܰܠܳܗܳܐ . ܕ݁ܒ݂ܶܪܝ ܐܰܢ̱ܬ݁ . ܐܶܢܳܐ ܝܰܘܡܳܢܳܐ ܝܺܠܶܕ݁ܬ݁ܳܟ݂ ܆ ܘܬ݂ܽܘܒ݂ ܁ ܕ݁ܶܐܢܳܐ ܐܶܗܘܶܐ ܠܶܗ ܠܰܐܒ݂ܳܐ ܇ ܘܗܽܘ ܢܶܗܘܶܐ ܠܺܝ ܠܰܒ݂ܪܳܐ . 6 ܬ݁ܽܘܒ݂ ܕ݁ܶܝܢ ܁ ܐܶܡܰܬ݂ܝ ܕ݁ܡܰܥܶܠ ܒ݁ܽܘܟ݂ܪܳܐ ܠܥܳܠܡܳܐ ܆ ܐܶܡܰܪ . ܕ݁ܠܶܗ ܢܶܣܓ݁ܕ݂ܽܘܢ ܟ݁ܽܠܗܽܘܢ ܡܰܠܰܐܟ݂ܶܐ̈ ܕ݁ܰܐܠܳܗܳܐ . 7 ܥܰܠ ܡܰܠܰܐܟ݂ܶܐ̈ ܕ݁ܶܝܢ ܗܳܟ݂ܰܢܳܐ ܐܶܡܰܪ . ܕ݁ܰܥܒ݂ܰܕ݂ ܡܰܠܰܐܟ݂ܰܘܗ̱ܝ̈ ܪܽܘܚ ܇ ܘܰܡܫܰܡܫܳܢܰܘܗ̱ܝ̈ ܢܽܘܪ ܝܳܩܕ݁ܳܐ . 8 ܥܰܠ ܒ݁ܪܳܐ ܕ݁ܶܝܢ ܐܶܡܰܪ . ܕ݁ܟ݂ܽܘܪܣܝܳܟ݂ ܕ݁ܺܝܠܳܟ݂ ܐܰܠܳܗܳܐ ܠܥܳܠܰܡ ܥܳܠܡܺܝܢ . ܫܰܒ݂ܛܳܐ ܦ݁ܫܺܝܛܳܐ ܫܰܒ݂ܛܳܐ ܕ݁ܡܰܠܟ݁ܽܘܬ݂ܳܟ݂ . 9 ܪܚܶܡܬ݁ ܟ݁ܺܐܢܽܘܬ݂ܳܐ ܘܰܣܢܰܝܬ݁ ܥܰܘܠܳܐ ܆ ܡܶܛܽܠ ܗܳܢܳܐ ܡܰܫܚܳܟ݂ ܐܰܠܳܗܳܐ ܐܰܠܳܗܳܟ݂ ܇ ܡܶܫܚܳܐ ܕ݁ܚܰܕ݂ܽܘܬ݂ܳܐ ܁ ܝܰܬ݁ܺܝܪ ܡܶܢ ܚܰܒ݂ܪܰܝܟ݁̈ . 10 ܘܬ݂ܽܘܒ݂ ܁ ܐܰܢ̱ܬ݁ ܡܶܢ ܒ݁ܪܺܝܫܺܝܬ݂ ܣܳܡܬ݁ ܫܶܬ݂ܶܐܣܶܝܗ̈ ܕ݁ܰܐܪܥܳܐ . ܘܰܫܡܰܝܳܐ ܥܒ݂ܳܕ݂ ܐܺܝܕ݂ܰܝܟ݁̈ ܐܶܢܽܘܢ . 11 ܗܶܢܽܘܢ ܢܶܥܒ݁ܪܽܘܢ ܘܰܐܢ̱ܬ݁ ܩܰܝܳܡ ܐܰܢ̱ܬ݁ . ܘܟ݂ܽܠܗܽܘܢ ܐܰܝܟ݂ ܢܰܚܬ݁ܳܐ ܢܶܒ݂ܠܽܘܢ . 12 ܘܰܐܝܟ݂ ܬ݁ܰܟ݂ܣܺܝܬ݂ܳܐ ܬ݁ܶܥܽܘܦ݂ ܐܶܢܽܘܢ . ܗܶܢܽܘܢ ܢܶܬ݂ܚܰܠܦ݂ܽܘܢ . ܘܰܐܢ̱ܬ݁ ܐܰܝܟ݂ ܕ݁ܺܐܝܬ݂ܰܝܟ݁ ܐܰܢ̱ܬ݁ . ܘܰܫܢܰܝܟ݁̈ ܠܳܐ ܢܶܓ݂ܡܪܳܢ̈ . 13 ܠܡܰܢ ܕ݁ܶܝܢ ܡܶܢ ܡܰܠܰܐܟ݂ܶܐ̈ ܡܶܡܬ݂ܽܘܡ ܐܶܡܰܪ . ܕ݁ܬ݂ܶܒ݂ ܡܶܢ ܝܰܡܺܝܢܝ ܆ ܥܕ݂ܰܡܳܐ ܕ݁ܶܐܣܺܝܡ ܒ݁ܥܶܠܕ݁ܒ݂ܳܒ݂ܰܝܟ݁̈ ܟ݁ܽܘܒ݂ܫܳܐ ܬ݁ܚܶܝܬ݂ ܪܶܓ݂ܠܰܝܟ݁̈ . 14 ܠܳܐ ܗܳܐ ܟ݁ܽܠܗܽܘܢ ܐܺܝܬ݂ܰܝܗܽܘܢ ܪܽܘܚܶܐ̈ ܕ݁ܬ݂ܶܫܡܶܫܬ݁ܳܐ ܆ ܕ݁ܡܶܫܬ݁ܰܕ݂ܪܺܝܢ ܒ݁ܬ݂ܶܫܡܶܫܬ݁ܳܐ ܡܶܛܽܠ ܐܰܝܠܶܝܢ ܕ݁ܰܥܬ݂ܺܝܕ݂ܺܝܢ ܠܡܺܐܪܰܬ݂ ܚܰܝܶܐ̈ ܀

2 Chapter 2 1 ܡܶܛܽܠ ܗܳܢܳܐ ܚܰܝܳܒ݂ܺܝܢܰܢ ܆ ܕ݁ܝܰܬ݁ܺܝܪܳܐܝܺܬ݂ ܢܶܗܘܶܐ ܙܗܺܝܪܺܝܢ ܒ݁ܡܶܕ݁ܶܡ ܕ݁ܰܫܡܰܥܢ ܕ݁ܠܳܐ ܢܶܦ݁ܶܠ . 2 ܐܶܢ ܓ݁ܶܝܪ ܡܶܠܬ݂ܳܐ ܕ݁ܶܐܬ݂ܡܰܠܠܰܬ݂ ܒ݁ܝܰܕ݂ ܡܰܠܰܐܟ݂ܶܐ̈ ܐܶܫܬ݁ܰܪܪܰܬ݂ : ܘܟ݂ܽܠ ܕ݁ܫܰܡܥܳܗ ܘܰܥܒ݂ܰܪ ܥܠܶܝܗ ܩܰܒ݁ܶܠ ܦ݁ܽܘܪܥܳܢܳܐ ܒ݁ܟ݂ܺܐܢܽܘܬ݂ܳܐ ܆ 3 ܐܰܝܟ݁ܰܢܳܐ ܚܢܰܢ ܢܶܥܪܽܘܩ ܇ ܐܶܢ ܢܰܒ݂ܣܶܐ ܥܰܠ ܐܰܝܠܶܝܢ ܕ݁ܗܶܢܽܘܢ ܐܶܢܽܘܢ ܚܰܝܰܝܢ̈ ܇ ܗܳܢܽܘܢ ܕ݁ܫܰܪܺܝܘ ܡܶܢ ܡܳܪܰܢ ܠܡܶܬ݂ܡܰܠܳܠܽܘ . ܘܡܶܢ ܐܰܝܠܶܝܢ ܕ݁ܡܶܢܶܗ ܫܡܰܥܘ ܁ ܒ݁ܰܢ ܐܶܫܬ݁ܰܪܰܪܘ ܇ 4 ܟ݁ܰܕ݂ ܣܳܗܶܕ݂ ܥܠܰܝܗܽܘܢ ܐܰܠܳܗܳܐ . ܒ݁ܳܐܬ݂ܘܳܬ݂ܳܐ̈ . ܘܰܒ݂ܬ݂ܶܕ݂ܡܪܳܬ݂ܳܐ̈ . ܘܰܒ݂ܚܰܝܠܶܐ̈ ܡܫܰܚܠܦ݂ܶܐ̈ . ܘܰܒ݂ܦ݂ܽܘܠܳܓ݂ܶܐ̈ ܕ݁ܪܽܘܚܳܐ ܕ݁ܩܽܘܕ݂ܫܳܐ ܇ ܕ݁ܶܐܬ݂ܺܝܗܶܒ݂ܘ ܐܰܝܟ݂ ܨܶܒ݂ܝܳܢܶܗ ܀ 5 ܠܳܐ ܗ̱ܘܳܐ ܓ݁ܶܝܪ ܠܡܰܠܰܐܟ݂ܶܐ̈ ܫܰܥܒ݁ܶܕ݂ ܥܳܠܡܳܐ ܕ݁ܰܥܬ݂ܺܝܕ݂ ܁ ܕ݁ܰܥܠܰܘܗ̱ܝ ܡܡܰܠܠܺܝܢܰܢ ܆ 6 ܐܶܠܳܐ ܐܰܝܟ݂ ܕ݁ܡܰܣܗܶܕ݂ ܟ݁ܬ݂ܳܒ݂ܳܐ ܘܳܐܡܰܪ . ܡܳܢܰܘ ܓ݁ܰܒ݂ܪܳܐ ܕ݁ܶܥ̱ܗܰܕ݁ܬ݁ܳܝܗ̱ܝ ܇ ܘܰܒ݂ܪܶܗ ܕ݁ܐ̱ܢܳܫܳܐ ܕ݁ܰܣܥܰܪܬ݁ܳܝܗ̱ܝ . 7 ܐܰܡܶܟ݂ܬ݁ܳܝܗ̱ܝ ܩܰܠܺܝܠ ܡܶܢ ܡܰܠܰܐܟ݂ܶܐ̈ . ܬ݁ܶܫܒ݁ܽܘܚܬ݁ܳܐ ܘܺܐܝܩܳܪܳܐ ܣܳܡܬ݁ ܒ݁ܪܺܝܫܶܗ . ܘܰܐܫܠܶܛܬ݁ܳܝܗ̱ܝ ܒ݁ܰܥܒ݂ܳܕ݂ܳܐ ܕ݁ܺܐܝܕ݂ܰܝܟ݁̈ . 8 ܘܟ݂ܽܠ ܡܶܕ݁ܶܡ ܫܰܥܒ݁ܶܕ݁ܬ݁ ܬ݁ܚܶܝܬ݂ ܪܶܓ݂ܠܰܘܗ̱ܝ̈ . ܒ݁ܗܳܝ ܕ݁ܶܝܢ ܕ݁ܟ݂ܽܠ ܡܶܕ݁ܶܡ ܫܰܥܒ݁ܶܕ݂ ܠܶܗ ܆ ܠܳܐ ܫܒ݂ܰܩ ܡܶܕ݁ܶܡ ܕ݁ܠܳܐ ܡܫܰܥܒ݁ܰܕ݂ . ܗܳܫܳܐ ܕ݁ܶܝܢ ܠܳܐ ܥܕ݂ܰܟ݁ܺܝܠ ܚܳܙܶܝܢܰܢ ܆ ܕ݁ܟ݂ܽܠ ܡܶܕ݁ܶܡ ܡܫܰܥܒ݁ܰܕ݂ ܠܶܗ . 9 ܗܰܘ ܕ݁ܶܝܢ ܕ݁ܡܰܟ݂ ܩܰܠܺܝܠ ܡܶܢ ܡܰܠܰܐܟ݂ܶܐ̈ ܁ ܚܳܙܶܝܢܰܢ ܆ ܕ݁ܗܽܘܝܽܘ ܝܶܫܽܘܥ ܡܶܛܽܠ ܚܰܫܳܐ ܕ݁ܡܰܘܬ݁ܶܗ . ܘܬ݂ܶܫܒ݁ܽܘܚܬ݁ܳܐ ܘܺܐܝܩܳܪܳܐ ܣܺܝܡ ܒ݁ܪܺܝܫܶܗ . ܗܽܘ ܓ݁ܶܝܪ ܒ݁ܛܰܝܒ݁ܽܘܬ݂ܶܗ ܐܰܠܳܗܳܐ ܚܠܳܦ݂ ܟ݁ܽܠܢܳܫ ܛܥܶܡ ܡܰܘܬ݁ܳܐ . 10 ܝܳܐܶܐ ܗ̱ܘܳܐ ܓ݁ܶܝܪ ܠܗܰܘ ܕ݁ܟ݂ܽܠ ܒ݁ܺܐܝܕ݂ܶܗ ܘܟ݂ܽܠ ܡܶܛܽܠܳܬ݂ܶܗ : ܘܰܒ݂ܢܰܝܳܐ̈ ܣܰܓ݁ܺܝܶܐܐ̈ ܐܰܥܶܠ ܠܬ݂ܶܫܒ݁ܽܘܚܬ݁ܳܐ ܆ ܕ݁ܰܠܪܺܝܫܳܐ ܕ݁ܚܰܝܰܝܗܽܘܢ̈ ܒ݁ܚܰܫܶܗ ܢܶܓ݂ܡܪܺܝܘܗ̱ 11 ܗܰܘ ܓ݁ܶܝܪ ܕ݁ܩܰܕ݁ܶܫ ܘܗܳܢܽܘܢ ܕ݁ܶܐܬ݂ܩܰܕ݁ܰܫܘ ܆ ܡܶܢ ܚܰܕ݂ ܐܶܢܽܘܢ ܟ݁ܽܠܗܽܘܢ . ܡܶܛܽܠ ܗܳܢܳܐ ܠܳܐ ܒ݁ܗܶܬ݂ ܕ݁ܢܶܩܪܶܐ ܐܶܢܽܘܢ ܐܰܚܰܘܗ̱ܝ̈ ܇ 12 ܟ݁ܰܕ݂ ܐܳܡܰܪ ܁ ܐܶܣܰܒ݁ܰܪ ܫܡܳܟ݂ ܠܰܐܚܰܝ̈ ܆ ܘܰܒ݂ܓ݂ܰܘܳܗ ܕ݁ܥܺܕ̱݁ܬ݁ܳܐ ܐܶܫܰܒ݁ܚܳܟ݂ . 13 ܘܬ݂ܽܘܒ݂ . ܕ݁ܶܐܢܳܐ ܐܶܗܘܶܐ ܬ݁ܟ݂ܺܝܠ ܥܠܰܘܗ̱ܝ . ܘܬ݂ܽܘܒ݂ . ܗܳܐ ܐܶܢܳܐ ܘܰܒ݂ܢܰܝܳܐ̈ ܕ݁ܝܰܗ̱ܒ݂ ܠܺܝ ܐܰܠܳܗܳܐ . 14 ܡܶܛܽܠ ܓ݁ܶܝܪ ܕ݁ܰܒ݂ܢܰܝܳܐ̈ ܐܶܫܬ݁ܰܘܬ݁ܰܦ݂ܘ ܒ݁ܒ݂ܶܣܪܳܐ ܘܰܕ݂ܡܳܐ ܆ ܐܳܦ݂ ܗܽܘ ܒ݁ܳܗ ܒ݁ܰܕ݂ܡܽܘܬ݂ܳܐ ܐܶܫܬ݁ܰܘܬ݁ܰܦ݂ ܒ݁ܗܶܝܢ ܒ݁ܗܳܠܶܝܢ ܇ ܕ݁ܰܒ݂ܡܰܘܬ݁ܶܗ ܢܒܰܛܶܠ ܠܡܰܢ ܕ݁ܰܐܚܺܝܕ݂ ܫܽܘܠܛܳܢܳܐ ܕ݁ܡܰܘܬ݁ܳܐ ܁ ܕ݁ܺܐܝܬ݂ܰܘܗ̱ܝ ܣܳܛܳܢܳܐ ܇ 15 ܘܢܶܫܪܶܐ ܠܗܳܢܽܘܢ ܐܰܝܠܶܝܢ ܕ݁ܰܒ݂ܕ݂ܶܚܠܬ݂ܳܐ ܕ݁ܡܰܘܬ݁ܳܐ ܒ݁ܟ݂ܽܠܗܽܘܢ ܚܰܝܰܝܗܽܘܢ̈ ܡܫܰܥܒ݁ܕ݂ܺܝܢ ܗ̱ܘܰܘ ܠܥܰܒ݂ܕ݁ܽܘܬ݂ܳܐ . 16 ܠܳܐ ܗ̱ܘܳܐ ܓ݁ܶܝܪ ܥܰܠ ܡܰܠܰܐܟ݂ܶܐ̈ ܡܰܫܠܰܛ ܗ̱ܘܳܐ ܡܰܘܬ݁ܳܐ ܆ ܐܶܠܳܐ ܥܰܠ ܙܰܪܥܶܗ ܕ݁ܰܐܒ݂ܪܳܗܳܡ ܡܰܫܠܰܛ ܗ̱ܘܳܐ . 17 ܡܶܛܽܠ ܗܳܢܳܐ ܙܳܕ݂ܶܩ ܗ̱ܘܳܐ ܆ ܕ݁ܰܒ݂ܟ݂ܽܠ ܡܶܕ݁ܶܡ ܢܶܬ݁ܕ݁ܰܡܶܐ ܠܰܐܚܰܘܗ̱ܝ̈ ܇ ܕ݁ܢܶܗܘܶܐ ܡܪܰܚܡܳܢܳܐ ܘܪܰܒ݂ ܟ݁ܽܘܡܪܶܐ̈ ܡܗܰܝܡܢܳܐ ܒ݁ܕ݂ܰܐܠܳܗܳܐ ܇ ܘܢܶܗܘܶܐ ܡܚܰܣܶܐ ܥܰܠ ܚܛܳܗܰܘܗ̱ܝ̈ ܕ݁ܥܰܡܳܐ . 18 ܒ݁ܗܳܝ ܓ݁ܶܝܪ ܕ݁ܗܽܘ ܚܰܫ ܘܶܐܬ݂ܢܰܣܺܝ ܆ ܡܶܫܟ݁ܰܚ ܕ݁ܰܢܥܰܕ݁ܰܪ ܠܰܐܝܠܶܝܢ ܕ݁ܡܶܬ݂ܢܰܣܶܝܢ ܀

3 Chapter 3 1 ܡܶܟ݁ܺܝܠ ܐܰܚܰܝ̈ ܩܰܕ݁ܺܝܫܶܐ̈ ܕ݁ܶܐܬ݂ܩܪܺܝܬ݁ܽܘܢ ܒ݁ܩܶܪܝܳܢܳܐ ܕ݁ܡܶܢ ܫܡܰܝܳܐ ܆ ܚܙܰܐܘܽܗ̱ܝ ܠܗܳܢܳܐ ܫܠܺܝܚܳܐ ܘܪܰܒ݂ ܟ݁ܽܘܡܪܶܐ̈ ܕ݁ܬ݂ܰܘܕ݁ܺܝܬ݂ܰܢ ܝܶܫܽܘܥ ܡܫܺܝܚܳܐ ܇ 2 ܕ݁ܰܡܗܰܝܡܰܢ ܠܡܰܢ ܕ݁ܥܰܒ݂ܕ݁ܶܗ ܐܰܝܟ݂ ܡܽܘܫܶܐ ܒ݁ܟ݂ܽܠܶܗ ܒ݁ܰܝܬ݁ܶܗ . 3 ܣܰܓ݁ܺܝܳܐܐ ܗ̱ܝ ܓ݁ܶܝܪ ܬ݁ܶܫܒ݁ܽܘܚܬ݁ܶܗ ܕ݁ܗܳܢܳܐ ܛܳܒ݂ ܡܶܢ ܕ݁ܡܽܘܫܶܐ ܆ ܐܰܝܟ݁ܰܢܳܐ ܕ݁ܣܰܓ݁ܺܝ ܐܺܝܩܳܪܳܐ ܕ݁ܒ݂ܰܢܳܝܶܗ ܕ݁ܒ݂ܰܝܬ݁ܳܐ ܛܳܒ݂ ܡܶܢ ܒ݁ܶܢܝܳܢܶܗ . 4 ܟ݁ܽܠ ܒ݁ܰܝܬ݁ܳܐ ܓ݁ܶܝܪ ܡܶܢ ܐ̱ܢܳܫ ܗ̱ܽܘ ܡܶܬ݂ܒ݁ܢܶܐ ܆ ܗܰܘ ܕ݁ܶܝܢ ܕ݁ܒ݂ܳܢܶܐ ܟ݁ܽܠ ܁ ܐܰܠܳܗܳܐ ܗ̱ܘ . 5 ܘܡܽܘܫܶܐ ܐܰܝܟ݂ ܥܰܒ݂ܕ݁ܳܐ ܐܶܬ݂ܗܰܝܡܰܢ ܒ݁ܒ݂ܰܝܬ݁ܳܐ ܟ݁ܽܠܶܗ : ܠܣܳܗܕ݁ܽܘܬ݂ܳܐ ܕ݁ܰܐܝܠܶܝܢ ܕ݁ܰܥܬ݂ܺܝܕ݂ܳܢ̈ ܗ̱ܘܰܝ̈ ܠܡܶܬ݂ܡܰܠܳܠܽܘ ܒ݁ܺܐܝܕ݂ܶܗ ܆ 6 ܡܫܺܝܚܳܐ ܕ݁ܶܝܢ ܐܰܝܟ݂ ܒ݁ܪܳܐ ܥܰܠ ܒ݁ܰܝܬ݁ܶܗ . ܘܺܐܝܬ݂ܰܘܗ̱ܝ ܒ݁ܰܝܬ݁ܶܗ ܚܢܰܢ ܆ ܐܶܢ ܥܕ݂ܰܡܳܐ ܠܚܰܪܬ݂ܳܐ ܢܶܐܚܽܘܕ݂ ܓ݁ܰܠܝܽܘܬ݂ ܐܰܦ݁ܶܐ̈ ܘܫܽܘܒ݂ܗܳܪܳܐ ܕ݁ܣܰܒ݂ܪܶܗ . 7 ܡܶܛܽܠ ܕ݁ܶܐܡܪܰܬ݂ ܪܽܘܚܳܐ ܕ݁ܩܽܘܕ݂ܫܳܐ . ܕ݁ܝܰܘܡܳܢܳܐ ܐܶܢ ܒ݁ܩܳܠܶܗ ܬ݁ܶܫܡܥܽܘܢ ܆ 8 ܠܳܐ ܬ݁ܩܰܫܽܘܢ ܠܶܒ݁ܰܘܳܬ݂ܟ݂ܽܘܢ̈ ܠܡܰܪܓ݁ܳܙܽܘܬ݂ܶܗ ܇ ܐܰܝܟ݂ ܡܡܰܪܡܪܳܢܶܐ̈ ܘܰܐܝܟ݂ ܝܰܘܡܳܐ ܕ݁ܢܶܣܝܽܘܢܳܐ ܕ݁ܰܒ݂ܡܰܕ݂ܒ݁ܪܳܐ ܇ 9 ܕ݁ܢܰܣܝܽܘܢܝ ܐܰܒ݂ܳܗܰܝܟ݁ܽܘܢ̈ ܇ ܘܰܒ݂ܩܰܘ ܚܙܰܘ ܥܒ݂ܳܕ݂ܰܝ̈ ܐܰܪܒ݁ܥܺܝܢ ܫܢܺܝܢ̈ . 10 ܡܶܛܽܠ ܗܳܢܳܐ ܡܶܐܢܰܬ݂ ܠܺܝ ܒ݁ܕ݂ܳܪܳܐ ܗܰܘ ܘܶܐܡܪܶܬ݂ ܆ ܕ݁ܥܰܡܳܐ ܗ̱ܘ ܕ݁ܛܳܥܶܐ ܠܶܒ݁ܗܽܘܢ . ܘܗܶܢܽܘܢ ܠܳܐ ܝܺܕ݂ܰܥܘ ܐܽܘܪܚܳܬ݂ܝ̈ . 11 ܘܰܐܝܟ݂ ܕ݁ܺܝܡܺܝܬ݂ ܒ݁ܪܽܘܓ݂ܙܝ ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܝ ܀ 12 ܐܶܙܕ݁ܰܗ̱ܪܘ ܗܳܟ݂ܺܝܠ ܐܰܚܰܝ̈ ܆ ܕ݁ܰܠܡܳܐ ܢܶܗܘܶܐ ܒ݁ܐ̱ܢܳܫ ܡܶܢܟ݂ܽܘܢ ܠܶܒ݁ܳܐ ܒ݁ܺܝܫܳܐ ܕ݁ܠܳܐ ܡܗܰܝܡܶܢ ܇ ܘܬ݂ܶܦ݂ܪܩܽܘܢ ܡܶܢ ܐܰܠܳܗܳܐ ܚܰܝܳܐ . 