Odes of Solomon: Ode 4

1 1 ܠܳܐ ܐ̱ܢܳܫ ܡܫܰܚܠܶܦ ܐܰܬܪܳܟ ܩܰܕܺܝܫܳܐ ܐܰܠܳܗܝ܆ ܘܠܳܐ ܕܰܢܫܚܰܠܦܺܝܘܗ̱ܝ ܘܰܢܣܺܝܡܺܝܘܗ̱ܝ ܒܰܐܬܪܳܐ ܐ̱ܚܪܺܢܳܐ. 2 ܡܶܛܽܠ ܕܠܰܝܬ ܥܰܠܰܘܗ̱ܝ ܫܽܘܠܛܳܢܳܐ܆ ܩܽܘܕܿܫܳܟ ܓܶܝܪ ܐܶܬܪܰܥܺܝܬ ܡܼܶܢ ܩܕܳܡ ܕܬܶܥܒܶܕ ܐܰܬܪ̈ܰܘܳܬܳܐ. 3 ܩܰܫܺܝܫܳܐ ܠܴܐ ܢܶܫܬܰܚܠܰܦ ܡܼܶܢ ܗܳܢܽܘܢ ܕܰܒܨܺܝܪܺܝܢ ܡܶܢܶܗ܆ ܝܰܗ̄ܒܼܬ ܠܶܒܳܟ ܡܳܪܝܳܐ ܠܰܡܗܰܝ̈ܡܢܰܝܟ. 4 ܠܴܐ ܡܬܽܘܡ ܬܶܒܛܰܠ܆ ܘܠܴܐ ܬܶܗܘܶܐ ܕܠܴܐ ܦܺܐܪ̈ܶܐ. 5 ܚܕܳܐ ܓܶܝܪ ܫܳܥܬܳܐ ܕܗܰܝܡܳܢܽܘܬܳܟ܆ ܡܝܰܬܪܳܐ ܡܼܶܢ ܟܽܠܗܽܘܢ ܝܰܘ̈ܡܳܬܳܐ ܘܰܫܢܰܝܴ̈ܐ. 6 ܡܰܢܽܘ ܓܶܝܪ ܢܶܠܒܰܫ ܛܰܝܒܽܘܬܳܟ ܘܢܶܬܛــܠܶܡ. 7 ܡܶܛܽܠ ܕܚܳܬܡܳܟ [ܝܺܕܺ]ܝܥ ܗ̱ܽܘܼ܆ ܘܝܺܕܺܝ̈ܥܳܢ ܠܶܗ ܒܶܪ̈ܝܳܬܳܟ. 8 ܘܚܰܝ̈ܠܰܘܳܬܳ[ܟ ܐܰ]ܚܺܝܕܺܝܢ ܠܶܗ܆ ܘܪ̈ܰܒܰܝ ܡܰܠܴܰܐܟܷ̈ܐ ܓܒܰܝܴ̈ܐ ܠܒܺܝܫܺܝܢ ܠܶܗ. 9 ܝܰܗ̱ܒܼܬ ܠܰܢ ܫܰܘܬܳܦܽܘܬܳܟ܆ ܠܴܐ ܗ̄ܘܼܳܐ ܕܚܰܣܝܺܪ ܐܰܢ̄ܬ ܡܶܢܰܢ܆ ܐܶܠܴܐ ܚܢܰܢ ܚܰܣܺܝܪܺܝܢܰܢ ܡܶܢܳܟ. 10 ܪܽܘܣ ܥܰܠܰܝܢ ܪ̈ܣܺܝܣܰܝܟ܆ ܘܰܦܬܰܚ ܡܰܒ̈ܽܘܥܰܝܟ ܥܰܬܺܝܪ̈ܶܐ ܕܡܰܪܕܶܝܢ ܠܰܢ ܚܰܠܒܳܐ ܘܕܶܒܫܳܐ. 11 ܠܰܝܬ ܓܶܝܪ ܬܘܳܬܳܐ ܠܘܳܬܳܟ܆ ܕܬܶܬܘܶܐ ܥܰܠ ܡܶܕܶܡ ܕܶܐܫܬܰܘܕܺܝܬ. 12 ܘܚܰܪܬܳܐ ܓܰܠܝܳܐ ܗ̱ܘܳܬ ܠܳܟ. 13 ܘܡܶܕܶܡ ܓܶܝܪ ܕܝܰܗܼܒܬ ܡܰܓܳܢ ܝܰܗ̱ܒܼܬ܆ ܕܠܴܐ ܡܶܟܺܝܠ ܬܬܘܽܦ ܘܬܶܣܰܒ ܐܶܢܶܝܢ. 14 ܟܽܠ ܡܶܕܶܡ ܓܶܝܪ ܐܰܝܟ ܐܰܠܳܗܳܐ ܓܠܷܐ ܗ̱ܘܳܐ ܠܳܟ܆ ܘܡܰܬܩܰܢ ܗ̱ܘܳܐ ܡܼܶܢ ܒܪܺܝܫܺܝܬ ܩܕܳܡܰܝܟ. 15 ܘܰܐܢ̱ܬ ܡܳܪܝܳܐ ܥܒܼܰܕܬ ܟܽܠ. ܗܰܠܶܠܘܽܝܰܐ.