Odes of Solomon: Ode 24

1 ܝܰܘܢܳܐ ܦܼܰܪܚ݀ܰܬ ܥܰܠ ܪܺܝܫܶܗ ܕܡܳܪܰܢ ܡܫܺܝܚܳܐ܆ ܡܶܛܽܠ ܕܪܺܝܫܳܐ ܗܘܳܐ ܠܳܗܿ. 2 ܘܙܰܡܼܪܰܬܿ ܥܠܰܘܗ̱ܝ܆ ܘܐܶܫܬܡܰܥ ܩܳܠܳܗܿ. 3 ܘܰܕܚܶܠܘ ܥܳܡܽܘܪ̈ܶܐ܆ ܘܐܶܬܬܙܺܝܥܘ ܬܰܘܬܳܒܷ̈ܐ. 4 ܦܳܪܰܚܬܳܐ ܫܶܒܼܩ݀ܰܬ ܓܶܦܶܝ̈ܗܿ܆ ܘܪܰܚܫܳܐ ܟܽܠܶܗ ܡܺܝܬ ܒܚܽܘܠܳܢܶܗ. 5 ܘܰܬܗ̈ܽܘܡܳܝܶܐ ܐܶܬܦܰܬܼܰܚܘ ܘܐܶܬܟܰܣܺܝܘ܆ ܘܰܗܘܰܘ ܒܿܳܥܶܝܢ ܠܡܳܪܝܳܐ ܐܰܝܟ ܗܿܳܢܶܝܢ ܕܝ̈ܳܠܕܳܢ. 6 ܘܠܴܐ ܐܶܬܺܝܗܶܒ ܠܗܽܘܢܿ ܠܡܶܐܟܽܘܠܬܳܐ܆ ܡܶܛܽܠ ܕܠܴܐ ܗ̱ܘܼܳܐ ܕܺܝܠܗܽܘܢ ܗ̱ܘܼܳܐ. 7 ܘܰܛܒܰܥܘ ܕܶܝܢ ܬܗ̈ܘܽܡܶܐ ܒܛܘܽܒܳܥܶܗ ܕܡܳܪܝܳܐ܆ ܘܐܶܒܰܕܘ ܒܗܳܝܿ ܡܰܚܫܰܒܬܳܐ ܕܺܐܝܬܰܝܗܽܘܢ ܗ̱ܘܰܘ ܡܼܶܢ ܠܽܘܩܕܰܡ. 8 ܚܰܒܶܠܘ ܓܶܝܪ ܡܼܶܢ ܒܪܺܝܫܺܝܬ܆ ܘܫܽܘܠܳܡܳܐ ܕܚܽܘܒܳܠܗܽܘܢܿ ܐܺܝܬܰܘܗ̄ܝ ܗ̱ܘܳܐ ܚܰܝܷ̈ܐ. 9 ܘܐܶܒܼܰܕ ܡܶܢܗܽܘܢܿ ܟܽܠ ܕܚܰܣܺܝܪ ܗ̱ܘܳܐ܆ ܡܶܛܽܠ ܕܠܰܝܬ ܗ̱ܘܳܐ ܠܗܽܘܢ ܠܡܶܬܰܠ ܦܶܬܓܳܡܳܐ ܐܰܝܟ ܕܰܢܩܰܘܽܘܢܿ. 10 ܘܡܳܪܝܳܐ ܡܰܚܫ̈ܒܳܬܳܐ ܐܰܘܒܶܕ܆ ܕܟܽܠܗܽܘܢܿ ܐܰܝܠܶܝܢ ܕܠܰܝܬ ܠܘܳܬܗܽܘܢܿ ܫܪܳܪܳܐ. 11 ܚܣܰܪܘ ܓܶܝܪ ܡܼܶܢ ܚܶܟܡܬܳܐ܆ ܗܳܢܽܘܢܿ ܕܡܶܬܬܪܺܝܡܺܝܢ ܗ̱ܘܰܘ ܒܠܶܒܗܽܘܢܿ. 12 ܘܐܶܣܬܠܺܝܘ܆ ܡܶܛܽܠ ܕܠܰܝܬ ܗ̱ܘܳܐ ܠܘܳܬܗܽܘܢܿ ܫܪܳܪܳܐ. 13 ܡܶܛܽܠ ܕܡܳܪܝܳܐ ܚܰܘܺܝ ܐܽܘܪܚܶܗ܆ ܘܐܰܦܬܺܝ ܛܰܝܒܽܘܬܶܗ. 14 ܘܗܿܳܢܽܘܿܢ ܕܶܐܫܬܰܘܕܥܽܘܗܿ܆ ܝܳܕܥܺܝܢ ܚܰܣܝܘܽܬܶܗ. ܗܰܠܶܠܘܽܝܰܐ.