13 ܐܶܠܳܐ ܒ݁ܥܰܘ ܡܶܢ ܢܰܦ݂ܫܟ݂ܽܘܢ ܟ݁ܽܠܗܽܘܢ ܝܰܘܡܳܬ݂ܳܐ̈ ܁ ܥܕ݂ܰܡܳܐ ܠܝܰܘܡܳܐ ܕ݁ܡܶܬ݂ܩܪܶܐ ܝܰܘܡܳܢܳܐ ܆ ܕ݁ܠܳܐ ܢܶܬ݂ܩܰܫܶܐ ܐ̱ܢܳܫ ܡܶܢܟ݂ܽܘܢ ܒ݁ܛܳܥܝܽܘܬ݂ܳܐ ܕ݁ܰܚܛܺܝܬ݂ܳܐ ܀.܀.܀܀ 2 14 ܐܶܬ݂ܚܰܠܰܛܢ ܓ݁ܶܝܪ ܥܰܡ ܡܫܺܝܚܳܐ ܆ ܐܶܢ ܡܶܢ ܪܺܝܫܺܝܬ݂ܳܐ ܘܰܥܕ݂ܰܡܳܐ ܠܰܐ̱ܚܪܳܝܬ݁ܳܐ ܇ ܒ݁ܶܗ ܒ݁ܰܩܝܳܡܳܐ ܗܳܢܳܐ ܫܰܪܺܝܪܳܐ ܢܚܰܡܣܶܢ . 15 ܐܰܝܟ݁ܰܢܳܐ ܕ݁ܰܐܡܺܝܪ . ܕ݁ܝܰܘܡܳܢܳܐ ܐܶܢ ܒ݁ܰܪ̱ܬ݂ ܩܳܠܶܗ ܬ݁ܶܫܡܥܽܘܢ ܆ ܠܳܐ ܬ݁ܩܰܫܽܘܢ ܠܶܒ݁ܰܘܳܬ݂ܟ݂ܽܘܢ̈ ܠܡܰܪܓ݁ܳܙܽܘܬ݂ܶܗ . 16 ܡܰܢ ܐܶܢܽܘܢ ܓ݁ܶܝܪ ܗܳܢܽܘܢ ܕ݁ܰܫܡܰܥܘ ܘܰܐܪܓ݁ܙܽܘܗ̱ܝ . ܠܳܐ ܟ݁ܽܠܗܽܘܢ ܗܳܠܶܝܢ ܕ݁ܰܢܦ݂ܰܩܘ ܡܶܢ ܡܶܨܪܶܝܢ ܒ݁ܝܰܕ݂ ܡܽܘܫܶܐ ܆ 17 ܘܒ݂ܰܐܝܠܶܝܢ ܡܶܐܢܰܬ݂ ܠܶܗ ܐܰܪܒ݁ܥܺܝܢ ܫܢܺܝܢ̈ . ܐܶܠܳܐ ܒ݁ܗܳܢܽܘܢ ܕ݁ܰܚܛܰܘ ܘܓ݂ܰܪܡܰܝܗܽܘܢ̈ ܢܦ݂ܰܠܘ ܒ݁ܡܰܕ݂ܒ݁ܪܳܐ ܆ 18 ܘܥܰܠ ܐܰܝܠܶܝܢ ܝܺܡܳܐ ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܶܗ ܆ ܐܶܠܳܐ ܥܰܠ ܗܳܢܽܘܢ ܕ݁ܠܳܐ ܐܶܬ݁ܛܦ݁ܺܝܣܘ ܆ 19 ܘܚܳܙܶܝܢܰܢ ܕ݁ܠܳܐ ܐܶܫܟ݁ܰܚܘ ܠܡܶܥܰܠ ܡܶܛܽܠ ܕ݁ܠܳܐ ܗܰܝܡܶܢܘ ܀

4 Chapter 4 1 ܢܶܕ݂ܚܰܠ ܗܳܟ݂ܺܝܠ ܆ ܕ݁ܰܠܡܳܐ ܟ݁ܰܕ݂ ܩܰܝܳܡ ܡܽܘܠܟ݁ܳܢܳܐ ܕ݁ܡܰܥܰܠܬ݁ܳܐ ܕ݁ܠܰܢܝܳܚܬ݁ܶܗ ܇ ܢܶܫܬ݁ܟ݂ܰܚ ܐ̱ܢܳܫ ܡܶܢܟ݂ܽܘܢ ܕ݁ܦ݂ܳܐܶܫ ܡܶܢ ܕ݁ܰܠܡܶܥܰܠ . 2 ܐܳܦ݂ ܚܢܰܢ ܓ݁ܶܝܪ ܐܶܣܬ݁ܰܒ݁ܰܪܢ ܁ ܐܰܝܟ݂ ܕ݁ܳܐܦ݂ ܗܶܢܽܘܢ ܆ ܐܶܠܳܐ ܠܳܐ ܐܰܘܬ݁ܪܰܬ݂ ܐܶܢܽܘܢ ܠܗܳܢܽܘܢ ܡܶܠܬ݂ܳܐ ܕ݁ܰܫܡܰܥܘ ܇ ܡܶܛܽܠ ܕ݁ܠܳܐ ܡܡܰܙܓ݂ܳܐ ܗ̱ܘܳܬ݂ ܒ݁ܗܰܝܡܳܢܽܘܬ݂ܳܐ ܠܗܳܢܽܘܢ ܕ݁ܫܰܡܥܽܘܗ . 3 ܥܳܐܠܺܝܢܰܢ ܕ݁ܶܝܢ ܠܰܢܝܳܚܬ݁ܳܐ ܚܢܰܢ ܐܰܝܠܶܝܢ ܕ݁ܗܰܝܡܶܢܢ . ܐܰܝܟ݁ܰܢܳܐ ܕ݁ܶܝܢ ܐܶܡܰܪ . ܐܰܝܟ݂ ܕ݁ܺܝܡܺܝܬ݂ ܒ݁ܪܽܘܓ݂ܙܝ ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܝ . ܕ݁ܗܳܐ ܥܒ݂ܳܕ݂ܰܘܗ̱ܝ̈ ܕ݁ܰܐܠܳܗܳܐ ܡܶܢ ܫܽܘܪܳܝܶܗ ܕ݁ܥܳܠܡܳܐ ܗܘܰܘ . 4 ܐܰܝܟ݂ ܕ݁ܶܐܡܰܪ ܥܰܠ ܫܰܒ݁ܬ݂ܳܐ . ܕ݁ܶܐܬ݁ܢܺܝܚ ܐܰܠܳܗܳܐ ܒ݁ܝܰܘܡܳܐ ܫܒ݂ܺܝܥܳܝܳܐ ܡܶܢ ܥܒ݂ܳܕ݂ܰܘܗ̱ܝ̈ ܟ݁ܽܠܗܽܘܢ . 5 ܘܗܳܪܟ݁ܳܐ ܬ݁ܽܘܒ݂ ܐܶܡܰܪ . ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܝ ܀ 6 ܡܶܛܽܠ ܗܳܟ݂ܺܝܠ ܕ݁ܺܐܝܬ݂ ܗ̱ܘܳܐ ܐܰܬ݂ܪܳܐ ܕ݁ܐ̱ܢܳܫ ܐ̱ܢܳܫ ܢܶܥܽܘܠ ܠܶܗ : ܘܗܳܢܽܘܢ ܕ݁ܶܐܣܬ݁ܰܒ݁ܰܪܘ ܩܰܕ݂ܡܳܝܶܐ̈ ܠܳܐ ܥܰܠܘ ܒ݁ܰܕ݂ܠܳܐ ܐܶܬ݁ܛܦ݁ܺܝܣܘ ܆ 7 ܬ݁ܽܘܒ݂ ܝܰܘܡܳܐ ܐ̱ܚܪܺܢܳܐ ܣܳܐܶܡ ܡܶܢ ܒ݁ܳܬ݂ܰܪ ܙܰܒ݂ܢܳܐ ܣܰܓ݁ܺܝܳܐܐ ܇ ܐܰܝܟ݁ܰܢܳܐ ܕ݁ܡܶܢ ܠܥܶܠ ܟ݁ܬ݂ܺܝܒ݂ ܕ݁ܶܐܡܰܪ ܕ݁ܰܘܺܝܕ݂ . ܕ݁ܝܰܘܡܳܢܳܐ ܐܶܢ ܒ݁ܩܳܠܶܗ ܬ݁ܶܫܡܥܽܘܢ ܆ ܠܳܐ ܬ݁ܩܰܫܽܘܢ ܠܶܒ݁ܰܘܳܬ݂ܟ݂ܽܘܢ̈ . 8 ܐܶܠܽܘ ܓ݁ܶܝܪ ܝܶܫܽܘܥ ܒ݁ܰܪ ܢܽܘܢ ܐܰܢܺܝܚ ܗ̱ܘܳܐ ܐܶܢܽܘܢ ܆ ܠܳܐ ܐܳܡܰܪ ܗ̱ܘܳܐ ܡܶܢ ܒ݁ܳܬ݂ܰܪܟ݁ܶܢ ܥܰܠ ܝܰܘܡܳܐ ܐ̱ܚܪܺܢܳܐ . 9 ܡܳܕ݂ܶܝܢ ܩܰܝܳܡ ܗ̱ܽܘ ܠܡܰܫܒ݁ܳܬ݂ܽܘ ܠܥܰܡܶܗ ܕ݁ܰܐܠܳܗܳܐ . 10 ܐܰܝܢܳܐ ܓ݁ܶܝܪ ܕ݁ܥܰܠ ܠܰܢܝܳܚܬ݁ܶܗ ܆ ܐܶܬ݁ܬ݁ܢܺܝܚ ܐܳܦ݂ ܗܽܘ ܡܶܢ ܥܒ݂ܳܕ݂ܰܘܗ̱ܝ̈ ܇ ܐܰܝܟ݂ ܕ݁ܰܐܠܳܗܳܐ ܡܶܢ ܕ݁ܺܝܠܶܗ . 11 ܢܶܬ݂ܚܰܦ݁ܰܛ ܗܳܟ݂ܺܝܠ ܕ݁ܢܶܥܽܘܠ ܠܗܳܝ ܢܝܳܚܬ݁ܳܐ ܆ ܕ݁ܠܳܐ ܢܶܦ݁ܶܠ ܒ݁ܰܕ݂ܡܽܘܬ݂ܳܐ ܕ݁ܗܳܢܽܘܢ ܕ݁ܠܳܐ ܐܶܬ݁ܛܦ݁ܺܝܣܘ . 12 ܚܰܝܳܐ ܗ̱ܝ ܓ݁ܶܝܪ ܡܶܠܬ݂ܶܗ ܕ݁ܰܐܠܳܗܳܐ ܘܟ݂ܽܠ ܣܳܥܪܳܐ . ܘܚܰܪܺܝܦ݂ܳܐ ܛܳܒ݂ ܡܶܢ ܣܰܦ݂ܣܺܪܳܐ ܕ݁ܰܬ݂ܪܶܝܢ̈ ܦ݁ܽܘܡܶܝܗ̈ . ܘܥܳܐܠܳܐ ܥܕ݂ܰܡܳܐ ܠܦ݂ܽܘܪܫܳܢܳܐ ܕ݁ܢܰܦ݂ܫܳܐ ܘܰܕ݂ܪܽܘܚܳܐ ܘܰܕ݂ܫܳܪܝܳܬ݂ܳܐ̈ ܘܰܕ݂ܡܽܘܚܳܐ ܘܰܕ݂ܓ݂ܰܪܡܶܐ̈ . ܘܕ݂ܳܝܢܳܐ ܡܰܚܫܒ݂ܳܬ݂ܳܐ̈ ܘܬ݂ܰܪܥܝܳܬ݂ܳܐ̈ ܕ݁ܠܶܒ݁ܳܐ . 13 ܘܠܰܝܬ݁ ܒ݁ܪܺܝܬ݂ܳܐ ܕ݁ܛܰܫܝܳܐ ܡܶܢ ܩܕ݂ܳܡܶܝܗ ܆ ܐܶܠܳܐ ܟ݁ܽܠ ܡܶܕ݁ܶܡ ܥܰܪܛܶܠ ܘܰܓ݂ܠܶܐ ܩܕ݂ܳܡ ܥܰܝܢܰܘܗ̱ܝ̈ ܇ ܕ݁ܠܶܗ ܝܳܗܒ݁ܺܝܢܰܢ ܦ݁ܶܬ݂ܓ݂ܳܡܳܐ ܀ 14 ܡܶܛܽܠ ܕ݁ܺܐܝܬ݂ ܠܰܢ ܗܳܟ݂ܺܝܠ ܪܰܒ݁ ܟ݁ܽܘܡܪܶܐ̈ ܪܰܒ݁ܳܐ ܝܶܫܽܘܥ ܡܫܺܝܚܳܐ ܁ ܒ݁ܪܶܗ ܕ݁ܰܐܠܳܗܳܐ ܁ ܕ݁ܰܣܠܶܩ ܠܰܫܡܰܝܳܐ ܆ ܢܚܰܡܣܶܢ ܒ݁ܬ݂ܰܘܕ݁ܺܝܬ݂ܶܗ . 15 ܠܳܐ ܓ݁ܶܝܪ ܐܺܝܬ݂ ܠܰܢ ܪܰܒ݁ܟ݁ܽܘܡ̈̈ܪܶܐ ܕ݁ܠܳܐ ܡܨܶܐ ܕ݁ܢܶܚܰܫ ܥܰܡ ܟ݁ܪܺܝܗܽܘܬ݂ܰܢ ܆ ܐܶܠܳܐ ܕ݁ܰܡܢܰܣܰܝ ܒ݁ܟ݂ܽܠܡܶܕ݁ܶܡ ܐܰܟ݂ܘܳܬ݂ܰܢ ܂ ܣܛܰܪ ܡܶܢ ܚܛܺܝܬ݂ܳܐ . 16 ܢܶܬ݂ܩܰܪܰܒ݂ ܗܳܟ݂ܺܝܠ ܒ݁ܰܓ݂ܠܶܐ ܥܺܝܢ ܠܟ݂ܽܘܪܣܝܳܐ ܕ݁ܛܰܝܒ݁ܽܘܬ݂ܶܗ ܆ ܕ݁ܢܶܣܰܒ݂ ܪܰܚܡܶܐ̈ ܘܢܶܫܟ݁ܰܚ ܛܰܝܒ݁ܽܘܬ݂ܳܐ ܇ ܠܥܽܘܕ݂ܪܳܢܳܐ ܒ݁ܙܰܒ݂ܢܳܐ ܕ݁ܽܐܘܠܨܳܢܳܐ ܀

5 Chapter 5 1 ܟ݁ܽܠ ܪܰܒ݁ ܟ݁ܽܘܡܪܶܐ̈ ܓ݁ܶܝܪ ܕ݁ܡܶܢ ܒ݁ܢܰܝܢܳܫܳܐ̈ ܗܳܘܶܐ : ܚܠܳܦ݂ ܒ݁ܢܰܝܢܳܫܳܐ̈ ܩܳܐܶܡ ܥܰܠ ܐܰܝܠܶܝܢ ܕ݁ܕ݂ܰܐܠܳܗܳܐ ܐܶܢܶܝܢ̈ ܆ ܕ݁ܰܢܩܰܪܶܒ݂ ܩܽܘܪܒ݁ܳܢܶܐ̈ ܘܕ݂ܶܒ݂ܚܶܐ̈ ܚܠܳܦ݂ ܚܛܳܗܶܐ̈ ܇ 2 ܐܰܝܢܳܐ ܕ݁ܡܶܫܟ݁ܰܚ ܕ݁ܢܰܡܶܟ݂ ܢܰܦ݂ܫܶܗ ܇ ܘܢܶܚܰܫ ܥܰܡ ܐܰܝܠܶܝܢ ܕ݁ܠܳܐ ܝܳܕ݂ܥܺܝܢ ܘܛܳܥܶܝܢ ܇ ܡܶܛܽܠ ܕ݁ܳܐܦ݂ ܗܽܘ ܟ݁ܪܺܝܗܽܘܬ݂ܳܐ ܠܒ݂ܺܝܫ ܇ 3 ܘܡܶܛܽܠܳܬ݂ܳܗ ܚܰܝܳܒ݂ ܗ̱ܽܘ . ܕ݁ܰܐܝܟ݁ܰܢܳܐ ܕ݁ܰܚܠܳܦ݂ ܥܰܡܳܐ ܆ ܗܳܟ݂ܰܢܳܐ ܐܳܦ݂ ܚܠܳܦ݂ ܢܰܦ݂ܫܶܗ ܢܩܰܪܶܒ݂ ܥܰܠ ܚܛܳܗܰܘܗ̱ܝ̈ . 4 ܘܠܳܐ ܗ̱ܘܳܐ ܠܢܰܦ݂ܫܶܗ ܐ̱ܢܳܫ ܢܳܣܶܒ݂ ܐܺܝܩܳܪܳܐ ܆ ܐܶܠܳܐ ܐܰܝܢܳܐ ܕ݁ܡܶܬ݂ܩܪܶܐ ܡܶܢ ܐܰܠܳܗܳܐ ܁ ܐܰܝܟ݁ܰܢܳܐ ܕ݁ܰܐܗܪܽܘܢ . 5 ܗܳܟ݂ܰܢܳܐ ܐܳܦ݂ ܡܫܺܝܚܳܐ ܠܳܐ ܗ̱ܘܳܐ ܢܰܦ݂ܫܶܗ ܫܰܒ݁ܰܚ ܕ݁ܢܶܗܘܶܐ ܪܰܒ݁ ܟ݁ܽܘܡܪܶܐ̈ ܆ ܐܶܠܳܐ ܗܰܘ ܕ݁ܶܐܡܰܪ ܠܶܗ . ܕ݁ܒ݂ܶܪܝ ܐܰܢ̱ܬ݁ ܇ ܐܶܢܳܐ ܝܰܘܡܳܢܳܐ ܝܺܠܶܕ݁ܬ݁ܳܟ݂ ܇ 6 ܐܰܝܟ݂ ܕ݁ܳܐܦ݂ ܒ݁ܕ݂ܽܘܟ݁ܬ݂ܳܐ ܐ̱ܚܪܺܬ݂ܳܐ ܐܶܡܰܪ . ܕ݁ܰܐܢ̱ܬ݁ ܗ̱ܽܘ ܟ݁ܽܘܡܪܳܐ ܠܥܳܠܰܡ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ . 7 ܐܳܦ݂ ܟ݁ܰܕ݂ ܒ݁ܶܣܪܳܐ ܠܒ݂ܺܝܫ ܗ̱ܘܳܐ ܆ ܒ݁ܳܥܽܘܬ݂ܳܐ ܘܬ݂ܰܟ݂ܫܶܦ݂ܬ݁ܳܐ ܒ݁ܰܓ݂ܥܳܬ݂ܳܐ ܚܰܝܠܬ݂ܳܢܺܝܬ݂ܳܐ ܘܰܒ݂ܕ݂ܶܡܥܶܐ̈ ܩܰܪܶܒ݂ ܗ̱ܘܳܐ ܠܡܰܢ ܕ݁ܡܶܫܟ݁ܰܚ ܗ̱ܘܳܐ ܇ ܡܶܢ ܡܰܘܬ݁ܳܐ ܕ݁ܢܰܚܶܝܘܗ̱ܝ . ܘܶܐܫܬ݁ܡܰܥ . 8 ܘܟ݂ܰܕ݂ ܛܳܒ݂ ܒ݁ܪܳܐ ܐܺܝܬ݂ܰܘܗ̱ܝ ܆ ܡܶܢ ܕ݁ܶܚܠܬ݂ܳܐ ܘܚܰܫܶܐ̈ ܕ݁ܰܣܒ݂ܰܠ ܇ ܝܰܠܦ݁ܳܗ ܠܡܶܫܬ݁ܰܡܥܳܢܽܘܬ݂ܳܐ . 9 ܘܗܳܟ݂ܰܢܳܐ ܐܶܬ݂ܓ݁ܡܰܪ : ܘܰܗܘܳܐ ܠܟ݂ܽܠܗܽܘܢ ܐܰܝܠܶܝܢ ܕ݁ܡܶܫܬ݁ܰܡܥܺܝܢ ܠܶܗ ܁ ܥܶܠܬ݂ܳܐ ܕ݁ܚܰܝܶܐ̈ ܕ݁ܰܠܥܳܠܰܡ ܆ 10 ܘܶܐܫܬ݁ܰܡܰܗ ܡܶܢ ܐܰܠܳܗܳܐ ܪܰܒ݁ ܟ݁ܽܘܡܪܶܐ̈ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ . 11 ܥܠܰܘܗ̱ܝ ܕ݁ܶܝܢ ܥܰܠ ܗܳܢܳܐ ܡܰܠܟ݁ܺܝܙܕ݂ܶܩ ܆ ܣܰܓ݁ܺܝܳܐܐ ܗ̱ܝ ܠܰܢ ܡܶܠܬ݂ܳܐ ܠܡܺܐܡܪܳܗ ܘܥܰܣܩܳܐ ܠܰܡܦ݂ܰܫܳܩܽܘܬ݂ܳܗ ܇ ܡܶܛܽܠ ܕ݁ܰܗܘܰܝܬ݁ܽܘܢ ܠܟ݂ܽܘܢ ܟ݁ܪܺܝܗܶܐ̈ ܒ݁ܡܰܫܡܰܥܬ݂ܟ݂ܽܘܢ . 12 ܚܰܝܳܒ݂ܺܝܢ ܗܘܰܝܬ݁ܽܘܢ ܓ݁ܶܝܪ ܡܰܠܦ݂ܳܢܶܐ̈ ܠܡܶܗܘܳܐ : ܡܶܛܽܠ ܕ݁ܙܰܒ݂ܢܳܐ ܠܟ݂ܽܘܢ ܒ݁ܝܽܘܠܦ݁ܳܢܳܐ ܆ ܗܳܫܳܐ ܕ݁ܶܝܢ ܬ݁ܽܘܒ݂ ܣܢܺܝܩܺܝܢ ܐܢ̱ܬ݁ܽܘܢ ܕ݁ܬ݂ܺܐܠܦ݁ܽܘܢ ܇ ܐܰܝܠܶܝܢ ܐܶܢܶܝܢ̈ ܟ݁ܬ݂ܺܝܒ݂ܳܬ݂ܳܐ̈ ܩܰܕ݂ܡܳܝܳܬ݂ܳܐ̈ ܕ݁ܪܺܝܫ ܡܶܠܰܘܗ̱ܝ̈ ܕ݁ܰܐܠܳܗܳܐ . ܘܰܗܘܰܝܬ݁ܽܘܢ ܠܟ݂ܽܘܢ ܣܢܺܝܩܶܐ̈ ܥܰܠ ܚܰܠܒ݂ܳܐ ܆ ܘܠܳܐ ܥܰܠ ܡܶܐܟ݂ܽܘܠܬ݁ܳܐ ܫܰܪܺܝܪܬ݁ܳܐ . 13 ܟ݁ܽܠܢܳܫ ܕ݁ܶܝܢ ܕ݁ܡܶܐܟ݂ܽܘܠܬ݁ܶܗ ܚܰܠܒ݂ܳܐ ܗ̱ܘ : ܠܳܐ ܡܰܦ݁ܰܣ ܒ݁ܡܶܠܬ݂ܳܐ ܕ݁ܟ݂ܺܐܢܽܘܬ݂ܳܐ ܁ ܡܶܛܽܠ ܕ݁ܫܰܒ݂ܪܳܐ ܗ̱ܘ ܆ 14 ܕ݁ܰܓ݂ܡܺܝܪܶܐ̈ ܗ̱ܝ ܕ݁ܶܝܢ ܡܶܐܟ݂ܽܘܠܬ݁ܳܐ ܫܰܪܺܝܪܬ݁ܳܐ ܇ ܐܰܝܠܶܝܢ ܕ݁ܡܶܛܽܠ ܕ݁ܰܡܕ݂ܰܪܫܺܝܢ ܁ ܐܶܬ݂ܢܰܦ݁ܰܩܘ ܪܶܓ݂ܫܰܝܗܽܘܢ̈ ܠܡܶܦ݂ܪܰܫ ܛܳܒ݂ܬ݂ܳܐ ܘܒ݂ܺܝܫܬ݁ܳܐ ܀

