Odes of Solomon: Ode 18

1 ܐܶܬܬܪܺܝܡ ܠܶܒܝ ܒܚܽܘܒܶܗ ܕܰܡܪܰܝܡܳܐ ܘܐܷܬܝܰܬܰܪ܆ ܕܐܷܫܰܒܚܺܝܘܗ̱ܝ ܒܝܰܕ ܫܶܡܝ. 2 ܐܶܬܥܰܫܰܢܘ ܗܰܕܳܡܱ̈ܝ܆ ܐܰܝܟ ܕܠܴܐ ܢܶܦܠܽܘܢ ܡܼܶܢ ܚܰܝܠܶܗ. 3 ܟܽܘܪ̈ܗܳܢܶܐ ܐܶܬܪܰܚܰܩܘ ܡܼܶܢ ܦܰܓܪܝ܆ ܘܩܳܡ ܠܡܳܪܝܳܐ ܒܨܶܒܝܳܢܶܗ܆ ܡܶܛܽܠ ܕܫܰܪܺܝܪܳܐ ܗ̱ܝܼ ܡܰܠܟܽܘܬܶܗ. 4 ܡܳܪܝܳܐ ܕܰܠܡܳܐ ܡܶܛܽܠ ܐܰܝܠܶܝܢ ܕܚܰܣܺܝܪܺܝܢ܆ ܬܶܫܕܶܐ ܡܶܢܝ ܦܶܬܓܳܡܳܟ. 5 ܐܳܦܠܴܐ ܡܶܛܽܠ ܥܒܿܳܕܰܝ̈ܗܽܘܢܿ܆ ܬܶܟܠܷܐ ܡܶܢܝ ܫܽܘܡܠܳܝܳܟ. 6 ܠܴܐ ܢܶܙܕܟܶܐ ܢܰܗܺܝܪܳܐ ܡܼܶܢ ܚܶܫܽܘܟܳܐ܆ ܐܳܦ ܠܴܐ ܢܶܥܪܽܘܩ ܫܪܳܪܳܐ ܡܼܶܢ ܕܰܓܳܠܽܘܬܳܐ. 7 ܠܙܳܟܽܘܬܳܐ ܬܣܺܝܡܝ ܦܽܘܪܩܳܢܰܢ ܝܰܡܝܺܢܳܟ܆ ܘܰܬܩܰܒܶܠ ܡܶܢ ܟܽܠ ܐܰܬܰܪ܆ ܘܰܬܢܰܛܰܪ ܡܼܶܢ ܠܟܽܠ ܕܰܒܒܺܝ̈ܫܳܬܳܐ ܐܰܚܺܝܕ. 8 ܐܰܢ̱ܬ ܐܰܠܳܗܝ ܕܰܓܳܠܽܘܬܳܐ ܘܡܰܘܬܳܐ ܠܰܝܬ ܒܦܽܘܡܳܟ܆ ܐܶܠܴܐ ܐܺܝܬܰܘܗ̱ܝ ܫܽܘܡܠܳܝܳܐ ܨܶܒܝܳܢܳܟ. 9 ܘܰܣܪܺܝܩܽܘܬܳܐ ܠܴܐ ܝܿܳܕܰܥ ܐܰܢ̱ܬ܆ ܡܶܛܽܠ ܕܳܐܦܠܴܐ ܝܳܕܥܳܐ ܠܳܟ. 10 ܘܠܴܐ ܝܿܳܕܰܥ ܐܰܢ̱ܬ ܛܳܥܝܽܘܬܳܐ܆ ܡܶܛܽܠ ܕܐܳܦܠܴܐ ܗ̱ܝܼ ܝܳܕܥܳܐ ܠܳܟ. 11 ܘܐܷܬܚܰܙܝܰܬ ܐܰܝܟ ܥܽܘܪܳܐ ܠܴܐ ܝܺܕܰܥܬܳܐ܆ ܘܐܰܝܟ ܣܰܪܝܽܘܬܶܗ ܕܝܰܡܳܐ. 12 ܘܰܣܒܼܰܪܘ ܥܠܶܝܗܿ ܣܪ̈ܺܝܩܶܐ ܕܪܰܒܳܐ ܗ̱ܝܼ܆ ܘܐܶܬܰܘ ܐܶܦ ܗܳܢܽܘܢܿ ܐܰܝܟ ܕܡܽܘܬܳܗܿ ܘܐܶܣܬܰܪܰܩܘ. 13 ܘܝܼܺܕܰܥܘ ܐܰܝܠܶܝܢ ܕܝܿܳܕܥܺܝܢ ܘܐܶܬܚܰܫܰܒܘ܆ ܘܠܴܐ ܐܶܬܛܰܢܰܦܘ ܒܡܰܚܫ̈ܒܳܬܗܽܘܢܿ. 14 ܡܶܛܽܠ ܕܰܗܘܰܘ ܒܬܰܪܥܺܝܬܶܗ ܕܰܡܪܰܝܡܳܐ܆ ܘܰܓܚܶܟܘ ܥܰܠ ܐܰܝܠܶܝܢ ܕܰܡܗܰܠܟܺܝܢ ܒܛܳܥܝܽܘܬܳܐ. 15 ܘܗܳܢܽܘܢܿ ܕܶܝܢ ܡܰܠܶܠܘ ܫܪܳܪܳܐ܆ ܡܼܶܢ ܢܦܳܚܳܐ ܕܰܢܼܦܰܚ ܒܗܽܘܢܿ ܡܪܰܝܡܳܐ. 16 ܬܶܫܒܘܽܚܬܳܐ ܘܪܰܒܘܽܬ ܝܳܐܝܘܽܬܳܐ ܠܰܫܡܶܗ. ܗܰܠܶܠܘܽܝܰܐ.