Odes of Solomon: Ode 9

1 ܦܬܰܚ ܐܶܕܢܰܝ̈ܟܽܘܢܿ܆ ܘܶܐܡܰܠܶܠ ܠܟܽܘܢܿ. 2 ܗܰܒ ܠܺܝ ܢܰܦܫܟܽܘܢܿ܆ ܕܳܐܦ ܐܶܢܳܐ ܐܶܬܶܠ ܠܟܽܘܢ ܢܰܦܫܝ. 3 ܦܶܬܓܳܡܶܗ ܕܡܳܪܝܳܐ ܘܨܶܒܝܳܢܱ̈ܘܗ̱ܝ܆ ܡܰܚܫܰܒܬܳܐ ܩܰܕܺܝܫܬܳܐ ܕܶܐܬܚܰܫܰܒ ܥܰܠ ܡܫܺܝܚܶܗ. 4 ܒܨܶܒܝܳܢܶܗ ܓܶܝܪ ܕܡܳܪܝܳܐ ܚܰܝܰܝ̈ܟܽܘܢܿ ܐܺܝܬܰܝܗܽܘܢܿ܆ ܘܬܰܪܥܺܝܬܶܗ ܚܰܝܷ̈ܐ ܕܰܠܥܳܠܰܡ܆ ܘܰܕܠܴܐ ܚܒܳܠܴܐ ܐܺܝܬܰܘܗ̱ܝ ܫܽܘܡܠܳܝܟܽܘܢܿ. 5 ܥܬܰܪܘ ܒܐܱܠܳܗܳܐ ܐܰܒܳܐ܆ ܘܩܰܒܶܠܘ ܬܰܪܥܺܝܬܶܗ ܕܰܡܪܰܝܡܳܐ܆ ܐܶܬܚܰܝܰܠܘ ܘܐܶܬܦܰܪܩܘ ܒܛܰܝܒܽܘܬܶܗ. 6 ܡܣܰܒܰܪ ܐ̱ܢܳܐ ܓܶܝܪ ܫܠܳܡܳܐ ܠܟܽܘܢܿ ܠܰܚܣܰܘ̈ܗ̱ܝ܆ ܕܟܽܠܗܽܘܢ ܐܰܝܠܶܝܢ ܕܫܳܡܥܺܝܢ ܠܴܐ ܢܶܦܠܽܘܢ ܒܰܩܪܳܒܳܐ. 7 ܘܐܰܝܠܶܝܢ ܬܽܘܒ ܕܝܰܕܥܽܘܗ̱ܝ ܠܴܐ ܢܺܐܒܕܽܘܢ܆ ܘܰܕܗܳܢܽܘܢܿ ܕܢܶܣܒܽܘܢ ܠܴܐ ܢܶܒܗܬܽܘܢܿ. 8 ܟܠܺܝܠܴܐ ܕܰܠܥܳܠܰܡ ܫܪܳܪܳܐ ܐܺܝܬܰܘܗ̱ܝ܆ ܛܽܘܒܰܝܗܽܘܢܿ ܠܐܰܝܠܶܝܢ ܕܣܿܳܝܡܺܝܢ ܠܶܗ ܒܪܺܝܫܗܽܘܢܿ. 9 ܟܺܐܦܳܐ ܝܰܩܺܝܪܰܬ ܕܡܰܝ̈ܳܐ܆ ܘܰܩܪ̈ܳܒܶܐ ܓܶܝܪ ܡܶܛܽܠ ܟܠܺܝܠܴܐ ܗܘܰܘ. 10 ܘܰܢܣܰܒܬܶܗ ܙܰܕܺܝܩܽܘܬܳܐ܆ ܘܰܠܟܽܘܢܿ ܝܰܗ̱ܒܬܶܗ. 11 ܣܺܝܡܘ ܟܠܺܝܠܴܐ ܒܰܩܝܳܡܶܗ ܫܰܪܺܝܪܳܐ ܕܡܳܪܝܳܐ܆ ܘܟܽܠܗܽܘܢ ܐܰܝܠܶܝܢ ܕܰܙܟܰܘ ܢܶܬܟܰܬܒܽܘܢ ܒܰܟܬܳܒܶܗ. 12 ܟܬܳܒܗܽܘܢܿ ܓܶܝܪ ܙܳܟܽܘܬܳܐ ܗ̱ܝܼ ܕܰܠܟܽܘܢܿ܆ ܘܚܳܙܝܳܐ ܠܟܽܘܢܿ ܩܕܳܡܶܝܗܿ ܘܨܳܒܝܳܐ ܕܬܶܬܦܰܪܩܽܘܢ. ܗܰܠܶܠܘܽܝܰܐ.