6 Chapter 6 1 ܡܶܛܽܠ ܗܳܢܳܐ ܢܶܫܒ݁ܽܘܩ ܫܽܘܪܳܝܳܐ ܕ݁ܡܶܠܬ݂ܶܗ ܕ݁ܰܡܫܺܝܚܳܐ ܘܢܺܐܬ݂ܶܐ ܠܰܓ݂ܡܺܝܪܽܘܬ݂ܳܐ . ܐܰܘ ܠܡܳܐ ܬ݁ܽܘܒ݂ ܫܶܬ݂ܶܐܣܬ݁ܳܐ ܐ̱ܚܪܺܬ݂ܳܐ ܡܰܪܡܶܝܬ݁ܽܘܢ ܆ ܠܰܬ݂ܝܳܒ݂ܽܘܬ݂ܳܐ ܡܶܢ ܥܒ݂ܳܕ݂ܶܐ̈ ܡܺܝܬ݂ܶܐ̈ . ܘܰܠܗܰܝܡܳܢܽܘܬ݂ܳܐ ܕ݁ܒ݂ܰܐܠܳܗܳܐ . 2 ܘܰܠܝܽܘܠܦ݁ܳܢܳܐ ܕ݁ܡܰܥܡܽܘܕ݂ܺܝܬ݂ܳܐ ܘܕ݂ܰܣܝܳܡ ܐܺܝܕ݂ܳܐ . ܘܠܰܩܝܳܡܬ݁ܳܐ ܕ݁ܡܶܢ ܒ݁ܶܝܬ݂ ܡܺܝܬ݂ܶܐ̈ . ܘܰܠܕ݂ܺܝܢܳܐ ܕ݁ܰܠܥܳܠܰܡ . 3 ܐܶܢ ܡܳܪܝܳܐ ܡܰܦ݁ܶܣ ܆ ܢܶܥܒ݁ܶܕ݂ ܗܳܕ݂ܶܐ . 4 ܐܶܠܳܐ ܠܳܐ ܡܶܫܟ݁ܚܺܝܢ ܗܳܢܽܘܢ ܕ݁ܰܚܕ݂ܳܐ ܙܒ݂ܰܢ ܠܡܰܥܡܽܘܕ݂ܺܝܬ݂ܳܐ ܢܚܶܬ݂ܘ ܘܰܛܥܶܡܘ ܡܰܘܗܰܒ݂ܬ݁ܳܐ ܕ݁ܡܶܢ ܫܡܰܝܳܐ ܇ ܘܰܢܣܰܒ݂ܘ ܪܽܘܚܳܐ ܕ݁ܩܽܘܕ݂ܫܳܐ ܇ 5 ܘܰܛܥܶܡܘ ܡܶܠܬ݂ܳܐ ܛܳܒ݂ܬ݂ܳܐ ܕ݁ܰܐܠܳܗܳܐ ܇ ܘܚܰܝܠܳܐ ܕ݁ܥܳܠܡܳܐ ܕ݁ܰܥܬ݂ܺܝܕ݂ ܆ 6 ܕ݁ܬ݂ܽܘܒ݂ ܢܶܚܛܽܘܢ ܇ ܕ݁ܡܶܢ ܕ݁ܪܺܝܫ ܢܶܬ݂ܚܰܕ݁ܬ݂ܽܘܢ ܠܰܬ݂ܝܳܒ݂ܽܘܬ݂ܳܐ ܇ ܘܡܶܢ ܕ݁ܪܺܝܫ ܢܶܙܩܦ݂ܽܘܢ ܠܰܒ݂ܪܶܗ ܕ݁ܰܐܠܳܗܳܐ ܘܰܢܨܰܥܪܽܘܢ . 7 ܐܰܪܥܳܐ ܓ݁ܶܝܪ ܕ݁ܶܐܫܬ݁ܝܰܬ݂ ܡܶܛܪܳܐ ܕ݁ܶܐܬ݂ܳܐ ܠܳܗ ܙܰܒ݂ܢܺܝܢ̈ ܣܰܓ݁ܺܝܳܐܢ̈ : ܘܰܐܘܥܝܰܬ݂ ܥܶܣܒ݁ܳܐ ܕ݁ܚܳܫܰܚ ܠܗܳܢܽܘܢ ܕ݁ܡܶܛܽܠܳܬ݂ܗܽܘܢ ܡܶܬ݂ܦ݁ܰܠܚܳܐ ܆ ܡܩܰܒ݁ܠܳܐ ܒ݁ܽܘܪܟ݁ܬ݂ܳܐ ܡܶܢ ܐܰܠܳܗܳܐ . 8 ܐܶܢ ܗܽܘ ܕ݁ܶܝܢ ܕ݁ܬ݂ܰܦ݁ܶܩ ܩܽܘܪܛܒ݁ܶܐ̈ ܘܕ݂ܰܪܕ݁ܪܶܐ̈ ܆ ܗܳܘܝܳܐ ܠܳܗ ܡܰܣܠܰܝܬ݁ܳܐ ܘܠܳܐ ܪܰܚܺܝܩܳܐ ܡܶܢ ܠܰܘܛܬ݂ܳܐ ܇ ܐܶܠܳܐ ܚܰܪܬ݂ܳܗ ܝܰܩܕ݁ܳܢܳܐ ܗܽܘ ܀.܀.܀܀ 3 9 ܡܦ݁ܺܝܣܺܝܢܰܢ ܕ݁ܶܝܢ ܥܠܰܝܟ݁ܽܘܢ ܐܰܚܰܝ̈ ܁ ܐܰܝܠܶܝܢ ܕ݁ܫܰܦ݁ܺܝܪܳܢ̈ ܘܩܰܪܺܝܒ݂ܳܢ̈ ܠܚܰܝܶܐ̈ ܆ ܐܳܦ݂ܶܢ ܗܳܟ݂ܰܢܳܐ ܡܡܰܠܠܺܝܢܰܢ . 10 ܠܳܐ ܗ̱ܘܳܐ ܓ݁ܶܝܪ ܥܰܘܳܠ ܐܰܠܳܗܳܐ ܆ ܕ݁ܢܶܛܥܶܐ ܥܒ݂ܳܕ݂ܰܝܟ݁ܽܘܢ̈ . ܘܚܽܘܒ݁ܟ݂ܽܘܢ ܁ ܗܰܘ ܕ݁ܚܰܘܺܝܬ݁ܽܘܢ ܒ݁ܰܫܡܶܗ ܇ ܕ݁ܫܰܡܶܫܬ݁ܽܘܢ ܠܩܰܕ݁ܺܝܫܶܐ̈ ܘܰܡܫܰܡܫܺܝܬ݁ܽܘܢ . 11 ܨܳܒ݂ܶܝܢܰܢ ܕ݁ܶܝܢ ܆ ܕ݁ܐ̱ܢܳܫ ܐ̱ܢܳܫ ܡܶܢܟ݂ܽܘܢ ܗܺܝ ܗܳܕ݂ܶܐ ܚܦ݂ܺܝܛܽܘܬ݂ܳܐ ܢܚܰܘܶܐ ܇ ܠܫܽܘܡܠܳܝܳܐ ܕ݁ܣܰܒ݂ܪܟ݂ܽܘܢ ܥܕ݂ܰܡܳܐ ܠܚܰܪܬ݂ܳܐ ܆ 12 ܘܰܕ݂ܠܳܐ ܬ݁ܶܬ݂ܩܰܛܰܥ ܠܟ݂ܽܘܢ ܇ ܐܶܠܳܐ ܕ݁ܬ݂ܶܗܘܽܘܢ ܡܡܰܪܝܳܢܶܐ̈ ܠܗܳܢܽܘܢ ܕ݁ܰܒ݂ܗܰܝܡܳܢܽܘܬ݂ܳܐ ܘܰܒ݂ܢܰܓ݁ܺܝܪܽܘܬ݂ ܪܽܘܚܳܐ ܗܘܰܘ ܝܳܪܬ݁ܶܐ̈ ܕ݁ܡܽܘܠܟ݁ܳܢܳܐ . 13 ܠܰܐܒ݂ܪܳܗܳܡ ܓ݁ܶܝܪ ܟ݁ܰܕ݂ ܡܠܰܟ݂ ܠܶܗ ܐܰܠܳܗܳܐ : ܡܶܛܽܠ ܕ݁ܠܰܝܬ݁ ܗ̱ܘܳܐ ܠܶܗ ܕ݁ܪܰܒ݁ ܡܶܢܶܗ ܕ݁ܢܺܐܡܶܐ ܒ݁ܶܗ ܆ ܝܺܡܳܐ ܒ݁ܢܰܦ݂ܫܶܗ ܇ 14 ܘܶܐܡܰܪ . ܕ݁ܰܡܒ݂ܰܪܳܟ݂ܽܘ ܐܶܒ݁ܰܪܟ݂ܳܟ݂ ܆ ܘܡܰܣܓ݁ܳܝܽܘ ܐܰܣܓ݁ܶܝܟ݂ . 15 ܘܗܳܟ݂ܰܢܳܐ ܐܶܓ݂ܰܪ ܪܽܘܚܶܗ ܘܩܰܒ݁ܶܠ ܡܽܘܠܟ݁ܳܢܳܐ . 16 ܒ݁ܢܰܝܢܳܫܳܐ̈ ܓ݁ܶܝܪ ܒ݁ܰܕ݂ܪܰܒ݁ ܡܶܢܗܽܘܢ ܝܳܡܶܝܢ . ܘܥܰܠ ܟ݁ܽܠ ܚܶܪܝܳܢ ܕ݁ܗܳܘܶܐ ܒ݁ܰܝܢܳܬ݂ܗܽܘܢ ܆ ܫܽܘܠܳܡܳܐ ܫܰܪܺܝܪܳܐ ܒ݁ܡܰܘܡܳܬ݂ܳܐ̈ ܗܳܘܶܐ ܠܶܗ . 17 ܡܶܛܽܠ ܗܳܢܳܐ ܝܰܬ݁ܺܝܪܳܐܝܺܬ݂ ܨܒ݂ܳܐ ܐܰܠܳܗܳܐ ܆ ܕ݁ܰܢܚܰܘܶܐ ܠܝܳܪܬ݁ܶܐ̈ ܕ݁ܡܽܘܠܟ݁ܳܢܳܐ ܇ ܕ݁ܫܽܘܘ̱ܕ݁ܳܝܶܗ ܠܳܐ ܡܶܫܬ݁ܰܚܠܰܦ݂ . ܘܚܰܒ݂ܫܶܗ ܒ݁ܡܰܘܡܳܬ݂ܳܐ̈ ܆ 18 ܕ݁ܰܒ݂ܬ݂ܰܪܬ݁ܶܝܢ̈ ܨܶܒ݂ܘܳܢ̈ ܕ݁ܠܳܐ ܡܶܫܬ݁ܰܚܠܦ݂ܳܢ̈ ܇ ܕ݁ܠܳܐ ܡܶܫܟ݁ܰܚ ܐܰܠܳܗܳܐ ܕ݁ܰܢܕ݂ܰܓ݁ܶܠ ܒ݁ܗܶܝܢ ܇ ܒ݁ܽܘܝܳܐܳܐ ܪܰܒ݁ܳܐ ܢܶܗܘܶܐ ܠܰܢ ܕ݁ܶܐܬ݂ܓ݁ܰܘܰܣܢ ܒ݁ܶܗ ܇ ܘܢܶܐܚܽܘܕ݂ ܣܰܒ݂ܪܳܐ ܕ݁ܰܡܠܺܝܟ݂ ܠܰܢ ܆ 19 ܗܰܘ ܕ݁ܺܐܝܬ݂ܰܘܗ̱ܝ ܠܰܢ ܐܰܝܟ݂ ܐܶܘܩܺܝܢܳܐ . ܕ݁ܰܠܒ݂ܺܝܟ݂ ܒ݁ܢܰܦ݂ܫܰܢ ܕ݁ܠܳܐ ܬ݁ܶܬ݁ܙܺܝܥ . ܘܥܳܐܶܠ ܠܓ݂ܰܘ ܡܶܢ ܐܰܦ݁ܰܝ̈ ܬ݁ܰܪܥܳܐ ܇ 20 ܟ݁ܰܪ ܕ݁ܩܰܕ݁ܶܡ ܥܰܠ ܚܠܳܦ݂ܰܝܢ ܝܶܫܽܘܥ ܇ ܘܰܗܘܳܐ ܟ݁ܽܘܡܪܳܐ ܠܥܳܠܰܡ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ .

7 Chapter 7 1 ܗܳܢܳܐ ܕ݁ܶܝܢ ܡܰܠܟ݁ܺܝܙܕ݂ܶܩ ܐܺܝܬ݂ܰܘܗ̱ܝ ܡܠܶܟ݂ ܫܳܠܺܝܡ ܁ ܟ݁ܽܘܡܪܳܐ ܕ݁ܰܐܠܳܗܳܐ ܡܪܰܝܡܳܐ . ܘܗܽܘ ܐܰܪܥܶܗ ܠܰܐܒ݂ܪܳܗܳܡ ܆ ܟ݁ܰܕ݂ ܗܦ݂ܰܟ݂ ܡܶܢ ܚܰܪܒ݁ܳܐ ܕ݁ܡܰܠܟ݁ܶܐ̈ . ܘܒ݂ܰܪܟ݂ܶܗ . 2 ܘܠܶܗ ܦ݁ܪܰܫ ܐܰܒ݂ܪܳܗܳܡ ܡܰܥܣܳܪܶܐ̈ ܡܶܢ ܟ݁ܽܠܡܶܕ݁ܶܡ ܕ݁ܺܐܝܬ݂ ܗ̱ܘܳܐ ܥܰܡܶܗ . ܡܶܬ݂ܦ݁ܰܫܰܩ ܕ݁ܶܝܢ ܫܡܶܗ ܡܰܠܟ݁ܳܐ ܕ݁ܟ݂ܺܐܢܽܘܬ݂ܳܐ . ܘܬ݂ܽܘܒ݂ ܡܠܶܟ݂ ܫܳܠܺܝܡ ܁ ܕ݁ܺܐܝܬ݂ܰܘܗ̱ܝ ܡܰܠܟ݁ܳܐ ܕ݁ܰܫܠܳܡܳܐ . 3 ܕ݁ܠܳܐ ܐܰܒ݂ܽܘܗ̱ܝ ܘܠܳܐ ܐܶܡܶܗ ܐܶܬ݂ܟ݁ܬ݂ܶܒ݂ܘ ܒ݁ܫܰܪܒ݂ܳܬ݂ܳܐ̈ . ܘܠܳܐ ܪܺܝܫܺܝܬ݂ܳܐ ܕ݁ܝܰܘܡܰܘܗ̱ܝ̈ ܘܠܳܐ ܫܽܘܠܳܡܳܐ ܕ݁ܚܰܝܰܘܗ̱ܝ̈ ܆ ܐܶܠܳܐ ܒ݁ܰܕ݂ܡܽܘܬ݂ܳܐ ܕ݁ܰܒ݂ܪܶܗ ܕ݁ܰܐܠܳܗܳܐ ܁ ܡܩܰܘܝܳܐ ܟ݁ܽܘܡܪܽܘܬ݂ܶܗ ܠܥܳܠܰܡ . 4 ܚܙܰܘ ܕ݁ܶܝܢ ܆ ܟ݁ܡܳܐ ܪܰܒ݂ ܗܳܢܳܐ ܇ ܕ݁ܰܐܒ݂ܪܳܗܳܡ ܪܺܝܫ ܐܰܒ݂ܳܗܳܬ݂ܳܐ̈ ܁ ܠܶܗ ܝܰܗ̱ܒ݂ ܡܰܥܣܳܪܶܐ̈ ܕ݁ܪܺܫܝܳܬ݂ܳܐ̈ . 5 ܐܰܝܠܶܝܢ ܓ݁ܶܝܪ ܡܶܢ ܒ݁ܢܰܝ̈ ܠܶܘܺܝ ܕ݁ܰܡܩܰܒ݁ܠܺܝܢ ܗ̱ܘܰܘ ܟ݁ܽܘܡܪܽܘܬ݂ܳܐ : ܦ݁ܽܘܩܕ݁ܳܢܳܐ ܐܺܝܬ݂ ܗ̱ܘܳܐ ܠܗܽܘܢ ܕ݁ܢܳܡܽܘܣܳܐ ܆ ܕ݁ܢܶܣܒ݂ܽܘܢ ܡܰܥܣܳܪܶܐ̈ ܡܶܢ ܥܰܡܳܐ ܁ ܗܶܢܽܘܢ ܡܶܢ ܐܰܚܰܝܗܽܘܢ̈ ܇ ܟ݁ܰܕ݂ ܐܳܦ݂ ܗܶܢܽܘܢ ܡܶܢ ܚܰܨܶܗ ܕ݁ܰܐܒ݂ܪܳܗܳܡ ܢܦ݂ܰܩܘ . 6 ܗܳܢܳܐ ܕ݁ܶܝܢ ܕ݁ܠܳܐ ܟ݁ܬ݂ܺܝܒ݂ ܒ݁ܫܰܪܒ݂ܳܬ݂ܗܽܘܢ̈ ܆ ܡܰܥܣܳܪܶܐ̈ ܫܩܰܠ ܡܶܢ ܐܰܒ݂ܪܳܗܳܡ . ܘܒ݂ܰܪܟ݂ܶܗ ܠܗܰܘ ܕ݁ܩܰܒ݁ܶܠ ܡܽܘܠܟ݁ܳܢܳܐ . 7 ܕ݁ܠܳܐ ܚܶܪܝܳܢܳܐ ܕ݁ܶܝܢ ܗܰܘ ܕ݁ܰܒ݂ܨܺܝܪ ܆ ܡܶܬ݂ܒ݁ܰܪܰܟ݂ ܡܶܢ ܗܰܘ ܕ݁ܰܡܝܰܬ݁ܰܪ ܡܶܢܶܗ . 8 ܘܗܳܪܟ݁ܳܐ ܒ݁ܢܰܝܢܳܫܳܐ̈ ܕ݁ܡܳܝܬ݁ܺܝܢ ܢܳܣܒ݁ܺܝܢ ܡܰܥܣܳܪܶܐ̈ ܆ ܠܗܰܠ ܕ݁ܶܝܢ ܗܰܘ ܕ݁ܰܐܣܗܶܕ݂ ܥܠܰܘܗ̱ܝ ܟ݁ܬ݂ܳܒ݂ܳܐ ܇ ܕ݁ܚܰܝ ܗ̱ܽܘ . 9 ܘܰܐܝܟ݂ ܐ̱ܢܳܫ ܢܺܐܡܰܪ ܁ ܒ݁ܝܰܕ݂ ܐܰܒ݂ܪܳܗܳܡ ܐܳܦ݂ ܠܶܘܺܝ ܗܰܘ ܕ݁ܡܰܥܣܳܪܶܐ̈ ܢܳܣܶܒ݂ ܗ̱ܘܳܐ ܆ ܐܳܦ݂ ܗܽܘ ܐܶܬ݂ܥܰܣܰܪ . 10 ܥܕ݂ܰܟ݁ܺܝܠ ܓ݁ܶܝܪ ܒ݁ܚܰܨܶܗ ܗܘܳܐ ܕ݁ܰܐܒ݂ܽܘܗ̱ܝ ܆ ܟ݁ܰܕ݂ ܐܰܪܥܶܗ ܠܡܰܠܟ݁ܺܝܙܕ݂ܶܩ . 11 ܐܶܠܽܘ ܗܳܟ݂ܺܝܠ ܓ݁ܡܺܝܪܽܘܬ݂ܳܐ ܒ݁ܝܰܕ݂ ܟ݁ܽܘܡܪܽܘܬ݂ܳܐ ܕ݁ܠܶܘܳܝܶܐ̈ ܐܺܝܬ݂ܶܝܗ ܗ̱ܘܳܬ݂ ܇ ܕ݁ܒ݂ܳܗ ܣܺܝܡ ܢܳܡܽܘܣܳܐ ܠܥܰܡܳܐ ܆ ܠܡܳܢܳܐ ܡܶܬ݂ܒ݁ܥܶܐ ܗ̱ܘܳܐ ܟ݁ܽܘܡܪܳܐ ܐ̱ܚܪܺܢܳܐ ܕ݁ܰܢܩܽܘܡ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ . ܐܶܡܰܪ ܕ݁ܶܝܢ ܕ݁ܒ݂ܰܕ݂ܡܽܘܬ݂ܶܗ ܕ݁ܰܐܗܪܽܘܢ ܢܶܗܘܶܐ . 12 ܐܶܠܳܐ ܐܰܝܟ݁ܰܢܳܐ ܕ݁ܰܗܘܳܐ ܫܽܘܚܠܳܦ݂ܳܐ ܒ݁ܟ݂ܽܘܡܪܽܘܬ݂ܳܐ ܆ ܗܳܟ݂ܰܢܳܐ ܗܘܳܐ ܫܽܘܚܠܳܦ݂ܳܐ ܐܳܦ݂ ܒ݁ܢܳܡܽܘܣܳܐ . 13 ܗܰܘ ܓ݁ܶܝܪ ܕ݁ܶܐܬ݂ܶܐܡܰܪ ܥܠܰܘܗ̱ܝ ܗܳܠܶܝܢ ܆ ܡܶܢ ܫܰܪܒ݁ܬ݂ܳܐ ܗ̱ܘ ܐ̱ܚܪܺܬ݂ܳܐ ܐܶܬ݂ܺܝܠܶܕ݂ ܇ ܕ݁ܐ̱ܢܳܫ ܡܶܡܬ݂ܽܘܡ ܡܶܢܳܗ ܠܳܐ ܫܰܡܶܫ ܒ݁ܡܰܕ݂ܒ݁ܚܳܐ . 14 ܓ݁ܰܠܝܳܐ ܗ̱ܝ ܓ݁ܶܝܪ ܆ ܕ݁ܡܶܢ ܝܺܗܽܘܕ݂ܳܐ ܕ݁ܢܰܚ ܡܳܪܰܢ ܆ ܡܶܢ ܫܰܪܒ݁ܬ݂ܳܐ ܕ݁ܠܳܐ ܐܶܡܰܪ ܥܠܶܝܗ ܡܽܘܫܶܐ ܡܶܕ݁ܶܡ ܥܰܠ ܟ݁ܽܘܡܪܽܘܬ݂ܳܐ . 15 ܘܝܰܬ݁ܺܝܪܳܐܝܺܬ݂ ܬ݁ܽܘܒ݂ ܝܺܕ݂ܺܝܥܳܐ ܒ݁ܗܳܝ ܕ݁ܶܐܡܰܪ ܆ ܕ݁ܒ݂ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ ܩܳܐܶܡ ܟ݁ܽܘܡܪܳܐ ܐ̱ܚܪܺܢܳܐ ܇ 16 ܗܰܘ ܕ݁ܠܳܐ ܗ̱ܘܳܐ ܒ݁ܢܳܡܽܘܣܳܐ ܕ݁ܦ݂ܽܘܩܕ݁ܳܢܶܐ̈ ܦ݁ܰܓ݂ܪܳܢܳܝܶܐ̈ ܗܳܘܶܐ ܇ ܐܶܠܳܐ ܒ݁ܚܰܝܠܳܐ ܕ݁ܚܰܝܶܐ̈ ܕ݁ܠܳܐ ܡܶܫܬ݁ܪܶܝܢ . 17 ܡܰܣܗܶܕ݂ ܓ݁ܶܝܪ ܥܠܰܘܗ̱ܝ ܆ ܕ݁ܰܐܢ̱ܬ݁ ܗ̱ܽܘ ܟ݁ܽܘܡܪܳܐ ܠܥܳܠܰܡ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ . 18 ܫܽܘܚܠܳܦ݂ܳܐ ܕ݁ܶܝܢ ܕ݁ܰܗܘܳܐ ܠܦ݂ܽܘܩܕ݁ܳܢܳܐ ܩܰܕ݂ܡܳܝܳܐ ܆ ܡܶܛܽܠ ܡܚܺܝܠܽܘܬ݂ܶܗ ܇ ܘܰܕ݂ܝܽܘܬ݂ܪܳܢ ܠܰܝܬ݁ ܗ̱ܘܳܐ ܒ݁ܶܗ . 19 ܡܶܕ݁ܶܡ ܓ݁ܶܝܪ ܠܳܐ ܓ݁ܡܰܪ ܢܳܡܽܘܣܳܐ . ܥܰܠ ܕ݁ܶܝܢ ܚܠܳܦ݂ܰܘܗ̱ܝ ܆ ܣܰܒ݂ܪܳܐ ܕ݁ܰܡܝܰܬ݁ܰܪ ܡܶܢܶܗ ܁ ܕ݁ܒ݂ܶܗ ܡܶܬ݂ܩܰܪܒ݂ܺܝܢܰܢ ܠܰܐܠܳܗܳܐ . 20 ܘܫܰܪܪܶܗ ܠܰܢ ܒ݁ܡܰܘܡܳܬ݂ܳܐ̈ . 21 ܗܳܢܽܘܢ ܓ݁ܶܝܪ ܕ݁ܠܳܐ ܡܰܘܡܳܬ݂ܳܐ̈ ܗܘܰܘ ܟ݁ܽܘܡܪܶܐ̈ ܆ ܗܳܢܳܐ ܕ݁ܶܝܢ ܒ݁ܡܰܘܡܳܬ݂ܳܐ̈ ܇ ܐܰܝܟ݂ ܕ݁ܶܐܡܰܪ ܠܶܗ ܒ݁ܝܰܕ݂ ܕ݁ܰܘܺܝܕ݂ . ܕ݁ܺܝܡܳܐ ܡܳܪܝܳܐ ܘܠܳܐ ܢܕ݂ܰܓ݁ܶܠ ܆ ܕ݁ܰܐܢ̱ܬ݁ ܗ̱ܽܘ ܟ݁ܽܘܡܪܳܐ ܠܥܳܠܰܡ ܒ݁ܰܕ݂ܡܽܘܬ݂ܶܗ ܕ݁ܡܰܠܟ݁ܺܝܙܕ݂ܶܩ . 22 ܗܳܢܳܐ ܟ݁ܽܠܶܗ ܡܝܰܬ݁ܪܳܐ ܕ݁ܺܝܰܬ݂ܺܩܺܐ ܗܳܕ݂ܶܐ ܕ݁ܰܗܘܳܐ ܒ݁ܳܗ ܥܰܪܳܒ݂ܳܐ ܝܶܫܽܘܥ . 23 ܘܗܳܢܽܘܢ ܗܘܰܘ ܟ݁ܽܘܡܪܶܐ̈ ܣܰܓ݁ܺܝܶܐܐ̈ ܆ ܡܶܛܽܠ ܕ݁ܡܳܝܬ݁ܺܝܢ ܗ̱ܘܰܘ ܇ ܘܠܳܐ ܡܶܫܬ݁ܰܒ݂ܩܺܝܢ ܗ̱ܘܰܘ ܕ݁ܰܢܩܰܘܽܘܢ . 24 ܗܳܢܳܐ ܕ݁ܶܝܢ ܡܶܛܽܠ ܕ݁ܰܠܥܳܠܰܡ ܩܰܝܳܡ ܆ ܠܳܐ ܥܳܒ݂ܪܳܐ ܟ݁ܽܘܡܪܽܘܬ݂ܶܗ ܆ 25 ܘܡܶܫܟ݁ܰܚ ܠܡܰܚܳܝܽܘ ܠܥܳܠܰܡ ܇ ܠܰܐܝܠܶܝܢ ܕ݁ܡܶܬ݂ܩܰܪܒ݂ܺܝܢ ܒ݁ܺܐܝܕ݂ܶܗ ܠܰܐܠܳܗܳܐ . ܚܰܝ ܗ̱ܽܘ ܓ݁ܶܝܪ ܒ݁ܟ݂ܽܠܙܒ݂ܰܢ ܘܡܰܣܶܩ ܨܠܽܘܬ݂ܳܐ ܚܠܳܦ݂ܰܝܗܽܘܢ . 26 ܕ݁ܰܐܝܟ݂ ܗܳܢܳܐ ܓ݁ܶܝܪ ܟ݁ܽܘܡܪܳܐ ܐܳܦ݂ ܙܳܕ݂ܶܩ ܗ̱ܘܳܐ ܠܰܢ ܆ ܕ݁ܰܟ݂ܝܳܐ . ܕ݁ܠܳܐ ܒ݁ܺܝܫܽܘ . ܘܰܕ݂ܠܳܐ ܛܽܘܠܫܳܐ . ܕ݁ܦ݂ܰܪܺܝܩ ܡܶܢ ܚܛܳܗܶܐ̈ ܘܰܡܪܰܝܰܡ ܠܥܶܠ ܡܶܢ ܫܡܰܝܳܐ ܇ 27 ܘܠܰܝܬ݁ ܠܶܗ ܐܽܘܠܨܳܢܳܐ ܟ݁ܽܠܝܽܘܡ ܁ ܐܰܝܟ݂ ܪܰܒ݁ܰܝ̈ ܟ݁ܽܘܡܪܶܐ̈ ܇ ܕ݁ܠܽܘܩܕ݂ܰܡ ܚܠܳܦ݂ ܚܛܳܗܰܘܗ̱ܝ̈ ܢܩܰܪܶܒ݂ ܕ݁ܶܒ݂ܚܶܐ̈ ܁ ܘܗܳܝܕ݁ܶܝܢ ܂ ܚܠܳܦ݂ ܥܰܡܳܐ . ܗܳܕ݂ܶܐ ܓ݁ܶܝܪ ܥܰܒ݂ܕ݁ܳܗ ܚܕ݂ܳܐ ܙܒ݂ܰܢ ܒ݁ܢܰܦ݂ܫܶܗ ܕ݁ܩܰܪܶܒ݂ . 28 ܢܳܡܽܘܣܳܐ ܓ݁ܶܝܪ ܒ݁ܢܰܝܢܳܫܳܐ̈ ܗܽܘ ܟ݁ܪܺܝܗܶܐ̈ ܡܩܺܝܡ ܟ݁ܽܘܡܪܶܐ̈ ܆ ܡܶܠܬ݂ܳܐ ܕ݁ܶܝܢ ܕ݁ܡܰܘܡܳܬ݂ܳܐ̈ ܕ݁ܰܗܘܳܬ݂ ܒ݁ܳܬ݂ܰܪ ܢܳܡܽܘܣܳܐ ܇ ܒ݁ܪܳܐ ܓ݁ܡܺܝܪܳܐ ܠܥܳܠܰܡ ܀.܀.܀܀

8 Chapter 8 4 1 ܪܺܝܫܳܐ ܕ݁ܶܝܢ ܕ݁ܟ݂ܽܠܗܶܝܢ ܁ ܐܺܝܬ݂ ܠܰܢ ܪܰܒ݁ ܟ݁ܽܘܡܪܶܐ̈ ܆ ܐܰܝܢܳܐ ܕ݁ܺܝܬ݂ܶܒ݂ ܡܶܢ ܝܰܡܺܝܢܳܐ ܕ݁ܟ݂ܽܘܪܣܝܳܐ ܕ݁ܪܰܒ݁ܽܘܬ݂ܳܐ ܒ݁ܰܫܡܰܝܳܐ ܇ 2 ܘܰܗܘܳܐ ܡܫܰܡܫܳܢܳܐ ܕ݁ܒ݂ܶܝܬ݂ ܩܽܘܕ݂ܫܳܐ ܘܰܕ݂ܡܰܫܟ݁ܢܳܐ ܕ݁ܰܫܪܳܪܳܐ ܇ ܗܰܘ ܕ݁ܰܩܒ݂ܰܥ ܐܰܠܳܗܳܐ ܘܠܳܐ ܒ݁ܰܪܢܳܫܳܐ . 3 ܟ݁ܽܠ ܪܰܒ݁ ܟ݁ܽܘܡܪܶܐ̈ ܓ݁ܶܝܪ ܕ݁ܩܳܐܶܡ ܆ ܕ݁ܰܢܩܰܪܶܒ݂ ܩܽܘܪܒ݁ܳܢܶܐ̈ ܘܕ݂ܶܒ݂ܚܶܐ̈ . ܡܶܛܽܠ ܗܳܢܳܐ ܙܳܕ݂ܩܳܐ ܗ̱ܘܳܬ݂ ܐܳܦ݂ ܠܗܳܢܳܐ ܆ ܕ݁ܢܶܗܘܶܐ ܐܺܝܬ݂ ܠܶܗ ܡܶܕ݁ܶܡ ܕ݁ܰܢܩܰܪܶܒ݂ . 4 ܘܶܐܠܽܘ ܒ݁ܰܐܪܥܳܐ ܗ̱ܘܳܐ ܆ ܐܳܦ݂ܠܳܐ ܟ݁ܽܘܡܪܳܐ ܗܳܘܶܐ ܗ̱ܘܳܐ ܇ ܡܶܛܽܠ ܕ݁ܺܐܝܬ݂ܰܝܗܽܘܢ ܗ̱ܘܰܘ ܟ݁ܽܘܡܪܶܐ̈ ܕ݁ܰܡܩܰܪܒ݂ܺܝܢ ܗ̱ܘܰܘ ܩܽܘܪܒ݁ܳܢܶܐ̈ ܐܰܝܟ݂ ܕ݁ܰܒ݂ܢܳܡܽܘܣܳܐ ܇ 5 ܗܳܢܽܘܢ ܕ݁ܰܡܫܰܡܫܺܝܢ ܠܰܕ݂ܡܽܘܬ݂ܳܐ ܘܰܠܛܶܠܳܢܝܳܬ݂ܳܐ̈ ܕ݁ܗܳܠܶܝܢ ܕ݁ܒ݂ܰܫܡܰܝܳܐ ܇ ܐܰܝܟ݂ ܕ݁ܶܐܬ݂ܶܐܡܰܪ ܠܡܽܘܫܶܐ ܟ݁ܰܕ݂ ܥܳܒ݂ܶܕ݂ ܗ̱ܘܳܐ ܡܰܫܟ݁ܢܳܐ ܆ ܕ݁ܰܚܙܺܝ ܘܰܥܒ݂ܶܕ݂ ܟ݁ܽܠܡܶܕ݁ܶܡ ܒ݁ܰܕ݂ܡܽܘܬ݂ܳܐ ܗܳܝ ܕ݁ܶܐܬ݂ܚܰܙܝܰܬ݂ ܠܳܟ݂ ܒ݁ܛܽܘܪܳܐ . 6 ܗܳܫܳܐ ܕ݁ܶܝܢ ܬ݁ܶܫܡܶܫܬ݁ܳܐ ܕ݁ܰܡܝܰܬ݁ܪܳܐ ܡܶܢ ܗܳܝ ܩܰܒ݁ܶܠ ܝܶܫܽܘܥ ܡܫܺܝܚܳܐ ܆ ܐܰܟ݂ܡܳܐ ܕ݁ܰܡܝܰܬ݁ܪܳܐ ܐܳܦ݂ ܕ݁ܺܝܰܬ݂ܺܝܩܺܐ ܗܳܝ ܕ݁ܰܥܒ݂ܺܝܕ݂ ܒ݁ܳܗ ܡܶܨܥܳܝܳܐ ܁ ܘܰܒ݂ܫܽܘܘ̱ܕ݁ܳܝܶܐ̈ ܕ݁ܰܡܝܰܬ݁ܪܺܝܢ ܇ ܡܶܢ ܕ݁ܗܳܝ ܐܶܬ݂ܝܰܗܒ݁ܰܬ݂ . 7 ܐܶܠܽܘ ܓ݁ܶܝܪ ܐܺܝܬ݂ܶܝܗ ܗ̱ܘܳܬ݂ ܩܰܕ݂ܡܳܝܬ݁ܳܐ ܕ݁ܠܳܐ ܪܶܫܝܳܢ ܆ ܠܰܝܬ݁ ܗ̱ܘܳܐ ܐܰܬ݂ܪܳܐ ܠܗܳܕ݂ܶܐ ܕ݁ܬ݂ܰܪܬ݁ܶܝܢ̈ . 8 ܪܳܫܶܐ ܠܗܽܘܢ ܓ݁ܶܝܪ ܘܶܐܡܰܪ . ܕ݁ܗܳܐ ܝܰܘܡܳܬ݂ܳܐ̈ ܐܳܬ݂ܶܝܢ ܁ ܐܳܡܰܪ ܡܳܪܝܳܐ ܆ ܘܶܐܓ݂ܡܽܘܪ ܥܰܠ ܒ݁ܰܝܬ݁ܳܐ ܕ݁ܒ݂ܶܝܬ݂ ܐܺܝܣܪܳܝܶܠ ܘܥܰܠ ܒ݁ܰܝܬ݁ܳܐ ܕ݁ܒ݂ܶܝܬ݂ ܝܺܗܽܘܕ݂ܳܐ ܕ݁ܺܝܰܬ݂ܺܩܺܐ ܚܕ݂ܰܬ݂ܳܐ ܇ 9 ܠܳܐ ܐܰܝܟ݂ ܗܳܝ ܕ݁ܺܝܰܬ݂ܺܩܺܐ ܕ݁ܝܶܗܒ݁ܶܬ݂ ܠܰܐܒ݂ܳܗܰܝܗܽܘܢ̈ ܒ݁ܝܰܘܡܳܐ ܕ݁ܶܐܚܕ݁ܶܬ݂ ܒ݁ܺܐܝܕ݂ܗܽܘܢ ܘܰܐܦ݁ܩܶܬ݂ ܐܶܢܽܘܢ ܡܶܢ ܐܰܪܥܳܐ ܕ݁ܡܶܨܪܶܝܢ . ܡܶܛܽܠ ܕ݁ܗܶܢܽܘܢ ܠܳܐ ܩܰܘܺܝܘ ܒ݁ܕ݂ܺܝܰܬ݂ܺܩܺܐ ܕ݁ܺܝܠܝ ܆ ܐܳܦ݂ ܐܶܢܳܐ ܒ݁ܣܺܝܬ݂ ܒ݁ܗܽܘܢ ܂ ܐܶܡܰܪ ܡܳܪܝܳܐ . 10 ܗܳܕ݂ܶܐ ܕ݁ܶܝܢ ܕ݁ܺܝܰܬ݂ܺܩܺܐ ܕ݁ܶܐܬ݁ܶܠ ܠܒ݂ܰܝܬ݁ܳܐ ܕ݁ܒ݂ܶܝܬ݂ ܐܺܝܣܪܳܝܶܠ . ܒ݁ܳܬ݂ܰܪ ܝܰܘܡܳܬ݂ܳܐ̈ ܗܳܢܽܘܢ ܐܳܡܰܪ ܡܳܪܝܳܐ ܆ ܐܶܬ݁ܠܺܝܘܗ̱ܝ ܠܢܳܡܽܘܣܝ ܒ݁ܡܰܕ݁ܥܰܝܗܽܘܢ̈ . ܘܥܰܠ ܠܶܒ݁ܰܘܳܬ݂ܗܽܘܢ̈ ܐܶܟ݂ܬ݁ܒ݂ܺܝܘܗ̱ܝ . ܘܶܐܗܘܶܐ ܠܗܽܘܢ ܐܶܢܳܐ ܐܰܠܳܗܳܐ . ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ . 11 ܘܠܳܐ ܢܰܠܶܦ݂ ܐ̱ܢܳܫ ܠܒ݂ܰܪ ܡܕ݂ܺܝܢ̱ܬ݁ܶܗ ܐܳܦ݂ܠܳܐ ܠܰܐܚܽܘܗ̱ܝ ܇ ܘܢܺܐܡܰܪ ܕ݁ܕ݂ܰܥ ܠܡܳܪܝܳܐ ܆ ܡܶܛܽܠ ܕ݁ܟ݂ܽܠܗܽܘܢ ܢܶܕ݁ܥܽܘܢܳܢܝ ܇ ܡܶܢ ܙܥܽܘܪܗܽܘܢ ܘܰܥܕ݂ܰܡܳܐ ܠܩܰܫܺܝܫܗܽܘܢ . 12 ܘܶܐܚܰܣܶܐ ܐܶܢܽܘܢ ܡܶܢ ܥܰܘܠܗܽܘܢ ܆ ܘܰܚܛܳܗܰܝܗܽܘܢ̈ ܬ݁ܽܘܒ݂ ܠܳܐ ܐܶܬ݁ܕ݁ܟ݂ܰܪ ܠܗܽܘܢ . 13 ܒ݁ܗܳܝ ܕ݁ܶܐܡܰܪ ܚܕ݂ܰܬ݂ܳܐ ܆ ܠܩܰܕ݂ܡܳܝܬ݁ܳܐ ܐܰܥܬ݁ܩܳܗ . ܘܰܐܝܢܳܐ ܕ݁ܰܥܬ݂ܶܩ ܘܰܣܶܐܒ݂ ܆ ܩܰܪܺܝܒ݂ ܗ̱ܽܘ ܠܰܚܒ݂ܳܠܳܐ ܀

9 Chapter 9 1 ܒ݁ܩܰܕ݂ܡܳܝܬ݁ܳܐ ܕ݁ܶܝܢ ܐܺܝܬ݂ ܗ̱ܘܳܐ ܒ݁ܳܗ ܦ݁ܽܘܩܳܕ݂ܶܐ̈ ܕ݁ܬ݂ܶܫܡܶܫܬ݁ܳܐ ܘܒ݂ܶܝܬ݂ ܩܽܘܕ݂ܫܳܐ ܥܳܠܡܳܢܳܝܳܐ . 2 ܡܰܫܟ݁ܢܳܐ ܓ݁ܶܝܪ ܩܰܕ݂ܡܳܝܳܐ ܕ݁ܶܐܬ݂ܥܒ݂ܶܕ݂ ܆ ܐܺܝܬ݂ ܗ̱ܘܳܐ ܒ݁ܶܗ ܡܢܳܪܬ݁ܳܐ ܘܦ݂ܳܬ݂ܽܘܪܳܐ ܘܰܠܚܶܡ ܐܰܦ݁ܶܐ̈ ܇ ܘܡܶܬ݂ܩܪܶܐ ܗ̱ܘܳܐ ܒ݁ܶܝܬ݂ ܩܽܘܕ݂ܫܳܐ . 3 ܡܰܫܟ݁ܢܳܐ ܕ݁ܶܝܢ ܓ݁ܰܘܳܝܳܐ ܕ݁ܰܠܓ݂ܰܘ ܡܶܢ ܐܰܦ݁ܰܝ̈ ܬ݁ܰܪܥܳܐ ܕ݁ܰܬ݂ܪܶܝܢ̈ ܆ ܡܶܬ݂ܩܪܶܐ ܗ̱ܘܳܐ ܩܕ݂ܽܘܫ ܩܽܘܕ݂ܫܶܐ̈ . 4 ܘܺܐܝܬ݂ ܗ̱ܘܳܐ ܒ݁ܶܗ ܒ݁ܶܝܬ݂ ܒ݁ܶܣܡܶܐ̈ ܕ݁ܕ݂ܰܗܒ݂ܳܐ ܘܩܺܒ݂ܽܘܬ݂ܳܐ ܕ݁ܕ݂ܺܝܰܬ݂ܺܩܺܐ ܕ݁ܰܩܪܺܝܡܳܐ ܟ݁ܽܠܳܗ ܒ݁ܕ݂ܰܗܒ݂ܳܐ . ܘܺܐܝܬ݂ ܒ݁ܳܗ ܩܶܣܛܳܐ ܕ݁ܕ݂ܰܗܒ݂ܳܐ ܇ ܗܳܝ ܕ݁ܺܐܝܬ݂ ܗ̱ܘܳܐ ܒ݁ܳܗ ܡܰܢ̱ܢܳܐ ܘܫܰܒ݂ܛܳܐ ܕ݁ܰܐܗܪܽܘܢ ܗܰܘ ܕ݁ܰܐܦ݂ܪܰܥ ܁ ܘܠܽܘܚܶܐ̈ ܕ݁ܕ݂ܺܝܰܬ݂ܺܩܺܐ . 5 ܘܰܠܥܶܠ ܡܶܢܳܗ ܟ݁ܪܽܘܒ݂ܶܐ̈ ܕ݁ܫܽܘܒ݂ܚܳܐ ܕ݁ܡܰܛܠܺܝܢ ܥܰܠ ܚܽܘܣܳܝܳܐ . ܠܳܐ ܗ̱ܘܳܐ ܕ݁ܶܝܢ ܙܰܒ݂ܢܳܐ ܗ̱ܘ ܆ ܕ݁ܢܺܐܡܰܪ ܥܰܠ ܚܕ݂ܳܐ ܚܕ݂ܳܐ ܡܶܢ ܗܳܠܶܝܢ ܕ݁ܗܳܟ݂ܰܢܳܐ ܡܰܬ݂ܩܢܳܢ̈ ܗ̱ܘܰܝ̈ . 6 ܘܰܠܡܰܫܟ݁ܢܳܐ ܒ݁ܰܪܳܝܳܐ ܒ݁ܟ݂ܽܠܙܒ݂ܰܢ ܥܳܐܠܺܝܢ ܗ̱ܘܰܘ ܟ݁ܽܘܡܪܶܐ̈ ܘܰܡܫܰܠܡܺܝܢ ܗ̱ܘܰܘ ܬ݁ܶܫܡܶܫܬ݁ܗܽܘܢ . 7 ܠܡܰܫܟ݁ܢܳܐ ܕ݁ܶܝܢ ܕ݁ܰܠܓ݂ܰܘ ܡܶܢܶܗ ܆ ܚܕ݂ܳܐ ܗ̱ܘ ܒ݁ܫܰܢ̱ܬ݁ܳܐ ܒ݁ܰܠܚܽܘܕ݂ܰܘܗ̱ܝ ܥܳܐܶܠ ܗ̱ܘܳܐ ܪܰܒ݁ܟ݁ܽܘܡ̈̈ܪܶܐ ܇ ܒ݁ܰܕ݂ܡܳܐ ܗܰܘ ܕ݁ܰܡܩܰܪܶܒ݂ ܗ̱ܘܳܐ ܚܠܳܦ݂ ܢܰܦ݂ܫܶܗ ܘܰܚܠܳܦ݂ ܣܰܟ݂ܠܽܘܬ݂ܶܗ ܕ݁ܥܰܡܳܐ . 8 ܒ݁ܗܳܕ݂ܶܐ ܕ݁ܶܝܢ ܡܰܘܕ݁ܥܳܐ ܗ̱ܘܳܬ݂ ܪܽܘܚܳܐ ܕ݁ܩܽܘܕ݂ܫܳܐ ܆ ܕ݁ܠܳܐ ܐܶܬ݂ܓ݁ܰܠܝܰܬ݂ ܥܕ݂ܰܟ݁ܺܝܠ ܐܽܘܪܚܳܐ ܕ݁ܩܰܕ݁ܺܝܫܶܐ̈ ܇ ܟ݁ܡܳܐ ܙܰܒ݂ܢܳܐ ܕ݁ܺܐܝܬ݂ ܗ̱ܘܳܐ ܩܝܳܡܳܐ ܠܡܰܫܟ݁ܢܳܐ ܩܰܕ݂ܡܳܝܳܐ . 9 ܘܺܐܝܬ݂ܰܘܗ̱ܝ ܗ̱ܘܳܐ ܡܰܬ݂ܠܳܐ ܗܳܢܳܐ ܆ ܠܙܰܒ݂ܢܳܐ ܗܰܘ ܕ݁ܒ݂ܶܗ ܩܽܘܪܒ݁ܳܢܶܐ̈ ܘܕ݂ܶܒ݂ܚܶܐ̈ ܡܶܬ݂ܩܰܪܒ݂ܺܝܢ ܗ̱ܘܰܘ ܇ ܐܰܝܠܶܝܢ ܕ݁ܠܳܐ ܡܶܫܟ݁ܚܺܝܢ ܗ̱ܘܰܘ ܠܡܶܓ݂ܡܰܪ ܬ݁ܺܐܪܬ݁ܶܗ ܕ݁ܡܰܢ ܕ݁ܰܡܩܰܪܶܒ݂ ܠܗܽܘܢ ܇ 10 ܐܶܠܳܐ ܒ݁ܡܶܐܟ݂ܠܳܐ ܘܰܒ݂ܡܰܫܬ݁ܝܳܐ ܒ݁ܰܠܚܽܘܕ݂ . ܘܰܒ݂ܡܰܥܡܽܘܕ݂ܝܳܬ݂ܳܐ̈ ܕ݁ܰܙܢܺܝܢ̈ ܙܢܺܝܢ̈ . ܕ݁ܺܐܝܬ݂ܰܝܗܶܝܢ ܦ݁ܽܘܩܳܕ݂ܶܐ̈ ܕ݁ܒ݂ܶܣܪܳܐ ܁ ܕ݁ܣܺܝܡܺܝܢ ܥܕ݂ܰܡܳܐ ܠܙܰܒ݂ܢܳܐ ܕ݁ܬ݂ܽܘܪܳܨܳܐ ܀ 11 ܡܫܺܝܚܳܐ ܕ݁ܶܝܢ ܕ݁ܶܐܬ݂ܳܐ ܁ ܗܘܳܐ ܪܰܒ݁ܟ݁ܽܘܡ̈̈ܪܶܐ ܕ݁ܛܳܒ݂ܳܬ݂ܳܐ̈ ܕ݁ܰܣܥܰܪ ܆ ܘܥܰܠ ܠܡܰܫܟ݁ܢܳܐ ܪܰܒ݁ܳܐ ܘܰܡܫܰܠܡܳܢܳܐ ܕ݁ܠܳܐ ܥܒ݂ܺܝܕ݂ ܒ݁ܺܐܝܕ݂ܰܝܳܐ̈ ܁ ܘܠܳܐ ܗ̱ܘܳܐ ܡܶܢ ܗܳܠܶܝܢ ܒ݁ܶܪܝܳܬ݂ܳܐ̈ . 12 ܘܠܳܐ ܥܰܠ ܒ݁ܰܕ݂ܡܳܐ ܕ݁ܨܺܦ݂ܪܳܝܶܐ̈ ܘܰܕ݂ܥܶܓ݂ܠܶܐ̈ ܆ ܐܶܠܳܐ ܒ݁ܰܕ݂ܡܳܐ ܕ݁ܢܰܦ݂ܫܶܗ ܥܰܠ ܚܕ݂ܳܐ ܙܒ݂ܰܢ ܠܒ݂ܶܝܬ݂ ܡܰܩܕ݁ܫܳܐ ܆ ܘܶܐܫܟ݁ܰܚ ܦ݁ܽܘܪܩܳܢܳܐ ܕ݁ܰܠܥܳܠܰܡ . 13 ܐܶܢ ܓ݁ܶܝܪ ܕ݁ܡܳܐ ܕ݁ܨܺܦ݂ܪܳܝܶܐ̈ ܘܰܕ݂ܥܶܓ݂ܠܶܐ̈ ܘܩܶܛܡܳܐ ܕ݁ܰܥܓ݂ܶܠܬ݁ܳܐ ܡܶܬ݂ܪܣܶܣ ܗ̱ܘܳܐ ܥܰܠ ܐܰܝܠܶܝܢ ܕ݁ܡܶܬ݁ܛܰܡܺܐܝܢ ܗ̱ܘܰܘ : ܘܰܡܩܰܕ݁ܶܫ ܠܗܽܘܢ ܠܕ݂ܽܘܟ݁ܳܝܳܐ ܕ݁ܒ݂ܶܣܪܗܽܘܢ ܆ 14 ܟ݁ܡܳܐ ܗܳܟ݂ܺܝܠ ܝܰܬ݁ܺܝܪܳܐܝܺܬ݂ ܕ݁ܡܶܗ ܕ݁ܰܡܫܺܝܚܳܐ ܁ ܕ݁ܰܒ݂ܪܽܘܚܳܐ ܕ݁ܰܠܥܳܠܰܡ ܢܰܦ݂ܫܶܗ ܩܰܪܶܒ݂ ܕ݁ܠܳܐ ܡܽܘܡ ܠܰܐܠܳܗܳܐ ܇ ܢܕ݂ܰܟ݁ܶܐ ܬ݁ܺܐܪܬ݁ܰܢ ܡܶܢ ܥܒ݂ܳܕ݂ܶܐ̈ ܡܺܝܬ݂ܶܐ̈ ܇ ܕ݁ܰܢܫܰܡܶܫ ܠܰܐܠܳܗܳܐ ܚܰܝܳܐ . 15 ܡܶܛܽܠ ܗܳܢܳܐ ܗܽܘ ܗܘܳܐ ܡܶܨܥܳܝܳܐ ܕ݁ܕ݂ܺܝܰܬ݂ܺܩܺܐ ܚܕ݂ܰܬ݂ܳܐ ܆ ܕ݁ܰܒ݂ܡܰܘܬ݁ܶܗ ܗܽܘ ܗܘܳܐ ܦ݁ܽܘܪܩܳܢܳܐ ܠܰܐܝܠܶܝܢ ܕ݁ܰܥܒ݂ܰܪܘ ܥܰܠ ܕ݁ܺܝܰܬ݂ܺܩܺܐ ܩܰܕ݂ܡܳܝܬ݁ܳܐ ܇ ܕ݁ܢܶܣܒ݂ܽܘܢ ܡܽܘܠܟ݁ܳܢܳܐ . ܐܰܝܠܶܝܢ ܕ݁ܶܐܬ݂ܩܪܺܝܘ ܠܝܳܪܬ݁ܽܘܬ݂ܳܐ ܕ݁ܰܠܥܳܠܰܡ . 16 ܐܰܝܟ݁ܳܐ ܓ݁ܶܝܪ ܕ݁ܺܐܝܬ݂ ܕ݁ܺܝܰܬ݂ܺܩܺܐ ܆ ܡܰܘܬ݁ܳܐ ܗ̱ܘ ܡܚܰܘܝܳܐ ܕ݁ܗܰܘ ܕ݁ܥܰܒ݂ܕ݁ܳܗ . 17 ܥܰܠ ܡܺܝܬ݂ܳܐ ܕ݁ܶܝܢ ܒ݁ܰܠܚܽܘܕ݂ ܡܶܫܬ݁ܰܪܪܳܐ ܆ ܡܶܛܽܠ ܕ݁ܰܟ݂ܡܳܐ ܕ݁ܚܰܝ ܗܰܘ ܕ݁ܥܰܒ݂ܕ݁ܳܗ ܁ ܠܰܝܬ݁ ܒ݁ܳܗ ܚܰܫܚܽܘ . 18 ܡܶܛܽܠ ܗܳܢܳܐ ܐܳܦ݂ܠܳܐ ܩܰܕ݂ܡܳܝܬ݁ܳܐ ܕ݁ܠܳܐ ܕ݁ܡܳܐ ܐܶܫܬ݁ܰܪܪܰܬ݂ . 19 ܟ݁ܰܕ݂ ܐܶܬ݂ܦ݁ܩܶܕ݂ ܓ݁ܶܝܪ ܟ݁ܽܠܶܗ ܦ݁ܽܘܩܕ݁ܳܢܳܐ ܡܶܢ ܡܽܘܫܶܐ ܠܥܰܡܳܐ ܟ݁ܽܠܶܗ ܒ݁ܢܳܡܽܘܣܳܐ ܆ ܢܣܰܒ݂ ܗ̱ܘܳܐ ܡܽܘܫܶܐ ܕ݁ܡܳܐ ܕ݁ܰܥܓ݂ܶܠܬ݁ܳܐ . ܘܡܰܝܳܐ̈ ܒ݁ܥܰܡܪܳܐ ܕ݁ܰܙܚܽܘܪܺܝܬ݂ܳܐ . ܘܙܽܘܦ݁ܳܐ ܆ ܘܪܰܣ ܥܰܠ ܣܶܦ݂ܪܶܐ̈ ܘܥܰܠ ܥܰܡܳܐ ܟ݁ܽܠܶܗ . 20 ܘܶܐܡܰܪ ܠܗܽܘܢ . ܗܳܢܳܐ ܗ̱ܘ ܕ݁ܡܳܐ ܕ݁ܕ݂ܺܝܰܬ݂ܺܩܺܐ ܗܳܝ ܁ ܕ݁ܶܐܬ݂ܦ݁ܰܩܕ݁ܰܬ݂ ܠܟ݂ܽܘܢ ܡܶܢ ܐܰܠܳܗܳܐ . 21 ܐܳܦ݂ ܥܰܠ ܡܰܫܟ݁ܢܳܐ . ܘܥܰܠ ܟ݁ܽܠܗܽܘܢ ܡܳܐܢܶܐ̈ ܕ݁ܬ݂ܶܫܡܶܫܬ݁ܳܐ ܆ ܡܶܢܶܗ ܡܶܢ ܕ݁ܡܳܐ ܪܰܣ . 22 ܡܶܛܽܠ ܕ݁ܟ݂ܽܠܡܶܕ݁ܶܡ ܒ݁ܰܕ݂ܡܳܐ ܗ̱ܘ ܡܶܬ݁ܕ݁ܰܟ݁ܶܐ ܒ݁ܢܳܡܽܘܣܳܐ . ܘܰܕ݂ܠܳܐ ܫܽܘܦ݁ܳܥ ܕ݁ܡܳܐ ܁ ܠܰܝܬ݁ ܫܽܘܒ݂ܩܳܢܳܐ . 23 ܐܰܢܰܢܩܺܐ ܗ̱ܺܝ ܓ݁ܶܝܪ ܁ ܕ݁ܗܳܠܶܝܢ ܕ݁ܰܕ݂ܡܽܘܬ݂ܳܐ ܐܶܢܶܝܢ̈ ܕ݁ܰܫܡܰܝܳܢܝܳܬ݂ܳܐ̈ ܇ ܒ݁ܗܳܠܶܝܢ ܡܶܬ݁ܕ݁ܰܟ݁ܝܳܢ̈ . ܗܳܠܶܝܢ ܕ݁ܶܝܢ ܫܡܰܝܳܢܝܳܬ݂ܳܐ̈ ܁ ܒ݁ܕ݂ܶܒ݂ܚܶܐ̈ ܕ݁ܰܡܝܰܬ݁ܪܺܝܢ ܡܶܢ ܗܳܠܶܝܢ ܀.܀.܀܀ 5 24 ܠܳܐ ܗ̱ܘܳܐ ܓ݁ܶܝܪ ܠܒ݂ܶܝܬ݂ ܡܰܩܕ݁ܫܳܐ ܕ݁ܰܥܒ݂ܺܝܕ݂ ܒ݁ܺܐܝܕ݂ܰܝܳܐ̈ ܥܰܠ ܡܫܺܝܚܳܐ ܇ ܕ݁ܺܐܝܬ݂ܰܘܗ̱ܝ ܕ݁ܡܽܘܬ݂ܳܐ ܕ݁ܗܰܘ ܫܰܪܺܝܪܳܐ ܇ ܐܶܠܳܐ ܠܶܗ ܠܰܫܡܰܝܳܐ ܥܰܠ ܆ ܕ݁ܢܶܬ݂ܚܙܶܐ ܩܕ݂ܳܡ ܦ݁ܰܪܨܽܘܦ݁ܶܗ ܕ݁ܰܐܠܳܗܳܐ ܚܠܳܦ݂ܰܝܢ ܆ 25 ܐܳܦ݂ܠܳܐ ܕ݁ܰܢܩܰܪܶܒ݂ ܢܰܦ݂ܫܶܗ ܙܰܒ݂ܢܳܬ݂ܳܐ̈ ܣܰܓ݁ܺܝܳܐܬ݂ܳܐ̈ ܇ ܐܰܝܟ݂ ܕ݁ܥܳܒ݂ܶܕ݂ ܗ̱ܘܳܐ ܪܰܒ݁ ܟ݁ܽܘܡܪܶܐ̈ ܇ ܘܥܳܐܶܠ ܒ݁ܟ݂ܽܠ ܫܢܳܐ ܠܒ݂ܶܝܬ݂ ܡܰܩܕ݁ܫܳܐ ܒ݁ܰܕ݂ܡܳܐ ܕ݁ܠܳܐ ܕ݁ܺܝܠܶܗ . 26 ܘܶܐܢ ܠܳܐ ܁ ܚܰܝܳܒ݂ ܗ̱ܘܳܐ ܆ ܕ݁ܙܰܒ݂ܢܳܬ݂ܳܐ̈ ܣܰܓ݁ܺܝܳܐܬ݂ܳܐ̈ ܢܶܚܰܫ ܡܶܢ ܫܽܘܪܳܝܶܗ ܕ݁ܥܳܠܡܳܐ . ܗܳܫܳܐ ܕ݁ܶܝܢ ܒ݁ܚܰܪܬ݂ܶܗ ܕ݁ܥܳܠܡܳܐ ܁ ܚܕ݂ܳܐ ܗ̱ܘ ܙܒ݂ܰܢ ܩܰܪܶܒ݂ ܢܰܦ݂ܫܶܗ ܒ݁ܰܕ݂ܒ݂ܺܝܚܽܘܬ݂ܶܗ ܆ ܕ݁ܰܢܒ݂ܰܛܠܺܝܗ ܠܰܚܛܺܝܬ݂ܳܐ . 27 ܘܰܐܝܟ݁ܰܢܳܐ ܕ݁ܣܺܝܡ ܠܰܒ݂ܢܰܝܢܳܫܳܐ̈ ܕ݁ܰܚܕ݂ܳܐ ܙܒ݂ܰܢ ܢܡܽܘܬ݂ܽܘܢ ܇ ܘܡܶܢ ܒ݁ܳܬ݂ܰܪ ܡܰܘܬ݁ܗܽܘܢ ܕ݁ܺܝܢܳܐ ܆ 28 ܗܳܟ݂ܰܢܳܐ ܐܳܦ݂ ܡܫܺܝܚܳܐ ܚܕ݂ܳܐ ܙܒ݂ܰܢ ܐܶܬ݂ܩܰܪܰܒ݂ ܇ ܘܒ݂ܰܩܢܽܘܡܶܗ ܕ݁ܒ݂ܰܚ ܚܛܳܗܶܐ̈ ܕ݁ܣܰܓ݁ܺܝܶܐܐ̈ . ܕ݁ܬ݂ܰܪܬ݁ܶܝܢ̈ ܕ݁ܶܝܢ ܙܰܒ݂ܢܺܝܢ̈ ܕ݁ܠܳܐ ܚܛܳܗܺܝܢ̈ ܡܶܬ݂ܚܙܶܐ ܠܚܰܝܰܝܗܽܘܢ̈ ܕ݁ܰܐܝܠܶܝܢ ܕ݁ܰܡܣܰܟ݁ܶܝܢ ܠܶܗ ܀

10 Chapter 10 1 ܢܳܡܽܘܣܳܐ ܓ݁ܶܝܪ ܁ ܛܶܠܳܢܺܝܬ݂ܳܐ ܐܺܝܬ݂ ܗ̱ܘܳܐ ܒ݁ܶܗ ܕ݁ܛܳܒ݂ܳܬ݂ܳܐ̈ ܕ݁ܰܥܬ݂ܺܝܕ݂ܳܢ̈ . ܠܳܐ ܗ̱ܘܳܐ ܩܢܽܘܡܳܐ ܕ݁ܺܝܠܗܶܝܢ ܕ݁ܨܶܒ݂ܘܳܬ݂ܳܐ̈ . ܡܶܛܽܠ ܗܳܢܳܐ ܟ݁ܰܕ݂ ܒ݁ܟ݂ܽܠ ܫܢܳܐ ܗܶܢܽܘܢ ܟ݁ܰܕ݂ ܗܶܢܽܘܢ ܕ݁ܶܒ݂ܚܶܐ̈ ܡܶܬ݂ܩܰܪܒ݂ܺܝܢ ܗ̱ܘܰܘ ܆ ܠܳܐ ܡܶܡܬ݂ܽܘܡ ܐܶܫܟ݁ܰܚܘ ܕ݁ܢܶܓ݂ܡܪܽܘܢ ܠܰܐܝܠܶܝܢ ܕ݁ܰܡܩܰܪܒ݂ܺܝܢ ܠܗܽܘܢ . 2 ܐܶܠܽܘ ܓ݁ܶܝܪ ܓ݁ܳܡܪܺܝܢ ܗ̱ܘܰܘ ܆ ܟ݁ܒ݂ܰܪ ܕ݁ܶܝܢ ܐܶܬ݁ܬ݁ܢܺܝܚܘ ܡܶܢ ܩܽܘܪܒ݁ܳܢܰܝܗܽܘܢ̈ ܇ ܡܶܛܽܠ ܕ݁ܠܳܐ ܡܶܟ݁ܺܝܠ ܛܳܪܝܳܐ ܗ̱ܘܳܬ݂ ܠܗܽܘܢ ܬ݁ܺܐܪܬ݁ܗܽܘܢ ܒ݁ܰܚܛܳܗܶܐ̈ ܇ ܠܰܐܝܠܶܝܢ ܕ݁ܰܚܕ݂ܳܐ ܙܒ݂ܰܢ ܐܶܬ݁ܕ݁ܰܟ݁ܺܝܘ ܠܗܽܘܢ . 3 ܐܶܠܳܐ ܒ݁ܗܽܘܢ ܒ݁ܕ݂ܶܒ݂ܚܶܐ̈ ܡܰܕ݂ܟ݁ܪܺܝܢ ܚܛܳܗܰܝܗܽܘܢ̈ ܒ݁ܟ݂ܽܠ ܫܢܳܐ . 4 ܠܳܐ ܓ݁ܶܝܪ ܡܶܫܟ݁ܰܚ ܕ݁ܡܳܐ ܕ݁ܬ݂ܰܘܪܶܐ̈ ܘܰܕ݂ܨܺܦ݂ܪܳܝܶܐ̈ ܠܰܡܕ݂ܰܟ݁ܳܝܽܘ ܚܛܳܗܶܐ̈ . 5 ܡܶܛܽܠ ܗܳܢܳܐ ܟ݁ܰܕ݂ ܥܳܐܶܠ ܠܥܳܠܡܳܐ ܁ ܐܶܡܰܪ . ܒ݁ܕ݂ܶܒ݂ܚܶܐ̈ ܘܩܽܘܪܒ݁ܳܢܶܐ̈ ܠܳܐ ܨܒ݂ܰܝܬ݁ . ܦ݁ܰܓ݂ܪܳܐ ܕ݁ܶܝܢ ܐܰܠܒ݁ܶܫܬ݁ܳܢܝ . 6 ܘܝܰܩܕ݁ܶܐ̈ ܫܰܠܡܶܐ̈ ܕ݁ܰܚܠܳܦ݂ ܚܛܳܗܶܐ̈ ܠܳܐ ܫܶܐܠܬ݁ . 7 ܗܳܝܕ݁ܶܝܢ ܐܶܡܪܶܬ݂ . ܕ݁ܗܳܐ ܐܶܢܳܐ ܐܳܬ݂ܶܐ ܐ̱ܢܳܐ ܁ ܕ݁ܰܒ݂ܪܺܝܫ ܟ݁ܬ݂ܳܒ݂ܶܐ̈ ܟ݁ܬ݂ܺܝܒ݂ ܥܠܰܝ ܆ ܕ݁ܶܐܥܒ݁ܶܕ݂ ܨܶܒ݂ܝܳܢܳܟ݂ ܐܰܠܳܗܳܐ . 8 ܡܶܢ ܠܥܶܠ ܐܶܡܰܪ . ܕ݁ܕ݂ܶܒ݂ܚܶܐ̈ ܘܩܽܘܪܒ݁ܳܢܶܐ̈ ܘܝܰܩܕ݁ܶܐ̈ ܫܰܠܡܶܐ̈ ܕ݁ܰܚܠܳܦ݂ ܚܛܳܗܶܐ̈ ܠܳܐ ܨܒ݂ܰܝܬ݁ . ܗܳܢܽܘܢ ܕ݁ܡܶܬ݂ܩܰܪܒ݂ܺܝܢ ܗ̱ܘܰܘ ܒ݁ܢܳܡܽܘܣܳܐ . 9 ܘܒ݂ܳܬ݂ܪܶܗ ܐܶܡܰܪ . ܕ݁ܗܳܐ ܐܳܬ݂ܶܐ ܐ̱ܢܳܐ ܆ ܕ݁ܶܐܥܒ݁ܶܕ݂ ܨܶܒ݂ܝܳܢܳܟ݂ ܐܰܠܳܗܳܐ . ܒ݁ܗܳܕ݂ܶܐ ܒ݁ܰܛܶܠ ܠܩܰܕ݂ܡܳܝܬ݁ܳܐ ܆ ܕ݁ܰܢܩܺܝܡ ܠܰܕ݁ܬ݂ܰܪܬ݁ܶܝܢ̈ . 10 ܒ݁ܗܳܢܳܐ ܓ݁ܶܝܪ ܨܶܒ݂ܝܳܢܶܗ ܐܶܬ݂ܩܰܕ݁ܰܫܢ ܁ ܒ݁ܩܽܘܪܒ݁ܳܢܳܐ ܕ݁ܦ݂ܰܓ݂ܪܶܗ ܕ݁ܝܶܫܽܘܥ ܡܫܺܝܚܳܐ ܕ݁ܰܚܕ݂ܳܐ ܙܒ݂ܰܢ . 11 ܟ݁ܽܠ ܪܰܒ݁ ܟ݁ܽܘܡܪܶܐ̈ ܓ݁ܶܝܪ ܕ݁ܩܳܐܶܡ ܗ̱ܘܳܐ ܘܰܡܫܰܡܶܫ ܟ݁ܽܠܝܽܘܡ ܆ ܗܶܢܽܘܢ ܒ݁ܗܶܢܽܘܢ ܕ݁ܶܒ݂ܚܶܐ̈ ܡܩܰܪܶܒ݂ ܗ̱ܘܳܐ . ܐܰܝܠܶܝܢ ܕ݁ܡܶܢ ܡܬ݂ܽܘܡ ܠܳܐ ܡܶܫܟ݁ܚܺܝܢ ܗ̱ܘܰܘ ܠܰܡܕ݂ܰܟ݁ܳܝܽܘ ܚܛܳܗܶܐ̈ . 12 ܗܳܢܳܐ ܕ݁ܶܝܢ ܚܰܕ݂ ܕ݁ܶܒ݂ܚܳܐ ܩܰܪܶܒ݂ ܚܠܳܦ݂ ܚܛܳܗܶܐ̈ . ܘܺܝܬ݂ܶܒ݂ ܥܰܠ ܝܰܡܺܝܢܳܐ ܕ݁ܰܐܠܳܗܳܐ ܠܥܳܠܰܡ . 13 ܘܰܡܩܰܘܶܐ ܡܶܟ݁ܺܝܠ ܆ ܥܕ݂ܰܡܳܐ ܕ݁ܢܶܬ݁ܬ݁ܣܺܝܡܽܘܢ ܒ݁ܥܶܠܕ݁ܒ݂ܳܒ݂ܰܘܗ̱ܝ̈ ܟ݁ܽܘܒ݂ܫܳܐ ܬ݁ܚܶܝܬ݂ ܪܶܓ݂ܠܰܘܗ̱ܝ̈ . 14 ܒ݁ܚܰܕ݂ ܓ݁ܶܝܪ ܩܽܘܪܒ݁ܳܢܳܐ ܓ݁ܡܰܪ ܠܰܐܝܠܶܝܢ ܕ݁ܡܶܬ݂ܩܰܕ݁ܫܺܝܢ ܒ݁ܶܗ ܠܥܳܠܰܡ . 15 ܣܳܗܕ݁ܳܐ ܠܰܢ ܕ݁ܶܝܢ ܐܳܦ݂ ܪܽܘܚܳܐ ܕ݁ܩܽܘܕ݂ܫܳܐ ܕ݁ܶܐܡܪܰܬ݂ . 16 ܗܳܕ݂ܶܐ ܗ̱ܝ ܕ݁ܺܝܰܬ݂ܺܩܺܐ ܕ݁ܶܐܬ݁ܶܠ ܠܗܽܘܢ ܡܶܢ ܒ݁ܳܬ݂ܰܪ ܝܰܘܡܳܬ݂ܳܐ̈ ܗܳܢܽܘܢ ܁ ܐܳܡܰܪ ܡܳܪܝܳܐ . ܐܶܬ݁ܠܺܝܘܗ̱ܝ ܠܢܳܡܽܘܣܝ ܒ݁ܡܰܕ݁ܥܰܝܗܽܘܢ̈ . ܘܥܰܠ ܠܶܒ݁ܰܘܳܬ݂ܗܽܘܢ̈ ܐܶܟ݂ܬ݁ܒ݂ܺܝܘܗ̱ܝ . 17 ܘܥܰܘܠܗܽܘܢ ܘܰܚܛܳܗܰܝܗܽܘܢ̈ ܠܳܐ ܐܶܬ݁ܕ݁ܟ݂ܰܪ ܠܗܽܘܢ . 18 ܐܰܝܟ݁ܳܐ ܕ݁ܶܝܢ ܕ݁ܺܐܝܬ݂ ܫܽܘܒ݂ܩܳܢܳܐ ܕ݁ܰܚܛܳܗܶܐ̈ ܆ ܠܳܐ ܡܶܬ݂ܒ݁ܥܶܐ ܩܽܘܪܒ݁ܳܢܳܐ ܕ݁ܰܚܠܳܦ݂ ܚܛܳܗܶܐ̈ ܀ 19 ܐܺܝܬ݂ ܠܰܢ ܗܳܟ݂ܺܝܠ ܐܰܚܰܝ̈ ܁ ܓ݁ܰܠܝܽܘܬ݂ ܐܰܦ݁ܶܐ̈ ܒ݁ܡܰܥܠܳܢܳܐ ܕ݁ܒ݂ܶܝܬ݂ ܩܽܘܕ݂ܫܳܐ ܒ݁ܰܕ݂ܡܶܗ ܕ݁ܝܶܫܽܘܥ . 20 ܘܽܐܘܪܚܳܐ ܕ݁ܚܰܝܶܐ̈ ܁ ܕ݁ܚܰܕ݁ܶܬ݂ ܠܰܢ ܗܳܫܳܐ ܇ ܒ݁ܰܐܦ݁ܰܝ̈ ܬ݁ܰܪܥܳܐ ܂ ܕ݁ܺܐܝܬ݂ܰܘܗ̱ܝ ܒ݁ܶܣܪܶܗ . 21 ܘܺܐܝܬ݂ ܠܰܢ ܟ݁ܽܘܡܪܳܐ ܪܰܒ݁ܳܐ ܥܰܠ ܒ݁ܰܝܬ݁ܶܗ ܕ݁ܰܐܠܳܗܳܐ . 22 ܢܶܩܪܽܘܒ݂ ܗܳܟ݂ܺܝܠ ܒ݁ܠܶܒ݁ܳܐ ܫܰܪܺܝܪܳܐ ܘܰܒ݂ܬ݂ܽܘܟ݂ܠܳܢܳܐ ܕ݁ܗܰܝܡܳܢܽܘܬ݂ܳܐ ܇ ܟ݁ܰܕ݂ ܪܣܺܝܣܺܝܢ ܠܶܒ݁ܰܘܳܬ݂ܰܢ̈ ܘܰܕ݂ܟ݂ܶܝܢ ܡܶܢ ܬ݁ܺܐܪܬ݁ܳܐ ܒ݁ܺܝܫܬ݁ܳܐ . ܘܡܰܣܚܰܝ ܦ݁ܰܓ݂ܪܰܢ ܒ݁ܡܰܝܳܐ̈ ܕ݁ܟ݂ܰܝܳܐ̈ . 23 ܘܰܢܚܰܡܣܶܢ ܒ݁ܬ݂ܰܘܕ݁ܺܝܬ݂ܳܐ ܕ݁ܣܰܒ݂ܪܰܢ ܘܠܳܐ ܢܶܨܛܠܶܐ . ܡܗܰܝܡܰܢ ܗ̱ܽܘ ܓ݁ܶܝܪ ܡܰܢ ܕ݁ܰܡܠܰܟ݂ ܠܰܢ . 24 ܘܰܢܚܽܘܪ ܚܰܕ݂ ܒ݁ܚܰܕ݂ ܆ ܒ݁ܓ݂ܽܘܪܳܓ݂ܳܐ ܕ݁ܚܽܘܒ݁ܳܐ ܘܕ݂ܰܥܒ݂ܳܕ݂ܶܐ̈ ܛܳܒ݂ܶܐ̈ . 25 ܘܠܳܐ ܢܶܗܘܶܐ ܫܳܒ݂ܩܺܝܢ ܟ݁ܢܽܘܫܝܰܢ ܇ ܐܰܝܟ݂ ܕ݁ܺܐܝܬ݂ ܥܝܳܕ݂ܳܐ ܠܐ̱ܢܳܫ ܐ̱ܢܳܫ ܆ ܐܶܠܳܐ ܒ݁ܥܰܘ ܚܰܕ݂ ܡܶܢ ܚܰܕ݂ ܇ ܝܰܬ݁ܺܝܪܳܐܝܺܬ݂ ܟ݁ܡܳܐ ܕ݁ܚܳܙܶܝܬ݁ܽܘܢ ܕ݁ܰܩܪܶܒ݂ ܝܰܘܡܳܐ ܗܰܘ . 26 ܐܶܢ ܓ݁ܶܝܪ ܒ݁ܨܶܒ݂ܝܳܢܶܗ ܢܶܚܛܶܐ ܐ̱ܢܳܫ ܡܶܢ ܒ݁ܳܬ݂ܰܪ ܕ݁ܩܰܒ݁ܶܠ ܝܺܕ݂ܰܥܬ݂ܳܐ ܕ݁ܰܫܪܳܪܳܐ ܆ ܠܰܝܬ݁ ܡܶܟ݁ܺܝܠ ܕ݁ܶܒ݂ܚܬ݂ܳܐ ܕ݁ܬ݂ܶܬ݂ܩܰܪܰܒ݂ ܚܠܳܦ݂ ܚܛܳܗܶܐ̈ . 27 ܐܶܠܳܐ ܥܬ݂ܺܝܕ݂ ܗ̱ܽܘ ܕ݁ܺܝܢܳܐ ܕ݁ܚܺܝܠܳܐ . ܘܰܛܢܳܢܳܐ ܕ݁ܢܽܘܪܳܐ ܕ݁ܳܐܟ݂ܶܠ ܠܰܒ݂ܥܶܠܕ݁ܒ݂ܳܒ݂ܶܐ̈ . 28 ܐܶܢ ܓ݁ܶܝܪ ܐܰܝܢܳܐ ܕ݁ܰܥܒ݂ܰܪ ܥܰܠ ܢܳܡܽܘܣܳܐ ܕ݁ܡܽܘܫܶܐ ܁ ܥܰܠ ܦ݁ܽܘܡ ܬ݁ܪܶܝܢ̈ ܘܰܬ݂ܠܳܬ݂ܳܐ ܣܳܗܕ݁ܺܝܢ̈ ܕ݁ܠܳܐ ܪܰܚܡܺܝܢ̈ ܡܳܐܶܬ݂ ܆ 29 ܟ݁ܡܳܐ ܣܳܒ݂ܪܺܝܢ ܐܢ̱ܬ݁ܽܘܢ ܝܰܬ݁ܺܝܪܳܐܝܺܬ݂ ܡܣܳܡ ܒ݁ܪܺܫܳܐ ܁ ܢܩܰܒ݁ܶܠ ܐܰܝܢܳܐ ܕ݁ܕ݂ܳܫܶܗ ܠܰܒ݂ܪܶܗ ܕ݁ܰܐܠܳܗܳܐ . ܘܰܚܫܰܒ݂ ܕ݁ܡܳܐ ܕ݁ܕ݂ܺܝܰܬ݂ܺܩܺܐ ܕ݁ܺܝܠܶܗ ܐܰܝܟ݂ ܕ݁ܟ݂ܽܠܢܳܫ ܁ ܕ݁ܒ݂ܳܗ ܐܶܬ݂ܩܰܕ݁ܰܫ . ܘܨܰܥܰܪ ܠܪܽܘܚܳܐ ܕ݁ܛܰܝܒ݁ܽܘܬ݂ܳܐ . 30 ܝܳܕ݂ܥܺܝܢܰܢ ܠܗܰܘ ܕ݁ܶܐܡܰܪ . ܕ݁ܕ݂ܺܝܠܝ ܗ̱ܺܝ ܬ݁ܒ݂ܰܥܬ݂ܳܐ ܘܶܐܢܳܐ ܐܶܦ݂ܪܽܘܥ . ܘܬ݂ܽܘܒ݂ . ܕ݁ܰܢܕ݂ܽܘܢ ܡܳܪܝܳܐ ܠܥܰܡܶܗ . 31 ܕ݁ܶܚܠܬ݂ܳܐ ܗ̱ܝ ܪܰܒ݁ܬ݂ܳܐ ܠܡܶܦ݁ܰܠ ܒ݁ܺܐܝܕ݂ܰܘܗ̱ܝ̈ ܕ݁ܰܐܠܳܗܳܐ ܚܰܝܳܐ ܀ 32 ܐܶܬ݁ܕ݁ܰܟ݂̱ܪܘ ܗܳܟ݂ܺܝܠ ܠܝܰܘܡܳܬ݂ܳܐ̈ ܩܰܕ݂ܡܳܝܶܐ̈ ܁ ܗܳܢܽܘܢ ܕ݁ܰܒ݂ܗܽܘܢ ܩܰܒ݁ܶܠܬ݁ܽܘܢ ܡܰܥܡܽܘܕ݂ܺܝܬ݂ܳܐ . ܘܰܐܓ݂ܽܘܢܳܐ ܪܰܒ݁ܳܐ ܣܰܝܒ݁ܰܪܬ݁ܽܘܢ ܕ݁ܚܰܫܶܐ̈ ܒ݁ܚܶܣܕ݁ܳܐ ܘܒ݂ܽܐܘܠܨܳܢܶܐ̈ ܇ 33 ܘܕ݂ܰܗܘܰܝܬ݁ܽܘܢ ܚܶܙܘܳܢܶܐ̈ . ܘܳܐܦ݂ ܐܶܫܬ݁ܰܘܬ݁ܰܦ݂ܬ݁ܽܘܢ ܠܐ̱ܢܳܫܳܐ ܕ݁ܗܳܠܶܝܢ ܣܰܝܒ݁ܰܪܘ . 34 ܘܟ݂ܶܐܒ݂ ܠܟ݂ܽܘܢ ܥܰܠ ܐܰܝܠܶܝܢ ܕ݁ܰܐܣܺܝܪܺܝܢ . ܘܰܚܛܽܘܦ݂ܝܳܐ ܕ݁ܢܶܟ݂ܣܰܝܟ݁ܽܘܢ̈ ܒ݁ܚܰܕ݂ܽܘܬ݂ܳܐ ܣܰܝܒ݁ܰܪܬ݁ܽܘܢ ܆ ܡܶܛܽܠ ܕ݁ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܺܐܝܬ݂ ܠܟ݂ܽܘܢ ܩܶܢܝܳܢܳܐ ܒ݁ܰܫܡܰܝܳܐ ܇ ܕ݁ܰܡܝܰܬ݁ܰܪ ܗ̱ܽܘ ܘܠܳܐ ܥܳܒ݂ܰܪ . 35 ܠܳܐ ܗܳܟ݂ܺܝܠ ܬ݁ܰܘܒ݁ܕ݂ܽܘܢ ܓ݁ܰܠܝܽܘܬ݂ ܐܰܦ݁ܶܐ̈ ܕ݁ܺܐܝܬ݂ ܠܟ݂ܽܘܢ ܁ ܕ݁ܰܥܬ݂ܺܝܕ݂ ܠܳܗ ܐܰܓ݂ܪܳܐ ܣܰܓ݁ܺܝܳܐܐ . 36 ܡܣܰܝܒ݁ܪܳܢܽܘܬ݂ܳܐ ܗ̱ܘ ܓ݁ܶܝܪ ܡܶܬ݂ܒ݁ܰܥܝܳܐ ܠܟ݂ܽܘܢ ܆ ܕ݁ܬ݂ܶܥܒ݁ܕ݂ܽܘܢ ܨܶܒ݂ܝܳܢܳܐ ܕ݁ܰܐܠܳܗܳܐ ܘܬ݂ܶܣܒ݂ܽܘܢ ܡܽܘܠܟ݁ܳܢܳܐ . 37 ܡܶܛܽܠ ܕ݁ܩܰܠܺܝܠ ܗܽܘ ܙܰܒ݂ܢܳܐ ܘܛܳܒ݂ ܙܥܽܘܪ ܆ ܕ݁ܢܺܐܬ݂ܶܐ ܗܰܘ ܕ݁ܳܐܬ݂ܶܐ ܘܠܳܐ ܢܰܘܚܰܪ . 38 ܟ݁ܺܐܢܳܐ ܕ݁ܶܝܢ ܡܶܢ ܗܰܝܡܳܢܽܘܬ݂ܳܐ ܕ݁ܺܝܠܝ ܢܺܚܶܐ . ܘܶܐܢ ܡܶܬ݂ܩܰܛܥܳܐ ܠܶܗ ܆ ܠܳܐ ܨܳܒ݂ܝܳܐ ܒ݁ܶܗ ܢܰܦ݂ܫܝ . 39 ܚܢܰܢ ܕ݁ܶܝܢ ܠܳܐ ܗܘܰܝܢ ܕ݁ܩܽܘܛܳܥܳܐ ܕ݁ܡܰܘܒ݁ܠܳܐ ܠܰܐܒ݂ܕ݂ܳܢܳܐ ܆ ܐܶܠܳܐ ܕ݁ܗܰܝܡܳܢܽܘܬ݂ܳܐ ܕ݁ܡܰܩܢܝܳܐ ܠܰܢ ܢܰܦ݂ܫܰܢ ܀

11 Chapter 11 1 ܐܺܝܬ݂ܶܝܗ ܕ݁ܶܝܢ ܗܰܝܡܳܢܽܘܬ݂ܳܐ ܦ݁ܝܳܣܳܐ ܥܰܠ ܐܰܝܠܶܝܢ ܕ݁ܺܐܝܬ݂ܰܝܗܶܝܢ ܒ݁ܣܰܒ݂ܪܳܐ ܁ ܐܰܝܟ݂ ܗܰܘ ܕ݁ܰܗܘܰܝ̈ ܠܗܶܝܢ ܒ݁ܣܽܘܥܪܳܢܳܐ . ܘܓ݂ܶܠܝܳܢܳܐ ܕ݁ܰܐܝܠܶܝܢ ܕ݁ܠܳܐ ܡܶܬ݂ܚܰܙܝܳܢ̈ . 2 ܘܰܒ݂ܗܳܕ݂ܶܐ ܗܘܳܬ݂ ܣܳܗܕ݁ܽܘܬ݂ܳܐ ܥܰܠ ܩܰܫܺܝܫܶܐ̈ ܀.܀.܀܀ 6 3 ܒ݁ܗܰܝܡܳܢܽܘܬ݂ܳܐ ܓ݁ܶܝܪ ܡܶܣܬ݁ܰܟ݁ܠܺܝܢܰܢ ܆ ܕ݁ܶܐܬ݁ܬ݁ܰܩܰܢܘ ܥܳܠܡܶܐ̈ ܒ݁ܡܶܠܬ݂ܳܐ ܕ݁ܰܐܠܳܗܳܐ ܇ ܘܗܳܠܶܝܢ ܕ݁ܡܶܬ݂ܚܰܙܝܳܢ̈ ܗ̱ܘܰܝ̈ ܡܶܢ ܐܰܝܠܶܝܢ ܕ݁ܠܳܐ ܡܶܬ݂ܚܰܙܝܳܢ̈ ܀ 4 ܒ݁ܗܰܝܡܳܢܽܘܬ݂ܳܐ ܩܰܪܶܒ݂ ܗܳܒ݂ܶܝܠ ܕ݁ܶܒ݂ܚܬ݂ܳܐ ܕ݁ܰܡܝܰܬ݁ܪܳܐ ܛܳܒ݂ ܡܶܢ ܕ݁ܩܳܐܝܶܢ ܠܰܐܠܳܗܳܐ . ܘܡܶܛܽܠܳܬ݂ܳܗ ܗܘܳܬ݂ ܥܠܰܘܗ̱ܝ ܣܳܗܕ݁ܽܘܬ݂ܳܐ ܕ݁ܟ݂ܺܐܢܳܐ ܗ̱ܘ . ܘܰܣܗܶܕ݂ ܥܰܠ ܩܽܘܪܒ݁ܳܢܶܗ ܐܰܠܳܗܳܐ . ܘܡܶܛܽܠܳܬ݂ܶܗ ܐܳܦ݂ ܟ݁ܰܕ݂ ܡܰܝܺܝܬ݂ ܡܡܰܠܶܠ ܀ 5 ܒ݁ܗܰܝܡܳܢܽܘܬ݂ܳܐ ܐܶܫܬ݁ܰܢܺܝ ܚܢܽܘܟ݂ ܘܡܰܘܬ݁ܳܐ ܠܳܐ ܛܥܶܡ . ܘܠܳܐ ܐܶܫܬ݁ܟ݂ܰܚ ܆ ܡܶܛܽܠ ܕ݁ܫܰܢܝܶܗ ܐܰܠܳܗܳܐ . ܡܶܢ ܩܕ݂ܳܡ ܕ݁ܰܢܫܰܢܶܝܘܗ̱ܝ ܓ݁ܶܝܪ ܆ ܗܘܳܬ݂ ܥܠܰܘܗ̱ܝ ܣܳܗܕ݁ܽܘܬ݂ܳܐ ܕ݁ܰܫܦ݂ܰܪ ܠܰܐܠܳܗܳܐ . 6 ܕ݁ܠܳܐ ܗܰܝܡܳܢܽܘܬ݂ܳܐ ܕ݁ܶܝܢ ܠܳܐ ܐ̱ܢܳܫ ܡܶܫܟ݁ܰܚ ܕ݁ܢܶܫܦ݁ܰܪ ܠܰܐܠܳܗܳܐ . ܚܰܝܳܒ݂ ܗ̱ܽܘ ܓ݁ܶܝܪ ܡܰܢ ܕ݁ܡܶܬ݂ܩܰܪܰܒ݂ ܠܘܳܬ݂ ܐܰܠܳܗܳܐ ܆ ܕ݁ܰܢܗܰܝܡܶܢ ܕ݁ܺܐܝܬ݂ܰܘܗ̱ܝ ܇ ܘܠܰܐܝܠܶܝܢ ܕ݁ܒ݂ܳܥܶܝܢ ܠܶܗ ܁ ܗܳܘܶܐ ܦ݁ܳܪܽܘܥܳܐ ܀ 7 ܒ݁ܗܰܝܡܳܢܽܘܬ݂ܳܐ ܢܽܘܚ ܟ݁ܰܕ݂ ܐܶܬ݂ܡܰܠܰܠ ܥܰܡܶܗ ܥܰܠ ܐܰܝܠܶܝܢ ܕ݁ܠܳܐ ܡܶܬ݂ܚܰܙܝܳܢ̈ ܗ̱ܘܰܝ̈ ܆ ܕ݁ܚܶܠ ܘܰܥܒ݂ܰܕ݂ ܠܶܗ ܩܺܒ݂ܽܘܬ݂ܳܐ ܠܚܰܝܶܐ̈ ܕ݁ܰܒ݂ܢܰܝ̈ ܒ݁ܰܝܬ݁ܶܗ ܇ ܕ݁ܒ݂ܳܗ ܚܰܝܒ݂ܶܗ ܠܥܳܠܡܳܐ . ܘܰܗܘܳܐ ܝܳܪܬ݁ܳܐ ܕ݁ܟ݂ܺܐܢܽܘܬ݂ܳܐ ܕ݁ܰܒ݂ܗܰܝܡܳܢܽܘܬ݂ܳܐ ܀ 8 ܒ݁ܗܰܝܡܳܢܽܘܬ݂ܳܐ ܐܰܒ݂ܪܳܗܳܡ ܟ݁ܰܕ݂ ܐܶܬ݂ܩܪܺܝ ܆ ܐܶܫܬ݁ܡܰܥ ܕ݁ܢܶܦ݁ܽܘܩ ܠܰܐܬ݂ܪܳܐ ܗܰܘ ܕ݁ܰܥܬ݂ܺܝܕ݂ ܗ̱ܘܳܐ ܕ݁ܢܶܣܰܒ݂ ܠܝܳܪܬ݁ܽܘܬ݂ܳܐ . ܘܰܢܦ݂ܰܩ ܟ݁ܰܕ݂ ܠܳܐ ܝܳܕ݂ܰܥ ܗ̱ܘܳܐ ܠܰܐܝܟ݁ܳܐ ܐܳܙܶܠ ܀ 9 ܒ݁ܗܰܝܡܳܢܽܘܬ݂ܳܐ ܗܘܳܐ ܬ݁ܰܘܬ݁ܳܒ݂ܳܐ ܒ݁ܰܐܪܥܳܐ ܗܳܝ ܕ݁ܶܐܬ݂ܡܰܠܟ݁ܰܬ݂ ܠܶܗ ܐܰܝܟ݂ ܕ݁ܰܒ݂ܢܽܘܟ݂ܪܳܝܬ݁ܳܐ . ܘܰܒ݂ܡܰܫܟ݁ܢܶܐ̈ ܥܡܰܪ ܥܰܡ ܐܺܝܣܚܳܩ ܘܝܰܥܩܽܘܒ݂ ܒ݁ܢܰܝ̈ ܝܳܪܬ݁ܽܘܬ݂ܳܐ ܕ݁ܺܝܠܶܗ ܕ݁ܡܽܘܠܟ݁ܳܢܳܐ . 10 ܡܣܰܟ݁ܶܐ ܗ̱ܘܳܐ ܓ݁ܶܝܪ ܠܰܡܕ݂ܺܝܢ̱ܬ݁ܳܐ ܕ݁ܫܶܬ݂ܶܐܣܬ݂ܳܐ ܐܺܝܬ݂ ܠܳܗ . ܕ݁ܽܐܘܡܳܢܳܗ ܘܥܳܒ݂ܽܘܕ݂ܳܗ ܐܰܠܳܗܳܐ ܗ̱ܘ ܀ 11 ܒ݁ܗܰܝܡܳܢܽܘܬ݂ܳܐ ܐܳܦ݂ ܣܰܪܳܐ ܕ݁ܰܥܩܰܪܬ݂ܳܐ ܗ̱ܘܳܬ݂ ܆ ܢܶܣܒ݁ܰܬ݂ ܚܰܝܠܳܐ ܕ݁ܰܬ݂ܩܰܒ݁ܶܠ ܙܰܪܥܳܐ . ܘܰܕ݂ܠܳܐ ܒ݁ܙܰܒ݂ܢܳܐ ܕ݁ܰܫܢܶܝܗ̈ ܝܶܠܕ݁ܰܬ݂ ܆ ܥܰܠ ܕ݁ܰܐܫܪܰܬ݂ ܕ݁ܰܡܗܰܝܡܰܢ ܗ̱ܽܘ ܗܰܘ ܕ݁ܰܡܠܰܟ݂ ܠܳܗ . 12 ܡܶܛܽܠ ܗܳܢܳܐ ܡܶܢ ܚܰܕ݂ ܕ݁ܰܒ݂ܛܶܠ ܒ݁ܣܰܝܒ݁ܽܘܬ݂ܳܐ ܆ ܐܶܬ݂ܺܝܠܶܕ݂ܘ ܣܰܓ݁ܺܝܶܐܐ̈ ܐܰܝܟ݂ ܟ݁ܰܘܟ݁ܒ݂ܶܐ̈ ܕ݁ܒ݂ܰܫܡܰܝܳܐ ܁ ܘܰܐܝܟ݂ ܚܳܠܳܐ ܕ݁ܥܰܠ ܣܶܦ݂ܬ݂ܶܗ ܕ݁ܝܰܡܳܐ ܕ݁ܡܶܢܝܳܢ ܠܰܝܬ݁ ܠܶܗ ܀ 13 ܒ݁ܗܰܝܡܳܢܽܘܬ݂ܳܐ ܡܺܝܬ݂ܘ ܗܳܠܶܝܢ ܟ݁ܽܠܗܽܘܢ ܘܠܳܐ ܢܣܰܒ݂ܘ ܡܽܘܠܟ݁ܳܢܗܽܘܢ . ܐܶܠܳܐ ܡܶܢ ܪܽܘܚܩܳܐ ܚܙܰܐܘܽܗ̱ܝ ܘܰܚܕ݂ܺܝܘ ܒ݁ܶܗ . ܘܰܐܘܕ݁ܺܝܘ ܕ݁ܰܐܟ݂ܣܢܳܝܶܐ̈ ܐܶܢܽܘܢ ܘܬ݂ܰܘܬ݁ܳܒ݂ܶܐ̈ ܒ݁ܰܐܪܥܳܐ . 14 ܐܰܝܠܶܝܢ ܕ݁ܶܝܢ ܕ݁ܗܳܠܶܝܢ ܐܳܡܪܺܝܢ ܆ ܡܚܰܘܶܝܢ ܕ݁ܠܰܡܕ݂ܺܝܢ̱ܬ݁ܗܽܘܢ ܒ݁ܳܥܶܝܢ ܁ 15 ܘܶܐܠܽܘ ܠܰܡܕ݂ܺܝܢ̱ܬ݁ܳܐ ܗܳܝ ܕ݁ܰܢܦ݂ܰܩܘ ܡܶܢܳܗ ܒ݁ܳܥܶܝܢ ܗ̱ܘܰܘ ܆ ܐܺܝܬ݂ ܗ̱ܘܳܐ ܠܗܽܘܢ ܙܰܒ݂ܢܳܐ ܕ݁ܬ݂ܽܘܒ݂ ܢܶܗܦ݁ܟ݂ܽܘܢ ܢܺܐܙܽܠ̱ܘܢ ܠܳܗ . 16 ܗܳܫܳܐ ܕ݁ܶܝܢ ܝܺܕ݂ܺܝܥܳܐ ܆ ܕ݁ܠܰܕ݁ܛܳܒ݂ܳܐ ܡܶܢܳܗ ܪܳܓ݁ܺܝܢ ܗ̱ܘܰܘ . ܠܗܳܝ ܕ݁ܺܐܝܬ݂ܶܝܗ ܒ݁ܰܫܡܰܝܳܐ . ܡܶܛܽܠ ܗܳܢܳܐ ܠܳܐ ܢܟ݂ܶܦ݂ ܐܰܠܳܗܳܐ ܆ ܕ݁ܰܐܠܳܗܗܽܘܢ ܢܶܬ݂ܩܪܶܐ . ܛܰܝܶܒ݂ ܠܗܽܘܢ ܓ݁ܶܝܪ ܡܕ݂ܺܝܢ̱ܬ݁ܳܐ ܀ 17 ܒ݁ܗܰܝܡܳܢܽܘܬ݂ܳܐ ܩܰܪܶܒ݂ ܐܰܒ݂ܪܳܗܳܡ ܠܺܐܝܣܚܳܩ ܒ݁ܢܶܣܝܽܘܢܶܗ ܆ ܘܠܺܝܚܺܝܕ݂ܶܗ ܐܰܣܶܩ ܠܡܰܕ݂ܒ݁ܚܳܐ . ܠܗܰܘ ܕ݁ܩܰܒ݁ܶܠ ܗ̱ܘܳܐ ܒ݁ܡܽܘܠܟ݁ܳܢܳܐ . 18 ܐܶܬ݂ܶܐܡܰܪ ܗ̱ܘܳܐ ܠܶܗ ܓ݁ܶܝܪ ܁ ܕ݁ܒ݂ܺܐܝܣܚܳܩ ܢܶܬ݂ܩܪܶܐ ܠܳܟ݂ ܙܰܪܥܳܐ . 19 ܘܶܐܬ݂ܪܰܥܺܝ ܗ̱ܘܳܐ ܒ݁ܢܰܦ݂ܫܶܗ ܆ ܕ݁ܡܳܛܝܳܐ ܒ݁ܺܐܝܕ݂ܰܘܗ̱ܝ̈ ܕ݁ܰܐܠܳܗܳܐ ܐܳܦ݂ ܡܶܢ ܡܺܝܬ݂ܶܐ̈ ܠܰܡܩܳܡܽܘ . ܘܡܶܛܽܠ ܗܳܢܳܐ ܒ݁ܡܰܬ݂ܠܳܐ ܐܶܬ݂ܺܝܗܶܒ݂ ܠܶܗ ܀ 20 ܒ݁ܗܰܝܡܳܢܽܘܬ݂ܳܐ ܕ݁ܡܶܕ݁ܶܡ ܕ݁ܰܥܬ݂ܺܝܕ݂ ܗ̱ܘܳܐ ܆ ܒ݁ܰܪܶܟ݂ ܐܺܝܣܚܳܩ ܠܝܰܥܩܽܘܒ݂ ܘܰܠܥܺܣܽܘ ܀ 21 ܒ݁ܗܰܝܡܳܢܽܘܬ݂ܳܐ ܟ݁ܰܕ݂ ܡܳܐܶܬ݂ ܝܰܥܩܽܘܒ݂ ܆ ܒ݁ܰܪܶܟ݂ ܠܟ݂ܽܠ ܚܰܕ݂ ܚܰܕ݂ ܡܶܢ ܒ݁ܢܰܘܗ̱ܝ̈ ܕ݁ܝܰܘܣܶܦ݂ ܘܰܣܓ݂ܶܕ݂ ܥܰܠ ܪܺܝܫ ܚܽܘܛܪܶܗ ܀ 22 ܒ݁ܗܰܝܡܳܢܽܘܬ݂ܳܐ ܝܰܘܣܶܦ݂ ܟ݁ܰܕ݂ ܡܳܐܶܬ݂ ܆ ܥܶܗܰܕ݂ ܠܡܰܦ݁ܰܩܬ݂ܳܐ ܕ݁ܰܒ݂ܢܰܝ̈ ܐܺܝܣܪܳܝܶܠ ܘܦ݂ܰܩܶܕ݂ ܥܰܠ ܓ݁ܰܪܡܰܘܗ̱ܝ̈ ܀ 23 ܒ݁ܗܰܝܡܳܢܽܘܬ݂ܳܐ ܐܰܒ݂ܳܗܰܘܗ̱ܝ̈ ܕ݁ܡܽܘܫܶܐ ܛܰܫܝܽܘܗ̱ܝ ܆ ܟ݁ܰܕ݂ ܐܶܬ݂ܺܝܠܶܕ݂ ܁ ܝܰܪܚܶܐ̈ ܬ݁ܠܳܬ݂ܳܐ ܇ ܕ݁ܰܚܙܰܘ ܕ݁ܫܰܦ݁ܺܝܪ ܗ̱ܘܳܐ ܛܰܠܝܳܐ . ܘܠܳܐ ܕ݁ܚܶܠܘ ܡܶܢ ܦ݁ܽܘܩܕ݁ܳܢܳܐ ܕ݁ܡܰܠܟ݁ܳܐ ܀ 24 ܒ݁ܗܰܝܡܳܢܽܘܬ݂ܳܐ ܡܽܘܫܶܐ ܟ݁ܰܕ݂ ܗܘܳܐ ܓ݁ܰܒ݂ܪܳܐ ܁ ܟ݁ܦ݂ܰܪ ܆ ܕ݁ܠܳܐ ܢܶܬ݂ܩܪܶܐ ܒ݁ܪܳܐ ܠܒ݂ܰܪܬ݂ܶܗ ܕ݁ܦ݂ܶܪܥܽܘܢ . 25 ܘܰܓ݂ܒ݂ܳܐ ܠܶܗ ܕ݁ܒ݂ܽܐܘܠܨܳܢܳܐ ܥܰܡ ܥܰܡܶܗ ܕ݁ܰܐܠܳܗܳܐ ܢܶܗܘܶܐ ܇ ܘܠܳܐ ܕ݁ܰܙܒ݂ܰܢ ܙܥܽܘܪ ܢܶܬ݂ܒ݁ܰܣܰܡ ܒ݁ܰܚܛܺܝܬ݂ܳܐ . 26 ܘܶܐܬ݂ܪܰܥܺܝ ܕ݁ܰܡܝܰܬ݁ܰܪ ܗ̱ܽܘ ܥܽܘܬ݂ܪܳܐ ܕ݁ܚܶܣܕ݁ܶܗ ܕ݁ܰܡܫܺܝܚܳܐ ܁ ܛܳܒ݂ ܡܶܢ ܣܺܝܡܳܬ݂ܳܗ̈ ܕ݁ܡܶܨܪܶܝܢ . ܚܳܐܰܪ ܗ̱ܘܳܐ ܓ݁ܶܝܪ ܒ݁ܦ݂ܽܘܪܥܳܢ ܐܰܓ݂ܪܳܐ ܀ 27 ܒ݁ܗܰܝܡܳܢܽܘܬ݂ܳܐ ܫܰܒ݂ܩܳܗ ܠܡܶܨܪܶܝܢ ܆ ܘܠܳܐ ܕ݁ܚܶܠ ܡܶܢ ܚܶܡܬ݂ܶܗ ܕ݁ܡܰܠܟ݁ܳܐ . ܘܣܰܝܒ݁ܰܪ ܐܰܝܟ݂ ܗܰܘ ܕ݁ܚܳܙܶܐ ܗ̱ܘܳܐ ܠܰܐܠܳܗܳܐ ܕ݁ܠܳܐ ܡܶܬ݂ܚܙܶܐ ܀ 28 ܒ݁ܗܰܝܡܳܢܽܘܬ݂ܳܐ ܥܒ݂ܰܕ݂ ܦ݁ܶܨܚܳܐ ܘܰܪܣܳܣ ܕ݁ܡܳܐ ܆ ܕ݁ܠܳܐ ܢܶܬ݂ܩܰܪܰܒ݂ ܠܗܽܘܢ ܗܰܘ ܕ݁ܰܡܚܰܒ݁ܶܠ ܗ̱ܘܳܐ ܒ݁ܽܘܟ݂ܪܶܐ̈ ܀ 29 ܒ݁ܗܰܝܡܳܢܽܘܬ݂ܳܐ ܥܒ݂ܰܪܘ ܝܰܡܳܐ ܕ݂ܣܽܘܦ݂ ܐܰܝܟ݂ ܕ݁ܥܰܠ ܐܰܪܥܳܐ ܝܰܒ݁ܺܝܫܬ݁ܳܐ . ܘܒ݂ܶܗ ܐܶܬ݂ܒ݁ܠܰܥܘ ܡܶܨܪܳܝܶܐ̈ ܆ ܟ݁ܰܕ݂ ܐܰܡܪܰܚܘ ܥܠܰܘܗ̱ܝ ܀ 30 ܒ݁ܗܰܝܡܳܢܽܘܬ݂ܳܐ ܫܽܘܪܶܝܗ̈ ܕ݁ܺܐܝܪܺܝܚܽܘ ܢܦ݂ܰܠܘ ܆ ܡܶܢ ܕ݁ܶܐܬ݂ܟ݁ܪܶܟ݂ܘ ܫܰܒ݂ܥܳܐ ܝܰܘܡܺܝܢ̈ ܀ 31 ܒ݁ܗܰܝܡܳܢܽܘܬ݂ܳܐ ܪܳܚܳܒ݂ ܙܳܢܺܝܬ݂ܳܐ ܠܳܐ ܐܶܒ݂ܕ݁ܰܬ݂ ܥܰܡ ܗܳܢܽܘܢ ܕ݁ܠܳܐ ܐܶܫܬ݁ܡܰܥܘ ܆ ܕ݁ܩܰܒ݁ܠܰܬ݂ ܠܓ݂ܳܫܽܘܫܶܐ̈ ܒ݁ܰܫܠܳܡܳܐ ܀ 32 ܘܡܳܢܳܐ ܬ݁ܽܘܒ݂ ܐܺܡܰܪ . ܙܥܽܘܪ ܗ̱ܽܘ ܠܺܝ ܓ݁ܶܝܪ ܙܰܒ݂ܢܳܐ ܆ ܕ݁ܶܐܫܬ݁ܰܥܶܐ ܥܰܠ ܓ݁ܶܕ݂ܥܽܘܢ . ܘܥܰܠ ܒ݁ܳܪܳܩ . ܘܥܰܠ ܫܶܡܫܽܘܢ . ܘܥܰܠ ܢܰܦ݂ܬ݁ܰܚ . ܘܥܰܠ ܕ݁ܰܘܺܝܕ݂ . ܘܥܰܠ ܫܡܽܘܐܝܶܠ . ܘܥܰܠ ܫܰܪܟ݁ܳܐ ܕ݁ܰܢܒ݂ܺܝܶܐ̈ . 33 ܐܰܝܠܶܝܢ ܕ݁ܰܒ݂ܗܰܝܡܳܢܽܘܬ݂ܳܐ ܙܟ݂ܰܘ ܠܡܰܠܟ݁ܘܳܬ݂ܳܐ̈ . ܘܰܦ݂ܠܰܚܘ ܟ݁ܺܐܢܽܘܬ݂ܳܐ . ܘܩܰܒ݁ܶܠܘ ܡܽܘܠܟ݁ܳܢܶܐ̈ . ܘܣܰܟ݁ܰܪܘ ܦ݁ܽܘܡܳܐ ܕ݁ܰܐܪܝܰܘܳܬ݂ܳܐ̈ . 34 ܘܕ݂ܰܥܶܟ݂ܘ ܚܰܝܠܳܐ ܕ݁ܢܽܘܪܳܐ . ܘܶܐܬ݂ܦ݁ܰܨܺܝܘ ܡܶܢ ܦ݁ܽܘܡܳܐ ܕ݁ܣܰܝܦ݁ܳܐ . ܘܶܐܬ݂ܚܰܝܰܠܘ ܡܶܢ ܟ݁ܽܘܪܗܳܢܶܐ̈ . ܘܰܗܘܰܘ ܚܰܝܠܬ݂ܳܢܶܐ̈ ܒ݁ܰܩܪܳܒ݂ܳܐ . ܘܣܰܚܶܦ݂ܘ ܡܰܫܪܝܳܬ݂ܳܐ̈ ܕ݁ܰܒ݂ܥܶܠܕ݁ܒ݂ܳܒ݂ܶܐ̈ . 35 ܘܝܰܗ̱ܒ݂ܘ ܠܢܶܫܶܐ̈ ܒ݁ܢܰܝܗܶܝܢ̈ ܡܶܢ ܩܝܳܡܬ݁ܳܐ ܕ݁ܡܺܝܬ݂ܶܐ̈ . ܘܰܐ̱ܚܪܳܢܶܐ̈ ܒ݁ܫܶܢܕ݁ܶܐ̈ ܡܺܝܬ݂ܘ . ܘܠܳܐ ܣܰܟ݁ܺܝܘ ܠܡܶܬ݂ܦ݁ܰܨܳܝܽܘ ܆ ܕ݁ܰܩܝܳܡܬ݁ܳܐ ܡܝܰܬ݁ܰܪܬ݁ܳܐ ܬ݁ܶܗܘܶܐ ܠܗܽܘܢ . 36 ܐ̱ܚܪܳܢܶܐ̈ ܕ݁ܶܝܢ ܠܒ݂ܶܙܚܳܐ ܘܰܠܢܶܓ݂ܕ݁ܶܐ̈ ܥܰܠܘ . ܐ̱ܚܪܳܢܶܐ̈ ܠܰܐܣܽܘܪܶܐ̈ ܘܠܰܚܒ݂ܽܘܫܝܶܐ̈ ܐܶܫܬ݁ܠܶܡܘ . 37 ܐ̱ܚܪܳܢܶܐ̈ ܐܶܬ݂ܪܓ݂ܶܡܘ . ܐ̱ܚܪܳܢܶܐ̈ ܐܶܬ݂ܢܣܰܪܘ . ܐ̱ܚܪܳܢܶܐ̈ ܒ݁ܦ݂ܽܘܡܳܐ ܕ݁ܣܰܝܦ݁ܳܐ ܡܺܝܬ݂ܘ . ܐ̱ܚܪܳܢܶܐ̈ ܐܶܬ݂ܟ݁ܪܶܟ݂ܘ ܁ ܟ݁ܰܕ݂ ܠܒ݂ܺܝܫܺܝܢ ܡܶܫܟ݁ܶܐ̈ ܕ݁ܶܐܡܪܶܐ̈ ܘܰܕ݂ܥܶܙܶܐ̈ . ܘܰܣܢܺܝܩܺܝܢ ܁ ܘܰܐܠܺܝܨܺܝܢ ܂ ܘܰܡܛܰܪܦ݂ܺܝܢ . 38 ܐ̱ܢܳܫܳܐ ܕ݁ܠܳܐ ܫܳܘܶܐ ܗ̱ܘܳܐ ܠܗܽܘܢ ܥܳܠܡܳܐ . ܘܰܗܘܰܘ ܐܰܝܟ݂ ܛܳܥܰܝܳܐ̈ ܒ݁ܚܽܘܪܒ݁ܳܐ . ܘܰܒ݂ܛܽܘܪܶܐ̈ . ܘܒ݂ܰܡܥܰܪܶܐ̈ . ܘܰܒ݂ܦ݂ܶܥܪܶܝܗ̈ ܕ݁ܰܐܪܥܳܐ . 39 ܘܗܳܠܶܝܢ ܟ݁ܽܠܗܽܘܢ ܕ݁ܰܗܘܳܬ݂ ܥܠܰܝܗܽܘܢ ܣܳܗܕ݁ܽܘܬ݂ܳܐ ܒ݁ܗܰܝܡܳܢܽܘܬ݂ܗܽܘܢ ܆ ܠܳܐ ܩܰܒ݁ܶܠܘ ܡܽܘܠܟ݁ܳܢܳܐ ܆ 40 ܡܶܛܽܠ ܕ݁ܰܐܠܳܗܳܐ ܩܰܕ݁ܶܡ ܚܳܪ ܒ݁ܥܽܘܕ݂ܪܳܢܰܢ ܕ݁ܺܝܠܰܢ ܇ ܕ݁ܠܳܐ ܒ݁ܶܠܥܳܕ݂ܰܝܢ ܢܶܬ݂ܓ݁ܰܡܪܽܘܢ ܀

12 Chapter 12 1 ܡܶܛܽܠ ܗܳܢܳܐ ܐܳܦ݂ ܚܢܰܢ ܕ݁ܺܐܝܬ݂ ܠܰܢ ܗܳܠܶܝܢ ܟ݁ܽܠܗܽܘܢ ܣܳܗܕ݁ܶܐ̈ ܁ ܕ݁ܰܐܝܟ݂ ܥܢܳܢܳܐ ܚܕ݂ܺܝܪܺܝܢ ܠܰܢ ܆ ܢܶܫܕ݁ܶܐ ܡܶܢܰܢ ܟ݁ܽܠ ܝܽܘܩܪܺܝܢ̈ . ܐܳܦ݂ ܚܛܺܝܬ݂ܳܐ ܕ݁ܰܒ݂ܟ݂ܽܠܙܒ݂ܰܢ ܡܛܰܝܒ݂ܳܐ ܗ̱ܝ ܠܰܢ ܇ ܘܒ݂ܰܡܣܰܝܒ݁ܪܳܢܽܘܬ݂ܳܐ ܢܶܪܗܛܺܝܘܗ̱ܝ ܠܰܐܓ݂ܽܘܢܳܐ ܗܳܢܳܐ ܕ݁ܣܺܝܡ ܠܰܢ ܇ 2 ܘܰܢܚܽܘܪ ܒ݁ܝܶܫܽܘܥ . ܕ݁ܗܽܘ ܗܘܳܐ ܪܺܝܫܳܐ ܘܓ݂ܳܡܽܘܪܳܐ ܠܗܰܝܡܳܢܽܘܬ݂ܰܢ . ܕ݁ܰܚܠܳܦ݂ ܚܰܕ݂ܽܘܬ݂ܳܐ ܕ݁ܺܐܝܬ݂ ܗ̱ܘܳܐ ܠܶܗ ܣܰܝܒ݁ܰܪ ܨܠܺܝܒ݂ܳܐ . ܘܥܰܠ ܒ݁ܶܗܬ݁ܬ݂ܳܐ ܐܰܡܣܰܪ . ܘܥܰܠ ܝܰܡܺܝܢܳܐ ܕ݁ܟ݂ܽܘܪܣܝܶܗ ܕ݁ܰܐܠܳܗܳܐ ܝܺܬ݂ܶܒ݂ ܀.܀.܀܀ 7 3 ܚܙܰܘ ܗܳܟ݂ܺܝܠ ܟ݁ܡܳܐ ܣܰܝܒ݁ܰܪ ܡܶܢ ܚܰܛܳܝܶܐ̈ ܗܳܢܽܘܢ ܇ ܕ݁ܗܶܢܽܘܢ ܗܘܰܘ ܣܰܩܽܘܒ݂ܠܳܐ ܠܢܰܦ݂ܫܗܽܘܢ ܆ ܕ݁ܠܳܐ ܬ݁ܶܡܰܐܢ ܠܟ݂ܽܘܢ ܘܠܳܐ ܬ݁ܶܬ݂ܪܰܦ݁ܶܐ ܢܰܦ݂ܫܟ݂ܽܘܢ . 4 ܠܳܐ ܥܕ݂ܰܟ݁ܺܝܠ ܡܰܛܺܝܬ݁ܽܘܢ ܥܕ݂ܰܡܳܐ ܠܰܕ݂ܡܳܐ ܒ݁ܰܐܓ݂ܽܘܢܳܐ ܕ݁ܠܽܘܩܒ݂ܰܠ ܚܛܺܝܬ݂ܳܐ . 5 ܘܰܛܥܰܝܬ݁ܽܘܢܳܝܗ̱ܝ ܠܝܽܘܠܦ݁ܳܢܳܐ ܐܰܝܢܳܐ ܕ݁ܰܐܝܟ݂ ܕ݁ܠܰܒ݂ܢܰܝܳܐ̈ ܐܶܡܰܪ ܠܟ݂ܽܘܢ . ܒ݁ܶܪܝ ܁ ܠܳܐ ܬ݁ܰܗܡܶܐ ܡܶܢ ܡܰܪܕ݁ܽܘܬ݂ܶܗ ܕ݁ܡܳܪܝܳܐ ܘܠܳܐ ܬ݁ܪܰܦ݁ܶܐ ܢܰܦ݂ܫܳܟ݂ ܁ ܐܶܡܰܬ݂ܝ ܕ݁ܡܶܢܶܗ ܡܶܬ݂ܟ݁ܰܘܰܢ ܐܰܢ̱ܬ݁ . 6 ܠܡܰܢ ܕ݁ܪܳܚܶܡ ܓ݁ܶܝܪ ܡܳܪܝܳܐ ܁ ܪܳܕ݂ܶܐ ܠܶܗ . ܘܰܡܢܰܓ݁ܶܕ݂ ܠܰܒ݂ܢܰܝܳܐ̈ ܐܰܝܠܶܝܢ ܕ݁ܗܽܘ ܨܳܒ݂ܶܐ ܒ݁ܗܽܘܢ . 7 ܣܰܝܒ݁ܰܪܘ ܗܳܟ݂ܺܝܠ ܡܰܪܕ݁ܽܘܬ݂ܳܐ ܆ ܡܶܛܽܠ ܕ݁ܰܐܝܟ݂ ܕ݁ܰܠܘܳܬ݂ ܒ݁ܢܰܝܳܐ̈ ܣܳܥܰܪ ܨܶܐܕ݂ܰܝܟ݁ܽܘܢ ܐܰܠܳܗܳܐ . ܐܰܝܢܰܘ ܓ݁ܶܝܪ ܒ݁ܪܳܐ ܕ݁ܠܳܐ ܪܳܕ݂ܶܐ ܠܶܗ ܐܰܒ݂ܽܘܗ̱ܝ . 8 ܘܶܐܢ ܕ݁ܠܳܐ ܡܰܪܕ݁ܽܘܬ݂ܳܐ ܐܰܢ̱ܬ݁ܽܘܢ ܇ ܗܳܝ ܕ݁ܒ݂ܳܗ ܡܶܬ݂ܪܕ݂ܶܐ ܟ݁ܽܠܢܳܫ ܇ ܗܘܰܝܬ݁ܽܘܢ ܠܟ݂ܽܘܢ ܢܽܘܟ݂ܪܳܝܶܐ̈ ܘܠܳܐ ܒ݁ܢܰܝܳܐ̈ . 9 ܘܶܐܢ ܐܰܒ݂ܳܗܰܝܢ̈ ܕ݁ܒ݂ܶܣܪܳܐ ܪܳܕ݂ܶܝܢ ܗ̱ܘܰܘ ܠܰܢ ܘܒ݂ܳܗܬ݁ܺܝܢ ܗܘܰܝܢ ܡܶܢܗܽܘܢ ܆ ܟ݁ܡܳܐ ܗܳܟ݂ܺܝܠ ܚܰܝܳܒ݂ܺܝܢܰܢ ܕ݁ܢܶܫܬ݁ܰܥܒ݁ܰܕ݂ ܠܰܐܒ݂ܽܘܗܶܝܢ ܕ݁ܪܽܘܚܳܬ݂ܳܐ̈ ܘܢܺܚܶܐ . 10 ܗܳܢܽܘܢ ܓ݁ܶܝܪ ܠܰܙܒ݂ܰܢ ܗ̱ܽܘ ܙܥܽܘܪ ܐܰܝܟ݂ ܕ݁ܨܳܒ݂ܶܝܢ ܗ̱ܘܰܘ ܁ ܪܳܕ݂ܶܝܢ ܗ̱ܘܰܘ ܠܰܢ ܆ ܐܰܠܳܗܳܐ ܕ݁ܶܝܢ ܠܥܽܘܕ݂ܪܳܢܰܢ ܕ݁ܢܶܫܬ݁ܰܘܬ݁ܰܦ݂ ܠܩܰܕ݁ܺܝܫܽܘܬ݂ܶܗ . 11 ܟ݁ܽܠ ܡܰܪܕ݁ܽܘܬ݂ܳܐ ܕ݁ܶܝܢ ܒ݁ܙܰܒ݂ܢܳܗ ܠܳܐ ܡܶܣܬ݁ܰܒ݂ܪܳܐ ܁ ܕ݁ܰܕ݂ܚܰܕ݂ܽܘܬ݂ܳܐ ܗ̱ܝ ܐܶܠܳܐ ܕ݁ܟ݂ܰܪܝܽܘܬ݂ܳܐ ܆ ܠܚܰܪܬ݂ܳܐ ܕ݁ܶܝܢ ܦ݁ܺܐܪܶܐ̈ ܕ݁ܰܫܠܳܡܳܐ ܘܰܕ݂ܙܰܕ݁ܺܝܩܽܘܬ݂ܳܐ ܝܳܗܒ݁ܳܐ ܠܰܐܝܠܶܝܢ ܕ݁ܒ݂ܳܗ ܐܶܬ݁ܕ݁ܰܪܰܫܘ . 12 ܡܶܛܽܠ ܗܳܢܳܐ ܐܺܝܕ݂ܰܝܟ݁ܽܘܢ̈ ܡܫܰܪܝܳܬ݂ܳܐ̈ ܘܒ݂ܽܘܪܟ݁ܰܝܟ݁ܽܘܢ̈ ܪܳܥܠܳܬ݂ܳܐ̈ ܫܰܪܰܪܘ . 13 ܘܰܫܒ݂ܺܝܠܶܐ̈ ܬ݁ܪܺܝܨܶܐ̈ ܥܒ݂ܶܕ݂ܘ ܠܪܶܓ݂ܠܰܝܟ݁ܽܘܢ̈ ܆ ܕ݁ܗܰܕ݁ܳܡܳܐ ܕ݁ܰܚܓ݂ܺܝܪ ܠܳܐ ܢܶܛܥܰܫ ܇ ܐܶܠܳܐ ܢܶܬ݂ܰܐܣܶܐ ܀ 14 ܗܰܪ̱ܛܘ ܒ݁ܳܬ݂ܰܪ ܫܠܳܡܳܐ ܥܰܡ ܟ݁ܽܠ ܐ̱ܢܳܫ ܇ ܘܒ݂ܳܬ݂ܰܪ ܩܰܕ݁ܺܝܫܽܘܬ݂ܳܐ ܕ݁ܒ݂ܶܠܥܳܕ݂ܶܝܗ ܐ̱ܢܳܫ ܠܡܳܪܰܢ ܠܳܐ ܚܳܙܶܐ . 15 ܘܰܗܘܰܝܬ݁ܽܘܢ ܙܗܺܝܪܺܝܢ ܆ ܕ݁ܰܠܡܳܐ ܐ̱ܢܳܫ ܢܶܫܬ݁ܟ݂ܰܚ ܒ݁ܟ݂ܽܘܢ ܕ݁ܚܰܣܺܝܪ ܡܶܢ ܛܰܝܒ݁ܽܘܬ݂ܳܐ ܕ݁ܰܐܠܳܗܳܐ ܇ ܐܰܘ ܕ݁ܰܠܡܳܐ ܥܶܩܳܪܳܐ ܕ݁ܰܡܪܳܪܶܐ̈ ܢܰܦ݁ܶܩ ܥܽܘܦ݂ܝܳܐ ܘܢܰܗܰܪܟ݂ܽܘܢ . ܘܒ݂ܶܗ ܣܰܓ݁ܺܝܶܐܐ̈ ܢܶܣܬ݁ܰܝܒ݂ܽܘܢ ܇ 16 ܐܰܘ ܠܡܳܐ ܐ̱ܢܳܫ ܢܶܫܬ݁ܟ݂ܰܚ ܒ݁ܟ݂ܽܘܢ ܕ݁ܙܰܢܳܝ ܘܰܪܦ݂ܶܐ ܐܰܝܟ݂ ܥܺܣܽܘ . ܕ݁ܒ݂ܰܚܕ݂ܳܐ ܡܶܐܟ݂ܽܘܠܬ݁ܳܐ ܙܰܒ݁ܶܢ ܒ݁ܽܘܟ݂ܪܽܘܬ݂ܶܗ . 17 ܝܳܕ݂ܥܺܝܢ ܐܢ̱ܬ݁ܽܘܢ ܓ݁ܶܝܪ ܕ݁ܳܐܦ݂ ܡܶܢ ܒ݁ܳܬ݂ܰܪܟ݁ܶܢ ܨܒ݂ܳܐ ܗ̱ܘܳܐ ܁ ܕ݁ܢܺܐܪܰܬ݂ ܒ݁ܽܘܪܟ݁ܬ݂ܳܐ ܆ ܘܶܐܣܬ݁ܠܺܝ . ܐܰܬ݂ܪܳܐ ܓ݁ܶܝܪ ܠܰܬ݂ܝܳܒ݂ܽܘܬ݂ܳܐ ܠܳܐ ܐܶܫܟ݁ܰܚ ܆ ܟ݁ܰܕ݂ ܒ݁ܕ݂ܶܡܥܶܐ̈ ܒ݁ܥܳܗ ܀ 18 ܠܳܐ ܓ݁ܶܝܪ ܐܶܬ݂ܩܰܪܰܒ݂ܬ݁ܽܘܢ ܠܢܽܘܪܳܐ ܕ݁ܝܳܩܕ݁ܳܐ ܘܡܶܬ݂ܓ݁ܰܫܳܐ . ܐܳܦ݂ܠܳܐ ܠܚܶܫܽܘܟ݂ܳܐ ܘܰܠܥܰܪܦ݁ܶܠܳܐ ܘܠܰܥܪܽܘܪܳܐ . 19 ܘܠܳܐ ܠܩܳܠܳܐ ܕ݁ܩܰܪܢܳܐ ܘܰܠܩܳܠܳܐ ܕ݁ܡܶܠܶܐ̈ . ܗܰܘ ܕ݁ܗܳܢܽܘܢ ܕ݁ܫܰܡܥܽܘܗ̱ܝ ܁ ܐܶܫܬ݁ܶܐܠܘ ܆ ܕ݁ܠܳܐ ܢܶܬ݁ܬ݁ܰܘܣܰܦ݂ ܢܶܬ݂ܡܰܠܰܠ ܥܰܡܗܽܘܢ . 20 ܠܳܐ ܓ݁ܶܝܪ ܡܶܫܟ݁ܚܺܝܢ ܗ̱ܘܰܘ ܠܰܡܣܰܝܒ݁ܳܪܽܘ ܡܶܕ݁ܶܡ ܕ݁ܶܐܬ݂ܦ݁ܰܩܰܕ݂ܘ . ܕ݁ܳܐܦ݂ܶܢ ܚܰܝܽܘܬ݂ܳܐ ܬ݁ܶܬ݂ܩܰܪܰܒ݂ ܠܘܳܬ݂ ܛܽܘܪܳܐ ܁ ܬ݁ܶܬ݂ܪܓ݂ܶܡ . 21 ܘܗܳܟ݂ܰܢܳܐ ܕ݁ܚܺܝܠ ܗܘܳܐ ܚܶܙܘܳܐ ܆ ܕ݁ܡܽܘܫܶܐ ܐܶܡܰܪ . ܕ݁ܕ݂ܰܚܺܝܠ ܐ̱ܢܳܐ ܘܪܰܬ݁ܺܝܬ݂ ܐ̱ܢܳܐ . 22 ܐܰܢ̱ܬ݁ܽܘܢ ܕ݁ܶܝܢ ܐܶܬ݂ܩܰܪܰܒ݂ܬ݁ܽܘܢ ܠܛܽܘܪܳܐ ܕ݁ܨܶܗܝܽܘܢ . ܘܠܰܡܕ݂ܺܝܢ̱ܬ݁ܳܐ ܕ݁ܰܐܠܳܗܳܐ ܚܰܝܳܐ . ܠܽܐܘܪܺܫܠܶܡ ܕ݁ܒ݂ܰܫܡܰܝܳܐ . ܘܰܠܟ݂ܶܢܫܶܐ̈ ܕ݁ܪܶܒ݁ܘܳܬ݂ܳܐ̈ ܕ݁ܡܰܠܰܐܟ݂ܶܐ̈ . 23 ܘܰܠܥܺܕ̱݁ܬ݁ܳܐ ܕ݁ܒ݂ܽܘܟ݂ܪܶܐ̈ ܕ݁ܡܶܬ݂ܟ݁ܰܬ݂ܒ݁ܺܝܢ ܒ݁ܰܫܡܰܝܳܐ . ܘܠܰܐܠܳܗܳܐ ܕ݁ܰܝܳܢܳܐ ܕ݁ܟ݂ܽܠ . ܘܰܠܪܽܘܚܳܬ݂ܳܐ̈ ܕ݁ܟ݂ܺܐܢܶܐ̈ ܕ݁ܶܐܬ݂ܓ݁ܡܰܪܘ . 24 ܘܰܠܝܶܫܽܘܥ ܡܶܨܥܳܝܳܐ ܕ݁ܕ݂ܺܝܰܬ݂ܺܩܺܐ ܚܕ݂ܰܬ݂ܳܐ . ܘܠܰܪܣܳܣ ܕ݁ܡܶܗ ܕ݁ܰܡܡܰܠܶܠ ܛܳܒ݂ ܡܶܢ ܗܰܘ ܕ݁ܗܳܒ݂ܶܝܠ ܀ 25 ܐܶܙܕ݁ܰܗ̱ܪܘ ܗܳܟ݂ܺܝܠ ܆ ܕ݁ܰܠܡܳܐ ܬ݁ܶܫܬ݁ܰܐܠܽܘܢ ܡܶܢ ܡܰܢ ܕ݁ܡܰܠܶܠ ܥܰܡܟ݂ܽܘܢ . ܐܶܢ ܓ݁ܶܝܪ ܗܳܢܽܘܢ ܠܳܐ ܐܶܬ݂ܦ݁ܰܨܺܝܘ ܇ ܕ݁ܶܐܫܬ݁ܶܐܠܘ ܡܶܢ ܕ݁ܡܰܠܶܠ ܥܰܡܗܽܘܢ ܒ݁ܰܐܪܥܳܐ ܆ ܚܰܕ݂ ܟ݁ܡܳܐ ܚܢܰܢ ܁ ܐܶܢ ܢܶܫܬ݁ܶܐܠ ܡܶܢ ܡܰܢ ܕ݁ܡܰܠܶܠ ܥܰܡܰܢ ܡܶܢ ܫܡܰܝܳܐ . 26 ܐܰܝܢܳܐ ܕ݁ܩܳܠܶܗ ܐܰܪܥܳܐ ܐܰܙܺܝܥ . ܗܳܫܳܐ ܕ݁ܶܝܢ ܡܠܰܟ݂ ܘܶܐܡܰܪ . ܕ݁ܬ݂ܽܘܒ݂ ܚܕ݂ܳܐ ܙܒ݂ܰܢ ܐܶܢܳܐ ܐܰܙܺܝܥ ܆ ܠܳܐ ܒ݁ܰܠܚܽܘܕ݂ ܐܰܪܥܳܐ ܁ ܐܶܠܳܐ ܐܳܦ݂ ܫܡܰܝܳܐ . 27 ܗܳܕ݂ܶܐ ܕ݁ܶܝܢ ܕ݁ܶܐܡܰܪ ܚܕ݂ܳܐ ܙܒ݂ܰܢ ܁ ܡܚܰܘܝܳܐ ܫܽܘܚܠܳܦ݂ܳܐ ܕ݁ܗܳܢܽܘܢ ܕ݁ܡܶܬ݁ܙܺܝܥܺܝܢ ܆ ܡܶܛܽܠ ܕ݁ܰܥܒ݂ܺܝܕ݂ܶܐ̈ ܐܶܢܽܘܢ ܆ ܕ݁ܰܢܩܰܘܽܘܢ ܗܳܢܽܘܢ ܕ݁ܠܳܐ ܡܶܬ݁ܙܺܝܥܺܝܢ ܀ 28 ܡܶܛܽܠ ܗܳܟ݂ܺܝܠ ܕ݁ܩܰܒ݁ܶܠܢ ܡܰܠܟ݁ܽܘܬ݂ܳܐ ܕ݁ܠܳܐ ܡܶܬ݁ܙܺܝܥܳܐ ܆ ܢܶܐܚܽܘܕ݂ ܛܰܝܒ݁ܽܘܬ݂ܳܐ ܕ݁ܒ݂ܳܗ ܢܫܰܡܶܫ ܘܢܶܫܦ݁ܰܪ ܠܰܐܠܳܗܳܐ ܁ ܒ݁ܬ݂ܰܚܡܶܨܬ݁ܳܐ ܘܰܒ݂ܕ݂ܶܚܠܬ݂ܳܐ . 29 ܐܰܠܳܗܰܢ ܓ݁ܶܝܪ ܢܽܘܪܳܐ ܗ̱ܘ ܐܳܟ݂ܶܠܬ݂ܳܐ ܀

13 Chapter 13 1 ܚܽܘܒ݁ܳܐ ܕ݁ܰܐܚܶܐ̈ ܢܟ݂ܰܬ݁ܰܪ ܒ݁ܟ݂ܽܘܢ . 2 ܘܪܶܚܡܬ݂ܳܐ ܕ݁ܰܐܟ݂ܣܢܳܝܶܐ̈ ܠܳܐ ܬ݁ܶܛܥܽܘܢ . ܒ݁ܗܳܕ݂ܶܐ ܓ݁ܶܝܪ ܫܘܰܘ ܐ̱ܢܳܫܳܐ ܆ ܕ݁ܟ݂ܰܕ݂ ܠܳܐ ܪܓ݂ܺܝܫܺܝܢ ܢܩܰܒ݁ܠܽܘܢ ܡܰܠܰܐܟ݂ܶܐ̈ . 3 ܥ̱ܶܗܰܕ݂ܘ ܠܰܐܝܠܶܝܢ ܕ݁ܰܐܣܺܝܪܺܝܢ ܁ ܐܰܝܟ݂ ܗܰܘ ܕ݁ܥܰܡܗܽܘܢ ܐܰܣܺܝܪܺܝܢ ܐܢ̱ܬ݁ܽܘܢ . ܐܶܬ݁ܕ݁ܰܟ݂̱ܪܘ ܠܰܐܝܠܶܝܢ ܕ݁ܰܐܠܺܝܨܺܝܢ ܁ ܐܰܝܟ݂ ܐ̱ܢܳܫܳܐ ܕ݁ܒ݂ܶܣܪܳܐ ܠܒ݂ܺܝܫܺܝܢ ܐܢ̱ܬ݁ܽܘܢ . 4 ܡܝܰܩܰܪ ܗ̱ܽܘ ܙܽܘܘܳܓ݂ܳܐ ܒ݁ܟ݂ܽܠ . ܘܥܰܪܣܗܽܘܢ ܕ݁ܰܟ݂ܝܳܐ ܗ̱ܝ . ܠܙܰܢܳܝܶܐ̈ ܕ݁ܶܝܢ ܘܰܠܓ݂ܰܝܳܪܶܐ̈ ܕ݁ܳܐܶܢ ܐܰܠܳܗܳܐ . 5 ܠܳܐ ܗܘܳܐ ܪܳܚܶܡ ܟ݁ܶܣܦ݁ܳܐ ܪܶܥܝܳܢܟ݂ܽܘܢ ܆ ܐܶܠܳܐ ܢܶܣܦ݁ܰܩ ܠܟ݂ܽܘܢ ܡܶܕ݁ܶܡ ܕ݁ܺܐܝܬ݂ ܠܟ݂ܽܘܢ . ܗܽܘ ܓ݁ܶܝܪ ܡܳܪܝܳܐ ܐܶܡܰܪ . ܕ݁ܠܳܐ ܐܶܫܒ݁ܩܳܟ݂ ܘܠܳܐ ܐܰܪܦ݁ܶܐ ܒ݁ܳܟ݂ ܐܺܝܕ݂ܰܝܳܐ̈ . 6 ܘܺܐܝܬ݂ ܠܰܢ ܕ݁ܢܺܐܡܰܪ ܬ݁ܟ݂ܺܝܠܳܐܝܺܬ݂ . ܡܳܪܝ ܡܥܰܕ݁ܪܳܢܝ ܠܳܐ ܐܶܕ݂ܚܰܠ . ܡܳܢܳܐ ܥܳܒ݂ܶܕ݂ ܠܺܝ ܒ݁ܰܪܢܳܫܳܐ ܀ 7 ܗܘܰܝܬ݁ܽܘܢ ܥܳܗܕ݁ܺܝܢ ܠܰܡܕ݂ܰܒ݁ܪܳܢܰܝܟ݁ܽܘܢ̈ . ܐܰܝܠܶܝܢ ܕ݁ܡܰܠܶܠܘ ܥܰܡܟ݂ܽܘܢ ܡܶܠܬ݂ܳܐ ܕ݁ܰܐܠܳܗܳܐ . ܐܶܬ݂ܒ݁ܰܩܰܘ ܒ݁ܫܽܘܠܳܡܳܐ ܕ݁ܕ݂ܽܘܒ݁ܳܪܰܝܗܽܘܢ̈ . ܘܡܰܪܰܘ ܒ݁ܗܰܝܡܳܢܽܘܬ݂ܗܽܘܢ . 8 ܝܶܫܽܘܥ ܡܫܺܝܚܳܐ ܐܶܬ݂ܡܳܠܝ ܘܝܰܘܡܳܢܳܐ ܗܽܘܝܽܘ ܘܰܠܥܳܠܰܡ . 9 ܠܝܽܘܠܦ݁ܳܢܶܐ̈ ܢܽܘܟ݂ܪܳܝܶܐ̈ ܘܰܡܫܰܚܠܦ݂ܶܐ̈ ܠܳܐ ܬ݁ܶܬ݁ܕ݁ܰܒ݂ܪܽܘܢ . ܫܰܦ݁ܺܝܪ ܗ̱ܽܘ ܓ݁ܶܝܪ ܁ ܕ݁ܰܒ݂ܛܰܝܒ݁ܽܘܬ݂ܳܐ ܢܫܰܪܰܪ ܠܶܒ݁ܰܘܳܬ݂ܰܢ̈ ܘܠܳܐ ܒ݁ܡܶܐܟ݂ܠܳܬ݂ܳܐ̈ ܇ ܡܶܛܽܠ ܕ݁ܠܳܐ ܐܶܬ݂ܥܰܕ݁ܰܪܘ ܐܰܝܠܶܝܢ ܕ݁ܗܰܠܶܟ݂ܘ ܒ݁ܗܶܝܢ ܀ 10 ܐܺܝܬ݂ ܠܰܢ ܕ݁ܶܝܢ ܡܰܕ݂ܒ݁ܚܳܐ ܁ ܕ݁ܠܳܐ ܫܰܠܺܝܛ ܠܡܶܐܟ݂ܰܠ ܡܶܢܶܗ ܠܗܳܢܽܘܢ ܕ݁ܰܒ݂ܡܰܫܟ݁ܢܳܐ ܡܫܰܡܫܺܝܢ . 11 ܚܰܝܘܳܬ݂ܳܐ̈ ܓ݁ܶܝܪ ܗܳܠܶܝܢ ܕ݁ܡܰܥܶܠ ܗ̱ܘܳܐ ܕ݁ܶܡܗܶܝܢ ܪܰܒ݁ ܟ݁ܽܘܡܪܶܐ̈ ܠܒ݂ܶܝܬ݂ ܡܰܩܕ݁ܫܳܐ ܚܠܳܦ݂ ܚܛܳܗܶܐ̈ ܆ ܒ݁ܶܣܪܗܶܝܢ ܝܳܩܶܕ݂ ܗ̱ܘܳܐ ܠܒ݂ܰܪ ܡܶܢ ܡܰܫܪܺܝܬ݂ܳܐ . 12 ܡܶܛܽܠ ܗܳܢܳܐ ܐܳܦ݂ ܝܶܫܽܘܥ ܕ݁ܰܢܩܰܕ݁ܶܫ ܠܥܰܡܶܗ ܒ݁ܰܕ݂ܡܶܗ ܆ ܠܒ݂ܰܪ ܡܶܢ ܡܕ݂ܺܝܢ̱ܬ݁ܳܐ ܚܰܫ . 13 ܘܳܐܦ݂ ܚܢܰܢ ܗܳܟ݂ܺܝܠ ܢܶܦ݁ܽܘܩ ܠܘܳܬ݂ܶܗ ܠܒ݂ܰܪ ܡܶܢ ܡܰܫܪܺܝܬ݂ܳܐ ܆ ܟ݁ܰܕ݂ ܫܩܺܝܠܺܝܢܰܢ ܚܶܣܕ݁ܶܗ . 14 ܠܰܝܬ݁ ܠܰܢ ܓ݁ܶܝܪ ܡܕ݂ܺܝܢ̱ܬ݁ܳܐ ܕ݁ܰܡܩܰܘܝܳܐ ܗܳܪܟ݁ܳܐ ܆ ܐܶܠܳܐ ܠܰܐܝܕ݂ܳܐ ܕ݁ܰܥܬ݂ܺܝܕ݂ܳܐ ܡܣܰܟ݁ܶܝܢܰܢ . 15 ܘܒ݂ܺܐܝܕ݂ܶܗ ܢܰܣܶܩ ܕ݁ܶܒ݂ܚܶܐ̈ ܕ݁ܬ݂ܶܫܒ݁ܽܘܚܬ݁ܳܐ ܒ݁ܟ݂ܽܠܙܒ݂ܰܢ ܠܰܐܠܳܗܳܐ . ܕ݁ܺܐܝܬ݂ܶܝܗ ܦ݁ܺܐܪܶܐ̈ ܕ݁ܣܶܦ݂ܘܳܬ݂ܳܐ̈ ܕ݁ܡܰܘܕ݁ܝܳܢ̈ ܠܰܫܡܶܗ . 16 ܘܠܳܐ ܬ݁ܶܛܥܽܘܢ ܡܪܰܚܡܳܢܽܘܬ݂ܳܐ ܘܫܰܘܬ݁ܳܦ݂ܽܘܬ݂ܳܐ ܕ݁ܡܶܣܟ݁ܺܢܶܐ̈ . ܒ݁ܗܳܠܶܝܢ ܓ݁ܶܝܪ ܕ݁ܶܒ݂ܚܶܐ̈ ܫܳܦ݂ܰܪ ܐ̱ܢܳܫ ܠܰܐܠܳܗܳܐ . 17 ܐܶܬ݁ܛܦ݁ܺܝܣܘ ܠܰܡܕ݂ܰܒ݁ܪܳܢܰܝܟ݁ܽܘܢ̈ ܆ ܘܶܐܫܬ݁ܰܡ̱ܥܘ ܠܗܽܘܢ . ܗܶܢܽܘܢ ܓ݁ܶܝܪ ܫܳܗܪܺܝܢ ܚܠܳܦ݂ ܢܰܦ݂ܫܳܬ݂ܟ݂ܽܘܢ̈ ܁ ܐܰܝܟ݂ ܐ̱ܢܳܫܳܐ ܕ݁ܝܳܗܒ݁ܺܝܢ ܚܽܘܫܒ݁ܳܢܟ݂ܽܘܢ ܆ ܕ݁ܰܒ݂ܚܰܕ݂ܽܘܬ݂ܳܐ ܢܶܗܘܽܘܢ ܥܳܒ݂ܕ݁ܺܝܢ ܗܳܕ݂ܶܐ ܘܠܳܐ ܒ݁ܬ݂ܶܢܚܳܬ݂ܳܐ̈ ܇ ܡܶܛܽܠ ܕ݁ܠܳܐ ܦ݁ܳܩܚܳܐ ܠܟ݂ܽܘܢ . 18 ܨܰܠܰܘ ܥܠܰܝܢ . ܬ݁ܟ݂ܺܝܠܺܝܢܰܢ ܓ݁ܶܝܪ ܕ݁ܬ݂ܺܐܪܬ݁ܳܐ ܛܳܒ݂ܬ݂ܳܐ ܐܺܝܬ݂ ܠܰܢ ܆ ܕ݁ܰܒ݂ܟ݂ܽܠܡܶܕ݁ܶܡ ܨܳܒ݂ܶܝܢܰܢ ܕ݁ܫܰܦ݁ܺܝܪ ܢܶܬ݁ܕ݁ܰܒ݁ܰܪ . 19 ܝܰܬ݁ܺܝܪܳܐܝܺܬ݂ ܒ݁ܳܥܶܐ ܐ̱ܢܳܐ ܡܶܢܟ݂ܽܘܢ ܆ ܕ݁ܬ݂ܶܥܒ݁ܕ݂ܽܘܢ ܗܳܕ݂ܶܐ ܇ ܕ݁ܒ݂ܰܥܓ݂ܰܠ ܐܶܬ݂ܦ݁ܰܢܶܐ ܠܟ݂ܽܘܢ . 20 ܐܰܠܳܗܳܐ ܕ݁ܶܝܢ ܕ݁ܰܫܠܳܡܳܐ ܁ ܗܰܘ ܕ݁ܰܐܣܶܩ ܡܶܢ ܒ݁ܶܝܬ݂ ܡܺܝܬ݂ܶܐ̈ ܠܪܳܥܝܳܐ ܪܰܒ݁ܳܐ ܕ݁ܡܰܪܥܺܝܬ݂ܳܐ ܒ݁ܰܕ݂ܡܳܐ ܕ݁ܕ݂ܺܝܰܬ݂ܺܩܺܐ ܕ݁ܰܠܥܳܠܰܡ . ܕ݁ܺܐܝܬ݂ܰܘܗ̱ܝ ܝܶܫܽܘܥ ܡܫܺܝܚܳܐ ܡܳܪܰܢ ܇ 21 ܗܽܘ ܢܶܓ݂ܡܽܘܪܟ݂ܽܘܢ ܒ݁ܟ݂ܽܠ ܥܒ݂ܳܕ݂ ܛܳܒ݂ ܆ ܕ݁ܬ݂ܶܥܒ݁ܕ݂ܽܘܢ ܨܶܒ݂ܝܳܢܶܗ . ܘܗܽܘ ܢܶܣܥܽܘܪ ܒ݁ܰܢ ܡܶܕ݁ܶܡ ܕ݁ܫܰܦ݁ܺܝܪ ܩܕ݂ܳܡܰܘܗ̱ܝ ܒ݁ܝܰܕ݂ ܝܶܫܽܘܥ ܡܫܺܝܚܳܐ . ܕ݁ܠܶܗ ܫܽܘܒ݂ܚܳܐ ܠܥܳܠܰܡ ܥܳܠܡܺܝܢ ܂ ܐܰܡܺܝܢ ܀ 22 ܒ݁ܳܥܶܐ ܐ̱ܢܳܐ ܕ݁ܶܝܢ ܡܶܢܟ݂ܽܘܢ ܐܰܚܰܝ̈ ܆ ܕ݁ܬ݂ܰܓ݁ܪܽܘܢ ܪܽܘܚܟ݂ܽܘܢ ܒ݁ܡܶܠܬ݂ܳܐ ܕ݁ܒ݂ܽܘܝܳܐܳܐ ܇ ܡܶܛܽܠ ܕ݁ܒ݂ܰܙܥܽܘܪܝܳܬ݂ܳܐ̈ ܗ̱ܘ ܟ݁ܶܬ݂ܒ݁ܶܬ݂ ܠܟ݂ܽܘܢ ܀ 23 ܕ݁ܰܥܘ ܕ݁ܶܝܢ ܠܰܐܚܽܘܢ ܛܺܝܡܳܬ݂ܶܐܳܘܣ ܕ݁ܶܐܫܬ݁ܪܺܝ . ܘܶܐܢ ܒ݁ܰܥܓ݂ܰܠ ܢܺܐܬ݂ܶܐ ܥܰܡܶܗ ܁ ܐܶܚܙܶܝܟ݂ܽܘܢ . 24 ܫܰܐܠܘ ܒ݁ܰܫܠܳܡܳܐ ܕ݁ܟ݂ܽܠܗܽܘܢ ܡܕ݂ܰܒ݁ܪܳܢܰܝܟ݁ܽܘܢ̈ ܆ ܘܰܕ݂ܟ݂ܽܠܗܽܘܢ ܩܰܕ݁ܺܝܫܶܐ̈ . ܫܳܐܠܺܝܢ ܒ݁ܰܫܠܳܡܟ݂ܽܘܢ ܟ݁ܽܠܗܽܘܢ ܕ݁ܡܶܢ ܐܺܝܛܰܠܺܝܰܐ . 25 ܛܰܝܒ݁ܽܘܬ݂ܳܐ ܥܰܡ ܟ݁ܽܠܟ݂ܽܘܢ ܂ ܐܰܡܺܝܢ ܀.܀.܀܀